Yuuda

Warakha aatikhiyeeyo

Yuuda

Salamu

¹Yuuda, mwiitthwaana wa Yinsa Al-Masiihu, ttwiiye Tiyaaku, apale akhuweliweeyo, oophetiwa ti Nluku Paapa na athokoreliweeyo ti Yinsa Al-Masiihu:

²Tthakaraka, heeri na pheta zeekezeleye khwa mweeyo.

Twampi na omwiisho wa makaafiri

³Aphetani aka, keeyaru pure wooshukulikhela owaatikhelani monkoni wa nusura niphakanyiyeeyo, koona yoori yaari ohithajiya owaatikhelani khwa wuutumerelani yoori muumane nkatthi wa amini swaafu moote khwa zooshi apweheliweeyo attakatthiifu. ⁴Nakataalikha atthu akina, ahinimoovaaye Nluku ata vakatthi venu woohisopheliwi. Yo anzukulisa rehema ya Nluku khwa vitthu zoovonyeya. Na aninkatthala Yinsa Al-Masiihu, Mfwalume eetthu na Mbwana eetthu otthwe. Raku zeene Zawaatikhiwa Ttakatthiifu zalupa hukhumu yo apwekheriyeeyo. ⁵Mweeyaru pure oojuwa zooshi epo zaya, kintakha wuukupuselani yoori Mbwana awaataphula atthu Misuri, ila theenya khuwaatapanya apale ahaakhupaliyeeyo. ⁶Mwifikhiri malayikha apale ahithokoreleeni puuro yaya ya ofwalume, ila khwanswi meekhazi aya, Nluku awaapweha nhali wooripamo na khuwaafukana makwinjili a mileele mpakha siikhu ya ophukiwa. ⁷Nkhama Sotooma na Komoora na sitati kiina zaya za nkerekhere zajittha nkatthi wa vitthu zootakhala na khaapa twayifu. Yo ari nkhama nthoonyezo yoori ari nkatthi wa hukhumu ya moottho wa mileele.

⁸Khwa nanna ethiito anamalottha aya apo, ankwakhulisa mwiili aya, antarawu ofwalume wa Nluku na antarawu zumpe za pinkuuni. ⁹Khwa zooshi epo, hatha nttunkhulu wa malayikha Minkhayilu, wakathi aari onyakulisananaaye Sheethwani monkoni wa mwiili wa Munsa, ye khaatakhiye onlokoveza sheethwani na mattukhano, ila paasi aalupiye yoori: “Mbwana ti ooshowere!” ¹⁰Ila apo aya antarawu yooshi etile ehiniweeleyaaye; na anretta vitthu nkhama nyama ehinuupuwelaaye, yo anretta eniwaatelaaye, mpakha vitthu zaya epo ziniwaatapanyeya. ¹¹Otakhaliwa pu waya! Maana anlottela tarikhi ya Kayiini. Mwaasa wa nzurukhu, yo ajittha nkatthi wa vitthu zoovonyeya za Palaawu, na atapanyiwa muukhijili wa Koora. ¹²Atthu aya apo anuupuwa nkhama livula la mawe oovitheya na anta va njampo venu, woohiina hatha shaakha, mishuki zoojishuka ottho. Mawiku oohiina maati owawaziwa ti pheevo; miitthi za mwiita zoohiimi mishumo zoofwa swaafu piiri, khukhuliwa mitathaari zaya. ¹³Yo anuupuwa nkhama mawipi oowali a mpahari, asarulelaka oje maphovu a khaazi zaya zoopatthisa haaya, anuupuwa nkhama matthottowa oohiina tarikhi, apo aya athokoreliwa mileele yoori eeye puuro ya wiicha n’yiiza.

¹⁴Enookhi ntthu wa khapila ya saapa paata ya Adamu, aahupiriye monkoni wa apo aya: “Moone, Mbwana onta na milikhi milikhizene za attakatthiifu awe, ¹⁵yoori awaaphuke atthu ooshi na awaashintte makaafiri ooshi monkoni wa khaazi zaya za okaafiri arettiyeeyo, wookaafirivo na monkoni wa mattakhuzi oohifwayi anatwampi, anlupeziyeeyo ye.” ¹⁶Atthu aya apo aniikhala ajilizaka, anamwiphiiriwa na nasipu yaya, anlottela tuvela zaya zoohifwayi, oojikhupali, aniwaattettekha azaaya khwa tuvela zaya.

Wuuziwa na Olakiwa

¹⁷Ila ajiraani zaka, mwifikhirele mattakhuzi apale alupiweeyo maaswihaapa a Mbwana eetthu Yinsa Al-Masiihu. ¹⁸Yo awuuzani mweeyo yoori: “Siikhu ya mwiisho anteela opuwa anamattukhana anttelaaye olottela tuvela zaya za okaafiri.” ¹⁹Pi atthaapo anuutothelaanini waawanyeya, atthaapo anlottaaye matakhelo a rooho zaya na khana rooho ya Nluku. ²⁰Mwikhomaale, ajiraani zaka, khwa amini ttakatthiifu etile mwiriina, mwilompaka khwa Rooho Ttakatthiifu. ²¹Mwiikhale nkatthi wa pheta ya Nluku, mweekeselaka yoori tthakaraka ya Mbwana eetthu Yinsa Al-Masiihu yuuthuuleni ewinkheni ohaayi wa mileele. ²²Mwiiyane huruma khwa apale aniwaakanyerelaanini; ²³akina aya mwiwoosuru, mwiweephulaka vamoottho; apo akina aya, owaathonyeze tthakaraka na woova, ewiiphiraka mpakha kuwo epile zookwakhulisiwa pi onaatamu.

Lompa ya Siifwa

²⁴Khwa otule eeyiyeeyo wa owahi yoori ookattazeni muukwakwanttuwa na yoori oothonyezeni nsiifwa mwawe woohiina hatha nlepa na furaha khuluyeene, ²⁵Nluku paasi, Namuusuru eetthu, eeye siifwa, nwulweene, nwahi na mfwalume, khwa Yinsa Al-Masiihu, Mbwana eetthu, khwa wakathi wooshi, nasaapi mpakha mileele! Amiina!