Afiliipu

Warakha

ya Paawulu awaatikhelaka

Afiliipu

Warakha ya Paawulu awaatikhelaka atthu a sitati ya Filiipu

¹Miiyo Paawulu na Timootiyu, akarumeya a Al-Masiihu Yinsa, niniwaatikhela attakatthiifu ooshi a Yinsa Al-Masiihu aniikhalaaye sitati ya Filiipu, attunkhulu awulu a ojama wa Nluku na anamarumeya a ojama wa Nluku.

²Rehema na heeri ya phantte ya Nluku Papeetthu na ya Mbwana Yinsa Al-Masiihu yiiye vamote na mweeyo.

Oshukhurwela na owaalompela afiliipu

³Kininshukhurwela Nluku aka khwa zooshi wakhula swaafu kiniwuupuwelaani mweeyo. ⁴Amana kuulompelakani mweeyo wakhula swaafu, kinlompa na furaha, ⁵mwaasa wa oretta phantte ya khaazi ya hapari zooshapweya, thanku siikhu ya mwanzo mpakha nasaapi. ⁶Kinkhupalela yoori otule aaziyeeyo khaazi yooshapweya khwa mweeyo onteela omarisela mpakha siikhu antaavo Al-Masiihu Yinsa.

⁷Ti ya shariya miiyo ojoona toowo monkoni wa mweeyo, nkhama etthiipo mwiriiye varoho vaka, hatha nkhama kiri mmakwinjili akifukiyeeyo, hatha kaakiselaka na kihakikhaka hapari zooshapweya, mooshi mweeyo mwinretta phantte na miiyo nrehema ya Nluku. ⁸Shaahiti aka Nluku khwa nanna mwikinukheliyeezo, khwa pheta khuluyeene ya Al-Masiihu Yinsa.

⁹Eto lompa yaka yoori: pheta yenu wakhula swaafu esala yeekezeleya khwa ojuwa na weeleyiwa wookhamilikha, ¹⁰yoori mwipheleleze vitthu zooziti na mwiiye swaafi oohiina hatha paathuli mpakha siikhu antaavo Al-Masiihu. ¹¹Mwiiye awiitaala mishumo za shariya, mishumo zinlankhaaye wa Al-Masiihu Yinsa, yoori wiiye ottitthima na siifwa ya Nluku.

Ohaayi khwa Yinsa

¹²Kintakha mwijuwe attwiizaku yoori epile zikirettikhaneliyeezo, wekhweele, enretta phantte ya omwazeya hapari zooshapweya. ¹³Nkhama swamiima, zaarettewa wiiya za wooneya khwa anamweekesela ooshi a nyuupa ya nsatoro na atthu ooshi khwiiya oojuwa yoori kiri nkalapooso mwaasa wa Al-Masiihu. ¹⁴Attwi enkeene, nawoona yoori kiri nkalapooso, yo apattha olipiseleya nwulweene khwa Mbwana. Etthiipo anvira alaleyaka woojilakelelavo na woohoovi nttakhuzi la Nluku.

¹⁵Weekhweele atthu akina aninlaleya Al-Masiihu khwa nrima na ohitakhani, ila akina aninlaleya khwa niiya yooshapweya. ¹⁶Apo anretta epo zaya khwa pheta, ajuwaka yoori Nluku akinkha khaazi ya wiiwulela hapari zooshapweya. ¹⁷Akina aninlaleya Al-Masiihu khwa rooho za otakha ochiraana, woohiina ookhweele, oonaka yoori aneekezela ohoowa waka nkalapooso mphu kiriimo. ¹⁸Ila ena fwayitani? Fwayita ti yoori wakhula nanna, hatha khwa nanna yoovonyeya ama ya khweele, Al-Masiihu ontta olaleyiwa, khwa etthiipo miiyo kinfurahi.

Wekhweele, kinvira kifurahaka, ¹⁹maana kinjuwa yoori mwaasa wa lompa zenu mweeyo na khwa awuni ya Rooho ya Al-Masiihu Yinsa, miiyo kinttela wiiya wootaphuliwa. ²⁰Kineekesela wa phoolevo kiwejelaka yoori khinteela okipattha haaya khwa hatha etthu. Olikha toowo khwa ominyala waka wooshi, nasaapi mpakha mileele, Al-Masiihu onteela ottitthimisiwa khwa mwiili aka, hatha khwa ohaayi, hatha khwa ofwa. ²¹Maana khwa miiyo ohaayi aka ti Al-Masiihu na ofwa fwayita yaka. ²²Amana mwiili aka orutela wiiyana ohaayi, kinteela wiiyana mishumo za khaazi yaka. Apha akinjuwa etthu yoothawula! ²³Kakukutteliwa phantte zoopiiri. Kinaaye niiya ya otakha wiiya vamote na Al-Masiihu, yooziti channu ti ethiito. ²⁴Ila mwaasa wa mweeyo enihithajiya channu miiyo nalelo wiiya haayi. ²⁵Kinkhupalela etthiipo, kinjuwa yoori kinteela wiiyavo na orutela wiiya vamote na mweeyo mooshi, yoori kiwaawunini mwipatthe weettetta saana na furaha nkatthi wa amini, ²⁶yoori amana kita wuuthotolani swaafu kiina, ojishashawula weenu khwa Al-Masiihu Yinsa weekezeleye mwaasa wa miiyo.

²⁷Ehuujalini etile enttelaaye orettikhana, mweettettise onyunti enu khwa nanna ensuhaaye hapari zooshapweya za Al-Masiihu. Yoori miiyo amana kitaaka owoonani ama hatha nkhama keetta ohiivo, kisiile khwa mweeyo akinoko aya yoori nalelo mwa woolipalipa khwa rooho moote paasi, na matakhelo mamote paasi, nuumanaka fooshi khwa amini ya hapari zooshapweya. ²⁸Mwihoove hatha etthu khwa maatuwi enu, maana eto enttela wiiya alama ya otapanyeya waya yo, ila khwa mweeyo nusura, na eto phantte ya Nluku. ²⁹Mweeyo mwenkhiwa ruhusa khahiyo paasi ya onkhupali Al-Masiihu ila theenya ohoowa mwaasa wa ye. ³⁰Nkhama etthiipo mwinuumanaaye viittha ethiito mwikooniyeeyo kuumanisaka na mwinsiila yoori nalelo kintta wuumana.

Ojipushuwisa na ottitthima wa Al-Masiihu

¹Nkhama niri vamote na Al-Masiihu na fweeyo ninaaye olipiseliwa, na otumereliwa wa pheta, na osiilana wa Rooho, na mahapa a huruma, ²aphano mmarisele furaha yaka mwiiyanaka wuupuwela mmote, pheta moote, rooho moote na mwentto mmote. ³Mwihirette etthu khwa otakha weenu ama ojikhupali, ila woojipushuwisavo owoona akina aya wiiya awuuzitini mweeyo. ⁴Wakhula mmote eenanele, khahiyo zootakha zawe paasi, ila theenya zootakha za akinoko.

⁵Menttezi enu eeye sawasawa na a Al-Masiihu Yinsa.

⁶Eeyiyeru pure Nluku,

khuhijooni wiiya sawasawa na Nluku

yaari etthu aari otakhaaye okholelela,

⁷ila khujileva,

khujiretta wiiya karumeya,

ajilikanisanaka anaatamu.

⁸Na khwiikhala khwa nanna ya onaatamu,

khujipushuwisa mwenyeweru,

na khwiiya namashututi mpakha ofwa,

ofwa wa vansalapa.

⁹Tiito Nluku anwulisiyeeyo Yinsa

khwa puuro khuluyeene

na khumwinkha nzina liriiye vatulu wa mazina ooshi,

¹⁰yoori nzina la Yinsa

likokhoreliwe ti makutha ooshi,

otulu, va tuniya

na vathi wa tuniya.

¹¹Na malimi ooshi atukhuru

yoori Yinsa Al-Masiihu ti Mbwana,

khwa siifwa ya Nluku Paapa.

Waara nkhama matthottowa

¹²Aphetani aka, nkhama etthiipo mwikishututeliyeeyo siikhu zooshi, khahiyo amana kiiyavo paasi, ila theenya amana kihiivo, mwikhole khaazi ya nusura yenu khwa woova na othukumela. ¹³Maana Nluku ti ankholaaye khaazi nkatthi mweenu yoori mwishututele niiya yawe waaza nwuupuwela mpakha muuretta.

¹⁴Mwirette zooshi woohijilizi wala onyakulisana, ¹⁵yoori mwihiiyane paathuli na mwiiye swaafi, aana a Nluku ohiina paathuli vakatthi wa atthu ootakhala rooho na ootapanyeya, attaapho mweeyo mwinaaraavo nkhama matthottowa voolumwenku, ¹⁶mwiwaafiselaka nttakhuzi la ohaayi. Yoori siikhu antaavo Al-Masiihu kijikhutupule, mwaasa wa ohijanjeli mahala na wala ohijilipisi mahala. ¹⁷Khwa zooshi, hatha nkhama keetta oshuluulisiwa nkhama zaakha yoonywiwa monkoni wa twaha ya amini yenu mwinimwinkhaaye Nluku, kiwoofurahi na kintthapa na mooshi mweeyo. ¹⁸Khwa nanna etthiipo mweeyo theenya mwina ya ofurahi na otthapa na miiyo.

Timootiyu na Epaforotiitu

¹⁹Kinweja wa Mbwana Yinsa wuuperekhezani Timootiyu woohirupazi yoori na miiyo kipatthe wiiyana furaha amana kipokhera hapari zenu. ²⁰Akina ntthu nkina nkhama ye, anshikhaaye saaneene yoori mweeyo mwiiye saana, ²¹maana atthu ooshi anshikha epile ziiyiye zaya, khanshikha epile ziiyiyeeyo za Yinsa Al-Masiihu. ²²Ila mweeyo mwinjuwa nanna Timootiyu athoonyeziyeeyo fwayita yawe, maana ye arumeya na miiyo khwa olaleya hapari zooshapweya nkhama mwaana ari mpavu wa papaawe. ²³Nakataalikha ti othuuto kineekeselaaye omperekha okho, paata ya miiyo ojuwa nanna enttelaazo okeettettela vitthu zaka, ²⁴kinroromelaka Mbwana yoori woohirupazi kiwahi ota owoonani.

²⁵Theenya kinoona yoori enihithajiya omperekha opheya ottuukho Epaforotiitu, ttwiiyaku kinkholanaaye khaazi na nshirikha wa nvittha, karumeya mwikiperekheziyeeyo otiisa epile enikihithajiyaaye. ²⁶Ye anukheliwa ti mooshi mweeyo na ona othunku maana mweeyo mwasiiliye yoori aari nlwele. ²⁷Weekhweele ye aari nlwele, aasaleliye ofwa. Ila Nluku khwiiyana huruma naye, khahiyo ye otthwe, ila na miiyo theenya, yoori kihiiyane huzuni vatulu wa huzuni. ²⁸Tiito, kinuuperekhezani woohirupazi yoori amana mwimoona opheya, mwiiyane furaha na miiyo ekivukuwe huzuni. ²⁹Kinuuvekelani yoori mwimpwekherele Epaforotiitu khwa Mbwana na furaha khuluyeene na mwiwaakhirimo atthu nkhama apo, ³⁰maana ye aasaleliye ofwa mwaasa wa pheta khwa khaazi ya Al-Masiihu, alevaka ohaayi awe yoori akinkhe awuni mweeyo mwahawahiyeeyo okinkha.

Al-Masiihu ona fwayita zayita vitthu zooshi

¹Wiishela waya attwiizaku, mwinfurahele Mbwana! Owaatikhelani opheya vitthu etthiipile khahi yooshokheza khwa miiyo, owiinanelani mweeyo.

²Phoole na “anapwa”! Phoole na apo anrettaaye vitthu zootakhala! Phoole na okhiriya woohiina fwayita! ³Maana ti fweeyo nikhiriyiyeeyo ninimwaputwaaye khwa Rooho ya Nluku, ninjisifwanaaye Al-Masiihu Yinsa nihina hatha nroromelo mmote wa menttezi a onaatamu, ⁴keeyanaru pure miiyo shariya ya wiiyana nroromelo nkhama opo. Nkhama ntthu onoona yoori ona shariya khwa ororomela menttezi a onaatamu, miiyo katepa: ⁵Kakhiriyisiwa kirina siikhu naane za ohaayi aka, ki mwiizirayiilu ovokoliwa, wa lihimo la Bejami, ki mwiipereewu khaamili, khwa mwentto wa kano, kaari mfwarizeewu; ⁶monkoni wa onyenyekheya, kaari namalupattha wa ojama wa Nluku; khwa shariya eriiye nkano kaari ntthu woohishowereyi.

⁷Ila etile khwa miiyo yaari fwayita, kinoona ohiina fwayita mwaasa wa Al-Masiihu. ⁸Khahiyo etthiiporu, ila vitthu zooshi kinoona ohiina fwayita, amana kilattanisa na owula wa ojuwa wa Al-Masiihu Yinsa, Mbwanaaka, mwaasa wa ye zakaashikha vitthu zooshi. Miiyo kinoona zooshi nkhama vitutu, yoori kimpatthe Al-Masiihu ⁹na kisikananiwe ye. Woohiiyi shariya yaka enlankhaaye nkano, ila entaaye nkatthi wa amini khwa Al-Masiihu, shariya enlankhaaye wa Nluku nkatthi wa amini. ¹⁰Kintakha onjuwa Al-Masiihu, owahi woosisimuwa wawe. Na kintakha oretta phantte nkatthi wa ohoowa wawe na kijirette wiiya nkhama ye ofwa wawe, ¹¹na nroromelo yoori miiyo kiiye woosisimuwa vakatthi wa ananfwa.

Wiikarisa etile otthomiyeeyo

¹²Akintakha olupa yoori zooshi epo kapattha ama wiiyana okhamilikha, ila kintta wiikarisa yoori kipatthe tthuvo, maana khwa etthiipo theenya khapatthiwa ti Al-Masiihu Yinsa. ¹³Attwiizaku, akinlupa yoori miiyo kampattha kimweenyewe, ila etthu moote kinretta: kisahawaka vitthu zooshi kilikhiyeyo nyuma khusala kiikara epi elokoziyeeyo, ¹⁴kiniikarisa epile kintthomaazo, yoori kipatthe tthuvo ya okhuweliwa wa pinkuuni wa Nluku khwa Al-Masiihu Yinsa.

¹⁵Fooshi fweeyo niiyiyeeyo okhomaala nkatthi wa amini nina ya woona vitthu khwa nanna ethiito, ila nkhama vakatthi venu, owaapho anuupuwelaaye khwa nanna yoofwarikhana, Nluku ontta othoonyeza epo zaya khwa mweeyo. ¹⁶Niikhale paasi khwa epile nipatthiyeeyo.

¹⁷Attwiizaku, mwikilotte woosiilanavo khwa nthoonyezo aka na mwiwoone apale aneettettaaye khwa menttezi nuuthonyeziyeenini mweeyo. ¹⁸Maana, nkhama etthiipo kilupiyeezo swaafu za waatta, na apha kinrutela na mishozi, yoori awaapho awaatta aniikhalaaye nkhama maatuwi a nsalapa wa Al-Masiihu. ¹⁹Mwiisho wa apo aya opwetheya, nluku aya ejohojoho yaya, na anjikhutupulana vitthu epile zoopatthisa haaya; anuupuwela vitthu za voolumwenku apha paasi. ²⁰Ila onyunti eetthu ori pinkuuni, ottuukho nininwejaawo woohivarankeyi Namuusuru, Mbwana Yinsa Al-Masiihu. ²¹Ye onteela ozukulisa mwiili eetthu wootarawiwa alattanisaka mwiili awe woottitthima, khwa owahi onimwinkhaaye makhaamu a oshintta vitthu zooshi vathi wa ofwalume awe.

¹Nakataalikha, attwiizaku mweeyo kinuuphetaanini, mwikinukheliyeeyo. Mweeyo mwiiyiyeeyo furaha yaka, na jarata yaka! Mwiiye woolipalipa etthiipo khwa Mbwana, oo aphetani aka!

Olipiselana

²Etthu kininvekelaaye Evootiya na Sintikhe ti yoori eekhale woosiilana khwa Mbwana. ³Na weeyo nshirikha aka wa waamineya nkatthi wa khaazi, kinuuvekela yoori owaawuni alupu apa. Maana yo na Kelementi na ashirikha aka akinoko, akhola khaazi phantte yaka ya omwaza hapari zooshapweya. Mazina aya ari nkithaapu ya ohaayi.

⁴Mwinfurahele Mbwana wakhula wakathi; kinrutela opheya kilupaka yoori: Mwinfurahele! ⁵Okemaani enu ojuwiwe pi atthu ooshi. Mbwana ori kharipu. ⁶Mwihishukulikhele hatha etthu, ila mwinvekele Nluku khwa lompa na oveka yooshi etile mwinhithajiyaaye na rooho ya oshukhuru. ⁷Na heeri ya Nluku, enzitaaye weeleyiwa wooshi, enthokorela rooho na akhili zenu mweeyo, khwa Al-Masiihu Yinsa.

⁸Wiishela waya attwiizaku, yooshi yiiyiyeeyo ya ookhweele, yooshi yiiyiyeeyo ya shitaha, yooshi yiiyiyeeyo yoolotteya, yooshi yiiyiyeeyo swaafi, yooshi yiiyiyeeyo yoophetiwa, yooshi yiiyiyeeyo yootuvela, amana yiiyavo etthu yootepa oshapweya ama ensuhaaye ottitthimisiwa, mwifikhiri vitthu zaya epo. ⁹Mwilottisele epile mwinozeliweeyo, mwipwekhereliyeeyo, mwisiiliyeeyo na mooniyeeyo khwa miiyo; na Nluku wa heeri ontta wiiya vamote na mweeyo.

Oshukhurwela monkoni wa zaakha

¹⁰Kinfurahi venkivene khwa Mbwana, maana omwiisho waya mweeyo mwathoonyeza opheya okitakha weenu miiyo. Weekhweele mweeyo mwaari okijali ila mweettiye ohiina kiphenyo ya othoonyeza. ¹¹Akinlupa toowo mwaasa wa othowiwa, maana kajinozela wiiya woofurahi wakhula nanna kiniyaazo. ¹²Kinjuwa niini othowiwa na kinjuwa niini wiiyana yawaatta. Kinjuwa siiri ya wiikhala woofurahi khwa zooshi na khwa wakhula nanna kiniyaazo, wiiyana etthu yoojiwa ama wiiyana jala, wiiyana yawaatta ama othowiwa. ¹³Kinwahi oretta zooshi khwa otule anikikhomaazaaye.

¹⁴Yeeyaru toowo, mweeyo mwinretta saana khwa oretta phantte khwa miswipa zaka. ¹⁵Nkhama etthiipo mweeyo afiliipu mwinjuwaazo, yoori khwa siikhu za waaza wa olaleyiwa hapari zooshapweya, wakathi kiliyeewo Masetooniya, khawiivo ojama wa Nluku mmote waajikusanyaniyeeyo miiyo monkoni wa winkha na winkhiwa, woohiiyi mweeyo paasi. ¹⁶Maana wakathi kaari Tizaloonika, mweeyo mwakaawuniye woohiiyi swaafu moote, wakathi khaari woothowiwa. ¹⁷Khahiyo yoori miiyo kineekesa winkhiwa zaakha, ila kintakha woona fwayita yeettaka weekezeleya khwa phantte yenu mweeyo. ¹⁸Kapwekhera zooshi, kapattha zooziti ofiyela. Kinaaye zooshi kinihithajiyaayo, paata ya Epaforotiitu okitiisela vitthu epi mwiperekhiyeeyo, epo zaya ziri nkhama mafuttha oonukhela awinkhiwa Nluku, twaha ankhupalelaaye na enintuvelaaye. ¹⁹Nluku aka onteela owinkhani zooshi epile mwinhithajiyaaye muuthowiwa mweenu maali zawe za siifwa khwa Al-Masiihu Yinsa.

²⁰Nluku Papeetthu attitthimisiwe khwa mileele. Amiina.

Salamu na parakha

²¹Salamu attakatthiifu ooshi khwa Al-Masiihu Yinsa. Attwi apa kiriina okhuno ooperekhezani salamu. ²²Attakatthiifu ooshi ooperekheza salamu, haaswahaaswa apale ariiye vaje wa Seezari.

²³Yoori rehema ya Mbwana Yinsa Al-Masiihu yiiye nroho mweenu. Amiina.