2 Pheeturu

Warakha ya phiiri aatikhiyeeyo

Pheeturu

Salamu

¹Miiyo Simawu Pheeturu, karumeya na aswihaapa wa Yinsa Al-Masiihu, kiniwaatikhela warakha eti apale khwa shariya ya Nluku eetthu Namuusuru Yinsa Al-Masiihu, apwekheriye amini moote yootafikhana nkhama yeetthu. ²Rehema na heeri ti yeekezeliwe khwa ojuwa wooshi wa Nluku na wa Yinsa, Mbwana eetthu.

Hakiikha ya okhuweliwa weetthu na othawuliwa

³Owahi wawe onlankhaaye pinkuuni onninkha wakhula etile ninhithajiyaaye yoori niiyane meekhazi a emaani vakatthi wa ojuwa wooshi wa otule anikhuweliyeeyo, khwa siifwa yawe mweenyewe na okemaani. ⁴Khwa nanna ethiito, ye aninkha ahiti yawe khuluyeene na yootafikhana yoori khwa etthiipo mweeyo mwipatthe oretta phantte ya ephattu ya Nluku, mwiweraweraka vitthu zootakhala ziriiye voolumwenku, mwaasa wa omaashokopho.

⁵Khwa etthiipo, mwijilipise yoori mweekezele va amini venu okemaani; va okemaani venu ojuwa; ⁶va ojuwa, ojishintta omweenyewe; va ojishintta omweenyewe, nthiti; va nthiti, emaani; ⁷va emaani, ojalana; va ojalana, pheta. ⁸Maana makhaamu mwintakhaaye wiiyana pi apa. Amana mwiiyana na khuretta yoori eekezeleye, mwiniiya okhomaala na mwinteela wiima vitthu zawaatta zooshapweya mwaasa wa fwayita ya ojuwa wooshi mwiriinaaye khwa Mbwana eetthu Yinsa Al-Masiihu. ⁹Nakataalikha ntthu amana ahina epo zaya ti woohooni, onoona epile ziriiye kharipu paasi, asahawaka otwahareshiwa wa twampi zawe epile za raku.

¹⁰Nakataalikha, attwiizaku, mwijilipise weekesa venkivene ohakikhi okhuweliwa na othawuliwa weenu, mwirettaru etthiipo khamwinteela okwakwanttuwa, ¹¹toowo pi mwinttelaavo opwekherela ruhusa yooshi ya weetta muufwalume wa mileele wa Mbwana eetthu na Namuusuru Yinsa Al-Masiihu.

Ottitthima wa Yinsa na hakiikha ya Zawaatikhiwa Ttakatthiifu

¹²Tiito wakhula wakathi akinsahawu wuukupuselani vitthu zaya epo, nkhama mwinjuwaazo na mwalipalipa khwa haakhi mwipwekheriyeeyo. ¹³Kinoona wiiya yootafikhana amana kiiya haayi olansela fwahamu zenu mweeyo khwa vitthu zaya epo. ¹⁴Maana kinjuwa yoori woohirupazi kinteela olikha mwiili opu, nkhama Mbwana Yinsa Al-Masiihu akithoonyeziyeeyo. ¹⁵Miiyo kinteela ojilipisa saaneene, yoori theenya amana kifwa, mweeyo mwiiyane makhaamu a wuupuwela vitthu zaya epi zooshi.

¹⁶Weekhweele fweeyo khanaari olotta hantisi zoopankiwa saaneene wakathi naari owuuzanini monkoni wa owahi wa ota wawe Mbwana eetthu Yinsa Al-Masiihu; ila naari mashaahiti nooniyeeyo owula wawe. ¹⁷Ye apwekhera, khwa phantte ya Papaawe Nluku, shitaha na siifwa ya pinkuuni, khusiila huula ya ottitthima nwulweene eraka: “Otu Mwanaka wompheta, na wookituvela channu!” ¹⁸Fweeyo ena naasiiliye huula ya eto elankhaka pinkuuni, wakathi naari vamote na ye vamwaako ttakatthiifu.

¹⁹Etthiipo, nalelo theenya ninaaye olipalipa khwa nttakhuzi la manapiyu, na mweeyo mwinretta saana amana mwisiileza, nkhama khantteya enmwasikhelaaye vahali wooripavo mpakha ocha, na phuluvulu omwasikhela nroho mweenu. ²⁰Khapulathi, mwijuwe yoori khawiivo ohupiri mmote wa Zawaatikhiwa Ttakatthiifu onlakhaaye khwa otaphuleliwa ti ntthu, ²¹maana khawiivo ohupiri mmote opuwiyeeyo khwa niiya ya pinaatamu; ila, anaatamu attakhula khwa phantte ya Nluku, alokoziwe ti Rooho Ttakatthiifu.

Otapanyeya wa anamanozela oojipanka

¹Raku, vakatthi wa atthu aapuwiyevo manapiyu oojipanka, etthiipo theenya vakatthi venu mweeyo anteela opuwavo anamanozela oojipanka. Yo anteela osarula vattiitthi vattiitthi mwentto woovonyeya ontapanyaaye, afiyelelaka onkatthala Mfwalume Nwulu otule awaakaphuliyeeyo, ajitothelaka nasaapiru otapanyeya. ²Atthu enkeene anteela olottela tarikhi zoopatthisa haaya za atthu atthaapo, na mwaasa wa atthaapo enttela otaraweya tarikhi ya haakhi. ³Khwa omaashokopho wa anamanozela aya atthaapo, anteela wuujelani khwa hantisi zoopankiwa, hukhumu yaya eri khwa yo raku zeene, na otapanyeya waya khunrupaza.

⁴Maana Nluku kheenaneliye malayikha apale akosiyeeyo, ila eeselela motthooni, khufukela nkhilintti wooripamo yoori apwehe mpakha siikhu ya ophukiwa. ⁵Nluku kheenaneliye olumwenku wa raku, wakathi aatisiyeevo nnyeri khwa makaafiri, ila khunlikha Nuuhi, namatafusiri wa shariya, na atthu akina sapa. ⁶Theenya khwinkha paathuli sitati ya Sotooma na Komoora, khulukuza khwiiya fuutha khuretta wiiya nthoonyezo wa etile enttelaaye owaarettikhanela makaafiri; ⁷ila khunlikha Loothi, ntthu wa shariya aari oshukulikhaaye mwaasa wa mwentto wootakhala wa atthu aya apale. ⁸Maana nashariya otule aari wiikhala vakatthi wa atthaapo, wakhula siikhu aari wiiya wooshukulikha channu mwaasa wa vitthu zootakhala aari woonaaye na aari osiilaaye. ⁹Nakataalikha, ninoona yoori Mbwana onjuwa owaataphula atthu apale a emaani khwa wootootiwa na khuwaapweha makaafiri vathi wa hukhumu ya siikhu ya ophukiwa, ¹⁰haaswa haaswa apale anlottelaaye vitthu zoohifwayi za onaatamu na otarawu ofwalume.

Anamanozela aya apo pi oohisuluheyi, oojikhupali, yo khanoova otarawu zumpe za pinkuuni. ¹¹Khwa zooshi, hatha malayikha, ariina kuvu zooziti na ofwalume, khanlupeza mattakhuzi ooveyisa zumpe zaya epo omaasho wa Mbwana. ¹²Ila atthu aya apo anlattanana nyama zohuupuweli zinikhalaaye yoori zikholiwe na zuuliwe. Anttakhula wootakhalavo khwa epile ehiniweeleyaaye. Anttela otapanyiwa nkhama nyama. ¹³Yo anteela opokhera phakari khwa oheettettisi shariya arettiyeeyo. Anttha fwayita oretta vitthu za tuvela zoohifwayi nthaneene. Apo aya ttaakha na malepa, amana arettaka phantte ya majampo enu anshezana tuvela zaya zootakhala. ¹⁴Mmaasho mwaya weetaalamo oraruwa, khanlikha theenya oretta twampi, aniwaattettekha apale oottettheya, anaaye rooho ya weettettisa omaashokopho. Atthu oolanikha! ¹⁵Yo answi tarikhi ya wookowa na athowelela, khusala alottela tarikhi ya Palaawu, mwaana wa Beyoori, otule entuveliyeeyo phakari ya vitthu zohiiyi za shariya, ¹⁶ila khwa ovonya wawe aashoweriwe ti puuru. Nyama yoohittakhuli, yaattakhuliye khwa huula ya enaatamu na khwiishisa ololo wa napiyu.

¹⁷Atthu aya apo ari nkhama anaattuuttu oohiina maati, na ari nkhama mawiku aweettettisiwa ti pheevo yawaatta. Nluku awaapwehela puuro ya wiicha saaneene na wooripamo. ¹⁸Maana yo, khwa mattakhuzi ohiina fwayita oojitayiti na atothaka tuvela zoohifwayi za onaatamu, aniwaattettekha atthu antakhaaye owaatthira apale aniikhalaaye khwa vitthu zoovonyeya. ¹⁹Awaahitaka atthu otaphuliwa, ila yo ari amwiitthwaana a vitthu zootakhala, maana ntthu oniiya mwiitthwaana wa etile eninshinttaaye. ²⁰Nkhama awahi owerawera vitthu zootakhala za olumwenku khwa ojuwa wa Mbwana eetthu na Namuusuru Yinsa Al-Masiihu, ila khulawa khukholiwa na khushinttiwa opheya pi epo zaya, meekhazi aya aniiya ootepa zayita eettaka waazaru. ²¹Afwataali ahaazeeni ojuwa tarikhi ya shariya, ehiiyeeni paata ya ojuwa khunoza enyokonyoko oruma ttakatthiifu opule apokhereliyeeyo. ²²Eto khwa yo enhakikhi kittaphi etile enlupaaye yoori: “Mwanapwa arutela mattapiso awe,”2:22 Woone Kithaapu ya Kittaphi 26:11. na “kuluwe yawoowisiwa yarutela ojitupweya mmattophe.”

Siikhu ya ota wa Mbwana

¹Aphetani aka, eti warakha ya phiiri kiniwaatikhelaanini. Khwa zoopiiri kintakha wuukupuselani, kilanselaka akhili zenu zooshapweya. ²Kintakha yoori muupuwele mattakhuzi alupiweeyo raku ti manapiyu ttakatthiifu, na oruma wa Mbwana eetthu Namuusuru opule maaswihaapa oosomisiyeenini.

³Khapula ya vitthu zooshi mwijuwe yoori, siikhu za mwiisho, anteela opuwa anamaveyisa aveyisaka na alottelaka tuvela zaya zootakhala. ⁴Yo anteela olupa yoori: “Niini erettikhaniyeeyo khwa ahiti ya ota wawe? Thanku afwiiyeevo amarehemu apapazetthu, zooshi ziri nkhama zaariizo thanku wumpiwa wa olumwenku.” ⁵Ila yo ansahawu mwayiini yoori raku, khwa nttakhuzi la Nluku, yapuwa pinku na vathi, na olumwenku wompiwa khwa maati na vakatthi wa maati. ⁶Na khwa maati a nnyeri olumwenku wa raku waazamiye na khutapanyiwa. ⁷Khwa nttakhuzi nttinttho pinku na vathi eriivo nasaapi eti zathokoreleliwa moottho, zapwehiwa yoori efiye siikhu ya ophukiwa na otapanyiwa wa makaafiri.

⁸Aphetani aka, mwihisahawu epo zaya: khwa Mbwana siikhu moote eri nkhama nyaakha alufu. Na nyaakha alufu eri nkhama siikhu moote. ⁹Mbwana khanrupaza oretta etile ahitiyeeyo, nkhama anaakanyeraazo atthu akina. Ila ye ti woovilela khwa mweeyo, khantakha yoori eeyevo ampwetheyaaye, ila ontakha yoori atthu ooshi athupwiye twampi zaya.

¹⁰Nakataalikha, siikhu ya ota wa Mbwana, enteela opuwa nkhama nantarawu. Pinku enteela ozimweela na onyakula saaneene, vitthu epile za otulu enttela otapanyeya mwaasa wa nkukuku. Olumwenku na zooshi ziriimo zinteela waashikha.

¹¹Maana vitthu zooshi zinteela wiiya etthiipo zootapanyiwa, mweeyo mwinhithajiya wiiya atthu a nanna ni? Mwina ya wiikhala khwa nanna ttakatthiifu na ya emaani, ¹²mwiwejelaka siikhu ya Nluku na mwirette thenke yoori ete woohirupazi. Siikhu ya eto pinku enteela otapanyiwa ti moottho, na vitthu epile za otulu enteela otothowa mwaasa wa haari. ¹³Nakataalikha, khwa ahiti yawe Nluku, ninwejela pinku pheeya na nti mpheya, ottuukho eriiwo shariya yawe.

¹⁴Khwa ethiito, aphetani aka, mwiwejaka vitthu zaya epo, mwijilipise yoori Nluku oosikaneni mwihina nlepa, mwihina twampi na mwirina heeri. ¹⁵Mwitthe mwa akhili mweenu yoori ovilela wa Mbwana eetthu onthoonyeza nusura, nkhama mphetani ttwiiyetthu Paawulu awaatikheliyeenini khwa ojuwa Nluku amwinkhiyeeyo. ¹⁶Warakha zawe zooshi ye aatikha nanna moote, alupaka monkoni wa vitthu etthiipo. Warakha zawe ena vitthu kiina zoolipa ntthu omweeleya, epo zaya atthu apale oohijaliwi na apale oottettheya nkatthi wa amini annyokola mattakhuzi, nkhama anrettaazo khwa phantte kiina ya Zawaatikhiwa Ttakatthiifu. Khwa ethiito yo anjitapanya eenyewe.

¹⁷Nakataalikha, aphetani aka mwahirimiziwa, yoori mwiiyane phoole! Mwihijilikhelele mwikwaka puuro mwiriiye yookhomaala, mwitthempiwaka pi ottettekha wa atthu aya apo ootakhala rooho. ¹⁸Ila mwiwule nkatthi wa rehema na muujuwa wa Mbwana eetthu Namuusuru Yinsa Al-Masiihu. Othuuto ti enkhiwe siifwa, waaza nasaapi mpakha mileele! Amiina.