Tiitu

Warakha

ya Paawulu amwaatikhelaka

Tiitu

Salamu

¹Miiyo Paawulu, karumeya wa Nluku na aswihaapa wa Yinsa Al-Masiihu khwa oweettana ananthawuliwa a Nluku nkatthi wa amini yoori ajuwe haakhi eniwettanaaye muukemaani; ²amini na ojuwa nchina la nroromelo khwa ohaayi wa mileele, opule Nluku woohihati, ahitiyeeyo khapulathi olumwenku ohinompiwe. ³Khwa wakathi khaamili, ye atana nuuru khwa nttakhuzi lawe monkoni wa tafusiiri kinkheleliweeyo khwa oruma wa Nluku, Namuusuru eetthu.

⁴Kiniwaatikhela weeyo Tiitu, mwanaka weekhweele khwa amini yeetthu fooshi:

Rehema na heeri ya phantte ya Nluku Paapa na ya Yinsa Al-Masiihu, Namuusuru eetthu.

Khaazi ya Tiitu nti wa Kereeta

⁵Etthu kuulikheliyeeyo nti wa Kereeta ti yoori weeyo wiikhazele vitthu zisaleliyeezo, na owaathawaze attunkhulu a ojama wa Nluku wakhula sitati nkhama etthiipo miiyo kuunozeliyeeyo. ⁶Nttunkhulu aya oto ona ya wiiya ntthu woohiina paathuli, nlume wa muukha mmote paasi na eeyane aana awaamineya oohiretti vitthu zootakhala ama okhijili. ⁷Mwaasa wa wiiya namapweheliwa wa khaazi ya Nluku, nttunkhulu nwulu wa ojama wa Nluku ona ya wiiya ntthu woohiina paathuli, woohijikhupali, woohiwalaali, woohihapaliwi, woohihusuti, wala wontuvela fwayita yohiiyi ya shariya. ⁸Ila ona yawiiya ntthu woomakeleya, swaahipu wa zooshapweya, wawiitthaala, nashariya, wa akhili, woosuluheya, wonshututela Nluku, woojikheeti mweenyewe ⁹na ona ya okholelela wookhomaalavo nttakhuzi la waamineya, khwa nanna asomisiweeyo, yoori eeyane makhaamu a owaalipisela azuwakhe khwa mwentto wooshapweya na owaakheeti apale anshinttananaaye.

¹⁰Maana awaapho alolo enkeene, anamattakhula na anamattettekha, haaswa-haaswa apale alankhiyeeyo nkhuntti ya anamakhiriya. ¹¹Enihithajiya owaanyamaza, maana antta owaatapanya ajama ooshi, asomisaka vitthu zoovonyeya, yoori asala apatthela nzurukhu wakhula nanna. ¹²Mmote wa manapiyu waya mpakha ofiyelela olupa yoori: “Atthu Akereeti, anamahata, anuupuwa nkhama nyama za ntthuttu, oviliwa na osokho.” ¹³Oshaahiti aya opo pi wa ookhweele. Nakataalikha owaashowere na kuvu, yoori eeye ookhomaala nkatthi wa amini, ¹⁴na ohisiileze hantisi za mayaahuuti wala oruma wa anaatamu apale ankhijilelaaye haakhi. ¹⁵Vitthu zooshi pi za oottakasiwa khwa atthu apale eeyiye oottakattha, ila khwa atthu apale ahiiyeeni oottakattha na ahiiyeeni mamuumini khayiivo etthu yoottakattha. Maana waaza shawuri zaya na akhili zaya zatapanyeya. ¹⁶Yo antukhuru yoori aninjuwa Nluku, ila mwaasa wa thwapiya zaya aninkatthala, tiito eeyiyeeyo oohifwayi, anamakhijili na oohisuhi khwa khaazi yooshi yooshapweya.

Mwentto wa haakhi

¹Ila weeyo, olupe epile ziriye nkatthi wa masomi oolotteya. ²Owaasomise alume awuuluvala yoori eeye atthu oojiitthaaza, ooshitaheya, aakhili, na okhomaala nkatthi wa amini, mpheta na oovilela.

³Na aakha apale awuuluvala owaasomise etthiipo eeyane meekhazi oolotteya, ahiiye atthu oowaatuvela wuumani wala oohapaliwa, ila yo asomise etile yiiyiye yooshapweya. ⁴Toowo phi anttelaavo owaanozela anakhinzi owaapheta amanna zaya na aana aya, ⁵na wiiya oojiitthaaza, okemaani, na oohisusi vaje vaya, na wiiya eemaani, na ojinkha mmakhono wa amanna zaya, yoori nttakhuzi la Nluku lihitarawiwe.

⁶Khwa nanna ethiito, owaalipisele mashaapu yoori eeye atthu oojiitthaaza. ⁷Khwa zooshi, weeyo wiiye nthoonyezo khwa yo, orettaka vitthu zooshapweya. Amana osomisaka wiiye weekhweele na woolotteya. ⁸Orumeyele mattakhuzi oolikana, yoori ahiiyevo hatha mmote anttelaaye wuuzukulisela, yoori apale anjumanisanaaye weeyo ewaapatthe haaya mwaasa wa oohooni hatha etthu yootakhala yoonilupeza.

⁹Owaasomise aviitthwaana ojinkha mmakhono wa ambwana zaya khwa zooshi, eekesaka owaatuvelisa, khahiyo ojipwanana, ¹⁰ama oweeyela ambwana zaya, ila ana yoothoonyeza saaneene wiiya atthu awaamineya, yoori epile anrettaazo, atthu anttela olupeza vitthu zooshapweya masomi a Nluku Namuusuru eetthu.

¹¹Maana rehema ya Nluku yajithoonyeza wuusuru khwa anaatamu ooshi. ¹²Rehema enninozela olikha okaafiri na tuvela za olumwenku, khwaaza wiikhala meekhazi oojiitthaaza, a shariya na waamineya khwa Nluku wakathi otthuupu, ¹³naahirishaka nroromelo wooshapweya na othoonyeziwa wa siifwa ya Nluku nwulu na Namuusuru Yinsa Al-Masiihu. ¹⁴Ye ajinkha khwa zwaamu yeetthu fweeyo yoori anitaphule khwa vitthu zootakhala na anitwahareshe niiye atthu awe monkoni wa weettettisa mwentto wooshapweya.

¹⁵Pi vitthu oriina ya osomisa, owaalipiselaka owaashoweraka na ofwalume. Woohitarawiwi ti hatha ntthu.

Menttezi anamalottela wa Yinsa

¹Owaakupusele attwi ooshi yoori ana ya owaashututela apale alokozeliyeeyo na afwalume, eeye anamashututi oolikana, anamaretta zooshapweya wakhula wakathi, ²ahinttakhule ntthu wootakhalavo, eeye oonyamala, oopheta, okemaani na asala athoonyeza ojipushuwisa khwa anaatamu ooshi.

³Waarivo wakathi na-fweeyo naari alolo, anamakhijili, meekhazi eetthu aari ottettekhiwa na oorettiwa oovitthwaana ti wakhula jaati ya tuvela na zootakha zeetthu. Naari wiikhala nkatthi wa vitthu zootakhala na nrima, niiphiranaka mmote na nzeetthu. ⁴Ila paata ya ojithoonyeza emaani ya Nluku Namuusuru eetthu na pheta yawe khwa anaatamu ooshi, ⁵ye anuusuru mwaasa wa onihurumiya, khahiyo yoori neetta oretta etthu yooshapweya. Anuusuru khwa owahi wa Rooho Ttakatthiifu, etile enoosiyeeyo, khunikaphula na khuninkha ohaayi mpheya. ⁶Nluku aniitthelela Rooho Ttakatthiifu wooniphetavo, khwa Yinsa Al-Masiihu, Namuusuru eetthu. ⁷Yoori niiye ohakikhiwa khwa rehema, niretteye onamarithi awe nirina nroromelo wa ohaayi wa mileele. ⁸Mattakhuzi apa pi awaamineya, miiyo kintakha yoori weeyo Tiitu okhanyarele olupa, yoori apale aninkhupalaaye Nluku ajilipisane oretta khaazi zooshapweya. Vitthu zaya epo pi za otepa oshapweya na za fwayita khwa anaatamu.

⁹Ila weeyo ojiwerawerisane onyakulisana wa ololo na warakha ya mazina a amarehemu, okheetisana na nyaasa monkoni wa kano za mayaahuuti. Vitthu zaya epo khinfwayi na khina fwayita. ¹⁰Khwa otule antisaaye waawanyeya vakatthi venu, onchimulele swaafu moote na ya phiiri; amana ahilikhi omwanswi. ¹¹Weeyo onjuwa yoori ntthu anrettaaye toowo ti woovonya na ori ntwampi; mweenyeweru ajinkha hukhumu.

Olakiwa wamwiisho

¹²Amana miiyo kuuperekheza Ariteema ama Tikiiku, orette thenke ya ota okikutthanana nti wa Nikopooli, maana kalakela wiisha mwiita kiri ottuukho. ¹³Olokotthele zooshi enihithajiyaaye orettana safwari Zeena, namataphulela wa kano, na Apoolu, yoori ahisaleeliwe ti hatha etthu. ¹⁴Atthu eetthu ana ya ojinozela oretta vitthu zooshapweya na awaawunaka azaaya nkatthi wa tafwawuthi, wakhula siikhu, na ahiiye ooviliwa.

¹⁵Atthu ooshi apa kiriina miiyo anuuperekheza salamu. Salamu ooshi apale anniphetaaye nkatthi wa amini.

Rehema yiiye vamote na mooshi mweeyo.