2 Pēētērō

¹ Aneen Siimnyōn Pēētērō nyoo ā-irchinii Yēēsu Kiriistō pāyit akaaneen kāāyooytooyiintēēnyiin. Āsirwookwaan choo kyoonyōōru kaarana nyaa karaam kitya kilēē achaan /akiikeecham /keetiliilook kupunuunō Yēēsu Kiriistō nyoo Iriintēēnyoon aku Sāruuniintēēnyoon. ² Kuupēēruurook :Iriin kitya ānyōōruu kaalya, nēē ātāsēy taay āsōwuuy inyeentee nkōō Yēēsu Kiptaayaantēēnyoon. ³ Kiikōōnēēch :Iriin kir aka tōkōl nkōō kaamuukeenyiin sikēētēpii kilēē wōloo mārtooy :inyeentee. Kiimuukēy kēētēpi kilēē nyoonēē, āmu kiinkēt inyeentee nyoo kiikuurēēch keeramtee ōōwintanyiin ākōō kāroomnyēēnyiin. ⁴ Nkōō kaamuukaanoonēē ku kiikukōōnēēch :Iriin tukun choo kāroomēēn kitya choo kiiyoomiisēēch, sikēēnyōōruu sopoon nyēpō Toomirmiiryeenyiin akeechirila rāyiityoo ngʼwēny nyoo āpuuy :makuut chaa raacheen. ⁵ Kunyuun, aroo wōloo āmuuktooy ātāsi kaarana kāroomin, ātāsi kāroomin ngʼoroomnyō, ⁶ ātāsi ngʼoroomnyō riipotoo keey, ātāsi riipotoo keey murtaar, ātāsi murtaar kōōnunātoo keey, ⁷ ātāsi kōōnunātoo keey choomnyoot nyoo āchāmēy choo ātuupcho, ātāsi choomnyoonoonēē choomnyoot nyoo āchāmēy piich tōkōl. ⁸ Nēē ātingʼēy ngʼaleechu kuyam, āpāyiisyēēchinii Iriin nkōō oor nyaa karaam kitya ākookiilyō nkōō ngʼoroomnyoo Kiptaayaantēēnyoon Yēēsu Kiriistō. ⁹ Piich choo mātingʼēy ngʼaleechu, ku kōryootēēn āmēēnkēt kiyoo mārēy :Iriin ākiikuruutyēērō kilē /kikēē-uuntoochi ngʼōōkiikwaak. ¹⁰ Kunyuun oo, choo kituupchō, atyama wōloo āmuuktooy a-ir kiyoo ngʼuutuuy kilē kiikukuurook :Iriin ālēkuu chaachiich. Nēē a-ir kilēē nyoonēē, ku moopētsōōt mpō āsip ākoongʼo, ¹¹ /akēētookook achuuta Kaa Kiptaayaantēēnyoon Yēēsu Kiriistō nyoo Sāruuniin, wōloo āpoomāngʼēy ākōy. ¹² Āpkootwook ngʼaleechu, mpō nēē ānkēt :akwaan, akyookiilchi ngʼālyoontoo man nyoo kyoonyōōru. ¹³ Ārōōtēy kilē karaam āngʼuutwook ngʼaleechu, kutoosāpēy, ¹⁴ āmu ānkēt kilē āmētooy pōōri kilēēkit, kilēē paani kiingʼuutwoon :Kiptaayaantēēnyoon Yēēsu Kiriistō. ¹⁵ Ātyāmēy nkōō kaamuukeenyuun āngʼuutwook ngʼaleechu, soopkootēy pērēētuus tōkōl mpō nēē kaameer. ¹⁶ Kii nēē kimwoorwook akipō chōōnētoo :Kiptaayaantēēnyoon Yēēsu Kiriistō ākōō kaamuukaa Iriin, ku maakumwoorunēēnook ātiintoon chēpō chiirana, āmu kiikeeroo ōōwintanyiin. ¹⁷ Kiitōrōōr :Paapa Iriin inyeentee aku-ir ku-ōōwiit, paani kiimwoorēy kilē, "Inyēēn wēēriinyuun nyoo āchāmēy ākoopāypāchinii." ¹⁸ Kiikuteer :achaan kuut kuchōōnēē im kēēmii ākōō inyeentee tulwoonoonēē tiliil. ¹⁹ Kunyuun, kiirānēy ngʼal choo kiimwoorēy :ōōrkooyiipō Iriin. Karaam āyāpchii iit ōōrkooyichoochēē, āmu lēē taayit nyoo lārēy nkōō tuurin ākōy kuurir :kōōrēē akutooku :kookeelyaantaa kutākwoorō kuulopooyook. ²⁰ Mārēy āsōwuu kir nyoo ōōw. Nyoonēē ku nyi: māsōwuunēē :chiich kāāpkootuutēchiich kiyoo ngʼuutuuy :ngʼaleepō ōōrkooyiipō Iriin mu siruut ²¹ āmu, kiimāmwooruuy :ōōrkooyiichoochēē ngʼaleekwaak kipaat, aku kingʼuutinii :Toomirmiir nyoo Tiliil kimwooru ngʼaleepō Iriin.

¹ Kiimii kēny :ōōrkooy chēpō ngʼuurnan Israayeel, aku nkōō oor nyoo lēē nyoonēē ku pkoonēy :koonēēt chēpō ngʼuurnan wōloo āmiikwaan. Chuutēē koonēētuut choo mā pō man choo mēlmēēlēy piich akutay mpō Kiptaayaan nyoo kii-ālēy akwaaneek, aku nkōō yoonēē nyuun kwoopchinii keey :koonēētiichoochēē ngʼāmiisyō nyēpō kwōngʼuut. ² Tuupēy :piich chaa chaangʼ ngʼōōkiipō koonēētiichoochēē, aku irēy /keemwaarteera rāyiityō araa man. ³ Āmu kimootiin :koonēētiichu, kuumēlmēēlēēnook ātiintoon chēpō ngʼuurnan sukwaam roopiyēēkwook. Kiikuchēp keey nkōō pērēētuus chaa chaangʼ :Iriin kutilchi kiirwook pichoochēē aku mii kichōōnēy ngʼamweengʼwaangʼ. ⁴ Maariira :Iriin malaykeen choo ki-ir ngʼōōki, aku kiiwiirchi wōloo tuur aku rātootēēn nkōō āngʼōōy kukānyēy pērēētuu nyoo kipa /kēētilchinii kiirwook. ⁵ Amaariira :Iriin ngʼwēny nyoo kiipō kēny, aku kiikōōnu chēēmurwoompēy kuchō kōōroonoonēē kiimii :piich choo kiimākoonyitēy inyeentee. Piich kipaat choo /kiikisāru ku Noowa, nyoo kii āmuuy lōkōōyipō man, ākōō katanyiin. Kii piich sisiit akwaaneek. ⁶ Kiiwaangʼa :Iriin ma kōōrootinēēpō Sotom ākōō Komoora tākulēku :nyoonēē koonēētuut nkōō wōloo mii :piich choo mātuupēy ngʼaleepō Iriin. ⁷ Kisāru :Iriin Lōōt, chiich nyoo kiipēērēy keey nyoo kii-iimēy :ngʼaleepō takal choo kii-irēy piich ākōō rāyityō nyoo kiimii kōōrēē. ⁸ Kiimāngʼiisyō :chiichoonēē kiipēērēy keey nkōō pichoochēē akiiro rāyiityooni kii-irēy :pichoochēē pērēēt ākōō langʼa. Kii-iimēy :ngʼōōkiipō pichoochēē kāāpkootuutēchiich choo tiliilēēn. ⁹ Kunyuun, nkēt :Iriin wōloo sāruntooy piich choo tuupēy inyeentee kungʼeetee nyāriluut, akuunkēt wōloo riiptooy choo raacheen ākōy pērēētuu nyoo /kitilchiinēē piich tōkōl kiirwook. ¹⁰ Aku choo ngʼwoonchinii kitya ku choo tuupēy mākuutēkwaak chaa raacheen akutāyēy /kēēpāyu. Lāsē keey :koonēētiichu pō ngʼuurnan aku āwēēsō amēēwārēy mpō kumuul toomirmiirēy choo tingʼēy kaamuuka. ¹¹ Mpō malaykeen choo tingʼēy kaamuuka kusiir koonēētiichoochēē ku māmuulēy toomirmiirēyiichoochēē mu taayuu Kiptaayaan. ¹² Muulsyēyii :pichu akipō tukun choo mēēnkēt. Karkeey :akwaaneek ākōō tyoongʼin choo irēy tukun choo mēēnkēt, choo /kiiku-ir /sikēēnāmēy /ākēēpārēy. Pētsōōt :pichu kilēē tyoongʼiichoochēē. ¹³ Mālāk pō pichoochēē ku /kēēngʼam akipō tukun choo kii-ir :akwaaneek. Chāmēy ku-irēy takal pērēēt. Sōōr :pichu choo nēē kimii tōkōl kaaptuum kuchuunsōōt. ¹⁴ Mārārtooy :pichoochēē kumārēy ku-ir takal amāpiryoongʼēy ku-irēy ngʼōōki. Mēlmēēlootēy choo kuskusēēn ku-ir ngʼal chaa raacheen aku piich choo kiikuuneet keey kitya kilēku kimootiin. /Kitilchinii pichu kiirwook. ¹⁵ Kiikumētō oor nyoo chuulaat ākiikupētyō. Kiikutuup araa Palaam wēēroo Pēēyōōr nyoo kiichāmēy kunyōōruuy rōōpiyō chēpō rāyiityō nyoo ki-irēy. ¹⁶ /Kiikukar koongʼ Palaam nkōō ngʼōōkistanyiin paani kiingʼalaal :sikiryō kilēē chiich akukar sālwoontii Palaam nyoo kii ōōrkooyoontoo Iriin. ¹⁷ Karkeey :koonēētiichu pō ngʼuurnan ākōō ēēnwēy choo kiikutēēngʼō, aku lēē kipuurēēt nyoo āpēy :yoomēt. Kiikuchēpchi :Iriin pichoochēē āriingʼwaangʼ mu saangʼ wōloo mii :tuurin. ¹⁸ Mwoorēy ngʼal choo lēē sālwēy choo mātoorētēy kir kulāsēy keey, akupāyiisyēērēē mākuutēkwaak chaa raacheen kuuchuut piich choo kātākuchirilēē ātēp nyaa ra. ¹⁹ Yoomiisēy :koonēētiichoochēē pichoochēē kaatyaaka, aku ōōtwook :akwaaneek chēpō ātēpuut choo rāāchēēn, āmu nēē pāyu :kir chiich ku ōōtwookiin chiichoonēē nyēpō kiyoonēē. ²⁰ Nēē chirila :piich rāyiityoo ngʼwēny, āmu nkēt Kiptaayaantēēnyoon nyoo Sāruuniintēēnyoon Yēēsu Kiriistō akunaarnaara keey ngʼōōkiichoochēē akuureer kilēku ōōtwookiintoo ātēpuutēchoochēē, kumii :yoo ra kitya kusiir taay. ²¹ Kii kaykay ntā kitoomō kusōwu araa man kusiir kusōwu akuureer kutay ngʼālyoontoo Iriin nyoo tiliil nyoo /kiikiineet akwaaneek. ²² Irēy :pichoochēē kir nyoo mwoorēy kāālēwēnichu pō man kilē, "Wārāchinii keey :sukōyō kiingʼuungʼaanichiich" ntā "Rēērēy kumiimilēē keey nkurwēēt nyoo /kākii-uun nyaarkwaat."

¹ Chamanichuuch, parwaa ārēēny :nyēēnyi āsirwook. Kyaasirwaak parweenichu tōkōl āchēērook akaangʼeet kāāpkootuutēkwook tākuchuuliisyō kukaraam. ² Āmārēy tāmooruutyēērēē ngʼal choo kiimwoorēy :ōōrkooyiipō Iriin kēny ākōō ngʼātuutyoo Kiptaayaan aku Sāruuniin nyoo kiineetaak kāāyooytooyiik. ³ Mārēy ānkēt kukaraam kilē pkooney :piich choo kiikupāyu :makuut chēpō pōōrwēyiikwaak nkōō pērēētuus chēpō lēt. Roorēchinook ⁴ akimwoorēy kilē, "Kiiyoomiis Yēēsu, kilē wārākēē, ara mii ānō :kāāyoomiisoonoonēē? Nku kungʼeetee pērēētuusyēpō mpō kuukō ākōy aniinee kutākuuryoongʼoot :kir aka tōkōl kilēē paani kiilēē /kēē-irēy ngʼwēny." ⁵ Irtooy keey :pichoochēē choo kiikuruutyēērō kilē kii-ir :Iriin kēny im ākōō ngʼwēny kupunuunō ngʼālyoontēēnyiin. Kiingʼēētuunō :kōōrēē pēr akuukwēēn pēr ⁶ /ākiikuuwaangʼa piich choo kiipō kōōroonoonēē pō taay pēr nkōō pērēētuunoonēē kiipō chēēmurwoompēy. ⁷ Riipēē :Iriin im ākōō ngʼwēny nyēpō paanyēēnyi ngʼālyoontēēnyiin ākōy pērēētuu nyoo /kuuwoongʼēē ma paani /kutilchinii kiirwook /akeewaangʼ piich choo mā pō Iriin. ⁸ Chamanichuuch, mooruutyēērēē kilē nkōō wōloo mii :Iriin ku lēē pērēētuu ākoongʼo kēnyiis ēlup ākoongʼo aku lēē kēnyiisyō ēlup ākoongʼo pērēētuu ākoongʼo. ⁹ Māsiistooy Iriin ki-ir kiyoo kiikuuyoomiis kilēē paani pkootēy :piich walak. Aku riirēē piich āmu māmārēy kilē kupēt :chiich mpō ākoongʼo, aku mārēy piich tōkōl kuwāliisyō nkōō ngʼōōkiikwaak. ¹⁰ Aku chōōnēy :pērēētuu Kiptaayaan kilēē chōōriin. Pētēy :imu pērēētuunoonēē nkōō chērāt nyoo ōōw kipootō kookeel nkōō araawa, /akēēpēēlēy ngʼwēny ākōō tukun tōkōl choo mii :ngʼwēny. ¹¹ Ara nēē /kungʼāmēy tukuuchu tōkōl, kilēē nyoonēē oo, /kēēmārēy a-ir nee nyuun? Makaat ātēpi nkōō tiliilin ākootāpoonchi keey Iriin, ¹² ākānyēy ākoo-irēy kichooku pērēētuunoonēē pō Iriin. /Kipēēlēē ma /akeengʼam pērēētuunoonēē im aku root kilēku pēr :kookeel ākōō tukun walak tōkōl. ¹³ Aku kukānyēēchaan kiyoo kiikuuyoomiis :Iriin: kipsēnkwēt nyoo rēēl ākōō ngʼwēny nyoo rēēl wōloo mii :man. ¹⁴ Kunyuun oo chamanichuuch, nēē āmii ākānyēy pērēētuunoonēē, atyam nkōō oor aka tōkōl a-ir tukun choo tiliilēēn amātingʼēy tisya, sikunyōōrwook :Kiptaayaan ātingʼēy kaalya. ¹⁵ Ānkēt :akwaan kilē riirēē :Iriin piich /tākēēsāru. Kiisirwaak kilēē nyoonēē mpō :tuupchēē Paawulō nyoo chamaat, kupāyiisyēērēē ngʼoroomnyō nyoo kiitēnii :Iriin. ¹⁶ Mwoorēy :inyeentee ngʼal choo lēē chu nkōō parweenichiich tōkōl. Mii :ngʼala walak parweenichiich choo kōlkōlō /keesōwu. Kwoongʼkwoongʼēy ngʼaleechiich :piich choo lēē sālwēy ākōō choo mēēnkēt oor nyoo pēētii. Nyēērēē :pichu mpō siruutēpō Iriin walak aku irēy :nyoonēē kupētyō :akwaaneek. ¹⁷ Kunyuun, akwaan chamanichuuch, āmu ānkēt ngʼaleechu, āriip keey, tāmēēchuunnyook :pichoochēē raacheen, kitooputyō. ¹⁸ Ānāryēē nkōō chamatee ākōō ngʼoroomnyēē nyēpō Kiptaayaantēēnyoon nyoo Sāruuniintēēnyoon Yēēsu Kiriistō. Kutōrōriit :inyeentee ākōy nkōō ākōy. Lēē nyoonēē.