Arooma

Warakha

ya Paawulu awaatikhelaka

Arooma

Hapari zooshapweya khwa atthu ooshi

¹Miiyo Paawulu, karumeya wa Yinsa Al-Masiihu, kakhuweliwa yoori kiiye aswihaapa, kithawuliweeyo yoori kilaleye hapari zooshapweya za Nluku, ²etthiipo Nluku ahitiyeeyo asulani khwa manapiyu awe nkatthi wa Zawaatikhiwa Ttakatthiifu, ³monkoni wa Mwanawe, othuuto nkhama pinaatamu, atiiyeeyo khwa ojama wa Daawuuda, ⁴na khuthoonyeziwa khwa Rooho ya ottakatthifu wiiya Mwaana wa Nluku na owahi wakathi asisimuwiyeeyo muufwa. Ye ti Yinsa Al-Masiihu Mbwana eetthu, ⁵khwa ye na mwaasa wa nzina lawe, napwekhera rehema na owaaswihaapa, yoori nikhuwele khapila zooshi wiiya atthu oshututi ontaaye khwa amini, ⁶na mweeyo theenya mwiri phantte ya apale akhuweliweeyo yoori eeye a Yinsa Al-Masiihu.

⁷Kiniwaatikhela atthu ooshi ariiye Rooma eeyiyeeyo aphetani a Nluku na akhuweliweeyo yoori eeye attakatthiifu:

Rehema na heeri ya phantte ya Nluku Papeetthu na ya Mbwana Yinsa Al-Masiihu yiiye vamote na mweeyo.

Paawulu ona niiya ya othotola ojama wa Nluku wa Rooma

⁸Khapula ya zooshi, kininshukhurwela Nluku aka, khwa Yinsa Al-Masiihu, khwa mooshi mweeyo, maana olumwenku wooshi entta olaleyiwa amini mwiriinaaye. ⁹Nluku, kininrumeyelaaye na rooho yaka yooshi kitafusiraka hapari monkoni wa Mwanawe, shaahiti aka yoori wakhula wakathi kinuufikhirini mweeyo, ¹⁰khwa lompa zaka, kinveka yoori enasaapi eti khwa otakha wa Nluku, kifukuleliwe tarikhi ya oteela wuuthotolani. ¹¹Kintakha owoonani mweeyo, kuufiselakani tthuvo kiina za nroho yoori kuukhomaazeni. ¹²Eto, ti yoori miiyo na mweeyo niiye woolipiseleya saaneene khwa amini. ¹³Kintakha mweeyo attwiizaku mwijuwe yoori kaaza raku owaza shawuri za oteela owoonani, ila khusala kitapwateliwa mpakha apha. Niiya kiriina otakha wuurula mishumo vakatthi venu mweeyo, nkhama kinuurulaazo vakatthi wa amalapo akina aya.

¹⁴Maana shuruthi yaka owaatafusirela apale oosilimu na apale oohisilimu, apale aakhili na oohijaliwi. ¹⁵Tiito miiyo kalikanana wuutafusirelani hapari zooshapweya theenya na mweeyo mwiriiye Rooma.

¹⁶Khinkipatthisa haaya olaleya hapari zooshapweya, maana owahi wa Nluku oniwoosurwaaye ooshi apale ankhupalaaye, amwanzo mayaahuuti mpakha amalapo. ¹⁷Maana khwa hapari zooshapweya ti enjithoonyezaaye shariya ya Nluku khwa amini, nkhama yaatikhiweezo yoori: “Nashariya oniikhala khwa amini.”

Katapu ya Nluku khwa anaatamu

¹⁸Nakataalikha, katapu ya Nluku enjithoonyeza pinkuuni khwa vitthu zooshi zootakhala na vitthu zohiiyi za shariya za anaatamu anvithaaye haakhi khwa vitthu zohiiyi za shariya. ¹⁹Maana etile entakhaaye ojuwiwa khwa Nluku ti ya wooneya khwa yo, maana Nluku awaathonyeza. ²⁰Maana thanku wumpiwa wa olumwenku makhaamu oohooneyi a Nluku, owahi wawe wa mileele na ephattu ya o Nluku awe, onooneya saaneene, na onjuweya khwa vitthu za wumpiwa. Khwa nanna ethiito atthu apo khanswamiheya. ²¹Maana yo anjuwa Nluku, ila khuhimwinkhi siifwa ansuhaaye na khuhinshukhurweli, ila wuupuwela waya waretteya wiiya woohiina fwayita na rooho zaya zoololo zariipa. ²²Ajoonaka nkhama aakhili, khupe aretteya wiiya alolo. ²³Apatilisa siifwa ya Nluku ahinfwaaye khwa ratarato yoolattanana ntthu anfwaaye, na nkhama ya anyannyi, nyama za moolu mane na zoojipurula vathi.

²⁴Tiito Nluku awenkhiyeeyo oretta khaapa twayifu, nkhama tuvela za twampi za nroho mwaya, yoori atapanye mwiili aya atthaaporu. ²⁵Apatilisa haakhi ya Nluku khwa ohata, aaputu na arumeyela vitthu za wumpiwa, khunlikha otule ompiyeeyo, othuuto ansuhaaye ottitthimisiwa khwa mileele. Amiina!

²⁶Mwaasa wa ethiito, Nluku khuwaalikhela tuvela zaya zoopatthisa haaya. Hatha aakha aya azukulisa mwentto wa khaapa ya ephattu khwa mwentto nkina woohiiyi opule weephattu. ²⁷Khwa nanna etthiipo, alume nayo, alikha oretta khaapa yeephattu na aakha, khwiiya awiitaala tuvela mmote na nzaawe. Arettaka vitthu zoovonyeya, olalisana alumeru na apwekhera eenyeweru hukhumu eniwaasuhaaye khwa vitthu zaya epo anrettaazo.

²⁸Olikha toowo, moone yoori atarawu ojuwa wa Nluku, ye awaalikhela akhili zaya zoovonyeya, yoori arette vitthu zihinrettiwaazo. ²⁹Yo ajiretta wiiya awiitaala nasipu zooshi zohiiyi za shariya, zootakhala, omaashokopho na ottettekha. Pi awaatta nrima, husuti za wuula, ohitakhani, ohata na vitthu zootakhala. Amwanomwaano, ³⁰anamatarawu, maatuwi a Nluku, oohileleyi, ooveyisa na oojinkhelela, anwazaaye ohata wa oretta zootakhala, woowakhijilela apapazaya, ³¹alolo, manaafikhi, oohiina pheta na ajamaazaya, wala huruma na azaaya. ³²Eeyaru pure oojuwa oruma wa shariya wa Nluku, yoori atthu anrettaaye vitthu nkhama epo ansuhi ofwa, khahiyo orettaru paasi, ila theenya aniwaattottopela apale anrettaaye.

Ophuka wa shariya ya Nluku

¹Nakataalikha, weeyo oniwaaphukaaye azaawo, khunswamiheya; maana onjihukhumu weeyo omweenyewe khwa epile omphukaazo, woone yoori weeyo, omphukaaye, onretta vitthu etthiipo. ²Fweeyo ninjuwa yoori ophuka wa Nluku pi wa haakhi khwa apale anrettaaye vitthu zaya etthiipo. ³Oo, weeyo pinaatamu, oniwaaphukaaye atthu apo anrettaaye vitthu epo khupe na weeyo orettaka etthiipo, onoona yoori onsaleela ophuka wa Nluku? ⁴Ama talili weeyo ontarawu maali za emaani yawe, ovilela na olevelela, ohijuwaka yoori okemaani wa Nluku onuulawana muuthupwiya?

⁵Ila mwaasa wa ohilikhiseyi na olipa rooho yawo, oneekezela katapu khwa weeyo enttelaaye osaruwa siikhu ya katapu ya Nluku, wakathi onttelaaye ojithoonyeza ophuka wawe wa shariya. ⁶Nluku onttela omwinkha wakhula ntthu khwa khiima ya wakhula etile arettiyeeyo. ⁷Ye oniwenkha ohaayi wa mileele apale aari okhanyarelaaye oretta zooshapweya, eekesaka siifwa, hishima na ohifwi. ⁸Ila eniiyavo katapu na hukhumu khwa apale ojikhupali, ankatthalaaye haakhi na khusala alottela vitthu zohiiyi za shariya. ⁹Eniiyavo miswipa na othunku khwa anaatamu ooshi anrettaaye zootakhala: waaza mayaahuuti, theenya khwa amalapo; ¹⁰ila ottitthima, hishima, na heeri yiiye vamote na ooshi apale anrettaaye zooshapweya: waaza mayaahuuti mpakha amalapo. ¹¹Maana Nluku khaninthawula ntthu.

¹²Wooshi otule ankosaaye woohiina kano onteela opwetheya woohiina kano; na wooshi otule ankosaaye ajuwaka kano, khwa kano onteela ophukiwa. ¹³Maana khahi apale ansiilaaye kano eeyiyeeyo anashariya omaasho wa Nluku, ila apale anshututelaaye kano pi anttelaaye wiitthiwa anashariya. ¹⁴Weekhweele, amana amalapo ohiina kano, aretta epile enrumaazo ephattu yaya, enretteya wiiya kano khwa yo, eeyaru pure ohiina kano. ¹⁵Anthonyeza yoori matakhelo a kano pi oopharisiwa nroho mwaya, tiito eninkhaaye oshaahiti theenya wa akhili zaya na wuupuwela waya, alokovezanaka na akiselanaka. ¹⁶Zooshi epo zinttela wooneya siikhu Nluku amphukaavo siiri za anaatamu, khwa Yinsa Al-Masiihu, nkhama etthiipo enlupaazo hapari zaka zooshapweya.

Mayaahuuti na kano

¹⁷Apho, weeyo onjilupeza oyaahuuti, onjilipisana kano na onjikhupalina Nluku. ¹⁸Weeyo onjuwa niiya ya Nluku na onjuwa othawula etthu yooziti olikana, maana wanozeliwa kano. ¹⁹Weeyo onjuwa yoori khweele oniweettettisa ananhooni, nuuru ya apale aariiye n’yiiza, ²⁰namanozela wa alolo, mwanliimu wa asimaana, maana awaamo nkano mwawo mattakhuzi oojuwa na a haakhi. ²¹Khi aphano? Weeyo oniwaasomisaaye akina, ohijisomisaka omweenyewe? Weeyo, ontafusiraaye monkoni wa wiiya, khi wiiya? ²²Weeyo onlupaaye yoori mwihiraruwe, khi oraruwa? Weeyo eniwiphiraaye sanamu, khi wiiya vitthu za nnyupa woosifwiwamo? ²³Weeyo onjikhupalanaaye kano, ila onintarawu Nluku khwa ohishututeli kano zawe! ²⁴Nkhama yaatikhiweezo yoori: “Nzina la Nluku linkhufurweliwa pi amalapo mwaasa wa mweeyo.”

²⁵Okhiriya ona fwayita amana oshututela kano, ila amana weeyo ohishututeli kano, okhiriya wawo onretteya wiiya ohikhiriyi. ²⁶Khi apale oohikhiriyi anshututela menttezi a kano, khansuhi otthanttiwa nkhama anamakhiriya? ²⁷Otule ahikhiriyeeni khwa mwiili, ila anshututelaaye kano, ye onteela wuhukhumuni mweeyo, mwiriina kano zawaatikhiwa na mwikhiriyiyeeyo, ti namakhijilela kano. ²⁸Nakataalikha, khahiyo yaahuuti khaamili otule eeyiye yaahuuti ojeru paasi, wala khahiyo okhiriya khaamili khwa otule akhiriyiyeeyo ojeru paasi na mwiili. ²⁹Wala! Yaahuuti ti otule eeyiye yaahuuti nkatthi mwawe, na okhiriya khaamili pi opule wa nroho, onrettiwaaye ti rooho ya Nluku, ohinrettiwaaye ti kano zawaatikhiwa. Na siifwa ampwekherelaaye atthu apo khinlankha mmakhono wa anaatamu, enlankha wa Nluku.

Fwayita ya mayaahuuti niini?

¹Ena fwayita ni wiiya yaahuuti, ama fwayita ni eriivo va okhiriya? ²Zawaatta, khwa nanna zooshi onaaye fwayita, maana weekhweele mayaahuuti pi yo enkheleliweeyo nttakhuzi la Nluku omwanzo. ³Enlikhisa-ni atthu akina wiiya oohaamineyi? Oohaamineyi waya onfuja waamineya wa Nluku? ⁴Hatha vattitthiiru! Eeye Nluku weekhweele, na ntthu wooshi woohata. Nkhama yaatikhiweezo:

“Yoori wiiye woohakikhiwa khwa mattakhuzi awo

na oshintte amana olokoveziwaka.”

⁵Ila, nkhama ohiina shariya weetthu onthoonyeza khwa nanna ya wooneya channu shariya ya Nluku, ninttela olupa ni? Yoori Nluku ti wohiina shariya khwa weettettisa katapu yawe? Kinrumeyela mattakhuzi oonaatamu. ⁶Wala khahiyo toowo! Eriwaka yaari etthiipo, nanna-ni Nluku aari weettelaaye ophuka olumwenku? ⁷Ntthu onwahi olupa theenya yoori: “Nkhama ohata waka onthoonyeza channu haakhi ya Nluku, eekezelaka etthiipo siifwa zawe, mwaasa wa niini kiphukiwaka nkhama natwampi?” ⁸Aphano nihilupaka yoori: “Nirette yootakhala yoori ete yooshapweya?” Akina anikilokoveza olupa etthiipo. Apo aya anlawa aphukiwe na ahukhumwiwe.

Khaavo ntthu wa shariya

⁹Apho niishelane toovi? Niriiye phantte ya fwayita ti fweeyo? Wala! Ninthoonyeza yoori waaza mayaahuuti mpakha amalapo, ashinttiwa ti twampi. ¹⁰Nkhama yaatikhiweeyo yoori:

“Khina eeyiye nashariya, hatha mmote,

¹¹Khaavo hatha mmote enimweleyaaye etile yiiyiyeeyo ya shariya;

khina animweekesaaye Nluku.

¹²Atthu ooshi athowelela, ajiretta wiiya atthu ohiina fwayita;

khina anrettaaye yooshapweya, hatha mmote.”

¹³“Khulo zaya khapuri zoohisireliwi,

anttettekha na malimi aya.”

“Maattha a nyookha awuula ari omilomo waya.”

¹⁴“Milomo zaya zeetaala laana na owaawa.”

¹⁵“Moolu aya anvurumela wuula;

¹⁶wakhula vahali anviraavo, anlikhavo ori wootapanyeyavo na fukhara,

¹⁷na khanjuwa tarikhi ya heeri.”

¹⁸“Yo khanimoova Nluku.”

¹⁹Ninjuwa yoori zooshi enlupaaye kano zawooza ooshi apale ari vathi wa kano etthiipo, yoori milomo zooshi zinyamale na olumwenku opatthe ophukiwa mmakhono wa Nluku. ²⁰Nakataalikha, khaavo anttelaaye ohakikhiwa omaasho wa Nluku khwa khaazi za kano. Maana khwa kano najuwa twampi.

Nusura khwa vakatthi wa amini

²¹Ila apha yajithoonyeza shariya enlankhaaye wa Nluku, woohiiyi mwaasa wa kano. Na tithiito enlawelaaye oshaahiti kano na manapiyu, ²²shariya ya Nluku khwa amini ya Yinsa Al-Masiihu khwa apale ooshi aninkhupalaaye. Khawiivo ofwarikhana, ²³maana atthu ooshi akosa na ari peetiwene khwa ottitthima wa Nluku. ²⁴Ila ahakikhiwa mahala khwa rehema, ya nusura eriiye wa Yinsa Al-Masiihu, ²⁵Nluku anvaha Yinsa nkhama twaha yoori eeye swamiima nkatthi wa amini, khwa taamu yawe, athoonyezaka shariya. Khwa ovilela, aalikhiye ohukhumu twampi epile zirettiweeyo raku; ²⁶ila nasaapi eti, aretta epo yoori athoonyeze shariya yawe, mwaasa wa wiiya nashariya na namahakikhi wa apale ariina amini khwa Yinsa. ²⁷Eri vayi aphano kiiswa ya ojikhutupula? Yalaziwavo. Wala yaaza vayi? Va oshututela kano? Wala, ila yaaza va amini. ²⁸Maana niniishelana nilupaka yoori pinaatamu onhakikhiwa mwaasa wa amini, khahiyo mwaasa wa khaazi za kano. ²⁹Niri Nluku, Nluku wa mayaahuuti paasi? Ye khahiyo Nluku theenya wa amalapo? Aaa theenya ti wa amalapo, ³⁰maana Nluku mmote paasi, othuuto anttelaaye owaahakikhi khwa amini apale ookhiriya na apale oohikhiriyi. ³¹Nifuje kano khwa amini? Wala, hatha vattitthiiru, ila nilipisele yoori kano ena fwayita.

Amini ya Eburahiima

¹Nakataalikha, nilupe niini khwa marehemu papeetthu Eburahiima? ²Nkhama khweele Eburahiima ahakikhiwe mwaasa wa khaazi zawe, ye ona ya ojittitthimisa, ila woohiiyi omaasho wa Nluku. ³Zawaatikhiwa Ttakatthiifu enlupa ni? “Eburahiima khumwaamini Nluku, na ye khukhupaliwa wiiya ntthu wa shariya.”

⁴Moone, phakari ya ntthu ankholaaye khaazi, ehooniwe nkhama antthaaye oveka, ila nkhama teeni. ⁵Olikha toowo, otule ahinkholaaye khaazi za kano, ila ankhupalaka Nluku, aninhakikhaaye kaafiri, amini yawe enkhupaleliwa nkhama shariya. ⁶Daawuuda alupa etthiipo yoori, oniiya wooparikhiyiwa ntthu otule Nluku animwinkhaaye shariya woohiiyi mwaasa wa khaazi zawe:

⁷“Ooparikhiyiwa pi apale koosa zaya eswamihiweeyo,

na twampi zaya khufujiwa!

⁸Wooparikhiyiwa ti otule

Nluku ahinimoonanaaye paathuli.”

⁹Oparikhiyiwa waya opo atthomeliwa apale paasi ookhiriya ama na apale oohikhiriyi? Maana ninlupa yoori khwa amini Eburahiima akhupaliwa wiiya ntthu wa shariya. ¹⁰Zarettikhana lini? Raku ama paata ya okhiriya? Khazirettikhaneeni paata ya okhiriya, ila ahina khiriye! ¹¹Etthiipo ye apwekherela okhiriya nkhama alama na nkhama ephariselo ya shariya aariinaaye khwa amini, wakathi nalelo aari ahinakhiriye. Nakataalikha, ye ti paapa wa ooshi apale ankhupalaaye, hatha nkhama khakhiriyeeni, yoori shariya yiiye okhupaleliwa theenya pi yo. ¹²Ye theenya paapa wa apale ookhiriya aheetteeni okhiriya paasi ila na theenya aneettettisaaye mwentto wa amini aariinaaye papeetthu Eburahiima ahinakhiriye.

Amini ya Eburahiima na ahiti ya Nluku

¹³Khahi mwaasa wa kano Eburahiima ama peewu yawe apattheliyeeyo wiiya namarithi olumwenku, ila maana ye ankhupaliye Nluku na aakhupaliwe ti ye. ¹⁴Maana, nkhama apale aniikhalaaye khwa nkatthi wa kano pi anamarithi aya, amini khina fwayita, na ahiti khinfwayi. ¹⁵Maana kano entana katapu, na vahali woohiivo kano, khiniiyavo koosa.

¹⁶Nakataalikha, ahiti enta khwa amini, yoori yiiye sawasawa na rehema na yiiye etthiipo yoolipaneya khwa peewu yooshi ya Eburahiima; khahiyo paasi apale anshututelaaye kano, ila theenya apale ariina amini etile Eburahiima aariinaaye. Ye paapa wa fweeyo fooshi. ¹⁷Nkhama yaatikhiweezo yoori: “Miiyo kooretta wiiya paapa wa khapila zawaatta.” Ye ti papeetthu omaasho wa Nluku, othuuto ankhupaliyeeyo, Nluku aniwinkhaaye ohaayi ananfwa na anrettisaaye vitthu zoohiivo nkhama za wiiyavo.

¹⁸Eburahiima, woohiivo hatha nroromelo, khwa amini khwiiyana nroromelo, khuretteya etthiipo wiiya paapa wa khapila zawaatta, nkhama yaalupiweeyo monkoni wa ye yoori: “Ojama yawo enteela wiiya etthiipo.” ¹⁹Woohishokheri nkatthi wa amini, ye khujuwa yoori onsaleela ofwa, maana aarina hirimu ya nyaakha miiya, na Suhura khaarina mavokozi. ²⁰Ila ye nalelo khuhaakanyereli wala khuhikheeti monkoni wa ahiti ya Nluku, ila khwiiya wookhomaala nkatthi wa amini yawe, na khumwinkha siifwa Nluku, ²¹aakhupaleliye weekhweelevo yoori Nluku onaaye owahi wa oretta epile ahitiyeeyo. ²²Tiito Eburahiima ooziweeyo wookhupaliwavo ti Nluku mwaasa wa amini yawe. ²³Mattakhuzi “ooziweeyo” khaatikheliwe ye otthwe paasi, ²⁴ila theenya khwa fweeyo, apale Nluku anttelaaye owaakhupalana shariya, fweeyo nininkhupalaaye otule ansisimuliyeeyo muufwa Yinsa, Mbwana eetthu. ²⁵Ye enkheleliwa ofwela twampi zeetthu na khusisimuwa yoori anihakikhi.

Heeri na furaha

¹Aphano nihakikhiweevo ti Nluku khwa amini, ninaaye heeri na Nluku khwa Mbwana eetthu Yinsa Al-Masiihu. ²Khwa othuuto ti nipatthiyeeyo ruhusa khwa amini, na rehema ethiito nikhomaleliyeeyo nasaapi na ninjittitthimisanaaye khwa nroromelo wa siifwa ya Nluku. ³Na khahiyo etthiipo paasi, ila theenya ninjittitthimisa mmiswipa, maana miswipa entana ovilela; ⁴ovilela mwentto wawooneya, na mwentto wa wooneya nroromelo. ⁵Na nroromelo aya opo khunnitarawu, maana Nluku eetthela pheta yawe nroho mweetthu khwa Rooho Ttakatthiifu, ethiito aninkhiyeeyo.

⁶Wekhweele, wakathi fweeyo nalelo naari woottettheya, Al-Masiihu awaafwela makaafiri. ⁷Ti yoolipa wiiyavo ntthu wonfwela nashariya, hatha nkhama ntthu eetta wiiya woominyala khwa onfwela nkemaani. ⁸Ila Nluku onthoonyeza pheta yawe khwa fweeyo, Al-Masiihu anifwela fweeyo nalelo niri anatwampi.

⁹Nkhama apha nihakikhiweeyo khwa taamu yawe, natepa theenya khwa ye ninteela wuusurukha khwa katapu ya Nluku! ¹⁰Maana wakathi naari maatuwi a Nluku nawahi osiilana na ye khwa ofwa wa mwanawe, khutepa nasaapi eti nisiilananiyeevo ye, ninteela wuusurukha mwaasa wa ohaayi awe. ¹¹Khahiyo ethiito paasi, ila theenya ninjittitthimisa khwa Nluku, vakatthi wa Mbwana eetthu Yinsa Al-Masiihu, othuuto anipatthisiyeeyo osiilana.

Ofwa khwa Adamu, Ohaayi khwa Al-Masiihu

¹²Nakataalikha, twampi yata voolumwenku khwa ntthu mmote, na twampi khutiisa ofwa, khwa etthiipo ofwa wawaateela atthu ooshi maana ooshi akosa; ¹³khapulathi kano ehineeyevo, twampi yaarivo voolumwenku, ila twampi khinaalakiwa ehivo kano. ¹⁴Maana ofwa weeyavo thanku wakathi wa Adamu mpakha wa Munsa, hatha apale ahiretteeni twampi zoolattanana koosa za Adamu, othuuto aari nkhama otule aari weettelaaye ota.

¹⁵Nakataalikha khawiivo olattisa tthuvo na ovonya. Maana khwa ovonya wa ntthu mmote paasi afwa atthu awaatta, ila yatepa rehema ya Nluku, eto tthuvo khwa rehema ya ntthu mmote paasi, Yinsa Al-Masiihu yawaafiyela atthu awaatta! ¹⁶Kinlattaniseya tthuvo ya Nluku na shaani ya twampi za ntthu mmote; maana ophukiwa walankhela va ovonya mmote paasi na khutana hukhumu; ila khwa nusura Nluku awaaswamihi ooshi apale aarittiyeeyo ovonya wa waatta eeyiyeru pure oohisuhi nswammaha. ¹⁷Mwaasa wa ovonya wa ntthu mmote paasi, ofwa weeyavo, atepa apale apokhereliyeeyo wa waattavo rehema na tthuvo ya shariya anteela wiiyana ohaayi wa ntthu mmote paasi Yinsa Al-Masiihu.

¹⁸Nkhama etthiipo khwa ovonya wa ntthu mmote otaniyeeyo ohukhumwiwa wa atthu ooshi, etthiipo theenya khwa khaazi moote ya shariya yatana ohakikhiwa ontanaaye ohaayi khwa atthu ooshi. ¹⁹Nkhama etthiipo, khwa okhijili wa ntthu mmote paasi atthu awaatta khuretteya wiiya anatwampi, na khwa etthiipo theenya, mwaasa wa oshututi wa ntthu mmote paasi, atthu awaatta aretteye wiiya anashariya. ²⁰Kano zaateeliye weekezela ovonya. Ila, vahali eniitaalaavo twampi, rehema ya Nluku eniittikhela attaapho. ²¹Epo zarettikhana yoori, nkhama etthiipo twampi eshinttiyeeyo khwa ofwa, na rehema yashintta khwa shariya yoori eninkhe ohaayi wa mileele, khwa Yinsa Al-Masiihu, Mbwana eetthu.

Ohaayi mpheya khwa Al-Masiihu

¹Apho niri je? Nikhanyarele oretta twampi yoori rehema yeekezeleye? ²Wala hatha vattitthiiru! Fweeyo, nifwiiyeeyo khwa twampi, nanna ni nintakhaaye wiikhala ntwampi nttumpho? ³Ama, mweeyo khamwinjuwa yoori fweeyo noosiweeyo khwa Yinsa Al-Masiihu, noosiwa khwa ofwa wawe? ⁴Nakataalikha nazikhaniwa ye muufwa khwa njampo la woosa, yoori, nkhama etthiipo Yinsa asisimuwiyeeyo muufwa khwa siifwa ya Paapa, na fweeyo niikhale khwa ohaayi mpheya.

⁵Nkhama nanna ethiito nikusanyeyaniyeeyo ye khwa ojilattisana ofwa wawe, na theenya ninteela wiiya oolattanana ye, osisimuwa wawe. ⁶Maana ninjuwa yoori otthu eetthu opule wa raku wafwa na Yinsa vansalapa yoori mwiili wa twampi wiiye wootapanyiwa, na theenya nihirutele wiiya aviitthwaana a twampi. ⁷Nakataalikha otule afwiiye ataphuliwa twampi.

⁸Nkhama nafwa na Al-Masiihu, ninkhupalela yoori theenya ninteela wiiya haayi vamote na ye. ⁹Maana najuwa yoori, asisimuliweevo muufwa, Al-Masiihu khanteela ofwa swaafu kiina; ofwa khuna oshintta theenya khwa ye. ¹⁰Maana ye afwaka, afwela twampi swaafu moote khwa mileele; ila ohaayi awe, ohaayi khwa Nluku.

¹¹Khwa nanna etthiipo, mwijoone mwifwiiye khwa twampi, ila mwiri haayi khwa Nluku, nkatthi wa Yinsa Al-Masiihu. ¹²Nakataalikha mwihilikhelele twampi orutela oshintta mwiili enu onfwaaye, zuurettisakani oshututela tuvela zenu. ¹³Mwihinkhe phantte za mwiili enu ntwampi, nkhama zaana zohiiyi za shariya. Ila mwimwinkhe Nluku nkhama atthu mwirutiyeeyo muufwa khweetta muuhaayi; na mwimwinkhe mwiili enu nkhama zaana za shariya. ¹⁴Maana twampi khinteela wuushinttani theenya mweeyo, mwaasa mweeyo khamwiri vathi wa kano, ila vathi wa rehema.

Mwiitthwaana wa Nluku

¹⁵Apho, nisala niretta twampi mwaasa wa yoori khaniri vathi wa kano, ila niri vathi wa nrehema ya Nluku? Hatha vattitthiiru! ¹⁶Khamwinjuwa yoori, amana ntthu ajinkha mmakhono wa ntthu yoori asala anshututela nkhama mwiitthwaana, oniiya mwiitthwaana wa othuuto aninshututelaaye: mwiitthwaana wa twampi enuulaaye, ama oshututi onimwettanaaye nshariya? ¹⁷Ila nininshukhurwela Nluku, maana mweeyaru pure aviitthwaana a twampi, mwavira mwininshututela Nluku na rooho yenu khwa nanna mwisomisiweezo. ¹⁸Mweeyo mwataphuliwa ntwampi, na mwaretteya wiiya amwiitthwaana a shariya.

¹⁹Kinttakhula nkhama pinaatamu mwaasa wa otteettheya weenu wa onaatamu. Nkhama etthiipo mwenkheleliyeeyo phantte za mwiili enu sawasawa mmakhono wa zoohifwayi na zootakhala zintanaaye zootakhala. Apho enasaapi eti mwinkhelele phantte za mwiili enu mwijirette wiiya aviitthwaana a shariya onuuttakatthisaanini. ²⁰Wakathi opule mwaari aviitthwaana a twampi mweeyo mwaari ootaphuliwa khwa shariya. ²¹Mishumo ni muuruliyeeyo khwa vitthu zaya epo mweeyo enuupatthisaanini haaya? Mwiisho aya ofwa. ²²Aphano mwalaziwamo ntwampi mwarettiwa oviitthwaana wa Nluku na mishumo mwinshumaaye zinuurettani wiiya a Ttakatthiifu, omwiisho waya ohaayi wa mileele. ²³Maana phakari ya twampi ofwa, ila tthuvo ya rehema ya Nluku ohaayi wa mileele khwa Yinsa Al-Masiihu, Mbwana eetthu.

Nlattaniso wa harusi

¹Attwiizaku, kiniwuuzani mweeyo nkhama atthu mwinjuwaaye kano. Mweeyo khamwinjuwa yoori kano ena owahi khwa ntthu amana eeya haayi paasi? ²Eri toono, khwa kano muukha wooraliwa oniiya vamote na mannawe amana nlume aya eeya haayi; ila amana nlume aya afwa, muukha otule oniiya wootaphuliwa khwa kano ya oraliwa. ³Tiito, amana muukha araliwa ti nlume nkina nalelo mannawe ari haayi, ontthanttiwa nkhama namararuwa. Ila mannawe amana afwa, ye oniiya wootaphuliwa khwa kano etile na hatha nkhama eetta oraliwa ti nlume nkina, khantta oraruwa.

⁴Apho attwiizaku, mweeyo theenya mwafwa khwa kano, vakatthi wa mwiili wa Al-Masiihu, yoori mwirette phantte ya nkina, opule osisimuwiyeeyo muufwa, yoori nipatthe wiiyana mishumo khwa Nluku. ⁵Maana wakathi opule naari weettettisiwaaye pi vitthu za onaatamu eetthu, khwa tuvela za twampi zithoonyeziweeyo ti kano zaari okhola khaazi nkatthi wa mwiili eetthu, khwa nanna naari wiimaazo mishumo za onilawana muufwa. ⁶Ila nasaapi, nifwelaka etile raku yaanifukiyeeyo, nataphuliwa nkatthi wa kano, yoori ninrumeyele Nluku khwa nanna pheeya ya Rooho na woohiiyi nanna ya mwentto opule wa raku wa kano zawaatikhiwa.

Wuumanana twampi

⁷Apho, nilupe niini? Niri kano twampi? Hatha vattitthiiru! Khwa hakiikha, akaari oteela ojuwa niini twampi woohijuwisiwi ti kano. Maana weekhweele, akaari oteela ojuwa niini omaashokopho, eriwaka kano khayaalupiye yoori: “Ohiiyane omaashokopho.” ⁸Ila twampi yajipatthisa kiphenyo elankhiyeeyo va oruma, khukipatthisa miiyo wakhula nanna ya tuvela ya omaashokopho. Woohiivo kano, twampi eniiya yoofwa. ⁹Raku miiyo kaari wiikhala woohiina kano, ila wakathi otiiyeevo oruma, twampi khwaaza okikhola khaazi miiyo khufwa. ¹⁰Miiyo khusophela yoori oruma otthuupo waahitiweeyo otana ohaayi, weekhweele wakitiisela ofwa. ¹¹Tiito twampi, khupattha kiphenyo etiisiweeyo ti oruma, khukittettekha na khwa oruma otthuupo khukuula.

¹²Khwa hakiikha kano Ttakatthiifu, na oruma pi woottakatthifu, shariya na oshapweya. ¹³Na aphano, etile yooshapweya yaretteya wiiya etthu enuulaaye khwa miiyo? Hatha vattitthiiru! Ila yoori twampi ejithoonyeze nkhama twampi, ye yatana ofwa khwa miiyo vakatthi wa etthu yooshapweya, yoori khwa vakatthi wa oruma ejithoonyeze khwa nanna yootepa woopisa.

¹⁴Ninjuwa yoori kano pi za nroho; ila miiyo ki pinaatamu woottettheya na koozanyisiwa nkhama mwiitthwaana wa twampi. ¹⁵Miiyo khinikeeleya etthu kinrettaaye, maana akinretta etile kintakhaaye, ila etile kihintakhaaye. ¹⁶Na, nkhama kinretta etile kihintakhaaye, kinkhupalela yoori kano ti yooshapweya. ¹⁷Khwa etthiipo enthoonyeza yoori khahi miiyo kinrettaaye, ila twampi yiikhaliyeeyo nkatthi mwaka. ¹⁸Miiyo kinjuwa yoori khina etthu yooshapweya eniikhalaaye nkatthi mwaka, olikha toowo, khwa onaatamu aka. Maana kinaaye niiya ya oretta etthu yooshapweya, ila akinwahi oretta. ¹⁹Maana akinretta yooshapweya etile kintakhaaye, ila yootakhala kihintakhaaye, eto kinkhanyarela oretta. ²⁰Ila nkhama kinretta etile kihintakhaaye, khahi miiyo kinrettaaye, ila twampi etile eniikhalaaye nkatthi mwaka.

²¹Aphano, kinsikana kano eniikhalaaye khwa miiyo: kitakhaka oretta yooshapweya, zootakhala ziniiya vamote na miiyo. ²²Maana nkatthi wa ohaayi aka, kinaaye tuvela ya kano ya Nluku; ²³ila kinoona khwa phantte za mwiili aka, kano kiina enuumananaaye kano eriiye nkatthi wa akhili zaka, enikiretta onapherezu wa kano za twampi ziriiye phantte za mwiili aka. ²⁴Ntthu fukhara kiriizo! Paani anttelaaye okitaphula mwiili opu onfwaaye? ²⁵Kininshukhurwela Nluku khwa Yinsa Al-Masiihu, Mbwana eetthu! Khwa nanna za akhili zaka, kimwenyewe kinrumeyela kano ya Nluku, ila mwiili aka, onrumeyela twampi.

Ohaayi khwa Rooho Ttakatthiifu

¹Nakataalikha, aphano khayiivo hatha hukhumu khwa apale ari khwa Yinsa Al-Masiihu. ²Maana vakatthi wa Yinsa Al-Masiihu, kano ya rooho ya ohaayi yakitaphula khwa kano ya twampi na ofwa. ³Maana, etile kano yahawahiyeeyo oretta mwaasa wa otteettheya wa onaatamu, Nluku aretta, khumperekha mwanawe, woolattanana pinaatamu wa twampi, nkhama zaakha ya twampi, khwa etthiipo khuttha paathuli twampi vakatthi wa onaatamu. ⁴Yoori epile ziiyiye shariya khwa oruma wa kano zinifiyele saaneene woonitoshavo fweeyo, nihinlottaaye vitthu za onaatamu, ila khwa rooho.

⁵Wakhula otule aniikhalaaye khwa vitthu za onaatamu, akhili zawe zinrutela epile pinaatamu antakhaazo; ila otule aniikhalaaye khwa Rooho ya Nluku, akhili zawe zinretta epile Rooho ya Nluku entakhaaye. ⁶Akhili za onaatamu ofwa, ila akhili za Rooho ya Nluku ohaayi na heeri; ⁷Akhili za onaatamu eniinanana Nluku, maana khinjittha nkano ya Nluku, wala kinwahi oretta. ⁸Nakataalikha otule anshinttiwaaye pi vitthu za onaatamu khanwahi ontuvelisa Nluku.

⁹Nakataalikha, mweeyo khamwishinttiweeni pi onaatamu, ila khwa Rooho, nkhama khweele rooho ya Nluku eniikhala khwa mweeyo. Na nkhama ntthu khana Rooho ya Al-Masiihu, khahi wa Al-Masiihu. ¹⁰Ila, nkhama Al-Masiihu ori vamote na-mweeyo, mwiili wafwa mwaasa wa twampi, Rooho eri haayi mwaasa wa shariya. ¹¹Nkhama Rooho ya otule ansisimuliyeeyo Yinsa eri vamote na mweeyo, othuuto ansisimuliyeeyo Al-Masiihu nkhapuri theenya onteela osisimula mwiili enu woofwa, khwa Rooho yawe eniikhalaaye khwa mweeyo.

Aana na Anamarithi

¹²Nakataalikha, attwiizaku, fweeyo niri nteeni, yoohiikhali khwa nanna ontakhaazo onaatamu. ¹³Maana, amana mweeyo mwiikhala khwa nanna ontakhaazo onaatamu, mwintta ofwa; ila khwa rooho amana muula tuvela za mwiili, mwiniiya haayi. ¹⁴Maana ooshi apale aneettettisiwaaye ti Rooho ya Nluku aana a Nluku. ¹⁵Maana mweeyo khamwipokhereeni Rooho yawuurettani oviitthwaana yoori mwirutele woova theenya, ila mwapokhera Rooho yuurettiyeenini wiiya aana khwa wuukaphulani, ethiito ninkhuwelaaye yoori “Aba, Paapa.” ¹⁶Rooho ethiito enlawela oshaahiti rooho yeetthu yoori na aana a Nluku. ¹⁷Nkhama na aana, apho na anamarithi, anamarithi a Nluku na anamarithi vamote na Al-Masiihu; nkhama khweele ninhoowana khwa ye, yoori theenya nirette phantte ya ottitthimisiwa wawe.

Siifwa entaaye

¹⁸Kinkhupalela yoori ohoowa weetthu nasaapi eti, khunlikanisaniwa siifwa enttelaaye othoonyeziwa khwa fweeyo. ¹⁹Zumpe zooshi enwejela, na nroromelo nwulweene, yoori aana a Nluku eeye othoonyeziwa. ²⁰Maana zumpe zaretteya ohiina fwayita, woohiiyi khwa otakha waya, ila mwaasa wa niiya ya otule awaatthiiyeemo na nroromelo ²¹yoori zumpe ziiye zootaphuliwa muuvitthwaana wa ohoocheya aari opattikhanaamo, apwekherelaka otaphuliwa wa siifwa za aana a Nluku.

²²Ninjuwa yoori zumpe zooshi zinsisimira na enoona olwaaza nkhama olwaaza wa ovokola. ²³Khahi etthiipo paasi, ila fweeyo niriina mwanzo mishumo za Rooho Ttakatthiifu, theenya ninsisimira nkatthi mweetthu, niwejelaka wooshukulikhavo okaphuliwa weetthu nkhama aana, na otaphuliwa sawasawa wa mwiili eetthu. ²⁴Maana khwa nroromelo otthuupo noosurwiwa. Ila nroromelo onooneyaaye khahiyo nroromelo. Paani anwejelaaye etile anoonaaye? ²⁵Ila amana niwejaka etile nihinoonaaye, ninweja na ovilela.

Olompeliwa wa Rooho

²⁶Khwa nanna etthiipo Rooho ya Nluku ennawuni muutteettheya mweetthu, maana khaninjuwa nanna ya olompa saana, ila Rooho ethiito enlompa khwa zwaamu yeetthu na osisimira khwa nanna yoohitaphuleleyi. ²⁷Na otule aninzaanaaye rooho zeetthu, onjuwa shawuri za Rooho, maana Rooho Ttakatthiifu enlompa khwa zwaamu ya atthu a Nluku khwa niiya ya Nluku.

²⁸Ninjuwa yoori apale animphetaaye Nluku na awaakhuweliyeeyo khwa shawuri zawe, zooshi ziniweettettela saana. ²⁹Maana apale Nluku awathawuliyeeyo, awaaphakula yoori alattanane Mwanawe. Ye aretta epo yoori mwanawe eeye wa omwanzo vakatthi wa attwi enkeene. ³⁰Apale awathawuliyeeyo, awaakhuwela; apale awaakhuweliyeeyo, awaahakikhi; apale awaahakikhiyeeyo, awaattitthimisa.

Ozayiniwa na okhupalela pheta ya Nluku

³¹Apho nilupe niini khwa vitthu zaya epo? Nkhama Nluku ori vamote na fweeyo, paani anttelaaye oshinttanana fweeyo? ³²Othuuto ahimwiinaneleeni Mwanawe, anvahiyeeyo khwa fooshi fweeyo, khi enttela orettikhana toovi ohininkhi vamote naye vitthu zooshi? ³³Paani ariina ruhusa ya owaalokoveza ananthawuliwa a Nluku? Nluku ti aniwaahakikhaaye. ³⁴Namahukhumu ti paani? Ti Yinsa otule afwiiyeeyo, na theenya khusisimuwa opheya ori nkhono nlume wa Nluku, na onnivekelela fweeyo. ³⁵Paani anwahaaye oniphakulana pheta ya Yinsa? Tafwawuthi, othunku, olupatthiwa ama jala ama owaazu, ajali, ama phanka? ³⁶Nkhama yaatikhiweezo yoori:

“Mwaasa wa wuupheta weeyo, wakhula siikhu nineekesela ofwa,

narettiwa nkhama pwittipwitthi enttelaaye oshijiwa.”

³⁷Ila khwa vitthu zaya epo zooshi naziti wiiya anamashintta, khwa vakatthi wa otule aniphetiyeeyo. ³⁸Maana miiyo kinkhupalela saaneene yoori wala ofwa, ama ohaayi, wala malayikha, wala sheethwani, wala vitthu za nasaapi wala zintaazo wala hatha owahi, ³⁹wala chanka, wala wiicha, wala etthu kiina ya wumpiwa eriina makhaamu ya oniphakulana pheta ya Nluku eriiye khwa Yinsa Al-Masiihu, Mbwana eetthu.

Nluku awaathawuliye atthu a Ezirayiilu

¹Kinlupa khweele khwa Yinsa, akintta ohata; khwa akhili zaka zinhakikhi nkatthi wa Rooho Ttakatthiifu: ²kinaaye huzuni khuluyeene na othunku woohiishi nroho mwaka, ³maana miiyo hatha kaari otakha opokhera laana na ovaluliwa khwa Al-Masiihu mwaasa wa pheta ya attwi a khapila yaka, ⁴eeyiyeeyo atthu a Ezirayiilu. Okaphuliwa wa wiiya aana pi waya; na siifwa za pinkuuni pi zaya, osiilana, winkhiwa kano, ya waaputu Nnyupa Woosifwiwamo na ahiti. ⁵Yo ojama wa amarehemu apapazetthu, na khwa yo pi olankhiyeevo ntathaari wa onaatamu wa Al-Masiihu, othuuto eeyiye Nluku vatulu wa vitthu zooshi, anlupiwaaye wooshapweyavo khwa mileele! Amiina!

⁶Nihuupuwele yoori nttakhuzi la Nluku tthi loovonyeya. Olikha toowo, khahiyo ojama yooshi ya Ezirayiilu eeyiyeeyo meezirayiilu. ⁷Wala khiriweene mwaasa wa wiiya ojama wa Eburahiima, atthu ooshi aretteya wiiya aana a Eburahiima. Olikha toowo, “Khwa Esiyaakha ti enttelaaye opuwa ojama awo.” ⁸Khwa mattakhuzi makina, khahiyo aana apale ephattu aniiyaaye aana a Nluku, ila aana a waahitiwa pi antthanttiwaaye wiiya ojama wa Eburahiima. ⁹Maana ahiti eti yaarettiwe toono: “Khwa wakathi khaamili kinruti opheya, na Suhura onteela ompattha mwaana.”

¹⁰Khahiyo ethiito paasi, ila theenya aana a Rapekha papaaya aari mmote, papeetthu Esiyaakha. ¹¹Yoori matakhelo a Nluku eeye nkhama othawula woohiishi woohiiyi khwa khaazi, ila khwa otule ankhuwaaye; nakataalikha, khapulathi amaphapo ahinavokoliwe ama ahinarette hatha etthu yooshapweya ama yootakhala, ¹²ye ooziwe yoori: “Nttunkhulu onttela onrumeyela nsimaana.” ¹³Nkhama yaatikhiweezo yoori: “Kampheta Yaakhumpa ila khumwiina Ezawu.”

¹⁴Apho nilupe niini? Talili Nluku khahi wa shariya? Hatha vattitthiiru! ¹⁵Maana ye amuuza Munsa yoori:

“Kinimoonela tthakaraka otule kintakhaaye omoonela tthakaraka,

na kinimoonela huruma otule kintakhaaye omoonela huruma.”

¹⁶Nakataalikha, epo khinrettiwa khwa tuvela ama kuvu za onaatamu, ila khwa tthakaraka ya Nluku. ¹⁷Maana Zawaatikhiwa Ttakatthiifu zamuuza Firawuuna yoori: “Miiyo koolansa haaswahaaswa khwa matakhelo yoori kuuthoonyeze weeyo owahi kiriinaaye, na yoori nzina laka lilaleyiwe olumwenku wooshi.” ¹⁸Nakataalikha, Nluku ona tthakaraka khwa otule anintakhelaaye, na onuumisa rooho ya otule anintakhelaaye.

¹⁹Ila akina a mweeyo anikuuza yoori: “Aphano, mwaasa aya niini Nluku nalelo aninkhaka paathuli? Paani anwahaaye wuumanana niiya yawe?” ²⁰Oo pinaatamu, o paani weeyo wa onyakulisana na Nluku? Toowo etile yuupiweeyo enwahi omuuza otule oopiyeeyo yoori mwaasa aya niini okuupaka toono? ²¹Otule anuupaaye zuuku khanwahi ottophe mmote wuupa yuuku ya fwayita na kiina yoohiina fwayita?

²²Na nkhama Nluku atakhaka othoonyeza katapu yawe na oretta wiiya woojuwiwa owahi ariinaaye, alevelela na ovilela nwulweene zoopo za katapu yawe, zootthenkezeliwa otapanyiwa? ²³Kilupe niini, nkhama ye aretta epo yoori opatthe ojuwiwa othaajiri wa siifwa yawe khwa zoopo ya tthakaraka yawe, atthenkeziyeeyo raku zeene khwa ottitthima wawe. ²⁴Ama talili ti fweeyo, theenya awaakhuweliyeeyo khahiyo vakatthi wa mayaahuuti paasi, ila theenya amalapo. ²⁵Nkhama etthiipo alupiyeezo nkithaapu ya Ozeeya yoori:

“Kiniwaakhuwela yoori ‘atthu aka’, apale ohiiyi atthu aka;

na kawaakhuwela yoori ‘ajiraani aka’, apale ohiiyi ajiraani aka,”

na, ²⁶“zinteela onrettikhana yoori puuro ethiito muuziweeyo yoori:

‘Mweeyo khahi atthu aka’,

yo anteela wiitthiwa yoori

‘aana a Nluku wa ohaayi.’ ”

²⁷Ezaaya alupa monkoni wa Ezirayiilu yoori:

“Yeeyaru pure thamani ya meezirayiilu nkhama mishaka za mmattima,

ila akina aya paasi ti anttelaaye wuusurukha.

²⁸Maana Mbwana amarisela nttakhuzi lawe vathi apha,

khwa nanna ya waakuva na yoolikana.”

²⁹Nkhama alupiyeezo Ezaaya raku yoori:

“Eriwaka Mbwana wa Owahi kheettiye onilikhela peewu kiina,

niri nkhama Sotooma

na nilattananiye Komoora.”

Ohikhupali wa meezirayiilu

³⁰Apho nilupe niini? Amalapo ahaariweekesaaye okhupaliwa, apattha okhupaliwa nkatthi wa amini; ³¹ila Ezirayiilu, aari weekesaaye kano yoori zitane okhupaliwa, khapattheeni. ³²Mwaasa wa niini? Maana kheekesiye khwa amini, ila khwa khaazi zaya. Yo akwakwanttuwa va liwe lookwakwanttula. ³³Nkhama etthiipo yaatikhiweezo yoori:

“Moone yoori kinttha khwa Siyoni liwe limote lookwakwanttula

na liwe limote linkwisaaye,

na otule ankhupalaaye khinteela ompattha haaya theenya.”

Mayaahuuti ankatthala shariya ya Nluku

¹Attwiizaku, niiya ya varoho vaka na lompa yaka wa Nluku khwa meezirayiilu ti yoori yo oosurukhe. ²Kiniwaalawela oshaahiti yoori yo ajinkha saaneene khwa Nluku, ila ojinkha waya opo khunlankha muujuwa. ³Theenya ahijuwaka shariya ya Nluku na eekesaka okheya shariya yaya ennyewe, khuhijitthi shariya ya Nluku. ⁴Maana mwiisho wa kano ti Al-Masiihu, yoori ahakikhiwe wooshi otule aninkhupalaaye.

⁵Munsa aatikha khwa nanna eti shariya entaaye khwa kano yoori: “Ntthu anrettaaye vitthu zaya epo oniikhala nkatthi wa etthiipo.” ⁶Ila shariya entaaye khwa amini enlupa yoori: “Ohilupe nroho mwawo yoori: ‘Paani anttelaaye owela pinkuuni?’ ” Eto, enimwiishusha Yinsa, ⁷“ama ‘paani anttelaaye wiishukhela nkhilintti?’ ” Eto eninretta Al-Masiihu owela vakatthi wa ananfwa. ⁸Ila niini alupiyeeyo? “Nttakhuzi liri kharipu na weeyo, liri nkhanyo mwawo na nroho mwawo.” Nttho, nttakhuzi la amini nintafusiraaye. ⁹Amana weeyo otukhuru na milomo zawo yoori “Yinsa Mbwana” na khukhupali nroho mwawo yoori Nluku ansisimula vakatthi wa ananfwa, ontta wuusurukha. ¹⁰Maana na rooho onkhupali khwa shariya, na milomo ontukhuru khwa nusura. ¹¹Nkhama etthiipo enlupaazo Zawaatikhiwa Ttakatthiifu yoori: “Wakhula otule aninkhupalaaye ye khinteela ompattha haaya theenya.” ¹²Khawiivo ofwarikhana khwa mayaahuuti na amalapo, maana Mbwana othuuto mmote ti Mbwana wa atthu ooshi na oniwaaparikhiya saaneene ooshi apale aninkhuwelaaye, ¹³maana “wakhula otule ankhuwelaaye nzina la Mbwana ontta wuusurukha.”

¹⁴Nannani anttelaaye onkhuwela otule ahinkhupaleeni? Na anttela onkhupali toovi otule ahinasiile hatha etthu monkoni wa ye? Na anteela osiila toovi ahipuweeni ntthu wa owaatafusirela? ¹⁵Khi anttela otafusiri toovi ahirumiweeni? Nkhama yaatikhiweezo yoori: “Nanna anshapweyaazo moolu atthu apale anlaleyaaye hapari zooshapweya!”

¹⁶Nakataalikha, wala khahi meezirayiilu ooshi aakhupaliyeeyo hapari zooshapweya, maana Ezaaya alupa yoori: “Mbwana, paani akhupaleliyeeyo tafusiiri zeetthu?” ¹⁷Khwa etthiipo amini enta khwa osiila hapari, na hapari ensiiliwa khwa nttakhuzi la Al-Masiihu. ¹⁸Ila miiyo kinuuzela yoori: Yo khasiileeni? Khweele pi etthiipo asiila, nkhama etthiipo enlupaazo Zawaatikhiwa Ttakatthiifu yoori:

“Olumwenku wooshi yasiileya huula yawe,

na mattakhuzi awe mpakha okhu wiisheliyeewo olumwenku.”

¹⁹Kinuuzela opheya yoori, talili meezirayiilu khiweeleyeeni? Mwanzo Munsa alupa yoori:

“Miiyo kinuutothelani wiivu na atthu apale ohiiyi aka

na kinuutothelani katapu khwa atthu oojika.”

²⁰Na Ezaaya khulupa woominyalavo araka:

“Kasikaniwa pi apale ahaari okeekesaaye;

kajithoonyeza vakatthi wa apale ahaari okuuzelelaaye.”

²¹Ila monkoni wa Ezirayiilu, ye alupa yoori:

“Wakathi wooshi kookola makhono aka

khwa atthu ookhijili na ohisiilaneyi.”

Meezirayiilu asaliyeeyo

¹Tiito kinuuzelaaye yoori: talili Nluku awaakatthala atthu awe? Hatha vattitthiiru! Maana miiyo ena ki mwiizirayiilu wa peewu ya Eburahiima, wa lihimo la Bejami. ²Nluku khawaakatthaleeni atthu awe, apale thanku raku awathawuliyeeyo. Ama khamwinjuwa Zawaatikhiwa Ttakatthiifu alupiyeeyo Aliyaasi khwa nanna aari onkhuwelaazo Nluku monkoni wa Ezirayiilu? ³“Mbwana, awoola manapiyu awo, awaakurumula maalitaari awo, miiyo kasala otthome, apha aneekesa okuula.” ⁴Nluku aajipwiyeni? “Kajipwehela miiyo alume alufu sapa, ahinkokhoreleeni nluku otule woovonyeya Bahaali.” ⁵Etthiipo, leelo theenya awaapho atthu asaliyeeyo athawuliweeyo khwa rehema. ⁶Na nkhama mwaasa wa rehema, khahiyo theenya khwa khaazi; eriwaka yaari etthiipo, rehema khayaari wiiya rehema.

⁷Apho kilupe niini? Ezirayiilu khapattheene etile aari weekesaaye, ila anamathawuliwa apattha. Akina zoomisiwa rooho zaya, ⁸nkhama etthiipo yaatikhiweezo yoori:

“Nluku awenkha rooho zoonyokowa,

maasho yoori ahoone,

mashiilo yoori ahisiile,

mpakha leelo eti.”

⁹Na Daawuuda alupa yoori:

“Meeza aya athatuwe eeye taapha na nraakho

liwe linkwakwattulaaaye na loozukuliseliwa yo.

¹⁰Oriipise maasho aya, yoori ahisala oona,

na pavu zaya zinyokowe khwa mileele.”

Okatthaliwa wa meezirayiilu khahiyo mwiisho

¹¹Kinuuzela opheya yoori: talili akwakwanttuwa yoori akwe? Hatha vattitthiiru! Olikha toowo, mwaasa wa ovonya waya, nusura yawaateela amalapo yoori meezirayiilu eeyane wiivu. ¹²Ila, nkhama ovonya waya onthoonyeza maali khwa olumwenku, na otteettheya waya maali khwa amalapo, khitepeeni othoonyeza waatta amana aretta zoolikana!

¹³Kiniwuuzani mweeyo, amalapo. Maana miiyo ki aswihaapa wa amalapo, kinwulisa khaazi yaka, ¹⁴kiroromelaka yoori koone nkhama khwa nanna kiina kintothela wiivu khapila yaka na owuusuru akina. ¹⁵Maana, nkhama wanswiwa waya yo osiilana wa olumwenku, khi okhupaleliwa waya onttela wiiya niini, woohiiyi ohaayi vakatthi wa ananfwa? ¹⁶Amana yiiya ttakatthiifu phantte ya phaawu yoovahiwa nkhama mishumo za mwanzo, phaawu yooshi eniiya theenya etthiipo; nkhama ntathaari ttakatthiifu, na virapi zaya ziniiya etthiipo.

¹⁷Amana virapi kiina zishijiwa, aphano weeyo, wiiyiye muutthi wooliveera wa ntthuttu, waluttaniwa khwa oluveera mikinoko na ori vamote na oronkovu ontaaye khwa ntathaari wa oluveera woozaliwa. ¹⁸Ohijikhutupulane virapi zaya epo. Amana oretta, ojuwe yoori khahiyo weeyo onshokholelaaye mitathaari, ila mitathaari khwa weeyo. ¹⁹Aphano weeyo onlupa yoori: “Virapi zeetta oshijiwa yoori eluttaniwe miiyo.” ²⁰Yalikana. Yo zashijiwa mwaasa woohikhupali, weeyo nalelo wiiye wookhomaala mwaasa wa amini. Aphano ohijikhutupule ila woove. ²¹Nkhama etthiipo Nluku ahiilikheleleni virapi epile za ephattu, na weeyo theenya khanteela owiinanela.

²²Nakataalikha, moone okemaani na okhomaala wa Nluku. Okhomaala khwa apale akwiiyeeyo, ila okemaani khwa weeyo amana wiiya muukemaani mwawe, noohijuwi ontta oshijiwa. ²³Na amana yo, arutela ohikhupali waya, antta olutthiwa va muutthi, maana Nluku onwahi owaaluttavo opheya. ²⁴Weeyo khahi o yaahuuti, ila ori nkhama erapi yooshijiwa va muutthi wa oluveera wa ntthuttu wa ephattu. Ohiiyeeni wa ephattu, wapharisiwa va oluveera woozaliwa. Moone yoori ti yootepa okhweya channu opharisela opheya virapi za ephattu va muutthi wa oluveera otthuupo.

Meezirayiilu ooshi antta wuusurukha

²⁵Attwiizaku, akintakha yoori mwihijali siiri epi zootikinisa, mwihijoone nkhama ajuwi. Meezirayiilu eezelela wuumisa rooho zaya, mpakha ofiyela olikana wa amalapo. ²⁶Khwa etthiipo, meezirayiilu ooshi antta wuusurukha nkhama yaatikhiweezo yoori:

“Namataphula onttela opuwa Siyoni

yoori awaawerawerise a Yaakhumpa mukaafiri mwaya.

²⁷Na opo osiilana waka na yo

wakathi kifujiyeeyo twampi zaya.”

²⁸Ila khwa hapari zooshapweya, yo ajiretta waatuwi mwaasa wa mweeyo. Ila khwa othawuliwa, mwimphetiwa mwaasa wa amarehemu. ²⁹Maana tthuvo na okhuweliwa wa Nluku khunnyakanyeya. ³⁰Nkhama etthiipo na mweeyo raku mwaari onkhijilela Nluku, ila aphano mooneliwa tthakaraka mwaasa wa okhijili wa mayaahuuti. ³¹Etthiipo theenya, nasaapi yo ajiretta onamakhijili, yoori theenya apwekherele nasaapi eti tthakaraka, rehema na tthakaraka ya Nluku khwa mweeyo. ³²Maana Nluku awaattha ooshi phantte ya okhijili, yoori apatthe owaathonyeza tthakaraka yawe khwa ooshi.

Liipo la onsifu Nluku

³³Oo wiicha wa maali na akhili za ojuwa wa Nluku! Woovitheya pi olakela wawe na zooheeleyi tarikhi zawe!

³⁴Paani anjuwaaye shawuri za Mbwana?

Ama aaziye wiiya shawuriiya awe paani?

³⁵Paani omwanzo amwinkhiyeeyo yoori naye anrutisele?

³⁶Maana zooshi zata khwa ye, na zooshi zeeyavo khwa ye, na pi zawe. Attitthimisiwe ye khwa mileele! Amiina.

Ohaayi mpheya

¹Nakataalikha, attwiizaku, kinuuvekelani khwa tthakaraka ya Nluku yoori mwinkhe mwiili enu nkhama twaha haayi, ttakatthiifu na yontuvela Nluku; eto ti aputu yenu mweeyo yoolikana. ²Mwihijilipisane menttezi a olumwenku opu, ila mwizukuliseye khwa ozukuluwa wa akhili zenu, yoori mwiiyane makhaamu aweezelela na wootela yooshapweya, otuva na khaamili niiya ya Nluku.

³Tiito, khwa rehema kinkhiweeyo, kiniwuuzani mooshi mweeyo yoori: Ahiiyevo aniiyanaaye khwa mweenyewe shawuri zooziti epile anwahaaye wiiyana; ila, olikha toowo, eeyane shawuri zoolipalipa nkhama etthiipo khiima ya amini Nluku amwinkhiyeeyo. ⁴Nkhama etthiipo wakhula mmote wa fweeyo nina mwiili mmote oriina phantte zawaatta na phantte zaya epo zooshi zinkhola khaazi zoofwarikhana. ⁵Etthiipo theenya fweeyo niiyiyeeyo awaatta, naretteya wiiya mwiili mmote khwa Al-Masiihu, na wakhula phantte yaluttana na phantte kiina zaya zooshi. ⁶Ninaaye tthuvo zoofwarikhana, khwa rehema ninkhiweeyo. Nkhama ntthu onaaye tthuvo ya ohupiri, arumeyele khwa amini ariinaaye. ⁷Nkhama tthuvo yawo ti ya orumeya, orumeye; nkhama ti ya osomisa, osomise; ⁸nkhama ti ya owaalipisela azaawo, owaalipisele. Nkhama ti ya winkha, winkhe wahurumavo; nkhama ti ya olokozela, olokozele na phoole; nkhama ti ya othoonyeza tthakaraka, othoonyeze na furaha.

Opheta

⁹Pheta yenu mweeyo ena ya wiiya ya khweele. Ewiiphireni zootakhala; mwikholelele epile ziiyiyeeyo zooshapweya. ¹⁰Mwijinkhe mmote na nzeenu nkhama pheta ya ntthu na ttwiiye. Mwihithari owaakhirimu azeenu zayita mweeyenaru. ¹¹Mwikhole khaazi na niiya mwihiiye anamaviliwa. Mwinrumeyele Mbwana na rooho ya nthiti. ¹²Mwifurahele nroromelo mwiriinaaye, mwiiye oovilela miswipa, na olompa woohilikheleli. ¹³Mwisala mwiwaameela attakatthiifu apale othowiwa epile mwiniiyanaaye, na owaapokherela aletto vaje venu.

¹⁴Mwiwaaparikhiye apale anuulupatthanini; mwiwaaparikhiye, na mwihiwaalaani. ¹⁵Mwifurahi na apale anfurahaaye; mwilile na apale anlilaaye. ¹⁶Mwiiyane osiilana na azeenu. Mwihiiye atthu oojikhupali, ila mwiiye oolikana khwa okusanyeya na atthu apale ohoonelewi vahali. Mwihijoone wiiya ajuwi.

¹⁷Mwihinriphe ntthu yootakhala khwa yootakhala. Mweekese oretta vitthu zoolotteya vakatthi wa atthu ooshi. ¹⁸Mwirette thenke ya weekesa wiikhala na heeri khwa atthu ooshi. ¹⁹Aphetani aka, mwiheekese ojiripha, ila mwinlikhele Nluku katapu yaya eto, maana yaatikhiwa yoori:

“Ojiripha pi waka,

kinteela oretta hisapu na yo,

Mbwana ti alupiyeeyo.”

²⁰Olikha toowo:

“Amana atuwi awo enkhola jala, omwinkhe etthu yoojiwa,

amana linkhola nnyottha, omwinkhe maati anywe;

amana oretta toowo

onuukela makhala ookholela veeshwa vawe.”

²¹Mwihijilikhelele oshinttiwa pi zootakhala, ila mweeyo mwishintte zootakhala khwa zooshapweya.

Owaashututela Afwalume

¹Anaatamu ooshi ana ya owaashututela afwalume apale aariiye wiilokozi, maana khawiivo ofwalume woohilankhi mmakhono wa Nluku; na wakhula ofwalume oriivo ye ti atthiiyeemo mmapuro mwaya. ²Nakataalikha, otule ankhijilelaaye ofwalume onkhijilela oruma wa Nluku; oto aya anrettaaye toowo onjitothela hukhumu. ³Maana afwalume khana ya wooviwa, woohiiyi apale anrettaaye zootakhala. Weeyo ontakha wiikhala woohiwoovi afwalume? Orette zooshapweya ontta ottottopeliwa. ⁴Maana ofwalume oninrumeyelaaye Nluku khwa saana yawo. Ila, weeyo amana orettaka zootakhala, woove, maana, yo khanthuula phanka woohiivo kiiswa. Yo anakhaazi a Nluku na antana hukhumu yaya monkoni wa apale anrettaaye zootakhala. ⁵Nakataalikha enuuhithajiyani owaashututela afwalume, khahiyo paasi mwaasa wa woova hukhumu, ila theenya khwa akhili zenu enuurumani mweeyo oretta etthiipo.

⁶Tiito theenya mweeyo mwiriina ya oripha lumpuru, maana afwalume ari nkhaazi ya Nluku, anjilipisana khaazi yaya ethiito wakhula siikhu. ⁷Mwimwinkhe wakhula ntthu etile eninsuhaaye: Nkhama lumpuru, mwiriphe lumpuru, nkhama oshokholeza, oshokholeze; nkhama woova, moove; nkhama onhishimu, onhishimu.

Pheta mmote na nzaawe

⁸Mwihiliwe hatha etthu, woohiiyi pheta ya mmote na nzeenu, maana otule animphetaaye nzaawe onshututela kano ya Nluku. ⁹Maana oruma waya opo pi opu: “Ohiraruwe, ohuule, ohiiye, ohiiyane omaashokopho,” wakhula oruma nkina ori nkatthi wa oruma opu: “Omphete nzaawo nkhama onjiphetaazo omweenyewe.” ¹⁰Ntthu aniwaaphetaaye azaawe khaniwaarettela vitthu zootakhala, nakataalikha pheta omarisela kano.

¹¹Mwisala mwiretta epo, mwijuwaka wakathi niniikhalaaye, wafiya wakathi wa mweeyo wuumwazeyani osikizi, maana nusura yeetthu eri kharipu zayita wakathi nikhupaliyeeyo. ¹²Osikhu onsaleela wiisha; nthana ori kharipu. Nakataalikha nilikhe khaazi za n’yiiza na nijiwalise zaana za nnuuru. ¹³Nijilikanise weekhweelevo nkhama atthu aneettettaaye nnuuru ya nthana, khahiyo khaapa twayifu na ohapaliwa, wala oraruwa na zowera, wala onyakulisana na nrima. ¹⁴Olikha toowo, mwinwale Mbwana Yinsa Al-Masiihu, mwihiikhale mwilottelelaka epile entakhaazo mwiili, nkhama winkha puuro vitthu za onaatamu.

Owaavilela apale otteettheya khwa amini

¹Mwinkhupalele otule eeyiyeeyo woottettheya nkatthi wa amini, woohinyakulisanani. ²Owaapho ankhupalaaye oja vitthu zooshi; ila akina apale amini yaya yiiyiyeeyo yoottettheya, etthu yoojiwa yaya mathapa. ³Otule anjaaye zooshi ahintarawu otule ahinjaaye, na otule ahinjaaye zooshi ahinhukhumu otule anjaaye, maana Nluku ankhupalela. ⁴Weeyo o paani wa omphuka karumeya wa watthu? Nkhama eetta weemela ama okwa zwaamu ya Mbwana awe. Na oniiya wa weemela, maana Mbwana ti ariina makhaamu a onshokholela.

⁵Awaapho atthu anhalalishaaye siikhu zayita siikhu kiina yaya; na awaapho anoonaaye siikhu zooshi wiiya sawasawa. Wakhula ntthu akholelele etile ariina mmwishwa mwawe. ⁶Otule anoonaaye siikhu yoori ena fwayita khwa Mbwana arette etthiipo. Otule anjaaye nyama khwa Mbwana aje, maana oninshukhurwela Nluku, na otule ahinjaaye khwa Mbwana ahije, na anshukhurwele Nluku. ⁷Maana khina mmote wa fweeyo aniikhalaaye khwa mweenyewe paasi, na khina mmote wa fweeyo anfwaaye khwa mweenyeweru paasi. ⁸Nkhama niri haayi, niri haayi khwa Mbwana, nkhama nanfwa, nanfwa khwa Mbwana. Etthiipo, hatha nkhama neetta ofwa, na atthu a Mbwana.

⁹Tiito Al-Masiihu afwiiyeeyo na khusisimuwa yoori eeye Mbwana wa apale afwiiyeeyo na apale ari haayi. ¹⁰Aphano weeyo mwaasa aya niini omphukaka ttwiiyo? Wala mwaasa wa niini weeyo ontarawaka ttwiiyo? Fooshi fweeyo nineekesela ophukiwa ti Nluku. ¹¹“Maana yaatikhiwa yoori:

“Kinlapha kimweenyewe,” alupaka Mbwana, “omaasho waka makutha ooshi anteela okokhora,

na malimi ooshi anteela ontukhuru yoori ki Nluku.”

¹²Etthiipo, wakhula mmote wa fweeyo onteela onjipu Nluku khwa zwaamu yawe.

Mwihiwaatthe azeenu ntwampi

¹³Nakataalikha, nilikhe ophukana mmote na nzeetthu. Olikha toowo, nirette matakhelo ohitthi liwe la okhwankhwanttula ama enttiyelelaaye tarikhi ya ttwiiyo. ¹⁴Nkhama ntthu ori wa Mbwana Yinsa, kinkhupalela yoori khina etthu yoojiwa ottho yiiyiyeeyo yoohifwayi, amana ntthu aharamusha, eniiya haraamu khwa ye. ¹⁵Amana ttwiiyo ahuzunikha khwa vitthu onjaazo, weeyo khuneettettisa pheta mwaasa wa etthu yoojiwa yawo. Ohintapanye ttwiiyo otule Al-Masiihu anfweliyeeyo. ¹⁶Etile yiiyiyeeyo yooshapweya khwa mweeyo ehiretteye wiiya etthu yootakhala. ¹⁷Maana ofwalume wa Nluku khahiyo etthu yoojiwa wala yoonywiwa, ila shariya, heeri na furaha khwa Rooho Ttakatthiifu. ¹⁸Otule aninrumeyelaaye etthiipo Al-Masiihu, Nluku ti wontuvela na oniiya woohakikhiwa pi anaatamu.

¹⁹Tiito, nijilipise weekesa zooshi entanaaye heeri na okhomaazana mmote na nzeetthu. ²⁰Ohitapanye khaazi ya Nluku mwaasa wa etthu yoojiwa. Vitthu zoojiwa zooshi pi za halaali, ila ti ya ovonyeya oja wakhula etthu eniwaakwakwanttulaaye akinoko. ²¹Afwataali ohiji nyama wala onywa viinyu, wala oretta wakhula etthu kiina eninkhwisaaye ttwiiyo. ²²Etthiipo, khwa nanna oriizo okhupali wawo monkoni wa vitthu zaya epo, othokorele weeyo na Nluku. Wooparikhiyiwa ti otule ahinjihukhumwaaye khwa etile anoonaaye yoori ti yoolikana! ²³Ila otule ariina nshikili ti wohukhumwiwa amana aja, maana khanja na amini; na yooshi etile ehintanaaye amini twampi.

Khaazi ya owaatuvelisa azeetthu

¹Fweeyo nikhomaaliyeeyo, nina ya ovilela otteettheya wa apale oohikhomaali, nihisala nijituvelisa neenyeweru. ²Wakhula mmote wa fweeyo ona ya ontuvelisa nzaawe khwa saana yawe, yoori ankhomaaze. ³Maana theenya Al-Masiihu khajituveliseeni mweenyeweru, ila nkhama yaatikhiweezo yoori: “Mattukhano a apale anuuttukhanaaye akikwela miiyo.” ⁴Maana zooshi zaatikhiweeyo asulani zaatikhiwa yoori enisomise, khwa nanna, yoori khwa nthiti na olipiseliwa onlankhaaye Zawaatikhiwa Ttakatthiifu elipisele nroromelo eetthu.

⁵Nluku otule aninkhaaye nthiti na ominyala, awinkheni mweeyo rooho ya osiilana, khwa Yinsa Al-Masiihu ⁶yoori khwa rooho moote paasi na huula moote mweeyo mwinttitthimise Nluku na Paapa wa Mbwana eetthu Yinsa Al-Masiihu.

⁷Nakataalikha, mwikhupalelane mmote na nzeenu, nkhama etthiipo Yinsa ookhupaleyeenini, yoori mwipatthe onttitthimisa Nluku. ⁸Maana miiyo kiniwuuzani mweeyo yoori Al-Masiihu ajiretta okarumeya wa apale eeyiyeeyo anamakhiriya, khwa pheta ya haakhi ya Nluku, yoori athoonyeze ahiti arettiyeeyo amarehemu apapazetthu; ⁹yoori amalapo anttitthimise Nluku khwa tthakaraka yawe, nkhama etthiipo yaatikhiweezo yoori:

“Tiito miiyo kinuusifu vakatthi wa amalapo;

kiniipela siifwa nzina lawo.”

¹⁰Na theenya khulupa yoori:

“Mwiipe na furaha, oo amalapo, na atthu awe.”

¹¹Na theenya:

“Mwinsifu Mbwana, mooshi mweeyo, amalapo;

mwimwiipele siifwa ye atthu ooshi.”

¹²Ezaaya theenya alupa yoori:

“Omphutuwa khwa ntathaari wa Yeese,

otule anttelaaye opuwa yoori alokozele vakatthi wa amalapo;

yo anttela ottha nroromelo aya khwa ye”.

¹³Nluku wa nroromelo ti aweetaaze furaha yooshi na heeri, mwaasa wa omwaamini ye, yoori nroromelo enu weekezeleye khwa owahi wa Rooho Ttakatthiifu.

Khaazi aakhupalaniweeyo Paawulu

¹⁴Attwiizaku, miiyo ena kinkhupalela yoori mweeyo mweetaala emaani saaneene na onozeleya, mwina makhaamu a olakana mmote na nzeenu. ¹⁵Monkoni wa vitthu kiina zaya, miiyo kawaatikhelani mweeyo woomaruwavo channu, haaswahaaswa yoori kuukupuseleni opheya vitthu zaya epo mwinjuwaazo. Kawaatikhelani mwaasa wa rehema Nluku akinkhiyeeyo, ¹⁶ya wiiya karumeya wa Al-Masiihu Yinsa khwa amalapo, nkhama khaazi ya ohaakhimu ya olaleya hapari za Nluku, yoori amalapo aretteye wiiya zaakha yookhupaliwa ti Nluku, oottakatthisiwa ti Rooho Ttakatthiifu.

¹⁷Nakataalikha, miiyo kinjittitthimisa khwa Yinsa Al-Masiihu, khwa khaazi yaka kininkholelaaye Nluku. ¹⁸Akinjilokozelisa ottakhula etthu woohiiyi etile Al-Masiihu arettiyeeyo khwa miiyo khwa nttakhuzi na vitthu zawooneya yoori kiwaathuule amalapo onshututela Nluku, ¹⁹khwa owahi wa alama na mitikiniso na khwa owahi wa Rooho ya Nluku. Etthiipo waaza Yeruzaleemu na nkerekhere mwaya mpakha Eliiriku kalaleya saaneene hapari zooshapweya za Al-Masiihu. ²⁰Wakhula siikhu karetta thenke ya otafusiri hapari zooshapweya ohali Al-Masiihu ahaari ojuwiwaawo, yoori kihikhomaaze vatulu wa nchina la akinoko. ²¹Ila khapulathi, nkhama etthiipo yaatikhiweezo yoori:

“Anteela omoona apale ahasiliyeeyo alupiwaka,

na enteela oweeleya apale ahansiliyeeyo”.

Paawulu onwaza othotola ojama wa Nluku wa Rooma

²²Tiito swaafu za waatta kaakhattaziweeyo ota vakatthi venu mweeyo. ²³Ila apha, kiishisiyeevo khaazi yaka mmuti mphu na kaaza raku otakha oteela owoonani, ²⁴kinwaza oretta amana kilawaka Shipaanya. Kinwejela wuuthotolani kiviraka na kiwinkheni mweeyo ruhusa ya okaawuni monkoni wa safwari yaka eto, paata ya opuha vattitthiiru vamote na mweeyo.

²⁵Ila nasaapi eti kineetta Yeruzaleemu, okhola khaazi ya attakatthiifu. ²⁶Maana ojama wa Nluku wa Masetooniya na wa Akaaya aarina furaha ya oshokholeza khwa asikhini ariiye vakatthi wa attakatthiifu a Yeruzaleemu. ²⁷Aarina tuvela wa epo zaya na weekhweele ana sharuthi ya attakatthiifu a Yeruzaleemu. Maana, nkhama amalapo aretta phantte ya parakha ttakatthiifu ya mayaahuuti, ana ya owaarumeyela mayaahuuti theenya na maali zaya. ²⁸Etthiipo, paata ya omarisela khaazi eti na khwiiyana hakiikha yoori yo apwekherela mishumo epi, kinlawa Shipaanya na kinuuthotolani amana kiviraka. ²⁹Kajuwa yoori, amana kita wuuthotolani, kinlawa kiri woolikana na parakha zawaatta za Al-Masiihu.

³⁰Miiyo kinuuvekelani attwiizaku, khwa Mbwana Yinsa Al-Masiihu na khwa pheta ya Rooho Ttakatthiifu, yoori muumane vamote na miiyo nkatthi wa lompa ya Nluku khwa zwaamu yaka. ³¹Mwilompe yoori akiwerawere atthu a Yudeya apale ahininkhupalaaye Yinsa na yoori khaazi yaka Yeruzaleemu ekhupaleliwe saaneene pi attakatthiifu, ³²khwa nanna yoori, miiyo kite kuuthotoleni khwa matakhelo a Nluku, yoori kiwahi ofiya vakatthi venu na furaha kizunkumuze vamote na mweeyo. ³³Nluku wa heeri eeye vamote na mweeyo mooshi. Amiina.

Salamu na Mihupi

¹Kinuuperekhezani mweeyo, nlupweetthu Feebe karumeya wa ojama wa Nluku wa Senkereeya. ²Kinuuvekelani yoori mwimpwekherele khwa nzina la Mbwana khwa nanna anrettaazo attakatthiifu, na mwimwaawuni khwa wakhula etile enihithajiyaaye, maana ye oniwaawunaka atthu enkeene hatha na miiyo.

³Salamu Pirisiila na Akiila, ashirikha aka nkatthi wa khaazi ya Yinsa Al-Masiihu. ⁴Yo aaleviye ohaayi aya mwaasa wa miiyo. Kiniwaashukhurwela venkivene, khahiyo otthome paasi, ila na amalapo ooshi a ojama wa Nluku. ⁵Salamu theenya ojama wa Nluku onkusanyeyaaye vaje vaya. Salamu mphetani aka ttwiiyaku Epeneetu, mwanzo wa onkhupali Al-Masiihu nti wa Aaziya. ⁶Salamu Mariyamu, akholiyeeyo khaazi venkivene khwa mweeyo. ⁷Salamu Antorooniku na Juuniya, ajaama zaku kaariina nkalapooso. Yo pi ooshitahiwa saaneene nkatthi wa maaswihaapa, na eeya anamalottela a Al-Masiihu khapulathi ya miiyo. ⁸Salamu Ampiliyaato, mphetani aka na ttwiiyaku khwa Mbwana. ⁹Salamu Urupaanu, nshirikha eetthu khwa khaazi ya Al-Masiihu, na mphetani aka ttwiiyaku Shitaakhisi.

¹⁰Salamu Apeleeshi, woohakikhiwa khwa Al-Masiihu. Salamu atthu a owawe Arishitopoolu. ¹¹Salamu Herotiyaawu, jamaayaku. Salamu atthu a owawe Narisiizu, ariiye wa Mbwana. ¹²Salamu Tirifeena na Tirifooza, aakha ankholaaye khaazi venkivene ya Mbwana. Salamu mphetani aka Peresiti naye akholiyeeyo khaazi venkivene khwa Mbwana. ¹³Salamu Ruufu, namathawuliwa wa Mbwana, na mamaawe othuuto eeyiye maama theenya khwa miiyo.

¹⁴Salamu Ashikiriitu, Folekonte, Heerimeshi, Patoropa, Heermashi na attwi ooshi ari vamote na yo. ¹⁵Salamu Filooloku, Juuliya, Nereewu na nlupuwe na theenya Oliipa na attakatthiifu ooshi ari vamote na yo. ¹⁶Mwichelisane mmote na nzeenu na salamu ttakatthiifu. Ojama wooshi wa Al-Masiihu omperekha salamu.

Shawuri za wiishela

¹⁷Kinuuvekelani attwiizaku, yoori mwiiyane phoole na apale antanaaye waawanyeya na ottha tafwawuthi khwa masomi apale mweeyo mwipwekhereliyeeyo. Apo aya mwiwaasuse. ¹⁸Maana atthu aya apo khaninrumeyela Al-Masiihu, Mbwana eetthu, ila tuvela zaya ennyewe. Khwa mattakhuzi awoolowa na ottettekha, anhata rooho za apale oottettekheya. ¹⁹Atthu ooshi ansiila olupiwaka oshututi weenu, tiito, kiwoofurahi monkoni weenu mweeyo; na kintakha yoori mwiiye aakhili khwa zooshapweya na mwihisala mwijaliwa ti hatha etthu moote yootakhala. ²⁰Woohirupazi Nluku wa heeri onteela omphwantta epiliisi vathi wa moolu enu mweeyo. Rehema ya Mbwana eetthu Yinsa yiiye na mweeyo.

²¹Timootiyu nshirikha aka wa khaazi ooperekhezani salamu, nkhama etthiipo Luusiyu, Yaso na Sosipaaturu, ajamaazaku. ²²Miiyo, Terisiyu, kaatikhiyeeyo warakha eti, kinuuperekhezani salamu khwa nzina la Mbwana. ²³Kaayu kammakeliyeeyo, ottuukho onkusanyeyaawo ojama wooshi wa Nluku omperekha salamu. Eraashitu namapweha nzurukhu wa nsitati na ttwiiyetthu Kwaarutu amperekha salamu. ²⁴Rehema ya Mbwana eetthu Yinsa Al-Masiihu yiiye vamote na mweeyo mooshi amiina.

²⁵Apho, otule ariina owahi wa wuuhakikhini khwa hapari zooshapweya zaka, na olaleyiwa wa Yinsa Al-Masiihu, khwa nanna ya othoonyeziwa wa siiri zoovitheya khwa wakathi oviriyeeyo, ²⁶ila nasaapi eti zathoonyeziwa na enkhiwa ojuwa khwa zawaatikhiwa za manapiyu, khwa oruma wa Nluku wa mileele, yoori khapila zooshi zinkhupali ye na enshututele; ²⁷aaa, Nluku mmote paasi wa akhili enkhiwe siifwa mileele zene, khwa Yinsa Al-Masiihu. Amiina.