Othoonyeziwa

Othoonyeziwa

Yaazo

¹Othoonyeza wa Yinsa Al-Masiihu, Nluku amwinkhiyeeyo yoori awaathoonyeze akarumeya awe vitthu zaariina ya orettikhana woohirupazi. Ye aperekha nlayikha lawe yoori linthoonyeze karumeya awe Yaahaya vitthu zaya epo, ²othuuto anlawelaaye oshaahiti wa zooshi epile ooniyeezo, epo zaya nttakhuzi la Nluku na oshaahiti wa Yinsa Al-Masiihu. ³Wooparikhiyiwa ti otule ansomaaye mattakhuzi apa ohupiri na ooparikhiyiwa pi apale ansiilaaye na khuthokorela epile zaatikhiweeyo, maana wakathi wanttama.

Salamu

⁴Miiyo Yaahaya kaatikhela warakha eti ojama sapa wa Nluku oriiye Aaziya:

Khwa mweeyo, rehema na heeri yoolankha khwa phantte ya otule ariivo, aariivo na otule anttelaaye ota, khwa rooho sapa ziriiye omaasho wa khukulu ya Nluku, ⁵na khwa Yinsa Al-Masiihu, shaahiti wa waamineya, wa omwanzo khwa ananfwa na mfwalume nwulu wa afwalume a voolumwenku.

Ye onnipheta na anitaphula twampi zeetthu khwa taamu yawe, ⁶khuniretta ofwalume na onamalokozela wa tiini yoori ninrumeyele Nluku awe na Paapa. Attitthimisiwe na owahi wiiye wawe khwa mileele! Amiina.

⁷Moone! Ye onta mmawiku,

maasho ooshi anteela omoona,

hatha apale anshomiyeeyo na nkokhi;

atthu ooshi a voolumwenku

anteela ojiliza mwaasa wa ye.

Enttela orettikhana etthiipo! Amiina.

⁸“Miiyo ki Omwanzo na Omwiisho,” alupa Nluku Mbwana, “otule ariivo, aariivo na otule anttelaaye ota, Nwahi zooshi.”

Ntthu woolattanana Mwaana wa Pinaatamu

⁹Miiyo Yaahaya, ttwi na nshirikheenu muuhoowa, na muufwalume, na nthiti khwa Yinsa, kaari esura ya Paatimo mwaasa wa nttakhuzi la Nluku na oshaahiti khwa Yinsa. ¹⁰Siikhu ya Mbwana khujoona kiri nkatthi wa Rooho Ttakatthiifu, khusiila huula yookhomaala nyuma waka, nkhama nlope, ¹¹elupaka yoori: “Waatikhe nkithaapu mphu epi onoonaazo, operekhe khwa ojama sapa wa Nluku ori Aaziya: Eefezu, Eshimiirina, Perekaamu, Tiyatiira, Saariti, Filateelifiya na Lawotiseeya.”

¹²Kizukuluwa yoori kimoone paani kinttakhulanaaye, kizukuluwiyeevo, khoona khantteya sapa za weero, ¹³na vakatthi wa khantteya epile aarivo ntthu mmote “woolattanana Mwaana wa Pinaatamu,” awaaliiyeeyo ajapi yoolepa yaafiyeeyo mpakha mmoolu mwawe, na aazukulelisiyeeyo nzako wa weero va efuwa vawe. ¹⁴Nyuuli za mmwishwa mwawe zaari zoolakala nkhama simawuuma, zoolakala nkhama maphovu. Maasho awe aari nkhama eviriviri ya moottho. ¹⁵Moolu awe aari nkhama poronzi wawoochiwa va njocho; huula yawe yaari ottitthima nkhama pahari. ¹⁶Nkhono nlume awe aarina matthottowa sapa, na nkhanyo mwawe khusaruwamo phanka yoonoliwa ya orere miwiri. Wuuso awe waari nkhama njuwa la elukuluku.

¹⁷Wakathi kimooniyeevo, keetta okwela nshini wa moolu awe nkhama ntthu woofwa. Aphano ye khukittheela nkhono nlume awe na khulupa yoori: “Ohoove. Miiyo ki wa Waaza na wa Wiishela. ¹⁸Ki otule ari haayi. Kaafwiye, ila apha kiri haayi khwa mileele! Na kinaaye efukulo ya ofwa na ya Ahera.

¹⁹“Nakataalikha waatikhe vitthu wooniyeeyo, waaza nasaapi na epile zinttelaaye orettikhana. ²⁰Eto siiri yootikinisa matthottowa sapa wooniyeeyo nkhono nlume aka na khantteya sapa za weero; matthottowa sapa malayikha sapa a ojama wa Nluku, na khantteya sapa wooniyeeyo ojama sapa wa Nluku.”

Khwa ojama wa Nluku wa Eefezu

¹“Khwa ojama wa Nluku wa Eefezu waatikhe yoori:

Apa mattakhuzi a otule ariina matthottowa sapa nkhono nlume awe aneettettaaye vakatthi wa khantteya sapa za weero. ²Miiyo kinjuwa zooretta zaya, na khaazi zaya, na nthiti laya. Kinjuwa yoori khunwahi owaavilela anamatakhala rooho, na wawootoota apale anjilupezaaye yoori maaswihaapa ahi, na khuwaasophela yoori anamahata. ³Mweeyo mwina nthiti na ovilela muuhoowa mwaasa wa nzina laka, na wala khamwikayireeni.

⁴Ila kinaaye eti khwa mweeyo, mweetta olikha pheta mwarinaaye mwanzo. ⁵Mwifikhiri vahalini mwikwiiyeevo! Mwithupwiye na mwirette epile mwaari orettakaaye omwanzo. Amana mwihithupwiyi, kintta wuuteelani na kilazevo khantteya yenu vahali eniiyakaavo. ⁶Ila ewaapho etthu khwa zwaamu yenu: mweeyo mwiniiphiriwa ti zooretta zaanikolayiita, nkhama enikiiphiraazo miiyo.

⁷Otule ariina mashiilo ti asiile etile Rooho ya Nluku elupiyeeyo khwa ojama wa Nluku. Otule anshinttaaye kinimwinkha ruhusa ya oja muutthi wa ohaayi, oriiye jannathi ya Nluku.”

Khwa ojama wa Nluku wa Eshimiirina

⁸“Khwa ojama wa Nluku wa Eshimiirina waatikhe yoori:

Apa mattakhuzi a otule eeyiye wa Waaza na wa Wiishela, afwiiyeeyo na khusisimuwa. ⁹Kinjuwa tafwawuthi zaya na osikhini aya, ila mweeyo mwaamathaajiri! Kinjuwa okufuru wa apale anjiitthaaye yoori mayaahuuti ila ahiiyeeni, yo sinakooka ya Epiliisi. ¹⁰Mwihoove etthu enttelaaye wuuhoochani nasaapi eti. Sheethwani oniweeselela akina a mweeyo nkalapooso yoori aweezeni, na mwinteela ohoowa monkoni wa olupatthiwa khwa siikhu khumi. Mwiiye awaamineya mpakha ofwa, na miiyo kintta owinkhani jarata ya ohaayi.

¹¹Otule ariina mashiilo ti asiile etile Rooho Ttakatthiifu elupiyeeyo khwa ojama wa Nluku. Otule anshinttaaye khanteela ohoochiwa ti ofwa wa phiiri.”

Khwa ojama wa Nluku wa Perekaamu

¹²“Khwa ojama wa Nluku wa Perekaamu waatikhe yoori:

Apa mattakhuzi a otule ariina phanka yoonoliwa ya orere miwiri. ¹³Miiyo kinjuwa ohali mwiniikhalaawo, ottuukho eriiwo khukulu ya Epiliisi. Mweeyo mwawaamineya khwa nzina laka na khamwansweeni amini mwiriina khwa miiyo, hatha wakathi wa Antiipa shaahiti aka wa waamineya, ooliiwa ottuukho Perekaamu, ohali aniikhalaawo Epiliisi. ¹⁴Ila kinaaye vitthu kiina khwa mweeyo: maana mwinaaye okho atthu anlottaaye masomi a Palaawu, othuuto ansomisiyeeyo Palaakhi nanna ya owaakwakwanttula meezirayiilu, awaanozelaka oja vitthu za otwaheliwa sanamu na oretta khaapa twayifu. ¹⁵Khwa etthiipo theenya mwinaaye atthu anlottaaye masomi aanikolayiita ¹⁶Nakataalikha, mwithupwiye! Woohiiyi toowo, kintta wuuteelani woohirupazi na kuumanane yo na phanka ya nkhanyo mwaka. ¹⁷Otule ariina mashiilo ti asiile etile Rooho Ttakatthiifu elupiyeeyo khwa ojama wa Nluku. Otule anshinttaaye kinimwinkha oja mana oovithiwa, na theenya kinimwinkha liwe loolakala lawaatikhiwa nzina lipheya, anjuwaaye ti otule anttelaaye opwekhera paasi.”

Khwa ojama wa Nluku wa Tiyatiira

¹⁸“Khwa ojama wa Nluku wa Tiyatiira waatikhe yoori:

Apa mattakhuzi a mwaana wa Nluku, otule ariina maasho nkhama eviriviri ya moottho na moolu oolattanana poronzi ya woochiwa. ¹⁹Kinjuwa zooretta zenu, opheta weenu, amini yenu, khaazi zenu na nthiti lenu, na kinjuwa yoori nasaapi mwinretta, zooziti epile za mwanzo. ²⁰Ila, kinaaye etthu khwa mweeyo: mweeyo mwininlikhelela Jezapeele, muukha otule anjilupezaaye onapiyu, na masomi awe, ye oniwaattettekha akarumeya aka, yoori asala aretta khaapa twayifu na oja vitthu za otwaheliwa sanamu. ²¹Kaamwinkhiye wakathi yoori athupwiye khwa khaapa yawe twayifu, ila ye khantakha othupwiya. ²²Khwa ethiito kintta omwinkha olwele, na owaatisela ohoowa nwulweene apale anraruwanaaye, amana ahithupwiyi vitthu epo anrettaazo. ²³Kiniwoola apale aninlottaaye muukha oto. Khwa toowo ojama wa Nluku wooshi ontta ojuwa yoori ki otule anootootaaye akhili na rooho, na kinteela omwinkha wakhula ntthu khwa khiima ya zooretta zawe.

²⁴Khwa mweeyo akinoko aya mwiriiye Tiyatiira, mwihinlottaaye masomi a muukha oto, na mwihijinozeleeni epile yo anlupaaye yoori siiri zawiicha za Epiliisi, kiniwuuzani yoori: Mwihijittikhe mapwattha makina, ²⁵ila paasi mwikholele woolipaneyavo epo mwiriinaazo mpakha miiyo ota.

²⁶Otule anshinttaaye na anttelaaye oretta matakhelo aka mpakha mwiisho, kinimwinkha ofwalume khwa khapila. ²⁷Ye onttela olokozela na puutta ya yuuma na awaapwechele nkhama yoopo ya ottophe. ²⁸Miiyo kinimwinkha ofwalume otthuupo kipwekheriyeeyo wa paapa. Na theenya kinimwinkha Phuluvulu.

²⁹Otule ariina mashiilo ti asiile etile Rooho ya Nluku elupiyeeyo khwa ojama wa Nluku.”

Khwa ojama wa Nluku wa Saariti

¹“Khwa ojama wa Nluku wa Saariti waatikhe yoori:

Apa mattakhuzi a otule ariina rooho sapa zininrumeyelaaye Nluku na matthottowa sapa. Kinjuwa zooretta zaya. Mweeyo mwinjuwaniwa wiiya haayi, ila mwafwa. ²Mwijeekesele! Mwilipisele etile nalelo eri haayi mwihinafwe sawasawa, maana akooneeni zooretta zaya wiiya khaamili omaasho wa Nluku aka. ³Nakataalikha, muupuwele etile mwipwekhereliyeeyo na mwisiiliyeeyo: mwishututele na mwithupwiye. Ila amana mweeyo mwihijeekeseli, kinttela ota nkhama nantarawu, mweeyo khamwinteela ojuwa wakathi kinttelaaye wuuteelani. ⁴Maana, mweeyo mwinaaye atthu vattitthiiru Saariti okho ahinyakuseeni kuwo zaya. Yo anttela weettettana miiyo, awaliye kuwo zoolakala, maana ansuhi.

⁵Otule anshinttaaye onttela owala kuwo zoolakala nkhama apale, na akinteela ofuja nzina lawe nkithaapu ya ohaayi, ila kinteela otukhuru nzina lawe omaasho wa Paapa na malayikha awe.

⁶Otule ariina mashiilo ti asiile etile Rooho Ttakatthiifu elupiyeeyo khwa ojama wa Nluku.”

Khwa ojama wa Nluku wa Filateelifiya

⁷“Khwa ojama wa Nluku wa Filateelifiya waatikhe yoori:

Apa mattakhuzi a otule eeyiye nttakatthifu na nkhweele, ariina efukulo ya Daawuuda. Etile ye anfukulaaye khina anwahaaye ofuka, na etile ye anfukaaye khina anwahaaye ofukula.

⁸Kinjuwa zooretta zaya. Moone yoori omaasho weenu katthaawo nlako woofukuwa, na khina anwahaaye ofuka. Kinjuwa yoori mweeyo mwinaaye kuvu vattitthiiru, ila mwathokorela nttakhuzi laka na khamwikatthaleeni nzina laka. ⁹Moone etthu kinttelaaye owaarettela apale eeyiyeeyo sinakooka ya epiliisi na anjilupezaaye oyaahuuti ahiiyeeni, ila eeyiyeeyo anamahata. Miiyo kinttela owaakokhorisa nshini wa moolu enu na ajuwe yoori miiyo koophetani mweeyo. ¹⁰Maana mweeyo mwathokorela nttakhuzi laka la otumerela nthiti, na miiyo kinuuthokorelani wakathi wa wootootiwa onttelaaye ota khwa olumwenku wooshi, yoori owootote apale aniikhalaaye voolumwenku. ¹¹Kinta woohirupazi. Mwithokorele etile mwiriina, yoori ahiiyevo hatha ntthu woothuula jarata yenu.

¹²Otule anshinttaaye, kininretta wiiya nripu la omwimpari wa Nluku aka, na khanteela olaawo theenya. Kinteela waatikha khwa ye nzina la Nluku aka na nzina la sitati ya Nluku aka, Yeruzaleemu pheeya, eniishukhaaye pinkuuni khwa phantte ya Nluku; na theenya kinteela omwaatikhela nzina laka lipheya.

¹³Otule ariina mashiilo ti asiile etile Rooho Ttakatthiifu elupiyeeyo khwa ojama wa Nluku.”

Khwa Ojama wa Nluku wa Lawotiseeya

¹⁴“Khwa ojama wa Nluku wa Lawotiseeya waatikhe yoori:

Apa mattakhuzi a Amiina, oshaahiti wa waamineya na wakhweele, mfwalume nwulu wa wumpa wa Nluku. ¹⁵Miiyo kinjuwa zooretta zaya, yoori mweeyo khahi mwa woozizima wala woolukuza! Yaari oshapweya mwiri woozizima ama woolukuza! ¹⁶Apho, mweeyo mwalawa pariti, khamwizizimeeni wala khamwilukuzeeni, kasaleela wuuchuwanimo nkhanyo mwaka. ¹⁷Mweeyo mwinri: ‘Nathaajiri, napattha maali na khanintakha hatha etthu.’ Ila khamwinjuwa yoori mwafukhara, mwa woohuzunikha na mwaasikhini, khamwinoona, na mwiri waazu. ¹⁸Kinuulakani yoori: mwikuuzanyane miiyo weero swaafi yoofuliwa va moottho yoori mwireele; na kuwo zoolakala mwiwale yoori ehisaruwe haaya ya owaazu enu; na muuzanye thiipa mwivaaze maasho enu yoori mwipatthe woona. ¹⁹Miiyo kiniwaashowera na kiniwaalikhisa apale kiniwaaphetaaye. Tiito, mwijipayini na mwithupwiye. ²⁰Mwisiileze! Miiyo kiri va nlako na kintta opiya. Amana ntthu asiila huula yaka na khufukula nlako, kintta ovira kije vamote na ye, na ye na miiyo.

²¹Otule anshinttaaye kinimwinkha ruhusa ya wiikhala na miiyo va khukulu vaka, nkhama etthiipo miiyo kishinttiyeezo khwiikhala na Paapa va khukulu vawe.

²²Otule ariina mashiilo ti asiile etile Rooho Ttakatthiifu elupiyeeyo khwa ojama wa Nluku.”

Khukulu pinkuuni

¹Paata ya vitthu zaya epo keetta weekesa, omaasho waka khoona oriwo nlako woofukuliwa pinkuuni. Huula kaasiliyeeyo omwanzo ettakhulaka, yaari nkhama nlope, khulupa yoori: “Owele ote apha, kintta wuuthoonyeza etthu eriina ya orettikhana paata ya vitthu epo.” ²Nasaapiru khujoona kiri nkatthi wa Rooho Ttakatthiifu, na omaasho waka yaariwo khukulu pinkuuni na aphale vaya wiikhaliwevo. ³Otule eekhaliyeevo nanna yawe yaari yoolattanana mawe a waara aniitthiwaaye jaasipi na sorotooniyu. Khukulu yawe yaazukuleliwe ti nkhankanyama woolattanana liwe liniitthiwaaye eshimiralata, ⁴na nkerekhere wa khukulu zaarimo khukulu kiina eshiriini na nne, na kiwoona eekhaliyevo attunkhulu a tiini eshiriini na wane. Yo awaliye kuwo zoolakala na mmwishwa arina jarata za weero. ⁵Va khukulu khupuwavo ozerima, huula na taari. Omaasho wawe zaakhoziwewo nyeeke sapa za moottho, ziiyiye rooho sapa zininrumeyelaaye Nluku. ⁶Omaasho wa khukulu yaariwo etthu yoolattanana pahari ya wooneela nkhama suupha, yoolakala yawaara venkivene nkhama matthottowa.

Vakatthi wa khukulu, nkerekhere zaarimo zumpe haayi nne za waatta maasho, omaasho na onyoko. ⁷Yumpe haayi yamwanzo yaari yoolattanana siipa, ya phiiri yoolattanana mompe, ya ttaatthu yaarina wuuso nkhama wa pinaatamu, yanne yaari olattanana saaka eettaka ovava. ⁸Wakhula moote yaarina mapaphelo sitha na zaari za wiitaala maasho, nkerekhere mpakha mmapaphelo. Woohilikheleli osikhu na nthana wiipa yoori:

“Ttakatthiifu, ttakatthiifu, ttakatthiifu, ti Mbwana Nluku,

Nwahi zooshi, aariivo, ariivo, na anttelaaye ota.”

⁹Swaafu zooshi zumpe haayi epile zaari omwinkhaavo siifwa, hishima na onshukhurwela otule eekhaliye va khukulu na ariivo khwa mileele, ¹⁰attunkhulu a tiini eshiriini na wane eetta okokhora omaasho wa otule eekhaliyeeyo va khukulu, khumwaaputu otule ariiye haayi khwa mileele. Khweeselela jarata zaya omaasho wa khukulu, eepaka yoori:

¹¹“Weeyo, Mbwana na Nluku etthu,

onsuhi opwekhera siifwa, hishima, na owahi,

maana wompa vitthu zooshi,

na khwa niiya yawo zooshi zeeyavo na zompiwa.”

Kithaapu na Pwittipwitthi

¹Aphano keetta woona kithaapu nkhama liphulupu, nkhono nlume wa otule eekhaliyeeyo va khukulu, yaatikhiwe phantte zoopiiri na eparisiwe na viphariselo sapa. ²Khoona nlayikha limote la owahi lilaleyaka na huula yoosileya liraka: “Paani ansuhaaye opharula viphariselo na khufunula kithaapu?” ³Ila khuhiivo hatha ntthu waaza pinkuuni mpakha va tuniya wala vathi wa tuniya, anwahaaye ofunula kithaapu ama weekesa nkatthi mwaya. ⁴Miiyo khulila venkivene, maana khaarivo aari osuhaaye ofunula kithaapu na wa weekesa nkatthi mwaya. ⁵Aphano nttunkhulu wa tiini mmote khukuuza yoori: “Ohilile! Omoone, otu ari apha Siipa wa lihimo la Yuuda, Ntathaari wa Daawuuda ashintta, yoori afunule kithaapu na viphariselo zaya sapa.”

⁶Paata ya toowo, keetta woona Pwittipwitthi eri nkhama ya wuuliiwa, yeemeliye vakatthi wa khukulu na ezukuleliwe ti zumpe haayi nne na attunkhulu a tiini. Ye yaarina manyaka sapa na maasho sapa, ziiyiye rooho sapa eninrumeyelaaye Nluku eperekhiweeyo va tuniya yooshi. ⁷Ye khwaattama na khuthuula kithaapu nkhono nlume wa otule eekhaliyeeyo va khukulu. ⁸Athuulaka kithaapu etile, zumpe haayi epile nne na attunkhulu a tiini eshiriini na wane khukokhora omaasho wa Pwittipwitthi. Wakhula mmote wa yo aarina tthakare mmote na miphiko za weero wiitaaliyemo ovupa, ziiyiyeeyo lompa za attakatthiifu. ⁹Na yo khwiipa liipo lipheya araka:

“Weeyo ti onsuhaaye opwekherela kithaapu

na opharula viphariselo zaya,

maana weettiye wuuliiwa, na khwa taamu yawo wamuuzanyela Nluku

mahimo ojama wooshi, luuka, atthu na khapila.

¹⁰Weeyo wawenkha ofwalume na wiiya mahaakhimu a tiini a Nluku eetthu,

yo anttela othawala va tuniya.”

¹¹Aphano khweekesa na khusiila huula ya malayikha alufu alufuzene na milikhi milikhizene. Azukuleliye khukulu, vamote na zumpe haayi na attunkhulu a tiini, ¹²na eepaka na huula yoosileya araka:

“Ensuhaaye Pwittipwitthi, yawuuliiwa,

khwa opwekherela owahi, maali, akhili, kuvu,

hishima, ottitthima na siifwa.”

¹³Nawiisha khusiila zumpe zooshi ziriiye pinkuuni, va tuniya, vathi wa tuniya, mpahari, na zooshi ziriimo, ziipaka yoori:

“Otule eekhaliyeeyo va khukulu na Pwittipwitthi

asifwiwe na hishima, ottitthima, na owahi, khwa mileele.”

¹⁴Zumpe haayi epile nne khulupa yoori: “Amiina!” Attunkhulu a tiini khukokhora khumwaaputu.

Viphariselo

¹Kooniye Pwittipwitthi wakathi yaari opharulaavo ephariselo ya mwanzo khwa epile sapa, aphano kisiila moote khwa zumpe haayi epile nne, elupaka na huula ya taari yoori: “Ote!” ²Khweekesa, omaasho waka khoona khavalo yoolakala! Nakhavalo aya arina nttetthe, na khwinkhiwa jarata, khupuwa ari namashintta wootthomeliwa oshintta.

³Wakathi Pwittipwitthi epharuliyeevo ephariselo ya phiiri, khusiila yumpe haayi ya phiiri elupaka yoori: “Ote!” ⁴Aphano khupuwa khavalo kiina, yookhuttuwa. Nakhavalo aya khwinkhiwa owahi wa olazavo heeri va tuniya na owenkha atthu wuulaana mmote na nzaawe. Na khwinkhiwa phanka moote khuluyeene.

⁵Wakathi Pwittipwitthi epharuliyeevo ephariselo ya ttaatthu, khusiila yumpe haayi ya ttaatthu eraka: “Ote!” Khweekesa, omaasho waka khoona khavalo yooriipa. Nakhavalo aya aarina mmakhono rathili moote. ⁶Aphano khusiila etthu yoolattanana huula vakatthi wa zumpe epile haayi nne, eraka: “Mphimo mmote wa tiriku khwa phakari ya siikhu moote, na miphimo mittatthu za nootti khwa phakari ya siikhu moote. Ila mwihiharipu mafuttha wala viinyu!”

⁷Wakathi Pwittipwitthi epharuliyeevo ephariselo yanne, miiyo khusiila huula ya yumpe haayi etile yanne eraka: “Ote!” ⁸Khweekesa, omaasho waka khoona khavalo ya njano! Nakhavalo aya aari wiitthiwa Ofwa, na Ahera yeettaka onlotta. Ye enkhiwe owahi wa wuula phantte yanne ya va tuniya khwa phanka, khwa jala, khwa pala na khwa nyama za ntthuttu.

⁹Wakathi Pwittipwitthi epharuliyeevo ephariselo ya thaanu, miiyo khoona vathi wa alitaari nafusi za apale ooliweeyo mwaasa wa nttakhuzi la Nluku na oshaahiti alaziyeeyo. ¹⁰Yo aari okhuwa woosileyavo alupaka yoori: “Mpakha lini oo Mfwalume Nwulu, nttakatthifu na nkhweele, onttelaaye oweja yoori owaaphuke anamwiikhala a va tuniya na ojiripha khwa taamu yeetthu?” ¹¹Aphano wakhula mmote wa yo khupwekhera kuwo moote yoolakala, na khuuziwa yoori aweje vattitthiiru theenya, mpakha olikana thamani ya ashirikha aya na attwiizaya, aarina ya wuuliiwa nkhama yo.

¹²Kooniye Pwittipwitthi wakathi yaari opharulaavo ephariselo ya siitha. Khupuwa esikinyaatthi yawoopisa, njuwa khwiiya looriipa nkhama osikhu, na mweezi wooshi khwiiya wookhuttuwa nkhama taamu, ¹³na matthottowa ootulu khukwela vathi nkhama mishumo miwishi za muuyu zitathiwaka ti pheevo zookhomaala za kashikhazi. ¹⁴Na pinku khujiputaputela nkhama liphulupu na khwaashikha, na nyaako zooshi na visura khuthamisiwa mmapuro mwaya.

¹⁵Aphano afwalume na alokozi a olumwenku wooshi, na attunkhulu a anajanka, mathaajiri, anamawahi, aviitthwaana ooshi na anamataphuliwa, khujivitha mmakurakuza na mmawe a nyaako. ¹⁶Yo aari onyakula alupaka yoori: “Nyaako na mawe, ti enikwele enivithe khwa wuuso wa otule eekhaliyeeyo va khukulu na khwa katapu ya Pwittipwitthi!” ¹⁷Maana yafiya siikhu khuulu ya katapu yaya yo; paani anttelaaye ovilela?

Miiya alufu na arupayiini na nne zoopharisiwa

¹Paata ya toowo miiyo khoona malayikha mane ari a weemela phantte nne za olumwenku, attiyeliye pheevo nne, yoori akhattaze ovuma wakhula pheevo va tuniya, mpahari, ama khwa wakhula muutthi. ²Na khoona nlayikha likina liwelelaka lintthamuwaawo njuwa, liriina ephariselo ya Nluku ariiye haayi. Ye khukuwela na huula yoosileya malayikha apale mane, atthaapo enkhiweeyo owahi wa oharipu tuniya na pahari: ³“Mwihiharipu wala tuniya, wala pahari, ama miitthi, mpakha nipharise alama ajihi za akarumeya a Nluku eetthu.” ⁴Aphano kisiila thamani ya apale apharisiiweeyo: Alufu miiya na arupayiini na nne, khwa mahimo ooshi a Ezirayiilu.

⁵Khwa lihimo la Yuuda apharisiwe alufu khumi na piiri.

Khwa lihimo la Ruubeni alufu khumi na piiri,

khwa lihimo la Gaati alufu khumi na piiri,

⁶khwa lihimo la Asheeri alufu khumi na piiri,

khwa lihimo la Nafitaali alufu khumi na piiri,

khwa lihimo la Manaase alufu khumi na piiri,

⁷khwa lihimo la Simiyooni alufu khumi na piiri,

khwa lihimo la Leevi alufu khumi na piiri,

khwa lihimo la Ezakaari alufu khumi na piiri,

⁸khwa lihimo la Zebulooni alufu khumi na piiri,

khwa lihimo la Yuusufu alufu khumi na piiri,

khwa lihimo la Bejami, alufu khumi na piiri.

Khuntti khuluyeene ewaliye kuwo zoolakala

⁹Paata ya toowo keekesa, koona khuntti khuluyeene yahaari owahaaye waalakeya, khwa khapila zooshi, mahimo, atthu na luuka, ziri omaasho wa khukulu na ya Pwittipwitthi, ewaliye kuwo zoolakala na ekholeliye virapi za mirita mmakhono mwaya. ¹⁰Na khusala akhuwa na huula yoosileya araka: “Khwa Nluku eetthu eekhaliyeeyo va khukulu, na Pwittipwitthi ti enlankhawo nusura.”

¹¹Malayikha ooshi aari aweemela nkerekhere wa khukulu, attunkhulu a tiini na zumpe epile haayi nne. Yo khukokhora omaasho wa khukulu khufiisa ajihi zaya vathi khumwaaputu Nluku, ¹²araka:

“Amiina! Siifwa na ottitthima,

akhili, oshukhurwela,

hishima, owahi na kuvu

ziiye za Nluku eetthu

khwa mileele. Amiina!”

¹³Aphano nttunkhulu wa tiini mmote khukuuzela: “Apaani apa awaliye zoolakala, na alankha vayi?” ¹⁴Miiyo khunjipu yoori: “Mbwana, weeyo onjuwa.” Ye khuri: “Apa pi apale alankhiyeeyo vakatthi wa nswipa nwulweene na afula kuwo zaya na alakaza na taamu ya Pwittipwitthi.

¹⁵“Tiito yo ari omaasho wa khukulu ya Nluku,

khusala anrumeyela osikhu na nthana omwimpari wawe;

na otule eekhaliyeeyo va khukulu oniwaafinikhana heema yawe ttakatthiifu.

¹⁶Yo khanteela wiiyana theenya jala, wala nnyottha.

Khalinteela owaantipu njuwa,

wala haari khinteela owaahukhumu,

¹⁷maana Pwittipwitthi eriye vakatthi wa khukulu enttela wiiya nshuki wa apo aya,

ye enttela owaalokoza va anaattuuttu a maati a ohaayi.

Na Nluku onttela opakusa mishozi za mmaasho mwaya.”

Ephariso ya saapa

¹Wakathi pwittipwitthi epharuliyeevo ephariselo ya saapa, waanyamaliwewo pinkuuni khwa nuusu ya wakathi.

²Miiyo khoona malayikha sapa ari aweemela omaasho wa Nluku; yo khwinkhiwa malope sapa.

³Nlayikha likina laataniyeeyo puhuri ya weero, khwaattama na khweemela kharipu ya alitaari. Ye khwinkhiwa ovupa wa waatta yoori enkhe na lompa za attakatthiifu ooshi va alitaari wa weero omaasho wa khukulu. ⁴Na khwa puhuri yaari mmakhono wa nlayikha omaasho wa Nluku laari owela loosi la ovupa na lompa za attakatthiifu. ⁵Aphano nlayikha ntthile khuthuula puhuri etile khwiitaazamo makhala a moottho wa va alitaari khumwazela va tuniya; khupuwa taari, huula, ozerima na esikinyaatthi.

Malope sapa

⁶Aphano malayikha sapa, apale aariina malope sapa, khujitthenkeza yoori avumise.

⁷Nlayikha la mwanzo khuvumisa nlope laya, aphano vuula ya mawe na moottho woophakanyaniwa taamu, khumwazeliwa va tuniya. Khulukuza phantte moote ya ttaatthu ya tuniya, phantte ya ttaatthu ya miitthi na nyaani zooshi piishi.

⁸Nlayikha la phiiri khuvumisa nlope laya, na etthu nkhama mwaako nwulweene eraka viriviri khweeseleliwa mpahari. Phantte ya ttaatthu ya mpahari khuthatuwa khwiiya taamu, ⁹khufwa phantte ya ttaatthu ya zumpe za mpahari na khupwecheya phantte ya ttaatthu ya mapaketi na kalawa zaya.

¹⁰Nlayikha la ttaatthu khuvumisa nlope laya, na ntthottowa limote liwululene, likholelaka nkhama mweeke, khukwa pinkuuni likwelaka phantte ya ttaatthu ya nyuuttho na anaattuuttu a maati. ¹¹Ntthottowa nttho nzina laya Owaawa. Phantte ya ttaatthu ya maati khuzukuluwa khwiiya owaawa. Atthu awaatta khufwa mwaasa wa maati wiiya a owaawa.

¹²Aphano nlayikha la nne khuvumisa nlope laya, na khuvulalisa phantte ya ttaatthu ya njuwa na phantte ya ttaatthu ya mweezi, na phantte ya ttaatthu ya matthottowa, ti nanna phantte ttaatthu epo zaariipiyeezo. Na phantte ya ttaatthu ya nthana khuhiina nuuru, na theenya phantte ya ttaatthu ya osikhu.

¹³Miiyo keettaka woona etthiipile, khunsiila saaka mmote aari ovavaaye otulu, na huula yoosileya araka: “Oolanikha! Oolanikha! Oolanikha pi apale aniikhalaaye va tuniya, mwaasa wa ovuma wa malope a malayikha mattatthu anttelaaye opiya nalelo!”

Nlope la thaanu

¹Nlayikha la thaanu khuvumisa nlope laya, miiyo khoona ntthottowa limote la pinkuuni lakweliyeeyo va tuniya; ntthottowa khwinkhiwa efukulo ya nlipu wa khilintti. ²Wakathi ntthottowa ntthile lifunuliyeevo nlipu wa khilintti, khusala litthuwelavo loosi nkhama njocho lookhoziwa na khwa loosi nttinttho la vanlipu khuriipisa njuwa na pinku. ³Loosi ntthile khupuwisa mapalaka va tuniya. Yo khwinkhiwa owahi nkhama anamareere a va tuniya. ⁴Yo khurumiwa yoori ahiharipu hatha nyaani za tuniya wala mathapa, wala muutthi mmote, alaputa atthu apale ohiina alama ya Nluku vaajihi. ⁵Khenkhiweeni ruhusa yoowoola, ila yoori khwa nyeezi mithaanu awoopopise. Na olwaaza ooniyeeyo waari nkhama olumiwa ti wenye. ⁶Siikhu zaya epo atthu anteela weekesa ofwa ila khanteela opattha, na anteela otakha ofwa, ila ofwa onttela awaatthira.

⁷Mapalaka aari oolattanana khavalo zootthenkezeliwa ovittha. Veeshwa vaya aarina vitthu nkhama jarata za weero, na wuuso aya waari olattanana wuuso wa ntthu. ⁸Na aarina nyuuli nkhama za muukha, na meeno aya aari nkhama a siipa. ⁹Aarina jaketa nkhama jaketa za yuuma, na ovuma wa mapaphelo aya waari nkhama ovuma wa khavalo na rikisho zitthirelaka ovittha. ¹⁰Aarina mikhira zooluma nkhama za namareere, na aarina owahi wa owaavulalisa atthu khwa nyeezi mithaanu. ¹¹Yo aarina mfwalume aya aari owaalokozelaaye, nlayikha la nkhilintti; khwa luuka ya meepereewu nzina lawe yaari oriwa Apatomi, na khwa luuka ya ekereeku, Apoliyoomi.

¹²Laana yamwanzo yavira; theenya laana kinoko piiri zinteela ota.

¹³Aphano nlayikha la siitha khuvumisa nlope laya, khusiila huula yoolankha va manyaka mane a alitaari wa weero, aari omaasho wa Nluku. ¹⁴Huula etile khuuza nlayikha la siitha ntthile laarina nlope yoori: “Ofukule malayikha mane afukiweeyo kharipu ya muuttho nwulweene oniitthiwaaye Efwarati.” ¹⁵Aphano khufukuleliwa malayikha apale mane aatthenkeziweeyo khwa wakathi otthuupo, siikhu, mweezi na mwaakha, yoori oole phantte ya ttaatthu ya anaatamu. ¹⁶Thamani ya anajanka aari va khavalo aari milikhi miiya piiri; miiyo khusiila thamani aariizo. ¹⁷Anakhavalo na khavalo zaya kooniyeezo njozi mwaka zaari toowo: jaketa zaya zaari zookhuttuwa nkhama moottho, na ooripelela, na njano; na viishwa za khavalo zaari wuupuwa nkhama viishwa za siipa, nkhanyo mwaya waari olankhamo moottho, loosi, na arufu yaya yaari nkhama oka. ¹⁸Phantte ya ttaatthu ya anaatamu khuuliiwa ti pala epile ttatthu: moottho, loosi na oka, zalankhiyeeyo nkhanyo wa khavalo. ¹⁹Maana owahi wa khavalo waari nkhanyo mwawe na onkhira wawe, nakataalikha nkhira aya onlattanana nyookha na ona eeshwa, ethiito yaari owavulalisaaye atthu.

²⁰Ila anaatamu apale aasaliyeeyo ahifweeni khwa pala epile, khuhithupwiyi khwa khaazi za makhono aya, khuhilikheleli waaputu masheethwani na sanamu za weero, na feeta, na za poronzi, na za mawe, na za thaapwa, zihinwahaaye woona, osiila wala weettetta. ²¹Na theenya khuhithupwiyi ohusuti wa wuula waya, oshawi aya, na khaapa yaya twayifu na wiiya waya.

Nlayikha na kithaapu

¹Aphano miiyo khoona nlayikha likina la owahi, laari wiishukhaaye pinkuuni. Ye awaliye liwiku nkhama kuwo; vatulu veeshwa vawe waarivo nkhankanyama. Wuuso awe waari nkhama njuwa, na moolu awe aari nkhama maripu a moottho. ²Ye aakholeliye kithaapu ttiitthiiru yoofunuliwa mmakhono mwawe. Khuttha muulu awe weelume mpahari na muulu awe weekha khwiiya tuulu, ³na khunyakula na huula yookhomaala nkhama okuluma wa siipa. Wakathi akulumiyeevo, taari sapa khuttakhula. ⁴Taari epile sapa noottakhula, miiyo kaarettiye kitakhaka waatikha, ila khusiila huula ya pinkuuni, eraka: “Opharise epo elupiyeeyo taari sapa, ila ohaatikhe.”

⁵Aphano nlayikha ntthile kooniyeeyo leemeliye mpahari na tuulu khulansa nkhono nlume khuthoonyeza pinkuuni ⁶na khulapha khwa otule ariina ohaayi wa mileele, otule ompiyeeyo pinku na zooshi eriina, na tuniya na zooshi eriimo, na pahari na zooshi eriimo, alupaka yoori: “Khuniiyavo theenya orupaza! ⁷Ila, siikhu ya ovumisiwa nlope ti nlayikha la saapa, enttela omariseleya siiri zootikinisa za Nluku nkhama aalaleyiyeezo awoozaka akarumeya awe, manapiyu.”

⁸Aphano khukittakhuza theenya huula kaasiliyeeyo pinkuuni eraka: “Olawe othuule kithaapu yoofunuliwa eriiye mmakhono wa nlayikha leemeliyeeyo mpahari na tuulu.” ⁹Miiyo khulawa mpakha aphale laariivo nlayikha kinvekela yoori akinkhe kithaapu ttiitthiiru. Ye khukuuza yoori: “Othuule na oje. Eto enttela wiiya yoowaawa mwiijohojoho mwawo, ila nkhanyo mwawo enttela wiiya yoottapitta nkhama asali.” ¹⁰Miiyo khuthuula kithaapu ttiitthiiru etile mmakhono wa nlayikha na khuja. Ye khwiiya yoottapitta nkhanyo mwaka nkhama asali; paata ya oja, mwiijohojoho mwaka khuwaawamo. ¹¹Aphano miiyo khuuziwa yoori: “Enuuhithajiya weeyo ohupiri opheya monkoni wa atthu awaatta, khapila, luuka, na afwalume.”

Oshaahiti miwiri

¹Miiyo khwinkhiwa tteketthe yoolattanana puutta ya mphimo; na khuuziwa yoori: “Olawe, waphime Nyuupa Yoosifwiwamo na alitaari aya, na owaalake atthu anaaputwaamo. ²Ila olikhe phantte ya vaje, ohiphime maana enkhiwa amalapo. Yo anteela oluwattha sitati ttakatthiifu khwa nyeezi arupayiini na miwiri. ³Kiniwinkha owahi mashaahiti aka awiri, anteela ohupiri khwa siikhu alufu na miiya piiri na siithiini, awaliye kuwo za saakhu.”

⁴Apo aya miitthi miwiri za oluveera na khantteya piiri ziriiye omaasho wa Mbwana va tuniya apha. ⁵Amana ntthu atakha owaaharipu, moottho ontta olankha nkhanyo mwaya owaamize maatuwi aya. Wakhula otule antakhaaye owaaharipu ona ya ofwa. ⁶Atthu aya apo anaaye owahi wa ofuka pinku, khwa nanna ya ohiwahi onya vuula khwa wakathi anttelaaye ohupiri, na anaaye owahi wa othatusha maati khwiiya taamu na omwazela va tuniya wakhula nanna ya pala, khwa swaafu epile antakhaazo.

⁷Amana oweeshela oshaahiti aya, nyama yawoopisa yoolankha nkhilintti eniwoomanana ewaashintte na ewoole. ⁸Na mwiili wa ananfwa aya onttela weeseleliwa tarikhi khuulu ya sitati khuluyeene khwa nlikaniso oniitthiwa Sotooma11:8 Sotooma enlupa yoori othowelela, Misuri enlupa yoori ohukhumwiwa. ama Misuri, ottuukho theenya akhomeliweewo Mbwana aya. ⁹Khwa siikhu ttatthu na nuusu, atthu a mahimo ooshi, a luuka na khapila anteela woona mwiili wa ananfwa aya na khanteela owaatakhisa ozikhiwa. ¹⁰Atthu aniikhalaaye va tuniya anteela ofurahi na otthapa na winkhana tthuvo wakhula mmote na nzaawe mwaasa wa ofwa manapiyu apa awiri aari owoopopisaaye atthu aniikhalaaye va tuniya.

¹¹Paata ya siikhu epo ttatthu na nuusu phuumu ya ohaayi wa olankha wa Nluku khuweetta, manapiyu apale khweemela na apale ooniyeeyo vitthu epile khuwaapattha woova nwulweene. ¹²Aphano yo khusiila huula yookhomaala pinkuuni ewoozaka yoori: “Mwiwele ottuukhuno!” Yo khuwela pinkuuni khwa liwiku, maatuwi aya eettaka owoona.

¹³Wakathi otthuupule khupuwa esikinyaatthi khuluyeene, na khupwecheya phantte ya khuumi ya sitati, atthu alufu sapa khufwa khwa esikinyaatthi; apale asaliyeeyo khwiiya oosuthuwa venkivene na khumwinkha siifwa Nluku wa pinkuuni.

¹⁴Laana ya phiiri yavira; laana ya ttaatthu enta woohirupazi.

Nlope la saapa

¹⁵Nlayikha la saapa khuvumisa nlope laya, pinkuuni khupuwawo huula zookhomaala zaari oraaye:

“Ofwalume wa olumwenku waretteya wiiya wa Mbwana eetthu na Al-Masiihu awe, na onteela olokozela khwa mileele.”

¹⁶Attunkhulu a tiini eshiriini na wane eekhaliyeeyo va khukulu vaya omaasho wa Nluku khukokhora na khufiisa ajihi zaya vathi khumwaaputu Nluku, ¹⁷araka:

“Ninuushukhurwela Mbwana Nluku Nwahi zooshi,

otule ariivo na aarivo,

maana oneettettisa owahi wawo nwulweene

na waaza olokozela.

¹⁸Atthu a khapila zooshi khwiiphiiriwa,

maana wafiya wakathi wa othoonyeza katapu yawo,

na wakathi wa ophukiwa ananfwa,

na ya owinkha phakari akarumeya awo, manapiyu, attakatthiifu awo,

na apale anoovaaye nzina lawo,

waaza nwulu mpakha nttiitthi,

wafiya wakathi wa owaatapanya apale antapanyaaye tuniya.”

¹⁹Aphano khufukuliwa mwimpari wa Nluku pinkuuni, khooneya aaraka wa woosiilana wawe. Khupuwa ozerima, huula, taari, esikinyaatthi na vuula yawaatta ya mawe.

Muukha na Jahanamu

¹Khupuwa alama pinkuuni yootikinisa: muukha awaliye njuwa, vathi wa moolu awe orivo mweezi na mmwishwa mwawe awaliye jarata ya matthottowa khumi na mawiri. ²Ye aari wawiimittha na eetta onyakula mwaasa wa woona olwaaza, maana aari osaleela opattha ekumi. ³Khupuwa theenya alama kiina pinkuuni: jahanamu moote khuluyeene yookhuttuwa yaarina viishwa sapa na manyaka khumi, wakhula eeshwa yaarina jarata moote. ⁴Nkhira aya khupurula phantte ya ttaatthu ya matthottowa pinkuuni, khusala eeselela va tuniya. Jahanamu yaarapaleliye omaasho wa muukha aari otakhaaye opattha ekumi, yoori emmize mwaana amana avokoliwa. ⁵Aphano muukha khupattha ekumi, mwaana wa nlume, yoori alokozele khapila zooshi na puutta ya yuuma. Ila mwanawe aya otule khulawaniwa kharipu va khukulu ya Nluku. ⁶Muukha otule khutthirela n’yaara, nttumpho Nluku aatthenkeziyeemo puuro yoori ashokholeliwe siikhu alufu na miiya piiri na siithiini.

Wuumani Pinkuuni

⁷Aphano khupuwa wuumani pinkuuni, Minkhayilu na malayikha awe khusala oomanana jahanamu, na ye jahanamu na malayikha awe khusala awaarutisela. ⁸Ila apo khwiiya oohikhomaali saana, khwa etthiipo khuwaapwetheya puuro yaya pinkuuni. ⁹Jahanamu khuluyeene khweeseleliwa oje. Ye ti nyookha ya raku eniitthiwaaye Epiliisi ama Sheethwani, namahata wa olumwenku wooshi, khweeseleliwa va tuniya na malayikha awe.

¹⁰Aphano kisiila huula khuluyeene pinkuuni elupaka yoori:

“Nasaapi yata nusura,

owahi na ofwalume wa Nluku eetthu

na ofwalume wa Al-Masiihu awe,

maana ti wa wiikariwa namalokova wa attwiizetthu,

othuuto aniwaalokovezaaye osikhu na nthana, omaasho wa Nluku eetthu.

¹¹Yo anshintta khwa taamu ya Pwittipwitthi

na khwa mattakhuzi oshaahiti alaziyeeyo;

maana aajilakeleliye oleva ohaayi aya na ofwa.

¹²Nakataalikha, otthape oo pinku

na apale aniikhalaawo!

Yalaanikha tuniya na pahari,

maana Sheethwani awiishukhelani mweeyo!

Na ye ti wookatipukha channu,

maana onjuwa yoori oninsaleela wakathi vattitthiiru.”

¹³Wakathi jahanamu ajooniyeevo yoori eeseleliwa va tuniya, khwaaza onlupattha muukha otule ampatthiyeeyo mwaana wa nlume. ¹⁴Muukha otule khwinkhiwa mapaphelo mawiri a saaka nwulweene yoori awahi ovava alawaka puuro aatthenkezeliweeyo n’yaara, ottuukho aari weettelaawo oshokholeliwa wakathi mmote, wakathi miwiri na nuusu ya wakathi, yoori ahikholiwe ti jahanamu. ¹⁵Aphano jahanamu khuchuwa maati nkhanyo mwawe nkhama muuttho, yoori ansikane muukha otule na ampurule na nziko wa maati. ¹⁶Nakataalikha tuniya khumwaawuni muukha otule, khufunula milomo zaya na khumiza muuttho opule jahanamu aachuwiyeeyo na milomo zawe. ¹⁷Jahanamu khwiiya wawiiphiiriwa ti muukha otule na khulawa wuumana ojama opule wa muukha waasaliyeeyo, apale anshututelaaye oruma wa Nluku na aniiyaaye awaamineya khwa oshaahiti wa Yinsa.

¹⁸Aphano jahanamu khulawa khweemela mwinttima.

Nyama yawoopisa elankhiyeeyo mpahari

¹Koona nyama yawoopisa elankhaka mpahari, eriina manyaka khumi na viishwa sapa na jarata khumi zishawiye manyaka aya, na wakhula eeshwa eriina nzina la kufuru. ²Nyama yawoopisa kooniyeeyo yaari olattanana shuuwi, na yaarina moolu mawulumawulu nkhama a khoole nwulweene na makhope oothokolowa, na milomo zaya nkhama za siipa. Jahanamu khwinkha nyama yawoopisa etile owahi aya khukulu yaya na ofwalume nwulweene. ³Eeshwa moote ya nyama yawoopisa etile yaari olattanana wiiyana likhwatta lawuula, ila likhwatta laya laavonisiwe. Atthu ooshi voolumwenku khwiiya ooshanka na khusala alotta nyama yawoopisa etile. ⁴Khwaaputwiwa jahanamu, maana yenkhiye ofwalume nyama yawoopisa, na theenya khwaaputu nyama etile araka: “Paani woolattanana nyama eti? Paani anttelaaye wuumanana?”

⁵Nyama yawoopisa yenkhiwe nlomo yoori ettakhule mattakhuzi oojikhupali na okufuru, na yenkhiwe ofwalume yoori erumeyele nyeezi arupayiini na miwiri. ⁶Ye khufunula nlomo awe yoori ankufurwele Nluku na alaanaka nzina lawe, heema yawe ttakatthiifu, puuro ya apale aniikhalaaye pinkuuni. ⁷Khwinkhiwa owahi wa wuumanana attakatthiifu na owaashintta. Enkhiwe ofwalume khwa mahimo, atthu, luuka na khapila zooshi. ⁸Atthu ooshi aniikhalaaye va tuniya apha anlawa aaputu nyama yawoopisa eto, ooshi apale ahaatikhiweeni mazina aya nkithaapu ya ohaayi ya Pwittipwitthi etile yuuliweeyo thanku wumpiwa wa olumwenku.

⁹Otule ariina mashiilo ti asiile:

¹⁰Nkhama ntthu onttela ofukeliwa,

ofukeliwa onlawa,

nkhama ntthu onulaaniwa phanka,

na phanka onulaaniwa.

Nthiti na waamineya wa attakatthiifu ori apha.

Nyama yawoopisa elankhiyeeyo va tuniya

¹¹Aphano khoona nyama yawoopisa kiina elankhaka va tuniya, yaarina manyaka mawiri nkhama pwittipwitthi, ila yaari ottakhula nkhama jahanamu. ¹²Aari orumeyela ofwalume wooshi wa nyama yawoopisa etile ya mwanzo khwa nzina lawe, na yaaretteyiye tuniya na apale aniikhalaamo waaputu nyama yawoopisa etile ya mwanzo, makhwatta ooliyeeyo nyama yawoopisa etile arettiye avoniye. ¹³Aari oretta alama khulukhulu, khufiyelela wiishusha moottho wa pinkuuni eeshushelaka va tuniya, ooniwaka pi atthu. ¹⁴Mwaasa wa alama enkhiweeyo ruhusa ya oretta khwa nzina la nyama yawoopisa etile ya mwanzo, ye awaahata apale aniikhalaaye va tuniya. Khuwaaruma yoori aattale ratarato khwa hishima ya nyama yawoopisa etile yaavulalisiweeyo na phanka na khwiiya haayi. ¹⁵Yenkhiwe owahi yoori yinkhe phuumu ratarato ya nyama yawoopisa etile ya mwanzo, yoori ye awahi ottakhula na yoori ewoole ooshi apale akatthaliyeeyo waaputu ratarato etile. ¹⁶Theenya khuwaakhanyarela atthu ooshi, nwulu na nttiitthi, mathaajiri na asikhini, ootaphuliwa na amwiitthwaana, apwekherelaka alama yootthiiwa nkhono nlume ama vaajihi, ¹⁷yoori ahiiyevo anwahaaye wuuzanya wala wuuzanyisa woohiiyi otule ariina alama, yiiyiyeeyo nzina la nyama yawoopisa ama thamani ya nzina lawe.

¹⁸Apha ewaapho akhili. Otule ariina weeleyiwa attheele hisapu ya thamani ya nyama yawoopisa yaya, maana thamani ya pinaatamu. Thamani yawe ti miiya sitha na siithiini na sitha.

Pwittipwitthi na alufu miiya na arupayiini na nne oopharisiwa

¹Aphano miiyo khweekesa, na omaasho waka khoona Pwittipwitthi yeemeliye vatulu wa mwaako Siyoni, vamote na ye aarivo alufu miiya na arupayiini na wane aatikhiweeyo vaajihi vaya nzina lawe na nzina la Papaawe. ²Miiyo khusiila ovuma pinkuuni nkhama ottitthima wa pahari na taari yookhomaala. Waari nkhama wa natthakare ampiyaka tthakare awe. ³Yo eetta wiipa liipo limote lipheya omaasho wa khukulu na wa zumpe haayi nne na wa attunkhulu a tiini. Na khina anwahaaye ojuwa liipo ntthile, ohiiyi apale alufu miiya arupayiini na wane oozanyiweeyo va tuniya. ⁴Apa pi apale ahiwaasapeeni aakha, maana eenaneliye omwari aya. Apo pi apale anlottaaye Pwittipwitthi wakhula aphale enttaavo. Oozanyiweeyo vakatthi wa anaatamu, khwiiya nkhama zaakha ya mwanzo mmakhono wa Nluku na khwa Pwittipwitthi. ⁵Nkhanyo mwaya khusaruweenimo hatha ohata mmote; yo makhaamili.

Malayikha mattatthu

⁶Aphano miiyo khoona nlayikha likina, laari ovavaaye pinkuuni na laarina mmakhono hapari zooshapweya za mileele yoori ziwaalaleyele apale aniikhalaaye va tuniya apha, khapila zooshi, mahimo, luuka na atthu. ⁷Ye khulupa na huula yoosileya liraka: “Mwimoove Nluku na mwinttitthimise, maana wafiya wakathi wa ophuka wawe. Mwimwaaputu otule ompiye pinku, nti, pahari na anaattuuttu a maati.”

⁸Nlayikha la phiiri khulupa na huula yoosileya liraka: “Yakwa! Yakwa Babilooniya khuulu! Yanywisa khapila zooshi viinyu ya katapu ya oraruwa waya.”

⁹Nlayikha la ttaatthu khuwaalotta na huula yoosileya liraka: “Amana ntthu aaputu nyama yawoopisa na ratarato yaya na khupwekherela alama vaajihi ama mmakhono, ¹⁰theenya onnywa viinyu ya okatipukha wa Nluku yiittikhiyeeyo yoohipakanyaniwi hatha etthu njiikira ya katapu yawe. Anlawa oopopisiwe na oka wookholela omaasho wa malayikha ttakatthiifu na wa Pwittipwitthi. ¹¹Loosi la owoopopisa atthu aya apo linwela khwa mileele. Khwa apale ooshi anaaputwaaye nyama yawoopisa na ratarato yaya, khwa apale ampwekherelaaye alama ya nzina laya, khawiivo ovumula osikhu na nthana.”

¹²Ntthi nthiti la attakatthiifu anshututelaaye oruma wa Nluku na anaamineyaaye khwa Yinsa.

¹³Aphano miiyo khusiila huula ya pinkuuni elupaka yoori: “Waatikhe: Ooparikhiyiwa ananfwa apale anfwaaye arina Mbwana nasaapi eti mpakha okho ninttaawo.” Rooho ya Nluku khulupa yoori: “Aaa, yo anttela ovumula khwa tafwawuthi zaya, maana zooretta zaya zinttela owaalotta.”

Wuurula va tuniya

¹⁴Khweekesa, na omaasho waka, khoona liwiku loolakala na va liwiku vaya eekhaliyevo ntthu woolattanana mwaana wa pinaatamu ye ariina jarata ya weero veeshwa na mmakhono aarina sheko yoonoliwa. ¹⁵Aphano nlayikha likina khulaawo omwimpari likhuwaka na huula yoosileya limuuzaka otule eekhaliyeeyo va liwiku yoori: “Othuule sheko yawo waaze wuurula, maana peewu za va tuniya zattokottha, na wafiya wakathi wa wuurula.” ¹⁶Khwa etthiipo, otule eekhaliyeeyo va liwiku khuvirisa sheko yawe va tuniya, na tuniya khwiiya ya wuuruliwa.

¹⁷Nlayikha likina khulaawo omwimpari pinkuuni liriina theenya sheko yoonoliwa. ¹⁸Theenya nlayikha likina, liriina ofwalume khwa moottho, khulaawo wa alitaari, khunkhuwela na huula yoosileya ntthile liriina sheko yoonoliwa liraka: “Othuule sheko yawo yoonoliwa na okusanye miwawa za wuuva za nviteera wa va tuniya, maana wuuva zaya zattokottha.” ¹⁹Nlayikha khuvirisa sheko etile va tuniya, khukusanya wuuva na khweeselela nkulaathayini ya katapu ya Nluku. ²⁰Yo khuluwattheliwa vakulaathayini oje wa sitati, na khusala eshuluula taamu vakulaathayini, mpakha khufiya mphule enfukiwaamo khavalo, khwa kiyasi ya miiya ttatthu olepa waya.

Malayikha sapa na pala sapa

¹Khoona pinkuuni alama kiina khuluyeene na yootikinisa: malayikha sapa na pala sapa za wiishela, maana khwa etthiipo enttela omariseleya katapu ya Nluku. ²Miiyo khoona etthu yoolattanana pahari ya suupha yoophakanyaniwa moottho, na mpahari nttumphule eemeliye apale aashinttiyeeyo nyama yawoopisa na ratarato yaya na thamani ya nzina laya. Yo awaakholeliye atthakare enkhiweeyo ti Nluku, ³na khusala eepa liipo la Munsa, karumeya wa Nluku, na liipo la Pwittipwitthi yoori:

“Khuluzeene na zootikinisa

zooretta za Mbwana Nluku Nwahi zooshi.

Tarikhi zawo shariya na haakhi,

Oo Mfwalume wa khapila zooshi.

⁴Paani ahinttelaaye owoova, oo Mbwana?

Paani ahinttelaaye ottitthimisa nzina lawo?

Maana weeyo paasi ti wiiyiyeeyo ttakatthiifu.

Khapila zooshi zinttela ota omaasho wawo na ziwaaputu,

maana zooretta zawo za shariya zathoonyezeya.”

⁵Paata ya vitthu epi, khweekesa na khoona yoori wafukuwa mwimpari wa heema ya oshaahiti pinkuuni. ⁶Omwimpari khusaruwawo malayikha sapa na pala sapa. Yo aawaliye paafutha zoottakattha na za waara, na aarina mizako za weero azokonzeliye efuwa. ⁷Aphano moote wa zumpe epile nne haayi enkhiye malayikha apale sapa miphiko sapa za weero, ziitaaliye katapu ya Nluku otule ariiye haayi mileele. ⁸Mwimpari khwiiya wawiitaala loosi la ottitthima wa Nluku na owahi wawe, na khaavo aari owahaaye ovira omwimpari ehiriwaka pala epile sapa za malayikha apale sapa zeeshela.

Miphiko sapa za katapu ya Nluku

¹Aphano miiyo khusiila huula yookhomaala yaari olankhaaye omwimpari khusala yuuza malayikha apale sapa yoori: “Mwilawe mweetthele va tuniya apho miphiko sapa za katapu ya Nluku.”

²Nlayikha la mwanzo khulawa khwiitthela mphiko aya va tuniya, khupuwisa makhwatta ootakhala na awoopisa khwa apale aarina alama ya nyama ya woopisa na aari waaputwaaye ratarato yaya.

³Nlayikha la phiiri khwiitthela mphiko aya mpahari, khuthatuwa taamu nkhama ya nanfwa, na khufwa zumpe zooshi zaari wiikhalaaye mpahari.

⁴Nlayikha la ttaatthu khwiitthela mphiko aya nnyuttho na anaattuuttu, maati aya khuthatuwa taamu. ⁵Aphano khusiila nlayikha liriina ofwalume monkoni wa maati liraka:

“Weeyo o shariya, weeyo, o Ttakatthiifu, oriivo na waariivo,

maana waphuka vitthu zaya epo.

⁶Maana pi atthaapo eetthiyeeyo taamu ya attakatthiifu awo na ya manapiyu awo,

na weeyo khuwenkha taamu yaya eto yoori anywe;

nkhama etthiipo ansuhaaye.”

⁷Na kinsiila alitaari ajipwaka:

“Aaa, Mbwana Nluku Nwahi zooshi,

za haakhi na shariya pi ophuka wawo.”

⁸Nlayikha la nne khwiitthela mphiko aya vanjuwa, na khwinkhiwa owahi njuwa yoori liwaalukuze atthu na moottho. ⁹Apa khwiiya oolukuziwa ti haari yookhomaala na khulaani nzina la Nluku, ntthile liriina oshintta pala zaya epo; khwa zooshi epo khukhijili othupwiya na onttitthimisa.

¹⁰Nlayikha la thaanu khwiitthela mphiko aya va khukulu ya nyama yawoopisa, ethiito ofwalume aya khutupweeza n’yiiza. Na atthu ooshi khwaaza ojapucha malimi aya mwaasa wa olwaaza nwulweene. ¹¹Ankufurwelaka Nluku wa pinkuuni, mwaasa wa olwaaza na makhwatta ariina; khwa zooshi, khukhijili othupwiya khwa zooretta zaya aakholiyeeyo.

¹²Nlayikha la siitha khwiitthela mphiko aya muuttho nwulu Efwarati, na khuumisa maati aya yoori etthenkeziwe tarikhi za afwalume anlankhaaye lintthamuwaawo njuwa. ¹³Aphano koona zilaakamo nkhanyo wa jahanamu na nkhanyo wa nyama yawoopisa na nkhanyo wa napiyu woojipanka, masheethwani attatthu oolattanana anaphulu. ¹⁴Epo rooho za masheethwani enrettaaye alama za minjuza; yo zinlawa wa afwalume a olumwenku wooshi, yoori zakusanyeye zilaze viittha ya siikhu khuluyeene ya Nluku Nwahi zooshi.

¹⁵“Moone yoori kinta nkhama nantarawu! Wooparikhiyiwa ti otule aniikhalaaye woojeekesela na wootthenkeza saana zoowala zawe yoori aheettette waazu na ehooniwe haaya yawe.”

¹⁶Aphano masheethwani apo attatthu awaakusanya puuro khwa luuka ya meepereewu eniitthiwaaye Arimajetooni.

¹⁷Nlayikha la saapa khwiitthela mphiko aya otulu, omwimpari khusiileya huula yoonyakula yaari olankhaaye va khukulu yaari oraaye: “Zarettikhana!” ¹⁸Aphano khupuwa ozerima, huula, taari na esikinyaatthi yookhomaala. Yaari ehinapuwe esikinyaatthi yookhomaala channu nkhama eti, thanku ompiwe pinaatamu va tuniya. ¹⁹Sitati khuulu khwawanyiwa phantte ttatthu na sitati za khapila khupwechiwa. Nluku khuupuwela Babilooniya khuulu na khwinkha mphiko wa wiitaalaamo viinyu yookatipukha ya katapu yawe yoori enywe. ²⁰Visura zooshi khutthira na nyaako zooshi khwaashikha. ²¹Khuwaakwela anaatamu mawe mawulu mawulu a vuula awaatta aari olankhaaye pinkuuni, wakhula liwe laari olemela miphimo talaathiini na thaanu; anaatamu khwaaza onkufurwela Nluku mwaasa wa mawe apale, maana pala zaya epile zaari za woopisa channu.

Muukha apakhiriye va nyama yawoopisa

¹Limote wa malayikha apale sapa aariina miphiko sapa khukaattama khukuuza yoori: “Ote, kuunoze ophukiwa wa malempe nwulu eekhaliye vakatthi wa maati awaatta, ²othuuto arettaniyeeyo omalempe afwalume a va tuniya, na atthu a va tuniya awaahapalisiye viinyu ya omalempe awe.”

³Aphano nlayikha khukithuula nkatthi wa rooho ya Nluku khukeettana n’yaara. Nttumpho khumoona muukha apakhiriye va nyama yawoopisa yookhuttuwa, efinikhaniwe na mazina ookufuru na yaariina viishwa sapa na manyaka khumi. ⁴Muukha aawaliye kuwo ya kisawu ya jampalawu na yookhuttuwa, ajijirisiye na weero, mawe ootafikhana na mawe awaara aniiyaaye nkatthi wa khoope. Mmakhono mwawe akholeleliye jiikira ya weero, ziitaaliyemo vitthu zootakhala na zooshi epile zoohifwayi za omalempe awe. ⁵Vaajihi vawe, laatikhiwevo nzina la siiri zootikinisa:

Babilooniya, Khuulu;

Maama wa Amalempe,

na namaretta zoojafu za va Tuniya.

⁶Miiyo khoona yoori muukha yaari yonhapala taamu ya attakatthiifu, taamu ya mashaahiti a Yinsa.

Wakathi kimooniyeevo khwiiya wooshanka channu. ⁷Aphano nlayikha khukuuza yoori: “Mwaasa wa niini oshankaka? Miiyo kintta oweeleza siiri zootikinisa za muukha otu na nyama yawoopisa eti aapakhiriyeeyo, eriina viishwa sapa na manyaka khumi. ⁸Nyama yawoopisa eto weeyo wooniyeeyo, yaari, ila apha khahi. Ye entakha osaruwa nkhilintti na enlotta tarikhi ya opwetheya. Apale aniikhalaaye va tuniya, mazina aya ahaatikhiweeni nkithaapu ya ohaayi thanku wumpiwa wa olumwenku anttela wiiya ooshanka amana oona nyama yawoopisa eto, maana eto yaari, ila apha khahi, na enteela ota.

⁹“Apha ontakhaavo weeleyiwa na akhili. Viishwa sapa enthoonyeza kulu sapa attaapho eekhaliyeevo muukha oto, ¹⁰na theenya afwalume sapa. Athaanu akwa, mmote nalelo owaapho na nkina nalelo khanapuwe. Ila amana apuwa, onlawa eeyevo wakathi vattitthiiru. ¹¹Nyama yawoopisa yaari, ila apha khahi, ti mfwalume wa naane. Eeyiyeeyo mmote wa apale sapa anlottaaye tarikhi ya opwetheya.

¹²“Manyaka khumi apale wooniyeeyo, afwalume khumi nalelo ahinapwekherele ofwalume, ila khwa wakathi mmote ampwekhera ofwalume nkhama afwalume, vamote na nyama yawoopisa. ¹³Yo ana niiya moote, na anlawa enkhe owahi aya na ofwalume aya khwa nyama yawoopisa. ¹⁴Anlawa oomanane Pwittipwitthi, ila Pwittipwitthi yawaashintte maana ti Mbwana wa ambwana na Mfwalume wa afwalume, na ye awaashintta vamote na anamakhuweliwa awe, anamathawuliwa awe na anamwamineya awe.”

¹⁵Aphano nlayikha khukuuza yoori: “Maati apo weeyo wooniyeeyo, vahali eekhaliyeevo malempe oto, pi atthu ooshi, khuntti khuluyeene, khapila zooshi na luuka. ¹⁶Nyama yawoopisa na manyaka khumi weeyo wooniyeeyo zinlawa za mwiine malempe, yo zinlawa zantapanye na zinlikhe waazu, zirafune nyama yawe na zintapanye na moottho. ¹⁷Maana Nluku attha va rooho vaya matakhelo ooretta niiya etile ye ariina, awaakhupalisaka khwa winkha nyama yawoopisa owahi opule afwalume ariina yoori eettettise mpakha amariseliwe mattakhuzi a Nluku. ¹⁸Muukha oto weeyo omoniyeeyo sitati khuluyeene eniwaalokozelaaye afwalume ooshi va tuniya.”

Okwa wa Babilooniya

¹Paata ya toowo, keetta woona nlayikha likina liishukhaka pinkuuni. Laarina ofwalume nwulweene, na tuniya khwiiya yoomwasikheliwa ti nuuru yawe. ²Ye khukhuwa na huula ya owahi yoori:

“Yakwa! Yakwa Babilooniya khuulu!

Khuretteya wiiya puuro aniikhalaawo masheethwani,

khwiiya etthirelo ya masheethwani,

na khwiiya etthirelo ya anyannyi ooshi oohifwayi,

etthirelo yy ayamya zooshi zoohifwayi na zootarawiwa.

³Maana khapila zooshi zanywa viinyu ya katapu ya omalempe awe.

Afwalume ooshi a va tuniya araruwa na ye;

anazanshara a va tuniya apha areela mwaasa wa raaha yawe yawaatta.”

⁴Aphano khusiila huula kiina ya pinkuuni eraka:

“Mwisusemo nsitati, mweeyo atthu aka,

yoori mwihirette phantte ya twampi zawe,

yoori pala zinttelaaye onkwela zihuupattheni!

⁵Maana twampi za Babilooniya pi za wuukeliwa mpakha ofiya pinkuuni,

na Nluku oopuwela zootakhala zaya.

⁶Mwinrutisele etile awinkhiyeenini,

na mwinriphe swaafu piiri khwa etile arettiyeeyo;

mwiitaaze njiikira etthu yoonywiwa swaafu piiri wookhomaalavo zayita yoonywiwa etile ye otthenkezeliyeenini mweeyo.

⁷Mwinhooshe womoopopisavo channu namashakha a waatta,

nkhama nsiifwa na nraaha mphule ye ajitthiiyeemo.

Khwa rooho yawe ye aari ojikhupali yoori:

‘Miiyo ki wa wiikhala nkhama rayisi,

aki namafweliwa ti mannaka

na akinteela woona theenya huzuni.’

⁸Tiito, khwa siikhu moote pala epo enttela owakunttuwa:

ofwa, huzuni na jala;

moottho onttela owoocha,

maana wa owahi ti Mbwana Nluku amphukaaye.”

⁹Wakathi afwalume a va tuniya, apale araruwaniyeeyo ye na arettiyeeyo phantte ya raaha yawe, nawoona loosi la woochiwa wawe, anttela olila na ojiliza khwa ye. ¹⁰Oovaka mwaasa wa woopopisiwa wawe, apo aya anttela wiiya peetiwene na onyakula araka:

“Woolanikha ti weeyo,

Babilooniya, sitati khuluyeene na yoowahi!

Maana, khwa wakathi mmote paasi wafiya ophukiwa wawo weeyo!”

¹¹Anazanshara a va tuniya apha anlawa alile na ojiliza mwaasa wa ye, maana khina theenya anuuzanyaaye epile ye anuuzanyisaaye: ¹²vitthu nkhama weero, feeta, mawe a fwayita na mawe a khoope ootafikhana; paafutha yoopepheya, kuwo za kisawu ya jampalawu, kuwo ya waara na kuwo zookhuttuwa; thaapwa zooshi zoonukhela na zaana zawaattalaniwa manyaka attheepo na za thaapwa zootafikhana, poronzi, yuuma na mawe a fwayita ooshapweya; ¹³kaneela na viluko kiina, ovupa, mafuttha oonukhela na vitthu zoonukhela; viinyu na mafuttha a oluveera, ofu woochileya na tiriku; mompe na pwittipwitthi, khavalo na rikisho zaya na amwiitthwaana, nafusi za anaatamu. ¹⁴Yo anlawa alupe yoori:

“Zeesha mishumo zaari wuutuvelanini channu!

Maali zawo zooshi na waara wawo wazizeya; khinteela orutela theenya.”

¹⁵Anazanshara a vitthu zaya epo, areeliyeeyo mwaasa wa ye, anttela wiiya peetiwene, oovaka woopopisiwa wawe, na anttela olila na ojiliza, ¹⁶anyakulaka:

“Yalaanikha sitati khuluyeene

ewaliyeeyo paafutha zoopepheya, ewaliyeeyo kuwo za kisawu ya jampalawu,

na kuwo zookhuttuwa, yoojirisaniwa weero,

mawe ootafikhana na mawe a khoope zootafikhana!

¹⁷Wakathi mmote paasi maali epile zooshi khutapanyeya!”

Manahota ooshi, na anampakhiriwa aya, amalinyero ooshi a kalawa na apale ankholaaye khaazi yoopwekhera mpahari, anttela wiikhala peetiwene. ¹⁸Nawoona loosi la olukula wawe, anttela onyakula araka:

“Sitati ni kiina enlikananaaye sitati khuluyeene eti!”

¹⁹Anteela ottukunttela lifufu mmwishwa mwaya, asala alila na ojiliza anyakulaka araka:

“Yalaanikha! Yalaanikha sitati khuluyeene!

Ooshi apale ariina kalawa mpahari

areeliye mwaasa wa maali zawe.

Khwa wakathi mmote paasi khutapanyeya.

²⁰Mwitthapele epile zinrettikhaneliyeeyo, oo pinku!

Mwitthapele, oo attakatthiifu, maaswihaapa na manapiyu!

Maana Nluku amphuka, anrutiselaka etile oretteliyeenini mweeyo.”

²¹Aphano nlayikha limote la owahi khuthuula liwe limote laari olikananaaye liwe liwululene loochila, khweeselela mpahari khuri:

“Enttela orettiwa etthiipi sitati khuluyeene ya Babilooniya,

weeseliwa oje na ohusutiwa na khinteela osikaniwa theenya.

²²Vakatthi vaya

khanteela osiiliwa theenya anatthakare, anamwiipa, anamavumisa kuruneetha na malope;

khanteela osikaniwa theenya nlikokoro mwawo nakhaazi mmote wa wakhula khaazi.

Khinteela osiiliwa theenya vakatthi vaya ovuma wa mawe oochila.

²³Khinteela waaramo theenya nuuru ya khantteya nlikokoro mwaya,

khinteela osiiliwamo theenya huula ya mposi ama namaposiwa,

anazanshara enu aari awulu a voolumwenku;

khapila zooshi khwiiya zoottettekhiwa khwa oshawi aya.

²⁴Nttumpho khusikaniwamo taamu ya manapiyu na ya attakatthiifu,

na ooshi apale aahusutiweeyo va tuniya apha.”

Furaha pinkuuni

¹Paata ya toowo miiyo khusiila etthu pinkuuni yoolattanana huula ya khuntti ya atthu awaatta enyakulaka yoori:

“Aleluuya!

Nusura, ottitthima na owahi pu wa Nluku eetthu,

²maana ophuka wawo pu haakhi na shariya.

Ye anhukhumu malempe nwulu

aari otapanyaaye tuniya na omalempe awe.

Ye khujiripha khwa taamu ya akarumeya awe.”

³Khuntti etile khurutela theenya onyakula eraka:

“Aleluuya!

Loosi lininlankhaaye linwela khwa mileele.”

⁴Attunkhulu a tiini eshiriini na wane na zumpe haayi nne khukokhora na khumwaaputu Nluku, eekhaliyeeyo va khukulu vawe, khunyakula araka: “Amiina, Aleluuya!” ⁵Aphano khusiileya huula yalankhiyeeyo va khukulu yaari onyakulaaye:

“Mwinsifu Nluku eetthu,

mooshi mweeyo akarumeya awe,

mweeyo mwinimoovaaye,

waaza nwulu mpakha nttiitthi!”

⁶Miiyo khusiila etthu yoolattanana huula ya khuntti ya atthu a waatta, nkhama onyakula wa pahari na taari yookhomaala yaari ovumaaye eraka:

“Aleluuya!

Maana onlokozela Mbwana, Nluku eetthu,

Nwahi zooshi, ti Mfwalume!

⁷Nifurahi! Na nlaweni nitthape

na ninttitthimise!

Maana wafiya wakathi wa harusi ya Pwittipwitthi,

na mposi awe tu woojilikanisa.

⁸Yoori awale, khwinkhiwa paafutha yoopeepheya, yawaara na swaafi.”

Paafutha yoopeepheya pi zooretta za shariya za attakatthiifu.

⁹Nlayikha khukuuza yoori: “Waatikhe yoori: Ooparikhiyiwa pi apale akharipwishiweeyo njampo liwululene la harusi ya Pwittipwitthi!” Na khumarisela alupaka yoori: “Apa pi mattakhuzi a haakhi ya Nluku.”

¹⁰Aphano miiyo kikwela nshini wa moolu a nlayikha yoori kaaputu, ila khukuuza yoori: “Ohirette etthu eto! Ki karumeya nkhama weeyo na nkhama attwiizo apale ari nkatthi wa waamineya khwa oshaahiti wa Yinsa. Omwaaputu Nluku! Oshaahiti wa Yinsa rooho ya ohupiri.”

Nakhavalo va khavalo yoolakala

¹¹Khoona pinku efukuwiye na omaasho waka eriwo khavalo yoolakala, nakhavalo aya aari wiitthiwa Waamineya na Haakhi, ye omphuka na onuumana khwa shariya. ¹²Maasho awe ari nkhama eviriviri ya moottho, veeshwa vawe zirivo jarata za waatta na nzina limote ahinjuwaaye hatha ntthu, woohiiyi ye mweenyewe. ¹³Awala ajapi yawaatikhaniwa taamu na nzina lawe Nttakhuzi la Nluku. ¹⁴Anajanka a pinkuuni eettaka onlotta, awaliye paafutha zoopepheya, zoolakala na swaafi, na apakhiriye va khavalo zoolakala. ¹⁵Nkhanyo mwawe enlaamo phanka yoonoliwa yoori avulaze khapila zooshi. “Ye onttela olokozela na puutta ya yuuma.” Ye onluwatthela nkulaathayini wa viinyu ya katapu ya wiiphiiriwa ya Nluku Nwahi zooshi. ¹⁶Khwa ajapi yawe na maphaja awe yaatikhiwamo yoori:

mfwalume wa afwalume

na mbwana wa ambwana.

¹⁷Khoona nlayikha leemeliye vanjuwa. Likhuwaka na huula yoosileya khwa anyannyi ooshi anvavaaye khwa vakatthi wa pinku yoori: “Mwite nikusanyeye khwa njampo liwulu la Nluku! ¹⁸Yoori arafune nyama za afwalume, attunkhulu a najanka na anamawahi, nyama za khavalo na anakhavalo aya, nyama za atthu ooshi amwiitthwaana na anantaphuliwa, awulu na attiitthi.”

¹⁹Aphano miiyo khoona nyama yawoopisa vamote na afwalume a va tuniya na anajanka aya akusanyeyiye yoori oomanane otule apakhiriyeeyo va khavalo na anajanka awe. ²⁰Ila nyama yawoopisa khufukiwa vamote na napiyu woojipanka aarettiyeeyo alama za minjuza khwa nzina laya. Atthaapo awaahatiyeeyo apale apwekhereliyeeyo alama ya nyama yawoopisa na khwaaputu ratarato yaya. Oowiiri khweeseleliwa ari awoona va ntthatta la moottho onkholelanaaye oka. ²¹Ooshi khuulaaniwa phanka yaari olankhaaye nkhanyo wa otule apakhiriyeeyo va khavalo yoolakala. Na anyannyi ooshi khurupala nyama ya atthu apale.

Nyaakha alufu

¹Aphano khoona nlayikha limote liishukhaka pinkuuni litanaka mmakhono mwaya efukulo ya Khilintti na likwinjili limote liwululene. ²Ye khukhola jahanamu, nyookha etile ya raku yiiyiyeeyo Epiliisi, Sheethwani, na khunfukana likwinjili nyaakha alufu, ³khumweeselela nkhilintti, khunfukela nlako na khumparisa ephariselo, yoori ankhattaze ottettekha khapila, mpakha ziishe nyaakha epo alufu. Nawiisha, onlawa afukuliwe khwa wakathi vattitthiiru.

⁴Koona khukulu eekhaliyevo apale enkhiweeyo ofwalume yoori aphuke. Koona theenya nafusi za apale akakattiweeyo viishwa zaya mwaasa wa oshaahiti wa Yinsa na mwaasa wa nttakhuzi la Nluku. Yo khaaputwiye nyama yawoopisa wala ratarato yaya, wala khaapwekhereliye alama vaajihi wala mmakhono. Yo asisimuwa na anlokozela vamote na Al-Masiihu nyaakha alufu. ⁵Ananfwa apa asaliyeeyo khuhiruteli wiiya haayi mpakha zifiye nyaakha alufu. Opu osisimuwa wa mwanzo. ⁶Ooparikhiyiwa na attakatthiifu pi apale ariina phantte ya osisimuwa wa mwanzo! Ofwa wa phiiri khuna owahi khwa yo; anttela wiiya anamalokozela a tiini ya Nluku na a Al-Masiihu, anttela olokozela vamote na ye khwa nyaakha alufu.

Otapanyiwa wa Epiliisi

⁷Amana ziisha nyaakha alufu, Epiliisi onttela ofukuliwa nkalapooso, ⁸na onlawa asaruwe yoori ahate khapila zooshi ziriiye phantte nne za tuniya, oto ti Kookhe na Makookhe, mwaasa wa okusanyeya yoori oomanise. Anttela waatta nkhama mishaka za mmattima. ⁹Khapila zazukulela phantte zooshi za olumwenku na zakukuttela aphale aamakiyeevo attakatthiifu, sitati yoophetiwa, ila moottho khukwa pinkuuni na khuwaamiza. ¹⁰Epiliisi otule aari owaahataaye, khweeseleliwa vantthatta la moottho onkholelaaye oka, okhule yeeseleliweewo nyama yawoopisa na napiyu woojipanka. Yo anlawa oopopisiwe osikhu na nthana khwa mileele.

Ananfwa anlawa aphukiwe

¹¹Paata ya toole, koona khukulu khuluyeene yoolakala na otule eekhaleliyeeyo. Tuniya na pinku khutthiravo vakatthi vaya, khuhisikani puuro khwa yo. ¹²Khuwoona theenya ananfwa, awulu mpakha attiitthi, eemeliye omaasho wa khukulu, kithaapu khwiiya zoofunuliwa. Kithaapu kiina khufunuliwa, kithaapu ya ohaayi. Ananfwa khuphukiwa khwa nanna ya zooretta zaya, nkhama etthiipo zaatikhiweeyo nkithaapu. ¹³Pahari khuwaaperekha ananfwa apale aariina, ofwa na Ahera khuwaaperekha ananfwa apale aariina, na wakhula mmote khusala aphukiwa khwa zooretta zawe. ¹⁴Aphano ofwa na Ahera khweeseleliwa va ntthatta la moottho. Ntthatta la moottho pi ofwa wa phiiri. ¹⁵Apale mazina aya ahaasikaniweeyo nkithaapu ya ohaayi khweeseleliwa va ntthatta la moottho.

Pinku pheeya na tuniya pheeya

¹Aphano koona pinku pheeya na tuniya pheeya, maana pinku ya mwanzo na tuniya ya mwanzo yaaviriye, na pahari khayaarivo. ²Koona Sitati Ttakatthiifu, Yeruzaleemu pheeya, yaari wiishukhaaye pinkuuni khwa phantte ya Nluku, etthenkeziwe nkhama namaposiwa woojirisiwa atiiseliwaka manna awe. ³Khusiila huula yookhomaala yaari olankhaaye va khukulu eraka: “Nasaapi heema ttakatthiifu ya Nluku ena anaatamu, ethiito Nluku anttelaaye wiikhalaamo na yo. Anttela wiiya atthu awe, na Nluku mweenyeweene onttela wiiya vamote na yo na onttela wiiya Nluku aya. ⁴Ye onlawa awaakukutthe mishozi za mmaasho mwaya zooshi. Khunteela wiiyavo theenya ofwa, wala huzuni, wala olila, wala olwaaza, maana vitthu epile za raku zavira.”

⁵Otule eekhaliyeeyo va khukulu khuri: “Kinretta opheya vitthu zooshi!” Khweekezela alupaka yoori: “Waatikhe eti, maana mattakhuzi apa pi a haakhi na ansuhaaye waamineya.”

⁶Khukuuza theenya yoori: “Zarettikhana. Miiyo ki Aalufwa na Oomeka, wa Waaza na wa Wiishela. Otule ariina nnyottha, kinimwinkha maati oonywa mahala khwa naattuuttu wa maati a ohaayi. ⁷Otule anshinttaaye onteela orithi zooshi epi, na miiyo kinttela wiiya Nluku awe na ye onttela wiiya mwanaka. ⁸Ila ananhiminyali, oohaamini, makookaani, anamahusuti, anakaapa twayifu, ashawi, anamwaaputu sanamu na anamahata ooshi puuro yaya enttela wiiya ontthatta la moottho onkholelanaaye oka. Opu pi ofwa wa phiiri.”

Yeruzaleemu pheeya

⁹Mmote wa malayikha apale sapa aariina miphiko sapa zawiitaala pala epile za wiishela khukaattama na khukuuza yoori: “Ote, miiyo kuunoze namaposiwa, muukha wa Pwittipwitthi.” ¹⁰Ye khukithuula nkatthi wa rooho ya Nluku mpakha vamwaako woolepa nwulweene na khukithoonyeza Sitati Ttakatthiifu, Yeruzaleemu, yaari wiishukhaaye pinkuuni khwa phantte ya Nluku. ¹¹Ye aari omwasikhela khwa nuuru ya Nluku, na waara wawe waari nkhama wa nkufu wa fwayita, nkhama jaasipi, wa wooneela nkhama suupha. ¹²Aarina muuri nwulweene na woolepa waariina milako khumi na miwiri na malayikha khumi na mawiri aari weekeselaaye milako. Mmamilako mwaya aatikhiwemo mazina a mahimo khumi na mawiri a Ezirayiilu. ¹³Zaariwo milako mittatthu okhu lintthamuwaawo njuwa, mittatthu kashikhazini, mittatthu kusini na mittatthu okhu lintupweelaawo njuwa. ¹⁴Muuri wa sitati ya etile waarina machina khumi na mawiri, khwa machina atthaapo aari awaatikhiwa mazina khumi na mawiri a maaswihaapa a Pwittipwitthi.

¹⁵Nlayikha laari ottakhulanaaye miiyo laarina puutta ya mphimo wa waattalaniwa weero yoori ephime sitati, milako zaya na muuri aya. ¹⁶Olepa wa sitati yaya sawasawa na otaphuwa waya. Khuphima sitati yaya etile na puutta mpakha opuwa kiyasi ya alufu piiri na miiya piiri olepa waya, otaphuwa waya na owula waya yaari sawasawa. ¹⁷Nlayikha ntthile khuphima theenya muuri aya, khupuwa phiima siithiini na thaanu khwa otaphuwa waya, khwa mphimo weenaatamu nlayikha aari orumeyelaaye. ¹⁸Muuri aya waajekaniwe jaasipi, theenya sitati yaya yaari ya weero swaafi, yoolattanana suupha ya wooneela. ¹⁹Machina a muuri a sitati yaya aattalaniwe wakhula nanna ya mawe a fwayita oofwarikhana. Mwanzo, jaasipi; ya phiiri, safiira; ya ttaatthu, ya kalisetooniya; yanne, ya eshimiralata; ²⁰ya thaanu, na sorotooniyu; ya siitha, ya saaritiyu; ya saapa na kirizoliitu; ya naane ya periilu; ya tiisiya, na topaaziyu; ya khuumi na kirisoparaso; ya khumi na moote, na jaasintu; ya khumi na piiri, na ametishiita. ²¹Milako khumi na miwiri aari mawe awaara khumi na mawiri aniiyaaye nkatthi wa khoope, wakhula nlako, waattalaniwe liwe limote la waara. Tarikhi khuulu ya sitati yaari ya weero swaafi, ya wooneela nkhama suupha.

²²Akooneeni hatha nyuupa yoosifwiwamo nsitati, maana Mbwana Nluku Nwahi zooshi na Pwittipwitthi ti yiiyiye nyuupa yoosifwiwamo. ²³Sitati kinhithajiya njuwa, wala mweezi, yoori emwasikhelemo, maana nuuru ya Nluku ti emmwasikhelaawo, na Pwittipwitthi ti yiiyiye khantteya yaya. ²⁴Khapila zooshi zinttela weettetta nnuuru mwawe, na afwalume a va tuniya anlawa antiisele maali zaya. ²⁵Milako zaya khazinteela ofukiwa theenya nthana, maana khunteela wiiyavo osikhu. ²⁶Maali na shitaha za khapila zooshi onttela otiiseliwa. ²⁷Mpho khinteela weettamo hatha etthu yoohifwayi, wala ntthu anrettaaye etile yoopattisa haaya ama yoohata, ila paasi apale mazina aya aatikhiweeyo nkithaapu ya ohaayi wa Pwittipwitthi.

Muuttho wa ohaayi

¹Aphano nlayikha khukithoonyeza muuttho wa maati a ohaayi, a wooneela nkhama suupha, aari wittikhaaye va khukulu ya Nluku na ya Pwittipwitthi, ²vakatthi wa tarikhi khuulu ya sitati. Wakhula phantte ya muuttho waarivo muutthi wa ohaayi, oniimaaye swaafu khumi na piiri wakhula mwaakha, swaafu moote khwa wakhula mweezi. Mathapa a muutthi aya ana fwayita ya ovonisa khapila zooshi. ³Khinteela wiiyavo theenya laana. Khukulu ya Nluku na ya Pwittipwitthi enttela wiiya nsitati, na akarumeya awe anttela onrumeyela. ⁴Yo anteela woona wuuso awe, na nzina lawe linttela wiiya vaajihi vaya. ⁵Khunteela wiiyavo theenya osikhu, khanlawa otakha yo nuuru ya khantteya, wala nuuru ya njuwa, maana Mbwana Nluku onttela waara khwa yo, na yo anttela olokozela khwa mileele.

⁶Nlayikha khukuuza yoori: “Mattakhuzi apa ansuhi waaminiwa na pi a haakhi. Mbwana Nluku, aniwinkhaaye rooho yawe amanapiyu, aperekha nlayikha lawe yoori awaathoonyeze akarumeya awe vitthu zinttelaaye orettikhana woohirupazi.

Yinsa onta woohirupazi

⁷“Moone! Miiyo kinta woohirupazi! Wooparikhiyiwa ti otule ampwehaaye mattakhuzi a ohupiri a kithaapu eti.”

⁸Miiyo Yaahaya, ki otule asiiliyeeyo na ooniyeeyo vitthu zaya epi. Wakathi kisiiliyeevo na khoona, kikwela nshini wa moolu a nlayikha otule akithoonyeziyeeyo zooshi epile, yoori kaaputu. ⁹Ila nlayikha khukuuza yoori: “Ohirette etthu eto! Miiyo ki karumeya nkhama weeyo na attwiizo, manapiyu, na nkhama apale anthokorelaaye mattakhuzi a kithaapu eti. Omwaaputu Nluku!”

¹⁰Aphano khukuuza yoori: “Wala ohipharise mattakhuzi ohupiri a kithaapu eti, maana wakathi wanttama. ¹¹Nanhiina shariya akhanyarele ohiina shariya, anamatakhala rooho akhanyarele otakhala rooho waya, na shariya akhanyarele oretta shariya, nttakatthifu akhanyarele ojittakatthisa.”

¹²Moone, kinta woohirupazi! Phakari ena miiyo, na miiyo kinimwinkha wakhula mmote khwa etile arettiyeeyo. ¹³Miiyo ki Aalufwa na Oomeka, Omwanzo na Omwiisho, wa Waaza na wa Wiishela.

¹⁴“Ooparikhiyiwa pi apale anfulaaye kuwo zaya, na etthiipo ana ruhusa ya muutthi wa ohaayi na anwahi ovira mmilako wa sitati. ¹⁵Vaje ansalavo anapwa, apale aneettettelaaye oshawi, apale anrettaaye khaapa twayifu, anamahusuti, anamwaaputu sanamu na ooshi apale amphetaaye na aneettettelaaye ohata.

¹⁶“Miiyo Yinsa, kaperekha nlayikha laka yoori liwinkheni mweeyo oshaahiti opu othoonyaka ojama wa Nluku. Miiyo ki Ntathaari na Ojama wa Daawuuda, na ki Phuluvulu.”

¹⁷Rooho na namaposiwa anri: “Ote!” Na wooshi otule anttelaaye osiila alupe yoori: “Ote:” Otule ariina nnyottha, ate; na otule antakhaaye, anywe maati a mahala a ohaayi.

¹⁸Kiniwuuzani mooshi mweeyo mwinsiilaaye mattakhuzi a ohupiri a kithaapu eti yoori: Amana ntthu eekezelamo etthu, Nluku ontta omweekezela pala zaatikhiweeyo nkithaapu mphu. ¹⁹Amana ntthu alazamo nttakhuzi limote la kithaapu eti ya ohupiri, Nluku ontta onlaza ntthu aya oto phantte yawe ya muutthi wa ohaayi na sitati ttakatthiifu, yaatikhiweeyo nkithaapu mphu.

²⁰Otule anlazaaye oshaahiti wa vitthu zaya epi alupa: “Aaa, kinta woohirupazi!”

Amiina! Ote, Mbwana Yinsa!

²¹Rehema ya Mbwana Yinsa yiiye na mweeyo mooshi. Amiina.