Ayuba

AYUBA

TA KO KITABU

Kitabu faamucogo

Ayuba ta ko kitabu bɛ min fɔ an ye a ta ko ra, ni a bɔra o ra, an ma foyi wɛrɛ lɔn Ayuba ta ko ra, walama nin kitabu sɛbɛbaga ta ko ra.

Ayuba tun ye mɔgɔ terennin ye, nka Ala sɔnna k’a to a ye kɔrɔbɔ. A borofɛnw bɛɛ cɛnna, bana k’a yɛrɛ fana mina. Ayuba teri dɔw nana ko o bɛna a jusu saaro, nka olugu k’a jaraki le, ko a ka kojugu minw kɛ, o le kɛra a tɔɔrɔkun ye. O kumaw ka Ayuba jusu kasi. A fana kumana k’a yira ko ale ma jaraki foyi ra, ko mun kosɔn Ala ka nin tɔɔrɔ lase ale ma. O bɛɛ kɔ fɛ, Ala yɛrɛ nana Ayuba jaabi, k’a ta danfɛnw kɛ sababu ye k’a ta sebagaya yira Ayuba ra.

Ayuba nimisara, ka lɔ a ra ko jo bɛ Ala fɛ ko bɛɛ ra. Nka Ala ka Ayuba teriw jaraki o ta kumaw kosɔn.

Ayuba ta ko b’a yira an na ko ni adamaden ka tɔɔrɔ cogo o cogo, a man kan ka a jigi tigɛ Ala ra, ka ban Ala ta ma. Ayuba tɔɔrɔra, nka o tɔɔrɔw bɛɛ kɛra Ala sago ye. Mɔgɔ tɛ se ka a ta tɔɔrɔ bɛɛ kun lɔn, mɔgɔ ta tɔɔrɔ bɛɛ fana tɛ jurumun nɔ ye.

Kitabu kɔnɔkow

Cɛnri ni banajugu sera Ayuba ma (1–2)

Ayuba k’a ta tɔɔrɔ lakari (3)

Ayuba teriw ta kumako fɔlɔ (4–14)

Ayuba teriw ta kumako flanan (15–21)

Ayuba teriw ta kumako sabanan (22–26)

Ayuba k’a ta terenninya lakari (27–31)

Elihu ta kuma (32–37)

Ala ka Ayuba jaabi (38.1–42.6)

Ala ka koɲuman min kɛ Ayuba ye (42.7-17)

Ayuba ta tagamacogoɲuman

¹Cɛ dɔ tun bɛ Usi1.1 Usi jamana tun bɛ Izirayɛli jamana woroduguyanfan ni a terebɔyanfan na, Edɔmu mara ra, Arabi jamana ra (Damina 36.28; Yeremi 25.20; Kasikan 4.21). jamana ra, min tɔgɔ tun ye ko Ayuba. O cɛ tun ye mɔgɔ jusukungbɛnin ye, ani mɔgɔɲuman. A tun bɛ siran Ala ɲa, k’a yɛrɛ mabɔ kojugu ra. ²Dencɛ wolonfla ni denmuso saba le tun b’a fɛ. ³A ta bɛganw tun ye saga waga wolonfla, ani ɲɔgɔmɛ waga saba, ani sɛnɛkɛmisi fla fla sigiyɔrɔma kɛmɛ looru, ani fali kɛmɛ looru. A ta baaradenw fana tun ka ca kosɛbɛ. Mɔgɔw tun bɛ ale le jate ka tɛmɛ Zuridɛn ba terebɔyanfan jamana mɔgɔ tɔw bɛɛ kan.

⁴Ayuba dencɛw tun bɛ to ka taga ɲɔgɔn ta so ka taga ɲanagbɛw kɛ. Ni o tun bɛ o kɛ, o tun bɛ o balemamusow fana wele ka taga domuni kɛ, ani ka duvɛn min ɲɔgɔn fɛ. ⁵Nka ni ɲanagbɛ tun nana ban tuma o tuma, Ayuba tun bɛ a ta denw wele ka na o saninya. A tun bɛ wuri sɔgɔmada joona fɛ ka saraka jɛnita* kelen bɔ o bɛɛ kelen kelen tɔgɔ ra. Sabu Ayuba tun b’a fɔ a yɛrɛ kɔnɔ ko: «A bɛ se ka kɛ ko ne ta denw barokɛtɔ ka Ala tɔgɔ cɛn o jusukun na, ka jurumun kɛ.» Ayiwa, Ayuba tun b’a kɛ ten le wagati bɛɛ.

Ayuba ta kɔrɔbɔriko fɔlɔ

⁶Ayiwa, lon dɔ Ala ta mɛlɛkɛw nana lɔ Matigi Ala ɲa kɔrɔ; Setana fana nana lɔ o cɛ ra. ⁷Matigi Ala ko Setana ma ko: «I bɔra min?» Setana ka Matigi Ala jaabi ko: «Ne tun bɛ dunuɲa le laminina dɔrɔn, ka yɔrɔw yaalayaala!» ⁸Matigi Ala ko Setana ma ko: «I ka ne ta jɔncɛ Ayuba kɔrɔsi kɛ? A ɲɔgɔn tɛ dunuɲa ra; mɔgɔ jusukungbɛnin lo, mɔgɔɲuman lo fana. A bɛ siran Ala ɲa, a b’a yɛrɛ mabɔ kojugu ra.» ⁹Setana ka Matigi Ala jaabi ko: «Yala Ayuba bɛ siranna Ala ɲa gbansan le wa? ¹⁰Yala i m’a tanga, a ni a ta somɔgɔw ni a borofɛnw bɛɛ wa? I ka baraka don a ra a ta baara bɛɛ ra; a ta bɛganw bɛ jamana yɔrɔ bɛɛ ra. ¹¹Nka ele ye i boro se a borofɛnw ni a ta mɔgɔw ma k’a flɛ sa; sigiya t’a ra, a bɛna i tɔgɔ cɛn mɔgɔ bɛɛ ɲa na sisan.» ¹²Matigi Ala ko Setana ma ko: «Ayiwa, ne b’a borofɛnw bɛɛ labla i ye, nka i kana i boro se ale yɛrɛ ma.» O fɔra minkɛ, Setana bɔra Matigi Ala kɔrɔ ka taga.

¹³Ayiwa, lon dɔ Ayuba dencɛw, ani a denmusow tun bɛ domuni kɛra, ka duvɛn min o kɔrɔcɛ ta so. ¹⁴O wagati yɛrɛ ra, ciraden dɔ nana a fɔ Ayuba ye ko: «Misiw tun bɛ sɛnɛ kɛra, faliw tun bɛ bin ɲimina o kɛrɛ fɛ; ¹⁵Sabeka1.15 Sabekaw tun ye benkannikɛbaga dɔw ye, minw tun bɛ bɔ Arabi jamana woroduguyanfan fɛ, ka na ben mɔgɔw kan kongokolon kɔnɔ. dɔw nana ben an kan, ka i ta baaradenw bɛɛ faga, ka bɛganw mina ka taga ni o ye. Ne kelen le sera ka bɔsi, ka n’a fɔ i ye.» ¹⁶Sani ale ye ban kuma ra, dɔ wɛrɛ nana ka na a fɔ ko: «Sanpɛrɛn jigira ka sagaw, ani baw, ani baaradenw bɛɛ jɛni ka o faga. Ne kelen le sera ka bɔsi, ka n’a fɔ i ye.» ¹⁷Sani ale ye ban kuma ra, dɔ wɛrɛ nana tuun ka n’a fɔ ko: «Kalideka1.17 O Kalidekaw tun ye kongokolon yaalabaga dɔw ye, minw tun bɛ bɔ Arabi jamana sahiliyanfan fɛ. dɔw ka o yɛrɛ taran jɛnkuru saba ka na ben baaradenw kan ka o faga, ka ɲɔgɔmɛw mina ka taga ni o ye. Ne kelen le sera ka bɔsi, ka n’a fɔ i ye.» ¹⁸Sani ale ye ban kuma ra, dɔ wɛrɛ nana tuun ka na a fɔ ko: «I dencɛw, ani i denmusow tun bɛ domuni kɛra ka duvɛn min o kɔrɔcɛ ta so; ¹⁹fɔɲɔba dɔ bɔra kongokolon fan na ka na bon fan naani bɛɛ ben; bon benna denw kan ka o faga. Ne kelen le sera ka bɔsi, ka n’a fɔ i ye.»

²⁰Ayuba wurira ka lɔ; a k’a ta deregeba mina k’a faran, k’a kun li. A k’a yɛrɛ firi dugu ma, k’a kinbiri gban, ²¹k’a fɔ ko:

«Ne borolakolon le bɔra ne bamuso kɔnɔ,

ne borolakolon le fana bɛna sekɔ ka taga.

Matigi Ala le k’a di,

Matigi Ala le fana k’a ta.

Bonya ye la Matigi Ala tɔgɔ kan.»

²²Ayiwa, nin bɛɛ ra, Ayuba ma jurumun kɛ, a ma kuma bɛnbari si fɔ Ala ma.

Ayuba ta kɔrɔbɔriko flanan

¹Ayiwa, lon dɔ wɛrɛ ra, Ala ta mɛlɛkɛw nana lɔ Matigi Ala ɲa kɔrɔ; Setana fana nana lɔ o cɛ ra, Matigi Ala ɲa kɔrɔ. ²Matigi Ala ko Setana ma ko: «I bɔra min?» Setana ka Matigi Ala jaabi ko: «Ne tun bɛ dunuɲa le laminina dɔrɔn, ka yɔrɔw yaalayaala!» ³Matigi Ala ko Setana ma ko: «I ka ne ta jɔncɛ Ayuba kɔrɔsi kɛ? A ɲɔgɔn tɛ dunuɲa ra; mɔgɔ jusukungbɛnin lo, mɔgɔɲuman lo fana. A bɛ siran Ala ɲa, a b’a yɛrɛ mabɔ kojugu ra. Hali bi a bɛ a ta jusukungbɛninya kan, nka ele b’a fɛ ne y’a halaki gbansan.» ⁴Setana ka Matigi Ala jaabi ko: «Gbolo le ye gbolo sara ye2.4 Gbolo le ye gbolo sara ye. I b’a sɔrɔ o tun ye zana dɔ ye, min kɔrɔ bɛ se ka kɛ ko mɔgɔ bɛ ko bɛɛ kɛ janko ka i nin kisi.. Mɔgɔ bɛ se k’a borofɛn bɛɛ di janko k’a nin kisi! ⁵Nka ele ye i boro se a farisogo ma k’a flɛ sa; sigiya t’a ra, a bɛna i tɔgɔ cɛn mɔgɔ bɛɛ ɲa na sisan.» ⁶Matigi Ala ko Setana ma ko: «Ayiwa, a flɛ, ne k’a labla i ye, nka i kana se a nin ma.»

⁷O fɔra minkɛ, Setana bɔra Matigi Ala kɔrɔ ka taga. A ka jorijugu dɔ bla Ayuba fari yɔrɔ bɛɛ ra, k’a ta a sentɛgɛ ra ka taga a bla fɔ a kuncɛ ra. ⁸Ayuba siginin tora bugurigbɛ ra, ka tɛgɛnɛnkolon dɔ ta ka to k’a yɛrɛ siyɛn.

⁹A muso ko a ma ko: «Ele belen bɛ i ta jusukungbɛninya le kan hali bi wa? Hali i ye Ala tɔgɔ cɛn ka sa!» ¹⁰Ayuba k’a jaabi ko: «Ele kɔni bɛ kumana i ko hakiri tɛ mɔgɔ min fɛ. O tuma an bɛ koɲuman dɔrɔn le sɔrɔ Ala fɛ, an tɛ kojugu fana sɔrɔ a fɛ wa?»

Ayiwa, nin kow bɛɛ ra, Ayuba ma kumajugu si bɔ a da ra k’a sin Ala ma.

Ayuba tericɛ saba nana a fɛ

¹¹Tericɛ saba tun bɛ Ayuba fɛ; kelen ye Elifazi ye, ale bɛ bɔ Teman2.11 Teman dugu tun bɛ wele ko: mɔgɔ hakiritigiw ta dugu (Yeremi 49.7). Suwa ni Naama, o duguw yɔrɔ ma lɔn., kelen ye Bilidadi ye, o bɛ bɔ Suwa, tɔ kelen ye Sofari ye, o bɛ bɔ Naama. Ayiwa, kogbɛlɛn minw bɛɛ sera Ayuba ma, olugu ka o kow kibaroya mɛn minkɛ, o bɛɛ bɔra o ta yɔrɔ ra, ka bɛn kelen ma, ko o bɛ na Ayuba jusu saaro, k’a ɲaji cɛ. ¹²O tora yɔrɔjan ka o ɲa kɔrɔta ka Ayuba ye minkɛ, o firira a ma. O ka o kan kɔrɔta ka kule kosɛbɛ. O ka o ta deregebaw faranfaran, ka buguri cɛ k’a firi san fɛ, k’a bɔn o kun na. ¹³O sigira dugu ma a kɔrɔ, fɔ tere wolonfla ni su wolonfla, mɔgɔ si ma kuma a fɛ, sabu a ta dimi bonyara o ɲa kɔrɔ fɔ ka tɛmɛ.

Ayuba ni a tericɛ saba ta kuma

(3–31)

Ayuba k’a worolon danga

¹Ayiwa, o kɔ, Ayuba k’a da yɛlɛ k’a yɛrɛ worolon danga. ²A kumana k’a fɔ ko:

³Ne worora lon min na Ala ye o lon halaki,

ani su min na a fɔra ko: «Cɛden dɔ worora!»

⁴O lon kɔni, Ala ye o lon kɛ dibi ye,

Ala kana to san fɛ k’a hakiri to o lon na fiyewu!

Yeelen kana bɔ o lon na!

⁵Dibifinba ni saya dibi ye o lon mina k’a kɛ o yɛrɛ ta ye,

sankabaw ye o lon datugu,

o lon ta tere ye yɛlɛma ka kɛ su ye.

⁶Dibiba le ye o su ta pewu!

O su kana ninsɔndiya san ta lon tɔw cɛ ra,

o su kana jate ni karow ta lon tɔw ye!

⁷Ɔnhɔn, o lon su ye kɛ densɔrɔbariya ta su ye,

ɲagarikan kana mɛn o su fɛ!

⁸Londangabagaw ye o lon danga3.8 O wagati ra, mɔgɔ dɔw tun b’a miiri ko dɔw bɛ se ka lonw danga, ka lon dɔw kɛ lonjuguw ye.,

o mɔgɔ minw bɛ se ka jirasa belebele lawuri!

⁹O lon ta dugugbɛda lolow ye kɛ dibi ye,

a ye tere yeelen kɔnɔ ka dɛsɛ, a kana a sɔrɔ,

a kana dugu gbɛtɔ ye!

¹⁰Sabu kɔnɔ min ka ne woro, o lon ma sɔn ka o kɔnɔ bari janko ne kana woro,

janko ne ɲa kana nin sɛgɛ ye.

¹¹Mun kosɔn ne worotɔ ma sa dɛ?

Mun na ne bɔtɔ ne bamuso kɔnɔ, ne nɛnɛkiri ma mina ne ra dɛ?

¹²Mun kosɔn mɔgɔ sɔrɔra ka ne sigi a sen kan,

mun kosɔn sin sɔrɔra k’a di ne ma ne y’a min?

¹³Ne lanin tun bɛna kɛ ɲasuma ra,

ne laganfiyanin tun bɛna to saya sunɔgɔ ra.

¹⁴Ne tun bɛna kɛ ni dugukolo masacɛw ni a kuntigiw ye,

minw ta yɔrɔɲuman lɔninw kɛra tomow ye bi.

¹⁵Ne tun bɛna kɛ ni fagama sanintigiw ye,

minw tun ka o ta bonw fa ni warigbɛ ye.

¹⁶Walama ne tun tɛna kɛ foyi ye,

ne tun bɛna kɛ i ko o bɛ den kɔgɔbari min dogo dugukolo ra,

i ko denfitini min bɛ sa k’a sɔrɔ hali a ɲa ma tere yeelen ye.

¹⁷O yɔrɔ ra kɔni, mɔgɔjuguw tɛ mɔgɔ tɔɔrɔ tuun,

mɔgɔ barakantan sɛgɛninw bɛ nɛnɛkiri.

¹⁸Kasodenw bɛɛ bɛ ɲasuma,

o tɛ o ɲagbanbagaw si kan mɛn tuun.

¹⁹Mɔgɔ fitiniw, ani mɔgɔbaw bɛ yi,

jɔnw tɛ o matigicɛw ta fanga kɔrɔ tuun.

²⁰Mun kosɔn Ala bɛ yeelen bɔ sɛgɛbagatɔ ye?

Mun kosɔn a bɛ si di mɔgɔ jusu kasinin ma?

²¹K’a sɔrɔ olugu bɛ saya kɔnɔna ka dɛsɛ, o t’a sɔrɔra,

o bɛ saya ɲinina ka tɛmɛ hali naforo kan.

²²Ni olugu tun ka kaburu sɔrɔ,

o tun bɛna ninsɔndiya fɔ ka ɲagari kosɛbɛ!

²³Mɔgɔ min tɛmɛsira dogora a ma,

Ala ka mɔgɔ min lamini fan bɛɛ ra, bɔyɔrɔ t’a fɛ,

mun kosɔn Ala bɛ si di o tigi ma tuun sa?

²⁴Ŋunakanw le kɛra ne ta domuni ye,

ne kasikan bɛ bɔra i ko ji woyotɔ.

²⁵Ne bɛ siran fɛn min ɲa, o le bɛ ne sɔrɔ,

ne tun bɛ borira min ɲa, o le sera ne ma.

²⁶Ɲasuma tɛ ne fɛ, laganfiya tɛ ne fɛ, jususuma tɛ ne fɛ;

ɲagban le bɛ ne kan.

Elifazi ta ladirikan fɔlɔ: Ala ka kan ka adamaden koro

¹Ayiwa, Elifazi min bɛ bɔ Teman, ale ka kuma ta k’a fɔ Ayuba ye ko:

²Ni mɔgɔ dɔ ko a bɛ kuma dɔ fɔ, yala o bɛna bɛn i ma wa?

Sabu jɔn le bɛ se ka kuma mara a yɛrɛ kɔnɔ?

³A flɛ, ele ka mɔgɔ caman karan.

Ni mɔgɔ minw baraka tun dɛsɛra, ele le tun bɛ baraka don olugu ra,

⁴ni mɔgɔ minw tun talonna ka ben, ele ta kumaw le tun bɛ olugu lawuri;

minw tun tɛ se ka lɔ o sen kan, ele le tun bɛ baraka don olugu ra.

⁵Nka sisan a sera ele yɛrɛ ma minkɛ, ele fari fagara!

Sisan a ka ele yɛrɛ le sɔrɔ minkɛ, ele jigi tigɛra!

⁶I ta Alaɲasiran le tun man kan ka i ja gbɛlɛya wa?

I ta jusukungbɛninya tun man kan ka kɛ i jigi ye wa?

⁷Ele ye miiri k’a flɛ! Ala ka mɔgɔ jarakibari juman le halaki ka ye?

I k’a mɛn yɔrɔ juman ko Ala ka kojugu ben mɔgɔɲuman dɔ kan k’a faga?

⁸Ne kɔni ka min ye, o le ye ko mɔgɔ minw bɛ terenbariya sɛnɛ,

ka juguya dan, olugu le b’a siman tigɛ;

⁹Ala bɛ olugu le fiyɛ ka o halaki,

a ta jusugban tasuma bɛ o jɛni ka o ban.

¹⁰Hali ni jara kasira, ni waraba ka kule,

Ala bɛ jarakanbelenw ɲinw karikari.

¹¹A bɛ domunintanya kɛ ka jara faga,

jaramuso denw bɛ janjan.

¹²Kuma dɔ le dogora ka se ne ma,

a mankan fitini donna ne toro ra.

¹³Wagati min siranyakow bɛ na mɔgɔ hakiri ra siko ra,

tuma min na mɔgɔ bɛ sunɔgɔ fɔ ka ɲina a yɛrɛ kɔ,

¹⁴o wagati le ra siranya ni jatigɛ dɔ ka ne mina,

k’a kɛ fɔ ne kolow bɛ yɛrɛyɛrɛ.

¹⁵Fɔɲɔ sumanin dɔ fiyɛra ka tɛmɛ ne ɲada kan,

fɔ ka ne farisi tagama.

¹⁶Mɔgɔ dɔ tun lɔnin bɛ,

nka ne tun tɛ se k’a cogoya lɔn;

fɛn dɔ ja tun lɔnin bɛ ne ɲa kɔrɔ.

Ne ka kumakan fitini dɔ mɛn, ko:

¹⁷«Yala adamaden bɛ se ka teren ka kaɲa ni Ala yɛrɛ sago ye wa?

Yala mɔgɔ bɛ se ka saninya ka kaɲa n’a danbaga sago ye wa?

¹⁸Ni Ala ma la hali a yɛrɛ ta ciradenw na,

o minw ye a ta mɛlɛkɛw ye, ni a bɛ jaraki sɔrɔ hali olugu ra,

¹⁹o tuma adamaden min farisogo ye bɔgɔ ye,

min danna ni buguri ye,

o bɛ se ka min terege dugu ma i ko tumu, yala kuma bɛ ale ma wa?

²⁰Sɔgɔmada ni wulafɛra cɛ, o y’a sɔrɔ adamaden mugumugura ka ban,

a halakira ka ban pewu, hali mɔgɔ t’a janto a ra.

²¹A ta fanibon juruw bɛ tigɛ,

a bɛ sa k’a sɔrɔ a ma hakiri sɔrɔ.»

Elifazi ko mɔgɔ tɛ ban Ala ta korori ma

¹Ayiwa, kule sisan sa! Jɔntigi le bɛna i jaabi?

I bɛna i ɲasin Ala ta mɛlɛkɛ saninman juman le ma k’a daari?

²Sabu jusugban bɛ naloman faga,

ɲangboya b’a to kolɔnbari bɛ sa.

³Ne ka naloman ye, a bɛ baraka sɔrɔra,

nka o yɔrɔnin bɛɛ ne k’a sigiyɔrɔ danga.

⁴«Dɛmɛbaga kana sɔrɔ a denw si ra!

Kiti ye ben o kan, mɔgɔ kana sɔrɔ ka o bɔsi!

⁵A ka siman min kan, kɔngɔtɔw ye o bɛɛ domu!

Hali siman minw bɛ ŋaniw cɛ ra, o ye o bɛɛ cɛ.

Natabaw ye a ta naforo bɛɛ domu!»

⁶Terenbariya tɛ bɔ dugukolo ra,

kojugu fana tɛ falen dugu ma.

⁷Adamaden le danna kojugukɛ kama,

i ko tadenw bɛ bɔ tasuma ra ka wuri ka taga san fɛ cogo min na.

⁸Ni nin ko tun sera ne le ma, ne tun bɛna Ala le ɲini;

ne tun bɛna ne ta kow ɲafɔ Ala le ye.

⁹Ala le bɛ kobaw kɛ, ko minw tɛmɛna adamaden hakiri dan kan;

a bɛ kabako minw kɛ, o tɛ se ka jate ka ban.

¹⁰Ale le bɛ sanji lana dugukolo kan,

ka ji lajigi kongokɔnɔyɔrɔw ra.

¹¹Mɔgɔ majigininw, a bɛ olugu lawuri fɔ san fɛ,

minw jusu kasira, a bɛ olugu kisi.

¹²A bɛ mɔgɔ cegumanw ta kolatigɛninw cɛn;

o ka baara o baara dabɔ, o bɛɛ bɛ cɛn o boro.

¹³A bɛ hakiritigiw mina ni o yɛrɛ ta ceguya ye;

ka janfamɔgɔw ta kolatigɛninw bɛɛ cɛn yɔrɔnin kelen na.

¹⁴Dibi bɛ ben o kan tere fɛ;

teregban fɛ o bɛ mɔmɔri kɛ i ko mɔgɔ min bɛ tagamana su fɛ.

¹⁵Nka kɛrɛkɛmuru min bɛ bɔ o mɔgɔw da ra, Ala bɛ fagantan kisi o ma,

ka o kisi ka bɔ fangatigiw boro.

¹⁶Ni o kɛra, dɛsɛbagatɔ bɛ jigiya sɔrɔ,

mɔgɔjugu da bɛ datugu.

¹⁷O kosɔn ni Ala bɛ mɔgɔ min jaraki, o tigi ta ɲana!

I kana ban Sebɛɛtigi Ala ta ladiri ma.

¹⁸Sabu ale le bɛ dimi ben mɔgɔ kan, ka sɔrɔ k’a suma;

a boro bɛ mɔgɔ bana, ka sɔrɔ k’a kɛnɛya.

¹⁹Deguko wɔɔrɔ bɛ se i ma, nka Ala bɛ i bɔsi a bɛɛ ra;

hali n’a wolonflanan ka kɛ, foyi t’i sɔrɔ.

²⁰Kɔngɔba wagati ra, a bɛ i kisi saya ma,

kɛrɛ wagati ra, a bɛ i kisi kɛrɛkɛmuru ma.

²¹A bɛna i tanga mɔgɔjuguw nɛnkun ma;

hali ni cɛnri wagati sera, i tɛ siran.

²²I bɛ yɛrɛko cɛnri wagati ni kɔngɔ wagati ra,

i tɛ siran kongowaraw fana ɲa;

²³sabu kabakuru minw bɛ foro kɔnɔ, olugu bɛna jɛnɲɔgɔnya don ni i ye,

kongowaraw fana bɛna hɛra layiri ta ni i ye.

²⁴I yɛrɛ bɛna a ye ko hɛra bɛ i ta so;

ni i tagara i ta bɛganw flɛ o ta domunikɛyɔrɔ ra, i b’a ye ko foyi ma o jɛn.

²⁵I bɛna a ye ko i ta durujaw cayara,

ko i denw ka ca i ko kongobinw.

²⁶I kɔrɔninba le bɛna sa ka don kaburu kɔnɔ,

i n’a fɔ ni simantigɛwagati sera, o bɛ a tigɛ k’a lajɛn cogo min na.

²⁷Ayiwa, a flɛ, an ka jatemina kɛ ka nin le sɔrɔ; a fana bɛ ten le cɔ!

Ele le ka kan ka nin lamɛn, k’a sira tagama.

Ayuba ta jaabi: Ayuba k’a teriw jaraki

¹Ayuba ka Elifazi jaabi k’a fɔ ko:

²E, ni ne ta dimi hakɛya tun bɛ se ka lɔn!

Ni ne ta sɛgɛ bɛɛ lajɛnnin tun bɛ se ka bla sumanikɛnan kan!

³Sigiya t’a ra, a tun bɛna gbiriya ka tɛmɛ hali kɔgɔjiw ta kɛnkɛn kan pewu.

O le kosɔn, ne ta kuma cayara.

⁴Sebɛɛtigi Ala ta biɲɛw ka ne sɔgɔ;

a baga donna ka se fɔ ne nin ma.

Ala k’a ta jatigɛkobaw labɛn ne kama.

⁵Yala kongofali bɛ se ka kasi k’a lɔnin to binkɛnɛ kɔrɔ wa?

Misi bɛ se ka kasi k’a lɔnin to a ta domuni kɔrɔ wa?

⁶Yala diya tɛ fɛn min na, o fɛn kɔgɔntan bɛ se ka domu wa?

Yala diya bɛ sisɛfan gbɛmanyɔrɔ ra wa?

⁷Ne tun t’a fɛ ka maga fɛn min na,

o le kɛra ne ta baro ye, hali ni a ka gbo ne ye.

⁸E, ne bɛ min daari, ni o tun bɛ se ka kɛ ne ye!

Ne jigi bɛ min kan, ni Ala tun bɛ se ka o kɛ ne ye!

⁹Ni a ka Ala diya, a ye ne ɲɔɲɔ,

a y’a boro kɛ ka ne tɔ laban!

¹⁰Nka o bɛɛ ra ne belen bɛna jususaaro sababu sɔrɔ,

ka ɲagari fɔ ka panpan, hali ni sɛgɛ bɛ ne kan,

sabu ne ma ban Ala saninman ta kuma ma ka ye!

¹¹Baraka juman le bɛ ne ra, ko ne belen bɛna Ala makɔnɔ?

Ne si tɔ ye jori le ye, ko ne belen bɛna muɲu?

¹²Yala ne baraka ye kabakuru baraka le ye wa?

Ne fari ye siranɛgɛ le ye wa?

¹³Yala dɛmɛbaga bɛ ne ra tuun wa?

Bɔyɔrɔ foyi tɛ ne fɛ tuun.

¹⁴Mɔgɔ tɔɔrɔnin ka kan ni a teri ta ɲumanya ye,

hali ni a ka Sebɛɛtigi Ala ɲasiran dabla.

¹⁵Nka ne balemaw ka ne janfa i ko dingakɔnɔji,

i ko dingakɔnɔji min bɛ ja.

¹⁶Nɛnɛwagati ra, a jiw bɛ simi ka duuru,

nɛnɛ bɛ a ɲa kɛ i ko bugun.

¹⁷Ni teremana sera, a bɛ ja,

fundɛninwagati ra, ji foyi tɛ sɔrɔ a ra.

¹⁸Kongokolon ɲɔgɔmɛtigiw bɛ to jiɲini na fɔ ka o ta sira bla,

o bɛ tunu kongokolon kɔnɔ, ka o yɛrɛ halaki.

¹⁹Tema jamana ɲɔgɔmɛtigiw bɛ o ɲa kɔrɔta ka o jiw yɔrɔɲini,

Saba jamana tagamabagaw jigi tun b’a kan.

²⁰Nka o ta jigi yɛlɛmana k’a kɛ nimisa ye,

sabu o tagara se yi minkɛ, o jigi tigɛra.

²¹Ayiwa, sisan aw ta kɛra o cogo le ra ne fɛ.

Kogbɛlɛn min sera ne ma, aw ka o ye minkɛ, aw siranna.

²²Yala ne k’a fɔ ko aw ye fɛn dɔ di ne ma,

walama ko aw ye dɔ bɔ aw ta naforo ra k’a di ne kosɔn wa?

²³Ne k’a fɔ aw ye ko aw ye ne bɔsi ne jugu boro wa,

ko aw a ye ne kunmabɔ mɔgɔ farimanw boro wa?

²⁴Aw ye o fɔ ne ye, ni o kɛra, ne bɛna je.

Ne firira yɔrɔ min na, aw ye o yira ne ra.

²⁵Cɛnkuma kɔni bɛ digi mɔgɔ ra,

nka aw ta jarakirikumaw bɛ mun le ɲa?

²⁶Yala aw b’a fɛ ka ne jaraki ne ta kumaw le kosɔn wa,

ka mɔgɔ jigi tigɛnin ta kumakan jate i ko fɔɲɔ?

²⁷Aw kɔni bɛ sɔn ka ben hali ferita kan;

aw bɛ sɔn ka hali aw teri fiyeere.

²⁸Ayiwa, sisan aw ye aw ɲa lɔ ne ra ka ne flɛ.

Yala ne bɛ sɔn ka faninya tigɛ aw ye wa?

²⁹Aw ye aw ta miiriya yɛlɛma, aw kana to juguya kan;

aw ye aw ta miiriya yɛlɛma, sabu ne bɛ can le kan hali bi.

³⁰Yala juguyakuma bɛ ne darakumaw ra wa?

Yala ne da tɛ kumajugu ni kumaɲuman lɔn ka bɔ ɲɔgɔn na wa?

Ayuba ta jaabi tɔ: Ayuba k’a ta dimi lakari

¹Adamaden ta dunuɲalatigɛ bɛ i ko kɛrɛkɛden min bɛ kɛrɛ ra;

a bɛ fɛn o fɛn kɛ a si kɔnɔ, a bɛ o kɛ i ko baaraden le.

²A bɛ i ko jɔn sɛgɛninba, yirisuma lɔgɔ bɛ a ra fɔ a bɛ ŋuna a nɔ fɛ;

a bɛ i ko baaraden min kɔrɔtɔnin bɛ a ta sara makɔnɔna.

³Ayiwa, ne fana ninyɔrɔ kɛra nimisa le ye kabini karo caman,

ne ta kɛra su caman sɛgɛ le ye.

⁴Ni ne lara su fɛ dɔrɔn, ne bɛ kɔrɔtɔ ne wuriwagati ra;

nka su bɛ janya.

Ne bɛ to yɛlɛmayɛlɛma ra fɔ ka taga dugu gbɛ.

⁵Tumuw donna ne sogo ra, ne fari jajara i ko bɔgɔjalan;

a bɛ pɛrɛnpɛrɛn, ka nɛɛn don.

⁶Ne si terew ka teli i ko jesedanbaga ta kurunin,

ne si bɛ banna, ne jigi fana bɛ banna!

⁷E, Ala, i hakiri to ne ra, ko ne si tɛ foyi ye ni fɔɲɔ dama tɛ;

ne ɲadenw kɔni tɛna hɛra ye tuun le fiyewu!

⁸Ɲa min bɛ ne flɛra, lon dɔ o tɛna ne ye tuun;

i ɲaw bɛna ne yɔrɔɲini, nka ne tɛna kɛ yi tuun.

⁹Sankaba bɛ tɛmɛ, ka tunu cogo min na,

ni mɔgɔ min ka taga lahara, o tigi fana tɛ sekɔ tuun.

¹⁰A tɛna sekɔ ka na a ta so kɔnɔ tuun,

ni i k’a ta so flɛ, i t’a lɔn ko mɔgɔ tun bɛ yi kakɔrɔ.

¹¹O le kosɔn ne tɛna ne da datugu;

ne nin degunin le bɛna kuma,

ne jusu kasinin le bɛna ne ta dimi lakari.

¹²Yala ne ye kɔgɔji le ye wa, walama ne ye kɔgɔji danfɛn barakaman7.12 O wagati mɔgɔ dɔw tun b’a miiri ko kɔgɔji ni kɔgɔji danfɛn barakaman tun ye batofɛn dɔw ye; ko olugu ta ala ka o fɛnw kɛrɛ, ka se o ra, ka o siri ka bla (Ezayi 27.1, ani Zaburu 74.13 flɛ). le ye,

fɔ i ka ne tɛmɛyɔrɔw bɛɛ datugu, bɔyɔrɔ si tɛ ne fɛ?

¹³Tuma dɔ ne b’a miiri ko ni ne lara, o bɛna dɔ bɔ ne ta sɛgɛ ra,

ko layɔrɔ ra, ne ta dimi bɛna nɔgɔya.

¹⁴Nka ni ne lara, i bɛ sikojuguw kɛ ka ne lasiran;

ne bɛ fɛn minw ye, o bɛ ne ja tigɛ.

¹⁵Hali i ye ne kan dɛrɛ ka ne nɛnɛkiri fereke,

ne ye sa, o ka fisa ni ne fasanin ye fɔ ka ne kolow bɔ kɛnɛ ma.

¹⁶Foyi lɔgɔ tɛ ne ra tuun!

Ne tɛna to si ra wagati bɛɛ le.

Ne to yi tan, sabu ne ta dunuɲalatigɛ kɛra gbansan le ye.

¹⁷O tuma adamaden ye mun le ye ko i b’a jate tan,

ko i bɛ i ta miiriya la a kan,

¹⁸ka i janto a ra lon o lon sɔgɔma,

k’a tɛmɛsiraw sɛgɛsɛgɛ wagati bɛɛ?

¹⁹I bɛna i ɲa bɔ ne ra tuma juman le sa,

k’a to ne ye nɛnɛkiriyɔrɔ sɔrɔ dɔɔnin ka ne daji kunu?

²⁰Ni ne ka jurumun le kɛ,

o tuma ne ka jurumun juman le kɛ ele ra sa, adamadenw kɔrɔsibaga?

Mun na i ka ne kɛ i kɛrɛkɛɲɔgɔn ye,

ka ne ta ko kɛ doni ye i yɛrɛ kunna?

²¹Mun na i tɛ ne ta hakɛ bɔ ne kunna,

ka ne ta terenbariya yafa sa?

Sabu sisan, ne bɛna taga la dugukolo jukɔrɔ,

i bɛna ne yɔrɔɲini, nka ne tɛna ye tuun.

Bilidadi ta ladirikan fɔlɔ: Sara bɛ kojugu ra

¹Bilidadi min bɛ bɔ Suwa, ale ka kuma ta, k’a fɔ Ayuba ye ko:

²Ele bɛna nin kuma suguyaw dabla tuma juman le dɛ?

I bɛna nin kumalakolonw dabla tuma juman?

Sabu i darakumaw bɛ i ko fɔɲɔ dama.

³Yala Ala bɛ se ka bɔ can sira kan wa?

Yala Sebɛɛtigi Ala bɛ se ka bɔ terenninya sira kan wa?

⁴I b’a sɔrɔ ko i ta denw ka jurumun kɛ ka Ala hakɛ ta,

o ra, Ala ka o ta hakɛw kunko ben o kan kɛ!

⁵Nka ni ele ka Ala ta jɛnɲɔgɔnya ɲini,

ni i ka Sebɛɛtigi Ala daari ko a ye makari i ra,

⁶ni i ma jarakiko kɛ, ni i terennin lo,

o tuma Ala bɛna a janto i ra sisan yɛrɛ;

a bɛna hɛra ladon i ta so tuun, ka kaɲa ni i ta terenninya ye.

⁷Ala bɛna min kɛ i ye, o bɛna bonya kosɛbɛ;

a bɛ kɛ i n’a fɔ fɛn minw tun bɛ i fɛ fɔlɔfɔlɔ, o belen tun tɛ foyi ye.

⁸Ayiwa, ele ye fɔlɔfɔlɔmɔgɔw ɲininka kɛ!

Olugu ta bɛmaw ka ko minw karan k’a lɔn, o kow sɛgɛsɛgɛ kosɛbɛ k’a flɛ!

⁹Sabu anw kɔni worora kunu le, an tɛ foyi lɔn;

dunuɲa ra yan, an si terew bɛ tɛmɛ i ko yirisuma.

¹⁰Fɔlɔfɔlɔmɔgɔw le bɛna i karan, ka o ta hakirinanta fɔ i ye;

o bɛna nin kuma dɔw bɔ o ta faamuyari ra ka o fɔ i ye:

¹¹«Yala jirabin bɛ se ka wuri ni a tɛ jida ra wa?

Kɔdarabin bɛ se ka falen ni ji t’a kɔrɔ wa?

¹²Ni ji t’a kɔrɔ, a kɛnɛ bɛ ja joona ka tɛmɛ bin tɔw bɛɛ kan,

k’a sɔrɔ mɔgɔ m’a tigɛ.»

¹³Minw bɛ ɲina Ala kɔ, olugu bɛ laban tan le;

Alaɲasiranbari jigi bɛ cɛn.

¹⁴A tun k’a boromala fɛn min ma, o bɛ tigɛ ka bɔ a kɔrɔ;

sabu a bɛ i n’a fɔ a tun k’a jigi la talenjuru le kan.

¹⁵A ko a bɛ dɛn a ta bon kan, nka bon benna;

a ko a bɛ dulon a ra cogo o cogo, a ma se a kɔrɔ.

¹⁶A tun bɛ i ko yiri barakaman min bɛ tere kɔrɔ;

a borow bɛ janya fɔ ka yiritu ta yiri tɔw datugu.

¹⁷A b’a lilinw melege ɲɔgɔn na ka o don ka se fɔ kabakuruw cɛ ra;

a bɛ donyɔrɔ ɲini ka taga fɔ faraw jukɔrɔ.

¹⁸Nka lon min ni a samana ka bɔ a sigiyɔrɔ ra dɔrɔn,

a sigiyɔrɔ bɛ ban a ra, k’a fɔ a ma ko: Ne ma deri ka ele ye!

¹⁹Ayiwa, ale bɛ ninsɔndiya min sɔrɔ a ta dunuɲalatigɛ kɔnɔ, o bɛ dan nin le ma!

Nka a ɲɔgɔn wɛrɛw bɛna falen tuun ka bɔ dugukolo ra.

²⁰Ala kɔni tɛ ban mɔgɔ jusukungbɛnin na fiyewu,

a fana tɛ kojugukɛbaga boro sabati a ta baara ra.

²¹A bɛna a to i ye yɛrɛko tuun kosɛbɛ,

k’a to i ye ɲagari tuun kosɛbɛ.

²²Minw bɛ i kɔninya, maroya le bɛna kɛ olugu kannaderege ye;

sabu mɔgɔjuguw sigiyɔrɔ bɛna halaki.

Ayuba ta jaabi: Mɔgɔ tɛ Ala sɔsɔ

¹Ayuba ka Bilidadi jaabi ko:

²Can ra, ne k’a lɔn ko i ka min fɔ ko a bɛ ten le;

adamaden tagamacogo bɛ se ka teren Ala ɲa kɔrɔ cogo di?

³Ni i ko i bɛ sɔsɔri kɛ ni Ala ye,

ni a ka ɲininkari waga kelen kɛ, ele tɛna se ka hali kelen jaabi a ra.

⁴Hakiritigiya b’a fɛ, a ta sebagaya fana ka bon.

Jɔn le bɛ se ka lɔ k’a kɔnɔ, ni fɛn ma o tigi sɔrɔ?

⁵Ale le bɛ kuruw wuri ka o bɔ o nɔ ra, hali o tɛ bɔ a kala ma;

ni a dimina, a bɛ kuruw dabiri.

⁶A bɛ dugukolo siginin to a jusiginan kan k’a yɛrɛyɛrɛ,

fɔ a samasenw bɛ yuguyugu.

⁷A bɛ kuma tere fɛ ko a kana bɔ, tere tɛ bɔ;

a bɛ lolow datugu janko o yeelen kana bɔ.

⁸Ale kelen le bɛ sankolo yɛrɛgɛ,

a bɛ tagama kɔgɔji jikurubaw kunna.

⁹Ale le ka sahiliyanfan ta lolow bɛɛ dan,

ani samiya wagati ta lolow,

ani teremana wagati ta lolow,

ani woroduguyanfan ta lolow.

¹⁰A bɛ kobaw kɛ, ko minw tɛmɛna adamaden hakiri dan kan;

a bɛ kabako minw kɛ, o tɛ se ka jate ka ban.

¹¹A flɛ, a bɛ se ka tɛmɛ ne kɔrɔ, nka ne t’a ye,

a bɛ se ka taga ka bɔ ne kɔrɔ, nka ne tɛ bɔ foyi kala ma.

¹²Ni a ka fɛn min mina, jɔn le bɛ se ka o bɔsi a boro?

Jɔn le bɛ se k’a fɔ a ma ko: «I bɛ mun le kɛra tan?»

¹³Ala tɛna a ta jusugban mala;

kɔgɔji danfɛn barakaman9.13 Min fɔra kɔgɔji danfɛn barakaman ta ko ra, aw ye o flɛ: 7.12. ni a jɛnɲɔgɔnw bɛɛ bɛ o yɛrɛ majigi a kɔrɔ.

¹⁴O tuma ne bɛ se k’a jaabi cogo di?

Ne bɛ se ka kuma juman le sɔrɔ ka sigi ka o fɔ ni a ye?

¹⁵Hali ni ne tun terennin lo, ne tun tɛna se k’a jaabi;

ne bɛ se k’a daari le dɔrɔn, sabu ale le ye ne ta kititigɛbaga ye.

¹⁶Ni ne k’a wele, hali ni a ka ne jaabi,

ne tɛna la a ra ko can ra, a bɛ sɔn k’a toro malɔ ka ne lamɛn.

¹⁷A bɛ ne fifa ka taga fan bɛɛ ra ni a ta sanfɔɲɔ ye;

a bɛ ne ta tɔɔrɔkow caya k’a sɔrɔ ne ma foyi kɛ a ra.

¹⁸A t’a to ne ye nɛnɛkiri;

a bɛ jusukasi caya ne kan.

¹⁹Ni ne ko ne b’a kɛ fangako ye, ale baraka le ka bon;

ni ne ko ne bɛ taga ni a ye kiti ra, jɔntigi le bɛna o kiti sigi?

²⁰Hali ni ne tun terennin lo, ne yɛrɛ da tun bɛna kiti ben ne kan;

hali ni ne jusukun tun gbɛnin lo, ne yɛrɛ da tun bɛna ne jaraki.

²¹Yala ne jusukun gbɛnin lo can ra wa? Ne m’a lɔn!

Ne lɔgɔ bɔra ne yɛrɛ ra!

²²A bɛɛ ka kan ne fɛ sisan! O kosɔn ne ko:

«Ala bɛ mɔgɔ jusukungbɛnin ni mɔgɔjugu bɛɛ halaki cogo kelen na!»

²³Hali ni kojugu dɔ ka bara ka ben mɔgɔ terennin kan k’a faga,

Ala bɛ yɛrɛko mɔgɔ jarakibariw ta jusukasikow ra le.

²⁴Ale le bɛ jamana labla mɔgɔjuguw ye,

k’a to kititigɛbagaw ye o ɲaw datugu kojugu kan.

Ni ale tɛ, o tuma jɔntigi lo sa?

²⁵Ne si terew bɛ tɛmɛna joona joona;

a ka teli ka tɛmɛ hali sennaboribaga teliman kan.

Ne si bɛ banna k’a sɔrɔ ne ma hɛra ye ne ɲa ra.

²⁶Ne si terew bɛ tɛmɛna joona joona le, i ko jirakurun min ka fiyɛn,

i ko bɔn bɛ jigi ka na cun sogo kan cogo min na.

²⁷Ni ne ko ne bɛ ɲina ne ta dimi kɔ,

ka ne ɲada cogoya yɛlɛma, ka ninsɔndiya,

²⁸ne ta sɛgɛ bɛ ne lasiran;

sabu ne k’a lɔn ko i tɛna ne jarakibari to.

²⁹Ne le bɛna jaraki!

O tuma mun kosɔn ne bɛ ne yɛrɛ sɛgɛ gbansan?

³⁰Hali ni ne kora ni ji saninyaninba dɔ le ye,

ka ne tɛgɛw ko k’a gbɛ ni safina ye,

³¹o bɛɛ n’a ta, i belen bɛna ne lajigi kaburu kɔnɔ, bɔgɔ ra;

hali ne ta faniw bɛ ne haramuya.

³²Ala tɛ adamaden ye, i ko ne,

janko ne y’a jaabi,

walama ko ne ye a wele ka taga kititigɛyɔrɔ ra.

³³Kititigɛbaga si tɛ se ka don an fla cɛ,

min bɛ se k’a ta fanga sigi an fla bɛɛ kan,

³⁴janko a ye a ta bere bɔ ne kan,

a ta siranyakow kana ne ja tigɛ tuun.

³⁵Ni o tun bɛ se ka kɛ, ne tun bɛna kuma,

ne tun tɛna siran a ɲa tuun;

nka o tɛ se ka kɛ, ne tora ne kelen na le.

Ayuba ta jaabi tɔ: Ala bɛ tugu le ka mɔgɔ tɔɔrɔ

¹Dunuɲa lɔgɔ bɔra ne ra!

Sisan ne bɛna ne ta dimi bɔ kɛnɛ kan;

ne jusu kasinin le bɛna kuma.

²Ne ko Ala ma ko: I kana kiti ben ne kan!

I bɛ ne jarakira fɛn min kosɔn, o fɔ ne ye!

³Yala ka ne minako juguya, o le ka di i ye wa?

Ka ban i ta danfɛn na, i yɛrɛ boro ka min dan,

ani ka mɔgɔjuguw ta kolatigɛninw ɲa k’a di o ma,

o le ka di i ye wa?

⁴O tuma adamaden ɲa le bɛ ele fɛ wa?

Yala ele ta yerikɛcogo ni adamadenw ta bɛɛ ka kan wa?

⁵Yala ele si terew bɛ ban i ko mɔgɔw ta wa,

walama i si sandaw bɛ ban i ko adamadenw ta?

⁶O kosɔn i bɛ ne ta terenbariyako sɛgɛsɛgɛra,

i bɛ ne ta jurumun sɛgɛsɛgɛra k’a lɔn,

⁷k’a sɔrɔ i yɛrɛ k’a lɔn ko ne ma jaraki,

ko mɔgɔ fana tɛ yi min bɛ se ka ne bɔsi ka bɔ i boro.

⁸I yɛrɛ boro le ka ne labɛn, ka ne fari yɔrɔ bɛɛ kelen kelen dan;

nka sisan i b’a fɛ ka ne halaki!

⁹Sabari, i ye i hakiri to a ra ko i ka ne dan ni bɔgɔ dama le ye;

yala i b’a fɛ ka ne lasekɔ dugukolo buguri ra tuun wa?

¹⁰I ka ne sɛnsɛn i ko nɔnɔ,

ka ne gbɛrɛn i ko nɔnɔ bɛ gbɛrɛn cogo min na.

¹¹I ka gbolo ni sogo don ne ra,

ka ne tugutugu ɲɔgɔn na ni kolow ni fasaw ye.

¹²I ka si di ne ma, ka ɲumanya kɛ ne ye,

ka i janto ne ra, ka ne nin mara.

¹³Nka i tun bɛ min dogora i jusukun na, o le ye nin ye;

ne k’a lɔn ko nin ko le tun bɛ i jusu ra:

¹⁴I tun bɛ ne kɔrɔsira, k’a flɛ ni ne bɛna ben jurumun na;

o ra, i tɛna sɔn ka ne jarakibari to ne ta terenbariya kosɔn.

¹⁵Ni ne jarakira, bɔnɔ bɛ ne sɔrɔ!

Ni ne jo lo fana, ne tɛ se ka ne kun kɔrɔta!

Maroya kɔni ka ne labɔ,

ɲani ma tɔ to ne ra.

¹⁶Ni ne ko ne bɛ ne kun kɔrɔta, i bɛ ne gbɛn i ko jara;

i bɛ gban ne ra tuun ni i ta sebagayaba ye.

¹⁷I bɛ seere wɛrɛw le wurira ne kama,

dɔ le bɛ farara i ta jusugban kan ne kɔrɔ;

kɛrɛkɛjamaw bɛ benna ne kan, fɔ o bɛ ɲɔgɔn labi.

¹⁸O tuma mun kosɔn i ka ne labɔ ne bamuso kɔnɔ sa?

Hali ne tun ye to yi ka sa, mɔgɔ si ɲa kana la ne kan!

¹⁹O ra, ne tun bɛna kɛ i ko Ala ma mɔgɔ min dan ka ye fiyewu;

ne sanin tun bɛ bɔ ne bamuso kɔnɔ ka sin kaburu ma.

²⁰Ne si teredaw tɔ ye dɔɔnin dɔrɔn!

O ra, Ala ye ne to yi tan;

a ye bɔ ne kɔrɔ janko ne ye ne yɛrɛ sɔrɔ dɔɔnin,

²¹sani ne ye taga dibifinba ni saya dibi ta jamana ra,

mɔgɔ tɛ sekɔ ka bɔ yɔrɔ min na.

²²Dibifinba ta jamana lo, yɔrɔ min finna i ko su dibi;

saya dibi lo, yɔrɔ ɲagamininba lo;

o yɔrɔ tere yeelen bɛ i ko su dibi!

Sofari ta ladirikan fɔlɔ: Ala ta hakiritigiya ka bon

¹Sofari min tun bɛ bɔ Naama, ale ka kuma ta k’a fɔ Ayuba ye ko:

²Yala jaabiri tɛna sɔrɔ nin kuma caman na le wa?

Yala kumalɔn bɛ se ka jo di mɔgɔ ma wa?

³Yala ele ta kuma caman kosɔn mɔgɔ tɔw ka kan ka je wa?

Ele bɛ mɔgɔ tɔw lɔgɔbɔ, ko mɔgɔ kana ele dɔgɔya!

⁴I ko Ala ma ko: «Ne ta kumaw gbɛnin lo,

ne saninyanin lo i ɲa kɔrɔ!»

⁵E, ni Ala tun bɛ sɔn ka kuma,

ni a tun bɛ sɔn k’a da yɛlɛ ka kuma ni ele ye,

⁶ka hakiritigiya ta gundow fɔ i ye,

o gundo minw tɛmɛna adamadenw ta hakiri dan kan!

O ra, i tun bɛna a lɔn ko Ala b’a ɲa datugura ele ta terenbariya dɔw kan le.

⁷Yala ele bɛ se ka Ala ta gundobaw sɛgɛsɛgɛ k’a lɔn wa,

walama ka Sebɛɛtigi Ala ta kow sɛgɛsɛgɛ ka se fɔ a dan bɛɛ ma?

⁸Fɛn min kɔrɔtanin lo ka tɛmɛ sankolo kan,

ele bɛ se ka mun le kɛ o ra?

Fɛn min ka dun ka tɛmɛ lahara dinga kan,

ele bɛ se ka mun le lɔn o ra sa?

⁹A ka jan ka tɛmɛ dugukolo janya kan,

a fana ka bon ka tɛmɛ kɔgɔji bonya kan.

¹⁰Ni Ala tɛmɛtɔ ka mɔgɔ dɔ mina k’a datugu,

ko a bɛ o tigi wele kiti ra, jɔn le bɛ se k’a bari?

¹¹Ale ka janfamɔgɔw lɔn;

a bɛ terenbariya ye, hali ni a ma a sɛgɛsɛgɛ.

¹²Nka mɔgɔ hakiri lakolon lo;

kongofali bɛ woro ni hakiri min ye, adamaden bɛ woro ni o hakiri ɲɔgɔn le ye.

¹³Ele kɔni, ni i ka i jusukun ta miiriyaw to Ala kan,

ka i boro kɔrɔta k’a daari,

¹⁴ka i boro bɔ terenbariyakow ra,

ka ban kojugu ma i ta so,

¹⁵o tuma i bɛna i kun kɔrɔta, sabu fiyɛn tɛna sɔrɔ i ra;

i bɛ baraka sɔrɔ, siranya tɛ kɛ i ra.

¹⁶I bɛna ɲina i ta sɛgɛ kɔ;

a bɛna kɛ i hakiri ra i ko ji min woyora ka taga.

¹⁷I ta dunuɲalatigɛ bɛna manamana ka tɛmɛ tere kan;

dibi bɛna yɛlɛma ka kɛ i ko sɔgɔmada yeelen.

¹⁸I tɛna sigiya i yɛrɛ ra, sabu jigi bɛna kɛ i fɛ;

i bɛna la hɛra ni laganfiya ra, sabu i bɛna a ye ko fɛn bɛɛ ka ɲi.

¹⁹I bɛna la ka laganfiya, mɔgɔ si tɛna i tɔɔrɔ;

mɔgɔ caman bɛna na i daari ko i ye o dɛmɛ.

²⁰Nka mɔgɔjuguw jigi bɛna ban;

dogoyɔrɔ si tɛna sɔrɔ o fɛ.

Jigi kelen min bɛna kɛ o fɛ, o ye saya le ye!

Ayuba ta jaabi: Ni min ka Ala diya a bɛ o kɛ

¹Ayuba ka Sofari jaabi ko:

²Can lo, dunuɲa bɛɛ lajɛnnin ta lɔnniya bɛ aw le boro!

Ni aw kɔni sara, o tuma hakiritigiya fana sara le!

³Nka hakiri dɔ bɛ ne fana fɛ i ko aw;

sabu ne hakiri man dɔgɔ ni aw ta ye!

Jɔntigi le ma nin kow lɔn?

⁴Ne kɔni kɛra yɛrɛkofɛn le ye ne teriw fɛ.

Ne min bɛ Ala daarira janko a ye ne jaabi,

ne min ye mɔgɔ terennin ye, ani mɔgɔ jusukungbɛnin,

ne le kɛra o ta yɛrɛkofɛn ye!

⁵«Ni bɔnɔ ka mɔgɔ min sɔrɔ, o tigi ta ye dɔgɔyari le ye!»

O le ye mɔgɔ wasaninw ta miiriya ye.

Ni ele mɔgɔ min ka talon ka ben, dɔgɔyari le bɛ kɛ ele ta sɔrɔta ye.

⁶K’a sɔrɔ cɛnrikɛbagaw laganfiyanin lo o ta sow kɔnɔ;

minw bɛ Ala mafiyɛnya, olugu ɲasumanin lo,

olugu minw bɛ o yɛrɛ ta baraka ta k’a kɛ o ta ala ye.

⁷Nka ni i ka bɛganw ɲininka, olugu bɛna i karan;

ni i ka kɔnɔw ɲininka, olugu bɛna dɔ fɔ i ye.

⁸Kuma dugukolo fɛ, ale bɛna i karan,

kɔgɔjirajɛgɛw bɛna a lakari i ye!

⁹Juman kelen le bɛ olugu bɛɛ ra ni min m’a lɔn

ko Matigi Ala le ye nin kow kɛbaga ye?

¹⁰Fɛnɲanaman bɛɛ nin bɛ ale Ala le boro,

ani adamadenw bɛɛ ta nɛnɛkiri.

¹¹Yala toro le tɛ kumakanw faranfasi k’a silɔn wa?

Mɔgɔ dakɔnɔyɔrɔ le tɛ domuniw diya lɔn ka bɔ ɲɔgɔn na wa?

¹²Hakiritigiya bɛ cɛkɔrɔbaw fɛ,

faamuri ye sijantigiw ta ye.

¹³Nka hakiritigiya ni sebagaya ye Ala le ta ye,

kokɛcogoɲuman, ani faamuri bɛ sɔrɔ ale le fɛ.

¹⁴Ni a ka min cɛn, o tɛ se ka lalaga tuun,

ni a ka da datugu mɔgɔ min da ra, mɔgɔ tɛ se ka da dayɛlɛ o da ra.

¹⁵Ni a ka jiw mina k’a lalɔ, fɛn bɛɛ bɛ ja;

ni a ka jiw labla, o bɛ dunuɲa halaki.

¹⁶Baraka ni hakiriɲuman ye a ta ye;

mɔgɔ lafirininw, ani o lafiribagaw bɛɛ ye a ta ye fana.

¹⁷A bɛ jamana kolatigɛbagaw bla sennakolontagama ra,

ka kuntigiw kɛ nalomanw ye.

¹⁸A bɛ masaw ta cɛsirijaraw foni ka bɔ o cɛ ra,

ka fani gbansan siri o soro ra.

¹⁹A bɛ sarakalasebagaw bla sennakolontagama ra,

ka fangatigibaw laben.

²⁰A bɛ kuma bɔsi kumalɔnbagabaw ra,

ka faamuri hakiri mina cɛkɔrɔbaw ra.

²¹A bɛ dɔgɔyari lase fagamaw ma,

ka cɛ barakamanw ta kurusijara yɔgɔyɔgɔ.

²²A bɛ dibirako dogoninw bɔ kɛnɛ kan,

ka saya dibi bla yeelen na.

²³A bɛ siyaw bonya, o kɔ, a bɛ o halaki;

a bɛ o caya, o kɔ, a bɛ o janjan.

²⁴A bɛ dunuɲa jamanakuntigiw kɛ hakirintanw ye,

k’a to o ye yaala o kun fɛ kongokolonw kɔnɔ, sira tɛ yɔrɔ minw na.

²⁵O bɛ mɔmɔri kɛ dibi ra, sabu yeelen tɛ yi;

a b’a to o ye yaala ka talontalon i ko dɔrɔtɔw.

Ayuba ta jaabi tɔ: Ne ni Ala ka kan ka kuma

¹Can lo, ne ɲa ka nin kow bɛɛ ye,

ne toro fana k’a mɛn, ne k’a faamu.

²Aw ka min lɔn, ne fana ka o lɔn;

sabu ne hakiri man dɔgɔ ni aw ta ye!

³Nka ne bɛna kuma Sebɛɛtigi Ala le fɛ,

ne bɛna kuma k’a yira Ala yɛrɛ le ra, ko ne ma jaraki.

⁴Aw kɔni ka ne datugu ni faninya ye;

aw bɛɛ ye flakɛbaga ɲacintanw le ye!

⁵Hali aw tun ye je, aw kana foyi fɔ!

O belen tun bɛna kɛ hakiritigiya sira ye aw fɛ.

⁶Ayiwa, ne bɛna min fɔ, ka ne ta jo yira, aw ye o lamɛn!

Ne da bɛna kuma min fɔ, ka can yira, aw ye aw janto o ra!

⁷Yala aw bɛ sɔn ka kumajugu fɔ Ala nɔ ra wa?

Aw bɛ sɔn ka janfakuma fɔ a tɔgɔ ra wa?

⁸Aw b’a fɛ ka fara Ala kan

ka kuma ka jo di a ma le wa?

⁹Ni Ala ka aw sɛgɛsɛgɛ, yala o bɛna diya aw ra wa,

walama aw b’a janfara le i ko mɔgɔ b’a mɔgɔɲɔgɔn janfa cogo min na wa?

¹⁰Sigiya t’a ra, a bɛna aw jaraki,

ni a kɛra ko aw bɛ mɔgɔ dɔw fisaya dɔw ye dogo ra.

¹¹Yala a ta masaya nɔɔrɔ tɛ jatigɛ blara aw ra wa?

Yala a ɲasiran tɛna kɛ aw ra wa?

¹²Aw ka fɛn o fɛn fɔ, o bɛɛ bɛ i ko buguri;

aw ka ne jaabi ni kuma o kuma ye, o bɛɛ bɛ i ko bɔgɔ.

¹³Aw ye je k’a to ne fana ye kuma!

Ni min bɛ kɛ ne ra o ye kɛ!

¹⁴Ne kɔni bɛna ne yɛrɛ bla farati ra,

ka ne nin fiyeere.

¹⁵Hali ni Ala bɛna ne faga le, ne jigi belen b’a kan.

Nka ne bɛna kuma a ɲa kɔrɔ k’a yira ko jaraki tɛ ne tagamacogo ra.

¹⁶O le fana bɛna kɛ ne kisisababu ye;

sabu Alaɲasiranbari si tɛ sɔn ka lɔ Ala ɲa kɔrɔ.

¹⁷Aw ye ne ta kumaw lamɛn kosɛbɛ!

Aw ye aw toro malɔ ne ta kumaɲafɔri ra!

¹⁸A flɛ, ne bɛna kuma k’a yira ko ne bɛ can le kan;

sabu ne k’a lɔn ko jo bɛ ne fɛ.

¹⁹Jɔntigi le bɛ se ka ne sɔsɔ?

Ni mɔgɔ sera ka ne jaraki, o tuma ne bɛ je, ka sa.

²⁰Nka, Ala, sabari ka nin fɛn fla kɛ ne ye,

ni o kɛra, ne tɛna dogo i ra tuun:

²¹I boro bɔ ne kan,

i kana ne ja tigɛ tuun ni i ta siranyafɛnbaw ye.

²²O kɔ, ele ye i ta fɔ, ne bɛ i jaabi,

walama ne le bɛ kuma ta, ele bɛ ne jaabi.

²³Ayiwa, ne ka terenbariyako ni jurumun jori le kɛ?

Ne ka hakɛkow ni jurumun minw kɛ, o fɔ ne ye kɛ!

²⁴Mun kosɔn i bɛ i ɲada dogora ne ra,

ka ne kɛ i jugu ye?

²⁵Yala i bɛ sɔn ka kɛrɛ ni flaburu gbansan ye wa, fɔɲɔ bɛ taga ni min ye?

I bɛ sɔn ka tugu binjalan dama kɔ k’a gbɛn wa?

²⁶I bɛ kogbɛlɛnw le sɛbɛ k’a bla ne kama;

i bɛ ne ta denmisɛnya wagati ta terenbariyaw kunko fana ben ne kan.

²⁷I bɛ ne sen don nɛgɛjɔrɔkɔ ra,

i bɛ ne tɛmɛyɔrɔw bɛɛ kɔrɔsi,

ka dan sigi ne tagayɔrɔw ra;

²⁸k’a sɔrɔ mɔgɔ farisogo bɛ torira ka cɛn,

i ko cɛnrifɛnw bɛ don fani na k’a cɛn cogo min na.

Ayuba ta jaabi tɔ: Dunuɲalatigɛ ye sɛgɛ le ye

¹Adamaden o adamaden, ni muso le k’a woro,

a si man jan, a ta dunuɲalatigɛ bɛɛ ye ɲagban le ye fana.

²A bɛ wuri i ko yirifiyeren, nka a bɛ ja;

a bɛ tɛmɛ i ko yirisuma, a tɛ mɛɛn.

³Ala, ele ɲa lɔnin bɛ o le ra ka to k’a kɔrɔsi wa!

Ele bɛ ne le minana ka taga ni ne ye kiti ra wa?

⁴Jɔn le bɛ se ka fɛn saninyanin sɔrɔ fɛn saninyabari ra?

Mɔgɔ si!

⁵I n’a fɔ i ka adamaden si teredaw latigɛ ka ban, ani a karodaw,

ka dan sigi a si ra, a tɛ se ka tɛmɛ min kan,

⁶o tuma i ɲa bɔ a ra k’a to a ye nɛnɛkiri dɔɔnin,

janko a ye a ta wagati laban diyabɔ, i ko baaraden bɛ a ta tere baara sara diyabɔ cogo min na.

⁷Jigi belen bɛ yiri fɛ,

sabu ni o k’a tigɛ, a bɛ nugu tuun,

ka to ka yiriborokuraw bɔ tuma bɛɛ.

⁸Hali ni a lilinw ka kɔrɔ dugukolo jukɔrɔ,

hali ni a kunkurun ka to dugukolo ra ka faga,

⁹ni sumaya ka se a ma dɔrɔn, a bɛ nugu,

ka yiriborow bɔ i ko yirisunkura.

¹⁰Nka ni mɔgɔ sara, a baraka bɛɛ le bɛ ban pewu;

ni adamaden nɛnɛkiri ka mina a ra, a bɛ taga min?

¹¹Ayiwa, kɔgɔji ta ji bɛ jigi,

ba ta ji bɛ ban, a bɛ ja.

¹²O cogo ra ni mɔgɔ ka la saya sunɔgɔ ra, a tɛ wuri tuun;

fɔ ka taga sankolo tunu, a tɛ wuri,

a tɛ wuri ka bɔ a ta sunɔgɔ ra.

¹³E, Ala, ni i tun bɛ sɔn ka ne dogo saya dibi ra,

ka ne dogonin to yi fɔ ka taga i ta jusugban mala,

ka wagati dɔ latigɛ ne ye, i bɛna i hakiri to ne ra wagati min na!

¹⁴Ni mɔgɔ sara, yala a bɛ se ka ɲanamanya tuun wa?

Ni o tun bɛ se ka kɛ, ne tun bɛna ne ta sɛgɛ muɲu ka Ala makɔnɔ,

fɔ ne ta wagati ye na se, o ye na ne labi.

¹⁵O ra i tun bɛna ne wele, ne tun bɛna i jaabi;

ne min ye i yɛrɛ boro ta danfɛn ye, ne lɔgɔ tun bɛna i sɔrɔ.

¹⁶O ra, i tun tɛna ne ta sentako kelen kelen bɛɛ jate,

i tun tɛna to ka ne ta jurumunw si kɔrɔsi tuun.

¹⁷I tun bɛna ne ta hakɛkow don bɔrɔ dɔ kɔnɔ k’a dasiri,

ka ne ta terenbariyakow datugu.

¹⁸Nka kuruw bɛ ben ka yɛrɛgɛ,

faraw bɛ kari ka bɔ o nɔ ra.

¹⁹Ji bɛ woyo kabakuru kan ka to ka dɔ bɔ a ra cogo min na,

a bɛ woyo ka bɔgɔ fana cɛ ka taga ni a ye cogo min na,

ele fana bɛ adamaden jigi cɛn o cogo le ra.

²⁰I bɛ ben a kan k’a kɛrɛ siɲaga kelen dɔrɔn ka se a ra, a bɛ tɛmɛ;

i b’a ɲada cogoya bɛɛ yɛlɛma, k’a bla ka taga.

²¹Yala mɔgɔw bɛna a denw bonya a kɔ yan wa? A tɛ se ka o lɔn.

Yala o bɛna o dɔgɔya le wa? A tɛ se ka bɔ o kala ma.

²²Sɛgɛ min b’a yɛrɛ farisogo kan, a bɛ o dɔrɔn le lɔn,

saya dimi min sera a yɛrɛ nin ma, a bɛ o le lɔn.

Elifazi ta ladirikan flanan: Mɔgɔjugu tɛ bɔsi kiti ma

¹Ayiwa, Elifazi min bɛ bɔ Teman, ale ka kuma ta k’a fɔ Ayuba ye tuun ko:

²Ni hakiritigi bɛ mɔgɔ jaabi, yala a ta lɔnniya ka kan ka kɛ kumalakolonw le ye i ko fɔɲɔ wa?

Yala a b’a kɔnɔ fa terebɔyanfan ta fɔɲɔ gbanninman le ra ka kuma wa?

³Yala a bɛ kuma k’a ta jo yira ni kuma nafantanw le ye wa,

walama kuma ɲacintanw?

⁴Ayiwa, ele kɔni bɛ Alaɲasiran cɛnna yɛrɛ le;

i bɛ Ala ko miiriya bɛɛ bɔ mɔgɔ hakiri ra.

⁵Sabu i ta terenbariyakow le bɛ i da blara nin kumaw fɔri ra;

i ka mɔgɔ cegumanw ta kumacogo le ladegi.

⁶Nka i yɛrɛ da le ka kiti ben i kan, ne tɛ!

I yɛrɛ darakan le ka kuma ben i kan!

⁷Yala ele le worora ka kɛ adamadenw bɛɛ ra mɔgɔ fɔlɔ ye wa?

Ele nana dunuɲa ra ka kɔn kongoriw ɲa wa?

⁸Yala ele tun bɛ ni Ala ye a ta jɛn ra, k’a ta gundow lamɛn wa?

Ele ka hakiritigiya bɛɛ mina k’a kɛ i kelen ta ye le wa?

⁹Ele ka mun le lɔn ni an tɔw ma min lɔn?

Faamuri juman le bɛ ele fɛ ka tɛmɛ anw kan?

¹⁰Kunsigigbɛtigi bɛ an cɛ ra, cɛkɔrɔba bɛ an cɛ ra,

minw si ka ca hali ni ele facɛ ta ye.

¹¹Ala ka i jusu saaro minkɛ,

ani kumadiman minw bɛɛ fɔra i ye, o belen ma i wasa!

¹²Mun na i jusu bɔra?

Mun na i ka i ɲa basa an na tan?

¹³I dimina Ala le kɔrɔ,

fɔ ka nin kuma ɲɔgɔn bɔ i da ra!

¹⁴Adamaden ye mun le ye k’a fɔ ko a bɛ saninya?

Muso ka fɛn min woro, o ye mun le ye k’a fɔ ko a bɛ teren?

¹⁵A flɛ, Ala ma la hali a yɛrɛ ta danfɛn saninmanw na;

hali sankolo ma saninya a ɲa kɔrɔ,

¹⁶janko ka n’a fɔ adamaden, fɛn haramunin, ani fɛn ɲacintan,

min bɛ kojugu kɛ a ta minji ye!

¹⁷Ayiwa, ne lamɛn, ne bɛna a ɲafɔ i ye!

Ne ka min lɔn, ne bɛna o lakari i ye.

¹⁸Hakiritigiw ka min fɔ,

o ka o sɔrɔ o bɛmaw le fɛ, o fana ma foyi dogo a ra.

¹⁹O wagati ra jamana tun dira olugu dɔrɔn le ma;

mɔgɔ wɛrɛw tun ma na ɲagami o ra fɔlɔ.

²⁰Mɔgɔjugu bɛ to sɛgɛ ra a si bɛɛ ra;

sanda minw latigɛra mɔgɔ jusu fariman ye, o da lɔnnin lo.

²¹Lon dɔ, jatigɛkan dɔw bɛna don a toro ra;

k’a siginin to ɲasuma ra, cɛnrikɛbaga dɔ bɛna ben a kan.

²²A tɛ la a ra tuun ko ale bɛ se ka bɔsi ka bɔ o dibi ra,

nka kɛrɛkɛmuru fana b’a dɛndɛnna.

²³A bɛna to ka yaala, a t’a lɔn a bɛna domuni sɔrɔ yɔrɔ min na15.23 A fɔra Kitabu dɔw kɔnɔ ko: Dugaw bɛna a sogo domu.;

a k’a lɔn ko lonjugu dɔ labɛnna ale kama.

²⁴Degu ni kɔnɔnɔfiri bɛna jatigɛ bla a ra,

k’a datugu pewu, i ko masacɛ ni a ta kɛrɛkɛjama b’a juguw datugu cogo min na.

²⁵Sabu a k’a borokanden sin Ala ma,

k’a yɛrɛ sanga ni Sebɛɛtigi Ala ye.

²⁶A k’a kun gbɛlɛya ka taga Ala kama,

ni a ta nɛgɛbɛnnan belebeleba gbirimanba ye.

²⁷A tun tɔrɔra fɔ a ɲada bɛ manamana,

ka bonya fɔ k’a fari bɛɛ gbiriya.

²⁸Nka a bɛna sigi dugu cininw le kɔnɔ,

ka si bonkolonw kɔnɔ,

bon minw bɛ benbenna.

²⁹A tɛna kɛ fɛntigi ye tuun, sabu a ta naforo tɛna mɛɛn tuun;

a borofɛnw tɛna caya ka se fɔ jamana yɔrɔ bɛɛ ra tuun.

³⁰A tɛna se ka bɔsi dibi ma;

tasumamana dɔ bɛna a lilinw jɛni ka o jaja,

Ala dafɔɲɔ bɛna a ta ka taga ni a ye.

³¹A kana a jigi la fɛngbansanw kan, k’a yɛrɛ lafiri;

sabu o fɛngbansanw le fana bɛna sekɔ a ma.

³²O kow bɛna se a ma sani a ta lon ye se;

a ta yiriborow kɔni tɛna nugu tuun fiyewu.

³³A bɛ kɛ i ko rɛzɛnsun min denw kɔgɔbari bɛ burun;

walama i ko oliviyesun min fiyeren bɛ bɔn.

³⁴Alaɲasiranbari ta bon lakolon bɛna to;

tasuma bɛna surafɛnw minabagaw ta so domu.

³⁵O bɛ kojugu kɔnɔ ta,

ka terenbariya woro,

ka janfa labɛn o yɛrɛ kɔnɔ.

Ayuba ta jaabi: Ne ta seere bɛ san fɛ

¹Ayuba ka Elifazi jaabi ko:

²Ne ka nin kow ɲɔgɔnna caman mɛn kakɔrɔ;

aw bɛɛ ye ladibaga mɔgɔsɛgɛbagaw le ye.

³Aw tɛ nin kumalakolonw dabla ten wa?

O tuma mun le digira ele ra, fɔ i bɛ ne jaabi?

⁴Min sera ne ma, ni o tun sera aw le ma,

ne fana tun bɛna kuma i ko aw.

Ne tun bɛna kuma dɔw labɛn aw kama,

ka kuma fɔ ka ne kun kɔmikɔmi aw ra.

⁵Nka ne da tun bɛna aw ja gbɛlɛya le,

ne tun bɛna ne da lamaga ka kuma ka aw jusu saaro.

⁶Ayiwa, ni ne kumana, o tɛna dɔ bɔ ne ta dimi na,

ni ne ka je fana, yala o le bɛna ne ta dimi bɔ ne kan wa?

⁷Sisan kɔni, Ala ka ne baraka bɛɛ le ban pewu!

Ala, i ka ne ta lu bɛɛ kɛ yɔrɔ lakolon ye.

⁸I ka ne fari cɛn, ka o kɛ i seere ye ko jo tɛ ne fɛ;

ne fasacogo yɛrɛ b’a yira ko ne jarakira.

⁹Ala dimina fɔ a bɛ ben ne kan ka ne farisogo tigɛtigɛ,

k’a ɲin ɲimi ne kama;

ne jugu bɛ a ɲa boso ne ra ka ne flɛ ni juguya ye.

¹⁰Mɔgɔw ka o daw waga ne kama;

o bɛ tɛgɛ ci ne ɲa kan, ka ne lamaroya.

O bɛɛ le bɛ jɛn ka ben ne kan.

¹¹Ala ka ne labla mɔgɔkolonw le ye,

a ka ne to mɔgɔjuguw boro.

¹²Ne ɲasumanin tun lo, nka a ka ne kolow bɛɛ karikari,

a ka ne mina ne kankɔfɛyɔrɔ ma ka ne ɲɔni ka ben, ka ne fari bɛɛ yɛrɛgɛ;

a ka ne kɛ a ta fɛnbonta le ye.

¹³A ta biɲɛw bɛ ne sɔgɔra fan bɛɛ ra;

a ka ne soro sɔgɔ, hali a ma hina;

a ka ne kunakuna sɔgɔ k’a bɔn dugu ma.

¹⁴A bɛ ben ne kan tuma bɛɛ,

i ko kɛrɛkɛdenw bɛ ben dugu kan, ka kogow sɔgɔ cogo min na;

a bɛ girin ka la ne kan i ko kɛrɛkɛcɛ.

¹⁵Ne ka bɔrɔfani le karan ka o kɛ ka ne fari datugu;

ne ni ne ta bonya bɛɛ le bɛ fofora dugu ma!

¹⁶Ne ɲa wulenna kasi fɛ,

saya dibi donna ne ɲa ra;

¹⁷k’a sɔrɔ ne boro ma kojugu kɛ,

ne jusukun saninyanin le tun bɛ Ala daari fana.

¹⁸E, dugukolo, ele kana ne jori datugu;

foyi kana ne kulekan bari k’a to Ala y’a lamɛn16.18 Mɔgɔw tun b’a bisigi ko ni mɔgɔ faganin jori tun ma datugu ni buguri ye, o jori kulekan tun bɛ se fɔ Ala ma, janko Ala y’a dimibɔ (Damina 4.10; Ezekiyɛli 24.7-8).!

¹⁹Nka hali bi ne ta seere bɛ sankolo ra;

min bɛ kuma ne nɔ ra, o bɛ san fɛ.

²⁰Ne teriw bɛ kumakolonw fɔ ne ma;

nka ne ɲajibɔtɔ bɛ Ala le daari.

²¹Ale ye kiti tigɛ mɔgɔw ni ale Ala cɛ,

ka kiti tigɛ adamaden ni a mɔgɔɲɔgɔn cɛ.

²²Sabu ne si sandaw bɛ sera a laban ma;

ne bɛna sira dɔ ta, tagakasegi tɛ sira min ta ko ra.

Ayuba ta jaabi tɔ: Ne teriw ka ne jigi tigɛ

¹E, ne nin baraka banna!

Ne si sera a dan ma!

Kaburu le bɛ ne kɔnɔna!

²Mɔgɔlɔgɔbɔbagaw le ka ne lamini;

ne tɛ se ka ne ɲadenw datugu ka sunɔgɔ o ta mafiyɛnyarikumaw kosɔn.

³Ele Ala yɛrɛ ye kɛ ne dɛmɛbaga ye i kɛrɛ fɛ;

sabu jɔn wɛrɛ le bɛna lɔ ni ne kunko ye?

⁴I ka o jusukunw datugu janko o kana hakiri sɔrɔ,

o kosɔn i tɛna a to o ye se sɔrɔ.

⁵O bɛ i ko mɔgɔ min b’a teriw wele domuni na,

k’a sɔrɔ kɔngɔ bɛ ale yɛrɛ ta denw ɲanaminina.

⁶Siyaw bɛɛ bɛ ne tɔgɔ le don o ta zanaw ra,

o bɛ daji tu ne ɲa ra.

⁷Ne ɲadenw baraka banna dimi kosɔn;

ne farisogo yɔrɔw kɛra i ko fɛn dɔ ja.

⁸Ni mɔgɔɲumanw ka o ye, o bɛ digi olugu ra;

mɔgɔ jarakibariw bɛ wuri Alaɲasiranbariw kama.

⁹O bɛɛ n’a ta, mɔgɔ terennin bɛ jija ka to a ta sira kan;

mɔgɔ minw ta kɛwalew saninyanin lo, olugu bɛ dɔ fara o ta baraka kan.

¹⁰Aw kɔni ye na, aw bɛɛ, aw ye na sekɔ aw ta kumaw kan tuun!

Ne tɛna hakiritigi si sɔrɔ aw ra!

¹¹Ne si teredaw banna, ne ta kolatigɛninw cɛnna,

ani ne jusukun diyanyakow.

¹²O belen b’a fɔ su ma ko «tere»,

o b’a fɔ ko «yeelen yɔrɔ ka surun», k’a sɔrɔ dibi le bɛ nana!

¹³Yala ne bɛ so min makɔnɔna, o tɛ lahara le ye wa?

Ne bɛna ne ta layɔrɔ labɛn o yɔrɔ dibi le ra.

¹⁴Ne bɛ kaburu wele ko: «Ne fa!»

Ne b’a fɔ kaburu tumuw ma ko: «Ne baw, ani ne balemamusow!»

¹⁵Ne jigi bɛ min le sa?

Jɔn le ɲa bɛ ne jigi ra?

¹⁶A bɛna jigi ka taga lahara donda le ra,

ni an nana kɛ taga ye ɲɔgɔn fɛ ka taga la buguri ra, ka nɛnɛkiri.

Bilidadi ta ladirikan flanan: Mɔgɔjugu bɛ halaki

¹Bilidadi min bɛ bɔ Suwa, ale ka kuma ta k’a fɔ Ayuba ye ko:

²Aw bɛna nin kuma caman dabla tuma juman le sa?

Aw ye hakiri sɔrɔ, o kɔ, an bɛ kuma!

³Mun kosɔn aw bɛ an jate i ko bɛgan?

Mun kosɔn aw bɛ an flɛ i ko nalomanw?

⁴Ele Ayuba min dimina fɔ ka i sɔn ja,

o tuma ele b’a fɛ dunuɲa lakolon ye to ele kosɔn wa,

walama ko faraw ye bɔ o nɔ ra ele kosɔn?

⁵Can lo dɛ, mɔgɔjugu ta fitinayeelen bɛna faga,

a ta gba tasuma tɛna yeelen bɔ tuun.

⁶Yeelen bɛna ban a ta bon kɔnɔ,

a ta fitina min bɛ yeelen bɔ a ye, o bɛna faga.

⁷A tun bɛ tagama ni baraka ye, nka a ta tagama bɛna sumaya.

A yɛrɛ ta kolatigɛninw le bɛna a laben;

⁸sabu a senw bɛna mina jɔ ra;

a bɛna taga a senw don jɔ wow kɔnɔ.

⁹Jan bɛna a mina a senju ra,

juru bɛna a sen dɛrɛ.

¹⁰Juru min b’a mina, o dogonin lo dugukolo jukɔrɔ;

jan lanin b’a ɲa sira kan.

¹¹Balahukow bɛna a lasiran fan bɛɛ ra,

o le tugunin b’a kɔ yɔrɔ bɛɛ ra.

¹²Kɔngɔ b’a baraka ban,

cɛnri wurira a kama,

¹³a b’a farisogo domudomuna;

banajugu dɔ b’a fari yɔrɔw bɛɛ domuna.

¹⁴A tun k’a jigi la a ta bon min kan, o bɛna a sama ka bɔ o kɔnɔ;

k’a fofo ka taga ni a ye balahu masa fɛ.

¹⁵Mɔgɔ wɛrɛ bɛ se ka sigi a ta so kɔnɔ, sabu a ta tɛ tuun;

o bɛ kiribi bɔn a ta sibon kan.

¹⁶A dugumalilinw bɛ jaja;

a yiriborow bɛ fagafaga.

¹⁷Mɔgɔ si hakiri tɛna to a ra tuun dunuɲa ra;

a tɔgɔ tɛ fɔ kɛnɛ ma yɔrɔ si tuun.

¹⁸O b’a ɲɔni ka bɔ yeelen na k’a bla dibi ra,

o b’a gbɛn ka bɔ dunuɲa ra.

¹⁹A tɛ den to a kɔ, a tɛ mamaden to a kɔ a ta mɔgɔw cɛ ra;

a ta mɔgɔ si ɲanaman tɛ to a kɔ a ta so kɔnɔ.

²⁰Terebenyanfan mɔgɔw bɛna manwu a labancogo kosɔn;

terebɔyanfan mɔgɔw kunmasi bɛna cɛ.

²¹Ayiwa, kojugukɛbaga ta so bɛ laban tan le;

mɔgɔ min ma Ala lɔn, o ta yɔrɔ bɛ kɛ tan le.

Ayuba ta jaabi: Ala ye ne kunmabɔbaga ye

¹Ayuba ka Bilidadi jaabi, ko:

²Aw bɛ ne jusu kasira cogo min na,

ka ne baraka ban ni aw ta kumaw ye, aw bɛna o dabla tuma juman le dɛ?

³Aw ka ne dɔgɔya ka se fɔ siɲaga tan!

Ni aw bɛ ne tɔɔrɔ tan, yala o maroya tɛ aw ra wa?

⁴Ni a kɛra ko can lo, ko ne firira,

ne ta firiri ye ne kelen ta le ye.

⁵Nka ni a kɛra ko aw b’a fɛ ka aw yɛrɛ fisaya ne ma le,

ka ne ta lebu kɛ sababu ye ka ne jaraki,

⁶o tuma, aw y’a lɔn fana ko Ala le ka ne ta jo bɔsi ne ra,

ko ale le ka ne mina a ta jɔ ra.

⁷Hali ni ne kulera ko: «O bɛ ne tɔɲɔra!», mɔgɔ si tɛna ne jaabi!

Ni ne kulera ko o ye ne dɛmɛ, mɔgɔ si tɛna jo di ne ma!

⁸Ala ka sira datugu ne ɲa, ne tɛ se ka tɛmɛ;

a ka dibi don ne tɛmɛsira ra.

⁹A ka ne ta bonya bɔ ne kan;

a ka ne ta masafugula bɔ ne kun na.

¹⁰A ka ne halaki fan bɛɛ ra, janko ka ne lataga;

a ka ne jigi tigɛ, i ko yiri bɛ sama ka bɔn cogo min na.

¹¹A dimina ne kɔrɔ kosɛbɛ;

a ka ne kɛ i ko a jugu dɔ.

¹²A ta kɛrɛkɛjamaw bɛɛ jɛnna ka na ɲɔgɔn fɛ,

ka o ta sira bɔ fɔ ka na se ne ma;

o ka o ta fanibonw turu ka ne ta bon lamini.

¹³A ka ne balemaw mabɔ ne ra,

ne lɔnbagaw faranna ka bɔ ne kɔ.

¹⁴Ne ta somɔgɔw bɔra ne kɔrɔ,

ne teriw ɲinana ne kɔ.

¹⁵Ne ta lukɔnɔmɔgɔw, ani ne ta jɔnmusow bɛ ne flɛ i ko o ma deri ka mɔgɔ min ye;

ne kɛra o ɲa kɔrɔ i ko jamana wɛrɛ mɔgɔ.

¹⁶Ne bɛ ne ta jɔncɛ wele, a t’a lamina;

fɔ ne yɛrɛ da ye makarikanw le fɔ a ye!

¹⁷Ne dakasa ka ne lɔgɔ bɔ ne ta muso ra;

ne yɛrɛ worodenw bɛ ɲigira ne ra.

¹⁸Hali denmisɛnw bɛɛ bɛ ne mafiyɛnyara;

ni ne ko ne bɛ wuri, o bɛ to ka ne lɔgɔbɔ.

¹⁹Ne tun ka minw kɛ ne jɛnɲɔgɔnw ye, olugu ka ne haramuya;

minw ko tun ka di ne ye, olugu le wurira ne kama.

²⁰Ne fasara fɔ ka ne kolow bɛɛ bɔ kɛnɛ ma;

a tun tora dɔɔnin ne nin bɛ to a ra19.20 Heburukan na a fɔra ko: Ne kisira ni ne ɲi gbolo dama le ye..

²¹E, aw ye makari ne ra, ne teriw, aw ye makari ne ra,

sabu Ala boro sera ne ma!

²²Mun kosɔn aw fana bɛ ne nɔgbɛn i ko Ala?

Aw belen ma wasa ne ra ban wa?

²³E, ni ne ta kumaw tun bɛ se ka sɛbɛ!

Ni o tun bɛ se ka sɛbɛ kitabu dɔ kɔnɔ!

²⁴Ni a tun bɛ se ka lɛsɛ fara ra,

ni biɲɛ nɛgɛraman dɔ ye, ani ntileku nɛgɛ,

janko a ye to yi wagati bɛɛ!

²⁵Nka o bɛɛ n’a ta, ne k’a lɔn ko ne kisibaga ɲanaman lo;

lon dɔ a bɛna wuri k’a yɛrɛ yira dugukolo kan.

²⁶Hali ni ne fari halakira ka ban,

ne belen farisogoraman ɲa bɛna la Ala kan.

²⁷Ne yɛrɛ le bɛna a ye,

ne ɲa le bɛna a ye, mɔgɔ wɛrɛ ɲa tɛ;

ne jusu gbannin lo, fɔ ne bɛ kɔrɔtɔ o wagati kɔrɔ.

²⁸Aw b’a fɔra ko: «An bɛna a nɔgbɛn k’a mina cogo di le sa?»

Sabu aw b’a miiri ko nin ko ju bɛ sɔrɔ ne le ra.

²⁹Ayiwa, aw yɛrɛ ye siran kɛrɛkɛmuru ɲa dɛ!

Sabu ni aw bɛ gban ne ra, o fana bɛ se ka kɛrɛkɛmuru lase aw ma,

janko aw y’a lɔn ko kiti dɔ belen bɛ kɔ.

Sofari ta ladirikan flanan: Mɔgɔjugu borofɛn tɛ mɛɛn

¹Sofari min bɛ bɔ Naama, ale ka kuma ta k’a fɔ Ayuba ye ko:

²Ayiwa, miiriya minw bɛ ne kɔnɔ,

ani jusugban min bɛ ne ra,

o le b’a to ne bɛ kɔrɔtɔ ka i jaabi.

³Ne ka jarakikan dɔ mɛn, min kɛra ne fɛ dɔgɔyari ye;

nka faamuri hakiri min bɛ ne fɛ, ne bɛna i jaabi ni o ye.

⁴O tuma ele m’a lɔn ko kabini fɔlɔfɔlɔ,

kabini adamaden sigira dugukolo kan,

⁵ko mɔgɔjugu ta ɲagari wagati ka surun,

ko Alaɲasiranbari ta ninsɔndiya ye wagati dɔɔnin ko le ye wa?

⁶Hali ni a kɔrɔtara ka se fɔ sankolo ma,

k’a kun se fɔ sankabaw ma,

⁷lon dɔ a bɛ halaki ka ban pewu, k’a kɛ i ko ɲamaɲama.

Minw tun bɛ deri k’a ye, olugu b’a fɔ ko: «E, a bɛ min le?»

⁸A bɛ tɛmɛ i ko siko; mɔgɔ t’a ye tuun.

A bɛ tunu i ko mɔgɔ bɛ fɛn minw ye su fɛ siko ra.

⁹Mɔgɔ minw tun bɛ to k’a flɛ, olugu ɲa tɛna a ye tuun,

a sigiyɔrɔ tɛna a ye tuun.

¹⁰A dencɛw bɛna dɛsɛbagatɔw ta borofɛnw sekɔ o ma jagboya ra;

a tun ka naforo min sɔrɔ, a yɛrɛ boro bɛna o sekɔ.

¹¹A kolow bɛɛ tun ka kɛnɛ i ko a kanbelenman

nka o bɛɛ bɛna taga la ni a ye kaburu buguri ra.

¹²Kojugu tun diyara a da ra,

fɔ a b’a dogo a nɛn jukɔrɔ.

¹³A tun b’a mara, a t’a fɛ k’a to a ye ban;

a tun b’a mina k’a to a da kɔnɔ.

¹⁴Nka o domuni bɛna yɛlɛma a kɔnɔbara ra;

a bɛ yɛlɛma ka kɛ fɔnfɔnnin baga ye a kɔnɔ.

¹⁵A tun ka naforo min kunu, a bɛna o fɔɔnɔ;

Ala bɛna a bɛɛ labɔ a kɔnɔ.

¹⁶A tun bɛ fɔnfɔnninw ta baga le muganna,

o ra, sajugu da le bɛna a faga.

¹⁷A tɛna li ni nɔnɔ camanba woyotɔ ye tuun

i ko bununji, walama i ko kɔji.

¹⁸A ka fɛn o fɛn sɔrɔ, a bɛna o sekɔ, a tɛna o si domu;

a tɛna a ta jago tɔnɔ diyabɔ.

¹⁹Sabu a tun ka dɛsɛbagatɔw tɔɲɔ fɔ ka o borolakolon to;

a ma bon minw lɔ, a tun ka o bɔsi o tigiw ra jagboya ra.

²⁰A tun tɛ wasa ka ye,

nka fɛn minw ko tun ka gbɛlɛn a ma, a tɛna se ka o si bɔsi cɛnri ma.

²¹A ta natabaya kosɔn, a tun tɛ foyi ye k’a to yi;

o kosɔn a ta hɛra fana tɛna mɛɛn.

²²K’a wasaninba to a borofɛn camanw cɛ ra, degu bɛna a sɔrɔ;

kojugu suguya bɛɛ bɛna ben a kan.

²³Wagati min a b’a kɔnɔbara fara,

o wagati le ra, Ala bɛna a ta dimiba lajigi a kan,

ka o bɔn a fari kan ka o kɛ a ta domuni ye.

²⁴Ni a borira kɛrɛkɛminan nɛgɛramanw ɲa,

kalan siranɛgɛraman dɔ ta biɲɛ b’a sɔgɔ.

²⁵Ni a ka o biɲɛ sama ka bɔ a kɔ ra,

ni a ka o nɛgɛ tasumaman sama ka bɔ a kɔnɔbara ra,

jatigɛba dɔ bɛ cun a kan.

²⁶Kojugu dogonin bɛ dibi ra k’a ta naforo kɔnɔ;

tasuma dɔ bɛna a domu, mɔgɔ ma tasuma min don.

Fɛn o fɛn tora a ta so kɔnɔ, tasuma bɛna o bɛɛ jɛni.

²⁷Sankolo bɛna a ta terenbariya yira,

dugukolo bɛna wuri a kama.

²⁸A ta so naforow bɛɛ bɛna taga;

Ala ta dimilon na mɔgɔw bɛna o bɛɛ cɛ.

²⁹Ayiwa, adamaden kojugukɛbaga ninyɔrɔ ye nin le ye Ala fɛ;

Ala bɛ nin le kɛ a ta sara ye.

Ayuba ta jaabi: Mɔgɔjugu ta hɛra ka ca

¹Ayuba ka Sofari jaabi, ko:

²Aw ye ne ta kuma lamɛn kosɛbɛ!

Aw ye sɔn ka o kelen kɛ ne ye, janko ka ne jusu saaro.

³Aw ye sabari k’a to ne fana ye kuma!

Ni ne kumana ka ban, aw ye ne lɔgɔbɔ sa.

⁴Yala ne diminin bɛ adamadenw le kɔrɔ wa?

Mun kosɔn aw ko ne jusu kana gban?

⁵Aw ye aw ɲa munu ka ne flɛ, aw bɛna kabakoya,

fɔ ka aw boro la aw da ra ka je!

⁶Ni ne ka miiri ne yɛrɛ ta ko ra, ne jigi bɛ tigɛ,

fɔ ne farisi bɛ tagama.

⁷Mun kosɔn Ala bɛ mɔgɔjuguw to si ra,

k’a to o ye kɔrɔ, ani ka dɔ fara o baraka kan?

⁸O ta durujaw bɛ baraka sɔrɔ o kɔrɔ, ka to ni o ye;

o ta denw bɛ to o kɔrɔ.

⁹Hɛra dɔrɔn le bɛ o ta so, siranyako tɛ yi;

Ala ta bugɔribere tɛ se o ma.

¹⁰O ta misitoranw bɛɛ bɛ den sɔrɔ, o baraka tɛ dɔgɔya ka ye;

misimusow fana bɛ misidenw woro, o si kɔnɔ tɛ can.

¹¹O bɛ o ta denmisɛnw to o ye boribori i ko sagadenw;

o ta denw bɛ toron kɛ o sago ma.

¹²O bɛ longanw ni koraw fɔ ka dɔnkiri la,

ka ninsɔndiya ni filenfiyɛkanw ye.

¹³O bɛ o si bɛɛ kɛ hɛra ra;

o kɔ, o ɲasumanin bɛ jigi kaburu kɔnɔ.

¹⁴K’a sɔrɔ olugu le tun b’a fɔra Ala ma ko: «I bɔ an kɔrɔ,

an t’a fɛ ka i ta siraw ɲalɔn!

¹⁵Jɔn le ye Sebɛɛtigi Ala ye, ka na fɔ ko an b’a bato?

Hali ni an ka makarikanw fɔ a ye, an bɛna mun le sɔrɔ?»

¹⁶K’a sɔrɔ o ta hɛra tɛ olugu yɛrɛ le boro.

Mɔgɔjuguw ta kow kɔni tɛmɛna ne ta faamuri kan!

¹⁷Yala can lo ko mɔgɔjuguw ta fitina bɛ faga joona wa?

Yala can lo ko cɛnri bɛ se o ma wa?

Yala can lo ko Ala ta jusugban bɛ se olugu fana ma wa?

¹⁸Wagati juman le o bɛ kɛ i ko binjalan, fɔɲɔ bɛ min ta,

walama i ko binɲaga, sanfɔɲɔ bɛ taga ni min ye?

¹⁹A fɔra ko Ala bɛna mɔgɔjuguw ta kojugu hakɛ bɔ o ta denw na;

Ala tun ka kan k’a bɔ olugu yɛrɛ le ra, janko o y’a silɔn!

²⁰Olugu yɛrɛ le tun ka kan ka o ta halakiri ye o ɲa ra!

Ala ta jusugban tun ka kan ka ben olugu yɛrɛ le kan!

²¹Ni o tɛ ni olugu yɛrɛ ta wagati dafara ka ban,

o bɛ taga ka o ta somɔgɔ minw to o kɔ, o ta mun le bɛ o ra tuun?

²²Mɔgɔ tɛ se ka lɔnni yira Ala ra,

sabu ale le bɛ hali sankolokɔnɔfɛnw ta kititigɛbaga ye.

²³Mɔgɔ dɔ bɛ sa ni a farisogo barakaman ye,

a ɲasumanin ni a laganfiyaninba bɛ sa.

²⁴O y’a sɔrɔ a tɔrɔninba lo, a garagaw bɛɛ ye turu ye,

a kolow bɛɛ fara sɔnbɛ ra.

²⁵Mɔgɔ dɔ wɛrɛ jusu kasinin bɛ sa;

ale si bɛɛ ra, a ma hɛra nɛnɛ ka ye fiyewu.

²⁶Nka o mɔgɔ fla bɛɛ bɛ don kaburu ra,

tumuw bɛ don o fla bɛɛ ra!

²⁷Ayiwa, ne ka aw ta miiriya lɔn yɛrɛ le;

aw bɛ ne tɔɲɔra ni dabari minw ye, ne ka o lɔn.

²⁸Aw b’a fɔ ko: «O mɔgɔba ta so bɛ min sisan?

O mɔgɔjugu tun siginin bɛ so min kɔnɔ, o bɛ min?»

²⁹O tuma aw ma yaalabagaw ɲininka wa?

Olugu ka ko minw kɔrɔsi, k’a lakari, aw ye o jate mina!

³⁰Cɛnrilon na, foyi tɛ se kojugukɛbaga ma!

Ala ta dimilon na, a bɛ bɔsi!

³¹Jɔn le bɛ se ka lɔ a ɲa kɔrɔ k’a jaraki?

Jɔn le bɛna a ta kojugu juru sara a ra?

³²O b’a su ta ka taga ni a ye kaburulo ra,

ka o janto a ta kaburu ra.

³³Kaburu bɔgɔkuruw bɛ fiyɛnya a kan;

jama caman bɛ tugu a su kɔ,

mɔgɔ caman fana bɛ bla a ɲa ka taga.

³⁴Ayiwa, aw bɛ se ka ne jusu saaro ni nin kuma gbansanw ye cogo di?

Aw ka kuma o kuma kɛ ka ne jaabi, o bɛɛ ye mɔgɔlafirikumaw le ye!

Elifazi ta ladirikan sabanan: Ayuba ka fagantanw tɔɲɔ

¹Ayiwa, Elifazi min bɛ bɔ Teman, ale ka kuma ta tuun k’a fɔ Ayuba ye ko:

²Adamaden bɛ se ka mun le ɲa Ala ye?

Mɔgɔ hakiriman bɛ fɛn ɲa a yɛrɛ le ye!

³Ni ele terenna, Sebɛɛtigi Ala ta mun le bɛ o ra?

Ni ele jusukun gbɛnin lo, ale Ala ta nafa juman le bɛ o ra?

⁴Yala Ala bɛ sɔn ka i jaraki i ta Alaɲasiran kosɔn,

walama ka kiti ben i kan wa?

⁵I ta juguya le ka ca,

dan tɛ i ta terenbariyakow ra fana!

⁶I tun bɛ i balemaw borofɛnw mina o ra k’a sɔrɔ o ma juru ta i fɛ;

i tun bɛ o ta faniw bɔsi o ra ka o fari lakolon to22.6 O kumaw fɔra ka kaɲa ni Ala ta sariya ye: Bɔri 22.25-26; Sariya 24.6,12-13,17..

⁷I tun tɛ ji di minlɔgɔtɔw ma,

i tun bɛ ban ka domuni di kɔngɔtɔw ma.

⁸I tun ka jamana labla mɔgɔ jusu farimanw le ye;

ni mɔgɔ min ko tun diyara i ye, i bɛ o sigi kuntigiya ra.

⁹I tun bɛ muso cɛ saninw borolakolon gbɛn ka taga,

ka feritaw bɛɛ jigi tigɛ pewu!

¹⁰O le kosɔn, janw lara ka i lamini fan bɛɛ ra;

siranyakow bɛ i ja tigɛ.

¹¹I ma nin dibibaw ye wa,

ani nin jiba minw ka i datugu?

¹²Yala Ala tɛ san fɛ sankolo ra wa?

Sankolo lolow flɛ fɔ san fɛ, o yɔrɔ ka jan cogo min na!

¹³Ele belen b’a fɔra ko: «Ala bɛ mun le lɔn?

Yala a bɛ se ka to sankaba dibi ra yi ka mɔgɔ ta kiti tigɛ wa?

¹⁴Sankabaw k’a dogo, a tɛ foyi yera!

A bɛ yaala sankolo sanfɛyɔrɔw le kunna yi.»

¹⁵Yala i b’a fɛ ka sirakɔrɔ le ta wa,

kojugukɛbagaw tɛmɛna sira min fɛ?

¹⁶Olugu tagara k’a sɔrɔ o ta wagati tun ma se;

o jigi tagara i ko kɔji bɛ woyo ka taga cogo min na.

¹⁷O tun b’a fɔra Ala ma ko: «I bɔ an kɔrɔ,

Sebɛɛtigi Ala bɛ se ka mun le kɛ an ye?»

¹⁸K’a sɔrɔ ale Ala le tun ka o ta bonw fa fɛnɲumanw na!

Mɔgɔjuguw ta kow kɔni tɛmɛna ne ta faamuri kan!

¹⁹Mɔgɔ terenninw bɛna o ye ka ninsɔndiya;

mɔgɔ jarakibariw bɛna o lɔgɔbɔ, ko:

²⁰«Minw tun wurira an kama, yala olugu ma halaki wa?

O borofɛn min o min tun tora o kɔ, yala tasuma ma o bɛɛ domu wa?»

²¹O ra, sabari ka sɔn Ala ta ma, janko i ye hɛra sɔrɔ;

ni o kɛra, i bɛna hɛra sɔrɔ tuun.

²²A to Ala darakumaw ye i karan;

a darakan mara i jusukun na.

²³Ni i ka sekɔ ka na Sebɛɛtigi Ala fɛ, a bɛna i sigi i cogokɔrɔ ra;

ni o kɛra, i bɛna kojugu mabɔ i ta so ra.

²⁴I ta sanin firi dugu ma!

I ta Ofiri sanin22.24 Ofiri jamana ta sanin tun ye sanin bɛɛ ra ɲumanman ye (Masacɛw fɔlɔ 9.28). firi kɔda kabakuruw cɛ ra!

²⁵Ni o kɛra, Sebɛɛtigi Ala bɛna kɛ i ta sanin ye,

a bɛna kɛ i fɛ warigbɛ camanba ye.

²⁶O tuma, Sebɛɛtigi Ala ko bɛna diya i ye ka tɛmɛ fɛn tɔ bɛɛ kan;

i bɛna se ka i ɲa kɔrɔta Ala fan fɛ.

²⁷I bɛna a daari, a fana bɛna i jaabi;

i ka dajuru minw ta a fɛ, i bɛna o dafa.

²⁸Ni i ka ko o ko latigɛ, o bɛɛ bɛ ɲa i boro.

Yeelen bɛna manamana i tɛmɛsira bɛɛ kan.

²⁹Ni mɔgɔ dɔ ka ben, ele le bɛna o tigi lawuri;

sabu Ala bɛ mɔgɔ majigininw dɛmɛ.

³⁰A bɛna hali mɔgɔ jarakininw bɔsi;

a bɛ o bɔsi ele boro ta kɛwale saninmanw le sababu ra.

Ayuba ta jaabi: Mɔgɔ tɛ Ala yɔrɔ lɔn

¹Ayuba ka Elifazi jaabi ko:

²Hali bi ne ta dimi bɛ juguya ka taga a fɛ;

a boro bɛ dɔ le farara ne ŋunakan kan.

³E, ni ne tun k’a yɔrɔ lɔn!

Ni ne tun bɛ se ka se fɔ a sigiyɔrɔ ra!

⁴Ne tun bɛna taga kuma a ɲa kɔrɔ ka ne ta jo yira;

ne tun bɛna ne ta josɔrɔsababu caman sɔrɔ k’a fɔ a ye.

⁵A tun bɛna ne jaabi ni min ye, ne tun bɛna o lɔn;

ne tun bɛna a ta fɔta mɛn.

⁶Yala a tun bɛna a ta fanga bɛɛ le ta ka kuma ka kiti ben ne kan wa?

Ɔn-ɔn, a tun bɛna a janto ne ra ka ne lamɛn.

⁷A tun bɛna a lɔn ko mɔgɔɲuman dɔ le bɛ kuma kɛra ni a ye;

ne tun bɛna bɔsi ka bɔ ne ta kititigɛbaga boro pewu!

⁸Nka ni ne ka taga terebɔyanfan na, a tɛ yi,

ni ne ka taga terebenyanfan na, ne t’a ye.

⁹Yala a boro degunin lo baara dɔ ra sahiliyanfan na, o kosɔn ne t’a yera wa?

Yala a dogonin bɛ woroduguyanfan le ra, o kosɔn ne ɲa tɛ se ka la a kan wa?

¹⁰Nka o bɛɛ n’a, ta ne bɛ sira min kan a ka o lɔn;

ni a ka ne kɔrɔbɔ ka ban, ne saninyanin bɛna bɔ i ko sanin.

¹¹Sabu ne sen tugura a sennɔ kɔ wagati bɛɛ;

ne k’a ta sira tagama, ne ma jɛngɛ ka bɔ a kan.

¹²Ne ma ne yɛrɛ mabɔ a kumakan na;

a da ka kuma min fɔ, ne ka ne yɛrɛ sago to yi ka o le kɛ.

¹³Nka ni ale ka ko min latigɛ, jɔn le bɛ se ka o yɛlɛma?

Ni fɛn min k’a yɛrɛ diya, a bɛ o le kɛ.

¹⁴A ka min latigɛ ne ta ko ra, a bɛna o kɛ,

ani a ka o ɲɔgɔnna ko caman wɛrɛ min mara ne ye.

¹⁵O le kosɔn, ne jigi tigɛra a ɲa kɔrɔ;

ni ne ka miiri nin kow ra, ne bɛ siran.

¹⁶Ala le ka ne baraka ban,

Sebɛɛtigi Ala le ka ne jigi tigɛ;

¹⁷dibi min bɛ ne kan, o le ma kuma bɔsi ne ra;

dibiba min ka ne datugu, o tɛ.

Ayuba ta jaabi tɔ: Ala tɛ mɔgɔjugu bɔsi

¹Mun kosɔn Sebɛɛtigi Ala tɛ wagati dɔ latigɛ kiti kama,

k’a to Ala batobagaw ye o lonw ye?

²Mɔgɔw bɛ o mɔgɔɲɔgɔnw ta forow dancɛw yɛlɛma ka dɔ fara o yɛrɛ ta foro kan24.2 Ka kaɲa ni Izirayɛlimɔgɔw ta sariya ye, dan minw tun sigira forow cɛ, mɔgɔ si tun man kan ka o danw yɛlɛma (Sariya 19.14; Oze 5.10; Zanaw 22.28).;

o bɛ bɛganw sonya, ka bla o kɔ ka o gbɛn ka taga ni o ye.

³O bɛ feritaw ta fali mina o ra ka taga ni a ye;

o bɛ muso cɛ sanin ta misi mina a ra ka o ta juru tɔnɔmasigi.

⁴O b’a to fagantanw bɛ o ta sira bla, ka sira wɛrɛ ta o ɲasiran kosɔn;

o b’a to jamana ɲanibagatɔw bɛɛ bɛ kɛ dogo ye o ɲa.

⁵Ɲanibagatɔw bɛ i ko kongofaliw bɛ kongo kɔnɔ cogo min na;

dugugbɛda fɛ, ɲanibagatɔw bɛ bɔ ka taga o ta baara ra ka taga domuni ɲini;

o bɛ domuni sɔrɔ kongokolon yɔrɔw le ra k’a di o ta denw ma.

⁶O bɛ bɛganw ta bin kan kongo kɔnɔ,

ka mɔgɔjugu ta rɛzɛnmɔw tigɛ a ye.

⁷O fari lakolon bɛ la su fɛ, sabu fani tɛ o boro,

birifani tɛ o fɛ ka o yɛrɛ datugu nɛnɛ ra.

⁸Sanji sumanin min bɛ ben kuruyɔrɔw ra, o bɛ o bugɔ ka o ɲigi;

dogoyɔrɔ tɛ o fɛ minkɛ, o bɛ dɛn fara dɔ kɔrɔ.

⁹Mɔgɔjuguw bɛ feritanin bɔsi a bamuso boro fanga ra,

o bɛ ɲanibagatɔ borofɛn mina a ra ka o ta juru tɔnɔmasigi.

¹⁰O tɛ fani si to o boro; o fari lakolon le bɛ yaala.

O bɛ o jagboya ko o ye simansiriw cɛ foro kɔnɔ k’a sɔrɔ o kɔngɔtɔ lo.

¹¹Olugu le bɛ oliviye turu bɔ turubɔyɔrɔw ra o matigicɛw ye;

o bɛ o ta rɛzɛn cɔngɔ ka rɛzɛnji bɔ o ye, k’a sɔrɔ olugu yɛrɛ minlɔgɔtɔ lo.

¹²Mɔgɔ minw bɛ fagara tɔɔrɔ boro, olugu kasikan bɛ bɔra dugu kɔnɔ;

mɔgɔ jusukasininw bɛ kulera,

nka o ko bɛnbari minw bɛ kɛra o ra, Ala tɛ o si jatera.

¹³O mɔgɔw tana ye tere yeelen ye;

o tɛ Ala ta siraw jate,

o tɛ a ta siraw tagama.

¹⁴Mɔgɔfagabaga bɛ wuri dugugbɛda fɛ,

a bɛ ben ɲanibagatɔ fagantan kan ka a faga;

ni su kora, a bɛ yɛlɛma ka kɛ son ye.

¹⁵Jɛnɛyakɛbaga ɲa bɛ terebenda le kɔrɔsira;

a b’a fɔ ko: «Mɔgɔ si ɲa tɛ ne ra!»

A b’a kun datugu ni fani dɔ ye.

¹⁶Mɔgɔ dɔw bɛ bondaw kari su fɛ dibi ra;

nka tere fɛ, o bɛ o yɛrɛ datugu bon kɔnɔ ka to yi;

o tɛ tere yeelen fɛ fiyewu.

¹⁷O mɔgɔw bɛɛ fɛ, sɔgɔmada bɛ i ko saya dibi;

sabu saya dibi ta jatigɛ ye min ye, o ka o silɔn.

¹⁸Nka aw b’a fɔ ko:

«Mɔgɔjugu ka fiyɛn; ni a blara ji kan, ji bɛ taga ni a ye.

O ta yɔrɔw bɛɛ danganin lo jamana kɔnɔ;

a tɛ se k’a ta rɛzɛnforo sira ta tuun!

¹⁹Tere ni fundɛnin bɛ bugun latunu cogo min na,

kaburu dibi bɛ jurumunkɛbaga latunu o cogo le ra.

²⁰A bɔra muso min kɔnɔ, o bɛ ɲina a kɔ,

kaburu tumuw b’a kɛ o sago ye;

mɔgɔ si hakiri tɛ to a ra tuun.

Mɔgɔjugu laban bɛ kari ka ben i ko yiri.

²¹«Ale le tun bɛ muso denworobariw, muso denntanw borofɛnw mina o ra;

a tun tɛ muso cɛ saninw minako ɲa fana!

²²Nka Ala le bɛ mɔgɔ farimanw gbɛn a ta sebagaya baraka ra;

ni ale wurira, olugu tɛ la o yɛrɛ ta adamadenya ra tuun.

²³Ala bɛ o to yi, o b’a miiri ko o bɛ hɛra ni laganfiya ra,

nka a ɲa bɛ o tɛmɛsiraw kɔrɔsira.

²⁴O tun kɔrɔtara ka wagati dɔɔnin dɔrɔn le kɛ, o kɔ, o bɛ tunu;

o bɛ ben i ko yirifiyeren bɛ ben cogo min na,

o bɛ tigɛ ka ben i ko siman bɛ tigɛ cogo min na.»

²⁵Jɔn le bɛ se k’a fɔ ko ne ka faninya le fɔ, ko a tɛ kɛ ten?

Jɔn le bɛ se ka ne ta kuma sɔsɔ?

Bilidadi ta ladirikan sabanan: Adamaden tɛ se ka saninya

¹Bilidadi min bɛ bɔ Suwa, ale ka kuma ta tuun k’a fɔ Ayuba ye ko:

²Kuntigiya ni jatigɛ, o ye Ala ta ye;

a bɛ hɛra sigi sankolo kɔnɔyɔrɔw ra.

³Yala a ta kɛrɛkɛjamaw jateda bɛ se ka lon wa?

Jɔntigi le bɛ yi, ko a ta yeelen tɛ sera min ma?

⁴Adamaden bɛ se ka teren cogo di Ala ɲa kɔrɔ?

Adamaden, muso ka min woro, o bɛ se ka saninya cogo di?

⁵A flɛ, hali karo gbɛnin tɛ Ala ɲa kɔrɔ,

lolow belen saninyanin tɛ a ɲa kɔrɔ,

⁶janko ka n’a fɔ mɔgɔ min tɛ foyi ye ni tumu tɛ,

adamaden min ni tɔnɔnkɔ bɛɛ ka kan.

Ayuba ta jaabi: Mɔgɔ tɛ Ala ta kow faamu

¹Ayuba ka Bilidadi jaabi ko:

²E, ele kɔni ka mɔgɔ barakantan dɛmɛcogo lɔn yɛrɛ le kosɛbɛ!

Se tɛ mɔgɔ min ye, ele bɛ se o dɛmɛcogo ra dɛ!

³Ele ka hakirintanw ladicogo lɔn dɛ!

I k’a yira ko i hakiri ka bon yɛrɛ le!

⁴O tuma ele bɛ nin kumaw fɔra jɔntigi le ma?

Jɔn le ka nin kumaw don i da ra?

⁵Mɔgɔ saninw jaw bɛ yɛrɛyɛrɛra

kɔgɔji ni a kɔnɔfɛn jukɔrɔ.

⁶Lahara so dayɛlɛnin lo Ala ɲa kɔrɔ;

lahara dibi yɔrɔ si dogonin tɛ Ala ma.

⁷Ala le ka sahiliyanfan sankolo bla yɔrɔ lakolon kunna;

a ka dugukolo dulon, k’a sɔrɔ foyi m’a mina ka lɔ.

⁸A bɛ jiw lajɛn a ta sankabaw kɔnɔ,

nka sankabaw tɛ faran ji baraka kosɔn.

⁹A bɛ a ta sankabaw yɛrɛgɛ a ta masasiginan kunna,

ka o kɛ k’a ta masasiginan datugu.

¹⁰A ka tagamasiyɛn koorinin dɔ kɛ kɔgɔji kan,

ka o kɛ yeelen ni dibi dan ye.

¹¹Ni a sɔngɔra,

sankolo jusiginanw dabari bɛ ban fɔ o bɛ yɛrɛyɛrɛ.

¹²A bɛ kɔgɔji lamaga ni a ta sebagaya ye,

a bɛ kɔgɔji danfɛn barakaman26.12 Min fɔra kɔgɔji danfɛn barakaman ta ko ra aw ye o flɛ: 7.2. halaki ni a ta lɔnniya ye.

¹³A ta fɔɲɔ bɛ sankolo fiyɛ k’a gbɛ,

a boro bɛ sa belebele boribagatɔ26.13 O sa belebele boribagatɔ ko fɔra fana Ezayi 27.1 ra. sɔgɔ.

¹⁴Ayiwa, ni nin ye Ala ta kow bɛɛ ra fitiniw ye,

an toro bɛ min mɛn nin kow ra, ni o ye a mankan fitini dɔrɔn le ye,

o tuma ni a nana a ta sebagaya yira i ko sanpɛrɛn mankan, jɔn le bɛna se ka o faamu?

Ayuba ta jaabi tɔ: Ne ma jaraki

¹Ayiwa, Ayuba ka dɔ fara a ta kuma kan, k’a fɔ ko:

²Ne bɛ kari Ala ɲanaman tɔgɔ ra, ale min ka jo bɔsi ne ra,

Sebɛɛtigi Ala min ka ne jusu kasi,

³ko fɔ ka taga ne nin mina ne ra,

Ala ta nɛnɛkiri min bɛ bɔ ne nunwo fɛ, fɔ ka taga o lalɔ,

⁴kumajugu tɛna bɔ ne da ra,

ne nɛnkun tɛna janfakuma fɔ.

⁵Ne kɔni tɛ se ka jo di aw ma fiyewu!

Fɔ ka taga ne sa, ne tɛna ne yɛrɛ jaraki!

⁶Ne lara a ra ko ne terennin lo, sigiya tɛ o ra, ne fana tɛ bɔ o kan fiyewu;

ne jusukun ma ne jaraki foyi ra ne si bɛɛ ra.

⁷Ala ye ne jugu kɛ i ko a bɛ mɔgɔjugu kɛ cogo min na;

mɔgɔ o mɔgɔ bɛ wuri ne kama, a ye o tigi kɛ i ko a bɛ kojugukɛbaga kɛ cogo min na!

⁸Jigi juman le bɛna to Alaɲasiranbari fɛ tuun,

ni a ta wagati nana ban,

ni Ala k’a nin mina a ra?

⁹Ni degu sera a ma,

yala Ala bɛna a kulekan lamɛn tuun wa?

¹⁰Yala Sebɛɛtigi Ala ko bɛna se ka diya a ye ka tɛmɛ fɛn tɔ bɛɛ kan tuun wa?

Yala a bɛna to ka Ala wele tuun wagati bɛɛ wa?

¹¹Ayiwa, ne bɛna aw karan Ala ta sebagaya ra,

ne tɛna Sebɛɛtigi Ala ta kow dogo aw ma.

¹²Aw bɛɛ ka o kow ye kosɛbɛ;

o tuma mun le bɛ aw blara nin kumakolonfɔ ra?

¹³Ayiwa, mɔgɔjugu ninyɔrɔ flɛ nin ye Ala fɛ;

mɔgɔ hinabari ta sɔrɔta ye nin ye Sebɛɛtigi Ala fɛ27.13 Nin kuma minw fɔra nin yɔrɔ ra 13–23, o bɔra Ayuba tericɛw ta kumacogo le fɛ. O kosɔn dɔw b’a miiri ko nin yɔrɔ ye Sofari ta ladirikan sabanan le ye.:

¹⁴Hali ni a ka den caman sɔrɔ, o bɛɛ bɛ faga ni kɛrɛkɛmuru ye;

a ta durujaw si tɛna domuni sɔrɔ ka wasa.

¹⁵Ni a ta mɔgɔ min o min ka to a kɔ, banajugu bɛna o faga;

a ta firiyamusow fana tɛna se k’a su kasi.

¹⁶Hali ni a ka wari sɔrɔ caman k’a lajɛn i ko kɛnkɛn,

hali ni a ka faniw sɔrɔ caman k’a ton ɲɔgɔn kan i ko bɔgɔ,

¹⁷ale kɔni bɛna a ton ɲɔgɔn kan, nka mɔgɔ terennin dɔ le bɛna o faniw don;

o wari bɛna kɛ mɔgɔ jarakibari dɔ le ta ye.

¹⁸A ka bon min lɔ, o ye tumuforogo le ye;

a bɛ i ko forokɔrɔsibaga ta gbata.

¹⁹A waritigiraman bɛ la ka sunɔgɔ, nka o ye a ta wagati laban le ye;

sabu ni a nana a ɲa yɛlɛ, a tɛ foyi ye tuun.

²⁰Balahu bɛ bara ka ben a kan, i ko jiba min bɛ mɔgɔ ta;

sanfɔɲɔ bɛ taga ni a ye su fɛ.

²¹Terebɔyanfan ta fɔɲɔ gbanninman b’a sama ka bɔ a sigiyɔrɔ ra,

ka taga ni a ye.

²²Ala b’a bon, hali a tɛ hina a ra;

ale kɔni bɛ bori le ko a b’a yɛrɛ kisi.

²³O bɛ tɛgɛrɛ fɔ a benko kosɔn;

o b’a sigiyɔrɔ flɛ ka kabakoya a ra fɔ ka filen fiyɛ!

Alaɲasiran le ye hakiritigiya ye

¹Warigbɛ bɔyɔrɔ bɛ yi,

sanin fana bɛ ko k’a woloma yɔrɔ min na, o yɔrɔ bɛ yi.

²Nɛgɛ bɛ bɔ dugukolo jukɔrɔ;

o bɛ kabakuru yeele ka siranɛgɛ bɔ a ra.

³Mɔgɔw bɛ dibi yɛlɛma k’a kɛ yeelen ye;

o bɛ sogiri kɛ dugukolo jukɔrɔ ka se fɔ yɔrɔjan,

ka lulu dogoninw ɲini dugukolo dibi ra, dibifinba ra yi.

⁴O bɛ dingaw sogi k’a yɔrɔ janya mɔgɔw sigiyɔrɔw ra,

mɔgɔ si tɛ tɛmɛ yɔrɔ minw na;

o bɛ dulon ka to ka fifa o dingaw kɔnɔ yi, o ni mɔgɔ si yɔrɔ ma surun.

⁵Adamadenw ta baro bɛ sɔrɔ dugukolo min na,

o bɛ o dugukolo jukɔrɔyɔrɔw le karikari,

k’a kɛ i ko tasuma ka fɛn min jɛni.

⁶Dugukolo kabakuruw le ye safiri luluw sɔrɔyɔrɔ ye,

ani saninbuguri.

⁷Dugaw tɛ o yɔrɔ sira lɔn,

sogodomukɔnɔw ɲa ma la o yɔrɔ kan ka ye.

⁸Kongosogo fagamaw sen ma se yi fɔlɔ;

jara ma se o yɔrɔ ra ka ye.

⁹Mɔgɔw bɛ taga ben faragbɛlɛnw kan ka o sogi,

ka kuruw sogi ka se fɔ o lilinw ma.

¹⁰O bɛ dingaw sogi faraw jukɔrɔ;

o ɲa bɛ dugukolo jukɔrɔnaforow bɛɛ ye.

¹¹O bɛ jisiraw gberen,

ka bɔ ni fɛn dogoninw ye kɛnɛ kan.

¹²Nka hakiritigiya bɛ sɔrɔ min le?

Faamuri hakiri bɛ yɔrɔ juman le?

¹³Adamaden t’a nafa lɔn,

sabu a tɛ sɔrɔ dunuɲa ra mɔgɔ ɲanamanw cɛ ra yan.

¹⁴Ji dunba ko: «A tɛ ne kɔnɔ!»

Kɔgɔji ko: «A tɛ ne fɛ!»

¹⁵Mɔgɔ tɛ se k’a falen sanin yɛrɛworo ra,

mɔgɔ tɛ se k’a san ni warigbɛ ye.

¹⁶A tɛ se ka suma ni Ofiri sanin ye,

walama ni onikisi lulu sɔngɔgbɛlɛn ye,

walama ni safiri lulu ye.

¹⁷Sanin walama dugalen tɛ se ka suma ni a ye;

mɔgɔ tɛ se k’a falen saninminan dɔ ra, hali sanin nugunin.

¹⁸Korayi lulu ni zasipe lulu tɔgɔ yɛrɛ tɛ se ka fɔ a kɔrɔ;

hakiritigiya nafa ka bon ni lulu sɔngɔgbɛlɛn suguya bɛɛ ye.

¹⁹Etiyopi jamana ta topazi lulu tɛ se ka suma ni a ye,

sanin yɛrɛworo tɛ se ka suma ni a ye.

²⁰Ayiwa, hakiritigiya bɛ bɔ min le?

Faamuri hakiri sɔrɔyɔrɔ bɛ min le?

²¹A dogonin lo danfɛn ninman bɛɛ ma,

sanfɛkɔnɔw tɛ se k’a ye.

²²Lahara dibi ni saya yɛrɛ b’a fɔ ko:

«An toro k’a ko mɛn dɔrɔn le!»

²³Ala le k’a sira lɔn,

ale le k’a yɔrɔ lɔn;

²⁴sabu ale le bɛ flɛri kɛ ka se fɔ dunuɲa danw bɛɛ ma,

fɛn o fɛn bɛ sankolo jukɔrɔ, a ɲa bɛ o bɛɛ ra.

²⁵Wagati min a ka fɔɲɔ baraka latigɛ,

ka jiw hakɛya latigɛ,

²⁶wagati min a ka sanji ta sariya yira a ra,

ka sanmanamana ni sanpɛrɛn tɛmɛyɔrɔw yira o ra,

²⁷o wagati le ra a ka hakiritigiya ye k’a ko fɔ;

a ka hakiritigiya sigi k’a sɛgɛsɛgɛ kosɛbɛ.

²⁸O kɔ, a ko adamaden ma ko: «A flɛ, Matigi ɲasiran, o le ye hakiritigiya ye;

ka i yɛrɛ mabɔ kojugu ra, faamuri hakiri bɛ sɔrɔ o le ra28.28 Nin kuma fɔra Zaburu 111.10, ani Zanaw 1.7; 9.10..»

Ayuba ta kumalaban: A k’a ta wagati tɛmɛninw lakari

¹Ayiwa, Ayuba ka dɔ fara a ta kuma kan tuun; a ko:

²E, ni ne tun bɛ se ka sekɔ ka kɛ i ko ne tun bɛ cogo min na karo tɛmɛninw na,

wagati minw na Ala tun b’a jantora ne ra,

³wagati minw na Ala tun bɛ a ta fitina mana ne kunna,

k’a to ne ye tagama o yeelen na dibi cɛ ma!

⁴O wagati ra ne tun bɛ ne ta dunuɲalatigɛ diya bɛɛ le ra;

Ala ta jɛnɲɔgɔnya nɛɛma tun bɛ ne ta so kan,

⁵Sebɛɛtigi Ala tun bɛ ni ne ye,

ne ta denw tun bɛ sigi ka ne lamini.

⁶O wagati ra ne tun bɛ ne sen ko nɔnɔ ra29.6 K’a sen ko nɔnɔ ra, o kɔrɔ ye ko misiw tun ka ca a fɛ.,

oliviye turu tun bɛ bɔ fara ra29.6 Turu bɛ bɔ fara ra, o kɔrɔ ye ko a ta sɛnɛfɛnw tun bɛ ɲa kosɛbɛ. ka woyo ne kɛrɛ fɛ.

⁷O wagati ra ni ne tun bɔra ko ne bɛ taga dugu donda29.7 Dugu donda le tun ye dugu cɛkɔrɔbaw, ani a ɲamɔgɔw ta ɲɔgɔnyeyɔrɔ ye, ani barokɛyɔrɔ, ani kititigɛyɔrɔ. ra,

ka taga sigi dugu ɲɔgɔnyeyɔrɔ ra,

⁸ni kanbelenw tun ka ne ye, o tun bɛ sekɔ kɔ fɛ,

cɛkɔrɔbaw tun bɛ wuri ka lɔ,

⁹fagamaw tun bɛ o ta kuma lalɔ,

ka o boro la o da ra, ka je.

¹⁰Kuntigiw tun bɛ o kumakan majigi,

o nɛn bɛ nɔrɔ o da kɔnɔ.

¹¹Ni mɔgɔ o mɔgɔ toro tun ka ne lamɛn, o tun b’a fɔ ko ne ta ɲana;

ni min o min ɲa tun ka ne ye, o tun bɛ to ka ne ko fɔ,

¹²sabu ne tun bɛ ɲanibagatɔ kasibagatɔ bɔ a ta ɲani na,

ani dɛmɛbaga tun tɛ ferita minw na, ne tun bɛ olugu dɛmɛ.

¹³Mɔgɔ sabagaw satɔ tun bɛ dugawu le kɛ ne ye;

ne tun bɛ muso cɛ saninw jusu diya.

¹⁴Terenninya le tun ye ne kannaderege ye,

ne ta can le tun ye ne ta deregeba ni ne ta jalamugu ye.

¹⁵Ne tun kɛra fiyentɔw ta ɲaden ye,

ani senkelenw ta sen;

¹⁶ne le tun ye fagantanw fa ye;

hali ne tun tɛ minw lɔn, ne tun bɛ ne janto olugu ta kow ra k’a sɛgɛsɛgɛ.

¹⁷Nka ne tun bɛ kojugukɛbagaw dagbaga kari,

ka o ta domuta sama ka bɔ o da ra.

¹⁸O wagati ra ne tun b’a miirira ko ne bɛna sa hɛra ra ne ta somɔgɔw cɛ ra,

ko ne si bɛna caya i ko kɔgɔjida kɛnkɛn,

¹⁹ko ne lilinw bɛna sama ka taga se fɔ ji ma,

ko gɔmiji bɛna jigi ne ta yiriborow kan su bɛɛ ra,

²⁰ko ne bɛna bonyakura sɔrɔ tuma bɛɛ,

ko ne ta kalan bɛna barakakura sɔrɔ ne boro tuma bɛɛ.

²¹O wagati ra mɔgɔw tun bɛ ne makɔnɔ janko ka ne lamɛn;

o tun bɛ je janko ka ne ta ladirikanw lamɛn.

²²Ni ne tun kumana ka ban, mɔgɔ si tun tɛ ne sɔsɔ;

o tun bɛ sɔn ne ta kumaw bɛɛ ma.

²³O tun bɛ ne makɔnɔ i ko sanji, i ko sanji laban,

i ko mɔgɔ minlɔgɔtɔ b’a da waga ka ji makɔnɔ cogo min na.

²⁴Ni o jigi tun tigɛra, ne tun bɛ o ninsɔndiya;

foyi tun tɛ ne bari ka koɲuman kɛ o ye.

²⁵Ne le tun kɛra o ta ɲamɔgɔ ye, ne le tun bɛ o tɛmɛsiraw yira o ra;

ne tun bɛ o cɛ ra i ko masacɛ min bɛ a ta kɛrɛkɛjama cɛ ra,

i ko min bɛ mɔgɔ jusukasininw jusu saaro.

Ayuba ta kumalaban tɔ: Kunu ni bi tɛ kelen ye

¹Nka bi kɔni, minw si ka dɔgɔ ni ne ta ye, olugu le bɛ yɛrɛko ne ma,

ne tun tɛ hali minw faw jate fɛn ye;

ne tun tɛ sɔn ka o bla ka taga ni ne ta wuruw ye ka taga ne ta bɛganw kɔrɔsi.

²O mɔgɔw baraka tun bɛ se ka mun le ɲa ne ye?

O baraka bɛɛ tun bannin lo ka ban.

³Fagantanya ni kɔngɔ tun ka o nagasi,

o tun bɛ yaala o kelen na kongokolonw kɔnɔ,

yɔrɔ lakolonw, ani yɔrɔ cɛjuguw ra.

⁴O tun bɛ binkɛnɛ tigɛ tuw kɔnɔ ka o ɲimi;

yirililinw le tun bɛ o ta baro ye.

⁵O tun ka o gbɛn ka bɔ o sigiɲɔgɔnw cɛ ra;

mɔgɔw tun bɛ kule ci o kɔ i ko sonw,

⁶o tun bɛ taga to dingakolonw le kɔnɔ,

ani kuruwow, ani farawow kɔnɔ.

⁷Mɔgɔw tun bɛ o kulekanw mɛn yirituw cɛ ra;

o tun bɛ taga ton ɲɔgɔn kan ŋanisunw cɛ ra.

⁸O tun ka o mɔgɔkolonw,

ani o mɔgɔkunntanw gbɛn le ka bɔ jamana kɔnɔ.

⁹Ayiwa, bi o mɔgɔw le bɛ ne tɔgɔ donna o ta dɔnkiriw ra,

ka baro kɛ ne tɔgɔ kan.

¹⁰O ka ne haramuya, fɔ o bɛ o yɛrɛ mabɔ ne ra.

O tɛ sigiya hali ka daji tu ne ɲa ra;

¹¹sabu Ala ka ne ta kalan juru foni, ka ne majigi;

mɔgɔw tɛ o yɛrɛ mina foyi ra ne ɲa kɔrɔ.

¹²Mɔgɔkolon caman wurira ka lɔ ka ne jaraki;

o b’a fɛ ka ne sen gbasi ka ne laben,

o bɛ ben ne kan janko ka ne halaki.

¹³O bɛ ne tɛmɛsira tigɛ, sabu o bɛ ne ta halakiri le ɲini;

o bɛ o kɛ o yɛrɛ ma, hali mɔgɔ tɛ o dɛmɛ.

¹⁴O bɛ na ne kɔ i ko mɔgɔ minw ka woba bɔ dugu kogo ra ka to ka don o fɛ;

o bɛ to ka girin ka na kogo benninw kabakuruw cɛ ra.

¹⁵Balahu benna ne kan,

ne ta bonya tagara, i ko fɔɲɔ bɛ taga ni fɛn ye cogo min na;

ne ta hɛra tɛmɛna i ko sankaba bɛ tɛmɛ cogo min na.

¹⁶Sisan kɔni ne si bɛɛ banna,

ɲani benna ne kan.

¹⁷Su fɛ, ne fari ta dimi bɛ ne sɔgɔ fɔ ne kolow ra;

dimi bɛ ne baraka banna, a fana tɛ malara ka ye.

¹⁸Ala ka ne ta deregeba tufa k’a mina ni a baraka bɛɛ ye,

ka ne ta derege kan cɛ.

¹⁹A ka ne firi bɔgɔ ra;

ne kɛra i ko buguri ni bugurigbɛ.

²⁰E, Ala, ne bɛ i wele ko i ye ne dɛmɛ, nka i tɛ ne jaabi;

ne bɛ lɔ i ɲa kɔrɔ, nka i bɛ ne flɛ dɔrɔn le!

²¹I tɛ hina ne ra;

i bɛ ben ne kan ka ne kɛrɛ ni i yɛrɛ boro baraka ye.

²²I bɛ ne sama ka ne bla fɔɲɔ ɲa fɛ,

k’a to sanfɔɲɔ ye ne tufatufa ka taga ni ne ye fan bɛɛ ra.

²³Ne yɛrɛ k’a lɔn ko i bɛ tagara ni ne ye saya le ra,

ninmanfɛn bɛɛ tagayɔrɔ ye yɔrɔ min ye.

²⁴Nka yala sabaga man kan k’a boro kɔrɔta ka i daari wa?

Ni bɔnɔ sera mɔgɔ min ma, o man kan ka i wele tuun wa?

²⁵Yala ne tun tɛ kasira ni tɔw ye o ta wagatigbɛlɛnw na wa?

Yala ne jusu tun tɛ kasira fagantanw kosɔn wa?

²⁶Ne tun bɛ koɲuman makɔnɔna, nka kojugu nana;

ne tun bɛ yeelen makɔnɔna, nka dibiba nana.

²⁷Ne kɔnɔ gbannin lo tuma bɛɛ,

ɲani le sera ne ma.

²⁸Ne jusu kasinin le bɛ tagama; tere yeelen tɛ ne ninsɔndiya tuun;

ne bɛ wuri ka lɔ jama cɛ ra ka kule ko o ye ne dɛmɛ.

²⁹Ne kɛra kongowuruw balema ye,

ka kɛ kɔnɔsogolonw jɛnɲɔgɔn ye30.29 Kongowuruw ni kɔnɔsogolonw bɛ kasi o kelen na kongokolon kɔnɔ cogo min na, Ayuba ko ale fana ta kɛra ten..

³⁰Ne fari finna, k’a ja fɔ a bɛ tigɛtigɛ ka ben;

farigban bɛ ne fari jɛni fɔ ka se ne kolow ma.

³¹Ne ta gɔni tɛ dɔnkiri wɛrɛ la ni sangadɔnkiriw tɛ,

ne ta filen tɛ dɔnkiri wɛrɛ lamina ni sukasibagaw ta dɔnkiriw tɛ.

Ayuba ta kumalaban tɔ: Ayuba ka jo di a yɛrɛ ma

¹K’a sɔrɔ ne tun ka layiri dɔ ta ni ne ɲadenw ye,

ko ne ɲa kana sunguru flɛ ka ɲabɔ a fɛ.

²Ne ninyɔrɔ bɛna kɛ mun le ye san fɛ Ala fɛ?

Ne ta sɔrɔta bɛna kɛ mun le ye Sebɛɛtigi Ala fɛ sankolo ra?

³Yala cɛnri ma labɛn kojugukɛbagaw le kama wa?

Minw bɛ terenbariyakow kɛ, bɔnɔ ma labɛn olugu le ye wa?

⁴Yala Ala tɛ ne tagamacogo yera wa?

Yala a tɛ ne sentako kelen kelen bɛɛ jatera wa?

⁵Yala ne tagamana janfa sira kan ka ye wa?

Ne sen teliyara ka don nanbarako dɔ ra ka ye wa?

⁶Ala ye ne suma ni sumanikɛnan terennin ye;

a bɛna a lɔn ko ne jusukun gbɛnin lo.

⁷Ni a kɛra ko ne sen jɛngɛra ka bɔ siraɲuman kan,

ne ɲa ka min ye, ni ne jusukun ta miiriya tugura o le kɔ,

ni a kɛra ko ne borow ka kɛwale dɔ kɛ min ka ne lanɔgɔ,

⁸o tuma ne ye siman dan, nka mɔgɔ wɛrɛ y’a domu,

walama o ye ne ta siman falenninw bɛɛ bɔn ka bɔ yi!

⁹Ni a kɛra ko walimuso dɔ ka ne nɛgɛ ka ye, ka ne jusukun yɛlɛma,

ni ne tagara dɛn ne mɔgɔɲɔgɔn ta luda ra k’a muso kɔnɔ,

¹⁰o tuma Ala y’a to ne muso ye mugu si cɛ wɛrɛ ye,

cɛ wɛrɛw ye la ni a ye!

¹¹Sabu o ye maroyako le ye;

terenbariyako dɔ lo min kiti ka kan ka tigɛ.

¹²Tasuma lo min bɛ mɔgɔ jɛni ka taga ni i ye fɔ lahara dibi ra;

o ko bɛ se k’a to ne ye bɔnɔ ne ta sɔrɔta bɛɛ ra.

¹³Ni a kɛra ko ko dɔ tun donna ne ni ne ta jɔncɛ, walama ne ta jɔnmuso cɛ,

ni ne banna ka lɔ a ra ko jo b’a fɛ,

¹⁴o tuma ni Ala nana o kuma lawuri, ne bɛna a kɛ di?

Ni a nana ne ɲininka o ko ra, ne bɛna a jaabi ni mun ye?

¹⁵Min ka ne kɛ mɔgɔ ye ne bamuso kɔnɔ, yala ale le ma olugu fana kɛ mɔgɔ ye wa?

Ale kelen le ma an fla bɛɛ kɛ mɔgɔ ye an bamusow kɔnɔ wa?

¹⁶Yala dɛsɛbagatɔ ka ne daari ka ye, ne banna k’a sɔn wa?

Yala muso cɛ saninw ka o ɲa lɔ ne ra ka dɛsɛ, ne ma o dɛmɛ wa?

¹⁷Yala ne ka ne ta domuni kɛ ne kelen na,

ka ban ka feritaw sɔn wa?

¹⁸Kabini ne kanbelenman, feritaw mɔna ni ne ye, ka ne kɛ i ko o fa;

kabini ne worora, ne bɛ muso cɛ saninw ladon,

¹⁹Yala ne derira ka mɔgɔ dɔ ye fani tɛ min fɛ,

walama ka fagantan dɔ ye birifani t’a boro,

²⁰ni ne ma ne ta sagaw ta sagasifani dɔ don o tigi ra ka nɛnɛ bɔ a ra,

k’a to a ye dugawu kɛ ne ye wa?

²¹Ni a kɛra ko ne boro sera ferita dɔ ma ka ye,

k’a sababu kɛ ko kititigɛbagaw ye ne teriw ye,

²²o tuma ne boro ye tigɛ ka bɔ ne kamankun na,

ne borokan ye kari ka tigɛ ka bɔ ne nɔngɔn na!

²³Sabu ne bɛ siran Ala ta cɛnri ɲa,

ne tɛ se ka foyi kɛ a ta masaya nɔɔrɔ ɲa kɔrɔ.

²⁴Yala ne ka ne boromala sanin ma wa?

Yala ne k’a fɔ sanin yɛrɛworo ma ko: «Ne jigi ye ele le ye» wa?

²⁵Ne borofɛnw, ne yɛrɛ boro sera ka naforo min sɔrɔ,

yala ne ninsɔndiyara o caya kosɔn wa?

²⁶Yala ne ka tere manamanatɔ flɛ,

walama ka karo ni a ta nɔɔrɔ tagatɔ flɛ,

²⁷k’a to ne jusukun ye ne lafiri,

k’a to ne ye ne boro la ne da ra o fɛnw tɔgɔ ra ka o bato wa?

²⁸O ko fana tun bɛna kɛ terenbariya dɔ ye min kiti ka kan ka tigɛ,

sabu ne tun bɛna Ala janfa, Ala min bɛ san fɛ.

²⁹Yala ne ninsɔndiyara ne kɔninyabaga ta bɔnɔ kosɔn ka ye wa?

Yala ne panpanna ka ɲagari, ko kojugu dɔ k’a sɔrɔ wa?

³⁰Ne min tun tɛ sɔn ne da ye jurumun kɛ,

ka mɔgɔ danga janko a ye sa!

³¹Lonan minw tun bɛ jigi ne ta so, yala olugu tun tɛ to k’a fɔ wa, ko:

«Jɔntigi le ma sogo domu a fɛ ka fa k’a ye»?

³²Lonan si tun tɛ si kɛnɛ ma;

ne ta lu dayɛlɛnin tun lo lonanw ye tuma bɛɛ.

³³Yala ne ka ne ta hakɛkow dogo i ko adamaden tɔw wa?

Ne ka terenbariyakow dogo ne jusukun na wa?

³⁴Yala jama ɲasiran kosɔn,

walama ne ta mɔgɔw ta mafiyɛnyari jatigɛ kosɔn,

ne jenin tora ko dɔ kan, ne ma sɔn ka o bɔ kɛnɛ ma wa?

³⁵E, ne bɛna lamɛnbaga sɔrɔ min sa?

O le ye ne ta kumalaban ye.

Sebɛɛtigi Ala ye ne jaabi,

ne kɛrɛbaga Ala ye ne ta jarakirisɛbɛ kɛ!

³⁶Ne bɛna o la ne kamankun kan,

ka o siri ne ten kan i ko masafugula.

³⁷Ne ka sentako da min kɛ, ne bɛna o bɛɛ fɔ a ye;

ne bɛna gbara a ra i ko fagamaden.

³⁸Ni a kɛra ko ne ta forow bɛ kulera ka ne jaraki,

ni walanw bɛ kasira ne kosɔn,

³⁹ni a kɛra ko ne ka foro baaradenw tɔɲɔ,

ka forow simanw domu k’a sɔrɔ ne ma olugu sara,

⁴⁰o tuma ŋaniw le ye falen siman nɔ ra,

binjuguw ye falen siman nɔ ra.

Nin ye Ayuba ta kumaw laban ye.

Elihu ta ladiri

(32–37)

Elihu ta ladirikan fɔlɔ: Elihu k’a ta kuma fɔkun yira

¹Ayiwa, i n’a fɔ Ayuba tora a ta miiriya kan ko ale terennin lo, a tericɛ saba ka kuma dabla ni a ye.

²O tuma, Barakɛli min ye Buzi ta somɔgɔ dɔ ye, ni a bɛ bɔ Ramu ta gba ra, ale dencɛ Elihu dimina kosɛbɛ. A dimina Ayuba kɔrɔ kosɛbɛ, sabu Ayuba tun b’a yɛrɛ jatera mɔgɔ terennin ye fɔ ka Ala jaraki. ³A dimina Ayuba tericɛ saba fana kɔrɔ kosɛbɛ, sabu olugu tun ma kuma ɲanaman sɔrɔ ka Ayuba jaabi, nka o bɛɛ n’a ta, o tun b’a jarakira. ⁴Ayiwa, i n’a fɔ o bɛɛ tun ka kɔrɔ ni Elihu ye, Elihu tun lɔra ka o makɔnɔ fɔlɔ, ka sɔrɔ ka kuma ni Ayuba ye. ⁵Nka Elihu nana a ye ko kuma ɲanaman tɛ bɔra o cɛ saba si da ra tuun minkɛ, a dimina kosɛbɛ.

⁶Barakɛli min ye Buzi ta somɔgɔ ye, ale dencɛ Elihu ka kuma ta o le ra; a ko:

Ne ye denmisɛn ye, aw ye cɛkɔrɔbaw ye,

o kosɔn sigiya tun bɛ ne ra,

ne tun bɛ siranna ka ne ta lɔnta fɔ aw ye.

⁷Ne tun b’a miirira ko aw minw kɔrɔra, ko aw bɛna kuma,

ko aw sancamantigiw bɛna hakiritigiyakuma fɔ.

⁸Nka can ra, hakiri min bɛ adamaden kɔnɔ,

Sebɛɛtigi Ala ta nin min b’a kɔnɔ, o le bɛ faamuri di a ma.

⁹Ka san caman sɔrɔ, o tɛ mɔgɔ kɛ hakiritigi ye;

cɛkɔrɔbaya t’a to mɔgɔ ye can sira faamu.

¹⁰O kosɔn ne ko i ye ne lamɛn,

ne fana bɛna ne ta lɔnta yira i ra.

¹¹Ayiwa, ne tun bɛ aw ta kuma makɔnɔna;

ne ka ne toro malɔ ka aw ta kumafɔcogow lamɛn,

k’a to aw ye kuma fɔ ka taga se aw ta miiriya dan ma.

¹²Ne ka ne hakiri sigi ka aw ta kumaw lamɛn kosɛbɛ,

nka aw si ma se ka Ayuba ta jaraki yira a ra;

aw si ma se k’a ta kuma kɔsegi a ma.

¹³O bɛɛ n’a ta, aw kana a fɔ ko: «An kɛra hakiritigiw ye!

Ala yɛrɛ le bɛna a yira a ra ko a firira, mɔgɔ tɛ!»

¹⁴Ayuba ma a ta kumaw fɔ k’a ɲasin ne ma;

ne tɛna a jaabi ni aw ta kumaw ɲɔgɔn ye.

¹⁵Ayiwa, kuma benna o kan, jaabi ma sɔrɔ o fɛ tuun,

kuma tɛ o da ra tuun!

¹⁶Ne ka o makɔnɔ, nka i n’a fɔ o tɛ kumana tuun,

i n’a fɔ o ka kuma lalɔ, jaabi tɛ o fɛ tuun,

¹⁷o ra ne fana bɛna kuma;

ne fana bɛna ne ta lɔnta yira.

¹⁸Ayiwa, kuma caman le bɛ ne fɛ,

ne jusu gbannin lo, ne kɔrɔtɔra ka kuma.

¹⁹A bɛ i ko minnifɛn fariman dɔ le bɛ fununa ne kɔnɔ,

i ko minnifɛn fununin b’a fɛ ka forogokura min faran.

²⁰O ra ne bɛna kuma ka ne yɛrɛ sɔrɔ;

ne bɛna ne da yɛlɛ ka i jaabi.

²¹Ne tɛna kuma ka mɔgɔ bɔ mɔgɔ ra,

ne tɛna kuma ka mɔgɔ si malasa;

²²sabu ne tɛ se mɔgɔmalasa ra;

ni ne ka o kɛ, ne Danbaga bɛna ne ta ka bɔ yi o yɔrɔnin bɛɛ ra.

Elihu ko Ala bɛ mɔgɔ karan tɔɔrɔ sababu ra

¹Ayiwa, sisan, Ayuba, ele ye ne ta kuma lamɛn!

I toro malɔ ne ta kumaw bɛɛ ra!

²A flɛ, ne bɛna ne da yɛlɛ sisan,

ne nɛnkun bɛna lamaga ne da kɔnɔ ka kuma.

³Terenninya min bɛ ne jusukun na, ne bɛna kuma ka kaɲa ni o le ye,

lɔnniya min bɛ ne fɛ, ne da bɛna o le fɔ k’a gbɛya.

⁴Ala Nin le ka ne kɛ mɔgɔ ye,

Sebɛɛtigi Ala dafɔɲɔ le bɛ ne ɲanamanya.

⁵Ni i bɛ se ka ne jaabi, i ye ne jaabi;

i yɛrɛ labɛn, i ye lɔ ne ɲa kɔrɔ ka i ta fɔ!

⁶A flɛ, ne ni ele bɛɛ ka kan Ala ɲa kɔrɔ;

sabu ne fana danna ni bɔgɔ le ye.

⁷O ra i man kan ka siran ko ne bɛna i ja tigɛ,

ne fana tɛ se ka ne ta fanga sigi i kunna.

⁸I ka kuma dɔ fɔ, ne toro ka o mɛn;

ne yɛrɛ ka i kumakan mɛn.

⁹I ko: «Ne saninyanin lo, hakɛ tɛ ne ra,

ne jusukun gbɛnin lo, ne ma terenbariyako kɛ!

¹⁰Nka o bɛɛ n’a ta, Ala belen bɛ ne jarakiyɔrɔ ɲinina;

a bɛ ne jatera a jugu dɔ ye.

¹¹A ka ne sen don nɛgɛjɔrɔkɔ ra,

a bɛ ne tagayɔrɔ bɛɛ kɔrɔsi.»

¹²Ayiwa, ne bɛ i jaabi ko jo t’i fɛ o ra,

sabu Ala ka bon ni adamaden ye.

¹³Mun kosɔn i b’a fɛ ka siyɛn ta ni a ye

ko a tɛ a ta kokɛtaw kɛkun ɲafɔra mɔgɔ ye?

¹⁴Ala bɛ kuma mɔgɔ fɛ cogo dɔ ra bi,

ka kuma a fɛ cogo wɛrɛ ra sini, nka mɔgɔw le tɛ a kɔrɔsi.

¹⁵A bɛ kuma mɔgɔ fɛ siko ra, a bɛ ko dɔw yira a ra su fɛ,

tuma min na mɔgɔ bɛ sunɔgɔ fɔ ka ɲina a yɛrɛ kɔ,

tuma min na a lanin bɛ sunɔgɔ ra a ta lanan kan.

¹⁶O wagati le ra, a bɛ mɔgɔ torow dayɛlɛ k’a sɔn hakiri ra,

k’a karan kosɛbɛ;

¹⁷janko ka adamaden mabɔ a ta kɛwalejuguw ra,

janko ka mɔgɔ kisi yɛrɛbonya ma,

¹⁸janko k’a kisi kaburu ma,

k’a nin kisi taman ta fagari ma.

¹⁹Ayiwa, Ala bɛ bana ta dimi fana kɛ ka mɔgɔ koro, k’a lanin to a ta lanan kan;

o wagati le ra, a tigi kolow bɛ to ka yɛrɛyɛrɛ tuma bɛɛ dimi boro;

²⁰domuni tɛ diya a da ra tuun,

a ta miiriya tɛ kɛ domuni dimanw si kan tuun.

²¹A bɛ fasa k’a fari bɛɛ bɔ a ra pewu;

a kolow tun tɛ ye, nka sisan o bɛɛ bɛ bɔ kɛnɛ ma.

²²O wagati b’a sɔrɔ a si surunyara kaburu ra,

o y’a sɔrɔ a nin lablara ninminamɛlɛkɛ ye ka ban.

²³Nka ni a kɛra ko mɛlɛkɛ soronarikɛbaga dɔ b’a kɔrɔ,

hali ni o mɛlɛkɛ ɲɔgɔnna kelen le ka sɔrɔ mɛlɛkɛ waga kelen cɛ ra,

min b’a tɛmɛsira yira a ra,

²⁴ni o ka makari a ra, k’a fɔ Ala ye ko:

«A kisi janko a kana jigi kaburu kɔnɔ,

sabu ne k’a kunmabɔsara sɔrɔ,»

²⁵o tuma a fari bɛ kɛnɛya ka kɛ i ko a denmisɛnman ta,

a bɛ sekɔ ka kɛ i ko a kanbelenman tun bɛ cogo min na.

²⁶A bɛ Ala daari, Ala bɛ sɔn a ta daariri ma;

a bɛ taga lɔ Ala ɲa kɔrɔ ka ɲagari,

sabu Ala le bɛ mɔgɔ ta terenninya kɔsegi a ma.

²⁷O tigi bɛ dɔnkiri la mɔgɔw ɲa kɔrɔ k’a fɔ ko:

«Ne tun ka jurumun kɛ, ne tun ka can sira bla,

nka ne tun ka kan ni min ye, Ala ma o kɛ ne ra.

²⁸A ka ne nin kisi janko ne kana jigi kaburu kɔnɔ;

o ra ne bɛna to si ra, ne bɛna to yeelen na belen!»

²⁹Ayiwa, Ala le bɛ nin kow bɛɛ kɛ adamaden ye;

a b’a kɛ siɲaga fla, a b’a kɛ siɲaga saba,

³⁰janko ka mɔgɔ nin bɔsi kaburu ma,

janko a ye to yeelen na ni mɔgɔ ɲanaman tɔw ye.

³¹Ayiwa, Ayuba, i janto ne ta kuma ra k’a lamɛn!

Ele ye je, k’a to ne ye kuma!

³²Nka ni kuma bɛ i fɛ ka ne jaabi, o fɔ!

Kuma, sabu ni i ka jo sɔrɔ, o ka di ne ye.

³³Ni o tɛ, ele ye ne lamɛn!

I je, k’a to ne ye hakiritigiya sira yira i ra.

Elihu ta ladirikan flanan: Ala ta kow bɛɛ terennin lo

¹Elihu ka dɔ fara a ta kuma kan k’a fɔ ko:

²Aw hakiritigiw, aw ye ne ta kuma lamɛn!

Aw kolɔnbagaw, aw ye aw toro malɔ ne fɛ!

³Sabu da bɛ domuni diya lɔn cogo min na,

toro fana bɛ kuma nafa lɔn ten le.

⁴O ra, an ye can le ɲini,

an ye koɲuman le jate mina ɲɔgɔn fɛ.

⁵Ayuba k’a fɔ ko: «Ne terennin lo,

nka Ala ka ne ta jo bɔsi ne ra.

⁶Ne kɛra i ko faninyatigɛbaga, k’a sɔrɔ jo bɛ ne fɛ;

ne ta dimi tɛ sera ka ban, k’a sɔrɔ ne ma hakɛko kɛ.»

⁷Ayiwa, wasoyakuma ka di jɔn ye ka Ayuba bɔ?

A ka di a ye i ko ji.

⁸A bɛ kojugukɛbagaw le kɛ a jɛnɲɔgɔnw ye,

ka mɔgɔjuguw kɛ a tagamaɲɔgɔnw ye!

⁹Sabu a ko: «Ni mɔgɔ k’a yɛrɛ ko diya Ala ye,

a tɛ nafa foyi sɔrɔ o ra!»

¹⁰O kosɔn, aw mɔgɔ hakirimanw, aw ye ne lamɛn!

Ala ni kojugu cɛ ka jan,

Sebɛɛtigi Ala ni terenbariya cɛ ka jan!

¹¹A bɛ adamaden sara ka kaɲa ni a ta kɛwalew le ye;

mɔgɔ tagamacogo ka kan ni min ye, a bɛ o le kɛ i ye.

¹²Can ra, Ala tɛ kojugu kɛ,

Sebɛɛtigi Ala tɛ bɔ can sira kan ka ye!

¹³Jɔn le k’a sigi dugukolo kuntigiya ra?

Jɔn le k’a sigi dunuɲa bɛɛ lajɛnnin kunna?

¹⁴Ni a kɛra ko Ala tun bɛ miiri ale yɛrɛ dɔrɔn ta ko le ra,

ni a tun k’a ta nɛnɛkiri ni a ta nin mina danfɛnw na,

¹⁵o bɛɛ tun bɛ sa yɔrɔnin kelen na,

adamaden tun bɛ sekɔ ka kɛ buguri ye.

¹⁶Ni i bɛ ko faamu, o tuma nin lamɛn;

i toro malɔ ne kumakan na!

¹⁷Yala can kɔninyabaga bɛ se ka sigi kuntigiya ra wa?

Yala ele bɛ se ka kiti ben Ala terennin kan wa, Fangatigi Ala?

¹⁸Ale min b’a fɔ masacɛw ma ko: «Aw mɔgɔkolonw,»

k’a fɔ kuntigiw ma ko: «Aw mɔgɔjuguw!»

¹⁹A tɛ ɲabɔ mɔgɔ fɛ ko fagama lo,

a tɛ naforotigi fisaya dɛsɛbagatɔ ye;

sabu a boro le ka o fla bɛɛ dan.

²⁰O bɛɛ bɛ se ka sa yɔrɔnin kelen na.

Jamana mɔgɔw bɛ se ka muruti su cɛmancɛ ra ka kuntigiw faga;

fangatigiw bɛ tunu hali mɔgɔ boro tɛ se o ma.

²¹Sabu Ala ɲa bɛ mɔgɔ tɛmɛsiraw bɛɛ ra,

a bɛ mɔgɔ ta sentako kelen kelen bɛɛ kɔrɔsi.

²²O dibi tɛ yi, kojugukɛbaga bɛ se ka dogo min kɔnɔ,

hali saya dibi.

²³Ala mako t’a ra ko a bɛ mɔgɔ ta ko sɛgɛsɛgɛ ka mɛɛn fɔlɔ,

ka sɔrɔ ka o tigi wele a ta kiti ra.

²⁴A bɛ fangatigiw laben, hali a tɛ ɲininkari kɛ o ta ko ra;

o kɔ, a bɛ mɔgɔ wɛrɛw sigi o nɔ ra,

²⁵sabu a ka o ta kɛwalew lɔn.

A bɛ o lawuri su kelen na ka o bɔ fanga ra, ka o ta ko bɛɛ cɛn.

²⁶A bɛ o bugɔ mɔgɔ bɛɛ ɲa na

i ko mɔgɔjuguw;

²⁷sabu o ka o yɛrɛ mabɔ Ala ra,

o ma hakiri sɔrɔ k’a ta kow si faamu.

²⁸O ka dɛsɛbagatɔw lakasi ka o kasikan se Ala ma;

o b’a to Ala bɛ ɲanibagatɔw kulekan mɛn.

²⁹Nka ni Ala jera, jɔn bɛ se k’a jaraki?

Ni a k’a ɲada dogo, jɔn bɛ se k’a ye?

O bɛɛ n’a ta, a bɛ min kɛ siyaw ra, a bɛ se ka o kelen kɛ adamadenw bɛɛ ra;

³⁰janko Alaɲasiranbari dɔ kana na sigi fanga ra,

ka to ka jan la mɔgɔw ɲa ka o laben.

³¹Ayiwa, ni mɔgɔ k’a fɔ Ala ye ko:

«Ne ta kojugu hakɛ bɔra ne ra ka ban, ne tɛna kojugu wɛrɛ kɛ tuun.

³²Ne ɲa tɛ se ka fɛn min ye, i yɛrɛ ye o yira ne ra;

ne tun ka terenbariyako minw kɛ, ne tɛna o dɔ wɛrɛ kɛ tuun.»

³³Ayiwa, ele min bɛ Ala jarakira,

ka kaɲa ni ele ta miiriya ye, yala Ala ka kan ka o tigi sara wa?

Ele le ka kan k’a latigɛ, ne tɛ.

I ka min lɔn, o fɔ!

³⁴Mɔgɔ hakirimanw

ani mɔgɔ hakiritigi minw bɛ ne lamɛnna,

olugu bɛna a fɔ ne ma ko:

³⁵«Ayuba bɛ kuma i ko mɔgɔ min tɛ ko lɔn;

a bɛ kuma i ko hakiri tɛ mɔgɔ min fɛ.

³⁶O ra, Ayuba ka kan ka kɔrɔbɔ ka se fɔ a dan ma,

sabu a ta jaabicogo ni kojugukɛbagaw ta bɛɛ ka kan.

³⁷A bɛ murutiri le farara a ta jurumunw kan;

a bɛ sigiya donna an jusukun na,

ka kuma caman fɔ k’a sin Ala ma.»

Elihu ta ladirikan sabanan: Ayuba bɛ kumalakolonw le fɔ

¹Elihu ka dɔ fara a ta kuma kan k’a fɔ Ayuba ye ko:

²Yala ele b’a miiri ko jo bɛ i fɛ wa?

I ko: «Ne terennin lo Ala ɲa kɔrɔ!»

³I ko: «Nafa juman le bɛ ne ta jurumunkɛbariya ra?»

I ko: «Ala bɛ mun nafa le sɔrɔ a ra?»

⁴Ne le bɛna i jaabi,

ele ni i tericɛw bɛɛ.

⁵I ɲa lɔ sankolo ra k’a flɛ!

Sankabaw flɛ i kunna fɔ yɔrɔjan!

⁶Ni ele ka jurumun kɛ, o bɛ mun le can Ala ye?

Ni i ka i ta hakɛkow caya, o bɛ mun kɛ Ala ra?

⁷Ni ele terenna, o bɛ mun lase Ala ma?

Ala bɛ mun le sɔrɔ i boro?

⁸I ta juguya bɛ digi i mɔgɔɲɔgɔnw le ra;

i ta terenninya fana bɛ adamadenw le nafa.

⁹Mɔgɔw bɛ kulera o tɔɲɔbagaw boro;

o bɛ kulera ko o ye o bɔsi ka bɔ fangatigiw boro.

¹⁰Nka mɔgɔ si t’a fɔ ko: «Ne Danbaga Ala bɛ min le,

ale min bɛ mɔgɔ bla dɔnkirila ra su fɛ,

¹¹ale min bɛ an karan ka an kɛ hakiritigi ye ka tɛmɛ kongosogow kan,

ka an kɛ hakiritigi ye ka tɛmɛ sanfɛkɔnɔw kan?»

¹²Mɔgɔw bɛ kule, nka Ala tɛ o jaabi,

kojugukɛbagaw ta yɛrɛbonya kosɔn.

¹³Can lo, o bɛ kulera gbansan le; Ala tɛ o lamɛn,

Sebɛɛtigi Ala t’a jantora o ra.

¹⁴O tuma a bɛna ele jaabi cogo di, ni ele ko i t’a yera,

ko i ka i ta kow to a boro, nka i k’a makɔnɔ ka dɛsɛ!

¹⁵Ayiwa, sisan, i n’a fɔ a ta jusugban tɛ foyi kɛra mɔgɔw ra fɔlɔ,

i n’a fɔ a tɛ mɔgɔw ta murutiriw jatera fɔlɔ,

¹⁶o kosɔn, Ayuba bɛ kuma gbansanw fɔra;

a bɛ hakirintanyakumaw cayara.

Elihu ta ladirikan naaninan: Mɔgɔ tɛ Ala sɔsɔ

¹Elihu ka dɔ fara a ta kuma kan tuun k’a fɔ Ayuba ye ko:

²Ne makɔnɔ dɔɔnin, ne bɛna a ɲafɔ i ye;

sabu kuma dɔ belen bɛ ne fɛ k’a fɔ i ye Ala ta ko ra.

³Ne bɛna ne ta lɔnniya ɲini fɔ yɔrɔjan,

ne bɛna kuma ka can di ne Danbaga ma.

⁴Can ra, ne ta kuma tɛ faninyakuma ye;

mɔgɔ min ta lɔnniya bɔra jusukun gbɛnin na, o tigi le bɛ i kɔrɔ tan!

⁵Ala ka bon, a fana tɛ ban mɔgɔ ra;

a baraka ka bon, a hakiri ka bon.

⁶A tɛ mɔgɔjugu to a ye si sɔrɔ;

nka a bɛ ɲanibagatɔw ta jo di o ma.

⁷A t’a ɲa yɛlɛma k’a kɔ don mɔgɔ terenninw na;

a bɛ o lasigi masasiginanw kan i ko masacɛw,

ka o sabati kosɛbɛ, ka o kɔrɔta.

⁸Ni nɛgɛjɔrɔkɔ dɔ ka o siri,

walama ni ɲani benna o kan,

⁹o tuma o ta kɛwale min ka o kow lase o ma, a bɛ o fɔ o ye;

o tara wasoya fɛ ka hakɛko minw kɛ, a bɛ o fɔ o ye.

¹⁰A bɛ o toro dayɛlɛ, janko o ye a ta karan lamɛn;

a b’a fɔ o ye ko o ye terenbariyakow dabla.

¹¹Ni o k’a lamɛn ka sɔn a ta ma,

o tuma o bɛ o ta dunuɲalatigɛ tɔ kɛ hɛra ra,

ka o si tɔ kɛ o diyanyakow ra.

¹²Nka ni o m’a lamɛn, a b’a to o ye faga ni taman ye,

o bɛ sa o ta kolɔnbariya kosɔn.

¹³Alaɲasiranbariw diminin bɛ to;

hali ni Ala ka o siri ni a ta sirinanw ye, o tɛ kule ko a ye o bɔsi.

¹⁴O kosɔn o bɛ sa ka o to kanbelenya ra,

ka o to ni cɛ jatɔyakɛbagaw36.14 Cɛ jatɔyakɛbagaw: o mɔgɔw tun bɛ o jatɔya kɛ o ta jobonw le kɔnɔ (Masacɛw fɔlɔ 14.24; 22.47). ye o ta sɔnnikɛyɔrɔw ra.

¹⁵Nka Ala bɛ ɲanibagatɔ bɔsi a ta ɲani sababu ra,

a bɛ sɛgɛ kɛ sababu ye k’a toro dayɛlɛ, janko a ye mɛnni kɛ.

¹⁶Ayiwa, a bɛna ele fana sama ka i bɔ sɛgɛ ra,

ka i laganfiya; foyi tɛna i degu tuun;

domuni dimanw bɛna caya i kɔrɔ.

¹⁷Bi, mɔgɔjuguw ka kan ni jaraki min ye, o le sera ele ma;

jaraki ni kiti benna i kan.

¹⁸Nka i kana ta jusugban fɛ ka i yɛrɛ bla kumakolonfɔ ra;

i kana a to tɔɔrɔ bonyakojugu ye i lafiri.

¹⁹Yala i kulekan bɛ se ka i bɔ i ta degu ra wa,

walama i yɛrɛ ta baraka fanga bɛɛ bɛ se wa?

²⁰I kana kɔrɔtɔ ko su ye ko,

su min bɛ siyaw ta ka o bɔ o sigiyɔrɔw ra.

²¹I yɛrɛ kɔrɔsi, i kana i yɛrɛ bla terenbariyakow ra;

sabu ɲani bɛ se ka i bla o ra.

Ala ta sebagaya ka bon

²²A flɛ, Ala ni a ta sebagaya ka bon.

Jɔn le bɛ se ka mɔgɔ karan i ko ale?

²³Jɔn le bɛ a ta kokɛtaw fɔra a ye?

Jɔn le bɛ se k’a fɔ a ma ko: «I ka kojugu kɛ»?

²⁴I hakiri to Ala ra k’a bonya a ta kokɛninw kosɔn;

mɔgɔw bɛ dɔnkiri la k’a tando a ta ko minw kosɔn.

²⁵Adamaden bɛɛ ɲa b’a ra,

mɔgɔw bɛ to fɔ yɔrɔjan k’a ye.

²⁶Ala ka bon, nka a ta bonya tɛmɛna an ta hakiri dan kan;

a sandaw tɛ se ka jate k’a da lɔn.

²⁷A bɛ jiw sama ka o layɛlɛn san fɛ,

ka o kɛ sanji ye sankabaw kɔnɔ.

²⁸Sankabaw bɛ sanji lajigi,

k’a bɔn adamadenw kan caman.

²⁹Ala bɛ sankabaw yɛrɛgɛ san fɛ cogo min na,

ani sanpɛrɛn bɛ mankan bɔ cogo min na a ta so kɔnɔ, jɔn bɛ se ka o faamu?

³⁰A flɛ, a bɛ a ta sanmanamanaw bɔ cogo min na sankolo fan bɛɛ ra,

k’a sɔrɔ kɔgɔji jukɔrɔyɔrɔw bɛ dibi ra.

³¹A bɛ kiti ben siyaw kan o fɛnw sababu ra,

a bɛ domuni di o ma caman o fɛnw sababu ra.

³²A bɛ sanmanamanaw kɛ k’a borotɛgɛw fa,

ka o ci ka taga o tagayɔrɔw ra.

³³A ta sanpɛrɛn le b’a ko fɔ;

hali bɛganw bɛ bɔ a nako kala ma.

Elihu ko Ala ta danfɛnw ye kabako ye

¹Elihu ko tuun ko:

Nin kow bɛɛ le kosɔn ne jusukun bɛ yɛrɛyɛrɛ,

fɔ a bɛ panpan.

²Aw y’a lamɛn, aw y’a pɛrɛnkan lamɛn,

ani a da bɛ sɔngɔkanba min bɛɛ fɔra.

³A bɛ o sɔngɔkan bɔ sankolo fan bɛɛ ra;

a ta sanmanamanaw bɛ se fɔ dugukolo danw na.

⁴O kɔ, kanba dɔ bɛ bɔ: a bɛ a ta sankurukan bɔ ni baraka ye;

ni a kan bɔra dɔrɔn, a ta sanmanamanaw tɛ dabla tuun.

⁵Ala ta sankurukan ye kabakofɛn le ye;

a bɛ kobaw kɛ, minw tɛmɛna an ta hakiri dan kan.

⁶A b’a fɔ sanbɛrɛ ye ko: «Jigi dugukolo kan»;

a bɛ sanji lana, a bɛ a ta sanji barakamanw lana,

⁷fɔ ka adamadenw bɛɛ ta baaraw lalɔ,

janko bɛɛ y’a lɔn ko ale Ala ta baara lo.

⁸Kongosogow bɛ don o ta wow kɔnɔ,

o bɛ to o layɔrɔw ra.

⁹Sanfɔɲɔ bɛ na ka bɔ woroduguyanfan na,

sahiliyanfan fɔɲɔ bɛ na ni nɛnɛ ye.

¹⁰Ala b’a dafɔɲɔ fiyɛ ka jiw suma fɔ ka o simi;

jiw bɛɛ bɛ ja ka kɛ i ko kabakuru.

¹¹A bɛ sankabaw fa ji ra;

san bɛ manamana sankabaw cɛ ra fan bɛɛ ra.

¹²Ale le bɛ o tɛmɛyɔrɔw yira o ra ka kaɲa ni a sago ye;

ni a ka fɛn o fɛn fɔ o ye, o bɛ o kɛ,

dunuɲa yɔrɔ bɛɛ lajɛnnin na.

¹³Ni a ko a bɛ mɔgɔw bugɔ ni a ta bere ye,

walama ni a ko a bɛ koɲuman kɛ o ye,

a bɛ o fɛnw le ci.

¹⁴I toro malɔ nin kow ra, Ayuba!

I lɔ dɔɔnin, i ye Ala ta kabakow jate mina.

¹⁵Ala bɛ nin fɛnw bɛɛ ta baara yira o ra cogo min na,

ani a bɛ sanmanamana bɔ sankabaw cɛ ra cogo min na, ele ka o lɔn wa?

¹⁶Sankabaw bɛ dulon ka lɔ yɔrɔ kelen na cogo min na, ele ka o lɔn wa?

O ye lɔnniya dafanin tigi ta baara kabakoman le ye.

¹⁷Ni woroduguyanfan fɔɲɔ ka dugukolo gban,

ele min ta faniw bɛ fundɛnin bla i ra,

¹⁸yala ele tun bɛ se ka Ala dɛmɛ ka sankolo yɛrɛgɛ,

k’a gbɛlɛya i ko dugalen nɛgɛraman wa?

¹⁹Ayiwa, an ka kan ka min fɔ a ye, ele ye o fɔ an ye;

an kɔni tɛ se k’a karan foyi ra, sabu anw bɛ dibi le ra.

²⁰Yala o ka kan ka Ala lasɔmi sani ne ye kuma ta wa?

Yala mɔgɔ ka kan ka Ala lasɔmi ko dɔ ra, janko a ye o ko lɔn wa?

²¹Tere yeelen bɛ bara ka tunu sankabaw kɔ fɛ,

nka ni fɔɲɔ ka fiyɛ dɔrɔn, olugu bɛ taga.

²²Yeelen dɔ bɛ manamana i ko sanin, ka bɔ sahiliyanfan na;

Ala ta masaya nɔɔrɔ ye siranyafɛnba ye dɛ!

²³Sebɛɛtigi Ala lo, an tɛ se ka se a ma;

a ka bon a ta fanga ni a ta can sababu ra,

sabu a tɛ mɔgɔ terennin tɔɲɔ.

²⁴O le kosɔn mɔgɔw ka kan ka siran a ɲa;

minw bɛ o yɛrɛ jate hakiritigi ye, a tɛ olugu jate.

Ala kumana Ayuba fɛ

(38.1–42.6)

Ala ta kumakan fɔlɔ: Ala ka sankolo ni dugukolo ko lakari

¹Matigi Ala tora sanfɔɲɔ cɛ ma ka Ayuba jaabi, ko:

²Jɔntigi le bɛ sigiya donna ne ta kow ra

ni a ta kolɔnbariyakumaw ye?

³I yɛrɛ cɛsiri i ko cɛfari;

ne bɛna hakiri ɲini ele fɛ, ele bɛna ne karan.

⁴Wagati min ne tun bɛ dugukolo ju sigira, ele tun bɛ min?

Ni i ka ko lɔn, o fɔ ne ye.

⁵Jɔn le ka a janya ni a bonya ni a lɔ latigɛ? Ele ka o tigi lɔn wa?

Jɔn le ka juru siri k’a suma?

⁶Dugukolo ju siginin bɛ mun le kan?

Jɔn le k’a kabakuru fɔlɔ sigi,

⁷wagati min sɔgɔmada ta lolow tun bɛ jɛnna ka dɔnkiri la ka ninsɔndiya ɲɔgɔn fɛ,

ani wagati min Ala ta mɛlɛkɛw bɛɛ tun bɛ ɲagarira fɔ ka pɛrɛn?

⁸Wagati min kɔgɔji serira ka bɔ,

jɔn le ka konw datugu a da ra k’a mina ka lɔ,

⁹ani wagati min ne ka sankabaw kɛ a ta derege ye k’a datugu,

ka dibi kɛ a ta faniw ye k’a lamini,

¹⁰ani wagati min ne ka ne ta sariyaw sigi a kunna,

ka konw kɛ k’a datugu, ka sɔgɔnanw don a ra,

¹¹k’a fɔ a ye ko: «I bɛ se ka na fɔ yan, nka i man kan ka tɛmɛ yan kan,

sabu i ta jikuruw ta yɛrɛbonya ka kan ka dan yan le»?

¹²Kabini ele worora, ele ka dugu gbɛ ka ye wa?

Ele ka dugugbɛda lɔyɔrɔ yira a ra ka ye wa,

¹³janko a yeelen ye manamana dugukolo fan bɛɛ ra,

ka mɔgɔjuguw gbɛn?

¹⁴O wagati le ra dugukolo cogoya bɛ yɛlɛma

k’a kɛ i ko mɔgɔ b’a boro tagamasiyɛn to bɔgɔ ra cogo min na,

k’a kɛ i ko mɔgɔ ka fani don k’a yɛrɛ pari.

¹⁵Nka mɔgɔjuguw ta yeelen bɛ bɔsi o ra;

a tun ka o boro min lawuri, o boro bɛ kari.

¹⁶Yala ele sera kɔgɔji ta jiw bɔyɔrɔ ra wa?

I yaalara a jidunbaw jukɔrɔ ka ye wa?

¹⁷Saya dondaw yirara ele ra wa?

Yala ele ɲa ka saya dibi donda ye wa?

¹⁸Yala i ka dugukolo bonya jate mina wa?

Ni a kɛra i ka o bɛɛ lɔn, a fɔ!

¹⁹Yeelen ta sosira bɛ min le?

Dibi sigiyɔrɔ bɛ min le,

²⁰ka n’a fɔ ko ele bɛ o ta sosiraw lɔn,

fɔ ka taga o mina o sigiyɔrɔw ra?

²¹Sigiya t’a ra, ele ka o lɔn, sabu i tun worora ka ban;

i si sandaw ka ca yɛrɛ le kosɛbɛ!

²²Bugun maranin bɛ yɔrɔ min na, ele sera yi wa?

I ka sanbɛrɛ marayɔrɔw ye wa?

²³Ne ka o fɛnw mara lonjuguw le kama,

lon min siyaw bɛ ben ɲɔgɔn kan ka ɲɔgɔn kɛrɛ.

²⁴Yeelen bɛ tɛmɛ sira juman le fɛ ka se yɔrɔ bɛɛ ra?

Terebɔyanfan ta fɔɲɔ gbanninman bɛ tɛmɛ min le ka fiyɛ dugukolo kan?

²⁵Jɔn le bɛ sanjibaw tɛmɛyɔrɔw labɛn o ye?

Jɔn le bɛ sanmanamanaw ni sanpɛrɛn ta sira bɔ o ye,

²⁶k’a to sanji ye ben dugukolo lakolon kan, mɔgɔ tɛ yɔrɔ min na,

ka ben kongokolonw kɔnɔ, adamaden tɛ yɔrɔ min na,

²⁷janko ka yɔrɔ lakolonw, ani yɔrɔjalanw sɔn ji ra,

janko binw ye falen ka caya?

²⁸Yala fa bɛ sanji fɛ wa?

Jɔn le ka gɔmiji den kelen kelen bɛɛ kɛ?

²⁹Ji siminin38.29 An ka ji siminin bla fɛn min nɔ ra, o tɔgɔ ye tubabukan na ko gilase. An ka bugun bla fɛn min nɔ ra, o ye fɛn dɔ ye min bɛ i ko gilase mugu. bɔra min?

Jɔn le ka bugun dan?

³⁰O wagati le ra, ji bɛ simi ka ja, ka kɛ i ko kabakuru,

k’a sanfɛyɔrɔ gbɛlɛya k’a kɛ kulugutu kelen ye.

³¹Ele bɛ se ka teremana wagati ta lolow juruw siri ɲɔgɔn na wa,

walama ka samiya wagati ta lolow juruw foni?

³²Ele bɛ se ka woroduguyanfan ta lolow bɔ o bɔwagati ra wa?

I bɛ se ka sahiliyanfan ta lolobaw, ani a lolo misɛnw ta siraw yira o ra wa?

³³Yala ele ka sankolo ta sariyaw lɔn wa?

Ele le bɛ o sariyaw lase dugukolo ma wa?

³⁴Yala ele bɛ se ka i kan kɔrɔta ka kuma sankabaw fɛ,

janko o ye sanji ben ka jiba bɔn i kan wa?

³⁵Ele le bɛ sanmanamanaw ci ka taga o tagayɔrɔw ra wa?

Ni i ka o wele, yala o b’a fɔ i ma ko: «An ye nin ye» wa?

³⁶Jɔn le ka hakiritigiya don adamaden jusukun na,

walama ka faamuri don a hakiri ra?

³⁷Jɔn le bɛ se ka sankabaw jate?

Jɔn bɛ se ka sankolo ta baraw jɛngɛ k’a ji bɔn,

³⁸ka buguri ɲigi k’a kɛ bɔgɔ ye,

ka bɔgɔkuruw nɔrɔ ɲɔgɔn na?

³⁹Ele le bɛ sogo mina k’a di jaramuso ma wa?

Ele le bɛ domuni di jaradenw ma ka kɔngɔ bɔ o ra wa,

⁴⁰wagati min o lanin bɛ o ta wow kɔnɔ,

walama wagati min o dogonin bɛ tu kɔnɔ ka sogow kɔnɔ?

⁴¹Wagati min kankan ta denw bɛ kule Ala nɔ fɛ,

ka to ka yaalayaala sabu domuni tɛ o fɛ,

jɔn le bɛ o ta domuni di o ma?

Ala ka kongobɛganw ko lakari Ayuba ye

Kongobakɔrɔnin

¹Ele ka kongobakɔrɔninw worotuma lɔn wa?

I ka minanmuso jigitɔ ye wa?

²O bɛ karo da min kɛ ka sɔrɔ ka woro, ele ka o jate k’a da lɔn wa?

Ele ka o denw worotuma lɔn wa?

³O bɛ biri le ka o ta denw woro;

ni o kɛra, o bɛ bɔsi ka bɔ o ta dimi boro.

⁴O denw bɛ baraka sɔrɔ ka bonya o yɛrɛ ma kongo kɔnɔ;

o bɛ taga o ɲanayɔrɔ ra, o tɛ sekɔ o bamuso fɛ tuun.

Kongofali

⁵Jɔn le ka kongofali labla k’a to a ye bori a sago ma?

Jɔn le ka kongofaliba foni k’a to a yɛrɛ ma?

⁶Ne ka kongokolon kɛ a ta yɔrɔ ye,

ka yɔrɔjalanw kɛ a ta so ye.

⁷A ta foyi tɛ dugukɔnɔyɔrɔ ta mankanw na;

a tɛ sowotorotigi pɛrɛnkanw mɛn.

⁸A bɛ yaala kuruw kunna k’a ta domuni ɲini;

a bɛ bin nugunin suguya bɛɛ ɲini.

Kongomisi

⁹Yala kongomisi bɛ sɔn ka baara kɛ ele ye wa?

A bɛ sɔn ka si i ta wɛrɛ kɔnɔ wa?

¹⁰I bɛ se ka juru siri kongomisi ra janko a ye sɛnɛ kɛ wa?

Yala a bɛ sɔn ka misidaba sama i ye foro kɔnɔ wa?

¹¹Yala ele bɛ sɔn ka i jigi la a kan, ko a baraka ka bon,

ka i ta foro baara bɛɛ to a boro wa?

¹²I bɛ sɔn ka la a ra ko a bɛna i ta siman cɛ ka na ni a ye,

ka na a lajɛn simangbasiyɔrɔ ra wa?

Kɔnɔsogolon

¹³Kɔnɔsogolon b’a kaman gbasigbasi, ka ninsɔndiya,

nka a tɛ se ka wuri a kaman na i ko baninkɔnɔ.

¹⁴A bɛ a ta fanw la dugukolo kan ka taga ka o to yi,

k’a to dugukolo fundɛnin ye a gban.

¹⁵A bɛ ɲina ko fɛn dɔ bɛ se ka o dɔn,

ko kongosogo dɔ bɛ se ka o ci ni a sen ye.

¹⁶A tɛ hina a denw na; a bɛ i n’a fɔ a yɛrɛ ta denw tɛ.

A tɛ siran ko a ka fan min la, o sɛgɛ bɛna kɛ gbansan ye,

¹⁷sabu Ala ka ale jɛn hakiritigiya ra,

a m’a sɔn faamuri ra.

¹⁸Nka n’a wurira ka lɔ tuma min na ka bori damina,

a bɛ yɛrɛko so ni sotigi bɛɛ ma.

So

¹⁹Ele le ka so ta baraka don a ra wa?

Jɔn le k’a kansiw kɛ k’a cɛɲa?

²⁰Ele le b’a to a bɛ pan i ko ɲɔdomutɔn wa?

A ta fagamayakasi bɛ jatigɛ bla mɔgɔw ra!

²¹A b’a sengbɔgɔrɔ gbasigbasi dugu ma ka ɲagari sabu baraka b’a ra;

a bɛ girin ka don kɛrɛkɛdenw cɛ ra.

²²A tɛ siranya jate, foyi tɛ a ja tigɛ;

hali ni a ka kɛrɛkɛmuru ye, a tɛ sekɔ kɔ fɛ.

²³Kɛrɛkɛcɛ min siginin b’a kan, a bɛ o ta biɲɛforogo mankan,

ani taman manamanatɔ ni biɲɛjan mankan mɛn.

²⁴A kɔrɔtɔninba bɛ bori yɔrɔ bɛɛ;

ni buru fiyɛra ka ban, a tɛ se ka lɔ yɔrɔ kelen na tuun.

²⁵Ni buru fiyɛra a b’a fɔ: «An ye taga!»

A bɛ to fɔ yɔrɔjan ka kɛrɛ kasa ta,

a bɛ kɛrɛkuntigiw pɛrɛnkan ni kɛrɛkɛdenw wɔyɔkan mɛn.

Santigi ni bɔn

²⁶Yala ele ta hakiri le sababu ra, santigi bɛ wuri a kaman na,

k’a kaman yangan ka taga fɔ woroduguyanfan na wa?

²⁷Ele le b’a fɔ bɔn ye ko a ye wuri wa?

Ele le b’a fɔ a ye ko a ye a ta ɲaga la fɔ kurujanw san fɛ wa?

²⁸A bɛ to faraw le cɛ ra; a bɛ si o yɔrɔw le ra.

A dogoyɔrɔ ye kuru jamijanw sanfɛyɔrɔw le ye.

²⁹A bɛ to o yɔrɔ ra ka sogo dɛndɛn;

k’a to fɔ yɔrɔjan, a ɲa b’a ye.

³⁰A denw bɛ jori min;

ni sogosu bɛ yɔrɔ o yɔrɔ, a bɛ yi39.30 Nin kumaw fɔra Matiyu kitabu ra (24.28), ani Luka kitabu ra (17.37)..

Ala ko Ayuba ye ale jaabi

¹Matigi Ala k’a fɔ Ayuba ye tuun ko:

²Ele min bɛ Sebɛɛtigi Ala sɔsɔra, yala ele b’a fɛ ka Ala wele kiti ra le wa?

Ele min bɛ Ala jarakira, ele bɛ se ka nin ɲininkariw jaabi wa?

³Ayiwa, Ayuba ka Matigi Ala jaabi ko:

⁴A flɛ, ne tɛ foyi ye; ne bɛna ele jaabi ka mun fɔ sa?

Ne bɛ ne boro la ne da ra le ka je.

⁵Ne kumana siɲagako kelen, ne tɛna foyi fɔ tuun;

ne kumana siɲagako fla, ne tɛna dɔ wɛrɛ fara o kan tuun.

Ala ta kumakan flanan: A ko se tɛ Ayuba ye

⁶Matigi Ala tora sanfɔɲɔ cɛ ma ka Ayuba jaabi tuun, ko:

⁷I yɛrɛ cɛsiri i ko cɛfari,

ne bɛna hakiri ɲini ele fɛ, ele bɛna ne karan.

⁸Yala i b’a fɛ ka jaraki ben ne le kan wa?

I b’a fɛ ka kiti ben ne kan ka jo di i yɛrɛ ma wa?

⁹Yala ele boro bɛ i ko ne Ala ta boro wa?

Yala ele kan bɛ i ko sankurukan, i ko ne Ala kan bɛ cogo min na wa?

¹⁰Ayiwa, i yɛrɛ masiri ni masaya ni fanga ye sa!

Bonya ni nɔɔrɔ la i yɛrɛ kan!

¹¹I ta jusugban lajigi mɔgɔw kan i ko jibaw;

i ɲa lɔ yɛrɛbonyabagaw bɛɛ ra, ka o laben!

¹²I ɲa lɔ yɛrɛbonyabagaw bɛɛ ra, ka o majigi!

Mɔgɔjuguw terege dugu ma ka o ɲɔɲɔ yɔrɔnin kelen na!

¹³O bɛɛ lajɛnnin dogo buguri jukɔrɔ!

O ɲa datugu ka o dogo kaburu kɔnɔ!

¹⁴Ni o kɛra, ne yɛrɛ le bɛna ele fo ka i waleɲumanlɔn,

sabu i yɛrɛ baraka bɛ se ka i kisi!

Ala ka jirafɛn dɔw lakari

Mali

¹⁵Ayiwa, mali flɛ! Ne ka ale dan i ko ne ka ele dan cogo min na;

a bɛ bin ɲimi i ko misi.

¹⁶A flɛ, baraka min b’a soro ra,

ani fanga min b’a kɔnɔbara ta sogobuw ra!

¹⁷A b’a kukala wuri k’a ja i ko sɛdirisun;

a wotow ta sogobuw ka ɲɔgɔn mina ni baraka ye.

¹⁸A kolo ka gbɛlɛn i ko siranɛgɛ,

a garagakolow bɛ i ko nɛgɛberew.

¹⁹Ale ye Ala ta danfɛnw bɛɛ ra kabakoman le ye;

a danbaga k’a dan ka muru di a ma40.19 Nin hayan fɔra cogo wɛrɛ ra Kitabu dɔw kɔnɔ..

²⁰A bɛ a ta baro sɔrɔ kuruw kan,

kongosogow bɛɛ bɛ boribori yɔrɔ minw na.

²¹A bɛ la kɔdarayiriw jukɔrɔ,

a bɛ dogo binw cɛ ra bɔgɔ ra.

²²Kɔdarayiriw suma b’a datugu,

a bɛ dogo yirimisɛnw cɛ ra.

²³Hali ni baji ka fariya cogo o cogo, a tɛ siran;

hali ni Zuridɛn ba ka fa ka se fɔ a da kɔrɔ, a hakiri siginin lo.

²⁴Yala mɔgɔ bɛ se k’a ɲa yɛlɛnnin to k’a mina wa,

walama k’a mina ni jan ye k’a nun sɔgɔ nin biɲɛ ye?

Jirasa belebele

²⁵Yala ele bɛ se ka jirasa belebele40.25 Jirasa belebele ye fɛnɲanaman dɔ ye min cogo bɔra banba fɛ. mina ni dulen ye wa?

Ele bɛ se k’a nɛnkun siri ni jurukisɛ ye wa?

²⁶Yala i bɛ se ka juru don a nun na wa?

I bɛ se ka a dagbaga sɔgɔ ni biɲɛ ye wa?

²⁷Ni i ko i b’a mina, a bɛna i daari ni makarikanw le ye,

ka kumadimanw fɔ i ye wa?

²⁸Yala a bɛna teriya don ni ele ye le,

k’a yɛrɛ kɛ ele ta jɔn ye wagati bɛɛ wa?

²⁹Yala i bɛ se ka toron kɛ ni a ye i ko kɔnɔnin wa,

walama k’a siri juru ra, i denmusow ye toron kɛ ni a ye?

³⁰Yala mɔgɔw bɛ se ka jɛn k’a mina k’a fiyeere wa?

O bɛ se k’a taran sannikɛbagaw ra wa?

³¹I bɛ se k’a bon ni biɲɛ ye k’a fari yɔrɔ bɛɛ sɔgɔsɔgɔ wa,

walama k’a kunkolo sɔgɔ ni jɛgɛfagabiɲɛ ye?

³²Ayiwa, ele ye i boro la a kan ka flɛ sa! A bɛna min kɛ i ra, o tɛna bɔ i kɔnɔ;

i tɛna a se fla!

Ala ka jirasa belebele ta ko lakari

¹I bɛ i jigi la fɛn o fɛn kan ko i bɛ jirasa belebele kɛrɛ ni o ye, ka se sɔrɔ a kan, o bɛɛ ye gbansan ye;

a yeri dama siranya bɛ mɔgɔ ben dugu ma.

²Mɔgɔ si tɛ sɔn ka farati k’a darabɔ.

Ayiwa, o tuma ne Ala, jɔntigi le bɛna se ka lɔ ka ne kɔnɔ?

³Jɔn le ka fɛn di ne ma, ko ne ka kan ka o juru sara o tigi ye?

Fɛn o fɛn bɛ dunuɲa kɔnɔ o bɛɛ lajɛnnin ye ne ta le ye.

⁴Ayiwa, ne tɛna jirasa belebele farikolow ko to fɔbari ye,

ani baraka min b’a ra, ani a fari cɛɲa.

⁵Jɔn le sera k’a ta derege bɔ a ra ka ye?

Jɔn le sera ka don a ɲinsira fla cɛ ma ka ye?

⁶Jɔn le sera k’a da yɛlɛ ka ye?

A ɲinw bɛ jatigɛ bla mɔgɔ ra!

⁷A faraw bɛ i ko nɛgɛbɛnnanw; o le bɛ bonya ni baraka di a ma.

O nɔrɔnɔrɔnin lo ɲɔgɔn na a fari kan i ko tagamasiyɛnw.

⁸O dondonnin lo ɲɔgɔn na;

hali fɔɲɔ tɛ tɛmɛ o ni ɲɔgɔn cɛ.

⁹O bɛɛ kelen kelen sirinin bɛ ɲɔgɔn na, ka ɲɔgɔn mina;

foyi tɛ se ka o faran ka bɔ ɲɔgɔn na.

¹⁰A tisotɔ bɛ tasumayeelen bɔ;

a ɲadenw bɛ manamana i ko teresun yeelen.

¹¹Tasumamana bɛ seri ka bɔ a da fɛ,

tadenw bɛ bɔ a da ra.

¹²Sisi bɛ bɔ a nunwow fɛ,

i ko daga, walama dagaba wuritɔ tasuma kan.

¹³A nɛnɛkiritɔ, a nunfɔɲɔ bɛ se ka takami fiyɛ k’a mana;

tasumamanaw bɛ bɔ a da fɛ.

¹⁴A ta fanga b’a kankala le ra;

ni i k’a ye, a bɛ jatigɛ bla i ra.

¹⁵A fari ɲuguyɔrɔw nɔrɔnin lo ɲɔgɔn na;

o jajanin lo ka o nɔrɔ ɲɔgɔn na kosɛbɛ.

¹⁶A jusukun ka gbɛlɛn i ko kabakuru,

a ka gbɛlɛn i ko mugusi kaba.

¹⁷Ni a wurira, hali cɛfaribaw bɛ siran;

jatigɛ kosɔn o bɛ bori ka dogo.

¹⁸K’a fɔ ko i b’a kɛrɛ ni kɛrɛkɛmuru ye,

walama biɲɛ ni taman ni nɛgɛderege, o si tɛ foyi ɲa.

¹⁹Nɛgɛ bɛ a ɲa kɔrɔ i ko binjalan;

siranɛgɛ bɛ a ɲa kɔrɔ i ko yiri torinin.

²⁰Biɲɛ tɛ se k’a labori;

ni i ka kabakuru don tafura ra k’a bon, o bɛ kɛ i ko binjalan le benna a kan.

²¹Berekuru b’a fɛ i ko binjalan,

a ta foyi tɛ biɲɛ tɛmɛtɔ mankan na.

²²Fara minw b’a kɔnɔbara kan, o da ka di i ko muru;

a fofotɔ, olugu bɛ kɛ i ko misidaba samatɔ bɔgɔ ra.

²³Ni a lamagara ji jukɔrɔ, a bɛ jidunbaw lawuri i ko ji wuritɔ daga kɔnɔ;

a bɛ baji ɲa duuru k’a kɛ i ko turudaga.

²⁴A tɛmɛsira nɔ bɛ manamana a kɔ fɛ;

ji ɲa bɛ gbɛ, k’a kɛ i ko kunsigigbɛ.

²⁵Mɔgɔ si tɛ ale kuntigi ye dugukolo kan yan;

ale danna ko a kana siran foyi le ɲa.

²⁶Danfɛn min o min kɔrɔtanin lo, a bɛ o bɛɛ kunna;

ale le ye kongosogo fagamaw bɛɛ ta masa ye.

Ayuba ka jo di Ala ma

¹Ayuba ka Matigi Ala jaabi, ko:

²Ne k’a lɔn ko fɛn bɛɛ se bɛ ele ye;

ko foyi tɛ i ta kolatigɛnin si bari.

³I ko: «Jɔntigi le bɛ sigiya donna ne ta kow ra

ni a ta kolɔnbariyakumaw ye?»

Can lo, ne tɛ ko minw faamu, ne ka o fɔ,

kabakoba minw ka bon ne ta lɔnniya ma, ne ka o fɔ.

⁴I ko: «Ne lamɛn, sisan ne bɛna kuma;

ne bɛna hakiri ɲini ele fɛ, ele bɛna ne karan!»

⁵Ne toro le tun ka i ko mɛn,

nka sisan ne yɛrɛ ɲa ka i ye!

⁶O kosɔn ne bɛ ne yɛrɛ jaraki;

ne nimisara ne ta kɛta ra;

ne bɛ ne yɛrɛ majigi ka sigi buguri ra, ka sigi bugurigbɛ ra.

Ala ka Ayuba tericɛ saba jaraki

⁷Ayiwa, Matigi Ala ka o kumaw fɔ Ayuba ye ka ban minkɛ, Elifazi min tun bɛ bɔ Teman, a k’a fɔ ale ye ko: «Ne dimina ele ni i tericɛ fla kɔrɔ kosɛbɛ, sabu aw ma ne ta ko fɔ ka kaɲa ni can sira ye, i ko ne ta jɔncɛ Ayuba k’a kɛ cogo min na. ⁸O ra, aw ye misitoran wolonfla, ani sagajigi wolonfla mina ka taga ni o ye ne ta jɔncɛ Ayuba fɛ, ka o kɛ saraka jɛnita* ye aw yɛrɛ kosɔn. Ne ta jɔncɛ Ayuba bɛna Ala daari aw ye. Ne bɛna a ta daariri lamɛn; o ra, ne tɛna aw mina ka kaɲa ni aw ta hakirintanya ye, sabu aw ma ne ta ko fɔ ka kaɲa ni can sira ye i ko ne ta jɔncɛ Ayuba k’a kɛ cogo min na.»

⁹Elifazi min bɛ bɔ Teman, ani Bilidadi min bɛ bɔ Suwa, ani Sofari min bɛ bɔ Naama, olugu tagara a kɛ i n’a fɔ Matigi Ala tun k’a fɔ o ye cogo min na. Matigi Ala ka Ayuba ta daariri lamɛn ka yafa o ma.

Ala ka Ayuba ta bonya kɔsegi a ma tuun

¹⁰Ayuba ka Ala daari a teriw ye ka ban minkɛ, Matigi Ala ka Ayuba kɔsegi a cogokɔrɔ ra. Naforo minw tun b’a fɛ fɔlɔfɔlɔ, a ka o bɛɛ ɲɔgɔn fla fla di a ma.

¹¹A balemacɛw, ani a balemamusow, ani a lɔnbagakɔrɔw bɛɛ nana a fɛ; o nana domuni kɛ ni a ye a ta so. Matigi Ala tun ka kojugu minw bɛɛ lase a ma, o k’a jusu saaro k’a ɲaji cɛ o bɛɛ kosɔn. O bɛɛ kelen kelen ka warigbɛ kelen kelen, ani sanin bororanɛgɛ kelen kelen di a ma.

¹²Matigi Ala ka baraka don Ayuba ra tuun a si tɔ ra, fɔ ka tɛmɛ wagati fɔlɔ ta kan. Ayuba ka saga waga tan ni naani (14 000), ani ɲɔgɔmɛ waga wɔɔrɔ (6 000), ani sɛnɛkɛmisi fla fla sigiyɔrɔma waga kelen (1 000), ani falimuso waga kelen (1 000) sɔrɔ tuun. ¹³A ka dencɛ wolonfla ni denmuso saba sɔrɔ tuun. ¹⁴A k’a denmuso fɔlɔ tɔgɔ la ko Yemima, ka flanan tɔgɔ la ko Kesiya, ka sabanan tɔgɔ la ko Kerɛni Hapuki42.14 Yemima kɔrɔ ye ko: tugani; Kesiya kɔrɔ ye ko: yirifiyeren; Kerɛni Hapuki kɔrɔ ye ko: kale.. ¹⁵Jamana bɛɛ lajɛnnin kɔnɔ, a denmusow ɲɔgɔn muso cɛɲuman tun tɛ yi. O facɛ ka o balemacɛw ta cɛn ɲɔgɔn dɔ di o ma.

¹⁶O kɔ, Ayuba ka san kɛmɛ ni binaani le kɛ; a ka a ta denw ye, ka olugu ta denw ye, fɔ ka taga se o ta duruja naaninan ma. ¹⁷Ayuba kɔrɔra ka sijan sɔrɔ, ka sɔrɔ ka sa.