Kalatiya

Kalatiya

¹ Aneen Paawulō :nyi āsirwook parwaani. Āmāraa āmwoorwook kilē Yēēsu Kiriistō ākōō Paapa Iriin nyoo kiingʼeeta Yēēsu meerat nyi kiilēwēnān ālēku kāāyooytooyiin. Mā kimukuul mēt nyi kilēwēnān āwō a-amtaata lōkōōy choo kāroomēēn. ² Ātookwēēsookwaan kaaniiseen tōkōl choo āmii Kalatiya akuutookwēēsook mpō tuupchēēnichooch choo kumii tōkōl wōli. ³ Lēyyē, āsooyaa kilē kuupēēruurook :Paapa Iriin ākōō Kiptaayaantēēnyoon Yēēsu Kiriistō akukōōnook kaalya. ⁴ Kilēē paani ānkēt akwaan, kiitētō :Yēēsu sāpoontanyiin akipō ngʼōōkichooch. Ki-ir kilēē nyoonēē sikuutyaaytaareeneech ngʼōōki chēpō ngʼwēnyuuni. /Kiiku-ir kilēē nyoonēē kutuup keey nkōō wōloo kiimārtooy :Iriin Paapeenyoon. ⁵ Lēyyē, kutōrōriit :Iriin ākōy. Lēē nyoonēē! ⁶ Kyoo-ātyaa kwōngʼuut paani kyaateer :aneen wōloo kyaatayteekwaan kilē weel Iriin nyoo kiikuurook āmāngʼiisyēē mu choomnyeenyiin akunyōōwook kaat ngʼōōkiikwook. Kyoo-ātyaa āmu kyoowāliisyēēkwaan atuup koonēētuut walak ⁷ choo mā kāroomō. Kaakungʼuutu keey man kilē mii :piich choo mii kuupootook mētēwēy āmu māmārēy atuup akwaan lōkōōy choo kāroomēēn chēpō Kiriistō. ⁸ Akanya āmwoorwook, mpō ntā chō :chiich nkōō achaan ntā ku malayka wōli āmiikwaan akwaamtaata lōkōōy choo ngʼulēy nkōō choo kiiku-āmwook, kuurookēē keepa /kēēwiirchi chiichoonēē ma nyēpō ākōy nkōō ākōy. ⁹ Kilēē paani kiikiikēēmwoorwook, akanya āmwoorwook kuureer: Nēē mii :chiich aka tōkōl nyoo āmtootēy lōkōōy chēpō sāruunō choo ngʼulēy nkōō choo kiiku-āmwook :achaan, kuurookēē :chiichoonēē keepa /kēēwiirchi ma nyēpō ākōy nkōō ākōy. ¹⁰ Paani āmwooraa kilēē nyēēnyi oo, āmiiyaa ā-irēy piich kupāypāyiituuy? Acha sōō, āmāraa apaypaay Iriin. Ntā āpāypooyaa piich ntā mootoopāyiisyēēchinaa Kiriistō. ¹¹ Tuupchēēnichuuch, āmwoorwook kilē lōkōōy choo kāroomēēn choo kyoo-āmwook ku kiimāpkoonēē wōloo mii :piich. ¹² Lōkōōy choo kāroomēēn choo kyoomwoorwook ku kiimaaneetan chiich. Kiingʼoongʼwoon :Yēēsu Kiriistō. ¹³ Āpkootēy kilē kyaateer kwaan wōloo kyoolaa paani kiitootuupaa ātēpuut chēpō Yāwuutik. Kyoo-us :aneen kitya kaaniisaa Iriin akaatyam :aneen kilē awaangʼ pichoochēē kilē chiim. ¹⁴ Kyaatuupaa ngʼātuut chēpō :paapatiinēchooch kusiir wōloo kiituuptooy :Yāwuutik walak chēpō anee āpēn. ¹⁵ Ku kiitil nyuun :Iriin kungʼoongʼwoon āsōwu wōloo lēē wēēriinyiin. Man kiisip kilēwēnān kitoomii moo nyēpō eeyeenyuun akukuurān nkōō choomnyeenyiin ā-āmchinootō piich choo mā Yāwuutik lōkōōy choo kāroomēēn akipō Yēēsu Kiriistō. Paani kikaakungʼoongʼwoon :Iriin ngʼaleechoochēē, ku kiimaawas :aneen kilē kuuneetan :piich. ¹⁷ Moowaa mpō Chēērusālēēm kilē awaateepa piich choo kiisip kilēku kāāyooytooy kutoomō ālēku. Acha sōō! Kyaachuul aneen kilē weel ākōy suur kwēēn nyēpō Areepya, nēē ityō, awaraka Tamaskaas. ¹⁸ Nēē mii lētuun, tēēnō karook :kēnyiisyēk choo lēē sōmōk kungʼeetee kukuurān :Iriin, āwō ākōy Chēērusālēēm awaa-am lōkōōy nkōō Pēētērō. Ātēpō nkōō Pēētērō pērēētuus taman nkōō muut. ¹⁹ Kiimaaroo :aneen nyuun kāāyooytooy walak kungʼātu Chēēmis nyoo tuupchō nkōō Kiptaayaan. ²⁰ Āmwoorwook nkōō taayuu Iriin kilē man :kiyoo āmii āsirwook. Moongʼuurnoonaa. ²¹ Paani karook :pērēētuusyēchoochēē, āwaa kōōroo Siirya nkōō nyēpō Kiliikya. ²² Kiitoomō kusōwoon :kaaniiseen chēpō Kiriistō chēpō Chuuteeya. ²³ Kiinkēt kipaat kiyi kiimwoorēy :piich kilē, "Mii kwoomtootēy ngʼālyoontoo Iriin :chiichi kii-usootēēch nyi kiimārēy kilē kupēt ngʼālyoontoonoonēē kilē wirwir." ²⁴ Kuuloosu :pichoochēē Iriin akipō kiyoo ki-ira nkōō wōloo āmii.

¹ Paani kāsiirtō :kēnyiisyēk taman nkōō angʼwan, awarakaa Chēērusālēēm. Ku kyoowaa paanoonēē nkōō Parnapa ākōō mpō Tiitō. ² Kyoowō āmu kiingʼoongʼwoon :Iriin kilē āwō. Āmii wōloonēē, ku kyoomwoochaa piich chēpō Kiriistō choo kiitookunootēēn nkōō wōloonēē lōkōōy choo kāroomēēn choo kyoomchinootaa piich choo mā Yāwuutik. Kyaa-ir aneen kilēē nyoonēē simangʼam :piich walak pāyiisyeenyaa kilēku kilēēn. ³ Mpō ntā kiimāmuroot :Tiitō nyi kiikupēētiichaan tōkōl āmu kii mā Yāwuutyoon, ku kiicham :kāāntōōy chēpō Chēērusālēēm kilē chiich nyēpō Iriin mpō ntā māmuroot. ⁴ Kiisyoongʼu keey ngʼaleechu āmu kiipka Yāwuutik walak Antyookya kumārēy kilē /kēēmur piich choo mā Yāwuutik. Kiichōōru keey :pichoochēē ku-irtooy keey kilē kii piich chēpō Kiriistō sikungʼam kaatyaaka nyoo kiikēēnyōōru nkōō wōloo mii :Meesaaya Yēēsu si nēē ngʼat ku-ireech kēēlēku ōōtwook chēpō ngʼātuut chēpō Yāwuutik. ⁵ Maakutēērchiichaan nyuun pichoochēē ngʼaleekwaak mpō kiitēēn. Kiiku-ir :achaan kilēē nyoonēē soonāmchiikwaan keey ngʼālyoon nyēpō man. ⁶ Akipō piich choo tookunootēēn, ku mootāsi :akwaaneek kir ngʼaleechu ānēētaa. Mpō ntā tookunootēēn :akwaaneek, ku moomii :kir, āmu mēērōōtēē :Iriin kāroomin nyēpō chiich wōlpō saangʼ. ⁷ Kiiro :pichoochēē kilē kiikōōnaa :Iriin kaamuuka ā-āmchinootō piich choo mā Yāwuutik lōkōōy choo kāroomēēn kilēē paani kiitēnii Pēētērō kaamuuka kwoomchinootō Yāwuutik. ⁸ Kilēē paani kiitē :Iriin Pēētērō kaamuuka, ku kiikōōnaa mpō inyeentee kaamuuka ā-āmchinootō piich lōkōōy choo kāroomēēn. ⁹ Kii nēē teer :Chēēmis ākōō Pēētērō ākōō Chowaana choo kii kāāntōōyiipō piich chēpō Kiriistō kilē kiipēēruur :Iriin pāyiisyeenyuun, kucham koonēētiisyeenyuun nkōō Parnapa. Kēēchoomnyēēchi nkōō akwaaneek kēē-āmchiichaan lōkōōy choo kāroomēēn piich choo mā Yāwuutik, kwoomchi akwaaneek Yāwuutik. ¹⁰ Kir nyoo kiimwoorwēēch pichoochēē ku keepkaata piich chēpō Kiriistō choo lēē mēēy nkōō Chēērusālēēm, kir nyoo kyoochēpoot :aneen a-ir. ¹¹ Kiimii yoo kiiruutoowu :Pēētērō Antyookya, akar :aneen koongʼ inyeentee kutēērēy :piich āmu kiimāchuulootēēn :tukuuchu kii-irēy. ¹² Paani ki-itu :Pēētērō, ku kyoomiisyō nkōō piich choo mā Yāwuutik. Ku nēē mii lētuun paani kapaku-itu :piich walak choo kiipkoonēē wōloo mii :Chēēmis, ku-istoorēē keey :Pēētērō wōloo mii :piich choo mā Yāwuutik, āmu kiiwar piich choo mwoorēy kilē mā pō :chiich Iriin nēē toomō /kēēmur. ¹³ Kiiwāriisyō :mpō Yāwuutik walak kilēē Pēētērō akutuup ātēpuut chēpō Pēētērō. Kuchuut mpō :Parnapa ngʼaleechoochēē. ¹⁴ Paani kyaaroo :aneen kilē kiimā-irēy :pichoochēē man kutuup keey nkōō lōkōōy choo kāroomēēn, āmwoochaa Pēētērō kutēērēy :piich tōkōl kilē, "Inyēēn Yāwuutyoon nkōō sikēēngʼuungʼ, akiitēpēē :inyēēn kilēē wōloo tēptooy :piich choo mā Yāwuutik. Āmu nee nyuun siimārēy i-ir piich choo mā Yāwuutik kutuup ngʼātuut chēpō Yāwuutik? ¹⁵ Inyēēn ākōō aneen keechaan Yāwuutik nkōō sikēēnyoon amākukārēēchaan keey nkōō piich choo mā Yāwuutik choo mēēnkēt ngʼātuut chēpō Iriin. ¹⁶ Kuunkēt :achaan kilē chāmēy chiich :Iriin nkōō taayuunyiin kilē tiliil nēē tiirō keey :chiich Yēēsu Kiriistō. Mā kilē āmu tuupēy :chiichoonēē ngʼātuut. Kiyoonēē nyoo irēēch Yāwuutik kēētiirēē keey Yēēsu Kiriistō sikuchameech :Iriin. Āmwooraa kilēē nyoonēē āmu moomii chiich nyoo chāmēy :Iriin kilē tiliil āmu tuupēy ngʼātuut. ¹⁷ Rōōtēēch :piich walak kilē kiikipngʼōōkiis āmu kutiirēē keey Yēēsu amaakutuupēy ngʼātuut chēpō Yāwuutik. Ara ngʼuutuuy sōō :nyēēnyi kilē irēēch :Kiriistō kee-ira ngʼōōki? Acha! Mā lēē nyoonēē mpō kiitēēn. ¹⁸ Ālēēlēy nyuun nēē acham kilē /kusāruuy chiich āmu tuupēy ngʼātuut chēpō Yāwuutik. ¹⁹ Kiikiikunamaa mpō :ngʼaleepō ngʼātuut /akiikeetyaaytaareenaa nyuun wōloo mii ngʼātuutēchoochēē, soomāngʼiisyō akipō Iriin. ²⁰ Kilēē paani kiimēērēy :Kiriistō, kilēē yoo kyaameer :aneen mpō kilēē nyoonēē. Maakukarkeey anee :sopoon paannyēēnyi ākōō nyēpō taay, āmu ātingʼēy paannyēēnyi Kiriistō nkōō sopoontanyuun. Sāpoon nyoo āmāngʼiisyēy ku sopoon nyoo ātiirēēyaa keey Wēēroo Iriin nyoo kiichaman ākōy kuutētō sāpoontanyiin akipō aneen. ²¹ Sārwēēch :Iriin akipō choomnyeenyiin ākityōōn mā āmu kutuupēy ngʼātuut. Kir :nyoonēē nyoo moomētooyaa. Ntā kii man kilē /kutilchinii chiich kilē chamaat nkōō taayuu Iriin āmu tuupēy ngʼātuut, man kilē tālēkuuy kilēēn meeraa :Kiriistō."

¹ Akwaan piich chēpō Kalatiya sālwēy nyaa tyaan kēny! Kiipanaak :ngʼoo? Nku /kiikungʼuutwook kukaraam wōloo kiimeerta :Yēēsu nkōō kimurtooyoon. ² Lēyyē, akanyaan ateepeenaak kir ākoongʼo. Kyoonyōōruukwaan Toomirmiir nyoo Tiliil āmu kyaatuup :akwaan ngʼātuut chēpō Yāwuutik aa, ntā kyoonyōōru āmu kyaaran kiyoo /kiikumwoorwook? ³ Akwaan sālwēy nyoo matingʼ /keemwa. Nku kyootoowunēē sopēēngʼwoongʼ nyēpō araa Kiriistō Toomirmiir nyoo Tiliil. Āmu nee nyuun paannyēēnyi saamar āmāngʼiisyēē nkōō kaamuukeengʼwoongʼ? ⁴ Āmārēēkwaan āmwoorwoon kilē kyoonyārilyō akipō tukun choo tēēnō chu nyēpō kilēēn? Man, kiimāpō kilēēn. ⁵ Kiikōōnook :Iriin Toomirmiiryeenyiin aku-ir tukun chēpō kwōngʼuut nkōō wōloo āmiikwaan āmu kyaaran kiyoo kyaateer, amaapkaat kilē āmu kyaatuup ngʼātuut chēpō Yāwuutik. ⁶ Aroo kee Apraam. /Kiikutilchi inyeentee kilē chamaat nkōō taayuu Iriin āmu kiitiirō keey inyeentee. ⁷ Mārēy nyuun āsōwu kilē piich choo rānēy Iriin kilēē Apraam ku piipō Iriin :choochēē chēpō man. ⁸ Kiisip kungʼuutu :siruut chēpō Iriin kilē chāmēy :Iriin piich choo mā Yāwuutik kilēku piich choo tiliilēēn nēē tiirō keey inyeentee. /Kiikungʼuutu paani kiimwoochinii :Iriin Apraam kilē "Kuupēēruurēy :piich tōkōl choo mii ngʼwēny kupunuunēēniin." ⁹ Pēēruuroot nyuun :piich tōkōl choo tiirēē keey Iriin kilēē paani kiitiirō keey :Apraam. ¹⁰ Ku pānootēēn nyuun :piich tōkōl choo tiirēē keey ngʼātuut. Āmwooraa kilēē nyoonēē, āmu mwoorēy :siruut chēpō Iriin kilē, "Panaat :chiich aka tōkōl nyoo mēēkoonyitēy ngʼātuut tōkōl choo /kiikukōōnu kupunuunō Muusa." ¹¹ Man nyuun kilē moomii chiich nyoo chāmēy :Iriin kilē tiliil āmu tuupēy ngʼātuut :chiichoonēē. Āmwooraa kilēē nyoonēē āmu mwoorēy :siruut kilē, "Nyōōruuy :chiich nyēpō man sopoon nēē tiirō keey Iriin." ¹² Nēē tuupēy :chiich ngʼātuut ku mamakaat :chiichoonēē kutiiro keey Iriin. Ku chiich nyoo kiilchinii keey ngʼātuutēchoochēē, kurātēy :ngʼātuut chiichoonēē ākōy. ¹³ Kiiwaleeneech keey :Kiriistō akuutyaaytaareeneech pan nyoo kyoopkēēch :ngʼātuut paani kiima akipō achaan. Āmwooraa kilēē nyoonēē āmu mwoorēy :siruut kilē, "Panaat :chiich aka tōkōl nyoo /kākuukārkooti keet." ¹⁴ Paani kiiwaleeneech keey :Meesaaya Yēēsu, /kēēpēēruur mpō piich choo mā Yāwuutik kilēē paani /kiikuupēēruur Apraam. /Kiiku-ir kilēē nyoonēē sikēēnyōōru Toomirmiir nyoo Tiliil nyoo kiiyoomiisēēch nēē kutiirēē keey inyeentee. ¹⁵ Tuupchēēnichuuch, ānkēt akwaan kilē nēē kaakwaam :piich ārēēny miis nkōō kir nyoo kātēērchi keey, ku moomii :chiich nyoo muukēy kusiir. Kilēē nyoonēē nyuun mpō miis nyoo kyaam :Iriin nkōō Apraam ¹⁶ Kiiyoomiis :Iriin Apraam nkōō miistonoonēē kilē /kuupēēruurēy piich tōkōl choo mii ngʼwēny kupunuunō siintaaryeenyiin. Nku ngʼāloolēē chiich ākoongʼo paani mwoorēy kilē ’siintaaryeenyiin’ aku chiichoonēē ku Kiriistō. ¹⁷ Kir nyoo āmii :aneen āmwoorēy ku nyi: Ki-ir :Iriin miis nkōō Apraam. Ku mēēmuukēy nyuun :ngʼātuut choo /kiipākēēkōōnu kēnyiis pōkōl angʼwan nkōō sosom lētuun kuput miistonoonēē. Mēēmuukēy nyuun :ngʼātuut chēpō Muusa kuput kir nyoo kiikuuyoomiisēēch :Iriin. ¹⁸ Nēē nyōōruuy :chiich pēēruur āmu tuupēy ngʼātuut, kupō kilēēn kooyoomiisō. Kiiyoomiis nyuun :Iriin Apraam kilē nyōōruuy :piich pēēruur kupunuunō kaaraneengʼwaangʼ. ¹⁹ Kiipō nee nyuun :ngʼātuut? Akanya āmwoorwook. /Kiikukōōnu ngʼātuut āmu kiiku-ir :piich ngʼōōki. Kiimakaat kilē kutēpi :ngʼātuutēchoochēē ākōy paani kāchō :siintaaryaani pō Apraam nyi kiiyoomiis :Iriin. Ki-ir :Iriin ngʼātuutēchoochēē akuutē ōōrkooyoon kupunuunō malaykeen. ²⁰ Tingʼēy :chiich nyoo lēē āsiisiin kāmōōs ārēēny choo ryoonchinii nēē ir piich ārēēny miis. Iriin ku ākoongʼo amooyoomiis Apraam kupunuunō āsiisiin. ²¹ Ara kārtooy :ngʼātuut kiyoo kiiyoomiis :Iriin Apraam? Acha, mālēē nyoonēē! Ntā /kiikukōōnu ngʼātuut sukukōōnu sopoon nyēpō ākōy, ntā kuumuukēy kēētililiitu akichameech :Iriin nēē kutuup ngʼātuut. ²² Mwoorēy :siruut nyuun kilē rātootēēn piich tōkōl nkōō ngʼōōki. Piich nyuun choo tiirēē keey Yēēsu Kiriistō choo nyōōruuy kiyoo kiikuuyoomiis :Iriin. ²³ Kiikiirātootēēn :achaan Yāwuutik nkōō ngʼātuut akuriipēēch :ngʼātuutēchoochēē ākōy kuchō :Yēēsu nyoo /kutiirēē keey. ²⁴ /Kiikukōōnēēch ngʼātuutēchoochēē kuriipootēēch ākōy kuchō Yēēsu /sikeechameech kilē kutiliilō āmu kutiirēē keey inyeentee. ²⁵ Paani kiikēētiirēē keey nyuun Kiriistō kimaakēēmārēy kiriipootēēch :ngʼātuut. ²⁶ Kyoolēku :tōkōl laakōōpō Iriin āmu, ātiirēē keey Meesaaya Yēēsu. ²⁷ Paani /kapakeepaatiisanaak, āpoyiitu Kiriistō, ākoonyōōru sopoon nyoo rēēl nyēpō Kiriistō. ²⁸ Mātingʼēy kilē ngʼoo :ngʼoo, nēē kā Yāwuutik ntā ku mā Yāwuutik, nēē kā ōōtwookiin ntā ku mā ōōtwookiin, nēē kā murēn ntā ku cheepyooso. Āmiikwaan :tōkōl kipakoongʼo nkōō Yēēsu Kiriistō. ²⁹ Kilēē paani kyoopāyiitu Kiriistō, ku akwaan laakōōpō Apraam chēpō man akunyoolchinii /kēēkōōnook pēēruur nyoo kiiyoomiis :Iriin Apraam.

¹ Apkaata kee kilēē nyi: Nēē ma pooyoon akumēti laakweenyiin nyoo tāku miningʼ tukuuchiich, ku karkeey laakwaanoonēē nkōō ōōtwookiin. Mpō ntā chaachiich :tukun chēpō apoonyiin, ku mātingʼēy kaamuuka nkōō wōloo mii :tukuuchoochēē ākōy ku-ōōwiit. ² Tākumii :laakwaanoonēē ēēruun chēpō tilyay nkōō piich choo ryoonchinii tukuuchoochēē ākōy paani /kākuutē kaamuuka kupayta tukuuchoochēē. Aku pērēētuunoonēē /kuutēnii kaamuuka ku pērēētuu nyoo kiikilēwēn apoonyiin. ³ Kii nēē tākupāytooyēēch :ātēpuut chēpō ngʼwēny ku kiikilēēchaan laakōōy choo mēēnkēt kir. ⁴ Ku kii nēē it :pērēētuu nyoo /kiikiikēēchēp, kukōōnu :Iriin laakweenyiin nyoo kiinam :cheepyooso akutēpuunō kōōr nyoo kiipāytooy :ngʼātuut chēpō Yāwuutik. ⁵ Kuchō kuutyaayteech choo kiikiikupayteech :ngʼātuut sikēēlēkuu laakōōpō Iriin kukaraam. ⁶ Kilēē paani kiikēēlēku tōkōl laakōōpō Iriin, ku kiiyookwēēch :Iriin Toomirmiiryoo Wēēriinyiin kumāngʼiisyō ākōō achaan. Toomirmiiryoonoonēē nyi irēēch kēēkuursyēē kilē, "Apoo." ⁷ Maakiichaan nyuun tōkōl paannyēēnyi ōōtwook. Kiikēēlēku laakōōpō Iriin. Āmu kiikēēpāyiitu nyuun Iriin, kēēkōōnēēch kir aka tōkōl nyēpō laakōōchiich. ⁸ Kii nēē toomō āsōwuukwaan Iriin, ku kiipāytooyook :tukun choo mēērookēē /kēēkutunchi. ⁹ Ku paanyēēnyi paani kāāsōwu Iriin, aku kaakusōwook :inyeentee oo, kilē nee saamara kuureer kupaytaak tukun choo mēētoorētook? Āmārēēkwaan kuureer kuupootook :tukuuchoochēē? ¹⁰ Āmiikwaan ākiilēy keey āriipēy tuumwēyiipō Yāwuutik. Āmu nee sookiilchi keey tuumwēyiichoochēē? ¹¹ Kaawar :aneen wōloo kāātēptēēkwaan nyoo āmii :aneen āpkootēy kilē kiilēku pāyiisyeenyuun puch. ¹² /Kiikeetyaaytaareenaa ngʼātuut ākoomāngʼiisyaa kilēē akwaan choo kiimāpāytooyook ngʼātuut. Āsoomook nyuun tuupchēēnichuuch ātyookiisyēērēē wōloo mii ngʼātuut soomāngʼiisyēē kilēē aneen. Kyaataakaan nkōō oor nyaa karaam paani kyoochōōn nyēpō taay ā-āmwook lōkōōy choo kāroomēēn. ¹³ Kilēē paani ānkēt :akwaan, kir nyoo ki-iraa soochoo-āmwook lōkōōy choo kāroomēēn nyēpō taay ku āmu kiimakaraam anee pōōr. ¹⁴ Mpō ntā kiimuukēy kuu-iimaak :pōōrtanyuun, ku kiimaatayaan ntā a-oonoon. Kyaataakaan nyuun kilēē yoo kyaaneen malayka nyēpō Iriin, ntā ku kilēē yoo kyaaneen Yēēsu Kiriistō. ¹⁵ Kiikwaamaak :nee aniin? Kiiwō ānō pāypooyēēngʼwoongʼ nyi kiipō taay? Āmwoorwook man kilē kyaachamaan nyoo ntā kiimuukēē, tākyoopāluuy koonyiikwook ākookōōnoon. ¹⁶ Kunyuun oo, ara kyoolēkwaa puunyoon nkōō wōloo āmiikwaan āmu kyoomwoorwook man? ¹⁷ Mii :pichoochēē mārwook atuupa ngʼātuut kuutyāmēy kilē kusaarsaaraak āchāmchii ngʼaleekwaak, aku mā ngʼal choo kāroomēēn. Mārēy :pichoochēē ku-istoorēēnook wōloo āmiiyaa sootēērchiikwaan ngʼaleekwaak. ¹⁸ Karaam ānāmchi keey ngʼālyoon nēē ngʼālyoon nyaa karaam. Akaa-ir kilēē nyoonēē ākōy mpō ntā mākumii tōkōl. ¹⁹ Chamanichuuch, kilēē paani ngʼwooniituuy cheepyooso :moo nēē mārēy kutuum, kumii kungʼwoonchinaa mpō kilēē nyoonēē ākōy aroo kilē kookiilyō nkōō Kiriistō. ²⁰ Ālēēlyaa ntā kākimii tōkōl saakuskuus mukulērtanyuun paani āngʼāloolwook, āmu kee-iiman :ngʼaleekwook. ²¹ Ateertee kee, akwaan pichu āmārēy kupaytaak :ngʼātuut. Ānkēt :akwaan kiyoo mwoorēy :siruut chēpō Muusa? ²² Siraat kilē kiitingʼēy :Apraam wēēchiichiich ārēēny. Kiināmēy :cheepyoosee aka nyoo lēē ōōtwookiin wēērii aka, kunam wēērii aka :cheepyooseetaa kata. ²³ /Kiikunam wēērii nyi pō cheepyooso nyoo lēē ōōtwookiin kutuup keey nkōō kāāpkootuut chēpō piich. Ku nyi kiipō cheepyooseetaa kata ku /kiikunam kilēē paani kiiyoomiis :Iriin Apraam. ²⁴ /Kiikuukarkeeyiit chēēpyōōsōōchoochēē nkōō miistiin ārēēny chēpō Iriin. Miis nyēpō taay nyoo /kiikutoowuunō Tulwoo Sinaay ku karkeey nkōō Akar. Nāmēy nyoonēē :laakōōy choo lēē ōōtwook. ²⁵ /Kiikuukarkeeyiit Akar Tulwoo Sinaay nyoo mii kōōroo Areepya /akeekarkeeyiita Chēērusālēēm nyēpō paannyēēnyi nyoo ōōtwook :piichiich nkōō ngʼātuut. ²⁶ Karkeey nyuun cheepyooseetaa kata nkōō :Chēērusālēēm nyēpō kipsēnkwēt. Tyaakaat aku eeyeenyoon. ²⁷ Mwoorēy :siruut kilē: "Paypayiituu, :inyēēn cheepyoosooni lēē sōōn. Isiiyta, nyoo mēētēērēy ngʼwoonin nyēpō laakwa. Tyaan :laakōōy choo nyōōruuy :cheepyooso nyoo kakusas kusiir nyoo kiitingʼēy murēn." ²⁸ Kunyuun oo, tuupchēēnichuuch, akarkee :akwaan nkōō Isaka āmu /kiikunamaak ālēku laakōōpō Iriin kilēē wōloo kiiyoomiistō :Iriin Apraam. ²⁹ Kilēē wōloo kiilēē :ngʼala nkōō pērēētuus chēpō Apraam, kilēē nyoonēē mpō paannyēēnyi. Ngʼēētēy :wēērii nyi /kiikunam kilēē wōloo pkootitooy piich ku-us nyi /kiikunam nkōō kaamuuka nyēpō Toomirmiir nyoo Tiliil. ³⁰ Mwoorēy nee nyuun :siruut chēpō Iriin akipō yēēnyi? Mwoorēy kilē, "Oona cheepyoosoonoonēē lēē ōōtwookiin nkōō wēēriinyiin kupeera kaayi. Mārāmtooy :wēēroo cheepyoosooni lēē ōōtwookiin kir nkōō wēēroo cheepyooseetaa kata." ³¹ Kunyuun, oo, tuupchēēnichuuch, mākiichaan laakōōpō cheepyoosooni lēē ōōtwookiin, kipoochaan cheepyooseetaa kata.

¹ Kiikuutyaayteech :Kiriistō, simaakupāytooyēēch :ngʼātuut. Kunyuun, aroo kilē kāātyookiisyō amataakany kuureer kupaytaak :ngʼātuut. ² Ātēērwoon ngʼaleechuuch. Āmwoorwook :aneen Paawulō kilē nēē kaakany /kēēmurook kilē sukuchamaak :Iriin, kumēēlē toorētook kir mpō kiitēēn :meeraa Kiriistō. ³ Akanya āmwoorwook kuureer kilē chiich aka tōkōl nyoo chāmtooy keey /kēēmur, ku maraat kuriip ngʼātuut tōkōl chēpō Yāwuutik. ⁴ Ku akwaan choo āmārēy kuchamaak :Iriin kilē ātiliilō āmu ātuupēy ngʼātuut chēpō Yāwuutik, ku kyoo-istoorēē keey wōloo mii :Kiriistō. Kyaachuchuukee keey chamataa Iriin. ⁵ Āmwooraa kilēē nyoonēē, āmu kutingʼēēchaan man kupunuunō Toomirmiir nyoo Tiliil kilē kunyōōruuy kir aka tōkōl nyoo kiiyoomiis :Iriin piich choo tiirēē keey Yēēsu. ⁶ Nēē /kākumur chiich ntā nēē /mākumur, ku moomii ngʼālyoon nkōō wōloo mii :Yēēsu Kiriistō. Kir nyoo maraat ku kutiirō keey :chiich Yēēsu akutingʼēy choomnyoot. ⁷ Kyoomiikwaan ātāsēy taay nyaa karaam. Ara ngʼoo :nyi kiingʼamaak ku maacham ngʼālyoon nyēpō man? ⁸ Māchōōnēē :ngʼamwa nyoo lēē nyoonēē wōloo mii :Iriin nyoo kiikuurook ālēkuu laakōōchiich. ⁹ Irēy :kimeera choo ngʼērin mayya chaa chaangʼ kukuutu. Kuumuukēy nyuun mpō :ngʼālyoon nyoo miningʼ kuwalaak tōkōl. ¹⁰ Ātiirēēyaa keey Kiptaayaan akipō akwaan kilē mootingʼēēkwaan kāāpkootuut walak choo ngʼulēy. Ngʼwoonchinii chiich nyoo kēēpootook, mpō ntā ngʼoo :chiichoonēē. ¹¹ Tuupchēēnichuuch, ntā toomii aneen ānēētook kilē maraat /kēēmur chiich sikilēku chiich nyēpō Iriin, ntā /maakēē-usoon. Ntā kiilēē nyoonēē, ntā moomii :riiri nēē aneet :aneen akipō meeraa Yēēsu nkōō kimurtooyoon. ¹² Āsoomaa kilē ntā til keey :pichoochēē mii kuu-iimook mētēwēy kilē ntā /kumurook. ¹³ Tuupchēēnichuuch, /kiikēēlēwēnook /akeetyaaytaak nyoo maakupāytooyook :ngʼātuut. Kilēē paani /kiikeetyaaytaareenaak ngʼātuut, kumaa-ir nyuun kir aka tōkōl kilēē wōloo mārtooy pōōrwēyiikwook. Ātoorētēy keey nkōō choomnyoot. ¹⁴ Rumēy ngʼātuut tōkōl :ngʼātuutyoonoonēē mwoorēy kilē, "Icham piich walak kilēē wōloo ichāmtooy keey." ¹⁵ Akaaman maasur keey nyuun aku maa-am keey akutaan, āmu āmuukēy awaangʼ keey. ¹⁶ Āmwoorwook nyuun kilē āmāngʼiisyēē kilēē wōloo mārtooy :Toomirmiir nyoo Tiliil simaa-ir tukun choo mārēy pōōrwēyiikwook. ¹⁷ Tukun choo mārēy :pōōrwēyiichooch kilē kee-ira, ku māmārwēēch :Toomirmiir nyoo Tiliil kilē ntā ku-ir. Ku tukun choo mārwēēch :Toomirmiir nyoo Tiliil kilē ntā ku-ir, ku māmārwēēch :pōōrwēyiichooch kee-ira. Mā-itinii keey :Toomirmiir nyoo Tiliil ākōō mākuut chēpō pōōrwēyiichooch. Moomuukēēkwaan nyuun a-ir kir nyoo āmārēy. ¹⁸ Ku nēē ntōrōōrwook :Toomirmiir nyoo Tiliil, ku maakupāytooyook :ngʼātuut. ¹⁹ Tookunoot :tukun choo irēy chiich nyoo pāyuuy makuut chēpō pōōr. Ngʼaleechoochēē ku kusiir karwa murēnō ntā ku cheepyooso, sopoon nyoo mā tiliil, takalanat, ²⁰ /kēēkutunchi kaanaamōōn, pan, keesas keey, pōlāt, ngʼat koongʼ, nārēēkyō, suuynoonti, pēēsyoot, ²¹ tuurinpō moo, pōōkitō, kimoo, nkōō walak choo karkeey nkōō choochēē. Lēyyē, akanya āmwoorwook kuureer kilēē paani kyoomwoorwook kilē chiich aka tōkōl nyoo tuupēy ngʼaleechoochēē, ku mānyōōruuy kuchuut Kaa Iriin. ²² Ku nēē pāyu nyuun :Toomirmiiryēē nyoo Tiliil sopoonwēchooch, kēēnyōōru choomnyoot, pāypooyō, kaalya, kirintaar, riirataa keey, kāroomin, kaarana, ²³ tāloosyō ākōō /kēēriip keey. Moomii :ngʼātuut aka tōkōl nyoo tāyēy tukun choo lēē chu. ²⁴ Piich chēpō Yēēsu Kiriistō ku kiikumētō mākuut chēpō pōōrwēyiikwaak nkōō tukun chaa raacheen choo mārēy :mootinēēkwaak. ²⁵ Kilēē paani kiikukōōnēēch :Toomirmiir nyoo Tiliil sopoon nyoo rēēl, akanya kee-ira tukun choo mwoorwēēch Toomirmiiryoonoonēē kee-ira. ²⁶ Kunyuun, amaakany keelasa keey, mākukwiintoochi piich amaakany kutuuriityēēch moo tukun chēpō piich.

¹ Tuupchēēnichuuch, nēē ir :chiich ngʼōōki, ā-isu muutyō :akwaan choo kyookiilyō nkōō Toomirmiir nyoo Tiliil ākooriipēy keey, āmu muukēē mpō /keetyamaak. ² Ātoorētēy keey nēē nyikisiityook :ngʼala. Nēē a-ir kilēē nyoonēē, ātuupēy kiyoo mwoorēy :ngʼātuut chēpō Kiriistō. ³ Nēē pkootēy :chiich kilē akaykay kusiir piikō walak, aku makaykay, ku kēēmēlmēēl keey :chiichoonēē. ⁴ Mārēy i-ir :chiich kir nyoo maraat i-ir, si nēē ngʼat itingʼēy kir nyoo ilāsēy keey simēētēēniityō keey nkōō chiitō aka. ⁵ Āmwooraa kilēē nyoonēē āmu kālāpēy :chiich aka tōkōl nyariltanyiin. ⁶ Piich tōkōl choo mii /kēēnēētēy ngʼālyoontoo Iriin, ku maraat kichārchinii tukun choo tingʼēy koonēētiikwaak. ⁷ Amaakany /kēēmēlmēēlook. Moomii :chiich nyoo muukēy kuumēlmēēl Iriin. Kāsēy :chiich kir nyoo kiitōōtēy. ⁸ Chiich nyoo irēy tukun kilēē wōli mārtooy mākuut chēpō pōōrtanyiin, ku kāsēy :chiichoonēē meerat akipō mākuut chēpō pōōrtanyiin. Ku :nyoo irēy tukun kilēē wōloo mārtooy Toomirmiir nyoo Tiliil, kukāsēy :chiichoonēē sopoon nyēpō ākōy kupunuunō Toomirmiiryoonoonēē. ⁹ Kimākuchoosyō kēē-irēy tukun choo kāroomēēn, āmu paani ka-it :pērēētuuni kiikuchēp :Iriin, kēēkāsēy kir nyoo kiikutoot nēē mākuchoosyō. ¹⁰ Ku nēē tākēētingʼēy nyuun pārooyin, akany kēē-irchii piich tukun choo kāroomēēn, aku kusiir tōkōl, kēē-irchi piich choo kiikutiirō keey Iriin. ¹¹ Aroo kee wōloo āsirtooy aneentee parwaani nkōō siruut choo ēēchēēn āpāyiisyēērēē ēēruunēchuuch. ¹² Piich choo mārēy kungʼuutuunō wōli pō saangʼ kilē kāroomō, choo mii kukārook koongʼ kilē /kēēmurook. Kir kipaat nyoo irēy akwaaneek siku-ir kilēē nyoonēē, ku /simāku-us akipō kimurtooyoontoo Kiriistō. ¹³ Āmwoorēy kilēē nyoonēē āmu māriipēy mpō :pichoochēē /kumurēy ngʼātuut tōkōl. Mārēy kipaat kilē /kēēmurook sikulas keey kilē /kaakēēmurook. ¹⁴ Lēyyē, mā ākōy alasaa keey kir aka, ālāsēēyaa keey kimurtooyoontoo Kiptaayaantēēnyoon Yēēsu Kiriistō. Āmu kiima :Yēēsu nkōō kimurtooyoon, ku sopoon nyaanyaa ku maakukarkeey nkōō sopoon nyēpō piich choo tuupēy ātēpuut chēpō ngʼwēnyuuni aku mā :aneen mpō kir nkōō wōloo mii :pichoochēē. ¹⁵ Mātoorētēy kir nēē /kumur chiich ntā nēē /mākumur. Kir nyoo maraat ku kunyōōru :chiich sopoon nyoo rēēl. ¹⁶ Lēyyē, kanya kuutō :Iriin kaalya piich tōkōl choo tuupēy ngʼaleechu akuupēēruur. Piich chēpō Iriin chēpō man :pichoochēē. ¹⁷ Kungʼeetee aniinee kitas taay, moomāraa takuu-iman :chiich, āmu ātingʼēy pēēruutēy nkōō pōōrtanyuun choo kyoonyōōru āmu kyaamtaataa ngʼālyoontoo Yēēsu. ¹⁸ Tuupchēēnichuuch, kuupēēruurook :Kiptaayaantēēnyoon Yēēsu Kiriistō. Lēē nyoonēē.