1 Yaahaya

Warakha ya mwanzo aatikhiyeeyo

Yaahaya

Nttakhuzi la ohaayi

¹Niniwaatikhelani monkoni wa Nttakhuzi la ohaayi, nttinttho laariivo thanku waaza woolumwenku, ti othuutu ninsiiliyeeyo na nimooniyeeyo na maasho eetthu na ninsapiyeeyo na makhono eetthu. ²Ohaayi wajithoonyeza; fweeyo noona na ninlawela oshaahiti na nawuuzani mweeyo monkoni wa ohaayi wa mileele, aariina Paapa na nathoonyeziwa. ³Fweeyo nawuuzani epile nooniyeezo na nisiiliyeezo, yoori na mweeyo mwiiyane osiilana na fweeyo, na osiilana weetthu ori khwa Paapa na Mwanawe Yinsa Al-Masiihu. ⁴Nawaatikhelani vitthu epi yoori fweeyo niiyane furaha khaamili.

Weettetta nnuuru

⁵Hapari ninsiiliyeeyo na khuufiselani mweeyo pi epo: Nluku nuuru, vakatthi vawe khiniiyavo hatha yiiza. ⁶Amana nilupaka yoori Nluku nina vamote na okhuno neettettaka n’yiiza, nintta olokova na khaninlotta haakhi. ⁷Ila amana neettetta nnuuru, nkhama ye ariiye nnuuru, phi ninthokorelaavo osiilana mmote na nzeetthu, na taamu ya Mwanawe Yinsa entta oniswafi twampi zeetthu zooshi. ⁸Nkhama ninjilupeza ohiina twampi, nintta ojittettekha na nkatthi mweetthu khayiimo haakhi, ⁹ila amana nitukhuru twampi zeetthu, Nluku tu wawaamineya na wa shariya, ontta oniswaamihi twampi zeetthu na aswafi zooshi zohiiyi za shariya. ¹⁰Nkhama ninjilupeza ohiina hatha twampi moote, toowo nininretta Nluku wiiya namahata, na nttakhuzi lawe khaliri nkatthi mweetthu.

Yinsa onaawuni

¹Aanaaka, mattakhuzi apa kiniwaatikhelani mweeyo yoori mwihisala mwiretta twampi. Ila ntthu arettaru twampi, ninaaye namwaakisa mmakhono wa Paapa, Yinsa Al-Masiihu nashariya. ²Ye swamiima wa twampi zeetthu, khahiyo zeetthu paasi, ila theenya khwa twampi za olumwenku wooshi.

³Onjuwa weetthu Yinsa onjuweya amana nishututela oruma wawe. ⁴Otule anraaye: “Miiyo kininjuwa” ila ahishututelaka oruma wawe namahata, na haakhi khiri vamote na ye. ⁵Ila ntthu anshututelaaye mattakhuzi awe, oto khweele pheta ya Nluku yankamilikhela vakatthi vawe. Khwa ethiito, ninjuwa yoori niri khwa ye: ⁶otule anraaye onlipana ye, oto ona yaweettetta nkhama ye eettettiyeezo.

Oruma mpheya

⁷Aphetani aka, akiniwaatikhelani oruma mpheya, ila oruma wa raku, otthuupo mwiriina omwanzo: oruma otthuupo wa raku pi hapari mwisiiliyeeyo. ⁸Nakataalikha, miiyo kiniwaatikhelani oruma mpheya, otthuupo wiiyiyeeyo wa haakhi khwa Al-Masiihu na khwa mweeyo, maana wafiya wakathi wa wiisha yiiza, na nuuru ya haakhi entta waara.

⁹Otule anraaye oneettetta nnuuru, ila khusala eephiiriwa ti ttwiiye, oto aya nalelo ori n’yiiza. ¹⁰Wakhula otule animphetaaye ttwiiye onlipana nuuru, na varoho vawe khayiivo hatha etthu eninkosisaaye. ¹¹Ila otule aniiphiiriwaaye ti ttwiiye, oto aya nalelo ori n’yiiza na oneettetta n’yiiza, khanjuwa ohali aneettaawo, maana yiiza yoomisa maasho awe.

¹²Miiyo kiniwaatikhelani mweeyo aanaaka,

maana twampi zenu zaswaamihiwa, mwaasa wa rehema ya Yinsa.

¹³Apaapa, miiyo kiniwaatikhelani mweeyo,

maana mwininjuwa otule ariivo thanku omwanzweene.

Mashaapu, kiniwaatikhelani mweeyo,

maana mwanshintta ntakhali.

¹⁴Aanaaka, kawaatikhelani maana mwanjuwa Paapa.

Apaapa, kawaatikhelani maana mwininjuwa otule ariivo thanku omwanzweene.

Mashaapu, miiyo kawaatikhelani

maana mweeyo mwa wookhomaala, na khwa mweeyo nttakhuzi la Nluku mwilipane na mwanshintta ntakhali.

Ohuutuveleni olumwenku

¹⁵Ohuutuveleni olumwenku wala vitthu ziriimo muulumwenku. Nkhama ntthu ompheta olumwenku, pheta ya Paapa khiri vamote na ye. ¹⁶Maana zooshi ziriiye voolumwenku, omaashokopho wa mwiili, omaashokopho wa maasho, ojikhupali na maali; epo zaya khinlankha wa Paapa, ila voolumwenku. ¹⁷Olumwenku oniisha na omaashokopho aya; ila otule anrettaaye epile Nluku antakhaaye, ontta olipana ohaayi wa mileele.

Ohupiriwa monkoni wa atuwi wa Al-Masiihu

¹⁸Aanaaka, mwijuwe yoori opu wakathi wa mwiisho; nkhama etthiipi mwisiiliyeezo oriwa onteela ota atuwi wa Al-Masiihu, aphano maatuwi a Al-Masiihu awaatta ampuwelela. Ti etthu ninjuwelaaye yoori opu wakathi wa mwiisho. ¹⁹Yo alaavo vakatthi veetthu, nakataalikha apo aya khaari eetthu; maana eriwaka eettiye wiiya eetthu eetta onipharelela na fweeyo; yo alaavo yoori athoonyeze yoori ooshi khaari eetthu.

²⁰Ila mweeyo mwapokhera othawaziwa onlankhaaye khwa Rooho Ttakatthiifu na mooshi mweeyo mwinjuwa. ²¹Miiyo akiniwaatikhelani mwaasa wa woohijuwi haakhi, maana mwinjuwa, na khawiivo hatha ohata mmote onlankhaaye vakatthi wa haakhi. ²²Namahata paani? Ti otule anlupaaye yoori Yinsa khahiyo Al-Masiihu. Othuuto tiye eeye atuwi wa Al-Masiihu, aninkatthalaaye Paapa na Mwaana. ²³Wakhula otule aninkatthalaaye Mwaana khari vamote na Paapa; ila otule anintukhurwaaye Mwaana, ona vamote na Paapa.

²⁴Mwilipane olottisela nttakhuzi looshi ntthile mwisiiliyeeyo waaza omwanzo ene. Amana mwilipana epile mwisiiliyeeyo waaza omwanzo ene theenya phi mwinlipanaavo Mwaana na Paapa. ²⁵Eti ahiti ye aniretteliyeeyo, ohaayi wa mileele.

²⁶Kiniwaatikhelani vitthu epi monkoni wa apale antakhaaye wuuthowelelisani. ²⁷Ila othawaziwa opu mweeyo mwipwekheriyeeyo khwa ye olipe khwa mweeyo, na khamwinihithajiya osomisiwa ti hatha ntthu. Othawaza wawe wiiyiyeeyo haakhi na woohivonyeyi onuusomisani vitthu zooshi, tiito, mwilipane otthuupo nkhama etthiipo ye oosomisiyeenini.

Aana a Nluku

²⁸Aphano aanaaka, mwilipane ye, yoori amana ofiya wakathi awe woota nipatthe ororomela, na nihiiye woopatthiwa ti haaya siikhu antaavo.

²⁹Nkhama mweeyo mwinjuwa yoori ye nashariya, mwijuwe theenya yoori wooshi otule aneettettelaaye shariya avokoliwa ti ye.

Nluku nttakatthifu, theenya aana awe ana ya wiiya attakatthiifu

¹Moone nanna ewuliyeezo pheta Paapa aninkhiyeeyo, yawiitthiwa aana a Nluku, khweele na aana a Nluku. Tiito olumwenku ohinnijuwaaye, maana olumwenku khuninjuwa Nluku. ²Aphetani aka, nasaapi eti naana a Nluku, ila nalelo khannathoonyeziwe niini ninttelaayo wiiya. Ila ninjuwa yoori amana ajithoonyeza, ninttela wiiya nkhama ye, maana ninteela omoona nanna ariizo. ³Wakhula otule ariina nroromelo opu ajittakatthise nkhama etthiipi naye eeyiyeeyo woottakattha.

⁴Wakhula otule anrettaaye twampi onvonya kano za Nluku. Weekhweele, oretta twampi oniiya ovonya kano. ⁵Na mweeyo mwinjuwacha yoori Yinsa aateeliye opakusa twampi zeetthu, na khwa ye khiniiyavo twampi. ⁶Wakhula otule anlipanaaye ye, khanrutela oretta twampi. Wakhula otule anrutelaaye twampi, oto aya khamooneeni wala khanjuweeni.

⁷Mweeyo aanaaka, mwihinlikhelele ntthu oohatakani. Wakhula otule aneettettisaaye shariya nashariya, nkhama etthiipi naye eeyiyeeyo nashariya. ⁸Otule anrettaaye twampi oto ntthu wa sheethwani, maana sheethwani namaretta twampi thanku omwanzo. Ti swapwapu yooperekhiwa Mwaana wa Nluku yoori ate apweche khaazi za sheethwani. ⁹Wakhula otule avokoliweeyo ti Nluku khanretta twampi, maana ojama awe onlipa khwa ye. Oto khanwahi orutela weettetta ntwampi maana avokoliwa ti Nluku. ¹⁰Etthiipo phi anjuweyaavo apale eeyiye aana a Nluku na apale eeyiye aana a sheethwani: otule ahineettettisaaye shariya oto khahi wa Nluku na otule ahinimphetaaye ttwiiye pi etthiipo.

Mwiphetane mmote na nzeenu

¹¹Hapari mwisiiliyeezo thanku omwanzo pi epi: yoori nisala niphetana mmote na nzeetthu. ¹²Nihiiye nkhama Kayiini, otule aari wa phantte ya ntakhali khumuula ttwiiye. Amuulela niini? Mwaasa wa khaazi zawe zaari zootakhala, ila epi za ttwiiye zaari za shariya. ¹³Mweeyo attwiizaku, mwihishankisiwe atthu a voolumwenku ahituveliwaka ti mweeyo. ¹⁴Fweeyo najuwa yoori navikana ofwa neetta muuhaayi, maana niniwaapheta attwiizetthu. Otule ahimphetaaye ompharerela muufwa. ¹⁵Wakhula otule aniiphiiriwaaye ti ttwiiye namahusuti, mweeyo mwinjuwacha yoori khina namahusuti mmote ariina ohaayi wa mileele woolipaneya nkatthi mwawe.

¹⁶Khwa etthiipo ninjuwa niini pheta: Yinsa aleva ohaayi awe khwa fweeyo, na nina yooleva ohaayi eetthu khwa attwi zeetthu. ¹⁷Nkhama ntthu onaaye vitthu za voolumwenku khumoona ttwiiye athowiwe na khunlipela rooho, pheta ya Nluku enlipa toovi khwa ye? ¹⁸Aanaaka, pheta yeetthu ehiiye ya nttakhuzi la omilomo, ila esala yiiya yooretta na ya haakhi. ¹⁹Toono nintta ojuwa yoori fweeyo na atthu a haakhi, na rooho zeetthu ziniiya za wiitthaala vakatthi vawe ye; ²⁰amana rooho zeetthu zinikheeti, Nluku ti eeye nwulweene khwa rooho zeetthu, maana ye ti njuwi wa vitthu zooshi.

²¹Aphetani aka, nkhama rooho zeetthu khinnikheeti, ninaaye nroromelo mmakhono wa Nluku; ²²na wakhula etile nininvekelaaye ye nimpwekhera, maana ninshututela oruma wawe na ninretta etile enintuvelaaye. ²³Oruma wawe pi opu: yoori fweeyo nikhupali nzina la Mwanawe Yinsa Al-Masiihu, na yoori niwaaphete azeetthu, nkhama Nluku anirumiyeezo. ²⁴Otule anshututelaaye oruma wawe oto onlipana Nluku, na Nluku na ye. Khwa toowo onjuwa yoori ye oniiya khwa ye, mwaasa wa Rooho aninkhiyeeyo.

Manapiyu oojipanka na mamuumini eekhweele

¹Aphetani aka, mwihiwaakhupali ooshi anraaye anaaye rooho ya Nluku, ila mwisala mwinzaani khoona nkhama enlankha wa Nluku, maana manapiyu awaatta oojipanka amwazeyela voolumwenku. ²Mwinteela ojuwa Rooho ya Nluku khwa etthiipo: wakhula rooho entukhurwaaye yoori Yinsa ata nkhama pinaatamu4:2 Nkhama pinaatamu khwa luuka ya ekereeku enlupa yoori khwa mwiili., oto ti wa Nluku, ³ila wakhula rooho ehinintukhurwaaye Yinsa khilankheeni wa Nluku. Eto rooho ya atuwi wa Al-Masiihu, ethiito mwasiiliyeeyo yoori enta, aphano yata eri voolumwenku.

⁴Aanaaka, mweeyo mwa atthu a Nluku, na mwiniwaashintta manapiyu apale oojipanka, maana wooziti ti otule ariiye khwa mweeyo zayita otule ariiye voolumwenku. ⁵Yo anlankha voolumwenku; tiito ottakhula waya pi wa voolumwenku, na olumwenku khusala owaasiila. ⁶Fweeyo ninlankha wa Nluku, otule aninjuwaaye Nluku onnisiileza. Otule ahinlankhaaye wa Nluku khannisiila. Khwa etthiipo ninjuwa Rooho ya haakhi na rooho yoovonya.

Pheta ya Nluku

⁷Aphetani aka, niphetane mmote na nzeetthu, maana pheta enlankha wa Nluku. Wakhula otule amphetaaye avokoliwa ti Nluku na oninjuwa Nluku. ⁸Ila otule ahimphetaaye khaninjuwa Nluku mwaasa yoori Nluku pheta. ⁹Nanna Nluku athoonyeziyeeyo pheta yawe khwa fweeyo pi toono; amperekha Mwanawe mmote paasi voolumwenku, yoori nipatthe ohaayi khwa ye. ¹⁰Pheta ya eto tiiti: khahiyo fweeyo nimphetiyeeyo Nluku, ila ye ti aniphetiyeeyo na khumperekha Mwanawe yoori mwaasa wa ye nipatthe swamiima ya twampi zeetthu. ¹¹Aphetani aka, nkhama etthiipo Nluku aniphetiyeezo, na fweeyo theenya nina yoophetana mmote na nzeetthu. ¹²Khaavo amooniyeeyo Nluku. Nkhama nimphetana mmote na nzeetthu, Nluku oniikhala khwa fweeyo, na toowo, opheta wawe oniiya wookhamilikha khwa fweeyo.

¹³Maana Nluku aninkha Rooho yawe, toowo fweeyo ninjuwa yoori niniikhala khwa ye, na ye khwa fweeyo. ¹⁴Fweeyo noona na ninlawela oshaahiti yoori Paapa amperekha Mwanawe yoori eeye Namuusuru wa voolumwenku. ¹⁵Wakhula otule antukhurwaaye yoori Yinsa Mwaana wa Nluku, Nluku onlipa khwa ntthu aya oto, na oto onlipa khwa Nluku. ¹⁶Fweeyo ninjuwa na nakhupali pheta ariina Nluku na fweeyo.

Nluku opheta. Otule anlipanaaye mpheta onlipana Nluku, na Nluku onlipa khwa ye. ¹⁷Khwa nanna eti opheta oniiya woozowereya khwa fweeyo, yoori siikhu ya mwiisho niiye wonroromela, maana voolumwenku apha fweeyo niri nkhama ye. ¹⁸Nkatthi wa opheta khawiimo woova, ila pheta yookamilikha eniikara woova. Mwaasa yoori woova onttheriwa ti hukhumu. Aphano otule anoovaaye khakamilikheeni khwa pheta.

¹⁹Fweeyo ninimpheta Nluku maana ye anipheta omwanzo. ²⁰Nkhama ntthu onri onimpheta Nluku khusala eephiiriwa ti ttwiiye, oto namalokova. Maana otule ahimpheteeni ttwiiye, otule animoonaaye, khanwahi ompheta Nluku, otule ahinimoonaaye? ²¹Al-Masiihu aninkha oruma opu: Otule animphetaaye Nluku, theenya ona yompheta ttwiiye.

Oshintta olumwenku

¹Ooshi apale ankhupalaaye yoori Yinsa ti Al-Masiihu oto avokoliwa ti Nluku, na ooshi apale animphetaaye Nluku onimpheta otule anvokoliyeeyo. ²Fweeyo ninjuwa yoori niniwaapheta aana a Nluku amana nimphetaka Nluku na nishututelaka oruma wawe. ³Ompheta Nluku oshututela oruma wawe, na oruma wawe khahi woolipa oshututela. ⁴Maana ooshi apale avokoliweeyo ti Nluku ashintta olumwenku. Na opu pi oshintta olumwenku: amini yeetthu. ⁵Paani aniwahaaye oshintta olumwenku? Otule akhupaliyeeyo yoori Yinsa mwaana wa Nluku paasi.

Oshaahiti monkoni wa Yinsa Al-Masiihu

⁶Otu ti otule atiiyeeyo khwa maati na taamu, Yinsa Al-Masiihu. Ye khateeni na maati paasi, ila khwa maati na taamu. Na Rooho Ttakatthiifu shaahiti yoori vitthu zaya epo haakhi maana Rooho Ttakatthiifu ti ya haakhi. ⁷Owaapho oshaahiti mittatthu: ⁸Rooho Ttakatthiifu, maati na taamu; vitthu epo ttatthu zooshi zinkhupalela. ⁹Fweeyo ninkhupalela oshaahiti wa anaatamu, ila oshaahiti wa Nluku watepa wiiyana fwayita. Opu oshaahiti wa Nluku enkhiyeeyo khwa shitaha ya Mwanawe. ¹⁰Otule aninkhupalaaye Mwaana wa Nluku onaaye oshaahiti aya opo nroho mwawe. Ila otule ahininkhupalaaye Nluku oninretta wiiya namahata, maana khakhupaleeni oshaahiti Nluku enkhiyeeyo monkoni wa Mwanawe. ¹¹Oshaahiti aya pi opu: Nluku aninkha ohaayi wa mileele, na ohaayi aya opo ori wa Mwanawe. ¹²Otule ari vamote na Mwaana wa Nluku onaaye ohaayi, ila otule ahina vamote na Mwaana khana ohaayi.

Hakiikha ya ohaayi wa mileele

¹³Miiyo kiniwaatikhelani mattakhuzi apa mweeyo mwikhupaliyeeyo nzina la Mwaana wa Nluku, mwijuwe yoori mwinaaye ohaayi wa mileele. ¹⁴Opu ororomela niriina mmakhono wa Nluku, amana niveka etthu khwa matakhelo awe, ninaaye hakiikha yoori onnisiila. ¹⁵Nkhama ninjuwa yoori onnisiila amana ninvekela etthu, ninjuwa yoori onninkha etile nininvekelaaye.

¹⁶Nkhama ntthu amoona ttwiiye eettaka oretta twampi ehinimweettanaaye muufwa, ona yonvekela Nluku, ye ontta omwinkha ohaayi. Kininlupa otule twampi ehinimweettanaaye muufwa. Ila ewaapho twampi entanaaye ofwa, miiyo akiwuuzeenini yoori mwilompele twampi ya eto. ¹⁷Vitthu zooshi zohiiyi za shariya twampi, ila ewaapho twampi ehintanaaye ofwa. ¹⁸Ninjuwa yoori ooshi apale avokoliweeyo ti Nluku khaneettetta ntwampi, maana Mwaana wa Nluku ontta owiinanela, na ntakhali khaninsapa. ¹⁹Fweeyo ninjuwa yoori niri wa Nluku na olumwenku onlokozeliwa pi owahi wa ntakhali. ²⁰Ninjuwa yoori Mwaana wa Nluku ata, khuninkha weeleyiwa yoori ninjuwe otule eeyiyeeyo wa khweele, na fweeyo niri wookusanyeya na Nluku wa khweele khwa Mwanawe Yinsa Al-Masiihu. Ye ti Nluku weekhweele, na ti ohaayi wa mileele. ²¹Aanaaka, mwiwerawere miluku zoovonyeya.