Ayeefezu

Warakha

ya Paawulu awaatikhelaka

Ayeefezu

Salamu

¹Miiyo Paawulu, aswihaapa wa Yinsa Al-Masiihu khwa matakhelo a Nluku, kiniwaatikhela warakha eti attakatthiifu na mamuumini khwa Yinsa Al-Masiihu a sitati ya Eefezu.

²Rehema na heeri ya phantte ya Nluku Papeetthu na ya Mbwana Yinsa Al-Masiihu yiiye vamote na mweeyo.

Parakha zanroho ziriyeeyo khwa Al-Masiihu

³Attitthimisiwe Nluku Paapa wa Mbwana eetthu Yinsa Al-Masiihu, aniparikhaniyeeyo nasipu zooshi za parakha za nroho za pinkuuni khwa Al-Masiihu. ⁴Olumwenku ohinompiwe, Nluku anithawula rakuzeene khwa Yinsa yoori niiye attakatthiifu na niiye atthu oohiina paathuli mmakhono mwawe. ⁵Khwa pheta atthomiyeeyo onikaphula yoori niiye aanaawe khwa Al-Masiihu na shawuri zooshapweya za niiya yawe. ⁶Khwa siifwa ya nuuru ya rehema yawe etile aninkhiyeeyo mahala khwa Mphetani awe. ⁷Ye anitaphula koosa zeetthu khwa taamu yawe, ninaaye nswammaha wa twampi khwa maali za rehema ya Nluku, ⁸epile aniittheleliyeeyo fweeyo venkivene khwa ojuwa na akhili zawe zooshi. ⁹Aretta etile atthomiyeeyo na anithoonyeza shawuri za siiri aalakeliyeeyo oretta khwa Al-Masiihu, ¹⁰shawuri zaya epo okusanya wakathi khaamili vitthu zooshi mmakhono wa Al-Masiihu epile ziriiye otulu na vathi. ¹¹Vitthu zooshi zarettiwa khwa shawuri na olakela wa Nluku. Khwa niiya na etile aatakhiyeeyo thanku omwanzo, Nluku anithawula yoori niiyane erathi ya okusanyeya weetthu khwa Al-Masiihu, ¹²yoori fweeyo amwanzo onwejela Al-Masiihu niiye a siifwa ya nuuru yawe. ¹³Wakathi mweeyo mwisiiliyeeyo na khukhupalela nttakhuzi la haakhi, hapari zooshapweya ziwuusuriyeenini, mweeyo mwamatthaniwa khwa Al-Masiihu Rooho Ttakatthiifu etile ye ahitiyeeyo. ¹⁴Ethiito ti yiiyiyeeyo nroromelo wa erathi yeetthu mpakha wookhowa sawasawa wa apale eeyiyeeyo a Nluku, khwa siifwa ya nuuru yawe.

Paawulu oniwaalompela mamuumini

¹⁵Tiito miiyo kiriyeeyo noosiila amini mwiriinaaye khwa Mbwana Yinsa na pheta mwiniwaathonyezaaye attakatthiifu ooshi, ¹⁶akinlikhelela onshukhurwela Nluku khwa mweeyo, na akinuusahawuni amana kilompaka. ¹⁷Kininvekela Nluku wa Mbwana eetthu Yinsa Al-Masiihu, Paapa wa siifwa, yoori awinkheni rooho ya akhili na yoothonyeziwa khwa onjuwa waya saaneene, ¹⁸kinveka yoori Nluku afukule rooho zenu yoori moone nuuru yawe na mwijuwe maali za siifwa yawe, nroromelo opule ookhuweleliyeenini. Theenya yoori mwijuwe nanna ziiyiyeezo zooshapweya parakha awaahitiyeeyo attakatthiifu awe, ¹⁹na miiyo kinlompa yoori mwijuwe nanna ohinlikananiwaayo owula wa owahi ariinaaye khwa fweeyo nikhupaliyeeyo, nkhama etthiipo onkholaazo khaazi vakatthi veetthu khwa owahi wa kuvu zawe. ²⁰Owahi aya opo pu otthuupule onsisimuliyeeyo Al-Masiihu nkhapuri, khunttha nkhono nlume awe attaapho ariivo ye pinkuuni. ²¹Ye ori vatulu wa alokozi ooshi, wa afwalume, owahi na oshintta khwa mazina ooshi, khahiyo nasaapi eti paasi mpakha okhu ninttaawo. ²²Nluku attha vitthu zooshi wiiya vathi wa moolu awe na khumwinkha wiiya eeswa ya vitthu zooshi za ojama wa Nluku. ²³Ojama wa Nluku mwiili wa Al-Masiihu, weetaazaniwa Al-Masiihu, othuuto anniitazaaye vitthu zooshi khwa phantte zooshi.

Wuusurwiwa ntwampi khwa rehema ya Nluku

¹Mweeyo mwaafwiiye mwaasa wa koosa zenu na twampi zenu. ²Etthiipo mwaazowereliyeezo, wakathi mwaari olottelaaye oruma wa olumwenku na owahi wa ofwalume wa rooho ya etulutulu yiiyiyeeyo sheethwani, rooho ethiito eniweettettisaaye apale aniikhalaaye muukhijili. ³Raku fooshi fweeyo naari wiikhala nkhama atthaapo, nirettaka niiya za onaatamu etthu, nilottelaka tuvela zaya na wuupuwela waya. Nkhama akinoko aya, naari atthu yaari onisuhaaye katapu ya Nluku. ⁴Ila mwaasa wa Nluku wiiya thaajiri wa tthakaraka na mwaasa wa pheta khuluyeene ariinaaye na-fweeyo, ⁵khuninkha ohaayi khwa Al-Masiihu, niri woofwa mwaasa wa koosa zeetthu. Khwa rehema ya Nluku moosurukha vamote na Al-Masiihu. ⁶Nluku anisisimula khwa Al-Masiihu na khwa ye aniikhaza puuro za pinkuuni khwa Yinsa Al-Masiihu. ⁷Yoori athoonyeze wakathi ontaaye, maali zihinlikananiwaaye za rehema zawe na athoonyezaka emaani yawe aarina na fweeyo khwa Yinsa Al-Masiihu. ⁸Khwa rehema moosurukha vakatthi wa amini, epo zaya khinlankha khwa mweeyo, tthuvo ya Nluku, ⁹khahiyo khwa khaazi, yoori ahiiyevo mmote anttelaaye ojisifu. ¹⁰Maana naazumpe za wumpiwa ti Nluku khwa Yinsa Al-Masiihu yoori nirette vitthu zooshapweya, epile Nluku atthenkeziyeeyo khapula yoori fweeyo neettettele.

Amalapo na Mayaahuuti akusanyeya khwa nsalapa wa Al-Masiihu

¹¹Nakataalikha, muupuwele yoori thanku ovokoliwa weenu mwaari amalapo, mwariwitthiwaaye ananhikhiriyi pi apale aari ojitthaaye anamakhiriya a mwiili, onrettiwaaye pi makhono eenaatamu. ¹²Muupuwele theenya yoori wakathi aya opule mwaattuwananiye Al-Masiihu, mwaari ophakuwanana khuntti ya meezirayiilu, mwaari ootaraweliwa ahiti ya osiilana, khamwaarina nroromelo wala Nluku muulumwenku. ¹³Raku mwaari peetiwene na Nluku ila apha, khwa okusanyeya na Yinsa Al-Masiihu, mweeyo mwamwaattama khwa taamu ya Al-Masiihu. ¹⁴Maana ye ti heeri yeetthu, othuuto akusanyiyeeyo vitthu piiri khwiiya moote na khupwecha mwiinano waajekiyeeyo wuumani. ¹⁵Eeshisha na mwiili awe kano za oruma khwa nanna yoolotteya, yoori oowiiri ajirette ontthu mpheya eettettisaka heeri, ¹⁶awasiilanisaka na Nluku oowiiri khwa mwiili mmote khwa nsalapa otthuupo, ye atapanya ohisiilani. ¹⁷Etthiipo Yinsa khuta khulaleya hapari za heeri khwa mweeyo mooshi mwaari peetiwene na Nluku na heeri theenya khwa apale aari kharipu na Nluku. ¹⁸Maana khwa ye mweeyo na fweeyo ninaaye ruhusa ya paapa khwa Rooho moote paasi.

¹⁹Nakataalikha, khayi mwa aletto wala atthu oosafiri, mwa anyunti sawasawa na attakatthiifu mwiri phantte ya vaje wa Nluku. ²⁰Mwajekiwa va nchina la maaswihaapa na la manapiyu, na khwiiyana liwe linkhomaazaaye nyuupa, Yinsa Al-Masiihu. ²¹Ye onrettisa nyuupa wiiya yookhomaala na onwulisa nkhama nyuupa ttakatthiifu ya osifwiwamo Mbwana. ²²Khwa ye theenya mweeyo mweeya woojekiwa yoori asala eekhalamo Nluku khwa Rooho Ttakatthiifu.

Khaazi ya Paawulu vakatthi wa amalapo

¹Mwaasa wa ethiito, kininvekela Nluku miiyo Paawulu, kimpattikhanaaye kiri napherezu khwa Al-Masiihu yoori mweeyo mwiiyiye amalapo mwiiye saana, ²weekhweele mweeyo mwinjuwa yoori Nluku, mwaasa wa rehema yawe, akinkha khaazi eti khwa saana yenu mweeyo. ³Nluku akithoonyeza shawuri zawe za siiri na khukitakhela yoori kijuwe, nkhama etthiipo kiwaatikheliyeenini khwa mattakhuzi vattitthiiru. ⁴Amana mwisoma mattakhuzi aya apo, mwintta ojuwa nanna miiyo enikeeleyaazo siiri za Al-Masiihu. ⁵Khaazi yaya eto khenkhiwe ojuwa atthu a raku, ila leelo eti maaswihaapa ttakatthiifu na manapiyu awe athoonyeziwa ti Rooho Ttakatthiifu. ⁶Eto enlupa yoori khwa hapari zooshapweya amalapo anrithi vamote parakha na meezirayiilu, maana atthu a mwiili mmote na anaaye phantte khwa etile Yinsa Al-Masiihu ahitiyeeyo nkatthi wa hapari zooshapweya. ⁷Khwa hapari zooshapweya etthiipo, karetteya wiiya nakhaazi khwa tthuvo ya rehema ya Nluku, akinkha khwa kuvu za owahi ariinaaye. ⁸Keeyaru pure woopushuwa vakatthi wa attakatthiifu ooshi, Nluku akinkha rehema eti ya owaatafusirela amalapo hapari zooshapweya za maali zoohaalakeyi ziriyeeyo wa Al-Masiihu, ⁹na oweeleza atthu ooshi monkoni wa nanna enkholiwaazo siiri eti, Nluku namumpa wa zooshi aavithiyeeyo thanku asulani. ¹⁰Aari otakha yoori khwa ojama wa Nluku, othoonyeze akhili khuluzeene khwa nanna yoofwarikhana ariina Nluku vakatthi wa afwalume na owahi wa pinkuuni, ¹¹epi shawuri Nluku arettiyeeyo, khwa Yinsa Al-Masiihu Mbwana eetthu olumwenku ohinompiwe. ¹²Khwa otule nimpattheliyeeyo otaphuliwa, ninlawa ojithoonyeza omaasho wa Nluku nirina nroromelo nwulweene wa amini khwa ye. ¹³Nakataalikha, kinuuvekelani yoori mwihihuzunikhe khwa nanna kinihoowaazo mwaasa wa mweeyo, maana ohoowa waka miiyo siifwa yenu.

Paawulu oniwaalompela theenya mamuumini

¹⁴Mwaasa wa ethiito, miiyo kinkokhora omaasho wa Paapa, ¹⁵othuuto ojama wooshi waaza otulu mpakha vathi ampwekheraaye mazina a ojama wooshi. ¹⁶Yoori khwa maali za siifwa, awinkheni wiiya ookhomaaziwa nkatthi wa nroho mweenu na owahi wa kuvu wa Rooho Ttakatthiifu. ¹⁷Theenya kinlompa yoori Al-Masiihu apatthe wiikhala nroho mweenu khwa amini, na yoori pheta yiiye mitathaari zenu na nchina lenu. ¹⁸Yoori epatthe oweeleyani vamote na attakatthiifu ooshi pheta ya ethiito, owula waya, olepa waya, chanka yaya na nchina laya, ¹⁹na ojuwa pheta ya Al-Masiihu, enzitaaye ojuwa wooshi, yoori awiitaaleni Nluku saaneene.

²⁰Otule ariina makhaamu ooretta zooshi zawaatta venkivene, zayita epile ninvekaazo ama ninuupuwelaazo khwa owahi onkholaaye khaazi vakatthi veetthu, ²¹asifwiwe ye vakatthi wa ojama wa Nluku na khwa Yinsa Al-Masiihu khwa khapila zooshi, mileele. Amiina!

Okusanyeya wa amini

¹Tiito kinuuvekelanini, miiyo kiiyiye napherezu khwa Mbwana, yoori mwiikhale khwa mwentto woosuhi khwa okhuweliwa otthuupo mwipwekhereliyeeyo. ²Mwiiye oojipushuwisa, ookemaani, oovilela, mwihurumiyanaka mmote na nzeenu na oophetana. ³Mwijilipise yoori mweekese othokorela okusanyeya wa Rooho Ttakatthiifu khwa ophakanyeya wa heeri. ⁴Mwiili mmote paasi na Rooho Ttakatthiifu eri moote paasi, nkhama etthiipo mwikhuweliweeyo khwa nroromelo mmote. ⁵Mbwana mmote paasi, amini eri moote paasi, woosiwa ori mmote paasi, ⁶Nluku mmote na Paapa wa atthu ooshi, othuuto eeyiyeeyo vatulu wa zooshi, ori khwa ooshi na onkhola khaazi khwa ooshi.

⁷Ila rehema enkhiwa wakhula mmote wa fweeyo khwa khiima ya tthuvo ya Al-Masiihu. ⁸Tiito yaatikhiwa yoori:

“Wakathi aweliyeevo pinkuuni,

awaathuula anamafukiwa awaatta

na khuwenkha tthuvo atthu.”

⁹Maana aya niini enraaye ye awela, ehiriwaka yoori theenya eettiye wiishukhela nkhilintti ya olumwenku? ¹⁰Otule eeshukhiyeeyo ti othuuto aweliye otulu wa pinku yooshi yoori eetaazewo vitthu zooshi. ¹¹Othuuto khuwenkha akina owaaswihaapa, akina onapiyu, akina onamalaleya, akina onshuki na onamanozela, ¹²awaattalelelaka attakatthiifu khaazi ya Mbwana, yoori mwiili wa Al-Masiihu ojekeye. ¹³Mpakha fooshi nifiyelele okusanyeya wa amini na onjuwa saaneene Mwaana wa Nluku, yoori niwahi okhomaala nifiyelelaka okhamilikha khwa Al-Masiihu. ¹⁴Aphano nihiiye theenya nkhama asimaana oothuuliwa ti mawipi, wala weeseleliwa okhuno na okhule ti pheevo ya wakhula mwentto, ohata na olavilavi wa atthu oovonyisana. ¹⁵Olikha toowo, nilottaka haakhi khwa pheta, ninwula khwa zooshi na otule eeyiye eeswa, Al-Masiihu. ¹⁶Ye ti arettisiyeeyo yoori mwiili wiiye wookusanyeya saaneene, na phantte zooshi zipharaane khwa okusanyiwa vamote. Na khwa etthiipo, wakhula phantte ekholaka khaazi yooshapweya, na mwiili wooshi onwula na onjitaphula nkatthi wa pheta.

Ohaayi wa raku na ohaayi mpheya

¹⁷Na kiniwuuzani khwa nzina la Mbwana yoori: mwihiiye nkhama amalapo, maana wuupuwela waya khuna fwayita. ¹⁸Weeleyiwa waya wattiyeleleya na ophakuwanana ohaayi wa Nluku mwaasa wookhijili ariinaayo khwa ozivala wa rooho zaya. ¹⁹Yo yawaashikha haaya na ajittha muuhuuzeyi, omaashokopho na anretta vitthu zooshi zootakhala.

²⁰Ila khahiyo toowo nanna mwinozeliweeyo khwa Al-Masiihu, ²¹nkhama khweele mwasiila alupiwaka na khusomisiwa khwa haakhi eriiyeeyo wa Yinsa. ²²Khwa mwentto wa meekhazi apale a raku, mwasomisiwa olikha ontthu opule wa raku, woojitapanya khwa tuvela zenu zoohata, ²³enhithajiya yoori rooho zenu na mmwishwa mweenu wiiye woozukulisiwamo saaneene, ²⁴na mwiiyane ontthu mpheya, wawumpiwa woolattanana Nluku khwa shariya na ottakatthifu wa khweele.

²⁵Nakataalikha, wakhula mmote wa mweeyo mwina yoolikha ohata, mwisala mwittakhula haakhi na azeenu, maana fooshi na a mwiili mmote. ²⁶Mwikatipukhe, ila mwihikose, owiisheleni okatipukha waya opo njuwa lihinatupweele. ²⁷Mwihimwinkhe kiphenyo sheethwani. ²⁸Otule aari nantarawu alikhe wiiya, ila arette etthu yooshapweya na makhono awe yoori apatthe etthu yoowaamela apale oothowiwa.

²⁹Nkhanyo mweenu lihilankhemo hatha nttakhuzi limote lootakhala, ila alankhemo mattakhuzi ooshapweya anwahaaye owaajeka azeenu khwa nanna enihithajiyaaye, yoori litane rehema vakatthi wa atthu apale ansiilaaye. ³⁰Mwihiphirise Rooho Ttakatthiifu ya Nluku, ethiito mwimatthaniweeyo enlawaaye mpakha siikhu ya wookhowa weenu. ³¹Mwiwerawere wiiphiiriwa wooshi, katapu, okatipukha, ojipwana, okufuru na vitthu zooshi zootakhala. ³²Mwiiyane emaani na azeenu, ovilelana mmote na nzeenu, oswaamihana nkhama etthiipo Nluku ooswamihiyeenini khwa Al-Masiihu.

Ohalaali wa ohaayi

¹Nakataalikha, mwiiye anamweezela a Nluku nkhama aana oophetiwa, ²na mwiikhale khwa pheta nkhama etthiipo Al-Masiihu aniphetiyeezo na khuleva ohaayi awe mwaasa wa fweeyo, khujiretta wiiya zaakha na twaha ya arufu ya ontuvela Nluku. ³Vakatthi venu ehiiyevo khaapa twayifu, wala etthu moote yootakhala ama omaashokopho; maana zooshi epo khahi zooshapweya vakatthi wa attakatthiifu. ⁴Wala mwihisala mwipiya mwaasa wootakhala, mattakhuzi enu ahisala eeya ohifwayi ama oophuja epo zaya khiniweezani, mattakhuzi enu ana ya wiiya onshukhurwela Nluku.

Wiikhala nnuuru

⁵Maana mweeyo mwinjuwa yoori khina nshawi akhapa mmote, ama namaretta zootakhala, mpakha na apa ariina omaashokopho opu wiiyiyeeyo sanamu, apo aya khana phantte muufwalume wa Al-Masiihu na Nluku. ⁶Ahiiyevo hatha ntthu mmote antakhaaye wuuttettekhani na mattakhuzi ohiivo, maana pi mattakhuzi atthaapo antanaaye katapu ya Nluku khwa apale aniikhalaaye muukhijili. ⁷Nakataalikha, mwihijikusanyane apo aya. ⁸Maana raku mwaari atthu a n’yiiza, ila aphano mwa nuuru khwa Mbwana. Meekhazi enu eeye nkhama aana a nnuuru. ⁹Maana mishumo za nnuuru zintana okemaani, shariya na haakhi. ¹⁰Na mwijinozele othawula etile enintuvelaaye Nluku. ¹¹Mwihijivuluwelise nkhaazi zihiniiyanaaye mishumo, khaazi zaya epo za n’yiiza mwitiise nnuuru. ¹²Maana vitthu anrettaazo amana eetthaala, hatha empatthisa haaya olupa. ¹³Ila, zooshi epile zinsaruleliwa nnuuru zinzukuluwa khwiiya zawooneya. ¹⁴Maana nuuru ti emmwasikhelaaye vitthu zooshi. Tiito nttakhuzi la Nluku linlupaaye yoori:

“Olankhe oo weeyo onlalaaye,

osisimuwe vakatthi wa atthu ofwa,

Al-Masiihu ontta wuumwasikhela.”

¹⁵Mwiiyane phoole na menttezi enu, mwihiikhale nkhama alolo, ila mwiikhale nkhama anaakhili, ¹⁶mwikholelelaka saaneene wakhula kiphenyo mwimpatthaaye, maana siikhu niriinaazo pi zootakhala. ¹⁷Nakataalikha mwihiiye alolo, mweekese ojuwa niiya ya Nluku. ¹⁸Mwihinywe viinyu. Ohapaliwa ontotha pala, ila mwilikhe Rooho Ttakatthiifu ewiitaaleni. ¹⁹Mwisala mwilipiselana na mattakhuzi ari nzaapuura, kaswiita na maliipo asiifwa, mwinsifwaka Mbwana nroho mweenu. ²⁰Woohilikheleli onshukhurwela Nluku Paapa khwa zooshi, khwa nzina la Mbwana eetthu Yinsa Al-Masiihu.

²¹Mwisala mwishututelana wakhula ntthu na nzaawe mwaasa wa shitaha mwiriinaaye na Al-Masiihu.

Mwentto wa anamaralana

²²Aakha, mwiwaashitahi amanna zenu nkhama etthiipo mwininshututelaazo Mbwana. ²³Maana nlume eeswa ya muukha, nkhama etthiipo Al-Masiihu eeyiyeeyo eeswa ya ojama wa Nluku, wiiyiyeeyo mwiili awe, na eeyiyeeyo ti Namuusuru aya. ²⁴Khwa nanna etthiipo ojama wa Nluku oninshututelaazo Al-Masiihu, na aakha ana ya owaashututela amanna zaya khwa zooshi.

²⁵Alume, wakhula nlume ona ya ompheta muukhaawe nkhama etthiipo Al-Masiihu aphetiyeezo ojama wa Nluku, khuleva ohaayi awe mwaasa wa ojama wa Nluku otthuupo, ²⁶yoori atwahareshe attakatthisaka, oosaka na maati khwa nttakhuzi lawe, ²⁷yoori wajithoonyeze khwa ye nkhama ojama wa Nluku woohiina hatha malepa wala jaraha ama vitthu kiina zootakhala, ila ttakatthiifu woohiina tafwawuthi. ²⁸Etthiipo naye alume ana yompheta muukha aya nkhama etthiipo amphetaazo mwiili aya. Ntthu animphetaaye muukha awe onjipheta mweenyewe. ²⁹Maana khaavo ntthu mmote aniinaaye mwiili awe, ila ontta ojisa na oshuka nkhama etthiipo Al-Masiihu anshukaazo ojama wa Nluku, ³⁰maana fweeyo na atthu ninrettaaye phantte ya mwiili awe. ³¹“Tiito nlume oninlikha papaawe na mamaawe khukusanyeya na muukha awe, oowiiri khuretteya wiiya mwiili mmote paasi.” ³²Eto siiri khuluyeene, ila miiyo kininlupa Al-Masiihu na ojama wa Nluku. ³³Nakataalikha, wakhula mmote wa mweeyo ona ya ompheta muukha awe nkhama etthiipo anjiphetaazo mweenyewe, na aakha ana ya owaakhola amanna zaya na shitaha khuluyeene.

Menttezi a apaapa na aana

¹Aana, mwiwaashututele apapazenu khwa Mbwana, maana etthu yaya eto shariya. ²“Onshitahi paapa na maama.” Opo oruma wa mwanzo oriinaaye ahiti: ³“Orette etthiipo yoori vitthu zooshi ziweettettele saana na wiiyane mansha awaatta voolumwenku apha.”

⁴Apaapa, mwihiweephirise aana enu, ila mwiwaalele na suluhu na owaalaka khwa Mbwana.

Menttezi a viitthwaana na ambwana zaya

⁵Amwiitthwaana, mwiwaasiileze ambwana zenu vathi apha na shitaha na owoova, na rooho ya ookhweele, nkhama mwininrumeyelaaye Al-Masiihu. ⁶Khahiyo owaashututela amana eeya attaapho paasi yoori mwipatthe owaatuvelisa, ila mwirette zooshi mwaasa wa wiiya amwiitthwaana a Al-Masiihu, mwirettaka na rooho yenu matakhelo a Nluku. ⁷Mwiwaarumeyele apale mwiniwakholelaaye khaazi khwa rooho yooshapweya, nkhama mwihiniwaarumeyelaaye atthu, muupuwe nkhama mwininrumeyelaaye Mbwana. ⁸Maana mwinjuwa yoori Mbwana onteela oninkha phakari khwa wakhula etile ntthu anrettaaye yooshapweya, waaza mwiitthwaana mpakha otule woohiiyi mwiitthwaana.

⁹Mweeyo mwiiyiyeeyo ambwana, mwiwaatthantte amwiitthwaana enu woohiwaatuturushi, muupuwelaka yoori mweeyo na yo Mbwana enu mmote na ori pinkuuni khaniwaafwarikhanisa atthu.

Zaana za Nluku

¹⁰Omwiisho waya, mwiiye wookhomaala khwa Mbwana na kuvu za owahi nwulweene ariinaaye. ¹¹Mwiwale zaana zooshi za Nluku, yoori mwiiye wookhomaala mwihikwisiwe ti miraakho za Sheethwani. ¹²Maana viittha yeetthu fweeyo khahi khwa atthu, ila ninuumanana owahi na ofwalume, ninuumanana owahi onshinttaaye olumwenku wa yiiza na kuvu za rooho zootakhala khwa puuro za pinkuuni. ¹³Tiito kiniwuuzani yoori mwijiwalise zaana zooshi za Nluku, yoori mwipatthe ovilela amana efiya siikhu za kuvu zootakhala, paata ya oretta zooshi mwihikwe. ¹⁴Khwa etthiipo, mwiiye woolikana, mwiwale nzako wa haakhi, na mwiwale jaketa ya shariya. ¹⁵Mwiwale shapatthu zoolikana khwa olaleya hapari za heeri. ¹⁶Olikha toowo, mwirumeyele khawo ya amini, khwa ethiito mwinwahi ofuja mikhwenyenye zooshi zoojakhuliwa za ntakhali. ¹⁷Mwiwale koofiya ya nusura na mwirumeyele phanka ya Rooho Ttakatthiifu yiiyiyeeyo nttakhuzi la Nluku. ¹⁸Wakhula wakathi mwisala mwilompa khwa Rooho Ttakatthiifu na ojeekesela woohilikheleli na mwiwaalompelaka attakatthiifu ooshi. ¹⁹Na theenya mwikilompele yoori amana kittakhulaka kipatthe ominyala na kisala kinkhiwa mattakhuzi aya, yoori ejuwiwe siiri za hapari zooshapweya. ²⁰Kafukiwa na makwinjili mwaasa wa onakhaazi wa hapari zooshapweya, mwikilompele yoori kiiye woominyala kisala kilaleya khwa nanna kiriinaazo ya olupa.

Salamu za wiishela

²¹Tikiiku, ttwiiyetthu na jiraani eetthu, karumeya wa waamineya wa Mbwana eetthu, othuuto ontta wuuthatelelani zooshi, yoori mweeyo mwijuwe nanna kiriizo enasaapi eti na etthu kinrettaaye. ²²Ye kanruma ota okho mwiriiwo yoori ate oojuwiseni khiima kiriizo na ataaka wuulipiselani.

²³Heeri yiiye vamote na attwi ooshi, na pheta na amini yoolankha wa Nluku Paapa na wa Yinsa Al-Masiihu. ²⁴Rehema yiiye vamote na ooshi apale animphetaaye Mbwana eetthu Yinsa Al-Masiihu na pheta khaamili.