Khaazi za Maaswihaapa

Khaazi za Maaswihaapa

Oweziwa wa Yinsa

¹Jiraani aka Tiyoofilu, hapari zaka za mwanzo kaatikha kilupaka monkoni wa zooshi epile Yinsa aarettiyeezo na asomisiyeeyo, ²mpakha siikhu aweziweevo pinkuuni. Khuwenkha oruma khwa owahi wa Rooho Ttakatthiifu maaswihaapa awathawuliyeeyo. ³Paata ya ohoowa na ofwa, Yinsa aajithoonyeziye wiiya haayi khwa maaswihaapa awe nanna nannazene zoohikheeteyi yoori ori haayi. Khuwaapuwelela khwa siikhu arupayiini awoozaka monkoni wa ofwalume wa Nluku. ⁴Siikhu moote eettaka oja na yo, Yinsa khuwaaruma yoori: “Mwihileewo Yeruzaleemu, mwiwejele etile Paapa ahitiyeeyo, ethiito miiyo kiwuuziyeenini mweeyo. ⁵Maana Yaahaya awoosani na maati, ila nkatthi wa siikhu vattitthiiru mweeyo mwinteela woosiwa na Rooho Ttakatthiifu.”

⁶Aphano apale aathukumananiyeeyo khumuuzela yoori: “Mbwana, wakathi aya pu otthuupo onttelaaye orutisela ofwalume khapila ya Ezirayiilu?”

⁷Yinsa khuwaajipu yoori: “Khinuuhithajiyani ojuwa wakathi ama siikhu Paapa atthomiyeeyo na ofwalume awe. ⁸Ila amana Rooho Ttakatthiifu ewiishukelani mwinteela winkhiwa owahi, mwiiye mashaahiti aka, waaza Yeruzaleemu na Yudeya yooshi na Samariiya mpakha ohali wiisheliyeewo olumwenku.”

⁹Paata ya olupa mattakhuzi apale, khuweziwa pinkuuni eettaka omoona na khupuwa liwiku khunkhutela. ¹⁰Nalelo ari wookhontola maasho aya eekesaka otulu, Yinsa eettaka owela, khupuwa alume awiri awaliye kuwo zoolakala aphale aarivo yo. ¹¹Khuwooza yoori: “Mweeyo a Kalileya, otulu mwineekesawo niini? Yinsa alaziweeyo vakatthi venu khuweziwa pinkuuni, onteela oruti khwa nanna etthiipo mwimooniyeezo awelaka.”

Othawuliwa wa Matiyazhi

¹²Aphano maaswihaapa khwiishukha vamwaako Oluveera oriiye kharipu ya sitati kiyasi ya phiima alufu, khusala arutela Yeruzaleemu. ¹³Noofiya khuvira nnyupa vatulu nhali amakiyeemo. Aarivo:

Pheeturu, Yaahaya, Tiyaaku na Antere;

Filiipe, Tome, Parutulumeewu Matewuzhu;

Tiyaaku mwaana wa Alufeeyu, Simawu Zelooti, na Yuuda mwaana wa Tiyaaku.

¹⁴Wakhula siikhu aari wiiya ookusanyeya vamote na olompa woohilikheleli, na aakha akina vamote na Mariyamu mamaawe Yinsa na attwiize.

¹⁵Siikhu etthiipile Pheeturu khweemela vakatthi wa mamuumini vahali aakusanyeyiyeevo atthu miiya na eshiriini khulupa awoozaka ooshi yoori: ¹⁶“Attwiizaku, zaarina zoorettikhana Zawaatikhiwa Ttakatthiifu za nkithaapu zooshi epile Rooho Ttakatthiifu elupeyeezo khwa Daawuuda monkoni wa Yuuda, othuuto awaalokoziyeeyo apale ankholiyeeyo Yinsa. ¹⁷Yuuda aya oto aari wa khuntti yeetthu, aari oretta phantte ya khaazi ethiiti.” ¹⁸(Ye oozanyiye lipuwa lawe na nzurukhu ariphiweeyo khwa etile yootakhala aarettiyeeyo, attaapho phi aakwaniyeevo eeshwa khuphutuwa, marupo awe khumwazeya. ¹⁹Mpakha atthu ooshi a Yeruzaleemu khujuwa. Aphano lipuwa ntthile khutthajiwa nzina khwa luuka yaya Akelataama, liriina maana a Lipuwa la Taamu.) ²⁰Nkithaapu ya Zaapuura1:20 Woone kithaapu ya Zaapuura 69:25 na 109:8. yaatikhiwamo yoori:

“ ‘Vahali aari wiikhalaavo yiiye yaara,

ohiikhaliwevo’;

na theenya,

“ ‘Khaazi yawe asalane ntthu nkina.’

²¹Nakataalikha, ninihithajiya khwa atthu apale aari onilottakaaye wakathi wooshi opule Mbwana Yinsa aari vamote na fweeyo, ²²waaza woosa1:22 Woosiwa, maana aya ootupweeziwa, shawuri zaya epo enthoonyeza yoori Yinsa onttela onitupweeza nkatthi wa Rooho Ttakatthiifu. Theenya enthoonyeza yoori wakathi yeekezeleyiyeevo waatta Rooho Ttakatthiifu yaari siikhu ya takhiriima. wa Yaahaya, mpakha siikhu Yinsa alaziweeyo vakatthi veetthu khuweziwa pinkuuni, mmote wa atthaapo vamote na fweeyo, eeye shaahiti wa osisimuwa wawe.”

²³Aphano, khuthoonyiwa atthu awiri: Yuusufu, aarina nzina likina la Baresaapa, anjuwaniwaaye nzina la Nashariya na nlume nkina aari wiitthiwaaye Matiyazhi. ²⁴Nawiisha atthu khulompa araka: “Mbwana, weeyo ti onjuwaaye rooho za atthu ooshi. Khwa atthu apa awiri nintakha onithoonyeze onthawuliyeeyo, ²⁵yoori akhole khaazi ya owaaswihaapa vamote na fweeyo, eti Yuuda alikhiyeeyo khweetta puuro yaari onsuhaaye.” ²⁶Paata ya toole khweekesiwa nasipu khusala enthoonya Matiyazhi. Khwa etthiipo ye khuphakanyeya na maaswihaapa khumi na mmote.

Ota wa Rooho Ttakatthiifu siikhu ya Takhiriima

¹Efiyeevo siikhu ya Takhiriima2:1 Takhiriima ena maana a njampo laari orettiwakaaye raku wakathi wa wuurula wiisha wa sumana, mayaahuuti enkeene wakhula mwaakha aari olawa Yeruzaleemu oretta njampo laya nttho. Takhiriima njampo laari orettiwakaaye paata ya ovira siikhu hamusiini ya Paashikowa. anamalottela a Yinsa ooshi akusanyeyiye vahali vamote. ²Nasaapiru khusiileya ovuma woolankha pinkuuni wuupuwaka nkhama pheevo zaari ovumaaye zookhomaala, khwiitaala nnyupa wooshimo mphule aakusanyeyiyeemo. ³Khuwaapuwela etthu yaari wuupuwaaye nkhama malimi a moottho aari waawanyeyaaye khwiikhala wakhula ntthu veeshwa vawe. ⁴Ooshi khwiiya awiitaala Rooho Ttakatthiifu, khwaaza ottakhula luuka kiina khwa nanna wakhula ntthu Rooho Ttakatthiifu yaari omwinkhaazo ottakhula.

⁵Aphano Yeruzaleemu aariwo mayaahuuti, ooshapweya rooho na omoova Nluku a khapila zooshi za olumwenku. ⁶Paata ya osiileya ovuma opule, khuntti ya atthu khukusanyeya vahali vamote ari oozinkuwa maana wakhula mmote wa yo aari owaasiila anakhiyoni apale attakhulaka khwa luuka yawe. ⁷Aari ooshanka na oosuthuwa, alupaka yoori: “Atthu apa anttakhulaaye apha ooshi khahi a Kalileya apa? ⁸Khi ensutuukhwana toovi fweeyo niwaasiilaka ottakhula, wakhula mmote wa fweeyo khwa luuka zeetthu? ⁹Fweeyo nalankha nti wa Paatiriiya, akina alankha Mediiya, akina Elaami, akina Mezapotaamiya, akina Yudeya, akina Kapatosiya, akina Pontu na Aaziya, ¹⁰akina alankha Firijiya na Panfiiliya, Misuri na phantte za Liibiya kharipu na Sireene, na anamathotola alankhiyeeyo Rooma. ¹¹Waaza mayaahuuti mpakha apale asilimweliyeeyo oyaahuuti akereeti na aarapu. Nawaasiila toovi attakhulaka nluuka mweetthu alupaka vitthu zootikinisa na za Nluku?” ¹²Ooshi aari ootikinisiwa na osuthuwa khusala oozelana araka: “Vitthu epi zinlupani?”

¹³Atthu akina eetta owaaveyisa maaswihaapa apale araka: “Eetta ohapaliwa!”

Pheeturu onlawela oshaahiti osisimuwa wa Yinsa

¹⁴Aphano Pheeturu khweemela na apale khumi na mmote, ye khusala attakhula araka: “Attwiizaku mayaahuuti na atthu ooshi a Yeruzaleemu, mwijuwe saana na mwisiileze mattakhuzi aka. ¹⁵Atthu apa kheetteni ohapaliwa, nkhama mweeyo mwinfikhirelaazo, maana eti nalelo saattatthu ya supu. ¹⁶Ila vitthu epi zinrettikhanazo apha pi epile zaalupiweyo rakuzeene ti napiyu Yoweele araka:

¹⁷“ ‘Nluku alupa yoori, siikhu za mwiisho

kinteela oweeshushela Rooho yaka atthu ooshi.

Aaneenu aalume na apa aakha anteela ohupiri,

mashaapu anteela wiiyana jozi,

anakhuuluvale anteela olottha.

¹⁸Khwa akarumeya aka aalume mpakha aakha,

yo kiniwenkha Rooho yaka siikhu zaya etthiipo

asala ahupiri.

¹⁹Kinteela othoonyeza vitthu zootikinisa otulu pinkuuni

na alama vathi wa olumwenku,

taamu, moottho na mawiku a loosi.

²⁰Njuwa lizukuluwe liiye yiiza,

mweezi na ye othatuwe wiiye taamu,

ehinafiye siikhu khuulu ya siifwa za Mbwana.

²¹Wakhula otule ankhuwelaaye nzina la Mbwana ontta wuusurukha!’

²²“Mweeyo, atthu a Ezirayiilu, mwisiileze mattakhuzi apa: Yinsa wa Nazareeti, ahakikhiwa ti Nluku vakatthi venu mweeyo khwa alama zawaatta na minjuza, etthiipo Nluku mweenyeweene arettiyeezo khwa ye vakatthi venu mweeyo nkhama etthiipo mwinjuwaazo. ²³Othuuto enkheleliweeyo khwa shawuri Nluku atthomiyeezo rakuzeene khwa ojuwa wawe, ila mweeyo khukusanyeya na atthu ootakhala rooho khunkhomela vansalapa khumuula. ²⁴Ila Nluku ansisimuliyeeyo vakatthi wa ananfwa, khuntthomela owahi woofwa maana yaari etthu yoohiwaheyi oshinttiwa ti ofwa. ²⁵Maana monkoni wa ye Daawuuda alupa araka:

“ ‘Miiyo wakhula wakathi kaari omoona Mbwana ari vamote na miiyo,

maana ye ori nkhono nlume aka akinteela osakhinyeya.

²⁶Tiito rooho yaka ti yoofurahi na nlimi laka lininttitthimisa;

mwiili aka onvumula orina ororomela,

²⁷maana khunteela okanswi nkhapuri

wala khunteela onkhupalela Nttakatthifu awo ovutta mwiili awe.

²⁸Wakijuwisa tarikhi za ohaayi,

onteela okiitaaza furaha vakatthi vawo.’2:28 Woone kithaapu ya Zaapuura 16:8-11.”

²⁹Pheeturu khurutela araka: “Attwiizaku, mwikilikhe kiwuuzeni saana monkoni wa papeetthu Daawuuda yoori ye afwa khuzikhiwa khapuri yawe eri mmuti mweetthu nttumphu mpakha leelo. ³⁰Ye aari napiyu na aari ojuwa yoori Nluku aamwahitiye khwa olapha yoori vakatthi wa ojama awe aari oteela opuwavo mfwalume aari oteelaaye osalana yenzi yawe ya ofwalume. ³¹Daawuuda aari ojuwa etthu Nluku aari weettelaaye oretta tiito aalupiyeeyo monkoni wa osisimuwa wa Al-Masiihu othuuto Nluku ahanlikhiyeeyo Ahera, wala mwiili awe ovutta. ³²Nluku ansisimula Yinsa, fweeyo fooshi na mashaahiti a vitthu zaya epo. ³³Khuweziwa khulawa wiikhala nkhono nlume wa Nluku, ye enkhiwa Rooho Ttakatthiifu ti Papaawe nkhama etthiipo amwahitiyeeyo, apha eetta oniitthelela ti ethiito mwinoonaaye na mwinsiilaaye enasaapi eti. ³⁴Daawuuda khaweziweeni pinkuuni, ila atukhuru alupaka yoori:

“ ‘Nnyizinku amuuza Mbwanaaka yoori:

“Wiikhale nkhono nlume aka,

³⁵mpakha miiyo maatuwi awo kiwaarette wiiya sakanso wa moolu awo.”2:35 Woone kithaapu ya Zaapuura 110:1. ’

³⁶“Nakataalikha, atthu ooshi a Ezirayiilu ana yoojuwa yoori: Yinsa, othuuto mweeyo mwankhomeliyeeyo, Nluku amwinkha wiiya Mbwana na wiiya Al-Masiihu.”

³⁷Paata yoosiila mattakhuzi apale, khukafilikha nroho mwaya, khumuuzela Pheeturu na maaswihaapa apale akinaaya yoori: “Attwiizetthu, apho niri je?”

³⁸Pheeturu khuwaajipu araka: “Mwithupwiye na moosiwe wakhula mmote wa mweeyo khwa nzina la Yinsa Al-Masiihu yoori mwipatthe nswammaha wa twampi zenu, mwintta opokhera tthuvo ya Rooho Ttakatthiifu. ³⁹Ahiti yaya eto ti yenu, mweeyo mpakha aaneenu na atthu akina awoolepawo, khwa apale ooshi Mbwana eetthu Nluku awaakhuweliyeeyo.”

⁴⁰Khwa mattakhuzi menkeene Pheeturu khusala alaza oshaahiti eekesaka yoori awaashintte araka: “Mwijuusuru vakatthi wa atthu apa ootakhala rooho.” ⁴¹Atthu awaatta khukhupalela nttakhuzi, khulawa khoosiwa. Siikhu etile atthu eekezeleyiye khwiiya alufu ttatthu.

Nanna aari wiikhalaazo atthu apale akhupaliyeeyo

⁴²Yo aari ooshututela masomi a maaswihaapa na osiilana, na oretta njampo la mwiili na taamu, na lompa. ⁴³Ooshi aarina woova nwulweene, maana Nluku eetta ovira arettaka vitthu zootikinisa na minjuza zawaatta khwa maaswihaapa apale. ⁴⁴Atthu ooshi apale ankhupaliyeeyo Yinsa aari vamote, zooshi ettiye ophakanya, wakhula etile yaari opattikhanaaye eetta omeelana. ⁴⁵Akina aari wuuzanyisa mashapa aya na vitthu zaya, nzurukhu aya nootiisa oteela owaamela azaaya, wakhula ntthu aari winkhiwa khwa khiima ya othowiwa wawe. ⁴⁶Yo aazowereliye okusanyeya wakhula siikhu Nnyupa Woosifwiwamo, na oretta njampo la mwiili na taamu vamote nyuupa khwa nyuupa, oja zoojiwa zaya na furaha khuluyeene na rooho ya ekhweele, ⁴⁷ansifwaka Nluku na khusala apattha rehema mmakhono wa atthu ooshi. Apho Mbwana wakhula siikhu aari ovira aweekezelaka atthu a wuusurukha.

Ovonisiwa wa ntthu woorakala

¹Siikhu moote Pheeturu na Yaahaya aari weetta Nyuupa Yoosifwiwamo wakathi wa saakhentta. ²Aarettiye athuuliwe ntthu aavokoliweeyo ari woorakala. Oto aya wakhula siikhu aari otthiwaka vanlako wa Nyuupa Yoosifwiwamo, onittheliwaaye Nlako Wooshapweya, yoori asala awaavekela zimola atthu apale aari oviramo. ³Amooniyeevo Pheeturu na Yaahaya aviraka Nnyupa Woosifwiwamo, khusala awaavekela zimola. ⁴Pheeturu na Yaahaya khunkhontolela maasho khumuuza yoori: “Oneekese fweeyo!” ⁵Mwinyi otule khusala aweekesa, awejelaka opwekhera etthu ya winkhiwa pa yo.

⁶Pheeturu khulupa yoori: “Akina feeta wala weero, ila kiniwinkha ethiiti kiriina. Khwa nzina la Yinsa Al-Masiihu wa Nazareeti, lankha weettette!” ⁷Khunkholela nkhono nlume awe khunlansa. Nasaapiru moolu awe na khoza zawe khookowa. ⁸Khwiirukha khweemela khwaaza weettetta. Khuvira Nnyupa Woosifwiwamo vamote na yo, eettaka wiirukha ansifwaka Nluku. ⁹Wakathi atthu ooshi amooniyeevo eettaka weettetta na ansifwaka Nluku, ¹⁰khufwahamu yoori mwinyi othuutule aari okhitirakaaye wiikhala va Nlako Wooshapweya wa Nyuupa Yoosifwiwamo Nluku khusala alola zimola. Ooshi aya khwiiya ootikinisiwa na oshanka channu khwa vitthu zanrettikhaneliyeeyo.

Oshaahiti wa Pheeturu Nnyupa Woosifwiwamo

¹¹Nazimola otule ankholeliyeevo Pheeturu na Yaahaya. Atthu ooshi khwiiya ootikinisiwa, khusala atthirela attaaphale aarivo Pheeturu na Yaahaya, puuro yaari wiitthiwaaye Livenu la Seleyimaana. ¹²Ooniyeevo vitthu epile, Pheeturu khuwooza yoori: “Attwiizaku meezirayiilu, mwashankisiwani khwa vitthu epi? Wala mwinneekesa ni nkhama enriwaaye ntthu otu eettetta khwa owahi weetthu ama emaani yeetthu? ¹³Nluku wa Eburahiima wa Esiyaakha na wa Yaakhumpa, Nluku wa amarehemu apapazetthu anttitthimisa karumeya awe Yinsa, othuutule mweeyo mwaawenkhiyeeyo atthu yoori amuule na khunkatthala vakatthi wa Pilaatu, wakathi ye aalakeliyevo onfukula. ¹⁴Mweeyo mwankatthaliye Nttakatthifu, Nashariya, khuveka yoori afukuliwe namahusuti. ¹⁵Mweeyo khumuula mweenyewe ohaayi, ila Nluku khunsisimula muufwa fweeyo na mashaahiti a vitthu zaya epo. ¹⁶Mwaasa wa waamini nzina la Yinsa, nzina nttinttho lanvonisa mwinyi otu mwinimoonaaye na mwininjuwaaye. Amini entaaye khwa Yinsa yamwinkha ekumi ya ekhweele, nkhama etthiipo mwinoonaazo vakatthi venu mooshi.

¹⁷“Aphano attwiizaku, miiyo kajuwa yoori mwaarettiye hatha mwihijuwaka na anamalokozela enu. ¹⁸Ila Nluku aretta etile yaalupiweeyo raku pi manapiyu ooshi araka: Al-Masiihu awe aari oteela ohoowa. ¹⁹Mwithupwiye mwirutele wa Nluku yoori twampi zenu ziiye za oswaamihiwa, ²⁰yoori ote wakathi wa ovumula wa olankha phantte ya Mbwana na amperekhe Yinsa, othuuto atthomiweeyo yoori eeye Al-Masiihu. ²¹Yinsa ona ya wiiya pinkuuni mpakha ofiya wakathi enttelaavo ozukulisiwa vitthu zooshi nkhama aalaleyiyeezo Nluku raku khwa manapiyu awe. ²²Maana Munsa alupa yoori: ‘Mbwana Nluku onlawa ampuwise khwa attwiizenu napiyu mmote nkhama miiyo; mwinsiileze zooshi anttelaaye owuuzani. ²³Otule ahininsiilezaaye napiyu aya oto, ontta ophakuliwavo vakatthi wa atthu a Nluku atapanyeye.’3:23 Woone kithaapu ya Tetoronoomiyu 18:15, 18-19.

²⁴“Manapiyu ooshi, waaza Samuweele na apale akinoko paata ya ye attakhula monkoni wa siikhu epi za leelo. ²⁵Mweeyo mwaanamarithi a manapiyu na wahati Nluku aarettaniyeeyo amarehemu apapazenu, ye aamuuziye Eburahiima yoori: ‘Khwa peewu yawo atthu ooshi a voolumwenku anttela wiiya ooparikhiyiwa.’3:25 Woone kithaapu ya Mwanzo 22:18.²⁶Nluku anthawula Karumeya awe, khumperekha omwanzo vakatthi venu mweeyo, yoori ooparikhiyeni amana mwilikha oretta vitthu zootakhala.”

Pheeturu na Yaahaya anlaza oshaahiti vakatthi wa mashawuriiya

¹Wakathi Pheeturu na Yaahaya aari ottakhulaavo awoozaka atthu, khutavo anamalokozela a tiini na nttunkhulu wa anajanka wa Nyuupa Yoosifwiwamo na masatukhi. ²Yo aari awiiphiiriwa mwaasa wa maaswihaapa eetta owaasomisa atthu yoori Yinsa asisimuwiye, eto enthoonyeza yoori ananfwa anteela osisimuwa. ³Aphano yo khunkhola Pheeturu na Yaahaya, khuwaattha nkalapooso mpakha mmeesho mwaya maana yaari makaaripi. ⁴Ila atthu apale asiiliyeeyo hapari epile aari olupaaye khukhupalela. Khwa etthiipo mamuumini khusala avira eekezeleyaka khufiya thamani ya alufu thaanu.

⁵Siikhu ya phiiri khuthukumana afwalume, attunkhulu a tiini na anamanozela a kano Yeruzaleemu. ⁶Atthu aarivo pi apa: Anaasi, haakhimu nwulu wa tiini, Kayifwa, Yaahaya, Alishantere, na atthu ooshi apale aari oojama wa haakhimu nwulu wa tiini. ⁷Yo khuwaattha omaasho waya maaswihaapa apale awiri. Khusala awoozela araka: “Vitthu epi mwarettana owahi ni wala nzina ni?”

⁸Pheeturu ari wa wiitaala Rooho Ttakatthiifu, khusala alupa araka: “Mweeyo afwalume na attunkhulu a atthu, ⁹mwanikhuwela leelo yoori mwinuuzele vitthu zooshapweya ninretteliyeezo ntthu otule woorakala na nanna avonisiweezo. ¹⁰Ila apho mwijuwe saana mooshi mpakha atthu a Ezirayiilu yooshi yoori khwa nzina la Yinsa Al-Masiihu wa Nazareeti, othuutule mweeyo mwankhomeliyeeyo na othuuto Nluku ansisimuliyeeyo muufwa, nzina lawe tthi linvonisiyeeyo namarakala otu mwinimoonaaye apha. ¹¹Yinsa othuuto liwe mweeyo anamajeka mwikatthaliyeeyo, laretteya wiiya liwe linkhomaazaaye.4:11 Woone kithaapu ya Zaapuura 118:22.¹²Khaavo ntthu nkina wala nzina likina linwahaaye owoosuru atthu vathi apha wooshivo, woohiiyi nzina la Yinsa.”

¹³Attunkhulu apale ooshi khwiiya onshankela Pheeturu na Yaahaya mwaasa wa ominyala aarinaaye maana ari owaajuwa yoori aari vamote na Yinsa. ¹⁴Ila khaarina ya olupa hatha etthu, maana ntthu otule aavonisiweeyo aari attaaphale eettiye weemela vamote na yo. ¹⁵Khuwaaruma yoori asaruwemo nnyupa khuulu ya mashawuriiya. Aphano attunkhulu apale khwaaza owazisana shawuri araka: ¹⁶“Nkahayani niwaarettele niini mamwinyi apa? Maana atthu ooshi Yeruzaleemu eti ajuwa yoori aretta minjuza zawooneya zihinikheeteyaaye. ¹⁷Apho yoori vitthu epo zihimwazeyele vakatthi wa atthu niwoopopise yoori ahimuuze hatha ntthu monkoni wa nzina nttho.”

¹⁸Aphano khukhuweliwa Pheeturu na Yaahaya opheya khuwaakhattaza yoori ahisomise wala ahittakhule hatha etthu monkoni wa Yinsa. ¹⁹Ila Pheeturu na Yaahaya khuwaajipu araka: “Mwinoona yoori eto yaya haakhi ya wuushututelani mweeyo khunlikha Nluku? ²⁰Fweeyo khaninwahi olikha olupa epile nooniyeezo na nisiiliyeezo.”

²¹Khuwaatuturusha theenya khuwaalikha, maana khaari woona etthu yoowaahukhumwela na atthu ooshi aari onsifu Nluku mwaasa wa minjuza epile zaarettikhaniyeeyo. ²²Mwinyi otule aavonisiweeyo khwa alama za minjuza aarina hirimu yooziti nyaakha arupayiini.

Olompa wa anamalottela a Yinsa yoori eeyane ominyala wa olaza oshaahiti

²³Wakathi Pheeturu na Yaahaya alawiyeevo, noofiya vahali aarivo ashirikhaaya, khusala awaathatelela zooshi epile aari wuuziwaaye pi mahaakhimu a tiini na attunkhulu a tiini. ²⁴Paata ya ashirikhaaya apale osiila mattakhuzi apale, ooshi aya khusala alompa anvekelaka Nluku araka: “Mbwana, ti weeyo wumpiyeeyo pinku na vathi, pahari na vitthu zooshi ziriiye va olumwenku. ²⁵Weeyo wattakhula khwa Rooho Ttakatthiifu khwa nlomo wa papeetthu Daawuuda karumeya awo oraka:

“ ‘Khapila epile zoohimoovi Nluku enkatipukhaka ni?

Khi atthu anaakanyerelaka ni shawuri zohiiyi etthiipo?

²⁶Afwalume a vathi alankha

na attunkhulu akusanyeya yoori

anlupatthe Mbwana na anlupatthe Al-Masiihu awe.’

²⁷Wekhweele, Herooti na Ponsiyu Pilaatu akusanyeya na amalapo na atthu a Ezirayiilu, ooshi ari sitati ethiiti na niiya yonlupattha Yinsa karumeya awo othuuto onthawaziyeeyo. ²⁸Yo aretta zooshi epile waalakeliyeeyo oretta khwa owahi oriinaaye. ²⁹Apho weeyo Mbwana, woone woopopisa waya onilipisele niwahi olaleya hapari zawo woohoovi hatha etthu. ³⁰Wookole nkhono awo waaze ovonisa na oretta minjuza na vitthu zooshankisa khwa nzina la ttakatthiifu karumeya awo Yinsa.”

³¹Paata ya maaswihaapa apale wiisha olompa, puuro etile akusanyeyiyeevo khusala esakhinyeya, ooshi khuwiitaala Rooho Ttakatthiifu, khusala alaleya nttakhuzi la Nluku woohoovi hatha etthu.

Anakhiyoni vitthu zaya eetta omeelana

³²Ooshi aakhupaliyeeyo rooho zaya zaari moote, akhili zaya zaari sawasawa. Khaarivo hatha mmote aari woonaaye etthu yawe wiiya yawe. Eetta waawanya na azaaya zooshi aari wiiyanaazo. ³³Maaswihaapa aari ovira alawelaka oshaahiti osisimuwa wa Mbwana Yinsa na owahi nwulweene, na yaaweeshukheliye rehema khuluyeene. ³⁴Vakatthi vaya khaarivo hatha ntthu mmote woothowiwa, apale aarina mapuwa ama manyupa eetta wuuzanyisa, nzurukhu aya nootiisa, ³⁵noowenkha maaswihaapa yoori awaawanyeze atthu ooshi wakhula ntthu khwa khiima yoothowiwa wawe.

³⁶Yuusufu mmote, wa lihimo la Leevi aatthajiweeyo nzina la Baranabe, liriina maana la namalipisela, owawe waari Shiipere, ³⁷khuuzanyisa nshapa lawe, nzurukhu aya khutiisa khuwenkha maaswihaapa.

Ananiiya na Safiira

¹Attaaphale Mwinyi mmote aniitthiwaaye Ananiiya na muukhaawe Safiira khuuzanyisa nshapa laya. ²Khusavula nzurukhu aya muukhaawe eettaka woona, opule waasaliyeeyo khuwenkha maaswihaapa.

³Aphano Pheeturu khumuuzela Ananiiya yoori: “Wamwiitaazelani epiliisi nroho mwawo, khuufiyelelisa ohata Rooho Ttakatthiifu mwaasa woovitha nzurukhu wuuzanyisiyeeyo nshapa lawo? ⁴Ohuuzanyiseeni nshapa la nttho laari wiiya lawo! Na paata ya wuuzanyisa nzurukhu aya waari wiiya wawo. Khi waari toovi orettaka etthu nkhama eto? Apho weeyo khuwaahateeni atthu ila wanhata Nluku.” ⁵Ananiiya noosiila mattakhuzi apale khukwela vathi khufwa. Khuwaapattha woova ooshi apale aasiiliyeeyo epile zaarettikhaniyeeyo. ⁶Attaaphale khulankha mashaapu, khumputaputela Ananiiya va joora khunsarulela vaje khulawa khunzikha.

⁷Oviriyeevo wakathi mittatthu khuta muukhaawe Ananiiya, woohijuwi etthu yaarettikhaniyeeyo. ⁸Aphano Pheeturu khumuuzela yoori: “Nkakuuze, moozanyisa hisapu ethiiti nshapa lenu?”

Muukha aya khujipwelela yoori: “Aaa hisapu ethiito.” ⁹Pheeturu khurutela omuuzela theenya yoori: “Mwaasa aya niini mwisiilanaka ohata Rooho ya Mbwana? Woone vanlako apho moolu eetteliyeeyo onzikha mannawo, theenya anttela wuuthuula weeyo.” ¹⁰Nasaapiru khukwela nshini wa moolu a Pheeturu khufwa, mashaapu apale khunsikana ari woofwa khunthuula khulawa khunzikha kharipu na mannawe. ¹¹Khupattha woova nwulweene ojama wa Nluku wooshi noosiila mattakhuzi aya apale.

Alama na minjuza za waatta

¹²Aphano alama zawaatta na minjuza zaari ovira zirettiwaka pi maaswihaapa vakatthi wa atthu, na mamuumini a Yinsa aazowereliye okusanyeya woosiilana Nlivenu la Seleyimaana. ¹³Khaarivo hatha mmote woohiiyi muumini aarina ominyala wa okusanyeya na yo, ila atthu akina apale ohiiyi a nkhuntti yaya aari owaalupeza mattakhuzi ooshapweya. ¹⁴Khuntti ya atthu yonkhupali Mbwana waaza alume mpakha aakha, khusala evira yeekezeleyaka. ¹⁵Mwaasa wa minjuza aari orettaazo maaswihaapa atthu aari owaathuula alwele noowaattha va nrepa ama valaavi noowaalawana mmatarikhi yoori amana aviraka Pheeturu yiivuuli yawe esala ewaafinikha akinaaya. ¹⁶Mpakha miti epile zattamananiyeeyo Yeruzaleemu atthu enkeene aari owaatana alwele na apale ohoochiwa pi masheethwani, ooshi aari wiiya ovonisiwa.

Olupatthiwa wa Maaswihaapa

¹⁷Aphano haakhimu nwulu wa tiini na ashirikhaawe ooshi, khuntti ya masatukhi khuwaata nrima. ¹⁸Khurumisa okholiwa maaswihaapa khutthiiwa nkalapooso. ¹⁹Osikhu layili, nlayikha la Nluku khufukula milako za kalapooso khuwaasarulela vaje na khuwooza yoori: ²⁰“Mwilawe mwajithoonyeze Nnyupa Woosifwiwamo na mwawooze atthu hapari epi zooshi za ohaayi opu.” ²¹Asiiliyeevo mattakhuzi apale, khulankha mmeesho mwaya supuyeene khulawa Nnyupa Woosifwiwamo khwaaza osomisa.

Haakhimu nwulu wa tiini na ashirikhaawe, khuwaakhuwela Mashawuriiya na attunkhulu a tiini ooshi a Ezirayiilu khuruma olawa osaruliwa maaswihaapa nkalapooso. ²²Ila anamweekesela, noofiya okalapooso okhule khuhiwaasikaniwo khuruti khuta khulupa yoori: ²³“Nasikana kalapooso eri yoofukiwa na anamweekesela ari nlako, ila wakathi nifukuliyeevo khuhinsikanimo ntthu.” ²⁴Wakathi asiiliyeevo nttunkhulu wa anamweekesela wa Nyuupa Yoosifwiwamo, mahaakhimu a tiini khwiiya ooshanka, oopuwelaka niini yaari weettelaaye orettikhana.

²⁵Wakathi otthuupule khuta ntthu khuwooza yoori: “Atthu apale mwaawaafukeliyeeyo nkalapooso ari Nnyupa Woosifwiwamo antta owaasomisa atthu.” ²⁶Aphano khulankha nttunkhulu otule wa anamweekesela na atthu akina khuweettela khuwaatiisa woohiwaahusuti mwaasa aari woova ovonyaniwa mwawe pi atthu apale aari owaasomisaaye.

²⁷Khulawa khuwaathuula khuwaatiisa wa Mashawuriiya, haakhimu nwulu wa tiini khuwoozela yoori: ²⁸“Fweeyo nawuuzani mweeyo yoori mihisomise hatha etthu mwilupaka nzina nttho! Theenya mweetaaza Yeruzaleemu yooshi masomi enu na mwineekesa onilokoveza ofwa wa mwinyi aya oto!”

²⁹Aphano Pheeturu na maaswihaapa akina khulupa yoori: “Fweeyo nina yonshututela Nluku zayita atthu. ³⁰Nluku wa amarehemu apaapa zeetthu ansisimula Yinsa othuuto mwimuuliyeeyo khunkhomela vansalapa. ³¹Othuuto, Nluku khunwulisa na khumwinkha wiiya Namalokozela na Namuusuru, yoori awenkhe meezirayiilu othupwiya na nswammaha wa twampi. ³²Fweeyo na Rooho Ttakatthiifu na mashaahiti monkoni wa mattakhuzi aya apo Nluku aniwenkhaaye apale aninshututelaaye.”

³³Noosiila mattakhuzi apale khwiiya ookatipukha khusala atakha owoola. ³⁴Ila vakatthi aphale wa Mashawuriiya khulankha mfwarizeewu mmote aari wiitthiwaaye Kamaliyeele njuwi wa kano wooshitahiwa pi atthu ooshi, khurumisa yoori asaruleliwe vaje aariivo maaswihaapa akina. ³⁵Khulupa yoori: “Attunkhulu a meezirayiilu, kiniwuuzani yoori phoole khwa eto mwintakhaaye owaarettela mamwinyi apa. ³⁶Maana, ehinafiye siikhu epi, aapuwiye mwinyi mmote aari wiitthiwaaye Teewuda, aari ojoonaaye wiiya nwali; othuuto alawiye khuwaakusanya atthu miiya nne. Ila yaya khuuliiwa na ooshi apale aari onsilezaaye khwiiya oomwazeya na woohishintti hatha etthu. ³⁷Paata ya ovira otule, khupuwa Yuuda wa Kalileya, wakathi aari waatikhiwaavo atthu, na ye khuwaalokoza atthu ookhijili; ila yaya khufwa atthu apale aari onsilezaaye khumwazeya. ³⁸Nakataalikha kiniwuuzaanini yoori mwiwaalikhe mamwinyi apa na heeri mwiwaataphule, nkhama khaazi eti ankholaaye ti ya onaatamu enteela wiisha. ³⁹Ila nkhama ti ya Nluku, mweeyo mwihitapanye, mwirettaru toowo mwiniiya nkhama mwinuumananaaye Nluku.”

⁴⁰Khuwaakhuwela maaswihaapa apale, khuwaajapha na khuwooza yoori ahirutele olupa nzina la Yinsa, khuwaafukulela.

⁴¹Maaswihaapa khusaruwamo nnyuupa khuulu ya Mashawuriiya ari ofurahi mwaasa wa Nluku owoona wiiyana owahi ohoowa wa opattisisiwa haaya mwaasa wa nzina la Yinsa. ⁴²Khuhilikhi osomisa na olaleya hapari zooshapweya Nnyupa Woosifwiwamo na nyuupa khwa nyuupa siikhu zooshi, alupaka yoori Yinsa ti Al-Masiihu.

Othawuliwa wa awaziri sapa

¹Siikhu etthiipile eetta ovira ataaka mamuumini aari onlottaaye Yinsa, apale aari ottakhulaaye ekereeku atthaaporu aari owaattakhula mamuumini aari ottakhulaaye eheepere, mwaasa yoori anamafweliwa pi amanna zaya a phantte yaya etta osahawiwaka amana yaawanyiwaka etthu yoojiwa ya wakhula siikhu. ²Tiito maaswihaapa apale khumi na awiri aawaakhusanyiyeeyo mamuumini ooshi, khusala awooza yoori: “Khaninwahi onyoonyeliwa olaleya nttakhuzi la Nluku khusala naawanya etthu yoojiwa. ³Attwiizetthu, mwiwaathawule vakatthi venu alume sapa ooshitahiwa, anaakhili, awiitaala Rooho Ttakatthiifu, yoori niwenkhe khaazi eto, ⁴na fweeyo nisala nilompa na weeleza nttakhuzi la Nluku.”

⁵Mattakhuzi apale khuwaatuvela ooshi aya, khunthawula Shiteevawu, nlume wa waamineya na wawiitaala Rooho Ttakatthiifu, na Filiipe, Porokoro, Nikanore, Timomu, Parimenashi na Nikolawu, otule asilimweliyeeyo oyaahuuti wa nti wa Antiyookiya. ⁶Khuwaathoonyeza atthu apale vakatthi wa maaswihaapa, atthaapo khuwaalompela awaattheliye makhono.

⁷Etthiipile nttakhuzi la Nluku khusala limwazeyela Yeruzaleemu, Thamani ya anakhiyoni khusala yeekezeleya; na anamalokozela a tiini enkeene aari oshututela amini.

Ofukeliwa wa Shiteevawu

⁸Shiteevawu ntthu wawiitaala rehema na owahi, aari oretta vitthu zootikinisa na alama khuluzeene vakatthi wa atthu. ⁹Attaaphale khulankha atthu akina aari a sinakooka ya anamataphuliwa, yaari ya mayaahuuti aalankhiyeeyo Sireene na Alishanteriya na apale a nti wa Siliisiya na Aaziya. Atthu aya apo khwaaza onyakulisana na Shiteevawu. ¹⁰Ila khaari owahi oshintta akhili na Rooho etile aari ottakhulanaaye. ¹¹Aphano khupankiwa atthu akinoko olawa olupa yoori: “Nansiila Shiteevawu attakhulaka mattakhuzi okufuru anlupezaka Munsa na Nluku.”

¹²Khwa ethiito, khuwaatapanya atthu, attunkhulu a tiini na anamanozela a kano, khunkhola Shiteevawu khunthuula khulawana wa Mashawuriiya. ¹³Noofiya khusala alaza oshaahiti woovonyeya araka: “Mwinyi otu okhitiri ottakhula pure khwa puuro eti ttakatthiifu na khwa kano. ¹⁴Nansiila araka Yinsa wa Nazareeti ontapanya puuro ya eti na onzukulisa thwapiya anilikheliyeezo Munsa.”

¹⁵Wakathi amwekesiyeevo, ooshi apale eekhaliyeeyo nyuupa khuulu ya Mashawuriiya khusala oona wuuso awe wuupuwaka nkhama wa nlayikha.

Ojaakisa wa Shiteevawu nnyupa khuulu ya Mashawuriiya

¹Aphano, haakhimu nwulu wa tiini khumuuzela Shiteevawu yoori: “Mattakhuzi apa onlokoveziwaaye khweele?”

²Shiteevawu khujipu araka: “Attwiizaku na apapazaku, mwisiileze! Nluku wa siifwa ampuweleliye Eburahiima, papeetthu, wakathi ari nti wa Mezapotaamiya ahinalawe wiikhala Harani, ³khumuuza yoori: ‘Olikhe tuniya yawo, na ajamaazo, na vaje wa apapazo olawe tuniya kinttelaaye wuuthoonyeza.’7:3 Woone kithaapu ya Mwanzo 12:1.⁴Aphano Eburahiima khulankha nti wa Makaliteewu7:4 Nti wa Makaliteewu nzina likina liniitthiwa yoori Mezapotaamiya., khulawa khwiikhala Harani. Paata yoofwa papaawe, Nluku khuntiisa nti otthuupu mwiniikhalaaye. ⁵Nluku khamwinkhiye hatha etthu moote yoori arithi, wala puuro ya luwattho yawe, ila amwaahitiye omwinkha nti, paata ya ye, waari weettela wiiya wa ojama awe. Wakathi aya opo aari waahitiwaavo ti Nluku aarettiye ahineeyane mwaana. ⁶Nluku anttakhulaniye amuuzaka yoori: ‘ojama awe onttela osafirela nti wa malaponi, ottuukho onlawa warettiwe oviitthwaana na ohukhumwiwa nyaakha miiya nne.’ ⁷Nluku khurutela olupa theenya yoori: ‘Miiyo kinteela ohukhumu khapila ethiito enttelaaye owaaretta oviitthwaana, paata ya toowo anlawa aleewo ate akaaputu puuro ethiiti.’ ⁸Aphano Nluku khumwinkha Eburahiima wahati7:8 Woone kithaapu ya Mwanzo 17:1-10. wa okhiriya. Tiito, Eburahiima khunvokola Esiyaakha khunkhiriyisa siikhu ya naane yoovokoliwa wawe. Elottelanaka Esiyaakha khunvokola Yaakhumpa, na ye khuwaavokola apaapa apale khumi na awiri.”

⁹Shiteevawu khurutela olupa yoori: “Apapazetthu aya atthaapo khunlazela nrima Yuusufu. Khumuuzanyisa awoozanyezaka amisuri, ila Nluku aari vamote na ye. ¹⁰Khuntaphula tafwawuti zawe zooshi khumwiishushela rehema na akhili omaasho wa Firawuuna, mfwalume wa Misuri. Othuuto aamwinkhiye Yuusufu owaziri wa Misuri na khumwinkha ottunkhulu wa atthu ooshi a vaje vawe.

¹¹“Paata ya toole, nti wooshi wa Misuri mpakha Kanaani khupuwa jala na tafwawuthi khuluzeene, amarehemu apapazetthu khuhisala awahi opattha etthu yoojiwa. ¹²Yaakhumpa noosiila yoori ewaapho tiriku Misuri, khuwaaruma amarehemu apapazetthu swaafu yamwanzo. ¹³Swaafu ya phiiri Yuusufu khujijuwisa a attwiize, na khujuwiwa ajama a Yuusufu ti Firawuuna. ¹⁴Aphano Yuusufu khuwaaruma atthu omweettela Yaakhumpa papaawe na ajamaaze ooshi, aari saapiini na athaanu atthu ene. ¹⁵Yaakhumpa khulawa Misuri, ottuukho afwiyeewo ye na amarehemu apapazetthu akina aya. ¹⁶Khuthuuliwa khulawa khuzikhiwa Shekemu vilalo oozanyiyeeyo Eburahiima na aana a Hamori. ¹⁷Maana waari osaleela ofiya wakathi wa ahiti etile Nluku aarittiyeeyo na Eburahiima, atthu khweekezeleya na khwaattelana nti wa Misuri. ¹⁸Aphano Misuri Khuthawala mfwalume nkinoko, ahaari ojuwaaye monkoni wa Yuusufu. ¹⁹Mfwalume otule khusala awaaveyisa amarehemu apapazetthu na owaahukhumu, awaakhanyarelaka aana aya yoori afwe.

²⁰“Pi wakathi otthuupo avokolaniweeyo Munsa, aari mwaana wooshapweya venkivene, khuleliwa vaje wa apapaze nyeezi mittatthu. ²¹Khulawa khulikhiwa otthwe, mwaana wa Firawuuna khunlokottha khusala anlela nkhama mwanawe. ²²Munsa khunozeliwa akhili zooshi za amisuri, khwiiya ntthu wa owahi khwa mattakhuzi na khaazi.

²³“Paata ya opattha hirimu ya nyaakha arupayiini, Munsa khulakela olawa owaathotola attwiize meezirayiilu. ²⁴Amooniyeevo mmisuri mmote anhukhumwaka mwiizirayiilu, na ye khunzukuluwela khuumanana, mpakha omuula mmisuri otule. ²⁵Munsa aari woona yoori meezirayiilu enlawa yaweeleye yoori Nluku aari otakha owaawuni khwa ye, ila yo khayaari oweeleya hatha etthu. ²⁶Siikhu ya phiiri, Munsa khulawa vahali aari wumanaavo meezirayiilu awiri, khusala atakha yoori awaakise araka: ‘Alume, mweeyo mwa attwi; khi mwinuumanela ni?’

²⁷“Ila otule aari onvulalisaaye nzaawe, khunsukhuma Munsa alupaka yoori: ‘Awinkhiyeeyo wiiya mfwalume wala namaphuka weetthu fweeyo ti paani? ²⁸Ontakha okuule nkhama omuuliyeezo mmisuri taana?’7:28 Woone kithaapu ya Olaawo 2:14.²⁹Noosiila mattakhuzi apale, Munsa khutthirela nti wa Midiyaani, khusala eekhala nkhama nletto, ottuukho khuwaapatthawo aana awe awiri.

³⁰“Ziviriyeevo nyaakha arupayiini, khumpuwelela nlayikha vamweeke wa moottho wahaari ozimaaye n’yaara, kharipu ya mwaako Sinaayi. ³¹Aphano Munsa wakathi ooniyeevo etthu etile, khwiiya wootikinisiwa. Khususela attaaphale yoori oonachache, khusiila huula ya Mbwana yaari oraaye: ³²‘Miiyo ki Nluku wa amarehemu apapazenu, Nluku wa Eburahiima, Esiyaakha na Yaakhumpa.’7:32 Woone kithaapu ya Olaawo 3:6. Munsa eettaka othukumela mwaasa wa woova, khuhisala awahi ominyala yoori afunule maasho awe.

³³“Aphano Mbwana Nluku khumuuza yoori: ‘Ovule jampali zawo epo, maana puuro eti oriivo ttakatthiifu. ³⁴Weekhweele kiniwoonaka atthu aka eettaka ohukhumwiwa nti wa Misuri. Kasiila olila waya khwiishukha yoori kiwaataphule. Apho ote nasaapi ethiiti, miiyo kuurume nti wa Misuri.’

³⁵“Munsa othuuto, yo ankatthaliyeeyo araka: ‘Awinkhiyeeyo wiiya mfwalume wala namaphuka weetthu fweeyo ti paani?’ Ye aaperekhiwe ti Nluku yoori eeye namalokozela na namwaawuni aya, ye alokoziwe ti nlayikha lampuweleliyeeyo vamweeke wa moottho wahaari ozimaaye. ³⁶Ti othuuto awaalaziyeewo, arettaka vitthu zootikinisa na alama za minjuza za nti wa Misuri, mpakha Pahari Yookhuttuwa na n’yaara khwa nyaakha arupayiini.

³⁷“Na aari Munsa othuuto awooziyeeyo meezirayiilu yoori: ‘Nluku onlawa ampuwise khwa attwiizenu napiyu mmote nkhama miiyo.’7:37 Woone kithaapu ya Tetoronoomiyu 18:15.³⁸Ti Munsa othuuto aathukumaniyeeyo na atthu a Ezirayiilu amarehemu apapazetthu n’yaara, aari vamote na nlayikha vamwaako Sinaayi. Khupwekherela khwa ye hapari za khweele khunifiisela fweeyo.

³⁹“Ila othuuto amarehemu apapazetthu khuhitakhi onshututela, na khwenkeza onkhijilela, nroho mwaya aari otakha orutela Misuri. ⁴⁰Khumuuza Haruni yoori: ‘Onaattalele miluku yoori enilokoze maana Munsa aya otule anilaziyeeyo Misuri khanijuweeni etthu empatthiyeeyo.’ ⁴¹Wakathi otthuupule khwaattala sanamu nkhama mompe. Khuretta twaha enkhaka sanamu ethiitile afurahelaka etile aattaliyeeyo na makhono aya. ⁴²Ila Nluku khuwaathekuwa khuwaalikha yoori aaputu matthottowa a pinkuuni, nkhama etthiipo yaatikhiweeyo nkithaapu za manapiyu yoori:

“ ‘Oo, atthu a Ezirayiilu, mwaakinkhiye miiyo twaha na zaakha khwa nyaakha arupayiini

wakathi opule mwariiyo n’yaara?

⁴³Olikha toowo theenya, mweemesa likhapuri la omwaaputu Moloke

na matthottowa a nluku enu Refwaani,

mwaattala sanamu khusala mwaaputu,

khwa attaapho miiyo kintta owiikarelani ohali woolepawo ovikana Babilooniya.’

⁴⁴“N’yaara amarehemu apapazetthu aarina heema ya wahati yaattaliweeyo khwa nanna etthiipo Nluku anrumiyeezo Munsa yoori aattale, nkhama etile anthoonyeziyeeyo. ⁴⁵Ethiito amarehemu apapazetthu enkhiweeyo ti apapazaya, khuthuula Yoshuwa theenya wakathi enkhiweeyo miti za khapila epile eekariiyeeyo Nluku vakatthi wa apapazetthu, heema etile khwiiya nti otthuupule mpakha yenzi ya Daawuuda. ⁴⁶Ye khupattha rehema mmakhono wa Nluku, khuveka yoori anjekele nyuupa Nluku wa Yaakhumpa. ⁴⁷Ila ti Seleyimaana aajekiyeeyo nyuupa yaya eto.

⁴⁸“Nakataalikha, Nluku Nwulu khaniikhala nnyupa yoojekiwa ti makhono apinaatamu, nkhama etthiipo alupiyeezo napiyu:

⁴⁹“ ‘Pinku khukulu yaka,

vathi ti sakanso wa moolu aka.

Nyuupa ni mwinttelaaye okijekela mweeyo, alupaka Mbwana,

ama, yaari weettela wiiya vayi puuro yaka yoovumulavo?

⁵⁰Khahiye makhono aka aattaliyeeyo vitthu zooshi?’7:50 Woone kithaapu ya Ezaaya 66:1-2.

⁵¹“Atthu ookhijili, na oolipa rooho na oohisiili! Mweeyo mwazowerela okhijilela Rooho Ttakatthiifu, etthiipo aari orettaazo apapazenu na mweeyo mwinretta etthiipo! ⁵²Napiyu ni amarehemu apapazenu ahinlupattheeni? Yo awoola apale aari olaleyaaye ota wa Nashariya, othuuto enasaapi eti mweeyo mwijirettiyeeyo onamanlupattha na namahusuti. ⁵³Mweeyo mwipwekhereliyeeyo kano khwa khaazi za malayikha ila khuhishututeli!”

Ofwa wa Shiteevawu

⁵⁴Paata ya yo osiila mattakhuzi apale khuwaapattha katapu nroho mwaya, khusala anwinela meeno. ⁵⁵Ila Shiteevawu wawiitaala wene Rooho Ttakatthiifu khweekesa otulu khoona nuuru ya Nluku na Yinsa ari nkhono nlume. ⁵⁶Khulupa yoori: “Moone! Miiyo kinoona pinku eri yoofukuwa na Mwaana wa Pinaatamu eemeliye nkhono nlume wa Nluku!”

⁵⁷Yo khusala akhuwa anyakulaka, khuttiyela mashiilo aya khunrikaanyela. ⁵⁸Khumweselela othetekele wa sitati khusala anvonya, oshaahiti aya khulikheliwa kuwo zawe shaapu mmote aari wiitthiwaaye Sawulu.

⁵⁹Eettaka onvonya etthiipile, Shiteevawu khusala akhuwa araka: “Mbwana aka Yinsa, pwekherela rooho yaka.” ⁶⁰Attaaphale khukokhora khusala akhuwa channu araka: “Mbwanaaka, ohiwenkhe paathuli khwa twampi eti!” Nawiisha olupa mattakhuzi apale, khufwa.

¹Sawulu aakhupaleliye wuuliiwa wa Shiteevawu.

Sawulu oniwaalupattha anamalottela a Yinsa

Siikhu zaya epile yaapuwiye lupattha khuluyeene ya ojama wa Nluku wa Yeruzaleemu wooshi, khumwazeyela miti za Yudeya na Samariiya, owaalikha maaswihaapa. ²Alume akina ooshapweya rooho khunthuula Shiteevawu khulawa khunzikha eettaka onlilela channu. ³Ila Sawulu aari wojilipisa yoori eeshise ojama wa Nluku. Ye aari ovira nyuupa khwa nyuupa khusala awaakhola alume na aakha noowaattha nkalapooso.

Oshaahiti wa Filiipe nti wa Samariiya

⁴Atthu apale amwazeyiyeeyo aari ovira atafusiraka hapari zooshapweya wakhula vahali aari ofiyaavo. ⁵Filiipe eettiye sitati ya nti wa Samariiya, noofiya khusala alaleya monkoni wa Al-Masiihu. ⁶Wakathi atthu asiiliyeevo saaneene hapari epile aari olupaazo Filiipe na khoona minjuza aari orettaazo, yo aashututeliye mattakhuzi apale aari olupaaye. ⁷Masheethwani aari osaruwa mmwiili wa atthu enkeene eettaka onyakula, anamarakala enkeene na apale oopiwa ti supiyaani aari wiiya oovona. ⁸Sitati etile yaapuwiyewo furaha khuluyeene.

Simawu namajintta

⁹Aarivo mwinyi mmote aari wiitthiwaaye Simawu, aari wiikhalaaye sitati ethiitile, raku aari orettakaaye majintta, na owaazinkula asamariiya ooshi, ajoonaka ye wiiya munumunu. ¹⁰Atthu ooshi aari onsiilaaye, waaza nttunkhulu mpakha nsimaana eetta onttottopela araka: “Opu owahi wa Nluku, otthuupo oniitthiwaaye yoori Owahi Nwulweene.” ¹¹Aphano, yo khusala ansiileza othuuto, mwaasa aaziye raku owaazinkula na vitthu za majintta. ¹²Ila paata ya Filiipe owaatafusirela monkoni wa hapari zooshapweya za ofwalume wa Nluku khwa nzina la Yinsa Al-Masiihu, yo khukhupali na khulawa khoosiwa, alume mpakha aakha. ¹³Simawu na ye khukhupali khoosiwa, khusala anlottelela Filiipe oonaka alama zootikinisa na minjuza miwuluzene zaari orettikhanaazo.

¹⁴Wakathi maaswihaapa asiiliyeevo Yeruzaleemu, yoori atthu a Samariiya akhupali nttakhuzi la Nluku, khumperekhawo Pheeturu na Yaahaya. ¹⁵Yo, noofiya, khuwaalompela atthu aya apale yoori apokherele Rooho Ttakatthiifu. ¹⁶Maana, nalelo yaari ehinaweeshukhele Rooho Ttakatthiifu ila eettiye woosiwa paasi khwa nzina la Mbwana Yinsa. ¹⁷Pheeturu na Yaahaya khuwaattheela makhono khupokherela Rooho Ttakatthiifu. ¹⁸Simawu nawoona yoori ntthu aari opokherela Rooho Ttakatthiifu paata ya ottheeliwa makhono ti maaswihaapa, ye khulaza nzurukhu khuwenkha, ¹⁹khuwooza maaswihaapa yoori: “Mwikinkhe na miiyo owahi waya opo yoori amana kinttheela makhono ntthu asala apokherela Rooho Ttakatthiifu.”

²⁰Ila Pheeturu khunjipu yoori: “Weeyo na nzurukhu awo otthuupo ti mwithowelele! Onoona yoori tthuvo ya Nluku enuuzanyiwa na nzurukhu? ²¹Weeyo khuna hatha phantte nkatthi wa khaazi eti, maana rooho yawo khahi rooho saana mmakhono wa Nluku. ²²Othupwiye zootakhala zawo na onvekele Mbwana. Yoori talili ooswamihi khwa ofikhiri wa nroho mwawo, ²³maana kinoona yoori weeyo yawiitaala katapu na washawiwa ti twampi.”

²⁴Simawu khujipu yoori: “Mwilompe okhu wa Mbwana khwa miiyo, yoori zooshi epo mwilupiyeezo zihikirettikhanele.”

²⁵Paata ya Pheeturu na Yaahaya olawela oshaahiti na otafusiri nttakhuzi la Nluku khulankha khusala arutela Yeruzaleemu, alawaka aari ovira atafusiraka miti mikina za Samariiya.

Filiipe na mwiitiyoopiya

²⁶Nlayikha la Mbwana khumuuza Filiipe yoori: “Weette ntarikhi ya mmakuluttu phantte ya kusini elankhiyeeyo Yeruzaleemu eniishukhelaaye sitati ya Kaaza.” ²⁷Filiipe khulankha khusala alawa. Ntarikhi khunsikana mwinyi mmote wa Etiyoopiya woohimemi, alankhaka Yeruzaleemu eettaka owawe. Oto aya aari nakhaazi nwulu enkhiweeyo othokorela nzurukhu wa Rayisi nwulu wa Etiyoopiya, Eettiye Yeruzaleemu omwaaputu Nluku. ²⁸Eettaka orutela owawe, eekhaliye varikisho vawe khusala asoma kithaapu ya napiyu Ezaaya. ²⁹Aphano, Rooho Ttakatthiifu khumuuza Filiipe yoori: “Waattame rikisho etile osala olottelela.”

³⁰Filiipe khutthirela rikisho etile khusikana khusala ansiila mwiitiyoopiya otule asomaka kithaapu ya napiyu Ezaaya, ye khumuuzela yoori: “Mattakhuzi apo onsomaaye aniweeleya?” ³¹Ye khujipu araka: “Anikeeleya toovi kihina ntthu wookeeleza?” Khumuuza Filiipe yoori awele varikisho attaaphale aariivo ye. ³²Zawaatikhiwa Ttakatthiifu za nkithaapu aari osomaaye mwiitiyoopiya otule zaari olupa toono:

“Ye aathuuliwe nkhama pwittipwitthi eneettelaaye wuuliiwa, khwiiya woonyamala,

ari vakatthi wa apale ankasaaye ovuzi,

Ye khaafunuliye milomo zawe.

³³Ye wakathi wa ohoochiwa wawe khukatthaziwa shariya.

Khi paani ariina ruhusa ya ottakhula ojama awe?

Ye ohaayi awe walaziwavo vathi apha.”8:33 Woone kithaapu ya Ezaaya 53:7-8.

³⁴Aphano mwiitiyoopiya khumuuza Filiipe yoori: “Kinuuvekela yoori okeeleze, napiyu otu oninlupa paani? Ye mweenyewe ama ntthu nkina?” ³⁵Elottelanaka Filiipe khwaaza omweeleza mwiitiyoopiya otule, khwa mattakhuzi atthaapale ari osomaaye a nkithaapu ya Ezaaya, khusala amuuza hapari zooshapweya monkoni wa Yinsa.

³⁶Ari ntarikhi eettaka olawa, khufiya vahali aarivo maati. Mwiitiyoopiya otu khumuuza Filiipe yoori: “Apha awaapho maati. Niini enkhattazaaye woosiwa miiyo?” ³⁷Filiipe khunjipu yoori: “Khahi haraamu amana okhupali na rooho yawo yooshi.” Ye khujipu yoori: “Miiyo kinkhupali yoori Yinsa Mwaana wa Nluku.”8:37 Zawaatikhiwa za raku nsithari opu khina.³⁸Aphano, khweemesa rikisho etile, khwiishukhela mmaati oowiiri, Filiipe khulawa khumoosa mwiitiyoopiya otule. ³⁹Wakathi avuwiyeemo mmaati, Rooho Ttakatthiifu khunthuula Filiipe, mwiitiyoopiya otule khuhimooni theenya, na ye khurutela safwari yawe etile ari woofurahi saaneene. ⁴⁰Filiipe khulawaniwa sitati ya Azotu, khulikhiwa ottuukho khusala avira alawaka mpakha Sezareeya alaleyaka hapari zooshapweya wakhula sitati aari ofiyaaye.

Okhupali wa Sawulu

¹Sawulu aarettiye nalelo awaatuturushanaka owoola anakhiyoni a Mbwana. Khulankha khulawa wa haakhimu nwulu wa tiini, ²khunvekela warakha ya ruhusa yoori alawe mmasinakooka ya sitati ya Tamaashiku, amana awaasikanamo anamalottela a Yinsa, waaza alume mpakha aakha awaathuule awaalawane Yeruzaleemu awaatthe nkalapooso. ³Khulankha khusala alotta tarikhi, asaleelaka ofiya Tamaashiku, khumpuwelela nuuru yoolankha pinkuuni khunmwasikhela. ⁴Aphano ye khukwela vathi, khusiila huula yaari oraaye: “Sawulu, Sawulu, niini onikilupatthelaaye?”

⁵Sawulu khuri: “Mwa a paani mweeyo, Mwinyi?”

Ye khujipwiwa yoori: “Miiyo ki Yinsa, otu weeyo oninlupatthaaye. ⁶Olankhe olawe ositati, ottuukho onttela wuuziwa etthu yooretta.”

⁷Ashirikha aari olawanaaye khweemela ari awoova khunyamala, mwaasa woosiila huula etile ila khuhisala amoona hatha ntthu. ⁸Aphano Sawulu khulankha vathi aphale afunulaka maasho khuhisala awahi woona hatha etthu, atthu khunkholela khunlawana mpakha Tamaashiku. ⁹Khwiikhala siikhu ttatthu ari woohooni, woohiji na woohinywi.

¹⁰Tamaashiku aariwo nakhiyoni wa Yinsa aari wiitthiwaaye Ananiiya. Mbwana khunkhuwela nkatthi wa jozi araka: “Ananiiya!”

Ye khujipu: “Lape, Mbwana!”

¹¹Mbwana khumuuza yoori: “Olawe owawe Yuuda, aniikhalaaye tarikhi eniitthiwaaye Yoolotteya, wamuuzelele ntthu mmote wa Taarusu aniitthiwaaye Sawulu. Maana ye eetta olompa; ¹²nkatthi wa jozi khumoona mwinyi aniitthiwaaye Ananiiya anttheeliye makhono yoori arutele woona, Ananiiya khujipu yoori:”

¹³“Mbwanaaka, kaaza raku osiila vitthu monkoni wa ntthu oto, na vitthu zooshi zootakhala aniwaarettelaazo attakatthiifu awo Yeruzaleemu. ¹⁴Ye ata okhuno khwa ruhusa ya mahaakhimu a tiini yoori awaakhole ooshi apale ansifwaaye nzina lawo.”

¹⁵Ila Mbwana khumuuza Ananiiya yoori: “Olawe, maana ntthu oto khwa miiyo, yoopo yoothawuliwa yoori ethuule nzina laka ewaalawanele amalapo na afwalume aya, na vakatthi wa atthu a Ezirayiilu. ¹⁶Kinlawa kanthoonyeze Sawulu nanna anttelaaye ohoowa mwaasa wa nzina laka.” ¹⁷Aphano, Ananiiya khulankha khulawa. Noofiya khuvira nnyupa khunttheela makhono khumuuza yoori: “Ttwiiyaku Sawulu, Mbwana Yinsa, otule oopuweleliyeeyo ntarikhi otaaka, akiperekha miiyo yoori orutele woona na wiiye wa wiitaala Rooho Ttakatthiifu.” ¹⁸Nasaapiru vitthu nkhama mavalako khunsaruwa mmaasho, khwaaza woona opheya. Noopattha ashikhaali khulawa khoosiwa. ¹⁹Ajiiyeevo etthu yoojiwa, khupattha kuvu.

Sawulu onlawela oshaahiti hapari zooshapweya

Sawulu aavirisiye siikhu vattitthiiru aari vamote na anakhiyoni a Yinsa, Tamaashiku. ²⁰Wakathi otthuupule khwaaza olaleya mmasinakooka araka Yinsa Mwaana wa Nluku. ²¹Ooshi apale aari onsiilaaye khwiiya ootikinisiwa channu, khusala alupa yoori: “Khahiyo othuutu aari owaalupatthaaye anamalottela a Yinsa a Yeruzaleemu? Aatiiye okhuno oteela owaakhola yoori awaalawane Yeruzaleemu wa mahaakhimu a tiini?” ²²Ila wakhula swaafu mattakhuzi a Sawulu aari wiiya oowahi. Na mithoonyezo aari olazaazo yoori Yinsa ti Al-Masiihu zaari zookhomaala mpakha mayaahuuti aari wiikhalaaye Tamaashiku khuhisala ajuwa etthu yoolupa.

²³Ziviriyeevo siikhu zawaatta, mayaahuuti khuwaza shawuri zoomuula, ²⁴ila Sawulu khwiiya woojuwa shawuri zaya epile. Nthana na osikhu aari wiiya oothotolela milako za sitati etile yoori apatthe omuula. ²⁵Anakhiyoni awe khunthuula osikhu khunttha nkhelenke khumwiirusha muuri.

²⁶Wakathi afiiyeevo Yeruzaleemu khusala atakha owaakusanya anakhiyoni a Yinsa, ila ooshi khusala amoova mwaasa woohinkhupali yoori khweele nakhiyoni. ²⁷Aphano Baranabe khunthuula khunlawana wa maaswihaapa khusala awooza nanna Sawulu amooniyeezo Mbwana ntarikhi na nanna anttakhulaniyeezo. Baranabe khusala alupa theenya khwa nanna atafusiriyeezo woominyalavo nzina la Yinsa Tamaashiku. ²⁸Khwiiya vamote na yo, Yeruzaleemu, alawaka othepela arutaka na ottakhula monkoni wa nzina la Yinsa woominyalavo. ²⁹Aari ottakhula na okheetisana na mayaahuuti oottakhula ekereeku, ila yo aari owaza shawuri za omuula. ³⁰Attwiize noojuwa shawuri za epile, khunthuula khunlawana nti wa Sezareeya khumpakhirisa yoori alawe sitati ya Taarusu.

³¹Siikhu zaya epo ojama wa Nluku waari wa heeri nti wooshi wa Yudeya, Kalileya na Samariiya, waari wookhomaala na wiikhala woomoova Mbwana alipiseliwaka ti Rooho Ttakatthiifu, atthu khusala eekezeleya.

Ovonisiwa wa Eneeya

³²Aphano Pheeturu aviriyeevo phantte zooshi, khwiishukhela theenya nti wa Liida olawa owaathotola attakatthiifu apale aari wiikhalaaye ottuukho. ³³Ottuukhule khunsikana ntthu woorakala aari wiitthiwaaye Eneeya aariina nyaakha minaane ari voolili. ³⁴Pheeturu khumuuza yoori: “Eneeya, Yinsa Al-Masiihu onuuvonisa! Olankhe okhuje nrepa lawo.” Ye khulankha nasaapiru. ³⁵Atthu ooshi apale aari wiikhalaaye Liida na Saroona, na woona vitthu epile, khunkhupali Mbwana.

³⁶Yoope aariwo nakhiyoni wankha aari wiitthiwaaye Tabita, khwa luuka ya ekereeku enriwa Dooroka. Ye aari oretta vitthu zooshapweya na winkha zimola. ³⁷Khumpattha olwele khufwa, mwiili awe khoosiwa khupwehiwa kaatthi ya vatulu. ³⁸Liida yaattamananiye sitati ya Yoope. Wakathi asiiliyeevo anakhiyoni yoori Pheeturu ori nti wa Liida, khuwaaruma atthu awiri olawa omuuza yoori: “Ohirupaze ota okhuno niriiwo.”

³⁹Pheeturu khulankha khulawa vamote na yo, noofiya khuthuuliwa khulawaniwa kaatthi etile ya vatulu. Anamafweliwa pi amanna zaya ooshi khunzukulela khusala alila na anthoonyezaka ajapi na kuwo kiina Dooroka aasoniyeezo ari vamote na yo.

⁴⁰Pheeturu khuwaaruma ooshi osaruwa okatthi okhule, attaaphale khukokhora khusala alompa. Khuzukuluwa khumweekesa muufwi otule khuri: “Tabita, olankhe!” Ye khufunula maasho awe, khumoona Pheeturu khwiikhala. ⁴¹Khunkholela nkhono khunlansa khweemela, aphano khuwaakhuwela anakhiyoni na anamafweliwa pi amanna zaya apale khuwenkha ari haayi. ⁴²Vitthu epile khwiiya zoojuwiwa sitati yooshi ya Yoope, atthu a waatta khunkhupali Mbwana. ⁴³Pheeturu eekhaliye nti wa Yoope siikhu zawaatta, owawe mwinyi mmote aari wiitthiwaaye Simawu aari owalakaaye shapala ya nyama.

Namalokozela Koroneele

¹Sitati ya Sezareeya aariwo mwinyi mmote aari wiitthiwaaye Koroneele, aari namalokozela wa khuntti yaanajanka yaari wiitthiwaaye Etaliyaanu. ²Ye na ajamaaze ooshi aari emaani na oomoova Nluku; aari owaatthantta venkivene anamathowiwa na aari omwaaputu Nluku wakhula wakathi. ³Siikhu moote njuwa looveva wakathi opule wa saakhentta, nkatthi wa jozi, khoona saaneene nlayikha la Nluku limwaattamiye leettaka onkhuwela liraka: “Koroneele!”

⁴Ye khusuthuwa, khusala eekesa nlayikha ntthile eettaka othukumela, khuuzela yoori: “Niini, mwinyi?”

Nlayikha khujipu liraka: “Lompa zawo na zimola zawo zafiya mmakhono wa Nluku nkhama tthuvo yoohisahawiwi. ⁵Apho, owaarume atthu alawe nti wa Yoope, amweettele Simawu ariiye ottuukho anjuwaniwaaye nzina la Pheeturu, ⁶amaka owawe Simawu, namawala ovuzi wa nyama, aniikhalaaye nshini wa pahari, ye onttela owuuza etthu yooretta.”

⁷Nlayikha nawiisha omuuza mattakhuzi apale Koroneele, khulankha khusala lilawa. Aphano, Koroneele khuwaakhuwela a karumeya awe awiri na najanka mmote wa atthaapale aari owaalokozelaaye na aari omoovaaye Nluku, ⁸khuwooza vitthu zooshi zaarettikhaniyeezo, nawiisha khuwaaruma olawa nti wa Yoope.

Othoonyeziwa wa Pheeturu

⁹Mmeesho mwaya, etthirelaka payina ya saasiitha yo khusala alawa Yoope, asaleelaka ofiya nsitati, Pheeturu khuwela vatulu wa nyuupa yoori alompe. ¹⁰Ila khunkhola jala, khusala atakha yoori apatthe etthu aje; etthu yoojiwa yaari oretta yeettaka wiipikhiwa, ye khuthoonyeziwa. ¹¹Khusala oona pinku eri yoofukuliwa na etthu nkhama nkhumi nwulweene elankhaka otulu etaka vathi efukiwe mashaka mane. ¹²Erivo wakhula jaati ya nyama za moolu mane, na epile zinjipurulaaye zeettettaka vathi mpakha anyannyi ootulu. ¹³Khupuwa huula yaari omuuzaaye yoori: “Pheeturu, olankhe; oshije nyama epo orafune.”

¹⁴Ila ye khujipu araka: “Akinwahi miiyo, Mbwanaaka! Thanku kumpiwe akinaje vitthu za haraamu wala zoohifwayi!”

¹⁵Swaafu ya phiiri huula etile khunjipu yoori: “Ohiharamushe etile Nluku ahalalishiyeeyo.”

¹⁶Swaafu ttatthu huula etile elupaka etthu moote, elottelanaka nkhumi opule khuputaputeliwa khurutiseliwa pinkuuni.

¹⁷Pheeturu eettaka opheleleza maana a jozi yaya etile, atthu apale arumiweeyo ti Koroneele khujuwawo owawe Simawu mwaasa wa wuuzelela khulawa mpakha vanlako. ¹⁸Khukhuwa khuuzela yoori Simawu anjuwaniwaaye nzina la Pheeturu amaka attaapha? ¹⁹Pheeturu aari oretta nalelo eettaka opheleleza maana a jozi etile, Rooho Ttakatthiifu khumuuza yoori: “Weeyo, Simawu, nna alume attatthu aniweekesaaye. ²⁰Apho, olankhe na wiishukhevo. Ohiiyane shaakha owaalotta apo aya, maana ti miiyo kiwaarumiyeeyo.”

²¹Pheeturu khwiishukha khuwaasikana khuwooza yoori: “Otu mwinimweekesaaye ti miiyo. Mwateela ni?”

²²Yo khujipu yoori: “Fweeyo neetta orumiwa ti namalokozela wa anajanka aniitthiwaaye Koroneele. Ye ntthu wa shariya na woomoova Nluku na ntthu wooshitahiwa pi atthu ooshi a Yudeya. Nlayikha limote ttakatthiifu ti limuuziyeeyo yoori onkhuwele olawe owawe asiile mattakhuzi onlalelaaye.” ²³Pheeturu khuwooza yoori avire nnyupa amake. Siikhu ya phiiri Pheeturu khulankha na atthu apale, vamote na mamuumini akina a Yoope khusala amperekha.

Amalapo noosiila oshaahiti wa Pheeturu khupwekherela Rooho Ttakatthiifu

²⁴Mmeesho mwaya khufiya Sezareeya. Koroneele na ajamaaze na maswaahipu zawe, awaalaleyiyeeyo eetta onweja. ²⁵Wakathi Pheeturu afiiyeevo atakhaka ovira nnyupa, Koroneele khunkokhorela nshini wa moolu awe khumwaaputu. ²⁶Ila Pheeturu khumuuza yoori: “Olankhe, miiyo ki pinaatamu nkhama weeyo.”

²⁷Khweemela khupiyana mwaasa, nawiisha Pheeturu khuvira nnyupa khuwaasikana atthu awaatta athukumaniye. ²⁸Khuwooza yoori: “Mweeyo mwinjuwa yoori okusanyeya mayaahuuti na mmalapo, ama owaathotola enkhattaziwa. Ila Nluku ti akithoonyeziyeeyo yoori akina haakhi ya onharamusha ntthu wala omoona ohifwayi. ²⁹Tiito mwiriiye nookikhuwela khusala kita woohiina hatha hoofu. Apha kintakha kiwuuzele yoori warumiseliyeni okhuweliwa miiyo?”

³⁰Koroneele khunjipu yoori: “Zavira siikhu nne payina ya saakhentta. Kiri onti keettaka olompa, Nasaapiru khupuwa mwinyi awaliye kuwo zoolakala. ³¹Khukuuza yoori: ‘Koroneele, Nluku asiila lompa yawo na onfwahamu zimola epi oniwinkhaaye atthu. ³²Orume weetteliwa Simawu aniitthiwaaye Pheeturu, ariiyeeyo nti wa Yoope amakiyeeyo vaje wa Simawu, namawala shapala, aniikhalaaye nshini wa pahari.’ ³³Aphano, miiyo khuwaaruma atthu wuuteela nasaapiru, kinuushukhurwela mwaasa wa ota. Nasaapi eti fooshi niri omaasho wa Nluku yoori nisiile wakhula etile Mbwana oorumiyeeyo onuuza.” ³⁴Pheeturu khwaaza ottakhula araka: “Aphano, enikeeleya saaneene yoori Nluku atthu ooshi oniwoonela sawasawa, ³⁵khwa wakhula khapila ye oniwaakhupalela atthu apale animoovaaye na anrettaaye epile ziiyiyeeyo za shariya. ³⁶Mweeyo mwinjuwa nttakhuzi Nluku aaperekhiyeeyo vakatthi wa atthu a Ezirayiilu, alaleyaka monkoni wa hapari zooshapweya za heeri khwa Yinsa Al-Masiihu, Mbwana wa atthu ooshi. ³⁷Mweeyo mwinjuwa vitthu zirettikhaniyeeyo Yudeya yooshi eti, waaza nti wa Kalileya paata ya njampo la woosa ntthile Yaahaya alaleyiyeeyo, ³⁸mweeyo mwinjuwa khwa nanna Nluku anthawaziyeeyo Yinsa wa Nazareeti khwa Rooho Ttakatthiifu na owahi, ethiito yanlawaniye phantte zinkizene arettaka vitthu zooshapweya na owaavonisa atthu ooshi apale aari ohoochiwaaye ti sheethwani, maana Nluku aari vamote na ye. ³⁹Fweeyo namashaahiti wa zooshi epile arettiyeezo nti wa mayaahuuti mpakha Yeruzaleemu, ottuukho akhomeliweewo vansalapa khuuliiwa. ⁴⁰Ila Nluku khunsisimula siikhu ya ttaatthu, khunsarula yoori ooniwe, ⁴¹khahiyo phi atthu ooshi, ila fweeyo, namashaahiti nithawuliweeyo ti Nluku ehinarettikhane epo zaya. Najana na nanywana maati paata ya Nluku onsisimula muufwa. ⁴²Ye ti anirumiyeeyo yoori niwaatafusirele atthu na nilawele oshaahiti, yoori othuuto Nluku amwinkha wiiya namaphuka wa apale ariiye haayi mpakha apale afwiiyeeyo. ⁴³Hatha na manapiyu ooshi anlawela oshaahiti yoori wakhula otule aninkhupalaaye onswamihiwa twampi zawe khwa nzina lawe ye.”

⁴⁴Pheeturu nalelo eettaka othatela mattakhuzi apale atthu ooshi aari osiilaaye khuweeshukhela Rooho Ttakatthiifu. ⁴⁵Mamuumini apale amayaahuuti aalankhiyeeyo Yoope na Pheeturu khwiiya ooshanka maana Nluku aawenkhiye woohirupazivo Rooho Ttakatthiifu hatha na amalapo, ⁴⁶maana yo awaasiiliye ansifwaka Nluku khwa luuka pheeya.

Elottelanaka Pheeturu khulupa yoori: ⁴⁷“Owaapho antakhaaye okhattaza maati yoori atthu apa ahoosiwe? Yo apokherela Rooho Ttakatthiifu nkhama fweeyo!” ⁴⁸Aphano ye khuruma yoori oosiwe khwa nzina la Yinsa Al-Masiihu. Nawiisha khunvekela Pheeturu yoori eekhale nenkawu siikhu vattitthiiru vamote na yo.

Pheeturu oniwooza mamuumini vitthu zaarettikhaniyeeyo

¹Maaswihaapa na attwi ooshi a Yudeya khusiila elupiwaka yoori amalapo apwekherela nttakhuzi la Nluku. ²Pheeturu noorutela Yeruzaleemu, apale a khuntti yookhiriya khusala annyakulisa amuuzaka yoori: ³“Weeyo wavira nnyupa wa atthu oohikhiriyi na wajana.”

⁴Aphano, Pheeturu khwaaza owooza zooshi zanrettikhaniyeeyo woolotteyavo araka: ⁵“Miiyo kaari sitati ya Yoope, keettaka olompa khuthoonyeziwa. Khoona etthu nkhama nkhumi nwulweene waari wiishukhaaye pinkuuni woofukiwa mashaka mane waatiye mpakha aphale kaariivo. ⁶Keekesiyeevo nkatthi wa nkhumi opule, keetta woona nyama za moolu mane za vaje, nyama za ntthuttu, nyama zoojipurula vathi na anyannyi ootulu. ⁷Khusiila theenya huula yaari okuuzaaye yoori: ‘Olankhe Pheeturu! Oshije na orafune.’

⁸“Miiyo khujipu yoori: ‘Wala, Mbwanaaka, akinaje etthu ya haraamu wala yoohifwayi.’ ⁹Khusiileya huula ya pinkuuni ya phiiri eraka: ‘Etile Nluku ahalalishiyeeyo ohiharamushe.’ ¹⁰Vitthu zaya epo zaarettikhaniye swaafu ttatthu, zooshi khuthuuliwa khuweziwa pinkuuni.

¹¹“Wakathi otthuupule, nyuupa etile kaamakiyeewo khutawo atthu attatthu aperekhiweeyo Sezareeya. ¹²Rooho Ttakatthiifu khukuuza yoori kiwaalotte woohiina hatha shaakha. Attwi apa sitha theenya khulawa vamote na miiyo. Khuvira nnyupa wa mwinyi aya otule. ¹³Ye khumuuza nanna nlayikha lampuweleliyeezo owawe limuuza yoori: ‘Orume weetteliwa Simawu aniitthiwaaye Pheeturu. ¹⁴Othuuto ontta owuuza mattakhuzi, khwa atthaapo ontta wuusurukha weeyo na atthu ooshi a vaje vawo.’

¹⁵“Wakathi kaaziyeevo ottakhula, Rooho Ttakatthiifu yeetta oweeshukhela nkhama etthiipile yaaniishukheliyeeyo omwanzo ene. ¹⁶Aphano miiyo khuupuwela etile Mbwana aanuuziyeeyo yoori: ‘Yaahaya awoosani na maati, ila mweeyo mwinttela woosiwa na Rooho Ttakatthiifu.’11:16 Woosiwa opu ona maana otupweziwa eto enthoonyeza yoori Yinsa onttela onitupweeza nkatthi wa Rooho Ttakatthiifu.¹⁷Nakataalikha Nluku awenkha tthuvo, ethiito aninkhiyeeyo fweeyo paata ya onkhupali Mbwana Yinsa Al-Masiihu, kaari paani miiyo wonkhijilela Nluku?” ¹⁸Noosiila mattakhuzi apale, khuhiruteli olupa mattakhuzi makina, khunsifu Nluku araka: “Khweele, mpakha amalapo Nluku awenkha othupwiya yoori apatthe ohaayi.”

Ojama wa Nluku wa Antiyookiya

¹⁹Apale aamwazeyiyeeyo mwaasa wa olupatthiwa waazaniyeeyo ofwa wa Shiteevawu, khufiya nti wa Feniisiya, esura ya Shiipere, na sitati ya Antiyookiya, alaleyaka hapari khwa mayaahuuti paasi. ²⁰Akinoko apale aari a Shiipere na sitati ya Sireene, khulawa Antiyookiya khusala awooza akereeku hapari monkoni wa Mbwana Yinsa. ²¹Nkhono wa Mbwana waari vamote na yo, atthu awaatta khukhupali khusala anlotta Mbwana.

²²Hapari epile khufiya va ojama wa Nluku Yeruzaleemu, yo khumperekhawo Baranabe Antiyookiya. ²³Noofiya khoona rehema ya Nluku, khwiiya woofurahi na khuwaalipisela yoori eeye ookhomaala mmakhono wa Mbwana na rooho yaya yooshi. ²⁴Baranabe aari ntthu nkemaani wawiitaala Rooho Ttakatthiifu na amini. Atthu awaatta khusala ajikusanya na Mbwana.

²⁵Aphano, khulankha Baranabe khusala alawa sitati ya Taarusu omweettela Sawulu. ²⁶Wakathi ansikaniyeevo khunthuula khusala alawa Antiyookiya. Yo aari wiiya okusanyeya na ojama wa Nluku wa Antiyookiya noowaasomisa atthu awaatta khwa mwaakha ntero. Antiyookiya pu ohali anakhiyoni aziiyeewo wiittheliwa nzina la atthu a Al-Masiihu.

Akaapu onlaleya jala ya waatta

²⁷Siikhu zaya epile manapiyu akinoko aalankhiye Yeruzaleemu eettaka Antiyookiya. ²⁸Mmote wa yo aari wiitthiwaaye Akaapu, khulankha khwa Rooho Ttakatthiifu khulupa yoori enteela opuwelela jala olumwenku wooshi, ethiito yaarettikhaniye wakathi wa Seezari Kalaawutiyu ari mfwalume nwulu. ²⁹Anakhiyoni khujilakelela owaawuni attwiizaya aari wiikhalaaye Yudeya wakhula ntthu khwa khiima aari owahaazo. ³⁰Khuwaaperekheza tthuvo attunkhulu a ojama wa Nluku mmakhono wa Baranabe na Sawulu.

Ofukuliwa wa Pheeturu nkalapooso

¹Wakathi aya opule, mfwalume Herooti aarumiye okholiwa atthu akina a ojama wa Nluku atakhaka yoori awaahukhumu, ²khumuula Tiyaaku, ttwiiye Yaahaya, na phanka. ³Aphano, ye nawoona yoori vitthu epile mayaahuuti zaari zowaatuvela, khuruma okholiwa Pheeturu. Wakathi laari orettiwaaye njampo la phaawu yoohiina fwaramento. ⁴Paata ya okholiwa Pheeturu khutthiiwa nkalapooso. Elottelanaka Herooti khuruma yoori asala eekeseliwa ti khuntti nne za anamweekesela, wakhula khuntti anajanka wane. Herooti aalakeliye omphuka Pheeturu vakatthi wa atthu paata ya wiisha njampo ntthile.

⁵Pheeturu khuvira nalelo ari nkalapooso, ila ojama wa Nluku waari oretta weettaka onvekela Nluku woohilikheleli.

⁶Osikhu otthuupule Herooti aari weettelaaye omphuka Pheeturu, ye aarettiye eettaka olala vakatthi wa anamweekesela awiri, afukiwe na makwinjili na anamweekesela akina aari vanlako eekesalaka kalapooso. ⁷Nasaapiru khupuwa nlayikha la Mbwana, nuuru yaya khumwasikhela nkalapooso. Nlayikha ntthile khulawa mpakha phantte etile aariwo Pheeturu, khunsapa ye khusisimuwa. Khumuuza yoori: “Waakuve, olankhe!” Aphano, makwinjili apale afukaniweeyo khuvuleya mmakhono mwawe.

⁸Nlayikha khumuuza yoori: “Owale kuwo zawo na tamanko zawo.” Pheeturu khulankha khuwala. Khumuuza theenya yoori: “Owale ajapi yawo, okilotte.” ⁹Pheeturu khusaruwa khusala alotta nlayikha ntthile, ila ahikhupalelaka yoori vitthu epile aari orettaazo nlayikha ntthile zaari khweele; ye aari woona nkhama jozi. ¹⁰Khunvirela namweekesela wamwanzo, khunvirela otu wa phiiri, khulawa mpakha khusikana nlako wa yuuma waari osaruwelaaye vaje. Nlako opule khufukuwa ottho, yo khusaruwa. Noosaruwa, eettaka weettetta ntarikhi, nlayikha ntthile khuzimweela. ¹¹Aphano Pheeturu khusala alupa yoori: “Kahakikhi yoori khweele Mbwana aperekha nlayikha lawe khuta okuusuru mmakhono wa Herooti na shawuri zooshi za mayaahuuti aari weekeselaaye.”

¹²Paata ya omweeleya vitthu epile zooshi, khulankha khusala alawa wa Mariyamu mamaawe Yaahaya, anjuwaniwaaye nzina la Maaruku, ottuukho akusanyeyiyeewo atthu khusala alompa. ¹³Pheeturu noofiya khuttha khomaala, khuta karumeya mmote aari wiitthiwaaye Rooti oteela omoona. ¹⁴Ye noojuwa yoori huula ya Pheeturu, khuhiwahi hatha ofukula milako, khusala aruti eettaka onyakula arina furaha khuluyeene, araka: “Pheeturu ori vanlako!” ¹⁵Ashirikhaawe khumuuza yoori: “Weeyo ona wazimu!” Ila ye khusala akhanyarela awoozaka yoori ti Pheeturu. Yo khulupa yoori: “Talili nttho nlayikha lawe.” ¹⁶Pheeturu khurutela ottha khomaala, noofukula atthu apale khunsikana khweele ari othuuto, ooshi khwiiya ooshanka. ¹⁷Ye khulansa nkhono awe khuwenkha alama yoori eeye oonyamala, khusala awaathatelela nanna Mbwana anlaziyeemo nkalapooso na khuwooza yoori: “Mattakhuzi apa mwinjuwise Tiyaaku na attwiizetthu.” Khulankha khusala alawa phantte kiina.

¹⁸Noocha anamweekesela apale a kalapooso khusala ari ootikinisiwa venkivene, mwaasa woohijuwi niini yanrettikhaneliyeeyo Pheeturu. ¹⁹Amwekesiyeevo khuhisala ampattha, Herooti khusala awoozela anamweekesela na khuruma wuuliiwa anamweekesela aya apale a kalapooso.

Ofwa wa Herooti

Attaaphale Herooti khulankha khusala alawa Yudeya eettaka Sezareeya, khulawa khwiikhala ottuukho wakathi wa waatta. ²⁰Herooti aari owakatipukhela atthu a Tiiru na atthu a Sitooni; yo khusiilana olawa okutthanana ye yoori anvekele asala asiilana. Paata ya opattha waawuniwa ti Palaashitu nakhaazi nwulu wa mfwalume Herooti, khuveka osiilana, maana etthu yoojiwa aari ojaaye atthu apale yaari olankha nti otthuupule wa mfwalume.

²¹Siikhu yaasiilaniweeyo okutthana, Herooti awaliye kuwo zawe za ofwalume, khwiikhala va khukulu ya ofwalume, khusala attakhula vamote na atthu apale. ²²Yo khwaaza onyakula araka: “Eto huula ya nluku khahiyo ya pinaatamu.” ²³Aphano wakathi otthuupule nlayikha la Nluku khunvulalisa Herooti mwaasa woohinttitthimisi Nluku; khujiwa pi nyunku khufwa.

²⁴Aphano nttakhuzi la Nluku khusala liwula na limwazeya.

²⁵Baranabe na Sawulu nawiisha khaazi zaya, arutaka Yeruzaleemu, khunthuula Yaahaya, anjuwaniwaaye nzina la Maaruku.

Safwari yamwanzo ya Baranabe na Sawulu yoolawa olaleya hapari zooshapweya

¹Ojama wa Nluku wa Antiyookiya aarivo manapiyu na anamanozela, Baranabe, na Simiyooni aari wiittheliwaaye Wooriipa, Luusiyu wa Sireene, Manayimu aaleliweeyo vamote na nsatoro Herooti wa phiiri na Sawulu. ²Eettaka omwaaputu na ofuka, Rooho Ttakatthiifu khuwooza yoori: “Mwimphakule nasaapi Baranabe na Sawulu yoori akhole khaazi yaka kiwaakhuweleliyeeyo.” ³Aphano yo khufuka na khulompa khuwaattheela makhono khuwaaperekha.

Sawulu na Baranabe anlaza oshaahiti esura ya Shiipere

⁴Aperekhiweevo ti Rooho Ttakatthiifu, khulawa mpakha nti wa Seluusiya ottuukho khulokhela esura ya Shiipere. ⁵Noofiya nti wa Salamiina, khusala alaleya nttakhuzi la Nluku nsinakooka ya mayaahuuti, aarina Yaahaya anjuwaniwaaye Maaruku aari namwaawuni.

⁶Alokhiyeevo visura zooshi mpakha Paafu, khunsikana yaahuuti mmote wa majintta, napiyu woojipanka aari wiitthiwaaye Bariyinsa. ⁷Oto aari onlokozaka mfwalume Seerishiyu Paawulu, aari ntthu wa akhili. Mfwalume otule khunkhuwelisa Baranabe na Sawulu aari otakha osiila nttakhuzi la Nluku. ⁸Ila Elimaashi namajintta maana a nzina lawe khwa luuka ya ekereeku aari muumani wa maaswihaapa. Ye aari otakha omwaattuwananisa amini mfwalume. ⁹Sawulu, aniitthiwaaye Paawulu, wa wiitaala Rooho Ttakatthiifu, khunkhontolela maasho, ¹⁰khumuuza yoori: “Mwaana wa sheethwani wamwiitaala ottettekha na zootakhala zooshi, atuwi wa shariya! Khunlikha otapwatela tarikhi za wookowa za Mbwana? ¹¹Apho, ojuwe yoori nkhono wa Mbwana ontakha wuumanana weeyo, onttela ofwa maasho, ovirevo wakathi paasi ohoonaka njuwa.” Nasaapiru khunteela tthapo na yiiza, eettaka weettetta etthiipile khusala ajizukulela amweekesa ntthu wonkholela nkhono. ¹²Mfwalume nawoona etile yaarettikhaniyeeyo khukhupalela na khwiiya wootikinisiwa pi masomi a Mbwana.

Paawulu onlaza oshaahiti Antiyookiya ya Pisitiya

¹³Paawulu na ashirikhaawe khupakhira nkalawa nti wa Paafu, khusala alawa Peereje ya Panfiiliya. Yaahaya khuwaalikha ottuukhule ye khurutela Yeruzaleemu. ¹⁴Alankhaka Peereje khufiya Antiyookiya ya Pisitiya, khusala alawa nsinakooka siikhu ya Saapatu,13:14 Saapatu yaari siikhu Ttakatthiifu ya ovumula wa mayaahuuti. Saapatu yaya eti jumwa monsi. noofiya khwiikhala. ¹⁵Nawiisha osomiwa kithaapu ya thawurethi na kithaapu za manapiyu attunkhulu a nsinakooka khulupa yoori: “Attwiizetthu, nkhama mwinaaye mattakhuzi owaalipisela atthu, mwilupe.”

¹⁶Paawulu khulankha khuttha alama na nkhono ya owaanyamaza atthu, khulupa yoori: “Atthu a Ezirayiilu na mweeyo akina mwinimoovaaye Nluku, mwikisiileze. ¹⁷Nluku wa meezirayiilu awaathawula apapazetthu eekhalaka nti wa Misuri, khuwaaretta wiiya atthu awaattelana. Ye khuwaalazawo khwa owahi nwulweene. ¹⁸Khuwaavilela khwa thwapiya zaya zootakhala nyaakha arupayiini n’yaara mphule aarimo. ¹⁹Atapanyiyeevo khapila sapa nti wa Kanaani, khuwaarithisa nti wa atthu aya atthaapo. ²⁰Zooshi epo zaaviriye kiyasi ya nyaakha miiya nne na hamusiini.

“Nawiisha, khwinkhiwa anamaphuka mpakha wakathi wa napiyu Samuweele. ²¹Aphano atthu khusala anveka mfwalume, Nluku khuwenkha Sawulu mwaana wa Khiishi wa lihimo la Bejami. Aalokozeliyeeyo nyaakha arupayiini. ²²Nonlikhisa Sawulu, Nluku khunlansa Daawuuda khumwinkha ofwalume nkhama etthiipo alaweliyeeyo oshaahiti yoori: ‘Kampattha Daawuuda mwaana wa Yeese, nlume wa va rooho vaka anttelaaye oretta matakhelo aka.’

²³“Khwa ojama ya othuuto, nkhama etthiipo ahiitiyeezo Nluku, antiisa Yinsa yoori eeye Namuusuru wa Ezirayiilu. ²⁴Ahinate Yinsa, Yaahaya atafusiri njampo la woosa woothupwiya khwa atthu ooshi a Ezirayiilu. ²⁵Wakathi aari weettelaaye wiishisa khaazi zawe Yaahaya aalupiye yoori: ‘Mweeyo mwinikoona nkhama paani? Aki otu mwinimupuwelaaye, ila onttela ota onyoko waka otule kihinsuhaaye ofukula mikhoyi za jampali zawe.’

²⁶“Attwiizaku aana Eburahiima na mweeyo akina aya mwinimoovaaye Nluku, fweeyo naperekheziwa hapari epi za nusura. ²⁷Atthu a Yeruzaleemu na afwalume aya khanjuwiye paani Yinsa, ila anhukhumwelaka ofwa aari weettettisela mattakhuzi alupiweeyo ti manapiyu, aari osomiwaaye wakhula saapatu. ²⁸Hatha ahimoonaneeni etthu ya paathuli yawuuleliwa, anvekeliye Pilaatu yoori ooliiwe. ²⁹Paata ya oretta zooshi zaatikhiweezo monkoni wa ye, khulaziwavo vansalapa aphale khutthiiwa nlikurakuza. ³⁰Ila Nluku khunsisimula muufwa. ³¹Siikhu zawaatta ooniwe pi apale aalawaniyeeyo Kalileya eettaka Yeruzaleemu. Apo aya pi eeyiye mashaahiti awe vakatthi wa atthu.

³²“Fweeyo na waatafusirela hapari zooshapweya, epile Nluku awaahitiyeeyo amarehemu apapazetthu, ³³ye anirettela fweeyo naana awe, khunsisimula Yinsa nkhama etthiipo zaatikhiweezo Nzaapuura13:33 Woone kithaapu ya Zaapuura 2:7. yoori:

“ ‘Weeyo o mwanaka;

leelo na miiyo karetteya wiiya papaawo.’

³⁴Nluku ansisimula Yinsa yoori ahivutte khulupa yoori:

“ ‘Kinteela owinkhani mweeyo parakha za amini na zoottakatthifu ahitiweeyo Daawuuda.’

³⁵Tiito theenya ye alupiyeeyo phantte kiina ya Zaapuura yoori:

“ ‘Khunteela onkhupalela Nttakatthifu awo ovutta mwiili awe.’

³⁶Paata ya Daawuuda onrumeyela Nluku khwa nanna aari otakhaazo, eetta ofwa khulawa, khwiiya vamote na amarehemu apapaze na khuvutta. ³⁷Ila otule Nluku ansisimuliyeeyo khavutteeni.

³⁸“Nakataalikha attwiizaku, kintakha mwijuwe yoori mooziwa monkoni wa nswammaha wa twampi. ³⁹Khwa ye, wakhula otule ankhupalaaye ontta ohakikhiwa khwa vitthu zooshi zahaari onhakhikhisaazo kano za Munsa. ⁴⁰Mwijinanele yoori zihuurettikhaneleni epi alupiyeezo manapiyu:

⁴¹“ ‘Moone, mweeyo mwininveyisaaye Nluku,

mwishanke na mwitapanyeye,

maana siikhu zenu etthiipi kinlawa karette etthu,

awuuziyeni ntthu khamwaari oteela waamini.’ ”

⁴²Wakathi Paawulu na Baranabe aari osaruwaavo nnyupa woolompiwamo, atthu khusala akhanyarela onvekela yoori ate alupe theenya monkoni wa mattakhuzi apale saapatu kiina. ⁴³Paata ya wiisha nkutthaano, mayaahuuti awaatta na atthu akina asilimweliye oyaahuuti khusala anlotta Paawulu na Baranabe. Yo khusala awaalipisela awoozaka yoori ajilipesena rehema ya Nluku.

⁴⁴Saapatu kiina, atthu a sitati yaya etile khukusanyeya yoori asiile nttakhuzi la Mbwana. ⁴⁵Mayaahuuti noowoona atthu apale, khuwaata nrima na khusala anttukhana Paawulu na okheeti mattakhuzi apale aari olupaaye.

⁴⁶Aphano Paawulu na Baranabe khuwaajipu woojilipisavo yoori: “Yaari ohithajiya waaza wuutafusirelani nttakhuzi la Nluku. Mwaasa wookatthala khinuusuhini opwekherela ohaayi wa mileele, apha nintta olawa nawaalaleyele amalapo. ⁴⁷Etthiipo Mbwana aniruma yoori:

“ ‘Miiyo kuuretteni mweeyo onuuru ya amalapo,

yoori mwithuule nusura mwilawane mpakha okhu wiisheliyeewo olumwenku.’ ”

⁴⁸Asiiliyeevo atthu, amalapo khwiiya ofurahi khuttottopela nttakhuzi la Mbwana, ooshi aathawuleliweeyo ohaayi wa mileele khukhupalela.

⁴⁹Nttakhuzi la Mbwana khumwazeyela nti wooshi. ⁵⁰Ila mayaahuuti khusala awaatumerela aakha ooshitahiwa na anamalokozela a nsitati khuwaakhitiri. Khwaaza onlupattha Paawulu na Baranabe khusala aweekara mmuti mwaya mphule. ⁵¹Attaaphale khutatha lifufu laari mmoolu mwaya, khusala alawa nti wa Ekooniyu. ⁵²Anakhiyoni aari ovira eetaalaka furaha na Rooho Ttakatthiifu.

Paawulu na Baranabe sitati ya Ekooniyu

¹Paawulu na Baranabe sitati ya Ekooniyu eettiye nsinakooka ya mayaahuuti. Nttumpho khusala attakhula mpakha khufiyelela atthu enkeene onkhupali Yinsa waaza mayaahuuti mpakha amalapo. ²Ila mayaahuuti apale ahaakhupaliyeeyo khusala awaatakhela viittha amalapo yoori oomanane mamuumini. ³Mwaasa wa ethiito Paawulu na Baranabe eeshiye siikhu zawaatta ari Ekooniyu ottuukhule, attakhulaka monkoni wa Mbwana woohiina hatha hoofu. Mbwana aari olipisela nttakhuzi la rehema arettaka alama na minjuza khwa khaazi etile aari okholaaye yo. ⁴Atthu a mmuti mphule khwaawanyeya, akina khwiiya phantte ya mayaahuuti akina khwiiya phantte ya maaswihaapa. ⁵Aphano mayaahuuti na amalapo, vamote na attunkhulu aya khujilakelela yoori awaapweche maaswihaapa na owaahukhumu. ⁶Yo noosiila shawuri epile, khutthirela sitati ya Liishitera na Teerepe nkatthi wa nti wa Likayooniya na miti za waattamanana. ⁷Noofiya khurutela olaleya hapari zooshapweya.

Ovonisiwa wa ntthu woorakala Liishitera

⁸Liishitera aariwo mwinyi woorakala moolu khaazi yawe yaari wiikhala, olwele aya opo eettiye ovokoleliwa. ⁹Mwinyi otule khunsiila Paawulu eettaka ottakhula. Wakathi Paawulu amwekesiyeevo khumoona yoori aarina amini ya otakha ovonisiwa, ¹⁰khumuuza woonyakulavo araka: “Olankhe! Weemele!” Khulankha khwiirukha khwaaza weettetta.

¹¹Wakathi atthu apale ooniyeevo etile aarettiyeeyo Paawulu, khwaaza onyakula khwa luuka ya Likayooniya araka: “Miluku zaniishukhela zumpuwaka nkhama atthu!” ¹²Baranabe khutthajiwa nzina la nluku Zeewu, Paawulu khutthajiwa nzina la nluku Heerimeshi, maana aari ye aari ottakhulaaye. ¹³Namalokozela wa nluku Zeewu, nyuupa aari osifwiwamo yaari othetekele wa sitati, khutiisa mompe na jarata ya maluwa vanlako wa sitati ethiitile, maana atthu aya ari otakha yoori awenkhe twaha.

¹⁴Aphano maaswihaapa apale, Paawulu na Baranabe noojuwa vitthu epile, yo khuvarula kuwo zaya khutthirela enakatthi nakatthi ya khuntti ya atthu, eettaka onyakula ¹⁵araka: “Mweeyo, niini epi zaya mwinrettaazo? Fweeyo na anaatamu nkhama mweeyo. Ila nootiseliyeni hapari zooshapweya, zinlupaaye yoori mwilikhe oretta vitthu zoohiina maana mwirutela olottela mwentto wa Nluku wa ohaayi, otule ompiyeeyo pinku na vathi, pahari na vitthu zooshi ziriiye va olumwenku. ¹⁶Khwa siikhu ziviriyeezo nyumani, Nluku aalikhiye khapila zooshi olotta tarikhi zaari otakhaazo. ¹⁷Ye khuhilikhi olaza oshaahiti, athoonyezaka okemaani awe, atiisaka vuula pinkuuni na wuuruliwa peewu wakathi khwaamili, awenkhaka etthu yoojiwa yoowaafiyela na rooho za wiitaala furaha.” ¹⁸Olikha toowo, Paawulu na Baranabe arina tafwawuthi khuluyeene yoowaalikhisa atthu apale owaarettela twaha.

¹⁹Aphano khuta mayaahuuti akina oolankha sitati ya Antiyookiya na Ekooniyu, khushintta khuntti etile ya atthu apale, khusala anvonya Paawulu na mawe, khumweeselela othetekele wa sitati, oonaka yoori eetta ofwa. ²⁰Ila wakathi atiiyeevo anamalottela a Yinsa khunzukulela eetta olankha khurutela nsitati. Siikhu ya phiiri ye na Baranabe khusala alawa sitati ya Teerepe.

Paawulu na Baranabe anrutela Antiyookiya ya Siiriya

²¹Paawulu na Baranabe khulaleya hapari zooshapweya sitati etile na khuwaaretta anakhiyoni awaatta. Nawiisha khurutela Ekooniyu, Liishitera na Antiyookiya. ²²Awaakhomaazaka na owaatumerela anakhiyoni yoori ajilipisane amini na awoozaka theenya yoori: “Ennihithajiya ovirela tafwawuthi zawaatta yoori neette muufwalume wa Nluku.” ²³Paawulu na Baranabe khusala awaathawula attunkhulu a ojama wa Nluku na owaattha wakhula ojama wa Nluku. Noowaalompela noofuka anvekelaka Mbwana othuutule yo ankhupaliyeeyo. ²⁴Paawulu na Baranabe khulawa mpakha nti oniitthiwaaye Pisitiya khuvikana khweetta Panfiiliya. ²⁵Paata ya otafusiri nttakhuzi la Nluku nti wa Peereje, khwiishukhela nti wa Ataaliya.

²⁶Noolankha Ataaliya khulokha arutelaka Antiyookiya, ottuukho enkheleliweewo rehema ya Nluku khwa khaazi etile eettaaye wiishisharu. ²⁷Noofiya Antiyookiya okhule, khuwaakusanya atthu apale a ojama wa Nluku khusala owooza zooshi epile Nluku aarettiyeeyo khwa yo na nanna aafukuliiyezo milako za amini khwa amalapo. ²⁸Yo eekhaliye siikhu zawaatta vamote na anakhiyoni a Yinsa a Antiyookiya.

Nkutthaano wa maaswihaapa a Yeruzaleemu

¹Atthu akina a Yudeya khuta mpakha Antiyookiya, noofiya khusala awaasomisa attwi zaya awoozaka yoori: “Mweeyo amana mwihikhiriyi nkhama etthiipo Munsa anisomisiyeezo khamwinteela wuusurukha.” ²Paawulu na Baranabe khusala akheetisanana atthu apale mpakha khufiyelela onyakulisana. Khwa etthiipo khuthawuliwa Paawulu na Baranabe na atthu akina, yoori alawe Yeruzaleemu amanyamanye mattakhuzi aya apale na maaswihaapa na attunkhulu a ojama wa Nluku. ³Ojama wa Nluku wa Antiyookiya khuwaaruma yoori alawe, alawaka khuvira nti oniitthiwaaye Feniisiya mpakha Samariiya. Khusala awaathatelela attwiizaya nanna amalapo ankhupaliyeezo Yinsa; hapari zaya epo zaari owaafurahisa channu attwiizaya ooshi. ⁴Wakathi afiiyeevo Yeruzaleemu, khupwekhereliwa ti ojama wa Nluku, attunkhulu a ojama wa Nluku na maaswihaapa, khuwaathatelela vitthu zooshi Nluku awaaretteliyeezo yo.

⁵Aphano attaapho khupuwavo atthu aari a khuntti ya mafwarizeewu ankhupaliyeeyo Yinsa, khulupa yoori: “Atthu ahiiyeeni mayaahuuti nina ya owaakhiriyisa na owaakhanyarela oshututela kano za Munsa.”

⁶Maaswihaapa apale na attunkhulu a ojama wa Nluku khukusanyeya yoori amanyamanye mattakhuzi aya apale. ⁷Paata ya winkhelelaniwa, Pheeturu khulankha khuwooza yoori: “Mweeyo attwiizaku, mwinjuwa yoori thanku ya raku Nluku akithawula miiyo vakatthi veetthu yoori amalapo kiwaafiisele hapari zooshapweya nyuupa ya Daawuuda etile yaakwiyeeyo. ⁸Nluku, anjuwaaye rooho za atthu ooshi, alaza oshaahiti wa owaakhupalela yo, awiishushelaka Rooho Ttakatthiifu nkhama etthiipo na fweeyo anishusheliyeeyo. ⁹Ye khanivirikaniseeni fweeyo na yo, maana atwaharesha rooho zaya khwa amini. ¹⁰Aphano khi niini mweeyo mwintakhelaaye omotoota Nluku, mwiwaattikhaka anakhiyoni mapwattha hatha fweeyo aya wala amarehemu apaapa zeetthu ahakhitiriyeeyo? ¹¹Ila khwa rehema ya Mbwana eetthu Yinsa fweeyo nakhupali na noosurwiwa nkhama na yo osuruweeyo ti othuuto.”

¹²Atthu ooshi eettiye onyamala khusala ansiileza Paawulu na Baranabe alupaka alama na minjuza zooshi aarettiyeezo Nluku khwa yo vakatthi wa amalapo. ¹³Paata ya yo wiisha ottakhula, na ye Tiyaaku khusala attakhula araka: “Attwiizaku, mwikisiileze. ¹⁴Simawu Pheeturu aneeleza khwa nanna Nluku omwanzo anthoonyeziyeeyo wiiyana niiya na amalapo, atakhaka yoori akusanye khapila za atthu khwa nzina lawe. ¹⁵Mattakhuzi aatikhiweeyo pi manapiyu raku, ankhupalela na apa, nanna aatikhiweezo yoori:

¹⁶“ ‘Paata ya ovira epo, Miiyo kinlawa karuti

kite kijeke opheya nyuupa ya Daawuuda etile yaakwiyeeyo;

kimatthele mphule wapwecheyiyeemo,

na kilansele,

¹⁷yoori atthu apale akina ansalaaye amweekese Mbwana,

mpakha amalapo ooshi ana yoottitthimisa nzina laka,

alupiyeeyo ti Mbwana,

¹⁸otule alaleyiyeeyo vitthu zaya epi thanku asulani.’

¹⁹“Apho kiniwuuzani yoori nihiwaatthe tafwawuthi amalapo, apale antakhaaye yoori ankhupali Nluku. ²⁰Ila ti yooshapweya owaatikhela warakha yoori ahisala aja vitthu za okafwareliwa sanamu, wala ahisala aretta khaapa ya haraamu, wala ahije nyama yoohishijiwi wala taamu yaya. ²¹Waaza raku kano za Munsa zaari otafusiriwa wakhula sitati na zaari osomiwa mmasinakooka wakhula saapatu.”

Warakha maaswihaapa awaatikheliyeeyo amalapo

²²Aphano maaswihaapa na attunkhulu a ojama wa Nluku ooshi, khuwaathawula atthu khuwaaruma weetta Antiyookiya vamote na Paawulu na Baranabe. Atthu aya apo aari Yuuda, aari ojuwaniwaaye nzina la Baresaapa, na Siila. Apo aari ooshitahiwa vakatthi wa attwiizaya. ²³Alawaka khwinkhiwa warakha yaari olupaaye yoori:

Fweeyo attwiizenu, maaswihaapa mpakha attunkhulu a ojama wa Nluku:

Ninuuperekhezani salamu.

Mweeyo mwiiyiye attwiizetthu amalapo mwiniikhalaaye Antiyookiya mpakha nti wa Siiriya na Siliisiya.

²⁴Nasiila yoori, vakatthi veetthu alankhavo atthu ata ottuukho oteela wuutapanyani na mattakhuzi oovonyeya arutiselaka nyuma nafusi zenu woohirumiwi ti fweeyo. ²⁵Aphano, fweeyo khukusanyeya khusiilana owaathawula atthu akina yoori niwaaperekhe okho vamote na jiraani eetthu Paawulu na Baranabe, ²⁶apo aleva ohaayi aya mwaasa wa nzina la Mbwana eetthu Yinsa Al-Masiihu. ²⁷Tiito ninrumiyeeyo ota okho Yuuda na Siila yoori ate aweelezeni saaneene mattakhuzi apo naatikhiyeeyo. ²⁸Maana Rooho Ttakatthiifu yathoonyeza saaneene khwa fweeyo ohuuttikhini hatha mapwattha, ohiiyi apa aatikhiweeyo. ²⁹Mwiwerawere oja nyama za okafwareliwa sanamu; wala taamu yaya, wala mwihije nyama yoohishijiwi, wala mwihisala mwiretta khaapa twayifu. Amana mwiwerawera epo zaya, mwintta woona vitthu zenu eweettettelakani saana.

Khwa heeri.

³⁰Khurumiwa atthu apale khusala alawa Antiyookiya, noofiya khukusanya ojama wa Nluku wooshi khuwenkha warakha etile. ³¹Yo khusoma khwiiya ootuveliwa mwaasa woolipiselaniwa mattakhuzi ooshapweya aari olupaaye warakha etile. ³²Yuuda na Siila, wiiya aari manapiyu, na mattakhuzi menkeene awaalipiseliye na owaatumerela atthu apale a Antiyookiya. ³³Eeshiye siikhu zawaatta, nawiisha khuleezana na attwiizaya khwa parakha na heeri, khusala arutela okhule ariiwo apale awaarumiyeeyo. ³⁴Ila Siila khujilakelela osala ottuukhule. ³⁵Paawulu na Baranabe khurupazawo Antiyookiya okhule na anamalottela akina enkeene, asomisaka nttakhuzi la Mbwana na otafusiri hapari zooshwapweya.

Omwazeyana wa Paawulu na Baranabe

³⁶Ziviriyeevo siikhu vattitthiiru, Paawulu khumuuza Baranabe yoori: “Nirutele sitati epile zooshi niviriyeezo nitafusiraka nttakhuzi la Nluku, nilawe nawaathotole attwiizetthu na woona menttezi aya.” ³⁷Aphano Baranabe alawaka khusala atakha yoori anthuule Yaahaya anjuwaniwaaye nzina likina la Maaruku. ³⁸Ila Paawulu khuhooni wiiya yooshapweya onthuula Yaahaya, maana wakathi aari ooshi nti wa Panfiiliya, ye ettiye otthira khuwaalikhela khaazi. ³⁹Paata ya ethiito, weetta opuwa ohisiilani nwulweene Paawulu na Baranabe mpakha khumwazeyana. Baranabe khunthuula Maaruku khulokhela nti wa Shiipere, ⁴⁰ila Paawulu khunthawula Siila, attwiizaya khuwenkhelela nkatthi wa rehema ya Mbwana khulankha khusala alawa. ⁴¹Khuvira Siiriya mpakha Siliisiya alipiselaka ojama wa Nluku wooshi.

Timootiyu onimperekha Paawulu na Siila

¹Paawulu khuthotola Teerepe khuvikanela Liishitera, ottuukho aari wiikhalaawo nakhiyoni mmote aari wiitthiwaaye Timootiyu. Mamaawe aari yaahuuti namalottela wa Yinsa ila papaawe aari nkereeku. ²Attwiize a Liishitera na Ekooniyu khusala anlawela oshaahiti wooshapweya. ³Paawulu khusala atakha yoori alawane, khunkhiriyisa mwaasa wa mayaahuuti aari wiikhalaaye nti otthuupule, maana ooshi aari onjuwa yoori papaawe nkereeku. ⁴Wakhula sitati aari oviraaye, aari owoozela attunkhulu a ojama wa Yinsa yoori oruma waawaziweeyo pi maaswihaapa na anamalokozela a ojama wa Nluku a Yeruzaleemu wiiye wooshututeliwa. ⁵Etthiipile ojama wa Nluku weetta okhomaala nkatthi wa amini, na wakhula siikhu atthu khusala atepa weekezeleya.

Jozi ya Paawulu nti wa Torowaati

⁶Paawulu na ashirikhaawe khuretta safwari ya nti wa Firijiya na wa Kalaasiya, khukhattaziwa ti Rooho Ttakatthiifu olaleya nttakhuzi nti wa Aaziya. ⁷Wakathi afiyeevo mmwiinano wa Miisiya, khuvira alawaka nti wa Bitiiniya, ila Rooho ya Yinsa khuwaakhattaza. ⁸Aphano khuvira Miisiya khwiishukhela Torowaati.

⁹Osikhu Paawulu khunteela jozi, mwinyi mmote wa Masetooniya aari wa weemela anvekelaka yoori: “Ovire Masetooniya ote onaawuni.” ¹⁰Paata ya jozi etile Paawulu khujitthenkeza nasaapiru yoori nilawe nti wa Masetooniya, nimariselaka yoori Nluku eetta onikhuwela olawa owaalaleyela hapari zooshapweya.

Okhupali wa Liitiya sitati ya Filiipu

¹¹Nilankhiyeevo Torowaati, khulokhela nti wa Samotoraasi, mmeesho mwaya khweetta Neyapolishi. ¹²Khulokha ottuukho khweetta Filiipu nti wa Masetooniya yaari sitati yootafikhana ya nti aya otthuupule waalokozeliweeyo pi arooma sitati khuulu ya nti wa Masetooniya. Ottuukhule khwishawo siikhu vattitthiiru.

¹³Saapatu neetta olaamo nsitati khulawa mpakha omuttho, ohali naari woonaawo yoori ninpatthawo puuro yoolompavo. Khwiikhala khwaaza opiya mwaasa na aakha aakusanyeyiyeeyo ottuukhule. ¹⁴Muukha mmote aari wiitthiwaaye Liitiya aari woonisiileza saana. Aari wuuzanyisaaye kuwo zawooneela wa sitati ya nti wa Tiyatiira. Liitiya aari woomoova Nluku, Mbwana khunfukula rooho yawe yoori apwekherele etile Paawulu aari olupaaye. ¹⁵Nawoosiwa na atthu ooshi a vaje vawe, khunivekela saaneene araka: “Nkhama mweeyo mwinikitthantta na mwinihakikhi yoori kinamalottela wa Mbwana wa waamineya, mwite mwiikhale onti.” Khwa ethiito khunishintta.

Paawulu na Siila nkalapooso

¹⁶Siikhu moote neettaka olawa ohali onlompiwakaawo, khunsikana njaazi aariina sheethwani, woopiya sako. Khwa ethiito, ambwanazawe khusala ampatthela nzurukhu. ¹⁷Mwanankha khusala anlottelela Paawulu na fweeyo eettaka onyakula araka: “Mamwinyi apa akarumeya a Nluku Nwulu wa pinkuuni na anlaleya hapari za tarikhi ya nusura.” ¹⁸Ye khusala avira arettaka etthiipile khwa siikhu zawaatta. Paawulu khunshokheza, khuzukuluwa khumuuza sheethwani otule aariina mwanankha otule yoori: “Khwa nzina la Yinsa Al-Masiihu miiyo kinuuruma yoori oleemo mmwiili mwawe!” Nasaapiru sheethwani otule khunlikha.

¹⁹Ooniyeevo ambwanazawe yoori fwayita etile aari opatthelakaaye mwanankha otule yeesha, khunkhola Paawulu na Siila khuwapurulela vahali ankusanyeyakaavo atthu omaasho wa afwalume. ²⁰Khuwaathoonyeza afwalume alupaka yoori: “Mamwinyi apa mayaahuuti antta otapanya sitati yeetthu, ²¹alaleyaka thwapiya ziiyiye haraamu opokherela ama oretta maana fweeyo na arooma.”

²²Atthu khukusanyeya khukukutteliwa Paawulu na Siila, afwalume khuruma yoori avuliwe kuwo zaya na ajaphiwe. ²³Paata yoojaphiwa channu, khulawa khweeseleliwa nkalapooso. Namweekesela wa kalapooso khurumiwa yoori asala aweekesela saaneene. ²⁴Ooziweevo mattakhuzi apale, khuwaathuula khuwaattha nkalapooso yoolipaneya, khuwaafukelela moolu aya va viika.

²⁵Osikhu layili, Paawulu na Siila eetta olompa na omwiipela maliipo asiifwa Nluku, anamafukeliwa akina eettaka owaasiila. ²⁶Nasaapiru khupuwa esikinyaatthi khuluyeene yaakurumuliyeeyo muuri wa kalapooso. Nasaapiru milako khufukuwa, na makwinjili afukaniweeyo ooshi khuttumula. ²⁷Namweekesela otule khulankha aphale aari olalaavo khoona milako za kalapooso ziri zoofukuwa, khuthuula phanka yawe yoori ajuule aari woona yoori anamafukeliwa apale atthiramo. ²⁸Paawulu khukhuwa alupaka yoori: “Ohijirette hatha etthu yootakhala, fooshi niri nttumphu!”

²⁹Namweekesela otule khuveka emwasikhelo, khuvira nkalapooso mphule eettaka otthira ari woozinkuwa khulawa khukokhora omaasho wa Paawulu na Siila eettaka othukumela. ³⁰Aphano khuwaasarulela vaje khuwoozela yoori: “Mamwinyi, kirette ni yoori kuusurukhe?”

³¹Yo khujipu yoori: “Omwaamini Mbwana Yinsa ontta wuusurukha weeyo na ajamaazo.” ³²Yo khuntafusirela nttakhuzi la Nluku na atthu ooshi a vaje vawe. ³³Wakathi otthuupule woosikhu, namweekesela otule khoosa makhwatta aya, na ye khulawa khoosiwa na ajamaaze ooshi. ³⁴Khuwaathuula khuwaalawana owawe khuwenkha etthu yoojiwa na atthu ooshi a vaje vawe khwiiya ofurahi mwaasa wonkhupali Nluku.

³⁵Noocha anamaphuka khuwaaruma anajanka wa namweekesela wa kalapooso olawa olupa yoori: “Owaafukulele mamwinyi apo!” ³⁶Namweekesela khumuuza Paawulu yoori: “Afwalume alupa yoori weeyo na Siila mwifukuleliwe. Apho mwileemo mwilawe na heeri.”

³⁷Ila Paawulu khuwooza mawaziri apale yoori: “Fweeyo na arooma, yo anijapha nhali wa waattiwamo nihipukhiweene khwa hatha etthu khunittha nkalapooso, apho, yo antakha onilikha sirini? Khaneepu! Mwawooze atthaapo ate anifukulele.” ³⁸Mawaziri apale khulawa khuwooza afwalume, noosiila yoori atthu apale aari arooma khoova. ³⁹Khuta oteela owaavekela nswammaha, khuwaasarulamo nkalapooso mphule, khuwooza yoori aleemo nsitati mphule. ⁴⁰Wakathi aliiyeemo nkalapooso, Paawulu na Siila khulawa owawe Liitiya, ottuukho awaasikaniyeewo attwiizaya na khuwaalipisela khuvira alawaka.

Paawulu na Siila sitati ya Tizaloonika

¹Aviriyeevo Anfiipoli na Apolooniya, khufiya Tizaloonika, ohali yaariiwo sinakooka ya mayaahuuti. ²Nkhama etthiipo aazowereliyeezo, Paawulu aaviriye nsinakooka Saapatu ttatthu, khusala amanyamanya Zawaatikhiwa Ttakatthiifu, ³aweelezaka na awaathoonyezaka yoori Al-Masiihu aarina yoofwa na asisimuwe muufwa. Khulupa yoori: “Yinsa othuutu miiyo kinuufiselanini Al-Masiihu ti othuuto.” ⁴Mayaahuuti akina aya khukhupali mattakhuzi apale khukusanyeya na Paawulu na Siila, na akereeku awaatta a rooho ya omoova Nluku, na aakha ooshitahiwa.

⁵Ila mayaahuuti khuwaata nrima liwululene. Khuwaakusanya atthu otakhala rooho na ohiina raayi na khuntti ya atthu akina, khusala alaza nzuuzu nsitati. Khulawa khupwecha nyuupa ya Yasooni omweettela Paawulu na Siila, yoori awaakhole awaatise vakatthi wa atthu. ⁶Khuhiwaasikaniwo, tiito khunkhola Yasooni na attwiize akinoko, khuwaatana vakatthi wa attunkhulu a sitati ethiitile, anyakhulazaka araka: “Apa pi antothaaye wuumani olumwenku wooshi, apha afiya mmuti mphu, ⁷amaka owawe Yasooni otu. Apa aya ooshi ankheeti epile Seezari arumiyeezo, anlupa yoori apuwa mfwalume nkina enriwaaye Yinsa.” ⁸Asiiliyeevo mattakhuzi apale, atthu na afwalume a nsitati khwiiya ootapanyeya. ⁹Ila paata yooripha hisapu ethiito oziweeyo, afwalume, khunlikha Yasooni na apale aariinaaye.

Paawulu na Siila sitati ya Bereeya

¹⁰Nooripa attwi khumperekha Paawulu na Siila weetta sitati ya Bereeya. Noofiya Bereeya yo khweetta nsinakooka ya mayaahuuti. ¹¹Atthu a Bereeya khaarina shawuri zoofukeya zayita atthu a Tizaloonika; yo aapokhereliye nttakhuzi la Nluku na niiya khuluyeene, khusala apheleleza siikhu zooshi Zawaatikhiwa Ttakatthiifu yoori oone nkhama zooshi zaari etthiipi. ¹²Khwa etthiipo mayaahuuti awaatta khukhupalela, theenya amalapo, aakha ooshitahiwa na alume awaatta.

¹³Wakathi mayaahuuti a Tizaloonika ajuwiyeevo yoori Paawulu aari ovira alaleyaka nttakhuzi la Nluku sitati ya Bereeya, khusala eetta ottuukho olawa olaza nzuuzu na owaatapanya atthu. ¹⁴Nasaapiru attwi khumperekha Paawulu yoori alawe nti wa waattamela pahari, ila Siila na Timootiyu khusala Bereeya ottuukhule. ¹⁵Apale aari omperekhaaye Paawulu, anlawaniye mpakha sitati ya Ateena, yo khurutela Bereeya, Paawulu khuwaalezela nhupi yoori amuuze Siila na Timootiyu alawe ottuukhule aariiwo, woohirupazi.

Paawulu sitati ya Ateena

¹⁶Paawulu aari Ateena ottuukhule nalelo anwejaka Siila na Timootiyu, rooho yawe khwiiya yoonyonyeya mwaasa wawoona sitati etile yooshi yitaaliye sanamu. ¹⁷Tiito, amana eetta nsinakooka ye aari okheetisanana mayaahuuti na akereeku apale omoova Nluku. Wakhula siikhu aari olawaka valipuwa aari othukumanaavo atthu olawa okheetisanana na wakhula otule aari onsikanaavo. ¹⁸Asomi akina ashikola yaari wiitthiwaaye Epikure na kiina yaari wiitthiwaaye Eshitoyiku khusala akheetisanana na Paawulu. Akina khusala alupa yoori: “Otu woothaala nkhanyo onri niini apha?” Akina khusala alupa yoori: “Talili oniwaalupa a miluku oohijuweyi,” maana Paawulu aari otafusiri hapari zooshapweya monkoni wa Yinsa na monkoni wa osisimuwa. ¹⁹Yo khunthuula Paawulu khunlawana onthukumano waari wiitthiwaaye Areyopaku, ottuukhule yo khusala amuuzela araka: “Nintakha nijuwe masomi ni apa mapheya onitiseliye fweeyo? ²⁰Weeyo ontta onuuza shawuri zoohijuweeyi, nintakha nijuwe maana aya.” ²¹Waaza atthu Ateena mpakha amalaponi aari wiikhalaaye ottuukhule, khaari ojali hatha etthu woohiiyi ottakhula ama osiila mattakhuzi awiishela.

²²Aphano Paawulu khulankha vakatthi wa nthukumano wa Areyopaku, khulupa yoori: “Mamwinyi a nti opu wa Ateena! Menttezi enu ooshi kinoona yoori mweeyo mwa annya tiini ooziti. ²³Kazukulela sitati eti yooshi, wakhula vahali khusala kisikana vitthu mwinaaputwaazo hatha kansikana alitaari17:23 Alitaari puuro ya waaputiwavo ama yoorettiwavo twaha. aatikhiweeyo yoori: nluku woohijuwiwi. Othuuto, mwinimwaaputwaaye mwihinjuwaka, ti othuuto kininlupaaye miiyo kiwuuzakani.

²⁴“Nluku othuuto ompiye olumwenku na vitthu zooshi ziriimo othuuto ti eeyiye Mbwana wa pinkuuni na vathi apha, ye khaniikhala nnyupa yawaattaliwa pi makhono enaatamu. ²⁵Ye khanrumeyeliwa pi makhono enaatamu nkhama anthowiwaaye ti etthu, maana ye ti awenkhiyeeyo ohaayi atthu ooshi, khuwenkha phuumu na vitthu kiina. ²⁶Atthu a khapila zooshi awompa khwa ntthu mmote paasi, yoori eekhale muulumwenku, ye khutthoma wakathi na khuwenkha puuro yawiikhala khapila zaya epo. ²⁷Nluku aretta vitthu zaya epo yoori atthu ooshi amweekese ampapaselaka talili awahi onsikana, maana ye khari woolepawo na fweeyo. ²⁸‘Khwa Ye niniikhala, nineettetta na ninaaye ohaayi,’ nkhama etthiipo anamwiipa akina anlupaaye yoori ‘fweeyo na aanaawe ye.’

²⁹“Nkhama, khweele, na aana a Nluku, ti yootakhala ofikhirela yoori ye alattanana mphiko wa weero, ama feeta wala liwe, lawaakanyereliwa ti pinaatamu khwaattaliwa. ³⁰Raku, Nluku khazaari onjali vitthu zaya epo, ila aphano alupa yoori atthu a phantte zooshi athupwiye. ³¹Ye atthoma siikhu anttelaaye ophuka olumwenku na shariya, khwa ntthu mmote anthawuliyeeyo na athoonyeza vakatthi wa atthu khwa onsisimula muufwa.”

³²Atthu apale nonsiila Paawulu alupaka monkoni wa osisimuwa wa ananfwa, akina khwaaza onveyisa, akina khusala alupa yoori: “Fweeyo mwaasa aya apo onlupaaye, khunitosheeni nintakha osiila wakathi nkina teenya.” ³³Attaaphale Paawulu khulaavo vakatthi vaya. ³⁴Atthu akina khukhupali khukusanyeya na ye, apo aya ari Diyoniisiyu wa Areyopaku, na muukha mmote aari wiitthiwaaye Damarishi na atthu akina aya.

Paawulu ori nti wa Korintiyu

¹Paata ya toole, Paawulu khulankha Ateena khusala alawa Korintiyu. ²Ottuukho khunsikana yaahuuti mmote aniitthiwaaye Akiila, wa nti wa Pontu, eettaka otaru olankha Etaaliya na muukhaawe Pirisiila, maana mfwalume Seezari Kalaawutiyu eettiye oruma yoori mayaahuuti ooshi aleewo Rooma, Paawulu eetteliye owaathotola. ³Ye khusala eekhala vamote na yo, maana khaazi yaya yaari moote waattala heema. ⁴Wakhula saapatu aari weettaka nsinakooka khusala awaashintta mayaahuuti na makereeku.

⁵Wakathi Siila na Timootiyu eeshukheliyeevo Masetooniya, Paawulu khujinkha khwa olaza nttakhuzi, alawelaka oshaahiti khwa mayaahuuti yoori Yinsa ti Al-Masiihu. ⁶Ila mwaasa wa yo wiiphiiriwa ti Paawulu na okufuru, ye khulankha khutatha ajapi yawe khulupa yoori: “Ekwele veeshwa venu, taamu yenu! Miiyo Paawulu akina hatha paathuli. Mpakha apha, kineetta wa amalapo.” ⁷Attaaphale khuwaalikha atthu aya apale khulawa khweetta wa mwinyi mmote aari wiitthiwaaye Tiisiyu Nashariya aari omoovaaye Nluku. Nyuupa yawe yaattameliye sinakooka. ⁸Kirishipu, namalokozela wa sinakooka khunkhupali Mbwana, na ajamaaze ooshi na akorintiyu enkeene asiiliyeevo khukhupali khulawa khoosiwa.

⁹Osikhu mmote Mbwana khumuuza Paawulu nkatthi wa jozi yoori: “Ohoove; orutele otafusiri na wala ohinyamale. ¹⁰Maana miiyo kiri vamote na weeyo, khina etthu moote enttelaaye wuupuwelela yootakhala, maana miiyo kinaaye atthu awaatta sitati ethiiti.” ¹¹Paawulu khwiikhala ottuukhule mwaakha na nyeezi sitha eettaka owaasomisa nttakhuzi la Nluku.

¹²Wakathi Kaaliyu enkhiweeyo onsataro wa nti wa Akaaya, mayaahuuti khukusanyana khusiilana, khukholiwa Paawulu khunlawana onyuupa woophukiwamo milattu. ¹³Khusala alupa yoori: “Otu ontakha owaathowelelisa atthu omwaaputu Nluku woohiiyi khwa nanna enlupaazo kano.”

¹⁴Wakathi Paawulu aari otakhaavo waaza ottakhula, Kaaliyu khuwooza mayaahuuti yoori: “Mayaahuuti! Eriwaka mwaari olupa vitthu zootakhala arettiyeezo ama husuti, yaari wiiya yooshapweya miiyo wuusilezani. ¹⁵Ila nkhama nlattu wa mattakhuzi, na mazina na kano zenu, mwiphuke mweenyewe. Miiyo akeepu wiiya namaphuka wa vitthu nkhama epo!” ¹⁶Khuwaasarulamo nnyupa mphule woophukiwamo milattu. ¹⁷Ooshi khunrikaanyela, Sositeene nttunkhulu wa nsinakooka, khusala ampiya omaasho wa nyuupa woophukiwawo milattu, ila Kaaliyu khuhinjali vitthu zaya epile.

Pirisiila, Akiila na Apoolu

¹⁸Paawulu khwiikhala Korintiyu ottuukhule siikhu zawaatta. Nawiisha khuwaaleza attwiize khulokhela nti wa Siiriya, aaperekhiwe ti Pirisiila na Akiila. Ahinattikhe khunyoola eeshwa yawe Senkereeya, athoonyezaka alama ya oretta etthu amwahitiyeeyo Nluku. ¹⁹Paata ya ofiyaza Eefezu, Paawulu khunlikha Pirisiila na Akiila. Ye khuvira nsinakooka khwaaza opiya mwaasa na mayaahuuti. ²⁰Mayaahuuti apale khuvekela yoori eekhale siikhu zawaatta vamote na yo, ye khukatthala. ²¹Ila khuwaaleza araka: “Kinlawa karuti amana Nluku atakha.” Khupakhira nkalawa khulaawo nti wa Eefezu. ²²Afiiyeevo Sezareeya, khulawa mpakha va ojama wa Nluku olawa ochelisa. Khuvikana khusala alawa Antiyookiya.

Safwari ya ttaatthu ya Paawulu

²³Paata yoovirisa wakathi vattitthiiru Antiyookiya, Paawulu khuvira nti wooshi wa Kalaasiya na wa Firijiya, awaalipiselaka anakhiyoni ooshi.

²⁴Wakathi aya otthuupule, Eefezu khutawo yaahuuti mmote wa nti wa Alishanteriya aari wiitthiwaaye Apoolu, mwinyi oto aari ntthu wa akhili na aarina ojuwa nwulweene wa mattakhuzi a nkithaapu. ²⁵Anozeliwe tarikhi ya Mbwana aari ottakhula na osomisa wookhomaalavo monkoni wa Yinsa, ila aari ojuwa woosa wa Yaahaya Namoosa paasi. ²⁶Khwaaza ottakhula woominyalavo nsinakooka wakathi Pirisiila na Akiila asiiliyeevo, khunthuula khulawa omweeleza saaneene monkoni wa tarikhi ya Nluku.

²⁷Apoolu khusala atakha olawa nti wa Akaaya, attwiize khunlipisela na khuwaatikhela warakha anakhiyoni yoori ampwekherele. Noofiya khuwaawuni apale aakhupaliyeeyo khwa rehema, ²⁸maana khwa owahi nwulweene, aari owaashintta mayaahuuti nhali waawaattiwamo ahakikhaka khwa zawaatikhiwa yoori Yinsa ti Al-Masiihu.

Paawulu nti wa Eefezu

¹Wakathi Apoolu aari Korintiyu, Paawulu khuvira miti epile za nkulu za Aaziya, khulawa mpakha Eefezu. Ottuukho khuwaasikana anakhiyoni akina, ²khuwoozela yoori: “Mwapwekherela Rooho Ttakatthiifu wakathi mwikhupaliyeevo?” Khujipu yoori: “Wala na khannasiile yoori ewaapho Rooho Ttakatthiifu.” ³Aphano Paawulu khuwoozela yoori: “Woosani moosaniweeyo?” Khujipu araka: “Woosa wa Yaahaya namoosa.” ⁴Paawulu khuri: “Yaahaya aretta woosa wa othupwiya, awoozaka atthu yoori ankhupali otule anttelaaye ota nyumani wawe, anlupaka Yinsa.” ⁵Yo wakathi asiiliyeevo mattakhuzi apale, khulawa woosiwa khwa nzina la Mbwana Yinsa. ⁶Wakathi Paawulu awaattheliyeevo makhono, khuweeshukhela Rooho Ttakatthiifu khwaaza ottakhula luuka pheeya na ohupiri. ⁷Ooshi aari atthu khumi na awiri.

⁸Khwa nyeezi mittatthu, Paawulu aari weettaka nsinakooka, attakhulaka woominyalavo monkoni wa ofwalume wa Nluku. ⁹Ila akinoko aya khuumisa rooho zaya khukatthala okhupali, khusala attakhula vitthu zootakhala monkoni wa Tarikhi ya Yinsa eettaka olupa vamwanttiwa. Paawulu, khuwaasusa apale aya, khuwaathuula anakhiyoni, khusala awaasomisa siikhu zooshi nlipantta la Tiraanu. ¹⁰Khuvira awaasomisaka mpakha nyaakha miwiri, atthu ooshi aari wiikhalaaye Aaziya khusiila nttakhuzi la Mbwana waaza mayaahuuti mpakha akereeku.

¹¹Nluku khwa nkhono wa Paawulu aari oretta minjuza zootikinisa. ¹²Mpakha atthu akina aari othuulaka khiyempa na kuwo aari okholelaaye khaazi, noowaasapana alwele aya noovona, apale aariina masheethwani mmwiili mwaya noowaasaruwa.

¹³Mayaahuuti akina aari wiikarakaaye masheethwani aari weezelela okhuwa khwa nzina la Mbwana Yinsa eekaranaka masheethwani araka: “Khwa nzina la Yinsa, ntthi Paawulu anlaleyaaye, miiyo kinuurumani yoori mwisaruwe!” ¹⁴Atthu aari orettaaye vitthu zaya epo aari aana sapa a yaahuuti mmote aari wiitthiwaaye Shekewa, haakhimu wa tiini ya mayaahuuti. ¹⁵Aphano sheethwani khuwaajipu yoori: “Yinsa miiyo kininjuwa, Paawulu kininjuwa, khi mweeyo mwa paani?” ¹⁶Attaaphale otule aariina sheethwani, khuweerukhela khusala awaapiya khuwavulalisa mpakha khuwaashintta ooshi, khutthiramu nnyupa mphule kuwo zaya ziri zoovaruwa.

¹⁷Wakathi zijuwiweevo vitthu epile pi mayaahuuti na akereeku aari wiikhalaaye sitati ya Eefezu khuweetaala woova na nzina la Mbwana Yinsa khwiiya loowulisiwa. ¹⁸Atthu apale aakhupaliyeeyo khusala ata oteela otukhuru twampi zaya na olupa siiri zaya za khaazi zootakhala aari okholaazo. ¹⁹Na atthu enkeene apale aari orettaaye majintta, khukusanya kithaapu zaya khulukuza atthu ooshi eettaka woona. Noorettiwa hisapu kithaapu epile, nzurukhu aya waari ofiya alufu hamusiini nzurukhu wa feeta. ²⁰Khwa nanna etthiipo nttakhuzi la Mbwana khusala limwazeya wookhomaalavo.

²¹Paata ya vitthu epile, Paawulu khulakela nroho mwawe ovira nti wa Masetooniya na wa Akaaya alawaka Yeruzaleemu. Khulupa yoori: “Nawiisha othotola Yeruzaleemu, enikihithajiya olawa Rooma.” ²²Aphano Paawulu khuwaaperekha Masetooniya atthu awiri apale aari omwaawunaaye, Timootiyu na Eraashitu, ila ye khusala nti wa Aaziya wakathi vattitthiiru.

Nzuuzu nti wa Eefezu

²³Wakathi aya otthuupo laapuwiye nzuuzu liwululene monkoni wa Tarikhi. ²⁴Namafula pirinku mmote aari wiitthiwaaye Temeetiriyu, aari waattalaaye miphiko za feeta za nyuupa ya nluku Tiyaana, zaari owenkha fwayita mafunti apale aari waattalelaaye. ²⁵Khuwaalaleya mafunti apale akina khukusanyeya na vamote khuwooza yoori: “Mamwinyi, mwinjuwa yoori khaazi yeetthu enninkha fwayita khuluyeene? ²⁶Ila mwinoona na mwinsiila khahiyo Eefezu eti paasi, ila Aaziya yooshi Paawulu otu onlaza mattakhuzi oovonyeya awaashittanaka atthu yoori awaathowelelise awoozaka yoori miluku zawaattaliwa pi makhono a enaatamu khina fwayita. ²⁷Khahiyo hasara ya khaazi yeetthu paasi ohiina fwayita, ila theenya zaawiya ya nluku eetthu Tiyaana, enttela wiiya yootarawiwa, atthu ooshi a Aaziya na olumwenku wooshi aari omwaaputwaaye anteela wiiya ootapanyeya na siifwa yawe enttela ovukuwa!”

²⁸Atthu noosiila mattakhuzi apale khwiiya ookatipukha khukhuwa araka: “Nwulu ti Tiyaana wa a eefezu!” ²⁹Nsitati mphule wooshimo khupuwamu nzuuzu, atthu apale khunkhola Kaayu na Arishitaruku aari wa Masetooniya, ashirikha awiri a Paawulu khuwaapurula mpakha puuro ankusanyeyaavo atthu. ³⁰Paawulu aari otakha yoori ajithoonyeze vakatthi wa atthu ooshi ila anakhiyoni khuhintakhisi. ³¹Afwalume a nti otthuupule, apale aari ashirikha a Paawulu khuleezela nhupi, yoori ooziwe Paawulu ahilawe puuro etile.

³²Wakathi aya opule atthu aari oozinkireya: Akina aari okhuwa alupaka etthu kiina na akina etthu kiina hatha atthu enkeene kaari ojuwa niini aateeliyeevo. ³³Aphano mayaahuuti khunsukhumela Alishantere wiilokozi, atthu apale akina aari vakatthi wa khuntti etile khunnozela etthu yoolupa. Ye khuttha alama na nkhono awe atakhaka ojaakisa vakatthi wa atthu. ³⁴Ila wakathi anjuwiyeevo yoori yaahuuti, ooshi khunyakula khwa huula moote wakathi miwiri alupaka yoori: “Nwulu ti Tiyaana wa a eefezu!” ³⁵Namwaatikha wa nsitati nttumphule khuwaanyamaza atthu apale araka: “A eefezu, paani ahinjuwaaye yoori sitati ya Eefezu ti eneekeselaaye zaawiya ya Tiyaana, nluku nwulu, liwe likwiiyeeyo pinkuuni? ³⁶Khina antakhaaye okheeti vitthu zaya epo, enuuhithajiyani wiiya oonyamala mwihirette vitthu na varanka. ³⁷Mweeyo mwawaatiisa mamwinyi apa apha, ila apo aya kharetteeni etthu yootakhala yoovirikanisa mwentto wa zaawiya ya nluku etthu, wala khanveyiseeni nluku eetthu oto Tiyaana. ³⁸Ila nkhama Temeetiriyu na ashirikha awe anaaye etthu yoolupa ooniyeeyo ya paathuli, nyuupa yoophukiwawo milattu ti yoofukuliwa awaakho atthu oophuka mwiwaalikhe alupe. ³⁹Nkhama mwinaaye etthu kiina mwintakhaaye olupa epo enttela ophukiwa vakatthi wa atthu enkeene. ⁴⁰Mwaasa wa vitthu ziviriyeeyo, entta onipattha hasara yoolokoveziwa wiiya atthu oovirikanisa. Maana khayiivo shariya yookhupalela nzuuzu nttho.” ⁴¹Paata ya olupa mattakhuzi apale, Ye khwiishisha nthukumano opule.

Paawulu ontta Masetooniya mpakha Kereesiya

¹Nawiisha nzuuzu ntthile, Paawulu khurumisa okhuweliwa anakhiyoni, khuwaalipisela khuwaaleza, khusala alawa Masetooniya. ²Paata yoovira mmamuti mphule awaalipiselaka anakhiyoni khwa mattakhuzi menkeene khufiya Kereesiya, ³ottuukho eekhaliyeewo nyeezi mittatthu. Wakathi aari osaleelaavo opakhira yoori avikanele Siiriya, mayaahuuti khuwaza shawuri yoori amuule; tiito ye khukayiri khwiishelana orutela Masetooniya ottuukhule. ⁴Khuperekhiwa ti Sopaaturu, mwaana wa Piiru wa Bereeya; na ti Arishitaruku na Sekuntu wa nti wa Tizaloonika; aarivo theenya Kaayu wa nti wa Teerepe na Timootiyu, onlikha Tikiiku na Torofimu a nti wa Aaziya. ⁵Mamwinyi apo pi aalokoziyeeyo khusala aniweja Torowaati. ⁶Paata ya ovira njampo la phaawu yoohiina fwaramento, neetta olankha sitati ya Filiipe, siikhu yathaanu khuwaasikana Torowaati, khwiisha sumana niri ottuukho.

Osisimuwa wa Eetiku

⁷Siikhu ya mwanzo ya sumana, fweeyo khukusanyeya yoori nirafune phaawu20:7 Orafuna phaawu opu ori apha, ona maana la njampo la mwiili na taamu ya Yinsa., Paawulu khusala attakhula awaalipiselaka mpakha osikhu layili, maana aarina ya oretta safwari mmeesho mwaya. ⁸Nhali naathukumaniyeemo zaarimo vimwasikhelo zawaatta. ⁹Shaapu mmote, aari wiitthiwaaye Eetiku, ekhaliyeeyo veettakha, khunkhola osikizi saaneene mwaasa wa tafusiiri etile ya Paawulu olepa, khukwa vatulu nyuupa ya ttaatthu ya manyupa oothatanyeliwa, khutthempiwa ari woofwa. ¹⁰Paawulu khwiishukha mpakha attaaphale aakweliyeevo, khumwaakuvela khwiinama khumpatikha, khuwooza atthu yoori: “Mwihishukulikhe, ori haayi!” ¹¹Paawulu khuwela opheya khurafuna phaawu. Khurutela otafusiri theenya khulawana mpakha ocha, nawiisha khusala alawa. ¹²Aphano, khuthuuliwa shaapu otule khulawaniwa owawe ari haayi, atthu khwiiya zoowaakhurunuwa rooho.

Paawulu oniwaaleeza anamalokozela a Eefezu

¹³Fweeyo khulokoza mpankaya khulawa mpakha nti wa Asose ohali naari onwejaawo Paawulu, maana ettiye oniruma oretta etthiipo, ye aaviriye tuulu. ¹⁴Wakathi anisikaniyeevo niri Asose, fweeyo khumpwekherela khuwela mpankaya khusala nilawa Mitilene. ¹⁵Mmeesho mwaya, khulokha khufiya nshini ya esura ya Khiiyo, siikhu ya ttaatthu theenya khulawa mpakha esura ya Saamo, siikhu ya nne ti nifiyeevo nti wa Miletu. ¹⁶Maana Paawulu aalakeliye oheemeli sitati ya Eefezu, khaari otakha orupazawo Aaziya, aariye aakuve arutele Yeruzaleemu ehinafiye siikhu ya Takhiriima amana awahi.

¹⁷Noofiya Miletu, Paawulu khuruma olawa okhuweliwa attunkhulu a ojama wa Nluku a sitati ya Eefezu. ¹⁸Noota, ye khuwooza yoori: “Mweeyo mwinjuwa saaneene nanna kaari wiikhalaazo wakathi opule kaari vakatthi venu, waaza siikhu etile miiyo kifiyeevo Aaziya okhuno. ¹⁹Kanrumeyela Mbwana na ojipushuwisa na mishozi zaka mwaasa wa nanna kaari olupatthiwaazo ti khuntti ya mayaahuuti. ²⁰Mweeyo mwinjuwa yoori akaalikhiye wuutafusirelani zooshi epile ziiyiye za fwayita, na osomisa vamwanttiwa mpakha nyuupa khwa nyuupa. ²¹Kiwaatafusirelaka venkivene mayaahuuti mpakha akereeku yoori ankhupali Nluku athupwiye na amwaamini Mbwana eetthu Yinsa. ²²Nasaapi eti Rooho Ttakatthiifu enikitakhela yoori keette Yeruzaleemu, akijuweeni niini enttelaaye okirettikhanela. ²³Ila kinjuwa yoori Rooho Ttakatthiifu wakhula sitati kineettaaye ye enikuuza yoori oniweekesa ohoowa na weetta nkalapooso. ²⁴Khwa miiyo ohaayi aka khuna fwayita, ila eriina fwayita okhola khaazi eti kithawuleliweeyo ti Mbwana Yinsa, mpakha wiishisa, khaazi ya olaleya hapari zooshapweya za rehema ya Nluku.

²⁵“Aphano khina mmote wa mweeyo kintafusireliyeeyo ofwalume wa Nluku, anttelaaye okoona theenya. ²⁶Nakataalikha, miiyo kintukhuru leelo yoori, akina paathuli khwa taamu yenu mooshi. ²⁷Maana miiyo akilikheleleeni oweelezani niiya ya Nluku yooshi. ²⁸Mweettette saana na mwitthantte khuntti etile Rooho Ttakatthiifu awinkhiyeenini otthantta, yoori mwiiye attunkhulu awulu a ojama wa Nluku, otthuupo ye oozanyiyeeyo na taamu yawe. ²⁹Kinjuwa yoori paata ya miiyo olawa enlawa zapuwe miiji za ntthuttu zite vakatthi venu yoori evulaze khuntti. ³⁰Mweeyena ru anlawa apuwevo akina anttelaaye okarawela haakhi yoori awaathowelelise attwiizaya. ³¹Apho, mwijeekesele, mwifikhirele yoori khwa nyaakha mittatthu miiyo akilikheleleeni wuulipiselani wakhula mmote wa mweeyo, osikhu na nthana, na mishozi zeettaka okikwa.

³²“Nasaapi eti, miiyo kiniwinkhelelani mmakhono wa Nluku na nttakhuzi la rehema lawe, linttelaaye wuujekani na owinkhani erathi vakatthi wa attakatthiifu. ³³Miiyo akilazeleeni omaashokopho feeta, wala weero, ama kuwo zawatthu. ³⁴Mweeyo mwinjuwa yoori miiyo kakhola khaazi na makhono aka yoori kiishishe othowiwa waka na wa ashirikhaaka. ³⁵Zooshi kirettiyeezo, miiyo koosomisani yoori khwa khaazi zoolipa nina ya owaawuni apale oothowiwa, nifikhirelaka mattakhuzi apale alupiyeeyo Mbwana Yinsa yoori: ‘Wooparikhiyiwa ti otule aninkhaaye zayita otule aninkhiwaaye.’ ”

³⁶Paata ya olupa toowo, khukokhora vamote na anakhiyoni apale khusala alompa. ³⁷Ooshi khusala alila, na ompatikha Paawulu. ³⁸Yo aari oohuzunikha venkivene mwaasa wa nttakhuzi awooziyeeyo yoori: “Khaari oteela woonana theenya.” Aphano yo khumperekha mpakha mpankaya.

Tarikhi ya weetta Yeruzaleemu

¹Paata yoomwazeyanana apale aya, khupakhira mpankaya khulokhela eperepere esura ya Kooshi. Mmeesho mwaya khulawa esura ya Roote mpakha sitati ya Patara. ²Khusikana kalawa yaari weettaaye Fineesiya, khupakhira khusala nilawa. ³Nooniyeevo esura ya Shiipere khulotta phantte ya kusini nilokhelaka Siiriya. Khupakhuwa sitati ya Tiiru, ohali pankaya yeetthu yaari weettelaawo opakhula pakaji. ⁴Khuwaasikana anakhiyoni aari wiikhalaaye ottuukhule, khwiiya vamote na yo siikhu sapa. Ari awiitaalawene Rooho Ttakatthiifu, khumuuza Paawulu yoori ohilawe Yeruzaleemu. ⁵Eviriyeevo siikhu zaya epile, fweeyo khulaamo mphule mwaya, khusala nilawa niperekhiwaka pi ooshi, wakhula mmote na muukhaawe na aana awe mpakha othetekele wa sitati. Khulawa khukokhora mmattima khusala nilompa. ⁶Paata ya oleezana neetta opakhira mpankaya, attwi apale khurutela owaya.

⁷Khuvira nilawaka safwari yeetthu ya olankha Tiiru mpakha ofiya Pitolemasi, ohali nawaachelisiyeewo attwiizetthu khwiiya ottuukho siikhu moote vamote na yo. ⁸Mmeesho mwaya khusala nilawa mpakha Sezareeya, khulawa khwiikhala owawe Filiipe namalaleya hapari zooshapweya. Ye aari wa khuntti ya apale sapa21:8 Woone Khaazi za Maaswihaapa 6:1-6; apale aathawuliweeyo Yeruzaleemu.. ⁹Ye aarina aanaawe wane aamwari aari ohupirakaaye.

¹⁰Paata yawiisha siikhu zawaatta niri ottuukhule khuta napiyu mmote aari olankhaaye Yudeya aari wiitthiwaaye Akaapu. ¹¹Khuta vahali naariivo, khuthuula nzako wa Paawulu, khufuka moolu awe na makhono awe khusala alupa yoori: “Rooho Ttakatthiifu yalupa yoori mweenyewe nzako opu onteela onfukiwa khwa nanna ethiiti ti mayaahuuti Yeruzaleemu, enkheleliwe mmakhono wa amalapo.”

¹²Noosiila toowo fweeyo na atthu apale ottuukhule khunvekela saaneene Paawulu yoori ahilawe Yeruzaleemu. ¹³Aphano Paawulu khuri: “Mwinlilani mwikipatthisaka huzuni? Miiyo kiri thwayaari khahiyo ofukiwaru paasi, ila na theenya ofwa Yeruzaleemu ottuukho mwaasa wa nzina la Mbwana eetthu Yinsa.” ¹⁴Wiiya khanaari owahi onlikhisa olawa; khukayiri niraka: “Ti erettikhane etile yiiyiye matakhelo a Mbwana eetthu.”

¹⁵Paata ya ovira siikhu zaya epile khujilokotthela khusala nilawa Yeruzaleemu. ¹⁶Attwi a sitati ya Sezareeya vamote na fweeyo, ataaka aataniye Manasoni wa esura ya Shiipere nakhiyoni wa raku othuuto naari weettelaaye ommakela.

Ofiya wa Paawulu Yeruzaleemu

¹⁷Wakathi nifiyeevo Yeruzaleemu, attwi khunipwekherela na furaha khuluyeene. ¹⁸Mmeesho mwaya Paawulu khulawa vamote na fweeyo okutthanana Tiyaaku na attunkhulu a ojama wa Nluku ooshi aari attaaphale. ¹⁹Paawulu khuwaachelisa khusala athatela saaneene zooshi Nluku arettiyeeyo vakatthi wa amalapo khwa khaazi yawe. ²⁰Paata ya osiila mattakhuzi apale yo khunttitthimisa Nluku na khulupa yoori: “Owoone attwiizetthu, alufu alufu zene mayaahuuti aretteyiyeeyo onamalottela a Yinsa na ooshi pi ookhomaalela kano za Munsa. ²¹Yo ooziwa yoori weeyo oniwaasomisa mayaahuuti aniikhalaaye vakatthi wa amalapo, owoozaka yoori aphakuwanane kano za Munsa na ahiwaakhiriyise aanaaya wala ahishitahi thwapiya za mayaahuuti. ²²Niri toovi? Weekhweele yo anteela ojuwa yoori weeyo wata. ²³Orette etile ninttelaaye owuuza. Awaapho vakatthi veetthu alume wane anrettiyeeyo natiri. ²⁴Owaathuule olawe warette njampo la otwahareshiwa vamote na yo, wariphe etile enhithajiyeyaaye yoori owahi onyooliwa, orettaru toowo atthu ooshi anttela ojuwa yoori epi enlupiwaazo monkoni wa weeyo khahiyo haakhi. Atthu aya atthaapo ooshi anttela woona yoori Paawulu onshitahi kano. ²⁵Monkoni wa amalapo akhupaleliyeeyo, nawaaperekheza warakha nawooza yoori ahije nyama zootwaheliwa sanamu, wala taamu ya nyama zoohishijiwi na alikhe khaapa twayifu.”

²⁶Aphano Paawulu mmeesho mwaya khuphakanyeya na alume apale wane khulawa khutwahareshiwa vamote, ye khuvira Nnyupa Woosifwiwamo, yoori awooze atthu apale siikhu laari weettelaaye wiisha njampo ntthile lootwahareshiwa na winkha zaakha yawe khwa apale wane.

²⁷Esaleelaka wiisha siikhu sapa epile za otwahareshiwa, mayaahuuti aalankhiyeeyo Aaziya, noomoona Paawulu ari Nnyupa Woosifwiwamo, khuwaatumerela atthu apale khunkhola. ²⁸Khusala anyakulaza alupaka yoori: “Meezirayiilu, mwinaawuni! Mwinyi otu ti othuutu aniwaasomisaaye atthu a phantte zooshi alupaka vitthu zoohata khwa khapila ya Ezirayiilu, akufurwelaka puuro eti na athanyaka kano za Munsa, theenya oniwaavirisa makereeku Nnyupa Woosifwiwamo.” ²⁹Yo aalupiye mattakhuzi apa mwaasa woomoona Torofimu wa Eefezu ari vamote na Paawulu nsitati mphule aari wuupuwela yoori ye eetta onthuula khunvirisa Nnyupa Woosifwiwamo. ³⁰Khupuwa nzuuzu nsitati mphule, khuwaakusanya atthu khusala ata eettaka otthira. Khukholiwa Paawulu khupuruleliwa othetekele wa Nyuupa Yoosifwiwamo, nasaapiru khufukiwa milako. ³¹Yo atakhaka omuula, hapari epile khunfiyela nttunkhulu wa anajanka a Rooma yoori Yeruzaleemu lapuwawo nzuuzu. ³²Nttunkhulu otule khuwaakhuwela anamalokozela na anajanka aya, khutthira alawaka mpakha aphale aariivo atthu apale. Wakathi ooniweevo nttunkhulu na anajanka awe, khunlikha ompiya Paawulu. ³³Nttunkhulu otule khumwaattama Paawulu, khunkhola khuruma ofukaniwa makwinjili mawiri. Khuuzela yoori ti paani otu aya wala arettani? ³⁴Atthu akina a khuntti ethiitile eetta onyakula alupaka eti akina alupaka etthu kiina. Nttunkhulu wa anajanka khuhisala awahi ojuwa etthu yaari orettikhanaaye, mwaasa wa nzuuzu ntthile, ye khuruma yoori athuuliwe Paawulu alawaniwe puuro yookhomaaziwa. ³⁵Wakathi afiiyeevo vashikatta, anajanka aarina ya omweerekha mwaasa wa husuti ya khuntti ya atthu. ³⁶Atthu apale khusala anlottelela anyakulaka araka: “Mwimuule!”

³⁷Paata ya othuuliwa alawaniwaka puuro yoolipaneya, Paawulu khumuuzela nttunkhulu wa anajanka yoori: “Onwahi okinkha ruhusa yoori kiwuuzele etthu?” Nttunkhulu wa anajanka khumuuzela yoori: “Weeyo onjuwa ottakhula ekereeku? ³⁸Khahiyo weeyo mmisuri waaziyeeyo owaatumerela atthu onizukuluwela raku na khuwaathuula anamahusuti alufu nne khuwaalawana n’yaara?” ³⁹Paawulu khujipu yoori: “Miiyo ki yaahuuti, wa Taarusu, sitati ya fwayita khuluyeene ya nti wa Siliisiya. Mwikinkhe ruhusa kittakhulane atthu.” ⁴⁰Khwinkhiwa ruhusa, Paawulu khweemela vashikatta, khuwaattheela alama na nkhono. Atthu ooshi khwiiya oonyamala, ye khusala attakhula khwa luuka ya meepereewu araka:

Paawulu vakatthi wa anamaphuka

¹“Attwiizaku na apapazaku, mwisiileze ojaakisa waka vakatthi venu mweeyo.” ²Wakathi ansiliyeevo attakhulaka luuka ya meepereewu, atthu apale khutepa onyamala. Aphano Paawulu khusala alupa yoori:

³“Miiyo ki yaahuuti kivokoliweeyo Taarusu ya Siliisiya, ila kaleliwa sitati ethiiti. Kaari nashikola wa Kamaliyeele, khunozeliwa wookhomaalavo nkatthi wa haakhi za kano za amarehemu apapazetthu. Miiyo kaari woojithoonyeza mmakhono wa Nluku nkhama etthiipo mwiriizo mweeyo leelo. ⁴Kalupattha Tarikhi eti mpakha otapwatela, kiwaakholaka anamalottela aya alume na aakha na owaattha nkalapooso. ⁵Haakhimu nwulu wa tiini na khuntti yooshi ya attunkhulu a tiini mashaahiti aka; maana yo ti aari okinkhaaye warakha yoori kawenkhe anamalokozela a Tamaashiku, miiyo khulawa mpakha ottuukhu, oweettela atthu Yeruzaleemu nkhama anapherezu yoori ate ahukhumwiwe.

⁶“Kisaleelaka ofiya Tamaashiku ntarikhi wakathi opule wa saasiitha, nasaapiru nuuru khuluyeene ya otulu khwaara khukizukulela. ⁷Miiyo khukwela vathi khusala kisiila huula yaari okikhuwelaaye eraka: ‘Sawulu, Sawulu, onikilupatthela ni?’ ⁸Miiyo khumuuzela yoori: ‘O paani weeyo, Mbwana?’ Akijipwaka ari: ‘Miiyo ki Yinsa wa Nazareeti, othuuto weeyo oninlupatthaaye.’ ⁹Atthu apale aari vamote na miiyo ooniye nuuru etile, ila khuhisala asiila huula etile yaari ottakhulanaaye miiyo. ¹⁰Attaaphale miiyo khuuzela yoori: ‘Kiretteni Mbwanaaka?’ Mbwana khukuuza yoori: ‘Olankhe olawe Tamaashiku, ottuukho onttela wuuziwa etthu yooretta.’ ¹¹Atthu apale aari vamote na miiyo khukikholela mpakha Tamaashiku, mwaasa wa nuuru etile yaakuuliye maasho.

¹²“Aariwo Mwinyi mmote wa ntiini aari wiitthiwaaye Ananiiya, wooshututela kano za Munsa na wooshitahiwa pi mayaahuuti. ¹³Khuta oteela okutthanana miiyo, khulupa yoori: ‘Ttwiiyaku Sawulu, woone!’ Wakathi otthuupule khwaaza omoona ye. ¹⁴Aphano ye khukuuza araka: ‘Nluku wa amarehemu apapazetthu oothawula weeyo yoori ojuwe matakhelo awe, omoone Nashariya na osiile huula yoolankha nkhanyo mwawe. ¹⁵Maana weeyo onttela wiiya shaahiti awe vakatthi wa atthu ooshi khwa epile wooniyeezo na osiiliyeezo. ¹⁶Aphano onrupazela ni? Olankhe olawe woosiwe na woose twampi zawo, okhuwelaka nzina lawe.’ ¹⁷Wakathi kiruteliyeevo Yeruzaleemu, keettaka olompa Nnyupa Woosifwiwamo, khukiteela jozi moote. ¹⁸Khumoona otule kaari ottakhulanaaye, khukuuza yoori: ‘Waakuve oleewo Yeruzaleemu, maana khanlawa okhupalela oshaahiti awo monkoni wa miiyo.’ ¹⁹Miiyo khujipu yoori: ‘Mbwana, atthu apa anjuwa yoori miiyo kaari oviraka mmasinakooka noowakhola apale ookhupaliyeeyo na owaajapha na owaattha nkalapooso. ²⁰Wakathi ooliweevo Shiteevawu, alazaka oshaahiti awo, miiyo karivo attaaphale, kijipwelelisaka husuti etile na osalana kuwo za apale aari onhusutaaye.’ ²¹Attaaphale Mbwana khukuuza yoori: ‘Olawe, miiyo kinuuperekha peetiwene vakatthi wa amalapo.’ ”

Paawulu, nnyunti wa Rooma

²²Yo khusala asiila mpakha olupa nttakhuzi nttinttho, atthaapale khwaaza onyakula araka: “Ooliiwe, khansuhi wiiya haayi.” ²³Atthu apale eettaka okhuwa etthiipile, avulaka ajapi zaya na afuselaka lifufu otulu. ²⁴Nttunkhulu wa anajanka khuruma olokoziwa Paawulu puuro yookhomaaziwa yoori alawe ajaphiwe na oozeliwaka ajuwe niini atthu aari onyakulelaaye mwaasa wa ye. ²⁵Eettaka onfuka yoori anjaphe, Paawulu khumuuza namalokozela wa anajanka otule aari attaaphale araka: “Enretteya onjapha nrooma mwihaazeeni onfiisa wa namaphuka?” ²⁶Asiiliyeevo mattakhuzi apale namalokozela wa anajanka khumweettela nttunkhulu otule nkina khumuuza yoori: “Ontakha orette ni? Mwinyi aya otu nnyunti wa Rooma!” ²⁷Nttunkhulu wa anajanka khulawa aphale aariivo Paawulu khumuuzela yoori: “Nkakuuze, weeyo onnyunti wa Rooma?” Ye khujipu araka: “Aayo, kiwoottuukho.” ²⁸Aphano nttunkhulu otule khuri: “Na miiyo ki othuuto karipha nzurukhu wa waatta yoori kipatthe wiiya nnyunti.” Paawulu khujipu yoori: “Ila weekhweele miiyo kinnyunti ovokoliwa.” ²⁹Nasaapiru, khumwaattuwa ooshi apale aari omuuzelaaye. Na nttunkhulu otule khwiiya wa woova paata ya ojuwa yoori Paawulu nnyunti wa Rooma.

³⁰Aphano mmeesho mwaya nttunkhulu otule aari otakha ojuwa saaneene niini mayaahuuti aari onlokovezelaaye Paawulu. Khunfukulela na khurumisa okhuweliwa mahaakhimu a tiini na Mashawuriiya aya ooshi. Khuruma otiisiwa Paawulu khunttha vakatthi vaya.

Paawulu vakatthi wa Mashawuriiya

¹Paawulu khuwaakhontolela maasho Mashawuriiya apale, khuri: “Attwiizaku, kineettettana Nluku, mpakha leelo eti rooho yaka khinikinkha hatha paathwili!” ²Ila haakhimu nwulu wa tiini aari wiitthiwaaye Ananiiya khuwaaruma apale amwaattamiyeeyo yoori ampiye Paawulu omilomo wawe. ³Aphano Paawulu khumuuza Ananiiya yoori: “Naafikhi, Nluku onttela wuuhukhumwela etthiipo! Weeyo weekhala apho yoori okiphuke khwa nanna enlupaazo kano. Khi onruma toovi opiiwa miiyo? Kano khilupeeni toowo!” ⁴Atthu apale amwaattameliyeeyo Paawulu khulupa yoori: “Ontta onttukhana haakhimu nwulu wa tiini ya Nluku?” ⁵Paawulu khujipu yoori: “Attwiizaku miiyo akaajuwiye yoori ye haakhimu nwulu wa tiini, maana yaatikhiwa yoori ohinttakhulele pure mfwalume wa atthu awo.” ⁶Aphano Paawulu noojuwa yoori atthu apale akinoko aari masatukhi na mafwarizeewu, khuttakhula woonyakulavo nnyupa mphule wa Mashawuriiya araka: “Attwiizaku, miiyo kinfwarizeewu, mwaana wa mafwarizeewu. Kimphukiwa mwaasa wa nroromelo aka wa osisimuwa wa ananfwa.” ⁷Alupiyeevo mattakhuzi apale, khupuwa onyakulisana nwulweene mafwarizeewu na masatukhi mpakha atthu apale waawanyeya. ⁸Maana masatukhi anlupa yoori khawiivo osisimuwa wa ananfwa, wala malayikha wala nafusi, ila mafwarizeewu ankhupalela vitthu zaya epo. ⁹Attaaphale khupuwa nzuuzu liwululene, anamanozela a kano apale aari mafwarizeewu khulankha khwaaza onyakulisana saaneene alupaka yoori: “Fweeyo khanimoonaneeni hatha etthu yoovonyeya ntthu otu. Paani ajuwiyeeyo nkhama Rooho Ttakatthiifu ama nlayikha leetta onttakhulana?” ¹⁰Nzuuzu ntthile khusala litepa mpakha nttunkhulu wa najanka khwaaza woova oonaka yoori Paawulu antta onvulalisa. Aphano khuwaaruma anajanka yoori anlazevo Paawulu vakatthi wa atthu apale anlawane puuro yookhomaaziwa.

¹¹Osikhu wa phiiri Mbwana khumpuwelela Paawulu khumuuza yoori: “Ominyale, nkhama etthiipo waalaweliyeezo oshaahiti monkoni wa miiyo Yeruzaleemu, ona ya olawela theenya Rooma.”

¹²Mmeesho mwaya mayaahuuti akina khukusanyeya na khulapha yoori khaari oteela oja wala onywa maati ahimuuleeni Paawulu. ¹³Atthu aasiilaniyeeyo oretta vitthu zaya epo aavikaniye arupayiini. ¹⁴Apo khulawa wa mahaakhimu a tiini na attunkhulu a tiini amayaahuuti khuwooza yoori: “Nalaphela yoori khaninja hatha etthu mpakha nimuule Paawulu. ¹⁵Nakataalikha nasaapi, mweeyo na Mashawuriiya mwinvekele nttunkhulu wa anajanka yoori antiise Paawulu okhuno. Mwamuuze yoori ontakha wathola tholiwe nlattu awe saaneene. Aphano ye ahinate fweeyo najilikhanisa yoori nimuule.” ¹⁶Ila ntuuluwe Paawulu khusiila shawuri zaya epile. Khulawa mpakha puuro yookhomaaziwa khumuuza zooshi. ¹⁷Attaaphale Paawulu khunkhuwela namalokozela wa anajanka khumuuza yoori: “Onthuule shaapu otu onlawane wa nttunkhulu wa anajanka. Ye onaaye mattakhuzi onthatelela.” ¹⁸Etthiipo ye khunthuula khulawana wa nttunkhulu wa anajanka. Noofiya khuri: “Napherezu Paawulu eetta okikhuwela, khukivekela yoori kintiise shaapu otu onaaye etthu antakhaaye wuuthatelela.” ¹⁹Nttunkhulu otule khunkholela nkhono shaapu otule khunlawana othetekele, khumuuzela yoori: “Niini oriinaaye ya okithatelela?” ²⁰Shaapu otule khujipu yoori: “Mayaahuuti awaza shawuri za wuuvekela yoori meesho ontane Paawulu wa Mashawuriiya yoori antholathole saaneene. ²¹Ohiwaalikhelele wuushintta, maana aziti arupayiini atthu anjitthekezayo yoori anvithaalele Paawulu. Yo alaphela yoori khanja wala khannywa maati ahimuuleeni. Pi oojitthenkeza nasaapi eti anuuweja owenkha ruhusa khwa etile avekiyeeyo.” ²²Aphano nttunkhulu wa anajanka khuleezana na shaapu otule khumuuza yoori: “Ohimuuze hatha ntthu mattakhuzi apa okuuziyeeyo.”

²³Paata ya wuuziwa mattakhuzi apale ye khuwaakhuwela anamalokozela awe a anajanka awiri khuwaaruma yoori: “Mwiwaatthenkeze anajanka miiya piiri, na saapiini awiiyana khavalo na miiya piiri awiiyana mikokhi alawe Sezareeya wakathi opule wa saattatthu ya osikhu. ²⁴Mwitthenkeze theenya khavalo yoori Paawulu awele mwinthuule woomwinanelavo mwinlawane wa nsatoro Feelishi,.”

²⁵Nttunkhulu wa anajanka khwaatikha warakha araka:

²⁶“Miiyo Kalaawutiyu Liisiya,

kiniwaatikhela nsatoro nwulu Feelishi,

Salamu.

²⁷Mwinyi otu afukisiwa pi mayaahuuti aari osaleela wuuliiwa, wakathi kifiyeevo miiyo, na anajanka aka khumuusuru maana kasopheliye yoori ye nnyunti wa Rooma. ²⁸Kitakhaka ohakikhi niini aari olokoveziwaaye, khunthuula khulawana wa Mashawuriiya. ²⁹Khulawa khujuwa yoori ye aari olupatthiwa mwaasa wa kano zaya, ila khaarina paathuli yaari osuhaaye wuuliiwa ama ofukeliwa. ³⁰Wakathi kuuziweevo yoori zawaziwa shawuri za wuuliiwa, tiito kuuperekheziyeeyo weeyo woohirupazi. Theenya khurumisa yoori apale aninlupatthaaye awuuze etthu akosiyeeyo.”

³¹Anajanka apale khuretta khwa nanna etthiipile aarumiweezo, osikhu otthuupule khunthuula Paawulu khulawana mpakha Antipatiriite. ³²Mmeesho mwaya anajanka khurutela puuro yookhomaaziwa, khuwaalikha anakhavalo yoori avire arettaka safwari na Paawulu. ³³Anakhavalo apale afiiyeevo Sezareeya, khunfiisa Paawulu wa nsatoro na khuperekha warakha. ³⁴Ye khusoma warakha etile na khumuuzela sitati yawe, wakathi ajuwiyeevo yoori aari wa Siliisiya khuri: ³⁵“Kinttela osiila nlattu awo amana ata apale anuulupatthaaye.” Khurumisa olawa ofukeliwa Paawulu nnyupa khuulu ya Herooti.

Ophukiwa wa Paawulu vakatthi wa Feelishi

¹Eviriyeevo siikhu thaanu haakhimu nwulu wa tiini aniitthiwaaye Ananiiya khwiishukhela Sezareeya vamote na attunkhulu a tiini na namwaakisa aari wiitthiwaaye Terituulu. Yo khulawa khujithoonyeza wa nsatoro yoori anlokoveze vitthu Paawulu. ²Wakathi akhuweliweevo Paawulu, Terituulu khwaaza nlattu awe, araka: “Woohishimwiwa waziri khwa rehema yawo na nanna olanseliyeeyo na akhili zawo vakatthi wa atthu apa nimpuhela heeri khaamili. ³Khwa wakhula phantte ninkhupalela na ninshukhurwela zooshi orettiyeeyo woohishimwiwa Feelishi. ⁴Aphano akintakha wuurupazisa; tiito kinuuvekelaaye yoori onisiileze wakathi vattitthiiru na emaani yawo. ⁵Mwinyi otu, fweeyo ninimoona nkhama namakarewela antanaaye nzuuzu vakatthi wa mayaahuuti na mmuti wooshimo. Ye ti eeyiye namalokozela wa zoovonyeya za anazare. ⁶Othuuto aalakeliyeeyo okufurwela Nyuupa Yoosifwiwamo. Fweeyo nankhola yoori nimphuke khwa mwentto wa kano zeetthu. ⁷Ila khuta nttunkhulu wa anajanka aniitthiwaaye Liisiya, khunthuula mmakhono mweetthu na kuvu zawe zooshi. ⁸Khuruma yoori ate apale aari onluphatthaaye apha oriivo. Amana weeyo omuuzela ontta woona haakhi monkoni wa vitthu epo aninlokovezaaye.”

⁹Mayaahuuti ankhupalela olokova waya opo, alupaka yoori mattakhuzi aya apo aari a khweele.

Paawulu onthoonyeza ojaakisa wawe

¹⁰Nsatoro Feelishi khumwinkha alama Paawulu yoori attakhule, ye khutukhuru araka: “Miiyo kinjuwa yoori khaazi eti yoophuka waaza raku, tiito kinfurahela saaneene ojaakisa vakatthi vawo. ¹¹Mwinlawa mwahakikhi yoori wala kifiyeeni siikhu khumi na piiri thanku kilawe Yeruzaleemu omwaaputu Nluku; ¹²wala apo anikilokovezaaye khakisikaneeni Nnyupa Woosifwiwamo keettaka onyakulisana na ntthu, wala owaalazela nzuuzu atthu nsinakooka wala nsitati; ¹³wala yo khanlawa opattha hakiikha ya vitthu zaya epo anikilupezaayo. ¹⁴Nakataalikha kintukhuru kiwuuzaka yoori nkatthi wa Tarikhi eti eniitthiwaaye yoovonyeya, kininrumeyela Nluku wa amarehemu apapazetthu, kikhupalelaka vitthu zooshi za kano na zawaatikhiwa pi manapiyu. ¹⁵Na kinaaye nroromelo khwa Nluku otthuupo arinaaye apa yoori owaapho osisimuwa wa anahaakhi na apale ohiina haakhi. ¹⁶Khwa attaapho theenya kinjilipisa yoori kiiyane rooho swaafi omaasho wa Nluku na wa anaatamu. ¹⁷Paata ya olaawo Yeruzaleemu khwa nyaakha vattitthiiru, kaaruteliyewo olawa othuula zimola yoori kawenkhe atthu a mmuti mwaka na kilawaka oretta twaha. ¹⁸Wakathi kaari orettaavo epo zaya, paata ya miiyo wiisha njampo la otwahareshiwa, mayaahuuti akina khukisikana phantte ya Nnyupa Woosifwiwamo, khaarivo atthu awaatta wala nzuuzu. ¹⁹Ila mayaahuuti akina a Aaziya aarina ya wiiya attaapha oriivo weeyo, asala alupa nkhama anaaye etthu ya okilupeza. ²⁰Ama apa ariiye apha alupe husuti akisikananiyeeyo wakathi kaathuuliweevo kilawaniwa wa Mashawuriiya, ²¹woohiiyi mattakhuzi apa kilupiyeeyo wakathi kaari vakatthi vaya kiraka: ‘Leelo kintta ophukiwa ti mweeyo monkoni wa osisimuwa wa ananfwa.’ ”

²²Aphano Feelishi aari ojuwa saaneene Tarikhi yaya etile, khukayirisa nlattu opule khuri: “Amana ata nttunkhulu Liisiya, phi kinttelaaye ottakhula nlattu enu mweeyo.” ²³Na khunruma namalokozela wa anajanka yoori amweekesele Paawulu mphule aafukeliweemo, amwinkhe ruhusa ya owahi waawuniwa pi ashirikhaawe.

²⁴Ziviriyeevo siikhu vattitthiiru, Feelishi khuta na Turusiila, muukha awe, aari yaahuuti. Khurumisa okhuweliwa Paawulu khunsiila attakhulaka amini khwa Yinsa Al-Masiihu. ²⁵Ila wakathi Paawulu aaziyeevo ottakhula monkoni wa ohaayi wa shariya, ojishintta omwenyeweru na siikhu ya ophukiwa, Feelishi khwiiya wawoova na khuri: “Paasi! Saruwa, amana kuutakha kintta wuukhuwela theenya.” ²⁶Feelishi aari onkhuwelaka Paawulu khusala apiyana mwaasa oonaka yoori onteela omwinkha nzurukhu. ²⁷Noovira nyaakha miwiri, Feelishi khurentteriwa ti Poorisiyu Feeshitu. Feelishi aari otakha owaatuvelisa mayaahuuti, tiito khunlikha Paawulu ari nkalapooso.

Ophukiwa wa Paawulu ti Feeshitu

¹Ziviriyeevo siikhu ttatthu paata ya Feeshitu ofiya nti aya opule, aavikaniye Sezareeya khuwelela Yeruzaleemu. ²Ottuukho mahaakhimu a tiini na mayaahuuti apale ooshitahiwa khuta aphale aariivo, khusala anlokoveza Paawulu. ³Khuveka ansafatalaka Feeshitu yoori Paawulu alawaniwe Yeruzaleemu, maana yo aasilaniye omuula ntarikhi. ⁴Feeshitu khuwaajipu yoori: “Paawulu afukeliwa Sezareeya, miiyo kintta ottuukhu woohirupazi. ⁵Ate attunkhulu enu nilawe mpakha ottuukhu alupe olokoveziwa waya opo, nkhama khweele aretta etthu yoovonyeya.” ⁶Ziviriyeevo siikhu naane ama siikhu khumi khusala alawa Sezareeya, mmeesho mwaya khwiikhala va khukulu ya ophuka na khurumisa yoori Paawulu atiisiwe attaaphale aariivo yo. ⁷Wakathi Paawulu atiiyeevo, mayaahuuti alankhiyeeyo Yeruzaleemu khukusanyeya attaaphale, khusala anlokoveza mattakhuzi awoopisa na ootakhala ila khuhimoonani hatha paathwili. ⁸Aphano Paawulu khusala ajaakisa alupaka yoori: “Akiretteeni hatha etthu yoovonyeya khwa kano za mayaahuuti wala Nyuupa Yoosifwiwamo ama Seezari.” ⁹Feeshitu, atakhaka owaatuvelisa mayaahuuti, khumuuzela Paawulu yoori: “Weeyo ontakha olawa Yeruzaleemu ophukiwa ti miiyo, monkoni wa mattakhuzi apa onlokoveziwaaye?”

¹⁰Paawulu khunjipu araka: “Miiyo kiri nnyupa yoophukiwa ya Seezari kiina yoophukiwa nttumpho. Akiwaaretteleeni hatha etthu yootakhala mayaahuuti nkhama etthiipo onjuwaazo. ¹¹Nkhama khweele, kiina paathuli yooretta etthu enikisuhaaye ofwa, wala akinkatthala. Ila nkhama epi kinlokoveziwaaye pi mayaahuuti apa khahiyo za haakhi, khina ariina ruhusa okinkhelela mmakhono mwaya. Kininhirimiza Seezari!”

¹²Paata ya Feeshitu ottakhula na mashawuriiya awe, khunjipu yoori: “Wiiya wanhirimiza Seezari onttaniwa wa Seezari ottuukho.”

Feeshitu onimuuza Akiriipa nlattu wa Paawulu

¹³Ziviriyeevo siikhu vattitthiiru mfwalume Akiriipa na Bereniisi khulawa Sezareeya yoori anchelise Feeshitu. ¹⁴Eeshiyeevo siikhu zawaatta ari ottuukhule, Feeshitu khumuuza milattu epile za Paawulu mfwalume yoori: “Owaamo mwinyi mmote mphu Feelishi anfukeliyeeyo. ¹⁵Wakathi kilawiyeevo Yeruzaleemu, mahaakhimu a tiini na attunkhulu a tiini amayaahuuti khusala anlokoveza mattakhuzi, avekaka yoori enkhiwe paathuli. ¹⁶Miiyo khuwooza yoori khahiyo thwapiya za arooma omwinkha paathuli ntthu ahaazeeni owaakutthanisa na apale anlokoveziyeeyo, otule anlokoveziwaaye oniiyana ruhusa ya ojaakisa khwa epile anlokoveziwaazo. ¹⁷Weekhweele, afiiyeevo yo apha, woohirupazi mmeesho mwaya, khwiikhala va khukulu ya ophuka khurumisa otiisiwa mwinyi otule. ¹⁸Wakathi atiiyeevo apale aari onlokovezaaye yoori attakhule, khuhinlokovezi hatha husuti khwa nanna kaari wuupuwelaazo. ¹⁹Olikha epo, aari onlupeza monkoni wa tiini yaya na ntthu woofwa aari wiitthiwaaye Yinsa, othuuto Paawulu aari olupaaye yoori ori haayi. ²⁰Miiyo khwiiya woohijuwi nanna ya wuuzela nlattu opu, tiito kaamuzeliyeeyo nkhama ye aari otakha olawa Yeruzaleemu aphukiwe ottuukho monkoni wa olokoveziwa. ²¹Ila Paawulu khuhirimiza yoori apwehiwe mpakha ate aphukiwe ti Seezari. Aphano miiyo khuruma yoori otu ona ya wiiya nkalapooso mpakha miiyo kimperekhe wa Seezari.”

²²Aphano Akiriipa khumuuza Feeshitu yoori: “Miiyo kaari otakha onsiila mwinyi aya oto.” Feeshitu khunjipu araka: “Meesho ontta onsiila.”

²³Attaaphale mmeesho mwaya, Akiriipa na Bereniisi khuta awaliye kuwo zootafikhana khuvira vansana wa mfwalume vamote na awaziri awulu na atthu ooshitahiwa a nsitati, khutiisiwa Paawulu khwa oruma wa Feeshitu. ²⁴Aphano Feeshitu khuri: “Mfwalume Akiriipa na mooshi mweeyo mwiriiye apha, mwimoone mwinyi otu, mwaasa wa niini atthu ooshi a mayaahuuti anikiteelaaye miiyo waaza Yeruzaleemu mpakha okhuno, anyakulaka araka khayaari ofwayi mwinyi otu wiiya haayi. ²⁵Ila miiyo kinoona yoori kharetteeni hatha etthu ansuhaaye wuuleeliwa. Mwaasa wa ye onhirimiza Seezari mfwalume wa Rooma, tiito kilakeliyeeyo omperekha wa mfwalume ottuukho. ²⁶Khwa etthiipo, monkoni wa mwinyi otu akina hatha etthu yoomwatikhela mfwalume, tiito kintisiyeeyo vakatthi venu, haaswahaaswa vakatthi wa mfwalume Akiriipa yoori mwimuuzele kipatthevo etthu ya waatikha. ²⁷Maana akinoona wiiya shariya omperekha napherezu olawa ophukiwa ehilupiweeni etthu anlokoveziwaaye.”

Ojaakisa wa Paawulu vakatthi wa mfwalume Akiriipa

¹Aphano mfwalume Akiriipa khumuuza Paawulu yoori: “Weeyo onaaye ruhusa ya ojaakisa.”

Elottelanaka, Paawulu khuttha alama na nkhono awe khwaaza ojaakisa araka: ²“Mfwalume Akiriipa, kiina furaha khuluyeene mwaasa wa leelo wiiya omaasho wawo weeyo yoori kijaakise khwa zooshi kinlokoveziwaazo pi mayaahuuti, ³haaswahaaswa mwaasa wa ojuwa thwapiya na shawuri za mayaahuuti zooshi. Tiito kinuuvekela yoori okisiileze mooremoore.

⁴“Mayaahuuti ooshi anjuwa nanna kikhaliyeeyo osimaana aka, waaza khapila kivokoliweeyo mpakha Yeruzaleemu. ⁵Yo anikijuwa thanku raku anwahi olawela oshaahiti amana atakha, yoori miiyo keekhala nkhama mfwarizeewu kaari wa khuntti ethiiti ya tiini yeetthu. ⁶Apha kintta ophukiwa mwaasa wa nroromelo aka khwa etile Nluku awaahitiyeeyo amarehemu apapazetthu. ⁷Ethiito mahimo apale khumi na mawiri, aari owejelaaye ansifwaka Nluku na rooho yaya yooshi osikhu na nthana. Oo mfwalume, mwaasa wa nroromelo otthuupo, ti kinlokovezeliwaaye vitthu, pi mayaahuuti. ⁸Mweeyo mamwinyi, mwaasa aya niini, mwinoonaaye yoori Nluku khanwahi owaasisimula ananfwa?

⁹“Weekhweele na miiyo kaari woojishintta yoori kiina yooretta wakhula etthu ya wuumanana nzina la Yinsa wa Nazareeti. ¹⁰Zaari vitthu etthiipo kaarettiyeeyo Yeruzaleemu, khwa ruhusa ya mahaakhimu a tiini khuwaattha nkalapooso attakatthiifu awaatta, amana atakheliwaka wuuliiwa miiyo khaari otakhaka etthiipo. ¹¹Wakathi mwinkeene kaari weettaka mmasinakooka olawa owaahukhumu attakatthiifu na owaakhanyarela okufuru, katapu kaariina khwa atthu apale yaakifiyelelisiye olawa sitati kiina kiwaalupatthaka.

Paawulu onlupa nanna anjuwiyeezo Yinsa

¹²“Khwa safwari epo kiina keettiye Tamaashiku, khwa ofwalume na ruhusa ya mahaakhimu a tiini. ¹³Payina ya saasiitha, kiri ntarikhi, oo mfwalume Akiriipa keetta woona nuuru yoolankha otulu yawaara zayita njuwa, yaarelaka aphale kaariivo na apale kaariina. ¹⁴Fooshi khukwela vathi. Aphano keetta osiila huula yaari okuuzaaye khwa luuka ya aramaayiku yoori: ‘Sawulu, Sawulu, onikilupatthela ni? Weeyo amana weekesa ohijali puutta ontta ojoonisa olwaaza omweenyewe.’ ¹⁵Aphano miiyo khumuuzela yoori: ‘O paani weeyo aya Mbwana?’ Khujipu Mbwana araka: ‘Ki Yinsa, otule weeyo oninlupatthaaye. ¹⁶Olankhe weemele, miiyo koopuwelela weeyo yoori kuuthawule wiiye karumeya na shaahiti aka, yoori owaathatelele akinoko epile wooniyeeyo leelo na epile kinttelaazo wuuthoonyeza. ¹⁷Kinttela owuusuru weeyo vakatthi wa mayaahuuti na amalapo, maana kinuuperekha vakatthi wa atthaapo. ¹⁸Yoori owaafunule maasho na owaalazemo n’yiiza owaatane nnuuru na owaalaze muuwahi wa epiliisi owaatane mmakhono wa Nluku, yoori apwekherele nswammaha wa twampi zaya, arithi na apale attakatthisiweeyo ti amini khwa miiyo.’

¹⁹“Khwa etthiipo mfwalume Akiriipa, miiyo akikhijileleeni othoonyeziwa wa pinkuuni. ²⁰Khuwaatafusirela omwanzo apale aari wiikhalaaye Tamaashiku, paata ya okhule khuwaatafusirela apale aari Yeruzaleemu na Yudeya yooshi mpakha amalapo, kiwoozaka yoori mwithupwiye mwirutele wa Nluku, mwirettaka vitthu enthoonyezaaye othupwiya weenu. ²¹Mwaasa wa etthiipo, mayaahuuti akina aya khukikhola miiyo kiri Nnyupa Woosifwiwamo khusala atakha okuula. ²²Ila kinaaye awuni ya Nluku mpakha siikhu eti ya leelo, na kiri apha mwaasa wa etthiipo kilazaka oshaahiti vakatthi wa atthu pure na apale ooshitahiwa. Akinlupa hatha etthu yohiiyi etile aalupiyeeyo manapiyu na Munsa yoori enteela orettikhana. ²³Yo aalupiye yoori Al-Masiihu aari oteela ohoowa na eeye wamwanzo woosisimuwa muufwa yoori athoonyeze nuuru khwa mayaahuuti mpakha amalapo.”

²⁴Wakathi otthuupule Paawulu eettaka ojaakisa, Feeshitu khuntapwatela khunyakula araka: “Weeyo onlolo, mwaasa wa osoma channu zintta owaashikha akhili!”

²⁵Paawulu khujipu yoori: “Mfwalume Feeshitu, Miiyo akinlolo, vitthu kinlupaazo pi za haakhi na zooshapweya. ²⁶Mattakhuzi aya apa ooshi mfwalume onjuwa, kinwahi omuuza saaneene maana khina moote erettikhaniyeeyo vahali woojiviteyavo. ²⁷Mfwalume Akiriipa, oniwaakhupali manapiyu? Miiyo kinjuwa yoori oniwaakhupali.”

²⁸Aphano Akiriipa khumuuza Paawulu yoori: “Apho weeyo onoona yoori khwa wakathi vattitthiiru onikishintta okirette wiiya namalottela wa Yinsa?”

²⁹Paawulu khujipu araka: “Wakathi wa waatta ama vattitthiiru, kininvekela Nluku khahiyo khwa weeyo paasi, ila apale ooshi anikisiilaaye aretteye wiiya nkhama miiyo, woohiina makwinjili apa kiriina.”

³⁰Mfwalume khulankha vamote na nsatoro na Bereniisi na apale eekhaliyeeyo attaaphale. ³¹Asaruwaka mphule khusala attakhula atthaaporu araka: “Mwinyi otu kharetteeni hatha etthu eninsuhaaye wuuliiwa ama ofukeliwa.” ³²Akiriipa khumuuza Feeshitu yoori: “Ye aarina yootaphuliwa eriwaka khahirimiziye ophukiwa ti Seezari.”

Paawulu ontta Rooma

¹Wakathi naalakeliyeevo olokhela Etaaliya, Paawulu na anapherezu akina khwinkhiwa namalokozela mmote aari wiitthiwaaye Zhuuliyu, aari nttunkhulu wa khuntti ya anajanka ya mfwalume wa Rooma. ²Khupakhira pankaya ya sitati ya Atirimiitiyu, yaari weettaaye shiini kiina ya nti wa Aaziya. Khulawa mpakha opahari nilawaka naalawaniye Arishitaruku Mmasetoniya wa sitati ya Tizaloonika. ³Mmeesho mwaya, khufiya Sitooni. Zhuuliyu khuntthantta Paawulu wookemaanivo, khumwinkha ruhusa yoolawa owoona ashirikhaawe yoori atthaapo amwinkhe etile yaari onhithajiyaaye. ⁴Paata ya olaawo Sitooni, khuvira phantte kiina ya Shiipere yoori nijiikitthe, mwaasa wa pheevo zaari zoonivirikanela. ⁵Nilokhiyeevo pahari ya Siliisiya na Panfiiliya, khufiya Miira, sitati ya nti wa Liisiya. ⁶Nifiyeevo okhule, namalokozela wa anajanka otule khusikana pankaya ya sitati ya Alishanteriya yaari weettaaye Etaaliya, ye khunipakhirisa nttumpho. ⁷Khulokha vattiitthi vattiitthi khwa siikhu zawaatta na tafwawuthi khulukhulu khufiya sitati ya Keniitu. Khuhisala niwahi ovira nilawaka mwaasa wa pheevo wiiya zoovirikana, khujikittha phantte ya Esura ya Kereeta na Salimoona. ⁸Khusala nilawa na tafwawuthi zeetthu, khufiya puuro yaari wiitthiwaaye Patari Yooshapweya, kharipu ya sitati ya Laseeya.

Hasara za safwari

⁹Paata ya ovira wakathi mwinkeene, olokha khwaaza woopisa, maana wakathi wa ofuka waaviriye. Tiito Paawulu khusala awaahirimiza, ¹⁰araka: “Mamwinyi, miiyo kinoona yoori safwari yeetthu enttela wiiya ya woopisa. Enlawa yapuwe hasara khuluyeene khwa pankaya na mapwattha na theenya khwa ohaayi eetthu.” ¹¹Ila namalokozela wa anajanka, olikha osiileza etile Paawulu aari olupaaye, khulottela shawuri za nahota na za mweenyewe pankaya. ¹²Ooniyeevo yoori patari yaya etile khayaari yooshapweya wiisha wakathi wa mwiita ari attaapho, tiito enki khujilakelela yoori aarina yoorutela olokha na nroromelo wa ofiya Foonika ottuukho alawe avirise wakathi wa mwiita, maana yaari patari ya Kereeta, ethiito yaari weekesaaye phantte lintupweelaawo njuwa na lintthamuwaawo njuwa.

¹³Khwaaza ovitelela vattiitthi vattiitthi pheevo za kuusi. Yo khusala oona yoori apattha etile aari otakhaaye; tiito khunvuula nankura khusala alawa aweraweraka shiini ya Kereeta. ¹⁴Ila oviriyeevo wakathi vattitthiiru, khupuwa pheevo zookhomaala ya tarupa. ¹⁵Pankaya khusala evevelushiwa khuhisala ewahi oshintta pheevo, khwiishusha matthaka khusala niwawaziwa ti pheevo. ¹⁶Khujikittha na esura ttiitthiiru eniitthiwaaye Kalaawuta, khuwahi okaphula shikareera za pankaya na tafwawuthi khuluyeene. ¹⁷Aphano amalinyero khuthuula shikareera khuweza mpankaya, khufukelela nkhoyi wa nankura vanshaluma. Eetta woova okhukuziwa pankaya etile yeettaniwaka mmavula, ari kharipu ya shiini ya Liibiya. Khwiishusha matthaka aya khulikha pankaya etile evevelushiwaka ti pheevo. ¹⁸Mmeesho mwaya, ari oohusutiwa saaneene ti pheevo, khwaaza weeselela mapwattha aya mpahari. ¹⁹Siikhu ya ttatthu, khweeselela mpahari na makhono aya phantte moote ya zaana kiina za pankaya. ²⁰Wakathi aya otthuupule, khuhisala lipuwa njuwa wala matthottowa siikhu zawaatta na pheevo yaari ovira enivumelaka, mpakha onaashikha nroromelo wa wuusurukha.

²¹Aavirisiyeevo siikhu zawaatta ahinaje hatha etthu, Paawulu khweemela vakatthi vaya khuwooza yoori: “Mamwinyi, mwaarina ya osiileza shawuri zaka yoohiliiwo Kereeta, maana naari weettela ojiinanela khwa hasara na oharipweyiwa ti pankaya na waashikhiwa pi vitthu. ²²Ila apha kiniwuuzani yoori mwiminyale, khina mmote wa mweeyo anttelaaye opwetheya, pankaya ti anttelaaye opwecheya. ²³Maana taana osikhu lakipuwelela nlayikha la Nluku mweenyewe miiyo na otule kinimwaputwaaye, ²⁴khukuuza yoori: ‘Paawulu! Ohoove! Enuuhithajiya weeyo olawa weemela okutthanane Seezari. Nluku na rehema yawe awinkha ohaayi na ooshi apale onlokhanaaye.’ ²⁵Khwa ethiito mwiminyale mamwinyi. Kininkhupali Nluku yoori zinteela orettikhana zooshi maana akuuza. ²⁶Ila enihithajiya fweeyo okhukuzeliwa veesura moote.”

²⁷Paata ya ofiya osikhu khumi na nne, neetta othuuliwa ti pheevo neettaniwaka phantte khwa phantte pahari eniitthiwaaye Atiriyaatiku. Payina ya osikhu layili, amalinyero khusala oona yoori naattamela vathi. ²⁸Khwaaza weesa nkhoyi, khoona wiicha waya ori phiima talaathiini na sitha. Khuweja wakathi vattitthiiru, khurutela weeza theenya khusikana orina phiima eshiriini na sapa wiicha waya. ²⁹Oovaka okhukuzeliwa valivula, khuwaatupweeza anankura aya wane a sheezi, khusala alompa yoori oche nasaapiru. ³⁰Eekesaka otthiramo mpankaya mphule, amalinyero khwiishushela shikareera zaya mpahari, ajinkhaka nkhama antakhaaye owaaweza anankura a loomo. ³¹Aphano Paawulu khumuuza namalokozela otule na anajanka awe yoori: “Amana mamwinyi apa ahisali mpankaya mphu, mweeyo khamwiwahi wuusurukha.” ³²Attaaphale anajanka khushija mikhoyi zaafukaniweeyo shikareera khulikha okwa.

³³Ohinache saana, Paawulu khuwooza ooshi yoori aje etthu yoojiwa, araka: “Leelo zinretta siikhu khumi na nne neettaka ojeekesela woohiji hatha etthu. ³⁴Nakataalikha kinuuvekelani oja etthu, amana mwiretta toowo phi mwinttelaaye wiiya haayi. Khina mmote wa mweeyo anttelaaye ovulala.” ³⁵Alupiyeevo mattakhuzi apale, khuthuula phaawu khunshukhurwela Nluku vakatthi wa ooshi aya. Aphano khumeya khwaaza orafuna. ³⁶Ooshi khwiiya oolipiseleya na theenya khuja etthu yoojiwa. ³⁷Mpankaya naarimo atthu miiya piiri na saapiini na sitha. ³⁸Paata yooja khurupala, khuvukula mapwattha a tiriku eeselelaka mpahari yoori pankaya yaya eveye.

Ozama

³⁹Wakathi ochiyeevo khuhisala ajuwavo vathi, ila khoona esura yaariina muuttho. Yo khuwaza olawa weeleeza nttumpho pankaya yaya amana ewaheya. ⁴⁰Yo khuwaashija anankura khuwaalikha mpahari na khutapula khayiro za maleemi. Aphano, khuweza ntthaka laya la loomo, yoori awahi olotta pahari. ⁴¹Ila pankaya etile khuphara valivula loomo waya. Sheezi yaya khwaaza opwechiwa ti kuvu za mawipi. ⁴²Anajanka khulakela owoola anapherezu yoori ahifiye vathi atthira. ⁴³Ila namalokozela wa anajanka aari otakha omwiinanela Paawulu, khuwaakhattaza anajanka owaza shawuri nkhama epo. Aphano khuruma yoori apale anjuwaaye woowelela atupweele mpahari alawe vathi. ⁴⁴Akina arina ya ojuusuru akholaka thaapwa akina akhole vitthu kiina za pankaya. Ti nanna noosurukhiyeezo fooshi fweeyo mpakha ofiya vathi.

Paawulu ari esura ya Maalata

¹Wakathi nifiyeevo vathi, neetta ojuwa yoori esura etile yaari wiitthiwa Maalata. ²Eenyewe nti aya opule khunitthantta na huruma khuluyeene khukhoza moottho mwaasa wa vuula na ozizima. ³Paawulu khukusanya khuuni atakhaka yoori atthe vamoottho, khusaruwamo nyookha etthiraka nkukuku khukhola na nkhono. ⁴Atthu a veesura aphale nawoona evili eri vankhono wa Paawulu, khusala alupa yoori: “Weekhweele mwinyi otu namahusuti, maana oosurukha mpahari, olikha toowo, haakhi khinlawa onlikha wiiya haayi.” ⁵Ila Paawulu nootathela nyookha etile vamoottho, khuhinretti hatha etthu yootakhala. ⁶Yo aari weekesela omoona Paawulu ari woovipa ama ofwa nasaapiru, ila khuvira wakathi mwinkeene khuhisala oona enrettaka etthu, khuzukulisa akhili zaya khwaaza olupa yoori ye aari nluku. ⁷Kharipu ya attaaphale yaarivo puuro ya mwinyi aari wiitthiwaaye Puupiliyu, mfwalume wa esura ya etile. Ye khunipwekherela saana siikhu ttatthu niri aletto awe. ⁸Aphano papaawe eetta olwaaziwa hooma na ohara taamu. Paawulu khumwaattama yoori amoone, paata ya onttheela makhono na khunlompela eetta ovona. ⁹Wakathi zirettikhaniyeevo epi, alwele akina a veesura attaaphale khuta na khuvonisiwa. ¹⁰Yo khunithoonyeza shitaha khuluyeene, paata ya opakhira mpankaya, khutthaamu zooshi epile naari ohithajiyaazo.

Efiyelo ya Rooma

¹¹Ziviriyeevo nyeezi mittatthu paata ya wiisha mwiita. Veesura attaaphale yaarivo pankaya ya Alishanteriya yaariina ratarato ya miluku za maphapo khupakhira nttumpho. ¹²Nifiyeevo Sirakuuza, neekhaliyeewo siikhu ttatthu. ¹³Attaaphale khusala nivira nilawaka mpakha ofiya sitati ya Reshiyu. Mmeesho mwaya khwaaza ovuma pheevo za kuusi, nkatthi wa siikhu piiri neetta ofiya patari ya Puuteyooli. ¹⁴Ottuukhule khuwaasikana attwi aanuuziyeeyo wiikhala sumana vamote na yo. Nawiisha khusala nilawa Rooma. ¹⁵Attwi arooma khusiila yoori nintta ota, khunithepeeza Vaparasa wa Apiiyu theenya va Wuuzanyisa Mittatthu, Paawulu noowoona khunshukhurwela Nluku na khwiiya woolipiseleya. ¹⁶Wakathi nifiyeevo Rooma, Paawulu khwinkhiwa ruhusa ya wiikhala otthwe, na weekeseliwa ti najanka mmote.

Otafusiri wa Paawulu Rooma

¹⁷Ziviriyeevo siikhu ttatthu, Paawulu khuwaalaleya Attunkhulu a tiini a mayaahuuti. Wakathi akusanyeyiyeevo, khusala awooza yoori: “Attwiizaku, miiyo akiretteeni hatha etthu khwa zowera za apapazaya, ila khufukiwa Yeruzaleemu khwinkheleliwa mmakhono wa arooma. ¹⁸Yo khusala akuuzela na aari otakha okilikha, mwaasa yoori khakoonaneeni hatha paathwili ya husuti moote yaari osuhaaye wuuleeliwa. ¹⁹Ila mayaahuuti khusala alupa vitthu zoovonyeya. Tiito kaavekiyeeyo yoori kite kiphukiwe ti Seezari, hatha nkhama akina paathwili yoowaarettela atthu aka. ²⁰Khwa ethiito, kinveka yoori mwite mwittakhulane miiyo. Kimpattikhana kiri mmakwinjili, mwaasa wa nroromelo wa meezirayiilu.”

²¹Yo khujipu araka: “Khanipwekhereleeni hatha warakha ya Yudeya monkoni wa weeyo, wala khateeni hatha ttwi mmote woolankha ottuukhu alupeziyeeyo etthu yootakhala. ²²Khwa attaapho naari otakha osiila khwa phantte yawo shawuri oriinaazo, maana najuwa yoori wakhula vahali enttakhuliwa vitthu zootakhala monkoni wa khuntti eti.”

²³Khusiilana orutela okutthana na Paawulu siikhu kiina, khulokotthelana khuntti yene khusala alawa owawe. Waaza supu yooshi mpakha njuwa oveva eettaka owaanozela na alazaka oshaahiti wa ofwalume wa Nluku, eekesaka owaashintta monkoni wa Yinsa, nkatthi wa kano za Munsa na za manapiyu. ²⁴Akinoko khwiiya oshinttiwa khwa mattakhuzi aari olupaaye Paawulu, ila akina khuhikhupaleli. ²⁵Ahinaleevo khusala akheetisana mmote na nzaawe, Paawulu khuwooza mattakhuzi makina araka: “Rooho Ttakatthiifu yattakhula haakhi monkoni wa amarehemu apapazenu, vakatthi wa napiyu Ezaaya yoori:

²⁶“ ‘Olawe vakatthi wa atthu apo wawooze yoori:

“Hatha nkhama mwasiila khiniweeleyani;

hatha nkhama moona khamwinjuwa.”

²⁷Maana rooho za atthu apa piza okhijili,

attiyela mashiilo aya

na khuphunya maasho aya.

Eriwaka khayaari ethiito,

aari owahi woona na maasho aya,

na osiila na mashiilo aya

na oweeleya nroho mwaya

na khurutela mmakhono mwaka keetta owaavonisa.’

²⁸“Apho, kintakha mwijuwe yoori nusura eti ya Nluku aperekheziwa amalapo, yo anteela osiila!” ²⁹Paata ya olupa mattakhuzi apale, mayaahuuti khulaavo eettaka onyakulisana.

Ofukiwa wa Paawulu khwa nyaakha miwiri

³⁰Khwa nyaakha miwiri Paawulu aari nnyupa ethiitile aarentteriyeeyo na khusala awaapwekherela ooshi apale aari oteelaaye omoona, ³¹awaatafusirelaka Ofwalume wa Nluku woominyalavo na woohiina hatha shaakha awaasomisaka monkoni wa Yinsa Al-Masiihu.