1 Tiimōti

¹ Aneen nyi Paawulō kāāyooytooyiintoo Yēēsu Kiriistō nyoo kiilēwēnān :Iriin Sāruuniintēēnyoon kupunuunō Yēēsu Kiriistō nyoo kuumoongʼuuy. ² Āsiruun inyēēn Tiimōti nyoo āchāmiin kilēē wēēriinyuun nyoo /kuurānēy ākēēpāyiisyēēchinii tōkōl Iriin. Kuupēēruurin :Paapa Iriin ākōō Kiptaayaantēēnyoon Yēēsu Kiriistō. Kuriireeniin akiinyōōru kaalya. ³ Kilēē yi kyoomwooruun, paani kyoomii āwēētii Makeetoonnya, ku mārēy itēpēē Ēpēēsō siimwoochi piich kukaaman keey meeneet tukun choo mā pō man. ⁴ Ikany kukaaman keey kumārārchi piich siiyēēn chēpō Yāwuutik chēpō kēny choo mēētoorētēy kir aka tōkōl. Āpuuy :ngʼaleechoochēē kwiintaan. Mēētoorētēy piich kumāngʼiisyō sopoon nyēpō man akutiirō keey Iriin. ⁵ Nēē kumii kēē-isuuy piich, kēēmārchinii kunyōōru choomnyoot nyoo chōōnēē moo nyoo rēēl, aku-ir kir nyoo nkēt kilē pō man akutiirō keey Iriin. ⁶ Kiikuchuunnyō :piich walak maakutiirēē keey Iriin akunam ngʼal choo mēētoorētēy kir. ⁷ Mārēy :pichoochēē kilēku koonēēt chēpō ngʼātuut amēēnkēt nyuun kir nyoo mwoorēy mpō ntā irtooy keey kilē kuunkēt. ⁸ Kiinkēt kilē kāroomō :ngʼātuut, nēē /kupāyiisyēērō nkōō oor nyaa karaam. ⁹ Kiinkēt mpō kilē /maakukōōnu ngʼātuutēchu akipō piich choo tiliilēēn. /Kiikukōōnu akipō piich choo mā tiliilō ākōō choo māchāmēy /keepayta. Pō :ngʼātuutēchu piich choo mēēwārēy Iriin ākōō kipngʼōōkiis. Pō :ngʼātuutēchu piich choo rumēy sikiikwaak ākōō piich walak. ¹⁰ Pō murēn nyoo rwēēy nkōō cheepyooso nyoo mā cheepyooseenyiin ntā ku cheepyooso nyoo rwēēy nkōō murēn nyoo mā poonteenyiin. Pō murēn choo āpēy keey ākōō piich choo chōōrēy piich. Pō piich choo mēlmēēliisyēy ākōō choo toomchinii piich ngʼal ākōō kir aka tōkōl nyoo mānāmēy keey nkōō koonēētuut chēpō man. ¹¹ Miitō koonēētuutēchoochēē lōkōōy choo kāroomēēn choo /kiikukōōnaa a-amtaata. Kiipkoonēē :lōkōōyichoochēē pō kwōngʼuut wōloo mii Iriin nyoo loosunoot. ¹² Ā-ōōchinaa Kiptaayaantēēnyoon Yēēsu Kiriistō kōōnkēy nyoo kiikōōnān kaamuuka, āmu kiirootaa kilē aneen chiich nyoo /kutiirēēnoon keey. Kiilēwēnān ā-irchi pāyiisyeenyiin, ¹³ mpō ntā kyoongʼāloolēēyaa inyeentee nkōō oor nyaa ra ākoonyāriilootēy piichiich. Kiriireenaan :Iriin nkōō yoonēē āmu kiimoonkēt kir nyoo kyoo-irēy akiitoomō aran inyeentee. ¹⁴ Kiinyōōwaa :Kiptaayaantēēnyoon kaat, āmu kiichamaa, mpō ntā kiimēērookēē /keechaman. Kii-iran acham inyeentee ākootiirēē keey. ¹⁵ Pō man ngʼālyoontooni aku karaam kuuran :chiich aka tōkōl: Kiichōōnēy :Yēēsu nyoo Meesaaya ngʼwēny kusāru kipngʼōōkiis. Aku aneen :akoongʼo nkōō pichoochēē nyoo kyoochō kipngʼōōkiyoon nyoo mātingʼ /keemwa! ¹⁶ Kiiriireenaan nyuun :Iriin nyoo kyoochō kipngʼōōkiyoon kwōngʼuut kusiir piich tōkōl choo kiikulēēlchi inyeentee sikungʼuutuunō :Yēēsu Kiriistō yoonēē murtaareenyiin tōkōl. Nēē muukēē /kēēsārwaa ākoonyōōru sopoon nyēpō ākōy, kuumuukēē mpō /kēēsāru piich walak. ¹⁷ Kunyuun, loosunoot akuukoonyitoot :Iriin nyoo pāytooyiisyēy ākōy nkōō ākōy, aku nyoo mākuurōōtēy. Lēē nyoonēē. ¹⁸ Wēēriinyuun, Tiimōti, āmwooruun ngʼaleechu kutuup keey nkōō ngʼal choo kiikumwooruun :ōōrkooy. Nēē tuupēy ngʼaleechoochēē, kuutoorētiin sii-ama pooryoot nyaa karaam ¹⁹ akiitas taay itiirēē keey Iriin akii-ir kiyoo inkēt kilē karaam. Kiikutay :piich walak ku-ir kilēē nyoonēē ākiikupētyō. ²⁰ Walak nkōō pichoochēē kiiku-ir kilēē nyoonēē ku Umeenaayo ākōō Aleekisaanta. Kyootētō pichoochēē kupa ēēruun chēpō Syeetaani sikupa kusōwu kilē mā maraat kungʼalaala Iriin nkōō oor nyaa ra.

¹ Ngʼālyoon nyuun nyēpō taay ku āmwooruun kilē isoochi piich tōkōl. Paani imii isooyēy, iriirchi Iriin kuriira akwaaneek akiimwoochi kōōnkēy. ² Makaat /kēēsoochi pāytooy nkōō kāāntōōy sikēēmāngʼiisyēē ākōō kaalya ākōō tāloosyō ākēēnāmchi keey Iriin ākēēmāngʼiisyō māngʼoot nyoo /kuukoonyitēēch. ³ Karaam nēē ku-ir kilēē nyoonēē, akuupāypooyēy :Iriin, Sāruuniintēēnyoon ⁴ āmu mārēy kilē /kēēsāru piich tōkōl akusōwu ngʼālyoon nyēpō man. ⁵ Āmwooraa kilēē nyoonēē āmu Iriin ku ākoongʼo, akimii :chiich ākoongʼo nyoo tuuyēēch ākōō Iriin. Nyoonēē ku Yēēsu Kiriistō. ⁶ Kiitētō :Yēēsu sopoontanyiin sikusāru piich tōkōl. Ki-ira :ngʼālyoontooni nkōō pērēētuus choo yāmootēēn. ⁷ Nkanyi /kiikēēlēwēnān nyuun a-amta ngʼaleechoochēē kilēē kāāyooytooyiin. Kiyi āmwooraa ku ngʼālyoon nyēpō man, mā ngʼuurnan. Ānēētaa piich choo mā Yāwuutik ātiirēēy keey Iriin ākoomwoorēy ngʼal chēpō man. ⁸ Mākootēēn :murēn nkōō ārii aka tōkōl kusa, kwoopēy ēēruun im choo tiliilēēn, mānyālāchi keey ntā kukwiintoochi keey. ⁹ Kumārēy :chēēpyōōsōōy kuulookēy keey nkōō oor nyaa karaam. Makaat kuulookēy sirōōy chēpō koonyit akutingʼēy ātēpuut choo kāroomēēn. Māmārēy kuulēētēy puut nkōō oor nyoo māpō koonyit. Māmārēy mpō kuulookēy cheepkarneet nyēpō taapu, sanay ākōō sirōōy choo /kyoolēē rōōpiyō chaa chaangʼ. ¹⁰ Ku maraat nkōō :chēēpyōōsōōy choo kiikunāmchi keey ngʼālyoontoo Iriin kutingʼēy ātēpuut choo kāroomēēn. ¹¹ Kumārēy kuuneet keey :cheepyooso aka tōkōl ngʼal nkōō oor nyēpō kaalya akwoop keey ngʼwēny. ¹² Machamaat :cheepyooso kilēku koonēētiintoo ngʼālyoontoo Iriin ntā kupayta saanteenyiin. Mārēy kutēpēē nkōō oor nyēpō kaalya. ¹³ Āmwooraa kilēē nyoonēē, āmu Aatam nyi kiisip ku-ir :Iriin kupōk, nēē mii lētuun, ku-ir Aawa. ¹⁴ Aku kii mā Aatam nyoo kiimēlmēēl :Syeetaani, kii cheepyoosee nyi /kiikuumēlmēēl ākōy ku-ir ngʼōōki. ¹⁵ Makaat :cheepyooso kuriip koonyiin ākōō laakōōchiich nkōō oor nyaa karaam. Nēē murta akutiirō keey Iriin, akutingʼēy chamat, akutiliil, akuriipēy keey, kunyōōruuy sopoon nyēpō ākōy.

¹ Pō man ngʼālyoontooni. Nēē mārēy :chiich kuuntōrōōrchi piich chēpō Kiriistō, ku kaakulēwēnchi keey pāyit nyēpō koonyit. ² Ku maraat nyuun, :kāāntōōyiintoonoonēē ku chiich nyoo mātingʼēy lēēluut. Mārēy ku chiich nyēpō cheepyooso ākoongʼo aku chiich nyaa chikanaat, nyoo nkēt kiyoo irēy, nyoo koonyitoot, nyoo tookēy too aku chiich nyoo muukēy kuunēētiisyō. ³ Mā maraat ku chiich nyoo lēē kipōōkityoon ntā ku kipriiriyoon. Makaat ku chiich nyoo tala amākwiintoochinii chiich, aku mā chiich nyoo chāmēy :rōōpiyō. ⁴ Makaat ku chiich nyoo nkēt kuriip katanyiin kukaraam. Mārēy kuuro kilē koonyitēy akutēērēy inyeentee :laakōōchiich. ⁵ Nēē mēēmuukēy :chiich kuriip katanyiin kukaraam, oo, kuumuukēy kuriip kilē nee kaaniisaa Iriin? ⁶ Mā maraat /kēēlēwēn chiich nyoo toomō kukiil nkōō ngʼālyoontoo Iriin kuuntōrōōrchi piich walak. Nēē /kilēwēn chiich nyoo lēē nyoonēē, kuumuukēy kulas keey, /Kēērwoochi nyuun kilēē wōloo kiikuurwoochiintō Syeetaani. ⁷ Makaat kāāntōōyiintoonoonēē ku chiich nyoo koonyitoot nkōō wōloo mii :piich choo toomō kuuran Iriin simachuut ngʼērēpoo Syeetaani /akeengʼalaala nkōō oor nyaa ra. ⁸ Makaat :toorētiipō piich chēpō Kiriistō ku piich choo koonyitootēēn choo māsākēy ngʼalyap, mā kipōōkitiis, ama piich choo chāmēy :rōōpiyō. ⁹ Mārēy kuukiilchi keey ngʼālyoon nyēpō man nyoo /kiikēēngʼoongʼwēēch aku-irēy kir nyoo nkēt kilē pō man. ¹⁰ Kutoomō /keekwar kilēku toorētiipō piipō Kiriistō, kumārēy /keetyamta. Ku nēē /kaakeero kilē mātingʼēy ngʼālyoon, /kēēchāmchi kilēku toorētiik. ¹¹ Mārēy :mpō chēēpyōōsōōy choo lēē toorētiik ku piich choo koonyitootēēn, choo māmwoorootēy seemseem. Mārēy ku chēēpyōōsōōy choo chikānootēēn /ākēērānēy nkōō kir aka tōkōl. ¹² Makaat toorētiik kutingʼēy cheepyooso ākoongʼo aku chiich nyoo riipēy laakōōchiich ākōō katanyiin nkōō oor nyaa karaam. ¹³ Chiich aka tōkōl nyoo kaaku-ir nyaa karaam kuuloongʼuuy keey nkōō wōloo mii ngʼālyoontoo Iriin akunyōōru koonyit akukiil nkōō man nyēpō Yēēsu Kiriistō. ¹⁴ Kaasiruun ngʼaleechu ākoopkootaa soonyeen nkōō moonyuun kilē lēēkit āchō wōloonēē, ¹⁵ si nēē koo ratan :ngʼala nkōō wōli, ku ānkēt wōloo maraat kutēptō :piich chēpō Kiriistō. Pichoochēē ku choo kiikwar :Iriin nyoo sopoot kilēku kaaniiseenyiin. Pichoochēē ku kiptālēny aku tiiriir choo tiirēy man. ¹⁶ Ngʼālyoon nyēpō man kilē ōōw :kiyoo kiikungʼoongʼwēēch :Iriin ku nyi: /Kiikunam inyeentee kilēē chiich aka tōkōl, kingʼuutu :Toomirmiir nyoo Tiliil kilē pēērēy keey. Kiiro :malaykeen. /Kiikyaamtaata inyeentee nkōō kōōrootin. /Keeran inyeentee mu ngʼwēny, /ākēē-āp kiwō im wōloo mii :tōrōōrin.

¹ Ngʼuutuuy :Toomirmiir nyoo Tiliil kutooku nkōō pērēētuus choo pkoonēy kilē chuunnyēērēē :piich ngʼālyoon nyēpō man akutuup ngʼaleepō :toomirmiirēy chēpō ngʼuurnan ākōō koonēētuut choo pkoonēē wōloo mii toomirmiirēy chaa raacheen. ² Mēlmēēliisyēy :pichoochēē amaakuunkēt ngʼuurnan ākōō man. ³ Rēētēē :pichoochēē piich kwoopiisyō. Mwoochinii piich kutaya keey kwoomēy tukun walak mpō ntā kii-irēy :Iriin āmiisyō kilē kutaak :piichiich choo nkēt man akwaam kumwoochinii inyeentee kōōnkēy. ⁴ Āmwooraa kilēē nyoonēē, āmu karaam :kir aka tōkōl nyoo ki-ir :Iriin. Māmārēy /keetay kir mpō ākoongʼo nēē /kutookēy /kēēmwoochinii Iriin kōōnkēy, ⁵ āmu irēy :ngʼālyoontoo Iriin ākōō saayeet :kir aka tōkōl kutililiit. ⁶ Nēē ngʼuuti tuupchēēnichooch ngʼaleechu, ku kee-ir pāyiisyoo Yēēsu Kiriistō nkōō oor nyaa karaam. Itiirēē keey ngʼālyoon nyēpō man nyoo /kiikuuneetin nyoo ituupēy. ⁷ Itayee keey siiyēēn chēpō sōlwoonti choo mānāmēy keey nkōō araa Iriin. Mārēy ineet keey itēpēē kilēē wōloo mārtooy :Iriin. ⁸ Nēē ineet ichuulaata pōōrtāngʼuungʼ, kuutoorētiin nkōō ngʼwēny, ku nēē tēpēē nyuun kilēē wōloo mārtooy :Iriin, ku sāruun nkōō sopoon nyēpō ngʼwēny ākōō nyēpō kōōrēē nyoo chōōnēy. ⁹ Pō man ngʼālyoontooni aku karaam kuuran :chiich aka tōkōl. ¹⁰ Kiikiilēēchaan keey kēē-irēy pāyit kwōngʼuut ākēēnyārilsōōt kilē sikuuran piich ngʼālyoon nyēpō man. Kitiirēē keey Iriin nyoo sāpoot nyoo inyeentee ku Sāruuniin nyēpō piich tōkōl choo kiikutiirō keey inyeentee. ¹¹ Makaat ikiil ngʼaleechoochēē paani inēētiisyēy. ¹² Kumeekany kureengʼin :piich āmu teemanangʼ. Inyēēn nyuun nyoo mārēy kuurōōtēēniin :piich tōkōl choo kiikuuran ngʼālyoontēē, wōloo ingʼālooltooy ākōō wōloo itēptooy, wōloo ichāmtooy piich, wōloo irāntooy Iriin, ākōō tiliilin nyoo itingʼēy. ¹³ Ipāyiisyēērēē pārooyin nyoo mii ku toomō a-itu, isōōmānchi piich ngʼālyoon, i-āmchinii akiinēētēy. ¹⁴ Kimeereengʼ kaamuukaanoonēē kiikōōnin :Iriin kupunuunō kiyoo kiimwooru ōōrkooyoontō aka paani kiikōnōōriin :kāāntōōy chēpō piich chēpō Kiriistō ēēruunēkwaak. ¹⁵ Itē keey tukuuchoochēē akiikiilchi keey kilē siiny sikuuro :chiich aka tōkōl wōloo itāstooy taay. ¹⁶ Makaat iriip sāpoontāngʼuungʼ akiiriip ngʼal choo inēētēy. Imurtoochi ngʼaleechoochēē āmu nēē i-ir kilēē nyoonēē, inyōōruuy nkōō piich choo inēētēy sopoon nyēpō ākōy.

¹ Āmēē-ārāsi pooyoon nēē mii ingʼāloolchinii, ingʼāloolchinii kilēē paani ingʼāloolchinii āpoongʼuungʼ. Ingʼāloolchi wēēchin kilēē wēēchiikwook. ² Nēē chēēpyōōsōōy, i-āp aka tōkōl kilēē eeyeengʼuungʼ. Nēē tiipin, i-āp akwaaneek kilēē tiipiikwook akiitikoon nkōō oor nyoo tiliil. ³ Makaat /kēēriip chēēpyōōsōōy choo lēē mōsōōk choo moomii piich choo riipēy. ⁴ Ku nēē tingʼēy :cheepyooso nyoo lēē mōsōk laakōōy ntā ku kōōkōtiin, ku maraat :laakōōchoochēē kuuwar Iriin akuriip sikiikwaak, kuukōngʼwaangʼ ntā ku kōōkōngʼwaangʼ. Nēē-ir kilēē nyoonēē, kumii kurookuuy kiyoo /kiiku-irchi akwaaneek. Ngʼālyoon nyoonēē nyoo chāmēy :Iriin. ⁵ Cheepyooso nyoo kiikungʼātu inyeentee ākityōōn, amoomii :chiich nyoo tākuriipēy, kitiirēē keey Iriin kipaat. Sooyēy pērēēt ākōō langʼa kuriirchinii Iriin. ⁶ Ku cheepyooso nyoo lēē mōsōk nyoo kiicham tukun chēpō lala, ku kiikima :nyoonēē kusopoot. ⁷ Makaat imwoochi piich chēpō Iriin ngʼaleechu, simāmwoorēy :chiich ngʼal chaa raacheen akipō akwaaneek. ⁸ Chiich aka tōkōl nyoo mēētoorētēy tilyayiichiich aku nyēpō taay piich chēpō katangʼwaangʼ, ku kaakutay ngʼālyoontoo Iriin. Ra :chiichoonēē kusiir chiich nyoo toomō kuuran ngʼālyoontoo Iriin. ⁹ /Sikēē-ititō cheepyooso nyoo lēē mōsōk pichu kuutoorētēy, ku maraat kutingʼēy kēnyiis tamanwook lo ku tas taay, amaawō kō aka. ¹⁰ Makaat ku cheepyooso nyoo tookunoot nkōō pāyiisyōōn choo kāroomēēn kilēē mpō kuriip laakōōchiich nkōō oor nyaa karaam, kutaak too, kuutoorēt tuupchēēnik walak akuutoorēt piich choo :nyārilsōōt. Makaat nyuun kuukiil keey ku-ir tukun choo kāroomēēn. ¹¹ Mamakaat /kēē-ititō chēēpyōōsōōy choo lēē mōsōōk choo tākumēnkēēchō. Āmwooraa kilēē nyoonēē, āmu nēē pāyu akwaaneek mākuut chēpō pōōr, kumar kilē tākwoopān akumētō kuukiilchi keey pāyiisyoo Kiriistō. ¹² /Kēērwoochi nyuun akwaaneek āmu kiikupit kiyoo kiiyoomiis Iriin kilē irchinii. ¹³ Kiicham :chēēpyōōsōōchoochēē kuuluumootō koorin kuupootootō saayitiisyakwaak. Mā nyoonēē kipaat, mwoorootēy seemseem kuuchuutootēy keey ngʼal choo mā pootō akungʼāloolootēy ngʼal choo mēērookēē /kēēmwoorēy. ¹⁴ Kunyuun, āmwoochinaa chēēpyōōsōōy choo lēē mōsōōk choo tāku mēēnkēēchō /kēē-āp, kunam laakōōy akuriip kooriikwaak simānyōōru :Syeetaani pārooyin kungʼalaaleeneech nyaa ra. ¹⁵ Āmwooraa kilēē nyoonēē āmu kiikuwāliisyō :walak kupa wōloo mii :Syeetaani akupa kutuup ngʼaleechiich. ¹⁶ Ku nēē mii :piich choo kiikucham Iriin akutingʼēy nkōō kooriikwaak chēēpyōōsōōy choo lēē mōsōōk, ku mārēy kuutoorēt chēēpyōōsōōchoochēē nkōō oor aka tōkōl kumāmēti nyikiisinoonēē kaaniisa. Nēē kaaku-ir kilēē nyoonēē, kuutoorēt :kaaniisa mōsōōkik choo moomii chiich nyoo toorētēy. ¹⁷ Makaat /kēēkoonyitēy /ākēētoorētēy kāāntōōy choo ntōrōōrchinii kaaniisa nyaa karaam, kitya ku choo āmtooy ngʼālyoon akuunēētēy. ¹⁸ Āmwooraa kilēē nyoonēē, āmu mwoorēy :siruut kilē, "/Mākurēētēē sikiryō kwaam suus nēē kāsānēy tukun." Akumwoorēy mpō kuureer kilē, "Rookēē :chiich nyoo ka-ir pāyit kunyōōru kir." ¹⁹ Ameeran ngʼālyoon nyoo /kākumwooru /keengʼalaala kāāntōōyiin nyaa ra, ākōy nēē kaakumwooru :sōwi choo lēē ārēēny ntā ku sōmōk kilē lēē nyoonēē. ²⁰ Nēē ir :chiich ngʼōōki, ikar koongʼ kutēērēy :piich, sikuuwāriisyō :chuuchō walak. ²¹ Kunyuun oo, Tiimōti, āmwooruun nkōō taayuu Iriin ākōō nyēpō Yēēsu Kiriistō ākōō mpō nkōō taayuu malaykeen choo lēwēnootēēn, kilē ituup ngʼaleechoochēē nyoo mēēlēwēnēy chiich. Māmārēy icham piich walak kusiir walak. ²² Amēēchōōchi ikonoor chiich ēēruunēkuuk paani /kulēwēnēy ku-ir pāyiisyoo Iriin, ameekany keenaamteen :ngʼōōki chēpō piich nēē ir piich ngʼōōki. Itēpō itiliil. ²³ Mēērēēy pēr kipaat, mārēy irēēy tiipaay tukutēēn akipō kōōrōōy pō moo nyoo iimiin ākēny. ²⁴ Mēēmuukēē ku-ungʼiisyō :ngʼōōkipō piich walak. Kisip /kēērōōtēy kilē weel kitoomō keepa /kēērwoochi. Ku chēpō walak, ku-ungʼootēēn ākōy pērēētuuni pō lēt kipa /kēērwoochinii. ²⁵ Nkōō oor nyoo lēē nyoonēē, kuusip kutookuuy :kāroomin nyēpō pāyiisyōōn chēpō piich walak. /Kungʼoongʼuuy mpō :choo tāku ungʼootēēn pērēētuu aka.

¹ Piich choo kiikutiirō keey Iriin aku ōōtwook, ku maraat kuukoonyit mōkōrēēkwaak /simakungʼalaala kaarinaa Iriin nkōō oor nyaa ra nkōō mpō koonēētuutēchiich. ² Ōōtwook choo kiikutiiro keey mōkōrēēkwaak Iriin, kumāpārooyin nyoonēē nyoo irēy akwaaneek kumēēkoonyit mōkōrēēchoochēē. Karaam kuukiilchi keey pāyiisyēēngʼwaangʼ, āmu piich choo toorētēy :pāyiisyōōnoonēē ku piich choo kiikuuran ngʼālyoontoo Iriin /ākēēchāmēy. Ngʼal choochēē choo rookēē inēētēy akii-āmtootēy. ³ Nēē neet :chiich ngʼal choo mānāmēy keey ākōō koonēētuut chēpō man chēpō Kiptaayaan Yēēsu Kiriistō, ntā kuuneet kir nyoo mā-irēy piich kupa wōloo mii Iriin, ⁴ ku kiikuulaampuus chiichoonēē :lasataa keey āmēēnkēt kir. Kiicham :chiich nyoo lēē nyoonēē ngʼal chaa chaangʼ ākōō kwiintaan. Āpuuy :ngʼaleechoochēē ngʼat koongʼ, syalat, kungʼalaala keey :piich nkōō oor nyaa ra, ākōō kaapkootuut chaa raacheen. ⁵ Chuunchuunsōōt :mētēwēyiipō piich akipō kāāpkootuut chaa raacheen choo tingʼēy :pichoochēē. Pichwēēchu chu /kiikeesara ngʼālyoon nyēpō man akuupkootēy kilē ālēē nēē cham :chiich kutuup araa Iriin kunyōōru mōkōrnoonti mu ngʼwēny. ⁶ Ku nēē nāmchi keey :chiich pāyiisyoo Iriin, amātingʼēy ngʼat koongʼ nyēpō tukun, kunyōōruuy mōkōrnoonti nyoo ōōw nyēpō kipsēnkwēt. ⁷ Āmwooraa kilēē nyoonēē āmu moomii kir nyoo /kiikunamteech, āmoomii kir nyoo kwoopēy paani kakumēērō. ⁸ Ku nēē kunyōōru kir nyoo kaku-am ākōō kir nyoo kakuulaak, keekany kuyameech :choochēē. ⁹ Piich nyuun choo wāsēy tukun kilē sukumokornoon, kuwiirchinii :ngʼaleechoochēē kootyāmuut akurat. Irēy :ngʼaleechoochēē ku-ir tukun chaa chaangʼ chēpō sālwoonti akunyōōru ngʼat koongʼ nyēpō tukun chēpō ngʼwēny. Irēy :ngʼaleechoochēē piich kupētyō akumēērō. ¹⁰ Āmwooraa kilēē nyoonēē āmu rāyiityō nyoo ōōw kuchōōnēē chamataa rōōpiyō. Piich choo yuuchinii rōōpiyō ku kiikuchuunnyō nkōō wōloo mii ngʼālyoontoo Iriin akumārchi keey ngʼwoonin nyoo mātingʼ /keemwa. ¹¹ Ku inyēēn nyoo ipō Iriin, ku mārēy i-istoorēē keey wōloo mii :ngʼaleechoochēē akiituup sopoon nyoo tiliil, ināmchi keey Iriin akiitiirō keey inyeentee, ichāmēy piich walak, imuurtoochinii ngʼal akiitālāyiituuy. ¹² I-am pooryoot nyaa karaam akipō ngʼālyoontoo Iriin. Inkēt kilē kiikuurin :Iriin inyōōru sopoon nyēpō ākōy. Kunyuun, ikiilchi keey sopoontonoonēē kiiran :inyēēn kutēērēy :piich chaa chaangʼ. ¹³ Nkōō taayuu Iriin nyoo tēnii kir aka tōkōl sopoon, ākōō mpō nkōō taayuu Yēēsu Kiriistō, nyoo kiiran nkōō taayuu Pōōntyō Pilaato kilē inyeentee ku Meesaaya, āmwooruun kilē ¹⁴ ikiilchi keey ngʼālyoontoo Iriin. Meekany inyōōru tisya ntā /keengʼalaaleeniin nyaa ra. Iriip keey kilēē nyoonēē ākōy pērēētuu nyoo chōōnēy :Kiptaayaantēēnyoon Yēēsu Kiriistō. ¹⁵ Mutuuy inyeentee :Iriin nkōō pērēētuunyiin nyoo kiikulēwēn. Tōrōōroot :Iriin aku inyeentee ākityōōn :pāytooyiin nyoo moomii aka. Inyeentee pāytooyiintoo pāytooyiik aku mōkōryoontoo mōkōrō. ¹⁶ Iriin ākityōōn :nyoo māmēērēy ākōy, akumāngʼiisyēy nkōō lēpooyin nyoo mākuurōōtēy. Moomii :chiich nyoo kiikuuro Iriin ntā nyoo muukēy kuuro. Lēyyē, kuukoonyitō :Iriin akupāyta ākōy. Lēē nyoonēē. ¹⁷ Imwoochi choo tingʼēy mōkōrnoonti nkōō ngʼwēny kilē malas keey amātiirō keey tukuuchoochēē. Tukun :tukuuchoochēē choo /mākiinkēt taay ākōō lēt. Kir nyoo maraat ku-ir ku kutiirō keey Iriin nyoo kōōnēēch kir aka tōkōl kuyameech, aku-irēēch :tukuuchoochēē kēēpāypāyiituu. ¹⁸ Imwoochi pichoochēē kupāyiisyēērēē rōōpiyēēkwaak ku-ir tukun chaa chaangʼ choo kāroomēēn, kilēku chēērēēlmoo, akichāmēy kurāmtooy tukun ākōō piich walak. ¹⁹ Nēē ir kilēē nyoonēē, ku kaakuusiintoochi keey mōkōrnoonti nyoo tiirēē keey mu kōōrēē nyoo chōōnēy, sikuukiilchi keey sopoon nyēpō man. ²⁰ Tiimōti, koomwooruun kilē iriip kir aka tōkōl nyoo kiikukōōnin :Iriin. I-istoorēē keey kwiintaan ākōō ngʼal chēpō sālwoonti nkōō wōloo mii :piich choo lāsēy keey kilē tingʼēy ngʼoroomnyō. Mā ngʼoroomnyō nyoonēē nyēpō man. ²¹ Irēy keey :pichoochēē kilē ngʼoroomō ākiikuchuunnyō nkōō wōloo mii ngʼālyoontoo Iriin. Kuupēēruurook nyuun :Iriin.