Dɔnkiriw

DƆNKIRIW TA DƆNKIRI

KITABU

Kitabu faamucogo

Dɔnkiriw ta dɔnkiri kɔrɔ ye ko dɔnkiriw bɛɛ ra ɲumanman, min ka di ni a tɔw bɛɛ ye. Dɔw b’a wele ko masacɛ Sulemani ta dɔnkiri. Mɔgɔ caman fana b’a miiri ko a sɛbɛbaga ye masacɛ Sulemani ye, sabu ale tɔgɔ le fɔra kitabu damina na.

Kanuɲɔgɔn fla ta ko le bɛ nin kitabu kɔnɔ, kanbelen dɔ ni a ta sunguru; olugu jarabira ɲɔgɔn na; o bɛ ɲɔgɔn tando, ka ɲɔgɔn ladiya ni o darakumaw ye. O mɔgɔ fla bɛ kuma ka ɲɔgɔn sɔn, walama o bɛ kelennakuma kɛ, walama o bɛ ɲɔgɔn ko fɔ o teri dɔw ye, o b’a fɔ minw ma ko «Zeruzalɛmu sunguruw».

Nin kitabu faamucogo ma nɔgɔn; tuma dɔw kuma min bɛ fɔ, i t’a lɔn ni o ye kanbelen, walama sunguru kan ye. O kosɔn an ka kuma dɔw kɛ kanbelen ta ye, ka dɔw kɛ sungurunin ta ye, hali ni heburukan kitabu m’a kɛ ten.

Mɔgɔw ka nin kitabu faamu cogo caman na: Dɔw ko, ko nin kitabu ye Ala ni a ta mɔgɔw ta kanuya tagamasiyɛn le ye, dɔw ko, ko Matigi Ala ni a ta jɔnw ta jɛnɲɔgɔnya* tagamasiyɛn lo, dɔw ko, ko Matigi Yesu ni lanabagaw ta kanuya tagamasiyɛn lo.

Nka an ka kan ka nin kitabu kumaw ta i n’a fɔ a sɛbɛra cogo min na; o kɔrɔ ye ko cɛ ni muso ta kanuɲɔgɔnya ko bɔra Ala yɛrɛ le ra. Cɛ ni muso ye ɲɔgɔn kanu, walama ka jarabi ɲɔgɔn na furu ta sira fɛ, o tɛ baasi ye, o ka ɲi.

O ra, an bɛ se k’a fɔ ko nin kitabu kunba yɛrɛ kɛra kanuya ye, ka kaɲa ni nin kumaw ye:

«Hali jiba tɛ se ka kanuya tasuma faga,

ji si tɛ se k’a datugu» (8.7).

Kitabu kɔnɔkow

Dɔnkiri fɔlɔ (1.1–2.7)

Dɔnkiri flanan (2.8–3.5)

Dɔnkiri sabanan (3.6–5.1)

Dɔnkiri naaninan (5.2–6.3)

Dɔnkiri loorunan (6.4–8.4)

Dɔnkiri wɔɔrɔnan (8.5-14)

Kanuɲɔgɔnmanw ta baro

¹Dɔnkiriw bɛɛ ta dɔnkiri. Sulemani ka min sɛbɛ.

(Sunguru kumakan)

²Ne mɔmɔ! Ne fari yɔrɔ bɛɛ saaro!

Sabu i ta kanuya ka di ka tɛmɛ duvɛn kan.

³I munturu kasa ka di.

I tɔgɔ bɛ i ko turu kasadiman min kasa bɛ yɔrɔ bɛɛ labɔ.

O kosɔn, i ko ka di sungurudenw ye.

⁴Ne mina, ka gban i kɔ, an ye bori!

Masacɛ, ne ladon i ta bon kɔnɔ!

An ye ɲagari ka ninsɔndiya ɲɔgɔn fɛ!

An ye kanuya diyabɔ ka tɛmɛ hali duvɛn kan.

Sunguruw jo lo ka ɲabɔ i fɛ.

⁵Zeruzalɛmu sunguruw, ne finnin lo, nka ne cɛ ka ɲi,

i ko Kedari ta fanibonw,

i ko Sulemani ta masaso bondarafaniw.

⁶Aw kana ne ta finya flɛ,

tere le ka ne fin.

Ne balemacɛw le dimina ne kɔrɔ,

ka ne bla ko ne ye rɛzɛnforow kɔrɔsi.

O ra, ne ma ne yɛrɛ ta foro kɔrɔsi.

⁷E, ne jusukun bɛ ele min kanu, a fɔ ne ye:

ele bɛ taga ni i ta bɛganw ye min, o ye taga bin ɲimi?

Aw bɛ sigi yɔrɔ juman ka nɛnɛkiri tere fɛ?

Ni ne ka o lɔn, ne tɛna to ka yaalayaala tuun ka lamini

i tɔɲɔgɔnw ta bɛganw kɔ gbansan.

(Kanbelen kumakan)

⁸E, musow bɛɛ ra cɛɲuman, ni ele ma o lɔn,

bɔ ka tugu bɛganw nɔ fɛ,

ka taga ni i ta badenninw ye,

o ye taga bin ɲimi sagagbɛnbagaw ta fanibonw kɛrɛ fɛ.

⁹E, ne kanuɲɔgɔn, ne bɛ i ta cɛɲa suma

ni masacɛ Farawona ta wotorosamasow le ye.

¹⁰I dafuruw cɛ ka ɲi i ta tororanɛgɛ fla cɛ ma,

i kankala cɛ ka ɲi i ta kannanɛgɛ cɛ ma!

(Sagagbɛnbagaw kumakan)

¹¹An bɛna tororanɛgɛ saninlamanw le gbasi i ye,

ka o ɲɛgɛn ni warigbɛ ye.

(Sunguru kumakan)

¹²Ka ne ta masacɛ ni a jɛnɲɔgɔnw siginin to,

ne ta turu ka yɔrɔ bɛɛ kasa diya.

¹³Ne jarabi bɛ i ko kasadiyanan, min bɛ bɔrɔnin kɔnɔ.

A lanin bɛ ne sin fla cɛ ma.

¹⁴Ne jarabi bɛ i ko jabifiyeren,

min bɛ Ɛni Gedi rɛzɛnforow cɛ ra.

(Kanbelen kumakan)

¹⁵E, i cɛ ka ɲi sa, ne kanuɲɔgɔn, i cɛ ka ɲi!

I ɲakisɛw cɛ ka ɲi i ko tugani!

(Sunguru kumakan)

¹⁶I cɛ ka ɲi, ne jarabi, i ko ka di ne ye;

an ta lanan bɛ i ko binkɛnɛ.

¹⁷An ta bon yiriw ye sɛdiriyiri cɛɲuman le ye,

a kogow ye sipɛrɛsi yiriɲumanw le ye.

¹Ne bɛ i ko yirifiyeren min bɛ falen Sarɔn kɛnɛgbɛ ra,

i ko yirifiyeren min bɛ falen kuruw furancɛ ra.

(Kanbelen kumakan)

²Ne kanuɲɔgɔn bɛ sunguru tɔw cɛ ra

i ko yirifiyeren cɛɲuman falennin ŋaniyiriw cɛ ra.

(Sunguru kumakan)

³Ne jarabi bɛ kanbelen tɔw cɛ ra

i ko pɔmusun bɛ yiri tɔw cɛ ra tu kɔnɔ cogo min na.

Ne jusu diyaninba bɛ sigi a suma kɔrɔ,

a den fana ka di ne da ra!

⁴A ka ne ladon ɲanagbɛyɔrɔ ra, so kɔnɔ;

ka kanu kɛ ka ne datugu.

⁵Aw ye rɛzɛn mɔnin di ne ma ka baraka don ne ra,

aw ye pɔmu di ne ma ka dɔ fara ne fanga kan,

sabu kanu kɛra ne ra bana ye.

⁶A numanboro ye to ne kun kɔrɔ,

a kininboro ye ne mɔmɔ.

(Kanbelen kumakan)

⁷E, Zeruzalɛmu sunguruw, ne bɛ aw daari,

aw y’a kɛ minanw, ani mankalaninw kosɔn,

aw kana kanu lawuri, aw kana a lakunu

k’a sɔrɔ a wagati ma se.

(Sunguru kumakan)

⁸Ne toro bɛ ne jarabi kumakan na!

A flɛ nin ye, a bɛ nana!

A bɛ panpanna kuruw kan,

a bɛ borira kongoriw kunna!

⁹Ne jarabi bɛ i ko minan,

i ko mankalanin den;

a lɔnin flɛ kɛnɛ ma an ta kogo kɔ fɛ.

A bɛ flɛri kɛra finɛtiri fɛ,

a ɲaw bɛ finɛtiri sansanw na.

¹⁰Ne jarabi kumana ne fɛ; a ko:

«I wuri, ne kanuɲɔgɔn! Ne ta cɛɲumanin, na yan!

¹¹A flɛ, nɛnɛwagati banna,

sanji tigɛra, sanji lɔra.

¹²Yiriw bɛ fiyerenna jamana kɔnɔ;

dɔnkirilawagati le sera2.12 An bɛ se k’a fɔ fana ko: dɔnkirilawagati ni gerenadisunw lɛsɛwagati.;

tuganiw kasikan bɛ bɔra an ta kongow kɔnɔ.

¹³Toroden fɔlɔw bɛ mɔna,

rɛzɛnsunw fiyerenna, ka yɔrɔ kasa diya.

I wuri, ne kanuɲɔgɔn! Ne ta cɛɲumanin, na yan!

¹⁴«E, ne ta tugani birinin bɛ farawow le ra,

a dogonin bɛ fɔ kuruwow le cɛ ra.

A to ne ye i ɲada flɛ sa!

A to ne ye i kumakan mɛn,

sabu i kumakan ka di,

i ɲada cɛ ka ɲi.»

(Bamusoman kumakan)

¹⁵Aw ye kongowuru mina an ye,

kongowurunin minw bɛ an ta rɛzɛnforow cɛn,

tuma min na o bɛ fiyeren bɔ!

(Sunguru kumakan)

¹⁶Ne jarabi ye ne ta ye, ne fana ye a ta ye.

A bɛ ni a ta bɛganw ye, o bɛ bin ɲimina yirifiyerenw cɛ ra.

¹⁷Sani tere ye suma,

sani yirisuma ye tunu,

i ye kɔsegi ka na, ne jarabi;

bori ka na i ko minan,

walama mankalaninden min bɛ panpan

kuru walonwalonninw kan.

Sunguru sikora ni a ta kanbelen ye

(Sunguru kumakan)

¹Ka ne to ne layɔrɔ ra,

su bɛɛ, ne sikora k’a ye

ko ne bɛ ne ta kanbelen kanunin yɔrɔɲinina.

Ne k’a yɔrɔɲini ka dɛsɛ, ne m’a ye.

²Ne wurira ka dugu yaala,

siradaw ra, ani jamalajɛnyɔrɔw ra.

Min ko ka di ne ye, ne ka o yɔrɔɲini,

ne k’a yɔrɔɲini ka dɛsɛ, ne m’a ye.

³Ne ka dugu kɔrɔsibagaw kunbɛn,

o bɛ yaalara ka dugu kɔrɔsi.

Ne ko: «Ne jarabi don? Aw ma bɛn ni a ye wa?»

⁴Ne tɛmɛna o ra dɔɔnin dɔrɔn,

ne bɛnna ni ne jarabi ye.

Ne k’a mina, ne tɛna a bla tuun,

fɔ ne ye don ni a ye ne bamuso ta so kɔnɔ,

ne woroba ta bon kɔnɔ.

⁵E, Zeruzalɛmu sunguruw, ne bɛ aw daari,

aw y’a kɛ minanw, ani mankalaninw kosɔn,

aw kana kanu lawuri, aw kana a lakunu

k’a sɔrɔ a wagati ma se.

⁶E, jɔn le bɛ wurira ka bɔ kongokolon kɔnɔ ka na,

i ko sisiba wuritɔ,

mire kasadiman ni wusunan kasadiman,

ani turutigiw ta turu kasadiman suguya bɛɛ kasa b’a kɔ?

⁷Masacɛ Sulemani le lanin bɛ a ta lanan kɔnɔ; o k’a ta, o bɛ nana.

Cɛ barakaman biwɔɔrɔ b’a blasirara,

Izirayɛli ta kɛrɛkɛcɛw bɛɛ ra cɛfariw lo.

⁸Kɛrɛkɛmuru bɛ o bɛɛ boro,

o degira kɛrɛ ra;

o bɛɛ ta kɛrɛkɛmuru bɛ o tɔgɔkun na,

o labɛnna sufɛra ta kojuguw kama.

⁹Masacɛ Sulemani ka o lanan lalaga

ni Liban jamana yiriɲumanw ye;

¹⁰a k’a senw lalaga ni warigbɛ ye,

k’a kɔdɛnyɔrɔ kɛ ni sanin ye,

k’a sigiyɔrɔ lalaga ni faniwulen cɛɲuman dɔ ye.

Zeruzalɛmu sunguruw k’a kɔnɔnɔyɔrɔ sɔgɔ ka ɲa, kanu kosɔn.

¹¹Siyɔn sunguruw, aw ye bɔ ka masacɛ Sulemani flɛ!

A bamuso ka masafugula min biri a kun na

a furulon na, o le bɛ a kun na;

a ta ninsɔndiyalon le kɛra o lon ye.

(Kanbelen kumakan)

¹E, i cɛ ka ɲi, ne kanuɲɔgɔn, i cɛ ka ɲi haali!

I ɲakisɛw cɛ ka ɲi i ko tuganiw,

i ta lankana jukɔrɔ.

I kunsigi finna, k’a caya i ko bakuru min bɛ jigira ka bɔ Galadi kuru kan.

²I ɲinw gbɛra i ko sagakuru min siw kanna,

i ko saga minw konin bɛ bɔra kɔ ra.

I ɲinsira fla bɛɛ dafanin lo,

dɔ ma fɔn a si ra.

³I dagbolo fla wulencogo ɲana haali;

i da cɛ ka ɲi.

I dafuru bɛɛ kelen kelen bɛ i ko gerenadi cɛtigɛ

i ta lankana jukɔrɔ.

⁴I kankala bɛ i ko masacɛ Dawuda ta sankaso,

min lɔra k’a kɛ kɛrɛkɛminanw marayɔrɔ ye;

nɛgɛbɛnnan waga kelen le dulonnin b’a kɔnɔ,

kɛrɛkɛcɛfari ta nɛgɛbɛnnanw.

⁵I sinbara fla bɛ i ko mankalaninden fla,

o bɛ i ko minanmuso ta flaninw,

minw bɛ bin ɲimi yirifiyerenw cɛ ra.

⁶Sani tere ye suma,

sani yirisuma ye tunu,

ne bɛna yɛlɛ o mirisunw ta kuru kan,

ne bɛ taga o wusunanyiriw ta kongori kan.

⁷Ne kanuɲɔgɔn, i cɛ ka ɲi haali!

Fiyɛn t’i ra!

⁸Na ne fɛ, ka bɔ Liban kuru kan, ne ta maminamuso,

jigi ka bɔ Liban kuru kan i ye na.

Jigi ka bɔ Amana kuru kunna ka flɛri kɛ;

jigi ka bɔ Seniri kuru kunna ka flɛri kɛ,

jigi ka bɔ Hɛrimɔn kuru kunna ka flɛri kɛ,

jaraw bɛ dogo yɔrɔ min na,

waraninkalaw bɛ dogo kuru minw cɛ ra.

⁹E, ne dɔgɔmuso, ne ta maminamuso, i ka ne jusukun mina.

I ta flɛrikɛko kelen dɔrɔn ka ne jusukun mina,

i ta kɔnɔkisɛ kelen dɔrɔn ka ne jusukun mina.

¹⁰Ne dɔgɔmuso, ne ta maminamuso, i ta kanu ka di dɛ,

i ta kanu ka di ka tɛmɛ duvɛn kan.

I munturu kasa ka di ka tɛmɛ wusunanw bɛɛ kan!

¹¹Ne ta maminamuso, li le bɛ tɔni ka bɔ i dagbolow ra,

li ni nɔnɔ le bɛ i nɛnden jukɔrɔ.

I ta faniw kasa ka di i ko Liban yiriw kasa.

¹²Ele ye nankɔ koorinin le ye,

ne dɔgɔmuso, ne maminamuso;

ele ye bununji koorinin le ye,

ani kɔlɔn min dasɔgɔra!

¹³I bɛ i ko gerenadi yirituɲuman min bɛ denɲumanw kɛ,

ani min denw ka di;

jabisunw, ani narisunw b’a ra.

¹⁴Narisunw ni safiransunw,

ani yiri kasadimanw, ani sinamɔnisunw,

ani wusunanyiri suguya bɛɛ:

miri ni alowɛsi,

ani kasadiyananw bɛɛ ra ɲumanman.

¹⁵Ele ye kɔlɔn le ye nankɔw cɛ ma,

bununji saninman

min bɛ woyo ka bɔ fɔ Liban kuruw ra!

(Sunguru kumakan)

¹⁶Sahiliyanfan fɔɲɔ ye wuri!

Woroduguyanfan fɔɲɔ ye na!

O ye fiyɛ ne ta nankɔ kan,

janko a yiriw kasadiman ye wuri,

k’a to ne jarabi ye don a ta nankɔ ra,

k’a yiridendimanw domu.

(Kanbelen kumakan)

¹Ne dɔgɔmuso, ne maminamuso,

ne bɛ nana ne ta nankɔ ra,

ka na ne ta kasadiyananw tigɛ,

mirisunw, ani ne ta wusunanyiriw.

Ne bɛna ne ta liɲaga ni a ji bɛɛ domu,

ka ne ta duvɛn ni ne ta nɔnɔ min!

(Teriw kumakan)

An teriw, aw ye domuni kɛ, ka min,

ka ɲɔgɔn kanu fɔ ka ɲanamini!

Sunguru ma da yɛlɛ joona

(Sunguru kumakan)

²Ne tun bɛ sunɔgɔra, nka ne hakiri tun bɛ ne jarabi ra.

A flɛ ne jarabi kan lo, a bɛ da gbasira.

(Kanbelen kumakan)

«Da yɛlɛ, ne dɔgɔmuso, ne kanuɲɔgɔn,

ne ta tugani, ne ta muso dafanin!

Ne kun bɛɛ kɛra gɔmiji ye,

su sumaya ka ne kunsigi bɛɛ ɲigi.»

(Sunguru kumakan)

³Ne ka ne ta derege bɔ ka ban;

o tuma ne bɛna a don tuun wa?

Ne ka ne senw ko ka ban,

ne bɛna o nɔgɔ tuun wa?

⁴Ne jarabi k’a boro don da wo fɛ;

a makari ka ne mina.

⁵Ne wurira ko ne bɛ da yɛlɛ ne jarabi ye,

k’a sɔrɔ ne boro bɛɛ tun ye turu kasadiman ye;

ne ta turu kasadiman ka da sɔgɔnan bɛɛ kɛ turu ye.

⁶Ne ka da yɛlɛ ne jarabi ye,

nka o y’a sɔrɔ a tun k’a kɔ don ka taga ka ban.

A tagako ka ne hakiri bɛɛ ɲagami.

Ne k’a yɔrɔɲini, nka ne m’a ye.

Ne k’a wele, nka a ma ne lamina.

⁷Dugu kɔrɔsibagaw yaalayaalatɔ ka ne kunbɛn,

o ka ne bugɔ fɔ ka ne mandimi;

o ka ne ta lankana bɔsi ne ra!

Dugu kɔrɔsibagaw ka o le kɛ ne ra.

⁸E, Zeruzalɛmu sunguruw, ne bɛ aw daari,

ni aw ka ne jarabi ye,

aw bɛna mun le fɔ a ye sa?

Aw y’a fɔ a ye ko a ta kanu ka bana bla ne ra!

(Dugu sunguruw kumakan)

⁹E, musow bɛɛ ra cɛɲuman,

o tuma mun le bɛ ele jarabi ra ka tɛmɛ cɛ tɔw kan sa?

Mun le bɛ ele jarabi ra ka tɛmɛ cɛ tɔw kan,

fɔ i bɛ an daarira tan?

(Sunguru kumakan)

¹⁰Ne jarabi gbɛnin lo, fɔ a bɛ manamana.

A bɔɲɔgɔnko tɛ sɔrɔ hali cɛ waga tan cɛ ra.

¹¹A kunkolo ye sanin yɛrɛworo ye,

a kunsigi ka ca fɔ a bɛ fifa a kɔ,

a kunsigiw finna i ko kɔnɔninfin ta siw.

¹²A ɲakisɛw bɛ i ko kɔdaratuganiw,

i ko nɔnɔ kɛra ka kɔdaratugani minw ko;

a ɲakisɛw bɛ a ɲa kɔnɔ i ko lulu.

¹³A dafuru bɛ i ko nankɔrayiri kasadimanw;

ani wusunanyiri kasadimanw.

A dagbolo cɛ ka ɲi, i ko yirifiyeren kasadimanw.

¹⁴A borow bɛɛ ye sanin ye,

ka lulu kɛ k’a ɲɛgɛn.

A fari cɛ ka ɲi, i ko samaɲin nugunin,

safiri lulu donna min na k’a cɛɲa.

¹⁵A senkalaw bɛ i ko farakuruɲuman gbɛman,

minw ju sigira sanin yɛrɛworo kan.

A baraka bɛ i ko Liban kuruw;

a bɛ i ko sɛdiriyiri, min ta cɛɲa ɲɔgɔn tɛ yiri tɔw si ra.

¹⁶A da ka timi,

a yɔrɔ bɛɛ ka di ne ye.

Ne jarabi bɛ ten le, ne kanuɲɔgɔn bɛ ten le,

Zeruzalɛmu sunguruw.

(Dugu sunguruw kumakan)

¹Musow bɛɛ ra cɛɲuman,

i jarabi tagara min le?

I jarabi tagara fan juman fɛ sa?

A fɔ an ye janko an ye i dɛmɛ k’a yɔrɔɲini.

(Sunguru kumakan)

²Ne jarabi tagara a ta nankɔ le ra,

wusunanyiriw falennin bɛ yɔrɔ min na.

A tagara to ni a ta bɛganw ye nankɔw kɔnɔ,

a bɛ yirifiyerenw tigɛra yi.

³Ne ye ne jarabi ta ye,

ne jarabi fana ye ne ta ye.

A bɛ ni a ta bɛganw ye, o bɛ bin ɲimina yirifiyerenw cɛ ra.

Sunguru ta cɛɲa

(Kanbelen kumakan)

⁴E, ne kanuɲɔgɔn, i cɛ ka ɲi, i ko Tirisa dugu,

i saraman lo i ko Zeruzalɛmu dugu;

i bɛ mɔgɔ ja tigɛ i ko kɛrɛkɛjamaba lajɛnnin.

⁵I ɲa bɔ ne ra,

sabu i ta flɛri bɛ ne hakiri wuri le.

I kunsigi cɛ ka ɲi, i ko bakuru

minw bɛ jigira ka bɔ Galadi kuru kan.

⁶I ɲinw gbɛra i ko sagakuru

min konin bɛ bɔra kɔ ra.

I ɲinsira fla bɛɛ dafanin lo,

dɔ ma fɔn a si ra.

⁷I dafuru bɛɛ kelen kelen bɛ i ko gerenadi cɛtigɛ,

i ta lankana jukɔrɔ.

⁸Masamuso biwɔɔrɔ bɛ masacɛ fɛ,

jɔnmuso biseegi ye a musow ye;

sunguruw da tɛ lɔn.

⁹Nka ne ta tugani, ne ta dafanin ye kelenpe le ye.

A ɲɔgɔn wɛrɛ tɛ a bamuso fɛ.

A ko ka di a woroba ye ka tɛmɛ fɛn bɛɛ kan.

Ni sunguru tɔw k’a ye, olugu b’a fɔ a ma ko a ta ɲana.

Masamusow, ani jɔnmusow minw ye a musow ye, olugu b’a tando.

(Teriw kumakan)

¹⁰E, nin ye sunguru juman natɔ ye i ko dugugbɛda bɔtɔ?

A cɛ ka ɲi i ko karo,

a bɛ manamana i ko tere;

a bɛ mɔgɔ ja tigɛ i ko kɛrɛkɛjamaba lajɛnnin.

¹¹Ne jigira nankɔ ra, yiridentaw bɛ nankɔ min na,

ka taga yiriw falentɔ flɛ,

k’a flɛ ni rɛzɛnsunw bɛ nugura,

ni gerenadisunw bɛ fiyerenna.

¹²Fɛn min k’a to ne nege ka ne sama

ka taga ni ne ye fɔ ne ta jamana ta kɛrɛkɛwotoro cɛ ra, ne ma o lɔn.

(Mɔgɔ wɛrɛw kumakan)

¹Na, na, Sulamiti sunguru!

Na, na janko an ye i ɲada flɛ!

(Sunguruw kumakan)

Mun na aw bɛ Sulamiti sunguru flɛra

i ko mɔgɔ minw bɛ dɔnkɛbagaw flɛra?

(Kanbelen kumakan)

²E, fagamadennin,

i senw cɛ ka ɲi i ta sanbaraw kɔnɔ!

I soro koorinin bɛ ka ɲa i ko kannakɔnɔn;

baarakɛbaga hakiriman dɔ boro nɔ le bɛ o ye.

³I cɛmancɛyɔrɔ bɛ i ko minan koorinin,

duvɛn kasadiman tɛ fɔn min kɔnɔ.

I kɔnɔbara bɛ i ko siman min lajɛnna ɲɔgɔn kan,

k’a lamini ni yiri fiyerenw ye.

⁴I sinbara fla bɛ i ko mankalaninden fla,

o bɛ i ko minanmuso ta flaninw.

⁵I kankala bɛ i ko sankaso

min lɔra ni samaɲin ye.

I ɲadenw bɛ manamana i ko Hɛsibɔn kɔ ji,

min bɛ Bati Rabimu donda kɛrɛ fɛ.

I nunkala bɛ i ko Liban sankaso,

min lɔnin bɛ k’a ɲasin Damasi dugu ma.

⁶I kunkolo cɛ ka ɲi i ko Karimɛli kuru.

I kunsigi danna k’a cɛɲa i ko danfani dawulaman.

I kunsigi bɛ se ka masacɛ sen fereke k’a laben.

⁷E, i cɛ ka ɲi dɛ! I ko ka di ne ye!

Ne ta kanunin, ne diyanyamɔgɔ.

⁸I lɔcogo bɛ i ko tamarosun.

I sin bɛ i ko tamaro tizanw.

⁹Ne bɛ yɛlɛn tamarosun na k’a tizan dɔ tigɛ!

I sinw bɛ i ko rɛzɛn mɔnin.

I da kasa ka di i ko yiriden mɔkoɲuman.

¹⁰I da ka timi i ko duvɛndiman.

Can lo, o duvɛn ye ne ni ne jarabi ta le ye,

a bɛ woyo an dagbolo kan fɔ ka taga an sunɔgɔ.

Kanu ni ninsɔndiya

(Sunguru kumakan)

¹¹Ne ye ne jarabi ta le ye,

a ta miiriya bɛɛ bɛ ne le kan.

¹²Na, ne jarabi, an ye taga kongo kɔnɔ,

an bɛna si togoda dɔ ra,

¹³sɔgɔmada joona fɛ, an bɛ taga rɛzɛnforo ra,

k’a flɛ ni rɛzɛnsun nugura, ni a bɛ fiyerenna,

ni gerenadisunw fiyerenna.

O yɔrɔ le ra, ne bɛna a yira i ra ko i ko ka di ne ye.

¹⁴Mandaragɔriw7.14 Mɔgɔw tun b’a miiri ko mandaragɔri yiriden tun bɛ se ka kanu bonya cɛ ni muso cɛ. kasadiman ka yɔrɔ bɛɛ labɔ.

Yiridenɲuman suguya bɛɛ bɛ an ta bonda ra;

yiriden tigɛninkuraw, ani a kɔrɔninw.

Ne jarabi, ne ka o bɛɛ mara ele le ye.

¹E, ni ele tun ye ne kɔrɔcɛ yɛrɛ le ye,

ni ele ni ne tun ka sin kelen min,

ne tun bɛna i kunbɛn kɛnɛ ma ka melege i ra,

mɔgɔ si tun tɛna ne mafiyɛnya.

²Ne tun bɛna taga ni i ye ka taga i ladon ne bamuso ta so;

i tun bɛna ne karan.

Ne tun bɛna duvɛndiman dɔ di i ma, i ye o min;

ne tun bɛna ne ta gerenadisunw yiriden ji dɔ di i ma.

³A numanboro ye to ne kun kɔrɔ,

a y’a kininboro melege ne ra.

(Kanbelen kumakan)

⁴E, Zeruzalɛmu sunguruw, ne bɛ aw daari

aw kana kanu lawuri, aw kana a lakunu

k’a sɔrɔ a wagati ma se.

Kanu ta fanga bɛ i ko saya fanga

(Dugu sunguruw kumakan)

⁵E, muso juman le bɛ nana ka bɔ kongokolon kɔnɔ,

a dɛnnin bɛ a jarabi kan?

(Sunguru kumakan)

Ne ka i lakunu pɔmusunw le kɔrɔ,

i bamuso ka i kɔnɔ ta yɔrɔ min na,

i woroba ka i kɔnɔ ta yɔrɔ min na.

⁶Ne sigi i jusukun kan i ko tagamasiyɛn,

ne don i boro ra i ko tagamasiyɛn;

sabu kanu fanga bɛ i ko saya fanga,

celiya ka fari i ko kaburu.

Kanu tasuma ye tasuma farimanba le ye,

a bɛ i ko Matigi Ala ta tasuma.

⁷Hali jiba caman tɛ se ta kanuya tasuma faga,

ji si tɛ se k’a datugu.

Ni mɔgɔ min ka hali a ta sokɔnɔfɛnw bɛɛ di ko a bɛ kanu san,

o tigi tɛna foyi sɔrɔ ni lɔgɔbɔri tɛ.

(Sunguru balemaw kumakan)

⁸Dɔgɔmuso dɔ bɛ an fɛ,

a kɔgɔ ma fa fɔlɔ.

An bɛna mun le kɛ an dɔgɔmuso ye,

ni a furukokuma nana wuri lon min na?

⁹Ni an dɔgɔmuso ye dugu laminikogo le ye,

an bɛna sansan warigbɛramanw lɔ a kunna.

Ni an dɔgɔmuso ye donda le ye,

an bɛna sɛdiriyiri barakamanw le kɛ a kon ye.

(Sunguru kumakan)

¹⁰Ne ye dugu laminikogo le ye,

ne sinw ye a kogo sankasow ye.

O ra, ne kɛra ne jarabi fɛ hɛra sababu le ye.

(Kanbelen kumakan)

¹¹Yiriforo dɔ tun bɛ Sulemani fɛ Baali Hamɔn.

A k’a karifa dɔw ma ko o y’a kɔrɔsi.

Olugu bɛɛ kelen kelen tun bɛ to ka na warigbɛ waga kelen le di a ma

yiridenw sɔngɔ ye.

¹²Ne ta yiriforo bɛ ne yɛrɛ le ɲa kɔrɔ yan.

Ele Sulemani ye to ni i ta warigbɛ waga kelen ye,

warigbɛ kɛmɛ fla ye kɛ a kɔrɔsibagaw ta ye.

¹³Ele min siginin bɛ nankɔ kɔnɔ,

ne tɔɲɔgɔn dɔw ka o toro malɔ, ko o bɛ i ta kuma lamɛn.

A to ne ye i kumakan mɛn!

(Sunguru kumakan)

¹⁴Bori, ne jarabi,

i ko minan, walama mankalanin den,

min bɛ panpan kuruw kan ka taga,

yirikasadimanw bɛ kuru minw kan.