Sofoni

SOFONI

TA KITABU

Kitabu faamucogo

Sofoni k’a ta ciraya kɛ masacɛ Yoziyasi ta wagati le ra.

Izirayɛlimɔgɔw tun b’a miiri ko Ala ta kiti bɛna ben siya wɛrɛ mɔgɔw le kan, o ta jurumunw kosɔn; nka olugu minw ye a ta mɔgɔw ye, a ta kiti tɛna se olugu ma. Nka cira Sofoni k’a yira o ra ko Ala ta kiti bɛna damina a yɛrɛ ta mɔgɔw le ra fɔlɔ, ka sɔrɔ ka se siya tɔw ma. O kosɔn Sofoni k’a fɔ o ye ko Matigi Ala ta lonba bɛna na, ko o lon tɛna kɛ ninsɔndiyalon ye, nka a bɛna kɛ halakirilon le ye. O kiti bɛna se siyaw bɛɛ le ma.

O kosɔn a ka Ala ta mɔgɔw lasɔmi, ko o ka kan ka nimisa, ka o ta jurumun dabla; ni o kɛra, Ala ta kiti tɛna ben o kan; Ala bɛna baraka don o ta jamana ra.

Nin kitabu b’a yira an na ko Ala tɛ mɔgɔ bɔ mɔgɔ ra. Jurumun hakɛ bɛ bɔ jurumunkɛbaga ra, nka ni mɔgɔ min ka nimisa ka jurumun dabla, Ala bɛ yafa o ma, ka sɔn o tigi ma, ka koɲuman kɛ a ye.

Kitabu kɔnɔkow

Matigi Ala ta kiti lon bɛna kɛ lonjuguba ye (1.1–2.3)

Ala ta kiti bɛna se siya wɛrɛw fana ma (2.4-15)

Ala bɛna Zeruzalɛmukaw ta jurumun yafa (3.1-20)

¹Matigi Ala k’a ta kuma min lase Sofoni ma, o le ye nin ye. Sofoni tun ye Kusi dencɛ le ye, Kusi facɛ tun ye Gedaliya ye, Gedaliya facɛ tun ye Amariya ye, Amariya facɛ tun ye Ezekiyasi ye. Sofoni ka nin kumaw fɔ Zuda masacɛ Yoziyasi ta wagati le ra, Yoziyasi min tun ye Amɔn dencɛ ye.

Ala ta kiti bɛ se dunuɲa bɛɛ ma

²«Ne bɛna danfɛnw bɛɛ flan ka bɔ dugukolo kan pewu!

Matigi Ala ko ten.

³Ne bɛna adamadenw, ani bɛganw flan ka bɔ yi!

Ne bɛna kɔnɔw, ani jɛgɛw flan ka bɔ yi!

Ne bɛna mɔgɔjuguw bɛɛ lajigi!

Ne bɛna adamadenw bɛɛ halaki ka bɔ dugukolo kɔ kan.

Matigi Ala ko ten.»

Zuda ni Zeruzalɛmu ta kiti

⁴«Ne bɛna ne boro kɔrɔta Zuda mara kama,

ani Zeruzalɛmukaw bɛɛ kama;

Baali ta jobatobaga tɔ minw tora, ne bɛna olugu bɛɛ halaki ka bɔ nin yɔrɔ ra.

Ne bɛna jobatobagaw ni o ta sɔnnikɛbagaw bɛɛ halaki pewu;

⁵minw bɛ o kinbiri gban o ta bon kunna ka lolow ni karo bato,

minw bɛ o kinbiri gban ka kari Matigi Ala tɔgɔ ra,

ani ka kari o ta jo Molɔki fana tɔgɔ ra;

⁶minw bɛ o kɔ di Matigi Ala ma,

minw tɛ tugu Matigi Ala kɔ,

minw tɛ Matigi Ala ɲininka,

ne bɛna olugu bɛɛ halaki.

⁷«Bɛɛ ye je Dunuɲatigi Ala ɲa kɔrɔ!

Sabu Matigi Ala ta lon surunyara.

Matigi Ala ka saraka dɔ le labɛn;

a k’a ta mɔgɔ weleninw bɛɛ saninya ka ban o saraka kama.

⁸«Matigi Ala ta saraka bɔlon na,

ne Ala bɛna kuntigiw, ani masacɛdenw bɛɛ ta kojugu hakɛ bɔ o ra,

ani minw bɛɛ bɛ siya wɛrɛw ta fanidoncogo1.8 Ka siya wɛrɛw ta fanidoncogo ta, o kɔrɔ ye ka tugu o siyaw ta landaw, ani o ta alaw kɔ. ta.

⁹«O lon na, kɔni, minw bɛ pan bon dakun kunna1.9 Ka pan bon dakun kunna, o ye siya dɔw ta landa dɔ ye (Samawilu fɔlɔ 5.1-5).,

ne bɛna olugu ta kojugu hakɛ bɔ o ra,

ani minw bɛ o matigicɛw ta bonw fa ni kojugu ni nanbara ye.

¹⁰«O lon na, kɔni, kulekanbaw bɛna bɔ Jɛgɛw ta donda yɔrɔ ra,

kasikanbaw bɛna bɔ dugu kindakura fan na;

mankanba dɔ bɛna bɔ kongoriw kan.

Matigi Ala ko ten.

¹¹Aw minw bɛ dugu jigijigi ra, aw ye kule;

sabu jagokɛbagaw bɛɛ halakira;

minw yɔrɔ bɛɛ tun fara wari ra, olugu bɛɛ halakira.

¹²O wagati ra, ne bɛna tasumayeelen le ta ka Zeruzalɛmu yɔrɔw bɛɛ yaala;

minw bɛɛ siginin bɛ ɲasuma ra, ko o lanin bɛ o yɛrɛ ra, ne bɛna olugu bɛɛ ta kojuguw hakɛ bɔ o ra;

olugu minw b’a fɔ o yɛrɛ kɔnɔ ko:

‹Matigi Ala tɛna koɲuman kɛ an ye, a fana tɛna kojugu kɛ an na.›

¹³O juguw bɛna o ta naforow bɛɛ cɛ,

o ta bonw lakolon bɛna to.

O tun ka bon minw lɔ, o tɛna don o bonw kɔnɔ;

o tun ka rɛzɛnforo minw sɛnɛ, o tɛna o rɛzɛnji min.»

Matigi Ala ta lonba

¹⁴«Matigi Ala ta lonba surunyara;

a surunyara, a tɔ man jan tuun.

Matigi Ala ta lon mankan bɛna kɛ jigitigɛmankan le ye;

kɛrɛkɛcɛw bɛna kule ci o lon na.

¹⁵O lon bɛna kɛ dimilon le ye,

degulon, ani kɔnɔnɔfirilon,

halakirilon, ani cɛnrikɛlon,

dibi bɛna don, ka yɔrɔ bɛɛ fin,

sankabaw bɛ caya,

ka yɔrɔ kɛ dibikuruba ye;

¹⁶burufiyɛkanw bɛ bɔ, ani kɛrɛkɛdenw kulekanw.

O bɛna wuri dugu barakamanw kama, ani sankasojanw kama.

¹⁷Ne bɛna tɔɔrɔ ben mɔgɔw kan,

k’a kɛ fɔ o bɛ tagama i ko fiyentɔw;

sabu o ka Matigi Ala hakɛ ta.

Mɔgɔw jori bɛna seriseri ka yɛrɛgɛ i ko buguri,

o sogo bɛna firi sununkun kan i ko ɲamaɲama.

¹⁸O ta wari o, o ta sani o, o si tɛna se ka o kisi Matigi Ala ta dimilon na;

jamana bɛɛ lajɛnnin bɛna halaki tasuma ra, Ala ta dimiba kosɔn;

sabu a bɛna dugukolo mɔgɔw bɛɛ halaki ka bɔ yi,

ka o bɛɛ ban ka bɔ yi pewu.»

Ala b’a fɛ a ta mɔgɔw ye nimisa

¹Aw siya marobari,

aw ye miiri, ka hakiri sɔrɔ,

²sani wagati ye se,

wagati min na o bɛna aw bɛɛ flan ka bɔ yi lon kelen na i ko binjalan;

aw ye miiri sani Matigi Ala ta dimiba ye na ben aw kan,

sani Matigi Ala ta dimilon ye na se aw ma.

³Aw ye Matigi Ala ta jɛnɲɔgɔnya ɲini, aw minw majiginin lo jamana kɔnɔ,

aw minw bɛ Ala ta sira tagamana.

Aw ye terenninya ɲini, ka aw yɛrɛ majigi;

ni o kɛra, a bɛ se ka kɛ ko Matigi Ala ta dimilon na,

a bɛna aw tanga.

Terebenyanfan mɔgɔw ta kiti

⁴Gaza dugu bɛna kɛ tomo ye,

Asikalɔn bɛna kɛ yɔrɔ lakolon ye.

O bɛna Azidɔdikaw labɔ teregban papa fɛ,

o bɛna Ekurɔnkaw gbɛn ka bɔ o sigiyɔrɔ ra.

⁵E, aw kɔgɔjidaramɔgɔw, bɔnɔ bɛna aw sɔrɔ dɛ!

Aw Keretikaw2.5 Keretikaw le ye kɔgɔjidaramɔgɔw ye. ta siya kɔni, bɔnɔ bɛna aw sɔrɔ!

Matigi Ala ta kuma fɔra ele kama,

ele Kanaana jamana, Filisikaw ta jamana.

Ne bɛna aw bɛɛ halaki,

ne tɛna hali mɔgɔ kelen to aw ra.

⁶Kɔgɔjida jamana bɛna kɛ bɛganw ta domunikɛyɔrɔw le ye,

a bɛna kɛ sagagbɛnbagaw ta bɛganyaalayɔrɔ le ye, ani bɛganw ta siyɔrɔ.

⁷O kɔgɔjida bɛna kɛ Zuda ta mɔgɔ tɔw ta ye;

a bɛna kɛ o ta bɛganmarayɔrɔ ye.

Asikalɔn dugu ta bonw bɛna kɛ o ta layɔrɔw ye su fɛ;

sabu Matigi Ala, o ta Ala bɛna a janto o ra,

ka o ta bonya lasekɔ o ma.

Terebɔyanfan mɔgɔw ta kiti

⁸«Ne ka Mohabukaw ta mafiyɛnyarikanw mɛn,

ani Amɔnkaw fana ka ne ta mɔgɔw mafiyɛnya ni kumajugu minw ye;

o ka ne ta mɔgɔw ta jamana danw yɛlɛma,

ka dɔ fara o yɛrɛ ta mara kan.

⁹O kosɔn ne bɛ kari ne yɛrɛ tɔgɔ ɲanaman kosɔn,

Fangatigi Ala, Izirayɛli ta Ala ko ten,

Mohabu bɛna kɛ i ko Sodɔmu,

Amɔnkaw bɛna kɛ i ko Gomɔri;

binjuguw le bɛna falen o ta yɔrɔ ra, kɔgɔjalan le bɛna kɛ ka o ta jamana bɛɛ datugu;

a bɛna kɛ yɔrɔ lakolonba le ye, yɔrɔ min tɛna ɲa tuun fiyewu.

Ne ta jamana mɔgɔw tɔ minw tora,

olugu bɛna o borofɛnw cɛ.

Ne ta jamana mɔgɔ minw ɲanaman tora,

olugu bɛna o ta jamana tigiya ta.»

¹⁰O le bɛ kɛ o ta yɛrɛbonya sara ye;

sabu o ka Fangatigi Ala ta mɔgɔw mafiyɛnya, ka o yɛrɛ bonya o ma.

¹¹Matigi Ala bɛna fariya o ma;

a bɛna dunuɲamɔgɔw ta batofɛnw bɛɛ halaki.

Ni o kɛra, siyaw bɛɛ, kɔgɔji kɔfɛjamanaw bɛna to o sigiyɔrɔ ra ka o kinbiri gban ka Matigi Ala bato.

Woroduguyanfan ni sahiliyanfan ta kiti

¹²«Aw Etiyopikaw, ne ta kɛrɛkɛmuru bɛna aw fana sɔgɔ.»

¹³Matigi Ala bɛna a boro kɔrɔta sahiliyanfan mɔgɔw kama;

a bɛna Asiri jamana halaki.

A bɛna Ninive dugu kɛ yɔrɔ lakolon ye,

k’a kɛ jintan yɔrɔ ye, k’a kɛ i ko kongokolon.

¹⁴Bɛganw bɛna la o yɔrɔ le ra;

ani kongofɛn suguya bɛɛ:

Kɔnɔdabaw, ani juguninw,

bɛɛ bɛna si a ta bon sanfɛyɔrɔ le ra.

O fɛnw kasikanw bɛna to ka mɛn bon finɛtiriw fɛ;

bonw dondaw bɛɛ bɛna cɛn.

Bonw tun lɔra ni sɛdiriyiri minw ye,

o yiriw bɛɛ bɛna waraga ka o bla kɛnɛ ma.

¹⁵Ɲagarikan tun bɛ dugu min na wagati bɛɛ ra, o dugu le ye nin ye tan bi wa?

Dugu min tun bɛ hɛra ni laganfiya ra,

fɔ o b’a fɔ o yɛrɛ kɔnɔ ko: «Anw wa, anw kɔni ɲɔgɔn tɛ!»

O dugu le kɛra yɔrɔ lakolon ye tan,

ka kɛ kongofɛnw dogoyɔrɔ ye!

Ni mɔgɔ o mɔgɔ ka tɛmɛ a kɔrɔ, o tigi bɛ filen fiyɛ a ra k’a boro sin a ma!

Zeruzalɛmukaw ma Ala ta kuma lamɛn

¹Dugu murutinin, dugu nɔgɔnin, dugujugu,

bɔnɔ bɛna ele ta mɔgɔw sɔrɔ!

²O ma sɔn ka mɔgɔ lamɛn,

o ma sɔn mɔgɔ ye o karan;

o ma o jigi la Matigi Ala kan,

o ma gbara o ta Ala ra.

³O kuntigi minw bɛ o cɛ ra, olugu bɛ i ko jara kasitɔ.

O ta kititigɛbagaw bɛ i ko wara min bɛ yaala su fɛ;

ni a ka fɛn o fɛn sɔrɔ, a bɛ o bɛɛ domu; a tɛ foyi bla sɔgɔmada ɲa.

⁴O ta ciraw ye kumakolonfɔbagaw le ye;

mɔgɔjanfabagaw lo.

O ta sarakalasebagaw bɛ Ala ta fɛn saninmanw lanɔgɔ;

o bɛ Ala ta sariya cɛn.

⁵K’a sɔrɔ Matigi Ala min ta siraw terennin lo, ale bɛ o cɛ ra;

ale min tɛ kojugu si kɛ.

Sɔgɔma o sɔgɔma, a bɛ a ta terenninya yira o bɛɛ ra;

a tɛ dɛsɛ o ra lon si.

Nka kojugukɛbaga tɛ maro!

⁶«Ne ka siya wɛrɛw halaki,

ne ka o ta sankasojanw benben.

Ne ka o ta siraw cɛn;

mɔgɔ si tɛ tɛmɛ o siraw fɛ tuun.

O ta duguw kɛra yɔrɔ lakolonw ye;

mɔgɔ tɛ yi, dugumɔgɔ si tɛ yi!

⁷Ne tun b’a fɔra ko sigiya t’a ra, aw bɛna siran ne ɲa,

ko aw bɛna sɔn ne ye aw karan.

O ra, aw ta so tun tɛna halaki,

ne tun ka kuma minw fɔ aw kama, ne tun tɛna o kow si kɛ aw ra.

«Nka o belen teliyara ka to ka terenbariyakow le kɛ!

⁸O kosɔn, aw ye ne makɔnɔ!

Matigi Ala ko ten!

Lon min ne bɛna wuri ka kuma ka kɛ seere ye aw kama, aw ye o lon makɔnɔ;

sabu ne k’a latigɛ ko ne bɛna siyaw lajɛn,

ka jamanaw kɛ ɲɔgɔn kan,

ka ne ta dimi ben o kan

ani ne ta jusugban bɛɛ.

Sabu o ma ne ta kanuya min jate, o dimi min bɛ ne ra,

o tasuma le bɛna jamana bɛɛ jɛni.»

Ala bɛna a ta mɔgɔw saninya

⁹«Nka o kɔ, ne bɛna nin mɔgɔw ta kumacogo yɛlɛma, ka o darakan saninya;

janko o bɛɛ lajɛnnin ye Matigi Ala tɔgɔ wele k’a bato,

ka baara kɛ a ye ni kan kelen ye.

¹⁰Ne batobagaw, ne ta mɔgɔ minw tun janjanna,

olugu bɛna bɔ fɔ Etiyopi baw kɔ fɛ, ka na sarakaw bɔ ne ye.

¹¹«O lon na, kɔni, aw murutira ka kojugu minw kɛ ka ne hakɛ ta,

aw tɛna maroya o kojuguw si kosɔn tuun.

Sabu yɛrɛbonya ka di minw ye, ne bɛna olugu labɔ aw cɛ ra;

aw fana tɛna waso tuun ne ta kuru saninman kan.

¹²Ne bɛna mɔgɔ dɛsɛbagatɔw, ani barakantanw le to dugu kɔnɔ;

olugu le bɛna o yɛrɛ karifa Matigi Ala ma, a tɔgɔ kosɔn.

¹³Izirayɛlimɔgɔ tɔ minw tora, olugu tɛna terenbariyako kɛ,

o tɛna faninya fɔ,

o tɛna janfa siri ni o darakan ye.

O bɛna domuni kɛ ka la ɲasuma ra;

mɔgɔ si tɛna o lasiran tuun.»

Zeruzalɛmu bɛna hɛra sɔrɔ

¹⁴Siyɔn dugu, aw ye dɔnkiri la!

Izirayɛli, aw ye ɲagarikanba bɔ!

Zeruzalɛmu dugu, aw ye ninsɔndiya, ka ɲagari ni aw jusu bɛɛ ye!

¹⁵Matigi Ala ka kiti mabɔ aw ra;

a ka aw juguw gbɛn ka o kɔsegi.

Izirayɛli masacɛ min ye Matigi Ala ye, o bɛ aw cɛ ra;

aw tɛna siran kojugu si ɲa tuun.

¹⁶O lon na, kɔni, o bɛna a fɔ Zeruzalɛmu ma ko:

«Aw kana siran, Siyɔn dugu!

Aw kana aw fari faga!»

¹⁷Matigi Ala, aw ta Ala bɛ aw cɛ ra, i ko cɛfari, min bɛ aw kisi.

A bɛna ɲagari fɔ k’a jusu diya aw kosɔn.

A bɛna aw kanu, ka ɲanamanyakura di aw ma;

a bɛna ɲagari aw kosɔn, fɔ ka dɔnkiri la ni kanba ye.

¹⁸«Ne bɛna maroya bɔ aw kan, k’a kɛ i n’a fɔ ɲanagbɛlon;

jaraki tɛna ben aw kan tuun.

¹⁹O wagati ra, mɔgɔ minw tun ka aw minako juguya, ne bɛna wuri olugu bɛɛ kama.

Ne bɛna saga sendimitɔw bɔsi;

minw tun yɛrɛgɛra, ne bɛna olugu lajɛn.

O tun ka aw lamaroya jamana minw bɛɛ ra,

ne bɛna tandori ni bonya la aw kan o jamanaw bɛɛ ra.

²⁰O wagati ra kɔni, ne bɛna aw lana;

o wagati ra, ne bɛna aw lajɛn.

Sabu ne bɛna aw ta bonya lasekɔ aw ma,

k’a to mɔgɔw ye aw tɔgɔ bonya ka aw tando dugukolo siyaw bɛɛ cɛ ra.

Matigi Ala ko ten!»