1 Akorintiyu

Warakha ya mwanzo

ya Paawulu awaatikhelaka

Akorintiyu

Salamu

¹Miiyo Paawulu, kikhuweliweeyo khwa matakhelo a Nluku yoori kiiye aswihaapa wa Al-Masiihu Yinsa, kinaatikha vamote na ttwi Sositeene, ²khwa ojama wa Nluku oriiye sitati ya Korintiyu, na apale oottakatthisiwa khwa Yinsa Al-Masiihu na akhuweliweeyo yoori eeye attakatthiifu, vamote na ooshi apale ankhuwaaye khwa nzina la Mbwana Yinsa Al-Masiihu, Mbwana aya na weetthu.

³Rehema na heeri ya phantte ya Nluku Papeetthu na ya Mbwana Yinsa Al-Masiihu yiiye vamote na mweeyo.

Oshukhuru wa Paawulu

⁴Wakhula wakathi kininshukhurwela Nluku mwaasa wa rehema yawe awinkhiyeenini mweeyo khwa Yinsa Al-Masiihu. ⁵Maana khwa etthiipo mweeyo mwareelisiwa khwa zooshi, eto tiiti, khwa nttakhuzi looshi na khwa ojuwa wooshi. ⁶Maana oshaahiti wa Al-Masiihu wahakikhiwa vakatthi venu mweeyo, ⁷khwa nanna ehinuusaleeleenini hatha tthuvo ttakatthiifu, mwiwejelaka othoonyeziwa wa Mbwana eetthu Yinsa Al-Masiihu. ⁸Ye onuukholelelani mpakha mwiisho, woohiina paathuli mpakha siikhu ya ota wa Mbwana eetthu Yinsa Al-Masiihu. ⁹Nluku ti wa waamineya, othuuto ookhuweliyeenini khwa osiilana na Mwanawe Yinsa Al-Masiihu Mbwana eetthu.

Waawanyeya wa ojama wa Nluku

¹⁰Attwiizaku, khwa nzina la Mbwana eetthu Yinsa Al-Masiihu kinuuvekelani mooshi mweeyo yoori mwikhupalelane mmote na nzeenu khwa etile mwinttakhulaaye, yoori ohiiyevo waawanyeya vakatthi venu; mwiiye wookusanyeya khwa wuupuwela mmote na shawuri moote. ¹¹Attwiizaku, kooziwa pi atthu akinoko oowawe Kolooye yoori owaapho waawanyeya vakatthi venu. ¹²Khwa etthiipo, kintakha kilupe yoori akina a mweeyo anri: “Miiyo ki wa Paawulu”, “Miiyo ki wa Apoolu”, “Miiyo ki wa Pheeturu”, ama nalelo “Ki wa Al-Masiihu.” ¹³Talili Al-Masiihu ti waawanyeya? Aari Paawulu aakhomeliwe khwa zwaamu yenu mweeyo? Ama mweeyo moosiwa khwa nzina la Paawulu? ¹⁴Kininshukhurwela Nluku mwaasa wa miiyo ohimoosi hatha mmote wa mweeyo, woohiiyi Kirishipu na Kaayu; ¹⁵khwa nanna yoori ahiiyevo anttelaaye olupa yoori oosiwa khwa nzina laka. ¹⁶Kawoosa theenya atthu oowawe Shiteefanu; ohiiyi atthaapo, akinfwahamu nkhama kawoosa akinoko theenya. ¹⁷Maana Al-Masiihu khakirumeeni yoori koose, ila yoori kitafusiri hapari zooshapweya, woohiiyi khwa mattakhuzi a akhili za onaatamu, yoori owahi wa nsalapa wa Al-Masiihu ohiiye wooveya.

Al-Masiihu, akhili na owahi wa Nluku

¹⁸Maana hapari za nsalapa ololo khwa apale anaashikhaaye, ila khwa fweeyo ninuusurukhaaye, owahi wa Nluku. ¹⁹Maana yaatikhiwa yoori:

“Kintapanya akhili za anaakhili

na kikatthale weeleyiwa wa anamweeleyiwa.”

²⁰Ori vayi naakhili? Ori vayi namwaatikha wa kano? Ori vayi namajuwa ottakhula? Olikha toowo Nluku khattheeni wiiya ololo akhili za olumwenku opu? ²¹Maana, nkatthi wa shawuri za Nluku, anaatamu khajuweeni khwa akhili za onaatamu, Nluku yantuvela owoosuru apale ankhupalaaye khwa ololo wa tafusiiri. ²²Mayaahuuti anveka alama za minjuza na Akereeku aneekesa akhili, ²³ila fweeyo nininlaleya Al-Masiihu namakhomeliwa, othuuto wekhweele, eeyiyeeyo etthu yootakhala khwa mayaahuuti, na ololo khwa amalapo; ²⁴ila khwa apale akhuweliweeyo, waaza mayaahuuti mpakha akereeku, Al-Masiihu owahi wa Nluku na akhili za Nluku. ²⁵Maana ololo wa Nluku akhili enzitaaye akhili za onaatamu; na otteettheya wa Nluku waziti okhomaala wa anaatamu.

²⁶Attwiizaku, muupuwele nanna mwaariizo wakathi mwikhuweliweevo. Vattitthiiru aari anaakhili khwa nanna ya onaatamu vattitthiiru aarina owahi, vattitthiiru aari oovokoliwa khwa ojama wootafikhana. ²⁷Ila Nluku athawula etile khwa olumwenku yiiyiye ololo yoori awaapatthise haaya anaakhili, na athawula etile khwa olumwenku yiiyiyeeyo yoottettheya yoori apatthise haaya epile zookhomaala. ²⁸Ye athawula etile va olumwenku yoohiina maana, yootarawiwa na yohiiyi etthu, yoori evukule etile yiiyiyeeyo etthu, ²⁹yoori ahiiyevo antakhaaye ojikhutupula enakatthi ya Nluku. ³⁰Tiito, khwa yaazo yawe mweeyo mwiiyiyeeyo khwa Yinsa Al-Masiihu, othuuto ajirettiye wiiya akhili ya Nluku khwa fweeyo, eeyiye shariya, ottakatthifu na nusura, ³¹yiiye nkhama yaatikhiweeyo, yoori: “Otule anjikhutupulaaye, ajikhutupule khwa Mbwana.”

Makhaamu a tafusiiri ya Paawulu

¹Miiyo attwiizaku, wakathi kaari vakatthi venu, akittakhuleeni mattakhuzi ootuva wala khwa akhili za waatta yoori kuulaleyeleni siiri za Nluku. ²Maana kajilakelela ohijuwi hatha etthu vakatthi venu, woohiiyi Yinsa Al-Masiihu otu akhomeliweeyo. ³Wakathi opule kaatiyeeyo wuuthotolani kaari woottettheya na othukumela khwa woova. ⁴Hapari zaka na tafusiiri zaka khinlankha nkatthi wa mattakhuzi a akhili otakha wuushinttanani, ila zinlankha khwa othoonyeziwa wa owahi wa Rooho ya Nluku, ⁵yoori amini mwiriina ehiiye yoolankha khwa akhili za onaatamu, ila khwa owahi wa Nluku.

Akhili zinta khwa Rooho Ttakatthiifu

⁶Nakataalikha, akhili epi ninttakhula khwa apale akhomaaliyeeyo, ila khahiyo akhili za wakathi opu ama anamawahi a wakathi otthuupu, anttelaaye ovukuliwa ahiiye etthu. ⁷Olikha toowo, ninlupa akhili za Nluku, zaari siiri zoovitheya, etthiipo Nluku arumiyeeyo ehineeyevo hatha etthu yoori yiiye siifwa yeetthu. ⁸Hatha namawahi mmote a wakathi opu emweleyiyeeyo; maana eriwaka zeettiye omweleya, ahinkhomeleeni Mbwana wa Siifwa. ⁹Nkhama yaatikhiweezo yoori:

“Maasho khooneeni, mashiilo khasiileeni

wala eeswa moote khiphelelezeeni

etile Nluku awatthenkezeliyeeyo apale animphetaaye.”

¹⁰Ila Nluku athoonyeza vitthu zaya epo khwa fweeyo monkoni wa Rooho. Rooho Ttakatthiifu enoona vitthu zooshi mpakha vitthu epile zoovitheya za Nluku.

¹¹Paani anjuwaaye wuupuwela wa pinaatamu, woohiiyi rooho ya pinaatamu mweenyewe etile ariina? Khwa etthiipo, khina anjuwaaye wuupuwela wa Nluku woohiiyi Rooho ya Nluku. ¹²Ila fweeyo khanipwekhereleeni rooho ya olumwenku otthuupu, ila Rooho enlankhaaye wa Nluku, yoori eneeleye vitthu Nluku anninkhaaye mahala. ¹³Epo zaya naye ninttakhulaka, khahiyo khwa mattakhuzi a akhili oosomisiwa pi anaatamu, ila khwa mattakhuzi oosomisiwa ti Rooho Ttakatthiifu, etaphuleliwaka khweele ttakatthiifu khwa apale eeyiyeeyo attakatthiifu. ¹⁴Ntthu wa ephattu khankhupalela vitthu zinlankhaaye khwa Rooho ya Nluku, maana onoona nkhama vitthu zoololo; ye khinimweeleya, maana epo zimpheleleziwa nroho. ¹⁵Ila otule eeyiyeeyo ttakatthiifu enimweeleya vitthu zooshi, ye khaavo aniphelelezaaye.

¹⁶“Paani anjuwaaye shawuri za Mbwana,

paani ariina makhaamu a onnozela?”

Ila fweeyo ninaaye shawuri za Al-Masiihu.

Waawanyeya muujama wa Nluku

¹Attwiizaku, akiwaheeni wuuttakhulelani nkhama atthu a wiiyana Rooho ya Nluku, ila nkhama atthu a voolumwenku, na nkhama asimaana khwa Al-Masiihu. ²Kawinkhani mweeyo leethi, akiwinkheenini etthu yoojiwa yookhomaala, maana mweeyo khamwaari okhitiri opwekherela, wekhweele, mweeyo nalelo khamwinkhitiri hatha vattitthiiru. ³Maana mwinlotta onaatamu, enooneya yoori vakatthi venu liwaapho nrima na waawanyeya, toowo khamwinretteya wiiya anamalotta vitthu za enaatamu, mwirettaka vitthu za va olumwenku? ⁴Toowo, amana ntthu alupaka yoori: “Miiyo ki wa Paawulu,” nkina khuri: “Miiyo ki wa Apoolu,” apho khinthoonyeza yoori mwinlotta vitthu za onaatamu?

⁵Amajaali, Paawulu paani? Wala Apoolu paani? Yo akarumeya vakatthi wa atthaapo mweeyo mwifiyeleliyeeyo okhupali, khwa khaazi etile Nluku amwinkhiyeeyo wakhula mmote. ⁶Miiyo keetta ozala, Apoolu khukhuwari, ila Nluku ti anwulisaaye. ⁷Khwa etthiipo, otule anzalaaye mpakha otule ankhuwaraaye khahiyo hatha etthu, ila Nluku paasi otule anwulisaaye. ⁸Otule anzalaaye na otule ankhuwaraaye ana shawuri moote, na wakhula ntthu onriphiwa khwa khiima ya khaazi yawe. ⁹Maana fweeyo na ashirikha a khaazi khwa onrumeyela Nluku, mweeyo mwa mashapa awe na mwa nyuupa yawe.

Khaazi ya apale ansomisaaye

¹⁰Khwa khiima ya rehema ya Nluku kinkhiweeyo, miiyo nkhama namajeka nwulu wa akhili kakheya nchina, akina antta ojeka. Ila wakhula mmote ona ya woona saana khwa nanna anjekaazo. ¹¹Maana khaavo anwahaaye ottha nchina likina, woohiiyi nchina ntthile likheyiweeyo, eeyiyeeyo Yinsa Al-Masiihu. ¹²Amana ntthu ajeka vatulu wa nchina laya ntthi arumeyelaka weero, feeta, mawe a fwayita, thaapwa, nyaani ama makutthi, ¹³khaazi yawe enttela wooniseliwa, maana Siikhu ya Mbwana entana nuuru yaya; na enttela othoonyeziwa khwa moottho, onttelaaye woona khaazi ya wakhula ntthu. ¹⁴Nkhama etile ntthu ajekiyeeyo ti ya wiiyavo, oto ompwekhera phakari yawe. ¹⁵Amana elukula etile ntthu ajekiyeeyo, oto ompattha hasara; olikha toowo, onlawa oosurukhe nkhama ntthu wa wiiphuwa va moottho.

¹⁶Mweeyo mwinjuwa yoori mwa Nyuupa ya Nluku na Rooho ya Nluku eniikhala khwa mweeyo. ¹⁷Amana ntthu atapanya Nyuupa ya Nluku, na Nluku ontta ontapanya. Maana Nyuupa ya Nluku ttakatthiifu, na mweeyo mwa nyuupa yawe yoosifwiwamo.

¹⁸Mwihijittettekhe, nkhama mmote wa mweeyo onuupuwela yoori naakhili wa voolumwenku apha, ona ya ojiretta wiiya nlolo yoori aretteye wiiya naakhili. ¹⁹Maana akhili za voolumwenku apha, ololo omaasho wa Nluku, maana yaatikhiwa yoori: “Ye oniwaakhola anaakhili muulavilavi mwaya.” ²⁰Na theenya: “Mbwana onjuwa wuupuwela wa anaakhili, wiiyiyeeyo wuupuwela wa ohiina fwayita.” ²¹Nakataalikha, ahiiyevo ntthu woojikhupali khwa anaatamu, maana vitthu zooshi pi zenu, ²²waaza Paawulu ama Apoolu ama Pheeturu ama olumwenku, ohaayi, ofwa, nasaapi ama akhipa; zooshi pi zenu, ²³na mweeyo mwa atthu a Al-Masiihu, na Al-Masiihu ti wa Nluku.

Khaazi za Maaswihaapa

¹Nakataalikha, mweeyo mooshi mwinoone wiiya akarumeya a Al-Masiihu, eeyiyeeyo anamalikheliwa weettettisa shawuri ya siiri za Nluku. ²Etthu eniwatakhaaye anamalikheliwa aya apo ti yoori eeye awaamineya. ³Khinikijali hatha vattitthiiru wiiya woophukiwa ti mweeyo ama khwa wakhula nyuupa woophukiwamo ya onaatamu; wekhweele hatha miiyo akinjiphuka kimweenyewe. ⁴Yeeyaru khwa yoohiivo hatha etthu akhili zaka pi ekilokoveze, tiito hatha akinjihakikhi ki mweenyewe. Mbwana ti anikiphukaaye. ⁵Nakataalikha, mwihiphuke hatha etthu ohinafiye wakathi khwaamili; mwiwejele mpakha Mbwana ate. Ye onsarulela nnuuru epile zoovithiwa n’yiiza na onthoonyeza shawuri za nroho. Wakathi opo, wakhula ntthu onlawa apwekherele okhupaliwa wawe wa Nluku.

⁶Attwiizaku, vitthu epi karumeyela miiyo na Apoolu, mwaasa wa pheta yenu mweeyo, yoori mwijinozele khwa fweeyo maana aya: “Mwihichirise etile yaatikhiweeyo”. Etthiipo ahiiyevo anjikhupalanaaye ntthu mmote, khuntarawu nkina. ⁷Paani anuurettaaye weeyo wiiya woofwarikhana na ntthu nkina? Niini oriina oheetteeni winkhiwa? Na nkhama wenkhiwa, khi onjikhutupulelani nkhama oheetteeni winkhiwa?

⁸Mweeyo mwinaaye zooshi mwintakhaaye! Mwaamathaajiri! Mwafiyelela wiiya afwalume woohiiyi khwa fweeyo, nkhama etthiipo miiyo yaari okituvelaaye yoori mweeyo wekhweele mwiiye afwalume, yoori nafweyo niiyane yenzi vamote na mweeyo! ⁹Maana miiyo kinoona yoori Nluku anittha fweeyo, maaswihaapa, puuro ya wiishela, nkhama atthu ohukhumweliwa ofwa. Naretteya wiiya anamooniwa a voolumwenku, waaza malayikha mpakha anaatamu. ¹⁰Fweeyo na alolo mwaasa wa Al-Masiihu, ila mweeyo mwa akumi khwa Al-Masiihu! Fweeyo na woottettheya, ila mweeyo mwa wookhomaala! Mweeyo mwa wooshitahiwa, ila fweeyo na wootaraweya! ¹¹Mpakha nasaapi ti yanipattha jala, nnyottha na othowiwa ti kuwo, nintthanttiwa wootakhalavo, khanina nyuupa khaamili, ¹²na ninkhola khaazi yoolipa na makhono eetthu. Amana nilaaniwa, fweeyo nintta oparikhiya; amana nilupatthiwaka, niniiya woovilela; ¹³amana niveyisiwa, fweeyo ninjipu wooshapweyavo. Mpakha nasaapi eti naretteya wiiya mafukhe a va tuniya na vitutu za voolumwenku.

¹⁴Akineekesa wuupatthisani haaya amana kaatikhaka vitthu epi; ila kineekesa wuuhirimizani, nkhama aanaaka awuuphetani. ¹⁵Hatha nkhama mweetta wiiyana alufu khumi anamasomisa khwa Al-Masiihu, mweeyo khamwina apaapa awaatta, maana khwa Yinsa Al-Masiihu miiyo koovokolani khwa hapari zooshapweya. ¹⁶Nakataalikha, kinuuvekelani yoori mwikeezele. ¹⁷Tiito, kinuuperekhezani Timootiyu, mwanaka wompheta na wa waamineya khwa Mbwana, othuuto anttelaaye wuukupuselani mwentto aka khwa Yinsa Al-Masiihu, khwa nanna kinsomisaazo phantte zooshi na ojama wa Nluku wooshi.

¹⁸Akina a mweeyo anjikhupali, nkhama enriwaaye miiyo akinta wuuthotolani theenya. ¹⁹Ila, kinteela ota woohirupazi, amana Mbwana atakha; aphano kinteela ojuwa, khahiyo mattakhuzi paasi anlupaaye anamajikhutupula apo, na owahi yo ariinaaye. ²⁰Maana ofwalume wa Nluku khahi wa mattakhuzi, ila pi wa owahi. ²¹Mwintakhaaye niini mweeyo? Kitaaka wuuthotolani kitane puutta, ama na pheta na rooho ya wiitthaala?

Khaapa twayifu entapanya ojama wa Nluku

¹Khwa phantte zooshi ensiiliwa yoori vakatthi venu ewaapho khaapa twayifu, khwa nanna wala ehinrettikhanaaye vakatthi wa amalapo, enfiyelelaavo mmote wa mweeyo olalana muukha wa papaawe. ²Na mweeyo mwintta ojikhutupula! Nakataalikha, khamwaarina ya wiitaala huzuni na omwiikara vakatthi venu otule anrettaaye vitthu zaya epo? ³Hatha nkhama miiyo keetta ohiivo khwa mwiili, kiri vamote na mweeyo khwa rooho. Na kamwinkha paathuli otule arettiyeeyo vitthu zaya epo, nkhama kiriivo. ⁴Amana mweeyo mwikusanyeya khwa nzina la Mbwana eetthu Yinsa, kiniiya vamote na mweeyo nroho mwaka, theenya oniiya vamote na mweeyo owahi wa Mbwana eetthu Yinsa Al-Masiihu, ⁵mwimwinkhelele mwinyi aya oto epiliisi, yoori mwiili awe wiiye wootapanyiwa, ila rooho yawe yiiye ya wuusurukha Siikhu ya Mbwana.

⁶Ojikhupali weenu opo khahiyo wooshapweya. Mweeyo khamwinjuwa yoori fwaramento vattitthiiru enjakhula ofu wooshi? ⁷Mwiphakuwanane fwaramento ya raku, yoori mwikhattiwe opheya woohiina fwaramento, nkhama wekhweele mwiriizo. Maana Al-Masiihu, Pwittipwitthi yeetthu ya Paashikowa, ya twahiwa. ⁸Tiito nitthapele njampo, woohiivo fwaramento ya raku wala ya etthu yootakhala na twayifu, ila na phaawu yoohiina fwaramento, phaawu swaafi na khweele.

⁹Kawuuzani nwarakha yoori mweeyo mwihikusanyeyane atthu anrettaaye khaapa twayifu. ¹⁰Khwa etthiipo akiniwaalupa apale anrettaaye khaapa twayifu a voolumwenku apha, wala anamakhwiririwa, manantarawu ama apale anaaputwaaye sanamu. Eriwaka yaari etthiipo, mweeyo mwaari ohithajiya olaavo va olumwenku apha. ¹¹Ila nasaapi kiniwaatikhelani yoori mwihiiye wookusanyeya na wakhula otule anjilupezaaye wiiya ttwi, ila arettaka khaapa twayifu, namakhwiririwa, namwaaputu sanamu, mmwanomwaano, nanhapaliwa ama nantarawu. Atthu aya apo wala mweeyo mwihijane. ¹²Nakataalikha, nannani miiyo kaari weettelaaye owaaphuka apale oje? Mweeyo mwina ya owaaphuka apale ari muujama wa Nluku. ¹³Nluku ti aniwaaphukaaye apale ari oje. Mwiweekare anamaretta zootakhala vakatthi venu.

Paawulu onnozela nanna yoophukana attwi

¹Amana mmote wa mweeyo eeyana nlattu na ttwiiye nkatthi wa amini, onthuula toovi nlattu aya olawa ophukiwa ti makaafiri, olikha olawana wa attakatthiifu? ²Mweeyo mwijuwe yoori attakatthiifu anteela ophuka olumwenku. Nkhama mweeyo mwinteela ophuka olumwenku, mwinwahi ophuka vitthu epo ttiitthittiitthi. ³Mweeyo khamwinjuwa yoori ninteela ophuka malayikha? Mwatepa ophuka vitthu za ohaayi opu! ⁴Nakataalikha, nkhama mweeyo mwinaaye tafwawuthi za ohaayi otthuupu, mwiwenkhe ophuka atthu a ojama wa Nluku hatha nkhama eetta ohiina fwayita khuluyeene. ⁵Kinlupa epo zaya yoori kuupatthiseni haaya. Nilupe yoori vakatthi venu khaavo hatha naakhili mmote anwahaaye ophuka milattu za attwi? ⁶Ila, ttwi mmote onlawa omphuka ttwiiye nnyupa woophukaniwamo, na etthiipo omaasho wa makaafiri. ⁷Hatha nkhama ziwaapho tafwawuthi khwa mweeyo enthoonyeza oshintteya woolikana. Mwaasa wa niini mwihihitharaka ohoowa khwa epile zohiiyi za shariya? Mwaasa wa niini mwihihitharaka otulumwiwa? ⁸Olikha toowo, mweeyo ena mwinretta vitthu zohiiyi za shariya na tulumu, mwiwaarettelaka attwiizenu nkatthi wa amini! ⁹Mweeyo khamwinjuwa yoori anamaretta zootakhala khanrithi ofwalume wa Nluku? Mwihijilikhelele mwihatiwaka: pi atthu twayifu, anamwaaputu sanamu, anamararuwa, hatha apale aniwaaralaaye alume azaawe, ¹⁰wala manantarawu, asokho, ananhapaliwa, amwanomwaano wala anamattettekha khanteela orithi ofwalume wa Nluku. ¹¹Akinoko a mweeyo mwaari etthiipo, ila moosiwa, mwattakatthisiwa, mwahakikhiwa khwa nzina la Mbwana Yinsa Al-Masiihu na khwa rooho ya Nluku eetthu.

Ajali ya khaapa twayifu

¹²“Kinaaye ruhusa khwa vitthu zooshi,” ila zooshi khahiyo zoofwayi. “Kinaaye ruhusa khwa vitthu zooshi,” ila miiyo akinlikha yoori ekishintte. ¹³Vitthu zoojiwa pi za ejohojoho na ejohojoho ti ya vitthu zoojiwa; ila Nluku onteela otapanya zoopiiri. Nakataalikha, mwiili khahiyo wa vitthu twayifu, ila khwa Mbwana na Mbwana khwa mwiili. ¹⁴Khwa owahi wawe, Nluku ansisimula Mbwana na theenya onteela onisisimula fweeyo. ¹⁵Mweeyo khamwinjuwa yoori mwiili enu phantte ya Al-Masiihu? Miiyo kinthuula mwiili wa Al-Masiihu khukusanyana amalempe? Khinretteya! ¹⁶Mweeyo khamwinjuwa yoori otule anjikusanyanaaye malempe oniiya mwiili mmote na othuuto? Maana, nkhama etthiipo zaatikhiweeyo yoori: “Oowiiri aniiya mwiili mmote.” ¹⁷Ila otule anjikusanyanaaye Mbwana oniiyana rooho moote na Mbwana. ¹⁸Mwiwerawere khaapa twayifu. Twampi zooshi ntthu anrettaaye ziniiya oje wa mwiili, ila otule anraruwaaye onkosisa mwiili awe. ¹⁹Olikha toowo, mweeyo khamwinjuwa yoori mwiili enu nyuupa ya Rooho Ttakatthiifu eniikhalaaye khwa mweeyo, mwinkhiweeyo ti Nluku? Mweeyo khahiyo a mweeyena. ²⁰Mweeyo moozanyiwa khwa hisapu khuluyeene; apho mwinttitthimise Nluku na mwiili enu.

Monkoni wa harusi

¹Monkoni wa mattakhuzi apa mweeyo mwikatikheliyeeyo mwilupaka yoori: “Ti yooshapweya nlume ohimpapasi muukha.” ²Ila mwaasa wa khaapa twayifu, wakhula mmote ona ya wiiyana muukha awe na wakhula muukha ona ya wiiyana mannawe. ³Nlume ona ya orumeyela shuruthi yawe ya oloola khwa muukha awe, khwa nanna ethiito muukha ona ya oretta etthiipo khwa mannawe. ⁴Muukha khana owahi khwa mwiili awe mweenyewe, ila mannawe. Khwa nanna etthiipo, nlume khana owahi khwa mwiili awe mweenyewe, ila muukha awe. ⁵Mwihikatthalane mmote na nzaawe, ehiriwaka mwasiilana moowiiri wiiyana wakathi woolompa; nawiisha mwirutele okutthana yoori mwihinlikhe epiliisi wuuzayinini mwaasa wa ohijishintti. ⁶Vitthu zaya epi kinlupa nkhama ruhusa, na khahiyo nkhama oruma. ⁷Yaari okituvela alume ooshi ari nkhama miiyo; ila wakhula ntthu onaaye tthuvo yawe khwa phantte ya Nluku, mmote onaaye tthuvo eti, na nkina etile.

⁸Nakataalikha kiniwooza apale ahilooleeni na apale oofweliwa pi amanna zaya, ti yooshapweya wiiya nkhama miiyo. ⁹Ila amana ahiwahi ojiinanela, ana ya oloola. Maana ti yooshapweya oloola ehiiyeeni wiiya wa wiitaala tuvela.

¹⁰Anamaloola kiniwenkha oruma opu, khahiyo miiyo, ila Mbwana yoori: Muukha ahaashanane mannawe. ¹¹Ila amana aretta, eekhale woohiraliwi ama arijeelane na mannawe. Na nlume ahimwaashe muukha awe.

¹²Khwa akinoko, ti miiyo kinlupaaye, khahiyo Mbwana, amana ttwi mmote eeyana muukha woohiiyi muumini, na ye khukhupalela wiikhalana, ahaashanane. ¹³Na amana muukha mmote eeyana manna woohiiyi muumini, na ye khukhupalela wiikhalana, ahaashanane. ¹⁴Maana nlume woohiiyi muumini onttakatthisiwa ti muukha awe, na muukha woohiiyi muumini onttakatthisiwa ti mannawe, amana zihirettikhani etthiipo, aana aya aari weettela wiiya oohifwayi, ila apha attakatthiifu.

¹⁵Ila, otule woohiiyi muumini amana atakha waasha, ti aashe. Khwa vitthu zaya epo, ttwi ama nlupu oniiya wootaphuliwa, Nluku anikhuwela yoori niikhale khwa heeri. ¹⁶Weeyo muukha, onjuwa toovi nkhama khunlawa omuusuru manna awo? Ama weeyo manna, onjuwa toovi nkhama khunlawa omuusuru muukha awo?

Ohaayi wa onshututela Nluku

¹⁷Nakataalikha, wakhula ntthu eekhale khwa nanna Mbwana amwinkhiyeeyo na khwa nanna Nluku ankhuweliyeezo. Opu oruma waka khwa ojama wa Nluku wooshi. ¹⁸Nkhama ntthu aari yaahuuti wakathi akhuweliweeyo nkatthi wa amini, ahekese otapwatela alama ya okhiriya wawe. Nkhama khaari yaahuuti, ahikhiriye. ¹⁹Okhiriya khuna maana na ohikhiriyi theenya khahi hatha etthu, ila etthu ya fwayita oshututela oruma wa Nluku. ²⁰Wakhula ntthu ona ya wiiya khwa nanna etthiipo akhuweleliweezo ti Nluku. ²¹Weeyo wakhuweliwa ori mwiitthwaana? Ohishukulikhele eto yaya; ila nkhama weeyo onwahi opattha otaphuliwa ti opatthe. ²²Maana otule aari mwiitthwaana, khukhuweliwa nkatthi wa amini ti wootaphuliwa wa Mbwana, maana ti wa Mbwana. Khwa nanna ethiito, otule aari wootaphuliwa khukhuweliwa nkatthi wa amini mwiitthwaana wa Al-Masiihu. ²³Mweeyo moozanyiwa khwa hisapu khuluyeene; mwihijirette wiiya amwiitthwaana a anaatamu. ²⁴Attwiizaku, mweekese wiikhala nkhama Nluku antakhaazo, khwa nanna mwaariizo wakathi mwikhuweliweeyo nkatthi wa amini.

Oloola ama ohilooli

²⁵Monkoni wa aamwari, akina hatha oruma wa Mbwana, ila kininkha shawuri zaka, nkhama ntthu ansuhaaye waaminiwa khwa tthakaraka ya Nluku. ²⁶Mwaasa wa tafwawuthi za siikhu epi, kinoona yoori ti ya fwayita nlume wiiya nkhama ariizo. ²⁷Weeyo o wooloola? Oheekese waasha. Khulooleeni? Ohimweekese muukha. ²⁸Ila amana ofiyelela oloola, ohirette twampi, na amana mwaari araliwa, naye ahirette twampi, ila apale anlolaaye aniiyana tafwawuthi zawaatta muuhaayi mwaya, miiyo kaari otakha owiinanelani khwa epo zaya. ²⁹Etthu kintakhaaye olupa ti yoori wakathi ori vattitthiiru. Waaza nasaapi mpakha ninttaawo, otule alooliyeeyo, eekhale nkhama ntthu woohilooli. ³⁰Apale anlilaaye, eeye nkhama ahinlilaaye; apale anfurahaaye, eeye nkhama oohifurahi; apale anuuzanyaaye etthu, eeye nkhama ahipattheeni etile oozanyiyeeyo; ³¹apale anrumeyelaaye vitthu za voolumwenku apha, eeye nkhama ahinshikhaaye epo zaya; maana vitthu zaya epo zinooneyaaye nasaapi eti zinvira.

³²Yaari okituvela owoonani mwiri wootaphuliwa khwa tafwawuthi. Nlume otule woohilooli onjifwazana vitthu za Mbwana, khwa nanna ya ontuvelisa Mbwana. ³³Ila nlume otule wooloola onjifwazana vitthu za voolumwenku apha, khwa nanna ya ontuvelisa muukha awe. ³⁴Khwa nanna ethiito, aneettetta ari a waawanyeya. Waaza muukha woohiraliwi mpakha mwaari anjifwazana vitthu za Mbwana, yoori eeye attakatthiifu mmwiili na nroho. Ila wooraliwa onjifwazana vitthu za voolumwenku apha, khwa nanna ya ontuvelisa mannawe. ³⁵Kiniwuuzani vitthu zaya epo khwa saana yenu mweeyo; khahiyo wuukhanyarelani, ila yoori mwiwahi wiikhala khwa nanna yoolotteya, na ojinkha sawasawa khwa Mbwana.

³⁶Nkhama owaapho nlume amposiyeeyo mwaari khoona yoori khaniwahi onvilela na ontta ontthimula rooho, afwataali anrale, khwa etthiipo Kankosa. ³⁷Khwa zooshi, nlume otule anjinanelaaye nroho mwawe woohikhanyareliwi, ila ariina niiya na khujilakelela ohinrali mwaari aya oto, theenya onretta saana. ³⁸Etthiipo, otule aninralaaye mwaari onretta saana, ila otule ahininralaaye atepa oretta yooshapweya.

³⁹Muukha oniiya wookusanyeya na mannawe amana eeya haayi. Ila amana mannawe afwa, muukha oniiya wootaphuliwa khwa oraliwa ti otule anintakhaaye, ajoonaka yoori ye ti wa Mbwana. ⁴⁰Wuupuwela waka, ye oniiya wa furaha amana eekhala woohiraliwi, na theenya kinoona yoori kinaaye Rooho ya Nluku.

Etthu yoojiwa ya otwaheliwa sanamu

¹Monkoni wa vitthu zoojiwa zootwaheliwa sanamu, ninoona yoori fooshi ninaaye ojuwa. Ojuwa ontana ojikhupali, ila pheta enjeka. ²Otule anuupuwelaaye yoori onjuwa etthu, nalelo khanajuwe nanna aneettelaazo ojuwa. ³Ila otule animphetaaye Nluku, oto onjuwiwa ti Nluku.

⁴Nakataalikha, monkoni wa etthu yoojiwa yootwaheliwa sanamu, ninjuwa yoori sanamu khinthoonyeza hatha etthu voolumwenku na Nluku ori mmote paasi. ⁵Maana, hatha nkhama eetta wiiyavo akina ankhuweliwaaye yoori miluku, waaza otulu mpakha vathi, weekhweele awaapho pure a miluku na ambwana, ⁶ila khwa fweeyo, Nluku ori mmote paasi, Paapa, otule ompiyeeyo vitthu zooshi na fweeyo niwaapho khwa ye; na Mbwana mmote Yinsa Al-Masiihu paasi, othuuto vitthu zooshi zumpiweeyo khwa ye, khwa othuuto fweeyo neeyavo. ⁷Khwa etthiipo, khahiyo atthu ooshi ariina ojuwa waya opo. Akinoko nalelo azowera sanamu, anja etthu yoojiwa yaya eto nkhama twaha ya sanamu; wiiya shawuri zaya pi zoottettheya, aniiya ookwakhula. ⁸Nakataalikha, etthu yoojiwa khinniretta wiiya atthu okhupaleliwa omaasho wa Nluku. Khaninziti amana nihiji, ama khanitepa amana nija.

⁹Khwa zooshi, mwiiyane phoole yoori otaphuliwa weenu ohiretteye wiiya etthu ya owaakwakwanttula apale oottettheya. ¹⁰Maana, nkhama ntthu ona shawuri zoottettheya khuwoonani mweeyo mwiriina ojuwa waya opo mwijaka nzaawiya, na ye khaniweezelani oja epile etwaheliweeyo sanamu? ¹¹Etthiipo, ttwi oto woottettheya, otule Al-Masiihu anfweliyeeyo, ontta otapanyeya mwaasa wa ojuwa opule weeyo oriina. ¹²Amana weeyo onkosa ttwiiyo khwa nanna nkhama eto, otuthulaka ojuwa wawe woottettheya, oninkosa Al-Masiihu. ¹³Nakataalikha, nkhama etile miiyo kinjaaye enintapanya ttwiiyaku, akinteela oja theenya nyama, yoori kihintapanye ttwiiyaku.

Ruhusa za Aswihaapa

¹Weekhweele ki wootaphuliwa, ki aswihaapa na kamoona Yinsa Mbwana eetthu na mweeyo mwa fwayita a khaazi kikholiyeeyo khwa Mbwana. ²Hatha nkhama aki aswihaapa khwa akinoko, weekhweele ki aswihaapa khwa mweeyo, maana mweeyo mwa ephariselo ya owaaswihaapa aka khwa Mbwana.

³Opu ojaakisa waka enakatthi ya apale anikiphukaaye. ⁴Fweeyo khanina ruhusa ya oja na onywa? ⁵Fweeyo khanina ruhusa ya onthuula muukha wa wiiya muumini nkhama anrettaazo maaswihaapa akinoko, attwi a Mbwana na Pheeturu? ⁶Ama niri miiyo na Baranabe paasi ti nihina ruhusa ya winkhiwa etthu yoojiwa woohikholi khaazi?

⁷Khaavo anrumeyaaye nkhama najanka khusala ajilela mweenyewe, wala anzalaaye nrayi wa wuuva khuhiji mishumo zaya, ama anshukaaye liphanko la pwittipwitthi khuhinywi leethi laya. ⁸Akinlupa epi zaya khwa shawuri za onaatamu; kano naye enlupa etthiipo. ⁹Maana yawaatikhiwa nkano za Munsa yoori: “Mwihifuke milomo za mompe amana ettukuttaka tiriku.” Niri Nluku, ashukulikhela mompe? ¹⁰Khahi mwaasa wa fweeyo afiyeleliyeeyo olupa epo zaya? Aaa, wekhweele epo zaatikhiwa khwa zwaamu yeetthu fweeyo. Maana namalima amana alima, namattukutta amana attukutta, ona ya oretta na nroromelo yoori aretta phantte ya wuurula. ¹¹Fweeyo vakatthi venu nkhama nazalavo vitthu ttakatthiifu, khayaari otepa wuurula khwa mweeyo vitthu za maali? ¹²Nkhama akina ana ruhusa ya otthanttiwa ti mweeyo, fweeyo natepa wiiyana. Ila fweeyo khaninarumeyele ruhusa yaya eto. Olikha toowo, ninvilela zooshi yoori nihitane etthu yoottiyelela hapari za Al-Masiihu.

¹³Mweeyo mwiiyane ojuwa yoori apale ankholaaye khaazi Nnyupa Woosifwiwamo, anja vitthu za Nnyupa nttumpho. Na apale anrumeyaaye vaalitaari anja epile zintaniwaaye vaalitaari. ¹⁴Khwa nanna etthiipo, Mbwana awaaruma apale anlaleyaaye hapari zooshapweya, yoori ajilelane etthiipo.

¹⁵Ila miiyo akinarumeyele hatha ruhusa moote khwa epo zaya. Na akaatikheeni kiwejelaka yoori mwikirettele etthiipo. Kinhithari ofwa kikhupalelaka yoori ntthu khankilaza ojishashawula waka. ¹⁶Khwa zooshi, amana kitafusiraka hapari zooshapweya, akinwahi ojishashawula, maana kenkhiwa shuruti ya otafusiri. Wootakhaliwa ti miiyo amana kihitafusiri hapari zooshapweya! ¹⁷Nkhama kintafusiri khwa niiya yaka, kiina ya oriphiwa; ila nkhama khahiyo khwa niiya yaka khinkhola khaazi kinkhiweeyo. ¹⁸Phakari yaka ti tiivi? Tiiti: otafusiri hapari zooshapweya kifiise mahala, woohirumeyeli ruhusa kiriina amana kitafusiraka.

¹⁹Maana, keeyaru pure wootaphuliwa khwa atthu ooshi, kajiretta omwitthwaana wa atthu ooshi, yoori kipatthe thamani ya atthu awaatta amana ewaheya. ²⁰Kajiretta oyaahuuti khwa mayaahuuti yoori kiwaapatthe mayaahuuti. Khwa apale aniikhalaaye vathi wa kano, kajiretta nkhama kiri vathi wa kano, keetta ohiiyiru pure vathi wa kano, yoori kiwaapatthe apale ari vathi wa kano. ²¹Khwa apale ahina kano, kajiretta wiiya woohiina kano, hatha nkhama keetta ohitaphuliwi khwa kano ya Nluku ila vathi wa kano ya Al-Masiihu, yoori kiwaapatthe apale aniikhalaaye ahina kano. ²²Khwa apale oottettheya kajiretta wiiya woottettheya, yoori kiwaapatthe apale oottettheya. Etthiipo miiyo kajiretta wiiya zooshi khwa atthu ooshi yoori khwa wakhula nanna kiwahi owoosuru akinoko. ²³Kinretta zooshi epo mwaasa wa hapari zooshapweya, yoori kirette phantte ya parakha zawe.

²⁴Mweeyo mwinjuwa yoori anchiraanaaye mmote ti ampatthaaye tthuvo. Otthire khwa nanna ontakhaaye opattha tthuvo. ²⁵Ooshi apale anchiraanaaye aniiyana wakathi woojitthenkeza wookhomaalavo, yoori apatthe jarata eniishaaye; ila fweeyo ninretta yoori nipatthe jarata yookhomaala khwa mileele. ²⁶Khwa etthiipo, akintthira nkhama ntthu antthiraaye woohiina shawuri, na wala akinuumana nkhama ntthu aniikaraaye pheevo. ²⁷Ila miiyo kinuumanana mwiili aka yoori kishintte, na ehikirettikhanele amana kiwaatafusirelaka akinoko aya kihiiye wookatthaliwa ti Nluku.

Nthoonyezo wa hatiithi ya meezirayiilu

¹Attwiizaku, miiyo kintakha yoori mweeyo mwihisahawu etthu yaarettikhaniyeeyo khwa amarehemu apapazetthu. Ooshi aalokoziwe ti liwiku na khulokha pahari ya maati ookhuttuwa. ²Khwa Munsa, ooshi apo oosiwa mmawiku na mpahari. ³Ooshi aajiiye vamote etthu yoojiwa ya nroho, ⁴na anywiiye vamote etthu yoonywiwa ya nroho. Aari onywa va liwe la nroho laari owaalokozaaye, liwe laya nttho aari Al-Masiihu. ⁵Khwa zooshi, Nluku khuhituveliwi khwa enki a yo, tiito, khufwelaza n’yaara.

⁶Vitthu zaya epo zarettikhana nkhama nthoonyezo khwa fweeyo, yoori nihilazele omaashokopho vitthu zootakhala nkhama yo arettiyeezo. ⁷Mwihaaputu sanamu, nkhama akinoko aya aari waaputwaaye, nkhama yaatikhiweezo yoori: “Atthu eekhala yoori aje na anywe, na khujittha mmuzaha.” ⁸Nihirette khaapa twayifu, nkhama arettiyeezo akinoko aya na siikhu moote khufwa alufu eshiriini na ttatthu. ⁹Nihimweeze Mbwana, nkhama akina aya arettiyeezo na khuuliiwa ti nyookha. ¹⁰Na mwihijilize, nkhama akinoko aya ajiliziyeeyo na khutapanyiwa ti nlayikha la wuula.

¹¹Vitthu zaya epo zawaarettikhanela nkhama nthoonyezo na zaatikhiwa yoori nuuziwe fweeyo, khwa otule anttelaaye ofiya wakathi wa mwiisho. ¹²Etthiipo, otule anjoonaaye wiiya wookhomaala, ajiinanele yoori ahikwe! ¹³Ozayiniwa wuupatthiyeenini mweeyo pi otthuupo oniwapatthaaye atthu ooshi. Na Nluku ti wa waamineya; ye khanteela olikhelela yoori mweeyo mwiiye ozayiniwa khwa khiima ya ohiwahi ovilela. Ila amana mwizayiniwaka, ye oniwinkhani nanna ya kiphenyo yoori mweeyo mwiwahi ovilela.

Majampo a sanamu na Njampo la Mbwana

¹⁴Tiito, aphetani aka kiniwuuzaanini yoori, mwilikhe waaputu sanamu. ¹⁵Kinttakhulana atthu aweeleyiwa; moone mweeyo ena etthu kinlupaaye. ¹⁶Jiikira ya parakha niparikhiyiyeeyo osiilana onrettiwaaye khwa taamu ya Al-Masiihu, na phaawu nimeyiyeeyo osiilana khwa mwiili wa Al-Masiihu. ¹⁷Wiiya ewaapho phaawu moote paasi, fweeyo, niiyiyeeyo awaatta, na mwiili mmote, maana fooshi ninja phaawu moote paasi.

¹⁸Mwiwoone mayaahuuti: apale anjaaye etile entthiwaaye vaalitaari nkhama twaha ari khwa osiilana na Nluku, otule alitaari awe eeyiyeeyo woohalalishiwa. ¹⁹Nakataalikha, kilupe niini? Talili twaha ya winkhiwa sanamu ena fwayita? Ama sanamu ena fwayita? ²⁰Wala, kintakha olupa yoori etile makaafiri antwahaaye aninkhiwa majini woohiiyi Nluku, na akintakha yoori mweeyo mwiiyane osiilana na majini. ²¹Khinretteya mweeyo onywela jiikira ya Mbwana na onywela jiikira ya majini; mwihirette phantte ya meeza a Mbwana na meeza a majini. ²²Toowo ninlika wiivu wa Mbwana! Fweeyo na wookhomaala zayita ye?

Otaphuliwa wa namalottela wa Yinsa

²³“Kinaaye ruhusa khwa vitthu zooshi,” ila zooshi khahiyo zoofwayi. “Kinaaye ruhusa khwa vitthu zooshi, ila khahi zooshi zinjekaaye.” ²⁴Ahiiyevo aneekesaaye ojirettela saana mweenyewe paasi, ila theenya owaarettela saana azaawe.

²⁵Mwije vitthu zooshi zinuuzanyisiwaaye opazari, woohuuzeli hatha etthu mwaasa wa akhili zenu. ²⁶Maana “nti pi wa Mbwana na zooshi ziriimo.”

²⁷Amana ntthu woohiiyi muumini ookharipusha olawa oja, oje zooshi onttelaaye otiiseliwa woohuuzeli hatha etthu mwaasa wa akhili. ²⁸Ila amana ntthu alupa yoori: “Zatwaheliwa sanamu,” ohije, mwaasa wa otule awuuziyeeyo na akhili zawe. ²⁹Eto tiiti, khwa akhili za akinoko, ila zohiiyi akhili zawo omweenyewe. Otaphuliwa wawo ohiphukiwe pi akinoko. ³⁰Nkhama kinja etthu yoojiwa khwa oshukhuru, akiniiya woohukhumwiwa mwaasa wa etile kijiyeeyo khwa onshukhurwela Nluku.

³¹Etthiipo, hatha nkhama mweetta oja, mweetta onywa, ama oretta wakhula etthu, mwirette zooshi khwa siifwa ya Nluku. ³²Ehiretteye wiiya etthu ya okwakwanttula wala khwa mayaahuuti wala akereeku ama ojama wa Nluku. ³³Theenya miiyo kineekesa owaatuvelisa atthu ooshi khwa nanna zooshi, maana akineekesa saana yaka paasi, ila saana ya atthu ooshi, yoori oosurukhe.

¹Mwikeezele miiyo, nkhama etthiipo miiyo kinimweezelaazo Al-Masiihu.

Onozela monkoni wa waaputu

²Miiyo kinuuttottopelani mwaasa wa okuupuwela na okholelela sawasawa menttezi khwa nanna kuufiseliyeenini. ³Ila kintakha eweeleyeni yoori Al-Masiihu eeshwa ya alume ooshi na nlume eeshwa ya muukha, na eeshwa ya Al-Masiihu ti Nluku. ⁴Wakhula nlume anlompaaye ama anhupiraaye afinikhiye eeshwa ontarawu eeshwa yawe. ⁵Ila wakhula muukha anlompaaye ama anhupiraaye ahifinikheeni eeshwa ontarawu eeshwa yawe maana onuupuwa nkhama anyooliwe. ⁶Nakataalikha, amana muukha ahitakhi owala nshukwi, khwa etthiipo ti akase nyuuli. Apho yiiyiyeevo haaya muukha okasa nyuuli ama onyooliwa, ti awale nshukwi. ⁷Nlume khana ya ofinikha eeshwa yawe, maana ye ratarato na siifwa ya Nluku; ila muukha siifwa ya nlume. ⁸Maana nlume khapuweeni khwa muukha, ila muukha apuwa khwa nlume. ⁹Olikha toowo, nlume khompiweeni mwaasa wa muukha, ila muukha mwaasa wa nlume. ¹⁰Mwaasa wa ethiito, na mwaasa wa malayikha, muukha ona ya wiiyana nshukwi mmwishwa nkhama alama ya ofwalume.

¹¹Khwa Mbwana, nlume khankamilikha woohiina muukha na muukha khankamilikha woohiina nlume. ¹²Nakataalikha, nkhama etthiipo muukha apuwiyeeyo khwa nlume na nlume avokoliwa ti muukha. Ila zooshi zinlankha wa Nluku. ¹³Moone mweeyena, ti yoolikana muukha onvekela Nluku ahifinikheeni eeshwa yawe? ¹⁴Maana ephattu ennozela yoori nlume ofuwa nyuuli haaya khwa ye. ¹⁵Ila khwa muukha wiiyana nyuuli zoolepa siifwa yawe. Maana nyuuli zoolepa enkhiwa ye nkhama nshukwi. ¹⁶Ila amana ntthu atakha okheetisana, monkoni wa vitthu zaya epo, fweeyo khanina thwapiya zaya epo wala ojama wa Nluku.

Njampo la Mbwana

¹⁷Nakataalikha, khwa epi kinttelaaye olupa akinuuttottopelani, maana okusanyeya weenu mweeyo mwinretta wootakhalavo woohiiyi wooshapweyavo. ¹⁸Ya mwanzo, kinsiila yoori, amana mweeyo mwikusanyeya nkhama ojama wa Nluku, owaapho waawanyeya khwa mweeyo. Mpakha ofiyelela miiyo okhupali, ¹⁹tiito enihithajiya wiiyavo waawanyeya mweeyenaru, yoori ajuwiwe paani wa mweeyo eeyiyeeyo woohakikhiwa. ²⁰Amana mweeyo mwikusanyeya khamwinretta nkhama atthu anjaaye, njampo la Mbwana. ²¹Maana, wakhula ntthu onja etthu yoojiwa yawe otthwe woohinweji nzaawe. Etthiipo, akina entta owaakhola jala, akina antta ohapaliwa. ²²Mweeyo mwinaaye manyupa oojamo na onywamo. Mwintarawu ojama wa Nluku na owaapatthisa haaya apale ahina. Kiri niini? Miiyo kinuuttottopelani mwaasa wa vitthu etthiipo? Kinoona yoori wala!

²³Maana kapwekherela wa Mbwana eti na miiyo kuusomisiyeeni yoori: Mbwana Yinsa, osikhu opule aazinkuliweeyo, aathuuliye phaawu, ²⁴na, paata ya oshukhurwela, khumeya khuri: “Opu mwiili aka, onvahiwaaye khwa zwaamu yenu mweeyo. Mwisala mwiretta etthiipi mwikifikhirelaka miiyo.” ²⁵Khwa nanna ethiito, paata ya etthu yoojiwa etile, khuthuula jiikira na khuri: “Jiikira eti osiilana mpheya khwa taamu yaka; mwisala mwiretta etthiipi wakhula mwinnywaavo, mwikifikhiraka miiyo.” ²⁶Maana, wakhula swaafu mwinrafunaavo phaawu eti na khunywela jiikira eti, mwinlaleya ofwa wa Mbwana mpakha ota wawe.

²⁷Nakataalikha, wakhula otule anrafunaaye phaawu eti na onywela jiikira ya Mbwana wootarawuvo, oniiyana paathuli ya okosela mwiili na taamu ya Mbwana. ²⁸Wakhula ntthu, ajinzaani mweenyewe, aphano arafune phaawu na anywele jiikira. ²⁹Maana, otule anrafunaaye woohitanizeli mwiili wa Mbwana, onrafuna na onywela khwa hukhumu yawe mweenyewe. ³⁰Tiito, awaapho vakatthi venu mweeyo atthu awaatta oottettheya na alwele, na akinoko afwiyeeyo. ³¹Ila eriwaka fweeyo naarina phoole ya ojinzaani nennyeweru, khanaari oteela ophukiwa. ³²Amana, niiya woophukiwa ti Mbwana, niniiya wooshoweriwa yoori nihiiye woophukiwa vamote na olumwenku.

³³Nakataalikha, attwiizaku amana mweeyo mwikusanyeya yoori mwije, mwiwejelane mmote na nzaawe. ³⁴Nkhama owaapho enkholiyeeyo jala, aje owawe yoori okusanyeya weenu ohikwele muuphukiwa. Monkoni wa mattakhuzi makinoko kinttela owuuzani amana kita ottuukho.

Tthuvo Ttakatthiifu

¹Attwiizaku, khwa tthuvo za nroho, akinuutakhelani ohijuwi. ²Mweeyo mwinjuwa yoori wakathi mwaari makaafiri, mwathowelelisiwa saaneene ti wakhula nanna khwa waaputu sanamu, etthiipo ehina ohaayi. ³Tiito, miiyo kinlupa yoori khaavo anttakhulaaye khwa Rooho ya Nluku anlupaaye yoori: “Yinsa eeye Woolanikha!” Na khaavo anlupaaye yoori: “Yinsa ti Mbwana,” woohiina Rooho Ttakatthiifu.

⁴Ziwaapho nanna za tthuvo zoofwarikhana, ila Rooho moote. ⁵Ewaapho nanna za khaazi zoofwarikhana, ila Mbwana mmote. ⁶Ewaapho nanna ya ofwarikhana khwa okhola khaazi, ila Nluku mmote othuuto ti anrettaaye zooshi khwa atthu ooshi.

⁷Nakataalikha, wakhula mmote oninkhiwa ojithoonyeza wa Rooho khwa saana ya atthu ooshi. ⁸Khwa Rooho mmote, oninkhiwa mattakhuzi aakhili; khwa Rooho ethiito, mattakhuzi oojuwa; ⁹nkina khwa Rooho ethiito amini; nkina khwa Rooho moote ethiito tthuvo yoovonisa; ¹⁰nkina owahi wa oretta minjuza; nkina otafusiri; nkina othawula rooho; nkina ottakhula luuka zoofwarikhana; na theenya nkina otaphulela luuka. ¹¹Nakataalikha, vitthu zaya epo zooshi zinrettiwa khwa Rooho moote ethiito paasi, na ye enimwaawanyela wakhula ntthu, khwa nanna entakhaazo.

Mwiili mmote khwa kifunko za waatta

¹²Apho, nkhama etthiipo mwiili wiiyiyeeyo etthu moote, weeyanaru pure kifunko zawaatta, na kifunko zooshi enretta mwiili mmote paasi, na fweeyo pi etthiipo khwa Al-Masiihu. ¹³Maana khwa mwiili mmote paasi noosiwa khwa Rooho moote: waaza mayaahuuti, akereeku, mpakha amwiitthwaana, hatha apale ootaphuliwa, fooshi napwekhera Rooho moote paasi.

¹⁴Mwiili khawaattaliweeni khwa kifunko moote paasi, ila zawaatta. ¹⁵Amana muulu olupa yoori: “Mwaasa wa ohiiyi nkhono, akinretta phantte ya mwiili”, wala khwa ethiito, khunlikha oretta phantte ya mwiili. ¹⁶Amana nshiilo lilupa yoori: “Mwaasa wa ohiiyi liisho, akinretta phantte ya mwiili”, wala khwa ethiito, khalinlikha oretta phantte ya mwiili. ¹⁷Eriwaka mwiili wooshi waari liisho, ntthu ahisiilaka. Eriwaka mwiili wooshi waari nshiilo, ntthu ahinukhiselaka. ¹⁸Wekhweele, Nluku attha wakhula kifunko vamwiili, khwa matakhelo awe. ¹⁹Eriwaka kifunko zooshi zaari moote, mwiili waari wiiya vayi? ²⁰Etthiipo, ziwaapho kifunko zawaatta khwa mwiili mmote paasi.

²¹Liisho lihuuze nkhono yoori: “Miiyo akinuuhithajiya weeyo”; wala eeshwa wuuza moolu yoori: “Miiyo akinuuhithajiya weeyo.” ²²Olikha toowo, kifunko epile zinuupuwaaye nkhama zootepa otteettheya pi enihithajiyiwaaye. ²³Phantte ninoonaaye ohiina fwayita vamwiili, pi etthiipo nintthanttaaye khwa hishimavo na epile zoopatthisa haaya ti nintthanttaaye khwa hishima yootafikhana. ²⁴Maana epile khwa fweeyo ziiyiye zooshapweya khinihithajiya otthanttiwa khwa nanna ya hishima. Ila Nluku aattala mwiili na khwinkha hishima epile zaari osaleelaaye, ²⁵yoori ohiiyevo waawanyeya khwa mwiili, ila yoori kifunko zooshi ziiyane otthanttana sawasawa kiina na nzaaya. ²⁶Amana kifunko moote ehoowaka, kifunko epile kiina zinhoowa na ye; amana kifunko moote eshitahiwa, kifunko epile kiina ziniiya zoofurahi na ye. ²⁷Maana, mweeyo mwa mwiili wa Al-Masiihu, wakhula mmote wa mweeyo, kifunko ya mwiili otthuupo. ²⁸Etthiipo, muujama wa Nluku, omwanzo Nluku awaatthaamo maaswihaapa; ya phiiri manapiyu; ya ttaatthu anamanozela; elottelanaka apale anrettaaye minjuza, apale ariina tthuvo ya ovonisa, apale ariina tthuvo ya waawuni, apale ariina tthuvo ya oshuka nzurukhu na apale anttakhulaaye luuka pheeya. ²⁹Ooshi khahiye maaswihaapa, ooshi khahiye manapiyu, ooshi khahiye anamanozela, ooshi khahiye anamaretta minjuza. ³⁰Khahiye ooshi ariina tthuvo ya ovonisa khahiye ooshi anttakhulaaye luuka pheeya, khahiye ooshi antaphulelaaye mattakhuzi a luuka pheeya. ³¹Nakataalikha, mwijilipise yoori mwipatthe tthuvo swaafi.

Pheta

Kinvira nasaapi kuuthonyezakani mweeyo tarikhi yootepa oshapweya.

Etthu khuulu pheta

¹Hatha nkhama miiyo keetta ottakhula luuka za anaatamu na za malayikha, ila khuhiina pheta, kiniiya nkhama yuuma envumaaye ama nkhama ovuma wa laatha. ²Hatha nkhama keetta wiiyana tthuvo ya otafusiri, khujuwa siiri zooshi zoovitheya, na ojuwa wooshi na khwiiyana amini enwahaaye othamisa nyaako, amana kihina pheta, akinpatthela hatha etthu. ³Hatha nkhama miiyo keetta owenkha asikhini zooshi kiriinaazo na khwinkha mwiili aka yoori olukuziwe, amana kihina pheta, epo zaya khiniiya hatha etthu.

⁴Ntthu amphetaaye ti woovilela, wookemaani, khahi wa nrima, khahi wa wiivu, khahi woojitayiti wala woojikhupali. ⁵Khahi wookuputi, khaneekesa ojituvelisa, khahi wawaakuva okatipukha, khahi woothokorela katapu. ⁶Ntthu amphetaaye khanfurahela vitthu zohiiyi za shariya, ila onfurahela haakhi, ⁷onhoowa khwa zooshi, onkhupalela zooshi, onwejela zooshi na onvilela zooshi. ⁸Pheta khiniisha. Ila otafusiri oniisha, luuka ziniisha, ojuwa oniisha. ⁹Maana, phantte kiina ninjuwa na phantte kiina ninhupiri. ¹⁰Ila, amana eta etile yiiyiyeeyo khaamili, etile yohiiyi khaamili entta waashikha. ¹¹Wakathi kaari nsimaana, kaari ottakhula nkhama nsimaana, kaari wuupuwela nkhama nsimaana na opheleleza nkhama nsimaana. Paata kiwuliyeevo, keetta olikha nyuma vitthu za esimaana. ¹²Maana, nasaapi ninoona ratarato yoozizeya, nkhama yiloolo; ila ninteela omoona wuuso khwa wuuso. Nasaapi ojuwa waka khayi khaamili; ila, kinteela onjuwa sawasawa, nkhama etthiipo na miiyo kinjuwiwaazo sawasawa. ¹³Aphano ziwaapho vitthu epi ttatthu: Amini, owejela na pheta. Nakataalikha khuulu khwa epi zaya pheta.

Tthuvo ya otafusiri na ya luuka pheeya

¹Mwilotte tarikhi ya pheta na mweekese woohilikheleli tthuvo ya rooho, haaswahaaswa tthuvo ya otafusiri. ²Maana otule anttakhulaaye luuka pheeya khaniwaattakhulela atthu, ila Nluku. Wekhweele, khina enimweleyaaye; na khwa rooho onttakhula siiri zoovitheya. ³Ila otule antafusiraaye onretta khwa ojeka, olipisela na owaazuru atthu. ⁴Otule anttakhulaaye luuka pheeya onjijeka mweenyewe, ila otule antafusiraaye onjeka ojama wa Nluku. ⁵Yaari okituvela mooshi mweeyo mwittakhulaka luuka pheeya, ila kinhithari yoori mwitafusiri. Otule antafusiraaye anziti otule anttakhulaaye luuka pheeya, ehiriwaka etta wiiyavo ntthu wootaphulela yoori ojama wa Nluku ojekeye.

⁶Aphano attwiizaku, amana miiyo kita wuuthotolani na kittakhulaka luuka pheeya, mwimpatthanivo mweeyo, woohiiyi miiyo owuuzani monkoni wa othoonyeziwa, ama ojuwa, ama otafusiri ama masomi? ⁷Mpakha khwa vitthu epile zinvumaaye, waaza kuruneetha ama tthakare, amana zihifwarikhanisiwi ovuma waya, ntthu onjuwa toovi eti enpiwaaye? ⁸Olikha toowo, amana nlope lihivumi saana, paani anttelaaye Ojitthenkeza yoori alawe ovittha? ⁹Etthiipo, zinrettikhana khwa mweeyo, amana nlimi lenu lihittakhuli mattakhuzi aweeleya, enttela ojuwiwa toovi etthu mwinlupaaye? Maana enttela wuupuwa nkhama mwinuuzaaye pheevo. ¹⁰Woohiivo hatha shaakha va olumwenku ziwaapho luuka zawaatta khwa zooshi ila khayiivo moote yoohilotteyi. ¹¹Nakataalikha, amana miiyo ehikeeleyi etile ntthu anlupaaye, kiniiya nletto khwa ye na ye oniiya nletto khwa miiyo. ¹²Enrettikhana etthiipo khwa mweeyo. Maana mwinshukulikhela opattha tthuvo za nroho, mweekese okhomaala khwa epile entiisaaye ojeka ojama wa Nluku.

¹³Tiito, otule anttakhulaaye khwa luuka pheeya, alompe yoori awahi otaphulela. ¹⁴Maana, nkhama kinlompa khwa luuka pheeya, rooho yaka ti enlompaaye, ila weeleyiwa waka oniiya woohiina hatha etthu. ¹⁵Aphano kirette niini? Kinteela olompa na rooho, ila theenya kinteela olompa na weeleyiwa; kiniipa na rooho, ila theenya kinteela wiipa na weeleyiwa. ¹⁶Amana weeyo onsifwaka Nluku khwa rooho, nannani ntthu antthaaye waazaru otamo anttelaaye owahi olupa yoori amiina khwa lompa yawo ya oshukhurwela, woone yoori khanjuwa etthu weeyo onlupaaye. ¹⁷Hatha nkhama ontta oshukhurwela wooshapweyavo, ila nkinoko khaniiya woojekeya. ¹⁸Kininshukhurwela Nluku khwa ottakhula luuka pheeya zayita mooshi mweeyo. ¹⁹Khwa etthiipo, va ojama wa Nluku kinhithari ottakhula mattakhuzi mathaanu aweeleya yoori kiwaanozele akinoko, woohiiyi ottakhula mattakhuzi alufu khumi khwa luuka pheeya.

²⁰Attwiizaku, mwilikhe wuupuwela nkhama asimaana. Monkoni wa zootakhala, mwiiye asimaana, ila khwa nanna ya wuupuwela mwiiye awulweene. ²¹Maana yaatikhiwa nkano yoori:

“Vakatthi wa atthu apale a luuka kiina

na vakatthi wa milomo za amalapo,

kinteela owooza atthu apa,

ila, etthiipo yo khanteela okisiila,”

Mbwana alupa.

²²Nakataalikha, luuka alama ya apale ohiiyi mamuumini, khahiyo khwa mamuumini; otafusiri na ye pi wa apale eeyiye mamuumini, khahiyo khwa apale ohiiyi mamuumini. ²³Amana ojama wooshi wa Nluku okusanyeya na ooshi khusala ottakhula luuka pheeya, khutamo atthu ohinozeliwi ama ohiiyi mamuumini, khanlupa yoori mwaalolo? ²⁴Ila, amana atamo ntthu woohiiyi muumini ama woohinozeliwi mweettaka otafusiri, ye khusiila etthu mwinlupaaye ontta opayini twampi zawe. Na ontta ophukiwa ti ethiitile ansiilaaye, ²⁵na siiri za nroho mwawe enteela osaruwa, khwa etthiipo, ye onkokhora afiise ajihi vathi, na omwaaputu Nluku anyakulaka araka: “Wekhweele Nluku ori vakatthi venu!”

Nanna ya wikhazela nthukumano

²⁶Nakataalikha, niri je attwiizaku? Amana mweeyo mwikusanyeya, wakhula mmote wa mweeyo eeyane liipo la zaapuura moote, ama nttakhuzi la onozela, othoonyeziwa, ama nttakhuzi la luuka pheeya ama otaphulela. Zooshi zirettikhane khwa ojeka ojama wa Nluku. ²⁷Nkhama awaapho akina anttakhulaaye luuka pheeya, attakhule atthu awiri ama attatthu na akina ataphulele. ²⁸Ila amana ahiivo namataphulela, mwinyamale, ottakhule otthowe na Nluku. ²⁹Monkoni wa manapiyu, attakhule atthu awiri ama attatthu, akinoko apheleleze saana etthu elupiweeyo. ³⁰Ila amana Nluku anthoonyeza ntthu etthu mmote eekhaliye, otule aari ottakhulaaye anyamale khapula. ³¹Maana mooshi mweeyo mwinwahi otafusiri, wakhula mmote khwa zwaamu yawe, khwa nanna yoori mooshi mwiiye woonozeleya na woolipiseleya. ³²Rooho ya anamatafusiri enooniwa pi anamatafusiri akina. ³³Maana Nluku khahiyo Nluku woohisilaneyi, ila wa heeri.

Nkhama khwa othukumana wooshi wa ttakatthiifu, ³⁴aakha ana ya onyamala vakatthi wa ojama wa Nluku, maana khantakheliwa ottakhula; ila ana ya ojinkha, nkhama enlupaazo kano. ³⁵Amana atakha onozeliwa etthu, ana ya owuuzela amanna zaya owaya; maana, haaya muukha ottakhula muujama wa Nluku. ³⁶Talili, nttakhuzi la Nluku lalankha vakatthi venu mweeyo? Atthu oopatthiyeenini ti mweeyo paasi? ³⁷Nkhama ntthu onjoona yoori napiyu ama ttakatthiifu, ona ya oojuwa yoori epi kiniwaatikhelaanini mweeyo oruma wa Mbwana. ³⁸Amana ntthu ahijali vitthu zaya epi, ye mweenyeweene khanjaliwa. ³⁹Nakataalikha, attwiizaku, mweekese otafusiri saaneene na mwihikhattaze ottakhuliwa luuka pheeya. ⁴⁰Ila zooshi ena ya orettiwa wooshapweyavo na wootthunkeyavo.

Osisimuwa wa Al-Masiihu

¹Attwiizaku, kintakha kuukupuseleni hapari zooshapweya kuutafusireliyeenini, etthiipo mweeyo mwipwekheriyeeyo na etthiipo mwilipaniyeeyo. ²Khwa hapari zooshapweya etthiipo mweeyo mwa wuusurukha, amana mwikholelela woolipanavo nttakhuzi kuutafusireliyeenini; woohiiyi toowo, mweeyo mwakhupali mahala.

³Maana etile kuutafusireliyeenini mwanzo ti ethiito kipwekhereliyeeyo: Yinsa afwa mwaasa wa twampi zeetthu, nkhama etthiipo enlupaazo zawaatikhiwa. ⁴Khuzikhiwa na khusisimuwa siikhu ya ttaatthu, nkhama etthiipo enlupaazo zawaatikhiwa. ⁵Khumpuwelela Pheeturu na theenya apale khumi na awiri. ⁶Paata ya toowo, khuwaapuwelela attwi aari ozitaaye miiya thaanu khwa swaafu moote, enki wa apo aya mpakha leelo ari haayi, ila akina afwa. ⁷Theenya, khumpuwelela Tiyaaku na khuwaapuwelela maaswihaapa ooshi. ⁸Paata ya apo, khukipuwelela miiyo, nkhama ntthu avokoliweeyo wakathi woohiiyi khaamili. ⁹Maana miiyo kinttitthiiru khwa maaswihaapa na hatha vattitthiiru akinsuhi wiitthiwa aswihaapa, maana kalupattha ojama wa Nluku. ¹⁰Ila khwa rehema ya Nluku, karetteya nanna eti kiriizo, na rehema yawe khwa miiyo khahiyo etthu yoohiina fwayita; khapulathi, kakhola khaazi channu zayita yo ooshi; khwa zooshi, khahiyo miiyo, ila rehema ya Nluku khwa miiyo. ¹¹Nakataalikha, hatha nkhama ti miiyo, hatha nkhama ti yo, ti ethiito nitafusiriyeeyo, na ti ethiito mweeyo mwikhupaliyeeyo.

Osisimuwa vakatthi wa ananfwa

¹²Nkhama entafusiriwa yoori Al-Masiihu asisimuwa vakatthi wa ananfwa, nannani akinoko a mweeyo alupaka yoori khawiivo osisimuwa wa ananfwa? ¹³Nkhama khawiivo osisimuwa wa ananfwa, hatha Al-Masiihu khasisimuweeni. ¹⁴Na nkhama Al-Masiihu khasisimuweeni, tafusiiri yeetthu khina fwayita, na theenya amini yenu khina fwayita. ¹⁵Khwa etthiipo, ninttela otthanttiwa nkhama mashaahiti oojipanka a Nluku, maana khwa ye nalawela oshaahiti yoori ansisimula Al-Masiihu vakatthi wa ananfwa. Ila nkhama khweele ananfwa khansisimuwa, ye theenya khansisimuleeni Al-Masiihu. ¹⁶Maana nkhama ananfwa khansisimuwa, hatha Al-Masiihu khasisimuweeni. ¹⁷Na nkhama Al-Masiihu khasisimuweeni amini yenu khina fwayita, na nalelo mwiri ntwampi mweenu. ¹⁸Nkhama pi etthiipo, apale afwiyeeyo amwaaminaka Al-Masiihu apwetheya. ¹⁹Nkhama ohaayi otthuupu paasi ti niriina nroromelo khwa Al-Masiihu, natepa ofukhara khwa atthu ooshi.

²⁰Ila wekhweele, Al-Masiihu asisimuwa vakatthi wa ananfwa, othuuto eeyiyeeyo mwanzo na nroromelo wa apale ooshi afwiyeeyo. ²¹Maana ofwa wata khwa ntthu mmote, na theenya vakatthi wa ntthu mmote wata osisimuwa wa ananfwa. ²²Khwa nanna etthiipo fooshi nafwa khwa Adamu, etthiipo theenya khwa Al-Masiihu fooshi ninteela osisimuliwa. ²³Ila wakhula mmote khwa zwaamu yawe: mwanzo Al-Masiihu, amana ye ata awaasisimule apale eeyiyeeyo awe. ²⁴Aphano onteela ofiya mwiisho wa vitthu zooshi, Al-Masiihu onteela otapanya owahi wooshi, ofwalume na maatuwi na aperekhe ofwalume mmakhono wa Nluku, Papaawe. ²⁵Maana enihithajiya ye wiiya va yenzi mpakha maatuwi awe ooshi atthiiwe vathi wa moolu awe. ²⁶Ofwa onttela wiiya atuwi wawiishela otapanyiwa. ²⁷Maana ye “zooshi attha vathi wa moolu awe.” Na amana eriwa “vitthu zooshi attheeliwa vathi wa moolu awe”, wekhweele enlupa yoori khatthiiweenimo Nluku mweenyeweene, otule amwinkhiyeeyo zooshi Al-Masiihu. ²⁸Ila amana Nluku attha vitthu zooshi vathi wa owahi wa Mwaana awe, theenya epo zaya onttela ottha vathi wa owahi wa papaawe amwinkhiyeeyo zooshi. Na, khwa nanna etthiipo Nluku onttela wiiya zooshi khwa atthu ooshi.

²⁹Nkhama khawiivo osisimuwa, anttela oretta niini apale anjosaaye khwa ananfwa? Nkhama khweele ananfwa khansisimuwa, mwaasa wa niini mwijoosaka khwa yo. ³⁰Theenya fweeyo, mwaasa wa niini nijitthaaka nkatthi wa ajali wakhula wakathi? ³¹Attwiizaku, wakhula siikhu kinuumanana ofwa, epo kinlupa khwa ojikhutupula kiriina khwa mweeyo khwa Al-Masiihu Yinsa, Mbwana eetthu. ³²Nti wa Eefezu miiyo koomanana maatuwi nkhama khaari wuumananaaye nyama za ntthuttu. Na nkhama epoza karetta khwa ajili ya onaatamu, fwayitani kipattheliyeeyo? Nkhama khweele ananfwa khansisimuwa, apho ti “Nije na ninywe, maana meesho nintta ofwa.” ³³Mwihijilikhelele ottettekhiwa: “Ashirikha oohisuhi antapwatela mwentto wooshapweya.” ³⁴Nkhama anashariya, mwiikhale mwentto wooshapweya na mwilikhe twampi; maana akina nalelo khananjuwe Nluku; kinlupa epo zaya khwa haaya yenu mweeyo.

Osisimuwa wa mwiili

³⁵Ila amana ntthu oozela yoori: “Ansisimuwa toovi ananfwa? Na anttela otana mwiili-ni?” ³⁶Alolo! Etile weeyo onzalaaye khimphutuwa khapula ehifweeni. ³⁷Amana weeyo ozala, khunzala muutthi onttelaaye owula, ila peewu paasi, nkhama ya tiriku ama ya etthu kiina. ³⁸Ila Nluku oniwinkha mwiili nkhama atthomiyeezo, na wakhula jaati ya peewu oninkha mwiili aya khaamili. ³⁹Mwiili wooshi khahi sawasawa, anaatamu ana jaati yaya ya mwiili, nyama enaaye mwiili nkina, anyannyi anaaye mwiili aya na swi enaaye mwiili aya. ⁴⁰Owaapho mwiili wa pinkuuni na mwiili wa vathi apha; ila nuuru ya mwiili wa pinkuuni kiina, na nuuru ya mwiili wa vathi apha kiina. ⁴¹Moote, nuuru ya njuwa, kiina nuuru ya mweezi, na kiina ya matthottowa. Hatha matthottowa atthaapo ana nuuru yoofwarikhana.

⁴²Enttela wiiya etthiipo khwa osisimuwa wa ananfwa. Mwiili ozaliweeyo ontta waashikha khusisimuwa ohinaashikhaaye. ⁴³Onzikhiwa ori wootaraweya, na onsisimuwa khwa siifwa; onzikhiwa khwa otteettheya na onsisimuwa khwa owahi; ⁴⁴onzikhiwa mwiili wa ephattu na khusisimuliwa mwiili ttakatthiifu. Nkhama owaapho mwiili wa ephattu, owaapho theenya mwiili ttakatthiifu. ⁴⁵Maana Zawaatikhiwa Ttakatthiifu zinlupa yoori: “Adamu, ntthu wamwanzo, ompiwa nkhama yumpe haayi”, ila Adamu wawiishela, Yinsa Al-Masiihu, rooho eninkhaaye ohaayi. ⁴⁶Khahiyo ttakatthiifu atiiyeeyo omwanzo, ila wa ephattu; paata ya ye, khuta ttakatthiifu. ⁴⁷Pinaatamu wamwanzo aari wa ottophe wa vathi; pinaatamu wa phiiri ari wa pinkuuni. ⁴⁸Apale eeyiyeeyo a vathi, anlattanana pinaatamu otule wa vathi; apale a pinkuuni anlattanana pinaatamu otule wa pinkuuni. ⁴⁹Nkhama etthiipo niriina ratarato ya pinaatamu wa vathi apha, ninteela wiiyana theenya ratarato ya pinaatamu wa pinkuuni.

⁵⁰Attwiizaku, miiyo kiniwuuzani mweeyo yoori mwiili na taamu khinwahi orithi ofwalume wa Nluku na etile enfwaaye khinrithi etile ehinfwaaye. ⁵¹Moone yoori miiyo kinlupa siiri zoovitheya yoori: khahiyo fooshi ninttelaaye ofwa, ila fooshi ninttela ozukulisiwa, ⁵²wakathi vattitthiiru, khwa ofunula na ophunya wa maasho, khwa ovuma wa nlope la wiishela. Maana nlope linttela ovuma, ananfwa asisimuwe woohitapwateleyi, na fweeyo ninttela wiiya oozukulisiwa. ⁵³Maana, etile yootapwateleya enhithajiya owala etile ehintapwateleyaaye, etile enfwaaye ewale etile ehinfwaaye. ⁵⁴Nakataalikha, enhithajiya etile yootapwateleya ewala etile ehintapwateleyaaye, na etile enfwaaye ewale etile ehinfwaaye, apho linttela omariseliwa nttakhuzi laatikhiweeyo yoori:

“Ofwa watapanyiwa ti oshintta!”

⁵⁵Oo, ofwa, ori vayi oshintta wawo?

Oo, ofwa, ori vayi owahi awo?

⁵⁶Owahi wa ofwa twampi, na eninkhaaye kuvu twampi kano. ⁵⁷Ila rehema ya Nluku ti eninkhaaye oshintta khwa Mbwana eetthu Yinsa Al-Masiihu. ⁵⁸Nakataalikha, attwiizaku aphetani aka, mwiiye wookhomaala, ehiiyevo hatha etthu enttelaaye wuusakhinyani. Mwiiye woojilipisana mileele khaazi ya Mbwana, maana mweeyo mwinjuwa yoori, khwa Mbwana, khaazi yenu khinteela wiiya ya mahala.

Zaakha za ojama wa Nluku wa Yeruzaleemu

¹Monkoni wa zaakha khwa ojama wa Nluku mwirette nanna kirumiyeezo ojama wa Nluku wa Kalaasiya. ²Siikhu yamwanzo ya sumana, wakhula mmote wa mweeyo apwehe owawe phantte etile apatthiyeeyo, yoori amana miiyo kita kihihithajiye oshokholeza. ³Aphano amana miiyo kifiya, kiniwenkha warakha ya owaaruma atthu apale mweeyo mwinttelaaye owaathawula na kiniwaaruma Yeruzaleemu yoori athuule zaakha zenu mweeyo. ⁴Amana yiiya ya oshapweya miiyo olawa theenya, yo antta okiperekha.

Shawuri za Paawulu

⁵Paata ya ovira Masetooniya kinlawa koothotoleni, wiiya kinttela ovira ottuukho. ⁶Talili miiyo keekhale na mweeyo wakathi vattitthiiru ama mpakha wiisha mwiita kirina mweeyo, yoori akaawuni nsafwari, wakhula vahali kinttaavo. ⁷Swaafu eti akintakha owoonani na wuuthotolani paasi amana kiviraka; kinwejela wiiya vamote na mweeyo wakathi nkina, amana Mbwana atakha. ⁸Ila kinttela wiikhala Eefezu mpakha wakathi wa njampo la Takhiriima. ⁹Maana wafukuliwa khwa miiyo nlako mmote nwulweene na ruhusa; na awaapho ashinttani awaatta.

¹⁰Amana Timootiyu ata okho, mwintthantte yoori ye ahiiyane hatha etthu ya woova amana eeya na mweeyo, maana ye onkhola khaazi ya Mbwana, etthiipo nkhama miiyo. ¹¹Nakataalikha, ahiiyevo anintarawaaye. Mwimwaawuni yoori avire arettaka safwari yawe na heeri, yoori ye awahi orutela okhuno kiriiwo. Maana kintta onweja na attwi akina.

¹²Monkoni wa ttwi yeetthu Apoolu, kankhanyarela yoori awaaperekhe attwi wuuthotolani mweeyo. Ye khuhitakhi hatha vattitthiiru olawa nasaapi, ila onteela olawa amana yiiyavo kiphenyo kiina.

Otumerela wawiishela

¹³Mwiiye woojeekesela, mwikhomaale nkatthi wa amini, mwiiye atthu ominyala, mwiiye ookhomaala. ¹⁴Mwirette zooshi epo khwa pheta.

¹⁵Mweeyo mwinjuwa yoori ojama wa owawe Shiteefanu pi atthu amwanzo a nti wa Akaaya okhupalela amini na ojinkha nkatthi wa khaazi ya attakatthiifu. ¹⁶Kinuurumani attwiizaku, mwiwaashitahi atthu nkhama apo na ooshi apale anrettaaye phantte na ankholaaye khaazi na fweeyo. ¹⁷Kafurahi khwa ota wa Shiteefanu, Furutunaatu, na Akaayiku, maana yo amarisela etile yaari okisaleelaaye khwa phantte yenu mweeyo. ¹⁸Yo atana ovumulisa rooho yaka channu, na yenu mweeyo theenya. Mwiwenkhe fwayita atthu nkhama yo.

Salamu ya wiishela

¹⁹Ojama wa Nluku wa nti wa Aaziya omperekha salamu. Akiila na Pirisiila anuuchelisani saaneene khwa Mbwana, na ojama wa Nluku onkusanyeyaaye owawe. ²⁰Attwi ooshi ookhuno amperekha salamu. Mwichelisane mmote na nzeenu na salamu ttakatthiifu.

²¹Miiyo Paawulu, kaatikha salamu epi na nkhono aka.

²²Nkhama owaapho ahinimphetaaye Mbwana, eeye Woolanikha. Ote Mbwana!

²³Rehema ya Mbwana eetthu Yinsa yiiye vamote na mweeyo.

²⁴Mwipwekherele pheta yaka kiriinaaye khwa mooshi mweeyo, khwa Al-Masiihu Yinsa Amiina!