Maarkō

Maarkō

¹ Lōkōōy :chu choo kāroomēēn chēpō Wēēroo Iriin, Yēēsu Kiriistō. ² /Kiikusir nkōō kiitapuu ōōrkooyoontoo Iriin Isaaya kilē, "Āyooytooy chiinyuun kuuntoroor kusātuun aree." ³ Siraat mpō kilē, "Mii :chiich nyoo kuursyēy nkōō suur kwēēn kilē, ’Āchēpō keey, ākoochuulchi Kiptaayaan aree.’ " ⁴ Kiichō Chowaana Koopootiisāniin Kwoomtooy mu suur kwēēn kilē kuwāliisyō :piich nkōō ngʼōōkiikwaak, /akeepaatiisan sukunyōōchi :Iriin kaat. ⁵ Kipeera :piich chaa chaangʼ Chēērusālēēm ākōō kāmōōs tōkōl chēpō Kōōroo Chuuteeya akupa kuteer ngʼaleepō Chowaana. Kungʼaangʼta :piich ngʼōōkiikwaak akuupaatiisan :Chowaana nkōō ēēmpō Choortan. ⁶ Kiilookēy :Chowaana sira nyoo /kikiileeta puut chēpō tamas, akirata keey angʼwa suwa, akii-āmēy taalim ākōō kuumoot. ⁷ Kyoomchinii piich kilē, "Paani kaawaangʼ koonēētiisyeenyuun, kuchōōnēy :chiich nyoo ōōw kusiir aneen. Māyāmēy mpō ālēku kipāyityoonteenyiin. ⁸ Kaapaatiisaneenaak pēr, wōloo nyuun pootiisānēēnook inyeentee Toomirmiir nyoo Tiliil." ⁹ Nēē mii pērēētuu aka, kungʼeetee :Yēēsu Naasareet nyoo mii Kōōroo Kalilaaya akiwō kuupaatiisan :Chowaana, mu ēēmpō Choortan. ¹⁰ Paani kāngʼēētuunō :Yēēsu pēr, kuuro kuyaata parak, akurēku :Toomirmiir nyoo Tiliil nyoo karkeey nkōō chēēptuukō akunam inyeentee. ¹¹ Kungʼalaal kuut nkōō im kilē, "Inyēēn Wēēriinyuun nyoo āchāmēy ākoopāypāchinii." ¹² Paanoonēē, kuumut :Toomirmiir nyoo Tiliil Yēēsu ākōy suur kwēēn. ¹³ Kiitēpō :Yēēsu pērēētuus artam kuutyāmēy :Syeetaani akiimii nkōō tyoongʼiipō kērti, aku kiimii malaykeen kupāyiisyēēchinii inyeentee. ¹⁴ Kii nēē /kaakeerat Chowaana, kiwō :Yēēsu kōōroo Kalilaaya kwaamtaata lōkōōy choo kāroomēēn choo kiipkoonēē wōloo mii :Iriin. ¹⁵ Kyoomtooy kilē, "Kaaku-it :pērēētuu! Kaaku-itu :Pāyuunātoo Iriin. Āwāliisyēē nkōō ngʼōōkiikwook akaaran lōkōōy choo kāroomēēn." ¹⁶ Nēē mii pērēētuu aka, kimii kumānēē :Yēēsu tapan nyēpō araaray pō Kalilaaya, kuuro Siimnyōn ākōō wēēriingʼwaangʼ Antereeya kuwiirchinii neetiisyakwaak araaray kunamēy kaaraak. ¹⁷ Kukuur :Yēēsu pichoochēē akilēēchi, "Apkaana atuupaan saaneetaak wōloo ānāmtooy piich." ¹⁸ Paanoonēē, kumētō neetiisyakwaak akutuup Yēēsu. ¹⁹ Kiwō :Yēēsu taay nyoo matyaan, kuuro wēēchiipō Sēpētaayo Chēēmis ākōō Chowaana choo kiimii kuu-uunēy aku-irtooy neetiisyakwaak. ²⁰ Paani keero :Yēēsu pichoochēē, kukuur. Kumēti wēēchoochēē apoongʼwaangʼ Sēpētaayo ākōō kipāyitiin mēēlii, akutuup Yēēsu. ²¹ Kiiwō :Yēēsu ākōō kiineetanichiich Kaaparnaam. Nēē mii pērēētuu Sapaatō, kupa :tōkōl sinakōōki, akitoowu kuuneet :Yēēsu piich lōkōōy choo kāroomēēn chēpō Iriin. ²² Kiikwōngʼyō :piich nkōō wōloo kiinēētitooy :Yēēsu. Kiimēēnēētēy kilēē wōloo kiinēētitooy :koonēētik chēpō ngʼātuut, aku kiinēētiisyēy kitingʼēy kaamuuka. ²³ Kiimii sinakōōkiinoonēē :chiich nyoo kii-iimēy :toomirmiir nyaa ra. ²⁴ Kuunchō :chiichoonēē kilē, "Yēēsu nyēpō Naasareet, imārēēnēēch nee? Kēēchōōn ipareech? Ānkētiin! Inyēēn Chiich nyoo Tiliil nyoo kiichōōnēē wōloo mii :Iriin." ²⁵ Kuupkoongʼ :Yēēsu toomirmiiryoonoonēē akilēēchi, "Siisa, ākiichōōnēē chiichoonēē." ²⁶ Paani kamwa kilēē nyoonēē, kuutimtiim :toomirmiiryoonoonēē chiichoonēē. Kuunchō nkōō kuut nyoo ōōw akichōōnēē chiichoonēē. ²⁷ Kiikwōngʼyō :piich tōkōl akutoowu kuteepee keey kilē, "Ngʼal nee :chu? Koonēētuut :nyi nyoo rēēl? Nku nēē pkoongʼ :chiichi toomirmiirēy chaa raacheen nkōō kaamuuka kupeeree piich, kuukoonyitēy :toomirmiirōōchoochēē." ²⁸ /Kiikyaamtaata ngʼaleechiich kuyāmu Kōōroo Kalilaaya tōkōl. ²⁹ Paani kangʼeetee :Yēēsu sinakōōki, kupa ākōō Siimnyōn kipootō Chēēmis ākōō Chowaana ākōō Antereeya kaa Siimnyōn. ³⁰ Kiimnyaanaat :pookēr pō Siimnyōn akiimii kurwēēy. Paani ka-it :Yēēsu, kēēmwoochi inyeentee akipō cheepyoosoonoonēē. ³¹ Kiwō :Yēēsu akunam ēēr, akuutoorēt kuuryoongʼ. Kusop :cheepyoosoonoonēē akupay akwaaneek. ³² Nēē mii pērēētuunoonēē ku kaakurēytō asiis, /kēēmuti Yēēsu piich tōkōl choo kimnyoonsōōt ākōō choo kii-iimēy :toomirmiirēy chaa raacheen. ³³ Kipka :piich chaa chaangʼ akuurumchi keey kurkat saangʼ kōyoonēē kiimii :Yēēsu. ³⁴ Kiisoop :Yēēsu piich chaa chaangʼ choo kiitingʼēy kōrōōytiin aku-oon toomirmiirēy chaa raacheen chaa chaangʼ. Kikar koongʼ :Yēēsu toomirmiirōōchoochēē kimamwa kir āmu kiinkēt :akwaaneek kilē ngʼoo :Yēēsu. ³⁵ Nēē mii paani kēērir :kōōrēē, kungʼeet :Yēēsu akuwēēchi keey wōloo kiimālēēkitēē :chiich, akiwō kisa. ³⁶ Kii nēē sōwu :mpō Siimnyōn kilē moomii :Yēēsu, kiwasaata wōloo kāwō. ³⁷ Kii nēē nyōōru, kilēēchi, "Mii kuwāsiin :piich tōkōl." ³⁸ Kumwoochi :Yēēsu akwaaneek kilē, "Kaykay keepee kāmōōs walak soowō a-amta lōkōōy chēpō Iriin, āmu choochēē chu kyoopkoon." ³⁹ Kyaamtaateeree :Yēēsu sinakōōkiin chēpō Kalilaaya, aku-ōōnēy toomirmiirēy chaa raacheen kupeeree piich. ⁴⁰ Kiimii :chiich nyoo kyaam :kōōnchōryoontō. Kichō :chiichoonēē wōloo mii :Yēēsu, kukutunchi akumwoochi kilē, "Nēē ichāmēy, isoopoon akiitiliiloon." ⁴¹ Kii nēē mwa kilēē nyoonēē, kuriiree :Yēēsu. Kuukoortō ēēruunyiin kutiingʼ chiichoonēē akilēēchi, "Āchāmēy, sopō." ⁴² Kii nēē kaakumwa kilēē nyoonēē, kusop :chiichoonēē kilē weel. ⁴³ Kukir :Yēēsu akilēēchi, ⁴⁴ "Āmēēmwoochi chiich aka tōkōl ngʼaleechu. Wiyō akiiwēēngʼuuti keey tisiin siitookuu kilē kaa-itililiitu akii-āp tukun choo /ki-irēē kōrōs kilēē paani kiimwoorēy :Muusa nkōō ngʼātuut." ⁴⁵ Wōloo nyuun kiwō :chiichoonēē akutoowu kwaamtaata lōkōōyichoochēē nyoo maa-ungʼ. Ki-ir :lōkōōyichoochēē kuti ārii aka tōkōl yoo kāwō :Yēēsu, kuurumchinii keey :piich, kumārēy kēēsoop. Ki-ir :ngʼaleechoochēē Yēēsu kuti maakuwēētii ārii aka tōkōl kuurōōtēy :piich. Ku-ir Yēēsu kutēpchi keey tapan wōloo mēēnkēt :chiich. Mpō paani kiitēpō :Yēēsu tapan wōloo mēēnkēt :chiich, kitākupkoonchinii :piich nkōō kāmōōs tōkōl.

¹ Nēē mii pērēētuu aka, kuureer :Yēēsu Kaaparnaam. Nyoo matyaan, kuteer :piich kilē mii kaaw. ² Kipka :piich chaa chaangʼ akuurumchi keey kō ākōy ku-it saangʼ kuti moomii wōloo puntoorēē :chiich nkōō kurkat. Kwoomchi :Yēēsu pichoochēē ngʼālyoontoo Iriin. ³ Kutākwoomchinii :Yēēsu piich lōkōōyichoochēē, kuumuti :piich choo lēē angʼwan chiich nyoo kiimeertaaraat pōōr kuusoop. ⁴ Āmu kiichaangʼ :piich ku maanyōōru :pichoochēē pārooyin kupa wōloo mii :Yēēsu. Kulaangʼ nyuun koot kēsyēp akupilpil yoo kiitāngʼēy yoo kiimii :Yēēsu. Kuurēēytēērēē chiichoonēē kiptaraancha ākōy yi kiimii :Yēēsu. ⁵ Kii nēē rō :Yēēsu kilē kiiran :pichoochēē inyeentee, kumwoochi chiichoonēē kiimeertaaraat pōōr kilē, "Wēēriinyuun, /kaakēēnyōōwuun kaat ngʼōōkiikuuk." ⁶ Kiimii yoonēē :koonēēt walak chēpō ngʼātuut. Kukit kilē, ⁷ "Āmu nee sikungʼāloolēy :chiichi kilēē nyi? Kā-āp keey im kilēē yoo Iriin inyeentee sōō? Ngʼoo :nyoo muukēy kunyōōchi piich kaat ngʼōōkikwaak nēē mā Iriin ākityōōn?" ⁸ Nkōō yoonēē, kusōwu :Yēēsu nkōō toomirmiiryēēnyiin kiyoo kiimii kuupkootēy :koonēētichoochēē, akumwoochi kilē, "Āmu nee saapkaata tukun choo lēē choochēē? ⁹ Kuskus /kēēmwoochi chiichi mnyoonēy kilē, ’/Kaakēēnyōōwuun kaat ngʼōōkikuuk’ ntā /keemwa kilē, ’Ngʼeeta, āpō kiptaraancheengʼuungʼ akiiwō’? ¹⁰ Āngʼuutwook nyuun kilē tingʼēy :Wēēroo Chiich, kaamuuka mu ngʼwēny kunyōōchi piich kaat ngʼōōkikwaak." ¹¹ Kumwoochi nyuun :Yēēsu chiichoonēē kiimeerta pōōr kilē, "Ngʼeeta, āpō kiptaraancheengʼuungʼ, akiiwēēchi keey kaaw." ¹² Kungʼeet :chiichoonēē kilē weel, kwoop kiptaraancheenyiin, akuwēēchi keey, kuurōōtēy :piich tōkōl. Kiikwōngʼyō :piich tōkōl akuuloosu Iriin kumwoorēy kilē, "Kitoomō keero tukun choo lēē chu." ¹³ Kiwō :Yēēsu kimanaateera tapan nyēpō araaray pō Kalilaaya. Kiirumchi keey :piich chaa chaangʼ wōli kiimii :inyeentee. Kuuneet :Yēēsu pichoochēē ngʼālyoontoo Iriin. ¹⁴ Kimii kuwēētiiy :Yēēsu, kuuro chiich nyoo kiimii kutēpēē koot aka nyoo kii kukwārēē kōōti. /Kiikukuurēē chiichoonēē Laawi wēēroo Alpaayō. Kumwoochi :Yēēsu chiichoonēē kilē, "Tuupaan." Kungʼeet :Laawi akutuup Yēēsu. ¹⁵ Kii nēē mii :Yēēsu ākōō kiineetanichiich kwoomiisyēy mu kaa Laawi, ku kiitēpiisōōt :piich chaa chaangʼ choo kiikwārēy kōōti ākōō kipngʼōōkiis kipootō Yēēsu ākōō kiineetanichiich, āmu kiikatuup :piich chaa chaangʼ Yēēsu. ¹⁶ Kii nēē ro :Parisaayik walak choo kiilēē koonēēt chēpō ngʼātuut kilē mii :Yēēsu kwoomiisyēy nkōō :kwāriipō kōōti ākōō kipngʼōōkiis, kuteepee kiineetanichiich kilē, "Āmu nee sukwoomiisyēy :chiichi ākōō kwāriipō kōōti kipootō kipngʼōōkiis?" ¹⁷ Kii nēē teer :Yēēsu kilēē nyoonēē, kuwālchi kilē, "Wāsootēy :piich choo mnyoonchootēēn cheepsaakityaan. Māwāsootēy :choo kāroomō pōōrwēy. Kyoochōōn akuur kipngʼōōkiis, amēēlē chēpō man." ¹⁸ Nkōō pērēētuusyēchoochēē, kiimii :pērēētuusyēk choo kiirukuut keey :kiineetanipō Chowaana Koopootiisāniin ākōō Parisaayiik. Kupkoonchi :piich Yēēsu akuteepee kilē, "Āmu nee sukuurukuutēy keey :kiineetanipō Chowaana ākōō chēpō Parisaay kumēērukuutēy keey :kiineetanikuuk?" ¹⁹ Kuwālchi :Yēēsu kilē, "Mēērukuutēy keey :choorwaayiipō saantaa laakwa kitakimii ākōō saanteetaa laakwa. ²⁰ Itēy :pērēētuu nyoo kwoopēy santeetaa laakwa kurukuutyō nyuun :choorwayiichiich." ²¹ Kumwoochi :Yēēsu kilē, "Moomii :chiich nyoo rārēy sira nyoo rēēl akiraakee siree nyoo kiikuroosiit. Nēē ir kilēē nyoonēē kupoolēy rookēywoontēē siree kirayiit kitya. ²² /Mākuroonchinii tiipaay choo /kātākēēryākēy tokol nyoo kiikuroosiit. Nēē /ku-ir kilēē nyoonēē, kuryēēy :tokoltō akuraanta keey :tiipaayiik. /Kuroonchinii tiipaay choo /kātākēēryākēy tokol nyoo rēēl." ²³ Nēē mii pērēētuu aka nyēpō Sapaatō, kupuntoorō :mpō Yēēsu paraa nkaanu. Paani mii kupēētii, kwaam :piri kiineetanichiich. Kutoowu kupaak mēsiisēpō nkaanu akwaam. ²⁴ Paani keero :Parisaay ku-irēy kilēē nyoonēē, kumwoochi Yēēsu kilē, "Roo kee, āmu nee taku-irēy :kiineetanikuuk kir nyoo tāyēy :ngʼātuut /kee-ir mu pērēētuu Sapaatō?" ²⁵ Kuwālchi :Yēēsu kilē, "Toomō asooman kir nyoo kii-ir :Tāwuti kii nēē am :piri inyeentee ākōō piichiich chu kiimii tōkōl? ²⁶ Kiiwō :Tāwuti Kōpō Iriin akunyōōru Tisiintēē aka nyoo Ōōw nyoo /kiikukuurēē Apiyaatar. Kisoom :Tāwuti /kēētē makatiin. Kuutē :tisiintoonoonēē makatiin choo kiikuchāmchinii :tisiik ākityōōn kwaam. Kwaam :Tāwuti akuutō mpō piichiich." ²⁷ Kumwoochi nyuun :Yēēsu pichoochēē kilē, "/Kiiku-irēy Sapaatō akipō chiich, /amaaki-ir chiich akipō Sapaatō. ²⁸ Kunyuun, pāyuy :Wēēroo Chiich pērēētuu Sapaatō."

¹ Kuureer kiwō :Yēēsu sinakōōki pērēētuu aka. Kiimii kōyoonēē :chiitō aka nyoo kiirarak :ēēru. ² Nkōō kōyoonēē, ku kiimii :Parisaayik choo kiimārēy kuuro nēē soopiisyēy :Yēēsu nkōō pērēētuu Sapaatō si nēē ngʼat kuutoomchi ngʼal /tākēērwoochi. ³ Kilēēchi :Yēēsu chiichoonēē kiirarak :ēēru, "Chōōnō taay yi." ⁴ Paani kaakuchō taay, kuteepee :Yēēsu pichoochēē kilē, "Chāmēy :ngʼātuut /kee-ir kir nyaa karaam nkōō pērēētuu Sapaatō ntā kir nyaa ra? /Kēēsāru sopoonpō chiich, ntā /keepar?" Kumaakuwālchi kir aka tōkōl :pichoochēē. ⁵ Kunyala :Yēēsu akuurootootō akwaaneek nyoo kāngʼwoonchi, āmu kiimaariirēē :akwaaneek chiich. Kumwoochi :Yēēsu chiichoonēē kiirarak :ēēru kilē, "Chuula ēēruungʼuungʼ." Kuchuul :chiichoonēē. Paani kachuul, kusop :ēēruu. ⁶ Kii nēē ro :Parisaayiichoochēē kiyoo ka-ira, kungʼēētyō, kipa kutuuyō ākōō choorwayiipō Ērōōtē takuwas wōloo /kupārtooy Yēēsu. ⁷ Kuwēēchi keey :Yēēsu ākōō kiineetanichiich ākōy araaray pō Kalilaaya. Kituup :piich chaa chaangʼ chēpō Kōōroo Kalilaaya. ⁸ Kipka :piich chaa chaangʼ wōloo kiimii :Yēēsu āmu kiiteer tukun choo kii-irēy :Yēēsu. Kiipkoonēē :pichoochēē walak Chēērusālēēm ākōō Kōōroo Chuuteeya tōkōl. Kipkoonēē :walak Kōōroo Ituumeeya, Kipkoonēē :walak kōōrootin choo kiimii kamasta nyiinō aka pō ēēmpō Choortan. Kipkoonēē :walak Tiirō ākōō Siitōn. ⁹ Kii nēē chaangʼiit :piich, kumwoochi :Yēēsu kiineetanichiich kupa kwoopu mēēli, simatoorta :piich inyeentee. ¹⁰ Kiitiiwu keey :piich tōkōl choo kiimnyoonsōōt sukutiingʼ :Yēēsu, āmu kiikiikuusoop :Yēēsu piich chaa chaangʼ. ¹¹ Kii nēē ro :piich choo kii-iimēy :toomirmiirēy chaa raacheen Yēēsu, ku-ir :toomirmiirik pichoochēē kuuputyō nkōō taayuu Yēēsu akuunchōōyō kilē, "Inyēēn Wēēroo Iriin." ¹² Kikar koongʼ :Yēēsu toomirmiirōōchoochēē raacheen kumāmwoochi chiich aka tōkōl kilē kii ngʼoo :inyeentee. ¹³ Nēē mii yoonēē, kiwō :Yēēsu tulwēē aka akukuur piich choo kiimārēy kupkoonchi. ¹⁴ Nkōō pichoochēē, kulēwēn piich taman nkōō ārēēny kilēku piich choo mii nkōō inyeentee /tākuuyooytō kwaamtaata lōkōōy choo kāroomēēn, akukuurēē choochēē kāāyooytooyiichiich. ¹⁵ Akuutē kaamuuka nyoo ōōnēē toomirmiirēy chaa raacheen. ¹⁶ Pichoochēē kii lēē taman nkōō ārēēny choo kiilēwēnēy :Yēēsu ku :Siimnyōn (nyoo kiitē :Yēēsu kaarinee aka kilē Pēētērō) ¹⁷ ākōō Chēēmis wēēroo Sēpētaayo ākōō wēēriingʼwaangʼ Chowaana (choo kiitē :Yēēsu kaarinee aka kilē Pōnēērkē. Ngʼuutuuy kaarinaani kilē wēēriipō iilat.) ¹⁸ Walak ku Antereeya, Pilip, Partolomeeya, Mataayo, Toomaas, Chēēmis wēēroo Alpaayō, Tataayo, Siimnyōn Kananooyiin, (ngʼuutuuy kaarinaani pō Kananooyiin kilē kii murēn nyēpō pooryoot), ¹⁹ ākōō Chuuta Iskaryoot nyoo kiichō ku-alta Yēēsu. ²⁰ Paani kangʼeetee :Yēēsu tulwēē, kuureer wōli pō Kaaparnaam kiwō kaaw. Kuurum keey :piich chaa chaangʼ nyoo kii maamuuk :Yēēsu ākōō kiineetanichiich kwoomiisyō. ²¹ Paani kapa kuteer kaamee ākōō wēēchiikwaak ngʼaleechoochēē, kupa kuumut :Yēēsu kiwō kaaw, āmu kiimwoorēy piich kilē, "Kiikiwōōsō." ²² Kiimii :koonēēt chēpō ngʼātuut walak choo kiipkoonēē Chēērusālēēm pākuurōōtēy kiyoo kiinēētēy :Yēēsu. Kiimwoorēy koonēētichoochēē kilē, "Pāyuuy chiichi :Pēēlsēpuul nyoo lēē pāytooyiintoo toomirmiirēy chaa raacheen. Nyoonēē nyoo miitō kuutēnii kaamuuka nyoo ōōnēē toomirmiirēy chaa raacheen." ²³ Paani kateer :Yēēsu kilēē nyoonēē, kukuur koonēētichoochēē akuteep akwaaneek nkōō kārkēēyin kilē, "Muuktooy ānō Syeetaani kukwat Syeetaani? ²⁴ Nēē poorsōōt :piich chēpō kōōr, ku mēēryoongʼēy kōōroonoonēē. ²⁵ Ku nēē maatēērchiinō :piich nkōō kaaw, ku mēēryoongʼēy kaayoonēē. ²⁶ Ku nēē pooryēērō keey nyuun Syeetaani, ku mēēryoongʼēy, akuputēē pāyuunāteenyiin. ²⁷ Moomii :chiich nyoo muukēy kuchuut kōpō nyakan akwoopō tukuuchiich nēē toomō kurat chiichoonēē kupōk takuumuuk kwoopō tuukuuk. ²⁸ Āmwoorwook man kilē, muukēy kunyōōchi :Iriin kaat piich ngʼōōkiikwaak tōkōl nkōō mpō ngʼaleekwaak chaa raacheen choo kiikumwa. ²⁹ Aku nyuun :chiich nyoo mwoorēy tukun chaa raacheen akipō Toomirmiir nyoo Tiliil, ku mēēmuukēy kunyōōchi :Iriin kaat. Kunyuun, rataat :chiichoonēē ākōy nkōō ngʼōōkiichiich." ³⁰ (Kiimwa :Yēēsu kilēē nyoonēē āmu kimwoorēy piich walak kilē, "Tingʼēy inyeentee toomirmiir nyaa ra.") ³¹ Kiimii :piich chaa chaangʼ choo kiirumchi keey yi mii :Yēēsu. Ku-itu :eeyeenyiin ākōō wēēchikwaak akuuyooytō /kēēkuurchi Yēēsu kuchō saangʼ āmu kiimoomii :pārooyin koot. ³² Kēēmwoochi :Yēēsu kilē, "Mii āyēēngʼuungʼ ākōō wēēchiikwook saangʼ akumārēy kungʼālooluun." ³³ Kuwālchi :Yēēsu kilē, "Ngʼoo eeyeenyaa? Aku ngʼoo wēēchiichan?" ³⁴ Kuuro :Yēēsu pichu kātēpi kuukwēēn inyeentee akilē, "Pichu tōkōl mii yi ku eeyeenyaa aku wēēchiichan. ³⁵ Chiich aka tōkōl nyoo irēy kilēē wōli mārtooy :Iriin, ku wēēriinchan, chēētanchan aku eeyeenyaa."

¹ Nēē mii pērēētuu aka, kiwō :Yēēsu kuureer kuunēētiisyō nkōō tapan nyēpō araaray pō Kalilaaya. Kiirumchi keey :piich chaa chaangʼ kuti kiimoomii wōloo kiimuukēy kuunēētiisyēērō. Kulaangʼ mēēlii aka akuunēētiisyō, kuuryoonchēērō piich tapan nyēpō araaray. ² Kiineet piich :Yēēsu ngʼal chaa chaangʼ nkōō kārkēēyin. Nkōō yoonēē, kuuneet akwaaneek kilē, ³ "Ateera! Kiingʼeet :pāliintēē aka akiwō kitoot pareenyiin. ⁴ Paani mii ku-isēē kāsur paree, kichinchi :kāsurēēk walak aree, kukwar :tāriit akwaam. ⁵ Kichinchi :kāsurēēk walak wōloo mii :korin yoo matyaan :nyungʼwēny. Kupiityō :choochēē kilē weel āmu kii tāwārārō nyungʼwēēk. ⁶ Aku kii nēē lar :asiis kupeel pareechoochēē, āmu kiimoomii wōloo chuutēy :iriin, kuyoomō. ⁷ Kichinchi :walak wōloo mii :katōōy, kupiityō :katōōchoochēē akwaam pareek, nyoo maatakunam par. ⁸ Kichinchi :kāsurēēk walak nyungʼwēny choo kāroomēēn. Kupiityō :choochēē kunāryō ku-ēēchiniituuy akunam par. Kiinam pareek :walak par choo ngʼērin, kunam :walak chēpō kwēēn, kunam :walak chaa chaangʼ." ⁹ Kumwoochi :Yēēsu kilē, "Chiich nyoo tingʼēy iit, kiteer." ¹⁰ Paani kiimii :Yēēsu inyeentee ākōō kiineetanichiich taman nkōō ārēēny ākōō piich walak choo kiicham kumii nkōō inyeentee, kuteepee :akwaaneek Yēēsu kumwoochi kiyoo kiingʼuutuuy :tukuuchoochēē kiimwoorunēē kārkēēyin. ¹¹ Kuwālchi :Yēēsu kilē, "/Kiikēēchāmwook āsōwu kiyoo ungʼaat akipō :Pāyunātoo Iriin. Ku piich walak, kutēērēē ngʼal tōkōl kārkēēyin. ¹² Kulēē paani kiikisir nkōō :kiitapuu ōōrkooyoontoo Iriin kilē, ’Mārārēy :akwaaneek, amēēnyitēy. Kuteer, amāsōwu. Āmu nēē ro akusōwu, kuwāliisyō /akēēnyōōchi kaat.’ " ¹³ Kuteep nyuun :Yēēsu kilē, "Moonkēt :akwaan kiyoo mwoorēy kārkēēyini? Nēē moonkēt :nyi āsōwuuntooy ānō walak? ¹⁴ Akanya nyuun āmwoorwook. Isēy :pāliintēē ngʼālyoontoo Iriin. ¹⁵ Karkeey :piich walak nkōō aree oor nyoo kāchinchi kāsur. Tēērēy :pichoochēē ngʼal aku nēē chō :Syeetaani kusara kiyoo kateer. ¹⁶ Karkeey :piich walak nkōō par yoo mii :korin. Tēērēy ngʼālyoon, akutaak kilē weel nkōō pāypooyō, ¹⁷ aku mānāmēy nyuun :pichoochēē ngʼālyoontoonoonēē kukaraam, amātāsēy taay kuurānēy nyoo lōōw. Ku nēē chō :nyaril /akēēwus akipō kaaraneengʼwaangʼ, kuuchuchuukiisyō kilē weel. ¹⁸ Ku karkeey walak nkōō par yoo mii :katōōyi. Tēērēy ngʼālyoon, ¹⁹ wōloo nyuun kutoowu kuupkaat tukun chēpō ngʼwēny akicham mōkōrnoonti, akutingʼēē ngʼat koongʼ tukun tōkōl chēpō ngʼwēny. Kiichēy :tukuuchoochēē ngʼālyoontēē kuti mayi lokor. ²⁰ Ku nyungʼwēēk choo kāroomēēn ku karkeey nkōō akwaaneek choo tēērēy ngʼālyoon akicham. Nāmēy :walak par choo ngʼērin, kunam :walak chēpō kwēēn, kunam :walak chaa chaangʼ." ²¹ Kitas taay :Yēēsu kumwoochi kiineetanichiich kilē, "Moomii :chiich nyoo noomēy taayit akukara tēr ntā kuuchuut kwērēroo kitōōk. Kiitēnii taayit yoo tōrōōr sikuulēpooyiit koot. ²² Kir nyoo ungʼaat, /kēēngʼoongʼuuy, ku kir nyoo tukoot kēēsuulēy. ²³ Nēē tingʼēy :chiich iit, kuteer." ²⁴ Kumwoochi :Yēēsu kilē, "Āyāpchii iit nyuun kukaraam ngʼal choo ātēērēy. Nyoo tēēnō nyoo kēē-irchi piich kēē-irwook akēētāswook mpō. ²⁵ Chiich nyoo pāyiisyēērēē kiyoo /kiikēētō /kēētāsinii walak, ku nyoo māpāyiisyēērēē, /kēēsārēē mpō nyoo tingʼēy." ²⁶ Kitas taay :Yēēsu kumwoochi piich kārkēēyin aka nyoo ngʼuutuuy wōloo lēē Pāyuunātoo Iriin. Kimwoochi kilē, "Lēē nyi :Pāyuunātoo Iriin. Isēy :chiich kōsur pareenyiin. ²⁷ Rwēēy langʼa, nēē mii pērēēt kutoopēntooy, aku nkōō yoonēē tōkōl, kimii kāsurēēk kupiitsōōt, āmēēnkēt :inyeentee wōloo piititooy. ²⁸ Nyungʼwēny ākityōōn choo irēy kōsur kumāryō akupiityō. Mārsōōt :kōsur kipōk sukupiit pareek, nēē mii lētuun, ku-ir mētēwēy choo yyēy mukuur chēpō par. ²⁹ Paani kaakururyō :pareechoochēē, kutoowu kukāsiisyō :chiichoonēē, āmu kaaku-it pērēētuu kaswa." ³⁰ Kumwoochi :Yēēsu pichoochēē kilē, "/Kuutēēnēē Pāyuunātoo Iriin nee? Ntā kārkēēyin nee nyoo /kungʼuutuunēē? ³¹ Lēē kōsuryoontoo aritaali, nyoo nēē kutoot ku miningʼ kisiir tōkōl nkōō ngʼwēny. ³² Paani kaakupiit, kulēkuuy keet nyoo ōōw kusiir keet tōkōl choo mii :par. Piitēy tāmoor choo ēēchēēn choo tēēchinii :tāriit kooriikwaak, akunāmēy sāk choo ēēchēēn choo tēnii uurwō tāriit." ³³ Kwoomchi :Yēēsu piich ngʼālyoontoo Iriin kupāyiisyēērēē kārkēēwuut choo karkeey, choo kiimuukēy kusōwu. ³⁴ Kiimāmwoochinii piich kir aka tōkōl kumāpāyiisyēērēē kārkēēyin, aku nyuun paani kiimii :inyeentee ākōō kiineetanichiich, ku kiimwoochi kir aka tōkōl. ³⁵ Nkōō pērēētuunoonēē kosoliny, paani kaakuuwaangʼ :Yēēsu koonēētiisyeenyiin, kumwoochi kiineetanichiich kilē, "Keetiltee araarayta keepee kamasta nyiino aka." ³⁶ Kipa :kiineetanichoochēē ākōō Yēēsu mēēlii, akumētō pichuuchō walak kumii tapaantaa araarayta. Kiimii mpō :mēēliinēk walak yoonēē. ³⁷ Kēēmii araarayta kwēēn kutiltooy, kuchō yoomēt nyoo nyikiis akuutimtiim mēēlii. Ku-ir :yoomoonoonēē pēr kuusyoolchi keey mēēlii kuti paanta kuchuut araaray. ³⁸ Kiimii :Yēēsu rwoon akiitiir mētinyiin nkōō mēēlii lēt. Kuungʼeet kiineetanichiich akilēēchi, "Koonēētiin! Mēērōōtēēnyēēn kilē kumii kēērookēy?" ³⁹ Kungʼeet :Yēēsu akuupkoongʼ yoomēē kusiis akumwoochi pērēēk kutālāyiituuy. Paani kamwa kilēē nyoonēē, kusiis :yoomēē akutālēyiituuy :pērēēk. ⁴⁰ Kumwoochi :Yēēsu kiineetanichiich kilē, "Āmu nee soowāriisyēē kilēē nyoonēē? Mootingʼēēkwaan kaarana?" ⁴¹ Kiikwōngʼyō :akwaaneek nkōō koowāriisyō akuteep keey kilē, "Chiich nee :chiichi? Nku tēērēy iit mpō :yoomēt ākōō pēr."

¹ Nēē mii yoonēē, ku-it :Yēēsu ākōō kiineetanichiich tapan nyēpō kamasta aka nyēpō araaray nkōō kōōroo Keeraasa. ² Paani kārēkuunō :Yēēsu mēēli, kutuuyō nkōō chiich aka nyoo kiitingʼēy toomirmiir nyaa ra kuchōōnēē wōloo /kiikutupchinii piich. ³ Kiimāngʼēy wōloonēē pō kēpēnootiichoochēē. Kiimoomii :chiich nyoo kiimuukēy kurat chiichoonēē mpō nkōō angʼwaa karin. ⁴ /Kiimaakēēmuukēy, āmu /kikiikeerata angʼwa nyēpō karin kinyil chaa chaangʼ ēēruun nkōō kēēlyēn aku kiimuuk kungʼāti āngʼōōchoochēē. Kimoomii :chiich nyoo kiitākuumuukēy chiichoonēē. ⁵ Kiinchwootēy pērēēt ākōō langʼa mu wōloo pō kēpēnoot ākōō tulōōntōōy akutilēē keey korin. ⁶ Kii nēē rōōti :chiichoonēē Yēēsu wōloo lōōw, kuuwiis akukutunchi. ⁷ Kumwoochi :Yēēsu kilē, "Toomirmiiryooni ra, wēērēē chiichōōnēē!" Kuunchō :chiichoonēē akimwa kilē, "Yēēsu! Wēēroo Iriin nyoo Tōrōōr, imārēēnoon nee? Āsoomiin nkōō kaarinaa Iriin kilē meenyariilaan." ⁹ Nkōō yoonēē, kuteepee :Yēēsu kilē, "/Kukuurēēniin ngʼoo?" Kuwālchi kilē, "/Kukuurēēnoon ’Luk’ āmu kichaangʼ." ¹⁰ Kusaarsaar :inyeentee Yēēsu kilē ma-oon akwaaneek kupeera kōōroonoonēē. ¹¹ Kiimii :ākwoot nyēpō nkurwēētiin nyoo kyookēētēē lakam nyoo kiilēēkitēē yoonēē. ¹² Kusoom :toomirmiirōōchoochēē raacheen Yēēsu kilē, "Kanyeech keepa keechuuta nkurwēētiinēchuuchō." ¹³ Kuchāmchi :Yēēsu toomirmiirōōchoochēē raacheen kuchuut nkurwēētiin. Kumwēr ākwootiinoonēē pō nkurwēētiin kii-itēy ēlup ārēēny, kuutuultēērō keey lakam akuwiirchi keey araaray akurook. ¹⁴ Paani keero :māsowēēpō nkurwēētiinēchoochēē kiyoo ki-ira, kumwēr akupa kumwoochi piich tōkōl chēpō kōōroonoonēē kiyoo ki-ira. Kupa :piich kuuro kiyoo kii-ira. ¹⁵ Kii nēē it yoonēē kiimii :Yēēsu, kuuro chiichoonēē kiikiikuu-iim :toomirmiirēy chaa raacheen kutēpēē ngʼwēny kuulaakaat akiikukaramiit. Kuuwāriisyō :pichoochēē tōkōl. ¹⁶ Kirarta :piich choo kiiro ngʼaleechoochēē kiyoo ki-ira nkōō wōloo mii :chiichoonēē kiitingʼēy toomirmiirēy chaa raacheen nkōō nkurwēētiinēk. ¹⁷ Kusaarsaar :pichoochēē Yēēsu kuwēērō kōōrēēngʼwaangʼ. ¹⁸ Paani mii kupēētii kipa kuloongʼēy mēēlii, kusaarsaar :chiichi kii-iimēy toomirmiirēy chaa raacheen Yēēsu kupa tōkōl. ¹⁹ Kitay :Yēēsu akilēēchi, "Wiyō kaaw akiiwēēmwoochi piikuuk kiyoo kaa-iruun :Iriin nkōō wōloo kariireeniin." ²⁰ Kiwō :chiichoonēē kwaamta nkōō kōōroo Teekapooli ngʼal choo kii-irchi :Yēēsu inyeentee. Kikwōngʼ :piich tōkōl choo kiiteer ngʼaleechoochēē. ²¹ Kii nēē ngʼeetee :Yēēsu ākōō kiineetanichiich yoonēē pō Keeraasa, kuwaraka kutilta araaray pō Kalilaaya kiwō kamasta nyiinō aka. Paani ka-it, kupka :piich chaa chaangʼ akuururuuchi keey yi mii :inyeentee. ²² Kutākumii tapan nyēpō araarayta, kuchō :kāāntōōyiintēē aka nyēpō sinakōōki nyoo /kiikukuurēē Chāyrō. Kii nēē ro Yēēsu, kukutungʼ nkōō taayuunyiin, ²³ akusoom kilē, "Mii chēētanyuun nyoo mārēy kumēērēy. Kaykay chōōnō tiingʼēē ēēruunēkuuk sukusop." ²⁴ Kucham :Yēēsu akiwō nkōō inyeentee. Kituup :piich chaa chaangʼ choo kiikiichootēy keey. ²⁵ Kiimii yoonēē :cheepyoosee aka nyoo kiikiikumnyaan kitya. Kiitingʼēy kēnyiis taman nkōō ārēēny kupēērēē :kērēti. ²⁶ Kiikiikunyaril kuruutoochinii cheepsaakitiis chaa chaangʼ akiikiikuutētō tukuuk tōkōl choo kiitingʼēy amāsop. Nyoo kātāsopēy, kitas taay :pōōrtō kurayiit. ²⁷ Kiikiikuteer akipō Yēēsu. Kuchōōnō nyuun lēt akutiingʼ sireenyiin. ²⁸ Kiikiikumwoochi keey :cheepyoosoonoonēē kilē, "Nēē ātiingʼ aneen mpō sireenyiin kipaat, āsopēy." ²⁹ Kukāriisyō :kērētiik kilē weel. Kuteer nkōō pōōrtanyiin kilē kaakusopēē kōrōōyoonēē kiitingʼēy. ³⁰ Kii nēē sōwu :Yēēsu kilē kāwēērō :kiimnān inyeentee, kuwarak keey kuuro lēt, akuteep kilē, "Ngʼoo nyi kātiingʼ sireenyuun?" ³¹ Kuwālchi :kiineetanichiich kilē, "Mēērōōtēy kilē keekiich keey :piich nkōō yoo imii, akiitēēpēy kilē ngʼoo :nyi kātiingʼān?" ³² Kuuro :Yēēsu kumārēy kusōwu kilē ngʼoo :nyi kātiingʼ sireenyiin. ³³ Paani kāsōwu :cheepyoosoonoonēē kiyoo ka-ira nkōō pōōrtanyiin, kuchō nkōō koowāriisyō kupōōtānēy akukutungʼ nkōō taayuu Yēēsu, akumwoochi kir aka tōkōl. ³⁴ Kumwoochi :Yēēsu kilē, "Cheetānyuun, kēēsoopin :kaaraneengʼuungʼ. Ruutēē nkōō kaalya akiisop kukaraam." ³⁵ Kutākumii :Yēēsu kungʼāloolēy, kupkaanee :piich kaa Chāyrō, akilēēchi Chāyrō, "Kaakima :chēētāngʼuungʼ. Tēē-iimchinii nee koonēētiin?" ³⁶ Kii nēē teer :Yēēsu ngʼaleechoochēē, kilēēchi kāāntōōyiintoo sinakōōki, "Mēēwāriisyō! Rana kipaat." ³⁷ Moochāmchi :Yēēsu chiich aka tōkōl kiwō ākōō inyeentee kingʼātu Chēēmis ākōō wēēriingʼwaangʼ Chowaana ākōō Pēētērō. ³⁸ Paani ka-it kaa kāāntōōyiintoo sinakōōki, kuuro :Yēēsu piich choo mii kuwiirtooy keey, kuriirsōōt akuunchōōsōōt. ³⁹ Kiwō kō akilē, "Nēē nyi āwiirtoochinii keey ākooriirsōōt? Ānchōōchinii nee? Maama :laakwee, mii rwoon." ⁴⁰ Kii nēē mwa :Yēēsu kilēē nyoonēē, kuroorēchi :piich. Kumwoochi piich tōkōl kupa saangʼ akukuur Chāyrō ākōō cheepyooseenyiin ākōō kiineetanichiich chu kiimii nkōō inyeentee akupa tōkōl wōloo kimii :laakwee. ⁴¹ Kunam :Yēēsu ēēruutaa laakwee akilē, "Taliita ku-mi" nyoo nēē kuwal kilēēnii, "Chēēpi, āmwooruun kilē ngʼeeta!" ⁴² Kungʼeet :chēēpoonēē kilē weel akuwēētootō. Kiitingʼēy :laakwaanoonēē kēnyiis taman nkōō ārēēny. Kikwōngʼyō :piich nkōō kiyoo kii-ira. ⁴³ Kikir :Yēēsu pichoochēē kimamwaarta ngʼaleechoochēē, akilēēchi kuutē laakwee kir nyoo āmēy.

¹ Kuwēērō :Yēēsu yoonēē akuureer Naasareet kōōrēēnyiin, kupa ākōō kiineetanichiich. ² Nēē mii pērēētuu Sapaatō, kiwō :Yēēsu sinakōōki akuunēētiisyō. Kiikwōngʼyō :piich tōkōl choo kiteer ngʼaleechoochēē akilē, "Kiinyōōrchi ānō :chiichi ngʼaleechu tōkōl? Ngʼoroomnyō nee :nyi /kiikiitē chiichi? Kaamuuka nee :nyi tingʼēy :chiichi nyoo muukēy ku-ir ngʼal chēpō kwōngʼuut? ³ Ma kiitoongʼiin :chiichi, wēēroo Maaryaa? Ma wēēriingʼwaangʼ Chēēmis, Chōōsēp, Chuutaas ākōō Siimnyōn? Mā tiipiikwaak :chu mii yi nkōō achaan?" Kitay nyuun :pichoochēē ngʼaleepō Yēēsu. ⁴ Kumwoochi :Yēēsu kilē, "/Kiikoonyitēy ōōrkooyoon nkōō wōltō aka tōkōl kungʼātu mu kōōrēēnyiin, ākōō wōloo mii tilyayiikwaak, ākōō katangʼwaangʼ wōloo /mākiikoonyitēē." ⁵ Maa-ir :Yēēsu ngʼal chaa chaangʼ chēpō kwōngʼuut mu kōōroonoonēē. Kiitiingʼō :ēēruunēchiich piich choo ngʼērin kipaat choo kiimnyoonsōōt akuusoop akwaaneek. ⁶ Kikwōngʼ :Yēēsu āmu kiimaaran :pichoochēē inyeentee. Kiwō :Yēēsu kōōrootin walak wōkuunēētiisyootō. ⁷ Nēē mii pērēētuu aka, kukuur :Yēēsu kiineetanichiich chu kiilēē taman nkōō ārēēny, akuuyooytō kupeera ārēēny ārēēny pakwaamtaata ngʼālyoontoo Iriin. Kitoomō kupa, kuutē akwaaneek kaamuuka nyoo muukēy ku-oon toomirmiirēy chaa raacheen. ⁸ Kumwoochi akwaaneek kilē, "Ameenamaata :chiich kir aka tōkōl paani iwēētii kungʼātu kaarya. Āmēē-āp āmiisyō, saapaa kātōōn, ntā ku rōōpiyō. ⁹ Iraap kwēēr akumēē-āp sira aka." ¹⁰ Kumwoochi akwaaneek kilē, "Nēē taakaak :chiich, apa katanyiin ātēpi ākōy apeeree yoonēē. ¹¹ Nēē mataakaak :piich akutay kuteer kiyoo āmwoorēy, āpēēchinii keey, aparta tēērit nkōō kēēlyēēkwook. Ngʼuutuuy :nyoonēē kilē tākutingʼēy pichoochēē ngʼōōkikwaak." ¹² Kupa :kiineetanichoochēē pākwoomchinootō piich kuwāliisyēērō rāyiityēēngʼwaangʼ nyoo kiiku-ir. ¹³ Kii-oon toomirmiirēy chaa raacheen chaa chaangʼ, akuu-iilee mwaar piich chaa chaangʼ choo kiimnyoonsōōt akuusoop. ¹⁴ Kiingʼalaala :piich chaa chaangʼ ngʼaleechu kiimii ku-irēy :Yēēsu kuti ku-it :ngʼaleechoochēē wōloo mii pāytooyiin Ērōōtē. Kiimwoorēy :piich walak kilē, "Kiikungʼeeta Chowaana Koopootiisāniin meerat nka nyi tingʼēy kaamuuka ku-ir ngʼal chēpō kwōngʼuut" ¹⁵ Kimwoorēy :walak kilē, "Eliicha nyi kaakuwaraka." Kimwoorēy :walak kilē, "Ōōrkooyoontoo Iriin nyi nyoo karkeey nkōō ākoongʼo nyēpō ōōrkooy chēpō kēny." ¹⁶ Paani kateer :Ērōōtē kilēē nyoonēē, kimwa kilē, "Chowaana Koopootiisāniin :nyi kyaamwaarta /keetil mētinyiin nyi /kaakeengʼeeta meerat." ¹⁷ Kiikiikumwaarta :Ērōōtē kilē /keenam Chowaana /akeerat nkōō korkoreet. Ki-ir :Ērōōtē kilēē nyoonēē āmu Ērōōtya, cheepyooseetaa wēēriingʼwaangʼ nyoo /kiikukuurēē Pilip, nyoo kyoop Ērōōtē. ¹⁸ Kiimwoochi :Chowaana Ērōōtē kilē, machamaat kwoop cheepyooseetaa wēēriingʼwaangʼ. ¹⁹ Kutoowu :Ērōōtya kusas Chowaana nkōō ngʼaleechoochēē kiimwoorēy, akimar kuukeet. Wōloo nyuun kimēēmuukēy kuukeet, ²⁰ āmu kiiwārēy :Ērōōtē Chowaana. Kuriip nyuun :Ērōōtē inyeentee āmu kiinkēt kilē chiich :Chowaana nyēpō man akutiliil. Kiichāmēy kutēērēy :Ērōōtē kiyoo kiimwoorēy :Chowaana, akii-iimēy inyeentee mēt :ngʼaleechoochēē. ²¹ Ku-it nyuun :pērēētuu nyoo kiinyōōru :Ērōōtya pārooyin. Kii-ir :Ērōōtē tuum nyoo /kiikuupkootēy pērēētuuni /kiikutuumēy inyeentee. Kikuur :Ērōōtē piichiich choo ēēchēēn. Kikuur mpō kāāntōōy chēpō lukoo pooryoot ākōō piich walak choo kii tookuunoot nkōō Kalilaaya. ²² Kuchō :chēpō Ērōōtya akunyaal nkōō taayuu Ērōōtē nkōō tooyēēchiich. Kupaypayiit :Ērōōtē akumwoochi chēēpoonēē kilē, "Ichāmēy ākōōnin nee? Ākōōniin kir aka tōkōl nyoo keemar." ²³ Kusirpēn :Ērōōtē akumwoochi inyeentee kilē, "Kir aka tōkōl nyoo keeteep ākōōniin, mpō nēē imārēy kareeran nyēpō kōōrēēnyuun." ²⁴ Paani kateer :chēēpoonēē kilēē nyoonēē, kiwō wōloo mii :eeyeenyiin akuteepee kilē, "Amwaarta /kēēkōōnān nee?" Kuwālchi :kaamee kilē, "Mwaartee /kēēkōōnin mēt pō Chowaana Koopootiisāniin." ²⁵ Kuwaraka :chēēpoonēē wōloo mii :Ērōōtē kilē weel akilēēchi, "Āmārēy ikōōnoon mēt pō Chowaana Koopootiisāniin mu kipis kilē weel." ²⁶ Paani kamwa :chēēpoonēē kilēē nyoonēē, kwootyō :Ērōōtē nyēpō kwōngʼuut. Aku āmu kiikiikusirpēn nkōō taayuu tooyeechiich, ku maamar kisiiru ngʼālyoontēēnyiin. ²⁷ Kuuyooytō :Ērōōtē riipiinteenyiin kiwō kwoopu mēt pō Chowaana. Kiwō :riipiintoonoonēē korkoreet akutil kaat Chowaana, ²⁸ akwoopuunō mētit kipis akuutē chēēpoonēē. Kunam :chēēpoonēē mētit akuutō eeyeenyiin. ²⁹ Paani kateer :kiineetanik chēpō Chowaana kilē kaakima, kupa kimar pōōrpō Chowaana akutup. ³⁰ Paani kāwārākiisyō :kiineetanichoochēē, kumwoochi Yēēsu tōkōl choo kiipa ku-ir akuuneet. ³¹ Āmu kiimii :piich chaa chaangʼ choo kipkoonēy akupēētii ku maanyōōru :Yēēsu ākōō kiineetanichiich pārooyin kwoomiisyō. Kilēēchi :Yēēsu kiineetanichiich, "Keepee wōloo mālēēkitēē :chiich sikēēmuungʼō nyoo miningʼ." ³² Kulaangʼ mēēli akupa ākōy wōloo mālēēkitēē :chiich. ³³ Paani keero :piich kuwēētii :Yēēsu ākōō kiineetanichiich, kusōwu wōloo kiipēētii. Kumētō kōōrootinēēkwaak akumwēr araa kēēlyēn kutuup tapan nyēpō araaray sukuutorook :akwaaneek taay. Ku-it :piich wōli kiiwēētii :Yēēsu ākōō kiineetanichiich kutoomō ku-it :akwaaneek. ³⁴ Paani kārēkuunō :Yēēsu mēēli, akuuro pichoochēē tōkōl, kuriira akwaaneek āmu kii lēē kēēchiir choo mātingʼēy māsōwoon. Kitoowu nyuun kuuneet :Yēēsu pichoochēē ngʼal chaa chaangʼ. ³⁵ Ku paanta kutuuriit :kōōrēē, kupēēchi Yēēsu :kiineetanichiich akilēēchi, "Kaakutuuriit :kōōrēē aku kōōrooni ku suur kwēēn. ³⁶ Ngʼuntee pichu kupa kēēstoonichu lēēkitēē yēēnyi kupa kwaalaata kiyoo āmēy." ³⁷ Kuwālchi :Yēēsu kilē, "Ātēē kir nyoo āmēy." Kilē :kiineetanichiich, "Kupa kee-al makatiin choo yāmēy kwaam :pichu tōkōl? Nku chaangʼ :rōōpiyēēchoochēē." ³⁸ Kuteepee :Yēēsu kilē, "Ātingʼēy makatiin ata? Apee kee aroo." Paani kaakuuro, kumwoochi kilē, "Kitingʼēy makatiin muut ākōō kaaraak ārēēny." ³⁹ Kumwoochi :Yēēsu kiineetanichiich kumwoochi piich kuururuuk keey akutēpi ngʼwēny yoo mii suusō. ⁴⁰ Kuupuur :piich kupeeraateera konom konom. ⁴¹ Kunam :Yēēsu makatiinachoochēē muut ākōō kaaraakik ārēēny, kuuro parak akumwoochi Iriin kōōnkēy, kupuutil makatiinak, akuutē kiineetanichiich kuchārchinootō piich. Kuchar mpō kaaraakichoochēē ārēēny akuutē piich. ⁴² Kyoomiisyō :piich tōkōl kuti piryoonchō. ⁴³ /Keerum kiituukaan chēpō makatiin, kunyir kitaseen taman nkōō ārēēny ākōō chēpō kaaraak. ⁴⁴ Piich :choo kyaam makatiinak ku murēn ēlup muut. ⁴⁵ Paanoonēē kumwoochi :Yēēsu kiineetanichiich kulaangʼ mēēli kusip kuuntoroor kutilta araaray kupa kamasta nyiinō aka pō Peetsaayta, kuta kuuyoomiisēy keey :inyeentee nkōō piich. ⁴⁶ Paani kaakuuyoomiistō :Yēēsu pichoochēē, kuwēēchi keey tul kiwō kusa. ⁴⁷ Kii nēē kaakutuuriit, ku kiikiiku-it :mēēlii araaray kwēēn, akutā kumii :Yēēsu tul. ⁴⁸ Kuuro :Yēēsu kilē kānyikisiit yoomēē nkōō wōloo mii kiineetanichiich nēē mārēy kukwaangʼkwaangʼ pērēēk āmu kiimii yoomēt nyoo nyikiis nyoo kiichōōnēē taayuungʼwaangʼ. Paani kāwōkuurir :kōōrēē, kuwēērēē :Yēēsu pēr parak ākōy wōloo kiimii :kiineetanichiich. Kii paanta kusiirtō akwaaneek, ⁴⁹ kii nēē ro :kiineetanik kumānēē :Yēēsu pēr parak, kuunchōōyō kukuurēē iilat. ⁵⁰ Kiiwāriisyō :kiineetanik tōkōl paani keero Yēēsu. Kumwoochi nyuun :Yēēsu akwaaneek kilē, "Āmoowāriisyō! Aneen :nyēēnyi." ⁵¹ Paani kalaangʼ :Yēēsu mēēlii, kusiis :yoomēē. Kikwōngʼyō :kiineetanik nyēpō kwōngʼuut, ⁵² āmu kitoomō kusōwu kiyoo ngʼutuuy paywaanoonēē kii pō piich ēlup muut. Kutōkōliituuy mētēwēyiikwaak. ⁵³ Paani kaakutilta :Yēēsu ākōō kiineetanichiich araarayta, kupa kuuryoongʼō yoo /kiikukuurēē Keeneesareet, akurāti mēēlii tapanpō araaray. ⁵⁴ Kii nēē rēkuunēē mēēlii, kusōwu :piich Yēēsu kilē weel. ⁵⁵ Kumwērootō :piich nkōō kōōroonoonēē tōkōl akukālāpuunō piich choo mnyoonsōōt kiptaraancheen kupa wōltō aka tōkōl wōloo kateer kilē mii :Yēēsu. ⁵⁶ Ārii aka tōkōl yoo kiiwō, kilēē kōōrootin ākōō kēēstoon, ku kiimuti :piich piich choo kiimnyoonchootēēn kupka yoo kiikutuuyēēchinii. Kusoom :pichoochēē kiimnyoonchootēēn kutiingʼ tapanuu siraa :Yēēsu. Kisop :chiich aka tōkōl nyoo kiitiingʼ tapanuu siree.

¹ Nēē mii pērēētuu aka, kupka Parisaay walak nkōō koonēēt chēpō ngʼātuut kuururuuchi keey taayuu :Yēēsu. Kiipkoonēē :pichu Chēērusālēēm kipa kuurōōtēy kiyoo kii-irēy :Yēēsu. ² Kuuro :pichoochēē kiineetanik walak chēpō Yēēsu kwoomiisyēērēē ēēruunēkwaak choo kiimātiliilō kilēē wōloo kiimārtooy :ngʼātuutēkwaak. ³ Āmu nkōō Parisaay ākōō Yāwuutik tōkōl, ku kiimā-āmiisyēy :chiich aka tōkōl kimaatiliil ēēruunēchiich, kilēē paani kiimwoorēy :ngʼātuut chēpō piich chēpō kēny. ⁴ Kiimā-āmēy mpō kir aka tōkōl nēē pkoonēē siirō ākōy kuu-uun keey. Kiituupēy ngʼātuut walak chaa chaangʼ chēpō kēny choo ngʼuutuuy wōloo /kuutiliiltooy tukun choo /kēēpāyiisyēērēē nkōō kēēstoon. ⁵ Kuteepa :Parisaayichoochēē ākōō koonēētichoochēē pō ngʼātuut Yēēsu kilē, "Āmu nee simātuupēy :kiineetanikuuk koonēētuut chēpō mpō kuukō? Nku āmiisyēērēē ēēruun choo mātiliilō." ⁶ Kumwoochi :Yēēsu kilē, "Kiipō man :ngʼaleepō ōōrkooyoon Isaaya paani kimwoorēy akipō akwaan ngʼuurichu kilē, ’Koonyitēēnoon :pichu ngʼālyēēpikwaak, aku lōōwō :mukuliiriikwaak nkōō wōloo āmii. ⁷ Looswoon kilēēn, aku ngʼātuut choo koonyitēy ku ngʼātuut choo nēētēy :piich kipaat.’ ⁸ Āmētooy ngʼātuut chēpō Iriin akaanam ātēpuut chēpō piich." ⁹ Kitas taay :Yēēsu kumwoochi kilē, "Ātingʼēy ngʼoroomnyēē aka nyoo ātēnii ngʼātuut chēpō Iriin kamas saatuupa ngʼātuutēkwook. ¹⁰ Kiimwooru :Muusa kilē, ’Ikoonyit āpoongʼuungʼ ākōō āyēēngʼuungʼ.’ Akimwa kilē, ’Nyoo muulēy apoonyiin ntā eeyeenyiin, /kēēkēētēy.’ ¹¹ Aku āmwoorēy :akwaan kilē, nēē mwoochi :chiich apoonyiin ntā eeyeenyiin kilē, ’Kir nyoo kookōōniin, ku kaakēētō Iriin,’ ¹² ku kaacham :akwaan chiichoonēē kumātoorēt apoonyiin ntā ku eeyeenyiin. ¹³ Aree aka :nyi nyoo ārēēngʼēy ngʼālyoontoo Iriin akaakeeree ngʼātuutēkwook, ākootāsēy taay ā-irēy ngʼaleek walak chaa chaangʼ choo lēē choochēē." ¹⁴ Kukuur :Yēēsu piich chaa chaangʼ akumwoochi kilē, "Āyāpchi iit :akwaan tōkōl ngʼaleechu āmwoorēy, ākoosōwu. ¹⁵ Mā :kir nyoo wēētii kuut nyoo irēy chiich ku mātililiit, aku ngʼal choo pkoonēē kuut. [ ¹⁶ Chiich nyoo tingʼēy iit, kuteer.]" ¹⁷ Kimētō :Yēēsu pichoochēē akuwēēchi keey nkōō kiineetanichiich kaaw nyoo kiitēpuunēē. Paani ka-it, kuteepee :kiineetanichiich kumwoochi kiyoo ngʼuutuuy kārkēēyini. ¹⁸ Kuwālchi :Yēēsu kilē, "Ara kōō moosōwu ngʼalēēchu koongʼāloolēē mpō? Moosōwu kilē kir aka tōkōl nyoo wēētii kuutii chiich kima-irēy chiich kumātililiit? ¹⁹ Kiyoo chuutēy kuutii chiich kumāwēētii mukulēruunyiin, aku wēētiiy moo /akeelayta kupa saangʼ." (Kiimwoorēy :Yēēsu kilēē nyoonēē, kingʼuutu kilē tiliilō :tukun tōkōl choo /kwoomēy.) ²⁰ Kitas taay :Yēēsu kumwa kilē, "Tukun choo pkoonēē or nyēpō chiich choo irēy inyeentee kumātililiit. ²¹ Āmu pkoonēē kaapkootuut chaa raacheen mukulēr nyēpō chiich. Irēy kaapkootuutēchoochēē piich ku-ir takal kutoomō kwoop keey, kuchōōrsyō, kurumiisyō, kusiir karwa, ²² kunyōōru ngʼat koongʼ, ku-ir ngʼal chaa raacheen, kumwa seemseem, kutakalaan, kunyōōru tuurin pō :moo, kungʼuurnaan, kulas keey, akumāngʼiisyō nkōō sōlwoonti. ²³ Kunyuun tukuuchu raacheen tōkōl kupkoonēē mukulēr nyēpō chiich aku-irēy chiich kumātililiit." ²⁴ Kungʼeeta :Yēēsu yoonēē akiwō ākōō kiineetanichiich ākōy kōōroo Tiirō ākōō Siitōn akichuut koot aka. Kiimārēy kilē māsōwu :chiich aka tōkōl kilē kaakuchō :inyeentee. Ku maakuumuuk ku-ungʼa keey piich. ²⁵ Kuteer :cheepyooso akipō Yēēsu nyoo kiitingʼēy chēētanyiin nyoo kii-iimēy :toomirmiir nyaa ra. Kuchō :cheepyoosooni wōli mii :Yēēsu akukutungʼēē taayuunyiin. ²⁶ Kiipō cheepyoosoonoonēē kōōroo Pōyinikē akiimā chēpō Yāwuutyoon. Kusoom Yēēsu kilē ku-oon toomirmiir nyaa ra nyoo kiikuu-iim chēētanyiin. ²⁷ Kuwālchi :Yēēsu kilē, "Kikānyēy kwoomiisyō :laakōōk kupōk. Makaraam /keenam āmiisyō nyēpō laakōōy /ākēētē sukōyēy." ²⁸ Kuwālchi :cheepyoosoonoonēē kilē, "Lēē nyoonēē, Kiptaayaan, akunyuun oo, kwārēy mpō :sukōyēy rārākēy choo chintooy nēē mii kwoomiisyēy :laakōōk." ²⁹ Kumwoochi :Yēēsu kilē, "Āmu kēēwālwoon kilēē nyoonēē, wiyō kaaw. Iwēēnyōōruuy chēētāngʼuungʼ kaakuwēērō :toomirmiiryoonoonēē ra." ³⁰ Paani kāmwooru :Yēēsu kilēē nyoonēē, kiwō :cheepyoosoonoonēē kaaw akiwō kunyōōru laakweenyiin kaakusop akimii rwoon kitōōk. ³¹ Kii nēē ngʼeetee :Yēēsu Tiirō, kiwō Siitōn, akuuweer araaray pō Kalilaaya kiwō kōōroo Teekapooli. ³² Kii nēē it wōloonēē, kuumuti :piich walak chiitō aka nyoo kii miinyaat amāngʼāloolēy kukaraam. Kisoom :piich Yēēsu kilē kutiingʼēē ēēruunēchiich chiichoonēē kii miinyaat sukusop. ³³ Kunam :Yēēsu chiichoonēē kii miinyaat akwoop tapan nkōō wōloo kiimii :piich. Kuuchuut mooriichiich iitiipō chiichoonēē, akungʼuti moorineenyiin akutiingʼēē ngʼalyaptii chiichoonēē. ³⁴ Kuuro im akilēēchi chiichoonēē, "Yaatee." ³⁵ Paani kamwa kilēē nyoonēē, kuyootiisyō :iitiik, akutoowu kungʼalaal nyoo rootoot. ³⁶ Kukir :Yēēsu piich kumāmwoochi chiich aka tōkōl ngʼaleechoochēē. Paani kāmwoochi piich :Yēēsu kilē mamwaartaata, kuunkēt piich kumwaartaata kitya. ³⁷ Kukwōngʼ :piich tōkōl choo kiiteer ngʼaleechoochēē akimwa kilē, "Kaku-ir :Yēēsu tukun tōkōl kukārāmiituuy. Irēy mpō piich choo miinyootēēn kuteerta ākōō choo māngʼāloolēy kungʼalaal."

¹ Kiimii pērēētuu aka nyoo kiireer kuurumchi keey :piich chaa chaangʼ Yēēsu, aku kiimoomii :kiyoo tākwoomēy. Kukuur :Yēēsu kiineetanichiich akilēēchi, ² "Man kaariiree pichu. Kaakēētēpi nkōō akwaaneek pērēētuus sōmōk āmoomii :kir nyoo ka-am. ³ Pkoonēē :pichu walak wōloo lōōw. Nēē āmwoochi kupēēchi keey kaaw kwoomēy :piri kuumuukēy kumistō nkōō aree." ⁴ Kumwa :kiineetanichiich kilē, "Kōōrooni ku suur kwēēn. /Kunyōōrchinii ānō āmiisyō nyoo yāmēy piich choo tēēnō chu tōkōl?" ⁵ Kuteepee :Yēēsu kiineetanichiich kilē, "Ātingʼēy makatiin ata?" Kuwālchi kilē, "Kitingʼēy choo lēē tisap." ⁶ Kumwoochi :Yēēsu kiineetanichiich kumwoochi piich kutēpi ngʼwēny. Kunam makatiinachoochēē lēē tisap akumwoochi Iriin kōōnkēy. Kupuutil akuutē kiineetanik kuchārchinootō piich. ⁷ Kiitingʼēy mpō :kiineetanik kaaraak choo ngʼērin choo mēnkēēchēēn. Kunam :Yēēsu kaaraakik, kumwoochi Iriin kōōnkēy akuutē kiineetanichiich kicharta. ⁸ Kyoomiisyō :piich kupiryoonchō. Kuurum :kiineetanik kiituukaan kuunyiriit kitaseen tisap. ⁹ Kii-itēy piichoochēē kiimii yoonēē ēlup angʼwan. ¹⁰ Kumwoochi nyuun :Yēēsu piich kupēēchi keey akuulaangʼ :inyeentee mēēli ākōō kiineetanichiich akupa ākōy kōōroo Talmanuuta. ¹¹ Kiipkoonchi :Parisaay Yēēsu choo kiimārēy kuutyam inyeentee. Kilēēchi ku-ir ngʼālyoon nyoo ngʼuutuuy kilē tingʼēy :Yēēsu kaamuuka nyoo chōōnēē wōloo mii :Iriin. ¹² Kiinyita :Yēēsu akilē, "Āmu nee sukumārēy :piich walak ngʼālyoon nyēpō kwōngʼuut? Koomwoorwook man kilē, moomii :kir nyoo ngʼuutinii :Iriin piich choo lēē chu." ¹³ Kumētō :Yēēsu pichoochēē akulaangʼ mēēlii nkōō kiineetanichiich akutilta araaray kuureer kamasta aka. ¹⁴ Kiiruutyēērō :kiineetanik kwoop makatiin nkōō wōloo kipkoonēē. Kiitingʼēy makatyaan ākoongʼo kipaat nkōō mēēlii. ¹⁵ Kumwoochi :Yēēsu kiineetanichiich kilē, "Āriip keey, sōō kimeereepō Parisaay ākōō chēpō Ērōōtē." ¹⁶ Kungʼalaala :kiineetanichoochēē ngʼaleechoochēē akumwoochi keey kilē, "Kamwa kilēē nyoonēē āmu mākitingʼēy makatiin." ¹⁷ Āmu kiinkēt :Yēēsu kiyoo kingʼāloolēē :kiineetanichiich, kuteepa kilē, "Āmu nee soongʼāloolēy kilē mootingʼēy makatiin? Moosōwu ngʼaleechu? Tōkōōlō :mētēwēyiikwook? ¹⁸ Ātingʼēy koonyin āmoosōwuuy? Ātingʼēy iitin, āmootēērēē? Moopkootēy :akwaan mpō? ¹⁹ Paani kyoopuutulēy makatiin muut /sikeepayee piich choo lēē ēlup muut oo, kyaarum :akwaan kitaseen choo lēē ata choo kiingʼātu?" Kilē :kiineetanik, "Kitaseen choo lēē taman nkōō ārēēny." ²⁰ Kuteepee :Yēēsu kuureer kilē, "Ki paani kyoopuutulēy makatiin tisap /sikeepayee piich choo lēē ēlup angʼwan oo, kyaarum :akwaan kitaseen choo lēē ata choo kiingʼātu?" Kilē :kiineetanik, "Kitaseen choo lēē tisap." ²¹ Kumwoochi :Yēēsu kiineetanichiich kilē, "Toomō āsōwu mpō ngʼaleechoochēē?" ²² Nēē mii pērēētuu aka, ku-it :Yēēsu ākōō kiineetanichiich Peetsaayta. Nkōō yoonēē, kuumuti :piich walak Yēēsu chiich aka nyoo kii koroot. Kisoom :pichoochēē Yēēsu kilē kutiingʼēē ēēruunyiin chiichoonēē sukusop. ²³ Kunam :Yēēsu ēēruu chiichoonēē kii koroot akuurēētō kiwō wōloo kimālēēkitēē :chiich. Nēē it, kungʼuti koonyiipō chiichoonēē akutiingʼēē ēēruunēchiich akuteepee kilē, "Irōōtēy kir aka tōkōl?" ²⁴ Kitoowu :chiichoonēē kimararta akilē, "Ārōōtēy piich aku lēē keet choo pēētootēy." ²⁵ Kuureer kutiingʼēē :Yēēsu ēēruunēchiich koonyiipō chiichoonēē. Kusopyō akimararta kukaraam. ²⁶ Kumwoochi :Yēēsu chiichoonēē kilē, "Wiyō kaaw ameeweemwaartaata kiyoo kaa-iruun." ²⁷ Nēē mii pērēētuu aka, kiwō :Yēēsu ākōō kiineetanichiich kōōrootin choo mii Kayisareeya Pilipi. Kumii aree kupēētii, kuteepee :Yēēsu kiineetanichiich kilē, "Mwoorēy :piich kilē aneen :ngʼoo?" ²⁸ Kuwālchi :kiineetanichiich kilē, "Mwoorēy :piich walak kilē inyēēn Koopootiisāniin Chowaana, kumwoorēy :walak kilē inyēēn Eliicha, kumwoorēy walak kilē inyēēn ākoongʼo nyēpō ōōrkooyiipō Iriin." ²⁹ Kuureer kuteepa :Yēēsu kiineetanichiich kilē, "Aa akwaan, āmwoorēy kilē aneen ngʼoo?" Kuwālchi Pēētērō kilē, "Inyēēn Meesaaya." ³⁰ Kikir :Yēēsu kiineetanichiich mamwaarta kilē Meesaaya inyeentee. ³¹ Kutoowu kuuneet :Yēēsu kiineetanichiich kilē nyōōruuy :Wēēroo Chiich nyāriluut chaa chaangʼ, akutāyēy :kāāntōōy, tisiik choo ēēchēēn ākōō koonēēt chēpō ngʼātuut. /Kupārēy aku nēē mii pērēētuu nyēpō sōmōk kungʼeetee meerat. ³² Kumwoochi :Yēēsu akwaaneek ngʼaleechoochēē nyoo maa-ungʼee. Kii nēē teer Pēētērō ngʼaleechoochēē, kuumut tapan Yēēsu akukar koongʼ nkōō ngʼaleechoochēē kāmwoorēy. ³³ Kuwarak keey :Yēēsu akuuro kiineetanik, akukar koongʼ Pēētērō kilē, "Istoorēēnoon keey :Syeetaani! Ipkootēy kilēē wōloo pkootitooy :piich mā wōloo pkootitooy :Iriin." ³⁴ Nkōō yoonēē, kukuur :Yēēsu piich choo kiimii yoonēē ākōō kiineetanichiich, akumwoochi kilē, "Chiich aka tōkōl nyoo mārēy kutuup ngʼaleechuuch, kutay keey, akicham /keenyariil akipō aneen, akichō kutuupkaan. ³⁵ Chiich aka tōkōl nyoo mārēy kusāru sāpoontanyiin, kuupootēy, ku nyoo kēētētō sāpoontanyiin akipō aneen ākōō lōkōōy choo kāroomēēn, kusāruuy. ³⁶ Kāroomin nee nyoo nyōōruuy :chiich nēē rumchi keey tukun tōkōl nkōō ngʼwēny, akuupoot sāpoontanyiin nyēpō ākōy? ³⁷ Ntā nee nyoo muukēy kuwala :chiich sāpoontanyiin? ³⁸ Chiich aka tōkōl nyoo māmārēy kumwaartaareenaan keey akutay ngʼaleechuuch mu kōōrooni pō ngʼōōki nyoo tāyēy :piich Iriin, ātāyēy :mpō Wēēroo Chiich, pērēētuuni āchōōnēy ākōō malaykeen choo tiliilēēn nkōō lēpooyin nyēpō Apoonyuun."

¹ Kitas taay :Yēēsu kumwoochi kilē, "Āmwoorwook man kilē mii :piich walak yi choo mamēērsōōt kitoomō kuuro Pāyuunātoo Iriin kuchō nkōō kaamuuka." ² Kii nēē kaakusiirtō :pērēētuus choo lēē lo, kuumut :Yēēsu Pēētērō, Chēēmis ākōō Chowaana kupa ākōy tul aka nyoo tōrōōr wōloo kimālēēkitēē chiich. Kumii tulwoonoonēē, kuwala :Yēēsu kilēpēyiit nkōō taayuungʼwaangʼ. ³ Kuwāliisyō :sirōōchiich kureelachiniituuy kilē tyal. Kiitingʼēy rēēlin nyoo kimēēmuukēy :chiich nkōō kōōrēē kuurēēliit sira kilēē nyoonēē. ⁴ Kuuro :kiineetanichoochēē sōmōk Eliicha kimii ākōō Muusa kungʼāloolchinii Yēēsu. ⁵ Kumwoochi :Pēētērō Yēēsu kilē, "Kiptaayaan, karaam āmu kimii yi, kanyeech keeteeka sōpōōtwēēn choo lēē sōmōk, nyoongʼuungʼ ākoongʼo, kipō Muusa aka, kipō Eliicha aka." ⁶ Kiimēēnkēt :Pēētērō kiyoo kiimwoorēy, āmu kiiwāriisyō :akwaaneek nyēpō kwōngʼuut. ⁷ Nyoo matyaan, kuulaampuus :pooltō akwaaneek, akichōōnō kuut pooltoonoonēē kilē, "Wēēriinyuun :nyi nyoo āchāmēy, ātēērchii kiyoo mwoorēy." ⁸ Nēē lē :kiineetanichoochēē keemarartee, kimaakuurō chiich aka tōkōl, Yēēsu ākityōōn nyoo kiimii ākōō akwaaneek. ⁹ Kii nēē mii kurēkuunēē tulwēē, kukaaman :Yēēsu kiineetanichoochēē kilē, momwoochi chiich aka tōkōl kiyoo keero :akwaaneek ākōy kungʼeetee :Wēēroo Chiich meerat. ¹⁰ Kikaaman keey :kiineetanichoochēē maamwaarta ngʼaleechoochēē, akuteepee keey kilē, "Ngʼuutuuy nee :ngʼālyoontooni pō ngʼeeteetaa meerat?" ¹¹ Kuteepa :kiineetanichiich Yēēsu kilē, "Āmu nee sukumwoorēy :koonēēt chēpō ngʼātuut kilē wārākēē :Eliicha kupōk?" ¹² Kuwālchi :Yēēsu kilē, "Ntōrōōruuy :Eliicha kilēē nyoonēē kupōk sikusat tukun tōkōl. Āmu nee /sikeesir nkōō siruut chēpō Iriin kilē nyōōruuy :Wēēroo Chiich nyāriluut chaa chaangʼ /ākēētāyēy?" ¹³ Āmwoorwook nyuun kilē kiikuchō Eliicha, akii-irchi :pichoochēē inyeentee kir aka tōkōl kilēē wōli kiimārtooy akwaaneek kilēē wōloo kiikusirta akipō inyeentee. ¹⁴ Paani kāwō :Yēēsu ākōō kiineetanichiich wōli kiimii kiineetanik chuuchō walak, kuuro ku kēērumchi keey :piich chaa chaangʼ yi kimii :akwaaneek, akiimii mpō :koonēēt chēpō ngʼātuut kukwiintoochinii keey ākōō kiineetanichoochēē. ¹⁵ Paani keero :piich Yēēsu, kupāypāyiituuy akutorooyta kipa kuutaakwees inyeentee. ¹⁶ Kuteep :Yēēsu kilē, "Ākwiintoochinii nee?" ¹⁷ Kumwa :chiich aka nkōō kwēēnuu pichoochēē kiikiirum keey kilē, "Koonēētiin, kaamutuun laakweenyuun, āmārēy isoopkoon. Tingʼēy toomirmiir nyaa ra nyoo irēy inyeentee kimangʼalaal. ¹⁸ Nēē ngʼēēti :toomirmiiryoonoonēē, kuwiirchinii ngʼwēny, aku-irēy kuchōōnēē :puchaan kuut. Nyārēy keeleechiich akuyaam :pōōrtō tōkōl. Kāāmwoochi kiineetanikuuk ku-oon toomirmiiryooni ra, kimaakuumuuk." ¹⁹ Kumwa :Yēēsu kilē, "Muutyō akwaan choo mootingʼēy kaarana. Ātēpēē nkōō akwaan ākōy āyu? Āmurtoochinook ākōy āyu? Amutwaan wēēroonēē." ²⁰ /Kēēmuti Yēēsu wēēroonēē. Paani keero :toomirmiiryoonoonēē Yēēsu, kuutimtiim wēēroonēē akuwiirchi ngʼwēny akumiimil akichōōnēē :puchaan kuut. ²¹ Kuteepee :Yēēsu apootaa wēēroonēē kilē, "Kungʼeetee āyu yoo kii lēē nyēēnyi :wēēri?" Kuwālchi kilē, "Kungʼeetee ku laakwa. ²² Kiikuutyam :toomirmiiryoonoonēē nkōō pērēētuus chaa chaangʼ kumārēy kuukēētēy, kuwiirchinii ma ntā ku pēr. Iriireeneech, akiisārwēēch nēē imuukēy." ²³ Kumwoochi :Yēēsu kilē, "Āmu nee siimwaara kilē ’Nēē imuukēy’? Muukēē :kir aka tōkōl nkōō chiich nyoo rānēy Iriin." ²⁴ Kuriir :apootaa wēēroonēē kilē, "Ārānēy Iriin, ākoosoomiin itoorētoon aran kitya." ²⁵ Paani keerō :Yēēsu piich kāmwēru kuurumchi keey yoonēē, kilēēchi toomirmiiryoonoonēē ra, "Toomirmiiryooni koroot amāngʼāloolēy, āmwooruun kilē chōōnēē wēēri āmēē-ōōchi keey kuureer." ²⁶ Kuunchō :toomirmiiryoonoonēē akuutimtiim wēēroonēē akichō saangʼ. Kuuritō keey wēēroonēē kilēē yoo kama. Kumwa :piich chaa chaangʼ kilē, "Acha! Kaakima :wēērii." ²⁷ Kunam :Yēēsu ēēruu wēēroonēē akuutoorēt kungʼeet. Kuuryoongʼ :wēēroonēē. ²⁸ Kii nēē chuut :Yēēsu kō ākōō kiineetanichiich, kuteep :kiineetanik Yēēsu kilē, "Āmu nee tamaakuumuuk kee-oon toomirmiiryoonoonēē ra?" ²⁹ Kuwālchi :Yēēsu kilē, "Mēēmuukēē /kee-oon toomirmiir nyoo lēē nyoonēē, nēē /makusa [/akeerukuut keey]." ³⁰ Kingʼeet :Yēēsu ākōō kiineetanichiich nkōō yoonēē, akupuntēērēē Kalilaaya. Kiimāmārēy :Yēēsu kusōwu :chiich aka tōkōl wōloo kiimii :inyeentee, ³¹ āmu kimii kuunēētēy kiineetanichiich. Kimwoochi kilē, "/Kunāmēy Wēēroo Chiich /ākēētē ēēruunēpō piich. Pārēy :pichoochēē Wēēroo Chiich aku nēē mii pērēētuu nyēpō sōmōk, kungʼeetee meerat." ³² Moosōwu nyuun :kiineetanik kiyoo kiimwoorēy :Yēēsu, kuuwar kuteep. ³³ Nēē mii pērēētuu aka, ku-it :Yēēsu ākōō kiineetanichiich Kaaparnaam. Nēē mii paani mii kō, kuteepee :Yēēsu kiineetanichiich kilē, "Kookwiintoochinii nee nkōō aree?" ³⁴ Kumaakuwālchi kir :kiineetanik, āmu kiimii kukwiintoochinii keey nkōō aree kilē ngʼoo nyoo ōōw nkōō akwaaneek. ³⁵ Kutēpō :Yēēsu ngʼwēny akukuur kiineetanichiich chu kii lēē taman nkōō ārēēny akumwoochi kilē, "Nyoo mārēy kilēku nyoo ōōw kwoop keey ngʼwēny akicham kilēku kipāyityoontoo piich tōkōl." ³⁶ Paani keewaangʼ kumwa kilēē nyoonēē, kunam :Yēēsu laakwa akukany kuuryoongʼēē taayuu kiineetanichiich. Kunamee laakwee ēēruunēchiich akilē, ³⁷ "Chiich aka tōkōl nyoo tookēy laakwa nyoo lēē nyi āmu nyaanyuun, ku kataakan, ku nyoo kataakan, ku kataak Iriin nyoo kiiyookwoon." ³⁸ Paani keewaangʼ :Yēēsu kumwa kilēē nyoonēē, kumwoochi :Chowaana kilē, "Koonēētiin, kakuuroo chiich nyoo kā-ōōnēy toomirmiirēy chaa raacheen nkōō kaarineengʼuungʼ. Keetayee, āmu moomii ākōō achaan." ³⁹ Kumwoochi :Yēēsu kilē, "Maatayee chiich nyoo lēē nyoonēē, āmu moomii :chiich nyoo irēy ngʼal chēpō kwōngʼuut nkōō kaarineenyuun akungʼalaaleenaan nkōō oor nyaa ra. ⁴⁰ Āmu chiich nyoo māsāsēēch, ku nyoonyoon. ⁴¹ Koomwoorwook kilē, chiich nyoo kākōōnook pēr choo ārēēy āmu akwaan chaachuuch, /kēētēnii mālāk. ⁴² Chiich aka tōkōl nyoo ka-ir chiich nyoo tākukuskus kaaraneenyiin kupēt, ku kaykay /kēērāti korpopar nyoo nyikiis kaat /ākēēwiirchi araaray. ⁴³ Nēē irin :ēēruungʼuungʼ ipēt, itilta, āmu kaykay inyōōru sopoon nyēpō ākōy kumēētingʼēy ēēr kusiir itingʼēy ēēruunēk tōkōl, /ākēēwiirchiin ma nyēpō ākōy nyoo māmēērēy. ⁴⁵ Nēē irin :kēēltongʼuungʼ ipēt itilta, āmu kaykay inyōōru sopoon ichō kimwaal, kusiir itingʼēy kēēlyēēk tōkōl /ākēēwiirchiin ma nyēpō ākōy. ⁴⁷ Nēē irin :koontongʼuungʼ ipēt, ipālu, āmu kaykay iwō Kaa Iriin nkōō koongʼ ākoongʼo kusiir itingʼēy koonyiik tōkōl /ākēēwiirchiin ma nyēpō ākōy, ⁴⁸ wōloo māmēērsōōt kuutyey, amāmēērēy ma ākōy. ⁴⁹ /Kuutiliilēē piichoochēē tōkōl ma. ⁵⁰ Kāroomō :muunya, aku nēē poot ānyinyintanyiin, i-irtooy nee sukuureer kuchāmu? Kunyuun, akanya kimii :muuny or nyoongʼwoongʼ, ākoomāngʼiisyō nkōō kaalya ākwoonēēk nkōō ākwoonēēk."

¹ Nēē mii pērēētuu aka, kungʼeetee :Yēēsu yoonēē, kutil ēēmpō Choortan akiwō Kōōroo Chuuteeya. Kuurumchi keey :piich chaa chaangʼ yi mii :Yēēsu. Kuuneet :Yēēsu piich kilēē yoo kiicham kuunēētēy. ² Kupkoonchi :Parisaayik walak Yēēsu choo kiimārēy kuutyam, akuteep kilē, "Chāmēy :ngʼātuutichooch kuutyaak :chiich cheepyooseenyiin?" ³ Kuwālchi :Yēēsu nkōō tēēpuut kilē, "Ngʼātuut nee :nyi kiimwoorwook :Muusa?" ⁴ Kumwa :pichoochēē kilē, "Kiichāmchi :Muusa saan kisir kartaasi nyoo tyookēē kooyēr suku-oon cheepyooseenyiin." ⁵ Kumwoochi :Yēēsu kilē, "Kiisir :Muusa ngʼātuutyooni āmu kiiwururiituuy :mukuliiriikwook. ⁶ Kii nēē ir :Iriin ngʼwēny, ku kii-ir murēn ākōō cheepyooso. ⁷ Āmu nyoonēē ku mētooy :murēnō apoonyiin ākōō eeyeenyiin, ⁸ akunam keey nkōō cheepyooseenyiin kilēku ākoongʼo. Mēēlē nyuun tāku piich ārēēny, aku kiikulēku ākoongʼo. ⁹ Kiyoo kaakuutuuyō :Iriin nyuun ku mēēpēēsyō :chiich." ¹⁰ Paani keereer kupa kō, kuteepee :kiineetanichiich Yēēsu kumwoochi kiyoo ngʼuutuuy :ngʼālyoontoonoonēē. ¹¹ Kumwoochi :Yēēsu kilē, "Chiich nyoo keetyaak cheepyooseenyiin akwoop cheepyoosee aka, ku kasiir karwa aku-irchi ngʼōōki cheepyoosooni keetyaak. ¹² Aku nēē oon keey cheepyooso akwoop keey nkōō chiich aka, ku kasiir karwa." ¹³ Kiimii :piich walak choo kiimuti laakōōy Yēēsu kilē kutiingʼēē ēēruunēchiich kuupēēruur. Kukar koongʼ :kiineetanik pichoochēē. ¹⁴ Kii nēē ro :Yēēsu kiyoo kii-irēy :kiineetanik, kinyala, akumwoochi kilē, "Akanya kupka laakōōk wōli āmii, amaakarta āmu piich choo lēē chu :choo pēētii Pāyuunātoo Kaa Iriin. ¹⁵ Āmwoorwook man kilē, chiich nyoo mātookēy pāyuunātoo Iriin kilēē wōloo lēē laakwa, ku māchuutēy Kaa Iriin." ¹⁶ Nkōō yoonēē, kuurum :Yēēsu laakōōchoochēē, akutiingʼēē ēēruunēchiich kuupēēruur. ¹⁷ Kitāsēy taay :Yēēsu nkōō paantanyiin, kuurip :chiich aka akukutungʼ nkōō taayuunyiin akuteepee kilē, "Koonēētiintooni karaam, a-ir nee soonyōōru sopoon nyēpō ākōy?" ¹⁸ Kuwālchi :Yēēsu kilē, "Āmu nee sēēkuurēēnoon nyaa karaam? Moomii nyaa karaam, kungʼātu Iriin. ¹⁹ Inkēt :inyēēn ngʼātuut chēpō Iriin choo mwoorēy kilē, ’Āmēērumiisyō, āmēēsiir karwa, āmēēchōōrsyō, āmēētoomchi chiich ngʼal, āmēēngʼoolsyō, ikoonyit apoongʼuungʼ ākōō eeyeengʼuungʼ.’ " ²⁰ Kumwa :chiichoonēē kilē, "Koonēētiin, kyaatuup :aneen ngʼātuutēchoochēē tōkōl kungʼeetee āchō naran." ²¹ Kuuro :Yēēsu chiichoonēē nkōō choomnyoot akumwoochi kilē, "Mii :kir ākoongʼo nyoo rartaaraat. Wiyō altee kir aka tōkōl nyoo itingʼēy akiitō mēēy, akiichōōn ituupaan. Inyōōru nyuun mōkōrnoonti nyēpō man nkōō kipsēnkwēt." ²² Kii nēē teer :chiichoonēē ngʼaleechoochēē kiimwoochinii :Yēēsu, kwootyō :mukulērtiinyiin akusungʼa :tokoch kurayiit. Kuwēēchi keey nyoo nareekaat āmu kiitingʼēy mōkōrnoonti nyoo mātingʼ /keemwa. ²³ Kumararta :Yēēsu komoosik tōkōl akumwoochi kiineetanichiich kilē, "Kōrōōm kitya nkōō piich choo lēē mōkōrō kupa Pāyuunātoo Kaa Iriin." ²⁴ Kikwōngʼyō :kiineetanik nkōō ngʼaleechoochēē pō Yēēsu. Kitas taay :Yēēsu kumwoochi kilē, "Piichuuch, kōrōōm keepa Pāyuunātoo Kaa Iriin. ²⁵ Nyumnyum nkōō :tamas kuchuut koongʼpō siintaanu kusiir kuchuut :mōkōryoon Pāyuunātoo Kaa Iriin." ²⁶ Kikwōngʼyō :kiineetanik nyēpō kwōngʼuut akilē, "Ara ngʼoo, nyuun, :nyoo muukēy /kēēsāru?" ²⁷ Kuuro :Yēēsu kiineetanichiich akilē, "Mēēmuukēē nkōō wōloo mii :chiich, aku mā nkōō wōloo mii :Iriin, āmu muukēē :kir aka tōkōl nkōō wōloo mii :Iriin." ²⁸ Kimwoochi :Pēētērō Yēēsu kilē, "Kiikēēmētēēchaan tukun tōkōl akeetuupiin." ²⁹ Kuwālchi :Yēēsu kilē, "Man āmwoorwook kilē moomii :chiich nyoo kāmētō koonyiin, wēēriingʼwaangʼ, chēētangʼwaangʼ, eeyeenyiin, apoonyiin, laakōōchiich ntā ku pareenyiin akipō aneen ākōō lōkōōy choo kāroomēēn, ³⁰ nyoo /mākuu-ōōchinii tukuuchoochēē nkōō pērēētuusyēchu kunyil pōkōl choo tingʼēy, /ku-usēy nkōō kōōrooni aku nyōōruuy nyuun sopoon nyēpō ākōy nkōō kōōrēē nyoo chōōnēy. ³¹ Wōloo nyuun chēpō taay kilēkuuy chēpō lēt, ku chēpō lēt kilēkuuy chēpō taay." ³² Kiintoroor :Yēēsu paani kiimii kupēētii Chēērusālēēm ākōō kiineetanichiich. Kikwōngʼ :kiineetanik akuuwāriisyō :piich walak choo kiimii kutuupēy Yēēsu. Kwoop :Yēēsu kiineetanichiich taman nkōō ārēēny kamas akumwoochi kiyoo kiiwō kii-irēē nkōō wōloo mii inyeentee, ³³ kilēēchi, "Ateertee kee! Kumii kēēpēētii ākōy Chēērusālēēm, wōloo kipa /kēēnāmēē Wēēroo Chiich /ākēētē tisiik choo ēēchēēn ākōō koonēēt chēpō ngʼātuut choo tilchinii kiirwok /keekeet. /Kinamēy, /ākēētē piich chēpō Rooma, ³⁴ choo muulēy, akungʼuti, akupir, akupar. Aku nēē mii pērēētuu nyēpō sōmōk, kungʼeetee meerat." ³⁵ Nēē mii yoonēē, kupēēchi :Chowaana ākōō Chēēmis wēēchiipō Sēpētaayo Yēēsu akilēēchi, "Koonēētiin, kumārēy kēēsoomin i-irweech kir." ³⁶ Kuteepee :Yēēsu kilē, "Āmārēy a-irwaak nee?" ³⁷ Kuwālchi :wēēchoochēē kilē, "Chāmwēēch kutēpō :akoongʼo nkōō achaan ēēruungʼuungʼ pō taay, kutēpō :aka ēēruungʼuungʼ pō lēt pērēētuuni ipāytooy." ³⁸ Kilēēchi :Yēēsu, "Moonkēt kiyoo āsoomēy. Āmuukēy aree :akwaan kikoompaa nyaril nyoo ārēēy :aneen? Ntā āmuukēy apuntēērō kaapaatiisana nyēpō ngʼwoonin nyoo apuntēērēē?" ³⁹ Kuwālchi kilē, "Kiimuukēy." Kilēēchi :Yēēsu, "Anyōōruukwaan nyāriluut choo ānyōōruuy :aneen, ākoopuntēērēē kaapaatiisana nyēpō ngʼwoonin kilēē aneen. ⁴⁰ Mpō ntā lēē nyoonēē ku mootingʼēy kaamuuka ālēwēn kilē ngʼoo nyoo tēpēē ēēruunyuun pō taay ntā ku lēt, wōloo nyuun pō pārooyinoonēē piich choo /kiikēēchēpchi." ⁴¹ Kii nēē teer :kiineetanik chuuchō walak lēē taman kiyoo kiimārēy :Chēēmis ākōō Chowaana, kunyāliisyō akipō akwaaneek. ⁴² Kukuur :Yēēsu kiineetanik tōkōl akumwoochi kilē, "Ānkēt :akwaan kilē mārēy :pāytooy choo mii kōōrooni kungʼuuti keey piich kilē akwaaneek choo pāytooy akutingʼēy kaamuuka kusiir chiich aka tōkōl. ⁴³ Mēērookēē nyuun ālēkuu choochēē. Nyoo mārēy kilēku nyoo ōōw nkōō akwaan kilēku kipāyityoon. ⁴⁴ Ku nyoo mārēy kilēku nyēpō taay, ku mārēy kilēku ōōtwookiintoo piich tōkōl. ⁴⁵ Kilēē yi kiimaachō Wēēroo Chiich /kēēpāyiisyēēchi, aku kiichō kupāyiisyō akuutētō sāpoontanyiin sikuutyaayta :piich chaa chaangʼ." ⁴⁶ Nēē mii yoonēē, ku-it :Yēēsu ākōō kiineetanichiich Chēērikō. Paani kiimii kupēērēē yoonēē, kutuup piich chaa chaangʼ. Kiimii :soomiin nyoo kii kipkoroot aree kamas kusoomsēy. /Kiikukuurēē chiichoonēē Partimaayo wēēroo Timaayo. ⁴⁷ Paani kateer :chiichoonēē kilē kii Yēēsu nyēpō Naasareet :nyi kiimii kusiirtooy, kukuur nkōō kuut nyoo ōōw kilē, "Yēēsu, Wēēroo Tāwuti, riireenaan." ⁴⁸ Kukar koongʼ :piich chaa chaangʼ kusiis. Wōloo nyuun kitas taay kukuur nkōō kuut nyoo ōōw kilē, "Wēēroo Tāwuti, riireenaan." ⁴⁹ Kuuryoongʼ :Yēēsu akumwoochi piich kilē, "Āmwoochii kuchō yi." /Kēēkuur chiichoonēē kii koroot /ākēēmwoochi kilē, "Paypayiituu akiiryoongʼ! Kuuriin :Yēēsu." ⁵⁰ Kii nēē teer kilēē nyoonēē, kungʼeet kilē weel akuwiirchi siree nyoo kiitukēē keey kamas /ākēērēētō ku-it yoo kiimii :Yēēsu. ⁵¹ Kuteepee :Yēēsu kilē, "Imārēy a-iruun nee?" Kuwālchi :chiichoonēē kii koroot kilē, "Koonēētiin, āmārēy amararta." ⁵² Kumwoochi :Yēēsu kilē, "Wēēchii keey, kaakuusoopin kaaraneengʼuungʼ." Paani kamwa :Yēēsu kilēē nyoonēē, kimararta akutuup Yēēsu.

¹ Kii nēē riichi :Yēēsu ākōō kiineetanichiich Chēērusālēēm, yoo kilēēkitēē Peetpaake ākōō Peetaaniya, yoo lēēkitēē Tulwoo Musēytuun, kuuyooytō kiineetanichiich ārēēny, ² akilēēchi, "Apee ākōy kēēstoonichu ātoopēnēy. Āmii āchuutēy, ānyōōruuy moorpō sikiryō kurataat akutoomō kukasan chiich pērēētuu aka. Atyaak sikiryoonoonēē ākoorēēwu. ³ Nēē teepaak :chiich kilē, ’Āmu nee saa-ira kilēē nyi?’ āmwoochi kilē, ’Mārēy Kiptaayaan akuu-ōōkuuy yēēnyi kilē weel.’ " ⁴ Kipa :kiineetanichoochēē akupa kunyōōru mooroonēē pō sikiryō kākirāti kurkat saangʼ, akuutyaak. ⁵ Kumii kuutyookēy, kuteepee :piich walak choo kiimii yoonēē kiineetanichoochēē kilē, "Kālē nee saatyaaka moortaa sikiryō?" ⁶ Kuwālchi :kiineetanichoochēē kilēē paani kimwoochinii :Yēēsu. Kuchāmchi :pichoochēē kwoop mooroonēē. ⁷ Kuurēētō ākōy yi kiimii :Yēēsu, akuukārkoorchi sirooy pataruu sikiryēē. Kutēpēērō :Yēēsu sikiryēē. ⁸ Kuukārkoorchi :piich chaa chaangʼ sirōōkwaak aree, kuukārkoorchi :walak sāk choo kiiyāpēē paraatin. ⁹ Kituumchinootō :piich choo kiimii taayuunyiin nkōō choo kituupēy lēt kilē, "Ōōsaana! Pēēruuroot :chiich nyoo chōōnēy nkōō kaarinaa Iriin. ¹⁰ Pēēruuroot pāyuunātoo paapēēnyoon Tāwuti nyi mii kuchōōnēy. Ōōsana mu kipsēnkwēt!" ¹¹ Ku-it :Yēēsu Chēērusālēēm akiwō kuchuut piriiruu Kōpō Iriin. Kuuro wōloo kiilēē :kir aka tōkōl. Āmu kiikiikutuuriit :kōōrēē kiwō :Yēēsu nkōō kiineetanichiich taman nkōō ārēēny Peetannya. ¹² Pērēētuu nyi kiituupēy, kupēērēē :Yēēsu ākōō kiineetanichiich Peetannya, kwaam :piri Yēēsu. ¹³ Nēē tākumii kupēētii, kuurōōti :Yēēsu mookāngʼwō wōloo lōōw nyoo kiituk sāk. Kiwō :Yēēsu kuuro nēē muukēy kunyōōrchi lokoryoon aka tōkōl. Nēē it mookāngʼwēē, kunyōōru kilē sāk kipaat, āmu kiimā pērēētuus choochēē choo kiiyēēy :maakany lokor. ¹⁴ Kumwoochi mookāngʼwoonoonēē kilē, "Kima-ameeniin :chiich lokor ākōy." Kiteer :kiineetanichiich ngʼaleechoochēē. ¹⁵ Kii nēē it :Yēēsu ākōō kiineetanichiich Chēērusālēēm, kuchuut :Yēēsu piriiruu Kōpō Iriin akutoowu ku-oon piich choo kyooltooy ākōō choo kyooliisyēy, akumilta meeseen chēpō piich choo kiiwāltooy rōōpiyō ākōō ngʼachareen chēpō piich choo kyooltooy chēēptuukēēn. ¹⁶ Kiimaachāmchi :Yēēsu chiich aka tōkōl nyoo kiitingʼootēy kir aka tōkōl nyoo kyooltooy kupuntoorō piriiruu Kōpō Iriin. ¹⁷ Kuuneet :Yēēsu pichoochēē kilē, "Masiraat kilē, ’/Kukuurēē koonyuun kōpō saayeet nyēpō piich chēpō kōōrootin tōkōl’? Nku kyaa-ir :akwaan kilēku ’kēpēnoo chōōr.’ " ¹⁸ Paani kateer :tisiik choo ēēchēēn ākōō koonēēt chēpō ngʼātuut kiyoo kii-ir :Yēēsu, kutuurchi :moo akutoowu kuwas wōloo pārtooy Yēēsu. Kiiwārēy :pichu Yēēsu āmu kiikwōngʼyō :piich tōkōl nkōō wōloo kiinēētitooy. ¹⁹ Kii nēē tuuriit :kōōrēē, kuureer :Yēēsu ākōō kiineetanichiich Peetannya. ²⁰ Paani kāwo kuyyeech :kōōrēē, kuureer :Yēēsu ākōō kiineetanichiich Chēērusālēēm. Kumii kupēētii, kuurō mookāngʼwooni kiipānēy :Yēēsu kiiyaam. ²¹ Kuupkaat :Pēētērō akilēēchi Yēēsu, "Koonēētiin, roo kee! Kiiyaam :mookāngʼwēē nyi kēēpānēy." ²² Kuwālchi :Yēēsu kiineetanichiich kilē, "Arana Iriin. ²³ Āmwoorwook man kilē chiich aka tōkōl nyoo mwoochinii tulwooni kilē, ’Ngʼeeta akiiwēēwiirchi keey araaray,’ akuuran nkōō moonyiin kilē irēē kiyoo kamwa, ku-irēē kilēē nyoonēē. ²⁴ Āmwoorwook nyuun kilē kir aka tōkōl nyoo koosoom nkōō soowuut, aran kilē koonyōōru, kukōōnook nyuun :Iriin. ²⁵ Nēē āsooyēy Iriin, akimii :kiyoo ra nyoo kiiku-irwaak :chiich aka, ānyōōchi kaat kupōk sukunyōōwook kaat mpō :Paapēēngʼwoongʼ Iriin nyoo mii kipsēnkwēt. [ ²⁶ Nēē moonyōōchi piich walak kaat, kumānyōōwook kaat :Paapēēngʼwoongʼ nyoo mii :kipsēnkwēt ngʼōōkiikwook.]" ²⁷ Kuureer kuwaraka :Yēēsu nkōō kiineetanichiich Chēērusālēēm. Paani mii kumānēē piriiruu Kōpō Iriin kupka tisiik choo ēēchēēn nkōō koonēēt chēpō ngʼātuut nkōō kāāntōōy, ²⁸ akuteepee kilē, "Itingʼēē kaamuuka nee i-ir ngʼaleechu? Ntā ngʼoo nyi kiikōōnin kaamuuka nyoo i-irēy ngʼaleechoochēē?" ²⁹ Kuwālchi :Yēēsu pichoochēē kilē, "Ātēēpēēnook tēēpuut aku nēē āwālwoon, āmwoorwook nyoo kiikōōnān kaamuuka a-ir ngʼaleechu. ³⁰ Āmwoorwoon! Kiichōōnēē :kaamuukaa Chowaana kuupootiisāniisyēy wōloo mii :Iriin, ntā wōloo mii :piich?" ³¹ Kuteepee keey pichoochēē kilē, "Nēē kumwaa kilē, ’Kiichōōnēē wōloo mii :Iriin,’ kuteepeeneech kilē, ’Āmu nee nyuun simaaran inyeentee?’ ³² Ku nēē kimwaa kilē, ’Kiichōōnēē wōloo mii :piich.’ " (Kiiwar piich āmu kii rānēy :piich tōkōl kilē kii ōōrkooyoontoo Iriin :Chowaana.) ³³ Kuwālchi nyuun :pichoochēē Yēēsu kilē, "Mākuunkēt." Kilēēchi :Yēēsu pichoochēē, "Moomwoorwook nyuun mpō nyoo kiikōōnān kaamuuka a-ir ngʼaleechu."

¹ Kumwoochi :Yēēsu kāāntōōyichoochēē nkōō kārkēēyin kilē, "Kiimii :chiich aka kēny nyoo kiitoot sapiipuun pareenyiin akukar. Kupal kēpēn sukupēēchi :pērēēpō sapiipuun paani kākupir. Kuteek kasar nyoo /kuriipēē paree. Kii nēē waangʼ, kuutē piich walak kipa kuriipchi paree akuwēēchi keey kōōrēē aka. ² Nēē mii paani kāruryō :sapiipuunēk, kuuyooytō :chiichoonēē pō paree kipāyityoonteenyiin kiwō wōloo kiimii :pichu kiiriipēy paraanoonēē kiwō kwoopchi lokoreechiich. ³ Paani ka-it :kipāyityoontoonoonēē wōloonēē, kunam :pichoochēē akulap, aku-oon kilēēn. ⁴ Kuuyooytō :chiichoonēē kipāyityoonteenyiin aka. Kunam :pichoochēē akulap mēt, akumuul. ⁵ Kuureer kuuyooytō :chiichoonēē pō paree kipāyityoonteenyiin nyēpō sōmōk. Paani ka-it /keekeet. Kuureer kuuyooytō kipāyitiinēk walak kutuup keey. Nēē itēy wōloonēē /kēēlāpēy walak /kēēkēētēy walak. ⁶ Kiitākitingʼēy :chiichoonēē chiich ākoongʼo nyoo muukēy kuuyooytō, wēēriinyiin nyoo kiichāmēy. Nyēpō lēt, kuuyooytō wēēroonēē kiwō wōloo mii :pichoochēē, kuupkootēy kilē, ’Koonyitēy wēēriinyuun’ kuuyooytō nyuun kiwō. ⁷ Paani ka-it :wēēroonēē wōloonēē, kukuur keey :pichoochēē akilē, ’Murēchu, ānyi nyoo pāyituuy paree! Apkaana keekeeta sikupāyitwēēch :paraani.’ ⁸ Kunam wēēroonēē akuukeet akuwiirchi pōōrtō paree saangʼ." ⁹ Kuteep :Yēēsu pichoochēē kilē, "Irēy nee nyuun :chiipō paree? Āmārēy āmwoorwook kiyoo irēy. Chōōnēy akuukeet pichoochēē tōkōl akuutē piich walak kuriipchi paree." ¹⁰ Kilēēchi :Yēēsu pichoochēē, "Ānkēt :akwaan man kilē mwoorēy siruut chēpō Iriin kilē, ’Kor nyoo kiitay :tēēkik :nyi kiilēku tēlēkuutaa koot. ¹¹ Iriin ākityōōn nyoo kii-ir ngʼaleechu. Akipō kwōngʼuut nēē /kuuro.’ " ¹² Kiisōwu :kāāntōōyichoochēē kilē mii :Yēēsu kungʼāloolēē akwaaneek nkōō kārkēēyinoonēē. Kiimārēy kunam Yēēsu, wōloo nyuun kiiwar piich. Kimētō akupēēchi keey. ¹³ Nēē mii lētuun, kuuyooytō :kāāntōōyichoochēē Parisaayik walak ākōō piipō Ērōōtē pakuutyam Yēēsu sukunam akipō ngʼaleechiich. ¹⁴ Paani ka-it wōloo mii :Yēēsu, kilēēchi, "Koonēētiin, kiinkēt kilē imwoorēy man, amēēwārēy piich kilē ngʼoo :ngʼoo. Akiinēētēy ngʼal chēpō man ākōō kiyoo mārēy :Iriin kee-ir. Mwoorwēēch nyuun, chamaat /kēēkwārchi Kayisaari kōōti ntā machamaat?" ¹⁵ Paani kateepee :pichoochēē Yēēsu kilēē nyoonēē, kusōwu ngʼuurnaneengʼwaangʼ nyoo kiipkootēy. Kumwoochi kilē, "Āmu nee saatyamaan? Āpkoon rōōpiyoon aro." ¹⁶ Kwoopchi rōōpiyoon. Kuteep :Yēēsu pichoochēē kilē, "Pō ngʼoo :itōōni mii rōōpiyoontooni, ākōō kaarinee nyi kiikusirchi? Kuwālchi :pichoochēē kilē, ’Pō Kayisaari.’ " ¹⁷ Nkōō yoonēē, kilēēchi :Yēēsu, "Ātēē Kayisaari chaachiich, ātē Iriin chaachiich." Kikwōngʼyō :pichoochēē nkōō kiyoo kiimwa :Yēēsu. ¹⁸ Nēē mii yoonēē, kupkoonchi Yēēsu :Satukaay walak. Kiirānēy :pichoochēē kilē /mākungʼēētēē piich meerat. Kuteepa :pichoochēē tēēpuut Yēēsu kilē, ¹⁹ "Koonēētiin, kiisirweech :Muusa ngʼātuut nyoo mwoorēy kilē ’Nēē ma :chiich akumētō cheepyooseenyiin kitoomō kunāmchi laakwa, kumilēy :wēēriingʼwaangʼ, akunāmchi laakōōy choo /kukuurtēērēē wēēriingʼwaangʼ :nyi kiima.’ ²⁰ Kiimii nyuun :chiitō aka kēny nyoo kiitingʼēy wēēchiichiich tisap. Kwoopiisyō :kipooreet akima kimaanam laakwa. ²¹ Kumil :wēērii nyēpō ārēēny cheepyoosoonoonēē, kima amaanam laakwa. Kutuup :wēērii nyēpō sōmōk, akima mpō ama laakwa. ²² Ku-ira kilēē nyoonēē ākōy ku-it wēērii nyēpō tisap. Kirook :pichoochēē tōkōl ama laakwa. Nēē mii lētuun, kima :cheepyoosoonoonēē. ²³ Mwoorwēēch kee, poyiituuy ngʼoo :cheepyoosoonoonēē paani kāngʼēētyēērō :pichoochēē tōkōl meerat, āmu pō man kilē, kiikwoop :pichoochēē tōkōl cheepyoosoonoonēē?" ²⁴ Kuwālchi :Yēēsu kilē, "Lēēluut nyoongʼwoongʼ ku nyi moonkēt :akwaan wōloo lēē :siruut chēpō Iriin, aku moonkēt mpō kaamuuka nyēpō Iriin. ²⁵ Paani kaakungʼēētyēērō :piich meerat, ku mēēlē tākwoopiisyēy ntā /kēē-āp, māngʼiisyēy kilēē malaykeen choo mii kipsēnkwēt. ²⁶ Akipō nyuun ngʼeetat nyēpō piich choo kiikumēērō oo, toomō asooman :akwaan nkōō kiitapuu Muusa, akipō saamuurta nyoo kiimii ma akimalar, kiyoo kiimwoochi :Iriin Muusa kilē, ’Aneen Iriintoo Apraam, Isaka ākōō Chaakōp?’ ²⁷ Mā Iriintoo piich choo kiikumēērō, aku pō choo sāpyootēēn. Kyoochuunnyēēkwaan." ²⁸ Kiimii yoonēē :koonēētiin aka nyēpō ngʼātuut nyoo kiimii kutēērēy kiyoo kiimii kungʼāloolēē :Yēēsu ākōō Satukaay. Paani keewaangʼ :Yēēsu kumwa ngʼaleechoochēē, kuuro :koonēētiintoonoonēē pō ngʼātuut kilē kiiwālchi :Yēēsu pichoochēē nkōō oor nyaa karaam. Kuteep :chiichoonēē Yēēsu kilē, "Nkōō ngʼātuut tōkōl choo kiikōōnēēch :Iriin, nyōō nyi ōōw nkōō tōkōl?" ²⁹ Kuwālchi :Yēēsu kilē, "Ngʼātuutyēē nyoo ōōw ku nyi: ’Israayeel, ateertee! Kiptaayaanteenyoon Iriin ku ākoongʼo. ³⁰ Icham Iriin Kiptaayaanteengʼuungʼ nkōō moongʼuungʼ tōkōl nkōō sāpoontāngʼuungʼ tōkōl, nkōō kaapkootuutēkuuk tōkōl, ākōō nkōō kaamuukēēngʼuungʼ tōkōl.’ ³¹ Aka nyoo ōōw nyēpō ārēēny ku nyi: ’Icham piich walak kilēē wōloo ichāmtooy keey.’ Moomii ngʼātuut walak choo ēēchēēn choo siirēy chu." ³² Paani keewaangʼ :Yēēsu kumwoorēy kilēē nyoonēē, kilēēchi :koonēētiintoonoonēē pō ngʼātuut, "Kōōnkēy koonēētiin, keemwaa man kilē Kiptaayaanteenyoon Iriin ku ākoongʼo. ³³ Karaam nyuun nēē cham :chiich aka tōkōl Iriin nkōō moonyiin tōkōl, nkōō kaapkootuutēchiich tōkōl, nkōō kaamuukeenyiin tōkōl, akicham piich walak kilēē wōloo chāmtooy keey. Karaam /keetuup ngʼaleechu kusiir /keepeel kōrōs nkōō Kōpō Iriin." ³⁴ Paani keero :Yēēsu kilē kāwālu :chiichoonēē nyaa karaam, kumwoochi kilē, "Mēēnyēēn lōōw mu pāyuunāt nyēpō kaa Iriin" Kungʼeetee yoonēē, ku moomii :chiich nyoo kiitakuteep Yēēsu ngʼālyoon aka tōkōl. ³⁵ Kii nēē mii :Yēēsu kuunēētēy piich mu piriiruu Kōpō Iriin, kuteep kilē, "Muukēē kilē nee kumwa :koonēēt chēpō ngʼātuut kilē chōōnēē :Meesaaya kōpō Tāwuti? ³⁶ Kiimwoochi :Toomirmiir nyoo Tiliil Tāwuti kumwa kilē, ’Kiimwoochi :Kiptaayaan Kiptaayaanteenyuun kilē: Tēpēē ēēruunyuun kamas pō taay ākōy āpēluun puunikuuk.’ ³⁷ Kunyuun oo, nēē kuurēē :Tāwuti inyeentee ’Kiptaayaanteenyuun,’ kilēkuuntooy ānō wēēriinyiin?" Kiipāypāchi :piich tōkōl kiyoo kiimwa :Yēēsu. ³⁸ Kitas taay :Yēēsu kunēētiisyō kilē, "Āriipēē keey koonēēt chēpō ngʼātuut. Chāmēy :pichu kuulookēy sirōōy choo koorēēn akumārēy /kēētookwēēsēy nkōō koonyit nkōō siirēēn. ³⁹ Chāmēy :pichu kulēwēnēy ngʼachareen chēpō taay mu sinakōōkiin aku mwērchinii :pichu ngʼachareen chēpō koonyit mu kaaptuum. ⁴⁰ Mēlmēēlēy :pichu chēēpyōōsōōy choo lēē mōsōōk takusaree tukuukwaak, aku sooyēy ku-irtooy keey kilē kāroomō. Tilchinii :Iriin kiirwook pichu nyaa ngʼwaan kusiir nyēpō chiich aka tōkōl." ⁴¹ Kimii :Yēēsu kutēpēē ngʼwēny mu Kōpō Iriin yoo kilēēkitēē saapōōy choo /kiikuutēnii kōōnuunēy chēpō pāyiisyoo Iriin. Nkōō yoonēē, kuuro :Yēēsu wōloo kiitēntooy :piich kōōnuunēy saapōōchoochēē. Kiitēnii :piich choo lēē mōkōrō rōōpiyō chaa chaangʼ saapōōchoochēē. ⁴² Nēē mii yoonēē, kuchō :cheepyooso nyoo kii mōsōk aku mēēywoon, akuutē rōōpiyō choo ngʼērin choo kiitingʼēy saapaanoonēē. ⁴³ Kukuur :Yēēsu kiineetanichiich akumwoochi kilē, "Āmwoorwook man kilē, cheepyoosooni lēē mōsōk nyi kākōōnu kōōnuunēy chaa chaangʼ kusiir chiich aka tōkōl nyoo kēētē kir saapaani. ⁴⁴ Kākoonu :pichu tōkōl kir nyoo miningʼ nkōō chaa chaangʼ choo tingʼēy, ku cheepyoosooni, lēē mēēywoon kilēē wōli lēē, ku kākōōnu chaachiich tōkōl choo kāriipēē keey."

¹ Kumii :Yēēsu ākōō kiineetanichiich kupēērēē piriiruu Kōpō Iriin, kumwoochi :kiineetanee aka kilē, "Koonēētiin, kāroomō koriichu ākōō kooriichu kilē nee kēny!" ² Kumwoochi :Yēēsu kilē, "Keeroo kooriichu ēēchēēn chu? /Kumilēy nyoo moomii :kor mpō ākoongʼo nyoo ngʼētuunēē parakuu aka." ³ Paani mii :Yēēsu kutēpēē ngʼwēny nkōō Tulwoo Musēytuun nyoo kiirōōtēy keey nkōō Kōpō Iriin, kuteepee :Pēētērō, ākōō Chēēmis, ākōō Chowaana ākōō Antereeya kilē, ⁴ "Mwoorwēēch, iriisōōt :ngʼaleechu āyu, aku kir nee nyoo ngʼuutwēēch kilē kaakuriiku pērēētuusyēk choo iriisōōt :ngʼaleechu?" ⁵ Kumwoochi :Yēēsu akwaaneek kilē, "Āriip keey! Maakany kuumēlmēēlook :chiich. ⁶ Chaangʼ choo pkoonēy nkōō kaarineenyuun, akumwoorēy kilē, ’Aneen Meesaaya’ akuupootēy piich chaa chaangʼ. ⁷ Aku nēē ateer akipō pooryoot nyoo lēēkit ākōō nyoo lōōw, ku moowāriisyō āmu ākōy ku-iriisyō :tukuuchoochēē, wōloo nyuun toomō ku-itēy lēt nyēpō ngʼwēny. ⁸ Poorsōōt :pōrōr ākōō pōrōryēē aka, kupooryō :kōōrēē aka ākōō aka. Chōōnēy :kiprangʼrangʼ kāmostiin chaa chaangʼ, akichō :kēmēy. Ngʼwoonin nyēpō taay :nyoonēē akimii nyuun ngʼwoonin nyoo ōōw nyoo tākuchoonēy. ⁹ Āriip keey nyuun āmu mii :piich choo nāmook akuumutaak /pākēērwookwook akuunōōrook mu sinakōōkiin. /Kunāmook /ākēē-āpook taayuu kāāntōōy ākōō pāytooy akipō aneen. Pārooyin :nyoonēē nyoo āmwoochinēē pichoochēē lōkōōy choo kāroomēēn. ¹⁰ /Ākēē-āmtooy kipōk lōkōōy choo kāroomēēn nkōō kōōrēē tōkōl sukuchō :pērēētuu nyēpō lēt. ¹¹ Nēē /kunamaak, /akēē-āpook /kēērwookwook, ku moosip a-iim keey kilē āmwoortooy nee. Paani ka-itu pērēētuu, amwaarta kiyoo /kukōōnook. Āmu kiyoo āmwoortooy, ku mēēlē :akwaan chu āngʼāloolēy, aku Toomirmiir nyoo Tiliil. ¹² Āltooy :chiich wēēriingʼwaangʼ /keekeet. Ku-alta :āpoo laakweenyiin, pooryēērēē :laakook sikiikwaak kuukeet. ¹³ Sāsook :piich tōkōl akipō aneen. Aku nyuun chiich nyoo murtooy ākōy pērēētuu nyēpō lēt /kēēsāruuy." ¹⁴ Kitas taay :Yēēsu kimwa kilē, "Nēē aroo ’kir nyēpō ngʼamat’ kuuryoongʼō yoo /mākumārchinii kumii, (iyāp iit :chiich nyoo isōōmānēy ngʼaleechu) ku kaykay kumwēr :piich choo mii Chuuteeya ākōy lakamōōs. ¹⁵ Nēē nyōōrchi :ngʼaleechu chiich kimii kō parak, ku marēku kuchuut kō kimar kir aka tōkōl sukwoop. ¹⁶ Ku chiich nyoo mii pareenyiin kimawaraka kaaw kiwō kimar sireenyiin. ¹⁷ Kōrōōmituuy pērēētuusyēchoochēē nkōō chēēpyōōsōōy choo tingʼēy tuum ākōō choo rēērinii laakōōy! ¹⁸ Asaa Iriin tāmā-iriisyō :ngʼaleechu pērēētuu kārtitin. ¹⁹ Ōōwiituuy :nyaril nyēpō pērēētuusyēchoochēē kusiir nyaril aka tōkōl nyoo kiikuchō kungʼeetee ku-ir :Iriin ngʼwēny. Āmoomii ātoo tākuchōōnēy :nyaril aka nyoo lēē nyoonēē pērēētuu aka. ²⁰ Aku nyuun oo, kiikuunwaakiit :Iriin pērēētuusyēchoochēē. Ntā kiimaanwaakiit :Iriin pērēētuusyēchoochēē, ntā moomii :chiich nyoo kusāruuy. Āmu mii :piichiich choo kiikulēwēn, ku kiikuunwaakiit pērēētuusyēchoochēē. ²¹ Aku nēē mwoorwook :chiich aka tōkōl kilē, ’Roo kee, ānyi Meesaaya!’ ntā kilē, ’Roo kee, ānyiinō!,’ ku moorānchi. ²² Pkoonēy :piich choo lēē ngʼuur choo irtooy keey Kiriistō ntā ku ōōrkooy chēpō Iriin. Irēy :pichu ngʼal chēpō kwōngʼuut sikuuchuunnyō nēē muukēē piich chēpō Kiriistō choo lēwēnootēēn. ²³ Kunyuun oo, āriip keey! Koosip āmwoorwook tukun tōkōl kitoomō ku-itu pērēētuu." ²⁴ Kitas taay :Yēēsu kumwa kilē, "Nēē woonyō :nyāriluutēchu nkōō pērēētuusyēchoochēē kuumiisēē :asiis amaakulārēy araawa. ²⁵ Chunuuy :kookeel nkōō parak, /ākēētimtiimēy tukun tōkōl choo mii parak. ²⁶ Nkōō yoonēē, /kēērōōtēy Wēēroo Chiich kuchōōnēy nkōō pool mu kaamuuka ākōō kiimnān nyoo ōōw nyēpō Iriin. ²⁷ Aku nēē ngʼat kuuyooytō :Iriin malaykeenichiich kupa komooswook tōkōl chēpō ngʼwēny pākuurum piichiich tōkōl choo kiikulēwēn :inyeentee." ²⁸ Kitas taay :Yēēsu kumwochi kilē, "Akanya kuuneetaak mookāngʼwō ngʼālyoon. Nēē aroo tāmoorichiich kānyāriliituuy akutoowu kupiityō :sāk, āsōwu kilē kaakuriiku kuwasees :kōōrēē. ²⁹ Ku lēē nyoonēē mpō, nēē aroo ku-iriisōōt :tukuuchoochēē, āsōwu kilē kaakuriiku :pērēētuu nyoo wārākēē Wēēroo Chiich. ³⁰ Āmwoorwook man kilē mārookēy :piichuuch mpō ntā iriisyō ngʼaleechu tōkōl. ³¹ Rookēy :parak ākōō ngʼwēny, aku mēēlē nyuun rookēy :ngʼālyoontēēnyuun. ³² Moomii :chiich nyoo nkēt pērēētuu ntā ku saayit nyoo chōōnēy :Wēēroo Chiich. Mēēnkēt :malaykeen, āmēēnkēt mpō :Wēērii. Iriin ākityōōn nyoo nkēt. ³³ Āriip keey, āmu moonkēt ātoo ituuy :pērēētuunoonēē. ³⁴ Karkeey nkōō chiich nyoo kāwō ruutoor. Kumēti kipāyitiinēchiich pāyit nyoo irēy akumwoochi aka kuriipsyō nkōō kurkat. ³⁵ Āriip keey nyuun āmu moonkēt paani chōōnēy :chiitaa kata. Muukēy ku-itu kosoliny, langʼa kwēēn, ntā kutoomō kuurir :kōōrēē, ntā paani kaakupuusu :asiis. ³⁶ Nēē chō kumoonkēt, ku kaykay kumānyōōrwook kooruuyō. ³⁷ Kunyuun, ngʼaleechu āmii āmwoorwook, ku āmii āmwoochinii piich tōkōl: Āriip keey."

¹ Kiikiingʼātu :pērēētuusyēk ārēēny ku-it tuum nyēpō Pasaka ākōō makatyaan nyoo maakuutu. Kiimii kuwāsēy :tisiik choo ēēchēēn ākōō koonēēt chēpō ngʼātuut wōloo nāmtooy Yēēsu kumēērōōtēy :piich sukuukeet. ² Kumwoochi keey kilē, "Kumaakunam chiichi nkōō pērēētuusyēchu pō tuum āmu muukēy kungʼeet :piich pooryoot." ³ Kumii :Yēēsu Peetannya kwoomiisyēy nkōō kaa Siimnyōn, chiich nyoo kiikyaam :kōōnchōryoontō, kuchō :cheepyoosee aka nyoo kiitingʼoonuuy mwaar. /Kiikyoolēē mwaari rōōpiyō chaa chaangʼ. Kuryēchi :cheepyoosoonoonēē kaat pō sētoo mwaar akuroonchi Yēēsu mwaaroonēē mēt. ⁴ Paani keero :piich walak choo kiimii kōyoonēē kiyoo ka-ir :cheepyoosoonoonēē, kunyāliisyō akuteep keey kilē, "Nee /kiiluluukeetaa mwaar nyi? ⁵ /Kātākyooltēērēē mwaari rōōpiyō chaa chaangʼ /ākēētē rōōpiyēēk mēēy." Kunyālāchi :pichoochēē cheepyoosoonoonēē. ⁶ Kilē :Yēēsu, "Āmētēē cheepyoosoonoonēē, koo-iimchi nee inyeentee? Kaaku-irwaan kir nyaa karaam." ⁷ Kitas taay :Yēēsu kumwoochi pichoochēē kilē, "Āmii :akwaan nkōō mēēy pērēētuu aka tōkōl ākootoorētēy nēē āchāmēy. Wōloo nyuun moomii nkōō aneen ākōy. ⁸ Kaaku-ir :cheepyoosoonoonēē kiyoo kēēmuukēy, akēēsip kuu-iil pōōrtanyuun kutoomō pērēētuuni /pākēētupēy. ⁹ Ākoomwoorwook man kilē, /mākuruutyēērēē cheepyoosooni nkōō kir nyoo ka-ir nkōō ārii aka tōkōl yoo /kwoomtoorēē lōkōōy choo kāroomēēn mu ngʼwēny tōkōl." ¹⁰ Nēē mii yoonēē, kiwō :Chuutaas Iskaryōōt, nyoo kii ākoongʼo nyēpō kiineetanik taman nkōō ārēēny wōloo kiimii :tisiik choo ēēchēēn kiwō ku-alta Yēēsu. ¹¹ Paani kateer :tisiichoochēē ngʼaleechoochēē pō Chuutaas, kupāypāyiituuy akuuyoomiis inyeentee rōōpiyō. Kutoowu :Chuutaas kuwas porooyin nyoo āltēērēē Yēēsu. ¹² Nēē mii pērēētuu nyēpō taay nyēpō tuum nyoo /kiikyoomēy makatyaan nyoo maakuutu, pērēētuuni yēēngʼēy :Yāwuutik mākool sukwaam paani katuuriit :kōōrēē, kuteepa :kiineetanik Yēēsu kilē, "Imārey kēēchēpēē ānō āmiisyoonipō Pasaka takee-ama?" ¹³ Kuuyooytō :Yēēsu kiineetanichiich ārēēny akilēēchi, "Apee ākōy :Chēērusālēēm yoo ātuuyēērēē chiich nyoo āpēē pēr kisaapan. Atuup chiichoonēē lēt. ¹⁴ Kaayi kachuut :chiichoonēē, apa ākoomwoochi chiipō kaayoonēē kilē, ’Kālē :koonēētiintēē: Mii ānō koonyuun nyēpō too nyoo ā-āmēē Pasaka ākōō kiineetanichuuch?’ ¹⁵ Ngʼuutwook :chiichoonēē koot aka nyēpō parak nyoo /kiikēēchēp. Āsātuunēēnēēch āmiisyō yoonēē." ¹⁶ Kingʼēētyō :kiineetanik akupa ākōy Chēērusālēēm. Kupa kunyōōru tukun tōkōl kilēē wōloo kāmwoochintō :Yēēsu, akichēp āmiisyō nyēpō Pasaka. ¹⁷ Paani kāwō kutuuriit kōōrēē, kuchō :Yēēsu ākōō kiineetanichiich taman nkōō ārēēny ākōy kōyoonēē. ¹⁸ Kimii :Yēēsu kwoomiisyēy ākōō kiineetanichiich, kumwoochi akwaaneek kilē, "Āmwoorwook man kilē, mii :akoongʼo nkōō akwaan nyoo wēētii ku-āltooyoon, inyeentee nyoo ā-āmiisyēy tōkōl." ¹⁹ Kutoowu kuu-iim keey :kiineetanik akuteepee :aka tōkōl kilē, "Ara aneen?" ²⁰ Kuwālchi :Yēēsu kilē, "Ākoongʼo nkōō akwaan nyoo kimii kēēnōnōōkēē :tōkōl makatyaan mōōnkwēē ākoongʼo. ²¹ Mēērēy :Wēēroo Chiich kilēē paani /kiikeesir mu siruut. Aku rāyiituuy nyuun kitya nkōō chiich nyoo āltooy. Kiitakaykay ntā /kiimakunam chiichoonēē." ²² Paani mii kwoomiisyēy, kunam :Yēēsu makatyaan akumwoochi Iriin kōōnkēy. Kupuutil akuutē kiineetanichiich, akilē, "Pōōrtanyuun :nyi, aama." ²³ Kunam kikoompee nyoo kiimii :tiipaay, kumwoochi Iriin kōōnkēy, kuutē kiineetanichiich, kura :chii tōkōl. ²⁴ Kumwoochi :Yēēsu kilē, "Kērētiichuuch :chu chēpō miis nyoo rēēl choo /kitārtooy akipō piich chaa chaangʼ. ²⁵ Āmwoorwook man kilē moorēēy kuureer tiipaay ākōy pērēētuuni āwoorēēy chaa reelacheen mu kaa Iriin." ²⁶ Paani keewaangʼ kutuumēy tuum kupa kuutangʼ kamas pō Tulwoo Musēytuun. ²⁷ Kumii kupēētii, kumwoochi :Yēēsu kiineetanichiich kilē, "Āryētooy :tōkōl ākoomētoon, kilēē paani /kiikusir kilē, ’Āpārēy māsowoontēē akusarat :kēēchiirēk.’ ²⁸ Aku nyuun, paani /kaakeengʼeeteenaan meerat, āntōrōōrtoorēēnook āwō Kalilaaya." ²⁹ Kumwoochi :Pēētērō Yēēsu kilē, "Mpō tāmwēr :piich tōkōl ku moomētooyiin." ³⁰ Kilēēchi :Yēēsu Pēētērō, "Āmwooruun man kilē kutoomō kuchār :kipsōōywō nyēpō ārēēny langʼatuuni, itayēy āsip sōmōk kilē mēēnkētoon." ³¹ Kilē :Pēētērō, "Mpō ntā meerat ku mootāyēy kilē moonkētiin." Kumwa mpō :kiineetanik tōkōl kilēē nyoonēē. ³² Kiwō :Yēēsu ākōō kiineetanichiich ākōy yoo /kiikuurēē Keetseemaani. Paani ka-it kilēēchi :Yēēsu akwaaneek, "Ātēpii yēēnyi āwō asa." ³³ Kuumut :Yēēsu Pēētērō, Chēēmis ākōō Chowaana kupa nkōō inyeentee. Nkōō yoonēē, kuchōōnchi :ngʼwoonin Yēēsu akuu-iim keey. ³⁴ Kilēēchi :Yēēsu kiineetanichoochēē, "Ngʼwaanaa moo nyoo paanta āmēērēy, āngʼētuunēē yi, ākoochikēnchō." ³⁵ Kiwō :Yēēsu taay nyoo matyaan kukutungʼ akusa kilē nēē muukēē kusiirtoorēē :pērēētuunoonēē pō ngʼwoonin inyeentee. ³⁶ Kumwa kilē, "Apoo! Muukiisōōt :tukun tōkōl nkōō wōloo imii, naayteereenaan nyarili, Aku nyuun, amee-ir kilēē wōloo āmārtooy, i-ir kilēē wōloo imārtooy." ³⁷ Paani kawaraka, kinyōōru kiineetanichiich chu lēē sōmōk kumii rwoon. Kumwoochi Pēētērō kilē, "Siimnyōn, kēēruu? Mēēmuukēy mpō ichikan saayit ākoongʼo? ³⁸ Āchikānchēē akaasaa simooputyō nēē /kuutyamaak. Chāmēy :mēē, wōloo nyuun moomii :kaamuukee." ³⁹ Kuureer kiwō kusa kilēē taay. ⁴⁰ Paani kawaraka :Yēēsu, kiwō kunyōōru kineetanichoochēē mii rwoon, āmu kiitingʼēy rwoon nyoo nyikiis. Kipēti :kiineetanik kiyoo mwoochinii Yēēsu. ⁴¹ Paani kawaraka :Yēēsu nyēpō sōmōk, kilēēchi kiineetanichiich, "Toomii āruusōōt ākoomuungʼēy? Kaakuyam! Kaaku-it :saayit nyoo kwooltooy Wēēroo Chiich kiwō ēēruunēpō kipngʼōōkiin. ⁴² Āngʼēētyēē keepee. Aroo kee anyi kaaku-itu :chiichi āltooyoon." ⁴³ Paani kiitākumii :Yēēsu kungʼāloolēy, ku-itu :Chuutaas nyoo kii ākoongʼo nyēpō kiineetanichiich taman nkōō ārēēny. Kiitāsoonuuy piich chaa chaangʼ choo kiitingʼēy chōōkoon ākōō ruunkuus. Kiiyooku pichoochēē :tisiik choo ēēchēēn, koonēēt chēpō ngʼātuut ākōō kāāntōōy. ⁴⁴ Kiikiikumwoochi :Chuutaas pichoochēē kilē, "Chiich nyoo ātēnii aasak ku nyoonēē, anam ākooriipootō." ⁴⁵ Paani ka-it :Chuutaas, kiwō kilē weel yoo kiimii :Yēēsu akuutaakwees kilē, "Aasak, koonēētiin." ⁴⁶ Kunam :pichoochēē Yēēsu. ⁴⁷ Wōloo nyuun kingʼeet :akoongʼo nyēpō pichu kiiryoonchēērēē yoonēē, kungʼusu chōōkeenyiin akichwan iitpō kipāyityoontoo Tisiintēē nyi Ōōw kuchinta. ⁴⁸ Kumwoochi :Yēēsu pichoochēē kilē, "Āmu nee soo-āpuu chōōkoon ākōō ruunkuus apaanamaan kilēē aneen pāriin? ⁴⁹ Nku kyoomii nkōō akwaan pērēētuu aka tōkōl, ānēētiisyēy mu piriiruu Kōpō Iriin amaanamaan? Wōloo nyuun, akanya kuusilta :siruut." ⁵⁰ Kimētō Yēēsu :kiineetanichiich akuryata kupēēchi keey. ⁵¹ Kiimii :narana nyoo kiikiilaak anka nyoo kituupēy Yēēsu, /keenam, ⁵² kungʼusta ankee akuurip kimutul. ⁵³ /Keemut Yēēsu ākōy kaa Tisiintēē nyoo Ōōw wōloo kiikiirumchi keey :tisiik choo ēēchēēn, koonēēt chēpō ngʼātuut ākōō kāāntōōy. ⁵⁴ Kiituup :Pēētērō Yēēsu nkōō ripaarip. Kiwō ākōy ku-it piriiruu kaa Tisiintēē nyi Ōōw. Kumii wōloonēē, kutēpō ngʼwēny ākōō piich choo kiiriipēy kaayoonēē akuyu ma. ⁵⁵ Kiiwas :tisiik choo ēēchēēn ākōō kōōkwoo Yāwuutik tōkōl ngʼal choo toomchinii Yēēsu /sikeekeet, kumākunyōōru nyuun ngʼālyoon aka tōkōl. ⁵⁶ Kiimwa :piich chaa chaangʼ ngʼal chēpō ngʼuurnan kuutoomchi Yēēsu, wōloo nyuun, maachoomnyō :ngʼaleekwaak. ⁵⁷ Kiiryoonchō :piich walak akuutoomchi Yēēsu ngʼal chēpō ngʼuurnan kilē, ⁵⁸ "Kiikuteer kumwoorēy :chiichi kilē, ’Āmilēy Kōyi pō Iriin nyi kiitēēkēy :piich, akaateek aka nkōō pērēētuus sōmōk nyoo mātēēkēy :chiich.’ " ⁵⁹ Kimaakichoomnyō :ngʼaleepō pichoochēē. ⁶⁰ Kuuryoongʼ :Tisiintēē nyoo Ōōw nkōō kōōkwoo pichoochēē tōkōl akuteep Yēēsu kilē, "Mēētingʼēy ngʼālyoon nyoo imwoorēy akipō ngʼaleechu kamwa :pichu akipō inyēēn?" ⁶¹ Kusiisi keey :Yēēsu amaawalta ngʼālyoon. Kuureer kuteep :Tisiintoonoonēē Ōōw Yēēsu kilē, "Inyēēn Meesaaya, Wēēroo inyeentee nyoo Pēēruuroot?" ⁶² Kilēēchi :Yēēsu, "Aneen nyoonēē, ākoorōōtēy Wēēroo Chiich, kutēpēē ēēruu taay nyēpō Iriin nyēpō kaamuuka tōkōl, ākoorōōtēy kuchōōnēē pool chēpō parak." ⁶³ Paani kateer :Tisiintoonoonēē Ōōw kiyi kamwa :Yēēsu kupaal sirōōchiich akimwa kilē, "Tākēēmārēy sōwi chēpō nee? ⁶⁴ Kaateer :akwaan wōloo muultooy :chiichi Iriin. Āmwoorēy nee nyuun?" Kutil tōkōl kilē yāmēy /keekeet. ⁶⁵ Kitoowu :walak kungʼuti Yēēsu, akurat koonyin, akulap, akumwoochinii kilē, "Mwoorwēēch, ngʼoo :nyi kalapin?" Kunam :riipiik akuurapaak. ⁶⁶ Kimii :Pēētērō piriiruunoonēē pō Tisiintoonoonēē Ōōw, kuchō :chēētō aka nyoo kii kipāyityoontoo tisiin, akuuweer yoonēē kiimii :Pēētērō. ⁶⁷ Paani keero :chēēpoonēē Pēētērō mii kuywēē ma, kuuro akilē, "Kēēmii :inyēēn mpō ākōō Yēēsu nyēpō Naasareet." ⁶⁸ Kitay :Pēētērō akilē, "Moonkēt :aneen amaasōwu mpō kiyoo ingʼāloolēē." Kuunaayta kiwō kurkat nyēpō piriiruu kaayoonēē. Nkōō yoonēē, kuchār :kipsōōywō. ⁶⁹ Kuuro :chēēpoonēē akumwoochi piich choo kiimii yoonēē kilē, "Kiineetanee aka nyēpō Yēēsu :chiichi." ⁷⁰ Kuureer kitay :Pēētērō. Nyoo matyaan, kumwoochi :pichoochēē Pēētērō kilē, "Man, inyēēn :akoongʼo nyēpō pichu, āmu ichōōnēē mpō Kalilaaya." ⁷¹ Kusirpēn :Pēētērō kilē, "Moonkēt chiichi āmii :akwaan āngʼāloolēē." ⁷² Nkōō yoonēē, kuchār :kipsōōywō nyēpō ārēēny. Kuupkaat nyuun :Pēētērō ngʼaleechu kiimwoochinii :Yēēsu kilē, "Kutoomō kuchār :kipsōōywō kunyil ārēēny itāyēy āsip sōmōk kilē mēēnkētoon." Nkōō yoonēē, kuriir :Pēētērō.

¹ Paani kāwō kuyyeech kōōrēē kupa kiilap :tisiik choo ēēchēēn, koonēēt chēpō ngʼātuut ākōō kāāntōōy ākōō kōōk tōkōl nyēpō Yāwuutik, nēē ityō kirat Yēēsu, akuumut kaa Pilaato. ² Kii nēē it, kuteep :Pilaato Yēēsu kilē, "Inyēēn :pāytooyiintoo Yāwuutik?" Kuwālchi :Yēēsu kilē, "Keemwee kilēē nyoonēē." ³ Kuutoomchi :tisiik choo ēēchēēn kilē kiiku-ir Yēēsu ngʼal chaa chaangʼ chaa raacheen. ⁴ Kuteep :Pilaato Yēēsu kilē, "Moomii kiyoo iwāluuy nkōō ngʼaleechu raacheen mwoorēy :pichu kilē kii-ir?" ⁵ Kumaakuwālchi :Yēēsu ngʼālyoon. Kikwōngʼ :Pilaato. ⁶ Nkōō kēnyii aka tōkōl nyoo kyoomēy :Yāwuutik Tuumpō Pasaka, ku kiityooytooy :Pilaato chiich ākoongʼo nyoo rataat nyoo kāsoom :Yāwuutik kilē /keetyaayta. ⁷ Kiimii :chiich aka nyoo /kiikukuurēē Paraapa nyoo /kiikurat nkōō piich walak choo /kiikurat choo kiipar chiich nkōō pooryoot. ⁸ Nkōō yoonēē, kuurumchi keey :piich Pilaato akusoom kuutyooytoochi chiich ākoongʼo nyaa rataat kilēē paani cham /kēētyooktooy nkōō pērēētuu Pasaka. ⁹ Kuteep :Pilaato pichoochēē kilē, "Āmārēy ātyookwook pāytooyiintoo Yāwuutik?" ¹⁰ Kiiteep :Pilaato pichoochēē kilēē nyoonēē āmu kiinkēt kilē kiimuti :tisiik choo ēēchēēn inyeentee akipō tuurin pō moo. ¹¹ Kingʼam :tisiichoochēē ēēchēēn piich tōkōl kumwoochi Pilaato kuutyaayta Paraapa nyoo kātēētyooytooy Yēēsu. ¹² Kuteep :Pilaato kilē, "A-irta nee nyuun chiichi ākuurēē pāytooyiintoo Yāwuutik?" ¹³ Kumwoochi :piich tōkōl kilē, "Karkaata!" ¹⁴ Kuteep :Pilaato kilē, "Āmu nee, kaleel nee :chiichi?" Kitas taay :pichoochēē kupōl kilē, "Karkaata!" ¹⁵ Kilēē yi kiimārēy :Pilaato kuupaypaay piich, kuutyaayta Paraapa, akumwoochi askariichiich kuutwoor Yēēsu akuutētō /pakeekarkaat. ¹⁶ Kiimut :askariik Yēēsu ākōy wōli kiimāngʼēy :akwaaneek akukuur lukēē tōkōl nyēpō pooryoot. ¹⁷ Kuuloochi :pichoochēē Yēēsu sirōōpō pāytooyiin. Kunaar nkat nyēpō kātōōy akuuloochi mētinyiin. ¹⁸ Paani kaakuuloochi tukuuchoochēē, kuutaakwees kilē, "Iril! Pāytooyiintooni pō Yāwuutik!" ¹⁹ Kulapa :pichoochēē Yēēsu kaarya mēt akungʼuti, akukutungʼō taayuunyiin ku-irtooy keey kilē kēēkoonyit. ²⁰ Kii nēē waangʼ :pichoochēē kupiirēnēē Yēēsu, kungʼusta siraa pāytooy nyi kātingʼēy akuuloochi siroochiich, akuurēētō /keepa /keekarkaat. ²¹ Kumii aree, kutuuyēērō chiich nyoo kiimii kuwēētiiy Chēērusālēēm. /Kiikukuurēē chiichoonēē Siimnyōn nyēpō Kurēēnō akii apootaa Aleekisaanta ākōō Ruupō. Ku-ir :pichoochēē inyeentee kukalap kimurtooyoontoo Yēēsu. ²² Kiimut :pichoochēē Yēēsu ākōy yoo /kiikukuurēē Kolkoota. (Nēē /kiwal ngʼālyoontooni lēē Kolkoota ku ārii reenkeesyaa mēt.) ²³ Kuutē :pichoochēē Yēēsu tiipaay choo /kiikuuwaar ākōō saakit walak kilē sikuupoot ngʼwoonin. Kutay :Yēēsu kira. ²⁴ Kupārchi :pichoochēē Yēēsu kimurtooyoon, akichārchi keey siroochiich, ku-istō sēkēēr sikusōwu kilē ngʼoo :nyoo āpēy nyōō. ²⁵ Kii saayit sōmōk nyēpō koorōōn paani /kiikupārchinii Yēēsu kimurtooyoon. ²⁶ /Kiikusirchi ngʼaleechu kii-ir /keekeet kimurtooyoontēē. Kiimwoorēy :ngʼaleechoochēē kilē: ’pāytooyiintoo yāwuut.’ ²⁷ Kiipārchi :askari chēēlōsōōstiin ārēēny kimurtooyoon kitas keey ākōō Yēēsu. Kiipārchi aka kamaspō ēēruu taay nyēpō Yēēsu; kipārchi aka ēēruu lēt. ²⁹ Kiipirpiirēy :piich choo kiisiirtooy mētēwēyiikwaak akumuulēy Yēēsu kumwoochinii kilē, "Inyēēn nyoo imuukēy isyaar Kōpō Iriin akiireer iteek nkōō pērēētuus sōmōk! ³⁰ Sāruu keey sōō! Rēkuunēē kimurtooyoon!" ³¹ Kimuul mpō :tisiik choo ēēchēēn ākōō koonēēt chēpō ngʼātuut Yēēsu kimwoorēy kilē, "Kiisāru :chiichi piich walak, nku mēēmuukēy kusāru keey. ³² Kimārēēchaan keeroo Meesaaya, pāytooyiintooni pō Israayeel kurēku nkōō kimurtooyoon sikeerana ngʼaleechiich." Kumuul mpō :pichu kiikupārchi kimurtooyoon ākōō inyeentee. ³³ Kii nēē it saayit lo nyēpō pērēēt kichō :tuurin nyoo kiikar kōōrēē tōkōl, ākōy saayit sokool. ³⁴ Paani ka-it saayit sokool, kuunchō :Yēēsu kilē, "Iriinteenyuun, Iriinteenyuun, āmu nee siimētoon?" (Kiimwooruuy nyoonēē nkōō kuutiinyiin kilē, "Ēlōōyi, ēlōōyi, leema sapaktaani?") ³⁵ Paani kateer :piich walak choo kiimii yoonēē, kilē, "Ateertee kee, mii kukuurēy Eliicha." ³⁶ Kuurip :chiich aka akunam anka nyoo kuulēy pēr akuuchuut :tiipaay choo ngʼwoonēēn. Kunam ankaanoonēē kuruti keet akuukoorchi kuutii Yēēsu akilē, "Akanya /sikeeroo nēē chōōnēy :Eliicha kuurēēkuuy nkōō kimurtooyoon." ³⁷ Kuunchō :Yēēsu akima. ³⁸ Kupaala :anka nyoo kiisēēkēnēēnēy mu Kōpō Iriin kupka ārēēny kungʼeetee mēt ākōy keel. ³⁹ Paani keerō :āskāriintēē nyoo ōōw nyoo kiiryoongʼēē taayuu kimurtooyoontoo Yēēsu, wōloo kameerta :Yēēsu kilē, "Man, koo Wēēroo Iriin :chiichi." ⁴⁰ Kiimii :chēēpyōōsōōy walak choo kiirōōtunēē wōloo lōōw. Nkōō chēēpyōōsōōchu ku kiimii :Maaryaa Maktaleena ākōō Maaryaa eeyaa Chēēmis nyoo miningʼ ākōō Chōōsēs, ākōō Sālōōmē. ⁴¹ Kiituupootēy :chēēpyōōsōōchu Yēēsu akuutoorētēy paani kiimii Kalilaaya. Kiimii mpō :chēēpyōōsōōk walak yoonēē chaa chaangʼ choo kiituup Yēēsu ākōy Chēērusālēēm. ⁴² Kii nee it :kosoliny nyēpō pērēētuu nyoo kiichēpēy keey :Yāwuutik kukānyoonuuy :Sapaatō, ⁴³ kiwō :chiich aka nyoo /kikukuurēē Chōōsēp nyēpō Arimateeya nkōō nyakanat kusoom Pilaato kuutē pōōr pō Yēēsu. Kii kiirwookiin Chōōsēp nyoo kiitookuunoot nkōō Kōōkwoo Yāwuutik, akiikānyēy pāyuunātoo kaa Iriin kuchō. ⁴⁴ Kikwōngʼ :Pilaato paani kateer kilē kaakima :Yēēsu, akukuur kāāntōōyiintoonoonēē pō luk akuteepee nēē kaakima :Yēēsu. ⁴⁵ Paani kāmwoochi :kāāntōōyiintoonoonēē kilē kaakima, kuchāmchi Chōōsēp kiwō kwoop pōōr pō Yēēsu. ⁴⁶ Kwaal :Chōōsēp anka akupa kuurēēkuunō pōōrpō Yēēsu kimurtooyoon akuratee ankaanoonēē. Kunam pōōrtō akupa kuukonoor kēpēn nyoo mii raat nyoo kiipalaat akuutiriinchi kor kukar kurkee nyēpō kēpēnēē. ⁴⁷ Kiiro :Maaryaa Maktaleena ākōō Maaryaa eeyaa Chōōsēs yoo /kiikuutē pōōr pō Yēēsu.

¹ Kii nēē rook :pērēētuu Sapaatō, kwaal :mpō Maaryaa Maktaleena, Maaryaa eeyaa Chēēmis, ākōō Sālōōmē mwaar sukupa kuu-iilee pōōr pō Yēēsu. ² Paani kayyeech :kōōrēē ku kaakupuusu asiis pērēētuu nyēpō taay nyēpō wiiki, kupa :chēēpyōōsōōchoochēē ākōy yi /kiikuutē pōōr pō Yēēsu. ³ Kumii aree, kuteep keey kilē, "Ngʼoo :nyoo wōkumiltoowēēch korta nyi /kiikukaree kurkeetaa kēpēn?" ⁴ Paani ka-it yoonēē, kuuro kēpēnēē kuyaataat, /akiikeemilta korta. Ki ōōw koroonēē kwōngʼuut. ⁵ Paani kachuut kēpēnēē, kuuro chiich nyoo mii kutēpēē ngʼwēny ēēruungʼwaangʼ pō taay. /Kiikiilaak sira nyoo rēēl, kikwōngʼyō :chēēpyōōsōōchoochēē. ⁶ Kumwoochi :chiichoonēē kilē, "Mookwōngʼyō, ānkēt kilē āmii āwāsēy Yēēsu nyēpō Naasareet, nyoo /kiikupārchi kimurtooyoon. Moomii yēēnyi, kaakungʼeeta meerat. Aroo kee yi kēēmii pōōrtō. ⁷ Apee āmwoochii kiineetanichiich ākōō Pēētērō kilē, ’Kaakuuntoroor :Yēēsu kiwō Kalilaaya. Āpēētii ānyōōrchinii wōliinēē kilēē paani kiimwoorwook.’ " ⁸ Kupeera :chēēpyōōsōōchoochēē kēpēnēē akumwēr āmu kiipōōtānchō akukwōngʼyō. Kumaakumwoochi chiich aka tōkōl nkōō aree ngʼaleechoochēē, āmu kiiwāriisyō kitya. ⁹ Paani kiingʼeeta :Yēēsu meerat koorōōn, nēē mii pērēētuu nyēpō taay nyēpō wiiki, kungʼuuti keey kupōk Maaryaa Maktaleena, cheepyoosoonoonēē kii-ōōnchinii :Yēēsu toomirmiirēy tisap choo kii-iimēy. ¹⁰ Kiwō :cheepyoosoonoonēē ākōy wōloo kiimii kuriiryēērēē :kiineetanipō Yēēsu akumwoochi ngʼaleechoochēē. ¹¹ Paani kāmwoochi kilē kaaroo Yēēsu akusāpoot, kimaaran. ¹² Kuureer :Yēēsu kungʼuuti keey kiineetanichiich ārēēny choo kiimii kupkoonēē Chēērusālēēm. Kungʼuuti keey nkōō aree aka nyoo kimēēmuukēy kusōwu :kiineetanichoochēē kilē Yēēsu :inyeentee. ¹³ Paani kāsōwu :kiineetanichoochēē ārēēny kilē kii Yēēsu :nyoonēē, kuchaayta ākōy Chēērusālēēm kipa kumwoochi kiineetanik chuuchō walak, kimaakuuran. ¹⁴ Nēē mii lētuun, kungʼuuti keey :Yēēsu kiineetanik choochēē kii lēē taman nkōō ākoongʼo kumii kwoomiisyēy. Kipōlchi :Yēēsu akwaaneek āmu kiitay kuuran kilē kaakungʼeetee :inyeentee meerat, akutay kuuran ngʼaleepō piich choo kiimwoorēy kilē keero Yēēsu kilē sāpoot. ¹⁵ Kiimwoochi :Yēēsu kiineetanichiich kilē, "Apee ngʼwēny tōkōl, ā-āmchinootō piich tōkōl lōkōōy choo kāroomēēn. ¹⁶ Chiich aka tōkōl nyoo keeran ngʼaleechuuch /akeepaatiisan, /kēēsāruuy. Ku nyoo mēērānēy ngʼaleechuuch, kēētilchinii kiirwook. ¹⁷ /Kuutēnii choo rānēy ngʼaleechu kaamuuka nyoo muukēy ku-oon toomirmiirēy chaa raacheen nkōō kaarineenyuun. Ngʼāloolēē ngʼālyēēp choo mēēnkēt. ¹⁸ Muukēy mpō kunam kipaangʼōōy nkōō ēēruunēkwaak, ntā kura ngʼwoonō aka tōkōl aku mā-āmēy :kir akwaaneek. Nēē tiingʼō ēēruunēkwaak piich choo mnyoonsōōt, kusopyō." ¹⁹ Kii nēē waangʼ :Kiptaayaan Yēēsu kungʼāloolchinii kiineetanichiich, /kēē-āp kiwō kipsēnkwēt akiwō kutēpō ēēruu taay nyēpō Iriin. ²⁰ Kipa :kiineetanik pakwaamtaata lōkōōy choo kāroomēēn nkōō kōōrēē tōkōl. Kiimii :Kiptaayaan nkōō akwaaneek kwoomtootēy lōkōōyichoochēē akuutēnii akwaaneek kaamuuka ku-irēy tukun choo mēēmuukēy ku-ir :chiich, kungʼuutinii piich kilē pō man lōkōōyichoochēē kāroomēēn.