TIITO

TIITO

¹ Ínje Paul, aroka ati Atijamit di poop áriiŋena ati Yensa Apakenaau Áamakau, eem di eciik letaraay uye. Nimukenimuken ban kuboñom man íliŋen kafiumak kati bukanak kan Atijamit amukenumi ban niliikiteniil man kúlaul malegenam máyiiseniimi buu kootumi ejaay di wan Atijamit amaŋumi eeno. ² Malegenam ume maseneiimi fúgolumaf fati eroŋey yati bándoorey. Atijamit, ágaajooreriitumi, áligeenumi eroŋey uye bala’a fúcitumaf fati dúniyaay. ³ Ban di nanan une nalegenan, Atijamit Apakenaolaal náyiisenyiisen furimaf foola kápurumul di káriiŋenak kan Atijamit abilenammi man íriiŋenufo ñátum di kájaatikenak koola. ⁴ Letaraay uye eciikiciik bee di Tiito, an isofumi nan añoolom alegen di kafium kákon. Emitey ekaan Atijamit Ampaau di Yensa Apakenaau Áamakau Apakenaolaal aseni majakam di kásuumaayak. ⁵ Moo kaane níkatulikat di fúrinkaf fati Kurete, mambi uŋoolen ufabel burokab boololaal barinobomi ban numuken kúfacula kati fujoj fammi di esukooesuk riiboor di kájaatikenak kúmboom. ⁶ Anifaan anoosani ati fujoj fati kuriiba aatut ebaj kabet, aate ebaj aseek ákon pat, ban kuñoolool búrom koote ekaan kúyinena ban takum kukaan kuñiil kakuruti ban kújameriit. ⁷ Mati anifaan ati fujoj, aakenumi burokab bati Atijamit aatut ebaj kabet. Takum akaan an apooñe, mba nawaaken kañuumul, mba takum akaan ákalia mba águuloora, mba áfekete di sígodi. ⁸ Bare aate emaŋ kawalen kujaaburuŋ di síndo’ool nanoosani ban naate emaŋ ekaan wajake búrom. Naate kasofooro ban nakaan joon, káliroor, di kasofooro. ⁹ Oo naate esof lit kurimak kalegenak nan man aliikitenimi, mambi aŋoolen abuntoor bukaaku ñátum di baliikitenerab balegenab ban naŋoolen áyiis bee di kalatemi ko. ¹⁰ Mati babaj kajuupoe kalatumi káyenten kaliikiten kalegen, di kasanken kútiikaar ban poop kubuntaak. Mo’omu mukankaan malegen bee di káliŋenemi mati mukaanaam mati futampaf. ¹¹ Bukanak buke koote katunoor sii. Mati kaliikitenak kaŋondaak kooliil bukoo súm kooku di kayiisiken kiil kajuupoe kápurumul di malegenam. Kuliikitenaak kaanomi mo’omu kumammaŋ sígodiuul ceb. ¹² Ákon di bukoo, aboña ákon di kuboñaiil ati fujoj, naane, “Bukanak kati Kurete kulepoora ceb, símunduŋ, ban kúmaŋeriit burok hani jasiinkun ban kurieri máamak.” ¹³ Káyiisenak uke kukankaan malegen. Moo kaane ninsi jimandooriil máamak manteer mbi kúliŋ di kafiumak kooliil. ¹⁴ Bukoo kootut káyenten ureg wati kayayapoorak wati Kúyahuudak mba kájaatikenak kápurumulomi di bukanak kalatumi malegenam. ¹⁵ Wanoosani útientien di bukanak kabajumi úyeget wátiene. Bare waaf útienut di bukanak kasikomi di káyinenutumi. Úyegetiil wo’owu di síwoonooriil woo ukañokaño. ¹⁶ Koonesoon koo kumammanj Atijamit, bare kuñooseooñoos di bakaaneriil. Leekusen kúkoiil bee di akila, ban koo bukan kabajutumi fúkaw bee ekaan wajake.

¹ Bare mati au Tiito, noote kaliikiten waaf riiboor di baliikitenerab balegenab ceb. ² Liikiten kúniinaak kunifaanak man takum kukaan kabaje fuuñ, kusofooro kúkoiil, takum kukaan kufiila, manteer mbi kúlebieni, ban koote ebaj kafiumak káliŋaak di emeeŋ di kamaŋak di kamuutenak. ³ Liikiten poop kuseekak kunifaanak manteer mbi kúlebieni di bagoroorerab booliil, takum kukaan kusuulena mba kukaan kúkalia. Bare koote kaliikiten bukaaku wajake, ⁴ ban koote kaliikiten kuseekak kuñiilak man kumaŋ kutaiil di poop kuñooliil, ⁵ di ebaj úyeget watote di wajoone, di kacookoor sísindoiil di ekaan wajake, di poop mbi kukob kutaiil, manteer furimaf fati Atijamit takum fukajeni. ⁶ Moo mákonam buntoor kúpuraak kúniinaak man kasofooro kúkoiil. ⁷ Au di fúkoi oote ekaan káyiisen kajake bee di kukila ñátum di mukaana majake manoosani. Nampi ommi di kaliikitenak di nujoon ban nusof lit. ⁸ Sen kasankenak kooli kajoone kan an aatut kaŋoolen añoos. Kaan mo’omu kalatimi mbi kupuño máamak leekuŋoolen kusanken waaf wajakut mati wulaal. ⁹ Reg kumiiceel koote esen kúkoiil bee di kurungaiil ban di yeiil di wanoosani wan kukammi. Takum koote kalaañen, ¹⁰ mba ékuut di kukila. Bare koote káyiisen kúkoiil kalegenoe di kajake. Kammojaat anoosani pánayiisen kálebienak káamakak mati waliikitenimi mati Atijamit Apakenaolaal. ¹¹ Mati Atijamit náyiisenolaayiisen majakam moola bee kapaken bukanak búrom. ¹² Majakam mukila mújaatikenolaajaatiken takum ukaanaal nan kamanjutumi Atijamit, takum uriibenaal emaŋey ejakutey, ban ootaale ebaj eroŋey yati kasofooroak di poop yajoonaay di dúniyaay uye. ¹³ Wulaal nukobaakob di kágolumak mati Funakaf fáriiŋumi síwoonoor, nampi Atijamit Áamakau di Apakenaolaal Yensa Apakenaau Áamakau, pánarajuli di mákalaam moola. ¹⁴ Nasensen fúko’ool bee mati wulaal man apakenolaal di majakut manoosani ban nakaanolaal útienaal ekaan bukanool ceb ban nubajaal fuuñ fati emaŋ wajoonumi ceb. ¹⁵ Liikiten uru nubuntoor bukanuul man kukammo, di poop umandooriil nan ceeŋumi. Nubabaj fujuum fati ekammo, ñaa takum umaŋ man an aheeleni.

¹ Woolen kúyinenaak man kusen kúkoiil kurungaiil di kati fujuumaf, ban takum kuñoosiil. Ban koote kajonjoor bee ekaan burok bajake. ² Regiil kootut ekaan jatem mati hani an ákon, jootut kasanken mulobaam. Bare koote ebaj búyeget bajinlene di káyiisen kawalenooro kalegen bee di anoosani. ³ Mati noo wulaal, bukan kágotete, kañoosumi, di kájinnoorumi. Wulaal nukaanaakaan nan kumiiceel kammi di ekaaney yati emaŋey yajakutey yanoosani di yati wayemi di kúko’olaal ceb. Wulaal nukaaneenaakaan bukan kájakaatie di poop kaleetoor di wati bukaaku. Wulaal nukaaneenaakaan nan bukan kuleeta, anoosani alate wulaal, wulaal poop nulataaloomi. ⁴ Bare nan Atijamit Apakenaolaal áyiisenolaami majakam di kamaŋak koola, ⁵ napakenolaapaken. Nakankaan mo’omu kaanut mati bakaanerolaal bajakaab ban ukaanaami, bare mati kabonketak koola. Atijamit napakenolaapaken kápurumul di kánkumak kati Búyegetab Bátienaab boola natilulolaami man tíenolaal ban nakaanolaami man ulaañaal uroŋaal man ubajaal eroŋey yoololaal yunkuley. ⁶ Atijamit nasenolaasen Búyegetab boola yaj mati wan Yensa Apakenaau Áamakau akammi Apakenaolaal. ⁷ Nakankaan mo’omu kápurumul di majakam moola, manteer mbi akaanolaal nan bukan kajoone bee di fúko’ool. Ban mambi úgolumaal bee eyab eroŋey yati bándoorey yan Atijamit áligolaami. ⁸ Uru búrom wan iregumiñaa woo malegen. Nimammaŋ man úliŋeniil mukaanaam ume máamak, manteer kafiummi di Atijamit mbi kúkaanum kúkoiil di ekaaney bakaaner bajake nanoosani. Ure búrom jajak máamak ban nuŋoolen uramben anoosani. ⁹ Bare aamaama mbi atey kañoosoor kútiikaar, kasanken mati urees wajuupoe wati kufannaaniŋ, kasanken muloba, di futiik mati sílingaas. Do’odu búrom bajut fúkaw ban rambenut. ¹⁰ Ugam kañakoorumi kagamen ñákon mba ñagaba. Púrutojaat núpuren butumi di bukoo. ¹¹ Numammanj mati bukan kaanomi mo’omu kujoonut, ban majakutiil múyiisenyiisen mati koo kulee di malegen. ¹² Nampi iboñumi Arutema mba Tukiko bee di au, ukaan túu man ubil utookom di ésukey yati Nikopoli, mati niwoonoowoonoor bee ekaan bo nanan nati ñonkañ. ¹³ Kaan túu wan uŋoolenumi man uramben Jena amanjaau áamakau ati sílingaas di Apolo kajaaburuŋak kooliil, manteer takumbi kúbajaati waaf. ¹⁴ Ban bukanolaal koote kaliikeni kúkoiil pipi ekaaney burok bajake, mambi kuŋoolen kuramben bukaaku kan ceeŋumi waaf. Ban takum eroŋey yooliil ekaan ebajut fúkaw. ¹⁵ Kammi baabe búrom kusaafuusaaf. Jisaafom kupaalolaal kuriibaak kámaŋolimi. Emitey ekaan Atijamit asen majakam moola bee di muyuul búrom.