JONEME
PEPA WAMBAO PIAMO DOKO
Pii atupa wambao kandapenge
Joneme pepa dake tenge lapomanya pia-pyaa. Mende doko Gotepi baanya Ikiningi Jisasa Kataisapi-pipa Kitisene dupa pakatae katapimi laka lao masetala baame mona minao sakatasoo pia-pyaa. Lapo doko takange Gotepa Jisasa Kataisapanya endakali kalyamino dupa sambo pii dupame wakale pisingina kandao wandyuu kalyepape lao lea-pyaa. Doko sambo pii mendapu payamosa Joneme dupa angoo pepa dake pia-pyaa.
Joneme pepa wambao piamo dokonya pii lyaa dupa:
1:1-4 Pii wambao pepanya piamo dupa
1:5–2:29 Tii pipaepa iminjingipa
3:1-24 Gotenya wane dupapi Satanenya wane dupapi
4:1-6 Kiningi piipa sambo piipa
4:7-21 Auu kaenge mana doko
5:1-21 Masoo minao katatamo dokome ita minata
1Lete katasingi Pii doko
1 Tee* 1:1 Lu 24:39; Jo 1:1-5,11,14; 20:20,25,27; Ap 22:15; 1 Jo 2:13-14 piamo dokopa lete katasingi Pii doko katea-pyaa. Naimame baanya pii leamo doko sowapi, baa lengeme kandawapi, kandatala kingimi watandawapi piamo. 2 Lete* 1:2 Jo 1:14; 5:20; 15:27 katenge doko paneamopa kandeama. Indupa naimame lete katawaka katenge dokonya lao kiningi nyakama langilyamano. Lete katenge doko Takangepa awapa katao naima-kisa panea. 3 Naima* 1:3 Ap 2:42; 4:20; 26:16; 1 Ko 1:9; 1 Jo 2:3,19,24,29 pyasetae mona setao katamana lao naimame siamapi kandemapi dupa lao panao nyakama apata langilyamano. Naima pyasetala Takangepa baanya Ikiningi Jisasa Kataisa-pipa pakatae kalyamano. 4 Naima* 1:4 Jo 5:11; 16:22-24; 2 Jo 12 mona etete yaepokondape piamana lao pii datupa pepa pilyamano.
Gote baa tii pipae
5 Gote* 1:5 Dan 2:22; Jo 8:12; 1 Ti 6:16; 1 Jo 3:11 baa tii pipae baa-kisa iminjetae etete kukipi mende napalengena lao baame leamopa siama dupa nyakama langilyamano. 6 Naima* 1:6 Jo 3:21; 1 Jo 2:4 Gote-pipa pyasetae mona setao kalyamano latala dee iminjetae ongonya payatamano kandao doko, naimame sambo pii latala kiningi pii lapae silyamoli pyoo napitamanosa pita. 7 Baa* 1:7 Ais 2:5; Mt 26:28; Lo 3:24-25; Ip 9:14; Pa 1:5; 7:14 tii pipae dokonya kalyamoli pyoo naima tii pipae ongonya payatamano kandao doko, naima baa-pipa pyasetae katatama. Baanya Ikiningi Jisasanya taiyoko dokome naimanya koo pingi dupa pitaka kunanya nepekenge. 8 Naima* 1:8 Wee 32:5; Pot 20:9; Ekl 7:20 koo mende napingina latamano kandao doko, naima tangeme tange sambo lamaitamanopa Gotenya kiningi pii doko naima-kisa napalita. 9 Naimame* 1:9 Wee 32:1; Mt 6:12 naimanya koo pingi dupa lao panatamano kandao doko, opale mende pitoo latala kini pingi Gote epe tolatae dokome naimanya koo pingi yanu dupa kayapala pitaka kunanya nepakata. 10 Naimame* 1:10 1 Jo 5:10 koo mende napiamana latamano kandao doko, naimame Gote sambo lenge injisetamanosaka pita. Dokopa baanya pii doko naima-kisa napalita.
2Kataisame naima nisingi
1 Nambanya* 2:1 Jo 14:16; Ap 3:14; Lo 8:34; Ip 7:25; 8:6; 9:24; 1 Jo 3:6 wane paluma, nyakamame koo napyepape lao nambame pii dake pepa pyao peekelyo. Endakali mendeme koo pilyamo kandao dokopa, naimanya akali epe tolatae Jisasa Kataisame baa nisoo baanya Takange doko pii lamaiyoo katenge. 2 Naimanya* 2:2 Jo 1:29; 3:14-16; 4:42; 11:52; Lo 3:25; 1 Jo 4:10,14 koo pingi dupanya yanu pyao baame baa tange kundi joo maiya. Naimanya koo pingi dupanya iki daa, yuunya endakali pitakanya koo dupanya apata kundi maiyaka.
3 Naimame* 2:3 Jo 10:14; 15:10 baanya mana setapae dupa watao minatamano kandao doko, baa lao masetae kalyamano lao masetama. 4 Endakali* 2:4 1 Jo 1:6,8; 4:20 mendeme Gote lao masoo kalyona latala baanya mana setapae dupa watao minala naelyamo doko-kisa Gotenya kiningi pii doko nasilyamopa baame sambo lao katenge. 5 Endakali* 2:5 Jo 14:21,23; 1 Jo 3:17; 4:12; 5:3 mendeme Gotenya pii minilyamo doko-kisa kiningi Gotenya auu kaenge doko etete sulu soo silyamo. Dopa pipumu dokome naima baa-pipa pakatae kalyamano lao masilyamano. 6 Namba* 2:6 Jo 13:15; Ep 5:2; 2 Te 3:7; 1 Pi 2:21 Gotepa pakatae kalyona lelyamo endakali dokome Jisasa payamoli pyoaka payapenge.
Mana setapae enenge pepa piamo doko
7 Mona* 2:7 Dit 6:5; Mt 22:37-40; Jo 13:34; 1 Jo 2:24; 3:11; 2 Jo 5-6 setenge paluma, mana setapae nambame nyakamanya pepa pyao peekelyo doko enenge mende, daa. Mana setapae wambatae kandasoo nyakama-kisa siamo dokoaka pyekelyo. Mana setapae wambatae doko pii wamba nyakamame sepeamino dokoaka. 8 Dopaka* 2:8 Jo 1:5,9; 8:12; Lo 13:12 doko, iminjetae doko pupumopa tii pipae angi doko tii pyoo tee pyatelyamo dokonya nambame mana setapae doko nyakama kandao enenge joo langilyo. Kataisapi nyakamapinya paenge dokome mana setapae enenge lelyo doko kiningi panenge. 9 Endakali* 2:9 1 Jo 2:11; 3:10,15; 4:20 mendeme “Namba tii pipae dokonya kalyona” latala endakali yango imbu kayamailyamo doko iminjetae dokonya mee kalyamo. 10 Endakali* 2:10 Wee 119:165; Pot 4:19; Ekl 2:13-14; Jo 11:9; 12:35-36; Lo 14:13 mendeme endakali yango auu kaelyamo doko tii pipae ongonya katawaka kalyamo. Baa lombapae sepenge tenge mende napalelyamo. 11 Endakali* 2:11 Mt 15:14; Jo 11:10; 1 Jo 2:9 mendeme endakali yango imbu kayamailyamo doko baa iminjetaenya katao payapala lenge iminjipumu dokome anja pelyope lao masala naelyamo.
12 Wane* 2:12 1 Ko 6:11; 1 Jo 1:7; 2:2 paluma, Goteme Jisasa lao masetala nyakamanya koo dupa kunanya nepatelyamo tenge ongonya nambame pii datupa nyakamanya pepa pyekelyo. 13 Akali* 2:13 Jo 1:1-2; Ep 6:16; 1 Jo 1:1 lyanga paluma, baa tee piamo ongopa katea kalyamo doko lao nyakamame masetae kalyamino tenge ongonya nambame nyakamanya pepa pyekelyo. Akali angi paluma, nyakamame akali koo doko ita minateamino tenge ongonya nambame nyakamanya pepa pyekelyo. 14 Wane* 2:14 Jo 3:11; 5:38 paluma, nyakamame Takange doko lao masetae kalyamino tenge ongonya nambame nyakamanya pepa pyekelyo. Akali lyanga paluma, baa tee piamo ongopa katea kalyamo doko lao nyakamame masetae kalyamino tenge dokonya nambame nyakamanya pepa pyekelyo. Akali angi paluma, nyakama pupu lao kalyamino dokonyapi, Gotenya pii doko nyakama-kisa salakao silyamo dokonyapi, nyakamame akali koo doko ita minateamino dokonyapi tenge dutupanya nambame nyakamanya pepa pyekelyo.
15 Nyakamame* 2:15 Jo 1:10; 5:42; Lo 8:7; Je 4:4; 2 Pi 1:4 isa yuu koo dake tamopi isa yuu koo dakenya singi dupa tamopi dupa auu nakayalapape. Isa yuu dake auu kaelyamo endakali dokome Takange doko auu nakaenge. 16 Yuunya* 2:16 Pot 27:20; Mt 6:24; Lo 13:14; Ep 2:3; Je 4:16; 1 Pi 2:11 endakali dupanya mana dupa pitaka naimame masilyamano. Yongeme nyoani kayapala mona sakatengepi, lengeme kandatala nyipu laka lao masingipi alyasale kalyo lao masoo luingipi mana dopale dupa Takange-kisa katao naepenge. Daa, mana dupa yuu dakenya pyakalyingi. 17 Isa* 2:17 Pot 10:25; Ais 40:8; Mt 7:21; 1 Ko 7:31 yuu dakepa dokonya nyipu laka lao masingi dokopa dolapo lapota aluaka pingi. Dopaka doko, Goteme masilyamoli pingi endakali doko etete katawaka katata.
Kataisanya yandapipi doko ipatelyamo
18 Wane* 2:18 Mt 24:5,24; 2 Te 2:3-4; 1 Ti 4:1; 1 Pi 4:7; 1 Jo 4:1,3 paluma, yuu gii etete etao doko indupa lamo. Nyakamame Kataisanya yandapipi doko ipatana lapae wamba sepeami. Indupa Kataisanya yandapipi longo paka ipatelyamino dokonya naimame yuu gii etete etao doko indupa lamona lao masilyamano. 19 Dutupa* 2:19 Ap 20:30; 1 Ko 11:19; 2 Ko 6:14-18; 1 Jo 1:3 naima-pipa awapa katao peaminoaka doko, naimanya joo nakateami. Naimanya joo kateamili kandao doko, naima-pipa awapa mee kateamali. Dopaka doko, naimanya joo nakateamino doko panasalanya naima yakinatala pateami.
20 Akali* 2:20 Jo 14:16; 1 Ko 2:15; 1 Jo 2:27 etete epe dokome Oli Sipitisa doko nyakama mee ditapumopa nyakama pitakame masoo kalyamino. 21 Nambame* 2:21 2 Pi 1:12; 1 Jo 3:19; 2 Jo 2 nyakama kiningi pii doko masala naelyaminona lao pepa pyao peakala naelyo. Daa, nambame nyakama kiningi pii masoo kalyamino dokopa, pii dokome sambo pii mende manja naenge dokopa tenge dolaponya pepa pyao peekelyo.
22 Sambo* 2:22 2 Te 2:4; 1 Jo 4:3; 2 Jo 7 lenge akali doko api kalyape? Jisasa baa Kataisa daana lao kalyamo akali dokome sambo lao kalyamo. Takange dokopa Ikiningi dokopa maita mailyamo endakali doko baa Kataisanya yandapipi jilyamo. 23 Ikiningi* 2:23 Jo 5:23; 14:7-9; 15:23; 1 Jo 4:15; 5:1; 2 Jo 9 doko maita maingi endakali doko pitaka Takange doko-pipa wakale katenge. Ikiningi doko lao panasilyamo endakali doko Takange doko-pipa pakatae katenge.
Oli Sipitisa dokome kiningi pii doko mana langingi
24 Nyakamame pii kandasoo siamino doko minawaka kalyepape. Pii doko minawaka katatamino kandao doko, Takange dokopa Ikiningi dokopa dolapo-pipa nyakama pakatae katatami. 25 Kataisame* 2:25 Jo 3:15; 5:24; 6:40,68; 17:2 naima mende ditona leamo doko lete etete katenge doko ditopa lao lea. 26 Nyakama minakasoo makande pilyamino dokonya nambame pii dupa pepa pyekelyo. 27 Jisasame* 2:27 Jet 31:34; Jo 14:26; 16:13; 1 Jo 2:20 Oli Sipitisa nyakama diamo doko nyakama-pipa pakatae katenge. Dopana nyakama mendeme mana langipenge joo nakalyamino. Jisasame Oli Sipitisa diamo dokome dupa pitakanya nyakama mana langingi dupa sambo daa, kiningi. Sipitisa dokome nyakama mana langiamoli pyoo nyakama Jisasapa pakatae kalyepape. 28 Wane* 2:28 Mt 24:3; 2 Te 1:7-9; 1 Jo 3:2; 4:17 paluma, indupa nyakama baapa pakatae katapenge. Dopa pitaminopa tenda baa panao dee ipatamo gii dokopa naima baanya enombasa pakapi elyapi mende nakayatama. 29 Nyakamame* 2:29 1 Jo 3:7,10; 4:7 Jisasa baa etete tolataena lao masetamino kandao doko, mana tolao miningi endakali doko pitaka Gotenya mandipaena lao masalapapeaka.
3Naima Gotenya mandipae kalyamano
1 Anematupa,* 3:1 Jo 1:12-13; 15:21; 16:3; 17:25; Lo 8:14-17,37-39; Ep 1:5; 1 Jo 3:10 Takangeme naima etete auu kayatelyamo. Dopa petala Goteme naima wanena lapumopa naima baanya wane kalyamano. Yuunya endakali dupame baa masala nayapimino tenge dokome naima apata masala naelyaminoaka. 2 Mona* 3:2 Lo 8:29; 2 Ko 3:18; Pl 3:21; Kl 3:4 setenge paluma, naima indupa Gotenya wane joo kalyamano. Dee tenda naima aipa pyoo katatamape doko etete masalakao masetala naelyamano. Dopaka doko, Kataisa panatamo gii dokopa naima baa katatamoli pyoo katatamana lao masilyamano. Kini, baa kalyamo dokoaka naimame kandatama. 3 Dopa* 3:3 Mt 5:48; 1 Jo 2:6 lao masoo malisoo katenge endakali doko pitakame nyakamanya koo dupa wasinya nepatala, baa etete epe joo kalyamoli pyoo katenge.
4 Koo pingi endakali doko pitakame mana setapae dupa yalenge. Koo pingi doko mana setapae yalenge mendai dokoaka. 5 Jisasame* 3:5 Ais 53:9; Jo 1:29; 8:46; 2 Ko 5:21; Ip 4:15; 7:26; 9:14; 1 Pi 1:19; 2:22,24; 3:18; 1 Jo 2:2; 4:10 koo dupa soo nepalanya panao epeamo doko nyakamame masilyamino. Baa-kisa koo mende nasilyamo. 6 Baa-pipa* 3:6 Mt 7:18; Lo 6:1-2,14; 1 Jo 2:14; 3:9 pakatae katenge endakali doko pitakame koo napingi. Koo pingi endakali doko pitakame baa lengeme nakandao moname masala nayawaka piami. 7 Wane* 3:7 1 Jo 2:29 paluma, aopyoo latala endakali mendeme nyakama minakaseta. Mana tolatae minilyamo endakali doko baa tolatae Jisasa yale jilyamo. 8 Tee* 3:8 Jen 3:15; Jo 8:44; 12:31-32; 1 Jo 3:5,12 pyao Sataneme koo piamo dokonya koo pilyamo endakali doko baa Satanenya. Gotenya Ikiningi panao epeamo dokome Satanenya kalai pingi dupa koyasalanya epea. 9 Gotenya* 3:9 1 Jo 2:14; 3:6; 5:18 mandipae endakali doko pitakame koo napingi. Doko, Gotenya lete katenge doko baa-kisa etete pokatae katenge. Baa Goteme mandipae dokonyana baame koo mende kapa pao napingi. 10 Gotenya* 3:10 Jo 1:12-13; 1 Jo 3:1,8,23; 4:6 wanepi Satanenya wanepi dupa dapa pyoo panenge. Mana epe tolatae naminingi endakali doko pitakapi endakali yango auu nakaenge endakali doko pitakapi dupa Gotenya wane daa.
Auu kayaloo pyoo kalyepape
11 Naima* 3:11 Jo 13:34; 15:12,17; 1 Jo 1:5; 2:7; 2 Jo 5 auu kayaloo pyoo kalyepape lapae pii tee pyao nyakamame siamino doko soo kalyamino. 12 Naima* 3:12 Jen 4:8; Jo 8:44; 1 Jo 3:8; Ju 11 Keene yale joo nakatamana. Baa akali koo dokonya joo katapala baame baanya kaiminingi doko pyao kumasia-pyaa. Aipuma pyao kumasia-pyaape? Baame mana koo miniamopa, baanya kaiminingi dokome mana tolatae miniamo dokonya pyao kumasia-pyaa.
13 Kaimia* 3:13 Mt 5:11-12; 24:9; Jo 15:18-21; 17:14 paluma, isa yuu koo dakenya endakali dupame nyakama imbu kayami kandeno doko, walu nalalapape. 14 Naimame* 3:14 Jo 5:24; 11:25-26 endakali yango dupa auu kaelyamano tenge dokome naima kumingi doko yakinatala lete katenge dokonya pao katapelyamano lao masilyamano. Endakali yango auu nakaenge endakali doko kumingi dokonya mee kalyamo. 15 Endakali* 3:15 Mt 5:21-22; Pa 21:8 mendeme endakali yango imbu kayamailyamo doko pyao kumasilyamosaka pingi. Endakali yango pyao kumasingi endakali doko pitaka kapa pao lete etete nakatatami doko nyakamame masilyamino. 16 Jisasame* 3:16 Mt 20:28; Jo 13:1; 15:12-13; Ga 1:4; 2:20; Ep 5:2; Pl 2:17; 1 Te 2:8; 1 Ti 2:6; Ta 2:14; 1 Jo 2:6 naima lao masetala baa kumia. Dopa piamo dokonya endakali auu kaenge mana doko naimame kandateama. Dopana, endakali yango dupa lao masetala naima kumapenge. 17 Endakali* 3:17 Dit 15:7-8; Jo 5:42; Je 2:16; 1 Jo 2:5; 4:12 mende-kisa yuunya oapi dupa setamopa, baame endakali yango mende opale daa jetamopa kandatala nisala naenya mona pyakilyetamo dokome aipa petala Gote auu kayao katatape? 18 Wane* 3:18 Mt 7:21; Je 1:22; 2:15-17 paluma, naimame piipi kambupimi iki endakali yango dupa auu kayala naenya pipenge dupa pyoo pituu angi auu kayapenge.
19 Dopa* 3:19-20 Jo 18:37; 1 Jo 2:21; 2 Jo 4* 3:19-20 1 Jo 4:4 pingi mana dokome naimame kiningi pii doko watao minilyamano lao masemana. Naimanya mona dokome naima-kisa tenge setatamo dokopa, naima Gotenya enombasa mona lyuu lao katamana. Doko, Gote baa Kamongo dokomena naimanya mona ita minao baame dupa pitaka masingi. 21 Mona* 3:21 Ip 4:16 setenge paluma, naimanya mona dokome naima kandao nyakama koo lamona laa naelyamo kandao doko, naimame Gotenya enomba dokonya paka nakayao katenge. 22 Naimame* 3:22 Mt 7:7-11; 21:22; Mk 11:24; Jo 8:28; 14:13-14; 15:7; 16:23-24; 1 Jo 5:14-15 baa-kisa tee latamano dupa pitaka nyetama. Naimame baanya mana setapae dupa minao baame auu kaenge dupa pitaka watao pitamano tenge ongonya nyetama. 23 Baanya* 3:23 Jo 6:29; 13:34; 15:12,17; 1 Jo 5:3 mana setapae doko dake: naimame baanya Ikiningi Jisasa Kataisa lao masoo minatala baame pyepape leamoli pyoo auu kayaloo pyoo katapenge. 24 Gotenya* 3:24 Jo 14:21-23; Lo 8:9; 1 Jo 4:13 mana setapae miningi endakali doko Gote-pipa pakatae kalyamopa, Gote baa-pipa pakatae katenge. Sipitisa Goteme naima diamo dokome baa naima-pipa pakatae kalyamona lao masilyamano.
4Sipitisa koopa epepanya leamo doko
1 Mona* 4:1 Mt 7:15; 24:24; 1 Ko 12:10; 1 Te 5:21; 1 Ti 4:1-14; 1 Jo 2:18; 2 Jo 7; Ju 4 setenge paluma, sambo potopesa longo paka dupa isa yuu soo pelyamo dupanya pao katapelyamino dokonya nyakamame sipitisa dupa pitaka tungi pyala nayalapape. Sipitisa dupa Gotenyape lao makande pyoo kanjepape. 2 Jisasa* 4:2 1 Ko 12:3 Kataisa baa yonge katao ipateana lao lao panenge sipitisa doko pitaka Gotenya. Pii lao panelyamino dokome nyakamame Gotenya Sipitisa doko, doko lamo lao kandelyamino. 3 Jisasa* 4:3 2 Te 2:4; 1 Jo 2:18; 2 Jo 7 lao panala naenge sipitisa ongo pitaka Gotenya daa. Sipitisa doko Kataisanya yandapipi doko. Wamba nyakamame baa ipatana lapae siamino doko indupa yuunya ipao katapelyamo. 4 Wane* 4:4 Mt 12:29; 1 Jo 3:20; 5:4-5 paluma, nyakama Gotenya kalyamino. Nyakama-pipa pakatae kalyamino Gote doko baa andake. Isa yuu koo dakenya mona setenge doko baa angi mende daa. Ongonya nyakamame sambo potopesa dupa ita minatelyamino. 5 Dupa* 4:5 Jo 15:19 isa yuu dakenya endakali dokonyana dupame isa yuu dakenyaka lelyaminopa yuunya endakali dupame singima. 6 Naima* 4:6 Jo 8:47; 14:17; 1 Jo 3:10 Gotenya kalyamano. Gote lao masingi endakali dokome naimanya pii singi. Gotenya endakali joo nakatenge dokome naimanya pii nasingi. Naimanya pii singipi nasingipi lao naimame kandatala Sipitisa dakeme pii kiningi lenge lamo, sipitisa dokome sambo lenge lamo lao masingi.
Auu kaenge tenge doko Gote
7 Mona* 4:7 1 Te 4:9; 1 Jo 2:29 setenge paluma, endakali dupa auu kaenge mana Goteme sakatasiamo tenge dokonya naima auu kayaloo pyoo katamana. Endakali auu kayamaingi doko pitakame Gotenya mandipae joo katapala Gote lao masingima. 8 Goteme* 4:8 1 Jo 4:16 endakali dupa auu kaenge. Endakali auu nakaenge dokome Gote masala naenge. 9 Goteme* 4:9 Jen 22:12; Mt 21:27; Jo 3:16 baanya Ikiningi mendai iki doko-kisa naima lete katasalanya isa yuunya epena leamo dokome baame naima auu kaenge doko panea. 10 Naimame* 4:10 Dit 7:8; Lo 3:25; 5:8,10; 8:31; 1 Jo 2:2 Gote auu kayama dokome auu kaenge mana doko panea, daa. Goteme naima auu kayapala naimanya koo dupa kunanya nepakalanya baanya Ikiningi doko kundi joo epena leamo dokome auu kaenge mana doko panea. 11 Mona* 4:11 Mt 18:33 setenge paluma, Goteme dopa pyoo naima auu kayamo dokonya naimalapo auu kayaloo pyoo katapenge. 12 Wambapi* 4:12 Jo 1:18; 6:46; 1 Jo 2:5-6; 4:17 indupapi endakali mendeme Gote nakandenge. Naima auu kayaloo pyoo kalyamano kandao doko, Gote naima-pipa pakatae kalyamopa baanya auu kaenge doko naima-kisa sulu soo singi.
13 Baame* 4:13 Lo 5:5; 8:9; 2 Ko 1:22; 1 Jo 3:24 baanya Sipitisa naima diamo ongonya naima baa-pipa pakatae katapumanopa baa naima-pipa pakatae kalyamanona lao masilyamano. 14 Takange* 4:14 Jo 3:17; 4:42 dokome Ikiningi doko isa yuunya endakali dupa pyoo nyala epena leamo doko naimame kandatala lao panelyamano. 15 Jisasa* 4:15 1 Jo 5:5 baa Gotenya Ikiningina lao lao panenge endakali doko Gote-pipa pakatae kalyamopa Gote baa-pipa pakatae katenge. 16 Goteme* 4:16 1 Jo 4:7-8 naima auu kaelyamo doko naimame kandatala masoo minao kalyamano. Goteme endakali dupa auu kaenge. Auu kayamaingi endakali doko Gote-pipa pakatae kalyamopa Gote baa endakali doko-pipa pakatae katenge. 17 Goteme* 4:17 Lo 8:15; Je 2:13; 1 Jo 2:5-6,28; 3:2-3; 4:12 endakali yapatamo gii dokopa naima paka nakayao katatama lao Jisasa kalyamoli pyoo naima isa yuu dakenya kalyamano dokonya-kaita baanya auu kaenge doko naima-kisa sulu soo silyamo. 18 Goteme* 4:18 2 Ti 1:7 naima auu kayapumopa paka nakaelyamano. Kini, Goteme naima auu kayalakao kaelyamopa naimanya paka kaenge doko watao pingi. Doko, paka kaenge doko koo pingi dokonya yanu. Paka kaenge endakali doko-kisa Gotenya auu kaenge doko sulu soo nasingi. 19 Goteme* 4:19 1 Jo 4:9-10 naima wambao auu kayamo tenge ongonya naimame endakali auu kayao kalyamanoaka. 20 Endakali* 4:20 1 Pi 1:8; 1 Jo 2:4 mendeme Gote auu kaelyona latala endakali yango doko imbu kayamaitamo kandao doko, baa sambo lenge akali joo katata. Endakali yango lengeme kandenge doko auu nakayatamo kandao doko, baame Gote lengeme nakandenge doko kapa pao auu nakayata. 21 Naimame* 4:21 Mt 5:44-45; 22:36-40; Mk 12:29-31; Jo 14:15,21; 15:17 baa-kisa mana nyiamano doko dapa: Gote auu kaenge endakali dokome endakali yango doko auu kayapengeaka.
5Masoo miningi endakali dokome isa yuu dake ita miningi
1 Jisasa* 5:1 Jo 8:42; 1 Pi 1:22-23; 1 Jo 4:15 baa Kataisa dokona lao masoo minao katenge endakali doko pitaka Gotenya mandipae lamo. Endakali mendeme takange mende auu kayatamo dokome baanya ikiningi doko auu kayataka. 2 Naimame* 5:2 Lo 13:9; Ga 5:14 Gote auu kayapala baanya mana setapae dupa watao minao kalyamano dokome baanya wane dupa auu kaelyamanona lao masilyamano. 3 Doko,* 5:3 Dit 30:11; Mt 11:30; Jo 14:15 naimame Gotenya mana setapae dupa watao minilyamano dokome Gote auu kaenge doko panasilyamano. Baanya mana setapae dupa kenda pipae daa. 4 Gotenya* 5:4 Jo 16:33; 1 Jo 2:14 mandipae doko pitakame isa yuu koo dake ita miningima. Naimanya masoo miningi dokomeaka isa yuu dake ita miningi. 5 Apimi* 5:5 Lo 8:37; 1 Jo 4:4 isa yuu dake ita miningipi? Jisasa baa Gotenya Ikiningina lao masoo minao paenge endakali dokome ita miningi.
Goteme baanya Ikininginya lao pii lao paneamo doko
6 Jisasa* 5:6 Jo 1:29-34; 4:1-2; 14:26; 19:34; 1 Jo 1:7; 2:20,27 Kataisa baa endaki dokopa taiyoko dokopa dolaponya-kaita epea. Endakinya ialyoo daa, endakipa taiyokopa lapotanya-kaita epea. Sipitisa dokome kiningi pii lenge dokonya baame pii dutupa lao panelyamo. 7 Tepomame* 5:7 Jo 15:26 pii doko lao panelyamino. 8 Sipitisapi, endakipi, taiyokopi tepoma dutupame pii mendai dokoaka lao panelyamino. 9 Endakali* 5:9 Jo 5:32-34,37; 8:18 dupame pii lao panelyamino doko naimame singiaka doko, Goteme pii lao paneamo doko alyasale joo silyamo. Goteme pii lao paneamo doko baanya Ikiningi dokonya lao lao panatea. 10 Gotenya* 5:10 Jo 3:33; Lo 8:16; Ga 4:6 Ikiningi doko lao masoo miningi endakali dokonya monanya pii Goteme lao paneamo ongo palelyamo. Gote lao masoo minala naelyamo endakali dokome Gote baa sambo lenge jinya nepatapumosaka pilyamo. Doko, Goteme baanya Ikiningi dokonya lao pii lao paneamo doko endakali dokome masoo minala naenge. 11 Goteme* 5:11 Jo 1:4; 3:11; 5:21,26; 1 Jo 1:7; 5:20 pii lao paneamo doko dapa: baame lete etete katenge naima diamo doko baanya Ikiningi doko-kisa singi. 12 Gotenya* 5:12 Jo 3:36 Ikiningi doko-pipa pakatae katenge endakali doko lete katawaka katenge. Gotenya Ikiningi doko-pipa pakatae nakatenge endakali doko lete nakatenge.
Naima lete etete kalyamanona lao masemana
13 Gotenya* 5:13 Jo 20:31 Ikiningi doko lao masoo miningi endakali nyakama lete katawaka kalyamino doko masalapale lao nambame pepa dake pyao peekelyo. 14 Naimame* 5:14 Mt 7:7; Jo 14:13-14; 15:7,16; 16:23; 1 Jo 3:21-22 Gote tangenya masilyamoli pyoo mendita mende baa-kisa tee lao loma silyamano kandao doko, baame singi. Dopa pilyamanopa naima baanya enombasa paka nakayao katenge. 15 Naimame tee lelyamano dupa pitaka baame silyamona lao masetamano kandao doko, baa-kisa tee latelyamano dupa nyepelyamanona lao masetama.
16 Mendeme* 5:16 Mt 12:31; Jo 15:22-24; Ip 6:4-6 kandataminopa endakali yango mendeme koo mende pitamopa koo dokome baa koyasala nayapenge jia kandeno doko, embame Gote lao loma setenopa Goteme lete katenge doko baa maita. Koyasala nayapenge koo dopale pitamino endakali dupa baame lete katenge doko maita. Koo tata mende dokome endakali dupa koyasingi. Nyakamame koo dopale dokonya loma salapape lao nalelyo. 17 Koo tata dupa pitaka koaka doko, koo mendapuame endakali etete koyasala naenge. 18 Gotenya* 5:18 Jo 1:13; 17:15; 1 Jo 3:6,9 mandipae doko pitakame koo pyoo nakatengena lao naimame masilyamano. Gotenya Ikiningi dokome dupa setao kalyamopa akali koo dokome dupa koyasala naepenge. 19 Naima* 5:19 1 Jo 4:6 Gotenya kalyamanona akali koo dokome isa yuu dakenya endakali dupa pitaka isoo kalyamona lao masilyamano. 20 Naimame* 5:20 Jet 24:7; Jo 17:3; Ep 1:17; 1 Jo 1:2; 5:12 Gote angi doko masalapale lao Gotenya Ikiningi doko ipupala naima masingi diamo doko masilyamano. Naima Gote angi dokopa baanya Ikiningi Jisasa Kataisa dokopa dolapo-pipa pakatae kalyamano dokoaka Gote angi lete etete katasingi doko. 21 Wane* 5:21 1 Ko 10:14 paluma, nyakamame sambo gote dupa minatamina nyakama tange kandao isoo kalyepape.