2 Teesaloonika

¹ Aneen :nyi Paawulō kimii kipootō Siila ākōō Tiimōti. Āsirwook kaaniisa nyēpō Teesaloonika choo āpō Paapa Iriin ākōō Kiptaayaan Yēēsu Kiriistō. ² Kuupēēruurook :Paapa Iriin ākōō Kiptaayaan Yēēsu Kiriistō ākoonyōōru kaalya. ³ Choo kituupchō, kumwoochinii Iriin kōōnkēy saayit aka tōkōl akipō akwaan. Yāmēy kee-ira kilēē nyoonēē āmu ātāsēēkwaan taay ārānēy Kiriistō kitya ākoochoomsōōt tōkōl. ⁴ Kiyoonēē nyoo kulāsēē keey nkōō wōloo mii :kaaniiseen chēpō Iriin walak akipō akwaan. Kulāsēy keey akipō woloo ātāstooy taay āmurtooy ākoorānēy Kiriistō nkōō ngʼwoonin tōkōl ākōō usāt nyoo āmii ānyōōruuy. ⁵ Ngʼuutuuy :ngʼalēēchoochēē kilē pō man tilwaa kiirwook nyēpō :Iriin, nēē cham kilē nyooluuy achuut :akwaan pāyuunātēēnyiin nyoo āmii ānyārilchinii. ⁶ Irēy :Iriin kir nyēpō man nēē nyariil pichoochēē nyāriilook, ⁷ aku kōōnook choo ānyārilēy kiimuny ākōō mpō achaan. Iriisōōt :ngʼalēēchoochēē nēē rēkuunō :Yēēsu parak kipootō malaykeenichiich choo tingʼēy kaamuuka ⁸ nkōō ma nyoo pēēlēē piich choo mēēkoonyitēy Iriin ākōō choo maaran lōkōōyipō Kiptaayaan Yēēsu. ⁹ Nyōōruuy :pichoochēē ngʼwoonin nyēpō ākōy, amāriichinii wōloo mii :Kiptaayaan ākōō wōloo mii :ōōwinpō kaamuukeenyiin. ¹⁰ Paani chōōnēy :Kiptaayaan kichō kunyōōruuy koonyit nkōō wōloo mii :piichiich kuuloosuuy :piich tōkōl choo rānēy inyeentee. Yāmook :mpō akwaan āmii nkōō pichoochēē, āmu kyaacham lōkōōy choo kiikumwoorwook. ¹¹ Kiyēēnyi :nyoo irēēch kēēsoowook ākōy, sikuutoorētook :Iriintēēnyoon ātēpi kilēē wōloo mārtooy :inyeentee ākoo-irēy kiyoo ārōōtēy kilē karaam. Kusooywook kuureer kilē kukōōnook kaamuuka nyoo āmuukēy ā-irchi pāyiisyeenyiin ārānēy inyeentee. ¹² Nēē a-ir kilēē nyoonēē nyuun /kēēloosu kaarinaa Kiptaayaantēēnyoon Yēēsu /ākēēlooswook mpō. Iriisōōt :ngʼalēēchoochēē tōkōl, āmu pēēruurook :Iriin ākōō Kiptaayaan Yēēsu Kiriistō.

¹ Choo kituupchō, kimārēy kēēngʼuutwook kir akipō chōōnētoo Kiptaayaan Yēēsu Kiriistō ākōō wōloo rumtēēch :inyeentee. Kusoomook kilē ² amaakany kuchuunnyō kāāpkootuutēkwook, ntā ā-ātyō nēē /kumwa kilē kaaku-itu :pērēētuu Kiptaayaan. Amaaran mpō nēē kilē kiimwoorēy kilēē nyoonēē :ōōrkooyoontēē aka ntā ku piich walak ntā /kēēmwooru kilē kiikusir :achaan ngʼaleechu nkōō parwa aka. ³ Maakany kuumēlmēēlook :chiich aka nkōō oor aka tōkōl. Mā ituuy :pērēētuunoonēē ākōy kutay :piich chaa chaangʼ Iriin /ākēēngʼoongʼu kipngʼōōkiyoontoonoonēē kipa /kēēngʼāmēy. ⁴ Kārēy :kipngʼōōkiyoontoonoonēē kir aka tōkōl nyoo kutunchinii :piich kipootō kir aka tōkōl nyoo rōōtēy :piich kilē pō Iriin sikuumuuk kuchuut :inyeentee Kōpō Iriin akuutōrōōr keey kilē Iriin. ⁵ Moopkootēēkwaan sōō, mpō kilē kyoomwoorwook ngʼaleechu kēēmii tōkōl? ⁶ Aku ānkēt :akwaan kiyoo rēēmēy kipngʼōōkiyoontoonoonēē, ākōy pērēētuuni /kungʼoongʼuuy. ⁷ Mii paannyēēnyi ku-irēy :kipngʼōōkiyoontooni pāyit nkōō ungʼoot, aku tāsēy taay ākōy /kuunaayta kiyoonēē rēēmēy. ⁸ Yoonēē nyuun ku tookuuy :kipngʼōōkiyoontoonoonēē akuupēlēy :Kiptaayaan Yēēsu chiichoonēē nkōō kāāpuusō nyoo chōōnēē kuutiinyiin. Ngʼāmēē :Yēēsu chiichoonēē kaamuukeenyiin paani kawaraka. ⁹ Chōōnēy :kipngʼōōkiyoontoonoonēē nkōō kaamuukaa Syeetaani akichō kuumēlmēēlō piich ngʼal chaa chaangʼ chēpō kwōngʼuut choo irēy. ¹⁰ Pāyiisyēērēē ngʼālyoon aka tōkōl nyēpō ngʼuurnan kuumēlmēēlēy piich choo pētii kupētsōōt. Pētsōōt :pichoochēē, āmu kiitay :akwaaneek kucham ngʼālyoontoo man /sikēēsāru. ¹¹ Kunyuun, irēy :Iriin akwaaneek kuuran ngʼuurnan, ¹² /ākēētilchi kiirwook tōkōl choo kiipāypāchi ngʼal chēpō ngʼōōki amaaran ngʼaleepō man. ¹³ Ku akwaan oo, choo kituupchō choo chāmook :Kiptaayaan, yāmēy kēēmwoochii Iriin kōōnkēy ākōy akipō akwaan. Lēē nyoonēē, āmu kiikwaraak :Iriin ālēku chēpō taay /kēēsārwook. Kiitapaanaak :kaamuukaa Toomirmiir ālēku chaachiich, paani kyaaran ngʼālyoontoo man. ¹⁴ Kiikuurook :Iriin kupunuunō lōkōōy choo kāroomēēn choo kiiku-āmwook sikeeramtee ōōwin nyēpō Kiptaayaantēēnyoon Yēēsu Kiriistō. ¹⁵ Kunyuun oo, choo kituupchō, anama ku karaam ākookiilchi koonēētuutēchoochēē kikēē-āmwook akeesirwaak. ¹⁶ Kiichameech :Paapa Iriin aku-ireech kēēpāypāyiituu ākōy kēēkānyēy kir nyaa karaam. Kanya kucheeraak :Kiptaayaantēēnyoon Yēēsu Kiriistō ākōō Paapa Iriin ¹⁷ akuukiilook a-ira ākoomwoorēy tukun choo kāroomēēn.

¹ Kunyuun oo, choo kituupchō, āsooywēēch kitas taay :ngʼālyoontoo Kiptaayaan kuseet akunyōōru koonyit, kilēē wōloo kii lēē nkōō wōloonēē āmiikwaan. ² Areer asaa kusārwēēch :Iriin nkōō wōloo mii :piich choo āwēēsēēn aku raacha, āmu mēēlē :piich tōkōl choo rānēy man. ³ Aku /kiirānēy Kiptaayaan akipō man. Kiilook akuriipook nkōō wōloo mii :Kipngʼōōkiyoon. ⁴ Kuurānēy kilē ā-irēy kiyoo kumwoorwook ākootāsēy taay ā-irēy kilēē nyoonēē āmu āpookwaan Kiptaayaan. ⁵ Kanya kuutoorētook :Kiptaayaan āsōwuu choomnyoo Iriin akaamurta kilēē Kiriistō. ⁶ Choo kituupchō, nkōō kaarinaa Kiptaayaan Yēēsu, kēēmwoorwook kilē ā-istoorēē keey tuupchēē aka tōkōl nyoo lēē saratan, nyoo mātuupēy koonēētuutēchoochēē kiikumwoorwook. ⁷ Ānkēt :akwaan kilē mārēy āmuustēēchaan choo kiimaakilēku sārotoon paani kiikimii ākōō akwaan. ⁸ Maaku-am āmiisyō nyēpō chiich amākiitō kir, aku kiikupāyiisyēy pērēēt ākōō langʼa simaku-iim chiich aka tōkōl nkōō akwaan. ⁹ Mpō ntā kiiyamaat kēēnyōōruu kir, ku kiiku-ir kilēē nyoonēē sikeeneetaak atuup kiyoo ku-irēy. ¹⁰ Paani kiikumii ākōō akwaan ku kikumwoorwook mpō kilē, "Chiich nyoo māmārēy kupāyiisyō, ku moomiisyō." ¹¹ Kimwoorēy kilēē nyoonēē, āmu kutēērēy kilē sārātoon :piich walak nkōō akwaan. Mā-irēy kir, aku kwoongʼkwoongʼootēy piich choo irchinii keey tukuukwaak. ¹² Nkōō kaamuukaa Kiptaayaan Yēēsu Kiriistō kēēmwoochinii pichu kilē kutēpi nyaa karaam akupāyiisyō sikunyōōru kiyoo āmēy. ¹³ Ku akwaan, choo kituupchō, āmoochoosyō ā-irēy choo kāroomēēn. ¹⁴ Nēē mākoonyitēy :chiich lōkōōyichu kusirwook, ku mārēy āsōwu chiichoonēē āmootēpi nkōō inyeentee sikuyoom :inyeentee. ¹⁵ Āmoo-āp chiichoonēē kilēē puunyoon, aku ā-isu kilēē tuupchēē. ¹⁶ Kilēē nyoonēē nyuun, kanya kukōōnook :Iriin kaalya ākōy nkōō oor aka tōkōl, āmu inyeentee ākityōōn nyoo kōōnuuy kaalya. Kanya kutēpō :Kiptaayaan kipootook tōkōl. ¹⁷ Āsirwook :aneen Paawulō tookwēēsuutēchu nkōō ēēruunyuun aneentee. Lēē nyēēnyi :wōloo āsirtooy parwa aka tōkōl kungʼuutu kilē chōōnēēnoon. ¹⁸ Kuupēēruurook tōkōl :Kiptaayaan Yēēsu Kiriistō.