Mise

MISE

TA KITABU

Kitabu faamucogo

Cira Mise tun bɛ Moresɛti. O yɔrɔ bɛ Zeruzalɛmu dugu kɛrɛ fɛ. Mise ni cira Oze, ani cira Ezayi bɛɛ tun ye wagati kelen mɔgɔw ye.

Cira Mise ta cirayakumaw tun ɲasinna Zeruzalɛmu dugu le ma, min tun ye Zuda mara ta duguba ye, ani Samari dugu min tun ye Izirayɛli mara ta duguba ye. O dugu fla ta mɔgɔw ta kɛwalew tun ka jugu kosɛbɛ. O tun tɛ Ala ta sariyaw jate, o tun bɛ mɔgɔw tɔɲɔ, ka o yɛrɛ waso, ka mɔgɔw minako juguya. Jamana ɲamɔgɔw, ani sarakalasebagaw, ani kuntigiw, ani naforotigiw bɛɛ tun bɛ kojugu kɛ.

Mise ka cira faninyafɔbagaw fana jaraki.

Mise k’a fɔ Izirayɛlimɔgɔw ye ko o ta jurumunw bɛna kɛ sababu ye k’a to Ala bɛ o don o juguw boro, minw ye Asirikaw, ani Babilɔnikaw ye.

Mise ta kitabu b’a fɔ k’a gbɛlɛya ko Ala bɛ terenninya le fɛ. Ni Ala ta mɔgɔw ka Ala ta sariyaw sira tagama a cogo ra, Ala bɛ baraka don o ra. Nka ni o ka ban Ala ta sariyaw ma, o tuma, Ala bɛna o ta kojuguw hakɛw bɔ o ra, ka o gbɛn ka o labɔ jamana kɔnɔ.

O bɛɛ n’a ta, Mise ta cirayakumaw bɛ Ala ta nɛɛma fana ko fɔ. Ala bɛna a ta mɔgɔw ta miiriya yɛlɛma k’a to o ye kɔsegi ale fɛ. Siya tɔw bɛɛ bɛna Ala ta nɛɛma sɔrɔ fana lon dɔ (4.1-4). Ala bɛna masacɛ Dawuda ta duruja dɔ kɛ kuntigi ye. O kuntigi min bɛna woro Bɛtilɛhɛmu, o le bɛna hɛra ni laganfiya di mɔgɔw ma (5.1-4).

Kitabu kɔnɔkow

Ala ta kiti bɛna ben a ta mɔgɔw kan (1–2)

Jamana ɲamɔgɔw ni sarakalasebagaw ta kiti (3–5)

Ala ta mɔgɔw ka kan ka nimisa (6–7)

Ala ka Izirayɛlimɔgɔw jaraki

¹Matigi Ala k’a ta kuma min lase Moresɛtikacɛ Mise ma, o le ye nin ye. O kɛra Zuda masacɛw Yotamu ni Ahazi ni Ezekiyasi ta wagatiw le ra. Ala ka nin kow le yira a ra Samari ni Zeruzalɛmu ta ko ra. A ko:

²Siyaw bɛɛ ye mɛnni kɛ!

Dunuɲa ni a kɔnɔfɛnw bɛɛ, aw ye aw janto nin kuma ra!

Dunuɲatigi Ala bɛna kɛ seere ye aw kama ka kiti ben aw kan.

Matigi bɛna to a ta so saninman kɔnɔ ka kiti ben aw kan.

³A flɛ, Matigi Ala bɛ nana ka bɔ a sigiyɔrɔ ra;

a bɛ jigira, a bɛ tagamana dugukolo yɔrɔ kɔrɔtaninw na.

⁴Kuruw bɛ yeele a sen kɔrɔ,

dingakɔnɔyɔrɔw bɛ dayɛlɛ,

i n’a fɔ kɛɲɛ bɛ yeele cogo min na tasuma ra,

i n’a fɔ ji bɛ woyo cogo min na ka jigi ka bɔ kuru kan.

⁵O kow bɛɛ bɛ kɛra Yakuba ta terenbariyakow le kosɔn;

o kow bɛɛ bɛ kɛra Izirayɛli ta mɔgɔw ta jurumunw le kosɔn.

Yakuba ta terenbariya sababu, o sɔrɔra jɔn le ra?

O sɔrɔra Samari le ra.

Zuda ta sɔnnikɛyɔrɔw, o dabɔra min le?

O dabɔra Zeruzalɛmu le.

⁶«Ne bɛna Samari kɛ tomo le ye kongo kɔnɔ,

k’a kɛ rɛzɛnsɛnɛyɔrɔ ye,

k’a kabakuruw bɛɛ kolonkolon ka o lajigi kurufurancɛ kɔnɔ,

k’a bonw jusigikabakuruw bɛɛ wɔgɔbi ka o bla kɛnɛ kan.

⁷O ta batofɛn lɛsɛninw bɛɛ bɛna cici.

O tun ka fɛn o fɛn sɔrɔ o ta baarajuguw ra, o bɛɛ bɛna jɛni tasuma ra,

o ta batofɛn lalaganinw, ne bɛna o bɛɛ halaki.

I n’a fɔ o fɛnw sɔrɔra ni jatɔya wari le ye,

o fana bɛna taga kɛ jatɔya dɔ wɛrɛ sara le ye.»

⁸O le kosɔn, ne Mise, ne bɛna kasi, ka kule;

ne sennakolon ni ne fari lakolon bɛna bɔ ka tagama.

Ne bɛna to ka kule i ko kongowuru,

ka maɲumankokasi kɛ i ko kɔnɔsogolon1.8 Kitabu dɔw kɔnɔ a sɛbɛra ko gbingbin..

⁹Sabu Samarikaw ta bana tɛ se ka kɛnɛya.

O bana juguyara ka se fɔ Zuda mara ma,

ka se ne ta mɔgɔw ma Zeruzalɛmu yɛrɛ.

¹⁰Aw kana nin kuma fɔ Gati dugu kɔnɔ dɛ1.10 Hayan 10–15: Kojugu minw fɔra nin duguw ta ko ra, o kojuguw fɔcogo ni duguw yɛrɛ tɔgɔw fɔcogo bɔra ɲɔgɔn fɛ. Bɛti Lefira kɔrɔ ye ko: buguriso; olugu ye kolonkolon buguri ra.!

Aw kana a to aw kasikan ye mɛn le fiyewu!

Aw ye kolonkolon buguri ra Bɛti Lefira dugu le kɔnɔ.

¹¹Safiri dugumɔgɔw, aw fari lakolon ni aw maroyanin ye tɛmɛ ka taga aw ta sira fɛ.

Sanan dugumɔgɔw tɛ sɔn ka bɔ,

Bɛti Hɛsɛli dugumɔgɔw bɛ kasira; olugu tɛ se ka foyi kɛ ka aw dɛmɛ.

¹²Marɔti dugumɔgɔw bɛ hamina, o m’a lɔn o bɛna ɲasuma sɔrɔ min;

sabu Matigi Ala ka bɔnɔ lana ka na se fɔ Zeruzalɛmu donda ra.

¹³Lakisi dugumɔgɔw, aw ye aw ta sowotorow siri sow ra!

Aw le kɛra Siyɔn dugu ta terenbariyakow sababu ye,

sabu Izirayɛli ta kojuguw bɔra aw le ra.

¹⁴O le kosɔn aw bɛna faran ka bɔ Moresɛti Gati dugumɔgɔw ra.

Akizibu ta somɔgɔw, olugu ta ko bɛna kɛ jigitigɛ sababu le ye Izirayɛli masacɛw fɛ.

¹⁵Aw minw ye Maresakaw ye, ne bɛna kuntigikura sigi aw kunna.

Izirayɛli masacɛ nɔɔrɔman bɛna taga Adulamu.

¹⁶Aw Zeruzalɛmukaw, aw ye aw kunsigiw sama ka bɔn.

Aw ye aw kun gbana aw dencɛ kanuninw kosɔn.

Aw ye aw kun gbana k’a kɛ i ko duga kuncɛ;

sabu o bɛna aw dencɛw ta ka bɔ aw kɔrɔ, ka taga ni o ye yɔrɔjan.

Minw bɛ mɔgɔw minako juguya

¹Minw bɛ terenbariyakow miiri,

minw bɛ kojugu ŋaninya o layɔrɔ ra su fɛ,

ni dugu ka gbɛ, o bɛ o kojuguw kɛ, sabu a se bɛ o ye,

bɔnɔ bɛna o mɔgɔw sɔrɔ.

²Ni o ka ɲabɔ mɔgɔ min ta foro fɛ, o bɛ o mina o tigi ra.

Ni o ka ɲabɔ min ta bon fɛ, o bɛ o bɔsi o tigi ra.

O bɛ ben mɔgɔw kan ka o ta bonw bɔsi o ra;

o bɛ ben yɔrɔtigiw kan ka o ta yɔrɔw bɔsi o ra.

³O kosɔn Matigi Ala ko:

«A flɛ, ne ka kojugu dɔ le ŋaninya nin siya kama.

O tɛna se ka o yɛrɛ kun bɔ kojugu min na.

Aw kun kɔrɔtanin tɛna se ka tagama tuun,

sabu o wagati bɛna kɛ bɔnɔ le ye aw fɛ.

⁴O lon na, mɔgɔw bɛna aw lɔgɔbɔ ka zana dɔ fɔ aw ma,

ka nin sangadɔnkiri la aw kunna, k’a fɔ ko:

‹E, anw kɔni halakira le pewu!

An ta mɔgɔw ta cɛn minana k’a di mɔgɔ wɛrɛw ma.

E, o ka an gbɛn ka bɔ a sigiyɔrɔw ra

ka an ta mara taran an juguw ra!› »

⁵Ayiwa, o le kosɔn mɔgɔ si tɛna sɔrɔ Matigi Ala ta jama ra

min bɛna juru la ka yɔrɔ dɔ suma, ko o yɔrɔ ye ale ta ye.

⁶O b’a fɔ ne ma ko ne kana kuma caya,

ko ne ye kuma caman dabla!

Ko maroyako si tɛna se olugu ma.

⁷Yakuba ta somɔgɔw, yala aw bɛ se ka nin kuma fɔ wa?

Ko: «O tuma Matigi Ala ta muɲu banna le wa?

Matigi Ala ta kɛta ye nin le ye wa?»

Ayiwa, mɔgɔ minw bɛ tagama terenninya kan, ne ta kuma bɛ fɛn ɲa olugu le ye.

⁸Ala ko: «Kabini wagatijan, aw wurira ka kɛ ne ta mɔgɔw ta juguw le ye.

Aw bɛ ben mɔgɔ sabarininw kan;

mɔgɔ minw ɲasumanin bɛ tɛmɛna ka bɔ kɛrɛkɛyɔrɔ,

aw bɛ ben o tigiw kan.

O ka deregeba min don o ta deregedennin kan,

aw bɛ o deregeba bɔsi o ra.

⁹Aw bɛ ne ta jamana ta musow gbɛn ka bɔ o ta bonɲumanw kɔnɔ.

Aw bɛ o denw ta sɔrɔtaw bɛɛ bɔsi o ra pewu.

¹⁰«Ayiwa, aw ye wuri ka taga!

Nin yɔrɔ tɛna kɛ aw ta laganfiyayɔrɔ ye;

sabu aw ka nin yɔrɔ lanɔgɔ;

aw ka nin yɔrɔ bɛɛ cɛn k’a halaki pewu!

¹¹Ni mɔgɔ dɔ le tun sɔrɔra ka na kɛ kumalakolonw fɔ ye,

ka kɛ faninyakumaw fɔ ye nin mɔgɔw ye,

k’a fɔ o ye ko: ‹Aw bɛna duvɛn ni dɔrɔ caman sɔrɔ›,

ayiwa, o kumafɔbaga ɲɔgɔn ko le tun bɛna diya nin mɔgɔw ye.»

Ala ka layiri ta a ta mɔgɔw ye

¹²«Nka sigiya t’a ra, aw Yakuba ta somɔgɔw, ne bɛna aw bɛɛ lajɛn tuun.

Izirayɛli ta mɔgɔ tɔ minw tora, ne bɛna olugu lajɛn tuun.

Ne bɛna o kɛ ɲɔgɔn kan

i ko sagaw bɛ lajɛn sagakuru kɔnɔ cogo min na;

i ko bɛganw bɛ lajɛn bɛganmarayɔrɔ ra cogo min na:

mɔgɔ camanba mankan le bɛna bɔ.

¹³Min bɛ o tɛmɛsira bɔ o ye, ale bɛna kɛ o ɲa fɛ.

O bɛna bara ka bɔ da fɛ ka taga.

O ta masacɛ bɛna tɛmɛ ka bla o ɲa,

Matigi Ala yɛrɛ le bɛna kɛ o ɲa fɛ.»

Izirayɛli kuntigiw ta terenbariyaw

¹Ayiwa, ne ko:

«Yakuba ta so kuntigiw, aw ye mɛnni kɛ!

Izirayɛli ta ɲamɔgɔw, aw ye mɛnni kɛ!

Aw minw tun ka kan ka kiti tigɛ ka kaɲa ni can ye,

²aw le bɛ koɲuman kɔninyara, ka kojugu kanu.

Aw le bɛ ne ta mɔgɔw gbolo wɔrɔra ka bɔ o sogo kan,

ka o sogo sama ka bɔ o kolow kan.

³Aw bɛ ne ta mɔgɔw sogo domu,

ka o gbolo wɔrɔ, ka o kolow cici.

Aw bɛ o sogo tigɛtigɛ i ko sogo min bɛ tobi daga kɔnɔ,

i ko sogo min bɛ tobi dagaba kɔnɔ.

⁴O kosɔn aw bɛna kule ka Matigi Ala wele,

nka a tɛna aw jaabi.

O wagati le ra, Ala bɛna a ɲada dogo aw ma

aw ta kojugu kɛninw kosɔn.»

Cira faninyafɔbagaw

⁵Matigi Ala ko: «Aw ciraw, aw minw bɛ ne ta mɔgɔw lafirira,

ne bɛ nin fɔra aw le ma:

Ni mɔgɔ min ka aw sɔn domuni na,

aw b’a fɔ o tigi ye ko Ala bɛna hɛra kɛ a ye;

nka ni min ma aw sɔn domuni na,

aw bɛ kɛrɛ le wuri o tigi kama.

⁶O kosɔn su bɛna ko aw ra, aw tɛna foyi ye k’a fɔ mɔgɔw ye tuun!

Dibi bɛna don aw ma, aw tɛna kuma foyi sɔrɔ Ala fɛ tuun, k’a fɔ mɔgɔw ye.

Tere bɛna ben o ciraw kan;

yeelen bɛna kɛ dibi ye ka o lamini.

⁷Ladibagaw bɛna maroya,

lagbɛrikɛbagaw bɛna lebu.

O bɛɛ bɛna o da datugu,

sabu Ala tɛna o si jaabi tuun.»

⁸Nka o bɛɛ n’a ta, ne kɔni, Matigi Ala ta nin baraka le bɛ ne ra.

Terenninya ni jagbɛlɛya bɛ ne jusu ra,

janko ka Yakuba ta mɔgɔw ta terenbariyakow fɔ o ye,

ka Izirayɛlimɔgɔw ta jurumun fɔ o ye.

Zeruzalɛmu dugu halakicogo

⁹Yakuba ta mɔgɔw ta kuntigiw,

Izirayɛli ta mɔgɔw ta fagamaw,

aw ye nin kuma lamɛn sa!

Aw minw bɛ kiti tigɛ faninya kan,

aw minw bɛ can yɛlɛma,

¹⁰aw minw bɛ Siyɔn dugu lɔra ni adamadenw jori ye,

ka Zeruzalɛmu lɔ ni terenbariya ye.

¹¹Aw ta kuntigiw bɛ bonya le mina dogo ra mɔgɔw fɛ,

ka sɔrɔ ka o ta kiti tigɛ.

Aw ta sarakalasebagaw bɛ sara le mina,

ka sɔrɔ ka mɔgɔw karan.

Aw ta ciraw bɛ wari le mina

ka sɔrɔ ka ciraya kɛ.

O bɛ Matigi Ala tɔgɔ le ta, k’a fɔ ko:

«Matigi Ala bɛ ni an ye! Kojugu foyi tɛna an sɔrɔ tuun!»

¹²O ra, aw ta kɛwalew le kosɔn, o bɛna Siyɔn dugu sɛnɛ i ko foro;

ka Zeruzalɛmu kɛ kabakuruton ye.

Alabatoso tun bɛ kuru min kan, yiritu le bɛna o kuru datugu.

Ala ka hɛra layiri ta a ta mɔgɔw ye

¹Wagati dɔw bɛna se, o wagatiw ra

Matigi Ala ta batoso lɔnin bɛ kuru min kan,

o kuru le bɛna sigi kuru tɔw bɛɛ kunna;

a bɛna kɔrɔta ka kɛ kongoriw bɛɛ kunna.

Jamanaw ta mɔgɔw bɛna ɲɔgɔn cɛ ka taga o yɔrɔ ra.

²Siya caman bɛna taga yi; o bɛna a fɔ ko:

«Aw ye na an ye taga Matigi Ala ta kuru saninman kan,

Yakuba ta Ala ta batoso ra,

janko a ye an karan a ta siraw ra,

an ye a ta siraw tagama.»

Sabu Ala ta sariya bɛna bɔ Siyɔn dugu le ra,

Matigi Ala ta kuma bɛna bɔ Zeruzalɛmu le.

³A bɛna jamana caman ta kiti tigɛ;

siya fangatigi minw bɛ yɔrɔjanw na, a bɛna olugu ta kow ɲanabɔ.

O bɛna o ta kɛrɛkɛmuruw yɛlɛma ka o kɛ sɛnɛkɛdabaw ye,

ka o ta tamanw yɛlɛma ka o kɛ wɔrɔsɔw ye;

siya dɔ tɛna kɛrɛkɛmuru ta siya dɔ wɛrɛ kama tuun;

o si tɛna kɛrɛkɛcogo karan tuun4.3 Nin kumaw fɔra Ezayi 2.2-4..

⁴Bɛɛ bɛna sigi ɲasuma ra a ta rɛzɛnforo kɔrɔ,

walama a ta torosun kɔrɔ.

Mɔgɔ si tɛna o tɔɔrɔ tuun;

sabu Fangatigi Ala yɛrɛ da le kumana.

⁵Jamana tɔw bɛɛ ta mɔgɔw bɛ tugu o ta alaw tɔgɔw le kɔ;

nka anw kɔni, anw bɛ tugu Matigi Ala, an ta Ala tɔgɔ le kɔ,

wagati bɛɛ, ani tuma bɛɛ.

Ala ka layiri ta a ta mɔgɔw ye

⁶«O wagatiw ra kɔni, ne bɛna ne ta saga sendimitɔw ladon;

minw tun gbɛnna ka taga yɔrɔjan,

ne tun ka minw minako juguya,

ne bɛna olugu bɛɛ kɛ ɲɔgɔn kan.

Matigi Ala ko ten!

⁷Minw tun ye sendimitɔw ye, ne bɛna olugu tɔ lawuri.

Minw tun gbɛnna ka taga yɔrɔjan, ne bɛna olugu kɛ siya barakaman ye.

Matigi Ala le bɛna kɛ o kuntigi ye Siyɔn kuru kan,

k’a ta o lon na, fɔ wagati bɛɛ.

⁸«Ayiwa, ele min ye sagakuru kɔrɔsiyɔrɔ ye,

ele min ye Siyɔn dugu ta sankasojan ye,

i ta fangakɔrɔ bɛna sekɔ i ma tuun!

Zeruzalɛmu dugumɔgɔw, aw ta masaya bɛna sekɔ aw ma!»

Zeruzalɛmu dugu bɛna kisi

⁹Mun kosɔn aw bɛ kulera sisan?

Yala masacɛ tɛ aw fɛ le wa?

Mun kosɔn dimi benna aw kan i n’a fɔ muso jigibagatɔ?

Yala aw ladibaga tɛ yi tuun le wa?

¹⁰Ayiwa, Siyɔn dugumɔgɔw, aw ye aw yɛrɛ tɔnɔmi ka ŋuna dimi boro,

i n’a fɔ muso jigibagatɔ;

sabu sisan aw bɛna bɔ dugu kɔnɔ,

ka taga to kongo kɔnɔ.

Aw bɛna taga fɔ Babilɔni*;

aw bɛna taga kisi o yɔrɔ le ra.

Matigi Ala bɛna aw kunmabɔ o yɔrɔ le ra

ka aw bɔsi aw juguw boro.

¹¹Sisan kɔni siya caman lajɛnna aw kama.

O b’a fɔ ko: «Siyɔn kuru ye lanɔgɔ,

janko an ɲa ye a halakitɔ ye!»

¹²Nka olugu tɛ Matigi Ala ta miiriya lɔn,

olugu tɛ Matigi Ala ta kolatigɛninw faamu.

O m’a lɔn ko Ala ka olugu lajɛn

i ko o bɛ simansiriw lajɛn cogo min na simangbasikɛnɛ kan gbasiri kama.

¹³Siyɔn dugumɔgɔw, aw ye wuri ka o dɔndɔn!

Ne bɛna gban nɛgɛramanw di aw ma;

ne bɛna sengbɔgɔrɔ siranɛgɛramanw di aw ma.

Aw bɛna siya caman ɲɔɲɔ,

ka o borofɛnw bla danna Matigi Ala ye,

ka o ta naforow di dunuɲa bɛɛ tigi Ala ma.

¹⁴Ayiwa, sisan, kɛrɛkɛjamaw ta dugu,

aw ye aw ta kɛrɛkɛjamaw lajɛn;

sabu an juguw ka an lamini;

o ka Izirayɛli kuntigi yɛrɛ bugɔ a ɲa ra ni bere ye!

Kuntigi min bɛna woro Bɛtilɛhɛmu

¹Ayiwa, ele Bɛtilɛhɛmu Efirata,

ele le ye Zuda mara duguw bɛɛ ra fitini ye;

nka mɔgɔ min bɛna sigi Izirayɛli kunna ne tɔgɔ ra,

o tigi bɛna bɔ ele le ra;

a ta buruju tun bɛ yi kabini wagatijan, kabini fɔlɔfɔlɔ.

²O kosɔn Ala bɛna a ta mɔgɔw to o kelen na,

fɔ muso min ka kan ka den woro, o ye den woro,

ani a balema tɔw ye sekɔ ka taga fara Izirayɛlimɔgɔw kan.

³A bɛna wuri ka kɛ Ala ta mɔgɔw kuntigi ye;

a bɛna o mara ni Matigi Ala ta baraka ye,

ka o mara ni Matigi Ala, a ta Ala ta tɔgɔ bonya ye.

Ni o kɛra, o bɛna sigi hɛra ra;

sabu o wagati ra a tɔgɔ bonya bɛna se fɔ dugukolo dan na.

⁴Ale le bɛna na ni hɛra ye.

Ni Asirikaw nana ben an ta jamana kan,

ka don an ta masabonbaw kɔnɔ,

an bɛna kuntigi caman ci

ka jamana ɲamɔgɔ camanba5.4 A sɛbɛra heburukan na ko kuntigi wolonfla, ɲamɔgɔ seegi. ci ka taga o kama.

⁵Olugu bɛna o ta fanga sigi Asiri jamana kan o ta kɛrɛkɛmuru baraka ra,

ka o ta fanga sigi Namurɔdu ta jamana kan o ta kɛrɛkɛmuru baraka ra.

Ni Asirikaw nana ko o bɛna don an ta jamana ra,

ni Asirikaw nana o sen don an ta mara kɔnɔ,

ale le bɛna an bɔsi ka bɔ Asirikaw boro.

Ala bɛna baraka don Izirayɛlimɔgɔ tɔw ra

⁶O tuma ra, Yakuba ta mɔgɔ tɔw bɛna kɛ jamana caman cɛ ra,

i ko Matigi Ala bɛ gɔmiji min lajigi,

i ko sanji min bɛ ben ka binw falen.

O jigi tɛ mɔgɔ si kan,

o tɛ foyi ɲini adamaden si fɛ.

⁷Yakuba ta mɔgɔ tɔw bɛna kɛ siya tɔw cɛ ra,

ani jamana caman cɛ ra,

i ko jara bɛ kɛ cogo min na kongosogow cɛ ra,

i ko jarakanbelen bɛ kɛ cogo min na sagakuruw cɛ ra.

A tɛmɛtɔ bɛ o dɔndɔn ka o sogo tigɛtigɛ!

Mɔgɔ si tɛ se ka o bɔsi ka bɔ a boro.

⁸O ra, aw boro bɛna kɔrɔta aw juguw kunna;

aw kɛrɛbagaw bɛɛ bɛna halaki.

Ala bɛna a ta mɔgɔw saninya

⁹«O lon na, kɔni,

ne bɛna aw ta sow bɛɛ faga ka bɔ aw kɔrɔ,

ka aw ta sowotorow halaki.

Matigi Ala ko ten!

¹⁰Ne bɛna aw ta jamana dugubaw halaki,

ka aw ta kɛrɛbonbaw bɛɛ benben.

¹¹Ne bɛna subagayakow bɛɛ bɔ aw cɛ ra;

lagbɛrikɛbaga tɛna kɛ aw cɛ ra tuun.

¹²Ne bɛna aw ta jo kabakururamanw, ani aw ta batofɛn lɛsɛninw bɛɛ cɛn ka bɔ aw cɛ ra.

Aw ta batofɛn minw ye aw yɛrɛ boro nɔ ye, aw tɛna aw kinbiri gban ka olugu si bato tuun.

¹³Ne bɛna jo musoman Asera ta berew bɛɛ bɔn ka bɔ aw ta yɔrɔw ra;

ne bɛna aw ta dugubaw halaki.

¹⁴Siya minw ma ne lamɛn,

ne jusu bɔnin ni ne dimininba bɛna ne yɛrɛ mɔnɛbɔ olugu bɛɛ ra.»

Ala k’a ta mɔgɔw jaraki

¹Ayiwa, Matigi Ala bɛ min fɔ, aw ye o lamɛn sa!

A ko:

«Wuri i ye nin kiti fɔ kuruw ye,

kongoriw fana ye i kan mɛn!»

²Kuruw, aw ye Matigi Ala ta kiti ko lamɛn!

Dugukolo jusiginan wuribariw, aw ye a lamɛn!

Sabu kiti le bɛ Matigi Ala ni a ta mɔgɔw cɛ;

sɔsɔri dɔ bɛ a ni Izirayɛli cɛ.

³«Ayiwa, ne ta mɔgɔw, ne ka mun le kɛ aw ra sa?

Ne ka aw sɛgɛ cogo di le? Aw ye ne jaabi!

⁴Ne ka aw ta ka aw labɔ Misiran jamana kɔnɔ;

ne ka aw kunmabɔ ka aw labɔ jɔnyaso kɔnɔ.

Ne ka Musa bla aw ɲa, ani Haruna ni Mariyamu.

⁵Ne ta mɔgɔw, Mohabu ta masacɛ Balaki tun ka jɛn min siri,

ani Behɔri dencɛ Balamu tun ka ale jaabi cogo min na,

aw ye aw hakiri to o ra!

Aw ka tagama min kɛ k’a ta Sitimu, ka taga se fɔ Giligali,

aw ye aw hakiri to o ra, k’a lɔn ko Matigi Ala ka koɲuman le kɛ aw ye!»

Ala bɛ min ɲini mɔgɔw fɛ

⁶Ne bɛna taga ni mun le ye Matigi Ala ɲa kɔrɔ?

Ne bɛna taga ne kinbiri gban ni mun fɛn le ye bonyatigi Ala ɲa kɔrɔ?

Yala ne bɛna taga a ɲa kɔrɔ ni san kelen misiden dɔw le ye, ka o kɛ saraka jɛnitaw* ye wa?

⁷Yala ni ne ka sagajigi waga caman kɛ saraka ye,

o le bɛna diya a ye wa,

walama ni ne ka kɔ waga tan ji kɛ turu ye ka o di a ma saraka ye,

o le bɛna diya a ye?

Walama ne ka kan ka ne dencɛ fɔlɔ le di a ma ne ta terenbariyakow kosɔn,

ka ne yɛrɛ woroden di ne ta jurumun sara ye,

o le bɛna diya a ye?

⁸Ele adamaden, sira min ka ɲi, o sira yirara i ra.

Matigi Ala bɛ min ɲini i fɛ,

o le ye ko i ye teren Ala ye, ka koɲuman kanu,

ka i yɛrɛ majigi, ka i ta Ala ta sira tagama.

Ala ta kiti bɛna ben Zeruzalɛmu kan

⁹Matigi Ala bɛ a kumakan lase dugumɔgɔw ma.

Alaɲasiran le ye hakiritigiya ye.

«Kiti min bɛna se aw ma aw ta hakɛw kosɔn,

ani min bɛna o kiti lase aw ma, aw ye o lamɛn sa!

¹⁰Jamanajugu ta mɔgɔw, aw bɛ wari ɲini nanbara le ra,

aw bɛ aw ta sumanikɛminanw dɔgɔya fɔ k’a cɛjuguya!

Ne bɛ se ka sɔn o ma cogo di?

¹¹Mɔgɔ minw bɛ o ta sumanikɛnan yɛlɛma,

ka kilo dafabariw bla o ta bɔrɔw kɔnɔ,

yala ne bɛ se ka o tigiw to yi,

ni ne ma o hakɛ bɔ o ra wa?

¹²Dugu naforotigiw bɛ mɔgɔw minako juguya;

dugumɔgɔw bɛ faninya fɔ.

O bɛ mɔgɔw janfa ni o nɛnkun ye.

¹³Ayiwa, ne fana bɛna tɔɔrɔ le ben aw kan;

ne bɛna aw halaki aw ta jurumunw kosɔn.

¹⁴Aw bɛna domuni kɛ, nka aw tɛna fa;

aw kɔnɔbara lakolon bɛna to.

Aw bɛna siman mara, nka foyi tɛna to aw boro.

Ni aw ta siman min ka to, ne bɛna a to aw juguw ye aw kɛrɛ ka o mina aw ra.

¹⁵Aw bɛna danni kɛ, nka aw tɛna siman tigɛ.

Aw bɛna oliviye turu bɔ, nka aw tɛna o turu mun.

Aw bɛna rɛzɛn forogi, nka aw tɛna o rɛzɛnji min.

¹⁶Aw bɛ Omiri ta cifɔninw sira le tagamana;

aw bɛ Akabu ta somɔgɔw ta sira le tara,

ka o ta kokɛcogow ladegi.

O kosɔn ne bɛna aw halaki,

ka aw ta dugumɔgɔw kɛ lɔgɔbɔrifɛn ye mɔgɔw fɛ.

Siya tɔw bɛna aw le mafiyɛnya.»

Mise ka mɔgɔw ta kojuguw fɔ

¹E, bɔnɔ ka ne sɔrɔ, sabu ne bɛ i ko mɔgɔ min tagara yiridenɲiniyɔrɔ ra

samiyayiridenw bɛɛ tɔmɔnin kɔ.

Ne bɛ i ko mɔgɔ min tagara rɛzɛntɔmɔyɔrɔ ra

rɛzɛnmɔ bɛɛ tigɛnin kɔ.

Ne ma rɛzɛnmɔ sɔrɔ k’a domu!

Toroden fɔlɔ minw lɔgɔ tun bɛ ne ra, ne ma o dɔ sɔrɔ ka o domu fana.

²Alaɲasiranbagaw bɛɛ tununa ka bɔ jamana kɔnɔ pewu!

Adamaden cantigi tɛ yi tuun;

o bɛɛ bɛ dogo ka mɔgɔ faga,

o bɛɛ bɛ jan la o balemaw ɲa.

³Ni kojugu kɔni lo, o borow bɛ se o ra fɔ ka ɲa.

Jamana kuntigiw ko, ko fɔ bonyafɛn le ye di olugu ma!

Kititigɛbagaw, olugu bɛ surafɛnw mina mɔgɔw fɛ.

Fagamaw kɔni, olugu bɛ min fɛ, o bɛ o fɔ bɛɛ ɲa na kɛnɛ kan.

O bɛɛ le jɛnna kojugu kan.

⁴O bɛɛ ra mɔgɔɲuman, ale ka jugu i ko ŋaniyiri;

mɔgɔ terennin, o bɛ i ko ŋani.

Aw ta kɔrɔsirikɛbagaw tun ka lon min ko fɔ, o lon le sera;

Matigi Ala bɛna na aw kama o lon le ra.

O ta kɔnɔnɔfirilon le sera.

⁵Mɔgɔ si kana a jigi la a jɛnɲɔgɔn kan tuun.

Mɔgɔ si kana la a teri ra tuun!

Hali i muso min bɛ deri ka la i kɔrɔ,

i kumacogo lɔn ni a ye!

⁶Sabu dencɛ bɛ a facɛ nɛni,

denmuso bɛ wuri a bamuso kama,

muso bɛ wuri a buranmuso kama.

Mɔgɔ bɛɛ juguw bɛna kɛ a yɛrɛ ta somɔgɔw le ye.

Mise k’a jigi la Ala kan

⁷Ayiwa, ne kɔni, ne ɲa lɔnin bɛ Matigi Ala le ra.

Ne jigi bɛ ne kisibaga Ala le kan;

ne ta Ala bɛna ne jaabi.

⁸Ne juguw, aw kana yɛrɛko ne ma;

sabu hali ni ne benna, ne bɛna wuri.

Hali ni ne siginin bɛ dibi le ra,

Matigi Ala bɛna yeelen bɔ ne ye.

⁹Ne ka Matigi Ala hakɛ ta;

o ra ne bɛna a ta dimi muɲu,

fɔ a ye na lɔ ni ne kunko ye, ka ne ta jo di ne ma.

A bɛna ne bla yeelen na,

k’a yira ko a ta kɛwalew bɛɛ terennin lo.

¹⁰Ni ne juguw nana o ye,

maroyaba le bɛna o mina.

Olugu minw tun b’a fɔra ko:

«Matigi Ala, aw ta Ala bɛ min?»

Ne bɛna olugu le flɛ sisan.

Mɔgɔw bɛna olugu le dɔndɔn, i ko bɔgɔ min bɛ sira kan.

Ala bɛna koɲuman kɛ a ta mɔgɔw ye

¹¹Aw ta dugu kogow lɔlon bɛna se.

O lon na, dɔ bɛna fara dugu bonya kan.

¹²O lon na, aw ta mɔgɔw bɛna sekɔ ka na aw fɛ,

ka bɔ Asiri, ani Misiran duguw ra;

minw tun siginin bɛ k’a ta Misiran, ka taga a bla fɔ Efirati ba ra,

k’a ta kɔgɔji dɔ ra, ka taga a bla kɔgɔji dɔ wɛrɛ ra,

k’a ta kuru dɔ ra, ka taga a bla kuru dɔ wɛrɛ ra,

olugu bɛɛ bɛna na.

¹³Nka jamana tɔw lakolon bɛna to, o ta mɔgɔw ta kɛwalew kosɔn;

o ta kɛwalew sara le bɛna kɛ o ye.

Cira ka Ala daari Izirayɛli ye

¹⁴Matigi Ala, i janto i ta mɔgɔw ra ka o gbɛngbɛn ni i ta sagagbɛnbere ye.

O bɛ i ko i yɛrɛ ta sagakuru.

O bɛ o kelen na tu kɔnɔ, yirisunɲumanw cɛ ra.

A to o ye domuni kɛ Basan ni Galadi mara ra, i ko a tun bɛ cogo min na fɔlɔfɔlɔ.

¹⁵«Ne bɛna kabakow kɛ i ye,

i n’a fɔ i bɔtɔ Misiran fɔlɔfɔlɔ, ne tun k’a kɛ cogo min na.»

¹⁶Siya tɔw ni o ta sebagaya bɛɛ bɛna o ko ye, ka maroya.

O bɛna o boro la o da ra; o torow tɛna se ka foyi mɛn tuun!

¹⁷O bɛna buguri nɛmu i ko sa,

i ko danfɛn minw bɛ fofo dugu ma.

O yɛrɛyɛrɛtɔ bɛna bɔ o ta dingaw kɔnɔ.

O ja tigɛninba bɛna o ɲasin ele Matigi Ala, an ta Ala ma, ka siran i ɲa.

¹⁸Ala juman wɛrɛ le bɛ i ko ele?

I ta mɔgɔw tɔ min tora, i bɛ olugu ta jurumunw bɔ a ra,

i tɛ o ta terenbariyakow jate.

I diminin tɛ to tuma bɛɛ;

koɲuman le ka di i ye.

¹⁹I bɛna makari an na tuun,

ka an ta jurumunw bla i sen kɔrɔ,

ka an ta kojuguw bɛɛ bla kɔgɔji jukɔrɔ.

²⁰I bɛna to i ta kankelentigiya ra ni Yakuba ta somɔgɔw ye,

ka nɛɛma Iburahima ta mɔgɔw ye,

i n’a fɔ i ka o layiri ta an bɛmaw ye cogo min na kabini fɔlɔfɔlɔ.