Olaawo

Olaawo

Ohukhumwiwa wa meezirayiilu nti wa Misuri

¹Apa mazina a aana a Ezirayiilu eettiyeeyo Misuri na Yaakhumpa, wakhula ntthu na ajamaaze: ²Ruubeni, Simiyooni, Leevi, Yuuda; ³Ezakaari, Zebulooni, na Bejami; ⁴Daani, Nafitaali, Gaati, na Asheeri. ⁵Ojama wa Yaakhumpa wooshi aalawaniyeeyo waari sapiyiini; ila Yuusufu aari Misuri ottuukho rakuzeene.

⁶Ziviriyeevo siikhu zawaatta, Yuusufu khufwa na attwiize apale na khapila yaya etile. ⁷Ila meezirayiilu apale aasaliyeeyo khuvokolelana khweekezeleya khwaattelana khwiiya okhomaala mpakha khufiyelela omwazeyela mmuti mphule wooshimo. ⁸Aphano Misuri khuthawala mfwalume mpheya, ahaari ojuwaaye hatha etthu monkoni wa Yuusufu. ⁹Aphano ye khuwooza atthu awe yoori: “Mwiwoone meezirayiilu pi awaattelana na ookhomaala zayita fweeyo. ¹⁰Nlaweni niwaalazele olavilavi yoori ahitepe waattelana, ehiri amana enipuwela viittha yo akusanyeya na maatuwi eetthu anirinkaanyela atthiramo mmuti mphu.”

¹¹Aphano amisuri khuwaaretta yo wiiya anamalokozela a khaazi za nkuumu yoori apatthe owaahukhumu na khaazi zoolipa. Khwa etthiipo meezirayiilu khunjekela Firawuuna sitati piiri za sakafu zaari wiitthiwaaye Pito na Rameesi. ¹²Nakataalikha zaama aari ohukhumwiwaavo, pi aari otepaavo waattelana, tiito amisuri khuwaapattha woova mwaasa wa meezirayiilu. ¹³Aphano amisuri khwaaza owaakholisa khaazi zoolipa. ¹⁴Ohaayi aya khwiiya woowaawa, mwaasa wa okholisiwa khaazi zoolipa nkhama omeya ottophe na waattala khizolo, na okhola khaazi zooshi za mmashapa. Zooshi aari okholisiwa khwa oviitthwaana wootakhalavo.

¹⁵Mfwalume wa Misuri khuttakhulana anamavokoza a meepereewu aari wiitthiwaaye Siifwara na Puuwa yoori: ¹⁶“Amana mwiwaawunaka meezirayiilu atakhaka ovokola, mwisala mwiwoona aanaaya. Eeyaru aalume, mwisala mwiwoola, ila eeyaru aakha, mwisala mwiwaalikha wiiya haayi.” ¹⁷Khwa nanna zooshi, anamavokoza apale khumoova Nluku khuhiretti etile ooziweeyo ti mfwalume wa Misuri, khusala awaalikha aana alume wiiya haayi. ¹⁸Aphano mfwalume wa Misuri khuwaakhuwela khuwoozela yoori: “Mwari toovi, owaalikha aana aalume wiiya haayi?”

¹⁹Anamavokoza apale khujipu yoori: “Aakha a meezirayiilu afwarikhana na apa a Misuri. Yo pi oojikhitiri, ampattha ekumi ahinafiyevo hatha namavokoza.”

²⁰Nluku khwiiya wemaani khwa anamavokoza apale, na meezirayiilu khusala avira eekezeleyaka wookhomaalavo. ²¹Mwaasa wa anamavokoza apale omoova Nluku, ye khuwenkha owahi wa wiiyana yo ojama aya.

²²Tiito Firawuuna khuwaaruma atthu awe ooshi yoori: “Wakhula mwaana wa meepereewu anvokoliwaaye eeyaru wanlume amweeselele mmuttho oniitthiwaaye Niilu, ila eeyaru wankha asala anlikha.”

Ovokoliwa wa Munsa

¹Mwinyi mmote wa lihimo la Leevi anraliye muukha wa lihimo limote na ye. ²Khumwiimitthisa khunvokolela mwaana. Amooniyeevo yoori aari wooshapweya khunvitha khwa nyeezi mittatthu. ³Nawoona yoori khayaari owaheya ovira anvithaka theenya, khuthuula khelenke ya tteketthe khumattha na piriniisi khuntthaamo mwaana otule, khulawa khunttha ntteketthe nkhome wa muuttho Niilu. ⁴Nlupuwe mwaana otule eemeliye toole sirini yoori oone niini yaari weettelaaye onrettikhanela.

⁵Mwaana wankha wa Firawuuna khwiishukhela mmuttho olawa woowa, ajaazi awe aarina khusala avira nkhome wa muuttho, ye khoona khelenke etile eri ntteketthe khunruma njaazi awe khweettela. ⁶Afunuliyeevo, khunsikanamo mwaana eettaka olila. Khumoonela huruma khuri: “Mwaana otu tuwa meepereewu.”

⁷Aphano, nlupuwe mwaana otule khumwaattama mwaana wa Firawuuna khumuuzela yoori: “Onuupuwela toovi? Ontakha miiyo kilawe kankhuwele nunu mmote mwiipereewu ate asala amwaamwisa?”

⁸Mwaana wa Firawuuna khunjipu yoori: “Haya etta.” Aphano mwanankha khulawa onkhuwela maama wa mwaana othuutule. ⁹Aphano, mwaana wa Firawuuna khumuuza yoori: “Onthuule mwaana otu omwaamwise zwaamu yaka, kintta wuuripha phakari yawo.” Nunu otule khunthuula mwaana khusala amwaamwisa. ¹⁰Paata ya mwaana otule owula khuntiisela mwaana wa Firawuuna khunretta wiiya mwanawe. Khuntthaja nzina la Munsa, araka: “Maana koolaza mmaati.”

Munsa onimuula mmisuri na khutthirela Midiyaani

¹¹Siikhu moote, wakathi Munsa apatthiyeevo omwinyi, khulankha khulawa wa attwiize meepereewu khoona khaazi yoolipa aari okholisiwaaye. Theenya khumoona mmisuri aari ompiyaaye na onvulalisa mwiipereewu. ¹²Khweekesa okhuno na okhuno nawoona yoori khaari otawo hatha ntthu, khumuula mmisuri otule khunsirela vanshaka.

¹³Siikhu ya phiiri khuwaasikana meepereewu awiri oomanaka khumuuzela otule aari ompiyaaye nzaawe yoori: “Onimpiyelani nzaawo?” ¹⁴Ye khumuuzela yoori: “Awinkhiyeeyo wiiya mfwalume wala namaphuka weetthu ti paani? Ontakha okuule nkhama omuuliyeezo mmisuri otule?” Munsa khoova khuri: “Ee, yajuwiwa etthu kirettiyeeyo!”

¹⁵Firawuuna nawuuziwa vitthu epile, khujilakelela omuula Munsa, ye khutthira khulawa mpakha nti wa Midiyaani, khwiikhala nshini wa nlipu. ¹⁶Namalokozela wa tiini wa Midiyaani aarina aanaawe sapa aakha, yo khuteela ottekha maati yoori atthe n’yoopo mwaya enkhe nyama za papaaya. ¹⁷Aphano khuta mishuki mikina khusala aweekara, ila attaaphale Munsa khulankha khusala awaakisa na khwinkha maati nyama zaya.

¹⁸Wakathi aruteliyeevo wa papaaya Reweele,2:18 Reweele nzina likina la Yeeturu. ye khuwoozela yoori: “Leelo mwaruti supuyeene mwaasa wa niini?”

¹⁹Yo khujipu yoori: “Mmisuri mmote ti anaakisiye mmakhono wa mishuki mikina na othuuto khunittekhela maati khunywisa nyama zeetthu.”

²⁰Khuuzeliwa ti papaaya yoori: “Apha yaya ori vayi? Mwanlikhelani? Mwankhuwele ate aje na fweeyo.”

²¹Munsa khukhupalela wiikhala owawe Yeeturu, othuuto amwinkhiyeeyo onrala mwanawe aari wiitthiwaaye Zipoora. ²²Zipoora khunvokola mwaana, Munsa khuntthaja nzina la Yeerisoni2:22 Nzina ntthi laYeerisoni khwa luuka ya meepereewu lina maana a omaka. enlupaaye yoori: “Kasaafirela nti wa malaponi.”

²³Ziviriyeevo siikhu zawaatta khufwa mfwalume wa Misuri. Atthu a Ezirayiilu khusala asisimira na okhuwa monkoni wa oviitthwaana, nkhuwo aya opule khunfiyela Nluku. ²⁴Nluku noosiila osisimira waya opule khufikhiri wahati aarettaniyeeyo Eburahiima, Esiyaakha na Yaakhumpa. ²⁵Nluku khuwoona meezirayiilu khumweeleya tafwawuthi aariinaazo.

Munsa na muutthi wookholela

¹Munsa aari oshukisa nyama za nkhwewe Yeeturu, namalokozela wa tiini wa Midiyaani. Siikhu moote khuthuula nyama khusala eettana phantte kiina ya n’yaara khufiya mpakha va mwaako wa Nluku, waari wiitthiwaaye Hereebe. ²Attaapho khumpuwelela nlayikha la Nnyizinku va nlimi la moottho waari olankhaaye vakatthi wa muutthi. Munsa khweekesa khoona yoori moottho weetta okholela ila muutthi opule khawaari olukula. ³Aphano ye khuri: “Vitthu zootikinisa, kintta attaaphale koonachache, moottho ontta okholela ila muutthi opule khunlukula mwaasa aya niini?”

⁴Nnyizinku khumoona yoori ye eetta waattama muutthi opule, olawa woona, Nluku khunkhuwela enakatthi-nakatthi ya muutthi otthuupule araka: “Munsa! Munsa!” Ye khujipu araka: “Lapeekha!”

⁵Aphano Nnyizinku khumuuza yoori: “Ohaattamevo apha! Ovule jampali zawo maana puuro yaya eti oriivo ttakatthiifu.” ⁶Khurutela olupa yoori: “Miiyo ki Nluku wa paapa awo, Nluku wa Eburahiima, Nluku wa Esiyaakha na Nluku wa Yaakhumpa.” Munsa khufinikha wuuso awe maana aari woova omweekesa.

⁷Nnyizinku khulupa yoori: “Khweele kinoona nanna anhukhumwiwaazo atthu aka Misuri na kasiila nkhuwo aya mwaasa wa khaazi ankholisiwaazo pi anamalokozela a Firawuuna na kinjuwa yoori antta ohoowa. ⁸Tiito kiishukhiyeeyo oteela owuusuru mmakhono wa amisuri na kiwaalazakamo mphu kiwaalawanaka nti wooshapweya na nwulweene, ohali liniittikhaawo leethi na asali; ottuukho aniikhalaawo akanaani, ahiiti, amoori, aperizi, amwiivi na ayepuzi. ⁹Maana nkhuwo wa atthu a Ezirayiilu wakifiyela miiyo, na kinoona nanna amisuri aniwaahukhumwaazo. ¹⁰Nakataalikha, olawe; miiyo kinuuruma wa Firawuuna, yoori wawaalazewo atthu aka Misuri, aana a meezirayiilu.” ¹¹Aphano Munsa khulupa amuuzaka Nluku yoori: “Ki paani miiyo woolawa wa Firawuuna olawa owaalazawo meezirayiilu?”

¹²Nluku khunjipu yoori: “Miiyo kiniiya vamote na weeyo. Eto ti alama yoori keetta wuuruma: amana owaalazawo atthu Misuri mwite vamwaako attaapha mwikaaputu.”

¹³Munsa khumuuzela Nluku yoori: “Miiyo amana kilawa vakatthi wa meezirayiilu kiwooza kiraka: ‘Nluku wa apapazenu akiruma vakatthi venu,’ khi amana akuuzela yoori: ‘Nzina lawe paani?’ Kiwooze niini?”

¹⁴Nluku khumuuza Munsa araka: “miiyo ti miiyo. Owooze etthiipo meezirayiilu, yoori: ‘miiyo ti miiyo ti akirumiyeeyo vakatthi venu.’ ”

¹⁵Nluku khulupa theenya amuuzaka Munsa yoori: “Wawooze meezirayiilu yoori: ‘Nnyizinku, Nluku wa amarehemu apapazenu, Nluku wa Eburahiima, Nluku wa Esiyaakha na Nluku wa Yaakhumpa, akiruma vakatthi venu.’ Nttho ti nzina linsalaaye kuupuwelaniwaka ojama khwa ojama.

¹⁶“Olawe wawaakusanye attunkhulu a meezirayiilu, owooze yoori Nnyizinku, Nluku wa amarehemu apapazenu, Eburahiima, Esiyaakha na Yaakhumpa, aakipuweleliye khukuuza yoori: ‘Khweele, Miiyo kinoona tafwawuthi zenu na kinjuwa etthu anuurettelaanini a Misuri. ¹⁷Miiyo kaahiti wuulazanimo nhukhumu za amisuri kiweettaneni nti wa akanaani, wa ahiiti, wa amoori wa aperizi wa amwiivi na wa ayepuzi nti oniittikhaaye leethi na asali.’

¹⁸“Attunkhulu a meezirayiilu anteela wuusiileza. Olankhe na attunkhulu a atthu aya atthaapo mwilawe wa Firawuuna wamuuze yoori: ‘Nnyizinku, Nluku wa meepereewu eettiye oniteela. Apho onilikhe nilawe neettette mwentto wa siikhu ttatthu neette n’yaara namwinkhe twaha Nnyizinku, Nluku eetthu.’ ¹⁹Miiyo kinjuwa yoori mfwalume wa Misuri khanteela wuulikhani olaawo woohiiyi khwa okhanyareliwa pi nkhono wa owahi. ²⁰Nakataalikha kinteela wookola nkhono aka kiwaavulaze amisuri khwa vitthu zootikinisa zooshi kinttelaazo oretta vakatthi vawo, paata ya toowo ontta wuulikhani olawa.

²¹“Na kinteela owenkha amisuri wiiyana niiya na atthu apa na amana mwilaakawo, khamwinlaawo makhono ru. ²²Aakha ooshi ana ya owaavekela anamwaattamanana aya na apale aawaamakeliyeeyo vitthu za feeta na za weero, na kuwo za owaawalisa aaneenu, aalume na aakha. Khwa etthiipo mwintta ovulula maali zooshi za amisuri.”

Alama za minjuza enkhiweeyo oretta Munsa ti Nluku

¹Munsa khunjipu Nnyizinku araka: “Wala yo khanteela okhupalela, na khanteela okisiileza, na anlupa yoori: ‘Nnyizinku khoopuweleleeni!’ ”

²Nnyizinku khumuuzela Munsa araka: “Eto oriina mmakhono niini?” Ye khuri: “Pakhora.”

³Aphano khumuuza yoori: “Weeselele vathi!” Ye khweesa khuthatuwa khwiiya nyookha. Munsa khutthira. ⁴Nnyizinku khumuuza Munsa theenya yoori: “Wookole nkhono awo okhole nkhira aya.” Munsa khookola nkhono awe, khukhola nyookha na khuthatuwa khwiiya pakhora. ⁵“Eto eniwaakhupalisa yoori oopuweleliye Nnyizinku, Nluku wa amarehemu apapazaya, Nluku wa Eburahiima, Nluku wa Esiyaakha, Nluku wa Yaakhumpa.”

⁶Nnyizinku khumuuza theenya yoori: “Otthe nkhono awo vamweyo!” Khutthaavo, alazakavo khwiiyana maaharaja khulakala nkhama maphovu.

⁷Nnyizinku khumuuza theenya yoori: “Othuule nkhono awo opheya otthe vamweyo.” Munsa khurutela ottha nkhono awe vamweyo, noolazavo khurutela wiiya sawa-sawa na mwiili awe wooshi.

⁸Nnyizinku nalelo khuvira amuuzaka araka: “Amana yo ahikhupaleli ama ahitakhi, alama yamwanzo, ya phiiri anteela okhupalela. ⁹Ila amana nalelo eeya ahinakhupalele alama epo piiri wala khuhuusiilezi, ottekhe maati vattitthiiru a mmuttho Niilu, wiitthele tuulu, antta othatuwa maati aya apo a tuulu eeye taamu.”

¹⁰Aphano Munsa khumuuza Nnyizinku yoori: “Oo, Mbwana, thanku raku miiyo akinwahi ottakhula saana; mpakha nasaapi eti waaziyeevo ottakhulana miiyo, amana kittakhulaka kintta okukuma.”

¹¹Nnyizinku khunjipu yoori: “Paani amwinkhiyeeyo milomo pinaatamu? Paani amwinkhiyeeyo ottakhula wala paani awuumpiyeeyo apale oohisiili? Wala apale awoona ama apale oohooni? Khahiyo miiyo Nnyizinku? ¹²Apho olawe, Miiyo kinttela wiiya vamote na weeyo, kuunozelaka etthu onttelaaye ottakhula.”

¹³Ye khujipu araka: “Oo Mbwanaaka, kinuuvekela yoori onrume ntthu nkina.”

¹⁴Aphano Nnyizinku khumpattha katapu khwa Munsa, khumuuza yoori: “Weeyo khuna ttwiiyo Haruni, nleevi? Miiyo kinjuwa yoori ye onwahi ottakhula saaneene. Nasaapi eti ye ontta ota oteela okutthanana weeyo, ye onttela wiiya woofurahi amana oosikana. ¹⁵Weeyo onttela ottakhulana omuuze mattakhuzi anttelaaye olupa; miiyo kintta owaawunini moowiiri yoori mwittakhule na kiwuuzeni etthu yooretta. ¹⁶Haruni onttela ottakhulana atthu khwa zwaamu yawo, onttela wiiya nlomo awo, weeyo onttela wiiya nkhama Nluku khwa ye. ¹⁷Othuule pakhora eti mmakhono, ti ethiiti onttelaaye orettana alama za minjuza.”

Munsa onrutela Misuri

¹⁸Aphano Munsa khurutela wa nkhwewe Yeeturu khumuuza yoori: “Safwatali, kilikheni kilawe Misuri kawoone ajamaazaku nkhama nalelo ari haayi.”

Yeeturu khujipu araka: “Olawe na heeri.”

¹⁹Nnyizinku aamuuziye Munsa ari Midiyaani yoori: “Orutele Misuri maana ooshi apale aari otakhaaye owuula afwa.” ²⁰Aphano Munsa khunthuula muukha awe na aanaawe khuwaattha va puuru vawe khusala arutela Misuri. Mmakhono mwawe aathuuliye pakhora ya Nluku.

²¹Nnyizinku khumuuza theenya Munsa yoori: “Miiyo kawinkha owahi wooretta minjuza zawaatta. Amana orutelawo Misuri wiiye woojitthenka yoori orette omaasho wa mfwalume wa nti aya opule minjuza zaya epo, ila miiyo kinlawa koomise rooho yawe ahiwaalikhe atthu apo olawa. ²²Omuuze Firawuuna oraka: ‘Nnyizinku alupa toono: Ezirayiilu mwanaka wamwanzo. ²³Miiyo kalupa yoori: “Onlikhe mwanaka alawe akaaputu.” Ila weeyo amana okatthala kintta omuula mwanawo wamwanzo.’ ”

²⁴Eettaka Misuri vahali aamakiyeevo ntarikhi, Nnyizinku khunteela Munsa yoori amuule. ²⁵Ila Zipoora khuthuula liwe loothokolowa khushija shapala ya soola ya mwanawe khupiyana moolu a Munsa. Khuri: “Weeyo omannaka miiyo khwa taamu.” ²⁶Zipoora khuri: “Omannaka khwa taamu,” athoonyezaka okhiriya opule. Wakathi otthuupule Nnyizinku khunlikha Munsa.

²⁷Aphano Nnyizinku khumuuza Haruni yoori: “Olawe n’yaara wakutthanane Munsa.” Ye khulawa khukutthanana va mwaako wa Nluku, khunchelisa. ²⁸Munsa khunthatelela Haruni zooshi epile Nnyizinku anrumiyeezo omuuza, na khumuuza alama zooshi za minjuza Nnyizinku arumiyeeyo oretta.

²⁹Aphano Munsa na Haruni khulawa khuwaakusanya attunkhulu ooshi a meezirayiilu. ³⁰Haruni khuwooza zooshi Nnyizinku aamuziyeeyo Munsa. Nawiisha naye Munsa khuretta alama za minjuza vakatthi wa atthu apale, ³¹yo khukhupali. Wakathi ajuwiyeevo yoori Nnyizinku awoopuweliye meezirayiilu na aawoniye nanna aari ohoowaazo yo khwiinama khwaaputu.

Firawuuna oneekezela hukhumu

¹Paata ya toole Munsa na Haruni khulawa ottakhulana Firawuuna amuuzaka yoori: “Nnyizinku, Nluku wa meezirayiilu, alupa toono: ‘Owaalikhe atthu aka alawe akirettele njampo n’yaara.’ ”

²Firawuuna khujipu araka: “Nnyizinku paani wonshututela miiyo khuwaalikha olawa meezirayiilu? Akininjuwa Nnyizinku aya na akiniwaalikha meezirayiilu olaamo mphu.”

³Munsa na Haruni khukhanyarela araka: “Nluku wa meepereewu ettiye oniteela, safwatali onilikhe nilawe narette safwari ya siikhu ttatthu neettaka n’yaara, namwinkhe twaha Nnyizinku, Nluku eetthu, nohiiyi etthiipo antta oniteela marati ama ontta onuula na phanka.”

⁴Aphano mfwalume wa Misuri khumuuza Munsa na Haruni yoori: “Mwaasa aya niini mweeyo mwiwantipwaka atthu na khaazi zaya? Haya! Mwilawe mwakhole khaazi.” ⁵Theenya Firawuuna khulupa yoori: “Atthu apa pi awaatta mwintta owaalikhisa okhola khaazi zaya.”

⁶Siikhu ethiitile Firawuuna khuwenkha oruma anamalokozela awe na masuphayi anakhaazi, araka: ⁷“Waaza leelo ethiiti mwihirutele owenkha malala awaattalana khizolo nkhama mwaari orettaazo; asala alawa weekesa eenyewe. ⁸Ila mwiwaakhanyarele waattala thamani ethiitile aari waattalakaaye, mwihiwaavukule hatha etthu; apa aya anamaviliwa, tiito aaziyeeyo okhuwa araka ‘ninttela omwinkha twaha Nluku eetthu.’ ⁹Mweekezele khaazi yaya yoolipa yoori ashikheye ahisiileze vitthu zoohatiwa.”

¹⁰Anamalokozela na masuphayi khulawa khuwooza atthu apale yoori: “Firawuuna alupa toono: ‘Nilikhe owinkhani malala mweeyo. ¹¹Mwilankhe mwilawe mwawooze yoori alawe akusanye malala nhali anwahaaye opatthamo, na khaazi yenu yoolipa khinteela ovukuwavo hatha etthu.’ ” ¹²Aphano atthu apale khumwazeyela nti wooshi wa Misuri khukusanya nyaani khwa zwaamu ya malala. ¹³Anamalokozela a khaazi khuwaattitta awoozaka yoori: “Mwiishise khaazi khwa nanna mooziweezo okhola wakhula siikhu wakathi opule mwaari winkhiwaavo malala.” ¹⁴Khujalitiwa masuphayi ameezirayiilu apale atthomiweeyo pi anamalokozela a anakhaazi a Firawuuna, na khusala oozeliwa yoori: “Mwaasa aya niini mwihiishisaka khaazi yenu ya waattala khizolo taana wala leelo nkhama mwaari orettaazo raku?”

¹⁵Aphano masuphayi a meezirayiilu khulawa ojiliza wa Firawuuna yoori: “Mwaasa aya niini owaatthanttaka toono akarumeya awo? ¹⁶Fweeyo akarumeya awo, khaninkhiwa malala na ninuuziwa waattala khizolo. Woone, nintta ojalitiwa; ila atthu awo pi ariina paathuli.”

¹⁷Ila Firawuuna khujipu yoori: “Anamaviliwa! Mweeyo oviliwa! Tiito mwinraaye: ‘Nintakha olawa omwinkha twaha Nnyizinku.’ ¹⁸Nasaapi ethiiti mwirutele okhaazi. Khamwinteela opokhera malala! Ila mwina ya wuupa khizolo thamani ethiito mwaari wuupakaaye!”

¹⁹Masuphayi apale a meezirayiilu khujuwa yoori aari nhukhumu, mwaasa woosiila yoori ahivukule thamani ya khizolo ooziweeyo waattala wakhula siikhu. ²⁰Paata ya masuphayi apale noolaavo aphale aariivo Firawuuna, khunsikana Munsa na Haruni eettaka owaaweja. ²¹Yo khulupa yoori: “Nnyizinku ti awooneni na oophukeni; maana mweeyo mwaniretta fweeyo wiiya atthu awiiphira omaasho wa Firawuuna na wa a karumeya awe, khuwenkha phanka mmakhono mwaya yoori anuule.”

Nnyizinku onlaleya otaphuliwa wa atthu

²²Aphano Munsa khuzukuluwela wa Nnyizinku khumuuza yoori: “Oo Mbwana, wawaahukhumwelani atthu apa? Khi wakirumeliyeeni? ²³Maana thanku kilawiyeevo ottakhulana Firawuuna khwa nzina lawo yoori ontta owaahukhumu atthu apa, weeyo khuretteeni hatha etthu yoori owaataphule!”

Nnyizinku onaahiti owaataphula meezirayiilu

¹Nnyizinku khumuuza Munsa yoori: “Aphano attaapha ontta woona etthu kinttelaaye onrettela Firawuuna; khwa nkhono aka wa owahi ontta owaalikha olawa, khwa nkhono aka wa owahi ontta owiikara mmuti mwawe.”

²Nluku khumuuza theenya yoori: “Miiyo ki Nnyizinku. ³Kampuweleliye Eburahiima, Esiyaakha, na Yaakhumpa nkhama Nluku wa owahi zooshi, ila akiwaalikheeni okijuwana nzina la Nnyizinku. ⁴Na theenya kaarettaniye wahati aka wa owenkha nti wa Kanaani, nti aari wiikhalaaye ari aletto. ⁵Nasaapi eti kasiila ojiliza wa meezirayiilu atthaapo amisuri awaarettiyeeyo oviitthwaana na kafikhiri wahati aka karettaniyeeyo.

⁶“Nakataalikha owooze meezirayiilu yoori: ‘Miiyo ki Nnyizinku na kinteela owaalazamo nkatthi wa oviitthwaana arettiweeyo pi amisuri. Kiwaataphule khaazi zoolipa epo enkhiweezo na kiniwoosuru na nkhono wookhomaala na owahi nwulweene na hukhumu. ⁷Kinuurettani wiiya atthu aka na miiyo kiiye Nluku enu, aphano pi mwinttelaavo ojuwa yoori miiyo ki Nnyizinku, Nluku enu kuulaziyeenini vathi wa khaazi zoolipa mwenkhiweeyo pi amisuri. ⁸Na kinuuthuulani kiweettaneni nti kaalaphiyeeyo omwinkha Eburahiima, Esiyaakha na Yaakhumpa; apho miiyo kiniwinkhani yoori wiiye weenu. Miiyo ki Nnyizinku.’ ”

⁹Munsa khuwooza etthiipo meezirayiilu, ila yo khuhitakhi onsiileza, mwaasa wa othunku na hukhumu aari woonaayo nkatthi wa oviitthwaana.

¹⁰Aphano Nnyizinku khumuuza Munsa araka: ¹¹“Olawe wamuuze Firawuuna mfwalume wa Misuri yoori awaalikhe meezirayiilu aleemo mmuti mwawe.”

¹²Munsa khunjipu Nnyizinku araka: “Meezirayiilu khanikisiila, khi nannani anttelaaye okisiileza Firawuuna, khupe miiyo kihijuwaka ottakhula saana?”

¹³Ila Nnyizinku anrumiye Munsa na Haruni, yoori awooze meezirayiilu na Firawuuna, mfwalume wa Misuri, yoori etta orumiwa owaalazawo meezirayiilu Misuri.

Ojama wa Munsa na Haruni

¹⁴Apa pi attunkhulu a ojama wa meezirayiilu:

Aana a Ruubeni, mwaana nwulu wa Yaakhumpa aari apa: Enookhi, Phaalu, Hesherooni, na Khariimu. Opu pi waari ojama wa Ruubeni.

¹⁵Aana a Simiyooni aari apa: Yemuweeli, Yamiini, Ohaati, Yakhiini, Zowaari na Shawaali mwaana wa nunu mmote wa Kanaani. Opu pi waari ojama wa Simiyooni.

¹⁶Apa mazina a aana a Leevi khwa ovokoliwa waya: Yeerisoni, Kowaati, na Meraari. Leevi eekhaliye nyaakha miiya na talaathiini na sapa.

¹⁷Aana a Yeerisoni khwa ojama aya pi apa, Lipiini na Simeeyi.

¹⁸Aana a Kowaati pi apa: Anraawu, Izaari, Heporooni na Uziili. Kowaati eekhaliye nyaakha miiya na talaathiini na mittatthu.

¹⁹Aana a Meraari pi apa: Maali na Muushi. Ntthi laari lihimo la Leevi khwa nanna ya ovokoliwa waya.

²⁰Anraawu khunrala Yokipeeti nlupu wa papaawe, khunvokolela Haruni na Munsa. Anraawu eekhaliye nyaakha miiya na talaathiini na sapa.

²¹Aana a Izaari pi apa: Koora, Nefekhe na Zikiiri.

²²Aana a Uziili pi apa: Mizayeele, Elizaafwa na Sithiira.

²³Haruni anraliye Elisheepa mwaana wa Aminataapi, nlupu wa Nashooni; ye khunvokolela Nataapi, Apiiwu, Elizaari na Itamaari.

²⁴Aana a Koora pi apa: Asiiri, Elikana na Apiyasaafi. Ntthi laari lihimo la Akoora.

²⁵Elizaari, mwaana wa Haruni, khunrala mwaana mmote wa Putiyeele, khunvokola Fineeya; apa pi attunkhulu a ojama wa Leevi khwa lihimo laya.

²⁶Ti Haruni na Munsa atthaapo Nnyizinku awaarumiyeeyo yoori: “Mwilazewo Misuri lihimo la meezirayiilu.” ²⁷Pi atthaapo, Munsa na Haruni, anttakhulaniyeeyo Firawuuna mfwalume wa Misuri na niiya ya owaalazawo meezirayiilu.

Nluku oninkhuwela Munsa na Haruni

²⁸Siikhu Nnyizinku attakhulaniyeevo Munsa ari nti wa Misuri, ²⁹Nnyizinku aamuuziye yoori: “Miiyo ki Nnyizinku. Omuuze Firawuuna mfwalume wa Misuri zooshi epile kiniwuuzaaye.” ³⁰Munsa khunjipu Nnyizinku araka: “Miiyo akinttakhula saana. Firawuuna onttela okisiila toovi?”

Munsa na Haruni enakatthi ya firawuuna

¹Aphano Nnyizinku khumuuza Munsa yoori: “Miiyo kooretta wiiya nkhama Nluku khwa Firawuuna na ttwiiyo Haruni wiiya nkhama napiyu awo. ²Weeyo omuuze zooshi epile kuurumiyeeyo, na ttwiiyo Haruni amuuze Firawuuna awaalikhe meezirayiilu aleemo mmuti mwawe. ³Ila miiyo kinteela wuumisa rooho ya Firawuuna na kinteela wenkeza alama zaka na vitthu zaka zootikinisa nti wa Misuri. ⁴Ye khanteela wuusilezani, ila miiyo kinteela wookola nkhono aka khwa Misuri, na khwa khaazi khuluzeene za ophuka, kinteela owaalazawo Misuri atthu a Ezirayiilu. ⁵Na amisuri phi anttelaavo ojuwa yoori miiyo ki Nnyizinku, amana kookola nkhono aka khwa Misuri kiwaalazavo meezirayiilu vakatthi vaya.”

⁶Munsa na Haruni khuretta etthiipo Nnyizinku awaarumiyeezo. ⁷Munsa aarina nyaakha thamaaniini na Haruni nyaakha thamaaniini na mittatthu, wakathi aattakhulaniyeevo Firawuuna.

Pakhora ya Haruni enthatuwa khwiiya nyookha

⁸Nnyizinku khumuuza Munsa na Haruni yoori: ⁹“Amana Firawuuna awuuzani yoori: ‘Mwirette minjuza,’ omuuze Haruni yoori: ‘Athuule pakhora yawo eeselele enakatthi ya Firawuuna,’ pakhora ya eto entta othatuwa yiiye nyookha.”

¹⁰Aphano Munsa na Haruni khulawa mpakha wa Firawuuna, noofiya khuretta etthiipile Nnyizinku aawaarumiyeeyo. Haruni khuthuula pakhora etile khweeselela enakatthi ya Firawuuna na mashawuriiya awe pakhora etile khuthatuwa khwiiya nyookha. ¹¹Aphano naye Firawuuna khuruma olawa okhuweliwa ajuwi na ashawi; na yo khuretta etthiipo khwa oshawi aya. ¹²Wakhula mmote wa yo khusala eesa pakhora yawe na othatuwa nyookha, ila pakhora ya Haruni khumiza pakhora epile. ¹³Ila Firawuuna khuumisa rooho yawe khuhitakhi onsiileza Munsa na Haruni, nkhama etthiipo Nnyizinku aalupiyeezo.

Pala yamwanzo: Taamu

¹⁴Nnyizinku khumuuza Munsa yoori: “Rooho ya Firawuuna ti ya nthiti khanteela owaalikha atthu apo olawa. ¹⁵Olawe wakutthanane Firawuuna supuyeene; ye onlawa woowa omuttho. Weemele nshini wa muuttho osala onweja, olawaka othuule pakhora yawo mmakhono etile yaathatuwiyeeyo nyookha. ¹⁶Omuuze yoori: ‘Nnyizinku, Nluku wa meezirayiilu, akiruma owuuza yoori: Owaalikhe atthu aka alawe akaaputu n’yaara, mpakha leelo khuntakha okisiileza. ¹⁷Nnyizinku alupa toono: Ethiito ti enttelaaye wuujuwisa yoori miiyo ki Nnyizinku: khwa pakhora eti kiriina mmakhono kintakha kipiye maati a muuttho Niilu athatuwe eeye taamu. ¹⁸Swi ziriiye mmuttho zinteela ofwa zooshi, osala onukhamo woohifwayivo. Aphano amisuri khanlawa ovilela anywa maati a mmuttho mphule.’ ”

¹⁹Nnyizinku khumuuza Munsa theenya yoori: “Omuuze Haruni athuule pakhora yawo ookolele nkhono maati a Misuri, a mmuttho na mpakha a mmatthatta na a mmazuuku athatuwe eeye taamu, Misuri yooshi yiitaale taamu, mpakha zoopo za thaapwa na za mawe.”

²⁰Munsa na Haruni khuretta nkhama etthiipo Nnyizinku awaarumiyeezo. Haruni khushashula pakhora etile, khujapha maati a mmuttho Firawuuna ari attaapho na mashawuriiya awe, maati apale ooshi khuthatuwa taamu. ²¹Swi zooshi zaariimo mmuttho mphule khufwa khusala onukhamo woohifwayivo, amisuri khuhisala awahi onywa maati a mmuttho mwaya mphule, nti wooshi waarina taamu.

²²Na yo anamajintta a Misuri khuretta etthiipo na ojuwa waya woovitheya, ila rooho ya Firawuuna nalelo khusala eri yawuuma khuhitakhi onsiileza Munsa na Haruni nkhama etthiipo Nnyizinku aalupiyeezo. ²³Firawuuna khuzukuluwa khusala alawa owawe khuhijali epile zaya. ²⁴Amisuri ooshi khulawa khuthipa nshini wa muuttho yoori apatthe maati oonywa, maana maati apale a mmuttho khaari onyweya.

²⁵Zaaviriye siikhu sapa paata ya Nnyizinku othatusha maati apale a mmuttho.

Pala ya phiiri: Anaphulu

¹Nawiisha Nnyizinku khumuuza Munsa yoori: “Olawe wa Firawuuna wamuuze yoori: ‘Nnyizinku alupa yoori: Owaalikhe atthu aka alawe akaaputu. ²Amana weeyo ohitakhi owaalikha olawa, kintta operekha pala ya anaphulu nti awo wooshi. ³Mmuttho Niilu wooshimo anttela ottheerelanamo anaphulu awaatta, awelele afiye owawo, okatthi wawo, mpakha voolili vawo na mmanyupa wa mashawuriiya awo mpakha wa atthu awo ooshi na mphule enkhattiwaamo na enoochiwaamu phaawu. ⁴Anaphulu aya apo anttela wuuteela weeyo na mashawuriiya awo na atthu awo ooshi.’ ”

⁵Aphano Nnyizinku khumuuza Munsa araka: “Omuuze Haruni yoori: ‘Wookole nkhono awo othuule pakhora wookolele mmuttho, mmilipu na mmatthatta yoori owaawelelise anaphulu Misuri yooshi.’ ”

⁶Haruni khookolela nkhono awe maati a Misuri, anaphulu khuwelela khufinikha nti wooshi wa Misuri. ⁷Ila anamajintta na ojuwa waya woovitheya khuwaapuwisa anaphulu Misuri yooshi.

⁸Firawuuna khuruma olawa okhuweliwa Munsa na Haruni khuwooza yoori: “Mwinvekele Nnyizinku akilaze anaphulu apa miiyo na atthu aka, yiiyaru etthiipo kintta owaalikha atthu apa alawe amwinkhe twaha Nnyizinku.”

⁹Munsa khumuuza Firawuuna yoori: “Ruhusa ti yawo ya okuuza lini ontakhaaye yoori kuulompele weeyo na mashawuriiya awo, atthu awo ooshi, yoori weeyo na vaje vawo mwilaziwe anaphulu asale mmuttho paasi.”

¹⁰Firawuuna khujipu araka: “Meesho.” Munsa khuri: “Enttela wiiya etthiipo ojipwiyeezo opatthe ojuwa yoori khaavo anlikananaaye Nnyizinku, Nluku eetthu. ¹¹Anaphulu antta wuulikha weeyo, vaje vawo, mashawuriiya awo na atthu awo; anttelaaye osala pi apale ari mmuttho paasi.”

¹²Aphano, Munsa na Haruni khulaavo aphale aarivo Firawuuna, Munsa khunvekela Nnyizinku mwaasa wa anaphulu, nkhama etthiipo aasilaniyeezo na Firawuuna. ¹³Nnyizinku khujipwelela oveka wa Munsa; anaphulu apale ooshi aari mmanyupa, vaje na mmashapa khufwa. ¹⁴Khulokottheliwa khuukeliwa nti opule khusala onukha woohifwayivo. ¹⁵Ila wakathi Firawuuna ajuwiyeevo yoori avumula, khurutela wuumisa rooho yawe khuhinsiilezi theenya Munsa na Haruni, khwa epile alupiyeezo Nnyizinku.

Pala ya ttaatthu: Shaawa

¹⁶Nnyizinku khumuuza Munsa yoori: “Omuuze Haruni: ‘Athuule pakhora yawo ookole nkhono ajaphe lifufu la vathi, lithatuwe liiye shaawa khwa Misuri yooshi.’ ” ¹⁷Khuretta etthiipo; Haruni khookola nkhono awe na pakhora etile khujapha lifufu ntthile khuthatuwa khwiiya shaawa khuweetaala atthu mpakha nyama na nti aya opule wooshi khwiitaala shaawa. ¹⁸Anamajintta khweezelela etthiipo na ojuwa waya woovitheya ila khuhiwahi othatusha; shaawa epile khusala evira eweetaalaka atthu na nyama.

¹⁹Aphano anamajintta apale khumuuza Firawuuna yoori: “Eti yaala ya Nluku,” ila rooho yawe Firawuuna khuumisa khuhitakhi owaasiileza, nkhama etthiipo Nnyizinku aalupiyeezo.

Pala yanne: Mempe

²⁰Aphano Nnyizinku khumuuza Munsa yoori: “Olankhe supuyeene wakutthanane Firawuuna ye onlawa omuttho, omuuze yoori: ‘Nnyizinku alupa toono: Owaalikhe atthu aka alawe akaaputu. ²¹Amana weeyo ohiwaalikhi atthu aka olawa, kintta wuuperekheza pala ya mempe zawaatta yoori ziwiiphirise weeyo, mashawuriiya awo, atthu awo na mmavaje mwaya. Manyupa a Misuri na vathi anluwatthaavo zinttela wiitaalavo mempe. ²²Ila siikhu yaya etile kinttela otthantta khwa nanna yoofwarikhana nti wa Gosheeni; okhule aniikhalaawo atthu aka, khinteela opuwawo hatha pala moote ya mempe, yoori weeyo ojuwe yoori miiyo Nnyizinku kiri mmuti nttumphu. ²³Kinlawa kawaafwarikhanise atthu aka na atthu awo. Meesho entta opuwa alama ya eto.’ ”

²⁴Nnyizinku khuretta etthiipo, mempe zawaatta khwiitaala nnyupa wa Firawuuna na mmanyupa wa mashawuriiya awe, nti wooshi khwiiya wootapanyeya mwaasa wa mempe.

²⁵Aphano Firawuuna khuruma okhuweliwa Munsa na Haruni khuwooza yoori: “Mwilawe mwamwinkhe twaha Nluku enu, ila mwihileemo mmuti mphu.”

²⁶Ila Munsa khujipu araka: “Khahi yoolikana fweeyo oretta toowo, maana twaha ninttelaaye omwinkha Nnyizinku, Nluku eetthu ti yoohifwayi khwa amisuri. Amana niretta twaha nkhama eto anoonaaye ohifwayi, amisuri antta onivonya na mawe. ²⁷Nina yooretta safwari ya siikhu ttatthu niri ntarikhi neettaka n’yaara olawa omwinkha twaha Nnyizinku, Nluku eetthu, nkhama etthiipo anuuziyeezo.”

²⁸Aphano Firawuuna khulupa yoori: “Kintta wuulikhani mwilawe, mwamwaaputu Nnyizinku, Nluku enu n’yaara, ila mwiheette peetiwene, noofiya mwikilompele na miiyo.”

²⁹Munsa khujipu yoori: “Nasaapi eti amana kilaavo vakatthi vawo kinttela onvekela Nnyizinku. Meesho mempe epo entta owaattuwa weeyo na mashawuriiya awo na atthu awo, ila safwatali ohikittettekhe theenya ohiwaalikhi atthu apa olawa omwinkha twaha Nnyizinku.”

³⁰Aphano Munsa khulaavo vakatthi wa Firawuuna khunvekela Nnyizinku. ³¹Nnyizinku khujipu lompa ya Munsa, mempe epile khumwaattuwa Firawuuna na mashawuriiya awe mpakha atthu awe, khuhisali hatha mempe moote. ³²Ila nalelo khusala ari wa wuumisa rooho, khuhitakhi owaalikha atthu apale olawa.

Pala ya thaanu: Ofwa wa nyama

¹Nawiisha Nnyizinku khumuuza Munsa araka: “Olawe wa Firawuuna wamuuze yoori: ‘Nnyizinku, Nluku wa meepereewu, alupa toono: “Owaalikhe atthu aka alawe akaaputu.” ²Amana weeyo nalelo ohitakhi owaalikha olawa na khukhanyarela owaakhattaza, ³ojuwe yoori nkhono wa Nnyizinku ontta otiisa pala yawoopisa khwa nyama zawo ziriiye omashapa, khwa khavalo zawo, khwa apuuru awo, khwa nkamiiya zawo, khwa mompe zawo mpakha pwittipwitthi zawo. ⁴Na Nnyizinku onteela ophakula nyama za amisuri na epi za meezirayiilu, yoori ehifwe hatha nyama moote ya meezirayiilu.’ ”

⁵Nnyizinku atthoma wakathi araka: “Meesho Nnyizinku ontta oretta mmuti mphu etile ahitiyeeyo.” ⁶Mmeesho mwaya Nnyizinku khuretta etthiipo: nyama za amisuri zooshi khufwa, ila za meezirayiilu hatha moote khuhifwi. ⁷Firawuuna khunruma ntthu olawa woona, khuhisikani hatha nyama moote ya meezirayiilu eri yoofwa; ye khuumisa rooho khuhitakhi owaalikha olawa atthu apale.

Pala yasiitha: Makhwatta a puupa

⁸Aphano Nnyizinku khumuuza Munsa na Haruni yoori: “Mwisavule fuutha ya vamafiya yawiitaala mmakhono Munsa amwazele otulu, Firawuuna ari attaapho. ⁹Entta othatuwa yiiye lifufu khwa nti wooshi wa Misuri, puupa entta owaapuwa atthu mpakha nyama, Misuri yooshi.”

¹⁰Yo khuthuula fuutha ya vamafiya khulawa wa Firawuuna. Munsa khumwazela fuutha etile otulu, puupa khuwaapuwa atthu mpakha nyama. ¹¹Wala anamajintta khuhisala awahi omwaattama Munsa, mwaasa wa makhwatta, awaapatthiyeeyo vamote na amisuri ooshi. ¹²Ila Nnyizinku khuumisa rooho ya Firawuuna, ye khuhinsiili Munsa na Haruni nkhama etthiipo Nnyizinku amuuziyeeyo.

Pala yasaapa: Vuula ya mawe

¹³Nnyizinku khumuuza Munsa yoori: “Olankhe supuyeene olawe wakutthanane Firawuuna, omuuze oraka: ‘Nnyizinku, Nluku wa meepereewu, alupa toono: Owaalikhe atthu aka alawe akaaputu. ¹⁴Olikha toowo, swaafu eti pala yaka yooshi kinuutiisela omweenyewe, na mashawuriiya awo na atthu awo, ojuwe yoori khina eeyiye nkhama miiyo olumwenku wooshi. ¹⁵Maana miiyo kinwahi wookola nkhono aka khuulwaaza weeyo na atthu awo khwa pala yaari owahaaye wuulazavo voolumwenku. ¹⁶Ila miiyo kinuulikha weeyo ori haayi yoori kithoonyeze owahi waka, yoori nzina laka lilaleyiwe olumwenku wooshi. ¹⁷Nalelo ontta ojikhutupulana atthu aka, khuntakha owaalikha alawa. ¹⁸Ila meesho wakathi otthuupu, kinlawa kanyise vuula ya mawe ehinanyeke nti opu wa Misuri thanku owaziwe mpakha leelo. ¹⁹Apho owaarume atthu awo alawe alokotthele nyama zawo ziriiye omashapa na vitthu zawo ziriiwo waaza atthu mpakha nyama ziriiwo. Amana ohilaziwo otana onti, khunyeliwa ti vuula ya mawe entta ofwa.’ ”

²⁰Mashawuriiya a Firawuuna aari woovaaye nttakhuzi la Nnyizinku khwaakuva khulawa khuwaalazawo, aviitthwaana aya mpakha nyama zaya khulawa khupwehiwa. ²¹Ila apale ahaari woovaaye nttakhuzi la Nnyizinku khuwaalikha amwiitthwaana aya na nyama zaya omashapa.

²²Aphano Nnyizinku khumuuza Munsa yoori: “Olansele makhono awo otulu entta onya vuula ya mawe nti wooshi wa Misuri, ewaanyele atthu, nyama na miitthi zooshi za Misuri.” ²³Munsa khulansa pakhora yawe khuthoonyeza otulu, Nnyizinku khuvumisa taari na vuula ya mawe, khwiishusha ozerima na taari khwa nti opule wa Misuri na vuula ya mawe khusala enya. ²⁴Vuula ya mawe na taari khuvuma yoopakhanyeya na mawe awoopisa ehinanyeke Misuri yooshi thanku ewaziwe. ²⁵Misuri yooshi vuula etile khutapanya vitthu zaari mmashapa, waaza atthu, nyama na mathapa mpakha miitthi zooshi za ntthuttu. ²⁶Khusala nti wa Gosheeni paasi, okhule aari wiikhalaawo meezirayiilu, okho khayaanyiyewo vuula ya mawe.

²⁷Aphano Firawuuna khuruma olawa okhuweliwa Munsa na Haruni khuwooza yoori: “Swaafu eti kakosa. Nnyizinku ti wa shariya, ila miiyo na atthu aka ninaaye paathuli. ²⁸Mwilompe wa Nnyizinku, maana ottitthima wa Nluku na mawe ankwaaye a vuula pi awaatta, miiyo kintta wuulikhani mwilawe; kinhithajiya wiikhala nttumphu theenya.”

²⁹Munsa khujipu yoori: “Amana miiyo kilaamo nsitati mphu kintta wookolela nkhono aka wa Nnyizinku kilompe. Taari enyamale na vuula yaamuse yoori weeyo ojuwe yoori olumwenku pi wa Nnyizinku. ³⁰Ila weeyo na mashawuriiya awo, miiyo kinjuwa yoori khamwinimoova Nnyizinku Nluku!”

³¹Alikutawu na liyapa zaatapanyeyiye mwaasa a liyapa laarina phunje na alikutawu aaleyiye. ³²Naye tiriku khayaaharipweyiye, maana yaari ehinalikane.

³³Munsa khulaavo aphale aariivo Firawuuna na nsitati mphule, khumookolela nkhono Nnyizinku, taari na vuula khwiisha. ³⁴Firawuuna nawoona yoori taari na vuula zeesha khurutela okufuru oomisaka rooho yawe na mashawuriiya awe. ³⁵Ari wawuumisa rooho etthiipo, Firawuuna khuhiwaalikhi meezirayiilu olawa, nkhama etthiipo Nnyizinku aamuziyeezo Munsa.

Pala yanaane: Mapalaka

¹Nnyizinku khumuuza Munsa yoori: “Olawe wakutthanane Firawuuna, maana miiyo koomisa rooho yawe na rooho za mashawuriiya awe, yoori miiyo kithoonyeze alama zaka epo vakatthi vaya, ²na yoori mwiwaathatelele aaneenu na atuulwenu nanna miiyo kiwaahukhumwiyeezo amisuri na minjuza zootikinisa kirettiyeezo vakatthi vaya, khwa etthiipo pi mwinttelaavo ojuwa yoori miiyo ki Nnyizinku.”

³Aphano Munsa na Haruni khulawa okutthanana Firawuuna, yo khumuuza yoori: “Nnyizinku, Nluku wa meepereewu alupa yoori: ‘Mpakha lini weeyo okatthalaka ojipushuwisa mmakhono mwaka miiyo? Owaalikhe atthu aka alawe akaaputu. ⁴Amana okhanyarela ohitakhi owaalikha atthu aka olawa, meesho kintiisa pala ya mapalaka mmuti mwawo. ⁵Yo anteela ofinikha vathi ohisala wooneyavo, maana anteela orafuna zooshi epile zaalikhiweeyo ti vuula ya mawe mpakha na miitthi epile zinphutuwaazo mmashapa. ⁶Anttela wiitaala nnyupa mwawo na mmanyupa wa mashawuriiya awo na wa amisuri ooshi. Vitthu amarehemu apapazenu ahooneeni siikhu epo eekhaliyeezo mphu mpakha leelo.’ ” Elottelanaka Munsa khulankha khulaavo aphale aariivo Firawuuna.

⁷Aphano mashawuriiya a Firawuuna khusala alupa yoori: “Mpakha lini ntthu otu anituturushaka? Owaalikhe atthu apa alawe amwaaputu Nnyizinku, Nluku aya. Khiniweeleya yoori Misuri yatapanyeya?”

⁸Aphano khuthuuliwa Munsa na Haruni opheya khulawaniwa mpakha wa Firawuuna, ye khuwooza yoori: “Ettani mwamwaaputu Nnyizinku, Nluku enu. Mwikuuze, anlawaaye paani?”

⁹Munsa khujipu yoori: “Ninlawa na atthu ooshi, mashaapu etthu, na anakhuuluvale etthu, aaneetthu, pwittipwitthi zeetthu mpakha mompe zeetthu. Maana ninttela onrettela njampo Nnyizinku eetthu.”

¹⁰Firawuuna khuwooza yoori: “Mweeyo mwinttela onhithajiya Nnyizinku amana kuulikhani olawa na aakha enu na aana enu! Eto enthoonyeza yoori mweeyo mwinwaza shawuri zootakhala. ¹¹Khahiyo toowo! Mwilawe alume ru mwamwaaputu Nnyizinku maana eto ti waakivekeliyeeyo.” Munsa na Haruni khwiikariwa aphale aariivo Firawuuna.

¹²Aphano Nnyizinku khumuuza Munsa yoori: “Wookolele nkhono nti wa Misuri yoori ate mapalaka vathi apha arafune mathapa ooshi ariimo na zooshi epile zaalikhiweeyo ti vuula ya mawe.”

¹³Munsa khookola pakhora yawe ookolelaka nti wa Misuri, Nnyizinku khutiisa pheevo ya ntulayi khuvuma nthana wooshi mpakha osikhu. Noocha pheevo etile khutana mapalaka. ¹⁴Misuri yooshi khwiitaala mapalaka woohilikhi hatha vahali, aari awaatta venkivene. Aari ahinapuwewo nkhama apo na paata ya apo khapuwiyewo theenya nkhama apo. ¹⁵Maana aafinikhiye phantte zinki za Misuri mpakha nti wooshi khwiiya wooriipa. Khurafuna zooshi epile zaalikhiweeyo ti vuula ya mawe, mathapa na mishumo za miitthi woohisali hatha etthu piishi waaza mmitthi mpakha mmashapa, nti wooshi wa Misuri.

¹⁶Firawuuna khuruma olawa okhuweliwa Munsa na Haruni woohirupazi, khuwooza yoori: “Kankosa Nnyizinku, Nluku enu na kookosani mweeyo! ¹⁷Apho kinuuvekelani yoori mwikiswaamihi twampi yaka swaafu eti theenya na mwinvekele Nnyizinku, Nluku enu yoori akilaze pala eti yoofwiwa.”

¹⁸Munsa paata ya olaavo aphale vaya aariivo Firawuuna khunvekela Nnyizinku. ¹⁹Aphano Nnyizinku khuvumisa pheevo yawaatta ya okhu lintupweelaawo njuwa, ethiito khukhupa mapalaka ooshi khwiitthela mpahari yookhuttuwa; khuhisalimo hatha lipalaka limote nti opule wa Misuri. ²⁰Ila nalelo Nnyizinku khuumisa rooho ya Firawuuna; ye khuhitakhi owaalikha meezirayiilu olawa.

Pala ya tiisiya: Yiiza

²¹Aphano Nnyizinku khumuuza Munsa yoori: “Makhono awo olansele pinkuuni yoori Misuri yooshi yiiye yoofinikhiwa ti yiiza yookhomaala.” ²²Munsa khookolela nkhono awe otulu, Misuri yooshi khufinikhiwa ti yiiza yookhomaala khwa siikhu ttatthu. ²³Khuhisala oonana mmote na nzaawe, khaarivo mmote aaliyeevo vahali aariivo khwa siikhu ttatthu; ila meezirayiilu ooshi mmanyupa mwaya yaarimo nuuru.

²⁴Aphano Firawuuna khunkhuwela Munsa khumuuza yoori: “Ettani mwamwaaputu Nnyizinku. Ila zisale pwittipwitthi zenu na mompe zenu paasi; ila aakha na aana mwilawane.”

²⁵Munsa khujipu yoori: “Weeyo ona ya oninkha nyama za orettela twaha na olukuza, yoori nimwinkhe Nnyizinku, Nluku eetthu. ²⁶Olikha toowo, nyama zeetthu nilawaka nintta othuula hatha likhope khalinsala, maana ninttela orumeyela etthiipo yoori nimwaaputu Nnyizinku, Nluku eetthu, khanijuweeni nyama-ni ninttelaaye omwaaputu-na Nnyizinku mpakha ofiya.”

²⁷Ila Nnyizinku khuumisa rooho ya Firawuuna, ye khuhitakhi owaalikha olawa. ²⁸Firawuuna khumuuza Munsa yoori: “Oleevo apha na ohirutelevo theenya! Siikhu onttelaavo okoona theenya ontta ofwa.”

²⁹Munsa khuri: “Walikanisa! Akinteela woona theenya wuuso awo.”

Olaleyiwa wa pala yakhuumi

¹Nnyizinku khumuuza Munsa yoori: “Kinimperekheza pala moote theenya Firawuuna na Misuri yooshi. Khwa ethiito ye onlawa awaalikhe olaamo mmuti mphu mpakha onlawa aweekaremo eperepere. ²Apho owooze meezirayiilu ooshi, waaza alume mpakha aakha, yoori awaavekele anamwaattamanana aya vitthu za feeta na za tahapu.” ³Nnyizinku khuwaaretta yoori atthu awe apatthe wooneliwa vahali pi amisuri. Theenya Munsa aari nlume nwulweene nti opule wa Misuri, waaza omaasho wa mashawuriiya a Firawuuna mpakha wa atthu ooshi.

⁴Aphano Munsa khumuuza Firawuuna yoori: “Nnyizinku alupa araka: ‘Osikhu layili kinvira Mmisuri. ⁵Aana ooshi aalume amwanzo a nti wa Misuri anttela ofwa, waaza mwaana wa mwanzo wa Firawuuna, anttelaaye orithi khukulu ya mfwalume, mpakha mwaana wa mwanzo wa njaazi ankholaaye khaazi yoochila na aana a mwanzo a nyama zaya. ⁶Misuri yooshi onlawa wapuwewo olila nwulweene, waari ohinapuwewo na ohinttelaaye opuwawo theenya. ⁷Ila khwa meezirayiilu, waaza atthu mpakha nyama, wala mwanapwa khanlawa owahowula. Khwa etthiipo, mwinttela ojuwa yoori Nnyizinku awavirikanisa amisuri na meezirayiilu.’ ⁸Mashawuriiya awo ooshi apa, anlawa akeekese na akikokhorele, akivekelaka yoori: ‘Olawe na atthu awo ooshi.’ Khwa etthiipo miiyo kinttela olaawo!” Munsa, khukatipukha channu, khulaavo aphale aariivo Firawuuna.

⁹Aphano Nnyizinku khumuuza Munsa yoori: “Firawuuna khanteela wuusiilani, yoori minjuza zaka zeekezeleye nti wa Misuri.”

¹⁰Munsa na Haruni khuretta minjuza epile zooshi khwa Firawuuna; ila Nnyizinku khuumisa rooho ya Firawuuna, khuhisala atakha owaalikha olaamo mmuti mphule meezirayiilu.

Njampo la Paashikowa

¹Nnyizinku khumuuza Munsa na Haruni nti wa Misuri yoori: ²“Opu ona ya wiiya mweezi wa mwanzo wa mwaakha khwa mweeyo. ³Mwiwooze atthu ooshi a Ezirayiilu, mwiraka: Siikhu ya khuumi ya mweezi otthuupu, alume ooshi ana yoovalula nshapi la pwittipwitthi leelume ya wakhula liphanko ya wakhula nyuupa. ⁴Ojama amana wiiya vattitthiiru ohinwahaaye orafuna nyama yooshi, ona yoowaalaleya anamwaattamanana aya apale a kharipu awaameele nyama enwahaaye owaafiyela khwa thamani ya atthu aya. ⁵Nyama yaya enttelaaye othawuliwa ena ya wiiya yeelume ya mwaakha mmote, yoohirakali hatha vahali. Ena ya wiiya pwittipwitthi ama puuzi. ⁶Mwipwehe mpakha siikhu khumi na nne ya mweezi, mpakha wakathi ajama ooshi a meezirayiilu anttelaaye otwahi, njuwa leettelaka otupweela.

⁷“Mwittukunttele taamu yaya vatulu na mpavu wa milako za manyupa, apale mweeyo mwirafuniyeemu nyama. ⁸Osikhu otthuupo mwina ya orafuna nyama yoomanikhiwa va moottho, na mathapa oowaawa na phaawu yoohiina fwaramento. ⁹Mwihirafune nyama piishi wala yawiipikhiwa, ila yoomanikhiwa va moottho waaza eeshwa, moolu na marupo aya. ¹⁰Mwihisalise hatha etthu efiya supu; amana esala mwilukuze. ¹¹Mwiwale, nzako n’yuunu, jampali mmoolu na mwikholele pakhora mmakhono, mwirafune wawaakuvavo; otu paashikowa wa Nnyizinku.

¹²“Maana osikhu aya otthuupo kinttela ovira nti wa Misuri na kiwoole aana ooshi amwanzo aalume waaza atthu mpakha a nyama, na kiwaahukhumu a miluku ooshi a Misuri: Miiyo ki Nnyizinku! ¹³Taamu mwivaziyeeyo milako zenu enttela wiiya alama yoori ethoonyeze manyupa mwiniikhalaaye, amana kiwaavulalisaka amisuri, miiyo kinttela woona taamu kisala kuuvikanani wooheemeli yoori mwihiiye wootapanyiwa ti pala yaya eto.

¹⁴“Mwitthapele siikhu ethiito nkhama njampo la tiini muupuwelele yoori ti miiyo, Nnyizinku, kirettiyeeyo epo. Mweeyo na peewu yenu mwina yooretta njampo la paashikowa khwa mileele. ¹⁵Nkatthi wa siikhu sapa mwina yooja phaawu yoohiina fwaramento. Siikhu yamwanzo mwilazemo fwaramento mmanyupa mweenu, maana wakhula otule anttelaaye oja etthu ya wiiyana fwaramento, ntthu aya oto ontta wiikariwa vakatthi wa meezirayiilu. ¹⁶Siikhu yamwanzo na siikhu yasaapa ona ya wiiyavo nthukumano ttakatthiifu, ahiiyevo hatha ntthu mmote antakhaaye okhola khaazi siikhu zaya epo, woohiiyi otthenkeza etthu yoojiwa ya wakhula siikhu; mwina yooretta ethiito paasi.

¹⁷“Mwirette njampo la phaawu yoohiina fwaramento, maana siikhu yaya ethiito ti kilaziyeeyo nti wa Misuri mahimo a atthu ooshi a meezirayiilu. Mwitthapele siikhu yaya eto wiiye oruma wa mileele, waaza wa apaapa mpakha wa aana aya. ¹⁸Mwina yoorafuna phaawu yoohiina fwaramento makaaripi siikhu ya khuumi na nne ya mweezi wamwanzo mpakha makaaripi siikhu zeettettaka eshiriini na moote. ¹⁹Siikhu epi sapa ahiiyevo ntthu mmote anttelaaye wiiyana fwaramento owawe. Wakhula antakhaaye oja etthu ya wiiyana fwaramento ontta wiikariwa muujama wa meezirayiilu, hatha nkhama mmalapo ama nnyunti. ²⁰Mwihije hatha etthu ya wiiyana fwaramento mmanyupa mweenu wooshimo, ila mwina yooja phaawu yoohiina fwaramento.”

Paashikowa wamwanzo

²¹Munsa khuruma okhuweliwa attunkhulu a atthu ooshi a meezirayiilu khuwooza yoori: “Mwithawule nshapi la pwittipwitthi yoori ajama ooshi a Ezirayiilu ashije pwittipwitthi ya Paashikowa. ²²Mwithuule zankalala mwinaanise na taamu eriiye mpasiya mwittukunttele milako zenu vatulu na mpavu mwaya. Ahiiyevo hatha ntthu mmote antakhaaye osaruwa nnyupa mwawe mpakha ocha. ²³Amana Nnyizinku aviraka mmuti mphule yoori awoole amisuri, amana oona taamu etile mwittukuntteliyeeyo nlako enu phantte na phantte na vatulu vaya, Nnyizinku onttela ovira attaapho khanlawa onlikha namatapanya ovira mmanyupa mweenu yoori awuuleeni.

²⁴“Mwishututele oruma opu mweeyo na aana enu ooshi khwa mileele. ²⁵Amana mwifiya nti opule Nnyizinku awahitiyeenini owinkhani, mwina yooretta njampo ntthi. ²⁶Aaneenu amana awuuzelani yoori: ‘Njampo laya ntthi maana aya niini?’ ²⁷Mwiwaajipu yoori: ‘Twaha ya Paashikowa wa Nnyizinku, aviriyeeyo vatulu wa manyupa a meezirayiilu nti wa Misuri, na khwiinanela manyupa eetthu wakathi aari owoolaavo amisuri.’ ” Attaaphale meezirayiilu khukokhora khumwaaputu Nnyizinku. ²⁸Meezirayiilu khulaavo, khulawa khuretta nanna ethiitile Nnyizinku amuuziyeeyo Munsa na Haruni.

Pala ya Khuumi: Ofwa wa aana amwanzo oovokoliwa pi amisuri

²⁹Aphano osikhu layili, Nnyizinku khuwoola aana ooshi amwanzo a Misuri, waaza mwaana wamwanzo wa Firawuuna, namarithi ofwalume awe, mpakha mwaana wamwanzo wa napherezu aari nkalapooso na theenya aana amwanzo a nyama. ³⁰Osikhu otthuupule, Firawuuna na mashawuriiya awe ooshi na amisuri ooshi khulankha na wapuwiye olila nwulweene, maana khayaarivo nyuupa yahaafwiweemo.

Olaawo

³¹Osikhu otthuupule Firawuuna khuruma okhuweliwa Munsa na Haruni khuwooza yoori: “Mwileemo nasaapi mmuti mwaka, mweeyo na meezirayiilu! Mwilawe mwamwaaputu Nnyizinku enu, nkhama etthiipo mwivekiyeezo. ³²Mwithuule pwittipwitthi zenu mompe zenu na puuzi zenu, nkhama mwaalupiyeezo na mwikiparikhiye theenya.”

³³Amisuri aari owaakhanyarela atthu apale yoori aleemo mmuti mphule, alupaka yoori: “Amana mwihiliimo fooshi fweeyo nintta ofwa!” ³⁴Aphano atthu apale khuthuula tiriku yookhattiwa yoohiina fwaramento, khuputaputela vakuwo khuttha mmapasiya mwaya khuvikela mmafuzi. ³⁵Meezirayiilu khushututela oruma wa Munsa, khuwaavekela amisuri vitthu za feeta za weero na kuwo. ³⁶Nnyizinku khuwaaretta atthu awe wooneliwa huruma pi amisuri, khwa nanna awenkhiyeevo etile avekiyeeyo; khwa etthiipo khusavula maali zooshi za amisuri.

³⁷Meezirayiilu khulankha khusala alawa mwentto, khuvira Rameesi eettaka Sukooti. Aari alume alufu miiya sitha, ohiwaalaki aakha na aana. ³⁸Khuntti khuluzeene zoofwarikhana za atthu akinoko aawaalottiye, na theenya maphanko mawulumawulu a nyama, mompe, pwittipwitthi na puuzi. ³⁹Khoocha phaawu zoohiina fwaramento khwa tiriku etile aathuuliyeeyo Misuri, maana khayaarina fwaramento mwaasa wawiikariwa Misuri, khuhiwahi otthenkeza etthu yoojiwa.

⁴⁰Meezirayiilu eekhaliye Misuri nyaakha miiya nne na talaathiini. ⁴¹Siikhu ethiito afisiyeevo nyaakha miiya nne na talaathiini, atthu ooshi a Nnyizinku eetta olaawo Misuri. ⁴²Osikhu otthuupo, Nnyizinku eekeseliye olaawo waya Misuri wooshiwo. Tiito, osikhu nkhama otthuupu na yo anttela ojeekesela ojama khwa ojama khwa shitaha ya Nnyizinku.

Kano monkoni wa Paashikowa

⁴³Nnyizinku khumuuza Munsa na Haruni yoori: “Epi kano za Paashikowa: ahiiyevo hatha mmalapo mmote anttelaaye onja. ⁴⁴Mwiitthwaana wawuuzanyiwa ona yonja Paashikowa, amana eeya wookhiriya. ⁴⁵Ila apale eettiye omaka na apale aateeliye okhola khaazi ahinje.

⁴⁶“Mweeyo mwina yonja nnyupa nttumpho aattaliweemo, mwihithuule hatha phittula moote mwisarulelaka vaje, wala mwihipweche hatha likhonkolo la nyama mwinttelaaye orafuna. ⁴⁷Atthu ooshi a Ezirayiilu ana yontthapela Paashikowa.

⁴⁸“Wakhula mmalapo aniikhalaaye nttumphu antakhaaye oretta njampo ntthi la Paashikowa wa Nnyizinku, mwina yowaakhiriyisa alume ooshi a muujama mwaya; apo ana yontthapela nkhama aana a muujama. Ahiiyevo ntthu woohikhiriyi anttelaaye ontthapela. ⁴⁹Kano ethiito ena ya orumeyeliwa pi anyunti na atthu akina apale aniikhalaaye vakatthi venu.”

⁵⁰Meezirayiilu ooshi khuretta nkhama etthiipo Nnyizinku amuuziyeezo Munsa na Haruni. ⁵¹Siikhu ethiitile Nnyizinku khuwaalazawo meezirayiilu Misuri, khuwaatthenkeza lihimo khwa lihimo.

Otwahareshiwa wa aana a mwanzo

¹Nnyizinku khumuuza Munsa yoori: ²“Okithawulele aana aalume ooshi a mwanzo. Aana aalume a mwanzo a meezirayiilu pi aka, khahiyo atthu paasi na nyama zooshi za mwanzo zeelume.”

³Aphano Munsa khuwooza atthu yoori: “Mwifikhirele siikhu eti mweeyo mwiliyeewo Misuri, nti opule mwarettiweeyo oviitthwaana, maana Nnyizinku oolazaniwo okhule khwa owahi wa makhono awe. Tiito mwihije hatha etthu yootthiiwa fwaramento. ⁴Siikhu ethiiti ya mweezi wa Habibi mweeyo mwintta olaawo Misuri. ⁵Amana Nnyizinku oofisani nti wa akanaani, wa ahiiti, wa amoori, wa ahaveewu na wa ayepuzi nti opule alaphaniyeeyo amarehemu apapazetthu yoori aari oteela owinkhani, nti liniittikhaawo leethi na asali, mweeyo mwina yooretta njampo ntthi mweezi otthuupo. ⁶Nkatthi wa siikhu sapa mwina yooja phaawu yoohiina fwaramento siikhu yaya eti ya saapa mwitthapele njampo la Nnyizinku. ⁷Mwije phaawu yoohiina fwaramento nkatthi wa siikhu sapa epo, mwihithuule hatha etthu ya wiiyana fwaramento, wala mmuti mweenu wooshimo ehiiyemo.

⁸“Siikhu yaya etile wakhula mmote ona yoomuuza mwanawe yoori: ‘Mwaasa wa epi Nnyizinku oretteliyeenini mwilankhaka Misuri.’ ⁹Epi enttela wiiya nkhama alama ya mmakhono mwawo na opheleleza wa mmwishwa mwawo yoori oruma wa Nnyizinku wiiye vanlimi vawo, maana Nnyizinku oolaza Misuri khwa nkhono awe wa owahi. ¹⁰Mwishututele oruma opu khwa siikhu etthomiweeyo, mwaakha khwa mwaakha.

¹¹“Amana Nnyizinku oofisani nti wa a Kanaani na khuwinkhani, nkhama etthiipo alaphaniyeeyo mweeyo na amarehemu apapazenu, ¹²mwinthawulele Nnyizinku aana ooshi amwanzo ovokoliwa aalume. Nyama za mwanzo ovokoliwa zooshi zeelume za maphanko enu pi za Nnyizinku. ¹³Mwiwoosuru aana a puuru ooshi a mwanzo mwipatilanaka pwittipwitthi, ila amana mwihitakhi owoosuru waya, mwivuje siiko zaya. Mwiwoosuru theenya aana enu ooshi aalume amwanzo.

¹⁴“Meesho amana aaneenu awuuzelani yoori: ‘Maana aya niini?’ Mwiwooze yoori: ‘Khwa oowahi wa nkhono awe, Nnyizinku anilazawo Misuri, nti narettiweewo oviitthwaana. ¹⁵Wakathi Firawuuna aari okhijilaaye na okatthala onilikha olaawo, Nnyizinku khuwoola aana ooshi a mwanzo Amisuri, waaza aalume mpakha aana a mwanzo a nyama. Tiito ninimwinkhaaye twaha Nnyizinku aana aalume a vitthu zooshi na niniwoosuru aaneetthu ooshi a mwanzo ovokoliwa.’

¹⁶“Eto enttela wiiya nkhama alama mmakhono mweenu na nthoonyezo wa vaajihi venu yoori Nnyizinku anilaza Misuri na owahi wa nkhono awe.”

Olawa wa meezirayiilu

¹⁷Wakathi Firawuuna awaalikhiyeevo olaawo meezirayiilu, Nluku khawaavirisiye tarikhi ya Afiliishiti, yeettiye wiiyaru tarikhi yoofupheya. Khulupa yoori: “Yo amana awoomanana, talili antta ozukuluwa arutele Misuri.” ¹⁸Etthiipile, Nluku khuwaazukulelisa atthu apale n’yaara mphule, phantte ya pahari yookhuttuwa. Meezirayiilu khulaawo Misuri ajitthenkiye yoori oomane.

¹⁹Munsa khuthuula makhonkolo a Yuusufu, mwaasa aalaphisaniye na aana a meezirayiilu wakathi aalupiyeeyo yoori: “Weekhweele Nluku onta awaakiseni mweeyo, amana mwilawaka mwithuulewo makhonkolo aka.”

²⁰Meezirayiilu khulankha Sukooti khulawa khumaka Eetani, ohali yaaziyeewo yaara. ²¹Nnyizinku aari vamote na yo, nthana aari owaalokoza khwa nripu la liwiku yoori eettette saana ntarikhi; amana wiiya osikhu aari owaalokoza na nuuru ya nripu la moottho amwasikhelaka tarikhi; etthiipo pi aari owahaaye weettetta nthana na osikhu. ²²Nripu la liwiku ntthile khalaari owaasusa meezirayiilu nthana, wala nripu la moottho, osikhu khalaari owaasusa.

Lupattha ya amisuri

¹Nnyizinku khumuuza Munsa yoori: ²“Owooze meezirayiilu yoori asapuwe alawe amake kharipu ya Piharoote enakatthi-nakatthi ya Mikotooli na pahari. Mwamake nshini wa pahari omaasho ya Baale-Zefooma. ³Paata ya toole Firawuuna khusala oopuwela yoori meezirayiilu antta ojeettettela athowelelaka n’yaara. ⁴Khwa etthiipo kinlawa koomise rooho ya Firawuuna, ye onlawa awiikariseni, paata ya toowo miiyo kinlawa kattitthimisiwe vakatthi wa Firawuuna na anajanka awe ooshi. Amisuri anlawa ajuwe yoori miiyo ki Nnyizinku.” Meezirayiilu khuretta etthiipo.

⁵Ila wakathi ooziweevo mfwalume wa Misuri yoori meezirayiilu atthira, ye na anakhaazi awe khuzukulisa akhili zaya na khulupa yoori: “Niini nirettiyeeyo? Nawaalikha meezirayiilu olawa, anaashikha amwiitthwaana etthu!” ⁶Aphano Firawuuna khuruma weetteliwa nkukutta awe wa viittha na anajanka awe. ⁷Khuthuula theenya mikukutta miiya sitha epile zookhomaala na mikukutta zooshi za Misuri na anajanka ooshi. ⁸Nnyizinku khuumisa rooho ya Firawuuna mfwalume wa Misuri, khusala aweekarisa meezirayiilu aliyeewo khwa nanna wooshinttavo. ⁹Firawuuna khusala aweekarisa na khavalo zawe zooshi, mikukutta zawe zooshi na anakhavalo awe na anajanka awe, khuwaasikana amakiye nshini wa pahari kharipu ya Piharoote omaasho wa Baale-Zefooma.

Olokha pahari

¹⁰Firawuuna asaleelaka owaasikana, meezirayiilu khweekesa nyuma khuwoona amisuri eettaka ota phantte etile aariiwo. Khuwaapattha woova channu, khusala ankhuwela Nnyizinku. ¹¹Na khumuuzela Munsa yoori: “Misuri zeetta othowawo vilalo tiito onilaziyeewo yoori nite nifwele n’yaara mphu? Niini eti weeyo oniretteliyeeyo, yoonilazawo okhu? ¹²Tiito nawuuziyeeyo Misuri yoori: ‘Onilikhe niiye aviitthwaana amisuri!’ Afwataali wiiya amwiitthwaana amisuri ehiiyeeni ofwa n’yaara.”

¹³Munsa khuwaajipu atthu apale yoori: “Mwihoove, mwiiye wookhomaala na moone otaphuliwa Nnyizinku anttelaaye wuutiselani leelo. Maana khamwinttela owoona theenya amisuri apa mwiniwoonaaye leelo. ¹⁴Nnyizinku onttela wuumana khwa zwaamu yenu mweeyo; mwiiye woonyamala.”

¹⁵Khulupa theenya Nnyizinku amuuzaka Munsa yoori: “Mwaasa aya niini mwikikhuwelaka miiyo? Owooze meezirayiilu avire alawaka. ¹⁶Olanse pakhora yawo na wookole nkhono awo ojaphe maati, antta waawanyeya yoori meezirayiilu alokhe eri tuulu yawuuma. ¹⁷Miiyo kinttela wuumisa rooho za amisuri, yo anttela wuulottelelani mpahari nttumpho. Miiyo kinttela wiiya woottitthimisiwa amana kinshintta mfwalume wa Misuri na anajanka awe ooshi na mikukutta zawe zooshi za nvittha na anakhavalo awe ooshi. ¹⁸Amisuri anttela ojuwa yoori miiyo ki Nnyizinku amana kittitthimisiwa khwa onshintta Firawuuna, mikukutta zawe na anakhavalo awe.”

¹⁹Aphano nlayikha la Nluku ntthile lawaalokoziyeeyo atthu a Ezirayiilu khuwaalikha, khurutela nyuma; theenya nripu la liwiku khuwaalikha, khurutela nyuma, ²⁰khwiiya vakatthi wa amisuri na meezirayiilu. Liwiku laari wiiya looriipa phantte ya amisuri khusala liwaamwasikhela meezirayiilu; mwaasa wa ethiito khuhisala liwaattamanisa meezirayiilu na amisuri osikhu wooshi.

²¹Munsa khookolela nkhono awe pahari, Nnyizinku khuvumisa pheevo zookhomaala za ntulayi osikhu wooshi mpakha pahari waawanyeya khupuwa mishaka zawuuma mwaasa wa waawanyeya wa maati. ²²Meezirayiilu khulokha vakatthi wa maati khwa mishaka zawuuma, khupuwa muuri phantte ya nkhono nlume na nkhono nkha.

²³Amisuri khusala aweekarisa na khavalo zaya zooshi, mikukutta zaya za nvittha na anakhavalo ooshi a Firawuuna khusala awaalotta mpakha vakatthi wa pahari. ²⁴Osaleelaka ocha, nkatthi wa nripu la moottho na la liwiku, Nnyizinku khuwoona anajanka amisuri khuwaakarawela. ²⁵Khuretta etthu yoophara maroota a mikukutta za amisuri nkhama ahaari ojuwaaye weettettisa na khusala akhuwa araka: “Nlaweni niwaatthire meezirayiilu! Nnyizinku ontta wuumanana fweeyo khwa zwaamu yaya yo.”

Amisuri anfwa mpahari

²⁶Nnyizinku khumuuza Munsa yoori: “Wookolele nkhono awo khwa pahari, yoori maati awaakhutele amisuri na mikukutta zaya na anakhavalo aya.” ²⁷Munsa khookolela nkhono awe pahari osaleelaka ocha, maati khurutela etthiipile aariizo. Wakathi amisuri ariiye atthire, khukutthanana maati a pahari, aphano Nnyizinku khuwaakhutela na pahari. ²⁸Maana maati aarutiye khukhutela mikukutta na anakhavalo, na anajanka ooshi a Firawuuna eeshukheliyeeyo mpahari. Hatha mmote khuhivukhi.

²⁹Ila meezirayiilu khulokha pahari etile eettaka oluwatthela mishaka, maati aari nkhama muuri nkhono nlume na nkhono nkha. ³⁰Etthiipile Nnyizinku khuwoosuru meezirayiilu siikhu etile mmakhono wa amisuri, na meezirayiilu khuwoona amisuri ari oofwa mmattima. ³¹Meezirayiilu khoona owahi nwulweene wa Nnyizinku na khumoova Nnyizinku aya na khunkhupali Nnyizinku na karumeya awe Munsa.

Liipo la Munsa

¹Aphano Munsa na aana a meezirayiilu khumwiipela Nnyizinku liipo ntthi:

“Kinimwiipela Nnyizinku,

mwaasa yoori ashintta wooshapweyavo,

khuzamisa mpahari khavalo

na anakhavalo aya.

²“Nnyizinku ti kuvu yaka

na liipo laka,

ye ti nusura yaka!

Ye ti Nluku aka na miiyo kininsifu,

ti Nluku wa paapa na miiyo kinimwaaputu!

³Nnyizinku ti naviittha,

nzina lawe ti Nnyizinku.

⁴Khuzamisa mpahari

mikukutta za nvittha

na anajanka a Firawuuna;

anamalokozela awe apale awaakhupaliyeeyo

khukhuteliwa ti pahari yookhuttuwa.

⁵Khilintti khuwaakhutela

khwiiya oozama nkhama mawe.

⁶Oo Nnyizinku, nkhono nlume awo

onaaye owahi nwulweene;

Oo Nnyizinku, nkhono nlume awo

wawaashijela maatuwi.

⁷“Khwa owula wa ofwalume awo

wawaakhitiri maatuwi awo,

katapu yawo khuwaaja nkhama malala.

⁸Khwa ovitelela wa phula yawo

maati na mawipi ajikusanya

khujakhuwa nkhama muuri,

vathi wa pahari

khwiiya awuuma nkhama liwe.

⁹Atuwi khusala ajittottopa araka:

‘Miiyo kintta oweekarisa kiwaasikane,

kaawanye maali na kiwoole na phanka na nkhono aka miiyo kiwaatapanye.’

¹⁰Khuperekha pheevo yawo,

na pahari khuwaafinikha.

Khuzama nkhama chumpwi

mpahari wawiichamo.

¹¹Khaziivo miluku zinlikananaaye weeyo

oo Nnyizinku.

Khaavo woottitthimisiwa woottakatthifu,

wawoopisa khwa oretta vitthu zootikinisa na oretta minjuza.

¹²“Wookoliye nkhono nlume awo

nti khuwaamiza.

¹³Khwa pheta yawo

wawaalokoza atthu awo apale owoosuruyeeyo;

na kuvu zawo,

khuwaattha puuro yawo yoottakatthifu.

¹⁴Khapila khusiila epile onrettaazo,

khusala zithukumela na woova.

Afiliishiti khuwaapattha huzuni.

¹⁵Attunkhulu a Meedomu

khwiiya ooshanka

na anamalokozela a amowaabu

khuwaapattha othukumela;

a Kanaani khuwaapattha otteettheya.

¹⁶Osuthuwa na woova khuwaapattha

khwa owahi wa nkhono awo,

khuhisala asakhinyeya nkhama mawe

mpakha ovira atthu awo,

Oo Nnyizinku,

mpakha ovira

atthu apale owoozanyiyeeyo.

¹⁷Weeyo onlawa wa waavirise na oweekhaze va mwaako wa erathi yawo,

puuro ttakatthiifu ojekiyeeyo yoori wiikhalevo,

va mwimpari wattalaniyeeyo makhono awo.

¹⁸Nnyizinku mfwalume wa mileele.”

¹⁹Wakathi khavalo za Firawuuna na mikukutta zawe za nvittha na anakhavalo awe eettiyeevo mpahari, Nnyizinku khuwaarutisela a Misuri maati a pahari etile; ila meezirayiilu aaviriye mwentto aluwatthelaka mishaka zawuuma vakatthi wa pahari. ²⁰Nhupiri Miiriyamu nlupuwe Haruni khuthuula nttowu na aakha ooshi khusala anlotta eettaka opiya na wiina.

²¹Miiriyamu aari owaajipu eettaka wiipa araka:

“Nimwiipele Nnyizinku,

mwaasa yoori ashintta wooshapweyavo.

Khutupweeza mpahari khavalo

na anakhavalo aya.”

²²Aphano Munsa khuwaalokoza meezirayiilu waaza pahari yookhuttuwa mpakha n’yaara ya Shuuri. Siikhu ttatthu eettaka weettetta n’yaara ahipatthaka maati. ²³Aphano khufiya Maara, ila khuhiwahi onywa maati ottuukho mwaasa wa owaawa. Ti maana aya wiittheliweeyo nzina la Maara. ²⁴Tiito meezirayiilu khusala ajiliza amuuzaka Munsa yoori: “Ninttela onywa-ni?”

²⁵Munsa khunkhuwela Nnyizinku, ye khuthoonyeziwa muutthi khuthuula khweeselela mmaati khwiiya ootuva. Puuro etile ya Maara Nnyizinku khuwenkha kano na oruma na khuwootota, ²⁶awoozaka yoori: “Mweeyo amana mwinsiileza Nnyizinku, Nluku enu na osiileza etile enintuvelaaye na khusiileza oruma wawe na khushututela kano zawe zooshi, khamwiniiyana hatha orati opule kiwaatiseliyeeyo amisuri, maana miiyo ki Nnyizinku anvonisaaye.”

²⁷Aphano khufiya nti wa Elimu, ottuukho zaariiwo milipu khumi na miwiri na mikokonoothi sapiyiini; khumaka ottuukho khwaattamela maati.

Nluku omperekha Mana

¹Mahimo a atthu ooshi a meezirayiilu khulankha nti wa Elimu khulawa mpakha yaara ya Siimu, eriiye enakatthi-nakatthi ya Elimu na Sinaayi. Yaari siikhu ya khuumi na thaanu mweezi wa phiiri paata ya olaawo Misuri. ²N’yaara mphule meezirayiilu ooshi khusala amwaapa Munsa na Haruni. ³Alupaka yoori: “Afwataali nkhono wa Nnyizinku onuuleeliye Misuri! Maana okhu fweeyo naari wiiya nshini wa vikhalako za nyama na naari ojaka etthu yoojiwa woohiivo hatha shaakha mpakha orupala, ila mweeyo khunitiisa n’yaara mphu yoori mwinuule jala fooshi fweeyo.”

⁴Aphano Nnyizinku khumuuza Munsa yoori: “Miiyo kintta okwisa etthu yoojiwa ya pinkuuni. Atthu nka asaruwaka na olokotthela wakhula siikhu khwa khiima eniwaafiyelaaye siikhu yaya etile, khwa etthiipo kinttela oweeza yoori kiwoone nkhama yo anshututela kano zaka. ⁵Siikhu ya sitha mwina yoolokotthela swaafu piiri zayita epile mwinlokotthelakaaye siikhu kiina zaya.”

⁶Aphano Munsa na Haruni khuwooza meezirayiilu ooshi yoori: “Makaaripi mwinttela ojuwa yoori ti Nnyizinku oolaziyeenini nti wa Misuri. ⁷Meesho supu mwinttela woona siifwa ya Nnyizinku maana asiila waapa weenu. Fweeyo na paani mwinnaapaaye?” ⁸Khurutela olupa theenya araka: “Nnyizinku oniwinkhani nyama yoorafuna makaaripi na etthu yoojiwa ya supu yoori mwirupale, maana asiila waapa weenu. Fweeyo na a paani? Mweeyo khamwinnaapa fweeyo, ila Nnyizinku.”

⁹Munsa khumuuza Haruni yoori: “Owooze meezirayiilu ooshi oraka: Mweette mmakhono wa Nnyizinku, maana asiila ojiliza weenu.”

¹⁰Haruni eettaka ottakhulana meezirayiilu, ooshi khusala eekesa phantte ya n’yaara na siifwa ya Nnyizinku khupuwa mmawiku.

¹¹Na Nnyizinku khumuuza Munsa yoori: ¹²“Kinsiila ojiliza wa meezirayiilu, ila owaajipu yoori: ‘Njuwa leettelaka otupweela mwinttela orafuna nyama, na supu mwiniiyana yoojiwa ya wuutoshani. Toowo mwinttela ojuwa yoori miiyo ki Nnyizinku, Nluku enu.’ ”

¹³Makaaripi khupuwa khwaali khwiitaala aphale aamakiyeevo, supu waarivo mmatte phantte yaya etile. ¹⁴Wakathi mmatte opule wuumiyevo, vathi aphale khupuwa vitthu nkhama mavalako zoolattanana cheelu vatulu wa nshaka. ¹⁵Wakathi meezirayiilu ooniyeevo vitthu epile, khwaaza wuuzelana atthaaporu araka: “Niini epi za?” Maana khaari ojuwa etthu yaari orettikhanaaye. Elottelanaka, Munsa khuwooza yoori: “Eti etthu yoojiwa Nnyizinku awinkhiyeenini yoori mwije. ¹⁶Nnyizinku aruma yoori: ‘Wakhula mmote wa mweeyo ona yookusanya epile anihithajiyaaye yoori aje, khwa thamani ya atthu ariina vaje vawe, ttompwiyo moote wakhula ntthu.’ ”

¹⁷Meezirayiilu khuretta etthiipo ooziweezo; akina khukhupa zawaatta, akina vattitthiiru. ¹⁸Wakathi aphimiyeeyo na ttompwiyo, otule aalokottheliyeeyo zawaatta na otule alokottheliyeeyo vattitthiiru ooshi khupattha sawasawa. Wakhula mmote aapatthiye epile aari ohithajiyaaye oja.

¹⁹Munsa khuwooza yoori: “Ahiiyevo hatha mmote antakhaaye opweha yoori aje meesho.”

²⁰Ila yo khuhinsiilezi Munsa, akina khulikha vattitthiiru yoori aje mmeesho mwaya; ochiyeevo khwiitaala nyunku na khusala enukha. Munsa khuwaakatipukhela venkivene.

²¹Wakhula siikhu supu yo eetta olokotthaka epile aari ohithajiyaaye oja, maana haari ya njuwa yeetta othulushaka etile yaari osalaaye vathi. ²²Siikhu ya siitha, khulokottha swaafu piiri, wakhula ntthu ttompwiyo piiri; attunkhulu a atthu khulawa omuuza Munsa. ²³Khuwaajipu Munsa araka; “Nnyizinku aruma yoori: ‘Meesho enttela wiiya siikhu yoovumula, Saapatu ttakatthiifu ya Nnyizinku etile mwintakhaaye wuumisa vamoottho muumise na etile mwintakhaaye wiipikha na maati, mwiipikhe, zooshi zinttelaaye osala mwipwehe mpakha mmeesho mwaya.’ ”

²⁴Khupweha mpakha mmeesho mwaya nkhama etthiipo Munsa aalupiyeezo; wala khuhivutti na hatha nyunku khuhiina. ²⁵Aphano Munsa khulupa yoori: “Mwije leelo maana Saapatu ttakatthiifu ya Nnyizinku maana leelo khamwinsikanavo hatha etthu valipuwa. ²⁶Siikhu sitha mwina yoolokotthela ila siikhu ya saapa, yiiyiyeeyo Saapatu, khazinteela wiiyavo.”

²⁷Olikha toowo, siikhu ya saapa aalankhiye atthu olawa olokottha ila khuhisikanivo hatha etthu. ²⁸Aphano Nnyizinku khumuuza Munsa yoori: “Mpakha lini mwikhijilaka oshututela oruma waka na onozela waka? ²⁹Moone saaneene yoori Nnyizinku awinkhani Saapatu, tiito siikhu ya siitha oniwinkhani etthu yoojiwa ya siikhu piiri yoori siikhu ya saapa wakhula ntthu eeye attaaphale aniiyaavo ahiiyevo ntthu antakhaaye weettetta.” ³⁰Aphano atthu apale khuvumula siikhu ya saapa.

³¹Atthu a Ezirayiilu khutthaja etthu yoojiwa etile nzina la mana. Zaari nkhama peewu ya phunje zoolakala zootuva nkhama mishikoto za asali. ³²Munsa khulupa araka, “Nnyizinku aruma yoori: ‘Mwilokotthele mana apa ttompwiyo moote mwipwehe, yoori khapila entaaye yoone etthu yoojiwa mwenkhiweeyo ti Nnyizinku wakathi oolaziyeenini Misuri.’ ”

³³Aphano Munsa khumuuza Haruni yoori: “Othuule ttompwiyo moote ya mana, otthe mmakhono wa Nnyizinku, yoori epweheliwe khapila eto entaaye.”

³⁴Khwa oshututela etile Nnyizinku aamuuziyeezo Munsa, Haruni khuthuula mana apale khuttha nkatthi wa aaraka wa osiilana, yoori apwehiwe. ³⁵Meezirayiilu khuja mana nyaakha arupayiini mpakha ofiya nti waari wiikhaleyaaye; khuvira ajaka mpakha ofiya mmwiinano wa Kanaani. ³⁶Mphimo waari ophimaniwaaye mana waari wiitthiwa ttompwiyo, ya phantte ya khuumi ya eefwa16:36 Eefwa enlikanana phantte ya khuumi ya maliituru eshiriini..

Maati aniittikha va mwaako

¹Meezirayiilu ooshi khulaamo n’yaara ya Siimu, khusala eettetta avumulaka alawaka, nkhama etthiipo aarumiyeeyo Nnyizinku. Khumaka Refidimu ila khaariwo maati oonywa. ²Mwaasa wa ethiito khusala anyakulisana na Munsa araka: “Oninkhe maati oonywa.” Ye khuwaajipu yoori: “Mwaasa wa niini mwinyakulisanaka na miiyo? Mwinimweezelani Nnyizinku?”

³Ila atthu apale aarina nnyottha khusala amwaapa Munsa araka: “Waanilazeliyeniwo Misuri? Ontakha onuula na nnyottha na aana eetthu na nyama zeetthu?”

⁴Aphano Munsa khunyakula ankhuwelaka Nnyizinku araka: “Kiwaarettele niini atthu apa? Ansaleela okivonya na mawe!”

⁵Nnyizinku khunjipu yoori: “Weette omaasho wa atthu, owaathuule attunkhulu a meezirayiilu na othuule pakhora mmakhono mwawo ethiito waapiyaniyeeyo muuttho Niilu na olokoze. ⁶Miiyo kinttela wiiya ottuukho vatulu wa liwe la Horeepe. Weeyo opiye liwe, nttinttho lintta olaza maati yoori atthu apo anywe.” Munsa khuretta etthiipile, attunkhulu a meezirayiilu eettaka omoona. ⁷Puuro yaya etile khutthaja nzina la Maasa na Mariiba, maana aphale vaya meezirayiilu aanyakulisananiye na khumweeza Nnyizinku araka: “Nnyizinku ori vamote na fweeyo ama wala?”

Meezirayiilu anuumanana Amalekiita

⁸Elottelanaka khuta Amalekiita oteela owoomanana meezirayiilu nti wa Refidimu. ⁹Aphano Munsa khumuuza Yoshuwa yoori: “Owaathawule atthu aalume oomanane Amalekiita. Meesho kinttela wiiya vatulu wa mwaako na pakhora ya Nluku mmakhono mwaka.”

¹⁰Yoshuwa khulawa wuumanana Amalekiita nkhama etthiipile Munsa aalupiyeeyo. Munsa, Haruni na Huri khuwelaza vatulu wa mwaako. ¹¹Wakathi Munsa aari olansaavo makhono awe meezirayiilu eetta oshintta, amana eeshusha makhono awe Amalekiita ti aari oshinttakaaye. ¹²Wakathi makhono a Munsa aashokheriyeevo, Haruni na Huri khunsusisela liwe yoori Munsa eekhalevo. Oowiiri khukholelela makhono a Munsa, mmote nkhono nkha nkina nkhono nlume yoori makhono a Munsa eeye aweemela mpakha njuwa otupweela. ¹³Yoshuwa khuwaashintta sawa-sawa anajanka a Amalekiita na phanka.

¹⁴Aphano Nnyizinku khumuuza Munsa yoori: “Waatikhe hapari epi nkithaapu yoori zisala zuupuweleliwa na omuuze Yoshuwa yoori Amalekiita anttela wiiya oosahawiwa khwa mileele vathi wa olumwenku.”

¹⁵Munsa khunjeka alitaari na khuntthaja nzina yoori: “Nnyizinku ti anikinkhaaye oshintta”, ¹⁶na khulapha khwa khukulu ya Nnyizinku yoori: “Nnyizinku ori nvittha na Amalekiita ojama khwa ojama.”

Othotola wa Yeeturu

¹Aphano Yeeturu, haakhimu wa Midiyaani, nkhwewe Munsa, khusiila vitthu zooshi Nluku anretteliyeeyo Munsa vamote na atthu a Ezirayiilu khwa nanna Nnyizinku awaalaziyeewo Misuri.

²Munsa anrumiye Zipoora muukha awe wankhwewe Yeeturu, ye khumpwekherela, ³vamote na aana awe awiri. Mmote aya aari wiitthiwa Yeerisoni18:3 Nzina la Yeerisoni lina maana a omaka., maana aalupiye yoori “Miiyo kaasafireliye nti wa malaponi”; ⁴nkina aari wiitthiwa Elizeeri, maana aalupiye yoori: “Nluku wa paapa ti eeyiye awuni yaka na akaawuni khwa phanka ya Firawuuna.”

⁵Yeeturu, nkhwewe Munsa, khutana na aana na muukha wa Munsa, okutthanana n’yaara omwaako wa Nluku okhule aamakiyeewo. ⁶Yeeturu khuruma wuuziwa Munsa yoori: “Miiyo, nkhwewo, kintta ota okutthanana weeyo, kintana muukhaawo na aanaawo awiri.”

⁷Aphano Munsa khumwaattama nkhwewe khumwiinamela khumpatikha, khusala enkhana hapari mmote na nzaawe, nawiisha khuvira nheema. ⁸Elottelanaka Munsa khwaaza omuuza nkhwewe vitthu zooshi Nnyizinku anretteliyeeyo Firawuuna na amisuri mwaasa wa pheta ya meezirayiilu na tafwawuthi zooshi akholiyeeyo ntarikhi na nanna Nnyizinku awaataphuliyeeyo.

⁹Yeeturu noosiila mattakhuzi apale ooshapweya Nnyizinku awaretteliyeeyo meezirayiilu, awaataphulaka mmakhono wa amisuri, khwiiya woofurahi. ¹⁰Yeeturu khulupa yoori: “Woottottopeliwa eeye Nnyizinku, ootaphuliyeenini mmakhono wa amisuri na mmakhono wa Firawuuna na khuwaataphula atthu awe vathi wa nkhono wa amisuri. ¹¹Aphano kajuwa yoori Nnyizinku nwulweene zayita miluku zooshi, maana khwa vitthu epile aari ojikhutupulanaaye atapanya.” ¹²Aphano Yeeturu nkhwewe Munsa, khuretta twaha yoolukuziwa khwa Nluku; khuta Haruni na attunkhulu ooshi a meezirayiilu, yoori aje etthu yoojiwa na nkhwewe Munsa omaasho wa Nluku.

Akhili za Yeeturu

¹³Mmeesho mwaya Munsa khwiikhala yoori aphuke onyakulisana wa atthu, atthu apale khweemela ya supu mpakha makaaripi. ¹⁴Wakathi nkhwewe ooniyeevo epile aari owaarettelaaye atthu apale, khuri: “Eto onrettaayo niini? Mwaasa aya niini wiikhalaka weeyo paasi yoori ophuke, na atthu ooshi khusala oweja ettiye weemela, supu yooshi mpakha makaaripi?”

¹⁵Aphano Munsa khunjipu nkhwewe yoori: “Atthu apa anikeekesa yoori miiyo kiwooze vitthu za Nluku. ¹⁶Wakhula swaafu aniiyanaavo tafwawuthi antta okitiisela yoori kimanyamanye khwa phantte zoopiiri, na kiwaasomisaka mwentto wa kano za Nluku.”

¹⁷Nkhwewe Munsa khulupa yoori: “Eto onrettaaye khahiyo yooshapweya. ¹⁸Weeyo na atthu awo mwinttela oshokhera, maana khaazi yaya eto ti yoolipa channu; khunwahi oretta otthowe. ¹⁹Osiile shawuri zaka! Nluku ti eeye vamote na weeyo. Wiiye namalokozela wa atthu omaasho wa Nluku na othuula tafwawuthi zaya zooshi khwa Nluku. ²⁰Owooze mwentto wa kano na owaajuwise tarikhi ya weettettela na khaazi ya okhola. ²¹Ila weeyo vakatthi wa atthu apo, owaathawule atthu a makhaamu ooretta etthu, oomoova Nluku, atthu a haakhi eniweephiraaye opattha fwayita ya haraamu. Owenkhe ottunkhulu wa atthu alufu wa atthu miiya wa atthu hamusiini wa atthu khumi. ²²Yo anttela wiiya vakatthi wa atthu yoori asala aphuka tafwawuthi zaya. Nka ootiiselaka weeyo tafwawuthi epile zoolipa; epile zookhweya anttela waattalela ottho. Amana oretta toowo enttela wiiya yookhweya khaazi yawo, maana yo anttela waawanyana na weeyo. ²³Amana weeyo oretta, na nkhama Nluku aruma, weeyo ontta owahi ovilela tafwawuthi zaya epo na atthu apa ooshi eettaka orutela onti, tafwawuthi zaya ziri zawaattaleliwa.”

²⁴Munsa khukhupalela shawuri za nkhwewe na khuretta etthiipile ooziweezo. ²⁵Khuwaathawula atthu amakhaamu vakatthi wa meezirayiilu ooshi khuwaaretta wiiya anamalokozela atthu aya apale; nttunkhulu wa atthu alufu, wa atthu miiya, wa atthu hamusiini, na wa atthu khumi. ²⁶Apa khwiiya nkhama anamaphuka awakhula siikhu, atafwawuthi za atthu. Amana wiiya mwaasa woolipa aari weettiseliwaka Munsa, amana ziiya zookhweya aari ophukaka atthaapo.

²⁷Aphano Munsa khuleezana na nkhwewe, Yeeturu khusala arutela owawe.

Nluku onttakhulana Munsa vamwaako Sinaayi

¹Mweezi wa ttaatthu siikhu ethiitile, paata ya meezirayiilu olaawo Misuri, khufiya mpakha n’yaara ya mwaako Sinaayi. ²Noolaawo Refidimu, khulawa mpakha n’yaara ya Sinaayi, meezirayiilu khulawa khumaka ottuukho omaasho wa mwaako Sinaayi.

³Elottelanaka Munsa khuwela vamwaako yoori akutthanane Nluku. Nnyizinku khunkhuwela vamwaako attaaphale araka: “Olupe mattakhuzi apa wuuzaka ojama wa Yaakhumpa, atthu ooshi a meezirayiilu yoori: ⁴‘Mweeyo moona etthu kiwaaretteliyeeyo amisuri na nanna kiwaathamisiyeeyo nkatthi wa mapaphelo a saaka kijitiiselaka miiyo. ⁵Aphano, amana mwikishututela wa waamineyavo mwisiila huula yaka na khuthokorela wahati aka, mweeyo mwinttela wiiya atthu aka, ootafikhana zayita khapila kiina, maana olumwenku wooshi pi waka. ⁶Khwa miiyo mweeyo mwinttela wiiya ofwalume wa ohaakhimu a tiini wa khapila ttakatthiifu.’ Apo pi mattakhuzi onttelaaye owooza meezirayiilu.”

⁷Munsa khuruti khulawa khuwaakhuwela attunkhulu ooshi atthu a meezirayiilu na khuwooza zooshi Nnyizinku anrumiyeeyo olupa. ⁸Atthu ooshi khujipu wa swaafu moote yoori: “Ninretta zooshi epile Nnyizinku arumiyeezo.” Aphano Munsa khulawa khumuuza Nnyizinku mattakhuzi ajipwiyeeyo atthu apale.

⁹Nnyizinku khumuuza Munsa yoori: “Woone! Kinttela ojittha nkatthi wa liwiku looriipa yoori atthu awahi okisiila kittakhulanaka weeyo asala ookhupali weeyo khwa mileele.”

Aphano Munsa khumuuza Nnyizinku mattakhuzi ooziweeyo pi atthu apale. ¹⁰Nnyizinku khurutela omuuza theenya Munsa araka: “Olawe vakatthi wa atthu apo, wawaattakatthise leelo na meesho. Yo ana ya ofula kuwo zaya, ¹¹yoori eeye oolikana siikhu ya ttaatthu, maana siikhu ya eto Nnyizinku onttela wiishukha vamwaako Sinaayi, mooshi mweeyo mwimoone. ¹²Otthe mwiinano nkerekhere wa mwaako na owooze atthu yoori: ‘Eeyane phoole ya ohiweli mwaako na ohisapi. Otule anttelaaye osapa mwaako, ona ya wuuliiwa. ¹³Ahiiyevo aninsapaaye na nkhono ila avonyiwe na mawe ama nttetthe, hatha nkhama ntthu ama nyama, ahiiye haayi.’ Ila amana nlope livuma swaafu moote apho pi anttelaavo owela.”

¹⁴Munsa khwiishukhela aphale aariivo atthu apale khuwaattakatthisa na yo khufulaza kuwo zaya. ¹⁵Khuwooza atthu apale yoori: “Mwiiye woolikana ovirisa siikhu ya ttaatthu. Ila ahiiyevo antakhaaye okutthanana muukha awe.”

¹⁶Noocha, siikhu ya ttaatthu khupuwa taari na ozerima, liwiku looriipa khufinikha mwaako na khuvumisiwa nlope channu. Atthu ooshi khuwaapattha woova aphale aarivo. ¹⁷Munsa khuwaalazavo atthu apale aphale vaya yoori akutthanane Nluku, yo khulawa khweemela waattamanana mwaako. ¹⁸Mwaako Sinaayi wooshi weetaaliye loosi, maana Nnyizinku eeshukheliye attaapho na moottho na loosi laya leetta owela nkhama loosi la vanjocho na mwaako wooshi weetta othukumela channu. ¹⁹Ovuma wa nlope weetta ovira otepaka, elottelanaka Munsa khuttakhula, huula ya Nluku khunjipu.

²⁰Nnyizinku khwiishukhela vatulu wa mwaako Sinaayi, khunkhuwela Munsa vatulu attaaphale Munsa khuwelela khulawa. ²¹Nnyizinku khumuuza Munsa yoori: “Wiishukhe wawooze atthu apo yoori ahivikane mwiinano yoori amoone Nnyizinku; nooretta toowo, enkeene antta ofwa. ²²Hatha anamalokozela a tiini amana amwaattamelaka Nnyizinku ana yoojittakatthisa. Amana ahijittakatthisi, Nnyizinku ontta owaatapanya.”

²³Aphano Munsa khumuuza Nnyizinku yoori: “Atthu khanwahi owela vamwaako Sinaayi, maana weeyo waanilikhisiye oraka: ‘Mwirette mwiinano nshini wa mwaako na nitukhuru ottakatthifu.’ ”

²⁴Nnyizinku khunjipu Munsa amuuzaka yoori: “Wiishukhe orutele owela theenya, operekhiwaka ti Haruni. Ila anamalokozela a tiini na atthu ahirukhe mwiinano yoori awelele apha ariivo Nnyizinku, amana aretta toowo Nnyizinku ontta owaatapanya.”

²⁵Aphano Munsa khwiishukha khuwooza atthu apale.

Oruma Khumi

¹Nluku alupa mattakhuzi ooshi apa araka:

²“Miiyo ki Nnyizinku, Nluku awo, kuulaziyeeyo nti wa Misuri ohali waarettiweewo omwiitthwaana. ³Ohiiyane miluku mikina kulukhwa miiyo. ⁴Ohijaattalele sanamu wala ratarato ya etthu ya otulu wala ya vathi ama vathi wa maati. ⁵Ohikokhorele wala ohaaputu, maana Miiyo ki Nnyizinku, Nluku ahintakhaaye miluku mikina; kintakha wiiye waka paasi, kinoonaaye twampi za apaapa na kifikhirelaka twampi zaya khwa aana aya mpakha khapila ya ttaatthu ama yanne ya apale anikitarawaaye, ⁶ila kintthantta na tthakaraka mpakha khapila alufu epile zinikiphetaaye na zinshututelaaye oruma waka.

⁷Ohilupe nzina la Nnyizinku, Nluku awo mahala, maana Nnyizinku khanlawa onlikha ahinhukhumweeni otule anlupaaye nzina lawe mahala.

⁸Wuupuwele Saapatu yoori siikhu ttakatthiifu. ⁹Okhole khaazi siikhu sitha, khwa siikhu etthiipo ona ya okhola khaazi zawo zooshi, ¹⁰ila siikhu ya saapa Saapatu ti yoomwinkha Nnyizinku, Nluku awo, siikhu yaya eti ohikhole hatha khaazi moote, waaza weeyo, mwanawo wa nlume ama wankha, wala mwiitthwaana awo wala njaazi awo, wala nyama zawo wala aletto ariiye nlikokoro mwawo. ¹¹Maana khwa siikhu sitha, Nnyizinku eetta wumpa pinku na vathi, pahari na vitthu zooshi ziriimo, ila Saapatu khuvumula. Paata ya toowo, Nnyizinku khuparikhiya Saapatu ya etile na khuttakatthisa.

¹²Onshitahi papaawo na mamaawo, yoori wiikhale siikhu zawaatta vathi apha, Nnyizinku, Nluku awo awinkhiyeeyo.

¹³Ohuule.

¹⁴Ohiraruwe.

¹⁵Ohiiye.

¹⁶Ohinlokoveze nzaawo.

¹⁷Ohilazele omaashokopho vaje wa nzaawo, wala muukha wa nzaawo, wala amwiitthwaana ama ajaazi awe, wala mompe zawe ama puuru zawe na wala etthu moote etile yiiyiye yawe.”

Atthu a Ezirayiilu wawaapatthiye woova

¹⁸Wakathi atthu apale aari osiilaavo taari na ozerima na ovuma wa nlope na khoona mwaako olazaka loosi, ooshi khusala athukumela mpakha osusela peetiwene. ¹⁹Khumuuza Munsa yoori: “Weeyo ottakhulane ye, fweeyo nintta osiila. Ila Nluku amana attakhulana fweeyo nintta ofwa.”

²⁰Munsa khuwooza atthu apale yoori: “Mwihoove! Nluku aateeliye oweezani, yoori mwisala mwimoova na ooweraweriseni twampi.”

²¹Ila atthu apale nalelo khwiiya peetiwene, Munsa khusala avira aattamelaka liwiku ntthile looriipa aariivo Nluku.

Kano monkoni wa alitaari wa Nnyizinku

²²Nnyizinku khumuuza Munsa yoori: “Owooze meezirayiilu mattakhuzi apa yoori: ‘Mweeyo moona na maasho nanna kittakhulaniyeeyo mweeyo pinkuuni. ²³Mwihaattale miluku za feeta wala miluku za weero yoori mwaaputu mwikilattisanaka miiyo.

²⁴“ ‘Mwikaattalele alitaari wa mattophe mwirettevo twaha ya olukuziwa na zaakha za heeri, pwittipwitthi na mompe zenu wakhula vahali mwinrettaavo nka mwifikhirelaka nzina laka, kintta wuuteelani mweeyo na kuparikhiyeni. ²⁵Amana mwikijekela alitaari wa mawe mwihinjekane mawe ooshijaniwa zaana, eeyaru mawe awaattaliwa saana mwintta onkufurwela. ²⁶Mwihinwele na shikatta alitaari aka amana mwinjekaka, maana mwintta onfulamela.’ ”