Zaburuw

ZABURUW

ALATANDODƆNKIRIW KITABU

Kitabu faamucogo

Zaburuw kitabu sɛbɛra wagati min kɔnɔ, o bɛ san waga kelen bɔ. Zaburuw caman sɛbɛbaga ye masacɛ Dawuda ye, nka cira Musa ni masacɛ Sulemani ni Asafu fana ka Zaburu dɔw sɛbɛ.

Zaburuw kitabu kumaw ye dɔnkiriw ye, ani daaririw, ani Alatandokumaw, ani yafamadaariw. A bɛ Izirayɛli jamana ta ko tɛmɛninw fana lakari, ani Ala ka baaraba minw kɛ o cɛ ra. Cirayakumaw fana bɛ Zaburu dɔw kɔnɔ.

Zaburuw kitabu ka yɔrɔba ta Ala ta kuma ra. Zaburuw kitabu kuma dɔw fɔra siɲaga kɛmɛ ni tan ni wɔɔrɔ Layirikura kɔnɔ. Hali bi, an b’a ye ko mɔgɔ caman bɛ Zaburuw kitabu karan, ani k’a dɔnkiriw la.

Zaburu caman damina ra, an bɛ a sɛbɛbaga tɔgɔ ye, walama a sɛbɛkun, walama a dɔnkiri lacogo. Kuma dɔw fana bɛ yi, an tɛ minw kɔrɔ lɔn, i n’a fɔ nin kuma min bɛ sɔrɔ Zaburu caman na ko «Sela». Dɔw b’a miiri ko o kuma kɔrɔ ye ko dɔnkiri ka kan ka lalɔ dɔɔnin o yɔrɔw ra.

Zaburuw kitabu bɛ Ala ta bonya ni a ta sebagaya yira an na. An b’a ye nin kitabuw kɔnɔnɔkumaw fɛ fana, ko Ala b’a janto a ta mɔgɔw ra, ka o lamɛn. Adamaden bɛ se k’a ta miiriyaw, ani a ta sɛgɛkow, ani a ta dɛsɛkow, ani a ta jusukasikow bɛɛ fɔ Ala ye, sabu Ala bɛ a welebagaw lamɛn.

Kitabu kɔnɔkow

Zaburuw kitabu taranna k’a kɛ kitabu looru:

Kitabu fɔlɔ: Zaburuw 1–41

Kitabu flanan: Zaburuw 42–72

Kitabu sabanan: Zaburuw 73–89

Kitabu naaninan: Zaburuw 90–106

Kitabu loorunan: Zaburuw 107–150

Kitabu fɔlɔ

(Zaburuw 1–41)

Mɔgɔ terennin ta sira ani mɔgɔjugu ta sira

¹Mɔgɔ min tɛ tagama ka kaɲa ni mɔgɔjuguw ta ladiri ye,

ni a tɛ lɔ ni jurumunkɛbagaw ye o ta sira kan,

ni a tɛ sigi ni kumakolonfɔbagaw ye o ta jɛn ra,

o tigi ta ɲana;

²Matigi Ala ta sariya le ka di a ye,

a ta miiriya bɛ o sariya le kan su ni tere.

³O tigi bɛ i ko yiri min turunin bɛ jiwoyo kɔrɔ;

ni a dentuma sera, a bɛ den,

a flaburuw fana tɛ jaja ka ye.

Ni a ka fɛn o fɛn kɛ, o bɛɛ bɛ ɲa.

⁴Nka mɔgɔjuguw ta tɛ ten fiyewu!

Olugu bɛ i ko binjalan, fɔɲɔ bɛ min ta ka taga ni a ye.

⁵O kosɔn mɔgɔjugu tɛ se ka jo sɔrɔ kiti lon na,

jurumunkɛbaga tɛ se ka don mɔgɔ terenninw ta jɛn ra.

⁶Sabu Matigi Ala bɛ mɔgɔ terennin ta sira kɔrɔsi;

nka mɔgɔjugu ta sira b’a lataga halakiyɔrɔ le ra.

Ala ka masacɛ min ɲanawoloma

¹Mun kosɔn siyaw bɛ muruti dɛ?

Mun kosɔn miiriya gbansanw bɛ jamana mɔgɔw kɔnɔ dɛ?

²Dugukolo masacɛw wurira ka lɔ;

kuntigiw ka ɲɔgɔn lajɛn

Matigi Ala ni a ta mɔgɔ ɲanawolomanin kama.

³O ko: «An ye o ta sirinanw foni ka bɔ an yɛrɛ ra,

an ye o ta juruw tigɛ ka bɔ an yɛrɛ ra!»

⁴Min siginin bɛ sankolo masaya ra, ale bɛ yɛrɛkora o ma;

Matigi bɛ o lɔgɔbɔra le!

⁵O kɔ, a dimininba bɛ kuma ni o ye,

a jusu bɔnin bɛ kuma o fɛ fɔ ka o ja tigɛ,

⁶ko: «Ne yɛrɛ le ka ne ta masacɛ sigi Siyɔn kuru* kan,

ne ta kuru saninman kan.»

⁷Ayiwa, ne bɛna Matigi Ala ta cifɔninw wangola.

A k’a fɔ ne ye ko: «Den min bɔra ne ra, ele lo;

ne kɛra i fa ye bi.

⁸Siyaw daari ne fɛ, ne bɛna o bɛɛ tigiya di i ma,

ne bɛna yɔrɔ bɛɛ kɛ i ta ye, ka taga se fɔ dugukolo danw ma.

⁹I bɛna o mara ni masacɛbere nɛgɛraman le ye;

i bɛna o ta fanga ɲɔɲɔ i ko bɔgɔdaga.»

¹⁰Ayiwa, sisan, aw masaw, aw ye hakiri sɔrɔ!

Aw y’a to o ye aw ladi, aw minw ye dunuɲa fangatigiw ye!

¹¹Aw ye baara kɛ Matigi Ala ye ni Alaɲasiran ye!

Aw ye ɲagari, nka aw ye siran a ɲa fɔ ka yɛrɛyɛrɛ.

¹²Aw y’a dencɛ bonya,

janko a kana na dimi aw kɔrɔ ka aw halaki aw ta siraw ra;

sabu a ta dimi bɛ se ka ben aw kan yɔrɔnin kelen na.

Minw bɛɛ bɛ o yɛrɛ karifa a ma,

olugu ta ɲana!

Ala le bɛ a ta mɔgɔw tanga

¹Dawuda ta Zaburu, a ka min sɛbɛ a boritɔ a dencɛ Abusalɔn ɲa.

²Matigi Ala, ne juguw ka ca,

minw wurira ne kama, o ka ca.

³Mɔgɔ caman b’a fɔra ne ta ko ra, ko:

«Ala tɛna a bɔsi fiyewu!»3.3 Nin yɔrɔ ra a sɛbɛra heburukan na ko: Sela.

⁴K’a sɔrɔ ele kɔni, Matigi Ala, ele le ye ne tangabaga ye,

ne bɛ bonya sɔrɔ ele le fɛ, ele le bɛ ne kun kɔrɔta.

⁵Ne bɛ ne kan kɔrɔta, ka Matigi Ala wele,

a bɛ to a ta kuru saninman kan ka ne jaabi.3.5 Nin yɔrɔ ra a sɛbɛra heburukan na ko: Sela.

⁶Ne bɛ la ka sunɔgɔ, ka kunu,

sabu Matigi Ala bɛ ne dɛmɛ.

⁷Ne juguw jamaba min ka ne lamini,

ne tɛ siran olugu si ɲa.

⁸E, Matigi Ala, i wuri!

Ne ta Ala, ne kisi!

I tɛgɛ ci ne juguw bɛɛ ɲa kan,

mɔgɔjuguw bɛɛ ɲinw karikari!

⁹Kisiri bɛ sɔrɔ Matigi Ala le ra;

baraka don i ta mɔgɔw ra!3.9 Nin yɔrɔ ra a sɛbɛra heburukan na ko: Sela.

Ala le bɛ a ta mɔgɔw dɛmɛ

¹Dɔnkirilabagaw kuntigi. Dɔnkiri min bɛ la ni gɔni ye. Dawuda ta Zaburu.

²E, Ala, ele min bɛ jo di ne ma,

ni ne ka kule i nɔ fɛ tuma o tuma, i ye ne jaabi.

Ne degunin tun lo, nka i ka laganfiya di ne ma.

Makari ne ra, ka ne ta daariri lamɛn!

³Aw adamadenw, aw minw bɛ ne ta bonya yɛlɛma k’a kɛ maroya ye,

aw bɛna o dabla tuma juman le?

Aw bɛ fɛngbansanw kanu, ka tugu faninya kɔ,

aw bɛna o fana dabla tuma juman le sa?4.3 Nin yɔrɔ ra a sɛbɛra heburukan na ko: Sela.

⁴Aw ka kan k’a lɔn ko Matigi Ala k’a ɲasiranbaga ɲanawoloma;

ni ne ka Matigi wele, a bɛ ne lamɛn.

⁵Ni aw dimina, aw kana jurumun kɛ;

aw ye to aw ta layɔrɔ ra ka je ka miiri kosɛbɛ.4.5 Nin yɔrɔ ra a sɛbɛra heburukan na ko: Sela.

⁶Aw ye terenninya sarakaw bɔ,

ka aw jigi la Matigi Ala kan.

⁷Mɔgɔ caman b’a fɔ ko: «E, jɔn le bɛna hɛra kɛ an ye tuun sa!»

E, Matigi Ala, makari an na ka i ta yeelen bɔ an ye.

⁸Hali ni mɔgɔw ka simankura ni rɛzɛnjikura sɔrɔ caman, ka ɲagari,

i bɛ ɲagari min don ne jusu ra, o belen ka bon ka tɛmɛ olugu ta kan.

⁹Ne bɛ la ka sunɔgɔ hɛra ra,

sabu ele Matigi Ala, ele yɛrɛ le bɛ ne mara ne layɔrɔ ra hɛra ni laganfiya ra.

Ala b’a ɲasiranbagaw dɛmɛ

¹Dɔnkirilabagaw kuntigi. Dɔnkiri min bɛ la ni filenw ye. Dawuda ta Zaburu.

²E, Matigi Ala, i toro malɔ ne kumakan na,

ne ŋunakan lamɛn!

³I janto ne ta welerikan na, ne ta Masa, ne ta Ala!

Sabu ne bɛ ele le daarira.

⁴Matigi Ala, lon o lon sɔgɔma i bɛ ne kan mɛn,

lon o lon sɔgɔma ne bɛ taga lɔ ka i makɔnɔ;

⁵sabu i tɛ Ala ye, kojugu ka di Ala min ye,

i tɛ mɔgɔjugu fɛ.

⁶Yɛrɛbonyabaga tɛ se ka lɔ ele ɲa kɔrɔ,

mɔgɔ o mɔgɔ bɛ kojugu kɛ, i bɛ o haramuya.

⁷I bɛ faninyafɔbagaw halaki;

mɔgɔfagabagaw, ani nanbaramɔgɔw, Matigi Ala bɛ olugu haramuya.

⁸Nka ne kɔni, i ta ɲumanyaba baraka ra,

ne bɛ se ka don i ta batoso kɔnɔ,

ka ne kinbiri gban i ta batoso saninman ɲa fɛ ka i bato,

sabu i ɲasiran bɛ ne ra.

⁹E, Matigi Ala, i ta terenninya sira yira ne ra,

i ta siraw lateren ne ye,

ne juguw kosɔn;

¹⁰sabu mɔgɔ tɛ se ka la olugu darakuma si ra,

cɛnri miiriya dɔrɔn le bɛ o jusu ra,

o kandinga ye kaburu dayɛlɛnin le ye5.10 Nin kuma fɔra Rɔmukaw 3.13.,

o bɛ mɔgɔw lafiri ni o nɛnkun ye.

¹¹E, Ala, o jaraki!

A to o yɛrɛ ta ŋaninyajuguw ye kɛ o ben sababu ye;

o gbɛn ka bɔ i ɲa kɔrɔ o ta jurumun caman kosɔn,

sabu o murutira i ma.

¹²Nka minw bɛɛ bɛ o yɛrɛ karifa ele ma, olugu bɛna ninsɔndiya,

ka ɲagari kosɛbɛ tuma bɛɛ fɔ ka kule ci,

sabu ele le bɛ o tanga.

I tɔgɔ ka di minw ye, olugu bɛna ɲagarikanbaw bɔ;

¹³sabu, Matigi Ala, ele le bɛ baraka don mɔgɔ terennin na,

i bɛ koɲuman caman kɛ a ye, k’a sutara i ko nɛgɛbɛnnan.

Ala le ye kɛnɛyari kɛbaga ye

¹Dɔnkirilabagaw kuntigi. Dɔnkiri min bɛ la ni gɔni juru seegi ye. Dawuda ta Zaburu.

²E, Matigi Ala, i kana ta dimi fɛ ko i bɛ ne jaraki,

i kana ta jusugban fɛ ko i bɛ ne koro.

³E, Matigi Ala, makari ne ra, sabu ne baraka bɛɛ le banna;

ne kɛnɛya, Matigi Ala, sabu ne kolow bɛɛ bɛ yɛrɛyɛrɛra.

⁴Ne hakiri ɲagamina kosɛbɛ!

Matigi Ala, nin bɛna ban tuma juman le sa?

⁵Na, Matigi Ala, na ne bɔsi,

na ne kisi i ta ɲumanya kosɔn.

⁶Sabu mɔgɔ saninw hakiri tɛ to i ra tuun;

jɔn le bɛna to kaburu kɔnɔ ka i fo ka i waleɲumanlɔn?

⁷Ne ŋunana fɔ ka ne baraka bɛɛ ban,

su o su ne ɲaji bɛ woyo fɔ ka ne ta lanan ɲigi,

ne bɛ kasi ka ne layɔrɔ bɛɛ kɛ ɲaji ye.

⁸Ne ɲadenw finna dimi kosɔn,

ne ɲadenw baraka bɛɛ banna ne juguw ta kɛwalew kosɔn.

⁹Aw kojugukɛbagaw, aw ye aw yɛrɛ mabɔ ne ra,

sabu Matigi Ala ka ne kasikan mɛn.

¹⁰Matigi Ala ka ne ta makarikan mɛn,

Matigi Ala sɔnna ne ta daariri ma.

¹¹Ne juguw bɛɛ bɛna maroya, ka o ja tigɛ fɔ o bɛ yɛrɛyɛrɛ;

o maroyaninba bɛna sekɔ ka taga joona joona.

Ala le bɛ a ta mɔgɔw lakisi

¹Dawuda ta maɲumanko dɔnkiri; a ka min la Matigi Ala ɲa kɔrɔ, Kusi ta ko ra, Kusi min tun ye Boniyaminu ta mɔgɔ dɔ ye.

²Matigi Ala, ne ta Ala, ne bɛ ne yɛrɛ karifa ele le ma;

ne kisi ka bɔ ne nɔgbɛnbagaw bɛɛ boro, ka ne bɔsi,

³janko o kana na ne sogo tigɛtigɛ i ko jara,

o kana na ne tigɛtigɛ, mɔgɔ kana sɔrɔ ka ne bɔsi.

⁴Matigi Ala, ne ta Ala, ni a kɛra ko ne ka nin ko ɲɔgɔn dɔ le kɛ:

ni ne boro ka kojugu kɛ,

⁵walama ni ne ka kojugu kɛ ne sigiɲɔgɔn na,

ni ne ka hali ne jugu dɔ ta borofɛnw bɔsi gbansan,

⁶o tuma ne juguw ye ne gbɛn fɔ ka ne nin mina;

o ye ne dɔndɔn ka ne terege dugu ma fɔ ka ne si ban,

ka ne ta bonya bɛɛ tunu bɔgɔ ra.7.6 Nin yɔrɔ ra a sɛbɛra heburukan na ko: Sela.

⁷E, Matigi Ala, i wuri ka i ta dimi yira,

i wuri ka ne juguw ta jusugban bɛɛ ban;

i wuri ka ne dɛmɛ, ka kiti tigɛ.

⁸Jamanaw bɛɛ ta mɔgɔw ye na lajɛn ka i lamini,

ele ye sigi san fɛ o bɛɛ kunna.

⁹Matigi Ala le bɛ siyaw ta kiti tigɛ;

Matigi Ala, ne ta kiti tigɛ ka kaɲa ni ne ta terenninya ye,

ka kaɲa ni ne ta jusukungbɛninya ye.

¹⁰Mɔgɔjuguw ta kojuguw lalɔ ten,

ka mɔgɔ terennin sabati,

ele min bɛ adamaden jusukunnakow ni a hakirinankow bɛɛ sɛgɛsɛgɛ k’a lɔn,

ele Ala min terennin lo.

¹¹Ala le ye ne tangabaga ye,

ale le ye mɔgɔ jusuɲumanw kisibaga ye.

¹²Ala ye kititigɛbaga terennin le ye,

a ta dimi bɛ ben mɔgɔjuguw kan lon o lon.

¹³Ni o ma nimisa, Ala bɛna a ta kɛrɛkɛmuru dabɔ o kama;

a bɛ a ta kalan labɛn, k’a sama.

¹⁴A bɛ a ta kɛrɛkɛminanw labɛn fagari kama,

a bɛ biɲɛ tasumamanw labɛn.

¹⁵A flɛ, mɔgɔjugu bɛ terenbariya kɔnɔ ta,

kojugu kɔnɔ le b’a ra;

a fana bɛna jigi faninya le ra.

¹⁶A bɛ dinga sogi, fɔ k’a dunya,

nka a ka dinga min sogi, ale yɛrɛ le bɛ ben o kɔnɔ.

¹⁷A ta kojugu bɛna ben ale yɛrɛ le kan,

a ta fariya bɛ jigi ale yɛrɛ le kuncɛ ra.

¹⁸Ne bɛna Matigi Ala fo k’a waleɲumanlɔn a ta terenninya kosɔn,

ka Alatandodɔnkiriw la ka Matigi Ala kɔrɔtaninba tɔgɔ tando.

Ala ta bonya ni a ta nɔɔrɔ

¹Dɔnkirilabagaw kuntigi. Dɔnkiri min bɛ la ni Gatikaw ta gɔni ye. Dawuda ta Zaburu.

²E, Matigi Ala, an Matigi,

i tɔgɔ ka bon dugukolo yɔrɔ bɛɛ le ra!

I ta bonya tɛmɛna sankolo bonya kan.

³I ka i tɔgɔ tandorikumaw don denmisɛnw ni sinmindenw da ra,

janko ka i kɛrɛbagaw lamaroya,

ka i juguw da datugu, ani minw b’a fɛ ka o yɛrɛ dimibɔ i ra.

⁴Ni ne ka i ta sankolo flɛ, i yɛrɛ boro ka min dan,

ka karo ni lolow flɛ, i boro ka minw labɛn,

⁵o tuma ne b’a fɔ ko: «Mɔgɔ ye mun le ye, ka n’a fɔ ko i bɛ i hakiri to a ra?

Adamaden ye mun le ye, ka n’a fɔ ko i bɛ i janto a ra?»

⁶O bɛɛ n’a ta, i k’a dan k’a dɔgɔya ni Ala yɛrɛ dɔrɔn le ye;

i ka bonya ni nɔɔrɔ masafugula sigi a kun na.

⁷I boro ka fɛn o fɛn dan, i ka o bɛɛ bla a ta fanga kɔrɔ,

ka fɛn bɛɛ bla a sen jukɔrɔ:

⁸sagaw, ani baw, ani misiw bɛɛ,

ani kongosogow,

⁹ani sanfɛkɔnɔw, ani kɔgɔji jɛgɛw,

ani fɛn o fɛn bɛ yaala kɔgɔjiw kɔnɔ.

¹⁰E, Matigi Ala, an Matigi,

i tɔgɔ ka bon dugukolo yɔrɔ bɛɛ le ra!

Ala b’a janto ɲanibagatɔw ra

¹Dɔnkirilabagaw kuntigi. Dɔnkiri min bɛ la ni filen ni gɔni ye. Dawuda ta Zaburu.9.1 Zaburu sura kɔnɔntɔn, ani sura tan ta hayanw bɛɛ kelen kelen bɛ damina ni heburukan sigininden dɔ ye, k’a ta a sigininden fɔlɔ ra, min ye Alɛfu ye, ka taga a bla a laban na min ye Tavu ye.

²Matigi Ala, ne bɛ i fo ka i waleɲumanlɔn ni ne jusukun bɛɛ ye,

ne bɛna i ta kabakobaw bɛɛ lakari.

³Ne bɛna ninsɔndiya, ka ɲagari kosɛbɛ ele Matigi Ala ta jɛnɲɔgɔnya kosɔn;

ne bɛna Alatandodɔnkiriw la ka i tɔgɔ tando, ele Ala kɔrɔtaninba!

⁴Ne juguw sekɔra ni o kɔ ye;

o bɛ talon ka ben, ka halaki i ɲa kɔrɔ;

⁵sabu ele le bɛ ne ta kiti tigɛ, ka ne ta jo di ne ma.

I siginin bɛ i ta masasiginan kan, i bɛ kiti tigɛ ka kaɲa ni terenninya ye.

⁶I ka siya tɔw jaraki, ka mɔgɔjuguw halaki;

i ka o tɔgɔ jɔsi ka bɔ yi pewu!

⁷Ne juguw bɛɛ banna, o sigiyɔrɔw kɛra tomo lawuribariw le ye;

i ka o ta duguw cici, mɔgɔ si hakiri tɛna to o ra tuun.

⁸Matigi Ala kɔni siginin bɛ a ta masaya ra wagati bɛɛ,

a siginin bɛ a ta masasiginan kan, ka kiti tigɛ.

⁹Ale le bɛ dunuɲa mara ni terenninya ye,

ka mɔgɔw ta kiti tigɛ ka ɲa.

¹⁰Matigi Ala le ye sɛgɛbagatɔw dogoyɔrɔ ye,

ale le ye o dogoyɔrɔ ye o degu wagatiw ra.

¹¹O kosɔn minw ka i tɔgɔ lɔn, olugu bɛ o jigi la i kan;

sabu minw bɛ i yɔrɔɲini, i tɛna olugu to o kelen na, Matigi Ala.

¹²Aw ye Alatandodɔnkiriw la Matigi Ala ye, Ala min siginin bɛ Siyɔn,

aw ye a ta kokɛninw lakari mɔgɔw ye.

¹³A bɛna mɔgɔfagabagaw ɲininka, sabu o ka mɔgɔ minw faga, a hakiri bɛ olugu ra;

a tɛ ɲina ɲanibagatɔw kasikan kɔ.

¹⁴E, Matigi Ala, makari ne ra,

ne ɲanicogo flɛ ne kɔninyabagaw boro;

ele le bɛ ne lawuri ka bɔ saya ta so donda ra,

¹⁵janko ne ye i tando ka i ta bonya bɛɛ lakari

Siyɔn dugu donda ra,

ka ɲagari i ta kisiri kosɔn.

¹⁶Siyaw benna o yɛrɛ ta dinga soginin kɔnɔ;

o dogora ka jɔ min siri, o yɛrɛ sen minana o jɔ ra.

¹⁷Matigi Ala k’a yɛrɛ yira, a ka kiti tigɛ can kan;

mɔgɔjugu ta kɛwalew kɛra jan ye k’a yɛrɛ mina.9.17 Nin yɔrɔ ra a sɛbɛra heburukan na ko: Higayɔni, Sela.

¹⁸Mɔgɔjuguw bɛna taga saya dibi ra,

o siya minw bɛɛ bɛ ɲina Ala kɔ.

¹⁹Nka Ala tɛ ɲina fagantanw kɔ ka o to yi ten,

ɲanibagatɔw jigi tigɛnin tɛ to yi ten tuma bɛɛ.

²⁰E, Matigi Ala, i wuri! I kana a to mɔgɔw ye se sɔrɔ!

Siyaw ta kiti ye tigɛ i ɲa kɔrɔ.

²¹Matigi Ala, siranyaba bla o ra,

siyaw y’a lɔn ko olugu tɛ foyi ye ni adamaden gbansanw tɛ.9.21 Nin yɔrɔ ra a sɛbɛra heburukan na ko: Sela.

Ala le bɛ ɲanibagatɔw bɔsi

¹E, Matigi Ala, mun kosɔn i k’a i yɛrɛ mabɔ ne ra?

Mun kosɔn i bɛ dogo ne ra ne ta degu wagatiw ra?

²Mɔgɔjugu ni a ta yɛrɛbonya bɛ ɲanibagatɔw tɔɔrɔra;

a ka dabarijugu minw siri, a bɛna o mina ni o le ye.

³Mɔgɔjugu b’a yɛrɛ tando, sabu ko min miiriya tun b’a jusukun na, a ka o sɔrɔ;

ale mɔgɔ nataba bɛ Matigi Ala nɛni, k’a mafiyɛnya.

⁴Mɔgɔjugu bɛ yada, fɔ k’a fɔ ko: «Ala tɛ yi!»

A ta miiriya bɛɛ bɛ o le ye.

⁵A ta kow bɛ ɲa a boro tuma bɛɛ;

i ta kolatigɛninw si tɛ se a ma,

a b’a juguw bɛɛ fiyɛ ka bɔ yi.

⁶A b’a fɔ a yɛrɛ kɔnɔ ko: «Foyi tɛ se ka ne bɔ ne nɔ ra!

Kojugu si tɛna ne sɔrɔ ka ye fiyewu!»

⁷Mɔgɔdangakanw dɔrɔn le bɛ a da ra, ani nanbara ni tɔɲɔri;

kumajuguw, ani terenbariyakumaw le b’a nɛnkun kan.

⁸A bɛ dogo dugu kɔ fɛ ka mɔgɔw kɔnɔ,

a bɛ to yɔrɔ dogoninw na ka baga mɔgɔ jarakibari ma k’a faga;

a bɛ dogo ka dɛsɛbagatɔw kɔnɔ.

⁹A bɛ dogo ka mɔgɔw kɔnɔ, i ko jara bɛ dogo a ta dinga kɔnɔ cogo min na,

a bɛ dogo ka ɲanibagatɔ kɔnɔ,

a bɛ ɲanibagatɔ sama k’a don a ta jɔ ra, k’a mina.

¹⁰A bɛ biri, ka sonzori,

ka dɛsɛbagatɔ dɛndɛn fɔ k’a mina.

¹¹Ni o kɛra, a b’a fɔ a yɛrɛ kɔnɔ ko: «E, Ala ɲinana!

Ala k’a ɲa datugu, a tɛ foyi yera!»

¹²E, Matigi Ala, i wuri! E, Ala, i boro kɔrɔta!

I kana ɲina ɲanibagatɔw kɔ.

¹³Mun na mɔgɔjugu bɛ Ala mafiyɛnyara tan?

Mun kosɔn a b’a fɔra a yɛrɛ kɔnɔ ko: «Ala tɛna foyi kɛ ne ra!»

¹⁴Nka ele Ala le bɛ fɛn bɛɛ yera!

Minw bɛ sɛgɛ ra, ani dimi bɛ minw kan, i ɲa bɛ olugu ra.

Ko bɛɛ bɛ ele le boro.

Dɛsɛbagatɔ b’a yɛrɛ karifa ele le ma,

ele le ye ferita dɛmɛbaga ye.

¹⁵Mɔgɔjugu kojugukɛbaga boro kari!

A ta kojuguw hakɛ bɔ a ra fɔ ka taga a halaki ka ban pewu!

¹⁶Matigi Ala le ye Masa ye tuma bɛɛ, ani wagati bɛɛ,

a bɛna Alaɲasiranbariw bɛɛ halaki ka bɔ a ta dugukolo kan.

¹⁷E, Matigi Ala, ɲanibagatɔw bɛ min fɛ, ele le bɛ o kɛ o ye,

i bɛ o ja gbɛlɛya, ka i toro malɔ ka o lamɛn,

¹⁸ka feritaw, ani sɛgɛbagatɔw ta jo di o ma,

janko adamadenw kana to ka o ta jagboyafanga sigi mɔgɔw kan tuun ka o degu.

Mɔgɔ terennin b’a yɛrɛ karifa Ala le ma

¹Dɔnkirilabagaw kuntigi. Dawuda ta Zaburu.

Ne bɛ ne yɛrɛ karifa Matigi Ala le ma.

Mun kosɔn aw b’a fɔ ne ma

ko ne ye bori i ko kɔnɔ bɛ wuri cogo min na ka taga dogo kuruw cɛ ra?

²A flɛ, mɔgɔjuguw bɛ o ta kalan samana,

o bɛ o ta biɲɛw donna kalan juru ra,

ka dogo dibiba ra ka mɔgɔ jusuɲuman bon.

³Ni terenninya jusiginanw benna ka ban,

o tuma mɔgɔ terennin bɛ se ka mun le kɛ tuun?

⁴Matigi Ala bɛ a ta batoso saninman kɔnɔ,

Matigi Ala ta masasiginan bɛ sankolo kɔnɔ;

a ɲa bɛ flɛri kɛra,

a bɛ adamadenw jusukunw flɛ, ka o sɛgɛsɛgɛ.

⁵Matigi Ala bɛ mɔgɔ terennin jusukun sɛgɛsɛgɛ,

nka a bɛ mɔgɔjuguw ni mɔgɔ farimanw kɔninya.

⁶A bɛ takami ni tasuma ni kiribi le bɔn mɔgɔjuguw kan,

ani fɔɲɔ gbanninman;

o le bɛ kɛ olugu ninyɔrɔ ye.

⁷Sabu Matigi Ala terennin lo,

ko terenninw le ka di a ye;

mɔgɔ terenninw le bɛna a ɲada ye.

Ala bɛ a ta mɔgɔw dɛmɛ wagatigbɛlɛnw na

¹Dɔnkirilabagaw kuntigi. Dɔnkiri min bɛ la ni gɔni juru seegi ye. Dawuda ta Zaburu.

²E, Matigi Ala, an bɔsi, ni o tɛ, Alaɲasiranbagaw banna,

lanamɔgɔ tɛ adamadenw cɛ ra tuun.

³O bɛɛ bɛ faninya le fɔ ɲɔgɔn ye,

o bɛ ɲɔgɔn nɛgɛ; flankafuya bɛ o jusuw ra.

⁴Matigi Ala ye mɔgɔnɛgɛbagaw bɛɛ halaki ka bɔ yi,

ani min o min nɛnkun bɛ yɛrɛbonyakumaw fɔ;

⁵minw b’a fɔ ko: «An bɛna se sɔrɔ an nɛnkun baraka ra,

an daw bɛ an fɛ ka ban, jɔn le bɛna se an na?»

⁶O bɛ ɲanibagatɔw minako juguya,

fagantanw bɛ ŋunana o boro;

o kosɔn Matigi Ala ko: «Sisan ne bɛna wuri,

o bɛ o mɔgɔ minw mafiyɛnya, ne bɛna olugu bɔsi.»

⁷Matigi Ala darakumaw ye kuma saninyaninw le ye,

a bɛ i ko warigbɛ min kora daganin kɔnɔ tasuma ra,

k’a saninya fɔ siɲaga wolonfla.

⁸E, Matigi Ala, ele le bɛna an mara,

ka an tanga nin mɔgɔ suguyaw ma tuma bɛɛ;

⁹sabu mɔgɔjuguw bɛ yaala yɔrɔ bɛɛ,

kojugu bɛ cayara adamadenw cɛ ra.

Ala bɛ an kisi an juguw ma

¹Dɔnkirilabagaw kuntigi. Dawuda ta Zaburu.

²E, Matigi Ala, i bɛna i hakiri jigi ne ra tuma juman le sa?

I bɛna i ɲa munu ka ne flɛ tuma juman le sa?

³Hami min bɛ ne jusu ra, o bɛna ban lon juman le?

Jusukasi min bɛ ne ra lon o lon, o bɛna ban lon juman le?

Ne jugu bɛ se sɔrɔra ne kan minkɛ, o bɛna dabla tuma juman?

⁴E, Matigi Ala, ne ta Ala, ne flɛ, i ye ne jaabi!

Baraka don ne ra janko ne ɲa yɛlɛnin ye to,

janko saya sunɔgɔ kana na ne ta.

⁵Ni o tɛ, ne jugu bɛna a fɔ ko: «Ne sera a ra le!»

Ni ne benna, ne kɔninyabagaw bɛna ɲagari le.

⁶O bɛɛ n’a ta, ne jigi bɛ i ta ɲumanya kan,

ne jusu bɛna ɲagari i ta kisiri kosɔn.

Ne bɛna dɔnkiri la Matigi Ala ye,

sabu a ka koɲuman kɛ ne ye.

Alaɲasiranbariw

(Zaburu 53)

¹Dɔnkirilabagaw kuntigi. Dawuda ta Zaburu.

Mɔgɔ kolɔnbariw b’a fɔ o yɛrɛ kɔnɔ ko: «Ala tɛ yi!»

O mɔgɔw ye mɔgɔkolonw le ye, o ta kɛwalew bɛɛ haramunin lo;

o si tɛ koɲuman kɛ.

²Matigi Ala bɛ to sankolo ra ka jɛngɛ ka adamadenw flɛ,

k’a flɛ ni a kɛra ko mɔgɔ bɛ yi, hakiri bɛ min fɛ,

min ye Alaɲinibaga ye.

³O bɛɛ ka o kɔ munu Ala ma, o bɛɛ kɛra ɲacintanw ye;

o si tɛ koɲuman kɛ,

hali mɔgɔ kelenpe.

⁴Minw bɛɛ bɛ kojugu kɛra, yala olugu tɛ ko lɔn le wa?

O bɛ ne ta mɔgɔw domuna i ko to;

o fana tɛ Matigi Ala bato.

⁵Sisan, jatigɛba le bɛna o mina,

sabu Ala bɛna kɛ ni mɔgɔ terenninw ye.

⁶Aw b’a fɛ ka ɲanibagatɔ ta kokɛtaw cɛn a boro,

nka Matigi Ala le ye a karifayɔrɔ ye.

⁷Jɔntigi le bɛna bɔ Siyɔn ka na Izirayɛli kisi!

Ni Matigi Ala nana a ta mɔgɔw ta bonya lasekɔ o ma tuma min na,

Yakuba ta mɔgɔw bɛna ɲagari, Izirayɛlimɔgɔw bɛna ninsɔndiya.

Ala ta mɔgɔ saninman

¹Dawuda ta Zaburu.15.1 Yahudiyaw tun bɛ deri ka nin dɔnkiri la, o dontɔ Alabatosoba kɔnɔ.

Matigi Ala, jɔn le bɛna sigi i ta bon saninman kɔnɔ?

Jɔn le bɛna sigi i ta kuru saninman kan?

²Mɔgɔ min bɛ tagama ni jusukun gbɛnin ye,

ka terenninya sira ta;

mɔgɔ min bɛ can bɔ a jusukun na k’a fɔ.

³O tigi tɛ mɔgɔ tɔgɔ cɛn ni a nɛnkun ye,

a tɛ kojugu kɛ a mɔgɔɲɔgɔn na,

a fana tɛ a sigiɲɔgɔn lamaroya.

⁴A bɛ mɔgɔ sɔnkolon mafiyɛnya,

nka Matigi Ala ɲasiran bɛ mɔgɔ minw na, a bɛ olugu bonya.

Ni a ka layiri min ta, a bɛ o dafa, hali ni o ko bɛ digi a ra.

⁵A tɛ juru don mɔgɔ ra ka tɔnɔ ɲini a ra,

a tɛ bonyafɛn mina dogo ra, ka kuma ben mɔgɔ jarakibari kan.

Mɔgɔ o mɔgɔ bɛ o sira tagama, o tigi tɛ jɛngɛ ka bɔ a nɔ ra ka ye fiyewu.

Mɔgɔ ka kan k’a jigi la Ala le kan

¹Dawuda ta dɔnkiri.

E, Ala, ne tanga, sabu ne ka ne yɛrɛ karifa i ma.

²Ne b’a fɔ Matigi Ala ye ko: «Ele le ye ne Matigi ye,

ne ta hɛra bɛɛ lajɛnnin bɛ ele le ra.»

³Ala ta mɔgɔ saninman minw bɛ jamana kɔnɔ, ani jamana ɲamɔgɔw,

olugu le ko ka di ne ye.

⁴Nka minw bɛ boribori batofɛn wɛrɛw kɔ,

olugu bɛ o ta jusukasi le caya.

O bɛ saraka minw bɔ, ka jori bɔn o ta batofɛnw kan, ne tɛ o dɔ kɛ;

ne fana tɛna o batofɛnw tɔgɔ fɔ ne da ra fiyewu.

⁵Matigi Ala le ye ne ninyɔrɔ ye, ani ne ta sɔrɔta.

Ne ta dunuɲalatigɛ bɛ ele le boro.

⁶Yɔrɔ min danw sigira k’a kɛ ne ninyɔrɔ ye, o ye yɔrɔ ɲumanba le ye;

ne ninyɔrɔ ye fɛnɲumanba le ye.

⁷Ne bɛ baraka la Matigi Ala ye, ne ladibaga;

hali su fɛ, o miiriya le bɛ ne jusukun na.

⁸Ne ɲa lɔnin bɛ Matigi Ala ra wagati bɛɛ;

k’a to ne kɛrɛ fɛ, foyi tɛ se ka ne bɔ ne nɔ ra.

⁹O kosɔn ɲagari bɛ ne jusu ra, ninsɔndiya bɛ ne ra,

foyi tɛna ne farikolo fana sɔrɔ;

¹⁰sabu i tɛna sɔn ka ne nin to saya dibi ra;

i tɛna sɔn k’a to i ta jɔn Alaɲasiranbaga ye to kaburu kɔnɔ.

¹¹I bɛna ɲanamanya sira yira ne ra;

ɲagari dafanin le bɛ i ɲa kɔrɔ,

kodiman banbari le bɛ i kininboro kɔnɔ.

Ala bɛ a ta mɔgɔw bɔsi o juguw boro

¹Dawuda ta Aladaari.

E, Matigi Ala, ne bɛ min daari i fɛ ka kaɲa ni terenninya ye, o lamɛn, i ye i janto ne kasikan na;

i toro malɔ ne ta daariri ra, sabu nanbarakuma si tɛna bɔ ne da ra.

²Ele yɛrɛ le bɛna ne ta jo di ne ma,

i yɛrɛ ɲa bɛna koɲuman ni kojugu faranfasi k’a lɔn.

³I bɛ ne jusukun sɛgɛsɛgɛ, i bɛ ne kɔrɔsi su fɛ,

i bɛ ne kɔrɔbɔ, nka i tɛ jarakiyɔrɔ foyi sɔrɔ ne ra;

ne k’a latigɛ ko ne tɛna a to ne da ye kojugu kɛ.

⁴Ne ka adamadenw ta kɛwalew kɔrɔsi;

nka i ta darakumaw baraka ra,

ne ka ne yɛrɛ mabɔ benkannikɛbagaw ta siraw ra.

⁵Ne tora i ta siraw le kan;

ne sen ma jɛngɛ ka bɔ o sira kan.

⁶E, Ala, ne bɛ i wele sabu i bɛ ne jaabi;

i toro malɔ ne ye, ka ne darakumaw lamɛn.

⁷I ta ɲumanyaba yira an na,

sabu minw bɛ o yɛrɛ karifa i ma,

i bɛ olugu kisi ni i boro barakaman ye, ka bɔ o juguw boro.

⁸I janto ne ra i ko mɔgɔ b’a janto a ɲakisɛ ra cogo min na;

ne dogo i kaman suma kɔrɔ,

⁹ka ne kisi mɔgɔjuguw ta cɛnri ma,

ani ne jugu farimanw ma, o minw ka ne lamini fan bɛɛ ra.

¹⁰O fanin bɛ o yɛrɛ ra;

wasoyakumaw le bɛ bɔ o da ra.

¹¹O ka ne nɔgbɛn fan bɛɛ ra, fɔ ka ne lamini;

o ɲa lɔnin bɛ ne ra, janko ka na ne bugɔ ka ne ben dugu ma.

¹²O bɛ i ko jara min kɔrɔtɔnin lo, a b’a fɛ ka fagari kɛ,

i ko jarakanbelen min dogora ka kɛ sogo dɛndɛn ye.

¹³E, Matigi Ala, i wuri ka o kunbɛn, ka o ben dugu ma;

ne kisi ka bɔ mɔgɔjuguw boro ni i ta kɛrɛkɛmuru ye.

¹⁴E, Matigi Ala, ne bɔsi ka bɔ nin mɔgɔw boro ni i yɛrɛ ta baraka ye!

Ne bɔsi ka bɔ nin dunuɲamɔgɔw boro!

A to o ninyɔrɔ ye kɛ nin dunuɲa dɔrɔn le ra yan!

I ka min labɛn k’a bla o ɲa, a to o ni o ta denw ye taga fa o ra.

O ye fa a ra fɔ k’a tɔ to o mamadenw ye.

¹⁵Nka ne kɔni, ne ta terenninya kosɔn, ne ɲa bɛna i ɲada ye.

Ni ne kununa tuma o tuma, ne bɛ i ye ne ɲa kɔrɔ, fɔ ka wasa i ra.

Masacɛ bɛ baraka la Ala ye

(Samawilu flanan 22.2-51)

¹Dɔnkirilabagaw kuntigi. Matigi Ala ta jɔncɛ Dawuda ta dɔnkiri. Wagati min na Matigi Ala ka Dawuda bɔsi ka bɔ a juguw bɛɛ boro, ani k’a bɔsi ka bɔ Sawuli boro, Dawuda ka nin dɔnkiri le la ka Matigi Ala tando. ²A ko:

E, Matigi Ala, ne ta baraka tigi, ne bɛ i kanu.

³Matigi Ala le ye ne ta Ala barakaman ye, ne dogoyɔrɔ, ani ne bɔsibaga;

ne ta Ala lo, ne ta barakatigi Ala, ne karifayɔrɔ,

ne tangabaga, ne ta sesɔrɔri tigi, ani ne dogoyɔrɔ.

⁴An ye Matigi Ala tando, sabu ne k’a wele minkɛ,

a ka ne bɔsi ka bɔ ne juguw bɛɛ boro.

⁵Saya juruw tun melegera ne ra,

jiba woyotɔ minw bɛ cɛnri kɛ, o tun ka ne ta.

⁶Saya juruw tun ka ne siri ka ban!

Saya janw tun bɛ ɲini ka ne dɛrɛ.

⁷Nka ka ne to o jusukasi ra, ne ka Matigi Ala daari.

Ne ka ne ta Ala wele ko a ye ne dɛmɛ.

A tora a batoyɔrɔ saninman kɔnɔ ka ne lamɛn,

a toro ka ne kulekan lamɛn.

⁸Dugukolo yuguyugura, a yɛrɛyɛrɛra;

kuruw jusigiyɔrɔw bɛɛ yɛrɛyɛrɛra;

a ta dimi ka o bɛɛ lamaga.

⁹Sisi bɛ bɔ a nunwow fɛ,

tasuma farimanba bɛ bɔ a da ra,

ani takami tasumaman.

¹⁰A bɛ sankolo jɛngɛ ka jigi,

sankaba finmanba le bɛ a sen kɔrɔ.

¹¹A tun yɛlɛnnin bɛ serubɛn mɛlɛkɛ* dɔ le kan,

a tun bɛ jigira ka na fɔɲɔ kan.

¹²A bɛ a yɛrɛ dogo dibi kɔnɔ,

ka dogo sanfɔɲɔ dibi ra, sankaba finmanbaw kɔnɔ.

¹³Yeelen min bɛ manamana a ɲa, sankabaw tun bɛ o ra,

ani sanbɛrɛ ni takami tasumamanw.

¹⁴Matigi Ala pɛrɛnkan bɔra sankolo ra;

Ala kɔrɔtaninba kan bɔra;

a ka sanbɛrɛ ni takami lajigi.

¹⁵A bɛ bara a juguw ra, ka o bon ni biɲɛw ye ka o bɛɛ janjan;

a bɛ sanmanamanaw bɔ caman k’a juguw bɛɛ labori.

¹⁶E, Matigi Ala, i ka i juguw bagabaga minkɛ,

i ka i ta dimi fɔɲɔ fiyɛ minkɛ,

o ka kɔgɔji jukɔrɔfɛnw bɛɛ bɔ kɛnɛ ma,

ka dugukolo jusiginanw bɛɛ bla kɛnɛ ma.

¹⁷Ala bɛ to sankolo ra k’a boro bɔ ka ne ta,

ka ne ta ka ne labɔ jibaw cɛ ra,

¹⁸ka ne bɔsi ka bɔ ne jugu barakamanw boro,

ka ne bɔsi ne kɔninyabagaw boro, o minw baraka ka bon ni ne ta ye.

¹⁹Lon min ɲagban sera ne ma, o tun bɛ benna ne kan;

nka Matigi Ala kɛra ne dɛmɛbaga ye.

²⁰A ka ne bla yɔrɔ laganfiyanin le ra,

ka ne bɔsi, sabu ne ko ka di a ye.

²¹Matigi Ala ka ne mina ka kaɲa ni ne ta terenninya le ye;

a ka ne sara, sabu ne boro ka kɛwale minw kɛ, o bɛɛ saninyanin lo;

²²sabu ne ka Matigi Ala ta siraw tagama,

ne ma ta juguya fɛ, ka ne yɛrɛ mabɔ ne ta Ala ra.

²³Ne bɛ a ta sariyaw bɛɛ sira tagama,

ne fana tɛ ne yɛrɛ mabɔ a ta cifɔninw na.

²⁴Ne jarakibari lo a ɲa kɔrɔ,

sabu ne ka ne yɛrɛ kɔrɔsi jurumun ma.

²⁵O kosɔn, Matigi Ala fana ka ne sara ka kaɲa ni ne ta terenninya ye,

sabu ne borow saninyanin lo a ɲa kɔrɔ.

²⁶Matigi Ala, ni mɔgɔ min kɛra i ɲasiranbaga ye, i bɛ o tigi mina ka kaɲa ni a ta Alaɲasiran ye;

ni mɔgɔ min kɛra mɔgɔ jusukungbɛnin ye, i bɛ o tigi mina ka kaɲa ni a ta jusukungbɛninya ye.

²⁷Ni mɔgɔ min kɔnɔ gbɛnin lo, i bɛ o tigi mina ka kaɲa ni a ta kɔnɔgbɛninya ye;

nka ni mɔgɔ min kɔnɔ finnin lo, i bɛ o tigi mina ni hakiri ye.

²⁸Sabu ele le bɛ mɔgɔ sabarininw kisi,

nka yɛrɛyira bɛ minw flɛrikɛcogo ra, i bɛ olugu kun suuru.

²⁹Ele le bɛ ne ta lanpan yeelen bonya;

Matigi Ala, ne ta Ala bɛ ne ta dibi kɛ yeelen ye.

³⁰Ni i bɛ ni ne ye, ne bɛ girin ka ben kɛrɛkɛjama murutigiw kan;

ni ne ta Ala bɛ ne fɛ, ne bɛ pan kogojanw kunna ka tɛmɛ.

³¹Ala ta siraw bɛɛ dafanin lo,

sigiya tɛ Matigi Ala darakuma ra.

Mɔgɔ min b’a yɛrɛ karifa Ala ma, a bɛ o tigi tanga i ko nɛgɛbɛnnan.

³²Sabu jɔn wɛrɛ le bɛ Ala ye ni Matigi Ala kelen tɛ?

Jɔn wɛrɛ le bɛ barakatigi Ala ye ni an ta Ala kelen tɛ?

³³Ala le bɛ baraka don ne ra;

ale le bɛ ne ta sira dakaɲa ka ɲa.

³⁴A bɛ ne senw teliya i ko dagbɛ senw,

a bɛ ne lɔ yɔrɔ kɔrɔtaninw na.

³⁵A bɛ ne boro degi kɛrɛ ra,

ka ne boro kɛ ka siranɛgɛkalan bon.

³⁶I bɛ i ta nɛgɛbɛnnan di ne ma, ka ne kisi;

i boro barakaman bɛ baraka don ne ra,

i ta ɲumanya bɛ ne bonya.

³⁷I bɛ ne sen lateliya,

ne sen tɛ sɛgɛ tagama ra.

³⁸Ne bɛ ne juguw gbɛn ka o mina;

ni ne ma o faga ka ban, ne tɛ sekɔ.

³⁹Ne bɛ o ban pewu, o si tɛ se ka wuri tuun;

o bɛ benben ne sen kɔrɔ.

⁴⁰I bɛ baraka don ne ra kɛrɛ kama,

ka ne juguw bɛɛ kuturu ka o bla ne sen kɔrɔ.

⁴¹I bɛ ne juguw bɛɛ labori,

k’a to ne ye ne kɔninyabagaw bɛɛ halaki.

⁴²Olugu bɛ weleri kɛ yɔrɔ bɛɛ, nka o tɛ dɛmɛbaga sɔrɔ o yɛrɛ ra;

o bɛ Matigi Ala wele, nka a tɛ o jaabi!

⁴³Ne bɛ o terege k’a kɛ i ko fɔɲɔ bɛ buguri ta cogo min na;

ne bɛ o flan i ko siradarabuguri.

⁴⁴I ka ne bɔsi ne ta jamana mɔgɔ murutininw boro,

ka ne kɛ siya dɔw ta ɲamɔgɔ ye;

ne tun ma siya min lɔn, olugu le bɛ ne ta fanga kɔrɔ.

⁴⁵Ni ne kumana ka min fɔ dɔrɔn, o bɛ o kɛ.

Siya wɛrɛ mɔgɔw bɛ o kinbiri gban ne kɔrɔ.

⁴⁶Siya wɛrɛ mɔgɔw baraka banna,

o yɛrɛyɛrɛtɔ bɛ bɔra o dogoyɔrɔw ra.

⁴⁷Matigi Ala ɲanaman lo! Ne bɛ ne ta barakatigi Ala tando.

Ne bɛ ne kisibaga Ala bonya.

⁴⁸Ala le bɛ ne dimibɔ ne juguw ra,

ka siyaw bla ne ta masaya fanga kɔrɔ.

⁴⁹A bɛ ne bɔsi ka bɔ ne juguw boro,

ka ne bla ne juguw san fɛ,

ka ne bɔsi ka bɔ mɔgɔ farimanw boro.

⁵⁰O kosɔn, Matigi Ala, ne bɛna i fo ka i waleɲumanlɔn siyaw cɛ ra,

ne bɛna Alatandodɔnkiriw la ka i tɔgɔ bonya.

⁵¹Matigi Ala bɛ sesɔrɔriba di a ta masacɛ ma.

A ka min ɲanawoloma k’a sigi masaya ra, a bɛna o mina ni ɲumanya ye;

a bɛ o kɛ Dawuda ni a ta duruja le ye, wagati bɛɛ, ani tuma bɛɛ.

Ala ta bonya

¹Dɔnkirilabagaw kuntigi. Dawuda ta Zaburu.

²Sankolokɔnɔfɛnw bɛ Ala ta bonya yira,

sankolo danfɛnw bɛ Ala boro ta baara lakari.

³Tere bentɔ b’a ko lakari tere bɔtɔ ye,

su bantɔ bɛ o lɔnniya yira su nata ra.

⁴A tɛ kɛ ni kumaɲafɔ ye, a tɛ kɛ ni darakuma ye,

kumakan tɛ, mɔgɔ toro bɛ min mɛn.

⁵Nka o ta karan bɛ se dugukolo fan bɛɛ ra,

o ta kumaw bɛ se fɔ dunuɲa dan na.

Ala ka bon dɔ le lɔ tere ye sankolo kɔnɔ.

⁶Ale bɔtɔ bɛ i ko kɔɲɔcɛ bɔtɔ a ta kɔɲɔbon kɔnɔ;

a jusu diyanin bɛ a ta bori damina i ko cɛ barakaman.

⁷A bɛ bɔ sankolo kun dɔ ra,

ka taga a ta tagama laban a kun dɔ ra;

a fundɛnin bɛ se fɛn bɛɛ ma.

⁸Matigi Ala ta sariya dafanin lo,

a bɛ baraka don mɔgɔ ra.

Matigi Ala ta jɛnɲɔgɔnya ta kumaw ye can le ye,

a bɛ kolɔnbariw sɔn hakiri ra.

⁹Matigi Ala ta sariya ta kumaw ka ɲi,

o bɛ mɔgɔ jusu diya.

Matigi Ala ta kumaw gbɛnin lo,

o bɛ mɔgɔ ɲa yɛlɛ.

¹⁰Matigi Ala ɲasiran ta sariya saninyanin lo,

a bɛ to a nɔ ra wagati bɛɛ.

Matigi Ala ta kolatigɛninw ye can ye,

o bɛɛ terennin lo.

¹¹A nafa ka bon ka tɛmɛ hali sanin kan,

hali sanin yɛrɛworo camanba kan.

A ka di ka tɛmɛ hali li kan,

hali li min bɛ bɔra kura ye liɲaga ra.

¹²Matigi Ala, o le bɛ i ta jɔncɛ fana karan;

ni mɔgɔ min b’a sira tagama, o tigi bɛ nafaba sɔrɔ a ra.

¹³Mɔgɔ bɛ firi ka kojugu minw kɛ, i tɛ bɔ o bɛɛ kala ma.

O kosɔn ne ma bɔ ne ta jurumun minw kala ma, o yafa ne ma.

¹⁴I ta jɔn tanga yɛrɛyirabagaw ma fana;

i kana a to o ye o ta fanga sigi ne kan.

Ni o kɛra, ne bɛna kɛ mɔgɔ jusukun gbɛnin ye,

o jurumunba jaraki tɛna kɛ ne kan.

¹⁵E, Matigi Ala, sabari k’a to ne darakumaw

ani ne jusukun ta miiriw ye bɛn i ma,

Matigi Ala, ne ta barakatigi Ala, ani ne kunmabɔbaga.

Matigi Ala ye a ta mɔgɔw jigi ye

¹Dɔnkirilabagaw kuntigi. Dawuda ta Zaburu.

²Matigi Ala ye i ta daariri jaabi i degulon na,

Yakuba ta Ala20.2 Yakuba ta Ala, o kɔrɔ ye Izirayɛli ta Ala. tɔgɔ ye i tanga!

³A ye to a ta yɔrɔ saninman kɔnɔ ka i dɛmɛ,

a ye to Siyɔn20.3 Siyɔn, o kɔrɔ ye Zeruzalɛmu., ka baraka don i ra.

⁴A y’a hakiri to i ta siman sarakaw* bɛɛ ra,

ka sɔn i ta saraka jɛnita* ma.20.4 Nin yɔrɔ ra a sɛbɛra heburukan na ko: Sela.

⁵A ye i jusukun diyanyafɛnw di i ma;

ni i ka ko o ko latigɛ, a ye o bɛɛ ɲa k’a di i ma.

⁶Ni i ka se sɔrɔ, an bɛna ɲagari fɔ ka kule o kosɔn,

ka an ta darapo kɔrɔta an ta Ala tɔgɔ kosɔn.

Matigi Ala ye i ta daariri bɛɛ jaabi.

⁷Sisan kɔni, ne k’a lɔn ko Matigi Ala bɛ a ta mɔgɔ ɲanawolomanin kisi;

a bɛ to a ta yɔrɔ saninman kɔnɔ sankolo ra, k’a jaabi,

k’a kisi ni a kininboro barakaman ye.

⁸Dɔw jigi ye o ta kɛrɛkɛwotorow ye,

dɔw jigi ye o ta kɛrɛkɛsow ye;

nka, anw kɔni, anw jigi ye Matigi Ala, an ta Ala tɔgɔ le ye,

an bɛ ale le wele.

⁹Olugu bɛ dɛsɛ ka ben,

nka anw bɛ wuri ka lɔ ni baraka ye.

¹⁰E, Matigi Ala, masacɛ kisi!

Ni an ka i wele tuma o tuma, i ye an lamɛn!

Ala le bɛ koɲuman kɛ masacɛ ye

¹Dɔnkirilabagaw kuntigi. Dawuda ta Zaburu.

²E, Matigi Ala, masacɛ bɛ ninsɔndiya ele ta baraka le sababu ra.

I k’a kisi minkɛ, o ko k’a jusu diya kosɛbɛ.

³Fɛn min ko tun b’a jusukun na, i ka o di a ma,

a da ka min daari i fɛ, i ma ban ka o kɛ a ye.21.3 Nin yɔrɔ ra a sɛbɛra heburukan na ko: Sela.

⁴I nana a fɛ ni dugawu ɲanaman caman le ye;

i ka sanin yɛrɛworo masafugula biri a kun na.

⁵A ka si daari i fɛ, i k’a di a ma,

sijan, si min tɛ ban ka ye.

⁶I k’a kisi minkɛ, o le sababu ra, a ta nɔɔrɔ bonyara;

i k’a masiri ni bonya ni nɔɔrɔ ye.

⁷I k’a kɛ dugawuden ye, dan tɛ dugawu min na;

i b’a sigi i yɛrɛ kɔrɔ k’a ninsɔndiya kosɛbɛ.

⁸Sabu masacɛ b’a jigi la Matigi Ala le kan;

Ala kɔrɔtaninba ta ɲumanya baraka ra, a tɛna jɛngɛ ka bɔ a nɔ ra.

⁹Masacɛ, i boro bɛna i juguw bɛɛ mina;

i boro barakaman bɛna i kɔninyabagaw mina.

¹⁰Ni i ka na i yɛrɛ yira lon min na,

o lon na, i bɛna i juguw mana i ko tasumaba.

Ele Matigi Ala bɛna dimi o kɔrɔ, ka o bɛɛ latunu pewu;

tasuma bɛna o jɛni ka o ban.

¹¹I bɛna o si tunu ka bɔ dugukolo kan,

ka o ta durujaw ban adamadenw cɛ ra.

¹²O tun ka kojugu le ŋaninya ele kama,

o tun ka dabarijuguw le siri, nka o tɛna se k’a kɛ.

¹³Sabu i bɛna i ta kalan kɛ ka o bon,

fɔ o ye bori ka sekɔ ni o kɔ ye.

¹⁴E, Matigi Ala, wuri ka i ta setigiya yira,

an bɛna dɔnkiriw ni Alatandodɔnkiriw la, i ta sebagaya kosɔn.

Ɲanibagatɔ ta Aladaari

¹Dɔnkirilabagaw kuntigi. Nin bɛ la dɔnkiri min lacogo ra, o tɔgɔ ye ko «Sɔgɔmada dagbɛ». Dawuda ta Zaburu.

²E, ne tigi Ala, ne tigi Ala, mun na i ka ne kelen to sa22.2 O kuma le fɔra Matiyu 27.46; Marika 15.34.?

I ka i yɛrɛ mabɔ ne ra;

ne ta maɲumankokanw fɔ, nka o bɛɛ n’a ta, i ma ne kisi.

³E, ne ta Ala, ne bɛ kule ka i wele tere bɛɛ, nka i tɛ ne jaabi;

ne bɛ kule su bɛɛ, nka ne tɛ laganfiya sɔrɔ.

⁴O bɛɛ n’a ta, ele le ye Ala saninman ye,

i siginin bɛ i ta masaya ra;

Izirayɛlimɔgɔw bɛɛ bɛ ele le tandora.

⁵An bɛmaw tun bɛ o jigi la ele le kan;

o tun bɛ o jigi la i kan, i bɛ o kisi fana.

⁶Ni o tun kulera ka i wele, i tun bɛ o bɔsi;

o tun bɛ o jigi la ele le kan, o kosɔn o tun tɛ maroya.

⁷Nka ne kɔni, ne kɛra tumu le ye, ne tɛ mɔgɔ ye tuun!

Ne kɛra lɔgɔbɔrifɛn ye adamadenw fɛ, mɔgɔw bɛɛ bɛ ne dɔgɔya!

⁸Ni min o min ka ne ye, o bɛ yɛrɛko ne ma;

o bɛ kuma ka ne kɔrɔfɔ, fɔ ka o kun kɔmi,

⁹ko: «A k’a yɛrɛ karifa Matigi Ala le ma;

Ala bɛna a bɔsi kɛ;

i n’a fɔ a ko ka di Ala ye, Ala y’a kisi sa!»

¹⁰Ayiwa, Matigi Ala, ele le ka ne labɔ ne bamuso kɔnɔ,

ka i janto ne ra, ka ne sigi ne bamuso sen kan.

¹¹Kabini ne worolon na, ne karifara ele le ma;

kabini ne bɔra ne bamuso kɔnɔ, ele le kɛra ne ta Ala ye!

¹²I kana i yɛrɛ mabɔ ne ra,

sabu degu sera ne ma,

mɔgɔ si tɛ yi min bɛ ne dɛmɛ!

¹³Misitoran caman ka ne lamini,

Basan misitoran22.13 Basan mara tun bɛ Zuridɛn ba kɔ fɛ, sahiliyanfan na. Misi caman tun bɛ o mara ra kosɛbɛ, sabu dugukolo tun ka di. (Sariya 32.14; Ezekiyɛli 39.18). kɔgɔnin dɔw ka ne fan bɛɛ koori.

¹⁴O bɛ o daw waga ne kama,

i ko jara kasitɔ min bɛ sogo ɲinina k’a faga.

¹⁵Ne fari magayara k’a kɛ i ko ji;

ne kolow bɛɛ yɔgɔyɔgɔra,

ne jusukun kɛra i ko kɛɲɛ;

a bɛ yeele ka jigi ne kɔnɔbara ra.

¹⁶Ne baraka bɛɛ banna, ka ne fasa k’a kɛ i ko bɔgɔjalan.

Ne nɛn nɔrɔra ne da kɔnɔ;

i ka ne la saya buguri jukɔrɔ.

¹⁷Wuruw ka ne lamini,

mɔgɔjuguw jɛnna ka ne koori;

o ka ne borow, ani ne senw sɔgɔ.

¹⁸Ne fasara fɔ ka ne kolow bɛɛ bɔ kɛnɛ ma;

olugu kɔni ka o ɲa lɔ ne ra, o bɛ ne flɛra le.

¹⁹O ka ne ta faniw taran o ni ɲɔgɔn cɛ,

ka kara la* ne ta deregeba kosɔn22.19 Nin kuma bɛ sɔrɔ Yuhana 19.24..

²⁰E, Matigi Ala, ele kɔni kana i mabɔ ne ra.

E, ne ta baraka tigi, i teliya ka na ne dɛmɛ.

²¹Ne nin kisi ne juguw ta kɛrɛkɛmuru ma,

ne nin kisi wuruw ma.

²²Ne kisi jaraw da ma,

ne bɔsi kongomisiw gbanw ma.

²³Ala, ne bɛna i tɔgɔ fɔ ne balemaw ye,

ne bɛna i tando ni dɔnkiriw ye i ta jama bɛɛ lajɛnninw cɛ ra22.23 Nin kumaw bɛ sɔrɔ Heburuw 2.12..

²⁴Aw minw bɛɛ bɛ siran Matigi Ala ɲa, aw y’a tando!

Yakuba ta durujaw bɛɛ, aw bɛɛ ye a bonya!

Izirayɛli ta durujaw bɛɛ, aw bɛɛ ye siran a ɲa!

²⁵Sabu a tɛ ɲanibagatɔ dɔgɔya, walama ka ɲigi a ra a ta ɲani kosɔn,

a fana t’a ɲada dogo ɲanibagatɔ ma;

nka ni ɲanibagatɔ k’a wele, a b’a lamɛn.

²⁶Ele le bɛna kɛ ne ta tandori sababu ye i ta mɔgɔw ta jamaba bɛɛ lajɛnnin cɛ ra;

ne ka dajuru minw ta, ne bɛna o bɛɛ dafa i ɲasiranbagaw ɲa na.

²⁷Ɲanibagatɔw ye na domuni kɛ ka fa,

Matigi Ala ɲinibagaw ye Ala tando,

Ala ye aw si sabati wagati bɛɛ!

²⁸Dunuɲa yɔrɔw bɛɛ ta mɔgɔw bɛna o hakiri jigi Matigi Ala ra, ka sekɔ ka na a bato;

siyaw bɛɛ ta mɔgɔw bɛna o kinbiri gban a ɲa kɔrɔ.

²⁹Sabu masaya ye Matigi Ala le ta ye,

dunuɲa siyaw bɛ ale ta fanga le kɔrɔ.

³⁰Dunuɲa mɔgɔbaw bɛɛ bɛna domuni kɛ, ka o kinbiri gban k’a bato fana;

minw bɛɛ bɛna don kaburu buguri jukɔrɔ, o bɛɛ ye o kinbiri gban a ɲa kɔrɔ,

min o min nin bɛna mina a ra.

³¹Duruja nataw bɛɛ bɛna a bato,

o bɛna Matigi ko fɔ wagati nata ta mɔgɔw ye.

³²Den minw bɛna woro, o bɛna na a ta terenninya lakari olugu ye,

ko ale le ka o kow kɛ.

Sagagbɛnbagaɲuman

¹Dawuda ta Zaburu.

Matigi Ala le ye ne kɔrɔsibaga ye, i ko sagagbɛnbaga;

ne tɛna dɛsɛ foyi si ra.

²A bɛ ne laganfiya i ko sagagbɛnbaga bɛ taga ni sagaw ye bin nuguninw kɔrɔ,

ani ji ɲamalɔninw kɔrɔ cogo min na.

³A bɛ barakakura don ne ra,

ka ne bla sira terenninw kan,

a yɛrɛ tɔgɔ kosɔn.

⁴Hali ni ne bɛ tagama kurufurancɛ dibi ra, min bɛ i ko saya dibi,

ne tɛ siran foyi ɲa, sabu ele Ala, ele bɛ ni ne ye.

I ta sagagbɛnbere ni i ta tagamabere, o le bɛ ne tanga.

⁵I bɛ domuni sigi ne kɔrɔ

ne juguw yɛrɛ ɲana;

i bɛ turu kasadiman mun ne kun na,

ka ne ta minan fa fɔ k’a bɔn23.5 Ni masacɛw tun ka mɔgɔ wele domuni na, a tun b’a kɛ nin cogo le ra o tigi ye..

⁶Ɔnhɔn, ɲumanya ni nɛɛma le bɛna tugu ne kɔ

ne si bɛɛ ra;

ne bɛna to ka taga Matigi Ala ta batoso kɔnɔ23.6 Kitabu dɔw b’a fɔ ko: ne bɛna sigi Matigi Ala ta batoso kɔnɔ.

wagati bɛɛ.

Jɛnɲɔgɔnya kɛsu dontɔ Alabatoso kɔnɔ

¹Dawuda ta Zaburu.

Matigi Ala ta le ye dugukolo ye, ani fɛn o fɛn bɛ dugukolo kan;

a ta le ye dunuɲa ni a kɔnɔfɛnw bɛɛ ye;

²sabu ale le ka dugukolo ju sigi kɔgɔjiw kan;

a k’a ju sigi jiw kunna k’a sabati.

³Jɔn le bɛ se ka yɛlɛn ka taga Matigi Ala ta kuru kan sa?

Jɔn le bɛ se ka don ka taga lɔ a ta yɔrɔ saninman kɔnɔ?

⁴Ayiwa, mɔgɔ min boro ma jarakiko kɛ, ani min jusukun gbɛnin lo,

mɔgɔ min tɛ sɔn faninya ma,

ani min tɛ kari nanbara kan.

⁵O tigi le bɛna Matigi Ala ta baraka sɔrɔ,

a kisibaga Ala b’a jate mɔgɔ terennin ye.

⁶Mɔgɔ minw bɛ Ala ta jɛnɲɔgɔnya ɲini, olugu ta bɛna kɛ ten le;

mɔgɔ minw bɛ jija ka ele Ala, Yakuba ta Ala ta nɛɛma ɲini, olugu ta bɛna kɛ ten le.24.6 Nin yɔrɔ ra a sɛbɛra heburukan na ko: Sela.

⁷Yɔrɔ saninman dondaw, aw ye kɔrɔta kosɛbɛ;

fɔlɔfɔlɔ dondakɔrɔw, aw ye kɔrɔta,

k’a to masacɛ nɔɔrɔman ye don!

⁸Jɔn le ye o masacɛ nɔɔrɔman ye sa?

Matigi Ala lo, fangatigi ni barakatigi;

Matigi Ala lo, kɛrɛkɛcɛfari lo.

⁹So dondaw, aw ye kɔrɔta,

donda wuribariw, aw ye kɔrɔta san fɛ,

k’a to masacɛ nɔɔrɔman ye don!

¹⁰Jɔntigi le ye o masacɛ nɔɔrɔman ye sa?

Fangatigi Ala lo!

Ale le ye o masacɛ nɔɔrɔman ye.24.10 Nin yɔrɔ ra a sɛbɛra heburukan na ko: Sela.

Mɔgɔ degunin ta Aladaari

¹Dawuda ta Zaburu.

E, Matigi Ala, ne bɛ samana ele le nɔ fɛ.25.1 Nin Zaburu kumakanw bɛɛ kelen kelen bɛ damina ni heburukan sigininden dɔ ye, k’a ta a sigininden fɔlɔ ra, min ye Alɛfu ye, ka taga a bla a laban na min ye Tavu ye.

²E, ne ta Ala, ne ka ne jigi la ele le kan;

i kana a to ne ye maroya,

i kana a to ne juguw ye yɛrɛko ne ma.

³Mɔgɔ minw bɛɛ ka o jigi la ele kan, olugu si tɛna maroya;

minw bɛna maroya, o ye i kanblabagaw le ye,

olugu le borolakolon bɛna to.

⁴E, Matigi Ala, ne tagamacogo yira ne ra,

ne ka kan ka sira min ta, ne karan o ra.

⁵Ne bla i ta can sira kan, ka ne karan;

sabu ele le ye ne kisibaga Ala ye,

ne jigi bɛ ele le kan lon bɛɛ.

⁶E, Matigi Ala, i hakiri to i ta hina ni i ta ɲumanya ra,

i n’a fɔ i derira k’a kɛ an ye cogo min na kabini wagatijan.

⁷Ne ka jurumunw, ani hakɛko minw kɛ ne denmisɛnman, i kana i hakiri to o ra,

nka i kɔni ye i hakiri to ne ra ka kaɲa ni i ta ɲumanya le ye,

i ta nɛɛma kosɔn, Matigi Ala.

⁸Matigi Ala ka ɲi, a bɛ koɲuman kɛ;

o kosɔn a bɛ siraɲuman yira jurumunkɛbagaw ra.

⁹A bɛ mɔgɔ sabarininw bla can sira kan,

a bɛ a ta sira yira mɔgɔ sabarininw na.

¹⁰Matigi Ala ta siraw bɛɛ ye ɲumanya ni kankelentigiya le ye;

minw bɛ a ta jɛnɲɔgɔnya* sira tagama, k’a ta ciw kɛ, a bɛ o le kɛ olugu ye.

¹¹Matigi Ala, ne ta kɛwalejuguw yafa ne ma i tɔgɔ kosɔn,

sabu o ka ca.

¹²Ni mɔgɔ min kɛra Matigi Ala ɲasiranbaga ye,

o tigi ka kan ka sira min ta, Matigi Ala bɛ o yira a ra.

¹³O tigi bɛna kɛ hɛra ra,

jamana bɛna kɛ a ta durujaw fana ta ye.

¹⁴Matigi Ala b’a ɲasiranbagaw le don a ta jɛn ra;

a bɛ a ta jɛnɲɔgɔnya siraw yira olugu le ra.

¹⁵Ne ɲa lɔnin bɛ Matigi Ala le ra wagati bɛɛ,

sabu ale le bɛ ne sen sama ka bɔ jɔ ra.

¹⁶I ɲa munu ka ne flɛ, ka makari ne ra,

sabu ne bɛ ne kelen na, ne fana ye ɲanibagatɔ ye.

¹⁷Ne jusukun degura kosɛbɛ;

na ne bɔ ne ta kɔnɔnɔfiri ra.

¹⁸Ne ta ɲani ni ne ta sɛgɛ flɛ,

i ye ne ta jurumunw bɛɛ yafa.

¹⁹A flɛ, ne juguw ka ca cogo min na!

A flɛ o bɛ ne kɔninyara ni kɔninyajugu min ye!

²⁰Ne nin mara, i ye ne bɔsi,

ne kana na maroya, sabu ne ka ne yɛrɛ karifa ele le ma.

²¹Ne tanga ne ta jusukungbɛninya ni ne ta terenninya kosɔn,

sabu ne jigi bɛ ele le kan.

²²E, Ala, Izirayɛli kunmabɔ,

k’a bɔsi ka bɔ a ta degukow bɛɛ ra.

Ala ta mɔgɔ tagamacogo

¹Dawuda ta Zaburu.

Ne ta kiti tigɛ ka ne ta jo di ne ma, Matigi Ala,

sabu ne jusukun gbɛnin lo.

Ne ka ne jigi la Matigi Ala le kan, foyi tɛna ne bɔ ne lɔyɔrɔ ra.

²Ne sɛgɛsɛgɛ, Matigi Ala, i ye ne kɔrɔbɔ k’a flɛ;

ne kɔnɔnɔkow, ani ne jusunankow bɛɛ flɛ kosɛbɛ;

³sabu ne ɲa lɔnin bɛ i ta ɲumanya le ra,

ne fana bɛ tagama ka kaɲa ni i ta can le ye.

⁴Ne tɛ sigi ni janfamɔgɔw ye,

ne tɛ tagama ni flankafuw ye.

⁵Ne bɛ kojugukɛbagaw ta jɛn kɔninya;

ne tɛ sigi ni mɔgɔjuguw ye.

⁶Ne bɛ ne tɛgɛ ko ka ne boro bɔ kojugu bɛɛ ra,

ka sɔrɔ ka taga tagama ka i ta sarakajɛnifɛn* lamini,

⁷ka dɔnkiri la ka baraka la i ye ni kanba ye,

ka i ta kabakow bɛɛ lakari.

⁸Matigi Ala, i siginin bɛ so min kɔnɔ, o ka di ne ye;

i ta nɔɔrɔ bɛ o so min kɔnɔ.

⁹O ra, i kana ne ni jurumunkɛbagaw laban kɛ kelen ye,

ka ne si ni mɔgɔfagabagaw si laban kɛ kelen ye;

¹⁰olugu minw boro bɛ kojugu ra,

o kininboro fanin lo bonyafɛnw na,

o ka minw mina mɔgɔw fɛ dogo ra.

¹¹Nka ne kɔni, ne jusukun gbɛnin lo;

makari ne ra, ka ne kunmabɔ.

¹²Ne sen bɛ tagama terenninya sira le kan;

ne bɛna baraka la Matigi Ala ye a ta jama cɛ ra.

Alabatobaga jigi bɛ Ala le kan

¹Dawuda ta Zaburu.

Matigi Ala le ye ne ta yeelen ye, ani ne ta kisiri tigi;

ne bɛna siran jɔntigi le ɲa?

Matigi Ala le ye ne nin karifayɔrɔ ye;

ne ja bɛna tigɛ jɔntigi le ɲa?

²Ni mɔgɔjuguw nana ne kama,

ko o bɛ na ne sogo ɲimi,

olugu minw ye ne kɛrɛbagaw ni ne juguw ye,

olugu yɛrɛ le bɛ talon ka benben.

³Hali ni kɛrɛkɛjama dɔ le nana ne lamini,

siranya si tɛna kɛ ne jusu ra.

Hali ni o ka kɛrɛ dɔ wuri ne kama,

o bɛɛ n’a ta, jigiba le belen bɛna kɛ ne fɛ.

⁴Fɛn kelen bɛ yi, ne bɛ o le daari Matigi Ala fɛ,

ne bɛ o le ɲini a fɛ kosɛbɛ:

ne b’a fɛ ka to Matigi Ala ta so kɔnɔ

ne si bɛɛ ra,

ka to ka Matigi Ala ta cɛɲa nɔɔrɔ flɛ,

ani ka to a ɲa kɔrɔ a ta batoso kɔnɔ.

⁵Sabu ni lonjugu sera, a bɛna ne dogo a ta so kɔnɔ;

a bɛna ne dogo fɔ a ta fanibon kɔnɔnɔyɔrɔ ra.

A bɛna ne yɛlɛn ka ne lɔ fara dɔ kunna, janko foyi kana ne sɔrɔ.

⁶Sisan ne kun kɔrɔtara;

ne jugu minw tun ka ne lamini, ne bɛ olugu bɛɛ kunna.

O ra ne bɛna saraka bɔ Matigi Ala ye a ta batoso kɔnɔ, ni ɲagarikanbaw ye;

ne bɛna dɔnkiriw la, ka Alatandodɔnkiriw la Matigi Ala ye.

⁷Ne kan lamɛn Matigi Ala, ne bɛ i wele;

makari ne ra, ka ne jaabi!

⁸I ka min fɔ ko: «Aw ye jija ka ne ta nɛɛma ɲini!» O kuma bɛ ne jusukun na.

E, Matigi Ala, ne bɛ ele ta nɛɛma le ɲinina.

⁹I kana i ɲada dogo ne ma,

i kana dimi ka ban i ta baaraden na.

Ele le ye ne dɛmɛbaga ye,

i kana taga ka ne to, i kana ban ne ra,

ne kisibaga Ala!

¹⁰Hali ni ne facɛ ni ne bamuso banna ne ra,

Matigi Ala bɛna ne ladon.

¹¹Matigi Ala, i ta siraw yira ne ra,

ne bla terenninya sira kan,

ne juguw kosɔn.

¹²I kana ne kɛ ne juguw sago ye,

sabu seerejugu dɔw wurira ne kama,

kuma farimanw dɔrɔn le bɛ o daw ra.

¹³Ne tun bɛna a kɛ di le sa,

ni ne tun ma la a ra ko ne bɛna Matigi Ala ta nɛɛma ye tuun

dunuɲa ra yan ni mɔgɔ ɲanaman tɔw ye!

¹⁴Matigi Ala makɔnɔ;

baraka don i yɛrɛ ra, ka jija,

ka Matigi Ala makɔnɔ.

Ala bɛ mɔgɔ sɛgɛninw ta welerikan mɛn

¹Dawuda ta Zaburu.

E, Matigi Ala, ne bɛ ele le welera;

ne ta barakatigi Ala, i kana i toro datugu ne ta welerikan na,

sabu ni i jera ne ra,

ne bɛna kɛ i ko o bɛ mɔgɔ minw lajigi kaburu kɔnɔ.

²Ne ta makarikanw lamɛn,

ne bɛ i wele ko i ye ne dɛmɛ;

ne bɛ ne borow kɔrɔta

ka o sin i ta yɔrɔ saninman* ma ka i daari.

³I kana ne ni mɔgɔjuguw minacogo kɛ kelen ye,

ani minw bɛ kojugu kɛ;

olugu bɛ kumadimanw fɔ o mɔgɔɲɔgɔnw ye,

k’a sɔrɔ kojugu le bɛ o jusukun na.

⁴O sara ka kaɲa ni o ta kɛwalew ye,

o sara ka kaɲa ni o ta baarajuguw ye.

O yɛrɛ borow ka baara min kɛ, o sara ka kaɲa ni o ye;

o ka kan ni sara min ye, o di o ma.

⁵Sabu o tɛ Matigi Ala ta kokɛninw jate,

ani a boro ta baara.

Matigi Ala bɛna o bɛɛ laben,

o si tɛna wuri tuun!

⁶Matigi Ala, baraka!

Sabu i ka ne ta makarikanw lamɛn.

⁷Matigi Ala le ye ne ta baraka tigi ye, ani ne tangabaga.

Ne bɛ ne jigi la ale le kan.

A bɛ ne dɛmɛ, fɔ ne jusu bɛ ɲagari;

ne bɛ dɔnkiri la k’a fo k’a waleɲumanlɔn.

⁸Matigi Ala le ye a ta mɔgɔw ta baraka ye;

ale le ye a ta mɔgɔ ɲanawolomaninw dogoyɔrɔ ni o kisiyɔrɔ ye.

⁹Matigi Ala, i ta jamanadenw kisi, ka baraka don i ta mɔgɔw ra,

o kɔrɔsi, ka i janto o ra tuma bɛɛ!

Matigi Ala kumakan

¹Dawuda ta Zaburu.

Ala ta mɛlɛkɛw, aw ye Matigi Ala ta kow lakari,

ka Matigi Ala ta bonya ni a ta baraka lakari!

²Aw ye Matigi Ala tɔgɔ bonya lakari!

Aw ye masirifɛn saninmanw don, ka aw kinbiri gban Matigi Ala ɲa kɔrɔ k’a bato.

³Matigi Ala kan fanga ka bon ni jiw mankan ye,

bonyatigi Ala kan bɛ i ko sanpɛrɛn.

Matigi Ala kan fanga ka bon ni jibaw mankan ye.

⁴Matigi Ala kan bɛ bɔ ni baraka ye,

Matigi Ala kan bɛ bɔ ni nɔɔrɔ ye.

⁵Matigi Ala kan bɛ sɛdiriyiribaw karikari,

Matigi Ala bɛ Liban sɛdiriyiriw karikari.

⁶A bɛ Liban kuruw yuguyugu i ko misiden bɛ panpan cogo min na,

ka Hɛrimɔn kuruw yuguyugu i ko kongomisiw bɛ panpan cogo min na.

⁷Matigi Ala kan bɛ sanmanamanaw bɔ.

⁸Matigi Ala kan bɛ kongokolon yɛrɛyɛrɛ,

Matigi Ala bɛ Kadɛsi kongokolon yɛrɛyɛrɛ.

⁹Matigi Ala kan b’a to minanw bɛ woro29.9 «Matigi Ala kan b’a to minanw bɛ woro.» Kitabu dɔw kɔnɔ a fɔra ko: Matigi Ala kan bɛ yiribaw yuguyugu.,

a bɛ yiriw flaburuw bɔn ka yiritu lakolon to.

A ta batoso kɔnɔ danfɛnw bɛɛ b’a fɔ ko: «Bonya ye Ala ta ye!»

¹⁰Matigi Ala bɛ a ta masaya sigi jibaw bɛɛ kunna,

Matigi Ala siginin bɛ masaya ra wagati bɛɛ.

¹¹Matigi Ala le bɛ sebagaya di a ta mɔgɔw ma,

Matigi Ala bɛ baraka don a ta mɔgɔw ra, ka hɛra kɛ o ye.

Ala le ye kɛnɛyari kɛbaga ye

¹Zaburu. Dɔnkiri min tun bɛ la ka Alabatosokura karifa Ala ma. Dawuda ta Zaburu.

²E, Matigi Ala, ne bɛ i tɔgɔ kɔrɔta,

sabu i ka ne lawuri;

i ma sɔn k’a to ne juguw ye yɛrɛko ne ma.

³Matigi Ala, ne ta Ala, ne ka i wele ko i ye ne dɛmɛ,

i fana ka ne kɛnɛya.

⁴E, Matigi Ala, i ka ne nin tanga saya ma;

o bɛ minw lajigi kaburu kɔnɔ, i ka ne kisi ka bɔ olugu cɛ ra.

⁵Aw Alaɲasiranbagaw, aw ye dɔnkiri la ka Matigi Ala tando.

Aw y’a fo k’a waleɲumanlɔn, ka aw hakiri to a tɔgɔ saninman na,

⁶sabu a ta dimi bɛ wagati dɔɔnin dɔrɔn le kɛ,

nka a ta nɛɛma bɛ to mɔgɔ kan a si bɛɛ ra.

Ni wulada kɛra kasi ye,

sɔgɔmada bɛ kɛ ɲagari ye.

⁷Ne kɔni ɲasumaninba tun b’a fɔra ko:

«Foyi le tɛna ne bɔ ne nɔ ra fiyewu!»

⁸Matigi Ala, ne ko tun diyara i ye minkɛ,

i tun ka ne sabati ka ne lɔ i ko kuru barakaman;

nka i nana i ɲada dogo ne ra minkɛ,

ne jigi tigɛra.

⁹Matigi Ala, ne ka ele le wele;

ne ka makarikanw fɔ Matigi ye.

¹⁰Ele bɛna mun nafa le sɔrɔ ne ta saya ra?

Ka ne su lajigi kaburu kɔnɔ, ele ta nafa juman le bɛ o ra?

Yala dugukolo buguri bɛ se ka i fo ka i waleɲumanlɔn wa?

A bɛ se ka i ta kankelentigiya lakari wa?

¹¹Ne lamɛn, Matigi Ala, i ye makari ne ra!

E, Matigi Ala, ne dɛmɛ!

¹²I ka ne ta jusukasi yɛlɛma k’a kɛ dɔn ye;

i ka ne ta ɲanasisifaniw bɔ ne ra,

ka ɲanagbɛfaniw don ne ra;

¹³janko ne ye dɔnkiri la ka i tando ni ne jusukun bɛɛ ye, ne kana je.

Matigi Ala, ne ta Ala, ne bɛna i fo ka i waleɲumanlɔn wagati bɛɛ.

Ala b’a ɲasiranbaga bɔsi ka bɔ a juguw boro

¹Dɔnkirilabagaw kuntigi. Dawuda ta Zaburu.

²Matigi Ala, ne bɛ ne yɛrɛ karifa ele le ma;

i kana a to ne ye maroya fiyewu!

Ne bɔsi ka kaɲa ni i ta terenninya ye.

³I toro malɔ ka ne lamɛn,

i ye ne bɔsi joona!

Kɛ ne ta barakatigi Ala ye,

ne dogoyɔrɔ barakaman, i ye ne kisi;

⁴sabu ele le ye ne ta Ala barakaman ye, ne dogoyɔrɔ.

Bla ne ɲa, ka sira yira ne ra, i tɔgɔ kosɔn.

⁵Mɔgɔw bɛ jɔ min siri ne ɲa, i bɛ ne bɔ o jɔ ra,

sabu ele le ye ne tangabaga ye.

⁶Ne bɛ ne nin to i boro31.6 «Ne bɛ ne nin to i boro.» Yesu Kirisita ka nin kuma fɔ fana k’a to gbengbenyiri kan (Luka 23.46).;

i ka ne kunmabɔ, Matigi Ala, cantigi Ala.

⁷Mɔgɔ minw bɛ batofɛn gbansanw bato, ne bɛ olugu kɔninya;

ne bɛ ne jigi la Matigi Ala le kan.

⁸Ne bɛ ɲagari ka ninsɔndiya i ta ɲumanya kosɔn,

sabu i ka ne ta ɲani lɔn,

degu min bɛ ne nin kan, i ka o lɔn.

⁹I ma sɔn ka ne to ne juguw boro;

i ka ne bla yɔrɔ laganfiyanin le ra.

¹⁰Makari ne ra, Matigi Ala, sabu ne degunin lo;

dimi kosɔn, ne ɲadenw, ani ne nin, ani ne farikolo bɛɛ baraka banna.

¹¹Ne si bɛ banna ka ne to tɔɔrɔ ra,

ne si sandaw bɛ banna ka ne to ŋuna le ra,

ne baraka bɛ banna ne ta terenbariya kosɔn,

ne farikolo baraka bɛɛ banna.

¹²Ne kɛra lɔgɔbɔrifɛn le ye ne juguw bɛɛ fɛ,

ne kɛra maroyafɛn ye ne sigiɲɔgɔnw fɛ,

ne kɛra siranyafɛn ye ne teriw fɛ;

ni o ka ne ye kɛnɛ ma, o bɛ bori ne ɲa.

¹³Mɔgɔw hakiri bɔra ne kɔ, k’a kɛ i ko mɔgɔ min sara ka ban;

ne kɛra i ko fɛn cɛnnin firinin.

¹⁴Ne ka kumajuguw mɛn mɔgɔ caman fɛ ne ta ko ra;

siranyaba bɛ ne ra fan bɛɛ ra.

O ka ɲɔgɔn lajɛn ne kama,

ka janfa siri ko o bɛ ne faga.

¹⁵Nka ne kɔni jigi bɛ ele le kan, Matigi Ala;

ne ko: «Ele le ye ne ta Ala ye!»

¹⁶Ne ta kow bɛɛ bɛ ele le boro.

Ne bɔsi ka bɔ ne juguw, ani ne nɔgbɛnbagaw boro.

¹⁷Sabari ka i ta jɔncɛ flɛ ni ɲumanya ye;

ne kisi i ta ɲumanya kosɔn.

¹⁸Matigi Ala, ni ne ka i tɔgɔ wele, i kana a to ne ye maroya;

a to mɔgɔjuguw le ye maroya,

o ye jigi kaburu kɔnɔ, kuma kana sɔrɔ o fɛ k’a fɔ.

¹⁹O bɛ faninyaw bɔ o da minw na, o daw ye datugu;

sabu o bɛ kuma ka mɔgɔ terenninw mafiyɛnya,

ka o yɛrɛ bonya, ka tɔw dɔgɔya.

²⁰E, Matigi Ala, i ta koɲumanw ka ca!

I bɛ o koɲumanw mara i ɲasiranbagaw le ye;

minw bɛ o yɛrɛ karifa i ma, i b’a kɛ olugu le ye,

k’a to adamadenw bɛɛ ɲa y’a ye.

²¹I bɛ i ɲasiranbagaw dogo i yɛrɛ kɔrɔ,

ka o bɔsi adamadenw ta dabarijuguw ma.

I bɛ o mara i yɛrɛ ta so,

ka o sen bɔ mɔgɔw ta kɛrɛtigɛkumaw ra.

²²Matigi Ala baraka!

Sabu i ka i ta ɲumanya kɛ ne ye, fɔ k’a bonya,

k’a sɔrɔ ne tun bɛ i ko kɛrɛkɛjama ka dugu min lamini.

²³Ne kɔni jigi tigɛnin tun b’a fɔra le

ko i ka ne gbɛn ka bɔ i ɲa kɔrɔ ka ban!

Nka ne ka i wele ko i ye ne dɛmɛ,

i fana ka ne ta makarikanw lamɛn.

²⁴Matigi Ala ɲasiranbagaw, aw bɛɛ ye Matigi Ala kanu!

Matigi Ala b’a janto lanamɔgɔw ra,

nka a bɛ yɛrɛbonyabagaw sara ni kojugu caman ye.

²⁵Aw minw jigi bɛ Matigi Ala kan,

aw ye jija, aw ye aw ja gbɛlɛya.

Ala le ye jurumun yafabaga ye

¹Dawuda ta Zaburu. Karan.

Ni Ala ka mɔgɔ min ta hakɛ bɔ a kunna, o tigi ta ɲana;

ni mɔgɔ min ta jurumun datugura, o tigi ta ɲana!

²Ni Matigi Ala tɛ mɔgɔ min ta terenbariyakow jate tuun,

ni janfa tɛ mɔgɔ min jusukun na, o tigi ta ɲana.

³Ne tun jera ne ta jurumun kan minkɛ, ne farikolo tun bɛ halakira le,

ne tun bɛ to ka ŋuna tere bɛɛ;

⁴sabu su ni tere, i tun bɛ i boro digira ne kan le.

Ne baraka bɛɛ tun banna, k’a kɛ i ko yiri bɛ ja cogo min na teremana fɛ.32.4 Nin yɔrɔ ra a sɛbɛra heburukan na ko: Sela.

⁵O kosɔn ne lɔra ne ta jurumun na, k’a fɔ i ye;

ne ma ne ta terenbariyakow dogo tuun.

Ne ko: «Ne bɛna lɔ ne ta jurumunw na k’a fɔ Matigi Ala ye!»

O ra, ele ka ne ta jurumun kunko bɔ ne kunna.32.5 Nin yɔrɔ ra a sɛbɛra heburukan na ko: Sela.

⁶O kosɔn, i ɲasiranbagaw bɛɛ ye i daari a wagati ra;

o ra, lon min ni jibaw jigira o kan,

o jiw si tɛna se o ma.

⁷Ele le bɛ ne sutara,

i bɛ ne bɔsi ka bɔ degukow ra.

Kisiri dɔnkiriw le ka ne lamini fan bɛɛ ra.32.7 Nin yɔrɔ ra a sɛbɛra heburukan na ko: Sela.

⁸I ko: «Ne bɛna i sɔn hakiri ra, ka i tɛmɛsiraw yira i ra;

ne bɛna i ladi, ka ne janto i ra.

⁹O ra, aw kana kɛ i ko so, walama sofali min tɛ ko faamu.

O bɛ juru ni karafe le don olugu ra,

janko o ye taga i ɲanayɔrɔ ra.»

¹⁰Dimi caman le bɛna ben mɔgɔjugu kan,

nka ni mɔgɔ min k’a jigi la Matigi Ala kan, a ta ɲumanya bɛ o tigi lamini.

¹¹Aw mɔgɔ terenninw, aw ye ninsɔndiya, ka ɲagari Matigi Ala kosɔn!

Aw mɔgɔ jusuɲumanw, aw bɛɛ ye ninsɔndiya fɔ ka kule ci!

Danbaga Ala ta ɲumanya ka ca

¹Aw mɔgɔ terenninw, aw ye ɲagari fɔ ka kule ci Matigi Ala tɔgɔ kosɔn,

sabu Ala tandori ka ɲi mɔgɔɲumanw da ra.

²Aw ye Matigi Ala fo ni kora ye,

aw y’a tando ni gɔni juru tan ye.

³Aw ye dɔnkirikura la a ye!

Aw ye aw ta gɔniw fɔ ka ɲa, ka aw kan kɔrɔta k’a tando.

⁴Matigi Ala ta kuma terennin lo,

a bɛ a ta baara bɛɛ kɛ ni kankelentigiya le ye.

⁵Terenninya ni can ka di a ye.

Matigi Ala ta ɲumanya ka dunuɲa yɔrɔ bɛɛ fa.

⁶Sankolo danna Matigi Ala kumakan le baraka ra;

sankolokɔnɔfɛnw bɛɛ danna a dafɔɲɔ le baraka ra.

⁷A bɛ kɔgɔji ta jiw bɛɛ lajɛn yɔrɔ kelen na,

a bɛ jibaw bɛɛ kɛ ɲɔgɔn kan ka o mara dingaw kɔnɔ.

⁸Dugukolo danfɛnw bɛɛ lajɛnnin ka kan ka siran Matigi Ala ɲa;

a ɲasiran ye kɛ dunuɲamɔgɔw bɛɛ ra;

⁹sabu a kumana ka min fɔ, o le kɛra,

a ko fɛn minw ye bɔ, olugu bɔra kɛnɛ kan.

¹⁰Matigi Ala le bɛ siyaw ta kolatigɛninw sa;

ale le bɛ mɔgɔw ta ko labɛnninw cɛn.

¹¹Matigi Ala ta kolatigɛninw bɛ to o nɔ ra wagati bɛɛ;

ni a ka ko minw latigɛ a jusukun na, o kow bɛ to o nɔ ra wagati bɛɛ, ani tuma bɛɛ.

¹²Matigi Ala ye siya min ta Ala ye, o siya ta ɲana!

Ni a ka mɔgɔ minw kɛ a ta mɔgɔw ye, olugu ta ɲana!

¹³Matigi Ala bɛ to san fɛ ka flɛri kɛ;

a ɲa bɛ adamadenw bɛɛ ra.

¹⁴A bɛ to a sigiyɔrɔ ra

ka dugukolo mɔgɔw bɛɛ flɛ.

¹⁵Ale le ka adamadenw bɛɛ jusukun don o kɔnɔ;

a bɛ o ta kokɛtaw bɛɛ kɔrɔsi.

¹⁶Masacɛ ta kɛrɛkɛjama bonya le tɛ a kisi,

kɛrɛkɛcɛfari ta baraka bonya le fana tɛ a bɔsi.

¹⁷Ka i jigi la so kan ko a bɛ i kisi kɛrɛ ra, o ye gbansan le ye;

so ni a ta baraka bɛɛ, a tɛ se ka mɔgɔ bɔsi.

¹⁸Matigi Ala le b’a janto a ɲasiranbagaw ra;

minw jigi bɛ a ta ɲumanya kan, a b’a janto olugu ra.

¹⁹A bɛ o nin kisi saya ma,

ka o baro kɔngɔ wagati ra.

²⁰An bɛ Matigi Ala le makɔnɔna,

ale le ye an dɛmɛbaga ye, ani an tangabaga.

²¹An jusu bɛ ɲagari ale le kosɔn,

an bɛ an jigi la a tɔgɔ saninman le kan.

²²E, Matigi Ala, i ta ɲumanya kɛ an ye,

sabu an jigi bɛ ele le kan.

Ala b’a daaribagaw jaabi

¹Dawuda ta Zaburu. Wagati min a tun k’a yɛrɛ kɛ i ko fatɔ, masacɛ Abimelɛki ɲa kɔrɔ, fɔ ale nana a gbɛn ka taga, a ka nin dɔnkiri sɛbɛ o wagati le ra34.1 O kow bɛ sɔrɔ Samawilu ta kitabu fɔlɔ ra (21.11-16). O masacɛ tɔgɔ tun ye ko Akisi..

²Ne bɛ baraka la Matigi Ala ye tuma bɛɛ;

wagati bɛɛ ne da b’a tando.

³Ne ta bonya sababu ye Matigi Ala le ye!

Mɔgɔ sabarininw ye o mɛn, ka ninsɔndiya!

⁴Aw ye fara ne kan ka bonya la Matigi Ala kan!

An ye jɛn k’a tɔgɔ kɔrɔta ɲɔgɔn fɛ!

⁵Ne ka Matigi Ala wele, a ka ne jaabi;

a ka ne bɔsi ka bɔ ne ta siranyaw bɛɛ ra.

⁶Minw bɛ o ɲa lɔ Matigi Ala ra, olugu ɲada bɛ manamana;

o ɲa tɛ sisi maroya fɛ.

⁷Ni ɲanibagatɔ ka Matigi Ala wele, a b’a lamɛn;

a b’a kisi ka bɔ a ta degukow bɛɛ ra.

⁸Matigi Ala ta mɛlɛkɛ b’a janto Alaɲasiranbagaw ra,

ka o kɔrɔsi fan bɛɛ ra janko ka o bɔsi.

⁹Aw ye a nɛnɛ k’a flɛ, k’a lɔn ko Matigi Ala ka ɲi;

ni mɔgɔ min k’a yɛrɛ karifa a ma, o tigi ta ɲana!

¹⁰Ala ta mɔgɔ saninmanw, aw ye siran Matigi Ala ɲa,

sabu foyi tɛ dɛsɛ a ɲasiranbagaw fɛ.

¹¹Hali jarakanbelenw ta domuni bɛ ban, kɔngɔ bɛ o sɔrɔ;

nka minw bɛ o ɲa lɔ Matigi Ala ra, foyi tɛ dɛsɛ olugu fɛ.

¹²Aw ye na, ne dencɛw, aw ye na ne lamɛn!

Ne bɛna aw karan Matigi Ala ɲasiran na.

¹³Jɔntigi le bɛ si fɛ?

Jɔn le b’a fɛ ka sijan sɔrɔ janko ka hɛra ye a ɲa ra?

¹⁴I nɛnkun kɔrɔsi kumajuguw ma,

ka i da kɔrɔsi nanbarakumaw ma.

¹⁵I yɛrɛ mabɔ kojugu ra, ka koɲuman kɛ,

i jija ka hɛra ɲini, i ye tugu a nɔ fɛ.

¹⁶Matigi Ala ɲa lɔnin bɛ mɔgɔ terenninw na,

a toro bɛ o kulekan na fana.

¹⁷Matigi Ala bɛ kojugukɛbagaw kɛrɛ,

ka o halaki ka bɔ dugukolo kan, janko mɔgɔ si kana a hakiri to o ra tuun.

¹⁸Ni mɔgɔ terenninw kasira, Matigi Ala bɛ o lamɛn;

a bɛ o bɔsi ka bɔ o ta degukow bɛɛ ra.

¹⁹Matigi Ala bɛ mɔgɔ jusukasininw kɛrɛ fɛ,

a bɛ mɔgɔ dɛsɛbagatɔw kisi.

²⁰Kojugu caman bɛ mɔgɔ terennin sɔrɔ,

nka Matigi Ala b’a bɔsi ka bɔ a bɛɛ ra.

²¹A b’a kolow bɛɛ mara,

o si tɛ karikari34.21 O kuma le fɔra Yesu ta ko ra fana (Yuhana 19.36)..

²²Kojugu bɛ mɔgɔjugu faga;

mɔgɔ terennin kɔninyabagaw kɔni, kiti bɛna ben olugu kan.

²³Matigi Ala bɛ a ta jɔnw nin kunmabɔ;

minw bɛ o yɛrɛ karifa a ma, kiti tɛna ben olugu si kan.

Ala bɛ a ɲasiranbagaw bɔsi

¹Dawuda ta Zaburu.

E, Matigi Ala, ne jarakibagaw jaraki!

Ne kɛrɛbaga kɛrɛ!

²Nɛgɛbɛnnan fitini ni nɛgɛbɛnnanba mina,

ka wuri ka ne dɛmɛ kɛrɛ ra.

³Taman ni biɲɛ mina, ka wuri ne nɔgbɛnbagaw kama!

A fɔ ne ye ko ele yɛrɛ le ye ne kisibaga ye!

⁴Minw bɛ ne ta saya ɲini,

olugu le ye maroya ni dɔgɔyari sɔrɔ!

Minw bɛ kojugu ŋaninya ne kama,

olugu kun suurunin le ye sekɔ ni o kɔ ye.

⁵O ye kɛ i ko binjalan, fɔɲɔ bɛ taga ni min ye;

Matigi Ala ta mɛlɛkɛ ye o gbɛn ka taga!

⁶O ta sira ye kɛ dibi ye, o ye tɛrɛndɛ a kan;

Matigi Ala ta mɛlɛkɛ ye o nɔgbɛn!

⁷O bagara ne ma ka dinga sogi ne ɲa,

o bagara ne ma ka jɔ siri ne ɲa ko o bɛ ne faga.

⁸Cɛnri ye bara ka cun o kan, k’a sɔrɔ o tun ma sigi ni a ye.

O ka jɔ min siri ne ɲa, o jɔ ye olugu yɛrɛ le mina,

o yɛrɛ ye mina o jɔ ra, fɔ ka o halaki.

⁹Ni o kɛra, ne bɛna ɲagari Matigi Ala baraka ra;

ne bɛna ninsɔndiya a ta kisiri kosɔn.

¹⁰Ne bɛna a fɔ ni ne jusukun bɛɛ ye ko:

«E, Matigi Ala, jɔn le bɛ i ko ele?

I bɛ ɲanibagatɔ bɔsi ka bɔ a juguw boro, o minw fanga ka bon ni a ta ye.

I bɛ ɲanibagatɔ ni fagantan bɔsi ka bɔ o tɔɲɔbagaw boro.»

¹¹Seerejugu dɔw wurira ne kama;

ne ma ko min lɔn, o bɛ ne ɲininka o ra.

¹²O bɛ ne ta koɲuman sarara ni kojugu le ye;

ne kɛra mɔgɔntan le ye.

¹³K’a sɔrɔ ne kɔni, ni olugu dɔ tun banara,

ne tun bɛ bɔrɔfaniw le don,

ka ɲanasisi, ka sun don;

ne tun bɛ Ala daari o ye wagati bɛɛ,

¹⁴i ko mɔgɔ b’a kɛ a teri, walama a balema dɔ ye cogo min na.

Ne kun suurunin ni ne ɲa sisinin tun bɛ to ka tagama,

i ko mɔgɔ min b’a bamuso su kasira.

¹⁵Nka sisan, tɔɔrɔ benna ne kan minkɛ, olugu ɲagaritɔ tagara ɲɔgɔn lajɛn;

o mɔgɔjuguw ka ɲɔgɔn lajɛn ne kama, k’a sɔrɔ ne tɛ foyi kala ma.

O bɛ ne tɔɔrɔ wagati bɛɛ.

¹⁶O Alaɲasiranbariw bɛ ne lɔgɔbɔ, ka ne nɛni,

fɔ ka o ɲin ɲimi ne kama.

¹⁷E, Matigi, ele bɛ se ka je ka nin ko flɛ cogo di?

Ne nin kisi o ta cɛnri ma,

ne kisi ka bɔ nin jaraw boro!

¹⁸Ni o kɛra, ne bɛna i fo ka i waleɲumanlɔn i ta mɔgɔw ta jamaba bɛɛ lajɛnnin cɛ ra;

ne bɛna i tando i ta mɔgɔw camanba lajɛnnin cɛ ra.

¹⁹Minw ka o yɛrɛ kɛ ne juguw ye gbansan, i kana a to olugu ye ɲagari ne kosɔn;

minw bɛ ne kɔninya gbansan, i kana a to olugu ye kɛ o ɲa kɔmikɔmi ye ne kosɔn.

²⁰Sabu o da tɛ hɛrakuma fɔ ka ye;

mɔgɔ minw ta ko tɛ se mɔgɔ ma jamana kɔnɔ, o bɛ nanbarako dɔw le labɛnna olugu kama.

²¹O bɛ o da waga ne kama,

k’a fɔ ko: «Ɔnhɔn, cɔ!

An yɛrɛ ɲa k’a ye!»

²²E, Matigi Ala, ele bɛ o yera; i kana je ka o flɛ!

Matigi, i kana i mabɔ ne ra!

²³I kunu, i ye wuri ka ne ta jo di ne ma!

Ne ta Ala, ne Matigi, i lɔ ni ne kunko ye.

²⁴Ne ta kiti tigɛ ka kaɲa ni i ta terenninya ye, Matigi Ala, ne ta Ala!

Ne le kana kɛ o ta ɲagari sababu ye!

²⁵O kana a fɔ o yɛrɛ kɔnɔ, ko:

«Ɔnhɔn, cɔ! An tun bɛ min ɲinina, an ka o sɔrɔ!»

I kana a to o y’a fɔ ko: «An k’a latunu pewu!»

²⁶Minw bɛɛ bɛ ɲagarira ne ta tɔɔrɔw kosɔn,

o bɛɛ ye maroya fɔ ka o kun suuru;

minw bɛɛ bɛ o yɛrɛ wasora ne ma,

maroya ni mafiyɛnyari le ye ben olugu kan.

²⁷Nka minw b’a fɛ ko Ala ye a yira ko jo bɛ ne fɛ,

olugu ye ɲagari, fɔ ka kule ci,

ka to k’a fɔ tuma bɛɛ ko:

«E, Matigi Ala ka bon,

a bɛ a ta jɔnw ta hɛra ɲini.»

²⁸O ra, ne da bɛna i ta terenninya lakari,

ka i tando lon bɛɛ.

Mɔgɔjugu ta kɛwalew tɛ Ala ta ɲumanya bari

¹Dɔnkirilabagaw kuntigi. Matigi Ala ta jɔncɛ Dawuda ta Zaburu.

²Jurumun bɛ mɔgɔjugu karan ko minw na, o bɛ ne jusu ra:

Alaɲasiran tɛ mɔgɔjugu jusukun na.

³A ko ka di a yɛrɛ ye fɔ ka tɛmɛ;

o kosɔn a tɛ se ka lɔ a ta jurumun na, ka jurumun kɔninya.

⁴A darakan bɛɛ ye terenbariya ni nanbara le ye;

a tɛ sɔn ka tagama ni hakiri ye, ka koɲuman kɛ.

⁵A lanin bɛ to a layɔrɔ ra su fɛ ka kojugu ŋaninya;

sira min man ɲi, a bɛ o le ta,

a fana tɛ ban kojugu ma.

⁶E, Matigi Ala, i ta ɲumanya bonya bɛ se fɔ sankolo ma!

I ta kankelentigiya bonya bɛ se fɔ sankabaw ma.

⁷I ta terenninya bɛ i ko kuru barakamanw,

i ta kolatigɛninw bɛ i ko jidunbaw.

Matigi Ala, i bɛ adamadenw, ani bɛganw bɛɛ kisi.

⁸E, Ala, i ta ɲumanya ɲɔgɔn tɛ yi!

Adamadenw bɛ o yɛrɛ dogo ele kaman suma le kɔrɔ.

⁹I ta so fara fɛnɲuman minw na, i bɛ o di o ma fɔ ka o wasa;

i bɛ koɲumanw kɛ o ye i ko mɔgɔ bɛ jiɲuman sɔrɔ k’a min cogo min na.

¹⁰Sabu ɲanamanya bununji bɛ ele le fɛ;

ele ta yeelen le baraka ra, an bɛ yeelen sɔrɔ.

¹¹Minw ka i lɔn o ta Ala ye, i ta ɲumanya ye to olugu kan tuma bɛɛ;

mɔgɔ minw jusu ka ɲi, olugu mina ka ɲa, ka kaɲa ni i ta terenninya ye.

¹²I kana a to yɛrɛbonyabaga ye tagama ka se ne ma,

i kana a to mɔgɔjuguw boro ye ne mina ka ne bɔ ne nɔ ra!

¹³Kojugukɛbagaw bencogo flɛ nin ye!

O bɛ ben, hali o tɛ se ka wuri tuun.

Muɲu ni Alamakɔnɔ

(Zaburu 49)

¹Dawuda ta Zaburu.

I kana i jusu gban mɔgɔ kɛwalejuguw kosɔn,

i kana ɲabɔ kojugukɛbagaw fɛ;37.1 Nin Zaburu hayan dɔw bɛ damina ni heburukan sigininden dɔ ye, k’a ta a sigininden fɔlɔ ra, min ye Alɛfu ye, ka taga a bla a laban na min ye Tavu ye.

²sabu o bɛna jaja yɔrɔnin kelen na i ko bin,

o bɛ fagafaga i ko flaburukɛnɛ.

³I yɛrɛ karifa Matigi Ala ma, ka koɲuman kɛ;

sigi jamana kɔnɔ, ka tagama can kan.

⁴Matigi Ala kanu ka tɛmɛ fɛn tɔ bɛɛ kan;

ni o kɛra, i jusukun bɛ ɲabɔ fɛn min fɛ, a bɛna o di i ma.

⁵I ta ko bɛɛ to Matigi Ala boro;

i yɛrɛ karifa a ma; ale le bɛna i ta kow ɲanabɔ.

⁶A bɛna i ta terenninya bɔ kɛnɛ kan mɔgɔw bɛɛ ɲa na, i ko tere bɔtɔ,

ka i ta jo bɔ kɛnɛ kan, i ko wagati min tere bɛ kun cɛ.

⁷I je, ka Matigi Ala flɛ, k’a makɔnɔ.

Mɔgɔ minw ta kow bɛɛ bɛ ɲa o boro, i kana i jusu gban olugu kosɔn;

minw bɛ kojuguw ŋaninya, i kana i jusu gban olugu kɔrɔ.

⁸Dimi dabla, jusubɔ to yi,

i kana i jusu gban, ni o tɛ, o laban bɛ kɛ kojugu le ye;

⁹k’a sɔrɔ kojugukɛbagaw bɛna halaki ka bɔ yi,

nka minw bɛ Matigi Ala makɔnɔ, olugu bɛna jamana tigiya ta.

¹⁰Sani wagati dɔɔnin cɛ, kojugukɛbaga tɛ ye tuun!

Ni i ka a sigiyɔrɔ flɛ, i tɛ foyi ye.

¹¹Mɔgɔ sabarininw le bɛna jamana tigiya ta;

o bɛna hɛraba sɔrɔ k’a diyabɔ fɔ ka wasa.

¹²Mɔgɔjuguw bɛ janfa siri mɔgɔ terenninw kama,

fɔ o bɛ o ɲin ɲimi o kama.

¹³Nka Matigi bɛ yɛrɛko mɔgɔjugu ma,

sabu a k’a lɔn ko mɔgɔjugu ta lon sera ka ban.

¹⁴Mɔgɔjuguw bɛ o ta kɛrɛkɛmuruw samana ka bɔ,

ka o ta kalanw sama,

janko ka ɲanibagatɔw ni fagantanw bon ka o faga,

ka mɔgɔsɔbɛw kannatigɛ.

¹⁵Nka o ta kɛrɛkɛmuru bɛna o yɛrɛ jusukun le sɔgɔ,

o ta kalanw bɛna karikari.

¹⁶Mɔgɔ terennin ta borofɛn fitini,

o ka fisa ni mɔgɔjuguw bɛɛ lajɛnnin ta borofɛn caman ye.

¹⁷Sabu Matigi Ala bɛna mɔgɔjuguw borow karikari,

nka a bɛ mɔgɔ terenninw dɛmɛ.

¹⁸Matigi Ala b’a janto mɔgɔ jusukungbɛninw ta dunuɲalatigɛ ra;

jamana min bɛna di o ma, o bɛna to o tigiya ra wagati bɛɛ.

¹⁹Hali ni kojugu sera o ma, o tɛna maroya;

hali kɔngɔ wagati ra, o bɛna fa.

²⁰Nka mɔgɔjuguw kɔni, olugu bɛna halaki;

Matigi Ala ta juguw bɛna tunu, i ko kongobinw cɛɲa bɛ tunu cogo min na;

o bɛna tunu, i ko sisi.

²¹Mɔgɔjugu bɛ fɛn singa, nka a t’a lasekɔ;

nka mɔgɔ terennin bɛ makari mɔgɔw ra, ka o sɔn.

²²Ni Matigi Ala ka baraka don mɔgɔ minw na, olugu le bɛna jamana tigiya ta;

nka ni a ka minw danga, olugu bɛ halaki.

²³Matigi Ala le baraka ra, mɔgɔ tagamacogo bɛ sabati,

ni a tigi ta kokɛcogo diyara Ala ye.

²⁴Hali ni a talonna, a tɛ ben,

sabu Matigi Ala k’a boro mina.

²⁵Ne kɛra denmisɛn ye, ka na kɔrɔ ka kɛ cɛkɔrɔba ye sisan;

ne m’a ye ban ko Ala banna mɔgɔ terennin na,

walama ko a ta denw le bɛ domuni daarira.

²⁶Wagati bɛɛ a bɛ makari, a bɛ juru don tɔw ra,

a ta denw fana bɛ baraka sɔrɔ.

²⁷I yɛrɛ mabɔ kojugu ra, ka koɲuman kɛ,

ni o kɛra, i bɛna to i nɔ ra wagati bɛɛ.

²⁸Sabu can le ka di Matigi Ala ye,

a tɛ taga k’a ɲasiranbagaw to,

a b’a janto o ra wagati bɛɛ;

nka mɔgɔjuguw ta durujaw bɛna halaki.

²⁹Mɔgɔ terenninw le bɛna jamana tigiya ta;

o bɛna sigi jamana kɔnɔ wagati bɛɛ.

³⁰Mɔgɔ terennin bɛ hakiritigiyakumaw le bɔ a da ra;

a nɛnkun bɛ can le fɔ.

³¹A ta Ala ta sariya b’a jusukun na;

a tagamatɔ, a sen tɛ tɛrɛndɛ.

³²Mɔgɔjugu bɛ mɔgɔ terennin dɛndɛnna;

a b’a fɛ k’a faga.

³³Nka Matigi Ala tɛna a to a boro;

hali ni a tagara ni a ye kiti ra, Ala tɛna a to kiti ye ben a kan.

³⁴Matigi Ala makɔnɔ, k’a ta sira tagama,

ni o kɛra, a bɛna i kɔrɔta, ka jamana tigiya di i ma;

i bɛna mɔgɔjuguw halakitɔ ye.

³⁵Ne ka mɔgɔjugu ye, a ni a ta jusukungbɛlɛya;

a baraka bɛ bonyara i ko sɛdiriyiriba min flaburuw nugunin lo.

³⁶Nka dɔɔnin kɛra dɔrɔn, a tɛmɛna, a ma ye tuun;

ne k’a yɔrɔɲini, nka ne m’a ye.

³⁷Mɔgɔ jusukungbɛnin kɔrɔsi, ka mɔgɔɲuman fana flɛ;

sabu mɔgɔ sabarinin labanko le bɛ ɲa;

³⁸nka mɔgɔ murutininw bɛɛ bɛna halaki,

mɔgɔjuguw laban ye halakiri ye.

³⁹Mɔgɔ terenninw ta kisiri bɛ bɔ Matigi Ala le ra;

ale le ye o dogoyɔrɔ ye o degu wagatiw ra.

⁴⁰Matigi Ala bɛ o dɛmɛ, ka o bɔsi;

a bɛ o bɔsi mɔgɔjuguw boro ka o kisi,

sabu o ka o yɛrɛ karifa ale le ma.

Mɔgɔ tɔɔrɔnin ta daariri

¹Dawuda ta Zaburu. Hakirijigi dɔnkiri.

²E, Matigi Ala, i kana ta dimi fɛ ko i bɛ ne jaraki,

i kana ta jusugban fɛ ko i bɛ ne koro.

³Sabu i ta biɲɛw ka ne sɔgɔ,

i boro sera ne ma kosɛbɛ.

⁴Yɔrɔɲuman si tɛ ne farisogo ra tuun,

i ta dimiba kosɔn;

yɔrɔ kɛnɛman tɛ ne farikolo yɔrɔ si ra tuun,

ne ta jurumun kosɔn.

⁵Sabu ne ta terenbariyakow cayara fɔ ka ne kun datugu,

a kɛra i ko doni gbiriman, min ka gbiri ka tɛmɛ ne baraka kan.

⁶Ne ta joriw torira fɔ ka nɛɛn don,

ne ta hakirintanya le ye o sababu ye.

⁷Ne sɛgɛra, ne baraka bɛɛ banna, fɔ ka ne kɔ kuru;

lon o lon ne ɲanasisinin le bɛ yaalayaala.

⁸Ne soro bɛ to ka ne jɛni;

yɔrɔɲuman si tɛ ne farisogo ra tuun.

⁹Ne baraka banna, ne jigi tigɛra pewu;

ne bɛ to ka ŋuna, sabu ne jusukun tɔɔrɔnin lo.

¹⁰E, Matigi, ne bɛ min ɲini, ele ka o lɔn,

ne ta jusukasikanw fana ma dogo i ma.

¹¹Ne sɔnkun bɛ yɛrɛyɛrɛ, ne baraka banna;

ne ɲa tɛ manamana tuun.

¹²Ne teriw, ani ne tɔɲɔgɔnw ka o yɛrɛ mabɔ ne ra, ne ta bana kosɔn;

ne sigiɲɔgɔnw fana bɔra ne kɔrɔ.

¹³Minw bɛ ne fagayɔrɔ ɲini, olugu ka o ta janw la ne ɲa,

minw b’a fɛ kojugu ye ne sɔrɔ, olugu bɛ ne halakirikuma le fɔra;

tere bɛɛ, o bɛ to ka dabarijuguw le siri ne kama.

¹⁴Ne kɔni, ne bɛ i ko torogberen, ne tɛ foyi mɛn;

ne bɛ i ko bobo, ne tɛ ne da yɛlɛ ka foyi fɔ.

¹⁵Ne bɛ i ko mɔgɔ min tɛ mɛnni kɛ,

ani min da tɛ se ka kuma jaabi fana.

¹⁶Nka ne jigi bɛ ele le kan, Matigi Ala,

ele le bɛna ne jaabi, ne Tigi Ala.

¹⁷Ne ko: «I kana a to o ye ɲagari ne ta tɔɔrɔ kosɔn,

walama ka waso ne ra, ni ne benna.»

¹⁸Sabu ne kɔni bɛ ɲini ka ben,

ne ta dimi bɛ ne kan hali bi.

¹⁹Ne lɔra ne ta terenbariya ra;

sabu ne ta jurumun ka ne hakiri ɲagami.

²⁰K’a sɔrɔ ne juguw ka kɛnɛ, olugu baraka ka bon;

minw bɛ ne kɔninya faninya gbansan kan, o ka ca.

²¹Minw bɛ ne ta koɲuman sara ni kojugu ye,

olugu wurira ne kama, sabu ne bɛ tugura koɲuman kɔ.

²²E, Matigi Ala, i kana taga ka ne to!

Ne ta Ala, i kana i yɛrɛ mabɔ ne ra!

²³I teliya ka na ne dɛmɛ,

Matigi, ne ta kisiri tigi.

Adamaden tɛ foyi ye

¹Dɔnkirilabagaw kuntigi, Yedutun. Dawuda ta Zaburu.

²Ne tun b’a fɔra ko ne bɛna ne tagamacogo kɔrɔsi,

janko ne nɛnkun kana na ne bla jurumun na;

ne tun b’a fɔra ko ka mɔgɔjugu to ne kɛrɛ fɛ,

ne bɛna karafe le don ne da ra.

³Ne jera, ne ma foyi fɔ,

hali kumaɲuman, ne m’a fɔ;

nka ne ta dimi juguyara le.

⁴Ne jusukun tun bɛ ne jɛnina;

ni ne ka miiri, a bɛ kɛ i ko tasuma dɔ le bɛ manana ne kɔnɔ;

a laban, ne ka ne da yɛlɛ ka kuma:

⁵E, Matigi Ala, ne si laban yira ne ra,

ani ne ta dunuɲalatigɛ dan;

janko ne y’a lɔn ko ne tɛ foyi ye.

⁶A flɛ, i ka ne si janya kɛ i ko mɔgɔ borotɛgɛ bonya;

ne ta dunuɲalatigɛ janya tɛ foyi ye i ɲa kɔrɔ.

Can lo, adamaden min o min lɔnin lo, o tɛ foyi ye ni fɔɲɔ tɛ.39.6 Nin yɔrɔ ra a sɛbɛra heburukan na ko: Sela.

⁷Can lo, adamaden bɛ taga, a bɛ na, i ko yirisuma;

a bɛ boribori, nka a bɛ tɛmɛ i ko fɔɲɔ.

A bɛ naforo lajɛn, nka a t’a lɔn a bɛna kɛ mɔgɔ min ta ye.

⁸Ayiwa, Matigi, sisan ne bɛ se ka ne jigi la mun le kan sa?

Ne boromalanin bɛ ele le ma.

⁹Ne bɔsi ka bɔ ne ta hakɛkow bɛɛ ra!

I kana a to mɔgɔ sɔnkolonw ye ne lebu!

¹⁰Ne bɛ je, ne tɛna ne da yɛlɛ tuun,

sabu nin kow kɛbaga ye ele yɛrɛ le ye.

¹¹I ta bugɔri mabɔ ne ra ten,

sabu i boro bɛ ne halakira.

¹²I bɛ adamaden koro a ta terenbariyakow kosɔn;

fɛn min ko ka gbɛlɛn a ma, i bɛ o cɛn i ko cɛnrifɛn bɛ fɛn cɛn cogo min na.

Can lo, adamaden tɛ foyi ye ni fɔɲɔ dama tɛ.39.12 Nin yɔrɔ ra a sɛbɛra heburukan na ko: Sela.

¹³E, Matigi Ala, ne ta daarikan lamɛn,

i toro malɔ ne ta welerikan na,

i kana i toro datugu ne kasikan na;

sabu ne kɔni ye lonan le ye i ta so,

ne ye tɛmɛbaga le ye, i ko ne bɛma tɔw bɛɛ.

¹⁴I ɲa bɔ ne ra ten, janko ne ye ninsɔndiya dɔɔnin,

sani ne ye na taga, ka tunu ka ban pewu!

Ala bɛ koɲuman kɛ a ɲinibagaw ye

(Hayan 14–18; Zaburu 70.2-6)

¹Dɔnkirilabagaw kuntigi. Dawuda ta Zaburu.

²Ne tun ka ne jigi la Matigi Ala kan k’a makɔnɔ,

a k’a toro malɔ ne fɛ, ka ne kulekan lamɛn.

³A ka ne sama ka bɔ dingajuguba kɔnɔ,

ka ne labɔ bɔgɔ cɛ ma, dingadun kɔnɔ;

a ka ne sen fla lɔ fara kan,

ka ne lɔ yɔrɔɲuman na.

⁴A ka dɔnkirikura don ne da ra,

ka o kɛ an ta Ala ta tandori dɔnkiri ye.

Mɔgɔ caman bɛna o ye, ka siran Ala ɲa,

ka o jigi la Matigi Ala kan.

⁵Mɔgɔ min bɛ Matigi Ala kɛ a jigi ye,

o tigi ta ɲana!

Yɛrɛbonyabaga minw bɛ o yɛrɛ bla faninyafɔ ra,

a tɛ sɔn k’a ɲasin olugu fan fɛ.

⁶E, Matigi Ala, ne ta Ala,

i ka koɲumanbaw, ani kabako minw kɛ an ye, o ka ca!

Foyi tɛ se ka suma ni ele ye;

ni ne ko ne b’a bɛɛ fɔ, ani k’a bɛɛ lakari,

a da tɛ se ka lɔn, sabu a ka ca.

⁷I ko i tɛ bɛgan saraka* fɛ, i tɛ siman saraka* fɛ;

i ka o kuma don ne toro ra kosɛbɛ.

Saraka jɛnitaw* o, jurumunyafa sarakaw* o,

i ma o si ɲini an fɛ.

⁸O ra ne ko: «Ne natɔ flɛ,

i n’a fɔ a fɔra ne ta ko ra sariya kitabu kɔnɔ cogo min na40.8 Nin kumaw fɔra Yesu Kirisita ta ko ra (Heburuw 10.5-7)..

⁹Ne ta Ala, i sago kɛri, o le ka di ne ye;

i ta sariya ta kumaw bɛ ne jusukun na.»

¹⁰Ne bɛ i ta terenninya ko fɔ

i ta mɔgɔw ta jamaba bɛɛ lajɛnnin cɛ ra.

A flɛ, ne ma ne da datugu o ko kan,

ele yɛrɛ ka o lɔn, Matigi Ala.

¹¹Ne tɛ i ta terenninya ko dogo ne jusu ra,

ne bɛ i ta kankelentigiya, ani i ta kisiri ko fɔ le;

ne tɛ i ta ɲumanya ni i ta can dogo i ta mɔgɔw ta jamaba lajɛnnin ma.

¹²E, Matigi Ala, ele kɔni tɛna ban ka hina ne ra;

i ta ɲumanya ni i ta kankelentigiya bɛna ne tanga wagati bɛɛ;

¹³sabu kojugu caman ka ne lamini,

dan tɛ kojugu minw na.

Ne ta terenbariyakow ka ne datugu,

k’a kɛ fɔ ne tɛ foyi yera tuun;

o ka ca ka tɛmɛ hali ne kunsigiw kan.

Ne baraka bɛɛ banna.

¹⁴Matigi Ala, sabari ka ne bɔsi,

Matigi Ala, teliya ka na ne dɛmɛ!

¹⁵Minw b’a fɛ ka ne nin bɔ ne ra,

olugu bɛɛ ye maroya fɔ ka o kun suuru!

Minw b’a fɛ kojugu le ye ne sɔrɔ,

olugu le ye dɔgɔyari sɔrɔ fɔ ka sekɔ ni o kɔ ye.

¹⁶Minw bɛ yɛrɛko ne ma ko: «Ha ha ha»,

maroya ye olugu halaki ka o ban pewu!

¹⁷Nka minw bɛɛ bɛ i yɔrɔɲinina,

olugu ye ninsɔndiya ka ɲagari i kosɔn!

I ta kisiri ko ka di minw ye,

olugu y’a fɔ tuma bɛɛ ko: «E, Matigi Ala ka bon!»

¹⁸Ne kɔni ye ɲanibagatɔ ye, ani fagantan,

nka Matigi hakiri bɛ ne ra.

Ele le ye ne dɛmɛbaga ye, ani ne kunmabɔbaga;

ne ta Ala, i kana mɛɛn ka na ne dɛmɛ.

Ala bɛ mɔgɔ jusukungbɛnin sutara

¹Dɔnkirilabagaw kuntigi. Dawuda ta Zaburu.

²Mɔgɔ min b’a hakiri to dɛsɛbagatɔ ra, o tigi ta ɲana!

Lon min ni kojugu k’a sɔrɔ, Matigi Ala b’a bɔsi.

³Matigi Ala b’a kɔrɔsi ka si di a ma;

a bɛ hɛra sɔrɔ jamana kɔnɔ.

Ala tɛna a don a juguw boro.

⁴K’a tɔɔrɔnin lanin to a ta lanan kan, Matigi Ala bɛ baraka don a ra;

ni bana k’a sɔrɔ, a b’a kɛnɛya ka bɔ o sɛgɛ bɛɛ ra.

⁵Ne ko: «Matigi Ala, makari ne ra!

Ne kɛnɛya, sabu ne ka jurumun kɛ ka i hakɛ ta.»

⁶Ne juguw bɛ kumajuguw fɔra ne kama, ko:

«A bɛna sa wagati juman le sa, janko a tɔgɔ ye tunu?»

⁷Ni min ka na ne flɛ, o bɛ faninyakumaw le fɔ;

a bɛ kumajuguw dogo a jusukun na,

ni a bɔra kɛnɛ ma, a bɛ o fɔ.

⁸Ne kɔninyabagaw bɛɛ bɛ kumana ɲɔgɔn fɛ o da jukɔrɔ ne kama;

o bɛ kojugu le miirira ne kama.

⁹O b’a fɔ ko: «Kojuguba dɔ benna a kan!

A lanin flɛ, a tɛna wuri tuun!»

¹⁰Hali ne tericɛgbɛlɛn, ne jigi tun bɛ min kan,

min tun bɛ domuni kɛ ni ne ye,

o k’a yɛrɛ kɛ ne jugu ye.41.10 Nin kuma fɔra Yesu Kirisita ni Zudasi ta ko ra (Yuhana 13.18).

¹¹Nka Matigi Ala, ele kɔni ye makari ne ra, ka ne lawuri,

janko ne ye ne ta juru sara o ra.

¹²Ni ne juguw ma se sɔrɔ ne kan,

o le bɛna a to ne b’a lɔn ko ne ko ka di i ye.

¹³I bɛ ne kɔrɔsi, sabu ne jusukun gbɛnin lo;

i bɛ ne to i ɲa kɔrɔ wagati bɛɛ.

¹⁴Matigi Ala baraka, Izirayɛli ta Ala baraka,

wagati bɛɛ, ani tuma bɛɛ!

Amina! Amina!

Kitabu flanan

(Zaburuw 42–72)

Alaɲinibagaw jigi ye Ala ye

¹Dɔnkirilabagaw kuntigi. Kore dencɛw42.1 Kore ni a ta mɔgɔw fana tun ye Alabatosoba dɔnkirilabaga dɔw ye (Kibaroyaw fɔlɔ 6.18,22). ta dɔnkiri.

²Minan minlɔgɔtɔ bɛ kasi kɔji nɔ fɛ cogo min na,

ne nin bɛ kasi ele nɔ fɛ ten le, Ala!

³Ala nege bɛ ne ra i ko ji, Ala ɲanaman nege bɛ ne ra.

Wagati juman le ne bɛna taga lɔ Ala ɲa kɔrɔ sa?

⁴Ne ɲaji le ye ne ta baro ye su ni tere;

k’a sɔrɔ wagati bɛɛ mɔgɔw b’a fɔ ne ma ko: «Ele ta Ala bɛ min le sa?»

⁵O bɛɛ n’a ta, ni ne hakiri ka jigi nin kow ra,

a bɛ miiri caya ne jusu ra:

O wagati ra ne le tun bɛ jama cɛ ra,

ne le tun bɛ bla o ɲa ka tagama ka taga Ala ta batoso ra,

ni ɲagarikanbaw ye, ani Ala tandorikanw;

o y’a sɔrɔ jama bɛɛ lajɛnnin ɲagarininba lo.

⁶E, ne nin, mun kosɔn ele bɛ i jusu kasi dɛ?

Mun na i bɛ ŋuna?

I jigi la Ala kan, sabu ne bɛna a fo k’a waleɲumanlɔn tuun;

ale le ye ne kisibaga ye, ani ne ta Ala.

⁷Ala, ne jusu kasira;

o kosɔn, ka ne to Zuridɛn mara yɔrɔ ra, ani Hɛrimɔn kuru yɔrɔ ra,

ani Misari kuru yɔrɔ ra,

ne bɛ ne hakiri to i ra.

⁸Jiba dɔ bɛ jiba dɔ wele, o bɛ tugu ɲɔgɔn kɔ,

ka woyo ni mankanba ye;

i b’a to o jikuruw, ani o jiwoyow bɛɛ ye woyo ka tɛmɛ ne kan.

⁹Tere fɛ, Matigi Ala bɛ a ta ɲumanya yira ne ra;

su fɛ, ne bɛ dɔnkiri la k’a tando,

ka ne ta ɲanamanya tigi Ala daari.

¹⁰Ne b’a fɔ ne ta Ala ye, ne ta Ala barakaman ye ko:

«Mun na i ɲinana ne kɔ?

Mun kosɔn ne ɲanasisinin le bɛ to ka yaalayaala,

ani ne juguw fana bɛ ne minako juguya?»

¹¹Ne juguw ka ne mafiyɛnya

fɔ ka na ne baraka bɛɛ ban;

o b’a fɔ ne ma tuma bɛɛ, ko:

«Ele ta Ala bɛ min le?»

¹²E, ne nin, mun kosɔn ele bɛ i jusu kasi dɛ?

Mun na i bɛ ŋuna?

I jigi la Ala kan, sabu ne bɛna a fo k’a waleɲumanlɔn tuun;

ale le ye ne kisibaga ye, ani ne ta Ala.

Ala le ye a ta mɔgɔw jigi ye

¹E, Ala, ne ta kiti tigɛ, ka ne ta jo di ne ma,

ka nin siya Alaɲasiranbariw kɛrɛ;

ne bɔsi ka bɔ nin mɔgɔ nanbaratɔw, ani nin mɔgɔ kɛwalejuguw boro;

²sabu ele le ye ne dogoyɔrɔ ye, ne ta Ala.

Mun kosɔn i banna ne ra?

Mun kosɔn ne ɲanasisinin le bɛ yaalayaala,

ne juguw fana bɛ ne minako juguya?

³I ta yeelen ni i ta can yira,

janko ka ne tɛmɛsira yira ne ra,

ka taga ni ne ye i ta kuru saninman kan,

i sigiyɔrɔ ra.

⁴O ra, ne bɛna taga Ala ta sarakajɛnifɛn kɔrɔ, Ala fɛ,

Ala min ye ne ta ninsɔndiya ani ne ta ɲagarikun ye;

ne bɛna i fo ka i waleɲumanlɔn ni kora ye,

Ala, ne ta Ala!

⁵E, ne nin, mun kosɔn ele bɛ i jusu kasi dɛ?

Mun na i bɛ ŋuna?

I jigi la Ala kan, sabu ne bɛna a fo k’a waleɲumanlɔn tuun;

ale le ye ne kisibaga ye, ani ne ta Ala.

Ala ta mɔgɔw ta tɔɔrɔ

(Zaburuw 74; 79; 80)

¹Dɔnkirilabagaw kuntigi. Kore dencɛw ta karan.

²E, Ala, i ka ko minw kɛ an bɛmaw ta wagati ra,

kabini fɔlɔfɔlɔ,

an torow ka o mɛn;

an bɛmaw ka o lakari an ye.

³I yɛrɛ boro ka siya dɔw gbɛn,

janko ka an bɛmaw sigi olugu nɔ ra;

i ka kojugu ben siya dɔw kan,

janko an bɛmaw ye laganfiya sɔrɔ.

⁴Sabu o ma jamana kɛrɛ k’a mina ni o yɛrɛ ta kɛrɛkɛmuruw le ye,

o yɛrɛ boro le ma se di o ma;

nka ele boro barakaman, ani i ta sebagaya,

ani i ta ɲumanya nɔ lo;

sabu o ko tun diyara i ye.

⁵E, Ala, ele le ye ne ta masacɛ ye;

ele le b’a latigɛ ka Yakuba ta mɔgɔw kisi ka o bɔ o juguw boro.

⁶Ele le baraka ra, an bɛ se ka an juguw gbɛn;

i tɔgɔ le baraka ra, an bɛ an kɛrɛbagaw dɔndɔn ka o terege dugu ma.

⁷Sabu ne tɛ ne jigi la ne ta kalan kan,

ne ta kɛrɛkɛmuru le tɛ ne kisi;

⁸nka ele le bɛ an kisi ka bɔ an kɛrɛbagaw boro,

ele le bɛ an kɔninyabagaw lamaroya.

⁹An bɛ Ala tando lon o lon,

k’a tɔgɔ bonya wagati bɛɛ.44.9 Nin yɔrɔ ra a sɛbɛra heburukan na ko: Sela.

¹⁰Nka sisan i banna an na, ka an lamaroya;

i tɛ bɔ ni an ta kɛrɛkɛdenw ye tuun.

¹¹I bɛ an labori an kɛrɛkɛɲɔgɔnw ɲa,

k’a to an kɔninyabagaw ye an borofɛnw cɛ o sago ma.

¹²I ka an don o boro i ko o bɛ saga min faga k’a sogo domu;

i ka an gbɛn ka taga yɔrɔ bɛɛ, siyaw cɛ ra.

¹³I ka i ta mɔgɔw fiyeere dasu le ra,

hali i ma o sɔngɔ gbɛlɛya.

¹⁴I ka an kɛ dɔgɔyarifɛn le ye an sigiɲɔgɔnw fɛ;

minw ka an lamini, olugu bɛ an lɔgɔbɔ, ka yɛrɛko an ma.

¹⁵I k’a to siya tɔw bɛ zanaw fɔ ni anw tɔgɔ le ye;

siya tɔw bɛ o kun yuguyugu anw le ra.

¹⁶Ne ta maroya bɛ ne kan wagati bɛɛ.

Ne maroyara fɔ ka ne kun suuru,

¹⁷sabu ne bɛ ne mafiyɛnyabagaw ni ne dɔgɔyabagaw kan mɛnna;

ne bɛ ne juguw yera, o b’a fɛ ka o yɛrɛ dimibɔ ne ra.

¹⁸Nin kow bɛɛ sera an ma,

nka an ma ɲina i kɔ,

an ma i ta jɛnɲɔgɔnya* layiri cɛn.

¹⁹An ma an ta miiriya munu fan wɛrɛ fɛ,

an sen ma bɔ i ta sira kan.

²⁰Nka i ka an baraka bɛɛ ban, ka an sigiyɔrɔ kɛ kongowuruw ta ye,

ka saya dibi kɛ ka an datugu.

²¹Ni an tun ɲinana an ta Ala tɔgɔ kɔ,

ni an tun ka an boro lɔ batofɛn wɛrɛw le ye,

²²yala Ala tun tɛna o lɔn wa,

ale min ka mɔgɔ jusukun ta gundow lɔn?

²³Ele le kosɔn o bɛ an fagayɔrɔ ɲinina lon o lon,

ka an kɛ i ko saga minw blara fagari kama.

²⁴Matigi, i wuri! Mun na i bɛ sunɔgɔra?

I kunu! I kana ban an na pewu ka an to yi ten!

²⁵Mun na i ka i ɲada dogo an ma sa?

Mun na i bɛ ɲina an ta ɲani ni an ta sɛgɛ kɔ?

²⁶Anw kɔni lanin lo buguri ra,

fɔ ka an farikolo nɔrɔ dugukolo ra.

²⁷I wuri ka an dɛmɛ!

An bɔsi i ta ɲumanya kosɔn!

Masacɛ ni masamuso ta furudɔnkiri

¹Dɔnkirilabagaw kuntigi. Nin dɔnkiri bɛ la dɔnkiri min lacogo ra, o tɔgɔ ye ko «Yirifiyeren». Kore dencɛw ta karan. Kanuyadɔnkiri.

²Ne jusukun fara kumadimanw na;

o ra, ne bɛna ne ta cirayakuma fɔ masacɛ ye.

Ne nɛnkun bɛ i ko sɛbɛrikɛbagaɲuman ta sɛbɛrikɛnan.

³I cɛ ka ɲi ka tɛmɛ adamaden tɔw bɛɛ kan;

nɛɛma bɛ i ta kuma bɛɛ ra,

o kosɔn Ala bɛ baraka don i ra tuma bɛɛ.

⁴E, kɛrɛkɛcɛfari, i ta kɛrɛkɛmuru siri i tɔgɔ ra!

O le ye i ta bonya ni i ta nɔɔrɔ ye.

⁵I ni i ta nɔɔrɔ ye don i ta sowotoro kɔnɔ ka kɛrɛ kɛ, ka se sɔrɔ;

taga kɛrɛ kɛ can ni sabari ni terenninya kosɔn.

I boro barakaman ye koba caman kɛ i ye!

⁶I ta biɲɛw da ka di;

o bɛ masacɛ ta juguw sɔgɔ o sɔnkun na,

ka mɔgɔw benben i sen kɔrɔ.

⁷E, Ala, i ta masaya bɛ to a nɔ ra tuma bɛɛ, ani wagati bɛɛ;

i ta masacɛbere ye hɔrɔnya bere le ye.

⁸I bɛ terenninya kanu, ka juguya kɔninya;

o kosɔn Ala, i ta Ala ka i ɲanawoloma,

ka turu kɛ i kun na, ka i ninsɔndiya, ka i fisaya i tɔɲɔgɔnw bɛɛ ye45.8 Hayan 7 ni 8, o fɔra Heburuw 1.8-9..

⁹Mire turu, ani alowɛsi turu, ani kase turu, o ka i ta faniw kasa diya.

I ta masabonw lɔra ni samaɲinw ye;

ka i to o masasow kɔnɔ, gɔnifɔkanw bɛ i ninsɔndiya.

¹⁰I diyanyamusow ye masacɛdenw le ye;

masamuso bɛ i kininboroyanfan fɛ, a masirinin bɛ ni Ofiri sanin yɛrɛworo ye.

¹¹Ne lamɛn, ne denmuso, i ɲa yɛlɛ, ka i toro malɔ fana;

i hakiri bɔ i ta siyamɔgɔw kɔ, ani i faso kɔ.

¹²Masacɛ ɲabɔra i fɛ i ta cɛɲa kosɔn;

i yɛrɛ majigi a kɔrɔ k’a bonya, sabu ale le ye i matigicɛ ye.

¹³Ni o kɛra, Tiri dugumɔgɔw, minw ye mɔgɔw bɛɛ ra naforotigiw ye,

olugu bɛna na ni bonyafɛnw ye i fɛ, ka o yɛrɛ ko diya i ye.

¹⁴Masacɛ denmuso bɛ a ta bon kɔnɔ, a yɔrɔ bɛɛ ye nɔɔrɔ le ye;

a ta faniw ɲɛgɛnɲɛgɛnna ni sanin ye.

¹⁵O tagara ni a ye masacɛ fɛ, a ni a ta fani cɛɲumanw.

Sunguruden dɔw b’a kɔ fɛ; a kafiɲɔgɔnw lo;

olugu fana tagara ni a ye.

¹⁶O tagara ɲagari ni ninsɔndiya le cɛ ra;

o ka o ladon masacɛ ta masabon kɔnɔ.

¹⁷Masacɛ, i dencɛw bɛna sigi i bɛmaw nɔ ra,

i bɛna o kɛ kuntigiw ye jamana yɔrɔ bɛɛ ra.

¹⁸Ne bɛna a to wagati bɛɛ ta mɔgɔw hakiri ye to i tɔgɔ ra;

ni o kɛra, siyaw bɛna i fo ka i waleɲumanlɔn wagati bɛɛ, ani tuma bɛɛ.

Ala le ye Sebɛɛtigi ye

¹Dɔnkirilabagaw kuntigi. Kore dencɛw ta dɔnkiri.

²Ala le ye an karifayɔrɔ ye, ani an ta baraka sɔrɔyɔrɔ.

Ni degu ka an sɔrɔ tuma o tuma, a bɛ kɛ an kɔrɔ ka an dɛmɛ.

³O kosɔn an tɛ siran, hali ni dugukolo bɛ yɛrɛyɛrɛ,

hali ni kuruw bɛ bɔ o nɔ ra ka yɛlɛma ka ben kɔgɔji kɔnɔ,

⁴hali ni a jikurubaw bɛ mankanbaw bɔ, ka kanga,

ka wuri san fɛ fɔ ka kuruw yuguyugu.46.4 Nin yɔrɔ ra a sɛbɛra heburukan na ko: Sela.

⁵Kɔ dɔ bɛ yi, min jiwoyo bɛ Ala ta duguba ninsɔndiya,

dugu min ye Ala kɔrɔtaninba ta sigiyɔrɔ saninmanba ye.

⁶Ala yɛrɛ siginin bɛ o dugu kɔnɔ,

o dugu tɛna bɔ a nɔ ra ka ye;

sabu ni dugugbɛda sera dɔrɔn, a bɛ na o fɛ ka na o dɛmɛ.

⁷Siya dɔw bɛ mankanw cira, masa dɔw ta masaya bɛ benna;

nka ni ale Ala k’a kan bɔ dɔrɔn, dugukolo bɛ yeele.

⁸Fangatigi Ala bɛ ni an ye;

an tangabaga ye Yakuba ta Ala le ye.46.8 Nin yɔrɔ ra a sɛbɛra heburukan na ko: Sela.

⁹Aw ye na Matigi Ala ta kabakow flɛ,

a ka cɛnriba min kɛ dugukolo kan, aw ye na o flɛ!

¹⁰Ale le bɛ kɛrɛw lalɔ dunuɲa fan bɛɛ ra;

a bɛ kalanw karikari, ka tamanw tigɛtigɛ,

ka kɛrɛkɛwotorow jɛni tasuma ra!

¹¹«Aw ye nin kow bɛɛ dabla, k’a lɔn ko ne le Ala ye;

ne le bɛ siyaw bɛɛ kunna,

ne le bɛ dunuɲa bɛɛ kunna.»

¹²Fangatigi Ala bɛ ni an ye;

an tangabaga ye Yakuba ta Ala le ye.46.12 Nin yɔrɔ ra a sɛbɛra heburukan na ko: Sela.

Siyaw bɛɛ ye tɛgɛrɛ fɔ Ala ye

(Zaburuw 93; 96–99)

¹Dɔnkirilabagaw kuntigi. Kore dencɛw ta Zaburu.

²Jamanaw bɛɛ ta mɔgɔw, aw ye tɛgɛrɛ fɔ!

Aw ye ɲagari ka kule ci, ka Ala tando!

³Sabu Matigi Ala kɔrɔtaninba ye siranyafɛnba le ye,

masacɛba lo min bɛ dunuɲa bɛɛ lajɛnnin kunna.

⁴A bɛ jamanaw ta mɔgɔw bla a ta fanga kɔrɔ,

ka siyaw bla an sen kɔrɔ.

⁵A ka jamana dɔ ɲanawoloma ka o kɛ an ninyɔrɔ ye;

o le ye Yakuba47.5 Yakuba, o kɔrɔ ye Izirayɛli. ta bonya kun ye, a bɛ Yakuba min kanu.47.5 Nin yɔrɔ ra a sɛbɛra heburukan na ko: Sela.

⁶Ala bɛ yɛlɛnna ka taga a ta yɔrɔ saninman* kɔnɔ a ta mɔgɔw ta ɲagarikanbaw le cɛ ra,

Matigi Ala bɛ yɛlɛnna ka taga burufiyɛkanw le cɛ ra.

⁷Aw ye tandoridɔnkiriw la Ala ye, aw ye tandoridɔnkiriw la!

Aw ye tandoridɔnkiriw la an ta Masa ye, aw ye tandoridɔnkiriw la.

⁸Sabu Ala le ye dunuɲa bɛɛ lajɛnnin ta Masa ye;

aw y’a tando ni dɔnkiri ɲanaman le ye.

⁹Ala ta fanga bɛ siyaw bɛɛ kan,

Ala siginin bɛ a ta masasiginan saninman kan.

¹⁰Siyaw ta kuntigiw bɛ lajɛn

ka fara Iburahima ta Ala ta mɔgɔw kan;

sabu dunuɲa nɛgɛbɛnnanw bɛɛ ye Ala ta le ye.

A kɔrɔtanin lo fɛn bɛɛ kunna.

Zeruzalɛmu dugu saninman

¹Dɔnkiri. Kore dencɛw ta Zaburu.

²Matigi Ala ka bon,

bɛɛ ka kan k’a tando kosɛbɛ

an ta Ala ta dugu saninman kɔnɔ,

min bɛ a ta kuru saninman kan.

³O kuru wuricogo cɛ ka ɲi;

a bɛ dunuɲa mɔgɔ bɛɛ ninsɔndiya.

Siyɔn kuru le ye Ala sigiyɔrɔ ye;

Masacɛba ta dugu lo.

⁴Ala bɛ Siyɔn masasobaw kɔnɔ,

bɛɛ k’a lɔn ko tangabaga ɲanaman lo.

⁵A flɛ, masacɛw tun ka ɲɔgɔn lajɛn,

ka jɛn ka na dugu kama.

⁶Nka olugu ɲa lara a kan minkɛ dɔrɔn, o kabakoyara,

o jigi tigɛra, o borira.

⁷O barara ka to ka yɛrɛyɛrɛ o yɔrɔnin bɛɛ ra,

i ko muso jigibagatɔ kɔnɔdimitɔ b’a kɛ cogo min na,

⁸i ko terebɔyanfan ta fɔɲɔ gbanninman min bɛ fiyɛ,

ka jirakurunbaw karikari.

⁹An tun ka min mɛn, an ɲa nana o le ye fana

Fangatigi Ala ta dugu kɔnɔ,

an ta Ala ta dugu kɔnɔ;

Ala bɛna o dugu baraka bonya wagati bɛɛ.48.9 Nin yɔrɔ ra a sɛbɛra heburukan na ko: Sela.

¹⁰E, Ala, ka an to i ta batoso kɔnɔ,

an bɛ miiri i ta ɲumanya ra.

¹¹E, Ala, i ta bonya bɛ i n’a fɔ i tɔgɔ;

i ta bonya sera fɔ dunuɲa dan bɛɛ ra.

I boro barakaman bɛ ko terenninw dɔrɔn le kɛ.

¹²Siyɔn kuru48.12 Siyɔn kuru, o ye Zeruzalɛmu ye; o dugu tun siginin bɛ kuru kan. bɛ ninsɔndiya,

Zuda duguw bɛ ɲagari,

i ta kolatigɛninw kosɔn.

¹³Aw ye yaala ka Siyɔn dugu yɔrɔ bɛɛ lamini;

aw ye a sankasow jate,

¹⁴k’a laminikogow flɛ ka ɲa,

k’a bon barakamanw kɔrɔsi kosɛbɛ,

janko ka na o lakari duruja nataw ye,

¹⁵ko an ta Ala le ye nin ye;

an bɛna tugu ale le kɔ wagati bɛɛ48.15 «Wagati bɛɛ»: Kitabu dɔw ko: «fɔ saya.».

Ala ye jigi ɲanaman ye ka tɛmɛ naforo kan

¹Dɔnkirilabagaw kuntigi. Kore dencɛw ta Zaburu.

²Aw ye nin lamɛn, jamanaw bɛɛ ta mɔgɔw;

aw ye aw toro malɔ, dunuɲamɔgɔw bɛɛ,

³mɔgɔ fitini fara mɔgɔba kan,

naforotigi fara fagantan kan!

⁴Ne da bɛna hakiritigiyakumaw le fɔ,

sabu faamurikumaw le bɛ ne jusukun na.

⁵Ne bɛ ne toro malɔ ka zanaw lamɛn,

ne bɛna ne ta kuma kɔrɔmanw kɔrɔ fɔ ni gɔnifɔkan le ye.

⁶Hali ni tɔɔrɔ sera ne ma,

ni ne janfabagaw ka ne lamini ni o ta terenbariyakow ye,

mun kosɔn ne bɛna siran o ra?

⁷Olugu jigi bɛ o borofɛnw le kan,

o bɛ o yɛrɛ waso o ta naforo caya le kosɔn.

⁸O bɛɛ n’a ta, mɔgɔ si tɛ se k’a mɔgɔɲɔgɔn nin kunmabɔ,

walama k’a yɛrɛ nin kunmabɔsara di Ala ma,

⁹sabu mɔgɔ nin kunmabɔsara ye sɔngɔba le ye;

mɔgɔ bɛ se ka fɛn o fɛn di, o si t’a bɔ.

¹⁰Yala olugu b’a miiri ko o bɛna to si ra wagati bɛɛ le wa,

ani ko o tɛna don kaburu kɔnɔ fiyewu le wa?

¹¹An b’a ye ko hakiritigiw bɛ sa,

hakirintan ni naloman fana bɛ ban;

o bɛ taga ka o borofɛnw to mɔgɔ wɛrɛw le boro.

¹²O b’a miiri ko o ta bonw bɛna to yi wagati bɛɛ,

ko o ta sigiyɔrɔw bɛna to yi wagati bɛɛ, ani tuma bɛɛ,

ko olugu tɔgɔw bɛna to o ta dugukolow ra tuma bɛɛ.

¹³Nka adamaden ni a ta bonya bɛɛ, a tɛ mɛɛn;

a bɛ i ko bɛgan fagata.

¹⁴Mɔgɔ minw jigi bɛ o yɛrɛ kan, olugu ta bɛ kɛ ten le;

minw yɛrɛ ta kumafɔta ka di o ye, olugu bɛ laban ten le.49.14 Nin yɔrɔ ra a sɛbɛra heburukan na ko: Sela.

¹⁵O bɛ o gbɛngbɛn i ko sagaw, ka taga o lajigi kaburu kɔnɔ;

saya le ye kɛ o gbɛngbɛnbaga ye.

Sɔgɔmada fɛ, mɔgɔɲuman bɛ tagama o kan.

O ta cɛɲa bɛɛ bɛ tɛmɛ;

saya dibi le bɛ kɛ o ta so ye.

¹⁶Nka Ala bɛna ne nin kunmabɔ saya dibi ma;

sabu a bɛna ne ta.49.16 Nin yɔrɔ ra a sɛbɛra heburukan na ko: Sela.

¹⁷Ni mɔgɔ dɔ ka naforo sɔrɔ, o kana digi i ra,

ni a borofɛnw cayara a ta so, o kana digi i ra;

¹⁸Sabu a satɔ tɛ taga ni foyi ye,

a borofɛnw tɛ jigi ni a ye kaburu kɔnɔ.

¹⁹A bɛ se k’a fɔ ko ale ka jususuma sɔrɔ a ta dunuɲalatigɛ ra,

sabu ni dunuɲa diyara i ra, mɔgɔw bɛ i tando.

²⁰O bɛɛ n’a ta, i bɛna taga fara i bɛmaw kan lahara;

olugu minw tɛna tere yeelen ye o ɲa ra tuun fiyewu.

²¹Adamaden ni a ta bonya bɛɛ,

a tɛ a faamu ko a bɛ i ko bɛgan fagata.

Saraka min ka di Ala ye

¹Asafu ta Zaburu.

Alaw ta Ala, Matigi Ala kumana,

ka dunuɲamɔgɔw wele,

k’a ta terebɔyanfan na ka taga a bla terebenyanfan na.

²Ala ta nɔɔrɔ manamanatɔ bɛ bɔ Siyɔn dugu kɔnɔ,

dugu min ta cɛɲa dafanin lo.

³An ta Ala bɛ nana yi, a kumabari tɛna to;

tasuma farimanba dɔ le b’a ɲa fɛ,

sanfɔɲɔ fariman dɔ k’a lamini.

⁴A bɛ sankolo wele san fɛ,

ka dugukolo wele, janko ka na a ta mɔgɔw ta kiti tigɛ.

⁵A ko: «Aw ye ne ɲasiranbagaw lajɛn ne ye,

minw ka saraka bɔ ka jɛnɲɔgɔnya* don ni ne ye!»

⁶sankolokɔnɔfɛnw bɛ Ala ta terenninya lakari,

sabu ale yɛrɛ le bɛ kiti tigɛ.50.6 Nin yɔrɔ ra a sɛbɛra heburukan na ko: Sela.

⁷«Ne ta mɔgɔw, aw ye ne lamɛn, ne bɛna kuma;

Izirayɛli, ne bɛna ele jaraki,

ne le ye Ala ye, i ta Ala.

⁸Ne tɛ aw jarakira aw ta sarakaw le kosɔn,

sabu aw ta saraka jɛnitaw* bɛ ne ɲa kɔrɔ tuma bɛɛ.

⁹Misitoran minw bɛ aw ta so, ne mako tɛ o dɔ ra,

ba minw bɛ aw ta babonw kɔnɔ, ne mako tɛ o dɔ ra;

¹⁰sabu kongosogow bɛɛ ye ne ta le ye,

bɛgan waga caman minw bɛ kuruw kan, o bɛɛ ye ne ta le ye.

¹¹Kɔnɔ o kɔnɔ bɛ san fɛ, ne ka o bɛɛ da lɔn,

fɛnɲanaman min o min bɛ kongo kɔnɔ, o bɛɛ ye ne ta ye.

¹²Ni kɔngɔ tun bɛ ne ra, ne tun tɛna o fɔ aw ye,

sabu dunuɲa bɛɛ lajɛnnin ye ne ta le ye, ani a kɔnɔfɛnw bɛɛ.

¹³Yala ne bɛ misitoran sogo domu wa?

Yala ne bɛ bakɔrɔninw jori min wa?

¹⁴Ni i bɛ saraka bɔ Ala ye, a ye kɛ barakalari le ye;

i ka dajuru minw ta Ala kɔrɔtaninba fɛ, o dafa.

¹⁵Ni o kɛra, ni i ka degu lon min na, i ye ne wele;

ne bɛna i bɔsi, i fana bɛna ne bonya.»

¹⁶Nka Ala b’a fɔ mɔgɔjugu ye ko:

«Mun kosɔn ele bɛ ne ta cifɔninw karan,

ka to ka ne ta jɛnɲɔgɔnya sariyaw fɔ i da ra?

¹⁷K’a sɔrɔ ele tɛ sɔn korori ma,

i bɛ ne ta kumaw firi i yɛrɛ kɔ fɛ.

¹⁸Ni i ka son ye, i bɛ fara a kan;

jɛnɛyakɛbagaw le ye i kokɛɲɔgɔnw ye.

¹⁹I bɛ i da don kojugu ra,

i nɛnkun bɛ nanbarakow labɛn.

²⁰I bɛ sigi ka i balema kɔrɔfɔ,

i bɛ i yɛrɛ baden tɔgɔ cɛn.

²¹I bɛ nin kow le kɛ, nka ne tɛ kuma minkɛ,

a kɛra i ɲana ko ne fana bɛ i n’a fɔ ele;

nka sisan ne bɛ i jaraki, ka i ta kɛwalew bɛɛ bla i yɛrɛ ɲa kɔrɔ.»

²²Aw minw bɛ ɲina Ala kɔ, aw ye nin faamu,

ni o tɛ, ne bɛna aw sogo tigɛtigɛ, mɔgɔ tɛna sɔrɔ ka aw bɔsi.

²³Minw bɛ barakalari kɛ o ta saraka ye, olugu le bɛ ne bonya;

minw bɛ o tagamacogo kɔrɔsi,

ne bɛna a yira olugu le ra ko ne Ala le ye o kisibaga ye.

Jurumunkɛbaga ta yafamadaari

¹Dɔnkirilabagaw kuntigi. Dawuda ta Zaburu. ²Masacɛ Dawuda tun jɛnna ni Huri ta muso Baseba ye; o kɔ, cira Natan tagara a fɛ ka taga a ladi. Dawuda ka nin yafamadaari le kɛ o wagati ra51.2 Aw ye Samawilu flanan sura 11–12 flɛ..

³E, Ala, makari ne ra

i ta ɲumanya kosɔn;

a kɛ i ta hinaba kosɔn,

i ye ne ta hakɛw jɔsi ka bɔ yi.

⁴Ne ko, ka ne bɔ ne ta terenbariyaw bɛɛ ra pewu;

ne saninya ka bɔ ne ta jurumun na.

⁵Sabu ne yɛrɛ k’a lɔn ko ne ka i hakɛ ta;

ne ta jurumunw bɛ ne ɲa kɔrɔ tuma bɛɛ.

⁶Ne ka jurumun kɛ ka ele kelen le hakɛ ta;

i bɛ fɛn min jate kojugu ye, ne ka o le kɛ.

O kosɔn ni i ka min o min latigɛ ne kama, o bɛnnin lo,

ni i ka kiti min ben ne kan, mɔgɔ si tɛna se ka i jaraki o ra.

⁷Can lo, ne worora ni terenbariya le ye,

ne bamuso ka ne jurumuntɔ le kɔnɔ ta.

⁸Nka ele b’a fɛ can le ye kɛ adamaden jusukun na;

o ra, hakiritigiya don fɔ ne jusukun kɔnɔ.

⁹Ne saninya ni izope51.9 O tun bɛ izopeyiri flaburuw le su ji ra walama jori ra, k’a seriseri mɔgɔw kan, walama fɛn dɔw kan, ka o saninya, ka kaɲa ni Layirikɔrɔ ta sariyaw ye (Bɔri 12.22). ye, ni o kɛra, ne bɛna saninya;

ne ko, ni o kɛra, ne bɛna gbɛ pepepe.

¹⁰A to ne jusu ye diya, k’a to ne ye ninsɔndiya tuun;

ni o kɛra, i tun ka ne min farikolo bɛɛ karikari, ne belen bɛna ɲagari tuun.

¹¹I ɲa yɛlɛma ka bɔ ne ta jurumun na,

i ye ne ta terenbariyakow bɛɛ jɔsi ka bɔ yi.

¹²E, Ala, jusukun saninyanin dɔ dan ka o don ne kɔnɔ,

hakiriɲuman labɛn ka o don ne kɔnɔ.

¹³I kana ne gbɛn ka bɔ i yɛrɛ ɲa kɔrɔ,

i kana i ta nin saninman bɔ ne jusukun na.

¹⁴Ne kisi, ka o kisiri ɲagari don ne jusukun na,

ka hakiriɲuman di ne ma, ka baraka don ne ra.

¹⁵Ni o kɛra, ne bɛna i hakɛtabagaw karan i ta siraw ra;

jurumunkɛbagaw bɛna sekɔ ka na i fɛ.

¹⁶E, Ala, ne ta kisiri tigi Ala, ne ka mɔgɔ min faga

o fagari hakɛ bɔ ne kunna;

ni o kɛra, ne da bɛna pɛrɛn ni kanba ye

ka i ta terenninya ko lakari.

¹⁷E, Matigi, ne dagbolow labla,

janko ne da ye i tando.

¹⁸I tɛ saraka fɛ,

ni o tɛ, ne tun bɛna dɔ bɔ i ye;

nka i tɛ sɔn saraka jɛnitaw ma.

¹⁹Saraka min ka di Ala ye, o ye adamaden nimisabagatɔ le ye,

kojugu nimisa bɛ mɔgɔ min jusukun na, fɔ k’a jusu kasi,

Ala, i tɛ ban o tigi ra.

²⁰Koɲuman kɛ Siyɔn dugu ye, i ta nɛɛma kosɔn;

Zeruzalɛmu laminikogow lɔ kokura!

²¹Ni o kɛra, saraka ɲanamanw ko bɛna diya i ye,

o saraka jɛnita minw kuturu bɛ di i ma;

an bɛna misitoran sarakaw bɔ i ye i ta sarakajɛnifɛn kan.

Naforo kanubagajugu labancogo

¹Dɔnkirilabagaw kuntigi. Dawuda ta dɔnkiri. ²A ka nin dɔnkiri la wagati min na Edɔmukacɛ Dɔgi52.2 Dɔgi ka min kɛ, o kow sɛbɛra Samawilu fɔlɔ 21.8; 22.9-10. tagara a fɔ Sawuli ye ko Dawuda tagara Ayimelɛki ta so.

³Ele cɛfari, mun kosɔn i bɛ i yɛrɛ tando i ta kojugu kosɔn,

k’a sɔrɔ Ala ta ɲumanya tɛ ban ka ye?

⁴I nɛnkun bɛ cɛnri kɛ i ko muru dadiman;

i bɛ janfaw siri.

⁵Kojugu ka di i ye ka tɛmɛ koɲuman kan,

faninya ka di i ye ka tɛmɛ can kan.52.5 Nin yɔrɔ ra a sɛbɛra heburukan na ko: Sela.

⁶Mɔgɔ halakikumaw dama le ka di i ye,

ele mɔgɔ nɛnkun nanbaratɔ!

⁷O kosɔn Ala bɛna ele halaki pewu;

a bɛna i mina, ka i sama ka bɔ i ta bon kɔnɔ,

ka i lilinw bɔn, ka i bɔ dunuɲa ra mɔgɔ ɲanamanw cɛ ra pewu.52.7 Nin yɔrɔ ra a sɛbɛra heburukan na ko: Sela.

⁸Mɔgɔ terenninw bɛna o ye ka siran;

o bɛna yɛrɛko i ma, k’a fɔ ko:

⁹«Mɔgɔ min tun ma sɔn ka Ala kɛ a dogoyɔrɔ ye, ale le ye nin ye;

a tun k’a jigi la a ta naforoba le kan,

ka baraka sɔrɔ a ta kɛwalejugu baraka ra.»

¹⁰Nka ne kɔni, ne bɛ Ala ta so kɔnɔ i ko oliviyesun nugunin;

ne jigi bɛ Ala ta ɲumanya kan wagati bɛɛ, ani tuma bɛɛ.

¹¹Ne bɛ i fo ka i waleɲumanlɔn wagati bɛɛ, i ta kokɛninw kosɔn;

ne jigi bɛ i tɔgɔ kan, sabu i ka ɲi i ɲasiranbagaw ma.

Alaɲasiranbariya laban ye maroya ye

(Zaburu 14)

¹Dɔnkirilabagaw kuntigi. Dawuda ta karan; dɔnkiri min bɛ la ni filen ye.

²Mɔgɔ kolɔnbariw b’a fɔ o yɛrɛ kɔnɔ ko: «Ala tɛ yi!»

O mɔgɔw ye mɔgɔkolonw le ye, o ta kɛwalew bɛɛ haramunin lo;

o si tɛ koɲuman kɛ.

³Ala bɛ to sankolo ra ka jɛngɛ ka adamadenw flɛ,

k’a flɛ ni a kɛra ko mɔgɔ bɛ yi, hakiri bɛ min fɛ,

min ye Alaɲinibaga ye.

⁴O bɛɛ ka o yɛrɛ mabɔ Ala ra, o bɛɛ kɛra ɲacintanw ye;

o si tɛ koɲuman kɛ, hali mɔgɔ kelenpe.

⁵Minw bɛ kojugu kɛra, yala olugu tɛ ko lɔn le wa?

O bɛ ne ta mɔgɔw domuna i ko to;

o fana tɛ Matigi Ala bato.

⁶Sisan jatigɛba le bɛna o mina,

k’a sɔrɔ siranya ko tɛ yi.

Minw ka aw lamini ko o bɛ aw kɛrɛ, Ala bɛna olugu kolow bɛɛ yɛrɛgɛ.

Aw bɛna o lamaroya, sabu Ala banna o ra.

⁷Jɔntigi le bɛna to Siyɔn ka Izirayɛli kisi!

Ni Ala nana a ta mɔgɔw ta bonya lasekɔ o ma tuma min na,

Yakuba ta mɔgɔw bɛna ɲagari, Izirayɛlimɔgɔw bɛna ninsɔndiya.

Ala ye mɔgɔ degunin bɔsibaga ye

¹Dɔnkirilabagaw kuntigi. Dɔnkiri min bɛ la ni gɔni ye. Dawuda ka nin dɔnkiri la, ²wagati min Zifikaw nana a fɔ Sawuli ye ko: «Dawuda dogonin bɛ anw fɛ yi!»54.2 Nin kumaw bɔ sɔrɔ Samawilu fɔlɔ 23.15-24; 26.1-5.

³E, Ala, ne kisi i tɔgɔ baraka ra;

kiti tigɛ ka ne ta jo di ne ma, i ta sebagaya baraka ra.

⁴E, Ala, ne ta daariri lamɛn,

i toro malɔ ne darakan na.

⁵Sabu Alaɲasiranbari dɔw wurira ne kama,

mɔgɔ fariman dɔw b’a fɛ ka ne nin bɔ;

o tɛ Alako fan si le jate.54.5 Nin yɔrɔ ra a sɛbɛra heburukan na ko: Sela.

⁶Nka, a flɛ, Ala le ye ne dɛmɛbaga ye,

Matigi le bɛ baraka don ne nin na.

⁷A bɛna ne juguw ta kojuguw hakɛ ben o yɛrɛ kan.

E, Ala, o halaki i ta kankelentigiya kosɔn.

⁸Ne bɛna ne yɛrɛ diyanya sarakaw bɔ i ye ni ne jusukun bɛɛ ye;

Matigi Ala, ne bɛna i fo ka i waleɲumanlɔn, ka i tɔgɔ bonya, sabu i tɔgɔ ka ɲi.

⁹A bɛ ne bɔsi ka bɔ ne ta degukow bɛɛ ra.

Ne bɛ ne ɲa lɔ ne juguw ra ka o bentɔ flɛ.

Terijugu mɔgɔjanfabagaw

¹Dɔnkirilabagaw kuntigi. Dɔnkiri min bɛ la ni gɔni ye. Dawuda ta karan.

²E, Ala, i toro malɔ ne ta daariri ra;

i kana dogo, ka ban ka ne ta makarikanw lamɛn.

³I janto ne kumakan na, i ye ne jaabi;

sabu ne hakiri ɲagamina, ne ta jusukasi kosɔn.

Ne bɛ ŋuna

⁴ne juguw ta kumakan kosɔn,

ani mɔgɔjuguw ta juguya kosɔn.

O bɛ kojuguw kɛ ne ra,

o dimininba bɛ ben ne kan.

⁵Ne sɔnkun bɛ panpanna,

saya jatigɛ ka ne mina.

⁶Siranya ni yɛrɛyɛrɛ ka ne mina,

jatigɛba ka ne datugu fan bɛɛ ra.

⁷Ne ko: «Jɔn le bɛna kaman di ne ma sa, ne ye kɛ i ko tugani?

Ne tun bɛna wuri ka taga sigi yɔrɔ wɛrɛ.

⁸A flɛ, ne tun bɛna bori ka taga fɔ yɔrɔjan,

ne tun bɛna taga to kongokolon kɔnɔ.55.8 Nin yɔrɔ ra a sɛbɛra heburukan na ko: Sela.

⁹Ne tun bɛna teliya ka taga dogoyɔrɔ dɔ ɲini,

janko ka kisi fɔɲɔba ni sanfɔɲɔ ma.»

¹⁰E, Matigi, o ta kuma ɲagami, ka o kan taran;

sabu ne ɲa bɛ jusukungbɛlɛya ni kɛrɛ le ra dugu kɔnɔ.

¹¹Su ni tere, o kow le bɛ kɛra dugu kogow kunna, ka dugu lamini;

terenbariyakow, ani tɔɔrɔ bɛ dugu kɔnɔ,

¹²cɛnri bɛ yi,

tɔɲɔri ni nanbara tɛ ban dugu jamalajɛnyɔrɔw ra ka ye.

¹³Ne jugu dɔ le tɛ ne mafiyɛnyara;

ni o dɔ tun lo, ne belen tun bɛna o muɲu.

Ne kɔninyabaga dɔ le ma wuri ne kama;

ni o dɔ tun lo, ne tun bɛna dogo o tigi ra.

¹⁴Nka ele lo, ne ni ele min bɛɛ ye mɔgɔ kelen ye,

ele min tun ye ne yɛrɛ teri ye, ani ne jɛnɲɔgɔn,

¹⁵ne ni ele min ta jɛnɲɔgɔnya tun ka di kosɛbɛ;

anw le tun bɛ kɛ ni jama ye, ka taga ɲɔgɔn fɛ Ala ta batoso kɔnɔ.

¹⁶Ayiwa, saya ye bara ka cun o kan,

o ɲanaman ye don saya dibi ra;

sabu juguya bɛ o ta so, a bɛ o jusukun na.

¹⁷Ne kɔni, ne bɛ Ala le wele;

Matigi Ala bɛna ne kisi.

¹⁸Wula fɛ, ani sɔgɔma, ani teregban fɛ

ne bɛ maɲumankokanw fɔ, ka ŋuna;

a fana bɛ ne kan mɛn.

¹⁹Kɛrɛ min dabɔra ne kama, a bɛna ne bɔsi ka bɔ o ra,

ka hɛra kɛ ne ye,

hali ni ne kɛrɛbagaw ka ca.

²⁰Ala bɛna ne lamɛn, ka o bɛɛ majigi,

ale min bɛ a ta masaya ra wagati bɛɛ.55.20 Nin yɔrɔ ra a sɛbɛra heburukan na ko: Sela.

Olugu kɔni tɛ o jogo yɛlɛma,

o fana tɛ siran Ala ɲa.

²¹Ne jɛnɲɔgɔn bɛ kojugu kɛ a teriw ra,

a tun ka teriya layiri min ta, a bɛ o cɛn.

²²A darakuma nugunin lo ka tɛmɛ nare kan,

nka kɛrɛ dogonin bɛ a jusukun na;

a ta kumaw ka di ka tɛmɛ turu kan,

nka a bɛ i ko kɛrɛkɛmuru bɔnin a la ra.

²³I ta ko bɛɛ to Matigi Ala boro,

ni o kɛra, a bɛna baraka don i ra;

a tɛ sɔn ka mɔgɔ terennin to a ye ben fiyewu.

²⁴Nka ele Ala kɔni, ele bɛna nin mɔgɔw lajigi fɔ kaburu kɔnɔnɔ.

Mɔgɔfagabagaw, ani nanbaramɔgɔw tɛna hali o ta si sandaw tarancɛ sɔrɔ.

Nka ne bɛ ne jigi la ele Ala kan.

Ala b’a janto a ta mɔgɔw ra

¹Dɔnkirilabagaw kuntigi. A bɛ la dɔnkiri min lacogo ra, o tɔgɔ ye ko «Yɔrɔjanna tugani kasibari.» Dawuda ka nin dɔnkiri la wagati min Filisikaw tagara a mina Gati dugu kɔnɔ56.1 Aw ye Samawilu fɔlɔ 21.11-16 flɛ..

²E, Ala, makari ne ra, sabu mɔgɔw bɛ ne nin tɔɔrɔra;

lon o lon o bɛ ne kɛrɛ, o bɛ ben ne kan.

³Lon o lon ne juguw bɛ ne tɔɔrɔ;

ne kɛrɛbagaw cayara, fɔ o bɛ waso ne ra.

⁴Nka ni siranya ka ne mina wagati min na,

ne bɛ ne jigi la ele le kan.

⁵Ne bɛ Ala ta kuma tando;

ne jigi bɛ Ala le kan, ne tɛ siran;

adamadenw bɛ se ka mun le kɛ ne ra?

⁶Lon o lon o b’a fɛ ka ne ta kow cɛn le;

o bɛ kojugu dama le miiri ne ta ko ra.

⁷O bɛ janfa siri ne kama, o bɛ dogo ka ne kɔrɔsi,

o bɛ ne tɛmɛyɔrɔw bɛɛ kɔrɔsi,

sabu o bɛ ne fagayɔrɔ le ɲini.

⁸Yala o bɛna bɔsi k’a sɔrɔ o bɛ nin terenbariyaw kɛra wa?

Ala, i ta dimi kosɔn, nin mɔgɔw halaki!

⁹I bɛ ne senlayɔrɔw bɛɛ kelen kelen jate, ka ne to ne ta dunuɲalatigɛ ta yaala ra.

Ne ɲajiw mina ka o mara i ta minan kɔnɔ;

yala a bɛɛ hakɛya sɛbɛnin tɛ i ta kitabu kɔnɔ wa?

¹⁰Ni ne nana i wele lon min na,

o lon na ne juguw bɛna sekɔ ni o kɔ ye;

o ra ne bɛna a lɔn ko Ala bɛ ni ne ye.

¹¹Ne bɛ Ala ta kuma tando,

ne bɛ Matigi Ala ta kuma tando.

¹²Ne jigi bɛ Ala le kan, ne tɛ siran;

adamadenw bɛ se ka mun le kɛ ne ra?

¹³E, Ala, ne ka dajuru min ta i fɛ, ne ka kan ka o dafa.

Ne bɛna barakalari sarakaw bɔ i ye,

¹⁴sabu i ka ne nin kisi saya ma,

i ma sɔn k’a to ne sen ye talon;

o ra, ne ɲanaman bɛna tagama Ala ɲa kɔrɔ yeelen na.

Ala ta mɔgɔw jigi ye Ala ye

(Hayan 8–12; Zaburu 108.2-6)

¹Dɔnkirilabagaw kuntigi. A bɛ la dɔnkiri min lacogo ra, o tɔgɔ ye ko «I kana a halaki.» Dawuda ka nin dɔnkiri la wagati min a borira Sawuli ɲa ka taga dogo kuruwo kɔnɔ57.1 Aw ye Samawilu fɔlɔ 22.1-2; 24.1-2 flɛ..

²Makari ne ra, Ala, makari ne ra!

Sabu ne ka ne nin karifa ele le ma.

Ne bɛ ne yɛrɛ dogo i kaman suma kɔrɔ,

sani k’a to kojugu wagati ye tɛmɛ.

³Ne bɛ kule ka Ala kɔrɔtaninba wele,

Ala min bɛ ko bɛɛ kɛ ne ye k’a dafa.

⁴A bɛna to sankolo ra ka ne kisi,

a bɛna ne tɔɔrɔbagaw mafiyɛnya.57.4 Nin yɔrɔ ra a sɛbɛra heburukan na ko: Sela.

Ala bɛna a ta ɲumanya ni a ta kankelentigiya lajigi ne kan.

⁵Ne kɔni lanin bɛ jaraw le cɛ ra,

minw bɛ adamaden sogo ɲimi;

o ɲinw bɛ i ko tamanw, ani biɲɛw,

o nɛnkun bɛ i ko kɛrɛkɛmuru dadiman.

⁶E, Ala, i tɔgɔ ye kɔrɔta fɔ ka tɛmɛ sankolo kan,

i ta bonya ye kɛ dunuɲa bɛɛ lajɛnnin kunna.

⁷O tun ka jɔ le siri ne sen kɔrɔ

janko ka ne laben;

o ka dinga sogi ne ɲa,

nka olugu yɛrɛ le nana ben o dinga kɔnɔ.57.7 Nin yɔrɔ ra a sɛbɛra heburukan na ko: Sela.

⁸Ne hakiri sigira, Ala, ne hakiri sigira;

ne bɛna dɔnkiri la ka Ala tando.

⁹Ne nin, i kunu!

Ne ta kora ni ne ta gɔni, aw ye kunu!

Ne bɛna dugugbɛda lakunu.

¹⁰E, Matigi, ne bɛ i fo ka i waleɲumanlɔn jamana mɔgɔw cɛ ra;

ne bɛ dɔnkiri la ka i tando siyaw cɛ ra,

¹¹sabu i ta ɲumanya bonya bɛ se fɔ sankolo kɔnɔ,

i ta kankelentigiya bɛ se fɔ sankolo ma.

¹²E, Ala, i tɔgɔ ye kɔrɔta fɔ ka tɛmɛ sankolo kan,

i ta bonya ye kɛ dunuɲa bɛɛ lajɛnnin kunna.

Ala le ye mɔgɔjugu sarabaga ye

¹Dɔnkirilabagaw kuntigi. A bɛ la dɔnkiri min lacogo ra, o tɔgɔ ye ko «I kana a halaki» Dawuda ta dɔnkiri.

²Aw fangatigiw, yala can ra aw bɛ terenninya sira kan wa?

Yala aw bɛ adamadenw ta kiti tigɛra ka ɲa wa?

³Fiyewu! Aw bɛ tugu ka kojuguw kɛ,

aw borow le bɛ kojugu caya jamana kɔnɔ.

⁴Mɔgɔjuguw bɛ sirajugu ta kabini o worolon na,

faninyafɔbagaw bɛ o yɛrɛ lafiri kabini o worolon.

⁵Baga min bɛ o ra, o baga bɛ i ko sa ta baga,

a bɛ i ko fɔnfɔnnin min tɛ mɛnni kɛ, min b’a toro datugu,

⁶janko a kana sanɛgɛbaga kan mɛn,

hali sanɛgɛbagaw bɛɛ ra ceguman.

⁷E, Ala, o ɲinw karikari o da kɔnɔ!

Matigi Ala, nin jarakanbelenw dagbagaw karikari!

⁸O ye tunu i ko ji bɛ woyo ka tunu cogo min na;

ni o ka o ta kalan bon, o ta biɲɛw kana foyi ɲa.

⁹O ye kɛ i ko tɔnɔnkɔ, min tagatɔ bɛ to ka yeele tere kɔrɔ.

O ye kɛ i ko den min kɔgɔbari worora, o ɲa kana tere yeelen ye.

¹⁰Sani daga ye bɔ ŋani tasuma fundɛnin kala ma,

ni ŋani kɛnɛ lo, walama ni a jalan lo o,

sanfɔɲɔ ye mɔgɔjugu ta ka taga ni a ye.

¹¹Mɔgɔ terennin bɛna ɲagari, sabu Ala k’a mɔnɛbɔ;

a bɛna a sen ko mɔgɔjuguw jori le ra.

¹²Mɔgɔw bɛna a fɔ ko: «Can lo, mɔgɔ terennin ta baraji bɛ yi;

can lo, Ala bɛ yi, min bɛ kiti tigɛ dunuɲa kɔnɔ.»

Ala le ye a ɲasiranbagaw karifayɔrɔ ye

¹Dɔnkirilabagaw kuntigi. A bɛ la dɔnkiri min lacogo ra, o tɔgɔ ye ko «I kana a halaki!» Dawuda ka nin dɔnkiri la wagati min Sawuli ka mɔgɔw ci ka taga a ta bon lamini, janko a bɔtɔ, o y’a faga59.1 Aw ye Samawilu fɔlɔ 19.11-17 flɛ..

²E, Ala, ne bɔsi ka bɔ ne juguw boro,

minw bɛ wurira ne kama, ne tanga olugu ma.

³Ne bɔsi ka bɔ mɔgɔ terenbariw boro,

ne kisi ka bɔ mɔgɔfagabagaw boro.

⁴Sabu o dogonin ye nin ye ka ne kɔnɔ;

mɔgɔ jusu farimanw lo.

O ka janfa siri ne kama, k’a sɔrɔ ne ma hakɛko kɛ,

ne ma jurumun kɛ, Matigi Ala.

⁵Ne ma terenbariyako si kɛ o ra, nka o bɛ boriborira ka o yɛrɛ labɛn ne kama.

I kunu, ka na o flɛ, i ye ne dɛmɛ!

⁶Ele, Matigi Ala, Fangatigi, Izirayɛli ta Ala,

i wuri ka siyaw bɛɛ kɛrɛ!

I kana makari nin janfamɔgɔw ni nin mɔgɔ terenbariw si ra.59.6 Nin yɔrɔ ra a sɛbɛra heburukan na ko: Sela.

⁷Wula fɛ o bɛ sekɔ ka na;

o bɛ kasi i ko wuruw;

o bɛ yaala ka dugu lamini.

⁸A flɛ, kumakolon tɛ ban o da ra ka ye,

o darakumaw ka jugu i ko kɛrɛkɛmuruw;

o b’a fɔ ko: «Mɔgɔ si tɛ an lamɛnna?»

⁹Nka ele, Matigi Ala, ele bɛ yɛrɛko o ma;

ele bɛ siyaw bɛɛ lɔgɔbɔ.

¹⁰E, ne ta barakatigi, ne ɲa lɔnin bɛ ele le ra,

sabu ele le ye ne tangabaga ye.

¹¹Ne ta ɲumanya tigi Ala bɛna na ne fɛ;

Ala bɛna a to ne ye ne juguw bentɔ flɛ.

¹²I kana o faga, janko ne ta mɔgɔw kana na ɲina o kɔ;

nka i ta sebagaya baraka ra, o janjan le, ka o majigi,

Matigi, an tangabaga Ala.

¹³O darakuma bɛɛ ye jurumun le ye;

o kosɔn o yɛrɛ ta yɛrɛbonya ye kɛ jan ye ka o mina,

sabu o bɛ kumajuguw ni faninyakumaw dama le fɔ.

¹⁴I jusu gbannin ye o bɛɛ halaki;

o halaki fɔ ka na o bɛɛ ban pewu!

O ra, bɛɛ bɛna a lɔn, ka taga se fɔ dunuɲa dan na,

ko Ala le ye Yakuba ta mɔgɔw59.14 Yakuba ta mɔgɔw, o kɔrɔ ye Izirayɛlimɔgɔw. ta masacɛ ye.59.14 Nin yɔrɔ ra a sɛbɛra heburukan na ko: Sela.

¹⁵Wula fɛ, o bɛ sekɔ ka na,

o bɛ kasi i ko wuruw,

o bɛ yaala ka dugu lamini.

¹⁶O bɛ yaalayaala ka o ta domuni ɲini;

ni o ma fa, o bɛ to ka kule ci.

¹⁷Ne kɔni, ne bɛna dɔnkiri la ka i ta sebagaya lakari,

lon o lon sɔgɔma, ne bɛna i ta ɲumanya ko fɔ.

Sabu ele le ye ne dogoyɔrɔ ye;

ne ta degulonw na, ele le ye ne karifayɔrɔ ye.

¹⁸E, ne ta barakatigi, ne bɛna dɔnkiri la ka i tando,

sabu Ala le ye ne tangabaga ye,

ne ta Ala ye ɲumanya tigi le ye.

Ala bɛ sesɔrɔri di a ta mɔgɔw ma

(Hayan 7–14; Zaburu 108.7-14)

¹Dɔnkirilabagaw kuntigi. Nin dɔnkiri bɛ la dɔnkiri min lacogo ra, o tɔgɔ ye ko «Jɛnɲɔgɔnya yirifiyeren.» Dawuda ka nin dɔnkiri la, janko ka mɔgɔw karan, ²wagati min a ta mɔgɔw tun tagara Mesopotami mara ta Sirikaw kɛrɛ, ani Soba mara ta Sirikaw, ani o kɔ fɛ Yohabu sekɔra ka na Edɔmuka cɛ waga tan ni fla faga Kɔgɔ kɛnɛgbɛ yɔrɔ ra60.2 Aw ye Samawilu flanan 8.3-14; Kibaroyaw fɔlɔ 18.3-13 flɛ..

³E, Ala, i banna an na, k’a to an juguw ka an gbɛn ka an janjan;

i tun dimina an kɔrɔ, nka sabari ka sɔn an na tuun.

⁴I ka dugukolo yɛrɛyɛrɛ, fɔ k’a pɛrɛn;

dugukolo pɛrɛndaw lalaga, sabu a bɛ yuguyugura.

⁵I ka kogbɛlɛnw lase i ta mɔgɔw ma,

k’a kɛ i n’a fɔ i ka duvɛn le di o ma, o k’a min fɔ ka ɲanamini.

⁶Nka i ka tagamasiyɛn dɔ di i ɲasiranbagaw ma,

min bɛ o tanga o juguw ta biɲɛw ma.60.6 Nin yɔrɔ ra a sɛbɛra heburukan na ko: Sela.

⁷An jaabi, ka an kisi ni i boro barakaman ye,

janko i ta mɔgɔ kanuninw ye bɔsi.

⁸Ala tora a ta yɔrɔ saninman* kɔnɔ, ka kuma, ko:

«Ne bɛna se sɔrɔ, ka Sikɛmu ta mara taran k’a nin,

ka Sukɔti dingakɔnɔyɔrɔ suma k’a nin.

⁹Galadi ta mara ye ne ta le ye,

Manase ta mara ye ne ta le ye,

Efirayimu ta mara ye ne kun dogoyɔrɔ ye,

Zuda ta mara ye ne ta masacɛbere ye,

¹⁰Mohabu ta mara ye ne ta kominan ye,

ne bɛ ne ta sanbara bɔ k’a firi Edɔmu ta mara le kan;

ne bɛ se sɔrɔ, fɔ ka pɛrɛn Filisikaw ta jamana kunna.»

¹¹Ala, jɔn le bɛna ne lataga dugu barakaman kɔnɔ sa?

Jɔn le bɛna taga ni ne ye Edɔmu?

¹²Ele Ala tɛ wa? Ele min tun banna an na,

ele min tun tɛ bɔra ni an ta kɛrɛkɛcɛw ye tuun, Ala!

¹³An dɛmɛ, ka an bɔsi ka bɔ an juguw boro!

Sabu adamaden ta dɛmɛri ye gbansan le ye.

¹⁴Nka ni Ala bɛ ni an ye, an bɛna kobaw kɛ;

ale le bɛna an juguw dɔndɔn fɔ ka o ɲɔɲɔ.

Ala le ye a ta mɔgɔw karifayɔrɔ ye

¹Dɔnkirilabagaw kuntigi. Dɔnkiri min bɛ la ni gɔni ye. Dawuda ta Zaburu.

²E, Ala, ne kulekan lamɛn!

I janto ne ta daarikan na!

³Ka ne to hali dunuɲa dan na, ne bɛ kule ka i wele,

sabu ne jigi tigɛra.

Farakuru min yɔrɔ ka jan ne ma,

ne layɛlɛn o kan,

⁴sabu ele le ye ne karifayɔrɔ ye,

i ko sankasojan min bɛ ne tanga ne juguw ma.

⁵Ne b’a fɛ ka to i ta bon kɔnɔ tuma bɛɛ,

ka ne yɛrɛ dogo i kamanw kɔrɔ;61.5 Nin yɔrɔ ra a sɛbɛra heburukan na ko: Sela.

⁶sabu Ala, ne ka dajuruw ta i fɛ fɛn minw na, i ka o kɛ ne ye;

i ka fɛn minw mara i tɔgɔ ɲasiranbagaw ye, i bɛna o di ne fana ma.

⁷Dɔ fara masacɛ si kan!

A ye to si ra ka wagatijan kɛ!

⁸A siginin ye to masaya ra Ala ɲa kɔrɔ wagati bɛɛ!

A to i ta ɲumanya ni i ta kankelentigiya y’a mara!

⁹Can lo, ne bɛna dɔnkiri la ka i tɔgɔ tando tuma bɛɛ,

ka ne ta dajuruw dafa lon o lon.

Ala kelenpe le ye kisiri tigi ye

¹Dɔnkirilabagaw kuntigi, Yedutun. Dawuda ta Zaburu.

²Ne nin, i je ka Ala kelenpe le makɔnɔ;

ne ta kisiri bɛ bɔ ale le ra.

³Ɔnhɔn, ale le ye ne ta barakatigi Ala ye, ani ne ta kisiri tigi;

ne tangabaga lo; foyi tɛna ne jɛngɛ ka bɔ ne nɔ ra.

⁴Tuma juman le aw bɛna nin dabla:

Aw bɛɛ bɛ ben mɔgɔ dɔ kan,

aw bɛ jɛn o tigi ra k’a bugɔ k’a faga,

i n’a fɔ mɔgɔ bɛ kogo jɛngɛnin tɔ laben cogo min na,

i n’a fɔ mɔgɔ bɛ sansan cɛnnin tɔ waraga cogo min na!

⁵Can lo, o bɛ janfa siri janko ka mɔgɔ laben ka bɔ a ta lɔyɔrɔɲuman na;

faninya le ka di o ye.

O bɛ dugawu kɛ i ye ni o da ye,

k’a sɔrɔ o bɛ i danga o jusukun na.62.5 Nin yɔrɔ ra a sɛbɛra heburukan na ko: Sela.

⁶Ɔnhɔn, ne nin, i je ka Ala kelenpe le makɔnɔ;

sabu ne jigi ye ale le ye.

⁷Ale le ye ne ta barakatigi ye, ani ne ta kisiri tigi;

ne tangabaga lo; ne tɛna jɛngɛ ka bɔ ne nɔ ra.

⁸Ne ta kisiri ni ne ta bonya bɛ bɔ Ala le ra;

ne ta barakatigi Ala barakaman, ani ne karifayɔrɔ ye Ala le ye.

⁹Aw adamadenw, aw ye aw yɛrɛ karifa a ma wagati bɛɛ;

aw ye aw jusukunnakow bɛɛ fɔ a ye,

sabu Ala le ye an dogoyɔrɔ ye.62.9 Nin yɔrɔ ra a sɛbɛra heburukan na ko: Sela.

¹⁰Can lo, adamadenw tɛ foyi ye;

mɔgɔw ye fɛngbansanw le ye.

Hali ni i ka o bɛɛ bla sumanikɛnan dɔ kɔnɔ,

o bɛɛ lajɛnnin bɛ fiyɛnya ka tɛmɛ hali fɔɲɔ kan.

¹¹Aw kana aw jigi la tɔɲɔri kan,

walama ka aw boromala sonyari kan gbansan.

Hali ni naforo ka caya cogo o cogo,

aw kana aw jigi la a kan.

¹²Ala ka nin fɔ siɲaga kelen,

ka sekɔ k’a fɔ siɲaga fla, ne k’a mɛn;

a ko: «Fanga ye Ala ta le ye.»

¹³Ɲumanya fana ye ele ta le ye, an Matigi!

Sabu ele le bɛ bɛɛ sara ka kaɲa ni a tigi ta kɛwalew ye.

Ala ta ɲumanya ka fisa ni fɛn bɛɛ ye

¹Dawuda ta Zaburu. A ka min la k’a to Zuda kongokolon kɔnɔ.

²E, Ala, ele le ye ne ta Ala ye, ne bɛ i ta jɛnɲɔgɔnya le ɲini,

i lɔgɔ bɛ ne ra i ko jiminlɔgɔ;

ne farikolo bɛ sama i nɔ fɛ,

i ko dugukolo janin, sɛgɛnin, jintan bɛ ji fɛ cogo min na.

³O kosɔn ka ne to i ta yɔrɔ saninman kɔnɔ, ne bɛ ne ɲa lɔ i ra,

janko ka i ta sebagaya ni i ta bonya flɛ,

⁴sabu i ta ɲumanya sɔrɔri ka fisa ni si sɔrɔri ye;

o kosɔn ne bɛ i bonya ni ne darakumaw ye.

⁵Ne bɛ ne boro fla lawuri i tɔgɔ ra,

ka baraka la i ye ne si bɛɛ ra.

⁶Ne nin wasara, i n’a fɔ mɔgɔ min ka domuni dimanyɔrɔw le domu ka fa;

ne ɲagarininba, ne da bɛna i tando.

⁷Ka ne to ne layɔrɔ ra, ni ne hakiri ka jigi i ra,

ne bɛ to ka miiri i ra su wagatiw bɛɛ ra.

⁸Sabu ele le ye ne dɛmɛbaga ye,

ne bɛ to i kaman suma kɔrɔ ka ɲagarikanw fɔ.

⁹Ne nin sirinin bɛ i ra,

i boro barakaman bɛ ne mina.

¹⁰Nka minw b’a fɛ ka ne nin halaki,

i bɛna olugu lajigi fɔ dugukolo jukɔrɔ.

¹¹I bɛna o labla murutigiw ye,

k’a to o sogo ye kɛ kongowuruw ta domuni ye.

¹²Nka masacɛ bɛna ɲagari Ala ta jɛnɲɔgɔnya kosɔn;

mɔgɔ o mɔgɔ bɛ kari ni Ala tɔgɔ ye, o tigi kun bɛ kɔrɔta,

sabu faninyafɔbagaw da bɛna datugu.

Ala bɛ mɔgɔjugu ta ko bɛɛ kala ma

¹Dɔnkirilabagaw kuntigi. Dawuda ta Zaburu.

²E, Ala, ne ta maɲumankokan lamɛn;

ne si tanga, sabu ne juguw ɲasiran bɛ ne ra.

³Mɔgɔjuguw ka jɛn min siri, ne kisi o ma,

ka ne bɔ kojugukɛbagaw ta mankanw cɛ ra.

⁴O bɛ o nɛnkun dabɔ, k’a da diya i ko kɛrɛkɛmuru,

o bɛ o ta kumajuguw labɛn i ko biɲɛw,

⁵ka dogo ka mɔgɔ jusukungbɛnin bon;

o bɛ bara a ra, k’a bon, hali o tɛ siran.

⁶O bɛ o yɛrɛ jija kojugu le ra,

k’a fɔ ko olugu bɛna jan dɔw dogo ka o la mɔgɔw ɲa;

o b’a fɔ ko: «Jɔn le bɛ an yera?»

⁷O bɛ kojugu ŋaninya,

k’a fɔ ko: «An ka dabarijugu min siri, o ɲana yɛrɛ le!»

Can lo, mɔgɔ kɔnɔnɔkow ni a jusukunnakow ye dingadunba le ye min dunya tɛ lɔn.

⁸Nka Ala bɛna o bon ni biɲɛ dɔ ye;

o bɛna bara ka benben.

⁹O yɛrɛ nɛnkun le bɛna kɛ sababu ye ka o laben;

ni mɔgɔ o mɔgɔ ka o ye, o tigi b’a kun yuguyugu.

¹⁰Ni o kɛra, adamadenw bɛɛ bɛna siran;

o bɛna Ala ta kobaw lakari,

sabu o bɛna a ta kokɛninw kɔrɔ faamu.

¹¹Mɔgɔ terennin bɛ ɲagari Matigi Ala kosɔn,

a b’a yɛrɛ karifa Matigi Ala ma;

mɔgɔ jusuɲumanw bɛɛ kun bɛna kɔrɔta.

Ala b’a janto a ta danfɛnw na

¹Dɔnkirilabagaw kuntigi. Dawuda ta Zaburu. Dɔnkiri.

²E, Ala, i ka kan ni tandori ye, Siyɔn dugu kɔnɔ;

mɔgɔw ka dajuru minw ta i fɛ, o bɛna na o dafa.

³Ele min bɛ daariri jaabi,

adamadenw bɛɛ bɛna na ele le fɛ.

⁴Ne ta terenbariyakow doni gbiriyara ne ma,

nka i bɛ an ta hakɛw bɛɛ yafa.

⁵I bɛ mɔgɔ minw ɲanawoloma, ka o gbara i yɛrɛ ra,

janko o ye to i ta so kɔnɔ, olugu ta ɲana.

I ta so ta fɛnɲumanw bɛna an wasa,

i ta batoso saninman ta fɛnɲumanw.

⁶An ta kisiri tigi Ala, i ka kabakobaw kɛ ka an jaabi,

janko ka i ta terenninya yira;

bɛɛ jigi ye ele le ye,

hali minw bɛ fɔ dugukolo dan na, ani fɔ kɔgɔji dan na.

⁷Ale le ka kuruw sigi a ta fanga baraka ra;

sabu sebagaya b’a fɛ.

⁸A bɛ kɔgɔjiw ta mankan mala,

ka jikuruw ta mankan mala,

ka siyaw ta wɔyɔkanw mala.

⁹Mɔgɔ minw bɛ fɔ hali dugukolo dan na, siranya bɛ olugu ra i ta tagamasiyɛnw kosɔn.

I bɛ terebɔyanfan mɔgɔw ni terebenyanfan mɔgɔw fa ɲagari ra.

¹⁰I bɛ i janto dugukolo ra k’a sɔn ji ra,

ka dugukolo diya kosɛbɛ,

sabu Ala ta kɔ fanin lo ji ra.

I bɛ siman di mɔgɔw ma, sabu i ka dugukolo labɛn o le kama.

¹¹I bɛ forow ta walanw sɔn ji ra kosɛbɛ,

k’a bɔgɔkuruw yɛrɛgɛ,

ka sanji kɛ ka o magaya,

ka baraka don simanw falentɔ ra.

¹²I ta koɲumanw sababu ra, san laban bɛ diya;

ni ele ka tɛmɛ yɔrɔ o yɔrɔ, o yɔrɔ fɛnw bɛɛ bɛ ɲa.

¹³Bɛganw ta domunikɛyɔrɔ minw bɛ kongokolon kɔnɔ, o bɛɛ ka ɲi;

ɲagarikanw bɛ kongoriw kunna fan bɛɛ ra.

¹⁴Kongokɔnɔyɔrɔw bɛɛ fara sagaw ni baw ra,

forow bɛɛ fara siman na.

Bɛɛ bɛ ɲagari fɔ ka dɔnkiriw la.

Ala bɛ a ta mɔgɔw bɔsi o juguw boro

¹Dɔnkirilabagaw kuntigi. Dɔnkiri. Zaburu.

Aw ye Ala tando ni ɲagarikanbaw ye, aw dunuɲamɔgɔw bɛɛ.

²Aw ye dɔnkiri la k’a tɔgɔ bonya lakari,

aw y’a tando ni bonyaba ye.

³Aw y’a fɔ Ala ye ko: «I ta kow ye siranyakobaw ye!

I ta baraka bonya kosɔn, i juguw bɛ o kinbiri gban i kɔrɔ.

⁴Dunuɲa bɛɛ lajɛnnin bɛ a kinbiri gban i kɔrɔ ka i bato,

ka dɔnkiri la ka i bonya,

ka dɔnkiri la ka i tɔgɔ bonya.»66.4 Nin yɔrɔ ra a sɛbɛra heburukan na ko: Sela.

⁵Aw ye na Ala ta kokɛninw flɛ;

a bɛ koba minw kɛ adamadenw ye.

⁶A ka kɔgɔji yɛlɛma k’a kɛ dugukolo jalan ye,

k’a to mɔgɔw tagamana a cɛ ma k’a cɛtigɛ.

O le kosɔn an bɛ ɲagari a ta kokɛninw kosɔn.

⁷A siginin bɛ kuntigiya ra wagati bɛɛ, a ta sebagaya baraka ra,

a ɲa bɛ siyaw ra;

o kosɔn mɔgɔ murutininw kana o yɛrɛ kɔrɔta!66.7 Nin yɔrɔ ra a sɛbɛra heburukan na ko: Sela.

⁸Siyaw, aw ye baraka la an ta Ala ye!

Aw ye aw kan bɔ k’a tando!

⁹A ka an nin ɲanamanya;

a m’a to an sen ye talon.

¹⁰E, Ala, i ka an sɛgɛsɛgɛ,

i ka an kɔrɔbɔ i ko mɔgɔ bɛ warigbɛ kɔrɔbɔ tasuma ra cogo min na.

¹¹I tun ka an don jɔ ra,

i tun ka doni gbiriman la an kɔ ra;

¹²I k’a to an juguw ka so bori ka yɛlɛn an kunw kan.

An ka tasuma cɛtigɛ, ka ji cɛtigɛ;

nka i ka an bɔsi ka bɔ o bɛɛ ra, ka an laganfiya.

¹³Ne bɛna taga i ta batoso kɔnɔ ni saraka jɛnitaw* ye;

ne ka dajuru minw ta i fɛ, ne bɛ taga o dafa;

¹⁴ne da ka dajuru minw ta,

ne da ka kuma minw fɔ wagati min ne tun degura, ne bɛna o dafa.

¹⁵Ne bɛna bɛgan tɔrɔninw kɛ saraka jɛnitaw ye ka o di i ma,

ani sagajigi sarakaw, ani wusunan sarakaw*;

ne bɛna misitoranw, ani bakɔrɔninw kɛ saraka ye.66.15 Nin yɔrɔ ra a sɛbɛra heburukan na ko: Sela.

¹⁶Aw minw bɛɛ bɛ siran Ala ɲa, aw ye na lamɛnni kɛ;

Ala ka min kɛ ne ye, ne bɛna o lakari.

¹⁷Ne kulera ni ne da ye k’a wele,

ne k’a bonya ni ne nɛnkun ye.

¹⁸Ni ne tun ka terenbariya ye ne jusukun na, ka je a kan,

Matigi tun tɛna ne lamɛn.

¹⁹Nka can ra, Ala ka ne lamɛn;

a k’a janto ne ta daarikan na.

²⁰Ala baraka,

sabu a ma ban ne ta daariri ma,

a fana ma a ta ɲumanya mabɔ ne ra.

Ala le ye hinatigi ye

¹Dɔnkirilabagaw kuntigi. Dɔnkiri min bɛ la ni gɔni ye. Zaburu. Alabatodɔnkiri.

²Ala ye hina an na, ka baraka don an na,

ka sɔn ka an flɛ ni ɲumanya ye.67.2 Nin yɔrɔ ra a sɛbɛra heburukan na ko: Sela.

³Ni o kɛra, mɔgɔw bɛna i ta kow ɲalɔn dunuɲa kɔnɔ,

siyaw bɛna i ta kisiri ko faamu.

⁴Ala, mɔgɔw ye i fo ka i waleɲumanlɔn!

Mɔgɔw bɛɛ ye i fo ka i waleɲumanlɔn!

⁵Siyaw ye ɲagari ka dɔnkiri la ka ninsɔndiya,

sabu i bɛ mɔgɔw ta kiti tigɛ hɔrɔnya kan,

ele le ye siyaw kuntigi ye dugukolo kan.67.5 Nin yɔrɔ ra a sɛbɛra heburukan na ko: Sela.

⁶Ala, mɔgɔw ye i fo ka i waleɲumanlɔn,

mɔgɔw bɛɛ ye i fo ka i waleɲumanlɔn!

⁷Dugukolo sɛnɛfɛnw bɛ den;

Ala, an ta Ala, ale bɛ baraka don an na.

⁸Ɔnhɔn, Ala bɛ baraka don an na;

a ɲasiran bɛna kɛ mɔgɔw bɛɛ ra, ka taga se fɔ dunuɲa danw bɛɛ ra.

Ala bɛ se sɔrɔ a juguw bɛɛ kan

¹Dɔnkirilabagaw kuntigi. Dawuda ta Zaburu. Dɔnkiri.

²Ala ye wuri k’a juguw bɛɛ janjan,

a kɔninyabagaw bɛɛ ye bori a ɲa.

³Sisi bɛ tunu cogo min na, i bɛna o latunu ten le,

ka o kɛ i ko kɛɲɛ bɛ yeele cogo min na tasuma kɔrɔ.

Mɔgɔjuguw bɛna halaki Ala ɲa kɔrɔ;

⁴nka mɔgɔ terenninw bɛna ninsɔndiya,

o bɛna ɲagari kosɛbɛ Ala ɲa kɔrɔ,

ka ninsɔndiya fɔ k’a kɛ ninsɔndiya dan ye.

⁵Aw ye dɔnkiri la Ala ye, ka Alatandodɔnkiriw la k’a tɔgɔ bonya;

aw y’a kunbɛn ni bonya ye, ale min bɛ sankabaw kɛ a ta sowotoro ye.

A tɔgɔ ye ko Matigi Ala, aw ye ɲagari kosɛbɛ a ɲa kɔrɔ.

⁶Feritaninw fa, ani muso cɛ saninw ta kititigɛbaga,

Ala ye o le ye; a siginin bɛ a ta yɔrɔ saninman kɔnɔ.

⁷Ala le bɛ mɔgɔ di mɔgɔntanw ma,

ka mɔgɔ minaninw labla ka o wasa.

Mɔgɔ murutininw le sigiyɔrɔ bɛna kɛ yɔrɔ lakolonw ye.

⁸E, Ala, wagati min i bɔra ka bla i ta mɔgɔw ɲa,

wagati min i tun bɛ tagamana o ɲa fɛ kongokolon kɔnɔ,68.8 Nin yɔrɔ ra a sɛbɛra heburukan na ko: Sela.

⁹dugukolo yɛrɛyɛrɛra, sankolo ka sanji lajigi;

o kɛra Ala ɲa kɔrɔ, Sinayi ta Ala,

o kɛra Ala ɲa kɔrɔ, Izirayɛli ta Ala.

¹⁰E, Ala, i ka sanji lana caman;

i ta jamana tun jara, nka i yɛrɛ ka sumaya jigi a kan tuun.

¹¹I ta mɔgɔw sigira o yɔrɔ le ra.

E, Ala, i ta ɲumanya kosɔn, i ka o yɔrɔ labɛn ɲanibagatɔw ye.

¹²Matigi kumana;

muso kumalasebagaw ye jamaba le ye.

¹³Siya tɔw ta kɛrɛkɛjamaw ni o ta masacɛw borira; o bɛɛ borira.

An ta muso minw tun tora so kɔnɔ, olugu le ka an juguw borofɛnw tarantaran.

¹⁴Jɛndɛtuganiw tagamasiyɛnw68.14 O jɛnɛtuganiw tagamasiyɛnw bɛ se ka kɛ Izirayɛlimɔgɔw juguw borofɛn minanin dɔw ye. lo, o kamanw warigbɛraman lo,

o kamansiw kɛra ni sanin nugunin le ye.

Nka kɛrɛkɛden dɔw lanin tora so sagakuruw cɛ ra.

¹⁵Wagati min Sebɛɛtigi Ala ka masacɛw gbɛn ka o janjan o kɛrɛyɔrɔ ra,

a tun kɛra i ko bugun le tun bɛ jigira Salimɔn kuru kan.

¹⁶Ala ta kuruba, Basan kuru!

Kuru kun caman, Basan kuru!

¹⁷Ala ka kuru min ɲanawoloma k’a kɛ a sigiyɔrɔ ye,

mun kosɔn o kuru ɲangboya bɛ aw ra, aw kuru kun camanw?

Sigiya t’a ra, Matigi Ala bɛna o yɔrɔ le kɛ a sigiyɔrɔ ye wagati bɛɛ.

¹⁸Ala ta sowotorow jateda ye waga camanba,

waga caman sigiyɔrɔma caman.

Matigi bɛ bɔ Sinayi kuru kan ka taga a ta yɔrɔ saninman kɔnɔ.

¹⁹I yɛlɛnna san fɛ,

i ka jɔn dɔw mina ka taga ni olugu ye,

i ka bonyaw mina mɔgɔw fɛ, hali mɔgɔ murutininw,

janko ka o yɔrɔ kɛ ele Masa Ala ta sigiyɔrɔ ye.

²⁰Matigi baraka lon bɛɛ!

Ale le bɛ lɔ ni an kunko ye,

ale Ala le ye an ta kisiri tigi ye.68.20 Nin yɔrɔ ra a sɛbɛra heburukan na ko: Sela.

²¹Ale Ala le ye an kisibaga ye;

Matigi Ala, an Matigi, ale le bɛ mɔgɔ bɔsi ka bɔ saya boro.

²²Nka Ala bɛna a juguw kun ci;

minw bɛ hakɛkow kɛ, a bɛna olugu kunkolo siman ci.

²³Matigi ko: «Ne bɛna o lana ka bɔ fɔ Basan;

ne bɛna o lana ka bɔ fɔ kɔgɔji jukɔrɔ;

²⁴janko aw ye aw senw ko aw juguw jori ra,

aw ta wuruw fana nɛnw ye aw juguw jori dɔ sɔrɔ k’a nɛmu.»

²⁵E, Ala, mɔgɔw ka i ni i ta mɔgɔw ta sesɔrɔri tagama ye,

ne ta Ala ka tagama min kɛ,

ne ta Masacɛ ka tagama min kɛ ka na don yɔrɔ saninman kɔnɔ.

²⁶Dɔnkirilabagaw tun bɛ ɲa fɛ, ka fɔrifɛntigiw gban olugu kɔ;

sungurudenw bɛ o cɛ ra, olugu bɛ longanw fɔra.

²⁷Aw ye baraka la Ala ye jamalajɛnyɔrɔw ra,

aw ye baraka la Matigi Ala ye, aw minw buruju bɔra Izirayɛli ra.

²⁸Mɔgɔ fɔlɔw ye o bɛɛ ra fitini Boniyaminu ta mɔgɔw le ye;

ale le ye o ɲamɔgɔ ye.

O kɔ, Zuda ta kuntigiw ni o ta jamakuru,

ani Zabulɔn ta kuntigiw, ani Nɛfitali ta kuntigiw.

²⁹I ta Ala k’a latigɛ ko i baraka ye bonya.

E, Ala, i ta sebagaya yira i n’a fɔ i tun derira k’a kɛ an ye cogo min na fɔlɔfɔlɔ.

³⁰Ka i to i ta batosoba kɔnɔ, Zeruzalɛmu dugu kunna,

masaw bɛna na i fɛ ni bonyafɛnw ye.

³¹Jirafɛn min bɛ yaala bin na, sɔngɔ ale ra,

ani misitoranw ni siya wɛrɛw ta misiden

minw bɛ na ni warigbɛw ye o boro, ka na o kinbiri gban;

kɛrɛ ka di siya minw ye, olugu bɛɛ janjan.

³²Ciraden dɔw bɛna na ka bɔ Misiran,

Etiyopikaw fana ka o boro kɔrɔta, o bɛ borira ka na Ala fɛ.

³³Dunuɲa masayaw bɛɛ, aw ye dɔnkiri la Ala ye,

aw ye Alatandodɔnkiriw la Matigi ye.68.33 Nin yɔrɔ ra a sɛbɛra heburukan na ko: Sela.

³⁴A yɛlɛnnin bɛ sankolo le kan i ko so, sankolo min danna kabini fɔlɔfɔlɔ;

a bɛ a kan bɔra, a bɛ a kan barakaman kɔrɔta.

³⁵Aw ye lɔ a ra k’a lɔn ko sebagaya ye Ala ta ye;

a ta bonya bɛ Izirayɛli kan,

a ta sebagaya ka sankolo fa.

³⁶E, Ala, i ye siranfɛnba le ye i ta yɔrɔ saninmanba kɔnɔ dɛ!

Izirayɛli ta Ala bɛ sebagaya ni baraka di a ta mɔgɔw ma;

Ala baraka!

Ala le bɛ mɔgɔ kisi

¹Dɔnkirilabagaw kuntigi. Nin dɔnkiri bɛ la dɔnkiri min lacogo ra, o tɔgɔ ye ko «Yirifiyeren». Dawuda ta Zaburu.

²E, Ala, ne kisi,

sabu ji ka ne mina fɔ ne kan kɔrɔ.

³Ne bɛ jigira jibɔgɔ jukɔrɔ, dan tɛ min dunya ra,

foyi tɛ yi ka ne lalɔ;

ne bɛ jigira fɔ ji jukɔrɔyɔrɔ ra,

jiwoyo bɛ tagara ni ne ye.

⁴Ne kulera fɔ ka ne baraka ban,

ne kan jara fɔ a bɛ ne jɛni;

ne ka ne ta Ala maflɛ,

fɔ ka na ne ɲadenw sɛgɛ flɛri ra.

⁵Mɔgɔ minw bɛ ne kɔninya gbansan,

olugu ka ca ka tɛmɛ hali ne kunsigiw kan.

Minw b’a fɛ ka ne halaki, olugu baraka ka bon kosɛbɛ;

ne juguw bɛ bagara ne ma le.

Ne ma fɛn min sonya,

o ko ne ye o sekɔ jagboya ra!

⁶E, Ala, ele ka ne ta hakirintanya lɔn,

ne ta hakɛkow fana ma dogo i ma.

⁷Minw jigi bɛ i kan, i kana a to olugu ye maroya ne kosɔn,

Matigi Fangatigi Ala.

Minw bɛ i ta jɛnɲɔgɔnya ɲinina, i kana a to olugu kun ye suuru ne kosɔn,

Izirayɛli ta Ala.

⁸Sabu ele le kosɔn mafiyɛnyari bɛ ne kan,

ele le kosɔn ne kun suurura.

⁹Ne kɛra mɔgɔ wɛrɛ ye ne yɛrɛ balemaw cɛ ra,

ne kɛra siya wɛrɛ mɔgɔ ye ne balemaw cɛ ra,

¹⁰sabu i ta so ko hami bɛ ne jɛnina ne jusukun na i n’a fɔ tasuma.

I mafiyɛnyabagaw bɛ mafiyɛnyarikuma minw fɔ i ma, o kumaw bɛ ben ne le kan.

¹¹Ni ne bɛ kasi ka sun don,

o bɛ dɔgɔyari le lase ne ma.

¹²Ni ne ka bɔrɔfani don ne yɛrɛ ra,

o bɛ ne tɔgɔ le don o ta zanaw ra.

¹³Minw bɛ sigi dugu donda ra, olugu bɛ ne kɔrɔfɔ,

dɔrɔminbagaw bɛ ne tɔgɔ le don o ta dɔnkiriw ra.

¹⁴Nka ne kɔni, Matigi Ala, ne bɛ ne ta daariri fɔra ele le ye;

nin ye kɛ wagatiɲuman ye.

E, Ala, ne jaabi i ta ɲumanyaba kosɔn,

i ye ne kisi ka kaɲa ni i ta kankelentigiya ye.

¹⁵Ne sama ka bɔ bɔgɔ ra, janko ne kana jigi tuun,

ne bɔsi ka bɔ ne kɔninyabagaw boro;

ne sama ka bɔ ji jukɔrɔ,

¹⁶jiwoyo kana taga ni ne ye,

jidunbaw kana ne datugu,

saya dinga kana datugu ne da ra.

¹⁷Ne jaabi, Matigi Ala, sabu i ta ɲumanya ka di;

a kɛ i ta hinaba kosɔn, i ye i ɲa munu ka ne flɛ.

¹⁸I kana i ɲada dogo i ta jɔn ma;

i teliya ka ne jaabi sabu ne degunin lo.

¹⁹Gbara ne ra, i ye ne kisi;

ne kunmabɔ ka bɔ ne juguw boro.

²⁰O ka ne dɔgɔya, ka ne lamaroya, ka ne kun suuru cogo min na, i yɛrɛ ka o lɔn;

i ka ne juguw bɛɛ lɔn.

²¹O ta dɔgɔyari ka ne jusu kasi

fɔ ka ne bana;

ne tun b’a miiri ko dɔ bɛna makari ne ra, nka mɔgɔ si ma makari ne ra,

ne tun ko jususaarobaga bɛna sɔrɔ ne ra, nka mɔgɔ ma sɔrɔ.

²²O ka fagarifɛn kɛ ne ta domuni na,

ka minnifɛn kumunin dɔ kɛ ne ta minji ye69.22 Nin kuma fɔra Yesu ta ko ra (Matiyu 27.48; Marika 15.36)..

²³Ala y’a to o ta domunibaw ye kɛ jan ye ka o mina,

o ta hɛra ye kɛ jɔ ye ka o mina.

²⁴O ɲaw ye fin, o kana yeri kɛ tuun;

o kɔ kurunin ye to tuma bɛɛ.

²⁵I ta jusugban ye jigi o kan,

i ta dimiba ye ben o kan.

²⁶O ta sigiyɔrɔw ye kɛ yɔrɔ lakolonw ye,

mɔgɔ si kana kɛ o ta bonw kɔnɔ.

²⁷Sabu ele ka kojugu ben mɔgɔ minw kan, o bɛ wuri olugu le kama ka o tɔɔrɔ;

ele ka dimi ben mɔgɔ minw kan, o bɛ to ka olugu ta sɛgɛkow le lakari.

²⁸O ta kojuguw bɛɛ jate,

o kana i ta terenninya sɔrɔ ka ye.

²⁹O tɔgɔ ye jɔsi ka bɔ ɲanamanya kitabu kɔnɔ,

o tɔgɔ kana sɛbɛ ni mɔgɔ terenninw tɔgɔw ye.

³⁰Ne kɔni ye ɲanibagatɔ ye, ne sɛgɛnin lo;

Ala, ne kisi, ka i janto ne ra.

³¹Ne bɛna dɔnkiri la ka Ala tɔgɔ tando,

ne bɛna a bonya ka baraka la a ye.

³²O le ka di Matigi Ala ye ka tɛmɛ misisaraka kan,

ka tɛmɛ misitoran ni a gbanw ni a sengbɔgɔrɔw bɛɛ kan.

³³Ni mɔgɔ majigininw ka o ye, olugu bɛna ninsɔndiya.

Aw Alaɲinibagaw, Ala ye sijan di aw ma!

³⁴Sabu Matigi Ala bɛ fagantanw lamɛn;

o k’a ta mɔgɔ minw mina, a tɛ ɲina olugu kɔ.

³⁵Sankolo ni dugukolo bɛɛ y’a tando,

ani kɔgɔji ni a fɛnɲanamanw bɛɛ;

³⁶sabu Ala bɛna Siyɔn dugu kisi,

ka Zuda duguw lɔ kokura.

A ta mɔgɔw bɛna sigi o duguw kɔnɔ tuun, k’a kɛ o ta ye;

³⁷o yɔrɔw bɛna kɛ a ta jɔnw ta durujaw ta ye.

A tɔgɔ ka di minw ye, o yɔrɔ bɛna kɛ olugu le sigiyɔrɔ ye.

Ala le ye ɲanibagatɔ dɛmɛbaga ye

(Hayan 2–6; Zaburu 40.14-18)

¹Dɔnkirilabagaw kuntigi. Dawuda ta Zaburu. Hakirijigi dɔnkiri.

²E, Ala, na ne bɔsi,

Matigi Ala, teliya ka na ne dɛmɛ!

³Minw b’a fɛ ka ne nin bɔ,

olugu le ye maroya, fɔ ka o kun suuru!

Minw b’a fɛ kojugu ye ne sɔrɔ,

olugu le ye dɔgɔyari sɔrɔ, fɔ ka sekɔ ni o kɔ ye.

⁴Minw bɛ yɛrɛko ne ma ko: «Ha ha ha»,

maroya ye olugu lasekɔ ni o kɔ ye!

⁵Nka minw bɛɛ bɛ ele yɔrɔɲini,

olugu ye ninsɔndiya ka ɲagari i kosɔn!

I ta kisiri ko ka di minw ye,

olugu y’a fɔ tuma bɛɛ ko: «E, Ala ka bon!»

⁶Ne kɔni ye ɲanibagatɔ ye, ani fagantan.

E, Ala, i teliya ka na ne dɛmɛ!

Ele le ye ne dɛmɛbaga ye, ani ne kunmabɔbaga,

Matigi Ala, i kana mɛɛn.

Ala le bɛ baraka don a ta jɔnw na

¹E, Matigi Ala, ne bɛ ne yɛrɛ karifa ele le ma;

i kana a to ne ye maroya.

²Na ne dɛmɛ, i ye ne bɔsi i ta terenninya kosɔn!

I toro malɔ ka ne lamɛn, i ye ne kisi!

³Kɛ ne ta barakatigi Ala ye, ani ne dogoyɔrɔ;

ne bɛ se ka taga dogo yɔrɔ min na wagati bɛɛ.

I k’a latigɛ ko i bɛ ne kisi,

sabu ele le ye ne ta Ala barakaman ye, ani ne dogoyɔrɔ.

⁴E, ne ta Ala, ne bɔsi ka bɔ mɔgɔjugu boro,

ne bɔsi ka bɔ kojugukɛbaga ni mɔgɔ jusufariman boro;

⁵sabu ele le ye ne jigi ye, Dunuɲatigi Ala;

kabini ne denmisɛnman, ne jigi bɛ i kan.

⁶Kabini ne worora, ne ka ne yɛrɛ karifa i ma,

sabu i ka ne mara kabini ne worolon;

ne ta tandori kun ye ele le ye wagati bɛɛ.

⁷Ne kɛra kabakofɛn le ye mɔgɔ caman fɛ,

nka ele le ye ne karifayɔrɔ barakaman ye.

⁸I tɔgɔ tandori dɔrɔn le bɛ ne da ra,

ne da bɛ i ta bonya nɔɔrɔman lakari lon bɛɛ.

⁹Ni kɔrɔya nana se ne ma wagati min ma, i kana i kɔ don ne ra;

ni ne baraka nana dɛsɛ, i kana ban ne ra.

¹⁰Sabu ne juguw bɛ ne le kɔrɔfɔra,

minw bɛ ne dɛndɛnna, olugu ka janfa siri ne kama.

¹¹O b’a fɔra ko: «Ala banna a ra;

an ye tugu a kɔ, k’a mina,

sabu mɔgɔ si tɛ yi min b’a bɔsi!»

¹²E, Ala, i kana i yɛrɛ mabɔ ne ra!

Ne ta Ala, i teliya ka na ne dɛmɛ.

¹³Minw bɛ ne jarakira gbansan,

maroya ye olugu le halaki pewu!

Minw b’a fɛ ka kojugu kɛ ne ra,

olugu le ye lebu fɔ ka o kun suuru.

¹⁴Ne kɔni jigi bɛ ele kan wagati bɛɛ;

ne bɛna dɔ le fara i tɔgɔ tandori kan tuun.

¹⁵Ne da bɛna i ta terenninya ko lakari,

ka i ta kisiri ko lakari lon bɛɛ,

sabu i ta koɲumanw dan tɛ se ka lɔn.

¹⁶Ne bɛna taga ele Dunuɲatigi Ala ta setigiya ko le fɔ,

ne bɛna ele kelen ta terenninya le lakari.

¹⁷E, Ala, i ka ne karan kabini ne denmisɛnman;

fɔ ka na se bi ma fana, ne bɛ i ta kabakow lakarira.

¹⁸O kosɔn fɔ ka taga ne kɔrɔ ka ne kunsigi gbɛ,

Ala, i kana i kɔ don ne ra,

janko ne ye i ta baraka ko fɔ ne ta durujaw ye,

ka i ta sebagaya ko lakari duruja nataw bɛɛ ye.

¹⁹E, Ala, i ta terenninya bonya bɛ se fɔ sankolo ma.

E, Ala, ele min ka kabakobaw kɛ,

jɔn le bɛ i ko ele?

²⁰Ele min ka kojuguw lase an ma, ka an degu kosɛbɛ,

ele le bɛna an laganfiya tuun;

i bɛna ne labɔ dugukolo jukɔrɔ, ka ne layɛlɛn san fɛ.

²¹Dɔ fara ne ta bonya kan,

i ye ne jusu saaro kokura.

²²Ni o kɛra, Ala, ne fana bɛna i fo ka i waleɲumanlɔn ni gɔni ye,

i ta kankelentigiya kosɔn.

Ne bɛna Alatandodɔnkiriw la i ye ni kora ye,

Izirayɛli ta Ala saninman!

²³Ni ne nana kɛ i tando ye ni dɔnkiriw ye,

ne da bɛna kule ci ka ɲagarikanw fɔ;

i ka ne nin min kunmabɔ, o fana bɛna i tando.

²⁴Ne nɛnkun fana bɛna i ta terenninya ko lakari wagati bɛɛ,

sabu minw tun b’a fɛ ka kojugu kɛ ne ra,

olugu maroyara, olugu kun suurura.

Ala ye si di masacɛ ma

¹Sulemani ta Zaburu.

E, Ala, masacɛ karan i ta kititigɛcogo ra,

i ta terenninya don masacɛ dencɛ jusukun na.

²Ni o kɛra, a bɛna i ta mɔgɔw ta kiti tigɛ terenninya kan,

ka i ta mɔgɔ ɲanibagatɔw ta kiti tigɛ ka kaɲa ni can ye.

³Kuruw bɛna hɛra lase mɔgɔw ma,

kongoriw fana bɛna hɛra lase mɔgɔw ma, terenninya sababu ra.

⁴A bɛna jamana ɲanibagatɔw ta jo di o ma,

ka fagantandenw kisi,

ka o tɔɔrɔbagaw dɔndɔn ka o terege a sen kɔrɔ.

⁵Ni o kɛra, fɔ ka taga dunuɲa wuri, ni tere bɛ bɔ, ni karo bɛ bɔ,

i ɲasiran bɛna kɛ mɔgɔw ra tuma bɛɛ.

⁶Masacɛ bɛna kɛ i ko sanji min bɛ ben siman wuritɔ kan,

i ko sanji min bɛ dugukolo sɔn ji ra.

⁷A ta masaya wagati ra, mɔgɔ terenninw bɛna caya,

hɛra bɛna caya wagati bɛɛ fɔ ka taga dunuɲa wuri.

⁸A ta fanga bɛna kɛ dunuɲa bɛɛ kan;

k’a ta kɔgɔji dɔ ra ka taga a bla fɔ kɔgɔji dɔ wɛrɛ ra,

k’a ta Efirati ba ra ka taga a bla fɔ dugukolo dan na.

⁹Kongokolon sigibagaw bɛna o kinbiri gban a kɔrɔ,

a juguw bɛna biri a kɔrɔ fɔ ka buguri nɛmu.

¹⁰Tarisisi ta masacɛw, ani kɔgɔji kɔfɛjamanaw masacɛw,

olugu bɛna na o borofɛnw nin a ra;

Saba jamana ta masacɛw, ani Seba mara ta masacɛw bɛna na bonyafɛnw di a ma.

¹¹Masacɛw bɛɛ bɛna o kinbiri gban a kɔrɔ,

siyaw bɛɛ bɛna baara kɛ a ye.

¹²Sabu fagantan minw bɛ kasi k’a wele, a bɛ olugu bɔsi,

ani dɛmɛbaga tɛ ɲanibagatɔ minw na.

¹³A bɛna makari dɛsɛbagatɔw ni fagantanw na;

a bɛna fagantanw nin kisi.

¹⁴A bɛna o nin kunmabɔ ka bɔ tɔɲɔrikɛbagaw ni mɔgɔ farimanw boro,

sabu o nin ko ka gbɛlɛn a ma kosɛbɛ.

¹⁵Ala ye si di masacɛ ma!

Mɔgɔw ye na ni sanin ye ka bɔ Seba jamana ra ka na a di a ma!

O ye Ala daari a ye tuma bɛɛ,

ka dugawu kɛ a ye lon o lon.

¹⁶Siman ye ɲa jamana kɔnɔ ka taga se fɔ kuruw san fɛ,

siman tizanw ye to ka fifa i ko Liban yirisunw,

mɔgɔw ye caya duguw kɔnɔ i ko kongobinw.

¹⁷A tɔgɔ ye fɔ tuma bɛɛ;

a tɔgɔ kana tunu fɔ ka taga dunuɲa wuri.

Mɔgɔw bɛɛ ye dugawu kɛ ɲɔgɔn ye ni a tɔgɔ le ye;

o bɛɛ y’a fɔ ko Ala k’a ta ɲa!

¹⁸Masa Ala, Izirayɛli ta Ala, baraka!

Ale kelen le bɛ kabakow kɛ.

¹⁹Baraka ye la a tɔgɔ nɔɔrɔman kan wagati bɛɛ!

A ta nɔɔrɔ ye dunuɲa yɔrɔ bɛɛ fa!

Amina! Amina!

²⁰Nin ye Yese dencɛ Dawuda ta daaririw laban ye.

Kitabu sabanan

(Zaburuw 73–89)

Alaɲasiranbari ta ko tɛ laban

¹Asafu ta Zaburu.

Can lo, Ala ka ɲi Izirayɛli ma;

minw jusukun saninyanin lo, a ka ɲi olugu ma.

²O bɛɛ n’a ta, a tun tora dɔɔnin, ne sen tun bɛna jɛngɛ ka sira bla,

ne tun bɛ ɲini ka talon ka ben;

³sabu yɛrɛbonyabagaw ɲangboya tun ka ne mina;

ne tun b’a yera ko mɔgɔjuguw ta kow bɛɛ bɛ ɲana o boro.

⁴Ne k’a ye ko sɛgɛ si tɛ o kan fɔ ka taga o sa,

o ka kɛnɛ, o tɔrɔnin lo tuma bɛɛ.

⁵Sɛgɛ min bɛ se mɔgɔ tɔw ma, o ɲɔgɔn tɛ se olugu ma;

kojugu tɛ o sɔrɔ i ko adamaden tɔw.

⁶O kosɔn o bɛ yɛrɛbonya kɛ masirifɛn ye ka o don o kan na;

jusukungbɛlɛya ye o kannaderege ye.

⁷O tɔrɔra fɔ o ɲada bɛ manamana;

miiriyajugu minw bɛ o jusukun na, dan tɛ o ra.

⁸O bɛ o yɛrɛ waso, ka mɔgɔw jaabi ni kumajuguw ye;

o bɛ kuma ka o yɛrɛ fisaya tɔw ma, ka mɔgɔw minako juguya.

⁹O da bɛ kuma ka se fɔ Ala ma san fɛ,

k’a sɔrɔ o nɛnkun bɛ cɛnri kɛra dugukolo kan.

¹⁰O kosɔn Ala ta mɔgɔw bɛ tugu o kɔ;

mɔgɔw bɛ la o ra, ka o ta kumaw bɛɛ kunu i ko ji,

¹¹ka to k’a fɔ ko: «Ala bɛ se ka an ta kɛwalew lɔn cogo di?

Lɔnniya juman le bɛ Ala kɔrɔtaninba fɛ?»

¹²Mɔgɔjuguw bɛ ten le.

O laganfiyanin lo tuma bɛɛ, dɔ le fana bɛ fara o ta naforo kan.

¹³O tuma ne ka ne jusukun saninya gbansan le kɛ!

Ne ka ne boro ko ka bɔ kojugu bɛɛ ra gbansan le!

¹⁴Sabu lon bɛɛ tɔɔrɔ bɛ ne le kan,

sɔgɔma o sɔgɔma, korori bɛ ne kan.

¹⁵Nka ni ne ko ne bɛ kuma i n’a fɔ o mɔgɔw,

o tuma ne bɛna Ala ta mɔgɔw janfa.

¹⁶Ayiwa, ne nana nin ko jate mina minkɛ janko k’a faamu,

nin ko ka ne sɛgɛ.

¹⁷Ne nana taga don Ala ta yɔrɔ saninman kɔnɔ minkɛ,

ne sɔrɔra ka mɔgɔjuguw ta labancogo ko faamu.

¹⁸Ala, can lo, i bɛ o bla sira dɔ kan, o bɛ tɛrɛndɛ sira min kan,

k’a to o ye ben ka halaki.

¹⁹E, a flɛ, cɛnri barara ka ben o kan yɔrɔnin kelen na!

O bɛɛ tununa, balahu ka o halaki ka ban pewu!

²⁰Mɔgɔ bɛ min ye siko ra, ni i kununa, o bɛ tunu cogo min na,

Matigi, i bɛna o mɔgɔw latunu o cogo le ra.

²¹O kosɔn tuma min ne jusu tun cɛnna,

tuma min nin ko tun digira ne ra kosɛbɛ,

²²o wagati ra ne kɔni tun ye naloman le ye, ne tun ma foyi lɔn;

ne tun bɛ i ɲa kɔrɔ i ko bɛganw.

²³O bɛɛ n’a ta, ne bɛ ni i ye tuma bɛɛ,

i ka ne kininboro mina.

²⁴I bɛ ne ladi ka sira yira ne ra,

o kɔ, i bɛna ne ladon i ta nɔɔrɔ ra.

²⁵Jɔn wɛrɛ le bɛ ne fɛ sankolo ra ni ele tɛ?

Ni i bɛ ni ne ye, ne tɛ foyi wɛrɛ fɛ tuun dugukolo kan yan.

²⁶Ne farisogo ni ne jusukun baraka bɛ se ka ban,

nka Ala le bɛ baraka don ne jusukun na,

ale le ye ne ninyɔrɔ ye wagati bɛɛ.

²⁷A flɛ, minw ka o yɛrɛ mabɔ i ra, olugu bɛna halaki;

minw ma kɛ kankelentigi ye i ta sira kan, i bɛna olugu bɛɛ latunu.

²⁸Ne kɔni, Ala ta jɛn le ka di ne ye;

ne karifayɔrɔ ye Dunuɲatigi Ala le ye,

janko ne ye a ta kobaw bɛɛ lakari.

Ala yɛrɛ le bɛna a juguw halaki

¹Asafu ta karan.

E, Ala mun kosɔn i banna an na pewu?

Mun kosɔn i ta dimi wurira i yɛrɛ ta sagakuru kama i ko tasuma sisiman?

²I hakiri to i ta jama ra, i ka min ɲanawoloma kabini fɔlɔfɔlɔ k’a kɛ i ta ye;

i ka i yɛrɛ ta mɔgɔ minw kunmabɔ, i hakiri to olugu ra,

Siyɔn kuru min tun ye i sigiyɔrɔ ye, i hakiri to o ra.

³Taga a yɔrɔ cɛnninw flɛ;

an jugu ka fɛn bɛɛ cɛn i ta yɔrɔ saninman kɔnɔ.

⁴I kɛrɛbagaw ka pɛrɛnkanba bɔ i ta yɔrɔ saninman kɔnɔ,

o ka o yɛrɛ ta darapow turu ka o kɛ i ta yɔrɔ tagamasiyɛn ye.

⁵O bɛ i ko mɔgɔ minw ka jende ta

ka taga yiriw kama yiritu ra.

⁶O ka tagamasiyɛnfɛnw bɛɛ cici

ni jendew ni nɛgɛkurunw ye.

⁷O ka tasuma don i ta yɔrɔ saninman na;

i ta mɔgɔw tun bɛ i tɔgɔ wele bon min kɔnɔ, o ka o ben dugu ma k’a lanɔgɔ.

⁸O tun b’a fɔra o yɛrɛ kɔnɔ ko: «An bɛna o bɛɛ halaki ka ban pewu!»

O ka Ala ta mɔgɔw ta jamalajɛnyɔrɔw bɛɛ jɛni jamana kɔnɔ.

⁹An ɲa tɛ an ta tagamasiyɛnw si ra tuun,

Ala ta cira tɛ yi tuun,

mɔgɔ si fana tɛ an cɛ ra min bɛ se ka nin kow laban lɔn.

¹⁰E, Ala, an tɔɔrɔbagaw bɛ mafiyɛnyari min lara an kan, o bɛna ban tuma juman sa?

Yala i juguw bɛna to ka i tɔgɔ cɛn tuma bɛɛ tan wa?

¹¹Ala, mun kosɔn i ka i boro barakaman dogo?

I boro bɔ, i ye o halaki ka ban pewu!

¹²Ala le ye ne ta masacɛ ye kabini fɔlɔfɔlɔ;

ale le bɛ mɔgɔw kisi dugukolo kan.

¹³Ele Ala le ka kɔgɔji cɛtigɛ fla ye i ta sebagaya baraka ra;

i ka danfɛn barakamanw kunw ci ji ra.

¹⁴Ele le ka jirasa belebele kunw ci,

k’a sogo di kongokolon danfɛnw ma, ko o y’a domu.

¹⁵Ele le ka bununw ni kɔw dayɛlɛ an ye;

kɔ minw ji tun bɛ woyo tuma bɛɛ, i ka olugu jiw ja.

¹⁶Tere ye ele ta ye, su fana ye i ta ye;

ele le ka karo ni tere dan.

¹⁷Ele le ka dugukolo danw bɛɛ sigi,

ele le ka samiya ni teremana wagatiw latigɛ.

¹⁸Ala, i hakiri to a ra ko i juguw bɛ ele Matigi Ala le mafiyɛnyara,

ko siya hakirintan dɔ bɛ i tɔgɔ cɛnna.

¹⁹I kana i ta tugani nin to kongowaraw boro,

i kana ɲina i ta mɔgɔ ɲanibagatɔw nin kɔ pewu.

²⁰I ka jɛnɲɔgɔnya min don ni o ye, i hakiri to o ra,

sabu jamana yɔrɔ dogoninw bɛɛ kɛra kojugukɛbagaw dogoyɔrɔw le ye.

²¹I kana a to sɛgɛbagatɔw maroyanin ye sekɔ ka taga!

A to ɲanibagatɔw ni fagantanw ye i tɔgɔ tando.

²²E, Ala, i wuri ka i juguw kɛrɛ ka i yɛrɛ mɔnɛbɔ!

Hakirintanw bɛ mafiyɛnyari min lara i kan lon bɛɛ, i hakiri to o ra.

²³I kana ɲina i juguw ta kumaw kɔ;

i kɛrɛbagaw bɛ mankanba minw cira tuma bɛɛ, i kana ɲina o kɔ.

Ala le ye kititigɛbaga ye

¹Dɔnkirilabagaw kuntigi. Nin dɔnkiri bɛ la dɔnkiri min lacogo ra, o tɔgɔ ye ko «I kana a cɛn!» Asafu ta Zaburu. Dɔnkiri.

²Ala, an bɛ i fo ka i waleɲumanlɔn;

an bɛ i fo ka i waleɲumanlɔn.

An bɛ i tɔgɔ bonya lakari;

mɔgɔw bɛ i ta kabakobaw lakari.

³Ne Ala ka wagati min latigɛ, ni o sera,

ne yɛrɛ le bɛna kiti tigɛ can kan.

⁴Ni dugukolo bɛ yɛrɛyɛrɛ ni a sigibagaw bɛɛ ye,

ne le b’a mina k’a lɔ yɔrɔ kelen na.75.4 Nin yɔrɔ ra a sɛbɛra heburukan na ko: Sela.

⁵Ne b’a fɔ yɛrɛbonyabagaw ye ko: «Aw kana aw yɛrɛ bonya!»

Ne b’a fɔ mɔgɔjuguw ye ko: «Aw kana aw yɛrɛ kɔrɔta!

⁶Aw kana aw kun kɔrɔta san fɛ tan,

aw kana aw kun gbɛlɛya ka dabayakumaw fɔ.»

⁷Sabu bonya tɛ bɔ terebɔyanfan na,

a tɛ bɔ terebenyanfan na,

a fana tɛ bɔ kongokolon fan le fɛ.

⁸Ala le bɛ ko bɛɛ latigɛ;

a bɛ dɔ majigi, ka dɔ kɔrɔta.

⁹Sabu minan dɔ le bɛ Matigi Ala boro;

minnifɛn fariman dɔ labɛnninkoɲuman bɛ o minan kɔnɔ, fɔ a bɛ kanga.

A bɛna o dɔ kɛ mɔgɔw kun.

Dunuɲa mɔgɔjuguw bɛna a kami;

o bɛna a min fɔ ka taga se a buruburu ma.

¹⁰Ne kɔni, ne bɛna nin lakari wagati bɛɛ;

ne bɛna dɔnkiri la ka Yakuba ta Ala tando.

¹¹A bɛna mɔgɔjuguw gbanw bɛɛ karikari;

mɔgɔɲumanw kun le bɛna kɔrɔta.

Ala le ye sesɔrɔbaga ye

¹Dɔnkirilabagaw kuntigi. Dɔnkiri min bɛ la ni gɔni ye. Asafu ta Zaburu. Alabatodɔnkiri.

²Ala tɔgɔ lɔnnin lo Zuda mara ra kosɛbɛ;

a tɔgɔ ka bon Izirayɛli mara ra.

³A ta so bɛ Salɛmu,

Siyɔn ye a sigiyɔrɔ ye.

⁴A k’a juguw ta biɲɛ tasumamanw karikari o yɔrɔ le ra,

ani o ta nɛgɛbɛnnanw ni o ta kɛrɛkɛmuruw ni o ta kɛrɛkɛminanw bɛɛ.76.4 Nin yɔrɔ ra a sɛbɛra heburukan na ko: Sela.

⁵Ala, i ta nɔɔrɔ ni i ta bonya tɛmɛna kurubaw ta kan,

kuru minw danna kabini fɔlɔfɔlɔ.

⁶Ala ka kɛrɛkɛcɛ jusufariw borofɛnw bɛɛ mina o ra;

o lara sunɔgɔ ra, o tɛna kunu tuun.

Kɛrɛkɛcɛfariw si ma se ka o boro kɔrɔta ka ko kɛ tuun.

⁷Yakuba ta Ala, i sɔngɔra o ra minkɛ,

soboribaga o, so yɛrɛ o, o bɛɛ benna ka kirin.

⁸Ele Ala ye siranyafɛnba le ye!

Ni i ta dimi wurira, jɔn le bɛ se ka lɔ i ɲa?

⁹I tora sankolo ra ka kiti tigɛ;

dunuɲamɔgɔw siranna, o bɛɛ jera;

¹⁰sabu Ala ka kiti tigɛ,

ka dunuɲa ɲanibagatɔw bɛɛ kisi.76.10 Nin yɔrɔ ra a sɛbɛra heburukan na ko: Sela.

¹¹Ala, hali adamaden diminin bɛ ele bonya jagboya ra;

i bɛ adamaden ta dimi kɛ masirifɛn le ye ka o don i yɛrɛ ra.

¹²Aw ye dajuru ta Matigi Ala, aw ta Ala fɛ, k’a dafa;

siya minw bɛɛ yɔrɔ ka surun,

olugu bɛɛ ye na o borofɛnw di jatigɛbaga Ala ma.

¹³Ale le bɛ kuntigiw ta yɛrɛbonya bɔ o ra,

a bɛ siranyaba bla dugukolo masacɛw ra.

Ala bɛ mɔgɔ tɔɔrɔninw jusu saaro

¹Dɔnkirilabagaw kuntigi, Yedutun. Asafu ta Zaburu.

²Ne bɛ ne kan bɔ Ala ma, ka kule;

ne bɛ ne kan bɔ Ala ma, janko a ye ne lamɛn.

³Wagati min ne tun degura, ne ka Matigi Ala ta jɛnɲɔgɔnya ɲini.

Su fɛ ne ka ne boro kɔrɔta ka mɛɛn, hali ne ma sɛgɛ;

ne ma sɔn mɔgɔ si ye ne jusu saaro.

⁴Ni ne hakiri jigira Ala ra, ne bɛ to ka ŋuna;

ni ne miirira a ma, ne jusu bɛ kasi.77.4 Nin yɔrɔ ra a sɛbɛra heburukan na ko: Sela.

⁵Ala, i ka ne bari sunɔgɔ bɛɛ ra,

ne hakiri ɲagamina, hali ne tɛ se ka kuma tuun.

⁶Ne bɛ to ka miiri lon tɛmɛninw ta kow ra,

ani sanjan tɛmɛninw ta kow.

⁷Ne tun bɛ to ka dɔnkiri minw la su fɛ, ne hakiri bɛ jigi o ra,

ne bɛ o kow miiri ne jusu ra,

ne bɛ ne yɛrɛ ɲininka ko:

⁸«Yala Matigi banna ne ra pewu le wa?

Yala a tɛna sɔn ne ra tuun fiyewu le wa?

⁹Yala a ta ɲumanya banna le wa?

Yala kuma si t’a fɛ k’a fɔ an ye tuun le wa?

¹⁰Yala Ala ɲinana a ta makari kɔ le wa?

Yala a dimina ko a tɛ hina tuun le wa?»77.10 Nin yɔrɔ ra a sɛbɛra heburukan na ko: Sela.

¹¹Ne ko: «Ne ta tɔɔrɔ sababu ye

ko Ala kɔrɔtaninba boro barakaman tɛ a cogokɔrɔ ra tuun.»

¹²Ayiwa, ne bɛna ne hakiri to Matigi Ala ta kobaw ra;

ne bɛna ne hakiri jigi i ta kabakobaw ra, i ka minw kɛ fɔlɔfɔlɔ.

¹³Ne bɛna i ta kokɛninw bɛɛ jate mina,

ne bɛna miiri i ta kobaw ra.

¹⁴Ala, i ta siraw saninyanin lo;

ala juman wɛrɛ le ka bon i ko ele Ala?

¹⁵Ele Ala le bɛ kabakow kɛ.

I ka i ta sebagaya yira siyaw ra.

¹⁶I ta sebagaya baraka ra, i ka i ta mɔgɔw kunmabɔ,

minw ye Yakuba ni Yusufu ta mɔgɔw ye.77.16 Nin yɔrɔ ra a sɛbɛra heburukan na ko: Sela.

¹⁷E, Ala, kɔgɔji ka i ye!

Kɔgɔji ka i ye minkɛ, a lamagara,

jidunbaw yuguyugura.

¹⁸Sanji caman jigira ka bɔ sankabaw ra;

san finna ka sankurukan bɔ,

i ka i ta biɲɛw bon ka taga fan bɛɛ ra.

¹⁹I ta sanpɛrɛnkan bɔra sanfɔɲɔba cɛ ma,

sanmanamanaw ka dunuɲa yɔrɔ bɛɛ kɛ yeelen ye;

dugukolo lamagara, ka yɛrɛyɛrɛ.

²⁰I ka i ta sira bɔ kɔgɔji cɛ ma,

i ka i tɛmɛyɔrɔ bɔ jiba cɛ ma;

nka i sennɔ ma ye.

²¹I blara i ta mɔgɔw ɲa ka taga ni o ye i ko sagakuru;

i ka Musa ni Haruna le bla o ɲa.

Ala ta mɔgɔw kɛra koɲumanlɔnbariw ye

¹Asafu ta karan.

Ne ta mɔgɔw, aw ye aw toro malɔ ne ta karan na,

aw ye aw toro sigi ka ne darakuma lamɛn.

²Ne bɛna ne da yɛlɛ ka talenw le fɔ,

ne bɛna gundokɔrɔ dɔw le lakari aw ye.

³An ka min mɛn, ani an ka min lɔn,

an bɛmaw ka min lakari an ye,

⁴anw tɛna o dogo o denw na,

an bɛna o fɔ duruja nataw ye;

an bɛna Matigi Ala ta bonya ni a ta sebagaya ko fɔ o ye,

ani a ka kabako minw kɛ.

⁵Ala tun ka ci dɔw fɔ Yakuba ta mɔgɔw ye,

a tun ka sariya di Izirayɛlimɔgɔw ma;

a k’a fɔ an bɛmaw ye

ko o ye o denw karan o ra,

⁶janko duruja nataw,

den minw bɛna woro kɔ fɛ,

olugu fana ye o lɔn,

ka a lakari o yɛrɛ ta denw ye.

⁷Ni o kɛra, o bɛna o boromala Ala ma,

o tɛna ɲina Ala ta kokɛninw kɔ;

o bɛna a ta kumaw lamɛn k’a sira tagama.

⁸O tɛna kɛ o bɛmaw bɔɲɔgɔnko ye,

ka kɛ mɔgɔ kanminabariw, ani mɔgɔ murutininw ye,

minw jusukun tun ma teren Ala ye,

ani minw ta miiriyaw tun ma to Ala kan.

⁹Efirayimu ta mɔgɔw borira ka kalan to o boro;

o borira kɛrɛkɛlon na.

¹⁰O ma Ala ta jɛnɲɔgɔnya sira tagama,

o banna ka a ta sariya sira tagama.

¹¹O ɲinana Ala ta kobaw kɔ;

a tun ka kabakoba minw kɛ o ɲana, o ɲinana o kɔ.

¹²A tun ka kabakow kɛ o bɛmaw ɲa na,

Misiran jamana ra, Sohan mara ra.

¹³A tun ka kɔgɔji cɛtigɛ fla ye ka o latɛmɛ a cɛ ma,

ka ji mina k’a lɔ i ko kogo.

¹⁴Tere fɛ a tun bɛ sankaba jamijan dɔ bla o ɲa, ka sira yira o ra,

su bɛɛ a tun bɛ tasumamana dɔ bla o ɲa fana.

¹⁵A ka fara dɔw dayɛlɛ kongokolon kɔnɔ,

ka ji camanba di o ma, o k’a min.

¹⁶A ka ji seri ka bɔ fara ra,

k’a woyo i ko baji.

¹⁷Nka o belen ka dɔ fara o ta jurumunw kan ka Ala hakɛ ta;

o murutira Ala kɔrɔtaninba ma kongokolon kɔnɔ.

¹⁸O k’a lawuri a kama ko o bɛ Ala kɔrɔbɔ;

o ka domuni daari a fɛ nege dɔrɔn kosɔn.

¹⁹O ka kumajuguw fɔ Ala ma, ko:

«Yala can ra, Ala bɛ se ka domuni di an ma kongokolon kɔnɔ yan wa?

²⁰A kɔni ka fara gbasi, ji serira ka bɔ,

fɔ ka woyo caman.

Nka yala can ra, a bɛ se ka domuni fana di,

walama ka sogo di a ta mɔgɔw ma wa?»

²¹Ayiwa, Matigi Ala ka o mɛn, a jusu bɔra o kɔrɔ;

a ka tasuma mana Yakuba ta mɔgɔw kama,

a ta dimi wurira Izirayɛli kama;

²²sabu o tun ma la Ala ra,

o tun ma o jigi la a kan, ko a bɛ se ka olugu kisi.

²³O bɛɛ n’a ta, a kumana sankabaw fɛ san fɛ,

a ka sankolo dayɛlɛ.

²⁴A ka mane* lajigi i ko sanji, k’a di o ma o k’a domu;

a ka sankolo ta domuni di o ma.

²⁵O bɛɛ ka Ala ta danfɛn barakamanw ta domuni le kɛ;

a ka domuni caman di o ma, o ka o domu fɔ ka fa.

²⁶O kɔ, a ka terebɔyanfan fɔɲɔ fiyɛ san fɛ,

ka woroduguyanfan fɔɲɔ lana a ta sebagaya baraka ra.

²⁷A ka sogo lajigi o kan caman i ko buguri,

a ka kɔnɔw lajigi caman i ko kɔgɔjida kɛnkɛn,

²⁸ka na o bɔn o sigiyɔrɔw ra,

ka o ta sow lamini.

²⁹O k’a domu ka fa kosɛbɛ;

fɛn min nege tun bɛ o ra, a ka o di o ma.

³⁰Nka hali bi, o belen tun ma wasa;

ka domuni to o da kɔnɔ,

³¹Ala ta dimi wurira o kama.

A ka o bɛɛ ra cɛ barakamanw faga,

a ka Izirayɛli kanbelenw ben dugu ma.

³²Nka o bɛɛ n’a ta, o ka jurumun kɛ tuun,

o ma la a ta kabakow ra.

³³O kosɔn a ka o ta dunuɲalatigɛ kɛ gbansan ye,

ka o si laban jatigɛ ra.

³⁴Nka ni Ala tun ka dɔw halaki, o wagati le ra, tɔw tun bɛ a ta jɛnɲɔgɔnya ɲini,

o tun bɛ nimisa ka Ala ta jɛnɲɔgɔnya ɲini.

³⁵O tuma ra o hakiri tun bɛ jigi a ra ko Ala le ye olugu ta barakatigi Ala ye,

ko Ala kɔrɔtaninba le ye o kunmabɔbaga ye.

³⁶Nka o tun bɛ o bɛɛ kɛ ka Ala janfa ni o da ye le,

o tun bɛ faninyaw le fɔ Ala ye ni o nɛnkunw ye.

³⁷O jusukun tun ma teren Ala ye,

o tun tɛ to Ala ta jɛnɲɔgɔnya kan.

³⁸K’a sɔrɔ Ala bɛ hina,

o kosɔn a tun bɛ o ta terenbariyakow yafa o ma,

a tun tɛ o halaki.

Wagati caman, a k’a ta dimi mala,

a ma sɔn k’a ta jusugban bɛɛ ben o kan.

³⁹A b’a hakiri to o ra, ko adamadenw lo,

ko o bɛ i ko fɔɲɔ min bɛ tɛmɛ, ni a tɛ sekɔ tuun.

⁴⁰O murutira a kama tuma caman kongokolon kɔnɔ;

o k’a jusu kasi kongo kɔnɔ tuma caman.

⁴¹Tuma bɛɛ o tun bɛ Ala dakɔrɔbɔ,

tuma bɛɛ o tun bɛ Izirayɛli ta Ala saninman le dɔgɔya.

⁴²O hakiri ma to Ala ta sebagaya ra;

lon min na a tun ka o bɔsi ka bɔ o juguw boro,

⁴³ani a k’a ta tagamasiyɛn kabakomanw yira Misiran jamana ra cogo min na,

ani a ka kabako minw kɛ Sohan mara ra, o hakiri ma to o ra.

⁴⁴A ka Misirankaw ta bajiw yɛlɛma ka o kɛ jori ye,

o ma se k’a ji min tuun.

⁴⁵A ka limɔgɔjuguw caman lana o kama, ka na o kin,

ka tɔrisenjanw lana o kama ka na o tɔɔrɔ.

⁴⁶A ka o ta simanw labla tɔnwulenninw ye,

ka o ta sɛnɛ sɛgɛ tɔnɔ di ɲɔdomutɔnw ma.

⁴⁷A k’a to sanbɛrɛ ka o ta rɛzɛnforow cɛn,

k’a to nɛnɛ ka o ta torosunw faga.

⁴⁸A k’a to sanbɛrɛ ka o ta bɛganw halaki,

sanpɛrɛn ka o ta misiw ni o ta sagaw ni o ta baw halaki.

⁴⁹A k’a ta dimiba ben o kan,

ani a ta jusugban ni a ta fariya, fɔ ka o degu;

a ka cɛnrikɛmɛlɛkɛ camanba ci o kama.

⁵⁰Foyi ma a ta dimi bari tuun;

a ma sɔn ka o bɔsi saya ma,

nka a ka banajuguw ben o kan.

⁵¹A ka Misirankaw den fɔlɔw bɛɛ faga,

Kamu ta durujaw ta den fɔlɔw, minw ye o ta baraka nɔ fɔlɔ ye.

⁵²O kɔ, a k’a ta mɔgɔw labɔ i ko sagakuru;

a ka o gbɛngbɛn kongokolon kɔnɔ i ko sagagbɛnbaga.

⁵³A blara o ɲa, k’a janto o ra, foyi ma o lasiran;

kɔgɔji ka o juguw le datugu.

⁵⁴A tagara ni o ye fɔ a ta jamana saninman donda ra,

ka taga se fɔ kuru kan, a yɛrɛ boro barakaman ka kuru min mina.

⁵⁵A ka siya dɔw gbɛn ka bɔ o ɲa,

ka o siyaw ta jamana tarantaran k’a di Izirayɛlimɔgɔw ma k’a kɛ o ta ye;

a ka Izirayɛli ta mɔgɔw sigi o siyaw ta sow kɔnɔ.

⁵⁶Nka o bɛɛ n’a ta, o ka Ala kɔrɔtaninba kɔrɔbɔ,

o murutira a ma, o ma a ta ciw kɛ.

⁵⁷O ka o yɛrɛ mabɔ Ala ra ka kɛ janfamɔgɔw ye i ko o bɛmaw;

kalan min man ɲi o biɲɛ bɛ jɛngɛ ka sira bla cogo min na, o kɛra ten le.

⁵⁸O ka o ta sɔnnikɛyɔrɔw caya kongoriw kan k’a kɛ fɔ Ala dimina o kɔrɔ;

o ka Ala ni batofɛn wɛrɛw jɛn ka o bato, k’a jusu bɔ.

⁵⁹Ayiwa, Ala k’a ye ten minkɛ, a jusu bɔra kosɛbɛ,

a banna Izirayɛli ra pewu!

⁶⁰A sigiyɔrɔ min tun bɛ Silo, a banna o yɔrɔ ra,

o yɔrɔ min tun ye a sigiyɔrɔ ye adamadenw cɛ ra.

⁶¹A ta jɛnɲɔgɔnya kɛsu* min ye a ta baraka tagamasiyɛn ye, a k’a to o ka o ta;

a k’a ta nɔɔrɔ labla a juguw boro.

⁶²A k’a to o k’a ta mɔgɔw faga ni kɛrɛkɛmuru ye;

sabu a jusu gbanna a yɛrɛ ta mɔgɔw kɔrɔ.

⁶³Tasuma ka o ta kanbelenw jɛni;

dɔnkiri ma se ka la o ta sungurudenw ye78.63 O dɔnkiriw tun bɛna kɛ o ta kɔɲɔdɔnkiriw ye..

⁶⁴O ka o ta sarakalasebagaw faga ni kɛrɛkɛmuru ye,

hali o ta firiyamusow ma se ka o su kasi.

⁶⁵Nka o bɛɛ kɔ, Matigi wurira i ko mɔgɔ min kununa sunɔgɔ ra,

i ko duvɛn ka kɛrɛkɛcɛ min mina k’a fariya!

⁶⁶A k’a juguw gbɛn ka o lasegi ni o kɔ ye,

a ka o lebu, dan tɛ lebu min na.

⁶⁷Nka a banna Yusufu ta somɔgɔw ra;

a ma ɲabɔ Efirayimu78.67 Efirayimu tun ye Yusufu dencɛ dɔ ye. ta mɔgɔw fɛ tuun.

⁶⁸A ka Zuda ta mɔgɔw le ɲanawoloma;

Siyɔn kuru78.68 Siyɔn kuru ye Zeruzalɛmu ye, Zuda mara ra. ko le diyara a ye.

⁶⁹A k’a ta yɔrɔ saninman lɔ k’a kɔrɔta san fɛ,

k’a ju sigi i ko dugukolo; a tɛ bɔ a nɔ ra tuun fiyewu.

⁷⁰A ka Dawuda le mina ka bɔ a ta sagabonw kɔrɔ,

k’a ɲanawoloma k’a kɛ a ta baaraden ye.

⁷¹A k’a mina ka bɔ saga denbatigiw kɔrɔ,

janko a ye na a janto ale ta mɔgɔw ra, minw ye Yakuba ta mɔgɔw ye,

k’a janto Izirayɛlimɔgɔw ra, minw ye ale yɛrɛ ta mɔgɔw ye.

⁷²Dawuda k’a janto o ra ni jusukun gbɛnin ye,

a ka o kɔrɔsi ni hakiri ye.

Ala bɛna Zeruzalɛmu kisi

¹Asafu ta Zaburu.

E, Ala, siya wɛrɛw nana don i ta jamana ra,

o ka i ta batoso saninman lanɔgɔ;

o ka Zeruzalɛmu dugu ci k’a kɛ tomo le ye.

²O ka i ta baaradenw faga,

ka o suw di kɔnɔw ma, ka o kɛ o ta baro ye.

O ka i ɲasiranbagaw sogo di waraw ma,

³ka o jori woyo i ko ji,

ka Zeruzalɛmu lamini;

hali mɔgɔ ma sɔrɔ ka o su don.

⁴An kɛra dɔgɔyarifɛn le ye an sigiɲɔgɔnw fɛ;

siya minw ka an lamini, olugu bɛ an lɔgɔbɔ, ka yɛrɛko an ma.

⁵E, Matigi Ala, i ta dimi bɛna mala tuma juman le sa?

An ka ala wɛrɛ minw bato, o dimi min bɛ i ra, o tasuma bɛna faga tuma juman le sa?

⁶I ta jusugban ben siya wɛrɛw kan, minw tɛ i lɔn o ta Ala ye,

ani jamana wɛrɛw kan, jamana minw tɛ i tɔgɔ bato;

⁷sabu o ka Yakuba ta mɔgɔw domu,

o ka o sigiyɔrɔ cɛn k’a kɛ yɔrɔ lakolon ye.

⁸I kana i hakiri to an ta terenbariyako tɛmɛninw na tuun;

a to i ta hina ye na joona ka na jigi an kan,

sabu an baraka dɛsɛra kosɛbɛ.

⁹An dɛmɛ, an ta kisiri tigi Ala,

i tɔgɔ bonya baraka ra;

an bɔsi, ka an ta jurumunw kafari

i tɔgɔ kosɔn.

¹⁰Mun na i b’a to siya tɔw b’a fɔ an ma ko:

«O ta Ala bɛ min le?»

O ka i ta baaraden minw faga ka o jori woyo, olugu dimibɔ,

k’a to an yɛrɛ ɲa y’a ye, siyaw fana y’a lɔn.

¹¹I toro malɔ ka kasodenw ŋunakan lamɛn;

minw blara fagari kama, olugu bɔsi i ta sebagayaba baraka ra.

¹²Matigi, an sigiɲɔgɔnw ka i mafiyɛnya ni mafiyɛnyari minw ye,

o ɲɔgɔn bɔɲɔgɔnko wolonfla kɔsegi o ma,

¹³Ni o kɛra, an minw ye i ta mɔgɔw ye, i ta sagakuru,

anw bɛna i fo ka i waleɲumanlɔn tuma bɛɛ;

an bɛna i ta bonya lakari wagati bɛɛ, ani tuma bɛɛ.

Ala le ye Izirayɛli marabaga ye

¹Dɔnkirilabagaw kuntigi. Nin dɔnkiri bɛ la dɔnkiri min lacogo ra, o tɔgɔ ye ko «Jɛnɲɔgɔnya yirifiyeren». Asafu ta Zaburu.

²E, Izirayɛli kɔrɔsibaga, i toro malɔ!

Ele min bɛ i janto Yusufu ta mɔgɔw ra i ko i ta sagakuru, i toro malɔ!

Ele min siginin bɛ masaya ra serubɛn mɛlɛkɛw* cɛ ra, i ta nɔɔrɔ manamana

³Efirayimu ni Boniyaminu ni Manase ta mɔgɔw ɲa kɔrɔ.

I ta baraka yira, i ye na ka na an kisi.

⁴E, Ala, an lasekɔ ka na i fɛ tuun!

Sabari ka an flɛ ni ɲumanya ye, janko an ye kisi.

⁵E, Matigi Ala, Fangatigi, i jusu bɛna suma tuma juman,

ka sɔn ka i ta mɔgɔw ta daariri lamɛn sa?

⁶I ka o ta domuni kɛ o yɛrɛ ɲaji le ye;

i ka ɲaji fa minan kɔnɔ fɔ siɲaga saba ka o kɛ o minji ye.

⁷An sigiɲɔgɔnw bɛ ɲɔgɔn kɛrɛ an ta jamana le nɔ fɛ,

fɔ an juguw bɛ an lɔgɔbɔ.

⁸E, Fangatigi, an lasekɔ ka na i fɛ tuun!

Sabari ka an flɛ ni ɲumanya ye, janko an ye kisi!

⁹Ala, i tun ka rɛzɛnsun dɔ bɔn Misiran jamana ra ka na ni a ye;

i ka siya tɔw gbɛn, ka o rɛzɛnsun turu olugu ta jamana ra.

¹⁰I k’a jukɔrɔyɔrɔ labɛn ka ɲa;

a ka lilinw don dugukolo ra fɔ ka jamana bɛɛ fa.

¹¹A suma tun ka kuruw bɛɛ datugu;

a yiriborow tun kɛra i ko sɛdiriyiribaw yiriborow.

¹²A yiriborow janyara ka se fɔ kɔgɔji ma,

ka woyo ka se fɔ Efirati ba ma.

¹³Ayiwa, mun na i nana a laminikogow ben,

k’a to tɛmɛbagaw bɛɛ ye kɛ a denw tigɛtigɛ ye?

¹⁴Kongolɛw bɛ don a ra k’a cɛn;

kongosogow k’a kɛ o ta domuni ye.

¹⁵E, Fangatigi, sabari, i ye kɔsegi ka na an fɛ;

ka i to sankolo ra ka i ɲa majigi ka an flɛ,

ka i hakiri to nin rɛzɛnsun na,

¹⁶i boro barakaman ka yiri min turu,

i yɛrɛ ka baraka don o den min na k’a kɛ i yɛrɛ ta ye.

¹⁷Tasuma ka i ta rɛzɛnsun jɛni, mɔgɔw k’a tigɛtigɛ!

I dimina ka i ta mɔgɔw jaraki, ka o bɛɛ halaki.

¹⁸I janto i ta mɔgɔ ɲanawolomanin na,

i yɛrɛ ka baraka don mɔgɔ min na, k’a kɛ i ta ye.

¹⁹Ni o kɛra, an tɛna an yɛrɛ mabɔ i ra tuun fiyewu!

Barakakura don an na, janko an ye i tɔgɔ wele ka i bato.

²⁰E, Matigi Ala, Fangatigi, an lasekɔ ka na i fɛ tuun!

Sabari ka an flɛ ni ɲumanya ye, janko an ye kisi.

Mɔgɔw ka kan ka Ala lamɛn

¹Dɔnkirilabagaw kuntigi. Dɔnkiri min bɛ la ni Gatikaw ta gɔni ye. Asafu ta Zaburu.

²Aw ye dɔnkiri la Ala ye ka ɲagari, sabu ale le ye an ta baraka sɔrɔyɔrɔ ye.

Aw ye aw kan kɔrɔta ka pɛrɛn ka Yakuba ta Ala tando!

³Aw ye Alatandodɔnkiriw damina, aw ye longan fɔ!

Aw ye kora kandimanw fana fɔ, ani gɔniw!

⁴Aw ye buru fiyɛ karokura ɲanagbɛ81.4 Karokura ɲanagbɛ tun ye Yahudiyaw ta ɲanagbɛ dɔ ye (Jateri 28.11-15; Amɔsi 8.5). Ni karo tun sera a cɛmancɛ ra, o tun bɛ ɲanagbɛ dɔ wɛrɛ kɛ (Sarakalasebagaw 23.33-43; Jateri 29.12-39). ra,

ni karo sera a cɛmancɛ ra, aw y’a fiyɛ tuun, an ta ɲanagbɛlon na;

⁵sabu nin ye Ala ta cifɔnin le ye k’a di Izirayɛli ma,

nin ye Yakuba ta Ala ta kolatigɛnin le ye.

⁶Ala tun ka o ciw le fɔ Yusufu ta mɔgɔw ye,

wagati min a tun tagara Misiran jamana kama.

Ne ka kan dɔ mɛn ne ma min lɔn:

⁷«Ne ka doni ta ka bɔ o kamankunw kan,

o borow ka segi gbirimanw bla.

⁸Aw tun degura wagati min na, aw ka ne wele, ne ka aw bɔsi,

ne dogonin tora sanpɛrɛn cɛ ma ka aw jaabi;

ne ka aw kɔrɔbɔ Meriba ta ji yɔrɔ ra.81.8 Nin yɔrɔ ra a sɛbɛra heburukan na ko: Sela.

⁹Ne ta mɔgɔw, aw ye ne lamɛn, ne bɛna aw lasɔmi.

E, Izirayɛli, ni a kɛra ko ele tun bɛ sɔn ka ne lamɛn sa!

¹⁰Aw kana a to ala wɛrɛ ye sɔrɔ aw cɛ ra,

aw kana aw kinbiri gban siya wɛrɛ ta ala kɔrɔ ka a bato.

¹¹Ne le ye Matigi Ala ye, aw ta Ala,

min ka aw labɔ Misiran jamana ra;

aw ye aw da yɛlɛ kosɛbɛ, ne bɛna a fa.

¹²«Nka ne ta mɔgɔw ma ne kan lamɛn,

Izirayɛli banna ne ra.

¹³O kosɔn ne ka o to ni o yɛrɛ jusukun ta miiriw ye,

k’a to o ka o yɛrɛ sagonansiraw ta.

¹⁴«E, ni ne ta mɔgɔw tun bɛ sɔn ka ne lamɛn,

ni Izirayɛli tun bɛ sɔn ka tagama ne ta sira kan!

¹⁵Ne tun bɛna o juguw majigi o ye yɔrɔnin kelen na,

ne tun bɛna wuri o kɛrɛbagaw kama.

¹⁶Minw bɛ Matigi Ala kɔninya olugu tun bɛna o kinbiri gban o kɔrɔ;

Izirayɛli tun bɛna kɛ hɛra le ra wagati bɛɛ.

¹⁷Ala tun bɛna o baro ni alikama* bɛɛ ra ɲumanman le ye,

ka kongokɔnɔli bɔ fara ra k’a di o ma o y’a domu fɔ ka o wasa.»

Ala bɛ kiti tigɛ can kan

¹Asafu ta Zaburu.

Ala bɛ a ta kititigɛjama cɛ ra,

a bɛ kiti tigɛ ala tɔw cɛ ra.

²«Aw bɛ kiti minw tigɛ terenbariya kan,

ka jo di mɔgɔjuguw ma, aw bɛna o ko dabla tuma juman?82.2 Nin yɔrɔ ra a sɛbɛra heburukan na ko: Sela.

³Aw ye dɛsɛbagatɔw, ani feritaw ta jo di o ma,

aw ye ɲanibagatɔw, ani fagantanw ta kiti tigɛ ni terenninya ye.

⁴Aw ye dɛsɛbagatɔw ni fagantanw kisi,

aw ye o bɔsi ka bɔ mɔgɔjuguw boro.

⁵«O tɛ foyi lɔn, o tɛ foyi faamu,

o bɛ tagama dibi le ra;

sabu dunuɲa kɔnɔ, terenninya jusiginanw bɛɛ jɛngɛra ka bɔ o nɔ ra.

⁶Ne tun k’a fɔ aw ma ko aw ye alaw ye,

ko aw bɛɛ ye Ala kɔrɔtaninba dencɛw le ye.

⁷Nka aw fana bɛna sa i ko adamadenw,

aw bɛna ben i ko dunuɲa kuntigi tɔw.»

⁸E, Ala, i wuri ka dunuɲa ta kiti tigɛ,

sabu siyaw bɛɛ ye ele ta le ye!

Izirayɛlimɔgɔw ka Ala daari o juguw kama

¹Dɔnkiri. Asafu ta Zaburu.

²E, Ala, i kana je,

i kana to ni i ma foyi kɛ,

i kana to ɲasuma ra, Ala!

³Sabu a flɛ, i juguw bɛ mankan cira,

i kɔninyabagaw bɛ o yɛrɛ kɔrɔtara.

⁴O bɛ dabarijuguw sirira i ta mɔgɔw kama,

ka janfa siri i ta mɔgɔw kama, minw ko ka gbɛlɛn i ma.

⁵O b’a fɔ ɲɔgɔn ye ko: «Aw ye na, an ye o ta siya tunu pewu,

janko mɔgɔ si hakiri kana to Izirayɛli tɔgɔ ra tuun.»

⁶O bɛɛ le bɛnna ni miiriya kelen ye ka janfa siri;

o ka jɛnɲɔgɔnya don ni ɲɔgɔn ye ele kama.

⁷Edɔmu ta mɔgɔw, ani Sumayila ta mɔgɔw,

Mohabukaw, ani Hagarikaw,

⁸Gebali, ani Amɔn, ani Amalɛki ta mɔgɔw,

ani Filisikaw, ani Tiri dugumɔgɔw.

⁹Asirikaw fana farara o kan;

olugu fana bɛ Lutu ta mɔgɔw dɛmɛna.83.9 Nin yɔrɔ ra a sɛbɛra heburukan na ko: Sela.

¹⁰Ala, o kɛ i n’a fɔ i ka Madiyankaw kɛ cogo min na,

i n’a fɔ i ka Sisera, ani Yabɛn kɛ cogo min na Kisɔn kɔda ra.

¹¹I tun ka olugu halaki Ɛni Dɔri,

ka o suw kɛ nɔgɔ ye dugukolo kan.

¹²O ta kuntigiw kɛ i n’a fɔ i ka Orɛbu ni Zɛbu kɛ cogo min na,

ka o ta ɲamɔgɔw kɛ i ko Zeba ni Salimuna.

¹³Olugu minw tun k’a fɔ ko: «An ye Ala ta yɔrɔ ta

k’a kɛ an yɛrɛ ta ye!»

¹⁴E, ne ta Ala, o kɛ i ko folonkonto ta gbangban,

o ye kɛ i ko fɔɲɔ bɛ binjalan min ta.

¹⁵Tasuma bɛ tu jɛni cogo min na,

tasumamana bɛ kuruw jɛni cogo min na,

¹⁶i ta sanfɔɲɔ kɛ ka o gbɛn ten;

o jatigɛ ni i ta sanfɔɲɔba ye.

¹⁷Maroyaba bla o ra, Matigi Ala,

janko o ye i ta jɛnɲɔgɔnya ɲini.

¹⁸Maroya ni jatigɛ ye o mina wagati bɛɛ,

o kun suurunin ye halaki.

¹⁹O y’a lɔn ko ele le tɔgɔ ye ko Matigi Ala,

ko ele kelenpe le ye Ala kɔrɔtaninba ye dunuɲa bɛɛ kunna.

Ala ta yɔrɔ saninman ko ka di a ta mɔgɔw ye

¹Dɔnkirilabagaw kuntigi. Dɔnkiri min bɛ la ni Gatikaw ta gɔni ye. Kore dencɛw ta Zaburu.

²E, Fangatigi Ala,

i ta so ko ka di ne ye dɛ!

³Matigi Ala ta batoso lukɛnɛw ɲanafin ka ne sɔrɔ fɔ ka ne baraka ban;

ne jusukun ni ne farikolo bɛɛ bɛ ɲagarikanba bɔ Ala ɲanaman kosɔn.

⁴Hali cɔrɔninw bɛ so sɔrɔ,

hali naganaganinw bɛ o ta ɲaga layɔrɔ sɔrɔ,

o bɛ se ka o denw bla yɔrɔ min na;

o yɔrɔ ye ele ta sarakabɔnan kɛrɛfɛyɔrɔw le ye, Fangatigi Ala,

ne ta masa, ani ne ta Ala.

⁵Minw bɛ sigi i ta so kɔnɔ, olugu ta ɲana!

O bɛ to ka i tando wagati bɛɛ.84.5 Nin yɔrɔ ra a sɛbɛra heburukan na ko: Sela.

⁶Ele ye mɔgɔ minw ta baraka sɔrɔyɔrɔ ye,

olugu ta ɲana;

i ta so sira tagama ka di minw ye,

olugu ta ɲana.

⁷Hali ni o bɛ Baka ta dingakɔnɔyɔrɔ84.7 Baka ta dingakɔnɔyɔrɔ ye yɔrɔjalan dɔ ye, min tagama ka gbɛlɛn kosɛbɛ. cɛtigɛ,

o yɔrɔ bɛ kɛ bununjiyɔrɔ ye o fɛ;

teremanasanji dɔ fana bɛna baraka di o yɔrɔ ma.

⁸O tagatɔ, dɔ le bɛ to ka fara o baraka kan ka taga,

fɔ ka taga se Ala ɲa kɔrɔ Siyɔn.

⁹Matigi Ala, Fangatigi, ne ta daariri lamɛn,

i toro malɔ, Yakuba ta Ala!84.9 Nin yɔrɔ ra a sɛbɛra heburukan na ko: Sela.

¹⁰E, Ala, ele min ye an ta tangabaga ye, an flɛ,

i janto i yɛrɛ ta mɔgɔ ɲanawolomaninw na.

¹¹Ka tere kelen dama kɛ i ta so lu kɔnɔ,

o ka fisa ni tere waga kelen ye yɔrɔ wɛrɛ.

Ne ye lɔ ne ta Ala ta so donda ra dɔrɔn,

o ka fisa sani ne ye taga to mɔgɔjuguw ta bon kɔnɔ.

¹²Sabu Masa Ala bɛ i ko tere, a bɛ mɔgɔ tanga.

Matigi Ala bɛ makari ni bonya lase mɔgɔ ma;

minw bɛ tagama ni jusukun gbɛnin ye,

a tɛ ban ka koɲuman kɛ olugu ye.

¹³E, Fangatigi Ala,

mɔgɔ min b’a yɛrɛ karifa i ma, o tigi ta ɲana!

Ala le bɛ koɲuman kɛ a ta mɔgɔw ye

¹Dɔnkirilabagaw kuntigi. Kore dencɛw ta Zaburu.

²E, Matigi Ala, i ka koɲuman kɛ i ta jamana ye;

i ka Yakuba ta mɔgɔw ta bonya lasekɔ o ma tuun.

³I ka i ta mɔgɔw ta terenbariya ta ka bɔ o kunna,

i ka o ta jurumunw bɛɛ datugu.85.3 Nin yɔrɔ ra a sɛbɛra heburukan na ko: Sela.

⁴I ka i ta jusugban bɛɛ dabla,

i ka i ta dimiba ban.

⁵E, an ta kisiri tigi Ala, sekɔ an fɛ tuun!

Dimi min bɛ i jusu ra an kama, a to o ye ban!

⁶Yala i bɛna dimi an kɔrɔ wagati bɛɛ le wa?

Yala i diminin bɛna to wagati bɛɛ, ani tuma bɛɛ le wa?

⁷Ele yɛrɛ le tɛna na sekɔ ka na barakakura don an na tuun,

janko i ta mɔgɔw ye ninsɔndiya i ta jɛnɲɔgɔnya ra wa?

⁸E, Matigi Ala, i ta koɲumanw kɛ an ye,

ka an kisi.

⁹Ala bɛ min fɔra, Matigi Ala bɛ min fɔra, a to ne ye o lamɛn;

sabu a bɛ hɛrakuma le fɔra a ta mɔgɔw ye, minw ye a ɲasiranbagaw ye;

nka o kana na sekɔ o ta hakirintanyakow ra tuun dɛ!

¹⁰Can lo, a ta kisiri ka surun a ɲasiranbagaw ra;

a bɛ o kɛ janko a ta bonya ye to an ta jamana kan.

¹¹Ɲumanya ni kankelentigiya ka ɲɔgɔn bɛn,

terenninya ni hɛra ka o boro mini ɲɔgɔn ma.

¹²Kankelentigiya bɛ falen ka bɔ dugukolo ra,

terenninya bɛ jigi ka bɔ sankolo ra.

¹³Matigi Ala yɛrɛ bɛna koɲuman kɛ an ye,

an ta dugukolo simanw bɛna ɲa.

¹⁴Terenninya le bɛna bla a ɲa fɛ,

k’a tɛmɛsira labɛn a ye.

Ala le ye dɛmɛbaga ye

¹Dawuda ta Aladaari.

Matigi Ala, i toro malɔ, ka ne jaabi,

sabu ne ye ɲanibagatɔ ye, ani fagantan.

²Ne nin mara, sabu ne ye i ɲasiranbaga le ye.

Ele le ye ne ta Ala ye;

i ta jɔncɛ kisi, sabu a jigi bɛ ele le kan.

³Makari ne ra, Matigi,

sabu ne bɛ kule ka i wele lon bɛɛ.

⁴I ta jɔncɛ ninsɔndiya,

sabu ne jusukun ta miiriya bɛ ele le kan, Matigi.

⁵I ka ɲi, Matigi, i bɛ yafa.

Mɔgɔ minw bɛɛ bɛ i bato, i bɛ koɲuman caman kɛ olugu ye.

⁶Matigi Ala, i toro malɔ ne ta daariri ra,

i janto ne ta makarikanw na.

⁷Ne ta degulonw na, ne bɛ i wele,

sabu i bɛ ne jaabi.

⁸E, Matigi, ele bɔɲɔgɔnko tɛ batofɛnw si ra;

i ta kɛwalew fana bɔɲɔgɔnko tɛ yi.

⁹I ka siya minw bɛɛ dan,

olugu bɛɛ bɛna na o kinbiri gban i ɲa kɔrɔ, Matigi,

ka bonya la i tɔgɔ kan;

¹⁰sabu i ka bon, i bɛ kabakow kɛ,

ele kelen le ye Ala ye.

¹¹E, Matigi Ala, ne karan i ta siraw ra,

janko ne ye tagama can kan;

ne jusukun kɛ jusukun kelen ye, ka i tɔgɔ ɲasiran don ne ra.

¹²Ne bɛ i fo ka i waleɲumanlɔn ni ne jusukun bɛɛ ye, ne tigi Ala;

ne bɛ i tɔgɔ bonya wagati bɛɛ;

¹³sabu i ka ɲumanya min kɛ ne ye, o ka bon,

i ka ne nin kisi ka bɔ saya dinga kɔnɔ.

¹⁴E, Ala, yɛrɛyirabaga dɔw wurira ne kama,

mɔgɔ jusukungbɛlɛn dɔw bɛ ne fagayɔrɔ ɲinina;

o tɛ ele ta kow si jate.

¹⁵Nka ele Matigi, ele le ye hina tigi Ala ye, ani Ala min bɛ makari;

i tɛ dimi joona, i ta ɲumanya ni i ta kankelentigiya ka bon.

¹⁶I ɲa lɔ ne ra, i ye makari ne ra,

i ta baraka don i ta jɔncɛ ra,

ka i ta jɔnmuso dencɛ kisi!

¹⁷Tagamasiyɛn dɔ kɛ ka i ta koɲuman yira ne ra,

janko ne kɔninyabagaw ye o ye, ka maroya,

sabu ele Matigi Ala le bɛ ne dɛmɛ, ka ne jusu saaro.

Ala ta dugu saninman

¹Kore dencɛw ta Zaburu. Dɔnkiri.

Matigi Ala ka Siyɔn dugu ju sigi kuru saninmanw le kunna.

²Siyɔn dugu donda ko ka di Matigi Ala ye

ka tɛmɛ Yakuba ta dugu tɔw bɛɛ kan.

³E, Ala ta dugu,

koba caman fɔra ele ta ko ra!87.3 Nin yɔrɔ ra a sɛbɛra heburukan na ko: Sela.

⁴Ne bɛna Misirankaw, ani Babilɔnikaw fana tɔgɔ fɔ ne lɔnbagaw ra;

ne bɛna Filisikaw, ani Tirikaw, ani Etiyopikaw fana jate, ko olugu worora yan.

⁵Nka Siyɔn kɔni, a fɔra ko bɛɛ le worora yi;

Ala kɔrɔtaninba yɛrɛ le ka nin dugu ju sigi.

⁶Ni Matigi Ala bɛ siyaw jateda sɛbɛ,

a b’a fɔ bɛɛ kelen kelen ta ko ra, ko: «Nin worora yan le!»87.6 Nin yɔrɔ ra a sɛbɛra heburukan na ko: Sela.

⁷Dɔnkirilabagaw, ani dɔnkɛbagaw bɛɛ b’a fɔ Siyɔn ma ko:

«Ne ta ko bɛɛ bɛ bɔ ele le ra.»

Ala ta mɔgɔ kasikan

¹Dɔnkiri. Kore dencɛw ta Zaburu. Dɔnkirilabagaw kuntigi. Dɔnkiri min bɛ la ni filen ye. Ezirahikacɛ Heman ta dɔnkiri.

²E, Matigi Ala, ne ta kisiri tigi Ala,

su ni tere, ne bɛ kule i ɲa kɔrɔ.

³A to ne ta daariri ye se i ma,

i toro malɔ ne kulekan na;

⁴sabu tɔɔrɔ warara ne ma,

ne nin ka surun saya ra.

⁵Ne bɛ jate i ko o ka minw lajigi kaburu kɔnɔ;

ne bɛ i ko mɔgɔ min baraka bɛɛ banna.

⁶Ne bɛ ni mɔgɔ saninw le ye,

ne bɛ i ko mɔgɔ faganin minw su lanin bɛ kaburu kɔnɔ,

i hakiri tɛ minw na tuun,

i tɛ i janto minw na tuun.

⁷I ka ne firi dingadunba le kɔnɔ,

fɔ dibiba cɛ ma dinga jukɔrɔyɔrɔ ra yi.

⁸I ka i ta jusugban bɛɛ ben ne kan,

ka i ta jikurubaw bɛɛ tɛmɛ ne kan.88.8 Nin yɔrɔ ra a sɛbɛra heburukan na ko: Sela.

⁹I ka ne lɔnbagaw bɛɛ mabɔ ne ra,

ka ne kɛ o fɛ i ko fɛn haramunin.

I ka ne datugu, bɔyɔrɔ si tɛ ne fɛ;

¹⁰tɔɔrɔ ka ne ɲadenw bɛɛ fin.

E, Matigi Ala, lon o lon ne bɛ i wele ko i ye ne dɛmɛ,

ne bɛ ne boro kɔrɔta i nɔ fɛ.

¹¹Yala i bɛna kabakow kɛ suw le ye wa?

Yala mɔgɔ saninw bɛ se ka wuri ka i fo ka i waleɲumanlɔn wa?88.11 Nin yɔrɔ ra a sɛbɛra heburukan na ko: Sela.

¹²Yala o bɛna i ta ɲumanya ko fɔ kaburu le kɔnɔ wa?

Yala o bɛna i ta kankelentigiya lakari lahara dibi le ra wa?

¹³Jɔn le ka i ta kabakow lɔn saya dibi ra yi?

Jɔn le ka i ta terenninya lɔn laharaso kɔnɔ yi?

¹⁴Nka ne kɔni, ne bɛ kulera ele Matigi Ala le nɔ fɛ;

lon o lon sɔgɔma, ne ta daarikan bɛ se i ma.

¹⁵E, Matigi Ala, mun kosɔn i banna ne ra sa?

Mun kosɔn i bɛ i ɲada dogora ne ma?

¹⁶Ne kɔni ye ɲanibagatɔ ye kabini ne denmisɛnman, ne ni saya cɛ man jan;

i ka jatigɛ bla ne ra fɔ ka ne jigi tigɛ.

¹⁷I ta dimiba ka ne datugu,

i ka sɛgɛba min la ne kan, o ka ne si ban pewu.

¹⁸O tɔɔrɔw bɛ ne lamini lon bɛɛ i ko jiwoyo,

o ka ne datugu fan bɛɛ ra.

¹⁹I ka ne teriw, ani ne sigiɲɔgɔnw bɛɛ mabɔ ne ra,

dibi dɔrɔn le kɛra ne teri ye.

Ala bɛ a ta layiri dafa

¹Ezirayikacɛ Etan ta karan.

²Ne bɛna Matigi Ala ta ɲumanya dɔnkiri la wagati bɛɛ,

ne da bɛna i ta kankelentigiya ko lakari wagati bɛɛ, ani tuma bɛɛ.

³Ne b’a fɔ ko i ta ɲumanya tɛna bɔ a nɔ ra ka ye;

i ka i ta kankelentigiya sabati k’a sigi sankolo kɔnɔ.

⁴I tun ko: «Ne ka jɛnɲɔgɔnya don ni ne ta mɔgɔ ɲanawolomanin ye,

ne tun karira ne ta jɔncɛ Dawuda ye.»

⁵Ne ko: «Ne bɛna baraka don i ta durujaw ra wagati bɛɛ,

ne bɛna i ta masaya sabati wagati bɛɛ, ani tuma bɛɛ.»89.5 Nin yɔrɔ ra a sɛbɛra heburukan na ko: Sela.

⁶Matigi Ala, sankolo ni a kɔnɔfɛnw bɛ i fo ka i waleɲumanlɔn i ta kobaw kosɔn,

danfɛn saninmanw bɛ i ta kankelentigiya fana lakari.

⁷Sabu jɔn le bɛ sankolo ra min bɛ se k’a yɛrɛ suma ni ele ye?

Ala ta danfɛn juman le bɛ se k’a yɛrɛ suma ni Matigi Ala ye?

⁸Ala ta danfɛn saninmanw ta jɛn ra, bɛɛ bɛ siran a ɲa;

siranyafɛnba lo ka tɛmɛ danfɛn tɔw bɛɛ kan, danfɛn minw k’a lamini.

⁹E, Matigi Ala, Fangatigi, se bɛ jɔntigi le ye i ko ele, Matigi Ala?

Kankelentigiya ka i lamini fan bɛɛ ra.

¹⁰Ele le bɛ kɔgɔji ta yɛrɛbonya mala;

ni a jikurubaw ka wuri, i bɛ o mala.

¹¹Ele le ka kɔgɔji danfɛn barakaman ɲɔɲɔ, fɔ k’a kɛ su ye;

i ka i juguw janjan i ta sebagayaba baraka ra.

¹²Sankolo ye i ta ye, dugukolo fana ye i ta ye;

ele le ka dunuɲa ni a kɔnɔfɛn bɛɛ dan.

¹³Ele le ka sahili ni worodugu dan,

Tabɔri kuru ni Hɛrimɔn kuru bɛ ɲagari ka pɛrɛn i tɔgɔ kosɔn.

¹⁴I boro ye cɛfariboro le ye;

sebagaya bɛ i borotɛgɛ kɔnɔ,

i boro barakaman kɔrɔtanin lo.

¹⁵Terenninya ni can le bɛ i ta masaya jusiginan ye,

ɲumanya ni kankelentigiya bɛ i ɲa kɔrɔ wagati bɛɛ.

¹⁶Siya min bɛ tandori dɔnkiriw la Ala ye, o ta ɲana;

Matigi Ala, o bɛna tagama i ɲada yeelen na.

¹⁷O siya bɛ ɲagari wagati bɛɛ i tɔgɔ kosɔn,

a bɛ bonya sɔrɔ i ta terenninya sababu ra;

¹⁸sabu ele le ye o ta baraka nɔɔrɔ ye,

ele le sababu ra an fanga bɛ kɔrɔta.

¹⁹An tangabaga bɛ Matigi Ala le boro,

an ta masacɛ bɛ Izirayɛli ta Ala saninman le boro.

²⁰I tun kumana i ɲasiranbagaw fɛ siko dɔ ra

k’a fɔ ko: «Ne ka cɛfari dɔ dɛmɛ,

ne ka kanbelen dɔ kɔrɔta mɔgɔw cɛ ra.

²¹Ne ka Dawuda sɔrɔ, ne ta jɔn lo,

ne ka ne ta turu saninman* kɛ a kun na.

²²Ne yɛrɛ boro bɛna a dɛmɛ k’a sabati,

ne yɛrɛ bɛna baraka don a ra.

²³A juguw tɛna se ka ben a kan a ɲina ma;

mɔgɔ kɛwalejuguw tɛna se k’a minako juguya.

²⁴Ne bɛna a kɛrɛbagaw bɛɛ ɲɔɲɔ a ɲa kɔrɔ,

k’a kɔninyabagaw bɛɛ kɛrɛ.

²⁵Ne ta kankelentigiya ni ne ta ɲumanya bɛna kɛ ni a ye,

a baraka bɛna bonya ne tɔgɔ sababu ra.

²⁶Ne bɛ kɔgɔji bla a ta kuntigiya kɔrɔ,

ka baw bla a ta fanga kɔrɔ.

²⁷«A bɛna ne wele k’a fɔ ko: ‹Ne fa,

ne ta Ala, ne ta kisibaga barakatigi Ala!›

²⁸Ne bɛna a kɛ bɛɛ ra fɔlɔ ye,

k’a kɔrɔta ka tɛmɛ dugukolo masacɛw bɛɛ kan.

²⁹«Ne bɛna ne ta ɲumanya to a kan wagati bɛɛ;

ne ta jɛnɲɔgɔnya bɛna sabati a kan.

³⁰Ne bɛna duruja dɔ to a kɔ wagati bɛɛ;

ni sankolo ma wuri ka bɔ a nɔ ra, a ta masaya fana tɛna wuri.

³¹«Ni a denw ka ne ta sariya sira bla,

ni o ma tagama ka kaɲa ni ne ta kolatigɛninw ye,

³²ni o ka ne ta cifɔninw sira bla,

ni o tɛ, ne ta kumaw lamɛn,

³³ne bɛna wuri o kama ni bere ye o ta hakɛw kosɔn,

ka wuri o kama ka o bugɔ o ta terenbariyaw kosɔn.

³⁴Nka ne tɛna ne ta ɲumanya bɔ o kan,

ne tɛna ne ta kankelentigiya dabla.

³⁵Ne tɛna ne ta jɛnɲɔgɔnya cɛn;

kuma min bɔra ne da ra, ne tɛna o yɛlɛma.

³⁶Ne karira ka ban siɲagako kelen ne ta saninmanya kosɔn;

yala ne bɛna faninya tigɛ Dawuda ye wa?

³⁷Ne ko a ta duruja bɛna to a kɔ wagati bɛɛ,

a ta masaya bɛna to ne ɲa kɔrɔ tuma bɛɛ i ko tere;

³⁸a bɛna to a nɔ ra wagati bɛɛ i ko karo,

min ye seere cantigi ye sankolo kɔnɔ.»89.38 Nin yɔrɔ ra a sɛbɛra heburukan na ko: Sela.

³⁹Nka sisan i banna a ra, i bɔra a kɔ,

i jusu gbanna i yɛrɛ ta mɔgɔ ɲanawolomanin kɔrɔ.

⁴⁰I ka i ni i ta jɔncɛ ta jɛnɲɔgɔnya cɛn,

i k’a ta masafugula ben dugu ma k’a lanɔgɔ.

⁴¹I k’a to o k’a ta dugu kogow bɛɛ sɔgɔsɔgɔ,

k’a to o k’a ta bon barakamanw benben ka o kɛ tomow ye.

⁴²Tɛmɛbagaw bɛɛ b’a borofɛnw cɛ;

i k’a kɛ lɔgɔbɔrifɛn ye a sigiɲɔgɔnw fɛ.

⁴³I k’a kɛrɛbagaw baraka bonya,

k’a juguw bɛɛ to o ye ninsɔndiya.

⁴⁴I k’a ta kɛrɛkɛmuru da gboya,

i ma sɔn k’a dɛmɛ kɛrɛ ra.

⁴⁵I k’a ta dawula ban,

i k’a ta masaya laben dugu ma.

⁴⁶I k’a ta kanbelenya wagati surunya,

i ka maroyaba bla a ra.89.46 Nin yɔrɔ ra a sɛbɛra heburukan na ko: Sela.

⁴⁷E, Matigi Ala, i dogonin bɛna to fɔ wagati juman le sa?

I ta jusugban tasuma bɛna faga tuma juman?

⁴⁸I hakiri to a ra ko ne ta dunuɲalatigɛ man jan,

i ka adamaden min o min dan, o bɛɛ bɛ tɛmɛ.

⁴⁹Jɔn le bɛna to si ra, ko ale ɲa tɛna saya ye,

walama jɔn le bɛ se k’a nin kisi kaburu ma?89.49 Nin yɔrɔ ra a sɛbɛra heburukan na ko: Sela.

⁵⁰E, Matigi, i derira ka ɲumanya minw kɛ fɔlɔfɔlɔ, o bɛ min sisan?

I tun karira ko i bɛna koɲuman minw kɛ Dawuda ye ka kaɲa ni i ta kankelentigiya ye, o bɛ min?

⁵¹E, Matigi, dɔgɔyari minw sera i ta jɔnw ma, i hakiri to o ra;

ka i hakiri to a ra ko nin jama caman doni bɛ ne le kunna.

⁵²E, Matigi Ala, i hakiri to i juguw ta mafiyɛnyari ra,

o bɛ i ta mɔgɔ ɲanawolomanin dɔgɔyara.

⁵³Matigi Ala, i baraka wagati bɛɛ!

Amina! Amina!

Kitabu naaninan

(Zaburuw 90–106)

Ala tɛ yɛlɛma

¹Ala ta jɔncɛ Musa ta Aladaari.

Matigi, ele le kɛra an karifayɔrɔ ye,

wagati bɛɛ, ani tuma bɛɛ.

²Sani kuruw ye dan,

sani i ye dugukolo ni dunuɲa dan,

ele le ye Ala ye wagati bɛɛ, ani tuma bɛɛ.

³Ele le bɛ mɔgɔ lasekɔ dugukolo bɔgɔ ra;

i b’a fɔ a ma ko: «Adamaden, i sekɔ!»

⁴Sabu ele fɛ, san waga kelen bɛ i ko kunu tere min tɛmɛna ka ban,

walama i ko su wagati dɔ.

⁵I bɛ adamadenw latɛmɛ,

o bɛ ban i ko sunɔgɔ bɛ ban cogo min na sɔgɔmada fɛ.

O bɛ tɛmɛ i ko bin;

⁶bin bɛ fiyerenkura bɔ sɔgɔma,

nka wula fɛ, a bɛ fɔsɔnfɔsɔn, ka ja.

⁷I ta dimi ka an halaki ka ban;

i ta jusugban ka an jigi tigɛ.

⁸I ka an ta terenbariyakow bla i ɲa kɔrɔ,

ka an ta ko dogoninw bla kɛnɛ kan.

⁹An si teredaw bɛɛ dɔgɔyara i ta jusugban kosɔn;

an sandaw bɛ banna i ko dafɔɲɔ fiyɛko kelen.

¹⁰An si sandaw bɛɛ lajɛnnin ye san biwolonfla;

minw ye mɔgɔ barakamanw ye, olugu le bɛ san biseegi sɔrɔ.

Nka an bɛ fɛn o fɛn kɛ, o bɛɛ laban ye sɛgɛ ni kojugu le ye,

sabu fɛn bɛɛ bɛ tɛmɛ, an fana tagatɔ lo.

¹¹Adamaden juman le ka i ta dimi baraka hakɛya lɔn?

I ta jusugban min ka kan ka i ɲasiran don mɔgɔw ra, jɔn ka o hakɛya lɔn?

¹²An karan, an ye an si terew jate,

janko an jusukun ye hakiritigiya sira ta.

¹³E, Matigi Ala, sekɔ ka na an fɛ! An bɛna i makɔnɔ fɔ wagati juman sa?

Makari i ta jɔnw na ten.

¹⁴An fa i ta ɲumanya ra lon o lon sɔgɔma,

ni o kɛra, an bɛna ninsɔndiya fɔ ka kule ci an si terew bɛɛ ra.

¹⁵An ka tereda min kɛ maroya ra i boro, o ɲɔgɔn ninsɔndiya fana di an ma;

an ka sanda min kɛ tɔɔrɔ ra, o ɲɔgɔn ninsɔndiya fana di an ma.

¹⁶I ta kokɛtaw yira i ta jɔnw na,

ka i ta nɔɔrɔ yira o ta denw fana ra.

¹⁷An tigi Ala ta nɛɛma ye to an kan!

An ta baara sabati an boro, Ala!

Ɔnhɔn, an ta baara sabati an boro.

Ala ye a ta mɔgɔw dogoyɔrɔ ye

¹Ni mɔgɔ min bɛ dogo Ala kɔrɔtaninba kɛrɛ fɛ,

o tigi bɛ laganfiya Sebɛɛtigi Ala ta suma kɔrɔ.

²Ne b’a fɔ Matigi Ala ma ko: «Ne karifayɔrɔ, ani ne dogoyɔrɔ,

ne ta Ala, ne jigi lanin bɛ min kan.»

³Ale le bɛ i kisi ka bɔ kɔnɔminabaga ta jɔ ra,

ka i kisi banajugu tɔɔrɔ ma.

⁴A bɛ i dogo i ko sisɛ b’a denw dogo a siw jukɔrɔ cogo min na,

i ko sisɛ b’a denw dogo a kamanw kɔrɔ cogo min na.

A bɛ i tanga i ko nɛgɛbɛnnan, walama i ko nɛgɛderege, a ta kankelentigiya kosɔn.

⁵Fɛn minw bɛ mɔgɔ ja tigɛ su fɛ, i tɛna siran o ɲa,

walama i juguw bɛ se ka i bon ni biɲɛ minw ye tere fɛ,

⁶walama banajugu min bɛ dɛndɛn dibiba ra ka taga ben mɔgɔ kan,

walama kojugu minw bɛ ben mɔgɔ kan teregban fɛ.

⁷Hali ni mɔgɔ waga kelen le ka ben i kɛrɛ fɛ,

hali ni mɔgɔ waga tan le ka ben i kininboroyanfan fɛ,

foyi tɛna se ele ma.

⁸Ele bɛna i ɲa le lɔ ka flɛri kɛ dɔrɔn,

ka mɔgɔjuguw ta sara flɛ.

⁹Can lo, Matigi Ala le ye ne karifayɔrɔ ye.

Ni Ala kɔrɔtaninba ye i dogoyɔrɔ ye,

¹⁰kojugu si tɛna se i ma,

banajugu si tɛna se i ta somɔgɔw ma;

¹¹sabu a bɛna i ko fɔ a ta mɛlɛkɛw ye,

k’a fɔ o ye ko o ye o janto i ra i ta kokɛtaw bɛɛ ra.

¹²O bɛna i ta o boro kɔnɔ,

janko i sen kana na talon kabakuru dɔ ra.

¹³I bɛna tagama jara kan, ka tagama fɔnfɔnnin kan;

i bɛna jarakanbelen dɔn ka tɛmɛ, ka sajugu dɔn ka tɛmɛ.

¹⁴I n’a fɔ ne ko ka di a ye, a nɔrɔra ne ra, ne bɛna a bɔsi,

ne bɛna a tanga, sabu a bɛ ne tɔgɔ lɔn.

¹⁵Ni a ka ne wele, ne bɛna a jaabi,

ni a degura, ne bɛ kɛ ni a ye;

ne bɛna a bɔsi, k’a bonya.

¹⁶Ne bɛna a si janya fɔ k’a wasa,

ne bɛna a yira a ra ko ne le ye a kisibaga ye.

Ala ta kɛwalew bɛɛ ka ɲi

¹Zaburu. Nɛnɛkirilon ta dɔnkiri.

²Ka Matigi Ala fo k’a waleɲumanlɔn, o ka ɲi;

ka dɔnkiri la ka ele Ala kɔrɔtaninba tɔgɔ tando,

³ka i ta ɲumanya lakari lon o lon sɔgɔma,

ka i ta kankelentigiya lakari lon o lon su fɛ

⁴ni gɔni juru tan ye,

ani korafɔkanw ye, o ka ɲi.

⁵E, Matigi Ala, i ta kɛwalew bɛ ne ninsɔndiya;

ne bɛ ninsɔndiya fɔ ka kule ci i boro ta baaraw kosɔn.

⁶Matigi Ala, i ta kokɛninw ka bon!

I ta kolatigɛninw kɔrɔ ka dun kosɛbɛ!

⁷Naloman t’a lɔn,

hakirintan tɛ se k’a faamu.

⁸Mɔgɔjuguw bɛ wuri ka caya i ko binjugu,

kojugukɛbagaw bɛɛ ta kow bɛ ɲa o boro,

nka o laban bɛ halaki ka ban le pewu!

⁹Nka ele kɔni Matigi Ala,

ele kɔrɔtanin lo wagati bɛɛ.

¹⁰E, Matigi Ala, i juguw flɛ,

i juguw halakitɔ flɛ,

minw bɛɛ bɛ terenbariyakow kɛ, i bɛ olugu bɛɛ janjan.

¹¹I bɛ ne baraka bonya i ko kongomisi baraka;

i bɛ turu kasadiman kɛ ne kan ka ne ninsɔndiya.

¹²Ne bɛ ne ɲa lɔ ne daraɲinibagaw ra ka o flɛ;

minw bɛɛ bɛ wurira ne kama ni kojugu ye, ne toro bɛ olugu kan na.

¹³Mɔgɔ terenninw bɛ wuri i ko tamarosun,

o baraka bɛ bonya i ko Liban jamana sɛdirisunw.

¹⁴O bɛ i ko yiri turuninw Matigi Ala ta so kɔnɔ,

o bɛ wuri ka nugu an ta Ala ta lukɛnɛ kɔnɔ.

¹⁵Hali o kɔrɔnin bɛ den,

ji bɛ o ra tuma bɛɛ, o flaburu nugunin lo;

¹⁶o bɛ Matigi Ala ta terenninya lakari.

Ale le ye ne ta barakatigi Ala ye, terenbariyako si t’a ra.

Ala le ye Masa ye

¹Matigi Ala le ye Masa ye,

bonya le ye a ta masiri ye,

bonya le ye Matigi Ala ta masiri ye;

baraka ye a ta cɛsirinan ye.

O kosɔn dunuɲa sabatinin lo,

a tɛ se ka jɛngɛ ka bɔ a nɔ ra.

²Ala, i ta masasiginan sigira kabini fɔlɔfɔlɔ,

i bɛ yi wagati bɛɛ, ani tuma bɛɛ.

³Bajiw bɛ o kan kɔrɔtara, Matigi Ala,

bajiw bɛ o kan kɔrɔtara kosɛbɛ,

bajiw bɛ mankan wurira.

⁴Nka Matigi Ala ta sebagaya ka bon ka tɛmɛ jibaw mankan kan,

a ka bon ka tɛmɛ kɔgɔji jikurubaw baraka kan;

Matigi Ala kɔrɔtanin lo san fɛ, a ta sebagaya ka bon.

⁵Ala, i ka ci minw fɔ, o tɛ yɛlɛma ka ye.

Saninyari bɛnna i ta so ma,

wagati bɛɛ ra, Matigi Ala.

Ala le bɛ mɔgɔɲuman dimibɔ

¹Dimibɔbaga Ala, Matigi Ala,

dimibɔbaga Ala, i ta nɔɔrɔ yira!

²I wuri, dunuɲa kititigɛbaga!

Yɛrɛbonyabagaw sara ka kaɲa ni o ta kɛtaw ye!

³Mɔgɔjuguw ta wagati ye juman le ye sa, Matigi Ala?

Mɔgɔjuguw ta ɲagari banwagati bɛna kɛ tuma juman le?

⁴O bɛ dabayakumaw fɔ ka mɔgɔw mafiyɛnya;

kojugukɛbagaw bɛɛ bɛ o yɛrɛ bonya.

⁵E, Matigi Ala, o bɛ i ta mɔgɔw teregera o sen kɔrɔ,

o bɛ i ta jamana mɔgɔw minako juguyara.

⁶O bɛ muso cɛ saninw, ani lonanw fagara,

o bɛ feritaw nin bɔra o ra.

⁷O b’a fɔ ko: «Matigi Ala tɛ foyi yera,»

ko: «Yakuba ta Ala tɛ foyi kala ma!»

⁸Aw ye miiri, aw nalomanw!

Aw hakirintanw, aw bɛna hakiri sɔrɔ tuma juman le?

⁹Ala min ka toro di mɔgɔ ma, mun b’a to ko ale tɛ mɛnni kɛ?

Ala min ka ɲaden di mɔgɔ ma, mun b’a to ko ale tɛ yeri kɛ?

¹⁰Ala min bɛ siyaw koro, mun b’a to ko ale tɛ se ka aw ta hakɛw juru sara aw ra,

ale min bɛ lɔnniya yira adamadenw na?

¹¹Matigi Ala ka adamadenw jusukunnakow lɔn,

a k’a lɔn ko o ta miiriyaw bɛɛ ye gbansan le ye.

¹²Matigi Ala, ni ele ka mɔgɔ min koro, o tigi ta ɲana;

ni i ka mɔgɔ min karan i ta sariya ra, o tigi ta ɲana.

¹³Ni wagatigbɛlɛnw sera a ma, i bɛ a jusu suma,

sani k’a to dingaba ye sogi, mɔgɔjugu bɛna ben min kɔnɔ.

¹⁴Matigi Ala tɛna bɔ a ta mɔgɔw kɔ fiyewu,

a tɛna ban a ta jamana mɔgɔw ra.

¹⁵Kiti bɛna tigɛ can kan tuun,

mɔgɔ jusuɲumanw bɛɛ bɛna sɔn o ma.

¹⁶Jɔntigi le bɛna lɔ ni kunko ye ne ni mɔgɔjuguw ta kiti ra?

Jɔn le bɛna fara ne kan janko ne ye jo sɔrɔ kojugukɛbagaw kan?

¹⁷Ni Matigi Ala tun ma kɛ ne dɛmɛbaga ye kɔni,

bi tun b’a sɔrɔ ne nin tagara jamana mankanntan94.17 Jamana mankanntan, o kɔrɔ ye lahara. na ka ban.

¹⁸Ni ne ko: «E, ne senw dɛsɛra tagama ra!»

O tuma i ta ɲumanya bɛ baraka don ne ra, Matigi Ala.

¹⁹Ni ne ta haminakow cayara,

i bɛ ne jusu saaro ka ne ninsɔndiya.

²⁰Fanga min sigira mɔgɔfaga kama, yala ele bɛ sɔn o fanga ma wa?

O bɛ Ala ta cifɔninw sira bla, ka sɛgɛ bla mɔgɔw kan.

²¹O bɛ ɲɔgɔn lajɛn mɔgɔ terennin nin kama,

ka kiti ben mɔgɔ jarakibari kan k’a faga gbansan;

²²nka Matigi Ala ye ne tangabaga ye,

ne ta Ala le ye ne ta barakatigi Ala ye, ne karifayɔrɔ.

²³A bɛna o yɛrɛ ta kojuguw le kɛ ka o sara,

ka o latunu pewu o ta juguya kosɔn.

Matigi Ala, an ta Ala bɛna o latunu pewu.

Ala le ka kan ni tandori ye

¹Aw ye na an ye ɲagari ka Matigi Ala tando,

an ye ɲagari ni kanba ye ka barakatigi Ala, an kisibaga Ala tando.

²An ye taga a ɲa kɔrɔ ni forikanw ye,

an ye ɲagari ka dɔnkiriw la k’a tando ni kanba ye;

³sabu Matigi Ala ye Alaba le ye,

Masaba lo min bɛ batofɛnw bɛɛ kunna.

⁴K’a ta dugukolo jukɔrɔyɔrɔw ra, ka taga a bla fɔ kuruw sanfɛyɔrɔw ra,

o bɛɛ b’a boro kɔnɔ, o bɛɛ ye a ta ye.

⁵Kɔgɔji ye a ta ye, ale le k’a dan;

dugukolo fana, ale le ka o dan.

⁶Aw ye na, an ye an yɛrɛ majigi a kɔrɔ k’a bato,

an ye an kinbiri gban Matigi Ala kɔrɔ, min ka an dan;

⁷Sabu ale le ye an ta Ala ye,

anw le ye a ta mɔgɔw ye, a bɛ minw kɔrɔsi;

an bɛ i ko a ta sagakuru, a yɛrɛ boro bɛ min gbɛngbɛn.

O kosɔn ni aw k’a kumakan mɛn bi,

⁸aw kana aw jusukun gbɛlɛya i n’a fɔ a kɛra Meriba cogo min na,

i n’a fɔ a kɛra cogo min na kongokolon kɔnɔ Masa95.8 Meriba ni Masa ta ko (Bɔri 17.7). ta ko ta wagati ra.

⁹O yɔrɔ le ra, aw bɛmaw ko o bɛ ne Ala kɔrɔbɔ, ka ne sɛgɛsɛgɛ k’a flɛ,

k’a sɔrɔ o tun ka ne ta kokɛninw ye.

¹⁰Fɔ san binaani, nin siya lɔgɔ bɔra ne ra;

ne ko: «Siya dɔ lo min jusukun terennin tɛ,

o tɛ ne ta sira tagama.»

¹¹O kosɔn ne dimikojugu fɛ, ne karira ko:

«O tɛna don ne ta jamana ra ka nɛnɛkiri fiyewu!»

Dunuɲa bɛɛ ye Ala ta bonya lakari

(Zaburuw 105; 106; Kibaroyaw fɔlɔ 16.23-33)

¹Aw ye dɔnkirikura la ka Matigi Ala tando!

Dunuɲamɔgɔw bɛɛ ye dɔnkiri la ka Matigi Ala tando!

²Aw ye dɔnkiri la Matigi Ala ye, k’a tɔgɔ bonya,

aw y’a fɔ lon o lon, ko ale le ye an kisibaga ye.

³Aw ye a ta bonya lakari siyaw bɛɛ ye,

aw ye a ta kobaw lakari mɔgɔw bɛɛ ye.

⁴Sabu Matigi Ala ka bon, a ka kan ni tandori ye kosɛbɛ;

an ka kan ka siran a ɲa ka tɛmɛ batofɛn tɔw bɛɛ kan.

⁵Siya tɔw ta alaw bɛɛ ye batofɛn gbansanw le ye,

nka Matigi Ala le ka sankolo dan.

⁶Bonya ni nɔɔrɔ ye ale ta le ye,

sebagaya ni dawula bɛ sɔrɔ a ta yɔrɔ saninman kɔnɔ.

⁷Dunuɲa siyaw bɛɛ, aw ye bonya ni fanga di Matigi Ala ma,

aw y’a di Matigi Ala ma.

⁸Aw ye bonya la Matigi Ala tɔgɔ kan,

aw ye na don a ta batoso lu kɔnɔ ni aw ta sarakaw ye.

⁹Aw ye saninya ka na aw kinbiri gban ka Matigi Ala bato,

dunuɲamɔgɔw bɛɛ lajɛnnin ye siran Matigi Ala ɲa fɔ ka yɛrɛyɛrɛ.

¹⁰Aw y’a fɔ siyaw bɛɛ ye ko: «Matigi Ala le ye Masa ye!»

O kosɔn dugukolo b’a nɔ ra, a tɛ jɛngɛ ka bɔ a nɔ ra ka ye.

Matigi Ala bɛna siyaw ta kiti tigɛ can le kan.

¹¹Sankolokɔnɔfɛnw ye ɲagari, dugukolokanfɛnw ye ninsɔndiya,

kɔgɔji ni a kɔnɔfɛnw bɛɛ ye mankanba bɔ!

¹²Kongokɔnɔyɔrɔw, ani kongokɔnɔfɛnw bɛɛ ye ɲagarikanba bɔ!

Kongoyiriw bɛɛ ye ɲagari, ka dɔnkiri la.

¹³O ye o kɛ Matigi Ala ɲa kɔrɔ, sabu a bɛ nana,

a bɛ nana ka na dunuɲamɔgɔw ta kiti tigɛ!

A bɛna dunuɲamɔgɔw ta kiti tigɛ ka kaɲa ni terenninya ye,

ka siyaw ta kiti tigɛ ka kaɲa ni a ta can ye.

Matigi Ala le ye dunuɲa Masa ye

¹Matigi Ala le ye Masa ye!

Dunuɲamɔgɔw ye ɲagari,

kɔgɔji kɔfɛmɔgɔw bɛɛ ye ninsɔndiya!

²Sankabaw, ani dibikurubaw k’a lamini,

terenninya ni can le ye a ta masaya jusiginan ye.

³Tasuma bɛ mana a ɲa fɛ,

k’a juguw jɛni fan bɛɛ ra.

⁴A ta sanmanamanaw yeelen bɛ bɔ dunuɲa bɛɛ kan;

ni dunuɲamɔgɔw ka o ye, o bɛ yɛrɛyɛrɛ.

⁵Kuruw bɛ yeele i ko kɛɲɛ, Matigi Ala ɲa kɔrɔ,

o bɛ yeele dunuɲa bɛɛ tigi Ala ɲa kɔrɔ.

⁶Sankolokɔnɔfɛnw bɛ a ta terenninya lakari,

dunuɲamɔgɔw bɛɛ bɛ a ta nɔɔrɔ ye.

⁷Minw bɛ batofɛn lɛsɛninw bato,

minw bɛ o yɛrɛ bonya batofɛn gbansanw kosɔn,

maroya ye kɛ olugu ta le ye;

ala tɔw bɛɛ ye o kinbiri gban Matigi Ala le kɔrɔ.

⁸Siyɔn dugu bɛna o mɛn ka ninsɔndiya,

Zuda dugumɔgɔw bɛna ɲagari

i ta kolatigɛninw kosɔn, Matigi Ala.

⁹Sabu, ele Matigi Ala le ye Ala kɔrɔtaninba ye dunuɲa bɛɛ lajɛnnin kunna,

i kɔrɔtara fɔ san fɛ alaw bɛɛ kunna.

¹⁰Ala kanubagaw, aw ye kojugu kɔninya!

Ala b’a ɲasiranbagaw nin kɔrɔsi,

a bɛ o bɔsi ka bɔ mɔgɔjuguw boro.

¹¹Ala bɛ yeelen manamana mɔgɔ terenninw kan,

a bɛ mɔgɔ jusuɲuman ninsɔndiya.

¹²Aw mɔgɔ terenninw, aw ye ninsɔndiya Matigi Ala kosɔn,

aw y’a fo k’a waleɲumanlɔn a tɔgɔ saninman kosɔn.

Danfɛnw bɛɛ ye Ala tando

¹Zaburu.

Aw ye dɔnkirikura la ka Matigi Ala tando,

sabu a ka kabakobaw kɛ.

A bɛ mɔgɔ kisi ni a boro barakaman

ni a ta sebagaya saninman ye.

²Matigi Ala k’a yira mɔgɔw ra ko ale le ye kisiri tigi ye;

a k’a ta terenninya yira siyaw ra, k’a to o ɲa y’a ye.

³A hakiri tora Izirayɛlimɔgɔw ra k’a ta ɲumanya ni a ta kankelentigiya kɛ o ye;

dunuɲa yɔrɔ bɛɛ k’a ye ko an ta Ala le ye kisiri tigi ye.

⁴Dunuɲamɔgɔw, aw bɛɛ ye ɲagarikanba bɔ Matigi Ala kosɔn!

Aw ye pɛrɛn ka ɲagari ka dɔnkiri la k’a tando!

⁵Aw ye dɔnkiri la ka Matigi Ala tando ni korafɔkan ye,

aw y’a tando ni korafɔkan ni dɔnkirilakan ye,

⁶k’a tando ni burufiyɛkan ni sagajigigban buru ye;

aw ye ɲagari ka pɛrɛn masacɛ ɲa kɔrɔ, Matigi Ala ɲa kɔrɔ!

⁷Kɔgɔji ni a kɔnɔfɛnw bɛɛ ye mankanba bɔ,

ani dunuɲa ni a kɔnɔfɛnw bɛɛ.

⁸Bajiw ye tɛgɛrɛ fɔ,

kuruw bɛɛ ye jɛn ka ɲagarikanw bɔ!

⁹O ye o kɛ Matigi Ala ɲa kɔrɔ, sabu a bɛ nana ka na dunuɲamɔgɔw ta kiti tigɛ;

a bɛna dunuɲamɔgɔw ta kiti tigɛ ka kaɲa ni terenninya ye,

ka siyaw ta kiti tigɛ ka kaɲa ni can ye.

Ala le ye saninyari Masa ye

¹Matigi Ala le ye Masa ye, dunuɲamɔgɔw bɛ yɛrɛyɛrɛ a ɲa kɔrɔ;

a siginin bɛ serubɛn mɛlɛkɛw* kunna, dugukolo bɛ yɛrɛyɛrɛ a ɲa kɔrɔ.

²Matigi Ala ka bon Siyɔn dugu kɔnɔ;

ale le kɔrɔtara dunuɲamɔgɔw bɛɛ kunna.

³Mɔgɔw ye i fo ka i waleɲumanlɔn, sabu i tɔgɔ ka bon, siranyafɛn lo,

a saninyanin lo fana.

⁴Ele Masacɛ barakaman, can ka di min ye,

ele le bɛ ɲumanya sabati,

ele le bɛ can ni terenninya sigi Yakuba ta mɔgɔw cɛ ra.

⁵Aw ye Matigi Ala, an ta Ala kɔrɔta!

Aw ye aw kinbiri gban a sen kɔrɔ k’a bato,

sabu a saninyanin lo.

⁶Musa ni Haruna tun ye a ta sarakalasebaga dɔw ye,

Samawilu tun ye a batobaga dɔ ye;

olugu ka Matigi Ala wele, a ka o jaabi.

⁷A tora sankaba jamijan cɛ ma ka kuma o fɛ;

o k’a ta ciw sira tagama,

a tun ka cifɔnin minw yira o ra, o ka o kɛ.

⁸Matigi Ala, an ta Ala, ele le ka o jaabi;

i kɛra o ta Ala ye, Ala min bɛ yafa o ma,

nka i tun bɛ o ta kɛwalejuguw hakɛ bɔ o ra fana.

⁹Aw ye Matigi Ala, an ta Ala kɔrɔta;

aw ye aw kinbiri gban k’a bato a ta kuru saninman kan,

sabu Matigi Ala, an ta Ala saninyanin lo.

Dunuɲamɔgɔw bɛɛ ye Ala tando

¹Barakalari Zaburu.

Aw ye ɲagari ka Matigi Ala tando,

aw dunuɲamɔgɔw bɛɛ!

²Aw ye baara kɛ Matigi Ala ye ni ninsɔndiya ye,

aw ye na a ɲa kɔrɔ ni ɲagarikanbaw ye!

³Aw y’a lɔn ko Matigi Ala le ye Ala ye,

ko ale le ka an dan, an fana ye a ta ye;

anw le ye a ta mɔgɔw ye, anw le ye a ta sagakuru ye.

⁴Aw ye don a ta so dondaw fɛ ni barakalari ye,

aw ye don a lu kɔnɔ ni tandori ye.

Aw y’a fo k’a waleɲumanlɔn, ka baraka la a tɔgɔ kan;

⁵sabu Matigi Ala ka ɲi,

a ta ɲumanya tɛ ban ka ye!

A ta kankelentigiya tɛ yɛlɛma ka ye!

Masacɛ ka kan ka layiri minw ta

¹Dawuda ta Zaburu.

Ne bɛna dɔnkiri la ka koɲuman sira ni can sira yira;

Matigi Ala, ne bɛna dɔnkiri la ka ele le tando.

²Ne bɛna jija ka tagama sira gbɛnin le kan.

I bɛna na ne fɛ tuma juman le sa, Ala?

Ne bɛna tagama ni jusukun gbɛnin le ye, ne ni ne ta somɔgɔw.

³Ne tɛna sɔn kokolonw ye kɛ ne ɲa kɔrɔ;

ne bɛna Alaɲasiranbariw ta sira kɔninya,

ne tɛna sɔn ka jɛn ni o kow si ye.

⁴Ne bɛna ne yɛrɛ mabɔ mɔgɔ terenbariw ra,

ne tɛna sɔn kojugu si ma.

⁵Mɔgɔ o mɔgɔ bɛ dogo k’a mɔgɔɲɔgɔn tɔgɔ cɛn,

ne bɛna o tigi halaki.

Yɛrɛyira bɛ minw flɛrikɛcogo ra, ani yɛrɛbonya bɛ minw jusukun na,

ne tɛna olugu ta ko muɲu.

⁶Ne bɛna ne janto lanamɔgɔw le ra jamana kɔnɔ,

k’a to olugu ye sigi ne kɔrɔ.

Mɔgɔ o mɔgɔ bɛ tagama sira gbɛnin kan,

o tigi le bɛna baara kɛ ne ye.

⁷Mɔgɔ o mɔgɔ b’a mɔgɔɲɔgɔn janfa,

o tigi tɛna sigi ne ta so;

mɔgɔ o mɔgɔ bɛ faninya tigɛ

o tigi tɛna to ne kɔrɔ.

⁸Lon o lon sɔgɔma, ne bɛna wuri

ka jamana mɔgɔjuguw bɛɛ halaki,

janko ka kojugukɛbagaw bɛɛ ban

ka bɔ Matigi Ala ta dugu kɔnɔ.

Ala le ye ɲanibagatɔ jigi ye

¹Nin ye ɲanibagatɔ dɔ ta daariri ye, wagati min na a jigi tigɛra; a k’a kɔnɔnɔkow ɲafɔ Matigi Ala ye.

²E, Matigi Ala, ne ta daarikan lamɛn,

a to ne ta welerikan ye se i ma.

³I kana i ɲada dogo ne ra k’a sɔrɔ ne degunin lo;

ni ne ka kule ka i wele tuma o tuma, i ye i toro malɔ ka ne lamɛn,

i teliya ka ne jaabi.

⁴Sabu ne si bɛ banna i ko sisi bɛ tunu cogo min na,

ne kolow bɛ ne jɛnina i ko tasuma.

⁵Ne jusukun baraka bɛɛ banna, k’a ja i ko binjalan;

ne bɛ ɲina hali ka domuni kɛ.

⁶Ne ŋunakojugu fɛ,

ne fasara fɔ ka ne kolow bɛɛ bɔ kɛnɛ ma.

⁷Ne kɛra i ko kɔnɔdaba min bɛ kongokolon kɔnɔ,

ne kɛra i ko gbingbinfin min bɛ sigi yɔrɔ dogoninw na.

⁸Ne bɛ si ɲana,

i ko kɔnɔnin min bɛ a kelen na bon kunna.

⁹Lon o lon ne juguw bɛ ne mafiyɛnya;

o bɛ ne lɔgɔbɔ, ka to ka ne tɔgɔ kɛ ka ɲɔgɔn danga.

¹⁰Bugurigbɛ le kɛra ne ta domuni ye,

ne ɲaji bɛ ɲagami ne ta minji ra,

¹¹i ta jusugban ni i ta dimi kosɔn;

sabu i ka ne ta ka ne firi fɔ yɔrɔjan.

¹²Ne si bɛ banna i ko wulafɛsuma min bɛ samana ka taga a laban na,

ne bɛ jara i ko bin bɛ ja cogo min na.

¹³Nka ele kɔni, Matigi Ala, ele siginin bɛ i ta masaya ra wagati bɛɛ,

i bɛ yi wagati bɛɛ, ani tuma bɛɛ.

¹⁴Ele le bɛna na, ka na hina Siyɔn dugu ra;

i ka kan ka makari a ra wagati min na, o sera;

wagati min tun latigɛra o sera.

¹⁵Sabu a dugu kabakuruw ko ka gbɛlɛn i ta jɔnw ma kosɛbɛ,

hali a buguri ko ka di o ye.

¹⁶Ni o kɛra, siyaw bɛna siran Matigi Ala tɔgɔ ɲa,

dunuɲa masaw bɛɛ bɛna siran i ɲa i ta bonya kosɔn.

¹⁷Matigi Ala bɛna Siyɔn dugu lɔ kokura,

a bɛna a ta bonya yira.

¹⁸A bɛna ɲanibagatɔw flɛ, ka o ta daariri lamɛn;

a tɛna a toro datugu o ta daarikan na.

¹⁹Nin kow ye sɛbɛ k’a bla duruja nataw ye,

janko mɔgɔ minw bɛna na kɔ fɛ, olugu fana ye Matigi Ala tando.

²⁰A bɛ to a ta yɔrɔ saninman kɔnɔ san fɛ ka flɛri kɛ dugu ma,

a bɛ to sankolo ra ka dugukolo flɛ,

²¹janko ka a ta mɔgɔ minaninw ŋunakan lamɛn,

ani minw blara fagari kama, janko ka olugu bɔsi.

²²Ni o kɛra, o bɛna Matigi Ala tɔgɔ lakari Siyɔn dugu kɔnɔ,

k’a tando Zeruzalɛmu;

²³o wagati le ra siyaw bɛna lajɛn ɲɔgɔn kan,

ani jamanaw, janko ka Matigi Ala bato.

²⁴Matigi Ala ka ne baraka ban ka ne to tagama ra;

a ka dɔ bɔ ne si ra.

²⁵Ne ko: «E, ne ta Ala, i kana ne ta ka ne to ne si cɛmancɛ ra,

ele min si sandaw tɛ ban ka ye fiyewu!»

²⁶I ka dugukolo dan kabini fɔlɔfɔlɔ,

sankolo fana ye i boro nɔ le ye.

²⁷Olugu kɔni bɛna ban pewu, nka ele bɛ to i cogo ra.

O bɛɛ bɛna kɔrɔ ka cɛn i ko fani,

i bɛna o yɛlɛma i ko mɔgɔ bɛ fani donta yɛlɛma cogo min na;

o bɛna tɛmɛ.

²⁸Nka ele kɔni bɛ to i cogo ra,

i si sandaw tɛ ban ka ye le fiyewu!

²⁹I ta jɔnw ta denw bɛna sigi i kɔrɔ,

o ta durujaw fana bɛna sabati i ɲa kɔrɔ.

Danfɛnw bɛɛ ye baraka la Ala ye

¹Dawuda ta Zaburu.

E, ne nin, baraka la Matigi Ala ye!

Ne jusukun bɛɛ ye baraka la a tɔgɔ saninman kan!

²E, ne nin, baraka la Matigi Ala ye,

i kana ɲina a ta koɲuman si kɔ.

³Ale le bɛ i ta terenbariyaw bɛɛ yafa,

ale le bɛ i ta banaw bɛɛ kɛnɛya.

⁴A bɛ i nin kunmabɔ kaburu ma,

k’a ta ɲumanya ni a ta hina kɛ masafugula ye i kun na.

⁵A bɛ koɲumanw kɛ i ye i si bɛɛ ra;

a bɛ i kanbelenman wagati ta baraka ɲɔgɔn don i ra, i ko bɔn ta baraka.

⁶Matigi Ala bɛ kiti tigɛ terenninya kan,

ka mɔgɔ tɔɲɔninw bɛɛ ta jo di o ma.

⁷A k’a ta siraw yira Musa ra,

k’a ta kobaw kɛ ka o yira Izirayɛlimɔgɔw ra.

⁸Matigi Ala bɛ hina, a bɛ makari,

a tɛ dimi joona, a ta ɲumanya ka bon.

⁹A tɛ mɔgɔ jaraki k’a kɛ jaraki dablabari ye,

a fana tɛ dimi maranin to a jusukun na mɔgɔ kama.

¹⁰A tɛ an mina ka kaɲa ni an ta jurumunw ye,

a fana tɛ an sara ka kaɲa ni an ta terenbariyaw ye.

¹¹Sankolo ni dugukolo cɛ ka bon cogo min na,

a bɛ ɲumanya min kɛ a ɲasiranbagaw ye, o fana ka bon ten le.

¹²Terebɔ ni tereben cɛ ka jan cogo min na,

a fana bɛ an ta hakɛw yɔrɔ janya an na ten le.

¹³Fa bɛ hina a denw na cogo min na,

Matigi Ala fana bɛ hina a ɲasiranbagaw ra ten le.

¹⁴Sabu an danna ni fɛn min ye, a yɛrɛ ka o lɔn;

a hakiri b’a ra ko an ye bɔgɔ le ye.

¹⁵Adamaden ta ɲanamanya bɛ i ko bin;

a bɛ i ko kongobinw bɛ fiyeren cogo min na.

¹⁶Nka ni fɔɲɔ wurira ka fiyɛ dɔrɔn, a tɛ ye tuun;

ni i k’a sigiyɔrɔ flɛ, i t’a lɔn ko fɛn tun bɛ yi.

¹⁷Nka Matigi Ala ta ɲumanya bɛ to a ɲasiranbagaw kan wagati bɛɛ, ani tuma bɛɛ;

a ta terenninya bɛ to o ta denw ta denw kan,

¹⁸minw kɔni bɛ sɔn ka to a ta jɛnɲɔgɔnya ra,

ka o hakiri to a ta sariya ta kumaw ra ka o sira tagama.

¹⁹Matigi Ala k’a ta masasiginan sigi sankolo kɔnɔ,

a ta fanga bɛ danfɛn bɛɛ kan.

²⁰Matigi Ala ta mɛlɛkɛw, aw ye baraka la Matigi Ala ye,

aw minw baraka ka bon, aw minw bɛ a ta baara kɛ,

aw minw bɛ a ta kumakan lamɛn.

²¹Matigi Ala ta sankolokɔnɔfɛnw, aw bɛɛ ye baraka la Matigi Ala ye,

aw minw bɛ a ta baara ra, aw minw b’a sago kɛ!

²²Matigi Ala ta danfɛnw, aw bɛɛ ye baraka la Matigi Ala ye,

ni aw ka kɛ dunuɲa yɔrɔ o yɔrɔ a ta fanga kɔrɔ.

E, ne nin, baraka la Matigi Ala ye!

Ala le ye danfɛn bɛɛ makoɲabaga ye

¹E, ne nin, baraka la Matigi Ala ye!

Matigi Ala, ne ta Ala, i ka bon kosɛbɛ;

bonya ni nɔɔrɔ le bɛ ele ta masiri ye.

²Yeelen ka i lamini i ko derege,

i bɛ sankolo yɛrɛgɛ i ko fanibon.

³I bɛ i ta so lɔ sankolo jiw le kunna san fɛ;

sankabaw ye i ta sowotoro ye,

i bɛ bori fɔɲɔ kan.

⁴I bɛ fɔɲɔ kɛ i ta ciradenw ye,

ka tasumamana kɛ i ta baaradenw ye.

⁵I ka dugukolo sigi a jusiginanw kan,

a tɛ jɛngɛ ka bɔ a nɔ ra ka ye fiyewu.

⁶I tun ka ji kɛ k’a datugu i ko fani,

jiw tun yɛlɛnna fɔ kuruw kunna.

⁷Nka i sɔngɔra jiw ra, o borira,

i ta sanpɛrɛnkan bɔra minkɛ, o teliyara ka taga.

⁸O yɛlɛnna kuruw kan ka taga, o jigira kurufurancɛw ra,

ka taga se fɔ o toyɔrɔ ra, i ka yɔrɔ min labɛn o ye.

⁹I ka dan dɔ sigi, jiw man kan ka tɛmɛ min kan,

janko o kana na dugukolo datugu tuun.

¹⁰I bɛ kɔw fa ji ra,

o bɛ fa fɔ ka woyo kuruw furancɛw ra.

¹¹I bɛ kongosogow bɛɛ sɔn ji ra,

kongofaliw bɛna min a ra.

¹²Sanfɛkɔnɔw bɛ to a jidaw ra,

o bɛ to ka kasi yiriflaburuw cɛ ra.

¹³I bɛ to i sigiyɔrɔ ra san fɛ ka sanji lana kuruw kan,

i ta baara tɔnɔ ka dugukolo wasa.

¹⁴I bɛ binw falen ka o di bɛganw ma,

ka adamadenw ta sɛnɛfɛnw falen,

janko o ye o ta baro sɔrɔ dugukolo ra,

¹⁵ani rɛzɛnji min bɛ adamaden jusu diya,

ani turu min b’a ɲada manamana,

ani domuni min bɛ baraka don a ra.

¹⁶Matigi Ala ta yiriw bɛ ji sɔrɔ fɔ ka wasa,

a ka Liban jamana sɛdiriyiri minw turu, o bɛ ji sɔrɔ.

¹⁷Kɔnɔninw bɛ o ta ɲagaw la o yiriw le ra,

baninkɔnɔw bɛ o ta so lalaga sipɛrɛsisunba le san fɛ.

¹⁸Kuru jamijanw ye kongobakɔrɔninw ta ye,

faraw ye farawo ɲinanw dogoyɔrɔ ye.

¹⁹A ka karo dan janko ka wagatiw bɔ ɲɔgɔn na,

tere fana k’a benwagati lɔn.

²⁰Ni a ka dibi don, su bɛ ko;

o wagati le ra kongosogow bɛɛ bɛ bɔ ka yaala.

²¹Jaraw bɛ kasi o ta domuni kɔ,

o bɛ o ta baro ɲini Ala fɛ.

²²Nka ni tere ka bɔ dɔrɔn, o bɛ sekɔ,

ka taga la o ta wow kɔnɔ.

²³O tuma ra mɔgɔw bɛ bɔ ka taga o ta baaraw kɛ;

o bɛ to o ta baaraw ra fɔ wula fɛ.

²⁴E, Matigi Ala, i ta kokɛninw ka ca!

I ka o bɛɛ kɛ ni hakiritigiya ye;

dunuɲa fara i ta danfɛnw na.

²⁵Kɔgɔji ye nin ye, a ka bon, a dan yɔrɔ ka jan;

fɛnɲanaman minw b’a kɔnɔ, o da tɛ lɔn,

a fitiniw, ani a belebelebaw.

²⁶Jirakurunbaw bɛ yaala a kan,

ani jirasa belebele, i ka o min dan janko a ye ɲanagbɛ ji kɔnɔ.

²⁷O fɛnw bɛɛ ɲa lɔnin bɛ ele le ra,

janko i ye o ta domuni di o ma a wagati ra.

²⁸I b’a di o ma, o b’a mina,

i bɛ i boro dayɛlɛ o ye, o bɛ wasa fɛnɲumanw na.

²⁹Nka ni i ka i ɲada dogo o ma, o jigi bɛ tigɛ,

ni i ka i ta nin bɔ o ra, o bɛ sa,

o bɛ sekɔ ka kɛ buguri ye tuun.

³⁰Nka ni i ka i ta nin lajigi, dɔ wɛrɛw bɛ woro kokura,

ka kɛ danfɛnkuraw ye dugukolo kɔ kan.

³¹Matigi Ala ta bonya ye to a nɔ ra wagati bɛɛ,

Matigi Ala ye ninsɔndiya a yɛrɛ ta baara kosɔn!

³²Ni a ka a ɲa lɔ dugukolo ra, dugukolo bɛ yɛrɛyɛrɛ,

ni a magara kuruw ra, o bɛ sisi bɔ.

³³Ne bɛna dɔnkiri la Matigi Ala ye ne si bɛɛ ra,

ka ne to nin na, ne bɛna dɔnkiriw la ka ne ta Ala tando lon bɛɛ.

³⁴Ne ta dɔnkiri ye diya Matigi Ala ye;

ne kɔni bɛna ninsɔndiya Matigi Ala kosɔn.

³⁵Ala y’a to jurumunkɛbagaw bɛɛ ye tunu ka bɔ dugukolo kan,

mɔgɔjugu si kana ye tuun!

E, ne nin, baraka la Matigi Ala ye!

Aw ye Matigi Ala tando!

Ala ye kankelentigi ye

(Hayan 1–15; Kibaroyaw fɔlɔ 16.8-22)

¹E, aw ye Matigi Ala fo k’a waleɲumanlɔn, aw y’a tɔgɔ wele!

Aw ye a ta kabakobaw ko fɔ siya tɔw ye!

²Aw ye dɔnkiri la a ye, aw ye tandori dɔnkiriw la a ye;

aw ye a ta koɲumanbaw bɛɛ ko fɔ mɔgɔw ye.

³Aw ye ɲagari a tɔgɔ saninman kosɔn;

minw bɛ Matigi Ala ta jɛnɲɔgɔnya ɲini, olugu ye ninsɔndiya!

⁴Aw ye Matigi Ala ta jɛnɲɔgɔnya ɲini, k’a ta baraka ɲini;

aw ye gbara a ra wagati bɛɛ!

⁵A ka koɲumanba minw kɛ, aw ye aw hakiri to o ra,

a ka kabako minw kɛ, ani a ka ko minw latigɛ, aw ye aw hakiri to o ra,

⁶aw minw ye a ta jɔn Iburahima ta durujaw ye,

aw minw ye a ta mɔgɔ ɲanawolomaninw ye, Yakuba ta denw!

⁷Ale le ye Matigi Ala ye, an ta Ala.

A ta fangatigiya bɛ dugukolo yɔrɔ bɛɛ kan.

⁸A b’a hakiri to a ta jɛnɲɔgɔnya ra wagati bɛɛ,

a tun ka o kuma minw fɔ duruja caman ye.

⁹A ka jɛnɲɔgɔnya min don ni Iburahima ye,

ani a karira min na ni Isiyaka ye,

¹⁰a kɔsegira o kuma le kan, ka o kɛ sariya ye k’a di Yakuba ma,

ka o kɛ jɛnɲɔgɔnya wuribari ye ka o di Izirayɛli105.10 Yakuba tɔgɔ ye fana ko Izirayɛli. ma.

¹¹A ko o ma ko: «Ne bɛna Kanaana jamana di aw le ma,

ka o kɛ aw ninyɔrɔ ye, ka o kɛ aw ta ye.»

¹²O wagati ra, o tun ye mɔgɔ dama dama le ye dɔrɔn,

o tun man ca, o tun bɛ lonanya ra o dugukolo kan;

¹³o tun bɛ yaala siyaw ni ɲɔgɔn cɛ,

ka bɔ jamana dɔ ra ka taga dɔ ra.

¹⁴Nka Ala ma sɔn mɔgɔ si ye o minako juguya,

a ka masaw jaraki o kosɔn.

¹⁵A ko: «Aw kana maga ne ta mɔgɔ ɲanawolomaninw na dɛ!

Aw kana kojugu si kɛ ne ta ciraw ra!»

¹⁶Ala nana kɔngɔ ben jamana kan,

ka domuni bɛɛ dɛsɛ mɔgɔw ra.

¹⁷A ka cɛ dɔ bla o ɲa,

o ye Yusufu ye, min tun fiyeerera ka taga kɛ jɔn ye.

¹⁸O ka nɛgɛjɔrɔkɔ don a senw na,

ka nɛgɛ don a kan na,

¹⁹fɔ lon min na a ta kuma nana kɛ can ye,

Matigi Ala darakuma nana jo di a ma.

²⁰Masacɛ k’a fɔ ko o y’a labla,

jamana matigicɛ ko o y’a labɔ kasobon na.

²¹O k’a labɔ k’a kɛ masacɛ ta so ɲamɔgɔ ye,

k’a sigi a borofɛnw bɛɛ kunna,

²²ko a bɛ se ka jamana kuntigiw jagboya a sago ma,

ka cɛkɔrɔbaw sɔn hakiri ra.

²³O kɔ, Izirayɛli nana Misiran,

Yakuba nana sigi Kamu ta jamana ra105.23 Aw ye hayan 10 flɛ: Yakuba le ye Izirayɛli ye; Misiran ye Kamu ta jamana ye..

²⁴Ala ka o ta mɔgɔw caya kosɛbɛ,

ka o baraka bonya ka tɛmɛ o juguw ta kan.

²⁵Nka Ala nana Misirankaw ta miiriya yɛlɛma, k’a to o ka Ala ta mɔgɔw kɔninya;

ka Ala ta jɔnw janfa.

²⁶Ala k’a ta jɔncɛ Musa ci o fɛ,

ani Haruna, a tun ka ale min fana wele.

²⁷O ka tagamasiyɛnw kɛ Ala ta sebagaya baraka ra, k’a yira Misirankaw ra;

o ka kobaw kɛ Kamu ta jamana ra.

²⁸Ala ka dibi don, ka jamana yɔrɔ bɛɛ kɛ dibi ye;

mɔgɔ si ma ban Ala ta kuma ma.

²⁹A ka o ta jiw yɛlɛma ka o kɛ jori ye,

ka o ta jɛgɛw faga.

³⁰O ta jamana fara tɔrisenjanw na,

ka taga don hali o ta masaw ta sibonw kɔnɔ.

³¹A kumana minkɛ, kinnifɛn misɛnw nana

jamana yɔrɔ bɛɛ ra, ani sosow.

³²A ka sanbɛrɛ lajigi o kan i ko sanji,

ka tasumamana lajigi o ta jamana kan.

³³A ka o ta rɛzɛnsunw, ani o ta torosunw halaki,

ka o ta jamana yiriw karikari.

³⁴A kumana minkɛ tuun, ɲɔdomutɔnw nana,

ani tɔnbaw, minw da tɛ se ka lɔn.

³⁵O ka o ta jamana binw bɛɛ ɲimi,

ka o ta dugukolo yiridenw bɛɛ domu.

³⁶A ka o ta jamana den fɔlɔw bɛɛ faga,

den minw tun ye o ta baraka nɔ fɔlɔ ye.

³⁷A k’a ta mɔgɔw labɔ, k’a to o ye bɔ ni warigbɛ ni sanin ye;

o ta gbaw si ta mɔgɔ ma dɛsɛ ka to kɔ.

³⁸O bɔko ka Misirankaw ninsɔndiya,

sabu o ɲasiran tun ka Misirankaw mina.

³⁹Ala ka sankaba kɛ ka a ta mɔgɔw datugu,

ka tasuma mana ka yeelen bɔ o ye su fɛ.

⁴⁰O ko o bɛ sogo fɛ, a ka wɔlɔninw lana o fɛ;

a ka domuni di o ma ka bɔ sankolo ra.

⁴¹A ka fara dayɛlɛ, ji bɔra,

ka woyo i ko kɔ, ka taga kongokolon fan bɛɛ ra.

⁴²Ala tun ka layiri saninman min ta, a k’a hakiri to o ra;

a k’a hakiri to a ta jɔncɛ Iburahima ra.

⁴³A k’a ta mɔgɔw labɔ ni ninsɔndiyakanw ye;

a k’a ta mɔgɔ ɲanawolomaninw labɔ ni ɲagarikanw ye.

⁴⁴A ka siya wɛrɛw ta dugukolow di o ma,

ka mɔgɔ wɛrɛw ta baara tɔnɔ kɛ o ta ye,

⁴⁵janko o ye a ta cifɔninw lamɛn,

k’a ta sariyaw sira tagama.

Aw ye Matigi Ala tando!

Izirayɛlimɔgɔw ma kɛ kankelentigiw ye

(Hayan 1,47-48; Kibaroyaw fɔlɔ 16.34-36)

¹Aw ye Matigi Ala tando!

Aw ye Matigi Ala fo k’a waleɲumanlɔn, sabu a ka ɲi,

a ta ɲumanya tɛ ban ka ye.

²Jɔn le bɛna se ka Matigi Ala ta kobaw bɛɛ lakari?

Jɔn le bɛna se k’a ta tandori bɛɛ fɔ?

³Minw bɛ tagama ka kaɲa ni can ye,

minw bɛ terenninya sira tagama tuma bɛɛ, olugu ta ɲana.

⁴Matigi Ala, ni i bɛ nɛɛma i ta mɔgɔw ye, i ye i hakiri to ne ra;

ni i bɛ o kisi, i ye i hakiri to ne ra,

⁵janko ne ɲa ye i ta mɔgɔ ɲanawolomaninw ta hɛra ye,

ka ninsɔndiya ni i ta jamana mɔgɔw ye;

ne fana kun ye kɔrɔta ni i ta mɔgɔw ye.

⁶Anw fana ka jurumun kɛ i ko an bɛmaw,

an ka ko bɛnbariw kɛ, ka kojuguw kɛ fana.

⁷An bɛmaw ma i ta kabakow kɔrɔ faamu Misiran;

i ka koɲuman caman min kɛ o ye, o hakiri ma to o si ra,

o murutira kɔgɔji kɔrɔ, Kɔgɔjiwulen kɔrɔ.

⁸Nka a ka o kisi a tɔgɔ kosɔn,

janko k’a ta sebagaya yira.

⁹A sɔngɔra Kɔgɔjiwulen na, a jara;

a ka o latɛmɛ jiba cɛ ma i ko mɔgɔ bɛ tagama kongokolon kɔnɔ cogo min na.

¹⁰A ka o bɔsi ka bɔ o kɔninyabaga boro,

ka o kunmabɔ o jugu boro.

¹¹Ji ka o juguw le datugu,

hali o ra kelen ma bɔsi.

¹²O ra, o lara a ta kuma ra,

o ka dɔnkiri la k’a tando.

¹³Nka a ma mɛɛn, o ɲinana a ta kokɛninw kɔ joona;

o ma muɲu k’a ta kolatigɛninw wagati makɔnɔ.

¹⁴Fɛn caman nege ka o mina kongokolon kɔnɔ,

o ko o bɛ Ala kɔrɔbɔ kongokolon kɔnɔ.

¹⁵O tun bɛ min fɛ, Ala ka o di o ma,

nka o kɔ, a ka banajugu dɔ bla o ra.

¹⁶Ka o to o ta sigiyɔrɔ ra, Musa ɲangboya ka o mina,

ani Haruna, min tun blara danna Matigi Ala ye.

¹⁷Dugukolo dayɛlɛra ka Datan kunu,

a datugura Abiramu ni a tɔɲɔgɔnw da ra.

¹⁸Tasuma ka o nɔfɛmɔgɔw jɛni,

tasumamana ka o mɔgɔjuguw halaki.

¹⁹O ka misiden dɔ bisigiya lalaga ni sanin ye Horɛbu,

o ka o kinbiri gban o ta batofɛn lalaganin kɔrɔ ka o bato.

²⁰Misi min bɛ bin ɲimi, o ka o bisigiya le lalaga,

ka o bla o ta Ala nɔɔrɔman nɔ ra.

²¹O ɲinana o kisibaga Ala kɔ,

ale min tun ka kobaw kɛ o ye Misiran,

²²min tun ka kabakow kɛ Kamu ta jamana ra,

min tun ka siranyakobaw kɛ Kɔgɔjiwulen kan.

²³A tun ko a bɛ o halaki,

nka Musa min tun ye a ta mɔgɔ ɲanawolomanin ye, ale lɔra o ni Ala cɛ,

janko ka Ala ta jusugban lalɔ, k’a to a kana o halaki.

²⁴O ka o jamana ɲumanba ko mafiyɛnya,

o ma la Ala ta kuma ra.

²⁵O ka Ala kɔrɔfɔ o ta fanibonw kɔnɔ,

o ma sɔn ka Matigi Ala kan mina.

²⁶Ala karira o ye,

ko ale bɛna a to o ye faga kongokolon kɔnɔ,

²⁷ko a bɛna o ta durujaw janjan ka taga jamanaw cɛ ra

k’a to o ye sa siya tɔw cɛ ra yi.

²⁸O kɔ, o ka Baali Pehɔri ta batofɛnw bato,

o ka o sukɔrɔw ta sarakaw domu.

²⁹O k’a to Matigi Ala dimina o ta kɛwalew kosɔn,

k’a to fagari sera o ma.

³⁰Finehasi le wurira ka o ko ɲanabɔ;

o kɛra minkɛ, bana lalɔra.

³¹Ala k’a jate mɔgɔ terennin ye o kɛwale kosɔn,

wagati bɛɛ, ani tuma bɛɛ, o tɛ yɛlɛma.

³²O ka Matigi Ala jusu bɔ Meriba ta ji yɔrɔ ra

k’a to Ala ka kojugu kɛ Musa ra olugu kosɔn,

³³sabu o tun k’a jusu kasi,

k’a to a ka kuma bɛnbari fɔ.

³⁴O ma sɔn ka siya wɛrɛw halaki

i ko Matigi Ala tun k’a fɔ o ye cogo min na.

³⁵O ka o yɛrɛ ɲagami o siyaw ra,

ka o ta kokɛcogow ladegi.

³⁶O ka o siyaw ta batofɛnw bato;

o kɛra jan ye ka o mina.

³⁷O ka o dencɛw kɛ saraka ye,

o ka o denmusow kɛ saraka ye ka o di jinaw ma.

³⁸O bagara mɔgɔ jarakibari ma k’a faga,

o ka o dencɛw, ani o denmusow faga,

ka olugu kɛ saraka ye ka Kanaana jamana ta jow sɔn.

O fagariw kɛra sababu ye ka jamana lanɔgɔ.

³⁹O ka o yɛrɛ lanɔgɔ ni o ta kɛwalew ye;

o ta kɛwalejuguw fɛ, o bɔra Ala kɔ ka jow bato.

⁴⁰O kosɔn Matigi Ala dimina a ta siya kɔrɔ kosɛbɛ;

a k’a yɛrɛ ta mɔgɔw haramuya.

⁴¹A ka o labla siya tɔw ye;

o kɔninyabagaw ka o ta fanga sigi o kunna.

⁴²O juguw ka o minako juguya,

ka o majigi ka o bla o ta fanga kɔrɔ.

⁴³Siɲaga caman, a ka o bɔsi,

nka o belen tugura ka muruti a ma,

ka dɔ fara o ta terenbariyaw kan.

⁴⁴Nka a ka o kasikan mɛn minkɛ,

a ka o degucogo ye.

⁴⁵A k’a hakiri to a ta jɛnɲɔgɔnya ra o kosɔn;

a k’a jusu suma o kɔrɔ a ta ɲumanyaba kosɔn;

⁴⁶o tun ka o mina ka taga siya minw bɛɛ fɛ,

a ka o hina don olugu ra.

⁴⁷E, Matigi Ala, an ta Ala, an kisi!

An labɔ siyaw cɛ ra ka an lajɛn;

janko an ye i fo ka i waleɲumanlɔn i tɔgɔ saninman kosɔn,

ka an ta bonya kun kɛ ele tandori ye.

⁴⁸Matigi Ala, Izirayɛli ta Ala, baraka,

wagati bɛɛ, ani tuma bɛɛ!

Jama bɛɛ lajɛnnin y’a fɔ ko: «Amina!»

Aw ye Matigi Ala tando!

Kitabu loorunan

(Zaburuw 107–150)

Ala le ye mɔgɔ bɛɛ kisibaga ye

¹Aw ye Matigi Ala fo k’a waleɲumanlɔn, sabu a ka ɲi,

a ta ɲumanya tɛ ban ka ye.

²Matigi Ala ka mɔgɔ minw kunmabɔ, olugu ye o fɔ;

a ka olugu minw bɔ degu ra,

³a ka minw labɔ jamana tɔw ra, ka o lajɛn

ka bɔ terebɔyanfan ni terebenyanfan na,

sahiliyanfan ni woroduguyanfan na.

⁴Dɔw tun bɛ yaalara kongokolon kɔnɔ o kun fɛ, yɔrɔ lakolonw na,

o tɛ sira sɔrɔra ka taga dugu si ra, o bɛ se ka sigi min na.

⁵Kɔngɔ ni minlɔgɔ tun bɛ o ra,

o baraka tun bɛ ɲini ka ban.

⁶Ka o degunin to, o kulera ka Matigi Ala wele,

a ka o bɔsi ka bɔ o ta kɔnɔnɔfiri ra.

⁷A ka o lataga sira terennin fɛ,

fɔ ka taga se dugu dɔ ma, o bɛ se ka sigi min na.

⁸Olugu ye Matigi Ala fo k’a waleɲumanlɔn a ta ɲumanya kosɔn,

a bɛ koɲumanba minw kɛ adamadenw ye;

⁹sabu minlɔgɔ tun bɛ minw na, a ka olugu ta minlɔgɔ ban,

ka fɛnɲumanw di kɔngɔtɔw ma ka o wasa.

¹⁰Dɔw tun siginin bɛ dibi ra, saya dibi ra,

o tun bɛ kaso ra, ɲani na, o sirinin bɛ nɛgɛjɔrɔkɔ ra,

¹¹sabu o murutira Ala ta kuma ma,

ka Ala kɔrɔtaninba ta ladiriw mafiyɛnya.

¹²O kosɔn a ka sɛgɛ ben o kan ka o majigi;

o talonna ka ben, mɔgɔ si ma sɔrɔ ka o dɛmɛ.

¹³Ka o degunin to, o kulera ka Matigi Ala wele,

a ka o kisi ka bɔ o ta kɔnɔnɔfiri ra.

¹⁴A ka o labɔ dibi ra, saya dibi ra,

ka o ta sirinanw tigɛtigɛ ka bɔ o ra.

¹⁵Olugu ye Matigi Ala fo k’a waleɲumanlɔn a ta ɲumanya kosɔn,

a bɛ koɲumanba minw kɛ adamadenw ye;

¹⁶sabu a ka kasobon ta siranɛgɛkonw karikari,

k’a sɔgɔnan nɛgɛramanw cici.

¹⁷Naloman dɔw tun bɛ hakɛkow kɛ,

fɔ bana ka o tɔɔrɔ o ta terenbariyaw kosɔn.

¹⁸Hali domuni lɔgɔ tun tɛ o ra tuun;

o tun bɛ surunyara saya donda le ra.

¹⁹Ka o degunin to, o kulera ka Matigi Ala wele,

a ka o kisi ka bɔ o ta kɔnɔnɔfiri ra.

²⁰A kumana minkɛ, a ta kuma ka o kɛnɛya,

a ka o bɔsi kaburu ma.

²¹Olugu ye Matigi Ala fo k’a waleɲumanlɔn a ta ɲumanya kosɔn,

a bɛ koɲumanba minw kɛ adamadenw ye.

²²O ye ɲumanlɔn sarakaw* bɔ,

k’a ta kokɛninw lakari ni ɲagarikanbaw ye.

²³Dɔw tun bɛ kɔgɔji kan jirakurunw kɔnɔ,

o tun bɛ sanni ni fiyeere kɛ yɔrɔw ni ɲɔgɔn cɛ jiw kan.

²⁴Olugu fana ka Matigi Ala ta kɛwalew ye,

o k’a ta kobaw ye ka o to ji dunbaw cɛ ma yi.

²⁵A kumana minkɛ, sanfɔɲɔba dɔ wurira,

ka jikuruw kɔrɔta.

²⁶Kurun tun bɛ wuri san fɛ, ka sekɔ ka na ben ji ra;

o tɔɔrɔra fɔ ka o baraka bɛɛ ban.

²⁷Ɲanamini ka o mina, o bɛ tingitanga i ko dɔrɔtɔw;

o ta dabari bɛɛ tun banna pewu.

²⁸Ka o degunin to, o kulera ka Matigi Ala wele,

a ka o bɔ o ta kɔnɔnɔfiri ra.

²⁹A ka sanfɔɲɔ lalɔ k’a mala,

ka jikuruw mankan suma.

³⁰Yɔrɔ sumana minkɛ, o diyara o ye;

Ala ka o lataga o ɲanayɔrɔ ra.

³¹Olugu ye Matigi Ala fo k’a waleɲumanlɔn a ta ɲumanya kosɔn,

a bɛ koɲumanba minw kɛ adamadenw ye.

³²O y’a tɔgɔ kɔrɔta a ta mɔgɔw ta jamalajɛnyɔrɔ ra

k’a tando cɛkɔrɔbaw ta ɲɔgɔnlajɛnyɔrɔ ra.

³³Ala le bɛ bajiw yɛlɛma ka o kɛ kongokolon ye,

ka bununjiw yɛlɛma ka o kɛ yɔrɔjalan ye,

³⁴ka dugukoloɲuman yɛlɛma k’a kɛ yɔrɔjalan ye,

jamana mɔgɔw ta juguya kosɔn.

³⁵A fana bɛ kongokolon yɛlɛma k’a kɛ jiyɔrɔ ye,

ka yɔrɔjalan yɛlɛma k’a kɛ bununji ye,

³⁶ka o kɛ kɔngɔtɔw sigiyɔrɔ ye,

ka o kɛ dugu ye, mɔgɔ bɛ sigi min na.

³⁷O bɛ simanw dan forow ra, ka rɛzɛnsunw turu,

ka den caman sɔrɔ o ra.

³⁸A bɛ baraka don o ra, ka o caya kosɛbɛ;

a t’a to dɔ ye bɔ o ta bɛganw na.

³⁹Dɔw baraka tun dɔgɔyara, fɔ ka o kun suuru

mɔgɔw ta tɔɲɔri ni sɛgɛ ni jusukasi sababu ra.

⁴⁰O kosɔn Ala ka dɔgɔyari lase fagamaw ma,

k’a to o ye yaala o kun fɛ kongokolonw kɔnɔ, sira tɛ yɔrɔ minw na.

⁴¹A ka fagantanw lawuri ka o bɔ ɲani na,

ka o ta gbamɔgɔw caya i ko sagakuruw.

⁴²Mɔgɔ terenninw bɛ o ye, ka ninsɔndiya,

nka kojugukɛbagaw bɛɛ da bɛ datugu.

⁴³Ni mɔgɔ min ye hakiritigi ye, o tigi bɛna nin kow kɔrɔsi,

ka Matigi Ala ta ɲumanya ko faamu.

Ala le ye sesɔrɔri tigi ye

(Hayan 2–6; Zaburu 57.8-12; Hayan 7–14; Zaburu 60.7-14)

¹Alatandodɔnkiri. Dawuda ta Zaburu.

²Ne hakiri sigira, Ala, ne hakiri sigira!

Ne bɛna dɔnkiri la ka Ala tando ni ne jusukun bɛɛ ye.

³Ne ta kora ni ne ta gɔni, aw ye kunu!

Ne bɛna dugugbɛda lakunu.

⁴E, Matigi Ala, ne bɛ i fo ka i waleɲumanlɔn jamana mɔgɔw cɛ ra,

ne bɛ dɔnkiri la ka i tando siyaw cɛ ra;

⁵sabu i ta ɲumanya bonya bɛ tɛmɛ sankolo kan,

i ta kankelentigiya bɛ se fɔ sankolo ma.

⁶E, Ala, i tɔgɔ ye kɔrɔta, fɔ ka tɛmɛ sankolo kan,

i ta bonya ye kɛ dunuɲa bɛɛ lajɛnnin kan.

⁷Ne jaabi, ka an kisi ni i boro barakaman ye,

janko i ta mɔgɔ kanuninw ye bɔsi.

⁸Ala tora a ta yɔrɔ saninman kɔnɔ, ka kuma, ko:

«Ne bɛna se sɔrɔ, ka Sikɛmu mara taran k’a nin,

ka Sukɔti dingakɔnɔyɔrɔ suma k’a nin.

⁹Galadi ta mara ye ne ta ye,

Manase ta mara fana ye ne ta ye;

Efirayimu ta mara ye ne ta nɛgɛfugula ye,

Zuda ta mara ye ne ta masacɛbere ye.

¹⁰Mohabu ta mara ye ne ta kominan dɔrɔn le ye,

ne bɛ ne ta sanbara bɔ k’a firi Edɔmu ta mara le kan;

ne bɛ se sɔrɔ, ka pɛrɛn Filisikaw ta jamana kunna.»

¹¹Jɔn le bɛna ne lataga dugu barakaman kɔnɔ sa?

Jɔn le bɛna taga ni ne ye Edɔmu?

¹²Ele tɛ wa? E, Ala! Ele min tun banna an na;

ele min tun tɛ bɔra ni an ta kɛrɛkɛcɛw ye tuun! E, Ala!

¹³An dɛmɛ, ka an bɔsi ka bɔ an juguw boro!

Sabu adamaden ta dɛmɛri ye gbansan le ye.

¹⁴Nka ni Ala bɛ ni an ye, an bɛna kobaw kɛ;

ale le bɛna an juguw dɔndɔn fɔ ka o ɲɔɲɔ.

Ala le bɛ fagantan mɔnɛbɔ

¹Dɔnkirilabagaw kuntigi. Dawuda ta Zaburu.

E, Ala, ne bɛ ele le tando, i kana je ne ra!

²Sabu mɔgɔjuguw, ani nanbaratɔw ka o da yɛlɛ ne kama;

o bɛ faninyakumaw fɔ ne kama.

³O bɛ kɔninyarikumaw fɔ ne kama fan bɛɛ ra,

o bɛ kɛrɛ ɲini ne fɛ gbansan.

⁴O bɛ ne jaraki k’a sɔrɔ ne bɛ olugu kanu;

ne kɔni ta ye Aladaari le ye.

⁵O bɛ ne ta koɲuman sara ni kojugu ye,

ka ne ta kanuya sara ni kɔninya ye.

⁶Mɔgɔjugu dɔ ye wuri a kama k’a jaraki,

a jarakibaga ye lɔ a kininboroyanfan fɛ!

⁷Ni a ta kiti bɛ tigɛ, kiti ye ben a kan;

hali a ta Aladaari ye jate jurumun ye!

⁸Dɔ ye bɔ a si ra,

mɔgɔ wɛrɛ ye a ta baara kɛ a nɔ ra.

⁹A denw ye kɛ feritaw ye,

a muso ye kɛ muso cɛ sanin ye!

¹⁰A denw ye yaala o kun fɛ ka daariri kɛ,

o ye bɔ o ta bonkolonw kɔnɔ ka taga domuni daari fɔ yɔrɔjan!

¹¹Jurunantigiw y’a borofɛnw bɛɛ mina,

mɔgɔ wɛrɛw ye a ta baara tɔnɔ bɛɛ cɛ!

¹²Mɔgɔ si kana koɲuman kɛ a ye,

a bɛ sa ka den minw to a kɔ, mɔgɔ si kana makari olugu ra.

¹³A kɔmɔgɔw ye halaki ka ban,

o tɔgɔ ye tunu ka bɔ duruja nata cɛ ra.

¹⁴Matigi Ala hakiri ye to a bɛmaw ta terenbariyakow ra;

a bamuso ta jurumunw kana yafa!

¹⁵O ta jurumunw ye to Matigi Ala hakiri ra tuma bɛɛ;

Ala ye o tɔgɔ tunu ka bɔ dugukolo kɔ kan.

¹⁶Ayiwa, nin kow bɛɛ y’a sɔrɔ, sabu ale ma miiri ka koɲuman kɛ mɔgɔ ye;

a ka mɔgɔ ɲanibagatɔw, ani fagantanw, ani mɔgɔ jusu kasinin tɔɔrɔ fɔ ka o faga.

¹⁷Ka mɔgɔw danga, o le tun ka di a ye;

sisan danga ye ben ale yɛrɛ kan!

Dugawukɛ tun man di a ye;

sisan dugawu yɔrɔ ye janya ale yɛrɛ ra!

¹⁸Danga le ye kɛ a kannaderege ye,

danga ye jigi a kɔnɔ i ko ji,

ka jigi a kolow kɔnɔ i ko turu.

¹⁹Danga ye kɛ fani ye a kanna k’a datugu,

ka kɛ a ta kurusijara ye a cɛ ra tuma bɛɛ.

²⁰Ne jarakibagaw, ani minw bɛ kumajuguw fɔ ne ma,

olugu ta sara bɛna kɛ o le ye Matigi Ala fɛ.

²¹E, Matigi Ala, ne Matigi,

ele kɔni ye ne minako ɲa, i tɔgɔ kosɔn;

ne bɔsi, sabu i ta ɲumanya ka ɲi!

²²Ne kɔni ye ɲanibagatɔ ye, ani fagantan;

ne jusu cɛnna!

²³Ne bɛ tagara i ko wulafɛsuma min bɛ samana ka taga a laban na.

O bɛ ne yuguyugu i ko o bɛ yiri yuguyugu ka tɔnw benben cogo min na.

²⁴Ne kinbirikunw bɛ yɛrɛyɛrɛ ne kɔrɔ, sundonkojugu fɛ;

ne fasara fɔ ka ne ja.

²⁵Ne kɛra dɔgɔyarifɛn le ye o fɛ,

o bɛ ne flɛ ka o kun yuguyugu.

²⁶E, Matigi Ala, ne ta Ala, ne dɛmɛ!

Ne kisi i ta ɲumanya kosɔn,

²⁷k’a to o y’a lɔn ko ele boro nɔ lo,

ko ele Matigi Ala yɛrɛ le ka nin kɛ.

²⁸Hali ni olugu ka ne danga, ele bɛna baraka don ne ra.

Ni o ka wuri ne kama, olugu le bɛna maroya,

nka i ta jɔn bɛna ninsɔndiya.

²⁹Dɔgɔyari le bɛna kɛ ne jarakibagaw kannaderege ye,

maroya le bɛna o datugu i ko deregeba.

³⁰Ne da bɛna Matigi Ala fo k’a waleɲumanlɔn kosɛbɛ,

ne bɛna a tando a ta mɔgɔw ta jamaba cɛ ra;

³¹sabu a bɛ lɔ fagantan kɔrɔ,

k’a kisi ka bɔ a jarakibagaw boro.

Masacɛ sarakalasebaga

¹Dawuda ta Zaburu.

Matigi Ala k’a fɔ ne Matigi ye ko:

«Na i sigi ne kininboroyanfan fɛ,

fɔ ne ye na i juguw mina ka o bla i sen kɔrɔ110.1 Nin kumaw fɔra Layirikura yɔrɔ caman na: (Matiyu 22.44; Marika 12.36; Luka 20.42-43; Kɛwalew 2.34-35; Heburuw 1.13)..»

²Matigi Ala bɛna i ta fanga bonya, k’a damina Siyɔn ka se fɔ yɔrɔjan;

i bɛna i ta kuntigiya sigi i juguw kan.

³I bɛna wuri ka i juguw kɛrɛ lon min na,

i ta mɔgɔw labɛnnin lo o lon kama.

I ta kanbelenw bɛna na to i kɔrɔ kuru saninman kan,

i ko sɔgɔmada gɔmiji.

⁴Matigi Ala karira,

a fana tɛna a ta miiriya yɛlɛma:

«Ele le ye sarakalasebaga ye wagati bɛɛ,

i n’a fɔ Mɛlikisedɛki tun bɛ cogo min na110.4 Nin kumaw bɛ sɔrɔ Heburuw 5.6; 6.20; 7.17,21..»

⁵Matigi bɛ i kɔrɔ i kininboroyanfan fɛ,

a ta dimilon, na a bɛna masaw ɲɔɲɔ.

⁶A bɛ kiti ben siyaw kan;

suw bɛ fan bɛɛ ra,

a bɛ kuntigiw ɲɔɲɔ jamana yɔrɔ bɛɛ ra.

⁷K’a tagatɔ to sira kan a bɛ ji min kɔ ra;

o kɔ, a b’a kun kɔrɔta tuun.

Ala ka kan ni tandori ye

(Zaburu 112)

¹Aw ye Matigi Ala tando!

Ne bɛ Matigi fo k’a waleɲumanlɔn ni ne jusukun bɛɛ ye,

mɔgɔɲumanw ta jɛn ra, ani jamalajɛnyɔrɔw ra.111.1 Nin Zaburu hayanw bɛɛ kelen kelen bɛ damina ni heburukan sigininden dɔw ye, k’a ta a sigininden fɔlɔ ra, min ye Alɛfu ye, ka taga a bla a laban na min ye Tavu ye.

²Matigi Ala ta kokɛninw ka bon,

a ta kow ka di minw bɛɛ ye, olugu bɛ o kow mara o jusu ra;

³sabu bonya ni nɔɔrɔ le bɛ a ta kokɛtaw kan,

a ta terenninya tɛ ban ka ye fiyewu.

⁴A b’a fɛ mɔgɔw hakiri ye to a ta kabakow ra;

Matigi Ala bɛ makari, a bɛ hina,

⁵a bɛ domuni di a ɲasiranbagaw ma,

a b’a hakiri to a ta jɛnɲɔgɔnya ra wagati bɛɛ.

⁶A k’a ta setigiya yira a ta mɔgɔw ra a ta kɛwalew sababu ra,

ka siya wɛrɛw ta jamanaw mina k’a di o ma.

⁷A boro bɛ baara o baara kɛ, o bɛɛ bɛ kɛ ni kankelentigiya ni can le ye;

mɔgɔ bɛ se ka la a ta sariya ta kumaw bɛɛ ra;

⁸a ta cifɔninw tɛ yɛlɛma ka ye,

o ju sigira can ni terenninya le kan.

⁹A k’a ta mɔgɔw kunmabɔ,

ka jɛnɲɔgɔnya don ni o ye, jɛnɲɔgɔnya min tɛ yɛlɛma;

a tɔgɔ saninyanin lo, siranyafɛnba lo.

¹⁰Matigi Ala ɲasiran le ye hakiritigiya damina ye.

Min o min bɛ o sira tagama, o tigi bɛ faamurikoɲuman sɔrɔ.

Matigi Ala ye tando wagati bɛɛ.

Ala ta baraka bɛ mɔgɔɲuman kan

(Zaburu 111)

¹Aw ye Matigi Ala tando!

Matigi Ala ɲasiran bɛ mɔgɔ min na,

a ta kumaw ka di mɔgɔ min ye kosɛbɛ, o tigi ta ɲana.112.1 Nin Zaburu hayanw bɛɛ kelen kelen bɛ damina ni heburukan sigininden dɔw ye, k’a ta a sigininden fɔlɔ ra, min ye Alɛfu ye, ka taga a bla a laban na min ye Tavu ye.

²A ta durujaw le bɛna kɛ jamana mɔgɔ barakamanw ye;

sabu mɔgɔɲumanw ta siya bɛ baraka sɔrɔ.

³Naforo ni fɛnɲumanw bɛ sɔrɔ a ta so,

a bɛ terenninya sira tagama tuma bɛɛ.

⁴Hali dibi ra, Ala bɛ yeelen bɔ mɔgɔɲuman ye,

mɔgɔ min bɛ makari, ni a bɛ hina, ani a terennin lo.

⁵Ni mɔgɔ bɛ makari a mɔgɔɲɔgɔn na ka juru don a ra,

ani k’a ta kow kɛ ka kaɲa ni can sira ye, o ka ɲi.

⁶O tigi kɔni tɛna jɛngɛ ka bɔ a nɔ ra fiyewu!

Sabu mɔgɔw hakiri bɛ to mɔgɔ terennin na wagati bɛɛ!

⁷A tɛ siran kibarojuguw ɲa,

a hakiri siginin lo, a jigi lanin bɛ Matigi Ala kan.

⁸A ja siginin lo, a tɛ siran;

a laban, a bɛna a ɲa lɔ a juguw ra ka o bentɔ flɛ.

⁹A b’a boro labla ka fagantanw sɔn;

a ta terenninya tɛ ban ka ye.

A ta fanga bɛ to ka kɔrɔta, ka bonya.

¹⁰Mɔgɔjugu bɛ o ye ka dimi,

k’a ɲin ɲimi fɔ k’a yɛrɛ halaki;

mɔgɔjugu bɛ sama fɛn min nɔ fɛ, o bɛ tunu a ma.

Matigi Ala bɔɲɔgɔnko tɛ yi

¹Aw ye Matigi Ala tando!

Matigi Ala ta jɔnw, aw y’a tando,

aw ye Matigi Ala tɔgɔ tando!

²Aw ye baraka la Matigi Ala tɔgɔ kan,

k’a damina sisan, ani wagati bɛɛ;

³k’a ta terebɔyanfan na ka taga a bla terebenyanfan na,

Matigi Ala tɔgɔ ye tando yɔrɔ bɛɛ.

⁴Matigi Ala le kɔrɔtara siyaw bɛɛ san fɛ,

a ta bonya tɛmɛna hali sankolo janya kan.

⁵Jɔn le bɛ i ko Matigi Ala, an ta Ala,

min siginin bɛ yɔrɔ kɔrɔtaninw na fɔ san fɛ?

⁶A b’a ɲa majigi

ka sankolo ni dugukolo flɛ.

⁷A bɛ dɛsɛbagatɔ lawuri ka bɔ dugu ma,

ka fagantan labɔ nɔgɔ ra,

⁸k’a lasigi ni fagamaw ye,

ni a ta jamana fagamaw ye.

⁹A bɛ somɔgɔ di muso denworobari ma,

k’a kɛ bamuso ninsɔndiyanin ye a denw cɛ ra.

Aw ye Matigi Ala tando!

Ala ka kobaw kɛ a ta mɔgɔw ye

¹Wagati min Izirayɛli bɔra Misiran,

wagati min Yakuba ta mɔgɔw bɔra o siya wɛrɛ mɔgɔw cɛ ra,

²Zuda mara le kɛra a sigiyɔrɔ saninman ye,

Izirayɛli kɛra a ta mara ye.

³Kɔgɔji ka o ye minkɛ, ale borira,

Zuridɛn ba sekɔra kɔ fɛ.

⁴Kuruw panpanna i ko sagajigiw,

kongoriw panpanna i ko sagadenw.

⁵Kɔgɔji, ele borikun?

Zuridɛn, ele sekɔkun kɔ fɛ?

⁶Kuruw, aw panpankun i ko sagajigiw?

Kongoriw, aw panpankun i ko sagadenw?

⁷Dugukolo, ele ye yɛrɛyɛrɛ Matigi ɲa kɔrɔ,

Yakuba ta Ala ɲa kɔrɔ;

⁸sabu ale le bɛ farayɔrɔ yɛlɛma k’a kɛ dinga jiman ye,

ka faragbɛlɛn yɛlɛma k’a kɛ bununji ye.

Ala le ye baraka bɛɛ tigi ye

¹Bonya kana la anw kan, Matigi Ala, bonya kana la anw kan,

nka bonya ye la ele tɔgɔ le kan,

i ta ɲumanya ni i ta kankelentigiya kosɔn!

²I kana a to siya tɔw y’a fɔ ko:

«O ta Ala bɛ min le?»

³Anw ta Ala bɛ san fɛ,

ni ko o ko k’a diya, a bɛ o kɛ.

⁴Olugu ta batofɛnw ye fɛn warigbɛramanw le ye, ani fɛn saninlamanw;

adamadenw yɛrɛ boro le ka o lalaga.

⁵Da bɛ o fɛ, nka o tɛ kuma,

ɲa bɛ o fɛ, nka o tɛ yeri kɛ,

⁶toro bɛ o fɛ, nka o tɛ mɛnni kɛ,

nun bɛ o fɛ, nka o tɛ kasa mɛn,

⁷boro bɛ o fɛ, nka o tɛ maga fɛn na,

sen bɛ o fɛ, nka o tɛ tagama,

mankan si tɛ bɔ o kandinga ra.

⁸O lalagabagaw ni olugu yɛrɛ bɛɛ ye kelen ye,

ani minw bɛɛ bɛ o jigi la o kan.

⁹Izirayɛli, i jigi la Matigi Ala kan!

Ale le ye o dɛmɛbaga ni o tangabaga ye.

¹⁰Haruna ta somɔgɔw, aw ye aw jigi la Matigi Ala kan!

Ale le ye o dɛmɛbaga ni o tangabaga ye.

¹¹Aw minw bɛ siran Matigi Ala ɲa, aw ye aw jigi la Matigi Ala kan!

Ale le ye o dɛmɛbaga ni o tangabaga ye.

¹²Matigi Ala hakiri bɛ an na, a bɛna baraka don an na;

a bɛna baraka don Izirayɛli ta somɔgɔw ra,

a bɛna baraka don Haruna ta somɔgɔw ra,

¹³a bɛna baraka don a ɲasiranbagaw ra,

mɔgɔba fara a fitini kan.

¹⁴Matigi Ala ye dɔ fara aw kan,

ka dɔ fara aw ni aw ta denw kan.

¹⁵Matigi Ala ye baraka don aw ra,

ale min ka sankolo ni dugukolo dan.

¹⁶Sankolo ye Matigi Ala kelen ta ye;

a ka dugukolo le di adamadenw ma.

¹⁷Suw le tɛna Matigi Ala tando,

laharatagabagaw le tɛna a tando.

¹⁸Anw le bɛna Matigi Ala tando,

k’a ta sisan, ani wagati bɛɛ.

Aw ye Matigi Ala tando!

Mɔgɔ min bɛ Ala waleɲumanlɔn

¹Ne bɛ Matigi Ala kanu,

sabu a bɛ ne ta makarikanw lamɛn,

²sabu a b’a toro malɔ ka ne lamɛn;

o kosɔn, ne bɛna a daari ne si bɛɛ ra.

³Saya ta sirinanw tun melegera ne ra ka ban,

kaburu jatigɛ tun ka ne mina ka ban,

degu ni jusukasi tun sera ne ma.

⁴Nka ne ka Matigi Ala tɔgɔ wele, ko:

«E, Matigi Ala, ne nin kisi!»

⁵Matigi Ala bɛ makari, a terennin lo;

an ta Ala bɛ hina.

⁶Matigi Ala b’a janto mɔgɔ majigininw na;

ne tun dɛsɛra, a ka ne kisi.

⁷Ne nin, sekɔ i ta laganfiya ra tuun,

sabu Matigi Ala ka koɲuman kɛ i ye.

⁸Can lo, i ka ne nin kisi ka bɔ saya ra,