1 Atizaloonika

Warakha ya mwanzo

ya Paawulu awaatikhelaka

Atizaloonika

Salamu

¹Miiyo Paawulu, Siila na Timootiyu, ninaatikhela warakha eti ojama wa Nluku wa atizaloonika khwa Nluku Paapa na Mbwana eetthu Yinsa Al-Masiihu. Rehema na heeri ya phantte ya Nluku na ya Mbwana eetthu Yinsa Al-Masiihu yiiye vamote na mweeyo.

Oshukhurwela khwa amini na nthoonyezo wa atizaloonika

²Wakhula wakathi nininshukhurwela Nluku khwa mweeyo mooshi, nuulupakani nlompa mweetthu. ³Ninfikhiri woohilikheleli omaasho wa Nluku eetthu Paapa, maana mweeyo mwinthoonyeza amini entanaaye khaazi, ojilipisa onlankhaaye khwa pheta na nthiti lintaaye khwa onroromela Mbwana eetthu Yinsa Al-Masiihu. ⁴Attwiizetthu, aphetani a Nluku, ninjuwa yoori ye oothawulani ⁵maana hapari zooshapweya zeetthu khazuufiyeleenini khwa mattakhuzi paasi, ila theenya khwa owahi wa Rooho Ttakatthiifu, na hakiikha yookhomaala. Mweeyo mwinjuwa nanna nijettettisiyeezo vakatthi venu, khwa zwaamu yenu. ⁶Weekhweele mweeyo mwaretteya wiiya atthu mwinneezelaaye fweeyo na khwa Mbwana, maana, mwahoowaru pure, mwapwekherela nttakhuzi na furaha entaaye khwa Rooho Ttakatthiifu. ⁷Etthiipo mwaretteya wiiya nthoonyezo khwa mamuumini ooshi a Masetooniya na Akaaya. ⁸Maana waaza khwa mweeyo nttakhuzi la Mbwana lamwazeyela Masetooniya na Akaaya, khahiyo ottuukhoru paasi, ila wakhula phantte yajuwiwa amini mwiriinaaye khwa Nluku. Wiishela waya khaninhithajiya olupa theenya monkoni wa eto yaya. ⁹Maana atthaapo anthatela nanna mweeyo mwinipwekhereliyeezo, na nanna mwiruteliyeezo mmakhono wa Nluku, khulikha sanamu yoori mwinrumeyele Nluku wa ohaayi na weekhweele, ¹⁰na onwejela mwanawe woolankha pinkuuni, othuuto ansisimuliyeeyo muufwa, Yinsa anniwerawerisaaye katapu enttelaaye ota.

Khaazi ya Paawulu sitati ya Tizaloonika

¹Attwiizaku, mweeyo mwinjuwa yoori wuuthotolani weetthu khawaari woohiina fwayita. ²Neeyiyeru pure woohikholiwi saana na ottukhaniwa sitati ya Filiipu, nkhama mweeyo mwinjuwaazo, khwa awuni ya Nluku naarina ominyala wa olaleya hapari zooshapweya za Nluku khwa mweeyo, vakatthi wa viittha ya waatta. ³Maana otumerela weetthu khunlankha nkatthi wa ovonya wala kiswaswi yoohifwayi, wala otakha ottettekha; ⁴olikha toowo, nkhama atthu ookhupaliwa ti Nluku, mpakha khuninkha olaleya hapari zooshapweya, khaninttakhula yoori niwaatuvelise atthu, ila Nluku, aninzaanaaye rooho zeetthu. ⁵Mweeyo mwinjuwa saaneene yoori mattakhuzi eetthu khahiyo ottettekha wala wuutakhani etthu. Nluku shaahiti wa epo zaya. ⁶Wala khanineekesa osifwiwa pi anaatamu, wala mweeyo ama akina.

⁷Neeyiyeru pure maaswihaapa a Al-Masiihu naarina ruhusa ya olemela, khwiiya akemaani wakathi naari vakatthi venu mweeyo, nkhama maama aniwiinanelaaye aana awe. ⁸Ninuuphetani venkivene, najilakelela owinkhani khahiyo paasi hapari zooshapweya za Nluku, ila theenya ohaayi eetthu, maana mweeyo mwaretteya wiiya aphetani eetthu saaneene. ⁹Attwiizetthu, weekhweele mweeyo mwinfikhiri khaazi yoolipa nikholiyeeyo woohishokheri vakatthi venu. Maana naari okhola osikhu na nthana, yoori nihimwantipu hatha ntthu wakathi naari olaleyaavo hapari zooshapweya za Nluku khwa mweeyo.

¹⁰Waaza Nluku mpakha mweeyo mwaamashaahiti khwa nanna ttakatthiifu neettettiyeeyo, washariya na woohishowereyi khwa mweeyo mwikhupaliyeeyo. ¹¹Maana mweeyo mwinjuwa yoori fweeyo nootthanttani wakhula mmote wa mweeyo nkhama paapa aniwaatthanttaazo aanaawe. ¹²Fweeyo ninuutumerelani, ninuuzuruni na nilazaka oshaahiti yoori mweeyo mwiikhale nanna ensuhaaye khwa Nluku, otule anuukhuwelelaanini yoori mwirette phantte muufwalume mwawe na nsiifwa mwawe.

¹³Theenya ninshukhurwele Nluku woohilikheleli, mwaasa yoori wakathi mwipwekhereliyeeyo khwa phantte yeetthu nttakhuzi la Nluku, mweeyo mwakhupalela, khahiyo nkhama nttakhuzi la anaatamu, ila khwa nanna weekhweele liiyiyeezo nttakhuzi la Nluku, linkholaaye khaazi wookhomaalavo khwa mweeyo mwikhupaliyeeyo. ¹⁴Maana mweeyo attwiizetthu, mwaretteya wiiya anamweezela a ojama wa Nluku khwa Al-Masiihu Yinsa oriiye Yudeya. Mweeyo mwahoowa khwa phantte ya atthu mwilankhaniyeeyo nti mmote, nkhama ojama wa Nluku opule nkina ohoowiyeeyo khwa phantte ya mayaahuuti, ¹⁵amuuliyeeyo Mbwana Yinsa na manapiyu, na theenya khunilupattha. Yo khanintuvelisa Nluku na maatuwi a atthu ooshi, ¹⁶ajilipisaka yoori anikhattaze owooza amalapo, yoori apo aya oosurukhe. Khwa nanna ethiito, anvira ookelaka twampi zaya na tiito katapu ya Nluku yawaakhwela haaswahaaswa yo.

Paawulu ontakha owoona opheya atizaloonika

¹⁷Nakataalikha fweeyo attwiizetthu, naphakuwana wakathi vattitthiiru khwa mwiili, ila woohiiyi khwa rooho, ninjilipisa venkivene yoori niwooneni wuuso khwa wuuso, khwa nanna ninukheliweezo ti mweeyo. ¹⁸Naatakhiye wuuthotolani. Miiyo Paawulu kaatakhiye, khahiyo swaafu moote ila zawaatta, ila sheethwani khunikhattaza. ¹⁹Nakataalikha nroromelo eetthu niini, furaha ama jarata ninjisifwanaaye omaasho wa Mbwana eetthu Yinsa khwa ota wawe? Khahiyo mweeyo? ²⁰Weekhweele mweeyo mwa siifwa yeetthu na furaha yeetthu.

¹Tiito, wakathi nahawahiyeeyo theenya ovilela, nooniye yoori afwataali wiikhala otthofwe sitati ya Ateena, ²na etthiipo, khunruma Timootiyu, ttwiiyetthu na nakhaazi wa Nluku khwa hapari zooshapweya za Al-Masiihu, yoori ookhomaazeni na wuuthuzani nkatthi wa amini, ³yoori ahiiyevo anttelaaye osakhinyiwa ti miswipa zaya epo. Maana mweeyo mwinjuwa saaneene yoori nathawuleliwa oretta etthiipo. ⁴Wakathi naari na mweeyo, naawuziyeeni yoori ninteela olupatthiwa, na khweele zarettikhana nkhama mweeyo mwinjuwaazo. ⁵Mwaasa wa ethiito, khuhivileli theenya, khunruma Timootiyu yoori alawe ajuwe monkoni wa amini mwiriinaaye. Maana miiyo kaari woova yoori namazayini ahuuzayinini, mpakha khaazi yeetthu yooshi eretteya ohiina fwayita.

Mattakhuzi ooshapweya atiisiweeyo ti Timootiyu

⁶Nakataalikha, nasaapi eti, Timootiyu ontta ofiyaru olankha ottuukho anitiisela mattakhuzi ooshapweya monkoni wa amini na pheta mwiriinaaye. Ye anuuza yoori wakhula swaafu mwinthokorela wuupuwela wooshapweya khwa fweeyo, mwitakhaka onoona, nkhama etthiipo fweeyo nintakhaazo owoonani. ⁷Tiito attwiizetthu, mattakhuzi apa monkoni wa amini yenu aretteya wiiya nlipiselo nwulweene khwa tafwawuthi na ohoowa weetthu. ⁸Aphano fweeyo ninjonana ohaayi mwinkeene maana ninjuwa yoori mweeyo mwiri woolipalipa khwa Mbwana. ⁹Nannani ninwahaaye onshukhurwela Nluku khwa furaha yooshi niriinaaye omaasho wawe mwaasa wa mweeyo? ¹⁰Osikhu na nthana ninkhanyarela olompa yoori niwahi owoonani wuuso khwa wuuso nimariselaka etile ensalelaaye khwa amini yenu.

¹¹Yoori Nluku mweenyeweene, Papeetthu, na Mbwana eetthu Yinsa, atthenkeze tarikhi yeetthu ya oteela wuuthotolani. ¹²Yoori Mbwana awulise na eekezele pheta mwiriinaaye mmote na nzeenu na atthu ooshi, khwa nthoonyezo wa pheta yeetthu na mweeyo. ¹³Yoori ye akhomaaze rooho zenu na mwiiye oohishowereyi khwa ottakatthifu omaasho wa Nluku eetthu Paapa, na khwa ota wa Mbwana eetthu Yinsa na attakatthiifu awe ooshi.

Wiikhala khwa ontuvelisa Nluku

¹Wiishela waya attwiizetthu, noonozelani nanna ya wiikhala khwa ontuvelisa Nluku, na wekhweele, mweeyo mwineettetta etthiipo. Nasaapi ninuuvekelani na ninuutumerelani mweeyo khwa Mbwana Yinsa yoori mwiwulele etthiipo theenya wakhula swaafu. ²Maana mwinjuwa oruma niwinkhiyeenini mweeyo khwa ofwalume wa Mbwana Yinsa.

³Niiya ya Nluku ti yoori mweeyo mwiiye woottakatthisiwa. Mwijiphakulane khaapa twayifu. ⁴Wakhula ntthu ajuwe weettettisa saana mwiili awe, khwa nanna woottakatthifuvo na wahishimavo. ⁵Mwihijilikhelele mwishinttiwaka pi tuvela zootakhala, nkhama amalapo ahininjuwaaye Nluku. ⁶Khwa vitthu zaya epo, ahiiyevo animoonisaaye olwaaza ttwiiye wala ahinttettekhe. Mbwana onteela ohukhumu zoorettiwa zaya epo, nkhama etthiipo naalupiyeezo na khuuchimulelani. ⁷Maana Nluku khanikhuweleeni yoori niiye oohifwayi, ila yoori niiye attakatthiifu. ⁸Nakataalikha, otule ankhijilelaaye epo zaya, khaninkhijilela pinaatamu ila Nluku, otule aniwinkhaaye Rooho Ttakatthiifu.

⁹Monkoni wa pheta ya attwi, khinihithajiya owaatikhelani, maana Nluku mweenyewe awaasomisa yoori mwina ya ophetana mmote na nzeenu. ¹⁰Maana wekhweele, mweeyo mwiniwaapheta attwi ooshi ariiye Masetooniya yooshi. Ila ninuukhanyarelani mweeyo yoori mwisala mwiretta etthiipo wakhula swaafu.

¹¹Mwijilipise yoori mwiiyane ohaayi wawiitthaala, mwiinanele zanshara zenu na mwikhole khaazi na makhono enu, nkhama etthiipo fweeyo nuunozeliyeenini, ¹²yoori mweettette wa waamineyavo omaasho wa apale ariiye oje, woohimweekeseli hatha ntthu.

Ota wa Mbwana

¹³Attwiizetthu, khanintakha yoori mweeyo mwitikhine khwa apale afwiiyeeyo, yoori mwihiiye ohuzunikha nkhama akina apale ahina nroromelo. ¹⁴Nkhama ninkhupalela yoori Yinsa afwa na asisimuwa, nakhupalela theenya yoori Nluku onlawa awaakusanye na Yinsa ooshi apale afwiyeeyo ankhupalaka ye. ¹⁵Niniwuuzani mweeyo khwa nttakhuzi la Mbwana, yoori fweeyo, niriiye haayi, niiyaruvo mpakha ota Mbwana, wekhweele khaninlawa owaalokozela apale afwiiyeeyo. ¹⁶Khwa alama ya oruma na huula ya nttunkhulu wa malayikha na ovuma wa nlope la Nluku, Mbwana mweenyeweene, oniishukha pinkuuni. Apale aafwiyeeyo ankhupalaka Al-Masiihu anttela osisimuwa mwanzo. ¹⁷Nawiisha, fweeyo ninttelaaye wiiya haayi, ninteela othuuliwa nilawaniwaka mmawiku vamote na atthaapo yoori nakutthanane Mbwana otulu. Etthiipo ninttela wiiya vamote na Mbwana mileele. ¹⁸Nakataalikha mwitumerelane mmote na nzeenu khwa mattakhuzi apa.

¹Attwiizaku, monkoni wa siikhu ama wakathi, khinihithajiya owaatikhelani. ²Maana mweeyo mwinjuwa saaneene yoori Siikhu ya Mbwana enta nkhama nantarawu osikhu. ³Amana atthu alupa yoori: “Vitthu zooshi pi za wiitthaala na zoolipaneya,” otapanyeya onta woohirupazi, nkhama olwaaza wa ovokola wa muukha, na hatha vattitthiiru khanteela ovukha.

⁴Ila mweeyo attwiizetthu, khamwiri n’yiiza, yoori siikhu eto yuusutiseni nkhama nantarawu. ⁵Mweeyo mooshi mwa aana a nnuuru, aana a nthana. Fweeyo khahi na aana a osikhu wala a n’yiiza. ⁶Nakataalikha, nihilale nkhama akinoko aya, ila niiye woojeekesela na woojipayini. ⁷Maana apale anlalaaye, anlala osikhu, na apale anhapaliwaaye, anhapaliwa osikhu. ⁸Olikha toowo, fweeyo niiyiyeeyo a nthana, niiye woojipayini, niwale amini na pheta nkhama jaketa na nroromelo wa nusura nkhama koofiya. ⁹Maana Nluku khanitthomeleeni katapu, ila yoori nipwekherele nusura khwa vakatthi wa Mbwana eetthu Yinsa Al-Masiihu. ¹⁰Ye afwa khwa fweeyo, hatha nkhama neetta wiiya haayi ama neetta ofwa, niikhale woojikusanya khwa ye. ¹¹Tiito, mwitumerelane na mwaawunane mmote na nzeenu, nkhama etthiipo mwinrettaazo.

Onozela wa wiishela

¹²Apho attwiizetthu, ninuuvekelani yoori mwiwaashitahi apale anjilipisaaye okhola khaazi vakatthi venu, anuulokozelaanini khwa Mbwana na anuulakaanini. ¹³Mwiwaashireheze venkivene na pheta, mwaasa wa khaazi yaya. Mwiikhale khwa heeri mmote na nzeenu. ¹⁴Ninuutumerelani mweeyo attwiizetthu, yoori mwiwaahirimize anamaviliwa, mwiwaalipisele apale ooshokhera, na mwiwaawuni apale ootteettheya, mwiwaavilele atthu ooshi. ¹⁵Mwiiyane phoole yoori ahiiyevo anriphaaye yootakhala khwa yootakhala, ila mwiiye akemaani mileele mmote na nzeenu na khwa atthu ooshi.

¹⁶Wakhula wakathi mwifurahi. ¹⁷Mwilompe woohilikheleli. ¹⁸Mwishukhurwele wakhula enuupatthaanini, maana apo matakhelo a Nluku khwa mweeyo mwaasa wookusanyeya na Al-Masiihu Yinsa.

¹⁹Mwihizimise Rooho Ttakatthiifu. ²⁰Mwihitarawu ohupiri. ²¹Mwinzaani vitthu zooshi na mwithokorele etile yiiyiye yooshapweya. ²²Mwiphakuwanane vitthu zooshi zootakhala.

²³Yoori Nluku mweenyewe heeri oottakatthiseni sawasawa. Yoori rooho yooshi, nafusi na mwiili enu mweeyo ziiye zawiinaneliwa zoohishowereyi mpakha ota wa Mbwana eetthu Yinsa Al-Masiihu. ²⁴Otule anuukhuwelanini ti wa waamineya na onteela oretta epoza zaya.

²⁵Attwiizetthu, mwinilompele fweeyo. ²⁶Mwiwaachelise atthu ooshi na salamu ttakatthiifu. ²⁷Omaasho wa Mbwana, kinuukhanyarelani mweeyo osoma warakha eti khwa attwi ooshi.

²⁸Rehema ya Mbwana eetthu Yinsa Al-Masiihu yiiye vamote na mweeyo.