Matyu

WAI PII EPE

MATYUAME

PEPA PIAMO DOKO

Pii Wambao Kandapenge Dupa

Ee kana 70 ad dosale Makeme wai pii epe doko pepa pia. Pyateamopa, Matyuame Makenya buku piamo doko itaki pyao kandatala, maitapyao baanya buku dake Giriki piimi pepa pia. Matyu baa akali 12 disaipolo dutupanya mende. Baanya kenge mende doko Lipai lenge. Baanya kalai pyoo takisa nyoo kateamopa, Jisasame wii lao lanyia. Dokopa baanya takisa nyingi kalai doko kaeyapala, Jisasa watao paeya. Paeyao pituu, Jisasanya kalai piapi, mana leapi, dupa pitaka lengeme kandao, moname masoo etapala, wai pii epe dake pyanya setea.

Propeta dupame Mesaeya doko ipata-lamona lao, pii doko pyanya seteamino dupa pitaka angi jiamo kandatala, Matyuame Juda dupame kandatala, Jisasa doko Mesaeya-lamona lao tungi pina lao pia-pyaa. Dopa piamo dokome, kamalya katenge dupa yakinao daa, dupa apata mona kapilyetala, Gotenya isingi mate doko nyetamina lao, wai pii epe dake pepa pyanya setea.

Jisasa Kraisanya Yumbange Dupa

(Lk 3:23-28)

¹ Pii dake Jisasa Kraisanya yumbange tata paliu epeamino dupanya. Jisasa baa Dapiti tatanya mandipae. Dapiti baa Abrakame tatanya mandipae.

² Abrakameme Aisake mandea. Aisakeme Jekope mandea. Jekopeme Juda mandipala, dee wane ane mendatupa apataka mandea. ³ Judame Peresapa, Serapa mandea. Dolaponya endangi doko Tama lenge. Peresame Esorone mandea. Esoroneme Ramo mandea. ⁴ Ramoame Aminadape mandea. Aminadapeme Nasone mandea. Nasoneme Salomone mandea. ⁵ Salomoneme Boasa mandea. Boasa endangi doko Reapa lenge. Boasame Obeta mandea. Obeta endangi doko Ruta lenge. Obetame Jesi mandea. ⁶ Jesiame Kiŋi Dapiti mandea.

Dapitimi Solomone mandea. Solomone endangi doko wamba Uria etanenge doko. ⁷ Solomoneme Reoboame mandea. Reoboameme Abaija mandea. Abaijame Esa mandea. ⁸ Esame Jeosapata mandea. Jeosapatame Jeorama mandea. Jeoramame Usia mandea. ⁹ Usiame Jotame mandea. Jotameme Easa mandea. Easame Esekia mandea. ¹⁰ Esekiame Manase mandea. Manaseme Emone mandea. Emoneme Josaeya mandea. ¹¹ Josaeyame Jekonaeya mandipala, dee wane ane mendatupa apataka mandea. Dokopa Babilone tange yanda singi dupame, Israele tange dupa yanda pyoo ita minatala, Babilone anjoo soo peami.

¹² Pateaminopa, Jekonaeyame Seatiele mandea. Seatieleme Serubabele mandea. ¹³ Serubabeleme Abiuta mandea. Abiutame Eliakimi mandea. Eliakimimi Esoa mandea. ¹⁴ Esoame Sadoko mandea. Sadokome Akimi mandea. Akimimi Eliuta mandea. ¹⁵ Eliutame Eleasa mandea. Eleasame Matana mandea. Mataname Jekope mandea. ¹⁶ Jekopeme Josepe mandea. Josepe doko Maria akalingi. Maria doko Jisasa Kraisa lengema dokonya endangi.

¹⁷ Dopana, wamba Abrakame kateamo gii dokonya pituu, Dapiti kateamo dokonya tuu lao, yumbange tata paleamino dupa 14 paleami. Dapiti kateamo gii dokonya pituu, Israele tange dupa Babilone anjoo soo peamino, gii dokonya tuu lao, yumbange tata paleamino dupa 14-aka paleami. Babilone anjoo soo, peamino gii dokonya pituu, Kraisa doko mandeamo gii dokonya tuu lao, yumbange tata dupa 14-aka paleami.

Mariame Jisasa Mandeamo Doko

(Lk 2:1-7)

¹⁸ Jisasa Kraisa mandeamo dokonya pii lapae doko dake: Jisasa endangi Maria doko Josepe nyetana latala, andaka joo lakuo peteambi. Gii dokopa Josepeme Maria enda joo lanyala naeyamopa, Maria wane tongota peteamo kandeami. Wane doko Oli Spiritame maiya. ¹⁹ Josepe doko akali epe tolatae dokonyana, baame Maria elya pisala naeyatoo lao masia. Dopa lao masetala, baame enda doko elyakalao pata-pata lao kaeyatoana lao masia. ²⁰ Dopa lao masoo kateamopa, Kamongonya enjele mendeme kombeame baa lamaiyoo, “Dapiti yumbange Josepe, Marianya inginya wane pilyamo doko, Oli Spiritame maipyana, embame baa enda joo lanyalanya paka nakaeyape. ²¹ Baame wane ane mende manditamo dokome, baanya endakali dupanya koo dupa kunao nepakamaitala pyoo nyetana, baanya kenge doko Jisasa+ 1:21 Jisasa Kenge Jisasa dokonya tenge doko, “Kamongome pyoo nyingi.” lape” lea. ²² Dopa pitana lao wamba Kamongome propeta mende-kisa pii leamo dake angi jia: “Enda mapukae, akali tole napingi mendeme wane ane mende manditamo, dokonya kenge doko Emanyuele latami.” (Emanyuele dokonya tenge doko, “Gote naima-pipa tole katenge.”) ²⁴ Josepe paliu sakatatala, Kamongonya enjele dokome lamaiyamoli pyoo, baame enda doko baanya etanenge joo lanyia. ²⁵ Lanyiamoaka doko, baame enda dokopa, yonge tole napiambinopaka, wane ane doko mandea. Wane doko mandipiamopa, Josepeme kenge doko Jisasa lea.

Niki Pyakaengesa Tange Akali Dupame Jisasa Kanja Epeamino Doko

¹ Erote baa kiŋi kateamopa, Mariame Jisasa yuu andake Judia, taono Beteleme dokonya mandea. Mandipiamopa, niki pyakaengesa tange, buinya tenge masingi akali mendapuame Jerusalema ipupala, ² endakali kateamino dupa lamaiyoo, “Naimame Judamanya kiŋi katapengena latae, wane ŋaŋa dokonya bui doko niki pyakaengesa-kaita, katamo kandatala, baa mambo pyala epelyamanona, anja mandipae silyape?” leami. ³ Dopa lapae sepala, Kiŋi Erote baa mona kenda kaeya. Dokopa Jerusalema tange endakali longome sepala, mona kenda kaeyamiaka. ⁴ Eroteme pitisa mupapi, Mosesanya loo mana nyepae akalipi, dupa pitaka epena lao nyoo elyambu pia. Elyambu petala dokaita tipa pyoo, “Kraisa doko yuu andukunya mandipengepe?” lea. ⁵ Dopa leamopa, dokaitame pii yanu pyao, “Goteme propeta mende-kisa lamaiyamo doko, dapa lao pepa pyapae silyamo: ’Nyakama Beteleme tange dupa, nyakamanya yuu taono doko taono waka Judia silyamo, dupanya pundi-pundi naseta. Nyakamanya mandipaenya mandipae, dupanya isingi akali mende pyakalyetamo dokome, nambanya Israele tange endakali dupa setao katakatana’ lao pepa pyapae silyamo. Dopa lapae silyamo dokonya, Kraisa doko yuu andake Judia dokonya taono yakane Beteleme mandipengena” leami.

⁷ Dopa lateaminopa, Eroteme akali niki pyakaengesa tange dupa elyakalao epena latala, bui doko gii andukupa katapyape lao tipa pia. ⁸ Dopa petala dokaita lamaiyoo, “Nyakama Beteleme pupala, wane doko kutakondape pyoo kutalapape. Kutao kandatala dokopa, nambame apata mambo pyala patoana, langya ipupape” lea. ⁹ Dopa lateamopa, kiŋi dokonya pii dupa sepala, nyakama peami. Peaminopa, wamba niki pyakaengesa-kaita bui kateamo kandeamino, dokoaka wambao pao wane mandipae siamo dokonya katea. ¹⁰ Dopa piamopa, nyakamame bui doko kandatala, mona etete auu kaeyami. ¹¹ Mona auu kaeyao andaka kolandatala, Mariame wane doko kopetae peteamo kandeami. Kandatala dupame luma lakapala, wane doko mambo piami. Mambo pyapala, nyakamanya mandi dupa tangupala, golopi, kena tunduma pingi pautapi,+ 2:11 Pauta muni andake pupenge doko ita Boswelia lenge dokonya ipange nyepala, lyaka lasetala yangelyaminopa, kena tunduma pipae pingi. wele epe tunduma pipae+ 2:11 Wele muni andake pupenge doko ita ipange nyepala wasingima. mendapu maiyami. ¹² Kuka Goteme akali dokaita Erote kalyamosa-kaita, pilyala naena lao kombea pimaiya. Dopa piamosa, dokaita kaitini waka mendenya-kaita, nyakamanya yuusa pilyiami.

Isipi Yuu Dokonya Paka Peamino Doko

¹³ Akali dokaita pateaminopa, kuka Kamongonya enjele mendeme, kombeame Josepe lamaiyoo, “Eroteme wane doko kutao pyao kumasalanya pilyamona, emba sakatatala, wane dokopa endangipa lanyoo, paka Isipi puu. Pupala katatenopa, nambame emba pilya lato gii dokopa pilyetena, emba dokonya mee katapena” lea. ¹⁴ Dopa lamaitiamopa, kuka dokopaka Josepe sakatatala, wane dokopa endangipa lanyoo, Isipi paanya pea. ¹⁵ Pupala Josepe Isipiaka katao, Erote kumiamo gii dokonya tuu lea. Dopa piamo dokome, wamba Kamongome propeta mende-kisa, “Nambanya ikiningi doko Isipi yuu doko yakinatala, nambame epena latona,”+ 2:15 nambame epena latona Giriki piimi “epena leona” lelyamo. Dakenya “epena latona” lelyamano. leamo doko angi jia.

Eroteme Wane Ŋaŋa Longo Pyao Kumasina Leamo Doko

¹⁶ Niki pyakaengesa tange masingi akali dupame Erote baa minakasetala, pupimi-lumu lao sepala, baa etete imbumi kumia. Imbu kaeyapala baame wamba akali dupa, bui doko gii andukupa kateape lao tipa piamo, doko masia. Masetala Betelemepi, yuu dosa makisa singipi, dupanya pupala, wane ane ee kana laponya anatena patae, dupa pitaka baanya yanda singi dupame, pyao kumasala pena lea. ¹⁷ Dopa piamo dokome, “Taono Rama dokonya, Resolonya wanenge dupanya, wane dupa lao yamataka lao, ee leaminopa, endakali mendeme dupanya mona minao taiyu lasakamaipenge nanjiana” lao, wamba propeta Jeremaeyame leamo doko angi jia.

Josepeme Wane Dokopa Endangipa Isipi Katao Lanyoo Pilyiamo Doko

¹⁹ Erote kumateamopa, Kamongonya enjele mende Isipi pupala, kombeame Josepe ²⁰ lamaiyoo, “Wane doko pyalanya piamo akali doko kumatelyamona, embame wane dokopa endangipa lanyoo, Israele pilya” lea. ²¹ Dopa lateamopa, Josepeme wane dokopa endangipa lanyoo, Israele pilyia. ²² Pilyiamoaka doko, Akelesa dokome baanya takange Erotenya panda nyepala, Judia yuu dokonya kiŋi joo kalyamo lapae sepala, Josepe yuu dokaita paanya paka kaeya. Dokopa Goteme kombeame, Judia yuu dokonya nakatape lao lamaiyamo dokonya, baame wane dokopa, endangipa lanyoo Galilea pea. ²³ Pupala taono Nasarete lenge dokonya katea. Dopa piamo dokome, wamba propeta dupame, “Baa Nasarete tangena latamina” leamo pii doko angi jia.

Jone Kaimbu Pingi Dokome Pii Lamaiyamo Doko

(Mk 1:1-8; Lk 3:1-9,15-17; Jn 1:19-28)

¹ Ee kana mendatupa pateamopa, Jone kaimbu pingi doko Judia yuu dokonya, endakali napalenge mendasa ipao katapala, pii tee pyao lamaiya. ² Lamaiyoo pituu, “Gotenya isingi mate doko tengesa ipatelyamona, mona kapilyalapa” lea. ³ Wamba propeta Aisaiyame Jone kaimbu pingi doko kandao, “Endakali napalenge yuu mendasa akali mendeme katapala wii lao, ’Kamongonya kaitini doko depa lakamaiyepape. Kaitini koeyapae dupa tolasakamaiyepape’ lao katatana” lea.

⁴ Jone baa yonge pee kamele itimi wasepaepi, matapu bulumakao yanungimi wasepaepi, dupa pyoo katea. Baa paiyombapi, ambulya kakasa lyingipi, dupa nao katea. ⁵ Dokopa Jerusalema tangepi, Judia tangepi, endaki Jodane mate dosale tangepi, longo dupa Jone kateamo dokonya peami. ⁶ Pupala dupame nyakamanya koo dupa lao panata piaminopa, baame endaki Jodane dokonya kaimbu pyakamaiya.

⁷ Dokopa Parasaipi, Sadyusiapi longo mendapu kaimbu pyekena lao epeamino kandatala, baame dokaita lamaiyoo, “Nyakama koo kanopatonya mandipae dupa! Gotenya imbu kaeyapae ipatamo doko, apimi langimusa, paka epelyamipi? ⁸ Nyakama kini mona kapilyeteamino doko, nyakamanya mana makandepi dupame panasalapape. ⁹ Abrakame nyakamanya yumbange dokonyana, nyakama yaka kalyamanona lao masala naeyalapape. Nambame nyakama langilyo: Goteme kapa pao kana silyamo datupa, Abrakamenya wane jina lapyali. ¹⁰ Goteme ita tenge dokonya, wua doko depa lanya setapelyamo. Ita dii epe manja naenge dupa pitaka, pokapala baame itatenya soo yangata.

¹¹ “Akali maitapyao epelyamo dokonya, pupu lapae dokome namba ita minao. Nambame baanya moko pee dolapo, nyoo minakamaiyanya, namba epe daa. Nambame kaimbu pyekelyo dake, mona kapilyingi doko pyekelyona, baame Oli Spiritapa, itate kaiyepaepame nyakamanya kaimbu pyakata. ¹² Wita angi imbupi pyasoo silyamopa, baame yapenge sapolo doko nyepala, ketae pyasingi. Dopa pingisa, poome imbu umbisa soo kambu pilyamopa, angi isa lapalapa kuiyetaenya ipao singi. Ipao silyamo dupa nyoo baanya nee setenge anda dokonya setapala, imbu dupa ita konjala naenge dokonya soo yangatana” lea.

Joneme Jisasanya Kaimbu Pyakamaiyamo Doko

(Mk 1:9-11; Lk 3:21-22)

¹³ Gii dokopa Jisasa Galilea yakinatala, endaki Jodane mate dokonya Joneme kaimbu pyekena lao pea. ¹⁴ Pao pyakameamopa, Joneme Jisasa lamaiyoo, “Embame nambanya kaimbu pyakapenge doko, aipuma nambame embanya kaimbu pyakatale lao epelepe?” lea. ¹⁵ Dopa leamopa, Jisasame baanya pii yanu pyakamaiyoo, “Nalimbame pyepale lao Goteme masilyamo, dupa apata pimbana pii” lea. Dopa leanya, Joneme baanya pii doko watao minatala, kaimbu pyakamaiya. ¹⁶ Jisasa kaimbu nyepala, endaki ketae pyakalyiamopa, kaiti saa papa laloo petala, Gotenya Oli Spirit doko yaka maiyolee joo lanao ipao, baa-kisa petea. ¹⁷ Dokopa kaiti-kisa katao, pii mende lea dokome lao pituu, “Doo kalyamo doko nambanya Ikiningi, mona setenge doko. Nambame baa etete auu kaengena” lea.

Sataneme Jisasa Minao Makande Piamo Doko

(Mk 1:12-13; Lk 4:1-13)

¹ Gii dokopa Sataneme Jisasa minao makande pina lao, Oli Spiritame baa laminao endakali napalenge yuu mendasa pea. ² Pupala Jisasa baa yuu gii 40 kuka kotakapi, Gote loma soo, nee nanao katea. Dopa pyoo katapala, baa lopo kaeya. ³ Dokopa makande pingi akali dokome, baa kateasa ipupala lao pituu, “Emba kini Gote Ikiningi-tamo doko, kana silyamo datupa betesa jina laa” lea. ⁴ Dopa leamopa, Jisasame baanya pii yanu pyakamaiyoo, “’Endakalimi betesa iki nenge dokonya-kaita, saka nakatenge. Goteme pii lelyamo dokonya-kaita, endakali saka katengena,’ dopa lao pepa pyapae silyamona” lea.

⁵ Dopa lateamopa, Sataneme baa laminao taono epe Jerusalema dokonya pupala, lotuu anda andake ketae dokonya katena lea. ⁶ Dopa latala baame Jisasa lamaiyoo, “Gotenya pii dapa lao pepa pyapae silyamo: ’Goteme emba masetala, kaname embanya mokopi mende, koeyatame latala, enjele dupame emba nisoo kopyoo nyina latana’ latae silyamo. Dopana, emba kini Gote Ikiningi-tamo doko, ketae dakenya katao isa mangau laa” lea. ⁷ Dopa leamopa, Jisasame baa lamaiyoo, “’Embame embanya Kamongo Gote doko minao makande napipi’ lao pepa pyapae silyamona” lea.

⁸ Sataneme Jisasa deaka laminao, yuu manda etete ketae mendenya pyakalyetala, isa yuu dakenya isingi matepi, oapi epe muni andake pupengepi, dupa baa kandena lea. ⁹ Dopa latala, baame Jisasa lamaiyoo, “Embame namba lao luma lakapala, mambo pyateno doko, silyamo dupa pitaka nambame emba ditoana” lea. ¹⁰ Dopa leamopa, Jisasame baa lamaiyoo, “’Embame embanya Kamongo Gote doko mambo pyao, baanya iki kalai pyakamaiyoo katape’ lao pepa pyapae silyamona, Satane, emba puu” lea. ¹¹ Dopa lateamopa, Sataneme Jisasa yakinatala pea. Dokopa enjele mendapu ipupala, Jisasa nisiami.

Jisasame Kalai Tee Pyao Piamo Doko

(Mk 1:14-15; Lk 4:14-15)

¹² Jone kaimbu pingi doko, anjiami lapae doko sepala, Jisasa baa Galilea pilyia. ¹³ Pilyetala taono Nasarete dokonya kuki katapala, taono Kapename dokonya pao katea. Kapename doko Galilea pete lembasa, akali tata Sebyulanepa, Napatalaipanya yuu dokonya singi. ¹⁴ Dopa piamo dokome, wamba propeta Aisaiyame pii leamo dake angi jia: ¹⁵ “Endakali Napatalaipa, Sebyulanepa, dupanya yuu Jodane omotenapa, Galilea lembasapa, dupanya tii pipae andake mende ipatamopa, endakali kamalya katenge dupa-kisa tapyatamo kandatami. Kamalya katenge dupa, yuu iminjetaenya kumapae joo katangema dupa-kisa, tii pipae dokome tii pisetana” lea.

¹⁷ Gii dokopa pituu, Jisasame endakali dupa pii tee pyao lamaiyoo, “Gotenya isingi mate doko tengesa ipatelyamona, nyakama mona kapilyalapa” lea.

Jisasame Pisa Nyingi Akali Kitomende Epena Leamo Doko

(Mk 1:16-20; Lk 5:1-11)

¹⁸ Jisasa Galilea pete lemba dokonya pao kandeamopa, pisa nyingi akali Saimone, kenge mende Pita lenge dokopa, kaiminingi Andruapame umbene nuu mende endaki pete dokonya pyandao, pisa nyoo kateambi. ¹⁹ Jisasame dolapo lamaiyoo, “Nyakambame pisa nyingimbali pyoo, endakali nyalapale mana langitoo, namba watao ipupa” lea. ²⁰ Gii dokopaka akali dolapome, umbene nuu dupa yakinatala, baa watao peambi. ²¹ Umbisale pateaminopa, Jisasame akali Sebedi-pipa, ikiningi Jemesa, Jonepa sipi andaka umbene nuu tambuo peteambino kandatala, epena lea. ²² Dopa leamopa, nyakambanya takangepa, sipi dokopa yakinatala, Jisasa watao peambi.

Jisasame Endakali Dupa Mana Lamaita Pii Lamaita Yaina Mee Jiseta Piamo Doko

(Lk 6:17-19)

²³ Jisasame Galilea yuu doko pitakanya paeyao, endakali dupa Judamanya lotuu anda dupanya mana lamaita, Gotenya isingi mate dokonya lao, wai pii epe doko lamaita pia. Dee baame endakali yaina tata longome pyapae dupa, pitaka mee jeta pyakamaiya. ²⁴ Baame piamo dupa Siria yuu doko, pitakanya lao taeyami. Dopa piamopa, endakali dupame yaina tata longome pyapaepi, tanda koo nengepi, imambu koo paletapi, mandipaeme nyingipi, papa tambutaepi, dupa pitaka laminao baa kateasa epeami. Dopa piaminopa, Jisasame yaina dupa mee jeta pyakamaiya. ²⁵ Dokopa endakali kambu longo mendapuame, yuu Galileapi, Dekapolisapi, Jerusalemapi, Judiapi, endaki Jodane yangi-kaitapi, dupanya katao ipupala, Jisasa watao paeyami.

Endakali Goteme Auu Pisingi Dupa

(Lk 6:20-23)

¹ Jisasame endakali kambu longo dupa kandatala, baa yuu manda mendenya pao petea. Peteamo dokonya baanya disaipolo dupa epeami. ² Dokopa baame tee pyao, dokaita dapa lao mana lamaiya:

³ “Endakali imambunya tipya joo katao, Goteme nisipya laka lao masingima dupa, Goteme minao auu pisingi. Auu pisetae dupa Gotenya isingi mate dokonya katatami.

⁴ “Endakali ee lao katengema dupa, Goteme minao auu pisingi. Auu pisetae dupa mona yaepao katatami.

⁵ “Endakali anasale joo katengema dupa, Goteme minao auu pisingi. Auu pisetae dupa Goteme yuu maituna leamo doko, nyakama nyetami.

⁶ “Lopo pilyamopapi, endaki nanu pilyamopapi, napu laka lao putiti kaengeli pyoo, mana tolatae dupa nyepala, watao minapu laka lao putiti kaeyao katenge endakali dupa, Goteme minao auu pisingi. Auu pisetae dupa Goteme maitamopa, nyakama etete yaka jeta.

⁷ “Endakali yango kondo kaenge dupa, Goteme minao auu pisingi. Auu pisetae dupa Goteme kondo kaeyata.

⁸ “Endakali Gote-kisa iki mona setenge dupa, Goteme minao auu pisingi. Auu pisetae dupame Gote kandatami.

⁹ “Endakali mona mendai paliu katamana lao, kyeto joo akema lengema dupa, Goteme minao auu pisingi. Auu pisetae dupa Goteme baanya ikiningina lata.

¹⁰ “Endakali Gotenya mana tolatae minilyamino latala, waka dupame tanda maitaminopa, tanda nenge dupa Goteme minao auu pisingi. Auu pisetae dupa Gotenya isingi mate dokonya katatami.

¹¹ “Nyakamame namba watao minilyaminosa, endakali dupame nyakama kandao pii koo lao, sambo pii koo longo dupa lao, nyakama minao koeyasilyaminopa, Goteme nyakama auu pisingi. ¹² Wamba propeta kateamino dupa, endakali dupame minao koeyasiamiakana, nyakama minao koeyasetamino dokopa, nyakama walu nalalapape. Yole etete andake doko kaitinya setekelyamona, nyakama eteke kaeyao, mona epe palyoo kalyepape,” Jisasame lea.

Jisasame Solepa Tii Pipaepa Dolaponya Kongali Leamo Doko

(Mk 9:50; Lk 14:34-35)

¹³ Jisasame dee mende lao pituu, “Nyakama yuu dakenya sole jepae kalyamino. Sole tende patamo doko, nyakamame aipa petala dee tende pisetamipi? Sole tende patae dokome mende napingi. Doko soo yakinatala moko katao nepenge.

¹⁴ “Nyakama yuu dakenya tii pipae joo kalyamino. Yuu taono mende manda mendenya silyamo doko, yalo pyoo nasingi. Dopaleaka joo, nyakama-kisa tii pipae doko yalo napipenge. ¹⁵ Endakali mendeme lama kaiyepae mende nyepala, penge mendenya koko pyandala naenge. Daa, baame nyepala, toko ketae dokonya setenge. Dopa pilyamo dokome, endakali andaka pilyamino dupa pitaka tii pingi. ¹⁶ Dopaleaka joo, nyakama-kisa tii pipae silyamo doko, endakali waka dupame kandena lao kalyepape. Dopa pitaminopa, dupame nyakamanya kalai epe pitamino dupa kandatala, nyakamanya Takange kaitinya katenge doko lao mambo pyatamina” lea.

Mana Setapae Dupanya Lao Jisasame Mana Lamaiyamo Doko

¹⁷ Jisasame dee mende lao pituu, “Mosesame loo seteamo dupapi, propeta dupame mana leamino, dupa nambame nyoo nepalanya epeepe lao masala naeyalapape. Dupa nambame nyoo nepalanya naepeo. Dupa angi jisalanya epeo. ¹⁸ Nambame nyakama kiningi langilyo: Yuupi kaitipi dupa etatamopa, loo dupanya kuki etete mendaipi mende alu napita. Dupa alu napitamopaka, pii pepa pyapae silyamo dupa pitaka pyoo etata. ¹⁹ Dopana, endakali mendeme mana setapae dupanya kuki etete mende yalatala, endakali waka dupame dopaka pina lao mana lamaitamo doko, baa Gotenya isingi mate dokonya anasale joo katata. Dopaka doko, endakali mendeme mana setapae dupa watao minatala, endakali waka dupame dopaka pina lao mana lamaitamo doko, baa Gotenya isingi mate dokonya, alyasale joo katata. ²⁰ Nambame nyakama langilyo: Mosesanya loo mana nyepae akalipi, Parasaipi, dupa ita minao nyakamame mana tolatae minala naeyatamino doko, Gotenya isingi mate dokonya napatamina” lea.

Imbu Kaenge Dokonya Mana Lamaiyamo Doko

²¹ Jisasame dee mende lao pituu, “’Embame endakali yango mende tuu pyoo pyao kumasala naeyape. Pyao kumasetamo endakali doko, laminao kote laa pupengena’ lao, wamba nyakamanya yumbange dupa lamaiyamino doko, nyakamame siami. ²² Dopaka doko, nambame nyakama dapa langilyo: Endakali mendeme endakali yango mende imbu kaeyatamo doko, laminao kote laa pupenge. Dee endakali mendeme, endakali yango mende kandao, lamba lao pii koo latamo doko, baa kanjole kambuingi andake doko-kisa laminao pupenge. Dee endakali mendeme mende kandao, kyakaenge mona napalengena latamo doko, baa ita tao katenge ele panda koo dokonya pupenge. ²³ Dopana, embame endakali mende koeyasetala, Gote kundi maiya alta tengesa pao pituu, endakali mende koeyasipu doko imbu kaeyao pilyamo lao masetala, ²⁴ embanya kundi maipenge doko dosa setapala, embame endakali doko katatasa pupala, lao tolasetala, mona yaepao dee kundi doko Gote maiya pilyepe.

²⁵ “Dee endakali mendeme emba-pipa kote laanya pia kandeno dokopa, kaitinisa kote laa pao pituu, embame kote langitamo endakali doko mona auu pisakamaipi. Dopa napitino doko, endakali dokome emba laminao pao jasa doko maitamopa, dokome yanda singi dupa maita. Dokopa dupame emba anjinya palyetami. ²⁶ Anjetae paliu, yanu dutupa pyao etateno dokopaka, emba mokatamina lao, nambame nyakama kiningi langilyona” lea.

Enda Kepo Kolapu Laka Lao Masingi Dokonya Jisasame Mana Leamo Doko

²⁷ Jisasame dee mende lao pituu, “’Embame kepo kolala naeyape’ lao, wamba nyakamanya yumbange dupa lamaiyamino doko nyakamame siami. ²⁸ Dopaka doko, nambame nyakama dapa langilyo: Akali mendeme enda mende lengeme kandatala, nyipu laka lao masilya dokome moname kepo kolenge. ²⁹ Embanya lenge tolae dokome, koo pyaale lao mapisetamo doko, lukunya nepape. Emba lenge mendai iki tao, Gotenya isingi mate dokonya pupili doko, auu pipyali. Emba lenge lapota tapeta, ele panda ita tao katenge dokonya soo pyandamili doko, auu napipyali. ³⁰ Embanya kingi tolae dokome, emba koo pyaale lao mapisetamo doko, kepanya nepape. Emba kingi mendai iki kateta, Gotenya isingi mate dokonya pupili doko, auu pipyali. Emba kingi lapota kateta, itate konjala naenge ele panda koo dokonya, pupili doko, auu napipyali.

Enda Yakinenge Dokonya Jisasame Leamo Doko

(Mt 19:9; Mk 10:11-12; Lk 16:18)

³¹ Jisasame dee mende lao pituu, “’Akali mendeme baanya enda doko yakinao pituu, enda yakinenge pepa doko pyao maipengena’ lao, wamba nyakamanya yumbange dupa lamaiyamino doko, nyakamame siami. ³² Dopaka doko, nambame nyakama dapa langilyo: Enda mendeme kepo kolala naeyatamopa, akalingimi mee yakinatamopa, enda dokome akali waka mende nyetamo doko, akali wambatae doko mambele enda doko kepo kolata. Dee akali mendeme enda yukupae doko, nyetamo kandao doko, akali doko kepoaka kolatana” lea.

Pii Etete Kiningi Lelyona Lao Lenge Dokonya Jisasame Mana Lamaiyamo Doko

³³ Jisasame dee mende lao pituu, “’Kamongo dokonya kenge doko latala, embame kiningi etete pituna lateno doko, kaeyala naeyao latenoli pipi’ lao, wamba nyakamanya yumbange dupa lamaiyamino doko, nyakamame siami. ³⁴ Dopaka doko, nambame nyakama dapa langilyo: Embame pii mende lao pituu, kiningi etete lelyona laa naeyape. Salapape! Kaiti doko Gotenya petenge toko dokona, embanya pii lateno dupa kyeto tasalanya, kaitinya kenge latala, pii mende kiningi etete lelyona laa naeyape. ³⁵ Yuu dake Gotenya moko setenge panda dokona, embame pii lateno dupa kyeto tasalanya, yuu dakenya kenge latala, kiningi etete lelyona laa naeyape. Jerusalema doko Kiŋi Andake dokonya taono dokona, embame pii lateno dupa kyeto tasalanya, Jerusalema kenge latala, kiningi etete lelyona laa naeyape. ³⁶ Embame iti pumbuti mende kapo jina laa naeyate. Dee kapo mende pumbuti jina laa naeyate. Dopana, embame pii lateno dupa kyeto tasalanya, langalu minatala, kiningi etete lelyona laa naeyape. ³⁷ Dopana, embame pii mende ŋee lao pituu, ŋee iki lape. Daa lao pituu, daa iki lape. Pii kyeto tasalanya, waipa sinyoo leleno, dupa Sataneme waipa singina” lea.

Itingi Yanu Pingi Dupanya Jisasame Mana Lamaiyamo Doko

(Lk 6:29-30)

³⁸ Jisasame dee mende lao pituu, “’Akali mendeme embanya lenge lukutamopa, itingi lengeaka lukope. Nenge longatamopa, itingi nengeaka longape’ lao, wamba nyakamanya yumbange dupa, lamaiyamino doko nyakamame siami. ³⁹ Dopaka doko, nambame nyakama dapa langilyo: Endakali mendeme emba-kisa koo pitamo doko yanu nanyepe. Endakali mendeme embanya wakena tolae-kaita, kingi kapame pia kandeno doko, yangi-kaita apata pina maipi. ⁴⁰ Dee endakali mendeme, embanya yonge pee isa pingi doko, nyotoo lao kote lea kandeno dokopa, yonge pee-kisa pingi doko apata baa maipi. ⁴¹ Dee akali yanda singi mendeme, emba pyalanya petala, pinju soo tengesa umbisale katao mapa lea kandeno dokopa, londatili pao mapape. ⁴² Endakali mendeme oapi mende tee latamopa, maipi. Endakali mendeme yanu tee latamopa, maipiaka” lea.

Yandapipi Dupa Auu Kaeyapenge Mana Doko

(Lk 6:27-28,32-36)

⁴³ Jisasame dee mende lao pituu, “’Embame embanya patali maki dupa auu kaeyape. Embanya yandapipi dupa imbu kaeyape’ lao, wamba nyakamanya yumbange dupa lamaiyamino doko, nyakamame siami. ⁴⁴ Dopaka doko, nambame nyakama dapa langilyo: Nyakamame nyakamanya yandapipi dupa auu kaeyao katao, nyakama koeyasilyamino dupa nisoo loma salapape. ⁴⁵ Dopa pitamino dokome, nyakamanya Takange kaitinya katenge dokonya, wane joo katatami. Baame niki doko endakali koopi epepi, dupa pitaka-kisa tapina lenge. Baame aiyuu doko, endakali mana tolatae miningipi, mana koo miningipi, dupa pitakanya epena lenge. ⁴⁶ Takisa nyingi akali dupame, endakali nyakama auu kaenge dupa, itingi auu kaengema. Dopaleaka joo, nyakamame endakali nyakama auu kaeyatamino dupa, iki auu kaeyatamino doko, dokonya aki yole mende nyetamipi? ⁴⁷ Dee kamalya katenge endakali dupame, nyakamanya kaiminingi dupa pii epe lamaingima. Dopaleaka joo, nyakamame nyakamanya kaiminingi dupa, iki pii epe lamaitamino doko, mana aipale mendeme endakali kamalya katenge dupa, ita minatamipi? ⁴⁸ Dopana, nyakamanya Takange kaitinya katenge dokome, endakali koopi, epepi dupa pitaka auu kaengena, nyakamame dopaka pyoo, auu kaeyao kalyepape” lea.

Endakali Daa Jepae Dupa Nisinginya Lao Mana Lamaiyamo Doko

¹ Jisasame dee mende lao pituu, “Endakali dupame kandamili lao, nyakamame mana tolatae dupa minatamino doko, nyakamanya Takange kaitinya katenge dokome, yole mende nanditana, kandao kalyepape.

² “Endakali Gote watao miningi mane-mane pingima dupame, nyakamanya lotuu andapi, kaitini kembopi, dupanya endakali dupame nyakama lalyipimili lao masoo, endakali tipya dupa maingima. Nambame nyakama kiningi langilyo: Dopa pingi endakali dupame nyakamanya yole doko nyepelyaminona, nyakamame dopa napyepape. ³ Dopana, nyakamame endakali tipya dupa kingi tolae-kaitame nisoo pituu, kingi koeya-kaitame nakandena lao pyepape. Dopa pitamino dokome, endakali mendeme nakandata. ⁴ Nyakamame yalo pyoo nisepae maitaminopa, nyakamanya Takange dokome yalo pyoo maitamino doko kandatala, nyakama yole mende ditana” lea.

Loma Mana Lamaiyamo Doko

(Lk 11:2-4)

⁵ Jisasame dee mende lao pituu, “Nyakamame loma setamino gii dokopa, endakali Gote watao miningi, mane-mane pingima dupame, loma singimali pyoo sala naeyalapape. Dupame lotuu andapi, kaitini kembopi, dupanya katao, endakali enombanya loma sipuma laka lao masingima. Nambame nyakama kiningi langilyo: Dopa pingi endakali dupanya yole doko nyepelyamino. ⁶ Nyakamame loma salanya pituu, nyakamanya palenge panda dokonya pao, kaita paii lanyetala, nyakamanya Takange yalo pyoo katenge doko lao loma salapape. Dopa pitaminopa, nyakamanya Takange dokome kandatala, nyakama yole mende dita.

⁷ “Kamalya katenge endakali dupame, pii tenge nakatenge longo dupa lao, nyakamanya sambo gote dupa lao loma singima. Dokaitame loma londe pyoo singi doko, sambo gote dupame auu kaeyao, sekelyaminona lao masingima. ⁸ Nyakama daa jilyamo dupa, tee laa naelyaminopa, wambao nyakamanya Takange Gote dokome masingina, nyakamame kamalya katenge dupame pingimali napyepape. ⁹ Nyakamame dapa lao loma salapape:

Naimanya Takange ketae kaitinya katenge doko, embanya kenge doko auu pyoo sina lape. ¹⁰ Embanya isingi mate doko epena lape. Ketae kaitinya embanya masingili pingima, dopaka pyoo isa yuu dakenya pyepa lape. ¹¹ Indupaka natamanoli pyoo, nee dupa dipi. ¹² Naimanya koo pyekelyamino dupanya, yanu dupa kaelyamanona, embame naimanya koo dupanya yanu dupa kaeyape. ¹³ Koo pyepa lao makande pingi dupanya, pupa lao yakinala naeyape. Koo dupanya embame naima pyoo nyepe.

¹⁴ Dopana, endakali mendeme nyakama-kisa koo pingitamo dupa, kame setamino doko, nyakamanya Takange ketae kaitinya katenge dokome, nyakamanya koo dupa kameaka sakata. ¹⁵ Nyakamame endakali mendeme, koo pingitamo dupa kame nasetamino doko, Goteme nyakamanya koo dupa kame nasakatakana” lea.

Gote Loma Soo Nee Nanao Katenge Dokonya Mana Lamaiyamo Doko

¹⁶ Jisasame dee mende lao pituu, “Nyakamame Gote loma soo, nee nanao katao, endakali Gote watao miningi, mane-mane pingima dupame pingimali pyoo, enomba kumala naeyalapape. Dokaitame nee nanao kalyamini-lamo lao, endakali dupame nyakama kandena lao, enomba kumao lambalu pyapae paengema. Dopa pingi endakali dupame, nyakamanya yole doko nyepelyaminona lao, nambame nyakama kiningi langilyo. ¹⁷ Nyakamame Gote loma soo, nee nanao katao, endakali dupame nyakama nee nanao kalyaminona lao, masala naena lao, nyakamanya lengelyapi wasa pyapala, iti weleme kai pyapala kalyepape. Dopa pitaminopa, nyakamanya Takange yalo pyoo katenge dokome, iki kandata. Baame nyakamanya yalo pyoo pitamino doko kandatala, nyakama yole mende ditana” lea.

Epe Dupa Kaitinya Setenge Mana Doko

(Lk 12:33-34)

¹⁹ Jisasame dee mende lao pituu, “Isa yuu dakenya oapi epe setelyamino dupa, kokalyame nao koeyasingi. Dee kaa tao koengeaka. Pake nenge endakali dupame, anda kalupala pake nyingimakana, nyakamame oapi epe dupa isa yuu dakenya nyoo setala naeyalapape. ²⁰ Kaiti dokonya oapi epe setelyamino dupa, kokalyame nao koeyasala naenge. Dee kaa tao koeyala naengeaka. Pake nenge endakali dupame, anda kalupala, pake nanyingimakana, nyakamame oapi epe dupa kaitinya nyoo setalapape. ²¹ Nyakamanya oapi epe dupa setenge panda dokonyaka, nyakamanya mona yukuo setengemana” lea.

Lenge Doko Yongenya Kia

(Lk 11:34-36)

²² Jisasame dee mende lao pituu, “Lenge doko yongenya kia joo tenge. Embanya lenge doko auu pyoo tao paeyateno doko, embanya yonge doko pitaka etete tii pita. ²³ Dopaka doko, embanya lenge lapota natao paeyateno doko, embanya yonge doko pitaka iminjeta. Emba-kisa kia telyamo doko konjetamopa, emba iminjetae andake mendenya katatena” lea.

Endakali Mendeme Kamongo Lapomanya Kalai Napipenge

(Lk 16:13)

²⁴ Jisasame dee mende lao pituu, “Endakali mendeme kamongo lapomanya, kalai pyakamaiya naeyapenge. Lapotanya kalai pyakamaitamo dokome, mende auu kaeyapala, mende doko auu kaeyala naeyata. Dee mende mona setapala, mende doko mona setala naeyata. Dopana, nyakama Gotepa, munipa, lapotanya kalai akali joo, nakatapengena” lea.

Auu Pyoo Katapuli Lao Masingi Doko

(Lk 12:22-31)

²⁵ Jisasame dee mende lao pituu, “Nyakamame nyakama tange auu pyoo, lete katapenge dupanya lao masetala, ’Naima neepi endakipi anja-tae nao katatamape? Yonge pee anja-tae pitamape?’ lao masala naeyalapape. Lete katenge angi doko neepi, endakipi, yonge peepi, dopale daa. ²⁶ Nyakamame yaka dupa kanjepape. Dupame ee pokala naengema. Dupame nee nyoo ipao setenge anda dupanya, mau pyala naengemaka doko, nyakamanya Takange kaitinya katenge dokome dupa nee maingi. Nyakamame yaka dupa etete ita minao kalyamino dokonya, Goteme nyakama nisala naeyatape? ²⁷ Nyakamanya mendeme auu pyoo katapuli lao masepae longo nyetamo dokome, baanya lete katenge dokonya, ee kana mendatupa waipa setape? ²⁸ Aipuma nyakamame yonge pee anja-tae pitamape lao, masepae longo nyilyamipi? Palao dii auu pyoo pilyamo dupa kanjepape. Dupa auu pisalanya tangeme kalai mende napingima. Dee yonge peepi mende wasala naengemaka. ²⁹ Wamba Kiŋi Solomoneme, yati tata epe longo dupa pitaka piamoaka doko, palao dii auu pyoo pilyamo dopale mendeme, baa yati napiana lao, nambame nyakama langilyo. ³⁰ Aipuma nyakamame Gote tungi kuki pilyamipi? Palao dii epapu telyamo, taita kepao yangapenge dupa, Goteme yati pisingi. Dopa pingi dokome, nyakama yonge pee pipenge dupa, kapa pao ditana lao masala naelyamipi? ³¹ Dopana, nyakamame neepi endakipi anja-tae natamape, yonge pee anja-tae pitamape lao masala naeyalapape. ³² Endakali kamalya katenge dupame, dopale dupa iki kutingi. Dopaka doko, nyakamanya Takange kaitinya katenge dokome, nyakama daa jilyamo dupa kandenge. ³³ Dopana, nyakamame Gotenya isingi mate dokopi, baanya mana tolatae dokopi, dolapo wambao kutalapape. Dopa pitaminopa, Goteme nyakamanya nyepenge dupa dita. ³⁴ Dopana, nyakamame taitanya lao masepae longo nyala naeyalapape. Taita kenda pipae ipatamo dupa, taita sepenge. Indupa kenda pipae ipatamo dupa, indupaka sepengena” lea.

Endakali Mende Koo Epe Lao Yapala Naeyalapape Leamo Doko

(Lk 6:37-38,41-42)

¹ Jisasame dee mende lao pituu, “Nyakamame endakali mende koo epe lao yapala naeyalapape. Dopa pitaminopa, nyakama koo epe lao yapala naeyatamiaka. ² Nyakamame endakali mende koo epe lao yapatamino kandao doko, nyakama dopaka pyoo yapatami. Nyakamame endakali mende yapatamino doko, makande mendai dokomeaka nyakama yapatami. ³ Embanya lengenya ita lyoo andake doko sina latala, mendenya lenge kuni yakane sipya doko, aipa petala kandakamaitipi? ⁴ Embanya lengenya ita lyoo andake mende setamopa, aipa petala embame waka mende kandao, ’Embanya lengenya kuni silyamona, nyakaowape’ latepe? ⁵ Dopa lenge endakali doko, endakali waka dupame, mana tolatae minina lao mana latala, embame mana tolatae doko naminingi. Wambao embanya lengenya ita lyoo andake setamo doko, nyoo nepatala, lenge auu pyoo tao, waka dokonya lenge kuni setamo doko, nyoo nepakamaipi.

⁶ “Nyakamame Gotenya latae dupa, yana namaiyepape. Maitamino doko, yana dupame kapilyetala, nyakama natami. Dee nyakamanya mamaku epe dupa mena katataminya pyale nalalapape. Pyale latamino doko, dokaitame dupa moko katao, longao nepatamina” lea.

Tee Lao Kutao Kaita Wata-Wata Pyepape Leamo Doko

(Lk 11:9-13)

⁷ Jisasame dee mende lao pituu, “Gote loma soo tee lelyamino endakali dupa pitaka, Goteme maingi. Kutilyamino endakali dupa pitaka, Goteme laitaka pingi. Anda kaita wata-wata pilyamino endakali dupa, pitakanya Goteme kaita lumbakamaingi. Dopana, nyakamame Gote loma soo tee lapape. Tee lataminopa, Goteme dita. Kutalapape. Kutataminopa, Goteme laitaka pita. Anda kaita wata-wata pyepape. Wata-wata pitaminopa, Goteme kaita lumbakata. ⁹ Waneme takange kandao, betesa natoo latamopa, nyakama apimi wane doko kana mende nena lao maitipi? ¹⁰ Waneme takange kandao, pisa natoo latamopa, nyakama apimi wane doko kanopato+ 7:10 Endakali Juda tange dupa kanopato nanengema. mende nena lao maitipi? ¹¹ Nyakama takange dupa koaka doko, nyakamanya wane dupa, oapi epe maipenge dupa maingima. Nyakamanya Takange kaitinya katenge dokome, nyakama ita minao, baa-kisa tee lelyamino endakali dupa, oapi epe maipenge dupa maingi.

¹² “Dopana, Mosesame loo seteamo dupanyapi, propeta dupame mana leamino dupanya, pii tenge angi lapae silyamo doko dake: Endakali waka dupame, nyakamanya pyakami laka lao masetamino dokoaka, nyakamame dokaitanya pyakamaiyepape” lea.

Kaitini Yakane Doko

(Lk 13:24)

¹³ Jisasame dee mende lao pituu, “Koo pandanya koeyala penge lome kaita doko, pee lapae. Kaitini dokonya endakali longo dupa, leke-leke natao pengema. Lete etete katenge panda dokonya penge lome kaita doko, etete yakane. Kaitini dokonya etete tanda nao pupenge. Lome kaita etete yakane dokonya, endakali kukimi kutao kandengema. Dopana, nyakama lome kaita yakane dokonya pupape” lea.

Sambo Propeta Dupa Wandyuu Kalyepape

(Lk 6:43-44)

¹⁵ Jisasame dee mende lao pituu, “Sambo propeta dupame sipisipi yanu nyoo petala, nyakama katatamisa ipatami. Dopa pitaminoaka doko, mona andaka yana kapu jetae ipatamina, wandyuu kalyepape. ¹⁶ Nyakamame dokaitanya mana minatamino dupa kandatala, dupa dopale-lamo lao masetami. Ikililyambu kende dupanya kopi lyingipi? Dee take ita dupanya anga lyingipi? ¹⁷ Ita epe dupame dii koo namandenge. Ita koo dupame dii epe namandengeaka. Ita epe dupa pitakame dii epeaka mandenge. Ita koo dupa pitakame dii koaka mandenge. ¹⁹ Dii epe namandenge ita dupa pitaka, pokapala itatenya soo yangenge. ²⁰ Dopana, sambo propeta dupame mana makandepi, minatamino dupa kandatala, nyakamame dopale-lamo lao masetamina” lea.

Jisasame Endakali Mendapu Nakandenge Latamo Doko

(Lk 13:25-27)

²¹ Jisasame dee mende lao pituu, “Namba kandao, mee ’Kamongo Kamongo’ lenge endakali dupa pitaka, Gotenya isingi mate dokonya napatami. Nambanya Takange kaitinya katenge dokome, masingili pingima dupa iki patami. ²² Yuu etatamo gii dokopa, endakali longo dupame namba kandao, ’Kamongo Kamongo, naimame embanya kenge doko lao, wai pii epe doko lamaiyama. Naimame embanya kenge doko lao, imambu koo longo dupa watao piamaka. Naimame embanya kenge doko lao, mirakolo kalai longo dupa piamana’ latami. ²³ Gii dokopa nambame dokaita lamaiyoo, ’Nyakama koo pingi dupa, nambame nakandengena pupa’ latona” lea.

Akali Lapomame Anda Lapoma Piambina Lao Kongali Leamo Doko

(Lk 6:47-49)

²⁴ Jisasame dee mende lao pituu, “Nambame mana lalo dutupa sepala, watao minatami endakali dupa pitaka, akali masepae epe palenge mendeme kandatala, yuu kyeto mendenya anda muku minatala, anda piamo dopale. ²⁵ Baame yuu kyetonya muku minatala, piamo dokonya, poo pupu lao lata, aiyuu ipata, endaki lyoo ipata piamopa, anda doko takyala naeya. ²⁶ Nambame mana lalo dutupa sepala, watao minala naeyatamino endakali dupa pitaka, akali masepae napalenge mendeme, endaki keanya anda muku minatala, anda piamo dopale. ²⁷ Baame endaki keanya muku minatala, anda piamo dokonya, poo pupu lao lata, aiyuu ipata, endaki lyoo ipata piamopa, anda doko kaluo koeya dokome, oapi dupa pitaka koeyakana” lea.

²⁸ Jisasame mana leamo dupa, Mosesanya loo mana nyepae akali dupame lengemali pyoo nalenya, baa-kisa singi joo mana lea. Tenge dokonya, baame mana dutupa lao etapeamopa, endakali kambu longo peteamino dupame sepala, walu lao paka kaeyami.

Jisasame Akali Mendenya Kopetali Mee Jakamaiyamo Doko

(Mk 1:40-45; Lk 5:12-16)

¹ Jisasame yuu manda doko yakinatala, lanao epeamopa, endakali kambu longome baa watao epeami. ² Dokopa akali kopetali mendeme, Jisasa kateamo dosa ipao, luma lakapala baa lamaiyoo, “Kamongo, embame nambanya yaina dake mee jakalapo lao maseteno doko, mee jakalapenona” lea. ³ Dopa leamopa, Jisasame akali doko kingimi watandatala baa lamaiyoo, “Nambame embanya yaina doko mee jipyali lao masilyona, epapu embanya yaina doko mee jekelyona” lea. Dopa leamopa yaina doko mee julu pia. ⁴ Dokopa Jisasame baa lamaiyoo, “Nambame embanya pyakalo doko, mende lamaiya naenya, pitisa dokome emba kandena puu. Pupala Mosesame wamba mana seteamoli pyoo, dopale mende Gote kundi maitinopa, endakali dupame embanya yaina doko, mee jipya-lamo lao kandenana” lea.

Isingi Akali Mendenya Kalai Akali Mende Jisasame Saka Nyiamo Doko

(Lk 7:1-10; Jn 4:43-54)

⁵ Jisasa Kapename pao pyakameamopa, yanda singi isingi akali mende ipupala, “Akali andake, nambanya kalai akali mende yainame tanda andake nao, andaka takyepae silyamona nisetepe?” lea. ⁷ Dopa leamopa, Jisasame baa lamaiyoo, “Nambame baa saka nyala ipatoana” lea. ⁸ Dopa leamopa, yanda singi isingi akali dokome, baanya pii yanu pyakamaiyoo, “Akali andake, emba nambanya andaka ipupenge, namba akali epe daana, embame piimi iki latenopa, nambanya kalai akali doko saka paapomo. ⁹ Nambanya isingi akali dokonya pundi-pundi namba katenge. Dee yanda singi mendapu, nambanya pundi-pundi katengemaka. Dupanya mende pena lelyopa, baa penge. Mende epena lelyopa, baa epenge. Dee nambanya kalai akali dokome, mende pina lelyopa, baame lelyoli pingina” lea. ¹⁰ Pii leamo doko walu lao sepala, Jisasame endakali baa watao epeamino dupa lamaiyoo, “Nambame nyakama kiningi langilyo: Akali dakeme namba tungi pilyamoli pyoo, Israele tange mendeme, namba tungi pyaminopa nakandapu. ¹¹ Endakali longo niki pyakaengesa tangepi, niki pambengesa tangepi, dupa ipao Gotenya isingi mate dokonya, Abrakame, Aisake, Jekope-pipa apata nee andake nao pititami. ¹² Dopaka doko, Gotenya isingi mate dokonya katatamina latae endakali dupanya mendatupa, iminjetae panda koo dokonya watao pyandata. Dopa pitamopa, dokonya katao ee lao, yamataka lao, nenge gilyoo katatamina” lea. ¹³ Dopa latala baame yanda singi isingi akali doko lamaiyoo, “Embame namba tungi pyatala, tee leeno dokonya, embanya kalai akali doko saka pelyamona, andaka puu” lea. Dopa leamo gii dokopaka, isingi akali dokonya kalai akali doko saka pea.

Jisasame Endakali Yaina Pyapae Longo Mee Jakamaiyamo Doko

(Mk 1:29-34; Lk 4:38-41)

¹⁴ Jisasa Pitanya andaka peamopa, Pitanya enda imange doko yonge itaita piamopa, yaina siamo kandea. ¹⁵ Kandatala baame enda dokonya kinginya watandeamopa, yonge itaita piamo doko mee jia. Mee jeteamopa, enda dokome sakatatala, Jisasa nee nyoo nena maiya.

¹⁶ Niki landa piamopa, endakali mendapuame imambu koo paleta endakali longo dupa, Jisasa kateasa laminao epeami. Dokopa Jisasame endakali dupa-kisa, imambu koo paleamo dupa, piimi watao pyata, endakali yaina pyapae dupa, pitaka mee jakamaita pia. ¹⁷ Baame dopa piamo dokome, wamba propeta Aisaiyame lao pituu, “Baame naimanya yongenyapi, imambunyapi, yaina dupa mee jakatana” leamo doko angi jia.

Endakali Mendapuame Jisasa Watao Paeyatamana Leamino Doko

(Lk 9:57-62)

¹⁸ Endakali kambu mendeme, Jisasa baa katao kakopeamino kandatala, baanya disaipolo dupa lamaiyoo, “Naima Galilea pete omotena mua” lea. ¹⁹ Dokopa Mosesanya loo mana nyepae akali mendeme, Jisasa kateasa ipupala lamaiyoo, “Mana Lenge Akali, emba paeyateli pyoo, namba watao ipatoana” lea. ²⁰ Dopa leamopa, Jisasame baa lamaiyoo, “Yana kapu dupanya palenge yuli tombapae dupa singi. Dee yaka dupanya anda katengeaka doko, Akalinya Ikiningi dokonya palenge anda mende nakatengena” lea. ²¹ Dokopa dee akali waka Jisasa watao paeyamino, dupanya mendeme baa lamaiyoo, “Kamongo, nambanya takange doko malu petala, emba watao ipatoo paowape?” lea. ²² Dopa leamopa, Jisasame baa lamaiyoo, “Endakali kumapae joo kalyamino dupame, kumapae yango dupa malu pina, emba namba watao ipu” lea.

Jisasame Poo Andake Mende Kaena Leamo Doko

(Mk 4:35-41; Lk 8:22-25)

²³ Dopa latala Jisasa baa sipi mendenya pyakalyiamopa, disaipolo dupa sipi dokonya apata pyakalyiami. ²⁴ Pyakalyetala peaminopa, Jisasa luu palea. Paleamopaka, poo yale mende leamo dokome, endaki buli pyao tandyoo, sipi dokonya kolandea. ²⁵ Dopa piamopa, disaipolo dupame baa pyale tatala, “Kamongo, naima mangalanya pilyamanona, embame naima nisepoko” leami. ²⁶ Dopa leaminopa, Jisasame dokaita lamaiyoo, “Aipuma nyakama paka kaelyamipi? Nyakama Gote kuki tungi pingima-lamona” lea. Dokopa baame sakatatala, poo leapi, endaki buli piapi, dupa pyalanya leamopa, kuki emapi mende napia. ²⁷ Dopa piamopa, disaipolo dupame paka kaeyapala lao pituu, “Endakipa poopa dolapome, baanya pii lapyali pilyambino doko, akali dake api laa kanjemape?” leami.

Jisasame Akali Lapomanya Imambu Koo Watao Pyakamaiyamo Doko

(Mk 5:1-20; Lk 8:26-39)

²⁸ Jisasa Galilea pete omotena, Gadara tangemanya yuu dokaita pao pyakameamopa, akali imambu koo longo palenge lapoma, endakali malu katenge dupanya paliu ipao, Jisasa kandanyiambi. Akali dolapo kapu joo kalyambinosa, endakali mende kaitini dokonya-kaita napaengema. ²⁹ Dokopa akali dolapome puu lao, “Gote Ikiningi, embame naima aipa piti? Embame tanda andake dipenge gii seteamo doko, ipatala naeyapumupa, embame naima tanda andake wambao dyaanya epelepe?” leambi. ³⁰ Kuki omosale mena elyambu mendapu nao kateami. ³¹ Dokopa imambu koo dupame Jisasa tee lao, “Naima pupale lao pyao watateno doko, mena dokaita-kisa landa pyalapa lapoko” leami. ³² Dopa leaminopa, Jisasame dupa kandao, “Pupa” lea. Dopa leamopa, imambu koo dupame akali dolapo soo yakinatala, mena dupa-kisa pao landa piami. Landa pyateaminopa, mena elyambu doko pitaka, papatale mendenya-kaita alo pyao pao, endaki pete mendenya mangatala kumiami. ³³ Dokopa mena setao katenge akali dupame, taono dokonya alo pyao pupala, akali imambu koo palenge dolapo-kisa, piamo dupa pitaka lamaiyami. ³⁴ Dopa leaminopa, taono dokonya palenge endakali dupa pitakame, Jisasa kutao pupala kandanyiami. Kandanyetala dokaitame kyeto joo, “Embame naimanya yuu dake yakinatala puu” leami.

Akali Papa Tambutae Mende Jisasame Tolasakamaiyamo Doko

(Mk 2:1-12; Lk 5:17-26)

¹ Jisasa sipi dokonya pituu, Galilea pete omotena, baa katenge taono Kapename dokonya pyakamea. ² Dokopa akali mendapuame akali papa tambutae mende lapa tokonya soo, baa kateasa epeami. Dopa piaminopa, dokaitame Jisasa baa tungi piamino doko kandatala, akali papa tambutae doko lamaiyoo, “Wane, embanya koo dupa kunao nepekelyona, emba mona yaepa” lea. ³ Dopa leamopa, Mosesanya loo mana nyepae akali mendapuame, nyakamalapo laloo pyoo, “Akali dakeme Gote lamba lelyamona” leami. ⁴ Dopa lao masiamino dupa Jisasame kandatala dokaita lamaiyoo, “Aipuma koo dopale dupa masilyamipi? ⁵ Akali dakenya koo dupa kunao nepakamailyona lapu dokopa, nyakamame namba koo kunao nepenge, pupu lapae doko singi-lamo lao nakandelyamino. Dee akali dake lamaiyoo, “Emba sakatatala puu” lato dokopa, namba koo kunao nepenge pupu lapae doko singi-lamo lao kanjamino. ⁶ Dopaka doko, Akalinya Ikiningi dokome isa yuu dakenya katao, endakali dupanya koo dupa kunao nepenge pupu lapae doko, baa-kisa singi-lamo lao kanjepalena” lea. Dopa latala baame akali papa tambutae doko lamaiyoo, “Emba sakatatala, embanya lapa toko doko nyoo soo, andaka puu” lea. ⁷ Dopa leamopa, akali doko sakatatala andaka pea. ⁸ Dopa piamo doko, endakali kambu piamino dupame kandatala, pupu lapae dopale dupa Goteme, akali dake maiya-lamo lao paka kaeyapala, Gote mambo piami.

Jisasame Matyu Epena Leamo Doko

(Mk 2:13-17; Lk 5:27-32)

⁹ Jisasame yuu doko yakinao ipupala, akali takisa nyingi Matyu lenge mende, takisa nyingi anda dokonya peteamo kandatala, baa lamaiyoo, “Emba namba watao ipu” lea. Dokopa baa sakatatala, Jisasa watao pea. ¹⁰ Maitakao Matyunya andaka pupala, Jisasa disaipolo dupa-pipa peteaminopa, koo pingipi, takisa nyingipi, longo dupa ipupala, apata nee nao peteami. ¹¹ Peteamino doko kandatala, Parasai dupame Jisasanya disaipolo dupa tipa pyoo, “Nyakamanya mana lenge akali doko, aipuma koo pingipi, takisa nyingipi, dupa-pipa nee nao pilyape?” leami. ¹² Jisasame pii leamino doko sepala dokaita lamaiyoo, “Endakali yaina napingi dupa dokosa yangyala naenge. Endakali yaina pyapae dupa dokosa yangingi. ¹³ Gotenya pii lapae silyamo dake, nyakamame pao mana nyalapape: ’Kundi iki dingi doko, namba Gote dokome auu nakaenge. Endakali yango kondo kaenge doko, namba Gote dokome auu kaengena’ lapae silyamo. Nambame endakali tolatae dupa, wii lao lanyalanya naepeo. Endakali koo pingi dupa, wii lao lanyalanya epeona,” Jisasame lea.

Gote Loma Soo Nee Nanao Katenge Mana Dokonya Jisasa Tipa Piamino Doko

(Mk 2:18-22; Lk 5:33-39)

¹⁴ Gii dokopa Jone kaimbu pingi dokonya disaipolo dupame, Jisasa kateasa ipupala baa tipa pyoo, “Nee nanao loma singi gii dokonya, naimapi, Parasaipi, dupame Gote loma soo pituu nee nanengena, embanya disaipolo dupame aipuma dopa napingimape?” leami. ¹⁵ Dopa leaminopa, Jisasame dokaitanya pii yanu pyakamaiyoo, “Akali mendeme enda kelyapala, watapae pyao baanya tata dupa-pipa, apata kalyamino gii dokopa, baanya tata dupa-pipa nee nao, mona yaepao, auu kaeyao katengema. Akali enda kelyenge dopale joo, namba nyakama-pipa apata katao, nee nao kalyamano. Gii mendepa, akali waka mendapuame namba nyokonyoo patataminopa, nambanya disaipolo dupa loma soo, nee nanao katatamina” lea.

¹⁶ Dopa latala kongali pii mendeaka dee Jisasame lao pituu, “Endakali mendeme lapalapa kangupae enenge mendeme, yonge pee atingi mendenya tii telyamo dokonya, kii pimbala naenge. Endakali mendeme lapalapa etete enenge mende, atingi-kisa kii pimbatala wasa pyatamopa, enenge doko inungunyetamo dokome, atingi doko kanguo koeyaseta. ¹⁷ Dopaka pyoo, endakali mendeme waene enenge kamuo, penge meme yanungimi wasepae, atinginya pyandatamo dokome, waene doko bolo lapala, penge atingi doko kangutamopa, waenepa, pengepa, lapota koeyata. Tenge dokonya, waene enenge kamupae doko, penge atinginya kamuo pisala naenge. Waene enenge doko, penge enengenyaka kamuo pisingi, dokome waenepa, pengepa, dolaponya mende koeyala naengena” lea.

Jisasame Isingi Akali Mendenya Wanenge Sakatasiamo Doko

(Mk 5:21-43; Lk 8:40-56)

¹⁸ Jisasame Jone kaimbu pingi dokonya, disaipolo dupa pii lamaiyoo kateamopa, Judamanya lotuu anda mendenya isingi akali mende, Jisasa kateasa ipao luma lakapala baa lamaiyoo, “Nambanya wanenge doko epapu kumatalamona, dee lenge tena, embame baa-kisa kingi setala ipupoko” lea. ¹⁹ Dopa leamopa, Jisasa disaipolo dupa-pipa sakatatala, akali doko watao peami. ²⁰ Peaminopa, enda mende ee kana 12 dutupanya, yuu gii dii lao angupae kandenge dokome, Jisasanya maitakaita pupala, Jisasanya yonge peenya watandatopa, nambanya yaina doko mee jakalapomona lao masetala, yonge pee punanya watandea. ²² Dopa piamopa, Jisasame kapilyetala, enda doko kandatala, “Wanaku, embame namba tungi pyapino dokome, embanya yaina doko etelyamona, emba mona yaepatala puu” lea. Dopa leamo gii dokopaka, enda dokonya yaina doko etea. ²³ Dokopa Jisasame isingi akali dokonya andaka pao kolandatala kandeamopa, endakali mendapuame kumanda pituu, pulupapu pyao ee wee leami. ²⁴ Dopa piaminopa, baame dokaita lamaiyoo, “Wanaku dake kumala naeyalamo, mee luu palelyamona, nyakama pyoo pupa” lea. Dopa leamopa, endakali dupame baa lamba lao, gii kaeyami. ²⁵ Dopa piaminopa, Jisasame endakali dupa watao kamanda pyalyetala, baa wanaku kumapae siamo dokonya pea. Pupala wanaku doko kinginya minateamopa, sakatea. ²⁶ Dopa piamo dokonya atome doko, yuu makisa singi dupa pitakanya taeya.

Jisasame Akali Lenge Monda Mendalapo Lenge Tasiamo Doko

²⁷ Jisasame yuu doko yakinatala peamopa, akali lenge monda mendalapome wii lao, “Dapiti Yumbange, embame nalimba kondo kaeyapoko” lao watao peambi. ²⁸ Jisasa andaka kolandatala peteamopa, akali lenge monda dolapo epeambi. Epeambinopa, baame dolapo tipa pyoo, “Nyakamba nambame yaka nisalapeno lao masilyambipi?” lea. Dopa leamopa, dolapome yanu pyao, “Kamongo, kini embame yaka nisalapenona lao masilyambanona” leambi. ²⁹ Dokopa Jisasame akali dolaponya lengenya watandatala lamaiyoo, “Nyakambame namba tungi pilyambino dokonya, masilyambinoli pilyamona” lea. ³⁰ Dopa lalu piamopa, akali dolapo lenge talu piambi. Dokopa Jisasame akali dolapo kyeto joo lamaiyoo, “Nyakamba-kisa pyomo dake, endakali waka mende lamaiya naeyalapape” lea. ³¹ Dopa leamoaka doko, Jisasame piamo dupa pitaka, akali dolapome yuu makisa singi dupa pitakanya lao taeyambi.

Jisasame Akali Muumaa Mende Nisiamo Doko

³² Akali dolapo puu peteambinopa, endakali mendapuame imambu koo paleta akali muumaa mende, laminao Jisasa kateasa epeami. ³³ Dokopa akali doko-kisa, imambu koo paleamo doko watao piamopa, muumaa doko pii lea. Dopa piamopa, endakali kambu piamino dupame kandatala, walu leami. Walu latala lao pituu, “Wamba naimame Israele tange endakali dupanya, mana dapale mende nakandeamana” leami. ³⁴ Dopa leaminoaka doko, Parasai dupame lao pituu, “Imambu koo dupanya isingi doko baa-kisa ipao palipya dokome, imambu koo waka dupa watao pilyamona” leami.

Jisasame Endakali Dupa Kondo Kaeyamo Doko

³⁵ Jisasame taono andakepi, yakanepi, dupa pitakanya paeyao, nyakamanya lotuu anda dupanya katao mana lamaita, Gotenya isingi mate dokonya lao wai pii epe doko, lamaita pia. Dee baame endakali yaina tata longome pyapae dupa mee jakamaiya. ³⁶ Endakali kambu dupa sipisipi setao katenge, daa jepae katao kekeamino kandatala, Jisasame dokaita konda kaeya. ³⁷ Kondo kaeyapala baame disaipolo dupa lamaiyoo, “Eenya nee longo wambu petelyamoaka doko, endakali mandyuu setapenge etete kuki kalyamino. ³⁸ Dopana, kalai akali mendatupa apata nee mandyuu, setala pena lape lao, ee tange doko nyakamame loma salapape” lea.

12 Disaipolo Dutupa

(Mk 3:13-19; Lk 6:12-16)

¹ Jisasame baanya 12 disaipolo dutupa epena latala, imambu koo dupa watao pyao, endakali yaina tata longome pyapae dupa mee joo, kalai pina lao, pupu lapae doko, dokaita maiya. ² 12 aposolo dutupanya kenge dupa, wambao doko Saimone, baanya kenge mende doko Pita, baanya kaiminingi Andru, Sebedi ikiningi Jemesa, baanya kaiminingi Jone, ³ Pilipa, Batolomyu, Tomasa, takisa nyingi akali Matyu, Alopiasa ikiningi Jemesa, Tadiusa, ⁴ Saimone, baanya kenge mende doko Selote, Jisasa enge nyiamo akali doko, Judasa Iskariota, akali dutupa yapao nyia.

Jisasame 12 Disaipolo Dutupa Kalai Pyaa Pena Leamo Doko

(Mk 6:7-13; Lk 9:1-6)

⁵ Jisasame 12 disaipolo dutupa, kalai pyaa pena latala lamaiyoo, “Endakali kamalya katengemapi, yuu Samaria dokonya taono singipi, dupanya nyakama napupape. ⁶ Israele tange sipisipi alu petae joo, kalyamino dupanya pupape. ⁷ Pupala, “Gotenya isingi mate doko tengesa ipatelyamona” lao lamaiyepape. ⁸ Endakali yaina pyapae dupa saka nyalapape. Kumapae dupa lenge tasalapape. Kopetali dupa mee jakamaiyepape. Imambu koo dupa watao pyakamaiyepape. Nyakamame mee nyilyamino dokonya, meaka maiyepape. ⁹ Nyakamame muni mendaipi mende manja naeyao mee pupape. ¹⁰ Akali kalai pilyami dupame, nee toma nengema. Nyakama kalai pyaa patamino yuu dupanya, endakali dupame nyakama nisepengena, nokainapi, moko peepi, pangalipi, yonge pee wakaowapi, mende nyoo napupape. ¹¹ Nyakama taono andake-tamopi, yakane-tamopi, mendenya pataminopa, endakali mendeme nyakama auu kaeyao lanyeta mende kutao kandatala, doko-pipa iki katao etapala, pupenge gii dokonya, baa yakinatala pupape. ¹² Nyakamame anda dokonya kolandatala, endakali dokonya palenge dupa auu kaeyao, kingi nyepala, “Nyakama Goteme nisalapomona” lapape. ¹³ Endakali dupame nyakama auu pyoo lanyetamino doko, nyakamanya pii epe latami doko, dupa-kisa sina kaeyalapape. Dopa napitamino doko, nyakamanya pii epe latami doko tange nyalapape. ¹⁴ Yuu tange mendeme nyakama auu kaeyao lanyala naeyao, nyakamanya pii doko nasoaka pia kandeno doko, andapi, taonopi dupa yakinatala pao pituu, mokonya yuu katatamo dupa lyanda lanya, setapala pupape. ¹⁵ Goteme endakali dupa mokosetamo gii dokopa, taono dokonya kenda pipae ipatamo dokome, taono Sodomo Gomorapanya kenda pipae ipatamo doko, ita minao ipatana lao, nambame nyakama kiningi langilyona” Jisasame lea.

Kenda Pipae Dupa Ipatana Leamo Doko

(Mk 13:9-13; Lk 21:12-17)

¹⁶ Jisasame dee mende lao pituu, “Nambame nyakama sipisipi jepae dupa, yana kapu dupanya kainanya pupa lelyo. Dopana, nyakama kanopato dupame waa katengeli pyoo, kandao waa katao kalyepape. Yaka maiyolee dupame ema napyoo, mende minao koeyasala naeyoo petengeli pyoo pilyepape. ¹⁷ Nyakama endakali mendapuame nyakamanya lotuu anda dupanya, kote lamana latala, laminao pupala, konjame pyatamina, kandao isoo kalyepape. ¹⁸ Nyakamame namba tungi pyatala, watao paelyamino dokonya, endakali dupame nyakama pyalya lao soo, kiŋipi, gapenapi, dupanya enombanya katasetami. Katasetaminopa, nyakamame wai pii epe doko kiŋipi, gapenapi, endakali kamalya katengepi, dupa panao lamaitami. ¹⁹ Endakali dupame nyakama anjetala laminao, kote anda dupanya pataminopa, nyakamame pii aki lamanape, aipa pyoo lamanape lao masala naeyalapape. Kote lapenge gii dokopa, nyakamame pii lapenge dupa, Goteme dita. ²⁰ Nyakamame latamino doko, masoo laa naeyatami. Takangenya Oli Spirit dokome, lungu pitamopa latamina” lea.

²¹ Jisasame dee mende lao pituu, “Akali mendapuame nyakamanya kaiminingi etete dupa, enge nyepala, pyao kumasina lao maitami. Akali mendapuame nyakamanya wane dupa dopaka pitami. Wane mendapuame kandapilyetala, nyakamanya endangi takangepi dupa pyao kumasina lao maitamiaka. ²² Nyakamame namba watao paeyatamino kandatala, endakali dupa pitakame nyakama etete imbu kaengitami. Dopa pitaminopapi, endakali mendeme kyeto joo katao etatamo doko, baa Goteme pyoo nyeta. ²³ Dopana, endakali dupame taono mendenya, nyakama minao koeyasetamino dokopa, taono doko yakinatala, mendenya paka pupape. Nyakamame Israele yuu dokonya, taono dupa pitakanya kalai pyoo etala naeyataminopa, Akalinya Ikiningi doko ipatana lao, nambame nyakama kiningi langilyona” lea.

²⁴ Jisasame dee mende lao pituu, “Mana nyingi akali mendeme, baanya mana lamaingi akali doko ita naminingi. Kalai akali mendeme baanya isingi akali doko ita naminingiaka. ²⁵ Endakali dupame mana lenge akali doko, mana maitaminoliaka pyoo, mana nyingi akali doko mana maitami. Isingi akali doko mana maitaminoliaka pyoo, kalai akali doko mana maitami. Dopana, endakali dupame namba isingi akali doko kandao, kenge koo Belesabulu+ 10:25 Belesabulu dokonya kenge mende doko Satane. ditamino dokonya, nyakama nambanya tata dupa kandao, kenge etete koo mendapu ditamiakana” lea.

Koeyasingi Akali Dupa Paka Nakaeyapengena Jisasame Leamo Doko

(Lk 12:2-7)

²⁶ Jisasame dee mende lao pituu, “Sanga pyatae silyamo dupa pitaka tenda lopalyeta. Yalo petae silyamo dupa tenda panaseta. Dopana, nyakamame Gotenya yalo petae dupa panao lamaitaminopa, endakali dupame nyakama minao koeyasetamino lao paka nakaeyalapape ²⁷ Nambame pii elyakalao langilyo dupa, panao lamaiyepape. Pii kakateme langilyo dupa, yuu manda dupanya katao wii lao lamaiyepape. ²⁸ Yonge doko pyao kumasetamino dupame, imambu doko pyao kumasala naeyatamina, paka nakaeyalapape. Yongepi, imambupi, lapota pyao koeyasetala, ele panda koo dokonya pyandatamo akali doko, paka kaeyalapape. ²⁹ Endakali dupame 10 toeame iki, yaka pimbinakae lapoma sambamili. Dopaka doko, Takange Gote dokome yaka dupanya mendaipi mende kumala naena lao, masilyamo doko, dupanya mende isa mangatala, kumala naengema. ³⁰ Dopaka pyoo, Goteme nyakamanya aiyomba iti dupa pitaka, mendai-mendai lao itaki pingi. ³¹ Nyakamame yaka pimbinakae dupa ita minao kalyaminona, paka nakaeyalapape” lea.

Endakali Mendeme Namba Kraisa Tatana Lao Panatamo Doko

(Lk 12:8-9)

³² Jisasame dee mende lao pituu, “Endakali mendeme endakali waka dupanya enombanya, namba Kraisa tatana latamo doko, nambame nambanya Takange kaitinya katenge dokonya enombanya, baa namba tatakana lato. ³³ Dopaka doko, endakali mendeme endakali waka dupanya enombanya, namba Kraisa tata daana latamo doko, nambame nambanya Takange kaitinya katenge dokonya enombanya, baa namba tata daakana latona” lea.

Jisasame Endakali Dupa Mona Setao Katena Lao Naepeona Leamo Doko

(Lk 12:51-53, 14:26-27)

³⁴ Jisasame dee mende lao pituu, “Nambame isa yuu dakenya, endakali dupa mona setao katena epeena lao masala naeyalapape. Daa, endakali dupa mona setao katena lao naepeo. Wakale pyoloo pingi mana doko, sakatasala epeo. ³⁵ Ikiningipa takangepa wakale pyoloo pingipi, wanengepa endangipa wakale pyoloo pingipi, aeyangepa wakale pyoloo pingipi, nambame mana doko, mapisala epeo. ³⁶ Tenge dokonya, endakali mendenya taiyoko etete dupame, baa yandapipili jetami.

³⁷ “Endakali mendeme baanya endangipi, takangepi, ikiningipi, wanengepi, mende moname etete auu kaeyapala, namba mee yongeme auu kaeyatamo doko, baa kapa pao namba tata joo nakatata. ³⁸ Dee endakali mendeme, baanya poko ita doko tange nyoo soo, namba watao naipatamo doko, baa kapa pao namba tata joo nakatataka. ³⁹ Endakali mendeme namba yakinatala, baa tange auu pyoo katapuli lao masetamo doko, baa koeyata. Endakali mendeme namba lao masetala, baa tange kame setamo doko, baa auu pyoo katatana” lea.

Yole Nyetamina Leamo Doko

(Mk 9:41)

⁴⁰ Jisasame dee mende lao pituu, “Endakali mendeme nyakama lanyetamo dokome, namba lanyeta. Namba lanyetamo dokome, namba puu leamo akali doko lanyetaka. ⁴¹ Endakali mendeme propeta mende baa propeta-lamona latala, lanyetamo doko, propeta dupa Goteme yole maitamoliaka pyoo, maita. Dee endakali mendeme akali mende tolatae-lamona latala, lanyetamo doko, akali tolatae dupa Goteme yole maitamoliaka pyoo, maita. ⁴² Dee endakali mendeme endakali tipya datupanya mende, namba watao paenge-lamona latala, endaki iki kamuo maitamo doko, baa tenda Goteme yole mende maitana lao, nambame nyakama kiningi langilyona” lea.

¹ Jisasame baanya 12 disaipolo dutupa, mana lamaiyoo etapala, baa kateamo panda doko yakinatala, Galilea taono waka singi dupanya, wai pii epe doko mana lamaiyanya pea.

Joneme Baanya Disaipolo Mendatupa Jisasa Kateasa Pena Leamo Doko

(Lk 7:18-35)

² Jone kaimbu pingi doko anjetae paliu, Kraisame kalai pupu lapae dupa pilyamo lapae sepala, baanya disaipolo mendatupame Kraisa kateasa pupala, “Emba akali naima pyoo nyala ipatana latae singi dokope, pande naimame akali waka mende malisemape?” lao, tipa pyoo sala pena lea. ⁴ Dupame Jisasa kateamo dokonya pupala, baa tipa piaminopa, Jisasame dokaitanya pii yanu pyakamaiyoo, “Nyakama pilyetala, kandelyaminopi, silyaminopi, dupa Jone lamaiyepape. ⁵ Lenge monda dupa dee lenge telyamino. Moko koo dupa kaita paelyamino. Endakali kopetali dupa mee jakamailyamo. Kaleketa dupame pii silyamino. Endakali kumapae dupa sakatatala paelyamino. Endakali tipya dupame wai pii epe doko silyamino. ⁶ Dee akali mendeme namba maka kaeyapala, mona lapo palyala naenge doko, Goteme auu pisetae kalyamona lao Jone lamaiyepape” lea.

⁷ Jonenya disaipolo dutupa pilyoo pateaminopa, endakali kambu dupa Jone kaimbu pingi dokonya lao, Jisasame pii mendapu lamaiyoo, “Wamba nyakamame endakali napalenge yuu dokonya, aki mende kanja peami? Kembo yokopi mende poome ema-ema piamo kanja peamipi, ⁸ pande akali mende yonge pee yati pipae epe mendapu pyoo kateamosa, kanja peamipi? Daa, akali yonge pee yati pipae epe pingi dupa, kiŋi dupanya andaka katengema. ⁹ Nyakama peamino doko, propeta mende kateamo kanja peami. Propeta doko baa mee ambe propeta mende daa. ¹⁰ Akali doko kandao, Goteme dapa lea: ’Salapape! Nambame nambanya wai akali doko, wambao pena latopa, Mesaeya dokonya kaitini doko depa lakamaitana’ lao pepa pyapae silyamo. ¹¹ Nambame nyakama kiningi langilyo: Yuunya endakali dupa pitaka, Jone kaimbu pingi dokome ita minao katea. Dopaka doko, endakali mende Gotenya isingi mate dokonya, anasale joo kalyamo dokome, Jone ita minilyamo. ¹² Jone kaimbu pingi dokome, pii lamaiyoo kateamo gii dokonya pituu, indupa tuu lao, endakali longo dupame Gotenya isingi mate doko, nyakamanya pupumi nyepala, isemana lelyamino. ¹³ Joneme pii tee pyao lamaitala naeyamopa, Mosesame loo seteamo dupapi, propeta dupame mana leamino dupapimi, Gotenya isingi mate doko ipatana leami. ¹⁴ Nyakamame dake kiningi-lumuna lao masetamino doko, dake salapape: Ilaija ipatana lao pii pepa pyapae singi doko, Jone kaimbu pingi doko kandao latae singi. ¹⁵ Nyakama kalekaita singi dupame, pii doko auu pyoo salapape.

¹⁶ “Endakali indupa gii dakepa kalyamino dupa, aki mendepa nambame makande pyuape? Nyakama wane kole dupame, kamapusa kambu lapoma pyapala, mumu lao wii laloo pingi dopale. Wane kole dupame dapa lengema: ’Naimame nyakamanya pulupapunya wee pyakamanopa, dokonya danisa laa naeyalamino. Naimame kondo kaeyao ee wee lenge doko lapumanopa, nyakamame ee laa naeyalamino.’

¹⁸ “Dopaleaka joo, endakali dupame Jone kandao, betesa waenepi dupa nanao kateamopa, mumu lao baa-kisa imambu koo mende palelyamona leami. ¹⁹ Dopaka doko, endakali dupame Akalinya Ikiningi doko kandao betesa waenepi, longo lao napumupa, mumu lao baa nee tiaka nakaeyao nenge-lamona lelyamino. Endakali koo pingipi, takisa nyingipi, dupa kaita minao apata kalyamona’ lelyamino. Dopaka doko, Gotenya masepae epe nyilyami dupa watao minilyaminopa, masepae epe dokome kalai tolatae pipenge dupa, pipae singina,” Jisasame lea.

Mona Kapilyala Naeyatamino Dupa Koeyatamina Leamo Doko

(Lk 10:13-15)

²⁰ Jisasame mirakolo kalai longo piamo taono dupanya tange endakali dupa, mona kapilyala naeyaminosa, baame pyalanya lao pituu, ²¹ “Taono Korasina tangepi, Betsaida tangepi, dupa nyakama koeyatamina, kandao kalyepape. Mirakolo kalai nyakamanya taono dupanya, pio dupa, taono Saidone tangepi, Taeya tangepi, dupame kandeamili doko, nyakamame yonge pee pumbuti dupa petala, yonge lindi pyapala, wamba mona kapilyiamili. ²² Goteme endakali mokosetamo gii dokopa, Taeyapi, Saidonepi, dupa-kisa tenge andake setataka doko, nyakama Korasina tangepi, Betsaida tangepi, dupa-kisa Goteme tenge eteteaka andake setata. ²³ Dee nyakama taono Kapename tange dupa, kapa pao kaiti-kisa patama lao masilyamipi? Daa, Goteme nyakama ele panda koo dokonya, watao pyandata. Mirakolo kalai nyakamanya yuu dupanya pio dupa, Sodomo tange dupame kandeamili doko, mona kapilyiaminopa, yuu doko koeyala naeyali. ²⁴ Goteme endakali mokosetamo gii dokopa, Sodomo tange dupa-kisa, tenge andake setataka doko, nyakama Kapename tange dupa-kisa, Goteme tenge eteteaka andake setatana” lea.

Nyakama Namba-Kisa Imambu Nyala Ipupapena Leamo Doko

(Lk 10:21-22)

²⁵ Gii dokopa Jisasame lao pituu, “Apane, emba yuupi, kaitipi, dupa pitakanya Kamongo. Mana longo kandenge endakalipi, mana longo nyepae endakalipi, dupame nakandena lao yalo piino dupa, wane ŋaŋa joo katengema endakali dupame, kandena lao embame panasino dokonya, nambame emba lao mambo pilyo. ²⁶ Kini Apane, embame pituna lao auu kaengeme masinoli pyoo pii-lamo. ²⁷ Nambanya Takangeme dupa pitaka nambame isepe lao, namba-kisa setea. Endakali mendeme Ikiningi doko angi nakandenge. Takangeme iki kandenge. Dee endakali mendeme Takange doko angi nakandengeaka. Ikiningimi iki kandenge. Dee Ikiningi dokome, Takange doko endakali mendeme kandena lao masetala, laitaka petelyamopa, endakali dokome Takange doko-lamo lao kandenge. ²⁸ Nyakamame kenda pipae longo dupa soo, popo tandapi neami kandeno doko, namba katatosa soo ipupape. Nambame nisotopa, nyakama imambu nyetami. ²⁹ Namba akali andiki pipae mende, namba anasale joo katenge. Nyakamame nambanya pii doko watao minao,+ 11:29 Giriki piimi ’Nambanya yoko ita doko nyalapa’ latae kalyamoaka doko, naimame pii dutupanya tenge dupa lao tata lao pilyamano. namba-kisa mana nyala ipupape. Nyepala dokopa, nyakama imambu setami. ³⁰ Nambanya kaitini dokonya paenge endakali dupa, leke-leke natao paengema. Nambame dopale mende salapale lao dilyo doko, kenda napingina” Jisasame lea.

Jisasa Baa Sambata Isingi Doko

(Mk 2:23-28; Lk 6:1-5)

¹ Sambata gii mendenya, Jisasapi baanya disaipolo dupa-pipa, wita ee kaina mendenya kaita pao pituu, baanya disaipolo dupame lopo kaeyapala, wita dii kii lanyetala tambao neami. ² Dopa piaminopa, Parasai dupame kandatala Jisasa lamaiyoo, “Embanya disaipolo dupame Sambata gii dokonya, daa latae singi mana doko minilyamino kanda” leami. ³ Dokopa Jisasame dokaita lamaiyoo, “Dapitimi piamo doko nyakamame pepanya itaki napiamipi? Dapitipi, akali apata kateamino dupa lopo kaeyami. Lopo kaeyapala Dapitimi Gotenya lotuu andaka kolandatala, betesa Gote opa maitae, pitisa dupame iki napenge siamo dupa nyepala, akali dupa maiyoo nea. ⁵ Dee Sambata gii dupanya, pitisa dupame lotuu anda andake dokonya, Gotenya enombanya koeyala naeyao, kalai pingimana lao pepa pyapae singi doko, itaki napiamipi? ⁶ Akali asa kalyamo dokome, lotuu anda andake doko ita minao kalyamona lao, nambame nyakama langilyo. ⁷ Gotenya pii mende dapa lao pepa pyapae singi: ’Endakalimi namba kundi iki dingima mana doko, nambame auu nakaenge. Endakali yango kondo kaenge mana doko, nambame auu kaenge.’ Pii dakenya tenge dupa nyakamame siamili doko, endakali tenge nakatenge dupa-kisa, tenge setala naeyamili. ⁸ Akalinya Ikiningi dokome, Sambata gii dokonya apata isoo kalyamoakana,” Jisasame lea.

Jisasame Akali Kingi Yangi Talyanga Mende Tolasakamaiyamo Doko

(Mk 3:1-6; Lk 6:6-11)

⁹ Dokopa Jisasame ee doko yakinatala, Judamanya lotuu anda dokonya andakote pea. ¹⁰ Peamopa, akali kingi yangi talyanga mende peteamo doko, Jisasame tolasakamaitamopa, Parasai dupame Jisasa kote lamana lao masetala, baa tipa pyoo, “Sambata gii dupanya endakali yaina pyapae dupa, mee jakamaipengepe, daape?” leami. ¹¹ Dopa leaminopa, Jisasame dokaita lamaiyoo, “Sambata gii mendenya, nyakamanya sipisipi mende yulinya mangatamopa, tange pao kopyoo nanyetamipi? ¹² Sipisipi dupa endakalimi ita minao kalyamino. Dopana, Sambata gii dokonya naimame kalai epe pyoo, endakali dupa nisepengena” lea. ¹³ Dopa latala baame akali kingi yangi talyanga doko lamaiyoo, “Embanya kingi doko tinoka” lea. Tinokateamopa, kingi epe yangi dopaleaka jia. ¹⁴ Dopa piamopa, Parasai dupame lotuu anda doko yakinatala, Jisasa pyao kumasemana latala, kamaka pao kambuiyami.

Gotenya Yapao Nyepae Kalai Akali Doko

¹⁵ Kambuiyamino kandatala, Jisasame yuu doko yakinatala pea. Dokopa endakali longo dupame baa watao peamino dupanya, endakali yaina pyapae dupa pitaka mee jakamaiya. ¹⁶ Jisasame yaina mee jakamaiyamo dokaita, kyeto joo lamaiyoo, “Nambame dopa pyakalamona lao, mende lamaiya naeyalapape” lea. ¹⁷ Dopa piamo dokome, Goteme propeta Aisaiya-kisa pii lea mende, angi paneamo doko dake: ¹⁸ “Dake nambanya kalai akali, nambame baa yapao nyio doko. Baa nambanya etete mona setenge doko. Namba tange baa etete auu kaenge. Nambanya Spirit doko baa maitupa, baame nambanya mana tolatae doko, akali tata dupa pitaka panao lamaita. ¹⁹ Baame kaitinisa katao, pii yanda pyoo, pii puu lao latamopa nasetami. ²⁰ Kembo maitange tambapae mende, baame etete lakanyala naeyata. Ita langa konjalanya kii lao seta mende, baame etete konjesala naeyata. Dopaka pyoo, baame endakali dupa kondo kaeyao, baanya mana tolatae dokome, koo dupa pitaka ita minata. ²¹ Akali tata dupa pitakame, baame tanga pyoo nyala ipatana lao, malisoo katatamina” lapae silyamo.

Jisasa Kandao Belesabulu Palelyamo Leamino Doko

(Mk 3:20-30; Lk 11:14-23, 12:10)

²² Gii dokopa endakali mendapuame, akali lenge monda, muumaa imambu koo paleta mende laminao, Jisasa kateasa epeami. Jisasame akali doko auu pyoo niseteamopa, baa pii lao, lenge tao pia. ²³ Baame piamo dupa kandatala, endakali kambu piamino dupa pitakame walu latala, “Akali dake Dapiti Yumbange dokope?” leami. ²⁴ Parasai dupame pii doko sepala lao pituu, “Baa-kisa imambu koo dupanya isingi, Belesabulu+ 12:24 Satanenya kenge mende doko Belesabulu. doko ipao palipya dokome, imambu koo waka dupa watao pilyamona” leami. ²⁵ Dopa leaminopa, Jisasame masiamino dupa kandatala, dokaita lamaiyoo, “Kiŋi mendenya tata doko pyaloo petala, nyakama wakale pitamino doko, pitaka koeyatami. Dee taono mendenya tangepi, akali mendenya enda wanepi, dupa wakale pyoloo petala, nyakama yangolapo pyaloo pitamino doko, nyakama saa latami. ²⁶ Dopaka pyoo, Satane tata doko pyaloo petala, nyakama wakale pitamino doko, baame aipa petala ita minatape? ²⁷ Belesabulu dokome namba pupu lapae dilyamopa, imambu koo dupa watao pingina lelyamino. Dopa lelyamino doko, nyakamanya disaipolo dupa apimi pupu lapae mailyamopa, imambu koo dupa watao pingina lelyamipi? Nyakamanya disaipolo dupameaka, nyakamame kopeta lapimi-lamona latami. ²⁸ Goteme Oli Spirit dokonya pupu lapae doko, namba ditamopa, imambu koo dupa watao pyato doko, Gotenya isingi mate doko nyakama-kisa ipao setamosa pita. ²⁹ Akali mendeme akali pupu lapae mendenya, andaka kolandatala, baanya pinju dupa pake nyalanya-tamo doko, wambao kendeme baa yaki pinya setapala nyeta. ³⁰ Endakali mende namba tata joo nakalyamo, doko nambanya yandapipi. Dee endakali mendeme namba nisoo, endakali dupa Goteme nisina lao nyoo kambu pyala naelyamo, dokome endakali dupa Gotenya isingi mate dokonya, watao pingi. ³¹ Tenge dokonya, nambame nyakama langilyo: Goteme endakali dupanya koo pingipi, lamba lengepi, dupa pitaka kunao nepakamaita. Dopaka doko, endakali mendeme Oli Spirit doko kandao, lamba latamo doko, Goteme baanya koo doko, kunao nepakamaiya naeyata. ³² Endakali mendeme Akalinya Ikiningi doko kandao, lamba latamo doko, Goteme baanya koo doko kunao nepakamaita. Dopaka doko, endakali mendeme Oli Spirit doko kandao, lamba latamo doko, Goteme baanya koo doko kunao nepakamaiya naeyatamopa, baa-kisa tanga tangapi sulu setana,” Jisasame lea.

Ita Koo Dupame Dii Koaka Mandenge Doko

(Lk 6:43-45)

³³ Jisasame dee mende lao pituu, “Ita epe dupame dii epeaka mandenge. Ita koo dupame dii koaka mandenge. Ita mendenya dii mandelyamo dupa, wambao kandatala, ita angi doko dopale-lamo lao masingima. ³⁴ Nyakama koo kanopatonya mandipae dupame, aipa petala pii epe mende latamipi? Endakalinya monanya paliu tumbilyamo dokoaka, kambunya pyakalyingi. ³⁵ Endakali mendenya monanya epe palelyamo dokoaka, kambunya pyakalyingi. Dee endakali mendenya monanya koo palelyamo dokoaka, kambunya pyakalyingi. ³⁶ Nambame nyakama dapa langilyo: Tanga Goteme mokosetamo gii dokopa, embanya pii koo lateno dutupanyaka, Goteme emba aipuma leepe lao tipa petala mokoseta. ³⁷ Emba tangenya pii dokonyaka, Goteme emba-kisa tenge mende nasilyamona lata. Daa-tamo doko, emba tangenya pii dokonyaka, Goteme tenge emba-kisa silyamona, latana” lea.

Jisasame Mirakolo Mende Pina Leamino Doko

(Mk 8:11-12; Lk 11:29-32)

³⁸ Gii dokopa Mosesanya loo mana nyepae akalipi, Parasaipi, mendapuame Jisasa lamaiyoo, “Embame kalai pilino doko, Gote-kisa katao pilini-lamo lao kandamana, mirakolo mende pii” leami. ³⁹ Dopa leaminopa, Jisasame dokaitanya pii yanu pyakamaiyoo, “Endakali Gote yakinao, koo pingi palelyamino dupame mirakolo mende nyakama kandamana lao tee lelyaminoaka doko, nambame mirakolo mende kanjepale napyakatoo. Goteme kongali mende, propeta Jonaa-kisa piamo mendai dokoaka, nyakama kandataminopa dita. ⁴⁰ Wamba Jonaa doko kotaka gii tepo, kuka gii tepoaka, pisa andake mendenya ingi koko paleamoliaka pyoo, Akalinya Ikiningi doko, kotaka gii tepo, kuka gii tepoaka, malunya palita. ⁴¹ Wamba Jonaa dokome yuu Ninipe tange dupa, pii panao lamaiyamopa, dokaitame sepala, mona kapilyiami. Indupa akali mende kalyamo dokome, Jonaa nyoo ana pyandao katamupa, nyakamame baanya pii doko sepala, mona kapilyala naelyamino. Tenge dokonya, Goteme endakali mokosetamo gii dokopa, endakali Ninipe tange dupame sakatatala, nyakama Parasaipi, endakali epapu pii silyamino, dupa-kisa tenge setatami. ⁴² Wamba kuini enda Seba tange dokome, yuu londati waka pituu, Kiŋi Solomonenya masepae epe dupanya pii yandaita dupa, nyotoo lao epea. Indupa akali mende kalyamo dokome, Kiŋi Solomone nyoo ana pyandao katamupa, nyakamame baanya masepae epe dupanya, pii yandaita dupa nanyilyamino. Tenge dokonya, Goteme endakali mokosetamo gii dokopa, kuini enda Seba tange dokome, sakatatala nyakama Parasaipi, endakali epapu pii silyamino dupa-kisa, tenge setatana” lea.

Imambu Koo Dee Pilyoo Epenge Doko

(Lk 11:24-26)

⁴³ Jisasame dee mende lao pituu, “Imambu koo mendeme endakali mende yakinatala, yuu sapu dupanya katapenge panda kutingi. Kutao kaeyapala ⁴⁴ lao pituu, ’Nambame anda wamba yakineo dokonya, dee pilyotoo’ lenge. Dopa latala baa pilyetala kandelyamopa, anda dokonya mende napaliu, auu pyoo tolasetae kalyamo kandenge. ⁴⁵ Dopa petae kalyamo kandatala, baa pao imambu etete koo 7-pela apata lanyepala, anda dokonya dee pilyetala katengema. Wamba akali doko kopeta kateamoaka doko, imambu koo dupa baa-kisa ipao paleaminopa, baa etete kopeta katea. Dopa piana, gii dakepa nyakama endakali etete koeyapae palelyamino dupa, mona kapilyala naeyatamino kandao doko, koeyatami iki-lamona” lea.

Jisasanya Endangipi Kaiminingipi Dupa

(Mk 3:31-35; Lk 8:19-21)

⁴⁶ Jisasame endakali kambu dupa pii lamaiyoo kateamopa, baanya endangipi, kaiminingipi dupa ipao, baa pii lamaimana lao, kamaka kateami. ⁴⁷ Dopa piaminopa, akali mendeme Jisasa lamaiyoo, “Embanya endangipi kaiminingipi kamaka katapala, emba pii langimana lelyaminona” lea. ⁴⁸ Dopa leamopa, Jisasame akali dokonya pii yanu pyakamaiyoo, “Nambanya endangi doko apipi? Nambanya kaiminingi dupa apitupape?” lea. ⁴⁹ Dopa latala baanya kingi kondeme, endakali baa watao epeamino dutupa laitaka petae katao, “Pii soo pilyamino datupa, nambanya endangipi kaiminingipina kanjepa. ⁵⁰ Nambanya Takange kaitinya katenge dokonya masingili pingima, endakali dupa nambanya kaiminingipi, pimalengepi, endangipina” lea.

Akali Mendeme Ee Wai Lyandeana Lao Kongali Pii Leamo Doko

(Mk 4:1-9; Lk 8:4-8)

¹ Gii dokopaka Jisasame anda doko yakinatala pao, Galilea pete lembasa petea. ² Peteamo dokonya endakali etete longo mendapu ipao, kambu piaminosa, baa sipi mendenya pyakalyetala petea. Dokopa endakali kambu doko pitaka, endaki pete lemba dokonya kateami. ³ Kateaminopa, Jisasame kongali lao endakali dupa, mana lamaiyoo dapa lea: “Akali mendeme ee wai lyandala pea-pyaa. ⁴ Lyandeamopa, ee wai yangi kaitininya pea. Peamo dupa pitaka yaka dupame nyoo neami. ⁵ Yangi kana-kisa yuu kuki singi dupanya peamo dupa, pupae langa lea. ⁶ Langa leamoaka doko, pingi auu pyoo napiamosa, niki teamo dokome kumasia. ⁷ Yangi yuu ikililyambu nenge-nenge katapae tenge palenge, dupanya pea. Peamo dupa langa leamoaka doko, ikililyambu tambe-tambe andapala, kui pyambea. ⁸ Ee wai yangi lyandeamo dupa, yuu epenya pupala, andao dii mandea. Yangimi 100 mandea, yangimi 60 mandea, yangimi 30 lao dii mandea. ⁹ Nyakama kalekaita singi dupame, pii doko auu pyoo salapapena” lea.

Jisasame Kongaliaka Lao Pii Lenge-Lamo Leamino Doko

(Mk 4:10-12; Lk 8:9-10)

¹⁰ Maitakao disaipolo dupame Jisasa kateasa ipupala, baa tipa pyoo, “Embame endakali dupa kongaliaka lao pii lamaiyoo kalyeno doko, aipuma pilipi?” leami. ¹¹ Baame nyakamanya pii yanu pyakamaiyoo, “Gotenya isingi mate dokonya, pii tenge yalo petae palelyamo doko, nambame nyakama panao langitoo. Dopaka doko, endakali waka dupa panao lamaiya naeyato. ¹² Endakali mende-kisa Gotenya pii setamo doko, baa konda pyoo maita. Dopaka doko, Gotenya pii nasingi mende-kisa kuki setamopa, sekelyamo lao masetamo doko, dutupa tange nyokonyeta. ¹³ Endakali dupame lengeme kandelyaminoaka doko, tenge angi doko nakandelyamino. Kaleme silyaminoaka doko, tenge angi doko nyala naelyamino. Tenge dokonya, nambame endakali dupa kongali pii lao lamaingi.+ 13:13 Jisasanya pii leamo doko mona katao nasingima endakali dupa eteteaka nasina latala, baame kongali pii lao lea. Baanya pii mona katao singima endakali dupame tenge doko auu pyoo tolao nyina lao, kongaliaka lea.¹⁴ Goteme propeta Aisaiya-kisa pii dapa lea: ’Nyakamame pii kaleme setamiaka doko, tenge angi doko soo nanyetami. Nyakamame lengeme kandatamiaka doko, tenge angi doko kandao nanyetami. ¹⁵ Endakali dakaitanya mona pyakilyia dokome, kale poeyamosa pii nasoo, lenge iminjiamosa kanja naeyao pilyamino. Dee kaleme sepala, lengeme kandatala, mona tii pitamopa, mona aloo petala, namba tungi pyamili doko, nambame pyoo nyipuli. ¹⁶ Dopaka doko, nyakama nambanya pii singi dupa, Goteme auu pisimupa, nyakamame lengeme angi kandao, kaleme angi pii soaka pilyamino. ¹⁷ Nyakamame kandelyamino dupa propeta longopi, endakali tolatae longopi, dupame kandatamana lao, nea kaeyao malisiaminoaka doko, angi nakandeami. Dee dupame setamana lao, nea kaeyao malisiaminoaka doko, angi nasiamina lao, nambame nyakama kiningi langilyona” lea.

Ee Wai Lyandeana Lao Kongali Leamo Dokonya Tenge Doko

(Mk 4:13-20; Lk 8:11-15)

¹⁸ Jisasame dee mende lao pituu, “Akali mendeme ee wai lyandea dokonya, tenge doko dakena salapape. ¹⁹ Ee wai yangi kaitinisa peamo dopaleaka joo, endakalimi Gotenya isingi mate dokonya, pii doko sepala, tenge doko nanyilyaminopa, Sataneme ipupala, monanya nasina lao, pii doko nyoo nepenge. ²⁰ Ee wai yangi kana-kisa pao, langa leamo dopaleaka joo, endakali yangimi wai pii epe doko sepala, auu kaeyao yapa nyingima. ²¹ Ee wai kana-kisa pingi napiamosa, kumiamo dopaleaka joo, endakali dupame, wai pii epe doko auu pyoo nyepelyaminopa, pii doko nyakama-kisa silyamo dokonya, pundu kendapi longo epelyamopa, wai pii epe doko pupae yakinengema. ²² Ee wai yangi yuu ikililyambu tenge palenge dupanya peamo dopaleaka joo, endakali yangi dupame wai pii epe doko singima. Singimaka doko, yuunya munipi, pinju longo nyoo setao katapu laka lao, putiti kaengepi, nea kaengepi, mana dupame, wai pii epe doko kui pilyamosa, dii namandengema. ²³ Ee wai yangi lyandeamo dupa, yuu epenya peamo dopaleaka joo, wai pii epe dokonya tenge angi doko soo nyepala, endakali yangimi dii 100 mandenge, yangimi 60 mandenge, yangimi 30 lao dii mandengena” lea.

Wita Kainanya Koo Tanu Lyandeamo Doko

²⁴ Jisasame dee kongali pii mende dokaita lamaiyoo, “Gotenya isingi mate doko, akali mendeme baanya eenya wita wai epe lyandeamo dopale. ²⁵ Kuka gii mendepa, endakali dupa pitaka palipiaminopa, akali dokonya yandapipi mendeme ipupala, wita wai lyandatae kaina dupanya, wita jepae koo tanu mende lyandatala pea. ²⁶ Maitakao wita dupa langa latala, andao dii manjanya piamopa, koo tanu dupa apata kateamo kandeami. ²⁷ Dokopa akali ee tange dokonya, kalai akali dupame baa peteasa ipupala, tipa pyoo, ’Akali andake, embame embanya ee dokonya wita wai epe lyandeno doko, koo tanu kalyamo dupa anja-tae kalyape?’ leami. ²⁸ Dopa leaminopa, baame dokaita lamaiyoo, ’Doko akali yandapipi mendeme lyandao piana’ lea. Dopa leamopa, kalai akali dupame baa lamaiyoo, ’Naimame dupa yukuo nepala pumili lao masilipi?’ leami. ²⁹ Dopa leaminopa, baame dokaita lamaiyoo, ’Daana, koo tanu dupa yukuatiti, wita dupa apata yukutamina, lapota pyasoo andena kaeyalapa. Wambu pitamo gii dokopa, nambame nee mandyuu mau pingi akali dupa lamaiyoo, “Wambao nyakamame koo tanu dupa, itatenya soo yangapengena, yukuo yaki pyepape. Dopa petala wita dupa elyambu petala, nambanya nee setenge anda dokonya, setalapape” latona’ leana,” Jisasame lea.

Mastet Waipa Yisapanya Kongali Pii Doko

(Mk 4:30-32; Lk 13:18-21)

³¹ Jisasame dee kongali pii mende dokaita lamaiyoo, “Gotenya isingi mate doko, akali mendeme ee wai mastet lenge mende, baanya eenya lyandeamo dopale. ³² Ee wai dupa pitakanya mastet wai doko, etete yakaneaka doko, lyandataesa langa latala andao, ee wai pokatae waka dupa pitaka ita miningi. Andao yale jilyamopa, wangya dupanya yaka dupame ipao anda pingimana” lea.

³³ Jisasame dee kongali pii mende dokaita lamaiyoo, “Gotenya isingi mate doko, yisa mendalapo enda mendeme nyoo, palao longo-pipa pyasoo endaki minilyamopa, yisa dokome palao doko pitakanya taeyapala, andasingi dopalena” lea.

Jisasame Kongaliaka Lao Pii Lamaiyamo Doko

(Mk 4:33-34)

³⁴ Jisasame endakali kambu andake doko, pii lamaiyamo dutupa pitakanya, mende mee lamaiya naeyao, kongaliaka lao lamaiya. ³⁵ Baame kongaliaka lao lamaiyamo dokome, wamba Goteme propeta mende-kisa, “Yuupi kaitipi tee piamo dokonya pituu, indupa tuu lao, yalo petae dupa nambame kongaliaka lao, endakali dupa lamaituna” leamo doko angi jia.

Wita Kainanya Koo Tanu Lyandeamo Dokonya Tenge Doko

³⁶ Dokopa, Jisasame endakali kambu andake doko yakinatala, baa andaka kolandateamopa, disaipolo dupa ipupala baa lamaiyoo, “Koo tanupa makande pyoo, kongali laleno dokonya tenge dupa naima langi” leami. ³⁷ Jisasame yanu pyao, “Ee wai epe lyandeamo doko, Akalinya Ikiningi doko kandao lea. ³⁸ Ee doko isa yuu dake kandao lea. Ee wai epe lyandeamo dupa, Gotenya isingi matenya katenge endakali dupa kandao lea. Dee koo tanu dupa, Satanenya endakali katenge dupa kandao lea. ³⁹ Koo tanu lyandeamo yandapipi doko, Satane kandao lea. Wambu piamo gii doko, tanga gii etatamo doko kandao lea. Nee mandyuu mau pingima akali dupa, enjele dupa kandao lea. ⁴⁰ Koo tanu dupa yukuo elyambu petala, itatenya soo yangeamino doko, gii etatamo dokopa, endakali koo dupa ele panda koo dokonya, soo yangata doko kandao lea. ⁴¹ Akalinya Ikiningi dokome baanya enjele dupa pena latamopa, dupame pupala koo pina lao mapisingipi, tanga lao koo pingi endakalipi, dupa baanya isingi mate dokonya nakatena lao yukuo nepatami. ⁴² Yukuo nepatamino dupa, itate andake dokonya soo pyandataminopa, dokonya katao endakali koo pingi dupa, ee lao nenge gilyoo yamataka latami. ⁴³ Dokopa endakali tolatae dupa, nyakamanya Takangenya isingi mate dokonya, tii pyoo niki joo tao katatami. Nyakama kalekaita singi dupame, pii doko auu pyoo salapapena,” Jisasame lea.

Bokosa Muni Yalo Petae Dokonya Jisasame Kongali Leamo Doko

⁴⁴ Jisasame dee mende lao pituu, “Gotenya isingi mate doko, bokosa muni ee mendenya yalo petae kateamo dopale. Yalo petae kateamo doko akali mendeme kandasetala, dee sanga pyambea. Dopa petala baa auu kaeyao andaka pupala, baanya oapi singi dupa pitakame muni nyepala, ee doko pao sambeana” lea.

Gotenya Isingi Mate Mamaku-Pipa Makande Pyoo Jisasame Kongali Leamo Doko

⁴⁵ Jisasame dee mende lao pituu, “Gotenya isingi mate doko, akali bisnis pingi mendeme, mamaku epe mendapu sambalanya kutao paenge dopale. ⁴⁶ Akali dokome mamaku eteteaka epe, muni andake pupenge mende kutao kandatala, andaka pupala, baanya oapi singi dupa pitakame muni nyepala, mamaku epe doko sambao nyingina” lea.

Gotenya Isingi Mate Doko Umbene Nuu-Pipa Makande Pyoo Jisasame Kongali Leamo Doko

⁴⁷ Jisasame dee mende lao pituu, “Gotenya isingi mate doko, akali dupame umbene nuu mende, endaki petenya pyandatala, pisa tata longo dupa nyingi dopale. ⁴⁸ Pisa umbene nuunya tumbatelyamopa, pisa nyingi akali dupame pyalya lao lembasa nyepala, isa pituu yapengema. Yapapala epe dupa nyoo mandipala, koo dupa nepengema. ⁴⁹ Dopaka pyoo, gii etatamo dokopa, enjele dupa ipupala, endakali koo pingipi, mana tolatae miningipi, dupa yapao mokosetami. ⁵⁰ Endakali koo dupa, itate andake dokonya watao pyandataminopa, dokonya katao ee lao nenge gilyoo, yamataka latamina” lea.

Oapi Enengepi Wambataepi Epe Dupa

⁵¹ Jisasame disaipolo dupa tipa pyoo, “Nyakamame pii datupanya tenge dupa nyilyamipi?” lea. Dopa leamopa, dokaitame yanu pyao, “Naimame tenge dupa nyepelyamanona” leami. ⁵² Dokopa baame dokaita kandao, “Anda tange mendeme baanya oapi enengepi, wambataepi, epe andaka setenge dupa, kalai pipenge jetamoli pyoo minao kalai pita. Dopaka pyoo, Mosesanya loo mana nyepae akali mendeme, Gotenya isingi mate dokonya mana nyepala, mana enenge dokopi, wambatae dokopi, lapota baame minao kalai pipenge jetamoli pyoo, pitana” lea.

Nasarete Tange Dupame Baa Tungi Napiamino Doko

(Mk 6:1-6; Lk 4:16-30)

⁵³ Jisasame pii kongali dutupa lamaiyoo etapala, yuu doko yakinatala pea. ⁵⁴ Baanya yuu tenge dokonya pupala, endakali dupa nyakamanya lotuu anda dokonya mana lamaiyamopa, walu latala, “Akali dakeme masepae epepi, mirakolo kalaipi, dupa pitaka anja-tae nyiape? ⁵⁵ Akali dake kapenda dokonya ikiningi daape? Baanya endangi doko Maria daape? Baanya kaiminingi dupa Jemesapi, Josepepi, Saimonepi, Judasapi dutupa daape? ⁵⁶ Baanya pimalenge dupa pitaka, ae naima-pipa apata napilyamape? Baame pilyamo datupa pitaka, anja mana nyiape?” leami. ⁵⁷ Dopa latala dupame baa kandao, mona koo palyiami. Dopa piaminosa, Jisasame dokaita lamaiyoo, “Propeta mende yuu waka dupanya kalyamo doko, endakali dupame baa andanda semaingima. Dopaka doko, propeta mende baanya yuu tenge dokonya kalyamo doko, baanya palupi, tatapi dupame baanya pii sepala, andanda semaiya naengemana” lea. ⁵⁸ Dupame baa tungi napiaminosa, baame mirakolo kalai longo yuu dokonya napia.

Jone Kaimbu Pingi Kumiamo Doko

(Mk 6:14-29; Lk 9:7-9)

¹ Gii dokopa Galilea tange isingi akali, Erote Antipasa lenge dokome, Jisasame pilyamo lapae dupa sia. ² Sepala baanya kalai akali dupa lamaiyoo, “Akali doko Jone kaimbu pingi doko. Baa malunya sakatatala, mirakolo kalai dapale dupa pyoo kalyamona” lea. ³ Wamba Eroteme baanya kaiminingi Pilipa, etanenge Erodiasa lenge doko baa tondao nyia. Dopa piamosa, Jone kaimbu pingi dokome Erote lamaiyoo, “Embame enda tondao nyilino doko, kopeta pilinona” lea. Dopa lati siamosa, Eroteme Jone anjinya pyandea. ⁵ Anjinya pyandatala baame Jone pyao kumasotoo lao masiamoaka doko, Juda dupame Jone baa propetana lao masiaminosa, paka kaeyapala yakinea. ⁶ Erotenya mandenge gii doko epeamopa, gii doko kandao nyoo, endakali longo peteami. Dopa piaminopa, kaina dokonya Erodiasa wanenge doko ipao, danisa lea. Danisa leamo doko kandatala, Eroteme etete auu kaeyapala, wanaku doko lamaiyoo, “Nambame kiningi etete lelyo. Embame dopale mende dii lateno doko, lateliaka pyoo dyaapona” lea. ⁸ Dokopa wanaku doko endangi peteasa pupala, aipa laowape lea. Dopa leamopa, endangi dokome, “Jone kaimbu pingi dokonya aiyombo doko, pelesanya setapala dina lamaiya puu” lea. Dokopa wanaku doko Erote peteasa pupala, endangimi leamo dutupa lamaiya. ⁹ Pii dutupa sepala, Erote mona kenda kaeyamoaka doko, wamba baame endakali enombanya, kiningi etete mende ditoana leamo doko masetala, ¹⁰ baame yanda singi mendeme anjetae andaka pupala, Jonenya aiyomba doko kepao nyala pena lea. ¹¹ Pena lateamopa, Jonenya aiyomba doko kepanyetala, pelesa mendenya setapala, wanaku doko minao ipao maiya. Maitiamopa, wanaku dokome nyepala endangi pao maiya. ¹² Maitiamopa, Jonenya disaipolo dupa ipupala, baanya yonge doko nyoo, malu piami. Malu petala, Jisasa pao lamaiyami.

Jisasame Akali 5 Tausene Nee Maiyamo Doko

(Mk 6:30-44; Lk 9:10-17; Jn 6:1-14)

¹³ Jisasame Jone malu pimi lapae doko sepala, baame yuu doko yakinatala, sipi mendenya pituu, Galilea pete omotena endakali napalenge yuu mendakaita, mendeme nakandena lao baa pea. Baa pelyamo lapae endakali dupame sepala, nyakamanya taono dupanya katao, baa watao kaitini peami. ¹⁴ Jisasa Galilea pete omotena pao pyakamatala, endakali kambu andake mende kateamino kandea. Kandatala baame endakali dokaita kondo kaeyapala, yaina pyapae dupa mee jakamaiya. ¹⁵ Niki landa piamopa, disaipolo dupa ipupala Jisasa lamaiyoo, “Endakali napalenge panda dakenya, yuu kuiyalanya pilyamona, embame endakali kambu dake maketa seta dupanya, tange nee sambao nala pena laa” leami. ¹⁶ Dopa leaminopa, Jisasame dokaita lamaiyoo, “Daa, dokaita napena, nyakamame nee maiyepa” lea. ¹⁷ Dopa leamopa, dupame baa lamaiyoo, “Naimanya nee longo nasilyamo. 5-pela betesa-pipa, pisa lapo-pipa iki silyamona” leami. ¹⁸ Dokopa baame lao pituu, “Dutupa nyoo minao ae ipupa” lea. ¹⁹ Dopa latala baame endakali dupa tanu dupanya petena lea. Petena latala, 5-pela betesa-pipa, pisa lapoma-pipa nyepala, kaiti-kisa kandalyetae katao, yaka pilino lea. Dopa latala betesa dutupa konjepala, baanya disaipolo dupa maiyamopa, dupame endakali dupa mokosoo maiyami. ²⁰ Endakali dupa pitakame nao tiaka kaeyateaminopa, kakana siamo dupa disaipolo dupame nyoo, 12 baseketa tumbasiami. ²¹ Enda wanepi itaki napyao, akali iki 5 tausenepi mendeme, nee neami.

Jisasa Endaki Ketae Moko Katao Paeyamo Doko

(Mk 6:45-52; Jn 6:15-21)

²² Dokopa Jisasame baanya disaipolo dupa, sipinya pyakalyetala, Galilea pete omotena wambao pena lea. Baame endakali kambu dupa, andaka pena latala kandao katea. ²³ Dokaita pateaminopa, baa iki loma sala, yuu manda mendenya pea. Yuu kuiyala peamopa, baa iki dokonya katea. ²⁴ Dokopa disaipolo dupa sipi dokonya pituu, endaki pete kainanya peaminopa, poo andake mende paanya peamino dokaita-kaita pituu, laeyao lao ipupala, endaki doko buli piamo dokome, sipi doko nyoo yangi pyasa-pyasa pia. ²⁵ Yuu yongao pukiamopa, Jisasa baa endaki pete dokonya moko katao, disaipolo dupa sipinya peamino dokonya pea. ²⁶ Disaipolo dupame baa endaki pete dokonya moko katao epeamo kandatala, “Timango mende epelyamona” latala, paka kaeyao ae leami. ²⁷ Dopa piaminopa, Jisasame dokaita lamaiyoo, “Namba epelyona, nyakama paka nakaeyalapa” lea.

²⁸ Dokopa Pitame baa lamaiyoo, “Kamongo, kini emba-tamo doko, embame namba endakinya moko katao ipu laa” lea. ²⁹ Dopa leamopa, Jisasame, “Emba ipu” lea. Dokopa Pitame sipi doko yakinatala, endakinya moko katao, Jisasa kateamo dokonya pea. ³⁰ Pao pituu kandeamopa, poo andake mende leamosa, baa paka kaeya. Dokopa baa endakimi nyoo landa piamopa, baame ae lao, “Kamongo, namba nisa!” lea. ³¹ Dopa leamopa, Jisasame yapa kingi pyale latala, Pita kii nyokonyetala, “Aipuma emba mona lapo palipala, namba kuki tungi pyalepe?” lea. ³² Dokopa nyakamba sipinya pyakalyiambinopa, poo doko yatu lea. ³³ Yatu leamo doko kandatala, disaipolo sipinya peteamino dupame, “Kiningi etete, emba Gote Ikiningi-lamona” lao mambo piami.

Genesarete Yuu Dokonya Jisasame Yaina Dupa Mee Jakamaiyamo Doko

(Mk 6:53-56)

³⁴ Jisasa disaipolo dupa-pipa, Galilea pete dokonya yangi-kaita, Genesarete yuu dokonya pao pyakameami. ³⁵ Yuu dokaita tange endakali dupame, Jisasa-lamo lao kandatala, yuu dosa singi dupa pitakanya wai leaminopa, yaina pyapae dupa pitaka soo epeami. ³⁶ Endakali soo epeamino dupame, baanya yonge pee punanya, yaina pyapae dupame watandena lao, Jisasa tee leami. Watandeamino endakali dupa pitakanya, yaina dupa mee jeta pia.

Yumbangenya Mana Setapae Dupanya Jisasame Leamo Doko

(Mk 7:1-23)

¹ Gii dokopa Parasaipi, Mosesanya loo mana nyepae akalipi, mendapuame Jerusalema katao, Jisasa kateasa ipupala tipa pyoo, ² “Embanya disaipolo dupame mana wambatae naimanya, yumbangeme seteamino dupa, aipuma yalengemape? Dupame nee nalanya dokopa, kingi wasa pingili pyoo napingima-lamo” leami. ³ Dopa leaminopa, Jisasame dupanya pii yanu pyakamaiyoo, “Nyakamame aipuma yumbangenya mana wambatae dupa, watao minama latala, Gotenya mana kyeto setapae dupa yalengemape? ⁴ Wamba Goteme lao pituu, ’Embanya endangi takangepi dolapo, andanda semaiyoo katape” lea. Dee Goteme, “Endakali mendeme baanya endangi takangepi mende kandao, pii koo latamo doko, baa pyao kumasepengena’ lea. ⁵ Dopa leamoka doko, nyakamame mana waka mende miningima-lamo. Akali mendeme endangi takangepi lamaiyoo pituu, ’Nambame nyakamba oapi dipenge dupa pitaka, Gote maitalona’ latamo kandao doko, nyakamame kapana lao mana lengema-lamo. Lelyamino dokome, endangi takangepi nisepengena lao, Gotenya loo seteamo doko mee joo nepengema. ⁷ Nyakama Gote watao miningi mane-mane pingima dupa, propeta Aisaiyame dapa lao makande pyokondape pia: ⁸ ’Endakali tata dakeme, kambumi namba mambo pyapala, nyakamanya moname namba angi mambo napingima. ⁹ Dupame endakalinya mana setapae dupa mana lao pituu, “Dake Gotenya mana setapaena” lengema. Nyakamame kambumi namba mambo pilyaminopa, nambame nasingina’ lapae silyamo.”

¹⁰ Dokopa Jisasame endakali kambu doko epena latala lamaiyoo, “Nyakamame pii dake sepala, masokondape pyepape: ¹¹ Endakali mendeme nee mende nelyamo dokome, baa koeyasala naenge. Endakali mendenya nengekaita pii koo epelyamo dokome, baa koeyasingina” lea. ¹² Gii dokopa disaipolo dupame ipupala baa lamaiyoo, “Parasai dupame embanya pii doko sepala, imbu kaelyamino doko embame kandelepe?” leami. ¹³ Dopa leaminopa, Jisasame pii yanu pyakamaiyoo, “Nambanya Takange kaitinya katenge dokome, ee waingi pokala naeyamo dupa pitaka, pingitaka yukuta. ¹⁴ Dopa pitana, nyakamame Parasai dupa katena kaeyapala, watala naeyalapape. Parasai lenge monda dupame, endakali yango dupa kii miningima. Akali lenge monda mendeme, lenge monda yango mende kii minilyamo doko, lapota yulinya pyakengembana” lea. ¹⁵ Dopa leamopa, Pitame baa lamaiyoo, “Nee nenge dokome, endakali mende koeyasala naengena lao, embame kongali laleno dokonya, tenge doko naima langi” lea. ¹⁶ Dopa leamopa, Jisasame lao pituu, “Nyakamame apata nongo pyapala, pii tenge doko nanyilyamipi? ¹⁷ Kamanda singi mende nengekaita pelyamo doko, inginya soo kamanda epenge, doko nyakamame masala naelyamipi? ¹⁸ Endakalinya monanya palenge mende, nengekaitanya epenge dokome, endakali dupa koeyasingi. ¹⁹ Monanya paliu pyakalyingi dupa, masingi koopi, endakali pyao kumasingipi, kepo kolengepi, enda akalipi nyele-nyele paengepi, pake nengepi, sambo pii lengepi, lamba lengepi, ²⁰ dopale dupame endakali koeyasingi. Dopaka doko, endakali mendeme kingi wasa napinya, mee nee nyoo nelyamo dokome, baa koeyasala naengena” Jisasame lea.

Enda Kenane Tange Mendeme Jisasa Tungi Piamo Doko

(Mk 7:24-30)

²¹ Jisasame yuu doko yakinatala, taono Taeyapa, Saidonepanya yuu siamo dupanya pea. ²² Peamopa, enda Kenane tange mendeme ipupala, puu lao, “Akali Andake, emba Dapiti Yumbange. Imambu koo mendeme nambanya wanenge doko, etete koeyasilyamona embame namba kondo kaeyao nisepoko” lea. ²³ Dopa leamopa, Jisasame pii mende yanu pyao, baa lamaiya naeya. Dokopa baanya disaipolo dupame ipupala, kongo lao baa lamaiyoo, “Enda dakeme wii latae katao, naima watao epelyamona, embame baa pena laa” leami. ²⁴ Dopa leaminopa, Jisasame dupanya pii yanu pyakamaiyoo, “Goteme namba Israele tange, sipisipi alu petae joo kalyamino, dupanya iki puu leana” lea. ²⁵ Dopa leamopa, enda dokome ipao baa kateamo dosa luma lakapala, “Akali Andake, embame namba nisepoko” lao tee lea. ²⁶ Dokopa Jisasame baa lamaiyoo, “Wanenya nee dupa nyepala, pyale lao yana dupa maitamopa, auu napitana” lea. ²⁷ Dopa leamopa, enda dokome baa lamaiyoo, “Akali andake, wane dupame nee nelyaminopa, kuku-kakanapi isa pelyamo dupa, yana toko pundi-pundi kalyamino dupame nyoo nengemakana” lea. ²⁸ Dopa leamopa, Jisasame baa lamaiyoo, “Enda, embame namba kini tungi pyatala, nambame pyakalapenona lao masilinoli, pyekelyona” lea. Dopa leamo gii dokopaka, wanaku doko-kisa imambu koo paleamo doko, yakinatala pea.

Jisasame Yaina Longo Mee Jakamaiyamo Doko

²⁹ Jisasame yuu doko yakinatala, Galilea pete tengesa dosale, manda mendenya lalyoo pupala petea. ³⁰ Peteamopa, endakali kambu longo dupame, endakali moko koopi, lenge mondapi, papa tambutaepi, muumaapi, waka yainame pyapaepi, longo dupa laminao baa peteamo dosa epeaminopa, yaina dupa pitaka mee jakamaiya. ³¹ Yaina mee jakamaiyamo dupa kandatala, endakali kambu dupame walu leami. Muumaa dupame pii lao, papa tambutae dupa tolao, moko koo dupa kaita paeyao, lenge monda dupa lenge tao piaminosa, Israelemanya Gote doko lao mambo piami.

Jisasame Akali 4 Tausene Nee Maiyamo Doko

(Mk 8:1-10)

³² Dokopa Jisasame baanya disaipolo dupa epena latala lamaiyoo, “Endakali dakaita yuu gii tepoma, namba-pipa katapuma. Indupa nee etalame-lamo dokonya, nambame dakaita kondo kaelyo. Nee nanao andaka pena latopa, kaitinisa laowambe lapae setamina” lea. ³³ Dokopa disaipolo dupame baa lamaiyoo, “Endakali napalenge yuu dakenya, naimame betesa anja-tae nyepala, endakali kambu andake dake nena maimape?” leami. ³⁴ Dopa leaminopa, “Nyakamanya betesa akipate silyape?” Jisasame lea. “7-pela betesa-pipa, pisa yakane kuki mendalapo-pipa, silyamona” leami. ³⁵ Dokopa Jisasame endakali dupa isa petena lea. ³⁶ Dopa latala, 7-pela betesapi, pisapi, dutupa nyepala, Gote lao yaka pilino latala konjia. Konjepala, baanya disaipolo dupa maiyamopa, dupame endakali dupa mokosoo maiyami. ³⁷ Maiyaminopa, pitakame nao tiaka kaeyami. Kakana siamo dupa disaipolo dupame, 7-pela baseketa tumbasiami. ³⁸ Enda wanepi itaki napyao, akali tausene kitomendeme neami. ³⁹ Napeaminopa, Jisasame endakali dupa pena latala, baa sipi mendenya pyakalyetala, yuu Magadana pea.

Deaka Jisasame Mirakolo Mende Pina Leamino Doko

(Mk 8:11-13; Lk 12:54-56)

¹ Dokopa Parasaipi, Sadyusiapi, mendapuame ipupala Jisasa minao makande pyoo, “Embame kalai pilino doko, Gote-kisa katao pilini-lamo lao kandamanana, mirakolo mende pii” leami. ² Dopa leaminopa, baame dokaitanya pii yanu pyakamaiyoo, “Niki landa pilyamopa, kaiti kate pilyamo kandatala, nyakamame taita paina pita-lamo lengema. ³ Yuu yongao pituu, kaiti kate pilyamo kandatala, aiyuu ipata-lamo lengema. Nyakamame kaiti doko kandatala, taita dopa pita-lamo lao lengemaka doko, indupa gii dakepa mana makandepi, aloo pipae epelyamo dupa, nyakamame yapao nakandelyamipi? ⁴ Endakali indupa palelyamino dupame, Gote yakinatala, koo pyaanya auu kaelyamino. Nyakamame mirakolo mende kandamana lelyaminoaka doko, mirakolo mende napyakatoo. Goteme Jonaa-kisa mirakolo piamo, dokoaka makande petae setana” lea. Dopa latala baame dupa yakinatala pea.

Jisasame Parasaipi Sadyusiapi Dupanya Mana Dupa Yisa-Pipa Makande Piamo Doko

(Mk 8:14-21)

⁵ Disaipolo dupame endaki pete dokonya yangitena pyakamatala, betesa nanyoo ipamane-lamo lao, kandeami. ⁶ Dokopa Jisasame dokaita kongalimi lamaiyoo, “Parasaipi, Sadyusiapi dupanya yisa dupame, nyakama koeyasetamina kandao kalyepape” lea. ⁷ Dopa leamopa, nyakamalapo laloo pyoo, “Naimame betesa nanyoo ipamano dokonya lelyamona” leami. ⁸ Dopa leamino doko Jisasame kandatala dokaita lamaiyoo, “Nyakama Gote tungi napingi dupame, aipuma betesa nasilyamo lao nyakamalapo lelyamipi? ⁹ Nyakamame namba apipi lao masala naelyamiakape? Nambame 5-pela betesa, akali 5 tausene dupanya konjakamaiyo, doko nao kakana siamo dupa, baseketa longo tumbasiamino doko, kame silyamipi? ¹⁰ Dee nambame 7-pela betesa, akali 4 tausene dupanya konjakamaiyo doko, nao kakana siamo baseketa longo tumbasiamino, doko kame silyamipi? ¹¹ Nambame betesanya iki lao nalalo doko, nasalamipi? Parasaipi, Sadyusiapi, dupanya yisa dupame koeyasetamina kandao kalyepape” lea. ¹² Dopa lateamopa, yisa doko palaonya taelyamopa, betesa doko andengeli pyoo, Parasaipi, Sadyusiapinya mana koeyapae dupa taenge. Taelyamo dokome, endakali longo dupa-kisa andinyilyamopa, koengemana lao yisa-pipa, Jisasame makande pyoo lalame-lamo lao, disaipolo dupame masiami.

Pitame Jisasa Kandao Emba Kraisana Leamo Doko

(Mk 8:27-30; Lk 9:18-21)

¹³ Jisasa baanya disaipolo dupa-pipa, taono Sisaria Pilipae pupala, baanya disaipolo dupa tipa pyoo, “Endakali dupame Akalinya Ikiningi doko kandao, apina lelyamipi?” lea. ¹⁴ Dopa leamopa, dupame yanu pyao, “Yangimi emba kandao Jone kaimbu pingi dokona lelyamino. Yangimi emba propeta Ilaijana lelyamino. Yangimi emba propeta Jeremaeyana lelyamino. Yangimi propeta waka wamba kateamino dupanya mendena, lelyaminona” leami. ¹⁵ Dopa leaminopa, Jisasame dokaita tipa pyoo, “Endakali dupame dopa lalumino doko, nyakamame namba kandao apina lelyamipi?” lea. ¹⁶ Dokopa Saimone Pitame Jisasa kandao, “Emba Kraisa, Gote saka katenge dokonya Ikiningi dokona” lea. ¹⁷ Dopa leamopa, Jisasame baa lamaiyoo, “Saimone, Jonaa ikiningi, embame pii leleno doko, endakali mendeme langya naelyamo. Nambanya Takange kaitinya katenge dokome, emba auu pisetala langipumupa leleno. ¹⁸ Nambame emba kandao dapa langilyo: Pita, emba kana kyeto dokona, nambanya siosa doko kana kyeto dake-kisa pitupa, Satanenya pupu lapae dokome, siosa doko ita minala naeyata. ¹⁹ Nambame Gotenya isingi mate dokonya, kii dupa emba ditu. Embame isa yuu dakenya, endakali mendenya kaita lyokateno doko, Gotenya isingi mate dokonya lyokataeyaka katata. Embame isa yuu dakenya endakali mendenya, kaita lumbateno doko, Gotenya isingi mate dokonya lumbapaeyaka setana” lea. ²⁰ Dopa latala baame disaipolo dupa kyeto joo lamaiyoo, “Namba Kraisa dokona lao, mendaipi mende lamaiya naeyalapape” lea.

Jisasame Baa Kumatapi Sakatatapi Dolaponya Leamo Doko

(Mk 8:31–9:1; Lk 9:22-27)

²¹ Gii dokopa pituu, Jisasame baanya disaipolo dupa panao dapa lamaiya: “Namba Jerusalema pupenge. Patopa, Judamanya isingi akalipi, pitisa mupapi, Mosesanya loo mana nyepae akalipi, dupame namba tanda longo ditala, pyao kumasetataminopa, yuu gii tepo dokonya Goteme namba dee sakatasetana” lea. ²² Dopa leamopa, Pitame Jisasa laminao umbisale pupala pyalanya lao, “Kamongo, embame leleno doko, dopa napinana” lea. ²³ Dopa leamopa, Jisasame kandapilyetala Pita lamaiyoo, “Satane emba puu! Embame Gotenya masingili pyoo nalenya, endakalinya masingili pyoo leeno dokome, nambanya kaita lyokekelenona” lea.

²⁴ Dokopa Jisasame baanya disaipolo dupa lamaiyoo, “Endakali mendeme namba watao ipatoo lao masetamo doko, baa tange kame sepala, baanya poko ita doko nyoo soo, namba watao ipupenge. ²⁵ Endakali mendeme namba watatosa, tanda natona lao masetala, wanditamo doko baa alu pita. Dopaka doko, endakali mendeme namba lao masetala, baa tange kame setamo doko, baame lete etete katenge doko nyeta. ²⁶ Endakali mendeme namba yakinatala, yuunya oapi dupa pitaka nyoo setao katapala, baa alu pitamo doko, oapi dupame tanga baa aipa petala nisetape? Aki mende Gote maitala, baanya lete etete katenge doko tange sambao nyetape? ²⁷ Akalinya Ikiningi doko baanya enjele dupa-pipa, baanya Takangenya tii pipae dokonya ipata. Ipupala endakali mendai-mendai lao, mana minataminoli pyoo, yole maita. ²⁸ Nambame nyakama kiningi langilyo: Endakali ae kalyamino datupanya mendapu, kumala naeyataminopa, Akalinya Ikiningi doko, baanya isingi mate dokonya pupu lapae doko-pipa, ipatamopa kandatamina” Jisasame lea.

Jisasa Waka Jiamo Doko

(Mk 9:2-13; Lk 9:28-36)

¹ Yuu gii 6-pela pateamopa, Jisasame Pita, Jemesa, Jemesa kaiminingi Jonepi, dutupa laminao yuu manda ketae mendenya pupala, nyakama iki kateami. ² Kateaminopa dutupanya enombanya Jisasa waka jia. Baanya lengelyapi doko tii pyoo, niki tele pia. Dee baanya yonge pee dupa, kyoo lao pole-pole pia. ³ Dokopa Mosesa, Ilaija, Jisasa-pipa pii lao kalyu piaminopa kandeami. ⁴ Kandatala Pitame Jisasa lamaiyoo, “Kamongo, naima dakenya katapumanopa auu pyuumuna, embame kapana lao maseteno doko, nambame dakenya sele anda tepoma pitoo. Mende embanya, mende Mosesanya, mende Ilaijanyana” lea. ⁵ Pitame dopa lao kateamopa, kopa tii pipae mendeme ipupala, dokaita sanga pia. Dopa piamopa, kopa tambe-tambe dokonya pii mende lea dokome, “Doo kalyamo doko nambanya Ikiningi, mona setenge doko. Nambame baa etete auu kaengena, nyakamame baanya pii doko sakamaiyepape” lea. ⁶ Dokopa disaipolo dutupame pii doko sepala, etete paka kaeyapala, tombauli siami. ⁷ Dopa piaminopa, Jisasame ipao dutupa watandatala, “Nyakama paka nakaenya sakatalapa” lea. ⁸ Dopa leamopa, dutupame kandeaminopa, Jisasa baa iki katea.

⁹ Dokaitame yuu manda dokonya katao lanao pituu, Jisasame kyeto joo, “Nyakamame kanjimino doko mende lamaiya naeyalapape. Tanga Akalinya Ikiningi doko, kumapala sakatatamopa, endakali dupa lamaitamina” lea. ¹⁰ Dokopa disaipolo dupame Jisasa tipa pyoo, “Mosesanya loo mana nyepae akali dupame, aipuma ’Ilaija wambao ipatatamopa, Kraisa ipupengena’ lengemape?” leami. ¹¹ Jisasame dutupanya pii yanu pyakamaiyoo, “Kini, dupa pitaka depa lasalanya, Ilaija wambao ipupenge. ¹² Dopaka doko, Ilaija ipateana lao nambame nyakama langilyo. Ilaija baaka epeamopa, endakali dupame kandao nanyepala, masiamili pyoo baa minao koeyasiami. Dopaka pyoo, Akalinya Ikiningi doko tanda maitamina” lea. ¹³ Dopa leamopa, Jone kaimbu pingi doko kandao, lelyamona lao disaipolo dupame masiami.

Wane Imambu Koo Paleta Mende Jisasame Nisiamo Doko

(Mk 9:14-29; Lk 9:37-43)

¹⁴ Endakali kambu pyao kateamino dokonya, Jisasapi baanya disaipolo tepo dutupa-pipa ipateaminopa, akali mendeme Jisasa kateasa ipao, baa lao luma lakapala ¹⁵ lamaiyoo, “Akali Andake, nambanya wane dake mandipaeme, itatenya nyoo yangao, endakinya nyoo pyandao pilyamopa, baa tanda longo nao katengena, embame baa kondo kaeyao nisakapoko. ¹⁶ Nambame baa laminao, embanya disaipolo dupa katamisa ipupupa, dupame baanya yaina doko kapa pao, mee jisala naeyalaminona” lea. ¹⁷ Dopa leamopa, Jisasame lao pituu, “Indupa endakali palelyamino dupame, koteaka lao pii tanga lao, Gote tungi napilyamino doko, namba oo koto doko, nyakama-pipaka tole katatope? Nyakama nongo pilyamino doko, andukupa tolataminopa lao nambame malisoo kataowape? Wane doko laminao asa ipupa” lea. ¹⁸ Lanyoo ipateaminopa, Jisasame imambu koo doko pyalanya latala, wane doko yakinatala pena leamopa pea. Puu piamopa, wane dokonya yaina doko mee jia. ¹⁹ Maitakao Jisasa iki peteamopa, disaipolo dupame ipupala baa tipa pyoo, “Aipuma naimame imambu koo doko, kapa pao watao napyalamape?” leami. ²⁰ Dopa leaminopa, Jisasame dokaita lamaiyoo, “Nyakamame Gote kuki tungi pilyamino dokonya, imambu koo doko kapa pao watao pyala naeyalamino. Nambame nyakama kiningi langilyo: Nyakamanya Gote tungi pingi doko, yakane mastet dii dopale-pili, dokome yuu manda dake lamaiyoo, ’Emba sakatatala, omosale puu’ lapinopa, pupyaliakana” lea.+ 17:20-21 Buku Baibolo Giriki piimi wambao pyatae mendatupanya vesa dakenya pii datupa apata lapae palelyamo: “Gote loma soo nee nanao katenge mana dokonya-kaita iki imambu koo dopale dupa watao pingi.”

Jisasame Baa Kumatapi Sakatatapi Dolaponya Paa Lapo Pyoo Leamo Doko

(Mk 9:30-32; Lk 9:43-45)

²² Jisasa baanya disaipolo dupa-pipa, Galilea yuu dokonya kambu pyatala dokaita lamaiyoo, “Akali mendeme Akalinya Ikiningi doko, enge nyepala, endakali waka dupa laitaka pyaanya pilyamo. ²³ Laitaka petatamopa, dupame baa pyao kumasetami. Kumasetataminopa, yuu gii tepo dokonya, Goteme baa dee sakatasetana” lea. Dopa leamo sepala, disaipolo dupa mona etete kenda kaeyami.

Jisasame Lotuu Anda Andakenya Takisa Maiyamo Doko

²⁴ Jisasa baanya disaipolo dupa-pipa, taono Kapename dokonya pyakameaminopa, lotuu anda andakenya takisa nyingi akali dupame, ipupala Pita tipa pyoo, “Nyakamanya mana lenge akali dokome, lotuu anda andakenya takisa doko maingipi?” leami. ²⁵ Dopa leaminopa, Pitame yanu pyao, “Kini maingina” lea. Dopa latala baa andaka pao kolandatala, pii mende latala naeyamopa, Jisasame tipa pyoo, “Saimone, embame aipa lao masili? Yuu dakenya kiŋi dupame nyakamanya ikiningi dupa-kisa takisa nyingimape, pande endakali yuu tenge tange dupa-kisa takisa nyingimape?” lea. ²⁶ Pitame yanu pyao, “Endakali yuu tenge tange dupa-kisa nyingimana” lea. Dopa leamopa, Jisasame baa lamaiyoo, “Dopa-tamo doko, kiŋi ikiningi dupame takisa namaipenge. ²⁷ Dopaka doko, naimame akali dokaita kenda pisala naeyamana, embame endaki pete dokonya pupala, uku mende pyandatala, pisa wambao nyeteno dokonya nengekaita angapu lakyepala, dokonya konde mende palyapomona nyepe. Nyepala pao lotuu anda andake dokonya, nalimbanya takisa maipi” lea.

Jisasame Alyasale Joo Katenge Dokonya Mana Leamo Doko

(Mk 9:33-37; Lk 9:46-48)

¹ Gii dokopa disaipolo dupame Jisasa tipa pyoo, “Gotenya isingi mate dokonya api alyasale joo katatape?” leami. ² Dopa leaminopa, Jisasame wane koo mende epena latala, dokaitanya kainanya katasetala ³ lamaiyoo, “Nyakamanya mana doko aloo petala, anasale jetala wane koo joo nakatatamino doko, Gotenya isingi mate dokonya, napatamina lao nambame nyakama kiningi langilyo. ⁴ Endakali mendeme baa tange anasale jetala, wane koo dapale jetamo doko, Gotenya isingi mate dokonya alyasale joo katata. ⁵ Endakali mendeme namba lao masetala, wane koo dapale mende lanyilyamo dokome, namba lanyingiakana” lea.

Koo Pina Lao Mapisingi Mana Dupa

(Mk 9:42-48; Lk 17:1-2)

⁶ Jisasame dee mende lao pituu, “Namba tungi pingi wane koo mende, endakali mendeme koo pina lao mapisetamo doko, kana andake mende baanya mangenya kende katatala, soo solowatanya pyandamili doko, auu pipyali. ⁷ Isa yuu dakenya, koo pina lao mapisingi dupa singi-lamo. Dopana endakali dupa pitaka-kisa makande pingi ipatana, kandao kalyepape. Kini makande pingi dupa ipatamoaka doko, endakali mendeme koo pina lao mapisetamo doko, baa koeyata-lamo! ⁸ Embanya kingi mokopi mendeme, emba koo pyaale lao mapisetamo doko, kepanya nepape. Emba kingi mokopi mendai iki kateta, lete etete katenge dokonya pupili doko, auu pipyali. Kingi mokopi lapota kateta itate konjala naenge dokonya, soo pyandamili doko, auu napipyali. ⁹ Embanya lenge mendeme koo pyaale lao mapisetamo doko, lukunya nepape. Emba lenge mendai iki tao, lete etete katenge dokonya pupili doko, auu pipyali. Emba lenge lapota tapeta, ele panda koo ita tao katenge dokonya, soo pyandamili doko, auu napipyali” lea.

Sipisipi Alu Petae Kutao Nyiana Lao Jisasame Kongali Pii Leamo Doko

(Lk 15:3-7)

¹⁰ Jisasame dee mende lao pituu, “Wane koo dupanya isingi enjele dupa, nambanya Takange kaitinya katenge doko-pipa, apata katengema. Dopana, nyakamame dupa kandanya palyala naeyalapape.+ 18:10-11 Buku Baibolo Giriki piimi wambao pyatae mendatupanya vesa dakenya pii datupa apata lapae palelyamo: “Akalinya Ikiningi dokome endakali alu petae dupa pyoo nyala epea.” ¹² Nyakamame aipa lao masilyami? Akali mendenya 100 sipisipi katatamo dokonya, mendai alu pitamopa, baame aipa pitape? Baame 99 sipisipi dutupa, pau manda mendenya katena latala, mendai alu pitamo doko kutala naeyatape? ¹³ Nambame nyakama kiningi langilyo: Sipisipi 99 katatamino dutupa, auu kaeyatamoaka doko, baame mendai alu pitamo doko kutao nyepala, etete auu kaeyata. ¹⁴ Dopaka pyoo, nyakamanya Takange kaitinya katenge dokome, wane koo dupanya mende alu napipya laka lao, masingina” lea.

Kaiminingi Mendeme Koo Pitamopa Tolasingi Mana Doko

(Lk 17:3)

¹⁵ Jisasame dee mende lao pituu, “Embanya kaiminingi mendeme emba koo pingitamo doko, baa katatasa emba pupala, nyakamba iki pitipala, baanya koo pitamo doko, lao panasoo lamaipi. Lamaitinopa, baame embanya pii setamo doko, embanya kaiminingi doko dee pilyoo nyete. ¹⁶ Baame embanya pii nasetamo doko, pii pepa pyapae singili pyoo, mendai lapopi mende lanyepala, nyakambanya pii latambino dupa sina, laminao deaka lamaiya pupape. ¹⁷ Baame dutupanya pii nasetamo doko, embame siosanya endakali kambu pyatae dupa lamaipi. Dee baame siosanya apata pii nasetamo doko, baa kamalya katenge endakalipi, takisa nyingi akalipi, dopale-lamo lao kandatala, wandyuu kalyepape.

¹⁸ “Nambame nyakama kiningi langilyo: Nyakamame isa yuu dakenya endakali mendenya, kaita lyokatamino doko, Gotenya isingi mate dokonya lyokataeyaka katata. Nyakamame isa yuu dakenya, endakali mendenya kaita lumbatamino doko, Gotenya isingi mate dokonya lumbataeyaka seta. ¹⁹ Nambanya Takange kaitinya katenge dokome, mende pyekena lao, nyakamanya mendalapome mona mendai palyetala, tee latambinopa, baame latambiliaka pyakata. ²⁰ Endakali lapo tepopi mendatupame, namba lao masetala, mendasa kambu pyao pitatamino dokonya, namba kainanya apata katatona lao, nambame nyakama langilyona” lea.

Endakalinya Koo Kame Nasingi Dokonya Jisasame Kongali Leamo Doko

²¹ Dokopa Pitame Jisasa tipa pyoo, “Kamongo, nambanya kaiminingi mendeme koo petae katao pingitamopa, nambame baanya koo dupa, paa 7-pela kame sakamaipengepe, pande akipatesape?” lea. ²² Dopa leamopa, Jisasame yanu pyao, “Paa 7-pela iki daa. Paa 77 pyoo, koo pitamo dupa kame sakamaipengena lao lelyo. ²³ Dopana, Gotenya isingi mate doko kiŋi mendeme, baanya kalai akali dupa-kisa, yanu maiyamo dupa tolasekena, latoo lao masiamo dopale. ²⁴ Kiŋi dokome tee pyao yanu dupa, pyekena lao kateamopa, kalai akali yanu singi dupanya mende, laminao epeamino doko-kisa, 10 milion kina yanu sakamaiya. ²⁵ Akali dokome yanu andake doko, kapa pao pyapenge nanjiamosa, kiŋi dokome baanya kalai akali dupa lamaiyoo, ’Nyakamame akali dakepi, baanya enda wanepi, dee oapi dupa pitakame muni nyepala, yanu doko pyekena lamaiyepape’ lea. ²⁶ Dopa leamopa, kalai akali dokome kiŋi dokonya enombanya, pao luma lakapala tee lao, ’Nambame embanya yanu dupa pitaka pyakatona, embame namba kondo kaeyapala, gii dipoko’ lea. ²⁷ Dopa leamopa, kiŋi dokome baa kondo kaeyapala, baanya yanu dupa kaeyapala yakinea. ²⁸ Dopa peteamopa, kalai akali dokome pupala, baanya kalai akali yango mende-kisa, 100 kina baanya yanu sakamaingi doko kandanyia. Kandanyetala kalai akali yango dokonya, mangenya puu lao minatala, ’Nambanya yanu dutupa yapa pyaka’ lea. ²⁹ Dopa leamopa, kalai akali yango dokome tombauli sepala tee lao, ’Nambame embanya yanu dupa pitaka pyakatona, embame namba kondo kaeyapala, gii dipoko’ lea. ³⁰ Dopa leamoaka doko, baame daa latala, kalai akali yango dokome, yanu dutupa etao pyatakala ipatana, anjoo pyandatala pena lea. ³¹ Dokopa baanya kalai akali yango dupame, piamo doko kandatala, kondo kaeyao maka kaeyapala, kiŋi doko pao lamaiyami. ³² Lamaiyaminopa, kiŋi dokome kalai akali doko epena latala lamaiyoo, ’Emba kalai akali koo-lamo! Nambame emba kondo kaeyao, nisepoko lao tee lapino dokonya, nambanya yanu emba-kisa sipumu dutupa pitaka kaeyapu. ³³ Nambame emba kondo kaeyapu dopaka pyoo, embanya kalai akali yango doko kondo kaeyateno!” lao pyalanya lea. ³⁴ Dopa latala, kiŋi dokome imbu kaeyapala, kalai akali doko anjoo, tanda maina lao, anjingi andaka isingi akali dupanya kingilyaka maiyoo pituu, ’Akali dakeme nambanya yanu dutupa, etao pyatakala ipatana, anjoo soo pupa’ lea-pyaa. ³⁵ Dopana, nyakamanya kaiminingi mendeme koo pingitamo dupa, kiningi etete monanya katao kame nasetamino doko, nambanya Takange kaitinya katenge dokome, nyakamanya koo pitamino dupa, kame nasakatakana” lea.

Enda Yakinenge Dokonya Jisasame Mana Leamo Doko

(Mk 10:1-12)

¹ Jisasame pii lao etapala, Galilea yuu doko yakinatala, Judia yuu dokonya endaki Jodane yangitena pea. ² Dokopa endakali kambu longome Jisasa watao epeaminopa, baame dokaitanya yaina dupa mee jakamaiya.

³ Dopa piamopa, Parasai mendapuame ipupala, baa minao makande pyoo, “Akali mendeme baanya enda doko-kisa, tenge mee mende-tamopi, angi mende-tamopi, setapala yakinatamo doko, loome daa latae singi doko yalatape?” leami. ⁴ Dopa leaminopa, baame yanu pyao, “Nyakamame pii dake itaki napiamipi? ’Tee piamo dokopa, Goteme enda akalipa lao wasia. ⁵ Tenge dokonya, akalimi baanya endangi takangepa yakinatala, baanya etanengepa tole pyao, yonge mendai joo pititambina’ lao pyapae silyamo. ⁶ Tenge dokonya, dolapo lapoma joo napetenya, yonge mendai joo pititambi. Goteme nyoo pyasetae doko, endakalimi wakale pyoloo napipengena” lea. ⁷ Dopa leamopa, Parasai dupame baa tipa pyoo, “Dopa-tamo doko, Mosesame loo seteamo dokonya, ’Akali mendeme baanya enda doko yakinao pituu, enda yakinapenge pepa mende maitala pena lapengena’ lao, aipuma seteape?” leami. ⁸ Dokopa Jisasame pii yanu pyao, “Nyakamanya yumbange dupa tuu-tuu piaminosa, Mosesame loo doko pepa pyanya setea-pyaa. Dopaka doko, wamba tee piamo dokopa, Goteme loo doko setala naeya. ⁹ Dopana, nambame nyakama dapa langilyo: Akali mendenya etanenge dokome, kepo kolala naeyatamopa, baame mee yakinatala, enda waka mende nyetamo doko, akali dokome kepo kolatana” lea. ¹⁰ Dopa leamopa, baanya disaipolo dupame baa lamaiyoo, “Enda akalipa tole pyao petenge mana doko, dopale-tamo doko, akalimi enda lanyala naeyao katataminopa, auu pitana” leami. ¹¹ Dopa leaminopa, Jisasame dokaita lamaiyoo, “Akali pitakame kapa pao, enda lanyala naeyao mee nakatatami. Goteme kyeto maitamo mendapuame, iki kapa pao enda nanyoo mee katatami. ¹² Akali mendapu enda nanyepenge jepae mandeami dupame, enda nanyoo mee katengema. Akali mendapu lakapo nyepae, enda lanyala naengema. Dee mendapuame Gotenya isingi mate dokonya kalai doko pitoo lao masetala, enda lanyala naengemaka. Tenge dokonya minao, akali mendeme enda lanyala naeyao katatoo lao masetamo doko, yakana” Jisasame lea.

Wane Wanakupi Dupa-Kisa Jisasame Kingi Seteamo Doko

(Mk 10:13-16; Lk 18:15-17)

¹³ Dokopa endakali mendapuame Jisasa kateamo dokonya, wane wanakupi dupa Jisasame kingi, aiyombanya setapala, loma sakamaina lao laminao epeaminopa, disaipolo dupame endangi takangepi dupa pyalanya leami. ¹⁴ Pyalanya leaminopa, Jisasame dokaita lamaiyoo, “Gotenya isingi mate doko, wane wanakupi koo dapale dupanyana, epekena kaita lyokala naeyalapa” lea. ¹⁵ Dopa latala baame dokaita-kisa kingi setao loma sepala, baa yuu doko yakinatala pea.

Akali Yuunya Kamongo Mende

(Mk 10:17-31; Lk 18:18-30)

¹⁶ Gii mendepa akali mende Jisasa kateasa ipupala, “Mana Lenge Akali, mana epe aipale mende minatala, tanga namba lete etete katenge doko nyotope?” lea. ¹⁷ Dopa leamopa, Jisasame baa lamaiyoo, “Aipuma embame mana epe dupanya lao namba tipa pilipi? Gote iki baa epe kalyamo. Emba lete etete katenge doko nyotoo lao maseteno doko, Gotenya loo dupa watao minape” lea. ¹⁸ Dopa lateamopa, akali dokome baa tipa pyoo, “Loo dupa andutupape?” lea. Dokopa Jisasame baa lamaiyoo, “Embame endakali pyao kumasala naeyape. Kepo kolala naeyape. Pake nala naeyape. Endakali mende sambo lao minakasala naeyape. ¹⁹ Embame embanya endangi takangepa dolapo, andanda semaiyoo katape. Dee embame emba tange auu kaengeli pyoo, endakali yango dupa auu kaeyao katapena” lea. ²⁰ Dokopa akali patange dokome pii yanu pyao, “Loo dutupa pitaka nambame watao miningina, dee nambame aki mende apata pipengepe?” lea. ²¹ Dopa leamopa, Jisasame baa lamaiyoo, “Embame Gotenya mana tolatae dupanya katapu laka lao maseteno doko, emba pupala, embanya oapi dupa pitakame muni nyepala, endakali daa jepae dupa maitala, namba watao ipupi. Dopa pitinopa, tanga embanya epe dupa kaitinya sakatana” lea. ²² Dopa leamopa, akali patange dokome sepala, baanya oapi etete longo singi dokonyana, mona kenda kaeyapala, baa yakinatala pea.

²³ Dokopa Jisasame disaipolo dupa lamaiyoo, “Nambame nyakama kiningi langilyo: Yuunya kamongo dupa Gotenya isingi mate dokonya paanya, leke-leke tatamina” lea. ²⁴ Dee mende nyakama langilyo: Kamele mendeme kepo tii mendenya leke-leke tao kolandapyaliaka doko, yuunya kamongo mendeme, Gotenya isingi mate dokonya paanya, eteteaka leke-leke tapyalina” lea. ²⁵ Dokopa disaipolo dupame pii dutupa soo etete walu latala, “Dopa-tamo doko, endakali apimi Gotenya isingi mate dokonya patape?” leami. ²⁶ Dopa leaminopa, Jisasame dokaita lengeme kandatae katao lamaiyoo, “Endakalimi nyakamanya pupu lapae dokome, Gotenya isingi mate dokonya napupenge. Endakalimi kapa pao napipenge dupa pitaka, Goteme kapa pao pingina” lea. ²⁷ Dokopa Pitame baa lamaiyoo, “Naimanya tatapi, pinjupi, dupa pitaka yakinatala, emba watao epelyamano dokonya, tanga naimame aki mende nyetamape?” lea. ²⁸ Dopa leamopa, Jisasame dokaita lamaiyoo, “Nambame nyakama kiningi langilyo: Tenda Goteme yuu kaitipi enenge jetamo gii dokopa, Akalinya Ikiningi doko, baanya kiŋi petenge toko dokonya, tii pipae-pipa pitita. Gii dokopa nyakama, nambanya disaipolo dupa kiŋi petenge toko, 12-pela dutupanya pititami. Dokonya pituu, Israele tata 12-pela dutupanya pii lao tolasakamaiyoo pititami. ²⁹ Endakali mendeme namba lao masetala, ee andapi, takange endangipi, kaiminingi pimalengepi, wane wanakupi dupanya mende yakinatamo dokome, dee wakao 100 lao nyeta. Dee lete etete katenge doko apata nyetaka. ³⁰ Salapape! Epapu endakali longo mendapu, wambao kalyamino dupa tanga maita pyatami. Maitapyao kalyamino dupa, tanga wambatamina” Jisasame lea.

Waene Eenya Kalai Akali Nyiana Lao Kongali Leamo Doko

¹ Jisasame kongali pii mende lao pituu, “Gotenya isingi mate doko, akali mendeme yongama wamba sakatatala, baanya waene ee dokonya kalai pyekena lao, kalai akali mendapu lanyala peamo dopale. ² Pupala ee tange dokome, akali mendatupa yuu gii mendainya, 1 kiname yole pingili pyoo pitoana, waene eenya kalai pyakala pena lea. ³ Pena latala 9 kilokopi mendenya, maketanya pupala kandeamopa, akali mendatupa mee kateami. ⁴ Kateamino kandatala baame dupa lamaiyoo, ’Nambame nyakama yole pipengeli pyoo pitoana, nyakama apata nambanya waene ee dokonya kalai pyakala pupa’ lea. ⁵ Dopa lateamopa, akali dupa kalai pyakamaiya peami. Dutupa pateaminopa, 12 kilokopi, 3 kilokopinya baame deaka maketanya pupala, kalai akali mendatupa lanyepala, waene eenya kalai pyakala pena lea. ⁶ Deaka 5 kilokopi mendenya pupala, baame akali mendatupa mee kateamino kandatala dupa lamaiyoo, ’Aipuma nyakama indupa gii dake, pitaka mee dakenya katalamipi?’ lea. ⁷ Dopa leamopa, dupame yanu pyao, ’Akali mendeme naima kalai nandipyasa, naima mee katalamanona’ leami. Dokopa baame dokaita lamaiyoo, ’Nyakama apata nambanya waene ee dokonya, kalai pyakala pupa’ lea. ⁸ Yuu kuiyalanya piamopa, akali ee tange dokome, ee isingi akali doko lamaiyoo, ’Embame kalai akali dupa epena latala, yole pipi. Yole pyoo pituu, kalai akali 5 kilokonya ipamino dupa, wambao yole pima-pima pyoo, yongama wamba ipamino dutupanya tuu lapena’ lea. ⁹ Dokopa kalai akali 5 kilokonya, kalai tee piamino dupa ipupala, 1 kina lao nyiami. ¹⁰ Dopa pyoo nyiaminosa, kalai akali yongama wamba kalai tee piamino, dupame nyakama muni mendalapo, apata wakao nyalamano lao masiaminoaka doko, nyakama apata 1 kina laowaka nyiami. ¹¹ Dopa pyoo nyepala, akali ee tange doko imbu kaeyapala, mumu leami. ¹² Dopa latala akali ee tange doko lamaiyoo, ’Kalai akali 5 kilokonya ipamino datupame, awa mendai iki kalai pimino. Naima indupa gii dake pitaka, niki yale mende tapumupa, leke-leke tao kalai pyemano doko, embame dupa naima-pipa kapa-kapa lao, yole pilino doko, auu napilyamona’ leami. ¹³ Dopa leaminopa, akali ee tange dokome kalai akali dupanya mende lamaiyoo, ’Kaimia, nambame emba minakasala naeyalo. Emba 1 kina nyotoana lapinopa, nalimba pii lao yaki pyaa naeyalambape? ¹⁴ Kalai akali maitapyao ipamino dupa, emba yole pilyo dopaka pyoo, dutupa nambanya auu kaengeme yole pyoo. Nambanya muni dokome, mendita mende pitoo lao masotoli pyoo napitupi? Nambame kalai akali maitapyao ipamino dupa, nambanya kondo kaengeme, 1 kina laowaka maiyo dokonya, embame dokaita-pipa tilya nyala naenya, embanya yole doko nyoo puu’ lea-pyaa. ¹⁶ Dopana, epapu endakali mendapu wambao kalyamino dupa, tanga maita pyatami. Maitapyao kalyamino dupa, tanga wambatamina” Jisasame lea.

Jisasame Baa Kumatapi Sakatatapi Dolaponya Paa Tepo Pyoo Leamo Doko

(Mk 10:32-34; Lk 18:31-34)

¹⁷ Jisasa Jerusalema pao pituu, baanya 12 disaipolo dutupa iki laminao, umbisale pupala lamaiyoo, ¹⁸ “Salapape! Naima indupa Jerusalema pelyamano. Dokonya akali mendeme, Akalinya Ikiningi doko enge nyepala, pitisa mupapi, Mosesanya loo mana nyepae akalipi, dupa laitaka pitamopa, dupame baa kote latala pyao kumasina latami. ¹⁹ Dopa latala dupame baa akali kamalya katenge dupanya, kingilyaka maitaminopa, dokaitame baa kandao lamba latala, konjame pyapala, poko itanya pyao yukutami. Dopa petataminopa, yuu gii tepo dokonya, Goteme dee sakatasetana” lea.

Jemesa Jonepanya Endangimi Jisasa-Kisa Tee Leamo Doko

(Mk 10:35-45)

²⁰ Jemesa, Jonepanya endangi dokome, Jisasa-kisa dopale mende tee latoo lao masetala, nyakamba-pipa apata ipao, Jisasanya enombanya baa luma lakea. ²¹ Dokopa Jisasame baa tipa pyoo, “Nambame embanya aipa pyakaowape?” lea. Dopa leamopa, enda dokome baa lamaiyoo, “Embanya isingi mate dokonya, kiŋi joo pititinopa, nambanya wane dalaponya mende, embanya kingi tolae-kaita petena lakape, mende embanya kingi koeya-kaita petena lakape” lea. ²² Dopa leamopa, Jisasame baa lamaiyoo, “Embame masala naeyao lelenona” lea. Dopa latala, wane dolapo lamaiyoo, “Nambame kenda pipae salapo-lamo doko, nyakambame kapa pao setambipi?” lea. Dokopa dolapome yanu pyao, “Nalimbame kenda pipae dupa, kapa pao setambakana” leambi. ²³ Dopa leambinopa, Jisasame dolapo lamaiyoo, “Kini nyakambame kende pipae dupa setambiaka. Dopaka doko, nambanya kingi tolae-kaita petena lapengepi, koeya-kaita petena lapengepi, doko nambanya kalai daa. Nambanya Takangeme pititamina lao, yapao nyiamo endakali dupa pititamina” lea. ²⁴ Pii doko sepala, 10-pela disaipolo dutupame Jemesa Jonepa imbu kaeyami. ²⁵ Dopa piaminopa, Jisasame dokaita pitaka epena latala lamaiyoo, “Akali kantri waka isingi, Gote tungi napingi dupame, nyakamanya endakali isingi dupa kandanya palyetala, nyakama alyasale joo katengema, doko nyakamame kandengema. Kantri dupanya akali andake dupame, nyakamanya pii watao minekena lao kandatae paengema, mana doko nyakamame kandengemaka. ²⁶ Nyakamame dopa napyepape. Nyakamanya mende akali andake joo katapuli lao masetamo dokome, nyakamanya kalai akali joo katapenge. ²⁷ Dee nyakamanya mende alyasale joo katapuli lao masetamo dokome, nyakamanya kendemane joo katapenge. ²⁸ Dopaka pyoo, Akalinya Ikiningi dokome baanya kalai pyekena lao naepea. Baame endakali longo dupa nisoo, kii tamao nyalanya, baa tangeme kumala epeana” lea.

Jisasame Akali Lenge Monda Mendalapo Lenge Tasiamo Doko

(Mk 10:46-52; Lk 18:35-43)

²⁹ Jisasa baanya disaipolo dupa-pipa, taono Jereko doko yakinatala peaminopa, endakali kambu andake mendeme baa watao peami. ³⁰ Dokopa, akali lenge monda lapoma kaitinisa peteambi. Akali dolapome Jisasa epelyamo leamino sepala, wii lao, “Dapiti Yumbange! Kamongo! Embame nalimba kondo kaeyapoko” leambi. ³¹ Dopa leambinopa, endakali dupame pii kaena lao pyalanya leami. Dopa leaminoaka doko, akali dolapome dee puu lao wii lao, “Dapiti Yumbange! Kamongo! Embame nalimba kondo kaeyapoko” leambi. ³² Dopa leambinopa, Jisasa baa katapala, akali dolapo epena latala lamaiyoo pituu, “Nambame nyakambanya aipa pyakapili lao masilyambipi?” lea. ³³ Dopa leamopa, akali dolapome baa lamaiyoo, “Kamongo, nalimba dee lenge tao kandambana, embame nalimba nisepoko” leambi. ³⁴ Dopa leambinopa, Jisasame dolapo kondo kaeyapala, baanya kingimi dolaponya lengenya watandalu piamopa, nyakamba lapota lenge talu piambi. Dopa petakamaiyamopa, nyakamba baa watao peambi.

Jisasa Kiŋi Joo Jerusalema Peamo Doko

(Mk 11:1-11; Lk 19:28-38; Jn 12:12-19)

¹ Jisasa disaipolo dupa-pipa Jerusalema tengesa, Olipimanda dokonya taono Betepasa peami. Pao pituu, Jisasame disaipolo lapoma wambao pena latala ² lamaiyoo, “Taono yakane silyamo omonya pupala, dongi matakai mende, yakane-pipa anjetae kalyamona, lapota tata lao minao ipupape. ³ Endakali mendeme nyakamba kandao pii mende lea kandeno doko, nyakambame baa lamaiyoo, ’Kamongome dongi dalapo minao, kalai mende pipenge jilyamo laamona’ lapape. Dokopa baame yapa dyaapomona” lea. ⁴ Dopa piamo dokome, propeta mendeme pii leamo dake angi jia: ⁵ “Jerusalema tange dupa lamaiyoo, ’Nyakamanya kiŋi doko, dongi yakane mendenya maitanya pituu, akali kenge nasingi joo, nisala epelyamona kanjepape’ lao, lamaiyepape” lea-pyaa.

⁶ Dokopa disaipolo dolapome pupala, Jisasame leamoli piambi. ⁷ Dopa petala dolapome, dongi matakai doko yakane-pipa minao epeambi. Ipupala nyakambanya yonge pee ketae pingi dolapo, dongi dolaponya maitanya seteambinopa, Jisasa pyakalyetala, pituu pea. ⁸ Peamopa, endakali kambu andake mendeme, nyakamanya yonge pee ketae pingi dupa, kaitini dokonya kuiyami. Yangi dupame ita yoko dupa lakao, kaitini dokonya kuiyamiaka. ⁹ Dokopa endakali dupa wambata, maita pyata pyoo pao pituu, puu lao wii lao, “Dapiti Yumbange doko epelyamo dokonya, naimanya Gote doko lao mambo pilyamano! Kamongonya kengenya akali epelyamo dake, Goteme auu pisetae! Gote Ketae Kaitinya Katenge doko lao mambo pilyamano!” leami. ¹⁰ Jisasa Jerusalema pao pyakameamopa, endakali dupa pitakame walu latala, “Akali epelyamo dake apipi?” leami. ¹¹ Dopa leaminopa, endakali kambu Jisasa-pipa apata peamino dupame, “Akali epelyamano dake kenge Jisasa lenge. Baa yuu andake Galilea taono Nasarete, tange propeta dokona” leami.

Jisasame Lotuu Anda Andake Kamenya Andakote Maketa Daa Leamo Doko

(Mk 11:15-19; Lk 19:45-48; Jn 2:13-22)

¹² Jisasa lotuu anda andake kame dokonya kolandatala, endakali maketa setao kateamipi, sambao kateamipi, dupa kandatala imbu kaeya. Imbu kaeyapala, toko ketae muni aloo piamino dupapi, yaka maiyolee maketa setao petenge toko dupa minalyetala, kaii lao nepatala watao pia. ¹³ Dopa petala baame dokaita lamaiyoo, “Pii pepa pyapae singi dokonya, ’Gotenya lotuu anda andake doko, loma singi anda latamina’ lapae silyamo. Dopaka doko, nyakamame anda dake, pake nengemanya anda jinya nepelyaminona” lea.

¹⁴ Endakali lenge mondapi, moko koopi, dupa Jisasa kateasa lotuu anda andake dokonya, kame andakote epeaminopa, baame yaina dupa mee jakamaiya. ¹⁵ Dopa piamopa, wane koo dupame, lotuu anda andake dokonya kame andakote katao, wee lao, “Naimame Gote lao Dapiti Yumbange, doko mambo pilyamano!” leami. Wee leamino dupa sepa, Jisasanya kalai pupu lapae piamo dupa kandata petala, pitisa mupapi, Mosesanya loo mana nyepae akalipi, dupame imbu kaeyami. ¹⁶ Imbu kaeyapala dokaitame Jisasa tipa pyoo, “Wane koo dupame wee lelyamino dupa embame silipi?” leami. Dopa leaminopa, baame yanu pyao, “Kini nambame silyo. ’Wane koo dupame, kambumi Gote lao mambo pyatamina’ lao, pepa pyapae silyamo doko nyakamame itaki napiamipi?” lea. ¹⁷ Dopa latala baame dokaita yakinatala, Betani pao palea.

Jisasame Piki Ita Mende Kandao Sapuina Leamo Doko

(Mk 11:12-14,20-24)

¹⁸ Oo yongama wamba, Jisasa dee Jerusalema pilyoo pituu, baa lopo kaeya. ¹⁹ Lopo kaeyapala baame piki ita mende kaitini lembasa kateamo kandatala, dokonya dii lyilyape lao kanja pea. Pao kandeamopa, dii nalyoo yoko iki pyoo katea. Dokopa baame piki ita doko kandao, “Embame tanga tangapi dee dii mende namanditina” lea. Dopa lalu piamopa, piki ita doko sapuiya. ²⁰ Disaipolo dupame piamo doko kandatala walu leami. Walu latala tipa pyoo, “Piki ita dake aipa petala pupae lao sapuilyape?” leami. ²¹ Dopa leaminopa, Jisasame dokaitanya pii yanu pyakamaiyoo, “Nambame nyakama kiningi langilyo: Nyakamame mona lapo palya naenya, Gote tungi pyatamino doko, nambame piki ita dake pilyoliaka nyakamame pitami. Dee nyakamanya mendeme, yuu manda dake sakatatala, solowatanya pyakala pena latamino doko, kini dopaka pita. ²² Nyakamame Gote tungi pyatala, dopale mende nyemana lao loma soo, tee latamino dupa pitaka, Goteme ditana” lea.

Jisasa Kandao Emba Apimi Kalai Andake Dupa Pii Lapumupa Pilipi Lao Tipa Piamino Doko

(Mk 11:27-33; Lk 20:1-8)

²³ Jisasa lotuu anda andake dokonya, kamenya andakote pilyetala, endakali dupa mana lamaiyoo kateamopa, pitisa mupapi, Judamanya isingi akalipi, dupame ipupala baa tipa pyoo, “Emba apimi kalai andake dupa pii lapumupa pilipi?” leami. ²⁴ Dopa leaminopa, Jisasame dokaitanya pii yanu pyakamaiyoo, “Nambame nyakama tipa mende pitoaka, nyakamame yanu pyatamino doko, nambame kalai dupa akali dokome pii lapumupa pilyona lao, nyakama langitoaka. ²⁵ Joneme kaimbu piamo mana doko, apimi pina leamopa piape? Goteme pina leape, pande akalimi pina leamipi?” lea. Dopa leamopa, dokaitame pii doko sepala, nyakamalapo laloo pyoo, “Naimame ’Joneme kaimbu piamo mana doko, Goteme pina leana’ latamano doko, ’Aipuma nyakamame baanya pii doko, kiningina lao masala naelyamipi?’ laapome-lumu. ²⁶ Dopaka doko, endakali kambu dakeme, Jone baa propeta kiningina lao masingima dokonya, naimame, ’Akalimi pina leamina,’ laanya paka pyuumuna” leami. ²⁷ Dopa latala dupame Jisasanya pii yanu pyakamaiyoo, “Apimi Joneme kaimbu pina leape lao, naimame masala naelyamanona” leami. Dokopa Jisasame dokaita lamaiyoo, “Dopa-tamo doko, nambame kalai dupa akali dokome, pii lapumupa pilyona lao, nyakama langya naeyatoakana” lea.

Jisasame Wane Lapoma Makande Pyoo Kongali Pii Leamo Doko

²⁸ Jisasame dee mende lao pituu, “Akali mendeme wane lapoma mandea-pyaa. Takangeme wane mupa doko lamaiyoo, ’Emba indupa waene ee dokonya kalai pyaa puu’ lea. ²⁹ Dopa leamopa, wane mupa dokome yanu pyao, ’Namba napatoana,’ leamoaka doko, maitakao mona aloo petala pea. ³⁰ Dokopa takange dokome wane kole doko, kateasa pao dopaka lamaiya. Dopa lamaiyamopa, ’Apane, yakalumuna’ latala, angi napea. ³¹ Dopa latala, “Wane dolaponya andukumi, takangenya masiamoli piape?” lao, Jisasame pitisa mupapi, Judamanya isingi akalipi, dupa tipa pia. Dokopa dokaitame yanu pyao, “Wane mupa dokomena” leami. Dopa leaminopa, Jisasame lamaiyoo, “Jone kaimbu pingi dokome, mana epe tolatae dupa leamopa, nyakamame kiningina lao masala naeyami. Dopaka doko, takisa nyingi akalipi, 2 kina endapi, dupame kiningina lao masiamino dokonya, Gotenya isingi mate dokonya, wambao puminopa, nyakama mona aloo napilyamino dokonya, nyakama napelyaminona lao kiningi langilyona” lea.

Jisasame Waene Ee Isinginya Kongali Leamo Doko

(Mk 12:1-12; Lk 20:9-19)

³³ Jisasame dee mende lao pituu, “Kongali pii dake salapape. Akali yuu andake singi mendeme, waene ee mende kame petala pokea-pyaa. Pokatala dii lyao waene ipange nyalanya, takyoo indyapenge yuli mende tombao wasia. Wasetala ee doko kandao isoo pitipenge, anda ketae mende pia. Petala akali mendapu-pipa, propeta mokosetamanopa latala, ee doko isoo bisnis pyoo katekena latala, baa yuu londati mendakaita pao katea. ³⁴ Waene wambu pingi gii doko epeamopa, baanya kalai akali mendapuame, ee isakamaingi akali dupa kateamisa pupala, waene baa nyepenge dupa peekena nyala pena lea. ³⁵ Leamo dokonya pateaminopa, ee isakamaingi akali dupame baanya kalai akali dupa minatala, mende pyao indyepa, mende pyao kumaseta, mende kaname pyapa piami. ³⁶ Dopa peteaminopa, akali ee tange dokome, dee kalai akali longo pena lea. Ee dokonya pateaminopa, ee isakamaingi dupame, wamba peamino dupa-kisa piaminoliaka piami. ³⁷ Dopa peteaminopa, akali dokonya ikiningi doko, andanda semaiyamino lao masetala, baa etao pena lea. ³⁸ Wane doko epeamo kandatala, ee isakamaingi dupame nyakamalapo laloo pyoo, ’Wane dakeme takangenya moeya dupa nyepengena, baa pyao kumasetamano doko, baanya moeya nyepenge dupa naima nyetamana’ leami. ³⁹ Dopa latala wane doko minatala, ee dokonya kamalya pyale latala, pyao kumasiamina” Jisasame lea. ⁴⁰ Dopa latala Jisasame dokaita tipa pyoo, “Dopa piami-lumu dokonya, akali ee tange dokome ipupala, ee isakamaingi dupa aipa pitape?” lea. ⁴¹ Dopa leamopa, dokaitame yanu pyao, “Akali ee tange dokome, akali koo dokaita tanda maiyoo, pyao kumaseta. Dopa petala akali waka, waene dii lyao tange maiyakamaipenge, mendapuame ee doko isoo katekena lao, laitaka pitana” leami. ⁴² Dopa leaminopa, Jisasame dokaita lamaiyoo, “Nyakamame pii pepa pyapae silyamo dake, itaki pyala naeyamipi? ’Kapenda dupame, anda pipenge kana mende kandao, koeyapae-lamo latala yakineamino doko, kana mupa jetelyamo. Kana mupa jetelyamo doko, Kamongome pipya-lamo dokonya, naimame eteteaka auu kaeyao, sani kandelyamano’” lapae silyamo. ⁴³ Dopana, ee tange dokome baanya ee doko, akali waka mendapuame, isoo katekena leamoli pyoo, Goteme nyakama daa latala, baanya isingi mate doko, akali waka mendapuame isoo katekena lata. ⁴⁴ Endakali mendeme kana dokonya pao lombapae setamo doko, baa indyuu koeyata. Dee kana doko kolimbatala pyatamo doko, baa indyuu koeyatakana” lea.

⁴⁵ Jisasame dopa leamopa, Parasaipi, pitisa mupapi dupame pii kongali dupa, nyakama kandao lalumuna lao sepala, ⁴⁶ baa anjemana lao kaita kutiami. Kutiaminoaka doko, endakali kambu kateamino dupame, Jisasa baa propetana lao masiaminosa, paka kaeyapala baa yakineami.

Enda Kelyao Nee Andake Yangeana Lao Jisasame Kongali Pii Leamo Doko

(Lk 14:15-24)

¹ Jisasame kongali pii mende deaka dokaita lamaiyoo, “Gotenya isingi mate doko dapale mende: Kiŋi mendenya ikiningi doko, enda keleamopa, takangeme nee andake mende yangakamaiya-pyaa. ³ Kiŋi dokome baanya kalai akali dupame, endakali nee napenge latae dupa lanyala pena lea. Dopa lateamopa, nyakama pupala, nee nala epena lamaiyaminopa, dokaitame nyakama naipumanana leami. ⁴ Dopa piaminosa, baame kalai akali mendatupa pena lao pituu, ’Endakali nee napenge latae dupa kandao, “Bulumakao maipapi, bulumakao andapaepi, dupa pyapalamo. Dupa pitaka depa latae sepelyamona, nyakama dokonya nala ipupa” lapape’ lea. ⁵ Dokopa kalai akali dupame pao lamaiyaminoaka doko, endakali nee napenge latae dupame, pii nepatala, nyakamanya masiaminoli pyoo, mende baanya eenya pea, mende baanya bisnis pyaa pea. ⁶ Dee yangimi kalai akali dupa minatala, mana koo minao pyao kumasiami. ⁷ Dopa piamino doko, kiŋi dokome sepala, imbu kaeya. Imbu kaeyapala baanya yanda singi dupame, kalai akali pyao kumasiamino dupa pyao kumasetala, dupanya taono doko yangala pena lea. ⁸ Dokopa kiŋi dokome baanya kalai akali dupa lamaiyoo, ’Nambanya nee andake doko depa latae sepelyamoaka doko, nee napenge latae endakali dupa mana epe naminingima, dokonyana nee nala naepena daa lelyo. ⁹ Dopana, nyakamame endakali kambu pingi panda dupanya pupala, endakali kandatamino dupa pitaka, nee andake dakenya nala epena lamaiyepape’ lea. ¹⁰ Dopa lateamopa, kalai akali dokaitame kaitini dupanya pupala, endakali koopi epepi kandeamino dupa pitaka laminao, ipao kambu piaminopa, nee andake napenge panda doko, tumbiami. ¹¹ Peteamino dokonya kiŋi dokome ipupala, endakali dokaita kandeamopa, akali mende yonge pee, enda kelyengesa pingi doko napyoo peteamo kandea. ¹² Kandatala kiŋi dokome baa lamaiyoo, ’Kaimia, aipuma embanya yonge pee, enda kelyengesa pingi doko napyoo dakenya epepe?’ lea. Dopa leamopa, akali doko ema napia. ¹³ Dokopa kiŋi dokome baanya kalai akali dupa lamaiyoo, ’Akali dake kingi mokopi yaki petala, kamalya iminjetae, endakali ee lao, yamataka lao, nenge gilyoo katenge dokonya soo pyale lapa’ lea. ¹⁴ Dopana, Goteme endakali longo dupa epena lengeaka doko, baame endakali kuki yapao nyingina,” Jisasame lea.

Muni Takisa Dupa Rome Tange Gapomane Andake Sisa Doko Maipengepe Daape Lao Jisasa Tipa Piamino Doko

(Mk 12:13-17; Lk 20:20-26)

¹⁵ Dokopa Parasai dupame pupala, Jisasame pii mende kopeta latamo dokonya, baa mangenya minamana latala, pii lao kambuiyami. ¹⁶ Dopa petala Parasai dupame, nyakamanya disaipolo mendapuapi, Erote Antipasa tata mendapuapi, dupa Jisasa kateasa pena leami. Dupame pupala Jisasa lamaiyoo, “Mana Lenge Akali, embame akali andake dupa paka nakaeyao, kiningi pii doko tolao lenge. Endakali dupame pipimili lao Goteme masilyamo, dokonya-kaita embame tolao mana lenge. ¹⁷ Dopana, embame aipa lao masili? Gapomane andake Sisa doko, naimame takisa maipengepe, daape?” leami. ¹⁸ Dopa leaminopa, Jisasame baa minao koeyasalanya, makande pilyamini-lamo lao kandatala, dokaita lamaiyoo, “Nyakama Gote watao miningi mane-mane pingima dupame, aipuma namba minao makande pilyamipi? ¹⁹ Takisa maipenge muni konde mende, kandatoo nyoo dyepa” lea. Dokopa muni konde mende maitiaminopa, ²⁰ Jisasame dokaita tipa pyoo, “Muni konde dakenya, apinya lengelyapi, kengepi kalyape?” lea. ²¹ Dopa leamopa, dokaitame yanu pyao, “Sisanya kalyamona” leami. Dopa leaminopa, baame dokaita lamaiyoo, “Sisanya dupa Sisa tange maiyakamaiyepape. Gotenya dupa Gote tange maiyakamaiyepape” lea. ²² Pii yanu pyao leamo doko sepala, dokaitame paka kaeyapala, baa yakinatala peami.

Sadyusi Dupame Jisasa Minao Makande Piamino Doko

(Mk 12:18-27; Lk 20:27-40)

²³ Sadyusi dupame, endakali kumapae dupa sakatala naeyatana lengema. Gii dokopaka, dopa lengema dupa, Jisasa kateasa ipupala baa lamaiyoo, ²⁴ “Mana Lenge Akali, wamba Mosesame mana leamo dokonya, ’Akali mendeme enda nyepala, wane manja naeyao kumatamopa, baanya kaiminingi dokome enda walyakae doko piseta. Baapa enda walyakae dokopa, wane mupa manditambino doko, kaiminingi kumia dokonya lao, manjakamaitana’ lapae silyamo. ²⁵ Gii mendepa akali mendenya, ikiningi 7-pela naima-pipa kateamano dokonya, mupa dokome enda nyepala, wane manja naeyao kumia. Kumateamopa, kaiminingi lapo dokome enda walyakae doko pisia. ²⁶ Pisiamoaka doko, wane namandeamopa, akali doko kumia. Kaiminingi teponge dokome, dopaka pia. Dopaka pyoo, kaiminingi 7-pela dutupa pitakame, enda dokoaka nyepala, wane manja naeyaowaka kumiami. ²⁷ Dokaita kumao ete dokonya, enda doko kumia. ²⁸ Akali kaiminingi 7-pela dutupa pitakame, enda mendai dokoaka nyiamino dokonya, tanga endakali sakatatamino gii dokopa, enda doko apinya jetape?” lao tipa piami. ²⁹ Dopa leaminopa, Jisasame yanu pyao, “Nyakamame pii pepa pyapae singi doko, masala naeyao, Gotenya pupu lapae, doko masala naeyaowaka pingima dokonya, nyakamame kopeta lelyamino. ³⁰ Endakali kumapae dupa dee sakatatamino gii dokopa, akali enda nyala naeyao, enda akali napao, kaitinya enjele dupa katengemali pyoo katatami. ³¹ Endakali kumapae dupa, dee sakatatamino dokonya, Goteme pii lanya seteamo dake, itaki napiamipi? ³² Goteme ’Namba Abrakame, Aisake, Jekopepinya Gotena’ lea. Baa kumapae dupanya Gote daa. Baa saka katenge dupanya Gote. Abrakame, Aisake, Jekopepi dee tanga sakatao katatamina lao, Goteme masala naeyali doko, baa dutupanya Gote laa naeyalina” lea.+ 22:32 Abrakame, Aisake, Jekopepi dee tanga sakatao katatamina lao Goteme masala naeyali doko, baa dutupanya Gote laa naeyalina” lea. Pii datupa buku Baibolo Giriki piimi pyatae dokonya nakalyamoaka doko, tenge doko yalo petae palelyamo.³³ Dopa leamopa, endakali kambu piamino dupame baanya mana leamo dupa sepala, walu lao paka kaeyami.

Mosesanya Loo Dupanya Mupa Doko

(Mk 12:28-34; Lk 10:25-28)

³⁴ Jisasame Sadyusi dupa pii nalena lao, etete auu pyoo yanu pyakamaiyamo sepala, Parasai dupa Jisasa kateasa ipao kapeami. ³⁵ Kapeamino dupanya, Mosesanya loo mana nyepae akali mendeme, Jisasa minao makande pyoo, ³⁶ “Mana Lenge Akali, Mosesanya loo dupanya anduku mupa joo silyape?” lao, tipa pia. ³⁷ Dopa leamopa, Jisasame baa lamaiyoo, “’Embame embanya Kamongo Gote doko, embanya monapi, imambupi, masingipi, dutupa pitakame auu kaeyape.’ ³⁸ Doko loo mupa doko. ³⁹ Loo lapo doko dake: ’Embame emba tange auu kaengeli pyoo, embanya endakali yango dupa auu kaeyape.’ ⁴⁰ Mosesanya loo setapaepi, propeta dupame pepa piamipi, dupa pitaka loo lapoma dolaponya, koko palelyamona” lea.

Kaitini Andukunya-Kaita Mesaeya Doko Dapitinya Yumbangepe Lao Jisasame Tipa Piamo Doko

(Mk 12:35-37; Lk 20:41-44)

⁴¹ Parasai dupa kapatae kateaminopa, Jisasame dokaita tipa pyoo, ⁴² “Nyakamame Mesaeya dokonya yumbange doko, apina lao masilyamipi?” leamopa, “Baa Dapitinya yumbangena” leami. ⁴³ Dopa leaminopa, Jisasame dupa lamaiyoo, “Oli Spiritame lungu piamopa, Dapitimi dapa lea: ’Goteme nambanya Kamongo Mesaeya doko lamaiyoo, “Emba nambanya kingi tolae-kaita piti. Dokonya pititinopa, nambame embanya yandapipi dupa ita minatakala, embanya moko pundi-pundi katena latona’ lao, pyapae silyamo.” Dopa latala Jisasame dokaita tipa pyoo, “Dapitimi Mesaeya doko kandao, baanya Kamongona lea-lumu doko, kaitini andukunya-kaita, Mesaeya doko baanya yumbangena leape? Mesaeya doko baa Dapitinya yumbange iki daa. Baanya Kamongo dokona lao, nyakamame masala naelyamipi?” lea. ⁴⁶ Dopa lateamopa, akali mendeme Jisasanya pii doko kapa pao, yanu pyapenge nanjia. Gii dokonya pituu, akali mendaipi mendeme, baa tipa pyaanya paka kaeyami.

Mosesanya Loo Mana Nyepae Akalipi Parasaipi Dupanya Mana Naminalapape Jisasame Leamo Doko

(Mk 12:38-40; Lk 11:37-52, 20:45-47)

¹ Jisasame endakali kambu andake piamipi, baanya disaipolopi, dupa lamaiyoo, ² “Loo mana nyepae akalipi, Parasaipi, dupame Mosesanya panda nyoo mana lengema. ³ Dopana, dupame nyakama langitamino dupa pitaka pyepape. Dopaka doko, dupame mana lelyaminoli pyoo, nyakama tange watao minala naengemana, nyakamame dopa napyepape. ⁴ Dee dupame kenda pipae dupa, endakali dupanya lataiyanya nyoo sakamaitala, nyakamame kukipi mende nisoo sala naengema. ⁵ Nyakama alyasale joo kalyamano lao masetala, pilyamino dupa pitaka, endakali dupame kandamili laka lao sakao pingima. Dupame Gotenya pii dokonya mendatupa, pepa pyanya bokosa yakane mendenya mandipala, langalunya angatatenge joo petala, mende kinginya kitambu joo pisetala, endakalimi kandamili lao paengema. Dee nyakamanya yonge pee ketae pingi punanya, yati pipae londe dupa, anjinya pyandatala paengemaka. ⁶ Dee Judamanya lotuu lelyamipi, nee andake nelyamipi, dupanya nyakama enomba nyoaka pitipumali laka lao masingima. ⁷ Dee kamapu dupanya endakali dupame, mana lenge akali lao, kingi nyoo, mambo pilyaminopa, dopaka pipimi laka lao masingima. ⁸ Dopa pingimaka doko, nyakamanya Mana Lenge Akali mendai iki kalyamo, dokonya nyakama kaiminingiaka kalyaminona, endakali dupame nyakama kandao, mana lenge akali lena nalalapape. ⁹ Gote kaitinya katenge doko iki, nyakamanya Takangena, nyakamame isa yuu dakenya endakali mende, lalyoo takange laa naeyalapape. ¹⁰ Nyakamanya Akali Andake mendai iki kalyamo, doko baa Kraisana, endakali dupame nyakama kandao, akali andake lena nalalapape. ¹¹ Nyakamanya mendeme akali andake joo katapuli lao, masetamo doko baa, nyakamanya kalai akali joo katapenge. ¹² Endakali mendeme tange kenge minalyoo katatamo doko, baa kenge anasale joo seta. Dee endakali mendeme tange kenge minanao katatamo doko, baa kenge alyasale joo seta.

¹³ “Mosesanya loo mana nyepae akalipi, Parasaipi, nyakama Gote watao miningi mane-mane pingima dupa, koeyatamina kandao kalyepape. Nyakama Gotenya isingi mate dokonya napenge dupame, endakali paanya pipimi dupanya kaita lyokelyamino.+ 23:13-14 Buku Baibolo Giriki piimi wambao pyatae mendatupanya vesa dakenya pii datupa apata lapae palelyamo: “Mosesanya loo mana nyepae akalipi, Parasaipi, nyakama Gote watao miningi mane-mane pingima dupa koeyatamina, kandao kalyepape. Nyakamame enda walyakae dupanya yuu andapi dupa minakasoo nyingima. Dee endakali waka dupame nyakama epena lao masina latala, loma londe pyoo singimaka. Goteme nyakama kenda pipae etete andake maita.”

¹⁵ “Mosesanya loo mana nyepae akalipi, Parasaipi, nyakama Gote watao miningi mane-mane pingima dupa, koeyatamina kandao kalyepape. Nyakamame disaipolo mende nyemana lao kutao, solowata yangitena pata, yuu waka dupanya pata pingima. Dokopa endakali mende nyilyamino doko, nyakamanya mana koeyapae dupa lamailyaminopa, baa etete koenge.

¹⁶ “Akali lenge monda dupame, endakali waka dupa kii miningima-lamo dupa, nyakama koeyatamina kandao kalyepape. Nyakamame endakali dupa mana lamaiyoo pituu, ’Endakali mendeme lotuu anda andake dokonya kenge latala, kiningi etete mende pituna latala, napitamo doko yakaka. Dopaka doko, endakali mendeme lotuu anda andake dokonya golome wasepae, setamo dupanya kenge latala, kiningi etete mende pituna latamo dokome, kaeyala naeyao, latamoli pipengena’ lengema. ¹⁷ Nyakama lenge monda kyakaenge! Lotuu anda andake dokome, golome wasepae andakote silyamo dupa, Gote maitaena lao auu pisingi. Tenge dokonya, golome wasepae andakote silyamo dupame, lotuu anda andake doko ita naminingi. Lotuu anda andake dokome, golome wasepae andakote silyamo dupa, ita miningi. ¹⁸ Dee nyakamame endakali dupa mana lamaiyoo pituu, ’Endakali mendeme lotuu anda andake dokonya, alta dokonya kenge latala, kiningi etete mende pituna latala, napitamo doko yakaka. Dopaka doko, endakali mendeme opa alta ketae setamo dokonya, kenge latala, kiningi etete mende pituna latamo dokome, kaeyala naeyao latamoli pipengena’ lengema. ¹⁹ Nyakama lenge monda daape! Alta dokome opa ketae silyamo dupa, Gote maitaena lao auu pisingi. Tenge dokonya, opa alta ketae silyamo dupame, alta doko ita naminingi. Alta dokome opa, alta ketae silyamo dupa ita miningi. ²⁰ Dopana, endakali mendeme alta dokonya kenge latala, kiningi etete mende pituna latamo doko, opa alta ketae setamo dupa, apata kandao lata. ²¹ Dee endakali mendeme lotuu anda andake dokonya, kenge latala, kiningi etete mende pituna latamo dokome, lotuu anda andake dokonya katenge Gote doko, apata kandao lata. ²² Dee endakali mendeme, kaiti dokonya kenge latala, kiningi etete mende pituna latamo dokome, Gotenya petenge toko dokopa, toko dokonya petenge Gote dokopa, apata kandao lata.

²³ “Mosesanya loo mana nyepae akalipi, Parasaipi, nyakama Gote watao miningi mane-mane pingima dupa, koeyatamina kandao kalyepape. Nyakama lenge monda dupame, endakali waka dupa kii miningima-lamo. Nyakamame takaepi, mondaipi, itamaiyapi, dupa malu 10-pela mokosoo setapala, dutupanya malu mendai Gote maingima. Dopa pingimaka doko, mana epeme endakali tolasingipi, kondo kaengepi, Gote tungi pingipi, loo andake dutupa nyakamame watao naminingima-lamo. Nyakamame loo yakane dupa watao miningimali pyoo, loo andake dupa apata watao minalapape. Dopa napitamino doko, nyakamanya kapo mendenya pongena mende, koko setamo doko, nyoo nepatala, kamele mende nyoo nengekaita goe lapimili dopale-lamo.

²⁵ “Mosesanya loo mana nyepae akalipi, Parasaipi, nyakama Gote watao miningi mane-mane pingima dupa, koeyatamina kandao kalyepape. Endakali mendeme kapopi, pelesapi, ketaetena iki wasa pyatala, koko wasa napingili pyoo, nyakamanya yongeme Gote watao miningi mane-mane petala, nyakama iki lao masingipi, putiti kaengepi, mana dopaleme mona andaka tumbatae kalyamo. ²⁶ Nyakama Parasai dupa lenge monda! Nyakamame kapopi, pelesapi, kaimala pipae dupa koko wambao wasa pyapenge. Pyataminopa, ketaetena wasa pyatae katata.

²⁷ “Mosesanya loo mana nyepae akalipi, Parasaipi, nyakama Gote watao miningi mane-mane pingima dupa, koeyatamina kandao kalyepape. Endakali malu yati petae katengeli pyoo, nyakama kalyamino. Malu ketae yatimi auu pilyamopa, malu koko tamuo, endakali kuli akipi aimi koenge dopale joo nyakama kalyamino. ²⁸ Dokaita joo, nyakamanya yongeme tolatae mane-mane pilyaminopa, mona andaka endakali yango minakasoo, koeyapae mana miningi dupa tumbatae kalyamo.

²⁹ “Mosesanya loo mana nyepae akalipi, Parasaipi, nyakama Gote watao miningi mane-mane pingima dupa, koeyatamina kandao kalyepape. Nyakamame propeta kumiami dupanya, malu-kisa anda epe dupa petala, endakali tolatae kumilyami dupanya, malu dupa yati pisingima. ³⁰ Dopa pyoo pituu, ’Wamba naimanya yumbange kateamino gii dokopa, naima kateamali doko, yumbange dupame propeta dupa pyao kumasiaminopa, naimame yumbange dupa nisala naeyamalina’ lengema. ³¹ Nyakamame dopa lelyamino dokome, nyakama propeta dupa pyao kumasiamino, akali dupanya mandipaena lao panelyamo. ³² Dopana, nyakamanya yumbange dupame kalai piamino doko, nyakamame indupa pyoo etasalapape. ³³ Nyakama koo kanopatonya mandipae dupa, Goteme ele panda koo dokonya watao pyandatamo doko, aipa petala wanditamipi? ³⁴ Nambame propetapi, masepae singi akalipi, mana lenge akalipi, dupa nyakamanya kainanya epena lato. Dopa pitupa, nyakamame dupanya yangi dupa pyao kumasetami. Yangi dupa pyao poko itanya yukutami. Yangi dupa nyakamanya lotuu anda dupanya konjame pyatami. Yangi dupa nyakamame taono mendenya pituu, mendenya watao paeyao pyatami. ³⁵ Nyakamame dopa pitaminosa, wamba akali tolatae kateamino dupa pitaka pyao kumasiami dokonya, tenge doko nyakama-kisa seta. Akali tolatae Abele lenge doko, pyao kumasiami dokonya pituu, Berekia ikiningi Sakaraeya, lotuu anda andakepa, altapa, dolaponya kainanya pyanya seteami, dokonya tuu lao tenge doko, nyakama-kisa seta. ³⁶ Dopa piamino dupa pitakanya, yanu doko endakali indupa palelyamino dupa-kisa, ipatana lao nambame nyakama kiningi langilyona” lea.

Jisasame Jerusalema Tange Dupa Kondo Kaeyao Pii Leamo Doko

(Lk 13:34-35)

³⁷ Jisasame Jerusalema tange dupa kondo kaeyao, “O Jerusalema Jerusalema! Nyakamame propeta dupa pyao kumasoo, Goteme epena latae akali dupa, kaname pyao kumasoaka katengema. Paa longosa, nambame nyakama nyoo kambu pyatala, yaka matakaimi yakane dupa, papa pundi-pundi, yapu nengeli pitoo lao masipupa, nyakamame tanga lelyamino. ³⁸ Goteme nyakamanya lotuu anda andake doko yakinatamopa, anda doko mee katata. ³⁹ Nyakamame ’Akali mende, Goteme epena lapumupa, epelyamo doko Goteme auu pisetaena’ latamino dokopa, nyakamame namba dee kandatamina lao, nambame nyakama langilyona” Jisasame lea.

Lotuu Anda Andake Doko Kaluo Nepatamina Jisasame Leamo Doko

(Mk 13:1-2; Lk 21:5-6)

¹ Jisasame lotuu anda andake, kame doko yakinatala peamopa, disaipolo dupame ipupala baa lamaiyoo, “Lotuu anda andake dakenya makisa, anda auu petae kalyamo datupa kanda” leami. ² Dopa leaminopa, baame dokaita lamaiyoo, “Anda kana soo namba-namba pyoo petae kalyamo, kandelyamino datupa, tanga dopaka petae nakatata. Pitaka pyao kaluo nepatamina” lea.

Kenda Pipae Longo Dupa Ipatana Jisasame Leamo Doko

(Mk 13:3-13; Lk 21:7-19)

³ Jisasa Olipimanda peteamopa, disaipolo dupa elyakalao ipupala baa tipa pyoo, “Embame laleno dutupa, gii andukupa dopa pitape? Gii etatamo dokopi, emba ipateno gii dokopi, dolaponya kongali aipale mende pitamopa kandatamape? Naima langi” leami. ⁴ Dopa leaminopa, Jisasame yanu pyao, “Endakali mendeme nyakama minao kyakasetana, kandao kalyepape. ⁵ Endakali longome nambanya kengenya ipupala, ’Namba Kraisa dokona’ lao, endakali longo minao kyakasetami. ⁶ Yanda pilyamino lapaepi, yanda ingingi lapaepi, dupa sepala, nyakama walu nalalapape. Kenda pipae andake dopale dupa pitaka ipatamoaka doko, yuu etapenge gii doko maitapyao ipata. ⁷ Kantri mendeme kantri mende yanda pimaita, kiŋi mendeme kiŋi mende yanda pimaita pitami. Dee yuu wakale-wakale dupanya, titiwali dupa minata, lopo andake dupa sepa pita. ⁸ Dopa pitamo doko, enda wane manjanya maita pingi dopale joo pita.

⁹ “Gii dokopa nyakama namba tata joo katataminosa, akali tata dupa pitakame, nyakama etete imbu kaengitami. Dopa petala, nyakama anjetala, pyao tanda ditala kumasetami. ¹⁰ Dokopa endakali longome, namba tungi pingima doko yakinatala, nyakamalapo imbu kaeyao pyaloo petala, mende enge nyaa-nyaa pitami. ¹¹ Dee sambo propeta longo mendapuame ipupala, endakali longo dupa minao kyakasetami. ¹² Luiyao koo pingi mana doko andatamopa, endakali longo dupame, endakali yango auu kaenge mana doko yakinatami. ¹³ Dopa pitaminopapi, endakali mende kyeto joo katao etatamo doko, baa Goteme pyoo nyeta. ¹⁴ Gotenya isingi mate dokonya lao, wai pii epe doko endakali dupa pitaka, sina lao lamaitami. Endakali dupa pitaka pii lamaiyoo kapa petataminopa, yuu etapenge gii doko ipatana” lea.

Kenda Pipae Andake Ipatamo Dupa

(Mk 13:14-23; Lk 21:20-24)

¹⁵ Jisasame dee mende lao pituu, “’Gii mendepa akali mendeme myuku pipae mende, lotuu anda andake andakote nyoo setatamopa kandatala, endakali dupame lotuu anda andake doko yakinatami. Dokonya lao wamba propeta Danieleme leamo doko, angi jetamo kandatala, endakali Judia katatamino dupa, paka yuu manda dupanya pupenge jetana” lea. (Pii dake itaki pyateno dokome, tenge doko kutao nyepe.) ¹⁷ Gii dokopa endakali mende, baanya anda patakisa katatamo dokome, baanya oapi andakote setamo dupa nyalanya, andakote pupenge nanjeta. ¹⁸ Dee endakali mende eesa katatamo dokome, baanya yonge pee ketae pingi doko nyalanya, pilyala naeyapengeaka jeta. ¹⁹ Enda wane tongatapi, enda wane andu nengepi, dupa gii dokopa etete kondo pita. ²⁰ Koo kana palitamopapi, Sambata gii palitamopapi, paka napataminopana, nyakama loma soo kalyepape. ²¹ Goteme yuu kaitipi wasiamo dokonya pituu, indupa tuu lao, kenda pipae epelyamo dupa pitaka, kenda pipae ene ipatamo dokome ita minata. Dee kenda pipae dopale mende tanga tangapi naipata. ²² Goteme yuu gii dupa muu pisala naeyatamo doko, endakali mendaipi mende nakatata. Dopaka doko, baanya endakali yapao nyepae dupa lao masetala, kenda pipaepi, yuu giipi, dupa minao muu piseta. ²³ Gii dokopa Gotenya yapao nyepae endakali dupa lanyoo, lemba pyalanya, sambo Kraisa mane-mane pipaepi, sambo propetapi, dupame ipupala, kongalipi, mirakolo kalaipi, dupa pitami. Dopana, endakali mendeme nyakama langyoo, ’Kraisa doko asa kalyamo kanjepa, amasa kalyamo kanjepa’ lea kandeno doko, kiningi lelyamona lao masala naeyalapape. ²⁵ Nambame enesa tanga pitamo dupa langilyona, nyakama kandao kalyepape. ²⁶ Paa mendai, yuu-wapaka pilyamopa, tii pipae doko niki pyakaengesa pituu, niki pambengesa tuu lenge. Dopa pilyamopa, endakali dupa pitakame kandengema. Dopaka pyoo, Akalinya Ikiningi doko ipatamopa, endakali pitakame kandatami. Dopana, endakali mendeme nyakama langyoo, ’Kraisa doko endakali napalenge yuu dokonya kalyamona, kanja pupa’ lea kandeno doko, kanja napupape. Dee endakali mendeme, ’Kraisa doko anda dakenya andakote pilyamona’ lea kandeno doko, kiningi lelyamona lao masala naeyalapape. ²⁸ Yaka lakepame buu minilyamopa, konaiyapi mende kumapae salame-lamo lao kandengema. Dopaka pyoo, kenda pipae dopale dupa ipatamopa, Akalinya Ikiningi doko ipanya tengesa pilyamona lao, kandatamina” lea.+ 24:28 Dopaka pyoo, kenda pipae dopale dupa ipatamopa, Akalinya Ikiningi doko ipanya tengesa pilyamona lao kandatami. Pii datupa buku Baibolo Giriki piimi pyatae dokonya nakalyamoaka doko, tenge doko yalo petae palelyamo.

Akalinya Ikiningi Doko Dee Ipatana Lao Jisasame Leamo Doko

(Mk 13:24-27; Lk 21:25-28)

²⁹ Jisasame dee mende lao pituu, “Kenda pipae andake dupa etalu dokonya, kaitinya singi dupa pitaka ema-ema pita. Dopa pitamopa, niki doko iminjoo, kana doko tii napyoo, kaitinya bui dupa kondao isa ipao pita. ³⁰ Dokopa Akalinya Ikiningi doko ipanya, kongali mende kaitinya pitamopa, yuunya akali tata dupa pitakame kandatala, yako lao ee latami. Dokopa Akalinya Ikiningi doko baanya pupu lapaepi, tii pipaepi, dupanya pituu kopa tambe-tambe ipata. ³¹ Dokopa beto mende puu lao latamopa, yuu lemba dupa pitakanya pituu, enjele dupame endakali yapao nyepae dupa pitaka, lanyoo kambu pina latana” lea.

Piki Ita Dokonya Mana Doko

(Mk 13:28-31; Lk 21:29-33)

³² Jisasame dee mende lao pituu, “Nyakamame piki ita dokonya mana mende nyalapape. Nyakamame piki ita mange popo pyoo, alulyamo doko kandatala, paina pyaanya pilyamona lengema. ³³ Dokaita joo, pitamo dutupa pitaka nyakamame kandatala, Akalinya Ikiningi doko ipanya tengesa petelyamona lao masalapape. ³⁴ Nambame nyakama kiningi langilyo: Endakali indupa palelyamino dupa, kumao etala naeyataminopa, lelyo dupa pitaka pita. ³⁵ Yuupi kaitipi dupa pitaka, alu pitaka doko, nambanya pii doko tanga tangapi alu napitana” lea.

Jisasame Depa Latae Kalyepape Leamo Doko

(Mk 13:32-37; Lk 17:26-30,34-36)

³⁶ Jisasame dee mende lao pituu, “Endakali mendeme Akalinya Ikiningi ipupenge gii doko masala naengema. Kaitinya enjele dupame masala naengemaka. Ikiningi dokome apata masala naengeaka. Takange dokome iki masingi. ³⁷ Wamba Noa kateamo gii dokopa, endakali dupame mana minao kateaminoliaka pyoo katataminopa, Akalinya Ikiningi doko dee ipata. ³⁸ Endakimi napiamopa, endakali dupame nee endakipi dupa nao, akali dupame enda lanyoo, wanaku dupa akali nyala pena lao maiyoo kateami. Dopa pyoaka kateaminopa, Noa sipi andaka kolandeamo, gii doko epea. ³⁹ Dupame aipa pitape lao masala naeyao nao kateaminopa, endaki andake dokome ipupala, dokaita pitaka pyambea. Dopa piana, tanga endakali dupa dopaka pyoo katataminopa, Akalinya Ikiningi doko tanda lao ipata. ⁴⁰ Ipatamo gii dokopa, akali lapoma eenya katatambinopa, dolaponya mende yakinatala, mende enjele dupame lanyoo patami. ⁴¹ Dee enda lapomame palao wasalanya, wita dii takyoo indyuu pititambinopa, dolaponya mende enjele dupame yakinatala, mende lanyoo patami. ⁴² Dopa pitamina, nyakamanya Kamongo doko andukupa ipatape lao, masala naelyaminona, kandao isoo kalyepape. ⁴³ Pii dake salapape: Anda tange mendeme pake nenge akali mende, andukupa ipatape lao masala naenge dokonya, baanya anda doko kalukatamina latala, kandao isoo katenge. ⁴⁴ Dopaka pyoo, Akalinya Ikiningi doko andukupa ipatape lao nyakama masala naelyaminona, kandao isoo kalyepape” lea.

Jisasame Kalai Akali Koopi Epepi Dolaponya Kongali Pii Leamo Doko

(Lk 12:41-48)

⁴⁵ Jisasame dee mende lao pituu, “Kalai akali pii watao miningi, masepae singi mendeme, baanya akali andake dokonya pii seta. Baanya akali andake dokome kalai akali waka dupa isina latala, yuu tependa mendakaita patamopa, baame dokaita isoo katao pituu, nee napenge gii dokonya, nee mokosoo maiyoo katata. ⁴⁶ Katatamopa, akali andake doko pilyetala, kalai akali dokome dopa pyoo katatamo doko kandatala, baa minao auu piseta. ⁴⁷ Nambame nyakama kiningi langilyo: Akali andake dokome baanya oapi dupa pitaka, kalai akali dokomeaka isakao katena lata. ⁴⁸ Dopaka doko, kalai akali koo mendeme, baanya akali andake doko tanga waka ipata-lamona lao masetala, ⁴⁹ baanya kalai akali yango dupa pyapapu, bia nao, kyakao paenge dupa-pipa neepi, biapi nao katatami. ⁵⁰ Dopa pyoo katao, baanya akali andake doko naipapomo lao masoo katatamo gii mendepa, walu lao ipata. ⁵¹ Ipupala akali andake dokome, kalai akali koo doko pyao indyepala, Gote watao miningi mane-mane pipae, dupa-pipa katena lao, ele panda koo dokonya watao pyandata. Dokonya, nyakama ee lao yamataka lao, nenge gilyoo katatamina” Jisasame lea.

Enda Mapukae 10-Pela Dutupanya Jisasame Kongali Pii Leamo Doko

¹ Jisasame dee mende lao pituu, “Gotenya isingi mate doko dapale: Gii mendepa akali mendeme, baanya enda watapae pyala ipatoo lateamopa, enda mapukae 10-pela dutupame, nyakamanya lama kaiyoo minao, kandanyemana latala malisoo peteami. ² Enda dutupanya 5-pela masepae nasingi. Yangi 5-pela dutupa masepae singi. ³ Enda masepae nasingi dutupame, nyakamanya lama dupanya katasini+ 25:3 katasini Giriki piimi, “olipi ipange” lao pepa pyatae silyamo. tumbasetala minao peaminoaka doko, wakao kamuo namandeami. ⁴ Enda masepae singi dutupame, nyakamanya lama dutupanya katasini tumbasetala, wakao kamuo minaowaka peami. ⁵ Pupala akali enda watapae pyapenge doko, yapa naepeamosa, enda dutupa lemonguti leami. ⁶ Lemonguti latala paleaminopa, kuka andatombe dokonya, wii mende epeamo dokome, ’Akali enda watapae pyapenge doko, ae epelyamona, nyakama kandanyalapale ipupa’ lea. ⁷ Dopa leamopa, enda mapukae dutupa pitaka sakatatala, nyakamanya lama dupa depa leami. ⁸ Dokopa enda masepae nasingi dutupame, enda masepae singi dutupa lamaiyoo, ’Naimanya lama datupa konjalanya pilyamona, nyakamanya katasini dupanya mendatupa dyepa’ leami. ⁹ Dopa leaminopa, enda masepae singi dutupame pii yanu pyakamaiyoo, ’Katasini datupame naimapi, nyakamapi, pitaka kapa napapome-lamona, stoa andaka pupala, nyakama waka sambala pupa’ leami. ¹⁰ Dokopa enda dutupa stoa andaka pateaminopa, enda watapae piamo akali doko epea. Epeamopa, enda depa latae peteamino dutupa, baa-pipa enda watapae dokonya, nee nalanya andaka kolandeami. Kolandateaminopa, kaitini doko paii lanyiami. ¹¹ Maitakao enda mapukae masepae nasingi dutupame ipupala, ’Akali andake! Akali andake! Naimanya kaitini lumbakapoko’ leami. ¹² Dokopa baame dokaita lamaiyoo, ’Nyakama kiningi etete langilyo: Nyakama nambame nakandengena’ lea. ¹³ Dopana, Akalinya Ikiningi doko andukupa ipatape lao, nyakamame masala naelyaminona, kandao isoo kalyepape,” Jisasame lea.

Kalai Akali Tepoma Dutupa Muni Maiyamo Dokonya Jisasame Kongali Pii Leamo Doko

(Lk 19:11-27)

¹⁴ Jisasame dee mende lao pituu, “Gotenya isingi mate doko, akali mende baa yuu londati mendakaita patoo latala, baanya kalai akali dupa wii lanyetala, oapi dupa pitaka kandao isoo katekena leamo dopale. ¹⁵ Akali dokome baanya kalai akali dupame, mana kandengemali pyoo, kalai pyaamino lao masetala, muni mokosoo maiya. Mende 5 tausene kina maiya. Mende 2 tausene kina maiya. Mende 1 tausene kina maiya. Dopa petala baa paanya piamo dokonya pea. ¹⁶ Pateamopa, akali 5 tausene kina nyiamo dokome, ongopaka pao, muni dutupame minao kalai petala, dee 5 tausene kina konda pyoo nyia. ¹⁷ Dopaka pyoo, akali 2 tausene kina nyiamo dokome, minao kalai petala, 2 tausene kina konda pyoo nyia. ¹⁸ Akali 1 tausene kina nyiamo dokome, pupala baanya akali andake dokonya muni dutupa yuli pia. ¹⁹ Yuu gii longo pateamopa, akali andake doko dee pilyetala, muni maiyamo dutupanya baanya kalai akali dupa-pipa, pii lao wasalanya epea. ²⁰ Ipateamopa, akali 5 tausene kina nyiamo dokome, 5 tausene kina dee konda pyoo minao ipupala, ’Akali Andake, embame namba 5 tausene kina diino dokonya, nambame 5 tausene kina konda pyoo nyekeona kanda’ lea. ²¹ Dopa leamopa, baanya akali andake dokome baa lamaiyoo, ’Embame yaka pyekee-lamo! Emba akali epe dokomena, nambame leoli pyoo pii-lamo! Embame kalai kuki dutupa, nambame leoli pyoo auu pyoo, isii-lamo dokonya, nambame emba longo dupa isoo kata latoo. Embapa nambapa, mona setao katambana ipu’ lea. ²² Dokopa akali 2 tausene kina nyiamo doko, apata ipupala, ’Akali Andake, embame namba 2 tausene kina diino dokonya, nambame 2 tausene kina konda pyoo nyekeona kanda’ lea. ²³ Dopa leamopa, baanya akali andake dokome baa lamaiyoo, ’Embame yaka pyekee-lamo! Emba akali epe dokomena, nambame leoli pyoo pii-lamo! Embame kalai kuki dutupa, nambame leoli pyoo auu pyoo isii-lamo dokonya, nambame emba longo dupa isoo kata latoo. Embapa nambapa mona setao katambana ipu’ lea. ²⁴ Dokopa akali 1 tausene kina nyiamo doko, apata ipupala, ’Akali Andake, emba akali tomba nenge, nambame kandenge. Embame wakamanya ee waingi pokatae, dupanya nee yukuo mandenge. Dee wakamanya ee waingi lyandatae, dupanya dii lyao mandengeaka. ²⁵ Dopa pingi dokonya, nambame paka kaeyapala, embanya muni dutupa pao yuli piona, embame muni namba diino, dutupa datupakana kanda’ lea. ²⁶ Dopa leamopa, akali andake dokome baa lamaiyoo, ’Emba kalai akali koo, maka-maka kaeyapae-lamona, nambame wakamanya ee waingi pokatae, dupanya nee yukuo mandyuu, wakamanya ee waingi lyandatae dupanya, dii lyao mandengeaka-lumu doko, ²⁷ nambanya muni dutupame, propeta mendatupa mandekena, beŋenya setakateno! Embame dopa pyekeeli kandao doko, nambanya muni dutupanya, wakao mendatupa apata nyipulina” lea. ²⁸ Dopa latala, baanya kalai akali yangi dokaita lamaiyoo, “1 tausene kina doko nyepala, akali 10 tausene kina singi doko maiyepa. ²⁹ Endakali mende-kisa longo setamo kandao doko, baa longoaka konda pyoo maita. Maitamopa, baa-kisa longoaka seta. Endakali nasingi mende-kisa, kuki setamo dutupa, baa-kisa nasina lao tange nyokonyeta. ³⁰ Dopana, nyakamame kalai akali koo dake, kamalya iminjetae endakali ee lao yamataka lao, nenge gilyoo katenge dokonya, soo pyale lapa’ leana” lao, Jisasame lea.

Akalinya Ikiningi Dokome Endakali Dupa Pitaka Yapao Mokosetamo Doko

³¹ Jisasame dee mende lao pituu, “Tanga Akalinya Ikiningi doko, baanya tii pipae-pipa, enjele dupa pitaka-pipa, apata ipao, baanya kiŋi petenge toko dokonya pitita. ³² Dokopa endakali paliu pelyamo dupa pitaka, baanya enombanya nyoo kambu pyatami. Dopa pitaminopa, sipisipi setao katenge mendeme, sipisipi memepi yapao wakale pyoloo pingili pyoo, endakali dupa yapao mokoseta. ³³ Mokosoo pituu, baame sipisipi dupa baanya kingi tolae-kaita katena lata. Meme dupa baanya kingi koeya-kaita katena lata. ³⁴ Dokopa kiŋi dokome kingi tolae-kaita katatamino dokaita lamaiyoo, ’Nyakama nambanya Takangeme auu pisetae. Yuu kaitipi tee piamo dokopa, baanya moeya doko nyakama nyetamina latala, baanya isingi mate dokonya, depa lanya setekeamo doko nyala ipupa. ³⁵ Wamba namba lopo kaeyopa, nyakamame namba nee diami. Endaki nanu kaeyopa, namba endaki kamuo diami. Opone joo epeopa, namba nyoo setao paleami. ³⁶ Yonge pee napyoo kateopa, namba yonge pee diami. Yaina siopa, namba kandao nisiami. Anjetae paleopa, namba kanja epeamina’ lata. ³⁷ Dopa latamopa, endakali tolatae dupame yanu pyao, ’Akali Andake, naimame andukupa lopo kaeyenopa, emba nee diamape? Andukupa endaki nanu kaeyenopa, emba endaki kamuo diamape? ³⁸ Andukupa opone joo epenopa, emba nyoo setao paleamape? Andukupa yonge pee napyoo katenopa, emba yonge pee diamape? ³⁹ Andukupa yaina siinopa, emba kandao nisiamape? Andukupa anjetae palenopa, emba kanja epeamape?’ latami. ⁴⁰ Dopa lataminopa, kiŋi dokome dokaita lamaiyoo, ’Nambame nyakama kiningi langilyo: Nambanya kaiminingi datupanya, koo kenge nasingi mende nisiamino dokome, namba nisiamiakana’ lata.

⁴¹ “Dopa latala, baame kingi koeya-kaita katatamino dokaita lamaiyoo, ’Nyakama watao pyatae dupa namba yakinatala, Satanepi, Satanenya enjele koopi, dupanya itate konjala naenge, setakamaiyamo dokonya pupa. ⁴² Wamba lopo kaeyopa, nyakamame namba nee nandiami. Endaki nanu kaeyopa, nyakamame namba endaki kamuo nandiami. ⁴³ Opone joo epeopa, nyakamame namba nyoo setao napaleami. Yonge pee napyoo kateopa, nyakamame namba yonge pee nandiami. Yaina siopa, nyakamame namba kandao nisala naeyami. Anjetae paleopa, nyakamame namba kanja naepeamina’ lata. ⁴⁴ Dopa latamopa, dokaitame yanu pyao, ’Akali Andake, andukupa emba lopo kaeyenopapi, endaki nanu kaeyenopapi, opone joo epenopapi, yonge pee napyoo katenopapi, yaina siinopapi, anjetae palenopapi, naimame kandatala, nisala naeyamape?’ latami. ⁴⁵ Dopa lataminopa, kiŋi dokome dokaita lamaiyoo, ’Nambame nyakama kiningi langilyo: Nyakamame endakali datupanya, koo kenge nasingi mende, nisala naeyamino dokome, namba nisala naeyamiakana’ latana,” Jisasame lea. ⁴⁶ Dopa latala, Jisasame endakali pii soo kateamino dupa lamaiyoo, “Endakali kingi koeya-kaita katatamino, dokaita tanda nao, leke-leke tao, etete katatami. Dopaka doko, endakali tolatae dupa, lete etete katenge doko nyetamina,” Jisasame lea.

Jisasa Pyao Kumasemana Lao Kambuiyamino Doko

(Mk 14:1-2; Lk 22:1-2; Jn 11:45-53)

¹ Jisasame pii manapi dokaita pitaka lamaiyoo etapala, baanya disaipolo dupa lamaiyoo, ² “Napinya Kaeyamo Pasopa gii doko ene ipanya pimupa, yuu gii lapoma silyamo doko, nyakamame masilyamino. Gii dokopa, Akalinya Ikiningi doko poko itanya pyao yukuina lao, yanda singi dupanya kingilyaka maitana” lea.

³ Gii dokopaka pitisa mupapi, Judamanya isingi akalipi, dupa pitisa mupa dupanya, aiyomba Kaeyapasa lenge dokonya, andaka pii lao kambuiyami. ⁴ Kambuingi dokonya pituu, nyakamame aipa petala Jisasa waa katao, anjoo nyepala pyao kumasemape lao, kaita kutiami. ⁵ Kutapala lao pituu, “Aopyoo latala endakali dupame pyao pitamina, gii epe dokonya dopa napimana” leami.

Enda Mendeme Jisasanya Aiyombanya Wele Kaii Lakamaiyamo Doko

(Mk 14:3-9; Jn 12:1-8)

⁶ Jisasa baa taono Betani dokonya, akali kopetali Saimone lenge dokonya andaka, nee nao petea. ⁷ Peteamopa, enda mendeme penge yakane mendenya, wele tunduma pipae, muni andake pupenge tumbatae mende minao epea. Ipupala Jisasanya aiyombanya, wele doko kaii lakamaiya. ⁸ Kaii lakamaiyamo doko kandatala, “Wele dake endakalimi sambaminopa, muni andake nyepala, endakali daa jepae dupa maipumalina, aipuma wele dake baame mee pyoo nepelyape?” lao, disaipolo dupame imbu kaeyami. ¹⁰ Dopa leamino doko Jisasame sepala, dokaita lamaiyoo, “Baame namba-kisa kalai epe etete mende pilyamona, aipuma nyakamame enda dakenya mona kenda pisakamailyamipi? ¹¹ Endakali daa jepae dupa koteaka lao nyakama-pipa apata katatamiaka doko, namba nyakama-pipa gii longo mende, kalya naeyalamano. ¹² Enda dakeme wele tunduma pipae, kaii lakalamo dokome, nambanya yonge doko malu pipenge dokonya depa lasoo pyakalamo. ¹³ Nambame nyakama kiningi langilyo: Yuu dupa pitakanya, wai pii epe doko lao taeyatamino gii dokopa, enda dakeme pilyamo dupa apata masina lao, taeyatamina” lea.

Jisasa Enge Nyalanya Pii Lao Kambuiyamino Doko

(Mk 14:10-11; Lk 22:3-6)

¹⁴ Judasa Iskariota lenge doko, 12 disaipolo dutupanya mende, baa pitisa mupa dupa kateamisa pupala, ¹⁵ dokaita tipa pyoo, “Nambame Jisasa nyakama laitaka pitoo, nyakamame namba aki mende ditamipi?” lea. Dopa leamopa, dokaitame baa silipa muni 30 maiyami. ¹⁶ Gii dokopa pituu, Judasame pitisa dokaita Jisasa laitaka pyaanya, kaitini kutia.

Napinya Kaeyamo Pasopa Nee Neamino Doko

(Mk 14:12-21; Lk 22:7-14,21-23; Jn 13:21-30)

¹⁷ Israele tange dupame betesa yisa napalenge nengema, yuu gii tee pyao dokonya, disaipolo dupame Jisasa kateasa ipupala baa lamaiyoo, “Napinya Kaeyamo Pasopa nee doko, naimame anja depa lamape?” leami. ¹⁸ Dopa leaminopa baame dokaita lamaiyoo, “Nyakamame Jerusalema pupala, akali mende kanjaminona, doko lamaiyoo, ’Mana Lenge Akali dokome, baanya gii doko tengesa petelyamona, Napinya Kaeyamo Pasopa nee doko, baanya disaipolo dupa-pipa, embanya andaka natoo lalamona’ lao lamaiyepape” lea. ¹⁹ Dokopa disaipolo dupame Jisasame leamoli pyoo, nee akipi depa leami.

²⁰ Yuu kuiyala peamopa, Jisasa baanya 12 disaipolo dutupa-pipa, nee nao peteami. ²¹ Nee nao pituu, baame dokaita lamaiyoo, “Nambame nyakama kiningi langilyo: Nyakamanya mendeme, namba enge nyipumu dokome, namba pyao kumasepenge akali dupa laitaka pyaapomona” lea. ²² Dopa leamopa, nyakama mona etete kenda kaeyapala, baa tipa pyoo, “Kamongo, doko namba kandao leepe?” lao laa-laa peami. ²³ Dopa leaminopa Jisasame yanu pyao, “Nee disanya poeyanyoo nao, apata pilyamano dakenya mendeme, dopa pyaapomo. ²⁴ Akalinya Ikiningi doko kumatana lao, pepa pyapae singi dokonya, dopaka pita-lamo. Dopaka doko, akali enge nyetamo doko, koeyata-lamo. Endangimi baa namandeali, doko yaka jialina” lea. ²⁵ Dopa leamopa, Jisasa enge nyiamo akali Judasa dokome, baa lamaiyoo, “Mana Lenge Akali, embame leeno doko, namba lao leepe?” lea. Dopa leamopa, Jisasame baa lamaiyoo, “Emba tangeme leleno dokoakana” lea.

Jisasame Betesa Waenepi 12 Disaipolo Dutupa Maiyamo Doko

(Mk 14:22-26; Lk 22:15-20; 1Ko 11:23-25)

²⁶ Nyakama nee nao pituu, Jisasame betesa mende nyepala, Gote lao yaka pilino latala konjia. Konjepala baanya disaipolo dupa maiyoo pituu, “Dake nambanya yonge dokona, nyoo nalapa” lea. ²⁷ Dopa latala baame kapo waene peteta mende nyepala, Gote lao yaka pilino latala, dokaita maiyoo pituu, “Nambanya taiyoko kaii lelyo dakeme, endakali longo dupa pitakanya, koo dupa kunao nepao, Goteme pii enenge mende lao setekelyamona, nyakama pitakame nyoo nalapa. ²⁹ Nambame nyakama langilyo: Namba dee waene nala naeyaowaka katao, tanga nambanya Takangenya isingi mate dokonya, waene enenge doko nyakama-pipa apata natamana” lea. ³⁰ Dopa lateamopa, dokaitame wee mende latala, kamaka pyakalyetala, Olipimanda peami.

Jisasame Pita Kandao Embame Namba Nakandengena Laapenona Leamo Doko

(Mk 14:27-31; Lk 22:31-34; Jn 13:36-38)

³¹ Dokopa Jisasame dokaita lamaiyoo, “Goteme dapa lea: ’Sipisipi setao katenge doko pyatopa, sipisipi dupa wakale saa latamina’ lao, pii pepa pyapae silyamo. Lapae silyamoliaka pyoo, indupa kuka gii dakepa, kenda pipae namba-kisa ipatamo kandatala, nyakama pitakame namba soo yakinalamino. ³² Dopaka doko, Goteme namba dee sakatasetatamopa, nyakama Galilea paa naeyataminopa, namba wambao patona” lea. ³³ Dokopa Pitame Jisasa lamaiyoo, “Disaipolo dupa pitakame emba soo yakinatala pataminopa, nambame emba yakinala naeyatona” lea. ³⁴ Dopa leamopa, Jisasame baa lamaiyoo, “Nambame emba kiningi langilyo: Indupa kuka gii dakenya, yaka pauli pii ene laanya pitamopa, paa tepomasa embame namba nakandengena laapenona” lea. ³⁵ Dopa leamopa, Pitame baa lamaiyoo, “Nambame emba yakinala naeyato. Emba kumateno dokonya namba apataka kumatambana” lea. Dokopa disaipolo yangi dupa pitakame dopaka leami.

Gesemani Ee Dokonya Jisasame Loma Siamo Doko

(Mk 14:32-42; Lk 22:39-46)

³⁶ Dopa lateaminopa, Jisasa baanya disaipolo dupa-pipa, Gesemani ee dokonya peami. Pupala baame dupa lamaiyoo, “Namba omosale loma sala pelyona, nyakama asa pilyepa” lea. ³⁷ Dokopa Jisasa baa mona kenda kaeyapala, Pitapi, Sebedi ikiningi dolapopi laminao umbisale pea. ³⁸ Pupala dutupa lamaiyoo, “Nambanya mona doko etete kenda pipaeme putukupala, kumapenge julumuna, nyakama asa kandao katamana kalyepape” lea. ³⁹ Dopa latala baa kuki umbisale pao, yuunya tombauli sepala, loma soo pituu, “Apane, embame namba-kisa kenda pipae silyamo dake, nyoo nepakapenge jia kandeno doko, nyoo nepakape. Embame namba-kisa kenda pipae silyamo dake, nyoo nepaka lapuliaka doko, nambame masilyo dokonya-kaita napipi. Embame masilino dokonya-kaita pipi” lea. ⁴⁰ Dopa lao loma sepala ipao kandeamopa, disaipolo dutupa luu palyasiamisa, baame Pita lamaiyoo, “Nyakama aipuma namba-pipa, awa mendai iki dokonya kandao isoo nakatalamipi? ⁴¹ Kiningi etete, nyakamanya moname pyuani kaeyapumupa, yongeme papa tambulyamona, makande pingi dupanya nyakama pao koeyatamina, loma soo kandao isoo kalyepape” lea. ⁴² Dopa latala Jisasa paa lapo pyoo loma sala pea. Loma soo pituu, “Apane, kenda pipae epelyamo dake, namba-kisa epena lao kaeya kandeno doko, embame masilino dokonya-kaita pipi” lea. ⁴³ Loma sepala dee ipao kandeamopa, disaipolo dutupa lemonguti kaeyapala, luu paliu siami. ⁴⁴ Paliu sina latala, baa paa tepo pyoo loma sala pea. Pupala wamba loma siamo dutupaka sia. ⁴⁵ Loma sepala dee ipao disaipolo dutupa lamaiyoo, “Nyakama mee luaka paliu silyamipi? Namba enge nyipumu akali doko ipatelyamo. Akalinya Ikiningi doko, koo pingi endakali dupa laitaka pyaapomo, gii doko ipatelyamona, mona sakatalapa” lea.

Jisasa Minatala Anjiamino Doko

(Mk 14:43-50; Lk 22:47-53; Jn 18:3-12)

⁴⁷ Jisasame dopa lao kateamopa, baanya 12 disaipolo dutupanya mende, Judasa lenge doko epea. Epeamo dokonya, endakali kambu andake mende, konja-wua, kolyepepi dupa minao, baa apata epeami. Dupa pitisa mupapi, Judamanya isingi akalipi, dupame pena leaminosa epeami. ⁴⁸ Jisasa enge nyiamo akali dokome, wambao endakali kambu doko lamaiyoo, “Nambame akali mende nunu pitu dokona, nyakamame baa minatala anjalapape” lea. ⁴⁹ Dopa lamaitala ipao baa Jisasa kateasa tolao pupala, “Mana Lenge Akali, kuakama!” lea. Dopa latala baa nunu pia. ⁵⁰ Dopa piamopa, Jisasame baa lamaiyoo, “Kaimia, embame pyaanya epeno doko pipoko” lea. Dokopa endakali kambu dokome, Jisasa minatala anjiami. ⁵¹ Anjeteaminopa, Jisasa-pipa apata kateamino dupanya mendeme, baanya konja-wua doko kolanyetala, pitisa mupa dupanya aiyomba dokonya, kalai akali mendenya kale lyanya nepea. ⁵² Dopa piamopa, Jisasame baa lamaiyoo, “Embanya konja-wua doko palenge andanda dokonya, mandi. Konja-wua miningi dupa, konja-wuameaka kumingi. ⁵³ Nambame nambanya Takangeme, namba nisina lao wii lalu pipupa, baame enjele 72 tausenepi mende, epena lapyalina lao masala naelepe? ⁵⁴ Namba nisina lapuli doko, kenda pipae dake namba-kisa, dopa pyoo ipupengena lao, pii pepa pyapae singi doko dii manja naeyapyalina,” Jisasame lea. ⁵⁵ Dopa latala, baame endakali kambu doko lamaiyoo, “Nyakamame pake nenge mende, anjala epele lao konja-wuapi, kolyepepi, dupa minao namba anjala epelyamipi? Nambame koteaka lao lotuu anda andake dokonya, endakali dupa mana lamaiyoo kateo dokopa, nyakamame namba anjala naeyami. ⁵⁶ Dopaka doko, wamba propeta dupame pii pepa piami dupa, angi jina lao, dutupa pitaka pilyamona” lea. Dokopa disaipolo dupa pitakame Jisasa yakinatala, paka pyakao peami.

Jisasa Kote Laa Peamo Doko

(Mk 14:53-65; Lk 22:54-55,63-71; Jn 18:13-14,19-24)

⁵⁷ Dokopa Mosesanya loo mana nyepae akalipi, Judamanya isingi akalipi, dupa pitisa mupa Kaeyapasa kateasa ipao kambu piami. Kambu piamino dokonya, Jisasa anjoo laminao epeami. ⁵⁸ Dokopa Pita waa katao, maitanya Jisasa watao pea. Pupala pitisa mupa dupanya aiyomba dokonya, anda kamapusa kolamatala, aipa pilyamipi lao kandatoo latala, yanda singi dupa-pipa petea. ⁵⁹ Pitisa mupapi, kanjole kambuingi andake dokomepi, Jisasa pyao kumasemana latala, akali mendapuame baa-kisa sambo pii setao, kote lena lao kutiami. ⁶⁰ Dokopa akali longo ipupala, Jisasa-kisa sambo pii setao, kote leami. Dopa leaminoaka doko, baa pyao kumasepenge tenge mende kandao nanyiami. Etao dokonya, akali lapoma ipupala ⁶¹ lao pituu, “Akali dakeme, ’Gotenya lotuu anda andake doko, kapa pao lakyepala, yuu gii teponya pituna’ leana” leambi. ⁶² Dokopa pitisa mupa dupanya, aiyomba dokome toeya katapala Jisasa lamaiyoo, “Pii emba-kisa tenge setao lelyambino dake, aipuma yanu napilipi?” lea. ⁶³ Dopa leamoaka doko, Jisasa ema napia. Dopa piamosa, pitisa mupa dupanya aiyomba dokome, dee baa lamaiyoo, “Gote saka katenge dokome kandao kalyamona, embame pii tolao kiningi doko naima langi. Emba Gote Ikiningi, Kraisa dokope?” lea. ⁶⁴ Dopa leamopa, Jisasame baa lamaiyoo, “Embame leleno dokoakana, nambame nyakama dapa langilyo: Akalinya Ikiningi doko, Gote etete pupu lapae dokonya kingi tolae dokonya pituu, tanga kaitinya kopa tambe-tambe ipatamopa, nyakamame kandatamina” lea. ⁶⁵ Dopa leamo sepala, pitisa mupa dupanya aiyomba dokome, baa tangenya yonge pee dupa minao lapyepala, lao pituu, “Baame Gote lamba lao pii lelyamo doko, nyakamame sepelyamino. Aipuma endakali mendapuanya pii deaka nyemanape? ⁶⁶ Nyakamame aipa pimana lao masilyamipi?” lea. Dopa leamopa dupame, “Baa pyao kumasepengena” leami. ⁶⁷ Dopa latala, baanya lengelyapinya sopokalimi pyapa, kimiame pyapa piami. Dee mendapuame baa kingi kapame pyao pituu, ⁶⁸ “Emba kini propeta-tamo doko, emba akali dokome pyalumu lao naima langi” leami.

Pitame Jisasa Nakandengena Leamo Doko

(Mk 14:66-72; Lk 22:56-62; Jn 18:15-18,25-27)

⁶⁹ Pita anda kamapusa peteamopa, pitisa mupa dupanya aiyomba dokonya, kalai pyakamaiyoo petenge wanaku mendeme ipupala, baa lamaiyoo, “Emba Galilea tange Jisasa dokopa apata katengembana” lea. ⁷⁰ Dopa leamopa, Pitame endakali kateamino dupanya enombanya tanga lao, “Embame leleno doko namba nakandengena” lea. ⁷¹ Dopa latala baa lome kambusa peamopa, kalai wanaku waka mendeme kandatala, endakali dosa kateamino dupa lamaiyoo, “Akali dake Nasarete tange Jisasa dokopa, apata katengembana” lea. ⁷² Dokopa Pitame deaka tanga lao, “Goteme namba kandao katamupa lelyo. Akali leeno doko nakandenge daana” lea. ⁷³ Gii kuki pateamopa, akali dosa kateamino dupame ipupala, Pita kandao, “Embanya pii dokome panalumuna, kiningi etete emba akali dupanya mendeaka-lamona” leami. ⁷⁴ Dopa lateaminopa, Pitame lao pituu, “Namba akali doko nakandengena, sambo lato doko, Goteme namba pinana” lea. Dopa lalu piamopa, yaka pauli pii mende lea. ⁷⁵ “Yaka pauli pii ene laanya pitamopa, embame paa tepomasa, namba nakandengena laapenona,” Jisasame leamo dutupa masetala, Pita kamaka pyakalyetala, putukuo ee lea.

Jisasa Anjoo Pondiasa Pailate Maiyamino Doko

(Mk 15:1; Lk 23:1-2; Jn 18:28-32)

¹ Oo yongama wamba, pitisa mupapi, Judamanya isingi akalipi, dupa pitakame Jisasa pyao kumasemana latala, lao kambuiyami. ² Dopa petala dupame Jisasa anjetala, laminao pao, Gapena Pondiasa Pailate maiyami.

Judasa Kumiamo Doko

(Ap 1:18-19)

³ Jisasa pyao kumasemana leamino doko kandatala, Jisasa enge nyiamo akali Judasa doko mona kenda kaeyapala, silipa muni 30 nyiamo dutupa minao pupala, pitisa mupapi, Judamanya isingi akalipi, dupa tange maiyakamaiya. ⁴ Maiyakamaiyoo pituu, “Akali tenge nakatenge mende, nambame enge nyipu doko, nambame kopeta pipu-lamona” lea. Dopa lamaiyamopa dokaitame, “Doko embanya kalai. Naimanya kalai mende daana” leami. ⁵ Dokopa Judasame muni dutupa, lotuu anda andake dokonya kainanya pyale latala pea. Pupala baa tange mangenya kende katatala, yukutae katao kumia.

⁶ Pitisa mupa dupame silipa muni dutupa yapao nyepala, “Endakali pyao kumasalanya muni datupame, enge nyepae dokonya, lotuu anda andakenya muni singi dokonya, setala naeyapengena” leami. ⁷ Dokonya dupame pii lao yaki petala, endakali waka kumatami dupa malu pipengena lao, akali yuumi endaki penge wasingi dokonya, yuu doko muni dutupame sambeami. ⁸ Tenge dokonya, yuu sambeamino doko kenge Taiyokosa lengema. ⁹ Dopa piamino dokome, wamba propeta Jeremaeyame lao pituu, “Israele tange dupame, akali mendai silipa muni 30 dutupame, sambao nyepengena lao, makande miniamino dutupa nyetami.+ 27:9-10 nyetami Giriki piimi, “nyiami” latae kalyamo. Nyepala Kamongo dokome namba langiamoli pyoo, akali yuumi endaki penge wasingi dokonya, yuu doko sambatamina”+ 27:9-10 sambatamina Giriki piimi, “sambeamina” latae kalyamo. leamo doko, angi jia.

Pailateme Jisasa Tipa Piamo Doko

(Mk 15:2-5; Lk 23:3-5; Jn 18:33-38)

¹¹ Jisasa baa Gapena Pondiasa Pailatenya, enombanya laminao pao katasiaminopa, Pailateme baa tipa pyoo, “Emba Judamanya Kiŋi dokope?” lea. Dokopa Jisasame, “Embame leleno dokoaka” lea. ¹² Dokopa pitisa mupapi, Judamanya isingi akalipi, dupame baa-kisa tenge seteaminopa, baa ema napia. ¹³ Dopa piamopa, Pailateme baa lamaiyoo, “Emba-kisa tenge longo setao, pii lelyamino dupa embame nasilipi?” lea. ¹⁴ Dokopa Jisasame pii leamino, dupanya mendaipi mende yanu pyala naeyamosa, gapena doko etete paka kaeya.

Pailateme Jisasa Pyao Kumasina Leamo Doko

(Mk 15:6-15; Lk 23:13-25; Jn 18:39–19:16)

¹⁵ Ee kana dii lao, Napinya Kaeyamo Pasopa gii doko epelyamoli pyoo, Pailateme akali anjetae dupanya mende, endakali dupame mokekena lelyamili pyoo, mokata pyakamaingi. ¹⁶ Gii dokopa akali Barabasa lenge mende, pundunya kenge singi doko anjetae palea. ¹⁷ Pitisa mupa dupame Jisasa-pipa tilya nyepala, baa anjoo dimini-lamo lao kandatala, Pailateme endakali kambu kateamino dupa tipa pyoo, “Nambame api mokakaowape? Barabasape, pande Jisasa Kraisa lengema dokope?” lea. ¹⁹ Pailateme disisene pyaanya peteamopa, baanya etanengeme, “Nambame kuakama akali tolatae dokonya, kombea koo mende pyoona, embame baa mende napipi” lanya pea. ²⁰ Dokopa pitisa mupapi, Judamanya isingi akalipi dupame, “Barabasa mokekena, Jisasa pyao kumasina lapape,” lao endakali kambu dupa, ingi tuu leami. ²¹ Dopa piaminopa, Pailateme endakali kambu dupa deaka tipa pyoo, “Nambame akali lapoma dolaponya, anduku nyakamanya mokakapili lao masilyamipi?” lea. Dopa leamopa, dokaitame yanu pyao, “Barabasana” leami. ²² Dokopa Pailateme dokaita lamaiyoo, “Dopa-tamo doko, nambame Jisasa Kraisa lengema doko, aipa pyuape?” lea. Dopa leamopa dokaitame, “Poko itanya pyao yuku!” leami. ²³ Dopa leaminopa, baame dokaita lamaiyoo, “Baame koo aki mende pipyape?” lea. Dopa leamopa, dokaitame eteteaka puu lao, “Baa pyao yuku!” leami. ²⁴ Pyao yuku leamino dokome, pundu andake mende sakatatamopa, Pailateme mende pyaa naeyalapo-lamo lao kandea. Kandatala baame endakali kambu dokonya enombanya, kingi wasa pyao pituu, “Akali dakenya taiyoko doko, namba-kisa nakatenana, nyakama tange-kisa katena peekelyona” lea. ²⁵ Dopa leamopa, endakali dupa pitakame, “Baanya taiyoko doko naimapi, naimanya wanepi, dupa-kisa sina kaeya!” leami. ²⁶ Dokopa Pailateme Barabasa mokatala, Jisasa konjame pyapala, pyao yukuina lao yanda singi dupa maiya.

Yanda Singi Dupame Jisasa Lamba Leamino Doko

(Mk 15:16-20; Jn 19:2-3)

²⁷ Dokopa gapenanya yanda singi dupame, Jisasa lanyoo gapomane anda kamapu dokonya pyakamatala, yanda singi waka dupa lanyoo ipao kambu piami. ²⁸ Dopa petala dupame baanya yonge pee dupa, lyokao nyepala, kiŋinya yonge pee kala pepola jepae mende, baanya pyakamaiyami. ²⁹ Dee kende nenge-nenge katapae mende nyoo, makipu petala, Jisasanya aiyombanya pisetala, kiŋinya pangali jepae mende, baanya kingi tolae-kaita minasiami. Dopa petala baa lamba lao, luma lakao, mambo pyao, “Judamanya Kiŋi, emba auu pyoo katape!” leami. ³⁰ Dopa latala dupame baa sopokalimi pyapa, keoo konjame aiyombanya pyapa piami. ³¹ Dopa pyoo etapala, yonge pee wamba pyakamaiyamino doko lyokao nyepala, baanya pingi dupa pyakamaiyami. Dopa petala, baa pyao yukulanya laminao peami.

Jisasa Poko Itanya Pyao Yukuiyamino Doko

(Mk 15:21-32; Lk 23:26-43; Jn 19:17-27)

³² Kamaka pyakalyiaminopa, akali Sairini tange Saimone lenge mende kandanyetala, yanda singi dupame baa pyalanya latala, Jisasanya poko ita doko nyoo sakamaina leami. ³³ Sina latala, yuu manda kenge Gologota lenge dokonya pao pyakalyiami. (Manda Gologota dokonya tenge doko, “Matena Kuli.”) ³⁴ Gologota pyakalyetala, yanda singi dupame baa tanda kaeyala naena lao, waene matasini-pipa wasepala maiyaminopa, baame nao sepala, nanenya kaeya. ³⁵ Dokopa yanda singi dupame baa poko itanya pyao yukuiyami. Yukutala baanya yonge pee wamba lyokeamino dupa setapala, yanda singi dupame apimi yonge pee dupanya mende, nyilyape kandamana latala lakii piami. ³⁶ Dopa petala dupame Jisasa kandatae peteami. ³⁷ Jisasa-kisa tenge seteamino pii doko, “Dake Jisasa, Judamanya Kiŋi dokona” lao pepa pyatae, doko poko ita ketae dokonya yukuiyami. ³⁸ Dokopa akali pake nenge lapoma, Jisasa-pipa apata pyao yukuiyami. Mende doko baanya kingi tolae-kaita yukuiyami. Mende doko baanya kingi koeya-kaita yukuiyami. ³⁹ Jisasa pyao yukutae kateamo dokonya-kaita, endakali paeyamino dupame, baa lamba lao, aiyomba wangatoto pyoo, ⁴⁰ “Embame lotuu anda andake doko lakyepala, yuu gii teponya waka mende pituna leeno dokae! Emba Gotenya Ikiningi-tamo doko, emba tange pyoo nyoo, poko ita doko yakinatala, isa ipu” leami. ⁴¹ Mendai dopaka pyoo, pitisa mupapi, Mosesanya loo mana nyepae akalipi, Judamanya isingi akalipi, dupame Jisasa lamba lao, ⁴² “Baame endakali waka dupa pyoo nyipumuaka doko, baa tange kapa pao pyoo nyala naenge-lamo. Baa Israelemanya Kiŋi daape, epapu poko ita doko yakinatala, isa epena kaeya. Yakinatamo doko, naimame baa lao masoo minamanalena” leami. ⁴³ Baa Gotenya Ikiningina latala, Gote tungi pingi daape. Goteme baa nea kaeyatamo doko, epapu baa pyoo nyina kaeya” leami. ⁴⁴ Akali pake nenge baa-pipa, apata pyao yukutae kateambino dolapome, mendai dopaka pyoo, baa-kisa lamba pii kando piambi.

Jisasa Kumiamo Doko

(Mk 15:33-41; Lk 23:44-49; Jn 19:28-30)

⁴⁵ Jisasa yukutae kateamopaka, 12 kilokonya pituu yuu kuiya. Kuiyamo doko, kuiyataeyaka katao pao, 3 kilokonya tuu lea. ⁴⁶ Dokopa Jisasame etete puu lao wii lao, “Ilai, Ilai, lema sabatani?” lea. (Pii dokonya tenge doko, “Nambanya Gote, nambanya Gote, embame namba aipuma yakinelepe?”) ⁴⁷ Dopa leamo doko endakali dosa kateamino dupanya, mendapuame sepala, “Ilaija lao wii lelyamona, salapape” leami. ⁴⁸ Dopa lateaminopa, akali mendeme alo pyao pao, koma jepae mende itakulimi tuku petala, waene kaa pipae mendenya poeyanyetala, Jisasa nena lao makapusakamaiya. ⁴⁹ Endakali yangi dupame lao pituu, “Ilaijame baa pyoo nyala epelyape lao kandamana, kaeyalapa” leami. ⁵⁰ Dokopa Jisasame eteteaka puu lao ae latala, baa kumia. ⁵¹ Dokopa lotuu anda andake dokonya, lapalapa andake mendeme, nee nyetae katenge panda dokonya, kame pinyetae katenge doko, ketae pituu titi pyao, isa tuu latala lapo pyoloo pia. Dopa piamopa, yuu doko titiwali minao, kana yale dupa pukutala, saa laloo pia. ⁵² Endakali malu dupa pukuloo petala lumbiamopa, Gotenya endakali kumapae malu petae kateamino, longo dupa sakatasia. ⁵³ Sakataseteamopa, nyakamanya malu dupa yakineami. Maitakao Jisasa sakateamo dokopa, nyakama Jerusalema peaminopa, endakali longo dupame kandeami. ⁵⁴ Yanda singi isingi akali dokopi, baa-pipa apata Jisasa isoo kateamino dupapimi, titiwali miniapi, waka tata longo mendapu piamo dupa pitaka, kandao etete paka kaeyapala, “Kiningi etete, akali dake Gote Ikiningi-lamona” leami. ⁵⁵ Maria Magadala tange dokopi, Jemesa Jonepanya endangi Mariapi, dee enda longo waka mendapu, Galilea pituu Jisasa nisoo apata epeamino, dupame kuki tependale pituu, piamo dupa kandatae peteami.

Jisasa Malu Piamino Doko

(Mk 15:42-47; Lk 23:50-56; Jn 19:38-42)

⁵⁷ Yuu kuiyalanya piamopa, akali Arimatia tange kamongo Josepe lenge, Jisasa watao paenge dokome, ⁵⁸ Pailate peteasa pupala, Jisasanya yonge doko dina lao tee lea. Dopa leamopa, yanda singi dupame kondao nyoo maina lea. ⁵⁹ Dokopa Josepeme Jisasanya yonge doko nyoo, lapalapa kyeto epe mendeme, yaki-yaki petala, ⁶⁰ Josepeme baa tange malu pitamina lao, kananda enenge tumbinya seteamo dokonya, Jisasanya yonge doko nyoo setea. Setapala, kana andake mendeme kapilya mina-mina pyoo, malu kambu doko piti petala, baa pea. ⁶¹ Dopa piamopa, Maria Magadala tange dokopa, Jemesa Jonepanya endangi Mariapame, malu dokonya yangitena pituu, kandatae peteambi.

Jisasanya Malu Isoo Kateamino Doko

⁶² Oo yongama Sambata gii epeamopa, pitisa mupapi, Parasaipi, dupame Pailate kanja peami. ⁶³ Pupala baa lamaiyoo, “Akali andake, akali sambo lenge dokome saka katao pituu, baa yuu gii tepo dokonya, sakatatona leamo doko naimame masilyamano. ⁶⁴ Dopa leana, baanya disaipolo dupame pao, baanya yonge doko waa katao nyoo yalo petala, endakali dupa lamaiyoo, baa sakatapyana latamino dokome, endakali dupa eteteaka kyakasetamina, malu doko isokondape pyoo, isoo katao, yuu gii tepo dokonya tuu lena lape. ⁶⁵ Dopa leaminopa, Pailateme dokaita lamaiyoo, “Nyakamame yanda singi mendatupa lanyoo pupala, malu doko isokondape pyoo isoo katena lapape” lea. ⁶⁶ Dokopa dupame pupala, malu doko piamili petae kalyape lao kandatamana latala, kongali pinya kateami. Dopa petala yanda singi dupame isokondape pyoo, isoo katena leami.

Jisasa Malunya Sakateamo Doko

(Mk 16:1-8; Lk 24:1-12; Jn 20:1-10)

¹ Sambata gii doko pateamopa, yuu yongalanya piamopa, Maria Magadala tange dokopa, Jemesa Jonepanya endangi Mariapame malu doko, kanja peambi. ² Gii dokopa titiwali andake mende minatala, Kamongonya enjele mende, kaiti-kisa katao isa ipupala, kana doko kapilya mina-mina pyoo nyoo kapya latala, dokonya ketae petea. ³ Baanya lengelyapi doko yuu-wapaka pingili pia. Dee baanya yonge pee doko, etete kyoo lao pole-pole pia. ⁴ Dopa piamo kandatala, yanda singi malu isetae kateamino dupa, walu lao paka kaeyami dokome, kumapae joo lombapae siami. ⁵ Dokopa enjele dokome enda dolapo lamaiyoo, “Nyakambame Jisasa pyao yukuiyamino doko, kutilyambino lao nambame masilyona, paka nakaeyalapape. ⁶ Wamba baa sakatato leamoli pyoo sakatatalamona, seteamino panda dakenya nasilyamona, kanja ipupa. ⁷ Kandatala nyakamba baanya disaipolo dupa katatamisa, yapa pupala, baa malunya sakatatala, Galilea wambao pelyamona, nyakamame dokonya pao kanjaminona, lamaiyapale lao, langya epona” lea. ⁸ Dopa leamopa, enda dolapo paka kaeyambinoaka doko, auu kaeyapaeme tumbiamopa, malu doko yapa yakinatala, alo pyao disaipolo dupa lamaiya peambi. ⁹ Alo pyao peambinopa, Jisasame kaitinisa kandanyetala, “Wanalapo, yongama etete!” lea. Dokopa dolapome pao, Jisasa mokonya kopetala mambo piambi. ¹⁰ Dopa piambinopa, Jisasame enda dolapo lamaiyoo, “Nyakamba paka nakaenya, nambanya kaiminingi dupa katatamisa pupala, Galilea pena lamaiyepape. Dupame dokonya namba kanjaminona” lea.

Yanda Singi Dupame Sambo Lena Lao Pii Wasoo Maiyamino Doko

¹¹ Enda dolapo peambinopa, malu isetae kateamino yanda singi dupanya mendapuame, taono dokonya pupala, piamo dupa pitaka pitisa mupa dupa lamaiyami. ¹² Dokopa pitisa mupapi, Judamanya isingi akalipi, dupame pii wasoo nyepala, yanda singi dupa muni longo mendapu maiyami. ¹³ Maitala pii dapa lena lamaiyami: “Nyakama luu palipumanopa, Jisasanya disaipolo dupa kuka ipupala, baanya yonge doko nyoo pamini-lamona lapape” leami. ¹⁴ Gapena dokome pii dake setamopa, naimame baa pii auu kaena lao lamaitamanopa, nyakama-kisa pundu mende naipapomona” leami. ¹⁵ Dopa lateaminopa, yanda singi dupame muni dutupa nyepala, lena leaminoliaka pyoo, lao taeyami. Pii doko lao Juda dupa-kisa taeyapae siamo doko, enepapupi dopaka pyoo taeyapae silyamo.

Wai Pii Epe Doko Yuu Pitakanya Lao Taeyalapape Leamo Doko

(Mk 16:14-18; Lk 24:36-49; Jn 20:19-23; Ap 1:6-8)

¹⁶ Disaipolo 11-pela dutupa, Galilea pupala, wamba Jisasame manda mendenya pena leamo dokonya peami. ¹⁷ Dokonya pao Jisasa kandatala, baanya kenge minalyoo mambo piami. Dopa piaminoaka doko, mendapuame mona lapo paleami. ¹⁸ Dokopa Jisasa nyakama kateamisa ipupala dokaita lamaiyoo, “Yuupi kaitipi dupa pitaka isepe lao, Goteme pupu lapae doko namba ditiana, ¹⁹ nyakama pupala, akali tata paliu pelyamo dupa pitaka, nambanya disaipolo jina lao pii lamaiyepape. Pii lamaiyoo pituu, Takange dokopi, Ikiningi dokopi, Oli Spirit dokopi, dutupanya kenge doko lao, kaimbu pyakamaiyepape. ²⁰ Nambame pii manapi langio dupa pitaka, minina lao mana lamaiyepape. Namba nyakama-pipa apataka katao pao, yuu etatamo gii doko nyetamana,” Jisasame lea.