Yuunusa

Yuunusa

Yuunusa onintthira Nnyizinku

¹Siikhu moote Nnyizinku anrumiye Yuunusa mwaana wa Amitaayi yoori: ²“Olankhe olawe sitati khuulu ya Neniive, walaleye ottuukho, yoori miiyo kinjuwa zooshi zootakhala zaya anrettaazo.”

³Ila Yuunusa asiiliyeevo toole, khuwaza otthirela tuniya yoolepelana Neniive, antthiraka Nnyizinku. Khulawa mpakha sitati ya Yoope khusikana pankaya vapatari, yaari weettaaye Taarisi. Khuripha pasaji yawe, khweetta mpankaya yoori atthirele Taarisi, antthiraka Nnyizinku.

⁴Aphano, alawaka, Nnyizinku khuperekha pheevo zawaatta na pahari khutakhala khusala esaleela opwecheya pankaya. ⁵Amalinyero ooshi khwiiya awoova, wakhula mmote wa yo khusala akhuwa anvekelaka nluku awe, yoori apatthe wuusurukha, na khusala atupweeza mapwattha aya mpahari, yoori eveyaveye pankaya yaya.

Wakathi aya opo Yuunusa, aarettiye eeshukheliye mpurawu eettaka olala ajisahawiye. ⁶Nahota khwiishukhela mpurawu mphule aari olalaamo Yuunusa, khumuuzela yoori: “Weeyo! Onlala ni? Olankhe onvekele nluku awo! Khinjuweya anoonelaka huruma yoori anuusuru nihifwe.”

⁷Paata ya toole, amalinyero khusiilana yoori: “Nlaweni neekese nasipu, ninjuwe nlupa otu anitotheliye hasara eti!” Yo khweekesa nasipu etile, khusala emoona Yuunusa.

⁸Khuuzeliwa Yuunusa: “Weeyo onlupa onitotheliyeeyo hasara eti. Nkanuuze! Weeyo onkhola khaazi ni? Wala onlankha vayi? Nti awo nti ni? Ama lihimo lawo lihimo ni?”

⁹Ye khujipu araka: “Miiyo ki mwiipereewu, kinimwaaputu Nnyizinku, Nluku wa pinkuuni, otu ompiye nti na pahari.”

¹⁰Elottelanaka Yuunusa khuwooza yoori aari ontthira Nnyizinku. Wakathi ajuwiyeevo etthu yaari onrettikhanelaaye, yo khwiiya ootepa woova, na khumuuzela Yuunusa: “Apho niini orettiyeeyo!”

¹¹Pheevo zeetta otepa zaattaka, khufiyelela amalinyero omuuzela Yuunusa araka: “Fweeyo nuurettele niini, yoori Pheevo na pahari eshapweye?”

¹²Yuunusa khujipu araka: “Miiyo kajuwa yoori pheevo epi zapuwelela mwaasa wa miiyo. Apho, mwikitthempe mwikeeselele mpahari. Mwirettaru toowo, mwintta woona pahari na pheevo zinyamaliye.”

¹³Ila amalinyero apale khuhintupweezi, khwaaza ofuttha kaafi na kuvu zaya zooshi yoori afiye vathi. Khuhisala ewaheya, mwaasa wa pahari yeetta ovira etepaka otakhala. ¹⁴Yo khukhuwa ankhuwelaka Nnyizinku araka: “Oo, Nnyizinku, ohinilikhelele nifwaka mwaasa wa pinaatamu otu, na ohinikwisele paathuli ofwa wa mwinyi otu. Zooshi zarettikhana khwa nanna olakeliyeezo.” ¹⁵Nawiisha khuntthempa Yuunusa khumweeselela mpahari. Aphano pahari na pheevo, zooshi khunyamala. ¹⁶Ooniyeevo toole, amalinyero ooshi khwiiya awoova channu na khumwaaputu Nnyizinku. Khunrettela twaha Nnyizinku na theenya ahiti.

¹⁷Amweeselelaziyeevo mpahari, Nnyizinku khuperekha swi khuluyeene yoori emmize Yuunusa, ye khwiiya mmatthupo wa swi siikhu ttatthu nthana na osikhu.

Olompa wa Yuunusa

¹Ari mmatthupo wa swi, Yuunusa khwaaza olompa anvekelaka Nnyizinku, Nluku awe:

²“Na khuri: Nhuzuni mwaka kankhuweliye Nnyizinku,

na aakijipwiye.

Mithili za ahera kaakhuwiye

na waasiiliye huula yaka.

³Waakitupweeziye mpahari wa wiichamo,

nkatthi wa khilintti,

nziko wa maati khukizukulela,

na mawipi awo khukikhutela.

⁴Miiyo khulupa yoori: Keekareliwa peetiwene

khwa omaasho wawo weeyo Nnyizinku.

Kinta kirutele woona theenya

nyuupa yawo yoottakatthifu?

⁵Maati khukifiya vakhulo,

khilintti khukizukulela

na mirawa khukizokonzela eeshwa yaka.

⁶Khuzama mpakha vanchina la nyaako,

tuniya ya vathi, puuro eninfukelaaye ntthu khwa siikhu zooshi.

Ila weeyo Nnyizinku, oo Nluku aka kuusuru nafusi yaka

nkhapuri mphule.

⁷Wakathi kaari osaleelaavo ofwa,

koofikhiriye weeyo Nnyizinku,

khuuperekheza lompa yaka,

yoori efiye nnyupa mwawo ttakatthiifu.

⁸Apale anaaputwaaye sanamu ziiyiyeeyo vitthu zoohiina fwayita,

antarawu tthakaraka ya Nnyizinku.

⁹Ila miiyo kinteela wuushukhurwela weeyo

na maliipo a siifwa na owinkha twaha,

na kinteela oretta eti kaahitiyeeyo,

maana nusura enlankha khwa Nnyizinku.”

¹⁰Aphano, Nnyizinku khuruma swi etile yoori, yanchuwe Yuunusa nshini wa nttima.

Otafusiri wa Yuunusa sitati ya Neniive

¹Aphano Nnyizinku khunruma Yuunusa swaafu ya phiiri yoori: ²“Olankhe olawe sitati khuulu ya Neniive, walaleye ottuukhu mattakhuzi apa kinuurumaaye.”

³Yuunusa khushututela nttakhuzi la Nnyizinku khulawa Neniive. Neniive yaari sitati khuluyeene ntthu aari wiishishaaye siikhu ttatthu eettaka weettetta mwentto. ⁴Ila ye noofiya sitati etile eettettiye siikhu moote, alaleyaka yoori: “Nkatthi wa siikhu arupayiini Nnyizinku onteela opwecha Neniive eti.” ⁵Aneniive khwiiya wonkhupali Nluku khulaleyana yoori afuke, waaza attunkhulu mpakha asimaana, ooshi khuwala saakhu.

⁶Hapari epile za Yuunusa zanfiyeliye mfwalume wa Neniive, ye khwiishukha vakhukulu ya ohaakhimu, khuvula kuwo zoofwalume khuwala saakhu na khwiikhala vafuutha. ⁷Aphano khuruma olaleyiwa Neniive yooshi yoori:

“Khwa nzina la mfwalume na mawaziri awe:

“Ahiiyevo hatha ntthu mmote antakhaaye oja na onywa, wala ojisa na onywisa nyama zawe, mompe zawe ama pwittipwitthi zawe. ⁸Atthu ooshi awale saakhu, na awalise nyama zaya, akhuwe khwa nzina la Nluku na kuvu zaya zooshi. Attharuwe oretta vitthu zootakhala na ohusuti. ⁹Khinjuweya Nluku omwiishelaka wiiphiiriwa wawe, anoonele huruma yoori nihifwe.”

¹⁰Wakathi Nluku ooniyeevo yoori alikhaza oretta vitthu zootakhala, ye khulikha etile aari wuupuwelaaye owaarettela na khuhiwaahukhumu.

Katapu ya Yuunusa na huruma ya Nnyizinku

¹Erettiyeevo toole, Yuunusa khuhintuveli etile yaya, na khwiiya wookatipukha. ²Ye khusala amuuza Nnyizinku araka: “Oo Nnyizinku, khahiyo eti khaalupiye nalelo kiri onti? Tithiito yaakipatthisiyeeyo otthira keettaka Taarisi. Miiyo kaajuwiye yoori weeyo o Nluku wa tthakaraka na wa huruma, woovilela na woopheta channu, onaahitaaye ohukhumu ila khulevelela amana wiiyavo othupwiya. ³Aphano Oo, Nnyizinku okilaze nafusi yaka, kinhithari ofwa ehiiyeeni wiiya haayi.”

⁴Nnyizinku khunjipu yoori: “Weeyo onaaye shariya yookatipukha?”

⁵Yuunusa aalawiye khwiikhala phantte ya okhu lintthamuwaawo njuwa ya sitati ethiitile. Khujeka lipantta lawe, khwiikhala vamwiivuuli, khusala aweja etthu ni yaari weettelaaye orettikhana sitati etile. ⁶Aphano, Nnyizinku, Nluku khootthisa nrayi khurapela vatulu wa lipantta aphale aariivo Yuunusa, yoori eeye vamwiivuuli na aawuneye haari. Nrayi opule waamwinkhiye furaha ya waatta Yuunusa. ⁷Ila mmeesho mwaya supuyeene, Nluku khumperekha mwanyanyama khurafuna nrayi opule, khuuma. ⁸Etthamutthamu ya njuwa, Nluku khuperekha pheevo za okhu lintthamuwaawo njuwa zoolukuza channu, naye njuwa khusala lipiyela veeshwa vawe Yuunusa, khusala asaleela ozileya. Paata ya toole, ye khusala ajitakhela ofwa, na khuri: “Toono afwataali ofwa ehiiyeeni wiiya haayi.”

⁹Ila Nluku khumuuzela Yuunusa: “Weeyo onaaye shariya yookatipukha mwaasa wa nrayi?” Ye khujipu: “Aayo, kinaaye! Na ki wookatipukha kintakha hatha ofwa.”

¹⁰Aphano Nnyizinku khumuuzela yoori: “Weeyo onoonela huruma nrayi opo, ohikholeleeni khaazi wala ohiwuliseeni, woottha osikhu mmote na osikhu nkina khufwa. ¹¹Ila Neniive awaakho atthu anzitaaye eshiriini na miiya alufu, ahinjuwaaye othawula etthu yooshapweya wala etthu yootakhala, na nyama za waatta. Miiyo akaari oteela wiiyana huruma na sitati khuluyeene etile?”