1 TIMOTI

POLOME

TIMOTINYA

PEPA

WAMBAO PYAO PYASAKAMAIYAMO DOKO

Pii atupa wambao kandapenge

Timoti baa wane kole doko Gotenya kalai akali jetala kalai pyoo kateamopa Polome pepa dake wambao pyao pyasakamaiyoo pituu, kalaipi manapi dupanya mana lea-pyaa. Lao pituu baame pii lyaa tepomanya lea-pyaa. Mende doko endakali mendapuame sambo lengema mana dupa wandyuu katapena lea-pyaa. Dupame sambo lao pituu, yuunya oapi silyamo dupa pitaka koona lao masetala Gotenya pii yalo petae dupa mana nyetamano kandao doko, Goteme naima pyoo nyetana lengema-pyaa. Lapo doko sosa aipa pyoo isoo setao katapengepe lao dokonya lea-pyaa. Tepo doko Timoti Kataisanya kalai akali epe joo katena lea-pyaa. Baame masoo miningi endakali dupa nisoo kalai pitamo kalai tata tata dupa mana lamaiya-pyaa.

Polome Timotinya pepa wambao pyao pyasakamaiyamo dokonya pii lyaa dupa:

1:1-2 Pii wambao pepanya piamo dupa

1:3–3:16 Sosanya nisingi akalipi setao katenge akalipi dupanya mana leamo dupa

4:1–6:21 Timotimi kalai pina lao mana leamo doko

¹ Namba* 1:1 Lo 1:1; Ep 5:23; Pl 3:20; 1 Ti 2:3; 4:10; Ta 1:3; 2:10; 3:4 Polo Kataisa Jisasanya aposele. Naima Pyoo Nyingi Gote dokopa masoo malisoo kalyamano Kataisa Jisasa dokopa dolapome namba aposele kalyale leambinoli pyoo kalyo. ² Naimame* 1:2 Ap 16:1; Ta 1:4 masoo minao kalyamano dokonya nambanya wane angi Timoti embanya pepa dake pyao peekelyo. Takange Gotepa naimanya Kamongo Jisasa Kataisapame emba kandao mona epe palyetala kondo kayao embanya mona doko lyuu lasekena.

Mana setapae dupanya mana lakondape pipengena leamo doko

³ Wamba* 1:3-4 1 Ti 4:7; 6:4,20; 2 Ti 2:14,16,23; 4:4; Ta 1:14; 3:9 namba Masetonia yuu dokonya pao pituu, emba Epesasa yuu dokonya katape lao kyoto joo langioliaka pyoo indupa dee langilyo. Embame endakali dupa lamaiyoo, mana pii waka dupa laa nayao, tindi piipi, akali wamba yumbange paliuu epeaminoli pyoo kenge lao atome pii londanyoo lengema dupapinya kale katao nasina lape. Pii dopale dupanya mee kaina pii dupa pyakalyetala Gotenya pyoo nyingi masoo miningi dokonya-kaita panasiamo doko pyakalyala naenge. ⁵ Dopana embame pii doko lamaiyoo pituu, endakali dupame mona auu petae paliuu masingi epe mende palyetala sambo laa nayao masoo minokondape pyoo auu kayao katena lao lamaipi. ⁶ Endakali mendapuame mana epe dupanya pakutala, tenge nakatenge pii dupa lao kaita waka mendenya pateami. ⁷ Dupame* 1:7 Ta 1:10 Gotenya mana setapae dupanya lao mana lenge akali joo katamana lao masetala pii lelyamino dupa tangeme masala nayapala, pii kyoto joo lelyamino dupanya tenge masala nayawaka lelyamino.

⁸ Dopaka* 1:8 Lo 7:7,12,16 doko, mana setapae dupanya pipengeli pyoo endakali mendeme pitamopa, mana setapae dupa epe jetana lao masilyamano. ⁹ Goteme* 1:9-10 Lo 1:29; Ga 5:23* 1:9-10 Pa 18:13 endakali epe tolatae dupa lao masetala mana setapae dupa setala nayana lao masemana. Mana setapae dupa minala nayao pii tanga lenge endakali dupapi, Gote maita maiyoo koo pingi endakali dupapi, mana epe minala nayao luiyao paenge endakali dupapi, takange pyao kumasingi dupapi, endangi pyao kumasingi dupapi, endakali yango pyao kumasingi dupapi, kepo kolao paenge dupapi, akali yango elya pingi pingima dupapi, endakali yango pake nyoo penge dupapi, sambo lenge dupapi, sambo lao pituu kiningi etete lelyona lenge dupapi, dutupanya Goteme mana setapae dupa setea-pyaa. Dee mana koo tata dupame mana tolatae doko pyao nenge dupa pitakanya baame mana setapae dupa seteaka-pyaa. ¹¹ Gote* 1:11 Jo 1:14; 2 Ko 4:4; 1 Te 2:4; 1 Ti 6:3; Ta 1:3,9,13; 2:13 etete mona yaepao katenge dokonya Wai Pii Epe tii pipae baame namba isakape lao diamo dokonya mana pii tolatae doko palenge.

Goteme Polo kondo leamo doko

¹² Naimanya* 1:12 Ap 9:15; Ga 1:15-16 Kamongo Kataisa Jisasa namba pupu lasiamo doko kandao nambame yaka pilino lao kalyo. Baame namba kandao embame mende pitoo latala kini pyoaka katatena lao masetala, kalai dokonya pyoo kalyale leamo dokonya nambame baa lao yaka pilino lao kalyo. ¹³ Wamba* 1:13 Ap 3:17; 8:3; 9:4-5; 1 Ko 15:9-10; Ga 1:13 nambame baa kilya kandao mana koo dupa minao baa pimaiyoo etete luiyao kateo. Dopa pyoo katewaka doko, nambame masala nayao katao, Kataisa doko lao masoo minala nayao pyoo kateo dokonya baame namba kondo lea. ¹⁴ Naimanya* 1:14 1 Ko 15:10 Kamongo dokome namba kandao eteteaka mona epe palipumopa, namba Kataisa Jisasapa pakatae katao baa lao masoo minao endakali dupa etete auu kayao kalyo. ¹⁵ Kataisa* 1:15 Mt 9:13; Lu 15:2; 19:10; 1 Ti 3:1; 4:9; Ta 3:8; 2 Pi 3:15 Jisasame isa yuu dakenya endakali koo pingi dupa pyoo nyala epeana lapae silyamo pii doko etete kiningi nyoo minao payapenge lamo. Endakali koo pingi dupanya mupa doko namba. ¹⁶ Dopaka* 1:16 1 Ko 15:9; 2 Te 3:7 doko, tenge dokonya Jisasa Kataisa dokome namba kandao yapa maka nakaenge lamo lao endakali dupame kandena lao baame namba kondo lea. Dopana baa lao masoo minatala lete etete katatamino endakali dupa kandao Jisasame yapa maka nakaenge dokonya makande mupa doko namba. ¹⁷ Yuu* 1:17 Wee 145:13; Lo 16:27; Kl 1:15; 1 Ti 6:16 gii dupa pitakanya Kamongo Kiŋi kumala nayao panala nayao katenge Gote mendai iki doko lao tanga tangapi andanda semaiyoo tama pyoo katapenge. Kiniaka.

Timoti lekeleke tao katape leamo doko

¹⁸ Nambanya* 1:18 1 Ti 4:14; 6:12; Ju 3 wane Timoti, wamba akali mendapuame potopesa joo emba kandao pii leaminoli pyoo nambame pii lelyo dupa embame nyoo minao payape lao emba-kisa setelyo. Embame pii leamino doko minao katao yanda epe pipenge doko pyoo katape. ¹⁹ Embame* 1:19 1 Ti 3:9; 2 Ti 4:7 masoo minao katao masingi epe mende paliuu katape. Endakali yangi dupame masingi epe doko daa latala nyakamanya masoo miningi dokonya lombapae sepala koyateami. ²⁰ Endakali* 1:20 1 Ko 5:5; 2 Ti 2:17; 4:14 dopale dupanya akali Aimeniasapa Alekesandapa dolapo kalyambino. Akali dolapome Gote kilya kanja naenya mana nyina lao Satanenya kingilyaka maitio.

Loma sepenge dokonya leamo doko

¹ Nambame* 2:1 Ep 6:8; Pl 4:6 wambao nyakama langyuu pituu, nyakamame endakali pitaka nisoo, loma soo tee lao tama pyoo yaka pilino lao kalyepapena lelyo. ² Nyakamame* 2:2 Lo 13:1-7; Ta 3:1 kamongo kiŋi dupapi, alyasale joo katenge akali dupa pitakapi dupa nisoo loma soo kalyepapeaka. Dopa pitamino dokome naima pitaka ema napyoo elyakalao katao, Gote etete auu pyoo minao male male nalao katatama. ³ Dopa* 2:3 1 Ti 1:1 pyoo katao loma singi doko naimanya Pyoo Nyingi Gote dokome epena lao masoo auu kayao kalyamo. ⁴ Baame* 2:4 Ese 18:23; Jo 8:32; 1 Ti 4:10; 2 Ti 3:7; 2 Pi 3:9 endakali pitaka pyoo nyipu laka lao masoo kalyamo. Dee endakali pitakame pii kiningi doko soo masipimi laka lao masoo kalyamoaka. ⁵ Gote* 2:5 Lo 3:29-30; Ip 8:6; 12:14 baa mendai iki kalyamo. Gotepa endakalipanya kainanya katao nyoo pyasingi akali mendai iki Kataisa Jisasa doko kalyamo. ⁶ Baa* 2:6 Mt 20:28; 2 Ko 5:15; Ga 1:4; Ep 5:2; 1 Ti 6:13 tangeme yole mende joo endakali dupa pitaka kii tamao nyia. Kataisame dopa piamo dupa Goteme gii seteamo dupanya panasia. ⁷ Tenge* 2:7 Ap 9:15; Lo 3:26; Ga 2:7-8; 2 Ti 1:11 dutupanya Goteme namba aposele kata leamopa pii lao panao kalyo. Baame namba netesa endakali dupanya masoo miningipa kiningi piipa dolaponya mana lamaiyoo kata lea. Nambame sambo laa nayao kiningi lelyo. ⁸ Dopana yuu pitakanya akali etete epe dupame imbu nakayao atete napyoo kingi minalyetala loma sipimi laka lao nambame masilyo.

Enda dupa kandao leamo doko

⁹ Enda* 2:9 Ais 3:16-17; 1 Pi 3:2-4 dupame dopaka pyoo yongenya pitamino dupa elya kaele lao mona paliuu pipimi laka lao nambame masilyo. Asili kumao mandengepi, opale golome wasepaepi, mamakupi, kolosa muni longome sambengepi dupame yati napipimi laka lao masilyo. ¹⁰ Dopale* 2:10 1 Ti 5:10 dupame yati napinya kalai epe dupame yati pipimi laka lao nambame masilyo. Dopa pitamino doko naimame Gote lao masoo minao paengena lenge enda dupa-pipa kapa pata. ¹¹ Enda* 2:11 1 Ko 14:34-35 dupame dupa pitakanya anasale joo mana nyoo ema napyoo pitipenge. ¹² Enda* 2:12 Jen 3:16 dupame endakali mana lamaiya nayao, akali isala nayao, mee ema napyoo petena lao nambame daa lenge. ¹³ Doko,* 2:13 Jen 2:7,21-22; 1 Ko 11:3,8-12 Goteme akali Atame wambao wapupala, maitakao enda Epa wapuiya-pyaa. ¹⁴ Atame* 2:14 Jen 3:1-6; 2 Ko 11:3 dokome sambo pii doko nyoo nea daa. Enda dokome sambo pii doko nyoo napala Gotenya pii nepao koo pia-pyaa. ¹⁵ Dopaka doko, enda dupame masoo minao auu kayao, mana epe dupa minao mona paliuu pitatamino kandao doko, wane mandelyamino dokonya Goteme dupa pyoo nyeta.

Setao katenge akali dupa kandao leamo doko

¹ Akali* 3:1 Ap 20:28; 1 Ti 1:15 mendeme setao katenge akali katapuli lao masilyamo dokome kalai epe mende pitoo lao masilyamona lapae silyamo pii doko etete kiningi. ² Dopana* 3:2-4 1 Ti 3:12; 2 Ti 2:24; Ta 2:6* 3:2-4 Ta 1:6-9* 3:2-4 1 Ti 3:12 baa-kisa tenge nasina lao katapenge. Baanya enda mendai pitipenge. Baa bia akipi epao nala nayao mona paliuu, mana epe minao katapenge. Baame endakali opone minao, mana auu pyoo lao, bia akipi masetae soo nala nayao, pyao napyoo, andiki pyoo, laiya laa nayao katapenge. Baa muni putiti nakayao, baa tangenya palu dupa auu pyoo isoo, baanya wane dupa baanya pundipundi joo baa auu kayao lalyina lao katapenge. ⁵ Baa tangenya palu dupa dopa pyoo isepengena lao masala naenge tamo kandao doko, aipa petala Gotenya sosa doko baame setao katatape? ⁶ Akali ene epapu mona kapilyetae mende setao katenge akali nakatapenge. Aopyoo latala baa luiyapala lombapae setamopa, Goteme Satane yapeamoli pyoo baa yapata. ⁷ Netesa* 3:7 1 Ko 5:12; 2 Ko 8:21 katenge endakali dupame setao katenge akali doko baa auu pipae lena lao katapenge. Aopyoo latala endakali dupame baa elya pisetaminopa Satanenya kone makatae ongonya baa lyeta.

Nisingi akali dupa kandao leamo doko

⁸ Nisingi* 3:8 1 Pi 5:2* 3:8 Ap 6:1-6 akali dupame dopaka pyoo male male nalao katapenge. Dupame pii lapoma laa nayao, bia akipi longo lao nala nayao, munipi opale longo waa palyoo nyalanya putiti nakayao katapenge. ⁹ Dupame* 3:9 Lo 16:25 masingi epe dokome masoo minao paenge dokonya Goteme yalo pyoo masiamo doko minao katapenge. ¹⁰ Nyakamame nisingi akali dupa wambao makande pyepape. Dupa-kisa koo tengepi mende nasetamo kandao doko, dupame nisingi kalai pyoo katapenge. ¹¹ Dee dupanya enda dupame dopaka pyoo male male laa nayao pitipenge. Dupame nambonambo napyoo bia akipi epao nala nayao mende pimana latamino dupa pitaka kini pyoaka pitipenge. ¹² Nisingi* 3:12 1 Ti 3:2,4 akali dupanya enda mendai lao pitipenge. Dupame nyakamanya wane dupapi nyakama tange palu dupapi dupa auu pyoo isoo katapenge. ¹³ Nisingi akali kalai auu pyoo pingi dupa kenge singi. Dupame Kataisa Jisasa lao masoo miningi dokonya pii doko pakapi mende nakayao lao katatami.

Gotenya masingi yalo petae andake doko

¹⁴ Namba emba kalyeno ongonya yapa ipupu laka lao masetala, pii datupa embanya pepa pyao peekelyo. ¹⁵ Dopaka* 3:15 Ep 2:9-22; Ta 1:7; Ip 3:6 doko, mendita mendeme namba minanjetamo kandao doko, Gotenya tata dupa-pipa aipa pyoo katapengepe lao embame pepa dakenya kandao mana nyepe. Nambame Gote lete katenge dokonya sosa doko kandao lelyo. Sosa doko kiningi pii lapae dokonya paka pinginapi joo katenge. ¹⁶ Naimame* 3:16 Mk 16:19; Jo 1:14; Ap 1:2,11; Lo 1:3-4; 16:25; Ep 3:9-10; 1 Pi 1:12 Gote minao kalyamano dokonya baame yalo pyoo masiamo doko kiningi etete andake lamona lelyamano.

Baa yonge katao panea.

Sipitisa dokome baa kapana lao laitaka pia.

Enjele dupame baa kandeami.

Endakali dupa pitaka baanya lao pii lamaiyami.

Isa yuu dakenya baa lao masoo miniami.

Goteme baa tii pipae dokonya ketae lanyia.

Sambo mana lenge endakali dupa kandao leamo doko

¹ Oli* 4:1 Mt 24:23-24; Ap 20:29-30; 2 Ti 3:1; 4:3; Ta 1:10; 2 Pi 2:1; 3:3; 1 Jo 2:18; 4:1; Ju 18 Sipitisa dokome panao lao pituu yuu gii maitakao ipatamo dupanya endakali mendapuame masoo miningi doko yakinatala enjele koo minakasingi dupanya pii dupa sakamaiyowapi, enjele koo dupanya mana pii lapae dupa nyoo minawapi pitami. ² Dupanya masingi yukuoo nyepae dupame sambo mana watao minatala sambo pii latami. ³ Dupame* 4:3 Jen 9:3; Lo 14:6; 1 Ko 10:25-26,30-31; 1 Ti 2:4 endakalipa nyala nayalapa, nee mendapua nala nayalapa lao daa lao katatami. Goteme baanya kiningi pii lapae doko masokondape pyoo masoo miningi endakali dupame yaka pilino lao nena lao wapuiyamo dupa sambo lenge endakali dupame daa lao nee nyoo katatami. ⁴ Goteme* 4:4 Jen 1:31; Mt 15:11; Ap 10:15; Lo 14:14,20 wapuiyamo dupa pitaka epe lamo. Mende daa lao nepala nayapenge. Dupa pitaka yaka pilino lao nyepenge. ⁵ Doko, Goteme wapuiyamo dupa pitaka baanya pii lapae dokopa loma singi dokopa dolapome etete epe injisingi.

Kataisanya kalai akali epe joo katape leamo doko

⁶ Embame* 4:6 2 Ti 2:15 pii dutupa naimanya masoo miningi kaiminingi dupa lamaiyoo katateno dokome emba Kataisa Jisasanya kalai pyakamaingi akali epe joo katate. Embame masoo miningi dokonya pii lapae dupapi, mana pii epe lapae nyoo minao payapino dupapi, dutupa minao pupu lao katate. ⁷ Embame* 4:7 1 Ti 1:4; 6:20; 2 Ti 2:16 yuunya mee tindi pii enda wambake dupame lengema dupa nasoo waka katape. Embame Gote minao payalanya mana nyoo makande peta peta pyoo pyoaka katape. ⁸ Yonge* 4:8 1 Ti 6:6 doko pupu lasoo mana nyoo makande pingi dokome naima kuki nisingiaka doko, Gote minao paenge dokome naima upa pitakanya nisingi. Dokome naima indupa kalyamano doko auu pyoo katao, dee tanga tangapi katatamano dokonya auu pyoaka katatamana lapae silyamo. ⁹ Pii* 4:9 1 Ti 1:15 dopa lapae silyamo doko etete kiningina lao masoo minapenge lamo. ¹⁰ Naimame* 4:10 1 Ti 1:1; 2:3-4 ongonyaka kalai pyoo katao lekeleke telyamano. Doko, naimame Gote lete katenge doko lao masoo malisoo kalyamano. Baa endakali dupa pitakanya Pyoo Nyingi Gote. Baa lao masoo minilyamino endakali dupa baame etete pyoo nyingi.

¹¹ Embame mana dutupa watao minina lao mana lamaiyoo katape. ¹² Endakali* 4:12 1 Ko 16:10-11; Ga 5:22; 2 Te 3:7; Ta 2:7-8,15 mendeme emba patange lamo lao kilya kanja naenalena, embame pii latepi, mana minatepi, endakali auu kayatepi, masoo minao payatepi, tolao pyoo katatepi dutupame masoo miningi endakali dupa makande minao maipi. ¹³ Embame* 4:13 1 Ti 6:11 endakali dupa Gotenya pii doko itaki pyao lamaiyowapi, dupanya mona sakatasakamaiyowapi, mana lamaiyowapi pyoo katao namba ipato gii dokonya tuu lape. ¹⁴ Wamba* 4:14 Mt 9:18; 19:13; Lu 4:40; Ap 6:6; 8:17; 9:12; 19:6; 28:8; 1 Ti 1:18; 5:22; 2 Ti 1:6; Ip 6:2 isingi akali mendapuame Gotenya pii mendapua latala embame Gotenya kalai pitina lao aiyomba minani pyekeaminopa epe mee nyiino doko aopyoo latala mee sina kayate.

¹⁵ Embame kalai dutupa makande pyoo pima-pima pyoo pyoo patenopa endakali pitakame kandena lao embame kalai dutupanya etete mona maitae katao pyokondape pyoo pipi. ¹⁶ Embame* 4:16 2 Ti 2:2 emba tange kandao katape. Mana lateno dupa embame masoo lape. Embame kalai dupa pyoaka katape. Dopa pitino kandao doko, embame emba tange pyoo nyoo, dee embanya pii soo kalyamino endakali dupa pyoo nyoaka piti.

Endakali tolasingi mana epe doko

¹ Embame* 5:1-2 Lep 19:32; Ta 2:2 akali lyanga mende puu lao pyalanya laa naenya, takange mana lamaingili pyoo mana lamaipi. Kolele dupa kaiminingina lao masoo, enda wambake dupa endangina lao masoo, kolele dupa pimalengena lao masoo, etete tolao pyoo katao mana lamaiyoo pyoo katape.

Enda walyakae dupa kandao leamo doko

³ Embame enda walyakae tapuita napetenge dupa andanda semaipi. ⁴ Dopaka doko, enda walyakae mendenya wane tamopi aputingi tamopi katengema tamo kandao doko, dupame wambao dapa pyoo mana nyepenge: nyakama Gote minao katao endangi takangepi dupame wamba nyakama nisiamino dokonya yanu pyao nisokondape pitamino mana doko Goteme auu kaenge. ⁵ Enda* 5:5 Lu 2:37; 18:7 walyakae tapuita napetenge mendeme baa iki pitipala, Goteme baa nisetana lao masetala kuka kotakapi tee lao loma soo petenge. ⁶ Dopaka* 5:6 Pa 3:1 doko, enda walyakae tangeme masilyali pyoo luiyao paenge doko lete petelyamopapi baa kumapae joo petenge. ⁷ Enda walyakae dupa-kisa tenge mende nasina lao embame pii utupa mana lao lamaipi. ⁸ Endakali mendeme baanya puu dupapi, dee angi baa palu dupapi, dutupa nisala naenge dokome Gote lao masoo minala nayao maita maingi. Dopa pilyamo dokome baa etete koo joo netesa endakali dupa-pipa kapa napenge.

⁹ Enda* 5:9-10 Jo 13:14; Ip 13:2 walyakae ee kana kingi ita tokange napetenge dupanya kenge nyoo setakamaiya nayape. Ee kana kingi ita tokange pitipae, wamba akali mendainya iki peteapi, mana epe miningipi, wane mondo pingipi, endakali opone miningipi, Gotenya endakali dupa auu pisingipi, endakali kenda pipae nyoo katenge dupa nisingipi mana epe dupa pitaka watao minawaka petengena lao kenge singi enda dupanya kenge nyoo setakamaipi.

¹¹ Embame* 5:11 1 Ko 7:8 enda walyakae kolele dupanya kenge setakamaiya nayape. Dupame akali nyowani kaelyami dokome Kataisa yakinatala akali pupuma laka lao masingima. ¹² Dopa petala enda dupame nyakamanya pii wambao lanya seteamino doko nepelyami dokome pyalanya pyoo lamaipenge jingima. ¹³ Dee mana koo dokonya konda pyoo enda walyakae kolele dupame anda lyaa dii lao payao kalai napyoo mee pitimana lao mana nyingima. Dee dupame mee napituu, pii nambonambo pyoaka, wakamanya dupanya tipa-tipa pyoo payao pii nalapenge dupa lao paengemaka. ¹⁴ Dopana,* 5:14 1 Ko 7:9; Ta 2:8 enda walyakae kolele dupame akali pupala wane mandyuu nyakamanya palu dupa isipimi laka lao masilyo. Dopa pitaminopa yandapipi mende naima kandao pii koo lenge kaitini mende naseta. ¹⁵ Yangi dupame mana epe dupa yakinatala Satane watao patelyamino. ¹⁶ Masoo miningi enda mende enda walyakae-pipa petenge tamo kandao dupa tange nisepenge. Dopana, enda walyakae tapuita napetenge dupa sosame nisalanya kenda nakaena lao dopa pipenge.

Isingi akali dupa kandao leamo doko

¹⁷ Isingi* 5:17 1 Ko 16:18; 1 Te 5:12 akali kalai auu pyoo pingi dupa nyakama sosa dupame eteteaka andanda semaipenge. Kiningi nyakama kandao etete kyoto joo pii manapi langyuu kalyamino dupa etete andanda semaipenge. ¹⁸ Doko* 5:18 Dit 25:4; Mt 10:10; Lu 10:7; 1 Ko 9:9; 3 Jo 8 Gotenya pii pepa pyapae singi dokonya dapa lapae silyamo: “Embame mena pulumakao wiisa dii moko katao tambelyamo dokonya nengekaita doko yaki pyoo tambombala nayape.” Dee, “Kalai pingi akali mendeme baanya yole nyalanya kapa pengena,” dopa lapae silyamo. ¹⁹ Endakali* 5:19 Dit 19:15; Mt 18:16; 2 Ko 13:1 mendeme isingi akali mende-kisa tenge setea kandeno doko, embame mee ambe nasepe. Endakali lapomapi dee tepomapi mendatupame lengeme kandatala laa ipatamino dokopa embame sepe. ²⁰ Isingi* 5:20 Ga 2:14; Ep 5:11 akali koo pyoo paenge dupa embame endakali pitakanya enombanya pyalanya lape. Isingi akali waka dupame sepala paka kaena lao dopa pipi. ²¹ Gotepi, Kataisa Jisasapi, dee enjele Goteme yapao nyiamo dupapi dutupanya enombanya nambame emba langyokondape pyoo langilyo. Embame kalai mende pyaanya emba tangeme wambao maseteno dokonya pyaa nayao, mana pii dutupa auu pyoo kandao minao katape. Embame mende kandao mende peta mende kandao mende peta pyoo opale mende napipi. ²² Akali mendeme Gotenya kalai pina lao embame aiyomba yapa minani pyakamaiya nayape. Endakali waka dupanya koo pingi dupa embame mokosoo nyala naenya, koo mende emba-kisa nasina lao isoo katape.

²³ Embame mee endaki iki nao nakatenya embanya ingi dokopa dee emba paa longo lao yaina nyingi dokopa dolapo lao masetala, waene kuki mende napa pipi.

²⁴ Endakali mendapuanya koo pingi dupa wambao panelyamopa naimame yapa yapenge. Dopaka doko, endakali mendapuanya koo pingi dupa yalo petala maitakao panenge. ²⁵ Epe* 5:25 Mt 5:16; 10:26 pingi dupa dopaka pyoo panengeaka. Panala naenge dupa tanga kapa pao yalo petae naseta.

Kendemane dupa kandao leamo doko

¹ Endakali* 6:1 Lo 2:24; 1 Ko 7:21-22; Ep 6:5-8; Kl 3:22-25; Ta 2:6,9-10 mendeme Gotepi baanya mana piipi dupa kandao pii koo laa naena lao, kendemane dupame nyakamanya akali andake dupa etete andanda semaipengena lao masepenge. ² Kendemane* 6:2 Pm 16 dupame nyakamanya masoo miningi akali andake dupa kaiminingi kalyamino dokonya kilya kanja naenya kalai auu pyoo pyakamaipenge. Doko, kendemane dupame kalai pilyami dupa mambele Gote lao masoo miningi akali andake dupame oapi epe dupa nyoo kalyaminopa, kendemane dupame auu kaengema.

Kamongo dupa kandao leamo doko

Embame pii dutupa mana lamaiyokondape pyoo lamaipi. ³ Endakali* 6:3 Ga 1:6-9; 1 Ti 1:10; 2 Ti 1:13 mendeme mana pii waka mende lao katao, naimanya Kamongo Jisasa Kataisanya pii tolatae dupa nasoo, Gote minao paenge dokonya mana pii lapae dupa nasoaka katatamo endakali doko baa luiyao katao pii mendaipi mende masala naenge. ⁴ Baame* 6:4 1 Ti 1:4 kyakaenge joo pii yanda pingi dupapi mee kaina pii atete pingi dupapi dupa iki auu kaenge. Pii dopale dupanya tilya nyingipi, laiya lengepi, lamba lengepi, mendeme koo pyoo pilyamo lao masingipi dopale dupa pyakalyingi. ⁵ Tenge* 6:5 2 Ti 3:8; 4:4; Ta 1:14 mendai dokonyaka katao endakali mendapuame masingi dokonya koyatala pii kiningi doko daa joo ŋiliŋali lao katengema. Endakali dopale dupame Gote minao katenge dokonya yuunya auu pingi longo lao nyingina lao masingimaka. ⁶ Kiningi,* 6:6 Pl 4:11-12; 1 Ti 4:8; Ip 13:5 endakali dupame opale nyakama-kisa silyamo dupa kapana lao masoo mona epe palyetala, Gote minao katenge dokome auu pingi longo lao nyingiaka. ⁷ Wamba* 6:7 Jop 1:21; Wee 49:17; Ekl 5:15 naima endangimi mandeamo gii ongopa opale mende minapeta naepeama. Dopaka pyoo naimame yuu dake yakinatamano dokopa kapa pao opale mende minao napatamaka. ⁸ Neepi* 6:8 Pot 30:8 yongenya pingipi dupa naima-kisa setamo dutupa naimame kapana lao mona epe paliuu katamana. ⁹ Kamongapuma* 6:9 Pot 23:4; 28:22 laka lao masingi endakali dupa minao makande pingi dokonya pyakatala kone makatae mendenya lyingima. Dupa-kisa nyipu laka lao masingi kyakao koyasingi longo dupa epenge. Masingi dopale dupame endakali dupa etete koyao alu pingi ongonya pyandenge. ¹⁰ Muni* 6:10 Mt 6:24; Ep 5:5; Ta 1:11 putiti kaenge doko koo pingi dupa pitakanya tenge. Endakali yangi dupame muniaka nyipu laka lao masetala, masoo minao paenge doko yakinatala pao, nyakama tangenya mona doko toka latala tanda koo longo lao napeami.

Embame kalai tolao pipi leamo doko

¹¹ Dopaka* 6:11 1 Ko 13:13; Ga 5:22; 2 Ti 2:22; Ta 2:2 doko, emba Gotenya akali dokome mana dopale dupa kandatala paka pupi. Embame epe tolatae joo katengepi, Gote minao katengepi, masoo minao paengepi, auu kaengepi, yapa maka nakayao mana epe dupa minao tinokengepi, andiki pingipi mana dutupa watao minao katape. ¹² Embame* 6:12 1 Ko 9:25-26; 1 Ti 1:18; 2 Ti 4:7 lekeleke tao katenge angi dokonya Kataisa lao masoo minao kyoto joo katao lete etete katenge doko minokondape pipi. Wamba Goteme emba lete etete kalyale lao ipu leamopa, embame endakali longo dupanya enombanya pii doko auu pyoo lao panee. ¹³ Upa* 6:13-14 Jo 18:36-37; 19:11* 6:13-14 2 Ti 4:1,8 pitaka lete katasingi Gote dokopa Pondiasa Pailatenya enomba dokonya pii auu pyoo lao paneamo Jisasa Kataisa dokopa dolaponya enombanya nambame emba kandao, embame emba-kisa pii lanya setapae doko minokondape pyoo minao katapena lao langyokondape pilyo. Naimanya Kamongo Jisasa Kataisa panao ipatamo gii dokonya tuu lao embame pii doko koyasala nayape. ¹⁵ Goteme* 6:15 Dit 10:17; Wee 136:3; Pa 17:14 Kataisa panao ipatana lao gii setakamaiyamo dokonya naimame baa kanjepale lao Goteme laitaka pita. Baa Akali Andake pupu lapae auu pisetae mendai iki doko kalyamo. Baa kiŋi dupanya Kiŋi katao kamongo dupanya Kamongo kalyamo. ¹⁶ Baa* 6:16 Eke 33:20; Jo 1:17-18; 1 Ti 1:17; 1 Jo 1:5 itange kumala naenge. Tii pipae tengesa dosa mende pupenge nanjilyamo dokonya katenge. Wamba endakali mendaipi mendeme baa lengeme nakandea. Indupa mendeme kapa pao nakandelyamoaka. Andanda semaingipa kyoto joo katengepa dolapo tanga tangapi baa-kisa sepenge lamo. Kiniaka.

Kamongo dupa kandao leamo doko

¹⁷ Isa* 6:17 Wee 62:10; Lu 12:20; Je 1:10 yuu dakenya auu pingi longo lao setenge endakali kamongo dupame luiyala naena lao embame mana lamaipi. Endakali dokaitame yuunya auu pingi yapa alu pingi dupame naima tanga tangapi nisetana lao masala naenya, Goteme iki naima tanga tangapi nisetana lao masoo katena lao mana lamaipiaka. Upa pitaka naimame auu kayalapale lao longo lao baame dilyamo. ¹⁸ Endakali kamongo dupame mana epe dupa minao katena lao embame lamaipi. Dupame mana epe dupanya kamongapenge. Dupame nyakamanya endakali yango dupa mona epe paliuu auu pyoo mokosoo maiyoo katapenge. ¹⁹ Dopa* 6:19 Mt 6:20; Pl 4:17 petala dupame tanga dokonya auu pingi epe kyoto mendapua malu palyetaminopa seta. Dokopa lete katenge angi doko nyetami.

Polome Timoti emba auu pyoo katapena leamo doko

²⁰ Timoti,* 6:20 1 Ti 1:4,7; 2 Ti 1:12,14; 2:2; 3:14; Ta 2:1 emba Goteme epe isatale lao diamo dupa kandao isoo katape. Embame mee kaina pii koo dupapi tanga lao pii lenge dupapi dupa nasinya maita maiyoo katape. Endakali mendapuame pii dopale dupa kandao kenge masingi epena lelyaminoaka doko, kenge doko mee sambo lelyamino. ²¹ Yangi dupame nyakama masepaena latala masoo minao paenge dokonya pyapakuteami.

Goteme nyakama kandao mona epe palena.