WAI PII EPE
MAKEME
PEPA PIAMO DOKO
Pii Wambao Kandapenge Dupa
Jisasa kumateamopa, ee kana 70 dosale, wai pii epe doko Makeme Giriki piimi wambao pepa pia. Jisasa baa-kisa pupu lapae siamopa, kalai tata dupa pitaka pia. Baame endakali dupa mana lamaiyoo, imambu koo dupa watao pyao, endakalinya koo dupa kunanya nepakamaiyoo piamopa, naimame kandeama. Jisasa baa tangeme baanya kenge doko Akalinya Ikiningina lea. Baanya lete katenge epe dokome, endakali dupa pyoo nyalanya, epelyona lea.
Makeme Jisasanya kalai piamo longo dupa atome lao pepa pyao pituu, Jisasanya pii leamo dupa longo lao pepa napia. Baame Jisasanya atome pii etasoo pituu, baanya yandapipili dupame poko itanya pyao yukuiyaminopa, kumapala, yuu gii tepo dokonya sakatatala, baa ketae kaiti-kisa peana lao pepa pia.
1Jone Kaimbu Pingi Dokome Pii Lamaiyamo Doko
(Mt 3:1-12; Lk 3:1-9,15-17; Jn 1:19-28)
1 Gote Ikiningi Jisasa Kraisanya wai pii epe doko dapa pyoo tee pia.
2 Propeta Aisaiyanya buku dokonya Goteme leamoli pyoo, dapa lao pepa pyapae singi: “Salapape! Nambame nambanya wai akali doko wambao pena latopa, baame Mesaeya dokonya kaitini doko depa lakamaita. 3 Akali dokome endakali napalenge yuu mendenya katapala, wii lao katata. Baame wii lao, ’Kamongonya kaitini doko depa lakamaiyepape. Kaitini koeyapae dupa tolasakamaiyepape’ lao katata.” 4 Goteme leamoli pyoo, Jone kaimbu pingi doko endakali napalenge yuu dokonya ipao katapala, “Nyakama mona kapilyetala, kaimbu nyalapa. Dopa pitaminopa, Goteme nyakamanya koo dupa kunao nepekena” lao katea. 5 Dopa piamopa, Judia tangepi, Jerusalema tangepi, longo dupa baa kateamo dokonya pii sala peami. Pupala nyakamanya koo dupa lao panata piaminopa, baame endaki Jodane dokonya kaimbu pyata pyakamaiya.
6 Jone baa yonge pee kamele itimi wasepaepi, matapu bulumakao yanungimi wasepaepi, dupa pyoo katea. Baa paiyombapi, ambulya kakasa lyingipi, dupa nao katea. 7 Baame endakali dupa lamaiyoo, “Akali maitapyao epelyamo dokonya pupu lapae dokome namba ita minao. Nambame luma lakapala, baanya moko pee kende tata lakamaiyanya, namba epe daa. 8 Nambame endakimi nyakama kaimbu pyekelyona, baame Oli Spirit dokome kaimbu pyakatana” lea.
Joneme Jisasanya Kaimbu Pyakamaiyamo Doko
(Mt 3:13-17; Lk 3:21-22)
9 Gii dokopa, Jisasa baa yuu Galilea, taono Nasarete katao epeamopa, endaki Jodane dokonya Joneme Jisasanya kaimbu pyakamaiya. 10 Jisasa kaimbu nyepala, endaki ketae pyakalyiamopa, kaiti saa papa laloo petala, Oli Spirit doko yaka maiyolee joo, lanao ipao baa-kisa petea. 11 Dokopa kaiti-kisa katao pii mende lea dokome lao pituu, “Emba nambanya Ikiningi mona setenge doko. Namba tange emba etete auu kaengena” lea.
Sataneme Jisasa Minao Makande Piamo Doko
(Mt 4:1-11; Lk 4:1-13)
12 Dokopa endakali napalenge yuu mendasa, Oli Spirit dokome Jisasa lanyoo pea. 13 Pao mena yanapi kapu katengema yuu dokonya yuu gii 40 kateamopa, Sataneme baa minao makande pia. Dokopa, enjele dupame ipao baa nisiami.
Jisasame Kalai Tee Pyao Piamo Doko
(Mt 4:12-17; Lk 4:14-15)
14 Jone kaimbu pingi doko anjeteaminopa, Jisasa Galilea pupala, Gotenya wai pii epe doko lamaiyoo katea. 15 Baame lao pituu, “Goteme wamba gii seteamo doko indupa ipao palipilyamo. Gotenya isingi mate doko tengesa ipatelyamona, nyakama mona kapilyetala, wai pii epe doko masoo minalapa” lea.
Jisasame Pisa Nyingi Akali Kitomende Epena Leamo Doko
(Mt 4:18-22; Lk 5:1-11)
16 Jisasa Galilea pete lemba dokonya pao kandeamopa, pisa nyingi akali Saimonepa, kaiminingi Andruapame umbene nuu mende endaki pete dokonya pyandao pisa nyoo kateambi. 17 Jisasame dolapo lamaiyoo, “Nyakambame pisa nyingimbali pyoo, endakali nyalapale mana langitoo, namba watao ipupa” lea. 18 Gii dokopaka akali dolapome umbene nuu dupa yakinatala, baa watao peambi. 19 Umbisale pateaminopa, Jisasame akali Sebedi ikiningi Jemesa, Jonepa sipi andaka umbene nuu tambuo peteambino kandea. 20 Kandatala baame dolapo epena lea. Dopa leamopa, nyakambanya takange Sebedi, kalai akali dupa-pipa sipi dokonya yakinatala, Jisasa watao peambi.
Jisasame Imambu Koo Mende Watao Piamo Doko
(Lk 4:31-37)
21 Jisasame akali kitomende dutupa-pipa pao Kapename pyakameami. Pyakamatala Sambata gii dokonya Judamanya lotuu anda dokonya kolandatala, Jisasame endakali dupa mana lea. 22 Baame mana leamo doko, Mosesanya loo mana nyepae akali dupame mana lengemali pyoo laa naeya. Baa-kisa pupu lapae singi joo mana leamosa, endakali dupame sepala, paka kaeyao walu leami. 23 Gii dokopa, akali imambu koo paleta mende peteamo dokome wii lao, 24 “Nasarete tange Jisasa, emba Gotenya akali anali latae doko nambame kandengena, embame naima aipa pyaa epepe? Naima minao koeyasalanya epepe?” lea. 25 Dokopa Jisasame baa pyalanya lao, “Embame embanya nengekaita lyokatala, akali dake yakinatala puu!” lea. 26 Dopa leamopa, imambu koo dokome akali doko minao walu lasetala, ae andake mende lao akali doko yakinatala pea. 27 Peamo kandatala, endakali dupa pitaka etete paka kaeyao walu latala, mende lamai-lamai pyoo, “Dake aipa pilyape? Dake mana waka pupu lapae singi mende-lamo! Baame imambu koo dupame mende pina lelyamopa, lelyali pingima-lamona” leami. 28 Dokopa yuu Galilea dokonya Jisasame piamo dupa pupae lao taeyami.
Jisasame Endakali Yaina Pyapae Longo Mee Jakamaiyamo Doko
(Mt 8:14-17; Lk 4:38-41)
29 Jisasa, Jemesa, Jonepi, dutupa Judamanya lotuu anda doko yakinatala, Saimonepa, Andruapanya andaka apata peami. 30 Pao pyakamalu piaminopa, Saimonenya enda imange doko yonge itaita pimupa, yaina silyamona lao Jisasa lamaiyami. 31 Lamaitiaminopa, enda doko siamo dokonya pupala, Jisasame baanya kinginya minatala sakatasia. Dokopa yonge itaita piamo doko mee jeteamopa, enda dokome dokaita nee nyoo, nena lao maiya.
32 Niki landa piamopa, endakali mendapuame yaina pyapaepi, imambu koo paletapi, dupa laminao baa kateasa epeami. 33 Endakali taono tange dupa pitaka anda kambu dokonya kapatae kateami. 34 Endakali yaina tata longome pyapae dupa baame mee jakamaiya. Dee baame imambu koo longo dupa watao pyakamaiyaka. Imambu koo dupame baa kandengema dokonyana, dupame pii laa naena daa lea.
Jisasame Yuu Andake Galilea Dokonya Pii Lamaiyamo Doko
(Lk 4:42-44)
35 Yuu ene yongalanya piamopa, Jisasa sakatao, endakali napalenge yuu mendenya pupala, dokonya loma soo katea. 36 Kateamopa, Saimonepi, endakali apata kateamino dupame baa kutao peami. 37 Pao kandatala baa lamaiyoo, “Endakali pitakame emba kutilyaminona” leami. 38 Jisasame dokaita lamaiyoo, “Nambame endakali dupa pitaka wai pii epe doko lamaipenge, tenge dokonya epeona, taono yakane tengesa silyamo dokaitanya apata pii lamaitoo mua” lea. 39 Dopa latala baame Galilea yuu doko pitakanya pao, Judamanya lotuu anda dupanya pii lamaiyoo, imambu koo dupa watao pyakamaiyaka.
Jisasame Akali Mendenya Kopetali Mee Jakamaiyamo Doko
(Mt 8:1-4; Lk 5:12-16)
40 Akali kopetali mende Jisasa kateasa ipao luma lakapala, baame kyeto joo lamaiyoo, “Embame nambanya yaina dake mee jakalapo lao maseteno doko, mee jakalapenona” lea. 41 Dokopa Jisasame akali doko kondo kaeyapala, kingimi watandatala baa lamaiyoo, “Nambame embanya yaina doko mee jipyali lao masilyona, epapu embanya yaina doko mee jekelyona” lea. 42 Dopa lalu piamopa, akali dokonya kopetali yaina doko mee jia. 43 Dokopa Jisasame kyeto joo baa lamaiyoo, “Nambame embanya pyakalo doko mende lamaiya naenya, pitisa dokome emba kandena puu. Pupala Mosesame wamba mana seteamoli pyoo, dopale mende Gote kundi maitinopa, endakali dupame embanya yaina doko mee jipya-lamo lao kandenana” lea. 45 Jisasame dopa leamoaka doko, akali dokome pupala, piamo dupa lao taeya. Dopa piamo dokonya, Jisasa taono mendenya panao napenya, endakali napalenge yuu dupanya katea. Kateamopa, endakali dupa yuu pitakanya katao baa kateasa epeami.
2Akali Papa Tambutae Mende Jisasame Tolasakamaiyamo Doko
(Mt 9:1-8; Lk 5:17-26)
1 Gii mendatupa pateamopa, Jisasa baa Kapename pilyia. Pilyeteamopa, baa andaka kalyamo lapae doko siami. 2 Sepala endakali longo dupa ipao, andaka kamandapi tumbiaminosa, panda nasia. Dokopa Jisasame dokaita wai pii epe doko lamaiyoo kateamopa, 3 akali kitomendeme akali papa tambutae mende soo epeami. 4 Ipatala kandeaminopa, endakali tumbia dokome, kolandapenge nanjiamosa, akali doko soo anda ketae pyakalyiami. Pyakalyetala, anda yame pyatae dokonya kaina dosa lopao kapya leami. Dopa petala, lapa toko dokonya kende katatala, lanao pyandeami. 5 Dokopa akali dokaitame baa tungi pilyamino lao kandatala, Jisasame akali papa tambutae doko lamaiyoo, “Wane, embanya koo dupa kunao nepekelyona” lea. 6 Dopa leamopa, Mosesanya loo mana nyepae akali mendapu peteamino dupame nyakamanya mona andaka masoo pituu, 7 “Akali dakeme aipuma Gote lamba lao dopa lelyape? Endakali mendeme koo dupa kunao nepala naenge. Goteme iki koo dupa kunao nepengena” lao masiami. 8 Masiamino dupa Jisasame kandatala dokaita lamaiyoo, “Aipuma nyakamame dopa lao masilyamipi? 9 Akali dakenya koo dupa kunao nepakamailyona lapu dokopa, nambame koo kunao nepenge pupu lapae doko singi-lamo lao nyakamame nakandelyamino. Dee akali dake lamaiyoo, emba sakatatala, embanya lapa toko doko nyoo soo, puu lato dokopa, nambame koo kunao nepenge pupu lapae doko singi-lamo lao kanjamino.+ 2:9 Giriki piimi dapa lao pepa pyapae silyamo: “Akali papa tambutae doko lamaiyoo, anduku mee petala lapengepe? Embanya koo dupa yakinatae lamaipengepe, pande embanya lapa toko doko nyoo kaita paeya lamaipengepe?” Pii dokonya tenge doko yalo petae katapyanya, Enga piimi nyepengeli pyoo kapilyetae kalyamo.10 Dopaka doko, Akalinya Ikiningi dokome isa yuu dakenya katao, endakali dupanya koo dupa kunao nepenge pupu lapae doko baa-kisa singi-lamo lao kanjepalena” lea. Dopa latala baame akali papa tambutae doko lamaiyoo, 11 “Emba sakata. Sakatatala embanya lapa toko doko nyoo soo, andaka puu lelyona” lea. 12 Dopa leamopa, akali doko pupae sakatatala, endakali dupanya enombanya lapa toko doko nyoo soo, kamanda pea. Peamopa, endakali dupame kandatala, paka kaeyao walu lapala, Gote mambo pyao, “Wamba naimame dapale mende nakandeamana” leami.
Jisasame Alopiasa Ikiningi Lipai Epena Leamo Doko
(Mt 9:9-13; Lk 5:27-32)
13 Jisasa baa Galilea pete lemba dokonya deaka pea. Dokopa endakali kambu andake mende baa kateamo dokonya epeaminopa, dokaita mana lamaiya. 14 Lamaitala baa kaita pao pituu, Alopiasa ikiningi Lipai takisa nyingi anda dokonya peteamo kandatala baa lamaiyoo, “Emba namba watao ipu” lea. Dokopa baa sakatatala, Jisasa watao pea.
15 Jisasapi, baanya disaipolo dupapi, Lipainya andaka pupala, nee nao peteami. Peteamino dokonya, koo pingipi, takisa nyingipi, longo mendapu Jisasa watao peamino dupa apata nee nao peteami. 16 Mosesanya loo mana nyepae akali Parasai dupame kandeaminopa, Jisasa koo pingipi, takisa nyingipi, dupa-pipa nee nao apata peteamopa, baanya disaipolo dupa tipa pyoo, “Baa aipuma koo pingipi, takisa nyingipi, dupa-pipa nee nao pilyape?” leami. 17 Jisasame pii leamino doko sepala dokaita lamaiyoo, “Endakali yaina napingi dupa dokosa yangyala naenge. Endakali yaina pyapae dupa dokosa yangingi. Nambame endakali tolatae dupa wii lao lanyalanya naepeo. Endakali koo pingi dupa wii lao lanyalanya epeona” lea.
Gote Loma Soo Nee Nanao Katenge Mana Dokonya Jisasa Tipa Piamino Doko
(Mt 9:14-17; Lk 5:33-39)
18 Jone kaimbu pingi dokonya disaipolopi, Parasaipi, dupame Gote loma soo nee nanao kateami. Dopa piaminopa, endakali dupame Jisasa tipa pyoo, “Jonenya disaipolopi, Parasaipi, dupa Gote loma soo nee nanao kataminopa, aipuma embanya disaipolo dupa dopa napilyamipi?” leami. 19 Jisasame dokaita lamaiyoo, “Akali mendeme enda kelyapala, watapae pyao, baanya tata dupa-pipa apata kalyamo gii dokopa, baanya tata dupame nee nala naenya kaengemape? Daa, enda kelyelyamo akali doko kalyamo dokopa, watapae pyao nee nengema. 20 Akali enda kelyenge dopale joo, namba nyakama-pipa apata katao, nee nao kalyamano. Gii mendepa, akali waka mendapuame namba nyokonyoo patataminopa, nambanya disaipolo dupa loma soo nee nanao katatamina” lea.
21 Dopa latala kongali pii mendeaka dee Jisasame lao pituu, “Endakali mendeme lapalapa kaketapae etete enenge mendeme yonge pee atingi mendenya tii telyamo dokonya kii pimbala naenge. Endakali mendeme lapalapa etete enenge mende atingi-kisa kii pimbatala, wasa pyatamopa, enenge doko inungunyetamo dokome, atingi doko kanguo koeyaseta. 22 Dopaka pyoo, endakali mendeme waene enenge kamuo, penge meme yanungimi wasepae atinginya pyandatamo, dokome waene doko bolo lapala, penge atingi doko kangutamopa, waenepa, pengepa, lapota koeyata. Tenge dokonya, waene enenge kamupae doko penge atinginya kamuo pisala naenge. Waene enenge doko penge enengenyaka kamuo pisingina” lea.
Jisasa Baa Sambata Isingi Doko
(Mt 12:1-8; Lk 6:1-5)
23 Sambata gii mendenya Jisasapi, baanya disaipolo dupa-pipa wita ee kaina mendenya pao pituu, baanya disaipolo dupame wita dii dupa kii lao nyepa-nyepa pyoo peami. 24 Dopa piaminopa, Parasai dupame Jisasa lamaiyoo, “Sambata gii dokonya akali dakaitame loome daa latae singi doko yalelyamino kanda” leami. 25 Dokopa Jisasame dokaita lamaiyoo, “Dapitimi piamo doko nyakamame pepanya itaki napiamipi? Wamba akali Abiata doko pitisa mupa dupanya aiyomba joo kateamopa, Dapitipi, akali apata kateamino dupa lopo kaeyami. Lopo kaeyapala, Dapitimi Gotenya lotuu andaka kolandatala, betesa Gote opa maitae, pitisa dupame iki napenge siamo dupa nyepala, akali dupa maiyoo neana” lea. 27 Dopa latala baame dokaita dee lamaiyoo, “Goteme Sambata gii doko lao masetala, endakali wasala naeya, etete daa. Endakali lao masetala, Goteme Sambata gii doko setea. 28 Akalinya Ikiningi dokome Sambata gii doko apata isoo kalyamoakana” Jisasame lea.
3Jisasame Akali Kingi Yangi Talyanga Mende Tolasakamaiyamo Doko
(Mt 12:9-14; Lk 6:6-11)
1 Gii mendepa Jisasa baa Judamanya lotuu anda dokonya peamopa, akali kingi yangi talyanga mende peteamo kandea. 2 Parasai dupame Jisasa kote lamana latala, baame akali doko Sambata gii dokonya kingi doko tolasakamailyape lao, isokondape petae peteami. 3 Jisasame akali kingi yangi talyanga doko lamaiyoo, “Emba sakatatala, endakali pitakanya enombanya kalya ipu” lea. 4 Dopa latala baame dokaita tipa pyoo, “Sambata gii dokonya kalai koo pipengepe, pande epe pipengepe? Dee endakali pyao kumasepengepe, pande nisepengepe?” lea. Dopa leamopa, dokaita ema napiami. 5 Dokaitame akali kingi yangi talyanga doko kondo kaeyala naeyaminosa, Jisasame imbu kaeyao dokaita kandayoko latala, akali doko lamaiyoo, “Embanya kingi tinoka” lea. Leamoli pyoo baanya kingi doko tinokateamopa, tolea. 6 Tolaseteamopa, Parasai dokaita kamaka pyakalyetala, Kiŋi Erote Antipasa tata dupa-pipa, Jisasa aipa petala pyao kumasemape lao, yapa pao kambuiyami.
Endakali Kambu Longome Jisasa Watao Peamino Doko
7 Dopa piaminopa, Jisasapi, baanya disaipolo dupapi, anda doko yakinatala, Galilea pete dokonya peami. Peaminopa, Galilea tangepi, Judia tangepi, Jerusalema tangepi, Idumia tangepi, endaki Jodane omotena tangepi, Taeya tangepi, Saidone tangepi, kambu longo dupame Jisasame pilyamo lapae dupa sepala, baa kateamo dokonya epeami. 9 Wamba baame endakali yaina pyapae longo mee jakamaiyamo kandeamino dokonya, endakali waka yaina pyapae longome baa watandamana latala, tuu-tuu lao baa katao tambukinalanya piaminosa, sipi yakane mende disaipolo dupame depa lekena lea. 11 Imambu koo dupame baa kandeaminoli pyoo, baa kateamo dosa ipao tombauli sepala puu lao, “Emba Gote Ikiningina” lata piami. 12 Dokopa Jisasame kyeto joo imambu koo dokaita lamaiyoo, “Nyakamame namba dokona lao panala naeyalapape, eteteaka daana” lea.
Jisasame 12 Disaipolo Yapao Nyiamo Dutupa
(Mt 10:1-4; Lk 6:12-16)
13 Jisasa baa yuu manda mendenya pupala, akali mendatupa yapao nyotoo lao masiamo dutupa epena leamopa, baa kateamo dokonya epeami. 14 Epeamino dupanya akali 12 dutupa yapao nyepala, baa-pipa tole katamana latala, kenge aposolo maiya. Dutupame wai pii epe doko lamaiyoo, dee imambu koo dupa watao pingi pupu lapae doko maiyanya yapao nyia. 16 Baame 12 disaipolo dutupa yapao nyepala, Saimone kandao kenge enenge Pita lea. 17 Sebedi ikiningi Jemesa, Jonepa dolapo kandao kenge Bonagesa lea. (Bonagesa tenge doko, “Kaiti toka lelyamo dopale.”) 18 Dee baame Andruapi, Pilipapi, Batolomyuapi, Matyuapi, Tomasapi, Alopiasa ikiningi Jemesapi, Tadiusapi, Saimone kenge mende Selote lengema dokopi, Jisasa enge nyiamo akali Judasa Iskariota dokopi, dutupa yapao nyia.
Jisasa Kandao Imambu Koo Dupanya Isingi Belesabulu Palelyamo Leamino Doko
(Mt 12:22-32; Lk 11:14-23, 12:10)
20 Disaipolo yapao nyepala, Jisasa baa andaka pea. Dokopa endakali deaka ipao kambu piaminosa, baanya disaipolo dupa-pipa nee napenge nanjia. 21 Endakali yangi dupame baa kyekelyamo leamino doko sepala, baanya tata dupame kii minao lanyala epeami. 22 Epeaminopa, Mosesanya loo mana nyepae akali, Jerusalema katao epeamino dupame lao pituu, “Baa-kisa imambu koo dupanya isingi, Belesabulu+ 3:22 Satanenya kenge mende doko Belesabulu. doko ipao palipya dokome, imambu koo waka dupa watao pilyamona” leami. 23 Dopa leaminopa, baame dokaita epena latala, kongali piimi lamaiyoo, “Sataneme Satane tange aipa petala watao pyatape? 24 Kiŋi mendenya tata doko pyaloo petala, nyakama wakale pitamino doko, nyakama mendai joo napalitami. 25 Akali mendenya enda wanepi dupa wakale petala, nyakama yangolapo pyaloo pitamino doko, nyakama mendai joo napalitami. 26 Dokaitaka joo Sataneme baanya tata doko wakale pyoloo petala, nyakama yangolapo yanda pitamino doko, nyakama mendai joo napalitamiaka. Nyakama etatami. 27 Akali mendeme akali pupu lapae mendenya andaka kolandatala, baanya pinju dupa pake nyalanya-tamo doko, wambao kendeme baa yaki pinya setapala nyeta.
28 “Nambame nyakama kiningi langilyo: Endakalinya koo dupapi, Gote kandao lamba lengepi, dupa pitaka Goteme kunao nepakamaita. 29 Dopaka doko, endakali mendeme Oli Spirit kandao lamba latamo doko, Goteme baanya koo doko kunao nepala naeyata. Tanga tangapi baa-kisa koo doko setana” lea. 30 Jisasa-kisa imambu koo mende palelyamona leaminosa, baame dopa lea.
Jisasanya Endangi Kaiminingipi Dupa
(Mt 12:46-50; Lk 8:19-21)
31 Dokopa Jisasanya endangi kaiminingipi, dupa ipao katapala, baa kamanda epena lao, endakali mendeme lanyala pena leami. 32 Lateaminopa, endakali baa pituu kakopeamino dupame Jisasa lamaiyoo, “Embanya endangi kaiminingipi, kamanda katao, emba ipu lelyamino” leami. 33 Jisasame yanu pyao, “Nambanya endangi kaiminingipi dupa apitupape?” lea. 34 Baa pituu kakopeamino dupa kandatala, “Pii soo pilyamino datupa nambanya endangi kaiminingipina kanjepa! 35 Gotenya masingili pingima endakali dupa nambanya kaiminingipi, pimalengepi, endangipina” lea.
4Akali Mendeme Ee Wai Lyandeana Lao Kongali Pii Leamo Doko
(Mt 13:1-9; Lk 8:4-8)
1 Deaka Jisasame Galilea pete lemba dokonya endakali dupa mana lamaiyoo kateamopa, endakali etete longo ipao kambu piami. Dopa piaminosa, baa sipi mendenya pyakalyetala peteamopa, endakali pitaka lembanya kateami. 2 Kateaminopa, Jisasame kongali lao endakali dupa mana lamaiya. Lamaiyoo pituu, 3 “Nyakamame salapape! Akali mendeme ee wai lyandala pea-pyaa. 4 Lyandeamopa, ee wai yangi kaitininya pea. Peamo dupa pitaka yaka dupame nyoo neami. 5 Yangi kana-kisa yuu kuki singi dupanya peamo dupa pupae langa lea. 6 Langa leamoaka doko, pingi auu pyoo napiamosa, niki teamo dokome kumasia. 7 Yangi yuu ikililyambu tenge palenge dupanya pea. Peamo dupa ikililyambu tambe-tambe andapala, kui pyatala, dii namandea. 8 Ee wai yangi lyandeamo dupa yuu epenya pupala, andao dii mandea. Yangimi dii 30 mandea. Yangimi dii 60 mandea. Yangimi dii 100 mandeana” lea. 9 Dopa latala, Jisasame dokaita lamaiyoo, “Nyakama kalekaita singi dupame pii doko auu pyoo salapapena” lea.
Jisasame Kongaliaka Lao Pii Lenge-Lamo Leamino Doko
(Mt 13:10-17; Lk 8:9-10)
10 Maitakao Jisasa baa endakali kambu doko yakinateamopa, 12 disaipolo dupapi, dee endakali mendatupa tole kateamino dupapimi kongali pii dupanya baa tipa piami. 11 Dokonya baame yanu pyao, “Gotenya isingi mate dokonya pii tenge yalo petae palelyamo doko nambame nyakama langitoo. Dopaka doko, endakali netesa katenge dupame kongaliaka salamino. 12 Sepala, ’dupame lengeme kanjaminoaka doko, tenge angi doko kandao nanyalamino. Pii salaminoaka doko, tenge angi doko nanyalamino. Dopaka pyoo, dupame sepala, mona kapilyala naeyataminopa, Goteme dupanya koo dupa kunao nepakamaiya naeyatana’” lea.
Ee Wai Lyandeana Lao Kongali Leamo Dokonya Tenge Doko
(Mt 13:18-23; Lk 8:11-15)
13 Deaka Jisasame dokaita lamaiyoo, “Nyakamame kongali pii dake sepala, tenge nyala naelyamino doko, aipa petala kongali pii waka dupanya tenge dupa soo nyetamipi? 14 Akali dokome ee wai joo Gotenya pii doko lyandea. 15 Ee wai lyandeamo dokonya yangi kaitinisa peamo dupa yakame nyoo neami. Dopaleaka joo, wai pii epe doko endakalimi sepelyaminopa, monanya nasina lao, Sataneme ipupala nyoo nepenge. 16 Ee wai yangi kana-kisa pao langa leamo dopaleaka joo, endakali dupame wai pii epe doko auu kaeyao yapa nyingima. 17 Ee wai kana-kisa pingi napiamosa, kumiamo dopaleaka joo, endakali dupame wai pii epe doko auu pyoo nyepelyaminopa, nyakama-kisa pundu kendapi longo epelyamopa, wai pii epe doko pupae yakinengema. 18 Ee wai yangi yuu ikililyambu tenge palenge dupanya peamo dopaleaka joo, endakali dupame wai pii epe doko singima. 19 Singimaka doko, yuunya munipi, pinjupi, longo lao nyoo setao katapu laka lao putiti kaenge mana dokome, wai pii epe doko kui pilyamosa, dii namandengema. 20 Ee wai yangi lyandeamo dupa yuu epenya pupala, andao dii mandea. Dopaleaka joo, wai pii epe doko sepala, endakali yangimi dii 30 mandenge. Yangimi 60 mandenge. Yangimi 100 lao dii mandengena” lea.
Lama Kaiyepae Yalo Napingina Leamo Doko
(Lk 8:16-18)
21 Dopa latala baame dokaita lamaiyoo, “Endakali mendeme lama kaiyepae nyepala, titopene pengenya koko pyandengepe, pande toko pundi-pundi pyandengepe? Daa, lama kaiyepae doko toko ketae setenge. 22 Yalo petae silyamo dupa gii mendepa panao seta. Yame pyatae silyamo dupa gii mendepa lopapae seta. 23 Nyakama kalekaita singi dupame pii doko auu pyoo salapapena” lea.
24 Dopa latala dee baame dokaita lamaiyoo, “Nyakamame endakali mende-kisa mana minatamino dopaka pyoo, Goteme nyakama-kisa mana minata. Dopana, nyakamame pii silyamino dokonya tenge doko masetala pyepape. Dopa pitaminoliaka pyoo, Goteme mana mendatupa apata konda pyakata. 25 Endakali mende-kisa Gotenya pii longo setamo doko, baa konda pyoo maita. Dopaka doko, Gotenya pii nasingi mende-kisa kuki setamopa, sekelyamo lao masetamo doko, dutupa tange nyokonyetana” lea.
Ee Wai Andenge Dokonya Kongali Doko
26 Jisasame kongali pii mende lao pituu, “Gotenya isingi mate doko akali mendeme ee wai lyandenge dopale. 27 Baame lyandatala, kuka luu palipa, yongama sakatata pilyamopa, ee wai doko tange langa latala, andenge. Dopa pilyamopa, aipa petala langa lao andelyape lao nakandenge. 28 Yuu dokome pilyamopa, ee wai doko langa lenge. Dokopa, yoko pingi. Dopa petala, mange dokonya dii lyoo, wambu pingi. 29 Dii doko wambu petelyamopa, ee pokenge akali dokome konja-wuame lyao mandengena” lea.
Ee Wai Mastet Lenge Dokonya Kongali Doko
(Mt 13:31-32; Lk 13:18-19)
30 Jisasame deaka dokaita lamaiyoo, “Naimame Gotenya isingi mate doko aipalena lamape? Dee aki mendepa makande pimape? 31 Doko ee wai mastet lenge dopale. Ee wai waka dupa ita minao, mastet wai doko etete yakane mende. 32 Yakaneaka doko, endakali mendeme mastet wai doko yuunya lyandelyamopa, andao yale jetala, ee wai waka pokatae dupa ita miningi. Dokopa, wangya dupame lumba nelyamo dupanya yakame ipao anda pingimana” lea.
Jisasame Kongaliaka Lao Pii Leamo Doko
(Mt 13:34-35)
33 Baame kongali dopale dupame wai pii epe doko endakali dupame sepengeli pyoo lamaiyoo katea. 34 Baame pii mende mee lamaiya naeyao, kongali laowaka lamaiya. Baanya disaipolo dupa-pipa iki katao, kongali dupa pitakanya tenge dupa lamaita pia.
Jisasame Poo Andake Mende Kaena Leamo Doko
(Mt 8:23-27; Lk 8:22-25)
35 Yuu kuiyamopa, Jisasame baanya disaipolo dupa lamaiyoo, “Naima endaki pete dakenya omotena mua” lea. 36 Dokopa endakali kambu dupa yakinatala, Jisasa sipi peteamo dokonya pituu peami. Dee sipi waka mendatupa apataka peami. 37 Peaminopa, poo yale mende leamopa, endaki buli piamo dokome, tandyoo sipi dokonya kolandea. Dopa piamopa, sipi doko endakimi tumbalanya pia. 38 Jisasa baa sipi dokonya maitakaita sanda setapae mendenya paleamopa, disaipolo dupame baa pyale tatala, “Mana Lenge Akali, naima kumalamane-lamo doko, embame nakandelepe?” leami. 39 Dopa leaminopa, Jisasa sakatatala, poo doko kaena latala, endaki buli piamo doko lamaiyoo, “Emba yatu laa! Ema napinya mee saa!” leamopa, poo doko yatu lao, endaki doko ema napyoaka pia. 40 Dokopa baame dokaita lamaiyoo, “Aipuma nyakama paka kaelyamipi? Nyakamame namba tungi napilyamipi?” lea. 41 Dopa piamopa, disaipolo dupa etete paka kaeyapala, nyakamalapo laloo pyoo, “Endakipa poopa dolapome baanya pii lapyali pilyambino doko, akali dake api laa kanjemape?” leami.
5Jisasame Akali Mendenya Imambu Koo Watao Pyakamaiyamo Doko
(Mt 8:28-34; Lk 8:26-39)
1 Dokopa Jisasa baanya disaipolo dupa-pipa Galilea pete omotena, Gerasamanya yuu dokonya peami. 2 Pao pyakamatala, Jisasa baa sipi doko yakinatala peamopa, akali imambu koo paleta mendeme endakali malu katenge dupanya katao ipao baa kandanyia. 3 Akali doko endakali malu katenge dupanya palenge. Endakali mendeme sene kendemepi baa anjala naengema. 4 Paa longosa baa sene kendepi, anengapupi, dupame anjeta pilyaminopa, baame dupa minao pindanya nepenge. Dopa pilyamopa, endakali mendeme kapa pao baa minao lambapenge nanjingi. 5 Kuka kotakapi, koteaka lao baa endakali malupi, yuu mandapi, dupanyaka paliu katenge. Dupanya katapala ae latae katao, baanya yonge doko tange kaname konjeta pingi.
6 Jisasa londati joo kateamopa, akali dokome kandatala, alo pyao ipupala baa kateamo dosa luma lakea. 7 Luma lakapeamopa, Jisasame baa lamaiyoo, “Imambu koo, embame akali dake yakinatala puu!” lea. Dopa lateamopa, baame puu lao, “Jisasa, emba Gote Etete Ketae Katenge dokonya Ikiningi. Embame namba aipa pitipi? Embame Gotenya kenge dokonya kyeto joo, namba tanda andake nanditoo lao laa” lea.
9 Dokopa Jisasame baa tipa pyoo, “Emba kenge apipi?” lea. Dopa leamopa, akali dokome yanu pyao, “Naima imambu koo longo kalyamano. Tenge dokonya, namba kenge Longo lengena” lea. 10 Dopa latala, imambu koo dupame kongo latae katao, nyakama yuu dokonya pyao watala naena lao wii lao tee leami.
11 Mena tausene lapomapi mende manda kili-kili dokonya nao kateami. Dokopa, imambu koo dupame Jisasa tee lao, “Naima mena dokaita-kisa landa pyalapa lapoko!” leami. Dopa leaminopa, mena dokaita-kisa kolandena leamopa, imambu koo dupame akali doko soo yakinatala, mena dupa-kisa pao landa piami. Landa pyateaminopa, mena elyambu doko pitaka alo pyao pao, endaki pete dokonya mangatala kumiami. 14 Kumateaminopa, mena setao katenge dupa taononyapi, mee akali palenge yuu dupanya paka pupala, dopa pyomona lao lamaiyami. Lamaitiaminopa, endakali dupame piamo dupa kanja epeami. 15 Dupa Jisasa kateamo dokonya ipupala kandeaminopa, wamba akali imambu koo longo paleta kateamo doko indupa yonge pee dupa petala, mona paliu peteamo kandatala, paka kaeyami. 16 Dokopa wamba kandeamino endakali dupame ene kanja epeamino dupa dopa pyomona lao lamaiyami. 17 Lamaitiaminopa, dupame kongo lao Jisasa baa nyakamanya yuu doko yakinatala, pena leami. 18 Dopa leaminopa, baa sipi dokonya pyakalyiamopa, wamba imambu koo paleta kateamo dokome baa apata buape lea. 19 Dopa leamopa, Jisasame daa latala, “Kamongome emba kondo kaeyapala, embanya pyakalamo dupa andaka pupala, emba tata dupa lamaipi” lea. 20 Dopa lamaitiamopa, akali dokome pupala, baa-kisa Jisasame piamo dupa pitaka yuu Dekapolisa dokonya panao lamaiyamopa, endakali siamino dupa pitaka walu leami.
Jisasame Jairusa Wanenge Sakatasiamo Doko
(Mt 9:18-26; Lk 8:40-56)
21 Jisasa baa sipi dokonya pituu, Galilea pete dokonya yangitena pilyetala kateamopa, endakali longo mendapu ipao kambu piami. 22 Dokopa Judamanya lotuu anda mendenya isingi akali Jairusa lenge doko epea. Ipao Jisasa kandatala, baanya moko siamo dosa tombauli sepala 23 kongo lao, “Nambanya wanenge doko kumalanya pilyamona, embame baa-kisa kingi setapala, saka nyakala ipu” lao tee lea.
24 Dopa leamopa, Jisasa baa-pipa apata peambinopa, endakali longome baa watao pupala, katao tambukiniami. 25 Kateamino dupanya enda mende ee kana 12 dutupanya yuu gii dii lao angupae kandenge doko etala naeya. 26 Dopa piamosa, enda dokome dokosa longo dupa-kisa muni longo nepeamoaka doko, dupame angi nisala naeyamopa, etete koeyala pea. 27 Jisasame pilyamo lapae dupa sepala, enda dokome maitakaita pupala, Jisasanya yonge peenya watandato doko, baanya yaina doko mee jakalapomona lao masetala, baanya yonge pee dokonya kingimi watandea. 29 Watandalu piamopa, enda dokome baanya yaina doko etalumu lao sia. 30 Dokopa Jisasa baanya pupu lapae mendatupa puumu lao sepala, endakali kambu kateamino dupa kandapilyetala, “Apimi nambanya yonge peenya watandelyape?” lea. 31 Baanya disaipolo dupame yanu pyao, “Endakali kambu dakeme emba katao tambukinilyamino kandeleno doko, aipuma embame ’Apimi namba watandelyape?’ leepe?” leami. 32 Dopa leaminopa, apimi pyape lao kanjanya, Jisasame kandayoko lea. 33 Dopa piamopa, enda dokome baa-kisa piamo dutupa pitaka masetala, paka kaeyao, walu lao ipao Jisasanya moko seteamo, dosa tombauli sepala, baame piamo dupa pitaka panao Jisasa lamaiya. 34 Dokopa Jisasame enda doko lamaiyoo, “Wanaku, embame namba tungi pyapino dokome, embanya yaina doko etelyamona, emba mona yaepatala puu” lea.
35 Dopa lao kateamopa, Judamanya lotuu anda isingi akali Jairusanya andaka katao, akali mendapuame ipupala Jairusa lamaiyoo, “Embanya wanenge doko kumatalamona, mana lenge akali doko epena laa naenya, kaeya” leami. 36 Dopa leaminopa, Jisasame soo nasili petala Jairusa lamaiyoo, “Embame paka nakaenya, Gote tungi pyatala katape” lea. 37 Dopa latala baame endakali pitaka baa watao naepena latala, Pita, Jemesa, Jemesa kaiminingi Jonepi, dutupa-pipa iki peami. 38 Pao Jairusanya andaka pyakamatala kandeaminopa, endakali dupame yako lao ee leami. 39 Dokopa Jisasame andaka kolandatala dokaita lamaiyoo, “Aipuma nyakama yako lao ee lelyamipi? Wanaku doko kumala naeyalamo. Mee luu palelyamona” lea.
40 Jisasame leamo doko sepala, endakali dupame baa kilya kandao gii kaeyami. Dopa piaminosa, baame dokaita watao kamanda pyalyetala, wanaku dokonya endangi takangepi, disaipolo tepoma apata peamino dutupa-pipa iki wanaku kumapae siamo dokonya peami. 41 Pupala wanaku dokonya kinginya minatala baa lamaiyoo, “Talita kum” lea. (Pii dokonya tenge doko, “Wanaku emba sakata.”) 42 Dopa leamopa, wanaku ee kana 12 patae doko sakatatala paeya. Paeyamo kandatala, dupame etete paka kaeyao, walu leami. 43 Dokopa Jisasame dokaita etete kyeto joo lamaiyoo, “Endakali dupame pyomo dake setamina, mende lamaiya naeyalapape” lea. Dopa latala, “Baa nee nena maiyepa” lea.
6Jisasa Tata Dupame Baa Tungi Napiamino Doko
(Mt 13:53-58; Lk 4:16-30)
1 Jisasame yuu doko yakinatala, baa katao andeamo yuu dokonya peamopa, baanya disaipolo dupame watao peami. 2 Pupala Sambata gii doko epeamopa, baame Judamanya lotuu anda dokonya mana lamaiya. Lamaiyamopa, pii siamino endakali longo dupame walu latala lao pituu, “Baanya masepae epe tolatae dokopi, mirakolo kalai pupu lapae pilyamo dokopi, dolapo anja-tae nyiape? 3 Akali dake kapenda kalai pingi doko daa kandamuape? Baa Maria ikiningi, Jemesa, Josepe, Judasa, Saimonepi dutupanya kaiminingi daape? Baanya pimalenge dupa ae naima-pipa apata napilyamape?” leami. Dopa latala dupame Jisasa kandao mona koo palyetala, baa yakineami. 4 Dokopa Jisasame dokaita lamaiyoo, “Propeta mende yuu waka dupanya kalyamo doko, endakali dupame baa andanda semaingima. Dopaka doko, propeta mende baanya yuu dokonya kalyamo doko, baa tata dupame baanya pii nasepala, andanda semaiya naengemana” lea. 5 Dokopa yuu dokonya baame mirakolo kalai mendapu kapa pao pipenge nanjiamosa, endakali kuki mendatupa-kisa kingi setao yaina mee jakamaiya. 6 Endakali dupame baa tungi pyala naeyaminosa, baa mona kenda kaeya.
Jisasame 12 Disaipolo Dutupa Kalai Pyaa Pena Leamo Doko
(Mt 10:1,5-15; Lk 9:1-6)
Maitakao Jisasa baa yuu yakane dupanya pao, endakali dupa mana lamaiya. 7 Mana lamaitala Jisasame 12 disaipolo dutupa epena latala, imambu koo dupa watao pina lao pupu lapae maitala, dupa lapo-lapo lao pena lea. 8 Pena lao pituu, “Nyakama kaita patamino dokonya nee napengepi, nokainapi, munipi, yonge pee wakaowapi, mende nyoo napupape. Pangali minao, moko pee pyoo pupape” lao kyeto joo lamaiya. 10 Dopa latala baame dokaita lamaiyoo, “Nyakama pao katatamino gii dutupanya anda tee pyao palitamino dokonyaka paliu kalyepape. 11 Yuu tange dupame nyakama mambo pyao lanyala naeyao, nyakamanya pii doko nasoaka piami kandeno doko, nyakamame yuu doko yakinatala pupape. Yuu tange dupa ketae kenda pipae silyame-lamo lao kandena, nyakamanya mokonya yuu katatamo dupa lyanda lanya setapala pupape” Jisasame lea. 12 Dopa leamopa, dupame pupala, endakali dupa mona kapilyina lao, wai pii epe doko lamaiyami. 13 Pii lamaiyoo pituu, imambu koo longo mendapu watao piami. Dee endakali yaina pyapae longo dupa olipi ipangeme kai pyakamaiyaminopa, yaina dupa mee jia.
Jone Kaimbu Pingi Kumiamo Doko
(Mt 14:1-12; Lk 3:19-20, 9:7-9)
14 Jisasame kalai andake pilyamo lapae doko yuu dupa pitakanya taeyamopa, Kiŋi Erote Antipasame sia. Endakali mendapuame lao pituu, “Jone kaimbu pingi doko malunya sakatatala, kalai pupu lapae dupa pyoo kalyamona” leami. 15 Yangi dupame baa Ilaijana leaminopa, yangimi baa propeta wamba kateamino dopale mende-lamona leami. 16 Eroteme pii doko sepala, “Jone kaimbu pingi, nambame mange kepeo doko, sakatapya-lumuna” lea.
17 Wamba Eroteme baanya kaiminingi Pilipa etanenge Erodiasa lenge doko tondao nyia. Dopa piamopa, Joneme Erote lamaiyoo, “Embanya kaimininginya etanenge tondao nyilino doko, loome daa latae singi doko yalelenona” lao kateamosa, enda Erodiasa dokome Jone imbu kaeyapala, pyao kumasalanya piamopa, kapa napea. Eroteme Jone doko akali tolatae epe etete mende-lamo lao kandatala, baa paka kaeyapala, auu pyoo isoo katea. Baame Jonenya pii dupanya tenge nanyiamoaka doko, mee baanya pii doko auu kaeyao sia. Dopa petala Eroteme Erodiasa auu kaeyapae nyina lao masetala, Jone anjinya pyandea.
21 Erotenya mandenge gii doko epeamopa, baanya kalai akali andake dupapi, yanda singi mupa dupapi, Galilea tange akali andake dokaitanya nee yangakamaiya. Gii dokopa, Erodiasame kandeamopa, Jone pyapenge kaitini mende sia. 22 Dokopa nee nao peteamino dokonya Erodiasa wanenge doko ipao kolandatala, danisa lea. Dopa piamopa, Erotepi, baa-pipa apata nee nao peteamino dupame etete auu kaeyao kandeami. Kandatala Kiŋi Eroteme wanaku doko lamaiyoo, “Embame dopale mende namba-kisa tee latenopa, nambame latenoli pyoo, emba dyaapo. 23 Embame nambanya isingi mate doko aopa lao konjepala, yangi dii lateno doko, dyaapoakana lao nambame kiningi etete lelyona” lea. 24 Dopa leamopa, wanaku doko endangi peteasa pupala, baa tipa pyoo, “Aki mende dina lao tee laowape?” lea. Dopa leamopa, endangimi baa lamaiyoo, “Jone kaimbu pingi dokonya aiyomba doko dina lape” lea. 25 Dokopa kiŋi doko peteasa wanaku doko alo pyao pupala, “Embame Jone kaimbu pingi dokonya aiyomba doko pelesa mendenya setapala, epapuaka dii” lea. 26 Dopa leamopa, kiŋi doko etete mona kenda kaeyamoaka doko, wamba endakali dupanya enombanya kiningi etete maitoana leamo doko masetala, wanaku dokonya pii nepala naeyatoo lao masia. 27 Dopa lao masetala dokopaka, yanda singi mendeme Jonenya aiyomba doko kepao nyala pena leamopa, baa anjetae andaka pupala, Jonenya aiyomba doko kepao nyia. 28 Kepao nyepala pelesa mendenya setapala, nyoo ipao wanaku doko maitiamopa, wanaku dokome nyepala, endangi pao maiya. 29 Dopa piamo doko sepala, Jonenya disaipolo dupame baanya yonge doko nyoo pao malu piami.
Jisasame Akali 5 Tausene Nee Maiyamo Doko
(Mt 14:13-21; Lk 9:10-17; Jn 6:1-14)
30 Aposolo dupa Jisasa kateamo dokonya pilyetala, nyakamame kalai piamipi, mana lamaiyamipi, dupa dopa pipumana lao baa lamaiyami. 31 Dokopa endakali longo mendapu pao ipao piami dokome, Jisasapi, baanya disaipolo dupapi, nee napenge gii nasia. Dopa piamosa, Jisasame dokaita lamaiyoo, “Naima iki endakali napalenge yuu mendasa, kuki koto nyemana mona ipupa” lea. 32 Dopa lateamopa, nyakama sipi mendenya pao pyakalyetala, endakali napalenge yuu mendakaita peami. 33 Peaminopa, endakali longo dupame nyakama dutupa dosa paanya pelyamino lao kandatala, taono dupa pitakanya tange dupame mee kaitini alo pyatala, wambao pao kateami.
34 Jisasa sipinya pituu isa pyakanatala, endakali kambu andake mende kateamino kandea. Dokaita sipisipi setao katenge akali mende nakatenge joo kateaminosa, kondo kaeyapala, baame pii longo mendapuame mana lamaiya. 35 Lamaiyoo kateamopa, niki lenge landa pyalanya pia. Dokopa baanya disaipolo dupame baa kateasa ipupala lao pituu, “Endakali napalenge panda dakenya yuu kuiyalanya pilyamona, 36 embame dokaita maketa seta dupanya tange nee sambao nala pena laa” leami. 37 Dopa leaminopa, baame pii yanu pyakamaiyoo, “Nyakamameaka nee maiyepa” lea. Dokopa dokaitame baa lamaiyoo, “Naimame muni andake anjataeme betesa sambapala, endakali longo dake nena lao maimape?” leami. 38 Dopa leaminopa, baame dokaita lamaiyoo, “Betesa akipate silyape lao kanja pupa” lea. Pao kandatala dokaitame baa lamaiyoo, “Naimanya 5-pela betesa-pipa, pisa lapoma-pipa iki silyamona” leami.
39 Dopa leaminopa, Jisasame disaipolo dupa lamaiyoo, “Tanu sakapae dupanya endakali dupa pitaka kambu pyao wakale-wakale petena lapa” lea. 40 Leamoli pyoo, kambu mende 50 lao pitipa, 100 lao pitipa piami. 41 Dokopa Jisasame 5-pela betesa, pisa lapoma-pipa siamo dutupa nyepala, kaiti-kisa kandalyetae katao yaka pilino lea. Yaka pilino latala baame betesa dutupa konjepala, baanya disaipolo dupame mokosina lao maiya. Dopa petala baame pisa dolapo endakali dupa pitakanya konjakamaiyaka. 42 Mokosoo maiyaminopa, dokaita pitakame nao tiaka kaeyami. 43 Napeaminopa, disaipolo dupame betesa pisapi konjepae kakana siamo dupa nyoo, 12-pela baseketa tumbasiami. 44 Nee neamino akali dupa 5 tauseneme neami.
Jisasa Endaki Ketae Moko Katao Paeyamo Doko
(Mt 14:22-33; Jn 6:15-21)
45 Dopa petala, Jisasame baanya disaipolo dupa sipinya pyakalyetala, Galilea pete omotena, yuu Betsaida wambao pena lea. Baame endakali kambu dupa andaka pena latala, kandao katea. 46 Dokaita pateaminopa, baa loma sala yuu manda mendenya pea. 47 Yuu kuiyala peamopa, sipi doko endaki pete kaina dokonya peamopa, Jisasa baa iki yuu manda dokonya katea. 48 Dokopa paanya peamino dokaita-kaita poo andake mende lao epeamosa, dokaitame leke-leke tao endaki tandyoo peamino Jisasame kandea. Kandatala yuu yongao pukiamopa, baa endaki pete ketae dokonya moko katao pupala, dokaita nyoo maita pyalanya pia. 49 Baa endaki pete ketae dokonya moko katao epeamo kandatala, baanya disaipolo dupame timango mende-lamo lao masetala, paka kaeyapala ae leami. Ae leaminopa, Jisasame dokaita lamaiyoo, “Namba kalyona, nyakama paka nakaeyalapa” lea. 51 Dopa latala, Jisasa sipinya pyakalyiamopa, poo doko yatu lea. Leamo kandatala, disaipolo dupa walu lao pakame kumiami. 52 Jisasame betesa kukimi akali 5 tauseneme nao kapa pena leamo tenge doko, disaipolo dupame nyala naeyami. Dopaka pyoo, Jisasame endaki ketae paeyamo tenge doko nyala naeyao nongo piami.
Genesarete Yuu Dokonya Jisasame Yaina Dupa Mee Jakamaiyamo Doko
(Mt 14:34-36)
53 Dokopa Jisasa disaipolo dupa-pipa endaki pete dokonya omotena, yuu Genesarete pyakamatala, sipi doko minanya seteami. 54 Sipi doko yakinatala peaminopa, endakali dupame Jisasa baa epelyamo lao yapa kandeami. 55 Yuu kungu dupa pitakanya baa mendasa kalyamo lapae siamino dokonya pupala, endakali yaina pyapae dupa lapa tokonya soo pata piami. 56 Baa taono andakepi, yakanepi, mee yuupi, dupanya peamoli pyoo, yaina pyapae dupa lapa tokonya soo ipupala, maketa kamapu dupanya setapa piami. Dopa petala endakali soo epeamino dupame baanya yonge pee punanya yaina pyapae dupame watandena lao, Jisasa tee leami. Watandeamino endakali dupa pitakanya yaina dupa mee jeta pia.
7Yumbangenya Mana Setapae Dupanya Jisasame Leamo Doko
(Mt 15:1-20)
1 Parasaipi, Juda tange pitakapi, dupanya yumbangenya mana dupa watao, nee nalanya kingi wasa pingili pyoo pyatala, nee nengema. Dupame maketanya katao ipupala, kingi wasa napinya, mee nee nanengema. Mana singili pyoaka, endaki pengepi, kapopi, titopenepi,+ 7:1-4 Buku Baibolo Giriki piimi wambao pyatae mendatupanya vesa dakenya pii dalapo apata lapae palelyamo: “petenge tokopi.” dupa wasa pingima.
Gii mendepa Mosesanya loo mana nyepae akali Jerusalema katao epeamino dupapi, Parasaipi, dupa Jisasa kateamo dokonya ipao kambu piami. Dokopa baanya disaipolo yangimi kingi wasa napyao, mee nee neaminosa, akali dupame kandokondape pyoo kandeami. 5 Kandatala Parasaipi, Mosesanya loo mana nyepae akalipi, dupame Jisasa tipa pyoo, “Embanya disaipolo dupa kingi wasa napinya mee nee nelyamino doko, naimanya yumbangeme mana wambatae seteamino dupa aipuma watao minala naelyamipi?” leami. 6 Dopa leaminopa, Jisasame dokaita lamaiyoo, “Nyakama, Gote watao miningi mane-mane pingima dupa kandao, wamba Goteme propeta Aisaiya-kisa nyakama-pipa makande pyokondape pyoo, dapa lea-pyaa: ’Endakali tata dakeme kambumi namba mambo pingimaka doko, nyakamanya moname namba angi mambo napingima. 7 Dupame endakalinya mana setapae dupa mana lao pituu, “Dake Gotenya mana setapaena” lengema. Nyakamame namba mambo pingimaka doko, nambame nyakamanya pii nasingina’ Goteme Aisaiya-kisa lea-pyaa. 8 Nyakama Parasaipi, Mosesanya loo mana nyepae akalipi, dupame Gotenya mana setapae dupa nepatala, endakalinya mana dupa watao minao kalyaminona” Jisasame lea.
9 Dee baame dokaita lamaiyoo, “Nyakamame nyakama tangenya mana dupa watao minamana latala, Gotenya mana setapae dupa waa katao, anguo nepelyamino. 10 Wamba Mosesame lao pituu, ’Embanya endangi takangepi dolapo andanda semaiyoo katape’ lea. Deaka lao pituu, ’Endakali mendeme baanya endangi takangepi dolapo kandao, Goteme minao koeyasina latamo doko, baa pyao kumasepengena’ lea. 11 Mosesame dopa leamoaka doko, nyakamame mana waka mende miningima-lamo. Akali mendeme endangi takangepi lamaiyoo, ’Nambame nyakamba oapi dipenge dupa pitaka, Gote maitalona’ latamo kandao doko, nyakamame kapana lao mana lengema-lamo. Dopa lao nyakamanya yumbange dupanya mana minilyamino, dokome endangi takangepi nisepengena lao, Gotenya loo seteamo doko mee joo nepengema-lamo. Dee nyakamame mana dopaleaka longo miningima-lamona” Jisasame lea.
14 Dokopa Jisasame endakali kambu piamino dupa dee baa kateamo dokonya epena latala lamaiyoo, “Nyakama pitakame pii nambame lelyo dake sepala, masokondape pyepape. 15 Endakali mendeme nee nelyamo dokome, baa Kamongo doko mambo napina lao kaita lyokala naenge. Endakali mendenya nengekaita pii koo epelyamo dokome, baa Kamongo doko mambo napina lao kaita lyokengena” lea.+ 7:15-16 Buku Baibolo Giriki piimi wambao pyatae mendatupanya vesa dakenya pii datupa apata lapae palelyamo: “Nyakama kalekaita singi dupame pii doko auu pyoo salapape.”
17 Jisasa endakali kambu doko yakinatala, andaka pao peteamopa, baanya disaipolo dupame kongali pii leamo dokonya tenge aipale mende palelyape lao baa tipa piami. 18 Tipa piaminopa, baame dokaita lamaiyoo, “Nyakamame masala naelyamipi? Kamanda singi mende nengekaita pelyamo doko mona andaka napenya, mee inginya soo kamanda ipao penge. Dopa pilyamo dokome, baa minao koeyasala naengena” lea. (Dopa leamo dokome, Jisasame nee dupa pitaka napengena lea.) 20 Dopa latala dee Jisasame lao pituu, “Endakali mende-kisa mona andaka pituu, kamanda koo pyakalyingi dokome, baa minao koeyasingi. Masingi koopi, enda akalipi nyele-nyele paengepi, pake nengepi, endakali pyao kumasingipi, 22 kepo kolengepi, longo setapu laka lao masingipi, tuu pyoo mende minao koeyasotoo lao masingipi, minakasingipi, elya nakaengepi, waka mendenya oapi setamo dupa kandatala nyipu laka lao masingipi, lamba lengepi, alyasale joo kalyo lao masingipi, kyakaenge mana miningipi, 23 koo dutupa pitaka monanya paliu kamanda ipupala, endakali dupa minao koeyasingina” Jisasame lea.
Enda Mendeme Jisasa Tungi Piamo Doko
(Mt 15:21-28)
24 Jisasame yuu doko yakinatala, yuu andake Taeya dokonya pea. Pupala baa anda mendenya kolandatala, elyakalao pititoo lao masiamoaka doko, baa yalo pipenge nanjia. 25 Dokopa wanaku imambu koo paleta mendenya endangimi anda dokonya Jisasa pilyamo lapae sepala, baa kolandatala, Jisasanya moko seteamo dosa luma lakapala, aiyomba yuunya sia. 26 Endangi kamalya petenge, yuu dokonya tange dokome, baanya wanenge-kisa imambu koo palenge doko Jisasame watao pyakamaina lao tee lea. 27 Dopa leamopa, Jisasame enda doko lamaiyoo, “Wanenya nee dupa yana namaipenge. Wambao wanenya nee dupa tange nao tiaka kaena maipengena” lea. 28 Dopa leamopa, enda dokome yanu pyao, “Akali andake, wane dupame nee nelyaminopa, kuku-kakanapi isa pelyamo dupa yana toko pundi-pundi kalyami dupame nyoo nengemakana” lea. 29 Dokopa Jisasame enda doko lamaiyoo, “Embame kiningi namba tungi pyao leleno dokonya, imambu koo dokome embanya wanenge doko yakinatala patelyamona, emba andaka puu” lea. 30 Enda dokome andaka pupala kandeamopa, imambu koo dokome wanaku doko yakinatala pateamopa, baa auu pyoo tokonya paliu sia.
Akali Kaleketa Muumaa Mende Jisasame Nisiamo Doko
31 Jisasa yuu andake Taeya doko yakinatala, yuu Saidone-kaita pao, yuu Dekapolisa pyakanatala, dokonya-kaita lanao pao Galilea petesa pyakanea. 32 Dokopa endakali mendapuame akali kaleketa muumaa mende baa kateamo dokonya laminao ipupala, kingimi watandena lao tee leami. 33 Dopa leaminopa, Jisasame akali doko iki laminao, endakali kambu doko yakinatala, umbisale pupala, baanya kingi konde dolapo akali dokonya kalekaita pyandakamaiya. Dopa petala baanya kingi kondenya sopokali talyinya pisetala, muumaa dokonya kekenya watandea. 34 Dopa petala kaiti-kisa kandalyetae katao, mona ŋee latala, “Epata” lea. (Pii dokonya tenge doko, “Lumba.”) 35 Dopa leamopa, akali dokonya kalekaita dolapo lumbapa, keke doko tolata piamopa, pii tolao lea. 36 Dopa piamopa, Jisasame endakali kambu doko kyeto joo lamaiyoo, “Nyakamame kanjamino dupa mende lamaiya naeyalapape” lea. Dopa leamoaka doko, dupame pii nepatala, lamaiyoo taeyami. 37 Endakali siamipi, kandeamipi, dupame paka kaeyao walu latala, “Baame kalai pitaka auu pyoo pilyamo. Kaleketa dupanya kalekaita lumbakamaiyoo, dee muumaa dupame pii lena lelyamoakana” leami.
8Jisasame Akali 4 Tausene Nee Maiyamo Doko
(Mt 15:32-39)
1 Gii mendepa endakali kambu andake mende deaka ipao kateami dokaitanya nee nasia. Dopa piamosa, Jisasame baanya disaipolo dupa epena latala lamaiyoo, 2 “Endakali dakaita namba-pipa yuu gii tepoma katapuma. Indupa nee etalame-lamo dokonya, nambame dakaita kondo kaelyo. 3 Yangi dupa tependa tangena, nee nanao andaka pena latopa, kaitinisa laowambe lapae setamina” lea. 4 Dopa leamopa, disaipolo dupame baa lamaiyoo, “Endakali napalenge yuu dakenya, naimame nee anja-tae nyepala nena maimape?” leami. 5 Jisasame, “Nyakamanya betesa akipate silyape?” leamopa, nyakamame, “7-pela silyamo” leami. 6 Dopa leaminopa, baame endakali kambu doko isa petena lea. Dopa latala betesa 7-pela dutupa nyepala, Gote lao yaka pilino latala konjia. Konjepala baanya disaipolo dupame mokosoo maina lao maiya. Maiyamopa, baanya disaipolo dupame endakali kambu peteamino dupa dii lao mokosoo maiyami. 7 Pisa kuki mendatupa apata siaka, dutupa Jisasame Gote lao yaka pilino latala, apata mokosoo maina lea. 8 Endakali dokaitame nao tiaka kaeyateaminopa, konjepae kakana siamo dupa 7-pela baseketanya tumbasiami. 9 Akali nee neamino dupa 4 tausenepi mende. Dokaita napeaminopa, Jisasame andaka pena lea. 10 Pena latala baanya disaipolo dupa-pipa sipi mendenya pyakalyetala, yuu Damanuta peami.
Mirakolo Mende Jisasame Pina Leamino Doko
(Mt 16:1-4)
11 Dokopa Parasai dupame ipupala, Jisasa pii yanda pimaiyami. Dupame baa minao makande pyoo, “Embame kalai pilino doko, Gote-kisa katao pilini-lamo lao kandamanana, mirakolo mende pii” leami. 12 Dopa leaminopa, Jisasame mona ŋee yale pyoo latala, “Aipuma endakali indupa palelyamino dupame mirakolo mende pii lelyamipi? Nambame nyakama kiningi langilyo: Mirakolo mende nyakama kanjepale lao napitoana” lea. 13 Dopa latala baame dokaita yakinatala, disaipolo dupa-pipa sipinya pyakalyetala, endaki pete dokonya omotena peami.
Jisasame Parasaipi Erotepinya Mana Dupa Yisa-Pipa Makande Piamo Doko
(Mt 16:5-12)
14 Disaipolo dupame betesa kame sepala ipateaminopa, sipi dokonya mendai iki sia. 15 Dokopa Jisasame disaipolo dokaita kongali lao lamaiyoo, “Parasaipi, Erote Antipasapinya yisa+ 8:15 Yisa doko palaonya taelyamopa, betesa doko andenge. Dopaka pyoo, Parasaipi, Erote Antipasapinya koo dupa taelya dokome, endakali longo dupa-kisa andinyilyamopa, koengemana lao yisa-pipa Jisasame makande pia. dupame nyakama koeyasetamina, wandyuu kalyepape” lea. 16 Dopa leamopa, nyakamalapo laloo pyoo, “Naimanya betesa nasipumu dokonya, baame dopa lelyamona” leami. 17 Dopa leamino doko Jisasame kandatala dokaita lamaiyoo, “Nyakamame aipuma betesa nasilyamo lao mende lamai-lamai pilyamipi? Nyakama nongo pyapala, namba kandao apipi lao masala naelyamipi? 18 Nyakama lenge tenge-lamo doko, angi kanja naelyamipi? Nyakama kale katenge-lamo doko, angi nasilyamipi? Nambame kalai pilyo dupa nyakamame kame silyamipi? 19 Nambame 5-pela betesa nyepala, akali 5 tauseneme nena lao konjakamaiyo dokonya nao, kakana baseketa akipatenya tumbasiamipi?” lao Jisasame tipa pia. Dupame yanu pyao, “12-pela baseketana” leami. 20 Jisasame dee tipa pyoo, “Nambame 7-pela betesa nyepala, akali 4 tauseneme nena lao konjakamaiyo dokonya nao, kakana baseketa akipatenya tumbasiamipi?” lea. Dopa leamopa, dokaitame, “7-pela baseketana” leami. 21 Dopa leaminopa, baame dokaita lamaiyoo, “Nyakamame namba kandao apipi lao masala naelyamipi?” lea.
Jisasame Akali Lenge Monda Mende Lenge Tasiamo Doko
22 Dokopa Jisasa baanya disaipolo dupa-pipa Betsaida yuu dokonya peami. Pupala kateaminopa, endakali dupame akali lenge monda mende baa kateamo dokonya laminao ipupala, Jisasame watandena lao tee leami. 23 Jisasame akali lenge monda doko kinginya minatae katao, taono yakane doko yakinatala peambi. Pupala baame sopokali talyinya lenge dolaponya pisetala, baanya kinginya minia. Dopa petala, “Embame dopale mende kandelepe?” lea. 24 Dopa leamopa, baame kandalyetala, “Nambame endakali dupa kandapupa, ita jepae mendapu kaita paele pilyaminona” lea. 25 Dokopa Jisasame akali dokonya lenge dolapo deaka kingimi minia. Minateamopa, baame dupa pitaka auu pyoo kandea. 26 Kandeamopa, Jisasame akali doko lamaiyoo, “Emba taononya napenya, andaka puu” lea.
Pitame Jisasa Kandao Emba Kraisa Dokona Leamo Doko
(Mt 16:13-20; Lk 9:18-21)
27 Jisasapi, baanya disaipolo dupapi yuu Sisaria Pilipae dokonya taono dupanya peami. Pao pituu Jisasame disaipolo dupa tipa pyoo, “Endakali dupame namba kandao apina lelyamipi?” lea. 28 Dopa leamopa, dupame yanu pyao, “Yangimi emba kandao Jone kaimbu pingi dokona lelyamino. Yangimi emba Ilaijana lelyamino. Yangimi emba propeta wamba kateamino dupanya mendena lelyaminona” leami. 29 Dopa leaminopa, Jisasame dokaita tipa pyoo, “Endakali dupame dopa lalumino doko, nyakamame namba kandao apina lelyamipi?” lea. Dopa leamopa, Pitame yanu pyao, “Emba Kraisa dokona” lea. 30 Dopa lateamopa, Jisasame dokaita kyeto joo lamaiyoo, “Endakali waka mende, namba dokona lao lamaiya naeyalapape” daa lea.
Jisasame Baa Kumatapi Sakatatapi Dolaponya Leamo Doko
(Mt 16:21-28; Lk 9:22-27)
31 Dokopa Jisasame disaipolo dupa tee pyao lamaiyoo, “Akalinya Ikiningi doko tanda longo napenge. Judamanya isingi akalipi, pitisa mupapi, Mosesanya loo mana nyepae akalipi, dupame baa maka kaeyapala, pyao kumasetami. Kumasetaminopa, yuu gii tepo dokonya baa dee sakatatana” lea. 32 Jisasame pii dutupa panao lateamopa, Pitame baa laminao umbisale pupala, pyalanya lea. 33 Dopa lateamopa, baame kapilyetala, baanya disaipolo dupa kandatala, Pita pyalanya lao, “Satane, emba puu! Embame Gotenya masingi doko masala naenya, endakalinya masingi doko masilinona” lea.
34 Dopa latala baame endakali kambu dokopi, disaipolo dupapi lamaiyoo, “Endakali mendeme namba watao ipatoo lao masetamo doko, baa tange kame sepala, baanya poko ita doko nyoo soo, namba watao ipupenge. 35 Endakali mendeme namba watatosa tanda natona lao masetala, wanditamo doko, baa alu pita. Dopaka doko, endakali mendeme nambapi, wai pii epe dokopi lao masetala, baa tange kame setamo doko, baa auu pyoo katata. 36 Endakali mendeme namba yakinatala, yuunya oapi dupa pitaka nyoo setao katapala, baa alu pitamo doko, oapi dupame tanga baa aipa petala nisetape? 37 Dee aki mende Gote maitala, baa tange kapa pao pyoo nyetape? 38 Gote yakinatala, koo pyoo kalyamino dupanya kainanya katapala, endakali mendeme nambapi, nambanya pii dokopi lao panalanya elya kaeyatamo doko, Akalinya Ikiningi doko enjele epe dupa-pipa Takangenya tii pipae dokonya ipatamo dokopa, baame dopaka pyoo endakali doko kandao elya kaeyatakana” Jisasame lea.
91 Dopa latala Jisasame dokaita lamaiyoo, “Nambame nyakama kiningi langilyo: Endakali ae kalyamino datupanya mendapu kumala naeyataminopa, Gotenya isingi mate doko panao ipatamopa, dokonya pupu lapae doko kandatamina” lea.
Jisasa Waka Jiamo Doko
(Mt 17:1-13; Lk 9:28-36)
2 Yuu gii 6-pela pateamopa, Pita, Jemesa, Jonepi, dutupa iki Jisasame laminao, yuu manda ketae mendenya pea. Dokonya katao kandeaminopa, Jisasa baa waka jia. 3 Baanya yonge pee dupa etete kyoo lao pole-pole pia. Jisasanya yonge pee kyoo leamo dopale joo, endakali mendeme kyoo lena lao wasa napingima. 4 Dokopa Ilaija Mosesapa, Jisasa-pipa pii lao kalyu piaminopa, kandeami. 5 Kandatala Pitame Jisasa lamaiyoo, “Mana Lenge Akali, naima dakenya katamanopa, auu pilyamona, sele anda tepoma pimana. Mende embanya, mende Mosesanya, mende Ilaijanyana” lea. 6 Pitame paka kaeyapala, aipa laowape lao masala naeyao, mee lea. 7 Dopa leamopa, kopa mendeme ipupala, dokaita sanga pia. Kopa dokonya-kaita pii mende epea dokome, “Doo kalyamo doko nambanya Ikiningi mona setenge dokona, nyakamame baanya pii doko sakamaiyepape” lea. 8 Dokopa disaipolo tepoma dutupame kandayoko leaminopa, Jisasa iki katea.
9 Yuu manda doko yakinatala, lanao epeaminopa, Jisasame kyeto joo dutupa lamaiyoo, “Nyakamame kanjimino doko mende lamaiya naeyalapape. Tanga Akalinya Ikiningi doko kumapala, dee sakatatamopa, endakali dupa lamaitamina” lea. 10 Baame pii leamo doko mende lamaiya naenya, nyakamalapo laloo pyoo, “Kumapala dee baa sakatata lalamo dokonya tenge doko aipa pyoo laape?” leami. 11 Dopa petala disaipolo tepoma dutupame Jisasa tipa pyoo, “Mosesanya loo mana nyepae akali dupame aipuma Ilaija wambao ipatatamopa, Kraisa ipupengena lengemape?” leami. 12 Baame yanu pyao, “Dupa pitaka depa lasalanya, Ilaija wambao ipupenge. Dopa latae singi-tamo doko, tenge aipuma Akalinya Ikiningi doko maka kaeyapala, tanda longo maitamina lao pepa pyapae silyape? 13 Jone kaimbu pingi doko Ilaija joo ipatea.+ 9:13 Giriki piimi, “Ilaija baa ipateana” latae silyamo. Dopaka doko, Matyuame Jone kaimbu pingi doko Ilaija joo ipateana lelyamo. Pii pepa pyapae singiliaka pyoo, baa epeamopa, endakali dupame masiamili pyoo, baa minao koeyasiamina” Jisasame lea.
Wane Imambu Koo Paleta Mende Jisasame Nisiamo Doko
(Mt 17:14-20; Lk 9:37-43)
14 Jisasa, Pita, Jone, Jemesapi pilyetala kandeaminopa, endakali kambu andake mendeme disaipolo yangi dokaita katao, kakopeami dokonya, Mosesanya loo mana nyepae akali mendapu katapala, disaipolo dupa-pipa pii yanda pyoo kateami. 15 Jisasa epeamopa, endakali kambu dupa pitakame walu lao kandatala, yapa pao kingi nyiami. 16 Dokopa Jisasame dokaita tipa pyoo, “Nyakama aki mendenya pii longo lelyamipi?” lea. 17 Akali kambu dupanya katea mendeme yanu pyao, “Mana Lenge Akali, nambanya wane doko imambu koo mendeme muumaa jiamosa, embame nisatale lao laminao epo. 18 Imambu koo dokome baa minao, lungu pilyamoli pyoo, lombapae singi. Dopa pilyamopa, wane doko nengekaita kambapupaka mandyuu, nenge kitakato lao, kingi mokopi tinokao tui lenge. Nambame embanya disaipolo dupame imambu koo watao pyakamaina lamaipupa, dupame kapa pao watao pyala naeyalaminona” lea. 19 Dopa leamopa, Jisasame lao pituu, “Nyakama Gote tungi napingi tata, oo koto-koto doko namba nyakama-pipaka tole katatope? Nyakama nongo pilyamino doko andukupa tolataminopa lao, nambame malisoo kataowape? Wane doko laminao asa ipupa” lea. 20 Dokopa wane doko laminao, Jisasa kateasa epeaminopa, imambu koo dokome Jisasa kanju katao, wane doko walumane minao, lombanya seteamopa, nengekaita kambapupaka mandea. 21 Dokopa Jisasame takange doko tipa pyoo, “Wane dake gii andukupa tee pyao dopa piape?” lea. Baame yanu pyao, “Koosa tee pyao pia. 22 Paa longosa imambu koo dokome baa soo itatenya yangata, endakinya soo pyandata pyoo, kumasalanya pingina, embame dopale mende kapa pao piti-tamo doko, naima kondo kaeyao pipoko!” lea. 23 Jisasame baa lamaiyoo, “Embame aipuma, ’Dopale mende kapa pao piti-tamo doko’ pii leepe? Endakali mendeme Gote tungi pilyamo dokome kalai dupa pitaka kapa pao pingina” lea. 24 Dopa leamopa, wane dokonya takange dokome puu lao, “Nambame Gote kuki tungi pilyona, kyeto joo tungi pyatoo, embame nisepe!” lea. 25 Dokopa endakali kambu dupame yapa ipao Jisasa katao kakopeamino kandatala, baame imambu koo doko pyalanya lao, “Emba muumaa kaleketa imambu koo dokome, wane dake yakinatala puu. Emba baa-kisa dee naipupi” lea. 26 Dopa leamopa, imambu koo dokome puu lao ae latala, wane doko minao etete walu lasetala, baa yakinatala pea. Dokopa wane doko kumapae joo siamopa, endakali longome, “Baa kumatelyamona” leami. 27 Dokopa Jisasame wane dokonya kinginya minatala, toeya katasia. 28 Toeya kataseteamopa, Jisasapi, disaipolo dupapi andaka peami. Dokopa disaipolo dupame Jisasa tipa pyoo, “Aipuma naimame imambu koo doko kapa pao watao pyala naeyalamape?” leami. 29 Dopa leaminopa, baame dokaita lamaiyoo, “Imambu koo dopale dupa lomame iki watao pingina” lea.
Jisasame Baa Kumatapi Sakatatapi Dolaponya Paa Lapo Pyoo Leamo Doko
(Mt 17:22-23; Lk 9:43-45)
30 Jisasame disaipolo dupa-pipa yuu doko yakinatala, Galilea-kaita peami. Pao pituu Jisasame baanya disaipolo dutupa iki mana lamaiyanya, endakali mendeme nakandena lao masia. 31 Dokopa baame dokaita lamaiyoo, “Akalinya Ikiningi doko enge nyepala, endakali dupame baa pyao kumasetami. Kumapala baa yuu gii tepo dokonya malunya dee sakatatana” lea. 32 Pii leamo dokonya tenge nyala naeyapala, disaipolo dupame baa tipa pyaanya paka kaeyami.
Alyasale Joo Katenge Dokonya Jisasame Mana Leamo Doko
(Mt 18:1-5; Lk 9:46-48)
33 Dokaita Kapename pupala, andaka pituu Jisasame disaipolo dupa tipa pyoo, “Nyakamame kaitinisa aki mendenya lao ipamipi?” lea. 34 Nyakama dutupanya mende api alyasale joo kalyape lao, pii yanda pyoo kaitinisa lao epeamino, dokonya ema napiami. 35 Dokopa Jisasame 12 disaipolo dutupa tengesale epena latala lamaiyoo, “Endakali mende alyasale joo katapuli lao masetamo doko, baa anasale jepala, endakali pitakanya kalai akali joo katapengena” lea. 36 Dopa latala baame wane koo mende lanyepala, dokaitanya kainanya katasia. Dopa petala, baame wane doko kopinyetala dokaita lamaiyoo, “Endakali mendeme namba lao masetala, wane koo dapale mende lanyilyamo dokome, namba lanyingiaka. Namba lanyilyamo dokome namba iki lanyala naenge. Namba puu leamo akali doko lanyingiakana” lea.
Naima Nisilyamo Endakali Dokome Naima Koeyasala Naenge
(Lk 9:49-50)
38 Joneme Jisasa lamaiyoo, “Mana Lenge Akali, akali mendeme embanya kengenya imambu koo dupa watao pyapya doko kandatala, naima-pipa apata napaenge dokonyana, baame kalai pipya doko kaena daa lapumana” lea. 39 Dopa leamopa, Jisasame baa lamaiyoo, “Baame kalai pilyamo doko nyakamame daa nalalapape. Endakali mendeme nambanya kengenya kalai pupu lapae mende pilyamo dokome, namba kandao yapa pii koo nalenge. 40 Naima nisilyamo endakali dokome naima koeyasala naenge. 41 Nambame nyakama kiningi langilyo: Nyakama namba tata-lamona latala, endakali mendeme endaki kapo mendai kamuo ditamo dokonya, yole doko alu napyoo, sulu setana” lea.
Koo Pina Lao Mapisingi Mana Dupa
(Mt 18:6-9; Lk 17:1-2)
42 Jisasame dee mende lao pituu, “Namba tungi pingi wane koo mende, endakali mendeme koo pina lao mapisetamo doko, kana andake mende baanya mangenya kende katatala, soo solowatanya pyandamili doko, auu pipyali. 43 Embanya kingi mendeme emba koo pyaale lao mapisetamo doko, kepanya nepape. Emba kingi mendai iki kateta, lete etete katenge dokonya pupili doko, auu pipyali. Emba kingi lapota kateta, itate konjala naenge ele panda koo dokonya pupili doko, auu napipyali.+ 9:43-44 Buku Baibolo Giriki piimi wambao pyatae mendatupanya vesa dakenya pii datupa apata lapae palelyamo: “Ele panda koo dokonya nene ambo dupame nelyamo doko nao etala naenge. Itateme telyamo doko tao etala naengeaka.”45 Embanya moko mendeme emba koo pyaale lao mapisetamo doko, kepanya nepape. Emba moko mendai iki kateta, lete etete katenge dokonya pupili doko, auu pipyali. Emba moko lapota kateta, itate konjala naenge ele panda koo dokonya soo pyandamili doko, auu napipyali.+ 9:45-46 Buku Baibolo Giriki piimi wambao pyatae mendatupanya vesa dakenya pii datupa apata lapae palelyamo: “Ele panda koo dokonya nene ambo dupame nelyamo doko nao etala naenge. Itateme telyamo doko tao etala naengeaka.”47 Embanya lenge mendeme emba koo pyaale lao mapisetamo doko, lukunya nepape. Emba lenge mendai iki tao, Gotenya isingi mate dokonya pupili doko, auu pipyali. Emba lenge lapota tapeta, ele panda koo dokonya soo pyandamili doko, auu napipyali. 48 Ele panda koo dokonya, nene ambo dupame nelyamo doko nao etala naenge. Itateme telyamo doko tao etala naengeaka.
49 “Nee opa mailyami dupa soleme pyoo wasingi. Dopaka pyoo, kenda pipaepi, makande pipaepi, dupanya-kaita endakali dupa Goteme pyoo wasingi.+ 9:49 Giriki piimi dapa lao pepa pyapae silyamo: “Endakali dupa pitaka itateme aipi jetala lyandata.” Pii dokonya tenge doko yalo petae katapyanya, Enga piimi nyepengeli pyoo kapilyetae kalyamo.50 Sole epeaka doko, tende patamo doko, nyakamame aipa petala dee tende pisetamipi? Nyakama sole katatae joo, auu pyoo kalyepape” Jisasame lea.
10Enda Yakinenge Dokonya Jisasame Mana Leamo Doko
(Mt 19:1-12)
1 Jisasa baa Kapename yakinatala, Judia pao pyakamatala, endaki Jodane omotena pea. Dokopa endakali kambu dupa ipatae katao, baa kateamo dokonya ipao kambu piami. Dopa piaminopa, baame pingiliaka pyoo, endakali dupa deaka mana lamaiya. 2 Dokopa Parasai mendapuame ipupala, baa minao makande pyoo, “Akali mendeme baanya enda yakinatamo doko, loome daa latae singi doko yalatape?” leami. 3 Jisasame yanu pyao, “Wamba Mosesanya mana seteamo dokonya aipa latae silyape?” lea. 4 Dupame yanu pyao, “Akali dokome enda yakinenge pepa doko maitala, yakinapengena latae silyamona” leami. 5 Jisasame dokaita lamaiyoo, “Nyakamanya yumbange dupame tuu-tuu piaminosa, Mosesame mana doko pepa pyanya setea-pyaa. 6 Seteamoaka doko, Goteme tee pyao yuu kaitipi wasiamo dokopa, enda akalipa lao wasia. 7 Tenge dokonya, akali dokome baanya endangi takangepi yakinatala, enda dokopa tole pingi. 8 Dopa pilyambinopa, nyakamba lapo joo napetenya, yonge mendai joo petengemba. 9 Goteme nyoo pyasetae doko, endakalimi wakale pyoloo napipengena” Jisasame lea.
10 Dopa lateamopa, baanya disaipolo dupame dee andaka patala, pii leamo dokonya Jisasa tipa piami. 11 Dokopa baame dokaita lamaiyoo, “Akali mendeme baanya enda doko yakinatala, waka mende nyetamo dokome, enda wambatae dokonya enombanya baa kepo kolata. 12 Dopaka pyoo, enda mendeme akalingi yakinatala, waka mendenya patamo doko, baa kepoaka kolatana” lea.
Wane Wanakupi Dupa-Kisa Jisasame Kingi Seteamo Doko
(Mt 19:13-15; Lk 18:15-17)
13 Endakali mendapuame Jisasa kateamo dokonya wane wanakupi dupa Jisasame kingi aiyombanya setapala, pii epe lamaina lao laminao epeaminopa, disaipolo dupame dokaita pyalanya leami. 14 Dokopa Jisasame imbu kaeyapala dokaita lamaiyoo, “Gotenya isingi mate doko wane wanakupi koo dapale joo kalyamino dupanyana, epekena kaita lyokala naeyalapa. 15 Nambame nyakama kiningi langilyo: Wane wanakupi koo dupame Gotenya isingi mate doko nyingimali pyoo, endakali mendeme nanyetamo doko, Gotenya isingi mate dokonya napatana” lea. 16 Dopa latala baame wane wanakupi koo dupa kopinyetala, kingi aiyombanya setao auu pisia.
Akali Yuunya Kamongo Mende
(Mt 19:16-30; Lk 18:18-30)
17 Dopa petala Jisasa paanya kaita nyiamopa, akali mendeme yapa ipao luma lakapala, baa tipa pyoo, “Mana Lenge Akali Epe, namba lete etete katenge doko aipa petala nyotope?” lea. 18 Jisasame baa lamaiyoo, “Aipuma embame namba kandao epena leepe? Endakali mende epe daa, Gote iki baa epe kalyamo. 19 Mosesanya loo dutupa embame masilino: ’Endakali pyao kumasala naeyape. Kepo kolala naeyape. Pake nala naeyape. Endakali mende sambo lao minakasala naeyape. Endakali mendenya dopale mende sambo lao tolao nyakamaiya naeyape. Embame embanya endangi takangepa, dolapo andanda semaiyoo katapena’” lea. 20 Akali dokome Jisasa lamaiyoo, “Mana Lenge Akali, namba wane kolesa pituu, Mosesanya loo dutupa pitaka watao minio, dopaka pyoo minao kalyona” lea. 21 Dopa leamopa, Jisasame akali doko kondo kaeyao kandatala, “Emba mendai mende daa jilyamona, pupala embanya oapi dupa pitaka muni nyepala, endakali daa jingi dupa maitala, namba watao ipupi. Dokopa embanya epe dupa kaitinya sakatana” lea. 22 Dopa leamopa, baanya oapi etete longo singi dokonyana, mona etete kenda kaeyao, enomba kumatala, Jisasa yakinatala pea.
23 Pateamopa, Jisasame kandayoko latala, disaipolo dutupa lamaiyoo, “Yuunya kamongo dupa Gotenya isingi mate dokonya paanya, etete leke-leke tatamina” lea. 24 Dopa leamopa, disaipolo dupame sepala, mona kenda kaeyaminosa, Jisasame deaka lamaiyoo, “Wane paluma, endakali dupa Gotenya isingi mate dokonya paanya, eteteaka leke-leke tatami. 25 Kamele mendeme kepo tii mendenya leke-leke tao kolandapyaliaka doko, yuunya kamongo mendeme Gotenya isingi mate dokonya paanya, etete leke-leke tapyalina” lea. 26 Dokopa pii dutupa sepala, disaipolo dupa etete walu leami. Walu latala nyakamalapo laloo pyoo, “Dopa-tamo doko, endakali apimi Gotenya isingi mate dokonya patape?” leami. 27 Dopa leaminopa, Jisasame dokaita kandatala lamaiyoo, “Endakalimi nyakamanya pupu lapae dokome Gotenya isingi mate dokonya napatami. Endakalimi kapa pao napipenge dupa pitaka Goteme kapa pao pingina” lea.
28 Dokopa Pitame baa lamaiyoo, “Naimanya tatapi, pinjupi, dupa pitaka yakinatala, emba watao epelyamano” lea. 29 Dopa leamopa, Jisasame lao pituu, “Nambame nyakama kiningi langilyo: Nambapa, wai pii epe dokopa, dolapo lao masetala, endakali mendeme baanya ee andapi, takange endangipi, kaiminingi pimalengepi, wane wanakupi, dupanya mende yakinatamo dokome, ee andapi, endangipi, kaiminingi pimalengepi, wane wanakupi, dupa wakao 100 lao baa nyeta. Dee endakali dokome kenda pipae longo dupa apata nyoaka katata. Dopa petala yuu enenge ipatamo dokonya, baa lete etete katenge doko nyeta. 31 Salapape! Epapu endakali longo mendapu wambao kalyamino dupa, tanga maita pyatami. Maitapyao kalyamino dupa, wambatamina” Jisasame lea.
Jisasame Baa Kumatapi Sakatatapi Dolaponya Paa Tepo Pyoo Leamo Doko
(Mt 20:17-19; Lk 18:31-34)
32 Jisasa disaipolo dupa-pipa Jerusalema paanya, kaita peaminopa, Jisasa wambea. Dokopa disaipolo dupa walu leami kandatala, watao peamino dupa paka kaeyami. Dopa piaminopa, baame 12 disaipolo dutupa lanyepala, tenda baa-kisa pitamo dupa dokaita lamaiyoo pituu, 33 “Naima Jerusalema pelyamano. Patatamanopa, akali mendeme Akalinya Ikiningi doko enge nyepala, pitisa mupapi, Mosesanya loo mana nyepae akalipi, dupa laitaka pyaapomo. Laitaka petatamopa, baa nyoo kote latala, pyao kumasalanya, akali kamalya katenge dupanya kingilyaka maitami. 34 Dopa petataminopa, baa lamba lao, sopokalimi pyao, konjame pyao petala, angi pyao kumasetaminopa, baa yuu gii tepo dokonya dee sakatatana” Jisasame lea.
Jemesa Jonepame Jisasa-Kisa Tee Leambino Doko
(Mt 20:17-19; Lk 18:31-34)
35 Sebedi ikiningi Jemesa, Jonepi ipupala Jisasa lamaiyoo, “Mana Lenge Akali, nalimbame emba-kisa dopale mende tee latambanopa, embame latamba dopaka pipi laka lao masilyambanona” leambi. 36 Jisasame dolapo lamaiyoo, “Nambame nyakambanya aki mende pyakapili lao masilyambipi?” lea. 37 Dokopa dolapome yanu pyao, “Embanya tii pipae dokonya ipatenopa, nalimbanya mende embanya kingi tolae-kaita pilyepa lape, mende kingi koeya-kaita pilyepa lapena” leambi. 38 Dopa leambinopa, Jisasame dolapo lamaiyoo, “Nyakambame masala naeyao lelyambino. Nambame kenda pipae salapo-lamo doko, nyakambame kapa pao setambipi? Namba kumala pelyo dopa pyoo, nyakambame kapa pao kumala patambipi?”+ 10:38 Giriki piimi dapa lao pepa pyapae silyamo: “Kapo penge nelyo dakenya nyakambame kapa pao natambipi, pande kaimbu nyilyo dakenya nyakambame kapa pao nyetambipi?” Pii dokonya tenge doko yalo petae katapyanya, Enga piimi nyepengeli pyoo kapilyetae kalyamo. Vesa 39 doko dopaka pyoo kapilyetae kalyamo. lea. 39 Dopa leamopa, dolapome yanu pyao, “Nalimbame kenda pipae dupa kapa pao setambaka. Dee nalimba emba kumateno dokonya kapa pao kumatambakana” leambi. Dopa leambinopa, Jisasame dolapo lamaiyoo, “Kini, nambame kenda pipae salapo-lamo doko, nyakambame setambiaka. Namba kumalapo dopaka pyoo, nyakamba kumatambiaka. 40 Dopaka doko, nambanya kingi tolae-kaita petena lapengepi, koeya-kaita petena lapengepi, doko nambanya kalai daa. Goteme pititamina lao yapao nyiamo endakali dupa pititamina” lea.
41 Dopa lelyambino lapae doko sepala, 10 disaipolo dutupame Jemesa, Jonepa imbu kaemaiyami. 42 Dopa piaminopa, Jisasame disaipolo dupa epena latala dokaita lamaiyoo, “Akali kantri waka isingi, Gote tungi napingi dupame, nyakamanya endakali isingi dupa kandanya palyetala, nyakama alyasale joo katengema, doko nyakamame kandengema. Kantri dupanya akali andake dupame, nyakamanya pii watao minekena lao kandatae paengema, mana doko nyakamame kandengemaka. 43 Nyakamame dopa napyepape. Nyakamanya mende akali andake joo katapuli lao masetamo dokome, dokaitanya kalai akali joo katapenge. 44 Nyakamanya mende alyasale joo katapuli lao masetamo dokome, dokaitanya kendemane joo katapenge. 45 Dopaka pyoo, Akalinya Ikiningi dokome baanya kalai pyekena lao naepea. Baame endakali longo dupa nisoo, kii tamao+ 10:45 Koo dupanya Goteme endakali watao piamo doko, Jisasa kumiamo dokome, endakali dupa dee Gote-kisa Jisasame sambao nyia. (Satane-kisa Jisasame endakali sambao nanyia.) nyalanya baa tangeme kumala epeana” lea.
Jisasame Akali Lenge Monda Mende Lenge Tasiamo Doko
(Mt 20:29-34; Lk 18:35-43)
46 Dokopa dokaita Jereko peami. Dokonya katao, Jisasapi, disaipolopi, endakali kambu andake mendepimi Jereko yakinatala peami. Pao kandeaminopa, Timiasa ikiningi Batimiasa, lenge monda doko kaitinisa muni tee lao petea. 47 Baa Nasarete tange Jisasa ipao pelyamo lapae sepala, wii lao, “Dapiti Yumbange Jisasa, namba kondo kaeyapoko!” lea. 48 Dopa leamopa, endakali longo dupame baa pii kaena lao, pyalanya leami. Dopa leaminopapi, baame etete puu lao wii lao, “Dapiti Yumbange, namba kondo kaeyapoko!” lea. 49 Dokopa Jisasa katapala, “Baa epena lapa” lea. Dopa leamopa, endakali dupame akali lenge monda doko lamaiyoo, “Emba ipu lelyamona, paka nakaenya sakatao puu” leami. 50 Dokopa baanya yonge pee ketae pingi doko lyokanya pyale latala, pupae sakatao Jisasa kateamo dokonya pea. 51 Dokopa Jisasame baa tipa pyoo, “Nambame embanya aipa pyakapili lao masilipi?” lea. Akali lenge monda dokome yanu pyao, “Mana Lenge Akali, namba dee lenge tao kandatoo, embame namba nisepoko!” lea. 52 Dopa leamopa, Jisasame baa lamaiyoo, “Embame namba tungi pyapino dokome, embanya lenge dolapo auu pilyamona puu” lea. Dopa lalu piamopa, baanya lenge dolapo auu peteamopa, Jisasa watao pea.
11Jisasa Kiŋi Joo Jerusalema Peamo Doko
(Mt 21:1-11; Lk 19:28-40; Jn 12:12-19)
1 Jisasa disaipolo dupa-pipa Jerusalema tengesa, Olipimanda, taono Betepasa, Betaniapa makisa singi dokonya peami. Pao pituu, Jisasame disaipolo lapoma wambao pena lea. 2 Pena latala dolapo lamaiyoo, “Taono yakane silyamo omonya pupala, dongi yakane wamba endakali napetenge mende anjetae kalyamona, tata lao minao ipupape. 3 Endakali mendeme, ’Aipuma dopa pilyambipi?’ lea kandeno dokopa, ’Kamongome pipenge mende pitoo latala, nyala pupa laamo. Kalai petala, dee yapa peakatoo laamona’ lapape” lea. 4 Dokopa dolapome pupala, dongi yakane doko kaitini lembasa anda kambu mendenya anjetae kateamo kandatala, tata leambi. 5 Tata leambinopa, endakali kateamino dupame, “Dongi yakane doko aipuma tata lelyambipi?” leami. 6 Jisasame leamoli pyoo, dokaita lamaiyambinopa, yakana latala nyoo pena kaeyami. 7 Akali dolapome dongi doko Jisasa kateamo dokonya minao ipupala, nyakambanya yonge pee ketae pingi dolapo lyokanya dongi maitanya setapeambinopa, Jisasa dokonya ketae petea. 8 Endakali longo dupame nyakamanya yonge pee ketae pingi dupa kaitini dokonya kuiyami. Yangimi ita yoko dupa lakao kaitini dokonya kuiyamiaka. 9 Dokopa endakali dupa wambata, maita pyata pyoo pao pituu, wee dapa leami: “Gote lao mambo pilyamano! Kamongonya kengenya epelyamo akali dake Goteme auu pisetae! 10 Wamba Dapitimi naimanya yumbange dupa isoo kateamoli pyoo, indupa Kraisame naima isoo kalyanya epelyamo dake Goteme auu pisetae! Gote Ketae Kaitinya Katenge doko lao mambo pilyamanona” leami.
11 Dopa leaminopa, Jisasa pao Jerusalema pyakamatala, lotuu anda andake kame+ 11:11 Kamenya andakote kamapupi, lotuu anda andakepi, dolapo kandao, Giriki pii lao “ieron” lengema. Lotuu anda andake doko iki kandao, “naos” lengema. Vesa dakenya “ieron” dokonya lao pepa pyapae silyamo. dokonya kolandatala, siamo dupa pitaka kandea. Niki lenge landa pyalanya piamopa, 12 disaipolo dutupa-pipa taono Betani dokonya peami.
Jisasame Piki Ita Mende Kandao Sapuina Leamo Doko
(Mt 21:18-19)
12 Oo yongama Betani yakinatala epeaminopa, Jisasa baa lopo kaeya. 13 Lopo kaeyapala, piki ita mende yoko pyoo omosale kateamo kandatala, dii lyilyape lao kanja pea. Pao kandeamopa, piki dii nalyingi gii dokonyana, dii nalyoo yoko iki pyoo katea. 14 Jisasame piki ita doko lamaiyoo, “Tanga tangapi endakali mendeme embanya dii mende lyao nanatamina” lea. Pii leamo doko disaipolo dupame siami.
Jisasame Lotuu Anda Andake Kamenya Andakote Maketa Daa Leamo Doko
(Mt 21:12-17; Lk 19:45-48; Jn 2:13-22)
15 Jisasa disaipolo dupa-pipa Jerusalema pyakamatala, baa lotuu anda andake kame dokonya kolandatala, endakali maketa setao kateamipi, sambao kateamipi, dupa kandatala, imbu kaeya. Dopa petala toko ketae muni aloo piamino dupapi, yaka maiyolee maketa seteamino dupa sepeta minalyetala kaii lao nepatala, watao pia. 16 Watao pyapala, endakali mendeme oapi mende soo, lotuu anda andake kame andakote-kaita, poko napina lao daa lea. 17 Dopa latala baame dokaita mana lamaiyoo, “Pii pepa pyapae singi dokonya, ’Nambanya anda doko akali tata dupa pitakanya loma singi anda latamina’ lapae nasilyape? Dopaka doko, nyakamame anda dake pake nenge dupanya yalo pingi kananda jetelyaminona” lea. 18 Endakali kambu kateamino dupa pitakame mana leamo doko sepala, walu leami. Tenge dokonya, Pitisa mupapi, Mosesanya loo mana nyepae akali dupapimi Jisasa paka kaeyapala, baa pyao kumasemana lao kaitini kutiami. 19 Yuu kuiyala peamopa, Jisasa disaipolo dupa-pipa Jerusalema yakinatala peami.
Piki Ita Sapuiyamo Dokonya Tenge Doko
(Mt 21:20-22)
20 Oo yongama wamba kaita dokonya pao pituu kandeaminopa, piki ita wamba dii namandena leamo doko tengenya pituu, sapuo pao mangenya tuu latae katea. 21 Jisasame piki ita doko kandao pii leamo doko Pitame masetala Jisasa lamaiyoo, “Mana Lenge Akali, kuaka embame piki ita dake sapuina lapino dokonya, sapupya-lamo kanda!” lea. 22 Dopa leamopa, baame disaipolo dokaita lamaiyoo, “Nyakamame Gote tungi pyalapape. 23 Endakali mendeme mona lapo palya naenya, Gote tungi pyatala, yuu manda dake sakatatala, solowatanya pyakala pena latamo doko, kini dopaka pita. 24 Nyakamame Gote tungi pyatala, dopale mende nyemana lao loma soo tee latamino dupa pitaka Goteme ditana lao nambame nyakama langilyo. 25 Nyakamame loma salanya pituu, endakali mendeme nyakama-kisa koo pitamo dupa kame sakamaiyepape. Dopa pitamino dokome, nyakamanya Takange kaitinya katenge dokome nyakamanya koo dupa kunao nepakatana” Jisasame lea.+ 11:25-26 Buku Baibolo Giriki piimi wambao pyatae mendatupanya vesa dakenya pii datupa apata lapae palelyamo: “Nyakamame endakali mendenya koo dupa kame sala naeyatamino doko, nyakamanya Takange kaitinya katenge dokome nyakamanya koo dupa kame sakala naeyataka.”
Jisasanya Pupu Lapae Dokonya Tipa Piamino Doko
(Mt 21:23-27; Lk 20:1-8)
27 Jisasa disaipolo dupa-pipa Jerusalema pilyetala, lotuu anda andake kame dokonya paeya. Dokonya paeyamopa, pitisa mupapi, Mosesanya loo mana nyepae akalipi, Judamanya isingi akalipi, dupame ipupala tipa pyoo, “Emba apimi kalai andake dupa pii lapumupa pilipi?” leami. 29 Dokopa Jisasame yanu pyao, “Nambame nyakama tipa mende pitoaka, nyakamame yanu pyakatamino doko, nambame kalai datupa akali dokome pupu lapae ditala, pii lapyana lao nyakama langitoo. 30 Joneme kaimbu piamo mana doko apimi pupu lapae maitala, pina leape? Goteme pina leape, pande akalimi pina leamipi? Nyakamame namba langyepa” lea. 31 Dopa leamopa, dokaitame pii doko sepala, nyakamalapo laloo pyoo, “Naimame, ’Goteme pina leana’ latamano doko, ’Aipuma nyakamame Jonenya pii doko kiningina lao masala naelyamipi?’ laapomo. 32 Dopaka doko, endakali kambu dakeme Jone baa propeta kiningina lao masingima dokonya, naimame akalimi pina leamina laanya paka pyuumuna” leami. 33 Dopa latala, dupame Jisasanya pii yanu pyakamaiyoo, “Apimi Jone kaimbu pina leape lao, naimame masala naelyamanona” leami. Dokopa Jisasame dokaita lamaiyoo, “Dopa-tamo doko, nambame kalai datupa akali dokome pupu lapae ditala, pii lapyana lao, nyakama langya naeyatoakana” lea.
12Waene Ee Isinginya Kongali Leamo Doko
(Mt 21:33-46; Lk 20:9-19)
1 Jisasame Judamanya isingi akali dupa kongali pii mende lamaiyoo, “Akali mendeme waene ee mende kakopatala pokea-pyaa. Pokatala dii lyao waene ipange nyalanya, takyoo indyapenge yuli mende tombao wasia. Wasetala ee doko kandao isoo pitipenge anda ketae mende pia. Dopa petala akali mendapu-pipa propeta mokosetamanopa latala, ee doko isoo bisnis pyoo katekena latala, baa yuu londati mendakaita pao katea. 2 Waene wambu pingi gii epeamopa, baanya kalai akali mendeme ee isakamaingi akali dupa kateamino dokonya pupala, waene dii mendapu lyao peekena pena lea. 3 Leamo dokonya pateamopa, ee isoo katenge dupame baa pyao indyepala, mee pilyina leami. 4 Deaka akali ee tange dokome kalai akali mende pena lea. Pateamopa, akali dupame kalai akali doko pyao aiyomba lombapala, baa-kisa mana koo elya pipae mendapu miniami. 5 Deaka baame kalai akali mende pena lateamopa, doko pyao kumasiami. Dopaka pyoo, baame kalai akali longo pena lea. Pateaminopa, yangi dupa mee pyao indyepala, yangi dupa pyao kumasiami. 6 Dopa peteaminopa, akali dokonya ikiningi mona setenge mendai iki katenge doko, andanda samaiyaminona lao masetala, baa etao pena lea. 7 Wane doko epeamo kandatala, ee isakamaingi akali dupame nyakamalapo laloo pyoo, ’Wane dakeme takangenya moeya dupa nyepengena, baa pyao kumasetamano, doko baanya moeya nyepenge dupa naima nyetamana’ leami. 8 Dopa latala wane doko pyao kumasetala, kamalya pyale leamina” lea.
9 Dopa latala Jisasame dokaita tipa pyoo, “Dopa piami-lumu dokonya waene ee tange dokome ipupala aipa pitape? Tange doko ipupala, ee isakamaingi dokaita pyao kumasetala, akali waka mendapuame isoo katekena lao laitaka pita. 10 Laitaka pita dokonya, nyakamame pii pepa pyapae silyamo dake itaki pyala naeyamipi? ’Kapenda dupame anda pipenge kana mende kandao, koeyapae-lamo latala yakineamino doko, kana mupa jetelyamo. 11 Kana mupa jetelyamo doko, Kamongome pipya-lamo dokonya, naimame eteteaka auu kaeyao sani kandelyamano’” lapae silyamo.
12 Jisasame dopa lamaiyamopa, Judamanya isingi akali dupame pii kongali doko nyakama kandao lalumuna lao sepala, baa anjemana lao kaita kutiami. Kutiaminoaka doko, endakali kambu kateamino dupa paka kaeyapala, baa yakinatala peami.
Muni Takisa Dupa Rome Tange Gapomane Andake Sisa Doko Maipengepe Daape Lao Jisasa Tipa Piamino Doko
(Mt 22:15-22; Lk 20:20-26)
13 Jisasame pii mende kopeta latamo dokonya, baa mangenya minamana latala, Judamanya isingi akali dupame Parasai mendapuapi, Kiŋi Erote Antipasa tata mendapuapi, baa kateamo dokonya pena leami. 14 Akali dupame pupala baa lamaiyoo, “Mana Lenge Akali, embame akali andake dupa paka nakaeyao, kiningi pii doko tolao lenge. Endakali dupame pipimili lao Goteme masilyamo dokonya-kaita embame tolao mana lenge. Dopana, gapomane isingi mupa Sisa naimame takisa maipengepe, daape?” leami. 15 Dopa leaminopa, Jisasame baa minao makande pilyamino lao kandatala, dokaita lamaiyoo, “Aipuma namba minao makande pilyami? Muni konde mende kandatoo, nyoo pealapa” lea. 16 Dokopa muni konde mende maitiaminopa, baame dokaita tipa pyoo, “Muni dakenya apinya lengelyapi, kengepi kalyape?” lea. “Doko Sisanya kalyamona” leami. 17 Dokopa Jisasame dokaita lamaiyoo, “Sisanya dupa Sisa tange maiyakamaiyepape. Gotenya dupa Gote tange maiyakamaiyepape” lea. Jisasame dopa leamopa, dokaitame baa kandatala, paka kaeyao walu leami.
Sadyusi Dupame Jisasa Minao Makande Piamino Doko
(Mt 22:23-33; Lk 20:27-40)
18 Sadyusi dupame endakali kumapae dupa sakatala naeyatamina lengema. Dopa lengema dokaita Jisasa kateamo dokonya ipupala baa lamaiyoo, 19 “Mana Lenge Akali, wamba Mosesame mana pepa pyao seteamo dokonya, ’Akali mende enda nyepala, wane manja naeyao kumatamopa, baanya kaiminingi dokome enda walyakae doko piseta. Baapa, enda walyakae dokopa wane mupa manditambino doko kaiminingi kumia dokonya lao manjakamaitana’ lao pyapae singi. 20 Gii mendepa akali mendenya ikiningi 7-pela kateami-pyaa. Dutupanya mupa dokome enda nyepala, wane manja naeyao kumia. 21 Dopa piamopa, kaiminingi laponge dokome enda doko pisiamoaka doko, wane namandeamopa, akali doko kumia. Kaiminingi teponge doko dopaka pia. 22 Dopaka pyoo, kaiminingi 7-pela dutupa pitakame enda dokoaka nyepala, wane manja naeyaowaka kumiami. Dokaita kumao ete dokonya enda doko kumia. 23 Akali kaiminingi 7-pela dutupa pitakame enda mendai dokoaka nyiamino dokonya, tanga endakali sakatatamino gii dokopa, enda doko apinya joo pitatape?” leami.
24 Dopa leaminopa, Jisasame dokaita lamaiyoo, “Nyakamame pii pepa pyapae singi doko masala naeyao, Gotenya pupu lapae doko masala naeyaowaka pingima. Tenge dokonya, nyakamame kopeta lelyamino. 25 Endakali kumapae dupa dee sakatatamino gii dokopa, akali enda nyala naeyao, enda akali napao, kaitinya enjele dupa katengemali pyoo katatami. 26 Ita saka mendenya ita yuli teana lao Mosesame pepa piamo doko itaki napiamipi? Atome dokonya Goteme Mosesa lamaiyoo, ’Namba Abrakame, Aisake, Jekopepinya Gotena’ lea. Baa kumapae dupanya Gote daa. Baa saka katenge dupanya Gote. Abrakame, Aisake, Jekopepi dee tanga sakatao katatamina lao, Goteme masala naeyali doko, baa nyakamanya Gote laa naeyali.+ 12:26-27 Abrakame, Aisake, Jekopepi dee tanga sakatao katatamina lao, Goteme masala naeyali doko, baa nyakamanya Gote laa naeyali. Pii datupa buku Baibolo Giriki piimi pyatae dokonya nakalyamoaka doko, tenge doko yalo petae palelyamo. Dopana, nyakamame endakali kumapae dupa sakatala naeyatamina lelyamino, doko kopeta lelyaminona” Jisasame lea.
Mosesanya Loo Dutupanya Mupa Doko
(Mt 22:34-40; Lk 10:25-28)
28 Mosesanya loo mana nyepae akali dupanya mende ipao kateamo dokome, Sadyusi dupame Jisasa pii yanda pimaiyamino doko sepa, dee Jisasame dokaitanya pii auu pyoo yanu piamo doko sepaka pia. Dopa petala baame Jisasa tipa pyoo, “Mosesanya loo dupanya anduku mupa joo silyape?” lea. 29 Jisasame yanu pyao, “’Nyakama Israele tange dupame salapape! Naimanya Kamongo doko, Gote, baa mendai iki doko kalyamo. 30 Embame embanya Kamongo Gote doko, embanya monapi, imambupi, masingipi, pupu lapaepi, dutupa pitakame auu kaeyape.’ Doko loo mupa doko. 31 Loo lapo dokome, ’Embame emba tange auu kaengeli pyoo, embanya endakali yango dupa auu kaeyape.’ Loo dolapo ita minao, loo dupanya waka mende alyasale joo nasilyamona” Jisasame lea. 32 Dopa leamopa, Mosesanya loo mana nyepae akali dokome baa lamaiyoo, “Mana Lenge Akali, embame kiningi leeno. Gote doko baa mendai iki kalyamo. Waka mende nakalyamo. 33 Gote doko monapi, imambupi, masingipi, pupu lapaepi, dutupa pitakame auu kaenge dokopi, dee tange auu kaengeli pyoo, endakali yango dupa auu kaenge dokopi, loo lapoma dolapome kundi maingipi, opa yangengepi, dolapo ita miningina” lea. 34 Akali dokome auu pyoo yanu piamo kandatala, Jisasame baa lamaiyoo, “Emba Gotenya isingi mate dokonya omosale joo nakalyenona” lea. Dopa lateamopa, endakali dupa pitakame Jisasa pii mende dee tipa pyaanya, paka kaeyami.
Kaitini Andukunya-Kaita Mesaeya Doko Dapitinya Yumbangepe Lao Jisasame Tipa Piamo Doko
(Mt 22:41-46; Lk 20:41-44)
35 Jisasame lotuu anda andake kame andakote dokonya mana lamaiyoo katao, endakali dupa tipa pyoo, “Mosesanya loo mana nyepae akali dupame aipa pyoo kandatala, Mesaeya doko Dapiti Yumbangena lengemape? 36 Oli Spiritame lungu piamopa, Dapitimi dapa lea: ’Kamongo Gote dokome nambanya Kamongo Mesaeya doko lamaiyoo, “Emba nambanya kingi tolae-kaita piti. Dokonya pititinopa, nambame embanya yandapipi dupa ita minatakala, embanya moko pundi-pundi katena latona’ lapae silyamo.”
37 Dopa latala, Jisasame dokaita tipa pyoo, “Dapitimi Mesaeya doko kandao, baanya Kamongona lea-lumu doko, kaitini andukunya-kaita Mesaeya doko baanya yumbangena leape?” lea. Jisasame pii leamo doko endakali kambu andake kateamo dokome auu kaeyao siami.
Mosesanya Loo Mana Nyepae Akali Dupanya Mana Dupa Naminalapape Jisasame Leamo Doko
(Mt 23:1-36; Lk 20:45-47)
38 Jisasame dokaita mana lamaiyoo, “Nyakama Mosesanya loo mana nyepae akali dopale jetamina, wandyuu kalyepape. Dupame nyakama alyasale joo kalyamano lao masetala, yonge pee auu petae dupa petala, endakali dupame mambo pyao, nyakama kandamili lao maketa kamapu dupanya paengema. 39 Dopaka pyoo, Judamanya lotuu lelyamipi, nee andake nelyamipi, dupanya nyakama enomba nyoaka, pitipumali lao masingima. 40 Dupame enda walyakae dupanya yuu andapi dupa minakasoo nyingima. Dee endakali waka dupame nyakama epena lao masina latala, loma londe pyoo singimaka. Goteme endakali dopale pingi dupa kenda pipae etete andake maitana” lea.
Enda Walyakae Mendeme Gote Opa Maiyamo Doko
(Lk 21:1-4)
41 Dopa latala Jisasa Judamanya lotuu anda andake muni pyasingi dokonya tengesa pao pitipala, endakali dupame aipa pyoo muni pyasilyamipi lao kandea. Kandao peteamopa, yuunya kamongo longo dupame muni longo lao pyasiami. 42 Dopa piaminopa, enda walyakae daa jepae mendeme ipupala, konde lapoma iki pyasiamo dolapo 2 toea joo pyasia. 43 Dokopa Jisasame baanya disaipolo dupa epena latala, “Nambame nyakama kiningi langilyo: Enda walyakae daa jepae dakeme muni pyasalamo dokome, endakali waka pyasalamino dupa pitaka ita minalamo. 44 Endakali dokaitame nyakamanya muni longo sipya dupanya kakana nyoo pyasalamino. Dopa piminopa, enda daa jepae dakeme baanya kuki sipya dupa pitaka pyasalamona” lea.
13Lotuu Anda Andake Doko Kaluo Nepatamina Jisasame Leamo Doko
(Mt 24:1-2; Lk 21:5-6)
1 Jisasame lotuu anda andake kame doko yakinatala peamopa, baanya disaipolo dupanya mendeme baa lamaiyoo, “Mana Lenge Akali, anda yale epe dupa kana yale auu petae dupame petae kalyamo kanda” lea. 2 Dopa leamopa, Jisasame baa lamaiyoo, “Anda yale epe kana soo namba-namba pyoo petae kalyamo kandeleno datupa, tanga dopa petae nakatata. Pitaka pyao kaluo nepatamina” lea.
Kenda Pipae Longo Dupa Ipatana Jisasame Leamo Doko
(Mt 24:3-14; Lk 21:7-19)
3 Jisasa Olipimanda pituu, lotuu anda andake katenge dokaita-kaita, kandamatae petea. Peteamopa, Pita, Jemesa, Jone, Andruapi, dutupame elyakao baa tipa pyoo, 4 “Embame laleno dutupa gii andukupa pitape? Kongali aipale mende pitamopa, naimame kandatala, dutupa pitaka angi jalanya, tengesa petelyamona lao masetamape? Naima langi” leami. 5 Dopa leaminopa, Jisasame yanu pyao, “Endakali mendeme nyakama minao kyakasetana, kandao kalyepape. 6 Endakali longome nambanya kengenya ipupala, ’Namba Kraisa dokona’ lao, endakali longo minao kyakasetami. 7 Yanda pilyamino lapaepi, yanda ingingi lapaepi, dupa sepala, nyakama walu nalalapape. Pipae, lapaepi, dupa pitaka ipatamoaka doko, yuu etapenge gii doko maitapyao ipata. 8 Kantri mendeme kantri mende yanda pimaita, kiŋi mendeme kiŋi mende yanda pimaita pitami. Dee yuu wakale-wakale dupanya titiwali dupa minata, lopo andake dupa sepa pita. Dopa pitamo doko, enda wane manjanya, maita pingi dopale joo pita.
9 Endakali dupame nyakama anjoo soo, kanjole dupa-kisa kote laa patami. Dee Judamanya lotuu anda dupanya nyakama pyatamiakana, kandao kalyepape. Nyakamame namba watao paeyataminosa, endakali dupame gapenapi, kiŋipi, dupanya enombanya nyakama laminao pao, katasetami. Katasetataminopa, nyakamame nambanya pii doko akali dokaita panao lamaitami.
10 Yuu etapenge gii doko ipatala naeyatamopa, wambao endakali dupa pitaka-kisa wai pii epe doko lamaiyoo taeyapenge. 11 Endakali dupame nyakama anjetala, laminao kote anda dokonya pataminopa, nyakamame aipa lamape lao masala naeyalapape. Kote lapenge gii dokopa, Goteme nyakama pii ditali pyoo lapape. Nyakamame latamino doko masoo laa naeyatami. Oli Spiritame ditamopa latami. 12 Akali mendapuame nyakamanya kaiminingi etete dupa enge nyepala, pyao kumasina lao maitami. Akali mendapuame nyakamanya wane dupa dopaka pitami. Wane mendapuame kandapilyetala, nyakamanya endangi takangepi dupa pyao kumasina lao, maitamiaka. 13 Nyakama namba tata joo katataminosa, endakali dupa pitakame nyakama etete imbu kaengitami. Dopa pitaminopapi, endakali mende kyeto joo katao, etatamo doko baa Goteme pyoo nyetana” lea.
Kenda Pipae Andake Ipatamo Dupa
(Mt 24:15-28; Lk 21:20-24)
14 Jisasame dee mende lao pituu, “Gote mambo napina lao kaita lyokapenge, myuku pipae dopale mende lotuu anda andake dokonya andakote nyoo setatamino dokopa, endakali Judia katatamino dupa yuu manda dupanya paka pupenge jetana” lea. (Pii dake itaki pyateno dokome tenge doko masoo nyepe.) 15 Gii dokopa, endakali mende baanya anda patakisa katatamo dokome, baanya oapi andakote setamo dupa nyala napupenge jeta. 16 Dee endakali mende eesa katatamo dokome, baanya yonge pee ketae pingi doko pilyoo nyala naeyapengeaka jeta. 17 Enda wane tongatapi, enda wane andu nengepi, dupa gii dokopa etete kondo pita! 18 Kenda pipae dutupa koo kana palitamo dokopa, naepena lao loma soo kalyepape. 19 Goteme yuu kaitipi wasiamo dokonya pituu, indupa tuu lao, kenda pipae epelyamo dupa pitaka kenda pipae ene ipatamo dokome ita minata. Dee kenda pipae dopale mende tanga tangapi naipata. 20 Kamongome yuu gii dupa muu pisala naeyatamo doko, endakali mendaipi mende nakatata. Dopaka doko, baanya endakali yapao nyepae dupa lao masetala, kenda pipaepi, yuu giipi, dupa minao muu piseta.
21 “Gii dokopa Gotenya yapao nyepae endakali dupa lanyoo lemba pyalanya, sambo Kraisa mane-mane pipaepi, sambo propetapi, dupame ipupala, kongalipi, mirakolo kalaipi, dupa pitami. Dopana, endakali mendeme nyakama langyoo, ’Kraisa doko asa kalyamo kanjepa! Amasa kalyamo kanjepa!’ lea kandeno doko, baame kiningi lelyamona lao nyakamame masala naeyalapape. 23 Nambame enesa tanga pitamo dupa langilyona, nyakama kandao kalyepape” lea.
Akalinya Ikiningi Doko Dee Ipatana Lao Jisasame Leamo Doko
(Mt 24:29-31; Lk 21:25-28)
24 Jisasame dee mende lao pituu, “Kenda pipae andake ipatamo dupa etapatamopa, ’kaitinya singi dupa pitaka ema-ema pita. Dopa pitamopa, niki doko iminjoo, kana doko tii napyoo, kaitinya bui dupa kondao isa ipao pita.’ 26 Dopa petatamopa, Akalinya Ikiningi doko baanya pupu lapaepi, tii pipaepi, dupanya pituu kopa tambe-tambe ipatamopa, endakali dupame kandatami. 27 Dokopa yuu lemba dupa pitakanya pituu, enjele dupame Gotenya endakali yapao nyepae dupa pitaka lanyoo elyambu pyekena latana” lea.
Piki Ita Dokonya Mana Doko
(Mt 24:32-35; Lk 21:29-33)
28 Jisasame dee mende lao pituu, “Nyakamame piki ita lenge dokonya mana mende nyalapape. Nyakamame piki ita mange popo pyoo, alulyamo doko kandatala, paina pyaanya pilyamona lengema. 29 Dokaita joo, pitamo dutupa pitaka nyakamame kandatala, Akalinya Ikiningi doko ipanya, etete tengesa pilyamona lao masalapape. 30 Nambame nyakama kiningi langilyo: Endakali indupa palelyamino dupa kumao etapala naeyataminopa, dupa pitaka pita. 31 Yuupi kaitipi dupa pitaka alu pita. Dopaka doko, nambanya pii doko tanga tangapi alu napita” lea.
Jisasame Depa Latae Kalyepape Leamo Doko
(Mt 24:36-44)
32 Jisasame dee mende lao pituu, “Endakali mendeme yuupi kaitipi etatamo gii doko masala naengema. Kaitinya enjele dupame masala naengemaka. Ikiningi dokome apata masala naengeaka. Takange dokome iki masingi. 33 Nyakamame gii doko andukupa ipatape lao masala naelyaminona, kandao isoo kalyepape. 34 Tenda namba isa yuu dake yakinatala pato doko, akali mendeme baanya anda doko yakinatala, yuu waka mendenya pao katenge dopale. Paanya pituu baanya kalai akali dupame anda doko isoo katekena latala, kalai wakale-wakale mokosoo maingi. Dopa petala akali lome kambu isoo katenge dokome lome kambu doko isokondape pyoo isoo katekena latala, baa penge. 35 Patatamopa, nyakamame anda tange doko yuu kutu-kuta ipatape, palyapenge gii dokopa ipatape, kuka andatombe ipatape, yongao minao ipatape lao masala naengema. Nyakama ambe lao luu palitaminopa, baa tanda lao ipatana, kandao isoo kalyepape. 37 Nambame nyakama langilyo dokoaka, endakali pitaka lamailyona, nyakamame kandao isoo kalyepape” lea.
14Jisasa Pyao Kumasemana Lao Kambuiyamino Doko
(Mt 26:1-5; Lk 22:1-2; Jn 11:45-53)
1 Israele tange dupame betesa yisa napalenge nengema gii dokopa, Napinya Kaeyamo Pasopa gii dokopa, dolapo ene ipanya yuu gii lapoma siamopa, pitisa mupapi, Mosesanya loo mana nyepae akali dupapimi aipa petala Jisasa waa katao, anjoo nyepala, pyao kumasemape lao, kaita kutiami. 2 Kutapala lao pituu, “Gii epe dakenya aopyoo latala, endakali dupame naima imbu kaeyapala, pundu yaka lasetamina, dopa napimanana” leami.
Enda Mendeme Jisasanya Aiyombanya Wele Kaii Lakamaiyamo Doko
(Mt 26:6-13; Jn 12:1-8)
3 Jisasa baa taono Betani dokonya akali kopetali Saimone lenge dokonya andaka nee nao peteamopa, enda mendeme penge yakane mendenya, wele tunduma pipae muni andake pupenge, tumbatae mende minao epea. Ipupala, baame penge dokonya kambu doko tambapala, Jisasanya aiyombanya wele doko kaii lakamaiya. 4 Kaii lakamaiyamopa, endakali yangi peteamino dupame enda doko imbu kaeyapala, mende lamai-lamai pyoo, “Wele dake endakalimi sambaminopa, silipa muni 300 yalao nyepala, endakali daa jepae dupa maipumalina, aipuma baame mee pyoo nepelyape?” leami. Dopa latala, enda doko maka kaeyapala, pyalanya leami. 6 Pyalanya leaminoaka doko, Jisasame dokaita lamaiyoo, “Baame namba-kisa kalai epe etete mende pilyamona, pina kaeyalapa. Aipuma nyakamame enda dakenya mona kenda pisakamailyamipi? 7 Endakali daa jepae dupa koteaka lao nyakama-pipa apata katatami. Dokopa dokaita pitali pyoo nisetami. Dopaka doko, namba nyakama-pipa gii longo mende kalya naeyalamano. 8 Baame pipenge jipya doko pyomo. Baame wele tunduma pipae kaii lakalamo dokome, nambanya yonge doko malu pipenge dokonya depa lasoo pyakalamo. 9 Nambame nyakama kiningi langilyo: Yuu dupa pitakanya wai pii epe doko lao taeyatamino dokopa, enda dakeme pilyamo dupa apata lao taeyataminopa, enda dakeme pilyamo dupa masetamina” lea.
Jisasa Enge Nyalanya Pii Lao Kambuiyamino Doko
(Mt 26:14-16; Lk 22:3-6)
10 Judasa Iskariota doko, 12 disaipolo dutupanya mende, dokome Jisasa enge nyotoo lao masetala, pitisa mupa dupa laitaka pyaanya pea. 11 Pao lamaitiamopa, nyakamame baanya pii doko sepala, eteke pyao auu kaeyami. Auu kaeyapala, muni mendatupa maimana leami. Dokopa Judasame pitisa dokaita Jisasa laitaka pyaanya kaitini kutia.
Napinya Kaeyamo Pasopa Nee Neamino Doko
(Mt 26:17-25; Lk 22:7-14,21-23; Jn 13:21-30)
12 Israele tange dupame betesa yisa napalenge nengema, yuu gii tee pyao dokonya, sipisipi yakane mendapu pyapala, Napinya Kaeyamo Pasopa gii doko masoo nengema. Dopa pingima gii doko epeamopa, disaipolo dupame Jisasa lamaiyoo, “Napinya Kaeyamo Pasopa nee doko naimame anja depa lamape?” leami. 13 Dopa leaminopa, baanya disaipolo dupanya lapoma lamaiyoo, “Nyakamba Jerusalema pupape. Patambinopa, akali endaki kamuo singi mendeme nyakamba kandanyalapomona, doko watao pupape. 14 Pao baa anda kolandatamo dokonya tange doko lamaiyoo, ’Mana lenge akali dokome baanya disaipolo dupa-pipa Napinya Kaeyamo Pasopa nee doko natoo, anda panda doko andusa silyape laamona’ lao lamaiyepape” lea. 15 Dokopa baame anda andake ketae mendenya lumu depa latae singi mende laitaka pyaapomona, dokonya nyakambame nee depa lapape” lea. 16 Dopa lamaitiamopa, disaipolo dolapo Jerusalema pyakamatala kandeambinopa, Jisasame leamoliaka petae siamo dokonya, nyakambame nee akipi depa leambi.
17 Depa lateambinopa, yuu kuiyala peamopa, Jisasa baa 12 disaipolo dutupa-pipa epeami. 18 Ipupala nee nao pituu, Jisasame dokaita lamaiyoo, “Nambame nyakama kiningi langilyo: Nee nao pilyamano dakenya mendeme namba enge nyipumu dokome namba pyao kumasepenge akali dupa laitaka pyaapomona” lea. 19 Dopa leamopa, dokaitame mona kenda kaeyapala baa tipa pyoo, “Doko namba kandao leepe?” lao laa-laa peami. 20 Dopa leaminopa, baame dokaita lamaiyoo, “Nyakama 12 disaipolo nee disanya poeyanyoo apata nao pilyamano dakenya mendeme dopa pyaapomo. 21 Akalinya Ikiningi doko kumatana lao pepa pyapae singi dokonya, dopaka pyaapome-lamo. Dopaka doko, akali enge nyetamo doko yamataka andake mende lao kumata-lamo! Endangimi baa namandeali doko, yaka jialina” lea.
Jisasame Betesa Waenepi 12 Disaipolo Dutupa Maiyamo Doko
(Mt 26:26-30; Lk 22:15-20; 1Ko 11:23-25)
22 Nyakama nee nao pituu, Jisasame betesa mende nyepala, Gote lao yaka pilino latala konjia. Konjepala dokaita maiyoo pituu, “Dake nambanya yonge dokona, nyoo nalapa” lea. 23 Dopa petala baame kapo waene peteta mende nyepala, Gote lao yaka pilino latala, dokaita maiya. Maiyamopa, dokaitame dokonya nyoo neami. 24 Baame dokaita lamaiyoo, “Nambanya taiyoko kaii lelyo dakeme, Goteme endakali longo dupa nisoo, pii enenge mende lao setekelyamo. 25 Nambame nyakama kiningi langilyo: Namba dee waene nala naeyaowaka katao, tanga Gotenya isingi mate dokonya waene enenge doko natona” lea. 26 Dopa lateamopa, dokaitame wee mende latala, kamaka pyakalyetala, Olipimanda peami.
Jisasame Pita Kandao Embame Namba Nakandengena Laapenona Leamo Doko
(Mt 26:31-35; Lk 22:31-34; Jn 13:36-38)
27 Dokopa Jisasame dokaita lamaiyoo, “’Sipisipi setao katenge doko Goteme pyatamopa, sipisipi dupa kaita wakale-wakale dupanya patamina’ lao pii pepa pyapae silyamo. Lapae silyamoliaka pyoo, nyakama pitakame namba soo yakinalamino. 28 Dopaka doko, Goteme namba dee sakatasetatamopa, nyakama Galilea paa naeyataminopa, namba wambao patona” lea. 29 Dokopa Pitame Jisasa lamaiyoo, “Yangi dupa pitakame emba soo yakinatala pataminopa, nambame emba yakinala naeyatona” lea. 30 Dopa leamopa, Jisasame baa lamaiyoo, “Nambame emba kiningi langilyo: Indupa kuka gii dakenya, yaka pauli pii lapo pyoo, ene laanya pitamopa, paa tepomasa embame namba nakandengena laapenona” lea. 31 Dokopa Pitame etete kyeto joo baa lamaiyoo, “Nambame emba yakinala naeyato. Emba kumateno dokonya namba apataka kumatambana” lea. Dokopa disaipolo yangi dupa pitakame dopaka leami.
Jisasa Gesemani Ee Dokonya Loma Siamo Doko
(Mt 26:36-46; Lk 22:39-46)
32 Dokopa dokaita Gesemani ee dokonya peami. Pupala Jisasame baanya disaipolo dupa lamaiyoo, “Namba loma sotoo, nyakama asa pilyepape” lea. 33 Dopa latala baame Pita, Jemesa, Jonepi, dutupa lanyoo, umbisale pea. Pupala baa mona etete kenda kaeyapala, dokaita lamaiyoo, “Nambanya mona doko etete kenda petala, kumapenge julumuna, nyakama asa kandao isoo kalyepape” lea. 35 Dopa latala baa kuki umbisale pao, yuunya tombauli sepala, loma soo pituu, “Apane, Apane, embame dupa pitaka pingi. Embame kandatenopa, gii dake namba-kisa naepena lapenge jia kandeno doko, dopa pipi. Embame namba-kisa kenda pipae silyamo dake nyoo nepaka lapuliaka doko, nambame masilyo dokonya-kaita napipi. Embame masilino dokonya-kaita pipi” Jisasame lea.
37 Dopa lao loma sepala, ipao kandeamopa, disaipolo dutupa luu palyasiamisa, baame Pita lamaiyoo, “Saimone, emba luu palelepe? Embame aipuma awa mendai dokonya kandao isoo nakatalepe? 38 Kiningi etete nyakamanya imambumi pyuani kaeyapumupa, yongeme papa tambulyamona, makande pingi dupanya nyakama pao koeyatamina, kandao isoo loma soo kalyepape” lea. 39 Dopa latala baa deaka pupala, wamba loma siamo dutupaka sia. 40 Loma sepala dee ipao kandeamopa, disaipolo dupa lemonguti kaeyapala, paleami. Dee nyakama sakatatala, baa aipa lamaimape lao masala naeyami. 41 Baa deaka paa tepo pyoo pilyetala, dokaita lamaiyoo, “Nyakama mee luaka paliu silyamipi? Namba enge nyipumu akali doko ipatelyamo. Akalinya Ikiningi doko koo pingi endakali dupa laitaka pyaapomo gii doko ipatelyamona, mona sakatalapa” lea.
Jisasa Minatala Anjiamino Doko
(Mt 26:47-56; Lk 22:47-53; Jn 18:3-12)
43 Jisasame dopa lao kateamopa, baanya 12 disaipolo dutupanya mende, Judasa lenge doko epea. Epeamo dokonya, endakali kambu mende konja-wuapi, kolyepepi, dupa minao baa apata epeami. Dupa akali pitisa mupapi, Mosesanya loo mana nyepae akalipi, Judamanya isingi akalipi, dupame pena leaminosa, epeami. 44 Jisasa enge nyiamo akali dokome wambao endakali kambu doko lamaiyoo, “Nambame akali mende nunu pitu dokona, nyakamame baa anjetala, kandao isoo laminao pupape” lea. 45 Dopa lamaitala, ipao baa Jisasa kateamo dokonya tolao pupala, “Mana Lenge Akali” latala, baa nunu pia. 46 Dopa piamopa, dokaitame Jisasa minatala anjiami. 47 Anjiamino dokopa, akali mende baapa makisa katea dokome baanya konja-wua doko kolanyetala, pitisa mupa dokonya kalai akali mendenya kale lyanya nepea. 48 Dokopa Jisasame dokaita lamaiyoo, “Nyakamame pake nenge mende anjala epele lao, konja-wuapi, kolyepepi, dupa minao namba anjala epelyamipi? 49 Koteaka lao namba lotuu anda andake dokonya, nyakamanya kaina dokonya katao, nyakama mana langio dokopa, nyakamame namba anjala naeyami. Dopaka doko, pii pepa pyapae singi doko angi panelyamona” lea. 50 Dokopa disaipolo dupa pitakame baa yakinatala, paka pyakao peami. 51 Peamino dupanya, wane kole mende lapalapa iki petae, Jisasa watao peamo doko anjalanya lapalapanya miniami. 52 Minateaminopa, lapalapa doko kakonya yakinatala, baa papata paka pea.
Jisasa Kote Laa Peamo Doko
(Mt 26:57-68; Lk 22:54-55,63-71; Jn 18:13-14,19-24)
53 Dokopa dupame Jisasa laminao, pitisa mupa dupanya aiyomba doko kateasa peami. Dopa piaminopa, pitisa mupapi, Judamanya isingi akalipi, Mosesanya loo mana nyepae akalipi, dupa ipao kambu piami. 54 Dokopa Pita waa katao maitanya Jisasa watao pea. Pupala pitisa mupa dupanya aiyomba dokonya anda kamapusa kolandatala, yanda singi dupa-pipa ita mende teamo dokonya endo soo petea.
55 Pitisa mupapi, kanjole kambuingi andake dokomepi, Jisasa pyao kumasemana latala, baa-kisa tenge mende setame lao kutiami. Dopa piaminoaka doko, tenge mende kandao nanyiami. 56 Endakali longo mendapuame baa-kisa tenge setao, sambo pii leaminoaka doko, nyakamanya pii leamino dupa mendai nanjia. 57 Endakali mendapuame sakatatala, baa-kisa sambo pii setao, 58 “Akali dakeme lao pituu, ’Nambame lotuu anda andake kingimi petae dake lakyepala, yuu gii tepomanya waka mende pitu doko, endakali kingimi napipenge mende pituna’ leamopa, naimame siamana” leami. 59 Dopa leaminoaka doko, nyakamanya pii leamino dupa mendai nanjia. 60 Dokopa pitisa mupa dupanya aiyomba dokome dokaitanya kaina dokonya toeya katapala, Jisasa tipa pyoo, “Pii emba-kisa tenge setao lelyamino dake, aipuma yanu napilipi?” lea. 61 Dopa leamoaka doko, Jisasame ema napia. Dokopa pitisa mupa dupanya aiyomba dokome dee baa tipa pyoo, “Emba Gote Tii Pipae dokonya Ikiningi Kraisa dokope?” lea. 62 Jisasame pii yanu pyao, “Doko namba. Akalinya Ikiningi doko, Gote etete pupu lapae dokonya kingi tolae dokonya pituu, kaitinya kopa tambe-tambe ipatamopa, nyakamame kandatamina” lea. 63 Jisasame dopa leamo sulu katao, pitisa mupa dupanya aiyomba dokonya yonge pee doko tange minao lapyepala, “Baame Gote lamba lao pii lelyamo doko sepelyamino. Aipuma endakali mendapuanya pii deaka nyemape? Nyakamame aipa pimana lao masilyamipi?” lea. Dokopa pitakame, “Baa-kisa tenge silyamona, baa pyao kumasepengena” leami. 65 Dopa latala akali mendapuame baa sopokalimi piami. Pyapala baanya lengelyapi yaki petala, kimiame pyao pituu, “Emba kini propeta-tamo doko, emba akali dokome pilyamo lao naima langi!” leami. Dokopa yanda singi kateamino dupame baa pyao takiamiaka.
Pitame Jisasa Nakandengena Leamo Doko
(Mt 26:69-75; Lk 22:56-62; Jn 18:15-18,25-27)
66 Pita baa anda kamapusa peteamopa, pitisa mupa dupanya aiyomba dokonya, kalai pyakamaiyoo petenge, wanaku dupanya mende epea. 67 Ipupala Pita endo soo peteamo doko kandokondape pyoo kandatala, baa lamaiyoo, “Emba Nasarete tange Jisasapa apata katengembana” lea. 68 Dopa leamopa, Pitame tanga lao, “Embame leeno doko namba nakandenge. Namba masala naelyona” lea. Dopa latala baa pitisa mupa dupanya aiyomba dokonya lome kambusa peamopa, yaka pauli pii mende lea.+ 14:68 yaka pauli pii mende lea. Buku Baibolo Giriki piimi wambao pyatae mendatupanya pii dutupa nakalyamo. 69 Dopa piamopa, kalai wanaku dokome baa deaka kandatala, akali kateamino dupa lamaiyoo, “Baa akali dutupanya mendena” lea. 70 Dopa leamopapi, Pitame deaka tanga lea. Gii kuki pateamopa, akali kateamino dupame Pita deaka lamaiyoo, “Kini, emba Galilea tange dokonyana, emba akali dutupanya mende-lamona” leami. 71 Dokopa Pitame lao pituu, “Nyakamame akali lelyamino doko namba nakandengena, sambo lato doko, Goteme namba pinana” lea. 72 Dopa lateamopa, yaka pauli pii lapo pyoo lea. Dokopa Jisasame pii wamba leamo datupa Pitame masia: “Yaka pii lapo pyoo, ene laanya pitamopa, embame paa tepomasa namba nakandengena laapenona” leamo doko masetala, Pita putukuo ee lea.
15Jisasa Anjoo Pondiasa Pailate Maiyamino Doko
(Mt 27:1-2,11-14; Lk 23:1-5; Jn 18:28-38)
1 Yongama wamba pitisa mupapi, Judamanya isingi akalipi, Mosesanya loo mana nyepae akalipi, kanjole kambuingi andake dupa pitaka kambuiyami. Lao kambutala, Jisasa anjoo soo, Pondiasa Pailate maiya peami. 2 Maitiaminopa, Pailateme baa tipa pyoo, “Emba Judamanya Kiŋi dokope?” lea. Dopa leamopa, Jisasame pii yanu pyakamaiyoo, “Embame leleno dokoakana” lea. 3 Dokopa pitisa mupa dupame baa-kisa tenge longo seteami. 4 Dokopa Pailateme baa dee tipa pyoo, “Akali dakaitame emba-kisa tenge longo lao setelyamino doko, embame piipi mende yanu pyao nalelepe?” lea. 5 Dopa leamopa, Jisasame dee pii mende yanu pyao naleamosa, Pailate paka kaeyapala, masepae longo nyia.
Pailateme Jisasa Pyao Kumasina Leamo Doko
(Mt 27:15-26; Lk 23:13-25; Jn 18:39–19:16)
6 Ee kana dii lao, Napinya Kaeyamo Pasopa gii doko epelyamoli pyoo, Pailateme akali anjetae dupanya mende, endakali dupame mokekena lelyamili pyoo, mokata pyakamaingi. Gii doko paleamopa, endakali kambu dokome ipupala, akali mende mokekena leami. Akali Barabasa lenge dokopi, akali mendapuapimi wamba gapomane yanda pimaitala, endakali mendapu pyao kumasetala, anjetae paleami. 9 Dokopa pitisa mupa dupame Jisasa-pipa tilya nyepala, baa anjoo dimini-lamo lao Pailateme kandea. Kandatala dokaita tipa pyoo, “Nambame Judamanya Kiŋi doko mokakapili lao masilyamipi?” lea. 11 Dopa leamoaka doko, pitisa mupa dupame akali Barabasa doko mokekena lamana lao, endakali kambu dupa ingi tuu leami. 12 Dokopa Pailateme dokaita deaka tipa pyoo, “Nyakamame Judamanya Kiŋi lengema dake nambame aipa pyakaowape?” lea. 13 Dopa leamopa, dupame deaka puu lao, “Poko itanya pyao yuku!” leami. 14 Dopa leaminoaka doko, Pailateme dokaita lamaiyoo, “Baame koo aki mende pipyape?” lea. Dopa leamopa, dokaitame eteteaka puu lao, “Baa pyao yuku!” leami. 15 Dokopa Pailateme endakali kambu dupanya auu kaeyamili pyoo, Barabasa doko mokakamaiya. Dopa petala yanda singi dupame Jisasa konjame pyapala, pyao yukuina lao maiya.
Yanda Singi Dupame Jisasa Lamba Leamino Doko
(Mt 27:27-31; Jn 19:2-3)
16 Dokopa yanda singi dupame Jisasa laminao, gapomane isingi akali andake petenge anda dokonya kolandatala, yanda singi dupa pitaka ipao kambu pina leami. 17 Kambu pyatala, dupame yonge pee ketae pingi kala pepola mende baanya petakamaitala, kende nenge-nenge katapae mende nyoo makipu petala, Jisasanya aiyombanya pyakamaiyami. 18 Dopa petala, dupame baa lamba lao, “Judamanya Kiŋi, emba auu pyoo katape!” leami. 19 Dopa latala, dupame keoo konjame aiyombanya pyapa, sopokalimi pyapa petala, baa lamba lao luma lakao, mambo piami. 20 Dopa pyoo etapala, yonge pee kala pepola wamba pyakamaiyamino doko lyokao nyepala, baanya yonge pee ketae pingi doko tange pyakamaiyami. Dopa petala baa pyao yukulanya laminao peami.
Jisasa Poko Itanya Pyao Yukuiyamino Doko
(Mt 27:32-44; Lk 23:26-43; Jn 19:17-27)
21 Dokopa Alekesandapa, Rupasapanya takange Saimone yuu Sairini tange doko kamalyatena katao, taono dokonya epeamo kandanyetala, yanda singi dupame baa pyalanya latala, Jisasanya poko ita doko sakamaina leami. 22 Sina latala, dupame Jisasa laminao, yuu manda kenge Gologota lenge dokonya pao pyakalyiami. (Manda Gologota dokonya tenge doko, “Matena kuli.”) 23 Yuu manda dokonya pupala, dupame baa tanda kaeyala naena lao, waene matasini-pipa wasepala maiyaminopa, nanenya kaeya. 24 Kaeyateamopa, yongama 9 kiloko dokonya Jisasa pyao poko itanya yukuiyami. Yukutala baanya yonge pee wamba lyokeamino dupa setapala, yanda singi dupame apimi yonge pee dupanya mende nyilyape kandamana lao lakii piami. 26 Jisasa-kisa tenge seteamino pii doko, “Judamanya Kiŋi dokona” lao pepa pyatae doko poko ita ketae dokonya katea. 27 Jisasa poko itanya pyao yukuiyamino dokopa, akali pake nenge lapoma apata pyao yukuiyami. Mende doko baanya kingi tolae-kaita yukuiyami. Mende doko baanya kingi koeya-kaita yukuiyami.+ 15:27-28 Buku Baibolo Giriki piimi wambao pyatae mendatupanya vesa dakenya pii datupa apata lapae palelyamo: “Dopa piamino dokome pii pepa pyapae singi dokonya, ’Mana setapae nepenge endakali dupa-pipa baa pyasoo itaki pyatamina’ lapae singi doko angi jia.”29 Jisasa pyao yukutae kateamo dokonya-kaita endakali paeyamino dupame baa lamba lao, aiyomba wangatoto pyoo, “Lotuu anda andake doko lakyepala, yuu gii tepomanya waka mende pituna leeno akali dokae! 30 Embame emba tange pyoo nyoo, poko ita doko yakinatala, isa ipupoko!” leami. 31 Dopaka pyoo, pitisa mupapi, Mosesanya loo mana nyepae akalipi, dupame lamba lao, nyakamalapo laloo pyoo, “Baame endakali waka dupa pyoo nyipumuaka doko, baa tange kapa pao pyoo nyala naenge-lamo. 32 Kraisa dake, Israelemanya Kiŋi daape, epapu poko ita doko yakinatala, isa epena kaeya. Yakinatamo doko, naimame kandatala, baa lao masoo minamanalena” leami. Akali lapoma baa-pipa apata pyao yukutae kateambino dolapome mendai dopaka pyoo, baa-kisa lamba pii kando piambi.
Jisasa Kumiamo Doko
(Mt 27:45-56; Lk 23:44-49; Jn 19:28-30)
33 Jisasa yukutae kateamopaka, 12 kilokonya pituu yuu kuiya. Kuiyamo doko kuiyataeyaka katao pao, 3 kilokonya tuu lea. 34 Dokopa, Jisasame etete puu lao, “Ilai, Ilai, lema sabatani?” lea. (Pii dokonya tenge doko, “Nambanya Gote, nambanya Gote, embame namba aipuma yakinelepe?”) 35 Dopa leamo doko endakali dosa kateamino dupanya mendapuame sepala, “Ilaija lao wii lelyamona, salapape” leami. 36 Dopa lateaminopa, akali mendeme alo pyao pao, koma jepae mende itakulinya tuku petala, waene kaa pipae mendenya poeyanyetala, Jisasa nena lao, makapusakamaiya. Dopa petala baame lao pituu, “Ilaijame baa kondao nyala epelyape lao kandamanana, malisalapa” lea. 37 Dokopa, Jisasame eteteaka puu lao ae mende latala, baa kumia. 38 Dokopa lotuu anda andake dokonya lapalapa andake mendeme nee nyetae katenge panda dokonya kame pinyetae katenge doko ketae pituu titi pyao isa tuu latala, lapo pyoloo pia. 39 Yanda singi isingi akali Jisasanya enomba-kaita kateamo dokome, Jisasa dopa pyoo kumiamo doko kandatala, “Kiningi etete, akali dake Gote Ikiningi-lamona!” lea.
40 Maria Magadala tange dokopi, wane kole Jemesa, Josesapanya endangi Mariapi, Salomiapi, dutupame kuki tependale pituu, kandatae peteami. 41 Wamba Jisasa Galilea yuu dokonya kateamo dokopa, enda dutupame baa watao paeyao nisiami. Dee enda longo mendapu Jisasa-pipa apata Jerusalema lalyoo epeamino dupa dosa kateamiaka.
Jisasa Malu Piamino Doko
(Mt 27:57-61; Lk 23:50-56; Jn 19:38-42)
42 Yuu kuiyalanya piamopa, Josepe Arimatia tange, kanjole dokonya akali kenge epe singi mende epea. Baa Gotenya isingi mate doko malisoo, katengeaka. Sambata depa lapenge gii paleamopa, Josepe paka nakaeyao, Pailate peteamo dokonya pupala, Jisasanya yonge doko dina lao tee lea. 44 Dopa leamopa, Pailateme Jisasa kumatalame-lumu lao walu lea. Walu latala baame yanda singi isingi doko epena latala, Jisasa kumatalape lao tipa pia. 45 Yanda singi isingi dokome Jisasa kini kumatalamona lao lamaitiamopa, Pailateme Jisasanya yonge doko Josepeme kondao nyala pena lea. 46 Dokopa Josepeme lapalapa epe kyeto mende sambapala pao, Jisasanya yonge doko kondao isa nyepala, lapalapa dokome yaki-yaki pia. Dopa petala akali mendenya kananda malu tumbinya setea mendenya yonge doko nyoo setapala, kana andake mende kapilya mina-mina pyoo minao pao, malu kambu doko piti pia. 47 Dopa piamopa, Maria Magadala tange dokopa, Josesa endangi Maria dokopame, Josepeme Jisasanya yonge doko nyoo seteamo panda doko kandao peteambi.
16Jisasa Malunya Sakateamo Doko
(Mt 28:1-8; Lk 24:1-12; Jn 20:1-10)
1 Sambata gii doko pateamopa, Maria Magadala tange dokopi, Maria Jemesa endangi dokopi, enda Salomiapi dutupame Jisasanya yonge doko kai pyala mona latala, welepi dopale tunduma pipae mendapu sambeami. 2 Wele tunduma pipae sambeamino dupa minao, Sandeenya yongama wamba niki pyakaeyamopa, malu dokonya peami. 3 Pao pituu nyakamalapo laloo pyoo, “Malu kambu dokonya kana piti petae doko apimi nyoo nepakatape?” leami. 4 Pupala kandeaminopa, kana etete andake doko nyoo, kapya latae katea. 5 Enda dupame malu dokonya kolandatala, akali patange, yonge pee londe kyoo lapae pingi mende kingi tolae-kaita pilyasiasa kandatala, walu leami. 6 Dopa piaminopa, baame enda dutupa lamaiyoo, “Nyakama walu nalalapape. Jisasa Nasarete tange, poko itanya pyao yukuiyamino doko, nyakamame kutilyamino doko sakatatalamo. Baa seteamino panda dakenya nasilyamo kanjepa. 7 Dopana, nyakama pupala, Pitapi, disaipolo yangi dupa lamaiyoo, ’Wamba nyakama langiamoli pyoo, baa wambao Galilea patamopa, nyakamame pao kanjaminona’ lamaiyepape” lea. 8 Enda dutupa walu latala, malu dokonya kamaka pyakalyetala, paka peami. Nyakama paka kaeyapala, mende lamaiya naeyami.
Jisasa Baa Maria Magadala Tange Dokome Kandena Lao Paneamo Doko
(Mt 28:9-10; Jn 20:11-18)
9 Sandee+ 16:9 Buku Baibolo Giriki piimi wambao pyatae mendatupanya vesa 9-nya pituu, vesa 20 dutupa pyatae nakalyamo. gii dokonya yongama wamba Jisasa sakatatala, Maria Magadala tange, wamba imambu koo 7-pela paleta mende, Jisasame watao pyakamaiyamo dokome, wambao kandena lao panea. 10 Panateamopa, Jisasa-pipa apata kateamino endakali dupa ee lao yamataka lao peteaminopa, enda dokome pupala dokaita lamaiyoo, “Jisasa lenge tao katapumupa, nambame kanjona” lea. Dopa leamopa, dokaitame sepala, pii doko kiningina lao masala naeyami.
Jisasa Baa Disaipolo Lapomame Kandena Lao Paneamo Doko
(Lk 24:13-35)
12 Maitakao disaipolo lapoma taono doko yakinatala peambinopa, dolapome nakandena lao Jisasa baa waka jetala, apata peami. Jisasa pateamopa, maitakao akali doko Jisasa-lamo lao kandeambi. 13 Kandatala dolapome pupala, disaipolo yangi dupa lamaiyambinopa, kiningi lelyambinona lao dupame masala naeyamiaka.
Jisasa Baa Disaipolo Dutupame Kandena Lao Paneamo Doko
(Mt 28:16-20; Lk 24:36-49; Jn 20:19-23; Ap 1:6-8)
14 Maitakao 11 disaipolo dutupa nee nao peteaminopa, Jisasa baa dokaitame kandena lao ipao panea. Baa sakatatala paneamo kandeamino endakali dupame kiningi lelyaminona lao, disaipolo dupame masala naenya, tuu pyoo mona pyakilyiaminosa, Jisasame dokaita pyalanya lea. 15 Dopa latala baame dokaita lamaiyoo, “Nyakamame yuu dupa pitakanya pupala, wai pii epe doko endakali dupa pitaka lamaiyepape. 16 Namba tungi pyatala, kaimbu nyetamo endakali doko, Goteme pyoo nyeta. Namba tungi pyala naeyatamo endakali doko, Goteme daa latala watao pyata. 17 Namba tungi pyatamino endakali dupame kalai andake datupa pitaminopa, Gotenya pupu lapae doko nyakama-kisa silyame-lamo lao kandatami. Dupame nambanya kenge doko lao, imambu koo dupa watao pyatami. Dee pii tata waka dupa latamiaka. 18 Kanopato salenda dupa kingimi minataminopapi, tomakai dupa nataminopapi, dupa koeyala naeyatami. Endakali yaina pyapae dupa kingimi minataminopa, yaina dupa mee jetana” lea.
Goteme Jisasa Kaiti-Kisa Lanyiamo Doko
(Lk 24:50-53; Ap 1:9-11)
19 Kamongo Jisasame baanya disaipolo dupa pii lamaitiamopa, Goteme baa lanyoo kaiti-kisa pea. Dopa petala Goteme baanya kingi tolae-kaita petena lea. 20 Disaipolo dupame yuu dupa pitakanya pupala, wai pii epe doko lamaiyami. Lamaiyaminopa, Kamongonya pupu lapae doko nyakama-pipa apata mirakolo kalai piamino dokome, wai pii epe doko kyeto jisia.