1 Timootiyu

Warakha ya mwanzo

ya Paawulu amwaatikhelaka

Timootiyu

Salamu

¹Miiyo Paawulu, aswihaapa wa Yinsa Al-Masiihu khwa oruma wa Nluku Namuusuru eetthu na wa Yinsa Al-Masiihu nroromelo eetthu, ²kiniwaatikhela weeyo Timootiyu, mwanaka weekhweele nkatthi wa tiini, rehema, tthakaraka na heeri ya phantte ya Nluku Paapa na ya Yinsa Al-Masiihu Mbwana eetthu, yiiye vamote na weeyo.

Phoole na anamanozela a mwentto woovonyeya

³Nkhama etthiipo kaawuuziyeezo wakathi opule kaari weettaaye nti wa Masetooniya, yoori amana osala nti wa Eefezu owaahirimize atthu akina yoori ahikhanyarele osomisa mwentto woovonyeya. ⁴Owoozaka theenya yoori alikhe olottela hantisi na waalaka mazina a marehemu. Epo zaya zintiisa onyakulisana na enlikhisa mwentto wa Nluku onlottaniwaaye amini. ⁵Maana a masomi aya apa ophetana wa rooho yookemaani, na ojuwa othawula yooshapweya vakatthi wa yootakhala, na amini yohiiyi yoonaafikhi. ⁶Akinoko ajilaziyeemo, arutelaka olottela vitthu zootakhala zoohiina fwayita. ⁷Yo antakha ojiretta wiiya anamanozela a kano za Nluku, ila khiniweeleya, wala epile anlupaazo na haakhi yaya khanjuwa.

⁸Apha ninjuwacha yoori kano pi zooshapweya zirumeeyeliwaru khwa nanna zinlupaazo. ⁹Nijuwaka etthiipo yoori kano khazaawaateeliye atthu apale aneettettelaaye shariya, ila zaawaateeliye apale ohiiyi a shariya na anamakhijili, zaawaateeliye makaafiri na anatwampi, zaawaateeliye anamatakhala rooho na anamakufuru, zaawaateeliye apale aniwoolaaye apapazaya na amamazaya, zaawaateeliye apale aniwoolaaye azaaya, ¹⁰zaawaateeliye anamajansili na apale aniwaalalanaaye alume azaaya, zaawaateeliye apale aniwaakholaaye atthu na owoozanyisa na anamahata, zaawaateeliye apale anlaphaaye eettaka ohata, na ooshi apale mwentto nzuuri ahintakhaaye. ¹¹Mwentto opo ori nhapari zooshapweya zinlankhaaye nkatthi wa nuuru ya Nluku wa parakha, kinkhiweeyo miiyo olaleya.

¹²Yinsa Al-Masiihu Mbwana eetthu akinkhiyeeyo kuvu, Ye akoona wiiya ntthu wa waamineya, khukinkha onrumeeyela, kininshukhurwela. ¹³Miiyo ena omwanzo kaari namakufuru, namalupattha, namahusuti, wakathi aya opule miiyo akaarina amini, etthu kaari orettaaye akaari ojuwa, apha kooneliwa huruma. ¹⁴Rehema yooziti ya Mbwana eetthu khukiishukhela, khukipatthisa ompheta na omwaamini Ye. ¹⁵Mattakhuzi apa pi ookhweele na ansuhi okhupaleliwa: Yinsa Al-Masiihu ti ye aatiiyeeyo voolumwenku oteela owoosuru anatwampi, wootepacha waya ti miiyo. ¹⁶Tiito kooneliweeyo huruma, yoori khwa miiyo, wootepacha waya, Yinsa Al-Masiihu akivilela yoori awaathoonyeze ooshi apale anttelaaye omwaamini apatthe ohaayi wa mileele. ¹⁷Apho, Mfwalume wa mileele attottopeliwe na asifwiwe siikhu zooshi, Ye ahinifwaaye wala ahinooneyaaye, Nluku mmote othuuto. Amiina!

¹⁸Masomi atthaapo kinuutumerela weeyo mwanaka Timootiyu, nkhama khwa weyo yuulupeziyeezo Rooho Ttakatthiifu, wuupuwelaka mattakhuzi apa wuuziweeyo, onttela owahi wuumana viittha ya nnafusi, ¹⁹ojilipisanaka amini na ojuwa othawula yooshapweya vakatthi wa yootakhala. Mwaasa woohitakhi othawula yooshapweya, atthu akina amini yaya apwetecha. ²⁰Akina aya ti Hemeeni na Alishantere. Yo kawaalikhela epiliisi yoori awaahoowise, ajuwe ohikufuru.

Nina ya owaalompela atthu ooshi

¹Apho, ehinarettiwe hatha etthu, kinuuhirimizani olompa; lompa yookhola moolu, yoovekeleliwa anaatamu ooshi na lompa yooshukhurwela. ²Mwiwaalompele afwalume na attunkhulu ooshi apale ariinaaye yenzi yoori fweeyo niiyane meekhazi a wiitthaala, a heeri, emaani na hishima khuluyeene. ³Epo pi ziiyiye zooshapweya na zontuvela Nluku Namuusuru etthu. ⁴Ye ontakha yoori eeye awuusurukha atthu ooshi na ajuwe haakhi.

⁵Maana, Nluku ori mmote paasi,

na namasiilanisa paasi khwa atthu na Nluku mmote,

Yinsa Al-Masiihu pinaatamu,

⁶otu aleviyeeyo ohaayi awe

khuripha hisapu za twampi za atthu ooshi,

oshaahiti opu Nluku enkha wakathi khwaamili.

⁷Akintta ohata kinlupa khweele, keetta othawuliwa yoori kiiye namalaleya, kiiye aswihaapa na kiiye namanozela wa mattakhuzi apa a amini na a haakhi, khwa khapila zooshi.

⁸Apho, alume ooshi kintakha yoori wakhula vahali ankusanyeyaavo alompe alansaka makhono na rooho ya emaani woohikatipukhi na woohinyakulisani.

Aakha apale eeyiye anamalottela a Yinsa

⁹Aakha nayo kintakha yoori awale kuwo wa hishimavo, ajishapweyise woohijitayiti khwa nanna eneezelaazo, oshapweya waya ohiiye woofuka mattunttu oohifwayi wala owala weero wala osaka ama kuwo zawaatta nzurukhu, ¹⁰oshapweya waya wiiye wa khaazi zooshapweya nkhama aakha animwaaputwaaye Nluku.

¹¹Aakha, amana anozeliwaka ana yoojiitthaaza na ojinyamaza. ¹²Akiniwaatakhisa aakha onozela wala ojinkha yenzi vakatthi wa alume, ana yawiiya oonyamala. ¹³Maana tthakuzi wa wumpiwa ti Adamu, aphano khumpiwa Haawa. ¹⁴Aattettekhiweeyo khahiyo Adamu, muukha ti ye aattettekhiweeyo2:14 Woone kithaapu ya Mwanzo 3:1-7., khusutukhwana akwelaka ntwampi. ¹⁵Apho, aakha hatha nkhama awaapattha aana, anuusurukha eeyaru nkatthi wa epaata na pheta, na ottakatthifu na hishima.

Attunkhulu awulu na anamarumeyela a ojama wa Nluku

¹Mattakhuzi apa pi ookhweele: Amana ntthu atakha wiiya namalokozela wa ojama wa Nluku, onhithajiya khaazi yooshapweya. ²Nkhama ntthu onhithajiya wiiya nttunkhulu nwulu wa ojama wa Nluku eeye ntthu woohaakanyereliwi hatha etthu, eeye nlume wa wiiyana muukha mmote, woojiinanela, wojiitthaaza, wooshitahiwa, woomakeleya na ankhitiraaye osomisa. ³Ahiiye ntthu woohapaliwa ama woohusuti, eeye ntthu wookemaani na wa heeri. Ahiiye ntthu wontuvela nzurukhu. ⁴Eeye ntthu wa weettettisa vaje vawe saana, wooshututeliwa pi aanaawe na wooshitahanana. ⁵Nkhama ntthu khaneettettisa saana vaje vawe, onlokozela toovi ojama wa Nluku? ⁶Namalokozela wa ojama wa Nluku ahiiye ntthu antthaaye onjuwaru Yinsa, maana enwaheya ompattha ojikhupali, khukwelana ophukiwa otthuupo aphukiweeyo sheethwani. ⁷Apho, namalokozela wa ojama wa Nluku eeye ntthu wooshitahiwa pi atthu apale ohiiyi a ojama wa Nluku, yoori ahikwele mmiraakho za sheethwani eeya wootaraweya.

Anamarumeyela a ojama wa Nluku

⁸Khwa nanna etthiipo anamarumeyela a ojama wa Nluku na yo eeye atthu ooshitahiwa, ahiiye amwanomwaano, ahiiye oohapaliwa wala oowaatuvela opattha fwayita yohiiyi ya haakhi. ⁹Eeye atthu oohikheetiwi pi rooho zaya na oojilipisana mwentto wa amini athoonyeziweeyo ti Nluku. ¹⁰Yo ahinenkhiwe orumeyela ana yawooniwa khapula mwentto aya, amana ahoonaniwi mwentto wootakhala phi aninkhiwaavo orumeyela. ¹¹Khwa nanna etthiipo na yo aakha anrumeyelaaye eeye ooshitahiwa, eeye atthu oohittakhuli pure, oosuluheya na awaamineya khwa zooshi. ¹²Anamarumeyela a ojama wa Nluku ana ya wiiya alume awiiyana muukha mmote, owaalela aanaaya saana na aweettettisa vaje vaya. ¹³Amana arumeyela saana ampattha shitaha khuluyeene na okhomaala nkatthi wa amini ariinaaye na Yinsa Al-Masiihu.

¹⁴Kiniwaatikhela weeyo Timootiyu warakha eti, keekeselaka oteela wuuthotola nasaapi, ¹⁵ila amana kirupaza, warakha eto entta owuuza nanna yoojeettettisa vakatthi wa ojama wa Nluku. Eti yiiyiyeeyo khuntti ya Nluku khwa ohaayi, nripu na nchina lookhweele. ¹⁶Khayiivo shaakha yoori etile Nluku athoonyeziyeeyo khuluyeene monkoni wa Yinsa Al-Masiihu ti yootikinisa:

Ye aajithoonyeziye nkhama pinaatamu,

khuhakikhiwa ti Rooho Ttakatthiifu, khooniwa pi malayikha,

khulaleyiwa tuniya zooshi,

khukhupaliwa voolumwenku, khuweziwa pinkuuni nkatthi wa nuuru.

Ohirimiziwa wa Timootiyu

¹Rooho Ttakatthiifu enlupa saaneene yoori omwiisho anlawa atthu akina alikhe amini, asiilezaka nafusi zoottettekha na masomi a masheethwani. ²Masomi aya apo anlankha mmakhono wa manaafikhi na anamahata, ariina rooho zoolukula ahinjuwaaye etthu yootakhala wala yooshapweya. ³Yo aniwooza atthu yoori oralana mwiikho na vitthu zoojiwa kinoko zaya haraamu. Vitthu zoojiwa epile Nluku ompiyeeyo yoori apale animwaaminaaye na anjuwaaye haakhi, aje anshukhurwelaka. ⁴Weekhweele, epile Nluku ompiyeeyo pi zooshapweya zooshi, ehiiyevo hatha moote enthanyiwaaye amana yiiya yoopokhereliwa wonshukhurwelavo Nluku. ⁵Vitthu zoojiwa zaya epo zinhalaalishiwa ti nttakhuzi la Nluku na lompa.

Karumeya woororomeleya wa Yinsa

⁶Amana weeyo owaanozela attwiizo mattakhuzi apa, oniiya karumeya wa Yinsa Al-Masiihu wookemaani, ojilipisanaka mattakhuzi a amini na masomi ookhweele apa olottiyeeyo. ⁷Masomi oovonyeya na hantisi zoololo ojiwerawerisane. Ojikhomaaze na emaani. ⁸Okhomaaza makhonkolo fwayita yaya vattitthiiru, ila emaani ti eriina fwayita khwa zooshi, maana entana nroromelo woohaayi otthuupu na Ahera. ⁹Mattakhuzi apa pi awaamineya na ansuhi okhupaleliwa. ¹⁰Tiito ninjuumanisaaye na okhola khaazi mwaasa yoori nroromelo eetthu nattha wa Nluku wa ohaayi. Ye Namuusuru wa anaatamu ooshi, haaswahaaswa khwa apale animwaaminaaye.

¹¹Mattakhuzi apa ohirimize na osomise. ¹²Ahiiyevo antakhaaye wuutarawu mwaasa wa wiiya shaapu, ila khwa ottakhula wawo, menttezi awo, pheta, amini na wookemaanivo wiiye nthoonyezo wa anamwaamini. ¹³Vakatthi wa anamalottela, mpakha miiyo ota, olipane osoma, otafusiri na osomisa Nttakhuzi la Nluku. ¹⁴Wakathi waattheeliweevo makhono pi attunkhulu a ojama wa Nluku veeshwa vawo oolompelaka, Nluku nkatthi wa Rooho Ttakatthiifu awinkha tthuvo. Ohisahawu orumeyela.

¹⁵Vitthu epi weettettise saana na ajilipisane etthiipi yoori okhomaala wawo nkatthi wa amini wiiye wa wooniwa pi atthu ooshi. ¹⁶Ojiinanele weeyo na wiiyane phoole na mwentto opu onsomisaaye, vitthu epo ojilipise oretta. Amana okhanyarela oretta etthiipo, ontta ojuusuru weeyo na apale anuusiilaaye.

Nanna yoowaatthantta anamafweliwa pi amanna zaya

¹Nlume wa wuuziti owula ohisala ommaruwela, ila onlipisele saana nkhama papaawo, mashaapu nkhama attwiizo, ²aakha a wuuziti owula nkhama amamazo, na aamwari nkhama alupuwo wookemaanivo.

³Owaatthantte aakha oofweliwa pi amanna zaya, apale khweele ahina ntthu woowaatthantta. ⁴Ila nkhama owaapho namafweliwa ti mannawe ariina aana ama atuulu, atthaapo mwanzo asome mwentto wa tiini antthanttaka jamaayaya. Etthiipo apapazaya phi aniwaariphaavo. Eto etthu enintuvelaaye Nluku. ⁵Muukha woofweliwa ti mannawe, woohiina ntthu wontthantta, nroromelo awe onttha wa Nluku, akhanyarele olompa avekaka waawunikha osikhu na nthana. ⁶Ila otule anjitupweezaaye nkatthi wa tuvela za olumwenku, hatha nkhama ori haayi oniiya woofwa. ⁷Owaarume oretta etthiipo theenya, yoori vakatthi vaya ehooniwevo paathuli. ⁸Ntthu amana ajamaaze haaswahaaswa mamaawe na pipiyaawe ahiwaatthantti, akatthala epaata yawe na oninziti kaafiri.

⁹Ahaatikhiwe nwarakha yawiinaneliwa namafweliwa ti mannawe, muukha woohiina nyaakha siithiini na eeye muukha araliweeyo nlume moote paasi. ¹⁰Eeye muukha woojuwaniwa oretta vitthu zooshapweya, woowaalela saana aanaawe, woomakeleya, ama eeye muukha aari woosakaaye moolu a atthu oottakatthiifu a Nluku, aari owaawunakaaye anamathowiwa na aari okholakaaye khaazi zooshi zooshapweya, othuuto ti aatikhiwe nwarakha ya anamafweliwa pi amanna zaya.

¹¹Aakha awiiya anakhinzi nwarakha ya anamafweliwa pi amanna zaya ohiwaatikhemo, maana amana tuvela zaya ziziti ojinkha mmakhono wa Yinsa Al-Masiihu, antakha oraliwa. ¹²Khwa nanna ethiito, antta ojipatthisa paathuli mwaasa wookattha wahati aya opule wamwanzo aarettaniyeeyo Nluku. ¹³Theenya antta ojinozela oviliwa, weettetta nyuupa khwa nyuupa, khahiyo oviliwa paasi, ohankawaani, waapa na ottakhula vitthu zoohifwayi. ¹⁴Apho, kintumerela yoori anamafweliwa pi amanna zaya apale eeyiye anakhinzi araliwe, eeyane aana alokozele vaje vaya, ahimwinkhe kiphenyo atuwi eetthu ya owaalupeza vitthu zootakhala. ¹⁵Akinoko aya apathuli khusala anlotta epiliisi.

¹⁶Muukha wa wiiya muumini amana eeyana jamaaye woofweliwa ti mannawe, ona ya ontthantta, ahilikhele ojama wa Nluku. Alikhe yoori owahi owaatthantta apale akina oofweliwa pi amanna zaya ahina ntthu woowaatthantta.

Monkoni wa anamarumeyela ojama wa Nluku

¹⁷Anamarumeyela ojama wa Nluku apale ankholaaye khaazi saana, haaswa haaswa apale antafusiraaye na apale ansomisaaye, ojama wa Nluku ona yoowaashitahi swaafu piiri. ¹⁸Nttakhuzi la Nluku linlupa yoori: “Milomo za mompe ettukuttaka tiriku mwihifuke.” Khulupa theenya liraka: “Nakhaazi onsuhi wiiyana phakari yawe.” ¹⁹Otule eeyiye nttunkhulu wa ojama wa Nluku, ohikhupalele olokoveziwa, aheetteeni opuwa atthu awiri ama attatthu awiiya mashaahiti. ²⁰Wakhula otule anrettaaye twampi onshowere vakatthi wa ojama wa Nluku yoori theenya apale akina aya oove.

²¹Miiyo kiniwuuza kuulipiselaka channu mmakhono wa Nluku na Yinsa Al-Masiihu na malayikha apale oothawaziwa, kuutumerelaka yoori mattakhuzi apa oshututele, ohiinanelaka wala ohinthawulaka hatha ntthu.

²²Ohaakuve onthawaza ntthu nkatthi wa khaazi ya Nluku yoori oheettemo ntwampi za atthu akina; ojiwerawerise wookemaanivo.

²³Mwaasa wa ejohojoho yawo na marati apale oniiyanakaaye, ohisala onywa maatiru paasi, osala onywa nenkawu viinyu vattitthiiru.

²⁴Awaapho atthu akinoko zinooneyaaye twampi zaya ahineeyane paathuli, ila twampi za atthu akinoko wooneya waya ziniiya zoorupaza. ²⁵Khwa nanna ethiito naye khaazi zooshapweya zinooneya, hatha epile zoohooneyi khazinwahi ojivitha.

¹Ooshi apale eeyiye amwiitthwaana ana yoowaashitahi ambwana zaya, yoori nzina la Nluku na masomi eetthu ahitarawiwe. ²Apale ariina Mbwana wa wiiya namalottela wa Yinsa, ahilikhe onshitahi maana ttwiiyaya. Okinoko waya ana ya owaakholela khaazi yooshapweya, maana apale ampatthelaaye fwayita khaazi etile ankholaaye yo mamuumini na pi oophetiwa.

Pheta ya Nzurukhu

Mattakhuzi apa osomise na ohirimize. ³Nkhama ntthu onsomisa mwentto woofwarikhana ohinkholananaaye na mattakhuzi oolikana a Mbwana eetthu Yinsa Al-Masiihu mwentto wa emaani, ⁴ntthu aya oto tu woojikhupali na woohijuwi hatha etthu. Onaaye olwele wontuvela onyakulisana na okheetisana nkatthi wa mattakhuzi antisaaye nrima, wuumani, mattukhano, waakanyerelana vitthu zootakhala, ⁵na oshinttana woohilikheleli. Nkhama etthiipile aazowereliyeezo atthu awiiyana akhili za wuntuwanyiwa, eeyeliweeyo haakhi yaya, apo aya anoona yoori tiini etthu enreelisaaye. ⁶Weekhweele, tiini enreelisa channu khwa atthu apale amfurahelaaye epile ariinaazo. ⁷Voolumwenku apha khanaataniyevo hatha etthu na khaninthuulavo hatha etthu. ⁸Amana niiyana kuwo na etthu yoojiwa nifurahele etthiipo. ⁹Ila apale aneekesaaye oreela ankwela muuzayiniwa na mmiraakho za sheethwani, alottelelaka tuvela zoololo zimpwetechaaye. Etthiipo eniwaatupweeza muuthowelela na nwantipweya. ¹⁰Weekhweele pheta ya nzurukhu nchina la vitthu zooshi zootakhala. Mwaasa wa omaashokopho na nzurukhu, atthu akina alikha epaata yaya khusala ajihoowisa venkivene.

Meekhazi omwaamini Nluku

¹¹Ila weeyo, ntthu wa Nluku, vitthu zaya epo owerawere. Weekese weettettisa shariya, emaani, epaata, pheta, ovilela na ojithuza. ¹²Wuumane viittha yooshapweya ya epaata, okholelele ohaayi wa mileele. Okhuweleliweeyo noolaza oshaahiti wooshapweya wa tukhuru yawo omaasho wa atthu a waatta. ¹³Aphano, mmakhono wa Nluku otule aninkhaaye ohaayi zumpe zooshi, na mmakhono wa Yinsa Al-Masiihu, otule alaziyeeyo oshaahiti wooshapweya wa tukhuru omaasho wa Ponsiyu Pilaatu, miiyo kinuuruma weeyo, ¹⁴yoori otthe nroho oruma swaafi na woohilokoveziwi hatha etthu, mpakha epuwelo ya Mbwana eetthu Yinsa Al-Masiihu. ¹⁵Etthu yaya eto Nluku onlawa arettikhanise, amana ofiya wakathi wa khweele. Nluku othuuto eeyiyeeyo wooshapweya na ariina owahi vatulu wa zooshi, Mfwalume wa afwalume na Mbwana wa ambwana. ¹⁶Ye otthwe khanfwa na oniikhala nnuuru ehinaattameyaaye, khina anamoone, wala anwahaaye omoona. Ottitthimisiwa wiiye wawe na owahi khwa mileele. Amiina.

¹⁷Monkoni wa mathaajiri voolumwenku apha, owaahirimize yoori ahisala ajinkhelela, wala thwaama zaya ahitthe nkatthi wa maali epile zoohilipaneyi; ila thwaama zaya atthe wa Nluku, Ye oninkha wa waattavo vitthu zooshi yoori nisala nijirela. ¹⁸Owaahirimize oretta saana na eeye mathaajiri a khaazi zooshapweya, awiiyana rooho yooleva na wiiya atthu anwahaaye omeela epile aniiyanaazo. ¹⁹Khwa nanna ethiito antta wiiyana okhu ninttaawo akhipa yookhomaala, yoori apatthe ohaayi wa ookhweele.

²⁰Weeyo Timootiyu! Etile olikheliweeyo otthe nroho. Owerawere mattakhuzi oololo aninveyisaaye Nluku na akhili zoovonyeya zinooniwaaye nkhama ojuwa ila zihiiyeeni. ²¹Akinoko aari olottelaaye akhili zaya epo, alaamo mwiipaata.

Rehema ya Nluku yiiye vamote na mweeyo.