1 Pheeturu

Warakha ya mwanzo aatikhiyeeyo

Pheeturu

Salamu

¹Miiyo Pheeturu, aswihaapa wa Yinsa Al-Masiihu, kiniwaatikhela warakha eti ananthawuliwa a Nluku amwazeyeliyeeyo nti wa Pontu, Kalaasiya, Kapatosiya, Aaziya na Bitiiniya, ²athawuliweeyo khwa matakhelo a ojuwa wa Nluku Paapa khwa khaazi ya ottakatthisa ya Rooho Ttakatthiifu, yoori anshututele Yinsa Al-Masiihu, na wiittikha wa taamu yawe:

Rehema na heeri ti yeekezeliwe.

Siifwa ya Nluku khwa nroromelo wawiiyavo

³Asifwiwe Nluku, Paapa wa Mbwana eetthu Yinsa Al-Masiihu! Khwa owula wa tthakaraka yawe, ye anikaphula khuninkha nroromelo wawiiyavo khwa osisimuwa wa Yinsa Al-Masiihu vakatthi wa ananfwa, ⁴yoori neeyane erathi ehinaashikhaaye, yoohiina hatha nlepa na ehinthuwaaye fwayita yaya. Erathi etile epwehiweeyo pinkuuni yoori yiiye yenu, ⁵khwa amini mwakholeleliwa ti owahi wa Nluku mpakha ota nusura entakhaaye othoonyeziwa wakathi wa mwiisho. ⁶Mwifurahele ethiito, nalelo enasaapi ti, khwa wakathi vattitthiiru, mwinteela ohuzunikhisiwa ti wakhula nanna ya wootootiwa. ⁷Enrettikhana etthiipo, yoori yooniwe amini mwiriinaaye ya fwayita zayita weero enaashikhaaye hatha nkhama yeetta ofuliwa ti moottho, amini yenu enihithajiya wooniwa nkhama ti yookamilikha. Toowo phi mwinipokheraavo siifwa, ottitthima na hishima, siikhu Yinsa Al-Masiihu anttelaaye othoonyeziwa. ⁸Hatha nkhama mweetta ohimooni, mweeyo mwinimpheta, na hatha nkhama mwintta ohimooni nasaapi eti, mwankhupali mwintthapa na furaha ehinlupeyaaye ya ottitthima, ⁹maana mweeyo mwimpattha nusura yiiyiyeeyo mwiisho wa amini yenu.

¹⁰Yaari monkoni wa nusura ethiito, manapiyu eekesiyeeyo khwa phoole khuthola yoori ajuwe. Yo khulupa rehema mwatthomeliweeyo, ¹¹eekesaka ojuwa wakathi na vitthu zinttelaaye orettikhana etthiipo zaari othoonyaaye Rooho ya Al-Masiihu, etile yaari khwa yo, ewenkhaka ohupiri monkoni wa ohoowa wa Al-Masiihu na siifwa zaari weettelaaye olottela ohoowa opule. ¹²Yo athoonyeziwe yoori khaazi aari okholaaye khayaari yaya ennyewe, ila yaari yenu mweeyo, wakathi aari olupaavo vitthu mwilaleyeliweeyo nasaapi eti pi apale antafusiraaye hapari zooshapweya khwa Rooho Ttakatthiifu eperekhiweeyo pinkuuni; vitthu hatha malayikha antakhaaye woona venkivene.

Otumereliwa monkoni wa ottakatthifu

¹³Nakataalikha mwiiyane akhili zootthenkezeya, oolikana khwa oretta, mwiiye oojisiileza na nroromelo enu wooshi mwitthe nkatthi wa rehema mwinttelaaye winkhiwa amana Yinsa Al-Masiihu athoonyeziwa. ¹⁴Nkhama aana oshututi, mwihijilipisane tuvela zootakhala za raku, za wakathi opule mwaari wiikhalaaye woohijaliwi. ¹⁵Ila nkhama etthiipo eeyiyeezo ttakatthiifu otule ookhuweliyeenini, theenya mweeyo mwiiye attakatthiifu khwa zooretta zenu zooshi, ¹⁶maana yaatikhiwa yoori: “Mwiiye attakatthiifu maana miiyo ki ttakatthiifu.”1:16 Woone kithaapu ya Leviitiku 11:44-45; 19:2; 20:7.

¹⁷Amana mwilompaka mwininkhuwela Paapa, otule amphukaaye sawasawa khaazi ya wakhula ntthu, mwinshitahi ye khwa ohaayi enu va olumwenku apha. ¹⁸Maana mweeyo mwinjuwa yoori khahiyo khwa vitthu ziniishaaye, nkhama feeta ama weero, mwikaphuleliweeyo khwa ohaayi opule woohiina fwayita mwaavalisiweeyo ti amarehemu apapazenu, ¹⁹ila khwa taamu yootafikhana ya Al-Masiihu, nkhama ya pwittipwitthi yoohiina nlepa wala yoohirakali. ²⁰Ye athawuliwa ti Nluku khapulathi olumwenku ohinompiwe, ila khuthoonyeziwa wakathi opu wa mwiisho khwa zwaamu yenu mweeyo. ²¹Khwa ye mweeyo mwankhupali Nluku, otule ansisimuliyeeyo muufwa na khunttitthimisa, khwa nanna yoori amini na nroromelo enu wiiye khwa Nluku.

²²Aphano mweeyo mwitwahareshiyeeyo ohaayi enu, khwa oshututela haakhi, mwithoonyezaka pheta ya ottwi na ya ookhweele, mwiphetane saaneene mmote na nzeenu na rooho yenu yooshi. ²³Khwa etthiipo mwivokoliweeyo opheya, woohiiyi khwa peewu enaashikhaaye, ila ehinaashikhaaye, khwa nttakhuzi la Nluku, la ohaayi na la mileele. ²⁴Nkhama enlupaazo Zawaatikhiwa Ttakatthiifu:

“Anaatamu ooshi ari nkhama nyaani,

na siifwa yaya yooshi eri nkhama maluwa a nyaani.

Nyaani ennyaala,

maluwa aya khukwa,

²⁵ila nttakhuzi la Mbwana, tthi la mileele”.1:25 Woone kithaapu ya Ezaaya 42:6-8.

Nttho ti nttakhuzi mwitafusireliweeyo.

Liwe haayi na atthu oothawuliwa

¹Nakataalikha, mwilikhe vitthu zootakhala zooshi na ottettekha wooshi, onaafikhi, nrima na wakhula nanna ya ohankawaani. ²Nkhama aana atteetthe, mwihithajiye leethi swaafi ttakatthiifu la nroho, yoori khwa nttinttho mwiwulele nusura, ³aphano moota yoori Mbwana ti wooshapweya.

⁴Khwa khiima mwinimwaattamaaye ye, liwe haayi likatthaliweeyo pi anaatamu, ila lithawuliweeyo ti Nluku na lootafikhana khwa ye, ⁵mweeyo theenya mwinrumeyeliwa nkhama mawe haayi khwa ojekaniwa nyuupa ttakatthiifu, yoori mwipatthe onamalokozela wa tiini ttakatthiifu, mwinkhaka twaha ttakatthiifu yookhupaleliwa ti Nluku vakatthi wa Yinsa Al-Masiihu. ⁶Maana etthiipo zalupa Zawaatikhiwa Ttakatthiifu yoori:

“Moone yoori kinttha khwa Siyoni

liwe linkhomaazaaye, loothawuliwa na lootafikhana,

na otule ankhupalaaye khinteela ompattha haaya theenya.”2:6 Woone kithaapu ya Ezaaya 28:16.

⁷Nakataalikha, khwa mweeyo mwikhupaliyeeyo, liwe laya ntthi tthi lootafikhana; ila, khwa apale ahinkhupalelaaye,

“Liwe anamajeka akatthaliyeeyo

nttho laya laretteya wiiya liwe linkhomaazaaye,”2:7 Woone kithaapu ya Zaapuura 118:22.

⁸na,

“Liwe lookwakwanttula

na liwe linkwisaaye.”2:8 Woone kithaapu ya Ezaaya 8:14.

Yo ankwakwanttuwa mwaasa akhijilela hapari, maana piitthiipo atthomeliweeyo.

⁹Nakataalikha, mweeyo mwa peewu yoothawuliwa, onamalokozela wa tiini wa mfwalume, khapila ttakatthiifu, atthu mwiiyiyeeyo a Nluku, yoori mwilaleye owula wa otule ookhuweliyeenini n’yiiza khuutthaani nnuuru mwawe wooshwapweyamo. ¹⁰Raku mweeyo hatha vattitthiiru khamwaari atthu awe, ila aphano mwa atthu a Nluku; mwaari mwihinapwekherele tthakaraka, ila aphano mwapwekherela.

Menttezi a namalottela a Yinsa

¹¹Aphetani aka, kinuutumerelani nkhama aletto na anamasaafiri a va olumwenku, mweeyo mwina ya wanswi tuvela za onaatamu etthiipo zinuumananaaye nafusi. ¹²Mwiikhale nkhama nthoonyezo vakatthi wa makaafiri, yoori hatha nkhama yo antta wuulokovezani oretta vitthu zootakhala, oone khaazi zenu zooshapweya na anttitthimise Nluku siikhu yoophukiwa.

¹³Mwaasa wa Mbwana, mwishitahi ofwalume wooshi enkhiweeyo anaatamu; waaza mfwalume ariina yenzi khuluyeene, ¹⁴mpakha misatoro zithawuliweeyo ti ye yoori ziwaahukhumu anamaretta zootakhala na owaattottopela apale anrettaaye saana. ¹⁵Maana niiya ya Nluku mweeyo oretta saana, yoori mwinyamaze ohijaliwi wa alolo. ¹⁶Mwiikhale nkhama atthu ootaphuliwa, ila mwihirumeyele otaphuliwa nkhama nswammaha wa orettana vitthu zootakhala; ila mwiikhale nkhama akarumeya a Nluku. ¹⁷Mwiwaatthantte atthu ooshi khwa shitaha, mwiwaaphete attwi, mwimoove Nluku, na mwinshitahi mfwalume.

¹⁸Akarumeya, mwiwaashitahi ambwana zenu na shitaha yooshi, khahiyo apale paasi anrettaaye saana na oosiilaneya, ila theenya apale ahinuutthanttanini saana. ¹⁹Maana eto siifwa, mwaasa wa akhili mwiriinaazo khwa Nluku, ntthu ona ya ovilela huzuni za ohoowa woohiivo shariya. ²⁰Khina fwayita ovilela ojaphiwa mwaasa wa oretta vitthu zootakhala. Ila weeyo amana ovilela ohoowa mwaasa wa oretta saana, eto siifwa omaasho wa Nluku. ²¹Tithiito mwikhuweleliweeyo, maana Al-Masiihu ahoowa khwa zwaamu yenu mweeyo, alikhaka nthoonyezo, yoori mweezele mwentto awe.

²²“Ye kharetteeni hatha twampi moote,

na wala khusaruweenimo ottettekha mmote nkhanyo mwawe.”2:22 Woone kithaapu ya Ezaaya 53:9.

²³Wakathi aari ottukhaniwaavo khaari orutisa; wakathi aari ohowaavo khaari otuturusha, ila aari ojinkha wa otule amphukaaye khwa shariya. ²⁴Ye mweenyeweene athuula mmwiili mwawe twampi zeetthu vansalapa, yoori nifwe khwa twampi na niikhale khwa shariya. Khwa makhwatta awe mweeyo mwavonisiwa. ²⁵Maana mweeyo mwaari nkhama pwittipwitthi zoothowelela, ila aphano mwarutela wa Nshuki enu na Nttunkhulu nwulu wa nafusi zenu.

Meekhazi a anamaralana

¹Khwa nanna etthiipo, mweeyo aakha mwina ya owaashitahi amanna zenu, yoori nkhama yo khankhupalela nttakhuzi la Nluku, afiyelele okhupali mwaasa wa menttezi enu, woohuuziwi hatha nttakhuzi, ²maana yo anttela woona menttezi enu a waamineya na shitaha. ³Oshapweya weenu mweeyo ohiiye wa vitthu za oje, nkhama ovaasha nyuuli na owala mikufu za weero, ama kuwo zooshapweya. ⁴Olikha toowo, oshapweya weenu mweeyo ona ya wiiya nroho, maana opo khunaashikha; oshapweya onthoonyezeya khwa rooho ya ojipushuwisa na yawiitthaala, ona fwayita khuluyeene omaasho wa Nluku. ⁵Maana pi etthiipo theenya aari ojijirisaaye aakha ttakatthiifu araku, aari onroromelaaye Nluku. Yo aari ojinkha mmakhono wa amanna zaya, ⁶nkhama Suhura aari onshututelaazo Eburahiima, khusala amwiittha yoori mbwanaaka. Mwinttela wiiya aana awe, amana mwirettaka zooshapweya woohoovi hatha etthu.

⁷Khwa etthiipo, mweeyo alume, mwiiyane ojuwa khwa wiikhala na aakha enu na mwiwaatthantte wahishimavo nkhama phantte ya ottettheya channu, maana yo anamarithi vamote na mweeyo, rehema ya ohaayi, yoori zihitapwateleye lompa zenu.

Ohoowa mwaasa wa oretta saana

⁸Omwiisho waya, wuupuwela weenu wiiye nanna moote, ohurumiyana, mwithoonyezaka pheta ya ottwi, mwiiye awoonelana tthakaraka na oojipushuwisa. ⁹Yootakhala mwihiriphe khwa yootakhala, wala mattukhano khwa mattukhano; olikha toowo mwijipu khwa mattakhuzi a parakha, maana mwakhuweliwa yoori mwirette etthiipo, yoori mwipwekherele parakha khwa erathi. ¹⁰Nkhama enlupaazo Zawaatikhiwa Ttakatthiifu yoori:

“Otule antakhaaye opheta ohaayi

na wiikhala woofurahi,

athokorele nlimi lawe khwa vitthu zootakhala

na nlomo awe khwa vitthu zoohata.

¹¹Owerawere vitthu zootakhala na orette vitthu zooshapweya;

weekese heeri khwa nthiti.

¹²Maana maasho a Mbwana ari khwa atthu apale a shariya

na mashiilo awe ansiileza lompa zaya,

ila Mbwana oniwaanoza enyokonyoko apale anrettaaye vitthu zootakhala.”3:12 Woone kithaapu ya Zaapuura 34:12-16.

¹³Khina anttelaaye wuurettelani yootakhala amana mweeyo mwirettaka zooshapweya na kuvu zenu zooshi. ¹⁴Khwa zooshi, hatha nkhama mwintta ohoowa mwaasa wa weettettisa shariya, mweeyo mwinttela wiiya oparikhiyiwa. “Mwihoove epile yo anoovaaye, mwihisuthuwe.”3:14 Woone kithaapu ya Ezaaya 8:12-13.¹⁵Khapulathi, mwimwinkhe hishima Al-Masiihu nroho mweenu nkhama Mbwana. Wakathi wooshi mwiiye woojitthenkeza yoori mwinjipu wakhula otule anuuvekelaanini weeleziwa monkoni wa nroromelo mwiriinaaye. ¹⁶Khwa zooshi, mwirette epo khwa emaani na shitaha mwithokorelaka akhili zooshapweya, khwa nanna yoori apale anttakhulaaye wootakhalavo khwa menttezi enu ooshapweya khwa Al-Masiihu, ewaapatthe haaya na ohankawaani aya. ¹⁷Afwataali ohoowa mwaasa wa oretta yooshapweya amana eeya matakhelo a Nluku, ehiyeeni ohoowa mwaasa wa oretta yootakhala.

¹⁸Maana Al-Masiihu ahoowa swaafu moote mwaasa wa twampi zenu, nashariya khwa apale oohiina shariya, yoori oofiyiseni wa Nluku. Khuuliiwa mwiili awe, ila khwiiya haayi khwa Rooho. ¹⁹Khwa kuvu za Rooho Ttakatthiifu, ye atafusirela rooho zaari zoofukeliwa. ²⁰Epo zaari rooho za apale ahaari onshututelaaye Nluku, wakathi ye aari oweejaaye na ovilela siikhu epile Nuuhi aari omwaattalaavo aaraka. Eettiyemo atthu vattitthiiru, oosheene aari wanaane pi oosurukhiyeeyo khwa maati. ²¹Nasaapi eti maati apo anthoonyeza njampo la woosa liniwuusurwaanini mweeyo, khahiyo mwaasa wa olaza ttaakha za mwiili, ila khwa ahiti ya akhili zooshapweya mmakhono wa Nluku khwa osisimuwa wa Yinsa Al-Masiihu, ²²aweliyeeyo pinkuuni na ori nkhono nlume wa Nluku; ye onlokozela malayikha, ofwalume na owahi wooshi.

Meekhazi oozukulisiwa

¹Nakataalikha, nkhama etthiipo Al-Masiihu ohoowiyeevo mwiili awe, theenya wuupuwela weenu mwitthenkeze nanna moote, maana otule ahoowiyeeyo khwa mwiili awe onlikha oshinttiwa ti twampi, ²yoori wakathi opo onuusaleelanini, mwihiikhale theenya mwilottelelaka tuvela zootakhala za onaatamu, ila oretta etile yiiyiye niiya ya Nluku. ³Maana raku mwaharipu wakathi mwinkeene mwirettaka epile eniwaatuvelaaye makaafiri. Wakathi aya opule mwaari wiikhala nkatthi wa khaapa twayifu, tuvela za onaatamu, ohapaliwa, osokho, majampo ohapaliwiwa na waaputu sanamu. ⁴Nasaapi eti, makaafiri anuushankelani amana mweeyo mwihikusanyeyaka na yo khwa ohaayi wootakhala na wa khaapa twayifu, tiito yo anuuttukhanaani. ⁵Khwa zooshi, yo anlawa anjipu otule ari thwayaari owaaphuka apale ariiye haayi na ananfwa. ⁶Khwa etthiipo hapari zooshapweya atafusireliwa theenya ananfwa yoori yo hatha nkhama eetta ophukiwa khwa mwiili wa onaatamu, eekhale khwa Rooho, nkhama Nluku antakhaazo.

⁷Mwiisho wa vitthu zooshi waattama. Nakataalikha mwiiye aakhili na woojisiileza; mwijilipisane olompa. ⁸Khwa zooshi, mwiphetane weekhweelevo wakhula mmote na nzeenu, maana pheta enswaamihi twampi zawaatta. ⁹Mwiiye atthu oomakeleya, woohijilizi khwa hatha etthu. ¹⁰Mwirumeyelane mmote na nzeenu, wakhula ntthu khwa tthuvo enkhiweeyo, mwirumeyelaka wa wawamineyavo rehema ya Nluku etile mwipwekheriyeeyo khwa nanna nannazene. ¹¹Otule anttakhulaaye, attakhule nkhama antafusiraaye nttakhuzi la Nluku; otule anrumeyaaye ti arumeye khwa kuvu enkhiweeyo ti Nluku, yoori khwa vitthu zooshi Nluku asifwiwe khwa Yinsa Al-Masiihu, otule eeyiye ottitthima na owahi khwa mileele. Amiina.

Ohoowa mwaasa wa wiiya namalottela wa Yinsa

¹²Aphetani aka, mwihisutisiwe ti tafwawuthi empuwaaye vakatthi venu nkhama moottho yoori ewoototeni, nkhama etthu yootikinisa enuupuwelaanini. ¹³Ila mwifurahi mwaasa wa oretta phantte ya ohoowa wa Al-Masiihu, yoori amana ottitthima wawe othoonyeziwa, mweeyo mwitthape khwa furaha khuluyeene. ¹⁴Nkhama mwintta ottukhaniwa mwaasa wa nzina la Al-Masiihu, mwa wooparikhiyiwa, maana Rooho ya ottitthima yiiyiye Rooho ya Nluku entthuluza khwa mweeyo. ¹⁵Nkhama vakatthi venu owaapho anihoowaaye, aheetteeni wiiya namahusuti, nantarawu, nazompere ama ojittha nzanshara zohiiyi zawe. ¹⁶Khwa zooshi, nkhama onhoowa mwaasa wa wiiya namalottela wa Al-Masiihu, ehimpatthe haaya, ila ansifu Nluku mwaasa wiiyana nzina la onamalottela wa Al-Masiihu. ¹⁷Maana wafiya wakathi wa waaziwa ophukiwa nyuupa ya Nluku, na nkhama enaaza khwa fweeyo, onttela wiiya woolipa mwiisho wa apale ahinshututelaaye hapari zooshapweya za Nluku.

¹⁸“Nkhama ti yoolipa wuusurukha nashariya,

makaafiri na anatwampi anttela wiiya toovi?”4:18 Woone Kithaapu ya Kittaphi 11:31.

¹⁹Tiito, theenya apale anihoowaaye khwa niiya ya Nluku, ana ya winkhelela ohaayi aya mmakhono wa Namumpa wa waamineya, khwa oretta zooshapweya.

Attunkhulu a ojama wa Nluku na mashaapu

¹Miiyo, theenya kiiyiyeeyo nttunkhulu wa ojama wa Nluku, kiniwaahirimiza attunkhulu a ojama wa Nluku ari vakatthi venu mweeyo. Ki shaahiti wa ohoowa wa Al-Masiihu na kinttela oretta phantte ya ottitthima onttelaaye othoonyeziwa: ²Mwishuke liphanko la Nluku mwinkhiweeyo otthantta saana, khahiyo khwa okhanyareliwa, ila khwa niiya yooshi nkhama Nluku antakhaazo. Mwihirette khwa omaashokopho, ila khwa niiya ya orumeya. ³Mwihijirette wiiya anamashintta wa apale mwiniwaalokozelaaye ila mwiiye nthoonyezo wa liphanko laya nttho. ⁴Amana ata Nshuki Nwulu, mweeyo mwinteela opwekhera jarata ya siifwa ehinishaaye waara waya.

⁵Khwa nanna ethiito, mashaapu awaashitahi attunkhulu. Mooshi mwiiye ojipushuwisa mmote na nzeenu,

maana Nluku khantuveliwa pi apale oojikhupali,

ila oniwenkha rehema apale oojipushuwisa.5:5 Woone Kithaapu ya Kittaphi 3:34.

⁶Nakataalikha, mwijipushuwise vathi wa nkhono wa owahi wa Nluku, yoori ye oolanseleni khwa wakathi khaamili. ⁷Mwimwinkhelele shukuli zenu zooshi, maana ye onuutthanttani mweeyo.

⁸Mwiiye oojisiileza na mwijeekesele. Sheethwani, atuwi enu, onzukulela akulumaka nkhama siipa amweekesaka ntthu yoori amwankameze. ⁹Muumanane na mwilipalipe nkatthi wa amini, mwijuwaka yoori attwi enkeene mwiriina olumwenku wooshi na yo anhoowa etthiipo.

¹⁰Nluku wa rehema yooshi, othuuto ookhuweliyeenini yoori mwirette phantte ya siifwa yawe ya mileele khwa Al-Masiihu Yinsa, paata ya ohoowa khwa wakathi vattitthiiru, othuuto onteela wuukaphulani, wuuhakikhini, wuukhomaazani na owinkhani nchina loolipaneya. ¹¹Owahi ori khwa ye mileele. Amiina.

Salamu zawiishela

¹²Khwa awuni ya Siila, othuuto kinimonaaye wiiya ttwi wa waamineya, miiyo kawaatikhelani khwa mattakhuzi vattitthiiru, kuulipiselakani na kilazaka oshaahiti yoori eti rehema ya ookhweele ya Nluku. Mwiiye woolipalipa nrehema ya Nluku. ¹³Ojama wa Nluku oriiye Babilooniya, othawuliweeyo ti Nluku, onuuperekhezani salamu, na theenya mwanaka Maaruku onuuperekhezani salamu. ¹⁴Mwichelisane mmote na nzeenu na salamu ttakatthiifu.

Heeri yiiye khwa mooshi mweeyo mwiri khwa Al-Masiihu.