2 Akorintiyu

Warakha ya phiiri

ya Paawulu awaatikhelaka

Akorintiyu

Salamu

¹Miiyo Paawulu aswihaapa wa Al-Masiihu Yinsa khwa matakhelo a Nluku, na ttwi Timootiyu ninaatikhela warakha eti ojama wa Nluku oriiye Korintiyu, na attakatthiifu ooshi ari nti wa Akaaya.

²Khwa mweeyo, rehema na heeri ya phantte ya Nluku Papeetthu na ya Mbwana Yinsa Al-Masiihu yiiye vamote na mweeyo.

Nluku ti annizurwaaye

³Attitthimisiwe Nluku na Paapa wa Mbwana eetthu Yinsa Al-Masiihu, Paapa wa tthakaraka na Nluku wa ozuru wooshi, ⁴annizurwaaye khwa miswipa zeetthu zooshi, yoori na fweeyo theenya niwahi owaazuru ooshi apale eniwaapatthaaye miswipa, na ozuru otthuupo fweeyo nizurwiweeyo ti Nluku. ⁵Maana, nkhama etthiipo ninrettaaye phantte ya ohoowa wa Al-Masiihu, theenya ozurwiwa weetthu onta khwa vakatthi wa Al-Masiihu. ⁶Nkhama zanipattha miswipa ennipattha yoori mwizurwiwe na muusurukhe; nkhama nazurwiwa, na mweeyo mwazurweya, otthuupo oninkhaaye ovilela na olevelela ohoowa onipatthiyeeyo. ⁷Na nroromelo eetthu khwa mweeyo pi wookhomaala, maana najuwa yoori khwa nanna ethiito mwinrettaaye phantte ya ohoowa weetthu, theenya mwinretta phantte khwa ozurwiwa weetthu.

⁸Attwiizaku, khanintakha yoori mweeyo mwitikhine miswipa zaanipatthiyeezo nti wa Aaziya, maana zaanizitiye khanaari owahi ovilela, naafiyeleliye otakha onaashikha nroromelo wa ohaayi. ⁹Weekhweele, fweeyo naari ojoona nkhama nitthomeliweeyo ofwa, ila epo zaarettikhaniye yoori eninozele ohijiroromeli nennyewe, ila Nluku otule aniwaasisimulaaye ananfwa. ¹⁰Ye anitaphula na onrutela onitaphula khwa ajali ya ofwa, othuuto nanpwehela nroromelo eetthu yoori onvira anitaphulaka. ¹¹Mweeyo mwina ya onaawuni nkatthi wa lompa yoori atthu awaatta awahi oshukhurwela zwaamu yeetthu khwa parakha ninkhiweeyo mwaasa wa lompa zenu mooshi.

Paawulu onzukulisa shawuri zawe

¹²Opo ojishashawula weetthu: akhili zeetthu enlaza oshaahiti yoori khanilokoziweeni ti olumwenku, ila osiilana weetthu na mweeyo khwa ottakatthifu na ookhweele onlankhaaye wa Nluku, woohiiyi khwa ojuwa wa enaatamu, ila khwa rehema ya Nluku. ¹³Maana nawaatikhelani vitthu mwinwahaaye osoma na khuweeleyani saaneene. Na kinweja yoori efiyelele oweeleyani saana, ¹⁴nkhama etthiipo mweeyo mweeleyiweeyo khwa fweeyo phantte kiina, mwifiyelele weeleyiwa saaneene, yoori mwiiyane ojishashawula khwa fweeyo, nkhama etthiipo fweeyo ninttelaaye khwa mweeyo Siikhu ya Mbwana Yinsa.

¹⁵Khwa ororomela otthuupo, kajilakelela, mwanzo oteela wuuthotolani mweeyo, yoori mwiiyane fwayita phiiri. ¹⁶Wekhweele, miiyo kaari wuupuwela wuuthotolani keettaka nti wa Masetooniya na kirutaka, yoori mwikaawuni oretta safwari yaka ya Yudeya. ¹⁷Wakathi kaari owazaavo epo zaya, talili kaarettiye woohijuweyivo? Ama niri kinwaza shawuri zaka khwa nanna za olumwenku, kilupaka wakathi mmote otthuupo yoori “aaa” na “wala?”

¹⁸Wiiya Nluku ti waamineya, hapari zeetthu khwa mweeyo khahiyo “aaa” na “wala”. ¹⁹Maana mwaana wa Nluku, Yinsa Al-Masiihu atafusiriweeyo vakatthi venu ti miiyo, na Siila mpakha Timootiyu khayaari “aaa” na “wala”, ila khwa ye wakhula wakathi yaari “aaa”! ²⁰Maana ahiti ziriivo zooshi za Nluku, ziri khwa Yinsa pi za “aaa”. Tiito khwa vakatthi vawe ye, ninlupa yoori “Amiina”, khwa siifwa ya Nluku. ²¹Nluku ti annikhomaazeye fweeyo na mweeyo khwa Al-Masiihu. Ye ti anithawaziyeeyo. ²²Othuuto theenya anipharisa na alama ya Rooho Ttakatthiifu nroho mweetthu.

²³Kininkhuwela Nluku nkhama shaahiti yoori yaari monkoni wa owiinanelani mweeyo, yoori miiyo kihirutele Korintiyu. ²⁴Khahiyo yoori neetta ojuwacha monkoni wa amini yenu, ila mwaasa wa wiiya ashirikha a furaha yenu, maana khwa amini mweeyo mwakhomaala.

¹Tiito miiyo kalakela ohuuthotolini theenya yoori kihuupatthiseni huzuni. ²Maana, amana kuutothelani huzuni, paani anttelaaye okifurahisa woohiiyi mweeyo mwihuzunikhisiweeyo ti miiyo? ³Kaatikha khwa nanna kaatikhiyeeyo yoori amana miiyo kita okho, kihihuzunikisiwe pi apale aariina ya okifurahisa. Kaari ororomela yoori mooshi mweeyo mwinaawanyana furaha yaka. ⁴Maana miiyo kawaatikhelani na tafwawuthi khuluyeene na huzuni nroho mwaka na mishozi zawaatta, khahiyo ya wuuhuzunikhisani, ila yoori mwijuwe nanna yiiyiyeezo khuluyeene pheta yaka khwa mweeyo.

Nswammaha wa natwampi

⁵Nkhama ntthu mmote wa mweeyo ontana huzuni, khanikitanela miiyo paasi, ila theenya khwa mweeyo, yoori miiyo kihiiye njawuri channu khwa mooshi mweeyo. ⁶Hukhumu enkhiweeyo ti atthu enki entosheleza. ⁷Olikha toowo, aphano mweeyo mwina ya onswaamihi na onzuru, yoori ye ahihuzunikhe channu. ⁸Nakataalikha, miiyo kinuuvekelani yoori mwithoonyeze pheta yenu mwiriina khwa ye.

⁹Kiwatikhelakani toole kaariye kiwooneni nkhama mwa atthu mwishututelaaye zooshi. ¹⁰Na amana mweeyo mwinswaamihi ntthu, na miiyo theenya kintta onswaamihi; na nkhama ewaapho etthu ya oswaamihi, kaswaamihi enakatthi ya Al-Masiihu mwaasa wa wuuphetani mweeyo, ¹¹yoori Epiliisi ahuushintteni; maana fweeyo ninjuwa thwapiya zawe saaneene.

Waziri wa osiilana mpheya

¹²Wakathi kifiyeevo Torowaati yoori kitafusiri hapari zooshapweya za Al-Masiihu, khoona yoori Mbwana akifukulela milako, ¹³akaari ovumula nroho mwaka, mwaasa wa ohinsikani ttwiiyaku Tiitu. Tiito miiyo khuwaaleeza attwi a ottuukhule khusala kilawa Masetooniya.

¹⁴Attitthimisiwe Nluku, anneettettisaaye wakhula siikhu wooshinttavo khwa Al-Masiihu, othuuto khwa fweeyo amwazela puuro zooshi na arufu ya ojuwa wawe. ¹⁵Maana khwa Nluku, fweeyo na arufu yooshapweya ya Al-Masiihu khwa apale anuusurukhaaye na apale ampwetheyaaye. ¹⁶Khwa apale oopwetheya arufu ya ofwa; ila khwa apale awuusurukha, arufu yooshapweya eninkhaaye ohaayi. Aphano paani anwahaaye okhola khaazi nkhama eto? ¹⁷Maana fweeyo khaniri nkhama atthu awaatta anlaleyaaye nttakhuzi la Nluku nkhama zanshara. Ila Nluku ti anirumiyeeyo, tiito ninlaleyaaye hapari zawe na khweele enakatthi yawe, nkhama akarumeya a Al-Masiihu.

Osiilana mpheya

¹Amana nilupaka epo, talili waaza wa ojisifu nennyewe? Ama ninhithajiya nkhama akina aya otiisa warakha ya onilokoza ama ya olankha khwa mweeyo? ²Mweeyo mwa warakha yeetthu yawaatikhiwa varoho veetthu, enjuwiwaaye na ensomiwaaye ti atthu ooshi. ³Mweeyo mwathoonyeza yoori mwa warakha ya Al-Masiihu, fwayita ya khaazi yeetthu yoohaatikhaniwi wiino, ila khwa Rooho ya Nluku haayi; yoohaatikhiwi va lipawu la liwe, ila va lipawu la rooho za anaatamu.

⁴Opu nroromelo niriinaaye enakatthi ya Nluku khwa Al-Masiihu. ⁵Khahiyo yoori neetta wiiyana makhaamu a wuupuwela etthu nkhama yeetthu nennyewe, ila makhaamu eetthu anlankha wa Nluku. ⁶Ye aninkha makhaamu a wiiya awaziri a osiilana mpheya, ohiiyi a kano, ila a rooho; maana kano enuula, ila Rooho ya Nluku eninkha ohaayi.

Siifwa ya osiilana mpheya

⁷Khaazi etaniyeeyo ofwa yapharisaniwa kano va mawe; ila khaazi yaya eto yata khwa siifwa, khwa nanna meezirayiilu ahaari owahaaye weekesa wuuso wa Munsa, mwaasa wa waara wa wuuso awe, weettiye wiiya woohirupazi. ⁸Khintepa khaazi ya Rooho ttakatthiifu wiiya yoosifwiwa channu? ⁹Maana, nkhama khaazi ya hukhumu enaaye siifwa, khaazi ya shariya ena siifwa channu. ¹⁰Khwa etthiipo, siifwa yaari waaraaye raku, khinlikanana siifwa eti ya aphano yiiyiyeeyo yooziti channu. ¹¹Maana nkhama etile yiishiyeeyo ena siifwa, yatepa wiiyana siifwa eti eriivo!

¹²Nakataalikha, wiiya ninaaye owejela opo, nithoonyeze nroromelo wa waatta. ¹³Khaniri nkhama Munsa, aajifinikhaniyeeyo nshukwi omaasho yoori meezirayiilu ahoone waara wawe wiishaka. ¹⁴Weekhweele akhili zaya zaari zoofukeya, mpakha leelo nshukwi laya nttho lapharelela amana osomiwaka osiilana wa raku. Khalaalaziwevo, maana khwa Al-Masiihu paasi ti linlazeyaavo. ¹⁵Weekhweele mpakha leelo, amana esomiwaka kithaapu ya Munsa, nshukwi linfinikha rooho zaya. ¹⁶Ila amana ntthu ajinkha khwa Mbwana, nshukwi lintta olaziwavo. ¹⁷Maana, Mbwana Rooho na vahali eniiyavo Rooho ya Mbwana apho vaya oniiyavo otaphuliwa. ¹⁸Ila fooshi fweeyo nifunuliweeyo wuuso eetthu nimpayini siifwa za Mbwana, khwa ratarato yawe nintta ozukulisiwa wakhula swaafu na siifwa yooziti enlankhaaye khwa Mbwana yiiyiyeeyo Rooho.

Nuuru ya Hapari zooshapweya

¹Nakataalikha, nihitteettheye maana ninaaye khaazi eti ninkhiweeyo khwa tthakaraka. ²Ninkatthala vitthu zooshi za haaya enrettiwaaye sirini, khaninrumeyela ohata, wala otapanya nttakhuzi la Nluku. Olikha toowo fweeyo ninthoonyeza haakhi, nintumerelana khwa akhili za atthu ooshi enakatthi ya Nluku. ³Ila nkhama nalelo hapari zooshapweya pi zoofinikheya, zafinikheya khwa apale ampwetheyaaye. ⁴Yo khankhupali maana nluku wa vathi apha oomisa weeleyiwa waya yoori ahoone nuuru yootafikhana ya hapari zooshapweya za siifwa ya Al-Masiihu, othuuto eeyiyeeyo ratarato ya Nluku. ⁵Maana khaninjitafusiri fweeyo, ila ninintafusiri Yinsa Al-Masiihu Mbwana; fweeyo na akarumeya enu, mwaasa wa Yinsa. ⁶Ila Nluku ti alupiyeeyo yoori: “N’yiiza emwasikhelemo nuuru”, na ti othuuto amwasikheliyeeyo nroho mweetthu, khwa ojuwa wa siifwa za Nluku omaasho wa Yinsa Al-Masiihu.

Njuju ttakatthiifu mvinyipo za ottophe

⁷Ila ninaaye njuju nttho khwa yoopo ya mattophe, yoori nithoonyeze owahi opu nwulweene woolankha khwa Nluku, khahiyo khwa fweeyo. ⁸Khwa phantte zooshi, ennipattha miswipa, ila khuhitteettheyi, khwiiya wooshanka, ila khuhinashikhi nroromelo; ⁹khulupatthiwa, ila khuhanswiwi, khukafilikha, ila khuhitapanyeyi. ¹⁰Wakhula swaafu va mwiili nintana ofwa wa Yinsa, yoori theenya ohaayi wa Yinsa othoonyezeye va mwiili veetthu. ¹¹Khwa etthiipo fweeyo niriiye haayi, wakhula wakathi nineekesela ofwa mwaasa wa Yinsa, yoori ohaayi awe othoonyezeye khwa mwiili etthu onfwaaye. ¹²Khwa nanna ofwa onrettaazo khwa fweeyo, na ohaayi onretta etthiipo khwa mweeyo.

¹³Yaatikhiwa yoori: “Kakhupali, tiito kalupa.” Na rooho ethiito ya amini fweeyo theenya ninkhupalela na tiito, nattakhula. ¹⁴Maana najuwa yoori otule ansisimuliyeeyo Mbwana Yinsa muufwa, theenya onlawa anisisimule na Yinsa na anithoonyeze vamote na mweeyo omaasho wawe. ¹⁵Maana zooshi epo piza yoori mweeyo mwiiye saana, yoori rehema yenkeziweeyo khwa atthu awaatta, yiitaale khaazi ya rehema khwa siifwa ya Nluku.

¹⁶Tiito nihittettheye, hatha nkhama mwiili eetthu ontta ojeya, rooho yeetthu envira elanseleyaka siikhu zooshi. ¹⁷Maana ohoowa weetthu wa oveya oniviraaye, onjeka khwa fweeyo siifwa ya mileele enlemeelaaye zayita zooshi epo. ¹⁸Apho maasho eetthu nihithoonyeze vitthu epile enooneyaaye, ila khwa epile ehinooneyaaye, maana epile enooneyaaye eniisha, ila epile ehinooneyaaye pi za mileele.

Meekhazi eetthu a Pinkuuni

¹Ninjuwa yoori amana epwechiwa heema yeetthu eti niniikhalaamo, wiiyiye mwiili eetthu wa vathi apha, Nluku onninkha nyuupa ya wiikhalamo pinkuuni. Nyuupa yoohijekiwi pi makhono eenaatamu, Nluku ti ajekiyeeyo, na ti ya mileele. ²Tiito, ninsisimiraaye, niikhalaka nyuupa eti niriimo, maana yaari onituvela nithamiye nasaapi neetta nyuupa yeetthu pheeya pinkuuni. Nyuupa yaya eto onttela wiiya mwiili eetthu wa pinkuuni, ³maana amana ninwala ye, khaninsikaniwa nihina mwiili. ⁴Amana niikhalaka nyuupa ethiiti, wiiyiyeeyo mwiili eetthu, ninsisimira woovelavelavo. Khahiyo yoori nintakha wiiya wootaphuliwa mwiili eetthu wa enaatamu, ila nintakha yoori nipwekherele mwiili wa pinkuuni yoori ohaayi orette etile enfwaaye wiiya ya waashikha. ⁵Nluku ti anitthenkeziyeeyo khwa niiya ethiito, aninkha Rooho nkhama nroromelo wa etile entaaye.

⁶Nakataalikha, ninaaye nroromelo mileele na ninjuwa yoori, nalelo amana niiya khwa mwiili, niniiya peetiwene na Mbwana. ⁷Maana niniikhala khwa amini, woohiiyi khwa etile ninoonaaye. ⁸Maana ninaaye nroromelo na ninhithari olikha wiikhala khwa mwiili opu khulawa khwiikhala khwa Mbwana. ⁹Tiito, ninaaye niiya ya otakha ontuvelisa, hatha nkhama na mwiili opu, hatha nkhama neetta olikha. ¹⁰Maana fooshi fweeyo nina ya ojithoonyeza enakatthi ya Yinsa yoori niphukiwe ti ye. Na wakhula ntthu onteela opwekhera etile eninsuhaaye, khwa etile arettiyeeyo yooshapweya ama yootakhala ohaayi awe vathi apha.

Khaazi ya osiilana

¹¹Nkhama etthiipo nijuwiyeezo omoova Mbwana, nineekesa owaatumerela atthu. Etile fweeyo niiyiyeeyo yathoonyezeya omaasho wa Nluku, na kinwejela theenya yoori ethoonyezeye nkatthi wa akhili zenu. ¹²Khanineekesa ojitumerela opheya khwa mweeyo, ila niniwinkhani ruhusa ya ojishashawula khwa fweeyo, yoori mwiiyane etthu ya owaajipu apale anjikhupalanaaye oshapweya yohiiyi etile eriiye nroho mwaya. ¹³Nkhama nina tuutu, mwaasa wa pheta ya Nluku; nkhama ninthokorela akhili, mwaasa wa pheta ya mweeyo. ¹⁴Maana pheta ya Al-Masiihu ennijekelela, na ninkhupalela yoori ntthu mmote paasi awaafwela atthu ooshi, khwa etthiipo, atthu ooshi afwa. ¹⁵Ye awaafwela atthu ooshi yoori apale ariiye haayi ahiikhale theenya khwa yo eenyewe paasi, ila khwa otule awaafweliyeeyo na khusisimuwa.

¹⁶Khwa etthiipo, waaza nasaapi mpakha ninttaawo, khaavo theenya ninintthanttaaye na shawuri za onaatamu, na hatha raku Al-Masiihu nanjuwa khwa nanna ethiito, ila nasaapi eti khanininjuwa toowo. ¹⁷Nakataalikha, amana ntthu eeya khwa Al-Masiihu, oniiya ntthu mpheya. Vitthu epile zaraku zavira; zooshi zaretteya opheeya! ¹⁸Zooshi epo zinlankha wa Nluku, anisilanisiyeeyo mweenyeweene khwa Al-Masiihu, na aninkha khaazi ya osiilanisa, ¹⁹eto tiiti, Nluku khwa Al-Masiihu ajisiilanisa olumwenku, khuhijali twampi za anaatamu, na khuninkhelela hapari zinsilanisaaye. ²⁰Nakataalikha, fweeyo na nthoonyezo wa Al-Masiihu, nkhama Nluku anhirimizaaaye anirumeyelaka fweeyo. Khwa pheta ya Al-Masiihu, mwijisiilanisane Nluku. ²¹Otule ahina twampi ajiretta onatwampi mwaasa wa fweeyo, yoori khwa ye niretteye wiiya shariya ya Nluku.

¹Nkhama ashirikha a Nluku nkatthi wa khaazi, ninuutumerelani yoori mwihipwekhere rehema ya Nluku mahaleene. ²Maana ye alupa yoori:

“Miiyo koosiila wakathi khaamili

na khuwaawuni siikhu ya nusura”.

Aphano kiniwuuza yoori opu wakathi khaamili, nasaapi eti siikhu ya nusura.

Ohoowa wa Paawulu

³Khanintakha onkhwakhwattula ntthu, yoori khaazi yeetthu ehitaraweye. ⁴Olikha toowo, nkhama akarumeya a Nluku, nintumerelana khwa wakhula nanna: nthiti venkivene, khwa ohoowa, tafwawuthi na huzuni, ⁵khwa ojaphiwa, ofukiwa, na nzuuzu, khwa khaazi za nkuumu, ohilali osikhu, ofuka, ⁶khwa ohalaali, ojuwa, ovilela na okemaani, khwa Rooho Ttakatthiifu na pheta ya khweele, ⁷khwa nttakhuzi la haakhi, na owahi wa Nluku; na zaana za shariya, zawuumanana na zoojaakisana; ⁸khwa oshitahiwa na ohishitahiwi, otarawiwa na ottakhuliwa saana. Nilupeziwaka onamahata, khupe niri anahaakhi; ⁹nkhama oohijuwiwi, ila nijuwiwaka saaneene; nkhama niri ofwa, ila niri haayi; nkhama oovulalisiwa, ila khuhifwi; ¹⁰ohuzunikhisiwa, ila niri ofurahi wakhula wakathi; asikhini, ila niwaarelisaka atthu awaatta; ohiina etthu, ila zooshi nipatthaka.

¹¹Nattakhulana mweeyo akorintiyu woosileyavo na nafukula rooho yeetthu yooshi. ¹²Khannuufukelani rooho zeetthu, ila mweeyo ti mwifukiyeeyo rooho zenu khwa fweeyo. ¹³Miiyo kiniwuuzani nkhama aanaaka. Mwirumeyele mphimo kirumeyeliyeeyo mwinitthantte khwa nanna miiyo kuutthanttiyeenini. Mwifukule rooho zenu khwa fweeyo.

Tafwawuthi ya ojikusanya na makaafiri

¹⁴Mwihijikusanyane makaafiri. Niini ephakanyiyeeyo shariya na etthu yootakhala? Khi osiilanani oriivo nuuru na yiiza? ¹⁵Osiilanani oriivo Yinsa na Epiliisi? Osiilanani oriivo muumini na kaafiri? ¹⁶Okusanyeyani oriivo Nyuupa Yoosifwiwamo Nluku na sanamu? Maana fweeyo na a Nyuupa ya Nluku woohaayi. Nkhama etthiipo alupiyeezo Nluku yoori:

“Kiniikhalana yo na keettette vakatthi vaya,

kinttela wiiya Nluku aya na yo anttela wiiya atthu aka.”

¹⁷Nakataalikha, Mbwana alupa yoori:

“Mwileevo vakatthi vaya na mwiwaattuwe,

mwihisape vitthu za haraamu

na miiyo kintta wuupwekherelani.

¹⁸Miiyo kinttela wiiya Papeenu,

na mweeyo mwiniiya aanaaka alume mpakha aakha,”

alupa Mbwana Nwahi zooshi.

¹Aphetani aka, wiiya ninaaye ahiti zaya epo, nijitwahareshe khwa vitthu zooshi zinkwakhulisaaye mwiili na rooho, nikamilikhisaka ottakatthifu khwa omoova Nluku.

Furaha ya Paawulu

²Mwininkhe puuro nroho mweenu. Khaavo nintulumwiyeeyo, khaavo ninthowelelisiyeeyo, khaavo ninjeliyeeyo. ³Akinlupa epo yoori kiwinkheni paathwili, maana kaalupiye yoori mwiri nroho mweetthu, yoori nifwe vamote ama niiye haayi. ⁴Kinaaye nroromelo nwulweene khwa mweeyo, na kinjishashawula saaneene khwa mweeyo; kiwoolipiseleya venkivene; furaha yaka eniittikha khwa miswipa zooshi. ⁵Maana, wakathi nifiyeevo Masetooniya, khanaavumuliye hatha vattitthiiru, ila zaanipatthiye miswipa wakhula nanna: tafwawuthi za oje na woova wa nkatthi. ⁶Ila Nluku, otule aniwaazurwaaye apale oohuzunikha, khunizuru khwa ota wa Tiitu, ⁷khahiyo ota wawe paasi, ila theenya khwa ozuru mweeyo mwinretteliyeeyo. Ye anuuza onukheliwa, huzuni na oshukulikha weenu khwa miiyo, khwa nanna furaha yaka ezitiyeeyo weekezeleya.

⁸Hatha nkhama warakha yaka yootothelani huzuni, akinlikha. Khweele mwanzo kaalikhiye na khukeeleya yoori warakha yaka yoohuzunikhisiyeni, weettiye wiiyaru wakathi vattitthiiru. ⁹Aphano miiyo kiwoofurahi, khahiyo mwaasa wa mweeyo ohuzunikha, ila mwaasa yoori ohuzunikhisiwa woopatthisani othupwiya, maana mweeyo mwahuzunikha khwa nanna Nluku aari otakhaaye, na khamwitulumwiweeni mwaasa wa fweeyo. ¹⁰Maana huzuni anrumeyelaaye Nluku entana othupwiya onnilawanaaye nnusura, khwa ethiito khayiivo kiiswa ya ntthu okhanyarela wiiya woohuzunikha. Ila huzuni ya voolumwenku apha entana ofwa. ¹¹Moone, huzuni eti ya Nluku, etthu etaniyeeyo khwa mweeyo: ojinkha, nswamaha, ojiinanela, woova, onukheliwa, tafwawuthi, niiya ya woona erettiwe vitthu za shariya! Khwa mooshi mweeyo mwajithoonyeza wiiya oohiretti hatha etthu monkoni wa vitthu epo. ¹²Nkhama kawaatikhelani etthiipi, khahiyo mwaasa wa otule avonyiyeeyo wala otule ahukhumwiweeyo, ila yoori omaasho wa Nluku mweeyo mwiwahi woona nanna mwijinkhiyeezo khwa fweeyo. ¹³Tiito fooshi nalanseleya.

Olikha olipiseleya paasi, nafurahi channu mwaasa wa omoona Tiitu ari woofurahi, maana rooho yawe yaapwekhereliye othuziwa weenu mooshi mweeyo. ¹⁴Miiyo kaamuuziye Tiitu yoori kaari woojishashawula mwaasa wa mweeyo, na khamwaakipatthisiye haaya. Khwa nanna etthiipo zeeyiyeezo haakhi zooshi epile niwuuziyenini, ojishashawula niriina na mweeyo khwa Tiitu wajithoonyeza wiiya etthu ya khweele. ¹⁵Na pheta yawe khwa mweeyo entepa weekezeleya amana awuupuwelakani yoori mweeyo mwaari atthu oshututi, na mwaari oolikana ompwekherela khwa ojipushuwisa na shitaha. ¹⁶Kinfurahi mwaasa wa wiiyana nroromelo nwulweene khwa mweeyo.

Ohilikheleli winkha zaakha

¹Aphano attwiizaku, nintakha yoori mweeyo mwiiyane ojuwa wa rehema ya Nluku enkhiyeeyo ojama wa Nluku wa Masetooniya. ²Vakatthi wa nswipa nwulweene, furaha khuluyeene na osikhini wa waatta enkhiye zaakha khwa rooho ya emaani. ³Kinlawela oshaahiti yoori yo enkha zooshi aari owahaaye, na mpakha hatha oziti epile aari owahaaye khwa yaazo yaya ennyewe. ⁴Anivekelaka wookhanyarelavo ruhusa ya oretta phantte ya owaawuni attakatthiifu. ⁵Na yo khaarettiye etile fweeyo naari weekeselaaye paasi, ila aajinkhiye omwanzo ennyewe mmakhono wa Mbwana nawiisha khwa fweeyo na matakhelo a Nluku. ⁶Etthiipo nanruma Tiitu yoori, nkhama etthiipo aaziyeezo, amarise khaazi eto ya rehema khwa phantte yenu mweeyo. ⁷Nakataalikha, etthiipo mwinthoonyezaazo yoori khwa zooshi mwa oolikana zayita atthu akinoko aya nkatthi wa amini, nttakhuzi, ojuwa na ojinkha wa owaawuni azeenu, na pheta mwiriina khwa fweeyo mwijilipisane ruhusa eto ya olaza.

⁸Akintta wuurumani, ila kintakha woona ekhweele ya pheta yenu na kilikanisanaka ojinkhelela wa akinoko. ⁹Maana mweeyo mwinjuwa rehema ya Mbwana eetthu Yinsa Al-Masiihu, ari thaajiri, ila khujiretta wiiya masikhini mwaasa wa pheta yenu, yoori vakatthi wa osikhini aya, mweeyo mwiretteye wiiya mathaajiri. ¹⁰Opo olaka waka monkoni wa vitthu zaya epo: ti yooshapweya wiishela nasaapi etile mwaaziyeeyo mwaakhajana. Mweeyo mwaari a mwanzo khahiyo a waawuni paasi, ila theenya a owaza shawuri zaya epo. ¹¹Aphano, mwimarise khaazi ya ojilaza wookhomaala wa waattala na wiiye sawasawa khwa niiya ya omarisa maali epile mweeyo mwimpatthaaye. ¹²Maana, amana ntthu ajilakelela winkha, Nluku ompwekherela etile ntthu ariina, khaninvekela ntthu etile ahina. ¹³Niiya yeetthu khahiyo yoori akina eetthuuwe, mweeyo mwiri oolemeliwa, nintakha yoori mooshi mwiiye sawasawa. ¹⁴Nasaapi eti, vitthu mwiriina za waatta, zinfiyela waawuni othowiwa waya yo. Swaafu kiina amana mweeyo mwithowiwa, na yo antta owahi owaawunini, toowo mwiniiya sawasawa.

¹⁵Nkhama etthiipo yaatikhiweezo yoori:

“Otule aalokottheliyeeyo zawaatta kaarina zooziti,

na otule aalokottheliyeeyo vattitthiiru khaathowiwe.”

Oshokholeza khwa mamuumini a Yudeya

¹⁶Kininshukhurwela Nluku, otule atthiiyeeyo nroho wa Tiitu phoole ethiito miiyo kiriinaaye khwa mweeyo. ¹⁷Maana Tiitu kheetteeni okhupalela paasi oveka weetthu, ila onta okho na niiya yawe. ¹⁸Namperekha vamote na ye, ttwiiyetthu anshitahiwaaye khwa ojama wa Nluku wooshi, mwaasa wa khaazi ya olaleya hapari zooshapweya. ¹⁹Khahiyo khwa ethiito paasi, ila ye theenya athawuliwa ti ojama wa Nluku yoori eeye nshirikha wa safwari, yoori asala anikholisa khaazi eti ya pheta ninkholaaye khwa siifwa ya Mbwana na theenya othoonyeza yoori khweele, nintakha waawuni. ²⁰Nintakha owerawera yoori ahiiyevo ntthu woonizukulisela mattakhuzi, nanna ninttelaaye ovira neettettisaka tthuvo eti khuluyeene ya zaakha. ²¹Maana ninaaye phoole ya oretta etile yiiyiyeeyo yoolotteya, khahiyo omaasho wa Mbwana paasi, ila theenya omaasho wa anaatamu. ²²Olikha toowo, nininperekha vamote na yo ttwiiyetthu, otule khwa swaafu zawaatta na khwa nanna zawaatta anithoonyeziyeeyo yoori ti woojinkha channu. Na nasaapi eti theenya onvira athoonyezaka ojinkha saaneene mwaasa wa nroromelo arina khwa mweeyo. ²³Monkoni wa Tiitu, ye nshirikha eetthu wa khaazi vakatthi venu, Monkoni wa attwiizetthu, yo anamalokozela a ojama wa Nluku eto yaya hishima khwa Al-Masiihu. ²⁴Nakataalikha, enakatthi ya ojama wa Nluku, mwiwaathoonyeze attwi apo pheta mwiriinaaye na ojishashawula niriina khwa mweeyo.

Zaakha khwa mamuumini a Yudeya

¹Akinhithajiya owaatikhelani monkoni wa owaatthantta attakatthiifu. ²Maana kinjuwa ojilaza weenu khwa waawuni. Miiyo kawaathoonyeza a Masetooniya ojishashawula kiriina khwa mweeyo, kiwoozaka yoori, waaza mwaakhajana, mweeyo atthu Akaaya mwaari woolikana khwa oshokholeza. Ojinkha weenu wawaalipisela atthu awaatta a Masetooniya. ³Olikha toowo, kinuuperekhezani attwi yoori ojishashawula niriinaayo khwa mweeyo monkoni wa epo zaya ohiiye wa mahala. Mwiiye woojitthenkeza nkhama miiyo kilupiyeeyo. ⁴Amana a masetooniya akinaaya ata vamote na miiyo, khuusikanani mwiri woohijitthenkezi, fweeyo enteela onipattha haaya, mweeyo mwatepa. ⁵Etthiipo, koona yoori enhithajiya owaaruma attwi wuuthotolani khapula na amarise otthenkeza monkoni wa oshokholeza opule mweeyo mwaahitiyeeyo. Aphano enttela wiiya yoolikana nkhama zaakha yoohilikheleliwi, na yohiiyi nkhama etthu eninkhiwaaye khwa okhwiririwa.

Ozala na wuurula

⁶Muupuwele epo zaya: otule anzalaaye vattitthiiru, onuurula vattitthiiru, na otule anzalaaye yawaatta, onuurula yawaatta. ⁷Wakhula ntthu enkhe etile alakeliyeeyo va rooho vawe, khahiyo na huzuni ama okhanyareliwa, maana Nluku onimpheta otule aninkhaaye na furaha. ⁸Na Nluku ti wa owahi khwa oretta yoori rehema yooshi mweekezeliwe, yoori khwa vitthu zooshi na wakathi wooshi, wiiyana zooshi enihithajiyaaye, yoori mwirette wakhula nanna ya khaazi yooshapweya. ⁹Nkhama etthiipo yaatikhiweeyo yoori:

“Aawanya maali zawe khuwenkha asikhini;

maana shariya yawe enrupaza khwa mileele.”

¹⁰Otule aniwinkhaaye peewu apale anzalaaye na etthu yoojiwa, theenya oneekezela peewu ya khaazi zenu zooshapweya na onteela owulisa mishumo za shariya yenu. ¹¹Mweeyo mwinttela oreelisiwa khwa wakhula nanna, yoori mwiiyane winkha woohilikheleli wakhula wakathi, khwa fweeyo, winkha woohilikheleli weenu esutukhwane yiiyaka rehema ya Nluku. ¹²Maana khaazi eto mwinkholaaye mweeyo, khinaawuni othowiwa paasi wa mamuumini, ila theenya emmwazeyela oshukhuru wa waatta aninkhiwaaye Nluku. ¹³Khwa wooneya wa khaazi eto mwinkholaaye, akina anlawa ansifu Nluku khwa oshututi onlokozaaye otukhuru yoori mweeyo mwinretta hapari za Al-Masiihu khwa winkha woohilikheleli weenu wa omeelana vitthu na yo na khwa akinoko aya ooshi. ¹⁴Na lompa anrettaaye khwa mweeyo, yo anttela wiitaala pheta khwa mweeyo, mwaasa wa rehema khuluyeene ya Nluku awinkhiyeenini mweeyo. ¹⁵Nininshukhurwela Nluku, khwa tthuvo yawe yootafikhana aninkhiyeeyo.

Paawulu onaakisela khaazi yawe

¹Miiyo Paawulu, khwa wiitthaala na okemaani wa Al-Masiihu, kinuuhirimizani mweeyo. Miiyo kiniiya “woojipushuwisa” amana kiiya wuuso khwa wuuso na mweeyo, ila kiniiya njawuri amana kiiya peetiwene! ²Kinuuvekelani yoori amana kita, mwihikikhanyarele olaza ojawuri nkhama khinuupuwelaazo oretta khwa akinoko aya apale anuupuwelaaye yoori ninretta vitthu khwa nanna ya onaatamu. ³Maana hatha nkhama niniikhala nkhama anaatamu, khaninuumana khwa nanna ya onaatamu. ⁴Zaana ninrumeyelaaye nuumanaka khahiyo za onaatamu, olikha toowo, pi za owahi khwa Nluku yoori epwechele korofwa zoolipalipa. ⁵Nintapanya shawuri na ojinkhelela wooshi onuumananaaye ojuwa wa Nluku, na nafukela wuupuwela wooshi yoori oretteye wiiya wonshututela Al-Masiihu. ⁶Amana oshututi weenu wiiya woolikana, ninttela wiiya woolikanana ohukhumu okhijili wooshi.

⁷Mweeyo mwinoona vitthu oje waya paasi. Nkhama ntthu onkhupalela yoori ti wa Al-Masiihu, ona ya ojoona opheya mweenyewe yoori etthiipo eeyiyeeyo wa Al-Masiihu na fweeyo theenya na a Al-Masiihu. ⁸Maana hatha nkhama keetta ojikhupali nakuvu khwa ofwalume Mbwana aninkhiyeeyo, khinkipatthisa haaya epoza, maana ofwalume aya opo pi wa ojeka, khahiyo wa otapanya. ⁹Akintakha wuupuwa nkhama kineekesaaye wuusutisani na warakha zaka. ¹⁰Maana atthu akina anlupa yoori: “Warakha zawe pi za okhomaala na olipa, ila mweenyewe ti woopepheya, na mattakhuzi awe pi ootaraweya.” ¹¹Atthu aya apo ana ya ojuwa yoori khifwarikhaneeni etile naatikhiyeeyo nwarakha, niri peetiwene, na etile ninrettaaye amana niiya okho na mweeyo.

¹²Khanina shawuri za otakha ojilikanisana wala ojilattisana apale anjishashawulaaye eenyewe. Amana yo ajiphima anjilattisana eenyewe anretta vitthu ehiweeleyaka. ¹³Fweeyo khaninjisifu woochirisavo khiima zaya, ila khwa khiima yoolikana Nluku aninkhiyeeyo, mpakha wuufiyelani mweeyo. ¹⁴Eriwaka khazaafiiye mpakha okho, zaari weettela orettikhana toovi zihuufiyeleenini, maana noofiyelani mweeyo na hapari zooshapweya za Al-Masiihu. ¹⁵Khwa nanna ethiito, khaninlawa ozitisa mwiinano eetthu, nijittottopaka khwa khaazi akholiyeeyo atthu akina. Nroromelo eetthu ti yoori khiima eneekezeleyaaye amini mwiriinaaye, na khaazi zeetthu khwa mweeyo etepe weekezeleya venkivene, ¹⁶yoori nipatthe otafusiri hapari zooshapweya khwa miti epile ziri peetiwene na mweeyo. Woohijitayiti na khaazi epile ekholiweeyo miti za akinoko aya. ¹⁷Khwa zooshi, “Otule anjisifwaaye, ajisifu khwa Mbwana!” ¹⁸Maana khankhupaliwa otule anjikhupalaaye, ila otule ankhupaliwaaye ti Mbwana.

Maaswihaapa a ojipanka

¹Kinweja yoori mweeyo mwivilele vattitthiiru ololo aka. Piitthiipo, safwatali mwikivilele. ²Niiya kiriina khwa mweeyo niiya enlankhaaye wa Nluku. Miiyo kawaahitini oraliwa ti nlume mmote paasi Al-Masiihu, kitakhaka wuuthoonyezani ye nkhama mwaari swaafi. ³Etthu kinweraweraaye, na kinoovaaye ti yoori nkhama etthiipo nyookha na olavilavi aya yanttettekhiyeeyo Haawa, akhili zenu mweeyo wiiya zootapanyiwa khulikha ookhweele na aputu swaafi ya Al-Masiihu. ⁴Maana, nkhama ntthu ootafusirelani mweeyo Yinsa nkina woohiiyi otule nuutafusireliyeenini, ama nkhama mwimpwekherela rooho yoofwarikhana na etile mwipwekhereliyeeyo, ama hapari zoofwarikhana na epile mwikhupaliyeeyo, mwinlottela wookhweyavo. ⁵Miiyo akinjoona hatha vattitthiiru ohiina fwayita zayita maaswihaapa apo awulu. ⁶Miiyo hatha nkhama keetta ohiiyi namattakhula saana; ila aki masikhini khwa ojuwa. Weekhweele, nathoonyeza epo zaya khwa mweeyo wakhula nanna ya vitthu zoorettikhana.

⁷Talili karetta twampi khwa ojipushuwisa yoori kuuwuliseni mweeyo, wuutafusirelani hapari zooshapweya za Nluku wooheekeseli hatha etthu? ⁸Kikholaka khaazi vakatthi venu, kaariphiwe ti ojama wa Nluku nkina. Kinlupa yoori, miiyo kaari oweeyela yo yoori kiwaawunini mweeyo. ⁹Wakathi kaari vakatthi venu waakipatthiye othowiwa, akanvelavelisiye hatha ntthu, maana attwi wakathi arutiyeevo Masetooniya aakinkhiye epile zaakisaleliyeeyo. Karetta zooshi epo yoori kihuulemeleni mweeyo, na kinrutela oretta etthiipo. ¹⁰Ti ya olikana nkhama khweele ya Al-Masiihu eri khwa miiyo; tiito, khina mmote wa nti wa Akaaya anttelaaye okikhattaza ojishashawula waya opo. ¹¹Mwaasa wa niini? Mwaasa wa ohuuphetini? Nluku onjuwa yoori kinuuphetani!

¹²Na kinrutela oretta etile kinrettaaye, yoori kihiwinkhe ruhusa apale antakhaaye opattha kiphenyo ya wooniwa wiiya sawasawa na fweeyo, khwa vitthu anjishashawulanaaye. ¹³Maana atthu aya apo maaswihaapa oojipanka, akarumeya oottettekha, ajinkha wiiya maaswihaapa a Al-Masiihu. ¹⁴Eto khahiyo etthu yooshankisa, maana Epiliisi onjiretta wiiya nlayikha la nuuru. ¹⁵Nakataalikha, khahi yosutisa yoori akarumeya awe anjinkhelela wiiya akarumeya a shariya. Omwiisho waya yo anttela wiiya etile ensuhaaye khaazi zaya.

Paawulu onjishashawula khwa ohoowa wawe

¹⁶Kinrutela olupa: Ahiiyevo ntthu anikoonaaye nkhama nlolo. Ila nkhama mweeyo mwinikoona etthiipo, mwikipwekherele nkhama mwimpwekhereliye nlolo, yoori na miiyo kijishashawule vattitthiiru. ¹⁷Etthu kinlupaaye, akinlupa khwa Mbwana, ila nkhama nlolo khwa waamineya opu kinjishashawulanaaye. ¹⁸Maana wiiya atthu enkeene anjikhutupula khwa matakhelo a onaatamu, na miiyo theenya kinteela ojikhutupula. ¹⁹Mweeyo, mwaasa wa wiiya a akhili channu mwiwaavilele alolo khwa nanna yooshapweya. ²⁰Wekhweele, mweeyo mwiniwaavilela mpakha apale anuuhukhumwaanini, ama anuttapwatthaanini, ama otule anjikhutupulaaye, ama anvulalisaaye wuuso enu. ²¹Khwa haaya yaka, kinkhupalela yoori naari oottettheya channu khwa vitthu zaya epo!

Khwa epile akinoko aya ooshi anlottelaaye khwa ojishashawula, miiyo theenya kinlottela. Nalelo kinttakhula nkhama nlolo. ²²Apa Meepereewu? Na miiyo ki othuuto. Meezirayiilu apa? Na miiyo ki othuuto. Pi peewu ya Eburahiima? Na miiyo ki othuuto. ²³Yo akarumeya a Al-Masiihu? Aphano ki woovevereya! Miiyo theenya kakhola khaazi channu. Kaafukeliwe swaafu zawaatta. Khujaphiwa nakuvu, swaafu zawaatta na khusala kisaleela ofwa. ²⁴Swaafu thaanu mayaahuuti akijaphaka miwashulo talaathiini na tiisiya. ²⁵Swaafu ttatthu kaapiyaniwe puutta. Swaafu moote kaavonyiwe na mawe. Swaafu ttatthu kizamaka, kiisha nthana na osikhu kuumananaka okatipukha wa pahari. ²⁶Kaari ovira kirettaka safwari phantte khwa phantte. Kavirela hasara mmamuttho, hasara za manantarawu, hasara za atthu a mmuti mwaka, hasara za amalapo; hasara ya nsitati, hasara za n’yaara, hasara za mpahari na hasara za attwi oojipanka. ²⁷Kaakholiye khaazi yoolipa. Swaafu za waatta woohilali, wookholiwa ti jala na nnyottha na swaafu za waatta yaari okisaleela nyuupa, etthu yoojiwa na kuwo. ²⁸Olikha epo, kinuumanana mfwaarakha nkatthi mwaka, na mwijuwaka shukuli zaka khwa ojama wa Nluku wooshi. ²⁹Amana ntthu atteettheya, na miiyo theenya kiniiya woottettheya. Amana ntthu akwela ntwampi, miiyo kiniiya wawantipweya.

³⁰Nkhama ewaapho swapwapu ya miiyo ojishashawula, aphano kinttela ojishashawula khwa vitthu zinthoonyezaaye otteettheya waka. ³¹Nluku na Paapa wa Mbwana eetthu Yinsa, woottitthimisiwa khwa mileele, onjuwa yoori akintta ohata. ³²Nsatoro wa Tamaashiku, aari okholanaaye khaazi mfwalume Areeta, aarumiye yoori yeekeseliwe sitati yoori kikholiwe. ³³Ila ashirikha aka khukiishusha va janela wa muuri kiri nkhelenke, pi kawahiyeevo ovukha.

Jozi ya Paawulu

¹Enhithajiya miiyo ojishashawula khwa epo zaya. Hatha nkhama kintta ohipattheli etthu, kinteela olupa monkoni wa jozi na othoonyeza wa Mbwana. ²Kininjuwa mwinyi mmote khwa Al-Masiihu, khwa nyaakha khumi na mine aweziweeyo pinku ya ttaatthu, nkhama zarettikhana mmwiili ama oje wa mwiili akijuweeni, Nluku ti anjuwaaye. ³Na kinjuwa yoori mwinyi oto, nkhama mmwiili ama oje wa mwiili akijuweeni, ila Nluku ti anjuwaaye, ⁴ye khuweziwa jannathi na khusiila vitthu ehinlupeyaaye, vitthu pinaatamu enkhattaziwaaye olupa. ⁵Khwa mwinyi othuuto kinjishashawula, ila khahiyo khwa miiyo kimweenyewe, woohiiyi khwa otteettheya waka. ⁶Hatha nkhama keetta otakha ojishashawula akaari wiiya nlolo, maana kaari ottakhula haakhi. Kinwerawera vitthu zaya epo yoori ahiiyevo hatha mmote anttelaaye wuupuwela monkoni wa miiyo ozitisa etile anoonaaye ama anikisiilaaye.

⁷Yoori akhattaze ojishashawula mwaasa wa othoonyeziwa opo nwulweene, khushomaniwa mwiiwa mmwiili mwaka ti karumeya a Epiliisi yoori akoopopise na kihijishashawule. ⁸Khunvekela Mbwana swaafu ttatthu yoori akilaze. ⁹Ila ye khukuuza yoori: “Rehema yaka entosheleza khwa weeyo, maana owahi waka onkamilikha muutteettheya.” Nakataalikha, miiyo kinjishashawula saaneene wa wafurahavo khwa otteettheya waka, yoori owahi wa Al-Masiihu ovumule khwa miiyo. ¹⁰Tiito khwa pheta ya Al-Masiihu, kinfurahi muutteettheya mwaka, muuttukhaniwa, ntafwawuthi, muulupatthiwa na muuthunku. Amana kiiya woottettheya ti kiniiyaaye wookhomaala.

Oshukulikha wa Paawulu khwa akorintiyu

¹¹Kaari nlolo ottakhula toowo, ila ti mweeyo mwikikhanyareliye epo zaya. Miiyo kaarina ya orumiwa ti mweeyo, maana aki woopushuwa fwayita zayita “maaswihaapa apale awulu,” hatha nkhama aki paani. ¹²Maana thalaapa za owaaswihaapa zathoonyeziwa vakatthi venu, na nthiti looshi, alama, vitthu zootikinisa na owahi wa minjuza. ¹³Nannani mweeyo mwizitiweeyo ti ojama wa Nluku nkinaaya? Ofwarikhana kiriina ti yoori miiyo akinveka yoori mweeyo mwikaawuni. Safwatali mwikiswaamihi koosa eto!

¹⁴Aphano kiwoolikana yoori kite kuuthotoleni swaafu ya ttaatthu na kihiiye etthu yoolemela khwa mweeyo, maana etthu kintakhaaye khahiyo vitthu zenu, ila mweeyo mweenyewe. Olikha toowo, aana khana ya okusanya maali yoori awenkhe apapazaya, ila apaapa owenkha aana aya. ¹⁵Etthiipo khwa niiya yooshapweya, khwa pheta yenu mweeyo, kaari oharipu zooshi kiriina na ojikukhumula kimweenyewe. Mwaasa wa wuuphetani nakuvu, na mweeyo mwina ya okipheta. ¹⁶Khwa wakhula nanna miiyo akeeyiye woolemela khwa mweeyo. Wiiya kinlavilavi, koofukani khwa olavilavi! ¹⁷Talili miiyo kanruma ntthu yoori ate oottapwattheni? ¹⁸Kanvekeliye Tiitu yoori ate oothotoleni, aperekhiwaka ti ttwi nkina. Tiitu khoottapwattheenini! Fweeyo ninretta vitthu khwa rooho moote na ninlottela mwentto mmote.

¹⁹Mweeyo mwinoona yoori khwa wakathi opu wooshi nintta ojaakisa khwa mweeyo? Ninttakhula omaasho wa Nluku nkhama atthu niri khwa Al-Masiihu, na zooshi ninrettaaye aphetani, ti yoori nuukhomaazeni. ²⁰Kinoova yoori amana kita wuuthotolani, kuusikanani nanna kahaari waakhipwelaaye, na mweeyo ohikisikani khwa nanna mwahaari waakhipwelaaye. Kinoova yoori owaapho onyakulisana, nrima, nthoonyezo wa wiiphiiriwa, waawanyeya, otarawana, wuumani, ojikhupali na ohisiilani. ²¹Kinwerawera yoori, amana kita wuuthotolani swaafu kiina, Nluku aka ti akipushuwise omaasho weenu. Kinoona yoori kinttela olila mwaasa wa apale aakosiyeeyo raku, khuhithupwiyi zootakhala zaya, khaapa twayifu na zootakhala kiina arettiyeeyo.

Ochimulela wawiishela

¹Opu onttela wiiya wuuthotolani waka wa ttaatthu. “Olokoveziwa weenu wooshi onhithajiya wiiya woohakikhiwa na okhupaleliwa pi mashaahiti awiri ama attatthu.” ²Koochimuleliyeni wakathi opule kaari na mweeyo swaafu ya phiiri. Apha kiri okhuno, kiniwaatikhela apale aakosiyeeyo na akinoko aya yoori amana kiruti, akinteela omwiinanela hatha ntthu. ³Enooneya yoori mweeyo mwintta oveka wootootiwa yoori Al-Masiihu attakhule khwa miiyo. Ye khahiyo woottettheya khwa wuutthanttani mweeyo, ila ti wa owahi vakatthi venu mweeyo. ⁴Maana wekhweele, aakhomeliwe khwa otteettheya, ila ori haayi khwa owahi wa Nluku. Khwa nanna etthiipo, na woottettheya khwa ye, ila khwa owahi wa Nluku ninteela wiikhalana ye yoori nuurumeyeleni mweeyo.

⁵Mwijinzaane yoori mwijoone nkhama mwiri nkatthi wa amini. Mwijoone mwamwenyewe! Ena ya oweeleyani yoori Yinsa ori khwa mweeyo! Ehiriwaka mweetta okatthaliwa! ⁶Na kineekesela mweeyo ojuwa yoori fweeyo khanikatthaliweeni. ⁷Nilompe ninvekelaka Nluku yoori mweeyo mwihirette hatha etthu yootakhala. Khahiyo yoori atthu akina anoone yoori ahinikatthale, ila yoori mweeyo mwirette etthu yoolotteya, hatha nkhama nalattanana atthu ookatthaliwa. ⁸Maana khina etthu ninwahaaye ozukulisela khwa wuumanana haakhi, ila wiiya phantte ya haakhi. ⁹Niniiya woofurahi wakhula wakathi nintteettheyaavo na mweeyo mwiniiya wookhomaala na lompa zeetthu pi za yoori mweeyo mwiiye oohakikhiwa. ¹⁰Tiito kinaatikha vitthu epi kiri peetiwene, yoori amana miiyo kita okho, kihihithajiye okhattaza, kirumeyelaka ofwalume opule Mbwana akinkhiyeeyo wa ojeka, woohiiyi wa otapanya.

Salamu za wiishela

¹¹Omwiisho, attwiizaku, kinuuvekelani yoori mwiiye ofurahi! Mweekese ozowerela, mwilikhisane woophetanavo, mwiiyane shawuri moote, mwiikhale na heeri. Nluku wa pheta na heeri onttela wiiya vamote na mweeyo.

¹²Mwichelisane mmote na nzeenu na salamu ttakatthiifu. ¹³Attakatthiifu ooshi amperekha salamu.

¹⁴Rehema ya Mbwana Yinsa Al-Masiihu, pheta ya Nluku na osiilana wa Rooho Ttakatthiifu wiiye vamote na mooshi mweeyo.