1 KOTINA

POLOME

KOTINA

TANGE DUPANYA PEPA

WAMBAO PYAO PYASAKAMAIYAMO DOKO

Pii atupa wambao kandapenge

Polome Kotina yuu dokonya pupala Wai Pii Epe doko lamaiyamopa sosa mende katapala sosa doko-kisa kenda pipae siamosa Polo pisiaminopa, Polome dupa nisoo pepa pia-pyaa. Polome masetala pii datupa lea-pyaa: (1) Kitisene dupa wakale pyaa nayalapape. (2) Kitisene dupame elya pipae mana dupa minala nayalapape. (3) Enda akalipa tole pyao petenge mana dupa lea-pyaa. (4) Endakalinya masingi dokome endakali tange yapenge dokonya lea-pyaa. (5) Mana tolatae minao losuu lengepi mana tolatae minao sosanya kalai pingipi dupanya baame lea-pyaa. (6) Oli Sipitisame opale tata tata dupa endakali maingi. (7) Jisasa kumapala dee saketeana lao lamaiya-pyaa. Sapeta 13 dokonya baame lao pituu, endakali auu kaenge mana doko epe mupa mende Goteme naima diana lea-pyaa.

Polome Kotina tange dupanya pepa wambao pyao Kotina pyasakamaiyamo dokonya pii lyaa dupa:

1:1–9 Pii wambao pepanya piamo dupa

1:10–4:21 Kitisene dupa wakale napipenge

5:1–7:40 Mana koo dupa kayapala mana epe dupa minao endakalipa tole pitipenge

8:1–11:1 Kitisenepi netesa endakalipi

11:2–14:40 Kitisene dupame auu pyoo kapatala losuu lapenge

15:1–58 Masoo miningi endakali dupa Jisasa kumapala malunya sakateamoli pitami

16:1–4 Jutia tange sosa dupa nisalanya muni elyambu piamino doko

16:5–24 Polonya masepae mendapuame lao eteamo doko

¹ Goteme* 1:1-2 Ap 18:7; Lo 1:1* 1:1-2 Ap 5:11; 9:13-14; 18:1; 20:28; 1 Ko 6:11; 10:32 masiamoli pyoo namba Polo Kataisa Jisasanya aposele kalyale lao ipu leamo dokopa kaiminingi Sosatenisapa nalimbame pepa dake nyakama Gotenya sosa Kotina yuu dokonya kalyamino dupanya pyao peekelyambano. Naimanya Kamongo Jisasa Kataisa lao loma singi endakali yuu pitakanya kalyamino dupa pitaka-pipa, nyakama baanya endakali joo kalyepale lao Goteme ipupa latala Kataisa Jisasa-pipa nyoo pakatala baame nyakama etete epe injisetea. Jisasa Kataisa baa dupapi naimapi pitakanya Kamongo.

³ Naimanya* 1:3 Lo 1:7 Takange Gotepa Kamongo Jisasa Kataisapame nyakama kandao mona epe mende palyetala nyakamanya mona lyuu lasekena.

Goteme Kataisa Jisasa-kisa epe dupa dingina leamo doko

⁴ Goteme* 1:4 Lo 1:8 Kataisa Jisasa-kisa nyakama kandao mona epe palyiamo dokonya nambame nyakama lao masetala koteaka lao Gote lao yaka pilino lenge. ⁵ Doko,* 1:5 2 Ko 8:7-9 Goteme Kataisa-kisa epe dupa pitakame nyakama kamongasia. Pii lamaingipi masingipi dupa pitaka nyakama-kisa silyamo. ⁶ Kataisanya lao pii naimame nyakama langiamano doko nyakamanya mona dokonya kyoto joo sepelyamo. ⁷ Dopana,* 1:7 Lu 17:30; 2 Te 1:7; Ta 2:13 indupa nyakamame naimanya Kamongo Jisasa Kataisa dee panao ipatamo gii doko putiti kayao malisoo katao, Goteme epe dingi dupanya mendaipi mende daa joo nakalyamino. ⁸ Dee* 1:8 1 Ko 3:13; 5:5; 2 Ko 1:14; Pl 1:6; 2:16; Kl 1:22 baame nyakama kyoto joo katasoaka pao yuu etatamo gii dokonya tuu lata. Dopa pitamopa naimanya Kamongo Jisasa Kataisame yapatamo gii dokopa nyakama-kisa koo tengepi mende nasingi katatami. ⁹ Gote* 1:9 1 Ko 10:13; 2 Ko 1:18; Pl 3:10-11; 1 Te 5:24; 1 Jo 1:3 baanya Ikiningi Jisasa Kataisa naimanya Kamongo doko-pipa nyakama pakalapale lao ipupa leamo Gote doko tungi pyapenge.

Wakale wakale masa masa pyoo nakalyepapena leamo doko

¹⁰ Kaimia* 1:10 Lo 15:5; Pl 2:2 paluma, nambame naimanya Kamongo Jisasa Kataisanya kingi dokonya katao, nyakama pitakame masingi mendai palyoo pii mendai iki lao kalyepape lao kyoto joo langilyo. Nyakamame wakale wakale masa masa pyoo kalya naenya, mona mendai palyoo mana mendai minao pyasalakao pyasetae kalyepape. ¹¹ Doko, nambanya kaimia paluma, enda Kolowinya endakali mendapuame nyakamalapo laiya lao kalyaminona lao namba langiami. ¹² Nambame* 1:12 Jo 1:42; Ap 18:24-28; 1 Ko 3:4,22-23; 9:5; 15:5 lelyo doko dapa lao lelyo: nyakama pitakanya mendeme, “Namba Polonya kalyona,” lapumopa; mendeme, “Namba Apolosanya kalyona,” lapumopa; mendeme, “Namba Sipasanya+ 1:12 sipasa Kenge Sipasa doko Iputu pii lao lenge. Kenge Pita doko Gitiki pii lao lenge. Kenge dolaponya tenge doko kana.kalyona,” lapumopa; mendeme, “Namba Kataisanya kalyona,” lelyamino. ¹³ Dopa* 1:13 Mt 28:19; Ap 2:38; Ep 4:5 lao kalyamino doko, Kataisa baa konjoo wakale wakale piape? Namba Polome nyakama alo pyoo ita pokonya pyao yukuotae kateope? Pande, nyakama namba Polonya kenge doko lao kaimbu nyiamipi?

¹⁴ Nambame* 1:14 Ap 18:8; 19:29; Lo 16:23 nyakamanya akali Kitisapasapa Gayasapanya iki kaimbu pyatakamaitala, nyakamanya mendenya kaimbu pyakala nayo dokonya Gote lao yaka pilino lelyo. ¹⁵ Dopana, endakali mendaipi mendeme kapa pao nyakama nambanya kenge doko lao kaimbu nyiamina nalapenge. ¹⁶ Ee* 1:16 1 Ko 16:15 kini, nambame akali Setepanasapi baa palupi dupanya kaimbu pyakamaiyoaka. Dee mendenya apata kaimbu pyakamaitopi doko masala naelyo. ¹⁷ Kataisame* 1:17 Mt 28:19; Jo 4:2; 1 Ko 2:1,4,13; 2:1; 3:18; 2 Ko 1:12 kaimbu pyakamaiyale lao namba puu nalea. Wai Pii Epe doko lamaiyale lao puu lea. Dee Kataisa ita pokonya kumiamo pii doko aopyoo latala mee jetame lao, pii waa katao lamaiyale lawapi puu nalea.

Kataisa baa Gotenya pupu lapaepi masepaepina leamo doko

¹⁸ Doko,* 1:18 Lo 1:16; 2 Ko 2:16; 4:3 yuu koo dokonya paanya pilyamino endakali dupame Kataisa ita pokonya kumiamo pii doko kyakaenge piina lao masilyamino. Dopaka doko, Goteme naima pyoo nyingi endakali dupame pii doko Gotenya pupu lapaena lao masilyamano. ¹⁹ Doko,* 1:19 Wee 33:10; Ais 29:14 pii pepa pyapae singi dokonya,

“Nambame masingi akali dupanya masingi dupa koyasinya nepato.

Mana kandenge akali dupanya mana kandenge dupa mee injisotona,” lapae silyamo.

²⁰ Masingi* 1:20 Jop 12:17; Ais 19:12; 33:18; 44:25 akali dupa angi mende daa. Mana setapae masingi akali dupa angi mende daa. Isa yuu angenya waa katao pii yanda pingi akali dupa angi mende daaka. Goteme isa yuunya endakali dupanya masingi doko kyakaengena lao laitaka pia. ²¹ Goteme* 1:21 Mt 11:25; Lo 1:19-20 baanya masingi dokome yuunya endakali dupame nyakamanya masingi dokonya-kaita baa masala nayatamina lao masia-pyaa. Dopa lao masetala, “kyakaenge piina” lelyaminopa naimame lamaingi dokome baa lao masoo minatamino endakali dupa pyoo nyotona lao masia-pyaa. ²² Juta* 1:22 Mt 12:38; Jo 2:18; Ap 17:18-23,32 endakali dupame kongali dupa kandamana pyepa lao tee lengema. Dee Gitiki endakali dupame mana dupa nyemana lao kutingima. ²³ Dopaka* 1:23 Lo 9:32; 1 Ko 2:14; Ga 3:1; 5:11 doko, naimame ita pokonya pyao yukuotae kateamo Kataisa dokonya lao pii lenge. Dokonya Juta dupame mona koo palyingima. Tata waka dupame pii doko kyakaenge piina lao masingima. ²⁴ Dopaka* 1:24 Kl 2:3 doko, Jutapi tata wakapi Goteme ipupa latae dupa pitakame Kataisa baa Gotenya pupu lapaepi Gotenya masepaepina lao masingima. ²⁵ Doko,* 1:25 2 Ko 12:10; 13:4 endakali dupame Gotenya kyakaenge manana lelyamino doko etete masepae mende. Dokome endakalinya masingi doko ita miningi. Dee endakali dupame Gotenya tambo lapaena lelyamino doko etete pupu lapae mende. Dokome endakalinya pupu lapae doko ita miningi.

²⁶ Dopana,* 1:26 Dit 7:7; Mt 11:25; Jo 7:48; Je 2:1-5 kaimia paluma, Goteme nyakama ipupa leamo dokopa nyakama endakali aipale joo kateamape lao masalapape. Yuunya endakali dupame masingi akalina lao yapengema dopale nyakama longo nakateami. Dee nyakama akali andakepi kamongonya mandipaepi longo nakateami. ²⁷ Dopaka* 1:27 Isi 7:2; 1 Sam 16:7; 2 Ko 4:7; Je 2:5 doko, masingi akali dupa elya sina lao Goteme yuunya endakali dupame kyakaengena lao masingima endakali dupa yapao nyia-pyaa. Akali andake dupa elya sina lao baame yuunya endakali dupame tambo lapaena lao masingima endakali dupa yapao nyia-pyaa. ²⁸ Dee* 1:28 Dit 8:17-18; Lo 4:17 yuunya endakali dupame kilya kandengema endakali dupapi, koo lamo lao masingima endakali dupapi dupa baame yapao nyia-pyaa. Endakalimi angina lao masingi dupa mee jina lao endakalimi angi daana lao masingi dupa Goteme yapao nyia-pyaa. ²⁹ Baame* 1:29 Lo 3:27; Ep 2:9 dopa piamo doko endakali mendaipi mendeme baanya enomba dokonya luiyala naena lao dopa pia. ³⁰ Dopa* 1:30 Jet 23:5-6; Jo 17:19; Lo 3:24; 8:1; 1 Ko 4:15; 6:11; 2 Ko 5:21; Ep 1:7,14; Kl 1:14; 1 Te 5:23 petala, Goteme nyakama Kataisa Jisasa-pipa nyoo pakea. Goteme Kataisa baa naimanya masingi doko injisekea. Kataisa mambele naima tolatae joo katao, etete epe joo katao, kii tamao nyepae kalyamano. ³¹ Dopana,* 1:31 Jet 9:24; 2 Ko 10:7 pii pepa pyapae singi dokonya, “Endakali mende luiyatamo dokome Kamongome piamo dupa lao masetala luinana,” lapae silyamo.

Kataisa pyao yukuotae kateamo dokonya lao leamo doko

¹ Kaimia* 2:1 Ap 18:1; Lo 1:16; 1 Ko 1:17; 2 Ko 1:12; 11:6 paluma, namba nyakama kateamisa ipao Goteme yalo pyoo masoo kateamo doko langio dokopa, nambame pii lyaa doko auu pina lawapi dee masingi akali mendeme pii yapao lengeli pyowapi langya nayo. ² Doko,* 2:2 1 Ko 1:23; Ga 3:1; 6:14 namba nyakama-pipa tole kateamano dokopa nambame waka mendenya laa naenya, Jisasa Kataisapa dee baa ita pokonya pyao yukuotae kateamo dokopa dolaponya iki latoo lao masio. ³ Dee* 2:3 Ap 18:6,9,12; 1 Ko 4:10; 2 Ko 7:15; 10:1; 11:30; Ep 6:5; Pl 2:12 namba nyakama-pipa tole katao pituu kyoto nanjoo paka kayao etete walu lao kateo. ⁴ Nambame* 2:4 Lo 15:19; 1 Ko 4:20; 2 Ko 12:12; 1 Te 1:5 Wai Pii Epepi manapi langio dupa masingi akali dupame endakalinya masingi kakunyoo lengemali pyoo langya nayo. Dopa napiopa, Sipitisa Gote dokonya pupu lapae dokome pii doko nyakama-kisa kiningi injisia. ⁵ Nambame* 2:5 2 Ko 4:7; 6:7 dopa pio doko, nyakamame Gotenya pupu lapae doko mambele masoo minalapale lao pio. Endakalinya masingi mende mambele masoo minalapale lao daa.

Goteme masepae yalo piamo dokonya leamo doko

⁶ Dopaka* 2:6 Ep 4:13; Pl 3:15; Kl 1:28; Ip 5:14 doko, masepae doko nambame Gotenya endakali wambu pipae dupa lamaingi. Masepae doko isa yuu angenyapi isa yuu angenya isingi akali koyapenge dupanyapi mende daa. ⁷ Endakali* 2:7 Lo 8:29-30; 16:25 dupame nakandena lao Gotenya masepae yalo petae singi doko nambame lamaingi. Wamba baame yuupi kaitipi wapuala nayao pituu, naima tii pyoo katasotona lao masepae doko wambao yapao nyia-pyaa. ⁸ Isa* 2:8 Wee 24:8; Lu 23:34; Ap 7:2; Ep 3:10; Je 2:1; 1 Pi 1:12 yuu angenya isingi akali mendaipi mendeme masepae doko nakandeami. Dupame kandeamili kandao doko, Kamongo tii pipae doko pyao yukuala nayamili. ⁹ Dopaka* 2:9 Ais 64:4 doko, pii pepa pyapae singi dokonya,

“Lengeme nakandeami dupapi, kaleme nasiami dupapi, moname masala nayami dupapi dupa

Goteme baa auu kaengema endakali dupanya depa lanya setakamaiyana,” lapae silyamo.

¹⁰ Dee* 2:10 Dan 2:28; Mt 11:25; 13:11; 16:17; Jo 14:26; Ep 3:3,5 dutupa Goteme Sipitisa naima dingi dokonya-kaita naima-kisa panasia. Sipitisa Gote dokome dupa pitaka kandokondape pyoo kandenge. Kini, baame Gotenya mona koko etete palelyamo dupa apata kandengeaka. ¹¹ Endakali* 2:11 Pot 20:27; Lo 11:33-34 mendaipi mendeme endakali mendenya masingi doko nakandenge. Baa tangenya mona dokome iki masingi. Mendai dopaka pyoo endakali mendaipi mendeme Gotenya masingi doko nakandenge. Sipitisa Gote dokome iki kandenge. ¹² Dee* 2:12 Jo 16:13-14; Lo 8:15 naimame sipitisa nyiamano doko isa yuu angenyatae mende nyala nayama. Goteme naima epe mee diamo dupa masalapale lao baame Sipitisa diamo doko nyiama. ¹³ Goteme* 2:13 1 Ko 1:17; 2:4 naima epe diamo dupanya lao naimame lamailyamano dokopa, masepae endakali dupame pii mana langilyamino dupa lao lamaiya naenya, Sipitisa Gote dokome pii mana langilyamo dupa lao baanya angi dupanya endakali dupa lamaingi. ¹⁴ Sipitisa* 2:14 Pot 28:5; Mt 16:23; Jo 8:47; 10:26; 14:17; 1 Ko 1:18,23; Je 3:15 nakatenge endakali dokome Sipitisa Gote dokome epe dingi dupa nyowani nakaenge. Baame epe dupa angi mende daa lamo lao masetala kapa pao masala naenge. Doko, Sipitisa katenge endakali dokome iki epe dupa yapapala angi etetena lao masingi. ¹⁵ Sipitisa* 2:15 1 Ko 3:1; 14:37; Ga 6:1; 1 Jo 2:20 katenge endakali dokome dupa pitaka yapao kandenge. Dopaka doko, endakali mendaipi mendeme kapa pao baa yapao kandala nayapenge.

¹⁶ “Doko* 2:16 Ais 40:13; Lo 11:34; 1 Ko 7:40 apimi Kamongonya masingi doko kandeape?

Apimi baa mana lamaipengepe?”

Dopaka doko, Kataisanya masingi doko naima-kisa palelyamo.

Gote-pipa tole pyao kalai pingina leamo doko

¹ Dopana,* 3:1 Jo 16:12; Lo 7:14; 1 Ko 7:40 kaimia paluma, nambame Sipitisa katenge endakali dupa pii lamaingili pyoo nyakama kapa pao langya nayo. Dopa napinya, Kataisanya mana dokonya wane kole joo wamba kateamili pyoo mee katenge dupa pii lamaingili pyoo nambame nyakama langipenge jianya langio. ² Nambame* 3:2-3 1 Te 2:7; Ip 5:12-14; 1 Pi 2:2* 3:2-3 1 Ko 1:10-11; 11:18; Ga 5:19-20; Je 3:16 nyakama andu ipange jepae pii dupa langio. Doko, nyakama nee kyoto jepae pii dupa sepenge joo nakateaminosa langya nayo. Kini, nyakamame yuunya endakali joaka mee katapiminosa indupa apata nasepenge joo kalyamino. Nyakama tilya nyoo laiya laloo pyoo katapimino dokome nyakama endakalinya mona koo dokome pyuani kaenge dupa watao isa yuunya endakali joo kalyaminona lao laitaka napilyape? ⁴ Doko,* 3:4 1 Ko 1:12 nyakamanya mendeme, “Namba Polonya kalyona,” lapumopa; mendeme, “Namba Apolosanya kalyona,” lao kalyamino dokome nyakama yuunya endakali joo nakalyamipi?

⁵ Apolosa* 3:5 2 Ko 6:4; Ep 3:7; Kl 1:25 doko apipi? Polo doko apipi? Nalimba kalai akali iki daape. Kamongome nalimba wakale wakale kalai diamoli pyoo piambanopa nyakamame baa masoo miniami. ⁶ Nambame* 3:6 Ap 18:4-11,24-28; 1 Ko 1:12; 2 Ti 2:6 ee wai pokeopa Apolosame tanu pia. Dopaka doko, Goteme andasia. ⁷ Dopana, ee wai pokenge akali doko angi mende daa. Dee tanu pingi akali doko angi mende daaka. Andasingi Gote doko iki angi. ⁸ Ee wai pokenge akali dokopa tanu pingi akali dokopa dolapo mendai. Dolapome kalai wakale wakale pitambinoli pyoo tange yole nyetambi. ⁹ Doko,* 3:9 Ais 61:3; Mt 13:3-9; Ep 2:20-22; 1 Pi 2:5 nalimba Gote-pipa tole pyao kalai mendai pingi. Nyakama Gotenya eepi andapi joo kalyamino.

¹⁰ Goteme* 3:10 1 Ko 15:10; 2 Pi 3:15 mona epe palyoo namba kalai diamoli pyoo namba anda pingi masepae mupa joo anda muku minanya seteo doko, indupa endakali waka mendapuame dokonya anda pilyamino. Dopaka doko, endakali mendai mendai lao dokome anda muku dokonya aipa pyoo anda pilyope lao isokondape pyoo pipenge. ¹¹ Doko* 3:11 Wee 118:22; Ais 28:16; Ap 4:11-12; 1 Pi 2:4-6 anda muku minapae silyamo doko Jisasa Kataisana, dee akali mendeme muku waka mende minala nayapenge. ¹² Anda muku minapae dokonya endakali mendapuame anda golome pilyaminopi, silipame pilyaminopi, kana epeme pilyaminopi pingima. Dee endakali mendapuame itame pilyaminopi, yangimi pilyaminopi, sambaiyame pilyaminopi pingima. ¹³ Kataisame* 3:13 Mt 3:11-12; 1 Ko 1:8; 4:5; 2 Te 1:7-10; 1 Pi 1:7 yapatamo gii dokopa endakali mendai mendai lao dupa pitakame kalai pitamino dupa panata. Doko, gii doko ipatamo dokopa, itate kaiyepae awapa ipupala itate dokome endakali mendai mendai lao dupa pitakame kalai pitamino dupa kopeta piami lamo kamea pyoo piami lamo lao makande petala panaseta. ¹⁴ Anda muku minapae dokonya endakali mendeme anda pitamo doko itate dokome makande pitamopa natatamo kandao doko, baa yole nyeta. ¹⁵ Dee* 3:15 Jop 23:10; Ais 43:2 endakali mendeme anda pitamo doko itate dokome tatamo kandao doko, baame kalai pitamo dupa mee maa yangatae katata. Dopaka doko, anda telyamopa kamanda kolao paka penge dopale joo baa itange pyoo nyepae katata.

¹⁶ Nyakama* 3:16 1 Ko 6:19; 2 Ko 6:16 Gotenya losuu anda joo kalyaminopa Sipitisa Gote doko nyakama-kisa katengena lao masala naelyamipi? ¹⁷ Endakali* 3:17 Ep 2:20-22 mendeme Gotenya losuu anda doko koyasetamo kandao doko, Goteme baa koyaseta. Doko, Gotenya losuu anda doko etete epe dokonyana baame dopa pita. Losuu anda doko nyakamaka daape.

¹⁸ Endakali* 3:18 Pot 28:26; Ais 5:21; 1 Ko 1:17-25; 8:2; Ga 6:3 mendeme baa tange minakasala naena. Nyakamanya endakali mendeme yuunya endakali dupame yapao masingimali pyoo baa masingi akalina lao masetamo kandao doko, baa etete masingi akali jalanya kyekena. ¹⁹ Doko,* 3:19 Jop 5:13; 1 Ko 1:20 yuunya endakali dupanya masingi doko Goteme kyakaengena lao masingi. Pii pepa pyapae singi dokonya,

“Goteme masingi akali dupa nyakama tangenya waa katenge mana dokome lyina lao kone makengena,” lapae silyamo.

²⁰ Dee* 3:20 Wee 94:11 pii mende:

“Kamongome masingi akali dupanya masingi doko angi daa lamona lao kandengena,” lapae silyamoaka.

²¹ Dopana,* 3:21 Lo 8:32; 1 Ko 4:6 nyakamanya mendaipi mendeme endakalinya opale mendenya luiyala nayalapape. Doko, dupa pitaka nyakamanya. ²² Polopi,* 3:22 Lo 8:38; 1 Ko 1:12 Apolosapi, Sipasapi, yuu kaitipi, lete katengepi, kumingipi, indupa silyamopi, tanga setapi, dupa pitaka nyakamanya. ²³ Dee* 3:23 Lo 8:10; 1 Ko 6:19; 11:3 nyakama Kataisanya. Dee Kataisa baa Gotenya.

Kataisanya kalai pyakamaingi akalina leamo doko

¹ Nyakamame* 4:1 Lu 12:42-44; Lo 11:25; 16:25; 1 Ko 9:17; Ta 1:7 naima kandao Kataisanya kalai pyakamaingi akalipi dee Goteme yalo pyoo masoo kateamo dupa isakamaingi akalipina lao masalapape. ² Isakamaingi akali dupanya kalai mupa doko, dupanya akali andake dokome latamoli pyoo pipenge. ³ Dopaka doko, nyakamame tamopi endakali kambu mendeme tamopi namba yapatamino kandao doko, nambame angi mende daana lao masilyo. Nambame namba tange yapala naenge. ⁴ Nambame* 4:4 Wee 143:2; 2 Ko 1:12; 5:10 koo pio mende masala naelyo. Dopaka doko, masala naelyo dokome namba-kisa koo tenge mende nasilyamona lao laitaka napingi. Kamongo dokome namba yapenge. ⁵ Dopana,* 4:5 Mt 7:1; Lu 12:2-3; Jo 5:44; Lo 2:16; 1 Ko 3:8,13; 2 Ko 10:18 pipenge gii doko ipatala nayatamopa wambao nyakamame endakali mende yapala naenya, Kamongo ipatamo gii doko malisalapape. Baame iminjetaenya yalo petae singi dupa tii pingi dokonya setata. Dee endakali dupame pitoo lao moname yalo pyoo masingi dupa panasetaka. Dokopa Goteme endakali dupa pitaka wakale wakale tama pipenge jetali pyoo tama pita.

⁶ Kaimia* 4:6 Lo 12:3; 1 Ko 1:12,31; 3:4,19-20 paluma, nyakama nisalanya nambame pii lelyo dutupa Apolosa nalimba makande pyoo lelyo. Nambame dopa lelyo doko, nyakamanya mendaipi mendeme pii pepa pyapae silyamo dupa yalatala pao endakali mende tungi pyao mende kilya kandao napyanya mana nyalapale lao lelyo. ⁷ Doko,* 4:7 Jo 3:27; Lo 12:6; Ga 6:3 nyakamame endakali waka dupa ita minao kalyaminona lao apimi masilyape? Nyakama-kisa silyamo dupa pitaka Goteme nandiape? Goteme dupa nyakama dia tamo kandao doko, aipuma baame nandiamopa nyakama tangeme nyiami joo nyakama tange lalyoo kalyamipi? ⁸ Indupa* 4:8 Pa 3:17,21 nyakama yaka jetelyamona lao masilyamino. Nyakama etete kamongotelyamanona lao masilyamino. Nyakamame naima nyoo ana pyandatala kiŋi joo dupa pitaka isoo katapelyamanona lao masilyaminoaka. Kanau! Kini nyakama kiŋi joo katapimili kandao doko, naima apata nyakama-pipa kiŋi joo katamana lao auu kayapuli.

⁹ Goteme* 4:9 Lo 8:36; 1 Ko 15:31; 2 Ti 3:10-11; Ip 10:33* 4:9 2 Ko 4:8-12; 6:4-10; 11:23-27 naima aposele dupa etete maita-kaita katenge akali injisetae kalyamanona lao nambame masilyo. Doko, naima pyalanya moko nyepae joo katao yuu kaitipi pyoo enjelepi endakalipi dupame kandena lao laitaka petae joo kalyamano. ¹⁰ Kataisa* 4:10 1 Ko 1:18; 2:3; 3:18; 2 Ko 11:19; 13:9 minao payapumanosa naima kyakao kalyaminona lelyaminoaka doko, nyakamame nyakama Kataisa-kisa katao mona paliuu kalyamanona lao masilyamino. Naima akali tambo lapaena lelyaminoaka doko, nyakamame nyakama akali pupu lapaena lao masilyamino. Naima kenge nasingina lelyaminoaka doko, nyakamame nyakama kenge singina lao masilyamino. ¹¹ Wambapi* 4:11 Lo 8:35 epapupi naima lopo kayao endaki nanu kayao yonge pee koo pyoo kateama doko mee kalyamano. Endakali dupame naima pilyamino. Naima anda yuupi mendenya katakinikini napyoo mendasa katao mendasaka paelyamano. ¹² Naimame* 4:12 Wee 109:28; Mt 5:44; Ap 18:3; 1 Ko 9:14-15; 2 Te 3:8; 1 Pi 3:9 nee akipi sambao nao katamana latala naima tangeme kalai lekeleke tao pyoo kalyamano. Endakali dupame naima kandao pii koo lapiminopa Goteme dupa auu pisina lao tee lelyamano. Dupame naima watao pyapiminopa pina lao kaelyamano. ¹³ Dupame* 4:13 Wee 116:10; J.Ee 3:45 naima lao koyasipiminopa naimame dupa mona epe palena lao pii epe lamailyamano. Endakali dupa pitakame naima kandao koo aii pyapaena lao masingima. Dupame naima koo etetena lao masiami doko indupa apata dopaka lao masoo kalyamino.

¹⁴ Nambame nyakama elya pisoo pii dutupa pepa pyala naelyo. Daa, nyakama nambanya mona setenge wane wanakupi dupa mana langyoo pilyo. ¹⁵ Doko,* 4:15 1 Ko 1:30; Ga 4:19; Pm 1:10; 1 Pi 5:13 nyakamame Kataisa minao kalyepale lao akali taosene kingi ita mendeme nyakama setao katatamino kandawapi, nyakamanya takange longo daa. Nambame iki Wai Pii Epe dokome nyakama Kataisa Jisasanya endakali joo kalyepale lao mandeo. ¹⁶ Dopana,* 4:16 1 Ko 11:1; Pl 3:17; 1 Te 1:6; 2 Te 3:7 nyakama nambame pingili pyoo pyoo kalyepape lao kyoto joo langilyo. ¹⁷ Tenge* 4:17 Ap 16:1; 19:22; 1 Ko 7:17; 16:10; Pl 3:19-21 mendai dokonyaka nambame akali Timoti baa nyakama kalyamino dokonya epena leo. Timoti baa Kamongopa pakatae katenge nambanya mona setenge wane tupi lapae mende. Nambame mana miningipi sosa yuu wakale wakale katenge dupa pitakanya Kataisa Jisasanya lao pii lamaingipi dupa nambame pingili pyoo baame nyakama langyuu nyakamanya masingi deaka sakatasakata.

¹⁸ Nambame nyakama kanja naipatena lao masetala nyakamanya yangi mendapuame luiyao kalyamino. ¹⁹ Dopa* 4:19 Ap 18:21 pilyaminoaka doko, Kamongome ipupili lao masetamo kandao doko, yapa mende namba nyakama katatamisa ipato. Ipupala luiyao kalyamino endakali dupanya pii dupa sala naenya, dupa-kisa pupu lapae aipale singipi lao kandato. ²⁰ Piimi* 4:20 1 Ko 2:4 lenge doko Goteme isingi dokonya mende daa. Pupu lapae doko Goteme isingi dokonya mende. ²¹ Nyakamame* 4:21 1 Ko 1:23; 10:2 aipa pipili lao masilyamipi? Nambame kolyepepi mende minao nyakama kalyamino dokonya ipupi laka lao masilyamipi, pande auu kayao andiki pyoo ipupi laka lao masilyamipi?

Kepo kolenge akali doko sosanya mee katena kayamino dokonya leamo doko

¹ Nyakamanya* 5:1 Lep 18:7-8; 20:11; Dit 22:30; 27:20 kaina dokonya kepo kolenge mana doko silyamo lao pii doko taelyamo. Akali mendeme baanya takangenya etanenge maitakao nyepae doko kepo kolao nyepala pilyambino lelyamino. Netesa endakali dupame kepo kolenge mana dopale naminingima! ² Dopana,* 5:2 Lep 18:29; Dit 13:5 nyakama aipa petala luiyao kalyamipi? Nyakama mona etete kenda kayapala dopa piamo akali doko nyakamanya kambu dokonya nakatena lao watao piamili kapa. ³ Kini* 5:3 Kl 2:5 namba nyakama-pipa tole nakalyamanoaka doko, nambanya mona doko nyakama-pipa katao mana koo miniamo akali doko nambame yapapeo. ⁴ Nyakama* 5:4-5 Mt 4:10; 16:19; 18:20; 1 Ko 1:8; 2 Ko 13:10; 2 Te 3:6,14; 1 Pi 4:6 Kamongo Jisasa lao masetala kambutamino dokopa, nambanya mona doko nyakama-pipa awapa katatamana, nyakamame naimanya Kamongo Jisasanya pupu lapae dokome akali doko Satanenya kingilyaka dokonya baa maiyepape. Baanya koo pingi yonge doko Sataneme koyasetatamopa Kamongo dee ipatamo gii dokopa baa mona enenge palyoo pyoo nyepae katatamopana dopa pyepape.

⁶ Nyakama* 5:6 Ga 5:9 luiyao kalyamino mana doko epe daa. Betesa andasingi iisa kukimi betesa wasalanya momanga pipae doko pitakanya tayao andasingili pyoo mana doko tayao andata. ⁷ Nyakama* 5:7 Eke 12:5,21; 13:7; Nam 5:3; Ais 53:7; Jo 1:29; 1 Pi 1:19 momanga pipae enenge joo katamana lao iisa wambatae mee palenge doko nepalapape. Nyakama betesa wasalanya momanga pipae iisa napalenge enenge joo kalyamino. Doko, naimanya Napinya Kayamo Giinya sipisipi yakane pyapenge doko kundi joo pyapea. Sipisipi yakane doko Kataisa. ⁸ Dokonya* 5:8 Eke 12:19; Dit 16:3 naimame betesa iisa wambatae palenge doko nepatala, betesa iisa napalenge enenge doko nao, koo pyoo luingi mana dupa nepatala auu pyoo katao kiningi mana minao naimanya Napinya Kayamo Gii doko kandao nyoo katamana.

⁹ Wamba* 5:9 Mt 18:17; 2 Ko 6:14; 2 Te 3:14 nambame nyakamanya pepa pyao peekeo dokonya nyakama kandao endakali kepo kolenge dupa-pipa tole nakalyepape leo. ¹⁰ Dopa* 5:10 Jo 17:15; 1 Ko 10:27; 2 Ko 6:17; 1 Jo 5:19 leo doko, nyakamame isa yuu angenya kepo kolenge endakalipi, opale nyipu laka lao masingi endakalipi, muni akipi pake nyingi endakalipi, sambo gote minao katenge endakalipi, dupa yakinalapape lao naleo. Nyakamame isa yuu dake kapa pao yakinapenge pyali kandao doko, nyakamame dupa etete yakinapimiliaka. ¹¹ Daa,* 5:11 Mt 18:17; Lo 1:29; 1 Ko 10:7,14,20-21; 2 Te 3:6; Ta 3:10; 2 Jo 10 nambame nyakamanya pepa pyao peekeo doko dapa lao pyao peekeo: nyakamanya masoo miningi kaiminingi latatamo endakali mendeme kepo kolawapi, nyipu laka lao masowapi, sambo gote minao katawapi, endakali yango dupa kandao pii koo lawapi, bia akipi longo lao nao kyakawapi, muni akipi pake nyowapi pingi yaa kandeno doko, baa-pipa tole nakalyepape. Endakali dopale doko-pipa neepi apata nanalapapeaka.

¹² Doko,* 5:12-13 Mk 4:11; Kl 4:5; 1 Te 4:12; 1 Ti 3:7* 5:12-13 Dit 13:5; 17:7; 22:24; 1 Ko 5:2 netesa endakali dupa yapenge kalai doko nambanya kalaipi? Daa, Goteme dupa yapata. Dopaka doko, kamenya katenge endakali dupa yapenge kalai doko nyakamanya. “Nyakamame koo pingi endakali doko nyakamanya kaina dokonya watao pyalapape.”

Mende kosimi laa laa napyepape leamo doko

¹ Nyakamanya* 6:1 Mt 18:17 endakali mendeme nyakamanya mende-kisa kosa pii mende setao pituu dokopa, baame Gotenya endakali dupa kayapala netesa endakali dupanya pii tolenge akali dupanya enombasa dupame tolasina lao napupenge. ² Gotenya* 6:2 Dan 7:22,26; Mt 19:28; Pa 3:21; 20:4 endakali dupame endakali dupa pitakanya pii dupa tolasakamaipenge doko nyakamame masalapape. Kini, nyakamame endakali dupanya pii dupa lao tolasakamaitami. Dopana, aipa petala nyakamame mee pii yakane dopale dupa tolasepenge nanjilyape? ³ Naimame* 6:3 Ju 5-6 enjele dupanya pii dupa lao tolakamaitama doko nyakamame masalapapeaka. Dopana, kiningi etete naimame kapa pao isa yuu angenya kalyamano dupanya pii dupa lao tolapenge jilyamo. ⁴ Dokonya, nyakamanya pii dopale dupa tolasepenge jipumopa nyakamame endakali sosanya konda napingi dupame tolasina lao aipuma nyoo pelyamipi? ⁵ Nambame nyakama elya salapale lao lelyo. Masoo miningi kaiminingi mendalaponya kainanya pii setamo dupa kapa pao lao tolasetami nyakamanya masingi akali mendapua kalyamino. ⁶ Dopaka doko, kaiminingi mendeme kaiminingi mende kosimi laa laa pilyamino. Dopa pipimino doko masoo minala naenge endakali dupame lao tolekena lao kaelyamino.

⁷ Kini,* 6:7 Mt 5:38-42; Lo 12:17-19; 1 Te 5:15; 1 Pi 3:9 nyakamame mende kosimi laa laa pilyamino dokome nyakama etete lombapae sepelyamino lao laitaka pilyamo. Mendeme nyakama-kisa koo pipumopa pina lao kayapimili doko epe. Dee nyakamanya oapi dupa waa katao pake nyalanya pipiminopa nyina lao kayapimili doko epeaka. ⁸ Epeaka doko, nyakamame dopa napilyamino. Daa, nyakamame endakali mende-kisa koo pyoo mendenya oapi waa katao pake nyoo kalyamino. Nyakamame mana doko nyakamanya kaiminingi dupa-kisa minilyamino! ⁹ Koo* 6:9-10 Lo 1:29-30; 1 Ko 15:50; Ga 5:19-21; Ep 5:5; Pa 22:15 pingi endakali dupa Goteme isingi panda dokonya nakatatami doko nyakamame masala naelyamipi? Nyakamame nyakama tange minakasala nayalapape. Endakalipi nyele-nyele paengema dupapi, sambo gote minao katengema dupapi, kepo kolengema dupapi, akali yangome elya pingi pina lao kaengema dupapi, akali yango-pipa elya pingi pingima dupapi, pake nengema dupapi, nyipu laka lao masingima dupapi, bia akipi longo lao nao kyekengema dupapi, endakali yango dupa kandao pii koo lengema dupapi, mana makandepi yalengema dupapi dupanya mende Goteme isingi panda dokonya nakatata. ¹¹ Wamba* 6:11 Jo 3:5; Ep 2:1-6; Ta 3:3-7; 1 Jo 2:12 nyakamanya mendapuame dopa pyoo kateami. Dopaka doko, Goteme nyakamanya koo dupa kunanya nepekea. Baame nyakama etete epe injisia. Dee baame nyakama tolataena lea. Naimanya Gote dokome Kamongo Jisasa Kataisa lao masetala baame Oli Sipitisa dokome dopa pia.

Nyakamanya yonge dokome Gote tama pyoo kalyepape leamo doko

¹² Kini,* 6:12 Jen 4:7; Lo 6:15; 1 Ko 10:23 dupa pitaka nambame pipenge kapa. Kapaka doko, dupa pitakame endakali nisala naenge. Nambame dupa pitaka pipenge kapana lao masilyoaka doko, dupanya mendeme namba isina lao kayala nayato. ¹³ Kini,* 6:13 1 Ko 10:31; Kl 2:22; 1 Te 4:3-5 nee silyamo doko inginya paanya silyamo. Dee ingi palelyamo doko nee ipao sina lao palelyamo. Dopaka doko, Goteme dolapo lapota etaseta. Yonge kalyamo doko kepo kolalanya nakalyamo. Daa, Kamongonya kalyamo. Dee Kamongome yonge doko nisalanya kalyamo. ¹⁴ Goteme* 6:14 Lo 1:4; 8:11; 1 Ko 15:20; 2 Ko 4:14 Kamongo doko malunya sakatasiamoli pyoo naima apata baanya pupu lapae dokome sakatasetaka.

¹⁵ Nyakamanya* 6:15 Lo 6:12-13; 12:5; 1 Ko 2:12; 12:27; Ep 5:30 yonge doko Kataisanya yonge dokonya kingi mokopi joo kalyamo doko nyakamame masala naelyamipi? Dopana, nyakamanya akali mendeme Kataisanya yonge dokonya mendatupa nyepala enda akali nyele-nyele paenge mendenya yongenya nyoo katatape? Daa, etete dopa napipenge! ¹⁶ Akali* 6:16 Jen 2:24; Mt 19:5; Mk 10:8; Ep 5:31 mendeme enda akali nyele-nyele paenge mende elya pingi pitamo dokome enda dokopa yonge mendai jetambi doko nyakamame masala naelyamipi? Doko Goteme, “Dolapo yonge mendai jetambina,” lea-pyaa. ¹⁷ Dopaka* 6:17 Jo 17:21-23; Lo 8:9-11; Ga 2:20 doko, endakali mende Kamongopa pakatae katatamo dokome baapa masingi mendai palyoo katata.

¹⁸ Kepo kolenge mana doko wandyuu kalyepape. Endakali mendeme koo waka dupa pitamo dokome baanya yonge dokonya napita. Dopaka doko, endakali mendeme kepo kolatamo dokome baa tangenya yonge dokonya pita. ¹⁹ Nyakamanya* 6:19 Jo 2:21; Lo 5:5; 1 Ko 3:16; 1 Te 4:4-8 yonge doko Goteme Oli Sipitisa nyakama dia nyakama-kisa kalyamo dokonya losuu anda joo kalyamo doko masalapape. Nyakama nyakama tangenya daa, nyakama Gotenya. ²⁰ Baame* 6:20 Ap 20:28; Lo 6:15; 12:1; 1 Ko 7:23; Pl 1:20; 1 Pi 1:18-19 nyakama sambao nyia. Dokonya nyakamanya yonge dokome Gote lalyoo kalyepape.

Akali enda lanyingipi enda akali pengepi dokonya leamo doko

¹ Wamba* 7:1 Mt 19:12* 7:1 Ep 5:22-33 nyakamame pepa pyao peyamino dokonya indupa lelyo. Akali mende enda nyala nayatamo doko epe. ² Dopaka doko, kepo kolenge mana silyamo dokonya akali pitaka mendai mendai lawanya enda wakale wakale pititamopa, enda pitaka mendai mendai lawanya akali wakale wakale katenaka. ³ Akalimi etanenge doko-kisa kalai pipenge doko pipenge. Dee etanengeme akalingi doko-kisa mendai dopaka pipenge. ⁴ Etanenge dokome baa tangenya yonge doko isala naena. Baanya akalingi dokome isina. Dopaka pyoo akalingi dokome baa tangenya yonge doko isala naena. Baanya etanenge dokome isina. ⁵ Dopana,* 7:5 Eke 19:15 enda akalipa tole pyalanya mendenya kaita lyoka lyoka napyepape. Nyilyambo lapotame loma salanya mona mendai palyoo gii kuki mende kayamba latala kayatambino doko epe. Epeaka doko, nyilyambome nyilyambo tange auu pyoo isala nayatambinosa Sataneme nyilyambo makande pitana, maitakao nyilyambo dee tole pyalapape. ⁶ Nambame lelyo doko nyakamame kayala nayao dopaka pyepapena lao nalelyo. Daa, nyakamame dopa pyuani kayatamino doko pyepape lao lelyo. ⁷ Nambame* 7:7 Mt 19:12; 1 Ko 9:5 nyakama pitaka namba yale joo katapimi laka lao masilyo. Dopaka doko, Goteme naima pitaka mendai mendai lao epe dupa wakale wakale dia. Endakali mende-kisa epe mendepale mende singi. Mende-kisa mendepale mendeaka singi.

⁸ Dee indupa nambame akali patangepi enda mapuakaepi enda walyakaepi dupa kandao lelyona, enda dupa akali napao akali dupa enda lanyala nayao mee namba kalyoli pyoo katao pituuwapi pitamino doko epe. ⁹ Dopaka* 7:9 1 Ti 5:14 doko, dupame nyakamanya nyowani kaenge doko ita minapenge nanjetamo kandao doko, akali enda lanyoo enda akali pao pipenge. Doko, endakalipa tole pyao petenge mana doko kuki epeaka doko, mee katao nyowanimi kumingi mana doko etete koo.

¹⁰ Dee* 7:10 Mt 5:32; 19:9; Mk 10:11-12; Lu 16:18 endakalipa lao pyasetae dupanya nambame mana dake setelyo (nambame ialyo daa, Kamongome setelyamo): endame akalingi doko yakinatala napupenge. ¹¹ Dopaka doko, endame akalingi doko yakinatala patamo kandao doko, baa akali waka napao mee pitipenge. Daa tamo kandao doko, baa pilyoo baanya akalingi tengesa pupala dee mona setao pitipenge. Dee akalimi baanya etanenge doko watao napyapengeaka.

¹² Dee endakali yangi dupa kandao nambame ialyo dapa lelyo (Kamongome nalelyamo): akali masoo miningi mendenya etanenge masoo naminingi mendeme akali dokopaka pitimbana lao masetamo kandao doko, akali dokome baa watao napyapenge. ¹³ Dee masoo miningi enda mendenya akalingi masoo naminingi mendeme enda dokopaka pitimbana lao masetamo kandao doko, enda dokome baa yakinala nayapenge. ¹⁴ Doko, masoo miningi enda-pipa tole petenge dokome masoo minala naenge akalingi doko etete epe jingi. Dee masoo miningi akali-pipa tole petenge dokome masoo minala naenge etanenge doko etete epe jingi. Dopa napyali kandao doko, dolaponya wane dupa netesa endakali dupanya wane dopale joo kalyimili. Dopa pimiliaka doko, etete epe joo katengema. ¹⁵ Dopaka doko, enda tamopi akali tamopi masoo minala naenge mendeme masoo miningi mende yakinea kandeno doko, yakinena kayalapape. Mendeme dopa pitamo kandao doko, masoo miningi akali tamopi enda tamopi mende dokopaka pilyepape lao mana setapae mendeme nyoo yaki napingi. Doko, Goteme naima mona setao kalyepale lao ipupa lea. ¹⁶ Enda,* 7:16 1 Pi 3:1 embame embanya akalingi doko kapa pao pyoo nyete laape? Akali, embame embanya etanenge doko kapa pao pyoo nyete laape?

Kamongome kalyepape leamoli pyoo katamana leamo doko

¹⁷ Dopaka* 7:17 Lo 12:3; 1 Ko 7:20,24; 11:16; 14:33; 2 Ko 11:28 doko, Kamongo dokome naima pitaka mendai mendai lao kalyepa leamoli pyoo katapenge. Dee Goteme naima ipupa leamo dokopa naima pitaka mendai mendai lao kateamanoli pyoo katapengeaka. Nambame mana doko sosa yuu wakale wakale kalyamino dupa pitakanya setenge. ¹⁸ Emba* 7:18 Ap 15:1-2 elya pingi kambu kepapaesa Goteme ipu lea tamo kandao doko, embame kombe doko mee jalanya pyaa nayape. Emba elya pingi kambu kepala naengesa Goteme ipu lea tamo kandao doko, elya pingi kambu kepala nayape. ¹⁹ Doko,* 7:19 Lo 2:25; Ga 5:6; 6:15 akali elya pingi kambu kepengepi kepala naengepi doko angi mende daa. Gotenya mana setapae dupa watao miningi doko iki angi. ²⁰ Goteme naima ipupa leamo dokopa naima pitaka mendai mendai lao kateamanoli pyoaka katapenge. ²¹ Emba kendemane joo katatenopa Goteme ipu lea tamo kandao doko, mona kenda nakayape. Dopaka doko, emba kendemane joo katenge doko kayapenge jia kandeno doko, kayape. ²² Doko,* 7:22 Jo 8:32,36; Lo 6:18,22; Ep 6:6; Kl 3:22-24; Pm 16; 1 Pi 2:16 kendemane joo kateaminopa Kamongome epena lea dupa Kamongonya mokao nyepae joo kalyamino. Dopaka pyoo mokao nyepae kateaminopa baame epena lea dupa Kataisa baanya kendemane joo kalyamino. ²³ Goteme* 7:23 Lo 3:24; 1 Ko 6:20; 1 Pi 1:18 nyakama sambao nyia. Dopana nyakama endakalinya kendemane jala nayalapape. ²⁴ Kaimia* 7:24 1 Ko 7:17 paluma, Goteme naima ipupa leamo dokopa naima pitaka mendai mendai lao kateamanoli pyoaka Gote-pipa awapa katamana.

Enda akalipi nyepengepi nanyepengepi dokonya leamo doko

²⁵ Indupa* 7:25 1 Ti 1:12-13 nambame akali enda lanyala nayao enda akali napao pingima dokonya latoo. Dokonya nambame Kamongonya pii mende minao laa nayatoo. Dopaka doko, Kamongome namba kondo kayamo dokonya namba tungi pyapenge akali joo kalyona, nambame namba tangenya masingi doko latoo. ²⁶ Indupa* 7:26 Lo 13:11 kenda pipae silyamo dokonya enda akalipi dupa kalyaminoli pyoo mee katatamino doko epena lao masilyo. ²⁷ Emba enda petenge tamo kandao doko, pyao watalanya pyaa nayape. Dee emba enda napetenge tamo kandao doko, lanyalanya pyaa nayape. ²⁸ Dopaka* 7:28 Lu 12:33 doko, emba enda lanyeteno kandao doko, koo piti daa. Dee enda akali patamo kandao doko, koo pita daaka. Enda lanyepala enda-pipa petengepi enda akali patala akali-pipa petengepi dupa-kisa kenda pipae koteaka lao epenge. Dopaka doko, kenda pipae doko nambame nyakama-kisa naipupya laka lao masilyo.

²⁹ Kaimia* 7:29 1 Ko 7:31; 2 Ko 6:2; Ip 13:14 paluma, nambame lelyo doko dapa lao lelyo: indupa yuu gii kuki silyamo. Dopa pilyamo dokonya Kamongo lao masalanya indupa pituu akali enda petenge dupa enda napetengeli joo katapenge. ³⁰ Ee* 7:30 1 Ko 6:8-10 lao katengema endakali dupa ee nalao katengemali joo katapenge. Mona yaepao katengema endakali dupa mona yaepala nayao katengemali joo katapenge. Oapi sambao setengema endakali dupa oapi nasingili joo katapenge. ³¹ Isa* 7:31 1 Jo 2:16-17 yuu dakenya oapi dupa minao kalai pingima endakali dupame dupa minao kalai napingili joo katapenge. Doko, isa yuu indupa silyamo dake etama etama pyoo etelyamona, silyamoli pyoo naseta.

³² Nyakamame* 7:32 Mt 19:12; 1 Ti 5:5 opale mendaipi mendenya nea nakayapimi laka lao masilyo. Akali enda lanyala naenge dokome Kamongonya kalai masetae soo pingi. Baame Kamongome auu kaengeli pyoo pitoo lao masingi. ³³ Dopaka doko, akali enda petenge dokome yuunya kalai dupa masetae soo pingi. Baame baanya etanengeme auu kaengeli pyoo pitoo lao masingi. ³⁴ Dokonya baanya masingi doko lapo palenge. Dee enda akali napengepi wanaku mapuakaepi dokome Kamongonya kalai doko masetae soo pingi. Baame baanya yongepi monapi lapotanya etete epe joo pititoo lao masingi. Dopaka doko, enda akali katenge dokome yuunya kalai dupa masetae soo pingi. Baame baanya akalingimi auu kaengeli pyoo pitoo lao masingi.

³⁵ Nambame* 7:35 Lu 10:40-42 pii dutupame nyakama nisoo lelyo. Kame pyoo laa naelyo. Nyakama mana tolao minao mona tambalya tambana napyoo Kamongonya kalai pyakamaiyoo pituu katawapi pipimi laka lao masoo lelyo.

³⁶ Enda mendepa akali mendepa nyilyambo nyetambana lao masetala andiki pitambiaka doko, tole pyala nayao gii kuki mende mee pitimbana lao masetambi. Dopa lao masetambinoaka doko, akali dokome enda doko-kisa mana epe naminilyona lao masetala baame etete nyowanimi kumapala enda doko lanyoto kapana lao masetamo kandao doko, baame masetali pyoo enda doko lanyepenge. Dopa pitamo doko koo pita daa. ³⁷ Dopaka doko, akali mendeme kyoto joo masetamopa mendeme tuu lanya palyala nayatana baa tangenya moname masetali pyoo baanya enda andiki pingi doko lanyala naenya kayatoo lao masetamo doko auu pyoo pita. ³⁸ Dopana, akali mendeme baanya enda andiki pingi doko lanyetamo dokome auu pyoo pita. Dopaka doko, akali mendeme lanyala nayatamo dokome etete auu pyoo pita.

³⁹ Akali* 7:39 Lo 7:2-3 kalyamo dokopa enda doko akalinya anjetae petenge. Dopaka doko, akali kumapatamo kandao dokopa, enda doko mendeme pii pyala nayatamopa mee pituu akali pawani kayata mendenya pupenge. Dopa pipengeaka doko, masoo miningi akali mendenya pupenge. ⁴⁰ Dopaka* 7:40 1 Ko 2:16; 7:25; Ep 3:4 doko, nambanya masingimi baa mee pititamoli pyoo pititamo doko baa mona etete yaepao pititana lao masilyo. Dee Sipitisa Gote doko namba-kisa apata kalyamoaka lao masilyo.

Sambo gote lao mena akipi kundi maitae dokonya leamo doko

¹ Indupa* 8:1 Ap 15:29; Lo 15:2,14* 8:1 Lo 14 sambo gote dupa kundi maiyoo mena akipi pyao yangatae dokonya nambame latoo.

Naimame dokonya naima pitaka mana kandapaena lao masingi. Dopaka doko, mana kandenge dokome endakali minao luiyasingi. Auu kaenge dokome endakali minao epe injisingi. ² Endakali* 8:2 1 Ko 3:18; 13:8-9,12; Ga 6:3 mendeme mana mende kandatelyona lao masetamo dokome kandao koe petala nayata. ³ Dopaka* 8:3 Lo 8:29; Ga 4:9 doko, Gote auu kaenge endakali doko Goteme kandenge.

⁴ Dopana,* 8:4 Dit 4:35,39; 6:4; 1 Ko 10:19; Ga 4:8 indupa sambo gote dupa kundi maiyoo mena akipi pyao yangatae nenge dokonya latoo. Naimame sambo gote angi mende nakatengena lao masilyamano. Gote waka mende mendasa nakatengena, Gote mendai ikiaka katengena lao masilyamano. ⁵ Endakali* 8:5-6 Eke 20:2-3; Mal 2:10; Jo 1:3; Lo 11:36; 1 Ko 1:2; 12:5-6; Ep 4:5-6; Kl 1:16-17 dupame yuunyapi kaitinyapi gote kalyamona lengema, doko kini gote longo katao kamongo longo katao pingima. Dopaka doko, dupa katataminopapi maimame Gote mendai iki kalyamona lao masilyamamo. Baa Takange Gote. Baa dupa pitakanya tenge. Naima baanya katakamailyamano. Dee naimanya Kamongo mendai iki kalyamo. Baa Jisasa Katasia. Baa ketae dupa pitaka pyoo injia-pyaa. Naima daa mambele kalyamano.

⁷ Dopaka doko, endakali dupa pitakame dopa lao masala naengema. Endakali yangi wamba sambo gote miniami dupame mena akipi nelyamano dupa sambo gote mendenya lamo lao mee masoaka katengema. Dupame natamano doko kapape kapa daape lao masala nayao nelyaminopa nyakamanya mona dokome kopeta pilinona lao nyakama-kisa tenge setenge. ⁸ Dopaka* 8:8 Lo 14:17; Kl 2:20-21; Ip 13:9 doko, nee nelyamano dokome naima Gotenya enomba dokonya mendepale joo kalyepale lao mende pyaa naenge. Naima nee nanelyamano kandao doko, naima Gotenya enomba dokonya mende daa joo nakatange. Dee naima nee nelyamano kandao doko, naima baanya enomba dokonya naima-kisa mende konda napingi. ⁹ Dopaka* 8:9 Lo 14:1,13-15; Ga 5:13 doko, mendeme emba pyalya naminilyamopa masilili pyoo katenge dokome, aopyoo latala endakali masoo miningi tambo lapae dupa minao lombasetena kandao katape. ¹⁰ Doko, masokondape napingi endakali tambo lapae mendeme kandatamopa mana kandenge akali emba sambo gote mendenya losuu andaka nee nao pititino kandao doko, baame sambo gote dupa kundi maiyoo pyao yangatae dupa nalanya mona sakatala nayatape? ¹¹ Embanya* 8:11 Lo 14:15,20 mana kandenge doko mambele masoo miningi kaiminingi Kataisame pyoo nyalanya kumiamo endakali tambo lapae doko koyata. ¹² Dee* 8:12 Mt 10:40; 18:6; Ap 9:5; Lo 14:20 embame dopa pyoo embanya kaiminingi dupa koo pimaiyoo dupanya masokondape napingi mona doko tanda maiyakamaitino dokome Kataisa-kisa koo piti. ¹³ Tenge* 8:13 Lo 14:13,20-21 dokonyaka nambame nee nato dokome nambanya kaiminingi mende koo pina lao mapisoto kandao doko, tanga tangapi namba mena akipi dee nanato. Aopyoo latala, nambame nambanya kaiminingi mende koo pina lao mapisotone lao dopa pito.

Aposele dupame mana kapa pao minapenge dupanya leamo doko

¹ Mendeme* 9:1 Ap 9:3,17; 22:17-18; 26:16; Lo 1:1; 1 Ko 9:19; 15:8; 2 Ko 12:12 namba pyalya minamopa kalyope? Namba aposele joo nakalyope? Nambame naimanya Kamongo Jisasa kanja nayope? Nambame Kamongonya kalai pyakamaingi dokonya dii doko nyakama nakalyamipi? ² Endakali* 9:2 2 Ko 3:2-3 waka dupame namba aposelena lao masala nayatamino kandawapi, nyakamame namba aposelena lao masilyamino. Doko, nyakama Kamongonya joo kalyamino dokome namba aposelena lao laitaka pilyamo.

³ Namba* 9:3-4 Lu 8:2-3; 10:8; 1 Ko 9:13-14 yapengema endakali dupanya nambame dapa lao pii yanu pingi: nambame kalai pilyo kaita dokonya nee nao katatopi endaki nao katatopi doko kapa pata. ⁵ Aposele* 9:5 Mt 8:14; 12:46; Jo 1:42; 1 Ko 7:7-8 yangi dupapi Kamongonya kaiminingi dutupapi Sipasapi dupame pingimali pyoo, nambame masoo miningi enda mende yokopyapala kaita tole payatambano doko kapa pata. ⁶ Akali* 9:6 Ap 4:36; 18:3 Banapasa nalimba nee nalanya nalimba tange iki kalai pyoo nakatapenge. ⁷ Akali* 9:7 2 Ti 2:6 mendeme yanda singi joo katao oapi pingi dupa tange sambao tangeme tange yole pyoo kateana lapae doko apimi siamipi? Akali mendeme ee mende pokatala mandyuu nala nayana lapae doko apimi siamipi? Akali mendeme mena pulumakao longo minao pituu andu ipange nyoo nala nayana lapae doko apimi siamipi?

⁸ Endakali dupame pingi mana dupa iki nambame makande pyoo lelyoaka doko, Moseseme pii pepa piamo dokonya dopaka lapae silyamo. ⁹ Doko,* 9:9-10 Dit 25:4; Lu 12:6,24; 1 Ti 5:18* 9:9-10 2 Ti 2:6 baanya pii dokonya, “Embame mena pulumakao+ 9:9-10 pulumakao Wamba Juta dupame wiisa dupa kepao nyepala yuu kyoto dupanya setengema-pyaa. Dopa petala pulumakao dupame wiisa dupa moko katao tambena lao pulumakao dupa watao wiisa-kisa dupanya katengema-pyaa. Tata mendapuame wiisa dii dupa natame lao masetala nengekaita dupa yaki pingimaka doko, Juta dupame yaki napingima-pyaa.wiisa dii moko katao tambelyamo dokonya nengekaita doko yaki pyoo tambombala nayape,” lapae silyamo. Doko, Goteme mena pulumakao dupa masetala dopa leape, pande naima masetala dopa leape? Kini, pii doko naima kandao lapae silyamo. Doko dapa: endakali mendeme ee pokalanya amatamopi dee endakali mendeme nee manditamopi dokome baa tange nee mendapua nyotoo lao masetala kalai pipenge. ¹¹ Naimame* 9:11 Lo 15:27 Gotenya epe dupa nyakamanya kaina dokonya wai pokeama. Dokonya naimame nyakama-kisa opale apalepi setamo dupa yapao manditamano kandao doko, etete andake jilyape? ¹² Endakali* 9:12 Ap 20:34-35; 1 Ko 4:12; 2 Ko 6:3; 11:9 waka dupame opale dupa nyakama-kisa nyetaminopa yaka jetamo kandao doko, naimame nyetamanopa etete yaka jeta.

Dopaka doko, naimame kapa pao nyepenge doko nyala naenya kayama. Naimame Kataisanya lao Wai Pii Epe doko kaita lyokala nayamana lao kenda pipae tata dupa pitaka mee nyoo kateama. ¹³ Losuu* 9:13 Nam 18:8,31; Dit 18:1-3 anda andake dokonya kalai pilyami endakali dupame nyakama losuu anda andake dokonya-tae nee nengema. Dee olata toko dokonya kalai pilyami endakali dupame olata toko dokonya nee silya dupanya yangi nyoo nengema. Dopa pingima doko nyakamame masala naelyamipi? ¹⁴ Mendai* 9:14 Mt 10:10; Lu 10:7-8; Ga 6:6 dopaka pyoo Wai Pii Epe lamaingi akali dupa Wai Pii Epe lamaingi dokonya Kamongome nee akipi nao katena lea.

¹⁵ Dopaka* 9:15 Ap 18:3; 2 Ko 11:9-10 doko, namba kapa pao nyepenge dupanya mendaipi mende nyala nayo. Dee indupa nambame lelyo doko nyakamanya opale mende nyakatoo lao nalelyo. Etete daa. Nambame dopa napyanya kumapuli doko yaka. Endakali mendaipi mendeme namba luilyo tenge doko mee injisina lao nambame kayala nayapenge. ¹⁶ Wai* 9:16 Jet 20:9; Ap 4:20; 9:15-16; 22:14-15; 26:16-18 Pii Epe doko lamaingi dokonya lamailyo latala namba luiyala nayapenge. Doko, nambame lamaipenge lamailyo. Wai Pii Epe doko lamaiya nayato kandao doko, namba-kisa kenda pipae koo ipata. ¹⁷ Nambame* 9:17 1 Ko 4:1; Ga 2:7 kalai pilyo doko namba tangeme yapao nyioli kandao doko, dokonya yole nyipuli. Dopaka doko, dopa daa. Goteme kalai doko nambame isoo pyakatale lao dia. ¹⁸ Dopana,* 9:18 2 Ko 11:7 nambanya kalai dokonya yole doko akipi? Nambame Wai Pii Epe doko endakali dupa lamaiyoo katenge kalai dokonya nambame kapa pao nyepenge dokonya mende tee laa nayao mee lamaingi doko nambanya yole.

¹⁹ Namba* 9:19 Mt 20:26-27; 1 Ko 10:32-33; Ga 4:4-5 endakali mendenya kendemane joo nakalyo. Dopaka doko, nambame endakali longo lao lanyalanya namba tangeme endakali dupa pitakanya kendemane jingi. ²⁰ Juta* 9:20 Ap 21:20-26; Lo 11:14 endakali dupa-pipa kalyo dokopa, nambame dupa lanyalanya Juta endakali joo katenge. Namba tangeme mana setapae Goteme Mosese maiyamo dupanya pundipundi anjetae joo nakatenge. Dopaka doko, mana setapae dupanya pundipundi anjetae joo katenge endakali dupa-pipa kalyo dokopa, nambame dupa lanyalanya mana setapae dupanya pundipundi anjetae joo katenge. ²¹ Mana* 9:21 Lo 2:12,14; Ga 2:3; 4:12 setapae dupa nasingi endakali dupa-pipa kalyo dokopa, nambame dupa lanyalanya mana setapae nasingi joo katenge. Nambame dopa lelyo doko Gotenya mana setapae dupa yakinengena lao nalelyo. Daa, nambame watao minao Kataisanya mana dokonya pundipundi katenge. ²² Dee* 9:22 Lo 11:14; 15:1; 1 Ko 10:33; 2 Ko 11:29 masoo miningi endakali tambo lapae dupa-pipa kalyo dokopa, nambame dupa lanyalanya namba masoo miningi tambo lapae joo katenge. Nambame endakali mendapua pyoo nyepenge kaita seta dupa pitakanya pyoo nyotoo latala endakali dupa pitakanya mana dupa minao katenge. ²³ Nambame Wai Pii Epe dokonya nyepenge dupa endakali waka dupa-pipa nyotoo latala Wai Pii Epe doko masetala dopa pingi.

²⁴ Endakali* 9:24 Ga 5:7; Pl 3:14; 2 Ti 4:7-8; Ip 12:1; Pa 2:10; 3:11 mendatupa mende nyoo maita pyaa pyaa pyoo alo pilyami dokonya dutupa pitakame alo pingiaka doko, mendaimi iki alo pyao ita minatala yole nyingi doko nyakamame masalapape. Dokaita doko nyakamame Gotenya yole doko nyemana lao puu lao alo pyalapape. ²⁵ Alo* 9:25 2 Ti 2:4-5; 4:8; Je 1:12; 1 Pi 5:4 pyatama lao depa lao katenge endakali dupame nyakama tange dupa pitakanya auu pyoo isoo katengema doko yole koyapenge mende nyalanya pingima. Dopaka doko, naimame yole koyala nayapenge mende nyalanya dopa pingi. ²⁶ Tenge* 9:26 Lo 8:13; 13:14 dokonya minao nambame lita etao dokonya tolao alo pingi. Kini, tenge dokonyaka minao nambame kii momange yanda auu pyoo pingi. Nambame poo pyalya pyana napingi. ²⁷ Daa, nambanya yongeme pyuani kaenge doko daa latala nambanya masingi doko watao pyoo katena lao kendemane injisingi. Nambame Wai Pii Epe doko endakali waka dupa lamaiyoo katatopa, tenda aopyoo latala Goteme nambaka watao pyatame latala dopa pingi.

Nyakama isa pyakatamane lao kandao isoo kalyepapena leamo doko

¹ Kaimia* 10:1 Eke 13:21-22; 14:22-29 paluma, nambame naimanya yumbange dupame akali Mosese watao peamino dupa-kisa piamo dupa nyakamame kame nasipimi laka lao masilyo. Dupa pitakame kopa dokonya pundipundi katao pao solowata pete Kate Pyapae doko auu pyoo pao yaleami-pyaa. ² Dupa* 10:2 Lo 6:3; Ga 3:27 pitakame Mosese-pipa pakatae kalyanya kopa dokopa solowata pete dokopanya kaimbu nyiami-pyaa. ³ Dupa* 10:3-4 Eke 16:4,35* 10:3-4 Eke 17:5-6; Nam 20:7-11; Wee 114:8 pitakame Goteme nee maiyamo mendai dokoaka nao endaki maiyamo mendai dokoaka nao piami-pyaa. Doko, Gotenya kana doko dupa-pipa awapa peamopa dupa pitakame dokonya endaki neami-pyaa. Kana doko Kataisa baa. ⁵ Dopaka* 10:5 Nam 14:26-30; Ip 3:17; Ju 5 doko, Goteme dupanya etete longo dupa auu nakayamopa dupa endakali napalenge yuu dokonya kumapae silya sana pyoo peami-pyaa.

⁶ Dopa* 10:6 Nam 11:4,34; 1 Ko 10:11; Ip 9:9 piamo dutupa pitakame naima kandao isoo kalyepale lao laitaka pilyamo. Dupame piaminoli pyoo naimame mana koo dupa minapuma laka lao putiti nakayamana. ⁷ Dupanya* 10:7 Eke 32:4,6 mendapuame piaminoli pyoo naimame sambo gote dupa minao nakatamana. Pii pepa pyapae singi dokonya, “Endakali dupame nee endakipi nalanya isa pitipala dee mali lyalanya sakateamina,” lapae silyamo. ⁸ Dupanya* 10:8 Nam 25:1-18 mendapuame piaminoli pyoo naimame kepo kolala nayamana. Dupame dopa piaminopa yuu gii mendainya iki endakali taosene kingi-ita lapoma-kisa dee tepo dupa lombapae sepala kumiami-pyaa. ⁹ Dupanya* 10:9 Nam 21:5-6; Ap 5:9 mendapuame piaminoli pyoo naimame Kamongome koo dupanya yanu nyetape nanyetape lao minao makande napimana. Dupame dopa piaminopa kanopatome dupa nao kumasia-pyaa. ¹⁰ Dee* 10:10 Eke 12:23; Nam 16:41-49; Ip 3:11,17 dupanya mendapuame piaminoli pyoo naimame mumu nalamana. Dupame dopa piaminopa endakali pyao Kumasingi Enjele dokome dupa kumasia-pyaa.

¹¹ Dupa-kisa* 10:11 Lo 15:4; 1 Ko 10:6; 1 Pi 4:7 dopa piamo dutupa pitakame endakali dupa mana nyalapale lao laitaka pilyamo. Dee piamo dutupa pepa pyapae silyamo doko, naima yuu gii etao kalyamano endakali dupa kandao isoo kalyepale lao pyapae silyamo. ¹² Dopana,* 10:12 Ga 6:1 endakali mende kyoto joo kalyona lao masetamo dokome baa isa pyakatone lao kandao katapenge.

¹³ Nyakama-kisa* 10:13 Mt 6:13; 26:41; 1 Ko 1:9; Je 1:13-14 makande pingi epeamo dupa waka mendepale daa. Endakali dupa-kisa makande pingi dopaleaka epenge. Dopaka doko, nyakamame Gote tungi pyao katapenge. Makande pingi mendeme nyakama ita minina lao baame kayala nayata. Makande pingi mende nyakama-kisa ipatamo dokopa Goteme nyakama nisalanya kaita dapa pyoo wasakata: baame nyakama pupu lasetamopa nyakamame kenda pipae doko nyoo kyoto joo katatami.

Nyakamame Gotepa Enjele koopa pyasoo naminapengena leamo doko

¹⁴ Dopana,* 10:14 Lo 14:1; 1 Jo 5:21 nambanya mona setenge paluma, sambo gote miningi mana doko wandyuu kalyepape. ¹⁵ Nyakama mona palenge endakali kalyamino dokonya nambame nyakama langilyo. Nyakama tangeme nambanya pii doko yapalapape. ¹⁶ Kapo* 10:16 Lep 3:1; Mt 26:26-28; Mk 14:22-24; Lu 22:19-20; Ap 2:42; 1 Ko 11:23-26 penge Goteme auu pisina latala auu pipae nelyamano dokome naima Kataisanya taiyoko doko-pipa pyasala naengepe? Betesa naimame konjoo nelyamano dokome naima Kataisanya yonge doko-pipa pyasala naengepe? ¹⁷ Betesa* 10:17 Lo 12:5; 1 Ko 12:12; Ep 4:4,16 mendai iki singi. Dopa pingi dokonya naima endakali longo dupa mendai joo kalyamano. Doko, naima pitakame betesa mendai dokonya nenge.

¹⁸ Isataele* 10:18 Lep 7:6 endakali dupanya mana doko masalapape: mena akipi kundi maitae dupanya nenge Isataele endakali dupame losuu anda andakenya olata toko dokonya Gote doko-pipa pyasetae kalyamino. ¹⁹ Nambame* 10:19 1 Ko 8:4 dopa lelyo doko aipa lao lelyope? Sambo gote dupa angina lao nalelyo. Sambo gote dupa kundi maingima doko angina lao nalelyoaka. ²⁰ Daa,* 10:20 Dit 32:17; Wee 106:37; 2 Ko 6:14-16; Pa 9:20 netesa endakali dupame nyakamanya olata toko dupanya kundi maingima doko enjele koo dupa lao maingima. Dupame Gote lao kundi namaingima. Dopana, nambame nyakama enjele koo dupa-pipa pyasala nayapimi laka lao masilyo. ²¹ Nyakamame* 10:21 2 Ko 6:15-16 Kamongonya kapo dokonya nao enjele koo dupanya kaponya nao napipenge. Nyakamame Kamongonya toko dokonya nee nao enjele koo dupanya tokonya nee nao napipenge. ²² Dee* 10:22 Dit 4:24; 31:21; Ekl 6:10; Ais 45:9 naimame Kamongo minao imbu pisala nayamana. Naimanya pupu lapae dokome baanya pupu lapae doko ita naminilyamano.

Opale mende pitami doko pitakame Gote lalyoo pyepape leamo doko

²³ Kini,* 10:23 1 Ko 6:12; Pl 2:21 dupa pitaka naimame pipenge kapaka doko, dupa pitakame naima nisala naenge. Dupa pitaka naimame pipenge kapaka doko, dupa pitakame naima minao epe injisala naenge. ²⁴ Endakali* 10:24 Lo 14:19; 15:2; 1 Ko 10:33; Pl 2:4 mendeme baa tangeaka nisepenge dupanya nisoo nakatenya, endakali waka dupa nisepenge dupanya nisoo katapenge.

²⁵ Mena akipi makesanya silya sambengema dupanya nyakamame moname longo lao masoo tipa pilya pyana napinya mee sambao napenge. ²⁶ “Doko,* 10:26 Wee 24:1; 50:12 isa yuu dakepi isa yuu dakenya silyamo dupa pitakapi dupa Kamongonya.”

²⁷ Masoo* 10:27 Lu 10:8 naminingi endakali mendeme nyakama baa-pipa awapa nee namana ipupa latamopa nala pawani kayami kandeno doko, pupala nee nalapale lao setatamo dupa pitaka nalapape. Nyakamame moname longo lao masoo tipa pilya pyana napyepape. ²⁸ Dopaka* 10:28 1 Ko 8:7,10-12 doko, endakali mendeme nyakama langyuu, “Mena akipi dutupa sambo gote kundi maitae mendenyana,” lea kandeno doko, nyakamame endakali dopa latamo dokopi baanya monapi lao masetala nee doko nanalapape. ²⁹ Doko, nambame nyakamanya mona doko lao nalelyo. Dolonya mona doko lao lelyo.

Moname masokondape napingi endakali mendeme nambanya masilyoli pyoo katenge doko kaita lyokapengepe? ³⁰ Nambame* 10:30 1 Ti 4:4 nee nato dokonya Gote lao yaka pilino lao nato kandao doko, dokonya endakali mendeme namba kandao pii koo lapengepe?

³¹ Dopana,* 10:31 Kl 3:17; 1 Pi 4:11 nyakamame nee natamipi endaki natamipi opale mende pitami doko pitakame Gote lalyoo pyepape. ³² Nyakamame* 10:32 Lo 14:13; 1 Ko 1:2; 8:13; 9:19-23 Jutapi tata wakapi Gotenya sosanya endakalipi dupanya mendeme koo pina lao mapisala nayao kalyepape. ³³ Nyakamame* 10:33 Lo 15:2; 1 Ko 10:24; 13:5 nambame pingili pyoo kalyepape. Nambame dupa pitakanya endakali dupa pitakame auu kaengemali pyoo pitoo lao pingi. Nambame namba tangeaka nisoo nakatenge. Daa, endakali longo dupa pyoo nyepae katena lao dupa nisoo katenge.

¹ Nambame* 11:1 1 Ko 4:16; Pl 3:17; 2 Te 3:7 Kataisame piamoli pyoo pingi. Dokotekee joo nyakamame nambame pingili pyoo pyoo kalyepape.

Losuu laanya aiyombanya opale mende andu pingi dokonya leamo doko

² Opale* 11:2 1 Ko 15:1-3; 1 Te 2:13; 4:1-2; 2 Te 2:15 mende pilya dupa pitakanya nyakamame namba lao masingima dokonyapi dee namba mana nyio nyakama langio dupa minokondape pyoo miningima dokonyapi nambame nyakama tama pilyo. ³ Dopaka* 11:3 Jen 3:16; Ep 1:22; 4:15; 5:23; Kl 2:19 doko, nyakamame akali doko baanya etanengenya aiyombana, Kataisa baa akali dupa pitakanya aiyombana, Gote baa Kataisanya aiyombana lao masipimi laka lao masilyo. ⁴ Akali* 11:4 1 Ko 3:23 mendeme baanya aiyombanya kotalepi opale mende andu petala loma setamopi Gotenya pii doko lamaitamopi dokome baanya aiyomba doko minao elya piseta. ⁵ Dee* 11:5 Lu 2:36; Ap 21:9; 1 Ko 14:34 enda mendeme baanya aiyombanya tangipi opale mende andu pyaa nayao loma setamopi Gotenya pii doko lamaitamopi dokome baanya aiyomba doko minao elya pisetaka. Enda doko baa enda mendeme baanya aiyomba iti tokao pau pinya nepenge enda dopale. ⁶ Endame* 11:6 1 Ko 11:15 baanya aiyombanya tangipi mende andu pyaa nayatamo kandao doko, baame baanya iti doko muu pyoo tokapenge. Dopaka doko, muu pyoo tokalanyapi tokao pau pinya nepalanyapi elya kayatamo kandao doko, baame baanya aiyombanya tangipi mende andu pipenge. ⁷ Akalimi* 11:7 Jen 1:26-27; Je 3:9 baanya aiyomba doko sanga pyao kotalepi opale mende andu pyaa nayapenge. Doko, baa Gote wangi tapae. Baame Gotenya makande doko laitaka pingi. Dopaka doko, endame akalinya makande doko laitaka pingi. ⁸ Doko,* 11:8 Jen 2:21-23 Goteme akali doko enda-kisa mendatupa nyepala wapuala naya-pyaa. Enda doko akali-kisa mendatupa nyepala wapuiya-pyaa. ⁹ Dee* 11:9 Je 2:18 baame enda doko lao masetala akali doko wapuala naya-pyaa. Daa, akali doko lao masetala enda doko wapuiya-pyaa. ¹⁰ Dopana, enjele dupame kandenge dokonya endame baa akalinya pundipundi petengena lao laitaka pyoo baanya aiyomba sanga pyao tangipi mende andu pipenge. ¹¹ Dopaka* 11:11 1 Ko 14:34 doko, Kamongonya joo katenge dokonya akali enda yangilyamopa, enda akali yangingiaka. ¹² Enda* 11:12 Lo 11:36 doko akali-kisa mendatupa nyepala wapuiyamo dokaita doko, akali doko enda-kisa langa lenge. Dee dupa pitaka Goteme pingi.

¹³ Endame baanya aiyombanya tangipi mende andu pyaa nayao loma setamo doko kapape kapa daape lao nyakama tangeme yapalapape. ¹⁴ Akali mendeme iti asili mandelyamo kandao doko, elya pingina lao naima endakalinya masingi dokome masingi. ¹⁵ Dopaka* 11:15 1 Ko 11:5 doko, enda mendeme asili mandelyamo kandao doko, dokome baa yati pingina lao masingi. Doko, endame baanya aiyomba sanga pina lao iti londe doko Goteme enda maiya-pyaa. ¹⁶ Dopaka* 11:16 1 Ko 1:2; 4:17; 7:17; 14:33 doko, endame aiyomba sanga pyao tangi akipi andu pyoo loma singi dokonya endakali mendeme pii tanga latoo lao masetamo kandao doko, naima aposelepi dee Gotenya sosapi dupame mana dokonya tanga laa naenge doko baame masepenge.

Kamongonya nee doko auu pyoo napenge dokonya leamo doko

¹⁷ Dopaka doko, indupa nambame nyakama pii langitoo dokome nyakama tama pyaa nayatoo. Doko, nyakamanya kambu pingi dokome nyakama nisala naenya kenda pisingi. ¹⁸ Nambame* 11:18 1 Ko 1:10-12; 3:3 nyakama pii wambao langitoo doko dapa: nyakama sosa kambu pilyamino dokopa wakale masa masa petala saa laloo pingimana lapae sepala, nambame pii doko kuki kiningi lumu lao masilyo. ¹⁹ (Kini,* 11:19 Dit 13:3; 1 Jo 2:19 nyakamanya masoo miningi endakali angi dupa panena lao saa laloo pingi mana doko nyakama-kisa ipupenge lao nambame masilyo.) ²⁰ Nyakama kambu pilyamino dokopa nyakama pitaka mendai mendai lao wambatala nyakamame nee minao epelyamili pyoo mende malisala nayao nengema. Dopa pilyaminopa nyakamanya yangi dupa mee lopo kayao kalyaminopa yangi dupa bia akipi nao kyakao katengema. Dokonya nyakamame Kamongonya nee doko kapa pao nala nayapengema. ²² Nee* 11:22 Je 2:5-6 endakipi napenge nyakamanya anda nakalyape? Pande nyakamame Gotenya sosa doko kilya kandatala kaiminingi nee daa jingi dupa minao elya pisemana lao masilyamipi? Dokonya nambame nyakama aki pii mende langyoape? Nambame nyakama tama pyuape? Daa, nambame nyakama tama napitoo.

²³ Doko,* 11:23-24 1 Ko 15:3* 11:23-24 Eke 12:14; Dit 16:3 nambame Kamongo-kisa pii nyio dake nyakama mana langiwaka: baa enge nyepala baanya yandapipi dupa laitaka piamo kuka gii dokonya, Kamongo Jisasame betesa mende nyepala Gote lao yaka pilino latala konjia-pyaa. Konjepala lao pituu, “Dake nambanya yonge dokona, doko nyakamanya silyamo. Nyakamame namba lao masoo dopa pyoo kalyepapena,” lea-pyaa. ²⁵ Nee* 11:25 Eke 24:6-8; Jet 31:31; Sak 9:11; 2 Ko 3:6; Ip 8:6-13 nao etapeaminopa mendai dopaka pyoo baame kapo penge doko nyepala lao pituu, “Kapo dakeme nambanya taiyoko dokonya-kaita pii enenge doko lao setekelyo. Nyakamame nataminoli pyoo namba lao masoo dopaka pyoo kalyepapena,” lea-pyaa.

²⁶ Nyakamame* 11:26 1 Ko 4:5 betesa dake nao kapo dakenya nao pitaminoli pyoo nyakamame Kamongo kumiamo doko panasoo natami. Dopaka pyoo pao Kamongo doko dee ipatamo dokonya tuu latami.

²⁷ Dopana,* 11:27 1 Ko 16:22; Ip 10:29 endakali mendeme auu pyoo masala nayao Kamongonya betesa doko mee ambe nao kapo dokonya nao pitamo dokome Kamongonya yonge taiyokopa dolapo minao koyaseta. ²⁸ Tenge* 11:28 Mt 26:22; 2 Ko 13:5 dokonya minao endakali mendai mendai lao dokome baa tange masokondape petala betesa doko nao kapo dokonya nao pipenge. ²⁹ Doko, baame Kamongonya yonge doko nelyona lao masala nayao Kamongonya nee dokonya natamo kandao doko, baa tange-kisa tenge sina lao nata. ³⁰ Tenge* 11:30 Ap 5:9 dokonya minao nyakamanya longo dupa yaina nyowapi yaina sowapi piaminopa dee yangi dupa isa palipiami. ³¹ Dopaka doko, naimame naima tange yapokondape pyemali kandao doko, Kamongome naima yapapala yanu nyala nayatali. ³² Dopaka* 11:32 Dit 8:5; 1 Ko 1:20; Ip 12:5-6; Pa 3:19 doko, yuunya endakali dupa-pipa naima koyala nayataminopa lao Kamongo dokome naima yapapala tenge setao tolasingi.

³³ Dopana, nambanya kaimia paluma, nyakama awapa Kamongonya nee nalanya kambu pyatamino dokopa mende malisa malisa pyepape. ³⁴ Aopyoo* 11:34 1 Ko 4:19 latala nyakama-kisa tenge setena lao kambu pyatamina, endakali mende lopo kayatamo kandao doko, baanya andaka nee napala ipupenge. Pii yangi mee silyamo dupa namba nyakama katatamisa ipato mendepa lao tolakato.

Oli Sipitisame epe dingi dupanya leamo doko

¹ Indupa* 12:1 1 Te 5:20 Oli Sipitisame epe dingi dupanya nambame latoo. Kaimia paluma, epe dingi dupa nyakamame masipimi laka lao masilyo.

² Nyakama* 12:2 Ap 2:18-19; Ga 4:8; Ep 2:11-12 netesa mee kateamino dokopa nyakamame sambo gote ema napingi dupa watao minalapale lao mendeme mendemepi pyalya lao nyia doko masilyamino. ³ Dopana* 12:3 Jo 14:26; Ap 2:21,36; Lo 10:9; Pl 2:11 nambame nyakama dake masalapape lelyo: Sipitisa Goteme sakatasilyamo endakali dupanya mendaipi mendeme, “Jisasa baa yuu koo dokonya penana,” nalenge. Dee Oli Sipitisame sakatasilyamo endakali dokome iki kapa pao, “Jisasa baa Kamongona,” lenge.

⁴ Oli* 12:4 Ep 4:4-5; 1 Pi 4:10* 12:4 Lo 12:6-8 Sipitisame epe tata tata dingi dupa singi. Dopaka doko, Oli Sipitisa mendaimi iki dingi. ⁵ Kamongonya* 12:5 Ep 4:11 kalai pyakamaipenge kalai tata tata dupa singi. Dopaka doko, Kamongo mendaimi iki dingi. ⁶ Dee kalai kapa pao pipenge mana tata tata dupa singi. Dopaka doko, kalai kapa pao pipenge mana doko naima pitaka-kisa Gote mendaimi iki sakatasingi. ⁷ Endakali* 12:7 Ap 1:8; Lo 12:6-8; 1 Ko 12:28-30; 14:26 mendai mendai lao dupame endakali dupa pitaka nisalapale lao Oli Sipitisame baanya epe mende dingi. ⁸ Oli* 12:8 1 Ko 1:5 Sipitisa dokome endakali mendeme pii masepae dupa lapale lao dingi. Dee Sipitisa dokomeaka endakali mendeme mana kandenge pii dupa lapale lao dingi. ⁹ Sipitisa* 12:9 Lo 12:3 mendai dokomeaka endakali mende tupi joo masoo miningi doko dingi. Dee endakali mende yaina pyapae dupa mee injisingi pupu lapae doko dingi. ¹⁰ Sipitisa* 12:10 Ap 2:4; 1 Ko 14:5,26; 1 Jo 4:1-3 dokome endakali mendeme kalai pupu lapae dupa kapa pao pyepale lao dita, mendeme Gotenya pii doko kapa pao panao lamaiyepale lao dita, dee mendeme sipitisa anduku Gotenyape anduku Gotenya daape lao kandao yapalapale lao pupu lapae dita pingi. Dee endakali mendeme pii tata waka mendepale dupa kapa pao laapale lao dita, mendeme pii dokonya tenge dupa kapilyalapale lao pupu lapae dita pingi. ¹¹ Sipitisa* 12:11 Lo 12:3; 1 Ko 7:7 mendai dokomeaka dutupa pitaka pingi. Baame pitoo lao masilyamoli pyoo epe waka mende naima pitaka mendai mendai lao mokosoo dingi.

Yongenya katenge longoaka doko yonge mendai iki katengena leamo doko

¹² Yonge* 12:12 Lo 12:4-5; 1 Ko 6:15; 10:17; Ep 4:25; Kl 3:15 mendai dokonya kingipi mokopi dopale dupa longo katengeaka doko, yongenya katenge longo dupa pitaka yonge mendainya iki katenge. Kataisanya apata dopaka pyoo katenge. ¹³ Doko,* 12:13 Jo 7:37-39; Ga 3:28; Ep 2:13-18; 4:4-6; Kl 3:11 Jutapi, tata wakapi, kendemanepi, meepi, naima pitaka yonge mendai doko-pipa pakatae kalyepale lao Sipitisa mendaimi naimanya kaimbu pyekea. Dee naima pitakame Sipitisa mendai doko-pipa pakatae katamana lao nyiama.

¹⁴ Yonge dokonya kingipi mokopi dopale dupa longo katenge. Mendai iki daa. ¹⁵ Mokome lao pituu, “Namba kingi daa dokonya namba yongenya katenge mende daana,” latamo kandao doko, baa yongenya katenge mende joo nakatatape? ¹⁶ Dee kaleme lao pituu, “Namba lenge daa dokonya namba yongenya mende daana,” latamo kandao doko, baa yongenya katenge mende joo nakatatape? ¹⁷ Yonge doko pitaka lengeaka pyali kandao doko, aipa petala pii sipyalipi? Dee yonge doko pitaka kaleaka pyali kandao doko, aipa petala tunduma sipyalipi? ¹⁸ Dopaka doko, dopa daa. Yongenya katenge dupa pitaka mendai mendai lao Goteme katatoo lao masiamoli pyoo katea-pyaa. ¹⁹ Yonge doko pitakanya yongenya katenge mendai iki katenge pyali kandao doko, yonge nakatapyali. ²⁰ Dopaka doko, dopa daa. Yongenya katenge longoaka doko, yonge mendai iki katenge.

²¹ Dopana, lengeme kingi kandao lao pituu, “Emba yangyala naelyamona,” laa nayapenge. Dee aiyombame moko kandao lao pituu, “Emba yangyala naelyamona,” laa nayapengeaka. ²² Daa, naimame yongenya katenge dupanya mendapua katapenge tenge andake nakalyamona lao masingi dupa katapenge kalyamo. ²³ Dee yongenya katenge angi daana lao masingi dupa naimame kandao isingi. Yongenya katenge panala nayapenge dupa naimame auu pyoo sanga pingi. ²⁴ Yongenya katenge panapenge dupa naimame dopa napipenge. Dopaka doko, Goteme yonge doko pyasoo mendai wasoo yongenya katenge dupanya mendapua katapenge tenge andake nakalyamona lao masingi dupa kenge epe sia-pyaa. ²⁵ Yonge doko saa laloo napinya yongenya katenge dupa pitakame mendai dopale joo mende kanda kanda pyoo katena lao baame dopa pia-pyaa. ²⁶ Dopana,* 12:26 Lo 12:15 yongenya katenge dupanya mende tanda nyilyamo kandao doko, yongenya katenge dupa pitaka awapa tanda nenge. Dee yongenya katenge dupanya mende lalyilyamino kandao doko, yongenya katenge dupa pitaka awapa mona yaepenge.

²⁷ Mendai* 12:27 Lo 12:5-8; 1 Ko 12:7-11; Ep 1:23; 4:12; 5:30 dopaka pyoo nyakama pitaka Kataisanya yonge joo kalyamino. Dee nyakama mendai mendai lao yonge dokonya kingipi mokopi joo kalyamino. ²⁸ Sosa* 12:28 Lo 1:1; Ep 2:20; 3:5; 4:11; Je 3:1 dokonya Goteme endakali mendapua dapa pyoo katea: mupa doko aposele dupa, laponge doko potopesa dupa, teponge doko tisaa dupa katea. Ongopa pakala endakali dupame kalai pupu lapae dupa pina lao katatala, dee ongopa pakala endakali dupame yaina pyapae dupa mee injisepengepi, endakali dupa nisepengepi, endakali isepengepi, dee pii tata waka mendepale dupa lapengepi dupa ditala katea. ²⁹ Dupa pitaka aposele daa. Dupa pitaka potopesa daa. Dupa pitaka tisaa daa. Dupa pitakame kalai pupu lapae dupa pyoo, yaina pyapae dupa mee injisoo, pii tata waka mendepale dupa lao, pii dupanya tenge dupa kapilyoo napingima. ³¹ Dopaka* 12:31 1 Ko 14:1 doko, Oli Sipitisame epe dingi etete andake dupa nyakamame nyowani kayao kalyepape.

Dee indupa nambame nyakama mana etete mupa doko laitaka pitoo.

Auu kaenge mana doko

¹ Endakali* 13:1 Wee 150:5; Lo 8:35; 14:15; Kl 1:18 dupanya pii tata wakale lengema dupa nambame latopi dee enjele dupanya pii lengema dupa latopi endakali dupa auu kayao nakatato kandao doko, nambanya pii dokome beto dili dalo lengepi meekota laiyane pii lengepi dopale jeta. ² Nambame* 13:2 Mt 17:20; 21:21; Mk 11:23; 1 Ko 14:2,15; Je 2:4-17 Gotenya pii doko panao lamaitopi, mana kandenge dupa pitakapi Goteme yalo pyoo masingi dupa pitaka kandatopi, dee yuu manda dupa mendasa pilya pena lao tuu lanya pyasepenge tupi joo masoo minatopi auu kayamaiyoo nakatato kandao doko, namba angi mende joo nakatato. ³ Nambame* 13:3 Mt 6:2 nambanya oapi dupa pitaka mokosoo maiyoo etatopi dee nambame namba yangao kumasina lao kayatopi nambame auu kayamaiyoo nakatato kandao doko, dopa pito dokome namba kukipi mende nisala nayata.

⁴ Auu* 13:4 Lo 13:8-10; 1 Te 5:14-15 kaenge dokome yapa maka nakayao malisoo katao kondo kaenge. Auu kaenge dokome endakali tilya nanyoo, tange lalyala nayao, luiyala naenge. ⁵ Auu* 13:5 1 Ko 10:24; Pl 2:4 kaenge dokome luiyala nayao, baa tangeaka nisepenge dupanya nisoo nakatao, yapa imbu nakaenge. Auu kaenge dokome baa-kisa mana koo minilyami dupanya masala naenge. ⁶ Auu* 13:6 Lo 12:9-10 kaenge dokome mana koo dupanya mona yaepala naenya, mana tolatae dupanya mona yaepenge. ⁷ Auu* 13:7 Pot 10:12; Lo 15:1; 1 Ko 9:12; 13:13; 1 Pi 4:8 kaenge dokome kenda pipae dupa pitaka nyoo soo, dupa pitakanya kiningina lao masoo, dupa pitakanya masoo malisoo, dupa pitakanya kyoto joo katenge.

⁸ Auu* 13:8 Ap 2:4 kaenge mana doko tanga tangapi etala nayata. Gotenya pii panao lamaingi kalai doko silyamoaka doko, etata. Pii tata waka mendepale dupa lenge mana doko silyamoaka doko, soaka nakatata. Dee mana kandenge mana doko silyamoaka doko, etataka. ⁹ Doko, naimame mana kandenge dokonya mendatupa kandao malata, dee Gotenya pii panao lamaingi dokonya mendatupa lamaiyoo malata pilyamano. ¹⁰ Dopaka doko, dopale dupa pitaka kandao etapenge gii doko ipatamopa, malata malata pingi mana doko etata.

¹¹ Namba wane koosa nambame wane koonya pii dupa lao, wane koo mona paliuu, wane koome masingili pyoo masoo kateo. Dopaka doko, namba angi jio dokopa wane koonya mana dupa yakineo. ¹² Epapu* 13:12 Nam 12:8; 2 Ko 5:7; Je 1:23 naimame opale kandelyamano dupa kandakinikini pyoo nakandenya galasanya joo kandelyamano. Dopaka doko, tenda kanjakao kandatama. Epapu nambame kandelyo dupanya yangi kandao malelyo. Dopaka doko, Goteme namba kanjakao kandengeli pyoo tenda nambame kanjakao kandato.

¹³ Dopana,* 13:13 Lo 5:4-5; Ga 5:6; Ep 1:15; 4:2; Kl 1:4; 1 Te 1:3; Pm 1:5; 1 Jo 4:16 masoo miningipi, masoo malisingipi, auu kaengepi tepoma dutupa mee soaka katata. Tepoma dutupanya auu kaenge doko etete mupa.

Pii tata waka mendepale lenge dokopa Gotenya pii panao lamaingi dokopa

¹ Nyakamame* 14:1 1 Ko 12:31; 14:39; 1 Te 5:20 auu kaenge mana doko watao minao kalyepape. Oli Sipitisame epe dingi dupa nyowani kayao katao Gotenya pii panao lamaingi mana doko nyepawanimi kumao kalyepape. ² Doko, endakali mendeme pii tata waka mendepale dupa lelyamo dokome endakali dupa pii lamaiya naenge. Daa, baame Gote pii lamaingi. Doko, endakali mendeme baanya pii doko aipa lelyape lao nasingi. Baa Oli Sipitisame sakatasilyamopa baame pii yalo petae dupa lenge. ³ Dopaka doko, Gotenya pii panao lamaingi endakali dokome pii lamailyamopa pii dokome endakali dupa kyoto injisoo, mona sakatasoo, mona lyuu lasoo pingi. ⁴ Pii tata waka mendepale dupa lenge endakali dokome baa tange kyoto injisingi. Dopaka doko, Gotenya pii panao lamaingi endakali dokome sosanya endakali dupa kyoto injisingi. ⁵ Nabame* 14:5 Nam 11:29 nyakama pitakame pii tata waka mendepale dupa lapimi laka lao masilyo. Dopaka doko, nyakamame Gotenya pii doko panao lamaipimi laka lao etete mupa joo masilyo. Pii tata waka mendepale latamo endakali dokome sosanya endakali dupa kyoto injisina lao kapilyala nayatamo kandao doko, Gotenya pii panao lamaitamo dokome pii tata waka mendepale latamo doko ita minata.

⁶ Dopana, kaimia paluma, namba nyakama katatamisa ipato dokopa nambame pii tata waka mendepale mende lato kandao doko, nambame aipa petala nyakama nisotope? Goteme namba opale laitaka pita mende tamopi, masingi pii mendapua tamopi, Gotenya pii mende tamopi, mana pii mende tamopi, nyakama langya nayato kandao doko, nambame kapa pao nyakama nisala nayato. ⁷ Ema napingi pulupapupi gitaa jepaepi dupanya mana mendai dopaleaka singi. Pulupalu lataminopapi gitaa pyataminopapi mende pyoo lata lata napinya mendai dopaka pyoo latamo kandao doko, aipa petala endakali mendeme wee ongo lalumu ongo lalumu lao setape? ⁸ Dee endakali mendeme wii auu pyoo nalatamo kandao doko, apimi yanda pyaa paanya baa depa latape? ⁹ Dokotekee joo nyakamame pii tolao nalatamino kandao doko, endakali mendeme aipa petala nyakamanya pii doko dopa lalumino lao setape? Daa, nyakamanya pii doko mee yuu kaina lao yakinatami. ¹⁰ Isa yuu angenya pii tata dupa longo singi. Dee pii dupanya tenge nakatenge mende sala naenge. ¹¹ Dopaka doko, endakali mendeme pii latamo doko nambame nasoto kandao doko, baame namba yuu waka tange mende lamo lao maseta. Dee nambame apata baa yuu waka tange mendeaka lamo lao masoto. ¹² Nyakamame dopaka pyoo Oli Sipitisame epe dingi dupa nyowani kaelyamino dokonya, epe dingi sosa kyoto injisepenge dupa nyakamame etete auu pyoo minamana lao masetala minao kalyepape.

¹³ Dopana, pii tata waka mendepale lenge endakali dokome pii dokonya tenge dupa kapilyalanya Goteme baa kapa pisina lao loma sepenge.

¹⁴ Nambame pii tata waka mendepale mende lao loma soto kandao doko, mendeme namba lungu pitamoli pyoo dopa lao loma sotoaka doko, nambanya mona doko mee palita. ¹⁵ Dopana* 14:15 Ep 5:19 nambame aipa pitope? Mendeme namba lungu pitamoli pyoo loma sotoaka doko, nambanya mona dokome apata loma soto. Mendeme namba lungu pitamoli pyoo lalyoo wee latoaka doko, nambanya mona dokome apata lato. ¹⁶ Doko,* 14:16 1 Ktl 16:36; Wee 106:48; 2 Ko 1:20 mendeme emba lungu pitamoli pyoo embame pii waka lao Gote tama pitino kandao doko, mana nanyingi endakali mende pititamo dokome aipa petala embame tama pitino dokonya kiniaka latape? Embame lateno doko aipa leepe lao baame naseta. ¹⁷ Embame auu pyoo tama pitinoaka doko, dokome endakali dolongo kyoto injisala nayata. ¹⁸ Nyakamame pii tata waka mendepale dupa lelyaminopapi nambame nyakama pitaka ita minao lenge dokonya nambame Gote lao yaka pilino lelyo. ¹⁹ Dopaka* 14:19 Lo 15:2 doko, losuu lao kambu pingi dokonya nambame pii tata waka mendepale lenge dupanya taosene kingi ita mende lato doko kuki epeaka doko, endakali dupa mana lamaiyanya nambanya moname masoo pii kaki yuungi iki lato doko etete epena lao masilyo.

²⁰ Kaimia* 14:20 Mt 10:16; Lo 16:19; Ep 4:14; Pl 3:15 paluma, nyakamame nyakamanya masingi dokome wane koo joo nakalyepape. Dopa napinya, nyakama mana koo dupanya wane ŋaŋa mandipae joo kalyepape. Dopaka doko, nyakamanya masingi dokome endakali angi joo kalyepape. ²¹ Pii* 14:21 Ais 28:11-12 pepa pyapae singi dokonya,

“‘Pii tata waka latamipi endakali tata waka dupanya kambu dupanya-kaitapi nambame endakali dakaita pii lamaito.

Dopa pitopaka doko, dupame nambanya pii nasetamina,’ Kamongo Goteme lea-pyaana,” lapae silyamo.

²² Dopana, pii tata waka mendepale lenge mana doko masoo minala naenge endakali dupame kandatala masina lao dupa kandao kongali pingi. Masoo miningi endakali dupa kandao daa. Dopaka doko, Gotenya pii panao lamaingi doko masoo miningi endakali dupame kandatala masina lao dupa kandao kongali pingi. Masoo naminingi endakali dupa kandao daa.

²³ Dopana,* 14:23 Ap 2:4,13 nyakama sosanya endakali dupa pitaka kambu pyatala nyakama pitakame pii tata waka mendepale dupa lataminopa mana nanyingi endakali mendapua tamopi masoo minala naenge endakali mendapua tamopi ipao kolandatamino kandao doko, dupame nyakama kyekelyaminona nalatamipi? ²⁴ Dopaka* 14:24 Jo 16:8 doko, nyakama pitakame Gotenya pii doko panao lataminopa masoo minala naenge endakali mendepi mana nanyingi endakali mendepi ipao kolandatamo kandao doko, nyakama pitakanya pii dokome baanya mona dokonya yandateme pili petala nyakama pitakanya pii dokome baa yapata. ²⁵ Dee* 14:25 Ais 45:14; Sak 8:23; Jo 4:17 baanya monanya yalo petae singi doko panatamopa baa tombauli sepala Gote tama pyoo lao pituu, “Kini, Gote nyakama-pipa awapa kalyamona,” lata.

Losuu lao kambu pingi dokonya pitamino dupa pitaka tolao pyepapena leamo doko

²⁶ Dopana,* 14:26 1 Ko 12:8-10; Ep 4:12; 5:19 kaimia paluma, nyakamame aipa pipengepe? Nyakama losuu laanya kambu pyatamino dokopa nyakamanya mendeme wee mende latamopa, mendeme mana pii mende latamopa, mendeme opale Goteme baa laitaka pita mende latamopa, mendeme pii tata waka mendepale mende latamopa, mendeme pii dokonya tenge doko kapilyeta. Dopa pitamiaka doko, utupa pitakame sosa doko kyoto injisalanya pipenge. ²⁷ Endakali mendapuame pii tata waka mendepale mende latamino kandao doko, endakali lapo tepopi mendeme iki lapenge. Dopaka doko, teponya ulutena pyakalyoame nalapenge. Mendeme latatamopa mendeme lata pipenge. Dee endakali mendeme pii doko kapilyeta pipenge. ²⁸ Dopaka doko, kapa pao kapilyepenge endakali mende nakatatamo kandao doko, losuu lao kambu pingi dokonya baa kambu piti petala, baa tange moname lata Gotepa lata pipenge. ²⁹ Dee* 14:29 Ap 17:11; 1 Te 5:21 Gotenya pii panao lamaingi akali lapo tepopi mendeme pii lamaipenge. Dopa pitaminopa pii setamino dupame aipa pyoo lelyamipi lao yapapenge. ³⁰ Dopaka doko, pii soo pititami dupanya mende Goteme pii mende maitamo kandao doko, pii lamaiyoo katatamo doko pii lao yatu lapenge. ³¹ Endakali pitaka mana nyowapi mona sakatawapi pina lao nyakama pitakame Gotenya pii doko mendeme lamaita pitamopa, mendeme lamaita lamaita pyoo lamaipenge. ³² Dee Gotenya pii panao lamaingi akali dupame pii panao lamaingi mana doko isingima. ³³ Doko,* 14:33-34 1 Ko 11:16* 14:33-34 Jen 3:16; 1 Ko 11:3,9; 1 Ti 2:11-12; Ta 2:5; 1 Pi 3:1 kyakalya kyakana pyoo lalya lana pingi mana doko Goteme sakatasala naenge. Daa, mona paliuu mana tolao miningi doko baame sakatasingi.

Sosa kalyamo dupa pitakanya Gotenya endakali dupanya mana singili pyoo losuu lao kambu pingi dokonya enda dupame nengekaita lyokapenge. Dupame pii lamaiya nayapenge. Moseseme pii pepa piamo dokonya lapae silyamoli pyoo enda dupa pundipundi joo pitipenge. ³⁵ Enda* 14:35 1 Ko 11:5 dupame opale mende mana nyemana lao masetamino kandao doko, andaka nyakamanya akalingi dupa pisepenge. Doko, losuu lao kambu pingi dokonya enda mendeme pii lelyamo doko elya pingi.

³⁶ Aa! Gotenya Wai Pii Epe boko nyakama-kisa katao sakateape? Pande, pii doko nyakama-kisa iki epeape? ³⁷ Endakali* 14:37 1 Ko 2:16; 7:40; 1 Jo 4:6 mendeme baa Gotenya pii panao lamaingi akalina lao masowapi Oli Sipitisame epe maita mende baa-kisa silyamona lao masowapi pitamo kandao doko, dopa pitamo endakali dokome nambame pepa pyao peekelyo pii dutupa Kamongome mana setea mende lamo lao masepenge. ³⁸ Dopaka doko, baame dopa lao masala nayatamo kandao doko, Goteme baa masala nayataka.

³⁹ Dopana, nambanya kaimia paluma, Gotenya pii panao lamaingi mana doko nyowani kayao kalyepape. Dee pii tata waka mendepale lenge mana doko nyakamame nee nyala nayalapape. ⁴⁰ Nyakamame* 14:40 Kl 2:5 pitamino dupa pitaka auu pyoo tolao pyepape.

Kataisa malunya dee sakatasiamo dokonya leamo doko

¹ Kaimia* 15:1 1 Te 2:13; 4:14 paluma, Wai Pii Epe nambame nyakama langio doko nyakamame masipimi laka lao masilyo. Nyakamame Wai Pii Epe doko nyepala dokonya ketae kalyamino. ² Wai Pii Epe dokome nyakama pyoo nyepae kalyamino. Dopaka doko, Wai Pii Epe dokonya pii langio doko nyakamame minalakao minala nayao mee masoo miniamili kandao doko, kapa napeali.

³ Doko,* 15:3 Ais 53:5-12; Lu 1:2; Ap 2:23; 1 Ko 11:2,23; 1 Pi 2:24 nambame pii nyio etete andake datupa nyakama langio: baame dopa pitana lao pii pepa pyapae singili pyoo Kataisa baa naimanya koo pingi dupanya kumikea. ⁴ Baa* 15:4 Wee 16:8-10; Mt 12:40; 16:21; 28:10; Ap 2:24-32 malu peteaminopa pii pepa pyepae singiliaka pyoo koto tepo dokonya Goteme baa sakatasia. ⁵ Sipasame* 15:5 Mt 28:16-17; Mk 16:14; Lu 24:34,36; Jo 20:19 baa kandateamopa maitakao akali kingi-ita mende-kisa dee lapoma dutupame baa kandeami. ⁶ Dee maitakao dutupa-pipa awapa masoo miningi kaiminingi andate yuunginya ulutena pyakalyoame baa kandeami. Kandeamino kaiminingi dupanya longo dupa mee kalyamino. Dopaka doko, yangi isa palipiami. ⁷ Dee* 15:7 Lu 24:50; Ap 12:17 maitakao Jemesame baa kandea. Dee maitakao aposele dupa pitakame kandeami. ⁸ Dutupa* 15:8 Ap 9:3-6; 1 Ko 9:1; Ga 1:16 pitakanya ete pyoo doko, namba endanya wane mandyuu nepataele dokome apata kandeo. ⁹ Aposele* 15:9 Ap 8:3; Ga 1:13; Ep 3:8; 1 Ti 1:15-16 dupa pitakanya namba etete anasale waka. Doko, nambame Gotenya sosa doko watao pyao kateo. Dopa pio dokonya namba aposele joo katapenge epe daa. ¹⁰ Dopaka* 15:10 2 Ko 6:1; 11:5,23; 1 Ti 1:14 doko, Gotenya mona epe palenge doko mambele namba kalyo dapa pyoo kalyo. Baame mona epe palyoo namba dia dokome dii namandenge mende daa. Nambame lekeleke tao aposele waka dupa pitaka ita minao kalai pio. Dopaka doko, namba tangeme napio. Daa, Goteme namba kandao mona epe palyingi dokome pio. ¹¹ Dopaka doko, nambame tamopi dupame tamopi doko angi mende daa. Naima pitakame pii dutupaka lamaiyoo kalyamanopa nyakamame pii dutupa masoo miningima.

Naima malunya dee sakataseta dokonya leamo doko

¹² Kini,* 15:12 1 Ko 6:14 Goteme Kataisa malunya dee sakatasiamo dokonya lao naimame pii lamaingi doko, aipa petala nyakamanya mendapuame, “Endakali kumapae dupa dee sakatasala nayatana,” lelyamipi? ¹³ Doko,* 15:13 Ap 2:24 endakali kumapae dupa kini dee sakatasala nayata yali kandao doko, Kataisa kini sakatasala nayaliaka. ¹⁴ Dee* 15:14 Ap 25:19; 1 Te 4:14 Kataisa sakatasala nayali kandao doko, naimame pii lamailyamano doko angi mende jala nayapumopa nyakamame masoo minilyamino doko angi mende jala nayapyaliaka. ¹⁵ Dee* 15:15 Ap 1:8,22; 4:33; 5:32; 26:16 naimame Gotenya lao pii lamaingi doko sambo lamaingi joo katapumaliaka. Doko, naimame Kataisa dee sakatasiana lao lamaingi. Dopaka doko, endakali kumapae dupa kini sakatasala naenge pyali kandao doko, Kataisa sakatasala nayali. ¹⁶ Doko, endakali kumapae dupa sakatasala naenge pyali kandao doko, Kataisa sakatasala nayaliaka. ¹⁷ Dee* 15:17 Lo 4:24-25; 10:9 Kataisa sakatasala nayali kandao doko, nyakamanya masoo miningi dokome kapa pao nyakama nisala nayapyali. Nyakamanya koo dupanya yanu doko nyakama-kisa mee sipyali. ¹⁸ Dee* 15:18 1 Te 4:16 Kataisa lao masoo minao isa palipiamino endakali dupa koyamiliaka. ¹⁹ Naimame Kataisa lao masoo malisoo kalyamanoaka doko, naima epapu kalyamano dakepa iki baame naima nisepenge jipyali kandao doko, naimame endakali koyao katenge yangi dupa pitaka ita minao naima etete koyao kondo pipae katapumali.

²⁰ Dopaka* 15:20 Lo 8:11; Kl 1:18; 1 Te 4:14 doko, dopa daa. Goteme Kataisa malunya dee sakatasia. Endakali isa palipiami dupanya wambao sakatasiamo doko Kataisa baa. ²¹ Akali* 15:21 Lo 5:12,18 mende mambele kumingi kende doko singi. Mendai dopaka pyoo Akali mende mambele endakali kumapae dupa sakatasingi. ²² Doko,* 15:22 1 Ko 15:45-49 endakali dupa pitaka Atamepa pakatae dokonya kumingi. Mendai dopaka pyoo endakali dupa pitaka Kataisapa pakatala dee lete kataseta. ²³ Dopaka* 15:23 1 Te 2:19; 4:16 doko, lete katasepenge jilyali pyoo dee lete katasingi. Wambao Kataisa dee lete katasia. Maitakao Kataisa baa ipatamo dokopa baanya endakali dupa dee lete katasepenge. ²⁴ Dokopa yuu etata. Dopa pitamopa kaitinya isingi dupa pitakapi, enomba nyoo isoo katenge dupapi, pupu lapae dupapi, dupa pitakanya pupu lapae dupa Kataisame etasetala, isingi doko Takange Gote-kisa setata. ²⁵ Doko,* 15:25 Wee 110:1; Mt 22:44 Kataisame kiŋi joo isoo katao yandapipi dupa pitaka baanya moko pundipundi Goteme katena latamo gii dokonya tuu lapenge. ²⁶ Dee* 15:26 Pa 20:14; 21:4 yandapipi ete pyoo baame etasetamo doko, kumingi kende doko etaseta. ²⁷ “Doko,* 15:27 Wee 8:6; Lo 6:9; Ep 1:22 dupa pitaka baanya moko pundipundi dokonya sina lea.” Dopaka doko, “dupa pitakana” lapae silyamo pii dokome dupa pitaka Kataisanya pundipundi sina leamo doko baa apatana lao makande napilyamo. Doko panao silyamo. ²⁸ Dupa* 15:28 Lo 9:5; Ep 4:6; Pl 3:21; Kl 3:11 pitaka Kataisa baanya pundipundi sepatamo dokopa, Ikiningi doko baa tangeme dupa pitaka baanya pundipundi sina latamo dokonya pundipundi katata. Dokopa Goteme dupa pitakanya ulusale katao isoo katata.

²⁹ Pii dutupa kini daa tamo kandao doko, endakali kumiami dupa lao masetala kaimbu nyilyamino endakali dupame aipa petala kumiami dupa nisetamipi? Kini, endakali kumapae dupa dee sakatasala nayata tamo kandao doko, aipuma dupame endakali kumiami dupa lao masetala kaimbu nyilyamipi? ³⁰ Dopa tamo doko, naimame aipuma kuka kotaka lao koyapenge dupanya tengesa pyoo katapumalipi? ³¹ Kaimia* 15:31 Lo 8:36; 2 Ko 4:10-12; Pl 1:26 paluma, Kataisa Jisasa naimanya Kamongo doko mambele nambame nyakama lao masetala luilyo doko mauwana, koteaka lao namba kumalanya pyoo kalyo. ³² Epesasa* 15:32 Ais 22:13; Lu 12:19-20; 2 Ko 1:8-9 yuu angenya nambame endakali mena kumbalo jepae dupa-pipa yanda pio. Dopaka doko, nambame mee endakali dupame masingimali pyoo masoo pioli kandao doko, dokonya namba yole aki mende nyiolipi? Endakali kumapae dupa dee sakatasala nayata tamo kandao doko, “Taita kumatama dokonya neepi endakipi dupa napama lao nao katapumali.” ³³ “Kaita miningi koo dupame endakali mana epe miningi dupa minao koyasingimana,” endakali mendeme nyakama minakasina lao kayala nayalapape. ³⁴ Nyakamame* 15:34 Ap 26:8; Lo 13:11; 1 Ko 6:5 nyakamanya kyakaenge mana doko yakinatala mona paliuu tolao masepengeli pyoo masalapape. Koo dupa deaka napyepape. Nyakamanya mendapuame Gote lao masala naelyamino. Nambame nyakama elya salapale lao lelyo.

Yonge aipale kateta dee sakatasetape dokonya leamo doko

³⁵ Dopaka* 15:35 Ga 6:8 doko, endakali mendeme lao pituu, “Endakali kumapae dupa aipa petala dee sakatatamipi? Dupa yonge aipale katao sakatatamipi?” lao pisetami. ³⁶ Emba* 15:36 Jo 12:24 akali kyakaenge! Embame ee wai pokeleno doko wambao sapuala naenge lamo kandao doko, langa lengepe? ³⁷ Dee embame ee wai pokeleno doko maitakao andao yoko pyoo katatamoli petae pokala naenge. Daa, kanopa wai lamopi ee wangi waka mende lamopi wangi iki pokenge. ³⁸ Gote* 15:38 Jen 1:11 baame masiamoli pyoo ee wai doko yoko wangyapi mandyuu katena lenge. Baame wai dupa wakale wakale mana minao yoko wangyapi mandyuu katena lenge.

³⁹ Dee lenge tenge dupa pitakanya yanu dupa mendai dopaleaka daa. Endakalinya yanu mendepaleaka, menanya mendepaleaka, yakanya mendepaleaka, wapakanya mendepaleaka katenge. ⁴⁰ Kaitinya dopale dupa kalyamopa yuunya dopale dupa singi. Dopaka doko, kaitinya katenge dupa kandengesa auu mendepale pingi. Dee yuunya singi dupa kandengesa auu mendepaleaka pingi. ⁴¹ Niki* 15:41 Dan 12:3 doko kandengesa auu mendeaka pyoo, kana doko auu mendeaka pyoo, bui doko auu mendeaka pingi. Dee bui dupa wakale wakale auu mendepaleaka pingi.

⁴² Endakali kumapae dupa dee sakatasingi doko mendai dopaleaka. Yonge malu pingi doko koyapenge. Yonge sakatasetamo doko koyala nayapenge. ⁴³ Yonge* 15:43 Pl 3:20-21 malu pingi doko koo. Yonge sakatasetamo doko epe. Yonge malu pingi doko tambo lapae. Yonge sakatasetamo doko pupu lapae. ⁴⁴ Yonge* 15:44 1 Ko 2:14-15; 2 Ko 5:1; Ip 4:12; Ju 19 malu pingi doko isa yuu angenya-tae mende. Yonge sakatasetamo doko kaitinya-tae mende. Isa yuu angenya-tae yonge katatamo kandao doko, kaitinya-tae yonge katataka. ⁴⁵ Pii* 15:45 Jen 2:7; Jo 6:63; 1 Ko 15:20-28; 2 Ko 3:6,17 pepa pyapae singi dokome apata lao pituu, “Akali tee pyao kateamo Atame doko lete katenge mende jiana,” lapae silyamo. Dee ete pyoo kateamo Atame doko lete katasingi Sipitisa mende jia. ⁴⁶ Dopaka doko, wambao naima Sipitisame kaitinya-tae yonge lete katasingi doko katao nakalyamano. Daa, wambao naima isa yuu dakenya-tae yonge doko katao kalyamano. Tenda naima kaitinya-tae yonge doko katao katatama. ⁴⁷ Akali* 15:47 Jen 2:7; Dan 7:13 tee pyao kateamo doko yuu dakenya-tae. Akali laponge doko kaitinya katao epea. ⁴⁸ Isa yuunya endakali dupa akali yuunya-tae dopale. Kaitinya endakali dupa akali kaitinya katao epeamo dopale. ⁴⁹ Indupa* 15:49 Lo 8:29; Pl 3:21 naima akali yuunya-tae doko wangi tao kalyamano. Tenda dopaka pyoo akali kaitinya katao epeamo doko wangi tao katatama.

⁵⁰ Kaimia* 15:50 Jo 3:5-6; 1 Ko 6:13 paluma, nambame lelyo doko dapa lao lelyo: Isa yuu angenya endakali dupame Goteme isingi panda doko kapa pao nyala nayapenge. Dee koyapenge dokome koyala nayao katapenge doko kapa pao nyala nayapengeaka.

⁵¹ Kandeleno!* 15:51-52 1 Te 4:15-17* 15:51-52 Nam 10:3; Joe 2:1; Mt 24:31 Goteme yalo pyoo masoo katea mende nambame nyakama langilyona, naima pitaka kumao etala nayatama. Dopaka doko, beto ete pyoo doko latamo dokopa etete lee mendai lenge lependi lakengeli pyoo naima pitaka minao aloo pita. Doko, kini beto doko latamopa endakali kumapae dupa koyala naena lao dee sakatasetala naima minao aloo pita. ⁵³ Doko,* 15:53 2 Ko 5:1-5 koyapenge yonge dake koyala nayapenge yonge jepenge. Dee kumapenge yonge dake kumala nayapenge yonge jepenge. ⁵⁴ Dopana,* 15:54 Ais 25:8 koyapenge yonge dake koyala nayapenge yonge joo dee kumapenge yonge dake kumala nayapenge yonge joo pitamopa, pii dapa lao pepa pyapae silyamo doko angi jeta:

“Goteme yanda pyoo ita minatala kumingi doko etasalakao etasetea!”

⁵⁵ “Kumingi* 15:55 Osi 13:14; Pa 20:14 mana dokome endakali dupa kapa pao kumasala nayapenge.

Kumingi dokonya pupu lapae doko dee nasilyamo.”

⁵⁶ Koo* 15:56 Jo 16:33; Lo 6:14; 7:7,13 pingi doko kumingi dokonya yandate. Dee mana setapae dupame koo pingi doko pupu lasingi. ⁵⁷ Dopaka doko, Gote tama pimana! Naimame yanda pyoo ita minalapale lao baame naimanya Kamongo Jisasa Kataisa-kisa naima pupu lasilyamo.

⁵⁸ Dopana,* 15:58 2 Ktl 15:7; Pa 14:13 nambanya mona setenge kaimia paluma, nyakama kyoto joo ema napyoo kalyepape. Nyakamame Kamongonya kalai pyakamailyamino doko mee maa yangala naelyamanona lao masetala koteaka lao pyokondape pyoo pyakamaiyoo kalyepape.

Gotenya endakali dupa nisoo muni pyasepenge dokonya leamo doko

¹ Indupa* 16:1 Ap 24:17; Lo 15:25-26; 2 Ko 8:1-9; Ga 2:10 nambame Gotenya endakali Jutia yuu dokonya kalyamino dupa nisoo muni pyasepenge dokonya lelyo. Nambame Galasia yuu dokonya sosa wakale wakale kalyamino dupame pina leoliaka pyoo nyakamame pyepape. ² Nyakama* 16:2 Mt 28:1; Ap 20:7; 2 Ko 9:4-5 pitaka mendai mendai lawame muni nyetamili pyoo Sandee dii lao nyakamanya andaka pituu mokosepala yangi waka nyoo elyambu pyoo kalyepape. Namba ipato dokopa muni pyasalanya kutala nayatamina dopa pyepape. ³ Namba* 16:3 2 Ko 8:18-19 ipupato dokopa nyakamame akali mendatupa makande petataminopa nambame pepa mende wakale wakale maitala nyakamame nisoo muni maitami dupa mandyakamaiyoo Jetusaleme pena lato. ⁴ Dee* 16:4 Ap 20:4 namba apata pupenge jetamo kandao doko, awapa patama.

Polome dopa pitona dopa pitona leamo doko

⁵ Namba* 16:5 Ap 19:21; 20:1; Lo 15:26; 2 Ko 8:1 Masetonia yuu ongonya pato lao masilyona, pato ongopa ongonya-kaita nyakama katatamisa ipato. ⁶ Ipupala* 16:6 Lo 15:24; Ta 3:12 nyakama-pipa gii mendatupa katato lao masilyo. Koo kana palitamo gii dutupa pitaka nyakama-pipa katatope lao masala naelyo. Dee maitakao namba mendakaita pato dokopa nyakamame namba kaitini pato dupanya nisetami. ⁷ Doko,* 16:7 Ap 18:21 namba pao pituu nyakama kandao yakinama napato. Kamongome yakana lao masetamo kandao doko, namba nyakama-pipa gii mendatupa katapuma laka lao masilyona katatama. ⁸ Dopaka* 16:8 Lep 23:15-21; Dit 16:9-11 doko, ae Epesasa mee katao Pendekosa gii doko kandao nyoto. ⁹ Doko,* 16:9 Ap 19:8-10; 2 Ko 2:12; Kl 4:3; Pa 3:8 nambame ae kalai andake pyoo dii longo mandipenge kaitini doko lumbapae sipumopa, dee tanga lao kaitini lyokalanya pingi endakali dupa longo kalyamino.

¹⁰ Timoti* 16:10 Ap 16:1; 1 Ko 4:17 baa nyakama kalyamino ongonya epea kandeno doko, baa nyakamanya kaina dokonya paka nakayao mona epe palyoo katatamopana nyakama kandao kalyepape. Doko, baame Kamongonya kalai nambame pilyo dokonyaka pingi. ¹¹ Dopana,* 16:11 1 Ti 4:12; 2 Ti 1:7 endakali mendeme baa kilya nakandalapape. Dee nyakamame baa namba katatosa pilyina lao mona minao auu pisakamaiyoo kaita ipupenge dupanya baa nisalapape. Nambame masoo miningi kaiminingi dupa-pipa baa malisoo kalyo.

¹² Kaiminingi* 16:12 Ap 18:24; 1 Ko 1:12; 3:6 Apolosanya pii doko dapa: nambame paa longosa kongo lao baa masoo miningi kaiminingi mendapua-pipa nyakama katatamisa epena lapuaka doko, baa epapu naipatoo lao kyoto jilyamo. Dopaka doko, maitakao baa ipupenge jetamo dokopa ipata.

Pii etao leamo dupa

¹³ Nyakama* 16:13 Wee 31:24; Ep 6:10 lenge tao katao, masoo miningi doko kyoto joo minao, akali joo tupi joo kalyepape. ¹⁴ Pitamino dupa pitaka auu kayao pyepape.

¹⁵ Nyakamame* 16:15-16 Lo 16:5; 1 Ko 1:16* 16:15-16 Pl 2:29-30; 1 Te 5:12; Ip 13:17 akali Setepanasapi baa palupi dupa masilyamino. Akaya yuu dokonya dupame kandasoo masoo miniami. Dopa petala dupa tangeme Gotenya endakali dupa nisemana lao masetala nisokondape pyoo nisoo kalyamino. Kaimia paluma, nambame nyakama kyoto joo langilyona, nyakamame endakali dopale dupapi dee dupa-pipa lekeleke tao kalai mendai pingi dupa pitakapi dupanya piipi manapi dupa watao minalapape.

¹⁷ Setepanasapi Potyunetasapi dee Akaikasapi akali dutupa namba kalyo angenya epeami dokonya namba eteke pilyo. Nyakama kapa pao naipupenge jiamo dokonya dupame nyakama alo pyoo epeami. ¹⁸ Dupame* 16:18 Pl 2:29 nambanya mona epe palisakao dee nyakamanya mona epe palisakao piami. Dopana, nyakamame akali dopale dupa masalapape.

¹⁹ Yuu* 16:19 Ap 18:2,18,26; Lo 16:5; 2 Ti 1:15 Esia Potopinja dokonya sosa wakale wakale kalyamino dupame nyakama kandao auu pyoo kalyepape lelyamino. Akuilapi Pitisikapi dee dolaponya andaka endakali kambu pingi sosa dokopi dupame Kamongo lao masetala nyakama kandao auu pyoo kalyepape lakondape pyoo lelyamino. ²⁰ Masoo* 16:20 Lo 16:16; 2 Ko 13:12 miningi kaiminingi ae katapimi dupa pitakame nyakama kandao auu pyoo kalyepape lelyamino.

Nyakamame nyakama tangelapo mende auu pyoo katena laa laa pyoo, Gotenya endakali dupame pipengeli pyoo mende kopyoo nunu pii pii pyoo kalyepape.

²¹ Nyakama* 16:21 Ga 6:11; Kl 4:18; 2 Te 3:17 auu pyoo kalyepape lelyo pii dake namba Polo tange kingimi pyekelyo.

²² Endakali* 16:22 Lo 9:3; 1 Ko 11:27; Ga 1:8-9; Pl 4:5 mendeme Kamongo doko auu nakayatamo kandao doko, baa yuu koo dokonya pena. Kamongo, emba ipu!

²³ Kamongo* 16:23 Lo 16:20 Jisasame nyakama kandao mona epe palena. ²⁴ Kataisa Jisasa-kisa nambame nyakama pitaka auu kayao kalyo.