Akaalata

Warakha

ya Paawulu awaatikhelaka

Akaalata

Salamu

¹Miiyo Paawulu, kiniwaatikhelani warakha eti, miiyo kikhuweliweeyo yoori kiiye aswihaapa khahiyo wooperekhiwa pi anaatamu wala woolankha mmakhono wa ntthu, ila woolankha mmakhono wa Yinsa Al-Masiihu na Nluku Paapa, otule ansisimuliyeeyo Yinsa muufwa, ²na attwi ooshi ari vamote na miiyo nimperekha salamu va Ojama wa Nluku wa Kalaasiya, niraka:

³Rehema na heeri ya phantte ya Nluku Papeetthu na ya Mbwana Yinsa Al-Masiihu, yiiye vamote na mweeyo, ⁴othuuto aajinkhiyeeyo mweenyeweene khwa twampi zeetthu yoori anitaphule khwa olumwenku wootakhala nkhama etthiipo atakhiyeezo Nluku Papeetthu. ⁵Othuuto attitthimisiwe khwa mileele amiina!

Khaziivo hapari zooshapweya kiina

⁶Kashanka mwaasa wa owoonani nasaapiru omwanswi otule ookhuweliyeenini khwa rehema ya Al-Masiihu, khweettela mwentto wa hapari kiina. ⁷Khaziivo hapari zooshapweya kiina. Ila awaapho atthu ootakha wuutapanyani na otapwatela hapari zooshapweya za Al-Masiihu. ⁸Ila hatha nkhama ti fweeyo ama nlayikha la pinkuuni khuutafusirelani hapari zoofwarikhana na epi nuutafusireliyeenini, ti eeye Woolanikha! ⁹Nkhama etthiipo niwuuziyenini, kinrutela kiwuuzakani theenya yoori: amana apuwa ntthu ootafusirelani hapari zoofwarikhana na epi mwipokhereliyeezo, ti eeye Woolanikha.

¹⁰Nasaapi eti miiyo kineekesa okhupaliwa ti anaatamu ama ti Nluku? Eriwaka kaari weekesa owaatuvelisa anaatamu, akaari wiiya karumeya wa Al-Masiihu.

Paawulu, namakhuweliwa ti Nluku

¹¹Ila kintakha kuujuwiseni attwiizaku, yoori hapari epi kinlaleyaaye miiyo khayi khwa matakhelo a anaatamu. ¹²Maana miiyo akipokhereleeni khwa mmakhono wa anaatamu wala akinozeliweeni ti hatha ntthu, ila Yinsa Al-Masiihu ti akithoonyeziyeeyo. ¹³Maana mweeyo mwasiila menttezi kaariina wakathi opule kaari olottelaavo tiini ya mayaahuuti, na khwa nanna kaari olupatthaazo na ohusuti ojama wa Nluku kiraka kitapanye. ¹⁴Khwa mwentto wa tiini ya oyaahuuti, kawaazitiye mayaahuuti enki apale a hirimu yaka, maana miiyo kaaphitiye na kuvu masomi a apapazaku. ¹⁵Ila Nluku aakithawuliye nalelo kiri mwiirukulu wa maama na khukikhuwela khwa rehema yawe. ¹⁶Wakathi atakhiyeevo onthonyeza Mwanawe khwa miiyo yoori kilaleye hapari zawe khwa amalapo, akimuuzeleeni hatha ntthu. ¹⁷Wala akilaweeni Yeruzaleemu okutthanana apale aari maaswihaapa khapulathi ya miiyo, ila nasaapiru keetta olankha khulawa Arapiiya. Khuruti, khweetta Tamaashiku swaafu ya phiiri.

¹⁸Paata ya ovira nyaakha mittatthu khulankha khulawa Yeruzaleemu onjuwa Pheeturu1:18 Pheeturu onaaye mazina makina anriwaaye Seefwa na Simawu., keeshiyewo siikhu khumi na thaanu kirina ye. ¹⁹Woohimooni hatha aswihaapa nkina woohiiyi Tiyaaku ttwiiye Mbwana. ²⁰Weekhweele khwa zooshi epi kiniwaatikhelaanini kinhakikhi okhu wa Nluku yoori akintta ohata. ²¹Elottelanaka keetta olankha khweetta nti wa Siiriya na Siliisiya. ²²Akaari ojuwiwa kimweenyeweene pi ojama wa Nluku wa Yudeya waari onlottaaye Al-Masiihu. ²³Yo etta osiila paasi yoori: “Otule aari onilupatthaaye, aphano ontta otafusiri monkoni wa amini ethiitile aari weekesakaaye otapanya.” ²⁴Na yo khumwinkha siifwa Nluku mwaasa wa miiyo.

Paawulu onkhupaleliwa pi maaswihaapa

¹Paata ya ovira nyaakha khumi na mine khurutela Yeruzaleemu na Baranabe kinthuuliye Tiitu. ²Kaalawiye, maana Nluku ti aakithoonyeziye yoori kaarina yooretta etthiipo. Vanthukumano wawiitthaala na attunkhulu, khuweeleza yo mattakhuzi a hapari zooshapweya kinlaleyaaye khwa amalapo, maana miiyo akaari otakha yoori khaazi kikholiyeeyo na khaazi kaari okholaaye ehiiye yoohiina fwayita. ³Ila wala Tiitu, otule kaarina, khooziwe yoori akhiriye, eeyiyeru pure nkereeku. ⁴Ila akina aajikusanyiye nkhuntti mweetthu, khujiretta wiiya attwiizetthu nkatthi wa amini, khusala atakha onkhiriyisa. Apo aya aateeliye othurumela otaphuliwa niriinaaye khwa Yinsa Al-Masiihu yoori anirutisele nkatthi wa oviitthwaana. ⁵Fweeyo khuhiwaashirehezeli hatha vattitthiiru, yoori haakhi ya hapari zooshapweya yiiye yookhanyareleya khwa mweeyo.

⁶Ila apale anjoonaaye wiiya oojuwanikha, kinlupa toowo, miiyo khinikijali nanna yo ariizo, maana Nluku khanimphuka ntthu khwa wumpo awe, apo anjoonaaye khakuuzeeni yoori kiina ya weekezelavo etthu khwa hapari epi kintafusiraaye. ⁷Olikha toowo, yo anjuwa yoori Nluku akinkha miiyo, otafusiri hapari zooshapweya khwa apale oohikhiriyi, nkhama amwinkhiyeezo Pheeturu khwa apale ookhiriya. ⁸Maana Nluku anrettiye Pheeturu wiiya aswihaapa wa apale ookhiriya ti othuuto theenya akirettiyeeyo miiyo wiiya aswihaapa wa amalapo. ⁹Aphano Tiyaaku, Pheeturu na Yaahaya aakhupaliweeyo wiiya anamalokozela, ajuwiyeevo rehema enkhiweeyo ti Nluku, khookoleliwa nkhono nlume, miiyo na Baranabe nkhama alama ya osiilana. Khukhupalela yoori fweeyo ninttela okhola khaazi vakatthi wa amalapo na yo vakatthi wa apale ookhiriya. ¹⁰Yo aanihirimiziye ohiwaasahawu asikhini, na ti etthu kaajilipisaniyeeyo oretta.

Paawulu oninshowera Pheeturu

¹¹Wakathi Pheeturu atiiyeevo Antiyookiya, miiyo khummaruwela vakatthi wa mamuumini, maana ye aavonyiye channu. ¹²Maana ahinate atthu akinoko oolankha phantte ya Tiyaaku, ye aari ojaka vamote na amalapo; ila paata ya ota eetta ojiphakhula wa amalapo, oovaka khuntti etile yaari okhanyarelaaye yoori mamuumini ana ya okhiriya. ¹³Attwi akina mayaahuuti khujiretta wiiya nkhama manaafikhi nkhama Pheeturu, mpakha Baranabe khujilikhelela khweetta nttumpho.

¹⁴Ila miiyo kooniyeevo yoori khaneettetta saana khwa haakhi ya hapari zooshapweya, khumuuza Pheeturu vakatthi wa atthu ooshi yoori: “Khwa vitthu zoojiwa, weeyo oniikhala nkhama mmalapo khahiyo nkhama yaahuuti, khi oniwaakhanyarela toovi apale eeyiye amalapo wiikhala nkhama mayaahuuti?”

Mayaahuuti na Amalapo oosurwiwa khwa amini

¹⁵Fweeyo na mayaahuuti khwa ephattu, khahi na amalapo “anatwampi”. ¹⁶Ila ninjuwa yoori pinaatamu khanihakikhiwa mwaasa wa oretta etile kano enrumaaye, ila khwa amini ya Yinsa Al-Masiihu, na fweeyo theenya namayaahuuti nankhupali Yinsa Al-Masiihu yoori nipatthe ohakikhiwa ti amini khwa Al-Masiihu. Khahiyo mwaasa wa mwentto wa kano, maana khina ntthu anttelaaye ohakikhiwa ti kano.

¹⁷Ila nkhama na fweeyo nineekesa ohakikhiwa ti Al-Masiihu, najijuwa yoori na anatwampi, talili enlupa yoori Al-Masiihu waziri wa twampi? Wala, hatha vattitthiiru! ¹⁸Nkhama kinjeka etile kitapanyiyeeyo, enthoonyeza yoori kinamavonya. ¹⁹Maana miiyo akiniikhala khwa kano, ila kafwa vakatthi wa kano, yoori kiiyane meekhazi khwa Nluku. ²⁰Kakhomeliwa vamote na Al-Masiihu. Ohaayi opu kiriina nasaapi eti khayi waka, ila Al-Masiihu ti aniikhalaaye khwa miiyo; na ohaayi onikiikhazaaye nasaapi eti khwa mwiili aka kiniikhala khwa amini ya Mwaana wa Nluku, othuuto akiphetiyeeyo khujinkha mweenyeweene khwa zwaamu yaka miiyo. ²¹Akinfuja rehema ya Nluku; maana nkhama shariya enta khwa kano, ofwa wa Al-Masiihu khuna fwayita!

Amini ama oshututela kano

¹Oo alolo Akaalata! Paani oolowiyeenini? Yinsa Al-Masiihu aasaruleliwe omaasho weenu khukhomeliwa vansalapa! ²Kintakha ojuwa etthu moote khwa mweeyo: Rooho Ttakatthiifu mwapokherela mwaasa wa oshututela kano ama mwaasa wa okhupalela mattakhuzi a hapari zooshapweya mwisiiliyeeyo khwa amini? ³Mweeyo mwa alolo venkivene! Mwaaza khwa Rooho Ttakatthiifu, aphano mwintakha wiishelana kuvu zenu mweenyewe? ⁴Ohoowa opule mwihoowiyeeyo khwa vitthu zawaatta pi wa mahala? Wala khinretteya! ⁵Otule aniwinkhaanini Rooho Ttakatthiifu na oretta minjuza khwa mweeyo onretta vitthu zaya epi khwa olottela kano ama mwaasa wa okhupalela mattakhuzi a hapari zooshapweya mwisiiliyeeyo khwa amini?

⁶Zarettikhana etthiipo khwa Eburahiima: “Ye ankhupaliye Nluku, tiito naye Nluku khunkhupalela wiiya nashariya.”3:6 Woone kithaapu ya Mwanzo 15:6.⁷Nakataalikha mwijuwe yoori ooshi apale ariina amini aana a Eburahiima. ⁸Zawaatikhiwa zooniye raku yoori Nluku aari oteela owaahakikhi amalapo khwa amini, ohinafiye wakathi aya, aamuuziye hapari Eburahiima, araka: “Khapila zooshi zinteela oparikhiyiwa mwaasa wa weeyo.” ⁹Khwa nanna ethiito ooshi apale ariina amini amparikhiyiwa vamote na Eburahiima, ntthu wa amini.

¹⁰Maana ooshi apale antakhaaye ohakikhiwa khwa khaazi za kano apo ari nkatthi Woolanikha; maana yaatikhiwa yoori: “Alaanikha wooshi otule ahinlottiselaaye vitthu zooshi epile zaatikhiweeyo nkithaapu ya kano khusala alottela.” ¹¹Enthoonyeza yoori khina ntthu mmote anttelaaye ohakikhiwa mwaasa wa kano mmakhono wa Nluku, maana nttakhuzi la Nluku lalupa yoori: “Nashariya oniikhala khwa amini.” ¹²Kano khinretta vitthu khwa yaazo ya amini, olikha toowo, “Otule anttelaaye orumeyela vitthu epi oniiya haayi.” ¹³Yaatikhiwa yoori: “Woolanikha ti otule wooshi athomeyiweeyo vansalapa.” Tiito Al-Masiihu khujiretta wiiya namalaanikha khwa zwaamu yeetthu fweeyo, na arettiyeevo toowo Ye anilaza nkatthi wa laana za kano. ¹⁴Epo zaretteya yoori parakha etile Nluku amwaahitiyeyo Eburahiima ewaafiyele amalapo khwa Yinsa Al-Masiihu, yoori khwa amini nipokhere Rooho Nluku ahitiyeeyo.

Kano na ahiti

¹⁵Attwiizaku, kinttela orumeyela nthoonyezo mmote wa ohaayi wa wakhula siikhu. Amana atthu asiilana khwinkhelelana ahiiyevo hatha mmote antakhaaye okattha wala weekezelavo etthu. ¹⁶Nkhama etthiipo amwahitiyeeyo Eburahiima na ojama awe. Nttakhuzi la Nluku khalilupeeni yoori “na ajamaaze” nkhama liniwaalupaaye atthu awaatta channu, ila “na ajamaaze”. Eto enthoonyeza yoori laari onlupa ntthu mmote, Al-Masiihu. ¹⁷Etthu kinlupaaye tiiti: Nluku omwanzo aretta osiilana. Kano, zitisiweeyo khwa nyaakha miiya nne na talaathiini, nyumani, khazinwahi ofuja osiilana na khulikha ehina fwayita ahiti ya Nluku. ¹⁸Maana nkhama eritho empuwa nkatthi wa kano, toowo khinlankha nkatthi wa ahiti; ila etile Nluku amwinkhiyeeyo Eburahiima, aamwinkhiye maana eettiye omwaahiti.

¹⁹Aphano kano yaateeliyeni? Yaateeliye yoori ethoonyeze ovonya, awejiwaka ota otule ahitiweeyo wa ojama wa Eburahiima. Nnyizinku enkha kano zawe vakatthi wa malayikha yoori amuuze Munsa. Othuuto aari namafiisa wa Nnyizinku khwa atthu. ²⁰Ila khinihithajiya wiiyavo namafiisa amana alupiwaka ntthu mmote; ila Nluku mmote paasi.

Etthu yaateliyeeyo kano

²¹Niri talili eto enlupa yoori kano enuumanana ahiti ya Nluku? Hatha vattitthiiru! Maana eriwaka yeettiye wiiyavo kano eriina owahi wa winkha ohaayi, aphano ohakikhiwa wa ntthu waari weettela olankha nkatthi wa kano ethiito. ²²Ila Zawaatikhiwa Ttakatthiifu zinlupa yoori olumwenku wooshi pi wooshinttiwa ti twampi, eto ti yoori atthu apale ankhupalelaaye apwekherela tthuvo Nluku ahitiyeeyo khwa apale ariina amini khwa Yinsa Al-Masiihu.

²³Ohinate wakathi wa amini naari nkatthi wa kano na yaari oniretta wiiya woofukeya, mpakha ofiyelela othoonyeziwa amini yaari weettelaaye ota. ²⁴Khwa etthiipo kano ti yaari oneettettisaaye mpakha Al-Masiihu ota, yoori nihakikhiwe ti Nluku khwa amini. ²⁵Aphano etiyeevo amini, khaniri nkatthi waweettettisiwa ti kano.

²⁶Nakataalikha nasaapi eti mooshi mweeyo mwa aana a Nluku khwa amini ya Yinsa Al-Masiihu. ²⁷Maana mooshi mweeyo moosiweeyo khwa Al-Masiihu, mwanwala Al-Masiihu. ²⁸Khina yaahuuti wala kereeku, ama mwiitthwaana wala woohiiyi mwiitthwaana, wala muukha ama nlume, mooshi mwa amoteru khwa Yinsa Al-Masiihu. ²⁹Na nkhama mwa a Al-Masiihu, mwa ojama wa Eburahiima na mwa anamarithi nkhama etthiipo yaahitiweezo.

Khahi na aviitthwaana ila na aana khwa Al-Masiihu

¹Kiniwuuzani theenya yoori, namarithi, amana eeya nsimaana khanfwarikhana na mwiitthwaana, oniiyaru pure mweenyewe zooshi ²Ila oniiya nkatthi wa anamalokozela na anamwiinanela mpakha ofiya wakathi opule otthomiweeyo ti papaawe. ³Etthiipo theenya fweeyo, niri asimaana, naari viitthwaana za owahi waari olokozelaaye olumwenku. ⁴Ila noofiya wakathi khaamili, Nluku amperekha Mwanawe, woovokoliwa ti muukha, na eekhaliyeeyo nkatthi wa kano, ⁵yoori apatthe owaakaphula ooshi apale aari weettettelaaye kano, yoori niretteye wiiya aana a Nluku. ⁶Na mwaasa wa mweeyo wiiya aana a Nluku, ye aperekha varoho venu Rooho ya Mwanawe, enkhuwaaye eraka: “Aba, enraaye Paapa!” ⁷Toowo weeyo khahi omwiitthwaana theenya, ila o mwaana, na apho wiiyiyeeyo mwaana, Nluku ooretta onamarithi.

Phoole na anamasomisa oovonya

⁸Ila wakathi mwaari mwihinanjuwe Nluku, mwaari aviitthwaana a miluku epile khwa ephattu zihiiyeeni miluku. ⁹Ila Nluku onuujuwani mweeyo ama mweeyo mwinjuwiwa ti Nluku, mwinri toovi theenya mwirutelaka owahi waari olokozelaaye olumwenku, woottettheya na wohiina owahi? Wekhweele mwintakha orutela theenya wiiya aviitthwaana a otthuupo? ¹⁰Mweeyo mwininkha fwayita khuluyeene nkatthi wa tiini siikhu kiina zaya, nyeezi, wakathi na nyaakha. ¹¹Maana kinoova khwa mweeyo yoori khaazi kikholiyeeyo khina fwayita.

¹²Kinuuvekelani attwiizaku yoori mwiiye nkhama miiyo, maana miiyo khiri nkhama mweeyo. Khina etthu moote mwikikosaniyeeyo. ¹³Muupuwele yoori swaafu etile ya mwanzo kaari wuutafusirelaanini hapari zooshapweya kaarettiye keettaka olwaaziwa, ¹⁴olwele aka weeyiyeru pure owuteya weenu, ila mweeyo khamwaakikholiye wa okitarawu ila mwaakipokhereliye nkhama nlayikha la Nluku na nkhama mweenyeweene Al-Masiihu. ¹⁵Mweeyo mwaari woofurahi: niini erettikhaniyeeyo? Miiyo kinlupa yoori, eriwaka yaari owaheya, mweeyo mwaari oteela okhulamo maasho enu mwikinkhe miiyo. ¹⁶Karetteya owaatuwi enu mwaasa wa olupa haakhi?

¹⁷Anamanozela oovonya anjifaza yoori ootuveliseni mweeyo, ila shawuri zaya khahiyo zooshapweya, yo antakha owaattuwanisani miiyo yoori mweeyo mwiwaathoonyeze niiya ethiito yo ariina. ¹⁸Ti yooshapweya ojilipisana oretta saana mileele, khahiyo paasi amana miiyo kiiya attaapho. ¹⁹Aanaaka, kinoona olwaaza ovokola opheya mwaasa wa mweeyo, mpakha Al-Masiihu okhomaala khwa mweeyo. ²⁰Kaari otakha miiyo nassapi eti wiiya vamote na mweeyo yoori kite kittakhulane mweeyo khwa huula kiina! Ki wooshanka venkivene na mweeyo!

Hajira na Suhura

²¹Mwikuuze mweeyo mwintakhaaye wiiya nkatthi wa kano: Mweeyo khamwinsiila eti enlupaaye kano? ²²Maana yaatikhiwa yoori Eburahiima aarina aana awiri, mmote wa njaazi nkina wa muukha awe wootaphuliwa4:22 Wootaphuliwa ena maana yoori woohiiyi njaazi. . ²³Mwaana wa njaazi aavokoliwe khwa shawuri zeenaatamu yoori alikanise ahiti ya Nluku, ila otu woohiiyi njaazi aavokoliwe khwa ahiti ya Nluku.

²⁴Eto enrumeyeliwa nkhama nthoonyezo: aakha apa awiri anthonyeza osiilana miwiri. Osiilana mmote pi wa vamwaako Sinaayi na aana aniwaavokolaaye aniiya aviitthwaana; oto aya ti Hajira. ²⁵Hajira onthoonyeza mwaako Sinaayi, wa Arapiiya, na yiiyiye sitati ya nasaapi ya Yeruzaleemu, ethiito erettiweeyo omwitthwaana na aanaaya. ²⁶Ila Yeruzaleemu eti ya otulu ti yootaphuliwa, ethiito yiiyiyeeyo maama wa fooshi fweeyo. ²⁷Maana yaatikhiwa yoori:

“Ofurahi, oo weeyo ohinvokolaaye ohineeyaneke mwaana;

okhuwe na furaha, weeyo ohinakholeke khaazi ya ovokola!

Maana muukha wootarawiwa onteela wiiyana aana awaatta

zayita otule aniikhalanaaye mannawe.”

²⁸Aphano mweeyo attwiizaku, mwa aana a ahiti nkhama Esiyaakha. ²⁹Wakathi aya otthuupo mwaana otule atiiyeeyo voolumwenku nkhama anvokoliwaazo aana apa akina, khusala anlupattha otule avokoliweeyo khwa Rooho ya Nluku; na etthu ya eto entta orettikhana mpakha nassapi eti. ³⁰Ila Nttakhuzi la Nluku linlupani? “Omwiikare njaazi na mwanawe, maana mwaana wa njaazi khanrithi vamote na mwaana wa otule wootaphuliwa.” ³¹Nakataalikha, attwiizaku, fweeyo khayi na aana a njaazi, na aana a otule wootaphuliwa.

Otaphuliwa khwa Yinsa

¹Al-Masiihu anitaphula yoori niiye wootaphuwa. Nakataalikha mwiiye ookhomaala, mwihijirutisele opheya nkatthi wa mapwattha oovitthwaana.

²Mwikisiileze saana! Miiyo Paawulu etthu kinttelaaye owuuzani: amana mwijilikhelela mwikhiriyisiwa, Al-Masiihu khanteela wuupatthelani fwayita. ³Kintukhuru opheya yoori, alume ooshi wakhula otule anttelaaye ojilikhelela khukhiriyisiwa ona shuruthi ya oshututela kano zooshi. ⁴Mweeyo mwineekesaaye ohakikhiwa ti kano mwajaattuwanisa Al-Masiihu; mwakwamo nrehema. ⁵Maana fweeyo khwa Rooho ya Nluku ninwejela khwa nroromelo, shariya enlankhaaye nkatthi wa amini. ⁶Maana khwa Yinsa Al-Masiihu, wala okhiriya, wala ohikhiriyi khuna hatha fwayita moote, ila amini paasi enkholaaye khaazi vakatthi wa pheta.

⁷Mweeyo mwaari weettetta saana. Khi paani olikhisiyeenini orutela oshututela haakhi? ⁸Masomi apo khanlankha mmakhono wa Nluku otule anuukhuwelanini. ⁹Fwaramento vattitthiiru enjakhula ofwu wooshi. ¹⁰Miiyo kinuuroromelani mweeyo khwa Mbwana yoori khamwinlawa olottela shawuri kiina. Ila otule anuutapwatelaanini, hatha nkhama paani, onttela opattha hukhumu. ¹¹Attwiizaku, nkhama miiyo nalelo kintafusiri okhiriya, khi kinlupattheliwani? Eriwaka miiyo kaari otafusiri epo, aphano otafusiri waka monkoni wa nsalapa wa Al-Masiihu khina mmote aari weettelaaye wiiyana tafwawuthi. ¹²Miiyo kaari otakha yoori ooshi apale anuutapwatelaanini khwa okhiriya afwataali ajuule-mmwikontta! ¹³Maana mweeyo attwiizaku, mwakhuweliwa yoori mwitaphuliwe. Otaphuliwa waya opo mwihirumeyele khwa winkha kiphenyo tuvela za onaatamu, ila mwirumeyelane mmote na nzeenu khwa pheta. ¹⁴Maana kano zooshi zakhusanyeya khwa oruma mmote: “Omphete namwaattamanani awo nkhama etthiipo onjiphetaazo omweenyewe.” ¹⁵Ila nkhama mwintta olumana na orafunana, mwiiyane phoole mwihitapanyane mmote na nzeenu!

Khaazi za onaatamu na mishumo za Rooho Ttakatthiifu

¹⁶Ila kinlupa yoori mwiikhale nkatthi wa Rooho ya Nluku, toowo khamwinlawa otuvelisa tuvela zoonaatamu. ¹⁷Maana epile entakhaaye onaatamu enuumanana etile entakhaaye Rooho Ttakatthiifu. Na etile entakhaaye Rooho Ttakatthiifu enuumanana etile entakhaaye onaatamu. Epo zintta wuumana moote na nzaaya, tiito mwihirette etile mwintakhaaye. ¹⁸Ila, nkhama mwineettettisiwa ti Rooho ya Nluku, khamwiri nkatthi wa kano.

¹⁹Maana khaazi za onaatamu zajithoonyeza, pi epi: khaapa twayifu, ojafu, ohuuzeyi, ²⁰sanamu, oshawi, ohisiilani, onyakulisana, wiivu, katapu, ojikhutupula, omwazeyana, ovalulana, ²¹nrima; ohapaliwa, osokho, na vitthu kiina zoolattanana etthiipo. Kiniwiinanelani nkhama kirettiyeezo swaafu kiina yoori apale anrettaaye vitthu epo khanteela opokherela ofwalume wa Nluku. ²²Ila nshumo wa Rooho Ttakatthiifu pi opu: pheta, furaha, heeri, ovilela, okemaani, oshapweya rooho, waamineya, ²³ojipushuwisa na ojishintta omweenyewe. Khwa vitthu epo khayiivo hatha kano. ²⁴Atthu apale ankhupaliye Yinsa Al-Masiihu akhomela onaatamu na tuvela zaya na zootakha zaya. ²⁵Nkhama niniikhala khwa Rooho ya Nluku, aphano nina yaweettetta naye khwa Rooho ethiito. ²⁶Nihiiye atthu oojikhupali, niwaalikaka azeetthu na wiiyana nrima mmote na nzeetthu.

Mwaawunane mmote na nzeenu

¹Attwiizaku, amana ntthu asikaniwa ntwampi, mweeyo mwiriina Rooho ya Nluku, mwina yonlikhisa wa emaanivo. Ila ojiinanele yoori na weeyo theenya ohizayiniwe. ²Mwaawunane mmote na nzeenu khwa etthiipo phi mwinshututelaavo kano za Al-Masiihu ³Nkhama ntthu onjoona wiiya wa fwayita, ila ahiiyeeni hatha etthu, ontta ojittettekha mweenyewe. ⁴Wakhula ntthu oone mwentto awe, aphano awahi ojikhupali mweenyewe, woohijilattanisani hatha ntthu, ⁵maana wakhula ntthu ona ya othuula lipwattha lawe.

Ethiito ntthu anzalaaye onuurula ethiito

⁶Otule annozeliwaaye nttakhuzi la Nluku ona ya ommeela vitthu zooshi zooshapweya otule aninnozelaaye. ⁷Mwihijittettekhe: Nluku khanveyisiwa. Etile pinaatamu anzalaaye, ethiito theenya ti anttelaaye wuurula. ⁸Maana otule anzalaaye za onaatamu, khwa za onaatamu onuurula otapanyeya; ila otule anzalaaye khwa Rooho ya Nluku, khwa Rooho onuurula ohaayi wa mileele. ⁹Na nihishokherele oretta zooshapweya: amana ofiya wakathi aya ninteela wuurula, amana nihishokhereli. ¹⁰Nakataalikha wakathi ninwahaaye, niwaarettele zooshapweya atthu ooshi, haaswa haaswa apale a ojama nkatthi wa amini.

Paawulu onjitthumpana nsalapa wa Yinsa

¹¹Moone yoori miiyo kawaatikhelani na haathwi khuluyeene khwa nkhono aka!

¹²Apale antakhaaye othoonyeza vitthu zooshapweya za mmwiili, anuukhanyarelani yoori mwikhiriye, yoori yo ahiiye oolupatthiwa mwaasa wa nsalapa wa Al-Masiihu. ¹³Ila wala na apo aya akhiriyiyeeyo khanshututela kano; yo antakha yoori mweeyo mwikhiriye, asala ajittottopa mwaasa wa ottha alama vamwiili venu. ¹⁴Ila miiyo kinteela ojitayitela nsalapa wa Mbwana eetthu Yinsa Al-Masiihu paasi, maana, khwa nsalapa, olumwenku wakifwela miiyo na miiyo kafwela olumwenku. ¹⁵Maana okhiriya, wala ohikhiriyi, khina fwayita. Eriina fwayita wiiya yumpe pheeya. ¹⁶Heeri na tthakaraka ti yiiye na apale aneettettelaaye mwentto otthuupo, theenya khwa Ezirayiilu ya Nluku.

¹⁷Woohiivo etthu kiina, ahiiyevo antakhaaye okiwuti, maana kintana mmwiili mwaka alama za Yinsa.

¹⁸Attwiizaku, rehema ya Mbwana eetthu Yinsa Al-Masiihu ti yiiye nroho mweenu. Amiina.