Chēēmis

Chēēmis

¹ Aneen nyi Chēēmis. Ā-irchinii Iriin ākōō Kiptaayaan Yēēsu Kiriistō pāyit. Lēyyē, piich chēpō Iriin, ātookwēēsook kooriik taman nkōō ārēēny choo kyoosārātinootō kōōrootin walak. ² Tuupchēēnichu, nēē ānyōōru kāātyāmuut chaa chaangʼ, āpāypāchi, ³ āmu ānkēt kilē nēē /kuutyam kaaraneengʼwoongʼ kukiil murtaareengʼwoongʼ. ⁴ Nēē kaamuurta, ākiilyō nyoo moomii kir nyoo rārwōōk. ⁵ Nēē mātingʼēy :chiich nkōō akwaan ngʼoroomnyō, kusoom Iriin nyoo kōōnuuy kilēēn amāpālchinii chiich. ⁶ Aku nēē soomēy :chiich kir, kumārēy kusoom nkōō moo ākoongʼo nyoo moomii :kāāpkootuut walak. Āmwooraa kilēē nyoonēē āmu chiich nyoo tingʼēy kāāpkootuut ārēēny, ku karkeey nkōō keet nyoo tānchinii :yoomēt wōli wēētii. ⁷ Kumeepkaat nyuun :chiich nyoo lēē nyoonēē kilē nyōōruuy kir kuchōōnō wōloo mii :Iriin. Pō man kilē, ⁸ chiich :chiichoonēē nyoo tingʼēy kāāpkootuut ārēēny, lēēlii āwō aree nyi ntā āwō nyi. ⁹ Makaat kupaypay :chiich nyēpō Iriin nyoo rēēngʼēy :piich choo lēē mōkōrō nkōō kōōrooni, āmu kiikunyōōru sopoon nyēpō kipsēnkwēt nkōō Kiriistō. ¹⁰ Makaat kupaypay :chiich nyoo kiilēē mōkōryoon āmu /kaakeechuchuuka mōkōrnoonti nyēpō ngʼwēny. Karkeey :mōkōrnoonti ākōō taapuk choo kataapkaan aku nyoo matyaan, ¹¹ kuyoomō akurarak. Nkōō oor nyoo lēē nyēēnyi muukēy kunyōōru chiich :meerat kutākumii kuwāsēy mōkōrnoonti. ¹² Mii yoo karaam :chiich nyoo murtoochinii kukiringʼēy kāātyāmuut. Nēē kaakukiringʼ kāātyāmuutēchoochēē, /kēētēnii sopoon nyoo kiiyoomiis :Iriin piich choo chāmēy inyeentee. ¹³ Nēē /kuutyam chiich ku-ir ngʼōōki, ku mēērookēē kumwa kilē Iriin nyi keetyam inyeentee. /Mēēmuukēē /keetyam Iriin ku-ir ngʼōōki amēētyāmēy :Iriin chiich ku-ir ngʼōōki. ¹⁴ Aku /kiityāmēy chiich nēē tingʼēy makat nyēpō tukun chēpō ngʼōōki. ¹⁵ Nēē payta chiich :mākuut chaa raacheen, kuuputi chiich ngʼōōki, ku nēē kaaku-ōōwiit :ngʼōōki, kupārēy chiich. ¹⁶ Kunyuun oo, tuupchēēnichuuch, maakany /kēēmēlmēēlook. ¹⁷ Tukun tōkōl choo kāroomēēn aku tiliilō kupkoonēē wōloo mii Iriin. Iriin ākityōōn nyoo ki-ir asiis, araawa ākōō kookeel aku māwālēē. ¹⁸ Kiikuchēp :Iriin kukōōnēēch sopoon kupunuunō ngʼālyoon nyēpō man sikēēlēkuuchaan chēpō taay nkōō tukun tōkōl choo ki-ir inyeentee. ¹⁹ Tuupchēēnichuuch choo āchāmēy, ateer ngʼaleechu: Mārēy :chiich kuyāpchinii iit ngʼal nkōō oor nyaa karaam amāmārēy kisip kusōkōrchinii ngʼal amāmārēy kunārēēkēy kilē weel. ²⁰ Āmwooraa kilēē nyoonēē āmu mākōōnuuy :nārēēkyō kir nyoo tiliil nyoo mārchinii :Iriin piich. ²¹ Kunyuun, āmētēē ātēpuut tōkōl choo mā kāroomō ākōō ngʼōōki choo kiikuulaampuus ngʼwēny, akaacham nkōō moo ākoongʼo ngʼālyoon nyoo kyoonyōōru nyoo muukēy kusārwook. ²² Maateer kipaat ngʼālyoontoo Iriin. Nēē a-ir kilēē nyoonēē, ku āmii āmēlmēēlēy keey. Kir nyoo miitō, ku aran akaa-ir kir nyoo mwoorēy :ngʼālyoontoonoonēē. ²³ Chiich aka tōkōl nyoo tēērēy ngʼālyoon amā-irēy kir nyoo mwoorēy :ngʼālyoontoonoonēē, ku karkeey ākōō chiich nyoo rōōtēē keey kii-ōōy. ²⁴ Man, rōōtēy keey wōloo lēē, aku nēē kaakuwēēchi keey, kumaakuunkēt kilē kālēē nee :itōōntanyiin. ²⁵ Ku chiich nyuun nyoo rōōtēy kukaraam ngʼātuutyēē nyoo tiliil nyoo tyooytooy piich aku-ir kiyoo mwoorēy ngʼātuutyoonoonēē kumāruutyēērō, /kēēpēēruurēy chiichoonēē nkōō kir aka tōkōl nyoo irēy. ²⁶ Chiich aka tōkōl nyoo āpēy keey kilē tuupēy ngʼātuut chēpō Iriin aku māriipēy kuutiinyiin, ku kalapta keey :chiichoonēē nkōō kiyoo mwoorēy aku puch pāyiisyeenyiin nkōō taayuu Iriin. ²⁷ Oor nyoo tiliil nyoo mārēy Iriin /kēēpāyiisyēēchi ku nyi: Mārēy kilē /kēēriipēy laakōōy choo lēē pānoon ākōō mōsōōk nkōō nyaril aka tōkōl nyoo tingʼēy. Mārēy ku-istoorēē keey :chiich wōloo mii :rāyiityō nyoo irēy :piich chēpō ngʼwēny.

¹ Tuupchēēnichuuch, kilēē paani kyootiirēēkwaan keey Kiptaayaan Yēēsu nyoo tōrōōroot, mā karaam nyuun aroo kilē anum :nyi ku anum :nyoon. ² Keemwaa kee kilē kapka :piich ārēēny sinakōōki. Tingʼēy :aka kaymoorin nyēpō ta-aapu akuulaakaat nyaa karaam. Ku nyiinō aka, ku mēēywoon akuulookēy sirōōy choo lēē cheemaratōōy. ³ Ku nēē itaak nyi laakaat akiimwoochi kilē, "Poontooni koonyitoot, ānyi :ngʼacharee chōōnō tēpēē taay." Imwoochi nyiinō lēē mēēywoon kilē, "Moomii :ngʼachara. Ryoongʼēē yoonēē, ntā itēpēē ngʼwēny kēēlyēēchuuch." ⁴ Nēē kaamwaakwaan kilē anum nyi ku anum nyiinō oo, ku māngʼuutuuy :nyoonēē kilē ntōrōōrtoorēēnook :rāyiityō? ⁵ Chamanichuuch, ateera kee ngʼālyoontooni: Kiikulēwēn :Iriin piich choo lēē mēēy nkōō ngʼwēny akuutō mōkōrnoontii im nyoo kiikuuyoomiis piich choo chāmēy :inyeentee. ⁶ Kyaareengʼkwaan nyuun mēēy kilēē yoo mā piich. Mā pichu lēē mōkōrō chu mii kuunyāriilook? Mā akwaaneek chu ka-iraak /kēērwookwook? ⁷ Mā akwaaneek chu mii kungʼāloolēē nkōō oor nyaa ra kaarinaa Yēēsu Kiriistō Kiptaayaantēēngʼwoongʼ? ⁸ Āmiikwaan ā-irēy nyaa karaam, nēē āriipēy man ngʼātuut nyoo ōōw nkōō tōkōl nyoo mwoorēy nkōō siruut kilē, "Icham piich walak kilēē wōloo ichāmtooy keey." ⁹ Ku nēē āchāmēēkwaan nyuun kipaat piich choo tookunootēēn, āmii ā-irēy ngʼōōki ākooputēy ngʼātuut. ¹⁰ Chiich nyoo riipēy ngʼātuut tōkōl, kungʼātu ākoongʼo nyoo kāput, ku karkeey nkōō nyoo kaakuput ngʼātuutēchoochēē tōkōl. ¹¹ Lēē nyoonēē, āmu Iriin nyoo kiimwa kilē, "Mēēsiir karwa," kitāku inyeentee :nyi kiimwa kilē, "Mēērumiisyō." Ku nēē rum :inyēēn nyuun chiich, ku kaa-iput ngʼātuut mpō ntā mēēsiir karwa. ¹² Ku paani āngʼāloolēy nyuun ntā nēē ā-irēy kir, angʼalaal kilēē piich choo nkēt kilē rwoochinēē :Iriin chiich ngʼātuut nyoo tyooytooy piich. ¹³ Ku nēē māriirēē nyuun :chiich piikō walak oo, kuriirēē :Iriin chiichoonēē kilē nee paani rwoochinii piich? Chiich nyoo riirēē piikō walak kumēēwāriisyēy nkōō pērēētuuni rwoochinii :Iriin piich. ¹⁴ Tuupchēēnichuuch, kāroomin nee nyoo miitō nēē irtooy keey :chiich kilē kiikuuran ngʼālyoontoo Iriin amāngʼuutuunō tukun choo irēy? Ara muukēy kusāru inyeentee :kaarana nyoo lēē nyoonēē? ¹⁵ Keemwaa kee kilē mātingʼēy :tuupchēēngʼuungʼ sira ntā ku kir nyoo āmēy. ¹⁶ Ku nēē mwoochi :chiich nkōō akwaan kilē, "Kuupēēruurin Iriin! Itēpēē nkōō kaalya akiipiryoongʼ," amootēēkwaan kir, ku kēētoorēt nee :ngʼaleechu kāāmwoochiikwaan chiichoonēē? ¹⁷ Karkeey :nyoonēē ākōō nēē ran :chiich Yēēsu Kiriistō kipaat amaa-ir tukun choo ngʼuutuuy kaaraneenyiin, kumēētoorētēy :kaaraneenyiin kir aka tōkōl. ¹⁸ Muukēy :chiich kumwa kilē, "Tingʼēy :chiich aka kaarana, kutingʼēy aka pāyiisyōōn." Kiyoo āwālchinii chiichoonēē ku nyi, "Mwoorwoon kee, muukēē :chiich kutingʼēy kaarana amātingʼēy pāyiisyōōn? Āngʼuutunēēniin kaaraneenyuun pāyiisyōōn. ¹⁹ Irānēy :inyēēn kēny kilē Iriin ku ākoongʼo? Lēē nyoonēē! Aku nyuun oo, nku rānēy mpō :toomirmiirēy chaa raacheen kilēē nyoonēē aku tākupōōtānsōōt nkōō kāwāriisyō. ²⁰ Isālwō nyaa tyaan kēny! Isōwuuy :inyēēn āyu kilē kilēēn :kaarana nyoo /mākungʼuutunēē pāyiisyōōn? ²¹ Kiingʼuutunō :kuukōnyoon Apraam pāyiisyōōnichiich kilē tiliil nkōō taayuu Iriin paani kiichamta wēēriinyiin Isaka kilē kima nkōō kaapkōrōs. ²² Keeroo sōō, kilē kiingʼuutuunō :Apraam kaaraneenyiin pāyiisyōōnichiich akungʼuutu kilē kii pō man kaaraneenyiin. ²³ Ki-ira nyuun kilēē paani kiimwooru :siruut kilē, ’/Kiikutilchi inyeentee kilē chamaat nkōō taayuu Iriin āmu kiitiirō keey inyeentee.’ /Kēēkuurō nyuun inyeentee ’Choorwaa Iriin.’ " ²⁴ Kaaroo sōō kilē chamaat :chiich nkōō taayuu Iriin akipō kir nyoo irēy mā kiyoo keeran kipaat? ²⁵ Kii lēē nyoonēē mpō nkōō wōloo mii :cheepyoosoonoono kii lēē cheepaykeeyaan nyoo /kiikukuurēē Raap. /Kiikucham nkōō taayuu Iriin akipō kir nyoo ki-ir. Kiitaak :cheepyoosoonoonēē yōōt choo kii lēē Yāwuutik, ku-ungʼ aku nēē ityō kumwoochi kupa aree aka. ²⁶ Ku nyuun oo, kilēē paani meeraat :pōōr nyoo mātingʼēy sopoon ku meeraat mpō kaarana nyoo mātingʼēy pāyiisyōōn.

¹ Tuupchēēnichuuch, amaawas :chaa chaangʼ kilē ntā ālēku koonēēt chēpō ngʼālyoontoo Iriin. Āmwooraa kilēē nyoonēē āmu ānkēt :akwaan kilē /kuusyookēēchaan choo kuunēētēy ngʼālyoontoo Iriin kusiir piich walak, paani tilchinii :Iriin piich kiirwook. ² Man kilē kulēēlēēchaan tōkōl saayit aka tōkōl. Ku nēē muuk nyuun :chiich kuriip kuutiinyiin, kumuukēy :chiichoonēē kuriip sāpoontanyiin tōkōl. ³ Keemwaa kee kilē kitingʼēy paraasi. Nēē /kurat kuut /ākēērēētē, kuumuukēē /kēērēētē kiwō wōltō aka tōkōl. Nēē kaakee-ir kilēē nyoonēē, ku kaakeepayta paraasinoonēē tōkōl. ⁴ Karkeey mpō ākōō mēēliin choo ēēchēēn mu araaray. Paani āpootēy :yoomēt nyoo nyikiis, ku mii :kir nyoo miningʼ nyoo roongʼēē :chiich mēēlii sikuutangʼ wōli /kumārēy kiwō. ⁵ Nkōō oor nyoo lēē nyoonēē, kēētingʼēēchaan ngʼalyap. Miningʼ kitya akungʼāloolēy ngʼal choo ēēchēēn. Muukēy :ma nyoo miningʼ kupeel kērti nyoo tēēnō wōli nkōō wōliinō! ⁶ Kōrōōm :ngʼalyap inyeentee kilēē ma. Nkōō pōōrpō chiich tōkōl, ngʼalyap :nyoo kiiwoonchi keey ngʼōōki nyoo /mākyoomu. Ngʼāmēy :ngʼalyap chiitōkōl aku :Syeetaani nyoo loorchinii maat. ⁷ Kiikuumuuk :piich kuriip aku tākuriipēy tyoongʼin tōkōl kungʼeetee :tāriit, tyoongʼin choo chuutēē keey ngʼwēny ākōō mpō walak choo mii araaray. ⁸ Moomii nyuun :chiich mpō ākoongʼo nyoo kiikuumuuk kuriip ngʼalyap. Kipngʼōōkiyoon :ngʼalyap, wooywooyēnēy akutingʼēy ngʼwoonō nyoo kōrōōm kitya. ⁹ Kupāyiisyēērēē ngʼalyap kēēloosunēē Kiptaayaan aku Paapa Iriin. Ākēēpāyiisyēērēē ngʼalyaptanyēēnyi kēēpānēē piich choo ki-irta :Iriin nkōō itōōntanyiin. ¹⁰ Kunyuun, kuutiinnyēēnyi ākoongʼo nyi kuuloosunēē Iriin aku nēē ityō kēēpāniisyēērēē. Tuupchēēnichuuch, mamakaat ku-ira kilēē nyoonēē. ¹¹ Mēēmuukēē kukoosuunō :pēr choo kāroomēēn ākōō choo chāmu muuny koongʼ ākoongʼo nyēpō pēr. ¹² Aku nyuun oo, tuupchēēnichuuch, mēēmuukēy :mookāngʼwō kunam siimaat, amānāmēy :siimootwō maakany. Kunyuun, mēēmuukēy kukoosuunō :pēr choo kāroomēēn yoo lēē muunyaan. ¹³ Mii :chiich nkōō akwaan nyaa ngʼoroom nyoo nkēt ngʼālyoon nyēpō man ākōō nyoo mā pō man? Nēē mii, ku karaam kungʼuutuunō sopoontanyiin akwoop keey ngʼwēny nkōō kir aka tōkōl nyoo irēy. ¹⁴ Ku nēē unchi keey nyuun :chiich ngʼat koongʼ, tuurinpō moo ākōō suuynoonti, ku mēērookēē kulas keey :chiichoonēē kilē ngʼoroom akimwaaraata ngʼuurnan akipō ngʼālyoon nyēpō man. ¹⁵ Ngʼoroomnyō nyoo lēē nyoonēē kuchōōnēē wōloo mii piich chēpō ngʼwēny akipō piich choo mātingʼēy Toomirmiir nyoo Tiliil. Pkoonēē kāāpkootuutēchoochēē Syeetaani. ¹⁶ Ārii aka tōkōl yoo mii ngʼat koongʼ ākōō suuynoonti, ku chaangʼ kwiintaani ākōō ngʼal chaa chaangʼ chaa raacheen. ¹⁷ Wōloo nyuun, nyēpō taay ku tiliil :ngʼoroomnyō nyoo chōōnēē wōloo mii :Iriin. Nēē ityō ku pō kaalya ākōō tāloosyō. Āpēy keey ngʼwēny, akuriirēē piich, akungʼuutuuy tukun choo kāroomēēn choo pkoonēē pāyiisyōōn. Mēēngʼuulēy piich amātingʼēy ngʼuurnan. ¹⁸ Nēē toot :piich kaalya choo chāmēy kaalya, /kunyōōruuy kaalya.

¹ Nee :nyi irook sookwiintoochii keey ākoopooryō? Mākuut chookwook chaa raacheen chu mii kuu-iimook mētēwēy aku-iraak ākwiintoochii keey kilēē nyoonēē. ² Āmārēēkwaan kilē ntā koonyōōru tukun choo mootingʼēy amoonyōōruuy. Nkanyi āmārēy āpāriisyēē kilē soonyōōruu. Ārōōtiniikwaan ngʼat koongʼ tukun chēpō piich āmoomuukēy ānyōōru nkanyi ākwiintoonootēy ākoopooryootō ākōō piich. Moonyōōruukwaan tukuuchoochēē, āmu moosoomēēkwaan Iriin kukōōnook. ³ Mpō paani koosoom, ku moonyōōruuy āmu āsoomēy saa-iree tukun chaa raacheen. ⁴ Muutyō, piich choo kyoochuunnyēērēē Iriin. Moonkēt akwaan kilē nēē chuutook :tukun chēpō ngʼwēny, ālēku puun chēpō Iriin? Chiich aka tōkōl nyoo kālēwēn kilēku choorwoo ngʼwēny, ku puunyoon :chiichoonēē nkōō wōloo mii :Iriin. ⁵ Ngʼālyoon nyēpō man nyi mwoorēy :siruut kilē, "Mārēy :Iriin toomirmiir nyoo kiikōōnēēch kuukoonyitēy inyeentee ākityōōn." ⁶ Riirēēnēēch nyuun :Iriin nkōō chamateenyiin kilēē paani mwoorēy :siruut kilē, "Tāyēy :Iriin piich choo lāsēy keey, akuriira :choo āpēy keey ngʼwēny." ⁷ Kunyuun oo, piichooch, ā-isii keey Iriin akaatay Syeetaani. Nēē a-ir kilēē nyoonēē, kuuripō :Syeetaaninoonēē wōli āmii. ⁸ Nēē āriichi Iriin, kuriiku :inyeentee wōli āmii. Ātiliilō ēēruunēkwook choo kyaa-ir ngʼōōki akaakany kureelachiniituuy mootinēēkwaan choo kyaasak kāāpkootuutēkwook. ⁹ Ānārēēkyēē, āriiryō ākoonchōōyō akipō tukun chaa raacheen choo kyaa-ir. Nyoo kātooroorsōōt, āriiryō, aku nēē kātoopāypāyiituuy, ānārēēkyō. ¹⁰ Nēē ā-āp keey ngʼwēny nkōō taayuu Kiptaayaan, kuutōrōōrook :inyeentee. ¹¹ Tuupchēēnichuuch, maangʼalaalee keey nkōō oor nyaa ra. Chiich aka tōkōl nyoo māchāmēy tuupcheenyiin ku kaakuput :chiichoonēē ngʼātuut chēpō Iriin amāchāmēy :ngʼātuutyoonoonēē. Mēētingʼēēnyēēn kaamuuka imwaa kilē ra :ngʼātuut ntā karaam. Makaat ikoonyit ngʼātuut. ¹² Iriin nyi kiikōōnuuy ngʼātuut aku :inyeentee kipaat nyoo tingʼēy kaamuuka kuurwoochi piich. Inyeentee nyi sāruuy piich ntā kungʼam piich. Ara inyēēn ngʼoo nyuun siimwaara kilē ra chiitō aka? ¹³ Kunyuun oo, pichu, ateertee kee :akwaan choo āmwoorēy kilē, "Aniinee ntā ku āsuun, kēēpēētiichaan ārii aka akeepa kēētēpi wōliinēē kēny ākoongʼo kēē-āltooy tukun ākēēnyōōruuy rōōpiyō chaa chaangʼ." ¹⁴ Āmu nee soopkootēēkwaan kilēē nyoonēē? Ānkēt :akwaan kilē yēēkāy kilē nēē kōōrēē āsuun? Akarkee :akwaan nkōō kisuunti nyoo yuungʼuuy aku nyoo matyaan, kusarat akupēt. ¹⁵ Kir nyoo maraat āmwoorēy ku nyi, "Nēē cham :Iriin kēēmāngʼiisyēē, kēēmāngʼiisyō akee-ir kiyi ntā ku nyi." ¹⁶ Ku, nēē kātoo-irēēkwaan nyuun kilēē nyoonēē, alas keey. Ra :lasataanoonēē. ¹⁷ Āsōwu nyuun kilē chiich aka tōkōl nyoo nkēt kir nyaa karaam nyoo maraat ku-ir, ama-ir, ku kaaku-ir ngʼōōki.

¹ Mōkōrēēchu, ateertee kee. Āriiryēē ākoonchōōyō āmu mii kuchōōnchinook :ngʼwoonin nyoo /mākyoomu. ² Wēētiiy kupētēy :mōkōrnoontiingʼwoongʼ akiwō kwoomēy :tooryoon sirōōkwook. ³ Ngʼāmiisōōt rōōpiyēēkwook choo ātingʼēy. Ngʼuutuuy ngʼamwaanoonēē rāyiityēēngʼwoongʼ paani rwookook :Iriin akupāyiisyēērēē :Iriin ngʼamwaanoonēē kilēē ma kupeel pōōrwēyiikwook. Pō nee kutoontuulchi keey mōkōrnoonti nkōō pērēētuusyēchu pō lēt? ⁴ Lēyyē, ateera kee ngʼaleechu: Mii kuriirchinook :rōōpiyō choo kyaatay :akwaan ātē piich choo kii-irwook pāyit nkōō pareenikwook. Kiiku-iti Iriin nyoo pāyuuy kir aka tōkōl :riirataa pichoochēē. ⁵ Kyaamangʼ :akwaan ngʼwēny āchāmēy tukun chēpō lala akukyaa-am :akwaan kuyam. Ku paannyēēnyi nyuun, akarkee :akwaan ākōō tich choo yākwooyēēn choo mii kukānyoonuuy pērēētuu nyoo /kuyēēngʼēy. ⁶ Kyaa-ir :akwaan piich choo mātingʼēy ngʼālyoon /kēērwoochi /akeekeet; piich choo kiimēēmuukēy kuyeet keey. ⁷ Tuupchēēnichuuch, amurtee ākōy pērēētuuni wārākēē :Kiptaayaan. Aroo kee mpō wōloo murtooy :chiich nyoo kapal pareechiich. Murtooy kungʼeetee kuchō roop nyēpō taay ākōy nyēpō lēt sikukas par choo kāroomēēn. ⁸ Makaat nyuun mpō amurta ākookiilyō, āmu kakuriiku ku-itu :pērēētuu nyoo wārākēē :Kiptaayaan. ⁹ Tuupchēēnichuuch, mookwiintoochinii keey simēērwookook :Iriin. Aroo kee, kaaku-itu :tiliintoo kiirwook kurkat. ¹⁰ Tuupchēēnichuuch, apkaata kee ōōrkooy choo kiingʼalaal nkōō kaarinaa Iriin. Aroo kee wōloo kiikirinta nyāriluut choo kiinyōōru. ¹¹ Kiiloosuuchaan piich choo kiikiringʼ nyāriluut. Aroo kee wōloo kiikirinta :Āyuupu ākōō kir nyoo kiichō ku-irchi :Iriin lētuun. Lēyyē, riirēē piich :Iriin nkōō mukulēr nyoo rēēl. ¹² Tuupchēēnichuuch, ngʼālyoon nyoo mārēy apkaat ku nyi: Mēēsirpēnēē :chiich kaarinaa Iriin ntā iilē kwaaman :nyungʼwēny. Nēē icham, icham, ku nēē itay, itay, /tāmākuurwookuun. ¹³ Nēē nyōōru :chiich nkōō akwaan nyaril, ku mārēy kusa Iriin. Nēē paypay, kutuum kuuloosu Iriin. ¹⁴ Ntā nēē kamnyaan, ku mārēy kukuur kāāntōōy chēpō kaaniisa sipākusoochi inyeentee akuu-iila mwaar nkōō kaarinaa Kiptaayaan. ¹⁵ Nēē /kusoochinii chiich nyoo mnyoonēy /kēētiirēē keey Iriin, kuusoopēy :Iriin chiichoonēē. Ku nēē kiiku-ir ngʼōōki, /kēēnyōōchinii kaat. ¹⁶ Āmwoochii keey nyuun ngʼōōkiikwook choo kyaa-ir ākoosoochi keey, /sikēēsoopook. Nēē sa :chiich nyoo tiliil, kutingʼēy :soowuutēchiich kaamuuka akuutoorētēy kwōngʼuut. ¹⁷ Aroo kee Eliicha! Kii chiich nyoo karkeey ākōō achaan aku paani kiisa kilē mārōōpēn kōōroo Israayeel, kutēērchi :Iriin soowuutēchiich. Kumaakurōōpēn nyuun kōōroo Israayeel kēnyiis sōmōk nkōō aroo lo. ¹⁸ Nēē mii lētuun, kuureer kusa Iriin kukōōnu roop. Kutēērchi :Iriin soowuutēchiich, kurōōpēn akupiityō par. ¹⁹ Tuupchēēnichuuch, nēē chuunnyō :chiich nkōō akwaan kumētō araa :man, ku maraat /kēē-isu kichō aree nyēpō man. ²⁰ Ateera kee ngʼālyoontooni: Chiich aka tōkōl nyoo kā-isuunō chiitō aka wōloo mii :rāyiityō, ku kaakusāru :chiichoonēē chiitō nyiinō aka akaaku-ir /kēētup ngʼōōki chaa chaangʼ.