Kasikan

KASIKAN

KITABU

Kitabu faamucogo

Kasikan kitabu ye mɔgɔ dɔ ta jusukasikumaw le ye, Zeruzalɛmu dugu halakiko kosɔn. Kogbɛlɛnw, ani kojugu minw kɛra mɔgɔw ra, nin tigi ɲa ka o bɛɛ ye. A bɛ se ka kɛ cira Yeremi yɛrɛ ye. O kosɔn nin kitabu tɔgɔ lara fana ko Yeremi ta kasikan kitabu.

Babilɔnikaw nana Zeruzalɛmu dugu lamini fɔ san kelen ni tarancɛ, ka kɔngɔba ben mɔgɔw kan. O kumaw bɛ sɔrɔ Masacɛw flanan 25, ani Kibaroyaw flanan 36, ani Yeremi 39 ni 52. O ka masacɛ Sulemani ta Ala batoso cɛɲumanba ci, ka mɔgɔw mina ka taga ni o ye Babilɔni.

Nin kitabu sɛbɛbaga ɲajibɔtɔ bɛ o kow le lakari nin kitabu kɔnɔ, ka mɔgɔw ladi, ko Ala kanblari tɔnɔ ye halakiri ye.

Ka kaɲa ni nin kitabu sɛbɛcogo ye, k’a ta a sura fɔlɔ ra ka taga a bla a sura naani na, o kumakanw bɛɛ kelen kelen bɛ damina ni heburukan sigininden dɔ ye. O sɛbɛricogo bɛ se ka kitabu karanbaga dɛmɛ k’a hakiri to kitabu kɔnɔkumaw ra.

Kasikan kitabu b’a yira ko Ala ka nin tɔɔrɔw bɛɛ lase a ta mɔgɔw ma o ta jurumunw, ani o ta terenbariyaw le kosɔn. Nka o bɛɛ n’a ta, Ala ta hina ka bon. Ni a ta mɔgɔw ka nimisa o ta jurumunw na, a bɛ sɔn ka yafa o ma, ka o ta daariri lamɛn. Nin kitabu kunba ye 3.22-23 ye; o yɔrɔ b’a fɔ ko: «Matigi Ala ta ɲumanya ma ban, a ta hina ma se a dan ma. Sɔgɔma o sɔgɔma ɲumanyakura, ani hinakura.»

Kitabu kɔnɔkow

Dɔnkiri fɔlɔ: Zeruzalɛmu kɛra yɔrɔ lakolon ye (1)

Dɔnkiri flanan: Ala ta kiti sera Zeruzalɛmu ma (2)

Dɔnkiri sabanan: Cira jigi ma tigɛ Ala ra (3)

Dɔnkiri naaninan: Zeruzalɛmu dugu halakira pewu (4)

Dɔnkiri loorunan: Ala ta mɔgɔw ta daariri (5)

Zeruzalɛmu kɛra dugu lakolon ye

¹E, dugu min tun fara mɔgɔw ra fɔlɔfɔlɔ,1.1 Kasikan kitabu sura 1 ka taga a bla sura 4, o kumakanw bɛɛ kelen kelen bɛ damina ni heburukan sigininden dɔ ye, k’a ta a sigininden fɔlɔ ra, min ye Alɛfu ye, ka taga a bla a laban na min ye Tavu ye.

bi o le kɛra dugu lakolon ye tan!

Siyaw bɛɛ tun bɛ dugu min ko fɔra fɔlɔfɔlɔ,

bi o dugu le kɛra i ko muso cɛ sanin!

Dugu min tun siginin bɛ kuntigiya ra jamanaw kunna fɔlɔfɔlɔ,

bi o dugu le blara jamana tɔw ta fanga kɔrɔ!

²A bɛ kasi o, ka kasi su bɛɛ;

a ɲada bɛɛ fara ɲaji ra.

A kanubagaw bɛɛ ra,

mɔgɔ si ma sɔrɔ k’a jusu saaro.

A teriw bɛɛ k’a janfa;

o bɛɛ yɛlɛmana ka kɛ a juguw ye.

³O ka Zuda ta mɔgɔw mina ka taga ni o ye,

ka taga o bla jɔnyagbɛlɛn le ra.

O siginin bɛ siyaw cɛ ra,

nka o tɛ laganfiya sɔrɔra.

O nɔgbɛnbagaw bɛɛ ka o gbɛn ka o mina;

o y’a sɔrɔ a deguninba tun lo.

⁴Siyɔn dugu ta siraw bɛ sukasi kɛra,

sabu mɔgɔ si tɛ nana ɲanagbɛw ra o siraw fɛ tuun.

O ta sarakalasebagaw bɛ ŋunana,

o ta sunguruw1.4 O sunguruw fana tun bɛɛ baara kɛ Alabatoso kɔnɔ. jusukun tɔɔrɔra.

Dugu dondaw bɛɛ benbenna,

dugu yɛrɛ ko bɛɛ kɛra jusukasi ko ye.

⁵O juguw sigira o kunna;

o ɲasumanin le siginin bɛ o kunna,

sabu Matigi Ala yɛrɛ le ka nin tɔɔrɔ la o kan

o ta hakɛw caya kosɔn.

O ka o denw mina ka taga ni o ye;

olugu tagara kɛ o juguw ta jɔnw ye.

⁶Siyɔn dugu ta nɔɔrɔ bɛɛ bɔra a kan.

O ta kuntigiw kɛra i ko mankalaninw,

domunikɛyɔrɔ tɛ minw fɛ tuun.

O bɛ bori o nɔgbɛnbaga ɲa,

k’a sɔrɔ baraka si tɛ o ra tuun.

⁷Naforoba min tun bɛ Zeruzalɛmukaw fɛ fɔlɔfɔlɔ,

sisan o ta sɛgɛ wagati ra,

o bɛ miirira o naforoba ko ra

ka o to yaala ra jamanaw ni ɲɔgɔn cɛ.

O ta mɔgɔw donna o juguw boro,

mɔgɔ si ma sɔrɔ ka o bɔsi;

o juguw ka o halakitɔ ye ten minkɛ,

olugu ka kɛ o lɔgɔbɔ ye.

⁸Zeruzalɛmu dugu ta jurumunw cayara fɔ k’a dama tɛmɛ;

o kosɔn a kɛra yɔrɔ saninyabari ye.

Minw bɛɛ tun b’a bonyara,

olugu k’a fari lakolon ye minkɛ,

o b’a dɔgɔyara sisan.

Ale yɛrɛ bɛ ŋunana le,

fɔ a b’a ɲa dogo.

⁹A ta nɔgɔninya nɔ bɛ a ta derege dugumayɔrɔ ra.

Ko min tun bɛna a sɔrɔ kɔ fɛ, a tun ma o jate mina.

A bencogo kɛra kabako le ye;

mɔgɔ si fana ma sɔrɔ k’a jusu saaro.

A ko: «E, Matigi Ala, ne ta sɛgɛ flɛ,

sabu ne juguw sera ne ra.»

¹⁰A juguw ka a borofɛn nafaman bɛɛ cɛ.

A ka siya wɛrɛw dontɔ ye

a ta yɔrɔ saninman kɔnɔ;

k’a sɔrɔ ele Ala tun ka o siyaw bari,

ko o man kan ka don i ta mɔgɔw ta jɛn ra.

¹¹A ta mɔgɔw bɛɛ ŋunatɔ le bɛ o ta domuni ɲini.

O borofɛn minw ko tun ka gbɛlɛn o ma, o ka o di o juguw ma,

janko ka domuni sɔrɔ k’a domu,

ka baraka dɔɔnin don o yɛrɛ ra.

«E, Matigi Ala, i ɲa lɔ ne ra ka ne flɛ,

sabu mɔgɔ si tɛ ne jatera fɛn ye tuun.»

¹²Aw minw bɛ tɛmɛna sira kan,

aw tɛ ne ta sɛgɛ jatera fɛn ye wa?

Aw ye aw ɲa lɔ ne ra ka ne flɛ;

jɔn ta tɔɔrɔ le ka ne ta bɔ?

Jɔn ta tɔɔrɔ bɛ i ko nin tɔɔrɔ min benna ne kan,

Matigi Ala ka min ben ne kan a ta dimiba lon na?

¹³A tora san fɛ ka tasuma lajigi

ka n’a don fɔ ne korokunw na.

A ka jɔ siri ne sen kɔrɔ,

ka ne laben kɔ fɛ.

A ka ne halaki pewu;

ne sɛgɛninba lo lon bɛɛ.

¹⁴A yɛrɛ boro ka ne ta terenbariyakow siri

k’a kɛ i ko yiri min bɛ la sɛnɛkɛmisi kan na;

a ka o siri ɲɔgɔn na ka o la ne kan na,

fɔ ka ne baraka bɛɛ ban.

Matigi ka ne don mɔgɔ dɔw boro,

ne fanga tɛ se mɔgɔ minw kɔrɔ.

¹⁵Ne ta kɛrɛkɛcɛfari minw bɛɛ tun bɛ ni ne ye,

Matigi ka olugu bɛɛ gbɛn.

A ka kɛrɛkɛjama dɔ wele ne kama,

janko ka ne ta kanbelenw terege;

Matigi ka Zuda mara ta dugumɔgɔw

terege a sen kɔrɔ i ko rɛzɛn bɛ cɔngɔ cogo min na.

¹⁶O le kosɔn, ne bɛ kasira.

E, ne ɲadenw fara ji ra,

sabu ne jusu saarobaga yɔrɔ janyara ne ra,

ale min tun bɛ se ka ne ja gbɛlɛya.

Ne dencɛw bɛɛ halakira ka ban,

sabu ne juguw baraka bonyara ni ne ta ye.

¹⁷Siyɔn k’a boro lɔ mɔgɔw ye,

nka mɔgɔ si ma sɔrɔ k’a jusu saaro.

Matigi Ala ka ci dɔ di

Yakuba ta denw ta juguw ma,

ko o juguw ye o lamini yɔrɔ bɛɛ ra.

Zeruzalɛmu dugu kɛra yɔrɔ saninyabari ye olugu ɲa kɔrɔ.

¹⁸Matigi Ala ta le ye can ye;

sabu ne le murutira ka ban a ta kuma ma.

Aw siyaw bɛɛ, aw ye ne lamɛn!

Aw ye ne ta dimi flɛ:

O ka ne ta sungurudenw, ani ne ta kanbelenw

mina ka taga ni o ye.

¹⁹Minw tun bɛ ne kanuna fɔlɔfɔlɔ, ne ka olugu wele,

nka o ka ne janfa.

Ne ta sarakalasebagaw, ani ne ta cɛkɔrɔbaw

fagara dugu kɔnɔ;

o tun bɛ domuni le ɲinina,

janko ka baraka don o yɛrɛ ra.

²⁰E, Matigi Ala, a flɛ, ne deguninba lo.

Ne kɔnɔ bɛɛ ɲagamina;

ne jusu bɛɛ ɲagamina,

sabu ne le murutira ka ban i ta kuma ma pewu!

Kɛnɛ ma, mɔgɔw bɛ fagara ni kɛrɛkɛmuru ye;

so kɔnɔ, saya le bɛ yi!

²¹Mɔgɔw ka ne ŋunakan mɛn,

nka mɔgɔ si ma na ne jusu saaro.

Kojugu min sera ne ma, ne juguw bɛɛ ka o mɛn;

ele Ala sɔnna ka o kɛ ne ra minkɛ, o diyara o ye sa.

I tun ka lon min ko fɔ, a to o lon ye se;

k’a to ne juguw fana ye kɛ i n’a fɔ ne.

²²I kana i hakiri bɔ o ta kojuguw kɔ!

I ka min kɛ ne ra

ne ta terenbariyakow kosɔn,

i ye o ɲɔgɔn le fana kɛ o ra;

sabu ne ŋunakan cayara,

ne baraka banna pewu.

Matigi Ala ka min kɛ a ta mɔgɔ ra

¹E, Matigi dimina

fɔ a ka Siyɔn dugu datugu ni sankabaw ye, k’a kɛ dibi ye!

A ka Izirayɛli ta nɔɔrɔ bɛɛ bɔ a kan,

k’a ben dugu ma.

O dugu le tun bɛ i ko a senlayɔrɔ;

nka a ma sɔn k’a hakiri to o ra, a ta dimilon na.

²Matigi ka Yakuba ta duguw bɛɛ halaki ka o ban pewu,

hali a ma hina o ra.

A jusu bɔninba

ka Zuda mara ta dugu barakamanw benben.

Jamana ni a kuntigiw bɛɛ,

o ka o bɛɛ ben dugu ma ka o lamaroya.

³A ta dimiba kosɔn,

a ka Izirayɛli ta baraka bɔ a kan.

Wagati min na o juguw wurira o kama,

a banna k’a boro bɔ ka o dɛmɛ.

A ka tasumaba mana Yakuba ta so kɔnɔ,

ka o ta yɔrɔw fan bɛɛ jɛni.

⁴A k’a ta kalan sama a ta mɔgɔw kama, i n’a fɔ o jugu dɔ.

A ka kalan mina ni a kininboro ye a ta mɔgɔw kama, i n’a fɔ o kɛrɛbaga dɔ.

Mɔgɔw ɲa tun bɛ bɔ mɔgɔ minw bɛɛ fɛ,

a ka olugu bɛɛ faga Siyɔn dugu ta sow kɔnɔ.

A k’a ta dimiba lajigi o kan

i ko tasuma.

⁵Matigi kɛra i ko Izirayɛli jugu dɔ;

a ka Izirayɛlimɔgɔw halaki ka o ban pewu.

A ka o ta masabonbaw bɛɛ halaki,

ka o ta bon barakamanw cɛn.

A ka ɲaji ni kasi caya

Zuda mara mɔgɔw cɛ ra.

⁶A k’a yɛrɛ ta yɔrɔ laminikogo cɛn, i ko nankɔ ta sansan bɛ cɛn cogo min na;

a k’a ta ɲɔgɔnkunbɛnyɔrɔ cɛn.

Matigi Ala ka mɔgɔw hakiri bɔ

ɲanagbɛw, ani Nɛnɛkirilonw* kɔ Siyɔn dugu kɔnɔ.

A ta dimiba kosɔn, a ka masacɛw

ani sarakalasebagaw bɛɛ dɔgɔya.

⁷Matigi banna a ta sarakajɛnifɛn* na;

a k’a kɔ don a ta yɔrɔ saninman ma.

A ka Siyɔn dugu masabonw labla,

k’a to o juguw ka o kogow cici.

Mankanw cayara Matigi Ala ta batoso kɔnɔ,

k’a kɛ i ko ɲanagbɛlon dɔ ta mankan.

⁸Matigi Ala k’a latigɛ

ko a bɛ Siyɔn dugu laminikogow ci.

A ka juru la k’a suma,

a fana ma sɔn k’a ciri dabla fiyewu!

A ka dugu kogo barakamanw ni a laminikogow bla sukasi ra;

o bɛɛ benbenna ɲɔgɔn kan.

⁹Dugu donda konw karira ka ben fɔ ka don bɔgɔ ra, dugukolo ra;

a ka konw sɔgɔnanw cɛn, ka o bɛɛ karikari.

O ta masacɛ ni o ta kuntigiw bɛ siya wɛrɛw boro.

Sariya tɛ yi tuun;

o ta ciraw fana tɛ kuma foyi sɔrɔra

ka bɔ Matigi Ala fɛ tuun k’a fɔ mɔgɔw ye.

¹⁰Siyɔn dugu cɛkɔrɔbaw,

olugu jenin siginin bɛ dugu ma.

O ka buguri kɛ o kun na,

ka bɔrɔfaniw don o yɛrɛ ra.

Zeruzalɛmu sungurudenw

ka o kun biri dugu ma.

¹¹Ne ɲadenw baraka banna kasi fɛ;

ne kɔnɔ gbanna;

ne kɔnɔnɔ firira

ne ta dugumɔgɔw ta cɛnri kosɔn;

sabu denmisɛnw ni denɲɛninw bɛ siradaw ra,

o bɛɛ baraka dɛsɛnin lo.

¹²O b’a fɔra o bamusow ye ko:

«An bɛ domuni ni rɛzɛnji fɛ!»

O baraka dɛsɛnin bɛ dugu siradaw ra

i ko mɔgɔ mandiminin.

O nin bɛ bɔra o ra,

ka o to o bamusow boro.

¹³Ne bɛna mun le fɔ aw ye tuun?

Ne bɛna aw suma ni jɔn le ye tuun, Zeruzalɛmu dugumɔgɔw?

Ne bɛna aw suma ni jɔn le ye,

ka aw jusu saaro, Siyɔn dugumɔgɔw?

Sabu aw ta cɛnri bonyara i ko Kɔgɔjiba!

Jɔn le bɛna se ka aw bɔsi ka bɔ nin na sa?

¹⁴Aw ta ciraw ka ko o ko ye k’a fɔ aw ye,

o bɛɛ tun ye kumalakolonw, ani mɔgɔlafirikumaw le ye.

O ma aw ta jurumunw gbɛya k’a fɔ aw ye,

ni o tɛ, o tun tɛna aw mina.

O ka kuma min o min fɔ aw ye,

o bɛɛ kɛra faninya ni janfakumaw le ye.

¹⁵Tɛmɛbagaw bɛɛ bɛ kabakoya

fɔ ka o boro fla gbasi ɲɔgɔn na aw le kosɔn.

O bɛ filen fiyɛ ka o kun yuguyugu

Zeruzalɛmu dugumɔgɔw kosɔn,

k’a fɔ ko: «E, o tun b’a fɔra dugu min ma ko a cɛɲa dafanin lo,

ani dunuɲa bɛɛ tun bɛ ɲagarira dugu min kosɔn,

o dugu le ye nin ye tan bi wa?»

¹⁶Aw juguw bɛɛ bɛ o daw wagara

ka kumabaw fɔ aw le ma.

O bɛ filen fiyɛ, ka o ɲin ɲimi,

ko: «An ka o bɛɛ halaki ka ban pewu!

An tun bɛ lon min kɔnɔna cɔ,

o le sera bi, an ɲa k’a ye!»

¹⁷Matigi Ala tun ka min latigɛ, a ka o kɛ.

A tun k’a darakan min di kabini wagatijan, a ka o le dafa.

A ka cɛnri kɛ,

hali a ma hina.

A k’a to aw juguw yɛrɛkora aw ma;

a ka aw juguw baraka bonya.

¹⁸O bɛ kulera ni o jusukun bɛɛ ye, ka Matigi wele.

Siyɔn dugu kogow,

aw ye ɲaji woyo su ni tere,

i ko baji.

Aw kana sɛgɛ kasi ra;

aw ɲaden kana ɲajibɔ dabla ka ye.

¹⁹Aw ye wuri su fɛ ka kule!

Aw ye kule su wagati bɛɛ ra.

Aw ye aw jusukunnakow bɛɛ fɔ Matigi ɲa kɔrɔ,

k’a kɛ i ko ji bɛ woyo cogo min na.

Aw ye aw boro kɔrɔta k’a daari,

janko a ye aw denw kisi,

sabu o bɛ sara kɔngɔ boro

dugu siradaw bɛɛ ra.

²⁰E, Matigi Ala,

i ɲa lɔ an na, k’a flɛ i bɛ nin kow kɛra mɔgɔ minw na.

Yala a daganin bɛ ko muso ye a yɛrɛ woroden sogo domu wa,

a b’a den min kanu?

Yala a daganin lo ko sarakalasebagaw ni ciraw ye faga

hali Matigi ta yɔrɔ saninman kɔnɔ wa?

²¹Denmisɛnw ni mɔgɔkɔrɔbaw

suw lalanin bɛ dugu ma siradaw ra.

O ka ne ta sungurudenw

ani ne ta kanbelenw faga ni kɛrɛkɛmuru ye.

I ta dimilon na kɔni, i ka fagari kɛ,

i ka mɔgɔw kannatigɛ, hali i ma hina.

²²I ka an jatigɛbagaw wele ka bɔ fan bɛɛ ra ka na an kama,

k’a kɛ i n’a fɔ o bɛ mɔgɔw wele ɲanagbɛ ra cogo min na.

Matigi Ala ta dimilon na, mɔgɔ si ma bɔsi,

mɔgɔ si ɲanaman ma to.

An tun ka an janto den minw na, ka o lamɔ,

an juguw ka olugu bɛɛ halaki.

Ala ta cira ta tɔɔrɔ ni a ta jigi

¹Ne ye mɔgɔ dɔ le ye min ka tɔɔrɔ silɔn,

sabu Ala ta dimi kosɔn, a ta tɔɔrɔ sera ne ma.

²A ka ne mina ka taga ni ne ye dibi ra;

a ma taga ni ne ye yeelen na.

³A boro bɛ ne kelen le kan;

wagati bɛɛ a bɛ tɔɔrɔ lase ne ma.

⁴A ka ne fari ni ne sogo bɛɛ cɛn;

a ka ne kolow bɛɛ karikari.

⁵A ka kogo le lɔ ne fan bɛɛ ra,

ka ne lamini ni bɔnɔ ni tɔɔrɔ ye.

⁶A ka ne bla dibi ra,

i n’a fɔ mɔgɔ minw sara kabini wagatijan.

⁷A ka ne lamini ni kogo ye janko ne kana se ka bɔsi;

a ka nɛgɛjɔrɔkɔ gbirimanw don ne ra.

⁸Ne kulera cogo bɛɛ ra k’a wele ko a ye ne dɛmɛ,

nka a ma ne ta daariri jaabi.

⁹A ka ne ta siraw datugu ni kabakurubaw ye;

a ka ne tɛmɛsira tigɛ.

¹⁰A lara ka ne kɔnɔ i ko wara bɛ la ka mɔgɔ kɔnɔ cogo min na,

i ko jara bɛ dogo ka mɔgɔ kɔnɔ cogo min na.

¹¹A ka ne sama ka bɔ ne ta sira kan, ka ne sogo tigɛtigɛ i ko wara;

a ka ne to ne kelen na.

¹²A ka biɲɛ don a ta kalan na k’a sama;

a ka ne suma, ka ne bon ni a ta biɲɛ ye.

¹³A ka biɲɛw bɔ a ta biɲɛforogo kɔnɔ,

ka ne bon ka ne sɔgɔ ne soro ra.

¹⁴Ne kɛra lɔgɔbɔrifɛn ye ne ta mɔgɔw bɛɛ le fɛ;

o bɛ ne tɔgɔ le don o ta dɔnkiriw ra lon bɛɛ.

¹⁵A ka ne kɔnɔ fa ni ɲuguflaburu kunaman le ye,

ka jalaji kɛ ne ta minji ye.

¹⁶A ka ne ɲinw karikari ni bɛrɛkisɛ ye,

ka ne la bugurigbɛ ra.

¹⁷I ka ne ni hɛra faran ka bɔ ɲɔgɔn na;

ne m’a lɔn tuun fɛn min tɔgɔ ye ko ɲasuma.

¹⁸O kosɔn ne ko: «Ne ta bonya banna pewu;

ne jigi tɛ foyi kan tuun Matigi Ala fɛ.»

Matigi Ala ta ɲumanya tɛ ban

¹⁹Ni ne miirira ne ta sɛgɛ ni ne ta maɲumanko ra,

a bɛ kɛ ne fɛ i ko jalaji ni baga.

²⁰Ne hakiri b’a ra tuma bɛɛ;

o kosɔn ne jusukun tɔɔrɔnin lo.

²¹Nka ne bɛ ko min to ne hakiri ra, o le ye nin ye;

fɛn min bɛ ne jigi ye o le ye nin ye:

²²Matigi Ala ta ɲumanya ma ban,

a ta hina ma se a dan ma.

²³Sɔgɔma o sɔgɔma ɲumanyakura, ani hinakura.

E, i ta kankelentigiya ka bon dɛ!

²⁴Ne b’a fɔ ne jusukun na ko: «Matigi Ala le ye ne ninyɔrɔ ye.»

O kosɔn ne jigi bɛ ale le kan.

²⁵Minw jigi bɛ Matigi Ala kan,

mɔgɔ minw bɛ Matigi ta jɛnɲɔgɔnya ɲini,

a bɛ koɲuman kɛ olugu ye;

²⁶Ka je ka Matigi Ala ta kisiri makɔnɔ,

o ka ɲi.

²⁷Mɔgɔ ye dimi sɔnmina a denmisɛnman,

o ka ɲi a ma.

²⁸A bɛna je ka sigi a kelen na,

sabu Ala le k’a latigɛ a ye ten.

²⁹A bɛna biri fɔ k’a da don buguri ra,

sabu kisiri jigiya bɛ se ka sɔrɔ hali bi.

³⁰A bɛna a yɛ lɔ a bugɔbaga ye,

k’a to mɔgɔw y’a dɔgɔya.

³¹Sabu Matigi tɛ ban mɔgɔ ra,

k’a tigi to yi wagati bɛɛ.

³²Nka hali ni a ka i jusukun tɔɔrɔ, a bɛ hina,

ka kaɲa ni a ta ɲumanyaba ye;

³³sabu a man di a ye ka sɛgɛ ben mɔgɔ kan,

a man di a ye ka adamaden jusukun tɔɔrɔ.

³⁴Nka ni aw bɛ jamana ta kasodenw

bɛɛ dɔndɔn aw sen kɔrɔ,

³⁵ni aw bɛ mɔgɔ ta jo yɛlɛma k’a kɛ a jaraki ye

Ala Kɔrɔtaninba yɛrɛ ɲa kɔrɔ,

³⁶ni aw bɛ mɔgɔ jo bɔsi a ra kititigɛyɔrɔ ra,

yala Matigi tɛ o kow yera le wa?

³⁷Jɔn le bɛ se ka kuma dɔrɔn, k’a to ko dɔ ye kɛ,

ni Matigi yɛrɛ m’a latigɛ ko o ko ye kɛ?

³⁸Koɲuman o, kojugu o,

yala Ala Kɔrɔtaninba yɛrɛ da le tɛ o bɛɛ latigɛra wa?

³⁹Mun kosɔn adamaden bɛ dimi,

mun kosɔn mɔgɔ bɛ dimi a ta jurumun tɔɔrɔ kosɔn?

Cira ko a ta mɔgɔw ye nimisa

⁴⁰An ye an ta kokɛcogo sɛgɛsɛgɛ, ka miiri,

ka sekɔ ka na Matigi Ala fɛ.

⁴¹An ye an jusukun miiriyaw bɛɛ la Ala kan,

ka an boro fana kɔrɔta Ala fan fɛ, sankolo ra.

⁴²An kɔni ka i hakɛ ta, an kɛra mɔgɔ murutininw ye;

ele fana ma sɔn ka yafa an ma.

⁴³I ka i ta dimi kɛ fani ye k’a melege i yɛrɛ ra, ka an nɔgbɛn;

i ka an faga, hali i ma hina an na.

⁴⁴I ka i yɛrɛ datugu ni sankaba ye,

janko an ta daariri si kana se i ma.

⁴⁵I ka an kɛ i ko fɛn ɲacintanw,

i ko ɲamaɲama, siya tɔw cɛ ra.

⁴⁶An juguw bɛɛ bɛ o da wagara

ka kumabaw fɔ anw le ma.

⁴⁷Jatigɛ ni dingakɔnɔben, o le sera an ma;

halakiri ni cɛnriba, o le sera an ma.

⁴⁸Ne ɲaji bɛ jigira i ko kɔji,

ne ta mɔgɔw ta cɛnriba kosɔn.

⁴⁹Ne ɲaji bɛ jigira le, a tɛ lɔ;

ne tɛna kasi dabla ka ye,

⁵⁰fɔ Matigi Ala ye na to sankolo ra

k’a hakiri to an na, ka an flɛ.

⁵¹Min sera ne ta dugu sunguruw ma,

ni ne ka o flɛ, o bɛ ne jusukun tɔɔrɔ le.

⁵²Minw kɛra ne juguw ye, k’a sɔrɔ kun t’a ra,

olugu ka ne nɔgbɛn i ko o bɛ kɔnɔnin gbɛn k’a mina cogo min na.

⁵³O ka ne firi kɔlɔn kɔnɔ ko o bɛ ne faga;

o ka kabakuru dɔ kɛ ka ne datugu.

⁵⁴Jiw ka ne tunu.

Ne ko: «Ne ta banna sa!»

⁵⁵Nka ne tora fɔ kɔlɔn kɔnɔnɔ yi

ka ele Matigi Ala tɔgɔ wele.

⁵⁶I ka ne ta welerikan mɛn:

«I kana i toro datugu ne ŋunakan ni ne ta welerikan na.»

Ala k’a ta mɔgɔw jaabi

⁵⁷Lon min ne ka i wele, i gbarara ne ra;

i k’a fɔ ne ma ko ne kana siran!

⁵⁸Matigi, i lɔra ni ne kunko ye,

i ka ne nin kisi.

⁵⁹Matigi Ala, o ka kojugu minw kɛ ne ra, i ka o ye;

o kosɔn, i yɛrɛ ye ne ta kiti tigɛ.

⁶⁰O b’a fɛ ka o yɛrɛ dimibɔ ne ra cogo min na,

ani o ka jɛn min siri ne kama, i ka o bɛɛ ye.

⁶¹Matigi Ala, i ka o ta dɔgɔyarikumaw mɛn,

ani o b’a fɛ ka jɛn min siri ne kosɔn.

⁶²O bɛ o ta kumaw bɛɛ fɔra ne le ma;

o ta miiriya bɛɛ bɛ ne le kan lon bɛɛ.

⁶³A flɛ, ni o siginin lo o, ni o lɔnin lo o,

ne tɔgɔ le bɛ o ta dɔnkiriw bɛɛ ra.

⁶⁴E, Matigi Ala, o ka min kɛ ne ra,

i ye o sara ni o ɲɔgɔn le ye fana.

⁶⁵I ye o jusukun tɔɔrɔ kosɛbɛ,

ka i ta danga ben o kan.

⁶⁶Matigi Ala, i ye dimi o kɔrɔ ka o nɔgbɛn,

ka o halaki ka bɔ i ta dugukolo kɔ kan pewu.

Zeruzalɛmu dugumɔgɔw ta sɛgɛ

¹E, sanin le ɲa finna!

Sanin yɛrɛworo le ɲa yɛlɛmana!

Yɔrɔ saninman ta kabakuruw le yɛrɛgɛra

siradaw bɛɛ ra!

²E, Siyɔn duguden dawulamanw,

minw dawula tun ka bon i ko sanin yɛrɛworo,

olugu le kɛra sisan i ko bɔgɔdaga,

dagalalagabaga boro bɛ min lalaga!

³Hali kongowuruw bɛ o sinw lɔ o denw ye,

k’a to o denw ye sin min.

Nka ne ta mɔgɔw kɛra mɔgɔ hinabariw le ye,

i ko kɔnɔsogolon4.3 Kɔnɔsogolon ye kɔnɔ dɔ ye, min bɛ taga k’a ta fanw ni a ta denw to a kɔ kongo kɔnɔ; a tɛ a janto o ra (Ayuba kitabu 39.14-18). min bɛ kongokolon kɔnɔ.

⁴Denɲɛninw kan bɛ ja

minlɔgɔ boro;

denmisɛnw bɛ kasi domuni nɔ fɛ,

nka mɔgɔ si tɛ foyi di o ma.

⁵Minw ta baro tun ye domuni dimanw ye,

olugu le bɛ sara kɔngɔ boro sirakunw na.

Minw tun lamɔna fani sɔngɔgbɛlɛnw cɛ ra,

olugu le bɛ lara sununkunw kan.

⁶Ne ta mɔgɔw ta jurumun tɔɔrɔ juguyara

fɔ ka tɛmɛ Sodɔmukaw ta kan;

Sodɔmukaw ta dugu tun halakira yɔrɔnin kelen na le;

mɔgɔ si boro tun ma se o ma.

⁷Siyɔn fagamaw tun saninyanin bɛ kosɛbɛ;

o tun gbɛnin bɛ ka tɛmɛ nɔnɔ kan.

O fari tun cɛ ka ɲi ka tɛmɛ kɔnɔnkisɛ kan;

o fari cogo tun dakaɲanin bɛ i ko safiri lulu.

⁸Nka sisan o ɲada finna ka tɛmɛ dagafinfin kan;

mɔgɔ tɛ se ka o ye sira ra ka o lɔn tuun.

O fasara, fɔ ka o kolow bɔ kɛnɛ ma;

o fari jajara i ko yirijalan.

⁹O ka minw faga ni kɛrɛkɛmuru ye, olugu ta belen fisayara

ka tɛmɛ kɔngɔ ta mɔgɔ faganinw kan;

kɔngɔ ka olugu baraka bɛɛ ban,

domunisɔrɔbariya ka o halaki.

¹⁰Muso minw tun ye hinabagaw ye kakɔrɔ,

bi olugu yɛrɛ boro le ka o ta denw sogo tobi.

O le kɛra o ta domuni ye.

O kow kɛra ne ta dugumɔgɔw ta halakiri wagati le ra.

¹¹Matigi Ala ta dimi sera a dan ma;

a k’a ta dimi bɔn Siyɔn dugu kan.

A ka tasuma dɔ mana Siyɔn dugu kɔnɔ,

fɔ ka dugu jusiginanw bɛɛ jɛni.

¹²Dugukolo masacɛw si tun tɛna la nin ko ra;

dunuɲamɔgɔw si tun tɛna la a ra,

ko lon dɔ, Zeruzalɛmu kɛrɛbagaw, ani o juguw

tun bɛna don Zeruzalɛmu dugu donda fɛ.

¹³O bɛɛ kɛra o ta ciraw ta terenbariyaw le kosɔn,

ani o ta sarakalasebagaw ta kojuguw kosɔn;

sabu olugu ka mɔgɔ terenninw faga,

ka o jori woyo dugu kɔnɔ.

¹⁴O bɛ talontalonna siraw kan ka taga, i ko fiyentɔw;

o ta mɔgɔfaga hakɛ ka o lanɔgɔ,

k’a kɛ fɔ mɔgɔ si tɛ sɔn

ka maga hali o ta faniw na.

¹⁵Mɔgɔw bɛ pɛrɛn k’a fɔ o ye ko: «Aw ye bɔ yi, mɔgɔ saninyabariw!

Aw ye bɔ yi! Aw ye bɔ yi! Aw kana maga an na!»

O kosɔn o bɔra ka kɛ yaala ye ka lamini.

Siya wɛrɛ mɔgɔw b’a fɔ o ma ko: «Aw tɛ se ka sigi an cɛ ra yan tuun!»

¹⁶Matigi Ala yɛrɛ le ka o janjan yɔrɔw ra;

a tɛna a janto o ra tuun.

Mɔgɔw ma sarakalasebagaw si bonya,

o ma makari cɛkɔrɔbaw si ra.

¹⁷An ɲadenw sɛgɛra flɛri ra;

an ka dɛmɛbaga ɲini an yɛrɛ ra, ka dɛsɛ.

An ka flɛri kɛ ka mɛɛn, ka an jigi la jamana min kan,

o jamana mɔgɔw ma na an kisi.

¹⁸An juguw bɛ an tagamatɔ kɔrɔsi;

hali an tɛ se ka tɛmɛ an yɛrɛ ta dugu siraw fɛ!

An laban kɔni surunyara, an ta teredaw dafara ka ban,

sabu an ta laban le sera.

¹⁹An nɔgbɛnbagaw ka teri

ka tɛmɛ bɔn tagatɔ kan san fɛ.

O ka an nɔgbɛn kuruw kan,

ka taga dogo ka an kɔnɔ kongokolon kɔnɔ.

²⁰Min tun ye an nin tangabaga ye, Matigi Ala ta mɔgɔ ɲanawolomanin,

ale yɛrɛ benna o ta jan na.

An tun b’a fɔra ko an bɛna dogo ale min ta suma kɔrɔ

janko ka ɲanamanya ka to siyaw cɛ ra.

²¹Edɔmu ta mɔgɔw, aw minw siginin bɛ Usi jamana ra,

aw ye ɲagari, ka ninsɔndiya!

Nka o bɛna minnifɛn dɔ di aw fana ma;

aw bɛna o min ka ɲanamini fɔ ka aw fari lakolon to.

²²Siyɔn dugu, aw ta jurumunw kafarira;

o tɛna aw mina ka taga ni aw ye tuun.

Ele Edɔmu dugu, Ala bɛna aw ta jurumunw hakɛw le bɔ aw ra sisan;

a bɛna aw ta terenbariyaw bɔ kɛnɛ kan.

Ala ta mɔgɔw ta daariri

¹E, Matigi Ala, ko min sera an ma, i hakiri to o ra;

an ta maroya flɛ, ka i janto an na.

²An ta cɛn yɛlɛmana ka kɛ siya wɛrɛ ta ye;

an ta sow kɛra mɔgɔ wɛrɛ ta ye.

³An kɛra feritaw le ye, sabu an facɛw tɛ yi;

an bamusow kɛra i ko muso cɛ saninw.

⁴An ka kan ka an ta ji minta san le;

an ta tobirikɛlɔgɔ fana bɛ sɔrɔ ni wari le ye.

⁵An nɔgbɛnbagaw bɛ an kɔ tuma bɛɛ;

an sɛgɛra, o tɛ a to an ye nɛnɛkiri.

⁶An bɛ Misirankaw, ani Asirikaw le daari,

janko olugu ye domuni di an ma ka an wasa.

⁷An bɛmaw le ka terenbariyakow kɛ, nka olugu tɛ yan tuun;

o ta jurumun hakɛ bɛ benna anw le kan.

⁸Jɔnw le sigira an kunna;

mɔgɔ tɛ yi min bɛ an bɔsi ka bɔ o boro.

⁹An bɛ an nin le bla farati ra ka taga an ta domuni ɲini ka na;

sabu mɔgɔfagabagaw bɛ ben an kan kongokolon kɔnɔ.

¹⁰Kɔngɔ gbanna an na, fɔ an fari bɛ an jɛnijɛni,

i n’a fɔ an donna furunɛ le kɔnɔ.

¹¹O benna Siyɔn dugu musow kan,

ka ben Zuda mara dugu ta sungurudenw kan.

¹²O boro ka an ta kuntigiw kan dulon juru ra;

o ma cɛkɔrɔbaw bonya.

¹³An ta kanbelenw le bɛ wugusikabaw ɲu;

cɛdenninw bɛ talontalonna ni lɔgɔdoniw ye o kunna.

¹⁴Dugu cɛkɔrɔbaw tɛ sigira dugu donda ra tuun,

kanbelenw tɛ o ta fɔrifɛnw fɔra tuun.

¹⁵Ɲagari banna an jusu ra pewu;

an ta dɔnw yɛlɛmana k’a kɛ sukasi le ye.

¹⁶An ta masafugula benna ka bɔ an kun na;

bɔnɔ ka an sɔrɔ, sabu an ka jurumun kɛ.

¹⁷Fɛn min k’a to an baraka banna;

fɛn min kosɔn an ɲadenw baraka dɔgɔyara,

¹⁸o le ye ko Siyɔn kuru* kɛra yɔrɔ lakolon ye,

ka kɛ kongowuruw ta yaalayɔrɔ ye.

¹⁹Nka ele kɔni Matigi Ala, ele bɛ i ta masaya ra wagati bɛɛ;

i ta masaya bɛ to a nɔ ra wagati bɛɛ, ani tuma bɛɛ le.

²⁰Mun kosɔn i ɲinana an kɔ pewu?

Yala i bɛna ban an na an ta si tɔ bɛɛ le ra wa?

²¹A to an ye sekɔ ka na i fɛ Matigi Ala, janko an ye sekɔ ka na;

a to an ye kɛ i ko an tun bɛ cogo min na fɔlɔfɔlɔ.

²²Yala i bɛna ban an na ka an to yi pewu le wa?

Yala i dimina an kɔrɔ fɔ ka taga se a dan ma le wa?