2 Tiimōti

¹ Aneen nyi Paawulō kāāyooytooyiin nyoo ā-irchinii Yēēsu Kiriistō pāyit. Ā-iraa pāyiisyōōnoonēē āmu kiilēwēnān :Iriin. Kiiyookwoon soochō ā-āmchi piich akipō sopoon nyēpō ākōy nyoo kiiyoomiisēēch kupunuunō Yēēsu Kiriistō. ² Āsiruun inyēēn wēēriinyuun Tiimōti nyoo āchāmēy. Kuupēēruurin :Paapa Iriin ākōō Kiptaayaantēēnyoon Yēēsu Kiriistō. Kuriireeniin akukōōnin kaalya. ³ Āpāyiisyēēchinaa Iriin nyoo ānkēt :aneen kukaraam kilēē paani kiipāyiisyēēchi sikiichuuch ākōō mpō kuukōtiināchuuch. Ākoomwoochinaa Iriin kōōnkēy akipō inyēēn pērēēt ākōō langʼa. ⁴ Nēē apkaat :aneen wōloo kiiriirta pērēētuuni kiikumētooy keey, kwaaman :ēēmō kilē ntā arootiin saapaypayiitu. ⁵ Ānkēt :aneen kilē irānēē Iriin nyoo mātingʼ /keemwa kilēē :kōōkōngʼuungʼ Lōōyis ākōō eeyeengʼuungʼ Yuunis. ⁶ Kutuup keey nyuun nkōō nyoonēē, ku āpkootuun kilē ikany kungʼuutu keey :kaamuuka nyoo kiikōōnin :Iriin paani kyookōnōōriin ēēruunēchuuch. ⁷ Mēēlē kiikōōnēēch :Iriin Toomirmiir nyēpō kāwāriisyō, aku kiikōōnēēch Toomirmiir nyēpō kaamuuka, choomnyoot ākōō kaapkootuut choo kāroomēēn. ⁸ Amēēwāriisyō imwoochinii piich akipō Kiptaayaantēēnyoon ntā akipō aneen nyoo arataat āmu āpāyiisyēēchinii inyeentee. Ikany kēēnyārilyēē :tōkōl akipō lōkōōy choo kāroomēēn kēētiirēē keey kaamuukaa Iriin. ⁹ Mēēruutyēērēē kilē Iriin nyoo kiikusārwēēch ākiikukuurēēch kēēpāyiisyēēchii nkōō sopoon nyoo tiliil. Maa-ir kilēē nyoonēē akipō kir aka tōkōl nyoo kiikee-ir, ki-ir kilēē wōloo mārtooy inyeentee nkōō moonyiin ākōō choomnyeenyiin ākityōōn. Kiisip kuchameech :Iriin kutoomō /kēētoowu ngʼwēny ¹⁰ akungʼuutwēēch choomnyoonoonēē paani kiichō Sāruuniintēēnyoon Yēēsu Kiriistō. Kiikuupēlwēēch :Kiriistō meerat akungʼuutwēēch oor nyēpō sopoon nyēpō ākōy kupunuunō lōkōōy choo kāroomēēn. ¹¹ Kiikulēwēnān :Iriin nyuun a-amtaata lōkōōyichu. Kiikulēwēnān ālēku kāāyooytooyiin akaaneetaata ngʼālyoon nyēpō man. ¹² Kiyoonēē nyoo /kiinyāriilchinoon kilēē nyēēnyi. Mpō ntā lēē nyoonēē, kumoowārēy :aneen, āmu ānkēt chiichi kyootiirēē keey ākootingʼēy man kilē muukēy kuriip kiyoo kiikuurchoon a-ir ākōy pērēētuu nyoo wārākēē. ¹³ Tiimōti, ineet piich kilēē wōloo kyoonēētitooy, akiitiirēē keey Yēēsu Kiriistō akiicham kilēē wōloo kyoochāmtooyaa. ¹⁴ Iriip ngʼaleechoochēē kāroomēēn choo /kiikēēkōōnin. Kuutoorētin :Toomirmiir nyoo Tiliil nyoo mii nkōō achaan tōkōl. ¹⁵ Inkēt :inyēēn kilē kiikumētaa :piich tōkōl chēpō kōōroo Eesya choo kiikumii tōkōl kupootō mpō Pukēēlō ākōō Ērmookēnē. ¹⁶ Āsooyaa kilē kuriira :Iriin kaa Ōnēsipōōrō, āmu inyeentee nyoo kiichō kuukaaykaayan akuukiilān ākēny. Kiichō kuurootān nyoo maawar kilē arataat aneen. ¹⁷ Kii nēē itu Rooma, kuwasaataan wōltō aka tōkōl ākōy kunyōōrwoon. ¹⁸ Āsooyaa kilē kuriira :Kiptaayaan Ōnēsipōōrō ākōy pērēētuuni /kuurwoochinii piich. Ānkēt :akwaan wōloo kiitoorētitoon :Ōnēsipōōrō paani kiikumii tōkōl Ēpēēsō.

¹ Wēēriinyuun, Tiimōti, ikiil, āmu inkēt kilē chāmiin akutiiriin :Yēēsu Kiriistō. ² Tukun chaa chaangʼ choo kiiteer :inyēēn aneet :aneen piich chaa chaangʼ ku āmāraa nyuun ineet :inyēēn piich choo tiirēē keey Iriin choo muukēy kuuneet piich walak. ³ Ikiringʼ nyaril ākōō achaan kilēē chiich nyoo āmēy pooryoot nyaa karaam akipō Yēēsu Kiriistō. ⁴ Nēē chuut keey :chiich nyēpō luk pāyiisyōōn walak, ku maakuumuukēy kuupaypaay chiitō nyoo ōōw nyoo pāytooy lukēē. ⁵ /Mākuutēnii chiich kuutwō nyēpō kiiripō ākōy kutuup ngʼātuut chēpō kiiripō. ⁶ Pāliin nyoo kiilēy keey kwoomēy pareek chēpō taay. ⁷ Tiimōti, ipkooti keey kiyoo āmwooraa, āmu maraat ku-irin :Kiptaayaan isōwu ngʼaleechu tōkōl. ⁸ Makaat inamee mēt kilē kiingʼeeta meerat :Yēēsu Kiriistō nyoo kiichōōnēē kōpō Tāwuti. Āmu ā-āmtootēyaa lōkōōy choo kāroomēēn, ⁹ /keenyariilan ākōy /keeratan kilēē yoo kaanyeeraa ngʼal. Aku mēēmuukēē nyuun /keerat ngʼālyoontoo Iriin. ¹⁰ Ārānēy akiringʼ kir aka tōkōl akipō piich choo kiikulēwēn :Iriin, sikusāru akwaaneek :Yēēsu Kiriistō akunyōōru sopoon nyēpō kwōngʼuut nyēpō ākōy. ¹¹ Pō man ngʼālyoontooni. "Nēē kakumēērō mu Kiriistō kēēmāngʼiisyēy ākōō inyeentee. ¹² Ku nēē kukiringʼ :achaan, ku pākēēpāytooy ākōō inyeentee. Ku nēē kutay inyeentee, kiwō kutāyēēch mpō :inyeentee. ¹³ Mpō ntā mā kupō man, kupō man inyeentee, āmu mēēmuukēy kutay keey." ¹⁴ Makaat ipkooti piich ngʼaleechu āmwooruun. Imwoochi nkōō taayuu Iriin kilē moopooryēēchinii ngʼal. Moomii :kir mpō kiitēēn nyoo toorētēy kwiintaanichoochēē, akuumuukēy kuululuuk kāāpkootuut chēpō pichu tēērēy. ¹⁵ Ityam wōloo imuuytooy i-ir pāyiisyēēngʼuungʼ nkōō oor nyaa karaam nyoo chāmēy :Iriin siiryoongʼēē taayuu Iriin kumēētingʼēy kāāwāriisyō. Makaat ineet ngʼālyoon nyēpō man kilēē paani lēē. ¹⁶ Istoorēē keey imwoorootēy ngʼal choo mānāmēy keey ākōō ngʼālyoontoo Iriin. Āmwooraa kilēē nyoonēē, āmu, piich choo chuutēy keey ngʼal choo lēē choochēē, kutāsēy taay kulōōwiituuy nkōō wōloo mii :Iriin. ¹⁷ Āmootēy :koonēētiisyoo pichoochēē piich kilēē paani āmootēy :chēēsēērkēēch kēēlpō chiich. Walak nkōō pichoochēē ku Umeenaayo ākōō Pilēētō ¹⁸ choo kichuunnyēērō ngʼālyoon nyēpō man. Mwoorēy :pichu kilē ki-ira kēny :ngʼeetataa meerat kululuukaata kaarana nyēpō piich walak. ¹⁹ Mpō ntā lēē nyoonēē, kutākuuryoongʼoot :kiptēlēny nyēpō Iriin ākēērōōtēē siruutēchu mwoorēy kilē, "Nkēt :Iriin piich choo lēē chaachiich." Aku "Chiich aka tōkōl nyoo chāmēy Kiptaayaan ku maraat kuwala nkōō rāyiityō." ²⁰ Nkōō kō aka tōkōl nyoo ōōw ku miitō :kikoompeen choo /kiku-irtaara ta-aapu ākōō chēpō peeteen. Miitō mpō choo kiiku-irtaara keet ākōō chēpō tangʼat. /Kupāyiisyēērēē kikoompeen chēpō koonyit /kēēpāyēy too, ku chu mā pō koonyit /kēēpāyiisyēērēē pērēētuu aka tōkōl. ²¹ Kunyuun, nēē tiliil keey :chiich aka tōkōl, kulēkuuy kikoompō nyoo tiliil nyoo muukēy :chiich nyēpō koot kupāyiisyēērō nkōō pāyit aka tōkōl nyaa karaam. ²² Tiimōti, istoorēē keey mākuut chēpō pōōrpō naran chēpō rāyiityō akiituup oor nyēpō man, nyēpō kaarana, nyēpō choomnyoot ākōō kaalya. I-ir kilēē nyoonēē ākōō piich choo sooyēy Iriin nkōō moo nyoo tiliil. ²³ I-istoorēē keey kwiintaan chēpō sālwoonti. Inkēt inyēēn kilē āpuuy :ngʼaleechoochēē riiri. ²⁴ Machamaat nkōō kipāyityoon nyoo irēy pāyiisyoo Kiptaayaan ku-ir riiri. Makaat kutalayiit nkōō wōloo mii :chiich aka tōkōl, kuuneet nyaa karaam akimurtooy ngʼal chaa chaangʼ. ²⁵ Ku nēē mii :piich choo kwiintoochinii inyeentee, ku maraat ku-isu pichoochēē muutyō akutingʼēē moo kilē muukēy :Iriin ku-ir akwaaneek kuwāliisyō tākusōwu man. ²⁶ Kuumuukēy nyuun :akwaaneek kusōwu man sikuchirila ngʼērēpoo Syeetaani nyoo kiikunam siku-ir kiyoo mārēy :inyeentee.

¹ Tiimōti, ipkaataata kee ngʼālyoontooni: Kōrōmiituuy :pērēētuusyēk chēpō lēt. ² Lēkuuy :piich piich choo chāmēy keey kipaat akicham rōōpiyēēkwaak. Lāsēy keey akumēēnnyō. Ngʼāloolootēērēē piich walak nkōō oor nyaa ra, amēēwārēy sikiikwaak, amātingʼ kumwa kōōnkēy nkōō kir aka tōkōl. Lēkuuy piich choo mā tiliilō nkōō taayuu Iriin, ³ amātingʼēy choomnyoot. Māriirēē piich, akuutoomchinootēy piich ngʼal, amātingʼ kuriip keey ngʼal. Sāmisiituuy, akichāmēy ku-irēy ngʼal chaa raacheen. ⁴ Āltooy keey, akuturchinootēy ngʼal. Āpēy keey kilē nkēt kir aka tōkōl. Lēkuuy piich choo kiicham lala kusiir kucham Iriin. ⁵ Irtooy keey kilē pō Iriin, akutāyēy nyuun kaamuukeenyiin. I-istoorēē keey piich choo lēē choochēē. ⁶ Mii :walak nkōō pichoochēē choo chōōrtooy keey kēēstoonipō piich akupa kuumēlmēēlootō chēēpyōōsōōy choo kuskusō mētēwēy choo kiikunyikisiiti :ngʼōōki akiikupayta :mākuut chēpō kir aka tōkōl. ⁷ Wāsēy :chēēpyōōsōōchoochēē koonēētuut chaa reelacheen kuumān aku mēēmuukēy nyuun kusōwu ngʼālyoon nyēpō man. ⁸ Kārēy :pichoochēē ngʼālyoon nyēpō man kilēē paani kiikārēy :Yaanee ākōō Yaampuree Muusa. Piich :pichu choo kiikukwōngʼyō ākiikupētyō nkōō man. ⁹ Mā-itēy nyuun :pichoochēē ōy, āmu rōōtēy :chiich aka tōkōl sōlwoonti nyoo tingʼēy akwaaneek kilēē wōli /kiikuurōōtitooy nyēpō Yaanee ākōō Yaampuree. ¹⁰ Tiimōti, āpkootaa kilē inkēt :inyēēn akipō koonēētiisyeenyuun ākōō wōloo ātēptooy. Inkēt :inyēēn wōloo āpāyiisyēēchinaa Iriin nkōō sopoon nyaanyaa ākōō wōloo ārāntooy. Inkēt inyēēn mpō kilē māsip ānārēēkaa ākootingʼēy choomnyoot ākōō kirintaar. ¹¹ Inkēt :inyēēn mpō wōloo kyaakiringʼtaa usāt nyoo kyoonyōōru ākōō nyāriluut paani kyoomii Antyookya, Ikoonnya ākōō Luustra. Mpō ntā kilēē nyoonēē ku kiisārwaa :Kiptaayaan nkōō tukuuchoochēē tōkōl. ¹² Pō man kilē /ku-usēy chiich aka tōkōl nyoo kāchāmchi keey kutuup Yēēsu Kiriistō. ¹³ Ku piich choo kiiku-ir ngʼōōki, choo mēlmēēliisyootēy, kutāsēy taay kuraachiituuy kitya kuumēlmēēliisyootēy /ākēēmēlmēēlootēy akwaaneek. ¹⁴ Akipō inyēēn nyuun oo, Tiimōti, itas taay ituup kir nyoo /kiikuuneetin akiiran, āmu inkēt :inyēēn pichu kiineetin ¹⁵ ākōō mpō wōloo kiinkētitō siruut chēpō Iriin kungʼeetee miningʼiityēēngʼuungʼ. Kiitoorētin :siruutēchoochēē isōwu kilē /kusāruuy piich nēē tiirō keey Meesaaya Yēēsu. ¹⁶ Pkoonēē :siruutēchoochēē tōkōl wōloo mii :Iriin. Kāroomō :siruutēchoochēē, nēē /kiinēētiisyēērō /akeekara koongʼ tukun chaa raacheen, /keechuula ngʼal /ākēētukoonō piich kumāngʼiisyō sopoon nyoo maraat, ¹⁷ sikuchēpō :chiich nyēpō Iriin kukaraam akipō pāyit aka tōkōl nyaa karaam.

¹ Ku aniin nyuun oo, Tiimōti, āmāraa āmwooruun nkōō taayuu Iriin ākōō nyēpō Meesaaya Yēēsu nyoo rwoochinii pērēētuu aka piich choo sāpsōōt ākōō choo kiikumēērō kilē, ² i-amta ngʼālyoontoo Iriin pērēētuu aka tōkōl, nēē kā kōrōōmō :ngʼala ntā ku kuskusō. Imurta paani inēētēy piich ngʼālyoontoo Iriin, ikar koongʼ, itukoon, akiikiil. ³ Āmwooraa kilēē nyoonēē, āmu chōōnēy :pērēētuu nyoo maakumārēy :piich kucham kir nyoo nēētēy :siruut chēpō man. Tuupēy :pichoochēē kir nyoo mārēy :pōōrwēyiikwaak akuwas koonēēt choo nēētēy akwaaneek kir nyoo kiichāmēy kuteer. ⁴ Kārēy mēt kumateer ngʼālyoon nyēpō man akutuup siiyēēn choo māpō man. ⁵ Akipō inyēēn, āmwooruun nyuun kilē ikiil nkōō oortin tōkōl. Ikiringʼ nyāriluut choo kēēnyōōru. I-ir pāyit nyoo /kumārchinii āmtooyiin ku-ir. I-ir pāyiisyēēngʼuungʼ tōkōl nyoo maraat i-ir. ⁶ Āmwooruun kilēē nyoonēē āmu mii ku-ituuy :pērēētuu nyoo keepa /kēētētooyoon /kee-ireenaan kōrōs. Kaaku-it :pērēētuu nyoo āruutoorēēy kōōrooni. ⁷ Kaa-am :aneen pooryoot nyaa karaam. Kaawaangʼ cheemureenyuun akyookiilchi keey man. ⁸ Mii nyuun kukānyoon :kuutwēēnyuun nyoo kōōnoon :Iriin akipō tiliilin. Kuutwoonoonēē ku nyoo kōōnuuy :Kiptaayaan nyoo tiliil nyoo tilchinii piich ngʼal nkōō pērēētuuni wārākēē. Mā aneen ākityōōn nyuun nyoo choonēy kukōōnoon :Iriin kuutwoonoonēē. Chōōnēy kuutēnii mpō :piich tōkōl choo mii kuukēnēy pērēētuuni wārākēē. ⁹ Ityam wōloo imuuytooy ākōy ichōōn kilē weel wōli āmii. ¹⁰ Kiikumētaa :Teema, āmu chāmēy tukun chēpō ngʼwēny, akuwēēchi keey Teesaloonika. Kiikiwō mpō :Kērēsēēn Kalatiya, kiwō Tiitō Taalmatyaa. ¹¹ Koongʼātwaa nkōō Luuka kipaat. Paani ichōōnēy, ichōōn ākōō Maarkō, āmu chiich :inyeentee nyoo muukēy kuutoorētaa nkōō pāyiisyeenyuun. ¹² Kāāyooytaa Tukiikō kiwō Ēpēēsō. ¹³ Paani kēēchōōn, i-āpkoon sampuunyuun, nyoo kyoomēti kaa Kaarpō mu Turoowa. I-āpkoon mpō kiitapuusyēchuuch, aku chēpō taay ku choochō pō makateen. ¹⁴ Kiikuululuukaa :Aleekisaanta, chiichoonēē lēē kiitoongʼiin nyēpō karin nyoo /mākyoomu. Tēnii :Kiptaayaan siiteenyiin akipō kir nyoo kiiku-ir. ¹⁵ Iriip keey nyuun nkōō wōloo mii :chiichoonēē, āmu kiikwiintoochi ngʼaleechooch nkōō kaamuuka aka tōkōl. ¹⁶ Paani kyootuukaa keey nyēpō taay, kumwērēēnaa :piich tōkōl nyoo moomii :chiich mpō ākoongʼo nyoo kiichō kusārwoon. Lēyyē, āsooyaa Iriin kunyōōchi pichoochēē kaat. ¹⁷ Mpō ntā kii lēē nyoonēē, ku kiitoorētān :Kiptaayaan akukōōnān kaamuuka saamuuk a-amta lōōkōōy choo kāroomēēn kukaraam kuteer :piich tōkōl choo mā Yāwuutik. Aku sārunēēnaa kuutii kimakeet. ¹⁸ Sārunēēnoon :Iriin wōloo mii rāyiityō aka tōkōl nyoo muukēy ku-irwaan :piich, akuurēētootoon nkōō oor nyaa karaam ākōy achuut katanyiin kipsēnkwēt. Lēyyē, kutōrōriit :Iriin ākōy. Lēē nyoonēē. ¹⁹ Itookwēēswoon Prisiila ākōō poonteenyiin Akiila ākōō mpō piich chēpō kaa Ōnēsipōōrō. ²⁰ Kiingʼātuunō :Eeraasto Kōōriintō, aku kyoomētaa Turōōpiimō kumnyaanaat nkōō Milēētō. ²¹ Ityam nyuun oor aka tōkōl wōloo imuuytooy ichōōn wōli ku toomō kuyuungʼu :kōōrēē. Tookwēēsiin :Ēēpuulō ākōō Puutēēn, Liinaas ākōō Kilaawutiya ākōō mpō tuupchēēnichooch walak tōkōl. ²² Kuriip :Iriin toomirmiiryēēngʼuungʼ akuupēēruurook.