Pilipi

Pilipi

¹ Aneen :nyi Paawulō, āmii ākōō Tiimōti kēēpāyiisyēēchinii Yēēsu Kiriistō. Āsirwook piipō Yēēsu Kiriistō mu Pilipi kipootō kāāntōōyiik ākōō toorētiik. ² Kuupēēruurook :Paapa Iriin ākōō Kiptaayaan Yēēsu Kiriistō ākoonyōōru kaalya. ³ Āmwoochinii Iriintēēnyuun kōōnkēy nēē āpkootook sayit aka tōkōl. ⁴ Ākootingʼēy pāypooyō nyoo ōōw nēē āsoowook tōkōl, ⁵ āmu kiikēētoorētoonuuy keey nkōō pāyiisyoo lōkōōy choo kāroomēēn kungʼeetee pērēētuunoonēē kyoonyōōruukwaan ngʼaleechu ākōy aniinee. ⁶ Ākoorānēy kilē tāsēy taay kuukiilook :Iriin nyoo kiitoowu pāyit nyaa karaam nkōō wōloo āmii. Irēy kilēē nyoonēē kutuuwaanta nkōō pērēētuunoonēē wārākēē :Yēēsu Kiriistō. ⁷ Man kilē āpkootook kilēē nyoonēē, āmu āpkootoon. Nēē arataat nkōō āngʼōōy ntā nēē ātēkēlēy ākoo-āmtooy lōkōōy choo kāroomēēn, kēērāmtooy :tōkōl pēēruurpō Iriin. ⁸ Nkēt :Iriin kilē āmoon :ēēmō akwaan tōkōl āmu āchāmook nkōō chamataa Yēēsu Kiriistō. ⁹ Āsoowook kilē kunar :choomnyēēngʼwoongʼ kitya ākoonyōōru āsowu Iriin akaanama mēt ngʼal kukaraam, ¹⁰ saamuuka ālēwēn kiyoo karaam, ākootililiituuy āmootingʼēy lēēluut pērēētuunoonēē wārākēē :Kiriistō. ¹¹ Āsoowook a-ir ākōy tukun chēpō man kupunuunō :Yēēsu Kiriistō /sikēētōrōōr /ākēēloosu Iriin. ¹² Choo kituupchō, āmārēy āmwoorwook kilē choo ki-iriisyō nkōō wōloo āmii :aneen ku kiikutoorēt kitas taay :lōkōōy choo kāroomēēn. ¹³ Nkēt mpō aniinee :riipiik tōkōl chēpō kaa pāytooyiintoo Rooma nkōō piich walak tōkōl kilē arataat :aneen āmu ā-irchinii Kiriistō pāyit. ¹⁴ Kiiku-ir ratweenyuun kunyākāniituuy chaa chaangʼ choo kituupchō nkōō Kiptaayaan kwaamta lōkōōyipō Iriin nyoo mēēwārēy. ¹⁵ Man kilē mii :piich walak choo āmtooy lōkōōyichoochēē pō Kiriistō ku tuurō moontinēy, aku mii nyuun :walak choo āmtooy lōkōōyichoochēē kitingʼēy kaapkaata nyaa karaam. ¹⁶ Āmtooy :akwaaneek āmu chāmoon akuunkēt kilē kiimutwaan :Iriin wōli sootēkēl lōkōōyichiich. ¹⁷ Mā-āmtooy :pichoochēē kāpō taay Kiriistō kitingʼēy kaapkaata nyaa karaam, pkootēy kilē ntā /kutāsi /kēē-usān kutoomii korkoreet. ¹⁸ Wōloo nyuun ma kir, nēē āmtooy :walak kitingʼēy kaapkaata nyaa ra, ntā kwoomtooy :walak kitingʼēy kaapkaata nyaa karaam ku apaypay kilē /kwoomtooy Kiriistō nkōō oor aka tōkōl. Ātāsaa taay āpāypāyiituuy ¹⁹ āmu ānkēt kilē nēē āsoowoon akuutoorētoon :Toomirmiiryoo Yēēsu Kiriistō /kēētyooytooyoon. ²⁰ Āmoongʼuuy kilē moo-iraa tukun choo kōōnoon sōōrnān aku ālēkuuy nyakan nkōō wōloo ātēptooy kilēē taay sootōrōōr Kiriistō nēē toosāpoot ntā nēē kaameer. ²¹ Sāpēēnyuun ku Kiriistō, ku nēē ameer mpō ku karaam kitya. ²² Nēē toosāpoot ku karaam āmu ā-irchinii Kiriistō pāyit, aku moonkēt kilē nyōōnō nyoo kaykay. ²³ Kēētoomtoomēnān :ngʼaleechu tōkōl. Āmārēy āwootēpō nkōō Kiriistō, āmu kir nyaa karaam nyoonēē kitya nkōō aneen, ²⁴ aku kaykayiituuy nkōō akwaan nēē āsāpoot. ²⁵ Ānkētaa nyuun kilē ātēpēē kōōrooni nkōō akwaan tōkōl sootoorētook āpāypāchi ākookiilyō nkōō kaaraneengʼwoongʼ. ²⁶ Nēē areer āruutoowook kutasa pāypooyēēngʼwoongʼ nkōō Yēēsu Kiriistō āmu kiyoo kiiku-irwaan. ²⁷ Ātēpii kilēē paani mwoorēy :lōkōōyipō Kiriistō, si nēē kāāchōōn ārōōtook ntā nēē ateer akipō akwaan, ānkēt kilē āmii kipakoongʼo, ākookiilchinii keey :tōkōl lōkōōyipō Kiriistō. ²⁸ Amaawar puunikwook. Nēē rō :piichoochēē wōloo ārāntooy Iriin, kungʼuuti :nyoonēē kilē kiikupētyō :akwaaneek akungʼuutwook kilē sārwook :Iriin. ²⁹ /Maakuchāmwook kilē ātiirō keey Kiriistō kipaat, aku /kiikuchāmwook mpō ānyārilyō akipō inyeentee. ³⁰ Āmiikwaan mpō pooryoonoonēē kyaarookwaan ātingʼaa ākoonkēt :akwaan kilē toomiiyaa pooryoot mpō aniinee.

¹ Nēē āchēērēy keey nkōō Kiriistō, ākookāykooyēē keey choomnyeenyiin, ākootingʼēy ramtaar nkōō Toomirmiir nyoo Tiliil, nēē āriirēē keey ākootēērchinii keey riruut, ² apaypaayaan. Ateera keey, ākoochoomnyō, ākoolēku ākoongʼo nkōō mukuliiriikwook ākōō kāāpkootuutēkwook. ³ Moolēku suuy, ntā alas keey kilēēn, aku āminingʼiitō keey ākookoonyit piich walak. ⁴ Maaroo kipaat kiyoo āmārēēkwaan, aku āroo :mpō kiyoo mārēy :piich walak. ⁵ Mārēy kilēku :ātēpēēngʼwoongʼ nyēpō :Yēēsu Kiriistō. ⁶ Kii lēē :inyeentee Iriin, akiitingʼēy man kukarkeeyiit nkōō Iriin. ⁷ Aku kiimētō mantanoonēē, akicham kilēku chiich nyoo lēē kipāyityoon. ⁸ Aku paani kii chiich, kuuminingʼiit keey akuukoonyit Iriin ākōy kima, meeraa sōōrnān nyēpō kimurtooyoon. ⁹ Āmu nyi, kuutōrōōr :Iriin Yēēsu, akuutē kaarin nyēpō koonyit kusiir kaarin aka tōkōl. ¹⁰ Si nēē ngʼat kukutungʼ :tōkōl nkōō parak, ākōō ngʼwēny ākōō choo mii kōōrēē ngʼwēny kuukoonyit kaarinaa Yēēsu ¹¹ akimwa :ngʼalyap aka tōkōl kilē Yēēsu Kiriistō ku :Kiptaayaan, /sikēētōrōōr Paapa Iriin. ¹² Kunyuun oo choorweeyiichuuch, kilēē paani kyookoonyitoon kēēmii tōkōl ākookoonyitoon mpō ku mākimii tōkōl, a-ir nyuun nkōō kāāwāriisyō ākōō pootana tukun choo ngʼuutuuy kilē /kiikēēsārwook. ¹³ Āmu pāyiisyēy :Iriin nkōō sāpēēngʼwoongʼ, kukōōnook amar a-ir kiyoo mārēy :inyeentee akuutoorētook mpō a-ira makeenyiin. ¹⁴ Nēē ā-irēy kir aka tōkōl, ku mookwiintoonēy ntā āpālchi keey, ¹⁵ soolēkuu choo pēērēy keey ākootililiitu kilēē laakōōpō Iriin choo mātingʼēy tisya nkōō ngʼwēnyuuni pō tuurin ākōō piich choo irēy ngʼōōki. Kanya kulēpēyiit ātēpēēngʼwoongʼ nkōō ngʼwēny kilēē kookeel. ¹⁶ Ākoonāmchi keey kukaraam lōkōōyipō sopoon. Nēē a-ir :akwaan kilēē nyoonēē, apaypayiitwaa pērēētuunoonēē wārākēē :Yēēsu Kiriistō, āmu maalēku kilēēn :pāyiisyēēnyuun nyi kyookiilchi keey. ¹⁷ Mpō nēē /kutārtooy kērētiichuuch kilēē kōrōs, āmu kyootoorētook aran Yēēsu, ku apaypay akēēpāypāyiituuy :tōkōl nkōō akwaan. ¹⁸ Nkanyi nyuun, mārēy mpō :akwaan āpāypāyiituu akipō ngʼaleechoochēē ākōō aneen. ¹⁹ Āmoongʼuuy kilē irēy Kiptaayaan Yēēsu kuumuuka āyooku Tiimōti lēēkitōōn kuchō wōloonēē āmiikwaan saapaypayiitwaa paani kawaraka kuchō ku-āmwoon lōkōōyikwook. ²⁰ Mootingʼaa chiich aka nyoo tēērwook ngʼalēēkwook kilēē inyeentee. ²¹ Riipēy :piich walak ngʼaleekwaak kipaat, amēēpkootēy kiyoo mārēy :Yēēsu Kiriistō. ²² Ānkēt :akwaan mpō wōloo kiingʼuutuntō keey :Tiimōti inyeentee. Kiikupāyiisyēēchaan tōkōl ākōō inyeentee kilēē laakwa ākōō paapeenyiin nkōō pāyiisyoo amtaar nyēpō lōkōōy choo kāroomēēn. ²³ Āyookuuy nyuun kuchō wōloonēē āmiikwaan nēē kāāsōwaa wōloo lēē ngʼala nkōō wōli. ²⁴ Ātingʼēy man nkōō Kiptaayaan kilē āchōōnēy mpō wōloonēē kilēēkit. ²⁵ Kyooyookuukwaan tuupchēē Eepapurotiitō kuchō kuutoorētān. Kiikee-amta lōkōōy choo kāroomēēn tōkōl, inyeentee ku kipāyityoon nyoo kuurānēy aku tuupchēē man. Aku, kaapkaat nyuun kilē karaam ā-ōōku wōloonēē āmiikwaan, ²⁶ āmu kiikwaam inyeentee ēēmō kuchō kuurootook tōkōl akuu-iimēy keey, āmu kyaateer :akwaan kilē kiikiimnyaan :inyeentee. ²⁷ Man kilē kiimnyaan nyoo kiitama. Aku kiriira :Iriin inyeentee kima ma. Mēēlē inyeentee ākityōōn, aku kiiriireenaan mpō aneen simatas :meereenyiin ngʼwoonin nyoo ātingʼēy. ²⁸ Aneen nyoo kyoomārēy kitya kilē kuchō wōloonēē soopāypāyiituukwaan nēē aroo inyeentee, nkōō yoonēē kilēku nyoo kēēkuskuus kāā-iimuutēchuuch. ²⁹ Ataaka :inyeentee nkōō pāypooyō tōkōl kilēē tuupchēē nkōō Kiptaayaan. Ākookoonyit kitya piich choo lēē chu, ³⁰ āmu kiitētō keey inyeentee nyoo kiitama akipō pāyiisyoo Kiriistō. Āmu kyoomiikwaan wōloo lōōw kuutoorētān inyeentee nkōō ngʼāl chaa chaangʼ choo kiimoomuukēēkwaan.

¹ Choo kituupchō, āpāypāyiituu nkōō Kiptaayaan. Moo-iimaa keey nēē ā-ōōchi keey ngʼaleechu, āmu toorētook. ² Āriipēē keey ngʼuurichoochēē, pichu irootēy ngʼal chēpō rāyiityō, akutilootēy pōōrwēy chēpō piich, akimwoorēy kilē tōkōl /kēēmur chiich /tākēēsāru. ³ Achaan nyuun choo /kikēēmurēēch nyēpō man, āmu kikutunchinii Iriin nkōō kaamuukaa Toomirmiir. Mākutiirēē keey tukun choo ku-irēy kipaat aku kutiirēē keey Yēēsu Kiriistō nyoo sārwēēch. ⁴ Āmuukaa mpō alas keey nkōō kiyoonēē lāsēē keey :pichoochēē walak. Nēē mii :chiich nyoo mwoorēy kilē tiirēē keey tukun choo irēy :piich kipaat, ātingʼaa ngʼālyoon nyoo siirēy choochēē. ⁵ /Kiikimuraa ātingʼēy pērēētuus sisiit ākōō Israayeeliin nyēpō kōpō Peenchaman, Ipurooniin koot. Kyooriipaa ngʼātuutēpō Muusa kilēē :Pārisooyiin, ⁶ akyookōrōōm kitya nyoo kyoo-usēy piipō Kiriistō. Kyooriipēy ngʼātuutēchoochēē nyoo kiimoolēēlēy. ⁷ Wōloo nyuun tukuuchoochēē tōkōl kyoo-iitaa kilē kii kāroomō, ā-iitēy paanyēēnyi kilē kilēēn akipō kiyoo kiiku-irwaan :Kiriistō. ⁸ Ngʼālyoon nyoo ōōw nyoo siirēy choochēē tōkōl ku ānkēt Yēēsu Kiriistō Kiptaayaanteenyuun. Kyoomētō kir aka tōkōl akipō inyeentee. Aroo tukuuchu tōkōl kilēē sikē soonāmchi keey Kiriistō, ⁹ ākēēlēku ākoongʼo nkōō inyeentee. Moo-iitēy kilē akaraam nkōō taayuu Iriin, nēē ātuupēy ngʼātuutēpō Muusa, aku akaraam āmu kyootiirō keey Kiriistō takusārwoon. Iriin ākityōōn :nyoo irēy chiich kutililiit nēē tiirō keey inyeentee. ¹⁰ Kiyoo āmārēy kipaat ku āsōwu Kiriistō ākōō kaamuuka nyoo /kiingʼeeta inyeentee meerat. Āmārēy akarkeeyiit nkōō inyeentee nyoo /kiikiinyariil ākōy /keepar ¹¹ si nēē ngʼat /keengʼeeteenaan meerat kilēē Yēēsu. ¹² Moomwoorēy kilē kyaawaanta ntā kyaa-it lēt, aku tookiilēy keey kilē a-ir kiyoonēē kiilēwēnchoon :Yēēsu Kiriistō. ¹³ Choo kituupchō, moopkootēy kilē kyoonyōōru. Ā-irēy kir ākoongʼo kipaat, āruutyēērō kir aka tōkōl nyoo mii lētuunyuun ākookiil keey ā-iti kiyoo mii taayuunyuun. ¹⁴ Nkanyi, āwiisēy awaanta soonyōōru mālāk nyoo kōōnoon :Iriin kupunuunō :Yēēsu Kiriistō. ¹⁵ Mārēēchaan tōkōl choo kiikēēkiilyō kēētingʼēy kāāpkootuut choo lēē choochēē. Ntā nēē ātingʼēēkwaan :walak kāāpkootuut choo makarkeey nkōō choochēē, kungʼuutwook :Iriin. ¹⁶ Aku nyuun oo, akanya keetasa taay kēētēptēē lēpooyinoonēē kiikēēnyōōru. ¹⁷ Choo kituupchō, aroo kiyoo ā-iraa akaatuup, akaaneetee keey piich choo irēy kilēē aneen. ¹⁸ Kyoosip āmwoorwook kinyil chaa chaangʼ akutoomwoorwook āriirēy kilē chaangʼ :piich choo tāyēy kimurtooyoontoo Kiriistō. ¹⁹ Pētsōōt :pichoochēē. Ntōrōōrchinii :mootinēēkwaak akulāsēy keey nkōō kir nyoo kātā-ātyēēchinii akuupkootēy tukun chēpō ngʼwēny kipaat. ²⁰ Wōloo nyuun kupoochaan kipsēnkwēt woli māngʼēy :Kiptaayaan Yēēsu Kiriistō ākēēmii kēēkānyēy inyeentee kuchōōnō kipsēnkwēt kilēē Sāruuniintēēnyoon. ²¹ Pāyiisyēērēē kaamuukeenyiin nyoo pāyunēē kir aka tōkōl kuwal pōōrwēēyiichooch chu pō ngʼwēny kukarkeeyiit nkōō pōōrtanyiin nyēpō tōrōōrin.

¹ Choo kituupchō, āchāmook aku āmoon ēēmō akwaan, āmu apaypay akipō akwaan ākāānyōōruuy :aneen mālāk āmu pāyit nyoo kyaa-ir :aneen. Choorwayiichuuch, ānāmchii keey nyuun Kiptaayaan. ² Āsoomēy chēēpyōōsōōchu ārēēny Eewootya nkōō Suntikēē kilē āchoomnyēē āmu āpō tōkōl Kiptaayaan. ³ Aku inyēēn, chiinyuun Siisiko, toorētō kuchoomnyō :chēēpyōōsōōchu āmu kiikuukiil keey ākōō akwaaneek keemwaarta lōkōōy choo kāroomēēn kipootō Kilēmēēnti ākōō piichuuch choo kiikupāyiisyēy tōkōl choo mii :kaariikwaak kiitapuu sopoon. ⁴ Āpāypāyiituu nkōō Kiptaayaan pērēētuus tōkōl. Ākoomwoorēy kuureer kilē āpāypāyiituu. ⁵ Akanya kuuro :piich tōkōl tāloosyēēngʼwoongʼ. Lēēkit kuchō :Kiptaayaan. ⁶ Āmoo-iimchi keey kir aka tōkōl, aku āsoomō Iriin kir aka tōkōl nyoo mootingʼēy, nēē āsoomēy, āmwoochinii inyeentee kōōnkēy nkōō tōkōl choo kiiku-ir. ⁷ Nēē a-ir kilēē nyoonēē kuriipkook :kaalyaa Iriin kāāpkootuutēkwook ākōō mukuliiriikwook saatuupa Yēēsu Kiriistō. Ōōw :kaalyaanoonēē nyoo mā-itinii :kāāpkootuutēpō piich. ⁸ Kunyuun oo, choo kituupchō, āpkootēyii tukuuchu: ngʼaleepō man, tukun choo /kuukoonyitēy, choo chuulootēēn, choo tiliilēēn, choo nāmēy koongʼ, choo /kupāypāychinii, choo kāroomēēn, nkōō choo /kiiloosuuy. ⁹ Āpāyiisyēērēē tukun choo kyaaneeteenaan keey ntā choo kyoomwoorwook ntā choo kyaaroo ā-iraa. Nēē a-ir kilēē nyoonēē kuupēēruurook Iriin nyoo kōōnuuy kaalya. ¹⁰ Apaypay kitya ākooloosuuy Kiptaayaan, āmu kyookōōnoon tukun kuureer mpō ntā kiikiikusiirtō :pērēētuus chaa chaangʼ. Ānkēt kilē kiimootingʼēēkwaan pārooyin, mpō ntā kyoomārēy ātoorētoon. ¹¹ Moomwooraa ngʼaleechu āmārēy kir. Kyaaneetaa keey kuyaman choo ātingʼēy nēē chaangʼ ntā ku ngʼērin. ¹² Kyoo-ānkēt wōloo lēē nēē mootingʼēy kir ntā ātingʼēy tukun tōkōl. Kyaaneet keey ātēpēē kilēē yoo āpiryoongʼoot āmii wōltō aka tōkōl, nēē /kakupayan ntā ku nēē āmoon :piri, ātingʼēy chaa chaangʼ ntā ku choo ngʼērin. ¹³ Ātingʼēy kaamuuka amuuyta tukuuchoochēē tōkōl kipunuunō inyeentee nyoo kōōnoon kaamuuka. ¹⁴ Aku nyuun oo, kii karamiit mpō ātoorētoon nkōō nyāriluutēchuuch. ¹⁵ Ānkēt :akwaan piipō Pilipi kilē kii nēē a-amtaata lōkōōy choo kāroomēēn ākoowēērō Makeetoonnya, ku moomii :kaaniisa nyoo kiitoorētān. ¹⁶ Mpō paani kimootingʼēy kir āmii Teesaloonika, ku kyootoorētoon āsip ārēēny. ¹⁷ Mēēlē āmārēy kilē /kēēkōōnān kir, aku kiyoo āpāypāchinii ku mālāk nyoo ānyōōruukwaan akipō toorētēēngʼwoongʼ. ¹⁸ Aku paanyēēnyi, ku kyoonyōōrwaa kiyoo āmārēy aku siirēy mpō. Ātingʼēy kir aka tōkōl, āmu kyoopkoon :Eepapurotiitō tukuuchoochēē kyookōōnoon. Lēē :tukuuchoochēē kōrōs choo ānyinyēēn choo /kākupēēlchi Iriin choo chāmēy :inyeentee akipāypāchinii. ¹⁹ Kōōnook :Iriin kiyoo mootingʼēy kupunuunō Yēēsu Kiriistō, āmu pō mōkōrnoonti tōkōl inyeentee. ²⁰ Kutōrōriit :Iriin nyoo Apoonyoon ākōy nkōō ākōy. Lēē nyoonēē. ²¹ Ātookwēēswoon chiich aka tōkōl nyēpō Yēēsu Kiriistō nkōō woloonēē. Tookwēēsook :mpō choo kituupchō chu kutāsēy keey. ²² Tookwēēsook :piipō Kiriistō tōkōl choo mii wōli, aku kitya ku kipāyitiinēpō Kayisaari. ²³ Akanya kuupēēruur nyuun :Kiptaayaan Yēēsu Kiriistō toomirmiirēyiikwook.