Akoloosu

Warakha

ya Paawulu awaatikhelaka

Akoloosu

Salamu

¹Miiyo Paawulu, aswihaapa wa Yinsa Al-Masiihu khwa matakhelo a Nluku, kiniwaatikhela warakha eti vamote na ttwiiyaku Timootiyu, ²attakatthiifu na attwi awaamineya khwa Al-Masiihu aniikhalaaye Koloosu:

Rehema na heeri ya phantte ya Nluku Papeetthu, yiiye vamote na mweeyo.

Oshukhurwela

³Wakhula wakathi nininshukhurwela Nluku, Paapa wa Mbwana eetthu Yinsa Al-Masiihu, amana nuulompelakani mweeyo. ⁴Maana ninsiila elupiwaka amini mwiriinaaye khwa Yinsa Al-Masiihu na pheta mwiriinaaye khwa attakatthiifu ooshi, ⁵mwaasa wa nroromelo mwipweheliweeyo pinkuuni. Otthuupo mweeyo mwisiiliyeeyo khwa nttakhuzi la haakhi, hapari zooshapweya ⁶zuufiyeliyeenini mweeyo. Hapari zooshapweya mwipwekhereliyeeyo eniima mishumo na emwazeyele olumwenku wooshi. Etthiipo erettikhaniyeezo khwa mweeyo, thanku siikhu mwisiiliyeeyo elupiwaka monkoni wa rehema ya Nluku na mwajuwa wa khweelevo. ⁷Mweeyo mwanozeliwa ti Epaafara, jiraani eetthu ninkholanaaye khaazi, karumeya wa waamineya wa Al-Masiihu khwa mweeyo, ⁸othuuto anuuziyeeyo pheta mwiriinaaye mweeyo Nroho.

Paawulu oniwaalompela akoloosu

⁹Khwa ethiito, thanku siikhu nisiiliyeeyo, khanilikheleleeni wulompelani mweeyo na oveka yoori mwiiye awiitaala ojuwa wooshi wa niiya ya Nluku, na akhili zooshi na weeleyiwa wa nroho. ¹⁰Na etthiipo, mwiwahi wiikhala nanna ensuhaaye khwa Mbwana na mwirettaka etile enintuvelaaye, mwiimaka mishumo zooshi zooshapweya na mwiwulaka khwa ojuwa wa Nluku. ¹¹Nininvekela Nluku yoori mwikhomaazaniwe owahi wooshi, khwa kuvu za siifwa yawe, yoori mwiiyane nthiti looshi na ovilela. ¹²Ninshukhurwele Paapa na furaha, aninkhiyeeyo makhaamu a oretta phantte ya erathi ya attakatthiifu muufwalume wa nuuru. ¹³Ye anikaphula nkatthi wa oshintta wa yiiza khunittha muufwalume wa Mwanawe wompheta wawe, ¹⁴ye ti anikaphuliyeeyo, na khwa othuuto ti eswamihiweeyo twampi zeetthu.

Omwanzo wa Al-Masiihu

¹⁵Ye ratarato ya Nluku woohooneyi,

omwanzo wa vitthu zooshi za wumpiwa.

¹⁶Maana khwa ye zompiwa vitthu zooshi,

pinkuuni na vathi, za wooneya na zoohooneyi,

waaza khukulu, yenzi, owahi ama ofwalume;

zooshi zompiwa khwa ye na pi za awe.

¹⁷Ye ti tthakuzi wa vitthu zooshi,

khwa ye zooshi zeeyavo.

¹⁸Ye eeshwa ya mwiili wiiyiyeeyo ojama wa Nluku,

waaza na omwanzo vakatthi wa ananfwa,

yoori eeye nwulu khwa zooshi.

¹⁹Maana Nluku oona oshapweya

wiiyana ephattu yawe yookamilikha khwa mwanawe,

²⁰na khwa ye ajisiilanisana vitthu zooshi,

waaza epi ziriiye vathi mpakha epi ziriiye pinkuuni,

atthaakavo heeri khwa taamu yawe etile yiittikhiyeeyo vansalapa.

²¹Raku mweeyo mwaari oophakuwanana Nluku, na mwaakhili mweenu mwaari maatuwi mwaasa wa menttezi enu ootakhala. ²²Ila aphano Nluku ajisiilanisana vitthu zooshi, khwa ofwa wa Mwanawe, yoori mwajithoonyeze omaasho wawe mwiri attakatthiifu oohiina hatha paathuli na ootaphuliwa khwa wakhula nanna ya olokoveziwa. ²³Ila enihithajiya wiiya nchina lookhomaala na olipalipa khwa amini, woohiphakuwanani nroromelo wa hapari zooshapweya, epile mwisiiliyeezo na zilaleyeliweeyo atthu ooshi ari vathi. Pi hapari zooshapweya etthiipo miiyo Paawulu kiretteyiyeeyo okarumeya.

Khaazi ya Paawulu khwa ojama wa Nluku

²⁴Aphano kinfurahi khwa ohoowa waka khwa mweeyo, na kinlikanisela mmwiili mwaka etile ensalaaye khwa ohoowa wa Al-Masiihu, zwaamu ya mwiili awe, wiiyiyeeyo ojama wa Nluku. ²⁵Khwa otthuupo miiyo karetteya wiiya karumeya khwa khaazi Nluku akinkhiyeeyo ya wuuthoonyezani mweeyo saaneene nttakhuzi lawe, ²⁶siiri etthiipo zaari zoovitheya raku na khwa khapila, ila aphano athoonyeziwa attakatthiifu awe. ²⁷Shawuri ya Nluku ti yoori amalapo ajuwe maali ya siifwa ya siiri eto, eeyiyeeyo Al-Masiihu khwa mweeyo, nroromelo wa siifwa.

²⁸Khwa etthiipo fweeyo nininlaleya, nitumerelaka na ninsomisaka wakhula ntthu na akhili zooshi, yoori nawaathonyeze atthu ooshi ari ookamilikha khwa Al-Masiihu. ²⁹Tiito miiyo kinjilipisa, kuumanaka khwa kuvu zawe, enkholaaye khaazi woowahivo khwa miiyo.

Niiya ya Paawulu khwa akoloosu

¹Kintakha yoori mweeyo mwijuwe saaneene khwa khiima kinjilipisaazo zwaamu yenu mweeyo na khwa apale ariiye Lawotiseeya na apale ooshi ahinkijuwaaye kimweenyeweene. ²Kinjilipisa yoori yo eeye ookhomaaziwa nroho mwaya, akusanyeye khwa pheta na apatthe maali zooshi za weeleyiwa wookhamilikha, yoori ajuwe saaneene siiri ya Nluku, yoori ti Al-Masiihu. ³Majuju ooshi, a akhili na a ojuwa avitheya khwa ye. ⁴Miiyo kiniwuuzani epo yoori ahiiyevo antakhaaye wuuhatani na mattakhuzi olattanana oshapweya. ⁵Maana, keeyaru pure peetiwene khwa mwiili, kiri vamote na mweeyo khwa rooho. Na kinfurahi khwa owoonani nanna mwinikhalaazo wookusanyeya na nanna eriizo yookhomaala amini mwiriina khwa Al-Masiihu.

Ohaayi woosiilana khwa Al-Masiihu

⁶Nakataalikha, nkhama etthiipo mweeyo mwimpwekhereliyeeyo Yinsa Al-Masiihu Mbwana, mwiikhale khwa osiilana na ye, ⁷wookheyiwa na woojekiwa khwa ye, ookhomaala khwa amini nkhama mwisomisiweezo, mwenkezaka onshukhurwela Nluku.

⁸Mwiiyane phoole yoori ahiiyevo anttelaaye wuurettani oviitthwaana mwaasa wa masomi oohiina fwayita na oottettekha, anlankhaaye khwa thwapiya za oonaatamu na yaazo yoolankha voolumwenku attaapha, zohiiyi khwa Al-Masiihu.

⁹Maana khwa Al-Masiihu, nkhama pinaatamu, eri khwa ye ephattu yookamilikha ya Nluku, ¹⁰mwaasa wa wiiya khwa ye, eeyiyeeyo eeshwa ya owahi wooshi na ofwalume, mweeyo mwapattha okhamilikha khwa zooshi. ¹¹Khwa ye theenya mweeyo mwakhiriya, woohiiyi nkhama okhiriya wa orettiwa pi makhono a enaatamu, ila okhiriya orettiwe ti Al-Masiihu, otthuupo onitapuliyeeyo khwa owahi wa ephattu ya twampi. ¹²Epo zarettikhana paata ya mweeyo ozikhaniwa Al-Masiihu khwa njampo la woosa, na mwasisimuliwa na ye khwa amini ya owahi wa Nluku opule onsisimuliyeeyo muufwa.

¹³Wakathi mweeyo mwafwiyeevo khwa twampi zenu na muuhikhiriyi wa mwiili enu, Nluku awinkhani ohaayi mpheya vamote na Al-Masiihu. Ye aniswaamihi koosa zeetthu zooshi, ¹⁴Nluku afuja thamani ya teeni yeetthu, ethiito yaari oninkhaaye paathuli nkhama etthiipo enrumaazo kano. Ye khulazavo teeni yaya eto, akhomelaka vansalapa, ¹⁵na paata ya oshintta owahi na ofwalume, khuretta nsapo vamwanttiwa, ashinttaka khwa epo zaya vansalapa.

¹⁶Nakataalikha, mwihinlikhelele ntthu wuuphukani mwaasa wa etthu yoonywiwa wala yoojiwa, ama monkoni wa njampo la ntiini, njampo la mweezi mpheya ama siikhu ya saapatu. ¹⁷Maana zooshi epo mwiivuuli wa vitthu zaari weettelaaye ota; ila khweele yaya empattikhana khwa Al-Masiihu. ¹⁸Mwihinlikhelele ntthu onintuvelaaye ojipushuwisa woovonyeya na khwa waaputu malayikha wuukarawelani opattha tthuvo. Ntthu aya oto onthatela saaneene jozi zawe, na akhili zawe za onaatamu enimwinkha ojikhupali. ¹⁹Ntthu nkhama toowo attuwanana Al-Masiihu otule eeyiyeeyo eeshwa, khwa ethiito mwiili wooshi, onleliwaaye na onkusanyiwaaye khwa phantte zoofwarikhana, entana owula Nluku aninkhaaye.

²⁰Etthiipo mwifwiyeeyo khwa Al-Masiihu mwafwa khwa yaazo yoolankha voolumwenku attaapha, mwihiikhale nkhama atthu a voolumwenku, mwisiilezaka nyiikho zaya epi: ²¹“Mwihisape! Mwihootele! Mwihikhole!” ²²Nyiikho zaya epo zooshi zinthoonya vitthu zinaashikhaaye, maana zinlankha khwa oruma na masomi a anaatamu. ²³Nyiikho zaya epo, weekhweele, zinlattanana akhili na aputu yoovonyeya, ojipushuwisa woovonyeya, ojawuri khwa mwiili. Ila zooshi epo khina hatha fwayita monkoni wa oshintta meekhazi ootakhala a onaatamu.

Onozeliwa monkoni wa meekhazi ttakatthiifu

¹Nakataalikha, nkhama etthiipo mweeyo mwisisimuwiyeeyo khwa Al-Masiihu, mweekese vitthu ziiyiye za otulu, ottuukho eekhaliyeeyo Al-Masiihu nkhono nlume wa Nluku. ²Wuupuwela weenu wiiye wa vitthu za otulu, ohiiye wa vitthu za vathi. ³Maana mweeyo mwafwa, na nasaapi ohaayi enu wavithiwa ti Al-Masiihu khwa Nluku. ⁴Al-Masiihu, otule eeyiye ohaayi enu, amana athoonyeziwa, aphano mweeyo theenya mwinlawa mwathoonyeziwe na ye mu ottitthima mwawe.

⁵Etthiipo, muule zooshi epile ziiyiye za ephattu yenu ya vathi: khaapa twayifu, ojafu, tuvela zootakhala na omaashokopho wiiyiyeeyo sanamu. ⁶Mwaasa wa vitthu etthiipo, enta katapu ya Nluku khwa apale aniikhalaaye nkatthi wookhijili. ⁷Epo zaya mweeyo mwaari oretta raku, maana mwaazoweriye wiikhala khwa etthiipo. ⁸Ila aphano mwanswi vitthu zaya epo zooshi: katapu, wiiphiiriwa, otakhala rooho, mattukhano, na mattakhuzi ootakhala a nkhanyo mweenu. ⁹Mwihihatane mmote na nzeenu, maana mweeyo mwavula ontthu opule wa raku na zowera zaya, ¹⁰na mwawala ontthu mpheya, onzukulisiwaaye khwa ojuwa wa ratarato ya otule amumpiyeeyo. ¹¹Khwa ohaayi opu mpheya khawiivo ofwarikhana khwa amalapo na mayaahuuti, ookhiriya na oohikhiriyi, woosilimu wala woohisilimu, mwiitthwaana na wootaphuliwa, ila Al-Masiihu zooshi na ori khwa atthu ooshi.

¹²Nakataalikha, nkhama atthu oothawuliwa a Nluku, attakatthiifu na oophetiwa, mwijiwalise huruma yawaatta, emaani, ojipushuwisa, ojiitthaaza na ovilela. ¹³Mwivilelane mmote na nzeenu, mwiswaamihane mmote na nzeenu amana ntthu eeyana nlattu na nzaawe. Nkhama etthiipo Mbwana oswaamihiyeeni, etthiipo theenya mwiswaamihane. ¹⁴Khwa zooshi epo mwijiwalise pheta, maana ti ethiito ennikusanyaaye wookhaamilikhavo.

¹⁵Yoori heeri ya Al-Masiihu yeettettise rooho zenu, maana mweeyo mwakhuweliwa yoori mwiikhale khwa heeri nkhama kifunko za mwiili mmote. Na mwiiye atthu ooshukhuru. ¹⁶Hapari za Al-Masiihu ziikhale saaneene nroho mweenu, mwisomisane na mwilakane mmote na nzeenu na akhili zooshi mwiipaka zaapuura, kaswiita na maliipo a siifwa na onshukhurwela Nluku nroho mweenu. ¹⁷Zooshi mwinrettaazo, waaza mattakhuzi ama khwa khaazi, mwirette zooshi khwa nzina la Mbwana Yinsa, khwa ye mwinshukhurwele Nluku Paapa.

Nanna ya wiikhala vamote

¹⁸Mweeyo aakha, wakhula mmote anshitahi mannawe, nkhama entakhaazo khwa otule ankhupaliyeeyo Mbwana.

¹⁹Mweeyo alume, wakhula mmote amphete muukha awe na mwihiwatthantte na katapu.

²⁰Mweeyo aana, mwiwaasiileze apapazenu khwa zooshi, maana eto enintuvela Mbwana.

²¹Mweeyo apaapa, mwihiweephirise aaneenu, yoori ahitteettheye.

²²Mweeyo amwiitthwaana, mwiwaasiileze ambwana zenu a vathi apha khwa zooshi, khahiyo paasi yoori mwiwaatuvelise amana eeya attaapho, ila na rooho ya ookhweele, mwaasa wa omoova Nluku. ²³Zooshi mwinkholaaye, mwikhole khwa rooho yenu yooshi, nkhama mwininrumeyelaaye Mbwana, woohiiyi khwa anaatamu, ²⁴mwijuwaka yoori mwinteela opwekhera phakari ya erathi khwa Mbwana, maana mwininrumeyela Al-Masiihu, Mbwana. ²⁵Ila otule anrettaaye vitthu zootakhala, onteela opwekhera phakari khwa vitthu zootakhala epile anrettaazo. Mbwana khanteela onthawula ntthu.

¹Mweeyo ambwana, mwiwenkhe amwiitthwaana enu etile yiiyiye ya shariya na yoolotteya, mwijuwaka yoori na mweeyo theenya mwinaaye Mbwana pinkuuni.

Onozela nkina

²Mwikhanyarele olompa, mwiiye oojisiileza na ooshukhuru. ³Mwinilompele fweeyo theenya, yoori Nluku anifukulele milako khwa hapari zawe, yoori niwahi olaleya siiri za Al-Masiihu, etthiipo kifukeliweeyo. ⁴Mwilompe yoori miiyo kiwahi wuujuwisani saaneene khwa nanna kiriina ya oretta. ⁵Mwiiye a akhili khwa menttezi enu khwa atthu apale a oje; nrumeyele channu wakhula kiphenyo mwimpatthaaye. ⁶Ottakhula weenu wiiye wootuva, woolukiwa mwiinyu, yoori mwijuwe nanna ya onjipu wakhula ntthu.

Salamu zawiishela

⁷Tikiiku onteela owuuzani vitthu zooshi monkoni wa miiyo. Ye ttwiiyetthu nininphetaaye, karumeya wa waamineya na nshirikha nkatthi wa khaazi ya Mbwana. ⁸Miiyo kinuuperekhezani mweeyo haaswahaaswa yoori mwijuwe zooshi zinnivirelaazo na yoori ye ookhomaazeni nroho mweenu. ⁹Ye onta na Oneesimu, ttwiiyetthu wa waamineya na mphetani, eeyiyeeyo mmote wa mweeyo. Yo anteela wuuthatelelani zooshi zinrettikhanaaye okhuno.

¹⁰Arishitaruku, nshirikha aka wa nkalapooso, omperekha salamu na theenya Maaruku nshuwani wa Baranabe. Mweeyo mwapwekherela onozeliwa ti Maaruku, na amana ye ata wuuthotolani, mwimpwekherele. ¹¹Yuzuwe, aniitthiwaaye Nashariya naye omperekha salamu. Apo paasi pi mayaahuuti akhupaliyeeyo kinkholanaaye khaazi khwa ofwalume wa Nluku. Yo anikilipisela channu. ¹²Epaafara, eeyiyeeyo mmote wa mweeyo na karumeya wa Al-Masiihu Yinsa, omperekha salamu. Ye onvira oomanaka nkatthi wa lompa khwa mweeyo, yoori nkhama etthiipo mwiiyiyeeyo atthu ookhomaala na ookhupali saaneene, mwivire mwikhomaalaka khwa matakhelo ooshi a Nluku. ¹³Khwa Epaafara kinlaza oshaahiti yoori onjilipisa venkivene khwa mweeyo na khwa apale ari Lawotiseeya na Herapooli. ¹⁴Luuka, nfirimeero nininphetaaye, na Teema anuuperekhezani salamu. ¹⁵Mwiwenkhe salamu attwi a sitati ya Lawotiseeya, na theenya Niifwa na ojama wa Nluku onkusanyeyaaye owawe.

¹⁶Paata ya osoma warakha eti vakatthi venu, mwiperekhe esomiwe theenya khwa ojama wa Nluku wa Lawotiseeya, na mweeyo theenya mwisome warakha yoolankha Lawotiseeya.

¹⁷Mwimuuze Athipu yoori: “Eeyane phoole khwa weettettisa khaazi mwipwekhereliyeeyo khwa Mbwana.”

¹⁸Miiyo, Paawulu, kinaatikha salamu epi kimweenyewe na nkhono aka. Mwifikhiri ofukiwa waka. Rehema yiiye vamote na mweeyo.