Luuka

Hapari za

Luuka

Yaazo

¹Oo Tiyoofilu woohishimwiwa, atthu awaatta ajilipisa waatikha hatiithi ya vitthu ziviriyeeyo vakatthi veetthu. ²Apale aari mashaahiti ooniyeeyo omwanzo ene zirettikhanaka, khwiiya anamalaleya a hapari zooshapweya, atthaapo pi anifiyiseliyeeyo fweeyo. ³Na miiyo zwaamu yaka khusala kitholathola woohilazeli varanka epile zirettikhaniyeezo zaazaka, khulakela owaatikhela zooshi woolotteyavo, ⁴yoori wiiyane nroromelo khwa vitthu epo osomisiweeyo.

Onlaleyiwa ovokoliwa wa Yaahaya Namoosa

⁵Wakathi Herooti aari mfwalume wa Yudeya, aarivo namalokozela wa tiini mmote aari wiitthiwaaye Zakariiya wa khuntti ya Apiiya. Muukhaawe aari wiitthiwa Elizabeeti aari wa ojama wa Haruni, haakhimu wa anamalokozela a tiini. ⁶Oowiiri aari atthu ookhweele nkatthi wa mwentto wa Nluku na ooshututela wa wawamineyavo kano na oruma wooshi wa Mbwana. ⁷Elizabeeti khaarina mwaana mwaasa woohiina mavokozi na oowiiri aya aari awuuluvala.

⁸Siikhu moote Zakariiya aari okhola khaazi yawe ya onamalokozela wa tiini Nnyupa Woosifwiwamo nti wa Yeruzaleemu, mwaasa yoori yaari zwaamu ya khuntti yawe okhola khaazi yaya etile. ⁹Nkhama aazowereliyeeyo anamalokozela a tiini, ye aathawuliwe nkatthi wa nasipu yoori asala akhoza ovupa omwimpari wa Mbwana. ¹⁰Noofiya wakathi wookhoza ovupa, atthu ooshi apale aari vaje eetta olompa.

¹¹Aphano nlayikha la Mbwana khumpuwelela Zakariiya nkhono nlume wa alitaari onkhoziwaavo ovupa. ¹²Wakathi ye ooniyeevo nlayikha ntthile, khwiiya wooshanka na woova channu. ¹³Nlayikha khumuuza yoori: “Ohoove Zakariiya! Nluku asiila lompa yawo; muukha awo Elizabeeti onteela ompattha mwaana. Weeyo onttela ontthaja nzina la Yaahaya. ¹⁴Ye onttela wiiya furaha yootuveliwa wawo, atthu awaatta anteela ofurahela ovokoliwa wawe, ¹⁵maana ye onteela wiiya nwulweene mmakhono wa Mbwana. Khanteela onywa viinyu wala onywa vitthu zoohapala. Onttela wiiya wa wiitaazaniwa Rooho Ttakatthiifu ari mwiirukulu wa mamaawe. ¹⁶Onteela owaarutisela atthu awaatta a Ezirayiilu wa Mbwana, Nluku aya. ¹⁷Onteela operekhiwa ti Mbwana na onttela wiiya wookhomaala na wa owahi khwa nafusi ya napiyu Aliyaasi, yoori azukulise rooho za apaapa eeyane osiilana na aana aya, na yoori awaazukulise anamakhijili eettettise ojuwa wa anashariya, yoori alikhe khapila yoolikana khwa Mbwana.”

¹⁸Aphano Zakariiya khuuzela nlayikha ntthile yoori: “Kinteela ohakikhi toovi eto yaya? Miiyo kooluvala na muukha aka ooluvala.”

¹⁹Khujipu nlayikha liraka: “Miiyo ki Jipiriilu, kiniiya vamote na Nluku, akiruma yoori kite kiwuuze hapari epi zooshapweya. ²⁰Wiiya khukhupaleeni mattakhuzi apa kiwuuziyeeyo, onttela wiiya woohittakhuli mpakha siikhu zinttelaaye orettikhana vitthu epi. Zinteela orettikhana wakathi otthuupo.”

²¹Nalelo atthu aari onwejaaye Zakariiya khushanka mwaasa woorupaza Nnyupa Woosifwiwamo. ²²Noosaruwa, khuhisala awahi ottakhulana atthu apale. Yo khujuwa yoori wanteeliye wahayi Nnyupa Woosifwiwamo. Khwiiya woohittakhuli khusala attakhula na makhono. ²³Wakathi eeshisiyeevo siikhu zawe za okhola khaazi Nnyupa Woosifwiwamo, khurutela owawe.

²⁴Paata ya toole, muukhaawe Elizabeeti khwiimittha, khuhisala asaruwa nnyupa mpakha nyeezi mithaanu. ²⁵Elizabeeti khuri: “Aphano Mbwana ajipu lompa yaka, eeshisa haaya etile kaariina na atthu.”

Onlaleyiwa ovokoliwa wa Yinsa

²⁶Mweezi wasiitha wa erukulu ya Elizabeeti, Nluku khuruma nlayikha Jipiriilu olawa nti wa Kalileya, sitati ya Nazareeti, ²⁷yoori lilawe wa mwaari mmote woohijansiliwi aari wiitthiwaaye Mariyamu, aaposiweeyo ti shaapu mmote aari wiitthiwaaye Yuusufu wa ojama wa mfwalume Daawuuda. ²⁸Nlayikha khumwaattama khumuuza yoori: “Heeri yiiye vamote na weeyo Mariyamu! O wooziti oparikhiyiwa, Mbwana ori vamote na weeyo.”

²⁹Ye khwiiya woozinkireya mwaasa wa mattakhuzi apale, khuvira aphelelezaka maana a hapari zaya epile. ³⁰Nlayikha khurutela omuuza liraka:

“Ohoove Mariyamu,

wapattha rehema omaasho wa Nluku.

³¹Onteela wiimittha ompatthe mwaana,

ontthaje nzina la Yinsa.

³²Ye onteela wiiya nttunkhulu,

nka eetthiwaka

Mwaana wa Nluku Nwulu wa Pinkuuni.

Mbwana Nluku onteela omwinkha

ofwalume wa papaawe Daawuuda.

³³Na onteela wiiya mfwalume wa Ezirayiilu khwa mileele,

ofwalume awe khunteela wiisha.”

³⁴Aphano Mariyamu khuuzela nlayikha yoori: “Zinttela orettikhana toovi na miiyo akininjuwa nlume?”

³⁵Nlayikha khujipu liraka: “Rooho Ttakatthiifu entta owiishukhela, owahi wa Nwulu wa Pinkuuni onttela wuufinikha na yiivuuli yawe. Tiito mwaana onttelaaye ompattha, onteela wiitthiwa Ttakatthiifu, Mwaana wa Nluku. ³⁶Omoone jamaayo Elizabeeti, otule yaari oriwakaaye khanvokola, ila apha na wuuluvala wawe nasaapi eti eemittha opu mweezi wasiitha. ³⁷Maana, mmakhono wa Nluku khayiivo ehinwaheyaaye.”

³⁸Mariyamu khuri: “Kiri raati miiyo karumeya wa Mbwana; mattakhuzi apa onlupaaye pi arettikhane khwa miiyo.” Nlayikha ntthile khulaavo khulawa.

Mariyamu oninthotola Elizabeeti

³⁹Ziviriyeevo siikhu, Mariyamu khujilokotthela khusala alawa na waakuva sitati moote yaari nti wa nnyaako za Yudeya. ⁴⁰Noofiya khuvira nnyupa owawe Zakariiya khunchelisa Elizabeeti. ⁴¹Elizabeeti noosiila mwacheliwa ya Mariyamu, mwaana aari mwiirukulu mwawe khujisakhinya. Elizabeeti khwiiya wawiitaala Rooho Ttakatthiifu. ⁴²Khukhuwa na kuvu araka:

“Wooparikhiyiwa ti weyo Mariyamu

vakatthi wa aakha,

na wooparikhiyiwa mwaana oto

ariiye mwiirukulu mwawo!

⁴³Miiyo ki paani wooteela wooniwa ti maama wa Mbwanaaka? ⁴⁴Noosiila mwacheliwa mwaana ariiye mwiirukulu mwaka eetta ojisakhinya wafurahavo. ⁴⁵Wooparikhiyiwa ti weeyo okhupaliyeeyo yoori anteela orettikhana mattakhuzi apa wuuziweeyo a phantte ya Mbwana.”

Oshukhuru wa Mariyamu

⁴⁶Aphano Mariyamu khuri:

“Nafusi yaka enlaleya owula

wa Mbwana,

⁴⁷Rooho yaka ti yonfurahela

Nluku Namuusuru aka,

⁴⁸mwaasa yoori akuupuwela

miiyo karumeya awe woohiitaali mmaasho.

Waaza attaapha, khapila zooshi

zinttela okiittha yoori muukha wooparikhiyiwa,

⁴⁹mwaasa yoori Nluku Wa Owahi

aretta vitthu khuluzeene muuhaayi mwaka;

nzina lawe ttakatthiifu.

⁵⁰Ye oniwaahurumiya atthu a khapila zooshi

apale animoovaaye.

⁵¹Aretta vitthu khuluzeene na makhono awe,

khuwaamwaza apale oojikhupali khwa shawuri za nroho mwaya.

⁵²Awaalaza afwalume va khukulu vaya

khuwaalansa atthu apale oojipushuwisa.

⁵³Aweetaaza vitthu zooshapweya apale ariina jala,

na khuweekara mathaajiri makhono ru.

⁵⁴Amwaawuni karumeya awe Ezirayiilu,

oopuwelaka emaani aarinaaye

⁵⁵na Eburahiima na peewu yawe khwa mileele,

nkhama etthiipo awooziyeezo amarehemu apapazetthu.”

⁵⁶Mariyamu eekhaliye nyeezi mittatthu wa Elizabeeti nawiisha khurutela owawe.

Ovokoliwa wa Yaahaya Namoosa

⁵⁷Khufiya wakathi wa Elizabeeti opattha ekumi, khunvokola mwaana wanlume. ⁵⁸Anamwaattamanana awe na ajamaaze khusiila elupiwaka huruma khuluyeene Mbwana amooneliyeeyo Elizabeeti, khulawa khufurahi vamote na ye.

⁵⁹Efiyeevo siikhu yanaane, apaapa a mwaana otule khulawa khunkhiriyisa khusala atakha otthajiwa nzina la Zakariiya, papaawe. ⁶⁰Ila mamaawe khujipu araka: “Wala! Nzina lawe linttela wiiya Yaahaya.”

⁶¹Yo khulupa yoori: “Weeyo khuna jamaayo ariina nzina laya nttho!”

⁶²Aphano khwinkhiwa alama papaawe yoori lijuwiwe nzina aari otakhaaye ontthaja mwaana otule. ⁶³Zakariiya khuveka lipawu nttitthiiru, khwaatikhavo yoori: “Nzina lawe ti Yaahaya.” Atthu ooshi khushanka. ⁶⁴Nasaapiru Zakariiya milomo zawe khufunuwa na nlimi lawe khushashuwa, khwaaza ottakhula ansifwaka Nluku. ⁶⁵Anamwaattamanana awe ooshi khwiiya awoova, hapari epile khumwazeyela nti wooshi wa nnyaako wa Yudeya. ⁶⁶Atthu ooshi asiiliyeeyo khusala oopuwela oozelanaka yoori: “Mwaana aya otu onttela wiiya niini?” Maana nkhono wa Mbwana ori vamote na ye.

Liipo la Zakariiya

⁶⁷Zakariiya paapa wa mwaana otule, khumwiitaala Rooho Ttakatthiifu khwaaza ohupiri mattakhuzi a Nluku araka:

⁶⁸“Asifwiwe Mbwana Nluku,

Nluku wa Ezirayiilu,

ateeliyeeyo owaawuni

na owaataphula atthu awe.

⁶⁹Nluku aninkha nusura yookhomaala

khwa ojama wa karumeya awe mfwalume Daawuuda,

⁷⁰nkhama aalupiyeezo rakuzeene

khwa manapiyu awe oottakatthiifu.

⁷¹Ye aanahitiye onuusuru

nkatthi wa maatuwi etthu,

anitaphulaka mmakhono wa apale

aniiphiiriwaaye ti fweeyo,

⁷²Yoori athoonyeze huruma etile awaahitiyeeyo amarehemu apapazetthu,

na oopuwelaka wahati woottakatthifu aarettiyeeyo na yo.

⁷³Na olapha aalaphisaniyeeyo

na marehemu papeetthu Eburahiima,

⁷⁴alaphaka yoori aari oteela onitaphula mmakhono wa maatuwi etthu,

yoori ninrumeyele ye woohoovi,

⁷⁵woottakatthifuvo na washariyavo omaasho wawe

siikhu zooshi zoohaayi etthu.

⁷⁶Weeyo mwanaka onteela wiitthiwa napiyu Nwulu wa Pinkuuni,

onttela wiiya namalokozisiwa wa Mbwana yoori omwaattalelele tarikhi zawe,

⁷⁷owaalaleyelaka atthu awe

nusura entaaye khwa nswammaha wa twampi zaya,

⁷⁸maana Nluku eetthu tu wa huruma.

Onteela othoonyeza nuuru yawe vakatthi veetthu,

⁷⁹ewaamwasikhele apale

ari n’yiiza na vamwiivuuli woofwa,

yoori eneettettise ntarikhi ya heeri.”

⁸⁰Mwaana otule khuvira awulaka na rooho yawe khusala ekhomaala, khwiikhala n’yaara mpakha siikhu apuweleliyeevo vakatthi wa atthu a Ezirayiilu.

Ovokoliwa wa Yinsa

¹Wakathi aya opo, Seezari Akuushitu mfwalume nwulu aarumiye yoori atthu ooshi apale a nkatthi wa ofwalume wa Rooma aarina ya olawa waatikhiwa nwarakha ya afwalume. ²Waatikhiwa opo wamwanzo waarettikhaniye Kureeniyo ari nsatoro wa Siiriya. ³Wakhula ntthu khusala alawa nti aavokoliweewo olawa waatikhiwa.

⁴Yuusufu khulankha Kalileya, sitati ya Nazareeti, khulawa Yudeya sitati ya Belemu, ottuukho aavokoliweewo wa mfwalume Daawuuda. Eetteliye waatikhiwa maana aari wa ojama wa Daawuuda. ⁵Ye aalawiye waatikhiwa na mposi awe Mariyamu ari wa wiimittha.

⁶Siikhu zaya epo ari Belemu ottuukhule, Mariyamu khunfiyela siikhu ya opattha ekumi. ⁷Khumpattha mwaana wa omwanzo awe, khumputaputela va kuwo, khunttattikhela nkashothi zaari ojaamo nyama, mwaasa yoori khaarina puuro yoomaka.

Malayikha na Amakhampuzi

⁸Nti otthuupule aariwo amakhampuzi aari wiikhalaaye ntthuttu ashukisaka pwittipwitthi zaya na weekesela osikhu wooshi. ⁹Nlayikha la Mbwana khwiishukhela attaaphale aariivo amakhampuzi apale, na nuuru ya Mbwana khuwaamwasikhela, khwiiya awoova channu. ¹⁰Ila nlayikha khuwooza yoori: “Mwihoove! Miiyo kateela owuuzani hapari zooshapweya za furaha khuluyeene, enttelaaye wiiya ya atthu ooshi. ¹¹Leelo ethiiti, sitati ya Daawuuda avokoliwa Namuusuru eeyiye Al-Masiihu, Mbwana! ¹²Alama yenu tiito: Mwininsikana mwaana aputaputeliwe va kuwo, attattikheliwe nkashothi.”

¹³Nasaapiru khupuwa malayikha awaatta, khuphakanyeya na ntthile la mwanzo, khusala ansifu Nluku araka:

¹⁴“Asifwiwe Nluku otulu,

na vathi apha heeri yiiye vamote na atthu ooshi awaatakheliyeeyo osaana.”

¹⁵Wakathi malayikha apale aruteliyeevo pinkuuni, amakhampuzi khuuzana yoori: “Nlaweni Belemu noone etthu erettikhaniyeewo, etile Mbwana anuuziyeeyo.”

¹⁶Yo khuhirupazi, khulawa khunsikana Mariyamu na Yuusufu, na mwaana otule attattikheliwe nkashothi. ¹⁷Paata ya omoona mwaana otule, yo khusala athatela epile ooziweezo ti nlayikha monkoni wa ye. ¹⁸Ooshi apale aasiiliyeeyo hapari aari olupaaye amakhampuzi apale khwiiya ooshanka. ¹⁹Ila Mariyamu aari ottha nroho mwawe vitthu epile aari osiilaazo, khusala apheleleza maana aya. ²⁰Paata ya toole, amakhampuzi apale khurutela ntthuttu anttitthimisaka Nluku na ansifwaka khwa zooshi aasiiliyeezo na ooniiyeezo, etthiipile nlayikha laawooziyeezo.

Okhiriya wa Yinsa

²¹Noofiya siikhu naane, mwaana otule khukhiriyisiwa, khutthajiwa nzina la Yinsa, nttintthile aalupiyeeyo nlayikha ahineemitthiwe.

Winkheleliwa wa Yinsa Nnyupa Woosifwiwamo

²²Zimariseliweevo siikhu zootwahareshiwa Mariyamu na Yuusufu, nkhama etthiipo zaari olupaazo kano za napiyu Munsa, khunthuula mwaana otule khunlawana Yeruzaleemu yoori enkheleliwe mmakhono wa Mbwana, ²³maana yaatikhiwa nkano za Mbwana yoori: “Mwaana wamwanzo wanlume ona yoophakuliwa khwinkhiwa Mbwana.” ²⁴Yuusufu na Mariyamu khwinkha twaha nkhama etthiipo zinrumaazo kano za Mbwana: “Makhoko mawiri ama jiwa piiri.”

²⁵Wakathi aya opo Yeruzaleemu aariwo mwinyi mmote aari wiitthiwaaye Simiyooni, aari wa shariya na wa omoova Nluku. Ye aari owejela wuusurwiwa wa atthu a Ezirayiilu. Rooho Ttakatthiifu yaari vamote na ye, ²⁶na khuthoonyeziwa ti Rooho Ttakatthiifu yoori khaari ofwa ahimooneeni Al-Masiihu wa Mbwana. ²⁷Simiyooni khweetta Nnyupa Woosifwiwamo alokoziwe ti Rooho Ttakatthiifu, wakathi apapaze antaniyeevo Yinsa yoori aretteliwe etile yaalupiweeyo nkano, ²⁸Simiyooni khunthuula mwaana otule mmakhono mwawe, khunshukhurwela Nluku araka:

²⁹“Mbwanaaka, aphano onleeze karumeya awo na heeri

maana yarettikhana etile waahitiyeeyo.

³⁰Koona nusura yawo na maasho aka

³¹owaattaleleliyeeyo atthu ooshi.

³²Ye nuuru ya omwasikhela khapila zooshi za amalapo

na siifwa ya atthu awe a Ezirayiilu.”

³³Papaawe na mamaawe khwiiya ooshanka mwaasa wa mattakhuzi apale aari onlupaaye Simiyooni monkoni wa mwaana otule. ³⁴Simiyooni khuwaaparikhiya, khumuuza Mariyamu maama wa mwaana yoori: “Moone, mwaana otu Nluku anthawula yoori atthu awaatta a Ezirayiilu ajikwise ama awoosuru. Ye alama ya Nluku; atthu awaatta anlawa anttakhule wootakhalavo. ³⁵Mwaasa wa ethiito, wuupuwela wa nroho za atthu awaatta onteela osaruwa; weeyo Mariyamu enteela wuupattha huzuni khuluyeene nkhama phanka yoonoliwa yoori eshije nafusi yawo.”

³⁶Attaaphale aarivo halifwa mmote aari wiitthiwaaye Aana. Aari mwaana wa Fwanuweele wa lihimo la Asheeri, aari wawuuluvala. Eekhalaniye mannawe nyaakha sapa, ³⁷paata ya ofwa mannawe, khuhiraliwi mpakha opattha nyaakha thamaaniini na mine. Khaari olaamo Nnyupa Woosifwiwamo osikhu na nthana, khaazi yawe yaari omwaaputu Nluku khwa ofuka na olompa. ³⁸Wakathi otthuupo khwaaza onshukhurwela Nluku attakhulaka monkoni wa mwaana otule, awoozaka atthu ooshi apale aari owejelaaye wookhowa wa Yeruzaleemu.

³⁹Yuusufu na Mariyamu nawiisha oretta zooshi epile zaari orumaazo kano ya Mbwana, khurutela Kalileya sitati ya Nazareeti owaya. ⁴⁰Mwaana otule khuvira awulaka na okhomaala, eetaaliye ojuwa, na rehema ya Nluku yaari vamote na ye.

Yinsa Nnyupa wa Nluku

⁴¹Wakhula mwaakha Mariyamu na Yuusufu aari weettaka Yeruzaleemu Onjampo la Paashikowa. ⁴²Wakathi Yinsa apatthiyeevo nyaakha khumi na miwiri, Mariyamu na Yuusufu khunthuula onlawana onjampo la Paashikowa nkhama etthiipile aazowereliyeezo. ⁴³Noofiya khuretta njampo ntthile mpakha wiisha, Mariyamu na Yuusufu khusala arutela owaya. Ila Yinsa khusala Yeruzaleemu, mamaawe na papaawe woohijuwi. ⁴⁴Yo aari woona yoori ori khuntti etile yaari orutelaaye onti, khuvira siikhu ntero eettaka weettetta, aphano khwaaza omweekesa awoozelaka ajamaaze na ashirikhaawe. ⁴⁵Khuhisala ampattha, khurutela Yeruzaleemu olawa omweekesa. ⁴⁶Eviriyeevo siikhu ttatthu, khunsikana ari Nnyupa Woosifwiwamo, eekhaliye na ajuwi awulu a tiini eettaka onsiila na omuuzela. ⁴⁷Ooshi apale aari onsiilaaye khunshankela mwaasa woojuwa wawe na nanna aari owaajipwaazo. ⁴⁸Aphano apapaze noomoona khushanka, mamaawe khumuuzela araka: “Mwanaka! Niini epi oniretteliyeezo? Miiyo na papaawo naari wa wantipweya naaza raku oweekesa.”

⁴⁹Ye khujipu yoori: “Mwaari okeekeselani? Khamwaari ojuwa yoori miiyo kaarina ya wiiya Nnyupa wa Paapa?” ⁵⁰Ila yo khuhiweeleyi etthu aari olupaaye.

⁵¹Yinsa khurutela nti wa Nazareeti na papaawe na mamaawe khusala awaashututela. Mamaawe aari othokorela vitthu epile zooshi nroho mwawe. ⁵²Yinsa khusala avira awulaka nkatthi wa hirimu, ojuwa, khwa rehema ya Nluku na atthu.

Olaleya wa Yaahaya Namoosa

¹Mwaakha wa khuumi na thaanu wa ofwalume wa Seezari Tibeeriyu, Ponsiyu Pilaatu ari nsatoro wa Yudeya. Herooti Antiipa ari reekule wa Kalileya na ttwiiye Filiipe na ye ari reekule wa Itureeya na Tarakhoniiti, na Lusaaniya ari reekule wa Abileeni. ²Anaasi na Kayifwa aari mahaakhimu awulu a tiini. Mwaakha aya pu otthuupo enkhiweeyo mattakhuzi a Nluku Yaahaya, mwaana wa Zakariiya, n’yaara. ³Ye khuzukulela miti zooshi zaattameliyeeyo muuttho Yorotaani, atafusiraka woosiwa wa othupwiya yoori aswaamihiwe twampi zaya. ⁴Nkhama etthiipo zaatikhiweezo nkithaapu ya napiyu Ezaaya:

“Owaapho ntthu ankhuwaaye n’yaara araka:

‘Mwitthenkeze tarikhi ya Mbwana,

na mookole miphiitelo zawe.

⁵Makunte ooshi asireliwe,

nyaako na kulu zooshi zishapweyisiwe,

tarikhi zoonyokowa zookoleliwe,

epile zoothipeya zishottheliwe.

⁶Atthu ooshi anteela woona

nusura ya Nluku.’ ”

⁷Yaahaya khusala awooza atthu apale aari otaaye woosiwa araka: “Khapila ya evili! Paani awuuziyeenini otthira hukhumu ya Nluku entaaye? ⁸Mwirette vitthu enthoonyezaaye yoori khweele mwathupwiya, mwihijilupeze yoori ‘Eburahiima ti papeetthu.’ Miiyo kiniwuuzani yoori khwa liwe ntthi Nluku onwahi owaattala aana a Eburahiima. ⁹Nshokha latthiiwa nshini wa mitathaari za miitthi. Wakhula muutthi ohiniimaaye mishumo zooshapweya ontta oshijiwa weeseleliwe va moottho.”

¹⁰Atthu khusala amuuzela araka: “Apho nirette niini?”

¹¹Ye khuwaajipu yoori: “Otule ariina hempe piiri, moote amwinkhe otule ahina. Otule ariina etthu yoojiwa awaameele apale ahina.”

¹²Khulankha anamariphisa lumpuru yoori alawe oosiwe khumuuzela Yaahaya yoori: “Mwaaliimu, khi fweeyo nirette niini?”

¹³Ye khuwaajipu araka: “Mwihiriphise mwizitisa hisapu mwirumiweeyo.”

¹⁴Anajanka nayo khumuuzela yoori: “Khi fweeyo niri toovi?” Khuwaajipu yoori: “Mwihiwaanyakanye atthu mwiroromelaka kuvu zenu, wala mwihiwaalokoveze vitthu zohiiyi etthiipo, mwishukhurwele ethiito mwimpatthaaye.”

¹⁵Nroromelo wa atthu khusala weekezeleya, oonaka yoori talili Yaahaya ti Al-Masiihu. ¹⁶Ye khuwooza ooshi apale aariivo yoori: “Weekhweele miiyo kiniwoosanani maati, ila onta nkina ariina owahi wookiziti miiyo, wala akinsuhi ofukula mikhoyi za jampali zawe. Ye onteela owoosani na Rooho Ttakatthiifu na moottho. ¹⁷Onaaye fosholo mmakhono mwawe anttelaaye ophakulana tiriku na maveya. Athuule tiriku atthe vantthala vawe, maveya eeselele va moottho ohinzimaaye.”

¹⁸Khwa mattakhuzi makina awaatta, Yaahaya aari owaahirimiza na owaatafusirela atthu hapari zooshapweya. ¹⁹Na khunshowera nsatoro Herooti mwaasa wonrala Herodiya muukha wa ttwiiye na oretta vitthu zootakhala zawaatta. ²⁰Aphano Herooti khweekezela zooshi epile, khuruma ofukeliwa Yaahaya nkalapooso.

Woosiwa wa Yinsa

²¹Wakathi aari owoosaavo atthu ooshi apale, Yinsa naye khuta attaaphale oteela woosiwa. Ye alompaka pinku khufukuwa, ²²Rooho Ttakatthiifu khumwiishukhela nkhama jiwa. Khusiileya huula yoolankha pinkuuni eraka: “Weeyo o mwanaka wa wuupheta, na wookituvela channu.”

Ntathaari wa ojama wa Yinsa

²³Yinsa wakathi aaziyeevo olaleya hapari zooshapweya aarettiye arina nyaakha talaathiini.

Ye aari waakanyeriwa wiiya mwaana wa Yuusufu, mwaana wa Heeli,

²⁴Heeli aari mwaana wa Mataati,

Mataati aari mwaana wa Leevi,

Leevi aari mwaana wa Melikhi,

Melikhi aari mwaana wa Yanaayi,

Yanaayi aari mwaana wa Yuusufu.

²⁵Yuusufu aari mwaana wa Matathiiya,

Matathiiya aari mwaana wa Amooshi,

Amooshi aari mwaana wa Nahuumu,

Nahuumu aari mwaana wa Heshiili,

Heshiili aari mwaana wa Nakhaayi,

²⁶Nakhaayi aari mwaana wa Maathi,

Maathi aari mwaana wa Matathiiya,

Matathiiya aari mwaana wa Shemeeni,

Shemeeni aari mwaana wa Yosheekhi,

Yosheekhi aari mwaana wa Yuuda,

²⁷Yuuda aari mwaana wa Zhuwaana,

Zhuwaana aari mwaana wa Reesa,

Reesa aari mwaana wa Zorobabeeli,

Zorobabeeli aari mwaana wa Sheyalitiyeeli,

Sheyalitiyeeli aari mwaana wa Neeri,

²⁸Neeri aari mwaana wa Meelikhi,

Meelikhi aari mwaana wa Aadi,

Aadi aari mwaana wa Kosaamu,

Kosaamu aari mwaana wa Elimadaamu,

Elimadaamu aari mwaana wa Eeri,

²⁹Eeri aari mwaana wa Yusuwe,

Yusuwe aari mwaana wa Elizeeri,

Elizeeri aari mwaana wa Yoriimu,

Yoriimu aari mwaana wa Mathaati,

Mathaati aari mwaana wa Leevi,

³⁰Leevi aari mwaana wa Simiyooni,

Simiyooni aari mwaana wa Yuuda,

Yuuda aari mwaana wa Yuusufu,

Yuusufu aari mwaana wa Yoona,

Yoona aari mwaana wa Eliyakhiimu,

³¹Eliyakhiimu aari mwaana wa Meleeya,

Meleeya aari mwaana wa Meena,

Meena aari mwaana wa Matatha,

Matatha aari mwaana wa Nathaani,

Nathaani aari mwaana wa Daawuuda,

³²Daawuuda aari mwaana wa Yeese,

Yeese aari mwaana wa Obeedi,

Obeedi aari mwaana wa Bowaazi,

Bowaazi aari mwaana wa Salimooni,

Salimooni aari mwaana wa Nashooni,

³³Nashooni aari mwaana wa Aminataapi,

Aminataapi aari mwaana wa Raami,

Raami aari mwaana wa Hezorooni,

Hezorooni aari mwaana wa Pereezi,

Pereezi aari mwaana wa Yuuda,

³⁴Yuuda aari mwaana wa Yaakhumpa,

Yaakhumpa aari mwaana wa Esiyaakha,

Esiyaakha aari mwaana wa Eburahiima,

Eburahiima aari mwaana wa Teera,

Teera aari mwaana wa Nahoori.

³⁵Nahoori aari mwaana wa Serukhi,

Serukhi aari mwaana wa Reewu,

Reewu aari mwaana wa Peleekhi,

Peleekhi aari mwaana wa Heebere,

Heebere aari mwaana wa Sheela,

³⁶Sheela aari mwaana wa Kayinaamu,

Kayinaamu aari mwaana wa Arifwakisaati,

Arifwakisaati aari mwaana wa Sheemu,

Sheemu aari mwaana wa Nuuhi,

Nuuhi aari mwaana wa Lameekhi,

³⁷Lameekhi aari mwaana wa Methuseela,

Methuseela aari mwaana wa Enookhi,

Enookhi aari mwaana wa Yareeti,

Yareeti aari mwaana wa Mahalaleeli,

Mahalaleeli aari mwaana wa Kenaani.

³⁸Kenaani aari mwaana wa Enooshi,

Enooshi aari mwaana wa Seethi,

Seethi aari mwaana wa Adamu,

Adamu aari mwaana wa Nluku.

Ozayiniwa wa Yinsa ti sheethwani

¹Yinsa aarutiye omuttho Yorotaani ari wawiitaala Rooho Ttakatthiifu, aalokoziwe tithiito mpakha n’yaara. ²Nttumpho khuzayiniwa ti Sheethwani siikhu arupayiini. Siikhu zaya epile khaari oja etthu, nawiisha khunkhola jala.

³Sheethwani khumuuza yoori: “Nkhama o mwaana wa Nluku, orume liwe nttho lithatuwe liiye phaawu.”

⁴Ila Yinsa khunjipu araka: “Yaatikhiwa yoori: ‘Khahiyo phaawu paasi enimwinkhaaye ohaayi pinaatamu.’ ”

⁵Sheethwani khunweza vatulu, khunnoza ofwalume wooshi wa olumwenku. ⁶Khumuuza yoori: “Kintta owinkha ofwalume na siifwa za olumwenku opu wooshi, mwaasa yoori zooshi kenkhiwa miiyo, na miiyo kinimwinkha otule kinintakhelaaye. ⁷Amana okaaputu miiyo, zooshi zintta wiiya zawo.”

⁸Yinsa khunjipu yoori: “Yaatikhiwa yoori:

“ ‘Omwaaputu Mbwana Nluku awo,

na onrumeyele othuuto paasi.’ ”

⁹Aphano sheethwani khunlawana Yeruzaleemu khunweza vatulu woolepavo wa Nyuupa Yoosifwiwamo, khumuuza yoori: “Nkhama o mwaana wa Nluku, ojeeselele vathi aphale.” ¹⁰Maana yaatikhiwa yoori:

“ ‘Ye ontta oruma malayikha awe awiinanele.

¹¹Atthaapo antta wuukholelela na makhono aya

yoori ohikwakwanttuwe va liwe.’ ”

¹²Yinsa khunjipu yoori: “Nttakhuzi la Nluku lalupa yoori: ‘Ohimweeze Mbwana Nluku awo.’ ”

¹³Sheethwani nawiisha onzayini khumwaattuwa, khusala awejela wakathi wonkhweyela.

Yinsa onaaza khaazi zawe nti wa Kalileya

¹⁴Aphano Yinsa khurutela Kalileya, owahi wa Rooho Ttakatthiifu ori vamote na ye. Hapari zaari olupaaye monkoni wa ye khumwazeyela miti zooshi za nkerekhere. ¹⁵Aari osomisa mmasinakooka, atthu ooshi khusala anttottopela.

¹⁶Khulawa mpakha sitati ya Nazareeti ohali aleliweewo. Siikhu ya saapatu khweetta nsinakooka nkhama etthiipo aazowereliyeezo. Khulankha yoori asome. ¹⁷Khwinkhiwa kithaapu ya napiyu Ezaaya. Khufunula khusikana vahali yaatikhiweevo yoori:

¹⁸“Rooho ya Mbwana

eri vamote na miiyo,

akithawaza yoori kiwaatafusirele

hapari zooshapweya asikhini

na owaatafusirela otaphuliwa wa anamahuzunikha,

owoonisa apale oohooni,

owaavumulisa apale oohukhumwiwa,

¹⁹na olaleya yoori wafiya

mwaakha wa rehema ya Mbwana.”

²⁰Yinsa khufinikha kithaapu etile khumwinkha karumeya wa nsinakooka, ye khwiikhala. Atthu ooshi apale aarimo khusala amweekesa. ²¹Ye khuwooza yoori: “Leelo zawaatikhiwa epi zarumeyeliwa, etthiipi mwinttaaye wiisharu osiila.”

²²Atthu ooshi khusala anttottopela, na khwiiya ootikinisiwa mwaasa wa mattakhuzi a rehema aari olankhaaye nkhanyo mwawe. Khusala oozelana yoori: “Khahi mwaana wa Yuusufu otu?”

²³Yinsa khuwooza yoori: “Khweele mweeyo mwinlawa mwakuuze kittaphi mmote enraaye toono: ‘Tothoro, ojivonise omweenyewe!’ Orette mmuti mwawo mphu minjuza nisiiliyeeyo epile orettiyeezo Kafwaranaawu.”

²⁴Khulupa theenya yoori: “Wa ookhweele kiniwuuzani, yoori khaavo napiyu mmote ankhupaliwaaye mmuti mwawe. ²⁵Na wa ekhweele wakathi wa napiyu Aliyaasi, Ezirayiilu aariwo aakha oofweliwa pi amanna zaya wakathi yaafukiweevo pinku nyaakha mittatthu na nyeezi sitha na yaapuwiye jala miti zooshi. ²⁶Aliyaasi khaaperekhiwe hatha vahali wa apale aya, woohiiyi nanfweliwa ti mannawe mmote wa Sarapita ya Sitooni. ²⁷Siikhu za napiyu Elizeewu, Ezirayiilu aariwo anamaaharaja awaatta, khuhiivo hatha mmote aavonisiweeyo ila Naama paasi wa nti wa Siiriya ti ye aavonisiweeyo otthwe.”

²⁸Atthu ooshi aari nsinakooka, noosiila mattakhuzi apale aari olupaaye Yinsa yo khwiiphiiriwa! ²⁹Khwiikariwamo nsitati mphule khulawaniwa vamwaako yaajekiweevo sitati yaya etile, yoori ansukhumele vathi. ³⁰Ila Yinsa khuvira vakatthi vaya khusala alawa.

Yinsa onimwiikara sheethwani

³¹Paata ya toole Yinsa khwiishukhela Kafwaranaawu, sitati ya Kalileya, khusala awaanozela siikhu ya saapatu. ³²Yo aari ooshankisiwa ti masomi awe, mwaasa yoori nttakhuzi lawe laarina ofwalume.

³³Nsinakooka aarimo ntthu mmote aariina sheethwani. Aphano sheethwani khunyakula na kuvu zawe zooshi araka: ³⁴“Eeee! Onnitakhelani weeyo Yinsa wa Nazareeti? Wata yoori onitapanye? Miiyo kinuujuwa weeyo yoori o Ttakatthiifu wa Nluku!”

³⁵Yinsa khummaruwela sheethwani araka: “Onyamale, oleemo mmwiili wa mwinyi otu!” Attaaphale sheethwani khunkwisela vathi ntthu otule vakatthi wa atthu, khumwaattuwa woohinvulalisi.

³⁶Atthu ooshi aari ooshankisiwa, khusala oozana atthaaporu: “Nttakhuzi ni ntthi? Khwa ofwalume na owahi wawe otu onruma masheethwani khusaruwa!” ³⁷Aphano siifwa ya Yinsa yaamwazeyeliye miti zooshi za nkerekhere.

Yinsa ona owahi vatulu wa masheethwani na marati

³⁸Yinsa khusaruwamo nsinakooka khweetta owawe Simawu. Nkhwewe Simawu aari nlwele hooma, yo khunvekela Yinsa yoori anvonise. ³⁹Ye khwiinama khwiikara hooma etile khunlikha, nasaapiru nunu otule khulankha khusala awaarumeyela.

⁴⁰Njuwa litupweelaka4:40 Otupweela wa njuwa siikhu ya saapatu mayaahuuti aari woona yoori siikhu ttakatthiifu yavira. atthu ooshi apale aariina marati khusala atiiseliwa Yinsa, ye noowaattheela makhono noowaavonisa. ⁴¹Theenya aarivo atthu awaatta aari owaasaruwaaye masheethwani, anyakulaka araka: “Weeyo o mwaana wa Nluku!” Yinsa khusala amaruwa alikhisaka masheethwani apale ottakhula, maana yo aari ojuwa yoori ye ti Al-Masiihu.

Yinsa onlaleya hapari zooshapweya

⁴²Noocha Yinsa khulankha khusala alawa puuro yawiitthaaleyavo. Atthu awaatta khusala amweekesa, nonsikana khuhisala atakha onlikha olawa. ⁴³Ye khuwooza yoori: “Enhithajiya theenya miiyo olawa sitati kiina olaleya hapari za Ofwalume wa Nluku, kaperekheliwa matakhelo atthaapo.” ⁴⁴Ye aari otafusiri mmasinakooka za Yudeya.

Yinsa oniwaakhuwela anakhiyoni awe a mwanzo

¹Siikhu moote, Yinsa aari nshini wa pahari ya Kalileya5:1 Theenya linjuwaniwa nzina la Jenezare., khuzukuleliwa pi atthu awaatta yoori asiile nttakhuzi la Nluku. ²Ye khoona nyaatiya miwiri ziri vapatari ya pahari ethiitile, zaalikhiweeyo pi anamajiya aari woosaaye matthavi aya. ³Yinsa khupakhira mmwaatiya mmote waari wa Simawu khunvekela yoori asusisele mpahari vattitthiiru, khwiikhala khusala awaanozela atthu.

⁴Nawiisha onozela khumuuza Simawu yoori: “Othuule mwaatiya awo mwilawe vahali wawiichavo mwajiye.”

⁵Simawu ajipwaka khuri: “Mbwana, najiya osikhu wooshi khuhipatthi etthu, ila wiiya walupa yoori neese, nintta weesa.”

⁶Yo khulawa khweesa matthavi aya khuula swi zawaatta mpakha khusala avaruwa matthavi aya. ⁷Khuwaakhuwela ashirikha aya aari mwaatiya nkina yoori ate arinkaanyele, khwiitaaza nyaatiya zaya zoomiwiri mpakha osaleela ozama.

⁸Simawu Pheeturu nawoona etthu etile yaarettikhaniyeeyo, khunkokhorela Yinsa amuuzaka yoori: “Mbwana, okisuse maana miiyo ki natwampi.” ⁹Simawu na ashirikha awe khuzinkuwa mwaasa wa swi epile zawaatta apatthiyeezo. ¹⁰Theenya Tiyaaku na Yaahaya, aana a Zepeteewu, ashirikha a Simawu aari ojiyanaaye khwiiya ootikinisiwa.

Aphano Yinsa khumuuza Simawu yoori: “Ohoove, waaza nasaapi eti onttela wiiya namajiya wa atthu.” ¹¹Khuwelelisa nyaatiya zaya vapatari, khulikha vitthu zaya zooshi khusala anlotta Yinsa.

Yinsa oninvonisa namakuttula

¹²Yinsa ari sitati moote, khuvira mwinyi mmote aariina makuttula. Noomoona Yinsa khukokhora khunsijitela khumuuza araka: “Mbwanaaka, otakaru, okivonise.”

¹³Yinsa khookola nkhono awe khunsapa khumuuza yoori: “Katakha! Vona!” Wakathi otthuupule khuvona.

¹⁴Yinsa khumuuza yoori: “Vitthu epi ohinthatelele hatha ntthu, ila olawe wajithoonyeze wa namalokozela wa tiini, oorettele twaha ya ovonisiwa wawo nkhama etthiipile alupiyeezo napiyu Munsa, yoori wiiye oshaahiti vakatthi wa atthu aya apale.”

¹⁵Ila hapari zawe zaari ovira zimwazeyaka. Atthu awaatta khusala ata oteela osiila hapari, na oteela ovonisiwa marati aya. ¹⁶Ila Yinsa eetta olaakavo noolawa mmakuluttu olompa.

Ovonisiwa wa mwinyi woorakala

¹⁷Siikhu moote Yinsa eetta onozela, aphale vaya aari onozelaavo aarivo mafwarizeewu na anamanozela a kano aalankhiyeeyo miti mikina za Kalileya na Yudeya mpakha Yeruzaleemu. Owahi wa Mbwana waari vamote na ye wa owaavonisa alwele. ¹⁸Aphano atthu akina khuntana mwinyi aariina supiyaani anttattikheliye vanrepa, yo aari otakha omphenyisa ampwehe omaasho wa Yinsa. ¹⁹Ila nawoona yoori khayiivo kiphenyo mwaasa wa atthu waatta, khuwela vatulu wa nyuupa khutamula liphala na khumwiishushela vakatthi wa atthu ari vanrepa omaasho wa Yinsa.

²⁰Ye nawoona amini aariina atthu apale, khumuuza nasupiyaani otule yoori: “Swaahipu, twampi zawo zaswaamihiwa.”

²¹Aphano mafwarizeewu na anamanozela a kano khusala attettha araka: “Otu aya paani ankufurwaaye? Paani anwahaaye oswaamihi twampi woohiiyi Nluku?”

²²Yinsa khujuwa etthu aari ofikhiraaye, khuwoozela yoori: “Mwinshukulikhela ni nroho mweenu? ²³Yookhweya ti tiivi omuuza yoori ‘twampi zawo zaswaamihiwa,’ ama yoori ‘olankhe weettette’? ²⁴Ila mwijuwe yoori Mwaana wa Pinaatamu onaaye owahi wa oswaamihi twampi vathi apha,” khumuuza nasupiyaani otule yoori: “Olankhe, othuule nrepa lawo, olawe owawo.” ²⁵Nasaapiru mwinyi otule khulankha vakatthi wa atthu khuthuula nrepa lawe khusala alawa owawe ansifwaka Nluku. ²⁶Atthu ooshi aariivo khwiiya ooshanka na woova channu, khusala ansifu Nluku araka: “Leelo noona vitthu zootikinisa.”

Okhuweliwa wa Leevi5:27 Nzina ntthi la Leevi nzina likina la Matewuzhu.

²⁷Paata ya wiisha vitthu epile, Yinsa khulankha khusala alawa, khunsikana mwinyi mmote ariphisaka lumpuru aari wiitthiwaaye Matewuzhu, khumuuza yoori: “Okilotte.” ²⁸Ye khulikha khaazi zawe zooshi khusala anlotta.

²⁹Leevi khuretta njampo liwululene owawe vamote na Yinsa, aarivo theenya anamariphisa lumpuru akinoko aya na atthu akina eekhaliye vamote na ye. ³⁰Mafwarizeewu na anamanozela a kano khusala awaapa anakhiyoni a Yinsa araka: “Mwaasa aya niini mweeyo mwijanaka na mwinywanaka anamariphisa lumpuru na anatwampi?”

³¹Yinsa khuwaajipu araka: “Akumi khaninhithajiya tothoro ila alwele. ³²Miiyo akaateeliye owaakhuwela anashariya, kateeliye owaakhuwela anatwampi yoori athupwiye.”

Monkoni wa ofuka

³³Atthu akina khumuuza Yinsa yoori: “Anakhiyoni a Yaahaya Namoosa na anakhiyoni a mafwarizeewu anfuka na anlompa, ila awo weeyo antta oja na onywa.”

³⁴Yinsa khuwaajipu yoori: “Enrettikhana toovi anamalaleyiwa harusi ofuka namaposa arivo? ³⁵Ila enteela ofiya siikhu mposi anttelaaye olaziwavo vakatthi vaya, siikhu zaya etthiipo, anteela ofuka.”

³⁶Elottelanaka Yinsa khulupa nlikaniso mmote araka: “Khaavo anshijaaye yaapa ya kuwo pheeya yoori atthe yaapa ya kuwo yoovutta, nooretta toowo etile pheeya entta oharipweya, mwaasa wa yaapa etile ya kuwo pheeya etthiiwevo oheezani na etile yoovutta. ³⁷Khaavo anthuulaaye viinyu pheeya ottha nttompwiyo ya shapala ya raku. Nooretta toowo entta ophutuwa, viinyu yiittikhe ttompwiyo yaya eharipweye. ³⁸Viinyu pheeya entthiiwa nttompwiyo pheeya. ³⁹Khaavo annywaaye viinyu ya raku khutakha onywa viinyu pheeya, maana ontta olupa yoori: ‘Afwataali etile ya raku.’ ”

Yinsa ti mweenyewe saapatu

¹Saapatu moote, Yinsa eetta ovira nshini wa nshapa la tiriku. Anakhiyoni awe khusala avulula asusuraka na makhono arafunaka phunje zaya. ²Mafwarizeewu khusala awoozela yoori: “Mwaasa aya niini mwirettaka vitthu ziiyiye mwiikho orettiwa saapatu?”

³Ye khuwaajipu araka: “Khamwinasome etthu aarettiyeeyo Daawuuda wakathi yankholiyeevo jala na ashirikha awe? ⁴Ye aaviriye Nnyupa ya Nluku khuthuula phaawu zoohalalishiwa khurafuna, kiina khuwenkha ashirikhaawe, ila aarina ruhusa ya orafuna aari anamalokozela a tiini paasi.” ⁵Yinsa khulupa araka: “Mwaana wa Pinaatamu Mbwana na ti mweenyewe Saapatu.”

Mwinyi woorakala nkhono

⁶Saapatu kiina, Yinsa khuvira nsinakooka khusala awaanozela, aarimo mwinyi aarakaliyeeyo nkhono nlume. ⁷Anamanozela a kano na mafwarizeewu eetta omweekesela yoori amoone Yinsa nkhama aari onvonisa siikhu ya Saapatu, yoori ankwisele paathuli. ⁸Ila ye aari ojuwa etthu aari wuupuwelaaye atthu apale. Khumuuza mwinyi otule woorakala nkhono nlume yoori: “Olankhe ote vakatthi apha.” Mwinyi khulankha khweemela.

⁹Aphano Yinsa khuwoozela yoori: “Ensuhaaye orettiwa Saapatu ti tiivi? Yooshapweya ama yootakhala, wuusuru ama wuula?”

¹⁰Aphano khuweekesa atthu ooshi apale aariivo khumuuza mwinyi otule yoori: “Wookole nkhono awo.” Ye khookola nkhono awe, khwiiya woovonisiwa. ¹¹Anamanozela a kano na mafwarizeewu khwiiphiiriwa khusala awaza etthu yonrettela Yinsa.

Othawuliwa wa anakhiyoni khumi na awiri

¹²Siikhu zaya epile Yinsa khulankha khusala alawa omwaako olompa, khwiisha osikhu wooshi eettaka anvekelaka Nluku. ¹³Noocha khuwaakhuwela anakhiyoni awe khuwaathawula khumi na awiri, atthaapo theenya khuwenkha nzina la owaaswihaapa. ¹⁴Simawu antthajiye nzina la Pheeturu, Antere ttwiiye Simawu, Tiyaaku, Yaahaya, Filiipe, Parutulumeewu, ¹⁵Matewuzhu, Tome, Tiyaaku mwaana wa Alufeeyu, na Simawu aniitthiwaaye Zelooti, ¹⁶Yuuda mwaana wa Tiyaaku, na Yuuda Eshikariyoote, otule aari weettelaaye onzinkula Yinsa.

Onozela na ovonisa wa Yinsa

¹⁷Yinsa khwiishukha vamwaako na anakhiyoni awe khweemela nshini vahali aariivo anakhiyoni awe na khuntti ya atthu a Yudeya yooshi na a Yeruzaleemu, mpakha apale a miti zawaattamela pahari, Tiiru na Sitooni. ¹⁸Atiiyeeyo yoori asiile na ovonisiwa moolwele aya, mpakha na apale aari wantipwiwaaye ti masheethwani aari ovonisiwa. ¹⁹Atthu ooshi aari otakha onsapa Yinsa mwaasa yoori waari onsaruwa owahi khusala owaavonisa ooshi.

²⁰Aphano Yinsa khulansa maasho khuweekesa anakhiyoni awe khuwooza yoori:

“Ooparikhiyiwa ti mweeyo mwiiyiye asikhini,

maana Ofwalume wa Nluku pu weenu.

²¹Ooparikhiyiwa ti mweeyo enuukholaanini jala nasaapi,

maana mwinlawa mwarupale.

Ooparikhiyiwa ti mweeyo mwinlilaaye,

maana mwinteela otheya.

²²Ooparikhiyiwa ti mweeyo, amana atthu eephiiriwaka ti mweeyo,

awiikarani, oottukhanani na khuwoonani ohifwayi

mwaasa wonlotta Mwaana wa Pinaatamu.

²³“Wakathi aya otthuupo, mwiiye woofurahi na mwitthape, maana tthuvo yenu eniiya khuluyeene pinkuuni. Maana wa nanna etthiipi, apaapa zaya na yo aawaaretteliye manapiyu.

²⁴“Ila olaanikha pu weenu mweeyo mwaamathaajiri,

maana mwapokhera phantte yenu vathi attaapha.

²⁵Olaanikha pu weenu mweeyo ziwiitaaleliyeenini vitthu zoojiwa,

maana mwinteela okholiwa jala.

Olaanikha pu weenu mweeyo mwiriina furaha leelo eti,

maana mwinteela ojiliza na olila.

²⁶Olaanikha pu weenu mweeyo

amana mwittottopeliwaka pi atthu ooshi,

maana apaapa zaya aawaaretteliye etthiipo manapiyu oojipanka.

Owaapheta maatuwi

²⁷“Nakataalikha mweeyo mwinikisiilaaye, kiniwuuzani yoori mwiwaaphete maatuwi enu, mwiwaarettele saana apale aniiphiiriwaaye ti mweeyo. ²⁸Mwiwaaparikhiye apale anuulaanaanini na mwiwaalompele apale anuurettelaanini zootakhala. ²⁹Nkhama ntthu oopwakula nlaku limote, na ntthi likina ontheteezele. Nkhama ntthu oovula ajapi yawo, ohinkhattaze othuula hempe yawo. ³⁰Omwinkhe wakhula otule anuuvekelaaye, nkhama ntthu athuula etile yiiyiye yawo, ohinkhanyarele wuurutisela. ³¹Epile mweeyo zinuutuvelaanini oretteliwa pi azeenu, na mweeyo mwiwaarettele azeenu etthiipo.

³²“Amana mwiwaaphetaka apale anuuphetaanini paasi, fwayita ni mwineekeselaaye mmakhono wa Nluku? Hatha anatwampi atthaapo aniwaapheta apale na yo aniwaaphetaaye. ³³Amana mwiwaarettelaka saana apale na yo anuurettelaanini saana paasi, fwayita ni mwinteelaaye wiiyana? Hatha anatwampi atthaapo na yo anretta etthiipo. ³⁴Amana mwiweepaashaka paasi apale mwinkhupalaaye wuurutiselani, fwayita ni mwinteelaaye wiiyana? Hatha anatwampi atthaapo aniipaashana aroromelaka orutiselana. ³⁵Mwiwaaphete maatuwi enu, mwiwaarettele zooshapweya, mwiweepaashe mwiheekeselaka wuurutiselani. Toowo tthuvo yenu enttela wiiya khuluyeene na mwinttela wiiya aana a Nwulu wa Pinkuuni, maana Nluku nkemaani hatha khwa apale ahininshukhurwaaye na apale ootakhala rooho. ³⁶Mwiiye a huruma nkhama etthiipi Papeenu wa pinkuuni naye eeyiye wa huruma.

³⁷“Mwihimphuke nzeenu yoori mwihiphukiwe; mwihinhukhumu nzeenu yoori mwihihukhumwiwe; mwinswaamihi nzeenu yoori mwiswaamihiwe. ³⁸Mwiwenkhe azeenu na Nluku ontta owinkhani: na mphimo khwaamili, wookhitteleliwa na wawiitaala mpakha wiittikha. Maana mphimo otthuupo mwimphimanaaye mwinteela ophimelaniwa otthuupo.”

³⁹Yinsa khulupa nlikaniso mmote araka: “Ntthu woohooni khaninlokoza ntthu woohooni nzaawe, oowiiri antta okwela nliphotto. ⁴⁰Nakhiyoni khaninziti mwaaliimu awe, ila wakhula otule ansomiseyaaye saana oniiya nkhama mwaaliimu awe.

⁴¹“Mwaasa aya niini woonaka etutu eriiye mmaasho wa ttwiiyo, ila khuhooni lipikhi liriiye mmaasho mwawo? ⁴²Enrettikhana toovi weeyo omuuza nzaawo yoori: ‘Ttwiiyaku, nkankaani kuulaze etutu eto eriiye mmaasho mwawo’, na khupe weeyo ohiwahaka woona lipikhi liriiye mmaasho mwawo? Naafikhi! Olazemo khapula lipikhi liriiye mmaasho mwawo, toowo ontta woona saana, khuwahi olazamo etutu eriiye mmaasho wa nzaawo.

Muutthi na mishumo zaya

⁴³“Khawiivo muutthi wooshapweya oniimaaye mishumo zootakhala, wala muutthi wootakhala oniimaaye mishumo zooshapweya. ⁴⁴Maana wakhula muutthi onjuweya mwaasa wa mishumo zaya. Mmiiwa khinshumiwamo mishumo za muuyu, mmutthalala khanshumiwamo wuuva. ⁴⁵Ntthu wookemaani, nroho mwawe onsarulamo vitthu zooshapweya, na ntthu wootakhala rooho, nroho mwawe onsarulamo vitthu zootakhala, maana milomo zawe zinttakhula etthiipile ziitaliyeeyo nroho mwawe.

⁴⁶“Mwinkikhuwelelani yoori ‘Mbwana, Mbwana’ mwihirettaka epile kiniwuuzaanini? ⁴⁷Miiyo kinuuthoonyezani ntthu anlikananaaye otule ansiilaaye mattakhuzi aka na khushututela. ⁴⁸Onlikanana ntthu anjekaaye nyuupa yawe khuthipa khwiichisa saaneene khuttha vanchina la mawe woozivalavo. Khuta nnyeri khupiya nyuupa etile ila khuhisakhinyeyi mwaasa woozivalisiwa. ⁴⁹Ila otule ansiilaaye mattakhuzi aka khuhishututeli onlikanana ntthu ajekiyeeyo nyuupa yawe va nshaka woohizivalivo. Khuta nnyeri khupiya nyuupa etile nasaapiru khukwa, khupwecheya khuhisali hatha etthu.”

Amini ya namalokozela wa anajanka

¹Eeshiyeevo mattakhuzi apale aari owoozaaye atthu, Yinsa khulawa sitati ya Kafwaranaawu. ²Ottuukho aariwo namalokozela mmote wa anajanka wa rooma, aariina karumeya awe wompheta aari olwaaziwaaye khusala asaleela ofwa. ³Wakathi namalokozela wa anajanka otule asiiliyeevo monkoni wa Yinsa, khuwaaperekha attunkhulu akina a mayaahuuti yoori anvekele Yinsa ate anvonise karumeya awe. ⁴Yo nonsikana khunvekela wookhanyarelavo araka: “Mwinyi oto onsuhi waawuniwa, ⁵mwaasa yoori apheta khapila yeetthu na anijekela sinakooka.”

⁶Aphano Yinsa khulankha khusala alawa vamote na yo, asaleelaka ofiya, namalokozela otule khuwaaruma ashirikha awe olawa omuuza yoori: “Mbwana, ohijantipu, miiyo akinsuhi wuupokherela vaje vaka. ⁷Tiito miiyo kinoona yoori akinsuhi okutthanana weeyo, ila olupe nttakhuzi limote paasi, karumeya aka ontta ovona. ⁸Maana na miiyo ki ntthu kiriiye vathi wa ofwalume na ki nlokozi wa anajanka. Kinimuuza mmote yoori: ‘Olawe,’ khulawa; khumuuza nkina yoori: ‘Ote,’ ye khuta. Kinimuuza karumeya aka yoori: ‘Orette khata,’ ye khuretta.” ⁹Yinsa noosiila epo, khwiiya wooshanka, khuzukuluwa khuwooza atthu apale aari omperekhaaye yoori: “Hatha Ezirayiilu ottuukho akooneeniwo amini nkhama eti.” ¹⁰Ashirikha apale aarumiweeyo khurutela owawe namalokozela otule, khunsikana karumeya otule avoniye.

Yinsa oninsisimula mwaana wa nunu mmote woofweliwa ti mannawe

¹¹Mmeesho mwaya Yinsa khulankha khusala alawa sitati ya Nayiimu, anakhiyoni awe na khuntti ya atthu awaatta khusala enlotta. ¹²Asaleelaka ofiya vanlako wa sitati etile, khusaruwa atthu aari weettelaaye ozikha. Otule aari weettelaaye ozikhiwa aari mwaana mmote paasi wa nunu woofweliwa ti mannawe; atthu awaatta a nsitati mphule aari olawa vamote na ye. ¹³Wakathi Mbwana Yinsa amooniyeevo nunu otule, khumoonela huruma, khunkhuwela khumuuza yoori: “Ohilile!”

¹⁴Aphano khuwaasusela khusapa janaayiza, apale aathuuliyeeyo khweemela. Yinsa khulupa araka: “Shaapu! Miiyo kinuuruma yoori olankhe!” ¹⁵Shaapu otule khulankha khwiikhala khusala attakhula; Yinsa khumwinkha mamaawe.

¹⁶Atthu ooshi khwiiya awoova khunsifu Nluku araka: “Napiyu nwulu aniteela!” Na “Nluku aateeliye owuusuru atthu awe!” ¹⁷Hapari epile za Yinsa khumwazeyela Yudeya yooshi mpakha miti epile zaattamananiyeeyo.

Yaahaya oniwaaruma anakhiyoni awe wa Yinsa

¹⁸Yaahaya khuuziwa pi anakhiyoni awe vitthu epile zooshi. Ye khuwaakhuwela awiri, ¹⁹khuwaaruma yoori alawe amuuzele Mbwana yoori: “Weeyo ti otu naari onwejaaye ama ninweje nkina?”

²⁰Yo khulawa mpakha ottuukhule aariiwo Yinsa khumuuza yoori: “Neetta orumiwa ti Yaahaya yoori nite niwuuzele nkhama otule naari onwejaaye ti weeyo, ama nivire ninwejaka nkina?” ²¹Wakathi otthuupule Yinsa khuwaavonisa atthu awaatta aarina vitthu zootakhala, marati awoopisa, na masheethwani, na khuwaafunula maasho atthu awaatta ahaari woonaaye. ²²Yinsa khuwaajipu araka: “Mwiruti mwamuuze Yaahaya epi mwinsiilaaye na mwinoonaaye: ananhooni anoona, anamarakala aneettetta, anamaaharaja antta otwahareshiwa, ananhisiili ansiila, ananfwa ansisimuwa, na hapari zooshapweya antafusireliwa asikhini. ²³Wooparikhiyiwa ti otule ahinkwakwattuwaaye mwaasa wa miiyo.”

²⁴Anakhiyoni a Yaahaya noolaavo, Yinsa khusala awooza atthu monkoni wa Yaahaya yoori: “N’yaara mweetteliye woona niini? Tteketthe yiinisiwaka ti pheevo? ²⁵Ama moona niini? Mwinyi mmote awaliye kuwo zooshapweya? Moone, apale anwalaaye kuwo zootafikhana aniiya nraaha na aniikhala mmanyupa wa afwalume. ²⁶Nka kuuzeni, mweetteliye woona niini? Napiyu? Wekhweele, miiyo kiniwuuzani yoori anziti napiyu. ²⁷Otu ti otule yaatikhiweeyo monkoni wa ye yoori:

“ ‘Moone, kinlawa kamperekhe karumeya aka omaasho wawo

yoori atthenkeze tarikhi yawo.’

²⁸“Miiyo kiniwuuzani yoori vakatthi wa apale avokoliweeyo pi aakha, khina mmote anzitiyeeyo Yaahaya; ila otule woopushuwa muufwalume wa Nluku, nwulweene zayita ye.”

²⁹Atthu ooshi mpakha anamariphisa lumpuru noosiila mattakhuzi a Yinsa. Yo khukhupalela yoori tarikhi ya Nluku shariya, paata ya woosiwa ti Yaahaya. ³⁰Ila mafwarizeewu na anamanozela a kano khukhijilela matakhelo a Nluku khwa yo, khuhoosiwi ti Yaahaya.

³¹“Anaatamu apa a leelo eti kiwaalattisane niini? Yinsa khurutela theenya yoori, wala alattanana niini? ³²Alattanana khuntti ya asimaana eekhaliye vaparasa akhuwelanaka araka:

“ ‘Fweeyo noovumiselani phivi za vaharusi, mweeyo khuhiini;

khwiipa liipo la huzuni, ila mweeyo khuhilili.’

³³Khuta Yaahaya Namoosa woofuka na ahinnywaaye viinyu, mweeyo mwinri: ‘Ye onaaye masheethwani.’ ³⁴Ata Mwaana wa Pinaatamu onja na onnywa, mweeyo mwinri: ‘Mmoone nsokho otu! Namanywa, nshirikha wa anamariphisa lumpuru na anatwampi!’ ³⁵Apale anlottaaye ojuwa wa Nluku, anthoonyeza yoori pi wookhweele.”

Natwampi aavaaziyeeyo mafuttha moolu a Yinsa

³⁶Mfwarizeewu mmote anvekeliye Yinsa yoori alawe aje owawe. Noofiya Yinsa khuvira nnyupa khwiikhala yoori aje. ³⁷Muukha mmote natwampi wa sitati ethiitile, noojuwa yoori Yinsa ontta oja wa mfwarizeewu, khuthuula suupha yawe ya mafuttha oonukhela. ³⁸Khulawa khweemela onyoko wa Yinsa nshini wa moolu awe, khusala alila. Mishozi zawe khusala zittonkela moolu a Yinsa. Khusala akukuttha na nyuuli zawe na opejari moolu a Yinsa avaazaka mafuttha oonukhela.

³⁹Aphano mfwarizeewu otule nawoona vitthu epile khusala alupa nroho mwawe araka: “Otu eriwaka aari napiyu, eetta ojuwa yoori mwanankha otu aninsapaaye natwampi.”

⁴⁰Yinsa khumuuza Simawu yoori: “Kintakha owuuza etthu.”

Simawu khujipu yoori: “Kuuzeni mwaaliimu.”

⁴¹Yinsa khumuuza yoori: “Atthu awiri eetta wiiliwa nzurukhu ti mwinyi mmote aari wiipaashisakaaye, otu mmote aari wiiliwa miiya thaanu, otu nkina aari wiiliwa hamusiini. ⁴²Ila oowiiri khuhiivo mmote aawahiyeeyo onripha, ye khuwaaswaamihi oowiiri. Atthu apa awiri amphetachiyeeyo ti tuuvi?”

⁴³Simawu khujipu araka: “Kinoona yoori ti otule aswaamihiweeyo wa waattavo.”

Yinsa khumuuza yoori: “Walikanisa.”

⁴⁴Ye khumuuza Simawu anthoonyezaka muukha otule araka: “Onimoona mwanankha otu? Miiyo kata vaje vawo apha khuhikinkhi hatha maati yoori koose moolu aka, ila ye oosa moolu aka na mishozi zawe khukukuttha na nyuuli zawe. ⁴⁵Khukipokhereleeni na peeju, ila ye khalikheleleeni opejari moolu aka. ⁴⁶Khukivaazeeni mafuttha oonukhela mmwishwa mwaka, ila otu avaaza mafuttha moolu aka. ⁴⁷Tiito kiniwuuzaaye yoori twampi zawe epile zawaatta ariinaazo zaswaamihiwa; mwaasa woophetacha wawe. Ila otule aswaamihiweeyo vattitthiiru, opheta wawe vattitthiiru.”

⁴⁸Aphano Yinsa khumuuza mwanankha otule yoori: “Twampi zawo zaswaamihiwa.”

⁴⁹Apale akharipwishiweeyo khusala oozelana yoori: “Otu paani anwahaaye oswaamihi twampi za atthu?”

⁵⁰Ila Yinsa khumuuza muukha otule yoori: “Waamini wawo wa wuusuru; olawe na heeri.”

Aakha aari onrumeyelaaye Yinsa

¹Paata ya toole, Yinsa khusala eettetta sitati khwa sitati na nti khwa nti, alaleyaka hapari zooshapweya za ofwalume wa Nluku. Anakhiyoni awe apale khumi na awiri aari vamote na ye, ²na theenya aakha akinoko aya apale aavonisiweeyo masheethwani na marati: Mariyamu aari wiitthiwaaye Mataleena, otule ansaruwiyeeyo masheethwani sapa, ³Zhuwaana muukha wa Kuuza, nsatoro wa vaje wa Herooti, Suzaana na aakha akinoko aari ontthanttaaye Yinsa na vitthu zaya vamote na anakhiyoni awe.

Nlikaniso wa namazala

⁴Phantte zawaatta za miti aari otawo atthu enkeene oteela okutthanana Yinsa. Aphano ye khulupa nlikaniso mmote araka: ⁵“Aarivo namalima aalawiye ozala peewu zawe. Amwazaka, kinoko khukwela nshini wa tarikhi, khuluwatthiwa na khujiwa pi anyannyi. ⁶Peewu kinoko khukwela vahali aariivo mawe, khoottha ila khuuma mwaasa woohiivo maati. ⁷Peewu kinoko khukwela va miiwa, khuwula vamote na miiwa, khurapeliwa pi miiwa. ⁸Kiina khukwela vanshaka wooshapweya, khuwula khwiima mishumo miiya wakhula mmote.” Alupiyeevo toole, ye khukhuwelela araka: “Ariina mashiilo ti asiile!”

⁹Anakhiyoni awe khumuuzela maana a nlikaniso opule. ¹⁰Yinsa khuwaajipu yoori: “Mweeyo mwenkhiwa ojuwa siiri za ofwalume wa Nluku, ila akinoko kiniwuuza na nlikaniso yoori

“ ‘oonaka ahijuwe,

asiilaka ehiweeleye.’ ”

Yinsa oneeleza maana a nlikaniso wa namazala

¹¹Maana a nlikaniso opu pi toono: Peewu eti enthoonyeza nttakhuzi la Nluku. ¹²Peewu zaakweliiye ntarikhi, zinlikanisaniwa atthu apale ansiilaaye nttakhuzi, ila sheethwani khulazavo varoho vaya yoori ahikhupali na ahipatthe wuusurukha. ¹³Peewu epi zaakweliiye va mawe, zinlikanisaniwa atthu apale ansiilaaye nttakhuzi la Nluku khupokherela na furaha. Ila mwaasa woohiina mitathaari, wakathi vattitthiiru nawootootiwa ti sheethwani anlikha waamini waya. ¹⁴Peewu epi zaakweliiye va miiwa, zinlikanisaniwa atthu apale ansiilaaye, ila mwaasa wooshukulikhela opattha tuvela na haali za meekhazi, yo waamini waya vattiitthi-vattiitthi onzima, ahifiyelelaka wiima mishumo. ¹⁵Peewu epi zaakweliiye vanshaka wooshapweya, zinlikanisaniwa atthu apale ansiilaaye nttakhuzi la Nluku khuthokorela nroho mwaya khushututela na ovilela, apo aniima mishumo zooshapweya.

Nlikaniso wa khantteya

¹⁶Khaavo ankhozaaye khantteya khufinikha na yuuku wala khupweha nlivuku. Entthiiwa vahali wawooneyavo yoori esala ewaamwasikhela apale anviraaye nnyupa. ¹⁷Maana khayiivo envithiwaaye ehinttelaaye osaruwela oje, zooshi epile za siiri enttela wiiya payana. ¹⁸Nakataalikha, mwiiyane phoole khwa nanna yoosiila. Otule ariina ontta weekezeliwa, ila otule ahina hatha na etile anuupuwelelaaye wiiyana ontta onyakanyiwa.

Mamaawe na attwiize Yinsa

¹⁹Mamaawe na attwiize Yinsa khulankha yoori amoone, ila khuhisala ewaheya omwaattama mwaasa yoori aarivo atthu awaatta. ²⁰Khuuziwa Yinsa yoori: “Vaje apho atavo mamaawo na attwiizo antakha owoona.”

²¹Ye khuwaajipu araka: “Maama na attwiizaku pi apale ansiilaaye Nttakhuzi la Nluku khushututela.”

Yinsa onnyamaza pheevo

²²Siikhu moote, Yinsa khuwooza anakhiyoni awe yoori: “Nlaweni kaapu kiina ya pahari.” Khupakhira nkalawa khusala alawa. ²³Aphano eettaka olawa Yinsa khusala alala, khupuwa pheevo yawoopisa kalawa khusala esaleela ozama. ²⁴Anakhiyoni apale khusala anlansa Yinsa araka: “Mwaaliimu, Mwaaliimu nasaleela ozama!”

Yinsa khulankha khunyamaza pheevo na mawipi, khupuwa nreke. ²⁵Nawiisha khuwoozela anakhiyoni awe yoori: “Waamini weenu ori vayi?”

Yo khwiiya awoova na ooshanka khusala oozelana, araka: “Otu aya paani anrumaaye pheevo na mawipi khunshututela?”

Ovonisiwa wa nlume mmote aariina masheethwani

²⁶Yinsa na anakhiyoni awe khulokhela Kerazeenu, kaapu ya Kalileya. ²⁷Wakathi Yinsa apakhuwiyeevo nkalawa, khuta nlume mmote wa sitati ethiitile aariina masheethwani. Ye eekhaliye siikhu zawaatta ahiwalaka kuwo na ahiikhalaka vaje, ila nvilalo. ²⁸Noomoona Yinsa khunyakula, khunkokhorela khukhuwa araka: “Onikitakhelani, Yinsa mwaana wa Nluku Nwulu wa Pinkuuni? Kinuuvekela yoori ohikoopopise.” ²⁹Ye aalupiye mattakhuzi apa mwaasa yoori Yinsa aarumiye onsaruwa masheethwani apale aari onwuti swaafu zawaatta. Hatha nkhama eettiye ofukaniwa makwinjili khwinkhiwa atthu oomweekesela, eetta ottumula noothuuliwa pi masheethwani nonlawana n’yaara.

³⁰Aphano Yinsa khumuuzela yoori: “Weeyo, nzina lawo o paani?” Ye khujipu yoori: “Miiyo nzina laka ki omathi,” mwaasa yoori ntthu otule aamweettiye masheethwani awaatta mmwiili mwawe. ³¹Khusala anvekela Yinsa yoori ahiikarele nkhilintti.

³²Liphanko liwululene la kuluwe laari oshukisiwa vamwaako, masheethwani apale khunvekela ruhusa Yinsa yoori eette nkuluwe, ye khukhupalela. ³³Wakathi aliiyeemo masheethwani apale mmwiili wa nlume otule khweetta mmwiili wa kuluwe, aphano kuluwe khusala zitthira ziishukhelaka va ntthatta khutupweela.

³⁴Apale aari oshukisaaye kuluwe epile nawoona vitthu epile zaarettikhaniyeezo, khutthira khulawa khulupa hapari epile nsitati mphule na miti mikinoko. ³⁵Khulawa atthu awaatta olawa woona vitthu epile zaarettikhaniyeezo. Wakathi amwaattamiyeeyo Yinsa, khumoona nlume otule ansaruwiyeeyo masheethwani eekhaliye nshini wa moolu a Yinsa awaliye kuwo zawe na atthiiyemo akhili, yo khwiiya awoova. ³⁶Apale ooniyeeyo khuwooza atthu nanna aavonisiweezo mwinyi otule aariina masheethwani. ³⁷Aphano atthu ooshi apale a nti opule wa Kerazeenu khunvekela Yinsa yoori aleemo mmuti mwaya mwaasa wa woova channu. Ye khuwela nkalawa khulaawo.

³⁸Nlume otule ansaruwiyeeyo masheethwani khusala anvekela Yinsa amuuzaka yoori anlikhe alawe vamote na ye. Ila Yinsa khumuuza olawa araka: ³⁹“Orutele owawo wawooze atthu etile Nluku ooretteliyeeyo.” Nlume otule khulankha khusala alawa owawe alaleyaka sitati yooshi etile aaretteliweeyo ti Yinsa.

Owahi wa Yinsa khwa marati na ofwa

⁴⁰Wakathi Yinsa arutiyeevo, khuntti khuluyeene ya atthu ooshi aari onwejaaye khumpwekherela na furaha. ⁴¹Aphano mwinyi mmote aari wiitthiwaaye Yaayiru, namalokozela mmote wa sinakooka, khuta khunkokhorela Yinsa nshini wa moolu awe anvekelaka yoori alawe owawe, ⁴²mwaasa yoori mwanawe aariina mmote paasi wa nyaakha khumi na miwiri aari osaleela ofwa.

Yinsa alawaka, atthu khusala aphunyana. ⁴³Attaaphale khutavo muukha mmote aariina nyaakha khumi na miwiri ari nlwele, yaari omwiittikhaaye taamu wakhula siikhu. Khuharipu nzurukhu awe wooshi aariina khwa akulukhala, ila khuhiivo mmote aawahiyeeyo onvonisa. ⁴⁴Ye khuta mpakha onyoko wa Yinsa khusapa ajapi yawe vattitthiiru, omuuta otthuupule khulikha wiittikha taamu etile.

⁴⁵Yinsa khuuzela yoori: “Paani akisapiyeeyo?”

Atthu ooshi khukhana, Pheeturu khulupa yoori: “Mbwana, atthu pi awaatta pi atthaapo anuuphunyaaye na wuusukhuma!”

⁴⁶Ila Yinsa khusala akhanyarela yoori: “Nna akisapiyeeyo keetta woona okisaruwiye owahi.”

⁴⁷Aphano muukha otule ooniyeevo yoori khaari owahi ojivitha, khuta eettaka othukumela khunkokhorela Yinsa vakatthi wa atthu ooshi khulupa nanna ansapiyeezo na avoniyeezo nasaapiru. ⁴⁸Attaaphale Yinsa khumuuza yoori: “Mwanaka, amini yawo yoovonisa! Olawe na heeri.”

⁴⁹Wakathi nalelo Yinsa eettaka ottakhula, khuta karumeya wa owawe Yaayiru, namalokozela wa nsinakooka, khumuuza yoori: “Mwanawo afwa. Ohimwantipu theenya Mwanliimu.”

⁵⁰Yinsa noosiila khumuuza Yaayiru yoori: “Ohoove, okhupali paasi. Mwanawo ontta wiiya nkumi.”

⁵¹Noofiya owawe Yaayiru, Yinsa khuhinlikhi hatha ntthu ovira nnyupa mphule, woohiiyi Pheeturu, Yaahaya, Tiyaaku, papaawe mwaana na mamaawe. ⁵²Atthu ooshi asaliye vaje eettaka olila, Yinsa khuwooza yoori: “Mwihilile! Otu khafweeni, ontta olala.”

⁵³Yo khusala antheya Yinsa mwaasa wa ojuwa yoori afwa. ⁵⁴Ye khuntheteezela nkhono awe khumuuza yoori: “Mwaari, lankha!” ⁵⁵Nafusi yawe khunrutela khulankha nasaapiru. Aphano Yinsa khumuuza papaawe yoori amwinkhe etthu yoojiwa. ⁵⁶Papaawe na mamaawe khwiiya ooshanka, ila Yinsa khuwooza yoori mwihimuuze hatha ntthu vitthu epi zirettikhaniyeezo.

Yinsa oniwaaruma anakhiyoni awe khumi na awiri

¹Yinsa khuwaakusanya anakhiyoni awe khumi na awiri khuwenkha owahi na ofwalume wa wiikara masheethwani na wa ovonisa. ²Khuwaaruma olawa olaleya ofwalume wa Nluku na owaavonisa alwele. ³Khuwooza yoori: “Mwilawaka mwihithuule hatha etthu, wala pakhora, wala nfukho, wala etthu yoojiwa, wala nzurukhu, wala ajapi ya phiiri. ⁴Nyuupa ethiito mwinttelaaye opokhereliwa, mwimake attaapho mpakha olaavo. ⁵Amana mwihipokhereliwi saana, mwilaakamo nsitati mwaya mpho mwitathe lifufu la mmoolu mweenu khwa oshaahiti waya yo.” ⁶Aphano yo khulankha khusala alawa aviraka mmamuti alaleyaka hapari zooshapweya na awaavonisaka alwele wakhula phantte.

Mishikili za Herooti

⁷Herooti Antiipa khusiila vitthu zaari orettikhanaazo ye khwiiya wootikinisiwa, mwaasa wa atthu akina aari olupa yoori Yaahaya ti asisimuwiye muufwa. ⁸Akina aari olupa yoori Aliyaasi ti awaapuweleliye, akina aari olupa yoori oto napiyu mmote wa raku eetta osisimuwa. ⁹Ila Herooti khulupa yoori: “Yaahaya, mwinyi kinshijiyeeyo, khi oto kininsiilaaye alupiwaka na anrettaaye vitthu epo ti paani?” Khusala atakha channu yoori amoone.

Yinsa oninkha khuntti ya atthu etthu yoojiwa

¹⁰Maaswihaapa nooruti khumuuza Yinsa zooshi aarettiyeezo. Aphano, ye khuwaathuula khusala alawa sitati moote yaari wiitthiwaaye Betezayiita. ¹¹Ila khuntti ya atthu noojuwa khusala anlotta. Ye khuwaapokherela khusala awooza monkoni wa ofwalume wa Nluku na awaavonisaka apale aari ohithajiyaaye ovonisiwa.

¹²Njuwa looveva, apale khumi na awiri khumwaattama Yinsa khumuuza yoori: “Owooze atthu apa alawe mmashapa aattameliyeeyo na mmiti mpho amake eekesaka etthu yoojiwa, maana mphu niriimo n’yaara.” ¹³Ye khuwaajipu yoori: “Mweeyo ena mwiwenkhe etthu yoojiwa.” Yo khunjipu araka: “Ninaaye phaawu thaanu na swi piiri paasi, woohiiyi olawa wuuzanya etthu yoojiwa, khiniwaafiyela atthu ooshi apa.” ¹⁴Alume aariivo aari alufu thaanu, ila ye khuwooza anakhiyoni awe yoori: “Mwiweekhaze atthu hamusiini wakhula khuntti.” ¹⁵Yo khuretta etthiipo khuweekhaza ooshi. ¹⁶Khuthuula phaawu thaanu na swi epile piiri khweekesa otulu, khuparikhiya, khumeya khuwenkha anakhiyoni awe yoori awaawanyeze atthu apale. ¹⁷Ooshi khuja khurupala, anakhiyoni khulokotthela khelenke khumi na piiri epile zasaliyeeyo.

Otukhuru wa Pheeturu

¹⁸Siikhu moote, Yinsa eetta olompa otthwe, anakhiyoni awe ari kharipu, nawiisha khuwoozela yoori: “Atthu anri miiyo ki paani?”

¹⁹Yo khunjipu yoori: “Akina anri weeyo o Yaahaya Namoosa, akina Aliyaasi, akina theenya anlupa yoori weeyo o napiyu mmote wa raku weetta osisimuwa.”

²⁰“Khi mweeyo mwinri ki paani?” Pheeturu khujipu araka: “Weeyo o Al-Masiihu wa Nluku.”

²¹Yinsa khuwaahirimiza yoori vitthu epile ahimuuze hatha ntthu. ²²Khuwooza araka: “Mwaana wa Pinaatamu aarina ya ohoochiwa pi vitthu zawaatta na okatthaliwa pi attunkhulu a tiini na mahaakhimu a tiini mpakha anamanozela a kano, onlawa ooliiwe. Siikhu ya ttaatthu asisimuwe.”

²³Khuvira awoozaka atthu ooshi yoori: “Nkhama ntthu atakha okilotta miiyo, ona yoojikatthala mweenyewe, khuvikela nsalapa awe wakhula siikhu khusala akilotta. ²⁴Amana ntthu atakha wuusuru ohaayi awe, ontta ompwetheya; ila otule onimpwetheyaaye ohaayi awe mwaasa wa miiyo, oto onteela wuusurukha. ²⁵Nakataalikha, ena fwayita ni ntthu opattha fwayita ya vitthu zooshi za olumwenku, ila khujipwetecha ama khujitapanya mweenyewe ru? ²⁶Otule anikoonelaaye haaya miiyo na mattakhuzi aka, na Mwaana wa Pinaatamu onteela omoonela haaya amana ataaka nsiifwa mwawe na nsiifwa wa Paapa na malayikha ttakatthiifu. ²⁷Kiniwuuzani khweele yoori, awaapho apha akina ahinteelaaye ofwa mpakha oone Ofwalume wa Nluku.”

Ozukulisiwa wa Yinsa

²⁸Ziviriyeevo siikhu naane paata yoolupa mattakhuzi apale, Yinsa khunthuula Pheeturu, Yaahaya na Tiyaaku, ye khuwela vamwaako olawa olompa. ²⁹Alompaka etthiipile omaasho wawe khuzukuluwawo, kuwo zawe khwiiya zoolakala na zawaara nkhama ozerima. ³⁰Nasaapiru khumpuwelela atthu awiri khusala attakhulana, aari Munsa na Aliyaasi. ³¹Aatiiye nnuuru ya pinkuuni khusala amuuza Yinsa khwa nanna aari weettelaazo ohoowa na ofwa Yeruzaleemu nkhama etthiipo Nluku asharutheliyeeyo.

³²Pheeturu na ashirikha awe aarettiye eettaka olala, wakathi asisimuwiyeevo khoona nuuru ya Yinsa na atthu awiri ari vamote na ye. ³³Atthu apale eettaka olawa Pheeturu khumuuza Yinsa yoori: “Mwaaliimu, ti yooshapweya wiikhala attaapha! Nintta ojeka mapantta mattatthu, limote lawo, limote la Munsa, na limote la Aliyaasi.” Pheeturu khaari ojuwa etthu aari ottakhulaaye.

³⁴Attakhulaka etthiipile, khuta liwiku khuwaafinikha, anakhiyoni apale khwiiya awoova wakathi ooniyeevo liwiku liwaafinikhaka atthu apale. ³⁵Mmawiku mphule khupuwamo huula yaari oraaye: “Otu Mwanaka kinthawuliyeeyo; mwinsiileze etile anlupaaye.” ³⁶Paata yoonyamala huula etile Yinsa khusalavo otthwe. Siikhu zaya epile anakhiyoni apale khwiiya oonyamala, khuhimuuzi hatha ntthu vitthu epile ooniyeezo.

Ovonisiwa wa shaapu aariina sheethwani

³⁷Mmeesho mwaya nawiishukha vamwaako, khuta khuntti ya atthu awaatta oteela okutthanana Yinsa. ³⁸Vakatthi wa khuntti ya atthu atthaapale khupuwavo mwinyi aari okhuwaaye araka: “Mwaaliimu, kinuuvekela yoori wamoone mwanaka, maana kiina mmote othuuto paasi. ³⁹Sheethwani eetta onvelavelisa khusala anthukumelisa, onnyakulisa na onkwisela vathi na olaza maphovu, khaninlikha ahinvulaliseeni. ⁴⁰Kaawaavekeliye anakhiyoni awo yoori amwiikare sheethwani aya oto, ila yo khumoojeela.”

⁴¹Yinsa khujipu araka: “Oo! Atthu oohaamini na ootakhala rooho! Mpakha lini kiiyaka vamote na mweeyo na kuuvilelakani? Ontiise apha mwanawo aya oto.”

⁴²Alawaniwaka etthiipile, sheethwani khunkwisela vathi khusala anthukumelisa, Yinsa khumwiikara sheethwani khuvona mwaana otule, khumwinkha papaawe. ⁴³Atthu ooshi khwiiya ooshanka mwaasa wa owahi wa Nluku.

Yo aashankeliye vitthu epile aari orettaazo Yinsa, ye khuwooza anakhiyoni awe yoori: ⁴⁴“Mwisiileze saana mattakhuzi apa kiniwuuzaanini: Mwaana wa Pinaatamu onttela winkheleliwa mmakhono wa anaatamu.” ⁴⁵Ila yo khaweeleyiye maana a mattakhuzi aya apale mwaasa yoori aari oovitheya yoori ahiweeleye na khusala oova omuuzela.

Nttunkhulu muufwalume wa pinkuuni

⁴⁶Khupuwa onyakulisana vakatthi wa anakhiyoni apale eekesaka onjuwa paani eeyiyeeyo nwulu. ⁴⁷Ila Yinsa khujuwa etthu aari wuupuwelaaye yo, khunthuula mwaana khumweemesa omaasho wawe. ⁴⁸Aphano khuwooza anakhiyoni awe yoori: “Otule animpokherelaaye mwaana otu khwa nzina laka, onikipokherela miiyo; otule anikipokherelaaye, onimpokherela otule akirumiyeeyo. Otule anjipushuwisaaye vakatthi venu mooshi, nttunkhulu tu othuuto.”

⁴⁹Yaahaya khulupa yoori: “Mwaaliimu, namoona ntthu aniikaraaye masheethwani khwa nzina lenu. Fweeyo khunkhattaza mwaasa woohiiyi wa khuntti yeetthu.”

⁵⁰Yinsa khuwooza yoori: “Mwihikhattaze. Maana otule ahinuumananaaye mweeyo ori phantte yenu.”

Asamariiya aninkatthala Yinsa

⁵¹Osaleelaka ofiya wakathi wa Yinsa orutela pinkuuni, khujilakelela weetta sitati ya Yeruzaleemu. ⁵²Khuwaalokozisa a karumeya awe, yo alawaka khusapuwa nti wa Samariiya yoori amweekesele puuro yoomakavo. ⁵³Ila atthu a nti wa Samariiya khuhimpokhereli, maana aajuwiye yoori eetta ovira eettaka Yeruzaleemu. ⁵⁴Tiyaaku na Yaahaya nawoona vitthu epile khumuuza Yinsa yoori: “Mbwana, ontakha yoori nirume moottho wa pinkuuni owaalukuze?” ⁵⁵Ila Yinsa khuzukuluwa khuwaamaruwela. ⁵⁶Aphano khulankha khusala alawa nti nkina.

Monkoni wa apale aninlottaaye Yinsa

⁵⁷Eettaka olawa ntarikhi khupuwa ntthu mmote khumuuza yoori: “Kintta wuulotta wakhula vahali oneettaavo.”

⁵⁸Yinsa khunjipu araka: “Ananthala anaaye maphotto aya, anyannyi anaaye vijaaro zaya, ila Mwaana wa Pinaatamu khana vahali woovumulisavo eeshwa yawe.”

⁵⁹Yinsa khumuuza ntthu nkina yoori: “Okilotte.”

Ye khujipu araka: “Mbwana, okilikhe khapula kilawe kanzikhe paapa.”

⁶⁰Yinsa khumuuza yoori: “Owaalikhe ananfwa awaazikhe ananfwa aya; weeyo olawe walaleye Ofwalume wa Nluku.”

⁶¹Khupuwa ntthu nkina theenya khumuuza Yinsa yoori: “Kintta wuulotta Mbwana, ila okilikhe khapula kawaaleeze ajamaazaku.”

⁶²Yinsa khunjipu yoori: “Otule anraaye alimaka khusala eekesa nyuma khaneezela muufwalume wa Nluku.”

Yinsa oniwaaruma anakhiyoni awe sapiyiini na awiri

¹Paata ya toole, Mbwana khuwaathawula anakhiyoni awe akinoko sapiyiini na awiri, khuwaaruma yoori alawe awiri awiri alokoze nsitati na mmuti wooshimo mphule aari weettelaaye oviramo. ²Ye khuwooza yoori: “Wuurula nwulweene, ila anakhaazi vattitthiiru. Apho, mwinvekele Mweenyewe wuurula awaaperekhe anakhaazi a wuurula. ³Mwilawe, kinuurumani nkhama pwittipwitthi zinttaaye vakatthi wa miiji. ⁴Mwihithuule nfukho wala napampa, ama jampali, wala mwiheemele ntarikhi mwichelisa.

⁵“Wakhula nyuupa mwinfiyaaye, mwilupe khapula yoori: ‘Heeri yiiye vamote na mweeyo vaje apha.’ ⁶Amana eeyavo apho vaya ntthu wa heeri, heeri yenu enttela wiiya vamote na othuuto; amana ahiivo, entta wuurutelani. ⁷Mwiheettette nyuupa khwa nyuupa, ila mwiikhale nyuupa ethiito mwije mwinywe wakhula etile mwinttelaaye winkhiwa, maana nakhaazi eninsuhi phakari yawe.

⁸“Wakhula sitati mwinfiyaaye khupokhereliwa saana, mwije etthu yoojiwa mwinttelaaye winkhiwa. ⁹Mwiwaavonise alwele mwinttelaaye owaasikana na mwiwooze atthu yoori: ‘Ofwalume wa Nluku ori kharipu na mweeyo.’ ¹⁰Wakhula sitati mwinfiyaaye amana mwihipokhereliwi, mwileemo mwilawe ntarikhi mwiwooze yoori: ¹¹‘Lifufu la sitati yenu ntthi liniphariyeeyo mmoolu mweetthu nootathelani mwaamweenyewe. Ila mwijuwe yoori Ofwalume wa Nluku ori kharipu na mweeyo.’ ” ¹²Yinsa khuwooza theenya yoori: “Kiniwuuzani yoori siikhu yaya etile, enteela wiiyavo tthakaraka khwa Sotooma zayita sitati eto.

¹³“Phoole weeyo, Korazini! Phoole weeyo, Betezayiita! Maana eriwaka Tiiru na Sitooni zeettiye orettiwawo minjuza epi mwiretteliweeyo mweeyo, apale aniikhalaaye ottuukho nka athupwiye raku, khuwala saakhu na khujivaaza fuutha. ¹⁴Nakataalikha siikhu yaya etile, enteela wiiyavo tthakaraka Tiiru na Sitooni zayita mweeyo. ¹⁵Weeyo Kafwaranaawu onttela oweziwa mpakha pinkuuni? Wala! Apho onteela wiishukhela Ahera.

¹⁶“Otule anuusiilezaanini, onikisiileza miiyo; otule anuukatthalaanini, onikikatthala miiyo. Otule anikikatthalaaye, oninkatthala otule akirumiyeeyo.”

Oruti wa anakhiyoni sapiyiini na awiri

¹⁷Anakhiyoni apale sapiyiini na awiri khuruti ari ofurahi khulupa yoori: “Mbwana, hatha masheethwani eetta onishututela amana nittakhulaka khwa nzina lawo!”

¹⁸Yinsa khuwaajipu yoori: “Miiyo kamoona epiliisi akwaka pinkuuni nkhama ozerima. ¹⁹Mwikisiileze! Kiniwinkhani owahi wooluwattha nyookha, wenye, na owahi wooshi wonshintta atuwi; khuhuurettini hatha etthu. ²⁰Ila mwihifurahi mwaasa wa masheethwani wuushututelani, mwifurahele mazina enu waatikhiwa pinkuuni.”

²¹Wakathi otthuupule Yinsa khwiiya woofurahi khwa Rooho Ttakatthiifu, khuri: “Miiyo kinuusifu Paapa, Mbwana wa pinkuuni na vathi, maana weeyo wawaavithela vitthu epi anaakhili na asomi, na khuwaathoonyeza apa attiitthi. Khweele Paapa, ti nanna waatakhiyeezo.

²²“Zooshi kenkhiwa ti Paapa, na khaavo aninjuwaaye Mwaana woohiiyi Paapa, wala aninjuwaaye Paapa woohiiyi Mwaana, na otule Mwaana anintakhelaaye yoori anjuwe.”

²³Paata ya toole, khuwaakhuwela anakhiyoni othetekele khuwooza yoori: “Ooparikhiyiwa pi apale anoonaaye epi mwinoonaazo. ²⁴Kiniwuuzani yoori manapiyu awaatta na afwalume aari otakha woona vitthu etthiipi mwinoonaazo ila khuhooni, na aari otakha osiila epi mwinsiilaazo ila khuhisiili.”

Nsamariiya wooshapweya rooho

²⁵Nooretta toole, namanozela mmote wa kano khulankha yoori amweeze Yinsa khuri: “Mwaaliimu, kirette niini yoori kipatthe ohaayi wa mileele?”

²⁶Yinsa khumuuzela yoori: “Yaatikhiwa niini nkithaapu ya kano? Eniweeleya toovi amana osomaka?”

²⁷Ye khujipu araka: “Omphete Mbwana Nluku awo na rooho yawo yooshi, na nafusi yawo yooshi, na kuvu zawo zooshi, na akhili zawo zooshi, na omphete namwaattamanani awo nkhama etthiipo onjiphetaazo omweenyewe.”

²⁸Aphano Yinsa khumuuza yoori: “Wajipu saana. Orettaru etthiipo, ontta opattha ohaayi wa mileele.”

²⁹Ila namanozela wa kano otule aari otakha ojihakikhi khumuuzela Yinsa theenya yoori: “Namwaattamanani aka ti paani?”

³⁰Yinsa khunjipu araka: “Aarivo ntthu mmote aari olankhaaye Yeruzaleemu eettaka Yeriko, khuvithaaleliwa pi manantarawu khunyakanyiwa vitthu zawe, khuvuliwa kuwo zawe, khupiiwa khulikhiwa asaleelaka ofwa. ³¹Erettiyeevo toole, khuviravo namalokozela wa tiini mmote, noomoona ntthu otule khunwerawera. ³²Khuviravo theenya nleevi10:32 Aleevi aari awaziri a mahaakhimu a tiini. mmote, noomoona ntthu otule ari ntarikhi mphule khunwerawera. ³³Aphano khuviravo nsamariiya10:33 Asamariiya aari atthu ootarawiwa pi mayaahuuti. mmote aari weettaaye safwari zawe, noomoona ntthu otule khumoonela huruma. ³⁴Khumwaattamela khoosa makhwatta awe na mafuttha na aalikoro, khufuka na alikatuura, khunthuula khunttha va puuru vawe khunlawana onyuupa ya aletto khumwiinanela. ³⁵Mmeesho mwaya, khulaza mizurukhu miwiri za feeta aariinaaye khumwinkha mweenyewe nyuupa khumuuza yoori: ‘Omwiinanele ntthu otu mpakha wakathi kinrutaavo, wakhula etile onttelaaye oharipu khwa ye, kinteela wuuripha nooruti.’ ”

³⁶Aphano Yinsa khumuuzela namanozela wa kano otule yoori: “Khwa atthu apa attatthu paani omooniyeeyo wiiya namwaattamanani awe nampiiwa pi manantarawu?”

³⁷Ye khujipu yoori: “Ti otule amooneliyeeyo huruma.” Yinsa khumuuza yoori: “Na weeyo olawe warette etthiipo.”

Owawe Maarata na Mariyamu

³⁸Yinsa na anakhiyoni awe eetta olawa khufiya mmuti, khupuwa muukha mmote aari wiitthiwaaye Maarata, khumpwekherela.

³⁹Ye aarina ttwiiye aari wiitthiwaaye Mariyamu, eekhaliye nshini wa moolu a Mbwana Yinsa khusala asiila mattakhuzi apale aari olupaaye. ⁴⁰Ila Maarata eetta ojizukulela mwaasa wa waatta khaazi, khulawa aphale aariivo Yinsa khumuuza yoori: “Mbwana, khinuujali ttwiiyaku okilikhela khaazi yawaatta otthome? Omuuze ate akikholise!”

⁴¹Mbwana khunjipu yoori: “Weeyo Maarata washukulikha na wajikhaza na vitthu zawaatta. ⁴²Ila eti moote ti yiiyiyeeyo yootafikhana. Mariyamu athawula phantte yooshapweya ahinnyakanyeyaaye.”

Yinsa oniwaanozela anakhiyoni awe nanna yoolompa

¹Siikhu moote Yinsa eetta olompa vahali vaya apho, eeshiyeevo mmote wa anakhiyoni awe khuri: “Mbwana, oninozele olompa nkhama etthiipile Yaahaya na ye awaanozeliyeezo anakhiyoni awe.” ²Aphano, Yinsa khuwooza yoori: “Amana mwilompaka, mwisala toono:

“Papeetthu,

littitthimisiwe nzina lawo loottakatthifu.

Wiishushe Ofwalume awo.

³Oninkhe wakhula siikhu etthu yoojiwa ninihithajiyaaye.

⁴Oniswaamihi twampi zeetthu,

nkhama etthiipi na fweeyo nininswaamihaaye

wakhula otule annikosaaye.

Ohinilikhelele nizayiniwaka.”

⁵Yinsa khuwooza theenya yoori: “Nkaakanyerelani mmote wa mweeyo anlankhaaye osikhu layili, khulawa opiya nlako wa swaahipu awe araka: ‘Swaahipu, kiipaashe phaawu ttatthu, ⁶mwaasa yoori eetta ota swaahipu aka onti alankhaka safwari yawe akina hatha etthu yoomwinkha.’ ⁷Khi amana swaahipu enu oojipuni ari nnyupa mwawe araka: ‘Ohikantipu! Miiyo kafuka milako zaka, karapalela na aanaaka alala. Akinwahi olankha yoori kuupatthise phaawu.’ ⁸Weekhweele miiyo kiniwuuzani yoori, hatha nkhama khatakheeni olankha yoori oopatthise phaawu mwaasa wa oswaahipu, oniishela olankha na awinkhe zooshi onhithajiyaazo mwaasa wa nthiti.

⁹“Tiito kiniwuuzaanini yoori: Mwiveke, mwintta winkhiwa; mweekese, mwintta opattha; mwipiye, nlako mwintta ofukuleliwa. ¹⁰Maana wooshi anvekaaye oninkhiwa, aneekesaaye ompattha, ampiyaaye nlako ontta ofukuleliwa.

¹¹“Paapa ni mmote wa mweeyo anraaye mwanawe anvekeliye swi khumwinkha nyookha? ¹²Wala anvekeliye laayi khumwinkha wenye? ¹³Nkhama mweeyo, mweeya ru pure ootakhala rooho, mwinjuwa owenkha aaneenu vitthu zooshapweya, sapiseni Paapa wa pinkuuni khanziti owenkha Rooho Ttakatthiifu apale aninvekelaaye?”

Owahi wa Yinsa wa wiikara masheethwani

¹⁴Siikhu moote, Yinsa aari omwiikara sheethwani mmwiili wa mwinyi mmote woohittakhuli. Wakathi ansaruwiyeevo sheethwani otule, ye khwaaza ottakhula; apale aari omoonaaye khushanka. ¹⁵Ila atthu akina khusala alupa yoori: “Ye oniikara masheethwani na owahi wa Belezibuuli mfwalume wa masheethwani.” ¹⁶Akinoko eetta omweeza, khusala anvekela alama moote ya pinkuuni.

¹⁷Yinsa noojuwa etthu aari wuupuwelaaye yo, khuwooza yoori: “Wakhula ofwalume wa waawanyeya khusala wuumana otthuuporu oniiya wootapanyeya, na ojama wa waawanyeya oniishelana wiisha. ¹⁸Nkhama Epiliisi eetta ojaawanya, ofwalume awe onttela wiiyavo toovi? Mweeyo mwinlupa yoori miiyo kiniikara masheethwani khwa owahi wa Belezibuuli. ¹⁹Nkhama Miiyo kiniikara masheethwani khwa owahi wa Belezibuuli, khi aana enu aniikara toovi? Tiito aana enu atthaapo pi anttelaaye wuuphukani. ²⁰Ila nkhama kiniikara masheethwani khwa owahi wa Nluku, eto enthoonyeza yoori ofwalume wa Nluku wafiya vakatthi venu.

²¹“Ntthu woozivala na woojuumaanya, amana eekeselaka vaje vawe saaneene, maali zawe ziniiya zookholeleleya. ²²Ila ntthu woozivala zayita ye, amana ankukuttela khunshintta ontta onnyakanya zaana zawe anroromelaazo athuule phantte ya maali zawe.

²³“Otule ahi vamote na miiyo ontta okuumanana, na otule ahinkusanyaaye khwa miiyo ontta omwaza.

²⁴“Amana sheethwani, anlawa ntthu oneekesa vahali woohiivo maati yoori avumule, noohisikani puuro ye onlupa yoori: ‘Kintta orutela nyuupa etile kaariimo.’ ²⁵Amana aruti khusikana nyuupa ori wooseeliwamo na wa waattaleliwamo saana. ²⁶Aphano ontta oruti na atane masheethwani sapa ootepa otakhala, na khweettamo khusala eekhala nttumpho. Na nanna ya mwiisho wa ntthu otule oniiya wootepa zayita omwanzo.”

²⁷Yinsa eettaka olupa mattakhuzi apale, muukha mmote aari attaaphale khunyakula araka: “Wooparikhiyiwa muukha otule oovokoliyeeyo khuwaamwisa.”

²⁸Ila Yinsa khunjipu araka: “Ooparikhiyiwa pi apale ansiilaaye nttakhuzi la Nluku khushututela.”

Alama ya Yuunusa

²⁹Wakathi atthu akusanyeyiyeevo vahali vamote, Yinsa khusala alupa yoori: “Atthu a leelo pi ootakhala rooho, anveka woona alama ya minjuza ila khanlawa othoonyeziwa hatha alama moote, yohiiyi etile ya napiyu Yuunusa. ³⁰Nkhama etthiipo Yuunusa eeyiyeeyo alama ya atthu a Neniive, naye Mwaana wa Pinaatamu onttela wiiya alama ya atthu a leelo. ³¹Rayisi wa kusini onlawa alankhe siikhu ya ophukiwa na atthu a khapila eti ookwiseleni paathuli, maana ye alankha peetiwene oteela osiila akhili za Seleyimaana, ila nasaapi otu ariiye apha anziti Seleyimaana. ³²Atthu a Neniive anlawa alankhe siikhu ya ophukiwa, ookwiseleni paathuli, maana yo athupwiya twampi zaya, paata ya osiila tafusiiri ya Yuunusa; otu mwiriina apha nasaapi anziti Yuunusa.”

Nuuru ya mwiili

³³Yinsa khuvira alupaka yoori: “Khaavo ntthu ankhozaaye khantteya khukhutela na yuuku, ila entthiiwa vahali wawooneyavo yoori esala ewaamwasikhela apale anviraaye nnyupa. ³⁴Maasho khantteya ya mwiili. Amana maasho awo eeya saana, mwiili awo wooshi oniiya wawiitaala nuuru. Ila amana maasho awo ahiiyi saana, mwiili awo oniiya n’yiiza. ³⁵Nakataalikha, wiiyane phoole na nuuru eto oriinaaye yoori ehiiye yiiza. ³⁶Amana mwiili awo wooshi wiiyana nuuru, khuhiina hatha phantte moote ya yiiza, oniiya woomwasikheliwa nkhama khantteya yuumwasikhelaka weeyo.”

Yinsa na mafwarizeewu na anamanozela a kano

³⁷Wakathi Yinsa eeshiyeevo ottakhula, mfwarizeewu mmote khumuuza olawa oja owawe. Ye noofiya khwiikhala vameeza. ³⁸Mfwarizeewu otule khushanka mwaasa wa omoona Yinsa eettela oja woohinawi.

³⁹Mbwana khuwooza yoori: “Mweeyo mafwarizeewu, mwinoosa koopho na parathu oje waya, ila rooho zenu zeetaala vitthu za omaashokopho na zoohusuti. ⁴⁰Alolo! Otule aattaliyeeyo oje khahi othuuto aattaliyeeyo nkatthi? ⁴¹Mwipakuse nkatthi mweenu khwa owenkha zimola asikhini, toowo mweeyo mwintta wiiya oottakattha saaneene.

⁴²“Olaanikha pu weenu mweeyo mafwarizeewu, maana mwininkha lifunku la khuumi mathapa na vitthu za nwoorotha, ila khusala mwitarawu shariya na pheta ya Nluku! Mweeyo mwina yooretta vitthu epo woohilikhi phantte kiina.

⁴³“Olaanikha pu weenu mweeyo mafwarizeewu, wa wuutuvelani puuro ya wiilokozi nsinakooka na ochelisiwa wa shitahavo vamwanttiwa.

⁴⁴“Olaanikha pu weenu mweeyo, mwiiyiyeeyo nkhama khapuri yoohooneyi anviraavo atthu vatulu vaya khuhijuwi.”

⁴⁵Aphano namanozela wa kano mmote khunjipu Yinsa araka: “Mwaaliimu, vitthu epo olupaazo, ontta onittukhana fweeyo.”

⁴⁶Yinsa khuri: “Olaanikha pu weenu mweeyo anamanozela a kano, mwiniwaapwecherisaaye atthu mapwattha oowaaziti. Ila mweeyo khamwiniwaawuni, hatha na yaala yenu.

⁴⁷“Olaanikha pu weenu mweeyo! Maana mwiniwaajekela khapuri manapiyu, ari amarehemu apapazenu awooliyeeyo. ⁴⁸Khwa etthiipo mweeyo mwinlawela oshaahiti wa okhupalela epile apapazenu arettiyeeyo. Yo awoola manapiyu, mweeyo khuwaajekela khapuri zooshapweya. ⁴⁹Tiito Nluku alupiyeeyo nkatthi wa akhili zawe yoori: ‘Kinlawa kawaaperekhe manapiyu na maaswihaapa; yo anteela owoola akina, aweekarise akina aya.’ ⁵⁰Mwaasa wa epo, atthu apa a leelo anttela ohukhumwiwa khwa taamu ya manapiyu ooshi ooliiweeyo thanku wumpiwa wa olumwenku. ⁵¹Waaza taamu ya Apeele mpakha taamu ya Zakariiya, otule ooliweeyo kharipu ya va alitaari vaje wa nyuupa ya Nluku. Kiniwuuzani yoori, atthu a leelo anlawa ajipu mwaasa wa ethiito.

⁵²“Olaanikha pu weenu mweeyo anamanozela a kano, maana mwathuula efukulo ya ojuwa, ila mweeyo khuhivirimo na khuwaakhattaza apale aari otakhaaye oviramo.”

⁵³Paata ya Yinsa olaavo aphale vaya, mafwarizeewu na anamanozela a kano khwaaza omuuzela vitthu zawaatta ari okatipukha. ⁵⁴Yo aari ontakhela alupe etthu ethiito yiiye kiswaswi ya opattha onlokoveza.

Ohirimiza na olipisela

¹Nakataalikha khuntti ya atthu khukusanyeya, mwaasa wa waatta akinoko khusala aluwatthana. Yinsa khuwooza khapula anakhiyoni awe yoori: “Phoole na fwaramento ya mafwarizeewu yiiyiye onaafikhi. ²Khayiivo yoovithiwa ehinteelaaye ovithuliwa na zooshi epile zoottiyeleliwa zinteela ojuwiwa.” ³Zooshi zinlupiwaaye n’yiiza, zinlawa zalupiwe nthana, na zooshi epile zinlupiwaaye sirini zinlawa zeeye payana.

Nimoove Nluku paasi

⁴“Miiyo kiniwuuzani ashirikha yoori: mwihiwoove apale anuulaaye mwiili, nawiisha khuhiretteli hatha etthu. ⁵Ila miiyo kinuuthoonyezani paani wa omoova: mwimoove Nluku, otule paata ya wuula mwiili, ariina owahi wa weeselela motthooni. Oto ti mwiriina ya omoova. ⁶Anyannyi athaanu attiitthi-attiitthi khanuuzanyisiwa sinku piiri? Ila apo aya khaavo mmote Nluku aninsahawaaye. ⁷Hatha na nyuuli za mmwishwa mweenu zooshi pi za waalakiwa. Mwihoove, mweeyo mwinaaye fwayita zayita anyannyi apo awaatta.”

Onkatthala Yinsa na otukhuru

⁸“Miiyo kiniwuuzani yoori: otule antukhurwaaye vakatthi wa atthu yoori namalottela aka, Mwaana wa Pinaatamu onteela otukhuru vakatthi wa malayikha a Nluku. ⁹Ila otule anikikatthalaaye vakatthi wa atthu, na ye onteela okatthaliwa vakatthi wa malayikha a Nluku. ¹⁰Wooshi otule anintarawaaye Mwaana wa Pinaatamu onswamihiwa, ila otule ankufurwelaaye Rooho Ttakatthiifu khanswamihiwa.

¹¹“Amana mwithuuliwa olawa ophukiwa nsinakooka ama wa afwalume, mwihiiyane shaakha khwa nanna mwinttelaaye ojaakisa ama etthu mwinttelaaye olupa. ¹²Maana wakathi otthuupo Rooho Ttakatthiifu entta wuuthoonyezani etthu yoolupa.”

Thaajiri woohiina akhili

¹³Mwinyi mmote wa khuntti etile khunvekela Yinsa araka: “Mwaaliimu, omuuze ttwiiyaku akaawanyele maali epile alikhiyeeyo papeetthu.”

¹⁴Yinsa khunjipu araka: “Weyo, paani akirettiye wiiya namaphuka enu wala namwaawanya maali zenu?” ¹⁵Aphano khuwooza yoori: “Phoole na omaashokopho wa vitthu, mwaasa yoori ohaayi wa pinaatamu khunlipisiwa pi vitthu epile ampatthaazo.”

¹⁶Yinsa khulupa nlikaniso araka: “Aarivo mwinyi mmote wa thaajiri aaruweriyeeyo channu. ¹⁷Ye khusala awaza toono: ‘Kirette-ni? Akina vahali wootthaavo peewu zaka epi.’

¹⁸“Khulupa yoori: ‘Aaa, kajuwa etthu yooretta. Kintta opwecha matthala apa mattiitthi kijeke mawulu-mawulu yoori kittheemo peewu zaka na vitthu zaka zooshi epile kiriinaazo. ¹⁹Nawiisha, kuuze nafusi yaka yoori: “Onaaye peewu na vitthu zawaatta zintoshelezaaye nyaakha zawaatta; ovumule, oje, onywe na ofurahi.” ’

²⁰“Ila Nluku khumuuza yoori: ‘Nlolo! Osikhu otthuupu ontta ofwa. Maali zawo paani anttelaaye osalana?’ ”

²¹Yinsa khumarisela araka: “Ntthu oto ori nkhama atthu apale anlipanaaye maali zaya ila mmakhono wa Nluku khahi mathaajiri.”

Onroromela Nluku

²²Aphano Yinsa khuwooza anakhiyoni awe araka: “Tiito kiniwuuzaanini yoori: mwihiiye woovelavelela ohaayi enu, wala etthu mwinttelaaye oja, ama mwiili enu khwa etthu ya owalisa. ²³Maana ohaayi ona fwayita khuluyeene zayita etthu yoojiwa na mwiili ona fwayita khuluyeene zayita kuwo. ²⁴Mwiwoone anakhuku; khanzala wala khanuurula hatha ntthala khana loopwehavo vitthu zoojiwa zaya, ila Nluku oniwenkha etthu yoojiwa. Ila mweeyo mwinaaye fwayita khuluyeene zayita anyannyi apo! ²⁵Paani wa mweeyo anwahaaye weekezela mansha awe hatha nkhama eetta oshukulikhela? ²⁶Mweeyo khamwinwahi oshintta vitthu nkhama epo ttiitthittiitthi, khi mwinshukulikhela toovi kinoko zaya?

²⁷“Moone nanna enwulaazo miitthi za ntthuttu na maluwa aya: yo khazinkhola khaazi, wala khazinsona. Ila wekhweele kiniwuuzani yoori: Seleyimaana na othaajiri wawe, khawaleeni kuwo zooshapweya nkhama maluwa apa. ²⁸Moone, Nluku onwalisa nyaani za ntthuttu leelo ziriivo meesho zinttelaaye olukuziwa khatepeeni, wuuwalisani mweeyo channu atthu oopushuwa amini! ²⁹Mwihishukulikhele etthu mwinttelaaye oja ama onywa. ³⁰Maana amalapo pi anshukulikhelaaye vitthu epo, ila mweeyo Papeenu onjuwa yoori enuuhithajiyani vitthu epo. ³¹Mweekese khapula ofwalume wa Nluku, vitthu zaya epo mwintta weekezeliwa.”

³²Yinsa khulupa theenya araka: “Mwihoove mweeyo mwiiyiye nkhama khuntti ttiitthiiru ya pwittipwitthi, maana Papeenu ti ye atakhiye owinkhani ofwalume awe. ³³Muuzanyise zooshi mwiriinaazo, nzurukhu aya mwiwenkhe asikhini. Mwijaattalelele mifukho zihinvaruwaaye, toowo mwinthokorela maali pinkuuni zihiniishaawo, okhu ahinifiyaawo nantarawu wala maweephe yoori aharipu. ³⁴Maana attaapho eniiyavo maali zawo rooho yawo eniiya attaapho.”

Anamarumeyela oojeekesela

³⁵Yinsa khuvira alupaka yoori: “Mwiiye oojeekesela na khantteya zenu ziri zookhoziwa. ³⁶Mwina yawiiya nkhama anamarumeyela aninwejelaaye mbwana aya yoori arutaka onjampo la harusi, amana apiiya nlako anfukulele nasaapiru. ³⁷Ooparikhiyiwa anamarumeyela apale mbwana aya anttelaaye owaasikana eettaka ojeekesela. Kiniwuuzani khweele yoori, mbwana aya na ye ontta ojiwalisa yoori arumeye, awooze wiikhala vameeza asala awaarumeyela. ³⁸Hatha nkhama ata osikhu layili ama lifwajiri, ooparikhiyiwa anamarumeyela apale mbwanaaka anttelaaye owaasikana ari oojeekesela. ³⁹Ila eweeleyeni vitthu zaya epi: maana, mweenyewe nyuupa eriwaka eetta ojuwa wakathi antaavo natarawu, khaari olikhelela opwechiwa nyuupa yawe. ⁴⁰Mweeyo theenya mwiiye woojilikanisa, maana wakathi antaavo Mwaana wa Pinaatamu pi opule mwihinaakhipwelaaye.”

⁴¹Aphano Pheeturu khumuuzela Yinsa yoori: “Mbwana, nlikaniso opo pu weetthu ama pu wa atthu ooshi?”

⁴²Mbwana khujipu araka: “Ti paani eeyiyeeyo nsatoro wa waamineya na wa akhili, Mbwana awe amwinkhiyeeyo owaalokozela akarumeya azaawe na owenkha etthu yoojiwa amana ofiya wakathi? ⁴³Wooparikhiyiwa karumeya otule Mbwana awe amana ataaka anttelaaye onsikana arettaka etthiipo. ⁴⁴Weekhweele, kiniwuuzani yoori onttela olikheliwa maali zooshi. ⁴⁵Ila karumeya otule amana eeya wootakhala rooho, ajilupezaka mweenyewe yoori: ‘Mbwanaaka ontta orupaza,’ khusala awaapiya akarumeya apale akina aakha na aalume, ajaka, anywaka na ahapaliwaka, ⁴⁶mbwana wa karumeya otule onttela ota siikhu ahaari waakhipwelaaye na wakathi ahinjuwaaye. Ye ontta onhukhumu saaneene antthe puuro ya atthu oohaamineyi.

⁴⁷“Karumeya otule anjuwaaye matakhelo a mbwana awe, ila khuhisala ajeekesela na khuhisala aretta epile antakhaazo mbwana awe, onteela ohukhumwiwa na ojaphiwa venkivene. ⁴⁸Ila otule ahinrettaaye matakhelo a mbwanaawe mwaasa woohijuwi, onteela ojaphiwa na ohukhumwiwa vattitthiiru. Wakhula otule enkhiweeyo zawaatta ona yoorutisa zawaatta; na otule aalikheliweeyo zawaatta, onlawa avekeliwe venkivene.”

Waawanyeya mwaasa wa Yinsa

⁴⁹Yinsa khurutela olupa yoori: “Miiyo kateela okhoza moottho va olumwenku, kaari otakha woona okholeliye! ⁵⁰Ila yamwanzo kiina ya woosiwa khwa ohoowa, kiri muuthunku mpakha vitthu epi zirettikhane! ⁵¹Mweeyo mwinaakanyera yoori miiyo katiisa heeri voolumwenku? Wala! Kiniwuuzani khweele yoori, miiyo katiisa ohisiilani. ⁵²Waaza nasaapi mpakha ninttaawo, nkatthi wa ojama wa atthu athaanu, onteela opuwamo waawanyeya; attatthu ohisiilanani apale awiri, apale awiri ohisiilanani apale attatthu. ⁵³Paapa wuumana na mwanawe na mwaana wuumana na papaawe. Maama wuumana na mwanawe wankha, mwaana wankha wuumana na mamaawe, nkhwe wuumana na nkhwewe, nkhwe wuumana na nkhwewe.”

Alama za wakathi

⁵⁴Yinsa khuwooza atthu aakusanyeyiyeeyo yoori: “Mweeyo amana moona liwiku leettaka phantte ya okhu lintupweelaawo njuwa mwilupaka yoori: ‘Entakha onya vuula’, khweele khurettikhana. ⁵⁵Amana moona pheevo za kuusi mwinlupaka yoori: ‘Enteela opuwa haari’, khweele khurettikhana. ⁵⁶Manaafikhi! Mweeyo mwinjuwa olupa alama za va tuniya na za otulu, aphano toovi mwihijuwaka olupa alama za wakathi opu?

⁵⁷“Mwaasa aya niini mwihijuwaka othawula etile yiiyiyeeyo ya shariya? ⁵⁸Amana weeyo na muumani awo mwilawaka wa namaphuka, enhithajiya osiilana khapula rakuzeene mwihinalawe, maana amana ofiya wa namaphuka ontta omuuza namweekesela ootthe nkalapooso. ⁵⁹Miiyo kiniwuuza khweele yoori khunlaamo ohiripheeni nzurukhu woolikana.”

Othupwiya ama ofwa

¹Wakathi aya opule, atthu aariivo khumuuza Yinsa yoori Pilaatu awoola a Kalileya akina wakathi aari orettaavo twaha zaya. ²Yinsa khuwaajipu yoori: “Mweeyo mwinoona yoori a kalileya apo aari anatwampi zayita atthu akina, mwaasa woohoowa toowo? ³Miiyo kiniwuuzani yoori wala! Ila amana na mweeyo mwihithupwiyi twampi zenu, mooshi mwintta opwetheya nkhama yo. ⁴Ama mwinaakanyera yoori apale khumi na wanaane yaawaakweliyeeyo korofwa ya Siloowe aari anapaathuli zayita apale ooshi aniikhalaaye Yeruzaleemu? ⁵Miiyo kiniwuuzani theenya yoori wala! Ila amana mwihithupwiyi twampi zenu mooshi mwintta opwetheya nkhama etthiipo nayo apwetheyiyeezo.”

Mfikeera woohiimi

⁶Aphano Yinsa khulupa nlikaniso opu onraaye: “Mwinyi mmote aarina mfikeera awe aazaliyeeyo mmashapa mwawe. Khulankha olawa oshuma mishumo zaya, khuhisikanimo hatha etthu. ⁷Aphano khumuuza namalimela nshapa ntthile yoori: ‘Kiina nyaakha mittatthu kitaaka oshuma, kihisikanakamo hatha etthu. Okakatte! Mwaasa wa etthu-ni ottiyelelaka puuro mahala?’

⁸“Ila karumeya awe otule khunjipu araka: ‘Mbwana, kinuuvekelani yoori mwilikhe mfikeera opu wiiye nttumphu mpakha mwaakhani; miiyo kintta othipa nshini mwaya kisala kiitthela vitutu. ⁹Mwaakha nkina amana wiima mishumo ti yooshapweya; amana ohiimi okakatte.’ ”

Muukha wa ovonisiwa Saapatu

¹⁰Siikhu ya saapatu, Yinsa eetta osomisa nsinakooka. ¹¹Nttumphule aarimo muukha aari ohoochiwaaye ti sheethwani khwa nyaakha khumi na minaane, aari wookhutupuwa ahaari owahaaye wookowa. ¹²Wakathi Yinsa amooniyeevo khunkhuwela khumuuza yoori: “Mwanankha wavona orati awo.”

¹³Yinsa khunttheela makhono nunu otule omuuta otthuupule khookowa, khwaaza otthapa ansifwaka Nluku. ¹⁴Ila haakhimu wa sinakooka khwiiya wawiiphiiriwa mwaasa wa Yinsa ovonisa siikhu ya saapatu, tiito aawooziyeeyo atthu yoori: “Ziwaapho siikhu sitha zookhola khaazi. Mwisala mwita siikhu etthiipo yoori mwivonisiwe, ila saapatu wala.”

¹⁵Aphano Mbwana khujipu araka: “Manaafikhi! Paani mmote wa mweeyo anraaye efiiye saapatu khuhifukuli mompe zawe na apuuru awe olawa onywisa maati? ¹⁶Nunu otu ojama wa Eburahiima, eettiye ofukiwa ti epiliisi khwa nyaakha khumi na minaane, nanna-ni ahaari weettelaaye otaphuliwa mwaasa wa wiiya saapatu?”

¹⁷Alupiyeevo mattakhuzi apale, maatuwi awe Yinsa ooshi khuwaapattha haaya, atthu ooshi aariivo khwiiya ofurahi mwaasa wa vitthu zooshapweya epile aari orettaazo Yinsa.

Nlikaniso wa phunje ya muuyu

¹⁸Yinsa khulupa yoori: “Ofwalume wa Nluku ori nkhama niini? Wala kilattisane niini? ¹⁹Ori nkhama phunje ya samuli, mwinyi mmote azaliyeeyo mmashapa mwawe. Khuwula khwiiya muutthi nwulweene, anyannyi a otulu khujekamo vijaaro zaya nvirapi mwaya.”

²⁰Yinsa khulupa theenya araka: “Ofwalume wa Nluku ori nkhama niini? ²¹Ori nkhama fwaramento muukha anthuulaaye khuphakanya na ofu wa tiriku wa waatta, wooshi khujakhuwa.”

Nlako woophunyeya

²²Yinsa eetta ovira anozelaka nsitati na miti mikina zawaatta eettaka Yeruzaleemu. ²³Ntthu mmote khumuuzela yoori: “Mbwana, vattitthiiru atthu anttelaaye wuusurukha?”

²⁴Yinsa khunjipu araka: “Mwijilipise yoori mwivire vanlako woophunyeya, maana awaatta anlawa eekese ovira ila khanteela owahi. ²⁵Mweenyewe nyuupa amana afuka nlako awe, mweeyo mwinsala vaje mwipiyaka nlako na mwivekaka yoori: ‘Mbwana mwinifukulele!’

“Ye ontta wuujipuni araka: ‘Akinjuwa ohali mwinlankhaawo.’

²⁶“Aphano mwinlawa mwalupe yoori: ‘Naja vamote, khunywa vamote na wanozela mmuti mweetthu.’

²⁷“Ila ye onlawa ajipu yoori: ‘Akinuujuwani wala ohali mwinlankhaawo akinjuwawo, mwikisuse mweeyo anamaretta zootakhala.’

²⁸“Mwinlawa mwamoone Eburahiima, Esiyaakha, Yaakhumpa na manapiyu ooshi ari muufwalume wa Nluku, ila mweeyo mwiikareliwe oje. Attaapho onlawa weeyevo olila na oluma meeno. ²⁹Atthu anttela olankha khipula akina okhu lintthamuwaawo njuwa, ate eekhale vameeza wa ofwalume wa Nluku. ³⁰Weekhweele, awaapho amwanzo anttela wiishela, na awiishela anttela wiiya amwanzo.”

Yinsa onoonela huruma Yeruzaleemu

³¹Wakathi otthuupule khutavo mafwarizeewu khumuuza Yinsa yoori: “Oleevo apha, maana Herooti ontakha owuula.”

³²Ye khuwaajipu yoori: “Mwilawe mwamuuze nanthala aya oto yoori: ‘Leelo na meesho kiniikara masheethwani na owaavonisa alwele, siikhu ya ttaatthu kintta wiishisa khaazi yaka. ³³Enhithajiya, leelo, meesho na nrotto ovira kilawaka; maana weekhweele khaavo napiyu anfwaaye nti nkina woohiiyi Yeruzaleemu!’

³⁴“Yeruzaleemu, Yeruzaleemu, weeyo oniwoola manapiyu na owaavonya apale aperekhiweeyo! Swaafu kavi miiyo kitakhaka owaakusanya aanaawo nkhama mwanakhu aniwaakusanyaazo aanaawe mmapaphelo mwawe, ila weeyo khuhitakhi? ³⁵Moone yoori nyuupa yenu enttela wiiya yoothamiwa. Miiyo kiniwuuzani yoori mweeyo khamwinteela okoona theenya mpakha wakathi mwinttelaaye olupa yoori: ‘Wooparikhiyiwa ti otule antaaye khwa nzina la Mbwana!’ ”

Ovonisa nkina Siikhu ya Saapatu

¹Saapatu moote, Yinsa aalawiye wa nttunkhulu mmote wa mafwarizeewu olawa oja, atthu aari nttumphule khusala amweekesela. ²Attaaphale vaya, aarivo mwinyi aavipiyeeyo mwiili awe wooshi. ³Yinsa khuwoozela mafwarizeewu na anamanozela a kano araka: “Halaali onvonisa nlwele saapatu ama wala?” ⁴Ila yo khwiiya oonyamala. Attaaphale, Yinsa khunkhola mwinyi otule nkhono awe, khunvonisa khumuuza yoori olawe.

⁵Aphano khuwoozela yoori: “Paani wa mweeyo anraaye amooniye mwanawe ama mompe yawe ekweliye vanlipu khuhilazivo nasaapiru eri Saapatu?”

⁶Yo khuhiwahi ojipu.

Ojipushuwisa na omakeleya

⁷Wakathi ajuwiyeevo yoori atthu apale aalaleyiweeyo njampo aari othawula puuro za wiilokozi, ye khulupa nlikaniso opu: ⁸“Amana olaleyiwa njampo la harusi, ohithawule puuro etile ya wiilokozi, maana khinjuweya alaleyiwe ntthu wootepa oshitahiwa zayita weeyo. ⁹Noota otule oolaleyiyeeyo ontta owuuza yoori: ‘Puuro eto omwinkhe otu’. Weeyo entta wuupattha haaya olawaka wiikhala puuro yawiishela. ¹⁰Ila amana olaleyiwa ona yawiikhala puuro yawiishela, noota otule oolaleyiyeeyo ontta owuuza yoori: ‘Swaahipu, ote wiikhale puuro eti ya wiilokozi.’ Aphano, weeyo onttela wiiya woohishimwiwa venkivene vakatthi wa anamalaleyiwa ooshi. ¹¹Maana wakhula otule anjiwulisaaye ontta opushuwisiwa, na otule anjipushuwisaaye ontta owulisiwa.”

¹²Attaaphale Yinsa khumuuza mwinyi otule anlaleyiyeeyo yoori: “Amana weeyo wiiyana etthu yoojiwa yawo ama njampo lawo, ohiwaalaleye attwiizo, ashirikha awo, ajamaazo ama anamwaattamanana awo oothaajiri. Amana oretta toowo nayo antta wuulaleya, ooriphe etile weeyo wawaretteliyeeyo. ¹³Ila amana wiiyana njampo owaalaleye asikhini, anamarakala na atthu oohooni. ¹⁴Toowo oparikhiyiwa onttela wiiya wawo, maana apo aya khanlawa wiiyana etthu yawuurutisela. Oriphiwa wawo onttela ota siikhu ya osisimuliwa wa anashariya.”

Nlikaniso wa njampo liwululene

¹⁵Ntthu mmote wa atthaapale aariina vameeza asiiliyeevo mattakhuzi apale khumuuza Yinsa yoori: “Ooshapweyiwa pi apale anttelaaye oja njampo la Ofwalume wa Nluku.”

¹⁶Aphano Yinsa khuri: “Mwinyi mmote atthenkeziyeeyo njampo lawe khuwaalaleya atthu awaatta. ¹⁷Noofiya wakathi khunruma karumeya awe olawa owooza anamalaleyiwa yoori: ‘Mwite, zalikana.’

¹⁸“Ila wakhula mmote khwaaza olupa tafwawuthi zawe, wamwanzo khulupa yoori: ‘Koozanya nshapa laka, apha kinttela woona, kinveka nswammaha.’

¹⁹“Wa phiiri khulupa yoori: ‘Koozanya mompe khumi zoolima, kintakha kilawe keezelele, kinveka nswammaha.’

²⁰“Wattaatthu khuri: ‘Kaloola nasaapi, akinwahi olawa.’

²¹“Karumeya otule khuruti khulawa khumuuza Mbwana awe vitthu epile. Mweenyewe njampo khwiiya wawiiphiiriwa khulupa yoori: ‘Waakuve olawe mmatarikhi na mmuti wa sitati wawaatiise anamarakala, asikhini na apale oohooni.’

²²“Karumeya otule nooruti khulupa yoori: ‘Mbwana, karetta epile mwaakirumiyeezo, ila nalelo yasala puuro.’

²³“Aphano mbwanaawe khumuuza yoori: ‘Olawe tarikhi khuulu na mmiphiitelo, wawaakhanyarele apale onttelaaye owaasikana yoori nyuupa yaka yiitaale. ²⁴Kiniwuuzani yoori khaavo khwa apale aalaleyiweeyo anttelaaye oja njampo laka.’ ”

Nanna ya onamalottela wa Yinsa

²⁵Siikhu moote, atthu awaatta eetta onlottelela Yinsa, ye khuzukuluwa khuwooza yoori: ²⁶“Otule antakhaaye okilotta, ona ya okipheta channu zayita papaawe, mamaawe, muukhaawe, aanaawe, attwiize, alupuwe, ama ohaayi awe, noohiretti etthiipo khaniiya nakhiyoni aka. ²⁷Na otule ahinthuulaaye nsalapa awe akilotta khaniiya nakhiyoni aka.

²⁸“Paani wa mweeyo anraaye atakhaka ojeka korofwa yawe, ahinaazaaye wiikhala khapula attheela hisapu vitthu zintakhaavo oona nkhama onwahi wiishisa? ²⁹Ahirettiru etthiipo, ye ontta waaza ila khaniishisa. Atthu apale anttelaaye omoona antta ontheya alupaka yoori: ³⁰‘Mwinyi otu aaza ojeka ila khawaheeni wiishisa.’

³¹“Ama mfwalume ni, anraaye alawaka wuumana viittha na mfwalume nkina, khuhaazi wiikhala khapula apheleleza na anajanka awe apale alufu khumi, nkhama anlawa awaakhitiri apale alufu eshiriini anttelaaye wuumanana? ³²Amana ahiretti toowo, apale ahinafiye ari peetiwene nalelo, ontta onruma waziri awe olawa owaavekela heeri. ³³Khwa nanna etthiipo wakhula mmote wa mweeyo ahinlikhaaye epile ariinaazo, khansuhi wiiya nakhiyoni aka.

³⁴“Mwiinyu ona fwayita, ila amana olikha onyuunya, onrutiseleya toovi onyuunya waya? ³⁵Khunretteliwa etthu wala mmashapa ama ophakanyana ottophe, ontta wiitthiwa.

“Otule ariina mashiilo, ti asiile.”

Pwittipwitthi yawaashikha

¹Wakathi nkina anamariphisa lumpuru na anatwampi khuta oteela onsiila Yinsa. ²Mafwarizeewu na anamanozela a kano khusala aapa araka: “Mwinyi otu oniwaapokherela anatwampi khusala aja vamote na yo.”

³Aphano Yinsa khuwooza nlikaniso opu araka: ⁴“Paani mmote wa mweeyo anraaye arina pwittipwitthi zawe miiya khumwaashikha moote, khuhilikhi ntthuttu epile tiisiini na tiisiya zisaliyeezo, eettela etile emwaashikhiyeeyo mpakha opattha? ⁵Amana asikana, ontta ovikela ari woofurahi. ⁶Noofiya owawe, oniwaakhuwela maswaahipu na anamwaattamanana awe khuwooza yoori: ‘Nlaweni nitthape, maana kapattha pwittipwitthi yaka etile yaashikhiyeeyo.’ ⁷Khwa nanna etthiipo kiniwuuzani yoori onttela wiiyawo otthapa nwulweene pinkuuni mwaasa wa natwampi othupwiya, zayita anashariya tiisiini na tiisiya ahinhithajiyaaye othupwiya.”

Nzurukhu wawaashikha

⁸Khulupa araka: “Ama muukha-ni anraaye arina nzurukhu awe khumi, khumwaashikha mmote, khuhikhozi khantteya aseela nnyupa mwawe, eekesa waakhilivo mpakha opattha? ⁹Amana apattha oniwaakhuwela maswaahipu zawe na anamwaattamanana awe khuwooza yoori: ‘Nlaweni nitthape, maana kapattha nzurukhu aka opule waakaashikhiyeeyo.’ ¹⁰Miiyo kiniwuuzani yoori eniiyavo furaha khuluyeene vakatthi wa malayikha a Nluku mwaasa wa natwampi mmote othupwiya.”

Nlikaniso wa mwaana wawaashikha

¹¹Yinsa khurutela theenya yoori: “Aarivo mwinyi mmote aariina aanaawe awiri. ¹²Otu nttiitthi aya khumuuza papaawe yoori: ‘Paapa, mwikinkhe lifunku la erathi yaka.’ Papaawe khuwaawanyeza maali epile aanaawe.

¹³“Oviriyeevo wakathi vattitthiiru, mwaana otule nttiitthi khuthuula maali zawe epile aawanyeliweezo khulawa tuniya kiina ya woolepawo. Ottuukho khuharipu maali zawe epile khwa mwentto woololo. ¹⁴Paata ya oharipu zooshi, khupuwa jala yawaatta tuniya etile, ye khusala ahankayikha. ¹⁵Tiito khulankha mpakha wa mwinyi mmote wa tuniya ethiitile khunvekela khaazi, ye khumwinkha oshukisa kuluwe zawe ntthuttu. ¹⁶Ye aari ohithajiya oja vitthu epile zaari ojiwaazo ti kuluwe na khaavo aari omwinkhaaye etthu yoojiwa.

¹⁷“Khujipayini khuri: ‘Anakhaazi akavi a paapa ariina etthu yoojiwa yoowaafiyela, miiyo kiri okhuno entta okikhola jala. ¹⁸Kintta olankha kilawe wa paapa kamuuze yoori: “Paapa, kakosa mmakhono wa Nluku na mmakhono mweenu. ¹⁹Akinsuhi theenya wiitthiwa yoori ki mwanenu, mwikipokherele nkhama mmote wa anakhaazi enu.” ’ ²⁰Khulankha khulawa mpakha wa papaawe. Nalelo ari peetiwene papaawe khumoona, khwiiyana huruma khuluyeene khusala antthirela khulawa khumpatikha na khumpejari.

²¹“Attaaphale mwaana otule khumuuza papaawe yoori: ‘Paapa, kakosa mmakhono wa Nluku na mmakhono mweenu. Akinsuhi wiitthiwa yoori ki mwanenu.’

²²“Ila papaawe khuwooza a karumeya awe yoori: ‘Mwaakuve, mwitiise kuwo swaafi mwinwalise. Na peetthe mwinwalise nzaala mwawe na shapatthu mmoolu mwawe. ²³Mwilawe onzizi mwanthuule mwaana wa mompe otule eesheliyeeyo oneneva mwite mwishije, nirette njampo la furaha. ²⁴Mwaasa yoori mwanaka otu aafwiiye, apha ori haayi; aashikhiye, apha apattikhana.’ Khwaaziwa njampo.

²⁵“Epo zaari orettikhana mwaana otule nwulu ari omashapa. Khuta mpakha kharipu ya vaje, khusala asiila koma zeettaka ovuma na atthu eettaka wiina. ²⁶Aphano ye khunkhuwela karumeya mmote wa vaje attaaphale khumuuzela niini yaari orettikhanaaye. ²⁷Ye khumuuza yoori: ‘Ttwiiyo tiye arutiyeeyo, papaawo khunshijela mwaana wa mompe otule eesheliyeeyo oneneva, mwaasa wa ompokherela ari haayi.’

²⁸“Mwaana otule nwulu khwiiphiiriwa khuhisala atakha oviramo. Attaaphale papaawe khusaruwa khunkhanyarela. ²⁹Ila ye khumuuza papaawe yoori: ‘Moone! Nyaakha zawaatta kuurumeyelakani, wala akinakhijilele hatha nttakhuzi lenu limote. Ila khamwinakinkhe hatha puuzi moote yoori kirette njampo na ashirikha aka. ³⁰Arutiyeevo mwanenu oto aharipwiyeeyo vitthu zenu na amalempe, mwanshijela mwaana wa mompe otule wooneneva aya.’

³¹“Aphano papaawe khumuuza yoori: ‘Mwanaka! Wakhula siikhu oniiya vamote na miiyo, wakhula etile kiriina ti yawo. ³²Ila yaari ohithajiya oretta njampo la furaha, mwaasa yoori ttwiiyo aafwiiye apha ori haayi, aashikhiye apha apattikhana.’ ”

Nlikaniso wa namalokozela wa anakhaazi woohaamineyi

¹Yinsa khuwooza anakhiyoni awe yoori: “Aarivo mwinyi mmote wa thaajiri aariina namalokozela wa anakhaazi awe, khuuziwa yoori: ‘Namalokozela otule ontta oharipu maali zawo.’ ²Ye khunkhuwelisa khumuuzela yoori: ‘Niini epi kinsiilaazo onrettaazo weeyo? Otiise warakha za hisapu koone etthu oretteliyeeyo nzurukhu aka, maana khunteela orutela wiiya namalokozela wa anakhaazi.’

³“Namalokozela wa anakhaazi otule khuupuwela toono: ‘Kinttela oretta ni, mbwanaaka amana akilikhisa khaazi? Othipa akinkhitiri na olawa olola enikipattha haaya. ⁴Aaa, kajuwa etthu yooretta yoori amana kiikariwa atthu akipokherele mmavaje mwaya.’

⁵“Aphano ye khuwaakhuwela ooshi apale aari wiiliwaaye ti mbwanaawe. Khumuuzela otule wamwanzo yoori: ‘Oniwiila kavi mbwanaaka?’ ⁶Ye khujipu yoori: ‘Onikiila ttompwiyo miiya za mafuttha.’

“Namalokozela wa anakhaazi otule khuri: ‘Teeni yawo ti eti eriiye va warakha apha, wiikhale waatikhe hamusiini.’

⁷“Elottelanaka khumuuzela otule wa phiiri yoori: ‘Khi weeyo oniiliwa kavi ti mbwanaaka?’ Ye khujipu yoori: ‘Kiniiliwa miphimo miiya za tiriku.’ Namalokozela wa anakhaazi otule khumuuza yoori: ‘Teeni yawo eti eriiye va warakha apha, waatikhe thamaaniini.’

⁸“Aphano Mbwana awe khunttottopela namalokozela wa anakhaazi otule woohaamineyi mwaasa wa akhili epile aariinaazo. Miiyo kiniwuuzani yoori, atthu a voolumwenku apha ana akhili zawaatta mmenttezi mwaya zayita atthu apale aneettettaaye nnuuru. ⁹Apho kiniwuuzani yoori: Mwirumeyele maali zenu zohiiyi za shariya yoori mwiiwaapatthe ashirikha, amana ziwiishelani yo oopokhereleni pinkuuni.

¹⁰“Otule anamineyaaye khwa etthu ttiitthiiru onaamineya khwa etthu khuluyeene; otule ahinaamineyaaye khwa etthu ttiitthiiru hatha etthu khuluyeene khanaamineya. ¹¹Nkhama khamwaamineyeeni na maali zohiiyi za shariya, paani anttelaaye owaaminini khwa maali zookhweele? ¹²Nkhama khamwaamineyeeni na vitthu za watthu, paani anttelaaye owinkhani etthu enttelaaye wiiya yenu?

¹³“Khaavo karumeya enshapweyaaye owaarumeyela a Mbwana awiri, mwaasa yoori ontta omwiiphiirisa mmote, antuvelise otu nkina; ama oniiya wa waamineya khwa otu mmote, antarawu otu nkina. Khinwaheya onrumeyela Nluku na nzurukhu.”

¹⁴Mafwarizeewu apale oopheta nzurukhu nakuvu, noosiila mattakhuzi apale, khusala antheya Yinsa antarawaka. ¹⁵Aphano ye khuwooza yoori: “Mweeyo pi apale oojoona wiiya anashariya vakatthi wa atthu, ila Nluku onjuwa rooho zenu. Etile atthu anoonaaye wiiya ya fwayita, omaasho wa Nluku ti yootaraweya.

Owahi wa Kano

¹⁶“Kano na manapiyu khazilikheleleeni mpakha wakathi wa Yaahaya. Waaza wakathi otthuupo hapari za Ofwalume wa Nluku zinvira zilaleyiwaka, wakhula ntthu onjilipisa yoori eettemo. ¹⁷Ti yookhweya pinku na vathi wiisha zayita olaziwavo alama ttiitthiiru ya nttakhuzi la kano.

¹⁸“Wakhula nlume animwaashaaye muukhaawe khunrala muukha nkina ontta oraruwa; na aninralaaye muukha otule wa waashiwa naye ontta oraruwa.”

Thaajiri na Laazaru

¹⁹“Aarivo mwinyi mmote wa thaajiri aari owalaaye kuwo zooshapweya na zootafikhana, na wakhula siikhu eetta opuha, owawe yaari wiipikhiwawo etthu yoojiwa yannofu. ²⁰Vanlako wa thaajiri otule atiisiweevo masikhini mmote wa waatta makhwatta aari wiitthiwaaye Laazaru. ²¹Ahithajiyaka oja tathela zaari okwaaye vameeza wa thaajiri otule, anapwa khusala ata olapa makhwatta awe.

²²“Masikhini otule khufwa, khuthuuliwa pi malayikha khulawa khwiiya vamote na Eburahiima. Naye thaajiri otule khufwa khulawa khuzikhiwa. ²³Ahera okhule eettaka woona shaani, ye khulansa maasho awe khweekesa otulu khumoona Laazaru ari mpavu wa Eburahiima. ²⁴Ye khusala akhuwa araka: ‘Paapa Eburahiima, koonele huruma! Onrume Laazaru anaanise yaala yawe na maati ate azizimise nlimi laka, maana kintta ohukhumweya va moottho apha kiriivo.’

²⁵“Eburahiima khunjipu yoori: ‘Mwanaka, omfwahamu yoori muuhaayi mwawo waapokheriye vitthu zooshapweya, ila Laazaru muuhaayi mwawe eetta ohoowa. Aphano ye asithirikha, weeyo ontta ohoowa. ²⁶Olikha eto, vakatthi veetthu yatthiiwavo khilintti khuluyeene ehinlokheyaaye ntthu olankha okhuno ataaka okho wala okho ataaka okhuno.’

²⁷“Thaajiri khulupa yoori: ‘Paapa Eburahiima, safwatali kinuuvekela yoori onrume Laazaru alawe wa ajamaazaku, ²⁸kinaaye attwiizaku athaanu, alawe awooze yoori ahite okhuno kiriiwo wa ohoowiwawo.’

²⁹“Eburahiima khunjipu yoori: ‘Attwiizo anaaye kano za Munsa na kithaapu za manapiyu, asiileze etthiipo.’

³⁰“Thaajiri khukhanyarela araka: ‘Wala paapa Eburahiima! Amana ntthu asisimuwa muufwa alawa awooza, antta othupwiya.’

³¹“Eburahiima khujipu yoori: ‘Ahisiileziru kano za Munsa na za manapiyu, hatha nkhama ntthu eetta osisimuwa muufwa, yo khanteela onkhupalela.’ ”

Twampi na nswammaha

¹Yinsa khuwooza anakhiyoni awe yoori: “Enteela opuwa vitthu zinteelaaye owaakwisela atthu ntwampi, ila atakhaliwa otule anttelaaye othowelela. ²Afwataali ofukeleliwa liwe loovalaza mmwisiko khutupweeziwa nkhilintti ya pahari ehiiyeeni owaakosisa apale eeyiye oohikhomaali. ³Mwiiyane phoole! Ttwiiyo amana ookosa, onshowere; amana athupwiya, onswaamihi. ⁴Amana ookosa swaafu sapa siikhu moote, na wakhula swaafu khusala ata olupa yoori: ‘Kathupwiya’, weeyo ona ya onswaamihi.”

Weekezeliwa wa amini

⁵Maaswihaapa khunvekela Yinsa yoori: “Mbwana, weekezele amini yeetthu!”

⁶Mbwana khujipu araka: “Eriwaka amini yenu yeettiye wiiya nkhama phunje ttiitthiiru ya muuyu, mweetta wuuza muutthi opu yoori: ‘Okhuleye watupweele mpahari,’ opo weetta wuushututelani.”

⁷Yinsa khuvira alupaka yoori: “Paani mmote wa mweeyo anraaye nakhaazi awe wa olima, ama wa oshukisa pwittipwitthi ntthuttu, eettaka otaru animuuzaaye yoori: ‘Ote niikhale vameeza apha nije!’ ⁸Kinoona yoori khaavo! Ila khapula onimuuza yoori: ‘Wiipikhe etthu yoojiwa, owale kuwo zawo okirumeyele kijaka na kinywaka. Aphano amana kiisha na weeyo oje na onywe!’ ⁹Karumeya otule oninsuhi oshukhurweliwa mwaasa wooretta etile aarumiweeyo? Kinoona yoori wala! ¹⁰Etthiipo na mweeyo, amana mwiretta epile mwirumiweezo, mwina ya olupa yoori: ‘Na akarumeya oohiina maana; naretta etile naariina ya oretta paasi.’ ”

Yinsa oniwaavonisa anamaaharaja khumi

¹¹Yinsa eettaka Yeruzaleemu, aaviriye enakatthi ya Samariiya na Kalileya. ¹²Noofiya nti aya opo, khuta anamaaharaja khumi khweemela peetiwene ¹³khusala ankhuwela araka: “Yinsa, Mwaaliimu, noonele huruma!”

¹⁴Ye noowoona khuwooza yoori: “Mwilawe mwajithoonyeze wa anamalokozela a tiini.” Eettaka olawa etthiipile, yo khwiiya oovona.

¹⁵Mmote wa apale khumi, nawoona yoori avona, khuruti ansifwaka Nluku na huula ya onyakula. ¹⁶Khukokhora khufiyisa ajihi yawe vathi, khunshukhurwela Yinsa; ye aari nsamariiya.

¹⁷Yinsa khumuuzela yoori: “Khahi atthu khumi avoniyeeyo? Khi apa akina tiisiya ari vayi? ¹⁸Khaavo aawahiyeeyo oruti oteela onshukhurwela Nluku, woohiiyi otu wa malaponi?” ¹⁹Yinsa khumuuza yoori: “Olankhe olawe; amini yawo yawuusuru.”

Ota wa ofwalume wa Nluku

²⁰Yinsa eetta wuuzeliwa pi mafwarizeewu wakathi waari weettelaavo ota ofwalume wa Nluku. Ye khujipu araka: “Ofwalume wa Nluku khunta nkhama etthu enooneyaaye. ²¹Khina anttelaaye olupa yoori: ‘Moone, opu ori apha!’ Ama ‘Opule oriiye okhule!’ Maana ofwalume wa Nluku ori vakatthi venu.”

²²Attaaphale khuwooza anakhiyoni awe yoori: “Onteela ofiya wakathi mwinttelaaye otakha woona siikhu moote khwa siikhu za Mwaana wa Pinaatamu, ila khamwinteela woona. ²³Akinoko anlawa alupe yoori: ‘Ori okhule!’ Ama ‘Ori apha!’ Ila mwihilankhe olawa omweekesa. ²⁴Nkhama etthiipo taari enzerimaaye phantte moote yeettaka phantte kiina, enteela wiiya etthiipo siikhu anttelaaye ota Mwaana wa Pinaatamu. ²⁵Ila mwanzo ye ona yoohoowa venkivene na okatthaliwa pi atthu a leelo.

²⁶“Nkhama zaarettikhaniyeezo wakathi opule wa Nuuhi, enttela orettikhana etthiipo wakathi wa Mwaana wa Pinaatamu. ²⁷Atthu eetta oja na onywa, aari oralana na oloozana, mpakha siikhu Nuuhi aapakhiriyeeyo mmwaaraka, khuta nnyeri ooshi khufwa.

²⁸“Nkhama zaarettikhaniyeezo wakathi wa Loothi. Atthu eetta oja na onywa, wuuzanya na wuuzanyisa, ozala na ojeka manyupa aya. ²⁹Wakathi Loothi aliiyeewo Sotooma, khukwa vuula pinkuuni ya moottho na oka, khuwoola atthu ooshi.

³⁰“Enttela orettikhana etthiipo siikhu anttelaavo othoonyeziwa Mwaana wa Pinaatamu. ³¹Siikhu yaya eto, otule anttelaaye wiiya vatulu wa nyuupa ahiishukhe yoori alokotthele vitthu ziriiye nnyupa mwawe; otule anttelaaye wiiya omashapa ahirutele onti. ³²Mwimfikhirele muukha wa Loothi! ³³Otule antakhaaye wuusuru ohaayi awe ontta ompwetheya, ila otule onimpwetheyaaye ohaayi awe ontta wuusuru. ³⁴Miiyo kiniwuuzani yoori, osikhu wa siikhu yaya eto, atthu awiri oorapalela olili mmote, onttela othuuliwavo mmote, asalevo mmote. ³⁵Aakha awiri achilaka tiriku vamote, onttela othuuliwavo mmote asale mmote. ³⁶Atthu awiri ari mmashapa, onttela othuuliwavo mmote asale mmote.”17:36 Zawaatikhiwa za raku khina aaya eti ya 36.

³⁷Yo khumuuzela Yinsa yoori: “Mbwana, enttela orettikhana vayi?” Yinsa khuwaajipu yoori: “Vahali aniiyaavo muufwi, akhwaazi aniiya attaapho.”

Nlikaniso wa namaphuka wootakhala rooho

¹Yinsa khuwooza anakhiyoni awe nlikaniso mmote yoori aarina yoolompa woohilikheleli wala woohinyoonyeyi. ²Ye khulupa yoori: “Sitati moote aariwo namaphuka mmote ahaari omoovaaye Nluku, wala ahaari onshitahaaye ntthu. ³Sitati ethiitile aariwo nunu mmote woofweliwa ti mannawe aalawiyeeyo onvekela namaphuka otule araka: ‘Okaawanyele haakhi khwa muumani aka.’

⁴“Khunkatthalela wakathi mwinkeene, ila omwiisho waya khusala alupa nroho mwawe yoori: ‘Na kihimoovi Nluku na ohinshitahi ntthu, ⁵nunu otu aaza raku okantipu; kintta omwaawanyela shariya yoori ahirutele okiwuti.’ ”

⁶Mbwana Yinsa khuvira alupaka yoori: “Mwisiileze saana etthu anlupaaye namaphuka otu woohiiyi wa shariya. ⁷Nluku khaniwaawanyela shariya ananthawuliwa awe apale aninvekelaaye osikhu na nthana? Mwinoona yoori ye onttela orupaza owaajipu? ⁸Kiniwuuzani yoori ye oniwaawanyela shariya woohirupazi. Aphano Mwaana wa Pinaatamu wakathi anrutelaavo va olumwenku apha, onteela osikanavo amini?”

Nlikaniso wa mfwarizeewu na namariphisa lumpuru

⁹Yinsa khulupa nlikaniso mmote awoozaka atthu apale aari ojoonaaye wiiya a shariya khusala awaatarawu azaaya. Ye khuri: ¹⁰“Alume awiri aaviriye Nnyupa Woosifwiwamo khusala alompa; mmote aari mfwarizeewu, nkina aari namariphisa lumpuru. ¹¹Mfwarizeewu ari wa weemela, aari olompa otthwe araka: ‘Nluku, miiyo kinuushukhurwela maana miiyo aki nkhama atthu akina, apale oheettetteli shariya, manantarawu, anamararuwa, wala nkhama namariphisa lumpuru oto ariiye apho. ¹²Miiyo kinfuka siikhu piiri wakhula sumana na kininkha zaakha khwa lifunku la khuumi ya wakhula etile kimpatthaaye.’

¹³“Ila namariphisa lumpuru eemeliye peetiwene, ye hatha khaari wiinuwa yoori eekese otulu, ila ajipiyaka veefuwa aari ori: ‘Oo Nluku, koonele huruma, miiyo ki natwampi.’

¹⁴“Miiyo kiniwuuzani yoori, namariphisa lumpuru aalawiye owawe ari woohakikhiwa ti Nluku, ila otule nkina wala. Maana otule anjiwulisaaye ontta opushuwisiwa, ila otule anjipushuwisaaye ontta owulisiwa.”

Yinsa oniwaaparikhiya asimaana

¹⁵Atthu akina khusala awaatiisa asimaana yoori asapiwe ti Yinsa. Ila anakhiyoni awe noowoona khusala awaamaruwela. ¹⁶Ila Yinsa khuwaakhuwela asimaana apale araka: “Mwiwaalikhe asimaana akiteele miiyo, wala mwihiwaakhattaze, maana ofwalume wa Nluku pi waya apale eeyiye nkhama asimaana. ¹⁷Miiyo kiniwuuzani khweele yoori, wakhula otule ahimpokherelaaye ofwalume wa Nluku nkhama nsimaana, khanteela weettamo.”

Thaajiri na Yinsa

¹⁸Nttunkhulu mmote khumuuzela Yinsa yoori: “Mwaaliimu saana, kirette niini yoori kipatthe ohaayi wa mileele?”

¹⁹Yinsa khunjipu araka: “Mwaasa wa niini okikhuwelaka yoori woosaana? Khaavo ntthu woosaana woohiiyi Nluku paasi. ²⁰Weeyo onjuwa oruma: Ohiraruwe, ohuule, ohiiye, wala ohilawele oshaahiti woovonyeya, onshitahi papaawo na mamaawo.”

²¹Mwinyi otule khujipu yoori: “Waaza osimaana zooshi epo kinretta.”

²²Yinsa noosiila mattakhuzi apale khumuuza yoori: “Enuusaleela etthu moote. Wuuzanyise vitthu zawo zooshi nzurukhu aya owenkhe asikhini, toowo ontta wiiyana maali pinkuuni; nawiisha ote okilotte.”

²³Noosiila mattakhuzi apale khwiiya woozinkuwa venkivene, mwaasa yoori ye aari thaajiri nwulweene. ²⁴Yinsa noomoona yoori azinkuwa khulupa yoori: “Nanna enlipaazo thaajiri weetta muufwalume wa Nluku! ²⁵Ti yookhweya enkamiiya ovira va liphotto la sikano zayita thaajiri weetta muufwalume wa Nluku.”

²⁶Apale aari onsiilaaye khumuuzela yoori: “Nkhama pi toowo, paani anttelaaye wuusurukha?”

²⁷Yinsa khujipu yoori: “Etile pinaatamu ahinwahaaye, enwaheya khwa Nluku.”

²⁸Aphano Pheeturu khumuuza Yinsa yoori: “Woone! Fweeyo nalikha vitthu zeetthu zooshi, khusala nuulotta.”

²⁹Yinsa khujipu araka: “Miiyo kiniwuuzani khweele yoori, khaavo anlikhaaye ojama awe ama muukhaawe, ama attwiize ama apapaze, ama aanaawe mwaasa wa Ofwalume wa Nluku, ³⁰oto onteela opokhera venkivene vathi attaapha, na omwiisho waya apokhere ohaayi wa mileele.”

Yinsa oniwooza anakhiyoni awe ofwa na osisimuwa wawe

³¹Yinsa khuwaakhuwelela othetekele apale khumi na awiri khuwooza yoori: “Moone! Apha nintta Yeruzaleemu, ottuukho zinttelaawo orettikhana zooshi epile zaatikhiweeyo pi manapiyu monkoni wa Mwaana wa Pinaatamu. ³²Ye onttela winkheleliwa mmakhono wa amalapo, antheye, anveyise, antthemele, ³³anjaphe na amuule. Ila siikhu ya ttaatthu onttela osisimuwa.”

³⁴Anakhiyoni awe khuhiweeleyi mattakhuzi aya apale maana aari oovitheya, yo khuhijuwi etthu aari olupaaye.

Ovonisiwa wa ntthu woohooni wa Yeriko

³⁵Yinsa asaleelaka ofiya Yeriko, mwinyi mmote woohooni eekhaliye nshini wa tarikhi khusala alola zimola. ³⁶Noosiila shintto za atthu aari oviraaye, ye khuuzela etthu yaari orettikhanaaye. ³⁷Khuuziwa yoori: “Yinsa wa Nazareeti ontta ovira.”

³⁸Aphano ye khusala akhuwa araka: “Yinsa, Mwaana wa Daawuuda, koonele huruma!”

³⁹Atthu apale aari oviraaye khusala ammaruwela yoori anyamale, ila ye khusala atepa okhuwa araka: “Yinsa, Mwaana wa Daawuuda, koonele huruma!”

⁴⁰Aphano Yinsa khweemela khuruma yoori atiiseliwe mwinyi otule. Nootiiseliwa khumuuzela araka: ⁴¹“Ontakha yoori kuurettele niini?”

Ye khujipu yoori: “Mbwana, kintakha woona.”

⁴²Attaaphale Yinsa khumuuza yoori: “Woone! Amini yawo yoovonisa.” ⁴³Nasaapiru ye khurutela woona, khusala anlotta Yinsa ansifwaka Nluku. Wakathi atthu ooniyeevo etile yaarettikhaniyeeyo, khunsifu Nluku.

Yinsa na Zakewu namariphisa lumpuru

¹Yinsa khuvira sitati ya Yeriko eettaka olawa. ²Ottuukho aariwo mwinyi mmote aari wiitthiwaaye Zakewu, nttunkhulu wa anamariphisa lumpuru na aari thaajiri. ³Ye aari otakha omoona Yinsa, ila khuhisala awahi mwaasa woofupheya channu na atthu aari enkeene. ⁴Aphano khutthira khulokoza khulawa khuwela mmutthi yoori awahi omoona, mwaasa yoori Yinsa aari weettela ovira attaaphale.

⁵Yinsa noofiya puuro etile, khweekesa otulu khumoona, khumuuza yoori: “Zakewu, waakuve wiishukhe, leelo kinttela omaka vaje vawo.” ⁶Attaaphale, ye khwiishukha wawaakuvavo khumpwekherela Yinsa na furaha.

⁷Atthu apale akinoko aari woonaaye vitthu epile, khwaaza ottettha araka: “Ye amaka vaje wa natwampi!”

⁸Zakewu khulankha khweemela khumuuza Mbwana yoori: “Woone Mbwana! Kintta owenkha asikhini phantte moote ya maali zaka na apale kaari oweeyelaaye, kintta owaarutisela swaafu nne.”

⁹Aphano Yinsa khulupa yoori: “Leelo vaje apha yafiyavo nusura maana otu naye ojama ya Eburahiima. ¹⁰Mwaasa yoori Mwaana wa Pinaatamu ateela oweekesa apale aashikhiiyeeyo awoosuru.”

Nlikaniso wa nzurukhu khumi wa feeta

¹¹Yinsa aattameliyeevo Yeruzaleemu, atthu khusala oopuwela yoori ofwalume wa Nluku waari oteela orettikhana nasaapiru. Aphano Yinsa khulupa nlikaniso opu araka: ¹²“Mwinyi mmote wa ojama wootafikhana, aasaafiriye khulawa nti woolepawo yoori athawaziwe ofwalume nawiisha aruti. ¹³Ahinalawe khuwaakhuwela a karumeya awe khumi, wakhula mmote khumwinkha nzurukhu wa feeta khuwooza yoori: ‘Mwirettele zanshara mpakha miiyo oruti.’

¹⁴“Ila atthu a mmuti mwawe khusala eephiiriwa ti ye, khunruma waziri onlotta olawa olupa yoori: ‘Khanimweepu mwinyi otule wiiya mfwalume eetthu.’

¹⁵“Noothawaziwa ofwalume khurutela owawe, khulawa khuwaakhuwela a karumeya awe apale aawenkhiyeeyo nzurukhu wa feeta yoori ajuwe fwayita apattheliyeeyo wakhula ntthu.

¹⁶“Khuta otule wamwanzo khulupa yoori: ‘Mbwana, nzurukhu opule mmote mwaakinkhiyeeyo kapatthela fwayita, wafiya khumi.’

¹⁷“Mbwanaawe khunjipu yoori: ‘Waretta saana, o karumeya wa waamineya. Mwaasa yoori weeyo waamineya khwa vitthu vattitthiiru, apho onttela wiiya mfwalume wa sitati khumi.’

¹⁸“Otule wa phiiri khuta khulupa yoori: ‘Mbwana, nzurukhu enu opule mwaakilikheliyeeyo, kapatthela fwayita wafiya mithaanu.’

¹⁹“Mbwanaawe khumuuza yoori: ‘Kemaani, weeyo onttela wiiya mfwalume wa sitati thaanu.’

²⁰“Otule wa wiishela khuta khulupa yoori: ‘Mbwana, nzurukhu enu opu, miiyo kaatthiiye mmwifukho khuthokorela. ²¹Miiyo keetta owoovani mwaasa wa ojuwa yoori mweeyo woopisa, mwinthuula etthu mwihithokoreleeni na mwinuurula mwihizaleeni.’

²²“Mbwana otule khuri: ‘Karumeya wootakhala rooho! Kinuuphuka khwa mattakhuzi awo atthaapo! Weeyo waajuwiye yoori ki ntthu wawoopisa, kinthuulavo etile kihithokoreleeni na kinuurula etile kihizaleeni. ²³Khi wahaathuuliye nzurukhu aka ottha mpanko? Toowo amana kiruti keetta opatthela fwayita.’

²⁴“Khuwooza apale aari attaaphale yoori: ‘Mwinnyakanye nzurukhu aya opo mwimwinkhe otule ariina khumi.’

²⁵“Yo khujipu yoori: ‘Mbwana, oto aya mwininlupaaye yoori nimwinkhe onaaye nzurukhu khumi!’

²⁶“Khulupa yoori: ‘Kiniwuuzani khweele yoori otule ariina zawaatta, ontta weekezeliwa venkivene, otule ahina, hatha etile ariina ontta onyakanyiwa. ²⁷Maatuwi aka apale ahaari okitakhelaaye ofwalume, mwiwaatiise apha ooliiwe kiwoonaka.’ ”

Ofiya wa Yinsa Yeruzaleemu

²⁸Paata ya wiisha olupa mattakhuzi apale, Yinsa khusala avira awelelaka eettaka Yeruzaleemu. ²⁹Asaleelaka ofiya nti wa Betifwaaje na wa Betaaniya kharipu ya mwaako Oluveera19:29 Oluveera muutthi oriina mishumo zaya enriwaaye azetoona., khuwaalokozisa anakhiyoni awe awiri. ³⁰Khuwooza yoori: “Mwilawe nti opo mwinoonaaye omaasho weenu okho, mwifiyaka mwinlawa mwansikane mwaana wa puuru afukeleliwe ahinaweliweke ti hatha ntthu. Mwinfukule mwintiise. ³¹Amana apuwa ntthu awuuzelani yoori: ‘Mwinimfukulela ni?’ Mwinjipu yoori: ‘Mbwana ti anintakhaaye.’ ”

³²Apale aawaarumiyeeyo khulawa khusikana nyama etile nkhama etthiipile aalupiyeezo Yinsa. ³³Wakathi aari omfukulaavo mwaana wa puuru otule, ennyewe khuwoozela yoori: “Mweeyo! Mwaana wa puuru oto mwinimfukulela ni?”

³⁴Yo khujipu yoori: “Mbwana eetthu ti ye anintakhaaye.”

³⁵Aphano khuntiisela Yinsa, yo khuttattikhavo kuwo zaya va puuru ye khupakhiravo. ³⁶Yinsa ataaka atthu khusala attattikha kuwo zaya ntarikhi. ³⁷Wakathi aattameliyeevo va mwiishukhelo wa Mwaako Oluveera, khuntti ya anakhiyoni ooshi khwiiya ofurahi khwaaza onyakula ansifwaka Nluku khwa minjuza epile ooniiyeezo, ³⁸araka:

“Aparikhiyiwe mfwalume antaaye

khwa nzina la Mbwana.

Yiiyewo heeri pinkuuni

na siifwa otulu.”

³⁹Mafwarizeewu apale aari vakatthi wa atthu apale khusala amuuza Yinsa yoori: “Mwaaliimu, owooze anakhiyoni awo anyamale!”

⁴⁰Ye khuwooza yoori: “Atthu apa amana anyamala, mawe pi anttelaaye onyakula.”

Yinsa onlila oonelaka huruma Yeruzaleemu

⁴¹Wakathi Yinsa afiiyeevo Yeruzaleemu, nawoona sitati etile, khulila, ⁴²araka: “Eriwaka waari onjuwa otule aniwinkhaaye heeri leelo! Ila apho epo zaya zavitheya khwa weeyo. ⁴³Onlawa wafiye wakathi maatuwi enu anttelaaye ojeka muuri khwa mweeyo na oojekeleleni phantte zooshi. ⁴⁴Onttela ophwantteliwa vamote weeyo na aanaawo, khalinlawa osala hatha liwe vatulu wa liwe nzaaya, maana weeyo khunhakikheeni Nluku wakathi aateeliyeeyo owuusuru.”

Yinsa Nnyupa Woosifwiwamo

⁴⁵Yinsa khuvira Nnyupa Woosifwiwamo khusala aweekara apale aari wuuzanyisaamo, ⁴⁶awoozaka yoori: “Yaatikhiwa yoori: ‘Nyuupa yaka enttela wiiya nyuupa ya olompiwamo, ila mweeyo mwaretta wiiya puuro ya manantarawu.’ ”

⁴⁷Wakhula siikhu Yinsa eetta onozela Nnyupa Woosifwiwamo, ila mahaakhimu a tiini, anamanozela a kano na anamalokozela a atthu aari weekesa shawuri zoomuula, ⁴⁸ila khuhisala apattha nanna yooretta, maana atthu ooshi aari omwiitaalela ye nonsiileza.

Ofwalume wa Yinsa na woosa wa Yaahaya

¹Siikhu moote, Yinsa aari owaanozela atthu Nnyupa Woosifwiwamo na awaatafusirelaka hapari zooshapweya. Nttumphule khutamo mahaakhimu a tiini, anamanozela a kano na attunkhulu a tiini. ²Yo khusala amuuzela araka: “Vitthu epi onrettana ofwalume ni, wala ti paani awinkhiyeeyo ofwalume aya opo?”

³Yinsa khujipu yoori: “Na miiyo kintta owuuzelani etthu moote mwikuuze; ⁴woosa wa Yaahaya waari wa pinkuuni ama wa anaatamu?”

⁵Yo khusala oozelana atthaaporu araka: “Amana nilupa yoori waari wa pinkuuni, ontta onuuzela yoori: ‘Khi mwaasa aya niini mwihinkhupalelaka?’ ⁶Na amana nilupa yoori waari wa anaatamu, atthu ooshi antta onivonya na mawe maana ankhupalela yoori Yaahaya napiyu.”

⁷Attaaphale yo khujipu yoori: “Khanijuweeni nlupa amwinkhiyeeyo ofwalume.”

⁸Aphano Yinsa khuwooza yoori: “Na miiyo akiniwuuzani ofwalume kinrettanaaye vitthu epi.”

Anamalima oohisuhi

⁹Yinsa khulupa nlikaniso awoozaka atthu yoori: “Aarivo mwinyi mmote aazaliyeeyo mmashapa mwawe miitthi za wuuva, khuweekesa atthu yoori asala alimela, ye khulawa safwari yawe khwiikhala siikhu zawaatta. ¹⁰Noofiya wakathi wa wuurula, khunruma karumeya awe mmote yoori alawe enkhiwe wuuva, ila anamalima apale khumpiya, khumwiikara woohimwinkhi hatha etthu. ¹¹Mweenyewe nshapa khunruma nkina, na oto theenya yo khunveyisa, khumpiya khumwiikara woohimwinkhi hatha etthu. ¹²Aphano khunruma wattaatthu, anamalima apale khumpiya, khunvulalisa na khumwiikara.

¹³“Paata ya toole, mweenyewe nshapa khusala oopuwela araka: ‘Kirette ni? Aaa! Kintta onruma mwanaka kinimphetachaaye, othuuto antta onhishimu.’

¹⁴“Ila anamalima apale wakathi amooniyeevo mwaana wa mweenyewe nshapa ntthile khulupa yoori: ‘Namarithi nshapa ntthi ti otu. Olawa nimuule, orithi wiiye weetthu.’ ¹⁵Khunsukhumela othetekele wa nshapa khumuula.

“Mweenyewe nshapa onttela owaarettela niini? ¹⁶Ye ontta ota awoole anamalima apale, nshapa ntthile awenkhe atthu akina.”

Atthu apale aariivo noosiila mattakhuzi apale khulupa yoori: “Zihirettikhane vitthu epo!”

¹⁷Yinsa khuweekesa khuwoozela yoori: “Maana a mattakhuzi apa aatikhiweeyo niini?

“ ‘Liwe anamajeka akatthaliyeeyo, nttho laya

laretteya wiiya liwe linkhomaazaaye.’

¹⁸Otule anttelaaye okwela liwe laya nttho ontta othapateya, na otule lininkwelaaye ontta osakeya eeye lifufu.”

Wuuzela monkoni wa lumpuru

¹⁹Mahaakhimu a tiini na anamanozela a kano khusala eekesa nanna yonkhola wakathi otthuupule, maana yo aajuwiye yoori nlikaniso opule oniwaalupa yo. Ila khusala awoova atthu apale aari attaaphale.

²⁰Aphano yo khusala amweekesela, khuwaaruma atthu aari ojinkhelelaaye wiiya anashariya onsaya sirini, yoori ansikanane etthu yoolupa ankhole anlawane wa nsatoro.

²¹Yo khusala amuuzela yoori: “Mwaaliimu, fweeyo najuwa yoori onttakhula na onnozela epile ziiyiyeeyo za shariya, ninjuwa yoori khuninthawula ntthu, ila onnozela tarikhi ya Nluku khwa haakhi. ²²Nkanuuze, nkhama ti yooshapweya oripha lumpuru la Seezari ama wala?”

²³Yinsa khujuwa olavilavi aya khuwooza yoori: ²⁴“Nkakitiiseleni nzurukhu apha. Ratarato eti va nzurukhu apha ti yaani?” Atthu khujipu yoori: “Ti ya Seezari!”

²⁵Khuwooza yoori: “Mwimwinkhe Seezari etile yiiyiye ya Seezari na mwimwinkhe Nluku etile yiiyiye ya Nluku.”

²⁶Yo khuhisala ansikanana hatha paathuli vakatthi wa atthu apale; khwiiya ootikinisiwa pi mattakhuzi apale aajipwiweeyo Yinsa, yo khunyamala.

Wuuzela monkoni wa osisimuwa

²⁷Masatukhi apale ahaari okhupalaaye osisimuwa wa ananfwa, khulawa khumwaattama Yinsa. ²⁸Khusala alupa yoori: “Mwaaliimu, Munsa aatikha yoori, nlume amana afwa, muukhaawe ahinvokoleleeni mwaana, ona ya oraliwa ti ttwiiye ampatthele aana eeye a marehemu ttwiiye. ²⁹Aarivo attwi sapa: otu nwulu aya khuloola khufwa, muukhaawe ahimpattheleeni mwaana. ³⁰Khuraliwa ti ttwiiye, khufwa ahimpattheleeni mwaana, ³¹khuraliwa ti ttwiiye wattaatthu, khufwa ahimpattheleeni mwaana, ooshi apale sapa khufwa woohimpattheli mwaana. ³²Omwiisho waya muukha otule khufwa. ³³Aphano siikhu ya osisimuwa onttela wiiya muukha waani, maana oosaapa anraliye?”

³⁴Aphano Yinsa khuwaajipu yoori: “Atthu a voolumwenku apha anloola na anraliwa. ³⁵Ila atthu apale anttelaaye osuhi olawa pinkuuni noosisimuwa muufwa, khanlawa oloola wala oraliwa, ³⁶maana khanfwa theenya, anttela wiiya nkhama malayikha na aana a Nluku, mwaasa yoori asisimuliwa. ³⁷Hatha napiyu Munsa athoonyeza monkoni wa osisimuwa wa ananfwa, wakathi moottho opule waari okholelaaye va muutthi nwishi, ye khunkhuwela Mbwana yoori, Nluku wa Eburahiima wa Esiyaakha na wa Yaakhumpa. ³⁸Eto enthoonyeza yoori Nluku khahiyo wa ananfwa, Nluku wa atthu ariiye haayi. Maana khwa ye atthu ooshi anaaye ohaayi.”

³⁹Anamanozela akina a kano apale aari attaaphale khumuuza yoori: “Wajipu saana Mwaaliimu!” ⁴⁰Khuhiivo hatha ntthu kiina wa otakha omuuzela theenya.

Al-Masiihu Mbwana wa Daawuuda

⁴¹Elottelanaka Yinsa khuwoozela yoori: “Mwaasa aya niini atthu alupaka yoori Al-Masiihu mwaana wa Daawuuda? ⁴²Daawuuda alupa nkithaapu ya Zaapuura yoori:

“ ‘Nnyizinku

amuuza Mbwanaaka yoori:

“Wiikhale nkhono nlume aka,

⁴³mpakha miiyo kitthe

moolu awo vatulu wa maatuwi awo.” ’

⁴⁴“Nkhama Daawuuda onimwiittha Al-Masiihu yoori Mbwana, enrettikhana toovi wiiya mwanawe?”

Yinsa na anamanozela a kano

⁴⁵Atthu ooshi eettaka onsiila, Yinsa khuwooza anakhiyoni awe yoori: ⁴⁶“Phoole na anamanozela a kano, apale owaatuvela owala ajapi zoolepisana, ochelisiwa va parasa, na wa owaatuvela wiikhala puuro za wiilokozi nsinakooka na puuro za wiilokozi va njampo, ⁴⁷aniweeyelaaye anamfweliwa pi amanna zaya vitthu zaya, ojihakikhi khwa oretta lompa zoolepa. Apo aya anlawa apokherele hukhumu khuluyeene.”

Zaakha ya muukha wa ofweliwa ti mannawe

¹Yinsa khuzukuluwa khuwoona mathaajiri alazaka zaakha zaya atthaaka n’yoopo ya zaakha. ²Khumoona theenya muukha wa masikhini woofweliwa ti mannawe, alazaka zaakha ttoosu piiri. ³Yinsa khulupa yoori: “Kiniwuuzani khweele yoori, muukha otu wa masikhini woofweliwa ti mannawe, enkha zayita atthu ooshi. ⁴Maana apale ooshi enkha epile zasaliyeeyo, ila muukha otu na osikhini awe enkha wooshi aari ororomelaaye.”

Yinsa onlupa monkoni wa opwechiwa Nyuupa Yoosifwiwamo

⁵Anakhiyoni awe akina khusala attottopela Nyuupa Yoosifwiwamo yaajekaniweeyo mawe ooshapweya na vitthu zaatthiiweemo zoolaziwa nkhama zaakha, Yinsa khuwooza yoori: ⁶“Enlawa zafiye siikhu vitthu zaya epo mwinoonaazo zinttelaavo opwecheliwa, maana khalinlawa olikhiwa liwe vatulu wa liwe nzaaya.”

Olupatthiwa na ohoowa

⁷Yo khumuuzela yoori: “Mwaaliimu, vitthu zaya epo zinteela orettikhana lini? Wala alama ni enttelaaye onijuwisa yoori zasaleela orettikhana?”

⁸Yinsa khuwaajipu yoori: “Phoole! Mwihihatiwe, maana anlawa apuwe atthu awaatta araka, ‘Al-Masiihu ti miiyo!’ Ama ‘wakathi wafiya!’ Ila mwihiwaalotte apo aya. ⁹Amana mwisiilaka viittha ama nzuuzu mwihoove, maana epo zaya zina yoorettikhana khapula, ila wakathi aya opo khahiyo wiisha woolumwenku.”

¹⁰Yinsa khulupa theenya yoori: “Khapila moote enttela wuumanana khapila kiina, na ofwalume woomane na ofwalume nzaaya. ¹¹Phantte zawaatta za miti zinlawa zapuwe visikinyaatthi khulukhulu, jala marati, vitthu zootikinisa na alama khulukhulu zoolankha pinkuuni.

¹²“Khapula zihinarettikhane vitthu zaya epo, mwinlawa mwalupatthiwe, mwilawaniwe mmakhono wa afwalume na mahaakhimu, mwiphukiwe nsinakooka, mwifukeliwe nkalapooso mwaasa wa okilotta miiyo. ¹³Enttela orettikhana yoori wiiye oshaahiti enu. ¹⁴Mwiiye awiitthaaza rooho zenu, mwihishukulikhele etthu mwinttelaaye ojipu amana ofiya wakathi aya otthuupo. ¹⁵Maana miiyo kinlawa kawinkheni mattakhuzi na akhili khwa nanna ya owaajipu maatuwi enu, ahinttelaaye owahi ozukulisa wala okheeti. ¹⁶Hatha mwinlawa mwafukisiwe wa afwalume pi apapazenu, attwiizenu, ajamaazenu na ashirikha enu, akinoko a mweeyo anlawa ooliiwe. ¹⁷Atthu enki anttela wiiya awiiphiiriwa ti mweeyo mwaasa wa nzina laka. ¹⁸Ila hatha nyuuli yenu moote khinlawa waashikha. ¹⁹Muuvilela weenu phi mwinttelaamo othokorela nafusi yenu.”

Yinsa onrutela olupa opwechiwa Yeruzaleemu

²⁰Yinsa khulupa theenya yoori: “Amana moona sitati ya Yeruzaleemu ezukuleliwe pi anajanka, mwijuwe yoori wafiya wakathi wa opwechiwa. ²¹Aphano apale anttelaaye wiiya nti wa Yudeya atthirele omwaako, apale anttelaaye wiiya nsitati atthiremo na apale anttelaaye wiiya ntthuttu ahirutele ositati. ²²Maana siikhu zaya epo enttela wiiya siikhu za hukhumu khuluyeene yoori erettikhane zooshi epile zaatikhiweezo. ²³Ootakhaliwa aakha apale anttelaaye osikaniwa ari awiimittha ama eettaka waamwisa siikhu zaya epo, maana va tuniya anlawa apuwevo mashakha mawulweene na hukhumu vakatthi wa anaatamu ooshi. ²⁴Awaatta anttela wuuliiwa na phanka, akinoko athuuliwe nkhama anapherezu eettettisiwaka miti zooshi za olumwenku. Yeruzaleemu enlawa yakurumuliwe pi amalapo mpakha yenzi ya amalapo wiisha.”

Ota wa Mwaana wa Pinaatamu

²⁵Yinsa khuvira awoozaka theenya yoori: “Zinlawa zeeyevo alama va njuwa, va mweezi, na va matthottowa. Atthu a voolumwenku anteela wiiyana huzuni na woova nwulweene mwaasa wa ottitthima na otapanyeya wa pahari. ²⁶Anlawa azirikhe atthu awaatta mwaasa wa woova vitthu zinttelaaye orettikhana voolumwenku, maana owahi wa pinkuuni onttela osakhinyeya. ²⁷Aphano onttela wooneya Mwaana wa Pinaatamu ataaka enakatthinakatthi ya mawiku na owahi na siifwa khuluyeene. ²⁸Amana zaazaka vitthu zaya epo, mwilankhe mweekese otulu, maana wuusurukha weenu ori kharipu na mweeyo.”

Nlikaniso wa mfikeera

²⁹Elottelanaka Yinsa khulupa nlikaniso mmote araka: “Moone mfikeera na miitthi zooshi. ³⁰Amana aazaka ophutuwela mathapa aya, mwinoona na mwinjuwa yoori wasaleela ofiya mwiita. ³¹Wa nanna etthiipo, amana moona zirettikhanaka vitthu epo, mwijuwe yoori ofwalume wa Nluku wasaleela ofiya.

³²“Miiyo kiniwuuzani khweele yoori, atthu apa a leelo khanlawa ofwa ooshi vitthu epi zihirettikhaneeni. ³³Pinku na vathi zooshi zinteela ovira, ila mattakhuzi aka khanviraru.”

Ohithajiya ojeekesela

³⁴Yinsa khulupa yoori: “Mwiiye woojeekesela, rooho zenu zihipakhire vitthu zoohifwayi, ohapaliwa, ama tafwawuthi za muuhaayi mweenu, yoori siikhu yaya ethiito ehuusikaneleni. ³⁵Maana siikhu yaya eto enttela owaatela atthu ooshi a voolumwenku. ³⁶Mwiiye woojeekesela na olompa wakhula wakathi, yoori zuuwerawereni vitthu zaya epo zinttelaaye orettikhana na yoori mwapatthe weemela omaasho wa Mwaana wa Pinaatamu amana ata.”

³⁷Yinsa wakhula siikhu aari onozela vaje wa Nyuupa Yoosifwiwamo, amana oripa aari weettaka vamwaako Oluveera khwiiya ottuukho mpakha ocha. ³⁸Atthu ooshi supuyeene aari weettaka vaje wa Nyuupa Yoosifwiwamo olawa osiila mattakhuzi aari onozelaaye Yinsa.

Shawuri za wuuliiwa Yinsa

¹Osaleelaka ofiya wakathi wa orettiwa Njampo la Phaawu yoohiina Fwaramento, liniitthiwaaye Paashikowa22:1 Nzina ntthi la Paashikowa lina maana a wakathi Nluku awaataphuliyeeyo meezirayiilu mmakhono wa amisuri., ²mahaakhimu a tiini na anamanozela a kano aari owaza shawuri zoomuula Yinsa, khuhisala ewaheya mwaasa wa owoova atthu.

³Aphano Epiliisi khumweetta Yuuda, aari wiitthiwaaye Eshikariyoote, wa khuntti ya apale khumi na awiri. ⁴Ye khulawa osiilanana mahaakhimu a tiini na attunkhulu a anamweekesela a Nyuupa Yoosifwiwamo, yoori eekese shawuri ya onkholisa Yinsa. ⁵Khwa mattakhuzi apale, yo khwiiya ofurahi, khumwaahiti Yuuda omwinkha nzurukhu. ⁶Ye khukhupali, khusala eekesa kiphenyo ya onkholisa Yinsa, woohiivo hatha ntthu.

⁷Khufiya siikhu ya orettiwa Njampo la Phaawu Yoohiina Fwaramento, siikhu yaya ethiito yaarina ya otwahiwa pwittipwitthi yoojeliwa Paashikowa. ⁸Yinsa khunruma Pheeturu na Yaahaya araka: “Mwilawe mwaattalele etthu yoojiwa yeetthu ya Paashikowa.”

⁹Yo khumuuzela yoori: “Ontakha naattalele vayi.”

¹⁰Ye khuwaajipu yoori: “Noofiya ositati mwinlawa mwansikane mwinyi apwecheriye yuuku ya maati. Mwinlotte mpakha nyuupa anttaamo. ¹¹Mwimuuze mweenyewe nyuupa yaya eto yoori: ‘Mwaaliimu onuuzela araka: Ori vayi nsana aka wa omakavo, kinttelaaye onjavo paashikowa na anakhiyoni aka?’ ¹²Othuuto ontta wuuthoonyezani nsana nwulweene wa vatulu oriina zaana zooshi, mwaattalele attaapho njampo nttho.”

¹³Yo khulawa khusikana nkhama etthiipile Yinsa aawooziyeezo, khwaattalela etthu yoojiwa ya Paashikowa. ¹⁴Noofiya wakathi Yinsa na maaswihaapa awe khwiikhala vameeza. ¹⁵Khuwooza yoori: “Kaari ohithajiya venkivene onja Paashikowa vamote na mweeyo kihinalawe ohoowa. ¹⁶Kiniwuuzani yoori akinteela oja theenya njampo ntthi mpakha linttelaavo omariseliwa muufwalume wa Nluku.”

¹⁷Athuuliyeevo jiikira khunshukhurwela Nluku, khuwooza yoori: “Mwithuule mwaawanyena. ¹⁸Kiniwuuzani yoori akinrutela onywa nshumo wa nrayi wa wuuva mpakha ontaavo Ofwalume wa Nluku.”

¹⁹Athuuliyeevo phaawu, khunshukhurwela Nluku, khumeya khuwenkha khuwooza yoori: “Opu mwiili aka onttelaaye ovahiwa khwa mweeyo. Mwisala mwiretta etthiipi mwikifikhiraka miiyo.”

²⁰Khwa nanna ethiito nawiisha oja khuthuula jiikira khulupa yoori: “Jiikira eti wahati mpheya onrettiwaaye ti taamu yaka, enttelaaye wiittikha khwa mweeyo. ²¹Ila mwijuwe yoori otule anttelaaye okikholisa ori vameeza attaapha vamote na miiyo. ²²Mwaana wa Pinaatamu onlawa afwe khwa nanna etthiipo Nluku asharutheliyeezo. Ila wootakhaliwa ti otule anttelaaye onzinkula.” ²³Yo khusala oozelana atthaaporu yoori anjuwe nlupa aari weettelaaye oretta etthu yaya eto.

Ariina fwayita ti paani?

²⁴Aphano maaswihaapa khusala anyakulisana atakhaka onjuwa paani eeyiyeeyo nwulweene vakatthi vaya. ²⁵Yinsa khuwooza yoori: “Afwalume a vathi apha aniiyana oshintta vakatthi wa atthu aya, na apale aneettettisaaye ofwalume oniwaatuvela olupeziwa onamaretta saana. ²⁶Ila mweeyo mwihiiye toowo, nttunkhulu vakatthi venu eeye ti nttiitthi aya, otule anlokozelaaye eeye ti namarumeyela aya. ²⁷Nttunkhulu ti paani, ti otule aniikhalaaye vameeza ama otule anrumeyaaye? Khaniiya otule aniikhalaaye vameeza? Ila vakatthi venu mweeyo, miiyo kiri nkhama otule anrumeyaaye. ²⁸Mweeyo tiye mwinhoowaaye vamote na miiyo mphule kinzayiniwaamo. ²⁹Nkhama etthiipo Paapa akinkhiyeeyo ofwalume, na miiyo kiniwinkhani mweeyo, ³⁰yoori mwije na mwinywe vameeza vaka muufwalume mwaka, na mwiikhale va khukulu ya ofwalume yoori mwiphuke mahimo khumi na mawiri a Ezirayiilu.

³¹“Simawu, Simawu, Epiliisi avekela yoori oopepetthe nkhama tiriku. ³²Ila miiyo koolompela yoori amini yawo ehizime. Amana orutela wiiya vamote na miiyo, owaalipisele azaawo.”

³³Simawu khujipu yoori: “Mbwanaaka, miiyo kakhupali wuulotta hatha nkhama nkalapooso, hatha nkhama ofwa.”

³⁴Ila Yinsa khunjipu araka: “Miiyo kiniwuuza weeyo Pheeturu, yoori leelo eti likukhuwi lihineekhe, onkikhana swaafu ttatthu oraka khunkijuwa.”

³⁵Aphano Yinsa khuwooza araka: “Wakathi opule koorumiyeenini mwihina hatha nfukho wala napampa, ama shapatthu, niini yoosaleeliyeenini?”

Yo khujipu yoori: “Hatha etthu khayaanisaleeliye.”

³⁶Ye khuwooza yoori: “Ila nasaapi eti otule ariina nfukho athuule na napampa awe anthuule. Otule ahina phanka oozanyise ajapi yawe oozanye. ³⁷Nkhama etthiipo Nttakhuzi la Nluku linlupaazo yoori: ‘Ye onaalakiwa nkhama anamavonya.’ Miiyo kiniwuuzani khweele yoori sharuthi vitthu epi zirettikhane khwa miiyo, maana etile yaatikhiweeyo monkoni wa miiyo ena yoorettikhana.”

³⁸Anakhiyoni apale khulupa yoori: “Fweeyo apha Mbwana ninaaye phanka piiri.” Ye khujipu araka: “Weesha mwaasa aya opo!”

Yinsa onlompa vamwaako wa Oluveera

³⁹Khulankha khusala alawa vamwaako wa Oluveera nkhama etthiipo aazowereliyeezo, anakhiyoni awe khunlotta. ⁴⁰Noofiya khuwooza yoori: “Mwilompe yoori mwihikwele muuzayiniwa.” ⁴¹Ye khuwaasusa vattitthiiru khukokhora khusala alompa araka: ⁴²“Paapa amana otakha, okilaze jiikira eti ya ohoowa. Ila ehirettikhane otakha waka miiyo, arettikhane matakhelo awo.” ⁴³Aphano khumpuwelela nlayikha la pinkuuni khusala linlipisela. ⁴⁴Ari mmashakha, khusala alompa woojilipisavo, mattottonka oovujuwela wawe nkhama taamu khusala akwela vathi.22:44 Aaya epi kithaapu kiina zaraku khina.

⁴⁵Noolaavo aphale aari olompaavo, khweetta aphale aariivo anakhiyoni awe, khuwaasikana eettaka olala ari oohuzunikha. ⁴⁶Khuwoozela araka: “Mwinlala ni? Mwilankhe mwilompe yoori mwihikwele muuzayiniwa.”

Okholiwa wa Yinsa

⁴⁷Eettaka ottakhula nalelo, khupuwa khuntti ya atthu awaatta, na mmote wa apale khumi na awiri, otule aari wiitthiwaaye Yuuda, aawaalokozeliyeeyo, khumwaattama Yinsa yoori ampatikhe. ⁴⁸Attaaphale Yinsa khuri: “Yuuda, Mwaana wa Pinaatamu oninkholisana opatikha?”

⁴⁹Anakhiyoni awe nawoona vitthu epile khulupa yoori: “Mbwana, niwoomanane na phanka?” ⁵⁰Aphano nakhiyoni mmote khushija nshiilo la nkhono nlume la karumeya wa haakhimu nwulu wa tiini.

⁵¹Ila Yinsa khuri: “Onlikhe ohinrutele!” Ye khukhola nshiilo la ntthu otule khunvonisa.

⁵²Aphano Yinsa khuwoozela mahaakhimu a tiini na attunkhulu a anamweekesela a Nyuupa Yoosifwiwamo na attunkhulu a tiini apale aateeliye onkhola araka: “Mwakiteela na phanka na puutta nkhama kiiyiye namalokozela wa anazompere? ⁵³Wakhula siikhu kaari wiiya vamote na mweeyo vaje wa Nnyupa Woosifwiwamo, khuhisala mwikikhola, aphano, opu wakathi enu na otule ariina ofwalume wa n’yiiza.”

Pheeturu oninkhana Yinsa

⁵⁴Aphano Yinsa nookholiwa khulawaniwa mpakha nlikokoro wa haakhimu nwulu wa tiini. Pheeturu khusala anlottelela Yinsa woohimwaattami. ⁵⁵Yo khukhoza moottho vaje khusala oottha, naye Pheeturu khuta attaapho khwiikhala. ⁵⁶Njaazi mmote aariivo noomoona eekhaliye nshini wa moottho khumweekesa saaneene khuri: “Otu aari vamote na Yinsa.”

⁵⁷Pheeturu khukhana araka: “Weyo mwanankha! Miiyo akininjuwa ntthu aya oto.”

⁵⁸Noovira wakathi vattitthiiru, Pheeturu khooniwa ti ntthu nkina khumuuza yoori: “Weeyo o wa khuntti ethiitile.”

Ila Pheeturu khukhana araka: “Mwinyi, khahiyo miiyo!”

⁵⁹Oviriyeevo wakathi mmote, ntthu nkina theenya khulupachacha yoori: “Weekhweele otu aari vamote na ye, maana otu aya naye nkalileya.”

⁶⁰Pheeturu khujipu araka: “Mwinyi! Miiyo akinjuwa etthu mwinlupaaye.” Eettaka ottakhula etthiipile, likukhuwi khwiikha. ⁶¹Mbwana khuzukuluwa khumweekesa Pheeturu, ye khufikhiri mattakhuzi apale ooziweeyo ti Mbwana yoori: “Leelo ethiiti likukhuwi lihineekhe, onteela okikhana swaafu ttatthu.” ⁶²Pheeturu khulaavo aphale vaya khusala alila ari wookafilikha.

⁶³Atthu apale aari omweekeselaaye Yinsa khusala anveyisa na ompiya, ⁶⁴khunfinikha omaasho wawe khusala amuuzela yoori: “Weeyo khahi o napiyu? Onlupe otu oopiyiyeeyo!” ⁶⁵Khusala anlupeza mattakhuzi awaatta a mattukhano.

Yinsa onlawaniwa wa amashawuriiya

⁶⁶Noocha khukusanyeya attunkhulu a mahaakhimu a tiini na anamanozela a kano, khuruma olawaniwa Yinsa wa mashawuriiya. ⁶⁷Khusala amuuzela yoori: “Nkahaya, nkanuuze nkhama weeyo o Al-Masiihu.”

Ye khujipu araka: “Amana kiwuuzani khamwinkaamini, ⁶⁸na amana kiwuuzelani khamwinkijipu. ⁶⁹Ila waaza nasaapi ethiiti Mwaana wa Pinaatamu onttela wiikhala nkhono nlume wa Nluku Wa owahi.”

⁷⁰Aphano ooshi khumuuzela yoori: “Apho niri weeyo o Mwaana wa Nluku?”

Yinsa khujipu araka: “Apho mweeyo mwalupa.”

⁷¹Yo khulupa yoori: “Nininhithajiya shaahiti theenya? Nansiila alupaka mweenyewe na nlomo awe.”

Yinsa onlawaniwa wa Pilaatu

¹Khulankha khuntti yooshi khunthuula Yinsa khunlawana wa Pilaatu. ²Noofiya khunlokoveza yoori: “Nansikana otu awaalikhisaka atthu eetthu oripha lumpuru la Seezari, ajilupezaka yoori ti Al-Masiihu na mfwalume.”

³Aphano Pilaatu khumuuzela yoori: “Ti weeyo mfwalume wa mayaahuuti?”

Yinsa khujipu yoori: “Weeyo walupa.”

⁴Pilaatu khuwooza mahaakhimu a tiini apale na khuntti ya atthu etile yaariivo yoori: “Miiyo akinimoonana hatha paathuli.”

⁵Atthu apale khusala akhanyarela olupa yoori: “Otu ontta owaakhupa atthu a Yudeya yooshi eti, aaza Kalileya mpakha ofiya okhuno.”

⁶Paata yoosiila mattakhuzi apale, Pilaatu khuuzela yoori: “Otu aya nkalileya?” ⁷Pilaatu ajuwiyeevo yoori Yinsa aari wa nti wa mfwalume Herooti, khuruma olawaniwa ottuukho. Wakathi aya opo Herooti naye ari Yeruzaleemu.

⁸Herooti noomoona Yinsa, khwiiya woofurahi venkivene maana aaziye raku otakha omoona, mwaasa woosiila vitthu aari orettaazo, khusala aweja woona minjuza arettaka. ⁹Aphano khusala amuuzela vitthu zawaatta, ila ye khuhisala anjipu hatha etthu. ¹⁰Mahaakhimu a tiini na anamanozela a kano aari attaaphale, anlokovezaka mattakhuzi mawulu mawulu. ¹¹Herooti na anajanka awe khwaaza onveyisa Yinsa na ontarawu, khunwalisa ajapi yoofwalume khuruma yoori arutiseliwe wa Pilaatu. ¹²Raku Herooti na Pilaatu khaari osiilanaka, ila siikhu ethiito khupuwa oshirikha.

Yinsa wa Pilaatu swaafu ya phiiri

¹³Aphano Pilaatu khuwaakhuwela mahaakhimu a tiini, anamaphuka milattu na atthu, ¹⁴khuwooza yoori: “Mwakitiisela otu mwinlupezaka yoori ontta owaakhupa atthu, ila miiyo kamuuzela vakatthi venu mweeyo, akimoonaneeni hatha paathuli khwa vitthu epo mwininlupezaazo. ¹⁵Herooti naye khamoonaneeni hatha paathuli, tiito arumiyeeyo orutiseliwa okhuno. Eto enthoonyeza yoori kharetteeni etthu yoosuhi wuuliiwa. ¹⁶Miiyo kintta nhukhumu nawiisha kinleve.” ¹⁷Noofiya siikhu ya njampo la Paashikowa, Pilaatu aarina sharuthi ya owaafukulela atthu napherezu mmote.23:17 Warakha za raku khina aaya eti ya 17.

¹⁸Attaaphale atthu ooshi khusala anyakula araka: “Mwimuule! Mwinifukulele Barapa!” ¹⁹Barapa aafukeliwe mwaasa woolaza onazompere nsitati na khumuula ntthu.

²⁰Aphano Pilaatu khurutela owooza atthu, atakhaka onleva Yinsa. ²¹Ila atthu khusala anyakula venkivene araka: “Akhomeliwe, akhomeliwe!”

²²Pilaatu khuuzela swaafu ya ttaatthu: “Niini arettiyeeyo yootakhala? Miiyo akinimoonana hatha paathuli yoosuhi wuuliiwa. Kinruma yoori mwinhukhumu nawiisha kinfukule.”

²³Ila yo khusala anyakulaka avekaka yoori Yinsa alawe akhomeliwe, akhanyarela onyakula. ²⁴Aphano Pilaatu khukhupalela oretta etile aari otakhaaye atthu apale. ²⁵Ye khunleva Barapa otule aafukeliweeyo mwaasa woolaza onazompere na ohusuti, khuwenkha Yinsa, otule anvekiyeeyo, yoori alawe anrettele etile aari ontakhelaaye.

Simawu onthuulisiwa nsalapa wa Yinsa

²⁶Yinsa khuthuuliwa olawaniwa, eettaka olawaniwa etthiipile, khusikaniwa mwinyi mmote wa Sireene aari wiitthiwaaye Simawu, aari olankhaaye omashapa. Khukholiwa khuthuulisiwa nsalapa opule yoori anlottisele Yinsa. ²⁷Aari olottiwa pi atthu awaatta na aarivo aakha aari onlilelaaye ankhupanyeraka. ²⁸Yinsa khuzukuluwa khuweekesa aakha apale khuwooza yoori: “Aakha a Yeruzaleemu, mwihikililele miiyo, ila mwijililele mweeyo na aaneenu. ²⁹Maana zinteela ofiya siikhu mwinttelaaye olupa yoori: ‘Aparikhiyiwa aakha apale ohivokoli na ahinaamwise.’

³⁰“Siikhu ethiito mwinlawa mwalupe yoori:

“ ‘Nyaako zinikwele

kulu zinisirele!’

³¹Maana, miiyo mwinikitthantta khwa nanna eti, muutthi nwishi, onttela wiiya toovi opule wawuuma?”

³²Khuthuuliwa theenya anazompere awiri yoori alawe ooliiwe vamote na Yinsa. ³³Noofiya puuro eniitthiwaaye Kalavaariyu23:33 Kalavaariyu lina maana la likurakuza la eeshwa ya ntthu woofwa., Yinsa khukhomeliwa na anazompere apale awiri, mmote nkhono nlume nkina nkhono nkha. ³⁴Aphano Yinsa khulupa yoori: “Paapa, owaaswaamihi atthu apa maana khanjuwa etthu anrettaaye.”23:34 Warakha za raku khina aaya eti ya 34. Elottelanaka yo khwaawanyana kuwo epile za Yinsa nkatthi wa nasipu.

³⁵Atthu aari attaaphale aari woona zooshi. Attunkhulu a Yudeya khusala antarawu Yinsa araka: “Ye awoosuru atthu akina, mwinlikhe ajuusuru mweenyewe nkhama khweele ti Al-Masiihu, nanthawuliwa ti Nluku.”

³⁶Anajanka na yo khusala antarawu Yinsa antiiselaka viinyu yoonyuunya, ³⁷na omuuza yoori: “Nkhama khweele weeyo o mfwalume wa mayaahuuti, ojuusuru omweenyewe.”

³⁸Vansalapa attaaphale aakhomeliweevo, khutthiiwavo lipawu laatikhiweeyo yoori: “Otu Mfwalume wa Mayaahuuti.”

³⁹Anazompere apale aakhomeliweeyo vamote na Yinsa, mmote aya khusala anveyisa amuuzaka yoori: “Nkhama weeyo o Al-Masiihu, ojuusuru na onuusurwaka na fweeyo.”

⁴⁰Otule nkina khujipu ammaruwelaka nzaawe araka: “Weeyo khunimoova Nluku, ye na fweeyo hukhumu yeetthu moote? ⁴¹Fweeyo khweele ninsuhi ohukhumweliwa epile nirettiyeezo, ila ye kharetteeni hatha etthu yootakhala.”

⁴²Aphano khulupa yoori: “Yinsa, okuupuwele amana ofiya muufwalume mwawo.”

⁴³Yinsa khujipu yoori: “Miiyo kiniwuuza khweele yoori leelo eti weeyo onttela wiiya vamote na miiyo jannathi.”

Ofwa wa Yinsa

⁴⁴Esaleelaka ofiya elukuluku njuwa khuzima, khupuwa yiiza olumwenku wooshi mpakha makaaripi. ⁴⁵Phazira khuluyeene yaafinikhiyeeyo omwimpari khuvaruwa vakatthi. ⁴⁶Aphano Yinsa khukhuwa na kuvu araka: “Paapa, rooho yaka kininkhelela mmakhono mwawo.” Noolupa nttakhuzi ntthile, khwiittha phuumu.

⁴⁷Nrooma mmote aari nttunkhulu wa anajanka, nawoona vitthu epile zaarettikhaniyeezo, khunsifu Nluku araka: “Weekhweele otu aari ntthu aari weettettisaaye shariya.” ⁴⁸Ooshi apale aari attaaphale, nawoona vitthu epile zaarettikhaniyeezo, khuruti apiyaka vifuwa zaya athoonyezaka huzuni. ⁴⁹Ashirikha a Yinsa ooshi na aakha apale anlottiyeeyo a Kalileya, aarettiye ari peetiwene eettaka woona vitthu epile.

Ozikhiwa wa Yinsa

⁵⁰Aarivo mwinyi mmote aari wiitthiwaaye Yuusufu wa sitati ya Arimateeya nti wa Yudeya. Ye aari wooshapweya rooho na wa shariya. Aari wa khuntti ya mashawuriiya, ⁵¹ila ye khaakhupaleliye epile mashawuriiya aawaziyeezo na aarettiyeezo, na aari weekesela ota wa ofwalume wa Nluku. ⁵²Ye khulawa wa Pilaatu oveka mwiili wa Yinsa. ⁵³Khulazavo vansalapa aphale, khuputaputela va joora khulawa khuzikha nliphotto la mwaako laari ahinazikhiwemo hatha ntthu. ⁵⁴Yaari Siikhu ya Ojitthenkeza, na yaari osaleela waaza Saapatu.

⁵⁵Aphano, aakha apale aataniyeeyo Yinsa Kalileya, khunlottelela Yuusufu omwaako okhule eetteliyeewo ozikha mwiili wa Yinsa, olawa woona khapuri na mwiili nanna waazikhiweezo. ⁵⁶Nawiisha, khurutela owaya olawa waattalela mafuttha oonukhela yoori alawe avaaze mwiili wa Yinsa. Saapatu yo khuvumula nkhama etthiipo enrumaazo kano.

Osisimuwa wa Yinsa

¹Jumwa-phiili supuyeene, aakha apale khusala alawa okhapuri athuuliye mafuttha oonukhela apale aattaliyeeyo. ²Yo noofiya khoona liwe ntthile laafukaniweeyo nlako wa khapuri liri loolaziwavo. ³Nooviramo, mwiili wa Mbwana Yinsa khuhisikanimo. ⁴Khwiiya oozinkuwa venkivene, attaaphale khuwaapuwelela atthu awiri awaliye kuwo zawaara. ⁵Aakha apale khuwaapattha woova khukokhora khufiyisa ajihi zaya vathi, atthu apale khusala awoozela yoori: “Mwinimweekesela ni ntthu wawoona vakatthi wa ananfwa? ⁶Ye khaamo mphu, asisimuwa. Muupuwele mattakhuzi apale awuuziyeenini ari nti wa Kalileya! ⁷Aalupiye yoori: ‘Mwaana wa Pinaatamu ona ya winkheleliwa mmakhono wa anatwampi, akhomeliwe vansalapa, siikhu ya ttaatthu asisimuwe.’ ” ⁸Aphano aakha apale khuupuwela mattakhuzi apale aalupiyeeyo Yinsa.

⁹Nooruti okhapuri okhule, khuwooza vitthu epile zooshi anakhiyoni apale khumi na mmote na atthu apale akinoko aariivo. ¹⁰Aakha aari Mariyamu Mataleena, Zhuwaana na Mariyamu mamaawe Tiyaaku na aakha akinoko aalawaniyeeyo ottuukhu. Yo khuwooza maaswihaapa vitthu epile. ¹¹Ila maaswihaapa khuhisala akhupali mattakhuzi a aakha apale, oonaka yoori aari oololo. ¹²Aphano Pheeturu khulankha khusala atthira alawaka okhapuri, noofiya khuthurumelamo khusikanamo joora, khusala aruti ari wootikinisiwa khwa epile zaarettikhaniyeezo.

Anakhiyoni eettaka Emawu

¹³Siikhu ethiitile, anakhiyoni awiri a Yinsa khulankha khusala alawa nti waari wiitthiwaaye Emawu, woolepelana Yeruzaleemu kiyasi ya phiima alufu khumi na moote. ¹⁴Yo aari olawa attakhulaka monkoni wa vitthu epile zaarettikhaniyeezo. ¹⁵Eettaka olawa etthiipile apiyaka mwaasa na akheetisanaka, Yinsa mweenyeweene khuwaattama khusala alawa vamote na yo. ¹⁶Ila yo khumpuwa nkhama oowaariipa omaasho, khuhisala anjuwa yoori Yinsa aya tuthuutule.

¹⁷Ye khuwoozela yoori: “Mwinnyakulisana monkoni wa niini ntarikhi mphu mweettaka weettetta?”

Yo khweemela ari oohuzunikha. ¹⁸Mmote wa yo aari wiitthiwaaye Keleyoopa, khumuuzela Yinsa yoori: “Niri weeyo o nletto mmote paasi wa Yeruzaleemu ohinjuwaaye vitthu zirettikhaniyeezo siikhu epi?”

¹⁹Yinsa khuwoozela yoori: “Niini erettikhaniyeeyo?”

Yo khunjipu yoori: “Epile zinrettikhaneliyeeyo Yinsa wa Nazareeti. Ye aari napiyu wa owahi khwa zooretta na mattakhuzi awe vakatthi wa Nluku mpakha wa atthu ooshi. ²⁰Ila mahaakhimu a tiini na afwalume a mmuti mweetthu khuruma ohukhumweliwa ofwa, khulawa khukhomeliwa vansalapa. ²¹Fweeyo naari onwejela yoori aari ye aari weettelaaye otana okaphuliwa wa Ezirayiilu. Thanku zirettikhane vitthu epo leelo siikhu ya ttaatthu. ²²Neeya wooshanka mwaasa yoori aakha akina a nkhuntti mweetthu, aalawiye okhapuri leelo lifwajiri, ²³khuhisikani mwiili awe, khuta khunuuza yoori ooniye malayikha, atthaapo pi alupiyeeyo yoori ye asisimuwa ori haayi. ²⁴Khulawa ashirikha etthu akina okhapuri, khusikana etthiipile aalupiyeezo aakha apale, ila yo khuhimooni.”

²⁵Aphano Yinsa khuwooza yoori: “Atthu oorupaza weeleyiwa na oolipa waamini epile alupiyeezo manapiyu! ²⁶Al-Masiihu khaarina yoohoowa etthiipo yoori eette nnuuru mwawe?” ²⁷Khusala aweeleza mattakhuzi ooshi aatikhiweeyo nkithaapu aari onlupaaye ye, waaza kithaapu ya napiyu Munsa mpakha za manapiyu akinoko.

²⁸Asaleelaka ofiya nti opule aari weettaaye, Yinsa khusala opuwa nkhama aari otakhaaye ovikana. ²⁹Ila yo khunkhanyarela araka: “Wiiye attaapha na fweeyo, njuwa linttela otupweela waripa.” Apho Yinsa khuvira nnyupa khwiiya vamote na yo.

³⁰Wakathi eekhaliyeevo vameeza vamote na atthaapale awiri, khuthuula phaawu khuparikhiya, khumeya khuwenkha. ³¹Attaaphale, oowiiri maasho aya khufunuwa khunjuwa yoori ti Yinsa, ila ye khwaashikha. ³²Khusala oozelana araka: “Wakathi opule naari ottakhulanaavo ntarikhi aneelezaka mattakhuzi a nkithaapu, rooho zeetthu khazeetta onikaphula?”

³³Yo khulankha nasaapiru khusala arutela Yeruzaleemu, khuwaasikana maaswihaapa apale khumi na mmote na anakhiyoni akina a Yinsa akusanyeyiye vahali vamote, ³⁴alupaka yoori: “Khweele Mbwana asisimuwa, ampuwelela Simawu.” ³⁵Nayo apale awiri khusala alupa epile ooniyeezo ntarikhi na nanna anjuwiyeezo Mbwana wakathi ameyiyeevo phaawu.

Yinsa oniwaapuwelela anakhiyoni awe

³⁶Anakhiyoni apale nalelo eettaka ottakhula etthiipile, Yinsa khuta vakatthi vaya, khulupa yoori: “Heeri yiiye vamote na mweeyo.”

³⁷Yo khwiiya oosuthuwa na woova amoonaka nkhama nshitapehe. ³⁸Yinsa khuwoozela yoori: “Mwasuthuwa ni? Wala mishikili ziriiye nroho mweenu pi za niini? ³⁹Moone makhono aka na moolu aka mwintta ojuwa yoori ti miiyo! Mwikikhole moone, maana nshitapehe khuna nyama wala makhonkolo nkhama etthiipo mweeyo mwinikoonaazo.”

⁴⁰Alupiyeevo vitthu epile, khuwaathoonyeza makhono awe na moolu awe. ⁴¹Mwaasa wa furaha khuluyeene na oshanka, yo khuhisala aamini nalelo, aphano Yinsa khuwoozela yoori: “Mwinaaye etthu yoojiwa mwikinkhe kije?” ⁴²Yo khumwinkha pattaasu ya swi ya woochiwa. ⁴³Khuthuula khusala arafuna attaapho yo amoonaka.

⁴⁴Nawiisha khulupa yoori: “Pi etthiipi kaawuuziyeenini wakathi opule kaari vamote na mweeyo, yoori zaarina yoorettikhana zooshi epile zaatikhiweeyo khwa miiyo nkithaapu ya kano ya napiyu Munsa na kithaapu za manapiyu akina na Zaapuura.”

⁴⁵Aphano Yinsa khuwaapatthisa fwahamu yoori ziweeleye Zawaatikhiwa Ttakatthiifu za nkithaapu. ⁴⁶Khuwooza araka: “Yaatikhiwa yoori Al-Masiihu aarina yoohoowa na siikhu ya ttaatthu osisimuwa vakatthi wa ananfwa, ⁴⁷na khwa nzina lawe onlawa walaleyiwe othupwiya yoori ziswaamihiwe twampi, waaza Yeruzaleemu mpakha khapila zooshi za va olumwenku. ⁴⁸Mweeyo mwa mashaahiti wa vitthu zaya epi. ⁴⁹Miiyo kinlawa kooperekhezeni etile Paapa ahitiyeeyo. Ila mweeye Yeruzaleemu ottuukho mpakha mwiitaazaniwe owahi wa pinkuuni.”

Owela wa Yinsa pinkuuni

⁵⁰Aphano Yinsa khuwaathuula anakhiyoni awe khulawana Betaaniya, noofiya khulansa makhono awe khuwaaparikhiya. ⁵¹Awaaparikhiyaka etthiipile, khuwaasusa khuweziwa pinkuuni. ⁵²Yo khumwaaputu, khurutela Yeruzaleemu na furaha khuluyeene. ⁵³Wakhula siikhu aari othukumana vaje wa Nyuupa Yoosifwiwamo ansifwaka Nluku.