2 Kōōriintō
11 Aneen nyi Paawulō nyoo kiilēwēnān :Iriin ālēku kāāyooytooyiintoo Yēēsu Kiriistō ākoomii :aneen nkōō tuupchēēnyoon Tiimōti. Kiitookwēēsook kaaniisaa Iriin nkōō māngʼoot nyēpō Kōōriintō ākōō piich chēpō Kiriistō tōkōl chēpō kōōroo Akaaya tōkōl. 2 Lēyyē, kuupēēruurook :Paapa Iriin ākōō Kiptaayaan Yēēsu Kiriistō akukōōnook kaalya. 3 Kēēloosuu Iriin nyoo paapaa Kiptaayaantēēnyoon Yēēsu Kiriistō. Iriin ku Paapa nyoo riirēē piich akuukooykooyēy piich nkōō oor aka tōkōl. 4 Kooykooyēēch :Iriin mu nyāriluutēchooch tōkōl sikeekaaykaaya choo tingʼēy nyaril aka tōkōl kilēē wōloo kiikooykooytēēch :inyeentee. 5 Kulēē paani kunyārilsōōt :achaan nkōō nyāriluut chēpō Kiriistō, /kēēkooykooyēēch kupunuunō Kiriistō. 6 Āmu kiikēēnyārilyēēchaan, kēēmuukēēchaan nyuun keekaykaayaak ākēētoorētook. Nēē /kuukaykaayeech, keemuuk keekaykaayaak akēētoorētook saamurtee nyāriluut choo kiikunyōōruuchaan mpō. 7 Kuurānēy kilē āmuukēēkwaan amurta nkōō nyāriluut choo kāpkoonchook, āmu kuunkēt kilē kāykooyook :Iriin kilēē wōloo kāykooytēēch. 8 Tuupchēēnichuuch, āpkootaa kilē karaam āsōwuukwaan usāt nyoo kiikunyōōruuchaan nkōō kōōroo Eesya. Kiinameech :ngʼala choo nyikiisēēn kwōngʼuut kusiir kaamuukeenyoon. Kiikuupkootēy kilē kiikēēwoonyō. 9 Man kiikiikeeteereechaan mootiinēēchooch kilē /kiikiikēētilchēēch meerat. Aku ki-iriisyō nyuun :ngʼaleechu simākutiirēēchaan keey kaamuukeenyoon āchoonēēch aku nyuun sikēētiirēēchaan keey Iriin nyoo ngʼēētēē piich meerat. 10 Man kilē kiisārunēēnēēch :Iriin meerat. Ākēētiirēē keey inyeentee kilē tāsēy taay kusārwēēch, 11 nēē āmiikwaan āsooywēēch. Wāluut chēpō soowuutēchoochēē ku-irēy piich chaa chaangʼ kumwoochi Iriin kōōnkēy. 12 Ngʼālyoon :nyi nyoo kulasee keey. Mwoorwēēch :kāāpkootuutēchooch kilē kiikutēpiichaan ātēp nyoo tiliil aku pō man. Maakitēpi kituup keey nkōō ngʼoroomnyō nyēpō piich chēpō ngʼwēny, aku kiikutuup :achaan kaamuukaa Iriin kitya paani kiikutēpiisōōt nkōō akwaan. 13 Kusirwook ngʼal choo /mākuu-ēēlēy koongʼ. Aku ātingʼēēy moonyuun kilē āsōwuukwaan ngʼaleechoochēē kilē siiny pērēētuu aka, 14 mpō ntā toomō āsōwuukwaan paannyēēnyi kukaraam. Nkōō pērēētuuni nyuun wārākēē :Kiptaayaan Yēēsu, ālāsēēnēēch keey kilēē paani kulāsēēnook keey. 15 Kilēē paani kootingʼēēyaa man ngʼālyoontooni, āchēp :aneen keey kilē āruutoowook kupōk paani āwēētii Makeetoonnya, aku paani āwārākēē, areer āpunuunēē araanoonēē. Sikuupēēruurook :ruutoortanyuun āsip ārēēny, ātoorētoon mpō paani āwēētii Chuuteeya. 17 Ara, kyoopiirēnaa paani kyoochēpaa ngʼaleechu? Ntā āchēpaaneen ngʼaleechuuch kilēē piich chēpō ngʼwēny choo mēēsiltooy kāāyoomiisēēngʼwaangʼ? 18 Āmwoorwook man kilē kilēē paani /kutiirēē keey :Iriin, ātiirēēnoon keey mpō kilē kir nyoo kyoomwoorwook āsiltooy :aneen, 19 āmu Wēēroo Iriin Yēēsu Kiriistō nyoo kiikwoomtooy ākōō Siila ākōō Tiimōti akipō inyeentee, kumēēyoomiisēy :inyeentee ama-ir kilēē yoo kaakuuyoomiis. 20 Mpō ntā tyaan :tukun choo kiikuuyoomiis :Iriin, ku-iriisōōt tukuuchoochēē :tōkōl kupunuunō Kiriistō. Nkanyi kiiloosuuchaan Iriin akipō Kiriistō kēēmwoorēy kilē, ’Lēē nyoonēē.’ 21 Iriin nyoo kiikōōnēēch Toomirmiryeenyiin aku-ireech kēēryoongʼēē Kiriistō kukaraam. 22 Kiikukōōnēēch :Iriin Toomirmiiryēēnyiin kungʼuutu kilē kiikēēlēku chaachiich, aku pēruur nyoonēē nyēpō taay nkōō tukun choo tākupkoonēy. 23 Nkēt mpō :Iriin kilē simoochwaa wōloonēē pō Kōōriintō, ku kiitoonyiteenook ngʼal. 24 Mākēēlē naas kumārēēchaan keepaytaayaak nkōō wōloo ārāntooy Kiriistō. Kumārēēchaan kee-ira tōkōl pāyit soopāypāyiituu ākookiilyō paani ārānēy Kiriistō.
21 Apkaat :aneen nyuun kilē moomāraa areer āruutoowook saanyiteenaak ngʼal. 2 Nēē anyiteenaak ngʼal oo, ku ngʼoo nyoo iraa apaypayiit? 3 Kyaasirwaak nyuun parwanōōnēē nyoo kātoochōōnēy. Ntā kāāchōōn ku koo-iimoon nyoo kātoopāypooyoon. Ātingʼēēnook man kilē kupāypāyiituuy :tōkōl akipō pāypooyeenyuun. 4 Kyoosirwook āriirēy, akungʼwaanaa :moo. Kiimoo-iraa kilēē nyoonēē saa-iraak ānyitiisyēē, kyoomāraa nyuun āsōwuukwaan wōloo āchāmtooyook. 5 Chiichi kiikunyit piich ku mēēlē kiinyitaa kitya, nku kiinyitaakwaan kusiir aneen. Āpkootēy kilē ānkēt :akwaan ngʼaleechu. 6 Kiikuyam chiichoonēē ngʼala choo kiitilchi chaa chaangʼ nkōō akwaan paani /kiikiirwoochinii. 7 Ku maraat nyuun paannyēēnyi ānyōōchii kaat akaacheer simama :moonyiin nēē nareek kusiir. 8 Āsoomook nyuun kilē achama chiichoonēē. 9 Kyoosirwook āmāraa āsōwu nēē āmuukēy atuup kir aka tōkōl nyoo kyoomwooraa. 10 Nēē koonyōōchi chiichōōnēē kaat, ānyōōchinaa mpō kaat nkōō taayuu Kiriistō akipō akwaan nēē kāmii :kir nyoo mārēy /kēēnyōōchi kaat. 11 Kyaa-ir kilēē nyoonēē simēēmēlmēēlēēch :Syeetaani āmu kiinkēt oortineechiich. 12 Nēē mii paani kaa-it Turoowa kilē saa-amta lōkōōy choo kāroomēēn akipō Kiriistō aroo kilē kiikiikuyootwoon :Kiptaayaan oor. 13 Aku kimootingʼēy nyuun kaalya āmu kitoomō ku-ituuna tuupcheenyuun Tiitō wōloonēē amiikwaan. Āmwoochaa nyuun piich saaysērē ākoowaa Makeetoonnya. 14 Loosuunoot nyuun :Iriin nyoo kiikuupēlwēēch Syeetaani kupunuunō Kiriistō. Pāyiisyēērēēnēēch :Iriin kēēmwoochinootō piich walak akipō pāypooyō nyoo tingʼēy :chiich nyoo nkēt inyeentee. Itinii :pāypooyoonoonēē kāmōōs tōkōl kilēē kir nyoo ngʼuutooy nyaa anyiny. 15 Kiikarkeey :achaan nkōō taayuu :Iriin nkōō kir nyoo ngʼuutooy nyaa anyiny paani kingʼuutinii ngʼaleepō Kiriistō piich choo mii /kēēsāruuy nkōō choo mii kupētsōōt. 16 Nkōō wōloo mii :choo mii kupētsōōt, kisāsēēch aku-ir nyoonēē akwaaneek kumēērō. Ku nkōō wōloo mii piich choo mii /kēēsāruuy, kichāmēēch aku-ir nyoonēē akwaaneek kunyōōru sopoon nyēpō ākōy. Ara, ngʼoo nyoo yamaat kwaamtaata lōkōōyichu kāroomēēn? 17 Mākuwāsēēchaan ngʼālyoontoo Iriin rōōpiyō kilēē wōloo wāsēē piich chaa chaangʼ. Āmu Iriin nyuun nyoo kiiyookwēēch, kēēmwoorēy ngʼal chēpō man choo kinyōōrchinii wōloo mii :Kiriistō kilēē piich choo kēēyooku :Iriin.
31 Nēē kumwoorēēchaan kilēē nyoonēē ku mēēlē kumiichaan kēēloosuuy keey amākumārēēchaan parwa aka tōkōl nyoo mwooruuy kilē kiichaan ngʼoo kilēē paani mārēy :piich walak. 2 Akwaan parweenchan nyoo siraat nkōō mukuliiriikwook akusōōmānēy :chiich aka tōkōl akusōwu. 3 Akarkee :akwaan nkōō parwaa Kiriistō nyoo kakusir :achaan. /Maakisira kalaamu, wōloo nyuun /kiikusira Toomirmiir nyoo Tiliil. /Maakisirchi kor, wōloo nyuun, /kiikusirchi mukuliiriipō piich. 4 Kumwoorēēchaan kilēē nyoonēē, āmu kutingʼēy man kilē kōōnēēch :Iriin kaamuuka kupunuunō Kiriistō kēēpāyiisyēēchii inyeentee. 5 Moomii kir nyoo kitingʼēēchaan nyoo irēēch keemwaa kilē rookēē kee-ira pāyiisyōōni. Kir nyoo kitingʼēy kuchōōnēē wōloo mii :Iriin, 6 aku inyeentee nyoo kiiku-ireech kēē-irchii pāyit nkōō miis nyoo rēēl. Mānāmēy keey :miistonoonēē rēēl nkōō ngʼātuut choo sirootēēn. Nāmēy nyuun keey nkōō Toomirmiir nyoo Tiliil. Āpuuy :ngʼātuutēchoochēē sirootēēn meerat, kwoopuuy :Toomirmiir sopoon. 7 /Kiikusirchi ngʼātuut chēpō Iriin kor akutooku :lēpooyinpō Iriin paanoonēē /kākukōōnu ngʼātuutēchoochēē. Mpō ntā kiimii kurookootēy :lēpooyintonoonēē kiimii tokochpō Muusa, ku kiitākuuryēlēy nyoo kiimēēmuukēy :piich chēpō Israayeel kuuro koonyiipō Muusa kulōōwiit. Ntā nēē kiichōōnō :pāyiisyoo ngʼātuut nyoo kyoopuuy meerat tōrōōrin oo, 8 /kupakeemwa nee nyuun tōrōōrin nyoo chōōnēy nkōō :pāyiisyoo Toomirmiir? 9 Nēē kii tōrōōr :miis nyēpō taay nyoo kii-irēy piich /kēētilchi meerat oo, ku tōrōōr ku tyaan nyuun :miis nyoo rēēl nyoo irēy piich /kēēnyōōchi kaat! 10 Nēē kuukarkeeyiit tōrōōrin nyēpō miis nyoo rēēl nkōō tōrōōrin nyēpō miis nyēpō taay, kilēē kilēēn :tōrōōrin nyēpō miis nyēpō taay. 11 Ntā nēē koo kitingʼēy tōrōōrin nyoo ōōw :miistoni pō taay mii kurookootēy oo, /kutingʼēy nyuun tōrōōrin nyoo ōōw kitya miistoni rēēl tēpēē ākōy. 12 Irēēch nyuun miistonnyēēnyi rēēl kuumoongʼuuy keengʼalaala nkōō nyakanat. 13 Makukarkeechaan nkōō Muusa nyoo kiikar koonyiichiich simeerō :piich chēpō Israayeel inyeentee paani kiimii kurookootēy :lēpooyintō. 14 Nku kii kāriisyō :mētēwēy piich chēpō Israayeel ākōy paannyēēnyi. Tākumii :kir nyoo kārēy koonyiikwaak paani /kusōōmānēy miis nyēpō kēny. /Kisuultooy kiyoonēē nkōō kaamuukaa Kiriistō kipaat. 15 Mpō nkōō paannyēēnyi, /kēēmiitō /kēēsōōmānēy siruut chēpō Muusa, ku tākukārootēēn koonyiipō piich. 16 Ku, nēē tēpō :chiich ākōy kuwal kāāpkootuutēchiich akicham Kiptaayaan, /kēēsuultooy kiyoonēē kiikar koonyiichiich. 17 Kunyuun, nee cham :chiich Kiptaayaan kunyōōru Toomirmiiryoo Kiptaayaan. Aku wōloo miitō :Toomirmiiryoo Kiptaayaan kuutyaakaat :chiich. 18 Kuurōōtēy tōkōl choo mākārootēēn :koonyiichooch tōrōōrinpō Kiptaayaan. Mii kuwārākēēch :Toomirmiiryoo Iriin keekarkeeyiituu nkōō Kiptaayaan akeetas taay kitya kēēngʼuutu tōrōōrintanyiin.
41 Kitingʼēy pāyiisyōōni, āmu kiiriireeneech :Iriin. Kunyuun, māmēērēēch :mukuliir. 2 Kiikēē-istoorēē keey ngʼaleepō sōōrnoonti choo ungʼēy :piich. Kiikeetay kēēmēlmēēliisyō amaakēēkwoongʼkwoongʼēy ngʼālyoontoo Iriin. Kumwoorēy ngʼālyoon nyēpō man nkōō taayuu Iriin akuunkēt :piich tōkōl choo mwoorēy man. 3 Mpō ntā ungʼootēēn :lōkōōyichoochēē kāroomēēn, ku ungʼootēēn nkōō wōloo mii :piich choo mii kupētsōōt. 4 Kiiku-ir :Syeetaani nyoo pāyuuy ngʼwēnyuuni kukōryō :pichoochēē toomō kuuran ngʼālyoontoo Iriin simeero lēpooyin nyēpō lōkōōyichoochēē kāroomēēn choo ngʼuutuuy tōrōōrin nyēpō Kiriistō. Inyeentee nyoonēē ngʼuutunēē keey :Iriin. 5 Mākēēmiichaan kēē-āmchinii piich ngʼālēēchooch. Kumiichaan nyuun kēē-āmtooy kilē :Yēēsu Kiriistō ku Kiptaayaan akeechaan kipāyitiinēkwook akipō inyeentee. 6 Iriin nyoonēē kiimwoorēy kilē, "Kupēt :tuurin, akichō :lēpooyin," ku nyoonēē nyoo kēētē lēpooyin kuupkangʼ kāāpkootuutēchooch sikēēnyōōruu lēpooyin paani kapakeeroo :Kiriistō kungʼuutuuy tōrōōrinpō Iriin. 7 Aku kiitē :Iriin lēpkēēyoonoonēē pō kwōngʼuut kāsumoon sikungʼuutu keey kilē kiichōōnēē kaamuuka wōloo mii :Iriin, mēēlē wōloo kimiichaan. 8 /Kikunāmuunēēnēēch kāmooswook tōkōl, aku /mākuuwoongʼēēch nyuun. Kukwōngʼootēēn nyoo mākuunkēt kiyoo ku-irēy, amāmēērēēch nyuun :mukulēr. 9 /Kiikēē-usēēch, aku /mookumētēēch nyuun. Mpō ntā /kiikulapeech ākōy kēēputyēē, ku /maakuuwaangʼeech. 10 /Kiikunyariileech kinyil chaa chaangʼ ākēētingʼēy pēēruutēy nkōō pōōrwēyichooch kilēē Yēēsu, aku /kikēēngʼuutu nyuun sopoon nyēpō Yēēsu kupunuunēēnēēch. 11 Kumiichaan kēērōōtēy meerat pērēētuus tōkōl āmu kupāyiisyēēchinii Yēēsu, sikungʼuutunō keey wōloo kiilēē :sopeenyiin pōōrwēyichooch chu rookēy. 12 Kunyuun, kānyēēch :meerat ākoonyōōruukwaan sopoon nyēpō ākōy. 13 /Kiikusir kilē, "Kyaaran :aneen Iriin, angʼalaal aneen nyuun." Kiirānēēchaan mpō kilēē paani mwoorēy siruut ākēēmwoortooy nyuun lōkōōyichiich. 14 Kiinkēt kilē Iriin nyoo kiingʼeeta Kiptaayaan Yēēsu meerat ku nyoonēē mpō nyoo ngʼēētēēnēēch meerat kilēē Yēēsu akuumuteech nkōō akwaan keepa taayuunyiin. 15 Pō :ngʼaleechu tōkōl kāroomintāngʼwoongʼ, /sikēēmwoochi Iriin kōōnkēy /ākēētōrōōr akipō piich chaa chaangʼ choo kiikunyōōru sopoon nyoo rēēl. 16 Māmēērsōōt nyuun mukuliiriichooch. Mpō ntā mii pōōrwēyichooch kuunyooriisōōt, /kēērēēliitēy sopoontō pērēētuu aka tōkōl. 17 Miitō kwoopkēēch :nyāriluutēchooch chu kuskusēēn choo kutingʼēy nkōō pērēētuus choo ngʼērin pēēruur nyēpō ākōy nyoo ōōw kusiir nyāriluutēchoochēē tōkōl. 18 Kunyuun, mēēlē kimii kēētiirēē keey kiyoo /kuurōōtēy, kitiirēē keey nyuun kiyoo /mākiirōōtēy. Kiyoo /kiirōōtēy ku mā pō ākōy, ku nyoo /mākiirōōtēy kipō :nyoonēē ākōy.
51 Karkeey :pōōrwēyiichooch nkōō kō nyoo kumāngʼēy nkōō ngʼwēny. Kiinkēt :achaan nyuun kilē nēē /kumil kooriichu, kukōōnēēch :Iriin koot aka nyoo kumāngʼēy. Kōyoonēē ku mii kipsēnkwēt, mātēēkēy :chiich aku māmilēē ākōy. 2 Kutākēētingʼēy pōōrwēyiichuchooch kēēmii kēē-iimēy keey, akwoomēēch :ēēmō kilē ntā /kiilookwēēch pōōr nyoo rēēl nyēpō wōliino pō kipsēnkwēt. 3 Mā kumārēēchaan kēēmāngʼiisyēē ku mākutingʼēy pōōr. Wōloo nyuun kumārēēchaan kēēnyōōruu pōōr aka nyoo rēēl. 4 Nēē tākēēmii kooriichooch, kēē-iimēy keey akungʼwoonchinēēch :ngʼala. Mākumārēēchaan /keesuuleech, aku kumārēēchaan /kēēlookwēēch pōōrwēyiichooch chēpō kipsēnkwēt sikuulaampuus :sopoon nyēpō ākōy pōōrwēyiichoochēē rookēy. 5 Iriin nyoo kiichēpwēēch sāpoonoonēē pō ākōy akuusip kukōōnēēch Toomirmiiryeenyiin kungʼuutu kiyoo kunyōōruuy. 6 Kunyuun, kunyākānoot :achaan ākōy, ākēēnkēt kilē nēē tākēētingʼēy pōōrwēyiichuchooch, ku mākumiichaan katanyoon wōloo mii :Kiptaayaan. 7 Kumāngʼiisyēēchaan kēētiirēē keey Iriin, mā kiyoo /kuurōōtēy. 8 Man kunyākānoot :achaan mpō ntā kuukāykāyiitēy kēē-istoorēē keey pōōrwēyiichu pō ngʼwēny akeepa kēēmāngʼiisyō nkōō Kiptaayaan. 9 Kunyuun, mākuut nyaanchan ku keepaypaaya Kiptaayaan nēē tākēēmii wōli nkōō pōōrwēyiichooch chēpō kōōrooni ntā ku nēē kakupa kipsēnkwēt. 10 Āmwooraa kilēē nyoonēē āmu /kuumutēēch tōkōl taayuu ngʼacharaa kiirwook nyēpō Kiriistō /ākēērwookēēch sikunyōōru :chiich aka tōkōl kiyoo nyōōruuy akipō kiyoo kii-irēy nkōō ngʼwēny nēē ka ra ntā ku karaam. 11 Āmu kiinkēt kilē tilwēēch :Kiptaayaan ngʼal, kēēkoonyitēy inyeentee ākēē-isuuy piich kuwāliisyō kupka wōli mii :inyeentee. Nkēt :Iriin wōloo kilēēchaan ākoopkootaa kilē ānkēt :akwaan mpō wōloo kilēēchaan. 12 Mēēlē kumiichaan kēēloosuuy keey. Kumiichaan kēēkōōnook pārooyin alasa keey akipō achaan soomwoochii man pichoochēē tākulāsēē keey tukun chēpō kōōrooni nyoo kātālāsēē keey kiyoo mii :mootinēēkwaak. 13 Nee kungʼalaal :achaan kilēē piich choo kāwōōsiisyō mētēwēy, kēēngʼāloolēy kilēē nyoonēē āmu kutingʼēy siirmōōy kēēpāyiisyēēchii Iriin. Ku nēē /kilē mookuwoosiisyēēchaan, ku karaam nyoonēē nkōō wōloo āmiikwaan. 14 Irēēch :chamataa Kiriistō kēēpāyiisyēēchii Iriin, aku āmu kuurānēy :tōkōl kilē kiima :Kiriistō akipō piich tōkōl, kēērānēy mpō kilē kiikurook ātēpuutēchooch chēpō kēny. 15 Kiima akipō piich tōkōl simaakumāngʼiisyēy :piich choo nyōōruuy sopoon nyoo rēēl kuupāypooyēy keey. Mākootēēn nyuun kumāngʼiisyō akipō Kiriistō nyoo kiima akipō akwaaneek /akeengʼeeta meerat. 16 Kungʼeetee aniinee nyuun, maakēēmārēēchaan keeroo chiich kilēē wōloo rōōstooy piich chēpō ngʼwēny. Mpō ntā kiikuuroochaan Yēēsu pērēētuu aka kilēē nyoonēē, kumaakilēē nyoonēē paannyēēnyi. 17 Ku nēē pō nyuun :chiich Kiriistō ku /kiikee-ir kilēku chiich nyoo rēēl. Kiikusiirtō :ātēpuut chēpō kēny akutoowu keey chaa reelacheen. 18 Pkoonēē :ngʼaleechu tōkōl wōloo mii :Iriin nyoo ki-ireech kēēchoomnyēē nkōō inyeentee kupunuunō Kiriistō ākiikukōōnēēch pāyit kee-ira piich kuchoomnyō nkōō inyeentee. 19 Kwoomtoochaan kilē kiichoomnyō :Iriin ākōō ngʼwēny kupunuunō Kiriistō siku-isto ngʼōōki choo kiiku-ir :piich. Ngʼālyoon nyoo kiikōōnēēch ku kēēchoomnyēē piich ākōō inyeentee. 20 Kiiyooytēēch :Iriin sikungʼalaalta ngʼaleepō Kiriistō kupunuunēēnēēch. Kungʼālooltoochinii nyuun Kiriistō kilē mārēy kuchoomnyō :piich ākōō Iriin. 21 Ki-ir :Iriin Kiriistō nyoo kiimātingʼēy ngʼōōki aka tōkōl kukarkeeyiit nkōō kipngʼōōkiyoon sikēēnyōōwēēch kaat ngʼōōkichooch.
61 Kulēē paani kupāyiisyēy nkōō Iriin, kēēmwoorwook kilē maakany kiwō kilēēn :chamataa Iriin nyoo kyoonyōōru. 2 Mwoorēy :Iriin kilē "Kyaateeriin nkōō pērēētuu chamat, ākoosāruun nkōō pērēētuu sāruunō." Āmwoorwook nyuun kilē aniinee pērēētuunoonēē chāmēy :Iriin piich aku aniin yoo /kusāruuy piich. 3 Kuutyāmēy kēēmāngʼiisyēē nkōō oor nyoo karaam /simākungʼāloolēē nyaa ra pāyiisyēēnyoon. 4 Aku, kungʼuutuuy keey nkōō oor aka tōkōl kilēē kipāyitiin chēpō Iriin. Kiikeemurta nkōō nyāriluut chaa chaangʼ. Kiikunyikisiityēēch akuukiicheech :ngʼala. 5 /Kupirēēch /ākēērātēēch ākēēnyōōruuy riiri. Kiikēēkiilchi keey pāyiisyēē nyoo nyikiis, amaakēēruuyēyii, ākēēruusōōt mpō kuut. 6 Nkōō ngʼaleechu tōkōl nyuun ku kiikēēngʼuutuuchaan kilē kupēērēy keey, ākēē-āp nkōō oor nyēpō ngʼoroomnyō, ākēēmurtooy, ākēētingʼēy moo nyoo rēēl, chamat nyēpō man nkōō kaamuukaa Toomirmiir nyoo Tiliil. 7 Ku-irēēchaan pāyiisyōōnoonēē nkōō oor nyēpō man nkōō kaamuukaa Iriin. Kutingʼēēchaan man kilēē kariichooch choo kusāruunēē keey ntā kēēpooryēērēē. 8 Ku-irēy pāyiisyōōni nēē /kākiilooswēēch ntā nēē /mākiilooswēēch, nēē /kākumwooru ngʼal chaa raacheen ntā ku choo kāroomēēn. Kumwoorēēchaan man mpō ntā mwoorēy :piich walak kilē kuuchuunnyēēyiichaan piich. 9 Kutookunoot :achaan, /ākēērēēngʼēēch nyuun. Lēēkitēēnēēch meerat, aku tākēēsopyootēēn nyuun. /Kuunyāriilēēch, /āmākupārēēch nyuun. 10 Mpō ntā kutingʼēy ngʼwoonin, kēēpāypāyō pērēētuu aka tōkōl. Kiichaan mēēy, ākēē-irēy nyuun piich chaa chaangʼ kunyōōru pēēruur. /Mākutingʼēy kir, aku choochooch nyuun tukun tōkōl. 11 Lēyyē, piich chēpō Kōōriintō, kaakēēngʼāloolwook nkōō moo ākoongʼo ākaakēēngʼoongʼwook wōloo lēē :koopkootuutēchooch. 12 Māku-ungʼēēnook :choomnyēēnyoon, ākoo-ungʼēēnēēch nyuun :ākwoonēēk nyoongʼwoongʼ. 13 Āngʼāloolwook kilēē laakōōchuuch, ātyookiisyēē akaachameech kilēē paani kichāmook. 14 Piichooch, amaakany /kēēnoomnyook nkōō piich choo toomō kuuran ngʼālyoontoo Iriin. Āmwooraa kilēē nyoonēē āmu mānāmēy keey :man ākōō rāyiityō amānāmēy keey :lēpooyin ākōō tuurin. 15 Mānāmēy keey :Kiriistō ākōō Syeetaani, amānāmēy keey :nyoo kiikuuran ākōō nyoo toomō kuuran. 16 Mānāmēy keey :Kōpō Iriin ākōō kaanaamōōn. Āmwooraa kilēē nyoonēē āmu kichaan Kōpō Iriin, kilēē paani mwoorēy :Iriin kilē, "Mārēy āmāngʼiisyō nkōō pichoochēē akeepeetaata :tōkōl. Ālēkuuy Iriinteengʼwaangʼ aku lēkuuy :akwaaneek piichuuch." 17 Kunyuun mwoorēy :Iriin kilē, "Ā-istoorēē keey pichoochēē amaanam kir aka tōkōl nyoo mā tiliil. Nkōō yoonēē, ataakaak." 18 Mwoorēy kuureer :Iriin nyoo pāyuuy kir aka tōkōl kilē, "Ālēkuuy Paapēēngʼwoongʼ ālēkuukwaan laakōōchuuch."
71 Tuupchēēnichuuch, kilēē paani /kiikiiyoomiisēēch tukuuchu ku maraat kēētiliilō keey nkōō wōloo mii :kir aka tōkōl nyoo nyēērēē pōōr nkōō sopoon nyēpō chiich. Kēēkiilō keey kēēlēku piich choo tiliilēēn ākēēkoonyitēy Iriin. 2 Lēyyē, ātyookiisyēē akaachameech. Maaku-irchi chiich aka tōkōl kir nyaa ra amaakunyeeree ātēpuut chēpō chiich aka tōkōl amaakusaree chiich aka tōkōl kir. 3 Mēēlē āmwooraa ngʼaleechu ārwookook. Kyoosip āmwoorwook kilē āchāmook kitya ākēēmii tōkōl nēē kāchōōnēy :sopoon ntā ku meerat. 4 Āsirwook parwaani nyoo mootingʼēy koowāriisyō ākoolāsēy keey akipō akwaan. Kacheeran ngʼaleekwook choo /kaakēēmwoorwoon aku kōōnān apaypayiit mpō ntā kumii :nyaril. 5 Nēē mii paani kaki-itu Makeetoonnya, ku maakunyōōru kiimuny. /Kikiinyariileech nkōō oor aka tōkōl. /Kēē-usēēch, ākēētingʼēy kāāwāriisyō akipō akwaan. 6 Aku kiicheereech :Iriin nyoo chēērēy piich choo tingʼēy kāāwāriisyō paani kāwō kichō :Tiitō. 7 Mēēlē kiikupāypāyiitu kipaat āmu kichō :Tiitō, aku kiikuchēēriisyō mpō āmu kyaacheer :akwaan inyeentee nkōō wōloonēē. Paani kāmwoorwoon :Tiitō kilē āmook :ēēmō kilē ntā kaarootaan, nkōō kāāwāriisyō nyoo kiinamaak akipō ngʼaleechu kii-irisyō, akuureer kumwoorwoon kilē ārānēy ākoochāmēēkwaan ngʼaleechu āmwoorwook, ānyōōru pāypooyō nyoo ōōw. 8 Mpō ntā ki-iraak :parweenyuun āmuyēē, ku mēē-iimoon kilē kyooyooku. Kyoopkootēy kilē kyaa-ir kir nyaa ra paani kyooyookuuy āmu kyoonkēt kilē ngʼwoonchinook nyoo matyaan. 9 Apaypay aniinee āmu kyooyookwook parwaanōōnēē. Mēēlē āmu kiingʼwoonchook, aku āmu kii-iraak āwāliisyēē. Kunyuun, /kiingʼwoonchook kilēē wōloo kiimārtooy :Iriin, ku maaku-ir :achaan nyuun kir nyoo ngʼāmook. 10 Muukēy nyuun kupāyisyēērō :Iriin ngʼwoonin kuwal chiich, /ākēēsāruunō chiichoonēē ngʼōōki. Karaam :ngʼwoonin nyoo lēē nyoonēē. Aku ngʼwoonin nyoo mākōōnuuy walat ku-āpuuy meerat. 11 Aroo kee mpō kiyoo kiikwoopkook :ngʼwoonintoni choonēē wōloo mii Iriin: Kiiku-iraak ātēē keey Iriin ākootililiitu. Kiiku-iraak ānārēēchii chiich nyoo kiiku-ir lēēluut ākoowāriisyō akipō kiyoo kiiku-ira. Kiiku-iraak ātēpi āmārēy kir nyēpō man ākoomārēy achuul ngʼālyoontooni, ākootō chiich nyoo kiikuleel siiteenyiin. Āmu kyaa-ir ngʼaleechu tōkōl kāroomēēn, kungʼuutuuy kilē kyootiliil keey. 12 Kunyuun oo, paani kyoosirwook, mēēlē kyoosirēy kipaat akipō chiichi kiiku-ir ngʼal chaa raacheen ntā akipō nyoo /kiikēē-irchi ngʼal chaa raacheen. Kyoosirēy kilē soosōwuukwaan nkōō taayuu Iriin kilē kyookōōnēēch keey kilē siiny. 13 Kiikucheereech :ngʼalēēchoochēē tōkōl. Kitas keey nkōō chēēruutēkwook, ku kiikupāypāyiitu keeroo kilē kyaapaypaay :akwaan Tiitō āmu kyaa-ir kukaalyan :mētinyiin. 14 Kyoomwoochi Tiitō wōloo ālāstooy keey akipō akwaan, amēēlē kyaanyaaltaan nyuun. Kulēē paani kii man :kir aka tōkōl nyoo kiikumwoorwook, kupō man wōloo ālāstooy keey akipō akwaan. 15 Chāmook :Tiitō nee pkaat kilē kyootēērchiikwaan tōkōl ngʼalēēchoochēē akaataak inyeentee nkōō koonyit. 16 Apaypay :aneen kitya paannyēēnyi āmu ātiirēēnook keey kilē siiny.
81 Kunyuun oo, tuupchēēnichuuch, kumārēēchaan āsōwuukwaan kilē tyaan :chamata nyoo kiinyōōru :kaaniiseen chēpō kōōroo Makeetoonnya. 2 Mpō ntā /kiikuutyam /keenyariil pichoochēē, ku kiipāypāyō. Mpō ntā kii mēēy :pichoochēē, ku kiireelacha :mootinēēkwaak sukuutētooy mpō rōōpiyō chaa chaangʼ kitya. 3 Koomwoorwook kilē kiipāsēy :pichoochēē rōōpiyō chaa chaangʼ choo tēēnō choo kiimuukēy akutāsi mpō walak. Kikōōnu :chiich kilēē wōloo kiichāmtooy inyeentee. 4 Kiisaarsaareech :akwaaneek /kēētēē pārooyin kuutoorēt piich chēpō Kiriistō nkōō Chēērusālēēm. 5 Ki-ir :pichoochēē kir nyoo ōōw nyoo kiimākupkootiniichaan. Nkōō makaa Iriin, ku kiitē keey :pichoochēē Kiptaayaan kupōk akukōōnēēch keey lētuun. 6 Kusoomēy nyuun Tiitō nyoo kiisip kutoowu paswaani kuutoorētook awaantee pāyiisyōōni karaam pō chamat. 7 Akwaan mōkōrō chēpō tukun tōkōl: nēē kā kaarana, nēē kā /kwoomtooy lōkōōy, nēē kā ngʼoroomnyō, nēē kā /kēētētō keey /kee-ir kir, ntā nēē kā choomnyoot. Karaam nyuun ākiilchi keey pāyiisyōōni /kuutoorētēē piich walak. 8 Moomiiyaa āngʼātwook ngʼātuut. Āmāraa kipaat āsōwuu wōloo lēē :choomnyēēngʼwoongʼ nēē /kuukarkeeyiit nkōō nyēpō piikō walak. 9 Ānkēt :akwaan wōloo lēē :chamataa Kiptaayaantēēnyoon Yēēsu Kiriistō. Mpō ntā kii mōkōryoon, kucham kilēku mēēywoon akipō akwaan soolēku mōkōrō kupunuunō mēēywoontiinyiin. 10 Wōloo ārōōtitooy ngʼālyoontooni ku kaykay awaantee pāyit nyoo kyootoowu kēnyiikoonyō, āmu kyoopō taay āpkootēy ātētō tukuuchoochēē akyoopō mpō taay a-ir kilēē nyoonēē. 11 Ātēē keey awaantee pāyiisyōōnoonēē kilēē paani kyootoowuuy, aku-ir :chiich kilēē wōloo muuktooy. 12 Nēē chāmēy :chiich kuutētō tukuuchiich, kuurōōtēy :Iriin kiyoo kēētētō kutuup keey nkōō kiyoo tingʼēy :chiichoonēē mēēlē kiyoo mātingʼēy. 13 Makeenyoon /kumakuu-iimaak /sikēētoorēt piich walak, wōloo kumārtoochaan ku kusopyō :piich tōkōl. 14 Ātingʼēēkwaan paannyēēnyi tukun chaa chaangʼ, ātoorētēē nyuun piich walak. Nēē mii pērēētuu nyoo tingʼēy :akwaaneek tukun chaa chaangʼ, kuutoorētook mpō. Karkeey :piich tōkōl 15 kilēē paani /kikusir kilē: "Piich choo kiirum chaa chaangʼ ku mēēlē kiinyōōru choo kiisiirtō, ku choo kiirum choo ngʼērin ku mēēlē kiirārchi." 16 Āmwoochinii Iriin kōōnkēy nyoo kiitē Tiitō moo nyoo lēē nyaanyaa akipō :akwaan. 17 Mēēlē kiicham kipaat :Tiitō kiyoo /kiikēēmwoochi, aku miitō kuchōōnēy wōloonēē āmiikwaan nkōō pāypooyō aku kacham :inyeentee ākityōōn. 18 Kumii kēēyookuuy kuchō nkōō tuupchēē aka nyoo loosuuy :kaaniiseen tōkōl akipō wōloo irtooy :inyeentee pāyiisyeenyiin nyēpō amtaarpō lōkōōy choo kāroomēēn. 19 Aku kitya ku kiikwar inyeentee :kaaniiseen kilē sikuwētootō ākōō achaan sikuriipēy tukun choo /kipāsēy. Ku-irēy pāyiisyōōni sikēēkoonyitō Kiptaayaan ākēēngʼuutu moo nyoo kutingʼēy kēētoorētō piich. 20 Kaku-ir kilēē nyoonēē simakwiintaan :piich akipō wōloo kuriiptooy tukuuchu chaangʼ /kupāsēy. 21 Kiikiilchinii keey kee-ira kir nyēpō man amēēlē nkōō taayuu Kiptaayaan kipaat aku mpō nkōō taayuu piich. 22 Kumii kēēyookuuy tuupchēē aka kuchō nkōō mpō Tiitō. Kiikungʼuutwēēch keey :tuupchoonoonēē nkōō oortin chaa chaangʼ kilē tingʼēē moo pāyiisyōōni aku aniinee kitya, āmu chēērēēnook keey :inyeentee kuyam. 23 Tiitō ku toorētiintēēnyuun ākēē-irēy :tōkōl pāyit nkōō wōloo āmii :akwaan. Aku mpō wēēchiichooch walak ku kiikwar :kaaniiseen aku piich akwaaneek choo koonyitēy Kiriistō. 24 Kunyuun, āpāypāchii pichoochēē, tākuurō :kaaniiseen tōkōl choomnyēēngʼwoongʼ akusōwu kilē kiikutingʼēy man paani kiikusālook :kichaan.
91 Moomārēy asirwaak kitya akipō pāyiisyōōnoonēē pō pāsuut chēpō piich chēpō Kiriistō choo mii Chēērusālēēm. 2 Ānkēt soonyeen kilē ātingʼēē moo kitya ātoorēt piich walak. Ngʼālyoon nyoo kyoolāsinii keey piich chēpō kōōroo Makeetoonnya āmwoochinii kilē kungʼeetee kēnyiikoonyō ku āchēpootēēn :akwaan ākōō kōōroo Akaaya ākoonu tukun ākootētooy. Āmu āchāpchāpēēn, ku kiikuchāpchāpiituuy :mpō akwaaneek. 3 Āmii nyuun āyookuuy choo kutuupchō simāwō kilēēn :kiyoo ālāsēē keey akipō akwaan nkōō pāyiisyōōni, aku soochēpō keey kilēē paani kyoomwoorwook. 4 Āmwoorēy kilēē nyoonēē, āmu nēē koochō :chiich aka tōkōl nyēpō Makeetoonnya akunyōōrwook kitoomō /āchēp keey, kēēwāriisyō, aku nāmook nyuun :kāwāriisyō nyoo ōōw kitya kusiir achaan. 5 Kunyuun, kyaaroo kilē kaykay asaarsaar choo kutuupchō kusip kuruutoowook pakuuwaanta chēpuut chēpō pāsuut choo kyooyoomiis. Nēē a-ir kilēē nyoonēē, kulēkuuy nyoo kookōōnu nkōō moo nyoo rēēl amēēlē nkōō moo nyaa tuur. 6 Apkaata kee ngʼālyoontooni: Chiich nyoo kā-is kāsur choo ngʼērin kukāsēy choo ngʼērin. Aku nyoo kā-is kāsur chaa chaangʼ, kukāsēy chaa chaangʼ. 7 Mārēy :chiich aka tōkōl kukōōnuuy kiyoo kaakutil nkōō moonyiin kilē kukōōnu. Māmārēy kukōōnuuy kukama :moo ntā ku /kākuusiichi āmu chāmēy :Iriin chiich nyoo kōōnuuy nkōō pāypooyō. 8 Aku pēēruurook :Iriin kitya akukōōnook kir aka tōkōl nyoo āmārchinii keey nkōō mpō chaa chaangʼ sootoorētēē piich walak, 9 kilēē paani /kiikusir kilē, "Kiiseer piich tukuukwaak akuutē mēēy. Makuruutyēērēē nyuun ākōy iruutēkwaak choo kāroomēēn." 10 Āmu Iriin nyoo tēnii piich kāsur kutoot akuutē mpō kiyoo āmēy, ku kōōnook mpō :akwaan kāsur saakasa chaa chaangʼ kupunuunō kāroomnyēēngʼwoongʼ. 11 Kyoolēkuukwaan mōkōrō nkōō oor aka tōkōl sootētēē chaa chaangʼ nkōō moo nyoo rēēl. Nēē kākēē-āptēēchaan tukun choo kookōōnu, kumwoochi :pichoochēē Iriin kōōnkēy. 12 Pāyiisyōōni ā-irēēkwaan ku mēēlē āmii ātoorētēy piich chēpō Iriin choo mātingʼēy kir kipaat, aku āpuuy mpō /kēēmwoochi Iriin kōōnkēy kunyil chaa chaangʼ. 13 Akoonyitēy Iriin, āmu kiikungʼuutu :pāyiisyēēngʼwoongʼ kilē ārānēy lōkōōy choo kāroomēēn chēpō Kiriistō ākootuupēy lōkōōyichoochēē. Akoonyitēy Iriin mpō akipō wōloo ākōōnuntooy tukuukwook nkōō moo nyoo rēēl ākoochārchinii mēēy nkōō chiich aka tōkōl nyoo mārēy toorētō. 14 Kunyuun, sooywook :akwaaneek kitya akwoomēy ēēmō kuurootook āmu kiikupāyisyēērēēnook :Iriin kunyōōru :akwaaneek pēruur. 15 Kunyuun, /kēēmwoochi Iriin kōōnkēy akipō kōōnunēēnyiin nyoo mātingʼ /keemwa.
101 Mwoorēy :piich walak kilē aneen tala nēē kumii :tōkōl nkōō akwaan, ku nēē mākumii :tōkōl ku ākōrōōm :aneen. Asoorsoorook :aneen Paawulō nkōō tāloosyō nyēpō Kiriistō. 2 Ākōrōōmiituuy nkōō piich walak choo lēēlii kutuupēy ātēpuutēpō kōōrooni, aku āpkootēy nyuun kilē mapō kir āchō ākōrōmiit nkōō wōloo āmiikwaan nēē āchōōn. 3 Mpō ntā kumāngʼēēchaan kōōrooni, ku mākupooryēērēē karin chēpō kimukuul mēt. 4 Kariipō pooryoot choo kēēpāyiisyēērēē ku makarkeey nkōō choo pāyiisyēērēē :piich chēpō kōōrooni. Kupāyiisyēērēē nyuun karin chēpō Iriin choo tingʼēy kaamuuka kuuryeew tēlēkuut chēpō Syeetaani. Kiiryēēwēēchaan kāruut aka tōkōl 5 nkōō lasataa keey nyoo kārtooy piich māsōwu Iriin ākēēwārākēēchaan kāāpkootuut walak tōkōl ku-ir kilēē wōloo mārtooy Kiriistō. 6 Kupka chēpootēēn kēētēē siitēt chiich aka tōkōl nyoo pistoorēē inyeentee paani mii kutēērēy :piich walak. 7 Murēnchu, mārēy āroo ngʼal kilēē wōloo lēē. Nēē nkēt :chiich man kilē pō Kiriistō kumārēy kuunkēt kilē kēēpoochaan mpō Kiriistō kilēē wōloo lēē :inyeentee 8 Kiikukoonēēch Kiptaayaan kaamuuka sikēēkiilēēnook amēēlē sikeeryeeweenaak. Man nēē alasa keey kitya kaamuukanoonēē, 9 aku moomārēy nyuun āmpuurook nkōō parweenichuuch. 10 Mwoorēy :piich walak kilē, "Siruuy :chiichoonēē ngʼal choo kōrōōmēēn, aku nēēcho :inyeentee ku tāwārārō ngʼaleechiich amā-isēy piich." 11 Mārēy kuunkēt :chiich nyoo pkootēy kilēē nyoonēē kilē kiyoo kumwoorēēchaan nkōō parweenichooch nēē mākulēēkitō ku karkeey nkōō nēē kumii nkōō akwaan. 12 Mākumārēy kēētēēniityēērēē keey piich choo loosuuy keey. Nēē tēēnō keey :akwaaneek nkōō akwaaneek ku mātingʼēy ngʼoroomnyō. 13 Aku mākumārēēchaan keelasa keey kusiir yoo māku-itinii. Rōōtyēēnyoon ku kir nyoo kiikuchēpkēēch :Iriin kee-ira aku āmiikwaan pāyiisyōōni. 14 Āmu kiichaan chēpō taay kēē-āpkook lōkōōy choo kāroomēēn chēpō Kiriistō ku maakusiir :achaan rōōtyōōt nēē kuutikoonook. 15 Makulāsēy keey nyuun akipō pāyiisyō nyoo kiiku-ir :piich walak. Kumārēy kilē nēē tāsēy taay kunārēy :kaaraneengʼwoongʼ ku pārāyiituuy kitya :pāyisyēēnyoon 16 sikee-amtaatee lōkōōy choo kāroomēēn kēē-itii kōōrootin chuuchō walak. Makumārēy keelasee keey pāyiisyō nyoo kiiku-ir :chiich aka nkōō kōōr aka. 17 Kilēē paani siraat nyuun, "Chiich nyoo mārēy kulas keey, kulas keey akipō kir nyoo kiiku-ir :Iriin." 18 /Mākiirānēy kilē karaam chiich nyoo loosuuy keey inyeentee. Aku chiich nyoo /kiirānēy kilē karaam ku nyoo loosuuy :Kiptaayaan.
111 Asoomook amurta nēē atas :aneen taay angʼalaal kilēē sālwō. 2 Āriipook kilēē wōloo riiptooyook Iriin. Ālēēkwaan cheeroos nyoo kyoomārchaa saan aku saantaanoonēē ku Kiriistō. 3 Aku āwārchinii kilē muukēē /kēēchuunyookwaan ataya areengʼwoongʼ nyoo karaam nyoo kyoonāmchi keey Kiriistō kilēē paani kiimēlmēēlēy :kipaangʼwa Aawa. 4 Lēē yoo āchāmēēkwaan nēē chō :chiich aka wōloo āmii aku-āmwook akipō chiich aka nyoo makarkeey nkōō Yēēsu nyoo kyoomtoochaan, ntā mpō nēē amwook akipō toomirmiir aka nyoo ngʼulēy nkōō nyoo kyoonyōōru, ntā nēē āmwook lōkōōy walak choo makarkeey nkōō choo kyaaran. 5 Moopkootaa kilē amanangʼ kusiir akwaaneek choo toroorēy keey kilē kāāyooytooyiik. 6 Moomuukēy akarkeeyiit nkōō ngʼālooliin nyoo /kikiineet wōloo /kungʼālooltooy, aku ātingʼēy nyuun ngʼoroomnyō. Āpkootēy kilē kyaarookwaan ngʼoroomnyoonoonēē āmu kikēēngʼuutwook nkōō oortin chaa chaangʼ. 7 Kyoo-āmwook lōkōōy choo kāroomēēn chēpō Iriin nyoo maraakaak kir. Kyoo-āp keey ngʼwēny /sikēē-āpkook parak. Ara kyaa-iraa kir nyaa ra? 8 Kyaamar :aneen rōōpiyō chēpō kaaniiseen chēpō kōōrootin walak saamuuk ā-āmwook lōkōōy choo kāroomēēn. 9 Aku paani kiikumii nkōō akwaan, akurārwoon rōpiyō ku kiimootō chiich aka tōkōl nkōō akwaan nyikiisin āmu kikōōnān choo kutuupchō choo kiipkoonēē Makeetoonnya kiyoo kyoomārēy. Kyooriip keey kilē mookōōnook nyikiisin nkōō oor aka tōkōl ākootāsēy taay ā-irēy kilēē nyoonēē. 10 Kilēē paani miitēēnoon :man nyēpō Kiriistō, ku moomārēy kukōōnān rōpiyō :chiich mpō ākoongʼo nkōō kōōroo Akaaya. 11 Āmu nee saa-ir :aneen kilēē nyoonēē? Ara, āmu moochāmook? Nkēt :Iriin kilē āchāmook. 12 Ātāsēy taay ā-irēy :aneen kilēē nyōōnēē simanyōōru :pichu pārooyin nyoo tēēnēēnēēch keey. 13 Mā kāāyooytooyiik :pichoochēē chēpō man. Ngʼoolook :pichu, aku-irēy keey akwaaneek kilē kāāyooytooyiipō Kiriistō. 14 Mākwōngʼuut ngʼālyoontoonoonēē āmu irēy keey mpō Syeetaani kilēē malayka nyoo āpuuy lēpooyin. 15 Kunyuun, mā ngʼālyoon nyēpō kwōngʼuut nēē ka-ir keey :piich choo pāyiisyēēchinii Syeetaani kilēku choo irēy pāyit nyēpō man. Pēētii kunyōōruuy siitēēngʼwaangʼ pichoochēē kutuup keey nkōō wōloo lēē :ātēpuutēkwaak. 16 Āmārēy nyuun alas keey kiitēēn. Moo-irēy kilēē nyoonēē soo-āpoon kilēē :chiich nyoolēē sālwō. Ntā nēē āpkootēy kilē aneen sālwō, ataakaan kilēē wōloo /kutooktooy sālwō. 17 Nēē āngʼāloolēy ālāsēy keey kilēē nyi, ku moongʼāloolēy kilēē wōloo kātāngʼālooltooy :Kiptaayaan, aku āngʼāloolēy kilēē chiich nyoo lēē sālwō. 18 Kilēē paani lāsēy keey :piich chaa chaangʼ kilēē wōloo lāstooy keey :piich chēpō ngʼwēny, akany alasaa keey mpō kilēē nyoonēē. 19 Kyaacham :akwaan nyuun choo āngʼōrōōmō kitya ātēērēy choo lēē sālwēy. 20 Āchāmēēkwaan āmurtoochinii pichoochēē irook ōōtwook, akusārēēnook tukuukwook, mēlmēēlook, aku āpēy keey parak ntā kumuulook mpō. 21 Muutyō āmu kiimākitingʼēy kaamuuka nyoo yāmēy kee-irwaak kilēē nyoonēē. Nēē lāsēy keey :pichoochēē, akany alasaa keey, mpō ntā sālwoonti :nyoonēē. 22 Epuraanik :pichu? Aneen mpō nyoonēē. Israayeelik :akwaaneek? Aneen mpō nyoonēē. Pō kōpō Apraam? Nku āpaaneen mpō. 23 Pāyiisyēēchinii :akwaaneek Kiriistō? Nku ā-irchinaa mpō kusiir akwaaneek. (Āngʼāloolēy kilēē chēēpkōōsoot.) Kyookiil keey nyēpō kwōngʼuut. /Kiikeerataanwaan asip chaa chaangʼ, kēētwooroonwoon choo mēē-iitiisyēy, aku kyaachirila meerat kunyil akunyil. 24 Kiitwoorān :Yāwuutik kunyil muut sitiit choo lēē sosom nkōō sokool. 25 /Kiikeelapeenaan kaarya kunyil sōmōk /akeewiireenaan mpō pērēētuu aka korin. Kyoowēērō mēēliin choo kiiputiisyō nkōō araaray kwēēn asip sōmōk. Ātēpō pērēētuu aka araaray kwēēn langʼa ākōō pērēēt. 26 Āmii oor pērēētuus tōkōl. Kyaachirila meerat mu ēēnwoon, chēēlōsōōs, piich chēpō kōōrēēnyuun ākōō mpō piich walak, mu kōōrootin, mu suur kwēēn, mu araaray, ākōō mpō piich choo kuurēē keey tuupchōōsyēk. 27 Kyoopāyiisyō ākiilēy keey āmoorwēēy pērēētuus walak. Kiikwaaman piri nkōō maral akyaarukuutaanu keey. Kiikwaaman yoomēt āmu kiimootingʼēy sirooy choo yāmēy. 28 Aku kitas keey nkōō choochēē tōkōl, ku ā-iimchinii keey kitya wōloo tāstooy taay :kaaniiseen nkōō wōltō tōkōl. 29 Nēē miitō :chiich nyaa tawarar, ku aneen tawarar kitya, aku nēē mētō :piich kaaraneengʼwaangʼ, ku paanta āmētooy mpō. 30 Aku nēē āmārēy alas keey, ku ālāsēē keey tāwārāryēēnyuun. 31 Nkēt :Iriin nyoo loosunoot ākōy, nyoo paapaa Kiptaayaan Yēēsu Kiriistō kilē āmwooraa man. 32 Kiimii :chiich aka ngʼwēnyuu pāytooyiin Areeta nyoo kiiryoontooy Tamaskaas. Kimwooru :chiichoonēē kilē /kēēriip koopooruu kōōroonoonēē /sikeenaman, 33 /kiikuuchuutan nyuun soompur /akēēkoortoorēēnoon koongʼ nyoo kiimii tēēnkō nyēpō kōōroonoonēē. Achirilaa nyuun ēēruunēchiich.
121 Āmārēy atas taay alas keey mpō ntā mākōōnuuy kir. Akanyaan, atas taay angʼalaala ngʼoongʼuut ākōō tukun choo kiikungʼuutwoon :Kiptaayaan. 2 Ānkēt chiipō Kiriistō nyoo /kiikwoop kiwō im kēnyiis taman nkōō angʼwan choo kiikusiirto. Nēē kitākumii pōōrtanyiin ntā kiimoomii, ku moonkēt, aku nkēt :Iriin. 4 Ānkēt kilē kiiwō Paratisō akiteer ngʼal chēpō kwongʼuut choo mātingʼ /keemwa. 5 Āmuukēy alas keey akipō kiyoonēē ki-ira nkōō chiichoonēē aku moolāsēy keey nyuun akipō aneentee. Ālāsēy keey kipaat akipō tāwārēēryēēnyuun. 6 Mpō ntoolē alas keey ku mēēlē aneen sālwō āmu āmii āmwoorēy man. Aku ātāyēē keey nyoonēē simeepkaat :chiich kilē akaraam :aneen kusiir wōloo lēē kiyoo ā-irēy ākōō nyoo āmwoorēy. 7 Pō kwōngʼuut :ngʼoongʼuutēchoochēē. Kunyuun oo, simaalas keey ku /kiikutē kata pōōrtanyuun nyoo kiiyooku Syeetaani keepareenaan. 8 Kyoosoom Kiptaayaan kunyil sōmōk kilē kungʼustawaan kiyi. 9 Kumwoorwoon kilē, "Yāmiin :chamateenyuun āmu ōōw :kaamuukeenyuun nkōō wōloo mii :tāwārēēryō." Kunyuun, apaypay alas keey akipō tāwārēēryēēnyuun sikutēpō :kaamuukaa Kiriistō kipootoon. 10 Kiyoonēē nyoo iroon apaypayiit nkōō tāwārēēryēēnyuun, nkōō muulēt, nkōō ngʼal choo nyikiisēēn, nkōō usāt, nkōō nyaril aka tōkōl akipō Kiriistō. Āmu, nēē atawarar, ku paanoonēē yoo akiiloot. 11 Aneen sālwō āmu ālāsēy keey, aku akwaan choo kyaa-iraan āloosu keey nyoo kātoolooswoon. Mpō ntā moomuukēy a-ir kir aneentee ku maaneen manangʼ kusiir akwaaneek choo toroorēy keey kilē kāāyooytooyiik. 12 Kyaa-irwaak nkōō murtaar nyoo ōōw tukun choo ngʼuutuuy kilē aneen kāāyooytooyiin nyēpō man. Ki-iriisyō :tukun chēpō kwōngʼuut choo muukiisōōt kipaat ki-iriisyō nkōō kaamuukaa Iriin. 13 Kir nyoo maa-irwaak nyoo kyoo-irchi kaaniiseen walak ku moo-āpkook nyikiisin. Asoomook nyuun kilē ānyōōwoon kaat nkōō lēēluutyoonoonēē. 14 Aku aniin paannyēēnyi, āchēpoot āruutoowook nyēpō sōmōk amēēlē ā-irēy kunyikisiityook āmu kiyoo āmārēy ku mā tukuukwook aku āmārook ākwoonēēk. Mēēsiintoochinii :laakōōk sikiikwaak kir, aku sikiik :choo siintoochinii laakōōk. 15 Kunyuun apaypay kitya ākōōnu keey ākoopāyiisyēērēē tukuuchuuch tōkōl choo ātingʼēy akipō akwaan. Ara, nēē āchāmook :aneen kilē siiny oo, āchāmoon kiitēēn kipaat? 16 Ānkēt :akwaan kilē kiimaa-āpkook nyikiisin, aku muukēy nyuun /keemwa kilē kyaachireeriitwaa ākōōmēlmēēlook. 17 Ātēēpēy kilē oo, kiimēlmēēlook :pichu kyooyookwook? 18 Kyoosoom Tiitō kuchō wōloonēē, ākooyooku kuchō nkōō tuupchēē aka. Ara kiimēlmēēlook :Tiitō? Acha mālēē nyoonēē, āmu kupāyiisyēy nkōō Tiitō akukarkeey ātēpēēnyoon. 19 Āmuukēēkwaan āpkootēy kilē kumwoorēy ngʼaleechoochēē tōkōl keereetee keey. Mālēē nyoonēē mpō kiitēēn. Lēyyē, kiikungʼāloolwook ngʼaleechu kilēē kipāyitiin chēpō Kiriistō akēēnkēt kilē nkēt :Iriin. Choo kutuupchō, kir aka tōkōl nyoo ku-irēy, kēē-irēy kilē kēēkiilook. 20 Ātingʼēy kāwāriisyō kilē nēē āchōōn ku āmuukēy ānyōōrwook ku moomii ātēpiisōōt kilēē wōloo āmārtooyaa, aku moopāypāchiniikwaan kiyoo āmwoorwook. Āwārēy ānyōōrwook ātingʼēē keey kwiintaan ākōō ngʼatkoongʼ, ānārēēchinii keey, aku akwaan suuy, āmuulēy keey, ā-āmēē keey seemseem, ākoolāsēy keey aku kyoochuunchuunnyō. 21 Ātingʼēy kāwāriisyō mpō kilē nēē koo areer awarakee ku āpkoon :Iriin āchō ngʼwēny nkōō taayuungʼwoongʼ, aku ā-iimēy keey akipō piich chaa chaangʼ choo kiisip ku-ir ngʼōōki akutoomō kuwāliisyō kumētō takal.
131 Lēkuuy :ruutoortanyuun nyēēnyi nyēpō sōmōk ākoochoonēy āwoongʼēy ngʼal tōkōl. Mwoorēy siruut kilē, "/Kuuwoongʼēy ngʼal nēē kaakumwooru :piich ārēēny ntā ku sōmōk akichoomnyō ngʼaleekwaak." 2 Kyoosip ariirchi akwaaneek choo kii-irēy ngʼōōki paani kyooruutoowook nyēpō ārēēny. Ā-ōōchinii keey nyuun āriirchinii akwaaneek nkōō mpō walak choo irēy ngʼōōki. Āmwoorwook kilē nēē koo awarakee ku mooriirēē chiich aka tōkōl. 3 Yoonēē yoo ārōōtēēkwaan kilē āngʼālooltoochinaa Kiriistō. Ākoorootēēkwaan kilē matawarar inyeentee aku nyuun pāyisyēērēē kaamuukeenyiin kurwoochinii kipngʼōōkiis. 4 Kiitawarar inyeentee paani /kiikukorkootēy nkōō kimurtooyoon, aku māngʼiisyēy paanyēēnyi nkōō kaamuukaa Iriin. Kichaan mpō tāwārārō, woloo nyuun kēēmii nkōō Kiriistō kēēpāyiisyēērēēchaan kaamuukaa Iriin. 5 Kunyuun oo, iroo keey akiityam keey nēē pō man kaaraneengʼuungʼ. Aku nēē roo kilē mēētingʼēy Yēēsu Kiriistō ku kiiput. 6 Ātingʼēy man kilē āsowuukwaan kilē mākuuputyēēchaan. 7 Kusooyēy Iriin kilē maa-ir kir nyaa ra. Māpō koomānuut nēē kuusilta ntā kēēputyō, aku kumārēy kilē a-irēēkwaan kir nyēpō man. 8 Mēēmuukēē keekarta man, aku kēēryoongʼō man. 9 Kupāypāyō nēē kyookiilyēēkwaan mpō ntā lēē yoo kichaan tāwārārō. Kusooyēēchaan kilē āsopchō. 10 Āsirēy ngʼaleechu kitoomō āchō, si nēē āchōōn ku māchoo-ārāsyook nkōō kaamuuka nyoo kiikōōnān :Kiptaayaan. /Kiikukōōnān kaamuukaanoonēē ākiilēēnook, mēēlē aryeeweenaak. 11 Ēē choo kutuupchō, ngʼāl chēpō lēt ku chu: Āpāypāyiituu ākoosāpyō, āchēēriisyō akakaalyan. Kukōōnook nyuun :Iriin choomnyoot nkōō kaalya. 12 Ātookwēēsēy keey nkōō pāypooyō. Tookwēēsook :piich chēpō Kiriistō tōkōl nkōō wōli. 13 Lēyyē, kanya kutēpō kupootook tōkōl pēēruur nyēpō Kiptaayaan Yēēsu Kiriistō, chamataa Iriin ākōō ramtaar nyēpō Toomirmiiryeenyiin.