Rooma

Rooma

¹ Aneen :nyi Paawulō āsirwook parwaani akwaan piich tōkōl chēpō Kiriistō choo āmii Rooma. Kiilēwēnān :Iriin āpāyiisyēēchi Yēēsu Kiriistō, ālēku kāāyooytooyiin akuutapaanan saa-amta lōkōōyichiich choo kāroomēēn. ² Kisip kuuyoomiisēēch :Iriin nkōō siruutēchiich lōkōōyichoochēē kupunuunō ōōrkooyichiich. ³ Lōkōōyichu ku pō Wēēriinyiin Yēēsu Kiriistō Kiptaayaantēēnyoon nyoo /kiikituum kilēē chiich nkōō kōpō pāytooyiin Tāwuti. Ku /kiikungʼuutu nkōō kaamuukaa Toomirmiir nyoo Tiliil kilē Wēēroo Iriin :inyeentee paani /kiikuungʼeeta meerat. ⁵ Kiikukōōnaa :Iriin kaamuuka kupunuunō Kiriistō saa-ir pāyiisyoo kāāyooytooyiik āmwoochinootō piich choo mā Yāwuutik kir nyoo kiiku-irchi :Iriin akwaaneek sikuteer akutiirō keey inyeentee. ⁶ Akwaan nyuun :walak nkōō pichoochēē /kikēēkuur kupoyiit Yēēsu Kiriistō. ⁷ Ātookwēēsookwaan tōkōl choo āmii Rooma choo chāmook :Iriin akiikuutapaanaak ālēku piichiich choo tiliilēēn. Kuupēēruurook :Paapēēnyoon Iriin ākōō Kiptaayaan Yēēsu Kiriistō akukōōnook kaalya. ⁸ Kir nyēpō taay nyoo āmwooraa, ku āmwoochi Iriintēēnyuun kōōnkēy akipō akwaan tōkōl nkōō kir nyoo ki-irwaak :Yēēsu Kiriistō. Āmwooraa kilēē nyoonēē āmu mii :piich kumwoorootēy nkōō ngʼwēny tōkōl kilē āmiikwaan ātiirēē keey Iriin. ⁹ Nkēt :Iriin nyoo āpāyiisyēēchinii nkōō moonyuun tōkōl ā-āmtooy lōkōōy chēpō Wēēriinyiin kilē āsoowook pērēētuu aka tōkōl. ¹⁰ Asooyaa saayit aka tōkōl kuchēp :Iriin oor ānyōōru pārooyin sooruutoowook. ¹¹ Āmii :aneen āpkootēy kilē ntā kutuuyō sookōōnook pēēruur nyēpō Toomirmiir nyoo Tiliil siku-iraak ākiilyēē nkōō kaaranēēngʼwoongʼ. ¹² Kir nyoo āmwooraa ku keecheera keey tōkōl nkōō kaaranēēnyoon, acheeraan acheeraak. ¹³ Tuupchēēnichuuch, āmāraa āsōwuukwaan kilē kyaatyam :aneen āsip chaa chaangʼ kilē āruutoowook ku maakuumuuka ākōy paannyēēnyi. Āmāraa āpāyiisyō nkōō akwaan kilēē paani kyoopāyiisyō nkōō kōōrootin walak. ¹⁴ Mārēy ā-irchi piich tōkōl pāyit, nēē kā tookuunoot ntā ku mā tookuunoot, nēē sōōmānootēēn ntā ku māsōōmānootēēn. ¹⁵ Kiyoonēē nyi iraa amar āchō Rooma wōli āmiikwaan aamtaata lōkōōy choo kāroomēēn chēpō Iriin. ¹⁶ Moowāraa a-amta lōkōōy choo kāroomēēn āmu nkōō lōkōōyichoochēē kumii kaamuuka nyēpō Iriin nyoo irēy /kēēsāru chiich aka tōkōl nyoo keeran, kitoowuunō Yāwuutik kupōk sikutuup choo mā Yāwuutik. ¹⁷ Ngʼuutuuy :Iriin kupunuunō lōkōōyiichiich choo kāroomēēn kilē chāmēy :inyeentee chiich aka tōkōl nyoo kātiirō keey Yēēsu akutas taay kilēē nyoonēē ākōy. Nyōōruuy chiichoonēē sopoon kilēē paani mwoorēy siruut kilē, "Nyōōruuy :chiich nyēpō man sopoon nēē tiirō keey Iriin." ¹⁸ Kiikungʼuutu :Iriin nyālootyō nyoo chōōnēē kipsēnkwēt kutāchi keey piich choo mēēwārēy inyeentee aku kipngʼōōkiis choo kiikutupō ngʼālyoon nyēpō man ngʼōōkiikwaak. ¹⁹ Nkēt :piich wōloo lēē Iriin āmu kiikungʼuuti keey :Iriin akwaaneek kupunuunō tukun choo ki-irta inyeentee. Mpō ntā toomō kuuro :piich nkōō koonyiikwaak Iriin nyoo māngʼiisyēy ākōy, ku kiikungʼuutu :Iriin kaamuukeenyiin āsip chaa chaangʼ kungʼeetee /kee-irta ngʼwēny. Ku moomii nyuun :wōloo yēētēē keey :piich. ²¹ Mpō ntā kiinkēt :akwaaneek kilē mii Iriin, ku maatōrōōr nyuun ntā kumwoochi mpō kōōnkēy. Kutoowu kuupkaat ngʼal chēpō sōlwoonti akupētyō :mētēwēēyiikwaak. ²² Paani ki-irtooy keey kilē ku ngʼoroomō, ku koo kiisōlwoontānchō. ²³ Kiikutunchinii :pichoochēē kāānāāmōōn choo /kiiku-irta choo karkeey nkōō piich, tāriit ntā ku tyoongʼin choo chuutēē keey ngʼwēny ākōō tyoongʼin walak. ²⁴ Kiyoonēē nyoo ki-ir Iriin kumētē pichoochēē ku-ir tukun choo mārēy pōōrwēyiikwaak sikutakalaan akunyeera pōōrwēyiikwaak. ²⁵ Kiikuchuunnyō :pichoochēē nkōō wōloo mii man nyēpō Iriin akicham ngʼuurnan. Kutunchinii nyuun tukun choo kii-irēy :Iriin nyoo kātākutunchinii Iriin nyoo tōrōōroot ākōy. Lēē nyoonēē. ²⁶ Āmu kii-ir ngʼal choo lēē choochēē tōkōl, kumētē :Iriin pichoochēē kutuup mākuut chēpō pōōrwēyiikwaak. Kiikutay mpō :cheepyooso kutēpō nkōō murēn sikutēpō nkōō cheepyoosee aka. ²⁷ Nkōō oor nyoo lēē nyoonēē, ku kiikutay mpō :murēnō kutēpō nkōō cheepyooso sikutēpō ākōō murēnēē aka. Kwoop keey nyuun murēnō nkōō murēnēē aka. Kiikutakalaan :murēn kuti nkanyi /kiikēētilchi kilē ngʼwoonchinii akipō ngʼōōkiikwaak. ²⁸ Aku paani maacham nyuun :pichoochēē kutuup ngʼoroomnyoo Iriin nyēpō man, kumēti :Iriin akwaaneek kuupkaat kaapkootuut chēpō ngʼōōki aku-irēy ngʼal choo mēērookēē /kee-ir. ²⁹ Kiikuulaampuus pichu :rāyiityō nyoo ōōw ākōō ngʼōōki, kimoo nkōō lēēluut. Rōōtinii keey ngʼat koongʼ, rumiisyēy, irootēy riiri, mēlmēēliisyēy akuululuukootēy ngʼal. Mwoorootēy seemseem, ³⁰ akungʼāloolootēērēē piich walak nyaa ra. Sāsēy Iriin, āwēēsō aku lāsēy keey. Wāsootēy oortin choo irēē ngʼōōki, amēēkoonyitēy sikiikwaak. ³¹ Sālwēy :pichu, /mākiirānēy, amāchāmēy chiich, amāriirēē chiich. ³² Mpō ntēēnkēt :akwaaneek kilē kiikumwooru :Iriin kilē chiich nyoo irēy ngʼal choo lēē choochēē kunyoolchinii kima, ku mēēlē tāsēy taay akwaaneek kipaat ku-irēy ngʼaleechoochēē, loosuuy mpō piich walak choo irēy ngʼaleechoochēē.

¹ Moomii kir nyoo yēētēē keey :chiich nyoo tilchinii piich walak ngʼal āmu nēē ir kilēē nyoonēē pērēētuus tōkōl, ku miitō kuurwoochinii keey āmu irēy mpō :inyeentee ngʼal choo lēē chu mwoorēy kilē irēy :piich. ² Kiinkēt :achaan Yāwuutik kilē nēē tilchinii :Iriin chiich kiirwook nkōō tukun choo lēē choochēē, kuuryoongʼēē man. ³ Ipkootēēnyēēn man kilē rwoochinii :Iriin piich walak akutilchinii akwaaneek kiirwook amēērwookuun nēēmii itāsēy taay i-irēy ngʼaleechoochēē? ⁴ Ntā irēēngʼēy rēēlin pō moo nyoo ōōw nkōō riirana nyoo riirēēnook Iriin? Mēēnkēt sōō kilē kōōniin pārooyin :rēēlintoonoonēē pō moo nyēpō Iriin iwalee? ⁵ Āmu nyikiis mētingʼuungʼ aku keetay iwalee ku ngʼwoonchiniin pērēētuunoonēē rwoochinii :Iriin piich. ⁶ Tilchinii :Iriin chiich aka tōkōl ngʼal kutuup keey nkōō kiyoo kiiku-ir. ⁷ Tēnii sopoon nyēpō ākōy piich choo tāsēy taay ku-irēy tukun choo kāroomēēn, choo wāsēy lēpkēēyoo Iriin ākōō koonyit mu taayuu Iriin akumārēy kunyōōru sopoontonoonēē pō ākōy. ⁸ Ku chiich aka tōkōl nyoo chāmēy keey ākityōōn akutay ngʼālyoontoo man akutuup oortin chēpō ngʼōōki kunyōōruuy ngʼwoonin nyoo chōōnēē wōloo mii :Iriin. ⁹ Nyārilēy :chiich aka tōkōl nyoo irēy ngʼōōki akungʼwoonchi :chiichoonēē kwōngʼuut. Toowuunēē keey :ngʼaleechoochēē wōloo mii Yāwuutik kupōk sikutuup piich walak choo mā Yāwuutik. ¹⁰ Kutōrōriit nyuun :chiich aka tōkōl nyoo irēy tukun choo kāroomēēn akuukoonyitō akunyōōru kaalya, kutoowuunō Yāwuutik kupōk sikutuup piich walak choo mā Yāwuutik. ¹¹ Āmwoorēy kilēē nyoonēē āmu mēēngʼuulēy :Iriin piich kilē anum nyi ku anum nyiinō. ¹² Nēē ir :chiich ngʼōōki nyoo mēēnkēt kiyoo mwoorēy :ngʼātuut chēpō Iriin, /kumākuurwoochinii kutuup keey nkōō ngʼātuutēchoochēē, akunyōōruuy nyuun siiteenyiin. Ku nēē ir ngʼōōki :chiich nyoo nkēt ngʼātuut, /kēērwoochinii kutuup keey nkōō ngʼātuutēchoochēē. ¹³ Kumēēlē piich choo tēērēy kiyoo mwoorēy :ngʼātuut choo /kutilchinii kilē pēērēy keey nkōō taayuu Iriin. Piich choo /kutilchinii kilē pēērēy keey ku choo irēy kiyoo mwoorēy :ngʼātuut. ¹⁴ Mēēnkēt :piich choo mā Yāwuutik ngʼātuut chēpō Iriin. Mpō ntā lēē nyoonēē, ku nēē ir tukun kilēē wōli mārtooy ngʼātuut, kungʼuutuuy kilē sirootēēn :ngʼātuutēchoochēē nkōō mētēwēyiikwaak. Inkēt kir nyaa karaam ākōō nyaa ra. Mwoochinii :kaapkootuutēkwaak kilē karaam :nyi ku ra :nyoon ¹⁶ nkōō pērēētuuni pō lēt. Pkoonēy :piich tōkōl pērēētuunoonēē taayuu Iriin sikuurwoochi :Yēēsu Kiriistō kutuup keey nkōō ngʼaleekwaak choo ungʼootēēn kilēē wōli mwoortooy :lōkōōyichu ā-āmtooy. ¹⁷ Inyēēn Yāwuutyoon nyoo ipkootēy kilē karaam kir aka tōkōl āmu inkēt ngʼātuut chēpō Iriin, ākiilāsēy keey kilē ipō Iriin. ¹⁸ Inkēt :inyēēn kir nyoo māruun :Iriin i-ir akiiteeree ngʼātuut kir nyēpō man nyoo maraat i-ir. ¹⁹ Ipkootēy kilē itingʼēy man kilē inyēēn nyoo i-ārōōrchinii piich choo kōryootēēn oor akiitēnii lēpkēēyō piich choo mii tuurin. ²⁰ Inēētēēnyēēn piich choo lēē sālwēy nkōō laakōōy choo mēēnkēt kir āmu ipkootēy kilē inkēt ngʼal tōkōl chēpō man choo mii ngʼātuut. ²¹ Kunyuun oo, nēē inēētēy piich walak kumēēnēētēy keey mpō? Ku nēē imwoochinii nyuun piich walak kutaya keey chōōrsyō oo, kwaamin :nee siichōōrsyēē? ²² Imwoorēy kilē ra nēē ir :chiich takal nkōō cheepyooso nyoo mā cheepyooseenyiin, akii-irēy :inyēēntēē? Irēēngʼēy piich choo kutunchinii kaanaamōōn, ākichōōrsyēy nkōō wōli /kukutunchinii kaanaamōōnichoochēē? ²³ Ilāsēy keey kilē ituupēy ngʼātuut, ara mēērēēngʼēy Iriin nēē siiru ngʼātuutēchoochēē? ²⁴ /Kikusir kilē "Mwoortoorēē :piich choo mā Yāwuutik ngʼal chaa raacheen kaarinaa Iriin akipō akwaan." ²⁵ Karaam ichō Yāwuutyoon akiinkēt ngʼātuut, nēē tuupēy ngʼātuutēchoochēē. Ku nēē siiru ngʼātuutēchoochēē, ku ilēēnyēēn chiich nyoo mēēnkēt ngʼātuut. ²⁶ Ku nēē tuup :piich choo ma Yāwuutik ngʼātuut chēpō Iriin oo, mā-āpēy :Iriin pichoochēē kilēē piichiich? ²⁷ Chiich nyoo mā Yāwuutyoon aku-irēy kiyoo mwoorēy :ngʼātuut, kuurwookuun nēē siiru ngʼātuut mpō ntēēnkēt ngʼātuut choo sirootēēn. ²⁸ Mēēlēēnyēēn Yāwuutyoon nyēpō man āmu /kikunamin ichō Yāwuutyoon, ntā ku āmu /kiikuyaatin murwoo Yāwuutik. ²⁹ Yāwuutyoon nyēpō man ku nyoo chāmēy Iriin nkōō moonyiin. Nyōōruuy :chiich murwō nyēpō man nēē ir :Toomirmiir nyoo Tiliil kuwala kilēku chiipō Iriin amēēlē nēē tyam kutuup kiyoo mwoorēy :ngʼātuut choo sirootēēn. Nyōōruuy :chiichoonēē kāāloosuunō kuchōōnēē wōloo mii :Iriin mā wōloo mii :piich.

¹ Mii :kāroomin nee nēē Yāwuutyoon chiich? Ntā toorētēy nee :murwoo Yāwuutik? ² Man, mii :kāroomin nyoo ōōw nkōō oor aka tōkōl nēē chō Yāwuutyoon. Nyēpō taay, ku /kiikumwoochi Yāwuutik ngʼālyoontoo Iriin. ³ Man kilē kiikutay :Yāwuutik chaa chaangʼ kuuran ngʼālyoontoo Iriin. Mpō ntā lēē nyoonēē oo, ara ngʼuutuuy :nyoonēē kilē /mākuurānēy Iriin? ⁴ Acha! Mālēē nyoonēē. Mpō ntā ngʼuur :piich tōkōl nkōō ngʼwēny, kipō man :Iriin kilēē paani mwoorēy :siruut kilē, "Itingʼēē man irwookwoon āmu itilchinii piich kiirwook kutuup keey nkōō man." ⁵ Muukēy :chiich kumwa kilē, "Nēē toorētēy :rāyiityēēnyoon piich kuurō kāroomin nyēpō Iriin oo, ku mākātāpāypāyiituuy :Iriin nēē kātēērwookēēch?" ⁶ Acha, mālēē nyoonēē. Ntā kiilēē nyoonēē, ntā kiimuukēē kilē nee kuurwoochi :Iriin ngʼwēny? ⁷ Muukēy :chiich aka kumwa kilē, "Nēē koo irēy :ngʼuurnaneenyuun Iriin kungʼuutu keey kilē tingʼēy man /ākēētōrōōr oo, kupō nee /sikeemwa kilē aneen kipngʼōōkiyoon?" ⁸ Imuukēy mpō imwaa kilē, "Kee-ira ngʼōōki sikuchōōnō kir nyaa karaam." Mii mpō :piich walak choo ngʼāloolēēnēēch nkōō oor nyaa ra akumwoorēy kilē kumwoorēēchaan ngʼaleechoochēē. /Kuurwoochinii akwaaneek āmu yāmēy /kēērwoochi. ⁹ Kumwoorēy nee nyuun? Ara ku kāroomēēchaan Yāwuutik kusiir piich walak? Acha! Kaakēēsip keemwaa kilē kiikupāyu :ngʼōōki piich tōkōl, nēē kā Yāwuutyoon ntā ku mā Yāwuutyoon. ¹⁰ Mwoorēy :siruut kilē, "Moomii :chiich mpō ākoongʼo nyoo pēērēy keey. ¹¹ Moomii :chiich man nyoo nkēt Iriin. Moomii mpō :akoongʼo nyoo wāsēy inyeentee. ¹² Kiikumētō :tōkōl Iriin, maakutingʼēy :tōkōl man. Moomii :chiich mpō ākoongʼo nyoo irēy ngʼal choo kāroomēēn." ¹³ Mwoorēy :siruut kilē, "Lēē :ngʼaleekwaak kawat aku ānyinyō :ngʼālyēēpikwaak kumwoorēy ngʼuurnan. Ngʼālyoon aka tōkōl nyoo mwoorēy ku ngʼwaan kilēē ngʼwoonoo kipaangʼwa." ¹⁴ "Moomii kir nyoo mwoorēy kungʼātu kupāniisyō nkōō kuutuwayiikwaak choo ngʼwoonēēn." ¹⁵ "Kwārkwārō :pichu kurumiisyēy. ¹⁶ Ārii aka tōkōl yoo pēētii kuululuukēy tukun akuunyariil piich. ¹⁷ Mēēnkēt :pichu kaalya." ¹⁸ "Mēēwārēy :pichoochēē Iriin mpō kiitēēn." ¹⁹ Kuunkēt kilē kir aka tōkōl nyoo mii siruut chēpō Iriin, kupāytooy pichu /kikusirchi siruutēchoochēē, simatuuk keey :chiich aka tōkōl sikuurwoochi :Iriin ngʼwēny tōkōl. ²⁰ Kunyuun, moomii :chiich nyoo chamaat nkōō taayuu :Iriin nēē tyam kutuup ngʼātuut āmu ngʼuutwēēch ngʼātuut kilē kii kipngʼōōkiin. ²¹ Kiikungʼuutwēēch :Iriin oor nyoo rēēl nyoo kichāmēēnēēch keepee taayuunyiin. Kiisip kungʼalaala :Muusa ākōō ōōrkooy chēpō Iriin araanoonēē. Kir nyoo irēēch kuchameech :Iriin ku kēētiirō keey Yēēsu ākityōōn nēē kātākutuupēy ngʼātuut chēpō Muusa. /Kusāruuy chiich aka tōkōl nyoo kātiirō keey Yēēsu. Moomii /keemwa kilē ngʼoo ngʼoo ²³ āmu kiiku-ir :chiich aka tōkōl ngʼōōki nyoo mēēmuukēy ku-iti tōrōōrin nyēpō Iriin. ²⁴ Kiikuchameech :Iriin sikēētililiitu kupunuunō Meesaaya Yēēsu nyoo kiiwaleeneech sāpoontanyiin kuutyaayteech. ²⁵ Kikōōnu :Iriin Yēēsu /kee-ira kōrōs sikuuchoomnyō piich nkōō inyeentee nēē tiirō keey :chiich kilē kiitarta :Yēēsu kērētiichiich akipō inyeentee. Ki-ir :Iriin kilēē nyoonēē sikungʼuutu kilē pō man kuriira piich akunyōōchi kaat ngʼōōkiikwaak. Kutoomō kitarta :Kiriistō kērētiichiich /sikēēsārwēēch, ku kiiriira :Iriin piich akuupuuytoochi ngʼōōkiikwaak choo kiikiiku-ir. ²⁶ Kitooku aniinee kilē pō man :Iriin, nēē mwa kilē kiikutililiituuy kipngʼōōkiis āmu kiikutiirō keey Yēēsu. ²⁷ Ara, kulāsinii keey nee? Moomii :kir āmu nēē kutiirēē keey Yēēsu kuchameech :Iriin keepee taayuunyiin, mā nēē kuutyam kee-ir tukun choo kāroomēēn. ²⁸ Kiinkēt kilē kiikutililiit :chiich nkōō taayuu :Iriin nēē tiirō keey Yēēsu, mā āmu tuupēy ngʼātuut. ²⁹ Ara nēē lēē :Iriin ku Iriintoo Yāwuutik ākityōōn? Mā Iriintoo mpō piich choo mā Yāwuutik? Pō :Iriin mpō piich choo mā Yāwuutik. ³⁰ Mii :Iriin ākoongʼo, aku inyeentee nyi tilchinii piich kilē tiliilō nēē tiirō keey Yēēsu nēē kā Yāwuutik ntā ku mā Yāwuutik. ³¹ Ara nēē kaakēētiirēē keey sōō Yēēsu kungʼuutuuy kilē kuumuukēy kēēmētō ngʼātuut? Acha! Mālēē nyoonēē, kimii achaan kēē-irēy kilēē wōli mārtooy ngʼātuut.

¹ Ara kumwaa nee nyuun akipō kuukonyoon Apraam? ² Ntā kiichamaat :Apraam nkōō taayuu Iriin nkōō ngʼal choo kāroomēēn choo kii-ir, ntā kiitingʼēy kir nyoo kilāsēē keey, aku mēēlē nyuun kiimuukēy kilasa keey taayuu Iriin. ³ Mwoorēy :siruut kilē "Kiiran :Apraam kiyoo kiimwoorēy Iriin. Kucham nyuun :Iriin Apraam kilē chiich nyēpō man nkōō taayuunyiin." ⁴ Nēē ir :chiich pāyit, ku maraat /kēētē kir nyoo yāmēy keey nkōō pāyit nyoo ka-ir. ⁵ Mēēmuukēy :chiich kupāyiisyēēchi Iriin kuupkootēy kilē tililiituuy :inyeentee nkōō taayuu Iriin āmu kaaku-ir tukun choo kāroomēēn. Acha sōō, tililiituuy :chiich nkōō taayuu Iriin nēē tiirō keey Yēēsu. ⁶ Kimwa mpō :Tāwuti kilē pēēruuroot chiich nyoo kiikucham :Iriin kilē pō man aku mā āmu tukun choo ka-ir woloo nyuun āmu kātiirō keey :chiichoonēē Iriin. ⁷ Mwoorēy :Tāwuti kilē, "Pēēruuroot :piich choo /kiikēēnyōōchi kaat nkōō rāyiityō nyoo kiitingʼēy /ākēē-istoochi ngʼōōki choo kiikiiku-ir. ⁸ Pēēruuroot :chiich nyoo maakuu-iitinii :Kiptaayaan ngʼōōkichiich." ⁹ Ara pō pēēruurtoni kipaat :Yāwuutik choo murēy keey, ntā pō mpō piich choo mā Yāwuutik? Ku nēē lēē Apraam? Kātākumwoorēy kilē kiicham :Iriin Apraam kilē chiich nyēpō man āmu kiiran Iriin. ¹⁰ /Kiikuchāmēy āyu kilē pō man Apraam? Kitoomō /kēēmur, ntā paani /kiikēēmur? Pō man kilē kiicham :Iriin Apraam kitoomō /kēēmur. ¹¹ /Kikumur Apraam lētuun sikungʼuutu kilē kiisip kucham :Iriin Apraam kilē chiich nyēpō man āmu kiirānēy Iriin kutoomō /kēēmur. Kunyuun, Apraam ku paapaa piich tōkōl choo rānēy Iriin akichāmēy :Iriin kilē tiliilō mpō ntā toomō /kēēmur. ¹² Inyeentee mpō ku paapaa piich choo murootēēn aku mēēlē nyuun paapeengʼwaangʼ kipaat āmu murootēēn. Paapeengʼwaangʼ kipaat nyuun nēē rānēy Iriin kilēē wōloo kiirāntooy :Apraam kutoomō /kēēmur. ¹³ Kii nēē yoomiis :Iriin Apraam ākōō kuukotiinēchiich kilē pōyiituuy kōōrooni akwaaneek, ku mēēlē kiiyoomiisi kilēē nyoonēē āmu kiituup :Apraam ngʼātuut. Kiiyoomiis āmu kiiran :Apraam Iriin akicham :Iriin kilē kii chiich Apraam nyēpō man. ¹⁴ Kunyuun, ntā /kuutēnii piich kir kilēē paani tuupēy ngʼātuut, ntā kii kilēēn kutiirō keey Iriin, aku puch kiyi kiiyoomiisi :Iriin pichoochēē. ¹⁵ Nēē siiru :piich ngʼātuut kunyōōru siitāt nyoo chōōnēē wōloo mii :Iriin. Ku nēē moomii :ngʼātuut /kumākuputēy. ¹⁶ Kunyuun, yoomiisēy :Iriin chiich nyoo rānēy inyeentee kilē pēēruurēy āmu chāmēy chiichoonēē, amēēlē āmu tuupēy ngʼātuut. Nyōōruuy nyuun :laakōōpō Apraam tōkōl pēēruurtonoonēē, mā choo tuupēy ngʼātuut kipaat, aku mpō piich tōkōl choo rānēy Iriin kilēē Apraam. Apraam ku paapeenyoon tōkōl. ¹⁷ Kii nēē mwoochi :Iriin Apraam kilē, "Ā-iriin ilēku paapaa kōōrootin chaa chaangʼ" kuuran :Apraam ngʼaleechoochēē, āmu kiinkēt kilē Iriin nyoo tēnii sopoon piich choo kiikumēērō aku-irēy tukun choo kiimoomii kutooku nēē ngʼalaal. ¹⁸ Paani kiiyoomiis :Iriin Apraam kilē lēkuuy paapaa kōōrootin chaa chaangʼ, kuuran :Apraam akuumoongʼu Iriin mpō ntā kiilēē yoo mēēmuukēē :kiyi /kiikuuyoomiis. Kichō kilēku :inyeentee paapaa kōōrootin chaa chaangʼ kilēē paani kiimwoochinii :Iriin kilē, "Choongʼiituuy laakōōkuuk kilēē kookeel." ¹⁹ Mpō ntā kiikiikuyoosiit :Apraam nyoo kiikiikuuwoonyō pōōr āmu kiitingʼēy kēnyiis pokol akiimaamuukēy kinam :Saara laakwa āmu kii sōōn, kumootoomtoomān :Apraam kutiirō keey Iriin. ²⁰ Maatoomtoomān :Apraam kuuran kiyi kiiyoomiis Iriin. Kitas taay nyuun :inyeentee kutiirō keey Iriin akuutōrōōr ²¹ akicham kilē tingʼēy :Iriin kaamuuka ku-ir kir nyoo kiikuuyoomiis inyeentee. ²² Kicham nyuun :Iriin Apraam kilē kii chiich nyēpō man āmu kiitiirō keey inyeentee kilēē paani mwoorēy :siruut. ²³ Mā Apraam ākityōōn nyoo kiicham :Iriin āmu kiitiirō keey inyeentee. ²⁴ Chāmēēch mpō :Iriin kilē kutiliilō nēē kutiirō keey inyeentee nyoo kiingʼeeta Kiptaayaantēēnyoon Yēēsu meerat. ²⁵ Yēēsu nyoo /kiikiitētooy kima akipō ngʼōōkichooch /akeengʼeeta meerat sikēēcham kilē kiipō man nkōō taayuu Iriin.

¹ Kunyuun, kilēē paani /kiikeechameech kilē kipō man nēē kutiirēē keey Iriin, /kēētingʼēy kalya nkōō Iriin kupunuunō Kiptaayaantēēnyoon Yēēsu Kiriistō. ² Āmu kutiirēē keey Yēēsu, kēēnyōōruuy choomnyoot nyēpō Iriin ākēēnāmchi keey choomnyoonoonēē. Kupāypāyō āmu kiimoongʼuuy kilē /pākēētōrōōrēēch ākēētēpi nkōō Iriin. ³ Mālēē nyoonēē kipaat, kupāypāyō mpō nēē kunyōōru kaa-iimuut, āmu kiinkēt kilē irēēch kaa-iimuut keemurtee. ⁴ Nēē kimurta, kēēkiilyō. Nēē kukiilyō, kēēnyōōru kāāmoongʼunō nyoo ōōw. ⁵ Aku māwiirtooyēēch kāāmoongʼunō āmu, /kiikukōōnēēch :Iriin Toomirmiiryeenyiin akukōōnēēch choomnyoot nyoo ōōw. ⁶ Paani kiimākuumuukēy keey, kima :Meesaaya nkōō pērēētuu nyoo kii yamaat akipō achaan choo kii kilēē kipngʼōōkiis. ⁷ Kōrōōm kuchamta keey :chiich kima akipō chiitō aka, akuumuukēē nyuun kuchamta keey :chiich kima akipō chiich nyoo lēē sikēn. ⁸ Aku nyuun, kiingʼuutwēēch :Iriin choomnyēēnyiin āmu mpō ntā kiikiichaan kipngʼōōkiin kuuyooku Kiriistō kichō kima akipō achaan. ⁹ Kilēē paani /kiikeechameech nyuun kilē kichaan piich choo tiliilēēn āmu kiitarta :Yēēsu kērētiichiich, ku sārwēēch nyuun :Iriin kupunuunō wēēriinyiin simēērwookwēēch pērēētuuni pō lēt akuwiirchēēch ma nyēpō ākōy. ¹⁰ Paani kiikiichaan puun chēpō Iriin, ku /kiichoomnyēēch meeraa wēēriinyiin ākōō inyeentee. Ku paani /kiikēēchoomnyēēch ākōō Iriin, kēētingʼēy man kilē kunyōōruuy sopoon nyēpō ākōy āmu :Yēēsu ku sopoon. ¹¹ Kupāypāyō nyuun āmu kiichoomnyēēch :Kiptaayaantēēnyoon Yēēsu Kiriistō ākōō Iriin. ¹² Paani kii-ir :Aatam ngʼōōki, kupka ngʼōōki ngʼwēny, akwoopu :ngʼōōkistonoonēē meerat. Kichōōnchi nyuun :meerat chiich aka tōkōl āmu ki-ir :chiitōkōl ngʼōōki. ¹³ Kiimii :ngʼōōki ngʼwēny kutoomō /kēēkōōnu ngʼātuut chēpō Muusa. Ntā kiimoomii :ngʼātuut /tāmākumwoorēy kilē kāput :chiich ngʼātuut. ¹⁴ Kiipāytooy nyuun :meerat kimukuul mēt kitoomō mpō /kēēkōōnu ngʼātuut chēpō Muusa mpō ntā kiimaatay :pichoochēē Iriin kilēē wōloo kiitayta :Aatam. Makarkeey :Aatam nkōō Yēēsu amakarkeey :Yēēsu nkōō Aatam. Paani ki-ir :Aatam ngʼōōki, kwoopchi piich tōkōl meerat. Ku paani kiitētō :Yēēsu sopoontanyiin, kwoopchi piich tōkōl chamat nyēpō Iriin. ¹⁶ Kii nēē kaaku-ir :Aatam ngʼōōki, kuurwoochi :Iriin piich tōkōl akutilchi kunyōōru siiteengʼwaangʼ. Ku paani ki-ir :piich chaa chaangʼ ngʼōōki nyuun, kuutēto :Yēēsu sopoontanyiin akipō achaan sikutilweech :Iriin kilē mākutingʼēy tisya. ¹⁷ Kii :ngʼōōki nyēpō chiich ākoongʼo nyi kyoopchi piich tōkōl meerat. Aku chamat nyuun nyēpō chiich ākoongʼo nyi āpchinii piich tōkōl choo tiirēē keey Yēēsu sopoon akunyōōru /kēēnyōōchi kaat ngʼōōkiikwaak. ¹⁸ Āmu kii :ngʼōōki nyuun nyēpō chiich ākoongʼo nyi ki-ir piich tōkōl /kēērwoochi /ākēētilchi kilē mēērsōōt. Ku kir nyuun ākoongʼo nyaa karaam nyoo ki-ir :chiitō aka mpō nyi ki-ir /keecham kilē tiliilō piich akunyōōru sopoon. ¹⁹ Āmu maateer iit :chiich ākoongʼo Iriin, ku-ir :nyoonēē piich tōkōl kilēku kipngʼōōkiis. Āmu kiitēēr iit nyuun :chiich ākoongʼo Iriin, ku-ir :chiichoonēē /keecham piich chaa chaangʼ kilē pō man. ²⁰ Paani /kiikukōōnu ngʼātuut, kuchaangʼiit :ngʼōōki. Ku nēē chaangʼiit :ngʼōōki, kutasa mpō chamataa Iriin ku-ōōwiit. ²¹ Paani kiipāyuuy piich :ngʼōōki, ku kyoopu meerat. Ku paanyēēnyi pāyuuy :chamataa Iriin piich chēpō man kwoopuuy sopoon nyēpō ākōy kupunuunō Yēēsu Kiriistō Kiptaayaantēēnyoon.

¹ Ki-ir nee nyuun? Ara kitas taay sōō kee-ir ngʼōōki sikutāsu keey :chamataa :Iriin? ² Acha sōō, mālēē nyoonēē mpō kiitēēn. Maakupāywēēch :ngʼōōki. Ara muukēē kilē nee nyuun keetas taay kee-ir ngʼōōki? ³ Moonkēt :akwaan sōō kilē paani /kikuupaatiisaneech kēēlēkuu kir ākoongʼo nkōō Yēēsu Kiriistō ku kiirook ātēpuutēchooch chēpō taay? ⁴ Kiima :Yēēsu, /kēētup /akeengʼeeta meerat nkōō kaamuuka nyēpō Paapa Iriin. Nkōō oor nyoo lēē nyoonēē, ku kiikēēmēērō /ākēētupēēch paani /kiikuupaatiisaneech sikēēnyōōru sopoon nyoo rēēl. ⁵ Āmu kii kēēlēku kir ākoongʼo nkōō Kiriistō nkōō meereenyiin paani /kikuupaatiisaneech, ku man kilē /kiingʼēētēēch nkōō inyeentee, kēēnyōōruu sopoon nyoo rēēl. ⁶ Kiinkēt kilē kiikēēmētoochi ātēpuut choochooch chēpō ngʼōōki kimurtooyoontoo Kiriistō simaakutingʼēy :ngʼōōki kaamuuka aka tōkōl mu sopoontonyoon ku-ireech kēēlēku ōōtwook chēpō ngʼōōki. ⁷ Kii nēē kumēēro nkōō Kiriistō, /keetyaataareeneech kaamuuka nyēpō ngʼōōki. ⁸ Āmu kiikumēērō nkōō Kiriistō, kēērānēy nyuun kilē kusopyootēēn kilēē paani sāpoot :inyeentee. ⁹ Kiinkēt kilē /kiikuungʼeeta Kiriistō meerat, amaakumēērēy kuureer, kunyuun maakupāyuuy :meerat inyeentee. ¹⁰ Paani kiimēērēy Kiriistō, ku kiima sikuuwaangʼ kaamuuka nyēpō ngʼōōki kilē chiim akumāngʼiisyēy aniin kupāyiisyēēchinii Iriin. ¹¹ Mārēy āsōwu ākwoonēēk kilē /kikeetyaaytaareenaak kaamuka nyēpō ngʼōōki. Ku maraat nyuun āpāyiisyēēchi Iriin kilēē paani pāyiisyēēchinii :Yēēsu. ¹² Maakany nyuun kupaytaak :ngʼōōki sima-iraak a-ir tukun chēpō ngʼōōki. ¹³ Āmoochāmchi kamas aka tōkōl nyēpō pōōrwēyiikwook ku-ir ngʼōōki. Akanya kupāywook :Iriin āmu, /kiikēēsāruunēēnook meerat ānyōōru sopoon. Āpāyiisyēērēē pōōrwēyiikwook ku-ir tukun choo chāmēy :Iriin. ¹⁴ Māmārēy kutakupaytaak :ngʼōōki, āmu maakuriipook :ngʼātuut. Choomnyoot nyuun nyēpō Iriin nyi pāytooyook. ¹⁵ Ara nee nyuun? Kitas taay sōō kee-ir ngʼōōki, āmu chamat nyēpō Iriin nyi pāytooyēēch, maaku :ngʼātuut nyi riipēēch? Acha! ¹⁶ Inkēt sōō kilē nēē cham ilēku ōōtwookiintoo chiich, ku mārēy ituup kiyi mwoorēy :chiichoonēē? Nēē cham kupāyuun :ngʼōōki inyōōruuy meerat. Ku nēē cham ikoonyit Iriin, kuchāmiin :inyeentee. ¹⁷ Mpō ntā kiipāytooyook ngʼōōki, kēēmwoochinii Iriin kōōnkēy, āmu kyaacham nkōō moo ākoongʼo kiyoo /kiikiineetaak. ¹⁸ /Kiikiityaaytaareenaak ngʼōōki aku kiikupāywook :man. ¹⁹ Āmiiyaa ā-āmēy pooryoot ārārwook tukuuchu āmu tookuskusō nkōō sopoon nyēpō araa Kiriistō. Nkōō sopoon nyoongʼwoongʼ nyēpō taay, ku kyaakany kupaytaak :kaapkootuut chaa raacheen ākōō ngʼal choo mātiliilō. Ku paannyēēnyi nyuun, kēēmārēy kupaytaak :ngʼaleepō man ākōō tiliilin. ²⁰ Paani kiitākupāywook :ngʼōōki, ku kiimāpāywook :ngʼaleepō man. ²¹ Ara, kāroomin nee nyoo kiikōōnook :ngʼaleechu kyaa-ir chu liilook paannyēēnyi? Āpuuy :ngʼaleechoochēē meerat. ²² Kunyuun, paannyēēnyi āmu /kiikeetyaaytaareenaak ngʼōōki akaakupaytaak :Iriin, ānyōōruuy nyuun man, aku lēt ānyōōru sopoon nyēpō ākōy. ²³ Kunyuun, mālāk nyēpō :ngʼōōki ku meerat. Ku kōōnunō nyēpō :Iriin ku sopoon nyēpō ākōy kupunuunō Yēēsu Kiriistō Kiptaayaantēēnyoon.

¹ Tuupchēēnichuuch, akwaan Yāwuutik choo ānkēt ngʼātuut chēpō Muusa, moonkēt :akwaan kilē pāyuuy kipaat :ngʼātuut chiich nēē tākusopoot? ² Ānkēt akwaan kilē mwoorēy :ngʼātuut kilē maraat :cheepyooso nyoo āpoot kutēpō nkōō saanteenyiin nēē tākusopoot. Ku nēē ma :saanteenyiin, ku maakurataat cheepyoosoonoonēē. ³ Ku nēē tākusopoot :saantee akwoop keey :cheepyoosoonoonēē nkōō chiich aka, ku kaaku-ir ngʼōōki. Ku nēē ma :saanteenyiin, ku kaakuutyaaka :cheepyoosoonoonēē kwoop keey nkōō chiich aka. Ku nēē āp :chiich, kumaa-ir ngʼōōki. ⁴ Tuupchēēnichuuch, ngʼālyoon kunyi: /kiikuutyaaytaareenaak kaamuuka nyēpō ngʼātuut paani kiima :Yēēsu akipō akwaan. Ātyookiisyēēkwaan soopōyiitu chiitō aka. Chiichoonēē ku Kiriistō nyoo /kiikuungʼeeta meerat. Ku paannyēēnyi nyuun, āmuukēy a-ir kir nyoo chāmēy :Iriin. ⁵ Kii nēē tākupāytooyēēch :ātēpuutēchooch chēpō ngʼōōki, ku kiingʼēētngʼēētēēch :ngʼātuut kee-ira ngʼal choo āpuuy meerat. ⁶ /Kiikeetyaaytaareeneech nyuun paannyēēnyi ngʼātuutēchoochēē kiirateech sikēē-irchii Iriin pāyit nkōō oor nyoo rēēl nyēpō Toomirmiir. Mā kilēē taay paani kiikutuupēy ngʼātuut choo sirootēēn. ⁷ Ara nee nyuun, rāāchō :ngʼātuut? Acha sōō, mālēē nyoonēē mpō kiitēēn. Ntā kiimoonkēt :aneen ngʼātuut chēpō Muusa oo, ntā kyoosōwuyaa kilē ngʼōōki ku nee? Āmwooraa kilēē nyoonēē āmu ntā kiimāmwoorēy :ngʼātuutēchoochēē kilē, "Mēērōōti ngʼat koongʼ kiipō chiich" ntā kiimaasōwuuy kilē ngʼat koongʼ ku kir nyaa ra. ⁸ Ngʼātuutēchwēēchu choo ki-ir kunyōōru :ngʼōōki pārooyin nyoo kiipaytaan aku-iran ānyōōru ngʼat koongʼ aka tōkōl nyaa ra. Nēē moomii :ngʼātuut, ku mātingʼēy :ngʼōōki kaamuuka. ⁹ Kitoomō āsōwaa ngʼātuut, ku kiimootingʼēy kaa-iimuut nkōō sopoontanyuun. Ku paani kyoowaasōwaa ngʼātuut, āsōwaa ngʼōōki ākoonyōōru nyaril nkōō sopoontanyuun. ¹⁰ Ku :ngʼātuut nyuun choo kiitā-āpkoon sopoon, kwoopkoon meerat. ¹¹ Kinyōōru :ngʼōōki pārooyin nkōō ngʼātuutēchoochēē kuupootān, akuparan. ¹² Mpō ntā kiipāyiisyēērō :ngʼōōki ngʼātuut kuparan, kutākutiliilō :ngʼātuut, man aku kāroomō. ¹³ Nēē kāroomō :ngʼātuut oo, kwoopkaa meerat kilē nee? Acha sōō, mā lēē nyoonēē! Kiimā :ngʼātuut chu kyoopkoon meerat. Kii ngʼōōki, āmu kiipāyiisyēērō :ngʼōōki ngʼātuut nyaa karaam kwoopkaa meerat. Ngʼuutuuy nyoonēē kilē raacha :ngʼōōki nyoo mātingʼ /keemwa. ¹⁴ Kiipkaana :ngʼātuut chēpō Muusa wōloo mii :Iriin aku nēē taarataat :aneen nkōō ātēpuutēchuuch chēpō kēny ku taarataat nkōō ngʼōōki. ¹⁵ Moonkēt :aneen nyuun kiyoo ā-iraa, āmu kir nyoo āmāraa kilē ntā a-ir, kumoo-iraa. Kiyi ā-iraa nyuun ku kiyi āsāsaa. ¹⁶ Ku nēē a-iraa kir nyoo āsāsaa, āchāmaa kilē pō man :ngʼātuut nēē mwoorēy kilē ra kiyoonēē. ¹⁷ Ku mā :aneen nyuun man nyi āmii ā-irēy kir nyaa ra. Ngʼōōki nyoo pāywoon :nyi mii ku-irēy tukun chaa raacheen. ¹⁸ Ānkēt :aneen kilē nēē taarataat nkōō ātēpuutēchuuch chēpō kēny, ku moomuukaa a-ir kir nyaa karaam, āmu mpō ntā apkaat :aneen kilē taa-ir kir nyaa karaam, ku moomuukaa a-ir. ¹⁹ Kir nyoo ā-iraa ku mā kir nyaa karaam nyoo āmāraa a-ir, mpō tukun chēpō ngʼōōki choo moomāraa a-ir, ātāsaa taay ā-irēy. ²⁰ Nēē ā-iraa kir nyoo moomāraa a-ir, ku mā :aneen nyoo ā-iraa. Ngʼōōki nyoo pāywoon nyoo irēy ngʼaleechoochēē. ²¹ Kunyuun, man ku :nyi: Nēē āmāraa a-ir kir nyaa karaam, kuchōōnchoon :ngʼōōki kilē weel. ²² Nkōō kāāpkootuutēchuuch, āpāypāchinii ngʼātuut chēpō Iriin, ²³ aku nyuun, ātēēraa kaamuuka aka nkōō pōōrtanyuun nyoo mii pooryoot nkōō kāāpkootuutēchuuch. Rātaa :nyoonēē nkōō ngʼōōki choo mii kupāyiisyēērēē pōōrtanyuun. ²⁴ Kunyuun ātingʼēy ngʼātuut chēpō Iriin nkōō kāāpkootuutēchuuch akutakupāywoon :ngʼōōki. Kyoopētitō ānō kēny? Ngʼoo nyoo muukēy kusāruunēēnoon sōpooni āpuuy meerat? Āmwoochinii nyuun kōōnkēy Iriin kipunuunō Kiptaayaantēēnyoon Yēēsu Kiriistō nyoo muukēy kusāruunō piich nyarili.

¹ Maakumii nyuun paannyēēnyi :chiich nyēpō Yēēsu Kiriistō nyoo /tākēētilchinii kiirwook. ² Kiikuutyaayteech :Toomirmiir nyoo Tiliil kungʼeetee wōloo mii :ngʼōōki choo kiipayteech akwoopu meerat. Kiikēēnyōōru nyuun sopoon nyoo rēēl kupunuunō Yēēsu Kiriistō. ³ Kiimātingʼēy :ngʼātuut chēpō Muusa kaamuuka kuupēl ngʼōōki choo kiikiikupayteech. Ku kiimuuk nyuun :Iriin inyeentee ngʼōōki paani kiiyooku Wēēriinyiin kichō ngʼwēny kimāngʼiisyō kilēē achaan choo kilēē kipngʼōōkiin. /Kiikuukarkaat Yēēsu nkōō kimurtooyoon /sikēēnyoowēēch kaat ngʼōōkiichooch. /Keemuuk nyuun ngʼōōki. ⁴ Ki-ir :Iriin kilēē nyoonēē sikeemuuka kee-ira man kilēē wōloo mārtooy :ngʼātuut chēpō Muusa nēē kutuup Toomirmiir nyoo Tiliil amakutuup ātēpuut chēpō ngʼōōki. ⁵ Piich choo tākutuupēy ātēpuut chēpō ngʼōōki kupāytooy :ātēpuutēchoochēē kāāpkootuutēkwaak. Ku piich choo tuupēy Toomirmiir kupāyuuy :Toomirmiir kāāpkootuutēkwaak. ⁶ Chiich nyoo pāyuuy :ngʼōōki kāāpkootuutēchiich, kunyōōruuy meerat. Ku chiich nyoo pāyuuy :Toomirmiir kāāpkootuutēchiich, kunyōōruuy :chiichoonēē sopoon ākōō kaalya. ⁷ Kunyuun nēē tākupāyuuy :ngʼōōki kāāpkootuut chēpō chiich, ku puunyoontoo Iriin :chiichoonēē. Māmārēy :chiichoonēē ku-ir kiyoo mārēy :Iriin aku man mēēmuukēy ku-ir. ⁸ Piich choo tākupāytooy :ngʼōōki, kumēēmuukēy :pichoochēē kuupaypaay Iriin. ⁹ Akwaan nyuun ku maakupāytooyook :ngʼōōki. Pāytooyook :Toomirmiir nyoo Tiliil, āmu ātingʼēēkwaan Toomirmiiryoonoonēē. Ku nēē mātingʼēy nyuun :chiich Toomirmiiryoo Kiriistō, ku mā pō :chiichoonēē Kiriistō. ¹⁰ Āmu kii-ir :Aatam ngʼōōki akwoopu meerat kuchō kōōrooni, ku ākōy kurook :piich tōkōl nkōō ngʼwēnyuuni. Ku nēē ātingʼēy Kiriistō nkōō sopoonwēkwook, ku kōōnook :Toomirmiiryeenyiin sopoon āmu kiikuchamaak :Iriin kilē ātiliilō. ¹¹ Āmu ātingʼēēkwaan Toomirmiir nyoo Tiliil nyoo kiingʼeeta Yēēsu meerat, kuungʼēētēēnook mpō :Toomirmiiryoonoonēē meerat akukōōnook sopoon nyēpō ākōy. ¹² Kunyuun oo, tuupchēēnichuuch, mii :ngʼālyoon nyoo mārēy kee-ira akuutoorētēēch :Toomirmiir nyoo Tiliil. Makaat kēēmētēē tukun chaa raacheen choo kiicham kēē-irēy. Chiich nyoo tuupēy ātēpuutēchoochēē pō taay, kumēērēy. Ku choo tuupēy Toomirmiir nyoo Tiliil ku sāpsōōt. ¹⁴ Piich choo ntōrōōrchinii :Toomirmiir nyoo Tiliil, ku laakōōpō Iriin :choochēē. ¹⁵ Mēēlē kyoonyōōruukwaan Toomirmiir nyoo ki-iraak ālēku ōōtwook ākoowāriisyō. Acha, kyoonyōōruukwaan Toomirmiir nyoo ki-iraak ālēku laakōōpō Iriin. Toomirmiiryoonoonēē nyoo irēēch kēēkuurēē Iriin ’Apoo.’ ¹⁶ Toomirmiir nyoo Tiliil nyoo ngʼuutwēēch kilē man kichaan laakōōpō Iriin. ¹⁷ Āmu kichaan laakōōpō Iriin, kēērāmtooy ākōō Kiriistō tukun choo tingʼēy Paapaan. Nee kunyaril kilēē Kiriistō, kēētōrōōrēēch kilēē inyeentee. ¹⁸ Āpkootaa kilē /mākuumuukēy /keekarkeeyiita nyarili kumii kēēnyōōruuy pērēētuusyēchu tōrōōrin nyoo kipa kēēnyōōruuy lētuun. ¹⁹ Mii kukānyēy :kir aka tōkōl nkōō kōōrēē pērēētuu nyoo irēy :Iriin kutooku man kilē ngʼoo laakōōchiich. ²⁰ Kiikiitaamparaar :kir aka tōkōl nkōō ngʼwēny aku mēēlē āmu kiikumārēy kilēē nyōōnēē, kiitē :Iriin siitāt paani kiimaateer inyeentee. /Akēēkēnēy nyuun kilē wēētii kukārāmiituuy nkōō lētuun. ²¹ Kipa /kēētyooytoorēē piich pērēētuu aka kaamuuka nyēpō meerat, aku nyōōru :piich ōōwin nyēpō laakōōpō Iriin. ²² Kiinkēt kilē miitō kungʼwoonchinii kir aka tōkōl nyoo miitō kōōrēē kungʼeetee kēny ākōy ātyēē kilēē paani ngʼwoonchinii :cheepyooso nyoo tuumēy laakwa. ²³ Kumiichaan mpō kēēnyārilēy choo /kikēēkōōnēēch Toomirmiir nyēpō Iriin sikeechamchama wōloo lēē tōrōōrin nyoo chōōnēy lētuun. Kumiichaan kēēkēnēy nkōō ngʼwoonin /kēēkōōnēēch pōōrwēy chaa reelacheen ākēēnyōōru kir aka tōkōl nyoo mārēy :Iriin kuutē laakōōchiich. ²⁴ Kii nēē /kusārwēēch, kēētoowu kēēkēn kiyi kipa kēēnyōōruuy nkōō pērēētuunoonēē. Nēē kiikunyōōru :chiich kir nyoo kiikēnēy, ku maakuukēnēy kiyoonēē kuureer. ²⁵ Ku nēē kuukēn kir nyoo mākutingʼēy, kēēmurtooy kēēkēnēy. ²⁶ Toorētēēch mpō :Toomirmiir nyoo Tiliil āmu kiikuskusō amākuunkēt wōloo kusooytooy nkōō oor nyaa karaam. Soowēēch nyuun :Toomirmiir nyoo Tiliil nkōō oor nyoo mākuumuukēy /keemwa nkōō kuutuwayiichooch. ²⁷ Āmu Iriin nyi syookēy mukuliiriichooch, kuunkēt nyuun :inyeentee kiyoo pkootēy :Toomirmiir, āmu soochinii :Toomirmiir piich chēpō Kiriistō kilēē wōloo mārtooy :Iriin. ²⁸ Kiinkēt kilē nkōō kir aka tōkōl, ku-irēy :Iriin ngʼal choo kāroomēēn nkōō wōloo mii :choo chāmēy inyeentee, choo kiikukuur :Iriin kilēē wōloo kiichēptō :inyeentee. ²⁹ Piich choo kiisip kusōwu :Iriin, ku kiitapaan kukarkeeyiit nkōō Wēēriinyiin sikulēku :Wēēriinyiin Kipooreet nyēpō tuupchēēnik chaa chaangʼ. ³⁰ Aku choochēē kiisip kuutapaan, kukuur akwaaneek. Ku choochēē kikuurēy, ku-ir kutililiituuy. Ku choochēē ki-irēy kutililiituuy, kuutōrōōr. ³¹ Ara, kumwoorēy nee nyuun? Nēē nyoonyoon Iriin, kuupēlēēch :ngʼoo? ³² Nēē kiikōōnu :Iriin Wēēriinyiin akipō achaan oo, kuumuukēy kilē nee ku mākōōnēēch kir aka tōkōl nkōō choomnyeenyiin? ³³ Ngʼoo :nyoo muukēy kutil kilē raacha :piich choo kiikukwar :Iriin? Iriin ākityōōn nyoo tilēy kilē pō man :chiich. ³⁴ Kunyuun oo, ngʼoo :nyoo muukēy kuurwookwēēch? Moomii :chiich, āmu kiima :Yēēsu Kiriistō akipō achaan, kungʼeetee meerat akutēpō ēēruu taay nyēpō Iriin akusoowēēch. ³⁵ Ara, mii :chiich nyoo muukēy kuupēēsyēēch nkōō choomnyoot nyoo tingʼēēnēēch :Kiriistō? Nēē kākinyārilyō ntā nēē kinyōōru ngʼal choo nyikiisēēn ntā /kēē-usēēch ntā kāchō :piri ntā nēē mākutingʼēy sirōōy ntā nēē kimii yaa ra ntā nēē chō :meerat, ku mēēpēēsyēēch nkōō Kiriistō mpō kiitēēn! ³⁶ Mwoorēy :siruut chēpō Iriin kilē, "/Kupārēēch pērēētuu aka tōkōl akipō inyēēn. Kukarkeey :achaan nkōō kēēchiir choo /kuyēēngʼēy." ³⁷ Mpō ntā mii :tukuuchoochēē tōkōl, kēēpēliisyēy kupunuunō inyeentee nyoo kiichameech. ³⁸ Ānkēt man kilē nēē kā meerat ntā kā sopoon, ntā ku malaykeen ntā toomirmiirēy chaa raacheen, ntā tukun chēpō aniinee ntā ku chēpō pērēētuus choo pkoonēy ntā ku kaamuuka aka tōkōl, ³⁹ nēē kā kir nyoo mii im ntā ku nyoo mii ngʼwēny ntā kā kir aka tōkōl nyoo ki-ir :Iriin, ku mēēmuukēy :tukuuchoochēē tōkōl kuupēēsyēēch nkōō choomnyoo Iriin kupunuunō Yēēsu Kiriistō nyoo Kiptaayaantēēnyoon.

¹ Ātingʼēy ngʼwoonin nyoo ōōw akiikuu-iiman mēt nyoo lēē yoo mārookēy :ngʼwoonintonoonēē āmu toomō /kēēsāru tuupchēēnichooch, piichuuch pō Israayeel. Ntā muukēē /kēēsāru akwaaneek ntā /kuwiirtaan /akeetapaaneenaan wōloo mii :Kiriistō. Āmwooraa man āmu kyootaa sāpoontanyuun Kiriistō ākoopkootaa kilē rānēy :Toomirmiir nyoo Tiliil kilē pō man ngʼaleechu kaamwa. ⁴ Piich chēpō Israayeel chu ki-ir :Iriin kilēku laakōōchiich akungʼuuti kaamuukeenyiin. Ku-ir miis nkōō akwaaneek akuutē ngʼātuut nkōō kōrōs chēpō Kōpō Iriin akuuyoomiis akwaaneek kilē /kaakēēpēēruurook. ⁵ Kiipkoonēē :akwaaneek kō pō mpō Apraam aku kōyēēnyi nyi kichōōno :Meesaaya. Kutōrōriit ākōy :Iriin nyoo pāytooy kir aka tōkōl. Lēē nyoonēē. ⁶ Maanyōōru :Yāwuutik chaa chaangʼ pēēruur nyoo kiiyoomiis :Iriin laakōōpō Apraam. Ara ngʼuutuuy :nyēēnyi kilē mākutiirēē keey Iriin? Mālēē nyoonēē, āmu mēēlē kiitiirō keey :piich tōkōl chēpō Israayeel Yēēsu. ⁷ Mā kuukōtiināpō Apraam tōkōl chu nyōōruuy pēēruur nyoo kiiyoomiis :Iriin laakōōpō Apraam. Choo nyōōruuy ku choo pkoonēē kōpō Isaka kilēē paani mwoorēy :siruut kilē, "/Ki-itēy laakōōkuuk kupunuunō Isaka." ⁸ Ngʼuutuuy :nyoonēē kilē mā piich tōkōl choo pkoonēē siintaar nyēpō Apraam :choo lēē laakōōpō Iriin. Kunyuun choo nyitēy :Iriin kilē laakōōpō Apraam chēpō man ku choo rānēy kir nyoo yoomiisēy :Iriin. ⁹ Kiiyoomiis :Iriin akipō Isaka kilē: "Āwārākēē pērēētuu nyoo lēē nyēēnyi kēnyiini chōōnēy, aku ātoonēē, kitingʼēy :Saara wēērii." ¹⁰ Irēy :Iriin kiyoo mārēy :moonyiin kilēē paani ki-irchi laakōōpō Rapeeka ākōō Isaka. ¹¹ Kitoomō /keenam laakōōchoochēē kii lēē saram, aku kitoomō ku-ir kir nyaa karaam ntā ku kir nyaa ra, kumwoochi :Iriin Rapeeka kilē, "Pāytooy :nyi miningʼ nyi ōōw." Kunyuun, ngʼuutuuy nyēēnyi kilē kiilēwēn :Iriin kilēē wōloo kiimārtooy :inyeentee, mā kiyoo ki-ir laakōōchoochēē. ¹³ Mwoorēy :Iriin mu siruut kilē, "Kyaacham :aneen Chaakōp kusiir Eesaaw." ¹⁴ Ara kumwaa nee? Māpō man :Iriin? Acha sōō, mālēē nyoonēē mpō kiitēēn. ¹⁵ Kimwoochi :Iriin Muusa kilē: "Āriirēēy piich choo āmāraa ariira." ¹⁶ Kunyuun, riirēē :Iriin piich choo chāmēy kusiir :piich choo āmēy pooryoot sikunyōōru pēēruur. ¹⁷ Kiimwoochi :Iriin pāytooyiintoo Miisiri kilē, "Kyoolēwēniin soongʼuutuunēēniin kaamuukeenyuun /sikee-amtaata kaarineenyuun nkōō kōōrēē tōkōl." ¹⁸ Kunyuun riirēē :Iriin chiich nyoo mārēy kuriira akukany kuyaam mēt chiich nyoo mārēy kuuyaam mēt. ¹⁹ Muukēy :chiich aka nkōō akwaan kuteepeenaan kilē, "Nkōō nee nyuun sikumwoorēy :Iriin kilē kaleel :chiich? Ngʼoo nyoo muukēy kukarta Iriin ku-ir kir nyoo mārēy?" ²⁰ Inyēēn ngʼoo nyoo imuukēy iwālchi Iriin ngʼālyoon? Ara muukēy :kir nyoo /kiku-irta kuteep chiichi kii-irtooy kilē "Āmu nee sii-iraan kilēē nyi?" ²¹ Muukēy :chiich nyoo irēy tērēēn kupāyiisyēērō min ākoongʼo ku-irta tēr nyēpō koonyit, aku-ir aka nyoo māpō koonyit. ²² Mpō ntā kiimuukēy :Iriin kungʼuutu kaamuukeenyiin kungʼwoonchi piich choo kiiku-ir ngʼōōki choo rookēē /keeluluuk, ku kiikirinta :Iriin pichoochēē. ²³ Ki-ir kilēē nyoonēē sikungʼuutu wōloo chāmtooy choo soomēy /kēēnyoochi kaat. Nyōōruuy :pichoochēē pēēruur nyoo kiikuchēpchi :Iriin akwaaneek. ²⁴ Achaan man nyuun chu kiikukuurēēch :Iriin kēēlēkuu piichiich, nēē kii Yāwuutik ntā ku mā Yāwuutik. ²⁵ Mwoorēy :Iriin nkōō siruut chēpō Oseeya kilē: "Ākuurēē pichoochēē kii mā chaachuuch, ’piichuuch,’ ku choo kimoochāmēy akuurēē, ’chamanichuuch.’ " ²⁶ Akimwoorēy mpō :siruutēchoochēē pō Oseeya kilē, "Nkōō ārii yi /kikumwoochiinēē kilē, ’Maakwaan piichuuch,’ keepa /kēēmwoochiinēē nyuun kilē, ’Akwaan laakōōpō Iriin nyoo tōrōōr.’ " ²⁷ Riirēē :Isaaya piich chēpō Israayeel kilē: "Mpō ntā chaangʼ :piich chēpō Israayeel kilēē asyaak choo mii araaray, /kēēsāruuy choo ngʼērin, āmu ²⁸ mārēy kuurwoochi :Iriin piich nkōō kōōrēē kilē weel." ²⁹ Karkeey nkōō yoo kiisip kumwa :Isaaya kilē "Ntā kiimaatuukweech :Iriin nyoo tingʼēy kaamuuka tōkōl piich choo ngʼērin, ntā /kiikiiwoongʼēēch kilēē piich chēpō Sotom ākōō Komoora." ³⁰ Ara, kumwaa nee? Kiikeerō kilē /kiikeecham kilē pō man :piich choo mā Yāwuutik mpō ntā kiimaatyam kutuup ngʼātuut kilēē Yāwuutik. /Kiikucham kilē tiliilō āmu kiitiirō keey Kiptaayaan. ³¹ Aku maatililiituuy nyuun Yāwuutik choo kiityam kutuup ngʼātuut chēpō Muusa kilē sikucham :Iriin akwaaneek. ³² Nēē nyi kiikarta? Kir nyoo kiikarta ku paani maatiirō keey Kiriistō. Kiitiirō keey tukun choo irēy :akwaaneek. Kiikwat ’:raatyaanoonēē kwātēy piich’ ³³ kilēē paani mwoorēy :siruut kilē "Aroo kee, kyootaa raat Saayoon nyoo kwātēy piich aku raat nyoo miltooy piich. Ku :chiich nyuun nyoo kātiiro keey inyeentee, ku manāmēy :sōōrnān."

¹ Tuupchēēnichuuch, kir nyoo mārēy :moonyuun nkōō kir nyoo āsooyaa Iriin ku /kēēsāru piichuuch chēpō Israayeel. ² Ānkēt aneen kilē tyāmēy :pichoochēē kuupaypaay Iriin, aku moosōwu nyuun kir nyoo mārēy :Iriin. ³ Mēēnkēt :pichoochēē oor nyoo irēē :Iriin chiich kilēku nyēpō man aku kiikuutyam kilēku chēpō man nkōō oortineekwaak. Maacham nyuun kutuup araa Iriin nyoo irēy chiich kilēku nyēpō man. ⁴ Kiichō kuusilta :Kiriistō ngʼātuut chēpō Muusa sikuchama :chiich aka tōkōl nyoo rānēy inyeentee. ⁵ Kiimwooru :Muusa akipō man nyoo chōōnēē wōloo mii :ngʼātuut kilē, "Chiich nyoo keeran kutuup ngʼātuut, ku māngʼiisyēy kutuup keey nkōō ngʼātuutēchoochēē." ⁶ Chiich nyoo /kiikēē-ir kupoyiit man āmu kātiirō keey Yēēsu kimamwa nkōō moonyiin kilē, "Wēētii :ngʼoo kipsēnkwēt kiwō kuumutu Kiriistō kuchō ngʼwēny, ⁷ ntā kilē ngʼoo nyoo wēētii kuungʼēētēē Kiriistō wōloo mii piich choo kiikumēērō." ⁸ Ara mwoorēy nee :siruut? Mwoorēy kilē, "Inkēt :inyēēn ngʼālyoontēē. Mii moongʼuungʼ akimii kuutiingʼuungʼ." Inkēt inyēēn mpō ngʼālyoontooni mii kēē-āmtootēy kilē maraat /kēētiirō keey Kiriistō. ⁹ Nēē mwaaree :kuutiingʼuungʼ kilē ’Yēēsu ku Kiptaayaan,’ akiiranee moongʼuungʼ kilē kiingʼeeta :Iriin meerat, /kēēsāruun ¹⁰ āmu, rānēē :chiich moonyiin ngʼālyoon tākuchama, /ākēēsāru nēē mwaara :kuutiinnyiin kiyoo keeran. ¹¹ Mwoorēy :siruut kilē, "Mānāmēy :sōōrnān chiich nyoo tiirēē keey inyeentee." ¹² Moomii kilē ngʼoo :ngʼoo nēē kā Yāwuutyoon ntā kā mā Yāwuutyoon. Pō piich tōkōl :Kiptaayaan akuupēēruurēy piich tōkōl choo riirchinii inyeentee, ¹³ āmu mwoorēy :siruut kilē "/Kusāruuy chiich aka tōkōl nyoo riirchinii Kiptaayaan." ¹⁴ Ara oo, muuktooy ānō :akwaaneek kuriirchi Kiptaayaan nēē toomō kuuran? Muukēy kuuran Kiptaayaan kilē nee nēē toomō kuteer ngʼal akipō inyeentee? Ntā muukēy kuteera ānō ngʼaleek nēē moomii :chiich nyoo kāmwoochi? ¹⁵ Akuumuukēy :piich kwaamtaata kilē nee nēē /mākiiyooytō pakwaamta? Mwoorēy :siruut kilē "Kāroomō kilē nee kēny kēēlyēn chēpō piich choo āpuuy lōkōōy choo kāroomēēn!" ¹⁶ Mā :piich tōkōl nyuun choo rānēy lōkōōyichoochēē kāroomēēn. Mwoorēy :Isaaya kilē "Kiptaayaan, ngʼoo nyoo kiiran lōkōōy choo kiiteereeneech?" ¹⁷ Ku mārēy nyuun /kee-amta lōkōōy chēpō Kiriistō sikuteer :piich, āmu yāpchinii :piich iit ngʼal sikuuran. ¹⁸ Ātēēpaa nyuun kilē oo, toomō kiteer :piich chēpō Israayeel lōkōōyichu? Man, mwoorēy :siruut kilē: "Kiikuteer /kēē-āmtootēērēē ngʼaleechoochēē kāmooswook tōkōl chēpō ngʼwēny akiikuyāmu :lōkōōyichoochēē ngʼwēny tōkōl." ¹⁹ Ātēēpaa kuureer kilē "Ara maasōwu :piich chēpō Israayeel ngʼaleechu?" Man kiisōwu amaacham kuuran. Kiimwooru :Muusa kilē: "Āpēēruuraa piich choo mā Yāwuutik siku-iraak ānyōōruu ngʼat koongʼ ākoonyāliisyō." ²⁰ Mwoorēy :Isaaya nkōō nyakanat kilē "Kinyōōrwoon :piich choo kii maawasan, ākoongʼuutyaa keey piich choo maateepaatan." ²¹ Kimwooru nyuun :Iriin akipō piich chēpō Israayeel kilē, "Ākuurēy pērēētuus tōkōl piich choo mātēēroon aku kwiintoonēy."

¹ Ātēēpaa nyuun kilē oo: Ara kiikuwiirta :Iriin Yāwuutik? Acha! Aneen Yāwuutyoon nyēpō kōpō Apraam ākoopō siintaaryaa Peenchaman. ² Māwiirtooy :Iriin piichiich choo kiisip kulēwēn. Moonkēt :akwaan kilē mwoorēy nee :siruut akipō :Eliicha, wōloo riirchinii Iriin kungʼāloolēē piich chēpō Israayeel nyaa ra? ³ Kiimwa Eliicha kilē, "Iriintooni, kiikupar :pichu ōōrkooyiikuuk akumil kaapkōrōsiinēkuuk choo /ku-irēē kōrōs. Koongʼātu :aneen ākityōōn akimii mpō kuutyāmēy kuparan." ⁴ Kiiwālchi nee :Iriin Eliicha? Kiimwoochi kilē, "Kyaatuuk :aneen piichuuch choo lēē ēlup tisap choo maaloosu Paal nyoo mwoorēy :piich walak kilē iriinteengʼwaangʼ." ⁵ Kunyuun, ākōy paannyēēnyi, mii :piich chēpō Israayeel choo /kiikiituuk choo kiikulēwēn :Iriin nkōō chamateenyiin. ⁶ Paani kiilēwēnēy :Iriin pichoochēē nkōō chamateenyiin, ku kir :nyoonēē nyoo kiiriira :Iriin akwaaneek kipaat. Maakilēwēn akipō kir nyaa karaam nyoo ki-ir pichoochēē. Ntā /kiikuriira akipō kir nyaa karaam nyoo ki-ir, ntā chamat nyēpō Iriin ku mā chamat. ⁷ Maanyōōru nyuun :piich chēpō Israayeel kir nyoo kiiwāsēy. Choo kiinyōōru man ku choo kiilēwēnootēēn, ku chuuchō walak /kee-ir kukāriisyō mētēwēy ⁸ kilēē paani mwoorēy :siruut kilē: "Ki-ir :Iriin kuyoomō :mētēwēy. Tingʼēy koonyin amēērōōstēērēē, tingʼēy iitin amātēērēy ngʼal ākōy paannyēēnyi." ⁹ Mwoorēy mpō :Tāwuti kilē: "Kanya kilēku tuumwēyiikwaak ngʼērēpēēngʼwaangʼ. Kuuputyō akungʼwoonchi. ¹⁰ Kanya kukōryō :koonyiikwaak simeerō kir aka tōkōl akilēku ōōtwook ākōy." ¹¹ Ātēēpēēnook nyuun kilē oo, ara /kiikukwat piich chēpō Israayeel takuuputyō nyoo maakuuryoongʼsōōt? Acha! Āmu kiileel :pichoochēē, ku /kiikusāru piich choo mā Yāwuutik sikunyōōru :Yāwuutik ngʼat koongʼ. ¹² Kii nēē ir ngʼōōki :Yāwuutik, kunyōōru :ngʼwēny tōkōl pēēruur. Ku nēē /kiikuupēēruur nyuun piich choo kii mā Yāwuutik kupunuunō lēēluut chēpō Yāwuutik oo, ku tyaan nyuun pēēruur nyoo nyōōruuy ngʼwēnyuuni nēē siku Yāwuutik. ¹³ Āmii āngʼāloolwook choo mooyāwuutik. /Kiikee-iraa ālēku kāāyooytooyiintoo piich choo mā Yāwuutik. Kunyuun, āmwoochinaa Iriin kōōnkēy akipō pāyiisyeenyuun, ¹⁴ āmu āmāraa a-ir piichuuch chu lēē Yāwuutik kunyōōru ngʼat koongʼ /sikēēsāru akwaaneek walak. ¹⁵ Paani kiitay :akwaaneek Kiriistō, /kēēchoomnyō ngʼwēny nkōō Iriin. Ku nēē cham :akwaaneek aniin oo, kulēkuuy nee? Lēkuuy yoo /kakuungʼeeta piich meerat. ¹⁶ Kilēē paani kiicham :Iriin kilē pō man Apraam, /kēēchāmēy mpō kilē tiliilō :laakōōchiich. Nēē kāroomō :iiriin chēpō keet, ku kāroomō mpō :tāmoorichiich. ¹⁷ Karkeey :piich chēpō Kiriistō nkōō keet, ku karkeey :Apraam nkōō irin nyēpō kēētoonēē. Kiilēy :kēētoonēē nēē kiiloot :irinee. Kiiyapta :Iriin tāmoor walak choo maaran Kiriistō, akaakarkee :akwaan nkōō tāmoor chēpō kēētit aka nyoo /kakunam /akeenaamta kēētpō Apraam. Āriip keey amoo-āp keey im, akaapkaat nyuun kilē :irin nyi tiirēy tāmoor ama tāmoor choo tiirēy irin. ¹⁹ Āmuukēy amwaa kilē, "/Kikuyapta tāmooriichuuchō /takeekeereeneech." ²⁰ Man, /kiikuyapta āmu kiimaatiirō keey Kiriistō, /akeenaamtaak kēētoonēē pō man āmu kyootiirēēkwaan keey Yēēsu. Āmēē-āp keey im nyuun. Makaat āriip keey, ²¹ āmu nēē kiimēēmuukēy :Iriin kuutuuk tāmoor choo kiipiititooy kēētoonēē oo, /keemwa nee nkōō akwaan choo /kikuunaamtaak, māyāptooyook mpō? ²² Aroo nyuun wōloo lēē kāroomin ākōō ngʼwoonin nyoo kōōnuuy :Iriin. Kōrōōm nkōō wōloo mii :piich choo kiikuchuunnyō nkōō ngʼaleechiich aku karaam :moo nkōō wōloo āmiikwaan nee atas taay kipaat ātiirēē keey inyeentee. Ntā kilēēn, ntā /kupātālook mpō. ²³ Ku nēē wāliisyō :Yāwuutik kutay ngʼaleekwaak akutiirō keey Iriin /kēēnoomtooy yi /kākuyāptoorēē, āmu tingʼēy :Iriin kaamuuka kuunoomchi yoonēē. ²⁴ Kyaapkaaneekwaan kēētpō musēytuun nyoo maatoot :chiich /akeenaamtaak keet nyoo /kiikutoot mpō ntā /kimēērookēē /keenaamtaak. Ara moopkootēēkwaan kilē tookēy kilē weel :Iriin tāmooriik choo /kiikuyapta takupka kēētit nyi /kiikuyāptoorēē? ²⁵ Tuupchēēnichuuch, āmāraa āmwoorwook kir nyoo kiingʼuutwoon :Iriin, aku moomāraa ā-āp keey im. Nyikiisō :mētēwēy chēpō Yāwuutik walak kutiirō keey Yēēsu ākōy /kēēsāru piich tōkōl choo mā Yāwuutik choo tiirēē keey Yēēsu. ²⁶ Paani /kaakēēsāru piich tōkōl choo mā Yāwuutik, /kēēsāru nyuun piich chēpō Israayeel kilēē paani /kiikusir kilē, "Chōōnēē :Sāruuniin Saayoon, aku-ir piich chēpō Israayeel kutililiituuy nkōō taayuunyiin. ²⁷ Ā-iraa miis nkōō akwaaneek nyoo ā-istoorēē ngʼōōkiikwaak." ²⁸ Puun :Yāwuutik paannyēēnyi chēpō Iriin āmu kiitay lōkōōy choo kāroomēēn. Ku nyuun, āmu kiitay :akwaaneek lōkōōyichoochēē, /kēēkōōnook lōkōōyichoochēē. Aku tākuchāmēy nyuun :Iriin pichoochēē, āmu kiisip kulēwēn kuukātiinākwaak. ²⁹ Māwālēy :Iriin kaapkootuutēchiich akipō kir nyoo kiiyoomiis piich nkōō kir nyoo kiikuurchi ku-ir. ³⁰ Kiimaateer :akwaan iit Iriin taay, ku nee tay :Yāwuutik riirana nyēpō Iriin, kuriireenaak :Iriin. ³¹ Kilēē paani kiimaaran :akwaan Iriin, ku mēērānēy :akwaaneek paannyēēnyi Kiriistō. Ku kilēē paani kariireenaak :Iriin, ku riirēē mpō :Iriin pichoochēē. ³² Kiichāmchi :Iriin piich tōkōl kumāngʼiisyō sopoon nyoo tāyēy inyeentee sikuriira :inyeentee piich tōkōl. ³³ Lēyyē, ōōw Iriin! Tyaan kēny :pēēruurtanyiin ākōō ngʼoroomnyeenyiin. Nkēt ngʼal chaa tyaan! Moomii :chiich nyoo muukēy kusōwu kaapkootuutēchiich ākōō wōloo lēē oortineechiich! ³⁴ "Ngʼoo :nyoo muukēy kusōwu kir nyoo pkootēy :Iriin? Ntā ngʼoo :nyoo tukoonēy Iriin?" ³⁵ "Ngʼoo :nyoo kiikuutō Iriin kir kilē sikurookwoon :Iriin?" ³⁶ Kii-ir :Iriin kir aka tōkōl nyoo mii ngʼwēny, akupkoonēē :tukun tōkōl wōloo mii :inyeentee, aku chaachiich :tukuuchoochēē tōkōl. Kunyuun, tōrōōr :Iriin ākōy. Lēē nyoonēē!

¹ Kunyuun oo, tuupchēēnichuuch, āmu kiiriireeneech :Iriin, āsoomook kilē ātētēē keey kilēē kōrōs choo sāpyootēēn, ātiliilō ākoopāypooyēy Iriin. Nēē a-ir kilēē nyoonēē, ku āmii ā-irchinii Iriin pāyit nkōō oor nyēpō man. ² Maatuup ātēpuut chēpō ngʼwēny. Akanya kuwal :Iriin kāāpkootuutēkwook saapkaata nkōō oor nyoo rēēl. Nēē a-ir kilēē nyoonēē, āsōwu kiyoo mārēy :Iriin, kir nyaa karaam, kir nyaa chamaat ākōō kir nyēpō man. ³ Kilēē paani ānkēt :akwaan kilē ki-iran :Iriin nkōō choomnyeenyiin ā-irchi pāyiisyeenyiin, āmwoochinii chiich aka tōkōl nkōō akwaan kilē mēē-āp keey im kusiir wōloo itēēnō. Iroo keey wōloo ilēē. Kiikuutē :Iriin chiich aka tōkōl pāyit nyoo irchinii kutiirēē keey inyeentee. ⁴ Kilēē paani tingʼēy :pōōrpō chiich kāmooswook chaa chaangʼ aku-irēy :kamasta aka tōkōl pāyiisyeenyiin, ⁵ kēēlēēchaan nyuun nyoonēē piich chēpō Kiriistō. Mpō ntā kiichaangʼ, kēēlēēchaan :tōkōl kir ākoongʼo nkōō Kiriistō kēēsāruuy keey. ⁶ Tingʼēy :chiich aka tōkōl kaamuuka nyoo ngʼulēy nkōō nyēpō chiitō aka kilēē paani kiipēēruurēēch :Iriin. Nēē /kiikuupēēruur chiich kilēku ōōrkooyoon, kungʼalaalta kilēē paani tiirēē keey Iriin. ⁷ Ku nēē /kiikuupēēruur kilē kuutoorēt piich, kuutoorēt, ku nēē /kikuupēēruur kuuneet piich kusōwu ngʼālyoontoo Iriin, kuunēētiisyō. ⁸ Ku nēē /kiikuupēēruur kucheeraata piich, kucheeraata. Ku nēē /kiikuupēēruur kuutētō, kuutētō nkōō moo nyoo rēēl. Ku nēē /kiikuupēēruur kuuntōrōōrchi piich, kunāmchi keey pāyiisyōōnoonēē kukaraam. Ku nēē /kiikuupēēruur kuriira piich walak, kuriira nkōō pāypooyō. ⁹ Akanya kilēku choomnyēēngʼwoongʼ nyēpō man. Atayee keey ngʼōōki ākookiilchi keey kir nyaa karaam. ¹⁰ Āchoomnyēē kilēē piich choo tuupchō ākookoonyitēy piich walak kusiir wōloo ākoonyititooy keey. ¹¹ Ā-irchii Kiptaayaan pāyit nkōō moo ākoongʼo nyoo moochoosōōt ākoonāmchi keey Iriin. ¹² Āpāypāyiituu, āmu ākēnēy Kiptaayaan. Amurta nēē chōōnchook :nyaril akaatas taay āsooyēy Iriin. ¹³ Āchārchinii piich chēpō Iriin kir aka tōkōl nyoo mārēy, ākootookēy too nkōō oor nyaa karaam. ¹⁴ Nēē usook :chiich, āpēēruur nyoo kātoopānēy. ¹⁵ Apaypayituu nkōō piich choo pāypāyō, ākooriirsōōt nkōō piich choo riirsōōt. ¹⁶ Āmāngʼiisyō nkōō kaalya aku maalas keey. Nyoo kātoolāsēy keey, acham ātēpiisyō nkōō piich choo mātookuunoot. Aku maapkaat kilē āngʼoroomō. ¹⁷ Nee irwaak :chiich ngʼal chaa raacheen, ku mooroochi rāyiityō. A-ira ngʼal choo chāmēy :piich tōkōl kilē kāroomō. ¹⁸ Ku nēē muukēē, āmāngʼiisyō nkōō kaalya nkōō chiich aka tōkōl. ¹⁹ Choorweeyiichuuch, nēē irwaak :chiich ngʼal chaa raacheen, ku māā-ōōchi rāyiityō, āmētii Iriin kuroochi chiichoonēē rāyiityeenyiin, āmu mwoorēy :Iriin nkōō siruut kilē "Nyaanyuun raaktaar pō mukētuut, kunyuun, ā-iraa kilēē nyoonēē." ²⁰ I-ir kilēē paani mwoorēy :siruut kilē, "Nee am :piri puunyoontēēngʼuungʼ, ipay, ku nēē am :maral, itē pēr kura. Nēē ir kilēē nyoonēē, kuu-iim ngʼaleekwaak chu kii-iruun." ²¹ Kunyuun, meekany kuupēlin :rāyiityō, aku ipēlēē rāyiityō kāroomin.

¹ Makaat ākoonyit piich choo pāytooyook āmu pāyuunāt aka tōkōl nyoo mii ngʼwēny ku kikōōnuuy :Iriin. ² Ku chiich aka tōkōl nyoo kwiintoochinii kaamuuka nyēpō kāāntōōy choo mii ngʼwēny kumii :chiichoonēē kukwiintoochinii kir nyoo kiikutil :Iriin akuurwoochinii :Iriin chiichoonēē. ³ Āmwooraa kilēē nyoonēē āmu :piich choo irēy tukun choo kāroomēēn kumēēwārēy kāāntōōyiikwaak. Piich choo irēy tukun chaa raacheen chu wārēy kāāntōōyiikwaak. Nēē mārēy simēēwārēy kāāntōōy i-ir ngʼal chēpō man sikuuloosuun. ⁴ Pāyiisyēēchinii :pichoochēē Iriin siku-iruun nyaa karaam. Ku nēē ir ngʼal chaa raacheen kuurookēē iwāriisyō, āmu tingʼēy :kāāntōōy kaamuuka kukōōnin siitāt. Irchinii :akwaaneek Iriin pāyit nyēpō man sikuutē chiich nyoo irēy ngʼal chaa raacheen siitāt. ⁵ Makaat nyuun kēētuupēy kir nyoo mārwēēch :kāāntōōy. Mākutuupēy kipaat āmu muukēy kukōōnēēch :Iriin siitāt, acha, mālēē nyoonēē. Ituup āmu kuunkēt kilē karaam kee-ir kilēē nyoonēē. ⁶ Kiyoonēē mpō nyoo irook ātētō kōōti, āmu irchinii :kāāntōōyichoochēē Iriin pāyit kuukiilchinii keey pāyiisyōōnoonēē. ⁷ Karaam a-ir tukun choo mākootēēn a-ir. Makaat akwarta kōōti akaawar choo nyooluuy keewar, ākookoonyit piich choo rookēē /kēēkoonyit. ⁸ Raaytee pēsēn aka tōkōl nyoo kirookiin kingʼātu choomnyoot, āmu chiich aka tōkōl nyoo chāmēy piich, ku kaaku-ir kir nyoo mwoorēy :ngʼātuut. ⁹ Aroo kee ngʼātuut: ’Mēēsiir karwa,’ ’mēērumiisyō,’ ’mēēchōōrsyō,’ ’āmēērōōti ngʼat koongʼ kiipō chiich’ nkōō ngʼātuut walak tōkōl choo miitō. Rumēy :ngʼātuutyooni ākoongʼo chwēēchu tōkōl. Ngʼātuutyoonoonēē ku nyi mwoorēy kilē, "Icham piich walak kilēē wōloo ichāmtooy keey." ¹⁰ Nēē ichāmēy chiich, ku mēē-irchinii tukun chaa raacheen. Choomnyoot nyuun kuusiltooy kiyoo mārēy :ngʼātuut. ¹¹ Ānkēt akwaan wōloo lēē ngʼwēnyu pērēētuusyēchu. Ku āngʼēētyēē nyuun ākookiilchi keey sopoon nyēpō piich chēpō Kiriistō āmu kiikulōōwiit kungʼeetee aran Yēēsu aku lēēkit kichō :Yēēsu paannyēēnyi kuumuteech keepa kēēmāngʼiisyēē nkōō inyeentee. ¹² Mii kurookēy :tuurin akimii ku-ituuy :lēpooyin. Kēē-istoorēē keey nyuun tukun chēpō tuurin akeenam chēpō lēpooyin. ¹³ Kēēmāngʼiisyēē sopoon nyoo tookuunoot kilēē :pērēēt. Atayee keey tuumwēy choo ā-āmēy ākōy kusiirtō nkōō mpō pōōkito, takal choo ā-irēy ākōō koor ntā ku murēn ākōō takal walak. Mookwiintoochi keey āmoorōōti keey ngʼat koongʼ. ¹⁴ Kanya kupāywook :Kiptaayaan Yēēsu Kiriistō amaaran a-ir mākuut chēpō ngʼōōki.

¹ Nēē kaaroo kilē kuskus :chiitō aka nkōō kaarana, ataak, āmookwiintoochi akipō wōloo pkootitooy. ² Mii :choo āmēy āmiisyō aka tōkōl, ku mii :choo kuskusō kaaraneengʼwaangʼ choo āmēy nkuyoon kipaat. ³ Chiich nyoo āmēy āmiisyō aka tōkōl ku mā maraat kureengʼ chiich nyoo moomēy āmiisyō aka tōkōl. Ku :chiich nyoo mā-āmēy āmiisyō aka tōkōl, ku mēērookēē kuurwoochi chiitō nyi āmēy āmiisyō tōkōl āmu kiikucham :Iriin chiichoonēē. ⁴ Inyēēn ngʼoo siirwoochii kipāyityoontoo chiitō aka? Mōkōryoontoo chiichoonēē :nyi tilēy nēē man :chiichoonēē ntā ku mā man. Ryoongʼēy :chiichoonēē āmu tingʼēy :mōkōryoontēē kaamuuka ku-ir chiichoonēē kuuryoongʼ. ⁵ Rōōtēy :chiich aka kilē tiliil pērēētuu aka kusiir aka, kuurōōtēy aka kilē karkeey :pērēētuus tōkōl. Ku maraat nyuun kutuup :chiich wōloo lēē :kāāpkootuutēchiich. ⁶ Chiich nyoo kālē tiliil :pērēētuu aka kusiir aka, kumwoorēy kilēē nyoonēē āmu mārēy kipaat kuukoonyit Kiptaayaan. Ku :chiich nyoo āmēy āmiisyō aka tōkōl, kwoomēy akipō Kiptaayaan āmu paani āmēy kumwoochinii Iriin kōōnkēy. Ku nyoo moomēy āmiisyō tōkōl ku ka-ir kilēē nyoonēē akipō Kiptaayaan kumwoochinii Iriin kōōnkēy. ⁷ Nēē kakumēērō ntā kēēsopyō, ku maraat kēēmēērō ntā kēēsopyō akipō Iriin, mā akipō āchoonēēch. ⁸ Nēē kusopyō, kēēsopyō akipō Kiptaayaan. Ku nēē kumēērō, kēēmēērēy akipō Kiptaayaan. Ku nēē kusopyō ntā kēēmēērō, ku tākēēpō Kiptaayaan. ⁹ Kiima :Kiriistō akungʼeeta meerat sikulēku Kiptaayaan nyēpō piich choo kiikumēērō ākōō choo sāpsōōt. ¹⁰ Ara oo, āmu nee siirwoochii tuupchēēngʼuungʼ? Irēēngʼchinii nee tuupchēēngʼuungʼ? Mārēy isōwu kilē kupēētii tōkōl taayuu Iriin /sikēērwookwēēch. ¹¹ Mwoorēy :siruut kilē "Pō man kilē kutungʼwoon :chiich aka tōkōl akumwa kilē aneen Iriin." ¹² Mwooruuy keey nyuun :chiich aka tōkōl nkōō achaan nkōō taayuu Iriin. ¹³ Makaat nyuun keetayee keey kēērwoochinii piiko walak. Nēē kātaku-irēy kilēē nyoonēē, keeroo kilē maku-ir kir nyoo muukēy kukarta tuupchēēnyoon ntā ki-ir ku-ir ngʼōōki. ¹⁴ Kilēē paani kiikungʼuutwoon :Kiptaayaan Yēēsu, ku ānkēt :aneen man kilē moomii :āmiisyō aka tōkōl nyoo mātiliil. Ku nēē ran nyuun :chiich kilē mātiliil :kir ku mātiliil :kiyoonēē nkōō chiichoonēē. ¹⁵ Ku nēē put :tuupchēēngʼuungʼ akipō kir nyoo i-āmēy, ku maangʼuutuunyēēn choomnyoot nkōō kiyoonēē kee-am. Meekany kuupoot :āmiisyēēngʼuungʼ tuupchēēngʼuungʼ nyoo kiima :Kiriistō akipō inyeentee. ¹⁶ Aku nyuun, makaraam keengʼalaala kiyoo irōōtēēnyēēn kilē karaam nkōō oor nyaa ra. ¹⁷ Nkōō :Kaa Iriin ku /mākumārēē kir kiyoo āmēy :chiich ntā kira. Kir nyoo maraat, ku man, kaalya ākōō pāypooyō nyoo kōōnuuy :Toomirmiir nyoo Tiliil. ¹⁸ Chiich aka tōkōl nyoo pāyiisyēēchinii Kiriistō nkōō araani kuupāypooyēy Iriin akichāmēy mpō :piich kilē karaam. ¹⁹ Lēyyē, keetyama nyuun keewasa wōloo kiimuuktooy kee-ir kir nyoo āpuuy kaalya aku-ireech keecheera keey. ²⁰ Ameekany nyuun kupēt :piich choo kiikuuran Iriin akipō kir nyoo i-āmēy. Karaam :āmiisyō aka tōkōl /kee-am, aku mēērookēē nyuun kwaam :chiich āmiisyō nyoo pkootēy kilē makaraam. ²¹ Makaraam iree mayya ntā i-am pēēny ntā i-ir kir aka tōkōl nēē muukēy ku-ir tuupchēēngʼuungʼ kuuput. ²² Ku nēē mii wōloo ipkootitooy akipō tukuuchoochēē, ikany kupāyituun nkōō Iriin. Pēēruuroot :chiich nyoo nkēt kilē karaam :kir nyoo irēy. ²³ Ku chiich nyoo āmēy āmiisyō kuupkootēy kilē mēērookēē kwaam, ku kaakuurwoochi keey inyeentee ākityōōn, āmu āmēy āmiisyoonoonēē kuupkootēy kilē makaraam. Kir aka tōkōl nyoo /ku-irēy /kēēpkootēy kilē makaraam, ku ngʼōōki :kiyoonēē.

¹ Makaat nkōō achaan choo kiikēēkiilyō nkōō kaaranēēnyoon kēēmurtoochii piich choo kuskusō kaaraneengʼwaangʼ. Mēērookēē kēēpāypooyēy keey kipaat. ² Makaat keepaypaaya piich walak sikukiilyō akwaaneek nkōō kaaraneengʼwaangʼ. ³ Āmwooraa kilēē nyoonēē, āmu kiimaapaypaay keey mpō :Kiriistō inyeentee kilēē paani siraat kilē: "Ngʼal tōkōl chaa raacheen choo mwoortoorēēniin :piich, ku kiikumwaartaareenaan mpō." ⁴ /Kiikusir siruut tōkōl chēpō kēny sikuuneeteech, kuutoorētēēch akuukiilēēch paani mii kēēkēnēy Iriin. ⁵ Lēyyē, Iriin :nyoo irēy piich kumurta ngʼal akukiilyō. Āsoomēy nyuun inyeentee kukōōnook anama keey ālēku kir ākoongʼo paani ātuupēy araa Yēēsu Kiriistō, ⁶ tooloosu nkōō kuut ākoongʼo Iriin nyoo inyeentee ku Paapa nyēpō Kiptaayaantēēnyoon Yēēsu Kiriistō. ⁷ Ataaka keey nyuun kilēē paani kiitaakaak :Kiriistō sikutōrōriit :Iriin. ⁸ Āmwoorwook kilē kiichō :Kiriistō kupāyiisyēēchi Yāwuutik nkōō piich choo mā Yāwuutik. Kiingʼuuti Yāwuutik kilē man :kiyoo kiiyoomiis :Iriin paapatiinakwaak, akungʼuuti piich choo mā Yāwuutik kilē mārēy :Iriin kuriira akwaaneek. Kimii nyuun kuuloosuuy :pichoochēē Iriin kilēē paani mwoorēy :siruut kilē, "Āloosuun paani āmii nkōō piich choo mā Yāwuutik. Ātuumuun tuumwēy choo āloosuunēēniin." ¹⁰ Mwoorēy mpō :siruut nkōō ārii aka kilē, "Akwaan, piich choo mā Yāwuutik, āpāypāyiituu nkōō Yāwuutik." ¹¹ Aku mwoorēy mpō :siruut nkōō ārii aka kuureer kilē, "Akwaan, piich tōkōl choo mā Yāwuutik, āloosu Iriin ākooloosu :piich tōkōl chēpō ngʼwēny." ¹² Mwoorēy :Isaaya kuureer kilē "Chōōnēē :chiich kōpō Yēēsi. Pāytooy kōōrootin tōkōl aku inyeentee nyoo chōōnēy kutiirēē keey :piich choo mā Yāwuut." ¹³ Lēyyē, kukōōnook :Iriin nyoo kutiirēē keey pāypooyō nkōō kaalya nyoo ōōw paani āmii ātāsēy taay āloosuuy inyeentee, si nēē ngʼat ātiirēē keey inyeentee kukaraam kupunuunō kaamuuka nyēpō Toomirmiir nyoo Tiliil. ¹⁴ Tuupchēēnichuuch, ānkēt :aneen man kilē ākāroomēēkwaan. Ānkēt :akwaan ngʼaleepō Iriin akuyamaat aneet keey ākwoonēēk. ¹⁵ Mii :ngʼala choo moowaa kamas nkōō parwaani. Kyaasirwaak āpkootwook ngʼal walak chēpō man, āmu kiilēwēnān :Iriin ¹⁶ āpāyiisyēēchi inyeentee soo-āpchi piich choo mā Yāwuutik Yēēsu Kiriistō. /Kiikulēwēnān a-amta lōkōōy chēpō Iriin /sikuutapaan piich choo mā Yāwuutik kilēku kōrōs choo chāmēy :Iriin choo kiikuutiliil :Toomirmiiryeenyiin. ¹⁷ Apaypay :aneen nyuun nkōō Yēēsu Kiriistō akipō pāyiisyeenyuun nyi ā-irchinii Iriin. ¹⁸ Moomii :kir nyoo ālāsēēyaa keey kungʼātu kir nyoo ki-ir :Kiriistō kupununēēnaa, paani ki-ir piich choo mā Yāwuutik kuuwar Iriin nkōō ngʼaleechu kyoomwoochi ākoo-irchi. ¹⁹ Kyaa-ir aneen kilēē nyoonēē kupunuunō kaamuuka nyēpō tukun chēpō kwōngʼuut nkōō chēpō Toomirmiir nyoo Tiliil saa-amtaata lōkōōy choo kāroomēēn chēpō Kiriistō kungʼeetee Chēērusālēēm ākōy Iluriikō. ²⁰ Nkōō pāyiisyeenyuun, ku kyaatyam aneen ā-āmchi lōkōōy choo kāroomēēn piich choo kiitoomō kuteer akipō Kiriistō āmu kiimoomāraa awaanta kō nyoo kiikusisin :chiitō aka. ²¹ Ku karkeey nyoonēē nkōō paani mwoorēy :siruut kilē, "Tēērēy :choo kitoomō /kēēmwoochi aku sōwu :choo kiitoomō /kuteera iitiikwaak." ²² Pāyiisyeenyaa nyuun nyi kiikartaan kumoochōōn wōloo āmiikwaan. ²³ Kyaawaangʼ :aneen nyuun paannyēēnyi pāyiisyeenyuun nkōō kōōrootinēēchu, aku kilēē paani kyaamar aneen kulōōwiit kilē toochōōn ānyōōrwook, ku āmii nyuun aniin āchēpēy keey āruutoowook. ²⁴ Āmii āchēpēy āchō ānyōōrwook paani āwēētii Sipaannya. Āchooruutoowook paani āmii āsiirtooy sootoorētoon āwō Sipaannya ku kaakēētēpi tōkōl pērēētuus choo ngʼērin. ²⁵ Ku paannyēēnyi nyuun, āmii āwēētii Chēērusālēēm ā-āpchinii piich chēpō Kiriistō choo mii wōliinēē rōōpiyō. ²⁶ Kiipāypāyō :piich chēpō Makeetoonnya ākōō chēpō Akaaya kuutē rōōpiyō piich chēpō Kiriistō choo lēē mēēy choo mii Chēērusālēēm. ²⁷ Ki-ir kilēē nyoonēē kupāypāyō āmu paani nyōōruuy :piich choo mā Yāwuutik pēēruur nyēpō Iriin kupunuunō Yāwuutik, ku maraat kusārunō :akwaaneek piich choo mā Yāwuutik tukun choo tingʼēy. ²⁸ Nēē a-iraa kilēē nyoonēē, akaaroo kilē kiikunyōōru rōōpiyēēk, āwēētii Sipaannya ākooruutoowook paani āsiirtooy wōloonēē. ²⁹ Ānkēt aneen kilē paani kaa-itu wōloonēē, ā-āpkook pēēruur nyoo ōōw. ³⁰ Kunyuun oo, tuupchēēnichuuch, āsoomook āsoowoon Iriin sikee-ama :tōkōl pooryoot nkōō kaarinaa Kiptaayaantēēnyoon Yēēsu Kiriistō nkōō chamat nyēpō Toomirmiir nyoo Tiliil. ³¹ Āsoowoon /sikēēsārunēēnoon Yāwuutik choo mii Chuuteeya choo maaran Kiriistō. Āsoowoon mpō sikucham :piich chēpō Kiriistō choo mii Chēērusālēēm tukuuchu ā-āpchinii. ³² Nēē iriisyō :ngʼaleechoochēē, āmuukēy āchōōn wōloo āmiikwaan nkōō pāypooyō nee cham :Iriin, sikēēpāypāyiitu tōkōl. ³³ Ānyōōru tōkōl kaalya nyoo chōōnēē wōloo mii :Iriin. Lēē nyoonēē.

¹ Akanya āmwoorwook akipō chēētānyoon Pōyēēpi nyoo lēē toorētiintoo kaaniisaa Keenkreeya. ² Paani ka-itu, ataak nkōō choomnyoot nyēpō Kiptaayaan nkōō oor nyoo yāmēy /keetaakta chiich nyēpō Iriin ākootoorēt nkōō oor aka tōkōl nyoo mārēy. Āmwoorēy kilēē nyoonēē āmu kiikuutoorēt :inyeentee piich chaa chaangʼ kupootō mpō aneen. ³ Ātookwēēswoon Prisiila ākōō Akiila choo kumii :tōkōl kēēpāyiisyēēchinii Yēēsu Kiriistō. ⁴ Kiichaalta :pichoochēē sopoonwēkwaak akipō aneen. Āmwoochinaa Iriin kōōnkēy akipō pichoochēē. Mā :aneen ākityōōn nyi āmwoorēy kōōnkēy aku mwoorēy mpō kōōnkēy :kaaniseen choo māpō Yāwuutik. ⁵ Ataakweesa mpō kaaniisa nyi tuuyēyii katangʼwaangʼ ākootookwēēswoon mpō choorweenyuun Ēpānēētō nyoo āchāmēy. Inyeentee nyēpō taay kuuran Kiriistō nkōō kōōroo Eesya. ⁶ Ātookwēēswoon Maaryaa nyoo kyaam pooryoot nyoo ōōw akipō akwaan. ⁷ Ātookwēēswoon tilyayiichuuch Antirōniikō ākōō Yuuniiya choo /kiikurateech tōkōl. Tookunootēēn :akwaaneek nkōō kāāyooytooyiik aku :akwaaneek chu kiisip kuuran Kiriistō kitoomō aran :aneen. ⁸ Ātookwēēswoon Ampilyaato, choorweenyuun nyoo āchāmēy nkōō Kiptaayaan. ⁹ Ātookwēēswoon Urpaano nyoo kuutoorētēy keey tōkōl nkōō pāyiisyoo Kiriistō ākootookwēēswoon mpō choorweenyuun Staaku nyoo āchāmēy. ¹⁰ Ataakweesa mpō Apēēlē nyoo /kikeetyam /akeecham nkōō Kiriistō akaataakwees mpō piich chēpō kaa Āriistōpuulō. ¹¹ Ātookwēēswoon tilyeenyuun Ērōōtyōōn akaataakwees mpō piich chēpō kaa Narkiisi choo kiikucham Kiptaayaan. ¹² Ātookwēēswēēch tiipiichooch, Trupeena ākōō Trupoosa choo pāyiisyēēchinii Kiptaayaan akaataakwees mpō chēētānyoon Pēērsi nyoo pāyiisyēēchinii Kiptaayaan nyēpō kwongʼuut. ¹³ Ataakweesa Ruupō muroonoon tookunoot nkōō pāyiisyoo Kiptaayaan ākootookwēēswoon mpō eeyeenyiin nyoo kiitaakan kilēē wēēriinyiin. ¹⁴ Ataakweesa mpō Āsuunkriitō, Pilēkōōn, Ēērmē, Paatroopa, Eermaas ākōō tuupchēēnik choo mii tōkōl. ¹⁵ Ataakweesa Pilolooko ākōō Yuliiya, Neereeya ākōō chēētangʼwaangʼ, Oliimpa ākōō piich chēpō Kiriistō choo mii tōkōl. ¹⁶ Ataakweesa keey nkōō pāypooyō. Tookwēēsook :kaaniiseen tōkōl chēpō Kiriistō. ¹⁷ Koomwoorwook, lēyyē tuupchēēnichuuch kilē āriip keey piich choo chārootēy piich akukārtooy kaaranēēngʼwoongʼ, piich choo chwēēsootēy koonēētuut choo /kiikuuneetaak. Ā-istoorēē keey pichoochēē. ¹⁸ Piich choo irēy kilēē nyoonēē ku mēēlē pāyiisyēēchinii Kiptaayaantēēnyoon Kiriistō, pō ngʼat koongʼtangʼwaangʼ :kiyi mii ku-irootēy. Ngʼāloolēy ngʼal choo kāroomēēn aku ānyinyō kuumēlmēēlēy kāāpkootuut chēpō piich choo mēēnkēt ngʼal chaa chaangʼ. ¹⁹ Apaypay, āmu kiikuteer :piich tōkōl wōloo kyootuuptooy lōkōōyichoochēē kāroomēēn. Kunyuun, āmāraa āngʼōrōmiituukwaan nkōō tukun choo kāroomēēn akaapeer keey nkōō rāyiityō. ²⁰ Pēlwook :Iriin nyoo kōōnuuy kaalya kaamuuka nyēpō Syeetaani akuutē kēēlyēēkwook atyaartyaar. Kuupēēruurook :Kiptaayaantēēnyoon Yēēsu Kiriistō. ²¹ Tookwēēsook :Tiimōti murooni kupāyiisyēy tōkōl, akuutookwēēsook :mpō tilyayiichuuch Lukiiyō, Yaason ākōō Sospaateeri. ²² Mpō aneen Tērtiiyō nyi koosirēy parwaani pō Paawulō ku ātookwēēsook nkōō kaarinaa Kiptaayaan. ²³ Tookwēēsook :mpō Kayaas nyoo kutēpiisōōt tōkōl akutuusōōt katanyiin :kaaniisee tōkōl. Tookwēēsook :mpō Eeraasto nyoo siintooy rōōpiyō choo kōōnuuy :piich choo māngʼēy yoonēē, akuutookwēēsook mpō tuupchēēnyoon Kwaartō. ²⁵ Akanya kēēloosu Iriin nyoo inyeentee :nyi muukēy ku-iraak ākiilyō nkōō kaaranēēngʼwoongʼ kupunuunō lōkōōy choo kāroomēēn chēpō Yēēsu Kiriistō choo āmii :aneen ā-āmtooy. Ki-ungʼootēēn lōkōōyichoochēē nkōō kēnyiis chaa chaangʼ choo kiikusiirtō ²⁶ nkanyi /kiikēēngʼuutu nyuun aniin. Kiicham kungʼāloolēē :ōōrkooy chēpō Iriin lōkōōyichu akaakungʼuuti nyuun :Iriin nyēpō ākōy piich tōkōl sikutiirō keey inyeentee akuukoonyit. ²⁷ Kutōrōriit :Iriin ākōy nyoo inyeentee ākityōōn nyi tingʼēy ngʼoroomnyō tōkōl. Kiikusōwuunēē ngʼoroomnyeenyiin Yēēsu Kiriistō! Lēē nyoonēē.