Zaapuura

Zaapuura

Anamweettettisa Shariya na Makaafiri

¹Wooparikhiyiwa ti otule

ahinlottelaaye shawuri za makaafiri,

wala ahinlottaaye tarikhi ya anatwampi,

na ahinkhusanyeyaaye vahali aniikhalaavo atthu ooveyisa.

²Ila tuvela yawe eri nkano ya Nnyizinku

na ompheleleza kano yaya ethiito nthana na osikhu.

³Ye onuupuwa nkhama muutthi woozaliwa

nshini wa muuttho:

Onraaye amana ofiya wakathi wa wiima khuhivonyeli wiima

na mathapa aya khannyaala.

Na wakhula etthu anrettaaye eniiya yonlikanela.

⁴Ila khwa makaafiri khahiyo toowo!

Yo anumpuwa nkhama maveya apale anvavanaaye pheevo.

⁵Tiito makaafiri siikhu ya ophukiwa

khanteela wiiyana hatha etthu yoolipana,

anatwampi anteela ophakuliwa mmuti wa apale aninshututelaaye Nnyizinku.

⁶Nnyizinku onlokozela na oniinanela

tarikhi ya anashariya,

ila tarikhi ya makaafiri

ti ethiito enttelaaye owaaphwetecha.

Furaha ya waatta

Zaapuura ya Daawuuda.

¹Okiinanele oo Nluku, maana miiyo kintthirela khwa weeyo.

²Khwa Nnyizinku kintukhuru yoori: “Weeyo o Mbwanaaka,

miiyo akina hatha etthu yooshapweya yohiiyi weeyo.”

³Khwa attakatthiifu ariiye vathi apha, yo pi anooneyaaye na khwa tuvela yaka yooshi eri na yo.

⁴Apale anlottaaye miluku mikina oneekezeleya ohoowa waya;

miiyo akinteela wiiyavo enkhaka zaakha zaya za taamu,

na wala nlomo aka khunteela olupa nzina la miluku zaya epo.

⁵Nnyizinku, weeyo o phantte ya eritho yaka na o koopho yaka,

maana ti weeyo onkhomaazaaye akhipa yaka.

⁶Yooshapweya puuro ekikweliyeeyo khwa winkhiwa na yootafikhana eritho okinkhiyeeyo.

⁷Kininsifu Nnyizinku, anikishawurisaaye;

maana hatha osikhu rooho yaka enikinozela.

⁸Maasho aka animweekesa Nnyizinku wakhula wakathi.

Ye, ori nkhono nlume aka, akinteela osakhinyeya.

⁹Tiito rooho yaka eniiya yoofurahi na nkatthi wa nafusi yaka kininsifu;

mwiili aka onvumula woororomeleyavo.

¹⁰Maana khunteela okanswi nkhapuri

wala khunteela onlikhelela

nttakatthifu awo ovutta mwiili awe.

¹¹Weeyo onikithoonyeza tarikhi ya ohaayi,

omaasho wawo ewaakho furaha ya waatta,

nkhono nlume awo ziwaakho vitthu zoopuheya zihinishaaye.

Ohoowa na oshintta

Zaapuura ya Daawuuda.

Zaapuura eti yeepiwa ti funti wa maliipo,

mahaati a Nazoro a Supu.

¹Nluku aka, Nluku aka, wakisukhelani?

Mwaasa wa niini wiiyaka peetiwene wa okuusuru na peetiwene wa nkhuwo aka wa othunku?

²Nluku aka, kintta okhuwa nthana, ila khunikijipu;

na kintta okhuwa osikhu, ila akimpattha ovumula.

³Nakataalikha weeyo onttakatthiifu,

wiikhaliyeeyo va khukulu ya siifwa ya Ezirayiilu.

⁴Amarehemu eetthu oororomeliye weeyo,

khuuroromela na khuwaataphula.

⁵Ookhuwela weeyo na khuwaataphula

khuuroromela weeyo woohittettekheyi.

⁶Ila miiyo ki nyunku, aki ntthu,

kintta oveyisiwa pi atthu na ki yaana ya otarawiwa pi anaatamu.

⁷Ooshi apale anikoonaaye miiyo anikiveyisa

na okinyemula asakhinyaka viishwa zaya alupaka yoori:

⁸“Ye oninroromela Nnyizinku! Nnyizinku othuuto ti antaphule,

na ti amuusuru, maana ontuveliwa ti ye!”

⁹Khwa zooshi weeyo ti okilaziyeeyo mwiirukulu,

waakiinaneliye nalelo miiyo kiri vamweyo wa maama.

¹⁰Katthiiwa mmakhono mwawo ovokoliwa wene,

thanku kiri mwiirukulu wa maama, weeyo o Nluku aka.

¹¹Ohikisuse miiyo,

maana othunku ori kharipu

na akina ntthu wookaawuni.

¹²Nari zawaatta zakikukuttela,

nari khulukhulu zookhomaala za nti wa Bashaani khukizukulela.

¹³Nkhama siipa yonkhola jala channu akulumaka,

khufunula milomo khwa miiyo.

¹⁴Miiyo kiniittikha nkhama maati,

na makhonkolo aka ooshi anlawa alikhane,

rooho yaka yiiye nkhama seera

woothuluwa nkatthi mwaka.

¹⁵Kuvu zaka zooma nkhama liika la ottophe,

nlimi laka linkiphara vatulu wa milomo zaka,

weeyo wakilikha orapalela va lifufu la ofwa.

¹⁶Anapwa akizukulela

na khuntti ya anaatamu ootakhala rooho akijekelela,

attiwula makhono aka na moolu aka.

¹⁷Kinwahi waalaka makhonkolo aka ooshi,

ila maatuwi aka antta okeekesa na okitarawu.

¹⁸Aawanyana kuwo zaka

na ajapi yaka eekesela nasipu.

¹⁹Ila weeyo Nnyizinku aka, ohikisuse!

Oo kuvu yaka, ote okaawuni!

²⁰Okiwerawerise phanka,

wuusuru ohaayi aka khwa oluma wa mwanapwa!

²¹Okuusuru khwa khanyo ya siipa

na khwa manyaka a nari.

²²Kintukhuru nzina lawo vakatthi wa attwiizaku

na kinuusifu vanthukumano wa atthu awo.

²³Mweeyo mwinimoovaaye Nnyizinku, mwinsifu!

Mwinttitthimise mooshi mweeyo peewu ya Yaakhumpa!

Na mweeyo peewu ya Ezirayiilu mwimoove!

²⁴Maana khataraweeni

na wala khakatthaleeni ohoowa wa anamahoowa.

Wala khavitheeni wuuso awe,

ila okhuwa wa anamaveka waawuniwa asiila.

²⁵Miiyo kinuusifu weeyo vanthukumano nwulweene wa atthu awo khwa vitthu orettiyeezo,

kinretta wahati aka vakatthi wa apale aniwoovaaye.

²⁶Anamahoowa anteela oja mpakha orupala;

Aninsifu Nnyizinku apale animweekesaaye!

Ti yiiye haayi rooho yenu khwa mileele!

²⁷Atthu ooshi mpakha okhu wiisheliyeewo olumwenku anteela ofikhiri

na arutele wa Nnyizinku,

khwa ye khapila zooshi

enlawa zashututi.

²⁸Maana Nnyizinku onaaye ofwalume,

na ti ye anlokozelaaye khapila zooshi.

²⁹Ananjikhupali ooshi anlawa aje na amwaaputu

na ooshi apale aniishukhelaaye nkhapuri anlawa amwiinamele,

na apale ahinwahaaye othokorela ohaayi aya.

³⁰Peewu entaaye enteela onrumeyela,

na atthu anttela olupa monkoni wa Mbwana oozaka khapila entaaye.

³¹Na enteela olaleya shariya yaya khwa atthu apale anttelaaye ovokoliwa,

awoozaka yoori Nnyizinku ti awompiyeeyo.

Nnyizinku ti nshuki aka

Zaapuura ya Daawuuda.

¹Nnyizinku ti nshuki aka,

khina etthu moote enttelaaye okisaleela.

²Ye onikinkha ovumula vahali ziriivo nyaani zooripelela

na onikilokoza vahali wawiitthaaleyavo ariivo maati;

³Ye ti ankhomaazaaye nafusi yaka.

Na onikeettettisa tarikhi za wookowa mwaasa wa pheta ya nzina lawe.

⁴Hatha nkhama keetta wiiya mmakuluttu wooripamo

na wawoopisamo akinoova hatha etthu moote yootakhala,

maana weeyo, oo Nnyizinku, ori vamote na miiyo,

puutta yawo na pakhora yawo enikiinanela.

⁵Onikaattalelela njampo liwululene,

maatuwi aka eettaka okoona.

Wakipwekhera na shitaha khwa ottukunttela eeshwa yaka mafuttha,

weetaaza jiikira yaka mpakha wiittikha.

⁶Kinjuwa yoori emaani yawo na pheta yawo

enikilokoza siikhu zooshi za ohaayi aka,

kinteela wiikhala nnyupa wa Nnyizinku

ohaayi aka wooshi.

Nluku, Mfwalume wa Olumwenku

Funti wa Wiipa.

Zaapuura ya Aana a Koora.

¹Khapila zooshi zipiye koofi;

enkhuwele Nluku na huula ya furaha.

²Maana Nnyizinku Nwulu wa Pinkuuni tu wa wooviwa

na mfwalume nwulu wa olumwenku wooshi.

³Ye aninkha oshintta khapila kiina,

atthu aya khuwaattha vathi wa moolu awe,

⁴Ye anithawulela fweeyo nti opu niniikhalaaye,

nti wiiyiyeeyo ojishashawula wa atthu awe, apale aniwaaphetaaye.

⁵Nluku awela pinkuuni na nkhuwo wa furaha;

Nnyizinku awela pinkuuni na onyakula wa malope.

⁶Mmwiipele maliipo a siifwa Nluku,

mmwiipele mfwalume eetthu maliipo a siifwa.

⁷Nluku mfwalume wa olumwenku wooshi;

mmwiipele na osiilana maliipo a siifwa.

⁸Nluku mfwalume wa khapila zooshi,

eekhala vakhukulu vawe yoottakatthifu.

⁹Attunkhulu a atthu a vathi apha

anthukumana vamote na atthu a Nluku wa Eburahiima,

maana owahi wooshi wa vathi apha pu wa Nluku;

ye onshintta vitthu zooshi.

Ozurwiwa wakathi wa huzuni

Khwa funti wa liipo. Khwa nanna ya Yeetutumu. Zaapuura ya ojama wa Asaafi.

¹Kininkhuwela Nluku yoori akaawuni,

kininkhuwela Nluku yoori asiile huula yaka.

²Amana kiiya muuthunku, kinvekelaka Mbwana;

nthana na osikhu woohishokheri;

nafusi yaka eniiya yoohizurweyi.

³Kinuufikhiri weeyo, oo Nluku aka, khusala kisisimera

kiphelelezaka, mpakha rooho yaka otteettheya.

⁴Khunikilikha ophunya maasho.

Kiwoonyamala venkivene hatha ottakhula akinwahi.

⁵Kinfikhiri siikhu ziviriyeezo,

na kinuupuwela nyaakha za asulani;

⁶Amana oripa kinuupuwela vitthu zawaatta,

rooho yaka empheleleza, na nafusi yaka khusala ejuuzela:

⁷“Mbwana onttela onikhana khwa mileele?

Khanlawa orutela theenya onithoonyeza rehema yawe?

⁸Talili wahati awe wa pheta khwa fweeyo wamwaashikha mileele?

Ahiti yawe yeetta wiisha khwa mileele?

⁹Nluku talili eetta osahawu yoori ye ti wa huruma?

Ama talili katapu yeetta ofuja huruma yawe?”

¹⁰Aphano miiyo khoona yoori eti huzuni yaka:

“Owahi wa Nluku wa pinkuuni weetta ozukuluwa.

¹¹Miiyo kinteela wuupuwela vitthu Nnyizinku arettiyeezo,

na kinteela ofikhiri vitthu zootikinisa zaraku.

¹²Kimpheleleza khaazi zawo zooshi

na kinttha fwayita zooshi onrettaazo.”

¹³Weeyo Nluku, tarikhi zawo pi za ottakatthifu;

nluku ni ariivo eeyiye nwulweene zayita Nluku eetthu?

¹⁴Maana weeyo, oo Nluku onretta vitthu zootikinisa

na onthoonyeza owahi oriinaaye vakatthi wa khapila.

¹⁵Khwa nkhono awo wa owahi wawaakaphula atthu awo,

aana a Yaakhumpa na a Yuusufu.

¹⁶Maati eetta owoona, oo Nluku,

maati noowoona khoova,

mpakha khilintti khusakhinyeya.

¹⁷Na mawiku khunyisa vuula,

pinku khusala ettitthima;

ozerima khumwazeyela phantte zooshi.

¹⁸Ottitthima wa taari yawo khumwazeyela otulu wooshiwo,

na ozerima khumwasikhela olumwenku wooshi;

nti khutatheya khusala othukumela.

¹⁹Tarikhi yawo yavira mpahari

miphiitelo zawo khuvira mmaati wawiichamo,

ila khina ntthu mmote ooniyeeyo luwattho yawo.

²⁰Weeyo wawaashukiye atthu awo nkhama pwittipwitthi khwa nkhono wa Munsa na Haruni.

Liipo la onsifu Nnyizinku

¹Mwite nimwiipele Nnyizinku etthu na furaha!

Nikhuwelaka nchina la nusura yeetthu.

²Nlaweni naattame omaasho wawe na maliipo ooshukhuru,

na ninkhuwele na maliipo a siifwa.

³Maana Nnyizinku ti Nluku nwulweene,

na mfwalume nwulweene vatulu wa miluku zooshi.

⁴Puuro za wiicha za olumwenku ziri mmakhono mwawe,

mithoma za nyaako zooshi pi zawe.

⁵Pahari ti yawe maana tiye ompiyeeyo,

na khumpa tuulu na makhono awe.

⁶Mwite ninsijitele nimwaaputu,

na ninkokhorele Nnyizinku otule anumpiyeeyo.

⁷Maana ye ti Nluku eetthu

na fweeyo na atthu awe,

na apwittipwitthi ti annishukaaye.

Leelo, amana mweeyo mwisiila huula yawe.

⁸Mwihuumise rooho zenu nkhama amarehemu apapazenu arettiyeeyo nti wa Mariiba,

na nkhama siikhu etile nti wa Maasa n’yaara,

⁹ohali amarehemu apapazenu eezeleliyeeyo wootoota ofwalume aka,

ooniyeru pure epile miiyo kaarettiyeeyo.

¹⁰Nyaakha arupayiini kaari wookatipukha khwa atthu apale

na khuri: “Yo atthu ariina rooho zoothowelela;

wala khanjuwa tarikhi zaka.”

¹¹Tiito miiyo kilaphiyeeyo nkatthi wa katapu yaka yoori:

“Wekhweele khamwinlawa ofiya puuro yaka ya ovumula.”

Mwinsifu Nnyizinku Nnyupa Woosifwiwamo

Zaapuura ya onshukhurwela.

¹Mwinkhuwele Nnyizinku

mooshi mweeyo mwiniikhalaaye voolumwenku!

²Mwimwaaputu Nnyizinku na furaha;

mwijithoonyeze omaasho wa Nnyizinku na maliipo a furaha.

³Mwijuwe yoori Nnyizinku ti Nluku.

Ye ti anumpiye, fweeyo na awe;

fweeyo na atthu awe, na pwittipwitthi ye ti annishukaaye.

⁴Mwivire vamilako wa Nyuupa Yawe Yoosifwiwamo na oshukhuru,

na nlivenu mwawe na maliipo a siifwa;

mwinshukhurwele, na mwilupe wooparikhiyavo nzina lawe.

⁵Maana Nnyizinku nkemaani,

na pheta ya wahati awe khiniisha,

na waamineya wawe oniiyavo khwa mileele.

Omoova Nnyizinku na furaha ya vaje

Liipo la osaafiri.

¹Wooparikhiyiwa ti otule animoovaaye Nnyizinku,

na anlottaaye tarikhi yawe.

²Weeyo onttela oja mishumo za khaazi zawo,

oniiyana furaha na oruwera.

³Muukha awo onttela wiiya nkhama nrayi wa wuuva

wawiima saaneene vaje vawo;

aanaawo anttela wiiya nkhama mittema za oluveera

azukuleliye vameeza vawo.

⁴Otule animoovaaye Nnyizinku

oniiya wooparikhiyiwa khwa nanna nkhama eto.

⁵Nnyizinku ti amparikhiye waaza vamwaako wa Siyoni,

yoori kusapi oone oruwera wa Yeruzaleemu

siikhu zooshi za ohaayi awo,

⁶mpakha awoone atuuluwe.

Heeri yiiye ya Ezirayiilu.

Osiilana na heeri

Liipo la osaafiri wa Daawuuda.

¹Moone nanna enshapweyaazo na otuva

amana attwi eekhalaka vamote na osiilana!

²Eri nkhama mafuttha ootafikhana eettheliwe eeshwa ya Haruni,

khusala atonkela ttevu zawe,

mpakha kuwo zawe.

³Eri nkhama mmatte wa mwaako Herimooni

amana wiishukhelaka mwaako Siyoni.

Aphale Nnyizinku aninkhaavo parakha

na ohaayi wa mileele.