Yaahaya

Hapari za

Yaahaya

Nttakhuzi la Nluku lajiretta opinaatamu

¹Omwanzo laari Nttakhuzi.

Nttakhuzi laari vamote na Nluku

na Nttakhuzi laari Nluku.

²Ye laari vamote na Nluku omwanzo.

³Vitthu zooshi zarettiwa khwa ye;

eriwaka khaari ye khayariwiiyavo moote yaari weettelaaye orettiwa.

⁴Ohaayi waari nkatthi mwawe,

ohaayi opo waari nuuru ya anaatamu.

⁵Nuuru enaara n’yiiza,

na yiiza khuhikhitiri oshintta.

⁶Aarivo nlume mmote aperekhiweeyo ti Nluku aari wiitthiwaaye Yaahaya. ⁷Ye aatiiye nkhama shaahiti yoori alawele oshaahiti monkoni wa nuuru, yoori atthu ooshi apatthe osiila hapari na akhupali khwa ye. ⁸Ye khaari nuuru, ila aatiiye nkhama shaahiti wa nuuru. ⁹Nuuru yeekhweele, eniwaamwasikhelaaye anaatamu ooshi, yata voolumwenku.

¹⁰Nttakhuzi laari voolumwenku na olumwenku wompiwa ti ye, ila olumwenku khuhinjuwi. ¹¹Awaateliye apale eeyiyeeyo awe, yo khuhimpwekhereli. ¹²Ila apale ampwekhereliyeeyo na akhupaliyeeyo nzina lawe, awenkha ruhusa yooretteya wiiya aana a Nluku. ¹³Atthaapo ahivokoliweeni khwa ephattu, wala khwa matakhelo a onaatamu wala ohiiyi khwa makhaamu a nlume, ila avokoliwa khwa matakhelo a Nluku.

¹⁴Nttakhuzi khujiretta ontthu na khwiikhala vakatthi veetthu. Fweeyo noona siifwa yawe, siifwa nkhama mwaana mmote paasi wa Paapa wawiitaala rehema na khweele.

¹⁵Yaahaya alaza oshaahiti awe araka: “Otu ti otule kaari onlupaaye, aari otaaye paata ya miiyo na nwulu zayita miiyo, maana ye aarivo miiyo kihineeyevo.” ¹⁶Maana fooshi napwekherela phantte ya zooshi ariina na rehema khwa rehema. ¹⁷Maana kano zatiisiwa khwa vakatthi wa Munsa; rehema na haakhi yata khwa Yinsa Al-Masiihu. ¹⁸Khina anamoone Nluku, ila Nluku mmote paasi, othuuto ariiye mpavu wa Paapa, ti anithoonyeziyeeyo.

Oshaahiti wa Yaahaya Namoosa

¹⁹Opu oshaahiti wa Yaahaya, wakathi mayaahuuti a Yeruzaleemu awaaperekhiyeevo anamalokozela a tiini na aleevi1:19 Aleevi awaziri a mahaakhimu a tiini. amuuzele yoori: “O paani weeyo aya.” ²⁰Ye khutukhuru na khuhikatthali, khulupa woosileyavo yoori: “Aki Al-Masiihu!”

²¹Khumuuzela yoori: “Aphano, weeyo o paani? Ti weeyo Aliyaasi?”

Khuri: “Aki!”

“Ti weeyo Napiyu aari weettelaaye ota?”

Khujipu yoori: “Wala!”

²²Khumuuzela yoori: “Khi o paani? Onijipu yoori nawooze apale anirumiyeeyo. Nanna eti onjilupezaaye omweenyewe?”

²³Yaahaya khujipu na mattakhuzi a napiyu Ezaaya araka: “Miiyo ki huula enkhuwaaye n’yaara eraka: ‘Mookolele tarikhi ya Mbwana.’ ”

²⁴Apale aarumiweeyo aari a khuntti ya mafwarizeewu, ²⁵khumuuzela yoori: “Khi oniwooselani atthu ohi Al-Masiihu wala Aliyaasi ama Napiyu?”

²⁶Yaahaya khuwaajipu yoori: “Miiyo kinoosa na maati, ila vakatthi venu mweeyo owaapho ntthu mwihininjuwaaye, ²⁷anttelaaye ota paata ya miiyo na wala akinsuhi ofukula mikhoyi za jampali zawe.”

²⁸Vitthu epo zarettikhana nti wa Betaaniya phantte ya okhu lintupweelaawo njuwa ya muuttho Yorotaani, ottuukho Yaahaya aari orettaawo njampo la woosa.

Pwittipwitthi ya Nluku

²⁹Mmeesho mwaya Yaahaya khumoona Yinsa eettaka ota khuri: “Mwimoone! Oto antaaye apho, pwittipwitthi ya Nluku enlazaaye twampi voolumwenku! ³⁰Otu ti otule kaari onlupaaye, wakathi opule kaari oraaye: ‘Onta nyumani waka nwulu zayita miiyo maana ye aarivo miiyo kihineeyevo.’ ³¹Miiyo akaari onjuwa paani yaya, kateela omoosa na maati yoori athoonyeziwe Ezirayiilu.”

³²Aphano Yaahaya khulawela oshaahiti alupaka theenya yoori: “Miiyo koona Rooho Ttakatthiifu yiishukhaka pinkuuni nkhama jiwa khummorela ye. ³³Miiyo akaari onjuwa paani yaya, ila otule akirumiyeeyo omoosa na maati, khukuuza yoori: ‘Weeyo onteela woona Rooho Ttakatthiifu yiishukhaka na emmorelaka, ntthu aya oto ti anoosanaaye Rooho Ttakatthiifu.’ ³⁴Miiyo koona vitthu epo, tiito kinlawelaaye oshaahiti yoori ye Mwaana wa Nluku.”

Anakhiyoni a Yinsa a mwanzo

³⁵Mmeesho mwaya Yaahaya aari attaaphale opheya na anakhiyoni awe awiri. ³⁶Noomoona Yinsa aviraka, khuri: “Mwimoone! Oto antaaye apho Pwittipwitthi ya Nluku!”

³⁷Anakhiyoni apale awiri a Yaahaya noosiila mattakhuzi apale khusala anlotta Yinsa. ³⁸Aphano Yinsa khuzukuluwa khweekesa nyuma, khuwoona anakhiyoni apale awiri eettaka onlotta khuwoozela yoori: “Mweeyo mwineekesani?”

Khujipu araka: “Rabi” (liriina maana a mwaaliimu), “wamaka vayi?”

³⁹Khuwaajipu yoori: “Olawa moonewo.”

Khulawa khoonawo ohali Yinsa amakiyeewo na khwiiya vamote na ye siikhu yaya etile yooshi. Epo zaarettikhaniye payina ya saa-khuumi ya njuwa-looveva.

⁴⁰Antere, ttwiiye Simawu Pheeturu, aari mmote wa mamwinyi apale awiri ansiliyeeyo Yaahaya attakhulaka monkoni wa Yinsa, tiito anlottiyeeyo. ⁴¹Mwanzo wonsikana aari ttwiiye Simawu, na khumuuza yoori: “Nansikana Al-Masiihu” (enlupaaye yoori Namathawaziwa). ⁴²Antere khunthuula ttwiiye khunlawana wa Yinsa. Yinsa khumweekesa Simawu khuri: “Weeyo o Simawu, mwaana wa Yaahaya, ila waaza nasaapi nzina lawo eriwaka Seefwa.” Seefwa enlupa yoori Pheeturu1:42 Nzina ntthi la Pheeturu lina maana a liwe..

Yinsa oninkhuwela Filiipe na Natanayeele

⁴³Mmeesho mwaya Yinsa khulankha khusala alawa Kalileya na khunsikana Filiipe, khumuuza yoori: “Okilotte!”

⁴⁴Filiipe aari wa sitati ya Betezayiita ottuukho waari owawe Pheeturu na Antere. ⁴⁵Filiipe khunsikana Natanayeele khumuuza yoori: “Nansikana otule Munsa aatikhiyeeyo nkithaapu ya kano monkoni wa ye na manapiyu. Yinsa wa Nazareeti, mwaana wa Yuusufu!”

⁴⁶Natanayeele khuuzela yoori: “Nazareeti, enlankhawo etthu yooshapweya?”

Filiipe khunjipu yoori: “Ote woone!”

⁴⁷Yinsa amooniyeevo Natanayeele amwaattamaka khuri: “Oto mwiizirayiilu weekhweele, ntthu woohiina ottettekha va rooho vawe.”

⁴⁸Aphano Natanayeele khumuuzela Yinsa yoori: “Mwaari okijuwa vayi?”

Yinsa khunjipu yoori: “Filiipe ahinookhuwele miiyo kaawooniye wiikhaliye nshini wa mfikeera opule.”

⁴⁹Attaaphale Natanayeele khushanka khuri: “Rabi, weeyo o Mwaana wa Nluku. Weeyo O Mfwalume wa Ezirayiilu!”

⁵⁰Yinsa khunjipu yoori: “Weeyo wakikhupali mwaasa wa olupa yoori kaawooniye nshini wa mfikeera? Toowo onttela woona vitthu khulukhulu zayita epi.” ⁵¹Khuvira alupaka yoori: “Miiyo kiniwuuzani khweele yoori, mwinoona pinku eri yoofukuwa na malayikha a Nluku awelaka na wiishukha amwiishukhelaka Mwaana wa Pinaatamu.”

Yinsa ontta oharusi

¹Siikhu ya ttaatthu, khwiiyawo harusi Kanaani ya Kalileya. Mamaawe Yinsa aari ottuukho. ²Yinsa na anakhiyoni awe, naye alaleyiwe olawa oharusi. ³Wakathi yeeshiyeevo viinyu, mamaawe Yinsa khulupa yoori: “Yaweeshela viinyu.”

⁴Ila Yinsa khujipu araka: “Muukha, enihithajiya okuuza? Nalelo khunafiye wakathi aka.”

⁵Aphano mamaawe khuwooza anamarumeyela yoori: “Mwirette zooshi epile anttelaaye owuuzani.”

⁶Attaaphale, zaarivo zuuku sitha mayaahuuti aari orumeyelakaaye wakathi wa otwahareshiwa zaari za maliituru thamaaniini kiina zaari za maliituru miiya na eshiriini.

⁷Yinsa khulupa yoori: “Mwiitaaze maati wakhula yuuku.” Yo khwiitaaza mpakha omilomo waya.

⁸Aphano Yinsa khuwooza yoori: “Mwittekhe vattitthiiru mwimweettisele mahutumu wa njampo.” Yo khuretta etthiipo. ⁹Mahutumu otule wa njampo khoota maati apale aarettiweeyo viinyu woohijuwi ohali yaalankhiyeewo, aari ojuwaaye aari anamarumeyela apale attekhiyeeyo maati. Aphano mahutumu khumuuza mposi, ¹⁰araka: “Atthu ooshi azowerela owenkha atthu viinyu ya mwanzo anamalaleyiwa, amana anywa ewaatosha phi mwiniwenkhaavo viinyu yoohafwiifweya, ila weeyo nalelo wapweha viinyu yooshapweya mpakha apha.”

¹¹Alama ya eto ya minjuza, yaari ya mwanzo Yinsa oretta nti wa Kanaani ya Kalileya. Siifwa zawe yaathonyezeyiye attaapho, na anakhiyoni awe khunkhupali.

¹²Paata ya vitthu epile khusala alawa Kafwaranaawu na mamaawe, attwiize na anakhiyoni awe. Khusala ottuukhule siikhu vattitthiiru.

Yinsa ontwaharesha Nyuupa Yoosifwiwamo Nluku

¹³Osaleelaka ofiya wakathi wa njampo la Paashikowa la mayaahuuti, Yinsa khuwelela Yeruzaleemu. ¹⁴Khuwaasikana Nnyupa Woosifwiwamo Nluku atthu aari wuuzanyisaaye mompe, pwittipwitthi, jiwa, na atthu aari opatilisaaye nzurukhu. ¹⁵Aphano khweesa puutta ya nkhoyi, khuweekaramo atthu ooshi Nnyupa Woosifwiwamo Nluku, vamote na pwittipwitthi mpakha mompe zaya. Khumwazela vathi nzurukhu wa apale aari opatilisaaye na khuphinttula meeza aya. ¹⁶Na khuwooza apale aari wuuzanyisaaye jiwa yoori: “Mwilazemo vitthu zooshi! Mwilikhe oretta pazari nyuupa ya Paapa.”

¹⁷Aphano anakhiyoni awe khuupuwela Zawaatikhiwa Ttakatthiifu enraaye: “Ojilipisana waka nyuupa yawo, Oo Nluku, onlukuzela nkatthi mwaka nkhama moottho.”

¹⁸Attaaphale anamalokozela amayaahuuti khumuuzela yoori: “Alama ni ya minjuza ontakhaaye onithoonyeza yoori weeyo onaaye owahi wooretta vitthu zooshi epi?”

¹⁹Yinsa khujipu yoori: “Mwipweche nyuupa eti, miiyo kintta ojeka opheya khwa siikhu ttatthu!”

²⁰Yo khulupa yoori: “Ojekiwa wa nyuupa eti yathuula nyaakha arupayiini na sitha, weeyo onlupa yoori onttela ojeka opheya khwa siikhu ttatthu?” ²¹Ila Yinsa nyuupa aari olupaaye waari mwiili awe. ²²Wakathi Yinsa asisimuwiyeevo nkhapuri, anakhiyoni awe khuupuwela epile aalupiyeeyo, aphano khukhupalela Zawaatikhiwa Ttakatthiifu na mattakhuzi awe.

Yinsa onjampo la Paashikowa

²³Wakathi Yinsa aari Yeruzaleemu, onjampo la Paashikowa, atthu awaatta khukhupali khwa nzina lawe mwaasa wa woona alama za minjuza epile aari orettaazo. ²⁴Ila Yinsa khaari owaamini, maana aari owaajuwa ooshi. ²⁵Khaari ontakha ntthu wa omwinkha oshaahiti monkoni wa pinaatamu, maana ye aari ojuwa niini ephattu ya onaatamu.

Nkutthaano wa Yinsa na Nikoteemu

¹Aarivo mfwarizeewu mmote aari wiitthiwaaye Nikoteemu, nttunkhulu wa mayaahuuti. ²Ye khulawa okutthanana Yinsa osikhu na khumuuza yoori: “Rabi, ninjuwa yoori onsomisa khwa phantte ya Nluku, maana khina anwahaaye oretta alama za minjuza nkhama epo, aheetteeni Nluku wiiya vamote na ye.”

³Yinsa khujipu yoori: “Miiyo kiniwuuzani khweele yoori, khina antakhaaye woona ofwalume wa Nluku aheetteeni ovokoliwa opheya.”

⁴Nikoteemu khumuuzela yoori: “Nanna ni ntthu anvokoliwaaye opheya ooluvaliye? Khinretteya ntthu weetta mwiirukulu wa mamaawe swaafu ya phiiri khuvokoliwa opheya!”

⁵Yinsa khujipu yoori: “Miiyo kiniwuuzani khweele yoori, aheetteeni ovokoliwa na maati na Rooho khina anwahaaye weetta muufwalume wa Nluku. ⁶Maana otule anvokoliwaaye khwa mwiili, mwiili, na otule anvokoliwaaye khwa Rooho, rooho. ⁷Ohiiye wootikinisiwa mwaasa wa miiyo olupa yoori: ‘Enihithajiya mweeyo ovokoliwa opheya.’ ⁸Pheevo envitelela aphale entakhaavo, ensileya evumaka, ila khinjuweya ohali enlankhawo wala eneettaawo. Enrettikhana etthiipo khwa apale ooshi oovokoliwa khwa Rooho.”

⁹Nikoteemu khuuzela theenya yoori: “Epo enttela orettikhana toovi?”

¹⁰Yinsa khujipu araka: “Weeyo o mwaaliimu wa nti wa Ezirayiilu khiniweeleya vitthu epo? ¹¹Miiyo kiniwuuzani khweele yoori, fweeyo ninlupa etile ninjuwaaye na ninlawela oshaahiti wa etile nooniyeeyo; ila mweeyo khamwinkhupalela oshaahiti etthu. ¹²Miiyo kawuuzani vitthu za vathi khamwinkhupaleeni khi mwinttela okhupalela toovi amana kiwuuzakani vitthu za pinkuuni? ¹³Maana khina anawele pinkuuni woohiiyi otule alankhiyeeyo pinkuuni: Mwaana wa Pinaatamu. ¹⁴Nkhama etthiipo Munsa alansiyeeyo nyookha n’yaara, etthiipo theenya enihithajiya Mwaana wa Pinaatamu wiiya woolansiwa, ¹⁵yoori wakhula otule aninkhupalaaye eeyane ohaayi wa mileele.

¹⁶“Khwa nanna etthiipo Nluku apheta olumwenku afiyelela onleva Mwanawe mmote paasi, yoori wakhula otule aninkhupalaaye ahipwetheye ila eeyane ohaayi wa mileele. ¹⁷Nluku amperekha Mwanawe voolumwenku, khahiyo yoori ahukhumu olumwenku, ila yoori olumwenku wuusurukhe khwa ye. ¹⁸Wakhula otule aninkhupalaaye khamphukiwa, ila otule ahininkhupalaaye aphukiwa, mwaasa wa ohikhupali nzina la Mwaana mmote paasi wa Nluku. ¹⁹Ophukiwa waya pi opu; nuuru yata voolumwenku, ila atthu khupheta yiiza, khwiiphiiriwa ti nuuru, mwaasa wa menttezi aya aari ootakhala. ²⁰Otule anrettaaye zootakhala oniiphiiriwa ti nuuru na wala kheepu waattamela nuuru ontakha yoori khaazi zawe zihooneye. ²¹Ila otule aneettettisaaye haakhi onta nnuuru, yoori zooneye saaneene, yoori khaazi zawe enkholiwa khwa Nluku.”

Oshaahiti wa Yaahaya Namoosa monkoni wa Yinsa

²²Paata ya vitthu epile Yinsa na nakhiyoni awe khweetta nti wa Yudeya, ottuukho eeshiyeewo wakathi vattitthiiru nooretta njampo la woosa. ²³Yaahaya naye aari owoosa atthu nti wa Enoomi, kharipu ya Saliimi maana aariwo maati awaatta na atthu aari ota oteela woosiwa. ²⁴Vitthu epo zarettikhana Yaahaya ahinatthiwe nkalapooso. ²⁵Khupuwa onyakulisana khwa anakhiyoni akinaaya a Yaahaya na yaahuuti mmote monkoni wa njampo la otwahareshiwa. ²⁶Yo khulawa wa Yaahaya na khumuuza yoori: “Rabi, mwinyi otule waariina kaapu ya muuttho Yorotaani wanlaweliyeeyo oshaahiti, ontta woosa na atthu ooshi antta olawa ottuukho ariiwo.”

²⁷Yaahaya khujipu yoori: “Khina ampwekheraaye etthu aheetteeni winkhiwa pinkuuni. ²⁸Mweeyo mwa mashaahiti a etile kilupiyeeyo yoori: ‘Miiyo aki Al-Masiihu, ila ki otule aperekhiweeyo wiilokozi wawe.’ ²⁹Namaposiwa ti wa namaposa. Swaahipu aninrumeyelaaye namaposa oninjali na onsiileza oniiya woofurahi amana asiila huula ya namaposa. Eto furaha yaka yookamilikha. ³⁰Enihithajiya yoori ye awule na miiyo kijipushuwise.”

³¹Otule anlakhaaye otulu weekhweele ori vatulu wa vitthu zooshi. Otule ari wa vathi ti wa vathi na onttakhula vitthu za vathi; ila otule alankhiyeeyo pinkuuni ori vatulu wa vitthu zooshi. ³²Ye ahakikhi epile oniyeezo na asiiliyeezo ila khina ankhupalelaaye oshaahiti awe. ³³Otule ankhupalelaaye oshaahiti awe onhakikhi yoori Nluku haakhi. ³⁴Otule Nluku amperekhiyeeyo onttakhula mattakhuzi a Nluku, maana ye oninkha Rooho Ttakatthiifu woohiphimi. ³⁵Paapa onimpheta Mwanawe na zooshi attha mmakhono mwawe. ³⁶Otule aninkhupalaaye Mwaana onaaye ohaayi wa mileele, ila otule aninkatthalaaye Mwaana khanlawa woona ohaayi na theenya katapu ya Nluku empharelela khwa ye.

Yinsa ompiya mwaasa na muukha wa Samariiya

¹Wakathi Yinsa asiiliyeevo yoori mafwarizeewu asiila yoori Yinsa ontta owaaretta anakhiyoni na owoosa zayita Yaahaya, ²eettiye ohiiyiru Yinsa aari woosaaye ila anakhiyoni awe, ³Mbwana noojuwa vitthu epile, khulaawo Yudeya khurutela Kalileya.

⁴Ila yaari ohithajiya ye ovira nti wa Samariiya. ⁵Ye khufiya sitati moote ya Samariiya yaari wiitthiwaaye Sikaari yaattamananiyeeyo nshapa la Yaakhumpa amwinkhiyeeyo mwanawe Yuusufu. ⁶Ottuukhule waariwo nlipu wa Yaakhumpa. Yinsa ari wooshokhera nkatthi wa safwari, khulawa khwiikhala nshini wa nlipu. Zaarettikhaniye payina ya saasiitha.

⁷Wakathi otthuupule khuta muukha wa Samariiya ottekha maati. Yinsa khumuuza yoori: “Kimeele maati vattitthiiru kinywe.” ⁸Zaarettikhaniye wakathi anakhiyoni awe eettiyeeyo ositati wuuzanya etthu yoojiwa.

⁹Muukha otule wa Samariiya khumuuzela Yinsa yoori: “Weeyo oyaahuuti onikivekela maati miiyo, muukha wa Samariiya?” Maana mayaahuuti na asamariiya khansiilana saana.

¹⁰Yinsa khunjipu yoori: “Weeyo eriwaka waari ojuwa tthuvo ya Nluku na paani anuuvekelaaye maati, weeyo weetta onvekela na ye eetta owinkha maati ohaayi.”

¹¹Muukha otule khuri: “Mbwana khuna etthu yoottekhana maati maana nlipu opu wiicha. Onttela opattha vayi maati aya apo ohaayi? ¹²Talili weeyo onwulweene zayita papeetthu Yaakhumpa? Ye aninkha nlipu otthuupo aari onywakaavo na aana awe na mompe zawe.”

¹³Yinsa khujipu yoori: “Otule annywaaye maati apa onlawa eeyane nnyottha theenya, ¹⁴ila otule anttelaaye onywa maati kinttelaaye omwinkha khanlawa wiiyana nnyottha theenya. Olikha toowo, maati kinttelaaye owinkha anttela oretteya naattuuttu wa wiittikha maati a ohaayi wa mileele.”

¹⁵Muukha otule khumuuza yoori: “Mbwana, kimeele maati aya apo yoori kihirutele wiiyana theenya nnyottha, wala kihirutele vanlipu apha ottekha maati theenya.”

¹⁶Yinsa khumuuza yoori: “Olawe owawo, wankhuwele mannawo mwite.”

¹⁷Muukha otule khujipu araka: “Akina manna.”

Yinsa khuri: “Weeyo wajipu saana olupa yoori khuna manna. ¹⁸Maana waarina amanna athaanu, ila aphano otu oriina nasaapi khahiyo mannawo. Eto olupiyeeyo nasaapi khweele.”

¹⁹Muukha otule khuri: “Mbwana, kiniwoona yoori o napiyu. ²⁰Amarehemu apapazetthu aari waaputwaka vamwaako apha, ila mweeyo mayaahuuti mwinri Yeruzaleemu ti yiiyiye puuro ya waaputwiwawo.”

²¹Yinsa khumuuza yoori: “Okhupali epi kiniwuuzaaye muukha, maana ontta waattamela wakathi mweeyo mwihinttelaaye omwaaputu Paapa vamwaako apha wala Yeruzaleemu. ²²Mweeyo asamariiya mwinaaputu etthu mwihinjuwaaye, ila fweeyo ninaaputu etile ninjuwaaye maana nusura enta khwa mayaahuuti. ²³Khwa attaapho ontta ofiya wakathi na khweele wafiya, anamwaaputu eekhweele anttela omwaaputu Paapa khwa rooho na khweele. Anamwaaputu Paapa aniweekesaaye pi atthaapo. ²⁴Nluku rooho ti eto eniwaahithajiyaaye apale animwaaputwaaye omwaaputu khwa rooho na khweele.”

²⁵Muukha otule khuri: “Miiyo kajuwa yoori o Al-Masiihu aniitthiwaaye Namathawaziwa onsaleela ota. Amana ata onteela onuuza zooshi.”

²⁶Aphano Yinsa khumuuza yoori: “Miiyo ki Al-Masiihu! Othuuto onttakhulanaaye.”

Anakhiyoni a Yinsa antta oruti ositati

²⁷Wakathi otthuupule anakhiyoni awe khuruti khwiiya ooshanka mwaasa wa onsikana apiyaka mwaasa na muukha. Ila khuhiivo hatha mmote aamuzeliyeeyo yoori: “Oneekesa ni?” Ama “Ottakhulanaka ye mwaasa aya niini?”

²⁸Aphano muukha otule khulikha yuuku yawe khurutela ositati khuwooza atthu yoori: ²⁹“Mwite mwimoone mwinyi akuuziyeeyo zooshi kinrettaazo. Talili khahiyo Al-Masiihu?” ³⁰Aphano khulankha atthu nsitati khulawa okhule aariiwo Yinsa.

³¹Wakathi wa vitthu epile anakhiyoni awe aari onkhanyarela yoori: “Rabi, mwije etthu yoojiwa.”

³²Ila ye khuwooza yoori: “Kinaaye etthu yoojiwa mwihinjuwaaye.”

³³Aphano anakhiyoni awe khusala oozelana araka: “Talili owaapho ntthu antiseliyeeyo etthu yoojiwa?”

³⁴Yinsa khuri: “Etthu yoojiwa yaka oretta matakhelo a otule akirumiyeeyo okhola khaazi zawe. ³⁵Mweeyo khamwinlupaka yoori: ‘Nkatthi wa nyeezi mine ninuurula?’ Miiyo kiniwuuzani yoori: Mwifunule maasho enu na moone mmashapa! Vitthu zakhomaala entakha wuuruliwa. ³⁶Otule anuurulaaye ompwekhera phakari yawe na onuurula mishumo za ohaayi wa mileele, khwa nanna namuurula anttelaaye ofurahi vamote na anamazala. ³⁷Maana khweele etile elupiweeyo yoori: ‘Mmote onzala nkina khuurula.’ ³⁸Miiyo koorumani yoori moorule epile mwihizaleeni. Akina akhola khaazi, mweeyo khuta opuhela khaazi yaya.”

Asamariiya awaatta a sitati etile aninkhupali Yinsa

³⁹Asamariiya awaatta a sitati etile khunkhupali Yinsa mwaasa wa oshaahiti aalupiyeeyo muukha otule araka: “Ye akuuza zooshi epile kinrettaazo.” ⁴⁰Attaaphale paata ya Asamariiya ofiya aphale aariivo Yinsa, khunvekela yoori eeye vamote na yo. Yinsa khwiiya vamote na yo siikhu piiri. ⁴¹Mwaasa wa mattakhuzi awe atthu awaatta khukhupali.

⁴²Na khumuuza muukha otule yoori: “Aphano nakhupali, khahiyo mwaasa wa mattakhuzi apa olupiyeeyo, maana fweeyo nansiila na najuwa yoori khweele otu Namuusuru wa olumwenku.”

Yinsa oninvonisa mwaana wa waziri wa mfwalume

⁴³Ziviriyeevo siikhu piiri, khulaawo okhule waya khusala eetta Kalileya. ⁴⁴Maana Yinsa Mweenyeweene alupa yoori napiyu khanshitahiwa saana mmuti mwawe. ⁴⁵Afiiyeevo Kalileya, a kalileya khumpwekherela saana yo ooniye zooshi aarettiyeezo Yeruzaleemu, va njampo la Paashikowa, maana yo aari ottuukho.

⁴⁶Khurutela theenya othotola Kanaani ya Kalileya, ottuukho athatushiyeewo maati khwiiya viinyu. Aariwo waziri mmote aariina mwanawe aari olwaaziwaaye Kafwaranaawu. ⁴⁷Wakathi asiiliyeevo elupiwaka yoori Yinsa ori Yudeya onlankha Kalileya, khusala amweekesa nonsikana khunvekela yoori anvonise mwanawe, aari osaleelaaye ofwa.

⁴⁸Yinsa khuri: “Mweeyo mwinkhupali paasi amana moona alama za minjuza miwulu miwulu.”

⁴⁹Waziri otule khuri: “Mbwana, waakuve okilotte mwanaka ahinafwe.”

⁵⁰Yinsa khujipu yoori: “Olawe, mwanawo ontta wiiya haayi.” Mwinyi otule khukhupalela mattakhuzi apale a Yinsa khulawa owawe. ⁵¹Nalelo mwinyi otule ari ntarikhi, a karumeya awe khusala anthepeeza oteela omuuza yoori mwanawo ori haayi. ⁵²Paata awoozeliyeevo yoori wakathi ni mwaana otule apatthiyeevo ashikhaali, yo khujipu yoori: “Hooma yanlikha taana payina ya saasapa ya makaaripi.”

⁵³Aphano papaawe mwaana khufwahamu yoori wakathi ooziweeyo ti Yinsa waari otthuupule yoori: “Mwanawo ontta wiiya haayi.” Attaaphale khunkhupali Yinsa ye na atthu ooshi a vaje vawe. ⁵⁴Eto yaari alama ya phiiri ya minjuza Yinsa aarettiyeeyo, paata ya olankha Yudeya eettaka Kalileya.

Ovonisiwa wa namarakala

¹Ziviriyeevo vitthu epile, Yinsa khulawa Yeruzaleemu mwaasa wa njampo la mayaahuuti. ²Ewaakho Yeruzaleemu, kharipu ya Vanlako wa Pwittipwitthi, kulaathayini khwa luuka ya meepereewu eniitthiwa Betezita, eriina milako mithaanu. ³Attaapho aari orapalelakaavo anamarati enkeene; anamarakala, ananhooni na anasupiyaani awejaka nziko wa maati, ⁴maana nlayikha la Mbwana laari wiishukhaka swaafu kiina na wunttula maati apale. Otule aari wiiyaaye wa mwanzo weetta nkulaathayini noovona marati awe. ⁵Attaaphale aarivo mwinyi aariina nyaakha talaathiini na minaane arina supiyaani. ⁶Yinsa khumoona mwinyi otule arapaleliye na khujuwa yoori aaza raku olwaaziwa, khumuuzela yoori: “Weeyo ontakha ovonisiwa?”

⁷Nlwele otule khujipu yoori: “Mbwanaaka, akina hatha ntthu wookaawuni okittha nkulaathayini amana maati onttuliwa. Kitakhaka weettamo, akina antta weettamo miiyo kihineettemo.”

⁸Aphano Yinsa khumuuza yoori: “Olankhe, othuule nrepa lawo weettette!” ⁹Nasaapiru mwinyi otule khwiiya woovona, khuthuula nrepa lawe khwaaza weettetta.

Siikhu yaya etile yaari saapatu. ¹⁰Mwaasa wa ethiito mayaahuuti khumuuza otule aavonisiweeyo yoori: “Leelo saapatu, enikhattaziwa weeyo othuula nrepa lawo.”

¹¹Ye khuwaajipu yoori: “Ntthu akivonisiyeeyo ti akuuziyeeyo yoori: ‘Othuule nrepa lawo na weettette.’ ”

¹²Khumuuzela theenya yoori: “Paani mwinyi aya oto awuuziyeeyo: ‘Othuula nrepa lawo na weettette’?”

¹³Mwinyi otule aavonisiweeyo khaari onjuwa paani otule aya, maana Yinsa khaari wooneya mwaasa wa waattiwavo.

¹⁴Paata ya vitthu epile, Yinsa khukutthanana Nnyupa Woosifwiwamo khumuuza yoori: “Woone, weeyo wavonisiwa! Ohirutele ntwampi yoori ehuurettikhanele etthu yooziti.” ¹⁵Mwinyi otule khulawa khuwooza mayaahuuti yoori aari Yinsa anvonisiyeeyo. ¹⁶Aphano mayaahuuti khwaaza onlupattha Yinsa, maana ye eetta ovonisa saapatu. ¹⁷Ila Yinsa khuwooza yoori: “Paapa ontta okhola khaazi mpakha leelo, na miiyo kintta okhola.” ¹⁸Mwaasa wa ethiito mayaahuuti khusala atakha omuula, woohiiyi paasi mwaasa wa ohishututeli kano monkoni wa saapatu, ila theenya eetta olupa yoori Nluku ti Paapa na ajilikanisanaka Nluku.

Yinsa oneeleza khaazi yawe

¹⁹Aphano Yinsa khuwooza yoori: “Miiyo kiniwuuzani khweele yoori, Mwaana khanretta etthu yawe, ila onretta etile animoonaaye Paapa arettaka. Maana zooshi epile anrettaaye Paapa, Mwaana onretta etthiipo. ²⁰Maana Paapa onimpheta Mwaana na oninthonyeza zooshi anrettaazo, onteela onthoonyeza khaazi kiina zooziti epi yoori mweeyo mwishanke. ²¹Maana etthiipo Paapa aniwaasisimulaaye ananfwa na khuwinkha ohaayi, Mwaana naye oniwinkha ohaayi apale ye aniwatakhaaye. ²²Paapa khanimphuka hatha ntthu, ila Paapa amwinkha Mwanawe ophuka wooshi, ²³yoori ooshi anshitahi Mwaana nkhama aninshitahaazo Paapa. Otule ahininshitahaaye Mwaana khaninshitahi Paapa otule anrumiyeeyo.

²⁴“Miiyo kiniwuuzani khweele yoori, otule ansiilaaye nttakhuzi laka na aninkhupalaaye otule akirumiyeeyo onaaye ohaayi wa mileele, wala khamphukiwa, ila avirela ofwa yoori eeyane ohaayi. ²⁵Miiyo kiniwuuzani khweele yoori, ontta ofiya wakathi, na wafiya, ananfwa anttelaaye osiila huula ya Mwaana wa Nluku na otule anttelaaye osiila oniiya haayi. ²⁶Nkhama etthiipo Paapa eeyiyeeyo mweenyewe ohaayi, amwinkha mwanawe wiiya mweenyewe ohaayi, ²⁷na amwinkha ofwalume yoori aphuke, maana ye Mwaana wa Pinaatamu.

²⁸“Mwihiiye wooshankela epo zaya, maana ontta ofiya wakathi wa ooshi apale ari nkhapuri anttelaaye osiila huula yawe ²⁹anlawa asisimuwe nkhapuri. Apale aari orettaaye zooshapweya anttela osisimuwa eeye haayi, apale aari orettaaye zootakhala anttela osisimuwa eeye ophukiwa. ³⁰Otthome akinwahi oretta hatha etthu. Miiyo kimphuka khwa nanna Paapa akuuziyeeyo, na ophuka waka pi wa shariya maana akineekesa ojituvelisa, ila matakhelo a otule akirumiyeeyo.

Oshaahiti monkoni wa Yinsa

³¹“Nkhama kinjilawela oshaahiti kimweenyewe, oshaahiti aka khahi wa khweele. ³²Ila owaapho nkina anlawelaaye oshaahiti monkoni wa miiyo na miiyo kinjuwa yoori oshaahiti aya opo alupiyeeyo monkoni wa miiyo haakhi.

³³“Mwawaarumiye atthu olawa omuuzela Yaahaya, yo khulaza oshaahiti wa khweele. ³⁴Miiyo akininhithajiya hatha ntthu okilawela oshaahiti, ila kinlupa vitthu epo yoori mweeyo mwiiye wa wuusurukha. ³⁵Yaahaya aari nkhama likhompe laari okholelaaye nuuru yaya nawuumwasikhelani, mweeyo khukhupalela khwa wakathi vattitthiiru ofurahela nuuru yaya eto. ³⁶Ila miiyo kinaaye oshaahiti nwulweene zayita Yaahaya, mwaasa wa khaazi akinkhiyeeyo Paapa yoori kikhole. Ethiito oshaahiti yoori Paapa ti akirumiyeeyo. ³⁷Paapa otu akiperekhiyeeyo, onlaza oshaahiti monkoni wa miiyo. Mweeyo khamwina siile huula yawe, wala khamwina moone nanna ariizo, ³⁸theenya khamwina nttakhuzi lawe nroho, maana khamwinkhupaleeni otule amperekhiyeeyo. ³⁹Mwinsoma Zawaatikhiwa Ttakatthiifu, maana mwinoona yoori khwa yo mwinaaye ohaayi wa mileele, ila pi etthiipo zinikilawelaaye oshaahiti, ⁴⁰ila mweeyo khamwintakha okiteela miiyo yoori mwiiyane ohaayi.

⁴¹“Miiyo akinkhupalela siifwa za anaatamu. ⁴²Ila kinuujuwani mweeyo. Kinjuwa yoori mweeyo khamwina pheta ya Nluku. ⁴³Miiyo kata khwa nzina la Paapa, ila khamwikipwekhereleeni. Nkina amana ata khwa nzina lawe mweenyewe, weekhweele mwintta ompwekherela. ⁴⁴Mwinttela okhupali toovi mwitakhaka osifwiwa pi atthu, mwihitakhaka siifwa ya Nluku mmote paasi?

⁴⁵“Khwa etthiipo mwihaakanyere miiyo wuulokovezani mmakhono wa Paapa. Anttelaaye wuulokovezani ti Munsa, othuuto mwiriinaaye nroromelo enu. ⁴⁶Eriwaka mwaari okhupalela epile Munsa alupiyeeyo, mweetta okikhupalela na miiyo, maana ye aatikha vitthu monkoni wa miiyo. ⁴⁷Ila amana mwihikhupalaka etile aatikhiyeeyo, nanna ni mwinttelaaye okhupalela etile miiyo kinlupaaye?”

Yinsa onjisa khuntti ya atthu

¹Paata ya vitthu epile, Yinsa khulokha pahari ya Kalileya theenya eniitthiwaaye Tiperiyaati. ²Khuntti khuluyeene ya atthu khusala enlotta, maana eettiye woona alama za minjuza aarettiyeezo za owaavonisa alwele. ³Ye khuwela vamwaako khwiikhala attaapho na anakhiyoni awe. ⁴Esaleelaka ofiya siikhu ya orettiwa njampo la Paashikowa la mayaahuuti.

⁵Aphano alansiyeevo maasho khoona khuntti khuluyeene ya atthu yeettaka onteela, Yinsa khumuuzela Filiipe yoori: “Noozanye vayi phaawu niwenkhe atthu apa aje?” ⁶Aamuzeliye yoori amweeze, maana ye aajuwiye etthu aari weettelaaye oretta.

⁷Filiipe khujipu araka: “Nzurukhu miiya piiri wa feeta khunfiyela wuuzanya phaawu yoori wakhula ntthu apatthe pattaasu.”

⁸Aphano nakhiyoni mmote aniitthiwaaye Antere, ttwiiye Simawu Pheeturu, khuri: ⁹“Shaapu otu ariiye apha onaaye phaawu thaanu na swi piiri, ila epo zaya niini khwa atthu awaatta apa?”

¹⁰Yinsa khuri: “Mwiwooze atthu apo eekhale.” Puuro yaya etile zaarivo nyaani zawaatta. Atthu apale khwiikhala, alume aari etthu ya alufu thaanu. ¹¹Aphano Yinsa khuthuula phaawu khunshukhurwela Nluku, khwaawanya na khuretta etthiipo khwa swi, wakhula ntthu khwa khiima aari otakhaaye. ¹²Paata ya orupala, Yinsa khuwooza anakhiyoni awe yoori: “Mwilokotthele zooshi epo zisaliyeezo yoori ehaashikhevo hatha moote.” ¹³Khulokotthela tathela za phaawu epile thaanu, khwiitaala khelenke khumi na piiri, aalikhiyeeyo apale aari orafunaaye. ¹⁴Ooniyeevo alama etile ya minjuza Yinsa aarettiyeeyo khulupaza yoori: “Woohiivo hatha shaakha otu ti Napiyu aari weettelaaye ota voolumwenku.” ¹⁵Yinsa noojuwa yoori aari otakha onthuula na kuvu zaya anrette wiiya mfwalume aya, khulaavo aphale vaya khulawa theenya omwaako otthwe.

Yinsa oneettetta vatulu wa maati

¹⁶Njuwa looveva anakhiyoni a Yinsa khwiishukhela ontthatta. ¹⁷Khupakhira nkalawa, khulokhela kaapu ya Kafwaranaawu. Vathi waariipiyevo, ila Yinsa khaari vamote na yo. ¹⁸Khusala evuma pheevo zawaatta na mpahari khupuwamo mawipi. ¹⁹Anakhiyoni eettaka ofuttha alawaka etthiipile eettettiye kiyasi ya phiima alufu thaanu ama sitha, khusala amoona Yinsa eettaka ota eettettaka vatulu wa maati aattamelaka kalawa; yo khwiiya awoova. ²⁰Ila Yinsa khuwooza yoori: “Ti miiyo! Mwihoove!” ²¹Aphano anakhiyoni apale khumpwekherela na furaha nkalawa mphule nasaapiru khufiya ohali aari weettaawo.

Yinsa phaawu ya ohaayi

²²Mmeesho mwaya, atthu apale asaliyeeyo kaapu ya kiina ya ntthatta, khujuwa yoori kalawa moote etile yaari aphale, Yinsa kapakhiriyemo, anakhiyoni awe aalawiye ottho. ²³Elottelanaka, kalawa kiina za sitati ya Tiperiyaati khufiya kharipu ya aphale atthu aari orafunaavo phaawu wakathi Mbwana Yinsa ashukhurweliyeevo. ²⁴Wakathi atthu apale ajuwiyeevo yoori Yinsa khaarivo aphale na anakhiyoni awe, khweetta nkalawa mwaya khusala alawa Kafwaranaawu olawa omweekesa.

²⁵Nonsikana kaapu ya ntthatta, khumuuzela yoori: “Rabi, wafiya lini okhuno?” ²⁶Yinsa khuwaajipu yoori: “Miiyo kiniwuuzani khweele yoori, mweeyo mwinikeekesa, khahiyo mwaasa wa woona alama za minjuza, ila mwaasa wa orafuna phaawu khwiiya woorupala. ²⁷Mwihikhole khaazi khwa etthu yoojiwa enharipweyaaye, ila khwa etthu yoojiwa eninkhaaye ohaayi wa mileele, ethiito Mwaana wa Pinaatamu aniwinkhaanini. Maana, Nluku Paapa, anttheliyeeyo alama yawe ya onhakikhi.”

²⁸Aphano khumuuzela Yinsa yoori: “Ninhithajiya oretta niini yoori nikhole khaazi Nluku antakhaaye?”

²⁹Yinsa khuwaajipu yoori: “Khaazi Nluku antakhaaye tiiti, onkhupali otule anrumiyeeyo.”

³⁰Aphano khumuuzela yoori: “Alama ni ya minjuza onttelaaye onithoonyeza yoori noone na nuukhupali weeyo? Wala onttela oretta ni? ³¹Amarehemu apapazetthu aja mana n’yaara, nkhama etthiipo enlupaazo Zawaatikhiwa Ttakatthiifu eraka: ‘Ye awenkha etthu yoojiwa ya pinkuuni.’ ”

³²Yinsa khuwooza yoori: “Miiyo kiniwuuzani khweele yoori, khahiyo Munsa awinkhiyeenini phaawu ya pinkuuni, ila Paapa ti aninkhaaye phaawu ya khweele ya pinkuuni. ³³Maana phaawu ya Nluku ti otule eeshukhiyeeyo pinkuuni khwinkha ohaayi olumwenku.”

³⁴Yo khuri: “Mbwana, oninkhe phaawu ethiito khwa mileele!”

³⁵Aphano Yinsa khulupa yoori: “Miiyo ki phaawu ya ohaayi. Otule anikiteelaaye miiyo khinteela onkhola theenya jala na otule anikikhupalaaye miiyo khalinteela onkhola theenya nnyottha. ³⁶Ila nkhama etthiipo miiyo kiwuuziyeenini yoori, mweeyo mwakoona, ila nalelo khamwinkikhupali. ³⁷Wakhula otule Paapa anikinkhaaye, onikiteela miiyo, na otule anikiteelaaye miiyo akinteela onthanya. ³⁸Maana keeshukha pinkuuni, khahiyo yoori kirette matakhelo aka, ila kirette matakhelo awe otule akirumiyeeyo. ³⁹Matakhelo a otule akirumiyeeyo pi apa: ahikaashikhe hatha mmote wa otule akinkhiyeeyo, ila miiyo kinsisimule siikhu ya mwiisho. ⁴⁰Maana matakhelo a Paapa pi yoori wooshi otule animoonaaye Mwaana na khunkhupali eeyane ohaayi wa mileele na miiyo kintta onsisimula siikhu ya mwiisho.”

Waapa wa mayaahuuti

⁴¹Mayaahuuti khusala aapa mwaasa wa Yinsa owooza yoori: “Miiyo ki phaawu yiishukhiyeeyo pinkuuni.” ⁴²Khurutela olupa yoori: “Khahi Yinsa otu, mwaana wa Yuusufu? Onoona yoori fweeyo khanninjuwa papaawe na mamaawe? Onlupa toovi yoori: ‘Keeshukha pinkuuni’?”

⁴³Yinsa khuwaajipu yoori: “Mwilikhe okaapa. ⁴⁴Khaavo ankiteelaaye miiyo woohiiyi otiisiwa ti Paapa, otule akiperekhiyeeyo na miiyo kininsisimula siikhu ya mwiisho. ⁴⁵Yaatikhiwa nkithaapu za manapiyu yoori: ‘Ooshi anttela osomisiwa ti Nluku.’ Nakataalikha, wooshi otule asiiliyeeyo phantte ya Paapa na khujuwa, onikiteela miiyo. ⁴⁶Khina anamoone Paapa, ila otule alankhiyeeyo wa Nluku ti amooniyeeyo Paapa. ⁴⁷Miiyo kiniwuuzani khweele yoori, otule anikikhupalaaye onaaye ohaayi wa mileele. ⁴⁸Miiyo ki phaawu ya ohaayi. ⁴⁹Apapazenu aja mana n’yaara na khufwa. ⁵⁰Eti phaawu yiishukhiyeeyo pinkuuni, yoori wakhula otule anjaaye ahifwe. ⁵¹Miiyo ki phaawu ya ohaayi yiishukhiyeeyo pinkuuni. Ntthu amana aja phaawu yaya eto, ontta wiiyana ohaayi wa mileele na phaawu kininkhaaye olumwenku yoori wiiyane ohaayi, mwiili aka.”

⁵²Aphano mayaahuuti khwaaza onyakulisana atthaaporu araka: “Mwinyi otu onttela oninkha toovi mwiili awe yoori nirafune?” ⁵³Yinsa khuwooza yoori: “Miiyo kiniwuuzani khweele yoori, amana mweeyo mwihirafuni mwiili wa Mwaana wa Pinaatamu na khuhinywi taamu yawe, khamwina ohaayi mwaamweenyewe. ⁵⁴Wakhula otule anrafunaaye mwiili aka na khunywa taamu yaka onaaye ohaayi wa mileele na miiyo kinteela onsisimula siikhu ya mwiisho. ⁵⁵Maana mwiili aka etthu yoojiwa ya khweele na taamu yaka etthu yoonywiwa ya khweele. ⁵⁶Otule anrafunaaye mwiili aka na khunywa taamu yaka oto oniikhala khwa miiyo na miiyo khwa ye. ⁵⁷Nkhama Paapa akiperekhiyeeyo eeyiyeeyo haayi, na miiyo kiniikhala mwaasa wa ye. Khwa etthiipo otule anrafunaaye mwiili aka oniiyana ohaayi mwaasa wa miiyo. ⁵⁸Eti phaawu elankhiyeeyo pinkuuni. Apapazenu aja mana na khufwa, ila otule anrafunaaye phaawu eti oniiya haayi mileele.” ⁵⁹Ye aalupiye mattakhuzi apa wakathi aari osomisaaye nsinakooka ya Kafwaranaawu.

Anakhiyoni awaatta anintthira Yinsa

⁶⁰Paata ya osiila mattakhuzi apale, anakhiyoni enkeene khulupa yoori: “Olipa mattakhuzi aya apa. Paani anwahaaye okhitiri?”

⁶¹Ila Yinsa khujuwa nkatthi mwawe yoori anakhiyoni awe eetta onyakulisana khuwoozela yoori: “Mattakhuzi aka antta wuutapanyani? ⁶²Khi enttela wiiya toovi amana mwimoona Mwaana wa Pinaatamu arutelaka okhu alankhiyeewo? ⁶³Rooho ya Nluku eninkha ohaayi, ila mwiili khuna fwayita. Mattakhuzi apa kiwuuziyeenini pi a rooho na ohaayi. ⁶⁴Ila khwa etthiipo awaapho vakatthi venu akina ahinkhupalelaaye.” Ila Yinsa aari ojuwa omwanzweene paavi apo aya ahaari okhupalaaye na paani aari weettelaaye onzinkula. ⁶⁵Ye khuri: “Tiito kiniwuuzaanini yoori, khina anwahaaye okiteela miiyo kiheetteeni winkhiwa ti Paapa.”

⁶⁶Wakathi otthuupule anakhiyoni enkeene khuntthira na khulikha onlotta.

⁶⁷Yinsa khuwoozela apale khumi na awiri yoori: “Na mweeyo mwintakha okitthira mwilawe?”

⁶⁸Simawu Pheeturu khujipu yoori: “Ninttela onlotta paani? Weeyo onaaye mattakhuzi a ohaayi wa mileele. ⁶⁹Fweeyo ninkhupalela na ninjuwa yoori o Ttakatthiifu wa Nluku.”

⁷⁰Aphano Yinsa khujipu yoori: “Khahi miiyo kiwaathawuliyeeyo apale khumi na awiri? Ila mmote wa mweeyo sheethwani.” ⁷¹Ye aari onlupa Yuuda, mwaana wa Simawu Eshikariyoote, aari mmote wa apale khumi na awiri, ila ti aari weettelaaye onzinkula Yinsa.

Yinsa ontta onjampo la heema

¹Paata ya vitthu epile, Yinsa khusala eettetta nti wa Kalileya, maana khaari otakha wiiya Yudeya, mwaasa wa mayaahuuti aari otakha omuula. ²Ila laattamelaka njampo la heema la mayaahuuti. ³Yinsa khuuziwa ti attwiize yoori: “Weeyo ona yoolaamo mphu olawe Yudeya yoori anakhiyoni awo awahi woona khaazi onkholaaye. ⁴Maana khina aneekesaaye ojuwiwa pi atthu awaatta ankholaaye khaazi zawe sirini. Nkhama weeyo onretta vitthu epi, othoonyeze vamwanttiwa.” ⁵Maana hatha attwiize khaari onkhupali.

⁶Yinsa khuwooza yoori: “Wakathi aka nalelo khunafiye, ila khwa mweeyo wakhula wakathi pi woolikana. ⁷Olumwenku khunwahi wiiphiiriwa ti mweeyo, ila oniiphiiriwa ti miiyo, maana miiyo kininkha oshaahiti wa yoori khaazi zaya pi zootakhala. ⁸Mwilawe onjampo, ila miiyo akinlawa maana khunafiye wakathi aka.” ⁹Paata ya olupa mattakhuzi apale khwiikhala Kalileya.

¹⁰Aphano paata ya attwiize olawa onjampo, ye khaalawiye payana, ila sirini. ¹¹Va njampo aphale mayaahuuti eetta onsaya na omuuzelela araka: “Mwinyi otule ori vayi?”

¹²Vakatthi wa atthu apale waarivo waapa monkoni wa ye, akina aari olupa toono: “Mwinyi wooshapweya rooho.” Akina araka: “Wala, oniwaattettekha atthu.” ¹³Ila khaavo aari ottakhulaaye payana mwaasa wa owoova mayaahuuti.

Yinsa oneetta onjampo

¹⁴Wakathi lifiiyeevo vakatthi njampo ntthile, Yinsa khweetta Nnyupa Woosifwiwamo khwaaza osomisa. ¹⁵Mayaahuuti khwiiya ooshanka na khuuzela yoori: “Mwinyi otu ajuwa toovi kano ahisomeeni?”

¹⁶Yinsa khuwaajipu yoori: “Osomisa waka khahiyo waka, walankha wa otule akiperekhiyeeyo. ¹⁷Amana ntthu ajilakelela oretta matakhelo a Nluku, ontta osophela nkhama osomisa waka onlankha wa Nluku ama kinjilupa kimweenyewe. ¹⁸Otule anjilupaaye mweenyewe oneekesa siifwa yawe, ila otule aneekesaaye siifwa ya otule amperekhiyeeyo, oto ti wa khweele; khayiivo hatha etthu yoovonyeya vakatthi vawe. ¹⁹Munsa awinkhani kano! Ila khina mmote wa mweeyo anshututelaaye. Khi mwineekeselani okuula?”

²⁰Atthu apale khujipu yoori: “Weeyo ona sheethwani! Antakhaaye owuula ti paani?”

²¹Aphano Yinsa khuri: “Keetta oretta minjuza, mooshi mweeyo ooshanka. ²²Mwaasa wa yoori Munsa awenkha okhiriya weetta ohiiyiru woolankha wa Munsa ila walankha wa amarehemu apapazetthu, mweeyo mwinkhiriyisana saapatu. ²³Moone, nkhama athuuliwa nlume khukhiriyisiwa Saapatu, yoori kano za Munsa zimariseliwe, khi mwiniphireliwani ti miiyo mwaasa wa ovonisa mwiili wooshi wa ntthu otu Saapatu? ²⁴Mwihiphukane mwaasa woona nanna ariizo ntthu aya, ila mwisala mwiphukana khwa shariya.”

Yinsa onsomisa va njampo

²⁵Atthu akina a Yeruzaleemu khusala alupa yoori: “Khahiyo mwinyi othuutu mwaari omwekesaaye yoori mwimuule? ²⁶Mwimoone, ye onttakhula vamwanttiwa, ila khuhisala apuwa hatha ntthu wonkheeti! Talili afwalume anjuwa saaneene yoori otu ti Al-Masiihu? ²⁷Ila fweeyo ninjuwa ohali alankhiyeewo. Amana Al-Masiihu ata, khina anttelaaye ojuwa ohali alankhiyeewo.”

²⁸Wakathi aari osomisaaye Nnyupa Woosifwiwamo, Yinsa khuttakhula woosileyavo araka: “Aaa, mweeyo mwakijuwa na mwinjuwa ohali kilankhiyeewo. Miiyo akiri apha khwa matakhelo aka, ila otule akirumiyeeyo ti eeyiye khweele. Otule mweeyo mwihininjuwaaye, ²⁹ila miiyo kininjuwa maana kata khwa ye na ti akirumiyeeyo.”

³⁰Aphano khusala atakha onkhola, ila khuhiivo mmote ansapiyeeyo maana wakathi waari ohinafiye. ³¹Atthu enkeene aari aphale khumkhupali na khusala alupa yoori: “Amana Al-Masiihu ata, onteela oretta alama zootikinisa zayita epi arettiyeeyo mwinyi otu?”

Anamweekesela aarumiweeyo yoori ankhole Yinsa

³²Mafwarizeewu noowasiila atthu aapaka monkoni wa Yinsa, aphano mahaakhimu a tiini na mafwarizeewu khuwaaruma anamweekesela a Nnyupa Woosifwiwamo yoori ankhole. ³³Yinsa khuwooza yoori: “Kiri vamote na mweeyo wakathi vattitthiiru nawiisha kinlawa wa otule akirumiyeeyo. ³⁴Mweeyo mwinlawa mwakeekese, ila mwihikipatthe; maana mweeyo khamwinwahi ofiya okhu kinttelaaye wiiyawo.” ³⁵Mayaahuuti khusala oozelana atthaaporu yoori: “Ontta vayi mwinyi aya otu nihinttelaaye onsikana? Talili onttela wiikhala na mayaahuuti apale aniikhalaaye malaponi, ama onttela owaasomisa akereeku? ³⁶Maana aya niini, a eto aalupiyeeyo yoori: ‘Mweeyo mwinlawa mwakeekese ila mwihikipatthe,’ maana ‘mweeyo khamwinwahi ofiya okhu kinttelaaye wiiyawo’?”

Nlipu wa maati ohaayi

³⁷Siikhu ya mwiisho la njampo, yaatepiye otafikhana, Yinsa khulankha khweemela khukhuwelela araka: “Nkhama owaapho linkholiyeeyo nnyottha, akiteele miiyo anywe. ³⁸Maana otule anikikhupalaaye miiyo, nkhama enlupaazo Zawaatikhiwa Ttakatthiifu: ‘nkatthi mwawe zinttela wiittikhamu nyuuttho za maati ohaayi.’ ” ³⁹Ye aari olupa monkoni wa Rooho Ttakatthiifu etile aari oteelaaye winkhiwa apale akhupaliyeeyo. Maana nalelo Yinsa aari ahinasifwiwe.

Waawanyeya wa atthu

⁴⁰Aphano noosiila atthu apale aathukumaniyeeyo aphale khuri: “Otu ti Napiyu weekhweele!” ⁴¹Akina khusala alupa yoori: “Ye ti Al-Masiihu!” Akina khusala oozelana yoori: “Al-Masiihu onttela olankha Kalileya? ⁴²Zawaatikhiwa Ttakatthiifu zinlupa yoori Al-Masiihu onttela olankha khwa ojama wa Daawuuda nti wa Belemu, okhu aari wiikhalaawo Daawuuda.” ⁴³Mwaasa wa ye khupuwa waawanyeya khwa atthu apale. ⁴⁴Akina khusala atakha onkhola Yinsa, ila khuhiivo hatha ntthu ansapiyeeyo.

Anamalokozela amayaahuuti aninkatthala Yinsa

⁴⁵Anamweekesela khulawa wa mahaakhimu a tiini na mafwarizeewu, atthaapo oozeliyeeyo yoori: “Mwaasa aya niini mwihintisaka?” ⁴⁶Yo khujipu yoori: “Khina anattakhule nkhama mwinyi oto anttakhulaazo.” ⁴⁷Mafwarizeewu khuuzela yoori: “Niri talili na mweeyo mweetta ohatiwa? ⁴⁸Awaapho afwalume ama mafwarizeewu ankhupaliyeeyo? ⁴⁹Wala! Ila atthu apo ahinjuwaaye hatha etthu ya kano alaanikha.” ⁵⁰Mmote wa atthaapale aari wiitthiwaaye Nikoteemu, otule swaafu moote alawiyeeyo okutthanana Yinsa, khuuzela yoori: ⁵¹“Kano zeetthu khazininhukhumu ntthu, ahaazeeni khapula osiiliwa khujuwiwa etthu arettiyeeyo, khahi etthiipo?” ⁵²Yo khujipu yoori: “Na weeyo o wa Kalileya? Woone na ontta ojuwa yoori Kalileya khampuwawo hatha napiyu.” ⁵³Aphano wakhula mmote khulankha khusala alawa owawe.

Muukha aasikaniweeyo araruwaka

¹Attaaphale Yinsa khulankha khusala alawa omwaako wa Oluveera. ²Supuyeene khurutela Nnyupa Woosifwiwamo, atthu ooshi khusala alawa onkutthanana, ye khwiikhala khusala awaasomisa. ³Anamanozela a kano na mafwarizeewu khuntana muukha mmote ansikaniyeeyo eettaka oraruwa. Khumweemesa vakatthi wa atthu apale. ⁴Khuuziwa Yinsa yoori: “Mwaaliimu, muukha otu asikaniwa eettaka oraruwa. ⁵Muukha toowo, nkatthi wa kano za Munsa, enniruma onvonya na mawe. Khi weeyo onlupa ni?” ⁶Aari olupa toowo atakhaka yoori apatthe nanna yonlokoveza. Ila Yinsa khwiinama khusala aatikha vathi na yaala. ⁷Wiiya eetta okhanyarela omuuzela, Yinsa khulankha khuwooza yoori: “Otule khwa mweeyo, ahina twampi eeye wamwanzo omweeselela liwe muukha otu.” ⁸Khurutela wiinama khusala aatikha theenya vathi.

⁹Noosiila mattakhuzi apale, ooshi khulaavo mmote mmote, aaziye apale awulu. Khusalavo Yinsa na muukha otule eemeliye, attaaphale. ¹⁰Aphano Yinsa khulankha khweemela khumuuzela yoori: “Muukha, ari vayi apale aya? Khina oohukhumwiyeeyo?”

¹¹Ye khujipu yoori: “Khina mmote, Mbwana.” Aphano Yinsa khumuuza yoori: “Na miiyo akinuuhukhumu. Olawe na ottharuwe oretta twampi.”

Yinsa nuuru ya olumwenku

¹²Yinsa khurutela owooza theenya yoori: “Miiyo ki nuuru ya olumwenku; otule anikilottaye khaneettetta n’yiiza, ila oniiyana nuuru ya ohaayi.”

¹³Mafwarizeewu khusala amuuza yoori: “Weeyo ojilawela oshaahiti omwenyeweru. Apho oshaahiti awo khahiyo wa khweele.”

¹⁴Yinsa khuwaajipu araka: “Hatha nkhama kintta ojilawela oshaahiti, oshaahiti aka pi wa ookhweele, maana kinjuwa ohali kilankhiyeewo na ohali kineettaawo. Ila mweeyo khamwinjuwa ohali kilankhiyeewo wala ohali kineettaawo. ¹⁵Ophuka weenu mweeyo pi wa phantte ya onaatamu; ila miiyo akinimphuka hatha ntthu. ¹⁶Hatha nkhama kintta ophuka, ophuka waka pi wa khweele, maana akiri otthome. Kiina Paapa otule akirumiyeeyo. ¹⁷Nkano zenu mweeyo yaatikhiwa yoori oshaahiti wa atthu awiri pi wa khweele. ¹⁸Miiyo kinjilawela oshaahiti na Paapa otule akirumiyeeyo onikilawela oshaahiti.”

¹⁹Aphano khumuuzela yoori: “Papaawo aya ori vayi?” Yinsa khuwaajipu yoori: “Mweeyo khamwinikijuwa miiyo na khamwininjuwa Paapa, eriwaka mwaari okijuwa, mweetta onjuwa Paapa.” ²⁰Ye aalupiye mattakhuzi apa eettaka osomisa Nnyupa Woosifwiwamo, kharipu ya puuro etile entthiwaamo zaakha. Ila khina mmote ankholiyeeyo, maana waari ohinafiye wakathi aya.

Yinsa onaakisela khaazi yawe na ofwalume

²¹Yinsa khurutela olupa theenya yoori: “Miiyo kintta olawa, mweeyo mwinlawa mwakeekese na mwinfwa na twampi zenu. Ohali kineettaawo mweeyo khamwinwahi ofiyawo.”

²²Aphano mayaahuuti khuuzelana yoori: “Talili ye onttela ojuula? Tiito anlupaaye yoori: ‘Ohali kineettaawo mweeyo khamwinwahi weettawo’?”

²³Yinsa khurutela olupa theenya yoori: “Mweeyo mwa atthu a vathi attaapha; miiyo ki wa otulu. Mweeyo mwa voolumwenku; ila miiyo aki wa voolumwenku. ²⁴Tiito kinlupaaye yoori mwinttela ofwa ntwampi mweenu. Nkhama mweeyo khamwinkhupali yoori Miiyo Ti Miiyo, weekhweele mwinttela ofwa ntwampi mweenu.”

²⁵Aphano khumuuzela Yinsa yoori: “O paani weeyo?” Yinsa khujipu yoori: “Thanku omwanzo kawuuzani. ²⁶Kinaaye vitthu zawaatta zoolupa na ophuka monkoni wa mweeyo. Ila otule akirumiyeeyo ti wa khweele na kinuuza olumwenku epile kinsiliyeeyo paasi.”

²⁷Yo khuhiweeleyi yoori Yinsa aari owuuza monkoni wa Paapa. ²⁸Aphano Yinsa khuri: “Amana mweeyo mwinsifu Mwaana wa Pinaatamu, mwintta ojuwa yoori Miiyo Ti Miiyo na akinretta hatha etthu ya matakhelo aka, ila kinlupa etile Paapa akisomisiyeeyo. ²⁹Otule akirumiyeeyo ori vamote na miiyo, ye khakilikheeni wiiya otthome, maana wakhula wakathi kinretta etile enintuvelaaye.” ³⁰Alupiyeevo mattakhuzi apale, atthu awaatta khumkhupali.

Aana a Eburahiima na aana a sheethwani

³¹Yinsa khuwooza mayaahuuti apale ankhupaliyeeyo yoori: “Amana mweeyo mwijilipisana nttakhuzi laka, weekhweele mwinttela wiiya anakhiyoni aka; ³²na mwinttela ojuwa haakhi, na haakhi ethiito entta wuutaphulani.”

³³Yo khunjipu yoori: “Fweeyo na ojama wa Eburahiima wala khanineeyeke amwiitthwaana a ntthu nkina. Weeyo onlupa toovi yoori ninttela wiiya wootaphuliwa?”

³⁴Yinsa khuwaajipu araka: “Miiyo kiniwuuzani khweele yoori, wooshi otule aniikhalaaye khwa twampi mwiitthwaana wa twampi. ³⁵Mwiitthwaana khaniiyana puuro ya mileele vakatthi wa ajama, ila mwaana oniiyana puuro ya mileele. ³⁶Amana Mwaana ootaphulani, weekhweele mwiniiya wootaphuwa. ³⁷Miiyo kinjuwa saaneene yoori mweeyo mwa ojama wa Eburahiima, ila mwineekesa okuula, maana khwa mweeyo nttakhuzi laka khalina puuro. ³⁸Miiyo kiniwuuzani epile kooniyeezo wa Paapa, na mweeyo mwinretta epile mwisiiliyeezo wa papeenu.”

³⁹Aphano yo khunjipu yoori: “Papeetthu ti Eburahiima!” Yinsa khuwooza theenya yoori: “Eriwaka mwaari aana a Eburahiima, mweetta okhola khaazi epile Eburahiima akholiyeezo. ⁴⁰Ila mweeyo mwintakha okuula, kiri miiyo kiwuuziyeenini haakhi etile kisiiliyeeyo wa Nluku. Eburahiima kharetteeni toowo. ⁴¹Mweeyo mwinretta etile papeenu arettiyeeyo.” Yo khujipu yoori: “Fweeyo khahi na aana pure, ninaaye Paapa mmote paasi Nluku.”

⁴²Yinsa khuwooza yoori: “Eriwaka Nluku aari Papeenu, mweetta okipheta, maana miiyo kalankha wa Nluku tiito kiriiyo apha. Miiyo akijitiiseeni otthome, ila ye ti akirumiyeeyo. ⁴³Mwaasa wa niini mweeyo ehiweeleyakani hapari zaka? Ama mwintta woona olipa nttakhuzi laka.

⁴⁴“Mweeyo mwinaaye papeenu, sheethwani, na mwintakha oretta etile enintuvelaaye. Ye namahusuti waaza omwanzweene wala khanalotteleke haakhi, maana ye khana haakhi. Amana ahataka onlupa mattakhuzi awe, maana namahata, paapa wa ohata. ⁴⁵Maana mwaasa wa miiyo olupa haakhi, khamwinkitakha! ⁴⁶Paani wa mweeyo anwahaaye okilokoveza oretta twampi? Nkhama kinlupa haakhi, khi mwaasa wa niini mwihikikhupalaka? ⁴⁷Otule eeyiyeeyo wa Nluku onsiila mattakhuzi a Nluku. Mweeyo khamwinsiileza maana khayi mwa a Nluku.”

Yinsa na Eburahiima

⁴⁸Mayaahuuti khumuuza Yinsa yoori: “Fweeyo khanivonyeleeni olupa yoori weeyo o nsamariiya na onaaye sheethwani.”

⁴⁹Yinsa khuwaajipu yoori: “Miiyo akina hatha sheethwani; olikha toowo, kininshitahi Paapa, ila mweeyo mwinkitarawu. ⁵⁰Miiyo akineekesa ojisifu, ila owaapho anekesaaye khwa miiyo na namaphuka. ⁵¹Miiyo kiniwuuzani khweele yoori, otule anshututelaaye nttakhuzi laka khanteela woona ofwa.”

⁵²Mayaahuuti khujipu araka: “Aphano ninjuwa yoori khweele onaaye sheethwani! Eburahiima afwa, na manapiyu, ila weeyo onlupa yoori: ‘Ntthu amana ashututela nttakhuzi aka khanteela ofwa.’ ⁵³Weeyo onwulweene zayita papeetthu Eburahiima? Ye afwa na manapiyu afwa, khi weeyo onjoona nkhama paani?”

⁵⁴Yinsa khuwaajipu yoori: “Nkhama kintta ojisifu, ojisifu waka khuna maana. Paapa otule mweeyo mwinraaye ‘Nluku eetthu,’ ti anikisifwisaaye. ⁵⁵Mweeyo khamwininjuwa, ila miiyo kininjuwa. Eriwaka keettiye olupa yoori akininjuwa, kaari wiiya namahata nkhama mweeyo, ila miiyo weekhweele kininjuwa na kinshututela nttakhuzi lawe. ⁵⁶Eburahiima papeenu aari woofurahi paata ya woona siikhu ya ota waka; khoona na khufurahela.”

⁵⁷Mayaahuuti khumuuzela yoori: “Weeyo nalelo khuneeyane nyaakha hamusiini, wamoona toovi Eburahiima?”

⁵⁸Yinsa khuwaajipu yoori: “Miiyo kiniwuuzani khweele yoori, Eburahiima ahinavokoliwe Miiyo Ti Miiyo.” ⁵⁹Aphano mayaahuuti khuthuula mawe yoori anvonye, ila Yinsa khujivitha na khusaruwamu Nnyupa Woosifwiwamo.

Yinsa oninvonisa ntthu aavokoliweeyo ahoonaka

¹Yinsa alawaka, ntarikhi khumoona mwinyi mmote aavokoliweeyo ari woohooni. ²Anakhiyoni awe khumuuzela yoori: “Rabi, otu ovokoliwa ahoonaka, mwaasa wa twampi zawe, ama, twampi za apapaze?”

³Yinsa khuwaajipu yoori: “Khahiyo ye wala apapaze akosiyeeyo, ila vitthu epi zarettikhana yoori owahi wa Nluku othoonyezeye muuhaayi mwawe. ⁴Maana enihithajiya okhola khaazi nthana otthuupu za otule akirumiyeeyo, amana oripa khina anwahaaye okhola khaazi. ⁵Wiiya kiri voolumwenku, ki nuuru ya olumwenku.”

⁶Paata ya olupa mattakhuzi apale khutthemela vathi, maattha awe khuphakanya na mattophe khuttukunttela mmaasho a mwinyi otule. ⁷Aphano khumuuza yoori: “Olawe wajoose nkulaathayini ya Siloowe” (liriina maana a “orumiwa”). Mwinyi otule khulawa khujoosa khuruti eettaka woona.

⁸Anamwaattamanana awe na apale aamoniyeeyo raku alolaka zimola khuuzela yoori: “Khahiyo mwinyi othuutu aari wiikhalakhaaye na olola zimola?” ⁹Akina khusala alupa yoori aari ye. Akina khusala alupa yoori: “Khahiyo, eetta olattanana.” Ila mweenyeweene khusala akhanyarela yoori: “Ti miiyo ena.”

¹⁰Aphano khusala amuuzela yoori: “Afunuliwa toovi maasho awo?”

¹¹Mwinyi otule khuwaajipu yoori: “Mwinyi aniitthiwaaye Yinsa eetheyiye mattophe, khuttha mmaasho mwaka na khukuuza olawa ojoosa okulaathayini ya Siloowe. Miiyo khulawa khujoosa apha kinoona.”

¹²Yo khumuuzela yoori: “Ori vayi mwinyi aya oto?” Mwinyi otule khujipu yoori: “Akijuweeni.”

Mafwarizeewu animuuzela nanhooni

¹³Khuthuuliwa mwinyi otule ahaari woonaaye khulawaniwa wa mafwarizeewu. ¹⁴Siikhu Yinsa eetheyiyeeyo mattophe khufunulana maasho a mwinyi otule, yaari Saapatu. ¹⁵Aphano mafwarizeewu khumuuzela theenya mwinyi otule nanna awahiyeezo woona. Mwinyi otule khujipu yoori: “Ye eettiye weetheya mattophe khuttha mmaasho mwaka miiyo khulawa khujoosa, apha kinoona.”

¹⁶Mafwarizeewu akina khulupa yoori: “Mwinyi oto khahiyo wa Nluku, maana khanshitahi Saapatu.” Akina aya khusala oozela yoori: “Natwampi onretta nanna ni alama nkhama epo zootikinisa?” Attaaphale khupuwavo ohisiilani.

¹⁷Khurutela omuuzela otule ahaari woonaaye yoori: “Khi weeyo onttela olupa niini monkoni wa oto aya, maana ofunula maasho awo?” Mwinyi otule khujipu yoori: “Ye napiyu.”

¹⁸Mayaahuuti khaari okhupalela yoori ye khaari woonaka apha ti anwahaaye woona. Tiito khukhuweliwa apapaze. ¹⁹Khuwoozela yoori: “Otu mwanenu othuutu mwaari onlupaaye yoori avokoliwa woohooni? Khi nanna ni anoonaavo nasaapi ti?”

²⁰Apapaze khujipu yoori: “Fweeyo ninjuwa yoori otu mwanetthu na avokoliwa ari woohooni; ²¹ila khanijuweeni nanna oniyeezo nasaapi eti na ntthu anfunuliyeeyo maasho khaninjuweeni. Mwimuuzele mweenyewe, hirimu eto ariina, onwahi onlupa.” ²²Apapaze aajipwiye toowo mwaasa wa owoova mayaahuuti; maana eettiye olupa yoori otule anttelaaye olupa yoori Yinsa ti Al-Masiihu, ontta wiikariwa nsinakooka. ²³Tiito apapaze alupiyeeyo yoori: “Khwa hirimu eto ariina, mwimuuzele mweenyewe.”

²⁴Khunkhuwela swaafu ya phiiri mwinyi otule ahaari woonakaaye khumuuza yoori: “Olaphe khwa Nluku na olupe haakhi. Maana najuwa yoori mwinyi aya oto natwampi.”

²⁵Mwinyi otule khujipu yoori: “Nkhama natwampi miiyo akijuweeni; etthu kinjuwaaye ti yoori miiyo akaari woona ila apha kinoona!”

²⁶Khumuuzela theenya yoori: “Oorettela niini? Ama ofunula toovi maasho?”

²⁷Mwinyi otule khujipu yoori: “Miiyo kawuuzani! Mweeyo khuhikisilezi. Mwaasa niini mwintakhelaaye osiila theenya? Na mweeyo mwintakha mwiiye anakhiyoni awe?”

²⁸Aphano khunttukhana na khulupa yoori: “Nakhiyoni awe ti weeyo! Fweeyo na anakhiyoni a Munsa! ²⁹Fweeyo ninjuwa yoori Nluku attakhulana Munsa; ila mwinyi oto fweeyo wala khaninjuwa ohali alankhiyeewo.”

³⁰Mwinyi otule ahaari woonakaaye khujipu yoori: “Eto etthu yootikinisa! Mweeyo khamwinjuwa ohali alankhiyeewo, ila akifunula maasho. ³¹Ninjuwa yoori Nluku khaninsileza natwampi; ila olikha toowo, nkhama ntthu onimoova Nluku na khusala aretta matakhelo awe, oto Nluku ontta onsiila. ³²Thanku olumwenku wumpiwe khina hatha ntthu mmote ana siile yoori maasho a ntthu woovokoleliwa ahoonaka afunuliwa. ³³Eriwaka mwinyi oto khaari wa Nluku, khaari owahi oretta hatha etthu.”

³⁴Mayaahuuti khunjipu yoori: “Weeyo wavokoliwa ntwampi; onaaye makhaamu oonisomisa fweeyo?” Attaaphale khumwiikara.

Oohooni wa nroho

³⁵Yinsa khusiila yoori mwinyi otule eekariwa nsinakooka. Khulankha olawa omweekesa nonsikana khumuuzela yoori: “Weeyo oninkhupali Mwaana wa Pinaatamu?”

³⁶Ye khujipu yoori: “Mbwana, paani oto aya yoori na miiyo kinkhupali?”

³⁷Yinsa khumuuza yoori: “Weeyo wamoona ti othuutu onttakhulanaaye.”

³⁸Aphano mwinyi otule khulupa yoori: “Oo Mbwana, kookhupali!” Na khumwaaputu.

³⁹Yinsa khuri: “Miiyo kata voolumwenku apha oteela ophuka, na yoori apale ahinoonaaye oone, apale anoonaaye azukuluwe eeye oohooni.”

⁴⁰Mafwarizeewu akina aya aari attaaphale nonsiila alupaka mattakhuzi apale khumuuzela yoori: “Talili na fweeyo khaninoona?”

⁴¹Yinsa khuwaajipu yoori: “Eriwaka mweeyo mweettiye wiiya woohooni, khamwaari wiiyana paathwili ya twampi; ila apha wiiya mwinlupa yoori mwinwahi woona, paathwili yenu nalelo mwinaaye.”

Yinsa nshuki wokhaamili

¹“Miiyo kiniwuuzani khweele yoori, otule ahinviraaye vanlako wa nzizi la pwittipwitthi, ila khweetta wawiirukhelamo, oto nantarawu na nazompere. ²Otule anviraaye vanlako, oto nshuki wa pwittipwitthi. ³Amana ataaka oto aya, namweekesela ontta ofukula nlako na pwittipwitthi zintta osiila huula yawe na ye ontta okhuwela wakhula moote na nzina laya asarulelaka vaje. ⁴Paata ya osarula zooshi epile ziiyiyeeyo zawe, ontta olokozela, khusala zinlotta maana zinjuwa huula yawe. ⁵Ila khazinlawa onlotta ntthu woohijuweyi; zinintthira oto aya, maana khazinjuwa huula yawe.” ⁶Yinsa awooziye nlikaniso opo, ila yo khuhiweeleyi maana a epile aari owoozaaye.

⁷Yinsa khurutela owooza theenya yoori: “Miiyo kiniwuuzani khweele yoori: Miiyo ki nlako wa pwittipwitthi. ⁸Ooshi apale atiiyeeyo kihinate, manantarawu na anazompere, ila pwittipwitthi khuhiwaasiili. ⁹Miiyo ki nlako; otule anviraaye khwa miiyo ontta wuusurukha. Na onaaye ruhusa ya ovira khusaruwa na onsikana nnyepu. ¹⁰Nantarawu onteela wiiya, wuula na otapanya. Miiyo kata yoori mwiiyane ohaayi wa waatta na woolikana.

¹¹“Miiyo ki nshuki wokhaamili. Nshuki wokhaamili onleva ohaayi awe mwaasa wa pwittipwitthi zawe. ¹²Namapokhera, khahiyo nshuki wa pwittipwitthi na khahiyo mweenyewe, amana oona miiji zitaaka, ontta otthira khulikha pwittipwitthi ottho. Aphano miiji ontta wiikarisa pwittipwitthi zimwazeye. ¹³Ye ontta otthira maana ontta opokhera na khanjali pwittipwitthi zaya.

¹⁴“Miiyo ki nshuki wokhaamili; kinjuwa pwittipwitthi zaka na yo zinikijuwa, ¹⁵etthiipo Paapa anikijuwaaye na miiyo kininjuwa Paapa; na kininkha ohaayi aka pwittipwitthi zaka. ¹⁶Kinaaye theenya pwittipwitthi kiina zihimo mmwizizi mphu. Epo enikihithajiya weettela kikusanye na epi ziiye liphanko limote na nshuki mmote na epo zinteela osiila huula yaka. ¹⁷Tiito Paapa onikipheta, maana miiyo kininkha ohaayi aka yoori kipwekherele opheya. ¹⁸Khina anikinyakanyaaye, ila miiyo kininkha khwa matakhelo aka ooshi. Kinaaye ruhusa ya winkha na othuula. Oruma opo kapokhera wa Paapa.”

¹⁹Mwaasa wa mattakhuzi atthaapo, mayaahuuti khurutela waawanyeya theenya. ²⁰Akinoko aari olupa yoori: “Ye onaaye masheethwani na ona tuutu! Mwininsiilezela ni?” ²¹Akina khusala alupa yoori: “Nanna nkhama eto yoottakhula khahiyo ya namasheethwani; sheethwani khanwahi ofunula maasho a ntthu woohooni!”

Mayaahuuti khaninkhupali Yinsa

²²Waari wakathi wa mwiita, Yeruzaleemu laariwo njampo la winkhelela. ²³Yinsa aari ovira Nlivenu la Seleyimaana wa Nyuupa Yoosifwiwamo. ²⁴Aphano mayaahuuti khunzukulela khusala amuuzela yoori: “Onnilikhela mishikili mpakha lini? Onuuze saana nkhama weeyo o Al-Masiihu?”

²⁵Yinsa khuwaajipu yoori: “Miiyo kawuuzani, ila mweeyo khuhikhupali. Khaazi kinkholaazo miiyo khwa nzina la Paapa enhakikhi monkoni wa miiyo. ²⁶Ila mweeyo khamwinkhupalela maana khayi mwa pwittipwitthi zaka. ²⁷Pwittipwitthi zaka ensiila huula yaka na miiyo kinjuwa na zinikilotta. ²⁸Miiyo kininkha ohaayi wa mileele; wala khazimpwetheya na khaavo anttelaaye olazamo mmakhono mwaka. ²⁹Paapa otu akinkhiyeeyo epi, nwulweene zayita vitthu zooshi, na mmakhono wa Paapa khina anwahaaye olazamo. ³⁰Miiyo na Paapa na amote.”

³¹Mayaahuuti khuthuula mawe opheya yoori anvonye, ³²Yinsa khuwooza yoori: “Miiyo karetta vakatthi venu vitthu zawaatta zooshapweya Paapa akirumiyeezo oretta, khwa zooshi ti tiivi mwintakhelaaye okivonyela?”

³³Mayaahuuti khunjipu Yinsa yoori: “Khahiyo mwaasa wa khaazi zooshapweya ninttelaaye wuupwechela, mwaasa wa okufuru, maana weeyo o pinaatamu, ila onjiretta wiiya Nluku.”

³⁴Yinsa khuwooza yoori: “Yaatikhiwa nkano mweenu na ‘Miiyo khulupa yoori: Mweeyo mwa miluku!’ ³⁵Nkhama ye awaatthaja o miluku apale liwaateliyeeyo nttakhuzi la Nluku, na Zawaatikhiwa Ttakatthiifu khazinfujiwa, ³⁶aphano otule Paapa anttakatthisiyeeyo na khunruma voolumwenku, mwinri: ‘Weeyo onamakufuru,’ mwaasa wa niini kilupaka yoori ‘Ki mwaana wa Nluku?’ ³⁷Amana kihikholi khaazi ya paapa, mwihikikhupalele. ³⁸Ila nkhama kinretta, hatha nkhama khamwinkikhupali miiyo, mwikhupalele khaazi ethiito, yoori mwiwahi ojuwa na oweeleyani yoori Paapa ori vamote na miiyo na miiyo kiri wa paapa.” ³⁹Khusala atakha onkhola theenya, ila Yinsa khusuruwamo mmakhono mwaya.

⁴⁰Aphano Yinsa khulokha opheya muuttho Yorotaani khulawa mpakha puuro etile Yaahaya aari owoosaawo atthu, eettaka waazaru khaazi yawe. Khwiikhala ottuukho. ⁴¹Atthu awaatta khulawa mpakha aphale aariivo khusala alupa yoori: “Yaahaya khaarettiye alama za minjuza, ila zooshi epile aari olupaazo monkoni wa mwinyi otu zaari za haakhi.” ⁴²Attaaphale atthu awaatta khumkhupali Yinsa.

Ofwa wa Laazaru

¹Aarivo mwinyi mmote aari wiitthiwaaye Laazaru ye aari wa nti wa Betaaniya, ottuukho aari wiikhalaawo Mariyamu na ttwiiye Maarata. Laazaru otule khwiiya nlwele. ²Mariyamu otu, nlupuwe Laazaru aari olwaaziwaaye, ti otule aavaaziyeeyo mafuttha oonukhela moolu a Yinsa khukukuttha na nyuuli zawe. ³Alupuwe khunruma ntthu olawa omuuza Mbwana yoori: “Mbwana, jiraani awo nlwele.”

⁴Wakathi Yinsa asiiliyeevo vitthu epile khuri: “Olwele aya opo khunlawa omuula, pu wa siifwa ya Nluku, yoori Mwaana wa Nluku attitthimisiwe khwa olwele otthuupo.” ⁵Yinsa aari ompheta Maarata, Mariyamu na Laazaru. ⁶Ila wakathi asiiliyeevo olwele opule aarupaziyewo siikhu piiri okhule aariiwo.

⁷Nawiisha khuwooza anakhiyoni awe yoori: “Nlaweni theenya nirutele Yudeya.”

⁸Anakhiyoni khulupa araka: “Rabi, onfwahamu yoori khwa siikhu vattitthiiru mayaahuuti aari otakha wuuvonya, apho onrutela ottuukho?”

⁹Yinsa khujipu araka: “Nthana khuna wakathi khumi na miwiri? Ntthu amana eettetta nthana khankwakwattuwa, maana onoona nuuru ya olumwenku otthuupu. ¹⁰Ila amana ntthu eettetta osikhu ontta okwakwanttuwa maana khiniiyavo nuuru.”

¹¹Paata ya olupa toowo, khurutela theenya araka: “Swaahipu eetthu Laazaru ontta olala, ila miiyo kineetta ottuukhu kanlanse.”

¹²Aphano anakhiyoni awe khumuuza theenya yoori: “Mbwana, nkhama ye ontta olala, onvona.” ¹³Ila Yinsa aari olupa yoori Laazaru afwa. Ila yo aari waakanyera yoori aari olupa osikizi paasi.

¹⁴Aphano Yinsa khuwooza saana yoori: “Laazaru afwa, ¹⁵ila Miiyo kiwoofurahi mwaasa woohiiwo okhuwaya, maana toowo mweeyo mwinttela okikhupali. Nlaweni mpakha owawe.”

¹⁶Aphano Tome aari wiitthiwaaye Maphapo khuwooza anakhiyoni azaawe: “Nlaweni nafwe vamote na ye.”

Yinsa oniwaathuza nafusi alupuwe Laazaru

¹⁷Wakathi Yinsa afiiyeevo ansikaniye Laazaru azikhiwe ziviriyeevo siikhu nne. ¹⁸Betaaniya waari kharipu kiyasi ya mwentto wa phiima alufu ttatthu olankha Yeruzaleemu, ¹⁹na mayaahuuti enkeene aalawiye onthotola Maarata na Mariyamu na onzuru mwaasa wa opwetheyiwa ti nlupwaaya. ²⁰Maarata noosiila yoori Yinsa ontta ota khunthepeeza, ila Mariyamu aasaliye eekhaliye onti.

²¹Maarata khumuuza Yinsa yoori: “Mbwana, eriwaka waarivo, nlupwaaka khaari ofwa. ²²Ila theenya kinjuwa yoori hatha nkhama nasaapi eti, Nluku oniwinkha wakhula etile oninvekelaaye.”

²³Yinsa khumuuza: “Nlupuwo onteela osisimuwa.”

²⁴Maarata khuri: “Miiyo kajuwa yoori onsisimuwa va osisimuliwa siikhu ya mwiisho.”

²⁵Yinsa khulupa araka: “Miiyo ki osisimuwa na ohaayi; otule anikaaminaaye miiyo hatha nkhama eetta ofwa oniiya ohaayi, ²⁶na wakhula otule ari haayi na khukaamini miiyo khanfwaru. Weeyo onkhupali epo zaya?”

²⁷Ye khujipu yoori: “Miiyo, Mbwana kinkhupali yoori o Al-Masiihu, mwaana wa Nluku, aari weettelaaye ota voolumwenku.”

²⁸Paata ya olupa mattakhuzi apale, khulawa owawe na khunkhuwelela Mariyamu othetekele khumuuza yoori: “Oo, Mwaaliimu otu ari apha onuukhuwela weeyo.” ²⁹Wakathi Mariyamu asiiliyeevo mattakhuzi apale, khulankha nasaapiru na khulawa okutthanana Yinsa. ³⁰Yinsa nalelo aari ahinafiye omwanttiwa, ila aari ottuukhule Maarata eetteliyeeyo onkutthananawo. ³¹Mayaahuuti aari nnyupa na Mariyamu, aateliyeeyo onzuru, khusala oopuwela yoori ye aari weetta ovilalo yoori alile ottuukho. Na yo khulankha khusala anlotta. ³²Wakathi Mariyamu afiiyeevo aphale aariivo Yinsa, noomoona khunkokhorela moolu awe khumuuza yoori: “Mbwana, eriwaka waari attaapha nlupwaaka khaari ofwa.”

³³Yinsa amooniyeevo eettaka olila na mayaahuuti apale aataniyeeyo, ye khwiiya wawantipweya nroho mwawe venkivene na wooshukulikha.

³⁴Ye khuuzela yoori: “Mwanzikha vayi?” Yo khujipu yoori: “Mbwana, ote omoone.”

³⁵Yinsa khulila.

³⁶Mayaahuuti khulupa yoori: “Mmoone nanna aari omphetaazo!”

³⁷Akina khusala alupa yoori: “Otu aari owaavonisa apale oohooni, khaari owahi oretta etthu Laazaru khuhifwi?”

Yinsa oninsisimula Laazaru

³⁸Yinsa nalelo ari woohuzunikha khulawa ovilalo. Yaari likurakuza laattiyelelaniweeyo liwe liwululene va nlako vaya.

³⁹Yinsa noofiya khulupa yoori: “Mwilazevo liwe nttho.” Maarata khulupa araka: “Leelo ona siikhu nne; aaza onukha.”

⁴⁰Yinsa khunjipu yoori: “Akaawuuziye yoori amana okhupali ontta woona siifwa ya Nluku?”

⁴¹Aphano yo khulazavo liwe ntthile. Yinsa khweekesa otulu khulupa yoori: “Paapa, miiyo kinuushukhurwela mwaasa wookisiila. ⁴²Miiyo kinjuwa yoori weeyo onikisiila wakathi wooshi, ila mwaasa wa khuntti eti ya atthu apa ariivo ti eto, kinlupaaye toowo yoori yo apatthe okhupali yoori weeyo ti okirumiyeeyo.” ⁴³Paata ya olupa toowo, khukhuwa venkivene araka: “Laazaru, osaruwele oje okhuno!” ⁴⁴Otule aafwiyeeyo khusaruwa, moolu awe na makhono awe ari wooputaputeliwa na tarapu na wuuso awe na makhono awe khuzukulelisiwa. Aphano Yinsa khulupa yoori: “Mwintaphule tarapu eto mwinlikhe alawe.”

Shawuri yoori ooliiwe Yinsa

⁴⁵Mayaahuuti enkeene alawiyeeyo onthotola Mariyamu, ooniyeevo vitthu epile arettiyeeyo Yinsa, yo khunkhupali. ⁴⁶Ila akina khulankha olawa owooza mafwarizeewu monkoni wa epile Yinsa arettiyeezo. ⁴⁷Aphano mahaakhimu a tiini na mafwarizeewu khuwaakhuwela Mashawuriiya khusala awooza yoori: “Niri je? Okho owaakho mwinyi oto anrettaaye alama zawaatta za minjuza. ⁴⁸Amana ninlikha etthiipo, atthu ooshi antta onkhupali na antta ota arooma aninyakanye puuro yeetthu ttakatthiifu na nti eetthu.”

⁴⁹Aphano mmote wa yo, aari wiitthiwaaye Kayifwa, aari haakhimu nwulu wa tiini wa mwaakha aya opule, ye khulupa yoori: “Mweeyo khamwinjuwa hatha etthu! ⁵⁰Khamwinjuwa yoori afwataali ofwa ntthu mmote awaafwelaka atthu ooshi zayita olikha khapila zooshi waashikha.” ⁵¹Wakathi aya opule Kayifwa khaari ojilupa mweenyewe. Ila mwaasa wa yoori ye aari haakhimu nwulu wa tiini mwaakha aya opule, etta ohupiri yoori Yinsa aari oteela ofwela khapila ya mayaahuuti, ⁵²khahiyo paasi khwa khapila ya mayaahuuti, ila theenya yoori awaakusanye khwa mwiili mmote aana a Nluku apale amwazeyiyeeyo. ⁵³Waaza siikhu ethiitile khusiilana omuula.

⁵⁴Khwa ethiito Yinsa khuhisala ajithoonyeza vakatthi wa mayaahuuti, khulawa nti waattameliyeeyo n’yaara waari wiitthiwaaye Efwarayiimu. Khwiikhala ottuukho na anakhiyoni awe.

⁵⁵Yaarettiye esaleelaka ofiya siikhu ya Paashikowa wa mayaahuuti, atthu enkeene a nti aya opule aalawiye Yeruzaleemu olawa ojitwaharesha ehinafiye siikhu ya Paashikowa ⁵⁶Yo aari omweekesa Yinsa oozelanaka ari vaje wa Nnyupa Woosifwiwamo: “Nkahayani niri toovi? Talili onta vanjampo?” ⁵⁷Ila mahaakhimu a tiini na mafwarizeewu aarumiye yoori, amana ntthu amoona Yinsa vahali ariivo, awooze, yoori yo alawe ankhole.

Yinsa onvaaziwa mafuttha oonukhela nti wa Betaaniya

¹Siikhu sitha ehinafiye siikhu ya Paashikowa Yinsa eettiye Betaaniya, ottuukho aari wiikhalaawo Laazaru, otule Yinsa ansisimuliyeeyo muufwa. ²Ottuukho khwiipikheliwa etthu yoojiwa ya osikhu. Maarata khusala arumeya, Laazaru eekhaliye vameeza vamote na Yinsa. ³Aphano Mariyamu khuthuula suupha ya mafuttha oonukhela awaatta nzurukhu, khuttukunttela moolu a Yinsa khusala akukuttha na nyuuli zawe. Nnyupa wooshimo khwiitaalamo arufu ya mafuttha apale.

⁴Aphano mmote wa anakhiyoni awe, Yuuda Eshikariyoote othuuto aari weettelaaye onzinkula khulupa yoori: ⁵“Ahoozanyisiwe mafuttha aya apo nzurukhu aya enkhiwa asikhini? Nzurukhu aya waari weettela wiiya miiya ttatthu wa paratha!” ⁶Ye khaalupiye toowo mwaasa wa wiiyana huruma na asikhini, ila mwaasa wa wiiya nantarawu, na tiye aari opwehaaye nfukho wa nzurukhu, amana otthiiwamo eetta olazakamo. ⁷Yinsa khunjipu araka: “Onlikhe khwa heeri! Yoori apwehe mafuttha apo mpakha siikhu ya ozikhiwa waka. ⁸Asikhini ari vamote na mweeyo mpakha mileele, ila miiyo khanniiya vamote mpakha mileele.”

⁹Paata ajuwiyeevo yoori Yinsa aari attaaphale, khuntti khuluyeene ya mayaahuuti khuta, woohiiyi mwaasa wa Yinsa paasi, ila theenya yoori amoone Laazaru, otule ansisimuliyeeyo muufwa. ¹⁰Khwa etthiipo mahaakhimu a tiini khuwaza shawuri zoomuula Laazaru naye, ¹¹maana atthu enkeene mwaasa wa ye eetta ophakuwanana mayaahuuti na khusala ankhupali Yinsa.

Yinsa onvira Nyeruzaleemu

¹²Siikhu ya phiiri, khuntti khuluyeene ya atthu yaatiyeewo onjampo khusiila yoori Yinsa ontta ota Yeruzaleemu. ¹³Khuthuula virapi za mirita, khusala alawa onkutthanana ye, anyakulaka araka:

“Ozaana!

Wooparikhiyiwa ti otule atiiyeeyo khwa nzina la Mbwana, wooparikhiyiwa ti Mfwalume wa Ezirayiilu!”

¹⁴Yinsa ampatthiyeevo mwaana wa puuru khupakhira attaapho, nkhama etthiipo yaatikhiweezo yoori:

¹⁵“Atthu a Yeruzaleemu, mwihoove,

mfwalume enu onta

aapakhiriye va mwaana wa puuru!”

¹⁶Omwanzo anakhiyoni awe khazaaweleyiye epo za; ila wakathi aaziyeevo osifwiwa Yinsa yo eetta wuupuwela yoori etthu yaya eto yaatikhiwe monkoni wa ye, na khweele khurettikhana etthiipo.

¹⁷Atthu apale aariina wakathi opule anrumiyeeyo Laazaru osaruwamo nkhapuri khusisimuwa muufwa, yo khuvira alawelaka oshaahiti vitthu epile zaarettikhaniyeeyo. ¹⁸Mwaasa wa ethiito, khuwaakusanya atthu awaatta olawa okutthanana, maana eettiye osiila elupiwaka yoori Yinsa aarettiye alama eto. ¹⁹Aphano mafwarizeewu khusala oozana yoori: “Khanipattheenivo etthu. Nkoonani olumwenku wa atthu ontta onlottelela.”

Yinsa onlupa ofwa wawe

²⁰Khwa atthu apale aalawiyeeyo omwaaputu Nluku onjampo la Paashikowa akina aari akereeku. ²¹Yo, khulawa ottakhulana Filiipe aari wa nti wa Betezayiita ya Kalileya, khunvekela araka: “Mwinyi, nintakha omoona Yinsa.” ²²Filiipe khulawa khumuuza Antere; aphano yo oowiiri khumuuza Yinsa.

²³Yinsa khujipu yoori: “Wafiya wakathi woottitthimisiwa Mwaana wa Pinaatamu. ²⁴Miiyo kiniwuuzani khweele yoori, amana phunje ya tiriku ehikweli vathi na ehifwi nalelo eniiya phunje paasi, ila amana efwa empuwisa mishumo zawaatta. ²⁵Otule amphetaaye ohaayi awe, onteela ompwetheya; ila otule antarawaaye ohaayi awe khwa voolumwenku apha, onthokorela ohaayi wa mileele. ²⁶Otule antakhaaye okirumeyela, akilotte; na puuro kiniiyaavo na karumeya aka oniiya attaapho. Otu anikirumeyelaaye, Paapa onteela onttitthimisa.

²⁷“Nasaapi eti rooho yaka ti yoohankayikha. Kiri niini? Kiri paapa, okuusuru wakathi opu wa ohoowa waka? Wala! Maana miiyo kateela ethiito. ²⁸Paapa osifu nzina lawo!” Aphano khuta huula yoolankha pinkuuni yaari olupaaye yoori: “Koosifu na kinteela wuusifu opheya.” ²⁹Khuntti etile yaariivo noosiila aariye eto taari; akina khusala alupa yoori: “Nlayikha ti lattakhulaniyeeyo Yinsa.”

³⁰Yinsa khulupa yoori: “Huula eto khiteeni mwaasa wa miiyo yata mwaasa wa mweeyo. ³¹Wafiya wakathi woophukiwa olumwenku opu, nasaapi eti onttela wiikariwa mfwalume wa olumwenku opu. ³²Ila miiyo amana kilansiwa vathi apha kintta ojitiisela atthu ooshi.” ³³Ye aalupiye mattakhuzi apa yoori athoonyeze nanna aari weettelaazo ofwa.

³⁴Khuntti etile khunjipu yoori: “Fweeyo ninsiilaka kano elupaka yoori Al-Masiihu ona ya wiiyavo khwa mileele, khi weeyo onlupa toovi yoori Mwaana wa Pinaatamu ona ya olansiwa? Mwaana wa Pinaatamu aya oto ti paani?”

³⁵Aphano Yinsa khuwooza yoori: “Nuuru eri vamote na mweeyo khwa wakathi vattitthiiru. Mweettette wakathi otthuupu mwiriinaavo nuuru, yoori yiiza ehuusikaneni, maana ntthu aneettettaaye n’yiiza khanjuwa ohali aneettaawo. ³⁶Wakathi otthuupu mwiriinaavo nuuru mwikhupalele nuuru ethiito yoori mwiretteye wiiya aana a nnuuru.” Paata ya olupa toowo Yinsa khulaavo khujivitha khuhisala amoona.

Ohikhupali wa mayaahuuti

³⁷Paata ya Yinsa oretta alama epile zooshi za minjuza vakatthi vaya, khankhupaleliye, ³⁸yoori limariseleye nttakhuzi la napiyu Ezaaya, linraaye:

“Mbwana, paani akhupaleliyeeyo tafusiiri yeetthu?

Na paani athoonyeziweeyo owahi wa Mbwana?”

³⁹Khwa ethiito yo khaari oteela okhupali, nkhama etthiipo aalupiyeeyo Ezaaya theenya yoori:

⁴⁰“Oola maasho aya

na oomisa rooho zaya,

yoori ahoone na maasho aya,

na ehiweeleye nroho mwaya, wala ahikhupali,

na miiyo kiwaavonise.”

⁴¹Ezaaya aalupiye mattakhuzi apa maana ooniye siifwa ya Yinsa na khulupa monkoni wa ye.

⁴²Nakataalikha, attunkhulu awaatta a mayaahuuti khunkhupali Yinsa. Ila mwaasa wa mafwarizeewu, khuhisala atukhuru amini yaya, na woova wiikariwa nsinakooka. ⁴³Maana yo waari owaatuvela venkivene osifwiwa pi atthu zayita osifwiwa ti Nluku.

⁴⁴Aphano Yinsa khulupa woosileyavo araka: “Otule anikaaminaaye miiyo, khanikaamini miiyo paasi, ila otule akirumiyeeyo. ⁴⁵Na otule anikoonaaye, amoona otule akirumiyeeyo. ⁴⁶Miiyo kata voolumwenku nkhama nuuru, yoori wakhula otule anikikhupalaaye miiyo, ahijileme n’yiiza.

⁴⁷“Amana ntthu asiila mattakhuzi aka na khuhishututeli, miiyo akininphuka. Maana miiyo akateeliye ophuka olumwenku ila wuusuru olumwenku. ⁴⁸Owaapho namaphuka wa otule anikikatthalaaye na ahinkhupalelaaye mattakhuzi aka; nttakhuzi laka nttinttho kilupiyeeyo ti linttelaaye omphuka siikhu ya mwiisho. ⁴⁹Akinjilupa miiyo, ila Paapa otu akirumiyeeyo ti akirumiyeeyo etthu yoolupa na olaleya. ⁵⁰Miiyo kinjuwa yoori oruma wawe ohaayi wa mileele. Nakataalikha etile akirumiyeeyo paapa kinlupa ethiito.”

Yinsa onoosa moolu a anakhiyoni awe

¹Esaleelaka ofiya siikhu ya Paashikowa, Yinsa aajuwiye yoori wafiya wakathi wa ye olikha olumwenku opu eette wa Paapa, khuwaapheta apale awe aari voolumwenku, awaaphetiye mpakha mwiisho.

²Wakathi wa etthu yoojiwa ya osikhu, Sheethwani aarettiye ahatiye rooho ya Yuuda Eshikariyoote mwaana wa Simawu, yoori anzinkule Yinsa. ³Yinsa aajuwiye yoori Paapa vitthu zooshi attha mmakhono mwawe, na alankhiye wa Nluku na aari orutela wa Nluku, ⁴khulankhavo vameeza aphale, khuvula ajapi yawe khuthuula epakuso khujifukelela n’yuunu. ⁵Khuttha maati mpasiya khwaaza woosa moolu a anakhiyoni awe awaapakusaka na epakuso etile aafukeleliyeeyo n’yuunu mwawe.

⁶Khufiya zwaamu ya Simawu Pheeturu, othuuto aamuziyeeyo yoori: “Mbwana, ontakha woose moolu aka?”

⁷Yinsa khunjipu yoori: “Eti kinrettaaye apha nasaapi khiniweeleya, ila enteela oweeleya.”

⁸Pheeturu khulupa yoori: “Wala! Khinretteya weeyo woosa moolu aka.”

Yinsa khunjipu araka: “Miiyo amana kihiwoosi, weeyo khunteela wiiyana phantte na miiyo.”

⁹Simawu Pheeturu khulupa yoori: “Mbwana, khayi moolu aka paasi na theenya na makhono aka na eeshwa yaka!”

¹⁰Yinsa khujipu: “Ntthu owiyeeyo eninhithajiya woosa moolu paasi, maana mwiili awe wooshi pu woottakattha. Mweeyo mwa oottakattha, ila khahi mooshi.” ¹¹Maana ye aari onjuwa ntthu aari weettelaaye onzinkula; tiito aalupiyeeyo yoori: “Khayi mooshi mwiiyiyeeyo oottakattha.”

¹²Paata ya wiisha owoosa moolu, khuthuula ajapi yawe khuwala khurutela aphale eekhaliyeevo. Aphano khuwoozela yoori: “Eniweeleyani vitthu epi khuuretteliyeenini? ¹³Mweeyo mwikiitthaka miiyo mwinri ‘Mwaaliimu’ na ‘Mbwana,’ mwina shariya, miiyo ki othuuto. ¹⁴Aayo, pi etthiipo miiyo kiiyiye Mbwana na Mwaaliimu enu, kawoosani moolu, na mweeyo theenya mwina ya woosaana moolu mmote na nzaawe. ¹⁵Miiyo kawinkhani nthoonyezo yoori etthiipi kirettiyeezo na mweeyo mwisale mwiretta etthiipi. ¹⁶Miiyo kiniwuuzani khweele yoori, khaavo karumeya wonziti Mbwana awe, nkhama etthiipo nanhupi khaninziti otule anrumiyeeyo. ¹⁷Nkhama mwinjuwa vitthu zaya epo, amana mwiretta, mwaparikhiyiwa.

Yinsa onlupa yoori onlawa azayiniwe

¹⁸“Akinuulupani mooshi, kiniwaajuwa apale kiwaathawuliyeeyo. Ila epo enttela orettikhana yoori emariseleye epile zilupiyeeyo Zawaatikhiwa Ttakatthiifu, yoori: ‘Othuuto kimeelaniyeeyo phaawu yaka akizinkula.’

¹⁹“Kinaaza nasaapi ethiiti owuuzani ehinarettikhane, yoori amana erettikhanaka mweeyo mwikhupali yoori Miiyo Ti Miiyo. ²⁰Miiyo kiniwuuzani khweele yoori, otule animpokherelaaye otule kininrumaaye onikipokherela miiyo; na anikipokherelaaye, onimpokherela otule akirumiyeeyo.”

²¹Paata ya olupa toowo, rooho yawe khwiiya yawaantipweya, khutukhuru alupaka yoori: “Weekhweele kiniwuuzani yoori, mmote wa mweeyo onlawa akizinkule.”

²²Anakhiyoni khusala eekesana mmote na nzaawe ahinjuwaka paani aninlupaaye. ²³Mpavu mwawe eekhaliyemu nakhiyoni otule aari omphetachaaye. ²⁴Simawu Pheeturu khunttheela alama nakhiyoni othuutule yoori amuuzele Yinsa anlupe oto ari weettelaaye onzinkula.

²⁵Aphano nakhiyoni otule khwiinamela vamweyo wa Yinsa khumuuzela yoori: “Mbwana, paani oto aya?”

²⁶Yinsa khunjipu yoori: “Ti otule kinttelaaye omwinkha pattaasu ya phaawu kinaanisiye mparathu.” Aphano khunaanisa pattaasu ya phaawu, khumwinkha Yuuda Eshikariyoote, mwaana wa Simawu. ²⁷Paata ya Yuuda orafuna phaawu etile, epiliisi eetta omweetta. Yinsa khumuuza yoori: “Etthu ontakhaaye oretta, orette nasaapi.” ²⁸Ila apale aari vameeza khuhiivo mmote yamweliyiyeeyo mwaasa aya niini Yinsa amuuzaka toowo. ²⁹Maana Yuuda ti aari opwehaaye nfukho wa nzurukhu, akina aari waakanyera yoori Yinsa amuuza olawa wuuzanya vitthu zooretteliwa njampo, ama yoori alaze etthu awinkhe asikhini. ³⁰Paata ya wiisha orafuna phaawu etile, Yuuda khulankha nasaapiru. Na waari osikhu.

Oruma mpheya

³¹Wakathi Yuuda aliyeevo, Yinsa khulupa yoori: “Nasaapi Mwaana wa Pinaatamu onsifwiwa, na Nluku onsifwiwa khwa ye. ³²Nkhama Nluku onsifwiwa khwa ye, na ye Nluku onsifwiwa mwanawe khwa ye mweenyewe, na onteela osifwiwa woohirupazivo.

³³“Aanaaka, nalelo khwa wakathi vattitthiiru kiri vamote na mweeyo. Mweeyo mwinlawa mwakeekese, ila miiyo kiniwuuzani nkhama kiwooziyeezo mayaahuuti yoori: ohali kineettaawo mweeyo khamwinwahi ofiyawo. Na mweeyo enasaapi eti kiniwuuzani etthiipo. ³⁴Kiniwinkhani oruma mpheya: mwiphetane mmote na nzeenu. Nkhama etthiipo kuuphetiyeenini, mwiphetane mmote na nzeenu. ³⁵Khwa etthiipo atthu ooshi antta ojuwa yoori mwa anakhiyoni aka, amana mwiphetanaka mmote na nzaawe.”

Yinsa onlupa yoori Pheeturu onteela onkhana

³⁶Simawu Pheeturu khumuuzela yoori: “Ontta vayi Mbwana?”

Yinsa khunjipu: “Ohali kineettaawo, weeyo khunikilotta nasaapi eti, ila onteela okilotta.”

³⁷Aphano Simawu khuri: “Mbwana, mwaasa wa niini kihuulottaka nasaapi? Miiyo kinleva ohaayi aka mwaasa wa weeyo!”

³⁸Aphano Yinsa khujipu araka: “Weeyo onleva ohaayi awo mwaasa wa miiyo? Miiyo kiniwuuza khweele yoori, khapula likukhuwi lihineekhe, weeyo onteela okikhana swaafu ttatthu.

Yinsa oniwaalipisela maaswihaapa awe

¹“Mwihihankayikhise rooho zenu. Mwinkhupali Nluku, na theenya mwikikhupali miiyo. ²Owawe paapa ewaakho puuro zawaatta; eriwaka khayaari ethiito, akaari owuuzani, yoori kinttela otthenkeza puuro yenu. ³Na amana kilawa kitthenkeza puuro yaya eto, kinlawa karuti kuuthuleni mweeye vamote na miiyo attaapho kinttelaaye wiiyavo. ⁴Mweeyo mwinjuwawo ohali kineettaawo na tarikhi yaya.”

⁵Khujipu Tome yoori: “Mbwana, fweeyo khaninjuwa ohali oneettaawo! Khi ninjuwa toovi tarikhi yaya?”

⁶Yinsa khujipu yoori: “Miiyo ki tarikhi, haakhi na ohaayi. Khina anfiyaaye wa Paapa, ahiiyeeni khwa miiyo. ⁷Eriwaka khweele mwaari okijuwa, nka mwinjuwaka Paapa. Apha enasaapi eti mwininjuwa na mwaaza omoona.”

⁸Filiipe khulupa yoori: “Mbwana, onithoonyeze Paapa, ethiito ennitosheleza.”

⁹Yinsa khunjipu yoori: “Filiipe, kiikhaliyeezo wakathi mwinkeene na mweeyo; nalelo khunikijuwa? Otule akooniye miiyo amoona Paapa. Khi onlupa toovi yoori: ‘Onithoonyeze Paapa’? ¹⁰Weeyo khunkhupali yoori miiyo kiina Paapa na Paapa ona miiyo? Mattakhuzi apa kiniwuuzaanini khahiyo aka paasi. Ila, Paapa aniikhalaaye khwa miiyo, ontta okhola khaazi yawe. ¹¹Mwikikhupali miiyo amana kilupa yoori kiri khwa Paapa na Paapa ori khwa miiyo; ama nenkawu mwikikhupali mwaasa wa khaazi epi kinkholaazo. ¹²Miiyo kiniwuuzani khweele yoori, otule anikikhupalaaye miiyo onkhola khaazi epi kikholiyeezo hatha onkhola zooziti epi, maana miiyo kineetta wa Paapa. ¹³Na zooshi mwinttelaaye oveka khwa nzina laka, miiyo kinretta, yoori Paapa attitthimisiwe khwa mwanawe. ¹⁴Wakhula etile mwinvekaaye khwa nzina laka kintta oretta.

Yinsa onaahiti operekha Rooho Ttakatthiifu

¹⁵“Nkhama mweeyo mwinikipheta, mwinteela oshututela oruma waka. ¹⁶Miiyo kinttela onvekela Paapa yoori awinkheni Namalipisela nkina, yoori eeye vamote na mweeyo khwa mileele, ¹⁷Rooho ya haakhi, atthu a voolumwenku ahinttelaaye opokhera, maana, khanteela woona na wala khanjuwa. Ila mweeyo mwinjuwa, maana Yo eniikhala nkatthi mweenu na enttela wiiya na mweeyo.

¹⁸“Miiyo akinuulikhani mwiri anasisa, kinlawa kooruteleni. ¹⁹Khwa wakathi vattitthiiru atthu a voolumwenku khanteela okoona theenya, ila mweeyo mwinlawa mwakoone. Mwaasa wa miiyo wiiya haayi, na mweeyo mwinlawa mweeyane ohaayi. ²⁰Siikhu ethiito enteela oweeleyani yoori kiri khwa Paapa, mweeyo mwiri khwa miiyo na miiyo kiri khwa mweeyo. ²¹Otule ansiilaaye oruma waka na khushututela oto ti anikiphetaaye; na otule anikiphetaaye oniiya woophetiwa ti Paapa, na miiyo theenya kininpheta na kinjithoonyeza khwa ye.”

²²Yuuda, nkina woohiiyi Yuuda Eshikariyoote, khuri: “Mbwana, mwaasa aya niini weeyo ontakhaaye ojithoonyeza khwa fweeyo paasi khuhijithoonyezi olumwenku wooshi?”

²³Yinsa khujipu yoori: “Nkhama ntthu onikipheta, onshututela mattakhuzi aka na Paapa ontta ompheta. Paapa na miiyo nintta wiikhala na ye. ²⁴Otule ahinikiphetaaye khanshututela mattakhuzi aka. Na nttakhuzi mwinsiilaaye khahiyo laka, ila tthi la Paapa otule akirumiyeeyo.

²⁵“Kaari olupaka zooshi epo nalelo niri vamote. ²⁶Ila Namalipisela, Rooho Ttakatthiifu, eto Paapa anttelaaye omperekha khwa nzina laka, onteela wuusomisani mweeyo vitthu zooshi na wuukupuselani zooshi epile kiwuuziyeenini. ²⁷Kinuulikhelani heeri, heeri yaka kiniwinkhani, ila akiniwinkhani nkhama oninkhaazo olumwenku. Mwihihankayikhise rooho zenu, wala mwihoove.

²⁸“Mwasiila eti kilupiyeeyo: ‘Miiyo kintta olawa, ila kinlawa kooruteleni mweeyo.’ Eriwaka mwaari okipheta, mweetta ofurahi mwaasa wa miiyo weetta wa Paapa, maana Paapa akiziti miiyo. ²⁹Kiniwuuzani nasaapi eti zihinarettikhane, yoori wakathi zinttelaavo orettikhana, mweeyo mwikhupalele. ³⁰Enasaapi eti akinlawa ottakhulana mweeyo, maana mfwalume wa voolumwenku ontta ota; ye khana hatha ruhusa khwa miiyo, ³¹nakataalikha yoori atthu a voolumwenku ojuwe yoori miiyo kininpheta Paapa, enikihithajiya oretta etile akirumiyeeyo. Lankhani, nileevo apha.”

Nrayi wa nviteera na virapi zaya

¹Yinsa khulupa yoori: “Miiyo ki nrayi wa wuuva weekhweele, Paapa namalima. ²Wakhula erapi etile eriiye khwa miiyo khuhisala yiima, ye ontta oshija; na wakhula etile eniimaaye ontta okasurela yoori etepe wiima. ³Mweeyo mwattakatthisiwa ti nttakhuzi kiwuuziyeenini. ⁴Mwijilipisane miiyo, na miiyo kintta ojilipisana mweeyo. Nkhama etthiipo erapi ehiniimaaye ottho ehijilipisaneeni nrayi, na mweeyo pi etthiipo khamwiniima mishumo woohijilipisani miiyo.

⁵“Miiyo ki nrayi, mweeyo mwa virapi. Otule anjilipisanaaye miiyo, na miiyo khwa ye, oto aya oniima mishumo zawaatta; maana mweeyo woohiiyani miiyo, khina etthu mwinwahaaye oretta. ⁶Amana ntthu ahilipani miiyo, ontta weeseleliwa oje, oome nkhama erapi enlokotthiwaaye khweeseleliwa va moottho khulukuziwa. ⁷Ila amana mwijilipisana miiyo na mattakhuzi aka khwiiya na mweeyo, mwiveke wakhula etile mwintakhaaye mwintta winkhiwa. ⁸Paapa onsifwiwa mwaasa wa mweeyo wiima mishumo zawaatta, etthiipo enthoonyeza yoori mweeyo mwa anakhiyoni aka. ⁹Khwa nanna etthiipo Paapa akiphetiyeezo, na miiyo koophetani; mwijilipisane pheta yaka. ¹⁰Amana mweeyo mwishututela oruma waka mwiniiya nkatthi wa pheta yaka, nkhama etthiipo na miiyo kinshututelaaye oruma wa Paapa na kiiyiyeeyo nkatthi wa pheta yawe. ¹¹Kaawuziyeni vitthu epi yoori furaha yaka yiiye khwa mweeyo, na yoori furaha yenu ekamilikhe.

¹²“Oruma waka pu opu: mwiphetane mmote na nzeenu nkhama etthiipi miiyo khinuuphetanini mweeyo. ¹³Khina ariina pheta yooziti, woohiiyi otule aninkhaaye ohaayi awe khwa maswaahipu ze. ¹⁴Mweeyo mwa maswaahipu zaka, mwirettaru etile kinuurumanini. ¹⁵Akiniwiitthani theenya akarumeya, maana karumeya khanjuwa niini anrettaaye Mbwana awe. Nakataalikha, miiyo kiniwiitthani yoori maswaahipu zaka, maana zooshi epile kinsiliyeeyo Paapa koojuwisani. ¹⁶Khahiyo mweeyo mwikithawuliyeeyo miiyo, ila miiyo ti kuuthawuliyeenini mweeyo na khuutthomani yoori mwilawe mweeme mishumo, mishumo zoolipaneya, yoori Paapa awahi owinkhani wakhula etile mwinvekaaye khwa nzina laka. ¹⁷Opo pi oruma waka: mwiphetane mmote na nzeenu.

Olumwenku oniiphiiriwa ti anakhiyoni

¹⁸“Amana atthu a voolumwenku eephiiriwaka ti mweeyo, mwifikhiri khapula yoori yo eephiriwe ti miiyo. ¹⁹Eriwaka mweeyo mwaari atthu a voolumwenku, yo aari otuveliwa ti mweeyo mwaasa wa wiiya aya. Nakataalikha mweeyo khahi mwa atthu a olumwenku, ila miiyo koothawulani khulazani vakatthi wa atthu a olumwenku. Tiito atthu a olumwenku aniiphiiriwaaye ti mweeyo. ²⁰Mwifikhiri mattakhuzi kiwuuziyeenini yoori: ‘Khaavo karumeya anzitiyeeyo Mbwana awe.’ Nkhama akilupatthiyeezo miiyo, na anlawa oolupattheni mweeyo theenya. Nkhama anshututela mattakhuzi aka, theenya anlawa ashututele apale mwinttelaaye olupa mweeyo. ²¹Zooshi epo anlawa ooretteleni mweeyo, mwaasa wa nzina laka, maana khaninjuwa otule akirumiyeeyo. ²²Eriwaka akaatiiye kilupa, yo khaari wiiyana paathwili ya twampi. Ila apha khana hatha nanna ya ojaakisa monkoni wa twampi zaya. ²³Otule aniiphiiriwaaye ti miiyo na theenya oniiphiiriwa ti Paapa. ²⁴Eriwaka akeettiye oretta vitthu vakatthi vaya ahinwahaaye oretta ntthu nkina, yo khaari wiiyana paathuli ya twampi. Ila yo oona epi kirettiyeezo na khusala akhanyarela wiiphiiriwa ti miiyo na Paapa. ²⁵Ila epo zaya zarettikhana yoori lilikaniseliwe nttakhuzi ntthile laatikhiweeyo nkatthi wa kano zaya yoori: ‘Yo eephiiriwa ti miiyo woohiivo hatha kiiswa.’

²⁶“Ila, amana ata Namalipisela, otule kinttelaaye wuuperekhezani woolankha phantte ya Paapa, Rooho ya ookhweele ya olankha wa Paapa, ye onttela olaza oshaahiti monkoni wa miiyo. ²⁷Na mweeyo mwinlawa mwalawele oshaahiti, maana mwina miiyo thanku omwanzo.

¹“Miiyo kawuuzani mattakhuzi apa yoori mwihanswi amini yenu. ²Mweeyo mwinteela wiikariwa nsinakooka; weekhweele, onlawa wafiye wakathi anraaye ntthu amana awuulaani khoona nkhama ankholaaye khaazi ya Nluku. ³Yo anttela oretta toowo mwaasa woohinjuwi Paapa wala miiyo.

Khaazi ya Rooho Ttakatthiifu

⁴“Mattakhuzi apa kiniwuuzani yoori amana ofiya wakathi enttelaavo orettikhana muupuwele yoori miiyo kaawuziyeni. ⁵Ila enasaapi eti kineetta wa otule akirumiyeeyo, khaavo mmote anikuuzelaaye yoori: ‘Oneetta vayi?’ ⁶Ila mwaasa woolupa vitthu epo, rooho zenu zahuzunikha. ⁷Miiyo kiniwuuzani haakhi yoori ena fwayita khwa mweeyo miiyo olawa, maana amana kihilawi, Namalipisela khanteela ota, ila amana kilawa, kintta omperekha. ⁸Ye amana ata onteela owaakhitiri atthu a olumwenku monkoni wa twampi, wa shariya na ophuka: ⁹khwa twampi, mwaasa wa anaatamu ohikikhupali miiyo; ¹⁰khwa shariya, maana kineetta wa Paapa, khamwinteela okoona theenya; ¹¹khwa ophuka, maana mfwalume wa voolumwenku apha aphukiwa.

¹²“Kinaaye nalelo vitthu zawaatta za owuuzani, ila nasaapi eti mweeyo khamwinteela ovilela. ¹³Ila amana Rooho ya haakhi eta, ye enttela wuusomisani khweele yooshi mweeyo. Ye kinteela ojilupa, ila enttela olupa zooshi esiiliyeeyo na owuuzani mweeyo vitthu zinttelaaye orettikhana. ¹⁴Ye enteela okisifu, maana enteela opokherela etile yiiyiye yaka na owuuzani mweeyo. ¹⁵Zooshi Paapa ariinaaye pi zaka, tiito kilupiyeeyo yoori Rooho Ttakatthiifu nka epokheraka etile yiiyiye yaka na owuuzani mweeyo.

¹⁶“Khwa wakathi vattitthiiru khamwinteela okoona, ila khwa wakathi vattitthiiru theenya mwinteela okoona opheya.”

Huzuni na furaha ya anakhiyoni

¹⁷Anakhiyoni awe khuhiweeleyi khusala oozelana yoori: “Khwa mattakhuzi apo anlupaaye araka: ‘Wakathi vattitthiiru khamwinteela okoona, wakathi vattitthiiru mwinteela okoona opheya.’ Theenya onri: ‘Maana kineetta wa Paapa.’ Onri niini?” ¹⁸Aphano khuuzelana theenya yoori: “Khwa wakathi vattitthiiru enlupa niini? Khinneleya etthu ye anlupaaye.”

¹⁹Ajuwiyeevo Yinsa yoori aari otakha omuuzela, monkoni wa mattakhuzi apale, ye khuwooza yoori: “Mweeyo mwintta wuuzelana monkoni wa mattakhuzi apa kilupiyeeyo yoori: ‘Khwa wakathi vattitthiiru khamwinteela okoona; khwa wakathi vattitthiiru theenya mwinteela okoona opheya’? ²⁰Miiyo kiniwuuzani khweele yoori, mwinteela olila na ojikhupanyisa, ila atthu a olumwenku afurahiye. Mweeyo mwiri oohuzunikha, ila huzuni ya ethiito ezukuluwe yiiye furaha. ²¹Muukha amana atakhaka ompattha mwaana, onoona olwaaza channu mwaasa wa ofiya wakathi awe woohoowa, ila amana ampattha oniiyana furaha, onsahawu olwaaza opule ooniyeeyo mwaasa wa ontana mwaana voolumwenku. ²²Zinrettikhana etthiipo khwa mweeyo: opu wakathi wa huzuni khwa mweeyo. Ila miiyo kinteela owoonani swaafu kiina theenya, na mwinteela ofurahi, na furaha eto khaavo anttelaaye wuulazani. ²³Siikhu yaya eto khamwinteela okuuzela hatha etthu. Miiyo kiniwuuzani khweele yoori, amana mwinvekela etthu Paapa khwa nzina laka miiyo, ye ontta owinkhani. ²⁴Mpakha nasaapi eti khamwinaveke hatha etthu khwa nzina laka. Mwiveke, mwintta winkhiwa, yoori furaha yenu ekamilikhe.

Yinsa ashintta olumwenku

²⁵“Miiyo kiniwuuzani vitthu epo khwa nlikaniso. Onteela ofiya wakathi kihinttelaaye orumeyela mattakhuzi nkhama apo, ila kinteelaaye owuuzani saaneene monkoni wa Paapa. ²⁶Siikhu yaya eto, mweeyo mwinteela oveka khwa nzina laka na khinlawa ohithajiya miiyo oveka zwaamu yenu mweeyo, ²⁷maana Paapa mweenyeweene onuuphetani, mweeyo mwinikipheta na mwinkhupalela yoori miiyo kalankha wa Nluku. ²⁸Kalankha wa Paapa khuta voolumwenku; nakataalikha, kinlaavo voolumwenku kirutele wa Paapa.”

²⁹Aphano anakhiyoni awe khulupa araka: “Onlupa woosileyavo, woohiiyi khwa milikaniso! ³⁰Nasaapi eti enneleya yoori onjuwa vitthu zooshi khinihithajiya opuwa ntthu owuuzela, khwa etthiipo nakhupali yoori weeyo walankha wa Nluku.”

³¹Yinsa khuwaajipu yoori: “Mwinkhupali nasaapi? ³²Wakathi waattama, weekhweele wafiya, mweeyo mwinttelaaye omwazeya wakhula ntthu alawe owawe, mwikilikhe otthome. Ila akiri otthome, maana Paapa ona miiyo.

³³“Miiyo kawuuzani vitthu epi yoori mwiiyane heeri khwa miiyo. Voolumwenku apha mwinteela wiiyana tafwawuthi; ila mwivilele! Miiyo kashintta olumwenku.”

Yinsa ontta ojilompela

¹Paata ya Yinsa wiisha ottakhula, khweekesa otulu khulompa araka:

“Paapa, wafiya wakathi Wonttitthimisa mwanawo, yoori naye mwanawo oosifu. ²Maana wamwinkha ofwalume khwa anaatamu ooshi, yoori awenkhe ohaayi wa mileele ooshi apale omwinkhiyeeyo. ³Na ohaayi opo wa mileele pi opu: Oojuwe weeyo, Nluku mmote paasi weekhweele, na Yinsa Al-Masiihu otule onrumiyeeyo. ⁴Miiyo koosifu vathi, kimariselaka khaazi okinkhiyeeyo oretta. ⁵Na, nasaapi eti, okittitthimise oo Paapa, vamote na weeyo khwa siifwa kaarinaaye na weeyo khapulathi olumwenku ohineeyevo.

Yinsa oniwaalompela anakhiyoni awe

⁶“Kawaathoonyeza nzina lawo apale okinkhiyeeyo voolumwenku. Apo aya aari awo, weeyo khukinkha miiyo, yo anshututela nttakhuzi lawo. ⁷Aphano yo anjuwa yoori vitthu zooshi okinkhiyeeyo zinlankha khwa weeyo. ⁸Maana miiyo kawooza mattakhuzi okinkhiyeeyo yo khupokherela, ajuwa yoori khweele miiyo kalankha mmakhono mwawo na khukhupalela yoori weetta okiruma. ⁹Miiyo kiniwaavekelela yo. Akiniwaavekelela atthu ooshi a voolumwenku, ila apale okinkhiyeeyo maana pi awo. ¹⁰Zooshi kiriinaazo pi zawo, na zooshi oriinaazo pi zaka. Miiyo kinttitthimisiwa mwaasa wa yo. ¹¹Nasaapi eti akinteela wiikhala voolumwenku ila yo ari voolumwenku, maana miiyo kineetta okho oriiwo weeyo. Paapa woottakatthifu, oweenanele khwa nzina lawo, nzina okinkhiyeeyo, yoori yo eeye vamote nkhama niriizo fweeyo. ¹²Wakathi kaari vamote na yo voolumwenku, miiyo kaaweenaneliye na khuwaathokorela khwa owahi wa nzina lawo, nzina nttinttho okinkhiyeeyo. Kaaweenaneliye na khuhiivo mmote aashikhiyeeyo, woohiiyi otule atthomeliweeyo waashikha yoori epile zilupiyeezo Zawaatikhiwa Ttakatthiifu zirettikhane.

¹³“Ila nasaapi eti kintta okho oriiwo weeyo, kinlupa mattakhuzi apo nalelo kiri voolumwenku, yoori yo eeyane furaha yaka yookamilikha. ¹⁴Miiyo kawinkha nttakhuzi lawo, atthu a voolumwenku khwiiphiiriwa ti yo, maana yo khahiyo a voolumwenku, nkhama etthiipi miiyo kihiiyeeni. ¹⁵Akinuuvekela yoori owaalazevo voolumwenku, ila oweenanele khwa ntakhali. ¹⁶Yo khahi a voolumwenku nkhama etthiipo miiyo kihiiyeeni. ¹⁷Owaattakatthise na haakhi; nttakhuzi lawo haakhi. ¹⁸Nkhama etthiipo weeyo okirumiyeezo miiyo voolumwenku, na miiyo kawaaruma voolumwenku. ¹⁹Khwa zwaamu yaya kinjittakatthisa miiyo, yoori na yo attakatthe khwa haakhi.

Yinsa oniwaalompela anamalottela awe ooshi

²⁰“Akiniwaavekelela apa ottho paasi, ila na apale anteelaaye okikhupali miiyo khwa nttakhuzi laya yo, ²¹yoori ooshi eeye amote, nkhama etthiipo niriizo miiyo na weeyo, na yo ti eeye khwa fweeyo, yoori atthu a voolumwenku akhupali yoori weeyo weetta okiruma. ²²Miiyo kawinkha siifwa etile weeyo okinkhiyeeyo, yoori yo eeye amote nkhama fweeyo niiyiyeeyo amote. ²³Miiyo khwa yo na weeyo khwa miiyo. Khwa nanna ethiito osiilana waya onttela wiiya khaamili, yoori atthu a voolumwenku ajuwe yoori weeyo ti okirumiyeeyo, na yoori oniwaapheta nkhama etthiipo onikiphetaazo miiyo.

²⁴“Paapa, niiya yaka ti yoori attaapho kiriivo miiyo na yo eeye attaapho ooshi apale okinkhiyeeyo, yoori oone siifwa okinkhiyeeyo, maana wakipheta khapulathi olumwenku ohinompiwe.

²⁵“Paapa wa shariya, atthu a olumwenku khanuujuwa, ila miiyo kinuujuwa; na apa okinkhiyeeyo anjuwa yoori weeyo weetta okiruma. ²⁶Miiyo kawaajuwisa nzina lawo, na nalelo kinvira kiwaajuwisaka, yoori pheta etile okiphetaniyeeyo yiiye vamote na yo, na miiyo kiiye vamote na yo.”

Ofukiwa wa Yinsa

¹Paata ya Yinsa wiisha olompa, khulankha na anakhiyoni awe khulokhela kaapu ya muuttho la Kedroni. Waariwo woorotha, ye khweetta ottuukho na anakhiyoni awe.

²Yuuda namazinkula aari ojuwawo ohali okhule, maana Yinsa swaafu zinkizene aari okusanyeyaka ottuukho na anakhiyoni awe. ³Aphano Yuuda khuthuula khuntti ya anajanka khweetta ottuukho na mawaziri akina aya arumiweeyo pi mahaakhimu a tiini na mafwarizeewu, athuuliye vimwasikhelo, na zuuma za nvittha. ⁴Yinsa, ajuwaka niini yaari weettelaaye orettikhana khwa ye, khuweettela khuwoozela yoori: “Mwinimweekesa paani?” ⁵Yo khujipu: “Yinsa, wa Nazareeti!” Aphano ye khuwooza yoori: “Ti miiyo.” Yuuda namazinkula, ti aariina atthu apale. ⁶Wakathi Yinsa alupiyeevo yoori “ti miiyo,” yo etta osusa khukwela vathi. ⁷Yinsa khuwoozela opheya yoori: “Mwinimweekesa paani?” Yo khujipu: “Yinsa wa Nazareeti!” ⁸Yinsa khuwooza yoori: “Kawuuzani yoori ti miiyo. Nkhama mwinikeekesa miiyo, mwiwaalikhe apa alawe.”

⁹Yinsa aalupiye toowo yoori eretteye etile aalupiyeeyo rakuzeene yoori: “Paapa, ooshi apale okinkhiyeeyo khakaashikheeni hatha mmote.” ¹⁰Aphano Simawu Pheeturu khusarula phanka, khushija nshiilo la karumeya mmote wa haakhimu nwulu wa tiini, nshiilo lawe la nkhono nlume. Nzina lawe karumeya aya otule laari Maliku. ¹¹Ila Yinsa khumuuza Pheeturu yoori: “Opwehe phanka yawo! Akaari oteela onywela jiikira akinkhiyeeyo Paapa?”

Yinsa onttaniwa wa Anaasi

¹²Elottelanaka, khuntti etile ya anajanka na namalokozela aya na anamweekesela a mayaahuuti khunkhola Yinsa khunfuka. ¹³Omwanzweene khunlawana wa Anaasi, nkhwewe Kayifwa, aari haakhimu nwulu wa tiini mwaakha aya opule. ¹⁴Kayifwa ti othuuto awooziyeeyo mayaahuuti yoori yaari yooshapweya ntthu mmote owaafwela atthu ooshi.

Pheeturu oninkatthala Yinsa

¹⁵Simawu Pheeturu na nakhiyoni nkina eetta onlottelela Yinsa. Mwaasa wa yoori nakhiyoni oto aari ojuwanana haakhimu nwulu wa tiini, ye awahiye ofiya vaje wa nyuupa ya haakhimu nwulu wa tiini, ¹⁶ila Pheeturu aasaliye anwejaka othetekele wa nlako. Nakhiyoni otule nkina, aari ojuwananaye haakhimu nwulu wa tiini, khusaruwa, khulawa khuttakhulana nakhinzi otule aari weekeselaaye nlako khunlikha Pheeturu ovira. ¹⁷Aphano njaazi otule aari weekeselaaye milako, khumuuzela Pheeturu yoori: “Weeyo khahi ommote wa anakhiyoni wa mwinyi otu?” Ye khujipu araka: “Aki!” ¹⁸Mwaasa wa ozizima, akarumeya na anamweekesela khusikhanyela moottho khusala oottha. Pheeturu khweemela attaapho na ye, khusala oottha.

Haakhimu nwulu wa tiini onimuuzela Yinsa

¹⁹Aphano, haakhimu nwulu wa tiini khumuuzela Yinsa monkoni wa anakhiyoni awe na masomi awe. ²⁰Yinsa khujipu araka: “Miiyo kawooza atthu a voolumwenku woosileyavo saaneene, na kaari osomisa nsinakooka mpakha Nnyupa Woosifwiwamo, nttumpho aari othukumanaamu mayaahuuti. Khina etthu kilupiyeeyo sirini. ²¹Khi oniikuzelelani? Owoozele apale akisiiliyeeyo, anjuwa saaneene vitthu kilupiyeeyo.” ²²Wakathi Yinsa alupiyeevo toowo, namweekesela mmote amwaattamiyeeyo khumpiya omaasho, araka: “Haakhimu nwulu wa tiini onjipwiwa etthiipo?” ²³Yinsa khunjipu yoori: “Nkhama kajipu etthu yootakhala, olupe etthu yootakhala kilupiyeeyo, ila nkhama kattakhula haakhi, khi wakipiyelani?” ²⁴Aphano, Anaasi khumperekha Yinsa wa Kayifwa haakhimu nwulu wa tiini ari woofukiwa.

Pheeturu oninkhana Yinsa swaafu ya phiiri

²⁵Pheeturu nalelo aari woottha moottho. Aphano khuuzeliwa yoori: “Weeyo khahi ommote wa anakhiyoni a mwinyi otu?” Ye khukhana araka: “Miiyo aki.” ²⁶Elottelanaka, karumeya wa haakhimu nwulu wa tiini, jaama mmote wa otule Pheeturu anshijiyeeyo nshiilo, khumuuza yoori: “Miiyo kaawooniye nwoorotha orina othuuto!” ²⁷Pheeturu khurutela theenya okhana. Wakathi otthuupo likukhuwi khwiikha.

Yinsa ari wa Pilaatu

²⁸Nawiisha khuthuuliwawo Yinsa wa Kayifwa khulawaniwa nyuupa khuulu ya nsatoro. Yaari supuyeene. Anamalokozela a mayaahuuti khuhivirimo nnyupa mphule, aari otakha yoori ehiwaalawe twahara, yoori awahi onja Paashikowa. ²⁹Aphano Pilaatu khusaruwa olawa ottakhulana yo na owoozela yoori: “Niini mwininlupezaye mwinyi otu?”

³⁰Yo khujipu yoori: “Eriwaka khaari nazompere khanaari wuutisela weeyo.”

³¹Pilaatu khuwaajipu yoori: “Mwinthuule mwilawe mwamphuke khwa nanna enlupaazo kano zenu.” Aphano mayaahuuti khujipu yoori: “Enikhattaziwa fweeyo omuula ntthu.” ³²Epo zaarettikhaniye toowo yoori emarisele mattakhuzi apale Yinsa aalupiyeeyo, wakathi aari ottakhulaavo monkoni wa nanna aari weettelaazo ofwa.

³³Pilaatu khurutela nnyupa khuulu ya nsatoro, khunkhuwela Yinsa khumuuzela yoori: “Weeyo o mfwalume wa mayaahuuti?”

³⁴Yinsa khujipu yoori: “Mattakhuzi aya apo onikuuzelaaye pa awo, ama atthu akina ti awuuziyeeyo monkoni wa miiyo?” ³⁵Pilaatu khunjipu yoori: “Miiyo ki yaahuuti? Atthu awo na mahaakhimu a tiini ti akitiseeliyeeyo weeyo. Niini orettiyeeyo?”

³⁶Yinsa khujipu yoori: “Ofwalume aka khayi wa voolumwenku apha! Eriwaka ofwalume aka waari wa voolumwenku apha, akarumeya aka eetta wuumanana mayaahuuti awaakhattazaka okikhola, ila weekhweele ofwalume aka khahiyo wa voolumwenku attaapha.”

³⁷Aphano Pilaatu khulupa yoori: “Khupe weeyo o mfwalume.”

Yinsa khunjipu yoori: “Weeyo ti onlupaaye yoori ki mfwalume. Miiyo kavokoleliwa ethiito na ti ethiito ekitaniyeeyo voolumwenku, yoori kite kilawele oshaahiti wa haakhi. Wakhula otule eeyiye wa haakhi onsiila huula yaka.”

³⁸Pilaatu khumuuzela yoori: “Haakhi niini?” Noolupa toowo khulankha opheya khulawa aphale aariivo mayaahuuti khuwooza yoori: “Miiyo akinimoonana hatha nlattu. ³⁹Ila khwa zowera yenu mweeyo, miiyo kintta ontaphula napherezu mmote mwaasa wa ofiya wakathi wa Paashikowa. Mwintakha yoori miiyo kinfukulele mfwalume wa mayaahuuti?”

⁴⁰Yo khunyakula ajipwaka yoori: “Wala, ye wala! Ninintakha Barapa.” Ila Barapa aari namahusuti.

Yinsa ahukhumweliwa okhomeliwa

¹Aphano Pilaatu khuruma ojaphiwa Yinsa. ²Anajanka khuvaasha khaara ya miiwa khunwalisa mmwishwa. Na khunwalisa ajapi yookhuttuwa. ³Ansuselaka amuuzaka yoori: “Mfwalume wa mayaahuuti otulu!” Na khusala ampiya omaasho wawe.

⁴Swaafu kiina Pilaatu khulankha khuwooza mayaahuuti yoori: “Moone! Miiyo kinuutiselani mweeyo yoori mwijuwe yoori miiyo akimoonaneeni hatha nlattu.” ⁵Wakathi atiisiweeyo vaje awaliye khaara ya miiwa, na ajapi yookhuttuwa, Pilaatu khuwooza yoori: “Mmoone mwinyi, otu ari apha!”

⁶Wakathi amooniyeevo Yinsa mahaakhimu a tiini na anamweekesela, khusala anyakula alupaka yoori: “Akhomeliwe! Akhomeliwe!” Ila Pilaatu khujipu yoori: “Mwinthuule mweeyo ena mwankhomele, miiyo akinimoonana hatha nlattu.”

⁷Yo khujipu yoori: “Fweeyo ninaaye kano, kano etthiipo enlupa yoori ooliiwe maana onjilupeza yoori Mwaana wa Nluku.”

⁸Paata ya osiila toowo, Pilaatu khutepa woova. ⁹Khurutela nnyupa khuulu ya nsatoro, khumuuzela Yinsa yoori: “Weeyo owa vayi?” Ila Yinsa khuhinjipu. ¹⁰Aphano, Pilaatu khumuuza yoori: “Khunikijipu? Khunjuwa yoori miiyo kinaaye owahi wa wuutaphula ama wuukhomela?”

¹¹Yinsa khunjipu yoori: “Weeyo khawaari wiiyana hatha owahi khwa miiyo, eriwaka khawenkhiwe otulu. Tiito otule ootiseliyeeyo Miiyo ona paathuli ya twampi yooziti.”

¹²Waaza wakathi otthuupule Pilaatu khusala atakha ontaphula Yinsa, ila mayaahuuti khusala anyakula araka: “Amana onlikha Mwinyi oto ojitatha, khuniiya swaahipu wa Seezari. Wakhula otule anjilupezaaye ofwalume oniiya muumani wa Seezari!”

¹³Pilaatu noosiila toowo, khunsarulela Yinsa vaje, khwiikhala va khukulu ya namaphuka puuro yaari wiitthiwaaye Eshotthelo ya Mawe, khwa luuka ya meepereewu enriwa Kabata. ¹⁴Yaari payina ya saasiitha, yaari Siikhu ya Ojilokotthela, maana yaari sumana ya njampo la Paashikowa.

Aphano Pilaatu khuwooza mayaahuuti araka: “Mwimoone, otu ari apha Mfwalume enu!”

¹⁵Ila yo khusala anyakula araka: “Onsarulele oje! Onsarulele oje! Akhomeliwe!”

Pilaatu khuuzela yoori: “Kinkhomele mfwalume enu?”

Mahaakhimu a tiini khujipu araka: “Khanina mfwalume fweeyo woohiiyi Seezari!”

¹⁶Aphano Pilaatu khunthuula Yinsa khuwenkha anajanka yoori ankhomele, yo khunthuula.

Okhomeliwa

¹⁷Yinsa khusaruwa attikhiwe nsalapa awe, khusala alawaniwa puuro yaari wiitthiwaaye Kalavaariyu, khwa luuka ya meepereewu yaari wiitthiwa Kolokoota, ¹⁸attaapho akhomeliweevo ye na atthu awiri, wakhula mmote mpavu mwawe, ye khwiiya vakatthi.

¹⁹Pilaatu khwaatikha lipawu khuthomeya pontha wa nsalapa; aatikhiyevo yoori: “Yinsa wa Nazareeti, Mfwalume wa Mayaahuuti!” ²⁰Mayaahuuti enkeene aasomiye lipawu ntthile, maana puuro etile Yinsa aakhomeliweeyo yaari kharipu na va sitati, lipawu ntthile laatikhiwe luuka ya meepereewu, ya elati na ekereeku. ²¹Mahaakhimu a tiini aari omuuza Pilaatu yoori: “Ohaatikhe yoori: ‘Mfwalume wa Mayaahuuti’, waatikhe etile aalupiyeeyo yoori: ‘Miiyo ki Mfwalume wa mayaahuuti.’ ”

²²Pilaatu khujipu yoori: “Etile kaatikhiyeeyo kaatikha.”

²³Anajanka paata ya onkhomela, khuthuula kuwo zawe, khwaawanya phantte nne yoori wakhula najanka apatthe phantte moote; na khuthuula ajapi yawe theenya. Ila ajapi yaari yoohisoniwi waaza vathi mpakha vatulu.

²⁴Yo khulupa yoori: “Nihivarule, ila neekese nasipu nimoone anttelaaye opattha.” Epo zaarettikhaniye yoori emarisele Zawaatikhiwa Ttakatthiifu enlupaaye yoori:

“Aawanya kuwo zaka, na khweekesa nasipu khwa ajapi yaka.

Na pi etthiipo anajanka aarettiyeezo.”

²⁵Kharipu ya vansalapa wa Yinsa aarivo mamaawe, na ttwiiye mamaawe, na Mariyamu muukha wa Kolopa, na Mariyamu Mataleena. ²⁶Yinsa noomoona mamaawe ari vamote na nakhiyoni otule wompheta wawe, khumuuza mamaawe yoori: “Muukha mwanawo oto,” ²⁷na khumuuza nakhiyoni awe yoori: “Omoone, mamaawo oto.” Waaza wakathi otthuupule, nakhiyoni otule khuretteya wiiya jaama.

Ofwa wa Yinsa

²⁸Paata ya Yinsa woona yoori zooshi zintta omariseleya khushankela, yoori zirettikhane epi zaari olupaazo Zawaatikhiwa Ttakatthiifu yoori: “Lakikhola nnyottha!” ²⁹Yaarivo suupha yaarimo viinyu yoonyuunya khuthuuliwa khunywisiwa etthiiwe va shiponja yoofukeleliwa va zankalala na khuweziwa mpakha omilomo wa Yinsa. ³⁰Yinsa wakathi anywiiyeevo viinyu etile yoonyuunya khulupa yoori: “Zooshi zamariseliwa”, khwiinamisa eeshwa yawe khwinkhelela rooho yawe.

³¹Yaari Siikhu ya Ojilokotthela na Saapatu eti yaari siikhu yootepa wiiya ttakatthiifu. Wiiya khaari otakha yoori mwiili wa apale ari vansalapa ofiya saapatu, mayaahuuti khunvekela Pilaatu yoori arume ovujiwa moolu a apale akhomeliweeyo na olaziwavo vansalapa. ³²Khuta anajanka khuvuja moolu a ntthu otule wa waaza okhomeliwa vamote na Yinsa elottelanaka khuvuja a otule nkina. ³³Ila noofiyeliwa Yinsa, khooniwa yoori ye aari woofwa, khuhivujiwi moolu awe. ³⁴Ila najanka mmote khukuphula pavu ya Yinsa na nkokhi, nasaapiru khusala esaruwa taamu na maati. ³⁵Otule ooniyeeyo vitthu zaya epo alawela oshaahiti, na oshaahiti awe pu wookhweele. Ye onjuwa yoori onlupa haakhi, na onlaza oshaahiti yoori na mweeyo mwikhupali. ³⁶Vitthu epo zarettikhana yoori emariseleye epile enlupaazo Zawaatikhiwa Ttakatthiifu yoori: “Hatha likhonkolo lawe limote khalinteela opwecheya,” ³⁷na nkhama theenya enlupaazo zawaatikhiwa phantte kiina yoori: “Yo anttela omoona othuuto anshomiyeeyo.”

Ozikhiwa wa Yinsa

³⁸Paata ya toole Yuusufu wa sitati ya Arimateeya, khunvekela Pilaatu mwiili wa Yinsa. Yuusufu aari nakhiyoni wa Yinsa, ila wa sirini, maana aari owoova mayaahuuti. Pilaatu khwinkha ruhusa, Yuusufu khulawa khulazavo mwiili wa Yinsa. ³⁹Ye aaperekhiwe ti Nikoteemu, otule alawiyeeyo ottakhulana Yinsa osikhu. Nikoteemu aathuliye mafuttha oonukhela oophakanyaniwa ela yaari ofiyaaye etthu ya miphimo talaathiini na mithaanu. ⁴⁰Khuthuula mwiili wa Yinsa, khuputaputela va joora yoottukuntteliwa ofu woonukhela, nkhama anrettaazo mayaahuuti va ozikha. ⁴¹Vahali akhomeliwevo Yinsa waariwo woorotha, waariina khapuri pheeya, yoohizikhiwivo hatha ntthu. ⁴²Maana yaari osaleela ofiya Siikhu ya Ojitthenkeza wa mayaahuuti, na khapuri yaari kharipu, khuzikhiwa attaapho.

Osisimuwa

¹Jumwa phiili supuyeene, Mariyamu Mataleena khulawa okhapuri, khoona liwe ntthile laattiyelaniweeyo khapuri lilaziwevo. ²Aphano khutthira khulawa mpakha vahali aariivo Simawu Pheeturu na nakhiyoni nkina, otule Yinsa aari omphetaaye, khuwooza yoori: “Mbwana alaziwamo nkhapuri, khanijuweeni vahali atthiiweevo!”

³Pheeturu khulankha na nakhiyoni nkina khulawa mpakha okhapuri. ⁴Oowiiri khulankha eettaka otthira, ila otu nkina khutthira channu khunziti Pheeturu, khwiiya mwanzo woofiya okhapuri. ⁵Khwiinama khutturumelamo, khoona joora, ila khuhivirimo nkhapuri mphule. ⁶Aphano, Simawu Pheeturu otule aari onlottaaye, khufiya khuvira nkhapuri mphule na ye khoona joora etile, ⁷na joora etile yaari veeshwa wa Yinsa, eri yooputaputeliwa eri phantte kiina. ⁸Aphano naye nakhiyoni otule aari mwanzo woofiya khuvira nkhapuri nttumphule, khoona na khukhupali. ⁹Yo nalelo zaari ehinaaweeleye Zawaatikhiwa Ttakatthiifu, zaari olupaaye yoori yaari ohithajiya Yinsa osisimuwa muufwa.

Yinsa onimpuwelela Mariyamu Mataleena

¹⁰Anakhiyoni apale khurutela owaya. ¹¹Ila Mariyamu, khusala nalelo ari vanlako wa khapuri, eettaka olila, khwiinama khuthurumela nkatthi wa khapuri. ¹²Khoona malayikha mawiri awaliye kuwo zoolakala, eekhaliye aphale waariivo mwiili wa Yinsa, mmote ovishwa nkina omoolu.

¹³Aphano malayikha apale khumuuzela yoori: “Weeyo muukha, onlila ni?”

Ye khujipu araka: “Eetta othuuliwa Mbwana aka na akijuweeni vahali atthiiweevo.” ¹⁴Paata ya olupa toowo, khuzukuluwa khumoona Yinsa eemeliye, ila khuhinjuwi yoori ti ye.

¹⁵Aphano Yinsa khumuuzela yoori: “Weeyo, muukha onlila ni? Onimweekesa paani?”

Ye khusala oopuwela yoori aari namalimela woorotha, khunjipu yoori: “Mwinyi, nkhama mweetta onlazamu, nkakuuzeni vahali mwintthiyeevo, miiyo kilawe kanthuule.”

¹⁶Yinsa khuri: “Mariyamu!”

Ye khuzukuluwa, khulupa khwa luuka ya meepereewu yoori: “Raboni!” (Eriina maana, a Mwaaliimu). ¹⁷Yinsa khulupa yoori: “Ohikikholele, maana nalelo akinarutele wa Paapa. Olawe vakatthi wa attwiizaku wawooze yoori: ‘Miiyo kintta orutela wa Paapa na Papeenu mweeyo, wa Nluku aka na Nluku weenu mweeyo.’ ”

¹⁸Aphano Mariyamu Mataleena khulawa khuwooza anakhiyoni a Yinsa yoori: “Kamoona Mbwana!” Na khuwooza zooshi epile oziweeyo ti Yinsa.

Yinsa oniwaapuwelela anakhiyoni awe

¹⁹Jumwa phiili njuwa looveva, anakhiyoni akusanyeyiye milako ziri zoofukiwa, mwaasa wa owoova mayaahuuti, Yinsa khuvira khweemela vakatthi vaya khuri: “Heeri yiiye vamote na mweeyo!” ²⁰Alupiyeevo vitthu epile khuwaathoonyeza makhono awe na pavu yawe. Anakhiyoni apale khwiiya ofurahi paata ya omoona Mbwana.

²¹Yinsa khulupa theenya yoori: “Heeri yiiye vamote na mweeyo! Nkhama etthiipo Paapa akirumiyeeyo, na miiyo kinuurumani mweeyo.” ²²Paata ya olupa toowo khuwaavitelela khuri: “Mwipokhere Rooho Ttakatthiifu. ²³Amana mwiswaamihi twampi za ntthu, twampi zaya epo eniiya zooswamihiwa, ila amana mwihiswaamihi khazinswamihiwa.”

Yinsa onimpuwelela Tome

²⁴Tome, aniitthiwaaye Maphapo, mmote wa anakhiyoni apale khumi na awiri, kaari vamote na anakhiyoni wakathi Yinsa awaapuweleliyeevo. ²⁵Anakhiyoni apale akina khumuuza yoori: “Namoona Mbwana!” Ila ye khuri: “Miiyo noohooni mmakhono ye alama za misumari, kitthaamo yaala yaka mphule aakhomeliweemo, na kittha nkhono aka mpavu mwawe, hatha vattitthiiru akinkhupali!”

²⁶Paata ya ovira siikhu naane anakhiyoni awe khurutela okusanyeya nttumphule theenya na Tome aarivo. Milako ziri zoofukiwa, Yinsa khuta khweemela vakatthi vaya khuri: “Heeri yiiye vamote na mweeyo!” ²⁷Aphano Yinsa khumuuza Tome yoori: “Otthe yaala yawo apha, na woone makhono aka, na wookole nkhono awo ottheele pavu yaka. Ohiiye nanhikhupali, ila wiiye namakhupali.”

²⁸Tome khujipu araka: “Mbwana aka na Nluku aka!”

²⁹Yinsa khumuuzela yoori: “Mwaasa wa okoona, wakhupali? Ooparikhiyiwa pi apale ahooneeni ila khukhupali.”

³⁰Yinsa khuretta alama za minjuza kiina zinkizene vakatthi wa anakhiyoni zihaatikhiweenimo nkithaapu mphu. ³¹Ila epi zaatikhiwa yoori mweeyo mwikhupali yoori Yinsa ti Al-Masiihu, Mwaana wa Nluku na yoori amana mwinkhupali mwiiyane ohaayi khwa nzina lawe.

Yinsa na ojiya wooshapweya

¹Paata ya toowo Yinsa khuwaapuwelela anakhiyoni awe opheya nshini wa ntthatta liniitthiwaaye Tiperiyaati21:1 Tiperiyaati theenya eniittheliwa nzina la ntthatta la Kalileya.. Ti nanna ye aajithonyeziyeeyo: ²Aari vamote Simawu Pheeturu, Tome aniitthiwaaye Maphapo, Natanayeele wa nti wa Kanaani ya Kalileya, na aana a Zepeteewu na anakhiyoni akina awiri. ³Simawu Pheeturu khuwooza ashirikha awe yoori: “Kinttela ojiya.” Akinoko aya khulupa yoori: “Fweeyo nintta wuulotta!” Yo khulawa khweetta mmwaatiya, ila osikhu aya opule khuhipatthi hatha etthu.

⁴Ekhunkumu Yinsa aarettiye ari vapatari, ila anakhiyoni awe khuhinjuwi.

⁵Ye khuwoozela yoori: “Aanaaka, mwapattha swi?”

Yo khujipu yoori: “Wala!”

⁶Ye khulupa yoori: “Mweeselele ntthavi nkhono nlume ya mwaatiya, mwintta opattha.” Yo khweesa, khuhisala awahi ofuttha ntthavi mwaasa wa swi waatta.

⁷Nakhiyoni wa Yinsa woophetacha khumuuza Pheeturu yoori: “Oto aya ti Mbwana!” Wakathi Simawu Pheeturu asiiliyeevo elupiwaka yoori aari Mbwana, khuwala juupa, maana eettiye ovula na khujeeselela mmaati. ⁸Anakhiyoni akina khuta na mwaatiya, eettaka ofuttha ntthavi liitaaliye swi, aari kiyasi ya phiima miiya ya osaleela ofiya vapatari. ⁹Wakathi afiiyeevo vapatari, khoona vahali waariivo moottho, na swi vatulu wa makhala, na phaawu.

¹⁰Aphano Yinsa khuwooza yoori: “Mwitiise swi vattitthiiru etthiipo mwijiyiyeeyo nasaapi.”

¹¹Simawu Pheeturu khuwela mmwaatiya khupurulela ntthavi vathi. Liri lawiitaala swi miiya na hamusiini na ttatthu khulukhulu, ila ntthavi khuhivaruwi. ¹²Yinsa khuwooza yoori: “Mwite mwije!” Khuhiivo hatha nakhiyoni awe mmote aminyaliyeeyo khumuuzela yoori: “Weeyo aya o paani?” Maana aajuwiye yoori otu ti Mbwana. ¹³Yinsa khuwaattama khuthuula phaawu, khuwenkha na khuretta etthiipo khwa swi. ¹⁴Eto yaari swaafu ya ttaatthu Yinsa ajithoonyezaka vakatthi wa anakhiyoni awe, paata ya osisimuwa muufwa.

Yinsa oninkaphula Pheeturu

¹⁵Paata ya wiisha oja Yinsa khumuuzela Simawu yoori: “Simawu, mwaana wa Yaahaya, onikipheta zayita apa?”

Ye khuri: “Aaa Mbwana, hatha na weeyo onjuwa yoori miiyo kinuupheta.”

Yinsa khumuuza yoori: “Ojise pwittipwitthi zaka.”

¹⁶Khumuuzela theenya swaafu ya phiiri yoori: “Simawu, mwaana wa Yaahaya, weeyo onikipheta?”

Ye khujipu yoori: “Aaa Mbwana, hatha na weeyo onjuwa yoori miiyo kinuupheta.”

Yinsa khumuuza yoori: “Oshuke pwittipwitthi zaka.”

¹⁷Khumuuzela theenya swaafu ya ttaatthu, yoori: “Simawu, mwaana wa Yaahaya, weeyo onikipheta?”

Pheeturu khunyoonyeya mwaasa wa Yinsa omuuzela swaafu ya ttaatthu, yoori: “Weeyo onikipheta?” Ye khuri: “Mbwana, weeyo onjuwa vitthu zooshi na onjuwa yoori miiyo kinuupheta.”

Yinsa khumuuza yoori: “Ojise pwittipwitthi zaka. ¹⁸Miiyo kiniwuuza khweele yoori, wakathi opule waari shaapu, weetta ojiwalisa, khweetta wakhula aphale ontakhaavo, ila amana wuuluvala onteela owookolela makhono, azaawo oothuule aweettane ohali ohintakhaawo weettawo.” ¹⁹Yinsa aalupiye toowo yoori athoonyeze nanna ya ofwa Pheeturu aari weettelaaye onsifwana Nluku. Nawiisha, khumuuza yoori: “Okilotte!”

²⁰Pheeturu azukuluwiyeevo khumoona yoori nakhiyoni otule Yinsa aari omphetachaaye etta owaalotta. Oto ti aari mpavu wa Yinsa wakathi wa etthu yoojiwa ya osikhu, na ti othuuto eenameliyeeyo vamweyo wa Yinsa khumuuzela yoori: “Mbwana paani anttelaaye wuuzinkula?” ²¹Wakathi Pheeturu amooniyeevo khuri: “Mbwana, khi otu?”

²²Khunjipu Yinsa yoori: “Hatha nkhama miiyo katakha yoori ye eeye haayi mpakha miiyo oruti, weeyo enuujali niini? Ila weeyo okilotte miiyo.” ²³Khwa etthiipo khumwazeyela vakatthi wa attwi yoori nakhiyoni otule khaari oteela ofwa. Ila Yinsa khaalupiye yoori khaari oteela ofwa; aalupiye yoori: “Nkhama miiyo katakha yoori eeye haayi mpakha miiyo oruti, weeyo enuujali niini?”

²⁴Otu ti nakhiyoni anlazaaye oshaahiti wa vitthu zaya epo na aatikhiyeeyo. Ninjuwa yoori oshaahiti awe pu wookhweele.

²⁵Yinsa aretta vitthu kiina theenya zawaatta. Eriwaka wakhula moote yeettiye waatikhiwa, kinoona yoori hatha voolumwenku wooshi khayaari wiiyavo puuro zootthiiwavo kithaapu zaari weettelaaye waatikhiwa.