1 PITA

PITAME

PEPA WAMBAO PIAMO DOKO

Pii atupa wambao kandapenge

Pitame pepa doko wambao pyapala Goteme yapao nyepae endakali Esia kateamino dupanya pyasakamaiya-pyaa. Wambao pyao pyasiamo doko dupame Jisasa lao masoo minao katataminosa kenda pipaepi tanda nengepi dupa epea kandeno dokopa, kyoto joo katena lao nisoo pyao pyasia-pyaa. Baame lao pituu, Jisasa kumapala malunya dee sakateana baa dee ipatana nyakamame doko masetala malisetae kalyepape lea-pyaa. Leamoli pyoo katataminopa kenda pipaepi tanda nengepi dupanya koyala nayao katatamina lao pia-pyaa.

Pitame pepa wambao piamo dokonya pii lyaa dupa:

1:1-2 Pii wambao pepanya piamo dupa

1:3-12 Goteme nyakama pyoo nyilyamona masalapape

1:13–2:10 Nyakama etete epe joo kalyepape

2:11–4:19 Tanda nengepi kenda pipaepi dupa ipatamopa Kitiseneme aipa pipengepe?

5:1-11 Kitiseneme anasale katao endakali nisingi

5:12-14 Pitame pii etao lasa leamo dupa

¹ Namba* 1:1 Jo 7:35; 2 Ko 5:6; 2 Ti 1:15; Je 1:1 Pita Jisasa Kataisanya aposele dokome nyakama Goteme yapao nyepae endakali yuu Pondasapi, Galasiapi, Kapatosiapi, Esiapi, Bitiniapi dupanya wakale wakale opone joo kalyamino dupanya pepa dake pyao peekelyo. ² Takange* 1:2 Eke 24:8; Mt 26:28; Lo 8:29; Ep 1:4; 2 Te 2:13; Ip 12:24 Goteme wamba waka pii lanya seteamoli pyoo, Oli Sipitisa endakali etete epe injisingi dokome Goteme nyakama yapao nyia. Nyakamame Gotenya pii doko watao minalapale lawapi, Jisasa Kataisanya taiyoko dokome yonge kaimbu pyalapale lawapi, Goteme dopa pia. Goteme nyakama kandao mona etete epe mende palyetala nyakamanya mona doko etete lyuu lasekena.

Lete etete katenge dokonya leamo doko

³ Naimame* 1:3-4 Jo 3:5; 2 Ko 1:3; 1 Pi 1:23; 1 Jo 2:29; 3:9* 1:3-4 Mt 6:19-20; Kl 1:5,12; 3:3-4 naimanya Kamongo Jisasa Kataisanya Gote-kisa Takange doko lao tama pimana. Baame naima eteteaka kondo kayapala Jisasa Kataisa malunya sakatasiamo dokome naima dee ŋaŋa joo mandea. Naima baame epe ditamo doko masoo malisoo katao kuki makapi mende nakayatamina lao dopa pia. Baame epe doko nyakamanyana lao ketae kaitinya isakao kalyamo. Epe doko koyala nayao kaimala napyoo sapualapi naengeaka. ⁵ Goteme* 1:5 Jo 10:28; 17:11; Ep 1:19; 1 Jo 2:29; 3:2,9 nyakama etao pyoo nyetamo doko gii etatamo dokopa panasetopa lao depa latae kalyamo. Baame dopa pitopa lao baanya pupu lapae dokome masoo miningi dokonya-kaita nyakama isoo kalyamo.

⁶ Makande* 1:6 Jo 16:20; Ip 12:11; Je 1:2-3; 1 Pi 5:10 pingi tata tata dupa nyakama-kisa ipatamopa epapu gii kuki tanda nyepenge. Dopaka doko, nyakamame lete etete katenge doko masetala mona yaepao kalyamino. ⁷ Makande* 1:7 Jop 23:10; Pot 17:3; Ais 48:10; Sak 13:9; Mal 3:2-3; Lo 2:7; 1 Ko 3:13; Je 1:3 pingi epelyamo dupame nyakamanya masoo miningi doko angi jilyape lao makande pilyamo. Masoo miningi angi dokonya-kaita Jisasa Kataisa dee panao ipatamo dokopa tama pingipi, andanda semaingipi, tii pipaepi dupa nyetami. Nyakamanya masoo miningi doko golo itateme yangao makande petae alu pingi dopale daa. Etete epe. ⁸ Nyakamame* 1:8 Jo 20:29; 2 Ko 5:7; 1 Jo 4:20 Jisasa Kataisa nakandeaminoaka doko, baa auu kaelyamino. Indupa nyakamame baa nakandelyaminoaka doko, baa lao masoo minilyamino. Masoo minao pituu, nyakamanya mona yaepelyamino doko epe etete auu pipae dopalena lao mendita mendepa etete kapa pao makande pipenge daa. ⁹ Nyakamame* 1:9 Lo 6:22; Ip 10:39 masoo minao kalyamino dokonya angi doko nyakama pyoo nyepae kalyamino doko. ¹⁰ Goteme* 1:10 Mt 13:16-17; Ip 11:39; 2 Pi 1:20 nyakama kandao mona epe palitamo doko wamba potopesa dupame lao panao pituu, pyoo nyingi dokonya tenge doko kutokondape pyoo kateami-pyaa. ¹¹ Kataisanya* 1:11 Wee 22; Ais 52:13; 53:12; Lu 18:31; 24:26-27; Ap 1:7; 2:23 Sipitisa doko potopesa dupa-kisa palipala lao pituu, Kataisa baa tanda nyetapi maitakao tii pipae nyetapi dupa dopa pitana lao baame akali mendepa yuu gii mendepa dolapo watambao lea-pyaa. Dokopa potopesa dupame akali doko apipi gii doko andukupape lao kutao kateami-pyaa. ¹² Dopa* 1:12 Mt 13:16-17; Lo 16:25; Ep 3:10 piaminopa Goteme dupa-kisa panasoo pituu, potopesa dupame dupa tange nisalanya dopa napiamina, nyakama nisoo dopa piamina lea-pyaa. Baame Oli Sipitisa kaitinya katao epena leamo dokonya pupu lapae dokome endakali mendapuame Wai Pii Epe doko nyakama langiami. Enjele dupame doko kandawanimi kumao kalyamino.

Nyakama etete epe joo kalyepape

¹³ Dopana,* 1:13 Lu 12:35-40; 1 Te 5:6 nyakamanya masingi sakatatae katao tangeme tange isoo kalyepape. Isoaka katao Jisasa Kataisa panao ipatamo gii dokopa epe ditona leamo doko masoo malisokondape pyoo kalyepape. ¹⁴ Nyakama* 1:14 Lo 6:19; 12:2; Ep 2:3; 4:17-18 pii singi wane joo katao pituu wamba nyakamame mana nanyingisa nyipu laka lao masingi koo palyoo payaminoli pyoo napayalapape. ¹⁵ Dopa* 1:15 Lep 11:44-45 napinya nyakama ipupa lateamo Gote doko etete epe joo katengeli pyoo nyakamanya mana minatamino dupa pitaka etete epe joaka minao katapenge. ¹⁶ Doko,* 1:16 Lep 19:2; Mt 5:48; 1 Jo 3:3 Gotenya pii pepa pyapae singi dokonya dapa lapae silyamo: “Namba etete epe joo kalyona, dokonya nyakama etete epe joaka kalyepape,” lapae silyamo.

¹⁷ Nyakamame* 1:17 Dit 10:17; Mt 6:9; Lo 2:11; 2 Ko 5:6; 2 Ti 4:14; Ip 11:6; Pa 2:23 Gote lao tee lao pituu, Takange lengema dokome endakalinya lengelyaapi kandao yapala naenge. Daa, endakali mendai mendai lao dupame mana minilyamili pyoo yapenge. Dopana, nyakama yuu dakenya tisa nao kalyamino gii dakepa Takange doko andanda semaiyoo kalyepape. ¹⁸ Nyakama* 1:18 Ais 52:3; 1 Ko 6:20; 7:23 nyakamanya yumbange dupame mee ambe payaminoli pyoo payao katengema dupanya Goteme silipapi golopi alu pingi dupanya mendeme nyakama sambao nanyiana lao masilyamino. ¹⁹ Dopana,* 1:19 Jo 1:29; Ap 20:28; Ip 9:12-14; 1 Pi 1:2 Kataisa doko kaimala napingi koopi mende nasingiaka sipisipi yakane dopale jiamopa, Goteme dokonya taiyoko etete angi baa dokome nyakama sambao nyiana lao masilyamino. ²⁰ Goteme* 1:20 Jo 17:24; Ap 2:23; Ga 4:4; Ep 1:4 yuupi kaitipi wapuala nayao pituu, baame Kataisa yapao nyia-pyaa. Yuu etalanya pilyamo gii dakepa baame nyakama nisotopa lao Kataisa doko panasekea. ²¹ Kataisa* 1:21 Jo 14:6; Lo 1:4; 4:24; 5:1-2; 8:11; 10:9 doko mambele nyakamame Gote lao masoo minilyamino. Goteme baa malunya sakatasetala tii pipae maiya. Dopa piamo dokome nyakamame Gote lao masoo minao malisoo kalyamino.

²² Nyakamanya* 1:22 Jo 13:34; 17:17; Lo 12:9-10 kaiminingi dupa mee sambo auu kaele nalenya kiningi etete auu kayamana latala, kiningi pii silyamino mana dokome monanya kaimala pipae dupa kunanya nepatala, nyakamame moname auu kayokondape pyoo auu kayaloo pyoo kalyepape. ²³ Goteme* 1:23 Jo 1:13; 3:11; Ip 4:12; Je 1:18; 1 Pi 1:3; 1 Jo 3:9; 5:1 nyakama dee mandeamo doko ee wai yapa kumingi mendeme namandea. Ee waingi kumala naenge baanya pii lapae lete katenge etala naenge dokome baame nyakama dee mandea.

²⁴ “Doko,* 1:24 Ais 40:6-8; Je 1:10-11 endakali dupa pitaka tanu joo kalyamino.

Dupanya pupu lapae dupa tanu dii dopale joo kalyamino.

Tanu dupa sapuilyamopa dii dupa isa kopo lenge.

²⁵ Dopaka doko, Kamongo dokonya pii lapae doko etala nayao tanga tangapi sulu soo seta.”

Pii lapae doko Wai Pii Epe nyakama langiamino dokoaka.

¹ Dopana,* 2:1 Mt 19:14; Ep 4:22; Je 1:21 nyakamame koo pingi dupa pitakapi, sambo lenge dupa pitakapi, minakasingi dupapi, nyipu laka lao masetala mona koo palenge dupapi, pii koo lenge dupapi mana dutupa pitaka soo nepalapape. ² Wane* 2:2 Mt 18:3; 1 Ko 3:2; Ip 5:12 nana epapu mandipae dupame andu ipange etete auu kaengemali pyoo nyakamame Gotenya pii kuni nasingi doko auu kayalapape. Pii dokome nyakama pyoo nyoo andasetae katamana lao nyakamame dopa pyepape. ³ Kamongo* 2:3 Wee 34:8 doko epe lamo lao nyakamame nakande sepeami.

Pingina lete katenge doko

⁴ Nyakama* 2:4 Wee 118:22; Ais 28:16; Mt 21:42; Ap 4:11; Ep 2:20-22 baa lete katenge pingina+ 2:4 pingina, kilya pulimbanapi Pitame pingina leamo doko Kataisa lete katenge doko kandao lea-pyaa. Kilya pulimbanapi leamo dupa naima Kataisa-pipa pakatae lete katenge dupa kandao kongali lea-pyaa. joo kalyamo doko-kisa ipupape. Endakali dupame pingina doko daa latala nepateaminoaka doko, Goteme baa etete angi lamona latala yapao nyia-pyaa. ⁵ Nyakama* 2:5 Eke 19:6; Ais 61:6; Lo 12:1; Pa 1:6 kilya pulimbanapi lete katenge joo kalyamino dupa Oli Sipitisanya losuu anda joo kalyepape. Dopa petala Oli Sipitisa dokome lelyamoli pyoo nyakamame Gote lao kundi maiyanya nyakama pitisa etete epe joo kalyepape. Goteme Jisasa Kataisanya kalai piamo doko lao masetala, nyakamame baa kundi maitamino dupa baame auu kayao nyeta. ⁶ Doko,* 2:6 Ais 28:16; Lo 9:33; 10:11; Ep 2:20 Gotenya pii pepa pyapae singi dokonya dapa lao pyapae silyamo:

“Nambame pingina mupa mende Sayone yuu dokonya katelyo.

Pingina doko yapao nyepae etete angi baa mende.

Doko lao masoo minatamo endakali doko etete elya nakayatana,” lapae silyamo.

⁷ Dopana* 2:7 Wee 118:22; Mt 21:42 nyakamame baa lao masoo miningi dupanya baa etete angi. Dopaka doko, masoo minala naenge endakali dupanya daa.

“Anda pingi akali dupame anda pingina daa latala nepeamino doko pingina mupa jetea.

⁸ Dee* 2:8 Ais 8:14-15; Lo 9:33 masoo minala naenge endakali dupa anda pingina dokome lombasetala, koo pina lao mapisingiaka.” Gotenya pii lapae doko daa lao nepelyamino dokonyaka lombapae soo kalyamino. Goteme dopa pitamina lao wamba waka lea-pyaa.

⁹ Dupa* 2:9 Eke 19:5-6; Dit 4:20; 7:6; 14:2; Ais 9:2; 43:20-21; Ap 26:18; Ep 5:8; Kl 1:12-13; Ta 2:14; 1 Pi 2:5 lombapae soo kalyaminoaka doko, Goteme nyakama iminjetae doko yakinatala baanya tii pipae etete auu koo pipae dokonya ipupa lateamopa, baanya kalai etete andake epe pingi dupa endakali dupa lamaiyanya nyakama Gotenya yapao nyepae endakalipi, kiŋinya pitisapi, Gote tangenya endakali etete epepi kalyamino. ¹⁰ Wamba* 2:10 Osi 1:6-9; 2:23; Lo 9:25-26 nyakama Gotenya joo nakateaminoaka doko, indupa nyakama baanya endakali joo katapelyamino. Wamba Goteme nyakama kondo nakayamoaka doko, indupa baame nyakama kondo kayatelyamo.

Naima Gotenya kendemane joo katapenge

¹¹ Mona* 2:11 Wee 39:12; Ga 5:17,24; Je 4:1 setenge paluma, nyakama endakali opone joo tisa nao katao pituu, endakalinya mona koo dokome nyakamanya imambu doko yanda pimaingi dupa etete yakinalapape lao nambame nyakama langyokondape pyoo langilyo. ¹² Netesa* 2:12 Ais 10:3; Mt 5:16; Lu 19:44 endakali dupame nyakama kandao, koo pingimana lao pyalanya latamino kandao doko, dupame nyakamanya mana epe minatamino dupa kantatala, Goteme endakali kanja ipatamo gii dokopa, baa lao tama pina lao nyakamame dupanya kainanya mana epe minao kalyepape.

¹³ Nyakamame* 2:13 Ta 3:1* 2:13 Lo 13:1-7 Kamongo doko lao masetala, endakalimi mana makandepi setapae dupa pitakanya pundipundi kalyepape. Kamongo kiŋi mupa dokonya pundipundi kalyepape. ¹⁴ Kapomane andake dupame koo pingi endakali dupa anjinya palyetala epe pingi endakali dupa kandao lalyina lao kiŋi dokome katena lelyamona lao masetala nyakamame akali dupanya pundipundi kalyepapeaka. ¹⁵ Doko,* 2:15 1 Pi 3:16 Goteme nyakama dapa pipimi laka lao masilyamo: dupame kyakaenge pii masala nayao mee lelyamino dupanya nyakamame mana epe minao nengekaita lyokakamaipimi laka lao masilyamo. ¹⁶ Nyakama* 2:16 Ga 5:13; Ju 4 mokao nyepae joo payao kalyepape. Dopa pyoo katataminoaka doko, naima mokao nyepae joo katao koo pyoo luiyapenge jilyamona lao masala nayalapape. Nyakama Gotenya kendemane endakali joo payao kalyepape. ¹⁷ Nyakamame* 2:17 Pot 24:21; Mt 22:21; Lo 12:10 endakali dupa pitaka andanda semaiyoo, kaiminingi dupa auu kayao, Gote paka kayao, kamongo kiŋi mupa doko andanda semaiyoo kalyepape.

Naimame Kataisa payamoli pyoo tanda nao payapenge

¹⁸ Nyakama* 2:18 Ep 6:5-8 kendemane dupame nyakamanya akali andake dupa etete andanda semaiyoo dupanya pundipundi kalyepape. Akali andake mona epe palengepi tambo lapaepi dupanya iki pundipundi nakatenya, isingi akali tomba napae dupanya apata pundipundi kalyepapeaka. ¹⁹ Akali* 2:19 Je 5:11; 1 Pi 3:14; 4:14 andake mendeme nyakama mee tanda ditamopa nyakamame Gote lao masetala mee tanda nyetamino doko, Goteme yaka pilyaminona lata. ²⁰ Nyakamame koo pitaminopa dupame nyakama pyao takyetaminopa takina lao kayatamino kandao doko, nyakama-kisa epe aki mende setape? Nyakama auu pyoo katao dupame tanda dina lao kayatamino kandao doko, Goteme yaka pilyaminona lata. ²¹ Nyakama* 2:21 Mt 16:24; Jo 13:5; 2 Te 3:7 dopa pyoo payatamina lao Goteme ipupa latea. Doko, Kataisame nyakama lao masoo tanda nyepala, baame piamoliaka pyoo nyakamame pyepale lao mana doko setekea. ²² Baame* 2:22 Ais 53:9; Jo 8:46 koopi mende napia. Baanya pii leamo dokonya sambo piipi mende napalea. ²³ Endakali* 2:23 Ais 53:7,12; Mt 5:39; Lo 12:19; 1 Pi 3:9 dupame baa kandao pii koo leaminopa, baame yanu pyao pii koo nalea. Baame tanda nyoo pituu itingi yanu nyotona nalea. Baame dupa pitaka etete tolao yapenge dokonya kingilyaka maiya. ²⁴ Naimame* 2:24 Ais 53:5; Lo 6:2-3,11,18; 2 Ko 5:21; Ip 9:28 koo pingi dupa etete kumina kayapala epe dupa pyoo kalyepale lao baame baa tangenya yonge dokome naimanya koo pingi dupa soo ita poko dokonya pea. Baa pyao kombe palisiamino dupame nyakama saka nyia. ²⁵ Mena* 2:25 Ais 53:6; Ese 34:5-6; Mt 9:36; Jo 10:14 sipisipi dupa wakale puu puu petala kyakao pengemali pyoo nyakama kyakao payao kateaminoaka doko, indupa nyakama dee pilyetala nyakamanya imambu dupa Isoo Setao Katenge Akali doko-kisa ipatelyamino.

Endakalipanya pii dupa

¹ Nyakama* 3:1-2 1 Ko 7:12-16; Ep 5:22-24; Kl 3:18; Ta 2:5; 1 Pi 1:25 enda dupame nyakamanya akalingi dupanya pundipundi pilyepape. Dopa pitaminopa nyakamanya akalingi dupanya mendeme Gotenya pii doko nasoo tanga lao katatamo kandao doko, nyakama enda dupame piipi mende lamaiya naenya, Gote paka kayao mana epe minao pititaminopa nyakamanya akalingi dupame mana doko kandatala Gotenya jetami. ³ Asili* 3:3 Ais 3:16-24; 1 Ti 2:9 kumao mandengepi, golome wasepaeme yati pingipi, yonge pee epe pingipi, dopale dupame nyakamanya yonge doko iki yati napyepape. ⁴ Dopa napinya andiki pingipi ema napyoo petengepi mana dopale dupame nyakamanya mona doko yati petae pilyepape. Mana dopale dupa koyao alu napingi. Goteme mana dupa kandatala epe etetena lao masingi. ⁵ Wamba waka Gote lao masoo malisoo peteamino enda etete epe dupame mana dopale dupame tange yati petala, akalinginya pundipundi peteami-pyaa. ⁶ Dopaka* 3:6 Jen 18:12; Ga 4:28 pyoo enda Seta dokome Apotakameme leamoli pyoo pitipala, baa kenge kamongona lao andasiaka-pyaa. Indupa nyakamame dopaka pyoo mana epe dupa minao opale koo mende paka nakayao pitipala enda Setanya wanenge jetelyamino.

⁷ Dopaka* 3:7 Ep 5:25-33; Kl 3:19 pyoo nyakama akali dupame enda dupa-kisa etete pupu lapae nasingina lao masokondape petala, nyakamanya etanenge dupa-pipa tole pyao pilyepape. Goteme mona epe palyoo nyalambo endakalipa lapota lete etete katasiamo doko lao masetala, nyakama akali dupame etanenge dupa andanda semaiyoo kalyepape. Opale mendeme nyakamanya loma singi doko minanjala naena lao dopa pyepape.

Nyakama mona mendai palyoo kalyepape

⁸ Nambame pii dutupa etasoo dapa lelyo: nyakama pitakame masingi mendai iki palyoo mende kanda kanda pyoo, kaiminingi dupa auu kayao, kondo kayao, anasale joo kalyona lao masoo kalyepape. ⁹ Endakali* 3:9 Mt 5:39,44; Lu 6:28; Lo 12:14-18; 1 Te 5:15; 1 Pi 2:23 dupame nyakama kandao koo pitamino dokopa itingi yanu nyoo koo napyepape. Pii koo latamino dokopa, itingi yanu nyoo pii koo laa nayalapape. Opa napinya, nyakamame dupa kandao pii epe laapape. Doko, Goteme nyakama epe doko ditoo latala ipupa latea.

¹⁰ “Endakali* 3:10 Wee 34:12-16 mende mona yaepao auu pyoo katapuli lao masetamo dokome keke kambupimi pii koopi sambo piipi mende laa naena.

¹¹ Koo pingi dupa baame maita maitala, epe dupa pyoo katena.

Baame mona lyuu lenge mana dupa kutao nyepala ongonyaka watao payao katena.

¹² Doko, Kamongo dokome epe pingi endakali dupa kandao katapala

dupanya loma singi doko baame soo kalyamo.

Kamongo dokome endakali koo pingi dupa kandao maita mailyamo.”

Mana epe dupa miningi dokonya tanda nyepenge

¹³ Nyakamame mana epe dupa minapuma laka lao minao katataminopa apimi nyakama koyasetape? ¹⁴ Dopaka* 3:14 Pot 3:25; Ais 8:12-13; Mt 5:10; 10:26-31 doko, nyakamame mana epe minatamino dokonya nyakama tanda ditamino kandao doko, nyakama mona yaepao katatami. Nyakamame dupa paka kayao walu laa nayalapape. ¹⁵ Kataisa* 3:15-16 1 Pi 2:12 baa Kamongo kalyamona lao masetala nyakamame baa lao moname tama pyepape. Nyakamame masoo malisilyamino dokonya pisetamino endakali dupa pitaka kandao paka kaele lao andiki pyoo pii tenge yanu pyakamaiyanya koteaka lao depa latae kalyepape. Nyakama masingi epe palyoo kalyepape. Dopa pitaminopa nyakama Kataisapa pakatae payao mana epe minilyamino dupa kandao endakali dupame pii koo lataminopa, pii koo latamino dupanya tange elya setami. ¹⁷ Goteme* 3:17 1 Pi 2:20 nyakama tanda nyipimi laka lao masetamo kandao doko, nyakamame mana epe minatala tanda nyetaminopa yaka jeta. Aopyoo latala nyakama mana koo minatala tanda nyetaminopa yaka nanjeta.

Naimanya koo dupanya akali tolatae doko kumikea

¹⁸ Kataisa* 3:18 Ais 53:11; Lo 1:3-4; 5:6; 6:10; Ip 9:26-28; 10:10; 1 Pi 1:21-24 baame naima laminao Gote kalyamo dokonya patona latala baame naimanya koo dupanya paa mendai iki kumia. Baa akali tolatae doko naima koo pingi endakali dupanya kumikea. Endakalimi yonge doko pyao kumasiaminoaka doko, Goteme imambu doko lete katasia. ¹⁹ Dee* 3:19 Mt 12:40; Lu 23:46; Ap 2:24-31; Lo 10:7; Ep 1:21-22; 4:9-11 imambu dokome imambu anjetae kateamino dupa pao pii lamaiya-pyaa. ²⁰ Wamba* 3:20 Jen 6:1–7:24; 2 Pi 2:5; 3:9 waka Noa katao endakinya pituu paenge sipi doko wapuoo kateamino dokopa, Goteme yapa maka nakayao endakali dupanya mona kapilyetamipi lao malisoaka kateamopa dupame baa lao masoo minala nayami-pyaa. Dopa piaminopa, endakinya pituu paenge dokonya peteamino endakali tukulapo dutupa iki Goteme endaki dokonya pyoo nyia-pyaa. ²¹ Indupa* 3:21 Lo 6:3-4; Kl 2:12-13; Ip 10:22 kaimbu dokome naima pyoo nyilyamo doko endaki dokome makande pia-pyaa. Kaimbu dokome yongenya kaimala kunanya nepalanya daa. Dokome Gotenya mana watao minalanya masingi epe palyetamina latae mende. Jisasa Kataisa dee malunya sakateamo dokonya-kaita kaimbu dokome naima pyoo nyingi. ²² Baa* 3:22 Mt 22:44; Ap 2:33; Ep 1:20-21; Kl 2:15 kaiti-kisa pupala Gotenya kingi tolae-kaita kalyamo. Goteme enjele dupapi, enomba nyoo isoo katenge dupapi, pupu lapae dupapi dupa baanya pundipundi katena lea-pyaa.

Nyakamame koo dupa daa lateamina leamo doko

¹ Kataisa* 4:1 Lo 6:2,7; 1 Pi 2:21 baa tanda nyiamo doko lao masetala baame masiamoli pyoo nyakamame apata masoo depa depa latae kalyepape. Endakali mendeme baanya yonge dokonya tanda nyepelyamo dokome koo pingi mana doko yakinatelyamo. ² Dopana* 4:2 Lo 7:14-20; 1 Jo 2:16-17 nyakama isa yuu dakenya kalyamino gii dakepa endakalimi nyipu laka lao masingimali pyoo pyaa naenya Goteme pipimi laka lao masilyamoli pyoo pipenge. ³ Doko,* 4:3 Lo 1:29; Ep 4:17-18; Ta 3:3 netesa endakali dupame pipuma laka lao masilyaminoli pyoo nyakamame kapa pao peteami. Gii dokopa nyakamame nyipu laka lao masoo luiyawaka payao, waene longo napala kyakao, nee andake pyoo yangelyami dupanya tuu lao nawaka pao, bia akipi longo lao nao, sambo gote naminalapape latae dupa minawaka pyoo payateami. ⁴ Indupa netesa endakali dupame mana koo longo paka dupa nyakama-pipa awapa minamana naepelyamino lao mona andapala, nyakama kandao pii koo lelyamino. ⁵ Dopa* 4:5 Ap 10:42; 2 Ti 4:1 pilyaminoaka doko, endakali sakapi kumapaepi dupa yapala ipanya depa latae kalyamo Gote dokonya enombanya dupame pingima dupa lao panatami. ⁶ Endakali* 4:6 Lo 8:10; 1 Ko 5:5 kumiamino dupa-kisa Wai Pii Epe doko peamopa sepeami. Goteme endakali yapengeli pyoo kumapae dupa yapatana lawapi, Gote lete katengeli pyoo dupanya imambu dupa lete katatamina lawapi Wai Pii Epe doko dupa-kisa pea-pyaa.

Gotenya epe dupa auu pyoo isakamaingi doko

⁷ Dupa* 4:7 Pot 10:12; Lo 13:11-12; 1 Ko 10:11; 2 Ko 6:2; 1 Pi 1:5-7; 4:17; 1 Jo 2:18 pitaka etatamo gii doko tengesa petelyamo. Dopana, nyakamame loma salanya mona palipala tangeme tange isoo kalyepape. ⁸ Nyakamame* 4:8 Je 5:20; 1 Pi 1:22 mupa joo dapa pipenge: nyakamame kyoto joo mende auu kaya kaya pyepape. Doko, auu kaenge dokome koo pingi etete longo sanga pingi. ⁹ Nyakamame* 4:9 Ip 13:2 mumu laa naenya opone minaloo pyoo kalyepape. ¹⁰ Goteme* 4:10 Lo 12:6-8; 1 Ko 12:4-11 mona epe paliuu epe nyakama mendai mendai lao mee diamopa nyiaminoli pyoo nyakamame mende nisa nisa pyoo kalyepape. Goteme mona epe paliuu wakale mee dilyamo dupa auu pyoo isoo katakamaingi endakali joo dopa pyoo kalyepape. ¹¹ Endakali* 4:11 Lo 9:5; 16:27; 1 Ko 10:31 mendeme pii mende latamo kandao doko, Gotenya pii doko lena. Endakali mendeme mende nisoo katatamo kandao doko, Goteme pupu lapae baa maitamo dokome nisoo katena. Dopa pitamopa dupa pitakame Jisasa Kataisa-kisa Gote tama pita. Tii pipaepa pupu lapaepa dolapo koteaka lao baa-kisaka singi. Kiniaka.

Kitisene joo katao tanda nyingi

¹² Mona* 4:12 1 Pi 1:6-7; 3:14 setenge paluma, makande pingi koo itaita pipae dupa minao nyakama-kisa pitaminopa mana enenge waka mendeme nyakama-kisa andinyala epelyamona lao mona andala nayalapape. ¹³ Daa,* 4:13 Mt 5:11-12; Ap 5:41; Lo 5:3-5; 8:17; Kl 3:4; 2 Ti 2:12; Je 1:2-3; 1 Pi 1:7,21 makande pingi dupanya nyakama tanda nyilyamino doko Kataisame tanda nyiamoli pyoo nyilyaminona mona yaepalapape. Doko, tanga baanya tii pipae doko panatamo gii dokopa nyakama eteke pyao etete mona yaepatami. ¹⁴ Nyakamame* 4:14 Wee 89:50-51; 1 Pi 2:20 Kataisanya kenge doko minao payatamino dokonya endakali dupame nyakama kandao pii koo dupa lataminopa, nyakama mona yaepapenge. Doko, Gotenya Oli Sipitisa tii pipae doko nyakama-kisa ipao katapelyamo. ¹⁵ Dopaka doko, aopyoo latala nyakamanya mendeme endakali pyao kumasowapi, waa nawapi, koo pyowapi, pyakane katawapi mende petala tanda nyetami. ¹⁶ Dopaka* 4:16 Ap 11:26; Pl 1:20 doko, nyakamanya mendeme Kitisene katapala tanda nyetamo kandao doko, elya nakaena. Baanya kenge doko Kitisenena latamino dokonya Gote lao tama pina. ¹⁷ Indupa* 4:17 Jet 25:29; Ese 9:6; Lu 23:31; 2 Te 1:8 Goteme baanya tata dupa tee pyao yapapenge gii doko epelyamo. Baame naima tee pyao yapatamo kandao doko, Gotenya Wai Pii Epe doko tanga lenge endakali dupa aipa petala yapao etatape?

¹⁸ “Goteme* 4:18 Pot 11:31 endakali tolatae doko etete lekeleke tao pyoo nyetamo kandao doko,

baa minao payala nayao koo pingi endakali doko kandao aipa pitape?”

¹⁹ Goteme* 4:19 Wee 31:5 endakali mende tanda nyina lao masilyamoli pyoo mana epe dupa minao katao pituu, dupanya imambu dupa baame setao katekena lao maipenge. Wapuingi Gote dokome mende pitoo latala kini pingiaka.

Isingi akali dupanya kalai dupa

¹ Namba* 5:1-2 Lo 8:17-18; Kl 3:4* 5:1-2 Jo 21:15-17; Ap 20:28; 1 Ti 3:8; Ta 1:7; Pm 14 nyakamanya isingi akali kalyamino dopale dokome Kataisa tanda neamo kandeo dupa endakali lamaingi. Dee tii pipae tanga panatamo dokonya namba nyakama-pipa awapa kalyamanoaka. Nambame nyakamanya isingi akali dupa dapa lao mona sakatasilyo: nyakamame Gotenya sipisipi nyakama-pipa awapa kalyamino dupa setakamaiyoo kalyepape. Setakamaiyoo katao pituu, pyepa lao tuu lapiminosa pilyamanona lao masala naenya, Goteme pipimi laka lao masilyamoli pyoo mona sakatao pyoo kalyepape. Nyakamame kalai pilyamino dokonya yole iki nyemana lao putiti nakaenya, tangeme pyuani kayao pyoo kalyepape. ³ Goteme* 5:3 1 Ko 4:16; 2 Ko 1:24; Pl 3:17; Ta 2:7-8 setao katakalapape lelyamo endakali dupanya nyakama kamongo alyasale joo nakalyepape. Opa napinya sipisipi kambu dokonya nyakamanya mana epe minao laitaka pyoo kalyepape. ⁴ Dopa* 5:4 Ese 34:1; 1 Ko 9:25 pyoo katataminopa, Setao Katenge Mupa doko panao ipatamo gii dokopa tii pipae koyala naenge yole doko nyakama nyetami.

Namba anasale joo kalyona lao masoo kalyepape

⁵ Nyakama* 5:5 Pot 3:34; Mt 23:12; Jo 13:14; Ep 5:21; Je 4:6; 1 Jo 2:12-14 akali dupame isingi akali dupanya pundipundi kalyepape. Nyakama pitakame mendenya anasale joo kata kata pingi mana doko yonge pee joo pee pyoo kalyepape. Doko, namba alysale joo kalyona lao masingi endakali dupanya kaitini doko Goteme lyokata lyokata pingi. Namba anasale joo kalyona lao masingi endakali dupa kandao baame mona epe palenge. ⁶ Dopana,* 5:6 Jop 22:29; Mt 23:12; Lu 14:11; 18:14; Pl 2:8-9; Je 4:10 baanya gii dokonya nyakama alyasale kalyepa latana lao masetala, nyakama baanya kingi pupu lapae dokonya pundipundi katao anasale joo kalyona lao masoo kalyepape. ⁷ Baame* 5:7 Mt 6:25-30 nyakama lao masoo kalyamo tenge dokonya nyakamanya monanya kenda pipae dupa pitaka baa-kisa pyasalapape.

Satane doko daa latala Gote lao masalapape

⁸ Mena* 5:8 Wee 22:13; 1 Te 5:6 layone+ 5:8 layone Layone doko pusii jepae andake mendeme endakalipi pulumakawapi pyao kumasingi.mendeme ŋyuu londolondo lao paengeli pyoo nyakamanya yandapipi Satane dokome endakali mende pyao nalanya maa paliuu kutao paelyamona, nyakama kandao katapala tangeme tange isoo kalyepape. ⁹ Nyakamame* 5:9 Ep 6:11-13; Je 4:7 kyoto joo masoo minao katao, Satane doko daa latala tuu pyoo kalyepape. Dopa pyoo katao nyakama tanda dilyamino dopaka pyoo Kitisene endakali yango yuu pitakanya kalyamino dupa tanda mailyaminoakana lao masoo kalyepape. ¹⁰ Goteme* 5:10 Lo 8:18; 2 Ko 4:17; 1 Te 2:12; 5:24; 1 Pi 1:6 mona epe paliuu epe dupa pitaka dyoo kalyamo dokome baanya tii pipae dokonya nyakama Kataisapa pakatae tanga tangapi katatamina lao ipupa latea. Nyakama gii kuki tanda nao katapataminopa, Gote baa tangeme nyakama auu pisoo tolasoo, kyoto injisoo, pupu lasoo pita. ¹¹ Pupu* 5:11 1 Pi 4:11 lapae doko tanga tangapi baanyaka lamo. Kiniaka.

Etao lasa leamo pii dupa

¹² Naimanya* 5:12 Ap 15:22,40 kaiminingi Silipenasa nambame tungi pilyo dokome pii muu pipae atupa pepa pyekena lelyo. Nambame pii datupame nyakama kyoto joo kalyepale lao mona sakatasoo Gotenya mona epe palenge angi doko panasilyo. Nyakama dokonya kyoto joo katapenge. ¹³ Kitisene* 5:13 Ap 12:12,25; 13:13; 15:37-39; Kl 4:10; 2 Ti 4:11; Pm 1:24; 2 Jo 1:1; Pa 17:5 endakali nyakama-pipa yapao nyepae Bapilone+ 5:13 bapilone Wamba Olotesamene gii dokopa Bapilone tange dupame koaka pyoo katao koonya kenge soo kateami-pyaa. Dokopa taono Bapilone doko koona lao kenge singi doko nyoo taono Loma makande pyoo waa katao lapae silyamo.yuu dakenya kalyamino dupapi nambanya wane Makepi dupame nyakama kandao auu pyoo kalyepape lelyamino. ¹⁴ Dopana,* 5:14 Lo 16:16; 1 Ko 16:20; 2 Ko 13:12 nyakamame nyakama tangelapo mende auu pyoo katena laa laa pyoo Gotenya endakali dupame pipengeli pyoo mende kopyoo nunu pii pii pyoo kalyepape. Nyakama pitaka Kataisapa pakatae katao mona lyuu lao kalyepape.