Maaruku

Hapari za

Maaruku

Yaahaya Namoosa ontthenkeza Tarikhi

¹Omwanzo wa hapari zooshapweya za Yinsa Al-Masiihu, Mwaana wa Nluku. ²Yaatikhiwa khwa ohupiri wa napiyu Ezaaya yoori:

“Moone, kinlawa kamperekhe omaasho wawo karumeya aka,

yoori atthenkeze tarikhi yawo;

³huula enkhuwaaye n’yaara eraka:

‘Mwitthenkeze tarikhi ya Mbwana na mookolele miphiitelo zawe.’ ”

⁴Aapuwiye Yaahaya aari woosaaye n’yaara, khusala atafusiri monkoni wa woosa wa othupwiya khwa nswammaha wa twampi. ⁵Atthu ooshi a nti wa Yudeya na apale a Yeruzaleemu aari ovira ataaka na otukhuru twampi zaya na yo aari wiiya a woosiwa khwa ye mmuttho Yorotaani. ⁶Kuwo aari owalaazo Yaahaya zaari za ovuzi wa enkamiiya. Ye aarina nzako awe wa shapala na aari ojaka mapalaka na asali ya ntthuttu.

Yaahaya onlawela oshaahiti wa Yinsa

⁷Atafusiraka aari ori: “Paata ya miiyo onta otule ariina oowahi zayita miiyo, oto akinsuhi ofukula mikhoyi za jampali zawe. ⁸Miiyo kiniwoosani na maati, ila ye onttela owoosani na Rooho Ttakatthiifu.”

Woosiwa na ozayiniwa wa Yinsa

⁹Wakathi otthuupule, khuta Yinsa wa Nazareeti ya Kalileya khoosiwa ti Yaahaya mmuttho Yorotaani. ¹⁰Nasaapiru, eettaka ovuuwa mmaati, khoona pinku efukuwiye na Rooho Ttakatthiifu yeettaka omwiishukhela nkhama jiwa. ¹¹Aphano khuta huula pinkuuni elupaka yoori: “Weeyo o Mwanaka wa wuupheta, na wookituvela channu.” ¹²Nasaapiru, Rooho Ttakatthiifu khunthuula khunlawana n’yaara. ¹³Nttumpho eekhaliyeemo siikhu arupayiini, eettaka ozayiniwa ti Epiliisi. Ye aari vakatthi wa nyama za ntthuttu, khuta malayikha oteela onrumeyela Yinsa.

Yinsa onrutela Kalileya

¹⁴Paata ya Yaahaya ofukeliwa, Yinsa khulankha khusala alawa Kalileya, alaleyaka hapari zooshapweya za Nluku, ¹⁵alupaka yoori: “Wakathi wafiya, na ofwalume wa Nluku ori kharipu; mwithupwiye na mwikhupali hapari zooshapweya.”

Othawuliwa wa Maaswihaapa

¹⁶Eettaka olawa alottaka shiini ya pahari ya Kalileya, Yinsa khuwoona attwi awiri Simawu na Antere, eeselelaka ntthavi laya mpahari, mwaasa yoori aari anamajiya. ¹⁷Ye khuwooza yoori: “Mwikilotte, kintta wuurettani wiiya anamajiya a atthu.” ¹⁸Nasaapiru yo khulikha matthavi aya khusala anlotta. ¹⁹Eettaka olawa etthiipile, Yinsa khumoona Tiyaaku, mwaana wa Zepeteewu na ttwiiye Yaahaya ari mmwaatiya alazelaka matthavi aya. ²⁰Khuwaakhuwela, nasaapiru khunlikha papaaya mmwaatiya vamote na anakhaazi awe khusala anlotta Yinsa.

Yinsa onimwiikara sheethwani

²¹Yo khulawa Kafwaranaawu, paata ya ofiya saapatu, Yinsa khusala asomisa nsinakooka. ²²Atthu ooshi khusala awaatuvela masomi awe, maana aari osomisa nkhama ntthu ariinaaye ofwalume na woohiiyi nkhama anamanozela a kano. ²³Aphano khuta nsinakooka mphule nlume aashinttiweeyo ti sheethwani. Khusala akhuwa araka: ²⁴“Onnitakhelani fweeyo, Yinsa wa Nazareeti? Wata yoori onitapanye? Kajuwa yoori weeyo o Ttakatthiifu wa Nluku!” ²⁵Ila Yinsa khummaruwela araka: “Onyamale, onsaruwe mwinyi otu!” ²⁶Aphano sheethwani khuntatha ntthu otule woohusutivo khusaruwa mmwiili mwawe eettaka onyakula. ²⁷Atthu ooshi khwiiya ooshanka mpakha khufiyelela wuuzelana atthaaporu yoori: “Niini epi zaya? Masomi mapheya antanaaye ofwalume! Mpakha onruma masheethwani yo khunshututela!” ²⁸Hapari epile monkoni wa ye khumwazeyela nasaapiru nti wooshi wa Kalileya.

Owahi wa Yinsa vakatthi wa masheethwani na marati

²⁹Khulaamo nasaapiru nsinakooka, khulawa na Tiyaaku na Yaahaya owawe Simawu na Antere. ³⁰Nkhwewe Simawu eettiye orapalela voolili, yaari onlwaaza hooma, yo khumuuza Yinsa monkoni wa nunu otule. ³¹Aphano ye khumwaattama, khunkhola nkhono khunlansa, nasaapiru hooma khumwiisha, nunu otule khwaaza owaarumeyela. ³²Weettelaka oripa, paata ya otupweela njuwa, atthu khuwaathuula alwele ooshi na anamasheethwani khumweettisela Yinsa. ³³Atthu ooshi a nsitati mphule khukusanyeya vanlako wa nyuupa ethiitile, ³⁴ye khuwaavonisa awaatta aari ohoochiwaaye pi marati a wakhula nanna. Theenya khwiikara masheethwani awaatta. Ye khaari olikha masheethwani apale ottakhula, maana yo aari onjuwa paani Yinsa.

Yinsa onlompa puuro yawiitthaaleyavo

³⁵Supuyeene, nalelo ohinache saana, Yinsa khulankha khusaruwa khulawa puuro yawiitthaaleya ohali aari olompaawo. ³⁶Simawu na ashirikhaawe khulawa omweekesa. ³⁷Nonsikana, khumuuza yoori: “Atthu ooshi antta oweekesa weeyo!” ³⁸Yinsa khuwaajipu yoori: “Nlaweni ohali okinoko, miti naattamananiyeeyo, yoori kilawe kalaleye, maana tithiito miiyo kiteeliyeeyo.” ³⁹Aphano ye khweettetta Kalileya yooshi eettaka otafusiri nsinakooka na eekaraka masheethwani. ⁴⁰Namaaharaja mmote khumwaattama na khunkokhorela khunvekela yoori: “Amana otakha okitwahareshe!” ⁴¹Yinsa ari wawiitaala huruma, khookola nkhono awe khunsapa na khulupa yoori: “Kintakha. Wiiye wootwahareshiwa!” ⁴²Nasaapiru maaharaja apale khwiiya omwiisha na ye khwiiya wootwahareshiwa. ⁴³Elottelanaka Yinsa khuwaaleeza woomaruwavo, ⁴⁴aphano Yinsa khumuuza yoori: “Vitthu epi ohinthatelele hatha ntthu. Ila olawe, wanvekele haakhimu yoori awoone nkhama wavona, arette twaha etile Munsa arumiyeeyo yoori wiiye oshaahiti.” ⁴⁵Ila mwinyi otule khusala alawa na khwaaza olaleya vitthu epile na omwaza hapari. Mwaasa wa vitthu epile, Yinsa khuhisala awahi theenya weetta nsitati, ila khwiikhala othetekele puuro yawiitthaaleyavo. Khusala ata atthu wakhula phantte oteela okutthanana Ye.

Ovonisiwa wa namarakala nti wa Kafwaranaawu

¹Paata ya siikhu vattitthiiru, wakathi Yinsa aaruteliyeeyo theenya Kafwaranaawu, atthu khusiila elupiwaka yoori ye aari owawe. ²Aphano atthu awaatta khweetta ottuukhule, khwa nanna yahaariivo puuro hatha vamilako, khusala awaatafusirela nttakhuzi la Nluku. ³Khutavo atthu akina antiisiyeeyo nasupiyaani, athuuliwe pi alume wane. ⁴Khuhisala awahi onfiisa aphale aariivo Yinsa mwaasa wa atthu waatta. Elottelanaka khulawa khutamula phantte ya liphala la nyuupa, khuphenyisavo nrepa opule arapaleliyeevo nasupiyaani. ⁵Ooniyeevo amini etile aariina, Yinsa khumuuza nasupiyaani otule yoori: “Mwanaka, twampi zawo zaswaamihiwa.” ⁶Eekhaliye attaaphale anamanozela a kano akina na khwaaza wuupuwela: ⁷“Mwinyi otu onttakhula toowo mwaasa wa niini? Ontta okufuru! Anwahaaye oswaamihi twampi ti paani, woohiiyi Nluku paasi?” ⁸Yinsa nasaapiru khumweeleya nroho mwawe yoori zaari etthiipo epile yo aari wuupuwelaaye na khuwooza yoori: “Mwaasa aya niini mweeyo muupuwelaka vitthu epo nroho mweenu? ⁹Etthu yookhweya omuuza nasupiyaani titiivi, omuuza yoori: ‘Twampi zawo zaswaamihiwa’ ama ‘Olankhe othuule nrepa lawo weettette?’ ¹⁰Ila mwijuwe yoori Mwaana wa Pinaatamu onaaye owahi wa oswaamihi twampi” — khumuuza nasupiyaani — ¹¹“Miiyo kiniwuuza: Olankhe, othuule nrepa lawo olawe owawo.” ¹²Wakathi otthuupule mwinyi otule khulankha ooniwaka pi atthu ooshi, khuthuula nrepa lawe khusaruwa. Yo khwiiya ooshanka na khunttitthimisa Nluku, alupaka yoori: “Khaninoone vitthu nkhama epi!”

Okhuweliwa wa Matewuzhu Leevi

¹³Yinsa khulawa theenya kharipu ya ntthatta. Atthu awaatta khumwaattama na khwaaza owaasomisa. ¹⁴Eettaka ovira etthiipile, khumoona Matewuzhu mwaana wa Alufeeyu eekhaliye ariphisaka lumpuru, khumuuza yoori: “Okilotte.” Ye khulankha khunlotta.

¹⁵Wakathi wa etthu yoojiwa, Yinsa eekhaliye va meeza owawe Matewuzhu. Vamote na anakhiyoni awe, na aarivo anamariphisa lumpuru awaatta na “anatwampi” maana atthu aari onlottaaye aari enkeene. ¹⁶Anamanozela a kano apale amafwarizeewu amooniyeevo ajaka na “anatwampi” na anamariphisa lumpuru, khuwoozela anakhiyoni a Yinsa yoori: “Mwaasa aya niini ye ajaka na anamariphisa lumpuru na anatwampi?” ¹⁷Yinsa noosiila, khulupa yoori: “Akumi khaninhithajiya tothoro, ila apale anlwaziwaaye. Miiyo akawaateeliye owaakhuwela anashariya, ila anatwampi.”

Yinsa onuuzeliwa monkoni wa ofuka

¹⁸Anakhiyoni a Yaahaya na mafwarizeewu eetta ofuka. Atthu akina khunteela Yinsa khusala amuuzela yoori: “Mwaasa aya niini anakhiyoni a Yaahaya na amafwarizeewu ofuka, khi awo ahifukaka?” ¹⁹Yinsa khujipu yoori: “Enretteya toovi ofuka anamalaleyiwa harusi, namaposa ari attaapho? Khinwaheya, ari vamote na yo.” ²⁰Ila enteela ofiya siikhu mposi anteelaaye olaziwavo, siikhu zaya epo, anlawa afuke. ²¹Khina antthaaye yaapa pheeya kuwo yoovutta, maana yaapa etile pheeya enttela ofutthela kuwo yoovutta etepe othaala. ²²Khina antthaaye viinyu pheeya nttompwiyo ya shapala ya raku, amana aretta toowo, viinyu entta ophutula ttompwiyo, waaza viinyu mpakha ttompwiyo zintta oharipweya. Ila viinyu pheeya ena ya otthiiwa nttompwiyo ya shapala pheeya.

Mbwana wa saapatu

²³Saapatu moote, Yinsa eetta ovira nshini wa nshapa la tiriku. Eettaka olawa, anakhiyoni awe khwaaza ovulula phunje zaya. ²⁴Mafwarizeewu khumuuzela Yinsa yoori: “Oniwoona, mwaasa aya niini yo arettaka etthu enkhattaziwaaye orettiwa saapatu?” ²⁵Ye khuwaajipu yoori: “Mweeyo khamwinasome etile arettiyeeyo Daawuuda wakathi ye na ashirikha awe aathowiweeyo na aakholiweeyo ti jala? ²⁶Wakathi wa haakhimu nwulu wa tiini Apiyataari, Daawuuda aaviriye Nnyupa ya Nluku khurafuna phaawu zoohalalishiwa enkhiweeyo Nluku na khuwenkha ashirikhaawe, aariina ruhusa ya orafuna paasi aari anamalokozela a tiini.” ²⁷Aphano khuwooza yoori: “Saapatu yatiisiwa mwaasa wa anaatamu, khahiyo anaatamu mwaasa wa saapatu. ²⁸Etthiipo, Mwaana wa Pinaatamu ti Mbwana hatha wa Saapatu.”

Mwinyi woorakala nkhono

¹Yinsa khurutela theenya nsinakooka, nttumphule aarimo mwinyi waarakaliyeeyo nkhono awe. ²Atthu akina aari weekesa nanna ya onlokoveza Yinsa, yoori amoone nkhama aari weettela ovonisa siikhu ya Saapatu. ³Yinsa khumuuza mwinyi otule woorakala nkhono yoori: “Olankhe ote vakatthi apha.” ⁴Aphano Yinsa khuwoozela yoori: “Niini entakheliwaaye orettiwa Saapatu, oretta yooshapweya ama yootakhala, wuusuru ama wuula?” Ila atthu apale nalelo khwiiya oonyamala. ⁵Yinsa khusala aweekesa ari wookatipukha na khuhituveliwi mwaasa wa wuuma rooho zaya na khumuuza mwinyi otule yoori: “Wookole nkhono awo.” Ye khookola nkhono awe na khwiiya woovonisiwa. ⁶Aphano mafwarizeewu apale khulankha na khwaaza owaza shawuri vamote na khuntti ya Herooti eekesaka nanna ya omuula Yinsa.

Yinsa oneekesiwa pi atthu awaatta

⁷Yinsa na anakhiyoni awe, khulawa mpakha ontthatta la Kalileya na nyumani wawe yaari ota khuntti khuluyeene ya nti wa Kalileya. ⁸Wakathi asiiliyeevo vitthu zooshi aari orettaazo, atthu awaatta aari olankhaaye Yudeya, Yeruzaleemu, Itumeeya, akina akaapu wa muuttho Yorotaani na apale a Tiiru na Sitooni khuta okutthanana ye. ⁹Mwaasa wa khuntti khuluyeene etile, Yinsa khuwooza anakhiyoni awe yoori antthekezele mwaatiya yoori awerawere ophunyiwa. ¹⁰Maana ye awaavonisiye atthu awaatta, khwa nanna ya apale aari olwaaziwaaye aafiyeleliyeeyo osukhumana yoori apatthe onsapa. ¹¹Wakhula swaafu masheethwani aari omoonaavo, eetta onkokhorela omaasho wawe na onyakula araka: “Weeyo o Mwaana wa Nluku.” ¹²Ila ye aari owenkha oruma wookhomaala yoori ahinlupe paani yaya.

Othawuliwa wa maaswihaapa khumi na awiri

¹³Yinsa khuwela vamwaako na khuwaakhuwela apale aari owaatakhaaye, apo aya khuta aphale aariivo. ¹⁴Khuwaathawula khumi na awiri na khuwenkha nzina la maaswihaapa yoori eeye vamote na ye na yoori ye awaarume otafusiri, ¹⁵na eeyane owahi wa wiikara masheethwani. ¹⁶Apa pi apale khumi na awiri awathawuliyeeyo aari wiitthiwaaye yoori: Simawu, otule amwinkhiyeeyo nzina la Pheeturu; ¹⁷Tiyaaku, mwaana wa Zepeteewu, na Yaahaya ttwiiye, atthaapo aatthajiweeyo nzina la Buneerije, liriina maana a “Aana a Ottitthima”; ¹⁸Antere, Filiipe, Parutulumeewu, Matewuzhu, Tome, Tiyaaku, mwaana wa Alufeeyu, Tadeewu, Simawu Zelooti, ¹⁹na Yuuda Eshikariyoote, otule ankholisiyeeyo Yinsa.

Okufuru wa anamanozela a kano

²⁰Aphano, ye khulawa owawe, khukusanyeya opheya khuntti khuluyeene, khwa nanna ye na anakhiyoni awe aari woojelaavo oja. ²¹Wakathi ajamaaze asiiliyeevo vitthu epile, khulankha khusala alawa onthuulawo, maana aari olupa yoori: “Ye zamwaashikha akhili zawe.” ²²Anamanozela a kano aalankhiyeeyo Yeruzaleemu aari olupa yoori: “Ye ashinttiwa ti epiliisi! Mfwalume wa masheethwani ti othuuto aniweekaranaaye masheethwani.” ²³Aphano Yinsa khuwaakhuwela khusala awaanozela nkatthi wa milikaniso yoori: “Nanna-ni epiliisi antakhaaye omwiikara epiliisi? ²⁴Amana ofwalume mmote ojaawanya, khunwahi ojishintta otthuuporu. ²⁵Ama nyuupa amana ejaawanya, theenya khinwahi wiikhala ethiitoru. ²⁶Na Epiliisi nkhama ontta ojuumanana, na amana aawanyeya, khanlawa owahi wiiyavo na wafiya mwiisho wawe. ²⁷Weekhweele khina anwahaaye ovira nnyupa wa nwali na khuthuulamo maali zawe ahaazeeni onfuka khapula. Toowo phi anwahaavo wiiya vitthu za nnyupa mwawe.

²⁸“Miiyo kiniwuuzani khweele yoori, twampi zooshi na okufuru wooshi wa anaatamu onlawa waswaamihiwe, ²⁹ila otule ankufurwelaaye Rooho Ttakatthiifu, khana nswammaha mileele, maana ona twampi ya mileele.” ³⁰Yinsa aalupiye mattakhuzi apa mwaasa wa yo aari olupa yoori: “Ona sheethwani.” ³¹Elottelanaka, mamaawe na attwiize Yinsa khuta. Khwiiya vaje na khuruma okhuweliwa Yinsa. ³²Aarivo atthu awaatta eekhaliyeeyo aphale aariivo, na khuuziwa yoori: “Mamaawo na attwiizo ari vaje apho antta oweekesa.” ³³Yinsa khuuzela yoori: “Maama ti paani, wala attwiizaku apaani?” ³⁴Aphano khuweekesa apale eekhaliyeeyo aphale aariivo na khuwooza yoori: “Maama na attwiizaku pi atthaapa ari attaapha! ³⁵Otule anrettaaye matakhelo a Nluku, ti eeyiye ttwiiyaku, nlupwaaka na maama.”

Nlikaniso wa Namazala

¹Yinsa khurutela osomisa nshini wa ntthatta. Khutavo atthu awaatta aphale aariivo, khusala ahithajiya weetta nkalawa yoori eekhale nttumpho. Kalawa yaari mpahari, atthu ooshi khwiikhala nshini wa pahari. ²Ye aari owaasomisa vitthu zawaatta nkatthi wa nlikaniso, asomisaka khuri: ³“Mwisiile! Namalima aalawiye ozala. ⁴Wakathi aari omwazaavo peewu, phantte kiina khukwela nshini wa tarikhi anyannyi khuta khuja. ⁵Kiina khukwela vahali aariivo mawe, vahali laarivo nttophe vattitthiiru; nasaapiru khoottha, maana nttophe ntthile khaleechiye. ⁶Aphano noopuwa njuwa khulukuza peewu yaya; maana khazaarina mitathaari, khuuma. ⁷Peewu kinoko khukwela va miiwa, khuwula vamote na miiwa, khurapeliwa pi miiwa, khwa nanna zahawahiyeeyo wiima mishumo. ⁸Kiina khukwela vanshaka wooshapweya, khoottha, khuwula na khwiima mishumo zooshwapweya, talaathiini, siithiini na mpakha miiya wakhula mmote.” ⁹Yinsa khumarisela alupaka yoori: “Otule ariina mashiilo, ti asiile!”

Otaphuleliwa wa nlikaniso

¹⁰Wakathi ye aari otthwe, anakhiyoni apale khumi na awiri na akinoko aari kharipu ya attaaphale khumuuzela monkoni wa milikaniso. ¹¹Ye khuwooza yoori: “Mweeyo mwenkhiwa ojuwa siiri za ofwalume wa Nluku, ila apale ari oje, zooshi anuuzaniwa milikaniso, ¹²yoori

“ ‘hatha nkhama oona ahijuwe,

hatha nkhama asiila ehiweeleye

yoori ahizukulise rooho zaya aswaamihiwa!’ ”

¹³Aphano Yinsa khuwoozela yoori: “Mweeyo khuniweeleyani nlikaniso opu, nanna-ni enteelaaye oweeleyani epi mikina? ¹⁴Namazala onzala nttakhuzi. ¹⁵Atthu akina ari nkhama peewu eriiye nshini wa tarikhi, nhali lizaliweemo nttakhuzi. Paata ya osiila, epiliisi onta, khulazavo nttakhuzi ntthile nroho mwawe. ¹⁶Akina, ari nkhama peewu ezaliweeyo vahali wawiiyavo mawe, ansiilaaye nttakhuzi nasaapiru khupwekherela na furaha. ¹⁷Ila paata ya wakathi vattitthiiru, atthu aya apo anlawa akatthale hapari maana kharetteeni wiiya nchina laya, amana ziwaapattha tafwawuthi ama lupattha mwaasa wa mattakhuzi apale antta wanswi. ¹⁸Theenya akina anlattanana na peewu ezaliweeyo vakatthi wa mwiiwa. Apo ansiila hapari, ¹⁹ila, amana ziwaapuwelelaka tafwawuthi za ohaayi, tuvela za maali na otakha kiina, vitthu zaya epo enshawa nttakhuzi na ahifiyelelaka wiima mishumo. ²⁰Awaapho theenya atthu akina, anlikananaaye peewu ezaliweeyo nti wooshapweya. Apo aya ansiila nttakhuzi khukhupalela na khuttheerisa talaathiini, siithiini na mpakha miiya khwa etile aazaliyeeyo.”

Nlikaniso wa likhompe

²¹Ye khuwooza yoori: “Paani ankhozaaye khantteya yawe khuttha n’yuuku ama nlivuku? Olikha toowo kampweha vahali wawooneyavo? ²²Maana khayiivo hatha etthu moote yoovithiwa, ehinttelaaye wiiya payana na khayiivo moote yoovithiwa ehinttelaaye ovithuliwa. ²³Nkhama ntthu onaaye mashiilo oosiila, asiile!” ²⁴Aphano, khuwooza yoori: “Phoole na epile mwinsiilaaye. Na mphimo otthuupo mwinttelaaye owaaphimela azeenu, mwinttela ophimeliwa otthuupo, na theenya mwinkeene mwinlawa mweekezeliwe. ²⁵Otule ariina, onlawa eekezeliwe; ila otule ahina hatha etile vattitthiiru ariinaaye ontta onyakanyiwa.”

Nlikaniso wa Peewu

²⁶Ye khurutela olupa yoori: “Ofwalume wa Nluku ori nkhama ntthu anzalaaye peewu yawe vathi. ²⁷Hatha nkhama eetta olankha, ama hatha nkhama eetta olala, epo zinoottha na zinwula, ye woohijuwi nanna erettikhaniyeeyo. ²⁸Otthuupo oniima mishumo zaya: yamwanzo nyaani, elottelanaka ntathi, mwiisho, phunje zawiitaala va ntathi. ²⁹Amana peewu ekhomaala, ntthu onttela othuula eesu, maana wafiya wakathi wa wuurula.”

Nlikaniso wa phunje ya samuli

³⁰Yinsa khurutela olupa theenya yoori: “Ofwalume wa Nluku onlattanana niini? Nlikaniso ni ninttelaaye orumeyela yoori nithoonyeze? ³¹Ori nkhama phunje ya samuli, etile yiiyiye phunje yootepa opushuwa vathi apha. ³²Ila, paata ya ozala, zintta owula channu, zayita mathapa ooshi mpakha anyannyi khupattha ovumula mwiivuuli mwaya.” ³³Khwa milikaniso zooshi zoolattana, Yinsa aari owooza monkoni wa nttakhuzi, nanna aari owahaaye oweeleya. ³⁴Khaari owooza hatha etthu ahirumeyeleeni nlikaniso, ila amana eeya na anakhiyoni awe paasi, eetta owoozaka zooshi.

Yinsa onnyamaza pheevo

³⁵Siikhu etile, weettelaka oripa, Yinsa khuwooza anakhiyoni awe yoori: “Nlaweni kaapu kiina ya ntthatta.” ³⁶Paata ya osusa khuntti etile, yo khupakhira nkalawa mphule aariimo Yinsa. Na kalawa kiina zeetta owaaperekha. ³⁷Khwaaza ovuma pheevo zawoopisa, na mawipi khusala apiya kalawa yaya khwa nanna aari wiitaalaamo maati. ³⁸Yinsa aarettiye eettaka olala sheezi aphiteeziye nsaawu. Aphano anakhiyoni awe khunlansa na khumuuza yoori: “Mwaaliimu, khinuujali fweeyo nifwaka?” ³⁹Yinsa khulankha khunyamaza pheevo na khuuza pahari yoori: “Etthe nreke! Onyamale!” Pheevo khunyamala na zooshi khwiiya zawiitthaala. ⁴⁰Aphano khuwoozela anakhiyoni awe yoori: “Mwinoovani? Nalelo khamwina amini?” ⁴¹Anakhiyoni apale ari awoova channu, khusala oozana yoori: “Ti paani otu aya, anshututeliwaaye ti pheevo na pahari?”

Ovonisiwa wa namasheethwani

¹Yo khulokha pahari, khufiya nti wa Katara. ²Wakathi Yinsa apakhuwiyeevo nkalawa, mwinyi mmote aariina sheethwani khusaruwa nvilalo khuta attaaphale. ³Mwinyi aya oto aari wiikhala nvilalo, khina mmote aari owahaaye onkhola, hatha ari ntthentte. ⁴Maana swaafu zawaatta aari wiiya ntthentte moolu awe na makhono awe, ila ye eetta opwechaka tthentte yaya na ovuja zuuma zaari ofukaniwaaye moolu awe. Khaarivo ntthu wookhomaala aari owahaaye onshintta. ⁵Woohilikheleli, nthana na osikhu eetta onyakulaka nnyaako na nvilalo ajishijaka na mawe. ⁶Wakathi amooniyeevo Yinsa ari peetiwene, khutthira khulawa khukokhora omaasho wawe. ⁷Khukhuwa na huula yawe yooshi araka: “Onikitakhelani miiyo, Yinsa mwaana wa Nluku Nwulu? Kinuuvekela khwa Nluku yoori ohikihukhumu!” ⁸Maana Yinsa aamuuziye yoori: “Mwileemo mmwiili wa mwinyi otu, rooho zootakhala.” ⁹Aphano Yinsa khumuuzela yoori: “Weeyo, nzina lawo o paani?” Khujipu yoori: “Nzina laka enriwa khuntti, maana niri awaatta.” ¹⁰Khusala anvekela wonkhanyarelavo yoori ahiwaarume olaamo mmuti mwaya mphule. ¹¹Liphanko liwululene la kuluwe laari oshukisiwaaye kharipu ya mwaako. ¹²Masheethwani apale khusala anvekela Yinsa yoori: “Onirume yoori neette nkuluwe mphule.” ¹³Yinsa khwinkha ruhusa masheethwani apale, khusaruwa khweetta nkuluwe. Liphanko laarina thamani ya alufu piiri za kuluwe, khwaaza otthira zilankhaka omwaako ziishukhelaka mpahari, zooshi khuzama khufwa.

¹⁴Apale aari oshukaaye kuluwe zaya epile, khutthira khulawa olupa vitthu epile zaarettikhaniyeeyo waaza nsitati mpakha mmashapa, atthu khulankha olawa woona epile zaarettikhaniyeeyo. ¹⁵Wakathi amwaattamiyeeyo Yinsa, khumoona mwinyi otule aamwitaliyeeyo masheethwani awaatta, eekhaliye awaliye saana na atthiiyemo akhili zawe, atthu apale khwiiya awoova. ¹⁶Apale ooniyeeyo khuwooza atthu zooshi epile zanrettikhaneliyeeyo mwinyi otule aariina masheethwani, na theenya khulupa monkoni wa kuluwe. ¹⁷Aphano atthu apale khusala anvekela Yinsa yoori aleemo mmuti mwaya mphule. ¹⁸Wakathi Yinsa aari owelaaye nkalawa, mwinyi otule aariina masheethwani khunvekela Yinsa yoori anlikhe alawe vamote na ye. ¹⁹Yinsa khuhinkhupaleli, ila khumuuza yoori: “Olawe owawo wawuuze ajamaazo zooshi epile Mbwana ooretteliyeeyo na tthakaraka awooneliyeeyo.” ²⁰Aphano, mwinyi otule khulawa na khwaaza olupa nti wa Tekapooli yooshi etile Yinsa anretteliyeeyo. Atthu ooshi khwiiya ooshanka.

Owahi wa Yinsa monkoni wa marati na ofwa

²¹Yinsa khupakhira theenya nkalawa alokhelaka kaapu kiina, khuntti khuluyeene ya atthu khuta khwiitaala aphale aariivo Yinsa nshini wa nttima. ²²Aphano khuta attaaphale namalokozela mmote wa nsinakooka aari wiitthiwaaye Yaayiru, amooniyeevo Yinsa, khukokhora nshini wa moolu awe. ²³Khunvekela wookhanyarelavo yoori: “Mwanaka wankha onsaleela ofwa! Safwatali ote, wanttheele makhono yoori avone na eeye haayi.” ²⁴Yinsa khusala alawa vamote na ye, khuntti khuluyeene khusala enlotta na omphunya.

²⁵Attaaphale, aarivo muukha mmote aariina nyaakha khumi na miwiri eettaka ohoowa mwaasa wa omwiittikha taamu. ²⁶Ye ahoowiye channu khwa oweekesa anamavonisa na khuharipu nzurukhu awe wooshi aariina, khuhisala avona khusala eetta wootepa. ²⁷Asiiliyeevo olupiwa wa Yinsa, khuta nyuma wawe vahali wa waattiwavo na khusapa ajapi yawe. ²⁸Maana aari wuupuwela yoori: “Miiyo kisaparu paasi ajapi yawe, kintta ovona.” ²⁹Nasaapiru yeetta olikha wiittikha taamu etile na muukha otule khoona yoori mmwiili mwawe aari wootaphuliwa ohoowa opule. ³⁰Wakathi otthuupule, Yinsa khoona yoori wansaruwa owahi, khuzukuluwa khweekesa khuntti etile khuuzela yoori: “Paani asapiyeeyo ajapi yaka?” ³¹Anakhiyoni awe khujipu yoori: “Woonaka khuntti khuluyeene eti ekusanyeyiyeeyo, khusala wuuzela yoori: ‘Paani akisapiyeeyo?’ ” ³²Ila Yinsa nalelo khusala eekesaka vakatthi wa khuntti etile yoori amoone otule aarettiyeeyo etthu yaya etile. ³³Aphano muukha otule, ajuwiyeevo etthu yaarettikhaniyeeyo, khumwaattama khukokhora nshini wa moolu awe eettaka othukumela mwaasa wa woova, khulupa haakhi yooshi. ³⁴Yinsa khumuuza yoori: “Mwanaka, amini yawo yoovonisa. Olawe na heeri, na wiiye wootaphuliwa ohoowa wawo.”

³⁵Nalelo Yinsa eettaka ottakhula, khutavo atthu a owawe Yaayiru, namalokozela wa nsinakooka khumuuza yoori: “Mwanawo afwa. Khinihithajiya onwuti theenya Mwaaliimu!” ³⁶Yinsa khumuuza namalokozela wa nsinakooka mphule yoori: “Ohoove, okhupali paasi.” ³⁷Na khuhinlikhi hatha ntthu onlotta, woohiiyi Pheeturu, Tiyaaku na Yaahaya ttwiiye Tiyaaku. ³⁸Wakathi afiiyeevo owawe namalokozela wa nsinakooka, Yinsa khoona tafwawuthi na atthu eettaka olila na ojiliza na huula ya onyakula. ³⁹Yinsa khuvira nnyupa na khuuzela yoori: “Tafwawuthi yaya eti ti ya niini na mwinjilizelani? Mwaana khafweeni, ontta olala.” ⁴⁰Ila ooshi khwaaza ontheya Yinsa. Ye khurumisa yoori aleemo ooshi, khunthuula papaawe na mamaawe mwaana na anakhiyoni awe apale aariina na khulawa aphale aariivo mwaana. ⁴¹Khunkhola nkhono awe khuri: “Taliita kuumi!” Liriina maana a “Mwanankha, miiyo kinuuruma yoori olankhe!” ⁴²Nasaapiru mwanankha otule, aariina hirimu ya nyaakha khumi na miwiri, khulankha na khwaaza weettetta. Ooshi aariivo khwiiya ooshanka. ⁴³Ila Yinsa khuwooza woosileyavo yoori ahiiyevo hatha ntthu anttelaaye ojuwa, na khuruma winkhiwa etthu yoojiwa.

Napiyu mmote wootarawiwa

¹Yinsa khulaawo okhule waya, khweetta sitati ya owawe, anakhiyoni awe khusala amperekha. ²Noofiya saapatu, khwaaza osomisa nsinakooka, awaatta aari onsiilaaye khwiiya ooshanka, alupaka yoori: “Zininlankha vayi vitthu zaya epi? Akhili ni epi enkhiweeyo? Na onretta toovi minjuza? ³Khahiyo kalapinteero otu, mwaana wa Mariyamu, ttwiiye Tiyaaku, Yuusufu, Yuuda na Simawu! Alupuwe khari nttumphu!” Khusala ajoona oveyisiwa ti ye. ⁴Yinsa khuwooza yoori: “Mmuti mwawe, vakatthi wa ajamaaze na vaje vawe pi attaapho napiyu ahinshitahiwaavo.” ⁵Ye khawahiye oretta minjuza Nazareeti, woohiiyi owaavonisa alwele vattitthiiru khwa owaattheela makhono. ⁶Khwiiya wooshanka mwaasa wa othowawo amini okhule waya. Yinsa khuvira asomisaka miti zaattameliyeeyo ottuukhule.

Yinsa oniwaaruma anakhiyoni awe khumi na awiri

⁷Khuwaakhuwela anakhiyoni awe apale khumi na awiri, khuwaaruma awiri khwa awiri na khuwenkha owahi wa wiikara masheethwani. ⁸Khuwaaruma yoori: “Mwihithuule hatha etthu, yohiiyi pakhora, khamwaarina ya othuula etthu yoojiwa wala kaapiyaka wa safwari wala nzurukhu. ⁹Mwiwale jampali, ila mwihithuule ajapi piiri. ¹⁰Amana mwifiya nyuupa moote, mwiiye attaapho mpakha siikhu mwinttelaaye olaavo. ¹¹Na miti mikinoko amana zihuupwekhereleni na khuhuusiilini, mwitathe lifufu la mmoolu mweenu mwilaakamo, nkhama oshaahiti vakatthi vaya.” ¹²Yo khulawa khuwaatafusirela atthu yoori athupwiye. ¹³Yo aari wiikara masheethwani awaatta na owaavaaza mafuttha mmwishwa mwaya na owaavonisa alwele awaatta.

Ofwa wa Yaahaya Namoosa

¹⁴Mfwalume Herooti khusiila elupiwaka hapari epile, maana nzina la Yinsa laajuwiwe saaneene. Atthu akina khwaaza olupa yoori: “Yaahaya Namoosa eetta osisimuwa muufwa! Tiito zinrettikhanaaye minjuza zootikinisa khwa ye.” ¹⁵Akina aari olupa yoori: “Ye ti Aliyaasi.” Akinoko khusala olupa araka: “Ye napiyu, nkhama manapiyu apale a raku.” ¹⁶Ila Herooti wakathi asiiliyeevo vitthu epile, khuri: “Yaahaya, mwinyi kinshijiyeeyo, asisimuwa muufwa!”

¹⁷Maana Herooti aarumiye yoori akholiwe Yaahaya, afukeliwe nkalapooso, mwaasa wa Herotiiya, muukha wa Filiipe ttwiiye, othuuto anraliyeeyo. ¹⁸Mwaasa wa Yaahaya aari omuuza Herooti yoori: “Khahi halaali weeyo onrala muukha wa ttwiiyo.” ¹⁹Herotiiya aarina katapu khwa Yaahaya, khusala atakha omuula, ila khuhisala awahi oretta, ²⁰mwaasa Herooti aari omoova Yaahaya na aari omwiinanela, maana aari ojuwa yoori ye mwinyi wa shariya na ttakatthiifu. Amana ansiilaka, eetta oshanka; khwa etthiipo waari ontuvela onsiila.

²¹Omwiisho Herotiiya khupattha kiphenyo siikhu ya oretta mwaakha Herooti. Khuretta njampo na anamalokozela awe awulu, attunkhulu a anajanka na ooshi apale eeyiye afwalume a nti wa Kalileya. ²²Wakathi mwaana wa Herotiiya aviriyeeyo khwiina, khuntuvela Herooti na apale awaakharipushiyeeyo. Mfwalume khumuuza mwanankha otule yoori: “Okivekele wakhula etile ontakhaaye kintta owinkha.” ²³Khumwaahiti khwa olapha yoori: “Wakhula onikivekelaaye, kintta owinkha, mpakha phantte ya ofwalume aka.” ²⁴Mwaana otule khusaruwa khumuuzela mamaawe yoori: “Kiveke niini?” Mamaawe khunjipu yoori: “Oveke eeshwa ya Yaahaya Namoosa.” ²⁵Nasaapiru mwanankha otule khwaakuva khulawa wa mfwalume khuveka yoori: “Kintakha mwikinkhe nasaapi eeshwa ya Yaahaya Namoosa mparathu.”

²⁶Mfwalume khwiiya woohuzunikha channu, ila mwaasa wa olapha opule aalaphiyeeyo na wa apale awaakharipushiyeeyo, khuhiwahi okatthala etile avekeliweeyo ti mwanankha otule. ²⁷Nasaapiru khunruma najanka khumuuza ontiisela eeshwa ya Yaahaya Namoosa. Ye khulawa okalapooso, khukakatta eeshwa ya Yaahaya Namoosa. ²⁸Khuttha ntthaalu khumwinkha mwanankha otule na ye khumwinkha mamaawe. ²⁹Noosiila hapari epile anakhiyoni a Yaahaya namoosa, khuta khuthuula mwiili awe khulawa khuzikha.

Yinsa oniwaajisa alume alufu thaanu

³⁰Maaswihaapa khurutela aphale aariivo Yinsa khumuuza zooshi aarettiyeezo na asomisiyeeyo. ³¹Aarivo atthu awaatta aari otaaye na olaavo, Yinsa na anakhiyoni awe nawoona yoori khaarina kiphenyo ya oja. Ye khuwooza yoori: “Mwite nilawe puuro yawiitthaaleyavo navumule vattitthiiru.” ³²Aphano yo khulawa nkalawa mpakha puuro yawiitthaaleyavo. ³³Atthu awaatta khuwoona alawaka paata ya owaajuwa. Atthu a miti zooshi za ottuukhule, khutthira khufiyawo yo ahinafiye.

³⁴Eeshukhaka nkalawa Yinsa, khoona khuntti khuluyeene ya atthu, khuwoonela huruma, maana zaari nkhama pwittipwitthi zoohiina makhampuzi. Aphano khwaaza owaasomisa vitthu zawaatta. ³⁵Weettelaka oripa, anakhiyoni awe khunsusela khumuuza yoori: “Puuro eti ti yawiitthaaleyavo, na waripa. ³⁶Owaamwaze atthu apa yoori alawe mmashapa na mmiti epile naattamiyeeyo yoori oozanye etthu yoojiwa aje.” ³⁷Ila ye khuwaajipu yoori: “Mwiwenkhe mweeyo ena etthu yoojiwa.” Yo khumuuza yoori: “Atthu apa yoori aje, ninhithajiya miiya piiri za feeta!” ³⁸Yinsa khuuzela yoori: “Mwina phaawu kavi? Mwilawe moone.” Anakhiyoni apale khulawa khoona khujipu yoori: “Ninaaye phaawu thaanu na swi piiri.”

³⁹Aphano, Yinsa khuwaaruma yoori ooshi eekhale, khuntti khwa khuntti va nyaani piishi. ⁴⁰Khuretta etthiipo khwaawanyeya khwa khuntti ya miiya na khuntti ya hamusiini. ⁴¹Athuuliyeevo phaawu epile thaanu na swi piiri khweekesa pinkuuni khuparikhiya. Nawiisha khumeya phaawu epile khuwenkha anakhiyoni awe yoori awaawanyeze atthu apale. Theenya khuwaawanyeza swi epile piiri ooshi aya. ⁴²Ooshi khuja khurupala, ⁴³anakhiyoni khulokotthela khwiitaala khelenke khumi na piiri za nyeenye za phaawu na za swi. ⁴⁴Atthu aajiyeeyo aari alufu thaanu alume ene.

Yinsa oneettetta vatulu wa maati

⁴⁵Elottelanaka, Yinsa khuwaaruma anakhiyoni awe yoori apakhire nkalawa na alokoze Betezayiita, wakathi ye aari oleezananaavo atthu. ⁴⁶Paata ya owaaleeza atthu, khuwela vamwaako yoori alompe. ⁴⁷Weettelaka oripa, kalawa yaari vakatthi wa pahari na Yinsa aari otthwe vathi. ⁴⁸Ye khuwoona anakhiyoni awe afutthaka kaafi woovelavelavo, maana eetta wiinyula pheevo. Lifwajiri, Yinsa khulawa aphale aariivo eettettaka vatulu wa maati, khusala asaleela owaavikana. ⁴⁹Wakathi amooniyeevo eettettaka vatulu wa pahari, khusala amoona nkhama nshitapehe, aphano khusala anyakula. ⁵⁰Maana ooshi aamoniyeeyo aari oosuthuwa. Ila Yinsa nasaapiru khuwooza yoori: “Mwiminyale! Ti miiyo! Mwihoove!” ⁵¹Aphano Yinsa khuwela nkalawa khwiiya vamote na anakhiyoni awe, na pheevo khunyamala, na yo khwiiya ooshanka, ⁵²maana khazaaweleyiye minjuza za phaawu. Rooho zaya zaari zookhomaala.

Yinsa oniwaavonisa alwele a Jenezare

⁵³Paata ya olokha pahari, khufiya Jenezare, ottuukho khufukelela kalawa yaya. ⁵⁴Wakathi apakhuwiyeevo atthu khunjuwa Yinsa. ⁵⁵Yo aari ovira azukulelaka nti wooshi opule, na owaathuula alwele aya va nrepa awaalawanaka ohali aari osiilaawo yoori Yinsa ori ottuukho. ⁵⁶Wakhula vahali aari weettaawo, mmamuti, nsitati ama mmashapa, aari othuuliwaka alwele na olawaniwa mparasa. Noovekeliwa yoori nenkawu awahi osapa nshaka la ajapi yawe; maana ooshi apale aari osapaaye eetta oovona.

Yinsa vakatthi wa zowera za Eyahuuti

¹Mafwarizeewu na akina anamanozela a kano alankhiye Yeruzaleemu khukusanyeya na Yinsa. ²Khusala awoona anakhiyoni awe akina eettaka oja na makhono aharaamu, enlupaaye yoori khanaweeni. ³Mafwarizeewu na mayaahuuti ooshi khanja ahinaweeni wotwahareshiwavo, alottelaka zowera za attunkhulu a tiini. ⁴Amana aruti oparasa, khannja ahaazeeni woosa makhono aya khapula. Anthokorela masomi makina a waatta, nkhama woosa pilawuri, mirinki, zoopo za malaatha na moolili.

⁵Aphano mafwarizeewu na anamanozela a kano khumuuzela Yinsa yoori: “Mwaasa aya niini anakhiyoni awo ahilottelaka zowera za attunkhulu a tiini, khusala aja ahinaweeni?”

⁶Ye khuwaajipu yoori: “Manaafikhi! Ezaaya ahupiri saaneene monkoni wa mweeyo nkhama etthiipo yaatikhiweeyo yoori:

“ ‘Atthu apa anikishitahi na milomo,

ila rooho zaya ziri peetiwene na miiyo.

⁷Mwinikaaputu mahala

mwisomisaka zowera zinsomisiwaaye pi anaatamu.’

⁸Mweeyo mwintarawu oruma wa Nluku na khusala mwilottela zowera za enaatamu.”

⁹Yinsa khwiishelana awoozaka yoori: “Mweeyo mwineekesa yoori mwitthe othetekele oruma wa Nluku mwaasa wa oshututela masomi enu! ¹⁰Maana Munsa alupa yoori: ‘Onshitahi papaawo na mamaawo,’ na ‘antakhaaye onlaani papaawe na mamaawe ona ya ohukhumweliwa ofwa.’ ¹¹Ila mweeyo mwinkhupalela yoori amana ntthu amuuza papaawe ama mamaawe yoori: ‘Wakhula etthu kiniwinkhaanini miiyo zaakha ya omwinkha Nluku,’ ¹²khwa nanna eto mwiwerawere ojikhanyarela omwaawuni papeenu na mameenu. ¹³Toowo mweeyo khamwinttha fwayita nttakhuzi la Nluku, khwa opatilana zowera zinlankhaaye wa paapa khwa aana aya. Na mwinretta vitthu zawaatta nkhama etthiipi.”

¹⁴Yinsa khuwaakharipusha theenya atthu apale khuwooza yoori: “Mwikisiileze mooshi na eweeleyeni saana vitthu epi. ¹⁵Khina etthu moote ya oje wa pinaatamu enraaye nonvira khunttha oharaamu, ila epile zininlankhaaye nroho mwawe ti eninharamushaaye. ¹⁶Nkhama ntthu onaaye mashiilo oosiila ti asiile!” ¹⁷Paata ya owaalikha atthu apale olawa owaya, anakhiyoni khunvekela yoori awooze maana a nlikaniso aya opule. ¹⁸Yinsa khuwoozela yoori: “Kiri na mweeyo khiniweeleyani? Yoori khina etthu moote eninviraaye pinaatamu eninharamushaaye? ¹⁹Maana kineetta nroho mwawe, ila mwiijohojoho mwawe, nawiisha khwiitthiwamo.” Khwa etthiipo mattakhuzi apale, Yinsa khutukhuru ottha wiiya halaali vitthu zoojiwa zooshi. ²⁰Khurutela olupa yoori: “Etile eninsaruwaaye pinaatamu ti eninharamushaaye. ²¹Maana nroho ti, enlakhaamo zawuupuweliwa zootakhala, oshawi akhapa, wiiya, wuula, ²²oraruwa, okhwiririwa, vitthu zootakhala, ohata, oralana woohiiyi wa halaali, nrima, waapa, ojoona na ololo. ²³Zootakhala zooshi zinlankha nroho wa ntthu na piitthiipo eninharamushaaye pinaatamu.”

Waamini wa muukha mmote weeletto

²⁴Yinsa khulaawo okhule waya khulawa phantte ya Tiiru na Sitooni, khweetta nyuupa yaya eto na khaatakhiye ojuwiwa ti ntthu, ila khuhiwahi ojivitha sirini. ²⁵Ila nasaapiru muukha mmote, aarina mwanawe wa nnatti ariina sheethwani, asiiliyeevo monkoni wa ye, khuta khukokhora nshini wa moolu a Yinsa. ²⁶Muukha otule aari nkereeka ya siiro-fineesiya aavokoliweewo, khusala anvekela Yinsa yoori amwiikare sheethwani aari mmwiili wa mwanawe. ²⁷Ila Yinsa khumuuza yoori: “Owaalikhe khapula aana aje arupale. Khahi yoolotteya othuula phaawu ya aana khuwenkha aana anapwa.” ²⁸Muukha otule khujipu yoori: “Khweele, Mbwanaaka, ila hatha aana anapwa, annja tathela vathi wa meeza eniwaakwaayo asimaana.” ²⁹Aphano ye khumuuza yoori: “Mwaasa wa nanna ojipwiyeezo weeyo, etta; sheethwani ansaruwa mwanawo.”

³⁰Muukha otule khurutela owawe na khunsikana mwanawe arapaleliye voolili, sheethwani otule anlikhiye.

Yinsa oninvonisa ntthu woohittakhuli na woohisiili

³¹Elottelanaka, Yinsa khulankha mmuti mphule wa Tiiru na khulokha Sitooni mpakha Pahari ya Kalileya nti wa Tekapooli. ³²Aphano khutiiseliwa mwinyi mmote woohisiili na wookukuma, khunvekela yoori anttheele nkhono. ³³Yinsa khunlazavo vakatthi wa atthu apale awaatta na khunttha yaala omashiilo wawe. Elottelanaka khutthema na khusapa nlimi la mwinyi aya otule. ³⁴Aphano khweekesa otulu, khwiittha phuumu na khumuuza mwinyi otule yoori: “Efata”, enlupaaye yoori: “Ofunule.” ³⁵Wakathi otthuupule mashiilo a mwinyi otule khufunuwa na nlimi lawe khuveya, ye khwaaza ottakhula woohiina tafwawuthi. ³⁶Yinsa khuwooza yoori ahimuuze hatha ntthu. Ila olikha toowo, khwa nanna aari owaakhattazaavo, yo aari otepa olaleya. ³⁷Atthu ooshi aari osiilaaye aari wiiya ootikinisiwa channu na khusala alupa yoori: “Ye onretta vitthu zooshi saana, mpakha oniwaattakhulisa apale oohittakhuli na owaasiilisa apale oohisiili.”

Yinsa oniwaajisa alume alufu nne

¹Ziviriyeevo siikhu vattitthiiru, atthu akina awaatta khukusanyeya vamote na Yinsa. Mwaasa wa atthu apale khaarina etthu yoojiwa, khuwaakhuwela anakhiyoni awe khuwooza yoori: ²“Kiniwoonela huruma atthu apa, maana ana siikhu ttatthu ari vamote na miiyo na khana hatha etthu yoojiwa. ³Amana miiyo kiwooza olawa owaya najala zaya, yo antta okwa ntarikhi maana akina alankha peetiwene.” ⁴Anakhiyoni awe khujipu yoori: “Vayi khwa puuro eti niriiyo yawiitthaaleyavo ntthu anwahaaye opattha phaawu zoofiyela oja atthu apa?” ⁵Yinsa khuuzela yoori: “Mweeyo mwina phaawu kavi?” Yo khujipu yoori: “Sapa.”

⁶Ye khuwaaruma atthu apale yoori eekhale vathi. Elottelanaka khuthuula phaawu epile sapa, khunshukhurwela Nluku, khumeya khuwenkha anakhiyoni awe yoori awawanyele atthu apale. Yo khuretta etthiipile, ⁷Aarina theenya swi kiina ttiitthittiitthi, khuthuula, khuparikhiya na khuwooza anakhiyoni awe yoori awawanyele atthu apale. ⁸Atthu apale khuja mpakha orupala. Na khukusanya tathela zaasaliiyeeyo khwiitaala khelenke sapa. ⁹Aarivo thamani ya atthu alufu nne. Nawiisha Yinsa khuwooza atthu apale olawa owaya. ¹⁰Nasaapiru khweetta nkalawa na anakhiyoni awe khusala alawa nti wa Talimanuuta.

Mafwarizeewu anveka alama

¹¹Mafwarizeewu khuta na khwaaza omuuzela Yinsa yoori amoone, na khunvekela alama ya pinkuuni. ¹²Ye khusisimira nkatthi nkatthi na khuri: “Mwaasa aya niini khapila eti evekaka alama moote ya minjuza? Miiyo kinhakikhi yoori hatha alama moote khanlawa winkhiwa.” ¹³Aphano khuwaalikha apale aya, khurutela nkalawa khusala alawa phantte kiina.

Othowelelisana wa mafwarizeewu

¹⁴Anakhiyoni apale eettiye osahawu othuula phaawu, aarina phaawu moote paasi nkalawa. ¹⁵Yinsa khuwooza yoori: “Mwijeekesele na mwiiyane phoole na fwaramento ya mafwarizeewu na ya Herooti.” ¹⁶Yo khusala akheetisana araka: “Mwaasa wa fweeyo ohithuuli phaawu.”

¹⁷Yinsa ajuwiyeevo yoori antta okheetisana, khuwoozela yoori: “Mwaasa aya niini mwinkhetisanaka monkoni wa ohiina phaawu? Nalelo khiniweeleyani wala khamwinsiila? Rooho zenu mweetta wuumisa? ¹⁸Mweeyo mwinaaye maasho ila khamwinoona, mwinaaye mashiilo ila khamwinsiila, khamwinfikhiri? ¹⁹Wakathi opule kaameyiyeeyo phaawu khuwenkha atthu apale alufu thaanu, khelenke kavi za tathela zasaliyeeyo?” Anakhiyoni apale khujipu yoori: “Khumi na piiri.” ²⁰Khi wakathi opule kaameyiyeeyo phaawu sapa yoori kiwenkhe atthu apale alufu nne, zaasaliye khelenke kavi za tathela mwaakhupeliyeeyo? Anakhiyoni khujipu yoori sapa. ²¹Ye khuwooza yoori: “Mweeyo nalelo khiniweeleyani?”

Ovonisiwa wa ntthu woohooni nti wa Betezayiita

²²Aphano yo khufiya Betezayiita, atthu akina ottuukhule khuntanela Yinsa ntthu woohooni, khusala anvekela yoori ansape. ²³Ye khunthuula ntthu otule khunlawana othetekele wa mmuti mphule, khulawa khutthemela mmaasho na khunttheela makhono. Yinsa khumuuzela yoori: “Weeyo onwahi woona etthu?” ²⁴Ntthu otule khweekesa otulu khuri: “Kiniwoona atthu anumpuwa nkhama miitthi enttaaye weettetta.” ²⁵Theenya, Yinsa khunttheela makhono ntthu otule na khufinikha maasho awe. Aphano maasho awe khufunuwa na khurutela woona zooshi saaneene. ²⁶Yinsa khunruma olawa owawe amuuzaka yoori: “Ohivire mmuti.”

Otukhuru wa Pheeturu

²⁷Yinsa na anakhiyoni awe khulawa miti zaattamananiyeeyo Sezareeya ya Filiipe. Ntarikhi eettaka olawa, khusala awoozela yoori: “Atthu anri miiyo ki paani?” ²⁸Yo khunjipu yoori: “Akina anri weeyo o Yaahaya Namoosa, akina anri o Aliyaasi, akinoko aya anri weeyo ommote wa manapiyu.” ²⁹Yinsa khuwoozela yoori: “Khi mweeyo? Mwinri miiyo ki paani?” Pheeturu khujipu yoori: “Weeyo o Al-Masiihu!” ³⁰Yinsa khuwaahirimiza yoori ahimuuze hatha ntthu monkoni wawe ye.

Yinsa onlupa ofwa na osisimuwa wawe

³¹Aphano ye khwaaza owaasomisa yoori yaari ohithajiya Mwaana wa Pinaatamu ohoochiwa pi vitthu zawaatta na okatthaliwa pi anamanozela a tiini, attunkhulu a tiini, mahaakhimu a kano, ooliiwe, ila siikhu ya ttaatthu asisimuwe.

³²Ye khulupa woosileyavo monkoni aya opo. Aphano Pheeturu khunkhuwelela othetekele khusala anshowera. ³³Yinsa khurutela aphale aariivo anakhiyoni awe khusala aweekesa na khunshowera Pheeturu yoori: “Osale nyuma waka, Epiliisi! Weeyo khunuupuwela vitthu za Nluku, ila vitthu za eenaatamu.”

³⁴Aphano khuwaakhuwela atthu na anakhiyoni awe khuwooza yoori: “Nkhama ntthu ontakha okilotta, ajikatthale mweenyewe, athuule nsalapa awe akilotte. ³⁵Maana otule antakhaaye wuusuru ohaayi awe ontta omwaashikha, ila otule onimwaashikhaaye ohaayi awe, mwaasa wa miiyo na mwaasa wa hapari zooshapweya ontta wuusurukha. ³⁶Nakataalikha, ena fwayita-ni ntthu opattha fwayita ya olumwenku wooshi, mwiisho waya khumwaashikha nafusi yawe? ³⁷Ama niini ntthu anwahaaye opatili na nafusi yawe? ³⁸Otule anikoonelaaye haaya miiyo na mattakhuzi aka, khwa khapila epi zoovonya na za twampi, Mwaana wa Pinaatamu onteela omoonela haaya amana ataaka nsiifwa wa Papaawe na malayikha ttakatthiifu.”

¹Khusala alupa theenya yoori: “Kiniwuuzani khweele yoori, khwa apa ariiye apha, akina khanfwa ahooneeni Ofwalume wa Nluku otaaka na owahi.”

Yinsa, Munsa na Aliyaasi

²Ziviriyeevo siikhu sitha, Yinsa khunthuula Pheeturu, Tiyaaku na Yaahaya paasi, khuwaalawana vamwaako woolepa woohiivo hatha ntthu nkina. Attaaphale Yinsa khuzukulisiwa vakatthi vaya. ³Kuwo zawe khwiiya zoottakattha nkhama etthu yawaara ameenaatho ahinwahaaye ofula khuttakatthisa nkhama toowo. ⁴Khuwaapuwelela Aliyaasi na Munsa, khusala attakhulana Yinsa. ⁵Aphano Pheeturu khumuuza Yinsa yoori: “Mwaaliimu, ti yooshapweya wiikhala attaapha. Nintta ojeka heema ttatthu, moote yawo, moote ya Munsa na kiina ya Aliyaasi.” ⁶Pheeturu khaari ojuwa etthu yoolupa, maana yo aari wa woova. ⁷Elottelanaka khupuwa liwiku khuwaafinikha, nttumpho khupuwamo huula yaari oraaye: “Otu Mwanaka wompheta; mwinsiileze.” ⁸Nasaapiru, wakathi eekesiyeeyo nkerekhere, khuhimooni hatha ntthu nkina theenya woohiiyi Yinsa.

⁹Eettaka wiishukha vamwaako aphale, Yinsa khuwaaruma yoori mwihimuuze hatha ntthu etile mooniyeeyo, mpakha Mwaana wa Pinaatamu asisimuwe muufwa. ¹⁰Mwaasa opule khuthokorela atthaaporu paasi, khusalana okheetisana maana a “osisimuwa muufwa”. ¹¹Khumuuzela yoori: “Mwaasa aya niini, anamanozela a kano alupaka wiiya yoohithajiya Aliyaasi ota khapula?” ¹²Yinsa khuwaajipu yoori: “Khweele Aliyaasi ona ya ota khapula, amana ata onrutisela opheeya vitthu zooshi. Khi mwaasa aya niini yaatikhiwaka yoori Mwaana wa Pinaatamu ona ya ohoowa channu, okatthaliwa na otarawiwa? ¹³Ila, miiyo kiniwuuzani yoori Aliyaasi ata, yo khunrettela zooshi aatakhiyeeyo nkhama zaatikhiweezo monkoni wa ye.”

Ovonisiwa wa shaapu aariina sheethwani

¹⁴Wakathi afiyeevo aphale aariivo anakhiyoni apale akina, khoona khuntti khuluyeene ewaazukuleliye apale na anamanozela a kano eettaka okheetisana na anakhiyoni. ¹⁵Atthu apale paata ya omoona Yinsa, khwiiya ooshanka khutthirela khunchelisa. ¹⁶Yinsa khuwoozela yoori: “Mwinkhetisana niini?” ¹⁷Mwinyi mmote aari vakatthi wa khuntti etile khujipu yoori: “Mwaaliimu, miiyo kootisela mwanaka ariina sheethwani aninkhattazaaye ottakhula. ¹⁸Wakhula vahali aninsikanaavo, ontta onkwisela vathi. Khusala alaza maphovu na owina meeno, na ojookola. Kawaavekela anakhiyoni awo yoori amwiikare sheethwani aya oto, ila yo khuhinkhitiri.”

¹⁹Aphano Yinsa khujipu yoori: “Oo, atthu oohaamini, mpakha lini kiiyaka vamote na mweeyo? Mpakha lini kuuvilelakani? Mwikitiisele shaapu oto.” ²⁰Aphano yo khuntiisa. Wakathi sheethwani amooniyeevo Yinsa, nasaapiru khuntothela mwaana otule ozoromowa woohusutivo khukwela vathi, khwaaza ojuupurusha alazaka maphovu. ²¹Yinsa khumuuzela paapa wa mwaana otule yoori: “Zamwaaza lini epi?” Papaawe mwaana khujipu yoori: “Thanku avokoliwe. ²²Swaafu zawaatta, sheethwani oto, ontta onkwisela vamoottho na mmaati yoori amuule. Ila nkhama onwahi oretta etthu, noonele huruma onaawuni.” ²³“Nkhama kinwahi?” Alupaka Yinsa. “Zooshi zinwaheya khwa otule ankhupalaaye.” ²⁴Nasaapiru paapa wa mwaana otule khunyakula araka: “Kinkhupali; okaawuni muuhikhupali mwaka!”

²⁵Wakathi Yinsa ooniyeevo yoori khuntti khuluyeene yeetta okusanyeya, khunsukisa sheethwani araka: “Sheethwani woohittakhuli na woohisiili, miiyo kinuuruma yoori onlikhe na ohinrutele theenya.” ²⁶Sheethwani khunyakula, khunsakhinya woohusutivo khusaruwa, shaapu khwiiya nkhama ntthu woofwa, khufiyelela atthu akina olupa yoori: “Afwa.” ²⁷Ila Yinsa khunkhola nkhono awe khunlansa, khweemela.

²⁸Paata ya Yinsa orutela owawe, anakhiyoni awe khumuuzela othetekele yoori: “Mwaasa aya niini nahaakhitireliyeeyo omwiikara?” ²⁹Ye khuwaajipu yoori: “Jaati yaya eto, eniikareya khwa lompa na ofuka paasi.”

Yinsa onlupa theenya ofwa wawe na osisimuwa wawe

³⁰Yo khulaawo okhule aariiwo na khulokhela Kalileya. Yinsa khaatakhiye atthu ojuwa ohali aariiwo, ³¹maana eetta owaasomisa anakhiyoni awe na awoozaka yoori: “Mwaana wa Pinaatamu onsaleela winkheleliwa mmakhono wa anaatamu. Yo anlawa amuule, ila siikhu ya ttaatthu onlawa asisimuwe.” ³²Ila yo khayaaweleyiye etthu aari otakhaaye olupa na khusala oova omuuzela.

Nwulu muufwalume wa pinkuuni paani?

³³Khufiya Kafwaranaawu. Ari owawe, ye khuwoozela anakhiyoni awe yoori: “Ntarikhi mwaari okheetisana niini?” ³⁴Ila yo khuhilupi hatha etthu, maana aari okheetisana yoori anjuwe paani eeyiyeeyo nwulweene channu vakatthi vaya. ³⁵Eekhaliyeevo, Yinsa khuwaakhuwela apale khumi na awiri khuwooza yoori: “Nkhama ntthu ontakha wiiya wa mwanzo, ona ya wiiya wawiishela na eeye karumeya wa ooshi.” ³⁶Khunthuula mwaana mmote khunttha vakatthi vaya, khunkholela nkhono awe na khuwooza yoori: ³⁷“Wakhula otule animpwekherelaaye nsimaana nkhama otu, khwa nzina laka, onikipwekherela miiyo, na otule anikipwekherelaaye khanikipwekherela miiyo, ila onimpwekherela otule akiperekhiyeeyo.”

Otule ahiniiphiriwaaye ti fweeyo ori khwa fweeyo

³⁸Yaahaya khunkhuwela Yinsa khumuuza yoori: “Mwaaliimu, namoona mwinyi mmote eekaraka masheethwani khwa nzina lawo, fweeyo khunkhattaza mwaasa woohiiyi wa khuntti yeetthu.”

³⁹Yinsa khumuuza yoori: “Mwihikhattaze, maana khina anrettaaye minjuza khwa nzina laka, elottelanaka khukittakhula wootakhalavo. ⁴⁰Maana otule ahinuumananaaye fweeyo, ori khwa fweeyo. ⁴¹Nakataalikha, kiniwuuzani khweele yoori, otule aniwinkhaanini maati oonywa, koopho moote khwa nzina laka, mwaasa wa mweeyo wiiya atthu a Al-Masiihu, weekhweele khinteela omwaashikha phakari yawe.”

Okwiselana ntwampi

⁴²“Amana ntthu ankosisa mmote wa asimaana apa akikhupaliyeeyo miiyo, afwataali ofukeleliwa liwe loovalaza mmwisiko khutupweeziwa nkhilintti ya pahari. ⁴³Na nkhono awo amana wuukosisa, oshije. Afwataali weetta muuhaayi ori woorakala, ehiiyeeni wiiyana makhono awo mawiri khweeseleliwa motthooni, ohali oriiwo moottho ohinzimaaye. ⁴⁴Ottuukho nyunku yaya ehinfwaaye wala moottho aya ohinzimaaye. ⁴⁵Na muulu awo amana wuukosisa, oshije. Afwataali weetta muuhaayi ori woorakala, ehiiyeeni wiiyana moolu mawiri khweeseleliwa motthooni, ⁴⁶ottuukho nyunku yaya ehinfwaaye na moottho aya ohinzimaaye. ⁴⁷Na liisho lawo limote amana luukosisa, olazemo. Maana afwataali weetta muufwalume wa Nluku na liisho limote paasi ehiiyeeni wiiyana maasho oomawiri ila khweeseleliwa motthooni, ⁴⁸ottuukho nyunku yaya ehinifwaaye na moottho aya ohinzimaaye.

⁴⁹“Maana wakhula mmote onlawa alukaniwe moottho. ⁵⁰Mwiinyu pi wooshapweya; ila mwiinyu aya amana olikha onyuunya, onrutiseleya toovi onyuunya waya? Mwiiye mwiinyu mweeyo ena, na mwiikhale na heeri mmote na nzeenu.”

Monkoni wa waashana

¹Aphano Yinsa khulaavo aphale vaya khusala alawa nti wa Yudeya na phantte kiina ya Yorotaani. Theenya khuntti moote khuta aphale aariivo. Nkhama etthiipo aazowereliyeezo khusala awaasomisa. ²Mafwarizeewu akina khunsusela yoori amweeze amuuzelaka yoori: “Halaali nlume omwaasha muukha awe?” ³Ye khuwaajipu yoori: “Munsa aruma niini?” ⁴Yo khulupa yoori: “Munsa aninkha ruhusa ya waatikha talakha khumwiikara.”

⁵Yinsa awaajipwaka khuri: “Mwaasa wa wuuma rooho, tiito ye oolikheliyeenini oruma opo aatikhiyeeyo. ⁶Ila Nluku omwanzo amumpa nlume na muukha. ⁷Mwaasa wa ethiito, nlume oninlikha papaawe na mamaawe khujikusanya na muukhaawe, ⁸na oowiiri anretteya wiiya mwiili mmote paasi. Toowo, yo khaniiya awiri, ila oniiya mwiili mmote. ⁹Nakataalikha, etile Nluku akusanyiyeeyo, ahiiyevo anvalulaaye.”

¹⁰Wakathi Yinsa ari owawe, anakhiyoni awe khumuuzela theenya monkoni wa mattakhuzi atthaapale. ¹¹Ye khuwaajipu yoori: “Wakhula otule animwaashaaye muukhaawe na khunrala muukha nkina, ontta oraruwa. ¹²Muukha naye amana antthira mannawe khuraliwa ti nlume nkina, ontta oraruwa.”

Yinsa na asimaana

¹³Atthu akina aari owaatana asimaana yoori asapiwe ti Yinsa, ila anakhiyoni awe eetta owaashoweraka. ¹⁴Yinsa paata ya woona vitthu epile, khuhintuveli na khuwooza yoori: “Mwiwaalikhe asimaana akiteele miiyo, wala mwihiwaakhattaze, maana ofwalume wa Nluku pu waya. ¹⁵Kiniwuuzani khweele yoori, otule ahimpwekherelaaye ofwalume wa Nluku nkhama nsimaana, khanteela weettamo.”

¹⁶Elottelanaka, khuwaathuula asimaana mmakhono, khuwaattheela makhono na khuwaaparikhiya.

Shaapu thaajiri

¹⁷Wakathi Yinsa aari weettelaaye osaruwa, mwinyi mmote khutthira amweettelaka khulawa khunkokhorela na khumuuzela yoori: “Mwaaliimu woosaana, kirette niini yoori kipatthe ohaayi wa mileele?” ¹⁸Yinsa khunjipu yoori: “Mwaasa aya niini okiitthaka woosaana? Khaavo woosaana, woohiiyi Nluku paasi. ¹⁹Weeyo onjuwa oruma onraaye: ‘Ohuule, ohiraruwe, ohiiye, ohilupe oshaahiti woovonyeya, ohinhate ntthu na onshitahi papaawo na mamaawo.’ ”

²⁰Mwinyi otule khulupa yoori: “Mwaaliimu, zooshi epo kinshututela thanku oshaapu aka.” ²¹Yinsa khumweekesa na khumpheta. Khumuuza yoori: “Enuusaleela etthu moote. Olawe woozanyise vitthu zawo zooshi, nzurukhu aya owenkhe asikhini na weeyo ontta wiiyana njuju pinkuuni; nawiisha ote okilotte.” ²²Paata ya mattakhuzi apale, shaapu otule khwiiya woottettheya khulaavo ari woohuzunikha, maana aarina maali zawaatta.

²³Yinsa khweekesa nkerekhere khuwooza anakhiyoni awe yoori: “Ti ya olipa thaajiri weetta muufwalume wa Nluku.” ²⁴Anakhiyoni awe khwiiya ooshanka khwa mattakhuzi apale. Ila Yinsa khurutela olupa theenya yoori: “Aanaaka, ti yoolipa weetta muufwalume wa Nluku! ²⁵Eniiya yookhweya Enkamiiya ovira valiphotto la sikano, zayita thaajiri weetta muufwalume wa Nluku.”

²⁶Anakhiyoni awe khwiiya ooshanka, khusala oozelana mmote na nzaawe yoori: “Nkhama pi toowo, paani anttelaaye wuusurukha?” ²⁷Yinsa khuweekesa khuwooza yoori: “Khwa pinaatamu khinwaheya, ila Nluku wala; khwa Nluku vitthu zooshi zinwaheya.”

²⁸Aphano Pheeturu khwaaza omuuza yoori: “Woone! Fweeyo nalikha zooshi yoori nuulotte.” ²⁹Yinsa khujipu araka: “Kiniwuuzani khweele yoori, khaavo anlikhaaye ojama awe, ttwiiye, nlupuwe, mamaawe, papaawe, aana awe ama mashapa awe, mwaasa wa miiyo na hapari zooshapweya, ³⁰ahinpwekheraaye venkivene ohaayi otthuupu, swaafu miiya theenya ya manyupa, attwi, alupu, maama, paapa, aana ama mashapa na olupatthiwa. Mwiisho waya ohaayi wa mileele. ³¹Awaatta eeyiye amwanzo anttela wiishela, na awiishela anttela wiiya amwanzo.”

Yinsa onrutela olupa ofwa wawe na osisimuwa wawe

³²Yo eetta owelela Yeruzaleemu, Yinsa khuwaalokoza. Anakhiyoni khwiiya oshanka, na apale aari onlottaaye khwiiya awoova. Theenya Yinsa khuwaakhuwela apale khumi na awiri na khuwooza vitthu zaari weettelaaye onrettikhanela araka: ³³“Moone, fweeyo ninwelela Yeruzaleemu, mwaana wa pinaatamu onlawa enkheleliwe mahaakhimu a tiini na anamanozela a kano. Yo anttela onhukhumwela ofwa na omwinkhelela mmakhono wa amalapo, ³⁴anttela onveyisa, ontthemela, onjapha na amuule. Paata ya siikhu ttatthu asisimuwe.”

Oveka wa Tiyaaku na Yaahaya

³⁵Aphano Tiyaaku na Yaahaya, aana a Zepeteewu, khumwaattama Yinsa khumuuza yoori: “Mwaaliimu, nintakha yoori oninkhe etthu ninttelaaye wuuvekela.” ³⁶Yinsa khuwoozela yoori: “Mwintakha yoori kuuretteleni niini?” ³⁷Khujipu yoori: “Oninkhe ruhusa yoori khwa nsiifwa mwawo, fweeyo neekhale mmote nkhono nlume mmote nkhono nkha.” ³⁸Ila Yinsa khuwooza yoori: “Khamwinjuwa etthu mwinvekaaye. Mwinwahi mweeyo onywela koopho etile kinyweliyeeyo ama opwekherela woosiwa opu khoosiweeyo miiyo?” ³⁹Yo khujipu yoori: “Ninwahi.” Yinsa khuwooza yoori: “Mweeyo mwinlawa mwanywele koopho kinyweliyeeyo na mwinlawa moosiwe nkhama khoosiweeyo miiyo, ⁴⁰ila phantte eto ya wiikhala nkhono nlume aka ama nkhono nkha khahi miiyo kininkhaaye. Maana puuro yaya eto ti ya apale atthenkezeliweeyo.”

⁴¹Noosiila vitthu epile, apale khumi khwiiya ookasirikha khwa Yaahaya na Tiyaaku. ⁴²Ila Yinsa khuwaakhuwela na khuwooza yoori: “Mweeyo mwinjuwa yoori apale anooniwaaye wiiya anamalokozela a khapila anshintta na attunkhulu aya anthoonyeza ofwalume khwa yo. ⁴³Ila vakatthi venu mweeyo mwihiiye toowo. Otule antakhaaye wiiya nttunkhulu vakatthi venu mweeyo ona ya wiiya othuuto anrumeyaaye; ⁴⁴otule antakhaaye wiiya wa mwanzo vakatthi venu eeye mwiitthwaana enu mweeyo mooshi. ⁴⁵Maana Mwaana wa Pinaatamu khateleeni orumeyeliwa, ila orumeya na winkha ohaayi awe khwa owaakaphula atthu awaatta.”

Ovonisiwa wa ntthu woohooni wa Yeriko

⁴⁶Noofiya Yeriko. Yinsa na anakhiyoni awe vamote na khuntti khuluyeene yaari olankhaaye Yeriko, Baritimeewu, woohooni mwaana wa Timeewu nazimola eettiye wiikhala kharipu ya tarikhi. ⁴⁷Noosiila yoori Yinsa wa Nazareeti ontta ovira, khwaaza okhuwa araka: “Yinsa, Mwaana wa Daawuuda, okoonele huruma!” ⁴⁸Atthu awaatta khusala anshowera yoori eeye woonyamala, ila ye khusala akhanyarela araka: “Mwaana wa Daawuuda, koonele huruma!”

⁴⁹Yinsa khweemela khuri: “Mwinkhuwele.” Khukhuweliwa otule woohooni khumuuza yoori: “Ofurahi, olankhe, ye ontta wuukhuwela!” ⁵⁰Khweesela ajapi yawe toole, khwiirukha khweemela khulawa aphale aariivo Yinsa. ⁵¹Yinsa khumuuzela yoori: “Ontakha yoori miiyo kuurettele niini?” Mwinyi otule woohooni khujipu yoori: “Mwaaliimu, miiyo kintakha woona!” ⁵²Yinsa khumuuza yoori: “Olawe! Amini yawo yawuusuru.” Nasaapiru khurutela woona na khusala anlotta Yinsa ntarikhi mphule.

Yinsa onvira na oshintta Yeruzaleemu

¹Wakathi aattameliyeevo Yeruzaleemu, khufiya Betifwaaje na Betaaniya, kharipu ya mwaako wa oluveera, Yinsa khuwaaruma anakhiyoni awe awiri, ²khuwooza yoori: “Mwilawe nti opo mwinoonaaye omaasho weenu okho, mwifiyaka mwininsikana mwaana wa puuru afukeleliwe ahinaweliweke ti hatha ntthu. Mwinfukule mwintiise. ³Amana apuwa ntthu awuuzelani yoori: ‘Mwaasa niini mwirettaka vitthu epo?’ Mwinjipu yoori: ‘Mbwana ontta onhithajiya na oninrutisa nasaapi.’ ”

⁴Yo khulawa khunsikana mwaana wa puuru afukeleliwe, vanlako nwulu wa ntarikhi ya vaje, na khunfukula. ⁵Atthu aari attaaphale khuwoozela araka: “Eto mwinrettaaye niini ya onfukula mwaana wa puuru oto?” ⁶Anakhiyoni apale khujipu etthiipile Yinsa awooziyeeyo, na ye khuwaalikha onlawana.

⁷Khuntiisela mwaana wa puuru otule Yinsa, yo khutthaavo kuwo zawe na ye khuwela. ⁸Atthu awaatta khusala attattikha kuwo zaya ntarikhi na akina khusala atthaamo virapi aashijiyeeyo ntthuttu. ⁹Apale aalokoziyeeyo na apale aari onlottaaye khusala anyakula araka:

“Hosaana!

Wooparikhiyiwa ti otule antaaye khwa nzina la Mbwana!

¹⁰Wooparikhiyiwa saana ofwalume ontaaye wa papeetthu Daawuuda!

Hosaana pinkuuni!”

¹¹Yinsa khufiya Yeruzaleemu na khulawa mpakha nnyupa woosifwiwamo. Khoona zooshi na wiiya waaripiye, khulawa Betaaniya na anakhiyoni awe apale khumi na awiri.

Yinsa ontwaharesha nyuupa yoosifwiwamo

¹²Mmeesho mwaya, wakathi aari olankhaaye Betaaniya, Yinsa khunkhola jala. ¹³Ari peetiwene, khoona muutthi wa mfikeera wooripelela mathapa, khulawa woona nkhama aari osikanamo nshumo. Wakathi aattameliyeeyo, khuhisikanimo hatha etthu, woohiiyi mathapa, maana khawaari wakathi wa wiima fiiku. ¹⁴Aphano khuuza mfikeera opule yoori: “Khina anttelaaye oja theenya mishumo khwa weeyo.” Anakhiyoni awe khusiila alupaka mattakhuzi apale.

¹⁵Yinsa khufiya Yeruzaleemu, khuvira nnyupa woosifwiwamo na khwaaza oweekara apale aari wuuzanyisaaye na apale aari wuuzanyaaye. Khupwalula khukulu za anamapatilisa nzurukhu na za apale aari wuuzanyisaaye jiwa. ¹⁶Khaari ontakhela ntthu oviranamo etthu yawuuzanyisa nnyupa woosifwiwamo. ¹⁷Khusala asomisa araka: “Khayaatikhiweeni yoori: ‘Nyuupa yaka enttela wiiya nyuupa yoolompiwamo khwa atthu ooshi ila mweeyo mwarettisa wiiya likurakuza la manantarawu.’ ”

¹⁸Mahaakhimu a tiini na anamanozela a kano khusiila mattakhuzi apale na khwaaza weekesa nanna ya omuula, maana eetta omoova, mwaasa wa khuntti khuluyeene yaari yooshankisiwa pi masomi awe. ¹⁹Weettelaka oripa, yo khulaamo nsitati mphule.

Mfikeera wa wuuma

²⁰Mmeesho mwaya supuyeene, khoona mfikeera opule ori wawuuma mpakha na mitathaari zaya. ²¹Pheeturu khuupuwela na khumuuza Yinsa yoori: “Mwaaliimu! Woone mfikeera opu waalaaniyeeyo wooma.” ²²Yinsa khujipu yoori: “Wiiyane amini khwa Nluku. ²³Miiyo kiniwuuzani khweele yoori, wakhula otule anttelaaye wuuza mwaako opu yoori okhuleye ojeeselele mpahari, na khuhiina hatha nshikili nroho mwawo, ila khukhupalela yoori enrettikhana etile olupiyeeyo, entta oretteya. ²⁴Apho, miiyo kiniwuuza yoori, zooshi weeyo onvekaazo khwa lompa, khukhupalela yoori wapwekherela, onteela opattha. ²⁵Na amana olompaka, khwiiyana nzaawo okosiyeeyo, onswaamihi, yoori naye Paapa wa pinkuuni oswaamihi twampi zawo. ²⁶Ila mweeyo amana mwihiswaamihi, na mweeyo Paapa wa pinkuuni kanswamihi twampi zenu.”

Ofwalume wa Yinsa na woosa wa Yaahaya

²⁷Khufiya theenya Yeruzaleemu, wakathi Yinsa aari oviraaye nnyupa woosifwiwamo, khususeliwa ti mahaakhimu a tiini, anamanozela a kano na attunkhulu a tiini, ²⁸khusala amuuzela yoori: “Vitthu epi, onrettana ofwalume waani? Paani awinkhiyeeyo ofwalume wa orettana?” ²⁹Yinsa khujipu yoori: “Miiyo kintakha kiwuuzele, amana okijipu, kintta owuuza ofwalume kinrettanaaye vitthu epi. ³⁰Nkakuuzeni, woosa wa Yaahaya waari wa pinkuuni ama waari wa anaatamu?”

³¹Yo khusala anyakulisana araka: “Amana niri ‘pi wa pinkuuni,’ ontta onuuzela yoori: ‘Aphano mwaasa aya niini mwihinkhupalelaka?’ ³²Ila amana nilupa yoori waari wa anaatamu! Otakhaliwa, pu weetthu!” Maana yo aari owoova atthu, weekhweele atthu aari ookhupali yoori Yaahaya aari napiyu. ³³Yo khunjipu Yinsa araka: “Khanijuweeni.” Yinsa zwaamu yawe khujipu yoori: “Hatha vattitthiiru, miiyo akiniwuuzani owahi kinrettanaaye vitthu epi.”

Nlikaniso wa anamalima

¹Aphano Yinsa khwaaza owooza na milikaniso yoori: “Mwinyi mmote khuzala miitthi za wuuva, khujekelela khwiiya nkatthi, khuthipa kulaathayini yoori asala atthaamo wuuva na khujeka korofwa. Paata ya toole khuwarentterisa anamalima ye khusaafiri.

²“Wakathi wa wuurula, khunruma karumeya awe khwa anamalima yoori enkhiwe phantte ya mishumo za wuuva. ³Ila yo khunkhola khumpiya na khumwiikara woohimwinkhi hatha etthu. ⁴Aphano khumperekha karumeya awe nkina yo khunvonya khunwozola veeshwa, na khumpatthisisa haaya. ⁵Khumperekha theenya nkina khumuula. Khuwaaperekha theenya awaatta: akina khupiiwa na akina khuuliiwa. ⁶Aari osala mmote paasi yoori amperekhe, mwanawe wompheta wawe. Mwiisho waya khumperekha na khuri: ‘Otu mwanaka antta onshitahi.’ ⁷Ila anamalima apale khuuzana yoori: ‘Otu ti namarithi. Nlaweni nimuule, nirithi fweeyo.’ ⁸Aphano khunkhola mwaana otule, khumuula khumweeselela oje wa nshapa.

⁹“Mweenyewe nshapa onttela owaarettela niini? Ye ontta ota awoole anamalima apale, nshapa ntthile awenkhe anamalima akina. ¹⁰Khamwinasome etthu enlupaaye Zawaatikhiwa Ttakatthiifu?

“ ‘Liwe anamajeka akatthaliyeeyo,

nttho laya laretteya wiiya liwe linkhomaazaaye!

¹¹Eto enlankha wa Mbwana

na ti yootikinisa khwa fweeyo.’ ”

¹²Aphano khwaaza weekesa nanna ya onkhola, maana eettiye ojuwa yoori nlikaniso opule aalupiyeeyo waari owaalupa yo. Ila eetta owoova atthu, attaaphale khunlikha khusala alawa safwari yaya.

Oriphiwa lumpuru

¹³Paata ya toole, khurumiwa mafwarizeewu akina na attunkhulu akina a khuntti ya Herooti olawa ottakhulana Yinsa eekesaka yoori ansikanane nttakhuzi loovonyeya. ¹⁴Wakathi afiyeevo aphale aariivo Yinsa khulupa yoori: “Mwaaliimu, ninjuwa yoori o weekhweele na khunjilikha oshawurisiwa ti ntthu. Maana khuniwaaphuka atthu khwa nanna ariizo, ila onsomisa wa waamineyavo tarikhi ya Nluku. Nkanuuze, halaali onripha lumpuru Seezari ama wala?” ¹⁵Ila Yinsa khumweeleya onaafikhi aya khuwoozela yoori: “Mwaasa aya niini mweeyo mwikootootaka? Mwikitiisele nzurukhu koone.” ¹⁶Yo khutana nzurukhu opule, ye khuwoozela yoori: “Ratarato eti na waatikha opu pu waani?” Yo khujipu yoori: “Seezari.” ¹⁷Aphano Yinsa khuri: “Mwimwinkhe Seezari etile yiiyiye ya Seezari, na ya Nluku etile yiiyiye ya Nluku.” Khwiiya onshankela.

Osisimuwa khweele

¹⁸Masatukhi akina, apale anlupaaye yoori khawiivo osisimuwa, khuta aphale aariivo Yinsa khulupa yoori: ¹⁹“Mwaaliimu, Munsa anilikhela zawaatikhiwa yoori, amana afwa ttwi na khunlikha muukhaawe ahinvokoleleeni mwaana, alooziwe ttwiiye yoori awaapatthe aana khwa zwaamu ya ttwiiye. ²⁰Moone, aarivo attwi sapa, otu wa mwanzo khuloola na khufwa ahiwaalikheeni hatha aana. ²¹Wa phiiri khulooziwa muukha otule aafweliweeyo ti mannawe na ye khufwa, woohinlikhi mwaana; na wattaatthu khwiiya etthiipo. ²²Etthiipile oosaapa khuhiwaalikhi hatha aana. Mwiisho waya muukha otule na ye khufwa. ²³Aphano wakathi woosisimuwa, khwa ooshi apa sapa anttelaaye wiiya muukhaawe tutuuvi? Maana ooshi anraliye!”

²⁴Yinsa khuwaajipu yoori: “Mweeyo mwattettekhiwa, maana khamwinjuwa Zawaatikhiwa Ttakatthiifu wala owahi wa Nluku! ²⁵Pi toono, amana ananfwa asisimuwa, khanlawa aloola, wala olooziwa, ila anttela wiiya nkhama malayikha a pinkuuni. ²⁶Mweeyo khamwinasome nkithaapu ya Munsa etthu yaatikhiweeyo monkoni wa osisimuwa? Wakathi aari ottakhulaaye va muutthi opule waari okholelaaye, yaatikhiwa yoori Nluku aamuuziye Munsa yoori: ‘Miiyo ki Nluku wa Eburahiima, wa Esiyaakha na wa Yaakhumpa.’ ²⁷Moone, Nluku khahiyo wa ananfwa, ila Nluku wa atthu haayi. Mwattettekheya venkivene.”

Oruma nwulu

²⁸Namanozela wa kano mmote noowasiila akheetisanaka khunsusela, ajuwiyeevo yoori ajipu saana, khumuuzela yoori: “Khi oruma wamwanzo khwa zooshi pu puuvi?” ²⁹Yinsa khujipu yoori: “Oruma wamwanzo khwa zooshi pi opu: ‘Osiileze, Ezirayiilu, Mbwana Nluku eetthu ti eeyiye Mbwana otthwe paasi. ³⁰Omphete paasi Mbwana Nluku awo khwa rooho yawo yooshi na nafusi yawo yooshi na akhili zawo zooshi na kuvu zawo zooshi.’ ³¹Wa phiiri pi opu: ‘Omphete nzaawo nkhama etthiipo onjiphetaazo omweenyewe.’ Khawiivo oruma nkina nwulu nkhama opu.” ³²Namanozela wa kano otule khuri: “Kemaani, Mwaaliimu, walupa na haakhi yoori ye mmote paasi, na khaavo nkina woohiiyi ye, ³³na omphete na rooho yawo yooshi na akhili zawo na kuvu zawo zooshi na omphete nzaawo nkhama etthiipo onjiphetaazo ti yooziti zaakha yoolukuziwa na twaha.”

³⁴Yinsa ansiliyeevo yoori ajipu waakhilivo, khumuuza yoori: “Weeyo khuri peetiwene na ofwalume wa Nluku.”

Elottelanaka, khuhiivo hatha mmote aari omuuzelaaye.

Al-Masiihu Mbwana wa Daawuuda

³⁵Yinsa eettaka osomisa nnyupa ya Nluku, khuwoozela yoori: “Anlupa toovi anamanozela a kano yoori Al-Masiihu mwaana wa Daawuuda? ³⁶Daawuuda aya alupa khwa Rooho Ttakatthiifu yoori:

“ ‘Nnyizinku amuuza Mbwanaaka

yoori wiikhale nkhono nlume aka,

mpakha miiyo kiwaatthe maatuwi awo vathi wa moolu awo.’

³⁷Daawuuda aya onimwiittha yoori ‘Mbwana’. Toovi anttelaaye wiiya mwanawe?” Khuntti khuluyeene yaari osiileza wootuveliwavo.

³⁸Yinsa eettaka owaasomisa, aari owooza yoori: “Phoole na anamanozela a kano, apale woowaatuvela owala ajapi zoolepisana, na ochelisiwa va parasa, ³⁹owaatuvela wiikhala wiilokozi nsinakooka na puuro za wiilokozi va njampo, ⁴⁰atthaapo antapanya vitthu za ananfweliwa pi amannazaya na ojihakikhi khwa oretta lompa zoolepa; apa aya anttela ohoowa khwa ophukiwa woolwaazavo!”

Zaakha ya muukha wa ofweliwa ti mannawe

⁴¹Yinsa eekhaliye waattamela puuro etile eninkhiwaavo zaakha, aari woona nanna khuntti etile yaari otthaamo nzurukhu n’yoopo ya zaakha. Mathaajiri awaatta aari otthaamo wa waatta. ⁴²Khumoona muukha woofweliwa ti mannawe wa masikhini, atthaakamo ttoosu piiri. ⁴³Yinsa khuwaakhuwela anakhiyoni awe khusala awooza yoori: “Kiniwuuzani khweele yoori, muukha otu wa masikhini woofweliwa ti mannawe atthaamo n’yoopo wa zaakha zayita akina aya. ⁴⁴Maana apale ooshi enkha epile zasaliyeeyo, ila muukha otu na osikhini awe enkha wooshi aari ororomelaaye.”

Yinsa onlupa opwechiwa wa Nyuupa Yoosifwiwamo

¹Wakathi Yinsa aari osaruwaamo Nnyupa Woosifwiwamo, nakhiyoni awe mmote khumuuza yoori: “Mwaaliimu nkoona! Maweni mawulu mawulu toono na manyupa ooshapweyisana toono!” ²Yinsa khunjipu yoori: “Woona manyupa mawulumawulu apa? Khalinlawa osala liwe vatulu wa liwe nzaaya lihinttelaaye opwechiwa.”

Alama ya mwiisho wa wakathi

³Yinsa aarettiye eekhaliye vamwaako Oluveera omaasho wa nyuupa yoosifwiwamo, Pheeturu, Tiyaaku, Yaahaya na Antere khumuuzela othetekele yoori: ⁴“Onuuze, wakathi ni enttelaaye orettikhana vitthu zaya epo, na enttela wiiyavo alama ni yoothoonyeza yoori zooshi zasaleela orettikhana?”

⁵Yinsa khuwooza yoori: “Phoole mwihihatiwe ti hatha ntthu. ⁶Maana atthu awaatta anlawa ate khwa nzina laka alupaka yoori: ‘Miiyo ki Al-Masiihu’! Na awaahate atthu awaatta. ⁷Amana mwisiila viittha ama hapari za viittha, mwihoove maana epo, ena zoorettikhana, khahiyo wiisha woolumwenku. ⁸Khapila moote enttela wuumanana khapila kiina, na ofwalume onlawa woomanane ofwalume nkina. Zinlawa zeeyevo visikinyaatthi khwa phantte zoofwarikhana na jala. Epo zaya yaazo ya vitthu za olwaaza.

⁹“Mweeyo mwiiyane phoole, maana mwinlawa mwenkheleliwe wa anamaphuka na mwinlawa mwajaphiwe mmasinakooka, na mwilawaniwe wa misatoro na wa afwalume, mwaasa wa miiyo, yoori mwiiye mashaahiti. ¹⁰Ila enihithajiya olaleyiwa hapari zooshapweya khapula khwa khapila zooshi. ¹¹Amana mwithuuliwa olawa ofukiwa na ophukiwa, mwihishukulikhele etthu yoolupa, ila ethiito mwinttelaaye winkhiwa wakathi aya otthuupo mwilupe ethiito, maana khahiyo mweeyo mwinttelaaye ottakhulaaye, ila Rooho Ttakatthiifu. ¹²Ttwi mmote onlawa anleve ttwiiye yoori ooliiwe, na paapa onleva mwanawe. Aana anlawa awaazukuluwele apaapa zaya na awoole. ¹³Atthu ooshi anttela owiinani mwaasa wa miiyo. Ila otule anttelaaye ovilela mpakha mwiisho, ontta wuusurukha.

Ohoowa nwulweene

¹⁴“Mwinteela woona okufuru wa woopisa wa pala nhali woohifwayi wiiyamo, otule ansomaaye ti emweeleye, aphano apale anttelaaye wiiya Yudeya atthirele omwaako. ¹⁵Otule anttelaaye wiiya vatulu wa nyuupa ahiishukhe wala ahivire nnyupa mwawe, yoori alazemo etthu. ¹⁶Otule aniiyaaye omashapa ahirutele onti yoori athuule juupa yawe. ¹⁷Ootakhaliwa aakha apale anttelaaye osikaniwa ari awiimittha ama eettaka waamwisa! ¹⁸Mwilompe yoori vitthu zaya epo ehirettikhane mwiita. ¹⁹Maana, siikhu zaya epo enttela wiiyavo miswipa zihineeyekevo thanku Nluku ompe olumwenku, na khinteela opuwa mikina nkhama opo. ²⁰Eriwaka Mbwana khaavukuliye siikhu zaya epo, khaavo aari weettelaaye wiiya haayi, ila mwaasa wa apale oothawuliwa, avukula siikhu zaya epo. ²¹Aphano, amana ntthu awuuzani yoori: ‘Mmoone, Al-Masiihu otu ariiye apha!’ Ama ‘mmoone, otule ari okhule!’ mwihikhupali. ²²Maana anlawa apuwe Al-Masiihu oojipanka na manapiyu oojipanka anttelaaye oretta alama na vitthu zootikinisa yoori awaahate apale oothawuliwa. ²³Mweeyo mwiiyane phoole! Miiyo kiniwuuzani zooshi epo khapulathi zihinarettikhane.

Ota wa mwaana wa pinaatamu

²⁴“Ila siikhu zaya epo, paata ya pala ya miswipa zaya epo, njuwa linttela oripa na mweezi onttela olikha waara. ²⁵Matthottowa akwe pinkuuni na owahi wa pinkuuni onttela osakhinyeya.

²⁶“Aphano, mwinttela omoona Mwaana wa Pinaatamu ataaka mmawiku na owahi nwulweene na siifwa. ²⁷Ye onttela operekha malayikha awe khwa phantte nne zooshi za nkerekhere za olumwenku mpakha nkerekhere ya pinkuuni yoori awaakusanye ananthawuliwa awe.

Nsomo wa mfikeera

²⁸“Mwijinozele osomisa wa mfikeera: amana virapi zaya zootthelaka mathapa mwinjuwa yoori onsaleela ofiya mwiita. ²⁹Etthiipo theenya mweeyo, amana moona vitthu epo zeettaka orettikhana, mwijuwe yoori ye ori kharipu ya va milako. ³⁰Miiyo kiniwuuzani khweele yoori, khapila eti kinvira vitthu epi zihirettikhaneeni. ³¹Pinku na vathi zooshi zinteela ovira, ila mattakhuzi aka khanviraru.

³²“Ila monkoni wa siikhu ama wakathi khina anjuwaaye, wala malayikha pinkuuni wala Mwaana, woohiiyi Paapa. ³³Phoole, mwiiye woojeekesela, maana khamwijuweeni ofiya wa wakathi aya opo. ³⁴Eri nkhama ntthu anlikhaaye nyuupa yawe khuretta safwari ya peetiwene, ila ahinalawe, khuwaalikhela ofwalume, a karumeya awe wakhula mmote shuruthi yawe, khunruma namweekesela yoori asale aweekeselaka. ³⁵Tiito, mwijeekesele, maana mweeyo khamwinjuwa wakathi mweenyewe nyuupa anttelaaye oruti; enttela wiiya njuwa looveva, osikhu layili, lifwajiri ama supu. ³⁶Amana ye ata woohileezi, ti ahuusikaneni mweettaka olala. ³⁷Epile kiniwuuzaanini, kiniwuuzani mooshi: Mwijeekesele!”

Shawuri za omuula Yinsa

¹Zaari osaleela siikhu piiri paasi yoori efiye siikhu ya Paashikowa na siikhu ya Njampo la Phaawu Zoohiina Fwaramento. Mahaakhimu a tiini na anamanozela a kano aari weekesa nanna ya onkhola Yinsa sirini yoori amuule. ²Yo aari olupa yoori: “Khanininkhola va njampo yoori nihipuwise nzuuzu vakatthi wa atthu.”

Yinsa onvaaziwa mafuttha Betaaniya

³Yinsa ari Betaaniya, eekhaliye vameeza owawe mwinyi mmote aniitthiwaaye Simawu, otule raku aariinaaye makuttula, khutawo muukha aataniyeeyo suupha ya mafuttha oonukhela awaatta nzurukhu. Khupwecha suupha etile khwiitthela mmwishwa wa Yinsa. ⁴Apale aari attaaphale khwiiya ookatipukha khusala oozana atthaaporu yoori: “Aharipwela ni mafuttha apale. ⁵Maana aari owahi wuuzanyisa miiya ttatthu za nzurukhu wa paratha, aari weettelaaye winkhiwa asikhini.” Yo khunshowera muukha otule. ⁶Ila Yinsa khuwaalikhisa araka: “Mwinlikhe muukha otu khwa heeri. Mwanvelaveliselani? Ye akirettela miiyo etthu yooshapweya. ⁷Maana asikhini aniiya vamote na mweeyo wakhula siikhu, na mwinwahi owaawuni mwitakharu. Ila miiyo akinteela wiiya vamote na mweeyo mileele. ⁸Ye aretta etile aawahiyeeyo. Avaaza mafuttha oonukhela mwiili aka raku zeene, atthenkezaka ozikhiwa waka. ⁹Kiniwuuzani khweele yoori, wakhula vahali zintafusiriwaavo hapari zooshapweya khwa olumwenku wooshi, epi arettiyeeyo muukha otu, zeettaka olupiwa noofikhiriwa ye.”

Yuuda oninzinkula Yinsa

¹⁰Aphano Yuuda Eshikariyoote, mmote wa apale khumi na awiri, khulawa wa mahaakhimu a tiini khwa shawuri za onzinkula Yinsa. ¹¹Khwa mattakhuzi apale, yo wakathi ansiliyeevo khwiiya ofurahi na khumwaahiti Yuuda omwinkha nzurukhu. Khwa wakathi aya opo Yuuda aari weekesa kiphenyo saana yoori anzinkule.

Yinsa onja njampo la paashikowa

¹²Siikhu ya mwanzo ya Njampo la Phaawu Yoohiina Fwaramento, wakathi waazoweriweeyo orettiwa twaha pwittipwitthi yoojeliwa paashikowa, anakhiyoni a Yinsa khumuuzela yoori: “Ontakha yoori neette vayi nootthenkesele etthu yoojiwa ya paashikowa?” ¹³Yinsa khuwaaruma anakhiyoni awe awiri khuwooza yoori: “Mwilawe mpakha ositati, ottuukho mwinlawa mwansikane mwinyi athuuliye yuuku ya maati. Mwinlotte othuuto, ¹⁴mwimuuze mweenyewe nyuupa ethiito anttelaaye oviramo yoori, ‘Mwaaliimu ontta wuuzela: Ori vayi nsana aka wa omakavo, kinttelaaye onja paashikowa na anakhiyoni aka?’ ¹⁵Aphano ye ontta wuuthoonyezani mweeyo khwa nyuupa ya vatulu nsana nwulweene na zooshi mwinihithajiyaaye. Mwitthenkeze attaapho njampo letthu.”

¹⁶Anakhiyoni apale khulawa mpakha ositati, khusikana zooshi nkhama etthiipile Yinsa aalupiyeezo na khuntthekeza paashikowa. ¹⁷Weettelaka oripa, Yinsa khuta na anakhiyoni awe apale khumi na awiri. ¹⁸Ari va meeza eettaka oja Yinsa khuri: “Weekhweele kiniwuuzani yoori mmote wa mweeyo anjaaye na miiyo onteela okizinkula.” ¹⁹Ooshi khwiiya oohuzunikha na khwaaza wuuzela wakhula mmote khwa zwaamu yawe yoori: “Talili khahiyo miiyo?” ²⁰Yinsa khujipu yoori: “Mmote wa khumi na awiri anjanaaye miiyo parathu moote. ²¹Mwaana wa Pinaatamu onlawa afwe, nkhama etthiipo yaatikhiweeyo monkoni wa ye. Ila wootakhaliwa ti otule anttelaaye onzinkula Mwaana wa Pinaatamu! Afwataali ahivokoliweeni!”

Njampo la mwiili na taamu ya Mbwana

²²Eettaka oja, Yinsa khuthuula phaawu, khuparikhiya, khumeya, khuwenkha anakhiyoni awe na khuwooza yoori: “Mwithuule; opu mwiili aka.” ²³Elottelanaka, khuthuula jiikira, khushukhurwela, khuwenkha anakhiyoni awe na ooshi khunywa. ²⁴Khuwooza yoori: “Eti ti taamu yaka ya wahati yiitthiweeyo khwa zwaamu ya atthu ooshi. ²⁵Miiyo kiniwuuzani khweele yoori, akinteela onywa theenya nshumo wa nrayi wa wuuva, mpakha siikhu kinttelaaye onywa theenya na mweeyo muufwalume wa Nluku.” ²⁶Paata ya yo wiipa liipo limote, khusala alawa omwaako Oluveera.

Yinsa oninchimulela Pheeturu

²⁷Aphano Yinsa khuwooza yoori: “Mooshi mweeyo mwinlawa mwakanswi. Maana yaatikhiwa yoori:

“ ‘Kininvulalisa nshuki aya,

pwittipwitthi zimwazeye.’

²⁸Ila paata ya osisimuwa waka, kinttela olokoza Kalileya.” ²⁹Aphano Pheeturu khutukhuru araka: “Hatha nkhama ooshi eetta wuutthira, miiyo akinuutthira.” ³⁰Yinsa khunjipu yoori: “Weekhweele kiniwuuza yoori leelo osikhu otthuupu, likukhuwi lihineekhe swaafu piiri, onteela okikhana swaafu ttatthu.” ³¹Ila Pheeturu khusala akhanyarela channu araka: “Hatha nkhama ofwa vamote na weeyo, akinteela wuukhana.” Ooshi khulupa etthiipo.

Yinsa nwoorotha wa Yetemaani

³²Aphano khulankha khulawa puuro eniitthiwaaye Yetemaani, khuwooza anakhiyoni awe yoori: “Mwiikhale apha, miiyo kinttela olompa.” ³³Khunthuula Pheeturu, Tiyaaku na Yaahaya khwaaza oshukulikha, othunkuwikha na ohuzunikha. ³⁴Yinsa khuwooza yoori: “Nafusi yaka ti ya ohuzunikha venkivene wa osaleela ofwa. Mwisale apha na mwijeekesele.” ³⁵Yinsa khuwaasusa vattitthiiru khukokhora na khusala alompa yoori nkhama enwaheya aattuwananisiwe wakathi opu wa ohoowa. ³⁶Aari olupa toono: “Oo Paapa zooshi khwa weeyo zinwaheya. Okaattuwananise miiyo jiikira eti ya ohoowa. Ila ehirettikhane khwa matakhelo aka, ila khwa matakhelo awo.”

³⁷Apho khurutela aphale aariivo anakhiyoni awe, khuwaasikana eettaka olala. Khumuuza Pheeturu yoori: “Simawu, ontta olala? Khuwaheeni ojeekesela nenkawu wakathi mmote? ³⁸Mwijeekesele na mwilompe, yoori mwihikwele muuzayiniwa. Rooho ti yookhomaala, ila mwiili pi woottettheya.”

³⁹Yinsa khuwaasusa opheya khusala alompa, arutelaka mattakhuzi mamoteru. ⁴⁰Wakathi arutiyeevo khuwaasikana eettaka olala theenya, mwaasa maasho aya eetta owaalemela; khaari ojuwa etthu yoojipu. ⁴¹Khuta swaafu ya ttaatthu khuwooza yoori: “Nalelo mwintta olala na ovumula? Zafiyela! Wafiya wakathi wa Mwaana wa Pinaatamu winkheleliwa mmakhono wa anatwampi. ⁴²Mwilankhe, nilawe! Mwimoone namazinkula ori kharipu.”

Ofukeliwa wa Yinsa

⁴³Yinsa nalelo eettaka ottakhula, khuta Yuuda, mmote wa apale khumi na awiri, vamote na khuntti khuluyeene athuuliye phanka na puutta, zaaperekhiweeyo ti mahaakhimu a tiini, anamalokozela a kano, na attunkhulu a tiini. ⁴⁴Namazinkula aawenkhiye alama, araka: “Otule kinttelaaye ompatikha, ti othuuto. Mwinkhole mwinthuule saana.”

⁴⁵Wakathi afiyeevo, ye khumwaattama khumuuza yoori: “Mwaaliimu!” Na khumpatikha. ⁴⁶Atthu apale khunkhola Yinsa khunfuka. ⁴⁷Aphano mmote wa anakhiyoni awe aariina kharipu, khufuttha phanka khunvavela khushija nshiilo la karumeya wa haakhimu nwulu wa tiini. ⁴⁸Yinsa khuwooza yoori: “Mwakiteela na phanka na puutta yoori mwikikhole nkhama namalokozela wa anazompere? ⁴⁹Siikhu zooshi kaari vamote na mweeyo kisomisaka Nnyupa Woosifwiwamo, khuhikikholi; ila zooshi epi zarettikhana yoori emarisele zawaatikhiwa ti manapiyu.”

⁵⁰Anakhiyoni awe ooshi khumwanswi na khuntthira. ⁵¹Ila shaapu mmote, aajifinikhiyeeyo nkhumi woolakala aari onlottaaye Yinsa. Yo khusala atakha onkhola, ⁵²ila khuvula nkhumi opule, khutthira waazu.

Yinsa vakatthi wa Mashawuriiya

⁵³Khunthuula Yinsa khunlawana wa haakhimu nwulu wa tiini na khuthukumana mahaakhimu a tiini ooshi, attunkhulu a tiini na anamanozela a kano.

⁵⁴Pheeturu khusala awaalotta ari peetiwene mpakha nlikokoro wa haakhimu nwulu wa tiini, na khulawa khwiikhala na anamarumeyela, ootthaka moottho.

⁵⁵Mahaakhimu a tiini na Mashawuriiya ooshi aari weekesa onsikanana paathuli moote Yinsa yoori anhukhumwele ofwa, ila khuhinsikanani hatha moote. ⁵⁶Maana awaatta aari olawela oshaahiti woovonyeya khwa Yinsa, ila tukhuru zaya khazaari sawasawa. ⁵⁷Aphano khulankha atthu akina na onlupeza vitthu zoovonyeya. ⁵⁸“Fweeyo nansiila alupaka yoori: ‘Kimpwecha Nyuupa eti Yoosifwiwamo yoojekiwa pi makhono a anaatamu, na siikhu ttatthu kijeke kiina, yoohijekiwi pi makhono eenaatamu.’ ” ⁵⁹Ila hatha nkhama piitthiipo, mattakhuzi aya khaari wiiya sawasawa. ⁶⁰Haakhimu nwulu wa tiini khulankha khumuuzela Yinsa yoori: “Weeyo khunjipu mattakhuzi apa onlokoveziwaaye?” ⁶¹Ila Yinsa nalelo khwiiya woonyamala, khuhijipu hatha etthu. Haakhimu nwulu wa tiini khurutela omuuzela theenya yoori: “Weeyo o Al-Masiihu, mwaana wa Nluku Wooparikhiyiwa?” ⁶²Yinsa khujipu yoori: “Miiyo ki othuuto, na mwinlawa mwamoone Mwaana wa Pinaatamu eekhaliye nkhono nlume wa Nluku wa Owahi Zooshi, na ataaka mmawiku a pinkuuni.”

⁶³Aphano haakhimu nwulu wa tiini khuvarula kuwo zawe na khuri: “Khaninhithajiya oshaahiti nkina theenya! ⁶⁴Mweeyo mwasiila okufuru wawe. Mwinuupuwela niini?” Atthu ooshi anri onsuhi wuuliiwa.

⁶⁵Aphano akina khwaaza ontthemela khunfinikha omaasho wawe khusala ampwakula na amuuzela yoori: “Ti paani oopiyeeyo? Ohupiri!” Anamweekesela khunkhola na khumpwakula.

Pheeturu oninkhana Yinsa

⁶⁶Pheeturu aarettiye ari vathi nlikokoro wa nyuupa etile wakathi atiiyeeyo njaazi wa haakhimu nwulu wa tiini. ⁶⁷Amooniyeevo Pheeturu eettaka woottha moottho khuri: “Weeyo waari na Yinsa wa Nazareeti.” ⁶⁸Ila Pheeturu khukhana araka: “Akininjuwa, na wala akinjuwa etthu onlupaaye.” Khusaruwela nlako wa nlikokoro. ⁶⁹Wakathi njaazi otule amooniyeevo theenya, khuwooza apale aariina attaaphale yoori: “Otu mmote wa atthaapo.” ⁷⁰Ila khukhana theenya. Oviriyeevo wakathi vattitthiiru, apale aariina atthaapale theenya khumuuza Pheeturu yoori: “Weekhweele, weeyo o mmoteru na atthaapo, maana onkalileya.” ⁷¹Ye khwaaza onlaani na olapha yoori: “Akininjuwa pinaatamu aya oto oninlupaaye.” ⁷²Nasaapiru likukhuwi khwiikha swaafu ya phiiri. Pheeturu khuupuwela mattakhuzi Yinsa amuuziyeeyo yoori: “Likukhuwi lihineekhe swaafu piiri, onikikhana swaafu ttatthu.” Khulaavo aphale vaya khusala alila.

Yinsa ari wa Pilaatu

¹Supuyeene, khukusanyeya mahaakhimu a tiini, attunkhulu a tiini, anamanozela a kano na mashawuriiya ooshi, khunfuka Yinsa khunthuula khumwinkha Pilaatu. ²Pilaatu khumuuzela yoori: “Weeyo o mfwalume wa mayaahuuti?” Ye khujipu yoori: “Weeyo ti onlupaaye.” ³Mahaakhimu a tiini aari onlokoveza vitthu zawaatta Yinsa. ⁴Pilaatu khurutela omuuzela theenya yoori: “Weeyo khunjipu? Nkoona vitthu kavi anuulokovezaaye.” ⁵Ila Yinsa khuhijipu hatha etthu, Pilaatu khwiiya wooshanka.

Yinsa ahukhumweliwa ofwa

⁶Yaari zowera yaya, wakathi wa Njampo la Paashikowa, Pilaatu onfukulela napherezu mmote, otule aari ovekiwaaye ti atthu. ⁷Mwinyi mmote aniitthiwaaye Barapa aafukeliwe vamote na anamakhijili mwaasa wa omuula ntthu wakathi wa nzuuzu. ⁸Khuntti ya atthu etile khuta na khunvekela Pilaatu yoori arette etile awaazoweziyeeyo owaarettela. ⁹Aphano Pilaatu khuwoozela yoori “Mweeyo mwintakha yoori kinfukulele mfwalume wa mayaahuuti?” ¹⁰Maana ye aari ojuwa saaneene yoori mahaakhimu a tiini anleviye Yinsa mwaasa wa nrima. ¹¹Ila mahaakhimu a tiini awaakhanyareliye atthu apale yoori anvekele Pilaatu onfukulela Barapa khwa otakha waya. ¹²Pilaatu khuwoozela theenya yoori: “Kinrettele niini mwinyi otu mweeyo mwinimwiitthaaye mfwalume wa mayaahuuti?” ¹³Yo khunyakula araka: “Akhomeliwe!” ¹⁴Ila Pilaatu khuuzela yoori: “Niini arettiyeeyo yootakhala?” Ila yo khusala atepa onyakula araka: “Akhomeliwe!” ¹⁵Pilaatu eekesaka otuvelisa khuntti etile ya atthu, khunfukulela Barapa na khuruma ojaphiwa Yinsa na khumwinkhelela olawa okhomeliwa.

Anajanka aninveyisa Yinsa

¹⁶Anajanka khunthuula Yinsa, khunlawana nlikokoro wa nyuupa khuulu ya nsatoro khukusanya khuntti khuluyeene ya anajanka. ¹⁷Khunwalisa juupa yookhuttuwa, khuvaasha khaara ya miiwa khunwalisa mmwishwa. ¹⁸Khusala anchelisa araka: “Wiiye haayi, mfwalume wa mayaahuuti!” ¹⁹Khusala ampiya veeshwa vawe na nthala na ontthemela, akokhoraka na omwaaputu.

Okhomeliwa wa Yinsa

²⁰Paata ya onveyisa, anajanka apale khunvula ajapi yookhuttuwa khunwalisa kuwo zawe. Aphano khunsarulela vaje yoori alawe ankhomele. ²¹Khukutthanana mwinyi mmote wa Sireene aari wiitthiwaaye Simawu, papaawe Alishantere na Ruufu, aari olankhaaye omashapa. Khunkhanyarela othuula nsalapa wa Yinsa. ²²Yo khunthuula Yinsa khunlawana puuro eniitthiwaaye Kolokoota, eriina maana a puuro ya likurakuza la eeshwa. ²³Khusala atakha omwinkha viinyu yoophakanyaniwa mafuttha oonukhela, ila ye khuhinywi. ²⁴Aphano khunkhomela na khwaawanyana kuwo zawe khwa weekesa nasipu yoori ajuwe wakhula ntthu phantte ari weettelaaye osalana.

²⁵Aakhomeliwe saa ttatthu ya supu. ²⁶Pi etthiipo yaatikhiweeyo khwa olokoveziwa wawe yoori: Mfwalume wa Mayaahuuti.²⁷Vamote na ye aakhomeliwe manantarawu awiri, mmote nkhono nlume, nkina nkhono nkha, ²⁸na khurettikhana epile zawaatikhiwa zaalupiyeeyo yoori: “Ye aatthanttiwe nkhama namatapanya.”

²⁹Apale aari oviraaye, eetta onttukhana na osakhinya viishwa zaya araka: “Haya, weeyo ompwechaaye Nyuupa Yoosifwiwamo, khwa siikhu ttatthu khujeka. ³⁰Wiishukhe vansalapa apho na ojuusuru omweenyewe!” ³¹Khwa nanna etthiipo, mahaakhimu a tiini na anamanozela a kano khusala alupa atthaaporu anveyisa yoori: “Wawoosuru akina, ila khunwahi ojuusuru omweenyewe. ³²Wiishukhe vansalapa apho O Al-Masiihu, mfwalume wa Ezirayiilu, wiishukhe yoori niwoone na nuukhupali.” Apale aakhomeliweeyo, na yo eetta onttukhana theenya.

Ofwa wa Yinsa

³³Yaapuwiye yiiza olumwenku wooshi, waaza saa sitha mpakha saakhentta. ³⁴Payina ya saakhentta, Yinsa khukhuwa na huula ya onyakula, araka: “Elooyi, Elooyi, Lama sabatani?” Eto ena maana ya “Nluku aka, Nluku aka, mwaasa aya niini okanswaka?” ³⁵Wakathi atthu apale aari attaaphale asiiliyeevo mattakhuzi apale, khulupa yoori: “Mwinsiile, oninkhuwela Aliyaasi!” ³⁶Mmote aari attaaphale khutthira khulawa khunaanisa shiponja na vinaakiri, khupweha va muutthi na khumwinkha Yinsa yoori anywe na khuri: “Mwinlikhe, nimoone nkhama Aliyaasi onta anlazevo aphale vaya.” ³⁷Ila Yinsa khunyakula channu khwiittha phuumu. ³⁸Phazira ya Nnyupa Woosifwiwamo khuvaruwa khwaawanyeya phantte piiri, waaza vatulu mpakha vathi.

³⁹Wakathi nttunkhulu wa anajanka aariiye omaasho wa Yinsa, ooniyeevo nanna afwiyeeyo, khuri: “Wekhweele mwinyi otu aari Mwaana wa Nluku!” ⁴⁰Aakha akina aari oretta eettaka woona vitthu epile zaari orettikhanaaye ari peetiwene. Khwa atthaapo aarivo Mariyamu Mataleena, Mariyamu mamaawe Tiyaaku, nsimaana wa Yuusufu, na Salome. ⁴¹Aakha aya apo amperekhiye Yinsa na omwaawuni wakathi ari Kalileya. Owaalikha apo aya, aarivo aakha akina awaatta aalawaniyeeyo Yeruzaleemu.

Ozikhiwa wa Yinsa

⁴²Njuwa leettelaka otupweela, mwaasa wa wiiya siikhu ya otthenkeza Saapatu, ⁴³Yuusufu wa Arimateeya, mwinyi wa fwayita na aari oretta phantte ya Mashawuriiya, oto naye aari oweja ota wa ofwalume wa Nluku, khulawa woominyalavo wa Pilaatu na khuveka mwiili wa Yinsa. ⁴⁴Pilaatu khwiiya wooshanka noosiila yoori Yinsa afwa. Khunkhuwela namalokozela wa anajanka khumuuzela nkhama khweele Yinsa afwa. ⁴⁵Wakathi ooziweevo ti namalokozela wa anajanka, khumwinkha mwiili wa Yinsa Yuusufu. ⁴⁶Aphano Yuusufu khuuzanya kuwo yoolakala yoopeepheya, khwiishusha mwiili wa Yinsa vansalapa aphale, khumputaputela va kuwo etile yoolakala na khunttha nkhapuri yaathipiweeyo vamwaako. Nawiisha, khutthaavo liwe liwululene vanlako vaya. ⁴⁷Mariyamu Mataleena na Mariyamu mamaawe Yuusufu, aarettiye eettaka woona na khoona mwiili wa Yinsa vahali waatthiiweevo.

Osisimuwa wa Yinsa

¹Paata ya ovira Saapatu, Mariyamu Mataleena, Salome na Mariyamu mamaawe Tiyaaku, khuuzanya mafuttha oonukhela yoori eetthele mwiili wa Yinsa. ²Siikhu ya mwanzo ya sumana supuyeene, njuwa leettelaka otthamuwa, aakha apale khulawa okhapuri. ³Ntarikhi khusala oozelana yoori: “Paani anttelaaye onilazelavo liwe lifukaniweeyo nlako wa khapuri?” ⁴Maana liwe laya laari liwululene. Ila noofiya okhule, khoona liri loolaziwavo. ⁵Aviriyeevo nkhapuri mphule, khumoona shaapu awaliye kuwo zoolakala eekhaliye nkhono nlume, na khwiiya awoova. ⁶Khuwooza yoori: “Mwihoove, mweeyo mwinimweekesa Yinsa wa Nazareeti, aakhomeliweeyo. Ye asisimuwa! Khaamo mphu, moone puuro aattattikheliwevo. ⁷Mwilawe mwawooze anakhiyoni awe na Pheeturu yoori: ‘Ye alokoza eettaka Kalileya.’ Ottuukho mweeyo mwinlawa mwamoone, nkhama etthiipo awuuziyeenini.”

⁸Eettaka othukumela na osuthuwa, aakha apale khulaawo na khutthiramu nkhapuri mphule. Na khuhimuuzi hatha ntthu, maana aari awoova.

Yinsa onimpuwelela Mariyamu Mataleena

⁹Wakathi Yinsa asisimuwiyeevo lifwajiri la siikhu ya mwanzo ya sumana, khumpuwelela omwanzo ene Mariyamu Mataleena, otule eekariweeyo mmwiili mwawe masheethwani sapa. ¹⁰Ye khulawa owooza ashirikha awe Yinsa, maana yo aari oohuzunikha na olila. ¹¹Wakathi asiiliyeevo yoori Yinsa ori haayi na ampuweleliye Mariyamu Mataleena yo khuhikhupali.

Yinsa oniwaapuwelela anakhiyoni awiri

¹²Paata ya vitthu epile, Yinsa khujithoonyeza khwa wuuso nkina vakatthi wa anakhiyoni awe awiri alottaka tarikhi ya omashapa. ¹³Yo khuruti khuta khuwooza mattakhuzi apale azaaya; ila theenya apale khuhikhupali.

¹⁴Wiishela waya Yinsa khuwaapuwelela apale khumi na mmote, wakathi aariiyo vameeza, na khuwaashowera mwaasa woohikhupali na wuuma rooho zaya, maana khawaasileziye apale aamoniyeeyo wakathi asisimuwiyeevo. ¹⁵Khuwooza yoori: “Mwilawe olumwenku wooshi mwawaafisele atthu ooshi hapari zooshapweya. ¹⁶Otule ankhupalelaaye na khoosiwa ontta wuusurukha, ila otule ahinkhupalelaaye oniiyana paathuli. ¹⁷Alama epi enttela owaalokoza apale anikikhupalaaye miiyo: khwa nzina laka aniikara masheethwani, anlawa attakhule luuka pheeya, ¹⁸ankhola nyookha na onywa amali, ila khuhiwaaretti hatha etthu na owaattheela atthu makhono khuvona.”

Yinsa oneetta pinkuuni

¹⁹Paata ya owooza mattakhuzi apale, Mbwana Yinsa khuweziwa pinkuuni khwiikhala nkhono nlume wa Nluku. ²⁰Aphano anakhiyoni apale khulankha khulawa olaleya phantte zooshi, Mbwana aari owaawuni ahakikhaka mattakhuzi aya na alama zaari owaalottaaye.