2 Atizaloonika

Warakha ya phiiri

ya Paawulu awaatikhelaka

Atizaloonika

¹Miiyo Paawulu, Siila na Timootiyu, ninaatikhela warakha eti ojama wa Nluku wa atizaloonika khwa Nluku Paapa na Mbwana eetthu Yinsa Al-Masiihu. ²Rehema na heeri ya phantte ya Nluku Papeetthu, na Mbwana Yinsa Al-Masiihu yiiye vamote na mweeyo.

Oshukhurwela na owaalompela atizaloonika

³Attwi, nina ya onshukhurwela Nluku wakhula swaafu khwa mweeyo; eto ya shariya, maana amini mweeyo mwiriinaaye entepa owula channu na eneekezela pheta yenu mooshi mmote na nzeenu. ⁴Khwa ethiito fweeyo ninjittitthimisa khwa mweeyo vakatthi wa ojama nkina wa Nluku khwa nthiti na amini mwithonyeziyeeyo mweeyo muulupatthiwa na mwivilelaka miswipa. ⁵Yo anhakikhi yoori ophuka wa Nluku pu wa shariya na mwinthoonyeza yoori mweeyo mwinsuhi wiiya muufwalume wa Nluku, otthuupo mweeyo mwinihoowelaaye.

⁶Khwa nanna ethiito, apale anuutothelaanini ohoowa ampwekhera hukhumu ya shariya khwa phantte ya Nluku, ⁷na oniwinkhani ovumula mweeyo mwintaneliwaaye miswipa na khwa fweeyo theenya. Epo zinttela orettikhana amana Mbwana Yinsa ajithoonyeza pinkuuni na malayikha awe owahi khwa vakatthi wa moottho wookholela. ⁸Ye onteela owaahukhumu apale ahininjuwaaye Nluku na apale ahinshututelaaye hapari zooshapweya za Mbwana eetthu Yinsa. ⁹Yo anttela ohoowa apatthe hukhumu khwa otapanyeya wa mileele, ophakuliwa omaasho wa Mbwana na siifwa ya owahi wawe. ¹⁰Epo enttela orettikhana siikhu antaaye, oteela ottitthimisiwa khwa attakatthiifu awe, na oshankeliwa khwa apale ooshi aninkhupalaaye, vamote na mweeyo mwikhupaliyeeyo oshaahiti eetthu.

¹¹Niphelelezaka vitthu epi, ninlompa wakathi wooshi khwa mweeyo, yoori Nluku eetthu awinkheni osuhi wawe opule ookhuweleliyeenini, na khwa owahi arette zooshi za niiya na khaazi zooshi zinlankhaaye khwa amini. ¹²Etthiipo nzina la Mbwana eetthu Yinsa linteela ottitthimisiwa khwa mweeyo, na mweeyo khwa ye, khwa rehema ya Nluku eetthu na ya Mbwana Yinsa Al-Masiihu.

Ota wa ntakhali

¹Attwiizaku, monkoni wa ota wa Mbwana eetthu Yinsa Al-Masiihu na okusanyeya weetthu na ye, ninuuvekelani mweeyo, ²yoori mwihijilikhelele osakhinyiwa wala osutusiwa wookhweyavo, hatha nkhama ohupiri, hatha nkhama mattakhuzi, hatha nkhama warakha yoolattanana nkhama elankhiye khwa fweeyo, elupaka yoori Siikhu ya Mbwana yafiya. ³Mwihinlikhe ntthu wuuttettekhani hatha vattitthiiru. Ehinafiye siikhu yaya eto, onlawa weeyevo okhijili, aphano phi anttelaaye othoonyeziwa ntthu wa twampi, mwaana wa opwetheya. ⁴Oto onuumanana na onjittottopa wiiya vatulu wa vitthu zooshi epile zinaaputwiwaaye ziniitthiwaaye yoori Nluku, afiyelelaka mpakha wiikhala omwimpari wa Nluku, ajilaleyaka yoori ye Nluku mweenyeweene.

⁵Khamwinfwahamu yoori wakathi miiyo kaari na mweeyo koozoweziyeni owuuzani vitthu zaya epo? ⁶Mweeyo mwinjuwa etthu eninkhattazaaye nasaapi eti, ila onteela ojisarula amana ofiya wakathi aya. ⁷Weekhweele siiri zoovitheya za vitthu zootakhala entta okhola khaazi, ila yoori zooshi zirettikhane eninhithajiya olaavo otule ankhattazaaye. ⁸Aphano onttela othoonyeziwa ntakhali, othuuto Mbwana Yinsa anttelaaye omuula na pheevo ya nkhanyo mwawe na ontapanya khwa ojithoonyeza wa ota wawe. ⁹Ota wa ntakhali oto onlankha khwa owahi wooshi wa epiliisi, khwa alama na mitikiniso zoottettekha. ¹⁰Ye onteela orumeyela nanna zooshi za ottettekha zohiiyi za shariya khwa apale ampwetheyaaye, maana akatthala pheta ya haakhi yaari weettelaaye owoosuru. ¹¹Tiito Nluku oniwaalikhelela oshinttiwa ti kuvu za ottettekha eniwaathulaaye okhupalela vitthu zoohata, ¹²na eeye oophukiwa ooshi apale ahikhupaleleeni haakhi, ila aariina tuvela zohiiyi za shariya.

Ohirimiziwa monkoni wa nthiti

¹³Ila fweeyo nina ya onshukhurwela Nluku wakhula wakathi khwa mweeyo attwiizetthu, aphetani a Mbwana, maana thanku omwanzo Nluku oothawulani2:13 Zawaatikhiwa kiina zinlupa yoori: Maana Nluku oothawulani nkhama mishumo zawe za mwanzo. yoori mwiiye awuusurukha, khwa khaazi za ottakatthisa wa Rooho na amini mwiriinaaye khwa haakhi. ¹⁴Ye ookhuwelelani ethiito khwa olaleya weetthu hapari zooshapweya, yoori mwipatthe siifwa ya Mbwana eetthu Yinsa Al-Masiihu. ¹⁵Nakataalikha attwi, mwiiye ookhomaala na okholelela menttezi mwisomisiweeyo mweeyo, waaza mattakhuzi apale mwisiiliyeeyo, ama a warakha zeetthu.

¹⁶Yoori Mbwana Yinsa Al-Masiihu mweenyewe, na Nluku papeetthu, aniphetiyeeyo na khuninkha ominyala wa mileele na nroromelo wooshapweya khwa rehema, ¹⁷athuze rooho zenu na oolipiseleni khwa oretta vitthu zooshapweya mileele, waaza nkhaazi mpakha mmattakhuzi.

Oveka wa lompa

¹Wiishela waya, attwi, mwinilompele yoori nttakhuzi la Mbwana limwazeye nasaapiru na lipwekhere shitaha linsuhaaye, nkhama etthiipo zaarettikhaniyeezo vakatthi venu. ²Mwilompe theenya yoori Nluku ooweraweriseni atthu ootakhala rooho na atakhali, maana khahiyo atthu ooshi ankhupalelaaye hapari zooshapweya. ³Ila Mbwana tu wa waamineya; ye ontta wuukhomaazani na wuuthokorelani khwa ntakhali. ⁴Ninroromela khwa Mbwana yoori mweeyo mwinretta na mwinvira mwirettaka vitthu epile nuurumiyeenini. ⁵Yoori Mbwana eettettise rooho zenu mweeyo khwa pheta ya Nluku na nthiti khwa Al-Masiihu.

Khaazi na oretta saana

⁶Attwi, khwa nzina la Mbwana eetthu Yinsa Al-Masiihu fweeyo ninuurumani yoori mwinwerawere wakhula ttwi aneettettaaye woovonyeyavo woohiiyi khwa mwentto opule mweeyo mpwekhereliyeeyo khwa fweeyo. ⁷Maana mweeyo mwinjuwa nanna ya oneezela fweeyo, mwaasa khaniikhaleeni khwa mweeyo woovonyeyavo. ⁸Wala khanijeeni hatha etthu ya ntthu khuhiriphi. Olikha toowo, nakhola khaazi venkivene na oshokhera, osikhu na nthana, yoori nihiwantipuni mweeyo. ⁹Khahiyo mwaasa wa yoori khanaarina ruhusa ya winkhiwa etthu yoojiwa ti mweeyo, ila yoori niretteye nthoonyezo wa weezeliwa ti mweeyo. ¹⁰Wakathi opule naari vamote na mweeyo naawuziyeni yoori, ntthu otule ahintakhaaye okhola khaazi, theenya ahije.

¹¹Maana nasiila yoori akina a mweeyo aneettetta woovonyeyavo, khantakha okhola khaazi, ila anjisoromeza muuhaayi wa azaaya. ¹²Khwa atthu aya opo ninruma na nintumerela khwa Mbwana Yinsa Al-Masiihu yoori akhole khaazi khwa heeri aje etthu yoojiwa yaya eenyewe. ¹³Ila mweeyo, attwiizaku, hatha vattitthiiru mwihishokerele oretta zooshapweya.

¹⁴Amana ntthu akhijilela epi nilupiyeezo nwarakha mphu, mwimoone saana mwihijikusanyane oto aya anrettaaye epo zaya, yoori empatthe haaya. ¹⁵Khwa zooshi mwihinrette wiiya atuwi, ila mwimchimulele nkhama ttwiiyenu.

Salamu za wiishela

¹⁶Yoori Mbwana mweenyewe heeri, awinkheni heeri mweeyo khwa wakathi wooshi na wakhula nanna. Mbwana eeye vamote na mooshi mweeyo. ¹⁷Miiyo Paawulu, kinaatikha mwacheliwa eti na nkhono aka, ethiito yiiyiye alama ya warakha zaka zooshi. Kinaatikhaka toono. ¹⁸Rehema ya Mbwana eetthu Yinsa Al-Masiihu yiiye vamote na mooshi mweeyo.