1 TESALONAIKA

POLOME

TESALONAIKA

TANGE DUPANYA PEPA

WAMBAO PYAO PYASAKAMAIYAMO DOKO

Pii atupa wambao kandapenge

Timotimi Polo baa lamaiyamo pii dupa sepala pepa dake pyao pyasia-pyaa. Baame Tesalonaika tange dupanya masoo miningi dupa masetala dupanya mende auu kaya kaya pingima dokonya Gote lao yaka pilino lao, wamba baa dupa-pipa awapa katao pituu mana miniamo dupa lao pepa pia-pyaa.

Tesalonaika tange dupame Jisasa dee ipatamo dokonya pisoo pituu, Kataisa dee naipupumopa masoo miningi endakali kumatami dupa Kataisame lanyetamopa lete etete katatamipi daape lawapi baa andukupa ipata laape lawapi pisiamino dupanya yanu pyao nyakamame kalai pilyaminoli pyoo mona paliuu pyoo kalyepape lea-pyaa. Jisasa dee ipupala baa lao masoo miningi endakali sakapi kumapaepi dupa pitaka lanyetana lea-pyaa.

Polome Tesalonaika tange dupanya pepa wambao pyao pyasakamaiyamo dokonya pii lyaa dupa:

1:1 Pii wambao pepanya piamo dupa

1:2–3:13 Yaka pilino lenge piipi tama pingi piipi dupa

4:1-12 Kitisene mana minina lao sakatasingi pii dupa

4:13–5:11 Kataisa dee ipatana lao pii dupa

5:12-22 Polome dupa pupu lasoo leamo doko

5:23-28 Polome pii etao lasa leamo dupa

¹ Namba* 1:1 Ap 15:22; 16:1; 17:1; Lo 1:1,7; 2 Ko 1:19; 2 Te 1:1-2 Polopi, Silipenasapi, Timotipi naimame naimanya Takange Gotepa, Kamongo Jisasa Kataisa-pipa awapa Tesalonaika yuu dokonya sosa kalyamino endakali dupanya pepa dake pyao peekelyamano. Goteme nyakama kandao mona epe mende palyetala nyakamanya mona doko lyuu lasekena.

Tesalonaika tange dupame masoo minao mana epe miniamino doko

² Naimame* 1:2 Lo 1:9-10; Pl 1:3-4; Kl 1:3; 2 Te 1:3,11; 2:13 loma soo pituu, nyakama pitaka masilyamali pyoo koteaka lao Gote kandao yaka pilino lenge. ³ Nyakamame* 1:3 Lo 8:25; 15:4; 1 Ko 13:4-7; Kl 1:4-6; 1 Te 5:8; Pa 2:2 Gote lao masoo minao kalai pilyamino dupapi, nyakamame endakali auu kayapimino dokome kyoto joo dupa nisilyamino dupapi, nyakamame Jisasa Kataisa lao masoo malisoo kyoto joo kalyamino dokopi dupa naimanya Gote-kisa Takange dokonya enombanya naimame kame nasingi. ⁴ Kaimia* 1:4 Lo 1:7; 2 Te 2:13; 2 Pi 1:10 paluma, Goteme nyakama auu kayapala yapao nyiana lao naimame masoo kalyamano. ⁵ Doko,* 1:5 Ap 1:8; 20:18; 1 Ko 2:4-5; 4:20; 2 Ko 12:12 naimame Wai Pii Epe nyakama-kisa lao paneamano doko mee pii iki daa. Pii doko pupu lapaepi, Oli Sipitisapi paleta dokona, naimame etete kapana lao maseteama. Dopana nyakama auu pyoo kalyepale lao naima nyakama-pipa tole kateamano mana doko nyakamame masilyamino. ⁶ Naimapi* 1:6 Ap 13:52; 17:5-9; Lo 14:17; 1 Ko 4:16; 11:1; Ga 5:22-23; 1 Te 2:10; 3:3; 2 Te 1:4; 3:7,9 Kamongo dokopimi piamanoli pyoo nyakamame piami. Nyakamame pii doko soo tanda longo neaminopa Oli Sipitisame nyakama mona yaepasia. ⁷ Dopa* 1:7 Lo 15:26; 2 Te 1:4; 1 Pi 5:3 piamopa, masoo minao paenge endakali yuu Masetoniapa Akayapa dolaponya katenge dupa pitakame mana kandena lao nyakama kateami. ⁸ Kamongo* 1:8 Lo 1:8; 2 Te 3:1 dokonya pii lapae doko nyakama-kisa soo yuu Masetoniapa Akayapa dolaponya tayatelyamo. Dee nyakamame Gote masoo minilyamino dokonya atome pii doko yuu dupa pitakanya tayatelyamoaka. Tayatelyamo dokonya naimame pii mende dee lapenge nanjilyamo. ⁹ Nyakamame* 1:9-10 Ap 14:15; Ga 4:8* 1:9-10 Mt 3:7; Ap 17:31; Lo 2:5-6; 5:9; 1 Te 2:19-20; 4:16-17; 5:9; Ta 2:13 naima auu kayao lanyiamina lawapi, kiningi Gote lete katenge dokonya kendemane jemana latala, baanya Ikiningi doko kaiti-kisa katao ipatamo doko malisemana lao sambo gote dupa maita maitala Gote lao mona kapilyiamina lawapi dupa Masetonia tangepi Akaya tangepi dupame atome lengema. Goteme naima imbu kayatamo dokonya naima Pyoo Nyetamo Akali Jisasa doko, Goteme malunya sakatasia.

Tesalonaika yuu dokonya kalai piamino dupa

¹ Kaimia* 2:1 1 Te 1:5,9 paluma, naima nyakama kateamino dokonya ipao kalai piamano doko mee maa yangatae nakalyamona lao nyakama tangeme masilyamino. ² Wambao* 2:2 Ap 13:46; 16:19-24; 17:1-9; 2 Ko 3:12; Pl 1:30 Pilipae yuu dokonya endakali dupame naima kandanya palyetala, mee pyao koyasiamino doko nyakamame masilyamino. Dopa piaminoaka doko, naimanya Goteme naima nisiamopa paka nakayao baanya Wai Pii Epe doko lekeleke tao nyakama langiama.

³ Naimame nyakama mona sakatasoo pii langingi doko sambo pii lawapi, mona koo palyowapi, nyakama minakasowapi langya naenge. ⁴ Dopa* 2:4 Jet 11:20; 2 Ko 4:2; 5:9; Ga 1:10; Ep 3:7 lao langya naenya, Goteme Wai Pii Epe lao panenge kalai doko naima ditala kapana leamoli pyoo naimame pingi. Endakali dupame kapa lamo lena lao naimame dopa pyaa naenya, Goteme naimanya mona kandatala kapa lamo lena lao dopa pingi. ⁵ Naimame* 2:5 Ap 20:33; Lo 1:9; 1 Te 2:10; 2 Pi 2:3 nyakama andiki andiki pyoo piipi mende etete naleamina lao nyakamame masilyamino. Dee oapi nyipu laka lao putiti kaenge doko yapae pyaanya sambo naleamina lao Gotemepi kandeaka. ⁶ Naima* 2:6-7 Jo 5:41,44* 2:6-7 1 Ko 3:2; Ga 4:19; 1 Te 2:11 Kataisanya aposele dupa alyasale joo katapenge jiamoaka doko, nyakamapi endakali waka dupapimi naima lalyimili lao masala nayama. Dopa lao masala naenya, naima nyakama-pipa awapa kateamano dokopa patapata lao kateama. Enda mendeme baanya wane dupa wanawana lao isingili pyoo naimame nyakama isoo kateama. ⁸ Nyakama* 2:8 Lo 9:3; 2 Ko 12:15; Ga 2:20; 1 Jo 3:16 naimanya mona setenge endakali joo kateamino dokonya naimame nyakama etete auu kayapala mona epe paliuu Gotenya Wai Pii Epe doko iki nyakama langya naenya, naimanya mona doko apata nyakama diamaka. ⁹ Kaimia* 2:9 Ap 18:3; 20:34; 1 Ko 4:12; 1 Te 4:11; 2 Te 3:7-9 paluma, naimame kalai lekeleke tao tanda nao piamano doko nyakamame kame sala naenya, masilyamino. Naimame nyakamanya mende kenda pisala nayalanya kuka kotakapi naima tangenya kalai peta pyoo Gotenya Wai Pii Epe doko nyakama langiama. ¹⁰ Naimame* 2:10 Ap 10:18 nyakama Gote lao masoo miningi endakali dupa kandao etete epe tolao pyoo koopi mende napyoo kateamano doko nyakamapi Gotepimi kandatala kalyamino. ¹¹ Takangeme* 2:11 Ap 20:32; 1 Ko 4:14-15; Pm 10 baa tangenya wane dupa-kisa pingili pyoo, naimame nyakama mendai mendai lao dupa-kisa piamina lao masilyamino. ¹² Nyakama* 2:12 Mt 4:17; Pl 1:27; 2 Ti 2:10; 1 Pi 5:10 Gotenya tii pipae dokonya katataminopa baame nyakama isoo katatopa lao ipupa leamo Gote dokonya mana dupanya etete kapa patae payalapale lao naimame nyakamanya mona minao sakataseta pupu laseta pyoo pii kyoto joo langiama.

¹³ Naimame* 2:13 Lo 1:16; 1 Ko 11:2; 15:1; Ga 1:11-12; Ep 1:13; 1 Te 1:2; 2 Te 2:13; Ip 4:12 Gotenya pii lapae nyakama langiamano doko nyakamame sepala endakalinya piina lao masala naenya, Gotenya pii angina lao masoo siami. Pii dokome nyakama masoo miningi endakali dupa pupu lasilyamo dokonya apata naimame koteaka lao Gote kandao yaka pilino lenge. ¹⁴ Kaimia* 2:14 Ap 17:5; 1 Ko 1:2; Ga 1:22; 1 Te 1:6; 2 Te 1:4 paluma, Gotenya sosa dupa Kataisa Jisasa-pipa pakatae Jutia yuu ongonya katengemali pyoo nyakama kalyamino. Juta endakali dupame sosa dupa tanda maiyamino dopaka pyoo nyakama tata mendai dupame nyakama tanda diami. ¹⁵ Juta* 2:15 Mt 23:29-37; Lu 24:20; Ap 2:23-24; 7:52; 9:23,29; 13:45-50; 14:2,5,19; 17:5,13; 18:12 dupame potopesa dupa pyao kumasetala Kamongo Jisasa doko pyao kumasoaka petala naima apata tanda dyoo watao piami. Dupame endakali dupa pitaka yandapipi jetala Goteme mana auu kaenge doko tanga lengema. ¹⁶ Dokopa* 2:16 Jen 15:16; Mt 23:32; 1 Ko 10:33; 1 Te 1:10 Goteme endakali tata waka dupa pyoo nyina lao naimame dupa pii lamailyamanopa Juta dupame kaitini lyokengema. Dupame dopa pyoo koteaka lao koo pilyamino doko pyoo tumbingima. Dopana indupa Gotenya imbu kaenge doko dupa-kisa ipatelyamo.

Polome Tesalonaika tange dupa dee kandawani kayamo doko

¹⁷ Kaimia* 2:17 Lo 1:10-11; 1 Ko 5:3; Kl 2:1,5; 1 Te 3:10 paluma, wane muiyeneme endangi takangepi nakandengeli pyoo gii kuki mende naimame nyakama nakandeamanoaka doko, naimame nyakama masoo kateama. Dopa petala naimame nyakama etete kandawanimi kumapala kanja ipanya makande pyoo etete lekeleke teama. ¹⁸ Naimame nyakama kateamisa ipawani kayama. Namba Polome nyakama kateamisa ipawani kayapala ipatoo lao deaka makande peta peta pio. Dopaka doko, Sataneme naima minanjia. ¹⁹ Naimanya* 2:19 Mt 16:27; Mk 8:38; Pl 2:16; 4:1; 1 Te 3:13; 4:15; 5:23 Kamongo Jisasa dee ipatamopa baanya enomba dokonya naimame api kandatamanopa lao masoo malisilyamape? Naimame api kandao mona epe palitamape? Naimame api yole etete andake doko jetamosa tama pitamape? Doko nyakamaka daape. ²⁰ Kiningi,* 2:20 2 Ko 1:14 indupa naimame nyakama masetala eteke pyao mona yaepelyamano.

Timoti baa Tesalonaika peamo doko

¹ Tenge* 3:1-2 Ap 17:15; Pl 2:19* 3:1-2 Ap 16:1-3; 1 Ko 3:9; 2 Ko 6:1 dokonya minao naimame kuki mende kapa pao malisala naenya Atenesa yuu ongonya akali lapoma iki katapenge jianya, Silipenasa nalimba iki katambana lao masetala nalimbame naimanya kaiminingi Timoti baame Kataisanya Wai Pii Epe doko endakali dupa lamaiyoo, Gotenya kalai awapa pyoo katenge doko nyakama kateamino ongonya epena leamba. Baame nyakama minao kyoto injisetala nyakamanya masoo miningi doko nisetamopa lao nalimbame baa epena leamba. ³ Nyakama* 3:3 Ep 3:13; 1 Te 1:6; 2 Ti 3:12 tanda nao kalyamino dokonya nyakamanya endakali mendaipi mendeme aopyoo latala paka kayatamini lao dopa piamba. Doko, naima tanda nao katapenge doko nyakama tangeme masilyamino. ⁴ Ongonya* 3:4 Mt 16:24; Ap 14:22; Lo 8:36; 1 Te 2:14; 2 Te 1:5; Ip 10:32,36 naima nyakama-pipa awapa kateamano dokopa naima tanda natamana lao nyakama wambao langiama. Langiamanoli pyoo angi jiamo doko nyakamame masilyamino. ⁵ Tenge* 3:5 Mt 4:3; Pl 2:16 ongonya minao nambame kuki mende kapa pao malisala nayao nyakamame aipa pyoo masoo minao kalyamipi lao kanjanya Timoti epena leo. Makande pingi dokome aopyoo latala nyakama makande pitamopa naimanya kalai lekeleke tao piamano doko mee jetame lao epena leo.

Timotimi Tesalonaika tange dupanya atome lao Polo lamaiyamo doko

⁶ Dopana,* 3:6 Ap 18:5; 2 Ko 7:7; 2 Te 1:3; 2:15 Timoti doko nyakama kalyamino ongonya katao naima kalyamano dakenya epapu ipupala nyakamame Gote lao masoo minao endakali dupa auu kaelyaminona lao atome doko baame naima langitilyamo. Nyakamame koteaka lao naima lao masoo mona epe palyetala naimame nyakama kandapuma laka lao masilyamanoli pyoo, nyakamame naima kandapuma laka lao masilyaminona lao baame naima langilyamoaka. ⁷ Ongonya* 3:7 2 Te 1:4 kaimia paluma, nyakama Gote lao masoo minao katapimino dokome naima tanda nao kenda pipae nyoo katapumano dupa pitakanya mona epe palisilyamo. ⁸ Nyakamame Kamongo doko pupu lao minao payapimino kandatala naima indupa kalyakao kalyamano. ⁹ Nyakama* 3:9 2 Te 2:15 mambele naima Gotenya enombasa etete mona yaepao kalyamano. Dopana, naimame nyakama kandao kapa pao Gote lao eteteaka yaka pilino lelyamano. ¹⁰ Masoo* 3:10 1 Te 2:17 miningi mende daa jilyape lao nyakama enomba kandao kapa pisemana latala kuka kotakapi naimame lomaka singi.

Polome loma siamo doko

¹¹ Naimanya* 3:11 2 Te 2:16-17 Gote-kisa Takange doko tangepa naimanya Kamongo Jisasa dokopame naima laminao nyakama kalyamino dokonya epena. ¹² Naimame* 3:12 Lo 12:17; Ga 6:10; 1 Te 5:15; 2 Te 1:3; Ta 3:2 nyakama auu kaengeli pyoo nyakamame nyakama tangelapopi dee endakali dupa pitakapi auu kaenge doko Kamongo dokome andao andake injisekena. ¹³ Dopa* 3:13 1 Ko 1:8; Pl 1:10; 1 Te 2:19; 4:17; 5:23 pyoo pituu, baame nyakamanya mona doko pupu lasekena. Tenda naimanya Kamongo Jisasa baanya endakali etete epe dupa pitaka-pipa dee ipatamo dokopa, naimanya Gote-kisa Takange dokonya enombasa nyakama-kisa koo nasingi etete epe katatami.

Goteme auu kaena lao paenge mana dupa

¹ Kaimia* 4:1 Lo 12:1-2; 1 Ko 11:2; 1 Te 2:13; 2 Te 3:16 paluma, naimame pii dake etao lelyamano: nyakamame tolao payapengepi Goteme auu kaenge dupa pipengepi dupa naima-kisa mana nyiaminoli pyoo nyakamame pingima. Indupa naimame Kamongo Jisasanya kenge doko lao nyakamame epao dopa pyepale lao kyoto joo tee lelyamano. ² Doko, naimame Kamongo Jisasanya pupu lapae dokome nyakama langiamano mana pii dupa pitaka nyakamame masilyamino. ³ Doko* 4:3 1 Te 5:23; Ip 10:10; 1 Pi 1:16 nyakamame endakalipi nyele-nyele paenge mana doko maita maitala epe tolao katamili lao Goteme masilyamo. ⁴ Nyakamanya* 4:4 1 Ko 7:2; Ep 1:4; 1 Pi 3:7 akali mendai mendai lawame enda lanyepala mana etete epe minao andanda semaiyoo pilyanya enda lanyetoana lao masetae kalyepape. ⁵ Gote* 4:5 Wee 79:6; Jet 10:25 lao masala naenge netesa akali dupame mona sakatao mee nyowanimi kumao enda nyingimali pyoo nanyalapape. ⁶ Pii* 4:6 Dit 32:35; Wee 94:1-2 lelyo dokonya akali nyakamanya mendeme endakali yango doko kandao luiyamaiyoo minakasala nayalapape. Doko naimame wambao langyokondape pyoo langiamanoli pyoo, Kamongo dokome koo dopale dupanya yanu pingina lao langilyamano. ⁷ Doko,* 4:7 Jo 17:19; 2 Te 2:13-14; 1 Pi 1:15-16 Goteme naima mana aii pyapae dupa minalapale lao ipupa laa naya. Mana etete epe dupa minalapale lao ipupa lea. ⁸ Tenge* 4:8 Ese 36:27; 37:14; Lu 10:16; 2 Ko 1:22; 2 Te 2:13 ongonya minao mana dutupa maita mailyamo endakali dokome endakali yango mende kandao maita maiya naenya, Goteme baanya Oli Sipitisa nyakama dilyamo doko kandao maita mailyamo.

⁹ Nyakama* 4:9 Ais 54:13; Jet 31:33-34; Jo 6:45; 13:34; 1 Jo 4:7 kaiminingi dupa auu kayao kalyepape lao pii mendapua pepa pyapenge tenge nasilyamo. Doko nyakama tangelapo mende auu kaya kaya pyoo kalyepale lao Goteme nyakama mana langitilyamo. ¹⁰ Kini,* 4:10 2 Te 1:3; 3:4 nyakamame Masetonia yuu doko pitakanya masoo miningi kaiminingi dupa pitaka auu kaelyamino. Kaimia paluma, nyakamame dee epao dopa pyepale lao naimame nyakama kyoto joo langilyamano. ¹¹ Nyakamame* 4:11 Ap 18:3; Ep 4:28; 1 Te 2:9; 2 Te 3:8,12 ema napyoo andiki pyoo katao, pyakane nakatao, kingimi kalai pyoo katao pimua laka lao masoo pyoo kalyepape. ¹² Nyakamame* 4:12 1 Ko 5:12-13; Kl 4:5 netesa endakali dupanya enombanya auu pyoo katamana latala, nyakama-kisa mende daa jala naena lao dopa pyepape.

Kamongo dokome naima sakataseta

¹³ Kaimia* 4:13 Ep 2:12; Kl 1:27 paluma, nyakamame endakali isa palipiamino dupa kandao masala naenge endakali joo nakatapimi laka lao masilyamano. Naima Gotepa lete etete tole katatamana lao masoo malisala naenge endakali dupame pingimali pyoo, nyakamame mona kenda nakayapimi laka lao masilyamano. ¹⁴ Doko,* 4:14 Lo 1:4; 8:11; 10:9; 14:9; 1 Ko 15:3-4,12; 2 Ko 4:14 Jisasa kumapala dee sakateana lao masoo minao paelyamanoli pyoo, Jisasa lao masoo minao isa palipiamino endakali dupa Goteme Jisasa-pipa tole pyao laminao ipatana lao masoo minilyamanoaka.

¹⁵ Kamongo* 4:15 1 Ko 15:51-52 dokome leamoliaka pyoo naimame nyakama dapa langilyamano: Kamongo doko dee ipatamo dokopa naima kumala nayao lenge tao katatamano dupame endakali isa palipiamino dupa nyoo maita pyatala wambala nayatama etete daa. ¹⁶ Kamongo* 4:16 Mt 24:30-31; 2 Te 1:7-8; 2:1-2 doko tangeme kaiti doko yakinatala isa ipatamo dokopa baame mona ipupa lao puu lao lao, enjele isingi dokome wii lao, Gotenya beto doko lao pita. Dokopa Kataisa lao masoo minao kumiamino endakali dupa wambao sakatatami. ¹⁷ Dokopa* 4:17 Jo 12:26 naima kumala nayao saka katatamano dupapi wamba kumiami endakali dupapimi Kamongo doko ketae kandanyalapale lao kopa dupanya yapa nyimina ketae pata. Dopa pitamopa naima koteaka lao Kamongo dokopa tole katatama. ¹⁸ Dopana, nyakamame pii dutupa lao mende mona yaepasa yaepasa pyoo kalyepape.

Naima depa latae katamana

¹ Kaimia* 5:1 Dan 2:21; Mt 24:36; Ap 1:7-8 paluma, dopa pitamo doko ee kana utupa patatamopana lawapi yuu gii dokonyana lawapi endakali mendeme nyakama langyuu pepa pyao peakapenge tenge mende nasilyamo. ² Doko,* 5:2 Mt 24:42-44; Lu 12:39; 1 Ko 1:8; 2 Pi 3:10; Pa 3:3 pake nenge endakali mende ipapomo lao masala naengesa epengeli pyoo Kamongo dokonya gii doko ipatana lao nyakama tangeme masokondape pyoo kalyamino. ³ Endakali* 5:3 Jet 4:31; 6:14; Ese 13:10; Mt 24:39; Lu 21:34-35; Jo 16:21-22; 2 Te 1:9 dupame epe yuu yongapumopa naima auu pyoo kalyamanona latamino gii dokopaka enda wane tongata pilyamo doko maita pingi dokotekee joo koyasingi doko dupa-kisa lee mendai andinyala ipata. Dokopa dupa paka pupenge nanjeta. ⁴ Dopaka* 5:4 Ap 26:18; Ep 5:8-9; 1 Jo 2:8 doko, kaimia paluma, nyakama iminjingi dokonya nakalyamino. Pake nenge endakali mende epengeli pyoo gii doko nyakama-kisa naipata. ⁵ Nyakama* 5:5 Jo 8:12; Lo 13:12; Ep 5:9 pitaka tii pingi dokonya wane joo katao kotaka gii dokonya wane joaka kalyamino. Naima kukapa iminjingipa dolaponya nakalyamano. ⁶ Dopana* 5:6 Mt 24:42; Lo 13:12-13; 1 Pi 1:13; 4:7; 5:8 endakali waka dupa luu palengemali pyoo, naima luu palya naenya, lenge tao katapala naima tange isoo katamana. ⁷ Luu* 5:7 Ap 2:15; 2 Pi 2:13 palenge endakali dupa kuka palengema. Bia akipi longo lao napala kyekenge endakali dupa kuka nao kyekengema. ⁸ Dopaka* 5:8 Ais 59:17; Lo 8:24; 1 Ko 13:13; Ep 6:13-17; 1 Te 1:3 doko, naima kotaka kalyamano dupame tange isoo katamana. Isoo katao pituu, yanda pyaanya konambi miningili pyoo naimame masoo minao paengepa auu kaengepa dolapo minao katamana. Yanda pyaanya aiyombanya andu pingili pyoo etete pyoo nyepae katatamana lao masoo malisoaka katenge doko andu pyoo katamana. ⁹ Doko,* 5:9 1 Te 1:10; 2 Te 2:13-14 Goteme naima baanya imbu kaenge doko nyetaminopa lao kalyepape laa naya. Daa, naimanya Kamongo Jisasa Kataisame naima pyoo nyina lao kalyepape lea. ¹⁰ Kataisa* 5:10 Lo 14:8-9; 1 Te 4:14 doko naimanyana lao kumikea. Naima lenge tao katatamanopi kumatamanopi baapa awapa katatamana lao baame dopa pia. ¹¹ Ongonya* 5:11 Ep 2:20; Ju 20 nyakamame mende mona yaepasa yaepasa pyoo, mende pupu lasa lasa pyoo pilyaminoli pyoo pyoaka kalyepape.

Polome pii etao leamo doko

¹² Kaimia* 5:12 1 Ko 16:16,18; Ga 6:6; 1 Ti 5:17; Ip 13:17 paluma, nyakama naimame dapa langilyamano: nyakamanya kainanya kalai pilyamino akali dupa nyakamame andanda semaiyoo kalyepape. Akali dupame nyakama minao tolasoo isoo katena lao Kamongo dokome katena lea. ¹³ Kalai* 5:13 Mk 9:50 dopale pilyamino dokonya nyakamame akali dupa auu kayao eteteaka andanda semaiyoo nyakamalapo mona soloo pyoo kalyepape. ¹⁴ Kaimia* 5:14 Ais 35:4; Lo 14:1; 1 Ko 8:7; 2 Te 3:6,11,15 paluma, naimame nyakama kyoto joo langilyamanona, makamaka kaenge endakali dupa maka nakaena lao lamaiyepape. Mona endaki minapae dupa pupu lasalapape. Tambo lapae dupa kingi maiyoo nisalapape. Endakali dupa pitaka lao masetala yapa maka nakayao malisoaka kalyepape. ¹⁵ Endakali* 5:15 Eke 21:23-25; Pot 20:22; Mt 5:38-39; Lo 12:17-19; 1 Pi 3:9 mendeme mende-kisa koo pitamo dokopa itingi yanu pyao koo napina laapape. Dee nyakamame koteaka lao mende epe pii pii pyoo endakali waka dupa pitaka-kisa epe pimua laka lao masoo pyepape.

¹⁶ Koteaka* 5:16 Pl 1:4; 4:4 lao mona yaepao kalyepape. ¹⁷ Koteaka* 5:17 Lu 18:1; Ep 6:18 lao loma soaka kalyepape. ¹⁸ Upa* 5:18 Ep 5:20 pitakame nyakama-kisa andinyala ipatamopa nyakamame Gote lao yaka pilino laapape. Nyakamame dopa pimili lao Goteme Kataisa Jisasa dokonya katao masilyamo.

¹⁹ Nyakamame* 5:19 1 Ko 12:1,10-11; Ep 4:30 Oli Sipitisanya itate doko konjembala nayalapape. ²⁰ Gotenya* 5:20 1 Ko 14:1,31,39 pii panao langilyamino dupa koo lamona latala daa laa nayalapape. ²¹ Dupa* 5:21 1 Ko 14:29; 1 Jo 4:1 pitaka makande petala epe doko minokondape pyoo minalapape. ²² Koo* 5:22 Jop 1:1,8; 2:3 pingi tata dupa pitaka wandinya nepao kalyepape.

²³ Epe* 5:23 Ais 11:6; Sak 9:8-10; Lo 15:33; 1 Te 3:13; 2 Te 3:16 yuu yongasingi Gote tangeme nyakama etete epe injisokondape pipya laka lao masilyamano. Naimanya Kamongo Jisasa Kataisa dee ipatamo dokopa nyakamanya imambupi monapi yongepi dutupa auu pipae joo nyakama-kisa koo tengepi mende nasipya laka lao masilyamanoaka. ²⁴ Nyakama* 5:24 1 Ko 1:9; 2 Te 3:3 ipupa lelyamo Gote dokome mende pitoo latala kini pingina, dokome angi pita.

²⁵ Kaimia* 5:25 Lo 15:30; Kl 4:3; 2 Te 3:1 paluma, nyakamame naima lao masetala Gote lao loma salapapeaka. ²⁶ Nyakamame* 5:26 Lo 16:16; 2 Ko 13:12 masoo miningi kaiminingi dupa auu pyoo katena lao Gotenya endakali dupame pipengeli pyoo mende kopyoo nunu pii pii pyoo kalyepape. ²⁷ Kamongo* 5:27 Kl 4:16 dokonya kenge doko lao nyakamame masoo miningi kaiminingi dupa pitakame sina lao pepa dake itaki pyalapape lelyo.

²⁸ Naimanya Kamongo Jisasa Kataisame nyakama kandao mona epe palyekena.