Ēpēēsō

Ēpēēsō

¹ Aneen :nyi Paawulō nyoo kilēwēnān :Iriin ālēku kāāyooytooyiintoo Yēēsu Kiriistō. Āsirwook lōkōōyichu akwaan piipō Iriin chēpō Ēpēēsō choo /kiirānook ākootuupēy Yēēsu Kiriistō. ² Kuupēēruurook :Paapaan Iriin ākoonyōōru kaalya nkōō wōloo mii :inyeentee nkōō Kiptaayaan Yēēsu Kiriistō. ³ Kuuloosuuy Iriin nyoo Paapaa Kiptaayaantēēnyoon Yēēsu Kiriistō nyoo kiikukōōnēēch pēēruur aka tōkōl nyēpō sopoonpō Toomirmiir kupunuunō Kiriistō. ⁴ Kiisip kulēwēnēēch :Iriin kutoomō /kēētoowu ngʼwēny sikēētililiituu nyoo mākutingʼēy rāyiityō aka tōkōl nkōō taayuunyiin kupunuunō :Kiriistō. ⁵ Kiisip kutil :Iriin nkōō choomnyēēnyiin kilē kēēlēkuuchaan laakōōchiich kupunuunō Yēēsu Kiriistō. Kuupaypaay nyoonēē inyeentee kitya. ⁶ Kuutōrōōrēy Iriin akipō pēēruuroonēē ōōw nyoo kiikukōōnēēch kupunuunō wēēriinyiin nyoo chāmēy :inyeentee. ⁷ Kiikutyaakeeneech :Kiriistō kērētiichiich choo kiitarta, /akiikēēnyōōwēēch kaat ngʼōōkiichooch. Chāmēēch :Iriin nyaa tyaan kēny! ⁸ Nkōō chamataani ōōw, ku kiingʼoongʼwēēch :Iriin chēpētēēnyiin nyoo kii-ungʼaat. Kikōōnēēch ngʼoroomnyēēnyiin aku-ireech kēēsōwuu kiyoo kiimārēy ku-ir kupunuunō Kiriistō. Kiitil ku-ir kilēē nyoonēē āmu kiirō :inyeentee kilē kii karaam. ¹⁰ Kir nyoo kiikuchēp :Iriin ku nyi: nēē iti :pērēētuus choo yāmootēēn ku-isu tukun tōkōl choo mii parak ākōō ngʼwēny kuuryoonchi :Kiriistō. ¹¹ Iriisōōt tukun tōkōl kutuup keey nkōō chēpuut chēpō Iriin. Kilēē wōloo kiimārtooy inyeentee nkōō taay, /kēēsip /kēēlēwēnēēch kēēlēkuu piichiich kipunuunō Kiriistō. ¹² Kunyuun, kuuloosuuy Iriin akipō ōōwintanyiin achaan Yāwuutik choo kiikuusip keekanyaanu :Meesaaya kitoomō kuchō. ¹³ Kyaateer :akwaan mpō ngʼālyoontoo man, lōkōōy choo kāroomēēn chēpō sāruunō. Kii nēē aran :akwaan Kiriistō /kēēkōōnook Toomirmiir nyoo Tiliil nyoo /kiikiiyoomiis kēny, /sikēēnkētēēnook kilē akwaan chaachiich. ¹⁴ Paani /kiikukōōnēēch Toomirmiir, ku toowunō :nyoonēē nyēpō tukun choo kupa kēēnyōōruuy mu pērēētuu nyēpō lēt nyoo /kiityooktēēch choo kipō Iriin. Kuuloosuuy nyuun Iriin akipō ōōwintanyiin. ¹⁵ Kyaateeraa kilē ārānēēkwaan Kiptaayaan Yēēsu ākoochāmēy piipō Iriin kitya. ¹⁶ Moochoosaa nyuun āmwoochinii Iriin kōōnkēy nēē āsoowook. Āsoowook pērēētuus tōkōl, ¹⁷ āsooyēy ākōy Iriin nyoo tōrōōr aku paapaa Kiptaayaantēēnyoon Yēēsu Kiriistō kilē kukōōnook ngʼoroomnyō nyēpō Toomirmiir akungʼoongʼwook āsowuu wōloo lēē :inyeentee. ¹⁸ Āsooyēy kuureer kilē kuyootiisyō :mētēwēyiikwook soosowuu ōōwinpō kiyoo kiikuuyoomiiswook :Iriin kilē kōōnook akaaroo mpō wōloo tēēnō :pēēruur nyoo ānyōōruukwaan kupootō piipō Iriin tōkōl. ¹⁹ Ākoosooyēy mpō āsowuukwaan wōloo tēēnō :nyikiisinpō kaamuuka nyoo mii kupāyiisyēērēē :Iriin nkōō wōloo kumiichaan choo kiikeeran inyeentee. Moomii :kiyoo kiitēēnēē kaamuukaanyēēnyi. ²⁰ Kiipāyiisyēērō :Iriin kaamuukaanoonēē, paani kiingʼeeta Kiriistō meerat aku-ir kutēpō ēēruunyiin nyēpō taay mu kipsēnkwēt. ²¹ Pāyuuy :Kiriistō pāytooyiin aka tōkōl ākōō piich tōkōl choo tingʼēy kaamuuka kipootō mōkōrō tōkōl. Inyeentee nyēpō kaamuuka nyoo ōōw kisiir walak tōkōl nkōō kōōrooni nkōō mpō kōōrēē nyoo chōōnēy. ²² Kiikuutē :Iriin Kiriistō kupayta kir aka tōkōl aku-ir inyeentee kuryoontō kaaniiseenyiin, ²³ nyoo pōōrpō Kiriistō. Inyeentee nyoo irēy tukun tōkōl kukēchi keey nkōō oor aka tōkōl. Nēē iti :kaaniisaa Kiriistō wōloo mārtooy inyeentee, kupaypayiit.

¹ Kyaakwaan mēērootēēn taay nkōō ngʼōōki choo kyootingʼēy. ² Kiitootuupēēkwaan ātēpuut choo nāmēy keey nkōō ātēpoo ngʼwēny akyootuupēy Syeetaani nyoo pāytooyiintoo toomirmiirēy chaa raacheen chēpō woowēēs parak. Pāytooyiintoonoonēē :nyi mii kupāyiisyēērēē choo mātēērēy iit Iriin. ³ Kii kilēēchaan tōkōl pichoochēē. Kiintōrōōrwēēch :ātēpuut chaa raacheen chēpō pōōrwēyiichooch akiikutuupēy kāāpkootuutēpō tukun chaa raacheen. Kiinyoolchinēēch mpō /kēēkōōnēēch siitēt kilēē :piich walak tōkōl. ⁴ Ku āmu chāmēēch :Iriin akuriirēēnēēch, ⁵ ku kiikukōōnēēch sopoon nyoo rēēl nkōō Kiriistō. Mpō ntā kiikiikēēpētyō nkōō ngʼōōki choo kiikutingʼēy, kusārwēēch nkōō chamateenyiin. ⁶ Kiikuungʼeeteeneech :Iriin meerat kilēē Yēēsu Kiriistō akuutuuyēēch nkōō inyeentee sikēēpāytee :tōkōl mu im, ⁷ sikungʼuutu nkōō pērēētuus choo pkoonēy kilē chāmēēch kitya nyoo moomii :kiyoo kiitēēnēē. Kiingʼuutwēēch choomnyoonoonēē kupunuunō Kiriistō. ⁸ Iriin kipaat nyoo ki-ir /kēēsārwook nkōō chamateenyiin, paani kyaaran inyeentee. Mēēlē kyaa-ir :akwaan kir /tākēēsārwook, wōloo nyuun kir nyoonēē nyoo kikōōnu :Iriin kipaat. ⁹ Kimalas keey nyuun :chiich kilē /kiikēēsāru, āmu makusāruuy chiich akipō tukun choo kāroomēēn choo ka-ir. ¹⁰ Kii-ireech :Iriin kēēlēkuu piich choo reelacheen kupunuunō Yēēsu Kiriistō sikee-ira tukun choo kāroomēēn choo kii kaakisip kutātwēēch. ¹¹ Ānkēt :akwaan kilē kiirēēngʼook :Yāwuutik āmu /maakimurook, akiirōōtēy kilē maalēwēnook :Iriin. Maasōwu kilē murwēēngʼwaangʼ ku kir nyēpō saangʼ kipaat amāwālēy sopoon. ¹² Nkōō taay ku kiimoonkēt :akwaan Meesaaya nyoo kiichōōnēy, aku /kiikuutapaaneenaak piipō Iriin Israayeel, nkōō kiyoo kiyoomiis :Iriin akwaaneek. Kyoomāngʼiisyēy nkōō ngʼwēny kimoonkēt Iriin āmootingʼēy :kir nyoo āmoongʼuuy. ¹³ Aku aniinee, ku kyoopāyiituukwaan Yēēsu nyoo Meesaaya. Mpō ntā kyaakwaan lōōwō nkōō wōloo mii :Iriin ku /kiikeemutwaak ālēēkiti inyeentee kupunuunō kērētiipō Kiriistō. ¹⁴ Kiriistō nyoo kyoopkēēch kaalya nēē kichaan Yāwuutik ntā ma Yāwuutik, ākiikuutuuyēēch tōkōl kēēlēku kir ākoongʼo. Kiisyaar inyeentee karwa nyoo kyoopuuy puunyoonti. ¹⁵ Paani kiitēto :Yēēsu sopoontanyiin, kurook ngʼātuutēpō Yāwuutik. Ki-ir kilēē nyoonēē tākuutuuyō kāmōōsichoochēē ārēēny kilēku ākoongʼo akunyōōru kaalya. ¹⁶ Kii nēē ma :Yēēsu nkōō kimurtooyoon, kuuchoomnyō kāmōōsichoochēē ārēēny nkōō Iriin. Kuuwoongʼu puunyoonti akuuchoomnyō pichoochēē kilēku kir ākoongʼo. ¹⁷ Kiichō :inyeentee siku-āmwook lōkōōy choo āpuuy kaalya, akwaan choo kyoolōōwō nkōō mpō choo kyoolēēkitō nkōō wōloo mii :Iriin. ¹⁸ Inyeentee nyuun nyoo irēēchaan tōkōl kēē-iti Paapa Iriin nkōō kaamuukaa Toomirmiiryēēnyiin. ¹⁹ Kunyuun, maakwaan too āmoomiikwaan saangʼ. /Kikeetastaak piipō Iriin ākēēpō :tōkōl kaaw ākoongʼo nyēpō Iriin, ²⁰ nyoo /kiikitēēchi tēlēkuu ngʼaleepō kāāyooytooyiik ākōō ōōrkooy, ku Yēēsu Kiriistō kiptālēnyēē. ²¹ Inyeentee nyoo tiirēy keetiik tōkōl chēpō koot /kēētēēkēy ākōy kukiil kilēku kō nyoo tiliil nyēpō Iriin. ²² Inyeentee nyoo tēēkook mpō ātuuyō ālēku kōyoonēē tiliil nyoo māngʼēy :Toomirmiir nyoo Tiliil.

¹ Āmii :aneen Paawulō korkoreet āmu āpāyiisyēēchinii Yēēsu Kiriistō akyoo-āmchi choo ma Yāwuutik lōkōōy choo kāroomēēn. ² Ānkēt :akwaan kilē kiikōōnān :Iriin ā-āmwook lōkōōyichu kāroomēēn pō chamateenyiin. ³ Kiingʼoongʼwoon :Iriin lōkōōyichoochēē kii-ungʼootēēn kilēē paani kaasir nkōō nwookin. ⁴ Nēē asooman ngʼaleechu, āsōwuukwaan tukun choo kii-ungʼootēēn choo ānkēt :aneen akipō Kiriistō. ⁵ Ngʼālyoon nyoonēē nyoo kiitoomō kungʼoongʼchi :Iriin piich pērēētuu aka kilēē paani kaakungʼoongʼchi kupunuunēē Toomirmiiryēēnyiin kāāyooytooyiik ākōō ōōrkooy choo kiilēwēn. ⁶ Ngʼālyoontoonoonēē kii-ungʼaat ku nyi: pēruurēy :Iriin piich choo ma Yāwuutik kilēē paani kiipēruur Yāwuutik. Kiikēētuuyō :akwaaneek tōkōl kilēku kir ākoongʼo nkōō Yēēsu Kiriistō aku nyōōruuy kiyoonēē kiiyoomiis :Iriin piich kupunuunō lōkōōy choo kāroomēēn. ⁷ Kiingʼoongʼwoon :Iriin pērēētuu ākoongʼo kaamuukeenyiin akukōōnān nkōō chamateenyiin a-ir pāyiisyōōni pō amtaar pō lōkōōyichoochēē kāroomēēn. ⁸ Mpō ntā āpō lēt nkōō piich tōkōl choo rānēy Iriin, ku /kiikēēkōōnān kaamuuka kilē ā-āmchi piich choo ma Yāwuutik lōkōōy choo kāroomēēn akipō pēruur choo mēē-iitiisōōt choo kinyōōrchinii :Kiristo. ⁹ /Kiikulēwēnān nyuun soongʼuuti chiich aka tōkōl ngʼalēēchoochēē kiichēp :Iriin nyoo kii-irēy kir aka tōkōl, akii-ungʼ :inyeentee ngʼaleechoochēē kungʼeetee /kee-ir ngʼwēny. ¹⁰ Kiimārēy :Iriin kungʼuuti pāytooyiik ākōō choo tingʼēy kaamuuka nkōō ngʼwēny ākōō parak ngʼoroomnyēēnyiin nyoo moomii kir nyoo kiitēēnēē. Kiimārēy kungʼuutuunō nyuun kaaniiseenyiin. ¹¹ Kiikiikuchēp :Iriin ngʼālēēchoochēē kitoomō ku-ir ngʼwēny akiisilta nkōō Kiptaayaantēēnyoon Yēēsu Kiriistō. ¹² Āmu kiirānēy inyeentee, kēētingʼēy nyakanat kēēpēēchii Iriin nyoo mākuuwārēy kir aka tōkōl. ¹³ Kunyuun, āmwoorwook kilē maakany kumēērook mukuliir nkōō kiyoo ānyārilaa akipō akwaan, āmu ki-iriisyō :ngʼalēēchoochēē /sikēētōrōōrook. ¹⁴ Nēē apkaat ngʼoroomnyō ākōō chēpuut tōkōl chēpō :Iriin, ākutungʼēy ākāāmwoochi Paapa Iriin kōōnkēy ¹⁵ nyoo kikuurtēērēē :paapatiin tōkōl choo mii ngʼwēny nkōō Parak. ¹⁶ Āsoomēy Iriin nyēpō tukun tōkōl kuukiil sopoonwēkwook nkōō kaamuukaa Toomirmiiryēēnyiin. ¹⁷ Āsooyēy kilē ātēpēēkwaan nkōō Kiriistō choo ārānēy inyeentee. Ātēēchii sopēēngʼwoongʼ tālākuu choomnyoot nyēpō Iriin akaachipta iriinēkwook kuchuut choomnyoonoonēē. ¹⁸ Āsooyēy kilē amuuk :akwaan nkōō piich tōkōl choo kiikuuran Iriin āsowu kilē tapees, koor, tōrōōr aku ōōw nyēpō kwongʼuut choomnyoo Kiriistō. ¹⁹ Āsooyēy mpō kilē āsōwuukwaan choomnyooni siirēy wōloo pkootitooy piich. /Tākēēkōōnook kuyam pēruur tōkōl chēpō Iriin. ²⁰ Kutōrōriit :Iriin nyoo kōōnuuy choo siirēy choo kākisoom ntā ku mpō choo kiipkootinii kupunuunō kaamuukeenyiin nyoo mii ku-irēy pāyit nkōō wōloo kimii. ²¹ Kēētōrōōrō Iriin ākōy nkōō ākōy achaan choo kuurānēy akipō kiyoo kiiku-ir kipunuunō Yēēsu Kiriistō. Lēē nyoonēē.

¹ Āsoomook :aneen nyoo arataat akipō pāyiisyoo Kiptaayaan kilē ātēpii nkōō oor nyoo chuulaat nyoo kiikuurchook :Iriin. ² Āminingʼiitō keey ākootālāyiitu. Āmurtoochinii keey ākoochoomsōōt. ³ Atyam wōloo āmuuktooy aroo kilē kooriip kipakoongʼo nyoo kōōnuuy :Toomirmiir ākōō kaalya nyoo tuuyook. ⁴ Kichaan pōōr ākoongʼo, akēētingʼēy Toomirmiir ākoongʼo kilēē paani /kikēēkuurchēēch kāāmoongʼunō ākoongʼo. ⁵ Ākoongʼo :Kiptaayaan, aku ākoongʼo :kaaranee, ku ākoongʼo :kaapaatiisanee. ⁶ Ākoongʼo :Iriin nyoo paapēēnyoon tōkōl. Pāytooyēēch tōkōl, pāyiisyēērēēnēēch tōkōl, akumāngʼēēch tōkōl :Toomirmiiryēēnyiin. ⁷ Kiitō :Kiriistō chiich aka tōkōl nkōō achaan pāyit kutuup keey nkōō wōloo rōōtitooy inyeentee. ⁸ Mwoorēy :siruutēpō Iriin kilē: "Kii nēē wō parak, kuumut luulēn akuutō piichiich kōōnunēy." ⁹ Ngʼuutuuy nee :ngʼaleechu: ’Kii nēē wō parak?’ Ngʼuutuuy kilē kiirēytō kiwō ngʼwēny kupōk. ¹⁰ Nyoonēē kiirēku, ku inyeentee mpō :nyoo kiiwō parak kusiir tōkōl sikuusilta kir aka tōkōl. ¹¹ Inyeentee :nyi kiitēnii piich walak kilēku kāāyooytooyiik, kilēku :walak ōōrkooy, kilēku :walak choo āmtootēy lōkōōy choo kāroomēēn, kilēku :walak māsōwō, kilēku :walak koonēēt. ¹² Pāyisyoo pichu ku kuchēp :piich ku-ir pāyisyoo Iriin sikukiil :pōōrpō Kiriistō ¹³ ākōy kēēlēku :tōkōl ākoongʼo nkōō kaarana akēēsōwu wēēroo Iriin kukaraam. Kēēlēku nyuun choo kiikēēkiilyō nkōō Kiptaayaan, akeekarkeeyiitu nkōō Kiriistō. ¹⁴ Yoonēē, nyuun ku mēēlē tākēētāwārārō nkōō ngʼālyoon /āmākēēwārākēēch keepa kamasi ntā kamasiinō nkōō koonēētiisyō aka tōkōl nyēpō piich choo mēlmēēlēēy piich ngʼoroomnyēēngʼwaangʼ. ¹⁵ Aku nyuun ryoongʼēē ngʼal chēpō man ākōō choomnyoot sikēēkiilyēē nkōō tukun tōkōl keekarkeeyiitu ākōō Kiriistō nyoo Kiptaayaanteenyoon. ¹⁶ Inyeentee :nyoo irēy kichoomnyō :kāmōōs chēpō pōōr kilēku kir ākoongʼo kuutoorētēy keey :tōkōl. Nēē ir aka tōkōl nkōō kāmōōsichoochēē pāyiisyeenyiin, kunārēy :kaaniisee tōkōl nkōō choomnyoot. ¹⁷ Āmwoorwook nkōō kaamuukaa Kiptaayaan kilē moomāngʼiisyō kilēē wōloo māngʼtooy :piich choo mēēnkēt Iriin choo tingʼēy kāāpkootuut choo mātoorētēy kir. ¹⁸ Mii :pichoochēē tuurin mu kaapkootuutēkwaak /akiikuutapaana wōloo mii :sāpoon nyoo kōōnuuy :Iriin. Mēēnkēt :akwaaneek kir āmu kiikar mētēwēy. ¹⁹ Maakuu-iitēy :pichu rāyiityō. Kiikuuchuut keey takal ākōō ngʼal walak tōkōl choo mā tiliilō akilēku kimootiin. ²⁰ Mā choochēē choo /kiikuuneetaak akipō Kiriistō. ²¹ Chōōnēē :man wōloo mii :Yēēsu ākoonkēt :akwaan inyeentee. /Kiikeeneetaak ²² atayee keey ātēpuutēchoochēē raacheen chu kiipō taay. Mākuutēchoochēē raacheen pō pōōr chu kiikuumēlmēēlook akuupootook. ²³ Kunyuun āwāliisyēē nkōō kāāpkootuutēkwook chu kiipō taay akaatuup araa Toomirmiir, ²⁴ akaanam ātēpuut choo reelacheen, saakarkeeyiitu nkōō Iriin, nkōō tiliilin, man ākōō māngʼoot nyoo chuulaat. ²⁵ Kunyuun, ataya ngʼuurnan ākoomwoochinii chiich aka tōkōl ngʼal chēpō man. Āmwoorēy kilēē nyoonēē āmu kipō :tōkōl pōōr ākoongʼo. ²⁶ Maakany kupāywook :nareek kutaa-ir ngʼōōki amaakany kumichinta asiis kutoonārēēksōōt. ²⁷ Mootō Syeetaani pārooyin mpō kiitēēn. ²⁸ Amātākichōōrsyō :chiich nyoo ka chōōriin, aku mārēy ku-ira :ēēruunēchiich pāyit tākunyōōru mpō kir nyoo chārchinii choo nyārilsōōt. ²⁹ Moongʼāloolēy ngʼal chaa raacheen. Āngʼāloolēy ngʼal choo chēērēy piich walak akutoorēt, si nēē ngʼat /kuupēēruuriisyō choo tēērtooy. ³⁰ Ma-ir :ātēpuutēkwook kuu-iim keey :Toomirmiir nyoo Tiliil nyoo kikōōnook :Iriin. /Kusōwuunēēnook Toomirmiiryooni kilē kyoolēku chaachiich, akungʼuutuuy nyoonēē kilē mii :pērēētuu nyoo /kusārwook. ³¹ Amaakany kungʼwoonchook :ngʼala. Maanareek, amaa-ir riiri, amaa-ama keey seemseem. Ākoomētō ngʼal walak tōkōl chaa raacheen. ³² Ātālāyiituu ākōy, ariiree walak, ākoonyōōchinii keey kaat kilēē paani kiikunyōōwook kaat :Iriin kupunuunō Kiriistō.

¹ Āmu akwaan laakōōpō Iriin choo chāmootēēn, ātēpii kilēē wōloo lēē :inyeentee. ² Kēēmāngʼiisyēē kēēchoomsōōt kilēē paani kiichameech :Kiriistō. Kiichameech :Kiriistō kutuutētō sopoontanyiin akipō achaan kilēē kōrōs choo kākipēēlchi Iriin akungʼuutooy nyaa anyiny. ³ Māmārēy kutookunēēnook :ngʼala chēpō takalaanti, ntā ku oortin walak choo mā tiliilō ntā mpō suuynoonti. Ngʼal :choochēē choo /mākinyōōrchinii wōloo mii :piich choo tiliilēēn. ⁴ Amāmārēy mpō /kēēngʼāloolēy ngʼal chaa raacheen, ntā ku ngʼal chēpō sālwoonti ntā kēēchiirānēy nkōō oor nyoo makaraam. Kiyoo kimārēy ku /kēēmwoochi Iriin kōōnkēy. ⁵ Ānkēt :akwaan man kilē: Mēēmuukēy kiptakalyaan, ntā ku chiich nyoo mā tiliil ntā ku nyoo lēē suuyoon kuchuut kaa Iriin ākōō Kiriistō. Chiich nyoo lēē suuyoon kukutunchinii tukun chēpō ngʼwēny nyoo katakutunchinii Iriin. ⁶ Amaakany kuumēlmēēlook :chiich kilē mā-irēē :kir nēē /ku-ir ngʼaleechoochēē. Irēy :ngʼalēēchoochēē kunareek :Iriin akuutō siitāt piich choo mātēērēy iit inyeentee. ⁷ Kunyuun, maakany kēērēēmook nkōō piich choo lēē choochēē. ⁸ Mpō ntā kyoomiikwaan tuurin taay, ku kyoonyōōru lēpooyin nkōō Kiptaayaan. Āmāngʼiisyēē nyuun kilēē laakōōpō lēpooyin, ⁹ āmu lēpooyin :nyoo āpuuy tukun tōkōl choo kāroomēēn, choo chuulootēēn, ākōō chēpō man. ¹⁰ Atyama awasa āsōwu kiyoo pāypooyēy Kiptaayaan. ¹¹ Maachuut keey ngʼal chēpō tuurin choo mākōōnuuy kir, aku āsyooruu kupka saangʼ. ¹² Sōōrnān mpō /keemwa tukun choo irēy nkōō ungʼoot :piich choo mātēērēy Iriin. ¹³ Aku nyuun nēē pkangʼ :lēpooyin tukuuchoochēē tōkōl, kutookuuy kilē lēē nee, ¹⁴ āmu lēpooyin nyoo irēy kir aka tōkōl kutooku. Nyoonēē nyoo irēy /keemwa kilē, "Ngʼeeta, chēērwoon, akiingʼēētuunō meerat tākuulēpooyin :Kiriistō." ¹⁵ Āriip keey nyuun wōloo āmāngʼtooy. Mōōmāngʼiisyō nkōō oor nyoo pō sālwoonti, aku āngʼōrōmiituuy. ¹⁶ Āpāyiisyēērēē pārooyin aka tōkōl kukaraam, āmu rāāchō :pērēētuusyēchu. ¹⁷ Kunyuun, moolēku sālwēy, aku awasa āsōwuu kiyoo mārēy :Kiptaayaan a-ir. ¹⁸ Āmētoorēē keey pōōkitō āmu ngʼāmook. Nyoo kātālēē nyoonēē, akany /kinyiryaak Toomirmiir nyoo Tiliil. ¹⁹ Yoonēē nyuun acheeree keey tuumwēy chēpō Toomirmiir ākōō tuumwēy choo kuuloosunēē Kiptaayaan. Āloosuuy mu mukuliiriikwook ²⁰ ākoomwoochinii Paapa Iriin kōōnkēy ākōy akipō kir aka tōkōl nkōō kaarinaa Kiptaayaantēēnyoon Yēēsu Kiriistō. ²¹ Āmu ākoonyitēy Kiriistō ākoonyit keey mpō. ²² Mārēy nyuun kuukoonyit :chēēpyōōsōōy pooyiikwaak kilēē wōloo koonyititooy Kiriistō. ²³ Āmwoorēy kilēē nyoonēē, āmu pooyoon :nyoo pāyuuy cheepyooseenyiin kilēē paani pāyuuy :Kiriistō kaaniiseenyiin nyoo akwaaneek ku pōōrtanyiin aku inyeentee :nyoo kiisāruuy. ²⁴ Kilēē wōloo koonyititooy :kaaniisee Kiriistō, ku mārēy kuukoonyit mpō :chēēpyōōsōōy pooyikwaak nkōō oor aka tōkōl. ²⁵ Akwaan pooy, achama chēēpyōōsōōkwook kilēē paani kiicham :Kiriistō kaaniisee kutuutētō sopoontanyiin akipō akwaaneek, ²⁶ sikutiliil kaaniiseenyiin nkōō ngʼālyoontoo Iriin kilēē paani /kii-ilēy cheeroos nyoo /kuu-iiltooy. ²⁷ Kiitēto sopoonoonēē siku-irchi keey kaaniisee nyoo lēē pukat, akichuulaat nyoo mātingʼēy tisya ntā ku rāyiityō aka tōkōl. Aku mārēy kutililiit nyoo mātingʼēy lēēluut. ²⁸ Nkōō oor nyoo lēē nyēēnyi, ku mārēy :pooyoon aka tōkōl kucham cheepyooseenyiin kilēē wōloo chāmtooy keey. Chiich aka tōkōl nyoo chāmēy cheepyooseenyiin ku kacham keey. ²⁹ Moomii :chiich pērēētuu aka nyoo kiikusas keey, aku pāyēy nyuun pōōrtanyiin akuriipēy kilēē wōloo irtooy :Kiriistō kaaniiseenyiin, ³⁰ āmu kichaan pōōrtanyiin. ³¹ Kilēē paani /kiikusir kilē, "Mētooy :chiich apoonyiin ākōō eeyeenyiin akwoop cheepyooseenyiin akichoomnyō :tōkōl kilēku pōōr ākoongʼo." ³² Ngʼuutuuy :siruutēchu man nyoo ōōw nyoo ungʼaat akungʼāloolēē mpō Kiriistō ākōō kaaniisee. ³³ Kunyuun, mārēy chiich aka tōkōl kucham cheepyooseenyiin kilēē wōloo chāmtooy keey. Akēēmārēy mpō cheepyooso kuukoonyit poonteenyiin.

¹ Laakōōchu, ākoonyitō sikiikwook, āmu ngʼālyoon nyoonēē nyoo mārwook :Iriin. ² Mwoorēy :siruut kilē, "Koonyitō apoongʼuungʼ ākōō eeyēēngʼuungʼ." Ngʼātuut :nyēēnyi nyēpō taay nyoo tingʼēy kāāyoomiisō, kitas taay :Iriin kumwa kilē, ³ "Tēēmāngʼiisyēē nyaa karaam mu ngʼwēny ākōy iril." ⁴ Siikiichu, moo-usēy laakōōkwook, aku ānēētēy ātēpuut chēpō Kiptaayaan. ⁵ Ōōtwook, ākoonyitō mōkōrēēkwook. Ākoonyitēy nkōō moo ākoongʼo kilēē wōloo ākoonyitēy Kiriistō. ⁶ Mookiilchi keey pāyit kipaat nēē rōōtook mōkōrēēkwook kilē sikuchamaak, aku a-ira kilēē yoo ā-irchinii Kiriistō. A-ira kiyoo mārēy :Iriin nkōō moo ākoongʼo. ⁷ Ā-irēy nkōō moo ākoongʼo kilēē yoo āmii ā-irchinii Kiptaayaan pāyiisyōōnoonēē amaapkaat kilē āmii āpāyiisyēēchinii piich. ⁸ Āmwoorēy kilēē nyoonēē, āmu ānkēt kilē tēnii :Iriin chiich aka tōkōl mālāk akipō kāroomin aka tōkōl nyoo ka-ir, nēē ōōtwookiin, ntā mā ōōtwōōkiin. ⁹ Mōkōrēēchu, āriipō ōōtwookiikwook nkōō oor nyaa karaam. Āmoo-ārāsi āmu ānkēt kilē Kiptaayaanteengʼwaangʼ ku Kiptaayaantēēngʼwoongʼ mpō aku mii inyeentee kipsēnkwēt. Amēēsyookēy chiich. ¹⁰ Ngʼālyoontēē aka nyoo āmwoorwook ku nyi, kanya kikōōnook :Kiptaayaan kaamuuka tookiilyēē. ¹¹ Alaaka kariipō pooryoot chēpō Iriin taamuuka akarta ngʼuurnan ākōō ngʼoroomnyō tōkōl nyēpō Syeetaani. ¹² Mā kupoorsōōt nkōō piich. Aku kumii kēēpoorsōōt nkōō paytaar ākōō koomuukēy chaa raacheen nkōō ngʼwēnyuuni pō tuurin, kipootō kaamuukaa toomirmiirēy chaa raacheen choo mii parak. ¹³ Alaaka nyuun kariipō pooryoot chēpō Iriin kukaraam, taamuuka akarta puunyoontee nkōō pēērēētuu rāyiityō, tānēērook pooryoot, ku tookiilootēēn. ¹⁴ Ākārmēnēē keey man, kilēē paani rātēy keey :chiich nyēpō luk nēē mārēy kiwō pooryoot. Āmāngʼiisyō nkōō māngʼoot nyaa chuulaat saakartaaree keey kilēē paani kārtoorēē :chiich takat karin nēē wēētii pooryoot. ¹⁵ Akaalaak mpō lōkōōy choo kāroomēēn choo āpuuy kaalya sookilyēē kilēē chiich nyoo keelaak kwēēr choo nāmēy ngʼwēny. ¹⁶ Anama kaarana kilēku loongʼ nyoo ātēēktoorēē kootin tōkōl choo uutuuy :Syeetaani. ¹⁷ Āriipēē mētēwēyiikwook sāruuno kilēē paani riipeey :chiich nyēpō luk mētinyiin loongʼoo pooryoot. Akaanam chōōkoo Toomirmiir nyoo ngʼālyoontoo Iriin. ¹⁸ Ā-irēy ngʼaleechu tōkōl asaa Iriin kuutoorētook. Āsooyēy sayit aka tōkōl nkōō kaamuuka nyēpō Toomirmiir. Ālēkuu choo āchēpootēēn pērēētuus tōkōl aku moochoosyō. Ākoosoochinii piipō Kiriistō tōkōl. ¹⁹ Āsoowoon mpō ānyōōru ngʼal choo āmwoorēy saamuuk āngʼuutu lōkōōy choo kāroomēēn choo kii-ungʼootēēn nyoo moowāriisyēy. ²⁰ Arataat āmu kyaa-amta lōkōōyichoochēē kāroomēēn. Asoowoon amwaarta ngʼalēēchoochēē kilēē wōloo maraat nyoo moowāriisyēy. ²¹ Āmii āyookuuy Tukiikō kuchō wōloo āmiikwaan. Tuupchēē :inyeentee nyoo chamaat aku nyoo /kiirānēy akipō pāyiisyoo Kiptaayaan. Mwoorwook lōkōōy tōkōl akipō aneen soonkēt :mpō akwaan wōloo ālaanēēn ākōō kiyoo ā-irēy akumwoorwook wōloo kilēēchaan tōkōl akuukiilook. ²³ Kuutoorētook :Paapa Iriin ākōō Kiptaayaan Yēēsu Kiriistō soochoomnyēē, akaaran inyeentee, ākootēpō nkōō kaalya. ²⁴ Kuupēēruuriisyō tōkōl choo chāmēy Kiptaayaantēēnyoon Yēēsu Kiriistō nkōō choomnyot nyoo matilēē.