Meepereewu

Warakha aatikheliweeyo

Meepereewu

Mwaana, nwulweene zayita malayikha

¹Raku Nluku attakhula swaafu zawaatta khwa nanna zene vakatthi wa apaapa zeetthu khwa manapiyu. ²Ila siikhu epi za mwiisho anittakhulana vakatthi veetthu khwa Mwanawe, othuuto amwinkhiyeeyo wiiya namarithi wa vitthu zooshi na khwa vakatthi vawe Nluku ompa olumwenku. ³Na ti mwaana othuuto eeyiye waara wa nuuru ya Nluku na nthoonyezo wa ratarato yawe khaamili na akholelelaka vitthu zooshi khwa nttakhuzi lawe la owahi. Paata ya oswafi twampi za anaatamu eetta wiikhala nkhono nlume wa Nluku wa owahi zooshi. ⁴Khwa nanna ethiito Nluku khunretta wiiya nwulweene zayita malayikha na khumwinkha nzina liwululene zayita yo.

⁵Nlayikhani Nluku ooziyeeyo yoori:

“Weeyo o mwanaka,

leelo koovokola”?

Na theenya yoori:

“Miiyo kinttela wiiya papaawo,

na ye onttela wiiya mwanaka”?

⁶Aphano wakathi amperekhiyeevo mwanawe wa omwanzo voolumwenku, khulupa yoori:

“Malayikha ooshi a Nluku amwaaputu.”

⁷Ye khulupa phantte ya malayikha araka:

“Aattala malayikha nkhama pheevo,

na akarumeya awe nkhama malimi a moottho.”

⁸Monkoni wa Mwaana awe alupa yoori:

“Ofwalume awo, Oo Nluku, pi wa mileele,

na pakhora yawo ya shariya ti pakhora ya ofwalume awo.

⁹Weeyo ompheta haakhi na eniwiiphiira yootakhala;

tiito Nluku, eeyiye Nluku awo oothawuliyeeyo

vakatthi wa ashirikha awo oothawaza na mafuttha a furaha.”

¹⁰Na theenya:

“Omwanzo, Mbwana, wakheya machina a nti,

na khwa makhono awo wompa pinku.

¹¹Pinku na vathi enteela wiisha, ila weeyo oniiyavo khwa mileele;

epo zaya zinttela othuwa nkhama kuwo.

¹²Weeyo oniwaakhujela nkhama nkhumi,

yo ampatilisiwa nkhama kuwo.

Ila weeyo oniiya nanna moote,

na siikhu zawo khiniisha.”

¹³Nlayikha ni Nluku amuuziyeeyo yoori:

“Wiikhale nkhono nlume aka,

mpakha maatuwi awo kiwaarette wiiya sakanso wa moolu awo?”

¹⁴Malayikha ooshi khahi rooho zininrumeyelaaye Nluku, aperekhiyeeyo yoori ewaawuni apale anttelaaye opwekherela nusura?

Woopisa wa okhijili

¹Khwa etthiipo nina ya osiileza saana nttakhuzi la Nluku nisiiliyeeyo, yoori nihithowelele theenya. ²Maana nkhama mattakhuzi2:2 Mattakhuzi apa enkhiweeyo malayikha kano za Munsa. alupiweeyo pi malayikha pi ookhomaaza, na ovonya wooshi na okhijili onaaye hukhumu, ³ninttela owerawera toovi hukhumu, amana nitarawu nusura khuluyeene? Ethiito elaleyiweeyo omwanzweene ti Mbwana, khuhakikhisiwa pi apale asiiliyeeyo. ⁴Nluku naye alawela oshaahiti vakatthi wa alama, minjuza, vitthu zootikinisa nanna zene na tthuvo ya Rooho Ttakatthiifu eperekhiweeyo khwa matakhelo awe.

Yinsa alattisaniwa attwiize

⁵Khahiyo malayikha enkhiweeyo olokozela olumwenku onttelaaye ota, monkoni wa otthuupo ninlupaaye. ⁶Ila phantte kiina nkatthi wa nttakhuzi owaapho ntthu alupiye yoori:

“Pinaatamu paani onjalaka?

Wala mwaana wa pinaatamu paani wooshukulikheliwa?

⁷Weeyo wampushuwisa wakathi vattitthiiru zayita malayikha;

ye wamwinkha jarata ya siifwa na onttitthimisa,

⁸vitthu zooshi wattha vathi wa moolu awe.”

Omwinkhaka vitthu zaya epo, khina etthu moote olikhiyeeyo ohittheeni nkatthi wa ofwalume awe. Ila apha, nalelo khaninoone yoori vitthu zooshi enkhiwa. ⁹Namoona, otule arettiweeyo wiiya nttitthiiru zayita malayikha, Yinsa, enkhiwa jarata ya hishima na ya siifwa mwaasa wa ohoowa na ofwa, yoori khwa rehema ya Nluku, khwa zwaamu ya atthu ooshi, ootele ofwa.

¹⁰Khwa owaalokoza aana awaatta nsiifwa, yaari ohithajiya yoori Nluku, khwa othuuto na vakatthi wa othuuto vitthu zooshi ziriivo, akhamilikhe2:10 Oretteya wiiya khaamili opu, khinlupa yoori khaari khaamili mwaasa wa twampi, ena maana a wiishisa khaazi zawe za ohoowa., vakatthi wa ohoowa, mweenyewe nusura yaya. ¹¹Maana khwa etthiipo otule antwahareshaaye na otule antwahareshiwaaye ooshi papaaya mmote, tiito khinimpattha haaya oweettha yoori attwiize. ¹²Ye alupa yoori:

“Kinteela olaleya nzina lawo vakatthi wa attwiizaku;

kiwiipele siifwa vanthukumano.”

¹³Na khulupa theenya yoori:

“Nroromelo aka kinttha mmakhono mwawe.”

Khulupa opheya yoori:

“Kiri apha na aana Nluku akinkhiyeeyo.”

¹⁴Mwaasa wa aana wiiya atthu awiiyana mwiili na taamu, tiito Yinsa ajirettiyeeyo ontthu, yoori khwa ofwa wawe anshintte sheethwani nlupa ariina owahi wa ofwa, ¹⁵na owaataphula ooshi apale arettiweeyo oviitthwaana ohaayi aya wooshi mwaasa wa woova ofwa. ¹⁶Maana ti ya wooneya yoori khaateeliye waawuni malayikha, aateeliye waawuni ojama wa Eburahiima. ¹⁷Khwa etthiipo yaari ohithajiya ye wiiya woolattanana attwiize khwa zooshi, yoori eeye haakhimu nwulu wa tiini wa tthakaraka na wa waamineya khwa khaazi ya Nluku, yoori aswamiheliwe twampi za atthu. ¹⁸Etthiipo, ye ahoowiyeeyo wakathi azayiniweevo, onaaye owahi wa owaawuni apale anzayiniwaaye.

Yinsa nwulweene zayita Munsa

¹Nakataalikha, attakatthiifu attwiizaku, mwiriiye nkatthi wa okhuweliwa ti Nluku wa pinkuuni, wuupuwela weenu mwitthe wa Yinsa, aswihaapa na haakhimu nwulu wa tiini ninintukhurwaaye. ²Othuuto eeyiyeeyo wa waaminiwa khwa otule anthawuliyeeyo, nkhama etthiipo Munsa eeyiyeeyo wa waamineya khwa khaazi ya nyuupa yooshi ya Nluku. ³Yinsa arettiwa wiiya woosuhi winkhiwa siifwa khuluyeene zayita Munsa, nkhama etthiipo namajeka nyuupa onttitthimisiwa na kuvu zayita nyuupa. ⁴Maana wakhula nyuupa enaaye namajeka aya, ila Nluku ti ajekiyeeyo vitthu zooshi. ⁵Na Munsa aari wa waamineya nkhama karumeya khwa nyuupa yooshi ya Nluku, na olawela oshaahiti khwa vitthu zooshi zaari weettelaaye olupiwa. ⁶Ila Al-Masiihu tu wa waamineya nkhama mwaana monkoni wa nyuupa ya Nluku. Nyuupa ya eto ti fweeyo, amana nikholelela woolipaneyavo nroromelo na owejela khwa etile ninjikhupalanaaye.

Ohupiriwa monkoni wa okhijili

⁷Nkhama etthiipo enlupaazo Rooho Ttakatthiifu yoori:

“Amana leelo mwisiila huula ya Nluku,

⁸mwihuumise rooho zenu nkhama wakathi opule wa okhijili wa amarehemu apapazenu,

wakathi wa weeziwa n’yaara,

⁹nttumpho amarehemu apapazenu eeziyeeyo okotoota,

ooniyeru pure vitthu kaarettiyeeyo khwa nyaakha arupayiini.

¹⁰Tiito yaakipatthiyeeyo katapu khwa khapila ya etile,

miiyo khulupa yoori: ‘Rooho zaya zathowelela mileele,

yo khajuweeni tarikhi zaka.’

¹¹Kalapha khwa katapu yaka yoori:

‘Khanteela ofiya puuro ya ovumula etile miiyo kiwaahitiyeeyo.’ ”

¹²Phoole attwiizaku, khwa mweeyo ahiiyevo ntthu mmote wawiiyana rooho yootakhala na yoohikhupali, ya wuuphakulanani Nluku wa ohaayi. ¹³Olikha toowo, mwitumerelane siikhu zooshi mmote na nzeenu khwa wakathi oniitthiwaaye “leelo”, yoori ahiiyevo mmote wa mweeyo enttelaaye wuumisiwa rooho ti ottettekha wa twampi. ¹⁴Maana fweeyo naretteya wiiya ashirikha a Al-Masiihu, amana ninkholelela mpakha mwiisho na nroromelo naariinaaye thanku omwanzo. ¹⁵Tiito enlupaaye yoori:

“Amana leelo mwisiila huula ya Nluku,

mwihuumise rooho zenu nkhama wakathi opule wa okhijili wa amarehemu apapazenu.”

¹⁶Apaani ariiyeeyo noosiila ila khukhijilela? Khahi ooshi apale Munsa awaalaziyeewo Misuri? ¹⁷Papaavi Nluku awakatipukheliyeeyo khwa nyaakha arupayiini? Khahiyo apale aakosiyeeyo, na mwiili aya khukwelana ofwela n’yaara? ¹⁸Khi apaani aawalaphiyeeyo yoori khaari oteela ofiya puuro ya ovumula? Khahi anamakhijili? ¹⁹Nakataalikha noone yoori yo mwaasa wookhijili khawaheeni ofiya.

Weetta muuvumula wa Nluku khwa amini

¹Nakataalikha, ahiti ya ofiya puuro ya ovumula ya Nluku nalikheliwa. Ahiiyevo mmote wa mweeyo anuupuwelaaye yoori avonya. ²Maana natafusireliwa hapari zooshapweya etthiipo atafusireliweezo yo, ila hapari epo asiiliyeeyo khattheleeni fwayita, maana khalokoziweeni ti amini apale asiiliyeeyo. ³Maana fweeyo nikhupaliyeeyo ninfiya puuro yoovumula nkhama etthiipo Nluku alupiyeezo araka:

“Kalapha khwa katapu yaka yoori:

‘Khanteela ofiya puuro ya ovumula etile miiyo kiwaahitiyeeyo.’ ”

Hatha nkhama khaazi yawe yeetta wiisha thanku wumpa wa olumwenku. ⁴Phantte kiina alupa monkoni wa siikhu yasaapa araka: “Siikhu yasaapa Nluku avumula khwa khaazi zooshi akholiyeezo.” ⁵Khurutela opheya olupa yoori:

“Khanteela ofiya puuro ya ovumula etile miiyo kiwaahitiyeeyo.”

⁶Nakataalikha ansaleela weettamo akina muuvumula mphule, na apale a omwanzo atafusireliweeyo hapari zooshapweya monkoni wa ovumula, kheetteenimo, mwaasa wa okhijili. ⁷Tiito Nluku atthomiyeeyo theenya siikhu kiina, eniitthiwaaye “Leelo”, ziviriyeevo nyaakha, Nluku khulaleya epo zaya khwa Daawuuda, nkhama nttakhuzi lilupiyeeyo rakuzeene yoori:

“Leelo amana mwisiila huula ya Nluku,

mwihuumise rooho zenu.”

⁸Maana eriwaka Yoshuwa eettiye owenkha raku zeene atthu apo ovumula, Nluku khaari oteela ottakhula monkoni wa siikhu kiina. ⁹Khwa etthiipo, onsala ovumula wa atthu a Nluku, nkhama ovumula wa Nluku siikhu ya saapa. ¹⁰Maana otule eettiye muuvumula wa Nluku, onvumula khwa khaazi zawe, nkhama Nluku avumuliyeezo khwa khaazi yawe. ¹¹Nakataalikha, nijilipise nifiye muuvumula wa Nluku yoori ahiiyevo ntthu mmote anttelaaye okwa alottelaka nthoonyezo wookhijili.

¹²Maana nttakhuzi la Nluku likumi na lookhomaala, na loonoleya zayita phanka ya orere miwiri; ye linthipa mpakha ofiyelela ophakula nafusi na rooho, linlawa mpakha nkatthi wa ntthu, na limphuka wuupuwela na shawuri za nroho. ¹³Khina hatha etthu moote khwa zooshi zumpiweeyo, ziiyiyeeyo zoovitheya omaasho wa Nluku, zooshi pi za wooneya na zatthiiwa omaasho wa otule anttelaaye oniretta hisapu.

Yinsa, haakhimu nwulu wa tiini

¹⁴Nakataalikha ninaaye haakhimu nwulu wa tiini, Yinsa Mwaana wa Nluku, othuuto aweliyeeyo pinkuuni nikholelele woolipanavo amini nintukhurwaaye. ¹⁵Tiito khanina haakhimu nwulu wa tiini ahinwahaaye omweeleya otteettheya weetthu, ila apho ninaaye haakhimu nwulu wa tiini wa wiiya nkhama fweeyo, azayiniweeyo nanna zene nkhama fweeyo, ila ye khakoseeni. ¹⁶Apho naattame khukulu ya rehema na nroromelo wooshi, yoori nipwekhere tthakaraka na napatthe rehema ya onaawuni wakathi woohithajiya.

Al-Masiihu, nwulu khwa mahaakhimu a tiini a osiilana wa raku

¹Wakhula haakhimu nwulu wa tiini onthawuliwa vakatthi wa atthu khwinkhiwa owaalokozela atthu khwa vitthu za Nluku na winkha zaakha na twaha za twampi. ²Ye onwahi owaavilela ooshi apale ohiina ojuwa na anjaashikhisaaye, maana naye mweenyeweene ontteettheya. ³Khwa ethiito ye ona ya winkha twaha mwaasa wa twampi zawe mweenyewe na theenya khwa twampi za atthu. ⁴Khina anjittitthimisaaye mwenyeweru, ila ona ya okhuweliwa ti Nluku nkhama etthiipo aakhuweliweezo Haruni. ⁵Khwa nanna etthiipo Al-Masiihu kheettiye ojinkha siifwa ya wiiya haakhimu nwulu wa tiini, ila Nluku eettiye omuuza yoori:

“Weeyo o mwanaka,

leelo koovokola.”

⁶Nkhama theenya alupiyeezo nhali nkina yoori:

“Weeyo onamalokozela wa tiini wa mileele

nkhama etthiipo aariizo Melikizeteekhi.”

⁷Wakathi opule Yinsa aari vathi, aarettiye nkhuwo eettaka olila alompaka na oveka khwa Nluku otule aari owahaaye omuusuru muufwa. Nluku khusiila oveka wawe, mwaasa wa ojinkha wawe. ⁸Eeyaru pure Mwaana, ye aajinozeliye oshututi khwa ohoowa opule aari woonaaye. ⁹Paata ya okhamilikhisiwa khwinkhiwa wiiya naattuuttu wa nusura ya mileele ya apale ooshi aninshututelaaye, ¹⁰khwinkhiwa ohaakhimu nwulu wa tiini ti Nluku nkhama etthiipo aariizo Melikizeteekhi.

Otumereliwa weettetta nkatthi wa amini

¹¹Khwa toowo ninaaye vitthu zawaatta za olupa, ziiyiye zoolipa weeleza, mweeyo olipa weeleyiwa mwaasa wa orupaza osomiseya. ¹²Maana mweeyo mwaarina ya wiiya anamanozela, ila nasaapi eti onuuhithajiyani ntthu wa wuunozelani opheya vitthu za masomi a mwanzo a nttakhuzi la Nluku. Linuutakhani leethi khahiyo etthu yoojiwa yookhomaala. ¹³Ntthu annywaaye leethi paasi, oto aya nalelo ntteetthe, na khanajuwe saana masomi a shariya. ¹⁴Ila etthu yoojiwa yookhomaala eniwaafwayi apale awulu, maana yo mwaasa wa oja wakhula siikhu, anjuwa othawula yooshapweya na yootakhala.

Otumereliwa weettetta khwa amini

¹Nakataalikha, nilikhe masomi apale amwanzo monkoni wa Al-Masiihu na neettele okhomaala, woohiruteli opheya nchina la othupwiya khwa khaazi ennilokozaaye muufwa, na theenya niiya ya omwaamini Nluku. ²Mweeyo khamwinihithajiya theenya masomi a njampo la woosa na ottheeliwa makhono, osisimuwa wa ananfwa na ophukiwa wa mileele. ³Fweeyo ninttela oretta etthiipo amana Nluku akhupalela.

⁴Moone khinwaheya, khwa apale swaafu moote amwasikheliweeyo na khootela tthuvo ya pinkuuni, khupwekhera Rooho Ttakatthiifu, ⁵khweezelela oshapweya wa nttakhuzi la Nluku na owahi wa wakathi ontaaye, ⁶ila khwanswi amini, khiniwaheya orutiseliwa othupwiya, maana aninkhomela opheya Mwaana wa Nluku anveyisaka vamwanttiwa.

⁷Nluku omparikhiya nti ompwekheraaye vuula swaafu zawaatta, khootthisa miitthi za fwayita khwa apale anlimaaye attaapho. ⁸Ila nti opule onootthaaye miiwa na vikhuuwa khuna fwayita na onsaleela olaaniwa. Mwiisho aya olukuziwa.

⁹Aphetani aka, hatha nkhama neetta ottakhula toowo, ninroromela vitthu khuluzeene vakatthi venu, vitthu khaamili za nusura. ¹⁰Nluku khahi woohiiyi wa shariya. Ye khanteela osahawu khaazi zenu na pheta mwithonyeziyeeyo, maana mwawenkha nkhono attakatthiifu na apho mwinvira mwiwenkhaka. ¹¹Apho ennituvela yoori wakhula mmote wa mweeyo ajithoonyeze wiiya woolikana mpakha mwiisho, yoori mwiiyane nroromelo khaamili, ¹²yoori mwihiiye nkhama atthu ooviliwa, ila mwiweezele apale khwa amini na ovilela apwekhereliyeeyo erathi etile Nluku ahitiyeeyo.

Nroromelo wa ahiti ya Nluku

¹³Wakathi Nluku aamwaahitiyeeyo Eburahiima, mwaasa woohiivo nwulweene woolapha khwa ye, khujilaphelela mweenyewe, ¹⁴araka: “Weekhweele kinteela wuuparikhiya na kaattise ojama yawo.” ¹⁵Yaarettikhaniye etthiipo, paata ya Eburahiima owejela na ovilela, khweele ye aapatthiye etile ahitiweeyo.

¹⁶Maana anaatamu anlapha khwa nzina la otule eeyiyeeyo nwulweene, ahakikhaka etile elupiweeyo, eeshishaka onyakulisana. ¹⁷Tiito, Nluku wakathi aatakhiyeeyo owaathonyeza wawooneyavo khwa anamarithi a ahiti yoori khaari ozukulisa matakhelo awe, khulupa khwa olapha, ¹⁸na yoori khwa vitthu piiri zihinzukuliseyaaye, khinretteya Nluku ohata khwa vitthu zaya epo, nina yookholelela na olipiseleya khwa nroromelo nwulweene naahitiweeyo vakatthi veetthu. ¹⁹Niiyane nroromelo nkhama nankura wa nafusi woolipalipa na wookhomaala. Nroromelo opu onvira va phazira khweetta puuro Ttakatthiifu ya attakatthiifu pinkuuni. ²⁰Ottuukho Yinsa eettawo khapulathi ya fweeyo, khwa puuro yeetthu. Khuretteya wiiya haakhimu nwulu wa tiini mileele nkhama etthiipo aariizo Melikizeteekhi.

Melikizeteekhi, mfwalume na namalokozela wa tiini

¹Melikizeteekhi oto aari mfwalume wa sitati ya Salemu na namalokozela wa tiini ya Nluku Nwulu wa Pinkuuni. Ye aakutthananiye Eburahiima wakathi aari orutaavo paata ya owaashintta afwalume. Melikizeteekhi khumparikhiya.7:1 Hatiithi eti empattikhana kithaapu ya Mwanzo 14:17-20.²Othuuto theenya Eburahiima amwinkhiyeeyo lifunku la khuumi la zooshi. Yamwanzo nzina lawe lina maana a “mfwalume wa shariya” ya phiiri “mfwalume wa Salemu,” enlupaaye yoori “mfwalume wa heeri.” ³Woohijuwiwi papaawe, wala mamaawe, ojama awe, omwanzo wa siikhu zawe, wala mwiisho wa ohaayi awe, ila wawumpiwa nkhama Mwaana wa Nluku, khwiiya namalokozela wa tiini khwa mileele.

⁴Mwishitahi ottunkhulu awe, hatha papeetthu Eburahiima aamwinkhiye ye lifunku la khuumi khwa vitthu aapatthiyeezo nvittha. ⁵Nkhama enlupaazo kano za Munsa, anamalokozela a tiini atthaapo aari ojama wa Leevi, ana shariya opwekherela lifunku la khuumi la attwiize eeyiyeru pure ojama wa Eburahiima. ⁶Ila Melikizeteekhi aheeyiyeru pure wa ojama wa Leevi, ye aapokhereliye lifunku la khuumi aalaziyeeyo Eburahiima, ye khumparikhiya Eburahiima othuuto ahitiweeyo. ⁷Khayiivo hatha shaakha nsimaana oparikhiyiwa ti nttunkhulu. ⁸Khwa phantte ya anamalokozela a tiini, lifunku la khuumi limpwekheriwa ti anaatamu anfwaaye. Ila khwa phantte ya Melikizeteekhi, lifunku la khuumi limpwekheriwa ti ntthu ariiye haayi nalelo. ⁹Enwaheya olupa yoori, hatha Leevi otule ampokherelaaye mafunku a khuumi, enkha lifunku la khuumi khwa Eburahiima, ¹⁰maana wakathi Melikizeteekhi akutthananiyeevo Eburahiima, Leevi aari ahinavokoliwe.

Yinsa ori nkhama Melikizeteekhi

¹¹Eriwaka yaari owaheya opattikhana okhaamili khwa ohaakhimu wa aleevi, kano apwekhereliyeeyo atthu a Ezirayiilu zaari olankhaaye nkatthi wa ohaakhimu opule, khaari ohithajiya opuwa haakhimu wa tiini nkina, nkhama etthiipo aariizo Melikizeteekhi khahiyo nkhama aariizo Haruni? ¹²Weekhweele amana wiiyavo ozukulisiwa wa ohaakhimu, theenya mpakha wiiyevo ozukulisiwa wa kano. ¹³Maana otule anlupeziwaaye vitthu zaya epo ti wa lihimo likina, khaarivo hatha ntthu mmote wa lihimo laya nttho aarumeyiyeeyo va alitaari. ¹⁴Maana enjuwiwa saaneene yoori Mbwana eetthu ojama wa lihimo la Yuuda, nttinttho Munsa ahilupezeeni hatha etthu monkoni wa ohaakhimu.

¹⁵Eto yaya yajithoonyeza saaneene wakathi apuwiyeevo namalokozela wa tiini woofwarikhana nkhama Melikizeteekhi. ¹⁶Ye aretteya wiiya haakhimu wa tiini, woohiiyi mwaasa wa ojama wa lihimo la Leevi, ila khwa owahi wa ohaayi woohiina mwiisho. ¹⁷Maana khwa ye yalupiwa yoori:

“Weeyo onamalokozela wa tiini wa mileele,

nkhama etthiipo aariizo Melikizeteekhi.”

¹⁸Oruma opule wa raku walaziwavo maana waari woottettheya na woohifwayi. ¹⁹Maana kano khikhamilikhiseeni hatha etthu. Nasaapi eti Nluku aninkha nroromelo nwulweene, otthuupo pi onnattamanisaaye Nluku.

²⁰Epo zaya khirettikhaneeni woohiivo olaphisana. Atthu akina aretteya wiiya mahaakhimu a tiini woohiivo olaphisana. ²¹Ila ye aretteya wiiya haakhimu wa tiini khwa olapha, wakathi Nluku aamuziyeeyo yoori:

“Mbwana alapha

na khanrutela nyuma,

weeyo o namalokozela wa tiini khwa mileele.”

²²Khwa ethiito Yinsa aretteya wiiya nroromelo wa osiilana nwulweene.

²³Anamalokozela apale a tiini aarivo awaatta, maana ofwa waari owaalikhisa orutela khaazi yaya. ²⁴Ila mwaasa wa Yinsa wiiya haayi khwa mileele, ohaakhimu awe khuniisha. ²⁵Tiito, ye onaaye owahi mileele wa owoosuru apale animwaattamaaye Nluku khwa ye, maana meekhazi awe ooshi aniiya a owaavekelela yo.

²⁶Nanna ya haakhimu nwulu wa tiini naari onhithajiyaaye oniiya nkhama toono: nttakatthifu, woohiina paathuli, watwahara, woophakuwana na anatwampi, woottitthimisiwa zayita pinku. ²⁷Ye khanihithajiya, wiiya nkhama mahaakhimu awulu a tiini akina, aninkhaaye wakhula siikhu twaha, yamwanzo khwa twampi zaya na nawiisha khwinkha khwa twampi za atthu; maana epo ye aretta khwa swaafu moote paasi ojinkha twaha ye mweenyewe. ²⁸Maana kano zawaathawula mahaakhimu awulu a tiini atthu antteettheyaaye; ila khwa olapha otiyeeyo paata ya kano za Munsa, Nluku anthawula Mwanawe khaamili wa mileele.

Yinsa, haakhimu nwulu wa tiini wa osiilana mpheya

¹Etthu yootafikhana ninlupaaye tiiti: ninaaye haakhimu nwulu wa tiini othuuto eekhaliyeeyo pinkuuni nkhono nlume wa khukulu ya Nluku wa owahi zooshi. ²Othuuto anrumeyaaye omwimpari wa nheema ttakatthiifu yookhweele yoojekiwa ti Mbwana, yoheemesiwi ti pinaatamu.

³Wakhula haakhimu nwulu wa tiini athawuliwa yoori asala enkha zaakha na twaha mmakhono wa Nluku, tiito naye haakhimu nwulu wa tiini otu aari ohithajiya wiiyana etthu ya winkha. ⁴Eriwaka eettiye wiiya vathi attaapha hatha vattitthiiru khaari wiiya namalokozela wa tiini, maana awaapho vathi apha apale aari winkhelelaaye zaakha mmakhono wa Nluku nkhama enlupaazo kano. ⁵Yo anrumeyela omwimpari wiiyiyeeyo weezela na mwiivuuli wa mwimpari oriiyeeyo pinkuuni. Tiito Munsa aachimuleliweeyo eemesaka heema ttakatthiifu, ooziweeyo yoori: “Phoole, weemesaka, orette khwa nanna etthiipo othonyeziweeyo vamwaako.” ⁶Ila weekhweele, khaazi Yinsa enkhiweeyo khuluyeene zayita khaazi ya anamalokozela a tiini, nkhama etthiipo osiilana otthuupo ye eeyiyeeyo namasiilanisa nwulweene zayita opule wa raku, omphita nkatthi wa ahiti khuluyeene. ⁷Eriwaka osiilana opule wa raku weettiye wiiya khaamili khayaari ohithajiya weekesa puuro ya osiilana nkina. ⁸Ila Nluku khuwoonana paathuli atthu awe na khuwooza yoori:

“Siikhu zintta ofiya, Mbwana alupa,

kinttela oretta lini osiilana mpheya na atthu a Ezirayiilu

na atthu a Yuuda.

⁹Osiilana opu kinttelaaye oretta nayo khunteela wiiya nkhama opule kaarettiyeeyo na amarehemu apaapa zaya,

wakathi kawaakholeleliyeeyo nkhono yoori kiwaalazewo Misuri,

maana yo khaari awaamineya khwa osiilana waka,

miiyo khwaattuwana nayo,” alupaka Mbwana.

¹⁰“Osiilana kinttelaaye oretta na atthu a Ezirayiilu,

paata ya siikhu zaya epo pi opu,” Mbwana alupa,

“Mwaakhili mwaya kinttela otthaamo kano zaka

na kaatikhe nroho mwaya.

Miiyo kintta wiiya Nluku aya

na yo anttela wiiya atthu aka.

¹¹Khaavo theenya anttelaaye onsomisa namwaattamanani awe

wala ttwiiye, araka: ‘Onjuwe Mbwana,’

maana yo ooshi anteela okijuwa,

waaza nttitthiiru mpakha nwulweene.

¹²Maana miiyo kiniwaaswaamihi vitthu zaya zootakhala

na wala akinteela wuupuwela theenya twampi zaya.”

¹³Nluku amana alupaka monkoni wa osiilana mpheya, ooluvaza opule wa raku. Na opule wiiyiye wa raku na wuuluvaliye onsaleela wiisha.

Aputu ya nheema ttakatthiifu yawaattaliwa pi anaatamu

¹Osiilana opu wamwanzo waarina kano khwa nanna ya waaputu na waarina mwimpari wa waattaliwa pi anaatamu. ²Khweemesa heema phantte ya omaasho puuro ya mwanzo, eniitthiwaaye Puuro Ttakatthiifu, yaariwo khantteya, meeza na phaawu zoohalalishiwa. ³Onyoko wa phazira eti ya phiiri yaariwo puuro eniitthiwaaye Ttakatthiifu ya Attakatthiifu. ⁴Ottuukho ariiwo alitaari wa weero ohali waari okhoziwaawo ovupa, na ohali aariiwo aaraka woosiilana afinikhaniweeyo weero phantte zooshi. Nkatthi wa aaraka othuuto yaarimo yoopo ya weero na etthu yoojiwa yaari wiitthiwaaye mana, theenya na puutta ya Haruni yaaphutuwiyeeyo mathapa, na mapawu a osiilana aatikhiweevo kano. ⁵Vatulu wa aaraka zaarivo kerupiina za siifwa zaataphuliyeeyo mapaphelo aya khufinikha va efinikho ya oswamiheliwa twampi. Wekhweele, vitthu zaya epi, khaninlawa othatela nasaapi woolotteyavo.

⁶Paata ya waattaleliwa vitthu zooshi epo, anamalokozela a tiini anttaka wakhula siikhu phantte ya wiilokozi ya heema yiiyiye Puuro Ttakatthiifu, olawa okhola khaazi zaya ttakatthiifu. ⁷Ila haakhimu nwulu wa tiini paasi ti aari ofiyaaye puuro Ttakatthiifu ya Attakatthiifu, wakhula mwaakha swaafu moote, na khaari ofiyawo aheettelaka winkhelela taamu ya nyama khwa twaha ya twampi zawe mweenyewe na twampi zoorettiwa pi atthu mwaasa woohijaliwi. ⁸Khwa nanna etthiipo, Rooho Ttakatthiifu yaari othoonyeza yoori nalelo yaari ehinapuwewo tarikhi ya puuro ttakatthiifu, mwaasa wa wiiyavo mwimpari opule wamwanzo. ⁹Eto enthoonyeza siikhu za leelo, yoori zaakha na twaha za nyama khazinkhamilikhisa akhili zooshapweya za atthu apale anaaputwaaye. ¹⁰Maana vitthu zoojiwa, zoonywa na majampo otwahareshaniwa na maati, epo vitthu za oje ziriina fwayita mpakha wakathi Nluku anzukulisaaye vitthu zooshi.

Taamu ya Al-Masiihu

¹¹Wakathi Al-Masiihu atiiyeevo nkhama haakhimu nwulu wa tiini khwa vitthu zooshwapweya ziriivo nasaapi eti, ye avira phantte khuulu ya heema ttakatthiifu, yootepa na yooziti okhamilikha, yoohaattaliwi ti pinaatamu, eto, khinretta phantte ya wumpiwa wa olumwenku opu. ¹²Khahiyo mwaasa wa taamu za puuzi zeelume wala aana a mompe eelume, ila khwa taamu yawe mweenyeweene yanfiisa puuro Ttakatthiifu ya Attakatthiifu, swaafu moote khwa zooshi, na taamu yawe napatthela nusura ya mileele. ¹³Taamu za puuzi zeelume ama mirurumpi za mompe ama fuutha ya mwaana wa mompe woolukuziwa khuwaatathela atthu apale ohitwahareshiwi, antwaharesheya ojeru paasi. ¹⁴Nkhama epi pi toono, mwipheleleze aphano yoori yootepa owula theenya ti owahi wa taamu ya Al-Masiihu, khwa vakatthi wa Rooho ya mileele ye ajinkha mweenyeweene khwa Nluku nkhama twaha yoohiina hatha jaraha, ye atwaharesha akhili zeetthu mwaasa wa khaazi ennilokozaaye muufwa yoori ninrumeyele Nluku wa ohaayi.

¹⁵Tiito Al-Masiihu namasiilanisa woosiilana mpheya khwa apale akhuweliweeyo yoori apokherele eritho ahitiweeyo mileele, nkhama etthiipo ye afwiyeeyo ari nkhama swamiima ya koosa zirettikhaniyeeyo nkatthi woosiilana opule wamwanzo.

¹⁶Vahali ntthu anatikheliwaaye orithi vitthu, enihithajiya ohakikhi yoori nlupa amwaatikheliyeeyo afwa. ¹⁷Maana ntthu ompattha vitthu zawaatikheliwa amana ntthu aya otule afwa, ila khuniiyana fwayita waatikheliwa waya opule mweenyewe amana eeya haayi.

¹⁸Tiito osiilana opule wamwanzo oniiyana fwayita paasi khwa taamu ya nyama. ¹⁹Wakathi Munsa eeshiyeevo owooza atthu oruma wooshi wa kano, khuthuula taamu ya mwaana wa mompe na ya puuzi, khuphakanya na maati, khutathela kithaapu ya kano na atthu ooshi, arumeyelaka ovuzi wookhuttuwa na zankalala, ²⁰araka: “Eti taamu ya osiilana opu Nluku arumiyeeyo yoori mwishututele.” ²¹Na khuthuula taamu ethiitile khusala atathela heema ttakatthiifu na zaana zooshi zaariimo zaari orumeyeliwakaaye amana lirettiwaka njampo. ²²Weekhweele, nkhama etthiipo enlupaazo kano, vitthu zinkizene zintwahareshaniwa taamu; na woohiittikhi taamu khawiivo nswamaha wa twampi.

²³Nakataalikha, yaari ohithajiya yoori weezela wa vitthu ziriiye pinkuuni ziiye zootwahareshiwa khwa twaha ethiito, ila vitthu etthiipo za pinkuuni enhithajiya twaha khuluyeene. ²⁴Maana Al-Masiihu khavireeni omwimpari waattaliwa pi makhono a atthu wiiyiye weezela wa mwimpari opule wookhweele; ye alawa pinkuuni, ojithoonyeza nasaapi mmakhono wa Nluku khwa zwaamu yeetthu. ²⁵Wala khahiye yoori ajinkhe swaafu zawaatta, nkhama haakhimu nwulu wa tiini aari weettaaye wakhula mwaakha puuro Ttakatthiifu ya Attakatthiifu swaafu moote na taamu yohiiyi yawe. ²⁶Eriwaka yaari etthiipo yaari ohithajiya Al-Masiihu ohoowa swaafu zawaatta thanku waaza wa olumwenku. Ila aphano, apuwa swaafu moote paasi khwa atthu ooshi mwiisho wa wakathi, yoori anilaze twampi zeetthu khwa otwahiwa mweenyeweene. ²⁷Wakhula ntthu ona ya ofwa swaafu moote paasi, nawiisha khusala alawa ophukiwa. ²⁸Etthiipo Al-Masiihu ajinkha swaafu moote khwa mileele yoori alaze twampi za atthu awaatta, na ye onruti swaafu ya phiiri, woohiteeli yoori alaze twampi, ila atane nusura ya apale aninwejelaaye.

Twaha ya Al-Masiihu ti ya mileele

¹Kano za Munsa mwiivuuli wa vitthu zooshapweya zaari otaaye, ila zohiiyi za ekhweele yaya. Tiito kano khazina makhaamu ya owaakhamilikhisa apale animwaattamaaye Nluku khwa enakatthi ya twaha etthiipo zinrettiwaaye woohilikheleliwi, mwaakha khwa mwaakha. ²Eriwaka yaari owahi otwaharesha, yaari olikha orettiwa? Maana atthu aya atthaapo aari waaputwaaye, nooswafiwa swaafu moote khwa mileele, khaari ojoona theenya wiiyana paathuli wa twampi zaya. ³Ila twaha epo zooshi, enretta wuupuwela wa twampi wakhula mwaakha. ⁴Maana khinwaheya taamu ya mirurumpi za mompe ama za puuzi olaza twampi.

⁵Tiito Al-Masiihu ariiyeeyo noota voolumwenku khuri:

“Twaha na zaakha khutakheene.

Ila watthenkeza mwiili khwa miiyo.

⁶Khinuutuvela twaha yoolukuziwa

na zaakha yoolaza twampi.

⁷Aphano, miiyo khulupa yoori: ‘Kiri apha, nkhama yaatikhiweezo nkithaapu monkoni wa miiyo,

kateela oretta etile yiiyiyeeyo ya matakhelo awo, oo Nluku.’ ”

⁸Nkhama ye alupiyeezo vatulu yoori: “Twaha na zaakha khutakheeni, wala twaha yoolukuziwa hatha zaakha kiina za nswammaha wa twampi zooshi khinuutuvela.” Epo zaari orettiwa khwa nanna zaari olupaazo kano. ⁹Aphano Al-Masiihu khweekezela alupaka yoori: “Kiri apha kateela oretta etile yiiyiyeeyo ya matakhelo awo, oo Nluku.” Ye onfuja etile ya mwanzo yoori akheye ya phiiri. ¹⁰Khwa matakhelo aya atthaapo phi nipatthiyeevo otwahareshiwa, khwa otwahiwa wa mwiili wa Yinsa Al-Masiihu, opu ovahiweeyo swaafu moote khwa zooshi.

¹¹Wakhula haakhimu wa tiini wooshi, siikhu khwa siikhu onkhola khaazi yawe ya winkha swaafu zawaatta twaha etthiipile aninkhakhaazo, ila epo zaya khina hatha owahi wa olaza twampi. ¹²Ila haakhimu nwulu eetthu wa tiini, Al-Masiihu eekhala phantte ya Nluku paasi paata ya winkha twaha moote paasi enlazaaye twampi swaafu moote khwa mileele. ¹³Waaza siikhu ethiito ontta oweja yoori mpakha Nluku awaarette maatuwi awe wiiya sakanso wa moolu awe. ¹⁴Maana khwa twaha moote ethiito paasi yawaakhamilikhisa mileele apale antwahareshiwaaye.

¹⁵Na Rooho Ttakatthiifu naye ennilawela oshaahiti khwa vitthu zaya epo. Mwanzo ye alupa araka:

¹⁶“Opu osiilana kinttelaaye oretta miiyo na yo,

amana zifiya siikhu zaya epo,” Mbwana alupa.

“Kinteela ottha kano zaka varoho vaya

na kaatikhe mwaakhili mwaya.”

¹⁷Na khulupa theenya yoori:

“Vitthu zaya zootakhala na twampi zaya,

akinteela ofikhiri theenya.”

¹⁸Khwa etthiipo, amana twampi eswaamihiwa, khinihithajiya theenya twaha ya twampi.

Ohupiriwa monkoni wa ovilela

¹⁹Khwa etthiipo, attwiizaku ninaaye nroromelo wookhamilikha ovira puuro Ttakatthiifu ya Attakatthiifu mwaasa wa taamu ya Yinsa, ²⁰khwa tarikhi pheeya na yo ohaayi anifukuleliyeeyo Yinsa khwa phazira, eto enthoonyeza mwiili awe. ²¹Khwa etthiipo ninaaye haakhimu nwulu wa tiini waweettettisa nyuupa ya Nluku, ²²apho nlaweni nimwaattame Nluku na rooho yookhweele na amini khaamili, na rooho zootwahareshiwa khwa akhili za paathuli na wiiyana mwiili wawoosiwa ti maati oohalalishiwa. ²³Nikholelele saaneene nroromelo nintukhurwaaye, maana otule anaahitiyeeyo tu wa waamineya. ²⁴Nina yoojalina mmote na nzeetthu yoori nilipiselane nkatthi wa pheta na oretta vitthu zooshapweya. ²⁵Na nihilikhe okusanyeya nkhama ojama wa Nluku. Etthiipo ahinrettaazo akina. Ila nina ya olipiselana mmote na nzeetthu; nkhama etthiipo mwinjuwaazo yoori yasaleela ofiya siikhu ya ota wa Mbwana.

²⁶Amana nirutelaka oretta twampi mwayiini paata ya opwekherela ojuwa wa haakhi, khinsala twaha kiina ya twampi, ²⁷ila onsala paasi ophukiwa nwulweene wawoopisa na moottho woohusuti onttelaaye owalukuza maatuwi a Nluku. ²⁸Otule aari okatthalaaye kano za Munsa eetta wuuliiwaka woohiivo hatha tthakaraka paata ya osiiliwa mashaahiti awiri ama attatthu. ²⁹Yatepa channu hukhumu khwa otule anintarawaaye Mwaana wa Nluku, ahittheeni fwayita taamu ya osiilana etile ewaatwahareshiyeeyo, na khuttukhana Rooho ya rehema? ³⁰Maana fweeyo nininjuwa otule alupiyeeyo yoori: “Ojiripha pu waka; kinteela oretta hisapu na yo,” na khulupa theenya yoori: “Mbwana onteela owaaphuka atthu awe.” ³¹Etthu ya woopisa okwamo mmakhono wa Nluku wa ohaayi!

³²Mwifikhiri siikhu epile za mwanzo paata ya mweeyo omwasikheliwa, mwavilela viittha zawaatta na ohoowa mwinkeene. ³³Swaafu kiina mweeyo mwaari ottukhaniwa na wuupatthani miswipa, wakathi nkina mwaarettiye phantte ya apale nayo ahoowiyeeyo etthiipo. ³⁴Mweeyo mwahoowa vamote na apale aari nkalapooso na khukhupalela onyakanyiwa vitthu zenu, mwaari ovilela na furaha khuluyeene, maana mwaajuwiye yoori mwinteela opattha maali zooziti epile na zoohiishi.

³⁵Apho mwihanswi nroromelo mwiriinaaye, onaaye phakari khuluyeene. ³⁶Mweeyo mwinhithajiya wiiyana nthiti, yoori amana mwiretta etile yiiyiye ya matakhelo a Nluku, mwipokhere etile ahitiyeeyo.

³⁷“Maana nasaapi, woohirupazi channu,

otule antaaye onta, na khanrupaza.

³⁸Otule eeyiye nashariya vakatthi vaka oniikhala khwa amini.

Ila otule anrutelaaye nyuma khanteela okituvela.”

³⁹Fweeyo, khahi apale anrutelaaye nyuma na khupwetheya; ila fweeyo pi apale ankhupalaaye khuusurukha.

Nthoonyezo wa amini

¹Amini hakiikha ya etile ninwejaaye na okhupalela wa vitthu nihinoonaaye. ²Maana khwa ethiito atthu apale a raku apwekherela oshaahiti wooshapweya.

³Khwa amini, yaneeleya yoori olumwenku wompiwa khwa nttakhuzi la Nluku, khwa etthiipo epile ninoonaaye khazaattaliweeni pi epile zinooneyaaye.

⁴Khwa amini, Apeele aamwinkhiye Nluku twaha khuluyeene zayita ya Kayiini. Khwa amini, Apeele khuhakikhiwa wiiya ntthu wa shariya, maana Nluku aakhupaleliye zaakha yawe. Eeyaru pure woofwa, khwa amini nalelo onttakhula.

⁵Khwa amini, Enookhi etta woophaziwa yoori ahootele ofwa, “khuhipattikhani, maana Nluku eettiye omphaza”. Ila ahinaphaziwe aapwekheriye oshaahiti wa oretta etile Nluku aatakhiyeeyo. ⁶Khweele, noohiina amini ntthu khanintuvelisa Nluku, khwa ethiito enihithajiya yoori otule antakhaaye omwaattama Nluku akhupali yoori ye owaapho na oniwenkha phakari apale aneekesaaye onjuwa saaneene.

⁷Khwa amini Nuuhi, wakathi aachimuleliweeyo monkoni wa vitthu zaari zihinooneye. Ye khunshututela Nluku na khumwaattala aaraka, yoori oosuru ojama awe. Khwa amini, ye khwinkha paathuli olumwenku, Nluku khunretta wiiya namarithi wa shariya monkoni wa amini.

⁸Khwa amini Eburahiima, wakathi akhuweliweevo ti Nluku yoori alawe puuro aari weettelaaye orithisiwa, ye khushututi; khusala alawa, woohijuwi ohali aari weettaawo. ⁹Khwa amini eekhaliye ari nletto nti otthuupo ahitiweeyo ori nkhama nti woohijuweyi; aari wiikhala nheema nkhama Esiyaakha na Yaakhumpa, atthaapo aarithiyeeyo ahiti ethiito ahitiweeyo ye. ¹⁰Maana ye aari oweja sitati eriina nchina, namwaatikha na namajeka aya eeyiye Nluku.

¹¹Khwa amini Eburahiima, naye Suhura, eeyiyeru pure woohivokoli na wa hirimu yooziti, aapwekheriye owahi wa onvokola mwaana, maana amooniye wiiya wa waamineya otule amwahitiyeeyo. ¹²Tiito khwa ntthu mmote paasi wawuuluvala khwiishavo wapuwa ojama yawaatta channu nkhama matthottowa ootulu na yawaatta channu nkhama mishaka za mmattima.

¹³Ooshi aya apo afwa ari nkatthi wa amini, ahina pokhere etile ahitiweeyo; yo nawoona ori peetiwene, ottuukhule khufurahela. Yo khutukhuru yoori khweele nalelo aletto na anamasaafiri mmuti mphule. ¹⁴Apale anlupaaye toowo anthoonyeza saaneene yoori aneekesa nti aya yo. ¹⁵Eriwaka etta wuupuwela ohali alankhiyeewo, aari wiiyana ruhusa ya orutelawo. ¹⁶Ila nasaapi eti, anwejela nti wa fwayita, nti aya opo pinkuuni. Tiito, Nluku khinimpattha haaya wiitthiwa yoori Nluku waya yo, na aattalela sitati yoori owaapwekherele.

¹⁷Khwa amini, Eburahiima wakathi oototiweevo ti Nluku, anvahiye mwanawe Esiyaakha nkhama twaha; otule ampwekhereliyeeyo khwa ahiti, aasaleliye onretta twaha mwanawe mmote paasi, ¹⁸Nluku aamuziyeru pure yoori: “Vakatthi wa Esiyaakha ti enttelaaye opuwa ojama awo.” ¹⁹Eburahiima aari ojuwa yoori Nluku aarina owahi wa omwinkha ohaayi mwanawe, hatha nkhama eetta ofwa. Na khwa nanna ethiito, Eburahiima ampwekherela mwanawe, anlazaka muufwa.

²⁰Khwa amini Esiyaakha amparikhiyiye Yaakhumpa na Ezawu monkoni wa akhipa yaya.

²¹Khwa amini ethiito, Yaakhumpa asaleelaka ofwa, amparikhiyiye wakhula mwaana wa Yuusufu. Na khujilipisela na pakhora yawe, khumwaaputu Nluku.

²²Khwa amini, Yuusufu asaleelaka wiisha mansha awe, aalupiye khwa nanna meezirayiilu aari weettelaaye olaawo Misuri, na khweeleza nanna aari weettelaaye oretteliwa makhonkolo awe.11:22 Woone kithaapu ya Mwanzo 50:25.

²³Khwa amini ethiito apapaze Munsa nonvokola eettiye onvitha khwa nyeezi mittatthu, maana ettiye omoona yoori mwaana otule khaari weephattu, na khuhoovi oruma wa mfwalume.

²⁴Khwa amini wakathi Munsa awuliyeevo, khukatthala wiitthiwa yoori mwaana wa mwaana wa Firawuuna. ²⁵Ye aahithariye ohoochiwa vamote na atthu a Nluku woohiiyi opuhela vitthu za twampi khwa wakathi vattitthiiru. ²⁶Ye aakhupaleliye yoori ti ya fwayita ohoochiwa na otarawiwa mwaasa wa Al-Masiihu maali khuluyeene zayita wiiyana majuju ooshi a Misuri, maana aari woona phakari yawe. ²⁷Khwa amini ethiito ye khulaawo Misuri woohoovi katapu ya mfwalume; ye khwiiya wookhomaala, nkhama aari omoonaaye Nluku woohooneyi. ²⁸Khwa amini, khuretta njampo la Paashikowa na khuruma ottha alama na taamu milako za meezirayiilu yoori nlayikha lootapanya lihiwoole aanaaya apa amwanzo.

²⁹Khwa amini, meezirayiilu aalokhiye pahari yookhuttuwa eri nkhama tuulu. Ila wakathi amisuri, eezeleliye nayo olokha, eetta ozama ooshi khufwa.

³⁰Khwa amini, nyuuri za Yeriko zaakwiiye paata ya ozukhuleliwa khwa siikhu sapa. ³¹Khwa amini, malempe Rahaape, ye khaafwiiye vamote na atthu apale ookhijili, maana ye awaapokhereliye anamasayela a meezirayiilu na heeri.

³²Kilupe niini theenya? Akina wakathi wa waatta ya owaalupa monkoni wa Zitiooni, Parakhi, Sansoni, Yafeeti, Daawuuda, Samuweele na manapiyu, ³³apo khwa amini, oomanana ofwalume, eettettisa shariya na khupwekhera etile Nluku awaahitiyeeyo, attiyela milomo za aasipa, ³⁴azimisa ohusuti wa moottho na khuvirisa orere wa phanka, khupattha kuvu khwa otteettheya, khujiretta wiiya atthu oowahi khwa viittha na khuwaashintta anajanka eeletto. ³⁵Khwa amini aarivo aakha, awaapokhereliye ananfwa aya ari osisimuwa. Akina woonisiwa shaani na khukatthala otaphuliwa, yoori awahi opattha osisimuwa nwulweene; ³⁶akinoko aya etta ottukhaniwa na ojaphiwa, akina ofukiwa na makwinjili khweeseleliwa nkalapooso. ³⁷Akina etta ovonyiwa mpakha ofwa, akina okheriwa vakatthi, akina wuuliiwa na phanka. Etta ojeettettela, awaliye shapala za pwittipwitthi na za puuzi, oothowiwa, oovelavelisiwa na ohoochiwa. ³⁸Olumwenku khawaari owaafwayi. Eetta ojeettettela n’yaara na nnyaako, aari wiikhala mmakurakuza na mmaphotto a vathi!

³⁹Ooshi apo aapokheriye oshaahiti wooshapweya monkoni wa amini; ila, khina mmote aapwekheriyeeyo etile ahitiweeyo, ⁴⁰maana Nluku aawaziye shawuri za fwayita monkoni wa fweeyo, yoori yo akhamilikhisiwe vamote na fweeyo.

Nluku oniwaashowera aana awe

¹Moone yoori na fweeyo nazukuleliwa ti mashaahiti awaatta nkhama liwiku liwululene, khwa etthiipo nilikhe nyuma zooshi epile ennizinkiraaye, na twampi enizukuleliyeeyo, nitthire woohilikheleli niikarisaka etile nitthomeliweeyo. ²Maasho nithoonyeze wa Yinsa, otule eeyiyeeyo namawaza na mweenyewe amini yeetthu. Ye avilela ofwa vansalapa, khuhinjali haaya etile yaariivo, ajuwaka furaha yaari onwejelaaye. Paata ya ohoowa ye eekhala nkhono nlume wa khukulu ya Nluku. ³Mwimuupuwele saaneene otule avileliyeeyo wiiniwa pi anatwampi, khwa ethiito mwihishokhere na wala mwihitteettheye.

⁴Khwa wuumanana twampi, nalelo khamwinavilele mpakha ofiyelela oshuluula taamu yenu. ⁵Mweeyo mwasahawu mattakhuzi a furaha apale aari wuulipiselanaanini Nluku awinkhiyeenini nkhama aanaawe araka:

“Mwanaka, ohitarawu olikhisiwa ti Mbwana,

wala mwihitteettheye amana ye ooshowerani.

⁶Maana Mbwana oninlikhisa otule animphetaaye

na oninhukhumu otule ye aninkupalelaaye nkhama mwanawe.”

⁷Mwivilele tafwawuthi, mwipwekherelaka nkhama olikhisiwa. Nluku onuutthanttani nkhama aanaawe. Owaapho paapa ahiniwaalikhisaaye aanaawe? ⁸Nkhama mweeyo khamwinlikhisiwa, na khupe olikhisiwa ori wa aana ooshi, toowo khahi mwa aana eekhweele, ila mwa aana ohiiyi akhweele. ⁹Olikha toowo, fooshi fweeyo naarina apapazetthu apa oonaatamu, aari onilikhisa noowaashitahi. Aphano nina yonshututela channu Papeetthu wa pinkuuni na toowo niniiya haayi. ¹⁰Apapazetthu apa oonaatamu aari onilikhisa khwa wakathi vattitthiiru, khwa khiima ari woonelaazo oshapweya; ila Nluku onnilikhisa yoori yiiye saana yeetthu, yoori nirette phantte ya ottakatthifu awe. ¹¹Wakhula olikhisiwa khiniiyavo furaha ila huzuni; mwiisho waya, entana furaha na heeri khwa apale enkhiweeyo weettettisa shariya.

¹²Khwa ethiito, mwilanse makhono enu apo ooshokhera na mwilipisele makutha enu oottettheya. ¹³Mwaattale tarikhi yoohiina maphotto yoori moolu apale oorakala ahikwakwanttuwe, ila eeye ovonisiwa.

Ohupiriwa monkoni wa onkhijilela Nluku

¹⁴Mwijilipisane wiikhala khwa heeri na atthu ooshi na yoori mwiiye attakatthiifu; noohiina ottakatthifu, khina anttelaaye omoona Mbwana. ¹⁵Mwiiyane phoole yoori ahiiyevo hatha mmote wa mweeyo anttelaaye ojilazamo nrehema ya Nluku, wala ahiiyevo anjirettaaye wiiya nkhama ntathaari woowaawa onttelaaye woottha owantipuni, na owaakwakhulisa atthu awaatta. ¹⁶Ahiiyevo njafu ama namakufurwela vitthu ttakatthiifu, nkhama Ezawu otu oozanyisiyeeyo lifunku lawe la ottunkhulu mwaasa wa parathu moote ya etthu yoojiwa. ¹⁷Nkhama etthiipo mwijuwiyeezo rakuzeene yoori atakhaka orithi parakha, ettiye okatthaleliwa, na khuhijuwi nanna ya ozukulisa ojilakelela wawe, eekesiyeru pure parakha khwa olila.

¹⁸Mweeyo khamwifiyeeni vamwaako waari osapiwaaye. Na waari okholelaaye moottho, yiiza, wala oripa na pheevo, ¹⁹onyakula wa nlope na huula yaari ottakhulaaye. Paata ya meezirayiilu osiila, khuveka yoori khantakha osiila theenya. ²⁰Maana khaari owahi ovilela oruma onraaye: “Hatha nkhama nyama esaparu mwaako, evonyiwe na mawe.” ²¹Vitthu zaarettikhaniyeeyo zaari zawoopisa saaneene mpakha Munsa ofiyelela olupa yoori: Kasuthuwa na kintta othukumela!

²²Ila mweeyo mwafiya vamwaako Siyoni na sitati ya Nluku wa ohaayi, Yeruzaleemu ya pinkuuni, ariiwo malayikha oohalakeyi ottuukho aathukumaniyeeyo na furaha, ²³va nthukumano wa apale amwanzo, mazina aya aatikhiweeyo pinkuuni. Mweeyo mwafiya wa Nluku, namaphuka wa atthu ooshi. Mweeyo mwafiyela rooho za anashariya okhamilikha. ²⁴Mweeyo mwafiya wa Yinsa, namasiilanisa wa osiilana mpheya na wa taamu etile evinyiweeyo, enttakhulaaye saana zayita taamu ya Apeele.

²⁵Phoole mwihikatthale onsiileza otule anttakhulaaye. Maana nkhama khavukheeni apale akatthaliyeeyo onsiila otule aari owoozaaye vathi apha, khanitepeeni fweeyo amana nimwanswi otule aninhirimizaaye wa pinkuuni. ²⁶Otule huula yawe raku yaasakhinyiyeeyo olumwenku, apha ahiti yawe tiiti: “Swaafu moote khwa zooshi, kinteela osakhinya khahiyo olumwenkuru paasi ila pinku theenya.” ²⁷Mattakhuzi apa “theenya khwa swaafu moote” enthoonyeza saaneene yoori vitthu epile zumpiweezo zinlawa zasakhinyiwe na zithamisiwe, yoori epile zihinsakhinyeyaaye nalelo ziiye etthiipo ziriizo. ²⁸Nakataalikha, zaama nimpwekheraaye ofwalume woohisakinyeyi, nina ya wiiya ooshukhuru na etthiipo nimwaaputu Nluku, khwa shitaha na woova wa ottakatthifu, ²⁹maana Nluku ori nkhama moottho wooharipu.

Nanna ya ontuvelisa Nluku

¹Mwikhanyarele ophetana mmote na nzeenu nkhama attwi khwa Al-Masiihu. ²Mwihisahawu wiiya atthu omakeleya, maana atthu akina, aamakeliwe pi malayikha yo woohijuwi. ³Mwiwaafikhiri apale ariiyeeyo nkalapooso nkhama mweettiye ofukaniwa vamote, na apale anhoowisiwaaye, nkhama mwiri mweeyo ena mwinhoowaaye.

⁴Harusi ena ya ottitthimisiwa pi atthu ooshi; amanna na aakha eeye awaaminana mmote na nzaawe; maana Nluku onteela owaaphuka ajafu na anamararuwa. ⁵Mwaattuwanise ohaayi enu pheta ya nzurukhu. Mwifurahele vitthu epile mwiriinaazo; maana Nluku mweenyeweene alupa yoori: “Miiyo akinteela wuulikhani na wala akinteela owaanswini.” ⁶Nakataalikha, etthiipo, ninwahi olupa na ororomela niraka:

“Mbwana ti anikaawunaaye,

akinteela woova.

Pinaatamu onikirettelani?”

⁷Mwiwuupuwele atthu apale oolokozeliyeenini, aari wuutafusirelaanini nttakhuzi la Nluku. Mwipheleleze saaneene mishumo za ohaayi aya, mweezele amini ethiito aariinaaye. ⁸Yinsa Al-Masiihu, ti othuuto taana, leelo na mpakha mileele.

⁹Mwihijilikhelele mwithuuliwaka pi masomi ofwarikhana na oohijuweyi. Afwataali rooho wiiya yoolipisiwa ti rehema woohiiyi khwa vitthu zoojeliwa majampo, etthiipo zihiniwapatthisaaye fwayita apale anjaaye. ¹⁰Ninaaye alitaari ahina ruhusa yoojawo anamalokozela a tiini a heema Ttakatthiifu.

¹¹Haakhimu nwulu wa tiini onthuula taamu ya nyama mpakha puuro Ttakatthiifu ya Attakatthiifu, nkhama zaakha ya nswammaha wa twampi, ila mwiili wa nyama zaya epile khulukuziwa oje wa aphale waamakiweevo. ¹²Etthiipo, Yinsa theenya ahoowa vaje wa nlako wa sitati, yoori awaatwahareshe atthu na taamu yawe mweenyewe. ¹³Nakataalikha, nisaruwe nimweettele ye oje wa aphale waamakiweevo, nivilelaka otarawiwa nkhama etthiipo avileliyeeyo. ¹⁴Weekhweele va olumwenku apha fweeyo khaninavo sitati ya mileele, ila neekesele eto entaaye.

¹⁵Tiito, woohilikheleli khwa Yinsa, nlaweni nimwinkhe Nluku twaha ya omwiipela maliipo a siifwa, ziiyiyeeyo mishumo za milomo zintukhurwaaye nzina lawe. ¹⁶Mwihilikhelele oretta zooshapweya na owaameela azeenu khwa etile mwiriinaaye, maana twaha zinintuvelaaye Nluku pi etthiipo.

¹⁷Mwiwaashututele atthu apale oolokozeliyeenini na mwiwaashirehezele khwa ofwalume aya, maana yo aniwiinanelani mweeyo nkhama atthu anttelaaye ojipu khwa khaazi yenu mweeyo wa Nluku. Mwiwaashututele, yoori khaazi zaya ziiye furaha na ehiiye etthu yoolemela, maana toowo khayaari wiiya etthu ya fwayita khwa mweeyo.

¹⁸Mwinilompele, maana ninkhupalela yoori akhili zeetthu pi zooshapweya, nitakhaka yoori niikhale wooshitaheya khwa vitthu zooshi. ¹⁹Kinuuvekelani saaneene olompa yoori miiyo kirutele mmakhono mweenu woohirupazi.

Lompa

²⁰Nluku wa heeri, otule ansisimuliyeeyo Mbwana eetthu Yinsa Nshuki nwulu wa pwittipwitthi, vakatthi wa ananfwa, khwa taamu ya osiilana wa mileele, ²¹okhamilikhiseni khwa zooshi zooshapweya yoori mwirette matakhelo awe, na erettikhane khwa fweeyo etile enintuvelaaye khwa Yinsa Al-Masiihu, othuuto siifwa ziiyiye khwa ye mileele. Amiina.

Salamu

²²Attwiizaku, kinuuvekelani yoori mwivilele mattakhuzi aka oolipisela; wekhweele etile miiyo kiwaatikheliyeenini khayaatteeni.

²³Kintakha mwijuwe yoori ttwiiyetthu Timootiyu alaamo nkalapooso; amana afiya okhuno woohirupazi, kintana othuuto oteela wuuthotolani.

²⁴Kimperekha salamu khwa anamalokozela ooshi okho na ojama wooshi wa Nluku. Na attwiizetthu a Etaaliya ooperekhezani salamu.

²⁵Rehema yiiye na mooshi mweeyo.