2 Timootiyu

Warakha ya phiiri

ya Paawulu amwaatikhelaka

Timootiyu

Salamu

¹Miiyo Paawulu, aswihaapa wa Yinsa Al-Masiihu khwa matakhelo a Nluku, khwa ahiti ya ohaayi oriiye wa Al-Masiihu Yinsa, ²kiniwaatikhela weeyo Timootiyu mwanaka wompheta waka nkatthi wa amini:

Rehema, tthakaraka na heeri ya phantte ya Nluku Paapa na Yinsa Al-Masiihu, Mbwana eetthu yiiye vamote na weeyo.

Khaazi za Rehema

³Kininshukhurwela Nluku othuuto kininrumeyelaaye khwa niiya yooshapweya, nkhama etthiipi anrumeyeliyeezo amarehemu apapazaku, na kinuufikhirini mweeyo amana kilompaka osikhu na nthana. ⁴Kinfikhiri mishozi zenu, kintakha venkivene oteela owoonani yoori furaha yaka ekamilikhe. ⁵Kinfwahamu amini yawo ya ekhweele, ethiito piipi awo Looyiti na Ewuniisi mamaawo aarinaaye, kinkhupalela yoori ti ethiito eriiye khwa weeyo.

Oretta nthiti la okhomaalela na la waamineya

⁶Khwa ethiito, kinuutumerela yoori okholelele wa ohaayivo tthuvo ya Nluku opatthiyeeyo paata ya miiyo wuutthela makhono aka. ⁷Maana Nluku khaninkheeni rooho ya woova, ila ya owahi, ya pheta na yoolipalipa. ⁸Nakataalikha, ehuupatthiseni haaya onlawela oshaahiti Mbwana, wala khwa miiyo, kiiyiye napherezu awe, ila ohoowe vamote na miiyo mwaasa wa hapari zooshapweya khwa owahi wa Nluku. ⁹Ye anuusuru khwa rehema yawe, khahiyo mwaasa wa khaazi zeetthu, ila khwa shawuri zawe mweenyewe na rehema ninkhiweeyo khwa Yinsa Al-Masiihu, khapulathi olumwenku ohinompiwe. ¹⁰Ethiito ethoonyeziweeyo enasaapi eti khwa ojisarulela wa Namuusuru eetthu, Al-Masiihu Yinsa. Ye ashintta owahi wa ofwa na khutiisa nuuru, ohaayi na ohifwi khwa hapari zooshapweya. ¹¹Khwa hapari etthiipo miiyo karettiwa wiiya namatafusiri, aswihaapa na namanozela. ¹²Na mwaasa wa ethiito kinhoowa, ila khinikipatthisa haaya, maana kininjuwa paani kinkhupaliyeeyo na kinhakikhi yoori ona owahi wa opweha etile kimwinkhiyeeyo mpakha siikhu ya ethiito. ¹³Othokorele khwa amini na pheta ya Yinsa Al-Masiihu, menttezi a masomi apa okisiiliyeeyo. ¹⁴Etile winkhiweeyo, othokorele khwa Rooho Ttakatthiifu eniikhalaaye khwa fweeyo.

¹⁵Weeyo wajuwa yoori attwi ooshi apale a Aaziya kaarinaaye akanswi, mpakha Fijeelo na Erimojeeni. ¹⁶Mbwana ti oonele huruma vaje wa Onisiiforu, maana swaafu zinki ti aari okilipiselaaye woohimpatthisi haaya ofukiwa waka. ¹⁷Olikha toowo, wakathi afiiyeevo Rooma etta okithola woopholevo mpakha okisikana. ¹⁸Mbwana ti amwinkhe, siikhu etile opattha tthakaraka ya olankha wa Mbwana! Weeyo onjuwa saaneene khaazi akikholeliyeeyo wakathi opule kaari Eefezu.

Okhomaala na waamineya khwa khaazi ya Nluku

¹Nakataalikha weeyo mwanaka, ojikhomaaze nrehema eriiye khwa Yinsa Al-Masiihu. ²Mattakhuzi okisiiliyeeyo vakatthi wa oshaahiti mwinkeene, owenkhe atthu awaamineya, anwahaaye owaasomisa atthu akina. ³Ovilele vamote na miiyo ohoowa waka, nkhama najanka wa waamineya wa Yinsa Al-Masiihu. ⁴Khaavo najanka mmote anjilikhelelaaye othuuliwa pi zanshara za meekhazi ootakhala, maana ye ontakha ontuvelisa namalokozela otule anthawuliyeeyo olawa ovittha. ⁵Nkhama etthiipo theenya khaavo namatthira aninkhiwaaye jarata ya oshintta, ahishututeleeni mwentto aya. ⁶Namalima ankholaaye khaazi woohiviliwi ona ya wiiya mwanzo wa opuhela peewu za wuurula. ⁷Opheleleze zooshi kinlupaazo, maana Mbwana onteela owinkha weeleyiwa khwa vitthu zooshi.

⁸Onfikhiri Yinsa Al-Masiihu, jaama wa Daawuuda asisimuliweeyo muufwa, nkhama enlupaazo hapari kinlaleyaaye. ⁹Miiyo kinhoowa mwaasa wa hapari etthiipo mpakha ofiyelela ofukiwa nkhama nazompere; ila khalifukiweeni nttakhuzi la Nluku. ¹⁰Nakataalikha, kinvilela khwa zooshi mwaasa wa pheta ya ananthawuliwa, yoori na yo apatthe nusura eri wa Al-Masiihu Yinsa, na siifwa za mileele.

¹¹Nttakhuzi ntthi linsuhi waaminiwa:

Nkhama nafwa khwa ye, ninteela wiiyana ohaayi khwa ye;

¹²amana nivilela, ninteela wiiya afwalume vamote na ye;

amana ninkhana, na ye onteela onikhana;

¹³amana niiya oohaamineyi, ye oniiya wa waamineya wakhula wakathi;

maana khinretteya ye ojikhana mweenyeweru.

Namarumeyela woohakikhiwa ti Nluku

¹⁴Mattakhuzi apa owaafikhirise atthu ooshi, owoozaka saaneene omaasho wa Nluku yoori ahijitupweeze muunyakulisana monkoni wa mattakhuzi. Opo aya khuna fwayita, oniwaatapanya apale ansiilaaye. ¹⁵Weekese ojinkha mmakhono wa Nluku ori woohakikhiwa nkhama namarumeya woohiina hatha etthu ya opatthisa haaya, anjuwaaye ofiisa saaneene nttakhuzi la haakhi. ¹⁶Owerawere nyaasa zoohiina fwayita na zohankawaani, maana apale anrettaaye epo zaya anjeettana tarikhi ya okaafiri. ¹⁷Mattakhuzi annozelaaye ammwazeya nkhama likhwatta lamrupela; khwa apo aya pi apa Emeneewu na Fileetu. ¹⁸Apo answi haakhi, alupaka yoori osisimuwa wa ananfwa warettikhana, atapanyaka amini za atthu akina. ¹⁹Ila nchina ankheyaaye Nluku khalinsakhinyeya liniiya loopharisiwa na mattakhuzi anraaye: “Mbwana oniwaajuwa apale eeyiye awe, wakhula otule anlottelaaye nzina la Al-Masiihu ona ya ophakuwanana vitthu zootakhala.”

²⁰Nyuupa khuluyeene eniiyamo zoopo, ila khahiyo paasi za weero na feeta, ila theenya za thaapwa na za mattophe; kiina za shitaha kiina zohiiyi za shitaha. ²¹Amana ntthu ajitwaharesha khwa vitthu zaya epo, oniiya yoopo ya shitaha yoottakasiwa, ya maana khwa Mbwana na yootthenkeziwa khwa khaazi zooshi zooshapweya.

²²Otthire tuvela za oshaapu weekese olotta shariya, amini, pheta na heeri, vamote na apale ariina rooho yooshapweya aninkhuwelaaye Mbwana. ²³Wiiye peetiwene na onyakulisana woololo woohiina fwayita, weeyo ojuwe yoori epo zaya entotha wuumani. ²⁴Karumeya wa Mbwana khana ya wuumana, ila wiiya ntthu woosilaneya khwa atthu ooshi, wookhitiri osomisa na woovilela. ²⁵Owaalikhise woojipushuwisavo apale aniwuumananaaye, na nroromelo wa yoori Nluku awenkhe othupwiya owaajuwisaka haakhi. ²⁶Yoori attheemo akhili zaya aleemo mmiraakho za sheethwani ziwaafukiyeeyo khusala aretta epile ziiye za niiya yaya.

Zootakha na zoohifwayi za siikhu za mwiisho

¹Ojuwe eti: siikhu za mwiisho onlawa weeyevo wakathi wa woopisa. ²Atthu anttela wiiya amiiko, ookhwiririwa, oojittottopa, oojikhupali, ookufuru, owaakhijilela apaapa zaya, oohishukhuru na makaafiri, ³ohiina pheta na ajaama zaya, ohaataniseyi, anzuuzu, ohijishintti eenyeweru, anazompere, maatuwi a vitthu zooshapweya, ⁴anamazinkula, avaranka, ojoona, oopheta vitthu ziniwaatuvelaazo zayita Nluku, ⁵ariinaaye wuuso wa omuumini, ila ankatthalaaye owahi waya opo. Ojiphakulane apo aya.

⁶Pi atthaapo aniitelaaye mmanyupa khusala awuura aakha apale oottettheya ooshokheziwa ti twampi ankhupiwaaye ti wakhula nanna ya tuvela. ⁷Yo ansoma wakhula swaafu ila khanfiyelela ojuwa haakhi. ⁸Nkhama Jaane na Jampere ankhijileliyeeyo Munsa, apo nayo ankheeti haakhi ya Nluku. Akhili zaya zatapanyeya, amini yaya kinkhupaleliwa. ⁹Khanteela weetta peeti, maana nkhama etthiipo ziwaarettikhaneliyeezo Jaane na Jampere, ololo wa atthu apho onttela wooniwa pi atthu ooshi.

Nhupi wa Paawulu khwa Timootiyu

¹⁰Ila weeyo onlottela wookharipweyavo masomi aka, menttezi aka, matakhelo aka, amini yaka, ovilela waka, pheta yaka, na okhanyarela waka, ¹¹lupattha na ohoowa zikivireliyeeyo, vitthu zikirettikhaneliyeezo Antiyookiya, Ekooniyu na Liishitera. Swaafu kavi kivileliyeeyo lupattha! Ila khwa vitthu zooshi epo Mbwana akitaphula! ¹²Weekhweele apale antakhaaye wiikhala wa emaani khwa Yinsa Al-Masiihu aniiya oolupatthiwa. ¹³Olikha toowo, atthu ootakhala rooho na oojinkhelela eniweettettela zootakhala wootepavo, attettekhaka nayo attettekhiwaka.

¹⁴Ila weeyo, wuumelele vitthu etthiipo onozeliweeyo na okhupaleliyeeyo, weeyo oninjuwa paani oonozeliyeeyo. ¹⁵Maana weeyo thanku osimaana awo onjuwa Zawaatikhiwa Ttakatthiifu, ziriina owahi woowinkha ojuwa onuufisaaye nnusura monkoni wa amini khwa Yinsa Al-Masiihu. ¹⁶Nluku avitelela Zawaatikhiwa Ttakatthiifu zooshi, ena fwayita ya osomisa, na olikhisa, oshowera na onozela shariya, ¹⁷yoori ntthu wa Nluku eeye khaamili na woolikana khwa khaazi zooshi zooshapweya.

Waamineya na niiya khwa otafusiri

¹Omaasho wa Nluku na wa Yinsa Al-Masiihu, anteelaaye owaaphuka atthu awoona na ananfwa, khwa ojithoonyeza wawe na ofwalume awe, miiyo kinuutumerela toono: ²otafusiri nttakhuzi, wiiye woojitthenkeza khwa wakathi ama oje wa wakathi. Oshowere, olikhise, olipisele woopholevo na ovilela venkivene khwa thwapiya. ³Maana onlawa wafiye wakathi ahinttelaaye okhupalela thwapiya zooshapweya; olikha toowo oonaka otikita omashiilo waya, anlawa awaakusanye ajuwi aya awaanozelaka nkhama etthiipo antakhaazo. ⁴Anttela olikha osiila haakhi asala asiileza hantisi. ⁵Ila weeyo ojithuze khwa wakhula etthu, ovilele ohoowa, okhole khaazi ya onamalaleya okhole sawasawa khaazi Nluku awinkhiyeeyo.

Aswihaapa onoona kharipu ofwa wawe

⁶Miiyo kintta oshuluulisiwa nkhama zaakha ya etthu yoonywiwa. Na wafiya wakathi wa ofwa waka. ⁷Koomana viittha yooshapweya, kamarisa otthira waka, kathokorela amini. ⁸Aphano kapweheliwa jarata ya shariya, etile Mbwana namaphuka wa shariya, anttelaaye okinkha siikhu yaya ethiito; khahiye miiyo otthome paasi, ila theenya ooshi apale aneekeselaaye ota wawe.

Mihupi za wiishela

⁹Weekese ota okutthanana miiyo woohirupazi. ¹⁰Ila Teema akanswi eetta Tizaloonika mwaasa wa opheta olumwenku. Kereseti eetta Kalaasiya, Tiitu eetta Talamaasiya. ¹¹Luuka paasi ti kiriinaaye. Otaaka ontane Maaruku, maana ona fwayita khwa miiyo nkatthi wa khaazi eti. ¹²Kanruma Tikiiku olawa sitati ya Eefezu. ¹³Amana otaaka, othuule ajapi yaka kilikhiyeeyo owawe Kaarupu, nti wa Torowaati, na kithaapu zaka, haaswahaaswa epo za shapala.

¹⁴Alishantere namafula zuuma akirettela vitthu zawaatta zootakhala. Mbwana onteela onripha khwa etthiipo arettiyeeyo. ¹⁵Wiiyane phoole khwa ye, maana ye onkheeti hapari zeetthu venkivene. ¹⁶Ojaakisa waka wamwanzo muuphukiwa, khina atiiyeeyo okaawuni; atthu ooshi eettiye okanswi. Pi ahiiyane hukhumu khwa epo zaya. ¹⁷Ila Mbwana khwiiya phantte yaka na khukinkha kuvu, yoori khwa miiyo hapari elaleyiwe saaneene na amalapo ooshi asiile. Miiyo khutapuliwamo nkhanyo wa siipa. ¹⁸Mbwana onikitaphula khwa khaazi zooshi zootakhala na onikithuula kiri woolipalipa muufwalume mwawe pinkuuni. Attitthimisiwe ye khwa mileele! Amiina!

Salamu zawiishela

¹⁹Pirisiila na Akiila kawaaperekheza salamu, na ajamaaze Onisiiforu theenya kiniwaaperekheza salamu. ²⁰Eraashitu asala Korintiyu, miiyo khanlikha Torofimu Miletu ari nlwele. ²¹Orette thenke ote ohinafiye mwiita. Epulu, Puteti, Liino, Kalaawutiyu na attwi ooshi ooperekheza salamu. ²²Mbwana eeye vamote na rooho yawo. Rehema yiiye vamote na mweeyo.